இனிய ஓவியா

சல்வேடர் டாலி - Part 2

2018-03-17T05:07:00.001-07:00

சல்வேடர் டாலி 84 வயது வரை வாழ்ந்த ஸ்பெயின் ஓவியர். இவரது ஓவியங்கள் இயற்கை காட்சிகளாகவும் அதே சமயம் சர்ரியலிச வகை தொகுப்புகளும் உலக புகழ் பெற்றவை.

விலங்குகள் இயற்கை ஓவியத்தில் தீட்டுவதை இவர் வித்தியாசமாக சர்ரியலிச வகைப் பட்டியலில் சேர்த்தார்.

சிறியவர் முதல் பெரியவர் வரை என்றும் பிரமித்து பார்த்து ரசிக்கும் விலங்கு யானை, இவரது ஓவியங்களில் ஒட்டகசிவிங்கி கால்களுடன் வித்தியாசமாக அணி வகுக்கும்.

ஓவியங்கள் பல இருப்பினும் யானைகள் பவனி வந்த 3 ஓவியங்களை உதாரணம் காட்டலாம் ஓவிய தலைப்புகள்

1. Les Elephants painting

2. Swans Reflecting Elephants

3. Dreams Caused by the Flight of a Bee around a Pomegranate

கிரேக்க மற்றும் எகிப்திய கட்டிட சிறப்புமிக்க நினைவுத்தூண்கள் அதன் உச்சியிலே ஒரு பிரமிட் இதை ஆங்கிலத்தில் அபிலிஸ்க் என்பர்.
முதுகில் இந்த தூண்கள் சுமந்து செல்லும்
குச்சி கால் யானைகள் "டாலியானைகள்" என்றே சிறப்பு பெற்றன. அரசனின் கோலோச்சிய பெருமை பேசும் தூண்கள் அந்த நாட்டின் பெருமை பேசினாலும் அதன் பின்னால் நசுக்கப் பட்ட, வஞ்சிக்கப் பட்ட ஏழை மக்களின் வாழ்வியலும் சேர்ந்தே இருப்பதை பட்ட வர்தனமாக சொல்கின்றன.

அன்னப் பறவையின் நீண்ட நிழல்கள் கஜமுகன்களாக தோற்றமளிக்கின்றன. அழகின் பின்னே மறைந்திருக்கும் கொடூர நிகழ்வுகளோ? பொய்கள் தோரணம் சூட்டி அழகில் மறைந்தாலும்

உண்மைகள் ஒரு நாள் வெளிவந்து எக்கால சிரிப்பு காட்டும் உலக நியதி.
கடைசியாக சொன்ன ஓவியம் டாலி தன் மனைவியை(காலா) கனவில் கண்ட காட்சியாக பிரதிபளிக்கிறது. நிர்வாணமாக இருக்கும் அவளை கொடூர புலிகள் துரத்த அந்த விலங்கினை விழுங்க முயற்சிக்கும்
மாதுளையில் முத்துக்களில் தோன்றிய
சுறாக்கள் பின்னணியில் கடலின் மேல் ஓடிவரும் கால் நீண்ட வெள்ளை யானை.

பெண்,துப்பாக்கி,புலி கீழே மாதுளையை சூழும் வண்டு இவைகள் சொல்லும் கருத்து? பெண் என்பவள் காமபசி புலிகளால் துரத்தப் படுபவள் ஏன்?. பூக்களை தேடி ஓடும் வண்டுகள் கனிகளை தேடி ஓடினால் ? அதிகார வர்கம் செய்யும் அட்டகாசங்களை இவ்வுலகம் பனியில் உறைந்த வெள்ளையானை போல பார்த்துக் கொண்டிருப்பதா ஜன நாயகம் ?

டாலியின் உருகும் கடிகாரங்கள்

2018-02-13T21:09:00.000-08:00

20 ம் நூற்றாண்டின் புகழ் பெற்ற ஓவியர்களில் "சர்ரியலிசம்" என்று சொல்லக்கூடிய கனவின் கற்பனையின் காட்சி வடிவங்களை தமக்கு என்று தனி பாணியில் தீட்டியவர் ஓவியர் "சல்வேடர் டாலி" இவர் ஓவியம் மட்டும் இல்லாது பண்முக தன்மை மிக்கவர். (Sculptor, Filmmaker, Printmaker, and Performance Artist)

இவரின் ஓவியங்களில் ஒன்றை இப்போது பார்போம். தலைப்பு The Persistence of Memory (1931) இதை தமிழில் இப்படிச் சொல்வோம் "ஞாபகத் தடம்" தமது 27 வது வயதில் இதை தீட்டியிருக்கிறார்.
ஒரு ஓவியம் சொல்லும் கருத்து இதுதான் என்பதை ஓவியர் சொன்னாலும் அதற்கு மேலாக பார்வையாளனின் கருத்துக்கள் வேறுபடும் ரசிப்பைப் பொறுத்து.

இந்த ஓவியம் எதை பற்றிப் பேசுகிறது என்று பார்த்தோமானால் கனவை , காலத்தை பற்றி என்று சுருக்கமாகச் சொல்லலாம்.

தியரிஆப் ரிலேட்டிவிட்டி ஐன்ஸ்டீன் கோட்பாடு பிரபலமாக இருந்த கால கட்டம் என்பதால் அதையும் கூட இந்த சித்திரம் செப்புகின்றது.

4 கடிகாரங்களில் ஒன்று முழுதாக தெரிகிறது. அந்த முதலாவது சிகப்பு கடிகாரத்தையும் எறும்புகள் மொய்க்கின்றன. எந் நேரமுமும்
சுறு சுறுப்பாக ஓடும் எறும்புகள் நேரத்தை தடுத்து நிறுத்திட இயலுமா?

நேரத்தை எதை வைத்து அளவீடு செய்கிறோம் ? எல்லாம் மாயை கற்பனை சரியான நேரம் என்ற ஒன்று உண்டா?

மற்ற 3 கடிகாரங்களும் சாக்லேட்டுகளை போல உருகி கிடக்கின்றன. பாலை வனத்தில் எல்லாம் உருகி உருக்குலைந்து போய் விட்டனவா?

ஒன்று வெட்டுப்பட்ட காய்ந்த மரத்தின் கிளையில் துணி காய்வது போல கிடக்கு.

இன்னொன்று தூங்கும் டாலியின் மேல் உருகிக் கிடக்கிறது.
அவர் கனவில் இருக்கிறார். கனவில் காணும் காட்சிகளுக்கு ஏது காலம்? விழித்துப் பார்த்தால் இது வேறு உலகம் வேறு காலம்.

அந்த கால கட்டத்தில் கை கடிகாரம் என்பதை காந்தி இடுப்பில் இணைத்திருந்த கடிகாரத்தோடு ஞாபகப் படுத்திக் கொள்ளலாம்.

கை கடிகாரம் என்பதே எளியவனுக்கு எட்டாக் கனி. பணம் படைத்தவர்களின் அந்தஸ்து சின்னமாக இருந்திருக்கிறது என்பதையும் இந்த ஓவியம் பேசு கிறது.

"#டாலியின்_உருகும்_கடிகாரங்கள்"

இந்திய ஓவியர்களின் ஓவியங்கள்

2014-07-29T05:00:00.000-07:00

இந்த பதிவில் நான் ரசித்த இந்தியர்களின் ஓவியங்களை உங்களோடு பகிர்ந்து கொள்கிறேன்.

இந்த ஓவியங்கள் ஒவ்வொன்றும் ஒவ்வோர் ரசனையோடு இருக்கின்றன. நவீன ஓவிய கைவண்ணம் இந்த ஓவியங்களில் புதினமாக மிளிர்கிறது.

மேல் ஓவியங்கள் : திலிப் செளத்ரி

ஓவியம் : புவா ஷெதே

ஓவியம் : அமோல் பவார்

ஓவியம் : தினகர் ஜாதவ்

ஓவியம் : கணேஷ் பான்டா

ஓவியம் :கோபால் செளத்ரி

ஓவியம் : ஜெகநாத் பால்

ஓவியம் : ஜிபான் பிஸ்வாஷ்

ரஷ்ய ஓவியர் விளாடிமிர் குஷெவ்

2014-06-28T04:24:00.001-07:00

ரஷ்ய ஓவியர் விளாடிமிர் குஷெவ் 1957 ல் பிறந்தவர். ரஷ்யன் ஓவியர்களின் கூட்டமைப்பில் இவர் ஒரு உறுப்பினர்.

1996 முதல் இவரது ஓவியங்கள் கண்காட்சியில் வைத்து வருகிறார்.

இவரது ஓவியங்கள் உலக அளவில் (ரஷ்யா பிரான்ஸ், பிரிட்டன், யுனைட்டேட் ஸ்டேட்ஸ்) பல்வேறு ஓவிய கண்காட்சிகளில் காட்சிப் படுத்தப்பட்டு விற்பனையாகி உள்ளன.

மனதைக் கவரும் விளாடிமிர் ஓவியங்கள்

2014-05-15T05:32:00.003-07:00

விளாடிமிர் வோல்கா ,ரஷ்யாவில் பிறந்தவர். இளம் பிராயத்தில் இருந்தே ( 3 வயசு) வரைந்து கொண்டிருக்கிறார். சோவியத் யூனியனின் பாலிகிராபிக் இன்ஸ்டிடியூட்டில் தமது படிப்பை தொடர்ந்தார். உலக அளவில் பல ஓவியப் போட்டிகளில் பங்கெடுத்து பரிசுகள் வாங்கி குவித்திருக்கிறார். போஸ்டர் ஆர்ட் எனும் ஓவிய வகைப் பட்டியலில் இவர் கைதேர்ந்தவர். ஓவியங்களை பாலட் நைப் மற்றும் தூரிகை கொண்டு தீட்டுகிறார். "பாலட் நைப் உபயோகிப்பவர்கள் தூரிகை உபயோகத்தை குறைத்துக் கொண்டிருப்பர். 1988 ல் இருந்து கமர்சியல் ஆர்டிஸ்டாக பரிமளிக்கின்றார். இவரது பல ஓவியங்களும் சி.டி மற்றும் புத்தகங்கள் மற்றும் கேலண்டர் போன்றவற்றில் பிரிண்ட் வடிவில் கண்ணைக் கவர்கின்றன.

