حاجات كتير

2015-07-08T12:33:00.004+02:00

امال فين نصك التاني ؟؟

السؤال ده غالبا بيكون سؤال عن الشخص التاني اللي الناس متعودين يشوفوك معاه .. أو معروف عندهم انكم مرتبطين ببعض.. مش شرط يكون ارتباط عاطفي على فكره .

"نصك" التاني ممكن يكون حبيبتك , اخوك, صاحبك أو حتى الكلب بتاعك.

"نصك" التاني ممكن يكون .. كتاب , جيتار, عربيه أو حتى علبة السجاير.

فكره "نصك" التاني في حد ذاتها فكره عجيبه جدا .. ليه التعبير ده ؟؟

وهل فعلا كل واحد محتاج يكون ليه "نص" تاني ؟؟

وكأن الإنسان أصلا لوحده مش كفايه .. يمكن ده جانب من جوانب فكره نقص الإنسان ,وإن مفيش إنسان كامل .. مش بس في الصفات .. لكن كمان في قدرته على الحياه لوحده ..مهو مفيش "نص" ممكن يعيش لوحده من غير "النص" التاني ..

يمكن علشان كده من بداية خلق الانسان وبعد ما ربنا سبحانه وتعالي خلق سيدنا آدم وسابه فترة في الجنة اللي كان فيها وهو أعلم بيه طبعا .. لما سيدنا آدم حس بالوحده وعدم السعاده - رغم إنه كان عايش في جنه وكمان كان لسه حديث عهد بالحياه وعنده كتير لسه محتاج يجربه ويتعرف عليه - .. لكن آدم حس بالوحدة وعدم السعادة !!

ومن هنا ربنا خلق حواء علشان تكون "النص" التاني لآدم .. بس دي مختلفة جدا عنه ..

هي أجمل .. هو أقوى .. هي أذكى ..هو أعقل .. هي أنشط .. هو أحرص ..

لكن برغم الاختلاف ده هي كانت "النص" التاني .. "النص" اللي بيكمل .. "النص" اللي برغم كل الاختلافات والخلافات هي "النص" اللي بيعمل التوازن لآدم .

وبعد ما آدم وحواء عملو أول ذنب وربنا قرر يحرمهم من الجنه اللي كانو فيها ويسيبهم يعيشو في الأرض العاديه اللي كانت مستنياهم يعمروها .. مكانش النزول ده هو العقاب الأقوى .. لكن العقاب الأقوى كان حرمان كل واحد منهم من "نصه" التاني ..

طيب حواء أول ما فتحت عينيها كانت جنب آدم وشافته من أول لحظه.. فطبيعي إن الوِحده بالنسبالها تكون مرعبة ..

لكن آدم أصلا كان عايش لوحده .. حياته كانت مستمرة قبل ظهور حواء .. صحيح مكانش مبسوط .. لكن كان "واحد صحيح"..

الفكره إن بمجرد حواء ما ظهرت آدم مبقاش "واحد" ... بقى "نص" واحد .. وحواء بقت "النص" التاني .. ولما تاهت منه ..كان صعب جدا يعيش وهو "نص" واحد ..

واحنا عملنا نفس اللي عمله آدم بالظبط ... أغلبنا بقى عنده "نص" تاني مينفعش ميبقاش موجود ف حياته ..

وممكن نلاقي حد ناصح وعنده أكتر من "نص" .. صاحب وحبيبه وكلب وكتاب .. مثلا يعني .. (اهو ده ابن محظوظه ).

النص التاني مش دايما بيكون كويس .. مش لازم يكون هو النص الصح ..

انت اصلا لما بتختار النص التاني ده مبتختاروش على اساس عقلي ومنطقي ..

في وجهه نظر علميه بتقول ان الإنسان بياخد قراراته غالبا بالعاطفه وبعد كده العقل بيحاول يدورلها على أسباب منطقيه..

وطبعا العاطفه دي غالبه بتودي الواحد ف حتت هو مكانش عاوز يروحها لما اختار ..العاطفه ممكن تخليك تختار نصك التاني ويطلع صاحب مش جدع .. او حبيبه انت مش اهم حاجه عندها .. او حاجه مضره من الاساس زي السجاير ..

السؤال هنا لو "النص" ده .. تاه ..أو اختار يتوه منك رغم إنه عارف مكانك ..

لو مات .. أو اختار يموت فيك وهو لسه حي ..

وانت استنفذت كل محاولات البحث عنه ..كل محاولات انقاذ حياته ..

هتعمل ايه ؟؟

الوضع هيكون صعب شويه .. يمكن تدور على "نص" غيره .. لكن قالها من زمان ابو فراج .. الدنيا متديش محتاج ..

واللي يدور ميلاقيش ..

ولما متلاقيش هتحاول تتأقلم وتعيش "نص" .. لكن مش هتكون عايش فعلا .. هتكون زي اللي بيتفرج على الحياه من بره .. سامع كلام الناس ليك ورغم انك بترد عليهم .. برضو كأنك مش معاهم

صاحي وطول الوقت نفسك تنام .. وتيجي تنام متعرفش ..فتصحى وانت نفسك تنام

افكار كتير بتجري ف عقلك .. وتيجي تعبر عنها متلاقيش كلام .. فتسكت وانت نفسك تتكلم

وهنا بتيجي ميزه صاحبنا الناصح اللي كان عنده اكتر من "نص" ..أهو لو نص منهم راح الباقيين هيملو الفراغ (مش بقولك ابن محظوظه)

بس يا سلام .. يا سلام .. يا سلاااااااام .. لو راحو كلهم ..هيعمل ايه ؟؟

لو صاحبه راح .. جه يدور على حبيبته لقاها تاهت .. راح يدور على الكلب بتاعه لقاه مات .. راح يدور ع الكتاب .... لقى نفسه مش قادر يقرا .. هيعمل ايه ؟ (طبعا كده مبقاش ابن محظوظه ولا نيله)

انا شخصيا مش عارف هيعمل ايه .. وماعتقدش ان في وصفه سحريه او أي كلام من بتوع "انت الامل وابتسم للحياه وهي هتضحكلك ويمكن تيجي تحضنك كمان" ممكن ينفع ف الظروف دي ..

اعتقد انها فتره ولااااازم تعدي بيها ..

وهنا هيظهر الفارس الشهم واكبر صديق للانسان ... النسيان ..

مع الوقت هتتعود وبعدين هتنسى ..

ولما هتنسي .. غصب عنك هتلاقي نفسك عملت لنفسك نص تاني من جديد ..

رغم اني اتمنى ان محدش يفقد "نصه" التاني لكن للأسف اكيد في ناس كتير هتعيش التجربه دي ..

لو لسه "نصك" التاني جنبك .. حافظ عليه وخلي بالك منه وحس بقيمته جدا واشكر بنا انه لسه معاك..

ولو تاه منك لاقدر الله .. استعن بالله .. واصبر .. لو لسه ليك عمر .. هتلاقي نص جديد ..

ماشي عادي فالشوارع

ناس بتحكي وهو سامع

لما يتكلم يردو وهو اصلا مش متابع

رغم انه كان بيضحك

ف المرايه شاف دموع

انا اللي ماشي هناك لوحده

بس واحد نصه ضايع

سقوط

2012-07-16T13:17:00.001+02:00

مكانش لازم افتح الشباك واطير وانا مجروح
مش كفايه اني اشوف الفضا قدامي والبراح مفتوح
جايز اكون حسيت للحظه اني شايف سكتي
لكن ضباب الجهل خلاني مشوفش الجبال بوضوح
والجرح جوايا صحيح مش في الجناح
لكني لما حاولت أعلى لفوق منعتني جراح الروح
واديني بهوي وشايف عمري بيعدي
واملي قبل ما اغرق في المحيط تلحقني سفينة نوح

جايز

2012-06-06T15:34:00.001+02:00

جايز ترتاحيلي ف لحظة وجايز برضو ارتاحلك
وجايز نتخنق من بعض وجايز تحكي واسمعلك
وجايز نبتدي موضوع تكون افكارة من عقلك
او احكيلك كلام عني تلاقي كلامي كان عنك
جايز تدخلي دنيايا قبل ما عقلي يسمحلك
وجايز تلقي نفسك جنبي فرحانه عشان جنبك
وجايز تبقى مبسوطة عشان جايلك وبتلكك
وجايز كل ده ميحصلش ولا توافقي ولا اقولك
يا ريتك تقبلي الفرصه وحاولي تغلبي شكك
انا محتاج تكوني صديقتي انا بصراحه محتاجلك
انا عاوز اكون موجود وانتي بتسردي حكايتك
ونفسي تعرفي اسمي وانا باخمن حروف اسمك
وجايز كل ده يكون وهم ولا انتي هنا ولا انا شفتك

