one-smart click

जी-मेलमध्ये भरा नवे रंग,नवे फोटो

2011-04-18T14:22:00.002+05:30

जी-मेल अधिक आकर्षक दिसण्यासाठी गुगलने युझरसाठी काही थीम दिल्या आहेत. मात्र त्याच त्याच थीम वापरण्याचा तुम्हाला कंटाळा आला असेल तर गुगलने तुमच्यासाठी नव्या थीम दिल्या आहे. अर्थात या थीम तुमच्या तुम्ही तयार करु शकता. अगदी तुमचा फोटोही थीम म्हणून तुम्ही वापरु शकता.

जी-मेलमधील या नव्या सुविधेमुळे तुम्ही तुमच्या मेलमध्ये हवे ते रंग भरु शकता. जी-मेलमध्ये नवे रंग भरण्यासाठी जी-मेलच्या Settings मधून Themesजा. तेथे सर्व थीम संपल्यानंतर Create your own theme यावर क्लिक करा. त्यावर क्लिक केल्यानंतर तुम्हाला खालील विडो दिसेल…

वर दाखवल्या प्रमाणे तुमच्या जी-मेलच्या प्रत्येक विभागात हवा तो रंग देऊ शकता. तसेच Main Background आणि Footer मध्ये तुम्हला हवा तो फोटो add करु शकता. याआधी जी-मेल वापरताना गुगलच्या होम पेजवर हवा तो फोटो टाकण्याची सोय गुगलने दिली होती. (अधिक माहिती वाचण्यासाठी येथे क्लिक करा) त्याच प्रमाणे आताही जी-मेलमध्येही हवा तो रंग आणि फोटो यापुढे देता येणे शक्य आहे.

जी-मेलच्या युझर्सकडून नव्या थीम देण्याची मागणी केली जात होती. मात्र गुगलने युझर्सना नव्या थीम देण्यापेक्षा हव्या त्या थीम तयार करण्याचे स्वतंत्र्य दिले आहे.

चार्ली वी मिस यू…

2011-04-15T09:35:00.002+05:30

विनोदी ढंगाच्या मूकअभिनयासाठी प्रसिद्ध असणाऱ्या चार्ली चॅप्लिन (चार्ल्स स्पेन्सर चॅप्लिन,ज्युनियर) यांचा आज 122 वा जन्मदिवस, त्यानिमित्ताने गुगलने आपल्या होम पेजवरील लोगो अर्थात गुगल डुडल बदल केला आहे.

गुगलचे प्रत्येक डुडल हा चर्चेचा विषय असतो. चित्र, ग्राफिक्स्, फ्लॅशच्या मदतीने तयार केलेले डुडल आतापर्यंत पाहिले होते. चार्लीसाठी मात्र गुगलने वेगळाच फंडा वापरला आहे. ज्यासाठी चार्ली प्रसिद्ध होता. त्या मूकअभिनयाचा वापर करुन गुगलने एक व्हिडीओच गुगल डुडल म्हणून वापरला आहे.

गुगलने तयार केलेला व्हिडीओ पहा….

‘जी-मेल मोशन’ वापरले का?

2011-04-01T10:18:00.001+05:30

ई-मेल सेवा पुरवण्यामध्ये सध्या लोकप्रिय असलेल्या गुगलच्या जी-मेलने एक एप्रिल रोजी एक नवी सेवा लाँच करण्याची घोषणा केली आहे. ‘जी-मेल मोशन’ असे या सेवेचे नाव आहे. याव्दारे जी-मेलचा वापर की-बार्ड आणि माउस शिवाय करता येण शक्य होणार आहे. जी-मेल मोशनमुळे युझरला केवळ इशाऱ्याच्या (जेस्चर्स) मदतीने ई-मेल पाठवता आणि वाचता येणार आहे.

1874 मध्ये सर्वप्रथम Qwerty की-बोर्डची निर्मिती झाली. त्यानंतर 1963 मध्ये जगाला माउस शोध लागला. आणखी 50 वर्षांनी उच्च क्षमतेचे माक्रोप्रोसेसर आणि हाय क्षमतेचे वेबकॅम तसेच स्पेशल ट्रॅकिंग तंत्रज्ञान आले असेल. असे झाले तरीही आपण संगणकाशी अथवा अन्य डिव्हाइस हाताळण्यासाठी जुने तंत्रज्ञान वापरणार का? असा प्रश्न गुगलने विचारला आहे.

केवळ प्रश्न विचारुन गुगल थांबले नाही तर त्यावर त्यांनी उत्तर शोधले आहे. भविष्यातील संगणक कसा असेल यांचा पहिला प्रयत्न गुगलने जी-मेल मोशनच्या व्दारे केला आहे. मोशमच्या मदतीने जी-मेलव्दारे मेल चेक करणे आणि त्याला उत्तर पाठवणे या गोष्टी युझर इशाऱ्याच्या मदतीने करु शकेल.

जी-मेल मोशनचा वापर करण्यासाठी संगणकामध्ये इन-बिल्ट वेबकॅम आवश्यक आहे. जी-मेलच्या Settings पेजव्दारे एकदा का तुम्ही मोशन पर्याय अॅक्टीवर की त्यानंतर जेव्हा तुम्ही जी-मेल ओपन कराल तेव्हा आपोआप spacial tracking algorithm तुमची ओळख करुन घेईल.

जी-मेल मोशनची निर्मिती करताना गुगलने शारीरीक हलचालींचा अभ्यास करणाऱ्या एक्स्पर्टच्या मदत घेतली आहे.

विशेष म्हणेजे जी-मेल मोशनची चाचणी गेले काही महिन्यांपासून गुगलच्या कर्मचाऱ्याकडून केली जात आहे. गुगलमधील कर्मचाऱ्यांकडून येणाऱ्या प्रतिक्रिया आणि सूचना याव्दारे जी-मेल मोशनमध्ये आणखी बदल केले जात आहेत. कर्मचाऱ्यांकडून वापरण्यात येणाऱ्या जी-मेल मोशनच्या दरम्यान गुगलने एक अहवाल तयार केला. या अहवालानुसार मोशनच्या वापरामुळे email compositionचा वेग 14 टक्क्यांनी वाढल्याचे दिसले. तसेच युझरचा इनबॉक्समधील वेळेत सरासरी 12 टक्क्यांची घट झाल्याचे आढळून आले.