1990 களீல் இவர் ஐரோப்பா சுற்றுப்பயணத்தின் போது ரோட்டோரமாக பல ஓவியங்களை வரைந்து அப்படி விற்று சென்று இருக்கிறார்.

அமெரிக்க பிரபல பப்ளிகேசன்களுக்கு ஓவிய பங்களிப்பு தொடர்கிறது.
இயற்கையோடு இயைந்த உருவ ஓவியங்கள் மனதை கவர்கின்றன.

ஒவ்வொரு ஓவியங்களிலும் ஒளி அமைப்பு பின்புலம் பளிச்சென நம் மனதில் பதிகின்றன.

"ஓவியர் விளாடிமிர்"

மா கலைஞன் மைகேலேஞ்சலோ

2014-02-04T22:34:00.000-08:00

மறுமலர்ச்சி காலத்தின் மிகச்சிறந்த கலைஞர் மைகேலேஞ்சலோ (Michelangelo
Buonarroti). சிற்பக்கலை, ஓவியர், கட்டிடக் கலை நிபுநர், கவிஞர், இப்படி பல பரிமாணங்கள் கொண்ட சகலகலா வல்லவராக திகழ்ந்தார். இவரைப் போல எந்த ஓவிய கலைஞனும் நிர்வாண ஓவியங்களை தத்ரூபமாக (perfection) வரைந்ததில்லை எனச் சொல்லுவார்கள்.

அரீஜோ வில் (டஸ்கெனி ,உயர் குடியில் பிறந்தவர். டொமினிகோ கிர்லேண்டையோ (Domenico Ghirlandaio ) எனும் ஓவியரிடம் தற்காலிக பணியாளராக சேர்ந்து கற்றுகொண்டார். பின் லோரென் ஜோ டி மெடிசி,இவரிடன் ஓவிய கலை நுணுக்கங்களை கற்றுத்தேர்ந்தார். ஆசானின் மறைவுக்குப் பின் ரோமுக்கு பயணமானார்.

அங்குதான் "sorrowful Pietà," எனும் மார்பிள் சிற்பங்களைப் படைத்தார். இந்த சிற்பம் கன்னி மரியாள் இறப்புக்குப் பின் யேசுவை மடியில் கிடத்தி இருப்பது போன்ற சிற்பம். "டேவி" நிர்வாண சிலை மாஸ்டர் பீஸ், இது ப்ளோரன்ஸ் தேசத்தில் உள்ளது (1504).

அதற்கு அடுத்த வருடத்தில் போப் இரண்டாம் ஜூலியஸ் இவருக்கு பாபல் (papal tomb) தேவாலயத்தில் பெரிய சிற்ப வேலையை கொடுத்தார் ஆனால் அது முழுமை அடைய வில்லை என்று சொல்லுகிறார்கள். இதற்கிடையில் சிஸ்டைன் சாபல் கூறை ஓவியங்களை வரைகிறார். தயக்கம் காட்டிய அவரை ஜூலியஸ் தான் அந்த பணியை முடிக்க வேண்டும் என அன்பு கட்டளை இடுகிறார். அப்போது அவருக்கு வயது 37 . இதை பற்றி ஒன்று கேள்விப்பட்டது ஜீலியஸிடம் வரைய ஒப்புக்கொண்ட மைகேலேஞ்சலோ தான் சொல்லும் வரை யாரும் அதில் நுழைந்து ஓவியங்களை பார்க்க கூடாது என்று கராராக சொல்லி வேலையை துவங்குகிறார்.

ஆறுமாதமாகியும் அவர் என்ன செய்து கொண்டிருக்கிறார் என்ற பேராவல் ஏற்படுகிறது ஜூலியஸிற்கு, அவர் இல்லை என நினைத்து உள்ளே செல்ல எதிர்பாராமல் இதை மைகேலேஞ்சலோ பார்த்துவிட்டு கோபத்துடன் கூரையில் வரைந்த ஓவியங்களின் மேல் பெயின்டை ஊற்றி விட்டார். பின் நீண்ட சமாதானத்தின் பின் அந்த அருமையான உலகப் புகழ்பெற்ற ஓவியங்களை திரும்ப படைத்தார்.

"தி லாஸ்ட் ஜட்ஜ்மென்ட் " கட்டிடக் கூறையின் மேல் அமைத்த இன்னொரு ஓவியம் போப் மூன்றாம் பாலின் வேண்டுதலுக்கு வரைந்து கொடுத்தார். கட்டிட மேற்கூரையில் ஓவியம் வரைவது என்பது எத்தகைய கடினமான பணி. நான்கு ஆண்டுகளிலே 300 கும் மேற்பட்ட ஓவியங்களை தீட்டினார்.
1546 ல் ரோமில் உள்ள செயின் பீட்டர் கதீட்ரல் இவரின் கட்டிடக் கலை சிறப்பிற்கு சான்று பகர்கிறது.

இறுதி காலங்களில் இவர் கட்டிடக் கலையில் அதிகம் ஈடுபட்டார். ரோமில் இவர் மறைந்தார்.

மைகேலேஞ்சலோ

Michelangelo [1475 - 1564]

நடிகர் சிவகுமாரின் ஓவிய அனுபவம்

2014-01-10T20:59:00.001-08:00

ஓவிய கலைஞன் தான் கண்ட காட்சியை ஓவியமாக்கும் போது அவன் கைக்கொள்ள வேண்டிய விசயங்கள் என்ன? குறிப்பாக மனித உருவங்களை வரையும் போது கவனிக்க வேண்டிய விசயங்கள் என்ன?

ஒன்னும் பெரிய விசயம் கிடையாது போட்டாகிராபிக் கண்ணு நமக்கு வேணும் பார்த்தவுனடே நாம என்ன பார்கிறமோ அத மனசில பதிஞ்சிருக்க வேனும், பதிவானது அப்படியே மேல போயி அப்படியே சுத்திட்டு இருக்கும் (தலையை தொட்டு காட்டுகிறார்) உதாரணமா இந்தியாவில 127 கோடி பேரு இருக்காங்கன்னு சொல்றோம் அத்தன பேரோட முகத்த போட்டோ எடுத்து இந்த ஹால்ல இருந்து ஏர்போர்ட் வரை மொத்தமா ஒட்டிவெச்சு பார்த்தோம்னா... எல்லாத்திலேயும் ரெண்டு கண்ணு, மூக்கு, இரண்டு காது இருக்கும்.. இந்த முகங்கள்ள எந்த ஒரு பேஸ் கூட ஒரே மாதிரி இருக்காது.

புருவங்கள்,மூக்கு தூவாரங்கள் இதில எதுவுமே ஒன்னுபோல இருக்காது. இது தான் இயற்கையோட அற்புதம் இறைவனோட படைப்பு. அதுமட்டும் இல்ல ட்வின்சுன்னு சொல்றோம். ராமன் லச்சுமன்னு பேர் வைப்போம் தனியா பார்த்தா யார் ராமன் யாரு லட்சுமன்னு குழப்பமா இருக்கும். ரெண்டு பேரையும் நேரா நிக்க வைச்சு பார்த்தம்னா. இரண்டு பேர்த்துல சின்ன டிபரண்ட் இருக்கும், கலர் வித்தியாசம் இருக்கும், ஒருத்தன் ப்ரைட்டா இருப்பான் ஒருத்தன் டார்க்கா இருப்பான். முடில வித்யாசம் இருக்கும், ஹைட்ல சின்ன வேரியேசன் இருக்கும். புருவ முடில சின்ன சேஞ்சஸ் இருக்கும்,பேசும் போது தொண்டை சவுண்ட்ல வித்யாசம் இருக்கும். அதுக்கே நீங்க போகாதீங்க...ஸ்டெயிர்ட்டா எடுத்த உங்க போட்டோவுலயே பாஸ்போர்ட்லேர்ந்து 12 x 10 பெரிசா எடுத்துக்கிட்டு நெற்றியில் இருந்து ஒரு நேர் கோடு போட்ட மாதிரி கட் பன்னி எடுத்து வெச்சு பார்த்தம்னா ..சூரியாவுக்கு கூட வலது கன்னு பெரிசா இடது கண்ணு சின்னதா தெரியும், அதேமாதிரி ரஜினிக்கு; மூக்கு தூவாங்கள், உதடுகள் இப்படி பகுதிக்கு பகுதியே வித்தியாசம் இருக்கும்.

எம்ஜியார்,சிவாஜிக்கு வலது தாடை பெருசா இருக்கும் (யாராவது கவனிச்சிருக்கீங்களா), எந்த தாடையை அதிகமா பயன் படுதரமோ அது வலிமை மிகுந்து பெரிசாயிரும். நூத்தில 85 பேருக்கு இப்படித்தான் இருக்கும். ஜெயலலிதா, நாகேஷ், நான் மூனுபேருக்கும் இடது தாடை பெரிசா தெரியும். இந்த மாதிரி உலகத்திலேயே சின்ன வயசிலேயே மோசமான தோற்றம் உடையவங்க இரண்டுபேரு ஒருத்தர் மஹாத்மா காந்தி இன்னொருத்தர் லிங்கன் சந்தேகம் இருந்தா ஜீவா கிட்ட கேட்டு பாருங்க (ஓவியர் ஜீவா) காது எலி காது மாதிரி பெரிசா இருக்கும், நெஞ்சு குறுகலா இருக்கும் (கிண்டல் பன்றதா எடுத்துக்காதீங்க... பெயின் டரா சொல்றேன்) ரெண்டு கன்ன எழும்பும் துருத்திட்டு இருக்கும் அப்படியான முகம் வாழ்க்கையில் மேம் படும் போது அவங்க முகம் அழகாகிடுது. நான் வரைஞ்ச காந்தி போர்ட்ரேய்ட் பாருங்க தெரியும்.

