ഉണ്ണാമ

അമേരിക്കയുടെ ഗതികേട് !

2016-10-24T09:22:00.002-07:00

"ഈ നഗരത്തിനിതെന്തു പറ്റി " എന്ന് തുടങ്ങുന്ന പുകവലി വിരുദ്ധ പരസ്യം ഒരു പ്രാവശ്യമെങ്കിലും കാണാത്ത മലയാളികൾ ഉണ്ടാകില്ല. അതിനു സമാനമായ ഒന്ന് ഇത്തവണത്തെ അമേരിക്കൻ പ്രസിഡണ്ട് തിരഞെടുപ്പിനു വേണ്ടി തയ്യാറാക്കിയാൽ ഒട്ടും അതിശയോക്തിയാകില്ലത്. തിരഞ്ഞെടുപ്പ് സമയത്തുണ്ടാകുന്ന ആരോപണങ്ങളും വിവാദങ്ങളും പുത്തരിയല്ല. എന്നാൽ ഇത്തവണത്തെ അമേരിക്കൻ തിരഞ്ഞെടുപ്പിന് ചില പ്രത്യേകതകൾ ഉണ്ട് . ഇതിന്റെ ഗുണഭോക്താക്കളെ വ്യത്യസ്തമായി നോക്കിക്കാണുക ആണ് ഈ ലേഖനത്തിൽ.

അനന്യസാധാരണമായ ഒരു പ്രസിഡണ്ട് തിരഞ്ഞെടുപ്പിനാണ് അമേരിക്ക ഇക്കുറി സാക്ഷ്യം വഹിക്കുന്നത്.തിരഞ്ഞെടുപ്പിന് ദിവസങ്ങൾക്കു മുൻപ് തന്നെ ക്ര്യത്യമായ ഫലപ്രവചനം
സാധ്യമാക്കുന്ന വിധത്തിൽ ഏകപഷീയമായ ഒന്നായിരിക്കുമെന്ന് ഇവിടുത്തെ ഒട്ടുമിക്ക മാധ്യമങ്ങളും വിലയിരുത്തുന്നു.'മാദ്ധ്യമ സിൻഡിക്കേറ്റ് ' എന്ന് ഒറ്റവാക്കിൽ അടച്ചാക്ഷേപിച്ചു തള്ളിക്കളയാൻ പറ്റുന്നതിനപ്പുറം ട്രന്പിന്റെ തോൽവി ഇവിടെ നിറഞ്ഞു നിൽക്കുന്നു. ജനാധിപത്യ വ്യവസ്ഥയിൽ ഒട്ടും അഭികാമ്യമല്ലാത്ത ഒരു പ്രവണതയാണ് ഏകപക്ഷീയമായ തിരഞ്ഞെടുപ്പുകൾ.വിജയിയുടെ മേന്മയെക്കാൾ, എതിരാളിയുടെ പോരായ്മകളാണ് വിജയകാരണമാകുന്നതെന്നത് അതിലും വലിയ ദുഃസൂചനയാണ്.നേതൃത്വ ദാരിദ്രം ഇരു പാർട്ടികളെയും ഒരുപോലെ പിടികൂടിയിരുന്ന ഈ തിരഞ്ഞെടുപ്പിൽ അമേരിക്കൻ വോട്ടർമാർ അക്ഷരാർത്ഥത്തിൽ ചെകുത്താനും കടലിനുമിടയിൽ അകപ്പെട്ട അവസ്ഥയിലായിരുന്നു.

രണ്ടു ശതാബ്ദത്തിലേറെ പഴക്കമുള്ള അമേരിക്കയുടെ തിരഞ്ഞെടുപ്പു ചരിത്രത്തിൽ ഇത്രയും മോശമായ രണ്ടു സ്ഥാനാർത്ഥികൾ ഏറ്റുമുട്ടിയിട്ടില്ല. രാഷ്ട്രത്തലവനാകാനുള്ള യോഗ്യത ഇരുവർക്കുമില്ലന്നാണ് ഭൂരിപക്ഷം ജനങ്ങളും തുടർച്ചയായ സർവേഫലങ്ങളിലൂടെ പറഞ്ഞുകൊണ്ടിരുന്നത് .എങ്കിലും തിരഞ്ഞെടുപ്പിൽ ഒരാളുടെ ജയം അനിവാര്യമാണല്ലോ ! . യാഥാർഥ പാർട്ടിക്കാരൻ പോലുമല്ലാത്ത ഒരാൾ സ്ഥാനാർത്ഥി നിർണയ സംവിധാനങ്ങളെ മുഴുവൻ അപഹാസ്യമാക്കി , റിപ്പബ്ലിക്കൻ പാർട്ടിയുടെ നോമിനി ആയി എന്ന് പറയുമ്പോൾ തന്നെ ആ പാർട്ടിയുടെ അവസ്ഥ നമുക്ക് ഊഹിക്കാവുന്നതേയുള്ളൂ.എട്ടുവർഷത്തെ ഡെമോക്രാറ്റിക്‌ ഭരണത്തിന് ശേഷം , സ്വാഭാവിക ഭരണവിരുദ്ധ വികാരത്തെ പോലും പ്രയോജനപ്പെടുത്തുവാൻ പാർട്ടിക്കായില്ല. സെനറ്റിലും ഹൗസിലും റിപ്ലബ്ലിക്കൻ ഭൂരിപകക്ഷമുള്ള അവസരത്തിലാണ് ഈ ഗതികേട് എന്നുകൂടി നാം ഓർക്കണം . ഡെമോക്രാറ്റിക്‌ പാർട്ടിയിലാകട്ടെ , ഹിലരി തന്നെയാകും സ്ഥാനാർഥി എന്ന് തുടക്കംമുതൽ തന്നെ ഏറെക്കുറെ ഉറപ്പായിരുന്നു . 'സ്ഥാനാർഥി നിർണ്ണയ പ്രഹസനം' പാർട്ടി നടത്തിയെങ്കിലും കിന്റൺ കുടുംബത്തിന്റെ അനുചരന്മാർ അടക്കിവാഴുന്ന പാർട്ടി നേതൃത്വം ഹിലരിക്ക് അനുകൂല നിലപാടെടുക്കുകയായിരുന്നു. ഹാക്കിങ്ങിലൂടെ പുറത്തു വന്ന ഇമെയിലുകൾ ഈ പക്ഷപാതം തുറന്നുകാട്ടിയെങ്കിലും ദുർബലനായിരുന്ന ബെർണി സാൻഡേഴ്‌സന്‌, തന്റെ രാഷ്ട്രീയ ഭാവിയോർത്ത് , ഹിലരിയെ പിന്തുണയ്‌ക്കേണ്ടിവന്നു.

"അമേരിക്ക, അമേരിക്കക്കാർക്ക്" എന്ന പ്രാദേശിക വാദമായിരുന്നു ട്രന്പ് മുന്നോട്ടു വച്ച ആശയത്തിന്റെ കാതൽ. മെക്സിക്കോയിൽ നിന്നുള്ള കുടിയേറ്റക്കാരിൽ ഏറിയപങ്കും കൊടും കുറ്റവാളികൾ ആണെന്നുള്ള പ്രസ്താവന ഏറെ വിവാദം സൃഷ്ടിച്ചു.മെക്സിക്കോയിൽ നിന്നുള്ള കുടിയേറ്റം തടയാൻ പടുകൂറ്റൻ മതിലുകൾ, ആ രാജ്യത്തിൻറെ ചിലവിൽ നിർമ്മിക്കണം എന്നതും , അനധികൃതമായി ഇവിടെ തുടരുന്ന എല്ലാവരെയും പുറത്താക്കുമെന്നുമുള്ള ആശയങ്ങൾ ഒരു വിഭാഗത്തെ ആകർഷിച്ചു. ഭീകരവാദം ലോകത്തിന്റെ പല ഭാഗത്തും ഭീതിപടർത്തിയപ്പോൾ , മുസ്ലിം ജന വിഭാഗത്തെ ഒന്നടക്കം, അമേരിക്കയിൽ പ്രവേശിക്കുന്നതിൽ നിന്ന് വിലക്കണം എന്ന പ്രസ്താവനയുമായി ട്രന്പ് രംഗത്തെത്തി. പ്രശ്നഗ്രസ്തമായ മദ്ധ്യ-പൂർവേഷ്യയിൽ നിന്നുള്ള അഭയാർഥികളെ നിരുപാധികം സ്വീകരിക്കുന്ന നിലപാട് , താൻ അധികാരത്തിലെത്തിയാൽ മാറ്റപ്പെടുമെന്നു അദ്ദേഹം പറഞ്ഞു . ഈ വർഷം ജൂൺ മാസത്തിൽ നടന്ന "ബ്രെക്സിറ്റ്‌" നു സമാനമായ ഒരു പിന്തുണ ഇവിടെ ട്രൻപിന് ലഭിക്കുമെന്നുപോലും വിലയിരുത്തുകയുണ്ടായി. ഇതിനെല്ലാം ഉപരിയായി , അഴിമതിയും സ്വജനപക്ഷപാതവും കൊടികുത്തി വാഴുന്ന , രാഷ്ട്രീയ -ഭരണ കൂട്ടുകെട്ടുകൾക്കു പുറത്തു നിൽക്കുന്ന , സ്വന്തമായി ഒരു റിയൽ എസ്റ്റേറ്റ് സാമ്ര്യാജ്യം കെട്ടിയുയർത്തിയ, ഇലക്ഷൻ പ്രചാരണത്തിന് പോലും ആരിൽ നിന്നും സംഭാവന സ്വീകരിക്കാത്ത , ആരോടും വിധേയത്വയമില്ലാതെ , ആർജ്ജവത്തോടെ തീരുമാനങ്ങൾ എടുക്കാൻ കഴിയുന്ന, ജനങ്ങളുടെ സ്ഥാനാർഥി എന്നരീതിയിൽ ജനങ്ങൾ തന്നെ കാണണമെന്നാണ് ട്രൻപ് ആഗ്രഹിച്ചത് .ബിസിനെസ്സ് ലാഭത്തിനുവേണ്ടി ഏതറ്റം വരെയും പോകുന്ന ട്രൻപ് , കൃത്യമായി ടാക്സ് പോലും അടയ്ക്കുന്നില്ല എന്നും, ട്രൻപിന്റെ സ്ഥാപനങ്ങളിൽ ഏറെയും കുടിയേറ്റക്കാർ ആണെന്ന് മാത്രമല്ല ,അവരുടെ സേവന -വേതന വ്യവസ്ഥകൾ വളരെ മോശമാണെന്നുമുള്ള വാർത്തകൾ വന്നതോടെ , ഈ പറയുന്നതൊക്കെ വെറുംവാക്കാണെന്നു ജനം തിരിച്ചറിഞ്ഞു.

രണ്ടു തവണ പ്രഥമ വനിതയായിരുന്നു എന്നതാണ് പ്രസിഡണ്ട് ആകാനുള്ള തന്റെ ഏറ്റവും വലിയ യോഗ്യത എന്ന ബാലിശ വാദമുന്നയിച്ച ഹിലരിയെയാണ് , എട്ടു വർഷം മുൻപ് കണ്ടതെങ്കിൽ , കൃത്യമായി ഗൃഹ പാഠം ചെയ്ത , ഒരു ചിരിയോ നോട്ടമോ പോലും അളന്നു കുറിച്ച് ചെയ്യുന്ന "കാല്കുലേറ്റഡ് ഹിലരി" യെയാണ് ഇത്തവണ നാം കാണുന്നത് . ഒബാമയുടെ നയങ്ങളുടെ ചുവട് പിടിച്ചു മുന്നോട്ടു പോകും എന്നതല്ലാതെ പൂർണമായും തന്റെതായ ഒരാശയവും ഹിലരി മുന്നോട്ടു വച്ചില്ല . ലോകത്തെന്പാടും സ്ത്രീ കൾക്ക് അംഗീകാരം ലഭിച്ചു തുടങ്ങിയെന്നും , അമേരിക്കയിൽ ഇതുവരെ വനിതാ പ്രസിഡന്റ് ഉണ്ടായില്ല എന്നും , അതിനു താൻ സർവഥാ യോഗ്യയാണെന്നും അവർ പലതവണ പറയാതെ പറഞ്ഞു . അമേരിക്കക്കാർ ഒത്തോരുമയോടെ നിന്നാൽ രാജ്യം നേരിടുന്ന എല്ലാ പ്രശ്ങ്ങൾക്കും പരിഹാരമാകുമെന്ന് അവർ ആവർത്തിച്ചു . സെനറ്റ് അംഗവും , സെക്രട്ടറി ഓഫ് സ്റ്റേറ്റ് -ഉം ഒക്കെ ആയിരുന്ന അവരിൽ, അമേരിക്കയിലെ സാധാരണ ജനത,ഒരു മതിപ്പും കണ്ടില്ല എന്ന് മാത്രമല്ല , വിശ്വാസക്കുറവ് പ്രകടിപ്പിക്കുകയും ചെയ്തു. ഒരു മികച്ച നേതാവോ, പ്രാസംഗികയോ ഒന്നുമല്ലാത്ത അവർക്കു എടുത്തു പറയാവുന്ന ഒരു മേന്മയുമില്ല.വളരെ സ്വാഭാവികമായി ഉണ്ടാകേണ്ടുന്ന പ്രതികരണങ്ങൾ പോലും , അളന്നു കുറിച്ച് , കണക്കു കൂട്ടലുകൾക്കു ഒടുവിൽ ക്യാമറയ്ക്കു മുന്നിൽ ചെയ്യുന്ന അഭ്യാസമായാണ് നമുക്ക് തോന്നുന്നത്. ഹിലരിയുടെ പൊതു പരിപാടികൾ ശ്രദ്ധിക്കുന്ന ആർക്കും ഇത് മനസിലാകും. സെക്രട്ടറി ഓഫ് സ്റ്റേറ്റ് ആയിരിക്കുമ്പോൾ , ക്ലാസിഫൈഡ് ഇൻഫർമേഷൻ അടങ്ങിയ ഇമെയിലുകൾ ശ്രദ്ധാപൂർവം കൈകാര്യം ചെയ്തില്ല എന്നതും, ക്ലിന്റൺ ഫൗണ്ടേഷന് പണം നല്കയവർക്കു ഗുണം ലഭിക്കത്തക്ക രീതിയിൽ പ്രവർത്തിച്ചു എന്നതും പകൽ പോലെ തെളിഞ്ഞ വസ്തുതകൾ ആണ് . ഗൗരവമായ ഈ ചെയ്തികൾക്ക് എതിരെ നിലവിലെ ഒബാമ ഭരണകൂടം മൃദു സമീപനം സ്വീകരിച്ചു എന്നത് ഉന്നതങ്ങളിൽ അവരുടെ സ്വാധീനം വ്യക്തമാക്കുന്നു.

വ്യക്തിഹത്യയും അങ്ങോട്ടുമിങ്ങോട്ടുമുള്ള കടന്നാക്രമണങ്ങളും നിറഞ്ഞ ഒരു പ്രചാരണമാണ് ആദ്യം മുതൽക്കു തന്നെ അമേരിക്കൻ ജനത സാക്ഷ്യം വഹിച്ചത്. കോടി ക്കണക്കിന് ഡോളർ ചിലവാക്കി ചെയ്യന്ന പരസ്യങ്ങളിൽ തന്റെ ആശയത്തെ കുറിച്ചും ജന നന്മയ്ക്കായി വിഭാവനം ചെയ്യുന്ന പദ്ധതികളെ കുറിച്ചുമുള്ളവ വിരളം . എതിരാളിയുടെ വീഴ്‌ചകൾ തുറന്നു കാട്ടുക എന്നത് മാത്രമാണോ ഒരു ഭരണാധികാരിയുടെ കടമ എന്ന് നാം സംശയിച്ചു പോകും.

കാര്യങ്ങൾ ഇത്രയെയൊക്കെകൊണ്ട് അവസാനിച്ചിരുന്നെങ്കിൽ ഒരു പക്ഷെ ഒരു സാധാരണ തിരഞ്ഞെടുപ്പ് ആയിപ്പോകുമായിരുന്നു ഇത്. എന്നാൽ കഴിഞ്ഞ ആഴ്ച, വാഷിങ്ടൺ പോസ്റ്റ് ദിനപത്രം പുറത്തുവിട്ട ഒരു വീഡിയോ ക്ലിപ്പും , വിവിധ തലത്തിൽ നിന്ന് അതിനു വന്ന പ്രതികരണങ്ങളും അമേരിക്കൻ സമൂഹത്തെ മുഴവൻ ഇളഭ്യരാക്കി. ഒരു ടെലിവിഷൻ പരിപാടിയുടെ റെക്കോർഡിങ്നു മുൻപുള്ള ട്രന്പിന്റെ സ്വകാര്യ സംഭാഷണം ആയിരുന്നു ക്ലിപ്പിന്റെ ഉള്ളടക്കം . സ്ത്രീ വിഷയത്തിൽ അദ്ദേഹത്തിനുള്ള ചപലതകളെ കുറിച്ച്,പല അടക്കംപറച്ചിലുകളും കേട്ടിരുന്നുവെങ്കിലും ഇത്ര വ്യക്തമായ ഒന്ന് , അദ്ദ്ദേഹത്തിന്റെ അനുയായികളായ പലരുടെയും വായടപ്പിച്ചു . നിഷേധിക്കുവാൻ കഴിയുന്നതിന് അപ്പുറം, വ്യക്തമായിരുന്ന അതിലെ ദൃശ്യങ്ങളും , സംസാരവുമൊക്കെ. റിപ്പബ്ലിക്കൻ പാർട്ടിക്കും കുടുംബാംഗങ്ങൾക്കും മാത്രമല്ല ട്രംപിന് പോലും സ്വയം മാപ്പു പറയേണ്ടി വന്നത് അതുകൊണ്ടാണ്. ഇതിന്റെ ചുവടുപിടിച് ഒട്ടേറെ പുതിയ വെളിപ്പെടുത്തലുകളും വന്നു .ബിൽ ക്ലിന്റൺ ആക്രമിച്ചുവെന്നു പരാതിപ്പെട്ട സ്ത്രീകളെ കൂട്ടു പിടിച്ച് ട്രൻപും പ്രതിരോധം തീർത്തു.ഇതിനെല്ലാം ഹിലരിയും മൗന സമ്മതം നൽകിയെന്നും അദ്ദേഹം ആരോപണമുന്നയിച്ചു. അമേരിക്കൻ ന്യൂസ് ചാനലുകൾക്ക് സെൻസറിംഗ് വേണ്ടി വരുമോ എന്നുപോലും പലരും സംശയിച്ചു.

റിപ്പബ്ലിക്കൻ പാർട്ടിയിലെ പല പ്രമുഖ നേതാക്കളും ട്രൻപിന് വോട്ടു ചെയ്യുകയില്ലയെന്നു പരസ്യമായി പ്രഖ്യാപിച്ചു . മത്സരത്തിൽ നിന്ന് പിന്മാറാൻ പോലും പലരും ആവശ്യപ്പെട്ടു. പ്രസിഡണ്ട് തിരഞ്ഞെടുപ്പിനോടൊപ്പം നടക്കുന്ന സെനറ്റ് , ഹൌസ് തിരഞ്ഞെടുപ്പുകളിൽ മത്സരിക്കുന്ന റിപ്പബ്ലിക്കൻ സ്ഥാനാർത്ഥികളും, തങ്ങളുടെ വിജയത്തിനായി, ട്രംപ് മായുള്ള അകലം അനിവാര്യമാണെന്ന് മനസിലാക്കിയ മട്ടിലാണ് പ്രചാരണം നടത്തുന്നത് . മാധ്യമങ്ങൾ ,സ്ഥിരം ശൈലിയിൽ , ഉദ്വേഗം നിലനിർത്തുന്ന വാർത്താശകലങ്ങളിലൂടെ ട്രന്പിനെ പ്രകോപിപ്പിച്ചുകൊണ്ടിരിക്കുന്നു.

ട്രൻപിന് എതിരെ ഉയരുന്ന ഈ വികാരം, അമേരിക്കൻ രാഷ്ട്രീയ സദാചാരത്തിന്റെ പ്രതീകമെന്ന കരുതുക വയ്യ.ട്രംപിനെ എതിരിക്കുകയും, ഹിലരിയെ പിന്തുണയ്ക്കുകയും ചെയ്യുന്ന എല്ലാവർക്കും അവരവരുടേതായ കണക്കുകൂട്ടലുകൾ ഉണ്ട് . ഒരു തരത്തിൽ അല്ലെങ്കിൽ മറ്റൊരുതരത്തിൽ തങ്ങൾക്കു നേട്ടമുള്ളതുകൊണ്ടാണ് ഇവർ ട്രന്പിനെ എതിർക്കുന്നത് . ട്രൻപി നെതിരെ ആരോപണവുമായി വന്നവർ , പത്തും പതിനഞ്ചും വർഷം , ഇതിനെക്കുറിച്ച് ഒരക്ഷരം പുറത്തു പറയാതെ , ഇലക്ഷന് വളരെ അടുത്ത സമയത്ത് , മലവെള്ളപാച്ചിൽ പോലെ ഇതെല്ലം പറയുന്നു . ഇത്രയും നാൾ ഇതൊന്നും പറയാൻ ത്രാണി ഇല്ലാത്തവർ ആയിരുന്നു ഇവരെന്ന് ആരും തെറ്റിദ്ധരിക്കരുത്. രാഷ്ട്രത്തലവനായിരിക്കെയും അതിനുമുന്പും ബിൽക്ലിന്റൺ നെ കുറിച്ചും ഇതുപോലെ ഗുരുതരമായ ആരോപണങൾ പുറത്തു വന്നിരുന്ന കാര്യവും , ആ അവസരങ്ങളിൽ ഹിലരിയും മറ്റും എടുത്ത നിലപാടുകളും നാം അപ്പാടെ വിസ്മരിക്കരുത് . അന്ന് ആപൽകാലത്ത് ഭർത്താവിനോട് ചേർന്ന് നിൽക്കുന്ന ഒരു നല്ല കുടുംബിനീയായിരുന്നു ഹിലരി.

അമേരിക്ക കണ്ടതിൽ വച്ച് ഏറ്റവും മാന്യനും, യുക്തി ബോധവുമുള്ള പ്രസിഡണ്ട് മാരിൽ ഒരാളാണ് ഒബാമ എന്ന കാര്യത്തിൽ ഒരു തർക്കവുമില്ല. ഹിലരിയ്ക്കു ലഭിച്ച ഏറ്റവും വലിയ

ഒരു ഭാഗ്യമാണ് ഒബാമ സ്വയം പ്രചാരണ വേദികളിൽ പ്രത്യക്ഷപ്പെടുന്നത് . ട്രന്പിനെ എതിർത്തും ഹിലരിയെ അനുകൂലിച്ചും അദ്ദേഹം നടത്തുന്ന പ്രസംഗങ്ങൾ കുറച്ചൊന്നുമല്ല ഹിലരിയ്ക്കു ഗുണം ചെയ്യുന്നത്.തന്റെ പിൻഗാമിയെ സഹായിക്കുന്ന രാഷ്ട്രീയ മാന്യതയ്ക്കപ്പുറത്ത് , ഒബാമയ്ക്കും ചില ലക്ഷ്യങ്ങളുണ്ട്. ഭാര്യ മിഷേൽ , ഭാവിയിലെ ഒരു പ്രസിഡൻഷ്യൽ സ്ഥാനാർത്ഥിയാണ് .ആ സമയത്തേക്ക് വേണ്ടുന്ന ചില മുന്നൊരുക്കങ്ങളുടെ ഭാഗമാണ് മിഷേലും സജീവമായി പ്രചരണ രംഗത്ത് നിൽക്കുന്നത് . ഡെമോക്രാറ്റിക്‌ നാഷണൽ കോൺവെൻഷ സംസാരിപ്പിച്ചതിന്റെ ലക്ഷ്യവും മറ്റൊന്നല്ല. സ്ത്രീ വോട്ടർ മാരെ കൈയിൽ എടുക്കുവാൻ തകർപ്പൻ പ്രസംഗങ്ങൾ നടത്തുന്ന മിഷെലിൽ ഒരു ഭാവി സ്ഥാനാർഥിയുടെ മട്ടും ശരീരഭാഷയും നമുക്ക് നിഷ്പ്രയാസം കാണാം .ക്യാമ്പയ്‌നിങ് ന്റെ ബാലപാഠങ്ങൾ പഠിക്കുകയാണവർ.

ഇനി റിപ്ലബ്ലിക്കൻ പാർട്ടിയിൽ നിന്നും ട്രന്പിനെ എതിർക്കുന്നവരെ നോക്കാം . വ്യവസ്ഥാപിത മായ പാർട്ടിയ്ക്ക് പണ്ടേ ട്രംപ് അനഭിമിതനായിരുന്നു. ട്രന്പിന്റെ "ന്യൂയോർക്കൻ ലിബറൽ" നയങ്ങൾ പാർട്ടിയിലെ കൺസർവേറ്റീവ് വിഭാഗത്തിന് ഒട്ടും സ്വീകാര്യമല്ലായിരുന്നു. ട്രൻപ് റിപ്പബ്ലിക്കൻ പാർട്ടിക്കാരനാണെന്നു സ്വയം പ്രഖ്യാപിച്ച്‌ , നോമിനേഷൻ നേടിയെടുത്തപ്പ്പോഴും ട്രൻപ് 'ഇങ്ങനെയൊക്കെ' തന്നെയെന്ന് എല്ലാവർക്കുമറിയാമായിരുന്നു എന്നാൽ ജനപിന്തുണയുള്ള ഒരു നല്ല നേതാവിനെപോലും രംഗത്തിറക്കി അദ്ദേഹത്തെ പ്രതിരോധിക്കാൻ അവർക്കായില്ല. മാർക്ക് അറൂബിയോ, പോൾ റയാൻ തുടങ്ങി, ഇത്തവണ വിജയ സാധ്യതയില്ലാ തിരുന്ന രണ്ടാം നിരയിലെ യുവ നേതാക്കൾക്കാകട്ടെ , ഇത്തവണ വിജയ സാധ്യതയുള്ള റിപ്പബ്ലിക്കൻ സ്ഥാനാർഥി വരാതിരുന്നത് തന്നെയാണ് അവരവരുടെ രാഷ്‌ടീയ ഭാവിയ്ക്കു നല്ലത് . ഹിലരി ഭരണകൂടത്തിന്റെ 'മികവ്' റിപ്ലബ്ലിക്കൻ പാർട്ടിയുടെ അനായാസ വിജയത്തിന് കാരണമാകുമെന്നും അവർ വിലയിരുത്തുന്നു.

ഇനി ശുദ്ധമായ സാമൂഹിക പ്രതിബദ്ധതയാണ് മാധ്യമങ്ങളെ കൊണ്ട് ഇതെല്ലാം ചെയ്യിക്കുന്നത് എന്ന് പറയുക വയ്യ. പ്രേക്ഷകരെയും ,വായനക്കാരെയും ആകർഷിക്കുവാൻ അവർ ഏതറ്റവും വരെ പോകുമെന്നതാണ് വാസ്തവം . ട്രന്പിനെ പരമാവധി പ്രകോപിപ്പിച് , രസകരമായ പ്രതികരണങ്ങൾ സൃഷ്ടിച്ച് പരസ്യവരുമാനം സമാഹരിക്കുക എന്നത് മാത്രമാണ് അവരുടെ ലഷ്യം . വായനക്കാരെ ഇക്കിളിപ്പെടുത്തുന്ന വാർത്ത ശകലങ്ങൾ എല്ലാദിവസത്തെയും ചർച്ചാ വിഷയമാക്കുന്നതിന്റെ രഹസ്യം മറ്റൊന്നുമല്ല . ഇമെയിൽ വിവാദത്തിലും , ക്ലിന്റൺ ഫൌണ്ടേഷൻ സാന്പത്തിക വിവാദത്തിലും "എനിക്ക് തെറ്റു പറ്റി .അതിന്റെ ഉത്തരവാദിത്വം ഏറ്റെടുക്കുന്നു " എന്ന ഹിലരിയുടെ അപേക്ഷ സ്വീകരിക്കുകയും , ട്രൻപ് മാപ്പു പറഞ്ഞിട്ടും " എങ്കിലും ഒരു "പ്രസിഡൻഷ്യൽ സ്ഥാനാർഥി ഇങ്ങനെയൊക്കെ പറയാമോ" എന്ന് ഇരുപത്തി നാല് മണിക്കൂറും പറഞ്ഞു കൊണ്ടിരിക്കുന്നതും അതിന്റെ ഭാഗം മാത്രമാണ്. മുസ്ലിം തീവ്രവാദം എതിർക്കപെടണമെന്ന് പറയുന്പോൾ - ട്രൻപ് പറയുന്ന രീതി തെറ്റാണെങ്കിൽ കൂടി - , അമേരിക്കയ്ക്ക് വേണ്ടി യുദ്ധത്തിൽ മരിച യോദ്ധാക്കളെ ഉയർത്തി മുസ്ലീങ്ങൾ രാജ്യസ്‌നേഹികൾ ആണെന്ന് ഹിലരി വാദിക്കുന്നത് നമുക്ക് മാസിലാക്കാം , എന്നാൽ മാധ്യമങ്ങൾ അനുചിതമായ താരതമ്യങ്ങൾ ഏറ്റു പിടിക്കരുത് . ഹിലരിയുടെ ഈമെയിൽ സംബന്ധിച്ച എല്ലാ വാർത്തകളിലും അവ പുറത്തു വരുവാൻ ഇടയാക്കിയ റഷ്യൻ ഹാക്കിങ്നാണു മാധ്യങ്ങൾ പ്രാധാന്യം കൊടുക്കുന്നത്.ട്രന്പിന്റെ വീഡിയോയുടെ ഉള്ളടക്കം ചർച്ച ചെയ്യുന്നതിന് പകരം , സംഭാഷങ്ങൾ രഹസ്യമായി റെക്കോർഡ് ചെയ്തു ,പരസ്യമാകുന്നതിനെ കുറിച്ച് ചർച്ച നടത്തുന്നത് പോലെയാണത് . നിഷ്പക്ഷത എന്ന മാദ്ധ്യമ ധർമം പലപ്പോഴും ലംഘിക്കപ്പെട്ടുപോകുന്നത് യാദൃച്ഛികമെന്നു കരുതുക വയ്യ .
അഭിപ്രായ സർവേകളിൽ ഒരു ദിവസം ഹിലരിയും അടുത്ത ദിവസം ട്രൻപും നേട്ടമുണ്ടാക്കുന്ന രീതിയിൽ വാർത്ത വരുന്നതും ജനങ്ങളെ ആകർഷിക്കുവാൻ വേണ്ടിയുള്ള വിദദ്ധമായ തിരക്കഥയുടെ ഭാഗം മാത്രമാണ് .പുകമറ സൃഷ്ടിക്കുകയല്ല , രാജ്യത്തെയും , സമൂഹത്തെയും ബാധിക്കുന്ന ഗൗരവമേറിയ വിഷയങ്ങളെ ചർച്ചയ്ക്കു വിധേയമാക്കുകയാണ് മാധ്യമങ്ങൾ ചെയ്യേണ്ടത് .

ഇനി എല്ലാവരാലും ആക്രമിക്കപ്പെടുന്ന ഒരു പാവം ഇരയാണ് ട്രൻപ് എന്നും ആരും ധരിക്കേണ്ട. ഈ തിരഞ്ഞടുപ്പിൽ പരാജയപ്പെട്ടാൽ തനിക്ക് വ്യക്തിപരമായി ഒരു ചുക്കും സംഭവിക്കാനില്ല എന്ന് അദ്ദേഹം പലതവണ പല രീതിയിൽ പറഞ്ഞു കഴിഞു. ട്രൻപ് എന്ന വ്യക്തിക്ക് വിവാദങ്ങൾ എല്ലാക്കാലത്തും ഒരു ത്രിൽ ആണ് . ഈ 'ഗെയിം' ഇവിടം വരെയൊന്നുമെത്തുമെന്നു അദ്ദ്ദേഹം പോലും കരുതിയിരിക്കില്ല . റിപ്പബ്ലിക്കൻ പാർട്ടിയെ തകർക്കാൻ , ഹിലരി തന്നെയാണ് അദ്ദേഹത്ത രംഗത്തിറക്കിയിരിക്കുന്നതെന്ന് പലരും തമാശ പറയുന്നത് അതുകൊണ്ടാണ് . ക്ലിന്റൺ കുടുംബവുമായി വളരെ നല്ല ബന്ധം പുലർത്തിയിരുന്ന ട്രൻപ് , ഒട്ടേറെ തവണ ക്ലിന്റണ് സംഭാവനകൾ നൽകിയിട്ടുണ്ട് . ഇതിനെല്ലാമുപരി 'ട്രൻപ് ബ്രാൻഡിന്' ഇതിലും നല്ല ഒരു മറ്റൊരു പരസ്യമുണ്ടോ? ലോകം മുഴുവൻ അദ്ദേഹത്തെ അറിയുന്നു , ശ്രദ്ധിക്കുന്നു.ഫോക്സ് ന്യൂസ് -ന്റെ തലപ്പത്തുള്ള ഒരുപറ്റമാളുകളുമായി ചേർന്ന് "ട്രൻപ് ടിവി" എന്ന പുതിയ മീഡിയ സംരംഭവുമായി വരുമെന്ന് ചില നിരീക്ഷകർ കരുതുന്നു .