जी-मेल मोशनचा वापर करण्यासाठी गुलल क्रोमची अद्यावत आवृत्ती अथवा फायर फॉक्सची 3.5 + आवृत्तीसह वेबकॅम असणे गरजेचे आहे. जी-मेलमधील ही सेवा सर्वांसाठी मोफत असणार आहे. अद्याप ही सेवा सर्वांसाठी खुली झाली नसली तरी काही दिवसांतच ती सुरु करणार असल्याचे गुगलने आपल्या अधिकृत ब्लॉगवर म्हटले आहे.

जी-मेल मोशनचा उपयोग सतत संगणकासमोर बसून काम करणाऱ्यांसाठी उपयोगी ठरणार आहे.

वरील लेख वाचून झाल्यानंतर तुम्हाला काही शंका असतील किंवा गुगलच्या संबंधीत पेजवर जाण्याआधी खालील मजकूर नक्की वाचा…

एप्रिल फूल

आज तारीख कोणती आहे माहित आहे का? एक एप्रिल, तर जी-मेल मोशन वैगरे काही नसून गुगलने केलेला हा एक एप्रिल फूल होता. जी-मेल मोशमच्या पेजवर जेव्हा तुम्ही Try gmail Motion वर क्लिक करता. तेव्हा तुम्हाला एप्रिल फूलचा मेसेज दिसेल.

एप्रिल फूल करण्याची गुगलची ही सवय 2000 पासूनची आहे. अर्थात गुगलने एक एप्रिल रोजी अनेक लोकांना जी-मेल मोशनच्या निमित्ताने फसवले. बर नाही म्हटले तरी गुललचा हा प्रयोग यशस्वी झाला आहे. कारण या संदर्भातील व्हिडिओ तब्बल 13 हजारहून अधिक लोकांनी पाहिला आहे. मात्र एक एप्रिल रोजी गुगलने काही महत्त्वाच्या घोषणा केल्या आहेत. त्यावेळी त्या लोकांना फूल बनवण्याचा प्रयत्न आहे असे वाटले होते. अशा घोषणेपैकी एक म्हणजे 2004मध्ये करण्यात आलेली जी-मेल सेवेची घोषणा होय.

गुगलने 2000मध्ये MentalPlexची घोषणा केली होती. त्यानंतर गुगलने PigeonRank, Google Gulp, Gmail Paper आणि Google TiSP अशा सेवा सुरु करणार असल्याची घोषणा केली होती.

गुगलच्या या एप्रिल फूलच्या अधिकृत पानावर जाण्यासाठी येथे किल्क करा…

‘आलम आरा’ची ८० वर्षे

2011-03-14T10:15:00.000+05:30

‘आलम आरा’ हा चित्रपट १४ मार्च १९३१ रोजी प्रदर्शित झालेला हा पहिला भारतीय बोलपट होय. ‘आलम आरा’ केवळ पहिला भारतीय बोलपट नव्हता तर तो पहिला संगीतपट देखील होता. त्यामुळे भारतीय चित्रपटात बोलपटाबरोबरच संगीतची सुरुवात या चित्रपटाने केली. या चित्रपटातील ”दे दे खुदा के नाम पर” हे गाणे खुप गाजले होते. दिग्दर्शक ‘अर्देशिर इराणी’ यांचा हा चित्रपटा पाहण्यासाठी इतकी गर्दी होती की त्यावर नियंत्रण मिळवण्यासाठी पोलिसांची मदत द्यावी लागली होती.

मुंबईतील मॅजेस्टिक सिनेमा हॉलमध्ये प्रदर्शित झालेल्या या चित्रपटाला आज ८० वर्षे झाली आहेत. या चित्रपटामुळे भारतीयांचे सामाजिक, संस्कृतीक आणि वैज्ञानिक जग बदलण्यास सुरुवात झाली. भारतीय चित्रपटात इतिहासात एक मैलाचा दगड ठरलेल्या या चित्रपटाच्या ८० व्या वर्षी गुगलने आपल्या होम पेजवर लोगो तयार केला आहे…

आलम आरा चित्रपटाविषयी अधिक वाचण्यासाठी येथे क्लिक करा.

गुगलचे जपान पर्सन फाइन्डर

2011-03-12T10:41:00.001+05:30

जपानच्या पूर्वोत्तर किनारपट्टीजवळ झालेल्या भूकंपानंतर गुगलने एक ऑनलाइन टूल सुरु केले आहे. ‘पर्सन फाइन्डर’ असे या टूलचे नाव आहे. या टूलच्या मदतीने भूकंप आणि त्सुनामीमुळे प्रभावीत झालेल्या व्यक्तींचा शोध घेता येतो. तसेच त्यांच्या संदर्भातील माहिती मिळवता येते.

या टूलमध्ये व्यक्तींचा शोध घेण्याबरोबर ज्याचा शोध लागला आहे त्यांची ही माहिती मिळू शकते. ही सेवा जपानी भाषेसह इंग्रजीमध्येही उपलब्ध आहे. भूकंपानंतर मोबाईल आणि फोन सेवा ठप्प झाल्यामुळे गुगलच्या या टूलच्या माध्यमातून व्यक्तींचा शोध घेणे शक्य आहे.

गुगलच्या या सेवेला जगभरातून चांगला प्रतिसाद मिळत आहे. ही सेवा सुरु झाल्यापासून २४ तासांमध्ये तब्बल २२ हजार ४०० लोकांचा शोध घेतला गेला आहे.

गुगलने हे टूल सर्वांसाठी मोफत उपलब्ध करुन दिले आहे. व्यक्ती, बातम्या देणाऱ्या वेबसाइट, अन्य संस्था आणि संघटना यांना आपल्या वेबसाइट,ब्लॉगवर गुगलचे हे टूल Add करता येते. हे टूल मिळवण्यासाठी येथे क्लिक करा.

हैतीमध्ये जानेवारी २०१०मध्ये झालेल्या भूकंपानंतर गुगलने अशा प्रकारची सेवा सुरु केली होती. इतकच नाही तर जपानमध्ये भूकंप झाल्यानंतर गुगलने आपल्या होम पेजवर त्सुनामी अलर्ट दिला होता.

त्यानंतर गुललने होमपेजवर जपानवर आलेल्या संकटासंदर्भातील सर्व माहिती देणारे एक स्वतंत्र वेबपेज (Resources) तयार केले आहे. या पेजवर अलर्ट, बातम्या, व्हिडिओ, रियल टाईम अपडेट अशा सर्व माध्यमातून माहिती देण्यात आली आहे. ही सर्व माहिती जपानी भाषेबरोबर इंग्रजीमध्ये ही उपलब्ध आहे.

