தமிழ்க் கவிதைகள்..!

காதல் விதை

2025-11-28T06:18:00.004+05:30

விதைத்தவள் நீயென்பதால்

விளைந்து கொண்டே இருக்கிறது

கவிதையும் காதலும்!

என் தாயுமானவனே

2025-04-26T16:46:00.005+05:30

கடல் கடந்து வந்தாலும்

கடுகளவும் அவன் நினைவுகள் குறையவில்லை

பாஸ்போர்ட் விசா இன்றி

எப்படி வந்தான் என்னோடு புரியவில்லை

கடல் விட்டு ஒதுங்கிய கிளிஞ்சலாக நானிருக்க

ஓயாத அலைகளாக அவன் இருக்க

கடல் சேரவும் முடியாமல்

கரை ஒதுங்கவும் முடியாமல்

ஏன் இந்த நிலை

என்ன நான் செய்த பிழை

மழையாக இருந்தவள்

கானல் நீர் போல் ஆனது ஏனோ?

நீல வானமாய் இருந்தவள்

கலையும் மேகமானது ஏனோ?

வான் நிலவாய் இருந்தவள்

நதியில் விழும் பிம்பம் போல்

ஆனதும் ஏனோ? - புரியல்வில்லை

உன்னை புரிந்துகொள்ளும் திறன் இல்லை,

மறந்துவிட மனமும் இல்லை,

காற்றில் என் உயிர் கரையும் வரை

நெஞ்சோடு இருக்கும் உன் நினைவுகள்

எனக்குள்ளே சிரித்து,

எனக்குள்ளே அழுது,

எனக்குள்ளே மகிழ்ந்து,

எனக்குள்ளே வருந்தி

எனக்குள்ளே அத்தனையும்

ஆனவனே நீ

என் தாயுமானவனே....

தாய் தந்தை அகவல்

2023-04-06T08:43:00.003+05:30

அன்னையின் மலரடி போற்றி போற்றி

தந்தையின் திருவடி போற்றி போற்றி

என்னைச் சுமந்தோரே போற்றி போற்றி

எந்தையாய் இருந்தோரே போற்றி போற்றி

கருவாக ஆக்கினீர் போற்றி போற்றி

உருவாக ஆக்கினீர் போற்றி போற்றி

கர்ப்பத்தில் தாங்கினீர் போற்றி போற்றி

பொற்பதம் பணிகிறேன் போற்றி போற்றி

வயிற்றினுள் காத்தீரே போற்றி போற்றி

வையகம் அளந்தீரே போற்றி போற்றி

உயிருதிரம் தந்தீரே போற்றி போற்றி

உயிர்பணயம் வைத்தீரே போற்றி போற்றி

பத்தியம் காத்தீரே போற்றி போற்றி

சத்தியத் தாயானீர் போற்றி போற்றி

சதைகீறி ஈன்றீரே போற்றி போற்றி

விதையினை தந்தீரே போற்றி போற்றி

உத்தமித் தாயேநீ போற்றி போற்றி

உதிரத்தைத் தந்தவரே போற்றி போற்றி

வித்தகத் தந்தையே போற்றி போற்றி

சித்தத்தை தந்தவரே போற்றி போற்றி

தாய்ப்பாலைத் தந்தவரே போற்றி போற்றி

தாயேஉன் மலர்மடி போற்றி போற்றி

சேயெனக் கொஞ்சினீர் போற்றி போற்றி

தூயவரின் திண்தோளே போற்றி போற்றி

குழவியெனைக் காத்தீரே போற்றி போற்றி

அழகென மகிழ்ந்தீரே போற்றி போற்றி

உலகத்தைக் காட்டினீர் போற்றி போற்றி

உலாப்போக வைத்தீரே போற்றி போற்றி

தாய்மொழி தந்தீரே போற்றி போற்றி

தாய்வழி உறவுகள் போற்றி போற்றி

சிந்தைமொழி தந்தீரே போற்றி போற்றி

தந்தைவழி உறவுகள் போற்றி போற்றி

நடைபயில வைத்தீரே போற்றி போற்றி

கடைகண்ணேறு கழித்தீரே போற்றி போற்றி

அடைமழையில் வாழ்ந்தீரே போற்றி போற்றி

குடைகொண்டு காத்தீரே போற்றி போற்றி

துள்ளிவிளை யாடவைத்தீர் போற்றி போற்றி

எள்ளிநகை யாடவைத்தீர் போற்றி போற்றி

பள்ளிக்கு போகவைத்தீர் போற்றி போற்றி

பலகலைகள் பயிற்றுவித்தீர் போற்றி போற்றி

மனிதராய் ஆக்கினீர் போற்றி போற்றி

புனிதராய் வாழ்ந்தீரே போற்றி போற்றி

மண்ணுலகம் சென்றீரே போற்றி போற்றி

உன்பாதம் பணிகிறேன் போற்றி போற்றி

வாழவைத்த எம்தாயே போற்றி போற்றி

வள்ளியம்மா உன்நாமம் போற்றி போற்றி

தோகைமயில் தந்தையே போற்றி போற்றி

மோகன்ராஜி உன்நாமம் போற்றி போற்றி

எனைபடைத்த தெய்வங்களே போற்றி போற்றி

என்னோடிருக்க வேண்டும் போற்றி போற்றி

விண்காற்றில் கலந்தீரே போற்றி போற்றி

எனைக்காப்பீர் எந்தைகளே போற்றி போற்றி!

உங்களின் மகன்

மோ.கணேசன்

சர்வதேச தந்தையர் தினக் கவிதை

2022-06-19T12:21:00.005+05:30

அம்மா அடிக்க வருகையில்

வேட்டிக்குள் மறைய...

தூக்கம் வருகையில்

தோள் மீது உறங்க...

வீதி உலா போகையில்

விரல் பிடித்து நடக்க...