شخبطة ع الحيط

2012-02-01T13:13:00.001+02:00

مسافر

2011-07-23T16:16:00.004+02:00

أقود سفينتي وحدي .. بلا هدفٍ ولا وجهات
وحيداً بائساً أمشي .. حياتي كلها أنات
تجول بخاطري الأفراحُ .. كحلمٍ والحياة سبات
ولاحت أرضك الغَنّاءُ .. نوراً يمسح الظلمات
مددتُ شراعيَ العالي .. لأبلغَ شاطئَ البسمات
ولكن بيننا بحرٌ .. وبحركِ عاتيَ الموجات
يحولُ الموجُ بين سفينتي .. وبينكِ دونما رحمات
يا مصر يا أحلى الحروفِ وأعذبَ الكلمات
سأقبل طردكِ المزعومَ لي .. ولن أشكو من الطعنات
وأنتِ خبئي عينيكِ .. وداري هذهِ الدمعات
وإن سألوكِ عن حالي فقولي .. أبعدته عني فمات

احد مميزات الناجحين

2011-06-01T12:24:00.003+02:00

ما زلت أنتظر

2011-05-16T16:36:00.004+02:00

تمر الايام ببطء كأنها تتعمد ان تشعرني بمرارة الانتظار

وانا برغم الملل القابع في جنباتي مازلت انتظر الغد بهدوء

ولن انسى ان اخر مرة شكوت فيها من الملل كانت بداية عاصفة لم تشتهيها ابدا سفينتي

وها أنا أبحر في صمت يتناسب مع هدوء الأيام

وأنتظر الغد الذي أعرف انه قد يأتيني بصديق طال غيابه ثم يأخذ منى عزيزا أتمنى بقاؤه

وقد يأتيني بنجاح أتطلع اليه ويأخذ منى راحة الذهن التي أحتاجها لأكمل الإبحار

وكـأني كفيف لا يعلم هل هو في اشد أوقات الليل ظلمة وأن القادم هو أول شعاع للنور

أم ان اليل لازال في أوله والقادم أكثر ظلمة والوقت طويل قبل طلوع النهار

وها أنا انتظرك يا غدا لا يريد أن يأتي إلا بعد أن اتوسل اليه أن يأتي

وأنا أخاف إن توسلت اليك لتأتي أن أعود وأتنمى لو أنني إستمتعت أكثر بلحظات الإنتظار

متخافوش

2011-02-12T07:13:00.008+02:00

الى مصر التي عانت كثيرا قبل الحصول على الحرية
والى شعبها الذي خسر كثيرا من أجل الكرامة
لكي لا ننسى اننا لم نكن مشاركون في ذلنا
يجب ان نتذكر ماضينا وكيف كنا فيه
لنحافظ على مستقبلنا ومكاننا فيه

لو فى يوم الحق تاه والسكوت سكن البيوت واتبدلت كل الحقايق والحلم آيل للسقوط

والجاى ايه....
منعرفوش
متخافوش
مهما كان الليل طويل والبرد عشش فى الضلوع

واختفت منا المشاعر كل شىء صحى الدموع والحب حلم مبنطلوش

متخافوش
هو ايه معنى الحياة لو ملاها الخوف ياناس لو تاطينا لكل ريح

وبقينا نشرب اى كاس

هو ايه معنى الحياة لو اتحبس جوانا صوتنا لو اتقتل فينا الحماس

بالخوف حياتنا زى موتنا

متخافوش واصحوا قبل ماينطفى اخر قمر

متخافوش واصحوا قبل مايتسرق ضيل الشجر

متخافوش وتضيعوا منا الطريق

متخافوش ده الخوف مابينجيش غريق

فوقوا قبل مايمحى ملامحنا السكوت

والامل بالروح يموت

هو ايه معنى الحياة لو ملاها الخوف ياناس لو تتطينا كل ريح

وبقينا نشرب اى كاس

هو ايه معنى الحياة لو اتحبس جوانا صوتنا لو اتقتل فينا الحماس

الخوف حياتنا زى موتنا

الى شعب مصر

2011-02-12T06:41:00.004+02:00

ها قد رحل كما قد طلبنا .. وترك لنا زمام الأمور
فهل سنكون كما قد حلمنا .. رجالاً تعمل كما تثور
كتبنا لتاريخ مصر الحديث .. سطوراً ويا مجدها من سطور
أفقنا من الذل شيئا فشيئا .. ونلنا انتصاراً كيوم العبور
فهيا الى العز يا شعب مصر .. لقد آن أوان وفاء النذور
لنعمل سويا بعزم أكيد .. يشيٌد للمجد أعلى القصور
ونلحق ركب العلا والتقدم .. بعقل سديد وقلب جسور

وُلِدَ حراً

2011-02-11T03:21:00.003+02:00

طفل في عيد أرضه .... لا يرى في الأرض عيد
لا يرى في العين فرحة .... لا يرى أم الوليد
لا يرى غير الدموع .... في عين أب في الحديد
ويقول هل في الأرض حب .... أم أن الحب قد أبيد
ويدرك أن الأم ماتت .... بعد تعذيب شديد
ويعرف أن الأب ضاع .... وعندها إشتعل الجليد
فيقول قد وُلِدتُ حراً .... لست وإخواني عبيد
ويقول سوف أفك قيدي .... سوف أرى العصر المجيد
ويقول سوف أعيد أمي .... وسأحيي الأرض من جديد
سيكون الحكم للبشر .... دوما وبنصهر الحديد

كتبتها في يناير 1993

خواطر عن مصر الحاضر (ثورة 25 يناير وما بعدها)

2011-02-07T15:49:00.011+02:00

"أقسم بالله العظيم أن أحافظ على النظام الجمهورى وأن أحترم الدستور والقانون، وأن أرعى مصالح الشعب رعاية كاملة، وأن أحافظ على استقلال الوطن وسلامة أراضيه"

في كل مرة كنت أسمع فيها التعديل الوزاري أو تكوين حكومة جديدة وأتابع فيها السادة الوزراء الجدد وهم يقومون بحلف اليمين أمام السيد رئيس الجمهورية وأسمع منهم هذا القسم الرائع

كنت دائما أسأل نفسي كيف يمكن لشخص قد أقسم بهذا القسم أن يقوم بإتخاذ أي قرار يمكن أن يتسبب في ضرر للشعب الذي قد اقسم أن يرعى مصالحه أو أن يمنع أي قرار يمكن أن يخفف من معاناته

وأكتشفت السبب أخيراً
وهو أن جميع الوزراء وبلا استثناء لا يستطيعون حفظ هذا القسم وكلهم يقرأونه من ورقة وهم يحلفون اليمين أمام السيد الرئيس وكأنهم يقرأون باب الأبراج في الجريدة
وبالتالي فإن أحدا منهم لن يبر بقسمه هذا -إلا من رحم ربي وكان من الأساس رجل يتقي الله في رعيته-
والسبب في هذا هو

أولا: لأن شخصا لايسطيع أن يحفظ هذا القسم المكون من سطرين فإنه بالتأكيد سوف ينساه بمجرد أن يتحرك خطوة واحدة للأمام ليصافح السيد الرئيس

ثانيا: لأنه وإن كان واعيا لما يقول فإنه في اللحظة التي كان يقسم فيها لم يكن ينظر للرئيس الذي يقف أمامه ولا للشعب الذي يقسم بالحفاظ على مصالحه ولا يقرأه بتمعن لكي يشعر أنه يقسم بالله ولم يكن قد قرأ الدستور أو القانون الذي سوف يحافظ عليه
ولكنه ببساطه كان يقسم لتلك الورقة الموجوده في يده وبالتالي فإذا كان يعتقد أن هذه الورقة ستحاسبه على هذا القسم كان سيبذل جهده ليبر بهذا القسم

ربنا يستر....

كل اللي فات حماده وكل اللي جاي حماده تاني خالص

بعد هذه الثورة العظيمة التي بالتأكيد ستغير من مصر تغييرا جذريا وبعد أن أصبحت الشرطة في أضعف حالاتها بعد أن كانت هي أقوى سلطة في شوارع مصر
وبعد أن قام شباب الفيس بوك بهذه الثورة وأصبحو هم من يقومون بتوقيف ضباط الشرطة في الشوارع للتأكد من هوياتهم والقبض على السجناء الهاربين والبلطجية والقتلة في الشوارع وأصبحو هم من بيدهم زمام الأمور
وبسبب إقتناعي بالكلمة الخالدة التي من المحتمل أن تكون أهم بنود الدستور الجديد لمصر وهي
"مصر قبل 25 يناير غير مصر بعد 25 يناير"
أتوقع أن يتم عمل كارنيهات لمن لهم حساب على الفيس بوك ليكونو هم أصحاب السلطة الحقيقية في المرحلة القادمة وبدلا من أن تقف في أي كمين مرور يحاول ان يسحب منك الرخصة لقيامك بمخالفة مرورية وتقول له انا ضابط شرطة لكي يضرب لك تعظيم سلام ويقول لك "آسفين يا باشا" ستخرج له كارنيه الفيس بوك ليقوم الضابط الموجود في الكمين بضرب تعظيم سلام لك ويقول متوسلا وبلهجة يملأها الرعب "آسفين يا باشا والنبي ما تقول لوائل باشا غنيم اننا وقفنا سعادتك"

ربنا يستر....