जपानमधील भूकंप आणि त्सुनामीसंदर्भातील सर्व व्हिडिओ पाहण्यासाठी येथे क्लिक करा.

‘जॉइन मि ऑन द ब्रिज’

2011-03-08T17:00:00.000+05:30

महिलांना त्यांचे हक्क मिळवून देण्यासाठी जागतिक महिला दिनाची सुरुवात आठ मार्च १९११ रोजी झाली. यंदाच्या १००व्या जागतिक महिला दिनानिमित्ताने गुगलने आपल्या होम पेजवर लोगो तयार केला आहे.

१९११पासून आजपर्यंत महिलांनी शिक्षण, आरोग्यापासून ते राजकारणापर्यंत अनेक क्षेत्रात आघाडी घेतली आहे. यंदाचा १००वा जागतिक महिला दिन साजरा करण्यासाठी GOOGLE आणि Women for Women International ने एक वेगळा कँपेन आयोजीत करण्याचे आवाहन केले आहे. Join women on bridgeअसे या कँपेन नाव असून जागतिक स्तरावर महिलांनी मिळवलेले यश, त्यांच्या कर्तृत्वाची दखल घेण्यासाठी आणि त्यांना शुभेच्छा देण्यासाठी आपल्या शहरात कोणत्याही bridgeवर एकत्र येण्याचे आवाहन गुगलने केले आहे.

महिला दिनानिमित्ताने गुगलने एक विशेष पेज तयार केले आहे. या पेजवर १९११ ते आत्तापर्यंत महिलांची वाटचाल आणि योगदान याची थोडक्यात माहिती देणारा एक विशेष व्हिडिओ पहायला मिळतो.

तसेच जागतिक पातळीवर महिलांसाठी काम करणाऱ्या संस्थांना मदत करण्याचे आवाहन गुगलने केले आहे.

काही दिवसांपूर्वी स्टार प्लसने प्रत्येकाच्या आयुष्यातील महिलाचे स्थान अधोरेखीत करणारे एक अँथम साँग सुरु केले होते. जागतिक महिला दिनानिमित्ताने स्टार प्लसचे तू ही तू… हे अँथम साँग महिला आणि पुरुष दोघांना प्रेरणादायी आहे.

क्रिकेट विश्वचषक स्पर्धेसाठी गुगलने तयार केलेला लोगो

2011-02-19T17:05:00.000+05:30

भारतीय उपखंडात होणाऱ्या क्रिकेट विश्वचषकची सुरुवात आजपासून होत आहे. या स्पर्धेसाठी गुगलने आपल्या होमपेजवर एक लोगो तयार केला आहे. जगभरात होणाऱ्या महत्त्वाच्या प्रसंगी गुगलकडून असे लोगो तयार केले जातात. क्रिकेट विश्वचषकाच्या निमित्ताने गुगलने ही क्रिकेटचा फिल देणारा लोगो तयार केला आहे.

या लोगोमध्ये गुगलने ‘Google’ या शब्दामधील चौथा शब्द ‘G’ हा फलंदाज म्हणून दाखवला आहे. हा फलंदाज एका दिशेने बॉल मारत असल्याचे दाखवण्या आले आहे. मात्र प्रश्न असा पडतो की फलंदाज ज्या दिशेला बॉल मारत आहे. त्याच बाजूला ‘Google’ या शब्दामधील ‘O’ हे अक्षर दोन वेळा येतात. मात्र हे ‘O’ अक्षर क्रिकेट बॉल म्हणून दाखवण्या ऐवजी त्याच ठिकाणी गुगलने स्वतंत्र लहान बॉल दाखवला आहे.

गुगलने याआधी अनेक उत्तम लोगो तयार केले आहेत. मात्र क्रिकेट विश्वचषकाचा लोगो करताना वरील गोष्टीचा विचार झालेला दिसत नाही.

ईएसपीएने आपल्या वेबसाईटवर क्रिकेट विश्वचषकाचे सामने पाहण्याची सोय केली आहे. गुगलने फिफा विश्वचषक 2010 साठी अशी सोय(अधिक वाचा) केली होती. मात्र क्रिकेट विश्वचषकासाठी त्यांनी याचा विचार केलेला दिसत नाही.

याच बरोबर टि्वटरनेही फिफासाठी एक स्वतंत्र पेज तयार केले होते. त्यावर फिफा विश्वचषकासंदर्भातील सर्व अपडेट मिळत असे, मात्र त्यांनीही क्रिकेटसाठी असा विचार केलेला दिसत नाही

सर्च देके ब्लेको

2010-11-03T19:37:00.000+05:30

सर्च इंजीनमध्ये आघाडीवर असलेल्या गुगलला टक्कर देण्यासाठी ब्लेको (Blekko.com) हे नवे सर्च इंजीन सुरु झाले आहे.

गुगलवर सर्च करताना अनेकवेळा अनावश्यक वेबसाइट सर्चमध्ये वरच्या क्रमांकावर दिसतात. गुगलच्या युजर्सकडून अशा तक्रारीही येत आहेत. नेमक्या याच गोष्टीमध्ये ब्लेकोने सुधारली आहे. ब्लेकोमध्ये युजर्सना अधिकृत तसेच अधिक सुसंगत वेबसाईटचे रिझर्ल्ट मिळणार आहेत. तुम्ही सर्च करत असलेल्या विषयाशी संबंधीत मात्र अनावश्यक वेबसाईट वगळण्याची यंत्रणा यामध्ये आहे. तसेच सर्चच्या संबंधी मात्र कमी महत्त्वाच्या आणि नकोशा spam साइट यामध्ये दिसणार नाहीत. यासाठी ब्लेकोने slashtags screening technology चा वापर केला आहे.

ब्लेकोवर सध्या तीन अब्ज अधिकृत वेबसाइटची नोदणी आहे. यामधूनच यूजर्सनी सर्च केलेल्या विषयासंर्भातील बेवसाइटची यादी अथवा माहिती दाखवली जाते.
ब्लेकोवर वेबसाइटच्या रॅकिंगच्या बाबतीत पारदर्शकता ठेवण्यात आली आहे. अन्य सर्च इंजिनमध्ये एखाद्या वेबसाइटचे रॅकिंग गुप्त ठेवले जाते. मात्र ब्लेकोवर ही माहिती सर्वासांठी खुली आहे. एखाद्या वेबसाइटचे रॅकिंग पहायचे असेल तर संबंधित बेवसाइटचा पत्ता लिहून/seo लिहावे.