சகதோழர்களுக்கு இணையாக

சைக்கிள் பழக...

பள்ளிக்கு செல்லும்போது

பத்திரமாய் கொண்டு விட..

நீரூறும் பெருங்கிணற்றில்

நீச்சல் பழக...

அத்தனைக்கும் நீங்கள் தேவை

என்றன் தந்தையே...

அகவை எனக்கு நாற்பதாகினும்

அந்த சிறுபிராயம்

மீண்டும் வேண்டுகிறேன்...

உங்கள் மடியில்

மீண்டும் நான் துள்ளிவிளையாட!

காலனால் எனைப் பிரிந்து

மண்ணில் புதைந்து

மறைந்தீர்களே நியாயமா?

மறுஜென்மத்தில்

நம்பிக்கையில்லாதவன்

தந்தையே உங்கள் மகன்!

நடவாதெனினும்

உங்கள் மகனாகப் பிறக்கவே

இன்னொரு ஜென்மம்

வேண்டுகிறேன் இயற்கையிடம்!

நிலவாய் மாறி வெளிச்சம் தந்தாலும்

நீங்கள் இல்லா இவ்வுலகம்

இருளாக இருக்கிறது அப்பா!

தாயில்லா பிள்ளையிவன்

என்றறிந்தும்

தந்தையில்லா பிள்ளையாக்கிய

காலமே என்

தந்தையிடம் சொல்லிவிடு

எனது தந்தையர் தின வாழ்த்துகளை!

பேப்பரை எப்படி தயாரிக்கிறார்கள் தெரியுமா? | how to made paper | vaalu t...

2020-09-23T06:15:00.001+05:30

காகிதத்தை எப்படி தயாரிக்கிறார்கள் என்பதை இந்த மூன்று நிமிட வீடியோவைப் பார்த்து தெரிந்து கொள்ளலாம்.

வீடியோ பிடித்திருந்தால் லைக் பண்ணுங்க... உங்க நட்பு வட்டத்துக்கும் அனுப்பி வையுங்க... கமெண்ட் பண்ணுங்க... வாலு டிவியை இன்னும் சப்ஸ்கிரைப் பண்ணாம இருந்தா சப்ஸ்கிரைப் பண்ணுங்க...

தொடர்ந்து இணைந்திருங்கள்... இது போன்ற பல்வேறு பொதுஅறிவு கேள்வி பதில்களோடு உங்களை சந்திக்க வருகிறேன்...

தொடரும் உங்களது ஆதரவுக்கு எனது நன்றி...

மிக்க அன்புடன்

மோ.கணேசன்,

நிறுவனர், நிர்வாக இயக்குநர்,

வாலு டிவி

#வாலு_டிவி #vaalu_tv #vaalutv

பிறந்தநாள் வாழ்த்து கவிதை வேண்டுமா?

2020-09-21T08:09:00.006+05:30

இந்த பிறந்தநாள் வாழ்த்து கவிதை எனது அண்ணனுக்காக நான் எழுதியது...

இந்த நிழற்படத்தில் கொடுக்கப்பட்டுள்ள கவிதையின் வரிகளில் 1,3,5,7,9 ஆகிய வரிகளின் முதல் எழுத்துகளை மேலிருந்து கீழாகப் படித்தால்... பிறந்தநாள் கொண்டாடும் எனது அண்ணனின் பெயர் வரும்...

உங்களுக்கும், உங்களது அன்பில் நிறைந்தவர்களுக்கும் இதுபோன்று அவர்களது பெயரைக் கொண்டு பிறந்தநாள் வாழ்த்து கவிதை வேண்டுமென்றால்... தாராளமாக 9600045295 என்ற எண்ணுக்கு வாட்ஸ்அப் செய்யுங்க... கவிதைக்கும்... வடிவமைப்புக்கும் கட்டணம் உண்டு...

இப்படி ஒரு வாழ்த்தினை உங்களின் அன்பானவர்களுக்கு கொடுக்க விரும்பினால் என்னை அணுகலாம்... சுயதொழில் செய்ய விரும்பும் எனக்கு இப்படியும் நீங்கள் எனக்கு பணி வழங்கலாம்...

மிக்க அன்புடன்

மோகனன்
moganan@gmail.com

எழுத்து வடிவில் இதே அந்தக் கவிதை

மோனத்தில் உழலும் இப்பூவுலகில் இந்நாள் ஓர்

மறவாத திருநாளனது நம்முடைய குடும்பத்திற்கு!

வேலும் மயிலும் துணையான வள்ளியம்மைக்கும்

வீரத்தின் வித்தான மோகன் ராஜிக்கும் பிறந்து

லுலுலுவாயென தாலாட்டுப் பாட வைத்தாய்!

தளிர் நடை பயின்று பெற்றோரை மகிழவைத்தாய்!

மளமளவென வளர்ந்து தச்சுப் பணியில் சிறந்து

குடும்பம் குழவியென சமூகத்தில் உயர்ந்தாய்!

ணிலவினைப்போல உன் வாழ்வில் துன்பம் தேய்ந்து

நன்மைகள் வளர நீ பிறந்த இந்நாளில் வாழ்த்துகிறோம்!

உடல் உறுப்பு தானம்! - காதல் கவிதை

2019-08-13T11:23:00.001+05:30

"தோழரே...
இன்று உடல் உறுப்புகள்
தான தினம்!
உங்கள் உறுப்புகளை
தானம் தாருங்கள்!"
என்று கேட்ட தன்னார்வலரிடம்
தாராளமாகத் தருகிறேன்!
உடலில் உள்ள
அனைத்தையும் தருகிறேன்!
என் இதயத்தைத் தவிர...
என்றேன்!
"ஏன் தோழர்?" என்றவரிடம்
என்னவளை
எப்போது சந்தித்தேனோ
அப்போதே அவளிடம்
என்னிதயத்தை தந்துவிட்டேன்!
இல்லாத ஒன்றை
எப்படித் தருவது தோழா?