بناء على تعليمات السيد الرئيس

في برنامج مصر النهاردة وفي وجود مجموعة من السياسيين والشباب الموجودين في ميدان التحرير قال أحد الشباب
"أنا مشفتش من 30 سنه وزير ولا مسؤول ولا حتى غفير افتتح ان شالله دروة مياه في الصحراء غير لما قال قبلها " بناء على تعليملت السيد الرئيس""
وبالطبع ضحك كل الموجودين وقالو له عندك حق

والعجيب الآن أنه في كل برامج التلفيزيون أصبحت هناك جملة جديدة وهي:

"شباب 25 يناير هم الذين غيروا مصر وهم أصحاب الفضل فيما نحن فيه الآن وهم الذين فعلو ما لم نكن نتخيل أنه سيحدث في مصر قبل 100 سنه وأننا جميعا نؤيدهم ونشجعهم ونرفع لهم القبعات"

ومن لا يبدأ حواره بهذه الجملة يصبح خائناً وعميلاً وغير مؤيد لهذه الثورة العظيمة

واضح إن مفيش فايده ولازم كلنا نفضل نمجد في من بيده زمام الأمور في كل مرحلة

آه صحيح .. على فكرة أنا طبعا مقصدش أني مش موافق على الثورة العظيمة بالعكس ده حتى شايف ان"شباب 25 يناير هم الذين غيروا مصر وهم أصحاب الفضل فيما نحن فيه الآن وهم الذين فعلو ما لم نكن نتخيل أنه سيحدث في مصر قبل 100 سنه وأننا جميعا نؤيدهم ونشجعهم ونرفع لهم القبعات"

وربنا يستر .....

من فوائد القهوة المغلية

لست من مدمنين شرب القهوة ولكني عندما أشربها أحب أن أشربها مغلية وهذا يتطلب منى أن أكون واقفا أمام الكنكة حتى لا تفور القهوة

وعندما كنت أنتظر غليان القهوة سرحت قليلا في ما يحدث في مصر الآن ووجدت بعض الشبه بين مصر الآن والقهوة على النار
لقد وضعنا منذ زمن طويل على نار هادئة تقوم بالتسخين والتسخين كنا نتألم كثيرا بسبب هذه الحرارة لكن لم يكن يظهر أي شئ على السطح بسبب طبقة البن الموجودة على القمة والتي تمنع دخول الهواء الى الباقي الإناء وتمنع صعود أي من جزيئات القهوة الى أعلى
وعلى فترات متباعدة كانت تظهر فقاعة صغيرة على أحد جوانب الإناء سرعان ما تختفي بسبب طبقة البن الموجودة على السطح
برغم أن هذه الطبقة هي طبقة صغيرة جدا إلا أنها كانت تكتم على أنفاس كل ما تحتها وتمنعه من الظهور على السطح

لكن الحرارة اشتدت وأصبحت لا يمكن تحملها وأصبح هناك إحتمالين لا ثالث لهما

الأول أن تفور القهوة وتطرد هذه الطبقة من البن الموجودة على السطح وتخرجها خارج الإناء فتقوم هذه الطبقة بخروجها بإطفاء النار المسببه للفوران وتهدأ الامور بسرعة

والثاني هو أن يقوم أحد بتقليب القهوة بسرعة وبهذا تسقط طبقة البن داخل الإناء وتبتلعها باقي القهورة وتبدأ مرحلة الغليان وتستمر والقهوة في الغليان والغليان ويختلط كل من فيها حتى يقوم المتحكم في الأمور بإطفاء النار عندما يتأكد أن هذه القهوة أصبحت جاهزة

لا أعرف ما الذي سيحدث في مصر لكن قهوتي أنا قد فارت بسبب سرحاني
لكن الغريب أن هذا الفوران لم يطفئ النار واستمرت القهوة في الغليان وأصبح عليَ أن اقوم بنتظيف المكان من بواقي طبقة البن الموجودة على السطح قبل أن أستمتع بشرب القهوة وأنا أشاهد تغطية لأحداث ثورة 25 يناير

ربنا يستر....

آه

2011-01-02T10:04:00.002+02:00

آه من عذابي وغربتي ويأسي
آه من دموعي وحزني على نفسي
آه يا سفينه جزن ما بترسي
مرساكي فرحي بس لولا ال آه

آه في دموع العين بقيت بحار
آه من شجوني قلبي قايد نار
آه لو تقولي ان زماني دار
جايز عليل الروح يلاقي دواه

آه لو تقول التوبه يا زماني
آه لو آهات الحزن تنساني
آه لو عيوني تبتسم تاني
هافرح وهانسى كل قولة آه

علموني عنيكي اغامر

2010-11-29T15:15:00.008+02:00

همس
أصغر طفلة في العائلة
عمرها سنه واحده
لها شخصية مستقلة تختلف عن جميع اطفال العائلة
هي الوحيدة التي كسرت حاجز الخوف من جدها (والدي)
هذا الخوف الذي سيطر على جميع افراد العائلة بسبب شدة وحزم والدي
لكنها منذ بداية وعيها وتعرفها على العالم الذي حولها
كانت دائمة الحركة والبحث والعبث بكل ما تطالة يديها
وهذا عامل مشترك بينها وبين اغلب الاطفال في هذا السن
لكن الفارق الوحيد هنا
هو انها لم تستسلم لتلك النظرات النارية المرعبة القادمة من جدها لتردعها عما تفعل
لقد كانت وما زالت تفعل الشيء ذاته
تذهب في اتجاه جدها ..
وتنظر اليه في عينيه..
وتبتسم..
متجاهلة كل الغضب والصوت العالي والنظرات التي ترعب حتى للكبار ..
فقط تنظر في عينيه وتبتسم .. وتبقى هكذا حتى يضحك رغما عنه
حتى وإن ضربها بقوة
أو دفعها من أمامه
تعود وتتسلق الكنبة التي يجلس عليها
حتى تستقر فوق ساقه
ثم تعود لتنظر اليه وتبتسم..
ولا يستطيع هو ان يفعل اي شيء ..
سوى أن يضحك

تمشي تبعتر في الحاجات
وايديها تتشعبط في كفك

عاوزه تطول كل الحاجات
والخوف عليها مالي قلبك

تقلب كيان كل الحاجات
وانت تصرخ بعلو حسك

تضحك عينيها من سكات
وايديها بتحاول تضمك

تلاقي نفسك من سكات
تضحك وتاخدها في حضنك

تقول عينيها من سكات
عمري يا جدو ما خفت منك

المقامة الفريدة في أصول السواقة الرشيدة

2010-10-27T01:17:00.010+02:00

بعد خبره في السواقة بقالي 16 سنة

جوه مصر وبره مصر بالهدوء والمسكنة
اكتشفت ان السواقه بالادب مش ممكنة
العافيايجه كانو صح واللي غلطان هو انا

من بكره هاعمل زيهم وامشي على طول ف الشمال
واللي هيفكر يعدي مش هاوسعله المجال
واخطف الغرزة السريعه دي الغرز طبع الرجال
اللي ماشيين بالهداوة يا إما ستات او عيال

هالغي فوانيس الإشارة مش انا عندي دراعين؟
عادي ابقى في الشمال وفجأة ادخل في اليمين
واللي جنبي يخلي باله هو يعني ملوش عينين
المهم اكون مهدي قبل ما ادخل ع الكمين

لو طريقي لقيته زحمه لازم اهرب م اللي حاصل
عادي جدا أمشي عكسي ومش مهم أعمل مشاكل
نوري عالي ومش في بالي اللي ماشي في المقابل
اصلي لو ممشيتش عكسي هابقى خيخه ومش مقاتل

أوعو بقى حد يعارضني أو يقولي ده مش كلام
هي دي اصول السواقه بالدراع والالتحام
السواقه ف مصر عافيه ومش هيعدلها نظام
لو قدرت تسوق بادبك قول وانا اضربلك سلام

الثقة

2010-10-17T09:55:00.005+02:00

الثقة بالناس
كانت هي الإحساس الأول حتى يثبت العكس
والتجربة أثبتت أنها يجب أن لا توجد حتى يثبت وجودها وتظل تحت الإختبار

الثقة بالأصدقاء
إن لم توجد لما أستطعت أن أنام مغمض العينين

الثقة بالنفس
زادت مع الأيام ويا ليتني عرفت معناها منذ زمن بعيد

الثقة بالله
لولاها لما قمت من سريري ولا خطوت خطوة تجاه أيامي القادمة

كنت مشلول..

