വള്ളിക്കുന്ന്

ക്വട്ടേഷന്‍ മണി സ്പീക്കിംഗ്

noreply@blogger.com (Basheer Vallikkunnu) — Sat, 26 May 2012 12:51:00 +0000

സി പി എം ഇടുക്കി ജില്ല സെക്രട്ടറി എം എം മണിയെ എത്ര അഭിനന്ദിച്ചാലും മതിയാവില്ല. ടി കെ ഹംസയുടെ ഏറനാടന്‍ ശൈലിയില്‍ 'ഇജ്ജാണെടാ ആങ്കുട്ടി' എന്ന് പറയേണ്ട ഡയലോഗാണ് മണിയണ്ണന്‍ പൊട്ടിച്ചിരിക്കുന്നത്. സ്വഭാവ ശാസ്ത്രത്തിന്റെ പാരമ്പര്യ മാനദണ്ഡം അനുസരിച്ച് പറയുന്നത് ചെയ്യുക എന്നതും ചെയ്യുന്നത് പറയുക എന്നതും തറവാട്ടില്‍ പിറന്നവരുടെ ഗുണഗണങ്ങളില്‍ പെട്ടതാണ്. അമ്പത്തൊന്നു വെട്ടു വെട്ടി സഖാവ് ടി പി യെ കൊന്നിട്ട് ഞങ്ങളൊന്നും അറിഞ്ഞില്ലെന്ന മട്ടില്‍ പ്രസ്താവനയിറക്കുന്ന സി പി എം നേതാക്കള്‍ക്കിടയില്‍ തറവാട്ടില്‍ പിറന്ന ആണ്‍കുട്ടിയാണ് താനെന്ന് എം എം മണി തെളിയിച്ചിരിക്കുന്നു. ലാല്‍ സലാം സഖാവേ ലാല്‍ സലാം.

വെട്ടിയും കുത്തിയും വെടിവെച്ചും കൊന്നിട്ടുള്ളവരാണ് ഞങ്ങള്‍, ആ ഞങ്ങളെ പേടിപ്പിക്കാന്‍ ആരും നോക്കേണ്ട എന്നാണ് മണിയണ്ണന്റെ പ്രഖ്യാപനം. ഒരു എട്ടുകാലി മമ്മൂഞ്ഞ് ശൈലിയില്‍ ആരാന്റെ ഗര്‍ഭം ഏറ്റെടുക്കുകയല്ല മണി ചെയ്തത്. കൊല്ലേണ്ടവരെ കൊല്ലാന്‍ ഞങ്ങളെയാരും പഠിപ്പിക്കേണ്ടെന്ന് പറഞ്ഞ ധീര വീര സഖാവ് മണിമണി പോലെ ഉദാഹരണങ്ങളും നിരത്തി. പീരുമേട്ടിലെ പാര്‍ട്ടി പ്രവര്‍ത്തകന്‍ അയ്യപ്പദാസിനെ കൊലപ്പെടുത്തിയ ബാലുവിനെ വകവരുത്തിയ സസ്പെന്‍സ് ത്രില്ലര്‍ സ്റ്റോറി അതിലൊന്ന് മാത്രം. വേറെ മൂന്നാല് പേരെ വെട്ടിയും വെടിവെച്ചും കുത്തിയും കൊന്ന ചരിത്രവും അക്കമിട്ടു നിരത്തി. ഈ പാര്‍ട്ടിയെപ്പറ്റി നിങ്ങള്‍ക്കൊരു ചുക്കുമറിയില്ല എന്ന ചരിത്രപ്രസിദ്ധമായ പിണറായി പ്രയോഗത്തിന് മണിയുടെ വെളിപ്പെടുത്തലുകളിലൂടെ കൂടുതല്‍ അര്‍ത്ഥതലങ്ങള്‍ കൈവരുകയാണ്. മണി പറഞ്ഞത് ഒരു ഹൈറേഞ്ച് തമാശയായി കണ്ടു കൊണ്ട് സഖാവ് പിണറായി രംഗത്ത് വരില്ല എന്ന് കരുതാം. ഇത്തരമൊരു പ്രസ്താവന നടത്തിയ എം എം മണിയെ തുറുങ്കില്‍ അടക്കണമെന്ന് കോണ്‍ഗ്രസ്‌ നേതാക്കള്‍ ആവശ്യപ്പെടുന്നത് തികഞ്ഞ വിവരക്കേട് കൊണ്ടാണ്. നാളിതു വരെ നടന്ന എണ്ണമറ്റ രാഷ്ട്രീയ കൊലപാതകങ്ങളില്‍ പ്രതികളെപ്പിടിക്കാന്‍ കഴിയാത്ത അധികാരികള്‍ക്ക് മുന്നില്‍ ജീവിക്കുന്ന തെളിവുമായി രംഗത്ത് വന്ന ഒരാള്‍ക്ക്‌ മിനിമം ഒരു പത്മഭൂഷണെങ്കിലും നല്‍കുവാന്‍ സര്‍ദാര്‍ജിയോടും മാഡത്തോടും ശുപാര്‍ശ ചെയ്യുകയാണ് കോണ്‍ഗ്രസ്‌ നേതാക്കള്‍ ചെയ്യേണ്ടത്.

വെട്ടിയും കുത്തിയും കൊന്ന ചരിത്രം മണിയുടെ വാക്കുകളില്‍ കേള്‍ക്കാം.

ലോക ചരിത്രത്തില്‍ അപൂര്‍വ്വം ചിലര്‍ മാത്രമേ ഇത്തരം ധീരമായ പ്രഖ്യാപനങ്ങള്‍ നടത്തിയിട്ടുള്ളൂ. അതിലൊരാള്‍ ഹിറ്റ് ലറാണ്. മറ്റൊരാള്‍ സഖാവ് സ്റ്റാലിനും. മനുഷ്യ സംസ്കാരത്തിന്റെ ശത്രുക്കളായ ജൂതന്മാരെ കൊന്നൊടുക്കല്‍ തന്റെ ജീവനിയോഗമാണെന്ന് തുറന്നു പ്രഖ്യാപിച്ചയാളാണ് ഹിറ്റ്‌ ലര്‍. ഈ മഹത്തായ കര്‍മം നിറവേറ്റാന്‍ ദൈവം തന്നെ നിയോഗിച്ചതാണെന്ന് പോലും അദ്ദേഹം അവകാശപ്പെടുകയുണ്ടായി. 'ആണ്‍കുട്ടികള്‍ക്ക്' ചേര്‍ന്ന ഇത്തരം ധീരമായ പ്രഖ്യാപനങ്ങള്‍ നടത്തിയത് വഴിയാണ് ഹിറ്റ് ലര്‍ ഹിറ്റ്ലറായത്. സഖാവ് സ്റ്റാലിന്റെ കാര്യവും വ്യത്യസ്തമല്ല. ഇവരുടെ രണ്ടു പേരുടെയും ജനുസ്സിലേക്ക് കേരളത്തിന്റെ അഭിമാന സംഭാവനയാണ് സി പി എമ്മിന്റെ ഇടുക്കി ജില്ല സെക്രട്ടറി. ഇതാദ്യമായല്ല മണിയണ്ണന്‍ ഇത്തരം പ്രസ്താവനകള്‍ നടത്തുന്നത്. വി എസ് കരിമ്പൂച്ചകളെ മൂന്നാറിലേക്ക് അയച്ച സന്ദര്‍ഭത്തിലും സമാനമായ വെട്ടുകത്തി പ്രസ്താവനകള്‍ അദ്ദേഹം നടത്തിയിട്ടുണ്ട്. പാര്‍ട്ടി യില്‍ പൂര്‍വാധികം ശക്തിയോടെ അദ്ദേഹം പിടിച്ചു നില്‍ക്കുന്നതും ഇത്തരം ധീരമായ സമീപനങ്ങള്‍ കൊണ്ടാണ്.

കൊല്ലുന്ന രാജാവിന് തിന്നുന്ന മന്ത്രി എന്ന് പറഞ്ഞത് പോലെ പാര്‍ട്ടി അജണ്ടയ്ക്കു യോജിച്ച ജില്ലാ സെക്രട്ടറിമാരെത്തന്നെയാണ് സി പി എം നിയോഗിച്ചിട്ടുള്ളത്. ഏതാണ്ട് എല്ലാവര്‍ക്കും ഒരേ ശരീര ഭാഷ. അതില്‍ മണി സാറിന്റെ ശരീര ഭാഷയ്ക്കാവട്ടെ ചോരച്ചെങ്കൊടിയില്‍ മുക്കിയെടുത്ത ക്ലാരിറ്റിയുണ്ട്. ഭാഷ പോലെ തന്നെ മുഖവും പ്രസാദാത്മകമാണ്. നോക്കിയാല്‍ കണ്ണെടുക്കാന്‍ തോന്നില്ല. വി എസിന്റെ വാക്ക് കേട്ട് പോളിറ്റ് ബ്യൂറോ പിണറായി സഖാവിനെ തത്ക്കാലം മാറ്റിനിറുത്താന്‍ തീരുമാനിച്ചാല്‍ സംസ്ഥാന സെക്രട്ടറിയാക്കാന്‍ പറ്റിയ ഒരൊന്നാന്തരം ഉരുപ്പടിയാണ് മണിയണ്ണന്‍. സമകാലിക കേരളത്തിലെ അമ്പത്തൊന്നു വെട്ടിന്റെ സി പി എം രാഷ്ട്രീയത്തിന് ഏറ്റവും അനുയോജ്യനായ സെക്രട്ടറി.

കേരള രാഷ്ട്രീയം അതിന്റെ ചരിത്രത്തിലെ ഏറ്റവും തിളക്കമാര്‍ന്ന ഫാസിസ്റ്റ് വഴികളിലൂടെയാണ് കടന്നു പൊയ്ക്കൊണ്ടിരിക്കുന്നത്. പ്രൈമറി ക്ലാസ്സിലെ കുട്ടികള്‍ക്ക് ടീച്ചര്‍ കണക്കു പഠിപ്പിച്ചു കൊടുക്കുന്ന പോലെ പാര്‍ട്ടി നടത്തിയ കൊലപാതകങ്ങളുടെ കൃത്യമായ പട്ടിക എണ്ണിയെണ്ണിയാണ് ജില്ലാ സെക്രട്ടറി പുറത്തു വിട്ടിരിക്കുന്നത്. വെട്ടിക്കൊന്നവര്‍ ഇത്ര, കുത്തിക്കൊന്നവര്‍ ഇത്ര, വെടിവെച്ചു കൊന്നവര്‍ ഇത്ര. ആനന്ദലബ്ദിക്കിനിയെന്ത് വേണം?. പൌഡറിട്ട് മുഖം മിനുക്കി നടക്കേണ്ട ഒരു ഉപതിരഞ്ഞെടുപ്പിന്റെ ഘട്ടത്തില്‍ പോലും ഇത്ര പരസ്യമായി പ്രസ്താവനകള്‍ നടത്തുവാന്‍ ധൈര്യം നല്‍കുന്ന ഒരു പാര്‍ട്ടി സംവിധാനത്തിലേക്ക് സി പി എമ്മിനെ വളര്‍ത്തിക്കൊണ്ടു വരുന്നതില്‍ പിണറായി സഖാവും ജയരാജത്രയങ്ങളും വിജയിച്ചിരിക്കുന്നു. സഖാവ് ടി പി വധം ആര് നടത്തി എന്ന വിഷയത്തില്‍ ഇനിയും സംശയങ്ങള്‍ ബാക്കി നില്‍ക്കുന്ന മന്ദബുദ്ധികള്‍ക്ക് വേണ്ടിയാണ് എം എം മണി സംസാരിച്ചിരിക്കുന്നത്. മണിയുടെ പ്രസംഗം കേട്ട ശേഷവും സംശയം ബാക്കിയുള്ളവരുണ്ടെങ്കില്‍ അവരെ അടിയന്തിര ശസ്ത്രക്രിയക്കു വിധേയരാക്കണം. കഴിയുമെങ്കില്‍ തലച്ചോറ് പുറത്തെടുത്ത് അതിലല്പം പങ്കജ കസ്തൂരിയെങ്കിലും നിറച്ചു തിരിച്ചു വെക്കണം.

Related Posts
പോളിറ്റ് ബ്യൂറോ, P.O. കണ്ണൂര്‍ സെന്‍ട്രല്‍ ജയില്‍
ജയരാജനെന്താ കൊമ്പുണ്ടോ?
സി പി എം ജയിലിലേക്ക്
ബല്‍റാം 'vs' താരാദാസ്
ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)

പോളിറ്റ് ബ്യൂറോ, P.O. കണ്ണൂര്‍ സെന്‍ട്രല്‍ ജയില്‍

noreply@blogger.com (Basheer Vallikkunnu) — Thu, 24 May 2012 06:20:00 +0000

ആഭ്യന്തര മന്ത്രി തിരുവഞ്ചൂര്‍ രാധാകൃഷ്ണന്‍ കണ്ണൂര്‍ സെന്‍ട്രല്‍ ജയില്‍ സന്ദര്‍ശിച്ചപ്പോള്‍ ആകെ കണ്‍ഫ്യൂഷന്‍ ആയത്രേ!. ഹോട്ടലാണെന്ന് കരുതി ബാര്‍ബര്‍ ഷോപ്പില്‍ കയറിയ പോലെ അല്‍പ നേരത്തേക്ക് ആകെ സ്ഥലകാല വിഭ്രമം. എ കെ ഗോപാലന്‍, ഇ എം സ്, ഇ കെ നായനാര്‍ , സുര്‍ജിത് തുടങ്ങി മരിച്ചു പോയ എല്ലാ പോളിറ്റ് ബ്യൂറോ മെമ്പര്‍മാരുടെയും ഫോട്ടോ ചുമരില്‍ തൂങ്ങിക്കിടക്കുന്നു. അന്തം വിട്ട മന്ത്രി കൂടെയുള്ള ജയില്‍ സൂപ്രണ്ടിനെ സൂക്ഷിച്ചു നോക്കി. "ബാക്കിയുള്ള ഫോട്ടോകള്‍ അടുത്ത റൂമിലുണ്ട് സാര്‍ " വിപ്ലവ നേതാക്കളില്‍ ആരുടെയെങ്കിലും ഫോട്ടോ വിട്ടു പോയതുകൊണ്ടായിരിക്കും മന്ത്രിക്ക് അങ്കലാപ്പ് എന്ന് ധരിച്ച സൂപ്രണ്ട് ഉടനെ അടുത്ത റൂമിലേക്ക്‌ നടന്നു. അവിടെ ദാണ്ടേ കിടക്കുന്നു, വിപ്ലവ പ്രസ്ഥാനത്തിന്റെ തീപ്പന്തം. സാക്ഷാല്‍ പിണറായി സഖാവ്!

ഗാന്ധിജിയുടെ ഫോട്ടോ പല സര്‍ക്കാര്‍ ആപ്പീസുകളിലും തൂക്കിയിടാറുണ്ട്. രാഷ്ട്രപിതാവല്ലേ, ഒരു കളര്‍ ഫോട്ടോ കിടന്നോട്ടെ എന്ന് കരുതി മാത്രമല്ല ഇത് വെക്കുന്നത്. ഓഫീസില്‍ വരുമ്പോള്‍ ഗാന്ധിത്തലയുള്ള നോട്ടുകളുടെ കാര്യം ആരും മറന്നു പോകരുത് എന്ന് കൂടി ആ ഫോട്ടോക്ക് അര്‍ത്ഥമുണ്ട്. കൊലയും കൊള്ളിവെപ്പും നടത്തി സെന്‍ട്രല്‍ ജയിലില്‍ എത്തുന്ന ഗുണ്ടകളുടെ തലയ്ക്കു മുകളില്‍ പോളിറ്റ് ബ്യുറോ നേതാക്കളുടെ ചിത്രം കെട്ടിത്തൂക്കുന്നതിന്റെ ഗുട്ടന്‍സ് എന്താണ്? അതൊരു പ്രതീകാത്മക കെട്ടിത്തൂക്കലാണോ? പിടികിട്ടാ പുള്ളികളുടെ ഫോട്ടോകള്‍ പോലീസ് സ്റ്റേഷനില്‍ പ്രദര്‍ശിപ്പിക്കുന്ന പോലുള്ള വല്ല പരിപാടിയും? അതോ ജയില്‍ അധികാരികള്‍ക്ക് ഗാന്ധിജിയുടെ ഫോട്ടോ കിട്ടാത്തത് കൊണ്ട് പിണറായി സഖാവിനെ വെച്ച് അഡ്ജസ്റ്റ് ചെയ്തതാണോ? കള്ളന്മാരും ഗുണ്ടകളും മാത്രം ഉള്ളിടത്ത് ഗാന്ധിജിക്കെന്തു കാര്യം എന്ന് ചിന്തിച്ചിട്ടാവാനുള്ള സാധ്യതയും തള്ളിക്കളയാനാവില്ല.

ഇയാളെ എവിടെയോ കണ്ടിട്ടുണ്ടല്ലോ?

കഷ്ടകാലം വരുമ്പോള്‍ കൂട്ടത്തോടെ എന്ന് പറഞ്ഞത് പോലെ ഒന്നിന് പിറകെ ഒന്നായി സി പി എം വെട്ടിലാകുന്ന വാര്‍ത്തകളാണ് വന്നു കൊണ്ടിരിക്കുന്നത്. ചെങ്കൊടിയല്ലാതെ മറ്റൊരു കൊടിയും പറപ്പിക്കാന്‍ അനുവാദമില്ലാത്ത പാര്‍ട്ടി ഗ്രാമങ്ങള്‍ കേരളത്തിലുണ്ട്. പക്ഷെ കണ്ണൂര്‍ സെന്‍ട്രല്‍ ജയിലിനകത്തും അത്തരം 'പാര്‍ട്ടി ഗ്രാമങ്ങള്‍' ഉണ്ട് എന്നത് ഞെട്ടിപ്പിക്കുന്ന വിവരമാണ്. ഒറ്റ വെട്ടിനും അമ്പത്തൊന്നു വെട്ടിനും ആളെക്കൊല്ലാന്‍ കഴിയുന്ന ക്വട്ടേഷന്‍ സംഘങ്ങളുടെ നായകന്മാരാണ് ജയിലിനുള്ളിലെ ഈ ഗ്രാമങ്ങളിലെ ഭരണ കര്‍ത്താക്കള്‍ . ജയില്‍ അധികാരികള്‍ അവരുടെ ആജ്ഞകള്‍ അനുസരിക്കുന്ന വെറും പാവകള്‍ മാത്രം. പറയുന്നത് മറ്റാരുമല്ല, മുന്‍ ജയില്‍ ഡി ജി പി തന്നെയാണ്.

പരോളും കാലാവധി തീരുന്നതിനു മുമ്പുള്ള ജയില്‍ മോചനവും നിയന്ത്രിക്കുന്നത്‌ സര്‍ക്കാര്‍ നിയമങ്ങളോ ജയില്‍ വകുപ്പുകളോ അല്ല. മറിച്ച് രാഷ്ട്രീയ നേതാക്കള്‍ അടങ്ങുന്ന ഉപദേശക സമിതികളാണ്. ആരൊക്കെ പരോളില്‍ പോകണം, ആരെയൊക്കെ മോചിപ്പിക്കണം എന്ന് ശുപാര്‍ശ ചെയ്യാന്‍ അധികാരമുള്ള കണ്ണൂര്‍ സെന്‍ട്രല്‍ ജയിലിന്റെ അഡ് വൈസറി കമ്മറ്റിയില്‍ ഉള്ള ഒരാള്‍ പി ജയരാജന്‍ ആണ്!. സഖാവ് ടി പി യെ കൊല്ലാന്‍ ക്വട്ടേഷന്‍ സംഘത്തെ ചുമതലപ്പെടുത്തി എന്ന് പലരും സംശയിക്കുന്ന ഒരു രാഷ്ട്രീയ നേതാവ്. ഇതേ കമ്മറ്റിയില്‍ ഉള്ള മറ്റൊരാള്‍ സി പി എം മുന്‍ കണ്ണൂര്‍ ജില്ല സെക്രട്ടറി പി ശശിയാണ്!. പെണ്ണ് കേസില്‍ പാര്‍ട്ടി പുറത്താക്കിയ അതേ ശശി സഖാവ് തന്നെ. ഇവര്‍ രണ്ടു പേരും അടങ്ങുന്ന സമിതിയാണ് ടി പി വധക്കേസിലെ മുഖ്യ പ്രതിയായ കൊടി സുനിയെ ജയിലില്‍ നിന്ന് തുറന്നു വിടാന്‍ ശുപാര്‍ശ ചെയ്തത്!. ഇതേ കൊടി സുനിയെ പിടിക്കാനാണ് കേരള പോലീസ് മൂന്നാഴ്ചയായി തെക്ക് വടക്ക് ഓടുന്നത്!!.

മലയാളം ന്യൂസ്‌ - 24 May 2012

ചന്ദ്രിക - 25 May 2012

ഇത്രയൊക്കെ സംഭവ വികാസങ്ങള്‍ കേരളത്തില്‍ നടന്നിട്ടും ഡി വൈ എഫ് ഐ യുടെയോ എസ് എഫ് ഐയുടെയോ ഒരു പൊടി പോലും കാണുന്നില്ല എന്നതാണ് എന്നെ അത്ഭുതപ്പെടുത്തുന്നത്. ബ്രാഞ്ച് കമ്മറ്റിയില്‍ നിന്ന് തുടങ്ങിയ അറസ്റ്റ് ഇപ്പോള്‍ ഏരിയ കമ്മറ്റി വരെ എത്തിനില്‍ക്കുന്നു. സി പി എം ഒഞ്ചിയം ഏരിയ സെക്രട്ടറി സി എച്ച് അശോകനാണ് അവസാനം അറസ്റ്റില്‍ ആയത്. ഒരു സഖാവിനെ പച്ചക്ക് വെട്ടിക്കൊന്ന കേസില്‍ ഇത്രയൊക്കെ കോലാഹലങ്ങള്‍ ഉണ്ടായിട്ടും യുവ തുര്‍ക്കികള്‍ നിദ്രയിലാണ്. ഒരു പാര്‍ട്ടി ഓഫീസിനു നേരെ കല്ലേറുണ്ടായാല്‍ പോലും തെരുവില്‍ യുദ്ധാന്തരീക്ഷം സൃഷ്ടിക്കാറുള്ള ഇവര്‍ ഇപ്പോള്‍ പാലിക്കുന്ന മൗനത്തെ നാം എന്ത് പേരിട്ടു വിളിക്കും. കൊല നടന്ന ഉടനെ ജില്ലാസെക്രട്ടറി ചൈനയില്‍ പോയത് പോലെ ഇവന്മാരൊക്കെ കൂട്ടമായി പോളണ്ടിലേക്ക് പോയോ?.

കള്ളന്മാരും കൊലയാളികളും സുഖവാസത്തിനു പോകുന്ന കേന്ദ്രമായി കണ്ണൂര്‍ ജയിലിനെ മാറ്റിയെടുത്തവര്‍ ആരായാലും അവര്‍ ഈ രാജ്യത്തിന്റെ നിയമ വ്യവസ്ഥയുടെ ശത്രുക്കളാണ്. നിയമം അപ്പൂപ്പന്‍ താടി പോലെ കാറ്റില്‍ പറന്നു പോകുന്ന ഈ ജയിലിനുള്ളിലെ സ്ഥിതിഗതികള്‍ മെച്ചപ്പെടുത്താന്‍ മൊബൈല്‍ ജാമറുകളും ക്യാമറകളും സ്ഥാപിക്കുമെന്നാണ് അഭ്യന്തര മന്ത്രി പറയുന്നത്. അത് നല്ല കാര്യം തന്നെ. പക്ഷേ ഒരു മൊബൈല്‍ ജാമറും ക്യാമറയും കൊണ്ട് തീര്‍ക്കാവുന്ന പ്രശ്നങ്ങളാണോ ഈ ജയിലിനുള്ളിലുള്ളത്?. ഒരിക്കലുമല്ല. സര്‍ക്കാര്‍ അടിയന്തിരമായി ചെയ്യേണ്ടത് സ്പെഷ്യല്‍ പോലീസിനെയോ അതല്ലെങ്കില്‍ പട്ടാളത്തേയോ കൊണ്ട് വന്നു ജയില്‍ ഭരണം നടത്തിക്കുകയാണ്. അതിനു സര്‍ക്കാരിന് ത്രാണിയില്ല എങ്കില്‍ പിന്നെ ചെയ്യാന്‍ കഴിയുന്ന ഏക കാര്യം സി പി എം കണ്ണൂര്‍ ജില്ലാ കമ്മറ്റിക്ക് സെന്‍ട്രല്‍ ജയില്‍ വാടകയ്ക്ക് കൊടുത്ത് താക്കോല്‍ ഏല്പിക്കുകയാണ്‌. Latest update ക്വട്ടേഷന്‍ മണി സ്പീക്കിംഗ്

Related Posts
ജയരാജനെന്താ കൊമ്പുണ്ടോ?
സി പി എം ജയിലിലേക്ക്
ബല്‍റാം 'vs' താരാദാസ്
ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)

ജയരാജനെന്താ കൊമ്പുണ്ടോ?

noreply@blogger.com (Basheer Vallikkunnu) — Mon, 21 May 2012 08:03:00 +0000

സി പി എം തീപ്പന്തമാകാന്‍ പോവുകയാണത്രെ! ജയരാജനെ തൊട്ടാല്‍ തൊട്ടവനെ തട്ടും എന്നാണ് ഭീഷണി. അടിപിടി സിനിമകളില്‍ വടിവാളുമായി ചന്തയില്‍ ഇറങ്ങി വെല്ലുവിളിക്കുന്ന തെരുവ് ഗുണ്ടകളുടെ ഭാഷയിലും ശൈലിയിലുമാണ് സഖാവ് ടി പി വധം അന്വേഷിക്കുന്ന പോലീസ് ഉദ്യോഗസ്ഥന്‍മാരെ സി പി എം നേതാക്കള്‍ വിരട്ടുന്നത്. ഞങ്ങളുടെ നേതാക്കളെ തൊട്ടാല്‍ പാര്‍ട്ടി ഒരു തീപ്പന്തമായി ആളിക്കത്തും എന്ന സഖാവ് പിണറായിയുടെ പ്രസ്താവന കേട്ടപ്പോള്‍ കീരിക്കാടന്‍ ജോസിനെയാണ് എനിക്കോര്‍മ വന്നത്. വളരെ സിമ്പിള്‍ ആയ ഒരു സ്ട്രാറ്റജിയാണ് കീരിക്കാടന്‍മാര്‍ക്കുള്ളത്‌. കയ്യില്‍ കോപ്പുണ്ടായാലും ഇല്ലെങ്കിലും ആളുകളെ പേടിപ്പിച്ചു നിറുത്തുക. ആര്‍ക്കും കാണാന്‍ പാകത്തില്‍ ഒരു കത്തി അരയില്‍ തിരുകി ചന്തയില്‍ ഇറങ്ങി വെറുതെ ഒന്ന് മീശ പിരിച്ചാല്‍ തന്നെ ഒരുമാതിരിപ്പെട്ട ആളുകളൊക്കെ അതില്‍ വീഴും. അയാളുടെ അരയില്‍ ഉള്ളതിന്റെ രണ്ടിരട്ടി വലിപ്പമുള്ള കത്തി ചന്തയിലെ കടകളില്‍ തൂങ്ങിക്കിടപ്പുണ്ടാകും. പക്ഷേ ആ മീശ പിരിക്കല്‍ ഉണ്ടാക്കിയ ഭയം കാരണം ഒരാളും കീരിക്കാടനുമായി ഏറ്റുമുട്ടാന്‍ തയ്യാറാകില്ല.

സഖാവ് പിണറായി വിജയന്‍ ഇപ്പോള്‍ പോലീസിനു നേരെ പ്രയോഗിക്കുന്നത് ഈ കീരിക്കാടന്‍ തന്ത്രം തന്നെയാണ്. മീശ പിരിച്ചു പോലീസിനെ വിറപ്പിച്ചു നിറുത്തുക. കൊലപാതകം അന്വേഷിക്കുന്ന പോലീസുകാര്‍ക്ക് കൃത്യമായ ഒരു ലക്ഷമണ രേഖ വരച്ചു കൊടുക്കുകയാണ് സഖാവ്. ആരെയൊക്കെ അറസ്റ്റ് ചെയ്യാം ആരെയൊക്കെ അറസ്റ്റ് ചെയ്യാന്‍ പാടില്ല എന്ന്. അന്വേഷണമൊക്കെ നടത്തിക്കോളൂ പക്ഷേ പാര്‍ട്ടി നേതാക്കളെ തൊട്ടുകളിച്ചാല്‍ വിവരം അറിയും എന്ന മുന്നറിയിപ്പ്. കണ്ണൂരില്‍ മൂന്ന് ജയരാജന്‍മാരുണ്ട്. അതില്‍ ഒരു ജയരാജനിലേക്കും അന്വേഷണം നീളാന്‍ പാടില്ല. സംശയമുണ്ടെങ്കില്‍ പോലും അവരെ വിളിച്ചു വരുത്താനോ ചോദ്യം ചെയ്യാനോ പാടില്ല. സിനിമ കാണുന്നവര്‍ക്കൊക്കെ അറിയാം, കീരിക്കാടനെപ്പോലെ അത്യാവശ്യം നിലവാരമുള്ള വില്ലന്മാര്‍ ഒരു സംഘട്ടന രംഗത്തും ആദ്യമേ ചാടി വീഴില്ല എന്ന്. തുടക്കത്തിലെ പ്രശ്നങ്ങള്‍ കൈകാര്യം ചെയ്യാന്‍ അസിസ്റ്റന്ടുമാരെ അയക്കുകയാണ് പതിവ്. ചോദ്യം ചെയ്യുന്നതിന് വേണ്ടി പോലീസ് അറസ്റ്റ് ചെയ്ത കൂത്തുപറമ്പ് ഏരിയ കമ്മറ്റി ഓഫീസ് സെക്രട്ടറി സി ബാബുവിനെ സമ്മര്‍ദ്ധ തന്ത്രം ചെലുത്തി മോചിപ്പിക്കാന്‍ എം വി ജയരാജനെ എല്പിക്കുകയാണ് സഖാവ് പിണറായി ചെയ്തത്. പരല്‍ മീനുകള്‍ക്കപ്പുറം വമ്പന്‍ സ്രാവുകള്‍ക്ക് ഈ കൊലപാതകത്തിലുള്ള പങ്ക് വെളിപ്പെടുന്നവിധം നിര്‍ണായക വിവരങ്ങള്‍ നല്‍കാന്‍ കഴിയും എന്ന് പോലീസ് സംശയിക്കുന്ന ഒരാളാണ് പാര്‍ട്ടി ഓഫീസിലെ സെക്രട്ടറി.അയാളെയാണ് പേനാക്കത്തി കാട്ടി അസിസ്റ്റന്റ്‌ പോയി മോചിപ്പിച്ചു കൊണ്ട് വന്നത്.

സി പി എം അതിന്റെ സമീപകാല ചരിത്രത്തില്‍ ഇത്രയധികം ഒറ്റപ്പെട്ട ഒരു സംഭവം ഉണ്ടായിട്ടില്ല. സഖാവ് ടി പി ചന്ദ്രശേഖരന്റെ കൊല പാര്‍ട്ടി തീരുമാനം ആയിരുന്നു എന്നത് ഇന്ന് പകല്‍പോലെ വ്യക്തമാണ്. അന്വേഷണവുമായി ബന്ധപ്പെട്ട് പുറത്തു വരുന്ന റിപ്പോര്‍ട്ടുകളൊക്കെ സൂചിപ്പിക്കുന്നത് അതാണ്‌. പാര്‍ട്ടിയുമായി പിണങ്ങിപ്പിരിഞ്ഞ ഒരു സഖാവിനെ അമ്പത്തി രണ്ടു വെട്ടുകള്‍ വെട്ടി ക്രൂരമായി കൊന്ന ശേഷം കൊലയാളികളെ സംരക്ഷിച്ചു നിറുത്തുവാന്‍ ഒരു പാര്‍ട്ടി ശ്രമിക്കുന്നുവെങ്കില്‍ ആ സമീപനം എത്രമാത്രം ജനവിരുദ്ധമാണ്? കോണ്ഗ്രസ്സുകാര്‍ പത്തുകൊല്ലം എല്ലുമുറിയെ പണിയെടുത്താല്‍ കിട്ടാത്ത സി പി എം വിരുദ്ധ തരംഗമാണ് കഴിഞ്ഞ പത്തു ദിവസം കൊണ്ട് സി പി എം നേതാക്കള്‍ സ്വയം ഉണ്ടാക്കിയിരിക്കുന്നത്. പൊതുജനത്തിന്റെ മനസ്സ് വായിക്കാന്‍ കഴിയാത്ത ഈ മുരടന്‍ നേതൃത്വം പതിനായിരങ്ങള്‍ വിയര്‍പ്പും ജീവനും നല്‍കി വളര്‍ത്തിയെടുത്ത ഒരു വലിയ പ്രസ്ഥാനത്തെ കുരുതി കൊടുക്കുകയാണ്. ജനങ്ങളുടെ പള്‍സ് നോക്കി പ്രതികരിക്കുന്നതില്‍ മഹാവിരുതനായ സഖാവ് വി എസ് ഇത് തിരിച്ചറിഞ്ഞു തുടങ്ങിയിട്ടുണ്ട്. പിണറായി പാര്‍ട്ടി സെക്രട്ടറി സ്ഥാനം ഒഴിഞ്ഞേ തീരൂ എന്ന അദ്ദേഹത്തിന്റെ പുതിയ നിലപാട് ഇത്തരമൊരു പാശ്ചാത്തലത്തില്‍ വേണം വായിച്ചെടുക്കാന്‍. ക്വട്ടേഷന്‍ സംഘത്തിനു വേണ്ടി തീപ്പന്തമായി ആളിക്കത്താന്‍ എന്നെക്കിട്ടില്ല എന്ന് തന്നെയാണ് വി എസ് പറഞ്ഞിരിക്കുന്നത്.

എന്തിനാണ് സി പി എം ഗുണ്ടാ രാഷ്ട്രീയത്തിലേക്ക് നീങ്ങുന്നത്‌? ഉത്തരം കിട്ടാത്ത ചോദ്യമാണത്. സി പി എമ്മിനെപ്പോലൊരു ജനകീയ പ്രസ്ഥാനത്തിന് നിലനില്‍ക്കാന്‍ ഗുണ്ടകളുടെയും ക്വട്ടേഷന്‍ സംഘങ്ങളുടെയും പിന്തുണ ആവശ്യമുണ്ടോ? ജയിലുകളില്‍ യൂനിറ്റുണ്ടാക്കിയാല്‍ ഒരു പാര്‍ട്ടി കോണ്‍ഗ്രസ്‌ ചേരാനുള്ള മെമ്പര്‍മാര്‍ കണ്ണൂര്‍ സെന്‍ട്രല്‍ ജയിലില്‍ നിന്ന് തന്നെ സി പി എമ്മിന് കിട്ടും. അത്രമാത്രം രാഷ്ട്രീയ കൊലയാളികളും തടവ്‌ പുള്ളികളുമാണ് പാര്‍ട്ടിയുടെ സംരക്ഷണത്തില്‍ ജയിലുകളില്‍ കഴിയുന്നത്‌. ഇത്തരം തടവ്‌ പുള്ളികള്‍ ജയിലുകളിലെ വി ഐ പി കള്‍ ആണെന്നും അവരെ തൊടാന്‍ ആര്‍ക്കും ധൈര്യമില്ലെന്നും മുന്‍ ജയില്‍ ഡി ജി പി യായിരുന്ന എം ജി എ രാമന്‍ പറയുകയുണ്ടായിട്ടുണ്ട്‌. ജീവനില്‍ പേടിയുള്ള ജയില്‍ വാര്‍ഡന്മാര്‍ ഇത്തരം തടവുപുള്ളികള്‍ ഉള്ള ഭാഗത്തേക്ക് തന്നെ പോകില്ല എന്നും അവര്‍ എന്താവശ്യപ്പെട്ടാലും നിവൃത്തി കേടു കൊണ്ട് അത് സാധിപ്പിച്ചു കൊടുക്കാന്‍ തയ്യാറാകുന്ന ദുരവസ്ഥയുണ്ടെന്നും അദ്ദേഹം തുറന്നു പറയുകയുണ്ടായി. നമ്മുടെ നിയമ സംവിധാനങ്ങളെപ്പോലും പാര്‍ട്ടി യന്ത്രങ്ങള്‍ എങ്ങിനെ കീഴടക്കിയിരിക്കുന്നു എന്നതിന്റെ പ്രത്യക്ഷമായ തെളിവാണ് സെന്‍ട്രല്‍ ജയിലുകളില്‍ പോലുമുള്ള പാര്‍ട്ടി ആധിപത്യം.

മലയാളം ന്യൂസ്‌ 21 May 2012

ഗുണ്ടകളുടെ സഹായം ഇല്ലാതെ തന്നെ കേരള രാഷ്ട്രീയത്തില്‍ പിടിച്ചു നില്‍ക്കാന്‍ കഴിയുന്ന പാര്‍ട്ടിയാണ് സി പി എം. ജനഹൃദയങ്ങളില്‍ നിറഞ്ഞു നിന്ന മഹാ നേതാക്കളും രക്തസാക്ഷികളും വളര്‍ത്തിയെടുത്ത പാര്‍ട്ടിയാണത്. കേരളത്തിന്റെ മണ്ണില്‍ ഇനിയും വളരാന്‍ കഴിയും വിധം ഒരു ജനപക്ഷ ആശയാടിത്തറ അവര്‍ക്കുണ്ട്. സമീപനങ്ങളില്‍ ഒരു ഇടതുപക്ഷ മനസ്സ് കാത്തുസൂക്ഷിക്കുന്ന ലക്ഷക്കണക്കിന്‌ ജനങ്ങള്‍ കേരളത്തിലുണ്ട് എന്നത് യാഥാര്‍ത്ഥ്യമാണ്. അവരെയെല്ലാം ഒറ്റയടിക്ക് ഇടതു വിരുദ്ധരാക്കാനുള്ള ഭഗീരഥ യത്നത്തിലാണ് സി പി എം സംസ്ഥാന സെക്രട്ടറിയും ജയരാജന്‍മാരും ഇന്ന് ഏര്‍പ്പെട്ടിട്ടുള്ളത്. സഖാവ് ടി പി വധത്തില്‍ ഏതെങ്കിലും ഒരു ജയരാജന് പങ്കുണ്ടെങ്കില്‍ അയാളെ പോലീസ് അറസ്റ്റ് ചെയ്യുന്നതിന് മുമ്പ് പാര്‍ട്ടിയാണ് 'അറസ്റ്റ്' ചെയ്യേണ്ടത്. ജനപക്ഷത്തു നില്‍ക്കുന്ന ഉത്തരവാദിത്വമുള്ള ഒരു പാര്‍ട്ടി സ്വീകരിക്കേണ്ട സമീപനം അതാണ്‌. മറിച്ച് പോലീസിനെയും സര്‍ക്കാരിനെയും ഒരു കലാപത്തിന്റെ മുന്നറിയിപ്പ് നല്‍കി പേടിപ്പിച്ചു നിറുത്തുന്നത് ഏറ്റവും ചുരുങ്ങിയ വാക്കില്‍ പറഞ്ഞാല്‍ ഗുണ്ടായിസമാണ്.

മ്യാവൂ: കണ്ണൂര്‍ സെന്‍ട്രല്‍ ജയിലില്‍ സി പി എം തടവുകാര്‍ ഉപയോഗിക്കുന്ന 'പ്രത്യേക' സ്ഥലം അഭ്യന്തര മന്ത്രി സന്ദര്‍ശിച്ചു. അവിടെ തൂക്കിയ സി പി എം നേതാക്കളുടെ ചിത്രങ്ങള്‍ മാറ്റുവാന്‍ ജയില്‍ അധികാരികള്‍ക്ക് നിര്‍ദ്ദേശം നല്‍കി - വാര്‍ത്ത‍ (കണ്ണൂര്‍ സെന്‍ട്രല്‍ ജയിലിനു സി പി എം സംസ്ഥാന കമ്മറ്റി ഓഫീസ് എന്ന് പേര് മാറ്റേണ്ടി വരുമോ?) Latest update പോളിറ്റ് ബ്യൂറോ, P.O. കണ്ണൂര്‍ സെന്‍ട്രല്‍ ജയില്‍

Related Posts
സി പി എം ജയിലിലേക്ക്
ബല്‍റാം 'vs' താരാദാസ്
ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)

സി പി എം ജയിലിലേക്ക്

noreply@blogger.com (Basheer Vallikkunnu) — Thu, 17 May 2012 06:29:00 +0000

സി പി എമ്മിന്റെ ജയിലിലേക്കുള്ള പോക്ക് ഉറപ്പായിക്കഴിഞ്ഞു. ഒഞ്ചിയം രക്തസാക്ഷികളുടെ മണ്ണില്‍ അവര്‍ നടപ്പിലാക്കിയ തലവെട്ടു രാഷ്ട്രീയത്തിന്റെ ചുരുളുകള്‍ അഴിഞ്ഞു തുടങ്ങി. ഇപ്പോള്‍ ചിത്രം കുറേക്കൂടി വ്യക്തമാണ്. സഖാവ് ടി പി വെട്ടേറ്റു വീണപ്പോള്‍ ക്വട്ടേഷന്‍ സംഘത്തിലേക്കാണ് പോലീസ് നായ ആദ്യം മണം പിടിച്ചു ഓടിയത്. ചോര മണക്കുന്ന വഴിയിലൂടെ നായ പിന്നീട് ഓടിക്കയറിയത് ലോക്കല്‍ കമ്മറ്റിയിലേക്ക്. ഇപ്പോഴിതാ നേരെ ഏരിയ കമ്മറ്റി ഓഫീസിലേക്കും നായ ചാടിക്കയറിയിരിക്കുന്നു. ഇനി ചാടാന്‍ ബാക്കിയുള്ളത് ജില്ല കമ്മറ്റി ഓഫീസും എ കെ ജി സെന്ററും മാത്രമാണ്. ഒരു കൊലപാതകം സി പി എം പോലൊരു പാര്‍ട്ടിയെ ഇത്രമേല്‍ വിറപ്പിച്ചു നിര്‍ത്തുമെന്ന് ആരും പ്രതീക്ഷിച്ചതല്ല.