(காதலிக்கும் தோழமைகள் இந்த கவிதையை சுட்டு பயன்படுத்திக்கொள்ளலாம்..!)

ஐம்பொன் மேனியனாய் - அகிலனுக்கு பிறந்தநாள் வாழ்த்து!

2018-06-04T07:50:00.000+05:30

அன்று நீ இப்பூமிக்கு வந்த தினத்தை நினைத்துப் பார்க்கிறேனடா அகிலா இன்றும் ஆறாத வடுவாய் ஆகிப்போனது நீயிங்கு அவதரித்த அன்றைய தினம் (1) செஞ்சுடராய் நீ பிறந்திருக்கிறாய் என்று நான் நினைத்துக்கொண்டு இருந்த போது மஞ்சள் காமாலை இவனுக்கு - இன்னும் இருபத்திநான்கு மணி நேரம் போகட்டும் (2) உயிர் பிழைப்பானா மாட்டானா என்று உனைப் பரிசோத்தித்த மருத்துவனின் விடை உயிரே போனது போலாயிற்று எனக்கு உன் தந்தையின் கண்களில் கண்ணீர் கடை! (3) உடல் கிழித்து உனை ஈன்ற அன்னைக்கு என்ன பதில்கூறுவேன் என்ன செய்வேன்? உடன்பிறப்பு தம்பியென மகிழ்ந்த உன் அண்ணனுக்கு என்ன பதில் கூறுவேன்? (4) கண்களில் கண்ணீர் அருவியாய் பெருக்கெடுக்க தொண்டைக் குழிக்குள் பெருந்துன்பம் அடைக்க மண்ணுக்கு நீ வாராமலிருந்திருக்கலாம் மகனே என நினைக்க வைத்த நாட்கள் அவை அகிலா! (5) ராச மருத்துவரின் கண் பட்டு கை பட்டு மஞ்சள் பூத்ததெல்லாம் மறைந்து போக பூசை செய்யும் ஐம்பொன் மேனியனாய் அகிலத்தில் வளர்ந்தாய் எங்கள் மகனே! (6) அன்று நீ தாங்கிய மருத்துவ சிகிச்சைகள்தான் உனை இன்று உரமேற்றி இருக்கின்றனவோ என்று நானும் உன் அன்னையும் அடிக்கடி பேசிக் கொள்வோம்..! சிலாகித்துக் கொள்வோம்! (7) குறும்புகளின் மொத்த உருவமாய் இருப்பதும் இரும்பென எதையும் தாங்கும் உறுதியிருப்பதும் அரும்பென மலரும் அழகு புன்னகை இருப்பதும் உனக்கே உனக்கென வாய்த்த சொத்துகளடா! (8) எங்களின் பதிற்றுப்பத்தே, எம்வம்சத்தின் முத்தே அகிலம் ஆண்ட பராந்தக சோழனின் பெயரினில் பங்கு பிரித்து அகிலனென பெயர் சூட்டினோமன்று அகிலமாளும் காலத்தில் வாழ்த்துவோம் நின்று! (9) அன்பு, பண்பு, அறிவு, ஆற்றல், செல்வம், நீளாயுள் ஆளுமை, திறமை, பொறுமை, வாய்மை பெற்று இன்பத்தோடு என்றும் வாழ்க எம்மிளைய மகனே உனக்கென் பத்தாமாண்டு பிறந்தநாள் வாழ்த்து! (10)

வான் மழை தந்த தண்ணீரே! - சிறுவர் பாடல்!

2018-03-22T10:53:00.002+05:30

வான் மழை தந்த தண்ணீரே!

வராமல் போனால் கண்ணீரே!

ஊனைக் காப்பது தண்ணீரே

உடலில் ஓடுது செந்நீரே!

உயிரைத் தருவது தண்ணீரே!

உடலில் எழுபது சதம் நீரே!

பயிரைக் காப்பது தண்ணீரே!

பசியைப் போக்குது உன் நீரே!

குடிக்கத் தேவை தண்ணீரே!

குறுநாவில் ஊறுது உமிழ்நீரே!

குளிக்கத் தேவை தண்ணீரே!

கிராமத்திலிருக்கு குளம் நீரே!

சுனையில் பிறக்கும் தண்ணீரே

அருவியாய் விழுவது உன் நீரே!

ஆறாய் ஓடும் தண்ணீரே!

கடலில் கலப்பது உன் நீரே!

குடிநீரை தினமும் சேமிப்பீரே

உயிர் நீர் என்று உணர்வீரே!

நீரின்றி அமையா உலகென்ற

வள்ளுவன் சொல்லைக் காப்பீரே!

எங்கும் இல்லை! - உலக கவிதை தின சிறப்புக் கவிதை!

2018-03-21T10:36:00.000+05:30

உலகில் அன்னையைப் போலொரு
அணைக்கும் கவிதை எங்கும் இல்லை!
கலியில் தந்தையைப் போலொரு
வணங்கும் கவிதை எங்கும் இல்லை!

அழுகையில் அக்காவினைப் போலொரு
துடைக்கும் கவிதை எங்கும் இல்லை!
விழுகையில் அண்ணனைப் போலொரு
தாங்கும் கவிதை எங்கும் இல்லை!

அறிவினில் ஆசிரியனைப் போலொரு
வாள்தரும் கவிதை எங்கும் இல்லை!
உறவினில் நண்பனைப் போலொரு
தோள்தரும் கவிதை எங்கும் இல்லை!

அழகில் காதலியைப் போலொரு
மயக்கும் கவிதை எங்கும் இல்லை!
பொழுதில் மனைவியைப் போலொரு
முயக்கும் கவிதை எங்கும் இல்லை!