லிங்கன் போர்ட்ராய்ட் பார்த்தீங்கன்னா தெரியும் கன்னம் எல்லாம் ஒடிங்கிப் போய் இருக்கும் தாடி வெச்சு இருப்பாரு, கண்ணு உள்ள போன கண்ணு நீண்ட கைகள்...

அழகான முகம்னா நேரு, இந்திரா காந்தி தீட்சயமான கண்கள், நீளமான மூக்கு, நேரா போட்டோ எடுத்தா மூக்கின் தூவாரம் தெரிய கூடாது இரண்டு கண்களும் ஒரே அளவாக,இடைவெளி (டிவைடர் வெச்சு மெஸர் பன்னீங்கன்னா) சமமா இருக்கனும், நெற்றி,மூக்கு, உதடு தாடை இவைகளுக்கு இடையேயான இடைவெளி சரிசமமா இருந்தா அந்த முகம் அழகானதா தெரியும். இதுதான் சாமுத்ரிகா லட்சனம். கோவில் சிலைகள் இதன் அடிப்படையில் கண்டிப்பா இருக்கும், இந்த அளவுகள் கரெக்டா இருக்கனும். காது புறப்பட வேண்டிய இடம் கண்ணுலிருந்து நேரா கோடு போட்டீங்கன்ன கொஞ்சம் மேலிருந்து காதுமடல் ஆரம்பிக்கும். அதுக்கு மேல வரஞ்சீங்கன்ன அது மொராஜி தேசாய் காது( பெரிசா இருக்கும்). அதே மாதிரி பக்கவாட்டு பகுதியில் இருந்து பார்க்கும் போது, மேல் உதடு கொஞ்சம் வெளியேயும் கீழ் உதடு கொஞ்சம் உள்ளேயும் இருக்கனும், உள்டாவும் இருக்கும், சந்தரகலான்னு ஒரு நடிகை இருந்தாங்க அவங்களுக்கு மேல் உதடு சின்னதாகவும் கீழ் உதடு பெரிசாகவும் இருக்கும், இது இயற்கையோடு படைப்பு. ஹூயூமன் பாடில..உடம்புடைய அளவு பார்த்தீங்கன்னா, பத்மினி, வைஜெயந்திமாலா இருவரும் அழகானவங்க ஆனா சிலைபோன்ற அழகு உடையவங்க வைஜெயந்திமாலா. ஒரே உயரம் உடைய கணவன் மனைவி ரெண்டு பேர்ல தனியா பார்த்தா அம்மா கொஞ்சம் உயரமா இருப்பாங்க போலிருக்கேம்பாங்க இதுக்கு காரணம் உடை. ஆண்களுக்கு முதுகெலும்பு நீளம் ஜாஸ்தி, பெண்களுக்கு குறைவு, சிம்பிள் தியரி யாருக்கு கால் நீளமா இருக்கோ அவங்க உயரமா தெரிவாங்க. இந்த மாதிரி உருவ அமைப்பை ஸ்டடிபன்னிதான் வரையனும்.

இயற்கை காட்சிகளை வரையும் போது கவனிக்க வேண்டிய விசயங்கள் என்ன?

கொடைக்கானல் போரீங்க எந்த பகுதியை வரையனும் தெரியாது.. அப்படியே பார்த்துட்டு போனீங்கன்னா குறிப்பிட்ட பகுதி அழகா இருக்கும் வரையலாம்னு உங்களுக்கே ஐடியா கிடைக்கும். அடிப்படை விசயம் என்னன்னா நாலு முனைப் பகுதில எந்த பகுதியும் சொட்டையா இருக்க கூடாது. காட்சியோட அமைப்பு உங்க மனசுல பதிஞ்சு வெச்சுகனும். திருவண்ணாமலை கோயில வரையப் போயிருந்தப்ப ஒரு வீட்ல பர்மிசன் வாங்கி வரைய ஆரம்பிச்சேன். வரைய ஆரம்பிச்ச உடனே மேகங்கள வரைந்தேன் ஏன்னா மேகம் 3 நிமிசத்தில மறைஞ்சி போயிரும்... அதுக்கப்புரம் கோவில் மலைகள வரைஞ்சேன். இதுமாதிரி ஸ்பாட்ல முடிவெடுக்க வேண்டிய விசயங்கள் இருக்கும். அதே மாதிரி தஞ்சாவூர் கோவில் வரைந்தப்ப காலை 6 மணிக்கு ஆரம்பிச்சு மத்தியானம் 2.30 மணிவரைக்கும் சிங்கில் சிட்டிங்ல 8 மணிநேரம் வரைஞ்சேன். காலைல ஆறரைமணி..ஏழு..ஏழரைமணில சூரிய உதிச்சு கோயில் மேல அடிக்கும் உச்சி நேரத்துக்கப்புரம் ஷேடோ விழ ஆரம்பிச்சுடும்

மூனுமணிங்கும் போது கருப்பா விழ ஆரம்பிச்சுடும்...அதுக்கப்புரம் வரையறது கஷ்டம். 6 மணிக்கு வரையும் போதே பேசிக்கல் லைட் அண்ட் ஷேடிங் வரைஞ்சிடனும்..மத்த டீட்டெய்ல்கள அப்புரம் வரையலாம்.

மதுரை மீனாட்சி அம்மன் கோயிலையும் இதுபோல வே வரைஞ்சேன். 10 மணிநேரம் ஆச்சு. திருப்பதி கோயில் வரையும் போது பாதில மழை வந்திடுச்சு. ஷேடிங் ஞாபகம் வெச்சு வரைய வேண்டியதாப் போச்சு. இந்த மாதிரி லேண்ட் ஸ்கேப் வரையும் போது சிக்கல்கள் இருக்கு.

ஓவியர் நடிகரான போது சந்தித்த சங்கடங்கள் என்னென்ன?

அவற்றை எவ்வாறு எதிர் கொண்டீர்கள்.

ஓவியர் வாழ்நாள் பூரா பேச வேண்டியதில்ல கை பேசுதில்ல. நடிகனுக்கு வேற வழி இல்ல பேசியே ஆகனும். 1950 - 60 கள்ள சினிமாவில் நல்ல தமிழ் இருந்தது அதை மறுக்க முடியாது. 45 பைசா குடுத்தாலே படம் பார்க்க முடிந்தது, நடிகனுக்கு அடிப்படை விசயம் உச்சரிப்பு, மேடை பயம் இருக்கக் கூடாது, நினைவாற்றல் இருக்கனும். சிவாஜி எம்ஜி ஆர் நாடகங்கள்ல நடிச்சு வந்தவங்க அவங்களோட நடிக்கனும்னா நாடகத்தில நடிச்சு பயிற்சியும் அவசியமா இருந்தது. 7 ஆண்டுகள் நாடகத்தில் நடித்தேன். கந்தனென்பார், கடம்பனென்பார்,கார்திகேயனென்பார்,குகனென்பார்,சண்முகனென்பார் உம்மையும் படைத்தபின் சூரனையும் வதைத்த திண் தோள்கலெங்கே...ன்னு வசனம் பேசும் போது வீட்டுக்கே ஓடிப் போயரலாமான்னு தோனும். (கட்டபொம்மன் முழுநீள வசனம் பேசி காட்டுகிறார்...கிஸ்தி திறை வரி வட்டி வேடிக்கை வானம் பொழிகிறது பூமி விழைகிறது,... யாரிடம் கேட்கிறாய் வரி மானம் கெட்டவனே... ) நல்ல புள்ளயா இருந்தாலும், கெட்ட புள்ளயா இருந்தாலும் பொட்ட புள்ளய பார்க்கக்கூடாது என்கிற கண்டிசன்லயே சினிமாவுக்கு வந்தேன்.

"கடந்த சனி (4.1.2014) அன்று கோவை கஸ்தூரி சீனிவாசன் அற நிலையத்தின் வெள்ளிவிழா" நிகழ்ச்சியில் நடிகர் சிவகுமார் அவர்கள் பேச்சில் இருந்து தொகுக்கப் பட்டது
#நடிகர்சிவகுமார்_அனுபவம்_பகுதி 1

நன்றி , கலாகுமரன்

கனவு ஓவியர் டான் வோய்னா

2013-12-28T01:37:00.000-08:00

ரூமேனியாவை சேர்ந்த ஓவியர் டான் வோய்னா DAN VOINEA
இவர் வரையும் ஓவியங்கள் madness and fantasy என்ற வடிவங்களின் கீழ் வருகிறது. கனவுலகில் சஞ்சரிகாதவர்கள் யாருமில்லை என சொல்லலாம். ஏதேனும் ஒரு சந்தர்பங்களில் நாம் அந்த உலகிற்குள் செல்கிறோம். இதை தனது ஓவியங்களின் மூலம் வெளிப்படுத்துகிறார். தற்போது இவர் பெர்லினில் வசித்து வருகிறார் (Berlin, Germany)

DAN VOINEA (b. 1970, Brasov, Romania)

(Oil on linen )

"உன் நினைவுகளை சுமந்து நான் எப்போதும்...."

"அவளின் அன்பின் பின்னே நான் எப்போதும்.."

"உன் நினைவுகளில் என் முகமே எனக்கு மறந்து போய்விட்டது"

கனவுகளில் என் தேடல்...

என் நினைவுகளை சிதறடித்து

வலைவீசி காத்திருக்கிறேன்...

அவனுக்காக ...

"ஓவியர் "

பெயர் தெரியா ஓவியர்களின் ஓவியங்கள்!