അമേരിക്കൻ തിരഞ്ഞെടുപ്പ് സംവിധാനം മുഴുവൻ അട്ടിമറിക്കപെട്ടിരിക്കുന്നുവെന്നും തന്റെ വിജയമൊഴികെയുള്ള ഒരു തിരഞ്ഞെടുപ്പ് ഫലവും താൻ അംഗീകരിക്കുകയില്ല എന്ന് ട്രൻപ് ആവർത്തിച്ചു കൊണ്ടിരിക്കുന്നു.ഹിലരിയുടെ വിവാദ ഇമെയിലുകൾ ഇപ്പോൾ ഓരോ ദിവസവും വിക്കി ലീക്സ് പുറത്തു വിട്ടുകൊണ്ടിരിക്കുകയാണ് . അതിന്റെ ചുവട് പിടിച്ചു ഇപ്പോഴത്തെ സമവാക്യങ്ങൾ മാറിമറിയില്ല എന്ന് ആർക്കും തീർത്തു പറയാനാവില്ല. പല സംസ്ഥാനങ്ങളിലും 'ഏർലി വോട്ടിംഗ്' ആരംഭിച്ചുകഴിഞ്ഞിരിക്കുന്നു . അവസാന നിമിഷം ജനങ്ങളെ സ്വാധീനിക്കുന്ന ഘടകങ്ങൾ എന്തൊക്കെയാകുമെന്നു കൃത്യമായി പ്രവചിക്കുക അസാദ്ധ്യമെങ്കിലും ട്രന്പിന്റെ വിജയം കൂടുതൽ ദുഷ്കരമായി മാറിയിരിക്കുന്നു എന്നുവേണം അനുമാനിക്കാൻ . എല്ലാവരും അവരവരുടെ നേട്ടത്തിനു വേണ്ടി, കൂട്ടലും കിഴിക്കലും നടത്തി പ്രവർത്തിക്കുന്പോൾ സാധാരണ ജനങ്ങൾ തികച്ചും വിഡ്ഡികളാവുകയാണ് ചെയ്യുന്നത് . അല്ലെങ്കിലും ലോകത്ത് എല്ലായിടത്തും പൊതു ജനം കഴുതകളാണല്ലോ ? വോട്ടു ചെയ്താലും,ഇല്ലങ്കിലും തിരഞ്ഞെടുപ്പുകളിൽ അവർ തോറ്റു കൊണ്ടേയിരിക്കും .ഓരോ ജനതയ്ക്കും അവർ അർഹിക്കുന്ന ഭരണാധികാരിയെ ലഭിക്കുന്നു എന്ന തത്വം അമേരിക്കൻ ജനത ഓർക്കുന്നത് ഇത്തരുണത്തിൽ നന്നായിരിക്കും. കഴിവും ,ആത്മാർത്ഥയും ഉള്ള നേതാക്കളുണ്ടാകുന്നില്ലെങ്കിൽ കുറ്റം സമൂഹത്തിന്റേതു തന്നെയാണ് .

.

ദി സ്ട്രെയിൻജർ (The Stranger)

2015-09-07T08:47:00.001-07:00

കാല-ദേശ പരിമിതികളെ അതിക്രമിച്ചു നില്ക്കുന്ന സാഹിത്യത്തെയാണ്‌ നാം വിശ്വ സാഹിത്യം എന്നു പറയുന്നത്.നോബൽ സമ്മാനജേതാവായ ആൽബേർട്ട് കമു -വിന്റെ (Albert Camus) "ദി സ്ട്രെയിൻജർ" (The Stranger) എന്ന പുസ്തകം ഈ ഗണത്തിൽപ്പെടുന്ന ഒന്നാണ് . രണ്ടാം ലോക മഹായുദ്ധത്തിൽ , ജെർമിൻ അധിനിവേശത്തിലകപ്പെട്ട ഫ്രാൻസിൽ വച്ച് ,1942 -ൽ എഴുതപ്പെട്ട ഈ നോവൽ, ലോകത്തിന്റെ മുഴുവൻ ശ്രദ്ധയും വളരെ വേഗം പിടിച്ചുപറ്റി. കൃതിയുടെ പഴക്കവും നോബൽ സമ്മാന ജേതാവ് എന്ന മുഖവുരയും, ഒരു ബോറൻ ധാരണയുണ്ടാക്കുന്നുവെങ്കിലും കേവലം നൂറു പേജിനോടടുത്ത് മാത്രം വലിപ്പമുള്ള , വളരെവേഗം വായിച്ചു പോകാൻ കഴിയുന്ന ഒരു ചെറിയ പുസ്തകമാണിത് .

മ്യുർസൗ(Meursault)എന്ന കഥാനായകൻ സ്വയം വിവരണം നടത്തുന്ന രീതിയിൽ ക്രമീകരിച്ചിട്ടുള്ള ഇതിന്റെ കഥ , ലോകത്തിന്റെ ഏതു കോണിലിരുന്ന്, ഏതു കാലഘട്ടത്തിൽ വായിച്ചാലും വായനക്കാരനെ സ്പർശിക്കുന്ന ഒന്നാണ് . പ്രായമായ അമ്മ മരിച്ചു എന്ന് വൃദ്ധ സദനത്തിൽ നിന്ന് ടെലിഗ്രാം വരുന്നതോടെയാണ് കഥ ആരംഭിക്കുനത്. ജോലി സ്ഥലത്ത് നിന്ന് ഒരു വിധത്തിൽ അവധി തരപ്പെടുത്തി അയാൾ നാട്ടിൽ എത്തുന്നു. അമ്മയുമായി അത്ര വലിയ ആത്മബന്ധം ഒന്നുമില്ലായിരുന്ന അയ്യാൾ, മൃത ശരീരം ഒന്ന് കാണുവാൻ പോലും താത്പര്യം പ്രകടിപ്പിക്കുന്നില്ല. കാപ്പി കുടിച്ചും സിഗരറ്റ് വലിച്ചും രാത്രി തള്ളി നീക്കുന്ന മ്യുർസൗ നെ ആശ്വസിപ്പിക്കുവാൻ വൃദ്ധ സദനത്തിന്റെ ഡയറക്ടർ ഉൾപെടെ ആളുകൾ നടത്തുന്ന ശ്രമങ്ങൾ എല്ലാം അയാളെ കൂടുതൽ അലോസരപ്പെടുത്തുന്നു.മ്യുർസൗ പ്രകടിപ്പിക്കുന്ന ഈ നിസംഗത എല്ലാവരെയും അന്പരപ്പിക്കുന്നു. പിറ്റേദിവസം യാന്തികമായ ഫ്യുണറലിനു ശേഷം ജോലി സ്ഥലത്തേക്ക് മടങ്ങുന്നു.

അടുത്ത ദിവസം സമീപത്തുള്ള ഒരു ബീച്ചിൽ നീന്താൻ പോകുന്ന അയ്യാൾ , അവിടെ വച്ച് പണ്ട് കൂടെ ജോലി ചെയ്തിരുന്ന മാരി (Marie)എന്ന സ്ത്രീയെ കാണുന്നു ; വൈകുന്നേരം അവർ രണ്ടുപേരും കൂടി ഒരു കോമഡി സിനിമയ്ക്ക്‌ പോകുന്നു; രാത്രി ഒരുമിച്ചു കഴിയുന്നു . അടുത്ത ദിവസം തിരികെ ജോലിക്കെത്തുന്ന അയാളെ ആശ്വസിപ്പിക്കുവാൻ പലരും ശ്രമിക്കുന്നു എങ്കിലും അതൊന്നും അയാൾ ശ്രദ്ധിക്കുന്നതേയില്ല . മ്യുർസൗ യുടെ അയൽവാസികളാണ് സലമാനൊ (Salamano) എന്ന വൃദ്ധനും , ഭാര്യയുമായി നിരന്തരം വഴക്കടിച്ചു കഴിയുന്ന റേമോണ്ടും (Raymond). ഇവരുമായെല്ലാം ലോഹ്യ സംഭാഷണങ്ങളിലും മറ്റും ഏർപ്പെട്ടു പോകുന്ന അയാൾ അവരുടെ ജീവിത പ്രശ്നങ്ങളുടെ ഒരു നല്ല കേൾവിക്കാരൻ കൂടിയാണ്.പിണങ്ങി പോകുന്ന ഭാര്യയെ തിരികെ കൊണ്ടുവരുവാൻ റേമോണ്ടിനു കത്തെഴുതി കൊടുത്തു സഹായിക്കുവാനും പിന്നീട് ഭാര്യയെ ഉപദ്രവിക്കുന്നതിനു പോലീസ് പിടിയിൽ ആകുന്ന അയാളെ രക്ഷിക്കുവാനും മ്യുർസൗനു ഒരു സങ്കോചവുമില്ല. സലമാനൊ യ്ക്ക് ആകെ തുണയായി ഉണ്ടായിരുന്ന പട്ടിയെ കാണാതാകുന്പോഴും മ്യുർസൗ അനുഭാവപൂർവം സഹായത്തിന് എത്തുന്നുമുണ്ട്.

ഒരാഴ്ച ശേഷം മാരി വീണ്ടും മ്യുർസൗനു കാണാൻ വരുന്നു . തന്നെ വിവാഹം ചെയ്യാൻ താത്പര്യം ഉണ്ടോ എന്ന് ചോദിക്കുന്പോൾ അയാൾ പറയുന്ന മറുപടി ഇതാണ് ; "It didn’t mean anything,” but probably not".

അടുത്ത ദിവസം മാരി,റേമോണ്ടും മായി മ്യുർസൗനു ബീച്ചിൽ പോകുന്നു. അവിടെ വച്ച് റേമോണ്ടും ന്റെ ഭാര്യാ സഹോദരൻ അടങ്ങുന ഒരു സംഘം അറബികളുമായി വഴക്ക് ഉണ്ടാകുന്നു . വഴക്കിനിടയിൽ റേമോണ്ടിനു കുത്തേല്ക്കുന്നു. കുറച്ചു മണിക്കൂറുകൾക്ക് ശേഷം വീണ്ടും അവരെ കണ്ടുമുട്ടുന്പോൾ റേമോണ്ടും അവരെ കൊല്ലാൻ തോക്ക് എടുക്കുന്നു എന്നാൽ മ്യുർസൗനു, റേമോണ്ടിൽ നിന്നും തോക്ക് വാങ്ങി, ഭാര്യാ സഹോദരനെ വെടിവച്ചു കൊല്ലുന്നു. ഇതോടെയാണ് നോവലിന്റെ ആദ്യ ഭാഗം അവസാനിക്കുനത് .

പോലീസ് അറസ്റ്റ് ചെയ്തു ജയിലിൽ കിടക്കുന്ന മ്യുർസൗ നെ യാണ് നോവലിന്റെ രണ്ടാം ഭാഗം നമുക്ക് പരിചയപ്പെടുത്തുന്നത് . ആദ്യ ഭാഗം പോലെ തന്നെ അയാൾ ജയിലിലും തികച്ചും വ്യത്യസ്തനാണ് . കുറ്റം ചെയ്തു പോയി എന്ന ഭാവമോ , പശ്ചാതാപമോ ഒന്നും അയാളിലില്ല. ജീവിതചര്യകൾക്ക് വന്ന മാറ്റവും ,സ്വാതന്ത്ര്യ കുറവും ഒക്കെ ആദ്യം അലോസരപ്പെടുത്തുന്നു വെങ്കിലും അയാൾ ജയിൽ ജീവിതവുമായി വളരെ വേഗം താദാത്മ്യം പ്രാപിക്കുന്നു .സാധാരണ ജയിൽപുള്ളികളെ സഹായിക്കുന്ന രീതിയിൽ മ്യുർസൗ നെ സമീപിക്കുന്ന അഭിഭാഷകനോ ,മജിസ്ട്രേറ്റിനോ ഒന്നും അയാളെ മനസിലാകുവാൻ സാധിക്കുന്നില്ല. സന്ദർശകരെ കാത്തിരിക്കുന്ന മറ്റു അന്തേവാസികളിൽ നിന്ന് വ്യത്യസ്തനായി , വല്ലപ്പോഴുമെങ്കിലും കാണാൻ വരുന്ന മാരിയുടെ വരവും അയാൾക്ക്‌ വെറും കൂടികാഴ്ചകൾ മാത്രമാണ്.

വിചാരണയ്ക്കായി കോടതി മുറിയിൽ എത്തുന്ന മ്യുർസൗ നിസംഗനായി തന്നെ തുടരുന്നു. വിചാരണയുടെ ഗതി വളരെ വേഗം അയാളുടെ സ്വഭാവത്തിന്റെ പ്രത്യേകതകളിലേക്ക് തിരിയുന്നു .കഥയുടെ ആദ്യ പകുതിയിലെ കഥാപാത്രങ്ങൾ മിക്കതും വിസ്തരിക്കപ്പെടുന്നു.ആമ്മയെ ഒറ്റയ്ക്ക് വൃദ്ധ സദനത്തിൽ ആക്കിയതും അമ്മയുടെ മരണത്തിൽ വിഷമം പ്രകടിപ്പിക്കാതിരുന്നതും ഒക്കെ വളരെ വലിയ അപരാധങ്ങൾ ആണെന്ന രീതിയിൽ വിസ്താരം പുരോഗമിക്കുന്നു. ഒടുവിൽ യാതൊരു ധര്‍മ്മനിഷ്‌ഠയുമില്ലാത്ത ഈ കിരാതൻ സമൂഹത്തിനു മുഴുവൻ ആപത്ത് ആണെന്നും , പരമാവധി ശിക്ഷ നല്കണമെന്നും പ്രോസിക്യുഷൻ വാദിക്കുന്നു. ഒടുവിൽ കോടതി ഇതെല്ലാം അംഗീകരിച്ചു വധശിക്ഷയ്ക്കു വിധിക്കുന്നു.

വിധിയ്ക്കു ശേഷം തിരിച്ചു ജയിലേക്ക് വരുന്ന മ്യുർസൗ, തന്റെ അപ്പീൽ വിജയി ക്കുന്നതിനെ കുറിച്ചും സ്വതന്ത്ര നാകുന്നതിനെ കുറിച്ചും ഒക്കെ സ്വപ്നം കാണുന്നു. ജയിൽ ശിക്ഷ അനുഭവിക്കുന്നവരെ ദൈവത്തെ പരിചയപ്പെടുത്തുന്ന സുവിശേഷ പ്രവർത്തകന്റെ വരവിനെ , മ്യുർസൗ പല തവണ എതിർക്കുന്നു എങ്കിലും ഒരു ദിവസം അനുവാദമില്ലാതെ വന്ന് ദൈവത്തിന്റെ മഹത്വത്തെ കുറിച്ചും ,മരണാന്തര ജീവിതത്തെ കുറിച്ചും ഒക്കെ പ്രസംഗിക്കുന്നു . കേൾവിയിൽ കടുത്ത ദേഷ്യവും അമർഷവും തോന്നുന്ന മ്യുർസൗ സുവിശേശേഷകനെ പിടിച്ചു പുറത്താക്കുന്നു. എന്നാൽ ആ നിമിഷം മ്യുർസൗ ഭൌതിക ലോകത്തിന്റെ വൈരുദ്ധ്യം തിരിച്ചറിയുന്നു. സ്വതന്ത്രമായി ഒരുവൻ ചെയ്യന്ന എല്ലാറ്റിനെയും കാര്യ -കാരണ മൂശയിലിട്ടു വിധിയെഴുതുന്ന സഹൂഹം , തികച്ചും പരിഹാസ്യമായ ഒന്നാണ് എന്ന് അയാൾ തിരിച്ചറിയുന്നു.
അതോടെ ശിക്ഷയിൽ നിന്ന് രക്ഷപെട്ടു ജീവിക്കണം എന്ന ആഗ്രഹം വെടിഞ്ഞു അയാൾ സന്തോഷവാനാകുന്നു .

വളരെ ലളിതമായ ഈ കൃതി ചിന്തയുടെ വളരെ വലിയ വാതായനങ്ങളെയാണ് വായനക്കാരിൽ തുറന്നിടുന്നത് . ഇതിലെ ഓരോ കഥാപാത്രവും , കഥാസന്ദർഭങ്ങളും നമ്മെ ആഴത്തിൽ ചിന്തിപ്പിക്കുന്നു. മനുഷ്യ ജീവിതത്തിനോ , ജീവിതത്തിനിടയിലെ സംഭവവികാസങ്ങൾക്കോ പ്രത്യേക അർഥങ്ങൾ കല്പിക്കുന്നത് ബുദ്ധിശൂന്യതയാണെന്ന തത്വശാസ്ത്ര ചിന്താധാരയാണ് കമ്യൂ മുന്നോട്ടു വയ്ക്കുന്നത് .

മ്യുർസൗ മായി ബന്ധപ്പെട്ടു ഭൌതിക ലോകത്ത് നടക്കുന്ന കാര്യങ്ങൾക്കോ , അയാളുടെ ചിന്തകൾക്കോ ചെയ്തികൾക്കോ ഒന്നും യുക്തിസഹം എന്ന് പറയാവുന്ന ഒരു ക്രമവുമില്ല . അമ്മയുമായുള്ള ആത്മ ബന്ധത്തിലും , അറബിക്കുനേരെ നിറയൊഴിക്കുന്ന നിമിഷത്തിലും , മ്യാരിയുടെ വിവാഹാഭ്യർഥന നിരസിക്കുന്ന അവസരത്തിലും , ജയിലിൽ വിചാരണ നേരിടുന്ന അവസരത്തിലുമെല്ലാം ഇത് വ്യക്തമാണ് . ഭൌതിക ലോകവുമായി നമ്മുടെ പ്രതികരണം ആണ് ജിവിതം എന്നും അതുമാത്രമാണ് ജീവിതത്തിന്റെ ഒരേ ഒരു ഉദേശ്യവും ലക്ഷ്യവും എന്നാണ് കമ്യൂ ഈ കഥയിലൂടെ നമ്മോടു പറയുവാൻ ശ്രമിക്കുന്നത് . നമ്മുടെ ശരീരം ചുറ്റുപാടുകളുമായി ഇടപഴകുന്പോൾ ഉണ്ടാകുന്ന സുഖവും സന്തോഷവും വേദനയും വിഷമവും മാത്രമാണ് ജീവിതം എന്ന് സ്ഥാപിക്കുന്ന 'എക്സ്സിസ്റ്റനിലിസം' (Existentialism) എന്ന ചിന്താധാരയുമായി വളരെ അടുത്തു നില്ക്കുന്ന ആശയമാണിത് . അമ്മയുടെ മൃതശരീര ത്തിനു സമീപത്ത് നിൽക്കുന്പോഴും , ദുഖത്തെക്കാളും, തന്റെ ശരീരത്തിന്റെ അസ്വ്യാസ്ത്യങ്ങൾ ആണ് ഇവിടെ മ്യുർസൗ പ്രകടിപ്പിക്കുന്നത് ; അതുപോലെ തന്നെ സൂര്യ പ്രകാശം കണ്ണിൽ അടിച്ചപ്പോൾ നിമിഷനേരത്തേക്ക് തോന്നിയ അസ്യാസ്ത്യമാണ് അറബിനെ കൊല്ലാനുള്ള കാരണം ആയി മ്യുർസൗ കോടതിയിൽ പറയുന്നതും ഇതിലേക്ക് തന്നെയാണ് വിരൽ ചൂണ്ടുന്നത്.

എന്നാൽ സമൂഹമാകട്ടെ എല്ലാ ചെയ്തികളെയും തമ്മിൽ ബന്ധിപ്പിച്ചു ഒരു വിധിപ്രഖ്യാപനം നടത്താൻ ഒരുങ്ങുന്നു. ജീവിതത്തിൽ സ്വാഭാവികമായി സംഭവിച്ചുപോകുന്ന കാര്യങ്ങളെ , മറ്റു സംഭവങ്ങളുമായി ചേർത്ത് വച്ച് വിലയിരുത്തുന്പോൾ വലിയ പിഴവുകൾ സംഭവിക്കുന്നു വെന്ന് കഥയിലൂടെ കമ്യു വാദിക്കുന്നു . അമ്മയുടെ മരണത്തിൽ, സമൂഹം ഏർപ്പെടുത്തിയിരിക്കുന്ന അളവു കോലിൻ പ്രകാരം ദുഃഖം പ്രകടിപ്പിക്കാത്തതു കൊണ്ട് , മ്യുർസൗ വിന്റെ കൊലപാതക കുറ്റം കൂടുതൽ വലുതാകുന്നു ; അയാൾ ഒരു കിരാതനായി മാറുന്നു. കോടതി മുറിയിലെ വിസ്താരം തികച്ചും പ്രതീകാത്മകമായ ഒന്നാണ്.ഒരുവന്റെ ചെയ്തികളെ , അവൻ അറിയാതെ സമൂഹം നിരീക്ഷിച്ച് ചില തീരുമാനങ്ങളിൽ എത്തുന്നു എന്നതിന്റെ സൂചനയാ ണത്.എല്ലാറ്റിനെയും നിയമത്തിന്റെ വരുതിയിൽ കൊണ്ടുവന്നു വിധിയെഴുതാൻ സമൂഹം വ്യഗ്രത കാട്ടുന്നതായും ഏതെങ്കിലും തരത്തിലുള്ള വിയോജിപ്പ് പ്രകടിപ്പിക്കുന്നവരെ , സാമൂഹ്യ വിരുദ്ധരെന്നു മുദ്രകുത്തി വക വരുത്തുന്നുവെന്നും കമ്യു ഈ കഥയിലൂടെ പറയുന്നു.

മരണം മാത്രമാണ് ആത്യന്തികമായി നിലനില്ക്കുന്ന സത്യം എന്നതാണ് കമ്യൂ മുന്നോട്ട് വയ്ക്കുന്ന മറ്റൊരു വാദം. നോവലിന്റെ തുടക്കത്തിൽ "മരണ" ത്തോട് മ്യുർസൗ ന്റെ പ്രതികരണവും അവസാനത്തിൽ "മരണം" എന്ന സത്യത്തെ സ്വീകരിക്കുന്നതോടെ അയാൾ സന്തോഷവാനുമാകുന്നതും പ്രതീകാത്മകമായി അവതരിപ്പിക്കുന്നതിൽ കഥാകാരൻ വിജയിക്കുന്നു.

മ്യുർസൗ-നു പുറമേ വളരെ കുറച്ചു കഥാപാത്രങ്ങളെ ഇതിലുള്ളൂ എങ്കിലും അവ ഓരോന്നും വ്യക്തിത്വമുള്ള പാത്ര സൃഷ്ടികളും അവരിലൂടെ പറയപ്പെടുന്ന കഥയും അങ്ങേയറ്റം യുക്തിഭദ്രവും മനോഹരമാണ് . ഹ്രസ്വമെങ്കിലും, ഇതിലെ കഥാസന്ദർഭങ്ങളും സംഭാഷണങ്ങളും വായനക്കാരന്റെ മനസ്സിൽ ചലനങ്ങളുണ്ടാക്കുന്നു.വായനയിൽ തങ്ങിയ ചില വാചകങ്ങൾ ചുവടെ കുറിക്കുന്നു :

“The only way to deal with an unfree world is to become so absolutely free that your very existence is an act of rebellion.”
“I opened myself to the gentle indifference of the world.”
“There is not love of life without despair about life.”
“If something is going to happen to me, I want to be there.”
“I explained to him, however, that my nature was such that my physical needs often got in the way of my feelings.”

കോസ്മോസ്

2015-08-07T18:15:00.000-07:00

'പോപ്പുലർ സയൻസ്' വിഭാഗത്തിൽ - വിശേഷിച്ചും അമേരിക്കയിൽ - ഏറെ ജനശ്രദ്ധ നേടിയ ഒരു പുസ്തകമാണ് "കോസ്മോസ്". അമേരിക്കൻ ടെലിവിഷൻ രംഗത്തെ എക്കാലത്തെയും ജന പ്രിയ പ്രോഗ്രാമുകളിൽ ഒന്നായ കോസ്മോസ്: എ പേർസണൽ വോയേജ് ( Cosmos: A Personal Voyage) എന്ന പരന്പരയുടെ പുസ്തകാവിഷ്കാരമാണ് ഇത്.ബഹിരാകാശ ഗവേഷണം അതിന്റെ ശൈശവ ദശയിൽ ആയിരുന്ന 1980 കളിൽ പുറത്തിറങ്ങിയ ഈ പുസ്തകവും ടെലിവിഷൻ പരന്പരയും, തലമുറകളെ സ്വാധീനിച്ചു എന്നു പറഞ്ഞാൽ ഒട്ടും അതിശയോക്തിയാവില്ല. ഇവയുടെ സ്വാധീനം കൊണ്ട് മാത്രം ശാസ്ത്ര ഗവേഷണ രംഗങ്ങളിൽ എത്തിപ്പെട്ട് കഴിവ് തെളിയിച്ച ഒട്ടേറെ പേർ ഇവിടങ്ങളിലുണ്ട് .അമേരിക്കൻ ബഹിരാകാശ ശാസ്ത്രകാരനായിരുന്ന കാൾ സാഗൻ(Carl Sagan) ആയിരുന്നു ഈ രണ്ടു സംരഭങ്ങളുടെയും സൂത്രധാരൻ. ശാസ്ത്ര വിഷയങ്ങളെ, സാധാരണ ജനങ്ങൾക്ക് , മനസിലാകുന്ന വിധത്തിൽ, ലളിതമായും സരസമായും അവതരിപ്പിക്കുന്നതിൽ സാഗനുള്ള കഴിവ് ഈ പുസ്തകം വിളിച്ചോതുന്നു. വിഖ്യാതമായ പുലിറ്റ്സെർ പ്രൈസ് അദ്ദേഹത്തെ തേടിയെത്തിയതിന്റെ കാരണവും മറ്റൊന്നല്ല. ടെലിവിഷൻ പോലെ ഒരു മാധ്യമത്തെ കേവലം വിനോദത്തിനു മാത്രമല്ല , വിദ്യാഭ്യാസപരമായ കാര്യങ്ങൾക്ക് കൂടി ഉപയോഗിക്കാം എന്നുള്ള അദ്ദേഹത്തിന്റെ ദീർഘ വീക്ഷണം ഏറെ പ്രശംസനീയമാണ് .

ഒരു ടെലിവിഷൻ പരന്പരയുടെ മാതൃകയിൽ പതിമൂന്ന്‌ അദ്ധ്യായങ്ങൾ ആണ് ഈ പുസ്തകത്തിനുള്ളത് . പറയുവാൻ പോകുന്ന വിഷയത്തെ ആസ്വദിക്കുവാൻ നമ്മുടെ മനസിനെ കൂടുതൽ പാകമാക്കുന്ന വിധത്തിലാണ് ഓരോ അധ്യായങ്ങളുടെ പേരും, തുടക്കത്തിൽ ഉൾപ്പെടുത്തിയിരിക്കുന്ന പ്രസിദ്ധമായ ചില മഹദ് വചനങ്ങളും. ആരംഭം മുതൽ അവസാനം വരെ വളരെ കാവ്യാത്മകമായ ഒരു ശൈലിയിൽ ആണ് ഈ പുസ്തകം പുരോഗമിക്കുന്നത് .

ചില ഉദാഹരണങ്ങൾ നോക്കൂ .

"The surface of the Earth is the shore of the cosmic ocean. From it we have learned most of what we know. Recently, we have waded a little out to sea, enough to dampen our toes or, at most, wet our ankles. The water seems inviting. The ocean calls. Some part of our being knows this is from where we came. We long to return. These aspirations are not, I think, irreverent,although they may trouble whatever gods may be"

"There was a time before television, before motion pictures, before radio, before books. The greatest part of human existence was spent in such a time. Over the dying embers of the campfire, on a moonless night, we watched the stars."

The dimensions of the Cosmos are so large that using familiar units of distance, such as meters or miles, chosen for their utility on Earth, would make little sense. Instead, we measure distance with the speed of light. In one second a beam of light travels 186,000 miles, nearly 300,000 kilometers or seven times around the Earth. In eight minutes it will travel from the Sun to the Earth. We can say the Sun is eight light-minutes away. In a year, it crosses nearly ten trillion kilometers, about six trillion miles, of intervening space. That unit of length, the distance light goes in a year, is called a light-year. It measures not time but distances - enormous distances.

The Earth is a place. It is by no means the only place. It is not even a typical place. No
planet or star or galaxy can be typical, because the Cosmos is mostly empty. The only typical place is within the vast, cold, universal vacuum, the everlasting night of intergalactic space, a place so strange and desolate that, by comparison, planets and stars and galaxies seem achingly rare and lovely. If we were randomly inserted into the Cosmos, the chance that we would find ourselves on or near a planet would be less than one in a billion trillion trillion* (1033, a one followed by 33 zeroes). In everyday life such odds are called compelling. Worlds are precious.

ശാസ്ത്രത്തിന്റെ ഉത്ഭവം, അതിന്റെ വികാസം,നക്ഷത്രങ്ങളുടെ ഉല്പത്തി,അവയുടെ നിലനില്പ് , അവയുടെ നാശം . ഭൂമിയിൽ ജീവൻ എന്ന പ്രതിഭാസത്തിന്റെ നിലനില്പ് ,പ്രപഞ്ചത്തിലെ മറ്റു ഗ്രഹങ്ങളിൽ അതിനുള്ള സാധ്യത, മനുഷ്യരായ നാം ഭൂമിയോട് കാണിക്കുന്ന അവഗണന , ബഹിരാകാശ യാത്രകളുടെ വിശേഷങ്ങൾ അങ്ങനെ വൈവിധ്യവും വ്യത്യസ്തവുമായ ഒട്ടേറെ വിഷയങ്ങളെ പ്രതിപാദിക്കുന്ന ഒരു പുസ്തകമാണിത്. പ്രപഞ്ചത്തിന്റെ വലിപ്പം അതിൽ മനുഷ്യരായ നമ്മുടെ സ്ഥാനം,നിസാരത അങ്ങനെ പല അസ്തിത്വ ചിന്തകളും ഈ പുസ്തകവായനയിലുടനീളം നമ്മളോടോപ്പമുണ്ടാകും എന്ന് തീർച്ച.

ശാസ്ത്ര വീക്ഷണങ്ങൾ നിരന്തരമായ മാറ്റത്തിനു വിധേയമായി കൊണ്ടിരിക്കുന്നതിനാൽ 1980 തിൽ പ്രസിദ്ധീകരിച്ച ഒരു ശാസ്ത്ര ഗ്രന്ഥത്തിന് ഇന്നെന്തു പ്രസക്തി എന്ന് തോന്നാം,ഇത് എഴുതുന്ന സമയത്തെക്കാളും ശാസ്ത്രം ഒരുപാടു പുതിയ അറിവുകൾ സ്വന്തമാക്കി എന്ന കാര്യത്തിൽ തർക്കമില്ല. എന്നിരിക്കിലും കേവലം ശാസ്ത്ര വിഷയങ്ങൾക്കുപരി നമ്മുടെ ചിന്തയിൽ ഒരു പാടു വാതായനങ്ങൾ തുറന്നിടുന്ന ഒരു പുസ്തകം എന്ന നിലയിൽ ഈ പുസ്തകം ഇപ്പോഴും പ്രസക്തമാണ് .