2010-10-05T10:11:00.001+02:00

الحمد لله

كلمة بنقولها كتير قوي لما حد يسأل عن أحوالنا..لكن لاأعتقد ان حد فينا بيبقى مركز وهو بيقولها أو حاسس معناها بجد

من فترة قصيرة في رمضان اللي فات ربنا أراد اني أعمل عملية جراحية بسيطة جدا من جراحات اليوم الواحد .. يعني عملتها وخرجت من المستشفى على رجلي في نفس اليوم والحمد لله

على رجلي..

هو ده بيت القصيد
العملية كانت من النوع البسيط جدا وأنا كنت واخد الموضوع ببساطة ومش قلقان خالص
دخلت غرفة العمليات وقابلت الدكاتره اللي هيعملو العملية
سألني دكتور التخدير تحب تخدير كلي ولا نصفي؟؟
أنا إخترت النصفي لأني كنت عاوز أعيش معاهم جو العمليه وأعرف ايه اللي بيحصل بالظبط

التخدير النصفي بقى للي مش عارفه هو عبارة عن إبرة بتتاخد في العمود الفقري بتتسبب في فقدان الإحساس بالنصف السفلي من الحسم تماما

أخدت الإبرة وبدأت أحس بتنميل في النصف السفلي من جسمي لحد ما فقدت الإحساس بيه تماما وفقدت القدرة على التحكم فيه تماما

انا دلوقتي مش قادر أحرك ولا حتى صباع من صوابع رجلي

خلصت العملية بعد ساعة تقريبا وأنا طول العملية عمال أتكلم مع الدكاترة واهزر معاهم وهم شغالين وكله تمام
خرجت من غرفة العمليات وقالولي هتستنى لحد ما أثر التخدير يروح وتقدر تمشي على رجلك
وهنا بدأت أحس بالمشكلة

العملية كانت الصبح وأنا كنت عاوز اقوم أخرج علشان نلحق أنا وأسرتي نفطر في البيت (إحنا في رمضان ..فاكرين؟؟)
إستنيت ساعة تقريبا زي ما دكتور التخدير قالي وبدأت أحاول أحرك رجلي

مش قادر..
مش عارف..
مش حاسس بيها لسه..
شايفها قدامي .. موصولة بجسمي ..لكن كأنها مش بتاعتي
مش مستجيبة لأوامري..
كان إحساس صعب جدا

استنيت كمان شويه لحد ما بدأت أحس بشوية تنميل خفيف فيها
حاولت تاني وبصعوبه قدرت أحركها

حاولت اقف .. مقدرتش.
رجلي مش عاوزة تشيلني.
الرجل اللي كنت بأتحرك بيها زي ما أنا عاوز ومن غير حتى ما أفكر أنا هاعمل ايه علشان أخليها تشيلني وتمشي بيا للمكان اللي أنا عاوزه.. مش عاوزة تستجيب
مش قادرة تشيلني
مش قادرة تسمع كلامي
بقت عبء تقيل عليا
لأني حسيت إنها فعلا تقيلة
لأني بقيت أنا اللي شايلها مش هي اللي شايلاني
تماسكت ورجعت قعدت تاني على السرير
واستنيت تاني

رغم إني كنت عارف إن اللي بيحصل ده شئ عادي وأني بعد شوية وقت قليلين هارجع أمشي عليها تاني
بس إحساسي كان رهيب جدا ساعتها
كأني مش هاقدر أمشي تاني
حسيت ساعتها بنعمة الصحة وبقيمة النعم الكتير اللي ربنا مقدمهالنا علشان نعيش بيها وإحنا ناسيين أصلا إنها موجودة

خلص اليوم وقدرت أمشي عادي تاني
لكن لسه جوايا ذكرى من يوم العملية
لسه كل شويه بافتكر اني مكنتش قادر أقف على رجلي ولا قادر اتحكم فيها

وأبص لرجلي واحركها
وأفرح لما اقدر احركها
وأعرف انها ماتحركتش علشانا انا عاوز احركها
لأ
دي اتحركت علشان ربنا اراد أنها تطيع أوامري وتتحرك
يا ريتني أفضل فاكر الموقف ده ومانساهوش أبدا
يا ريتني اقدر أوفي حق النعمة دي وكل النعم اللي ربنا اداهالي وأنا مش حاسس بيها

الحمد لله على كل نعمه علينا
الحمد لله على نعمة إدراك نعمه علينا
الحمد لله على نعمة الحمد على نعمه علينا
الحمد لله رب العالمين..

عين ونني

2010-05-27T10:35:00.006+03:00

في الكام يوم اللي فاتو على رأي لطيفة كان بيتكرر معايا موقف متشابه الى حد ما
مثلا
كنت راكب المترو من اول محطه ليه وبعدين دخل المترو راجل واضح من لبسه انه راجل على قد حاله وقعد جنبي
وعلى الكرسي اللي قصادنا قعدت واحده ست وجنبها شابه صغيره
المترو اتحرك واحنا في الطريق ابتدت الست اللي قاعده قصادنا تتكلم مع الشابه اللي جنبها
- هو انتي كلمتي محمد
- لأ مكلمتوش
- طب مش تكلميه عشان يستنانا
-معنديش رصيد
-يا حسين.. متكلم محمد
- مفيش معايا تليفون (ده الراجل اللي قاعد جنبي)
- ليه ؟؟
- مش انا بِعته امبارح
- ليه؟
- مكانش معايا فلوس
- طب خذ تليفوني وحط فيه شريحتك وكلم محمد
- ماشي
وهنا بدأت اخد بالي ان الست والراجل تقريبا مش شايفين بعض كويس
لأنها مدت ايدها بالتليفون وهو كمان مد ايده لكن مكانوش محددين الإتجاه بالظبط
وابتدا هو يفتح التيفون من غير ميبص عليه ويطلع الشريحة اللي فيه
وقعد يدور في جيوبه على الشريح بتاعته لحد ما لقاها
راحت الشابه اللي قاعده قصاده فالت
- هات انا ركب الشريحه
(وضع طبيعي ان هي اللي تركب الشريحة لأن الراجل نظره ضعيف جدا)
خدت منه التليفون وبدأت تركب الشريحة ولقيتها برده مبتبصش على التليفون
بعد شويه كده من الكلام والحركات اكتشفت ان التلاته اسره واحده والتلاته نظرهم ضعيف جدا
يعني تقريبا بيشوفوا خيالات بس
لكن هم التلاته متعاملين مع الموقف تماما ومعندهمش مشاكل في الحياه

مره تانيه كنت واقف مع واحد صاحبي عند محل عصير قصب بنشرب شاي بلبن
قصدي عصير
المهم دخل المحل اتنين اصحاب وطلبوا عصير ودفعوا

وهما ماشيين ركزت معاهم شويه لقيت الاتنين أكِفّاء (اديني شكلت الحروف اهه على الله حد يغلط في النطق)
انتين شباب عاديين جدا ماسكين شنط شيك جدا وماشيين عادي خالص وابتدو يحاولو يعدو الطريق في شارع القصر العيني

الغريبه بقى انهم محاولوش يطلبو من حد انه يعديهم
لقيت الاولاني رفع ايده جامد لفوق والتاني ابتدي ينزل رجله من على الرصيف لما حسو ان مفيش صوت للعربيات قريب وابتدو ياخدو خطواتهم ويعدو الطريق عادي جدا

انا كنت سعيد انهم قادرين يتعاملو مع الحياه كده من غير خوف

مره تالثه بس دي مكانتش معايا انا .. دي قصه سمعتها من رجل عزيز جدا على قلبي
بيقول
كنت ماشي في الشارع مرة ولقيت راجل عجوز جدا واقف عند محطة الاتوبيس ولما بيسمع صوت اتوبيس وصل بيسأل اللي جنبه هو ده اتوبيس كام ؟؟
رحت وقفت جنب الراجل وسالته انت عاوز اتوبيس كام يا حج؟؟
قالي على رقم الاتوبيس طلع اللي انا مستنيه
قلتله خلاص انا كمان مستنيه لما ييجي هنركب مع بعض
وفعلا جه الاتوبيس وركبنا وقررت اني انزل معاه عشان اوصله بيته
هو كان فاكرني نازل عادي مش علشانه مخصوص
المهم مشينا في الشارع مع بعض وقالي انا هاطلب منك حاجه
ياريت تيجي معايا البيت وتشرب معايا كبايه شاي
حاولت اشكره واعتذر لكن هو اصر جدا وانا كمان حسيت اني عاوز اروح معاه
المهم وافقت وفي الطري واحنا ماشيين كان بيقولي خلي بالك من الحفرة اللي جايه دي أو حاسب في حجر كبيثر في الحته دي وهكذا!!!
المهم وصلنا البيت ولقيت هناك مراته ست عجوزه جدا وقاعده في الضلمة وعرفت ان هي كمان كفيفه
اول ما دخلنا البيت الست عرفت ان في حد مع جوزها وقالت اهلا بالضيوف
الراجل قالها الاستاذ هيشرب معانا الشاي
قامت الست ونورت النور ودخلت المطبخ وعملت الشاي ورجعت
وشربت معاهم الشاي واحنا بنتكلم عنهم وعن انهم عايشين لوحدهم من زمان ومتعايشين مع الحياه