2013-12-19T05:11:00.001-08:00

இப்பதிவில் சில ஓவியங்கள் உங்கள் பார்வைக்கு... இந்த ஓவியங்களை தீட்டியவர்கள் யார் யார் என தெரியவில்லை. மேற்குலக ஓவியமா, ஆசிய ஓவியமா, அரேபிய ஓவியமா? . எப்படி இருப்பினும் ஒவ்வொரு ஓவியமும் நம்மோடு கதை பேசுகிறது. அந்த கால கட்டத்திற்கு நம்மை இழுத்து செல்கிறது. ஓவியங்களுக்கு அவர்கள் செலவிட்ட மணித்துளிகளும் சிரத்தையும் இன்று பார்க்கும் போதும் நம்மை அசர வைக்கிறது.

நன்றி

கலாகுமரன்

நிழல்கள்...

2013-10-25T05:35:00.000-07:00

சில புதிய ஓவியங்களை இந்த பதிவில் பகிர்கிறேன்.

மேலே உள்ளது பெல்காமை சேர்ந்த ஓவியர் ஷிரிஸ் தேஷ்பாண்டேவின் ஓவியம் இந்த ஓவியத்தில் டெல்லியின் பழைய தெரு வரையப்பட்டு உள்ளது இதில் வெயில் மற்றும் நிழல் அருமையாக காட்டப் பட்டுள்ளது. ( சைக்கிள் , சைக்கிள் ரிக்ஸா, மின் கம்பி).

கீழே உள்ளது அவரின் இன்னொரு ஓவியம்

சீன ஓவியர் ஷீ தோ வின் ஓவியம் மேலே உள்ளது. இது வாட்டர் கலரில் வரையப் பட்டது. வயதின் சுருக்கங்கள் , தலை மீது இருக்கும் மூங்கில் தொப்பியில் இருந்து விழும் நிழல் தத்ரூபமாக இருக்கிறது. ஓவியரை பற்றிய குறிப்புகள் தெரியவில்லை.

இது பிரேஸில் ஓவியர் அந்தேரி மராணி வரைந்த ஓவியம். இதற்கு " காஃபியின் வாழ்க்கை " என தலைப்பு கொடுக்கப்பட்டிருக்கிறது. வயதான பெண்மணி காபி தோட்டத்தில் வேலை செய்கிறார். இது அவரின் வாழ்க்கையும் ஆகும் என்பதே இதன் பொருள். காகிதத்தில் பென்சிலால் வரையப்பட்ட இந்த ஓவியம் ஒரு புகைப்படம் போல தெரிகிறது ஓவியரின் உழைப்பு இதில் தெரிகிறது. இது உங்களையும் கவரும் என நினைக்கிறேன்.

அதே போல கருப்பு வெள்ளையின் அழகை வெளிப்படுத்தும் ஓவியம் இது. தாரகையின் கண்கள் பார்பவரை நிச்சயம் கவரக் கூடியது.

ஓவியரை பற்றிய விவரங்கள் தெரியவில்லை. தூரிகையின் வீச்சை நான் சொல்ல வேண்டிய அவசியமே இல்லை. நாட்டிய மங்கையின் நளினம் நம் மனதை கவர்கிறது.

artist Sir John Everett Millais 1829-1896

ஓவியர் சர் ஜான் எவரெட் மெலே, அருமையான இவரின் ஓவியங்கள் கிடைத்தால் தகவல்களுடன் பகிர்கிறேன்.

இந்திய கார்ட்டூன் மேதை ஆர்.கே.எல்

2013-10-24T21:45:00.002-07:00

ஆர்.கே.லக்ஷ்மன் எனும் கார்ட்டூன் மேதையின் பிறந்தநாள் (24 அக்டோபர் ). இவரின் சகோதரர் தான் பிரபல எழுத்தாளர் ஆர்.கே.நாராயன். முதலில் 'தி ஹிந்து'வில் வரைந்த இவர் பின் 'டைம்ஸ் ஆப் இந்தியா'வில் அறுபதாண்டு காலமாக 'யூ செட் இட்' (You Said it ) என்கிற தலைப்பில் காமன்மேன் (Common Man) என்கிற கதாபாத்திரத்தின் மூலம் இவர் அடித்த எள்ளல்கள் அபாரம்.

'டைம்ஸ் ஆஃப் இந்தியா'வின் ஒன்றரை நூற்றாண்டு முடிவடைந்த விழாவில் ஒரு அஞ்சல் தலையே அந்த 'காமன்மேன்' நினைவாக வெளியிடப்பட்டது. ஆர்.கே. நாராயனின் 'மால்குடி நாட்கள்'தொலைக்காட்சி தொடருக்கு இவரே ஓவியம் வரைந்தார்.

எளிய ஆனால் ஆழ்ந்த சமூகப்பார்வைக்கு நல்ல எடுத்துகாட்டு இவரின் கார்டூன்கள். ஆசியன் பெய்ன்ட்ஸ் நிறுவனத்தின் முத்திரையும் இவர் வரைந்ததே! இவரை ஒட்டி ஒரு நகைச்சுவை தொடரே ஹிந்தியில் வந்தது .

இவரின் கார்ட்டூன்கள் நூல்களாக வந்து நல்ல விற்பனை ஆயின. தற்பொழுது தொன்னூறு வயதை தாண்டி விட்ட அவர் சில வருடங்களுக்கு முன் ஸ்ட்ரோக் வந்து சீர்பெற்று அவ்வளவாக பேச முடியாமல் அமைதியாக இருக்கிறார்.

அவரின் தூரிகை தெளித்த வெளிச்சத்தில் எத்தனையோ பேர் இப்பொழுது மின்னுகிறார்கள். இப்பொழுதும் அவர் உருவாக்கிய ’காமன்மேன்‘ சிலை நிற்கிறது மும்பையில்.

அவரின் தைரியம் பலரால் சுவீகரிக்க பட்டு இருக்கிறது.அதுதானே வெற்றி !

நன்றி : தி ஹிந்து

நவீன ஓவியங்கள்

2013-10-19T02:06:00.000-07:00

இந்த பதிவில் நீங்கள் காணும் ஓவியங்கள் பல்வேறு பகுதியை சேர்ந்தவ ஓவியர்கள் வரைந்தது. ஜெர்மனி, ஆப்ரிக்கா, லாஸ் ஏஞ்சல்ஸ், எகிப்து,ஸ்பெயின்.. இப்படி. தூரிகையின் வீச்சு ஒவ்வொன்றும் ஒவ்வொரு புரிதலை நமக்குள் ஏற்படுத்துகிறது.

ஒரு பீடத்தில் முதியவரும் ஒரு பீடத்தில் குழந்தையும்
ஒரு மனிதனின் வாழ்க்கையை வெளிப்படுத்துவதாக வரையப்பட்டது. மனித வாழ்க்கை நீண்டது ஆனால் வேகமாக செல்கிறது. முதியவரின் எண்ணப் பிரதி பளிப்பாக இந்த ஓவியம்.

Drawing where I want to represent the 'Man' reflecting on his own life, "" life is long .. but it goes so fast "," two figures comprise an elderly man sitting in a 'humble pedestal' and at the bottom left a child with their first days of life on another pedestal .. man looks at him and thinks ....... muerta (spain)

இது ஒரு சுவர் ஓவியம், ஓவியர் ஹோஸ்னி, எகிப்து.

மேலே உள்ள புதுமைப்பெண் மரப்பலகையில் தீட்டப்பெற்றது. பெண் ஓவியர் மார்ஸி ஈபென்.

அவரின் இன்னொரு ஓவியம் கீழே

கொக்குகளின் நாட்டியம்

மெட்டாமோர்பிக் ஓவியர் ஓகம்போ

2013-08-17T05:42:00.002-07:00

Octavio Ocampo

அக்டோவியோ ஓகம்போ, ஷெலயா { குவானவாடோ (மெக்ஸிகோ)[ Celaya, Guanajuato ] } என்ற ஊரில் பிறந்தவர் (1943).

இவர் மெக்ஸிகோ நுண்கலை கல்வி நிறுவனத்திலும் பின் சான்ப்ரான்ஸிஸ்கோ கலை கல்லூரியிலும் பயின்றவர். 1972 முதல் இவரின் ஓவியங்களை காட்சிப் படுத்தி வருகிறார்.

ஏராளமான மெக்ஸிகன் மற்றும் அமெரிக்க படங்களுக்கு பின்புல இயற்கை காட்சிகளை யும், அதே போல பல நாடகங்களுக்கும் டிசைன்களை வரைந்து கொடுத்து இருக்கிறார்.

இவர் ஒரு நடிகராகவும், நடனம் ஆடுபவராகவும் அறியப்படுகிறார், 1976க்கு பின் முழுக்க முழுக்க தமது கவனத்தை ஓவியத்திலும், சிற்பக்கலையிலும் செலுத்தினார்.

இவர் பாணியில் வரைந்திருந்த அமெரிக்க ஜனாதிபதி ஜிம்மி கார்டரின் உருவ ஓவியத்தை மெக்ஸிகோ அரசாங்கத்தின் சார்பாக அவருக்கு பரிசளிக்கப்பட்டது.

இவரது ஓவியங்கள் மெட்டாமோர்பிக் (உருமாற்றம் சார்ந்த வகை) என வகைப்படுத்தப் படுகிறது. இந்த வகையில் வரையப்பட்ட ஓவியத்தின் முதல் பார்வையில் ஒரு ஓவியமாகவும் கூர்ந்து கவனிக்கும் போது அது பல்வகை உருவங்கள்,படங்களை,பிரதிபிம்பங்களை ஒருங்கிணைத்து வரையப்பட்டது என புலப்படும்.

மொத்ததில் ஒரு ஓவியம் என்பது பல ஓவியங்கள் அசைவுகள் இணைந்த தொகுப்பாக இருக்கும்.

He works primarily in the metamorphic style - using a technique of superimposing and juxtaposing realistic and figurative details within the images that he creates.

இந்த ஓவியத்தில் ஒரு மனிதன் தெரிகிறான் உற்று பார்க்கும் போது, இந்த உருவத்தில் காடுகள், மலைப்பாதை, பாதையில் போகும் கார்கள், குப்புறப்படுத்து ரசிக்கும் மனிதன், நிலங்கள் தெரிகின்றது.