கொஞ்சும் மழலையைப் போலொரு
சுவைதரு கவிதை எங்கும் இல்லை!
கொஞ்சும் தமிழினைப் போலொரு
மொழிதரு கவிதை எங்கும் இல்லை!

விஞ்சும் உறவுகளைப் போலொரு
வில்லங்கக் கவிதை எங்கும் இல்லை!
அஞ்சும் மரணத்தைப் போலொரு
ஆழ்துயில் கவிதை எங்கும் இல்லை!

(உலக கவிதைகள் தினத்திற்காக இன்று காலை அவசர அவரசமாகக் கிறுக்கியது)

அறம் செய்ய விரும்புவோம் புத்தகம் இப்போது விற்பனையில்...

2017-12-27T13:29:00.000+05:30

அன்பு வலைப்பூ நண்பர்களுக்கு...

நான் அண்மையில் ‘அறம் செய்ய விரும்புவோம்’ - நாடக வடிவில் ஆத்திசூடி கதைகள் என்ற புத்தகத்தை எழுதியிருக்கிறேன்.

இப்புத்தகத்தை பாரதி புத்தகாலயத்தின் புக் ஃபார் சில்ட்ரன் வெளியிட்டிருக்கிறது.

சிறார்கள், பள்ளி மாணவர்களுக்கு ஆத்திசூடியை, தற்கால உதாரணங்களோடு, நாடகமாக எழுதி இருக்கிறேன். அதாவது, அறம் செய விரும்பு முதல் அஃகஞ் சுருக்கேல் வரை 13 செய்யுள்களுக்கு 13 காட்சிகளை நாடகமாக எழுதி இருக்கிறேன்.

வகுப்பறைகளில், வீடுகளில், பொது விழாக்களில் என நாடகமாக இதை நடித்துக்காட்டலாம். இதன் மூலம் குழந்தைகளின் தனித்தன்மை, நடிப்புத் திறமையும் வெளிப்படும். அமேசானின் கிண்டிலிலும் படிக்கக் கிடைக்கிறது.

மொத்தம் 64 பக்கங்கள். விலை ரூ. 50.

ஆன்லைனில் ஆர்டர் செய்யலாம்: https://thamizhbooks.com/aram-seiyya-virumbuvom.html

சென்னையில் உள்ள பாரதி புத்தகாலயத்திலும் வாங்கிக்கொள்ளலாம்.

அடுத்ததாக, சிறுவர்களுக்கான பாடல்களை எழுதி இருக்கிறேன். இது ‘ஓடி வா.. ஓடி வா... சின்னக்குட்டி’ என்ற தலைப்பில் வெளிவர இருக்கிறது.

அறம் செய்ய விரும்புவோம்! - நாடக வடிவில் ஆத்திசூடி கதைகள்!

2017-09-21T11:31:00.001+05:30

வணக்கம் வலைப்பூ நண்பர்களே...

ஆத்திசூடியை நாடக வடிவில் கதையாக எழுதி இருக்கிறேன். இதை புத்தகமாக வெளியிடுகிறது பாரதி புத்தகாலயம். விரைவில் விற்பனைக்கு வர இருக்கிறது இப்புத்தகம்... உங்களின் அன்பும் ஆதரவும் இப்புத்தகத்திற்கு கிடைக்கும் என நம்புகிறேன்.

பள்ளி செல்லும் சிறுவர்களுக்காகவும், புலம் பெயர்ந்து வாழும் தமிழ் குடும்பங்களின் குழந்தைகளுக்காகவும் இந்த நாடக நூல் பயன்படும்....

சங்கிலிப் பறிப்பு

2017-08-10T21:26:00.002+05:30

’ஹெல்மெட் அணிந்த
கொள்ளையர்கள்
சாலையில் சென்ற
பெண்களிடம்
சங்கிலிப் பறிப்பு’ செய்தியை
பெட்டிக்கடையில்
பல்லிளித்துக் கொண்டிருந்த
வால் போஸ்டரில்
பார்த்துவிட்டு
பைக்கில்
வந்துகொண்டிருக்கையில்
போக்குவரத்துக்
காவல் துறை
வழிமறித்துக் கேட்டது!
“நீங்கள் ஏன்
ஹெல்மெட் போடவில்லை?”

பிறருக்காக வாழ்! - செல்பி கவிதை

2017-07-29T13:46:00.001+05:30

முகநூலில்
முகமறியா நண்பர்களுக்கு
முகம் காட்ட வேண்டும்
என்பதற்காகவும்...
வாட்ஸ் அப்பில்
மணிக்கொரு முறை
புரொபைலை
மாற்ற வேண்டும்
என்பதற்காகவும்
தினந்தோறும்
உயிர்ப்பிக்கப்படுகின்றன
திடீர் செல்பிக்கள்!
வாழ்க இதிலேனும்
'பிறருக்காக வாழ்'கின்ற
தத்துவம்!

இளந் தமிழ்க் காளைகளே..!

2017-01-19T20:26:00.000+05:30

மானமுள்ள தமிழா…
இன மானமுள்ள தமிழா…
மக்களாட்சி என்று சொல்லும்
மந்திகளின் இடையிலே
பொம்மை ஆட்சி நடத்துகின்ற
நாட்டில் இருக்கிறோமடா!
பதவிக்காய் பல்லிளிக்கும் பச்சோந்திகளிடையே
விரவிக் கிடக்கிறோமடா!
பாயும் புலியைப் போலவே
சீறி நீயும் எழுந்திடடா!

ஆட்சியாளன் என்ற பெயரில்
ஆட்டம் போடலாகுமா?
தமிழின மக்களின் மானத்தை
தட்டிப் பறிப்பது நியாயமா?
குடியில் விழுந்து கிடக்கும் இனமென
குறுக்குப்புத்தி மாறுமா!
சட்டம் என்ற பெயரிலே
தமிழனை கட்டம் கட்டலாகுமா?
தமிழினத்தின் காளைகளை
வேரறுக்கலாகுமா?