കൊലപാതകത്തിനു ഉപയോഗിച്ച കാറില്‍ "മാഷാ അല്ലാഹ്" എന്ന സ്റ്റിക്കര്‍ ഒട്ടിച്ചു സി പി എം കളിക്കാന്‍ ശ്രമിച്ചത് വളരെ അപകടകരമായ രാഷ്ട്രീയമാണ്. പോലീസ് ആ സ്റ്റിക്കറിന് പിന്നില്‍ അന്വേഷണം അവസാനിപ്പിച്ചു റിപ്പോര്‍ട്ട്‌ നല്‍കിയിരുന്നുവെങ്കില്‍ അബ്ദുല്‍ നാസര്‍ മഅദനിക്ക് ഒരു ഇരുപതു വര്‍ഷം കൂടി കര്‍ണാടകയിലെ ജയിലില്‍ തന്നെ താങ്ങുവാന്‍ വകുപ്പുണ്ടാകുമായിരുന്നു. തൊഴിലാളി വര്‍ഗ്ഗസമരങ്ങളുടെയും ജനപക്ഷ രാഷ്ട്രീയത്തിന്റെയും പാതയില്‍ നിന്ന് വിട്ടു മാറി നരേന്ദ്ര മോഡി പരീക്ഷിച്ചു വിജയിച്ച 'എന്‍കൌണ്ടര്‍ ഭീകരത' യുടെ രാഷ്ട്രീയം രുചിച്ചു നോക്കാനുള്ള ഒരു ശ്രമമാണ് സി പി എമ്മിന്റെ കണ്ണൂര്‍ ലോബി നടത്തിയത്.

സഖാവ് ടി പി തന്റെ രക്തം കൊണ്ടാണ് കപാലികരോട് മറുപടി പറഞ്ഞതെങ്കില്‍ ടി പിയുടെ ഭാര്യ രമ ഭര്‍ത്താവ് പകര്‍ന്നു നല്‍കിയ മനക്കരുത്ത് കൊണ്ടാണ് മറുപടി നല്‍കിയത്. "ചന്ദ്രശേഖരന്റെ ഭാര്യയാണ് ഞാന്‍, പതറില്ല.. പതറാന്‍ പാടില്ല. മരിക്കുന്നത് വരെ പോരാട്ടം തുടരും" രമ പറഞ്ഞ വാക്കുകള്‍ ഏതെങ്കിലും സഖാവിന്റെ ഉറക്കം കെടുത്തുമോ എന്നറിയില്ല. പക്ഷെ ഒന്നുണ്ട്, അവര്‍ തുറന്നു പറഞ്ഞ പല സത്യങ്ങളും സി പി എം എന്ന പാര്‍ട്ടിയുടെ ജനവിരുദ്ധ സമീപനങ്ങള്‍ക്കുള്ള മുദ്ര പതിച്ച സര്‍ട്ടിഫിക്കറ്റാണ്. ഭര്‍ത്താവിനെ കൊന്നാല്‍ ഭാര്യ തലതല്ലിക്കരഞ്ഞു ജീവിതം ഒടുക്കിക്കൊള്ളും എന്ന് കരുതിയവര്‍ക്ക് കിട്ടിയ ചെകിടത്തടിയാണ്. ഗൂഡാലോചന പ്രാദേശിക തലത്തില്‍ മാത്രമല്ല എന്നും അത് സംസ്ഥാന തലം വരെ പോയിട്ടുണ്ടെന്നും രമ ഉറപ്പിച്ചു പറയുന്നു. ഇപ്പോള്‍ പിടിയിലായ ചന്ദ്രശേഖരന്റെ വളരെ അടുത്ത സുഹൃത്തായിരുന്ന പ്രാദേശിക നേതാവിന് ആസൂത്രണം ചെയ്യാന്‍ കഴിയുന്ന ഒരു കൊലപാതകമല്ല ഇതെന്ന് മനസ്സിലാക്കാന്‍ വലിയ ബുദ്ധിയൊന്നും വേണ്ട. "മാഷാ അല്ലാഹ്" എന്ന സ്റ്റിക്കര്‍ ഒട്ടിക്കാന്‍ കാണിച്ച ബുദ്ധിയുടെ പത്തിലൊന്ന് മതി. കൊലപാതകം നടത്തി ഒളിത്താവളത്തില്‍ എത്തി വേഷംമാറിയ ശേഷം ആദ്യം പോയത് കൂത്തുപറമ്പിലെ സി പി എം ഏരിയ കമ്മറ്റി ഓഫീസിലേക്കാണെന്ന അറസ്റ്റിലായ പ്രതിയുടെ മൊഴി സി പി എം നേതൃത്വത്തിന്റെ അണ്ണാക്കില്‍ കുടുങ്ങിക്കിടക്കുകയാണ്. "ചന്ദ്രശേഖരനുമായി വ്യക്തിപരമായി വിരോധമൊന്നും ഇല്ല, നടപ്പിലാക്കിയത് പാര്‍ട്ടി തീരുമാനമാണ് കൊന്നതില്‍ സങ്കടമുണ്ട്" പിടിയിലായ സി പി എം ഓര്‍ക്കാട്ടേരി ലോക്കല്‍ കമ്മറ്റി അംഗം രവീന്ദ്രന്‍ അന്വേഷണ ഉദ്യോഗസ്ഥന്മാരോട് തുറന്നു പറഞ്ഞതായി റിപ്പോര്‍ട്ടുകള്‍ ഉണ്ട്.

രക്തസാക്ഷി ദിനത്തില്‍ നടന്ന പ്രകടനത്തില്‍ പോലും 'ചന്ദ്രശേഖരനെ വെള്ള പുതപ്പിച്ചു കിടത്തും' എന്ന് മുദ്രാവാക്യം വിളിച്ച പാര്‍ട്ടിയല്ലാതെ മറ്റാരുമല്ല തന്റെ ഭര്‍ത്താവിനെ കൊന്നതെന്ന രമയുടെ വാക്കുകളെ അക്ഷരം പ്രതി ശരിപ്പെടുത്തുന്നതാണ് ഇപ്പോള്‍ വന്നു കൊണ്ടിരിക്കുന്ന റിപ്പോര്‍ട്ടുകള്‍. ജീവിച്ചിരുന്ന ചന്ദ്രശേഖരെനേക്കാള്‍ സി പി എമ്മിന് അപകടം വരുത്തുക മരിച്ചു കഴിഞ്ഞ ചന്ദ്രശേഖരന്‍ ആണെന്നും ടി വി ചാനലുകള്‍ക്ക് നല്‍കിയ അഭിമുഖത്തില്‍ രമ പറഞ്ഞിട്ടുണ്ട്. അതിന്റെ ലക്ഷണങ്ങള്‍ കണ്ണൂര്‍ കോഴിക്കോട് ജില്ലകളില്‍ ഇപ്പോള്‍ തന്നെ കണ്ടുതുടങ്ങിയിട്ടുണ്ട്. രാഷ്ടീയ പ്രതിയോഗികളെ അമര്‍ച്ച ചെയ്യാന്‍ ഇത്തരം കൊലപാതകങ്ങള്‍ക്ക് ക്വട്ടേഷന്‍ കൊടുക്കുന്നതിനു മുമ്പ് രണ്ടു വട്ടം ആലോചിക്കുവാന്‍ ഇനി ഏതൊരു പാര്‍ട്ടിയും - സി പി എമ്മായാലും കോണ്‍ഗ്രസ്സായാലും - തയ്യാറാവേണ്ടി വരും.

കിട്ടിയ ചാന്‍സിന് വടകരയില്‍ പരല്‍മീനുകളെ പിടിക്കാന്‍ ഇറങ്ങിയിരിക്കുന്ന രമേശ്‌ ചെന്നിത്തലയുടെ ഉപവാസപ്പന്തലില്‍ കിടന്നു കറങ്ങുന്നതിനു പകരം മുഖ്യമന്ത്രിയും അഭ്യന്തരമന്ത്രിയും ചെയ്യേണ്ടത് അന്വേഷണം ഊര്‍ജ്ജിതപ്പെടുത്താനുള്ള ശ്രമങ്ങള്‍ക്ക് നേതൃത്വം കൊടുക്കുകയാണ്. ഒരു ദിവസം ഉപവാസം കിടന്നാല്‍ ചെന്നിത്തലക്ക് അരക്കിലോ തൂക്കം കൂടിക്കിട്ടിയേക്കും. കൊലപാതക രാഷ്ട്രീയത്തിന് കോണ്‍ഗ്രസും ചെറുതല്ലാത്ത സംഭാവനകള്‍ നല്‍കിയിട്ടുണ്ട്. ആ മഹത്തായ സംഭാവനകളെ ഒരു ഉപവാസം കൊണ്ട് മായ്ച്ചു കളയാനാവില്ല. വാഴ വെട്ടാന്‍ പറ്റിയ സമയത്ത് അത് ചെയ്യുന്ന ഒരു സാധാരണ രാഷ്ട്രീയക്കാരന്റെ അഭ്യാസങ്ങള്‍ മാത്രമാണ് ചെന്നിത്തലയും കളിക്കുന്നത്.

കൊലപാതക രാഷ്ട്രീയത്തിനെതിരെ കേരളക്കര ഇന്നോളം കണ്ടിട്ടുള്ളതില്‍ വെച്ച് ഏറ്റവും വലിയ ജനവികാരമാണ് ഇപ്പോള്‍ ഉയര്‍ന്നു വന്നിരിക്കുന്നത്. സഖാവ് ടി പി തന്റെ ചോരയിലൂടെ കേരളത്തിനു നല്‍കിയിരിക്കുന്ന സന്ദേശം വളരെ വലുതാണ്‌. "ഇനിയൊരു പാര്‍ട്ടിയും കൊലക്കത്തിയുടെ രാഷ്ട്രീയം കളിക്കരുത്. അതിനു മാത്രമുള്ള പാഠം അവര്‍ എന്റെ രക്തത്തില്‍ നിന്നും പഠിച്ചിരിക്കണം". ടി പി തന്റെ ചോര കൊണ്ടെഴുതിയ വാക്കുകള്‍ സി പി എമ്മിന്റെ മാത്രമല്ല, കൊലക്കത്തി കൊണ്ട് കൊടി പറപ്പിക്കാം എന്ന് കരുതുന്ന എല്ലാ രാഷ്ട്രീയക്കര്‍ക്കുമുള്ള പാഠമാണ്. 'കുലംകുത്തി'യായ ഒരു സഖാവിനെ കഷണം കഷണമായി വെട്ടിനുറുക്കിയാല്‍ പാര്‍ട്ടി ശക്തിപ്പെടും എന്ന് കണക്കു കൂട്ടിയ മനുഷ്യപ്പിശാചുക്കളെ - അവര്‍ എത്ര വലിയ നേതാവായിരുന്നാലും ശരി - എത്രയും പെട്ടെന്ന് ജയിലഴിക്കുള്ളില്‍ എത്തിക്കുക എന്നതാണ് കേരളക്കരയുടെ പൊതുമനസ്സ് ആവശ്യപ്പെടുന്നത്.

Related Posts
ബല്‍റാം 'vs' താരാദാസ്
ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)

ബല്‍റാം 'vs' താരാദാസ്

noreply@blogger.com (Basheer Vallikkunnu) — Sun, 13 May 2012 06:12:00 +0000

പൊരിഞ്ഞ സ്റ്റണ്‍ഡ് തുടങ്ങിക്കഴിഞ്ഞു. ബല്‍റാമും താരാദാസും അത്യുഗ്രന്‍ ഫോമിലായതിനാല്‍ ആര് ജയിക്കും ആര് തോല്‍ക്കും എന്ന് ഇപ്പോള്‍ പറയുക വയ്യ. കാണികളായ നമ്മുടെ കടമ രണ്ടു പേരെയും പരമാവധി പ്രോത്സാഹിപ്പിക്കുക എന്നുള്ളതാണ്. ഒരു ഗോദയുടെ പ്രാഥമിക നിയമം അതാണ്‌. കിടിലന്‍ പ്രകടനം ആര് കാഴ്ച വെച്ചാലും അയാള്‍ക്ക്‌ സപ്പോര്‍ട്ട് കൊടുക്കണം. ഇന്നലത്തെ പത്രസമ്മേളനത്തില്‍ ബല്‍റാം താരാദാസിനെ പുഷ്പം പോലെ മലര്‍ത്തിയടിച്ചു എന്നത് സത്യമാണ്. അതിനൊരു കയ്യടി അപ്പോള്‍ തന്നെ കൊടുത്തിട്ടുണ്ട്. ഞൊണ്ടി ഞൊണ്ടിയാണെങ്കിലും താരാദാസ് ഒരുവിധത്തില്‍ എഴുന്നേറ്റു വന്നിട്ടുണ്ട്. ഇനി പുള്ളിയുടെ പെര്‍ഫോമന്‍സ് കണ്ട ശേഷമേ ബാക്കി പറയാന്‍ പറ്റൂ.

വി എസ് ഈ അടുത്ത കാലത്ത് പൊട്ടിച്ചിട്ടുള്ളതില്‍ വെച്ച് ഏറ്റവും വലിയ ബോംബാണ് ഇന്നലെത്തേത്. ശക്തിയും വീര്യവും വെച്ചു നോക്കിയാല്‍ ഹിരോഷിമയില്‍ അമേരിക്ക പൊട്ടിച്ച ബോംബിന്റെ ഏതാണ്ട് ഒരളിയനായി വരും ഇത്. അഭിപ്രായ സ്വാതന്ത്ര്യത്തെ അടിച്ചമര്‍ത്തുകയും പാര്‍ട്ടിയെ ജനവിരുദ്ധ പക്ഷത്തു നിറുത്തി പിളര്‍പ്പ് ക്ഷണിച്ചു വരുത്തുകയും ചെയ്ത ഡാങ്കേയോടാണ് പിണറായി വിജയനെ വി എസ് ഉപമിച്ചത്. വിജയന് ഡാങ്കേയുടെ ഗതി വരുമെന്ന് സൂചിപ്പിക്കാനും വി എസ് മറന്നില്ല. സി പി എം സ്പോന്‍സര്‍ ചെയ്ത ടി പി ചന്ദ്രശേഖരന്റെ അറുംകൊല കേരളത്തിലുണ്ടാക്കിയ പൊതുവികാരമെന്തെന്ന് വി എസ് തിരിച്ചറിയുകയും താരാദാസിനെ അടിച്ചു വീഴ്ത്താനുള്ള ഒരു അവസരമായി അതിനെ ഉപയോഗപ്പെടുത്തുകയും ചെയ്തു എന്ന് പറയുന്നതാകും ശരി. കിട്ടുന്ന ഗ്യാപ്പിലൊക്കെ തരാദാസിന്റെ മൂക്കിനു ഇടിക്കുക എന്ന മിനിമം പരിപാടിയില്‍ ഒട്ടും വിട്ടുവീഴ്ച ചെയ്യുന്ന ആളല്ല വി എസ് എന്ന ബല്‍റാം.

കഴിഞ്ഞ ഒരു പതിറ്റാണ്ട് കാലമായി സഖാവ് പിണറായി ഒട്ടും മുടങ്ങാതെ ചെയ്തുകൊണ്ടിരിക്കുന്ന ഒരു വലിയ ദൗത്യമുണ്ട്. വി എസ്സിന് കയ്യടി കിട്ടാനുള്ള സാഹചര്യങ്ങള്‍ ഒരുക്കിക്കൊടുക്കുക എന്നുള്ളതാണത്. ടി പി ചന്ദ്രശേഖരനെ കൊന്നത് ആരാണെന്നും ആ കൊലയാളികളെ പറഞ്ഞു വിട്ടത് ആരാണെന്നും കൃത്യമായ ധാരണ പാര്‍ട്ടി സെക്രട്ടറി എന്ന നിലക്ക് പിണറായി സഖാവിനു ഉണ്ടാവാതിരിക്കാന്‍ ഇടയില്ല. ആ അറുംകൊലയെ തുടര്‍ന്ന് സി പി എമ്മിനെതിരെ ഉരുത്തിരിഞ്ഞു വന്ന വമ്പിച്ച ജനവികാരം മനസ്സിലാകാതിരിക്കാന്‍ മാത്രം പൊട്ടനുമല്ല പിണറായി വിജയന്‍. എന്നിട്ടും എരിതീയില്‍ എണ്ണ ഒഴിക്കും പോലെ ഒരു തെരുവ് ഗുണ്ടയുടെ ഭാഷയും ശൈലിയുമാണ് അദ്ദേഹം സ്വീകരിച്ചത്. സഖാവ് ടി പി യുടെ ചിത എരിഞ്ഞു തീരുന്നതിനു മുമ്പ് തന്നെ അദ്ദേഹത്തെ വീണ്ടും വീണ്ടും കുലംകുത്തിയെന്നു വിളിച്ച് ആക്രോശിച്ചുകൊണ്ടിരിക്കുകയായിരുന്നു അദ്ദേഹം. വി എസിന് ഷൈന്‍ ചെയ്യാനുള്ള ഒന്നാന്തരം അവസരം ഒരുക്കിക്കൊടുക്കുന്ന തന്റെ ചരിത്ര ദൗത്യമാണ് പിണറായി അതുവഴി നിര്‍വഹിച്ചത്.

വി എസ്സിന്റെ നിലപാടുകളെ പഠിക്കുന്ന ആര്‍ക്കുമറിയാവുന്ന ഒരു കാര്യം അദ്ദേഹത്തിന്‍റെ പോരാട്ടങ്ങള്‍ക്ക് സ്ഥായിയായ എന്തെങ്കിലും ഒരാശയതലം ഇല്ല എന്നുള്ളതാണ്. കൂടുതല്‍ കയ്യടി കിട്ടുക ഏത് നിലപാടുകള്‍ക്കാണോ ആ നിലപാട് സ്വീകരിക്കുക എന്നുള്ളതാണ് അദ്ദേഹം കഴിഞ്ഞ ഒരു പതിറ്റാണ്ട് കാലമായി തുടര്‍ന്ന് വരുന്ന നയം. പാര്‍ട്ടിയും പാര്‍ട്ടിയുടെ ഇമേജുമൊന്നും നോക്കുന്ന പരിപാടി അദ്ദേഹത്തിന് പണ്ടേ ഇല്ല. മാക്സിമം കയ്യടി വാങ്ങി മുന്നോട്ടു പോവുക. അവസരവാദമെന്ന് പച്ച മലയാളത്തിലും വര്‍ഗവഞ്ചന എന്ന് ചൈനീസ് ഭാഷയിലും പറയുന്ന ഈ നയമാണ് വി എസിന്റെ നിലപാടുകളുടെ ആകെത്തുക. അത് മനസ്സിലാക്കാന്‍ വലിയ ബുദ്ധിയൊന്നും വേണ്ട. ഒരു ശരാശരി പോളിറ്റ് ബ്യൂറോക്കാരന്റെ തലച്ചോറ് ഉള്ളവര്‍ക്ക് പോലും വി എസ്സിന്റെ പൊളിട്രിക്സ് പെട്ടെന്ന് പിടികിട്ടും. അത്തരമൊരു കയ്യടി രാഷ്ട്രീയത്തിന് പരമാവധി അവസരങ്ങള്‍ നല്‍കുന്ന നിലപാടുകളും ശരീരഭാഷയുമാണ്‌ പിണറായിയുടെയും കണ്ണൂര്‍ ജയരാജന്‍മാരുടെതും എന്നുള്ളതാണ് സമകാലീന ഇടതുപക്ഷ രാഷ്ട്രീയത്തിലെ ഏറ്റവും വലിയ ദുരന്തങ്ങളെ സൃഷ്ടിക്കുന്നത്.

വി എസ്സ് പാര്‍ട്ടിയില്‍ നിന്ന് പുറത്തു പോകാനും ഒരു പുതിയ പാര്‍ട്ടി രൂപീകരിക്കാനുമുള്ള സാധ്യത വളരെ കുറവാണ്. അതിനു മാത്രമുള്ള നട്ടെല്ലൊന്നും അദ്ദേഹത്തിനുണ്ട് എന്ന് കരുതുക വയ്യ. ഇനി അഥവാ അദ്ദേഹത്തെ പാര്‍ട്ടി പുറത്താക്കിയാലും നിരുപാധികം മാപ്പെഴുതിക്കൊടുത്ത് തിരിച്ചു വരാനും അദ്ദേഹം തയ്യാറായേക്കും. ഒരു ദിവസം പുലിയെപ്പോലെ ചാടിവീണാല്‍ പിന്നെ പതിനാലു ദിവസം എലിയെപ്പോലെ ഓടിയൊളിക്കുക എന്നുള്ളതാണ് അദ്ദേഹത്തിന്‍റെ ലൈന്‍. ആ ഒരു ലൈന്‍ തന്നെയായിരിക്കും വരുന്ന ദിവസങ്ങളില്‍ വി എസ് കൈക്കൊള്ളാന്‍ കൂടുതല്‍ സാധ്യത. ഇപ്പൊ പിളരും, ഇപ്പൊ പിളരും എന്ന് കരുതി വായില്‍ വെള്ളമൊലിപ്പിച്ചു കാത്തിരിക്കുന്ന കോണ്ഗ്രസ്സുകാര്‍ ഉണ്ടെങ്കില്‍ അവരോടു എനിക്ക് പറയാനുള്ളത് മോഹന്‍ലാല്‍ പറഞ്ഞ ഡയലോഗാണ്. ഗോ ടു യുവര്‍ ക്ലാസ്സസ്.. ഗോ ഗോ..

Related Posts
ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)
കൈപ്പത്തിയുണ്ടോ സാറേ ഒന്നാത്മഹത്യ ചെയ്യാന്‍?

ക്രിമിനല്‍സ് പാര്‍ട്ടി ഓഫ് ഇന്ത്യ (ഫാസിസ്റ്റ്)

noreply@blogger.com (Basheer Vallikkunnu) — Sun, 06 May 2012 05:37:00 +0000

റവല്യൂഷനറി മാര്‍ക്സിസ്റ്റ്‌ പാര്‍ട്ടി നേതാവ് ടി പി ചന്ദ്രശേഖരന്‍ ക്രൂരമായി കൊലചെയ്യപ്പെട്ടു എന്ന വസ്തുത ഒരു രാഷ്ട്രീയപാര്‍ട്ടിയും നിഷേധിച്ചിട്ടില്ല!!. അത്രയും ഭാഗ്യം!. അദ്ദേഹം ഒരു കോടാലിയെടുത്ത് സ്വയം തല വെട്ടിപ്പൊളിച്ച് ആത്മഹത്യ ചെയ്തതാണ് എന്ന് ആരെങ്കിലും പറഞ്ഞിരുന്നെങ്കില്‍ എന്നെപ്പോലുള്ള ശുദ്ധന്‍മാര്‍ ആകെ കണ്ഫ്യൂഷനില്‍ ആകുമായിരുന്നു. ഏതായാലും അതുണ്ടായില്ല. ചന്ദ്രശേഖരന്‍ കൊല്ലപ്പെട്ടു എന്ന വിഷയത്തില്‍ അഭിപ്രായ ഐക്യമുണ്ട്‌. ആരു കൊന്നു എന്ന ചോദ്യത്തിനാണ് ഇനി ഉത്തരം കിട്ടേണ്ടത്. ഇരുപത്തിനാല് മണിക്കൂറിനുള്ളില്‍ തന്നെ പോലീസ് പ്രാഥമികമായ ഒരുത്തരം മുന്നോട്ട് വെച്ച് കഴിഞ്ഞു. ക്വട്ടേഷന്‍ സംഘം. ഇനി അവരെ ആര് കാശ് കൊടുത്തയച്ചു എന്നേ അറിയേണ്ടതുള്ളൂ. അത് സി പി എം ആണോ അതോ കോണ്‍ഗ്രസ്സാണോ?.

ഒരു സേതുരാമയ്യര്‍ തിരക്കഥയിലെ ട്വിസ്റ്റുകള്‍ ഈ കൊലപാതകത്തിന് പിന്നില്‍ ഉണ്ടാകുമോ എന്ന് പറയാനായിട്ടില്ല. പക്ഷേ ഇതുവരെയുള്ള രംഗങ്ങളും ഒഞ്ചിയത്തെ രാഷ്ട്രീയ സാഹചര്യങ്ങളെയും നിഷ്പക്ഷമായി വിലയിരുത്തുന്നവര്‍ കൊന്നത് ഭീമന്‍ തന്നെ എന്ന നിഗമനത്തിലെത്തുക തികച്ചും സ്വാഭാവികമാണ്. കാരണം കേരളത്തിലെ ചെങ്കൊടി ഭീമന്റെ ട്രാക്ക് റെക്കോര്‍ഡ്‌ വളരെ മോശമാണ്. എണ്ണമറ്റ രാഷ്ട്രീയക്കൊലപാതകങ്ങള്‍ക്ക് ആ പാര്‍ട്ടി നേതൃത്വം നല്‍കിയിട്ടുണ്ട്. എതിര്‍ത്തു തോല്‍പ്പിക്കാന്‍ കഴിയാത്തവരെ 'അരിവാളും ചുറ്റികയും' കൊണ്ട് വെട്ടിയും തലക്കടിച്ചു വീഴ്ത്തിയും മുന്നേറിയ ഒരു ഭൂതകാലവും അവര്‍ക്കുണ്ട്. അധ്യാപകനെ കുട്ടികളുടെ കണ്മുന്നില്‍ വെച്ചു വെട്ടിക്കൊന്നതടക്കം മഹത്തായ വിപ്ലവ പാരമ്പര്യവും സ്വന്തമായുണ്ട്. കണ്ണൂരിലെ സി പി എം വിചാരണക്കോടതി അബ്ദുല്‍ ശുകൂര്‍ എന്ന ചെറുപ്പക്കാരനെ പട്ടാപ്പകല്‍ വെട്ടിക്കൊന്നു വധശിക്ഷ നടപ്പിലാക്കിയിട്ടു മൂന്ന് മാസം തികഞ്ഞിട്ടില്ല. ഇത്തരം സാഹചര്യത്തെളിവുകളുടെ പാശ്ചാത്തലത്തില്‍ 'മാപ്പര്‍ഹികാത്ത വര്‍ഗ്ഗവഞ്ചകരെ' ഉന്മൂലനം ചെയ്യാനുള്ള പാര്‍ട്ടി അജണ്ടയുടെ ഭാഗമാണ് ഈ കൊലപാതകവുമെന്ന് ആരെങ്കിലും പറഞ്ഞാല്‍ അവരെ കുറ്റം പറയാനാവില്ല.

കൊല്ലാം, പക്ഷെ തോല്‍പ്പിക്കാനാവില്ല. - സഖാവ് ടി പി യുടെ ഭാര്യ പ്രതികരിക്കുന്നു.

പാര്‍ട്ടിയില്‍ നിന്ന് വിട്ടനാള്‍ മുതല്‍ ചന്ദ്രശേഖരന്‍ സി പി എം ഭീമന്റെ വധഭീഷണികളുടെ നിഴലിലാണ് ജീവിച്ചു പോന്നത്. പലരോടും അദ്ദേഹം ആശങ്കകള്‍ പങ്കു വെച്ചിട്ടുണ്ട്. സഖാവ് പിണറായി 'കുലംകുത്തി'യെന്നും സഖാവ് വി എസ് ധീരനായ കമ്യൂണിസ്റ്റെന്നും വിളിച്ച ടി പി ചന്ദ്രശേഖരന്‍ പൊരുതിയിരുന്നത് പാര്‍ട്ടിക്കെതിരെ ആയിരുന്നില്ല, പാര്‍ട്ടിയുടെ വഴിപിഴച്ച പോക്കിനെതിരെയായിരുന്നു. അതുകൊണ്ട് തന്നെയാണ് ആ പോരാട്ടത്തെ അദ്ദേഹത്തിന്റെ കര്‍മഭൂമിയിലെ 'കുലംകുത്തികള്‍ ' ഒന്നടങ്കം പിന്തുണച്ചത്‌. ചരിത്രത്തിലാദ്യമായാണ് ഒഞ്ചിയം രക്തസാക്ഷികളുടെ വിപ്ലവ ഭൂമിയില്‍ മാര്‍ക്സിസ്റ്റ്‌ പാര്‍ട്ടി പഞ്ചായത്ത് ഇലക്ഷനില്‍ തോല്‍ക്കുന്നത്. നാലഞ്ചു പഞ്ചായത്തുകളില്‍ സി പി എമ്മിനെ മറികടന്നു സഖാവ് ചന്ദ്രശേഖരന്റെ നേതൃത്വത്തിലുള്ള റവല്യൂഷനറി മാര്‍ക്സിസ്റ്റ്‌ പാര്‍ട്ടി വേരോട്ടമുണ്ടാക്കി. ഈ കൊലപാതകത്തിന്റെ മാസ്റ്റര്‍ പ്ലാന്‍ ഇത്തരമൊരു പാശ്ചാത്തലത്തില്‍ വേണം വായിച്ചെടുക്കാന്‍. കണ്ണും മൂക്കും കവിളും വെട്ടി നുറുക്കി മുഖമില്ലാതാക്കിയ പ്രിയ സഖാവിന്റെ മൃതദേഹത്തിനു പിറകില്‍ നടന്നു നീങ്ങിയ പതിനായിരങ്ങളുയര്‍ത്തിയ മുദ്രാവാക്യം ശ്രദ്ധേയമായിരുന്നു.

കമ്യൂണിസ്റ്റായി ജീവിക്കാന്‍
കമ്യൂണിസ്റ്റായി കണ്ടു മരിക്കാന്‍
ധീരത കാട്ടിയ വീര സഖാവ്
ഒഞ്ചിയത്തിന്‍ ഓമന പുത്രന്‍
സഖാവ് ടി പി മരിക്കുന്നില്ല

രാഷ്ട്രീയ കാപാലികര്‍ വെട്ടി നുറുക്കിയ സഖാവിന്റെ മുഖമല്ല, അദ്ദേഹം ഉയര്‍ത്തിയ ആശയ സമരത്തിന്റെയും ചെറുത്തുനില്‍പ്പിന്റെയും ധീര മുഖമാണ് 'കമ്യൂണിസ്റ്റായി കണ്ടു മരിക്കുന്നുവെന്നു' അനുയായികള്‍ വിളിച്ച മുഖം. പാര്‍ട്ടിക്കെതിരെ അഭിപ്രായ വ്യത്യാസങ്ങള്‍ ഉണ്ടായപ്പോള്‍ സെല്‍വരാജിനെപ്പോലെ യു ഡി എഫ് പാളയത്തിലെ എച്ചില്‍ തിന്നാന്‍ പോകാതെ ഒറ്റയ്ക്ക് നിന്ന് പൊരുതി എന്നിടത്താണ് സഖാവ് ടി പി വ്യത്യസ്തനാകുന്നത്. അക്കാരണം കൊണ്ട് തന്നെയായിരിക്കണം അദ്ദേഹത്തിനു ഇങ്ങനെയൊരു മരണം വരിക്കേണ്ടി വന്നിരിക്കുകയും ചെയ്യുക.

ഒരു ഉപതെരെഞ്ഞെടുപ്പിന്റെ വക്കില്‍ ഇത്തരമൊരു രാഷ്ട്രീയ കൊലപാതകം നടത്താന്‍ ആരെങ്കിലും തയ്യാറാകുമോ എന്ന ചോദ്യം പലരും ഉയര്‍ത്തുന്നുണ്ട്. കൊല്ലാന്‍ ഗുണ്ടകളെ ചുമതലപ്പെടുത്തിക്കഴിഞ്ഞാല്‍ പിന്നെ അതെപ്പോള്‍ ചെയ്യണമെന്നു അവര്‍ തീരുമാനിക്കുന്നത് ഹൈക്കമാന്ടിനോടോ പോളിറ്റ് ബ്യൂറോയോടോ ചോദിച്ചിട്ടല്ല. കൊല നടത്താന്‍ രാഹുവും കേതുവും നോക്കുന്ന പരിപാടിയും ഗുണ്ടകള്‍ക്കുണ്ടാകില്ല. സമയവും സന്ദര്‍ഭവും ഒത്തുവന്നാല്‍ കാര്യം നടത്തി തിരിച്ചു പോവുക മാത്രമാണ് അവര്‍ ചെയ്യുക. സഖാവ് ടി പി യുടെ കേസില്‍ പ്രാഥമിക അറസ്റ്റുകള്‍ നടന്നു കഴിഞ്ഞു. ഗുണ്ടകള്‍ ആണെങ്കിലും അവര്‍ക്കും ജീവനില്‍ കൊതിയുണ്ടാകും. അത്ര പെട്ടെന്നൊന്നും കാശ് കൊടുത്തവന്റെ പേര് അവര്‍ പറഞ്ഞു കൊള്ളണമെന്നില്ല. അന്വേഷണത്തിന്റെ ഗതി വരും നാളുകളില്‍ നമുക്കറിയാന്‍ പറ്റും. ഈ കൊലപാതകത്തിന് പിന്നില്‍ സി പി എം ആണെങ്കിലും അല്ലെങ്കിലും ഒരു കാര്യം ആ പാര്‍ട്ടി ശ്രദ്ധിച്ചേ തീരൂ. പാര്‍ട്ടിയെ തിരുത്താനും ജനപക്ഷത്തു നിറുത്താനും ശ്രമിക്കുന്ന സഖാവ് ടി പി യെപ്പോലുള്ള ചെറുപ്പക്കാരെയാണ് ഈ കാലഘട്ടം ആവശ്യപ്പെടുന്നത്. അവരോടൊപ്പം നില്‍ക്കണമോ അതോ അവരെ കൊന്നൊടുക്കി ഫാസിസ്റ്റുകളുടെയും ക്രിമിനലുകളുടെയും പാര്‍ട്ടിയായി രൂപാന്തരം പ്രാപിക്കണമോ എന്ന് ആ പാര്‍ട്ടിയുടെ നേതൃത്വമാണ് തീരുമാനിക്കേണ്ടത്.

മ്യാവൂ: "കേരളമെന്നു കേട്ടാലോ തിളക്കണം ചോര നമുക്ക് ഞരമ്പുകളില്‍.. " ഉവ്വുവ്വ്.. തിളക്കുന്നുണ്ട്.. ഞരമ്പുകളിളല്ല, തെരുവുകളില്‍.. Latest update ബല്‍റാം 'vs' താരാദാസ്

Related Posts
കൈപ്പത്തിയുണ്ടോ സാറേ ഒന്നാത്മഹത്യ ചെയ്യാന്‍?
പിള്ളയെ തട്ടാന്‍ ജയരാജന്റെ ക്വട്ടേഷന്‍
നിര്‍മല്‍ മാധവിനെ അമേരിക്കയിലയച്ചു പഠിപ്പിക്കണം.
ഷാജഹാനേ, ഇത് കണ്ണൂരാ..
പരിയാരത്തെ ശുംഭന്മാരും പാവം NRI കളും

കലാം വീണ്ടും വരുമോ?

noreply@blogger.com (Basheer Vallikkunnu) — Wed, 02 May 2012 06:00:00 +0000

പ്രതിഭ പാട്ടീലിന്റെ പേര് ഇന്ത്യന്‍ പ്രസിഡന്റ്‌ സ്ഥാനത്തേക്ക് നിര്‍ദേശിക്കപ്പെട്ടപ്പോള്‍ ഗൂഗിളില്‍ മുടിഞ്ഞ ഹിറ്റായിരുന്നു. ഇതേതു പ്രതിഭ? ഗൂഗിള്‍ അമ്മച്ചിയുടെ പിടലക്കിട്ടു കൊട്ടി സകലരും സെര്‍ച്ചി. അപകടം മണത്ത വിക്കിപീഡിയക്കാര്‍ ഒരു ഫോട്ടോ ഒപ്പിച്ചെടുത്തു പെട്ടെന്നൊരു പേജ് തട്ടിക്കൂട്ടി സെര്‍ച്ചന്മാരുടെ പ്രശ്നം പരിഹരിച്ചു. അങ്ങിനെ പ്രതിഭ പാട്ടീല്‍ ഇന്ത്യന്‍ പ്രസിഡണ്ടായി. കഴിഞ്ഞ തവണത്തെപ്പോലെ ഇത്തവണയും കോണ്‍ഗ്രസ്സും ഇടതു പക്ഷവും ഒരുമിച്ചാലോചിച്ച് ഏതെങ്കിലും ഒരു സമവായ 'പ്രതിഭ'യെ കണ്ടെത്തുമെങ്കില്‍ ഒരുപകാരം ചെയ്യണം. പ്രഖ്യാപിക്കുന്നതിന്റെ രണ്ടു ദിവസം മുമ്പെങ്കിലും രഹസ്യമായി ഗൂഗിള്‍ അമ്മച്ചിയെയും വിക്കി അമ്മാവനെയും വിവരം അറിയിക്കണം. ഒരു പേജ് ഉണ്ടാക്കിയെടുക്കാനുള്ള സാവകാശം കൊടുക്കാതെ പേര് പ്രഖ്യാപിക്കുന്നത് കൊലച്ചതിയാണ്.

ഇന്ത്യന്‍ പ്രസിഡന്റ്‌ പദത്തിലിരിക്കുന്നത് ആരായാലും അവരെ നമ്മള്‍ ബഹുമാനിച്ചേ തീരൂ..ശ്രീമതി പ്രതിഭ പാട്ടീലിനോടും ഇന്ത്യക്കാര്‍ക്ക് ബഹുമാനമുണ്ട്. വലിയ ബഹളങ്ങളൊന്നും ഉണ്ടാക്കാതെ അഞ്ചു കൊല്ലം അവര്‍ രാഷ്ട്രപതി ഭവനില്‍ കഴിച്ചു കൂട്ടിയിട്ടുണ്ട്. ഇരുപത്തി രണ്ടു രാജ്യങ്ങള്‍ സന്ദര്‍ശിച്ചു നമ്മുടെ സ്റ്റാറ്റസ് കാത്തിട്ടുണ്ട്. (120 കോടി ജനങ്ങളുള്ള രാജ്യത്ത് 205 കോടി ടൂറിനു ചിലവാക്കി എന്നത് വലിയ ആനക്കാര്യമൊന്നുമല്ല, ആള്‍ക്കൊന്നിനു രണ്ടു രൂപ പോലും വന്നില്ല). അവരെക്കൊണ്ട് കഴിയുന്ന രൂപത്തില്‍ ചടങ്ങുകളിലൊക്കെ വീഴാതെ പിടിച്ചു നിന്നിട്ടുണ്ട്. ഒപ്പിടാന്‍ പറയുന്നിടത്തൊക്കെ ഒപ്പിട്ടു കൊടുത്തിട്ടുമുണ്ട്. ചുരുക്കത്തില്‍ ഒരു പ്രസിഡന്റ്‌ ചെയ്യേണ്ട പണികളൊക്കെ ഭംഗിയായി അവര്‍ ചെയ്തിട്ടുണ്ട്. അതുകൊണ്ടാണ് താങ്കു താങ്കു പ്രതിഭാജി എന്ന് ഓരോ ഇന്ത്യക്കാരനും ഇപ്പോള്‍ പറഞ്ഞു പോകുന്നത്. അഞ്ചു വര്‍ഷം കഴിയാരായ സ്ഥിതിക്ക് രാഷ്ട്രപതി ഭവന് സമീപം അവര്‍ക്കും ഭര്‍ത്താവിനും പെയിന്റടിച്ച നല്ലൊരു ക്വാട്ടേര്‍സ് കൂടി ഉണ്ടാക്കി കൊടുത്താല്‍ കോണ്‍ഗ്രസ്സുകാരുടെ പ്രധാന ഉത്തരവാദിത്വം തീര്‍ന്നു.

എന്റെ വിഷയം പ്രതിഭാ പാട്ടീലല്ല. എ പി ജെ അബ്ദുല്‍ കലാമാണ്. അദ്ദേഹത്തെ വീണ്ടും പ്രസിഡണ്ടാക്കണമെന്ന ആവശ്യം പല കോണുകളില്‍ നിന്നും ഇപ്പോള്‍ ഉയര്‍ന്നു വരുന്നുണ്ട്. ഇന്ത്യന്‍ യുവസമൂഹത്തില്‍ പൊതുവെയും സോഷ്യല്‍ മീഡിയകളില്‍ പ്രത്യേകിച്ചും കലാം വീണ്ടും തരംഗമാവുകയാണ്. സമാജ് വാദി പാര്‍ട്ടി നേതാവ് മുലായം സിംഗ് യാദവാണ് കലാമിന്റെ പേര് തുടക്കത്തില്‍ മുന്നോട്ടു വെച്ചത്. ബി ജെ പി യും മമതയും ജയലളിതയും കലാമിനെ പിന്തുണച്ചേക്കുമെന്നാണ് റിപ്പോര്‍ട്ട്‌. കോണ്ഗ്രസ്സും ഇടതു പക്ഷവും മാത്രമാണ് ഇടഞ്ഞു നില്‍ക്കുന്നത്. കലാം വീണ്ടും വന്നാലും ഇല്ലെങ്കിലും ഒരു കാര്യം ഉറപ്പാണ്. സമീപ കാല ഇന്ത്യന്‍ പ്രസിഡന്റുമാരില്‍ കലാമിനോളം ജനകീയത നേടിയ മറ്റൊരു പ്രസിഡന്റ്‌ ഉണ്ടായിട്ടില്ല. People's President എന്നാണു അദ്ദേഹം അറിയപ്പെട്ടത്. ഈ എണ്‍പതുകാരനെ ഏറ്റവും കൂടുതല്‍ ഇഷ്ടപ്പെടുന്നത് യുവാക്കളും കൊച്ചുകുട്ടികളുമാണ്. ഇത്തരമൊരു പിന്തുണ നേടുന്നതില്‍ എന്താണ് കലാം ചെയ്ത മാജിക്?.

കുട്ടികളിലും യുവാക്കളിലും അദ്ദേഹം അര്‍പ്പിച്ച പ്രതീക്ഷയും അവരിലേക്ക്‌ പകര്‍ന്ന ഊര്‍ജ്ജവുമാണ് കലാമിന്റെ ഏറ്റവും വലിയ സംഭാവനയെന്നു ഞാന്‍ കരുതുന്നു. ലോകം ആദരിക്കുന്ന ശാസ്ത്രകാരന്‍, ഇന്ത്യയുടെ മിസൈല്‍ സാങ്കേതികതയുടെ പിതാവ്, വേറിട്ട ചിന്തകളുടെയും ആശയങ്ങളുടെയും വക്താവ് തുടങ്ങി എന്തൊക്കെ വിശേഷങ്ങള്‍ അദ്ദേഹത്തിനു ഉണ്ടെങ്കിലും വരും തലമുറയ്ക്ക് പ്രതീക്ഷയുടെ കരുത്ത് പകര്‍ന്നു എന്നത് തന്നെയാണ് അദ്ദേഹത്തെ വ്യതിരിക്തനാക്കുന്നത്. ഹാമിദ് അന്‍സാരി, പ്രണബ് മുഖര്‍ജി, ഗോപാല്‍ ഗാന്ധി. സാം പിത്രോഡ, മീര കുമാര്‍ , ജസ്വന്ത് സിംഗ്, ഫാറൂഖ് അബ്ദുള്ള, എ കെ ആന്റണി , മുലായം സിംഗ് തുടങ്ങി ഇപ്പോള്‍ ഉയര്‍ന്നു കേള്‍ക്കുന്ന പേരുകളേക്കാള്‍ ജനകീയത കലാം നേടുന്നത് അത് കൊണ്ട് തന്നെയാണ്.