താല്പര്യമുള്ളവർക്ക് പുസ്തകം സൗജന്യമായി വായിക്കുവാൻ ഇവിടെ ക്ലിക്ക് ചെയ്യുക.

വികടകവി
മനുഷ്യരാശി നേടിയ പുരോഗതിയിൽ ഗ്രീക്ക് ,അയോണിയൻ സംസ്കാരങ്ങൾ നല്കിയ സംഭാവനകളെ വാനോളം പുകഴ്ത്തുന്ന സാഗൻ , ഭാരതീയ സംസ്കാരത്തെ കുറിച്ച് പറയുന്പോൾ പിശിക്കു കാണിക്കുന്നു .എന്നാൽ ലോക രാജ്യങ്ങൾ നടത്തുന്ന ആയുധ പന്തയ മാത്സര്യത്തെക്കുറിച്ച് പറയുന്നിടത്ത് ,അമേരിക്കയ്ക്കും, റഷ്യയ്ക്കും ചൈനയ്ക്കും മറ്റും ഒപ്പം ഇന്ധ്യയ്ക്കും സ്ഥാനമുണ്ട് !

പ്ലേയിംഗ് ഇറ്റ്‌ മൈ വേ (സച്ചിൻ തെണ്ടുൽക്കറുടെ ആത്മകഥ)

2015-06-05T19:27:00.000-07:00

വലിയ പ്രതീക്ഷയോടെയാണ് സച്ചിൻ തെണ്ടുൽക്കറുടെ ആത്മകഥയായ "പ്ലേയിംഗ് ഇറ്റ്‌ മൈ വേ" (Playing It My Way)വായനയ്ക്ക് എടുത്തത്. ഇരുപത്തിയഞ്ച് വർഷത്തോളം ഇന്ത്യൻ ക്രിക്കറ്റിന്റെ എല്ലാമെല്ലാമായിരുന്ന സച്ചിന്റെ ജീവിതത്തെ കുറിച്ച് കൂടുതൽ അറിയുവാൻ, ആ കാലഘട്ടത്തിൽ ജീവിച്ച ഏതൊരാൾക്കും താല്പര്യം തോന്നുന്നത് സ്വാഭാവികം . ഈ ആവേശങ്ങളെയൊക്കെ തല്ലിക്കെടുത്തുന്ന ഒന്നാണ് ഈ പുസ്തകം എന്ന് പറയാതെ നിവൃത്തിയില്ല. വായന യുടെ ഒരു വേളയിലും, ഒരു തരത്തിലുള്ള സംതൃപ്തിയും ഈ പുസ്തകം പ്രദാനം ചെയ്യുന്നില്ല. ബോറിയ മജുംദാർ (Boria Majumdar) എന്ന പത്ര പ്രവർത്തകനാണ് സച്ചിനെ ഇത് തയ്യാറാക്കാൻ സഹായിച്ചിരിക്കുന്നത് . ഇന്ത്യൻ ക്രിക്കറ്റ്ന്റെ സാമൂഹിക ചരിത്രത്തിൽ ഡോക്ട്രേറ്റ് ഉള്ള അദ്ദേഹം ഒരു പ്രബന്ധം തയ്യാറാക്കുന്ന രീതിയിൽ ആണ് ഇതിനെ സമീപിച്ചിരിക്കുന്നത്.

സച്ചിന്റെ ജീവിതത്തിലെ മുഹൂർത്തങ്ങളെ അവലംബിച്ച് വായനയ്ക്ക് -രസകരമായ രീതിയിൽ- പുതിയ മാനങ്ങൾ നല്കുവാൻ പുസ്തകം ശ്രമിക്കുന്നതേയില്ല .സച്ചിന്റെ ജീവിതത്തിലേക്ക് എത്തി നോക്കുന്ന സന്ദർഭങ്ങളെപോലും വളരെ നിർജ്ജീവമായ രീതിയിലാണ് അവതരിപ്പിച്ചിരിക്കുന്നത്. വായന തുടരുന്നതിനുതകുന്ന " താല്പര്യം" ജനിപ്പിക്കുന്നതിൽ പുസ്തകം പരാജയപ്പെടുന്നു.സച്ചിന്റെ കരിയറിലെ ഓരോ മത്സരത്തെയും , വളരെ സൂക്ഷമായി ഈ പുസ്തകം വിശദീകരിക്കുന്നു (പലപ്പോഴും ആവശ്യത്തിലേറെ) . ചുരുക്കത്തിൽ സച്ചിൻ പങ്കെടുത്ത കളികളുടെ പത്ര റിപ്പോർട്ടുകൾ ഒരുമിച്ചു ചേർത്തുവച്ച് വായിക്കുന്ന ഒരു പ്രതീതിയാണ് വായനയുടെ 90 ശതമാനവും നമുക്ക് അനുഭവപ്പെടുന്നത് . പുസ്തകത്തിലുടനീളം നിറഞ്ഞു നില്ക്കുന്ന "ഞാൻ" പ്രയോഗവും ആവശ്യത്തിനും അനാവശ്യത്തിനും ഭാര്യയായ അഞ്ജലിയുടെ 'സ്വാധീനം' പരാമർശിക്കുന്ന രീതിയും വായനക്കാരനിൽ ചെലുത്തുന്ന അലോസരം ചെറുതൊന്നുമല്ല .

സച്ചിനെകുറിച്ച് നമുക്കുള്ള ധാരണകളെ അതെ പടി നിലനിർത്തുന്നു എന്നത് ഈ പുസ്തകത്തിന്റെ ഒരു മേന്മയായി വേണമെങ്കിൽ നമുക്ക് പറയാം . തന്റെ ജീവിതത്തിൽ സച്ചിൻ പുലർത്തുന്ന സംശുദ്ധി ഈ അക്ഷരക്കൂട്ടങ്ങൾക്കുമുണ്ട് എന്ന് നിസംശയം പറയാം .ആരെയും കുറ്റപ്പെടുത്തുകയോ പഴിചാരുകയോ ഒന്നും ചെയ്യാതെ, കാര്യമാത്ര പ്രസക്തമായി പറഞ്ഞു പോകുന്ന ഒരു രീതി . ഒരു 'കുറുമുന്നണി' യുണ്ടാക്കി ഇന്ത്യൻ ക്രിക്കറ്റിനെ മുതലെടുത്ത്‌ നേട്ടങ്ങൾ കൊയ്യാൻ പദ്ധതിയിട്ട് സച്ചിനെ സമീപിക്കുന്ന ഗ്രെഗ് ചാപ്പലിനെ പോലും സച്ചിൻ തന്റെ ആത്മകഥയിൽ ആക്രമിക്കുന്നില്ല. ഇന്ധ്യൻ ക്രിക്കറ്റിനെയാകെ നാണക്കേടിൽ ആഴ്ത്തിയ കോഴ വിവാദത്തെകുറിച്ച് വളരെ ചെറുതായി മാത്രം പരമാർശിക്കുന്ന ഈ പുസ്തകം , വിവാദങ്ങളിൽ നിന്ന് മാറി നില്ക്കുവാനുള്ള സച്ചിന്റെ പ്രകൃതത്തെ വരച്ചു കാട്ടുന്നു.
അതുപോലെ തന്നെ കളിക്കളത്തിൽ പുലർത്തുന്ന മാന്യതയും അനേക സന്ദർഭങ്ങളിൽ നിന്ന് നമുക്ക് ബോധ്യമാകും. സച്ചിന്റെ ഒരു പിടി നല്ല ചിത്രങ്ങൾ ഈ പുസ്തകം സമ്മാനിക്കുന്നു എന്ന ത് ഒരു ആശ്വാസമായി കാണാം ! .

പതിനാല് വയസു മുതൽ സച്ചിന്റെ ജീവിതം പൊതു ജനസമക്ഷമാണ് .പത്രമാധ്യമങ്ങളിലൂടെ ഓരോ മുഹൂർത്തവും നാം നിരന്തരം അറിഞ്ഞു കൊണ്ടുമിരിക്കുകയാണ് .സച്ചിനെ കുറിച്ച് ആവേശത്തോടെ വായിച്ച് അറിയാൻ പുതുതായി ഒന്നും ബാക്കിയില്ലാത്തതാകാം വായനയിൽ രസം തോന്നാത്തതിന്റെ ഒരു കാരണം.വലിയ ഉയർച്ച-താഴ്ചകൾ ഇല്ലാത്ത ഒരു ജീവിതത്തിനുടമയും സ്വതവേ അന്തർ മുഖനുമായ അദ്ദേഹം, ഈ ആത്മ കഥയിലും അങ്ങേയറ്റം മിത ഭാഷിയാണ്. രഹസ്യ വെളിപ്പെടുത്തലുകളും തുടർ വിവാദങ്ങളും ഇല്ലാത്ത ഒന്നും നമ്മെ രസിപ്പിക്കാത്തത് പുസ്തകത്തിന്റെ കുഴപ്പമല്ല മറിച്ച് നമ്മുടെ നമ്മുടെ വായനാ നിലവാരത്തിന്റെതാണ് !!!!!

വാലറ്റം
ഒരു കളിയുടെ തലേ ദിവസം താറാവ് (duck) ന്റെ മാംസം കഴിച്ചാൽ പിറ്റേദിവസം കളിയിൽ ഡക്ക് ആകും എന്നത് വളരെ ഗൌരവമായി അദ്ദേഹം നിരീക്ഷിച്ചിരുന്നുവത്രേ!

ബോധത്തിന്റെ ഉള്ളറകൾ തേടി... (Shadows of the Mind)

2015-05-16T11:57:00.000-07:00

എബ്രഹാം ലിങ്കണ്‍-ന്റെ ഇടതു കാൽ വാഷിംഗ്ടണ്‍ ഡി സി യിൽ ആയിരിക്കുന്പോൾ വലതു കാൽ എവിടെ ആയിരിക്കും? ഒന്ന് ചിന്തിക്കുക പോലും ചെയ്യാതെ , ഞൊടിയിടയിൽ നിങ്ങൾ ഉത്തരം കണ്ടെത്തിക്കാണുമെന്നുറപ്പ് . എന്നാൽ അത്യാധുനീക സൂപ്പർ കന്പ്യൂട്ടറുകൾ ഈ ചോദ്യത്തിന് ഉത്തരം കണ്ടെത്തുവാൻ ചിലപ്പോൾ മണിക്കൂറുകൾ ചിലവഴിച്ചേക്കാം എന്ന് പറയുന്പോൾ, ഒരു പക്ഷെ നമ്മൾ അല്പം സംശയിച്ചേക്കാം . കണക്കുകൾ കൂട്ടുന്ന വേഗതയിലും , സങ്കീർണമായവ കൃത്യതയോടെ ചെയ്യുന്ന കാര്യത്തിലും , ഓർമ്മ ശക്തിയിലും കന്പ്യൂട്ടറുകൾ മനുഷ്യനെക്കാൾ കേമന്മാരാണ്.ചെസ്സ്‌ പോലെ , ബുദ്ധി ഉപയോഗിക്കേണ്ടുന്ന കളികളിലും ഓർമ്മ ശക്തിയോടൊപ്പം , മനസ്സാന്നിദ്ധ്യവും (Presence of mind) പരീക്ഷിക്കപ്പെടുന്ന ജെപർഡി (Jeopardy) പോലുള്ള ഗെയിം ഷോ കളിലും കന്പ്യൂട്ടറുകൾ മനുഷ്യനുമേൽ വിജയം നേടി കഴിഞ്ഞിരിക്കുന്നു . എന്നിരുന്നാലും നമ്മുടെ ചിന്താശേഷി ഉപഗോഗിച്ച്, അനായാസേന, കണ്ടെത്താൻ കഴിയുന്ന പല ചോദ്യങ്ങളും കന്പ്യൂട്ടറുകൾക്ക് ഇന്നും കീറാമുട്ടിയാണ് .

ഇവിടെ ബുദ്ധി ,എന്ന് സാമാന്യമായി നാം വിവക്ഷിക്കുന്ന ഗുണത്തെ കുറച്ചു കൂടി സൂക്ഷമായി മനസിലാക്കേണ്ടതുണ്ട് . വേഗത്തിൽ കണക്കുകൂട്ടാനുള്ള കഴിവിനെയും, ഓർമ്മ ശക്തിയെയും, കാര്യങ്ങൾ പെട്ടന്ന് ഗ്രഹിച്ചു ഉചിതമായ തീരുമാനത്തിലെത്തുവാനുള്ള കഴിവിനെയും ഒക്കെ ചേർത്താണ് നാം ബുദ്ധി എന്ന് സാമാന്യമായി പറയുന്നത്.ഇവയിൽ ആദ്യം പറഞ്ഞ രണ്ടു ഗുണങ്ങൾ കന്പ്യൂട്ടറുകൾക്ക് ഒരു ശരാശരി മനുഷ്യനെക്കാൾ കൂടുതൽ ഉണ്ട് എന്ന കാര്യത്തിൽ ഒരു തർക്കവുമില്ല . എന്നാൽ മൂന്നാമത്തെ ഗുണമാകട്ടെ കന്പ്യൂട്ടറുകൾക്ക് തീരെയില്ലതാനും. എന്തായിരിക്കാം ഇതിനു കാരണം ? മനുഷ്യന്റെ ചിന്താശേഷി അതേപടിയുള്ള കന്പ്യൂട്ടറിനെ നിർമ്മിക്കുവാൻ സാധിക്കുമോ ? ഈ ചോദ്യങ്ങളെ കൂടുതൽ ആഴത്തിൽ അന്വേക്ഷിക്കുന്ന ഒന്നാണ് സർ റോജർ പെൻ റോസിന്റെ (Roger Penrose)   'ഷാഡോസ് ഓഫ് ദി മൈൻഡ്' (Shadows of the Mind) എന്ന പുസ്തകം.

ഗണിതശാസ്ത്രത്തിലൂന്നിയ ഭൌതികശാസ്ത്ര പഠനങ്ങളിൽ ഇന്ന് ജീവിച്ചിരിക്കുന്ന ശാസ്ത്രകാന്മാരിൽ അഗ്രഗണ്യനാണ്,ഓക്സ്ഫോർഡ് യൂണിവേർസിറ്റി പ്രൊഫസ്സർ ആയ സർ റോജർ പെൻ റോസ്. അൽബെർറ്റ് ഐൻസ്റ്റെൻ, സ്റ്റീഫൻ ഹോക്കിംഗ് തുടങ്ങിയ മഹാരഥൻമാരുടെ ഗണത്തിൽ പെടുത്താവുന്ന ഒരു തിയററ്റിക്കൽ ഭൌതികശാസ്ത്രഞ്നാണ് ആണ് അദ്ദേഹം . ഗണിത ശാസ്ത്രത്തിലും , ശാസ്ത്രവും തത്വശാസ്ത്രവും തമ്മിൽ സന്ദിക്കുന്ന മേഖലകളിലും ശ്രദ്ധേയമായ ഒട്ടേറെ സംഭാവനകൾ നല്കിയ അദ്ദേഹം , മനുഷ്യ മനസിന്റെ പ്രവർത്തന രഹസ്യങ്ങളെ കുറിച്ചുള്ള പഠനത്തിൽ കഴിഞ്ഞ കുറെക്കാലമായി വ്യാപൃതനാണ്.

ബുദ്ധിയെ കുറിച്ച് പറയുന്പോൾ അതിന്റെ കേന്ദ്രമായ മസ്തിഷ്കത്തെ കുറിച്ച് പറയാതെ പറ്റില്ലലോ . മനുഷ്യ മസ്തിഷ്കത്തെ പ്രധാനമായും സെറിബ്രം(Cerebrum) , സെറിബെല്ലം(Cerebellum) എന്നിങ്ങനെ രണ്ടായി തിരിക്കാം . ഇതിൽ ബോധപൂർവമായ ചെയ്തികളെ നിയന്ത്രിക്കുന്നതും ഏകോകിപ്പിക്കുന്നതും സെറിബ്രം ആണ് , മറ്റു പ്രവർത്തനങ്ങളെ നിയന്ത്രിക്കുന്ന ഭാഗമാണ് സെറിബെല്ലം . ഉദാഹരണമായി നിങ്ങൾ ഡ്രൈവിംഗ് പഠിക്കുക ആണെന്ന് കരുതുക , അത് സ്വയാത്തമാകുന്നത് വരെ സെറിബ്രം ആണ് അതിനു നേതൃത്വം കൊടുക്കുന്നത് . നിങ്ങൾ അതീവ ശ്രദ്ധയോടെ , 'ബോധ' ത്തോടെയാണ് എല്ലാം ചെയ്യന്നത് . എന്നാൽ പത്തു കൊല്ലമായി വാഹനം ഓടിക്കുന്ന ഒരാൾ , വളരെ പരിചിതമായ ഒരു റോഡിലൂടെ വാഹനം ഓടിക്കുക ആണെന്ന് കരുതുക . ഇവടെ ശ്രദ്ധയും ബോധവും വളരെ കുറവ് മതിയെന്ന് നമുക്കറിയാം . വേഗത വ്യതാസം വരുന്പോൾ അറിയാതെ തന്നെ ഗിയർ മാറ്റുന്നതും, വളവുകളിലും മറ്റും വേഗത കുറയ്ക്കുന്നതും ഹോണ്‍ മുഴക്കുന്നതും ഒക്കെ സ്വാഭാവികമായി തന്നെ ചെയ്യപ്പെടുന്ന ചെയ്തികളായി മാറുന്നു . ഇത്തരം ഡ്രൈവിംഗ് കളെ സെറിബെല്ലം ആണ് നിയന്ത്രിക്കുന്നത്.   സെറിബെല്ലത്തെ അപേക്ഷിച്ച് സെറിബ്രത്തിൽ ന്യൂറോണുകളുടെ എണ്ണം പതിന്മടങ്ങ്‌ കൂടുതൽ ആയതിനാൽ , അതായിരിക്കാം ഈ 'ബോധ' വ്യത്യാസത്തിനു കാരണം എന്നാണ് ആദ്യ കാലങ്ങളിൽ ശാസ്ത്രലോകം കരുതിയിരുന്നത് , എന്നാൽ തുടർന്നുള്ള പഠനത്തിൽ , കൂടുതൽ കെട്ടു പിണഞ്ഞു കിടക്കുന്ന പർകിൻജി( Purkinje cell) സെല്ലുകൾ സെറിബെല്ലത്തിൽ കൂടുതൽ ആയതിനാൽ, ന്യൂറോണ്‍ ബന്ധനങ്ങളുടെ സാന്ദ്രത രണ്ടു ഭാഗത്തും ഏറക്കുറെ ഒരുപോലെ ആണെന്ന് കണ്ടെത്തി .ബോധത്തിന്റെ രഹസ്യം മറ്റെന്തൊ ആയിരിക്കാം മെന്ന് ഗവേഷകർ ചിന്തിച്ചു തുടങ്ങി .

ഒരു ചോദ്യത്തിൽ നിന്ന് ഉത്തരത്തിലെത്തുവാൻ മനുഷ്യ ബുദ്ധിയും കന്പ്യൂട്ടറുകളും സഞ്ചരിക്കുന്ന വഴികൾ തികച്ചും വ്യത്യസ്തമാണ്. അല്പം സാങ്കേതികമായി പറഞ്ഞാൽ തികച്ചും 'കംപ്യൂട്ടേഷണൽ' ആണ് കന്പ്യൂട്ടർ ബുദ്ധിയെങ്കിൽ , അതിനെ അതിക്രമിച്ചു നില്ക്കുന്ന ഏതോ ഒരു ഘടകം മനുഷ്യനുണ്ട്. ഈ ഘടകത്തെയാണ് നാം 'മനസ്' അഥവാ 'തിരിച്ചറിവ്' എന്നതു കൊണ്ട് വിവക്ഷിക്കുന്നത് . മനുഷ്യൻ കാര്യങ്ങൾ അറിയുക മാത്രമല്ല ; അറിയുന്നു എന്ന് അറിയുക കൂടി ചെയ്യുന്നു. ഇത്തരത്തിൽ മനുഷ്യനുള്ള 'ഗ്രാഹ്യം' നമ്മുടെ മസ്തിഷ്കത്തിൽ നടക്കുന്ന ഒരു കൂട്ടം കണക്കു കൂട്ടലുകളുടെ പരിണിത ഫലമാണോ എന്ന് ശാസ്ത്രകാരന്മാർ പഠനം തുടങ്ങിയിട്ട് കാലമേറെയായി . കണക്കു കൂട്ടലുകളുടെ വേഗത മാത്രമാണ് 'ഗ്രാഹ്യ' ത്തിൽ മനുഷ്യനുള്ള മുൻ തൂക്കത്തിന് കാരണമെന്നാണ് ആദ്യ കാലങ്ങളിൽ ശാസ്തകാരന്മാർ കരുതിയിരുന്നത് . എന്നാൽ കന്പ്യൂട്ടറുകൾ അവയുടെ പ്രോസിസ്സിംഗ് സ്പീഡും മെമ്മറിയും ഒക്കെ പതിന്മടങ്ങ് വർദ്ധിപ്പിച്ചിട്ടും ഈ രീതിയിലുള്ള പുരോഗതി കാണിക്കാത്തത് ഗവേഷകരെ മറ്റു പല രീതിയിലും ചിന്തിപ്പിച്ചു തുടങ്ങി.

അൽഗോരിതങ്ങളെ (Algorithm) അടിസ്ഥാനമാക്കിയാണ് കന്പ്യൂട്ടറുകൾ പ്രവർത്തിക്കുന്നത് .ഒരു ചോദ്യത്തിന്റെ ഉത്തരം കണ്ടെത്തുവാനായി, ഒന്നിൽ നിന്ന് അടുത്തതിലേക്ക് കൃത്യമായി,പുരോഗമിക്കുന്ന പടവു (steps) കളുടെ സഞ്ചയത്തെയാണ് ഗണിത ശാസ്ത്രപരമായി അൽഗോരിതം എന്ന് പറയുന്നത്. നമ്മുടെ നിത്യ ജീവിതത്തിൽ നാം നേരിടുന്ന എല്ലാ സന്ദർഭങ്ങളേയും കന്പ്യൂട്ടർ ബുദ്ധിക്ക് വഴങ്ങുന്ന രീതിയിലുള്ള അൽഗോരിതങ്ങളാക്കി മാറ്റാൻ കഴിയില്ല എന്നും 'കണക്കു കൂട്ടലുകളെ' അതിക്രമിച്ചു നില്ക്കുന്ന ഒരു 'തിരിച്ചറിവ്‌' മനുഷ്യനുണ്ട് എന്നും നിരവധി ഉദാഹരണങ്ങൾ നിരത്തി പെൻ റോസ് വിശദമാക്കുന്നു . മനുഷ്യ മനസിന്റെ പ്രവർത്തനം   'കണക്കു കൂട്ടലുകൾക്ക് ' അതീതമാണെന്ന് പറയുന്പോൾ , മനുഷ്യരായ നമ്മിൽ നിന്ന് വേറിട്ട്‌ നില്ക്കുന്ന,'ദൈവിക' മായ, ഒന്നായല്ല അതിനെ കാണേണ്ടുന്നത് .തികച്ചും സങ്കീർണ്ണമായതിനാൽ നമ്മുടെ ബുദ്ധിക്കു പിടിതരാത്ത ഒന്നായും മനസിനെ കാണേണ്ടുന്നതില്ല . ഉദാഹരണമായി കാലാവസ്ഥ അതീവ സങ്കീർണ്ണമായ ഒന്നാണ് എന്നാൽ അവ 'കണക്കു കൂട്ടലുകൾക്ക് ' വിധേയമായവ ആകയാൽ കാലാവസ്ഥാ പ്രവചനത്തിൽ കന്പ്യൂട്ടറുകൾ കൃത്യത കൊണ്ട് വന്നു കഴിഞ്ഞു.

'കംപ്യൂട്ടേഷണൽ' ആയ ഒരു ഭാഗം നമ്മുടെ ബുദ്ധിക്കും ഉണ്ടെന്ന കാര്യത്തിൽ തർക്കമില്ല . നമ്മുടെ തലച്ചോറിന്റെ അടിസ്ഥാന ഘടകമായ ന്യൂറോണ്‍ ആണ് ഇത്തരം കണക്കു കൂട്ടലുകളുടെ കേന്ദ്രമെന്നു ഈ രംഗത്തെ ഗവേഷണങ്ങൾ സ്ഥിതീകരിച്ചിട്ടുണ്ട്‌ . എന്നാൽ നാം ഒരു കാര്യത്തെ വിഭാവനം (വിഷ്വലൈസ്) ചെയ്യുന്നതും അതിനനുസൃതമായി തീരുമാനങ്ങൾ എടുക്കുന്നതും ബുദ്ധിയുടെ 'കംപ്യൂട്ടേഷണൽ'ഭാഗം അല്ല . ഉദാഹരണമായി , ഒരു മീറ്റർ നീളമുള്ള ഒരു കയറിൽ ഒരു കുരുക്ക് ഉണ്ടോ എന്ന് അറിയണം എന്ന് കരുതുക . മനുഷ്യ ബുദ്ധി വളരെ വേഗം അതിന്റെ ഉത്തരത്തിൽ എത്തുന്നു എന്നാൽ കന്പ്യൂട്ടറുകൾക്ക് സങ്കീർണമായ ഒട്ടേറെ കണക്കുകൂട്ടലുകൾക്ക് ശേഷമേ ഉത്തരം കണ്ടുപിടിക്കാൻ സാധിക്കുകയുള്ളൂ.

ഗണിതശാസ്ത്രപരമായി നിർവചിക്കുവാൻ കഴിയുന്ന സംവിധാനങ്ങൾ , സ്വയം പര്യാപ്‌തമായി വർത്തിക്കുവാൻ സാദ്ധ്യമല്ല എന്ന് ഗൊദെൽ ന്റെ അപൂർണത സിദ്ധാന്തം (Gödel's incompleteness theorems), ചർച് -ടൂറിംഗ് തീസിസ് (Church–Turing thesis) എന്നിവയെ ഉദ്ധരിച്ചു കൊണ്ട് പെൻ റോസ്സ് വിവരിക്കുന്നു. അതുകൊണ്ട് തന്നെ കന്പ്യൂട്ടറുകൾക്ക് ഈ തിരിച്ചറിവ് ഒരിക്കലും കൈവരിക്കുവാൻ കഴിയില്ല എന്ന് പെൻ റോസ് നിസംശയം പറയുന്നു . നമ്മുടെ ഇന്റെലിജെൻസ് -മായി താരതമ്യം ചെയ്യ്മ്പോൾ അർട്ടിഫിഷ്യൽ ഇന്റെലിജെൻസ് (Artificial intelligence ) എന്നും അപൂർണമായി തന്നെ തുടരും എന്ന പെൻ റോസ് ന്റെ ശക്തവും യുക്തി ഭദ്രവുമായ നിരീക്ഷണം ഈ മേഖലയിലെ പല ഗവേഷകരേയും അസ്വസ്ഥരാക്കി . ആ മേഖലയുടെ വികാസത്തിന് അടിത്തറ പാകിയ ഗൊദെൽ ന്റെയും അലെൻ ടൂറിംഗ് ന്റെയും സിദ്ധാന്തങ്ങളുടെ ചുവടുപിടിച്ചു തന്നെയാണ് ഈ നിഗമനത്തിലെത്തിച്ചേർ ന്നിരിക്കുന്നത് എന്നത് വായനക്കാരായ നമ്മളിൽ കൌതുകം ജനിപ്പിക്കും. പുസ്തകത്തിന്റെ ആദ്യ പാദത്തിൽ ഈ ആശയത്തെ ഒട്ടേറെ ഉദാഹരണങ്ങൾ നിരത്തി സ്ഥാപിക്കുന്നുണ്ട്.

നമ്മുടെ മനസ്സ് 'കംപ്യൂട്ടേഷണൽ' അല്ല എന്ന് സ്ഥാപിച്ചതിനു ശേഷം , അതിന്റെ ഉള്ളിലേക്ക് കടക്കുകയാണ് പുസ്തകത്തിന്റെ രണ്ടാം ഭാഗത്തിൽ. ഇവിടെയാണ് ഭൌതിക ശാസ്ത്രത്തിലേക്ക് വായനക്കാരെ കൊണ്ടുപോകുന്നത് . നമ്മുടെ കണ്മുൻപിൽ നാം കാണുകയും ഇടപഴകുകയും ചെയ്യുന്ന നമ്മുടെ ഭൌതിക ലോകം വിശദമാകുന്ന ക്ലാസിക്കൽ ഫിസിക്സും, സബ് അറ്റോമിക് കണങ്ങളുടെ പ്രവർത്തനത്തെ വിവരിക്കുന്ന ക്വാണ്ടം മെക്കാനിക്സും(Quantum mechanics ) മാണ് നമ്മുടെ മനസിന്റെ പ്രവർത്തനത്തെകുറിച്ച് പറയുവാൻ പെൻ റോസ് കൂട്ട് പിടിക്കുന്നത് . ക്ലാസിക്കൽ ഫിസിക് സിദ്ധാന്തങ്ങൾ പൂർണമായും കണക്കു കൂട്ടലുകൾക്ക് വിധേയവും ക്വാണ്ടം മെക്കാനിക്സ് സിദ്ധാന്തങ്ങൾ 'കണക്കു കൂട്ടലുകൾക്ക്' വഴങ്ങി നിൽക്കാത്തവയുമാണെന്നതാണ് . നേരത്തെ വ്യക്തമാക്കിയത് പോലെ നമ്മുടെ ബുദ്ധിക്കും കംപ്യൂട്ടേഷണൽ-ലും നോണ്‍ കംപ്യൂട്ടേഷണലുമായ ഭാഗങ്ങൾ ഉള്ളതിനാലാണ് ഇത്തരമൊരു അന്വേക്ഷണത്തിന്റെ പ്രസക്തി.

സബ് അറ്റോമിക് തലങ്ങളിലെ പ്രതിഭാസങ്ങളെ എല്ലാം ക്വാണ്ടം മെക്കാനിക്സ് യുക്തി ഭദ്രമായി വിശദീകരിക്കുന്നുണ്ടെങ്കിലും ഭൌതിക തലത്തിലേക്ക് വരുന്പോൾ ഈ വിശദീകരണങ്ങൾ പൂർണ മല്ലാതായി തീരുന്നു. "ഷോഡിങ്ങറുടെ പൂച്ച" (Schrödinger's cat)എന്നറിയപ്പെടുന്ന വിശ്വപ്രസിദ്ധമായ ചിന്താ പരീക്ഷണത്തിൽ , പൂച്ച ഒരേ സമയം മരിക്കുകയും ജീവിച്ചിരിക്കുകയും ചെയ്യുന്ന അവസ്ഥ യുണ്ടാകുന്നു എന്നാൽ പ്രായോഗിക തലത്തിൽ അത് സംഭവിക്കുന്നില്ല. ഒരുവൻ നിരീക്ഷിക്കുന്നത് വരെ പൂച്ച രണ്ടവസ്ഥയിലും നിലനില്ക്കുന്നു വെന്നും നിരീക്ഷിക്കപെടുന്ന സമയത്ത് അവയിലൊന്നിലേക്ക് ചുരുങ്ങുന്നുവെന്നുമാണ് ഭൌതിക ശാസ്ത്രകാന്മാർ നല്കുന്ന വിശദീകരണം.

നാം ഇന്ന് കാണുന്ന അർട്ടിഫിഷ്യൽ ഇന്റെലിജെൻസ് -ന്റെ വളർച്ച പൂർണമായും മറ്റൊരു ദിശയിൽ ആണെന്നും , അവിടെ നാം എത്ര പുരോഗതി കൈവരിചാലും മനുഷ്യ മനസിന്‌ സമാനമായ ഒന്നും പുന സൃഷ്ടിക്കാൻ കഴിയില്ല എന്നും പെൻ റോസ് വാദിക്കുന്നു .മനുഷ്യ മനസിന്റെ ഭൌതിക മായ അടിത്തറയും അതിന്റെ പ്രവർത്തനത്തെ കുറിച്ചും മനസിലാക്കാൻ പുതിയ രീതിയിലുള്ള അന്വേക്ഷണം വേണമെന്നും ഈ പുസ്തകം പറയുന്നു .