ஜிம்மிகார்டர் ஓவியம் அமெரிக்க கட்டிடங்கள், தொழிற்சாலைகள், கப்பல்கள், வாகனங்கள்,மலைகளின் தொகுப்பு

பூச்சாடி பூ ஒரு அழகிய பெண்ணாக

இந்த வீரர் ஓவியத்தில் பல உருவங்களை பார்க்கலாம் இரண்டு குதிரை வீரர்கள், கேடயம், வாள் மற்றும் உறை, குதிரைகள்,வானத்தை பார்க்கும் ஒரு பெண்முகம் ஒரு வீடாக, இருகைகளில் வாளியை ஏந்தி நிற்கும் பெண், முகமூடி அணிந்த வீரன், விண்ணில் பறக்கும் பெண் உருவம், மனித மண்டை ஓடு, காற்றாலை,தடி ஊன்றி செல்லும் மனிதர்கள்.. இன்னும்...

மக்களும் ரோஜா மலர்களும்,கோட்டையும்....மாதாவாக

நாற்காலி, பூணை, கேரட்டுகளின் மேல் படுத்துறங்கும் முயல், மனிதமுகங்கள்,மலைகள் இவை எல்லாம் இணைந்து மோனாலிஸா ( ஒரிஜினல் ஓவியத்தை பார்த்தால் இன்னும் பல தென்படலாம் ! )

கொடி,மலர், வண்ணத்துப்பூச்சி ஒரு அழகிய பெண்ணாக (கவிதையே தேவையில்லை !)

கடல் = காதலர்கள், இரு கைகளை தூக்கி ஒய்யாரமாக பாடிச் செல்லும் பெண் இலை உதிர்ந்த மரமாக, வானத்தில் காதலர்கள், வேர்களில் முகங்கள்,

சங்குகள், கடற்கன்னி, கடற்கன்னியின் தந்தை, மீன்கள் = நிர்வாண உருவங்கள், மரம்

குதிரைகளும், பறவைகளும் அழகி உருவமாய்...

ஒரு முகம், பல கதைகள் ( புத்தர், இந்தியாவை நினைவுபடுத்துகிறது)

மிகப் பழமையான குகை ஓவியம் - அவதாரில்

2013-07-16T04:17:00.000-07:00

மேலே காணும் இந்த குகை ஓவியத்தில் பலவகை காட்டு விலங்குகளின் கூட்டம் உயிரோட்டமாக தென்படுகிறது.

நேர்த்தியான, இந்த ஓவியத்தில் என்னை கவர்ந்தது ஒரு குதிரை அதன் தலையில் இருந்து நீண்ட வால் போன்ற பகுதி இருக்கிறது. இந்த விலங்கு காலப்போக்கில் அழிந்து போயிருக்கலாம். எனக்கு இதே குதிரை உருவத்தை அவதார் ஆங்கிலப் படத்தில் கிராபிக்ஸில் கொண்டு கொண்டுவந்திருப்பது போல் தோன்றியது (உங்களுக்கு எப்படி தெரிகிறது ?)

இந்த குகை ஓவியத்தின் வரலாறு இதோ :

நான்கு சிறுவர்கள் தாங்கள் வசித்த காட்டுப்பகுதியில் காலார நடந்து சென்ற போது கண்டறியப்பட்டது இந்த குகை ஓவியங்கள் (Lascauz cave ).

இந்த குகை ஓவியங்கள் பிரான்ஸின் டார்டோனே (Dordogne) என்ற இடத்தில் அறியப்பட்ட ஆண்டு 1940. இந்த ஓவியங்கள் சூமார் 17000 ஆண்டுகளுக்கு முற்பட்டவை. இரண்டாம் உலப்போர் சமயத்தில் கண்டுபிடிக்கப்பட்டாலும் வெளி உலகத்திற்கு எட்டு ஆண்டுகள் கழித்து தெரிந்தது. 1963 வரையிலும் இதை பார்வையிட அனுமதிக்கப்பட்டிருந்ததாம். வரலாற்றுக்கு முந்திய காலத்தின்(prehistoric) உலகின் சிறந்த ஓவியமாக இதை கருதுகிறார்கள்,ஃபிரான்ஸில்.

முப்பரிமாண ஓவியர் M.C. எஷர்

2013-07-01T06:07:00.002-07:00

Maurits Cornelis Escher [1898 – 1972]

டச்சு எழுத்துரு ஓவியர் எம்.சி. எஷர் (மாரிட்ஸ் குர்ன்லிஸ் எஷர்) தனக்கென முத்திரை பதித்தவர். இவரது ஓவியங்களை மீசோ டிண்ட், அச்சு கலை பாணி(லித்தோ), கணித வரைகலை, முப்பரிமாண வியூகம்,நிழலுறுக்கள்... என பல வகைப்பாட்டியலில் சேர்க்கிறார்கள். (மேலும் மர வேலைப்பாடும் அறிந்த ஜீனியஸ்) எனக்கு இவரது ஓவியங்களை பார்க்கையில் நம்மூர் (தமிழக) ஓவியர் ராமு அவர்களின் ஓவியங்கள் மனக்கண் முன் விரிந்தன.

ஃப்ரிஸ்லாந்தில் (Friesland) சிவில் இன்ஜினியரின் மகனாக பிறந்த தாலோ என்னவோ இவரக்கு முப்பரிமாண ஓவியங்கள் எளிதாக கைகூடியது. இவர் கற்பனைப் பார்வையில் பட்ட ஒவ்வொன்றும் இவரின் தூரிகையில் முப்பரிமாணங்களாக உயிர் உருவம் பெற்றன.

அரசியல் ஈடுபாடு மிக்க இவர், 1937ல் பெல்ஜியதிற்கு குடிபெயர்ந்தார் அங்கிருந்து தொடங்குகிறது (லைப் அண்ட் ஸ்ட்ரீட் )இவரது ஓவிய உலகம். இரண்டாம் உலப்போர் இவரை நெதர்லாந்துக்கு தள்ளியது.

கருப்பு வெள்ளையில் வரைந்த ஓவியங்கள் அதன் பரிமாணம், வியூகம் நம்மை ஒரு புது உலகத்திற்கு அழைத்து செல்கிறது. "தன்னை தானே வரைந்து கொள்ளும் கைகள் (drawing hands), வானமும் தண்ணீரும் (sky and water), ஏற்றமும் இறக்கமும் ( Ascending and Descending)
இன்னும் எண்ணற்ற ஓவியங்கள் நம் நெஞ்சத்தை அள்ளுகின்றன. இங்கு குறிப்பிட்டு சொல்ல வேண்டிய ஒன்று அவர் இடது கை பழக்கம் உள்ளவர்.

1958 ல் Regular Division of the Plane என்ற ஒரு புத்தகம் வெளியிட்டார். இந்த புத்தகம் கணிதம் சார்ந்த டிசைன்களையும், வரைகலை(DRAFTS) நுணுக்கங்களை, மர உருவக் கலைகளை விளக்கியது.

ஹாகுவே அருங்காட்சியகத்தில்(Hague Museum) இவரது ஓவியங்கள் காட்சிக்குள்ளன இன்னும்..,the National Gallery of Art (Washington, DC); the National Gallery of Canada (Ottawa); the Israel Museum (Jerusalem); Huis ten Bosch (Nagasaki, Japan); and the Boston Public Library

Drawing Hands, lithograph (1948)

House of Stairs, lithograph (1951)

[findings] அலங்கார ஓவியர் அல்போன்ஸ் முக்‌ஷா

2013-06-12T21:37:00.002-07:00

ஓவியர் அல்போன்ஸ் முக்‌ஷா
Alfons Maria Mucha [1860 -1939]

அல்போன்ஸ் மரிய முக்‌ஷா செக் குடியரசில் பிறந்தவர். இளம் வயதில் இருந்து ஓவியம் வரைவதில் ஆர்வம் கொண்டிருந்தார். அதுவும் ஓவியத்தில் அலங்கார வகை (Decorative art) இவருக்குப் பிடித்த ஒன்று. விளம்பரக் கம்பெனிக்காக சாரா பெர்ன்ஹர்ட் எனும் நடிகையின் உருவ ஓவியங்களை வரைந்து கொடுத்தார். அழகுமிக்க அலங்கார வகை ஓவியங்களை புத்தக நிறுவனங்களுக்காகவும், காலண்டர், நகை,கார்பெட், தியேட்டர் செட்களுக்காகவும் இவரது கலை பயன்பட்டது.

”முக்‌ஷா ஸ்டைல்” என்றே இவரது ஓவியங்கள் புகழ் பெற்றது. பின்னாளில் இந்த வகை பிரெஞ்சில் “ஆர்ட் நூவு” (art Nouveau)எனும் ஒரு தனி வகை ஓவியமாக அழைக்கப்பட்டது. இதை தமிழில் ”புதிய கலை” எனச் சொல்லலாம்.

1900ல் பாரிஸில் நடைபெற்ற உலக ஓவிய கண்காட்சியில் உலக அளவில் பேசப்பட்டார்.

முதல் உலகப்போருக்குப்பின் செக்கோஸ்லோவோகியா சுதந்திரநாடாகப்பிரகனப்படுத்தப்பட்ட பின் அந்நாட்டு தபால்தலை, பணம், அரசாங்க பத்திர டிசைன்களில் இவரின் உழைப்பு இருந்தது.

1928 ப்ராகுவில் ”ஸ்லேவ் எபிக்” எனும் தலைப்பிளான 20 பெரிய ஓவியங்களை படைத்தார். இந்த ஓவியங்கள் செக் மக்களின் வாழ்க்கை முறை மற்றும் வரலாற்றை பேசியது.

தனது 78வது வயதில் 14 July 1939 ல் நிமோனியாவால் பாதிக்கப்பட்டு மரணம் அடைந்தார்.

காலங்களில் அவள் வசந்தம்
கலைகளிலே அவள் ஓவியம்
மாதங்களில் அவள் மார்கழி
மலர்களிலே அவள் மல்லிகை...