കലാം തനിക്കു ചുറ്റുമുള്ളവരിലേക്ക് എങ്ങിനെ ഊര്‍ജ്ജം പകരുന്നു എന്നതിന്റെ ഒരു ചെറിയ ഉദാഹരണമാണ് തമിള്‍നാട് സ്വദേശി കതിരേസന്‍ . പത്താം ക്ലാസ് പൂര്‍ത്തീകരിക്കുന്നതിന് മുമ്പ് പഠനം നിര്‍ത്തിയ അയാളുടെ ജീവിതം മാറിമറിയുന്നത് കലാമിന്റെ ഡ്രൈവര്‍ ആകുന്നതോട് കൂടിയാണ്. പത്താം ക്ലാസ് പാസ്സാകാത്ത കതിരേസന്‍ ബിരുദവും ബിരുദാനന്തര ബിരുദവും ഡോക്ടറേറ്റും എടുത്ത് കോളേജ് അധ്യാപകനായി രൂപപരിണാമം വന്ന കഥ കലാം പകര്‍ന്ന ഊര്‍ജ്ജത്തിന്റെ കൂടി കഥയാണ്. ഹൈദരാബാദിലെ ഡിഫന്‍സ് റിസേര്ച്ച് ലബോറട്ടറിയില്‍ നാല് കൊല്ലം കലാമിന്റെ ഡ്രൈവര്‍ ആയിരുന്നു കതിരേസന്‍. നിര്‍ത്തിയ പഠനം തുടരുവാന്‍ കലാം അയാളെ നിരന്തരം പ്രേരിപ്പിച്ചുകൊണ്ടിരുന്നു. പകല്‍ ജോലിയും രാത്രി പഠനവും. കതിരേസന്‍ ആദ്യം പത്താം ക്ലാസ് എഴുതിയെടുത്തു. പിന്നീട് പ്രീഡിഗ്രീ, ബി എ, എം എ , എം എഡ് , അവസാനം പി എച്ച് ഡി. അന്നത്തെ കലാമിന്റെ ഡ്രൈവര്‍ ഇന്ന് സേലത്തെ സര്‍ക്കാര്‍ ആര്‍ട്സ് കോളേജിലെ ചരിത്രാദ്ധ്യാപകനാണ്.

രണ്ടു സ്യൂട്ട് കേസുകളുമായി രാഷ്ട്രപതി ഭവനിലേക്ക് കയറിയ കലാം അതുമായി തന്നെയാണ് തിരിച്ചിറങ്ങിയതും. അപൂര്‍വമായി തന്നെ സന്ദര്‍ശിച്ച കുടുംബക്കാരുടെ ഭക്ഷണത്തിന്റെയും താമസത്തിന്റെയും ചിലവിലേക്ക്‌ രണ്ടര ലക്ഷം രൂപ സ്വന്തം സമ്പാദ്യത്തില്‍ നിന്ന് നല്‍കി മാതൃക കാണിക്കാനും അദ്ദേഹം തയ്യാറായി. ഭാവി ഇന്ത്യ എങ്ങിനെയായിരിക്കണം എന്നതിനെക്കുറിച്ച് വ്യക്തമായ കാഴ്ചപ്പാടും പ്രായോഗിക നിര്‍ദേശങ്ങളും ഉള്‍കൊള്ളുന്നതാണ് അദ്ദേഹത്തിന്‍റെ Vision 2020 Missions. ജാതിമത ചിന്തകള്‍ക്കതീതമായി കലാമിനെ ഒരിന്ത്യന്‍ പ്രതീകവും അഭിമാനവുമായി കാണാന്‍ ഏവര്‍ക്കും കഴിയുന്നത് ആ വ്യക്തി പ്രഭാവത്തിന്റെ സവിശേഷതകള്‍ കൊണ്ട് തന്നെയാണ്. അബ്ദുല്‍ കലാമിനെ ഇന്ത്യന്‍ പ്രസിഡന്റ്‌ പദത്തിലേക്ക് 2002 ല്‍ ആദ്യമായി നിര്‍ദേശിച്ചത് ബി ജെ പി യാണ്. രണ്ടാം തവണയും അബ്ദുല്‍ കലാമിന് പിന്തുണയുമായി ബി ജെ പി യുണ്ട്. ഇത്തരമൊരു പിന്തുണക്ക് പിന്നില്‍ എന്തൊക്കെ രാഷ്ട്രീയ അടിയൊഴുക്കുകള്‍ ഉണ്ടെന്നു വാദിച്ചാലും ഇന്ത്യന്‍ മതേതരത്വ സങ്കല്പത്തിന് ബി ജെ പി യുടെ ഏറ്റവും തിളക്കമാര്‍ന്ന സംഭാവനയായി ഇതിനെ ചരിത്രം വിലയിരുത്തിയേക്കും. സ്വതന്ത്ര ഇന്ത്യയുടെ ചരിത്രത്തില്‍ ഡോ. രാജേന്ദ്ര പ്രസാദിന് മാത്രമേ രണ്ടു തവണ പ്രസിഡന്റ്‌ പദത്തില്‍ ഇരിക്കാനുള്ള ഭാഗ്യം ഉണ്ടായിട്ടുള്ളൂ. ആ ഭാഗ്യം ലഭിച്ച് ഡോ. കലാം വീണ്ടും രാഷ്ട്രപതി ഭവനില്‍ എത്തുന്ന ദിനം സ്വപ്നം കാണുന്ന ലക്ഷക്കണക്കിന്‌ ചെറുപ്പക്കാരോടൊപ്പം ഞാനും പങ്കു ചേരുന്നു.

സ്വപ്നമെന്നത് നിങ്ങള്‍ ഉറക്കത്തില്‍ കാണുന്ന ഒന്നല്ല, അത് നിങ്ങളെ ഉറങ്ങാന്‍ അനുവദിക്കാത്ത ഒന്നാണ് - ഡോ. എ പി ജെ അബ്ദുല്‍ കലാം.

Related Posts
പഞ്ചാബിലെ സുഹൃത്ത്, അയോധ്യയിലെ പള്ളി

കാന്തപുരത്തില്‍ നിന്ന് പഠിക്കേണ്ടത്

noreply@blogger.com (Basheer Vallikkunnu) — Sun, 29 Apr 2012 18:15:00 +0000

കാന്തപുരത്തിന്റെ കേരള യാത്ര അവസാനിച്ചു. മാനവികത ഉണര്‍ന്നോ ഇല്ലയോ എന്നത് വേറെ വിഷയം, പക്ഷേ യാത്ര ഗംഭീരമായിരുന്നു എന്ന് പറയാതെ വയ്യ. കാന്തപുരമാണെന്ന് കരുതി നമുക്കത് കണ്ടില്ലെന്നു നടിക്കാനാവില്ലല്ലോ. ആരെന്തൊക്കെ വിമര്‍ശനം ഉയര്‍ത്തിയാലും കാസര്‍കോട്‌ മുതല്‍ തിരുവനന്തപുരം വരെ ഒരു വലിയ ചലനമുയര്‍ത്താന്‍ കാന്തപുരത്തിന് കഴിഞ്ഞിട്ടുണ്ട്. അതിനദ്ദേഹത്തെയും പ്രവര്‍ത്തകരെയും അഭിനന്ദിച്ചേ തീരൂ. ഞാന്‍ കൂറുമാറി എന്ന് കരുതരുത്. മുടിക്കച്ചവടത്തെക്കുറിച്ച് മുമ്പ് എഴുതിയതൊക്കെ അപ്പടി ഈ ബ്ലോഗിലുണ്ട്. ഒന്നും മായ്ച്ചു കളഞ്ഞിട്ടില്ല. ആ അഭിപ്രായങ്ങള്‍ക്ക് ഇച്ചിരി കടുപ്പം കൂടിയിട്ടുണ്ട് എന്നല്ലാതെ ഒട്ടും കുറഞ്ഞിട്ടുമില്ല. എന്ന് വെച്ചു കണ്ട കാര്യം പറയാതിരിക്കാന്‍ നിവൃത്തിയില്ല.

മാനവികതയെ ഭൂമിക്കടിയില്‍ നിന്ന് പൊക്കിക്കൊണ്ട് വരാനല്ല, മറിച്ച് മുടിപ്പള്ളിക്കെതിരെ ഉയര്‍ന്ന വ്യാപകമായ ജനവികാരത്തെ മായ്ച്ചുകളയാനായിരുന്നു ഈ യാത്രയെന്നത് എല്ലാവര്‍ക്കുമറിയാം. അതുകൊണ്ട് തന്നെ കാന്തപുരത്തിന്റെ പ്രധാന എതിരാളികളായ ഇ കെ വിഭാഗം സുന്നികള്‍ ആ ലാ പോയിന്റില്‍ പിടിച്ചു ഈ യാത്രക്കെതിരെ വലിയ പ്രചാരണമൊക്കെ നടത്തിനോക്കിയിരുന്നു. പക്ഷെ അതൊന്നും വല്ലാതെ ഏശിയില്ല എന്നിടത്താണ് കാന്തപുരത്തിന്റെ മിടുക്ക് കിടക്കുന്നത്. ഇ കെ വിഭാഗം ഒരു കാര്യം മനസ്സില്‍ കാണുമ്പോള്‍ അതിന്റെ രണ്ടാഴ്ച മുമ്പ് അത് മരത്തില്‍ കണ്ടു കരുക്കള്‍ നീക്കുന്ന ആളാണ്‌ കാന്തപുരം. ഒരു കാര്യം പ്രഖ്യാപിക്കുമ്പോഴും ചെയ്യുമ്പോഴും വ്യക്തമായ പ്ലാനിങ്ങും പഠനവും നടത്തുന്നു എന്നതാണ് കാന്തപുരത്തിന്റെ പ്രത്യേകത.

പേടിക്കേണ്ട, സിറാജ് പത്രത്തിന്റെ തലക്കെട്ടാണ്!!

വളരെ ബുദ്ധിപരമായും ആസൂത്രിതമായും കാര്യങ്ങള്‍ നീക്കുന്ന ഒരു പി ആര്‍ വിഭാഗം കാന്തപുരത്തിനുണ്ട്. ഓരോ രംഗത്തെ പ്രവര്‍ത്തനങ്ങള്‍ക്കും നേതൃത്വം വഹിക്കാന്‍ അതാതു മേഖലകളിലെ വിദഗ്ധന്മാരുടെ ഒരു പാനലുണ്ട്. കാശ് കൊടുത്തിട്ടായാലും അല്ലെങ്കിലും മാധ്യമ പ്രവര്‍ത്തകരുടേയും പൊതുസ്വീകാര്യരായ വ്യക്തികളുടെയും പിന്തുണ നേടിയെടുക്കുന്നതില്‍ കാന്തപുരം വിഭാഗം കാണിക്കുന്ന കൗശലത്തിന്റെ പത്തിലൊന്ന് ലീഗിന്റെ ബി ടീമായ ഇ കെ വിഭാഗത്തിനു ഇല്ല. അവിടെയും ഇവിടെയും കൂട്ടം കൂടി നിന്ന് കുശുമ്പും കുന്നായ്മയും പറഞ്ഞു തീര്‍ക്കുന്ന ഒരു വിഭാഗമായി മാത്രമേ ഇ കെ ഗ്രൂപ്പിനെ കാണാനാവൂ. അനുയായികളുടെ എണ്ണം നോക്കിയാല്‍ കാന്തപുരം ഗ്രൂപ്പിനുള്ളതിന്റെ പത്തിരട്ടി അനുയായികള്‍ ഇ കെ ഗ്രൂപ്പിന് ഉണ്ടാകും (അല്പം ഓവറായി എന്ന് തോന്നുന്നുവെങ്കില്‍ ഒന്നോ രണ്ടോ ഇരട്ടി കുറയ്ക്കാം കെട്ടോ). പക്ഷെ കാന്തപുരം വിഭാഗം നടത്തുന്ന പ്രചാരണങ്ങളുടെ പത്തിലൊന്ന് നടത്താന്‍ അവരെക്കൊണ്ടു കഴിയില്ല. അതാണ്‌ രണ്ടു കൂട്ടരും തമ്മിലുള്ള വ്യത്യാസം.

കാന്തപുരത്തിന്റെ യാത്രക്ക് സമാന്തരമായി വിമോചന യാത്ര എന്ന പേരില്‍ ഇ കെ വിഭാഗം ഒരു യാത്ര ഇപ്പോള്‍ നടത്തുന്നുണ്ട്. പക്ഷെ അതിന്റെ കാര്യം കട്ടപ്പൊകയാണ്‌. വെയില് കൊണ്ട് കുറെ വെള്ളം കുടിക്കുന്നു എന്നതല്ലാതെ മറ്റെന്തെങ്കിലും ചലനം ആ പാവങ്ങളെക്കൊണ്ട് ഉണ്ടാക്കാന്‍ കഴിയുമോ എന്നറിയില്ല. കേരള യാത്രക്ക് കാന്തപുരം ഇറക്കുമതി ചെയ്ത ജി എം സി കാര്‍ ഉപയോഗിച്ചതിലാണ് ഇ കെ വിഭാഗത്തിന് വലിയ പരാതിയുള്ളത്. ഇറക്കുമതി ചെയ്ത മൊബൈലും ഇറക്കുമതി ചെയ്ത തലേക്കെട്ടും ഇ കെ വിഭാഗത്തിനു ഉപയോഗിക്കാമെങ്കില്‍ ഇറക്കുമതി ചെയ്ത കാര്‍ കാന്തപുരത്തിനും ഉപയോഗിച്ചു കൂടെ. കയ്യില്‍ കാശുണ്ടെങ്കില്‍ ജി എം സി യല്ല, സാക്ഷാല്‍ റോള്‍സ് റോയിസ് തന്നെ ഇ കെ ക്കാര്‍ വാങ്ങുമെന്നതിനു സംശയമൊന്നുമില്ല. കാശില്ലാത്തത് കൊണ്ട് മാത്രമാണ് അവര്‍ മാരുതി 800 ഉം നാനോയും കൊണ്ട് തൃപ്തിപ്പെടുന്നത്.

സമ്മേളനത്തിന് ആളെക്കൂട്ടാന്‍ കാന്തപുരം ഒരു തീവണ്ടി തന്നെ ചാര്‍ട്ടര്‍ ചെയ്തു. പതിനേഴു കോച്ചുള്ള ഒരു തീവണ്ടിയാണ് മംഗലാപുരത്തു നിന്ന് തിരുവനന്തപുരത്തു എത്തിയത്. ഗള്‍ഫില്‍ നിന്നുള്ള പ്രവര്‍ത്തകരുമായി ചാര്‍ട്ടര്‍ ചെയ്ത രണ്ടു വിമാനങ്ങളും തിരുവനന്തപുരത്തു പറന്നിറങ്ങി. ദുഷ്ടനെ ദൈവം പനപോലെ വളര്‍ത്തും എന്ന് പറഞ്ഞു ഇ കെ കാര്‍ക്ക് ആശ്വസിക്കാന്‍ വകയുണ്ടെങ്കിലും കാന്തപുരത്തെ അത്ര എളുപ്പത്തില്‍ എഴുതിത്തള്ളാന്‍ കഴിയില്ല എന്ന് തന്നെയാണ് കേരള യാത്ര തെളിയിക്കുന്നത്. ലീഗിനെതിരെ ആഞ്ഞടിച്ചു കൊണ്ടിരിക്കുന്ന ആര്യാടന്‍ മുഹമ്മദിനെയും മുരളീധരനെയും വേദിയുടെ മുന്‍നിരയില്‍ ഇരുത്തിയാണ്‌ കാന്തപുരം സമാപന സമ്മേളനത്തില്‍ പ്രസംഗിച്ചത്. ഈ യാത്രയെ എതിര്‍ത്തുകൊണ്ടേയിരുന്ന ഇ കെ വിഭാഗം സുന്നികള്‍ക്കും ലീഗിനും ഇതിലപ്പുറം മനോഹരമായ ഒരു മറുപടി വേറെയുണ്ടോ?

പ്രവര്‍ത്തന രംഗത്തെ ഊര്‍ജ്ജസ്വലതക്കും കൗശലത്തിനും കാന്തപുരത്തില്‍ നിന്ന് ഇ കെ കാര്‍ക്ക് മാത്രമല്ല എല്ലാ വിഭാഗം മുസ്ലിം സംഘടനകള്‍ക്കും ഏറെ പഠിക്കാനുണ്ട്. കാന്തപുരത്തില്‍ നിന്ന് പഠിക്കേണ്ടത് മതത്തെയും പ്രവാചകനെയും എങ്ങനെ വിറ്റ് കാശാക്കാം എന്ന അദ്ദേഹത്തിന്‍റെ ട്രേഡ് മാര്‍ക്ക് സൂത്രങ്ങളല്ല, മറിച്ച് പ്രതികൂല സാഹചര്യങ്ങളെ അവഗണിച്ച് പദ്ധതികളും പ്രവര്‍ത്തങ്ങളും എങ്ങനെ വിജയിപ്പിച്ചെടുക്കാമെന്നതാണ്. മാധ്യമങ്ങളെയും പ്രചാരണങ്ങളെയും എങ്ങിനെ കൈപ്പിടിയില്‍ ഒതുക്കാം എന്നതാണ്. എല്ലാ മുസ്ലിം സംഘടനകളുടെയും അടുത്ത പ്രവര്‍ത്തക സമിതി യോഗത്തില്‍ ചര്‍ച്ച ചെയ്യുന്നതിനായി എന്റെ ഈ പോസ്റ്റ്‌ ഫ്രീയായി സമര്‍പ്പിച്ചു കൊണ്ടും കാന്തപുരം ഉസ്താദിന് ഒരിക്കല്‍ കൂടി അഭിവാദ്യങ്ങള്‍ അര്‍പ്പിച്ചു കൊണ്ടും നിറുത്തുന്നു.

മ്യാവൂ. : ഉസ്താദേ, ഇങ്ങനെയുള്ള പോസ്റ്റുകള്‍ ഇനിയും എഴുതാന്‍ ഞാന്‍ റെഡിയാണ്. മുടിപ്പള്ളിക്ക് മുന്‍വശം രണ്ടു സെന്റ്‌ ഭൂമി ...ങ്ങ്യാ ഹ.ഹ..

Related Posts
തിരുകേശപ്പള്ളി: വൈ ദിസ്‌ കൊലവെറി?
പിണറായിക്കൊരു റെഡ് സല്യൂട്ട്!
കത്തുന്ന മുടി, കത്തുന്ന വിവാദം.

കൈപ്പത്തിയുണ്ടോ സാറേ ഒന്നാത്മഹത്യ ചെയ്യാന്‍ ?

noreply@blogger.com (Basheer Vallikkunnu) — Thu, 26 Apr 2012 05:33:00 +0000

വലിയ ചുരങ്ങളുടെ ഉച്ചിയില്‍ ആത്മഹത്യാ മുനമ്പുകള്‍ ഉണ്ടാകാറുണ്ട്. തീവണ്ടിക്കു തലവെക്കാനും കെട്ടിത്തൂങ്ങി ചാകാനും ചങ്കുറപ്പില്ലാത്തവര്‍ക്ക് കണ്ണ് മുറുക്കി ചിമ്മി ഒരൊറ്റ ചാട്ടം വെച്ചു കൊടുത്താല്‍ ക്ലീന്‍ ക്ലീനായി വടിയാകാന്‍ പറ്റും എന്നുള്ളതാണ് ഇത്തരം മുനമ്പുകളുടെ ഒരു പ്രത്യേകത. എന്‍ഡോസള്‍ഫാനോ എലിവിഷമോ വാങ്ങാന്‍ കാശില്ലാത്തവര്‍ക്കും ആത്മഹത്യാ മുനമ്പുകള്‍ വലിയ പ്രതീക്ഷയാണ് നല്‍കാറുള്ളത്. സെല്‍വരാജിന് ചാടാന്‍ വേണ്ടി യു ഡി എഫിന്റെ ആത്മഹത്യാമുനമ്പ് റെഡിയായിക്കഴിഞ്ഞു. യു ഡി എഫിലേക്ക് പോകുന്നതിനേക്കാള്‍ ഭേദം ആത്മഹത്യ ചെയ്യുകയാണ് എന്നാണ് ഏതാനും ദിവസങ്ങള്‍ക്കു മുമ്പ് സെല്‍വരാജ് പറഞ്ഞിരുന്നത്. എന്നാല്‍ ലതേ വേന്ദ്രന്‍ തന്നെ ഇന്നലെ പറഞ്ഞത് യു ഡി എഫിലേക്ക് പോവുന്നതിലും കൈപ്പത്തി ചിഹ്നത്തില്‍ മത്സരിക്കുന്നതിലും അഫിമാനം കൊള്ളുന്നു എന്നാണ്!!. ഈ ഒരൊറ്റ മലക്കം മറിച്ചിലോട് കൂടി തന്നെ കേരളത്തിന്റെ രാഷ്ട്രീയ ഭൂപടത്തില്‍ നിന്ന് സെല്‍വരാജ് എന്ന കപട രാഷ്ട്രീയക്കാരന്‍ ആത്മാഹൂതി ചെയ്തുകഴിഞ്ഞു.

തെമ്മാടികളുടെ അവസാന അഭയ കേന്ദ്രമാണ് രാഷ്ട്രീയം എന്ന് ആരാണ്ടോ പറഞ്ഞതായി എവിടെയോ വായിച്ചിട്ടുണ്ട്. അപ്പറഞ്ഞയാളെ കണ്ടുമുട്ടിയിരുന്നെങ്കില്‍ തറവാട് വിറ്റിട്ടാണെങ്കിലും ഒരു പരിപ്പ് വടയും ചായയും വാങ്ങിച്ചു കൊടുക്കണമെന്ന അഭിപ്രായക്കാരനാണ് ഞാന്‍. വോട്ടു ചെയ്തു അഞ്ചു വര്‍ഷക്കാലത്തേക്ക്‌ എം എല്‍ എ ആക്കിയ പൊതുജനത്തിന്റെ മുഖത്തു കാര്‍ക്കിച്ചു തുപ്പിയത് പോരാഞ്ഞിട്ടാണ്‌ ഒരു ഉളുപ്പുമില്ലാതെ ഇത്ര പരസ്യമായി വാക്ക് മാറി ആത്മഹത്യാ മുനമ്പിലേക്ക്‌ സെല്‍വരാജ് എത്തിയിരിക്കുന്നത്. വോട്ടു ചെയ്ത പൊതുജനത്തെ കഴുതകളാക്കി കാലുമാറിയും കൂറ്മാറിയും പലരും പല പാര്‍ട്ടിയിലും ചേക്കേറിയിട്ടുണ്ട്. ഇങ്ങനെ ചേക്കേറി വരുന്ന അവസരവാദികള്‍ക്ക് ഇടതുപക്ഷവും വലതുപക്ഷവും ഒരുപോലെ അവസരം കൊടുത്തിട്ടുണ്ട്. ഈ കുളിമുറിയില്‍ എല്ലാവരും ഉടുമുണ്ടില്ലാത്തവര്‍ തന്നെയാണ്. എന്നാലും സെല്‍വരാജിന്റെ ആത്മഹത്യാ പ്രസ്താവനയും പെട്ടെന്നുള്ള ഈ കരണം മറിച്ചിലും വല്ലാത്ത അറപ്പും വെറുപ്പും ഉളവാക്കുന്നു എന്നതാണ് സത്യം.

ഏഷ്യാനെറ്റിന്റെ ജാതിക്കണക്ക്!!..

അന്വേഷണാത്മക മാധ്യമപ്രവര്‍ത്തനത്തിന്റെ ഉദാത്ത മാതൃക..

ആശയ പരമായ അഭിപ്രായ വ്യത്യാസങ്ങള്‍ കാരണം ഒരു പാര്‍ട്ടിയില്‍ നിന്നും മറ്റൊരു പാര്‍ട്ടിയിലേക്ക് പോകുന്നതിനെ ആര്‍ക്കും എതിര്‍ക്കാന്‍ കഴിയില്ല. ഒരു നിലപാട് തറയുടെ സുസ്ഥിരത അത്തരം കൂടുമാറ്റങ്ങളെ സാധൂകരിക്കും. എന്നാല്‍ ആശയപരമായ ഭിന്നതകള്‍ ഒന്നുമില്ലാതെ പാര്‍ട്ടി നേതാക്കള്‍ എന്നെ മൈന്‍ഡ് ചെയ്യുന്നില്ല എന്ന ഒറ്റ കാരണം പറഞ്ഞാണ് സെല്‍വരാജ് കൂട് മാറിയിരിക്കുന്നത്. കോലുമുട്ടായി തന്നില്ല എന്ന് പറഞ്ഞു കൊച്ചു പിള്ളേര്‍ പിണങ്ങിപ്പോകുന്ന പോലെ.. യു ഡി എഫിന്റെ 'പിന്തിരിപ്പന്‍ മുതലാളിത്ത മൂരാച്ചി' രാഷ്ട്രീയത്തെ ഇത്രകാലവും തൊണ്ട പൊട്ടുമാറുച്ചത്തില്‍ എതിര്‍ത്ത ഒരു തൊഴിലാളി വര്‍ഗ രാഷ്ട്രീയക്കാരന്‍ രായ്ക്കു രാമാനം ആ യു ഡി എഫിലേക്ക് തന്നെ കൂട് മാറുമ്പോള്‍ അതിലൊരു ആത്മഹത്യയുണ്ട്. മുപ്പതു വെള്ളിക്കാശിനു വേണ്ടി സ്വന്തം വ്യക്തിത്വത്തെ തീയിട്ടു ചുടുന്ന ആത്മഹത്യ. യു ഡി എഫില്‍ നിന്ന് കാശ് വാങ്ങിച്ചിട്ടാണ് സെല്‍വരാജ് പോയതെന്ന് ഞാന്‍ പറയുന്നില്ല. കാശ് വാങ്ങിച്ചാലും ഇല്ലെങ്കിലും ഒരു നിലപാടിന്റെയും രാഷ്ട്രീയ സദാചാരത്തിന്റെയും പ്രശ്നമാണ് ഉയര്‍ന്നു വരുന്നത്. ഒരു നിലപാടില്‍ നിന്ന് അതിന്റെ നേര്‍വിരുദ്ധമായ മറ്റൊരു നിലപാടിലേക്ക് കുതിരച്ചാട്ടം ചാടുമ്പോള്‍ ഒരു കോഴിമുട്ട വിരിയാനുള്ള സമയമെങ്കിലും കൊടുക്കണം. അധികാര രാഷ്ട്രീയത്തിന്റെ അപ്പക്കഷണങ്ങള്‍ക്ക് പിറകെ നാക്ക് നീട്ടി ഓടുന്ന തെരുവുനായ്ക്കളുടെ നിലവാരത്തിലേക്ക് തൊഴിലാളിവര്‍ഗ രാഷ്ട്രീയത്തിന്റെ പ്രതിനിധികള്‍ക്ക് പോലും രൂപപരിണാമം വരുമ്പോള്‍ പ്രതീക്ഷയുടെ അവസാന തുരുത്തും കടലെടുക്കയാണ് എന്നാണു നാം തിരിച്ചറിയേണ്ടത്.

ഈ തിരഞ്ഞെടുപ്പില്‍ സെല്‍വരാജ് എട്ടു നിലയില്‍ പൊട്ടേണ്ടത്‌ നെയ്യാറ്റിന്‍കരക്കാരുടെ മാത്രം ആവശ്യമല്ല, അത് കേരളക്കരയുടെ രാഷ്ട്രീയ സദാചാരത്തിന്റെ കൂടി അനിവാര്യതയാണ്.

സുരേഷ് ഗോപി vs ടിന്റുമോന്‍

noreply@blogger.com (Basheer Vallikkunnu) — Thu, 19 Apr 2012 05:18:00 +0000

ഞാന്‍ സുരേഷ് ഗോപിയുടെ ഒരു മുടിഞ്ഞ ഫാനാണ്. ഈ ബ്ലോഗില്‍ ഏറ്റവും കൂടുതല്‍ പോസ്റ്റുകള്‍ ഇട്ടിട്ടുള്ളത് മലയാള നടന്മാരില്‍ സുരേഷ് ഗോപിയെക്കുറിച്ചാണ്. ജസ്റ്റ്‌ ഡിസംബര്‍ ദാറ്റ്‌ എന്ന ഒരൊറ്റ ഡയലോഗാണ് ഞാന്‍ അദ്ദേഹത്തിന്‍റെ ഫാനാകാനുള്ള പ്രധാന കാരണം. ഇടിവെട്ട് ശബ്ദത്തില്‍ ആ ഡയലോഗ് കാച്ചി സ്ലോ മോഷനില്‍ വരുന്ന ആ വരവുണ്ടല്ലോ അതില്‍ വീഴാത്തവന്‍ പിന്നെ പി സി ജോര്‍ജിന്റെ ഡയലോഗില്‍ പോലും വീഴില്ല. നടുവിരല്‍ ആകാശത്തേക്ക് ഉയര്‍ത്തിയുള്ള ആ മറ്റേ പ്രയോഗമാണ് എന്റെ ഫാന്‍ ലിസ്റ്റിലെ രണ്ടാമത്തെ ഐറ്റം. ചുരുക്കിപ്പറഞ്ഞാല്‍ സുരേഷേട്ടന്‍ കഴിഞ്ഞിട്ടേ എനിക്ക് കുതിരവട്ടം പപ്പു പോലും ഉള്ളൂ. പത്തോ നൂറോ ഗുണ്ടകള്‍ ഒരുമിച്ചു വന്നാലും പഴം പൊരി കടിക്കുന്ന ലാഘവത്തോടെ കൈകാര്യം ചെയ്യാന്‍ സുരേഷേട്ടനെപ്പോലെ ആകാരവടിവുള്ള ഒരു നടന്‍ ഇന്ത്യയില്‍ തന്നെ വേറെയുണ്ടോ? സംശയമാണ്.

അങ്ങനെ ജനകോടികളുടെ വിശ്വസ്ത സ്ഥാപനമായി മാറിയ സുരേഷ് ഗോപിയെന്ന തീപ്പൊരി നായകനാണ് ഒരൊറ്റ ആഴ്ച കൊണ്ട് ടിന്റുമോന്റെ പരുവത്തില്‍ ആയിട്ടുള്ളത്. ഏഷ്യാനെറ്റ് ഇങ്ങനെയൊരു കൊലച്ചതി സുരേഷ് അണ്ണനോട് ചെയ്യുമെന്ന് ഒട്ടും പ്രതീക്ഷിച്ചതല്ല. 'നിങ്ങള്‍ക്കുമാകാം കോടീശ്വരന്‍ 'ഷോയുടെ ആദ്യ പരസ്യങ്ങള്‍ വന്നപ്പോള്‍ തന്നെ ഒരു ടിന്റുമോന്‍ സ്മെല്ല് മണത്തുതുടങ്ങിയിരുന്നു. പരസ്യമല്ലേ, സാരമില്ല ഷോ തുടങ്ങിയാല്‍ സംഗതിയൊക്കെ മാറും എന്നായിരുന്നു ഞാന്‍ ധരിച്ചിരുന്നത്. എസ് എം എസ്സിലൂടെ ഏഷ്യാനെറ്റിന് കിട്ടാനുള്ള കോടികള്‍ ആദ്യം തന്നെ ഉറപ്പിക്കാനുള്ള ഒരു ഫരിപാടിയായിരിക്കും അതെന്നും കരുതി. പക്ഷേ ആ ധാരണ ഗോപിയായി. സുരേഷ് ഗോപിയുടെ ചോദ്യങ്ങള്‍ നാട്ടിലൊക്കെ പാട്ടായി. ടിന്റുമോന്‍ ഔട്ടായി.

എല്ലാത്തിനെയും കുറ്റം പറയുന്ന ഒരു പരിപാടിക്കാരനാണ് ഞാനെന്നു കരുതരുത്. കോടീശ്വരന്‍ ഷോ (Who Wants to Be a Millionaire?) ലോകം മുഴുക്കെ ഹിറ്റായ ഒരു ഷോയാണ്. റിയാലിറ്റി ഷോകളുടെ ചരിത്രം തന്നെ മാറ്റിമറിച്ച ഗെയിം ഷോ. നൂറിലധികം രാജ്യങ്ങളിലെ ടി വി റേറ്റിംഗ് ചാര്‍ട്ടുകളെ കുത്തനെ ഉയര്‍ത്തിയ ഷോയാണിത്‌. അമിതാബ് ബച്ചനും ഷാരൂഖ് ഖാനും ഹിറ്റാക്കി മാറ്റിയ അതിന്റെ ഹിന്ദി വേര്‍ഷനും നാം കണ്ടതാണ്. മൂക്ക് പിഴിച്ചില്‍ സീരിയലുകളെയും സ്റ്റാര്‍ സിംഗര്‍ എസ് എം എസ് തട്ടിപ്പുകളേയും അപേക്ഷിച്ച് നോക്കുമ്പോള്‍ ആയിരം വട്ടം ഗുണമേന്മയുള്ള ഷോയാണിത്‌. കുട്ടികളിലും മുതിര്‍ന്നവരിലും പൊതുവിജ്ഞാനതാത്പര്യം ജനിപ്പിക്കുന്ന തികച്ചും ക്രിയേറ്റീവായ ഒരു കണ്സപ്റ്റ് ഈ ഷോക്ക് പിന്നിലുണ്ട്. ദോഷം പറയരുതല്ലോ ഏഷ്യാനെറ്റും വളരെ നന്നായി തന്നെ ഈ ഷോ പ്ലാന്‍ ചെയ്തിട്ടുണ്ട്. കെട്ടിലും മട്ടിലും ഒറിജിനല്‍ ഷോയുടെ രാജകീയത നിലനിര്‍ത്താന്‍ അവര്‍ക്കായിട്ടുണ്ട്. പക്ഷേ കാണികളെയും മത്സരാര്‍ത്ഥികളെയും ഒരുതരം മന്ദബുദ്ധികള്‍ ആക്കുന്ന ചോദ്യങ്ങളാണ് സുരേഷ് ഗോപിക്ക് 'ഗുരുജി' കൊടുക്കുന്നത്. തികച്ചും ലളിതമായ ചോദ്യങ്ങളില്‍ നിന്ന് പ്രയാസമുള്ള ചോദ്യങ്ങളിലേക്കു കടക്കുന്ന രീതിയെയല്ല ഇവിടെ ഉദ്ദേശിക്കുന്നത്. ഈ ഷോയുടെ ഫോര്‍മാറ്റ് അങ്ങനെയാണെന്നറിയാം. പക്ഷേ ഒരു എല്‍ കെ ജി കുട്ടിയുടെ ബുദ്ധിയെങ്കിലും മത്സരാര്‍ത്ഥികള്‍ക്കും പ്രേക്ഷകര്‍ക്കും ഏഷ്യാനെറ്റ്‌ വകവെച്ചു കൊടുക്കണം. ഒരു ടിന്റുമോന്‍ ഫലിതമാക്കി ഈ ഷോയെ മാറ്റരുത്. കോടിപതികളാകാന്‍ വേണ്ടി പൊതുവിജ്ഞാനം അരച്ച് കലക്കിക്കുടിച്ചെത്തുന്ന മത്സരാര്‍ത്ഥികളോട് സുരേഷേട്ടന്‍ ചോദിച്ച ചില ചോദ്യങ്ങള്‍ നോക്കുക. നെറ്റിലാകെ പാട്ടാണ് ഈ ചോദ്യങ്ങള്‍ .

ആരായിരിക്കും ഈ ചോദ്യങ്ങള്‍ എഴുതിക്കൊടുക്കുന്നത്?. എനിക്ക് സംശയം നമ്മുടെ മര്‍ഡോക്കിന്റെ സ്വന്തം ആളെത്തന്നെയാണ് . മൂപ്പരാണല്ലോ ഇപ്പോള്‍ ചാനലിന്റെ ഹെഡ്. 'നമ്മള്‍ തമ്മില്‍ ' ഷോ മെല്ലെ കൈക്കുള്ളില്‍ ആക്കിയത് പോലെ സുരേഷ് ഗോപിയെ ഒരു പരുവത്തിലാക്കി ഈ ഷോയും അവതരിപ്പിച്ചു കളയാനുള്ള വല്ല പൂതിയും പുള്ളിക്കുണ്ടോ എന്ന് ആരെങ്കിലും സംശയിച്ചു പോയാല്‍ അതില്‍ തെറ്റ് പറഞ്ഞു കൂട. ഏതായാലും ഇത്തരം ചില ചോദ്യങ്ങളുടെ തമാശകള്‍ ഒഴിച്ച് നിര്‍ത്തിയാല്‍ സാമാന്യം നന്നായി തന്നെ സുരേഷ് ഗോപി ഈ ഷോ മുന്നോട്ടു കൊണ്ടുപോകുന്നുണ്ട്‌ എന്ന് പറയാതെ വയ്യ. പഴയ തമിഴ്നടന്മാരെ പോലെ എന്തും അല്പം ഓവറായി പറയുക എന്നൊരു ശൈലി അദ്ദേഹത്തിനു പണ്ടേ ഉണ്ട്. മഹാ സംവിധായകന്മാര്‍ വിചാരിച്ചിട്ട് മാറ്റാന്‍ കഴിയാത്ത അക്കാര്യം നമ്മള്‍ കുറച്ചു ഒണക്ക പ്രേക്ഷകന്മാര്‍ വിചാരിച്ചാല്‍ മാറ്റാന്‍ കഴിയില്ല. അതുകൊണ്ട് നമുക്കത് കണ്ടില്ലെന്നു നടിക്കാം. ആകെ മൊത്തം ടോട്ടല്‍ നോക്കിയാല്‍ അദ്ദേഹത്തിന്‍റെ പെര്‍ഫോമന്‍സിന് എ പ്ലസ് മാര്‍ക്ക് കൊടുത്തേ തീരൂ. ഏഷ്യാനെറ്റിന്റെ സെലക്ഷന്‍ തെറ്റിയിട്ടില്ല. മലയാള നടന്മാരില്‍ ഈ ഷോ ഇത്രയും നന്നായി കൊണ്ടുപോകാന്‍ മറ്റാര്‍ക്കെങ്കിലും കഴിയുമോ എന്ന് സംശയമാണ്. നമ്മുടെ കോബ്രയേയും കാസനോവയേയും മറന്നു കൊണ്ടല്ല ഞാനിത് പറയുന്നത്.

ചോദ്യങ്ങളുടെ നിലവാരം ഉയര്‍ത്തുവാന്‍ ഏഷ്യാനെറ്റിനു താത്പര്യമുണ്ട് എങ്കില്‍ എന്റെ വകയായി രണ്ടു മൂന്നു ചോദ്യങ്ങള്‍ ഡെഡിക്കേറ്റ് ചെയ്യുകയാണ്.

1) കോഴിക്കോട് കടപ്പുറം ഏത് ജില്ലയിലാണ്?
A: കഞ്ചിക്കോട് B: കാസര്‍ക്കോട് C: കോഴിക്കോട് D: അഴീക്കോട്

2) ഈയിടെ കാറപകടത്തില്‍ ഗുരുതരമായി പരിക്കേറ്റ മലയാള നടന്‍?
A: ജോര്‍ജ് ബുഷ്‌ B: നെല്‍സന്‍ മണ്ടേല C: ജഗതി ശ്രീകുമാര്‍ D: സാനിയാ മിര്‍സ

3) മൂവാണ്ടന്‍ മാവില്‍ കായ്ക്കുന്നതു എന്താണ്?.
A: മത്തങ്ങ B: കുമ്പളങ്ങ C: വഴുതനങ്ങ D: മൂവാണ്ടന്‍ മാങ്ങ

4) എം ടി യുടെ നാലുകെട്ട് എഴുതിയത് ആരാണ്?
A: ഷേക്സ്പിയര്‍ , B: സുരാജ് വെഞ്ഞാറമ്മൂട്, C: കാളിദാസന്‍, D: എം ടി വാസുദേവന്‍ നായര്‍

ഇതുപോലെ നിലവാരമുള്ള ചോദ്യങ്ങള്‍ ആരുടെയെങ്കിലും മനസ്സില്‍ വരുന്നുണ്ടെങ്കില്‍ അത് ഇവിടെ പങ്കു വെക്കാന്‍ മറക്കരുത്. സുരേഷ് ഏട്ടനെ സഹായിക്കേണ്ടത് നമ്മള്‍ ഫാന്‍സുകാരുടെ കടമയാണ്. ഞാനിതാ ദേ പോയി ദാ വന്നു!!

Related Posts
ദാസേട്ടാ, രഞ്ജിനി വിളിക്കുന്നു
ചൈനയിലെ സുരേഷ് ഗോപിയും ഡോളറമ്മാവനും
ബ്രിട്ടാസേ നീയും!!! (A John Brittas Drama)
സുരേഷ് ഗോപി സെറോക്സ്‌ കോപ്പിയല്ല
ബ്രിട്ടാസിക്ക മര്‍ഡോക്കിക്ക
രഞ്ജിനി സിനിമയിലേക്ക്, ന്‍റെ പടച്ചോനേ!!

ചെങ്കടലില്‍ ഒരു ബ്ലോഗ്‌ മീറ്റ്‌

noreply@blogger.com (Basheer Vallikkunnu) — Sun, 15 Apr 2012 06:20:00 +0000

ബ്ലോഗര്‍മാര്‍ തവളകളെപ്പോലെ ഉഭയജീവികളല്ല. അതുകൊണ്ട് ബ്ലോഗ്‌ മീറ്റുകള്‍ അധികവും കരയിലാണ് നടക്കാറുള്ളത്. വാടക കുറഞ്ഞ ഏതെങ്കിലും ഓഡിറ്റോറിയം അതല്ലെങ്കില്‍ ഫ്രീയായി കിട്ടുന്ന പാര്‍ക്കുകള്‍ (ധൂര്‍ത്ത് ഇഷ്ടപ്പെടാത്തവരാണ് ബ്ലോഗര്‍മാര്‍ , അല്ലാതെ പിശുക്കന്മാര്‍ ആയതു കൊണ്ടല്ല!) ഇതിലേതെങ്കിലും ഒന്നിലായിരിക്കും മീറ്റും ഈറ്റും! എന്നാല്‍ വളരെ ലാവിഷായി ഒട്ടും പിശുക്കില്ലാതെ കടലില്‍ നടത്തിയ ഒരു ബ്ലോഗ്‌ മീറ്റിനെക്കുറിച്ചാണ് ഈ പോസ്റ്റ്‌. ഒരു ആവേശത്തിന് ആളെക്കൂട്ടാന്‍ വേണ്ടി പറഞ്ഞതല്ല. അക്ഷരാര്‍ത്ഥത്തില്‍ തന്നെ കടലില്‍ നടത്തിയ ഒരു മീറ്റ്!!. കരയിലെന്ന പോലെ കടലിലും ഒരു കൈ നോക്കാന്‍ ചങ്കുറപ്പുള്ള പത്തു ബ്ലോഗര്‍മാരാണ് (നീന്താന്‍ അറിയാത്തവര്‍ മൂന്ന് ) ഈ മീറ്റിലെ കഥാപാത്രങ്ങള്‍ .