மத்தியில் ஆட்சி என்று
மந்திகளைப் போல் திட்டம் தீட்டி
எமது பொருளாதாரம் ஒழித்தாய் – பொறுத்தோம்!
அந்நியப் பொருள் நுழைய
அனுமதித்தாய் - பொறுத்தோம்!
தமிழ்நாட்டு மரமான
பனைக்கு தடை விதித்து
பன்னாட்டு குளிர்பானங்களை
அனுமதித்தாய் – பொறுத்தோம்!
இன்னும் எத்தனை எத்தனையோவைகளை
பொறுத்தோம்..!

குட்டக் குட்டக் குனியும் கூட்டம் என்று
ஆட்டம் போட்ட பேடிகளே
முட்ட வரும் காளைகளை வட்டமிட்டு
அடக்கியாளும் சல்லிக்கட்டை
சட்டம் போட்டு தடுக்க நினைத்தால்
விட்டுவிடுவானா – தமிழன் விட்டுவிடுவானா?
மானம் காக்க பிறந்த இனம்
எங்கள் தமிழினமடா!
சங்க காலம் தொட்டே
சிங்க நிடை போட்ட இனமடா!

சல்லிக்கட்டு காளைக்காக
முன் வைத்த காலை
இன்னும் வேகமாக எடுத்து வைக்கும்
இளம் தமிழ்க் காளைகளே
"ஏறுதழுவுதல்
நம் இன வழக்கம்!
விவசாயம்
நம் குலவழக்கம்" என்று முழங்கிடு!
ஆரியர்கள் சூழ்ச்சி கண்டும்
அடங்காத தமிழ்நாடிது!

சேர, சோழ, பாண்டியர்கள்
வீரம் சொறிந்த நாடிது!
உயிரைத் தந்து மானம் காக்கும்
சேயைத் தந்த நாடிது!
இனத்தை அழிக்க நினைப்பவனை
எதிர்த்து போராடு!
இணைந்து நானும் போராடுகிறேன்
தோளுக்குத் தோளோடு!

பண்பாட்டை அழிக்க நினைக்கும்
பன்னாடைகளே தமிழகத்தைப் பாருங்கள்!
பதவி ஆசை பிடித்தலையும் - தமிழகத்தின்
அரசியல் பச்சோந்திகளே பாருங்கள்!
எழுச்சி கொண்ட இந்த இளைஞர் கூட்டம்
ரயிலை எரிக்கவில்லை!
பயணம் செய்யும் பேருந்தை
பாய்ந்து கொளுத்தவில்லை!
அங்கும் இங்கும் சூறையாடி மக்களை
துன்புறுத்தவில்லை!
சாதி, மத கலவரம் போல்
மக்களை வெட்டி சாய்க்கவில்லை!

எழுச்சி இது! எழுச்சி இது! தன்மான எழுச்சி இது!
தானாய் எழுந்த எழுச்சி இது!
சுயம்புவாய் எழுந்த எழுச்சி இது!
வீரம் கலந்த தாய்த் தமிழ் பாலின்
வீரியம் மிக்க எழுச்சி இது!
பிரியாணி பொட்டலத்திற்கும்
இருநூறு ரூபாய்க்கும் கூடிய கூட்டமல்ல இது!
தமிழரின் பண்பாட்டைக் காக்கக் கூடிய
தமிழ் இளங்காளைகளின் கூட்டம் இது!
காளையை அடக்க நினைத்தாய்
ஒராயிரம் ஒரு லட்சமல்ல
ஒரு கோடி காளைகள் எழுந்திருக்கிறது பார்!
தம் தினவெடுத்த தோள்களோடு
களத்தில் போராடிக் கொண்டிருக்கிறது பார்!

எடுத்ததெற்கெல்லாம் அறிக்கை விடும்
அரசியல் ஓநாய்கள் ஒடுங்கிப் போய் விட்டன
எடுத்ததெற்கெல்லாம் ஆமாம் சாமி போடும்
ஈனப் பன்றிகள் இருப்பிடத்தில் ஒளிந்து கொண்டன
இப்படிப்பட்ட அரசியல் கிருமிகளை
ஆட்சிக் கட்டிலில் அமர்த்திய எம்மினம்
குடியில் விழுந்ததடா எம் தமிழினம்
என்று வெம்பிக் கிடந்திருந்தேன்!
வெம்பாதே தமிழா… வெஞ்சுடராய் எழுகிறோம்
என்று நம்பிக்கையூட்டிய தமிழ் இளைஞர்களே...

இந்தியாவையே திரும்பிப் பார்க்க வைத்திருக்கும்
இந்த போராட்டம்
அமைதியான முறையில் இருக்கட்டும்
எதற்கும் சேதமில்லாது
எவரிடத்தும் பேதமில்லாது
எவனுக்கும் செவி சாய்க்காது
தொடரட்டும் நம் போராட்டம்
வெல்லட்டும் வெல்லட்டும்
நம் உரிமைப் போராட்டம் வெல்லட்டும்!

இத்தோடு நின்று விடாதே தமிழா
பன்னாட்டு நிறுவன ஆக்கிரமிப்பிற்கு எதிராக
பொம்மை ஆட்சிக்கு எதிராக
பெண் கொடுமைகளுக்கு எதிராக
சாதியக் கொடுமைகளுக்கு எதிராக
விவசாயிகள் தற்கொலைக்கு எதிராக
தரங்கெட்ட அரசியலுக்கு எதிராக
இன்னும் பலவற்றுக்கும் எதிராக
நாம் போராட வேண்டுமடா தமிழா!