Roger Penrose

ഭൌതിക ശാസ്ത്രവും ജൈവ ശാസ്ത്രവും കൈകോർത്ത് കൊണ്ടുള്ള ഒരു സിദ്ധാന്തത്തിനു മാത്രമേ 'ബോധത്തെ' പൂർണമായും നിർവചിക്കുവാൻ സാധിക്കുകയുള്ളൂ എന്നും കോശങ്ങളുടെ അടിസ്ഥാന ഘടകം ആയ സൈറ്റോസ്കെലിട്ടൻ(cytoskeleton) -ലെ ടുബുലർ പ്രൊട്ടീൻ ആയ മൈക്രോ ടൂബ്യൂൾസ് -ൽ ഇപ്രകാരമുള്ള ഒബ്ജെറ്റിവ് റിഡക്ഷൻ സംഭാവിക്കുന്നതാകാം നമ്മുടെ 'ബോധ' ത്തിന്റെ അടിസ്ഥാനം എന്നതാണ് പെൻ റോസ്സ് മുന്നോട്ടു വയ്ക്കുന്ന നിർദേശം.
നമ്മുടെ ശരീരത്തിലെ എല്ലാ കോശങ്ങളിലും കാണപ്പെടുന്ന മൈക്രോ ടൂബ്യൂൾസ് ആണ് നമ്മുടെ ബോധത്തിന് കാരണം എങ്കിൽ നമുടെ ശീരത്തിലെ എല്ലാ അവയവങ്ങൾക്കും ബോധം ഉണ്ടാകേണ്ടതല്ലേ എന്ന ചോദ്യം സ്വാഭാവികമാണ് . അതിനുപരി, പരമെസിയം പോലെയുള്ള ഏക കോശ ജീവികളിൽ പോലും മൈക്രോ ടൂബ്യൂൾസ് (Microtubule ) ഉണ്ടെന്നു പറയുന്പോൾ പെൻ റോസ്സ് മുന്നോട്ടു വയ്ക്കുന്ന സിദ്ധാന്തം സംശയത്തിന്റെ നിഴലിൽ വരുന്നു. കുറഞ്ഞപക്ഷം കൂടുതൽ ആഴത്തിലുള്ള പഠനങ്ങൾ ആവശ്യമാണെന്ന ബോധ്യം വായനക്കാരന് വരുന്നു .

തന്റെ നിർദേശങ്ങൾ പൂർണമായും സ്ഥിതീകരിക്കരപ്പെടുവാൻ പഠനങ്ങൾ ആവശ്യമാണെന്നും ,നിലവിലുള്ള വിക്ഞാനം അനുസരിച്ച് , വിശ്വാസയോഗ്യമായ ഒന്ന് മാത്രമാണിത് എന്നും പെൻ റോസ്സ് മുന്നറിയിപ്പ് നല്കുന്നുണ്ട് . നമ്മുടെ 'ബോധം' ത്തിന്റെ അടിസ്ഥാന തലത്തിലേക്ക് പൂർണമായും വിശദീകരിക്കുന്ന സിദ്ധാന്തങ്ങളൊന്നും നിലവിലില്ലാത്ത പശ്ചാതലത്തിലാണ് പെൻ റോസ്സിന്റെ ഈ സിദ്ധാന്തം പ്രസക്തമാകുന്നത് .

ഈ നിർദേശത്തെ അനുകൂലിക്കുകയും പ്രതികൂലിക്കുകയും ചെയുന്ന വിദഗ്ദ്ധർ ശാസ്ത്ര ലോകത്തുണ്ട് . കൂടുതൽ കൃത്യതയുള്ള ഉത്തരങ്ങൾ തേടിയുള്ള അക്ഷീണ പരിശ്രമം ലോകത്തിലെ വിവധ പരീക്ഷണ ശാലകളിൽ നടന്നുകൊണ്ടിരിക്കുകയാണ് . അത്തരം സംരംഭങ്ങളെ കുറിച്ച് കൂടുതൽ മനസിലാക്കുന്നതിന്റെ ആദ്യപടിയായി വേണം ഈ പുസ്തക പാരായണത്തെ കാണാൻ.

ആടുജീവിതം

2014-12-31T08:50:00.001-08:00

സാധാരണക്കാരായ വായനക്കാരുടെ പ്രിയം ഒന്നു കൊണ്ടു മാത്രം പ്രശസ്തിയുടെ കൊടുമുടികൾ കയറിയ ഒരു നോവൽ ആണ് ബെന്യാമിന്റെ 'ആടുജീവിതം'.പുഴയില്‍നിന്ന് മണല്‍വാരി ഉപജീവനം കഴിച്ചിരുന്ന നാട്ടിന്‍പുറത്തെ നജീബ് എന്ന ചെറുപ്പക്കാരന്‍ ജീവിതത്തിൽ നേട്ടങ്ങൾ ഉണ്ടാക്കുവാൻ ആഗ്രഹിച്ച് , ഹക്കീം എന്ന സുഹൃത്തിനോടൊപ്പം, സൗദി അറേബ്യയിലേക്ക് പുറപ്പെടുന്നു. കേരളത്തിൽ നിന്ന് ഗൾഫ് രാജ്യങ്ങളിൽ പ്രവാസ ജീവിതം നയിക്കുന്ന ലക്ഷക്കണക്കിന്‌ സാധാരണക്കാരുടെ പ്രതീകമാണ് നജീബ് . ട്രാവൽ എജെന്റും മറ്റു സുഹൃത്തുകളും പറഞ്ഞിരുന്നത് പോലെ വിസ സ്പോണ്‍സർ ചെയ്തിരുന്ന അറബി ,അല്പം വൈകി എങ്കിലും, എയര്‍പോട്ടില്‍ നിന്നും അവരെ കൂട്ടികൊണ്ട് പോകുന്നു. അതുവരെ തികച്ചും സ്വാഭാവികമായി തോന്നുന്ന ഒരു കഥ പിന്നീട് വായനക്കാരെ അന്പരപ്പിക്കുന്ന ഒരു തലത്തിലേ ക്ക് വളരുകയാണ് ചെയ്യുന്നത്. മരുഭൂമിക്ക് നടുവില്‍ ഏകാന്തവും വിജനവുമായ ഒരു ആടു ഫാമില്‍ എത്തിപ്പെട്ട നജീബിന്റെ തുടര്‍ന്നുള്ള ജീവിതം, നമ്മുടെ സങ്കല്‍പങ്ങള്‍ക്കപ്പുറത്തുള്ള ദൈന്യതയുടെയും പീഡയുടെയും ഏകാന്തതയുടെയും കദനകഥയാണ്. കുടിക്കുവാൻ ഒരിറ്റു വെള്ളമോ , ഒന്നു മിണ്ടുവാൻ ഒരു ജീവിയോ പോലും കൂടെയില്ലാതെയുള്ള നരകതുല്യമായ ജീവിതം. രക്ഷപെടുവാൻ അതിവിദൂരമായ ഒരു സാദ്ധ്യതപോലുമില്ലാതെ നജീബ് അവിടെ കഴിച്ചു കൂട്ടുന്ന ഓരോ നിമിഷവും വായനക്കാരായ നാം അസ്വസ്ഥരാകും എന്നു തീർച്ച. അതിനൊടുവിൽ അയാൾ അതിസാഹസികമായി രക്ഷപ്പെടുന്നു.അതിനു ശേഷമാണ് അയാൾ അറിയുന്നത് തന്നെ കൂട്ടിക്കൊണ്ടു പോയത് , തനിക്കു വിസ നല്കിയ അറബി അല്ലായിരുന്നു എന്ന സത്യം . അതോടെ നമ്മുടെ ഓരോരുത്തരുടെയും 'ജീവിതം' എന്ന ഈശ്വരന്റെ പകിടകളിയെക്കുറിച്ച് ഓരോ വായനക്കാരും ചിന്തിച്ചു പോകുമെന്നുറപ്പ്.

വലിയ ഗിമിക്കുകൾ ഒന്നുമില്ലാത്ത വളരെ സാധാരണവും സ്വതസിദ്ധവുമായ ശൈലിയിൽ ആണ് ഈ നോവലിന്റെ ആഖ്യാനം. വളരെ ലളിതമായ ഭാഷയില്‍ ആണ് ബെന്യാമിന്‍ നജീബിന്റെ ദുഖങ്ങളെയും, പ്രാര്‍ഥനകളെയും, സ്വപ്നങ്ങളെയും, പ്രതീക്ഷകളെയും, സഹനത്തെയും നോവലില്‍ അവിഷ്കരിച്ചിട്ടുള്ളത് . എന്നിരുന്നാലും നമ്മുടെ മനസ്സിൽ തറയ്ക്കുന്ന , നമ്മെ ആഴത്തിൽ ചിന്തിപ്പിക്കുന്ന ഒട്ടനവധി വാചക ശകലങ്ങൾ ഇതിൽ അടങ്ങിയിട്ടുണ്ട്. താഴെ കൊടുത്തിരിക്കുന്ന ഏതാനും വാചകങ്ങൾ ശ്രദ്ധിക്കുക :

"നാം അനുഭവിക്കാത്ത ജീവിതങ്ങള്‍ എല്ലാം നമുക്ക് വെറും കെട്ടുകഥകള്‍ മാത്രമാണ് "

"ആഗ്രഹിക്കുമ്പോള്‍ നിര്‍ഭാഗ്യങ്ങള്‍ പോലും നമ്മെ തേടി വരാന്‍ മടിക്കുന്നു എന്നത് അത്ര കഷ്ടമാണ്..".

"അങ്ങനെ എത്ര അവസരങ്ങള്‍ നാം ഓരോരുത്തരും വേണ്ടെന്നു വയ്ക്കുന്നു അല്ലെ? കൊതിച്ച കൊതിച്ചിരുന്ന സുവര്‍ണ പാത്രം കൈയില്‍ കിട്ടി കഴിയുമ്പോള്‍ അനാഥമായി വലിച്ചെറിയുക. അതപ്പോള്‍ ഉപയോഗിക്കാതിരിക്കുക എന്നതും നമ്മുടെ ജീവിതത്തിന്റെ ഒരു നിയോഗം."

"പണക്കാരന്റെ വണ്ടിയിലും വല്ലപ്പോഴും അള്ളാഹു സഞ്ചരിക്കുമെന്ന് എനിക്കന്നേരം മനസ്സിലായി "

ആലോചിക്കുംതോറും സത്യമെന്ന് നമുക്ക് തന്നെ പലവട്ടം ബോദ്ധ്യം വന്നിട്ടുള്ളവയാണിത്‌ എന്ന കാര്യത്തിൽ തർക്കമില്ല.

മരുഭൂമിയിലെ ആകാശത്തെക്കുറിച്ചുള്ള ഈ വർണ്ണന ശ്രദ്ധിക്കുക :

''അതിരുകള്‍ നരച്ച ഒരു നീലക്കൊട്ട ഞങ്ങള്‍ക്കു മുകളില്‍ കമിഴ്ത്തിവച്ചിരിക്കുന്നത് പോലെയാണ്. ആ നടത്തത്തിനിടയില്‍ എനിക്ക് ആകാശത്തെപ്പറ്റി തോന്നിയത്. മരുഭൂമിയുടെ ഏതോ ഒരു കോണില്‍ ആ കൊട്ടയുടെ ഒരു വശം ആരംഭിക്കുന്നു. അതു പതിയെ ഉയര്‍ന്നുപൊങ്ങി എന്റെ ശിരസ്സിന്റെ മുകളിലെത്തുമ്പോള്‍, ഏറ്റവും ഉയര്‍ന്ന് പതിയെ താഴ്ന്നുപോയി മറ്റൊരു കോണില്‍ അവസാനിക്കുന്നു. ആ കൊട്ടയ്ക്കുള്ളില്‍ അടയ്ക്കപ്പെട്ടുപോയ കോഴിക്കുഞ്ഞുങ്ങളാണ് ഞങ്ങള്‍. എങ്ങനെയും അതു പൊക്കി പുറത്തുകടക്കണം. അതിന് ആ അതിരുവരെയെങ്കിലും എത്തണ്ടേ? എത്ര നടന്നാലും എത്താത്ത ഒരു അതിര്...''

പീഡനങ്ങള്‍ക്കും ദുരന്തങ്ങള്‍ക്കും പ്രകൃതി പ്രതിഭാസങ്ങള്‍ക്കും മുന്‍പിന്‍ ഇങ്ങനെ ഗ്രാമീണമായ നിഷ്‌കളങ്കതയോടെ, നിര്‍വ്യാജമായ കൗതുകത്തോടെ, നില്‍ക്കാന്‍ സന്നദ്ധതകാട്ടുന്ന നജീബിന്റെ മനസ്സാണ് ഈ നോവലിനെ വ്യത്യസ്തമാക്കുന്നതും ഹൃദയത്തോട് ചേര്‍ത്തു പിടിക്കാന്‍ നമ്മെ പ്രേരിപ്പിക്കുന്നതും . താന്‍ ആഗ്രഹിച്ച ജീവിതം തനിക്കു ലഭിച്ചില്ല എന്ന് നിശബ്ദമായെങ്കിലും വേദനിക്കുന്ന ഓരോരുത്തരെയും ഇരുത്തി ചിന്തിപ്പിക്കുന്ന ഒന്നു കൂടിയാണ് നജീബിന്റെ അനുഭവനഗ്നത. ഇവിടെ നമ്മളോട് സംസാരിക്കുന്നത് നജീബ് എന്ന സാധാരണക്കാരനാണ്,പറയത്തക്ക വിദ്യാഭ്യാസ യോഗ്യതയോ സാമൂഹിക ജ്ഞാനമോ ഇല്ലാതെ സമൂഹത്തിന്റെ താഴെത്തട്ടിൽ ജീവിക്കുന്നവൻ , അയാളുടെ സ്വപ്നങ്ങളിലെ ഗൾഫ്‌ അതുകൊണ്ട് തന്നെ സ്വപ്നങ്ങളുടെ മാത്രം രാജ്യമാണ് .

ഗള്‍ഫ്‌ എന്ന മലയാളികളുടെ സ്വപ്നഭൂമിയെ കുറിച്ച് ഒരു പുതിയ കാഴ്ചപ്പാട് തരുന്ന ഈ നോവൽ മരുഭൂമിയില്‍ പെട്ട് പോകുന്ന ഒരു മനുഷ്യന്റെ ജീവിതം അതിന്റെ എല്ലാ തന്മയത്തത്തോടെ അവതരിപിച്ചിരിക്കുന്നു.ബെന്യാമിന്റെ വിവരണങ്ങളെ പരകായ പ്രവേശമെന്നു വിശേഷിപ്പിച്ചാൽ പോലും തെറ്റുണ്ടാവില്ല.

വായനയിൽ ഒരല്പം മുഴച്ചു നില്ക്കുന്നതായി തോന്നിയ ചല കാര്യങ്ങൾ കൂടി സൂചിപ്പിച്ചു കൊള്ളട്ടെ. ആവശ്യത്തിനും അനാവശ്യത്തിനും ഈശ്വരനെ കുത്തിനിറയ്ക്കുവാൻ ബെന്യാമിൻ ബോധപൂർവം ശ്രമിക്കുന്നതായി തോന്നുന്നു. പുസ്തകത്തിന്റെ അനുബന്ധത്തിൽ ചേർത്തിരിക്കുന്ന കുറിപ്പുകളിൽ നിന്ന് യഥാർത്ഥ നജീം അപ്രകാരമുള്ള ഒരു വ്യക്തി അല്ല എന്ന് കൂടി വായിച്ചറിയുന്പോൾ, ഈ മടുപ്പ് കൂടുതൽ പ്രകടമായിത്തീരുന്നു

ദി ഫൗണ്ടന്‍ ഹെഡ്

2014-12-09T05:48:00.003-08:00

അഹംബോധം വെടിഞ്ഞ് നിഷ്‌കാമനായി ജീവിതം നയിക്കുവാന്‍ മനുഷ്യന് സാധിക്കുമോ? മതഗ്രന്ഥങ്ങളും മഹാനുഭാവന്മാരും എല്ലാം ഒരേ സ്വരത്തോടെ ഉദ്‌ഘോഷിക്കുന്നുവെന്ന് നാം ധരിച്ചുവച്ചിരിക്കുന്ന അത്തരം 'നിസ്വാര്‍ത്ഥ ജീവിത'ങ്ങള്‍ നാം മാതൃകയാക്കണമോ? അഥവാ ഒരുവന്റെ പരമമായ ജീവിത ലക്ഷ്യം അതായിരിക്കണമോ ? മൗലികമായ ഇത്തരം ഒട്ടേറെ ചോദ്യങ്ങള്‍ വായനക്കാരില്‍ ഉണര്‍ത്തുന്ന ഒരു നോവല്‍ ആണ് അയന്‍ റാന്റെ 'ദി ഫൗണ്ടന്‍ ഹെഡ്'.

റഷ്യയില്‍ ജനിച്ചു വളര്‍ന്ന്, 1920 ലെ ബോള്‍ഷെവിക് വിപ്ലവത്തിന്റെ ദുരന്തങ്ങള്‍ നേരിട്ട് അനുഭവിച്ച അയന്‍, വ്യക്തി സ്വാതന്ത്ര്യം ഒന്നിനു വേണ്ടി മാത്രം അമേരിക്കയിലേക്ക് കുടിയേറി പ്പാര്‍ത്ത ഒരു വ്യക്തിയാണ്. സമൂഹത്തിന്റെയും ഗവണ്മെന്റിന്റെയും അനാവശ്യമായ ഇടപെടലുകള്‍ വ്യക്തിവികാസത്തെ പ്രതികൂലമായി ബാധിക്കുന്നു എന്ന നിലപാട് വിശദീകരിക്കുന്നതാണ് റാന്റിന്റെ നോവലുകളും ലേഖനങ്ങളുമെല്ലാം. ഇത്തരം ആശയങ്ങളെ പൊതുജനസമക്ഷം അവതരിപ്പിക്കുന്നതിനു തുടക്കംകുറിച്ച ഒരു നോവല്‍ ആണ് 1943 ല്‍ പുറത്തിറങ്ങിയ ദി ഫൗണ്ടന്‍ ഹെഡ്. കഥയില്‍ കഴമ്പില്ല എന്ന കാരണത്താല്‍, പത്തിലകം പ്രസാധകര്‍ നിരസിച്ച ഈ കഥ, പുറത്തിറങ്ങിയ ശേഷം ക്രമേണ ജനശ്രദ്ധ ആകര്‍ഷിക്കുകയായിരുന്നു.

മാതൃഭൂമി ബുക്സ് പ്രസിദ്ധീകരിച്ച ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

ഖസാക്കിന്റെ ഇതിഹാസം

2014-10-14T18:56:00.001-07:00

ചില പുസ്തകങ്ങൾ ആദ്യവായനയിൽ നമുക്ക് വഴങ്ങിത്തരില്ല്ല ; കുതറി മാറുന്ന ഇത്തരം പുസ്തകങ്ങളെ കീഴ്പ്പെടുത്തണമെങ്കിൽ ശ്രദ്ധയോടെയുള്ള പുനർവായന അനിവാര്യം. ഇത്തരത്തിൽ ഒരനുഭവം സമ്മാനിച്ച ഒന്നാണ് 'ഖസാക്കിന്റെ ഇതിഹാസം'. വർഷങ്ങൾക്ക് മുന്പ് വിരസമായിത്തോന്നി, ഒരുവിധം വായിച്ചവസാനിപ്പിച്ച ഈ പുസ്തകം വീണ്ടും വായനയ്ക്കെടുക്കുന്പോ
ൾ, ഏറെ പ്രശംസപിടിച്ചു പറ്റിയ ഈ നോവലിൽ എനിക്ക് ഒരു മതിപ്പും തോന്നാതിരുന്നതെന്തേ? എന്ന ചിന്ത മനസ്സിനെ അലോസരപ്പെടുത്തിയിരുന്നു . 'ഖസാക്കിന്റെ ഇതിഹാസം' പോലെയുള്ള ശക്തമായ ഒരു നോവൽ വായിച്ച് , കഥയിലെ ബിംബങ്ങളെ അപഗ്രഥിച്ച് , ആസ്വദിക്കണമെങ്കിൽ അല്പം 'വായനാ നിലവാരവും' പക്വതയുമൊക്കെ ആവശ്യമാണ്‌. വായനയിലും ആസ്വാദനത്തിലും ആർജിച്ച ഈ 'പക്വത' യാകാം, വർഷങ്ങൾക്കു ശേഷമുള്ള രണ്ടാം വായനയെ കൂടുതൽ ആസ്വാദ്യകരമാക്കിയത്. നോവലിന്റെ ഘടനയെ കുറിച്ചോ എഴുത്തിന്റെ ശൈലിയെ കുറിച്ചോ ഒന്നും ആധികാരികമായി വിലയിരുത്തുവാനോ അതിനെ സംബന്ധിച്ച് ഒരു പ്രബന്ധം അവതരിപ്പിക്കുവാനോ ഒന്നും ഇവിടെ മുതിരുന്നില്ല .തികച്ചും സാധാരണമായ ഒരു (പുനർ) വായനയിൽ ഉളവായ ചില തോന്നലുകൾ ഇവിടെ കുറിക്കുന്നു എന്ന് മാത്രം.

ആദർശത്തിന്റെയും സഹനത്തിന്റെയും പ്രതിപുരുഷന്മാരോ അല്ലെങ്കിൽ ക്രൂരതയുടെയും കുടിലതയുടെയും പര്യായങ്ങളോ ആയിരുന്നു ഒട്ടു മിക്ക മലയാള കഥകളിലെയും കേന്ദ്ര കഥാപാത്രങ്ങൾ. ഈ പതിവ് തെറ്റിക്കുന്ന ഒന്നാണ് ഈ നോവൽ . മലയാള നോവലിന്റെ ചരിത്രത്തെ "ഖസാക്കിനു മുൻപും പിൻപും" എന്ന് രണ്ടായി പതുക്കാം എന്ന് സാഹിത്യ പഠിതാക്കൾ പറയുന്നതിന്റെ കാരണവും മറ്റൊന്നല്ല . ഇവിടെ നായകനായ രവി ഒരു സാധാരണ മനുഷ്യനാണ്. തിന്മയും നന്മയും ഒത്തു ചേർന്ന ഒരു വ്യക്തി.പഠനത്തിൽ അതി സമർഥൻ .. പ്രാചീന ഭാരതീയ ദർശനങ്ങളും അത്യാധുനീക ഭൌതിക ശാസ്ത്രവും തമ്മിലുള്ള ബന്ധത്തെ കുറിച്ച് പ്രമുഖ വിദേശസർവകലാശാലയിൽ പഠനം നടത്തി എങ്കിലും അതു പൂർത്തിയാക്കാതെ ,സംതൃപ്തി തേടി ഒരു ആശ്രമത്തിൽ അഭയം പ്രാപിക്കുന്നു. എന്നാൽ സാഹചര്യം വീണ്ടുമൊരു ഒളിച്ചോട്ടം അനിവാര്യമാക്കുന്നു. അങ്ങനെ 'ഖസാക്ക്' എന്ന കുഗ്രാമത്തിലെ ഏകാദ്ധ്യാപക വിദ്യാലയത്തിൽ , അദ്ധ്യാപക വേഷമെടുക്കാൻ തീരുമാനിക്കുന്നു . അതിനായി രവി കൂമൻ കാവിൽ ബസ്സിറങ്ങുന്നിടത്താണ് കഥ തുടങ്ങുന്നത് . പ്രാദേശികമായ ചെറു സംഭവങ്ങളിലൂടെയും കഥാപാത്രങ്ങളിലൂടെയും സാവധാനം വികസിക്കുന്ന കഥയിൽ പലപ്പോഴായുള്ള ഓർമ്മ ശകലങ്ങളിലൂടെ യാണ് കഥാകാരൻ രവിയുടെ ചിത്രം വരയ്ക്കുന്നത്. സാഹചര്യങ്ങൾക്ക് അനുസൃതമായി ചെയ്തു പോകുന്ന തെറ്റുകളും അതിൽ തോന്നുന്ന പശ്ചാത്താപവും, നിത്യ മോചനത്തിനായി പാതകൾ പലതു മാറി സഞ്ചരിച്ചു നോക്കുന്നതുമായ രവിയെ വായനാന്ത്യത്തിൽ വായനക്കാരൻ കണ്ടുമുട്ടും.ആദ്യം മുതൽ അന്ത്യം വരെ ഒരുതരം 'അസ്വസ്ഥത' അനുഭവിക്കുന്ന ഒരു കഥാപാത്രമാണിത് . ഈ 'അസ്വസ്ഥത' വായനക്കാരിലേക്ക് സംക്രമിപ്പിക്കുന്നതിൽ കഥാകാരൻ നേടുന്ന വിജയമാണ് ഈ നോവലിന്റെ വിജയം എന്ന് നമുക്ക് സാമാന്യമായി പറയാം. അതുപോലെ തന്നെ കഥ പറയുവാനായി തിരഞ്ഞെടുത്ത 'ഖാസക്' എന്ന സാങ്കല്പിക ഗ്രാമവും അവിടെ നാം പരിചയപ്പെടുന്ന ഓരോരുത്തരും ആസ്വാദ്യതയുടെ മാറ്റുകൂട്ടുന്നു. നിത്യ ജീവിത യാഥാർത്ഥ്യങ്ങളും , മിത്ത് കളും, മെറ്റാഫിസിക്സും, ഫിലോസഫിയും ഒക്കെ ഇത്ര സമർത്ഥമായി ഇഴ ചേർത്തിരിക്കുന്ന മറ്റൊരു മലയാള നോവൽ ഉണ്ടോ എന്ന് സംശയമാണ്. പാലക്കാടൻ ഗ്രാമങ്ങളിലെ മുസ്ലിം സമുദായത്തിന്റെ സംഭാഷണം പോലും വിജയൻ ഇതിൽ സസൂക്ഷ്മം സന്ദിവേഷിപ്പിച്ചിട്ടുണ്ട്. "ബീഡി തൊഴിലാളി യൂണിയനും" "സ്കൂൾ ഇൻസ്പെക്ഷനും" ഒക്കെ ചെറുതെങ്കിലും നമ്മുടെ കൊച്ചു കേരളത്തിന്റെതായ നിരവധി കയ്യൊപ്പുകൾ ഇതിൽ കാണാം . അതുകൊണ്ട് തന്നെ അവ നമ്മുടെ മനസ്സിൽ മായാതെ നില്കുകയും ചെയ്യും.

മലയാളി വായനക്കാരുടെയും വിമർശകരുടെയും ഒട്ടേറെ പ്രശംസയ്ക്കു പാത്രമായ ഈ നോവൽ "ലെജണ്ട്സ് ഓഫ് ഖസാക്ക് " എന്ന പേരിൽ ഇംഗ്ലീഷ് -ലേക്ക് പരിഭാഷപ്പെടുത്തിയിട്ടുണ്ട്. മലയാളത്തിൽ പ്രസിദ്ധീകരിച്ച് വർഷങ്ങൾക്ക് ശേഷം കഥാകൃത്ത് തന്നെയാണ് ഇതിന്റെ ഇംഗ്ലീഷ് മൊഴിമാറ്റം നടത്തിയിരിക്കുന്നത് എന്ന പ്രത്യേകതയും ഇതിനുണ്ട്. മൊഴിമാറ്റങ്ങളിൽ സാധാരണ സംഭവിക്കാറുള്ള വിടവുകൾ ഇതിൽ തുലോം കുറവായിരിക്കും എന്ന് നമുക്കുറ പ്പിക്കാം. ശ്രീ.കരുണാകര ഗുരുവുമായുള്ള അടുത്ത ബന്ധം, ശ്രീ.വിജയന്റെ ജീവിത വീക്ഷണത്തെ ആകെ മാറ്റി മറിച്ചു എന്നും മൂലകൃതിയും തർജ്ജിമയും തമ്മിലുള്ള വ്യതിയാനം ഇതിന്റെ ഉത്തമ ദർശനമാണെന്നും ചില പഠനങ്ങളിൽ കാണുകയുണ്ടായി. ഇത് മനസിലാക്കുവാൻ വേണ്ടിയാണ് , മലയാള വായനയുടെ ചൂടാറും മുൻപ് "ലെജണ്ട്സ് ഓഫ് ഖസാക്ക്" വായനയ്ക്കെടുത്തത്. എന്നാൽ നിർഭാഗ്യമെന്നു പറയട്ടെ, സൂചിപ്പിക്കപ്പെട്ട ഒരു വീക്ഷണ വ്യതിയാനവും എന്റെ ശ്രദ്ധയിൽപ്പെട്ടില്ല. അതു മാത്രമല്ല മലയാളത്തിൽ ലഭിക്കുന്ന ഒരു വായനാ സുഖവും ഇംഗ്ലീഷ് -ൽ നിന്ന് ലഭിച്ചതുമില്ല.വാചകങ്ങളെ പദാനുപദം തർജിമചെയ്തു വച്ചിരിക്കുന്നത് അവയുടെ ആത്മാവ് നഷ്ടപ്പെടുത്തി എന്ന തോന്നലുളവാക്കി . അരോചകമായി തോന്നിയ ഒരു സാഹിത്യ ശകലത്തിൽ നിന്ന് കഥാകാരന്റെ വീക്ഷണ വ്യതിയാനം തൊട്ടറിയുവാനുള്ള ശ്രമം തികച്ചും വിഫലമാണെന്ന് പറയെണ്ടുന്നതില്ലല്ലോ !

താഴെ കൊടുത്തിരിക്കുന്ന ഏറ്റവും പ്രസിദ്ധമായ വരികളും അവയുടെ പരിഭാഷയും ഇതിനെ വ്യക്തമാക്കുന്നു.

" പണ്ടുപണ്ട്, ഓന്തുകള്‍കും മുന്‍പ്, ദിനോസ്രുകള്‍ക്കും മുന്‍പ്, ഒരു സായാഹ്നത്തില്‍ രണ്ടു ജീവബിന്ദുക്കള്‍ നടക്കാനിറങ്ങി. അസ്തമയത്തിലാറാടിനിന്ന ഒരു താഴ് വരയിലെത്തി.
ഇതിന്റെ അപ്പുറം കാണണ്ടേ? ചെറിയ ബിന്ദു വലിയതിനോടു ചോദിച്ചു.
പച്ചപിടിച്ച താഴ് വര, ഏട്ടത്തിപറഞ്ഞു. ഞാനിവിടെത്തന്നെ നില്ക്കട്ടെ.
എനിക്കു പോകണം, അനുജത്തി പറഞ്ഞു.
അവളുടെ മുന്‍പില്‍ കിടന്ന അനന്തപഥങ്ങളിലേക്ക് അനുജത്തി നോക്കി.
"നീ ചേച്ചിയെ മറക്കുമോ?" ഏട്ടത്തി ചോദിച്ചു.
"മറക്കില്ല", അനുജത്തി പറഞ്ഞു.
"മറക്കും", ഏട്ടത്തി പറഞ്ഞു.
ഇതു കര്‍മ്മപരന്പയുടെ സ്നേഹരഹിതമായ കഥയാണ്. ഇതില്‍ അകല്‍ച്ചയും ദുഃഖവും മാത്രമേയുള്ളൂ.
അനുജത്തി നടന്നകന്നു.അസ്തമയത്തിന്റെ താഴ് വരയില്‍ ഏട്ടത്തി തനിച്ചു നിന്നു.

പായല്‍ക്കുരുന്നില്‍ നിന്ന് വീണ്ടുമവള്‍ വളര്‍ന്നു. അവള്‍ വലുതായി. വേരുകള്‍ പിതൃക്കളുടെ കിടപ്പറയിലേക്കിറങ്ങി. മൃതിയുടെ മുലപ്പാലു കുടിച്ച് ചില്ലകള്‍ പടര്‍ന്നു തിടംവച്ചു. കണ്ണില്‍ സുറുമയും കാലില്‍ തണ്ടയുമിട്ട ഒരു പെണ്‍കുട്ടി ചെതലിയുടെ താഴ് വരയില്‍ പൂവിറുക്കാനെത്തി. അവിടെ തനിച്ചു നിന്ന ചെന്പകത്തിന്റെ ചില്ലയൊടിച്ചു പൂ നുള്ളിയപ്പോള്‍ ചെന്പകം പറഞ്ഞു,
"അനുജത്തീ, നീയെന്നെ മറന്നുവല്ലോ".