الغريب بقى في كل القصص دي ان كل النماذج اللي انا قابلتها دي وغيرها كتيييير مبيحاولوش يستعينو بعين حد تاني او يطلبو من حد انه يعملهم حاجه
العيله الاولي فضلو يحاولو يفكو التليفون ويغيرو الشريحه من غير ما يطلبو من حد
والشابين التانيين عدو الطريق برضه من غير ما يطلبو من حد
حتى الراجل العجوز مطلبش من حد انه يقوله لما اتوبيسه ييجي لكن كان بس بيسأل اللي واقف جنبه ساعتها وخلاص

مش عارف ليه انا حسيت انهم فقدو الثقه في اللي حواليهم وانهم متأكدين ان محدش حاسس بيهم وعلى عنده استعداد يساعدهم
ولو ساعده مره مش هيكررها تاني
وقررو انهم يعتمدو على نفسهم ويمشو في الحياه بالقدرات اللي ربنا اداهالهم وحرمنا احنا منها

الموسيقار عمار الشريعي قال مره لمنى الشاذلي المذيعه لما سألته عن سر القدرات الكتيره اللي عنده ومش عند ناس كتير بتشوف
قالها ان ربنا بيخلق الانسان وعنده 100% من القدرات الكامنه جواه والمفروض تطلع
الانسان العادي بيعتمد على العين عشان تقوم بعمل 90% من القدرات دي والبالتالي القدرات دي متستخدمش ولا يتطلع من الاساس
لكن الكفيف بيستغني عن 10% من القدرات اللي معتمده على العين وبيطلع بالقي ال 90% من القدرات زي الذاكرة والشم والاحساس والتركيز العالي والقدرة على تمييز الاصوات في الزحمه والدوشه ... الخ

فهمت بعد كده ان مش هما اللي ربنا حرمهم من نعمة البصر
لكن احنا اللي اتحرمنا من القدره على سماع صوت الاخرين وفهم احتياجات الاخرين من غير ميطلبو ورؤيه اللي محتاج مساعده من غير ميطلب

انا اكتشفت اني مبشوفش ومحتاج حد ياخد بايدي عشان اعرف طريقي

غريب

2010-04-14T10:14:00.003+02:00

هنا..من ألف عام أمشي..
ولا أحد يوقفني.. يسألني..
كم ساعتك ؟ من أين أنت؟
أخرج في الصباح..
أمشي بأحلام صغار..
وأسير ألقي السلام على السماء.. وعلى وجوه العابرين..وعلى الرصيف..
ولا أحد يرد السلام
وأعود ان ذاب النهار..
والباب والمفتاح أسمعها تقول..
عاد الغريب..
وأبيت يحضنني الأرق..
وجميع أصحابي.. ورق..
وجميع أفكاري.. قصيدة..
وجميع أحلامي.. فتاه..
لا تحب الشعر والسفر الطويل..
ولا المغيب.
وغداً أموت..
وأسير يحملني الطريق .. وبعض طلاب الثواب..
ويقول سائل .. من؟؟
فيرد صوت من وسط الخليط.. شخص غريب.
هي قصة لم أحكها .. للعقل أو للناس أو حتى الطريق..
لا يفهم الغرباء في هذا الزمان..سوى غريب.

الحب

2010-04-08T14:07:00.006+02:00

قوس وسهم وقلب جريح ...
وفرح وحزن وتعب مريح ...
وعين بكت ولسان يصيح ...
وعد لنجم السماء الفسيح ...
وحب لحب لوجه مليح ...

لأن عيونها أجمل.. (من خواطري القديمة)

2008-10-05T12:18:00.001+02:00

في يوم .. من أجمل أيام الدنيا
إجتمع الناس ..قالو أين القمر..
ذاع الخبر .. ما عاد في الدنيا قمر..
ضحت كثيراً
فسألوني .. وما القصة؟
رويت لهم..
عشقت القمر أعواماً..
بُِِهرتُ بنوره الأخاذ..
وكاد العقل أن يقسم ..
بأن الأرض لا تحوي من الحُسن .. سوى القمر..
وفي يوم ..
قصدت الليل اقضيه اناجي البدر
ومرت ..
كطيف خيالٍ حالمٍ يفيض بسحر..
رأيتها أحببتها
وصرت مفتونا بها
مللت النظر للقمر
فعاتبني .. لماذا الآن تتركني؟
فقلت هناك من أجمل
فقال كذبت
أنا أحلى رموز الحسن في أرض البشر
ضحت كثيرا
وقلت هناك يا قمر .. رموز أحلى منك في عيني
فقال إذاً ارينيها
وإن صدقت رواياتك
فإني يوم مولدها سأختبئ
فقلت عيونها بحر من السحر
قال لي ارينيها
قلت الشعر منسدل كليل العاشق الحر
قال لي ارينيها
لها صوت كعزف الناي
لها صمت يضيئ خطاي
إذا ظهرت .. سيخبو نورك الأخاذ يا قمر
ويأتي الفجر
وجاءت..
كلؤلؤة أطلت من سكون البحر
فبُهِر البدر
وقال ربحت
فما أشرقت يوما على أحد بهذا الحسن
وعيني لم ترى يوما عيونا مثل عينيها
كعين الزهر يبتسم
وقلبا مثل هذا القلب
عليه الحب يرتسم
الآن أبر بالقسم
سياتي يوم مولدها وأختبئ
وأتركها تضئ الكون
لأن عيونها أجمل..

عزيزي العزيز عبد العزيز

2008-09-18T16:01:00.011+02:00

BUZZ!!!

bob:عزيزي العزيز عبد العزيز
bob: ازيك وايه اخبارك
bob: يا ريت لما تقعد على النت ترنلي

BUZZ!!!
BUZZ!!!