ஏறு தழுவும் போராட்டம்
வெல்லும் காலம் வந்திடினும்
நீறு பூத்த நெருப்பாய் இருப்பாய் தமிழா
பொம்மை ஆட்சியை தூக்கியெறிந்து
நம்மை நாமே ஆளுகின்ற
நல்ல நாள் வரும் வரை
நீறு பூத்த நெருப்பாய் இருப்பாய் தமிழா!
தமிழர் மானம் காக்கின்ற
தமிழன் நிலை உயர்கின்ற
நல்ல நாள் வரும் வரை
நீறு பூத்த நெருப்பாய் இருப்பாய் தமிழா!

தலைநிமிர்ந்த எனது பேனா!

2016-12-07T13:55:00.000+05:30

உங்கள் ஆட்சியில்
ஏற்பட்ட பல்வேறு குளறுபடிகள்
நாட்டை சுரண்டிய அமைச்சுகள்
டாஸ்மாக் விற்பனைகள்
என பல்வேறு
விஷயங்களுக்காக
உங்களுக்கு எதிராய்
தலைநிமிர்ந்து
எழுதிய எனது பேனா
நீங்கள் இம்மண்ணிலிருந்து
மறைந்து போன போது
தலைகுனிந்து
கண்ணீர் விட்டதை
பகிரங்கமாய் ஒப்புக்கொள்கிறேன்!
நீங்கள் கட்டிக்காத்த தமிழகம்
இனி என்னாகுமோ
என்ற கவலையில்
என் பேனா
விழிப்போடு இருக்கிறது!
வல்லூறுகளும்
பிணம் தின்னி கழுகுகளும்
என் தமிழ்நாட்டை
கூறுபோட்டிடுமோ
என்ற கவலையில்
என் பேனாவை
முன்னை விட முனைப்போடு
கூர்தீட்டிக் கொள்கிறேன்!
சத்தியத்தின் பக்கத்தில்
சத்தியமாய்
நீங்கள் இருப்பீர்
என்ற நம்பிக்கையில்..!

இரும்புத் தாரகையே! - ஜெயலலிதாவிற்கு கவிதாஞ்சலி

2016-12-06T16:22:00.000+05:30

சிந்தனை, செயல், வேகம் என அனைத்திலும்
பெண் சிங்கமென செயல்பட்ட மனமே எழுவாயோ?

வந்தனை பாடும் கூட்டத்தை எல்லாம் பந்தாடி
நிந்தனை கூட்டத்தை துரத்தியடித்த மனமே எழுவாயோ?

உன் குரல் கேட்டு ஒடுங்கிய சிறு நரிகளெல்லாம்
இன்று கூடி நின்று வேடிக்கை பார்க்கிறதே எழுவாயோ?

காவிரி, பெண் குழந்தை பாதுகாப்பு, இட ஒதுக்கீடு
என நீ செய்த நன்மைகள் ஒன்றல்ல இரண்டல்ல எனினும்

தமிழகம் நீ இருந்த போதே தள்ளாடிற்று – நீயின்றி
எப்படித் தள்ளாடுமோ என கவலையுறுறேன் குடிமகனாய்!

உன் மேல் எனக்கு ஆயிரம் வருத்தமிருப்பினும் - பெண்
இனத்தின் வழிகாட்டி என்பதில் பெருமை கொள்கிறேன்!

நிலவு முகம் கொண்ட உனைச் சுற்றி இருள் சூழுதே!
உலரும் வங்கக்கரை மண்ணுளுன் பொன்னுடல் மறையுதே!

துரோகங்களைத் தாங்கி துயரங்களைத் தாங்கி
தமிழகத்தினை வழிநடத்திய இரும்புத் தாரகையே

உண்மையில் நீ வானத்துத் தாரகையாகி விட்டாய் - உன்
துதி பாடி, கறை படிந்த கரங்கள் இனி இருளட்டும்

நீ கொண்டு வந்த நல்ல திட்டங்கள் உன் பேர் சொல்லட்டும்!
உன்னால் புனர்வாழ்வு பெற்ற ஏழைகள் உன் புகழ் பாடட்டும்!

தமிழகத்தின் தனிப்பெரும் இரும்பு பெண்மணியே
தாயே நின் ஆன்மா இயற்கையோடு இணையட்டும்!

உங்களைத் தின்பதற்கு..?

2016-11-29T17:31:00.000+05:30

மழை பொய்த்ததால்
எங்கு பார்த்தாலும்
பெரும் வறட்சி!
நகரத்தில் மூச்சுவிடாமல்
இயங்கிக் கொண்டிருக்கின்றன
குளிரூட்டிகள்!
கிராமத்தில் நீரின்றி
வாய்பிளந்து கிடக்கிறது
நெடிய வயல்வெளி!
கடும் பயணத்தில்
கண் சிமிட்டி மறைகிறது
கானல் நீர்!
வெறிச்சோடிக் கிடக்கின்றன
வெள்ளாமை செய்த
பெருவயல்கள்!
பயிர்கள் தலை கருக
விவசாயிகள் தற்கொலைகளால்
விவசாயம் தூக்கிலேறுகிறது!
பண முதலைகளின்
வராக்கடன்களை
வாஞ்சையாய் நீக்கிய வங்கிகள்
பஞ்சத்திற்கு கடன்வாங்கி
நிலம் உழுதவனை
பழி தீர்த்துக் கொள்கின்றன!

சுற்றுச் சூழலை சீரழிக்கும்
தொழிற்சாலைகளுக்கு
ரத்தினக் கம்பளம் விரிக்கும் ஓநாய்களே!
ரியல் எஸ்டேட் முதலைகளின்
பின்னால் வாலாட்டித்
திரியும் வங்கிகளே..!
விவசாயத்தை மறந்து
தொழிற் புரட்சியில் வீழும்
கனவான்களே..?
சீனாவின் பிளாஸ்டிக் அரிசியை
நீங்கள் தின்னும் காலம்
வெகு விரைவில் இல்லை!
கறுப்பு பணத்தை மீட்கும் அக்கறையை
கண்ணீல் நீரோடும்
கழுத்தில் சுருக்குக் கயிறோடு இருக்கும்
விவசாயிகள் மீதும் காட்டுங்கள்!
எதிர்காலத்தில்
நீங்கள் தின்பதற்கு
அரிசி இருக்கிறதோ இல்லையோ
உங்களைத் தின்பதற்கு
இந்த மண் கூட இருக்காது
சிமெண்ட் தரைகளாகத்தான் இருக்கும்!