ब्लेको गुगल सारख्या प्रस्थापीत सर्च इंजीनला तसेच गुगल, बिंग या सर्च इंजीनना टक्कर देईल का नाही. हे इतक्यात सांगता येणार नाही. मात्र अन्य सर्च इंजीनवर ज्या गोष्टी करता येणार नाहीत. त्या ब्लेकोवर करता येईल असा दावा यांच्या निर्मात्यांनी केला आहे.
ब्लेको अन्य वैशिष्टे पाहण्यासाठी सर्च करुन पहायला हरकत नाही.

याहू मेल नव्या स्वरुपात

2010-11-01T19:32:00.000+05:30

गुगलच्या जी-मेलला आणि माक्रोसॉफ्टच्या हॉटमेलला टक्कर देण्यासाठी याहूने आपल्या मेल सेवेची नवी व्हर्जन लॉच केली आहे.

याहू मेलच्या नव्या व्हर्जनची काही वैशिष्टे

या नव्या व्हर्जनमध्ये युजर्सना अमर्यांदित जागा देण्यात आली आहे.
अधिक वेगाने इ-मेल पाठवने शक्य होणार आहे.
याहूने नवे व्हर्जन आकर्षक Designमध्ये उपलब्ध करुन दिले आहेत.
तुम्ही वापरत असलेल्या फेसबुक, टि्वटर आदी या सोशल नेटवर्किंग साइटचे अपडेट याहू मेलच्या डॅशबोर्डवर पाहता येणारा.
इंटरनेट कनेक्ट असलेल्या कोणत्याही माध्यमातून याहूमेल ओपन करता येणे शक्त.
अनावश्यक येणा-या मेलपासून (Spam) अधिक संरक्षण

इ-मेल सेवा देणा-यामध्ये याहू दुस-या(273 दशलक्ष युजर्स) क्रमांकावर असला तरी त्याला हॉटमेल आणि जी-मेलची जबरदस्त स्पर्धा आहे. त्यामुळेच तब्बल पाच वर्षांनंतर याहूने बदल केले आहेत. इ-मेल सेवा देणा-यामध्ये हॉटमेल 362 दशलक्ष युजर्ससह पहिल्या क्रमांकावर आहे. तर जी-मेल 193 दशलक्ष युजर्ससह तिस-या क्रमांकावर आहे.

Wikipedia Meetupसाठी जिमी वॉल्स मुंबईत

2010-10-29T13:46:00.000+05:30

इंटरनेटवरील माहितीवर कुणाचा एकाचा अधिकार असता कामा नये तसेच तो सर्वांना मोफत उपलब्ध झाले पहिजे या उद्देशाने सुरू झालेल्या विकिपीडिया या संकेतस्थळावर सक्रिय सहभाग घेणा-यांचा मुंबईतला तिसरा मेळावा रविवारी सोफिया महाविद्यालयात होणार आहे. या मेळाव्यासाठी विकीपीडियाचे संस्थापक जिमी वॉल्स हेदेखील येणार आहेत!

विकिपीडियाचा वापर करून न थांबता तेथील मजकूर समृद्ध करणारे आणि विकीपीडियाच्या अन्य उपक्रमांतही सहभाग घेणारे (विकिपीडियन्स आणि विकिमीडियन्स) मुंबईत अनेकजण आहेत. पण यापूर्वीच्या दोन बैठका वांद्रे आणि खारघर येथे झाल्या, तेव्हा वांद्रय़ात 13, आणि खारघरला अवघे 10जण आले! तिस-या मेळाव्याला जिमी वॉल्स येणार असल्याने 800 जण बसतील एवढ्या सभागृहात हा मेळावा होत आहे.

या भेटी दरम्यान चर्चा करण्यासाठी निश्चित असा कार्यक्रम ठरवलेला नाही. सहभागी होणा-यांनाही मतप्रदर्शनाची, व्यक्त होण्याची संधी मिळणार आहे. जिमी वॉल्स विकिपीडियाच्या विस्ताराबद्दल, तसेच प्रत्यक्षात विकिपीडियाचे काम कसे चालते. भारतातील इंटरनेट यूजर्स माहितीच्या या सर्वांत मोठ्या लिंकचा अद्याप पुरेसा वापर का करत नाहीत अशा मुद्दयांवरही बोलतील, अशी अपेक्षा आहे.

ब्रीच कँडीच्या सोफिया महाविद्यालयातील `सोफिया भवन हॉल'मध्ये सायंकाळी सहा वाजता होणा-या या मेळाव्यासाठी कोणतेही शुल्क नाही. `विकिपीडिया'चा ज्ञानमार्ग रुंद करू शकणारे सर्वजण येथे येऊ शकतात!

मेलसोबत डॉक्युमेंटही सर्च करा...

2010-10-29T13:06:00.000+05:30

इंटरनेटवर सर्च करताना सापडलेल्या अनेक गोष्टी किंवा आवश्यक वर्ड फाइल, स्प्रेडशीट्स आणि प्रेझेन्टेशन्स ऑनलाइन सेव्ह करून ठेवण्यासाठी गुगल डॉक्युमेंटचा वापर केला जातो. एखादी गोष्ट ऑनलाइन सेव्ह करून ठेवण्यासाठी गुगलची ही सेवा उपयुक्त ठरते. गुगल डॉक्युमेंट जी-मेलसह आणि स्वतंत्रही वापरता येतं.

जी-मेलमध्ये इनबॉक्स आणि आऊटबॉक्समधील मेल सर्च करण्यासाठी मेल सर्च हा Default search पर्याय दिला आहे. मात्र जी-मेल सोबत गुगल डॉक्युमेंटमध्ये सेव्ह केलेली एखादी फाइल शोधायची असेल तर स्वतंत्रपणे गुगल डॉक्युमेंट ओपन करावे लागत होतं.

आता मात्र गुगलने यावर उपाय सुचवला आहे. जी-मेलचा वापर करतानाच तुम्ही गुगल डॉक्युमेंटमधील कोणतीही फाईल शोधू शकता. यासाठी जी-मेलच्या Settings¸मध्ये Labs options¸मधील Apps Search या पर्यायांचा वापर करा. त्यानंतर झालेला बदल सेव्ह करा.