ചെങ്കടലില്‍ ആള്‍പ്പാര്‍പ്പില്ലാത്ത ഒരു ദ്വീപ്‌ സമൂഹമുണ്ട്‌. അല്‍ബതാഇന്‍ ഐലന്റ്സ്. സൗദി അറേബ്യയുടെ തെക്കന്‍ പ്രവിശ്യയില്‍ കരയില്‍ നിന്നും ഏതാണ്ട് അര മണിക്കൂര്‍ സ്പീഡ് ബോട്ടില്‍ സഞ്ചരിച്ചാല്‍ എത്താവുന്ന ദൂരത്താണ് അടുത്തടുത്ത് കിടക്കുന്ന അഞ്ചു ദ്വീപുകളുടെ ഈ കൂട്ടമുള്ളത്. ഈ ദ്വീപിലേക്ക് ഒരു ട്രിപ്പ്‌ നടത്താനുള്ള ആശയം ബ്ലോഗര്‍ ഫൈസല്‍ ബാബുവിന്റെതാണ്. ഞങ്ങള്‍ ഒരുമിച്ചു ഇതിനുമുമ്പ് രസകരമായ ഒരു മരുഭൂയാത്ര നടത്തിയിട്ടുണ്ട്. അന്നാണ് ഈ ആശയം ഫൈസല്‍ മുന്നോട്ടു വെക്കുന്നത്. യാത്രകള്‍ ഏറെ ഇഷ്ടപ്പെടുന്ന ഞാന്‍ ഉടനെ ഓക്കേ പറഞ്ഞു. അനുയോജ്യമായ തിയ്യതിയും കൂടെ ആരെയൊക്കെ കൂട്ടണം എന്നതും ഫൈസല്‍ എനിക്ക് വിട്ടു. യാത്ര ഉള്‍ക്കടലിലേക്കാണ്, മാത്രമല്ല സംഗതി അല്പം റിസ്ക്കുള്ള കാര്യവുമാണ്. അതുകൊണ്ട് തന്നെ ഒരു പ്രത്യേക ജനുസ്സില്‍പെട്ട ജീവിവര്‍ഗം എന്ന നിലയില്‍ ബ്ലോഗര്‍മാര്‍ ആയിക്കോട്ടെ എന്ന് ഞാന്‍ സജസ്റ്റ് ചെയ്തു. ഈ ദ്വീപിലേക്ക് പോകണമെങ്കില്‍ സൗദി കോസ്റ്റ് ഗാര്‍ഡിന്റെ മുന്‍കൂട്ടിയുള്ള അനുമതി വേണം. പത്തു പേരില്‍ കൂടുതല്‍ അനുമതി കിട്ടില്ല. ജിദ്ദയിലും പരിസരത്തുമായി അമ്പതിലധികം മലയാളി ബ്ലോഗര്‍മാര്‍ ഉണ്ട്. വിവരം അറിഞ്ഞാല്‍ എല്ലാവരും റെഡിയാവും. അറിയിക്കാതിരുന്നാല്‍ അത് പരാതിയാവുകയും ചെയ്യും. പക്ഷെ നിവൃത്തിയില്ല. പത്തു പേര്‍ക്ക് മാത്രമേ പറ്റൂ. വളരെ അടുത്ത സൗഹൃദമുള്ള മൂന്നാല് ബ്ലോഗര്‍മാരെ ഞാന്‍ സെലക്ട്‌ ചെയ്തു. പിന്നീട് അതിലൊരാളോട് ബാക്കിയുള്ളവരെ സെലക്ട്‌ ചെയ്യാന്‍ പറഞ്ഞു. (സുരക്ഷാ കാരണങ്ങളാല്‍ അദ്ദേഹത്തിന്‍റെ പേര് വെളിപ്പെടുത്തുന്നില്ല) വളരെ പ്രയാസപ്പെട്ടു അദ്ദേഹം ഒരു ഫൈനല്‍ ലിസ്റ്റ് ഉണ്ടാക്കി. അക്ബര്‍ ചാലിയാര്‍ , സലിം ഐക്കരപ്പടി , എം ടി മനാഫ് , അബ്ദുല്‍ ജബ്ബാര്‍ വട്ടപ്പൊയില്‍ , ഉസ്മാന്‍ ഇരിങ്ങാട്ടിരി , രമേശ്‌ അരൂര്‍ , എഞ്ചി. അബ്ദുല്‍ ലത്തീഫ് , കൊമ്പന്‍ മൂസ പിന്നെ ഞാനും ഫൈസലും. ടാസ്ക് ഫോഴ്സ് റെഡി.

ഉച്ച തിരിഞ്ഞു രണ്ടു കാറുകളിലായി ജിദ്ദയില്‍ നിന്നും യാത്ര. അക്ബറിന്റെ മെര്‍ക്കുറി ഗ്രാന്‍ഡ്‌ മാര്‍ക്വിസും ലത്തീഫിന്റെ ഫോര്‍ഡും ജീസാന്‍ ഹൈവേയിലൂടെ ചീറിപ്പാഞ്ഞു. ഒരു വണ്ടിയില്‍ ഇരിങ്ങാട്ടിരിയുടെ കവിതകളുടെ ബഹളം. മറ്റൊരു വണ്ടിയില്‍ രമേശിന്റെ നേതൃത്വത്തിലുള്ള സാഹിത്യ സംവാദങ്ങള്‍ . രണ്ടും നോണ്‍ സ്റ്റോപ്പ്‌. നാനൂറു കിലോമീറ്റര്‍ ഓടിയതേ അറിഞ്ഞില്ല. രാത്രി ഒമ്പത് മണിയോടെ ഖുന്‍ഫുദക്ക് സമീപം ദ്വീപ്‌ സമൂഹത്തിനു നേരെയുള്ള കടല്‍ക്കരയില്‍ എത്തി. ഫൈസല്‍ അവിടെ കാത്തുനില്കുന്നുണ്ട്. അതിരാവിലെ ദ്വീപിലേക്ക് പോകാനാണ് പരിപാടി. രാത്രി കടല്‍ക്കരയില്‍ തങ്ങുക. അതിനു വേണ്ടി രണ്ടു ടെന്റുകള്‍ ഫൈസല്‍ റെഡിയാക്കി വെച്ചിട്ടുണ്ട്. തീരത്ത്‌ തന്നെയാണ് ടെന്റ് കെട്ടിയിട്ടുള്ളത്. കടല്‍ വെള്ളത്തിലേക്ക് കഷ്ടി രണ്ടോ മൂന്നോ മീറ്റര്‍ അകലം മാത്രം. അറബിക്കടലിന്റെ തീരങ്ങളിലേത് പോലുള്ള തിരമാലകള്‍ ചെങ്കടലിനു ഇല്ല. രാത്രിയില്‍ നോക്കുമ്പോള്‍ കാറ്റില്‍ ഓളം തത്തിക്കളിക്കുന്ന ഒരു കായല്‍പരപ്പാണെന്നേ തോന്നൂ.

ബാഗുകള്‍ ടെന്റില്‍ വെച്ചു എല്ലാവരും പുറത്തിറങ്ങി. കള്ളിമുണ്ടും തലയിലൊരു റൌഡിക്കെട്ടുമായി പുറത്തിറങ്ങിയ കൊമ്പന് ശരിക്കും ഒരു കുട്ടികൊമ്പന്റെ ലുക്ക്‌. പരിസരമൊക്കെ ഒന്ന് ചുറ്റിക്കറങ്ങി വന്ന ശേഷം രാത്രി ഭക്ഷണത്തിനു വേണ്ട ഒരുക്കങ്ങള്‍ .. കോഴിയും മീനും ചുടുകയാണ് പ്രധാന പരിപാടി. അതിനു വേണ്ട സംഗതികളൊക്കെ ഫൈസല്‍ ഒരുക്കിയിട്ടുണ്ട്. നേരിയ തണുത്ത കാറ്റില്‍ ബാര്‍ബിക്യൂ അടുപ്പിന്റെ ചുറ്റും എല്ലാവരും വട്ടം കൂടി. പിന്നെ പാട്ടുകളും സാഹിത്യ ചര്‍ച്ചകളുമായി രംഗം കൊഴുത്തു. ചുട്ട കോഴിയുടെ മണം വന്നതോടെ അക്ബര്‍ ഫുള്‍ ഫോമിലായി. ഇടിവെട്ട് തമാശകളുടെ കുത്തൊഴുക്ക്. അക്ബറിന്റെ വാക്കുകള്‍ക്കു ഫൈസല്‍ എരിവു പകര്‍ന്നു. രണ്ട് പേരും സഹോദരന്മാരാണ്. ഇരുവരും തമ്മിലുള്ള സൗഹൃദബന്ധം ഞങ്ങളെ എല്ലാവരെയും അത്ഭുതപ്പെടുത്തിയിട്ടുണ്ട്. കളിയും ചിരിയും തമാശകളുമായി വല്ലാതെ ഇഴുകിച്ചേര്‍ന്ന ഒരു കൂട്ടുകെട്ട്. ചര്‍ച്ചയും തമാശകളും പുരോഗമിക്കുന്നതിനിടെ ലാപ്ടോപ്പിലെ കരോക്കി ഈണങ്ങള്‍ക്ക് സലീമിന്റെ ഹിന്ദി ഗസലുകള്‍ . വളരെക്കാലത്തെ സൗഹൃദം ഉണ്ടെങ്കിലും സലീം ഇത്തരം കടുംകൈകള്‍ ചെയ്യാറുണ്ടെന്നത് എനിക്കൊരു പുതിയ അറിവായിരുന്നു. ഇതിനിടെ ഖലീല്‍ ജിബ്രാന്റെ ഒരു കവിതയുടെ മലയാള വിവര്‍ത്തനം വട്ടപ്പൊയില്‍ മനോഹരമായി ആലപിച്ചു. കടലിലെ ഓളങ്ങളുടെ നനുത്ത സംഗീതം ജിബ്രാന്റെ ഭാവനകള്‍ക്ക് എന്തെന്നില്ലാത്ത അനുഭൂതിയാണ് പകര്‍ന്നത്.

തല ചായ്ക്കാന്‍ രാത്രി മൂന്നു കഴിഞ്ഞെങ്കിലും അതിരാവിലെ തന്നെ എല്ലാവരും എഴുന്നേറ്റു റെഡിയായി. രണ്ടോ മൂന്നോ മണിക്കൂറിന്റെ ഉറക്കം മാത്രം.എന്നിട്ടും ആര്‍ക്കും ഉറക്കച്ചവടില്ല. ദ്വീപിലേക്കുള്ള പോകാനുള്ള ആവേശമാണ് എല്ലാവരുടെയും മുഖത്ത്. ഫൈസലിന്റെ സുഹൃത്തും സഊദി പൗരനുമായ യഹ് യ ബോട്ടുമായി എത്തിയിട്ടുണ്ട്. അദ്ദേഹമാണ് ഞങ്ങളുടെ ഗൈഡും ബോട്ടിന്റെ ഡ്രൈവറും. സഊദി ഇന്റര്‍ മീഡിയറ്റ് സ്കൂളിലെ സ്പോര്‍ട്സ് അദ്ധ്യാപകനാണ് യഹ് യ മുഹമ്മദ്‌ മിന്കീര്‍ . കണ്ടാല്‍ ഒരു ഗ്രാമീണ മീന്‍പിടുത്തക്കാരന്റെ ലുക്ക്‌. അദ്ദേഹം തന്നെയാണ് ഫൈസലിന്റെ അഭ്യര്‍ത്ഥന പ്രകാരം ഇവിടെ ടെന്റ് ശരിയാക്കിക്കൊടുത്തതും. പണിക്കാരെ കിട്ടാതെ വന്നപ്പോള്‍ സ്വയം കുഴികള്‍ കുത്തി അദ്ദേഹം ഒറ്റക്കാണ് ഈ ടെന്റ് കെട്ടിയതത്രേ. ഫൈസല്‍ അത് പറഞ്ഞപ്പോള്‍ ഞങ്ങള്‍ക്കെല്ലാവര്‍ക്കും അദ്ദേഹത്തോട് വല്ലാത്ത ബഹുമാനമായി.

ബര്‍മുഡയും ബനിയനും റെഡിയാക്കി എല്ലാവരും ബോട്ടിലേക്ക്. ദ്വീപ്‌ ലക്ഷ്യമാക്കി കടലിലൂടെ ഒരു യാത്ര. കുസൃതിക്കുട്ടികള്‍ സൈക്കിള്‍ ഓട്ടുന്ന പോലെയാണ് യഹ് യ ബോട്ട് ഓടിക്കുന്നത്. ഞങ്ങളെ രസം പിടിപ്പിക്കുകയാണ് അദ്ദേഹത്തിന്‍റെ ലക്ഷ്യമെന്നത് ഉറപ്പ്. ചായ്ച്ചും ചരിച്ചും വൃത്തം വരച്ചും പെട്ടെന്ന് നിറുത്തിയുമൊക്കെ സ്പീഡ് ബോട്ടിന്റെ സകല സാധ്യതകളും യഹ് യ പുറത്തെടുത്തു. ഇരിങ്ങാട്ടിരി മാഷിന്റെ അടുത്താണ് ഞാന്‍ ഇരിക്കുന്നത്. നീന്തല്‍ അറിയാത്ത മാഷിന്റെ നെഞ്ചിടിപ്പ് ഏതാണ്ട് ഉടുക്ക് കൊട്ടുന്ന പോലെ എനിക്ക് കേള്‍ക്കാം. ഞാന്‍ പറഞ്ഞു, പേടിക്കേണ്ട. എന്തെങ്കിലും സംഭവിച്ചാല്‍ വീട്ടിലെ മൊബൈല്‍ നമ്പര്‍ എന്റടടുത്തുണ്ട്. ഞാന്‍ വിളിച്ചു പറഞ്ഞോളാം. സലീമിന്റെ യു എസ് ബി യില്‍ നിന്നും കെ പി എ സിയുടെ ആ പഴയ നാടകപ്പാട്ട്. പാമ്പുകള്‍ക്ക് മാളമുണ്ട്... ഇത്തരമൊരു അടിച്ചുപൊളിയാത്രയുടെ നാലയലത്തു അടുപ്പിക്കാന്‍ പറ്റാത്ത പാട്ടാണ്. പക്ഷെ എന്ത് ചെയ്യാം. സലീമിന്റെ മൊത്തം കളക്ഷനില്‍ ശോക ഗാനങ്ങള്‍ മാത്രം. പാട്ടിന്റെ പോക്ക് ശരിയല്ല എന്ന് കണ്ടതോടെ പ്ലയര്‍ ഓഫാക്കി യഹ് യ നാടന്‍ അറബിപ്പാട്ടും ഡാന്‍സും തുടങ്ങി. അതിനൊപ്പിച്ച്‌ എല്ലാവരും കളി തുടങ്ങി.

ഏതാണ്ട് പകുതി ദൂരം പിന്നിട്ടപ്പോള്‍ യഹ് യ ബോട്ട് നിര്‍ത്തി. പിന്നെ ചൂണ്ടലുകള്‍ പുറത്തെടുത്തു. അഞ്ചാറു ചൂണ്ടകള്‍ ഉണ്ട്. അവയില്‍ ഇര കോര്‍ത്ത്‌ ഓരോരുത്തരുടെ കയ്യിലായി നല്‍കി. ഭാഗ്യമുണ്ടെങ്കില്‍ നിങ്ങളുടെ ഉച്ച ഭക്ഷണത്തിനുള്ള മീന്‍ നമുക്ക് ഇപ്പോള്‍ പിടിക്കാം. ഇന്‍ഷാ അല്ലാഹ്.. യഹ് യ യുടെ ആ വാക്കുകളിലെ ശുഭ പ്രതീക്ഷ നല്‍കിയ ആവേശത്തില്‍ ഞങ്ങള്‍ ചൂണ്ടലുകള്‍ എറിഞ്ഞു. അവിശ്വസനീയമായിരുന്നു. ചൂണ്ടലുകളില്‍ തുടരെത്തുടരെ മീനുകള്‍ . അറബികളുടെ പ്രിയമത്സ്യങ്ങളില്‍ ഒന്നായ ശുഊറാണ് കൂടുതലും കിട്ടിയത്. യഹ് യ യുടെ ചൂണ്ടയില്‍ ആണ് ഏറ്റവും കൂടുതല്‍ മീനുകള്‍ കിട്ടിയത്. ആ ആവേശത്തില്‍ പലരും ഡാന്‍സ് തുടങ്ങി.

ചൂണ്ടക്കു വേണ്ട ഇരകളെ തയ്യാറാക്കുകയാണ് യഹ് യ

പെട്ടെന്നാണ് ടപ്പോ എന്ന ശബ്ദത്തില്‍ ആരോ കടലിലേക്ക്‌ വീണത്‌. എന്റെ നെഞ്ചിലൂടെ ഒരു ഇടിമിന്നല്‍ പാഞ്ഞു. ഞാന്‍ ഇരിങ്ങാട്ടിരിയുടെ സീറ്റിലേക്ക് നോക്കി. ഭാഗ്യം. പുള്ളി അവിടെയുണ്ട്. പിന്നെ എന്താണ് സംഭവിച്ചത്. നോക്കുമ്പോള്‍ ലത്തീഫ് കടലില്‍ മുങ്ങി ഉയരുന്നു!. ഒരു നിമിഷം പകച്ചു പോയെങ്കിലും സുന്ദരമായി നീന്തിക്കുളിക്കുകയാണ് കക്ഷി. എല്ലാവരെയും ഒന്ന് ഞെട്ടിക്കാന്‍ വേണ്ടി എടുത്തു ചാടിയതാണ്. മീന്‍ വേട്ട തുടരുക തന്നെയാണ്. ഏകദേശം മുക്കാല്‍ മണിക്കൂറിനുള്ളില്‍ ആറര കിലോ മത്സ്യം പിടിച്ചു. പത്തു പേര്‍ക്ക് ഇത് ധാരാളം. അത് പറഞ്ഞു യഹ് യ വീണ്ടും ബോട്ട് സ്റ്റാര്‍ട്ടാക്കി. ഇപ്പോള്‍ ബോട്ട് വളരെപ്പതുക്കെയാണ് പോകുന്നത്. ഞാന്‍ കാര്യം തിരക്കിയപ്പോള്‍ യഹ് യ വെള്ളത്തിനടിയിലേക്ക്‌ സൂക്ഷിച്ചു നോക്കാന്‍ പറഞ്ഞു. പാറക്കെട്ടുകള്‍ .. കിലോമീറ്ററുകള്‍ പരന്നു കിടക്കുന്ന പാറക്കുന്നുകള്‍ ഇവിടെ ധാരാളമുണ്ട്. അറിയാത്തവര്‍ ഈ വഴി വന്നാല്‍ ടൈറ്റാനിക്ക് ഉറപ്പ്.

ദൂരെ ഒരു പൊട്ടു പോലെ കാണുന്ന ആ ദ്വീപാണ് ഞങ്ങളുടെ ലക്ഷ്യം.

സൂക്ഷിച്ചു നോക്കിയാല്‍ പാറക്കൂട്ടങ്ങള്‍ കാണാം.

അറബ് ശൈലിയില്‍ ഒരു ബ്രേക്ക്ഫാസ്റ്റ് - ഫൂലും തമീസും

ഒരു കൊച്ചു ദ്വീപിലാണ് ഞങ്ങള്‍ ഇറങ്ങിയത്‌. ആള്‍ താമസമില്ലാത്തതിനാല്‍ തീര്‍ത്തും വൃത്തിയുള്ള തീരം. മരങ്ങളുടെ ഇലകളും പക്ഷികളുടെ തൂവലുകളും മാത്രമേ തീരത്ത്‌ ചിതറിക്കിടക്കുന്നുള്ളൂ. പലതരം പക്ഷികളെ അവിടെ കാണാന്‍ പറ്റി. ഒരു ഞണ്ടിനെക്കണ്ടപ്പോള്‍ അതിനെ പിടിക്കാനൊരു വിഫല ശ്രമം കൊമ്പന്‍ നടത്തി. ദ്വീപില്‍ ചുറ്റിക്കറങ്ങി ഞങ്ങള്‍ ഈ സന്ദര്‍ശനത്തിന്റെ പ്രധാന അജണ്ടയിലേക്ക് കടന്നു. എല്ലാവരും ബര്‍മുഡയില്‍ കയറി. അധികം ഉയരമില്ലാത്തതിനാല്‍ വട്ടപ്പൊയില്‍ ബര്‍മുഡയിട്ടിട്ടും പാന്റ് ധരിച്ച പോലെയുണ്ട്.

അകലെ മറ്റൊരു ദ്വീപ്‌ കാണാം.

ഞങ്ങള്‍ വെള്ളത്തില്‍ ഇറങ്ങി കുളി തുടങ്ങി. പക്ഷെ മൂന്ന് പേര്‍ ബര്‍മുഡയിട്ട് കരയില്‍ തന്നെ നില്‍ക്കുന്നു. പെണ്ണ് കാണാന്‍ വന്ന ചെറുക്കനെ നോക്കി വധു വിരലുകൊണ്ട് നിലത്തു ചക്രം വരയ്ക്കുന്ന പോലെ അവര്‍ കടലിനെ നോക്കി ചിത്രം വരച്ചു നില്‍ക്കുകയാണ്. ഇരിങ്ങാട്ടിരി മാഷ്‌ക്ക് തുണയായി നീന്തല്‍ അറിയാത്ത രണ്ട് പേര്‍ ഉണ്ടെന്നത്‌ അപ്പോഴാണ്‌ പുറത്തു വന്നത്. ജഗജില്ലികളായ രമേഷും സലീമും. സംഗതി മനസ്സിലാക്കിയ യഹ് യ അവരുടെ സംരക്ഷണ ചുമതല ഏറ്റെടുത്തു മൂന്ന് പേരെയും പിടിച്ചു വെള്ളത്തില്‍ ഇറക്കി. ഇതിനകം ഞങ്ങള്‍ കടലിലേക്ക്‌ കുറെ ദൂരം പോയിരുന്നു. മഹാ ധൈര്യശാലിയായ ഞാന്‍ വീണ്ടും ദൂരേക്ക്‌ പോകുന്നത് കണ്ടപ്പോള്‍ യഹ് യ വിലക്കി. 'ലാ തറൂഹ് ബഈദ്.. ഖത്റ .. (ദൂരേക്ക്‌ പോണ്ട.. അപകടമാണ്). ഒരു മണിക്കൂര്‍ നീണ്ട കുളി കഴിഞ്ഞതോടെ ബ്ലോഗ്‌ മീറ്റ്‌ തുടങ്ങി. ഔദ്യോഗികമായ സ്വാഗതം ഫൈസല്‍ ബാബു വക. ഉദ്ഘാടനം മഹാനായ ഞാന്‍ തന്നെ നിര്‍വഹിച്ചു. ഇരിങ്ങാട്ടിരി ഒരു കിടിലന്‍ അദ്ധ്യക്ഷ പ്രസംഗം നടത്തി. നല്ല പോയിന്റുകള്‍ വരുമ്പോള്‍ എല്ലാവരും പരസ്പരം വെള്ളം തൂകി. കയ്യടിക്കുന്നതിനേക്കാള്‍ തികച്ചും അര്‍ത്ഥഗര്‍ഭമായിരുന്നു അത്. കൂടുതല്‍ പോയിന്റുകള്‍ പറയുന്നതിനനുസരിച്ച് ഇരിങ്ങാട്ടിരി കൂടുതല്‍ വെള്ളം കുടിച്ചു കൊണ്ടിരുന്നു. അപകടം മണത്ത അദ്ദേഹം പ്രസംഗം ചുരുക്കി. രമേശ്‌ അരൂര്‍ തന്റെ പത്രപ്രവര്‍ത്തന കാലത്തെ രസകരമായ അനുഭവങ്ങള്‍ പങ്കു വെച്ചു. ആദ്യമായി പ്രസംഗിക്കുകയാണ് എന്ന് പറഞ്ഞു തുടങ്ങിയ അക്ബര്‍ ഒരു കിടിലന്‍ പ്രസംഗം തന്നെയാണ് കാച്ചിയത്. മനാഫ് മാസ്റ്റര്‍ ഒരു മനോഹര കവിത ചൊല്ലിയാണ് പ്രസംഗം അവസാനിപ്പിച്ചത്. ഞങ്ങളുടെ കൂട്ടത്തിലെ ഒരേയൊരു ഇംഗ്ലീഷ് ബ്ലോഗറായ ലത്തീഫിന്റെ ഊഴം വന്നപ്പോള്‍ പുള്ളി ഒരൊറ്റ മുങ്ങല്‍ .. പൊങ്ങിയത് കൈ നിറയെ മണല്‍ തരികളുമായി. തന്റെ കുട്ടിക്കാലത്ത് വീടിനുടുത്ത പുഴയില്‍ ഇതുപോലുള്ള മണലായിരുന്നു. എന്നാല്‍ ഇപ്പോള്‍ മുട്ടോളം ചളിയാണ്‌. മണല്‍ ഖനനം നമ്മുടെ പുഴകളെ കൊന്നു തുടങ്ങിയിരിക്കുന്നു. വളരെ ടച്ചിംഗ് ആയ ഒരു ശൈലിയിലാണ് ലത്തീഫ് അത് പറഞ്ഞത്.

യോഗയല്ല, സലീമിനെ നീന്തല്‍ പഠിപ്പിക്കുകയാണ് യഹ് യ

യഹ് യ യുടെ ജിംനാസ്റ്റിക് പ്രദര്‍ശനം

ഇരിങ്ങാട്ടിരിയുടെ പ്രസംഗം കത്തിക്കയറുന്നു.

സലീം പ്രസംഗിക്കുന്നതിനിടയില്‍ പെട്ടെന്ന് വെള്ളത്തിനടിയില്‍ നിന്ന് രണ്ടു കാലുകള്‍ പൊങ്ങി വന്നു. എല്ലാവരും ഒന്ന് ഞെട്ടി പിറകോട്ടു മാറി. യഹ് യ ഊളിയിട്ടു വന്നു തല കീഴായി നിന്നതാണ്. ഇനിയും പ്രസംഗം തുടര്‍ന്നാല്‍ മീന്‍ കേടു വരും എന്ന് മുന്നറിയിപ്പ് തന്നു അദ്ദേഹം വീണ്ടും ഊളിയിട്ടു എങ്ങോട്ടോ പോയി. കൊമ്പനും വട്ടപ്പോയിലും ബ്ലോഗ്‌ അനുഭവങ്ങള്‍ പങ്കുവെച്ചു. പ്രസംഗങ്ങള്‍ അധികം ദീര്‍ഘിപ്പിക്കാതെ ബ്ലോഗ്‌ മീറ്റ് അവലോകനം നടത്തി ഞങ്ങള്‍ മടങ്ങി. പിടിച്ച മീന്‍ അറേബ്യന്‍ സ്റ്റൈലില്‍ പൊരിച്ചു കൊണ്ടുവരാനുള്ള ഏര്‍പാടുകള്‍ കരയിലെത്തിയ ഉടനെ ഫൈസല്‍ ചെയ്തു.

ജുമുഅ നമസ്കാരം കഴിഞ്ഞു തിരിച്ചെത്തിയപ്പോഴെക്ക് ഫൈസലിന്റെ വീട്ടില്‍ ഭക്ഷണം റെഡി. ഞങ്ങള്‍ തന്നെ പിടിച്ച മത്സ്യമായതിനാല്‍ അതിനു എന്തെന്നില്ലാത്ത രുചി. ഫൈസലിനോടും കുടുംബത്തോടും യാത്ര പറഞ്ഞു ഞങ്ങള്‍ മടങ്ങി. സൗദിയിലെ പ്രധാന ടൂറിസ്റ്റ് ആകര്‍ഷണങ്ങളില്‍ ഒന്നായ അല്‍ബാഹ ചുരം വഴിയാണ് മടക്കയാത്ര. ചെങ്കുത്തായ പര്‍വതനിരയുടെ മുകളിലേക്ക് ജര്‍മന്‍ സാങ്കേതിക വിദ്യയില്‍ പണികഴിപ്പിച്ചിട്ടുള്ള ചുരത്തിലൂടെയുള്ള യാത്ര ഏറെ ആസ്വാദ്യകരമായിരുന്നു. ചുരത്തിനു മുകളിലെത്തിയപ്പോള്‍ മൂടല്‍ മഞ്ഞും നല്ല തണുപ്പും. ഏതു ഉഷ്ണ കാലത്തും ഇവിടെ നല്ല തണുപ്പായിരിക്കും. ഒരു ഗ്രാമീണ അറബി നാടന്‍ മാങ്ങ വില്‍ക്കുന്നുണ്ട്. ഇരുപതു റിയാലിന് അയാളില്‍ നിന്നും ഒരു ചെറിയ പെട്ടി മാങ്ങ വാങ്ങി. മാങ്ങ തിന്നു കഴിഞിട്ടും കൊമ്പന്‍ മൂസ അണ്ടി വിടുന്നില്ല. ആ മല്ലയുദ്ധം കണ്ടു തൊട്ടപ്പുറത്തെ മരത്തിനു മുകളില്‍ നിന്ന് ഒരു കുരങ്ങന്‍ പ്രത്യേക ചിരി ചിരിച്ചു.'എന്നെക്കാള്‍ കഷ്ടമാണല്ലോടാ നിന്റെ സ്ഥിതി' എന്നൊരു അര്‍ത്ഥം ആ ചിരിക്കുണ്ടോ ആവോ?. രസകരമായ ചുരം കാഴ്ചകള്‍ കണ്ടു ജിദ്ദയിലേക്ക് മടങ്ങുമ്പോള്‍ തികച്ചും വ്യത്യസ്തമായ ഒരു ബ്ലോഗ്‌ മീറ്റില്‍ പങ്കുകൊണ്ടതിന്റെ അനുഭൂതിയായിരുന്നു മനസ്സ് നിറയെ. ഒപ്പം ഈ യാത്രക്ക് അവസരമൊരുക്കിയ ഫൈസല്‍ ബാബുവിനോടുള്ള അകമഴിഞ്ഞ ഇഷ്ടവും.

മ്യാവൂ: ഇത്തരം യാത്രകളില്‍ പങ്കെടുക്കുവാന്‍ താത്പര്യമുള്ളവര്‍ അറിയിക്കുക. എന്റെ ഫുള്‍ ചെലവു എടുക്കാന്‍ തയ്യാറാണെങ്കില്‍ നിങ്ങള്‍ക്കുള്ള സീറ്റ് റെഡി.

Related Posts (Travel)
മരുഭൂമിയില്‍ രണ്ടു നാള്‍ അഥവാ ആട് ജീവിതം റീലോഡഡ്
ദാല്‍ തടാകത്തിലെ രണ്ടു രാത്രികള്‍
പഞ്ചാബിലെ സുഹൃത്ത്, അയോധ്യയിലെ പള്ളി
കാത്തയെ കണ്ട ഓര്‍മയില്‍
മക്കയില്‍ നിന്ന് ചുള്ളിമാനൂരിലേക്ക് ബസ്സുണ്ടോ?
ബ്ലോഗറുടെ കപ്പല്‍ യാത്ര (ടിക്കറ്റ് ഫ്രീയാണ്)

ആറാം മന്ത്രി ഉടന്‍, ഹൈക്കമാന്ഡിന്റെ അടിയന്തിരയോഗം!

noreply@blogger.com (Basheer Vallikkunnu) — Thu, 12 Apr 2012 04:01:00 +0000

പതിനൊന്നു മാസം ഗര്‍ഭം ധരിച്ച ശേഷം ലീഗ് അഞ്ചാം മന്ത്രിയെ പ്രസവിച്ചു. നാലെണ്ണം സുഖപ്രസവം ആയിരുന്നെങ്കില്‍ അഞ്ചാമത്തേത് സിസേറിയന്‍ ആയിരുന്നു എന്ന് മാത്രം. തള്ളക്കും കുട്ടിക്കും കാര്യമായ കുഴപ്പങ്ങള്‍ ഒന്നും ഇല്ല. നാലഞ്ചു കുപ്പി രക്തവും രണ്ടു ബോട്ടില്‍ മയക്കുമരുന്നും അധികം ചിലവായി എന്ന് മാത്രം. ലേബര്‍ റൂമില്‍ നിന്നും കുട്ടിയുടെ കരച്ചില്‍ കേട്ടതോടെ ലീഗുകാര്‍ ആഘോഷങ്ങള്‍ തുടങ്ങിക്കഴിഞ്ഞു. മലപ്പുറത്തെ കടകളില്‍ ലഡുവും ജിലേബിയും കിട്ടാനില്ലാത്ത അവസ്ഥയാണ്. ഷെയര്‍ മാര്‍ക്കറ്റില്‍ ഓഹരി വില ഇടിയുന്ന പോലെ കുത്തനെ ഇടിഞ്ഞ പാണക്കാട് തങ്ങളുടെ വാക്കിന്റെ വില ഈ പ്രസവത്തോടെ കുതിച്ചു മുകളിലേക്ക് തന്നെ കയറി. മോന്തായം തൊട്ടു തൊട്ടില്ല എന്ന മട്ടിലാണ് ലീഗ് സൂചികയുടെ ഗ്രാഫ് നില്‍ക്കുന്നത്.

ഈ തര്‍ക്കത്തില്‍ ഏറ്റവും വിലയിടിഞ്ഞത്‌ കോണ്ഗ്രസ്സിനാണ് എന്ന് പറയാതെ വയ്യ. ലീഗ് മുന്നോട്ടു വെച്ച ആവശ്യം തികച്ചും ന്യായമാണെന്നും അതുകൊണ്ട് കോണ്‍ഗ്രസ് വിട്ടു വീഴ്ച ചെയ്തു മുന്നോട്ടു പോവുകയാണെന്നുമാണ് അവര്‍ ഇപ്പോള്‍ പറയുന്നത്. എങ്കില്‍ ഇത് വരെ മസില്‍ പിടിച്ചു നിന്ന് ഈ വിവാദങ്ങളൊക്കെ ഉണ്ടാക്കിയത് എന്തിനായിരുന്നു എന്ന ചോദ്യമുണ്ട്. കേരള രാഷ്ട്രീയത്തില്‍ സമീപകാലം കണ്ട ഏറ്റവും അപകടകരമായ ഒരു ചര്‍ച്ചയെ ഇത്ര വഷളായ ഒരവസ്ഥയിലേക്കു എത്തിച്ചത് രമേശ്‌ ചെന്നിത്തലയും അദ്ദേഹത്തിന്‍റെ ഗ്രൂപ്പുമാണ്. ഏതാനും മാസങ്ങളായി സംപ്രേഷണം നടക്കുന്ന അഞ്ചാംമന്ത്രി എപ്പിസോഡുകളെ അല്പം സീരിയസ്സായി വിശകലനം ചെയ്‌താല്‍ മനസ്സിലാകുന്ന ഒരു കാര്യമുണ്ട്. ഈ സംഭവ പരമ്പരകള്‍ കേരളത്തിലെ മതേതര പൊതുസമൂഹത്തില്‍ വലിയ വിള്ളലുകള്‍ ഉണ്ടാക്കി എന്നതാണത്. മതവും ജാതിയും ഉപജാതിയും തിരിച്ചു മന്ത്രിമാരുടെ എണ്ണവും വകുപ്പും വിശകലനം ചെയ്യപ്പെട്ടു.

മതം മനുഷ്യനെ മയക്കുന്ന കറുപ്പാണെന്ന് പറഞ്ഞ പ്രത്യയശാസ്ത്രത്തിന്റെ വക്താക്കള്‍ പോലും ജാതിയും മതവും തിരിച്ചു മന്ത്രിമാര്‍ക്ക് വേണ്ടി വാദിച്ചു. ലീഗിന് അഞ്ചാം മന്ത്രി സ്ഥാനം കൊടുത്താല്‍ സാമുദായിക സന്തുലനം തകരുമെന്ന് വി എസും കോടിയേരിയും പിണറായിയും വിലപിച്ചപ്പോള്‍ കേരളീയ മതേതര പൊതുസമൂഹത്തിന്റെ മനസ്സാക്ഷിക്കാണ് മുറിവേറ്റത്. ഇത്രയേറെ ജാതിബോധവും സന്തുലനബോധവും വി എസ്സിനുണ്ടായിരുന്നെങ്കില്‍ തന്റെ നേതൃത്വത്തിലുള്ള കഴിഞ്ഞ മന്ത്രിസഭയിലെ മുസ്ലിം മന്ത്രിമാരുടെ എണ്ണം കൂട്ടണമായിരുന്നു. രണ്ടു മുസ്ലിം മന്ത്രിമാരെ വെച്ചാണ് വി എസ് കഴിഞ്ഞ അഞ്ചു വര്‍ഷം ഭരിച്ചത്. അപ്പോള്‍ എവിടെയായിരുന്നു ഈ സന്തുലനബോധം?. മുന്നണിയിലെ രണ്ടാം കക്ഷി ഒരേ ജാതിയില്‍ നിന്ന് നാല് മന്ത്രിമാരെ പ്രഖ്യാപിച്ചപ്പോള്‍ എവിടെയായിരുന്നു ആ സമത്വ ബോധം. സി പി എം പതിറ്റാണ്ടുകള്‍ ഭരിച്ച പശ്ചിമ ബംഗാളില്‍ എത്ര സാമുദായിക സന്തുലനം പാലിച്ചിട്ടുണ്ട്?

ഇപ്പോള്‍ മാത്രം മതത്തിന്റെയും ജാതിയുടെയും കണക്കു നോക്കിയ വി എസ്സും സഖാക്കളും ഈ ചോദ്യങ്ങള്‍ക്കൊക്കെയും മറുപടി പറയേണ്ടതുണ്ട്. ലീഗിന് മന്ത്രിമാരുടെ എണ്ണം കൂടുമ്പോള്‍ എന്‍ എസ് എസും ആര്‍ എസ് എസും ഹര്‍ത്താല്‍ നടത്തിയാല്‍ അത് മനസ്സിലാക്കാന്‍ എളുപ്പമുണ്ട്. പക്ഷെ സി പി എം പോലൊരു മതേതര കക്ഷി തൊട്ടാല്‍ പൊള്ളുന്ന ഇത്തരമൊരു വിവാദം ഉയര്‍ത്തിക്കൊണ്ടു വരുവാന്‍ ഒരിക്കലും ശ്രമിക്കരുതായിരുന്നു. ജാതിയും മതവും നോക്കിയല്ല മന്ത്രിമാരെ നിശ്ചയിക്കേണ്ടതും അവരുടെ പ്രവര്‍ത്തനങ്ങളെ വിലയിരുത്തേണ്ടതും. ഓരോ മന്ത്രിമാരും ചെയ്യുന്ന പ്രവര്‍ത്തനങ്ങളെ വിലയിരുത്തിയാണ് അവരെ മൂല്യനിര്‍ണയം ചെയ്യേണ്ടത്. ഇനി ജാതിയുടെയും മതത്തിന്റെയും കണക്കു നോക്കിയേ തീരൂ എന്ന് ആര്‍ക്കെങ്കിലും വാശിയുണ്ടെങ്കില്‍ അവര്‍ക്ക് മനസ്സിലാകുന്ന കണക്കുകള്‍ നിയമസഭക്കകത്ത് തന്നെ ലഭ്യമാണ്. യു ഡി എഫിലെ എഴുപത്തി രണ്ടു എം എല്‍ എ മാരില്‍ നാല്പത്തി ആറു പേര്‍ ന്യൂനപക്ഷ സമുദായങ്ങളില്‍ നിന്നാണ്. ഭൂരിപക്ഷ സമുദാത്തെക്കാള്‍ കൂടുതലാണ് മുസ്ലിം സമുദായത്തില്‍ നിന്നുള്ള എം എല്‍ എ മാരുടെ എണ്ണം. ആ പ്രാതിനിധ്യം മന്ത്രിസഭയിലും പ്രതിഫലിച്ചു പോയാല്‍ ആകാശം ഇടിഞ്ഞു വീഴും എന്ന് പ്രചരിപ്പിക്കുന്നത് ആര്‍ക്കും ഭൂഷണമല്ല, ഒരു വിപ്ലവ പാര്‍ട്ടിക്ക് പ്രത്യേകിച്ചും.

ലീഗ് അണികളോടും ഒരു വാക്ക് പറയാനുണ്ട്. പാണക്കാട് തങ്ങള്‍മാര്‍ എന്ന് പറഞ്ഞാല്‍ തെറ്റ് പറ്റാത്ത അമാനുഷര്‍ അല്ല. അവരുടെ വായില്‍ നിന്ന് ഒരു വാക്ക് വീണു പോയാല്‍ അതില്‍ പിടിച്ചു ഭൂമി കുലുക്കേണ്ട ആവശ്യമില്ല. പാണക്കാട് തങ്ങള്‍ ഒരു വാക്ക് പറഞ്ഞാല്‍ അത് നടന്നിരിക്കണം എന്ന അര്‍ത്ഥത്തില്‍ പ്രചാരണം നടത്തുന്നത് ഒരുതരം ഫാസിസമാണ്‌. ആരു പറഞ്ഞാലും അപ്പറഞ്ഞത്‌ ന്യായമാണോ അല്ലയോ എന്നാണ് നോക്കേണ്ടത്. ലീഗിന് അഞ്ചാം മന്ത്രിസ്ഥാനം അര്‍ഹതപ്പെട്ടതാണ് അതുകൊണ്ട് അത് ലഭിക്കണം എന്ന് പറയുന്നതിനായിരുന്നു പാണക്കാട് തങ്ങള്‍ പ്രഖ്യാപിച്ചത് കൊണ്ട് അത് ലഭിക്കണം എന്ന് പറയുന്നതിനേക്കാള്‍ അന്തസ്സ്. ഇപ്പോള്‍ ലഭിച്ച മന്ത്രിസ്ഥാനത്തിന്റെ പേരില്‍ ലീഗിന് വന്നു ചേര്‍ന്ന ഇമേജ് ആ പാര്‍ട്ടിയുടെ ഇതര സമൂഹങ്ങളുമായുള്ള ഗുണപരമായ സഹവര്‍ത്തിത്വത്തിന് ഉതകുന്ന രൂപത്തില്‍ പരിവര്‍ത്തിപ്പിച്ചെടുക്കാന്‍ നേതൃത്വത്തിനും അണികള്‍ക്കും കഴിയേണ്ടതുണ്ട്.