புரட்சி தீபம் பிதெல் காஸ்த்ரோ - கவிதாஞ்சலி!

2016-11-28T18:10:00.001+05:30

சர்வாதிகாரத்திற்கு சாட்டையடி இந்த பிதெல்
சாகும் வரையிலும் சாமுராயாய் வாழ்ந்த பிதெல்
மக்களதிகாரத்தின் மனசாட்சியாய் நின்ற பிதெல்
மானுட குலமே தாய்நாடு என்ற பிதெல்
புரட்சி வெடிப்பில் பீரங்கி என் பிதெல்
பூகம்பமே ஆயினும் தாங்கிடும் பிதெல்
சுதேசிய பொருளாதாரத்தின் சூத்திரதாரி பிதெல்
சுதந்திரமாய் கியூபாவை சுவாசிக்வைத்த பிதெல்
கியூப மக்களின் இதயத்துடிப்பு பிதெல்
கிடைத்தவற்றை அனைவருக்கும் பங்கிட்ட பிதெல்
கம்யூனிஸத்தின் ஆலமரம் பிதெல்
கடைக்கோடி குடிமகனுக்கும் கல்வி கற்பித்த பிதெல்
மக்களை மக்களாய் வழிநடத்திய பிதெல்
மனிதநேயத்தோடு மருத்துவத்தை பறைசாற்றிய பிதெல்
சுயம்புவாய் எழுந்து நின்ற பிதெல்
சுயமரியாதைச் சூரியன் இந்த பிதெல்
முதலாளித்துவ நரிகளின் சிம்மசொப்பனம் பிதெல்
முறைகேடாய் பணம் சேர்க்காத பிதல்
புரட்சிக்கே நாயகனான சே கெவாராவின் தோழமை பிதெல்
புரட்சி தீபமாய் வாழ்ந்து வந்த பிதெல்
வரலாற்றை மாற்றிக் காட்டிய பிதெல்
வரலாறாய் மாறிவிட்ட பிதெல்
நீ மண்ணை விட்டு மறைந்தாலும் பிதெல்
மனிதகுலம் வாழும் வரை வாழ்ந்திருப்பீர் பிதெல்!

(மாபெரும் புரட்சியாளரும், கியூபாவின் பிதாமகரும், எனது பேரண்மை மிகு சே கெவாரா*வின் இணையருமான பிதெல் காஸ்த்ரோ*வுக்கும் எந்த எளியவனின் கவியாஞ்சலி… புரட்சி தீபம் ஒன்று அணைந்துவிட்டது

ஸ்பானிய மொழி உச்சரிப்பில் இதுவே சரியானதாகும். இப்படித்தான் இம்மாவீரர்களின் பெயர் அவர்கள் நாட்டில் உச்சரிக்கப்பட்டு வருகிறது)

விடிவெள்ளியாய்..! - பிறந்தநாள் வாழ்த்து கவிதை!

2016-09-09T12:51:00.002+05:30

உலக உருண்டையை

வயிற்றுக்குள் வைத்திருக்கும்

பிரபஞ்சத்தைப் போல…

எனது உலகத்தையே

வயிற்றுக்குள் வைத்திருந்தாள்

உன் அன்னை!

திங்கள் நிகர் உன் அன்னை

திங்களாய் உனை சுமந்து

விடிவெள்ளியாய் உனை பெற்றெடுத்தாள்!

இன்னும் நினைவிலிருக்கிறது

அந்த வெள்ளிக்கிழமை

நீ கொடுத்த முதல் மழலைக் குரலால்!

அடங்காத காளை, கோவக்காரன், முரடன்,

திமிர் பிடித்தவன் என பட்டம் பெற்ற எனக்கு

அப்பா எனும் பட்டம் கொடுத்த மழலை!

கன்னியாய் இருந்தவளுக்கு

அம்மா எனும் ஒப்பற்ற பதவி கொடுத்த

எங்களின் முதல் இளவரசன்!

இருண்டு கிடந்த எம் வாழ்வில்

சூரியனாய் உதித்ததால்

ஆதித்தனென்று பெயர் சூட்டினோம்!

கல்வி, கேள்வி, கலைகளில்

சிறந்து விளங்கிய ஆதித்த கரிகாலனைப்போல

ஆதவனாய் வரவே அப்பெயர் தீட்டினோம்!

என்றும் எங்கள் ஆதவனே

மோகனன் வீட்டு இளவரசனே

தாய்க்குத் தலை மகனே!

இன்றோடு நீ பிறந்து

ஆயிற்று ஆண்டுகள் பதினொன்று

வாழ்க ஆண்டுகள் பலநூறு!

எல்லா கலைகளும் கைவரப் பெற

தந்தையை விஞ்சும் தனையனாக மலர

இயற்கையோடு இணைந்து வாழ்த்துகிறேன் மகனே!

(இன்று 11-வது பிறந்தநாள் காணும் எனது முதல் மகன் ஆதித்தனுக்காய் இந்த கவிதை..!)

குப்பை வண்டி!

2016-08-08T10:43:00.003+05:30

ஊரைச் சுத்தப்படுத்துகிறேன்
எனும் போர்வையில்
தெருக்களை சுத்தப்படுத்தும்
மாநகராட்சி குப்பை வண்டி
குப்பைத்தொட்டியில் இருந்து
குப்பைககளை மொத்தமாய்
அள்ளிக் கொண்டு
தெரு முழுக்க இறைத்துக் கொண்டு
போவது போல
இன்றைய அரசியல் கட்சிகள்
தமிழ்நாட்டை
குப்பையாக்கிக் கொண்டிருக்கின்றன!