जी-मेलच्या मेल सर्चबरोबरच डॉक्युमेंट सर्चचा एक नवा पर्याय दिसेल. या ठिकाणी मेल सोबत डॉक्युमेंटमधील फाइल शोधणं कमी वेळात शक्य होतं. जी-मेलचा वापर करताना वेळ वाचवणारा हा स्मार्ट बदल तुम्ही नक्की कराल.

जी-मेलसोबत गुगल डॉक्युमेंटचा वापर करणा-यांसाठी हा पर्याय नक्कीच उपयुक्त आहे.

शेड्युल युअर मेल व्हाया बुमरॅँग

2010-10-21T13:12:00.000+05:30

आपल्या मित्र-मैत्रिणीचा वाढदिवस किंवा ऑफिसमधील एखाद्या मिटिंगची वेळ अथवा विशिष्ट वेळेला अत्यंत महत्त्वाची सूचना देणारा मेल पाठवायचा असतो. कित्येकदा असा मेल पाठवण्यासाठी नेमक्या त्या वेळेला आपल्याजवळ संगणक किंवा लॅपटॉप नसतो. अशा वेळी आपली खूप पंचाईत होते. त्यावेळी जवळच्या एखाद्या सायबरचा आधार घेतला जातो. मात्र कधी कधी आपण सायबर कॅफे शोधण्याच्यादेखील तयारीत नसतो. अशा वेळी आपले महत्त्वाचे मेल त्या दिवशी त्या व्यक्तीपर्यंत कसे पोहोचतील असा प्रश्न आपल्याला पडतो. अगदीच महत्त्वाची मेल असेल तर ती आपण जवळच्या मित्राला किंवा घरातल्या कोणाला तरी करायला सांगितलं जातं.

नियोजित मेल निश्चित तारखेला किंवा वेळेला पाठवण्याची सोय सध्या जी-मेलमध्ये नाही. आणि तशी सोय उबलब्ध होण्याची शक्यता नजीकच्या काळातही दिसत नाही. असं असलं तरी Boomerang द्वारे तुम्ही क्रोम आणि फायरफॉक्स ब्राउझरच्या माध्यमातून अशा प्रकारे मेल schedule करू शकता. असे ठरावीक वेळेचे महत्त्व असलेले मेल पाठवण्यासाठीBoomerang चा वापर करता येईल. हे क्रोममधीली extension तर फायरफॉक्समधील ad-on असून या द्वारे तुम्ही तुम्हाला पाठवायचे मेल schedule करू शकता.

गुगल क्रोमसाठी आणी फायरफॉक्समध्ये Boomerangextension आणि ad-on तुम्ही या लिंकद्वारे डाऊनलोड करू घेऊ शकता. त्यानंतर गुगल क्रोमद्वारे जी-मेल आयडी ओपन करा.

मेलच्या composemailमध्ये सर्वात वर send या पर्यायानंतर send later हा पर्याय दिसेल. तुम्हाला ज्यांना मेल पाठवायचा आहे. त्यांचा ई-मेल आयडी आणि मजकूर लिहून. हा मेल म्हणून सेव्ह करा. त्यानंतर send later या पर्यायावर क्लिक करा. या ठिकाणी तुम्हाला केव्हा मेल पाठवायचा आहे. त्या संदर्भात काही पर्याय दिले आहेत. या शिवाय तुम्हाला कोणत्या वेळी ही मेल पाठवायची आहे ती वेळही देऊ शकता. अशा रितीने तुम्ही तुमच्या महत्त्वाच्या पाठवायच्या काही मेल schedule करू शकता

Boomerangवापर करून पाठवले जाणारे मेल हे सुरक्षित राहतात. त्यामुळे तुमच्या मेलमधील मजकूर सुरक्षित राहतो. त्यामुळे तुम्ही आता मेल तयार केली तुमचं काम झालं. त्या वेळी त्या व्यक्तीपर्यंत तुमचा मेल जाईल याबाबत तुम्ही निश्चिंत राहाल यात काही शंका नाही.

भारतीय रुपयासाठीच्या चिन्हाला युनिकोड मान्यता

2010-10-12T17:09:00.000+05:30

भारतीय रुपयासाठीच्या नव्या चिन्हाला युनिकोड मान्यता मिळाली आहे. जुलै महिन्यात भारत सरकारने रुपयासाठी नवे चिन्ह जाहीर केले होते. हे चिन्ह लवकरच सर्वसाधारण की-बोर्डवर तसंच विविध फाँटमध्ये उपलब्ध होईल, असं सांगण्यात आलं होतं. पण त्याच्या निश्चित कालावधीबाबत शंका होती. त्यानंतर मंगळूर येथील एका फाँटद्वारे ` हे चिन्ह उपलब्ध करून दिलं गेलं. मात्र ` चिन्हाला जागतिक मान्यत मिळण्यासाठी आणि की-बोर्डवर दिसण्यासाठी त्याला जागतिक युनिकोड कन्सॉर्टियम या संघटनेची मान्यता मिळणं आवश्यक होतं. या संघटनेकडून युनिकोडच्या नव्या फाँट आणि चिन्हांना मान्यता दिली जाते.

युनिकोड संघटनेकडून नुकतेच युनिकोड 6.०.० व्हर्जन लाँच करण्यात येणार असल्याची घोषणा करण्यात आली आहे. यामध्ये 2०88 नव्या अक्षरांना जागा देण्यात आली आहे. भारतीयांसाठी नोंद घेण्याजोगी गोष्ट म्हणजे यात भारतीय रुपयासाठी वापरण्यात येणा-या चिन्हालाही स्थान देण्यात आलं आहे. भारतीय रुपयाच्या चिन्हासाठी U+20B9 हा कोड देण्यात आला आहे. युनिकोडचे नवे व्हर्जन संगणक आणि मोबाइलमध्ये डाऊनलोड केल्यानंतर तो सहज वापरता येणार असल्याचे संघटनेचे अध्यक्ष मार्क डेविस यांनी सांगितले. ` चिन्हाला युनिकोड मान्यता मिळाल्यामुळे काही महिन्यांतच तो डॉलर ($) युरो (€) प्रमाणे लिहिण्यास सहज उपलब्ध होणार आहे. HTML चा वापर करणारे &#x20b9या कोडद्वारे ` हे चिन्ह मिळवू शकतात.