bob: زيزو
zizo: بوب
bob: ازيك يا واد
bob:يا ترى عامل ايه في بلاد الانجليز
zizo: مانا قلتلك قبل كده ان اي حته احسن من عندك مش بس بلاد الانجليز
bob: بس برضه مفيش احسن من بلد الواحد
zizo: يا راجل بلد الواحد ايه .. دانتو عايشين زي المعيز
bob: ملكش دعوه احنا مبسوطين هنا
zizo: لا يا حبيبي انت بيتهيألك
zizo: أو بتستعبط.. حاجه من الاتنين
bob: احترم نفسك
bob: يابني على الاقل هنا الواحد وسط اهله واصحابه وكده يعني
zizo: اه .. ووسط الزحمة و القرف وقلة القيمه في كل حته
zizo: ووسط طوابير العيش وطوابير البنزين ال80 وطوابير زحمة العربيات على الكباري
zizo: وطوابير تذاكر المترو وطوابير الناس ورا بعض في الشوارع من الزحمة
bob: يا سلام هو انت مش شايف ف البلد حاجه غير الطوابير يعني
zizo: لأ ازاي وبرضه وسط المجاري الطافحة والعمارات ام شقق 60 متر بالبروزات والمناور وكمان بتقع على الناس
zizo: ووسط الميه المقطوعه ف معظم المدن ووسط الكهرباء المقطوعه ف أغلب القرى ووسط الجبال اللي بتقع على الناس وهي نايمه
bob: بس برضه احنا هنا حاسين بالأمان
zizo: طبعا الأمان وسط الشرطه اللي دايما بتحافظ على كرامة المواطن
zizo: يا راجل ده من كتر ما الناس بتنضرب على قفاها الظباط بقو يصورو نفسهم وهم بيضربو المتهمين في الاقسام على قفاهم
zizo: "دانتو البلد الوحيده الي طلع فيها كتاب اسمه "عشان متنضربش على قفاك
bob: تصدق انت رخم يا عبد العزيز
bob: طب قولي بقى انت ايه اللي مخليك مرتاح عندك
zizo: اولا: لاني بتعامل معاملة تليق ببني ادم
zizo: اللي هي مبيتعاملهاش عندكم غير الوزراء والمسئولين الكبار وأمناء الشرطة بس
bob: ازاي بقى انا بتعامل كويس جدا في أي مصلحة حكوميه بروحها
zizo: ده عشان بتدفع رشوه يا خفيف مش عشان انت محترم
bob: لتاني مره احترم نفسك
zizo: يا عم وانا مالي مش هي دي الحقيقه
zizo: ثانيا : لأن كل حاجه هنا مظبوطه بالثانيه وتقدر بجد تنظم مواعيدك لمدة سبوع أو اكتر من غير ما معاد منهم يبوظ عشان المترو اتعطل مثلا ...ومفيش داعي نجيب سيرة المواكب
bob: بس الإلتزام ده حاجة بترجع للإنسان نفسه اذا كان منظم ولا لأ
zizo: يا راجل دانت مهما كنت منظم وملتزم ونزلت قبل معادك بساعتين حتى ..ممكن جدا يطلعلك الف خازوق يأخروك عن معادك يومين مش ساعتين
zizo: وبعدين دانتو البلد الوحيده اللي لما حد يدي حد معاد فيها يقوله استناني من الساعة واحدة للساعة اتنين لو مجيتش الساعة تلاتة ابقى امشي انت الساعة اربعة
bob: هههههههههههههههههه حلوه
zizo: بتضحك على ايه على خيبتك؟؟
bob: تصدق انت عيل قليل الادب
zizo: يا عم متزعلش قوي كده .. مش هو ده الواقع
bob: الواقع اني خايب
zizo:لأ الواقع انك متحاوط بخيبة الأمل في كل حاجه حواليك
zizo:ده حتى كرم جابر خد على قفاه من اول ماتش في البطولة
bob: انا حاسس انك فرحان فينا
zizo: لأطبعا مش فرحان فيكم ..انا اخلاقي مش زي أخلاق الزملكاويه اللي بيبقو عاوزين الاهلى يتغلب والسلام حتى لو كان بيلاعب اسرائيل
bob: امال ليه حاسس من كلامك انك مش من هنا
bob: وزي ماتكون مشربتش من نيلها ولا جربت تغنيلها
bob:وزي متكون البلد دي مش هي امك
zizo: يا سيدي اذا كان على النيل انا شربت منه لحد ما جتلي حصوه في الكلى من البلاوي اللي في الميه
zizo: اما بالنسبه لأن البلد دي مش هي أمي
zizo: الأم في الاول لازم تدي ابنها وتقف جنبه وتتعب عشانه وتحسسه انها تعبت عشان توقفه على رجليه وبعدين لما يبقى قادر انه يقف على رجليه تبقى تطلب منه ان هو يديها
zizo: الأم بتقدم الأول وبعدين تاخد
zizo:لكن مش معقول تكون امي دي كانت رمياني في الشوارع ومش مدياني حتى لقمة عيش تسد جوعي ولا مكان رجل واحده اقف بيها في الاتوبيس ولا شوية ميه نضيفه اشربها ولا معامله آدميه من اي حد في اي حته ولا امان على نفسي ولا عيالي من اي حد عنده سلطه
zizo:وفي الاخر تقولي متقولش اديتنا ايه وقول هنديلها ايه
zizo: هندليها اللي خدناه منها
zizo: البعد والقسوه والهجر
bob: أفهم من كده انك مبتفكرش ترجع تاني
zizo: ارجع فين
bob: بلدك
zizo: وارجع ليه
bob: ترجع لما السبب اللي انت سافرت عشانه يتحقق
bob: خلاص بقى عملت قرشين كويسين وجبت شقه وعربيه وبقى عنك فلوس تخليك تعمل مشروع يجيبلك دخل كويس
zizo: صحيح ده كان الهدف .. بس مش كده بالضبط
zizo: يعني دي كانت تفاصيل الهدف
zizo: الواحد بيجيب العربيه والشقة والدخل الكويس عشان يعيش مرتاح ومبسوط

zizo:يعني الهدف الأساسي من الحاجات دي هو ن الواحد يعيش مبسوط

zizo: لكن انا لو رجعت دلوقتي وعملت كل الحاجات دي برضه هافضل تعبان ومش مبسوط

bob: ليه بقى ان شاء الله

zizo: بسبب الهرجله والزحمة وعدم النظام وعدم الوعي من الناس

bob:انت هتقلب على الناس كمان

bob:والناس مالها بقى

zizo:الناس متعوده على الهرجلة ومعندهاش استعداد تتعامل بأسلوب فيه شئ من الحضارة

bob:طب مترجع وتعمل اي حاجه عشان تخلى الناس تبقى متحضرة ومش همجيه

bob:يعني .. اي مشروع توعيه يخلي بلدك تتحسن

zizo:موت يا حمار

zizo:حتى لو عملت كده فعلا مش بعيد تلاقي الف واحد بيحاولو يخلو مشروعك يفشل ومش بعيد كمان يلفقولك تهمة توديك ورا الشمس

bob:ليه يا عم

zizo:صدقني في ناس كتيره قوي مستفيده من جهل الشعب وفقره ومرضه وغباءه وايمانه بالخرافات

zizo:ولو حاولت تصلح يبقى بتدخل معاهم حرب انت مش قدها

bob:حتى لو كلامك ده صح..برضه بلدك تستحق انك تحارب عشانها

zizo:بلدي ؟؟

bob:اه بلدك

zizo: سألو جحا بلدك فين
zizo: قالهم اللي فيها كرامتي وراحتي ومستقبلي
zizo: سلام
bob:رايح فين يا عم احنا لسه مخلصناش كلام
zizo: معلش نكمل بعدين بقى عشان عندي معاد
bob:لأ مش موضوع معاد انا حاسس ان في حاجه تانيه
zizo: بصراحة الكلام تعبني
zizo:لأني لسه بحبها قوي
zizo:لكن للأسف مش هاقدر ارمي نفسي ف حضنها تاني
zizo: سلام يا بوب
bob: سلام يا عبد العزيز

bob has signed out
zizo has signed out

لأني أحبك (من خواطري القديمة)

2008-09-10T13:35:00.005+02:00

لأني أحبك .. تعجز عن وصفك الكلمات
لأني أحبك .. أبقى بصمتي حتى الممات
لأني أحبك .. عيني تنام .. ويبقى كلام فؤادي عليكِ ولو في السُبات

لأني أحبك .. يصمت مِني لسان الغزل
لأني أحبك .. تبقين أنتِ لعمري الأمل
لأني أحبك .. عيني تقول .. وصمتي يطول .. ولا تسمعين سوى همسات

أحبك قلبا وعقلا وروحا..
أحبك سكنا وأملا طموحا..
أحبك وطنا من الأمنيات.

زقزوق وظريفة

2008-08-24T23:32:00.007+03:00

كان يا ما مكان
كان في زمان و ف كل زمان
حدوتة بتتكرر وتتعاد في كل مكان
في بيت من البيوت الكبيرة الغنية النضيفة
اتولد حصان صغير اسمه زقزوق
ومهرة صغيرة اسمها ظريفة
الاتنين اتولدو مع بعض
فتحوا عينهم على الحياة لقو بعض
كل دنيتهم كانت لبعض
زقزوق طبعا حب ظريفة
وظريفة برضه حبت زقزوق
الاتنين كانو فرحانين ومبسوطين واخدين الحياه لعب وهزار وحب
وفضل زقزوق وظريفة مع بعض
كانو بيكبرو مع بعض وقوتهم بتزيد مع بعض وحبهم كان بيكبر معاهم
ومرت الأيام جميلة كلها حرية ومتعة
لكن خلاص دلوقتي آن الأوان للشغل
وابتدا زقزوق وظريفة يقفوا جنب بعض ويجروا مع بعض الكرته بتاعة صاحب البيت
كان هما الاتنين شكلهم جميل وهم جنب بعض وبيجروا الكرته بقوه وجمال
وفرحانين انهم برضه مع بعض
وبعد شويه زقزوق وظريفة جابو فرس صغير
فرحو بيه قوي
لكن اكيد برضه كان مسؤليه عليهم
وابتدت ظريفة تهتم شويه بالمولود الجديد وتبعد شويه بمشاعرها عن زقزوق
هي طبعا لسه بتحبه
لكن دلوقتي بقى في حد تاني لازم ياخد جزء كبير من اهتمامها
وكبر زقزوق وظريفة
والكرته بقت عربيه كبيره
وبقوا بدل مكانوا بيمشوا يتمختروا ويجروها بكل خفة وسط الجناين
العربيه الكبيرة بقت تتملي حاجات كتيرة وتقيله
وبقوا يجروا العربية هم الاتنين بصعوبه
لكن مفيش حل تاني
بس برضه كانو مبسوطين ان هم الاتنين مع بعض
رغم الحمل التقيل
ورغم مسئولية الفرس الصغير
ورغم ان الطريق مبقاش جناين وورود
ده بقى كله مطبات وحفر وسدود
ورغم انهم دلوقتي عشان الحمولة بقت تقيله ممكن جدا وهم ماشيين جنب بعض
يدوسو على رجل بعض
او يجرحو بعض بسبب الاحتكاك
بس برضه فضلوا يحبوا بعض
واديهم ماشيين وشايلين حمولهم ولسه مع بعض
يا ترى هيفضول كده جنب بعض على طول؟؟
ولا هيتعبو من بعض وكل واحد فيهم يهرب من التاني
طب ولو فضلو مع بعض
هيفضل كل واحد فيهم يبتسم في وش التاني ويهون عليه جراحه ويساعده ف مشواره
ولا هتبقى العلاقه بينهم مجرد اضطرار لأنهم مربوطين بعربية واحدة ومش قادرين يبعدو عن بعض بسبب القيود مش بسبب الحب؟؟