ആര് തോറ്റാലും ജയിച്ചാലും അഞ്ചാം മന്ത്രി വിവാദം ഇപ്പോള്‍ ഒരു തീര്‍പ്പില്‍ എത്തിയിരിക്കുന്നു. ഇനി വേണ്ടത് വിവാദാഗ്നി ആളിപ്പടരാതിരിക്കുകയാണ്. അതിനു ശ്രദ്ധിക്കേണ്ടത് കേരളത്തിലെ മാധ്യമങ്ങള്‍ തന്നെയാണ്. ദൌര്‍ഭാഗ്യകരം എന്ന് പറയട്ടെ ജാതിമത സമവാക്യ ചര്‍ച്ചകളുടെ ഏറ്റവും വലിയ പ്രചാരകരും പ്രായോജകരും കേരളത്തിലെ മാധ്യമങ്ങള്‍ ആയിരുന്നു. റേറ്റിംഗ് ചാര്‍ട്ടിനപ്പുറത്തേക്ക് ചിന്തിക്കാന്‍ വകതിരിവില്ലാത്ത മനുഷ്യപ്പിശാചുക്കളായി വാര്‍ത്താവതാരകന്മാര്‍ മാറിയ കാഴ്ചയാണ് ഏതാനും നാളുകളില്‍ നാം കണ്ടത്. കേരളീയ ബോധമനസ്സില്‍ വിഷം നിറച്ച ഈ ചര്‍ച്ചകള്‍ ഇനിയും തുടരുന്ന പക്ഷം അപകടകരമായ മതധ്രുവീകരണത്തിലേക്ക് കേരളം പൊയ്ക്കൂടെന്നില്ല. ഇത്തരം ചര്‍ച്ചകള്‍ക്ക് ഇന്ധനവും അഗ്നിയും പകരാന്‍ സ്റ്റുഡിയോകളില്‍ നിന്ന് സ്റ്റുഡിയോകളിലേക്ക് ഓടുന്ന 'മതേതര' നേതാക്കളോടും ഒരു വാക്ക്. നിങ്ങള്‍ കത്തിച്ച അഗ്നി നിങ്ങള്‍ തന്നെ കെടുത്തിയേ തീരൂ.. ഒരു പിറവമോ നെയ്യാറ്റിന്‍കരയോ ഉണ്ടാക്കിയെടുക്കാന്‍ എളുപ്പമുണ്ട്. പക്ഷേ അകന്നകന്നു പോകുന്ന മനസ്സുകളെ തിരിച്ചു കൊണ്ടുവരുക അത്ര എളുപ്പമല്ല.

മ്യാവൂ: ആറാം മന്ത്രി ഉടന്‍ - തങ്ങള്‍.. കോണ്‍ഗ്രസ്‌ ഹൈക്കമാന്ഡ് അടിയന്തിര യോഗം ചേരുന്നു!!!

Related Posts
അഞ്ചാം മന്ത്രി ഊരാക്കുടുക്കിലേക്ക്!!
ദി കിംഗ്‌ വരുന്നു !!!

TIME 100 : നരേന്ദ്രമോഡി ഔട്ട്‌?

noreply@blogger.com (Basheer Vallikkunnu) — Sun, 08 Apr 2012 07:41:00 +0000

ഓരോ വര്‍ഷവും ലോകത്തെ സ്വാധീനിച്ച നൂറു പേരുടെ ലിസ്റ്റ് തയ്യാറാക്കുന്ന ഒരു ~~തട്ടിപ്പ്~~ പരിപാടി ടൈം മാഗസിനുണ്ട്. ഈ വര്‍ഷത്തെ പ്രാഥമിക ലിസ്റ്റിന്റെ മുന്‍ നിരയില്‍ നമ്മുടെ നരേന്ദ്രമോഡി സാഹിബുണ്ട്. ഇന്ത്യ കണ്ട ഏറ്റവും വലിയ മനുഷ്യക്കുരുതികളില്‍ ഒന്നിന് ഒത്താശ ചെയ്തു കൊടുത്ത വകയിലാണോ അതോ ഗുജറാത്ത് കൈവരിച്ച വ്യവസായിക പുരോഗതിയുടെ പേരിലാണോ അദ്ദേഹം ഈ ലിസ്റ്റില്‍ ഇടം പിടിച്ചത് എന്നറിയില്ല. ഇരുനൂറു പേരുടെ ലിസ്റ്റില്‍ നിന്ന് നൂറു പേരെ തിരഞ്ഞെടുക്കുന്നതിനുള്ള വോട്ടിംഗ് ഏപ്രില്‍ ആറിനു അവസാനിച്ചു. ഓരോരുത്തര്‍ക്കും കിട്ടിയ വോട്ടുകളുടെ എണ്ണം ടൈം മാഗസിന്‍ അവരുടെ വെബ്‌ സൈറ്റില്‍ പ്രസിദ്ധീകരിക്കുകയും ചെയ്തു. നരേന്ദ്ര മോഡിയെ ലിസ്റ്റില്‍ ഉള്‍പെടുത്തണമെന്ന് വോട്ടു ചെയ്തവരുടെ എണ്ണം 2,56,792. അദ്ദേഹത്തിനെ ആ വഴിക്ക് അടുപ്പിക്കരുത്‌ എന്ന് പറഞ്ഞവരുടെ എണ്ണം 2,66,684. ലതായത് 9892 പേരുടെ ഭൂരിപക്ഷത്തിന് മോഡി സാഹിബ് തോറ്റു.

ഈ വര്‍ഷം ലോകത്തെ 'ഉഴുതുമറിച്ച' നൂറു മാന്യമഹാജനങ്ങളുടെ ഫൈനല്‍ ലിസ്റ്റ് ഏപ്രില്‍ ഇരുപത്തി ഏഴിന് ടൈം മാഗസിന്‍ പ്രഖ്യാപിക്കുമ്പോള്‍ അതില്‍ മോഡി ഉണ്ടാകുമോ എന്നറിയില്ല. വോട്ടിംഗ് പരിഗണിക്കുമെങ്കിലും ഫൈനല്‍ ലിസ്റ്റ് ഒരു പ്രത്യേക സമിതി അവരുടെ ഇഷ്ടപ്രകാരം പ്രഖ്യാപിക്കുകയാണ് പതിവ്. (ഏതാണ്ട് ഏഷ്യാനെറ്റിന്റെ ഐഡിയ സ്റ്റാര്‍ സിംഗര്‍ ഗ്രാന്‍ഡ്‌ ഫിനാലേയുടെ മോഡലില്‍ !!). മോഡി ലിസ്റ്റില്‍ വന്നാലും ഇല്ലെങ്കിലും മോഡിക്കെതിരെ No പറഞ്ഞവരാണ് Yes പറഞ്ഞവരെക്കാള്‍ കൂടുതലുള്ളത്. ടൈമിന്റെ വോട്ടിംഗ് റിസള്‍ട്ടിലെ രസകരമായ ഒരു കാര്യം ഇത്തവണ ഏറ്റവും കൂടുതല്‍ വോട്ടു കിട്ടിയിട്ടുള്ളത് 'അനോണി'ക്കാണ് എന്നതാണ്. ഇന്റര്‍നെറ്റില്‍ ഒളിഞ്ഞിരുന്നു സൈബര്‍ ആക്രമണം നടത്തുന്ന ഹാക്കര്‍മാരുടെ പ്രതിനിധിയായ അനോണിക്ക് ഏതാണ്ട് നാല് ലക്ഷം വോട്ടുകളാണ് കിട്ടിയത്. ഇതിനു മുമ്പും അനോണികള്‍ ടൈം ലിസ്റ്റില്‍ ഏറെ പുകിലുകളും വിവാദങ്ങളും ഉണ്ടാക്കിയിട്ടുണ്ട്.

റെഡിറ്റ് എന്ന സോഷ്യല്‍ ന്യൂസ്‌ വെബ്‌ സൈറ്റിന്റെ ജനറല്‍ മാനേജര്‍ എറിക് മാര്‍ട്ടിനാണ് രണ്ടാം സ്ഥാനത്ത്. കിട്ടിയ വോട്ടുകളുടെ എണ്ണം 2,64,193. മൂന്നാം സ്ഥാനത്താണ് നമ്മുടെ സംഘപരിവാര നായകന്‍ ഉള്ളത്. വോട്ടിംഗ് തുടങ്ങിയ നാള്‍ മുതല്‍ തന്നെ മോഡിയെ മുന്നിലെത്തിക്കാന്‍ കൊണ്ടുപിടിച്ച പ്രചാരണങ്ങള്‍ ചില ഗ്രൂപ്പുകാര്‍ നടത്തിയിരുന്നു. അവരുടെ കൂട്ട വോട്ടിങ്ങിന്റെ ഫലമായിട്ടാണ് പുള്ളി മുന്നിലെത്തിയത്. പക്ഷേ ഇത്രയധികം ആളുകള്‍ അദ്ദേഹത്തിനെതിരെ വോട്ടു ചെയ്യുമെന്ന് ആരും പ്രതീക്ഷിച്ചതല്ല. ലിസ്റ്റിലുള്ള ഇരുനൂറു പേരില്‍ ഏറ്റവും കൂടുതല്‍ ആളുകള്‍ NO എന്ന് എതിര്‍ത്തു വോട്ടു ചെയ്തത് മോഡിയുടെ പേരിനു നേരെയാണ്.

വോട്ടിങ്ങില്‍ ഇരുപതാം സ്ഥാനത്താണ് മിസ്റ്റര്‍ ഒബാമയുള്ളത്. ഒബാമക്ക് തൊട്ടു താഴെ നമ്മുടെ അഭിനവഗാന്ധി അണ്ണാ ഹസാരെയും ഉണ്ട്!. ഒറ്റനോട്ടത്തില്‍ ലിസ്റ്റ് പരതിയപ്പോള്‍ ഇന്ത്യയില്‍ നിന്ന് വേറെയും ചില മഹാന്മാരെ കണ്ടു. വിദ്യാബാലന്‍, സല്‍മാന്‍ ഖാന്‍, സച്ചിന്‍ ടെണ്ടുല്‍ക്കര്‍, നിതീഷ് കുമാര്‍ . ഫേസ്ബുക്ക് ചെക്കന്‍ സുക്കര്‍ബര്‍ഗിനേക്കാള്‍ വോട്ട് വിദ്യാബാലന്‍ നേടിയിട്ടുണ്ട്!!.

ഈ ലിസ്റ്റില്‍ കടന്നു കൂടാന്‍ വേണ്ടി മോഡി കളിച്ച പി ആര്‍ കളികള്‍ വാര്‍ത്തകളില്‍ ഉണ്ടായിരുന്നു. സര്‍ക്കാര്‍ ഉദ്യോഗസ്ഥന്മാരെ ഉപയോഗപ്പെടുത്തി മോഡി വോട്ടിംഗ് ക്യാമ്പയിന്‍ നടത്തിയതായി ഗുജറാത്തിലെ കോണ്‍ഗ്രസ്‌ അദ്ധ്യക്ഷന്‍ ആരോപണവും ഉയര്‍ത്തിയിരുന്നു . അത് ശരിയാണെങ്കിലും അല്ലെങ്കിലും ടൈം മാഗസിനുമായി ഒരു നല്ല പി ആര്‍ ബന്ധം മോഡിക്കുണ്ട് എന്നതുറപ്പാണ്. അവരുടെ ഒരു ഇന്ത്യന്‍ പതിപ്പിന്റെ മുഖചിത്രത്തില്‍ ഇതിനു മുമ്പ് മോഡി പ്രത്യക്ഷപ്പെട്ടിട്ടുമുണ്ട്.

ലോകത്തെ ഗുണപരമായോ അല്ലാതെയോ സ്വാധീനിച്ച ആളുകളെ (അതായത് പ്രസിദ്ധരെയും കുപ്രസിദ്ധരെയും) ഞങ്ങള്‍ തിരഞ്ഞെടുക്കാറുണ്ട് എന്നൊരു മുന്‍‌കൂര്‍ ജാമ്യം ടൈം അധികൃതര്‍ എടുത്തിട്ടുള്ളത് കൊണ്ട് ഏത് മോഡിയെ ലിസ്റ്റില്‍ പെടുത്തിയാലും അവര്‍ക്ക് പിടിച്ചു നില്‍ക്കാന്‍ കഴിയും. മാഗസിനുകളുടെ സര്‍ക്കുലേഷനും ഹിറ്റും കൂട്ടാനുള്ള ഒരു തന്ത്രം എന്നതിലുപരി ഇത്തരം സെലക്ഷനുകളില്‍ വലിയ കാര്യമൊന്നുമില്ല എന്ന് എല്ലാവര്‍ക്കും അറിയാം. സമീപകാല ചരിത്രത്തില്‍ ലോകത്ത് ഏറ്റവും കൂടുതല്‍ യുദ്ധങ്ങളും അധിനിവേശങ്ങളും നടത്തിയ ജോര്‍ജ് ബുഷിനെ രണ്ടു തവണയാണ് ഇതേ ടൈം മാഗസിന്‍ പേഴ്സന്‍ ഓഫ് ദി ഇയര്‍ ആയി തിരഞ്ഞെടുത്തത്!. കമ്മ്യൂണിസ്റ്റ് കൂട്ടക്കുരുതികളില്‍ വേള്‍ഡ് റിക്കോഡ്‌ ഉടമയായ ജോസഫ് സ്റ്റാലിനും രണ്ടു തവണ ഈ മഹാപദവി അലങ്കരിച്ചിട്ടുണ്ട്. എന്തിനധികം സാക്ഷാല്‍ അഡോള്‍ഫ് ഹിറ്റ്ലര്‍ ആയിരുന്നു 1938 ലെ ടൈം മാഗസിന്റെ മാന്‍ ഓഫ് ദി ഇയര്‍ !! മിനിമം ഒരു 'തളത്തില്‍ ദിനേശ'ന്റെ ബുദ്ധിയെങ്കിലും ഉള്ളവര്‍ക്ക് ഈ അവാര്‍ഡിന്റെ ലൈന്‍ പെട്ടെന്ന് മനസ്സിലാവും. നരേന്ദ്ര മോഡി സിന്ദാബാദ് ! ടൈം മാഗസിന്‍ സിന്ദാബാദ്!!

മനോരമ പത്രവുമായി നയന്‍താര വരുമോ?

noreply@blogger.com (Basheer Vallikkunnu) — Tue, 03 Apr 2012 08:28:00 +0000

സില്‍മാതാരം നയന്‍താര അതിരാവിലെ എന്റെ വീട്ടില്‍ എത്തുന്നു. കോളിംഗ് ബെല്‍ അടിക്കുന്നു. വാതില്‍ തുറക്കുന്ന എന്നെ നോക്കി കണ്ണിറുക്കിയിട്ടു മനോരമ പത്രം ഭവ്യതയോടെ വെച്ചു നീട്ടുന്നു. തിരിച്ചങ്ങോട്ടും ഒന്ന് കണ്ണിറുക്കി മൂന്നു രൂപ ചേഞ്ച്‌ ഞാന്‍ കൊടുക്കുന്നു. അത് വാങ്ങി അരയില്‍ തിരുകി നാളെക്കാണാം ബൈ ബൈ എന്ന് പറഞ്ഞു നയനതാരകം പടി കടന്നു പോകുന്നു!!. വട്ടാണല്ലേ എന്ന് ചോദിക്കാന്‍ വരട്ടെ, ഇങ്ങനെയൊരു സാധ്യത പാടെ തള്ളിക്കളയാന്‍ പറ്റാത്ത ഒരവസ്ഥയിലേക്കാണ് മനോരമയുടെ കാര്യം പോകുന്നത്. ലക്ഷ്മിഗോപാലസ്വാമിയാണ് ഇന്നലെ കൊച്ചിയില്‍ മനോരമ പത്രം വായനക്കാര്‍ക്ക് എത്തിച്ചത്. മനോരമ അല്പം കൂടെ കാശ് ഇറക്കിയാല്‍ നയന്‍താര തന്നെ പത്രവിതരണത്തിനു എത്തിക്കൂടായ്കയില്ല.

സി ഐ ടി യു വിന്റെ മേല്‍നോട്ടത്തില്‍ നടക്കുന്ന ഇപ്പോഴത്തെ പത്ര വിതരണസമരത്തിന് പിന്തുണ പ്രഖ്യാപിക്കാന്‍ വേണ്ടിയല്ല ഈ പോസ്റ്റ്. ഇപ്പോഴത്തെ സമരത്തിനു അതിന്റേതായ ഒരു രാഷ്ട്രീയം ഉണ്ട് എന്നത് വ്യക്തമാണ്. എന്നിരുന്നാലും പത്രവിതരണം നടത്തുന്ന സമൂഹത്തിന്റെ താഴെക്കിടയിലുള്ള പാവങ്ങളുടെ അവകാശങ്ങളെ ഒട്ടും ഗൗനിക്കാതെ ഇത്തരം സിനിമാ സര്‍ക്കസ്സുകള്‍ നടത്തി വന്‍കിട പത്രമുത്തശ്ശിമാര്‍ക്ക് എത്ര കാലം മുന്നോട്ടു പോകാന്‍ കഴിയും?. അവരുമായി ചര്‍ച്ച നടത്തി ഒരു പരിഹാര മാര്‍ഗം കണ്ടെത്തുന്നതിനു പകരം സിനിമാതാരങ്ങളെ തെരുവിലിറക്കി എത്ര കോപ്പികള്‍ വില്‍ക്കാന്‍ മനോരമക്ക് സാധിക്കും? മാസങ്ങള്‍ക്ക് മുമ്പ് പത്രവിതരണക്കാര്‍ സൂചന സമരം തുടങ്ങിയ സന്ദര്‍ഭത്തില്‍ ഞാനെഴുതിയ പോസ്റ്റിലെ ചില ഭാഗങ്ങള്‍ ഇവിടെ വീണ്ടും നല്‍കട്ടെ. മുന്‍പ് വായിച്ച വായനക്കാര്‍ ക്ഷമിക്കുക

എട്ടു പേജ് പത്രം വിതരണം ചെയ്തിരുന്ന കാലത്ത് ഏജന്റിനു കിട്ടിയിരുന്ന കമ്മീഷന്‍ മുപ്പത്തഞ്ചു ശതമാനമായിരുന്നു. പേജുകളുടെ എണ്ണം കൂടുന്നതിനനുസരിച്ച് മനോരമയും മാതൃഭൂമിയും കമ്മീഷന്‍ കുറച്ചു കൊണ്ടേയിരുന്നു! ഇപ്പോള്‍ ഏജന്റിനു ലഭിക്കുന്ന കമ്മീഷന്‍ ഇരുപത്തിയഞ്ച് ശതമാനമാണ്!. പേജുകളും സപ്ലിമെന്റുകളും കൂടുന്നതിനനുസരിച്ച് പരസ്യ വരുമാനത്തില്‍ കോടികളുടെ ലാഭം കൊയ്യുന്ന പത്ര മുത്തശ്ശിമാര്‍ അവ ചുമന്നു കൊണ്ട് പോയി വിതരണം ചെയ്യുന്ന പാവങ്ങളുടെ കഴുത്തിനു പിടിക്കുന്നു എന്ന് ചുരുക്കം. അധിക പതിപ്പുകളും സപ്ലിമെന്റുകളും ഇറക്കുന്ന ദിവസം കമ്മീഷന്‍ തുകയില്‍ ഒരു നേരിയ വര്‍ധനവ്‌ നല്‍കിയാല്‍ തീരുന്ന പ്രശ്നമാണ് ഇപ്പോള്‍ പത്രവിതരണം തന്നെ നിന്ന് പോകുന്ന ഒരവസ്ഥയിലേക്കു എത്തിച്ചിരിക്കുന്നത്. ഇനിയും ബാലവേല നിരോധിച്ചിട്ടില്ലാത്ത ഏക ഫീല്‍ഡ് പത്രവിതരണമാണ്!. അതിരാവിലെ സ്കൂളില്‍ പോകുന്നതിനു മുമ്പ് പത്ര വിതരണത്തിന് പോകുന്ന കുട്ടികളെ എവിടെയും കാണാം. ഒരു പത്രവും ഇതിനെക്കുറിച്ച് ഫീച്ചര്‍ എഴുതാറില്ല!. അതിരാവിലെ 50 വീടുകള്‍ കയറിയിറങ്ങി പത്രം ഇടുന്ന ഒരു പയ്യന് ഒരു മാസം എജന്റ്റ് നല്‍കുന്നത് 600 ഓ 700 ഓ രൂപയാണ്. ഉറക്കമൊഴിച്ചു ഒരു മാസം കഷ്ടപ്പെടുന്നതിനു പകരം രണ്ടു ദിവസം പെയിന്റിംഗ് പണിക്കു ഹെല്‍പ്പറായി പോയാല്‍ ഇതിലധികം പണം കിട്ടും. തനിക്കു കിട്ടുന്ന തുച്ഛം കമ്മീഷന്‍ തുകയില്‍ നിന്ന് ഇതിലധികം പണം നല്‍കുവാന്‍ ഒരു ഏജന്റിനു കഴിയില്ല എന്നത് സത്യമാണ്. അതുകൊണ്ട് തന്നെ മുതിര്‍ന്നവരെ ഈ പണിക്കു കിട്ടുകയുമില്ല. സത്യത്തില്‍ ബാലവേല നടത്തിക്കുന്ന സാഹചര്യത്തിലേക്ക് ഈ മേഖലയെ തള്ളിവിട്ടത് പത്രവ്യവസായത്തിലൂടെ കൊഴുത്തു തടിച്ച മനോരമയും മാതൃഭൂമിയും അടക്കമുള്ള പത്രങ്ങളാണ്.

പത്രം വേണോ പത്രം, ഫ്രീ.. ഫ്രീ...

വന്‍കിട പത്രങ്ങളെ സംബന്ധിച്ചിടത്തോളം പ്രധാന വരുമാനം പരസ്യങ്ങളാണ്. വരിക്കാര്‍ നല്‍കുന്ന പണം മഷി വാങ്ങാന്‍ പോലും തികയില്ല എന്നാണ് പറയാറുള്ളത്. മനോരമ ഒരു ദിവസം രണ്ടു പത്രം ഇറക്കുന്നത്‌ വായനക്കാരനെ സുഖിപ്പിക്കാനല്ല, പരസ്യക്കാരനെ സുഖിപ്പിക്കാനാണ്. എട്ടു പേജില്‍ നിന്നും മുപ്പതു പേജിലേക്ക് പത്രം വളരുമ്പോഴും സാധാരണക്കാരന് ലഭിക്കുന്നത് പഴയ എട്ടു പേജിന്റെ വാര്‍ത്തകള്‍ തന്നെയാണ്. വരിക്കാരന് പത്രം ഫ്രീയായി കൊടുത്താല്‍ പോലും മനോരമാക്കാരന് ലാഭം കിട്ടുന്ന രൂപത്തില്‍ പരസ്യ വരുമാനം കൂടിയിരിക്കുന്നു എന്ന് ചുരുക്കം. പിന്നെ എന്തിനാണ് മഞ്ഞിലും മഴയത്തും മുടങ്ങാതെ അതിരാവിലെ പത്രം വീട്ടുപടിക്കല്‍ എത്തിക്കുന്ന ഈ പാവങ്ങളുടെ കമ്മീഷന്‍ ശതമാനം വെട്ടിക്കുറക്കുന്നത്?

മംഗളം, മാധ്യമം തുടങ്ങിയ പത്രങ്ങള്‍ എജന്റുമാരുമായി ചര്‍ച്ച നടത്തി ധാരണയില്‍ എത്തിയിട്ടുണ്ട്. സമരം നിര്‍ത്താതെ ചര്‍ച്ചക്കില്ല എന്ന പിടിവാശി മനോരമയും മാതൃഭൂമിയും ഒഴിവാക്കിയേ പറ്റൂ. ഈ രണ്ടു പത്രങ്ങളും മലയാളികളുടെ പത്രവായന സംസ്കാരത്തിന്റെ ആവേശകരമായ പാരമ്പര്യം അവകാശപ്പെടാവുന്ന പത്രങ്ങളാണ്. മലയാളികളുടെ ജീവിതത്തിലും അവരുടെ ചിന്തകളിലും നിത്യേന ഇടപെടുന്ന സാംസ്കാരിക സ്ഥാപനങ്ങളാണ് ഈ പത്രങ്ങള്‍ . ഈ രണ്ടു പത്രങ്ങളും മുടിഞ്ഞു പോകണമെന്ന് ആരും ആഗ്രഹിക്കുന്നില്ല. അവര്‍ ഇനിയും കൂടുതല്‍ ശക്തിയോടെ നിലനില്‍ക്കണം. പക്ഷേ പത്രവിതരണം നടത്തുന്ന ഈ പാവങ്ങളുടെ ചോര ഇനിയും കുടിക്കരുത്. അവര്‍ക്ക് നല്‍കുന്ന കമ്മീഷന്‍ കാര്യത്തില്‍ കൂടുതല്‍ മാനുഷികമായ സമീപനങ്ങള്‍ ഉണ്ടാകണം. മറ്റുള്ളവരെ അന്തസ്സും സംസ്കാരവും പഠിപ്പിക്കാന്‍ ദിവസവും കാണിക്കുന്ന ആവേശത്തിന്റെ പത്തിലൊരംശം സ്വയം നന്നാവാനും കാണിക്കണം.

Related Posts
ഏജന്റുമാരുടെ സമരം, മനോരമ വിറക്കുന്നു.
മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)
മനോരമയെ എന്തിനാണ് ബഹിഷ്കരിക്കുന്നത്?
മനോരമയുടെ കാര്യം എന്തായി? പൂട്ടിയോ?

മരുഭൂമിയില്‍ രണ്ടു നാള്‍ അഥവാ ആട് ജീവിതം റീലോഡഡ്

noreply@blogger.com (Basheer Vallikkunnu) — Thu, 29 Mar 2012 05:54:00 +0000

ഇസ്മാഈലിന്റെ ആടുകളുടെ കൂടെ മരുഭൂമിയില്‍ അല്പനേരം ചിലവഴിക്കുക എന്നതായിരുന്നു ഖുന്‍ഫുദയിലേക്കുള്ള എന്റെ യാത്രയുടെ 'ഒളി'അജണ്ട. ഖുന്‍ഫുദ മലയാളി അസോസിയേഷന്റെ സെക്രട്ടറി ഫൈസല്‍ ബാബു അവരുടെ പ്രവാസി സംഗമത്തില്‍ പങ്കെടുക്കുന്നതിനു വേണ്ടി ക്ഷണിച്ചപ്പോള്‍ ഒരു ലൊട്ടുലൊടുക്ക് കാരണം പറഞ്ഞു ആദ്യം ഞാന്‍ ഒഴിഞ്ഞു മാറി. 'വന്നേ പറ്റൂ, ഞാന്‍ നാളെ വീണ്ടും വിളിക്കും' എന്ന് ഫൈസല്‍ . 'എനിക്ക് പറ്റില്ല, മറ്റാരെയെങ്കിലും സംഘടിപ്പിച്ചു തരാം' എന്ന് ഞാനും. ഒരു വിധം ഫൈസലിനെ ഒതുക്കിയെടുത്ത് ഫോണ്‍ വെച്ചു കഴിഞ്ഞ ഉടനെയാണ് ഇസ്മാഈലിന്റെ കാര്യം ഞാന്‍ ഓര്‍ത്തത്.

ഖുന്‍ഫുദക്കടുത്ത് മരുഭൂമിയിലെ ഏതോ ഒരു ഉള്‍നാടന്‍ ഗ്രാമത്തിലാണ് ഇസ്മാഈല്‍ ഉള്ളത് എന്നറിയാം. ഉടനെ ഞാന്‍ ഫൈസലിനെ വിളിച്ചു. 'ഞാന്‍ തന്നെ വരാം. ഒരു ബ്ലോഗറായ നിങ്ങള്‍ വിളിച്ചിട്ട് വരാതിരിക്കുന്നത് ശരിയല്ലല്ലോ'. ഫൈസലിനു സന്തോഷമായി. എന്റെ 'ഒളി അജണ്ട' ഞാന്‍ പുറത്തു വിട്ടില്ല. പ്രവാസി അസോസിയേഷന്റെ ചിലവില്‍ നാട്ടുകാരനെ സന്ദര്‍ശിക്കാന്‍ പോകുന്ന ഒരു കഞ്ഞിയാണ് ഞാനെന്നു വരരുതല്ലോ. ഇസ്മാഈലിനെ വിളിച്ചു അങ്ങോട്ടെത്താനുള്ള വഴിയൊക്കെ ചോദിച്ചു മനസ്സിലാക്കി. ജിദ്ദയില്‍ നിന്നും ജീസാന്‍ ഹൈവേയില്‍ ഏതാണ്ട് നാനൂറു കിലോമീറ്റര്‍ യാത്ര ചെയ്തു വേണം ഖുന്‍ഫുദയില്‍ എത്താന്‍. ഖുന്‍ഫുദയില്‍ എത്തുന്നതിനു അമ്പതു കിലോമീറ്റര്‍ മുമ്പ് ഒരു കൊച്ചുപട്ടണമുണ്ട്. മുദൈലിഫ്. അവിടെ നിന്ന് മരുഭൂമിയിലൂടെ അല്പം ഉള്ളോട്ടു പോയാല്‍ നവാന്‍ എന്ന ഗ്രാമത്തിലെത്തും. അവിടെ വന്നു വിളിച്ചാല്‍ മതി ഉടനെ ഞാന്‍ എത്തും എന്ന് ഇസ്മാഈല്‍ പറഞ്ഞു. ജിദ്ദയില്‍ നിന്നും ഇന്ത്യന്‍ കോണ്‍സല്‍ ജനറലും ഡിപ്ലോമാറ്റിക് ടീമും ഖുന്‍ഫുദയിലെ പരിപാടിയില്‍ പങ്കെടുക്കുന്നുണ്ട്. അവരുടെ യാത്രയുടെ പ്രധാന ഉദ്ദേശം അവിടെയുള്ള ഇന്ത്യക്കാരുടെ പാസ്പോര്‍ട്ട്‌ പുതുക്കി നല്‍കുക, യാത്രാ രേഖകള്‍ ശരിയാക്കിക്കൊടുക്കുക തുടങ്ങിയവയാണ്. വിദൂര പ്രദേശങ്ങളില്‍ ഒറ്റപ്പെട്ടു കഴിയുന്ന ഇന്ത്യന്‍ തൊഴിലാളികളെ സംബന്ധിച്ചിടത്തോളം കോണ്‍സുലര്‍ സംഘത്തിന്റെ ഇത്തരം സന്ദര്‍ശനങ്ങള്‍ വലിയ അനുഗ്രഹമാണ്.

വെന്നിയൂര്‍ സ്വദേശി അബ്ബാസിനെയാണ് ജിദ്ദയില്‍ നിന്നും എന്നെ കൊണ്ടുപോകാന്‍ പ്രവാസി അസോസിയേഷന്‍ ചുമതലപ്പെടുത്തിയത്. കുടി വെള്ളം കൊണ്ടുപോകുന്ന ട്രക്കുമായി മരുഭൂമിയില്‍ ഏറെക്കാലം ജോലിയെടുത്തിട്ടുണ്ട് അബ്ബാസ്. ജിദ്ദ - ജീസാന്‍ റോഡിന്റെ പ്രാന്തപ്രദേശങ്ങളിലുള്ള മരുഭൂമിയിലെ ഗ്രാമങ്ങളിലേക്ക് ഇന്നത്തെപ്പോലെ റോഡുകള്‍ ഇല്ലാതിരുന്ന കാലത്തും അദ്ദേഹം വെള്ളം കൊണ്ടുപോയിട്ടുണ്ട്. യാത്രയിലുടനീളം രസകരമായ പല അനുഭവങ്ങളും അബ്ബാസ് പറഞ്ഞു. സ്ഥലം ചോദിച്ചറിഞ്ഞെങ്കിലും മരുഭൂമിയല്ലേ, ഇസ്മാഈലിനെ കണ്ടു പിടിക്കാന്‍ ആവുമോ എന്നൊരു സംശയം യാത്ര പുറപ്പെടുമ്പോള്‍ എനിക്കുണ്ടായിരുന്നു. പക്ഷേ ഇസ്മാഈലിന്റെ പേരും നില്‍ക്കുന്ന സ്ഥലവും സൂചിപ്പിച്ചപ്പോഴേക്ക് അബ്ബാസ് പറഞ്ഞു. 'ആളെ എനിക്കറിയാം. അവന്റെ തോട്ടത്തിലേക്ക് ഞാന്‍ വെള്ളം കൊണ്ടുപോയിട്ടുണ്ട്'. സമയം ഉണ്ടെങ്കില്‍ നമുക്ക് പോകുന്ന പോക്കില്‍ തന്നെ അവിടെ കയറിയിട്ട് പോകാം". സത്യം പറഞ്ഞാല്‍ അബ്ബാസിന്റെ ആ മറുപടി എന്നെ വല്ലാതെ ആവേശം കൊള്ളിച്ചു. എനിക്ക് പറ്റിയ ഒരാളെത്തന്നെയാണ് കിട്ടിയിരിക്കുന്നത്.

രാത്രി പത്തു മണിക്കാണ് ഖുന്‍ഫുദയിലെ പരിപാടി. ജിദ്ദയില്‍ നിന്ന് നാല് മണിക്കാണ് പുറപ്പെട്ടത്‌. മരുഭൂമിയെ കീറിമുറിച്ചു കടന്നു പോകുന്ന വിജനമായ ആറുവരിപ്പാത. ഏതു കൊഞ്ഞാണന്‍ ഡ്രൈവറും നൂറ്റിപ്പത്തിനു താഴെ ചവിട്ടില്ല. അമ്മാതിരി റോഡാണ്. അബ്ബാസാകട്ടെ നൂറ്റിനാല്പതിനു താഴേക്ക്‌ വന്നിട്ടേയില്ല. അതുകൊണ്ട് വിചാരിച്ചതിലും നേരത്തെ മുദൈലിഫില്‍ എത്തി. പോകുന്ന പോക്കില്‍ തന്നെ നേരെ ഇസ്മാഈലിന്റെ അടുത്തേക്ക്‌ വിട്ടു. മെയിന്‍ റോഡില്‍ നിന്നും നവാനിലേക്കുള്ള കട്ട്‌ റോഡിലേക്ക്. അല്പം പോയിക്കഴിഞ്ഞപ്പോള്‍ ഹോളോബ്രിക്സ് ഉണ്ടാക്കുന്ന ഒരു കൊച്ചു ഫാക്ടറിയുടെ മുറ്റത്ത് അബ്ബാസ്‌ വണ്ടി നിര്‍ത്തി. ഇരുട്ടിത്തുടങ്ങിയിട്ടുണ്ട്. ഇസ്മാഈലും നാട്ടുകാരായ ചില സുഹൃത്തുക്കളും അവിടെ കാത്തു നില്‍ക്കുന്നുണ്ട്. അവരെയും കൂട്ടി മണ്‍പാതയിലൂടെ അല്പം പോയതോടെ ഇസ്മാഈലിന്റെ സങ്കേതം എത്തി. മരുഭൂമിയില്‍ വിജനമായ ഒരിടത്ത് നാട്ടുമ്പുറത്തെ പീടികമുറികള്‍ പോലെ രണ്ടു റൂമുകള്‍.. ചുറ്റുപാടും ആടുകളുടെ കൂട്ടങ്ങള്‍ ..അവയുടെ വാസസ്ഥലം മരുഭൂമിയില്‍ വേലി കെട്ടി തിരിച്ചിട്ടുണ്ട്. അപരിചതരായ ഞങ്ങളെ കണ്ടപ്പോള്‍ ആടുകള്‍ക്ക് കാവല്‍ നില്‍ക്കുന്ന നായ ഒടുക്കത്തെ കുര. ഇസ്മാഈലിനെ കൂട്ടത്തില്‍ കണ്ടതോടെ അവനൊന്നു അടങ്ങി.

ഇടത്ത് നിന്ന് മൂന്നാമത് ഇസ്മായീല്‍ . കൂടെ വള്ളിക്കുന്നുകാരായ മറ്റു സുഹൃത്തുക്കള്‍

ഞാന്‍ അവിടെയൊക്കെ ഒന്ന് ചുറ്റിക്കറങ്ങി. "എല്ലാം പകല്‍ കാണാം. ഇപ്പോള്‍ വല്ലാതെ കറങ്ങേണ്ട. നായകള്‍ വേറെയും വരും" ഇസ്മാഈല്‍ പറഞ്ഞു. റൂമിന്റെ മുറ്റത്തെ കാര്‍പെറ്റില്‍ ഇരുന്നു ചായയും കാരക്കയും കഴിച്ചു. നാട്ടു വര്‍ത്തമാനങ്ങള്‍ പറഞ്ഞിരിക്കുന്നതിനിടയില്‍ ഇസ്മാഈല്‍ റൊട്ടിയും കോഴിക്കറിയും വിളമ്പി. അവന്‍ എല്ലാം റെഡിയാക്കി വെച്ചിട്ടുണ്ട്.

നായയുടെ കുരയും തണുത്ത കാറ്റും ചുറ്റിലും ആടുകളുമായി ആ രാത്രി അവിടെ കഴിയാന്‍ എനിക്ക് കൊതിയുണ്ടായിരുന്നു. പക്ഷേ പരിപാടിക്ക് പോകണമല്ലോ. 'കുതിക്കുന്ന ഇന്ത്യ കിതക്കുന്ന പ്രവാസി' എന്ന വിഷയമാണ് എനിക്ക് സംസാരിക്കേണ്ടത്. നേരം വൈകി കിതച്ചു കൊണ്ട് അങ്ങോട്ട്‌ എത്തിയാല്‍ എന്റെ കുതിപ്പ് അതോടെ അവര്‍ തീര്‍ക്കും!. എല്ലാം കാണാനായി പകല്‍ സമയത്ത് നാളെ വരാം എന്ന് പറഞ്ഞു വണ്ടിയില്‍ കയറിയപ്പോള്‍ നായ നീട്ടി ഓരിയിട്ടു. 'ഇനി ഞാനുറങ്ങട്ടെ' എന്നൊരു ട്യൂണുണ്ട് അതിന്. ഖുന്‍ഫുദയില്‍ കൃത്യസമയത്ത് എത്തി. ആദ്യം ഫൈസലിന്റെ വീട്ടില്‍ നിന്ന് പത്തിരിയും വെള്ളപ്പവും കോഴിക്കറിയും!. ഇസ്മാഈലിന്റെ റൂമില്‍ നിന്ന് ഭക്ഷണം കഴിച്ച വിവരം ഞാന്‍ പറഞ്ഞില്ല. (ഹല്ല പിന്നെ!.)

പ്രവാസി സംഗമം ഭംഗിയായിക്കഴിഞ്ഞു. കോണ്‍സല്‍ ജനറല്‍ ഫായിസ് അഹമ്മദ് കിദ്വായിയുടെ പ്രസംഗത്തിനു ആളുകള്‍ കയ്യടിച്ചു. എന്റെ പ്രസംഗത്തിനും കിട്ടി അടി (ഐ മീന്‍, കയ്യടി, സത്യമായിട്ടും!!). പിറ്റേന്ന് രാവിലെ മുതല്‍ ഉച്ച വരെ ഫ്രീയാണ്. ഉച്ചക്ക് ശേഷമാണ് ഇസ്മാഈലിന്റെ ആടുകളുടെ അപ്പോയിന്റ്മെന്റ് ഉള്ളത്. രാവിലെ അവനു പണിയുണ്ടാകും. ഖുന്‍ഫുദയില്‍ നിന്നും നൂറ്റിമുപ്പതു കിലോമീറ്റര്‍ അകലെ അമഖ് എന്നൊരു സ്ഥലമുണ്ട്. (ഹമുക്ക് എന്നാണു മലയാളികള്‍ പറയുക) ചെങ്കടലിനോട് ചേര്‍ന്ന് കിടക്കുന്ന ആ പ്രദേശം ഒരു ചെറിയ ടൂറിസ്റ്റ് കേന്ദ്രമാണ്. ഗ്രാമീണരായ അറബി സ്ത്രീകള്‍ കടല്‍ മത്സ്യം ഒരു പ്രത്യേക രീതിയില്‍ ചുട്ടു കൊടുക്കുന്ന ഒരു ചന്ത അവിടെയുണ്ട്. ഫൈസലിനെയും അവന്റെ സുഹൃത്തും എന്റെ ബന്ധുവുമായ മറ്റൊരു ഫൈസലിനെയും (ടൊയോട്ട കമ്പനിയില്‍ ജോലി ചെയ്യുന്നതിനാല്‍ ഫൈസല്‍ ടൊയോട്ട എന്നാണ് വിളിപ്പേര്) കൂട്ടി അങ്ങോട്ട്‌ വെച്ചു പിടിച്ചു. പന്ത്രണ്ടു മണിയോടെ ഞങ്ങള്‍ അവിടെയെത്തി. ചുട്ട മീന്‍ തിന്നുക എന്നതിനോടൊപ്പം ഇവിടെയും എനിക്ക് ഒരു 'ഒളി അജണ്ട' ഉണ്ട്. എന്റെ പെങ്ങളുടെ മരുമകന്‍ നിസാര്‍ ഈ ചന്തയുടെ തൊട്ടു മുന്നില്‍ പെട്രോള്‍ പമ്പ് നടത്തുന്നുണ്ട്!!. അതോടു ചേര്‍ന്ന് ഒരു കടയും. അവനെയൊന്നു കാണണം. കട സന്ദര്‍ശിച്ച ശേഷം നിസാറിനെയും കൂട്ടി ചന്തയിലേക്ക് ഇറങ്ങി. വെള്ളിയാഴ്ച രാവിലെ ആയതിനാല്‍ ചന്തയില്‍ തിരക്ക് കുറവാണ്. ഈത്തപ്പനയോലകൊണ്ട് കൂരകള്‍ പോലെ കെട്ടിയുണ്ടാക്കിയ ഷെഡുകള്‍ നിരന്നു കിടക്കുന്നു.

with Faisal Babu

With Faisal Chemban

ഓരോ ഷെഡിലും പ്രത്യേക തരം മണ്ണടുപ്പുകള്‍ ഉണ്ട്. മൈലാഞ്ചിയോ മറ്റോ ഇട്ട് കറുപ്പിച്ച കൈകളോടെ നില്‍ക്കുന്ന ഗ്രാമീണ സ്ത്രീകള്‍ ആളുകള്‍ക്ക് മീന്‍ ചുട്ടു കൊടുക്കുന്നു. കടലില്‍ നിന്ന് അപ്പോള്‍ പിടിച്ചു കൊണ്ട് വന്ന പല തരം മീനുകള്‍ വില്‍ക്കുന്ന ചെറിയ ഷെഡുകള്‍ ചുറ്റുപാടും ഉണ്ട്. നിസാര്‍ അറബികളുടെ പ്രിയ മത്സ്യമായ ഹാമൂര്‍ വാങ്ങി. 45 റിയാലാണ് ഒരു കിലോക്ക്. (ഏകദേശം 600 രൂപ). കടക്കാരന്‍ അത് പ്രത്യേക രീതിയില്‍ മുറിച്ചു തന്നു. ഗ്രാമീണ സ്ത്രീകളുടെ വേഷത്തിലും വൃത്തിയിലുമൊക്കെ അല്പം ശങ്കയുള്ളതിനാല്‍ ഞങ്ങള്‍ തന്നെ മീന്‍ കഴുകി വൃത്തിയാക്കിക്കൊടുത്തു.