जगातील आघाडीच्या संगणक कंपन्या खास भारतीय बाजारपेठेसाठी ` या चिन्हाचा समावेश असलेल्या की-बोर्डची निर्मिती करत आहेत. चिन्हाचा युनिकोडमध्ये समावेश झाल्याने आता तो संगणकासह भारतातील मोबाइलच्या की-पॅडवरही दिसणार आहे. युनिकोडच्या नव्या व्हर्जनमध्ये मोबाइल फोनसाठी नवं चिन्ह सहज वापरता येईल, याचा विचार करण्यात आला आहे. युनिकोडच्या या नव्या व्हर्जनची सध्या अंतिम चाचणी सुरू असून काही महिन्यांतच ते मोफत उपलब्ध होणार आहे.

विंडोजचा स्मार्टफोन

2010-10-09T17:20:00.000+05:30

स्मार्टफोनच्या वाढणा-या बाजारपेठेचा विचार करून मायक्रोसॉफ्टने स्मार्टफोनच्या क्षेत्रात उतरण्याचा निर्णय घेतला आहे. मायक्रोसॉफ्ट विंडोजने विंडोज सेव्हन ऑपरेटिंग सिस्टीम हा स्मार्टफोन बाजारात दाखल करण्याची घोषणा केली आहे. गेल्या काही महिन्यांमध्ये मायक्रोसॉफ्टने विंडोजच्या मोबाइल ऑपरेटिंग सिस्टीम बाजारपेठेतील वाटा घसरत आहे. स्मोर्टफोनच्या बाजारपेठेत विंडोजला ‘अ‍ॅपल’चा आयफोन, रिसर्च इन मोशनचा ‘ब्लॅकबेरी’ आणि गुगलचा ‘अ‍ॅन्ड्रॉईड’ या स्मार्टफोनला टक्कर द्यावी लागणार आहे. विंडोजच्या या स्मार्टफोनसाठी ‘सॅमसंग’, ‘एलजी’ आणि ‘एचटीसी’चे हँडसेट वापरले जाणार आहेत. विंडोजच्या स्मार्टफोनच्या विक्रीची जबाबदारी ‘एटी अ‍ॅण्ड टी’कडे असणार आहे.

गुगलकडून नवा इमेज फॉरमॅट

2010-10-08T17:22:00.000+05:30

गुगलने वेबपी नावाने नवा इमेज फॉरमॅट विकसित केला आहे. या फॉरमॅटमुळे फोटोचा आकार 40 टक्क्यांनी कमी होणार आहे, असं गुगलने म्हटलं आहे. सध्या इंटरनेटवर जेपीजी किंवा जिफ फॉरमॅट बहुतेक लोकांकडून वापरले जातात. मात्र यामुळे इंटरनेटचा वेग कमी होतो, अशी तक्रार युझरकडून केली जाते. गुगलने युझरकडच्या अन्य फॉरमॅटमधले फोटो वेबपीमध्ये कन्व्हर्ट करण्यासाठी कन्व्हर्टर उपलब्ध करून दिला आहे. गुगलच्या वेबपीबद्दल अधिक माहितीसाठी येथे क्लिक करा.

हॅपी बर्थडे टू गुगल

2010-09-27T19:06:00.000+05:30

आघाडीच्या गुगल सर्च इंजीनने नुकताच आपला बारावा वाढदिवस साजरा केला. अर्थात, गुगलच्या वाढदिवसाच्या तारखेबद्दल संभ्रम असला तरी चार सप्टेंबर रोजी गुगलची कंपनी म्हणून नोंद झाली. 15 सप्टेंबर 1998 रोजी गुगलने www.google.com या डोमेनची नोंदणी केली. त्यानंतर मात्र गुगलकडून 27 सप्टेंबर रोजी वाढदिवस साजरा केला जातो.

गुगलचे संस्थापक लॅरी पेज आणि सेजी ब्रीन हे सर्वप्रथम 1995 मध्ये भेटले. 1996 मध्ये त्यांनी स्टॅनफोर्ड विद्यापीठात एक प्रोजेक्ट सुरू केला. या प्रोजेक्टचं रूपांतर गुगल नावाच्या कंपनीमध्ये झाले.
गुगलच्या या वाढदिवसानिमित्त गुगलने अमेरिकेसह अन्य देशांतील होमपेजवर नवा लोगो तयार केला होता. एका केकवर गुगल असं लिहिलेला लोगो अमेरिकेतील वेन दीबेव्ड या 89 वर्षीय चित्रकाराने तयार केला आहे.

गुगलच्या बाराव्या वाढदिवसानिमित्त तयार केलेला लोगो...

गुगलने होम पेजवर केलेले अन्य लोगो पाहण्यासाठी येथे क्लिक करा.

गुगलविषयी काही महत्त्वाचं –

गुगल या शब्दाचा गणिती अर्थ एक(1)वर शंभर शून्य असा होतो.
गुगल सर्चच्या होमपेजवर दिसणारे ”I feel lucky”हा पर्याय युजरकडून सर्वात कमी वेळा वापरला जातो. तरीही गुगल हा पर्याय काढून टाकण्याचा विचार करत नाही. कारण त्यांना सर्च लूक आणि फिलमध्ये बदल करायचा नाही.
गुगलची ई-मेल सेवा असलेल्या जी-मेलचा वापर तब्बल दोन वर्षे गुगल कार्यालयात केला जात होता. त्यानंतर गुगलने एक एप्रिल 2004 रोजी तो सर्वासाठी खुल केला.
क्रेग सिल्वरस्टीन हा गुगलचा पहिला कर्मचारी होय.

लॅरी पेज आणि सेजी ब्रीन यांनी गुगलची सुरुवात ज्या ठिकाणी सर्वप्रथम केली. ते ठिकाण पाहण्यासाठी येथे क्लिक करा.

`बॉम सबाडो' नष्ट करण्यात गुगलला यश

2010-09-25T23:43:00.000+05:30

ऑर्कुट या आघाडीच्या सोशल नेटवर्किंग साइटवर हल्ला करणारा ‘बॉम सबाडो’ नामक बग काढून टाकण्यात गुगलला यश आले आहे. गुगलने आपल्या अधिकृत ब्लॉगवर यासंदर्भात माहिती दिली आहे. यामुळे जगभरातील लाखो युजर्स वारत असलेले ऑर्कुट आत्ता सुरक्षित झाले आहे. शनिवारी ‘बॉम सबाडो’या ‘बग’ने ऑर्कुटवर हल्ला केला होता. यामुळे जगभरातील अनेक युजर्सचे अकाउंट हॅक झाले होते. मात्र गुगलने तातडीने यावर उपाय शोधून काढला.