"Long before the lizards, before the dinosaurs, two spores set out on an incredible journey.
They came to a valley bathed in the placid glow of sunset.
My elder sister, said the little spore to the bigger spore, let us see what lies beyond.
This valley is green, replied the bigger spore, I shall journey no further.
I want to journey, said the little spore, I want to discover. She gazed in wonder at the path below her.
"Will you forget your sister", asked the bigger spore.
"Never", said the little spore.
"You will, little one", for this is the loveless tale of karma; in it there is only parting and sorrow.

The little spore journeyed on. The bigger spore stayed back in the
valley. Her root pierced the damp earth and sought the nutrients of death
and memory. She sprouted over the earth, green and contended.

A girl with silver anklets and eyes prettied with surma came to
Chetali’s valley to gather flowers. The Chempaka tree stood alone-
efflorescent, serene. The flower gatherer reached out and held down a soft
twig to pluck the flowers. As the twig broke the Chempaka said,

My little sister you have forgotten me !

ഇതുപോലെ മലയാള വായനയിൽ മനോഹരമായി തോന്നിയ പല ബിംബങ്ങളും തികച്ചും നിർജീവ പദസഞ്ചയങ്ങളായിത്തോന്നി ഇംഗ്ലീഷിൽ. സാന്മാർഗികതയുടെയും ആത്മാന്വേഷനത്തിന്റെയും ഒരു നേർത്ത വരന്പിലൂടെയുള്ള ആ യാത്രയ്ക്ക് സൌകുമാര്യമുള്ള ഒരു ഭാഷ കൂടിയേകഴിയൂ "ലെജണ്ട്സ് ഓഫ് ഖസാക്ക്"ന് അതില്ല തന്നെ!

ചുരുക്കത്തിൽ കാലം , കഥാകാരനിൽ വരുത്തിയ മാറ്റം അന്വേക്ഷിച്ചിറങ്ങിയ ഞാൻ, കാലം എന്നിലും എന്റെ വായനയിലും വരുത്തിയ മാറ്റമാണ് കണ്ടെത്തിയത്. കൂടുതൽ പരന്ന വായനയുടെ ആവശ്യകതയും അതെനിക്ക് ബോദ്ധ്യപ്പെടുത്തിത്തരുന്നു !

വരുന്നൂ, ജീവിക്കുന്ന ചിത്രങ്ങള്‍!

2014-08-25T05:54:00.002-07:00

പഴയകാല ഫോട്ടോയെടുക്കലിന്റെ ഗൃഹാതുരത്വം കലര്‍ന്ന ഓര്‍മകളിലൂടെ, ഫോട്ടോഗ്രാഫിയില്‍ പുതിയൊരു വിപ്ലവത്തിന് നാന്ദികുറിക്കാന്‍ സഹായിച്ചേക്കാവുന്ന ലൈറ്റ്-ഫീല്‍ഡ് ഫോട്ടോഗ്രഫിയിലേക്കൊരു യാത്ര....

കവലയിലെ സ്റ്റുഡിയോവിലേക്കുള്ള യാത്ര ഇന്നും കൗതുകം നിറഞ്ഞ കുട്ടിക്കാല ഓര്‍മ്മയാണ്. കുളിച്ചൊരുങ്ങി, നല്ല ഉടുപ്പും നിക്കറുമൊക്കെയിട്ട്, വെയില്‍ താഴ്ന്നതിനു ശേഷമാകും മിക്കവാറും യാത്ര. ക്ഷീണം കാരണം ഫോട്ടോ മോശമാകാതിരിക്കാനുള്ള മുന്‍കരുതലുകളാണിവ.

ചുമരുകള്‍ നിറയെ വലിയ ഫോട്ടോകള്‍ ഫ്രെയിം ചെയ്തുവച്ചിരിക്കുന്ന ഒന്നാകും സ്റ്റുഡിയോയ്ക്കുള്ളിലേക്ക് കടക്കുന്ന മുറി. പൊട്ടിച്ചിരിക്കുകയും വിങ്ങിക്കരയുകയും ചെയ്യുന്ന കൊച്ചുകുട്ടികള്‍, വിവാഹത്തിനും മറ്റും എടുക്കുന്ന കുടുംബ ചിത്രങ്ങള്‍, സമീപത്തെ സ്‌കൂളിലെ ഗ്രൂപ്പ് ഫോട്ടോകള്‍, ഗാന്ധിജി, പണ്ഡിറ്റ്ജി തുടങ്ങിയ പ്രമുഖ നേതാക്കള്‍, യേശുദാസ്, പ്രേംനസീര്‍ തുടങ്ങിയ കലാരംഗത്തെ പ്രമുഖര്‍....അങ്ങനെ ഒട്ടു മിക്കവാറും സ്റ്റുഡിയോകള്‍ക്കും ഒരേ മുഖമായിരിന്നു അന്ന്.

ചെരുപ്പുകള്‍ പുറത്തിട്ട് ഒരു ആരാഥനാലയത്തില്‍ കയറുന്ന സൂക്ഷ്മതയോടെയാണ് ഫോട്ടോ എടുക്കുന്ന മുറിയിലേക്ക് പ്രവേശിക്കുക. മങ്ങിയ പ്രകാശം പരന്ന ഒരത്ഭുത ലോകമാണത്. പല ഉയരത്തിലായി വച്ചിരിക്കുന്ന വെളുത്തതും കറുത്തതുമായ കുടകള്‍, ചുവരിലെ സീനറി ചിത്രങ്ങള്‍, വലിയ ഒറ്റനിറ കര്‍ട്ടനുകള്‍, രാജകീയ സിംഹാസനങ്ങള്‍ പോലെയുള്ള ഇരിപ്പിടങ്ങള്‍-ആദ്യ കാഴ്ചയില്‍തന്നെ എല്ലാം ഗ്രഹിക്കുക അസാധ്യം.

അതിനുള്ളിലെ ഒരുക്ക മുറിയും അതില്‍ തങ്ങി നില്ക്കുന്ന കുട്ടിക്യുറ പൗഡര്‍ന്റെ ഗന്ധവും ഒരിക്കലും മറക്കാനാവില്ല. മുഖത്ത് നല്ല പ്രകാശം വീഴത്തക്ക വിധം ക്രമീകരിച്ചിരിക്കുന്നതിനാല്‍ ഏതൊരാളും സുന്ദരനും സുന്ദരിയും ആകുന്ന അത്ഭുതമുറിയാണത്.

മാതൃഭൂമി പ്രസിദ്ധീകരിച്ച ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

ഐന്‍സ്‌റ്റൈനെ അടുത്തറിയാന്‍

2014-08-05T08:09:00.000-07:00

മനുഷ്യചരിത്രത്തിലെ ഏറ്റവും ശപിക്കപ്പെട്ട നിമിഷമാണ് 1945 ആഗസ്ത് 6 രാവിലെ 8:15. ആ സമയം ജപ്പാനിലെ ഹിരോഷിമ നഗരത്തില്‍ ആറ്റംബോബ് പതിച്ചത്തിന്റെ ആഘാതം ഇന്നും നമ്മെ പിന്തുടരുന്നു. അങ്ങനെ തുറന്നുവിടപ്പെട്ട ഭൂതം ഇനിയെന്നും മനുഷ്യരാശിയെ വേട്ടയാടുമെന്ന കാര്യത്തില്‍ തര്‍ക്കമില്ല.

ഒരിക്കലും മായ്ച്ചുകളയാന്‍ കഴിയാത്ത ഈ പാപക്കറയുടെ പിന്നില്‍ പ്രവര്‍ത്തിച്ച ഒരു ശാസ്ത്രകാരന്‍, ബോബ് നിര്‍മ്മിക്കാനാധാരമായ കണ്ടുപിടുത്തം നടത്തിയെന്ന് മാത്രമല്ല, അതിന്റെ നിര്‍മാണം വൈകാന്‍ പാടില്ല എന്ന് അമേരിക്കന്‍ പ്രസിഡന്റിന് കത്ത് നല്‍കുകയും ചെയ്തു. തീര്‍ത്തും മനുഷ്യത്വരഹിതമെന്ന് നിസംശയം പറയാവുന്ന ആ പ്രവൃത്തിക്ക് അദ്ദേഹത്തിന് എന്തെങ്കിലും ന്യായീകരണമുണ്ടോ?

മരണത്തിന് കുറച്ചുമാസങ്ങള്‍ക്ക് നല്‍കിയ ഒരഭിമുഖത്തില്‍, 'എന്റെ ജീവിതത്തില്‍ ഞാന്‍ വിലിയൊരു തെറ്റ് പ്രവര്‍ത്തിച്ചു.....ആറ്റംബോംബ് നിര്‍മിക്കണമെന്ന് കാണിച്ച് പ്രസിഡന്റ് റൂസ്‌വെല്‍റ്റിനുള്ള കത്ത് ഒപ്പുവെച്ചു. പക്ഷേ, അതിനല്‍പ്പം ന്യായീകരണമുണ്ട്. ജര്‍മനി ആറ്റംബോംബ് നിര്‍മിക്കുകയെന്ന അപകടം മുന്നിലുണ്ടായിരുന്നു' എന്നു പറഞ്ഞതില്‍ ആത്മാര്‍ഥതയുടെ അംശമെങ്കിലുമുണ്ടോ?

ഒരു വിധിയെഴുത്തിന് മുമ്പ്, അദ്ദേഹത്തെ അടുത്തറിയാന്‍ സഹായിക്കുന്ന ഒരു ജീവചരിത്ര ഗ്രന്ഥത്തെക്കുറിച്ചുള്ളതാണ് ഈ കുറിപ്പ്.

മാതൃഭൂമി പ്രസിദ്ധീകരിച്ച ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

നയാഗ്ര എന്ന മഹാത്ഭുതം

2014-07-12T04:55:00.000-07:00

പ്രകൃതി ഒരുക്കുന്ന സ്വതസിദ്ധമായ വിസ്മയങ്ങള്‍ ആസ്വദിക്കുകയും, അവയെ ഹൃദയത്തോട് ചേര്‍ത്ത് വയ്ക്കുകയും ചെയ്യുന്നവര്‍ തീര്‍ച്ചയായും കണ്ടിരിക്കേണ്ടുന്നഒന്നാണ് നയാഗ്ര വെള്ളച്ചാട്ടം. വടക്കെ അമേരിക്കയുടെയും കാനഡയുടെയും അതിര്‍ത്തിയില്‍ സ്ഥിതി ചെയ്യുന്ന നയാഗ്ര, ഒഴുകി പോകുന്ന വെള്ളത്തിന്റെ അളവ് കണക്കിലെടുത്താല്‍, ലോകത്തിലെ ഏറ്റവും വലിയ വെള്ളച്ചാട്ടമാണ്. സമ്മര്‍ യാത്രകള്‍ക്ക് തുടക്കം കുറിക്കുവാന്‍ ഞങ്ങളും അത് തിരഞ്ഞെടുക്കുവാന്‍ കാരണം മറ്റൊന്നായിരുന്നില്ല.

അമേരിക്കന്‍ തലസ്ഥാനമായവാഷിങ്ടണ്‍ ഡി സിയില്‍ നിന്ന് 400 മൈല്‍ (ഏകദേശം 640 കിലോമീറ്റര്‍) ദൂരത്താണ് നയാഗ്ര. യാത്രയുടെ ദൈര്‍ഘ്യം ഏതാണ്ട്ഏഴു മണിക്കൂറോളം വരുമെങ്കിലും, ഇവിടുത്തെ മെച്ചപ്പെട്ട റോഡുകളും അനുബന്ധ സൗകര്യങ്ങളുംയാത്രയെ ആയാസരഹിതവും വിനോദപ്രദവുമാക്കി മാറ്റുന്നു. കുറച്ചു കാലം മുമ്പ് വരെ ഇത്തരം യാത്രകള്‍ക്ക് ചില തയ്യാറെടുപ്പുകള്‍ അനിവാര്യമായിരുന്നു. അമേരിക്കന്‍ ഓട്ടോമൊബൈല്‍ അസോസിയേഷന്റെ ഓഫീസ് സന്ദര്‍ശിച്ച്അവിടുത്തെ 'ട്രാവല്‍ എക്‌സ്‌പേര്‍ട്ടില്‍ നിന്ന് ആവശ്യമായ മാപ്പുകളും ഇന്‍ഫര്‍മേഷന്‍ ബുക്ക് ലെറ്റ് കളും മറ്റും കരസ്ഥമാക്കുക, കടന്നു പോകുന്ന വഴികളിലെവിശ്രമത്താവളങ്ങളെകുറിച്ചും,സുരക്ഷാ കരുതലുകളെക്കുറിച്ചും ചോദിച്ചറിയുക, കാലേ കൂട്ടിതാമസ സൗകര്യങ്ങള്‍ തരപ്പെടുത്തുക അങ്ങനെ പോയിരുന്നുആമുന്നൊരുക്കങ്ങള്‍. ഇന്ന് കാലം മാറി, എല്ലാം വിരല്‍ത്തുമ്പിലോ, ഒരു ഫോണ്‍ കോളിലോ സാദ്ധ്യമായി തുടങ്ങി . ജി പി സ് സൗകര്യം കൂടി സര്‍വ്വസാധാരണമായതോടെ ക്ഷണനേരം കൊണ്ട് തീരുമാനമെടുത്ത്എവിടെയും പോകാം എന്ന നിലയിലായി കാര്യങ്ങള്‍. അപ്പോള്‍, നിലവിലുള്ള ട്രാഫിക് അനുസരിച്ച് , വേഗത്തില്‍ പോകുവാന്‍ കഴിയുന്ന എളുപ്പവഴികള്‍ കണ്ടുപിടിച്ച്തരുന്ന ജി പി എസുകള്‍, പോകേണ്ടുന്ന വഴിയെകുറിച്ചുള്ള മുന്നറിവ്' എന്ന അനിവാര്യതയെയും ആശങ്കയെയും പൂര്‍ണമായും ഒഴിവാക്കുന്നു.

ലേഖനം മുഴുവൻ വായിക്കാൻ ഇവിടെ ക്ലിക്ക് ചെയ്യുക

ദി സെല്ഫിഷ് ജീന്‍

2014-05-11T09:11:00.001-07:00

നിസ്വാര്‍ത്ഥത, അനുകമ്പ, ത്യാഗശീലം തുടങ്ങിയ ഗുണങ്ങള്‍ പ്രകൃതിയിലൂടെ സ്വാഭാവികമായി ലഭിക്കുന്ന ഒന്നാണെന്ന ധാരണ തെറ്റാണെന്നും, ബോധപൂര്‍വ്വം നാം ആ ഗുണങ്ങള്‍ വളര്‍ത്തിയെടുക്കണമെന്നും പ്രഖ്യാപിക്കുന്ന ഗ്രന്ഥമാണ് റിച്ചാര്‍ഡ് ഡോക്കിന്‍സിന്റെ 'സെല്‍ഫിഷ് ജീന്‍ '. ആ പുസ്തകം മുന്നോട്ടുവെയ്ക്കുന്ന ആശയങ്ങളെയും പ്രശ്‌നങ്ങളെയും കുറിച്ച്...

മനുഷ്യനോളം പ്രായമുള്ള ഒന്നാണ് അവന്റെ സ്വാര്‍ത്ഥത. ഒരു തരത്തിലല്ലെങ്കില്‍ മറ്റൊരു തരത്തില്‍ അതിനെക്കുറിച്ച് പരാമര്‍ശിക്കപ്പെടാതെ ഒറ്റ ദിവസവും കടന്നു പോകുന്നില്ല എന്നതാണ് വാസ്തവം.

ജീവജാലങ്ങളില്‍ മനുഷ്യന് മാത്രമാണോ സ്വാര്‍ത്ഥതയുള്ളത്? അതോ മറ്റു ജീവജാലങ്ങള്‍ക്കിടയിലും ഇതൊക്കെ പ്രകടമാണോ? സാമൂഹ്യ-ദാര്‍ശനിക തലങ്ങള്‍ക്ക് അതീതമായി ജൈവശാസ്ത്രപരമായി ഇതിന് എന്തെങ്കിലും അടിസ്ഥാനമുണ്ടോ? ജൈവികമായി മനുഷ്യന്‍ സ്വാര്‍ത്ഥനാണോ? അതോ നിഷ്‌കളങ്കനായി ജനിക്കുന്ന മനുഷ്യനെ ജീവിത സാഹചര്യങ്ങളാണോ സ്വാര്‍ത്ഥനാക്കി മാറ്റുന്നത്?

ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

നക്ഷത്രങ്ങളെക്കുറിച്ച് ഒരല്പം ....... (Stars: A Very Short Introduction)

2014-03-11T18:16:00.000-07:00

ചില പുസ്തകങ്ങൾ നമ്മെ തേടിയെത്തും; നാം തേടിപ്പോകുന്നവയെക്കാൾ ആസ്വാദകരമായി തോന്നുകയും ചെയ്യും!. അത്തരം ഒരു അനുഭവം സമ്മാനിച്ച ഒരു പുസ്തകമാണ് സ്റ്റാർസ്: എ വെരി ഷോർട്ട് ഇന്റ്രോഡക്ഷൻ(Stars:A Very Short Introduction). അലസമായ ഒരു ലൈബ്രറി യാത്രയിൽ തികച്ചും യാദൃച്ചികമായി കണ്ടത് ,താത്പര്യം തോന്നിയ മറ്റൊരു പുസ്തകവുമില്ലാത്തതിനാൽ, വെറുതെ ചെക്ക്‌ ഔട്ട്‌ ചെയ്തു അത്രമാത്രം,ആഴ്ചകൾ കഴിഞ്ഞാണ് ഇത് വായനക്കെടുത്തതുപോലും.ഓക്സ്‌ഫോർഡ് യൂണിവേർസിറ്റി പ്രസ്സിന്റെ(Oxford University Press) വെരി ഷോർട്ട് ഇന്റ്രോഡക്ഷൻസ് (Very Short Introductions) പരന്പരയിൽപ്പെട്ട ഈ പുസ്തകം എഴുതിയത് യൂണിവേർസിറ്റി ഓഫ് ലീസെറ്റർ (University of Leicester)-ലെ തിയോററ്റിക്കൾ ആസ്ട്രോഫിസിക്സിന്റെ(Theoretical Astrophysics) തലവൻ ആയ ആണ്ട്രൂ കിംഗ്‌ (Andrew King) ആണ്.

കടിച്ചാൽ പൊട്ടാത്ത വലിയ വലിയ കാര്യങ്ങൾ പ്രതിപാദിക്കുന്ന ഒരു ബോറൻ പുസ്തകത്തിന്റെ ചിത്രമാകാം സ്വാഭാവികമായും വായനക്കാരുടെ മനസ്സിൽ തെളിയുന്നത്. ഈ വിശേഷണങ്ങളെയൊക്കെ അപ്രസക്തമാക്കുന്ന,ഒരു ലോഗരിതം ടേബിൾന്റെ അത്രയും മാത്രം വലുപ്പമുള്ള , കേവലം നൂറ്റന്പതു പേജിൽ താഴെ മാത്രം ഒരു കുഞ്ഞൻ പുസ്തകമാണ് ഇത് . ലളിതമായ ആഖ്യാന ശൈലിയും അതുവഴി പ്രതിപാദ്യ വിഷയത്തിനു നല്കുന്ന വ്യക്തതയുമാണ് ഈ പുസ്തകത്തിന്റെ ഏറ്റവും വലിയ മേന്മ .

പുസ്തകത്തിന്റെ പേര് സൂചിപ്പിക്കുനതു പോലെ, നക്ഷത്രങ്ങളുടെ ഉല്പത്തിയും, നിലനില്പും, കാലക്രമത്തിൽ അതിനു വരുന്ന നാശവുമാണ് ഇതിന്റെ കേന്ദ്ര ബിന്ദു. എവിടെ നിന്ന് , എങ്ങനെയാണ് നക്ഷത്രങ്ങൾ ജന്മമെടുക്കുന്നത് ?സൂര്യനെ പോലുള്ള വന്പൻ നക്ഷത്രങ്ങൾ ഇനി എത്ര നാൾ ഇങ്ങനെ പ്രകാശം ചൊരിയും?ജീവനുള്ളവയെപ്പോലെ നക്ഷത്രങ്ങൾക്കും ഒരു 'ജീവിത'കാലവും 'മരണ'വും ഒക്കെയുണ്ടോ ? അങ്ങനെയൊക്കെയുണ്ടെങ്കിൽ 'മരണ' ശേഷം അവയ്ക്ക് എന്തു സംഭവിക്കും?തമോഗർത്തങ്ങളും(Black Hole),പൾസാറും(Pulsar) പോലെയുള്ള പ്രതിഭാസങ്ങൾ ഒരേ സമയം രസകരവും എന്നാൽ കീറാമുട്ടിയായും മാറുന്നത് എങ്ങനെ? അങ്ങനെ വെള്ളക്കുള്ളൻ(White Dwarf) മാരും,ന്യുട്രോണ്‍ സ്റ്റാറും(Neutron Star),റെഡ് ജെയിന്റുകളും(Red Giant), ഇരട്ട നക്ഷത്രങ്ങളും(Binary Star) മറ്റും മറ്റും വായനക്കാരന്റെ ദൈനംദിന, തീന്മേശാചർച്ചാവിഷയങ്ങളായി മാറുന്നു.സാധാരണ വായനക്കാരെ പറഞ്ഞു മനസിലാക്കാൻ പ്രയാസമുള്ള ഇത്തരം വിഷയങ്ങളുമായി ബന്ധപ്പെട്ട വസ്തുതകൾ നിരത്തിവയ്ക്കുകയല്ല ഇവിടെ കിംഗ്‌ ചെയ്യുന്നത് , മറിച്ച് വായനക്കാരനുമായി ചേർന്ന് ഒരു പഠനം നടത്തുകയാണ്. നക്ഷത്രങ്ങളുടെയും മറ്റ് ശൂന്യാകാശ വസ്തുക്കളുടെയും വിവരങ്ങൾ അടങ്ങുന്ന ഗ്രാഫുകളും പട്ടികകളും മറ്റും ഇതിൽ ആവശ്യാനുസരണം ചേർത്തിട്ടുണ്ട് .അസ്ട്രോഫിസിസിറ്റ് കൾ ആഴത്തിലുള്ള പഠനത്തിനായി ഉപയോഗിക്കുന്ന എച്ച് ആർ ഡയഗ്രങ്ങളും (Hertzsprung-Russell Diagram) മറ്റും വായനയുടെ ഗൌരവത്തെ വർദ്ധിപ്പിക്കുന്നു, എന്നാൽ അതോടൊപ്പം നല്കിയിരിക്കുന്ന ലളിതമായ വിവരണങ്ങൾ കൂടുതൽ വായിക്കുവാനും മനസിലാക്കുവാനും വായനക്കാരെ പ്രേരിപ്പിക്കുകയും ചെയ്യുന്നു.

ചുരുക്കത്തിൽ, നമ്മുടെ പുസ്തക ശേഖരത്തിൽ ചേർത്ത് സൂക്ഷിച്ചുവയ്ക്ക്കാനും , യാതൊരു ആയാസവും ഇല്ലാതെ , ഇടയ്ക്കിടയ്ക്ക്‌ എടുത്ത് മറിച്ചു നോക്കാനും പറ്റിയ ഒരു റെഫറൻസ് ഗ്രന്ഥം!.

ദി കൈറ്റ് റണ്ണർ (The Kite Runner)

2014-02-06T18:21:00.000-08:00

ഭാവനാ സന്പുഷ്ടമായ കഥകൾ വായിക്കുവാൻ രസമായിരിക്കാം എന്നാൽ ഭാവനയോടൊപ്പം അല്പം ചരിത്രവും അനുബന്ധസത്യങ്ങളും കൂട്ടിച്ചേർത്ത് പറയുന്ന കഥകൾക്ക് തീവ്രത കൂടും . ആ ഗണത്തിൽപ്പെടുന്ന ഒന്നാണ് ഖാലിദ്‌ ഹുസേനി(Khaled Hosseini)യുടെ ദി കൈറ്റ് റണ്ണർ (The Kite Runner) എന്ന നോവൽ. അമീർ എന്ന അഫ്ഗാൻ ബാലനിലൂടെ പറഞ്ഞു പോകുന്ന കഥയിൽ , അഫ്ഗാനിസ്ഥാൻ -ന്റെ സോവൈറ്റ്‌(Soviet) അധിനിവേശവും തുടർന്നുള്ള താലിബാൻ -ന്റെ വളർച്ചയും അടക്കും ആ പ്രദേശത്തിന്റെ ഏറ്റവും നിർണ്ണായകവും സംഭവ ബഹുലവുമായ ഒരു കാലഘട്ടവും വന്നു പോകുന്നുണ്ട് . ഒരു അഭയാർത്ഥിയായി അമേരിക്കയിലേക്ക് കുടിയേറിയ ഹുസേനിയുടെ ആത്മകഥാപരമാണോ ഈ നോവൽ എന്ന് വ്യക്തമാക്കിയിട്ടില്ല എങ്കിലും എഴുത്തിന്റെ ശക്തി യും കഥാഗതിയും വായനക്കാരനെക്കൊണ്ട് അങ്ങനെ ചിന്തിപ്പിക്കുന്നു.

പഷ്ടാൻ(Pashtun) എന്ന ഉന്നത കുലത്തിൽപ്പെട്ട ബാലനാണ് അമീർ.അമ്മയുടെ ലാളന അനുഭവിക്കാനുള്ള ഭാഗ്യമില്ലായിരുന്നുവെങ്കിലും എല്ലാ ഭൌതിക സുഖസൗകര്യങ്ങളോടും കൂടിയാണ് അവൻ വളർന്നത്‌.തിരക്കുള്ള ഒരു ബിസിനെസ്സ് കാരനായിരുന്ന അവന്റെ ബാബ , അവനെ സന്തോഷിപ്പിക്കുവാൻ കഴിയുന്നതെല്ലാം ചെയ്യുമായിരുന്നു.വീട്ടിലെ ജോലിക്കാരനായിരുന്ന ഹസൻ ആയിരുന്നു അവന്റെ കളിക്കൂട്ടുകാരൻ.ബാബ യുടെ കളിക്കൂട്ടുകാരനായിരുന്നു ഹസൻന്റെ അച്ഛൻ അലി, അതായത് കേവലം മുതലാളി-തൊഴിലാളി ബന്ധത്തിനുപരിയുള്ള അടുപ്പം അവർ തമ്മിൽ  ഉണ്ടായിരുന്നു. അമീർ -നെ പോലെ ഹസൻ-നും അമ്മയുടെ സ്നേഹ വാത്സല്യങ്ങൾ അനുഭവിക്കുവാൻ ഭാഗ്യം ലഭിച്ചിരുന്നില്ല.

സുഖലോലുപതയിൽ വളരുന്ന ഒരു ബാലന്റെ ചിത്രമാണ് വായനക്കാർക്ക്‌ ഇവിടെ ലഭിക്കുക.
പ്രഭാത ഭക്ഷണം തയ്യാറാക്കി നല്കുക, സ്കൂളിൽ പോകുന്നതിനു വേണ്ട ഒരുക്കങ്ങൾ ചെയ്തു കൊടുക്കുക അങ്ങനെ എല്ലാം ചെയ്തിരുന്നത് ഹസനാണ് എന്നിരുന്നാലും ഒരു കളിക്കൂട്ടുകാരൻ എന്നതിൽ കവിഞ്ഞ ഒരാത്മാർഥതയും അമീറിനുണ്ടായിരുന്നില്ല.തനിക്ക് ആവശ്യമില്ല എന്ന് തോന്നുന്ന അവസരങ്ങളിൽ ഹസൻ-നെ ഒഴിവാക്കി മാറ്റി നിർത്തുവാൻ അവന് ഒരു മടിയും ഉണ്ടായിരുന്നില്ല. ഒളിച്ചോടിപ്പോയ അമ്മയെപ്പറ്റിപറഞ്ഞ് നാട്ടുക്കാരും കൂട്ടുകാരും ഹസൻ നെ കളിയാക്കുന്പൊഴൊന്നും അമീർ നിസംഗത ഭാവിക്കുകയും ചെയ്തു.എഴുതാനും വായിക്കാനും അറിയാത്ത ഹസൻ നെ അതിന്റെ പേരിൽ കളിയാക്കി രസിക്കാനും അമീറിന് മടിയില്ലായിരുന്നു. പിറന്നാൾ ദിനത്തിലോ മറ്റോ ബാബ ഹസനോട് സ്നേഹം കാണിക്കുന്നത് അവനെ ആലോസരപ്പെടുത്തുമായിരുന്നു. എങ്ങനെയൊക്കെ ആണെങ്കിലും കറകളഞ്ഞ ആത്മാർത്ഥ മായ സ്നേഹമായിരുന്നു ഹസന് അമീറിനോട്. ഒരു ദിവസം കളിക്കിടയിൽ ഉണ്ടാകുന്ന വാക്കു തർക്കത്തിനിടയിൽ അസഫ് എന്ന കുട്ടി അമീറിനെ ആക്രമിക്കാൻ ശ്രമിക്കുന്നു ഉടൻ തന്നെ ഹസൻ   അവനെ ആക്രമിച്ച് അമീറിനെ രക്ഷപെടുത്തുന്നു. ഹസൻനെയും മറ്റു താഴ്ന്ന ജാതിക്കാരെയും ആ പ്രദേശത്തുനിന്നു തുരത്തണം എന്ന് പരസ്യമായി വാദിക്കുന്ന അസഫിനെ യാണ് തന്റെ നിലനിൽപ്പിനെപ്പോലും വെല്ലുവിളിച്ചു കൊണ്ട് ഹസൻ ആക്രമിക്കുന്നത്. ഹസൻ ന്റെ സ്നേഹം വരച്ചു കാട്ടാൻ കഥാകാരൻ ഉപയോഗിക്കുന്ന പല സന്ദർഭങ്ങളിൽ ഒന്നാണിത്.

കഥ പറഞ്ഞു ഫലിപ്പിക്കുവാൻ കഥാസന്ദർഭങ്ങളെ മനോഹരമായി ഉപയോഗിക്കുന്നതിൽ ഹുസേനി യുടെ കരവിരുത് വ്യക്തമാകുന്ന ഒന്നാണ് "പട്ടം പറത്തൽ"-ന്റെ ഉപയോഗം . വായനക്കാരെ അവരവരുടെ കുട്ടിക്കാലത്തേക്ക് അനായാസം കൂട്ടികൊണ്ട് പോയി വികാര തീവ്രത വർദ്ധിപ്പിക്കുകയാണ് ഇവിടെ അദ്ദേഹം ചെയ്യുന്നത്.നോവലിന്റെ പേരു പോലും അപ്രകാരം തിരഞ്ഞെടുത്തിരിക്കുന്നു.

മൽസരിച്ചു പട്ടം പറത്തുക എന്നത് കുട്ടികളുടെ ഏറ്റവും വലിയ വിനോദമായിരുന്നു.എതിരാളി പട്ടങ്ങളെ എല്ലാം ആക്രമിച്ചു തോൽപ്പിക്കുന്നവാനാണ് ഈ ആകാശ പന്തയത്തിലെ വിജയി.ഓരോ പട്ടത്തിന്റെ ചരടു പൊട്ടുന്പോഴും അതു കൈക്കലാക്കാൻ കുട്ടികൾ കൂട്ടത്തോടെ പായും. ഇവരെയാണ് കൈറ്റ് റണ്ണർ എന്നു വിളിക്കുന്നത്‌ . പട്ടം പറത്തുന്നതുപൊലെ ഒരു മൽസരമായിരുന്നു അതും. കാറ്റിൽ ആടി ഉലയുന്ന പട്ടത്തിന്റെ ദിശ നിർണ്ണയിച്ച് , ഇടവഴികളിലൂടെ ഓടി, നിലം തൊടുന്നതിനു മുൻപ് അവയെ കയിലാക്കാൻ ഹസൻ ബഹുമിടുക്കനായിരുന്നു. അങ്ങനെ ആ വർഷത്തെ മൽസരവും വരവായി.വിജയിക്കണമെന്ന് അമീറിന് അതിയായ മോഹം;ആത്മ വിശ്വാസം തീരെ ഇല്ലതാനും. ഒടുവിൽ ഹസൻ ന്റെ    പ്രോൽസാഹനം അമീറിനെ വിജയിയാക്കുന്നു. അവസാനം പൊട്ടിക്കപ്പെട്ട പട്ടം അമീറിന് സമ്മാന മായി നല്കാൻ ഹസൻ പായുന്നു.സമയം ഏറെക്കഴിഞ്ഞിട്ടും തിരികെ എത്താത്ത അവനെ തേടി അമീർ പോകുന്നു . ഒടുവിൽ അസഫും കൂട്ടാളികളും ഹസൻനെ ആക്രമിക്കുന്നത് അമീർ കാണുവാനിടയാകുന്നു.ഇടപെട്ട് അവനെ രക്ഷിക്കണമെന്നു മനസാക്ഷി പറയുന്നുവെങ്കിലും അമീർ നിശബ്ദനായി മടങ്ങുന്നു. സ്വയ രക്ഷ പോലും മറന്ന് ,നല്കിയ വാക്കു പാലിക്കുന്ന ഹസൻ അമീറിന്റെ ചിന്തകളെയും സ്വസ്തത യെയും വേട്ടയാടുന്നു. കുറ്റബോധത്തിൽ നിന്ന് രക്ഷ പെടാൻ അവൻ പലതും ചെയ്തു നോക്കുന്നു .