(இன்று காலை அலுவலகம் வரும் சாலையில் சென்னை மாநாகராட்சியின் குப்பை வண்டி செய்த வேலையை சாலையில் பார்த்த போது... தோன்றியது... )

பச்சை உயிரி!

2016-08-06T11:04:00.000+05:30

உலக உயிர்கள்
எல்லாம்
சுவாசிக்க வேண்டும்
என்பதற்காக
தன் உடலெங்கும்
சுவாசப் பையினை
சுமந்து கொண்டிருக்கும்
பச்சை உயிரி
'மரம்..!'

(இன்றும், வழக்கம் போல சிலம்பாட்டப் பயிற்சியில் இருக்கும் போது, பிரசாந்த் எனும் 16 வயது பையன் என்னிடம் கவிதை சொல்லக் கேட்ட தலைப்பு 'மரம்'

இரண்டு நிமிட யோசிப்பில், சிலம்பத்தை சுழற்றியபடியே அவனிடம் சொன்ன கவிதை இது...)

ரசாயனக் காதலால்..!

2016-08-05T16:59:00.003+05:30

இரும்பிற்கும்
ஈரப்பதக் காற்றிற்கும்
ஏற்பட்ட
ரசாயனக் காதலால்
பிறந்த குழந்தை
'துரு'

**************************

(இன்று காலை சிலம்பப் பயிற்சியின் போது, என்னுடன் பயிற்சி செய்யும் 16 வயது பையன் ஒருவன்... அண்ணா நீங்க கவிதை எல்லாம் சொல்லுவீங்களாமே... எனக்கு ஒரு கவிதை சொல்லுங்கண்ணா என்று கேட்க... எதைப்பத்தி கவிதை சொல்லணும் என்று கேட்டேன். பக்கத்தில் இருந்த இரும்புப் பெட்டியில் துரு பிடித்திருந்ததைப் பார்த்ததும்... 'துரு' பத்தி கவிதை சொல்லுங்கண்ணா என்றான்.

அடுத்த ஒரு நிமிடத்தில் கவிதை சொன்னேன்... அண்ணா.. சூப்பருங்கண்ணா... என் ஸ்கூல்ல கவிதைப் போட்டின்னா உங்ககிட்டதான் வருவேன்.. எழுதிக் கொடுங்கண்ணா என்றான்.

அவனிடம் சொன்னது அப்படியே மேலே....)

மீண்டும் எழுந்து'வா..!’ - அப்துல் கலாம் நினைவஞ்சலி கவிதை

2016-07-27T14:40:00.000+05:30

இந்தியாவின்

கடைக்கோடியில்

பிறந்திருந்தாலும் எங்களை

தலைக்கோடியிலிருந்து

ஆண்ட எங்களின்

எளிமைத் தலை'வா…'

குறளுக்கு

இலக்கணமாய்

இருந்து

குமரித்தமிழ்

பரப்பிய

உண்மைத் தலை'வா…'

அணுவின் அசைவுகளை

நுணுக்கமாய் ஆராயும்

அமெரிக்காவின் கண்ணில்

மண்ணைத் தூவி

பொக்ரானில் அணுவைப் பிளந்த

விஞ்ஞானத் தலை'வா…'

மாணவர்கள் இதயத்தில்

சிம்மாசனமிட்ட

கறுப்புத் தமிழா…

உனை இந்நாளில்

இழந்து தவிக்கின்றோம்

நீ மீண்டும் எழுந்து'வா…'

தமிழ் உலகமே

அழுகின்றதே தலை'வா…'

மீண்டும்'வா…'

கண்ணீரில் கரைகின்றோம்

அன்புக் கரம் கொண்டு

துடைத்திட எழுந்து'வா…'
தலை…. வா…… தலை'வா..!'

****************************

எங்கள் அப்துல் கலாம் ஐயாவே..!

ஒப்பற்ற ஒளிவிளக்கு! - காமராஜருக்கு பிறந்தநாள் வாழ்த்து!

2016-07-12T19:50:00.000+05:30

கல்வி ஒளியற்று

இருண்டு கிடந்த

தமிழகத்தை

கல்வி ஒளியால்

வெளிச்சமேற்றிய

ஒப்பற்ற ஒளிவிளக்கு

காமாட்சி எனும் விளக்கு

காமராசர் எனும்
தமிழ் விளக்கு!

**************************

பனையோலையில்

'தொட்டணைத்தூறும்

மணற்கேணி'

என்றார் திருவள்ளுவர்

ஏழைகளின்

மன ஒலையில்

கற்றணைத்தூறும்
கல்வி அறிவு

என்று எழுதாமல்

அரசுப்பள்ளிகளின் மூலம்

எழுத வைத்து

கல்விச் செம்மல்

எங்கள் காமராசர்
ஏழைகளுக்கு
கல்விக்கண் திறந்த

காமராசர்!

**************************

எனைப்போன்ற

கல்வி வாசம் அறியா

குழந்தைகளுக்கு

கடையேழு வள்ளல்களை

அறிமுகப்படுத்தியது

யாரென்று கேட்டால்

இலக்கியமில்லை

புத்தகமில்லை

ஆசிரியரில்லை

கல்வி தந்த வள்ளல்

காமராசர் என்பேன்!

**************************

(எங்களின் கல்வி வள்ளல் காமராசரின் பிறந்தநாள் வரும் ஜூலை 15 அன்று வருகிறது. அதற்காக இந்த குட்டிக்கவிதைகள் சமர்ப்பணம்... கடலை கடுகில் அடக்கமுடியாது... அவரின் புகழை எதனாலும் அடக்க முடியாது...)