या बगचा फटका बसलेली ऑर्कुट प्रोफाइल्स पुन्हा सुरू करण्यासाठीही गुगलचे प्रयत्न चालू आहे. या बगने ऑर्कुटवर हल्ला केल्यानंतर नेट युजर्सनी त्याचा चांगलाच धसका घेतला होता. या काळात युजर्सना सावध करणा-यांचे गुगलने आभार मानले आहेत.

इंटरनेट एक्स्प्लोरर 9 बिटा

2010-09-24T19:26:00.000+05:30

माक्रोसॉफ्टने इंटरनेट एक्सप्लोरर 9चे बिटा व्हर्जन नुकतेच लाँच केले आहे. जगभरातील नेट युझरकडून आयईचा सर्वाधिक वापर होत असला तरी गेल्या काही दिवसांमध्ये गुगल क्रोम आणि मोझीलाफायरफॉक्सच्या बरोबरीने आयईला स्पर्धा करावी लागत आहे. माक्रोसॉफ्टने आयई 9 बिटामध्ये अनेक नव्या सुविधा उपलब्ध करून दिल्या आहेत. तसेच याचे Graphics आणि designया आधीच्या व्हर्जनपेक्षा अधिक चांगले आहे.

आयई 9 बिटा ला नेट युझरकडून जोरदार प्रतिसाद मिळाला असून पहिल्या ४८ तासांत वीस लाख युझर्सनी हे व्हर्जन डाऊनलोड करून घेतलं आहे.

आयई 9 बिटा डाऊनलोड करण्यासाठी येथे क्लिक करा.

ऑर्कुटवर ‘बॉम सबाडो’ बगचा हल्ला

2010-09-24T18:33:00.000+05:30

ऑर्कुट या आघाडीच्या सोशल नेटवर्किंग साइटवर ‘बॉम सबाडो’ नामक ‘बग’ने हल्ला केला असून स्क्रॅपच्या माध्यमातून येणारा हा बग ऑर्कुटचे खाते हॅक करू शकतो. ‘बॉम सबाडो’ या मूळ पोर्तुगिज शब्दाचा अर्थ ‘गुड सॅटर्डे’ असा असला तरी या बॉम सबाडोने अनेक ऑर्कुट युजर्सचा शनिवार खराब केला आहे.

या बगचा नेट युझर्सनी चांगलाच धसका घेतला असून गुगल ट्रेन्डसनुसार अवघ्या काही तासांत मोस्ट पॉप्युलर सर्चमध्ये बॉन सबाडो 13व्या क्रमांकावर पोहचला आहे. ऑर्कुटवर ‘बॉम सबाडो’चा हल्ला होण्याची या आठवड्यातील दुसरी वेळ आहे. ऑर्कुटसोबतच फेसबुक या आणखी एका सोशल नेटवर्किंग साइटवर या बगने हल्ला केल्याचे समजते. ऑर्कुटवर ‘स्क्रॅप’च्या माध्यमातून तर फेसबुकवर ‘वॉल’च्या माध्यमातून या बगने हल्ला केल्याचे वृत्त आहे.

‘एक्सएसएस’ (क्रॉस-साइट स्क्रिप्टिंग) प्रकारच्या या बगमुळे ऑर्कुट युजरचे अकांउट हॅक होण्याचा धोका आहे. त्यामुळे पुढील सूचना मिळेपर्यंत ऑर्कुटचा वापर न करु नये असे, ऑर्कुटने म्हटले आहे. तसेच कोणत्याही संशयास्पद लिंकला क्लिक करु नये, असेही ऑर्कुटने कळवले आहे.

गेल्या तीन महिन्यांपासून ऑर्कुट फिसर्च अपडेट करत आहे. त्यानंतर दुस-यांदा अशा प्रकारच्या बगने ऑर्कुटवर हल्ला केला आहे. या आठवड्यात टि्वटरवरही ‘बॉम सबाडो’ने हल्ला केला होता. शनिवारपासून ऑर्कुट युजर्सच्या खात्यावर मित्रांकडून आपोआप ‘बॉम सबाडो’चा ‘स्क्रॅप’ येत आहे. यावर क्लिक केल्यास खाते तर हॅक होतेच. शिवाय नव्या कम्युनिटीज आपोआप जॉइन होतात. तसेच बाउझरही हॅक होण्याचा धोका आहे. अशा प्रकारच्या स्क्रॅपला क्लिक केले असेल तर युजरने ऑर्कुटच्या जुन्या व्हर्जनवर जाऊन साइन आऊट करावे. कम्युनिटीमध्ये काही नव्या कम्युनिटी आल्या असतील तर त्या अनजॉइन कराव्यात. तसेच वापरत असलेल्या ब्राऊझरमधील ‘कैश’ आणि ‘कुकीज्’ डिलिट कराव्यात. त्यानंतर पुन्हा ऑर्कुटला लॉगइन करुन पासवर्ड आणि सुरक्षाविषयक प्रश्नाचे उत्तर बदलावा. तसेच ऑर्कुट ओपन करताना अन्य वेबसाइटच्या माध्यमातून ओपन न करता www.orkut.com वरुन ओपन करा.

या संदर्भात गुगले अद्याप कोणतीही अधिकृत माहिती दिलेली नाही.

मराठी ब्लॉगरसाठी स्पर्धा

2010-09-23T18:57:00.000+05:30

इंटरनेटवर स्वत:ला व्यक्त करणारं ब्लॉग हे प्रभावी माध्यम होत चाललं आहे. यातही मराठी ब्लॉगची संख्या दिवसेदिवस वाढत आहे. मराठी ब्लॉगर्सना प्रोत्साहन देण्यासाठी ‘स्टार माझा’च्या वतीने ‘ब्लॉग माझा’ ही स्पर्धा आयोजित केली आहे. या स्पर्धेचं हे तिसरं वर्ष असून मराठी ब्लॉगर्ससाठी अशी ही एकमेव स्पर्धा आहे.

या स्पर्धेसाठी स्वत:चा ब्लॉग पाठवण्याची अंतिम तारीख 15 ऑक्टोबर 2010 आहे. स्पर्धेत सहभागी होण्यासाठी ब्लॉगर्सनी आपलं नाव, ब्लॉगची लिंक आदी माहिती blogmajha3@gmail.com या ई-मेल आयडीवर पाठवावी, असं आवाहन ‘स्टार माझा’च्या वतीने करण्यात आले आहे.