ഇതുവരെ പറയപ്പെട്ട കഥയുടെ ഗതിയിൽ നിന്ന് ചടുലമായ ഒരു മാറ്റമാണ് തുടർന്നുള്ള അദ്ധ്യായങ്ങളിൽ നാം കാണുന്നത്.അധിനിവേശങ്ങളും യുദ്ധങ്ങളും അവരെ പലായനം ചെയ്യുവാൻ നിർബന്ധിതരാക്കുന്നു. തങ്ങളുടെ സർവസ്വവും നഷ്ടപ്പെട്ട് അമേരിക്കയിൽ കുടിയേറ്റക്കാരായി ജീവിക്കുന്ന ഒരു കൂട്ടം ആൾക്കാരിലൂടെയാണ് ഇവിടെ കഥ വികസിക്കുന്നത് .
അവിടെ വെച്ചാണ് അമീർ വിവാഹിതനാകുന്നതും ബാബ ക്യാൻസർ രോഗബാധിതനായി മരിക്കുന്നതും . അങ്ങെനെയിരിക്കെ ഒരു ദിവസം ബാബയുടെ ഒരു പഴയ സുഹൃത്തായ റഹിം സാഹിബ് പാകിസ്ഥാനിൽ നിന്ന് ഫോണ്‍ വിളിക്കുന്നു. അദ്ദേഹത്തെ കാണുവാനായി പോകുന്ന അമീറിനൊപ്പം ഹുസേനി നമ്മെയും കൂട്ടിക്കൊണ്ടു പോവുകയാണ് ,അടിച്ചേൽപ്പിക്കപ്പെടുന്ന ഓരോ യുദ്ധവും വിതക്കുന്ന നാശത്തിന്റെ കാണാക്കാഴ്ചകളിലേക്ക്.

ഈ കൂടിക്കാഴ്ചയിലാണ് ഹസൻ തന്റെ ബാബയുടെ തന്നെ മകനാണ് എന്ന ഞെട്ടിക്കുന്ന സത്യം അമീർ മനസ്സിലാക്കുന്നത് .ഹസൻ ന്റെ സ്നേഹബന്ധത്തിന്റെ കൂടുതൽ നിദാനങ്ങൾ അമീർ-നെ ശ്വാസം മുട്ടിക്കുന്നു . താലിബാൻ ആളുകളുടെ കൈകളാൽ ആണ് അവൻ കൊല്ലപ്പെട്ടതെന്നും,അവസാന കാലം വരെ അമീർ ഭായിയെ കാണുവാൻ അവൻ ആത്മാർത്ഥ മായി ആഗ്രഹിച്ചിരുന്നു വെന്നും അമീർ തിരിച്ചറിയുന്നു. ഹസൻ ന്റെ മകൻ ഇപ്പോഴും താലിബാൻ പിടിയിലാണെന്ന് അറിയുന്ന അമീർ, അവനെ രക്ഷപെടുത്തണമെന്നുറച്ച് താലിബാൻ കേന്ദ്രത്തിലേക്ക് യാത്രതിരിക്കുന്നു.അവിടെവച്ചാണ് താലിബാനിന്റെ ഇപ്പോഴത്തെ നേതാവ് അസഫ് ആണെന്ന് തിരിച്ചറിയുന്നത്‌. പണ്ട് ചെയ്തു പോയ ഒരു പാപകർമ്മത്തിനു പ്രായശ്ചിത്തമെന്നോണം അസഫുമായി മല്ലയുദ്ധം നടത്തി അമീർ കുട്ടിയെ രക്ഷപെടുത്തുന്നു.
അല്പം നാടകീയതയ്ക്കൊടുവിൽ അവനെ അമേരിക്കയിലേക്ക് കൊണ്ടു വരുന്നതോടെ കഥ അവസാനിക്കുന്നു.

കഥാപാത്രങ്ങളെ സൂക്ഷ്മമായി സൃഷ്ടിക്കുന്നതിലും അവരെ ബുദ്ധിപരമായി ബന്ധിപ്പി ക്കുന്നതിലുമുള്ള ഹുസേനിനിയുടെ പാടവം പ്രശംസ അർഹിക്കുന്നു. വളരെ വലിയ ഒരു കഥാപാത്രപട തന്നെ അദ്ദേഹത്തിന്റെ നോവലുകളിൽ കാണുമെങ്കിലും അവയെ ഒരിക്കലും പാതി വഴിക്ക് ഉപേക്ഷിച്ച് പോകാറില്ല.അദ്ദേഹത്തിൻറെ ഏറ്റവും പുതിയ നോവൽ ആയ ആൻഡ്‌ മൌണ്ടൻസ് എക്കോദ്(And mountains echoed) വായിച്ചതിനു ശേഷമാണ് ഇത് വായിക്കുന്നത് എന്നതിനാൽ ശൈലിയുടെ ആവർത്തനം അല്പം മടുപ്പുളവാക്കി എന്ന് പറയാതെ വയ്യ. ദി കൈറ്റ് റണ്ണർ വളരെയധികം പ്രശംസ പിടിച്ചു പറ്റുകയും എന്നാൽ പുതിയ നോവൽ അത്ര ശ്രദ്ധിക്കപ്പെടാതെയും പോയത് ഇതുകൊണ്ട് തന്നെയാകണം.

ഈ രണ്ടു പുസ്‌തകവും വായിച്ചിട്ടില്ലാത്ത വായനക്കാർ ആദ്യം കൈറ്റ് റണ്ണർ തന്നെ തിരഞ്ഞെടുക്കുന്നത് ആസ്വാദ്യത കൂട്ടും എന്ന കാര്യത്തിൽ തർക്കമില്ല.പ്രസ്തുത നോവലിനെ ആസ്പദമാക്കി നിർമ്മിക്കപ്പെട്ട ചലച്ചിത്രം മോശമല്ലാതെ ആസ്വാദകരെ ആകർഷിച്ചുവെന്നു മൂവി റേറ്റിംഗ് കൾ പറയുന്നു.

ദൃശ്യം സിനിമയ്ക്ക് ആധാരമായ പുസ്‌തകം(The Devotion of Suspect X)

2014-01-28T18:34:00.003-08:00

യുക്തി ഭദ്രമായ ഒരു കുടുംബ-കുറ്റാന്വേക്ഷണ ചിത്രം ! മോഹൻലാൽ നായകനായി ! അതും 2014-ൽ ... ഒരിക്കലും ചേർത്തു വയ്ക്കാൻ കഴിയില്ല എന്ന് മനസിലുറപ്പിച്ച ഒട്ടേറെ വിശേഷണങ്ങൾ ഒരുമിച്ച് ചേർത്ത് വച്ചത് പോലെ തോന്നി.മലയാള സിനിമയിലെ എല്ലാ റെക്കോർഡുകളും ഭേദിച്ചു, കണ്ടവർ കണ്ടവർ വീണ്ടും വീണ്ടും കാണുന്ന ഒരു ഒരുഗ്രൻ സിനിമ എന്നാണ് മാധ്യമങ്ങളിൽ നിന്നും സോഷ്യൽ മീഡിയയിൽ നിന്നും മറ്റും കിട്ടിയ വിവരം.ഇത്തരം സിനിമകളാണ് കേരളത്തിലെ എല്ലാ കുറ്റകൃത്യങ്ങൾക്കും(ഇതുവരെ നടന്നതും ഇനി നടക്കാനിരിക്കുന്നതും )ആധാരം എന്ന പോലീസ് ഏമാൻമാരുടെ കണ്ടെത്തലും കൂടി കേട്ടപ്പോൾ ഉഗ്വേഗം മുൾമുനയിലെത്തി .അങ്ങനെ അന്തം വിട്ടിരിക്കുംപോഴാണ് ഒരു ജാപ്പനീസ് നോവലും അതിനെ അധികരിച്ച് നിർമ്മിക്കപ്പെട്ട ഒരു ചലച്ചിത്രവുമാണ് ഇതിന്റെ പിന്നിലെന്ന് അറിയുന്നത് . ജിത്തു ജോസഫ് അത്ര ജീനിയസ് ഒന്നുമല്ല എന്ന് കേട്ടപ്പോൾ എല്ലാ മലയാളികളെയും പോലെ ഒരു ആശ്വാസം തോന്നാതിരുന്നില്ല !

ഒരു പുസ്തകത്തെ അധികരിച്ച് ചലച്ചിത്രമെടുക്കുന്പോൾ, അണിയറ പ്രവർത്തകർ നേരിടുന്ന വെല്ലുവിളികൾ പലതാണ് . വായനക്കാരന്റെ അനന്തമായ ഭാവനയിൽ പടുവൃക്ഷമായി പടർന്നു പന്തലിച്ചു നിൽക്കുന്ന, ഒന്നിനെ ഒരു നിശ്ചിത സമയത്തിനുള്ളിൽ കുറേക്കൂടി വലിയ ആസ്വാദക വൃന്ദത്തിനു മുന്നിൽ അവതരിപ്പിക്കുക എന്നത് അത്ര എളുപ്പമുള്ള പണിയല്ല . അതുകൊണ്ടാണ് പുസ്തകം വായിച്ചുകഴിഞ്ഞാൽ , അതിനെ അധികരിച്ച് നിർമ്മിക്കുന്ന സിനിമ പലപ്പോഴും നമുക്ക് ഇഷ്ടപ്പെടാതെ പോകുന്നത് . ഈ അനുഭവത്തിന് ഒരു അപവാദമാണ് ദൃശ്യം സിനിമ കണ്ടപ്പോൾ തോന്നിയത് .

കീഗോ ഹിഗഷിനൊ( Keigo Higashino) എന്ന ജാപ്പനീസ് എഴുത്തുകാരന്റെ ദി ഡിവോഷൻ ഓഫ് സസ്പെക്റ്റ് എക്സ് (The Devotion of Suspect X) എന്ന കുറ്റാന്വേക്ഷണ നോവൽ ആണ് ഇവിടെ പ്രതിപാദിക്കുന്ന മൂല കഥ. ലോകത്താകമാനം ഒട്ടേറെ വായനക്കാരുടെ ഇഷ്ടം പിടിച്ചു പറ്റിയ ഒന്നായ ഇതിന്റെ കഥ വികസിക്കുന്നത് ഇങ്ങനെ :

ഇഷിഗാമി എന്ന ഒരു ഹൈസ്കൂൾ അദ്ധ്യാപകൻ ആണ് ഇതിന്റെ കേന്ദ്ര കഥാപാത്രം. ആരോടും മിണ്ടുകയോ അധികം ഇടപഴകുകയോ ചെയ്യാത്ത ഉൾവലിഞ്ഞ ഒരു വ്യക്തിത്വത്തിനുടമ.പഠനകാലത്ത്‌ അതി സമർഥനായിരുന്ന അയാൾക്ക് , വീട്ടിലെ ബുദ്ധിമുട്ടുകൾ നിമിത്തം ഗവേഷണം തുടരാൻ കഴിയാതെ, ഒരു അദ്ധ്യാപകനായി  ഒതുങ്ങിക്കൂടെണ്ടി വരുന്നു .രാവിലെ കൃത്യമായി ഉണരുന്നു, കടയിൽ നിന്ന് ഭക്ഷണവും വാങ്ങി കാൽനടയായി സ്കൂളിൽ എത്തുന്നു, ക്ലാസ് കഴിഞ്ഞ് തിരികെ വീട്ടിൽ എത്തിക്കഴിഞ്ഞാൽ ഒറ്റയ്കിരുന്ന് ഗണിത സമസ്യകൾക്ക് ഉത്തരം കണ്ടുപിടിക്കുന്നു, ഇതാണ് സാമാന്യമായിപ്പറഞാൽ അയാളുടെ ദിനചര്യ. നടന്നു പോകുന്ന വഴികൾക്കോ , ഭക്ഷണം വാങ്ങുന്ന കടയ്കോ , വാങ്ങുന്ന വിഭവത്തിനൊ പോലും ഒരിക്കലും ഒരു വ്യത്യാസവുമില്ല. ചില ദിവങ്ങളിൽ, സ്കൂൾ സമയത്തിനു ശേഷം കുട്ടികളെ ജൂഡോ പരിശീലിപ്പിക്കുന്നു എന്നതൊഴിച്ചാൽ ദിവസങ്ങൾ തമ്മിൽ ഒരു വ്യത്യാസവുമില്ല അയാൾക്ക്‌.

ഇഷിഗാമിയുടെ അപ്പാർട്ട്മെന്റിന് തൊട്ടടുത്തുള്ള അപ്പാർട്ട്മെന്റിലാണ് യസുകൊ എന്ന സ്ത്രീയും അവരുടെ കൗമാരക്കാരിയായ മകളും താമസിക്കുന്നത്. ഭർത്താവിൽ നിന്ന് വേർപിരിഞ്ഞ്-അയാളുടെ ശല്യം സഹിക്കാനാകാതെ- ഒളിവിൽ താമസിക്കുകയാണ് അവർ.
അതീവ സുന്ദരിയായ യസുകൊ, വളർന്നു വരുന്ന മകളുടെ ഭാവിയെ മുൻനിർത്തിയാണ്  നിശാ ക്ലബുകളിലെ ജോലി അവസാനിപ്പിച്ച്‌ ഈ സ്ഥലത്തേക്ക് വരുവാൻ തീരുമാനിച്ചത്. ഇഷിഗാമി സ്ഥിരമായി ഭക്ഷണം വാങ്ങുന്ന കടയിലാണ് ഇപ്പോൾ അവർ ജോലിചെയുന്നത്.അയൽക്കാരായിരുന്നിട്ടും ,എല്ലാ ദിവസവും കാണുമായിരുന്നിരുന്നിട്ടും, അവർ തമ്മിൽ വലിയ അടുപ്പമൊന്നും പുറമേ കാണിക്കാറുണ്ടായിരുന്നില്ല.

അങ്ങനെയിരിക്കെ ഒരു ദിവസം, തന്നെത്തേടിയെത്തുന്ന മുൻ ഭർത്താവുമായി യസുകൊ വഴക്കുണ്ടാക്കുന്നു. അത് ഒടുവിൽ അയാളുടെ മരണത്തിനു കാരണമാകുന്നു.ബഹളം കേട്ട് എത്തുന്ന ഇഷിഗാമിയോട് ,ആദ്യം മറച്ചു വയ്ക്കാൻ ശ്രമിക്കുന്നുവെങ്കിലും, ഒടുവിൽ  എല്ലാം തുറന്നു പറയുന്നു. ഇഷിഗാമി അവരെ സഹായികുവാൻ തയാറാകുന്നു. താൻ പറയുന്നത് അതേപടി അനുസരിക്കുകയാണെങ്കിൽ രക്ഷപെടുവാൻ സാധിക്കുമെന്ന്  അയാൾ ഉറപ്പു നല്കുന്നു.തുടർന്ന് കഥ, വ്യത്യസ്തമായ മാനങ്ങളിലേക്ക് വ്യാപിക്കുന്നു.

തൊട്ടടുത്ത ദിവസം, സമീപത്തെ നദിക്കരയിൽ , മുഖവും കൈവിരലുകളും പൊള്ളിച്ച് തിരിച്ച് അറിയുവാൻ കഴിയാത്ത വിധത്തിൽ ഒരു അക്ഞാത ശവശരീരം കണ്ടെത്തുന്നു . മറ്റ് സൂചനകളിൽ നിന്ന് അത് യസുകൊ യുടെ മുൻ ഭർത്താവ് തന്നെയെന്ന നിഗമനത്തിൽ പോലീസ് എത്തിച്ചേരുന്നു.സ്വാഭാവികമായും അന്വേക്ഷണം യസുകൊയെയും മകളെയും കേന്ദ്രീകരിച്ചാകുന്നു.എന്നാൽ സംഭവം നടക്കുവാൻ ഇടയുണ്ടെന്ന് പോലീസ് അനുമാനിക്കുന്ന സമയത്ത് ഇരുവരും സിനിമ തീയറ്ററിലും കരോകീ ബാറിലും(Karaoke) ആയിരുന്നുവെന്ന് തെളിയിക്കുന്ന ടിക്കറ്റുകൾ കുസനാഗി എന്ന സമർഥനായ അന്വേക്ഷണ ഉദ്യോഗസ്ഥനെ കുഴക്കുന്നു . സാഹചര്യ തെളിവുകളുടെയും , യസുകൊ-യ്ക്ക് ഒറ്റയ്ക്ക് കുറ്റകൃത്യം ചെയ്യുവാൻ കഴിയില്ല എന്ന നിഗമനത്തിന്റെയും അടിസ്ഥാനത്തിൽ അന്വേക്ഷണം ക്രമേണ ഇഷിഗാമിയിലേക്ക് കൂടി വ്യാപിക്കുന്നു. കുറ്റകൃത്യം മറച്ചുവയ്ക്കുവാൻ സൂക്ഷ്മ ബുദ്ധി ഉപയോക്കുന്ന ഒരു ജീനിയസും ,യഥാർത്ഥ കുറ്റവാളിയെ കണ്ടെത്തുവാൻ നിരീക്ഷണ പാടവും സമർത്ഥന ബുദ്ധിയും ഉപയോഗിക്കുന്ന മറ്റൊരു ജീനിയനും തമ്മിലുള്ള ബൌദ്ധിക വടംവലിയാണ്, തുടർന്ന് ഇതിനെ രസകരമാക്കി മാറ്റുന്നത് .കുസനാഗിയുടെ സുഹൃത്തും ഇഷിഗാമിയുടെ സഹപാഠിയുമായ യുക്കാവ എന്ന ഫിസിക്സ് പ്രൊഫസർ ഉം  കഥയിൽ നിർണ്ണായകമായ പങ്ക് വഹിക്കുന്നുണ്ട്.

നോവലിന്റെ അവസാന ഭാഗങ്ങൾ കുറ്റാന്വേക്ഷണ കഥകളോട് നീതി പുലർത്തുന്ന തരത്തിലായി എന്ന് പറയുവാൻ കഴിയുന്നില്ല .കഥ പുരോഗമിക്കുന്ന മുറയ്ക്, വായനക്കാർക്കും അന്വേക്ഷണ ഉദ്യോഗസ്ഥർക്കും ഒരുപോലെ വസ്തുതകൾ ലഭ്യമാക്കുക എന്നത് ഇത്തരം കഥകളുടെ അനിവാര്യമായ ഒരു സ്വഭാവ ഗുണമാണ് . വായനക്കാരന് , താനും ഉൾപ്പെടുന്ന , ഒരു സംഘമാണ് കുറ്റം തെളിയുക്കുന്നത് എന്ന പ്രതീതി ഉണ്ടാകണം .അതല്ലാതെ വായനക്കാരന് ലഭ്യമല്ലാത്ത ചില വിവരങ്ങൾ ,കഥയുടെ അവസാനത്തിൽ , ഒന്നോ രണ്ടോ അദ്ധ്യായങ്ങളിൽ വെറുതെ പറഞ്ഞു പോയാൽ, വാർത്തമാന പത്രത്തിൽ വരുന്ന ഒരു റിപ്പോർട്ട്‌ വായിക്കുന്നത് പോലെ മാത്രമേ അനുഭവപ്പെടൂ. എന്തിനു വേണ്ടിയാണ് ഇഷിഗാമി ഇതെല്ലം ചെയതത് എന്ന ചോദ്യത്തിനു യുക്തി ഭദ്രമായ ഒരു ഉത്തരം നൽകുന്നതിൽ കഥാകാരൻ വേണ്ടത്ര വിജയിച്ചതായി തോന്നുന്നില.ഇഷിഗാമി എന്ന കഥാപാത്രത്തിന്റെ ആത്മസമർപ്പണം(ഡിവോഷൻ) മാത്രമാണ് ഇവിടെ പല ചോദ്യങ്ങള്ക്കും ഉത്തരമായി നല്കാൻ കഴിയുന്നത്‌.നോവലിന്റെ പേരിനോട് നീതി പുലർത്തുന്നുണ്ടെങ്കിലും , ഒരു കുറ്റാന്വേക്ഷണ കഥ യുടെ ഭംഗി ചോർത്തിക്കളയുകയോ കുറഞ്ഞ പക്ഷംദുർബലപ്പെടുത്തുകയോ ചെയ്യുന്നു വെന്ന് പറയാതെ വയ്യ.

കലാസൃഷ്ടികളിലെ അനുകരണങ്ങൾ പ്രോൽസാഹിപ്പിക്കപ്പെടണമോ എന്ന ബൌദ്ധിക സമസ്യയുടെ ഉത്തരം, ഒരു സാധാരണ നോവലിനേയും സിനിമയെയും അധികരിച്ച് തേടുന്നത് എത്രത്തോളം യുക്തി സഹജമാണെന്ന് നാം ചിന്തിക്കണം.ഒരു പ്രദേശത്തെ ജനങ്ങൾക്ക്‌ പ്രീയംകരമായി മാറിയ ഒന്നിനെ അതെ ചേരുവകയിൽ മറ്റൊരിടത്ത് അവതരിപ്പിക്കുന്നത്‌ എല്ലായ്പ്പോഴും വിജയിക്കണമെന്നില്ല.ഇവിടെയാണ് ദൃശ്യം സിനിമയുടെ അണിയറ പ്രവർത്തകർ അഭിനന്ദനം അർഹിക്കുന്നത്.കഥയുടെ പ്രധാന ആശയം മുകളിലിൽ പറഞ്ഞ നോവലിൽ നിന്ന് കടം കൊണ്ടതാണ് എന്ന കാര്യത്തിൽ തർക്കമില്ല എന്നാൽ അതിനെ മലയാളിക്ക് ഉൾക്കൊള്ളുവാൻ പാകത്തിൽ അവതരിപ്പിച്ചിരിക്കുന്നു എന്നതാണ് ഇവിടെ നാം കാണേണ്ടുന്ന ഏറ്റവും വലിയ മേന്മ . അക്കാദമിക് ജീനിയസായ,അതി സമർഥനായ ഇഷിഗാമിയിൽ നിന്ന് സാധാരണക്കാരനായ,നാലാം ക്ലാസുവരെ മാത്രം പഠിച്ച ,തികച്ചും ഗ്രാമീണനായ ജോർജുകുട്ടിയിലേക്കുള്ള പരിണാമം അതിന്റെ ഏറ്റവും വലിയ തെളിവാണ്. അയാൾ ഇതൊക്കെ എന്തിന് ചെയ്യുന്നു എന്ന ചോദ്യത്തിന് ഉത്തരം കണ്ടെത്താൻ രണ്ടാമതൊന്നു ആലോചിക്കണം എന്നു തോന്നുന്നില്ല. അരിയാഹാരം കഴിക്കുന്ന ഏതൊരു മലയാളിക്കും ഉത്തരം പകൽ പോലെ വ്യക്തം.മിതമായ പാത്രസൃഷ്ടി എടുത്തു പറയേണ്ടുന്ന മറ്റൊരു കാര്യമാണ്.ആർക്കും പറഞ്ഞാൽ മസിലാകാത്ത കാര്യങ്ങൾ മാത്രം പറഞ്ഞു നടക്കുന്ന ഒരു സൂപ്പർ ജീനിയസ് ആയിരുന്നു ഇതിലെ നായകൻ എങ്കിൽ കഥ ഇത്ര ആസ്വദകരമായി തോന്നുമായിരുന്നില്ല.അതുപോലെ നോവലിലെ കുസനാഗിക്കും യുക്കാവ യ്ക്കും സമാനമായി കുറ്റം തെളിയിക്കുവാൻ ബുദ്ധി കൂർമ്മത മുറ്റി നിൽക്കുന്ന ഒരു പോലീസ് ഓഫീസറും അയാളുടെ സുഹൃത്തും ചിത്രത്തിൽ ഇല്ലാതെ പോയതും നല്ല ഒരു മാറ്റമായിത്തോന്നി. ഒരു കച്ചവട സിനിമയിൽ നിന്ന് മലയാളീ പ്രേക്ഷകർ,നാം,ഇതിൽ കൂടുതൽ എന്താണ് പ്രതീക്ഷിക്കുന്നത് ?സാധാരണ പ്രേക്ഷകരുടെ മനസ്സിൽ തട്ടുന്ന ഒരു സാധാരണ കുടുബചിത്രം എന്നതാണ് ഇതിന്റെ ഏറ്റവും വലിയ അംഗീകാരം.

പുസ്തകത്തെ കുറിച്ച് കൂടുതൽ അറിയാൻ ഇവിടെ ക്ലിക്ക് ചെയ്യുക

സാങ്കേതിക മുന്നേറ്റങ്ങൾ - 2013

2014-01-15T06:49:00.004-08:00

കൃത്യമായി ഭാവി പ്രവചിക്കുക അസാദ്ധ്യമാണ് എന്നാൽ നിലവിലുള്ള സൂചകങ്ങൾ ഉപയോഗിച്ച് ഭാവിയെ നോക്കിക്കാണുന്നത് രസകരമായ കാര്യമാണ് . സാങ്കേതിക രംഗത്ത് 2013 സംഭവിച്ച അത്തരം വ്യതിയാനങ്ങളിൽ ഏറ്റവും പ്രധാന്യമേറിയ പത്ത് എണ്ണത്തെ അവതരിപ്പിക്കുകയാണിവിടെ . ശാസ്‌ത്ര സാങ്കേതിക രംഗത്തെ ഏറ്റവും മികച്ച പ്രസിദ്ധീകരണം ആയ MIT ടെക്നോളജി റിവ്യൂ വിന്റെ സയിന്റിഫിക് ബ്രേക്ക്‌ ത്രൂസ് ഓഫ് 2013 നിന്ന്

1)ഡീപ് ലേർനിങ്
മനുഷ്യ മനസിനെ കൃത്രിമമായി നിർമ്മിക്കുവാൻ കഴിയുമോ? അതിനുള്ള സാദ്ധ്യതകൾ ശാസ്ത്രലോകം അന്വേക്ഷിച്ച്‌ തുടങ്ങിയിട്ട് കാലം കുറെയായി . ഈ അടുത്ത കാലം വരെ കംപ്യൂട്ടർ ബുദ്ധിക്ക് പരിമിതികൾ ഉണ്ടായിരുന്നു. ഇത്തരം പരിമിതികളെ ക്രമേണ അകറ്റി ,ചുറ്റുമുള്ള സാഹചര്യങ്ങളിൽ നിന്ന് കാര്യങ്ങൾ ഗ്രഹിച്ച് ബുദ്ധിപൂർവമായ തീരുമാനങ്ങൾ എടുക്കാൻ കെല്പുള്ളവയാണ് ഇന്നത്തെ കംപ്യൂട്ടറുകൾ . പറയുന്നതെന്തും അപ്പടി ചെയ്യുന്ന ഒന്നിൽ നിന്ന് വിവേകത്തെ സന്നിവേശിപ്പിക്കുന്ന ശാഖയിൽ ഒട്ടേറെ മുന്നേറ്റങ്ങൾ നടക്കുകയുണ്ടായി. വർദ്ധിച്ചു വരുന്ന കംപുട്ടെഷൻ കഴിവിനെ ഉപയോഗപ്പെടുത്തിയാണ് ആർട്ടിഫിഷ്യൽ ഇന്റെലിജെൻസ് പുതിയ വാതായനങ്ങൾ തുറക്കുന്നത് .1950 കളിൽ രൂപമെടുത്ത ന്യുറൽ നെറ്റ്‌വർക്ക് എന്ന ശാഖയിലേക്ക് ഗൂഗിൾ പോലെയുള്ള കംപനികൾ ഇതിൽ ശ്രദ്ധ കേന്ദ്രീകരിച്ചു തുടങ്ങിയിരിക്കുന്നു .മറ്റു പല മേഖലകളിലേക്കും വ്യാപിപ്പിക്കാവുന്ന ചില മുന്നേറ്റങ്ങൾ 2013 -ൽ ഈ രംഗത്ത്‌ നടക്കുക ഉണ്ടായി

2) സ്നാപ് ചാറ്റ്
ഇന്റർനെറ്റ് ഉം സോഷ്യൽ നെറ്റ്വർക്ക്കളും നമ്മുടെ സ്വകാര്യതയെ കാർന്നു തിന്നുന്നു എന്ന മുറവിളിക്ക് ഇന്റർനെറ്റിനോളം പ്രായമുണ്ട് . ഒരിക്കൽ പറഞ്ഞു പോയാൽ ഒരിക്കലും മാറ്റാൻ സാധിക്കാത്തവിധം വലയ്ക്അകത്ത് കുടുങ്ങി കിടക്കും എന്നതിന് പരിഹാരമായ് വന്നിരിക്കുന്ന പുതിയ സംവിധാനം ആണ് സ്നാപ് ചാറ്റ് . ഒരു നിശ്ചിത സമയശേഷം സ്വയം ഇല്ലാതാകുന്ന സംവിധാനമാണിത് .കേവലം പത്തു സെക്കന്റ്‌ മാത്രം പ്രത്യക്ഷ പെടുന്ന ഇത്തരം ഫോട്ടോ മെസ്സേജുകൾ സ്വീകരിക്കുന്ന വ്യക്തി സ്ക്രീൻ ഷോട്ട് എടുക്കുകയോ മറ്റോ ചെയ്താൽ അത് അയച്ച വ്യക്തിയെ അറിയിക്കുകയും ചെയ്യും. മെസ്സേജുകൾ സൂക്ഷിച്ചു വയ്കപ്പെടതിരിക്കുവാൻ ഇത് മാത്രം പര്യാപ്തമല്ല എങ്കിലും 'താത്കാലിക' സോഷ്യൽമീഡിയ ഒരു പുതിയ വഴിത്തിരിവാണ് .

3) ഗർഭസ്ഥശിശുവിന്റെ ഡി ൻ എ വായന
ജനനത്തിനു മുൻപ് കുട്ടിയുടെ ജനിതക വിവരങ്ങൾ അറിയുവാൻ കഴിയുക എന്നത് രോഗ നിർണയരംഗത്ത് ഏറെ പ്രയോജനമുള്ള ഒരു കാര്യ മാണ് . എന്നാൽ മാതാവിനും കുഞ്ഞിനും യാതൊരു ദോഷവും സംഭവിക്കാതെ , സുരക്ഷിത മായി ഇത്തരം ഒരു കാര്യം ചെയ്യുവാൻ ഈ അടുത്ത കാലം വരെ കഴിയില്ലായിരുന്നു . എന്നാൽ അമ്മയുടെ രക്തത്തിൽ നിന്ന് കുട്ടിയുടെ ജീൻ സീക്വൻസു കൾ മനസിലാക്കാൻ കഴിയുന്ന ചില മാർഗങ്ങൾ ഈ രംഗത്തെ ഗവേഷകർ കണ്ടുപിടിച്ചിരിക്കുന്നു. ആരോഗ്യമുള്ള ഒരു തലമുറയെ വാർത്തെടുക്കുന്നതിൽ ഈ മുന്നേറ്റങ്ങൾ ഒരു മുതൽക്കൂട്ടായി മാറും എന്ന് വിലയിരുത്തപ്പെടുന്നു .