ഒരടുപ്പില്‍ തീയിട്ടു കത്തിച്ചു മറ്റൊരു അടുപ്പിലേക്ക് അതിന്റെ ചൂട് പകര്‍ന്നു ചുടുന്ന രീതിയാണ്. അതിനാല്‍ തന്നെ മീനില്‍ പൊടിയോ അഴുക്കോ ഏല്‍ക്കില്ല. അവര്‍ മീന്‍ ചുടുന്ന രീതി ഫോട്ടോയെടുക്കാന്‍ ഫൈസല്‍ ഒരു ശ്രമം നടത്തിയപ്പോള്‍ ആ സ്ത്രീ തടഞ്ഞു. ഫോട്ടോയില്‍ കുടുങ്ങാതിരിക്കാന്‍ അവര്‍ മാറി നിന്നു. ഞങ്ങള്‍ക്ക് മുന്നേ വന്ന ചില അറബികള്‍ മീനുമായി കാത്തു നില്‍ക്കുന്നുണ്ട്. അല്പം താമസിക്കുമെന്ന് തോന്നിയതിനാല്‍ മീന്‍ ചുടാന്‍ ഏല്‍പിച്ച ശേഷം ഞങ്ങള്‍ തൊട്ടടുത്തുള്ള പള്ളിയില്‍ പോയി. ജുമുഅ നമസ്കാരം കഴിഞ്ഞു വന്നപ്പോഴെക്കു മീനെല്ലാം ചുട്ടു റെഡിയാക്കി വെച്ചിട്ടുണ്ട്. പത്തു റിയാലാണ് ചുടാനുള്ള ചാര്‍ജ്. മീനിന്റെ കൂടെ കഴിക്കാന്‍ അവര്‍ കൈ കൊണ്ട് കുഴച്ചു ഉണ്ടാക്കുന്ന ഒരു പ്രത്യേക തരം തന്തൂരി റൊട്ടിയും സലാഡും ചട്ടിണിയും വില്പനക്കുണ്ട്. അതൊന്നും ഞങ്ങള്‍ വാങ്ങിയില്ല. നിസാര്‍ അവന്റെ കടയില്‍ നിന്നു കുബ്ബൂസും ചെറുനാരങ്ങയും തൈരും കെച്ചപ്പുമൊക്കെ കൊണ്ട് വന്നു. എണ്ണയോ മസാലകളോ ഒന്നും ചേര്‍ക്കാതെ പച്ചയില്‍ ചുട്ടെടുക്കുന്ന മത്സ്യം മുകളില്‍ അല്പം ഉപ്പും എരിവ് ആവശ്യമുള്ളവര്‍ക്ക് അല്പം മസാല പൊടിയും വിതറി കഴിക്കുകയാണ് രീതി.അറബികള്‍ നമ്മെപ്പോലെ എരിവു ഇഷ്ടപ്പെടുന്നവരല്ല. മസാലകള്‍ വളരെ കുറവായിരിക്കും എന്നതാണ് അവരുടെ ഭക്ഷണ രീതിയുടെ ഏറ്റവും വലിയ പ്രത്യേകത.

ഒരു ചെറിയ മീന്‍ തിന്നു കഴിഞ്ഞപ്പോഴേക്ക് ഫൈസല്‍ ആളാകെ മാറി. ഒരു അറബി പ്രമാണിയുടെ ലുക്കും മംഗലശ്ശേരി നീലകണ്ഠന്റെ ഇരിപ്പും!.

വ്യത്യസ്തമായ ഒരു ചുറ്റുപാടില്‍ രുചികരമായ ഭക്ഷണം കഴിച്ച സംതൃപ്തിയോടെ അവിടെ നിന്ന് യാത്ര തിരിച്ചു. വഴിയില്‍ മരുഭൂമിയില്‍ നിന്ന് ഒന്ന് രണ്ടു ഫോട്ടോകള്‍ എടുത്തു. ഒരു മണിക്കൂറിനുള്ളില്‍ ഖുന്‍ഫുദയില്‍ എത്തി. അവിടെ അബ്ബാസ് വണ്ടിയുമായി കാത്തു നില്‍ക്കുന്നുണ്ട്. രണ്ടു ഫൈസലുമാരോടും സംഘാടകരോടും യാത്ര പറഞ്ഞു നേരെ ഇസ്മാഈലിന്റെ അടുത്തേക്ക്‌.

നാല് മണിയോടെ അവിടെയെത്തി. ഉറക്കത്തില്‍ ആയിരുന്ന ഇസ്മാഈലിനെ വിളിച്ചുണര്‍ത്തി. പിന്നെ അവന്‍ ആടുകള്‍ക്ക് തീറ്റ കൊടുക്കുന്നതും അവയോടു ചങ്ങാത്തം കൂടുന്നതുമൊക്കെ നോക്കി ഏറെ നേരം നിന്നു. ഞാന്‍ ആടുകളുടെ അടുത്തേക്ക്‌ ചെല്ലുംതോറും അവ പേടിയോടെ പിറകിലേക്ക് ഓടുന്നു. എന്നാല്‍ ഇസ്മാഈല്‍ നടന്നടുക്കുമ്പോള്‍ അവ കൂട്ടത്തോടെ അവനെ പൊതിയുന്നു. ഇസ്മാഈലുമായുള്ള ആ മിണ്ടാപ്രാണികളുടെ ഹൃദയബന്ധം ഒറ്റ നിമിഷത്തിനുള്ളില്‍ എനിക്ക് ബോധ്യമായി. കൂട്ടത്തില്‍ രാജാവായ ഒരു കൂറ്റനെ ഇസ്മാഈല്‍ പിടിച്ചു നിര്‍ത്തി. ഞാന്‍ ഒരു ഫോട്ടോക്ക് പോസ് ചെയ്തു. പല ഗ്രൂപ്പുകളിലായി ഏതാണ്ട് ഇരുനൂറോളം ആടുകളുണ്ട്. ഒരു കൊച്ചു ഉന്തുവണ്ടിയില്‍ വൈക്കോല്‍ പോലുള്ള ഉണക്ക പുല്ലുകളുടെ കെട്ടുകള്‍ .. തൊട്ടടുത്ത ഗ്രാമത്തില്‍ നിന്നു കൊണ്ട് വരുന്ന ആ പുല്ലുകളാണ് ആടുകളുടെ പ്രധാന ഭക്ഷണം. കൂടെ അല്പം ഗോതമ്പും കൊടുക്കും. നമ്മുടെ നാട്ടിലെ ആടുകള്‍ ഇത്തരം ഉണങ്ങിയ പുല്ലു തിന്നില്ല. ഇവിടുത്തെ ആടുകള്‍ കിട്ടുന്ന എന്തും തിന്നും. കുബ്ബൂസും ചിക്കനും മട്ടനുമെല്ലാം കിട്ടേണ്ട താമസം. നിമിഷ നേരം കൊണ്ട് കാലിയാക്കും. ഒരിക്കല്‍ കൂട്ടിനടുത്തു അട്ടിയിട്ടു വെച്ച സിമന്റു ചാക്കുകളുടെ കവര്‍ ഷീറ്റുകള്‍ മുഴുവന്‍ ആടുകള്‍ തിന്നുതീര്‍ത്ത സംഭവം ഇസ്മാഈല്‍ പറഞ്ഞു.

ഇസ്മാഈലിന്റെ താമസസ്ഥലവും ആടുകള്‍ക്ക് വേണ്ടി വളച്ചു കെട്ടിയ കൂടുകളും

ഇസ്മാഈലിന്റെ കഫീലിന്റെ ആടുകളാണ് ഇവയെല്ലാം. വളരെ മനുഷ്യപ്പറ്റുള്ള ഒരാളാണ് അദ്ദേഹം. വില്പനക്കോ പാലിനോ വേണ്ടിയല്ല ആടുകളെ വളര്‍ത്തുന്നത്. പാല്‍ കറക്കുന്ന പരിപാടിയേ ഇല്ല. അവയെല്ലാം കുട്ടികള്‍ കുടിച്ചു തീര്‍ക്കുക മാത്രമാണ്. മാസത്തില്‍ മൂന്നോ നാലോ ആടുകളെ കഫീല്‍ തന്റെ വീട്ടിലെ ആവശ്യത്തിനു വേണ്ടി അറുത്തു കൊണ്ടുപോകും. ഇസ്മായീലിനു ആവശ്യമുള്ള ഇറച്ചി എടുത്തിട്ടു ബാക്കിയാണ് കൊണ്ട് പോവുക. ആ ഗ്രാമപ്രദേശത്തെ പാവപ്പെട്ട പലര്‍ക്കും അയാള്‍ ആടുകളെ വെറുതെ കൊടുക്കും. ആടുകളെ നോക്കുന്നതിനു ഇസ്മാഈലിനു കൃത്യമായ ശമ്പളവും നല്‍കും.

ഇസ്മാഈലിന്റെ ഓരോ ദിവസവും വളരെ തിരക്ക് പിടിച്ചതാണ്. തൊട്ടടുത്ത മണ്‍കട്ടയുണ്ടാക്കുന്ന കമ്പനിയില്‍ ഒരു ചെറിയ ജോലിയുണ്ട്. ആടുകളെ നോക്കി ബാക്കിയുള്ള സമയം എന്ത് ജോലിയും എടുക്കാം എന്നുള്ളതാണ് കഫീലിന്റെ നിലപാട്. ആടുകളുടെ കാര്യത്തില്‍ പ്രത്യേക ശ്രദ്ധ വേണം. അതില്‍ വിട്ടു വീഴ്ച പാടില്ല. അറബികളുടെ ഒരു പൊതു കാഴ്ചപ്പാടാണ് അത്. വീട്ടില്‍ പട്ടിണി കിടന്നാലും വളര്‍ത്തുന്ന ആടുമാടുകളെ അവര്‍ പട്ടിണിക്കിടില്ല. മുഹമ്മദ്‌ നബി കുട്ടിക്കാലത്ത് ആട്ടിടയനായിരുന്നു. ആ ഒരു പാരമ്പര്യത്തിന്റെ കണ്ണി പിടിച്ചാണ് പല അറബികളും ആടുമാടുകളെ മേച്ചു നടക്കുന്നതും വളര്‍ത്തുന്നതും. വലിയ ധനികര്‍ പോലും ഒട്ടകത്തെയും ആടുകളെയും മേച്ചു നടക്കുന്നത് മരുഭൂമിയില്‍ സാധാരണമാണ്. ഒരു ആരാധനയുടെ ഭാഗമെന്നോണം ചെയ്യുന്ന ഒരു പ്രവര്‍ത്തനമാണത്. ആടുകളെ നോക്കുന്ന കാര്യത്തില്‍ ഒരിക്കല്‍ പോലും ഇസ്മാഈലിന് കഫീലിന്റെ അനിഷ്ടം നേരിടേണ്ടി വന്നിട്ടില്ല. അത്ര സ്നേഹത്തോടെയാണ് അവന്‍ ആടുകളെ നോക്കുന്നത്. രാവിലെ എഴുന്നേറ്റു ആടുകള്‍ക്ക് തീറ്റയും വെള്ളവുമൊക്കെ നല്‍കിയ ശേഷം കമ്പനിയിലേക്ക് പോകും. തൊട്ടടുത്തു തന്നെയായതിനാല്‍ ഇടയ്ക്കിടെ ആടുകളെ വന്നു നോക്കാം. വൈകിട്ട് വന്നാല്‍ മറ്റൊരു പണിയുണ്ട്. ട്രാക്റ്റര്‍ ഓട്ടുക. കഫീലിന്റെതാണ് ട്രാക്റ്റര്‍ . മരുഭൂമിയാണെങ്കിലും അവിടെ കൃഷി ചെയ്യുന്ന ഗ്രാമീണര്‍ ഉണ്ട്. അവര്‍ക്ക് വേണ്ടി അത് വാടകയ്ക്ക് ഓട്ടിക്കൊടുക്കും. അതിന്റെ വാടകയില്‍ ഒരു ചെറിയ അംശം ഇസ്മാഈലിന് ഉള്ളതാണ്. ചുരുക്കത്തില്‍ വളരെ തിരക്ക് പിടിച്ച ജീവിതം. എന്നാല്‍ പൂര്‍ണ സംതൃപ്തിയോടെ അത് ചെയ്യുന്നു എന്നതാണ് ഇസ്മാഈലിന്റെ പ്രത്യേകത. ആരോടും പരിഭവമില്ല, പരാതിയില്ല. എല്ലാവരെക്കുറിച്ചും. നല്ല അഭിപ്രായം മാത്രം.

ഇസ്മാഈല്‍ മുമ്പ് ജോലി ചെയ്തിരുന്ന ഒരു വലിയ തോട്ടം കാണുവാന്‍ വേണ്ടി എന്നെ കൊണ്ട് പോയി. മണ്‍പാതയിലൂടെ ഏറെ നേരം വണ്ടി ഓട്ടിയ ശേഷമാണ് അവിടെ എത്തിയത്. മരുഭൂമിയുടെ നടുവില്‍ ഒരു വലിയ പച്ചപ്പ്‌. വര്‍ഷങ്ങളോളം ഈ തോട്ടത്തില്‍ ഇസ്മാഈല്‍ പണിയെടുത്തിട്ടുണ്ട്. ശരിക്കും ഒരു വിസ്മയമായിരുന്നു എനിക്കാ തോട്ടത്തിലെ കാഴ്ചകള്‍ . നിറയെ കായ്ച്ചു നില്‍ക്കുന്ന മാമ്പഴങ്ങള്‍ . മുരിങ്ങയും തക്കാളിയും ഭീമാകാരന്‍ വഴുതനങ്ങയും എന്ന് വേണ്ട എല്ലാ വിധ പച്ചക്കറികളും. വിശാലമായ കൂട്ടില്‍ തത്തകളും പ്രാവുകളും.. ഒരു ഭാഗത്ത് വലിയ ടര്‍ക്കി കോഴികള്‍ ....മറ്റൊരു ഭാഗത്ത് ആടുകളും താറാവുകളും.. ഒരു കൂട്ടില്‍ നിറയെ മാന്‍ കുട്ടികള്‍ .. കാവല്‍ പട്ടികള്‍ ..

കയ്യെത്തും ദൂരത്ത്‌ പഴുത്തു നില്‍ക്കുന്ന മാങ്ങയും പേരക്കയും സീതപ്പഴവുമെല്ലാം അവര്‍ ഞങ്ങള്‍ക്ക് പറിച്ചു തന്നു. തോട്ടമുടമയോട് ചോദിക്കാതെ ഇങ്ങനെ പറിക്കാന്‍ പാടുണ്ടോ എന്ന് ചോദിച്ചപ്പോള്‍ ഇസ്മാഈല്‍ പറഞ്ഞു. സുഹൃത്തുക്കളോ ബന്ധുക്കളോ വന്നാല്‍ ആവശ്യമുള്ളത് പറിച്ചു കൊടുക്കണം എന്നാണ് അവരുടെ ഓര്‍ഡര്‍ . നല്ല മധുരമുള്ള വില കൂടിയ ഇനം മാങ്ങകളാണ് ഇവിടെ ഉള്ളത്. ആറ് വലിയ മാങ്ങകള്‍ പാക്ക് ചെയ്തു വെക്കുന്ന ഒരു ചെറിയ ബോക്സിനു മുപ്പത്തി രണ്ടു റിയാലാണ് വില. നഗരത്തില്‍ നിന്നും പഴവര്‍ഗങ്ങളുടെ ഹോള്‍സെയില്‍ കച്ചവടക്കാര്‍ ഇവിടെ വന്നു വാങ്ങുകയാണ് ചെയ്യുക. മാര്‍ക്കറ്റില്‍ അതിനു അറുപതു റിയാല്‍ വരെ കൊടുക്കണം. ഇസ്മാഈല്‍ നാട്ടില്‍ നിന്നു കൊണ്ട് വന്നു വെച്ച നാടന്‍ തെങ്ങുകളും അക്കൂട്ടത്തില്‍ ഉണ്ട്. നല്ല പോലെ വളര്‍ന്നു നില്‍ക്കുന്നുവെങ്കിലും തേങ്ങ നാട്ടിലെ പോലെ ഉണ്ടാകുന്നില്ല. എല്ലാം കൊഴിഞ്ഞു പോകുന്നു. ഉള്ളവ തന്നെ പൂര്‍ണ വളര്‍ച്ച എത്തുന്നില്ല. കാലാവസ്ഥയുടെ തകരാര് കൊണ്ടാവണം. എന്നാലും തെങ്ങിനെ അവര്‍ വല്ലാത്ത സ്നേഹത്തോടെ നനച്ചു വളര്‍ത്തുന്നു. തെങ്ങോലകളുടെ മര്‍മരം അവരുടെ മനസ്സിന് എന്തെന്നില്ലാത്ത ഒരു സന്തോഷം നല്കുന്നുണ്ടാവണം. ഒരു തെങ്ങിന്റെ ചുവട്ടില്‍ ചെന്ന് അതിനെ മെല്ലെ തൊട്ടു തലോടുന്നു ഇസ്മാഈല്‍ . "നാട്ടില്‍ നിന്ന് കൊണ്ട് വന്നു ഞാന്‍ നനച്ചു വളത്തിയതാ.".. എന്റെ കണ്ണുകള്‍ നിറഞ്ഞു പോയ ഒരു നിമിഷം..

തെങ്ങിനോട് ചേര്‍ന്ന് പൂവിട്ടു നില്‍ക്കുന്ന ചെമ്പരുത്തിയും.. അറേബ്യന്‍ മരുഭൂമിയുടെ നടുവിലാണെങ്കിലും നാട്ടില്‍ എത്തിപ്പെട്ട ഒരു പ്രതീതി. അതിരുകള്‍ തിരിച്ച മൂന്നു തോട്ടങ്ങള്‍ ഒന്നിച്ചു ചേര്‍ന്ന ഒരു വലിയ ഫാം ആണിത്. ഓരോ തോട്ടത്തിലും ഓരോ ജോലിക്കാരന്‍. മൂന്നു പേരും മലയാളികള്‍ . കാസര്‍ഗോഡ് സ്വദേശി ബഷീര്‍ , രാമനാട്ടുകരയിലെ ഹനീഫ, ഇടിമുഴിക്കല്‍ സ്വദേശി സൈതലവി .. മൂന്നു പേര്‍ക്കും പ്രത്യേക താമസ സ്ഥലങ്ങള്‍ ഉണ്ട്. ജോലി കഴിഞ്ഞാല്‍ എല്ലാവരും ഒന്നിച്ചു കൂടും. ഒരുമിച്ചു ഭക്ഷണം ഉണ്ടാക്കി കഴിക്കും. ഒരു പഴയ ടൊയോട്ട സിംഗിള്‍ കാബിന്‍ പിക്കപ്പ് കിടക്കുന്നത് കണ്ടു. തോട്ടത്തിലെ ആവശ്യങ്ങള്‍ക്കായി ഉള്ള വണ്ടിയാണത്. പട്ടണത്തില്‍ പോയി സാധനങ്ങള്‍ കൊണ്ട് വരാന്‍ അതാണുപയോഗിക്കുക.

നാട്ടില്‍ നിന്ന് കൊണ്ട് വന്നു പിടിപ്പിച്ച തെങ്ങും ചെമ്പരുത്തിയും

തോട്ടം ചുറ്റിക്കണ്ടപ്പോഴേക്ക് ഇരുട്ടിത്തുടങ്ങിയിരുന്നു. ജോലിയൊക്കെ പെട്ടെന്ന് തീര്‍ത്ത്‌ കുളിച്ചു റെഡിയായി ബഷീറും ഹനീഫയും സൈതലവിയും എത്തി. ഞങ്ങള്‍ ഒരുമിച്ചു മഗ് രിബ് നമസ്കരിച്ചു. പിന്നെ മാഞ്ചുവട്ടിലെ കട്ടിലില്‍ അവരോടൊപ്പം അല്പം സൊറ പറഞ്ഞിരുന്നു. കുറച്ചു കോഴികള്‍ മാവിന്റെ കൊമ്പത്ത് കയറി ഇരിക്കുന്നുണ്ട്‌. അവരുടെ അന്തിത്താവളം അവിടെയാണ്. "ഇവര്‍ രണ്ടു മൂന്നു പേര്‍ വി ഐ പി കളാണ് കൂട്ടില്‍ കയറില്ല. സ്ഥിരമായി ഈ മാവിലാണ്". ഹനീഫയുടെ കമന്റ്. ഇതിനിടെ പറിച്ചെടുത്ത പഴങ്ങള്‍ വെട്ടി ഒരു വലിയ തളികയിലാക്കി ബഷീര്‍ കൊണ്ട് വന്നു. "ഇവിടത്തെ ജീവിതം എങ്ങിനെയുണ്ട്.. ശമ്പളമൊക്കെ ശരിക്ക് കിട്ടാറുണ്ടോ?" ഞാന്‍ ചോദിച്ചു. 'എല്ലാം സുഖമാണ്. ഒരു ബുദ്ധിമുട്ടുമില്ല. ശമ്പളം കൃത്യമായി കിട്ടുന്നു..മാത്രമല്ല അത്യാവശ്യം വന്നാല്‍ അത് അഡ്വാന്‍സായി നല്‍കുകയും ചെയ്യും'. സൈതലവിയാണ് അത് പറഞ്ഞത്. ഒരാവശ്യം വന്നപ്പോള്‍ ഒരു വര്‍ഷത്തെ ശമ്പളം അഡ്വാന്‍സായി നല്‍കിയ അനുഭവം ബഷീറും പങ്കു വെച്ചു. തോട്ടം ഉടമകളായ അറബികള്‍ ഇടയ്ക്കിടയ്ക്ക് വരും. അത്യാവശ്യ സാധനങ്ങള്‍ കൊണ്ട് വന്നു കൊടുക്കും. അവര്‍ കുടുംബ സമേതം വന്നാല്‍ അവരുണ്ടാക്കുന്ന ഭക്ഷണം എല്ലാവരും ഒന്നിച്ചിരുന്നു കഴിക്കും.

മുമ്പ് ഇവിടെയുണ്ടായിരുന്ന ജോലിക്കാരില്‍ ഒരാള്‍ക്ക്‌ നാട്ടില്‍ കുട്ടി ജനിച്ച വിവരം അറിഞ്ഞപ്പോള്‍ രണ്ടു ആടുകളെ അറുത്തു തോട്ടമുടമയായ കഫീല്‍ പാര്‍ട്ടി നടത്തി അവന്റെ സന്തോഷത്തില്‍ പങ്കു ചേര്‍ന്ന അനുഭവം ഇസ്മാഈല്‍ വിവരിച്ചപ്പോള്‍ എന്റെ മനസ്സ് 'ആടുജീവിതം' വായിച്ച ഓര്‍മകളിലൂടെ പായുകയായിരുന്നു. അറബികളെന്ന് കേള്‍ക്കുമ്പോള്‍ പലര്‍ക്കും മനസ്സിലേക്ക് വരുന്നത് ക്രൂരന്മാരും മൃഗതുല്യരുമായി പെരുമാറുന്ന ആളുകളുടെ ചിത്രമാണ്. അത്തരം ചിലര്‍ ഉണ്ടാവാം. എന്നാല്‍ നൂറിലൊരാള്‍ ചെയ്യുന്ന അനീതി ഒരു ജനതയുടെ മുഴുവന്‍ മുഖത്തു ചാര്‍ത്തിക്കൊടുത്തു സായൂജ്യം അടയുന്നവര്‍ ധാരാളമുണ്ട്. ബഹുഭൂരിപക്ഷം നല്‍കുന്ന സ്നേഹത്തിന്റെ ഊഷ്മളത പലപ്പോഴും അവര്‍ക്ക് കാണാന്‍ കഴിയുന്നില്ല. ലക്ഷക്കണക്കിന്‌ മലയാളി കുടുംബങ്ങള്‍ക്ക് അന്തസ്സാര്‍ന്ന ജീവിതം നല്‍കുന്ന നല്ലവരായ അറബികളെ ഒരു സാഹിത്യകാരനും വേണ്ട!!. കൂടുതല്‍ പതിപ്പുകള്‍ വിറ്റഴിച്ചു പോകണമെങ്കില്‍ അറബികളെ ക്രൂരന്മാരായി ചിത്രീകരിച്ചേ മതിയാവൂ.. എങ്കില്‍ മാത്രമേ അവാര്‍ഡുകളും സ്വീകരണങ്ങളും ലഭിക്കൂ!! കേരളത്തിന്റെ സാമ്പത്തിക ഘടനയുടെ വളര്‍ച്ചക്ക് അറബ് രാജ്യങ്ങളോളം സംഭാവന നല്‍കിയ മറ്റൊരു ഭൂപ്രദേശമില്ല. ലക്ഷക്കണക്കിന്‌ മലയാളികള്‍ ഉപജീവനം തേടിയെത്തുന്ന ഈ ഭൂമിയുടെ സംസ്കാരവും ജീവിതവും കെട്ടുകഥകളുടെ നിറം പിടിപ്പിക്കാതെ ചിത്രീകരിക്കുന്ന ഒരു സാഹിത്യം നമുക്കെന്നെങ്കിലും കാണാന്‍ കഴിയുമോ?

സംസാരിച്ചിരുന്നു നേരം പോയതറിഞ്ഞില്ല. പിറ്റേന്ന് ജോലിയുണ്ട്. രാവിലെ ഓഫീസില്‍ എത്തണം. ഇപ്പോള്‍ പുറപ്പെട്ടാല്‍ തന്നെ രാത്രി ഒരു മണിയാവും ജിദ്ദയില്‍ എത്താന്‍. അവരെ ഉറങ്ങാന്‍ വിട്ടു ഞാനും അബ്ബാസും തിരിച്ചു. വണ്ടിയുടെ ശബ്ദവും ലൈറ്റും കണ്ട ഉടനെ കാവല്‍ പട്ടി ഓടിയെത്തി. ബഷീര്‍ അവനെ ഓടിച്ചു. ഇസ്മായീലും ഞങ്ങളോടൊപ്പം കയറി. അവനെ അവന്റെ സങ്കേതത്തില്‍ തിരിച്ചെത്തിച്ച ശേഷം ഞങ്ങള്‍ ഇറങ്ങി. "അടുത്ത അവധിക്കാലത്ത് കുറച്ചു ദിവസം ഞങ്ങളോടൊപ്പം നില്‍ക്കാന്‍ വരണം". ഇസ്മാഈല്‍ പറഞ്ഞു. "തീര്‍ച്ചയായും ഞാന്‍ വരും. ഇന്‍ഷാ അള്ളാ" അവനെക്കെട്ടിപ്പിടിച്ചു അത്രയും പറഞ്ഞപ്പോള്‍ എന്റെ വാക്കുകള്‍ ഇടറി. മണല്‍പ്പരപ്പിലൂടെ കാര്‍ മുന്നോട്ടു നീങ്ങുമ്പോള്‍ ഞാന്‍ തിരിഞ്ഞു നോക്കി. ആടുകള്‍ക്ക് വെള്ളവുമായി ഇസ്മാഈല്‍ പോകുന്നു. മരുഭൂമിയില്‍ തണുത്ത കാറ്റ് വീശുന്നുണ്ട്.

Related Posts (Travel)
ദാല്‍ തടാകത്തിലെ രണ്ടു രാത്രികള്‍
പഞ്ചാബിലെ സുഹൃത്ത്, അയോധ്യയിലെ പള്ളി
കാത്തയെ കണ്ട ഓര്‍മയില്‍

അഞ്ചാം മന്ത്രി ഊരാക്കുടുക്കിലേക്ക്!!

noreply@blogger.com (Basheer Vallikkunnu) — Mon, 26 Mar 2012 06:15:00 +0000

"കുഞ്ഞാലിക്കുട്ടിയുടെ മൊബൈല്‍ നമ്പറുണ്ടോ കയ്യില്‍? " ഞാന്‍ ജോലി ചെയ്യുന്ന കമ്പനിയുടെ സെയില്‍സ് ഡിവിഷനില്‍ സ്ഥിരമായി വരാറുള്ള ചെറുപ്പക്കാരന്‍ ഇന്നലെ എന്നോട് ചോദിച്ചു. കയ്യില്‍ എപ്പോഴും ഒരു ചന്ദ്രിക പത്രം കൊണ്ടുനടക്കുന്ന ആളായതിനാല്‍ കറകളഞ്ഞ ലീഗുകാരനാണ് പുള്ളി എന്ന് എനിക്കറിയാം. എന്നാലും കുഞ്ഞാലിക്കുട്ടി എന്ന് പറഞ്ഞപ്പോള്‍ മുഖത്തു വല്ലാത്തൊരു ഗൗരവം വന്നത് പോലെ. "എന്റെ കയ്യിലില്ല, പക്ഷെ അത്യാവശ്യമാണേല്‍ സംഘടിപ്പിച്ചു തരാം. എന്താണ് പ്രശ്നം?" ഞാന്‍ ചോദിച്ചു. "അത്യാവശ്യമാണ്. വിളിച്ചു നാല് വര്‍ത്താനം പറയാനുണ്ട്!!". അല്പം കൗതുകത്തോടെ സംഗതി ഞാന്‍ വിശദമായി ചോദിച്ചറിഞ്ഞു. അഞ്ചാം മന്ത്രിയുടെ കാര്യം തന്നെയാണ് പ്രശ്നം. "ലീഗിന് അവകാശപ്പെട്ട ഈ മന്ത്രിസ്ഥാനം ചോദിച്ചു വാങ്ങുന്നതില്‍ കുഞ്ഞാലിക്കുട്ടിക്ക് എന്താണിത്ര തടസ്സം?. അതൊന്നു നേരിട്ടറിയാനാണ്". സ്വന്തം നേതാവിനെതിരെ അയാളുടെ രോഷം തിളച്ചു പൊങ്ങുകകയാണ്. ഒരു സാധാരണ ലീഗ് പ്രവര്‍ത്തകന്റെ മനസ്സ് അയാളില്‍ എനിക്ക് വായിക്കാന്‍ കഴിഞ്ഞു.

ഐശ്വര്യയുടെ പ്രസവവും സച്ചിന്റെ സെഞ്ച്വറിയും ഓക്കെയായതോടെ ഇനി ബാക്കിയുള്ളത് മഞ്ഞളാംകുഴി അലിയുടെ മന്ത്രിക്കാര്യം മാത്രമാണ് എന്ന് എല്ലാവര്‍ക്കും അറിയാം. പക്ഷെ ലീഗ് നേതാക്കള്‍ ഒരു ഉശിരും ചുണയും കാണിക്കാത്തത് കാരണം ആ പാവം ഇപ്പോഴും പെരുവഴിയില്‍ കിടക്കുന്നു. കാര്യങ്ങള്‍ ഇങ്ങനെ പോവുകയാണെങ്കില്‍ ഐശ്വര്യയുടെ അടുത്ത പ്രസവം കഴിഞ്ഞാലും മൂപ്പരുടെ കാര്യം സലാമാത്താവുമെന്നു കരുതാന്‍ വയ്യ. എങ്ങനെ കഴിഞ്ഞിരുന്ന ആളാണ്‌. ലീഗുകാര്‍ അങ്ങോട്ട്‌ ചെന്ന് പറഞ്ഞു പൂതിവെപ്പിച്ചതാണ് അലിക്കയെ. ഇപ്പോള്‍ നാട്ടുകാരും കൂട്ടുകാരുമൊക്കെ കളിയാക്കിച്ചിരിക്കുന്ന ഒരു പരുവത്തിലേക്ക്‌ ആ പാവം എത്തിപ്പെട്ടിരിക്കുന്നു. ഇന്റര്‍നെറ്റില്‍ ടിന്റു മോന്റെ തമാശകളേക്കാള്‍ ഹിറ്റ്‌ ഇപ്പോള്‍ മഞ്ഞളാംകുഴി അലിയുടെ ഫോട്ടോകള്‍ക്കാണ്.

മുപ്പത്തൊന്‍പത്‌ എം എല്‍ എ മാരുള്ള കോണ്‍ഗ്രസ്സിനു പന്ത്രണ്ടു മന്ത്രിമാര്‍ ഉണ്ടെങ്കില്‍ ഇരുപതു എം എല്‍ എ മാരുള്ള ലീഗിന് ചുരുങ്ങിയത് ആറ് മന്ത്രിമാര്‍ വേണ്ടേ എന്നതാണ് ചോദ്യം. സംഗതി ന്യായമാണ്. എസ് എസ് എല്‍ സി നാലുതവണ തോറ്റ കുട്ടികള്‍ക്ക് പോലും ഈ കണക്കു പെട്ടെന്ന് മനസ്സിലാവും. അപ്പോള്‍ പിന്നെ വക്കീല്‍ പരീക്ഷ പാസായ ഉമ്മന്‍ ചാണ്ടിക്കും രമേശ്‌ ചെന്നിത്തലക്കും അത് മനസ്സിലാവാതെ ഇരിക്കണമെങ്കില്‍ അതിലെന്തോ ഗുട്ടന്‍സില്ലേ. അവിടെയാണ് കുഞ്ഞാലിക്കുട്ടി സാഹിബിന്റെ റോള്‍ കിടക്കുന്നതായി ലീഗ് അണികള്‍ സംശയിക്കുന്നത്. ഒന്നുകില്‍ മൂപ്പര്‍ക്ക് ഈ മന്ത്രി സ്ഥാനം ശരിക്ക് തലയില്‍ കയറിയിട്ടില്ല. കയറിയിട്ടുണ്ടെങ്കില്‍ ഒറ്റ ആഴ്ച കൊണ്ട് സംഗതി ഓക്കേ ആക്കാനുള്ള മരുന്ന് കയ്യിലുണ്ട്. അതല്ല എങ്കില്‍ പിന്നെയുള്ളത് ഒരേയൊരു കാരണമാണ്. അത് ഐസ്ക്രീമിന്റെ ചരടാണ്‌. ആ ചരട് വെച്ച് യു ഡി എഫിലെ ആരോ ഗോള്‍ഫ് കളിക്കുന്നുണ്ട്. ആ ഗോള്‍ഫ് തൊണ്ടയില്‍ കുടുങ്ങി കിടക്കുന്നത് കൊണ്ടാണ് സാഹിബ് തന്റെ തന്ത്രങ്ങളൊന്നും പുറത്തെടുക്കാത്തത്!!.

പുരയില്‍ അടുപ്പ് പുകഞ്ഞില്ലെങ്കിലും ലീഗുകാര്‍ പിടിച്ചു നില്‍ക്കും, പക്ഷെ പാണക്കാട് തങ്ങള്‍ ഒരു വാക്ക് പറഞ്ഞിട്ട് അത് നടന്നില്ലെങ്കില്‍ അതവര്‍ക്ക് സഹിക്കാന്‍ കഴിയില്ല. അഞ്ചാംമന്ത്രിയുടെ കാര്യത്തില്‍ തീരുമാനമായിട്ടുണ്ട് എന്നും ഉടനെ അധികാരമേല്‍ക്കുമെന്നും ഹൈദരലി ശിഹാബ് തങ്ങളെക്കൊണ്ട് പരസ്യപ്രസ്താവന നടത്തിപ്പിച്ചത് കുഞ്ഞാലിക്കുട്ടിയല്ലാതെ മറ്റാരെങ്കിലും ആകാനുള്ള സാധ്യത കുറവാണ്. അതുകൊണ്ട് തന്നെ ഇനി ഈ വിഷയത്തില്‍ 'മാഞ്ഞാളം' കളിക്കാന്‍ പറ്റില്ല എന്ന് ആരെക്കാളും ബോധ്യമുണ്ടാകേണ്ട വ്യക്തി കുഞ്ഞാലിക്കുട്ടി തന്നെയാണ്. പാണക്കാട്ടെ തങ്ങന്മാരെ കൊടപ്പനക്കല്‍ തറവാട്ടില്‍ എത്തി കണ്ട ശേഷമാണ് കരുണാകരന്‍ അടക്കമുള്ള പഴയകാല കോണ്‍ഗ്രസ്‌ നേതാക്കള്‍ മന്ത്രിമാരുടെ ലിസ്റ്റ് പോലും പ്രഖ്യാപിക്കാറുണ്ടായിരുന്നത്. അത്ര മാത്രം സ്ഥാനമാണ് യു ഡി എഫില്‍ പാണക്കാട്ടെ തങ്ങന്മാര്‍ക്ക് ഇത്രകാലവും ലഭിച്ചിരുന്നത്. ഏത് ലീഗ് പ്രവര്‍ത്തകനും ആത്മാഭിമാനത്തിന്റെ നിമിഷങ്ങള്‍ സമ്മാനിക്കുന്നതായിരുന്നു പാണക്കാട്ടേക്കുള്ള ദേശീയ നേതാക്കളുടെ സന്ദര്‍ശനങ്ങള്‍ .. ആ പാണക്കാട്ടെ തങ്ങളുടെ പരസ്യ പ്രസ്താവനയാണ് ഇപ്പോള്‍ യു ഡി എഫ് നേതാക്കള്‍ 'കറിവേപ്പില' പോലെ ( വി എസ് ഉദ്ദേശിച്ച അര്‍ത്ഥത്തില്‍ അല്ല) വലിച്ചെറിഞ്ഞിരിക്കുന്നത്!!. അതുകൊണ്ട് തന്നെ യു ഡി എഫ് നേതാക്കളെ ന്യായീകരിച്ചു കൊണ്ട് മുന്നോട്ടു പോകുന്ന പാര്‍ട്ടി നേതൃത്വത്തിനെതിരെ അണികള്‍ തെരുവില്‍ ഇറങ്ങിയിട്ടുണ്ടെങ്കില്‍ അതിനവരെ കുറ്റം പറഞ്ഞിട്ട് കാര്യമില്ല. കുഞ്ഞാലിക്കുട്ടി സാഹിബിന്റെ വീട്ടിലേക്കു ഇന്നലെ പ്രകടനം നടത്തിയത് വിരലിലെണ്ണാവുന്ന ചെറുപ്പക്കാരാണെങ്കിലും അവര്‍ പ്രതിനിധീകരിക്കുന്നത് ലീഗ് അണികളിലെ ഭൂരിപക്ഷത്തെയാണ്. എന്നോട് കുഞ്ഞാലിക്കുട്ടിയുടെ മൊബൈല്‍ നമ്പര്‍ ചോദിച്ച ചെറുപ്പക്കാരന്റെ മനസ്സും നേതൃത്വത്തിനെതിരെ മുദ്രാവാക്യം വിളിച്ച ആ യുവാക്കളോടൊപ്പമാണുള്ളത് എന്നതുറപ്പ്.

പുള്ളി ഇപ്പോഴും പ്രതീക്ഷയില്‍ ആണ്!!.

സത്യം പറഞ്ഞാല്‍ ലീഗ് നേതൃത്വത്തിന്റെ പിടിപ്പു കേടാണ് ഈ പുകിലുകളൊക്കെ ഉണ്ടാക്കിയത്. പ്രവര്‍ത്തകര്‍ തെരുവില്‍ ഇറങ്ങുന്ന ഒരവസ്ഥതയിലേക്ക് കാര്യങ്ങള്‍ എത്തിച്ചതും അവര്‍ തന്നെയാണ്. യു ഡി എഫിനകത്ത് വ്യക്തമായ ഒരു ധാരണ വരുന്നതിനു മുമ്പ് അഞ്ചാം മന്ത്രിയെക്കുറിച്ച് പ്രവര്‍ത്തകര്‍ക്കിടയില്‍ അമിത വിശ്വാസം പകരുകയും അതൊരു പ്രസ്റ്റീജ് ഇഷ്യൂവാക്കി വളര്‍ത്തിക്കൊണ്ട് വരികയും ചെയ്തത് സാധാരണ പ്രവര്‍ത്തകരല്ല, മറിച്ച് സംസ്ഥാന പ്രസിഡന്റില്‍ നിന്ന് തുടങ്ങുന്ന നേതൃത്വമാണ്. ആടറിയുന്നോ അങ്ങാടി വാണിഭം എന്ന് ചോദിച്ച പോലെ യു ഡി എഫിനകത്ത് എന്ത് നടക്കുന്നു എന്നതിനെക്കുറിച്ച് ഒരു ഐഡിയയും ഇല്ലെങ്കിലും പത്രക്കാരെ കാണുമ്പോഴൊക്കെ 'അഞ്ചാം മന്ത്രി ഉടന്‍ ഉടന്‍ ' എന്ന് പറഞ്ഞു കൊണ്ടിരുന്ന കെ പി എ മജീദ്‌ അടക്കമുള്ള നേതാക്കളാണ് സ്ഥിതിഗതികള്‍ ഇത്ര വഷളാക്കിയത്. അലിയുടെ പേര് മാധ്യമങ്ങളില്‍ കൂടെക്കൂടെ പറഞ്ഞു കൊണ്ട് അദ്ദേഹത്തെ ഒരു പരിഹാസ കഥാപാത്രമാക്കി വളര്‍ത്തിക്കൊണ്ടു വന്നതിലും പ്രധാന പങ്ക് നേതൃത്വത്തിനു തന്നെയാണ്.

പിറവം കഴിഞ്ഞാല്‍ മന്ത്രി എന്നതിന് പകരം നെയ്യാറ്റിന്‍കര കഴിഞ്ഞാല്‍ മന്ത്രി എന്ന പുതിയ ഫോര്‍മുലയുമായി ചില യു ഡി എഫ് നേതാക്കള്‍ രംഗത്ത് വന്നിട്ടുണ്ട് എന്ന് കേള്‍ക്കുന്നു. പ്രവര്‍ത്തകരുടെ വികാരം കണക്കിലെടുത്ത് കൊണ്ട് നിലവിലുള്ള മന്ത്രിമാരെ പിന്‍വലിച്ചു യു ഡി എഫില്‍ ഒരു സുനാമി സൃഷ്ടിക്കാന്‍ ലീഗ് ഒരുങ്ങുന്നു എന്ന വാര്‍ത്തയും പുറത്തു വന്നിട്ടുണ്ട്. ഏതായിരുന്നാലും അഞ്ചാം മന്ത്രി ഒരു ഊരാക്കുടുക്കിലേക്ക് കേരള രാഷ്ട്രീയത്തെ തള്ളിവിടാന്‍ പോവുകയാണ്. കാത്തിരുന്നു കാണാം.

മ്യാവൂ: എന്റെ പോസ്റ്റുകള്‍ സ്ഥിരമായി വായിക്കുന്ന ഒരാള്‍ കുഞ്ഞാലിക്കുട്ടിയുടെ സ്റ്റാഫില്‍ ഉണ്ട്. ഈ പോസ്റ്റ് സാഹിബ് കാണാതിരുന്നാല്‍ മതിയായിരുന്നു!!!.