என்ற கவிஞர் கண்ணதாசன் பாடல் வரிகளை ஞாபகப்படுத்துகிறது இந்த ஓவியங்கள்.

ஒவ்வொரு காலத்திற்கும் (Seasons) ஒவ்வொரு ஓவியம்

^ Autumn(1896)

^ Spring (1896)

^ Summer (1896)

^ Winter (1896)

^ Self Portrait

[ Findings ]துயரத்துடன் முடிந்த ஓவியரின் வாழ்க்கை ( வான்கா) - Part 2

2013-05-14T03:09:00.001-07:00

தொடர்புடைய பதிவு : பகுதி 1

வான்காவின் ஓவியங்கள் அவரின் மறைவுக்கு பின் அதிகம் பேசப்படுவதற்கும், அதிக விலை போவதற்கும் காரணம் ஓவிய நுணுக்கங்களை விடவும் அதில் உள்ள உண்மை தன்மையும் உணர்ச்சி வெளிப்பாடும் என்று சொல்வது மிகை இல்லை என்று நினைக்கிறேன்.

இவரின் ஓவியங்களின் தூரிகையின் வீச்சு பிரமிப்பை ஏற்படுத்துகிறது. போர்ட்ராய்ட் எனப்படும் வகையில் தனது சுய ஓவியத்தை பல வரைந்துள்ளார் அதில் ஒன்று காது அறுபட்ட நிலையில் தன்னை தானே வரைந்து கொண்டது. இன்னொரு ஓவியம் தாடி இல்லாமல் இருக்கும் போது வரையப்பட்டது. இந்த ஓவியம் மட்டும் 1998 நவம்பரில் $71.5 million (டாலர்) விலை போனது அதுவே டிசம்பர் 2011 ல் $98.4 million டாலர் என்பது வியப்பான விசயம்.

இவர் ஓவியனாவதற்கு ஒரு காரணம் இவரின் சகோதரர் தியோ (ஆர்ட் டீலர்), இந்த தொழிலில் பிரகாசிக்கலாம் என்ற அவரின் எண்ணம். இன்னொரு காரணம் காதலாக இருக்கலாம் ஆனால் அந்த காதலே அவரின் உடல் நலக்கேட்டிற்கும் காரணமாக போய்விட்டது வருத்தப்படவைக்கும் தகவல். சகோதரரின் மனைவி ஜோஹனா இவரின் ஓவியங்களுக்கு ஊக்கம் அளித்தவர். அவரின் மறைவிற்கு பிறகு 1901 ல் 71 ஓவியங்களை காட்சிப்படுத்தினார்.

ஓவியங்களில் , 860 ஆயில் பெயிண்டிங்குகள், 1300 வாட்டர் கலர் பெயிண்டிங்குகள் மற்றும் ஸ்கெட்சுகள். இன்னும் காணாமலும் அழிந்தும் போயிருக்கலாம். அநேக பெயிண்டிங்குகளின் விலைகள் அதிகம் பேசப்படுகின்றன.

வருமையின் காரணமாக 15 வயதில் படிப்பை துறந்து வேலை தேடினார். தாய்மொழியாம் டச்சை தவிர ப்ரெஞ்ச், ஜெர்மன் மற்றும் ஆங்கிலம் நன்றாக அறிந்திருந்தார்.

மஞ்சள் வீடு அவர் வசித்த வீடு அந்த ஓவியம் நம்முள் ஒரு தாக்கத்தை ஏற்படுத்துகிறது. தன்னை “Christ of the Coal Mines” என்று அழைத்துக்கொண்டார்.

[ Findings ]துயரத்துடன் முடிந்த ஓவியரின் வாழ்க்கை ( வான்கா)

2013-05-10T00:02:00.000-07:00

வின்செண்ட் வான்கா நெதர்லாந்தில் பிறந்தவர். கலைப்பொருட்கள் விற்பனை செய்யும் ஒரு நிறுவனத்தில் எழுத்தராக (clerk) பணிபுரிந்தார். சில காலம் ஆசிரியராக பணியாற்றினார். இன்னும் சில காலம் சமய தொண்டு (preacher) புரிந்தார். இவர் தமது 30 ஆவது வயதிற்கு பின்னாலே ஓவியம் வரைய ஆரம்பித்தார், என்பது கவனிக்கத்தக்கது. 1886 ல் பாரிசுக்கு புலம் பெயர்ந்த பின்னர் ஓவிய புதுமையாளர்கள் அல்லது உணர்வுபதிவுவாத ஓவியர்களுடன் இவருக்கு ஏற்பட்ட தொடர்ப்பு இவரின் ஓவியங்களை மெருகேற்றியது என்று சொல்லலாம். ஜப்பானிய ஓவியங்களின் தாக்கம் இவரிடம் இருந்தது.

இவரின் முதல் ஓவியமான உருளைகிழங்கு உண்போர் ஏழை மக்களுடன் பழகியதன் வெளிப்பாடு.

நூற்றுக்கணக்கான ஓவியங்கள் வரைந்த இவரால் ஒரே ஒரு ஓவியம் மட்டுமே விற்கமுடிந்தது நெருடலான விசயம். அவரின் மறைவுக்கு பின்னரே உலக அளவில் மிகச்சிறந்த ஓவியங்களாக இவரது ஓவியங்கள் கணிக்கப்பட்டன.

இறுதி நாட்களில் இவர் மனநோயால் பீடிக்கப்பட்டார். தன் காதுமடல்களை அறுத்துக் கொண்டார். இறுதியில் துப்பாக்கியால் சுட்டு தற்கொலைக்கு முயன்றார். இறுதியில் 37 ஆம் வயதில் உயிர் நீத்தார். இன்றைக்கு அவரது ஓவியங்கள் விலை மதிக்க முடியாதவையாக கருதப்படுகிறது.

"The sadness will last forever." துயரம் என்றும் தொடரும் என்பது இவரின் இறுதி வாக்கியம்.

அவரின் திருவாசகம் :
” I cannot help that my pictures do not sell. Nevertheless the
time will come when people will see that they are worth more
than the price of the paints and my own living”

இவரின் சில படைப்புக்கள் :

மஞ்சள் வீடு

ஓய்வு அறை Bedroom in Arles, 1888

The Sower, 1888

Starry Night Over the Rhone, (1888)

இன்னும் சில ஓவியங்கள் மற்றும் தகவல்களுடன் அடுத்த பதிவில் தொடர்கிறேன்..

பிகாஸோவின் குவர்னிகா - [Findings]

2013-05-04T01:08:00.000-07:00

(Guernica) குவர்னிகா எனும் இந்த ஓவியம் 20 ஆம் நூற்றாண்டின் ஒரு புரட்சி படைப்பு என புகழப்படுகிறது. உலகப் புகழ் பெற்ற இந்த ஓவியத்தை 1937 ல் வரைந்தார். கேன்வாஸில் வரையப்பட்ட இந்த ஓவியம் (ஆயில் பெயிண்டிங்) சுமார் 11 அடி உயரமும் 25 அடி நீளமும் கொண்டது. (மேல் பகுதிகளை ஏணி இல்லாமல் வரைய முடியாது.) பிகாஸோ பாரிஸ் உலக விழாவில் (செப்.1938) இதை காட்சிப்படுத்தினார்.

இவ்வோவியம் சிம்பாலிசம் என்ற வகைப்பட்டது. போருக்கு எதிரான கொள்கையை சித்தரிக்கிறது. உலகப்போரினால் குவர்னிகா மக்கள் பட்ட துன்பதை, போரின் கொடுமையை,அடக்குமுறையை சாடுகிறது.

ஸ்பெயின் தேசம் நாஜிக்களால்(ஜெர்மனி) விமான குண்டுதாக்குதலுக்குள்ள வரலாற்றை சொல்லுகிறது இவ் ஓவியம்.

பின்னாளில் ஒரு ஜெர்மன் அதிகாரி ”நீங்கள் தான் இதை வரைந்ததா? ”என கேட்டார். அதற்கு பிகாஸோ சொன்ன பதில் “இல்லை..இதை நீங்கள்தான் உருவாக்கினீர்கள்”.

மேலோட்டமாக பார்த்தால் இவ்வோவியத்தின் கூறுகளை புரிந்து கொள்ள முடியாது.

முதலில் நமக்கு தெரிவது கூரையில் எரியும் மின்விளக்கு. இது குண்டு தாக்குதலை சொல்கிறது. ஏற்பட்ட விளைவுகளை காணச் சொல்கிறது பெரிய கண் உருவம். ஞான கண்ணை திறக்க சொல்கிறது. மின் விளக்கின் பின்னே இருளில் சிறகு ஒடிக்கப்பட்ட பறவை.

குரல் வலை நசுக்கப்பட்டு கதறும் குதிரை. அதன் கதறலை வெளித்தள்ளும் நாக்குகள் உணர்த்துகிறது. அந்த குதிரையின் கால்களும் உடைக்கப்பட்டு உள்ளது. எலும்புகளின் சிதறல்கள்..

இறந்த குழந்தையை பதறும் கைகளில் ஏந்தி வானத்தை நோக்கி கதறும் தாய்.

எருது ஸ்பெயினின் கலாச்சார குறியீடு. அதன் முகத்தில் மனிதனின் உருவமும் ஒப்புமை படுத்தப்பட்டுள்ளது. மாட்டின் வால் தீயின் நாக்குகள்... கொழுந்து விட்டு எரிவதாக காட்டப்பட்டுள்ளது.

தீபற்றி எரியும் வீட்டில் (பின்புல ஜன்னல்) தீ நாக்குகளில் சிக்கிகொண்டு காப்பாற்ற கதறும் பெண். (இவ்வுருவம் பெண்ணாகவும் தெரிகிறது ஆணாகவும் தெரிகிறது)

வெட்டுப்பட்டு வீழ்ந்து கிடக்கும் சிப்பாய். கைகளில் உடைந்த வாள். அந்த கையின் பின்புலத்தில் மலர் சமாதானத்தின் குறியீடு. போர் தேவையில்லை என்பதை உணர்த்துகிறது. காலில் நசுக்கப்படும் தலை கவசம்.