الحكايه دي موجوده من زمان وهتتكرر ف كل مكان
زقزوق... الحب اللي بيتولد جوه الولد لما يشوف بنت ويحس انها شريكة حياته
وظريفة ...الحب اللي بيتولد جوه البنت لما بتشوف الولد اللي تحس انه هيخاف عليها ويحميها ويكون شريك حياتها
والكرته ...هي المسؤليات الصغيرة في أول الحياة الزوجيه
بيكون الحب لسه قوي والمسئوليات صغيرة والحياه برضه جميلة
الفرس الصغير..هو حب الام والاب للمولود الجديد اللي بيجيلهم ويزود عدد افراد الاسره واحد ويزود مسؤلياتها مسئوليات كتير
و العربية الكبيرة..هي المسؤليات الكبيرة اللي بتزيد يوم ورا يوم على الاب والام اللي كانوا ولد وبنت
اللي برضه وهما ماشيين ممكن يدوسو على رجل بعض لما ينسوا انهم المفروض يراعو بعض
وممكن يجرحو بعض لما يحتكو ببعض وهما بيجرو العربية التقيلة ويتعصبوا على بعض او يزعلو بعض بسبب الضغوط والمشاكل
وينسوا انهم لازم يفضلو فاكرين انهم بيحبوا بعض وان حبهم بس اتغير شويه
مبقاش هو الحب اللي من غير اي مسؤليه.. اللي كان كله بس كلام حب وخروج وهدايا ورومانسية
وبقى حب اكبر واعمق وشايل مسؤليات كتير.. صعب في وجودها انه يكون بنفس الرونق الاصلي
لكن هو اكيد دلوقتي .. اهم .. واعمق .. واقوى
لكن فين بقى اللي يقدر يشوف زقزوق وظريفة الصغيرين ويطلعم من بين العربية والفرس الصغير والحمل الكبير ومطبات الطريق الصعب..؟؟

كرامة

2008-08-22T16:40:00.015+03:00

الكلام لو كان يعبر ع الحنااااااان ... كنت قلت اني بحبك من زمااااااان كل يوم الش .. ببص لروحي فجعه لأتني كبرت فجعه تعبت من المفاجعه ونزلت دمعتي

هلع وازبهلال وكرشة نفس ..
هي دي اعراض الصدمه اللي حصلتلي لما بطاريات ال mp3 player بتاعي فضيت فجعه .. اا قصدي فجأه وانا راكب الميكروباص ورايح الشغل واتنقلت من منتهى الرومانسية لمنتهى الفجعه مع الاغنيه المشهورة قوي لدرجه تجيب انتفاخ.. " قوليلي يا مرايتي"

هو في الحقيقه الاغاني دي ممكن تكون كويسه لكن انا بصراحة لما باسمعها بيجيلي روح معنويه على رأي عادل امام
وقلت هو اليوم باين من أوله .. لأني كنت يا دوب لسه راكب الميكروباص بعد ما وقفت مستنى اي حاجه اركبها لمده 45 دقيقة
طبعا كان في ميكروباصات كتير فاضيه بتعدي لكن دايما تلاقي السواق يا اما عامل فيها عزيز بيه الاليت وراسم دور التناكه ومش عاوز يركب حد من الناس المحترمة اللي واقفة مستنيه تركب عشان تروح شغلها. وبيعوض بكده عقدة نقص عنده احنا منعرفهاش
يا اما عيل صغير كده يعني.. خماشر تمناشر سنه ومعلى صوت الكاسيت على اخره باغاني من عينة الفجعه دي ومركب جنبه بنتين من بتوع المدارس الصناعية وهايص بقى وعمال يبص على الناس وهو فرحان قوي

المهم بعد طول عناء ركبت الحمد لله واضطريت اني اسمع رائعة الفنان العظيم اللي كان نايم حولي 45 سنة ده وصحي من النوم ملقاش في بيته غير المراية اللي قعد يكلمها

نزلت من الميكروباص في موقف الاتوبيسات وطبعا زي العادة ملقيتش فيه اتوبيسات (فينك يا باريس) وبعد شويه كتير كده تسع ست سنين يعني لقيته هالل علينا من بعيد (هو مين ده؟؟) حبيب الملايين.. (مين؟) أمل العمال والفلاحين والموظفين (مين يا رخم؟؟) الاتوبيس المكيف .. وكلنا جرينا عليه .. اللي يشاور واللي يرمي نفسه تحت العجل واللي يتشعبط على الرفرف واخيرا وقف وفتح الابواب وابتدت المعارك حامية الوطيس
واخيرا الحمد لله ركبت وطبعا وقفت في الطرقة الضيقة وابتديت انتظر مرحلة قطع التذاكر
طبعا دي مرحلة مبتجيش كده بالساهل لأن لازم في الاول السواق ينزل يروح الكشك بتاعه في المحطة ..ويثبت ميعاد وصولة.. وياخد ميعاد جديد
وبعدين يروح عند بتاع الشاي.. ويشرب شاي
وبعدين يطلع لنا يبص في وشنا شويه كده ومنعجبوش.. فينزل تاني من الاتوبيس ويروح الحمام..(يارب سهلّه)
واخيرا يطلع بقى ويقطع التذاكر .. والحمد لله كل ده حصل بسلام واتحرك الاتوبيس زي العاده
يمشي 20متر وواحد يشاورله ويقف بعديه بشويه.. ويفتح الباب ويستنى الراجل اللي جاي جري عشان يركب الاتوبيس
..والراجل يركب ..ويقطع التذكرة ويدخل يقف معانا في الطرقة.
وتفضل العملية دي تتكرر لكن مع بعض التغييرات
لأن الاتوبيس بيكون اتملى على الاخر فيبتدي السواق بدل ميفتح الباب اللي قدام يفتح الباب اللي ورا والناس ترمي نفسها جوا الاتوبيس وتيجي تقف معانا ..وجنبينا.. وفوقينا.. وتحتينا.. وكل الاوضاع اللي ممكن تحلموا بيها .

وفجعه (ييييه ) قصدي فجأه تحصل حاجه جامده جدا
الراجل اللي في الكرسي اللي قدامي ينزل من الاتوبيس...(ان ان اااااان) واقعد ..هييييييييه..هييييييييه
يا سلام على الفرحه والسعاده بقى وانا قاعد جوه الاتوبيس وشايف نظرات الحقد والغل في عيون الناس اللي لسه واقفين وكأني سامعهم وهم بيقولو شوف الحظ ..جتنا نيله ف حظنا الهباب .. يا رب الكرسي يولع بيه وهو قاعد ..
لكن انا ولا هاممني منهم وقاعد فرحان قوي ومستكنيص (يعني ايه؟) ولا أعرف
بس واضح ان كان في واحد منهم متوضي وهو بيدعي لأن الفرحه دي قلبت بكابوس لما اكتشفت ان الل قاعد على الكرسي اللى جنبي راجل بسم الله ما شاء الله عليه كده طويييييييل وتخيييييييييين

والدنيا حر.. والراجل عرقان.. وانا بقيت قاعد تقريبا كده تحت باطه.. وعرقه عمال ينزل على القميص بتاعي
بعدت عنه شويه وخرجت بجسمي لبره كده ناحية الطرقه لقيت الراجل اللي واقف جنبي في الطرقه من الحر يا عيني عمال ينهج.. وريحه نفسه...استغفر الله العظيم.. منيله بنيله ..سجاير كيلوباترا من اللي عليها علامة االراجل الميت.. على ريحة بقه الي واضح انه محطش فيه حاجه من ساعة ما صحي.. واحتمال يكون ميعرفش انه المفروض يغسل سنانه اصلا.
الحقيقة انا لقيت نفسي هافقد الوعي تدريجيا
رحت عامل شهم وقمت وقفت وخليت الراجل ده يقعد ويبتدي بقى معركته مع الراجل اللي جنبه ونشوف بقى العرق ولا النفس هو اللي هيغلب