രഞ്ജിനി സിനിമയിലേക്ക്, ന്‍റെ പടച്ചോനേ!!

noreply@blogger.com (Basheer Vallikkunnu) — Sat, 24 Mar 2012 06:36:00 +0000

രഞ്ജിനി ഹരിദാസ് സിനിമയില്‍ അഫിനയിക്കാന്‍ പോകുന്നു. അതും പോലീസ് വേഷത്തില്‍ !!. രണ്ടു ദിവസം മുമ്പ് പത്രത്തില്‍ ആ വാര്‍ത്ത‍ വായിച്ചപ്പോള്‍ ന്‍റെ പടച്ചോനേ! എന്നൊരു വിളി ഞാനറിയാതെ വായില്‍ നിന്ന് വന്നു പോയി. അതിന്റെ കാരണം എന്താണെന്ന് അറിയില്ല. ഞാന്‍ എന്നോട് തന്നെ ചോദിച്ചു.. 'അല്ല, രഞ്ജിനി ഹരിദാസിന് എന്താണൊരു കുഴപ്പം?. സാരിയുണ്ട്, ലിപ്സ്റ്റിക്കുണ്ട്, സൗന്ദര്യമുണ്ട്, ഇപ്പോഴുള്ള നടിമാര്‍ക്ക് വേറെ എന്തൊക്കെ കഴിവുകള്‍ ഉണ്ടോ അതൊക്കെയുണ്ട്‌. (ഏതാണ്ടൊരു ഐഡിയ വെച്ചാണ് പറയുന്നത് കെട്ടോ). അവര്‍ക്കൊക്കെ അഭിനയിക്കാമെങ്കില്‍ രഞ്ജിനിക്കും അതാവാം'. ഞാന്‍ എന്നെത്തന്നെ സമാധാനിപ്പിച്ചു. 'കൂള്‍ ഡൌണ്‍ ! കൂള്‍ ഡൌണ്‍ !!. ചാടിപ്പിടിച്ചു ബ്ലോഗൊന്നും എഴുതല്ലേ!'. ഞാനാ വിഷയം വിട്ടു. മേശപ്പുറത്തു കിടക്കുന്ന പത്രത്തില്‍ നിന്നും ഇന്നലെ വീണ്ടും ആ വാര്‍ത്ത എന്റെ കണ്ണിലുടക്കി. അപ്പോഴും വന്നു 'ന്‍റെ പടച്ചോനേ!' എന്നൊരു വിളി.. നിങ്ങള്‍ പറ.. ഇതെന്റെ മാത്രം കുഴപ്പമാണോ? അതോ മൊത്തം മലയാളികളുടെ തൊണ്ടയില്‍ നിന്നും ഇതുപോലൊരു നിലവിളി ഉയരുന്നുണ്ടോ?

രാജേഷ്‌ അമങ്കരയുടെ (അങ്ങനെയും ഒരു സംവിധായകന്‍ ഉണ്ട്!) ചിത്രത്തിലാണ് തട്ടുപൊളിപ്പന്‍ പോലീസ് ഓഫീസറായി രഞ്ജിനി എത്തുന്നത്. എന്‍ട്രി എന്നാണു സിനിമയുടെ പേര്. സിനിമയില്‍ നിന്ന് മുമ്പ് പലരും തന്നെ തേടിയെത്തിയിട്ടുണ്ടെന്നും പറ്റിയ തിരക്കഥ കിട്ടാത്തത് കൊണ്ടാണ് തന്റെ എന്‍ട്രി ഇത്ര വൈകിപ്പോയതെതുന്നും രഞ്ജിനി പറയുന്നു. സുരേഷ് ഗോപി സ്റ്റൈലില്‍ അല്പം ആക്ഷന്‍ സീനുകള്‍ക്ക് അവസരം ഉള്ളത് കൊണ്ടാണ് പോലീസ് ഓഫീസര്‍ റോള്‍ രഞ്ജിനി സ്വീകരിച്ചത്. (വരാനുള്ളതൊന്നും വഴിയില്‍ തങ്ങില്ല മക്കളേ, അത് ടാസ്കി പിടിച്ചു വരും!!) സിനിമ വാര്‍ത്ത പുറത്തു വിട്ട കൂട്ടത്തില്‍ സാംസ്കാരിക കേരളത്തെ ഞെട്ടിപ്പിക്കുന്ന മറ്റൊരു പ്രസ്താവനയും രഞ്ജിനി പുറപ്പെടുവിച്ചിട്ടുണ്ട്. അഫിനയത്തില്‍ ശ്രദ്ധ കേന്ദ്രീകരിക്കുന്നതിനായി ഐഡിയ സ്റ്റാര്‍ സിംഗറില്‍ നിന്ന് തത്ക്കാലം വിരമിക്കുന്നു എന്ന്!!. ഐസക്ക് ന്യൂട്ടന്റെ തിയറി അനുസരിച്ച് ഏതൊരു സന്തോഷ വാര്‍ത്തക്കും പിറകെ ഒടുക്കത്തെ ഒരു ദുഃഖ വാര്‍ത്തയുണ്ടാവും. ഇത് അമ്മാതിരി ഒരു ദുഃഖ വാര്‍ത്തയായിപ്പോയി.

രഞ്ജിനി സൂപ്പര്‍ സ്റ്റാറായി മാറിയാല്‍ ഏഷ്യാനെറ്റ്‌ എന്ത് ചെയ്യുമെന്നത് ഒരു വലിയ വിഷയം തന്നെയാണ്. കാര്യമെന്തൊക്കെ പറഞ്ഞാലും മലയാളം റിയാലിറ്റി ഷോകളുടെ ചരിത്രത്തില്‍ നിന്നും രഞ്ജിനിയുടെ പേര് ആര്‍ക്കും മാറ്റി വെക്കാന്‍ കഴിയില്ല. ഒരേ പരിപാടിയില്‍ ഇത്രയധികം വര്‍ഷം ആങ്കര്‍ ആയി നിന്ന മറ്റൊരു അവതാരക ഉണ്ടോ എന്ന് തന്നെ സംശയമാണ്. രഞ്ജിനി ഐഡിയ സ്റ്റാര്‍ സിംഗറിനെക്കാള്‍ വലുതാകുന്നു എന്ന് തോന്നിത്തുടങ്ങിയപ്പോള്‍ ഏഷ്യാനെറ്റ്‌ ഒരിക്കല്‍ അവരെ മാറ്റി നിര്‍ത്തി ഒരു പുതുമുഖത്തെ പരീക്ഷിച്ചിരുന്നു. പക്ഷെ ഒരാഴ്ച കൊണ്ട് റേറ്റിംഗ് കുത്തനെ ഇടിഞ്ഞു. അപകടം മണത്ത ഏഷ്യാനെറ്റ് വീണ്ടും രഞ്ജിനിയെത്തന്നെ കൊണ്ട് വന്നു. ഇത് അസന്നിഗ്ദമായി തെളിയിക്കുന്ന ഒരു കാര്യം പ്രേക്ഷകര്‍ രഞ്ജിനിയുടെ 'മലയാലം' ഇഷ്ടപ്പെടുന്നു എന്ന് തന്നെയാണ്. അതിസുന്ദരമായി മലയാള ഭാഷ സംസാരിക്കാന്‍ കഴിയുന്ന അവതാരകര്‍ പോലും ഇപ്പോള്‍ കഷ്ടപ്പെട്ട് 'മലയാലം' പഠിച്ചു കൊണ്ടിരിക്കുന്നത് രഞ്ജിനി ട്രെന്‍ഡിന്റെ വിജയമെന്ന് വേണം പറയാന്‍.

ഒരു താരത്തെയും താരമല്ല സൃഷ്ടിക്കുന്നത്, പ്രേക്ഷകരാണ്. രഞ്ജിനി വിജയിച്ചെങ്കില്‍ അതിന്റെ 'ക്രെഡിറ്റ്‌' മലയാള ടി വി പ്രേക്ഷകര്‍ക്ക്‌ അവകാശപ്പെട്ടതാണ്. അത് കൊണ്ട് തന്നെ 'ന്റെ പടച്ചോനെ' എന്ന വിളിക്ക് ഇനി അര്‍ത്ഥമില്ല. മലയാള ഭാഷയുടെ വഴിത്തിരിവില്‍ രഞ്ജിനി വെറുമൊരു നിമിത്തം മാത്രം!. ടെലിവിഷന്‍ കീഴടക്കിയ 'ശുദ്ധ മലയാലം' സിനിമയിലേക്കും അത് വഴി മലയാള സാഹിത്യത്തിലേക്കും പടര്‍ന്നു കയറാന്‍ പോകുന്ന ഒരു ചരിത്ര മുഹൂര്‍ത്തമായി മാത്രം നമുക്കിതിനെ കണ്ടാല്‍ മതി. മമ്മൂട്ടിയും മോഹന്‍ലാലുമൊക്കെ 'രഞ്ജിനി മലയാല'ത്തില്‍ സംസാരിക്കുന്ന ഒരു നല്ല നാളെ ഉണ്ടായിക്കൂടെന്നില്ല. രഞ്ജിനിക്കും രഞ്ജിനിയിലൂടെ മലയാള സിനിമക്കും അത് വഴി നമ്മുടെ മാതൃഭാഷക്കും വെച്ചടി വെച്ചടി കയറ്റമുണ്ടാകട്ടെ എന്ന് ഞാന്‍ ആശംസിക്കുന്നു.

മ്യാവൂ: രഞ്ജിനിയുടെ നായകന്‍ ആരാണെന്ന് വാര്‍ത്തയില്‍ ഇല്ല. നമ്മുടെ മറ്റേ പുള്ളി ആയിരിക്കുമോ?

Related Posts
ദാസേട്ടാ, രഞ്ജിനി വിളിക്കുന്നു

സിന്ധു മോളേ, അബദ്ധം പറ്റിപ്പോയി

noreply@blogger.com (Basheer Vallikkunnu) — Wed, 21 Mar 2012 06:31:00 +0000

ഇടതു പക്ഷത്തിനു കിട്ടേണ്ടത് കിട്ടി. എന്നാലും ഇതൊരു ഒടുക്കത്തെ അടിയായിപ്പോയി. ജീവന്‍ പോയീന്നു മാത്രമല്ല, പൊതു ദര്‍ശനത്തിനു വെക്കാന്‍ ശരീരം പോലും ബാക്കിയായില്ല. ഉമ്മന്‍ ചാണ്ടി സ്വപ്നത്തില്‍ പോലും കാണാത്ത ഭൂരിപക്ഷമാണ് പിറവത്തെ വോട്ടര്‍മാര്‍ യു ഡി എഫ് സര്‍ക്കാരിന് നല്കിയിരിക്കുന്നത്. ഇരു മുന്നണികളുടെയും കണക്കുകൂട്ടലുകളെ കാറ്റില്‍ പറത്തിക്കൊണ്ടാണ്‌ 'ഇന്നാ പിടിച്ചോ' എന്ന മട്ടില്‍ ജനങ്ങള്‍ ചാണ്ടിക്ക് പിന്തുണ നല്കിയിരിക്കുന്നത്. യു ഡി എഫിനെ സംബന്ധിച്ചിടത്തോളം തികച്ചും അഭിമാനിക്കാവുന്ന വിജയം തന്നെയാണ് ഉണ്ടായിരിക്കുന്നത്.എന്നാല്‍ ഈ വിജയത്തില്‍ നിന്ന് പാഠമുള്‍ക്കൊള്ളേണ്ടത്‌ എല്‍ ഡി എഫിനേക്കാള്‍ കൂടുതല്‍ യു ഡി എഫ് ആണെന്നാണ്‌ എന്റെ പക്ഷം. കാലുവാരലും പരസ്പരമുള്ള പാരവെക്കലും ഒഴിവാക്കി മുന്നോട്ടു നീങ്ങിയാല്‍ ജനങ്ങളുടെ വിശ്വാസം ലഭിക്കുമെന്ന ലളിതമായ പാഠം.

ശരിയോ തെറ്റോ ആകട്ടെ എന്തിനെയും അന്ധമായി എതിര്‍ക്കുക എന്ന തികച്ചും പിന്തിരിപ്പനായ ഒരു സമീപനമാണ് എല്‍ ഡി എഫിന്റെ പ്രവര്‍ത്തനങ്ങളുടെ ആകെത്തുക. മാറി വരുന്ന കാലത്തിന്റെ വികസന സങ്കല്പങ്ങളോട് പുറംതിരിഞ്ഞു വരട്ടുവാദത്തിന്റെ മതിലുകള്‍ക്കുള്ളില്‍ നിന്ന് കൊണ്ടുള്ള നിലപാടുകള്‍ തുടരെത്തുടരെ എടുക്കുന്നു എന്നതാണ് എല്‍ ഡി എഫിനെ പുതുതലമുറയില്‍ നിന്ന് അകറ്റി നിറുത്തുന്നത്. പ്രശ്നങ്ങളോട് ക്രിയാത്മകമായ ഒരു സമീപനം നിയമസഭയിലോ അതിനു പുറത്തോ എടുക്കുവാന്‍ ഇടതുപക്ഷ നേതാക്കള്‍ക്ക് സാധിക്കുന്നില്ല. പാര്‍ട്ടി സെക്രട്ടറിയും പ്രതിപക്ഷനേതാവും തമ്മിലുള്ള ശീതസമരത്തിന്റെ അച്ചുതണ്ടിലാണ് സി പി എം കര്‍മപദ്ധതികളുടെ കരടുരേഖ തന്നെ രൂപം കൊള്ളുന്നത്‌. അതാ പാര്‍ട്ടിയുടെ ആത്മാവിനെ തന്നെ കൊന്നുതിന്നുന്ന ഒരവസ്ഥയിലേക്കു ഇപ്പോള്‍ എത്തിപ്പെട്ടിരിക്കുന്നു. പാളയത്തിനുള്ളിലെ ഈ ദ്വിമുഖയുദ്ധത്തിന് അവസാനം കുറിക്കാന്‍ അതിന്റെ സുപ്രിം കമാണ്ടര്മാര്‍ക്ക് സാധിക്കുന്നില്ല എങ്കില്‍ മലയാള മണ്ണിന്റെ വിപ്ലവ ചരിത്രത്തോട് അതിന്റെ പിന്‍തലമുറക്കാര്‍ ചെയ്യുന്ന കൊടിയ പാതകമായി ചരിത്രം അതിനെ വിലയിരുത്തും.

ഈ പരാജയം എം ജെ ജേക്കബിന്റെ പരാജയമല്ല, പരാജയപ്പെട്ടത് ഇടതുപക്ഷമാണ്. ഇത്പോലൊരു പരാജയം ജേക്കബ് സാര്‍ അര്‍ഹിക്കുന്നില്ല എന്നതാണ് നേര്. അന്തസ്സുള്ള ഒരു സ്ഥാനാര്‍ത്ഥിയായിരുന്നു അദ്ദേഹം. മിതഭാഷിയും പൊതുസേവന താത്പരനുമായ ഒരു രാഷ്ട്രീയ പ്രവര്‍ത്തകന്‍. അദ്ദേഹം ജയിച്ചു കാണണമെന്ന് പാര്‍ട്ടിക്കതീതമായി ആഗ്രഹിച്ചവരുണ്ട്. പക്ഷെ അവസാന ദിവസങ്ങളിലെ ട്രെന്‍ഡ് നിഷ്പക്ഷമായി വിലയിരുത്തിയ ആളുകള്‍ അനൂപിന്റെ വിജയം പ്രവചിച്ചിരുന്നു. ഇത്രക്കങ്ങോട്ടു പോകുമെന്ന് ആരും കരുതിയില്ല എന്ന് മാത്രം. ഇന്ത്യാവിഷനില്‍ വാരാന്ത്യം അവതരിപ്പിക്കുന്ന അഡ്വ. ജയശങ്കറിനെപ്പോലുള്ള ചില പൊട്ടന്മാര്‍ മാത്രമാണ് എല്‍ ഡി എഫ് മൂവ്വായിരം വോട്ടിനു ജയിക്കുമെന്ന് പ്രവചിച്ചത്. പുള്ളി ഇപ്പോള്‍ എവിടെയുണ്ടോ ആവോ?

ഇടതുപക്ഷത്തെ ഇത്ര ദയനീയമായ പരാജയത്തിലേക്ക് എത്തിച്ചതിന്റെ കാരണങ്ങള്‍ പലതാണ്. വികസന വിരുദ്ധ സമീപനത്തിന് അതില്‍ പ്രഥമസ്ഥാനമുണ്ടെങ്കിലും തിരഞ്ഞെടുപ്പിന്റെ അവസാന നാളുകളില്‍ ഉണ്ടായ ചില സുനാമിത്തിരകളെയും കണ്ടില്ലെന്നു നടിക്കാനാവില്ല. ശെല്‍വരാജിന്റെ രാജിയാണ് അതിലൊന്ന്. കരിങ്കാലി എന്ന് എത്ര തവണ പാര്‍ട്ടി നേതാക്കള്‍ വിളിച്ചാലും പാര്‍ട്ടിക്കുള്ളിലെ ചീഞ്ഞു നാറുന്ന സ്ഥിതിഗതികളെക്കുറിച്ച് ശെല്‍വരാജ് ഉയര്‍ത്തിയ ആരോപണങ്ങള്‍ നിഷ്പക്ഷരായ ജനങ്ങള്‍ക്ക്‌ തള്ളിക്കളയാന്‍ പറ്റുന്നതായിരുന്നില്ല. കണ്ണൂരില്‍ പാര്‍ട്ടികോടതിയുടെ വിധിപ്രകാരം ഒരു ചെറുപ്പക്കാരനെ വെട്ടിക്കൊന്ന അക്രമ രാഷ്ട്രീയവും ജനങ്ങളുടെ മനസ്സിലുലുണ്ടായിരുന്നിരിക്കണം.

അനൂപ്‌ ജേക്കബിന് പിറവത്തെ സ്ത്രീ ജനങ്ങളുടെ വോട്ടു നേടിക്കൊടുത്തതില്‍ ഏറ്റവും പങ്കു വഹിച്ചത് സഖാവ് വി എസ് ആണ്. ഒന്നുമില്ലായ്മയില്‍ നിന്ന് സി പി എം വളര്‍ത്തിക്കൊണ്ടു വന്ന സിന്ധു ജോയിയെന്ന പൊതുപ്രവര്‍ത്തകയെ അഭിസാരികയെന്നു ഉപമിക്കുക വഴി വി എസ് സഖാവ് അനൂപ്‌ ജേക്കബിന് വിജയം സ്വര്‍ണത്തളികയില്‍ സമ്മാനിക്കുകയായിരുന്നു എന്ന് വേണമെങ്കിലും പറയാം. അനൂപ്‌ ജേക്കബ് അല്പപമെങ്കിലും നന്ദിയുള്ളവവനാണ് എങ്കില്‍ വി എസ്സിന്റെ വീട്ടിലെത്തി അദ്ദേഹത്തിന്‍റെ കൈ പിടിച്ചു മുത്തണം. പോകുന്ന വഴിയില്‍ സിന്ധുവിന്റെ വീട്ടിലെത്തി ഒരു പാക്കറ്റ് കിറ്റ്‌കാറ്റ് മിഠായി അവള്‍ക്കു നല്‍കുകയും ആവാം.

Related Posts
അഭിസാരികയില്‍ നിന്ന് കറിവേപ്പിലയിലേക്കുള്ള ദൂരം
തോറ്റവരുടെ മാഞ്ഞാളംകുഴികള്‍

പെന്‍ഷന്‍ പ്രായം 65 ആക്കണം !!

noreply@blogger.com (Basheer Vallikkunnu) — Mon, 19 Mar 2012 08:17:00 +0000

ലോകത്തെ മിക്ക വികസിത രാജ്യങ്ങളിലെയും റിട്ടയര്‍മെന്റ് പ്രായം 60-65 ആണ്. അമേരിക്കയിലും ജര്‍മനിയിലും നോര്‍വേയിലും ഇത് അറുപത്തേഴു വയസ്സാണ്. ഇത്ര 'ചെറു പ്രായത്തില്‍' ആളുകള്‍ റിട്ടയര്‍ ചെയ്യുന്ന അപൂര്‍വ്വം രാജ്യങ്ങളില്‍ ഒന്നാണ് ഇന്ത്യ. മസില്‍ പിടിക്കാതെ പറഞ്ഞാല്‍ ആളുകള്‍ വളരെ ചെറുപ്പത്തില്‍ തന്നെ 'തട്ടിപ്പോയിരുന്ന' കാലത്ത് ഉണ്ടാക്കിയ ഒരു പെന്‍ഷന്‍ പ്രായമാണ് ഇപ്പോള്‍ ഉള്ളത്. ലൈഫ് എക്സ്പെക്ടന്സി കൂടിക്കൂടി വരുന്നതിനനുസരിച്ച് പെന്‍ഷന്‍ പ്രായം അല്പാല്പമായി ഉയര്‍ത്തുന്നത് കൊണ്ട് തെറ്റില്ല എന്നാണ് വിദഗ്ദരുടെ (ഞാനടക്കമുള്ള) അഭിപ്രായം!.

ശിലായുഗത്തില്‍ ഇരുപതു വയസ്സായിരുന്നുവത്രേ മനുഷ്യന്റെ ശരാശരി ആയുസ്സ്. അത് കൂടിക്കൂടി വന്നു ഇപ്പോള്‍ അറുപത്തിയേഴില്‍ എത്തിനില്‍ക്കുന്നു. ഇത് ലോക ശരാശരിയാണ്. ജപ്പാനില്‍ ഇത് 83 ആണ്. ഇന്ത്യയില്‍ അറുപത്തിയഞ്ചും. ആയുസ്സിന്റെ കാര്യത്തില്‍ ലോകത്ത് ഏറ്റവും താഴെ നില്‍ക്കുന്നത് ആഫ്രിക്കന്‍ രാജ്യമായ മൊസാമ്പിക്ക് ആണ്. അവിടുത്തെ ശരാശരി വളരെ കഷ്ടമാണ്. 39 വയസ്സ്!!. ഞാന്‍ പറഞ്ഞു വരുന്നത് ഓരോ രാജ്യത്തിനും അവരുടെ നിലവാരത്തിനനുസരിച്ച പെന്‍ഷന്‍ പ്രായം ഉണ്ടാക്കേണ്ടി വരുമെന്നതാണ്. ഇന്ത്യയില്‍ ശരാശരി ആയുസ്സ് അറുപത്തിയഞ്ച് ആയതിനാല്‍ പെന്‍ഷന്‍ പ്രായവും അറുപത്തിയഞ്ചു ആക്കിയാല്‍ ചില്ലിക്കാശ് പെന്‍ഷന്‍ വിഷയത്തില്‍ നീക്കി വെക്കേണ്ടി വരില്ല. ഖജനാവില്‍ ഇഷ്ടം പോലെ പണമുണ്ടാവും. സാമ്പത്തിക വിഷയത്തില്‍ അതിവിദഗ്ദനായ കെ എം മാണിക്കെന്നല്ല ശരാശരിയായ തോമസ്‌ ഐസക്കിന് പോലും അടിപൊളി ബജറ്റ് ഉണ്ടാക്കാന്‍ പറ്റും.

വിവിധ രാജ്യങ്ങളിലെ റിട്ടയര്‍മെന്റ് പ്രായം കാണിക്കുന്ന ചാര്‍ട്ട്

അമേരിക്ക ഇനി ആരുടെ മേലും ആറ്റംബോംബ്‌ പ്രയോഗിക്കുകയില്ലായെങ്കില്‍ ആയുസ്സ് ഇനിയും കൂടാനുള്ള സാധ്യതയുണ്ട്. അതിനനുസരിച്ച് പെന്‍ഷന്‍ കൊടുക്കാന്‍ വേണ്ടി നീക്കി വെക്കുന്ന തുക കൂട്ടിക്കൊണ്ടേയിരിക്കേണ്ടി വരും. ഇപ്പോള്‍ തന്നെ നമ്മുടെ ഖജനാവിന്റെ പ്രധാന ഭാഗം പോകുന്നത് പെന്‍ഷന്‍ വകുപ്പിലേക്കാണ്. അടിയന്തിരമായി ഒരഞ്ചു വര്‍ഷമെങ്കിലും പെന്‍ഷന്‍ പ്രായം ഉയര്‍ത്തിയില്ലെങ്കില്‍ നമ്മുടെ ഖജനാവ് കുളമാകും എന്ന കാര്യത്തില്‍ സംശയം വേണ്ട. സൗജന്യ നിരക്കില്‍ വിദ്യാഭ്യാസം നല്‍കി പ്രൊഫഷനല്‍ മേഖലയില്‍ ഒരാളെ തൊഴില്‍ പ്രാപ്തനാക്കി വളര്‍ത്തിക്കൊണ്ട് വരുവാന്‍ സര്‍ക്കാര്‍ ഭീമമായ തുക ചെലവ് ചെയ്യുന്നുണ്ട്. അതുകൊണ്ട് തന്നെ അത്തരം ആളുകളെ മാക്സിമം ഉപയോഗപ്പെടുത്തുക എന്ന പ്രായോഗിക ബുദ്ധികൂടി പെന്‍ഷന്‍ പ്രായം ഉയര്‍ത്തണം എന്ന് ആവശ്യപ്പെടുന്നതിന് പിന്നില്‍ ഉണ്ട്.

തൊഴിലില്ലായ്മ പരിഹരിക്കാന്‍ പെന്‍ഷന്‍ പ്രായം താഴ്ത്തുകയാണ് വേണ്ടത് എന്നത് തികച്ചും അശാസ്ത്രീയമായ ഒരു വീക്ഷണമാണ്. അതിനേക്കാള്‍ നല്ലത് സര്‍ക്കാര്‍ സര്‍വീസില്‍ ഉള്ളവരെ ഓരോ കുപ്പി എന്‍ഡോസള്‍ഫാന്‍ കുടിപ്പിച്ചു കാലപുരിക്ക് അയക്കുന്നതാണ്. തൊഴിലില്ലായ്മ പരിഹരിക്കാന്‍ മറ്റു മാര്‍ഗങ്ങള്‍ നോക്കണം. പുതിയ തൊഴില്‍ മേഖലകള്‍ കണ്ടെത്തണം. ഇപ്പോള്‍ സര്‍വീസില്‍ ഉള്ളവരെ പെട്ടെന്ന് റിട്ടയര്‍ ചെയ്യിപ്പിച്ചു അവര്‍ക്കും അവരുടെ ബന്ധുക്കള്‍ക്കും മരണ കാലം വരെ പെന്‍ഷന്‍ കൊടുത്തുകൊണ്ട് ഖജനാവ് കാലിയാക്കുക എന്ന പിന്തിരിപ്പന്‍ ആശയത്തേക്കാള്‍ എത്രയോ ഭേദമാണ് ജീവനക്കാരെ പരമാവധി ഉപയോഗപ്പെടുത്തി വെറുതെ പെന്‍ഷന്‍ കൊടുക്കേണ്ട കാലം കുറച്ചു കൊണ്ട് വരിക എന്നത്. ഇതൊക്കെ പറയുമ്പോഴേക്കു ഡി വൈ എഫ് ഐ, യൂത്ത് കാങ്ഗ്രസ്സ് കുട്ടികള്‍ക്ക് അപസ്മാരം ഇളകാന്‍ സാധ്യതയുണ്ട്. അതിനുള്ള മരുന്ന് കൊടുക്കേണ്ടത് ആ പാര്‍ട്ടികളിലെ മുതിര്‍ന്ന ഘടകങ്ങളുടെ പണിയാണ്. അപസ്മാരത്തിന്റെ ലക്ഷണങ്ങള്‍ കണ്ടു തുടങ്ങുമ്പോള്‍ തന്നെ ചികിത്സിച്ചാല്‍ കുറഞ്ഞ പൈസ കൊണ്ട് രോഗം മാറിക്കിട്ടും. രോഗം കണ്ട്രോള്‍ വിട്ടു പോയിക്കഴിഞ്ഞാല്‍ തറവാട് വിറ്റ് ചികിത്സിക്കേണ്ടി വരും.

ഇന്ന് പലരും ജോലിയില്‍ കയറുന്നത് തന്നെ മുപ്പത്തഞ്ചും നാല്‍പ്പതും വയസ്സ് ആകുമ്പോഴാണ്. പതിനഞ്ചു കൊല്ലം പണിയെടുക്കുമ്പോഴേക്ക് റിട്ടയര്‍ ചെയ്യാനുള്ള പ്രായമായി. പെന്‍ഷന്‍ പ്രായം ഒരഞ്ചു കൊല്ലം കൂടി ഉയര്‍ത്തിക്കഴിഞ്ഞാല്‍ അടുത്ത അഞ്ചു കൊല്ലത്തേക്ക്‌ സര്‍ക്കാര്‍ സര്‍വീസില്‍ വലിയ ഒഴിവുകളൊന്നും വരില്ല. അതുകൊണ്ട് തന്നെ യുവാക്കള്‍ക്ക് വാദ്ധ്യാര്‍ പണിക്കും ഗുമസ്തന്‍ പണിക്കും വേണ്ടി പി എസ് സി പരീക്ഷയെഴുതി വെറുതെ കുത്തിയിരുന്നു കാലം കളയേണ്ട ഗതികേട് ഉണ്ടാവില്ല. അഭ്യസ്ത വിദ്യരായ ചെറുപ്പക്കാര്‍ക്ക് പുതിയ തൊഴിലവസരങ്ങള്‍ സൃഷ്ടിക്കുന്നതിനു വേണ്ടി സ്വകാര്യ പങ്കാളിത്തത്തോടെ വ്യവസായ കാര്‍ഷിക ഐ ടി മേഖലകളില്‍ പുതിയ സംരംഭങ്ങള്‍ കൊണ്ടുവരാന്‍ സര്‍ക്കാരിന് ശ്രമിക്കേണ്ടി വരും. അതൊരു ഗുണപരമായ തുടക്കമാവുകയും ചെയ്യും.

ഒരു പ്രധാന കാര്യം കൂടി പറയാനുണ്ട്. കച്ചറയുണ്ടാക്കില്ല എങ്കില്‍ അതുകൂടി പറഞ്ഞു അവസാനിപ്പിക്കാം. സ്ത്രീകള്‍ക്ക് പുരുഷന്മാരേക്കാള്‍ ആയുസ്സ് കൂടുതലാണെന്നാണ്‌ പുതിയ പഠനങ്ങള്‍ കാണിക്കുന്നത്. മിക്കവാറും പുരുഷന്മാര്‍ ആണ് ആദ്യം തട്ടിപ്പോവുക. ആ ഒരു ലൈനില്‍ പിടിച്ചു സ്ത്രീകള്‍ക്ക് ഒന്നോ രണ്ടോ വര്‍ഷം പെന്‍ഷന്‍ പ്രായം കൂട്ടിക്കൊടുത്താലും കുഴപ്പമില്ല എന്നാണ് എന്റെ പക്ഷം. ഇതൊക്കെ കേള്‍ക്കുമ്പോള്‍ ചൊറിഞ്ഞു വരുന്നവര്‍ ഉണ്ടെങ്കില്‍ ക്ഷമിക്കുക. ഞാനെന്റെ അഭിപ്രായമാണ് പറയുന്നത്. ഇന്ത്യന്‍ ഭരണഘടന പ്രകാരം ആര്‍ക്കും അവരുടെ അഭിപ്രായങ്ങള്‍ പറയാനുള്ള സ്വാതന്ത്ര്യമുണ്ട്. ജയ്‌ ഹിന്ദ്‌!.

Note:20.03.2012
ഈ പോസ്റ്റ്‌ ഇന്ന് പുന:പ്രസിദ്ധീകരിച്ച വര്‍ത്തമാനം പത്രത്തിനു നന്ദി.

കേരളത്തിന് അവലോസുണ്ട !!

noreply@blogger.com (Basheer Vallikkunnu) — Thu, 15 Mar 2012 07:07:00 +0000

ഭൂമിയില്‍ മറ്റെല്ലാത്തിനും വില കൂടുമ്പോള്‍ റെയില്‍വേ ടിക്കറ്റിനു മാത്രം വില കൂട്ടാന്‍ പാടില്ല എന്ന് പറയുന്നതില്‍ എത്ര മാത്രം ഔചിത്യമുണ്ട്?. റെയില്‍വേയെ നഷ്ടത്തിലോടുന്ന ഒരു പൊതുമേഖല സ്ഥാപനമാക്കി ഇന്നുള്ള സര്‍വീസുകള്‍ കൂടി അവതാളത്തിലാക്കിയാല്‍ ആത്യന്തിക നഷ്ടം ആര്‍ക്കാണ്? ആഡംബര കാറുകളും ഹെലിക്കോപ്റ്ററുകളും സ്വന്തമായുള്ള ദേശീയ നേതാക്കന്മാര്‍ക്ക് ഒരു പക്ഷെ റെയില്‍വേ ഇല്ലെങ്കിലും ജീവിച്ചു പോകാന്‍ പറ്റിയേക്കും. പക്ഷെ ഈ പൊതുമേഖല സ്ഥാപനത്തെ നിലനിര്‍ത്തേണ്ടത് ഇന്നാട്ടിലെ സാധാരണക്കാരന്റെ ആവശ്യമാണ്‌. ഒരുകാലത്തും റെയില്‍വേയുടെ യാത്രാ നിരക്കുകള്‍ വര്‍ധിപ്പിക്കാന്‍ പാടില്ല എന്ന വാശിയില്‍ മമത ബാനര്‍ജി കളിക്കുന്ന നാടകം ശുദ്ധ തോന്നിവാസമാണ്. അയമ്മയുടെ സാരിത്തുമ്പിലാണ് കോണ്‍ഗ്രസ്സിനെപ്പോലൊരു ദേശീയ പാര്‍ട്ടിയുടെ നട്ടെല്ല് കെട്ടിയിട്ടിരിക്കുന്നത് എന്ന് കാണുമ്പോള്‍ സഹതാപമുണ്ട്.

വില വര്‍ദ്ധനയെ ന്യായീകരിക്കുകയല്ല. പക്ഷെ ഒമ്പത് വര്‍ഷത്തെ ഇടവേളയ്ക്കു ശേഷം കിലോമീറ്ററിന് രണ്ടു പൈസ വര്‍ദ്ധിപ്പിക്കുമ്പോള്‍ ഇത്രമാത്രം ബഹളത്തിന്റെ ആവശ്യമുണ്ടോ? സാധാരണക്കാര്‍ ഏറെ ഉപയോഗിക്കുന്ന സബര്‍ബന്‍, സെക്കണ്ട് ക്ലാസ് ട്രെയിനുകളില്‍ രണ്ടു പൈസയുടെ വര്‍ദ്ധനവാണ് ഇപ്പോള്‍ വരുത്തിയിട്ടുള്ളത്. എക്സ്പ്രസ് സെക്കന്റ്‌ ക്ലാസ് നിരക്കുകളില്‍ മൂന്നു പൈസയും സ്ലീപ്പര്‍ ക്ലാസ്സില്‍ അഞ്ചു പൈസയും. പത്തു പൈസ മുതല്‍ മുപ്പതു വരെ ആപേക്ഷികമായി വലിയ വര്‍ദ്ധന ഉള്ളത് എ സി ക്ലാസ്സുകളിലെ നിരക്കുകളിലാണ്. കഴിഞ്ഞ ഒമ്പത് വര്‍ഷക്കാലത്തിനിടക്ക് ബസ് നിരക്കുകളില്‍ കിലോമീറ്ററിന് എത്ര പൈസയുടെ വര്‍ദ്ധനവ്‌ ഉണ്ടായിട്ടുണ്ട് എന്ന് തട്ടിച്ചു നോക്കിയാല്‍ റെയില്‍വേ നിരക്കുകളുടെ അവസ്ഥ നമുക്ക് ബോധ്യപ്പെടും. ഒരൊറ്റ ഉദാഹരണം പറയാം. വള്ളിക്കുന്ന് നിന്നും കോഴിക്കോട്ടേക്ക് ട്രെയിന്‍ ടിക്കറ്റിനു മൂന്നു രൂപയാണ്. ഏകദേശം 20 കിലോമീറ്റര്‍ ദൂരമുണ്ടാകും. ബസ്സ്‌ ടിക്കറ്റിനു അതിന്റെ അഞ്ചിരട്ടി കൊടുക്കണം. ഇപ്പോഴുള്ള നിരക്ക് മൂന്നു രൂപയില്‍ നിന്ന് നാല് രൂപ ആയാലും ഒരു തവണ ബസ്സിനു പോകുന്ന പൈസ കൊണ്ട് നാല് തവണ ട്രെയിനിനു പോകാം. ഇത്തരമൊരു നിരക്ക് വര്‍ദ്ധന വരുത്തിയതിനു ഒരു മന്ത്രിയെ ബജറ്റ് അവതരിപ്പിച്ചതിന്റെ പിറ്റേ ദിവസം തന്നെ പുറത്താക്കണം എങ്കില്‍ കേന്ദ്രത്തിലും സംസ്ഥാനങ്ങളിലും എത്ര മന്ത്രിമാരെ നമുക്ക് ആ സ്ഥാനങ്ങളില്‍ ഇരുത്താന്‍ പറ്റും.

റെയില്‍വേയുടെ പ്രധാന വരുമാനം ചരക്കു കൂലിയില്‍ നിന്നാണ്. അവയുടെ വര്‍ദ്ധനവിനെക്കുറിച്ച് വ്യാകുലപ്പെടാത്ത രാഷ്ട്രീയക്കാര്‍ വോട്ടു ബാങ്ക് രാഷ്ട്രീയത്തിന്റെ കളികള്‍ക്ക് വേണ്ടിയാണ് യാത്രാ നിരക്കുകളിലുള്ള കാലോചിത വര്‍ദ്ധനക്കെതിരെ ചന്ദ്രഹാസം ഇളക്കുന്നത്. സാധാരണക്കാര്‍ക്ക് താങ്ങാവുന്ന മിതമായ വില വര്‍ദ്ധനവ്‌ വരുത്തി റെയില്‍വേയുടെ അടിസ്ഥാന സൌകര്യങ്ങള്‍ വികസിപ്പിക്കുകയും ഇരട്ടപ്പാതകളുടെ നിര്‍മാണം, വൈദ്യതീകരണം എന്നിവ ത്വരിതപ്പെടുത്തുകയും ചെയ്യേണ്ടത് കാലഘട്ടത്തിന്റെ ആവശ്യമാണ്‌. പൊട്ടിപ്പൊളിഞ്ഞ കമ്പാര്‍ട്ട്മെന്റുകളും കയറാന്‍ അറപ്പുളവാക്കുന്ന കക്കൂസുകളും ശോചനീയമായ പ്ലാറ്റ്ഫോമുകളുമൊക്കെ കാലോചിതമായ പരിഷ്കാരങ്ങള്‍ക്ക് വിധേയമാകേണ്ടാതുണ്ട്. ഇവക്കൊക്കെ പണം കണ്ടെത്താന്‍ കഴിയാനാവാതെ ഇന്ത്യന്‍ റെയില്‍വേയെ പാപ്പരാക്കി നിറുത്തുന്നത് കൊണ്ട് അല്പം വോട്ടു ലഭിച്ചേക്കാം, പക്ഷേ അത് ഈ നാടിന്റെ അടിസ്ഥാന യാത്രാ സൗകര്യ വികസനത്തിന്റെ കടക്കല്‍ കത്തി വെക്കലാവും.

കേരളത്തെ തീര്‍ത്തും അവഗണിച്ച റെയില്‍വെ ബജറ്റിനെ ഇപ്പഹയന്‍ ന്യായീകരിക്കുകയാണ് എന്ന് പറഞ്ഞു കത്തിയൂരരുത്. കേരളത്തിനു കിട്ടിയ അവലോസുണ്ടയില്‍ തികഞ്ഞ വിഷമമുണ്ട്. സോണിയ ഗാന്ധിയുടെ ഇടത്തും വലത്തും കുത്തിയിരിക്കുന്ന നാലഞ്ചു ~~കൊഞ്ഞാണന്‍~~ മന്ത്രിമാര്‍ നമുക്കുണ്ട്. കേരളത്തിനു വേണ്ടി വായ തുറന്നു നാലക്ഷരം മിണ്ടുവാന്‍ കെല്‍പ്പില്ലാത്ത ഇത്തരക്കാര്‍ നൂറെണ്ണം കേന്ദ്രത്തില്‍ ഉണ്ടായിട്ടും കാര്യമില്ല. ബഹളം വെക്കുന്നവന്റെ വീതിച്ചെടുക്കലാണ് കേന്ദ്രത്തില്‍ നടക്കുന്നത്. കൂടുതല്‍ ഒച്ചയുണ്ടാക്കുന്ന ബംഗാളിന് കൂടുതല്‍ ഓഹരി. അതിനു താഴെ ഒച്ചയുണ്ടാക്കുന്ന തമിഴ്നാടിനു രണ്ടാമത്തെ ഓഹരി. മിണ്ടാതെ വായ കെട്ടി ഇരിക്കുന്ന കേരളത്തിന് അവസാന ഓഹരി.

ബജറ്റ് അവതരിപ്പിക്കുന്നതിന്റെ തലേന്ന് ടി വി ചാനലുകളില്‍ കയറി വീരശൂര പരാക്രമികളാകുന്ന എം പി മാര്‍ ബാക്കി മുന്നൂറ്റി അറുപത്തഞ്ചു ദിവസവും ടി എ യും ഡി എ യും എഴുതി എടുക്കുന്ന തിരക്കിലായിരിക്കും. ബജറ്റ് കഴിഞ്ഞ ശേഷം അവലോസുണ്ടയും പിടിച്ചു ഒരു കൂട്ടക്കരച്ചിലാണ്!!!. എന്ത് പറയാന്‍. ഇതൊക്കെയാണ് കേരളത്തിന്റെ വിധി. ഇടതും വലതുമൊക്കെ ഇക്കാര്യത്തില്‍ കണക്കാണ്. അവനവന്റെ വയറ്റിനുള്ളിലേക്ക് മാക്സിമം കുത്തിനിറക്കുക എന്നതിലപ്പുറമുള്ള ഒരു പോളിസിയും ആരില്‍ നിന്നും പ്രതീക്ഷിക്കേണ്ടതില്ല. അടച്ചാക്ഷേപിക്കുകയല്ല, ഒന്നോ രണ്ടോ അപവാദങ്ങള്‍ ഏതെങ്കിലും പാര്‍ട്ടികളില്‍ കാണുമായിരിക്കും. പക്ഷേ കേരളം അനുഭവിക്കുന്ന നിരന്തര അവഗണനയുടെ തീക്ഷണത കുറക്കാന്‍ അവരെക്കൊണ്ടു മാത്രം കഴിയില്ല.

Related Posts
ശമ്പളം ഇത് മതിയോ എംപിമാരേ?