திறந்த கதவின் வழியே பறந்து வரும் பெண். கைகளில் அணைத்து பிடித்த விளக்கு போர் அற்ற சூழல் வேண்டும் என்பதன் குறியீடு.

PABLO PICASSO [ 1881–1973 ]

பாப்லோ பிகாஸோ ஸ்பெயின் தேசத்தில் மெலேகா (malaga)வில் பிறந்தவர். பாரிஸில் வாழ்ந்தவர் அதற்கு முன் இளவயதில் பார்ஸிலோனாவில் வளர்ந்தவர். முப்பரிமாண ஓவியங்களின் முன்னோடி. 92 ஆவது வயதுவரை வாழ்ந்தார்.

(Findings) அமைதி விரும்பி ருடால்ப் எர்னஸ்ட்

2013-03-29T22:06:00.000-07:00

ருடால்ஃப் எர்னஸ்ட் (Rudolf Ernst )வியன்னாவில் பிறந்தவர் (1854). தமது 15ஆவது வயதில் பைன் ஆர்ட்ஸ் அகடாமியில் சேர்ந்தார். இத்தாலிய இயற்கை காட்சி ஓவியங்களை கற்றுக்கொள்ளவும், கலையழகு காதல் ஓவியங்களையும் 1885 ஆம் ஆண்டு தொடக்கம் வரைய ஆரம்பித்தார்.
அவரது ஓவியங்களில் குழந்தைகள் மற்றும் உருவ ஓவியங்கள் தனித்தன்மை வாய்ந்தது. (அதாவது அச்சு அசல் என்று சொல்வோமே அப்படி ஒரு தன்மை மிக்கது).

1885 முதல் மத்திய கிழக்கு மற்றும் மொராக்கோ,ஸ்பெயின், துருக்கி (கீழ்திசை நாடுகள்) இங்கெல்லாம் பயணம் செய்தார். பலப்பல பாராட்டுகள் புகழ் அவரைத்தேடி வந்தாலும் தம் இறுதிகாலங்களை தனிமையில் கழித்தார். பாரிஸில் பாண்டே-அக்ஸ்-ரோஸஸ் (Fontenay-aux-Roses )என்ற இடத்தில் 1932 ல் மரணம் அடைந்தார்.

இவர் பயணக்காட்சிகள் நம் கண்முன்னே...அவை நம்முள் பல வித துடிப்புகளை எற்படுத்துவதை உணருங்கள்.

”விற்பனையாளருடன் பேரம் நடக்கிறது”

”கொல்லன் பட்டறை”

”புலியின் வருகைக்காக...”

”ஓவியத்தை ரசிக்கும் மங்கையர்(ஆஸ்திரியா)”

”சூரிய அஸ்தமனத்தை ரசிக்கும் அரேபியப் பெண்கள்”

”புலி வேட்டை”

”பூ காரிகை”
(மேலே உள்ள ஓவியத்தின் லைட்டிங் எபெக்ட் மற்றும் தரை சுவர்,பின்புலம்.. அஹா.. அற்புதம் !)

”நுழை வாயில்”

”ஓவியன்”

கார்டூன் புலி (John Buscema) ஜான் புஸிமா

2013-02-09T02:58:00.001-08:00

ஜான் புஸிமா , அமெரிக்க காமிக் புத்தக ஆர்டிஸ்ட் (1927 - 2002)

முக்கியமாக இவர் மார்வெல் காமிக் நிறுவனத்தில் 1960 முதல் 1970 வரை பணியாற்றினார்.

கீற்று போன்ற கோட்டுருவங்களின் வேகம்..கோணங்கள் நம்மை வெகுவாக கவர்கிறது.

சில ஓவியங்களை உங்களுடன் பகிர்ந்து கொள்கிறேன்.

ஓவிய மேதை நார்மன் ராக்வெல் (Part 2)

2012-12-07T22:03:00.001-08:00

நார்மன் ராக்வெல் அவர்களின் உருவ ஓவியங்கள் நம்மை வெகுவாக கவர்கின்றன. ஒவ்வொரு ஓவியத்திற்கும் அவர் எடுத்துக்கொண்ட பொருமை, சிரத்தை வியப்பின் உச்சிக்கு நம்மை அழைத்து செல்கிறது. நுண்ணிய முக பாவங்கள் மற்றும் டீட்டெயில் என்று சொல்லப்படுகின்ற பொருள் அமைவு, எதார்த்தம், துல்லியமான வரை கோடுகள் இப்படி பலவற்றை அடுக்கிக்கொண்டே செல்லலாம். அவருக்கு இவ்வோவியங்கள் சாதனைகள் அல்ல ஆனால் தம் வாழ்நாளில் இத்துறைக்கென ஒரு வகைப்பாட்டை ஏற்படுத்தி வாழ்நாள் சாதனையின் உச்சத்தில் அவர் இருந்தார் என்பதற்கு இருவேறு கருத்துகளுக்கு இடமில்லை.

இந்த ஓவியத்திற்கு ஒரு வரலாற்று பின்புலம் உள்ளது. 6 வயது ஆப்பிரிக்க-அமெரிக்க சிறுமி வெள்ளையர்கள் படிக்கும் பள்ளிக்கு (நியூ ஆர்லேன்ஸ்) செல்கிறாள். அவளின் பாதுகாப்பிற்காக நான்கு எஸ்கார்டுகள் அதுவும் யுஎஸ் டெப்டி மார்ஷல்ஸ் செல்கிறார்கள். சிறுமிக்கு பின்புறம் உள்ள சுவற்றில் "நைஜர் "என்னும் எழுத்துக்கள். நிறவெறியர்கள் விட்டெறிந்த தக்காளி சுவரில் பட்டு தெரித்திருக்கிறது. ஜனவரி 14ல் 1964 ல் ஒரு பத்திரிக்கையின் நடுபக்கத்தில் வெளியாகியது. அக்காலத்திய நிற வெறியை இது வெளிப்படுத்துகிறது.

இவரின் ஓவியத்தை விளக்க வேண்டிய அவசியம் இல்லை இருப்பினும் புதியவர்களுக்காக இரண்டொரு வரிகள் !

"வசந்ததின் பூக்கள்" எனும் இந்த ஓவியத்தில் கூர்ந்து கவனித்தால் ஒரு சிட்டுகுருவி வாசற்படியில் அமர்ந்திருப்பது தெரியும். (வீட்டினுள் ஒரு பொன் வசந்தம் !)

இத்துணைபேர் அதட்டலுக்கு அசையாமல் வழியை மறித்து அடம்பிடிக்கும் செல்ல நாய். (சிலபேர் அதனிடம் கெஞ்சுகிறார்கள் !)

நாய்குட்டிகளுக்கு பாசத்தோடு உணவளிக்கும் சிறுவன் பாசத்தோடு முகம் பார்கும் தாய்.

நேருவின் உருவப்படம் இதில் இந்தி வார்த்தை "ஷாந்தி" மற்றும் பின் புலத்தில் இந்தியர்களின் முகங்கள், நேட்டிவிட்டியோடு ;

உடையை ஹேங்கரில் தொங்கவிட்டு சந்தோசமாக பாலதின் அடியில் குளிக்கும் வழிப்போக்கன் (ஒவியம் நம்மை அந்த இடத்திற்கே அழைத்துசெல்கிறது. சந்தோச தருணங்கள் ! )

தண்ணீரில் விழுந்த சிறுமியை தாவி எடுத்துவரும் வீரர் தோளில் செல்ல பூனை. (கடமை !)

தாதாவும் பேரனும் நாய்குட்டியோடு கடலை ரசிக்கிறார்கள். இவர்களோடு வானத்தில் வட்டமிடும் பறவைகள். (இப்படிப்பட்ட அனுபவம் எல்லோருக்கும் வாய்கிறதா?)

குழந்தையின் அழுகையை எப்படி நிறுத்துவது? என்று புத்தகத்தை படித்து ஆராய்ச்சி செய்யும் "பேபி ஸிட்டர் "

புகைத்துப் பார்கும் சிறுவர்கள் கண்டுபிடித்துவிட்ட நாய். இதில் ஒருவன் ஏழை மற்றவன் வசதியானவன் (நண்பர்களிடம் ஏற்றத்தாழ்வு இல்லை) குறும்பு !

செருப்பு தைக்கும் தொழிலாளியான தாத்தாவும் சிறுமியும் பொம்மையின் ஷூவை வியந்து ஆராய்ச்சி செய்கிறார்கள் .

காலைமுதல் இரவு வரை ஒரு சிறுமியின் வாழ்க்கை.(யோசித்தால் நம் சிறுவயதில் இப்படிப்பட்ட சம்பவங்கள் நடந்திருக்கலாம்)

குழந்தையின் சிரிப்பில் லயிக்கும் தாய். (பாசம்)

ஊசி போடும் டாக்டருக்கு பின்புறத்தை காட்டி இவர் டாக்டர் தான ? என சர்டிபிகேட்டை சரிபார்க்கும் சிறுவன் (ஹா..ஹா.ஹா..)

அப்பாவும் அம்மாவும் சண்டையிட செய்வதறியாது அழுகும் சிறுவன். அவனோடு பூனையும் நாயும்.

விளக்கின் ஒளியில் சிறுமியும் சிறுவனும் தத்துரூபமான காட்சி

முத்தத்தை பரிமாறிக்கொள்ளும் இளசுகள் பெண்ணின் கைகளையும் கால்களையும் கவனியுங்கள். (உணர்வின் வெளிப்பாடு ! )

உடைந்த பீப்பாயை டேபிலாக மாற்றி எழுதும் சிறுவன் யோசிக்க உதவி வேண்டுமா ! என கேட்கும் வளர்ப்பு நாய்.