4)അഡിറ്റീവ് മാനുഫാക്ച്ചറിംഗ്
മാനിഫാക്ച്ചറിംഗ് രംഗത്ത് പുതിയ ഒരു വാഗ്ദാനമാണ് അഡിറ്റീവ് മാനുഫാക്ച്ചറിംഗ് .
വളരെ വ്യാപക മായി അറിയപ്പെടുന്ന ത്രിഡി പ്രിന്റിംഗ് ന്റെ (3 D Printing) വ്യാവസായിക രൂപമാണ് അഡിറ്റീവ് മാനുഫാക്ച്ചറിംഗ്. വളരെയധികം കൃത്യത വേണ്ടതും സങ്കീർ ണവുമായ ഭാഗങ്ങൾ ഉണ്ടാക്കുവാൻ ഈ പുതുയ വിദ്യ ഗുണം ചെയ്യുമെന്നു ഈ രംഗത്തെ വിദഗ്ധർ കരുതുന്നു . ജെറ്റ് വിമാനങ്ങളുടെ ഇന്ധന കുഴലുകളുടെ അഗ്രം നിർമ്മിക്കുവാൻ ജനറൽ ഇലക്ട്രിക്‌ പോലെയുള്ള കന്പനികൾ ഈ സാങ്കേതിക വിദ്യ ഉപയോഗിച്ച് തുടങ്ങിക്കഴിഞ്ഞു. നിർമ്മാണ വേളയിലെ കുറഞ്ഞ വെയിസ്റ്റും കൃത്യതയും ആണ് ഇതിന്റെ എറ്റവും പ്രധാന മേന്മ. വരും നാളുകളിൽ ഒട്ടേറെ നിർമാണങ്ങൾ ഈ സാങ്കേതിക വിദ്യ ഉപയോഗിക്കും എന്ന് വിലയിരുത്തപ്പെടുന്നു

5) നവീന സോളാർ പാനലുകൾ
ഊർജപ്രതിസന്ധിയുടെ ശാശ്വത പരിഹാരം സൌരോർജ്ജത്തിലാണ് എന്ന് ശാസ്ത്ര ലോകം തിരിച്ചറിഞ്ഞിട്ട് കാലം കുറച്ചായി. എന്നാൽ ഒരു മുടക്കുമുതലും ഇല്ലാതെ , ആവശ്യാനുസരണം ലഭ്യമായ പ്രകൃതിയുടെ ഈ വരദാനത്തെ വേണ്ട വിധം ഉപയോഗപ്പെടുത്തുന്നതിൽ നമുക്ക് പല പരിമിതികളും ഉണ്ടായിരുന്നു. സോളാർ പാനലുകളുടെ കാര്യ പ്രാപ്തി ആയിരുന്നു ഏറ്റവും പ്രധാനപ്പെട്ട ഒരു കീറാ മുട്ടി . ഈ രംഗത്ത് വന്ന ചില പുതിയ മാറ്റങ്ങൾ നമുക്ക് കൂടുതൽ പ്രതീക്ഷ നല്കുന്നു . സൂര്യപ്രകാശത്തെ കൂടുതൽ കേന്ദ്രീകരിപ്പിച്ച് ,വർദ്ധിത കാര്യപ്രാപ്തി നേടിയെടുക്കാൻ കഴിയുന്നവയാണ് പുതിയ പുതിയ പാനലുകൾ.

6)സൌഹൃദ റോബോട്ടുകൾ
ശാസ്ത്ര -സാങ്കേതികരംഗത്ത് റോബോട്ടുകളുടെ വരവ് ഒരു പുതിയ യുഗപ്പിറവി തന്നെ ആയിരുന്നു . മനുഷ്യന് എത്തിപ്പെടാൻ കഴിയാത്തതോ സുരക്ഷിതമല്ലാത്തതോ ആയ സാഹചര്യങ്ങളിൽ റോബോട്ട്കൾ നമ്മെ സഹായിക്കാൻ തുടങ്ങി. എങ്കിലും സാധാരണ വ്യവസായങ്ങൾക്ക് എളുപ്പം ഉപയോഗപ്പെടുത്തുവാൻ പാകത്തിന് അവ ലഭ്യമായിരുന്നില്ല . വേണ്ടിവരുന്ന കൂടുതൽ മുതൽമുടക്കും വേണ്ടവിധം ഉപയോഗപ്പെടുത്താൻ വേണ്ടിവരുന്ന സങ്കീർണതയും ഇതിന്റെ പ്രധാന കാരണങ്ങൾ ആണ് . ഇതിന് പരിഹാരമായാണ് ബാക്സ്റ്റർ എന്ന കുഞ്ഞൻ റോബോട്ടുകളുടെ വരവ് . താരതമ്യേന വില കുറവ് ആണെന്ന് മാത്രമല്ല നമുക്ക് വേണ്ടുന്ന രീതിയിൽ അവയെ പരിശീലിപ്പിച്ചെടുക്കാം എന്നതാണ് അതിന്റെ ഏറ്റവും വലിയ മേന്മ . ഗൂഗിൾ ഉൾപ്പെടെ യുള്ള പല കംപനികളും ഇത്തരം റോബോട്ട് കളിലേക്ക് ശ്രദ്ധ കേന്ദ്രീകരിച്ചു തുടങ്ങിയിരിക്കുന്നു എന്നത് തന്നെ ഇതിന്റെ പ്രാധാന്യം വെളിവാക്കുന്നു.

7)സൂപ്പർ ഗ്രിഡുകൾ
ലോകം നേരിടുന്ന ഊർജ പ്രതിസന്ധിയുടെ ഒരു പ്രധാന കാരണം പ്രസരണ നഷ്ടം ആണ് . ഇതിനു ഒരു പരിധിവരെ പരിഹാരം കാണാൻ സാധ്യതയുള്ള ഒരു സാങ്കേതിക മുന്നേറ്റം ആണ് സൂപ്പർ ഗ്രിഡ് കൾ എന്നറിയപ്പെടുന്നത് . ദീർഘ ദൂര ഹൈ വോൾട്ടേജ് പ്രസരണത്തിന് ഡി സി (DC) ഉപയോഗിക്കാം എന്നതാണ് ഇതിന്റെ മേന്മ. വിൻഡ് മില്ലുകളും സോളാർ ഫാംകളും വഴി നിർമ്മിക്കപ്പെടുന്ന വൈദ്യുതി വളരെ അകലെയുള്ള ജനവാസ കേന്ദ്രങളിൽ ഫലപ്രദമായി എത്തിക്കുവാൻ ഈ മുന്നേറ്റത്തിനു കഴിയും എന്നും ഇത് ക്ലീൻ എനർജി ചിന്തകർക്ക്‌ പുതിയ ഉന്മേഷം പകരും എന്നും വിലയിരുത്തപ്പെടുന്നു .

8)സ്മാർട്ട്‌ വാച്ചുകൾ
കണ്‍സ്യുമർ ഇലക്ട്രോണിക്സ്‌ രംഗം അതിവേഗം മാറ്റങ്ങൾക്ക് വിധേയമായി കൊണ്ടിരിക്കുകയാണ് . ഇതിൽ ഏറ്റവും ശ്രദ്ധേയമായി നോക്കിക്കാണേണ്ടുന്നത് മനുഷ്യന് ധരിക്കാവുന്ന സ്മാർട്ട്‌ ഉപകരണങ്ങൾ ആണ് .ഈ വിഭാഗത്തിലെ ആദ്യ ചുവടു വെയ്പ്പാണ് സ്മാർട്ട്‌ വാച്ചുകൾ . കേവലം സമയം നോക്കുവാനുള്ള ഒരു ഉപകരണം എന്നതിൽ നിന്ന് ,നമ്മുടെ കല്പനകൾക്ക് അനുസരിച്ച് കാര്യങ്ങൾ ചെയ്യുവാൻ ശേഷിയുള്ള ഇത്തരം ഉപകരണങ്ങൾ നമ്മുടെ നിത്യ ജീവിതത്തിൽ വലിയ സ്വാധീനം ചെലുത്തും എന്ന കാര്യത്തിൽ തർക്കമില്ല. സാം സങ്ങും ഗൂഗിളും ആപ്പിളും എല്ലാം ഈ രംഗത്ത് ചുവടുറപ്പിക്കുവാൻ ശ്രമങ്ങൾ തുടങ്ങി ക്കഴിഞ്ഞു .

9)'ഓർമ മാറ്റ' ശസ്തക്രീയകൾ
അവയവ മാറ്റ ശസ്തക്രീയകൾ ഇന്ന് സർവസാധാരണമായിക്കഴിഞ്ഞിരിക്കുന്നു. എന്നാൽ ശാസ്ത്ര ലോകത്തിന് ഒട്ടും പിടിതരാതെ നിന്നിരുന്ന ഒന്നാണ് ഓർമ . അപകടങ്ങളോ മറ്റ് രോഗങ്ങൾ മൂലമോ പ്രായം മൂലമോ ഓർമനഷ്ടപ്പെട്ടു തുടങ്ങിയാൽ , അവ പരിഹരിക്കുക എന്നത് തികച്ചും അസാദ്ധ്യമായ ഒന്നായിരുന്നു . ഈ അവസ്ഥയ്ക് മാറ്റം വരാൻ പോകുന്നു തലച്ചോറിലെ ഇലട്രോണിക് ഇംപ്ലാന്റുകൾ മുഖേന ദീർഘകാല ഓർമയുമായി ബന്ധപ്പെട്ട തകരാറുകൾ പരിഹരിക്കുവാൻ ആകുമെന്ന് ഗവേഷണങ്ങൾ സൂചിപ്പിക്കുന്നു .

10)സാമൂഹിക വിവരശേഖരം
സാമൂഹിക മാറ്റങ്ങൾ വിലയിരുത്തുവാനും മറ്റും വിവരശേഖരം നടത്തുക എന്നത് ഒരു സാധാരണമാർഗമാണ് . സമൂഹത്തിലെ കുറ്റവാസനകൾ , പകർച്ചവ്യാധികൾ എന്നിവയുടെ
തോത് കൃത്യമായി മനസിലാകുവാൻ സാമൂഹിക ശാസ്ത്രകാരന്മാർ ഉപയോഗിക്കുന്ന ഒരു മാർഗമാണ് . (നമ്മുടെ സെൻസസ് വിവര ശേഖരണം ഉദാഹരണമാണ് ) . ഇത്തരം മാർഗങ്ങൾ ചെലവ് ഏറിയതും സമയം പിടിക്കുന്നതുമാണ് . ഇതിനു പരിഹാരമായാണ് എളുപ്പമുള്ള വിവരശേഖരണ മാർഗങ്ങൾ ശാസ്ത്രകാരന്മാർ അന്വേക്ഷിച്ചു തുടങ്ങിയത്, ഒരു സമൂഹത്തിന്റെ സെൽഫോണ്‍ വിവര ശേഖരത്തിൽ നിന്ന് ഇത്തരം അനുമാനങ്ങൾ നടത്താൻ കഴിയും എന്ന് MIT യിലെ ഒരു കൂട്ടം ഗവേഷകർ തെളിയിച്ചിരിക്കുന്നു.വികസിച്ചുവരുന്ന രാജ്യങ്ങളിൽ ഈ നവീന രീതികൾ വൻ സാദ്ധ്യതകളാണ് തുറന്നിടുന്നത് .

ലേഖനം പൂർണമായും വായിക്കാൻ ഇവിടെ ക്ലിക്ക് ചെയ്യുക

വിദ്യാര്‍ഥികള്‍ക്ക് റാസ്‌ബെറി പൈ കമ്പ്യൂട്ടര്‍ , ഫാബ് ലാബ്‌

2013-12-16T06:10:00.000-08:00

കേരളത്തിലെ സ്കൂൾ കുട്ടികൾക്ക് റാസ്‌ബെറി പൈ നല്കാനുള്ള സർക്കാർ തീരുമാനം വായിച്ചപ്പോൾ വളരെ സന്തോഷം തോന്നി. മാതൃഭുമിയിൽ പ്രസിദ്ധീകരിച്ച ഈ ലേഖനം അതിന് ഒരു പങ്കു വഹിച്ചു എന്നറിഞപ്പോൾ വല്ലാത്ത ഒരു സംതൃപ്തിയും ! നന്ദി മാതൃഭൂമി ! ഇതാണ് യഥാർത്ഥ പത്രത്തിന്റെ ശക്തി !!

മാതൃഭൂമി 14 -Dec -2013
കൊച്ചി: വിദ്യാര്‍ഥികളില്‍ കമ്പ്യൂട്ടര്‍ അഭിരുചി വര്‍ദ്ധിപ്പിക്കുന്നതിനായി തിരഞ്ഞെടുത്ത 10,000 സ്‌കൂള്‍ കുട്ടികള്‍ക്ക് കമ്പ്യൂട്ടറിന്റെ ചെറിയ പതിപ്പായ റാസ്‌ബെറി പൈ നല്‍കാന്‍ സര്‍ക്കാര്‍ തീരുമാനം. അടുത്ത വര്‍ഷം മുതല്‍ പദ്ധതി സംസ്ഥാനത്ത് നടപ്പിലാക്കും.

ഭാരം കുറഞ്ഞ്, സിങ്ങിള്‍ ബോര്‍ഡിലൊതുങ്ങുന്ന കമ്പ്യൂട്ടറാണ് റാസ്‌ബെറി പൈ. മൈക്രോ യുഎസ്ബി കേബിള്‍ വഴി പവര്‍ നല്‍കുകയും കീബോര്‍ഡും മൗസും ഘടിപ്പിക്കാന്‍ ആവശ്യമായ യുഎസ്ബി പോര്‍ട്ടുകളും നെറ്റ് വര്‍ക്ക് കണക്ടിവിറ്റിക്കായുള്ള സംവിധാനവുമുണ്ട്. സോഫ്റ്റ് വെയറിനൊപ്പം ഹാര്‍ഡ് വെയറും കുട്ടികളെ പരിചയിപ്പിക്കുകയാണ് ഇതിന്റെ ലക്ഷ്യം. എട്ടുമുതല്‍ 12 വരെ ക്ലാസിലെ തിരഞ്ഞെടുത്ത കുട്ടികള്‍ക്കാണിത് നല്‍കുക. വര്‍ഷം 3 കോടിയാണ് ചെലവ് പ്രതീക്ഷിക്കുന്നത്. ഹാര്‍ഡ് വെയര്‍ പരിചയിക്കുന്നതോടെ കമ്പ്യൂട്ടറുമായി ബന്ധപ്പെട്ട കൂടുതല്‍ മേഖലകളിലേക്ക് കുട്ടികളെ എത്തിക്കുകയാണ് പരിപാടിയുടെ ലക്ഷ്യം.

മുഴുവൻ വാർത്ത വായിക്കാൻ ക്ലിക്ക് ചെയ്യുക

സാങ്കേതിക വിപ്ളവം റാസ്ബറി പൈ വഴി

2013-12-02T06:09:00.001-08:00

വെള്ളം, വെള്ളം സര്‍വത്ര! തുള്ളി കുടിക്കാന്‍ ഇല്ലത്രെ!!' എന്ന പഴമൊഴിയെ അനുസ്മരിപ്പിക്കും വിധമാണ് ശാസ്ത്രസാങ്കേതിക വിദ്യാഭ്യാസ മേഖല ഇപ്പോള്‍ . സ്മാര്‍ട്ട് ഫോണുകളും അത്യാധുനിക കമ്പ്യൂട്ടറുകളും ഇന്നത്തെ വിദ്യാര്‍ത്ഥികള്‍ക്ക് സുപരിചിതമാണ്. പണ്ട് ഗ്രാഡ്വേറ്റ് വിദ്യാര്‍ഥികള്‍ക്ക് മാത്രം ലഭ്യമായിരുന്ന സൗകര്യങ്ങള്‍ ഇന്ന് പ്രീസ്‌കൂള്‍ വിദ്യാര്‍ഥികള്‍ക്കുപോലും ലഭ്യമാണ്.

കമ്പ്യൂട്ടര്‍മേഖലയും കണ്‍സ്യൂമര്‍ ഇലക്ട്രോണിക്‌സ് ( Consumer Eletcronics ) മേഖലയും ചേര്‍ന്ന് മനോഹരവും എളുപ്പത്തില്‍ പ്രവര്‍ത്തിപ്പിക്കാന്‍ കഴിയുന്നതുമായ ഒട്ടേറെ ഗാഡ്ജറ്റുകള്‍ നമുക്ക് സമ്മാനിച്ചിട്ടുണ്ട്. സ്മാര്‍ട്ട്‌ഫോണുകളും ടാബ്‌ലറ്റ് കമ്പ്യൂട്ടറുകളുമൊക്കെ ലക്ഷ്വറി ഉപകരണങ്ങള്‍ എന്നതില്‍നിന്ന് നിത്യജീവിതത്തിലെ ഓരോ നിമിഷത്തെയും സ്വാധീനിക്കുന്നവയായി മാറിയിരിക്കുന്നു. സമീപഭാവിയില്‍ പാഠപുസ്തകങ്ങളും ഹോംവര്‍ക്കുകളും പരീക്ഷകളുമെല്ലാം കമ്പ്യൂട്ടര്‍ അധിഷ്ഠിതമാകും എന്ന യാഥാര്‍ത്ഥ്യം മുന്നില്‍കണ്ട്, പല വിദേശ രാജ്യങ്ങളിലും കുട്ടികളെ അക്ഷരം എഴുതി പഠിപ്പിക്കുന്നതിന് പകരം കമ്പ്യൂട്ടര്‍ ടൈപ്പിങിന് പ്രാധാന്യം കൊടുത്തു തുടങ്ങിയിരിക്കുന്നു.

മാതൃഭൂമിയിൽ പ്രസിദ്ധീകരിച്ച ലേഖനത്തിന്റെ പൂർണ്ണ രൂപം വായിക്കാൻ ഇവിടെ ക്ളിക്ക് ചെയ്യുക

ദി ജേർണി ഹോം

2013-11-19T06:14:00.000-08:00

ജീവിതത്തിലെ നിയോഗങ്ങൾ നമ്മെ അത്ഭുതപ്പെടുത്താറുണ്ട് ,കാല-ദേശ പരിമിതികൾക്കപ്പുറത്ത് , എന്തു ജാലവിദ്യയും ഒരുക്കുന്ന അവയെക്കുറിച്ച് ,ആഴത്തിൽ ചിന്തിക്കുവാൻ പ്രേരിപ്പിക്കുന്ന ഒരു പുസ്തകമാണ് ദി ജേർണി ഹോം(The Journey Home) . ഒറ്റ നോട്ടത്തിൽ അവിശ്വസനീയമായി തോന്നാവുന്ന ഒട്ടേറെ നിയോഗങ്ങളുടെയും നിമിത്തങ്ങളുടെയും കഥ പറയുന്ന ഒരു ആത്മകഥയാണിത് .തികച്ചും വ്യത്യസ്തമായ ജീവിത സാഹചര്യങ്ങളിൽ നിന്ന് ഒട്ടേറെ പ്രതിബന്ധങ്ങളെ അതിജീവിച്ച് ഭാരതത്തിൽ എത്തി , അതിന്റെ പാരമ്പര്യവും സംസ്കാരവും മനസിലാക്കുകയും അവയെ ലോകത്തെമ്പാടും പ്രചരിപ്പിക്കുവാൻ ജീവിതം ഒഴിഞ്ഞു വയ്ക്കുകയും ചെയ്യുന്ന രാധാനാഥ സ്വാമികളാണ് (Radhanath Swami) തന്റെ പൂർവാശ്രമ അനുഭവങ്ങൾ വായനക്കാരുമായി പങ്കു വയ്ക്കുന്നത് . ശ്രേഷ്ഠമായ പൈതൃകങ്ങൾക്ക് നടുവിൽ ജനിച്ച് വളർന്നിട്ടും അവയോട് അവകജ്ഞയും അറിവില്ലായ്മയും വച്ച് പുലർത്തുന്ന നമ്മിൽ പലരെയും സ്വയം വിമർശനത്തിന് പ്രേരിപ്പിക്കുന്നതുകൂടിയാണ് ഇതിന്റെ ഉള്ളടക്കം.

അമേരിക്കയിലെ ചിക്കാഗോ നഗരത്തിനു സമീപമുള്ള ഒരു ചെറു പട്ടണത്തിൽ ജനിച്ച് വളർന്ന റിച്ചാർഡ്‌ എന്ന കുട്ടി . ജുയിഷ് മത വിശ്വാസികൾ ആയ അച്ഛനും അമ്മയും രണ്ടു സഹോദരന്മാരും അടങ്ങുന്ന ഒരു കുടുംബം. റിച്ചി എന്ന വിളിപ്പേരിൽ അറിയപ്പെട്ടിരുന്ന അവൻ സാധാരണ കുട്ടികൾ കളിച്ചു വളരുന്നത്‌ പോലെ വളർന്നു. ഒരിക്കൽ കളിക്കുന്നതിനിടയിൽ ഒരു കൂട്ടുകാരൻ പറഞ്ഞ ചില വാചകങ്ങൾ റിച്ചിയുടെ മനസിനെ വല്ലാതെ പിടിച്ചുലച്ചു . " ക്രിസ്തുവിൽ വിശ്വസിക്കാത്ത നീ , വെറുക്കപ്പെട്ട വിഭാഗത്തിൽപ്പെട്ടവനാണ് . ഈശ്വരനുപോലും നിന്നോടു വെറുപ്പാണ് " തന്റെ വീട്ടിൽ പറഞ്ഞു കേട്ട വാചകങ്ങൾ അതേപടി ഉരുവിട്ട അവൻ, കൂടുതൽ ഒന്നും ചിന്തിച്ചിരിക്കില്ല എന്നാൽ സ്നേഹിക്കാൻ മാത്രം പഠിപ്പിക്കുന്ന ദൈവങ്ങൾ എങ്ങനെ വെറുക്കും എന്ന ചിന്ത റിച്ചിയെ അസ്വസ്ഥനാക്കി . അമ്മയോട് അവൻ ഈ കാര്യങ്ങൾ പറഞ്ഞുവെങ്കിലും പക്വമതിയായ അവർ മറ്റു വിഷയങ്ങളിലേക്ക് അവന്റെ ശ്രദ്ധ തിരിച്ചുവിട്ടു.

കുറച്ചുകൂടി വളർന്നു കൌമാരത്തിൽ എത്തിയ റിച്ചാർഡ്‌ , മറ്റെല്ലാ സമപ്രായക്കാരെയും പോലെ
ഹിപ്പി സംസ്കാരത്തിലേക്ക് വഴുതി വീണു . ആ കാലഘട്ടത്തിൽ സമൂഹത്തിൽ നിലനിന്നിരുന്ന കൌണ്ടർ കൾച്ചർ -ന്റെ ഭാഗമായി ജീവിതം നയിക്കുവാൻ തുടങ്ങി.മുടി നീട്ടി വളർത്തി , മദ്യവും മയക്കുമരുന്നുമായി സമൂഹത്തിന്റെ വ്യവസ്ഥാപിത രീതികൾക്ക് എതിരെ പ്രവർത്തിക്കുക ഇതായിരുന്നു ചുരുക്കത്തിൽ അവരുടെ ജീവിത ലക്ഷ്യം .വിയറ്റ്നാം യുദ്ധവും മാർട്ടിൻ ലൂഥർ കിങ്ങിന്റെ നേതൃത്വത്തിലുള്ള സിവിൽ റൈറ്റ് മൂവ്മെന്റും ഇത്തരം പ്രസ്ഥാനങ്ങൾക്ക് വളരാൻ പറ്റിയ ഒരു ചുറ്റുപാടൊരുക്കി.

കോളേജ് പഠനത്തിനു തയ്യാറെടുക്കേണ്ടുന്ന ഒരു സമ്മർ സമത്ത് ഗ്യാരി എന്ന കൂട്ടുകാരനുമായി ചേർന്ന് യുറോപ്യൻ രാജ്യങ്ങളിലേക്ക് ഒരു ഉല്ലാസ യാത്ര നടത്തുന്നു.ഹിപ്പികൂട്ടങ്ങളുമായി കൂട്ടായ്മകളും സംഗീത സായാഹ്നങ്ങളും മറ്റും ആസ്വദിക്കുന്നതിനിടയിൽ ഹിപ്പി കളുടെ നേതാക്കളിൽ ഒരാളായ ജിമ്മി ഹെന്ദ്രിക്സ് -ന്റെ (Jimi Hendrix) മരണ വാർത്ത അറിയുന്നു. മദ്യത്തിന്റെയും മയക്കുമരുന്നിന്റെയും ആധിക്യത്താൽ സംഭവിച്ച ആ മരണം റിച്ചിയെ കൂടുതൽ ചിന്തിപ്പിച്ചു. ജീവിതത്തിൽ നിർവൃതി തേടിയുള്ള യാത്രയിൽ താൻ സ്വീകരിച്ച പാതയുടെ അർഥശൂന്യത അവൻ ആദ്യമായി തിരിച്ചറിഞ്ഞ ഒരു നിമിഷമായിരുന്നു അത് .ബഹളങ്ങളിൽ നിന്ന് മാറി അല്പസമയം ഏകനായി ഇരിക്കുന്ന അവന് ഭാരതത്തിലേക്ക്‌ തീർത്ഥാടനം നടത്താൻ ഉൾവിളി ഉണ്ടാകുന്നു. ഇന്നത്തേത് പോലെ കേവലം മണിക്കൂറുകൾ കൊണ്ട് ഇന്ത്യയിൽ എത്തുന്ന ഒരു വിമാനയാത്രയായിരുന്നില്ല റിച്ചാർഡ്‌ -ന്റെ മുൻപിൽ ഉണ്ടായിരുന്നത് മറിച്ച് , മറ്റു യാത്രക്കാരുടെ ഔദാര്യം കൊണ്ട് , ഒരു സ്ഥലത്ത് നിന്ന് മറ്റൊരു സ്ഥലത്തേക്കും അവിടെനിന്ന് മറ്റൊരു സ്ഥലത്തേക്കും പോയി ഒടുവിൽ ലക്ഷ്യസ്ഥാനത്ത് എത്തിച്ചേരുന്ന,കൃത്യമായ പ്ളാനുകൾ ഒന്നുമില്ലാത്ത ഒരു 'നാടോടി' യാത്ര . ഹിച്ച്ഹൈക്കിങ്ങ് (Hitchhiking) എന്ന ഓമനപ്പേരിൽ അറിയപ്പെടുന്ന , ഈ യാത്രകൾ യുറോപ്യൻ രാജ്യങ്ങളിൽ സർവസാധാരണമായിരുന്നുവെങ്കിലും, ഒരു പരിചയവുമില്ലാത്ത രാജ്യങ്ങളിലൂടെ ,ഒരു പരിചയവുമില്ലാത്ത ഒരു രാജ്യത്തിലേക്ക് നടത്തുന്ന ഈ യാത്ര അത്യന്തം അപകടകരമാണെന്ന് അറിയാമായിരുന്നിട്ടും, അവൻ തന്റെ ഉൾവിളിയെ പിന്തുടരുവാൻ തീരുമാനിക്കുന്നു .

പ്രതീക്ഷിച്ചത് പോലെ തന്നെ ദുർഘടമായിരുന്നു ആ യാത്ര. വിവധ രാജ്യങ്ങളുടെ അതിർത്തികൾ ഭേദിച്ചു മുന്നോട്ട് പോകേണ്ട യാത്ര പല സ്ഥങ്ങളിലും തടസപ്പെട്ടു. കോളറ മഹാമാരി പടർന്നു പിടിച്ച തുർക്കിയും , ഓപ്പിയം പോലുള്ള മയക്കുമരുന്നുകൾ പുകയ്ക്കുന്ന ഇറാനും , അഫ്ഗാനിസ്ഥാനും , പാകിസ്ഥാനും ഒക്കെ റിച്ചാർഡ്‌ -നു അനന്യ സാധാരണമായ അനുഭവങ്ങൾ നല്കി. തരണം ചെയ്യാൻ കഴിയില്ല എന്ന് കരുതിയ ഓരോ പ്രതിസന്ധിയിലും തന്റെ അചഞ്ചലമായ അഭിവാഞ്ച അദ്ദേഹത്തിന് തുണയായി . ഒടുവിൽ ഭാരതത്തിൻറെ അതിർത്തിയിൽ എത്തിയപ്പോൾ , കയിൽ വേണ്ടത്ര പണമില്ല എന്ന കാരണത്താൽ അവന് പ്രവേശനം നിഷേധിച്ചു . മുഷിഞ്ഞ വസ്ത്രധാരിയായ റിച്ചാർഡിന്റെ തുടരെ തുടരെയുള്ള അപേക്ഷ ഓഫീസറെ ചൊടിപ്പിച്ചു. ഒടുവിൽ ഷിഫ്റ്റ്‌ മാറി വന്ന പുതിയ ഉദ്യോഗസ്ഥൻ റിച്ചാർഡിന്റെ ഉൾവിളിയെ വിശ്വസിച്ച് ,ഭാരതത്തിലേക്ക് പ്രവേശനം അനുവദിക്കുന്നു. എന്തു ചെയ്യണമെന്നോ എങ്ങോട്ട് പോകണമെന്നോ നിശ്ചയമുണ്ടായിരുന്നില്ല എങ്കിലും തന്റെ സ്വന്തം വീട്ടിൽ എത്തിയ ഒരു ആശ്വാസം റിച്ചാർഡ്‌ -ന് അനുഭവപ്പെട്ടു.

അല്ലറ ചില്ലറ അലച്ചിലുകൾക്കൊടുവിൽ അദ്ദേഹം , ഹിമാലയൻ പർവതനിരകളിൽ എത്തിപ്പെടുന്നു , അവിടെ ഗംഗാ നദിക്കരയിൽ കണ്ടുമുട്ടുന്ന അക്ഞാതനായ ഒരു സാധു , വിദേശ വസ്ത്രങ്ങൾ മുഴുവൻ ഉപേക്ഷിച്ച് , ഉടുക്കുവാനും പുതക്കുവാനും പരുത്തി മുണ്ടുകളും കൌപീനവും പരിചയപ്പെടുത്തുന്നു, അതിനുശേഷം നടന്നു നീങ്ങിയ ആ മഹാനുഭാവനെ പിന്നീട്‌ ഒരിക്കലും അവൻ കണ്ടിട്ടില്ലത്രെ. സത്യത്തെ അന്വേക്ഷിച്ച്‌ ഒരു യഥാർഥ സാധകനായി അവിടെത്തുടങ്ങുന്ന ആ യാത്ര , ഗംഗാനദിയുടെ ഒഴുക്കിനിടയിലെ ചെറു ചാലുകൾ പോലെ , ഉത്തരേന്ത്യ മുഴുവനും നേപ്പാളും റ്റിബെറ്റും ഒക്കെ ഉൾപ്പെടുന്ന ഒട്ടേറെ ചെറു യാത്രകളായി മാറുന്നു .ഈ യാത്രകൾക്കിടയിൽ പല ആത്മീയ മഹാരഥന്മാരെയും കണ്ടു മുട്ടുന്നു . ഇവരിൽ മിക്കവരും ജ്ഞാനദൃഷ്ടിയിലൂടെ റിച്ചാർഡ്‌ നെ കുറിച്ച് അറിയുകവും ,മിക്ക വേദികളികിലും പ്രധാന സ്വാമിമാർക്കൊപ്പം ഇരിക്കുവാൻ അവസരം നല്കുകയും ചെയ്യുന്നത്‌ അദ്ദേഹത്തെപ്പോലെ വായനക്കാരെയും അത്ഭുതപ്പെടുത്തും. ഈ കൂടിക്കാഴ്ചകളിൽ ആനന്ദമയിഅമ്മ (Sri Anandamayi Ma),ജിദു കൃഷ്ണമൂർത്തി(Jiddu Krishnamurti), ദലൈ ലാമ(Dalai Lama) ,കൈലാസ് ബാബ എന്നിവരുടെത് എടുത്തു പറയേണ്ടുന്ന പേരുകളാണെന്ന് അദ്ദേഹം തന്നെ സൂചിപ്പിക്കുന്നു . ശ്രീ ബുദ്ധൻ തപസ്സു ചെയ്ത ബോധി വൃക്ഷ (Bodhi Tree)ചുവട്ടിൽ ഏകാഗ്രനായി തപസു ചെയ്യുന്ന ഒരു ഇരുപതു വയസുകാരന്റെ ചിത്രം ,വായനയിൽ, നമ്മുടെ മുന്നിലും തെളിഞ്ഞു വരുന്നു .വാരണാസിയിലെ ശ്മശാനത്തറയിൽ , മരണത്തെക്കുറിച്ച് ചിന്തിച്ചിരിക്കുന്ന റിച്ചാർഡ്‌ വായനക്കാരിലും അത്തരം ചിന്തകൾ ഉദ്ദീപിപ്പിക്കുന്നു.