അഭിസാരികയില്‍ നിന്ന് കറിവേപ്പിലയിലേക്കുള്ള ദൂരം

noreply@blogger.com (Basheer Vallikkunnu) — Sun, 11 Mar 2012 16:51:00 +0000

അന്തസ്സുള്ള കുടുംബത്തില്‍ പിറന്നവര്‍ അന്തസ്സുള്ള ഭാഷ ഉപയോഗിക്കും. അല്ലാത്തവര്‍ അവരുടെ കുടുംബത്തിന്റെ സംസ്കാരത്തിന് യോജിക്കുന്ന തെറി ഭാഷ ഉപയോഗിക്കും. രാഷ്ട്രീയരംഗത്തുള്ളവരെയും ഇല്ലാത്തവരെയുമൊക്കെ ഈ പൊതു തത്വം ഉപയോഗിച്ച് നമുക്ക് അളക്കാവുന്നതാണ്. നല്ല കുടുംബത്തില്‍ പിറന്ന് അച്ഛനും അമ്മയും നല്ല പോലെ വളര്‍ത്തിയ ഒരാളും സ്ത്രീകളെക്കുറിച്ച് അസംബന്ധങ്ങള്‍ പുലമ്പില്ല. സിന്ധു ജോയിയെ അഭിസാരികയോട് ഉപമിച്ച് പ്രസ്താവന നടത്തിയ വി എസ് ഇതില്‍ ഏത് വിഭാഗത്തില്‍ പെടുന്ന നേതാവാണ്‌ എന്ന് അറിയില്ല.പക്ഷേ ഒരു കാര്യം അറിയാം, അദ്ദേഹം നിരന്തരം ഉപയോഗിക്കുന്ന ഭാഷ അദ്ദേഹത്തിന്‍റെ സ്ഥാനത്തിരിക്കുന്ന ഒരാള്‍ക്ക്‌ ഒട്ടും യോജിച്ചതല്ല. വല്ലപ്പോഴും നാക്ക്‌ പിഴക്കുന്നത്‌ മനസ്സിലാക്കാം. പക്ഷേ നിരന്തരമായി അത് സംഭവിക്കുന്നുവെങ്കില്‍ ആ സൂക്കേടിനു അടിയന്തിര ചികിത്സ വേണം.

വായില്‍ വരുന്നതെന്തും വിളിച്ചു കൂവുക എന്നത് ഒരു മുഖ്യമന്ത്രിക്കോ പ്രതിപക്ഷ നേതാവിനോ ചേര്‍ന്ന പണിയല്ല. മുന്‍ രാഷ്ട്രപതി എ പി ജെ അബ്ദുല്‍ കലാമിനെ 'വാണം വിടുന്നവന്‍' എന്നാണു വി എസ് ഒരിക്കല്‍ വിളിച്ചത്. ഉത്രാടം തിരുനാള്‍ മാര്‍ത്താണ്ഡവര്‍മയെ പായസപ്പാത്രത്തില്‍ സ്വര്‍ണം കടത്തുന്ന കള്ളനെന്നും വിളിച്ചു!. മുഖ്യമന്ത്രിയായിരുന്ന എ കെ ആന്റണിയെ തന്തയില്ലാത്തവനെന്ന് ഉപമിച്ചതും വി എസ് തന്നെ. . കെ ഇ എന്‍ കുഞ്ഞഹമ്മദിനെ കുരങ്ങന്‍ എന്ന് പച്ചക്ക് വിളിച്ച വി എസ് ലതിക സുഭാഷിനെ അശ്ലീലച്ചുവയില്‍ 'പ്രശസ്ത'യെന്നും ചിത്രീകരിക്കുകയുണ്ടായി. രാജ്യത്തിന്‌ വേണ്ടി ജീവന്‍ അര്‍പ്പിച്ച മേജര്‍ ഉണ്ണികൃഷ്ണന്റെ വീട്ടിലെത്തി 'പട്ടി' പ്രയോഗം നടത്തിയതും മറ്റാരുമല്ല!!. ഏതെങ്കിലും ഒരു സാധാരണക്കാരനാണ് ഇത്തരം വാക്കുകള്‍ ഉപയോഗിച്ചിരുന്നതെങ്കില്‍ ചെകിടത്തടി ഉറപ്പാണ്. ഒരടി ശരിക്ക് കിട്ടിയാല്‍ പിന്നെ മറ്റൊന്ന് പറയുന്നതിന് മുമ്പ് കവിളൊന്ന് തടവി നോക്കും. പക്ഷെ വി എസ് ഉന്നതനായ ഒരു രാഷ്ട്രീയ നേതാവായതിനാല്‍ കേട്ടവര്‍ കേട്ടവര്‍ തലതാഴ്ത്തി നടന്നു പോകുന്നു. അത് വളമാക്കി അദ്ദേഹം ആര്‍ക്കെതിരെയും എന്തും പുലമ്പിക്കൊണ്ടേയിരിക്കുന്നു!!.

സിന്ധു ജോയി വിമര്‍ശനങ്ങള്‍ക്ക് അതീതയായ ഒരു രാഷ്ട്രീയ നേതാവാണ്‌ എന്നെനിക്കു അഭിപ്രായമില്ല. രാഷ്ട്രീയ ചതുരംഗക്കളത്തില്‍ ആളും തരവും നോക്കി ചാടിക്കളിക്കാന്‍ അതിസമര്‍ത്ഥ തന്നെയാണവര്‍ . രാഷ്ട്രീയ എതിരാളികള്‍ക്ക് അവരെ വിമര്‍ശിക്കാനും അര്‍ഹതയുണ്ട്. പക്ഷെ വി എസ് ഉപയോഗിച്ചത് പോലുള്ള ഒരു ഭാഷയിലല്ല അത് വേണ്ടത് എന്ന് മാത്രം. അവിവാഹിതയായ ഒരു സ്ത്രീയുടെ ഭാവിയെപ്പോലും ദോഷകരമായി ബാധിക്കുന്ന ഇത്തരമൊരു പ്രസ്താവന കേരളത്തിലെ രാഷ്ട്രീയ സദാചാരത്തിനു മൊത്തത്തില്‍ അപമാനമാണ് എന്ന് പറയാതെ വയ്യ.

അധികാര ദുര്‍വിനിയോഗം നടത്തിയും രേഖകളില്‍ കൃത്രിമം നടത്തിയും സ്വന്തം മകന് അനര്‍ഹമായ സ്ഥാനമാനങ്ങള്‍ നേടിക്കൊടുത്ത ഒരച്ഛനാണ് വി എസ് എന്നാണ് നിയമസഭ സമിതി ഇപ്പോള്‍ കണ്ടെത്തിയിരിക്കുന്നത്. അതിന്റെ നിയമ നടപടികളും അനന്തര പുകിലുകലും ഇനി വരാനാണിരിക്കുന്നത്. തീര്‍ച്ചയായും അതിന്റെ അസ്വസ്ഥത വി എസ്സിന് കാണും. പാര്‍ട്ടിക്കുള്ളിലെ തരം താഴ്ത്തലിന്റെ അപമാന ഭാരം വേറെയും. അദ്ദേഹത്തോട് എല്ലാവര്‍ക്കും തീര്‍ത്തും സഹതാപം തോന്നേണ്ട ഒരു സാഹചര്യമാണ് ഇപ്പോള്‍ ഉള്ളത്. ഇത്രയും സംഭവങ്ങള്‍ നടന്നിട്ടും ഞാനൊരു പോസ്റ്റിടാതിരുന്നത് അത്തരമൊരു സഹതാപം എനിക്കുള്ളത് കൊണ്ടായിരുന്നു. പക്ഷേ ഈ പ്രസ്താവന അതെല്ലാം കളഞ്ഞു കുളിച്ചിരിക്കുന്നു.

സിന്ധു ജോയിയോട് എനിക്ക് പറയാനുള്ളത് വി എസ് സമ്മാനിച്ച ഈ അപമാനത്തെ ഒരവസരമാക്കി മാറ്റണം എന്നാണ്. തന്നെ മറന്നു തുടങ്ങിയ കോണ്‍ഗ്രസ് നേതൃത്വത്തിനിടയിലേക്ക് നുഴഞ്ഞു കയറാനുള്ള ഒരവസരമാക്കി ഇതിനെ മാറ്റുക. അതായിരിക്കും വി എസ്സിന് കൊടുക്കാവുന്ന ഏറ്റവും നല്ല മറുപടി.

മ്യാവൂ : ശുംഭന്‍ എന്ന പദത്തിന് പ്രശോഭിക്കുന്നവന്‍ എന്ന് അര്‍ത്ഥം കണ്ടുപിടിച്ച മഹാകവി ജയരാജനാശാനെ കടത്തിവെട്ടി അഭിസാരികക്ക് കറിവേപ്പില എന്ന അര്‍ത്ഥം കണ്ടുപിടിച്ചിരിക്കുകയാണ് ഭാഷാവിശാരദന്‍ വേലിക്കപ്പുറത്ത് എഴുത്തച്ഛനാനന്ദന്‍. ഭാഷ ഇങ്ങനെ അനുദിനം വികസിച്ചു വരുമ്പോള്‍ മലയാളം മരിക്കുകയാണ് എന്ന് ആരെങ്കിലും പറഞ്ഞാല്‍ അവനെ അരിവാള്‍ ചുറ്റിക കൊണ്ട് അടിച്ചു കൊല്ലണം !!.

ഈ പോസ്റ്റ്‌ പുന:പ്രസിദ്ധീകരിച്ച വര്‍ത്തമാനം പത്രത്തിനു (13 March 2012) നന്ദി.

Special Note: 13.03.2012

അഭിസാരിക എന്ന് വിളിച്ചില്ലല്ലോ, അഭിസാരികയെപ്പോലെ യു ഡി എഫ് ഉപയോഗിച്ചു എന്നല്ലേ വി എസ് പറഞ്ഞുള്ളൂ എന്നാണു പലരും ഈ പോസ്റ്റിന്റെ കമന്റ് ബോക്സില്‍ എഴുതിയിരിക്കുന്നത്. logically അത് ശരിയാണ്. പക്ഷെ 'പോലെ' എന്ന പദം അതുപയോഗിക്കുന്ന ശൈലിയും ശരീര ഭാഷയും അനുസരിച്ച് വിലയിരുത്തപ്പെടും. ഒരു മാന്യന്റെ മുഖത്തു നോക്കി 'നിങ്ങള്‍ ഒരു ചെറ്റയെപ്പോലെ പെരുമാറരുത്‌' എന്ന് പറഞ്ഞു നോക്കൂ.. ചെകിടത്തടി എപ്പോള്‍ കിട്ടിയെന്നു ചോദിച്ചാല്‍ മതി. 'പോലെ'യുടെ അര്‍ത്ഥം അപ്പോള്‍ മനസ്സിലാവും!!. ഉപമയാണത്രെ, ഉപമ!!!.. Latest update : സിന്ധു മോളേ, അബദ്ധം പറ്റിപ്പോയി

വെല്‍ഡന്‍ ഗണേഷ്, വെല്‍ഡന്‍ !!

ഏത് ലതിക? എന്ത് കോടതി?

'അച്ഛ'നാനന്ദന്‍

സിന്ധു ജോയി കോണ്‍ഗ്രസ്സിലേക്ക്.. ഹി.. ഹി..

വി എസ്, ഇതും കോപ്പിയടിയാണോ?

മനോരമയുടെ 'ഭാര്യ' വീണ്ടും അറസ്റ്റില്‍ !!

noreply@blogger.com (Basheer Vallikkunnu) — Sun, 04 Mar 2012 15:10:00 +0000

മ്പടെ മനോരമ ചാനലിലെ മാതൃകാ ദമ്പതികള്‍ വീണ്ടും വാര്‍ത്ത സൃഷ്ടിക്കുകയാണ്. ശ്വേതചേച്ചിയുടെ സൂപ്പര്‍ മെഗാഹിറ്റ് ഷോയെക്കുറിച്ചും അതിലെ വിവാദ ദമ്പതികളെക്കുറിച്ചും മുമ്പ് ഞാനൊരു പോസ്റ്റിട്ടപ്പോള്‍ സദാചാര പോലീസുകാര്‍ ഒന്നടങ്കം എന്റെ നേര്‍ക്ക്‌ കുരച്ചു ചാടി. ഒരാളെ നന്നാവാനും സമ്മതിക്കില്ലേ എന്നായിരുന്നു ചോദ്യം. ഉവ്വ്..ഉവ്വ്.. നന്നായിട്ടുണ്ട്. ദമ്പതികള്‍ ക്ലീന്‍ ക്ലീനായി നന്നായിട്ടുണ്ട്..!! ഇന്നത്തെ പത്രവാര്‍ത്ത ആ നന്നാവലിന്റെ കഥയാണ് പറയുന്നത്. മനോരമയല്ലേ, ഇരുപതു ലക്ഷം കോപ്പിയല്ലേ, പുതിയ ചാനലല്ലേ എന്നൊക്കെ കരുതി സംഗതി എല്ലാവരും മറന്നു തുടങ്ങുമ്പോഴാണ് കഥയിലെ പുതിയ എപ്പിസോഡ് വന്നിരിക്കുന്നത്.

ആദ്യ വാര്‍ത്ത പുറത്തു വിട്ട മാധ്യമം തന്നെയാണ് ലേറ്റസ്റ്റ് വാര്‍ത്തയും പുറത്തു വിട്ടിരിക്കുന്നത്. (മാധ്യമം മനോരമയുടെ പുറകില്‍ തന്നെയുണ്ട്‌ എന്ന് ചുരുക്കം). സംഗതി സിനിമാ മോഡല്‍ കഥയാണ് നടന്നിരിക്കുന്നത്. എല്ലാ ചേരുവകളും ചേരും പടി ചേര്‍ന്ന ചൂടന്‍ തിരക്കഥ. സെക്സ്, ഒളിക്യാമറ, ബ്ലാക്ക് മെയില്‍ , പോലീസ്, കോടതി, റിമാണ്ട് എന്നിങ്ങനെ ബോക്സാഫീസ് ഹിറ്റാവാനുള്ള എല്ലാ മസാലകളും മനോരമയുടെ ദമ്പതികള്‍ ഈ കഥക്ക് നല്‍കിയിട്ടുണ്ട്. ഞാന്‍ വളച്ചു കെട്ടി പറയുന്നതിനേക്കാള്‍ നല്ലത് മാധ്യമത്തില്‍ നിന്ന് നേരിട്ട് വായിക്കുന്നതാവും.

അറസ്റ്റിലായ ദമ്പതികള്‍ ഇല്ലാതെയാണ് ഇപ്പോള്‍ ഷോ പുരോഗമിക്കുന്നതെങ്കിലും ഒരു കാര്യം ഉറപ്പാണ്. മഴവില്ലിനു ഇനിയും ഹിറ്റ് കൂടും! ആന ചത്താലും ചത്തില്ലെങ്കിലും പന്തീരായിരം എന്ന് പറഞ്ഞത് പോലെയാണ് മനോരമയുടെ കാര്യം. ദമ്പതികള്‍ അകത്തായാലും ഇല്ലെങ്കിലും ഷോയ്ക്ക് വേണ്ട പബ്ലിസിറ്റി കിട്ടിക്കഴിഞ്ഞു. പുതിയ അറസ്റ്റോടെ ഹിറ്റ് ഇച്ചിരികൂടെ വര്‍ദ്ധിക്കും എന്ന് മാത്രം. ഷോയുടെ പേരില്‍ ശ്വേത ചേച്ചിക്ക് ഒരു യൂത്ത് ഐക്കോണ്‍ അവാര്‍ഡും ഇതിനകം കിട്ടിയിട്ടുണ്ട്. നവദമ്പതികളുടെ കുശുമ്പുകളും കുന്നായ്മകളും എന്ന് വേണ്ട അടുക്കളയും കിടപ്പറയും വരെ 'റിയാലിറ്റി' ആക്കുന്നതിനു സാംസ്കാരിക കേരളത്തിന്റെ അവാര്‍ഡുകള്‍ ഇനിയും കിട്ടും. മനോരമ നീണാള്‍ വാഴട്ടെ!. നമ്മുടെ ചാനല്‍ സംസ്കാരം പടര്‍ന്നു പന്തലിക്കട്ടെ!. മലയാളത്തിന്റെ സുപ്രഭാതം കൂടുതല്‍ ശോഭനമാവട്ടെ!.

Related Posts
മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)
മനോരമ ന്യൂസ്‌മേക്കര്‍ :ഗോവിന്ദച്ചാമി ലിസ്റ്റിലില്ല
ദാസേട്ടാ, രഞ്ജിനി വിളിക്കുന്നു
കുബേര്‍ കുഞ്ചി, മാഗ്നറ്റ് ചെരുപ്പ്, സ്പെയിന്‍ കുങ്കുമം

ഫേസ്ബുക്കിനെ വെടിവെച്ചു കൊല്ലുന്ന വിധം

noreply@blogger.com (Basheer Vallikkunnu) — Mon, 27 Feb 2012 06:12:00 +0000

കൊലവെറിയെ കടത്തിവെട്ടി യുടൂബില്‍ ഒരു ഇടിവെട്ട് ഹിറ്റ് വന്നിട്ടുണ്ട്. ഒരച്ഛനും പതിനഞ്ചു വയസ്സുകാരി മകളും തമ്മിലുള്ള ഫേസ്ബുക്ക്‌ യുദ്ധമാണ് സംഗതി. 3 കോടിയിലേറെ ഹിറ്റാണ് ഏതാനും ദിവസങ്ങള്‍ കൊണ്ട് ഈ ക്ലിപ്പ് നേടിയിരിക്കുന്നത്. കഥ നടന്നത് അമേരിക്കയില്‍ . മമ്മൂട്ടിയെപ്പോലെ കഷ്ടി മുപ്പതു വയസ്സ് പ്രായം തോന്നിക്കുന്ന ഒരാള്‍ - ടോമി ജോര്‍ഡന്‍ - പുല്‍ത്തകിടിയിലെ കസേരയില്‍ ഇരുന്നു ഒരു കടലാസ് വായിക്കുന്നു. തന്റെ മകള്‍ ഹേന (Hannah) അവളുടെ ഫേസ്ബുക്ക് ചുമരില്‍ എഴുതിയ ഒരു പോസ്റ്റാണ് അത്. അച്ഛനെയും അമ്മയെയും പുളിച്ച തെറി പറഞ്ഞുള്ള ഒരു പോസ്റ്റ്‌. അമേരിക്കക്കാര്‍ സ്ഥിരമായി ഉപയോഗിക്കുന്ന (സുരേഷ് ഗോപി വല്ലപ്പോഴും ഉപയോഗിക്കുന്ന) രണ്ടു പദങ്ങള്‍ ഒരു പത്തു പതിനഞ്ചു തവണ ആ പോസ്റ്റില്‍ ഉണ്ട്.

ഹേനയുടെ ഫേസ്ബുക്ക്‌ പോസ്റ്റ്‌ ആരംഭിക്കുന്നത് ഇങ്ങനെയാണ്. "അച്ഛനും അമ്മയും അറിയാന്‍. ഞാന്‍ നിങ്ങളുടെ അടിമയല്ല. നിങ്ങളുടെ s**t. വൃത്തിയാക്കുകയല്ല എന്റെ പണി. അതിനൊരു വേലക്കാരിയുണ്ട്. അവളുടെ പേര് ലിന്റ എന്നാണ്, ഹേന എന്നല്ല".. കസറിയ തുടക്കം, അല്ലേ?. പിന്നെയങ്ങോട്ട് ശരിക്കും പാര്‍ലിമെന്റിലെ ഭാഷയാണ്‌. അതിവിടെ എഴുതാന്‍ കൊള്ളില്ല. അതിനെ സോപ്പിട്ടു കഴുകി ഒന്ന് വൃത്തിയാക്കിയെടുത്താല്‍ ഏതാണ്ട് ഈ ആശയം കിട്ടും. "സ്കൂള്‍ വിട്ടു വന്നാല്‍ മുടിഞ്ഞ പണിയാണ്. പത്തു മണിയാവും കിടന്നുറങ്ങാന്‍. രാവിലെ അഞ്ചിന് എഴുന്നേല്‍ക്കണം. തന്തേ, കാപ്പി വേണേല്‍ നിങ്ങള്‍ക്ക് തന്നെ അതങ്ങുണ്ടാക്കി കുടിച്ചൂടെ? പൂന്തോട്ടം വേണേല്‍ നിങ്ങള്‍ക്ക് തന്നെ അതങ്ങ് നനച്ചൂടെ?. ഒരു ജോലി നോക്കണമെന്ന് പിറുപിറുത്തുകൊണ്ടേയിരിക്കുന്നു!!. ജോലി ഞാന്‍ വീട്ടില്‍ ചെയ്യുന്നുണ്ടല്ലോ. അതിനു കൂലി തരരുതോ? വയസ്സ് കാലത്ത് നിങ്ങളുടെ s**t എടുക്കാന്‍ എന്നെക്കിട്ടില്ല, പറഞ്ഞേക്കാം" your pissing kid Hannah എന്ന് പറഞ്ഞാണ് അവള്‍ കുറിപ്പ് അവസാനിപ്പിക്കുന്നത്!!.

മാതാപിതാക്കള്‍ക്ക് എതിരെ ഇത്തരമൊരു ആറ്റം ബോംബ്‌ പരസ്യമായി ഫേസ്ബുക്കില്‍ ഇടാന്‍ മാത്രം മണ്ടത്തിയാണ് നമ്മുടെ കഥാപാത്രം എന്ന് കരുതേണ്ട. എല്ലാ പഴുതുകളും അടച്ചിട്ടു തന്നെയാണ് ഹേന ഈ പോസ്റ്റ്‌ ഇട്ടത്. ഫ്രണ്ട്സ് ലിസ്റ്റില്‍ ഉള്ള ഫാമിലി അംഗങ്ങളെ മുഴുവന്‍ അവള്‍ ഈ പോസ്റ്റ്‌ കാണുന്നതില്‍ നിന്നും ബ്ലോക്കി. കൂട്ടുകാര്‍ക്കിടയില്‍ അച്ഛനെയും അമ്മയെയും ഒന്ന് കൊച്ചാക്കുക എന്നതായിരുന്നു പ്ലാന്‍. പിന്നെ ഇതെങ്ങിനെ അച്ഛന്റെ കയ്യിലെത്തി എന്ന് ചോദിക്കും. അതാണ്‌ ഫേസ്ബുക്കിന്റെ കളി. അത് വഴിയേ പറയാം. അച്ഛന്റെ കയ്യില്‍ കിട്ടിയ ശേഷമുള്ള സംഭവമാണ് വീഡിയോയില്‍ ഉള്ളത്. അവിടെയാണ് ക്ലൈമാക്സ് കിടക്കുന്നത്. കസേരയില്‍ ഇരുന്നു അയാള്‍ കത്ത് വായിക്കുന്നു. മകള്‍ കത്തില്‍ പറയുന്ന ജോലിയെക്കുറിച്ചുള്ള പരാമര്‍ശങ്ങളൊക്കെ ശുദ്ധ ഭാവനകള്‍ മാത്രമാണെന്ന് വിശദീകരിക്കുന്നു. അഞ്ചു മിനുട്ടില്‍ ചെയ്തു തീര്‍ക്കാവുന്ന പണികള്‍ മാത്രമേ ഒരു ദിവസം അവള്‍ക്കു ചെയ്യേണ്ടാതായിട്ടുള്ളൂ. അവ തന്നെ അവളുടെ വ്യക്തി ശുചിത്വവുമായി ബന്ധപ്പെട്ടവയാണ്. അവയെല്ലാം രസകരമായി പറഞ്ഞു കഴിഞ്ഞ ശേഷം പുള്ളി കീശയില്‍ നിന്നും .45 കൈത്തോക്ക് കയ്യിലെടുക്കുന്നു. പിന്നെ പുല്ലില്‍ കിടക്കുന്ന മകളുടെ ലാപ്ടോപിനു നേരെ തുരുതുരാ വെടിയാണ്. അവളുടെ ഫേസ്ബുക്കിന്റെ പണി ഇന്നത്തോടെ ഞാന്‍ തീര്‍ക്കും എന്നാണ് ഡയലോഗ്. വീഡിയോ കാണുക.

ഇനി കഥയുടെ ട്വിസ്റ്റിലേക്ക്. അമേരിക്കയില്‍ മിക്ക പട്ടികള്‍ക്കും ഫേസ്ബുക്ക്‌ ഉണ്ട്. ടോമി ജോര്‍ഡന്റെ പട്ടിക്കുമുണ്ട് ഒരു ഫേസ്ബുക്ക്‌ അക്കൗണ്ട്‌. അവള്‍ കുളിക്കുന്നത്, കിടക്കുന്നത്, കാലു പൊക്കി മൂത്രമൊഴിക്കുന്നത് (അമേരിക്കയാണെന്നു പറഞ്ഞിട്ട് കാര്യമില്ല, സംഗതി അവിടെയും അങ്ങനെത്തന്നെയാണ്) .. എല്ലാം ഫേസ്ബുക്കില്‍ അപ്പപ്പോള്‍ അപ്‌ലോഡ്‌ ചെയ്യാറുണ്ട്. ഹേനയുടെ ഫ്രണ്ട് ലിസ്റ്റില്‍ ഈ പട്ടിയുണ്ട്!!. ഈ പോസ്റ്റിന്റെ ഗ്രൂപ്പില്‍ നിന്നും പട്ടിയെ മാറ്റാന്‍ ഹേന മറന്നു!!!. ലവിടെയാണ് സംഗതി ലീക്കായത്. പുതിയ ഫോട്ടോ അപ്‌ലോഡ്‌ ചെയ്യുന്നതിന് വേണ്ടി പട്ടിയുടെ അക്കൌണ്ടില്‍ ജോര്‍ഡന്‍ നുഴഞ്ഞു കയറിയപ്പോഴാണ് മകളുടെ ഭരണിപ്പാട്ട് ചാടി വീണത്‌. ശേഷം സ്ക്രീനില്‍ നാം കണ്ടു. ഞാന്‍ പല തവണ പറഞ്ഞ കാര്യം വീണ്ടും ആവര്‍ത്തിക്കുകയാണ്. ഫേസ്ബുക്ക് നമ്മള്‍ വിചാരിക്കുന്ന പാര്‍ട്ടിയല്ല. സൂക്ഷിച്ചു കളിക്കണം!!!.

യുടൂബ് എപ്പിസോഡിലെ ഗുണപാഠം കൂടി പറഞ്ഞു അവസാനിപ്പിക്കാം. 1) ആറ്റംബോംബ്‌ പൊട്ടിക്കുമ്പോള്‍ ചുരുങ്ങിയത് രണ്ടു മീറ്ററെങ്കിലും വിട്ടു നിന്ന് വേണം പൊട്ടിക്കാന്‍. ചീള് തെറിക്കാന്‍ സാധ്യതയുണ്ട്. 2) ഫ്രണ്ട് ലിസ്റ്റില്‍ ആളെ ചേര്‍ക്കുന്നത് വളരെ ശ്രദ്ധിച്ചു വേണം. പ്രത്യേകിച്ച് 'പട്ടി'കളെ 3) കുട്ടികള്‍ തെറ്റ് ചെയ്‌താല്‍ അവരെ ശിക്ഷിക്കരുത്. പകരം ലാപ്ടോപ്പിനെ വെടിവെച്ചു കൊല്ലുക. 4) ടീനേജുകാര്‍ ബേജാറാവേണ്ട!. ബുള്ളറ്റ് പ്രൂഫ്‌ ലാപ്ടോപ്പിന്റെ പണി ചൈനക്കാര്‍ തുടങ്ങിക്കഴിഞ്ഞു!

Related Posts
പേര് ഫേസ്ബുക്ക്, വയസ്സ് പതിനാറ് (Female)
സൂക്ഷിക്കുക, ഭാര്യ ഫേസ്ബുക്കിലുണ്ട് !!.

പിണറായിക്കൊരു റെഡ് സല്യൂട്ട്!

noreply@blogger.com (Basheer Vallikkunnu) — Wed, 22 Feb 2012 05:40:00 +0000

Comment Box Closed

സഖാവായാല്‍ ഇങ്ങനെ വേണം. ഒരല്പം നട്ടെല്ലും ആരെയും കൂസാത്ത തന്റേടവും. പിണറായി സഖാവിനു അതുണ്ട്. ഒള്ളത് പറയാമല്ലോ, അദ്ദേഹത്തെ കെട്ടിപ്പിടിച്ചു ഒരുമ്മ കൊടുക്കുവാന്‍ എനിക്ക് തോന്നുന്നുണ്ട്!. സമകാലീന കേരളീയ സമൂഹത്തില്‍ ഒരു രാഷ്ട്രീയ നേതാവ് നടത്തുന്ന ഏറ്റവും ചങ്കുറപ്പുള്ള അഭിപ്രായ പ്രകടനമാണ് വ്യാജകേശം വിഷയത്തില്‍ സഖാവ് നടത്തിയിരിക്കുന്നത്. കത്തിച്ചാല്‍ ഏത് മുടിയും കത്തുമെന്നു സഖാവ് പറഞ്ഞപ്പോള്‍ മുടി വ്യാപാരത്തിന്റെ ഹോള്‍സെയില്‍ ഏജന്‍സി എടുത്തിട്ടുള്ള കാന്തപുരം ഉസ്താദ് കത്തിയൂരി! തൊട്ടാല്‍ തട്ടുമെന്നായിരുന്നു ഭീഷണി.

വോട്ടു രാഷ്ട്രീയത്തിന്റെ ബാലപാഠം അറിയാവുന്ന ഒരു സാധാരണ രാഷ്ട്രീയക്കാരന്‍ ഇത്തരം സന്ദര്‍ഭങ്ങളില്‍ മെല്ലെ തടിയൂരുകയാണ് ചെയ്യുക. പക്ഷെ സഖാവ് പിണറായി പറഞ്ഞിടത്ത് തന്നെ ഉറച്ചു നിന്നു എന്ന് മാത്രമല്ല ഒരു പടി കൂടി കടന്നു അടുത്ത വെടിയും പൊട്ടിച്ചു. ആണായി പിറന്ന രാഷ്ട്രീയക്കാരന്‍ ഇങ്ങനെയാണ് വേണ്ടത്. നാല് വോട്ടിനു വേണ്ടി വാക്ക് മാറ്റിപ്പറയില്ല, പറയരുത്. പിണറായി സഖാവിനു അദ്ദേഹത്തിന്റേതായ ഒരു രാഷ്ട്രീയമുണ്ട്. ഈ പ്രസ്താവനയുടെ പിന്നിലും അത്തരമൊരു രാഷ്ട്രീയം ഇല്ലെന്നു ഞാന്‍ പറയുന്നില്ല. പക്ഷെ അദ്ദേഹം ഉയര്‍ത്തിയ അഭിപ്രായം മതത്തിന്റെ പേരിലുള്ള ഒരു ശുദ്ധതട്ടിപ്പിനെതിരെയുള്ള ഏറ്റവും ഫലവത്തായ ഒരു സാമൂഹ്യ ഇടപെടലാണ്. അത്തരമൊരു ഇടപെടലിന് കരുത്തു പകര്‍ന്നേ തീരൂ. പിണറായി സഖാവ് പറയുന്ന എന്തിനെയും പിന്തുണക്കുക എന്നതല്ല ഇതിനര്‍ത്ഥം. അദ്ദേഹത്തിന്‍റെ പല നിലപാടുകളെയും പല തവണ ഈ ബ്ലോഗില്‍ എതിര്‍ത്തിട്ടുണ്ട്. ഇനിയും എതിര്‍ക്കേണ്ടി വന്നെന്നിരിക്കും. പക്ഷേ, വോട്ടു രാഷ്ടീയത്തിന്റെ കണക്കുകള്‍ പേടിച്ചു തിരുകേശം തട്ടിപ്പിനെതിരെ ക മ എന്നരക്ഷരം മിണ്ടാതെയിരിക്കുന്ന രാഷ്ട്രീയ നപുംസകങ്ങള്‍ക്കിടയില്‍ സഖാവ് പിണറായി വേറിട്ട്‌ നില്‍ക്കുന്നുണ്ട്. അതിനൊരു സല്യൂട്ട് കൊടുത്തേ തീരൂ.

മതം എന്നത് ഏതെങ്കിലും മുസ്ലിയാരുടെ തറവാട്ടു സ്വത്തല്ല. അത് മനുഷ്യരാശിയുടെ മൊത്തം പൊതു സ്വത്താണ്. താടിയും തലപ്പാവും മതത്തെ വിറ്റ് പുട്ടടിക്കാനുള്ള ലൈസന്‍സാണെന്ന് കരുതുന്ന പുരോഹിത വര്‍ഗം എക്കാലത്തും പറഞ്ഞിരുന്ന ഒരു വാദമാണ് മതത്തെക്കുറിച്ച് മറ്റാരും അഭിപ്രായം പറയരുത് എന്നത്. അത് ഞങ്ങള്‍ മാത്രം പറഞ്ഞോളാം എന്നതും!. ഇതൊരു പുതിയ വാദമല്ല. വിശുദ്ധ ഖുര്‍ആന്‍ മലയാളത്തിലേക്ക് പരിഭാഷപ്പെടുത്തരുതെന്നു പോലും ഒരു കാലത്ത് വാദിച്ച പുരോഹിത വര്‍ഗ്ഗത്തെയാണ്‌ കാന്തപുരം ഉസ്താദ് പ്രതിനിധീകരിക്കുന്നത്. പച്ചത്തുണിയില്‍ പൊതിഞ്ഞു അലമാരയില്‍ പൂട്ടിവേക്കേണ്ട ഒന്നാണ് ഖുര്‍ആന്‍ എന്നാണു മത പൌരോഹിത്യം കേരളക്കരയിലെ മുസ്ലിംകളെ പഠിപ്പിച്ചത്. സാധാരണക്കാരന്‍ വിശുദ്ധ ഖുര്‍ആന്‍ മനസ്സിലാക്കിയാല്‍ അവരെപ്പറ്റിച്ചു ജീവിക്കുന്ന തങ്ങളുടെ കഞ്ഞി കുടി മുട്ടും എന്ന സിമ്പിള്‍ ലോജിക്കാണ് ഇത്തരമൊരു നിലപാടിന് പിന്നിലുണ്ടായിരുന്നത്. വക്കം മൌലവി, കെ എം മൌലവി, മുഹമ്മദ്‌ അബ്ദുറഹിമാന്‍ സാഹിബ് തുടങ്ങിയവരുടെ നേതൃത്വത്തില്‍ കേരളക്കരയില്‍ ഉയര്‍ന്നു വന്ന മതനവോത്ഥാന പ്രസ്ഥാനങ്ങളാണ് ഇവക്കെതിരെ ശക്തമായ സാമൂഹ്യ ഇടപെടലുകള്‍ നടത്തിയത്. മലയാളം ആര്യനെഴുത്താണെന്നും ഇംഗ്ലീഷ് നരകത്തിലെ ഭാഷയാണെന്നും മുസ്ലിംകളെ 'പഠിപ്പിച്ച'വരാണ് ഈ മുസ്ലിയാക്കന്മാര്‍ . പെണ്‍കുട്ടികള്‍ സ്കൂളുകളില്‍ പോകരുതെന്ന് പോലും പറഞ്ഞ് നടന്നവര്‍ !!. അവര്‍ക്കെതിരില്‍ ഒരു ചെറിയ ന്യൂനപക്ഷം നടത്തിയ ധീരമായ ചെറുത്തുനില്‍പ്പിന്റെ കഥയാണ് കേരളത്തിലെ മത നവോത്ഥാന പ്രസ്ഥാനങ്ങള്‍ക്ക് പറയാനുള്ളത്.

വിശ്വാസികളെ പറ്റിക്കാന്‍ വേണ്ടിയെന്ന് നൂറു ശതമാനം ഉറപ്പുള്ള ഈ 'നാല്പതു കോടി വ്യവസായ'ത്തിന് സര്‍ക്കാര്‍ അനുമതി നല്‍കരുത് എന്നാണ് എന്റെ പക്ഷം. ഇതിനു വേണ്ടിയുള്ള ഭൂമിയെടുപ്പും നിര്‍മാണവും തടയുന്നതിന് വേണ്ട നിയമ നടപടികള്‍ സ്വീകരിക്കാന്‍ സര്‍ക്കാര്‍ തയ്യാറാവണം. പ്രവാചകന്റെ മുടിയോ നഖമോ അല്ല, അദ്ദേഹത്തിന്റെ വാക്കുകളും ജീവിതവുമാണ് മുസ്ലിംകള്‍ കണക്കിലെടുക്കേണ്ടത് എന്ന സഖാവ് പിണറായിയുടെ പ്രസ്താവന കേരളക്കരയില്‍ ഉയര്‍ത്തിവിട്ട ഒരു സംവാദ അന്തരീക്ഷം മതം എന്താണെന്ന് പഠിക്കാനുള്ള ഒരവസരമാണ് പൊതുസമൂഹത്തിനു നല്‍കുന്നത്. ഈ പ്രസ്താവനയുടെ ചരിത്രപരത അതാണ്‌ എന്ന് ഞാന്‍ കരുതുന്നു. അതുകൊണ്ട് തന്നെ സഖാവിനു എന്റെ മനസ്സറിഞ്ഞ ഒരു റെഡ് സല്യൂട്ട്.

മ്യാവൂ: പിണറായി പറഞ്ഞതെല്ലാം ശരിയെന്നു വി എസ്.. ഉവ്വ് ഉവ്വ്.. എല്ലാം ശരിയാണ്.. എല്ലാം ശരിയായി വരുന്നുണ്ട്!!.

Related Topics
തിരുകേശപ്പള്ളി: വൈ ദിസ്‌ കൊലവെറി?
കത്തുന്ന മുടി: പിണറായിക്കിതെന്തു പറ്റി?

കത്തുന്ന മുടി, കത്തുന്ന വിവാദം.

noreply@blogger.com (Basheer Vallikkunnu) — Mon, 20 Feb 2012 06:48:00 +0000

പിണറായി സഖാവ് വീണ്ടും കച്ചറയുണ്ടാക്കുകയാണ്. യേശു ക്രിസ്തുവിന്റെ അരയില്‍ അരിവാള്‍ ചുറ്റിക തൂക്കിയതിന്റെ പുകില് ഇനിയും അവസാനിച്ചിട്ടില്ല. അതിനിടയിലാണ് കാന്തപുരത്തിന്റെ മുടിക്കെതിരെ തിരിഞ്ഞിരിക്കുന്നത്. ഇതിയാന്‍ ഇതെന്തിനുള്ള പുറപ്പാടാണെന്നു ഒരു പിടിയും കിട്ടുന്നില്ല. ഏത് മുടിയും കത്തിച്ചാല്‍ കത്തുമെന്നാണ് സഖാവ് പറഞ്ഞിരിക്കുന്നത്!!. പോരേ പൂരം. പറഞ്ഞു തീര്‍ന്നില്ല. ഉടന്‍ തന്നെ വന്നു കാന്തപുരം ഉസ്താദിന്റെ ഫത് വ. "രാഷ്ട്രീയക്കാര്‍ക്ക് മതത്തില്‍ ഇടപെടാന്‍ അവകാശമില്ല. ഇടപെട്ടാല്‍ കയ്യും കെട്ടി നോക്കി നില്‍ക്കില്ല".

ഈ മുടി കത്തിച്ചാല്‍ കത്തുമെന്നു നൂറ്റൊന്നു ശതമാനം ഉറപ്പുള്ള ആദ്യത്തെ ആള്‍ കാന്തപുരമാണ്. അതുകൊണ്ടാണ് ആ മുടിയുടെ നാലയലത്ത് ഒരു തീപ്പെട്ടിക്കൊള്ളി വെക്കാന്‍ പോലും അദ്ദേഹം സമ്മതിക്കാത്തത്. ഇതൊക്കെ ഏത് പോലീസുകാരനും അറിയാവുന്ന കാര്യമാണ്. കാന്തപുരത്തിന് സിന്ദാബാദ് വിളിക്കുന്ന ആളുകള്‍ക്കും ഇക്കാര്യത്തില്‍ അണുമണിത്തൂക്കം സംശയം ഉണ്ടാവുമെന്ന് തോന്നുന്നില്ല. നാല് വോട്ടു കിട്ടുന്നത് മുടക്കേണ്ട എന്ന് കരുതിയാണ് ലീഗ് നേതാക്കള്‍ പോലും മുടിക്കെതിരെ ഒരക്ഷരം മിണ്ടാത്തത്. അപ്പോള്‍ കാന്തപുരം ഉസ്താദുമായി പതിറ്റാണ്ടുകളുടെ ചങ്ങാത്തമുള്ള പിണറായി ഉസ്താദ്‌ ഇങ്ങനെ പറയാന്‍ കാരണമെന്താണ്. അതാണ്‌ എനിക്ക് പിടി കിട്ടാത്തത്.

കാലാകാലങ്ങളായി കാന്തപുരത്തിന്റെ വോട്ടു വാങ്ങുന്നത് സഖാക്കളാണ് എന്നത് ഒരു തുണിയഴിച്ചിട്ട സത്യമാണ്. കാന്തപുരം എന്ത് പ്രസ്താവന നടത്തിയാലും പടച്ചോന്റെ കൃപയുണ്ടായി അദ്ദേഹത്തിന്‍റെ അണികള്‍ കൊന്നാലും ലീഗിന് വോട്ടു ചെയ്യില്ല. അവരുടെ ഒരു മൈന്‍ഡ് സെറ്റ് അതാണ്‌. ഇ കെ വിഭാഗം സുന്നികള്‍ ലീഗിന്റെ കൂടെ ഉള്ളിടത്തോളം കാലം ദുഫായീന്ന് ഖസ്റജി തന്നെ വന്ന് പറഞ്ഞാലും അവര്‍ മാറ്റിക്കുത്തില്ല. പക്ഷേ, രാഷ്ട്രീയക്കാരെക്കാള്‍ ഒരു മുഴം നീട്ടിയെറിയാനുള്ള തന്ത്രം കയ്യിലുള്ളതിനാല്‍ ആര് ജയിച്ചാലും അവര്‍ക്കാണ് ഞങ്ങള്‍ വോട്ടു ചെയ്തത് എന്ന് കാന്തപുരം പറയും. പാവം ലീഗുകാര്‍ അത് വിശ്വസിക്കുകയും കാന്തപുരത്തിന്റെ കൂടെയിരുന്നു നെയ്ച്ചോറും ബിരിയാണിയും കഴിച്ചു അല്‍ഹംദുലില്ല എന്ന് പറഞ്ഞു കൈ കഴുകി പോരുകയും ചെയ്യും.

ഈ അടിയൊഴുക്കുകളൊക്കെ പച്ച വെള്ളം പോലെ അറിയാവുന്ന ആളാണ്‌ സഖാവ് പിണറായി. അതുകൊണ്ടാണ് മൂപ്പര്‍ക്ക് ഇതെന്തു പറ്റി എന്ന് നാം ചോദിച്ചു പോകുന്നത്. നാല്പതു കോടി ചെലവില്‍ നിര്‍മിക്കുന്ന തിരുകേശപ്പള്ളിയുടെ പണി പൂര്‍ത്തിയായാല്‍ അതിന്റെ ഉദ്ഘാടനത്തിന് സ്റ്റേജില്‍ ഇരിക്കേണ്ട ആളാണ്‌ പിണറായി. ആ അവസരമാണ് വെറുതെ കളഞ്ഞു കുളിച്ചിരിക്കുന്നത്. ഏതായാലും ഒരു കാര്യം ഉറപ്പാണ്. പിറവത്ത് കാന്തപുരത്തിന് വോട്ടൊന്നും ഇല്ല!!. Latest update പിണറായിക്കൊരു റെഡ് സല്യൂട്ട്! മതം ആരുടേയും തറവാട്ടു സ്വത്തല്ല.

Related Posts
തിരുകേശപ്പള്ളി: വൈ ദിസ്‌ കൊലവെറി?