தொடர்புடைய முதல் பகுதி :

[ Findings ]ஓவிய மேதை நார்மன் ராக்வெல் (Part1)

2012-12-06T21:23:00.001-08:00

ஓவிய மேதை நார்மன் ராக்வெல்
Norman Percevel Rockwell 1894 - 1978

அமெரிக்காவின் புகழ்பெற்ற ஓவியர் நார்மன் ராக்வெல். பத்திரிக்கை துறையில் இவர் ஆற்றிய பங்கு அளவிடற்கரியது.
சாட்டர்டே ஈவினிங் போஸ்டில் 40 ஆண்டுகாலம் தன் வாழ்நாளை கழித்தார்.
நியூயார்கில் பிறந்தவர். 14 வயது முதல் ஓவியப்பள்ளியில் காலடி வைத்தவர் வாழ்நாள் முழுக்க ஓவியத்தை தனது உயிர் மூச்சாக கொண்டிருந்தார்.

அமெரிக்காவின் பல பிரபல பத்திரிக்கைகளில் பணியாற்றியுள்ளார். [செயின் நிகோலஸ், பி எஸ் ஏ, பாய்ஸ் லைப் இதில் சில) ஓவியத்தில் தனக்கென ஒரு தனி இடத்தை பிடித்தார்.

கார்ல் ஹெச் க்ளவுடி எனும் முதல் புத்தகத்தில் இயற்கை குறித்த ஓவியங்கள் இவரை பத்திரிக்கை துறையில் சிறப்பான இடத்திற்கு அழைத்து சென்றது.

19 வயதிலேயே பாய்ஸ் லைப் இதழில் ஆர்ட் எடிட்டர் ஆனார்.

முதலாம் உலகப்போர் மற்றும் இரண்டாம் உலகப்போர் சமயத்தில் இவரின் தனிதிறமை பெற்ற ஓவியங்கள் புகழப்பட்டன.

முதலாம் உலக்ப்போர் சமயத்தில்அமெரிக்க ராணுவத்தில் கடினமான முயற்சியில் சேர்ந்தார் இருப்பினும் அவருக்கு அங்கு கிடைத்த உத்தியோகம் ராணுவ ஆர்டிஸ்ட்.

மாஸாசுசெட்ஸில் ( Stockbridge-massachusetts) இவரின் மியூசியம் உள்ளது இதில் 700 ஒரிஜினல் ஓவியங்கள் இங்கு உள்ளது.

இவருக்கு 1977 ல் அமெரிக்காவின் உயரிய விருதான ஜனாதிபதிமெடல் இவருக்கு (presidential medal of freedom) அளித்து கெளரவிக்கப்பட்டது.

ஓவிய மேதை நார்மன் ராக்வெல் தமது 84 ஆவது வயதில் இயற்கை எய்தினார் (நவ.8, 1978).

வாழ்நாள் முழுக்க இவர் வரைந்து தள்ளிய சிறப்பான ஓவியங்கள் சுமார் 4000 இருக்கும்.

இவரின் புகழ்பெற்ற ஓவியங்கள் :
Scout at Ship's Wheel (first published magazine cover illustration, Boys' Life, September 1913)
Santa and Scouts in Snow (1913)
Boy and Baby Carriage (1916; first Saturday Evening Post cover)
Circus Barker and Strongman (1916)
Gramps at the Plate (1916)
Redhead Loves Hatty Perkins (1916)
People in a Theatre Balcony (1916)
Tain't You (1917; first Life magazine cover)
Cousin Reginald Goes to the Country (1917; first Country Gentleman cover)
Santa and Expense Book (1920)
Mother Tucking Children into Bed (1921; first wife Irene is the model)

[அடுத்த பகுதியில் இன்னும் சில ஓவிங்களோடு தொடர்கிறேன்... ]

[Findings] ரூசோ ஹென்றியின் ஓவியங்கள் !

2012-11-18T22:19:00.000-08:00

Rousseau Henri (or) Le Douanier Rousseau [ 1844 - 1910 ]

Scout Attacked by a Tiger 1904 (The Barnes Foundation, Merion, Pennsylvania )

Combat of a Tiger and a Buffalo - 1909

தூங்குகின்ற ஜிப்ஸி (The Sleeping Gypsy- 1897

Oil on canvas) இது நியூயார்கின் மார்டர்ன் மியூசியத்தில் உள்ளது.

திக்கு தெரியா காட்டில் நடந்து செல்லும் பெண் (Woman Walking in an Exotic Forest) 1905 Oil on canvas இவைகள் பென்சில்வேனியாவில் உள்ளது

Rousseau Henri (or) Le Douanier Rousseau [ 1844 - 1910 ]

ரூசோ ஹென்றி இவர் ஒரு பிரெஞ்சு ஓவியர். இவருக்கு இன்னொரு பெயர் லெ டானெயர் ரூஸோ. டானெயர் என்றால் சுங்க அதிகாரி
ஆனால் இவர் அந்த ரேங்கை இவர் பணியாற்றிய சுங்க துறையில் அடையவில்லை. அதற்கு முன்பு இராணுவத்தில் சிலகாலம் மெக்சிகோவில் பணி புரிந்திருக்கிறார். ஓவியம் வரைவதை ஒரு பொழுது போக்காக கொண்டிருந்தாலும் பணி ஓய்வுக்கு (1893 )முன்னரே இவரது ஓவியங்கள் பேசப்பட்டன .

இவர் வறுமையில் வாடியதாக கேள்விப்படுகிறோம். இவருக்கு ஒவியம் மீதிருந்த காதல் இவருக்கு பாராட்டை பெற்று தந்தது. அதிலும் காட்டு ஓவியங்கள் இவரை போலவே எதார்த்தமாகவும், வெளிப்படையாகவும் இருந்தன.

இவர் காலத்து ஓவியர்கள் ( Bouguereau and Gerome) இவரை ஏளனமாகவே பார்த்தார்கள். 1908 ல் பிகாஸோ இவரை அரை மனதாக பாராட்டியதாக அறிகிறோம்.

இவரின் இறுதி ஓவியம் "கனவு" (Dream 1910) இது நியூயார்க் மியூசியத்தில் (MOMA) உள்ளதாக அறிகிறோம்.

இறப்பிற்கு பின் ஏழையின் கல்லறையில் இவரது உடல் புதைக்கப்பட்டது
அதன் பிறகே இவரின் ஓவியத்தின் நேர்மை பரவலாக பாராட்டு பெற்று பிரபலமானது ஒரு சோகமான நிகழ்வே !

ரூஸோ ஹென்றி (self portrait)

ரசிக்கும் சீமான் - லியொனார்டோ (ஓவியம்)

2012-10-19T22:00:00.001-07:00

இவரின் ஓவிய கலை நயத்தை புரிந்து கொள்ள , ஒரு ஒப்புமைக்காக, இரண்டு ஓவியங்களை பகிர்ந்துள்ளேன். உயிரோவியம் என்று சொல்கிறோமே அதை நீங்கள் உணரலாம். காற்றில் அலையும் கேச அழகை சிலாகிக்க முடியும்.

இந்த ஸ்கெட்ச் ஒரு பெண்ணின் தலைமுடி ஒப்பனை மற்றும் முக வடிவம் 1506 ல் பேப்பரில் வரையப்பட்டது. இது போர்ட்ராய்ட் என்று சொல்லபடும் உருவ ஓவியம். இங்கிலாந்தில் வின்சர் கோட்டையில் ராயல் கலெக்சனாக உள்ளது.

அடுத்து வருவது அதே அமைப்பில் உள்ள பெண்ணின் உருவம் இது மர பளகையில் வரையப்பட்டது ( ஆண்டு 1508). வாட்டர் கலர் பசை கொண்டு தீட்டப்பட்டது. இந்த ஓவியத்தை பார்த்தால் உருவம் நம் கண்முன் இருப்பது போன்று உணர முடியும் ( ஒரு 3டி போல) இது இத்தாலியில் பார்மா (Galleria Nazionale, Parma, Italy) கேலரியில் வைக்கப்பட்டுள்ளது.

அவர் தன்னைதானே வரைந்து கொண்டது ஆண்டு 1513

லியொனார்டோ பற்றிய சிறு குறிப்பு :

லியொனார்டோ டா வின்சி [Leonardo da vinci ] - 1452 -1519

கட்டிடக்கலைஞர்,பொறியியலாளர்,கண்டுபிடிப்பாளர்,உடற்கூறு இயலார்,வானியலாளர்,சிற்பி, இப்படி பல துறைகளில் ஆர்வம் கொண்டவர் என்ற அளவினோடே சிறப்பிக்கப்படுகிறார். லத்தீனிலும், கணிதத்திலும் முறையான கல்வி இல்லாததால் இவர் ஒரு விஞ்ஞானி அல்ல என்று புரக்கணிக்கப்பட்டார். பல்துறை மேதை யாக இருந்தாலும் ஓவியத்திற்கென்றே புகழப்பட்டார்.

இத்தாலியிலுள்ள வின்சி இவரது பிறந்த ஊர். புளோரன்சில் தந்தையுடன் வளர்ந்தார். இவரது ஓவிய குரு வெரோக்கியோ. முழுமையான ஓவியங்கள் 17 மட்டுமே. அறிவியல் சம்பந்தமாக கலைகளஞ்சியம் வெளியிட விரும்பி பல டிராப்ட்களை வரைபடங்களாக வைத்திருந்தது பிற்காலத்திலேயே அறியப்பட்டது. இவரது சுபாவம் முழுமையாக ஒரு ஓவியத்தை முடிக்காமல் அடுத்ததிற்கு சென்றுவிடுவது என்று இவரைப்பற்றி சொல்கிறார்கள்.

மோனாலிசா [Monalisa], கடைசி விருந்து [the last supper]பலரும் அறிந்த ஓவியங்கள்.

மைக்கலாஞ்சலோ சமகாலத்தவர்.

இவரது இறுதி யாத்திரையில் 60 பிச்சைக்காரர்கள் பின் தொடர்ந்தனர் இவர் விருப்பத்தின் படி.