بس بقى وصلت محطة الشغل وطبعا السواق مرضيش يقف فيها ووقف قدام شويه معرفش ليه
ونزلت من الاتوبيس بعد جهاد فظيع مع الركاب اللي واقفين على الباب وخايفين ينزلو عشان ينزلوني لحسن السواق يسيبهم ويمشي زي ما بيحصل ديما
الهم نزلت ودخلت القميص جوه البنطلون تاني .. وسرحت شعري .. مسحت الجزمة اللي اتفرمت.. وطلعت الشغل
وطبعا قعدت استريح من الرحلة دي اللي خدت حوالي ساعتين ونص وابتديت شغلي بعد ساعة تقريبا من وصولي الشغل

وطبعا في الرجوع نفس القصة مع فارق اني باستنى الاتوبيس في شارع صلاح سالم في عز الضهر لحد ما دماغي تسيح وابتدي اهلوس بكلمات غريبة من عينة ..مصر هي مامتي .. لونها لون بيجامتي .. وكده يعني
واللي ينقط بقى ان اهالينا مش عارفين احنا بقينا جيل عصبى ليه؟؟

عشان كده ياجدعان انا نفسي ومنى.. عيني اني أعيش بس لحد ما اشتري عربيه
وطبعا هاسميها.. "كرامه"..

مش انا رحت فرنسا

2008-08-20T18:21:00.009+03:00

يا راجل
اه والله

ازاي
تَبَع الشغل
مممممم
.يا سييييدي ..ها وعملت ايه هناك .. وايه الاخبار. .. وايه اخبار الحريم هناك.. الخ الخ
هو ده بالضبط الحوار اللي بيدور بيني وبين أي حد اقوله الجمله اللي مكتوبه في عنوان البوست
والمفروض ان انا ابتدي احكي ال10 ايام اللي قضيتهم هناك
طبعا الحكايه دي صعبه شويه لأني كنت كل ماجي احكي لازم يطلع تعليق أو إستفسار أو نكته أو عيل صغير يعيط ويبوظ القعدة أهه كلن لازم يحصل أي حاجه تقطع تسلسل الحديث والسلام فكنت باحكي شوية مقتطفات وخلاص
طبعا انتو دلوقتي متوقعين اني المره دي هاكي بالتفصيل
لكن لأني غلس جدا زي مكل اللي بيتعاملو معايا عارفين انا مش هاحكي حاجه
بس مش غلاسه في الحقيقه لكن لأني بصراحه لقيت حد تاني بيحكي عن باريس احسن مني شويه وهاديكم الصفحة للي عاوز يقرا ويعرف عن باريس اكتر
لكن انا في الحقيقة قررت اني اقول شويه حاجات كده بما اني باكتب في (حاجات كتير) هي آرارء على انطباعات على ملاحظات
وكده يعني

1- على الرغم من اني باعرف اتكلم واقرا انجليزي وكل حته في باريس من اول المطار لحد المطار برضه ..(ايه الغباوه دي؟؟) يعني اقصد من أول ما وصلت باريس لحد ما مشيت منها وكل حته فيها لافتات ولوحات وارشادات وحاجات ومحتاجات إلا اني في الحقيقة وبكل فخر كنت عامل في اول يومين زي الاهبل بس من غير "زَي" وغالبا ده راجع لأني مش واخد على النظام الزياده ف كل حاجه وف نفس الوقت مش قادر استعمل النصاحه المصريه وأسأل لأن محدش بيعبر حد. لكن يكفي اقولكم ان أو يوم وصلت مطار شارل ديجول الساعة 3:30 ووصلت البيت في لوكسمبرج الساعة 8:30 و آخر يوم وانا ماشي اتحركت من البيت الساعة 2:30 ووصلت المطار الساعة 3:30 :)
طبعا واضح ان في 4 ساعات فرق هَبَل بسبب الصدمة الحضارية بعيد عنكم.

2- على الرغم من ان مساحة باريس اقل من ربع مساحة القاهرة الكبرى إلا ان فيها 14 خط مترو مش 3 بس وكمان منهم واحد لسه ماتعملش وواحد على وشك انه يتلغي بسبب سوء الإدارة والتالت مش بطال بس لو الفروق بين مواعيد القطارات تقل شويه عشان نقلل من حلات الإغماء اللي بتحصل للناس اللي بينسو يحطو مشبك غسيل على مناخيرهم قبل ما يدخو المتروف يحصلهم صدمة عصبية من ريحة عرق الشعوب اللي في المترو.

3- على الرغم من ارتفاع أسعار كل شئ في باريس والضرائب الكبيرة اللي المواطنين بيدفعوها إلا ان الشعب هناك سعيد ومبسوط وعايش كويس جدا لأن برضه في خدمات كتيييييييييييييييييييييييييره جدا مدعمه دعم كبير وكمان هم عندهم يقين كامل ان كل سنت بيدفعوه في الضرايب بيرجعلهم تاني في صورة خدمات ودعم وعشان كده لما حاول الرئيس الفرنسي ساركوزي انه يقلل الضرائب شويه الشعب عمل مظاهرات احتجاج على تقليل الضرايب عشان هم عارفين كويس ان كل ما يدفعو ضرايب اكتر كل ما الخدمات تزيد اكتر واكتر وده طبعا من غير ما يطلعلهم محمد شومان في التليفزين ويقولهم الضرايب مصلحتك اولا عشان هم كلهم متفوترين مش متظبطين طييييييين .

4-على الرغم من ان الشحاتين في باريس ممكن يكونو بينامو في الشارع ويشحتو اللقمه زي عندنا إلا انهم مبتسمين دايما وده طبعا بالنسبه للشحاتين الشحاتين لكن في نوع تاني انا بصراحه ماقدرش اقول عليه شحاته لأن اللي بيقوم بيه سواء كان فرد لوحده او مجموعة بيقدمو نوع من الموسيقى او الغناء او الرقص في الشارع للناس ومبيطلبوش حاجه من حد لكن الناس بتقدرهم كويس من غير بقى الدعوات اللي من عينة ربنا يكفيك شر الجرب ويخليلك الامورة ام شعر مضروب في الخلاط اللي ماشيه جنبك ولو ماديتهمش يقلب الدعا لجمل تانيه من عينة روح الهى يلعن يحرق يولع الخ الخ الخ.

5-كفايه بقى "على الرغم من " (دانت رخم قوي) في الحقيقة لازم اعترف ان من غير وجود "مدام هالة" المديرة بتاعتي معايا في باريس مكنتش هاعرف او اشوف ربع الحاجات اللي عرفتها او شفتها في باريس..وانا من هذا المزنق باشكرها جزيل الشكر.

6- المواصلات في باريس بكل انواعها (مترو - ترام - RER - اتوبيسات - عَجَل الحكومه)كلها موجوده بكثرة و بتيجي ف مواعيد منظمة للغاية لدرجة ان لما اكون واقف في محطة اتوبيس والشاشة اللي في المحطة تقول ان الاتوبيس التالي هيوصل المحطة بعد 6 دقايق (يا حلولي هو في شاشة على محطة الأتوبيس بتقول الاتوبيس الجاي هيوصل امتى؟؟؟!!!) بلاقي الناس اللي جنبيى زعلانين جدا انه هيتأخر!!!!!! وكمان الناس ممكن تستعمل اي حاجه تاني كوسيلة مواصلات زي (الاسكوتر - الباتيناج - العَجَل الشخصي) ف عشان كده تلاقيني مستغرب قوي هو ليه الناس في باريس بتشتري عربيات؟؟

7- "مدام هالة" مره قالتلي واحنا ماشيين ان الناس هنا بتحب الحكومه بتاعتها وسألتني سؤال عجيب قوي .. "هو انت عمرك حسيت انك بتحب الحكومة بتاعتك"؟!!!!! وفورا رحط ماطط شفتي التحتانيه ورفعت حواجبي ورفضت التعليق على السؤال.

8- لاحظت طول ما انا في باريس ان كل الناس مبتسمه ولا حظت طول ما انا في مصر ان كل الناس راسمين 111 ممزوجه بحالة قرف .

9- أكتر حاجه زعلتني في الموضوع ده اني طول مانا هناك مصر موحشتنيش ..وكنت زعلان قوي وانا راجع بلدي .
واكتشفت اني مبقيتش بحس اغنية "يا حبيبتي يا مصر يا مصر".
بس الحقيقة.. نفسي ارجع زي زمان واحب مصر.

طبعا مش هانسى اسيبلكم عناوين الصفحات الي بتتكلم عن باريس احسن مني
http://babyblue-travels.blogspot.com/2007/08/blog-post_08.html