ഗുരു തുല്യരായ ഒട്ടേറെ പ്പേരെ കാണുവാനും അടുത്ത് ഇടപഴകാനും റിച്ചാർഡ്‌ -നു അവസരം ലഭിച്ചിട്ടും , അവരിൽ പലരും തങ്ങളുടെ പാത പിന്തുടരുവാൻ ക്ഷണിച്ചിട്ടും അദ്ദേഹം അതിനു കൂട്ടാക്കിയില്ല. ആത്മീയതയിലെ സത്യാന്വേക്ഷണതിന് ഒരു ഗുരുവിനെ സ്വീകരിച്ചു കഴിഞ്ഞാൽ ലുള്ള വർദ്ധിച്ച ഉത്തരവാദിത്വബോധം, അദ്ദേഹത്തെ അതിൽ നിന്നെല്ലാം പിന്തിരിപ്പിക്കുകയായിരുന്നു . ഒടുവിൽ കാശ്മീരിലേക്കുള്ള യാത്രാ മദ്ധ്യേ , വെള്ളം കുടിക്കുവാൻ സ്റ്റേഷനിൽ ഇറങ്ങുന്ന അദ്ദേഹത്തിനു ശ്രീ കൃഷ്ണന്റെ ജന്മസ്ഥലമായ മഥുരയിൽ വച്ച് യാത്ര മുറിഞ്ഞു പോകുന്നു . ജന്മാഷടമി ദിവസം ആയിരുന്ന അന്ന് , തന്റെ സ്വപ്നത്തിൽ വന്ന , ഓടക്കുഴൽ വായിക്കുന്ന കറുത്ത ബാലനെ റിച്ചാർഡ്‌ തിരിച്ചറിയുന്നു. തുടർന്നു കുറച്ചു മാസങ്ങൾ അദ്ദേഹം വൃന്ദാവനത്തിൽ ചിലവഴിക്കുന്നു. അവിടെ വച്ച് മാസങ്ങൾക്ക് മുൻപ് ഒരു വലിയ ആത്മീയ സമ്മേളനത്തിനിടയിൽ ,യാതൊരു മുൻപരിചയവും ഇല്ലാതിരുന്ന തന്നെ , ആൾക്കൂട്ടത്തിൽ നിന്ന് തിരഞ്ഞുപിടിച്ച് , വേദിയിൽ അടുത്തിരുത്തി അത്ഭുതപ്പെടുത്തിയ ശ്രീല പ്രഭുപദ സ്വാമികളുടെ (Swami Prabhupada)ആശ്രമം കാണാനിടയാകുന്നു . ആശ്രമത്തിൽ കഴിയുന്ന അദ്ദേഹം ഒടുവിൽ രാധാനാഥ സ്വാമി എന്ന നാമത്തോടെ സന്യാസം സ്വീകരിക്കുന്നു. തുടർന്ന് ഇസ്കോണ്‍ (ISKON)എന്ന പ്രസ്ഥാനത്തിന്റെ ആത്മീയ ഗുരുക്കളിൽ പ്രധാനിയായി ലോകം മുഴുവൻ സഞ്ചരിച്ച് ആത്മീയ നവോത്ഥാനത്തിന് നേതൃത്വം നല്കുന്നു .

ഒരു ഗുരുവിനെ സ്വീകരിക്കുന്നത് മുൻപ് , സ്വയം നടത്തുന്ന വാദ പ്രതി വാദങ്ങളും, ദൈവം സമൂർത്തമാണോ അമൂർത്തമാണോ? വിഗ്രഹാരാധനയുടെ വിവിധ തലങ്ങളിൽ ഏതാണ് കൂടുതൽ ശരി ? തുടങ്ങിയ വൈവിധ്യമാർന്ന ചിന്താശകലങ്ങളും, പല ഘട്ടങ്ങളിലായി കുടുംബത്തിലേക്ക് അയച്ച കത്തുകളും റിച്ചാർഡ്‌ എന്ന യുവാവിൽ വളരെ ആഴത്തിൽ തന്നെ മാറ്റം സംഭവിച്ചു കഴിഞ്ഞിരുന്നു എന്നതിൻറെ ഉത്തമ ദൃഷ്ടാന്തങ്ങളാണ് . ഈശ്വരചിന്തയും സത് സംഘങ്ങളും സാധാരണ ഒരുവനെ , ഒരു പുണ്യാത്മാവായി പരിണമിപ്പിക്കുന്ന അത്ഭുതകരമായ കാഴ്ചയാണ് വായനക്കാരൻ കണ്മുൻപിൽ കാണുന്നത് .

സ്വന്തം ജീവിതം മുഴുവൻ സത്യന്വേക്ഷണത്തിനും മനുഷ്യസേവനത്തിനും ഒഴിഞ്ഞു വച്ച ഒട്ടേറെ സാധകന്മാരെകുറിച്ച് ഈ ഗ്രന്ഥത്തിൽ പ്രതിപാദിച്ച് പോകുന്നുണ്ട് . അതുപോലെ തന്നെ തന്റെ യാത്രക്കിടയിൽ കണ്ടുമുട്ടുന്ന കപട സന്യാസിമാരെക്കുറിച്ചും സത്യ സന്ധമായി ഇതിൽ വിവരിക്കുന്നുണ്ട് . വിസ കാലാവധി കഴിഞ്ഞും ഇന്ത്യയിൽ തുടരുന്ന റിച്ചാർഡ്‌ ഇമിഗ്രേഷൻ ഓഫീസറിൽ നിന്ന് രക്ഷപെടുന്നതും , വിദേശികൾക്ക് പ്രവേശനം നിഷേധിച്ചിരിക്കുന്ന നേപ്പാളിലെ പശുപനാഥ് ക്ഷേത്രത്തിൽ ,പ്രച്ഛന്ന വേഷനായി അകത്തു കടക്കുന്നതും മറ്റും , വായനക്കാരെ ത്രസിപ്പിക്കുവാൻ വേണ്ടിയുള്ളവ ആണെന്ന് തോന്നിപ്പോകുന്നു. അതുകൊണ്ടു തന്നെ സന്യാസിമാരുടെ പൂർവാശ്രമ ചെയ്തികൾ വിമർശന ബുദ്ധിയോടെ സമീപിക്കെണ്ടുന്നതില്ല എന്ന ഒരു തത്വം വായനക്കാരൻ പല സന്ദർഭങ്ങളിലും ഓർക്കേണ്ടതായി വരുന്നുമുണ്ട് . ചെയ്തികളിലും ചിന്താധാരയിലും ഉത്തര -പൂർവ ഭേദമില്ലാത്ത ശങ്കരനും വിവേകാന്ദനും ഉള്പെടുന്ന നമ്മുടെ ഗുരുപരമ്പരയുടെ സ്ഥാനം ഇവയിൽ നിന്നെല്ലാം വളരെ ഉയരത്തിൽ ആണെന്ന് നമ്മെ ഓർമ്മപ്പെടുത്തുകയും ചെയ്യുന്നു, ഈ വായന!

ഈ പുസ്തകത്തെ അധികരിച്ച് സ്വാമികൾ നടത്തുന്ന പ്രഭാഷണത്തിന്റെ വീഡിയോ കാണാം :

തീൻമേശയിലെ വിപ്ളവം

2013-11-08T09:00:00.003-08:00

'ഇന്നു മുതല്‍ ഞങ്ങള്‍ വെജിറ്റേറിയന്‍ ആണ്. മൃഗങ്ങളോടുള്ള ക്രൂരത ഒഴിവാക്കാന്‍ ഇനി ഐസ്‌ക്രീം പോലും ഞങ്ങള്‍ കഴിക്കില്ല, ആരേയും കഴിക്കാന്‍ അനുവദിക്കുകയുമില്ല'. എന്റെ കൈയിലിരിക്കുന്ന ഫാമിലിപായ്ക്ക് ഐസ്‌ക്രീമില്‍ ഒന്ന് നോക്കുക പോലും ചെയ്യാതെ ആയിരുന്നു, പത്തു വയസുകാരി ഗായത്രിയുടെ നേതൃത്വത്തില്‍ വീട്ടിലെ 'കുട്ടിപ്പട' നടത്തിയ ആ ഉപരോധസമരം! ഭക്ഷ്യാവശ്യങ്ങള്‍ക്കായി മനുഷ്യന്‍ ജീവികളോട് കാട്ടുന്ന ക്രൂരതകള്‍ ആധാരമാക്കി അനിമല്‍പ്ലാനെറ്റില്‍ വന്ന ഒരു പരിപാടിയായിരന്നു ആ സമരാവേശത്തിനു പിന്നില്‍ .കഷ്ടിച്ച് ഒരു മണിക്കൂറിന്റെ ആയുസ്സേ ആ സമരത്തിനുണ്ടായിരുന്നുള്ളൂ. എങ്കിലും, സമരാനുകൂലികള്‍ ഉയര്‍ത്തിയ ചില ചോദ്യശരങ്ങള്‍ നമ്മളെ കൂടുതല്‍ ചിന്തിപ്പിക്കുന്നു. ലോകത്തെ മനുഷ്യരെല്ലാം ഇതുപോലെ ചിന്തിച്ച് വെജിറ്റേറിയനാകാന്‍ തീരുമാനിച്ചാല്‍ എന്ത് സംഭവിക്കും? കേള്‍ക്കുമ്പോള്‍ വളരെ ലളിതമെന്നു തോന്നാമെങ്കിലും, വളരെ ഗൗരവതരമായ ചില വിഷയങ്ങളിലേക്കാണ് ഇത് വിരള്‍ ചൂണ്ടുന്നത്

മനുഷ്യന്റെ ആഹാരശീലങ്ങള്‍ പ്രകൃതിക്കും മറ്റ് ജീവികള്‍ക്കും ഏല്‍പ്പിക്കുന്ന സമ്മര്‍ദ്ദം ചില്ലറയല്ല. ഈ പശ്ചാത്തലത്തില്‍ കൃത്രിമമാംസം സൃഷ്ടിക്കാനുള്ള ശാസ്ത്രലോകത്തിന്റെ ശ്രമങ്ങള്‍ വിജയത്തിലെത്തുന്നതിന് പ്രാധാന്യം ഏറെയാണ്.

മാതൃഭുമിയിൽ പ്രസിദ്ധീകരിച്ച ലേഖനത്തിന്റെ പൂർണ്ണ രൂപം വായിക്കാൻ ഇവിടെ ക്ളിക്ക് ചെയ്യുക.

പട്ടിണി കിടക്കുന്നവനെ സഹായിക്കാത്ത ദൈവത്തില്‍ ഞാന്‍ വിശ്വസിക്കുന്നില്ല- സ്റ്റീവ് ജോബ്‌സ്‌

2013-10-10T06:16:00.000-07:00

പ്രസിദ്ധരായ വ്യക്തികളുടെ സാധാരണ ജീവിതചര്യകളെ കുറിച്ചും ഇഷ്ടാനിഷ്ടങ്ങളെ കുറിച്ചും അറിയാന്‍ താത്പര്യമില്ലാത്തവര്‍ ഉണ്ടാകുമോ? എന്തായിരുന്നു അവരുടെ ഇഷ്ടപ്പെട്ട ആഹാരം?,ഏതു പാട്ടുകളാണ് അവര്‍ സ്ഥിരം കേട്ടിരുന്നത് ? , ഏതു പുസ്തകം ആണ് അവര്‍ വായിച്ചിരുന്നത് ? എന്തായിരിന്നു അവരുടെ ഇഷ്ടപ്പെട്ട വസ്ത്രം .... അങ്ങനെ നീണ്ടുപോകുന്നു നമ്മുടെ ജിജ്ഞാസ. സ്റ്റീവ് ജോബ്സിന്റെ ജീവിതത്തിലെ , സാധാരണക്കാരായ നമുക്ക് കൌതുകം തോന്നിപ്പിക്കുന്ന, ചില ഇഷ്ടാനിഷ്ടങ്ങളും സംഭവങ്ങളും അടര്‍ത്തിയെടുത്തു അവതരിപ്പിക്കുകയാണ് ഇവിടെ. ലേഖനം മുഴുവൻ വായിക്കുവാൻ മാതൃഭൂമി ബുക്സ് സന്ദർശിക്കുക

ഗൂഗിൾ ഗ്ളാസ് അത്ഭുതലോകം ഒരുക്കുമ്പോൾ

2013-10-09T06:56:00.004-07:00

പരിചയമില്ലാത്ത ഒരു നഗരത്തിലാണ് നിങ്ങൾ. രാവിലെ കോഫി കുടിക്കുന്ന സമയം ആയല്ലോ എന്ന് മനസ്സിൽ ചിന്തിക്കുമ്പോഴേയ്ക്ക് , നിങ്ങൾക്ക് ഏറ്റവും പ്രീയപ്പെട്ട കോഫി ഷോപ്പിലേക്കുള്ള വഴി കണ്മുൻപിൽ തെളിഞ്ഞു വരുന്നു. നിങ്ങൾ നടന്ന് കടയിൽ എത്തുമ്പോൾ , ഒരു മുൻ പരിചയവും ഇല്ലാത്ത കടക്കാരൻ നിങളെ പേര് വിളിച്ച് ,സ്വാഗതം ചെയ്യുന്നു . എപ്പോഴും ഓർഡർ ചെയ്യാറുള്ള അതെ ഐറ്റം തന്നയെയാണ് ഇത്തവണയും വേണ്ടതെന്ന് എന്ന് ഉറപ്പുവരുത്തി , അത് നിങ്ങള്ക് കൈമാറുന്നു. നിങ്ങൾ നന്ദിയും പറഞ്ഞ് യാത്ര തുടരുന്നു . ഏതെങ്കിലും ഒരു സ്വപ്ന ലോകത്തെ കുറിച്ചാണ് പറഞ്ഞു വരുന്നതെന്ന് കരുതിയെങ്കിൽ തെറ്റി . ഒന്ന് രണ്ടു വർഷത്തിനുള്ളിൽ ബാഹ്യ ലോകവുമായുള്ള നമ്മുടെ ഇടപെടലുകൾ ഏതാണ്ട് ഇപ്രകാരമായിരികും എന്ന് പറഞ്ഞാൽ അത്ഭുതപ്പെടാനില്ല . ഈ വർഷ അവസാനം വിപണിയിൽ വരുമെന്ന് ഉറപ്പായിരിക്കുന്ന ഗൂഗിൾ ഗ്ളാസ് ആണ് നമ്മുടെ ജീവിതത്തെ നാം അറിയാതെ മാറ്റി മറിക്കാൻ പോകുന്നത് . ഒരു സാധാരണ കണ്ണട പോലെ തോന്നിക്കുന്ന ഈ സൂപ്പർ കണ്ണട ധരിക്കുന്നതോടെ, ബാഹ്യ ലോകവുമായുള്ള നമ്മുടെ വ്യവഹാരങ്ങൾ നാം അറിയാതെ നാം മറ്റൊരുതലത്തിലെത്തപ്പെടും.സോഷ്യൽ നെറ്റ്‌വർക്ക് കളിൽ നാം പ്രകടിപ്പിക്കുന്ന ഇഷ്ടാനിഷ് ടങ്ങൾ, സാധനങ്ങൾ വാങ്ങുകയും ഉപയോഗിക്കുകയും ചെയ്യുന്നതിലെ പാറ്റെണുകൾ, വിനോദങ്ങളിലും , ആഹാരരീതികളിലും മറ്റും സൂക്ഷമായി ഒളിഞ്ഞു കിടക്കുന്ന പ്രിഫറെൻസുകൾ , ഇങ്ങയെ അമൂർത്തമായി, പല തലങ്ങളിൽ വ്യാപിച്ചു കിടക്കുന്ന വ്യക്തി നിഷ്ഠമായ വിവരങ്ങളെ , സ്ഥല-കാല മാനങ്ങളുമായി സമർഥമായി അനുനയിപ്പിക്കുവാൻ ആണ് ഗൂഗിൾ ശ്രമിക്കുന്നത്.

മാതൃഭുമിയിൽ പ്രസിദ്ധീകരിച്ച ലേഖനത്തിന്റെ പൂർണ രൂപം വായിക്കുവാൻ ഇവിടെ ക്ളിക്ക് ചെയ്യുക

നയൻ പോയിന്റ്‌ സീറോ ആൻഡ്‌ ബിയോണ്ട് (Nine point zero and beyond )

2013-10-09T06:16:00.000-07:00

ഐ ഐ ടി യിൽ നിന്ന് എൻജിനിയറിംഗ് ബിരുദം ; അമേരിക്കയിൽ ഉപരിപഠനം ; ഇൻവെസ്റ്റ്‌മെന്റ് ബാങ്കിംഗ് മേഖലയിൽ ഉയർന്ന പദവി; ജീവിത വിജയത്തിന് മറ്റൊന്നും ആവശ്യമില്ല എന്ന് കരുതുന്ന രവിശങ്കർ അയ്യർ എന്ന പാലക്കാടൻ മലയാളിയുടെ കഥ പറയുന്ന നോവൽ ആണ് രേഷ്മ ആനന്ദ് -ന്റെ നയൻ പോയിന്റ്‌ സീറോ ആൻഡ്‌ ബിയോണ്ട് (9 .0 and beyond ). പുസ്തകമായി പ്രസിദ്ധീകരിക്കുന്ന ആദ്യ നോവൽ ആണിതെങ്കിലും , പക്വമതിയായ ഒരു എഴുത്തുകാരിയെയാണ് നാം ഇതിൽ കാണുന്നത് .ലളിതമായ ഭാഷാ ശൈലിയും ഇഴച്ചിലോ വലിച്ചു നീട്ടലോ ഇല്ലാത്ത ആഖ്യാന രീതിയും പ്രശംസയർഹിക്കുന്നു . അതുകൊണ്ട് തന്നെ വളരെ എളുപ്പത്തിൽ വായിച്ചു തീർക്കാവുന്ന ഒരു കൃതിയാണിത് .

ഐ ഐ ടി എൻട്രൻസ്‌ പരീക്ഷയുടെ ഫലം പ്രസിദ്ധീകരിക്കുന്ന ദിവസം,പാലക്കാട്ടെ ഒരു സാധാരണ ബ്രാഹ്മണ കുടുംബത്തിൽ അരങ്ങേറുന്ന ഒരു രംഗം വിവരിച്ചു കൊണ്ടാണ് കഥ തുടങ്ങുന്നത് . എല്ലാവരുടെയും സ്വപ്നങ്ങൾ സാക്ഷാത്കരിച്ചുകൊണ്ട്‌ രവിശങ്കർ അയ്യർ ഉയർന്ന റാങ്കോടെ പ്രവേശനം നേടുന്നു.ഐ ഐ ടി യിൽ "സാങ്കി" എന്ന വിളിപ്പേരിൽ അറിയപ്പെടുന്ന രവി , മാറ്റ് (മാത്യു) , സാറ്റ (സന്തോഷ്‌) തുടങ്ങിയ മറ്റു മലയാളികളുമായി സൌഹൃതത്തിലാകുന്നു . ഉത്പതിക്ഷ്ണുക്കളായ ഇവർ ഉന്നത പഠനത്തിനു അമേരിക്കയിലേക്ക് പോകുന്നു.സുഹൃത്തുകൾ എങ്കിലും സാങ്കി യുടെ ജീവിത വീക്ഷണം മറ്റുള്ളവരിൽ നിന്ന് തികച്ചും വ്യതസ്തമായിരുന്നു. ജോലിയിൽ ഉന്നത പദവി അലങ്കരിക്കുന്നതും കൂടുതൽ പണം സമ്പാദിക്കുന്നതും മാത്രമാണ് ജീവിതവിജയം എന്ന് കരുതിയ അവൻ വ്യക്തി ബന്ധങ്ങളെ, തന്റെ നേട്ടത്തിന്റെ ചവിട്ടുപടി കൾ ആയി മാത്രം കാണുന്നു . നേട്ടങ്ങൾ ഉണ്ടാകുന്ന മുറയ്ക്ക് അവൻ വന്ന വഴികൾ മറക്കുന്നു .

തന്റെ നാടും നാട്ടാരും എന്തിന് വീട്ടുകാർ പോലും അവനു നാണക്കേടായും അധികപ്പറ്റായും തോന്നുന്നു .വൈകാരികമായ ഒട്ടേറെ തളർച്ച നേരിടുന്ന രവി , തന്റെ ഔദ്യോഗിക യാത്രയ്ക്കിടയിൽ കണ്ടുമുട്ടുന്ന ഗായത്രി എന്ന സാമൂഹിക പ്രവർത്തകയുടെ സ്വാധീനത്തിൽ നാട്ടിൽ തിരിച്ചെത്തി അവരെ വിവാഹം കഴിക്കുന്നു . ഗ്രാമ വാസികൾക്ക് വേണ്ടി അവർ ചെയ്തിരുന്ന സാമൂഹ്യ പ്രവർത്തനങ്ങളിൽ സ്വയം പങ്കാളി ആവുക മാത്രമല്ല ; 'മാറ്റി' നെയും 'സാറ്റ' യെയും ഉൾപ്പെടുത്തി ആ സംരംഭം വിപുലീകരിക്കുകയും ചെയ്യുന്നതോടെ കഥ അവസാനിക്കുന്നു.

സാങ്കിയെ ചില ജീവത യാഥാർത്യങ്ങൾ പഠിപ്പിക്കുവാൻ വേണ്ടി പല കഥാപാത്രങ്ങളെയും കഥാസന്ദർഭങ്ങളേയും കഥാകാരി ഇതിൽ ഉപയോഗിക്കുന്നുണ്ട് .അമേരിക്കൻ കുടുംബ ജീവിതത്തിന്റെ നിരർത്ഥത ബോധ്യമാക്കാൻ ഹാർഡ് വാർഡ്‌ പഠന കാലത്ത് കണ്ടുമുട്ടുന്ന 'കാഞ്ചൻ' എന്ന സ്ത്രീയുമായുള്ള സൌഹൃതം . ബന്ധങ്ങളുടെ ഊഷ്മളത പഠിപ്പിക്കുവാൻ ഗൾഫിലെ മരുഭുമിയിൽ കഷ്ടപ്പെടുന്ന കുഞ്ഞുമോൻ എന്ന ഡ്രൈവറുമായി നടത്തുന്ന സംഭാഷണങ്ങൾ , സായിപ്പിനേക്കാൾ വലിയ സായിപ്പാണ്‌ നാം എന്ന് സ്വയം നടിച്ചാലും ,വെള്ളക്കാരിൽ സ്വതവേ ഒളിഞ്ഞിരിക്കുന്ന പുച്ഛഭാവവും ,അത് ഒരുവൻറെ ആത്മാഭിമാനത്തിനു പറയുന്ന വിലയെക്കുറിച്ച് ബോധ്യപ്പെടുത്തുവാൻ അമേരിക്കൻ കൂട്ടുകാരിയുടെ കുടുംബവുമായുള്ള കൂടിക്കാഴ്ച . തുടങ്ങിയവ അവയിൽ ചില ഉദാഹരണങ്ങൾ മാത്രം. ഇവയിലെല്ലാം, കഥാപാത്രങ്ങൾ നേരത്തേ എഴുതി തയ്യാറാക്കിയ അച്ചടിഭാഷ സംസാരിക്കുന്നതായി തോന്നി . ഒരിക്കലും ഭാരതത്തിലേക്ക് തിരികെ വരില്ല എന്ന് ഉറപ്പിച്ചിരുന്ന സാങ്കി ,നാട്ടിൽ തിരിച്ചെത്തിയ ശേഷവും തലപൊക്കുന്ന 'തൃപ്തിയില്ലാഴ്മ' യുടെ പേരിൽ തന്റെ അടുത്ത കൂട്ടുകാരോടു പോലും തട്ടിക്കയറുന്നു. പൊടുന്നനെ ഒരു ഗ്രാമീണ ചായക്കടിൽ പണിയെടുക്കുന്ന ഒരു ബാലനെ കാണുന്നതോടെ മനസ് മാറി, തന്റെ നിലപാടുകൾ തിരുത്തുന്നു. ഒരു വൈമാനികൻ, മറ്റു മാർഗമില്ലാതെ, വിമാനം ഇടിച്ചിറക്കി രക്ഷപെടുന്നത് പോലെ , കഥ അവസാനിപ്പിക്കുവാൻ വേണ്ടി അവലംബിച്ച ഒരു രക്ഷാമാർഗം മാത്രമായാണ് ഇതു വായിച്ചപ്പോൾ എനിക്ക് തോന്നിയത് .കഥയുടെ ക്ളൈമാക്സിൽ അമേരിക്കൻ ഉപരിപഠനത്തിന്റെ സാദ്ധ്യതകൾ ചർച്ച ചെയ്യുന്ന അപ്പു എന്ന കൌമാരക്കാരനും തികച്ചും കൃത്രിമമാണെന്ന തോന്നൽ ഉളവാക്കി. വായനക്കാരെ ഭാവനയുടെ ലോകത്തേക്ക് കൊണ്ട് പോകുന്നില്ല എന്ന് മാത്രമല്ല ,കഥാ സന്ദർഭങ്ങൾക്ക് ചാരുത പകരുന്ന 'സംഗതി'യുടെ അഭാവം കൂടി വായനക്കാരെ അലോസരപ്പെടുത്തുന്നു

ചേതൻ ഭാഗത്തിന്റെ നോവലുകളുമായുള്ള സാമ്യമാണ് ഇതിൽ ആദ്യം മുതല്ക്കേ എനിക്ക്തോ ന്നിയത് . 'അനുകരണം' എന്ന കടുത്ത വാക്ക് ഉപയോഗിക്കുവാൻ കഴിയില്ല എങ്കിലും കഥയുടെ പേരു മുതൽ ഒട്ടേറെ സാമ്യങ്ങൾ എവിടെക്കൊയോ ഒളിഞ്ഞു കിടപ്പുണ്ട് .

കൊട്ടിഘോഷിക്കപ്പെടുന്ന യുവ എഴുത്തുകാരുടെ കൃതികൾ പലതും , ഒന്ന് രണ്ടു പേജുകൾക്ക്‌ അപ്പുറം വായിക്കുന്നത് ശ്രമകരമായ ഒരു ജോലിയായി പലപ്പോഴും തോന്നിയിട്ടുണ്ട് . അതുമായി താരതമ്യം ചെയ്യുമ്പോൾ തന്റെ ആദ്യ സംരഭമായ, ഈ രചനയിലൂടെ രേഷ്മ പ്രതീക്ഷയുടെ ഒരു തിരിനാളം വച്ച് നീട്ടുന്നുണ്ട് . എന്നെ പോലുള്ള സാധാരണയിൽ സാധാരണക്കാരായ വായനക്കാരുടെ , വികാരങ്ങൾ കൂടി മനസിലാക്കി ഇനി വരാനിരിക്കുന്ന സൃഷ്ടികൾ ഉജ്ജ്വലമാക്കുമെന്നു പ്രത്യാശിക്കുന്നു .

പുസ്തകം വാങ്ങാം

പർവതങ്ങളിലെ പ്രതിധ്വനി........

2013-10-04T10:08:00.000-07:00

"അപ്പോൾ നിങ്ങള്‍ക്ക് ഒരു കഥ കേൾക്കണം..... പക്ഷെ കഥ പറഞ്ഞു തുടങ്ങിയാല്‍ ചോദ്യങ്ങള്‍ ചോദിച്ച് ശല്യപ്പെടുത്തരുത്; ഒന്ന് കൂടി, ഒന്ന് കൂടി എന്ന് പറഞ്ഞു വാശിയും അരുത് ". ഉറങ്ങാന്‍ കിടക്കുന്ന പത്തു വയസുകാരന്‍ അബ്ധുള്ളയോടും അനുജത്തി പരിയോടും അച്ഛന്‍ ചട്ടം കെട്ടുകയാണ്. "നാളെ ഞാനും പരിയും കൂടി നടത്തുന്ന ദീർഘയാത്ര സുഖകരമാകണമെങ്കിൽ ഇന്ന് നന്നായി ഉറങ്ങിയേ തീരൂ. അതുപോലെ, മോനേ അബ്ദുേളള, ഒരു കാര്യം കൂടി, ഞങ്ങൾ അടുത്തില്ലാത്ത സമയത്ത്, അമ്മയെ അനുസരിച്ച് നീ നല്ല കുട്ടിയായി ഇരിക്കുകയും വേണം".

'ദി കൈറ്റ് റണ്ണർ ' എന്ന ഒറ്റ നോവലിലൂടെ ലോക ശ്രദ്ധ ആകർഷിച്ച എഴുത്തുകാരനായ ഖാലിദ്‌ ഹോസ്സേനി (Khaled Hosseini) യുടെ ഏറ്റവും പുതിയ നോവൽ ആണ് 'ആൻഡ്‌ മൌണ്ടൻസ് എന്ഖോഡ് ' (And the mountains echoed). സങ്കീർണ്ണമായ മനുഷ്യ ബന്ധങ്ങളുടെ കഥ പറയുന്നതിൽ സമർഥനായ ഹോസ്സേനി, ഇക്കുറി ദേശ-കാല സമസ്യകൾ കൂടി മനോഹരമായി സന്നിവേശിപ്പിച്ചിരിക്കുന്നു . അങ്ങ് കിഴക്ക് കാബുൾ മുതൽ ഇങ്ങ് പടിഞ്ഞാറൻ കാലിഫോർണിയ തീരങ്ങൾ വരെ പരന്നു കിടക്കുന്ന വിവിധ ദേശങ്ങളിൽ , 1947 മുതൽ 2010 വരെയുള്ള അഞ്ചു പതിറ്റാണ്ട്നു മുകളിൽ പടർന്നു കിടക്കുന്ന ഒരു പറ്റം ജീവിതങ്ങളുടെ കഥയാണിത്. ശബ്ദ വീചികൾ , മലനിരകളിൽ തട്ടി പ്രധിധ്വനിയുണ്ടാക്കുന്നത് പോലെയാണ് , ജീവിതത്തിൽ ഒരുവൻ എടുക്കുന്ന തീരുമാനങ്ങളും എന്ന ഹുസ്സെനിയി യുടെ നിരീക്ഷണത്തോട്‌ ഈ കഥ പൂര്ണമായും നീതി പുലർത്തുന്നുണ്ട് .അനേക അദ്ധ്യായങ്ങളായി , ഹോസ്സേനി വായനക്കാർക്ക് വിളമ്പുന്ന , സമൃദ്ധമായ വിരുന്നിന്ന്റെ ആദ്യ അദ്ധ്യായത്തിന്റെ പരിഭാഷ വായിക്കുവാൻ മാതൃഭൂമി ബുക്സ് ന്റെ ഫിക്ഷൻ പേജ് സന്ദർശിക്കുക

ബിറ്റ്‌കോയിന്‍സ് - കറന്‍സിയുടെ ഡിജിറ്റല്‍ അവതാരം

2013-08-14T08:25:00.000-07:00

ഇന്റര്‍നെറ്റ് വ്യാപാരത്തിനുള്ള ഒരു ഡിജിറ്റല്‍ കറന്‍സി എന്ന് ബിറ്റ്‌കോയിന്‍സിനെ വിവരിക്കാം. കേന്ദ്രീകൃതമായി ഇത് നിയന്ത്രിക്കപ്പെടുന്നില്ല. മാത്രമല്ല, ഭൗതികമായ ഒരു രൂപവും അതിനില്ല. കമ്പ്യൂട്ടറുകള്‍ സ്വയം സംവദിക്കുന്ന 'പിയര്‍ ടു പിയര്‍ സാങ്കേതികവിദ്യ' ഉപയോഗപ്പെടുത്തുന്ന ഓപ്പണ്‍സോഴ്‌സ് സോഫ്റ്റ്‌വേര്‍ പ്രോഗ്രാമാണ് ഈ സംവിധാനത്തെ നിലനിര്‍ത്തുന്നത്.

മാതൃഭൂമിയിൽ പ്രസിദ്ധീകരിച്ച ലേഖനത്തിന്റെ പൂർണ്ണ രൂപം വായിക്കാൻ ഇവിടെ ക്ളിക്ക് ചെയ്യുക