स्पर्धेच्या अधिक माहितीसाठी येथे क्लिक करा.

प्रबोधनकार तुमच्यापर्यंत!

2010-09-19T18:52:00.000+05:30

आपल्याला हवा असणारा संदर्भ शोधण्यासाठी इंटरनेटचा वापर केला जातो. मात्र इंटरनेटवर मिळणारी माहिती ही प्रसिद्ध आणि सर्वज्ञात असते. त्यातही मराठीतून एखादा संदर्भ मिळणं अधिकच कठीण. कारण यासाठी आवश्यक वेबसाइट मराठीतून तयार झालेल्या नाहीत. मात्र आता महाराष्ट्रातील सामाजिक, राजकीय क्षेत्रात ठसा उमटवणा-या व्यक्तीची माहिती इंटरनेटवर मराठीतून उपलब्ध करून देण्याचा प्रयत्न सुरू झाला आहे. नुकतीच थोर समाजसुधारक आणि क्रांतिकारक विचारवंत प्रबोधनकार ठाकरे यांच्या जीवनचरित्रावरीलं www.prabodhankar.com ही वेबसाइट नुकतीच लाँच करण्यात आली आहे.

या वेबसाइटवर प्रबोधनकारांनी लिहिलेली पुस्तकं आणि अप्रकाशित लेख ठेवण्यात आले आहेत. हे लेख पीडीएफ स्वरूपात असून ते डाऊनलोड करण्याची सोय देण्यात आली आहे. प्रबोधनकारांवर लिहिलेली पुस्तकं, पीएचडीचे प्रबंध, प्रासंगिक लेख आणि त्यांच्याविषयी अन्य ठिकाणी लिहून आलेले लेख या ठिकाणी एकत्रितपणे देण्यात आले आहेत. तसेच प्रबोधनकारांचे फोटो, व्हिडिओ, वॉलपेपर देण्यात आले आहेत.

या वेबसाइटचं स्वरूप युझर फ्रेंडली ठेवण्यात आलं आहे. मात्र त्यात एक त्रुटी जाणवते. प्रबोधनकारांच्या संदर्भात एखादा संदर्भ शोधण्यासाठी त्या ठिकाणी सर्चचा पर्याय नाही. मराठी अथवा इंग्रजीमध्ये सर्चचा तो पर्याय उपलब्ध करून देणं आवश्यक आहे. या साइटच्या माध्यमातून प्रबोधनकारांच्या साहित्यावर आणि विचारांवर ऑनलाइन चर्चसत्रंही आयोजित करता येतील. इंटरनेटवरील सोशल नेटवर्किंग साइटचा प्रभाव पाहता या साइटने ऑर्कुट, फेसबुक, ट्विटर अशा सोशल नेटवर्किंग साइटशी कनेक्ट होणं गरजेचं आहे. या माध्यमातून साइटची माहिती अधिक लोकांपर्यंत पोहोचण्यास मदत होऊ शकेल.

या साइटची संकल्पना पत्रकार सचिन परब यांची असून हा प्रयोग केवळ एका साइटपुरता मर्यादित नाही तर महाराष्ट्रातील अन्य कर्तृत्ववान व्यक्तीचे अशा प्रकारे इंटरनेटच्या माध्यमातून डॉक्युमेंटेशन करण्याची परब यांची योजना आहे. मराठी भाषेचा इंटरनेटवरील टक्का वाढवण्यासाठी केलेली ही कल्पना निश्चितच अभिनंदनीय आहे.

ट्विटर नव्या स्वरूपात...

2010-09-17T17:49:00.000+05:30

मायक्रोब्लॉगिंगमधील आघाडीच्या ट्विटरमध्ये लवकरच नवे बदल होणार असल्याचं ट्विटरने जाहीर केलं आहे. या बदलामुळे ट्विटरच्या माध्यमातून फोटो आणि व्हिडिओ पाहता येणं शक्य होणार आहे. तसेच ट्विटरच्या पेजमध्ये बदल होणार असून सध्या मेसेज पाठवण्याच्या बाजूला दुसरी विंडो असेल. ज्यात फोटो, व्हिडिओ आणि अन्य माहिती असेल. ट्विटरच्या माध्यमातून फोटो आणि व्हिडिओ पाहण्यासाठी तसंच ते शेअर करण्यासाठी यूट्यूब, फ्लिकर, जस्टइन.टीव्ही, ट्विटगो, ट्विट पिक, ट्विटव्हिड, युस्ट्रीम, व्हिमिओ आणि वायफ्रॉग या वेबसाइट्सबरोबर करार करण्यात आले आहेत.

टि्वटच्या संदर्भातील अन्य लेख वाचण्यासाठी येथे क्लिक करा.

गुगलद्वारे लवकरच म्युझिक सेवा..

2010-09-14T17:45:00.000+05:30

इंटरनेटवरून आपल्याला हवं असलेलं म्युझिक किंवा गाणी डाऊनलोड करणे तसेच ते शेअरिंग करण्याची सेवा यात सध्या अ‍ॅपल आघाडीवर आहे. गुगल आपल्या म्युझिक सेवेच्या माध्यमातून थेट अ‍ॅपलला टक्कर देणार आहे. काही दिवसांपूर्वी अ‍ॅपलने ‘पिंग’च्या माध्यमातून सोशलनेटवर्किंगमध्ये प्रवेश केला होता.

सर्च इंजिनमध्ये आघाडीवर असलेले गुगल येत्या डिसेंबरमध्ये आपली म्युझिक सेवा सुरू करणार आहे. ही सेवा ख्रिसमसच्या मुहूर्तावर सुरू होण्याची शक्यता आहे. इंटरनेटवरून आपल्याला हवं असलेलं म्युझिक किंवा गाणी डाऊनलोड करणे तसेच ते शेअरिंग करण्याची सेवा यात सध्या अ‍ॅपल आघाडीवर आहे. गुगल आपल्या म्युझिक सेवेच्या माध्यमातून थेट अ‍ॅपलला टक्कर देणार आहे. काही दिवसांपूर्वी अ‍ॅपलने ‘पिंग’च्या माध्यमातून सोशलनेटवर्किंगमध्ये प्रवेश केला होता. इंटरनेटवर म्युझिक क्षेत्राची वाढत जाणारी क्रेझ आणि त्याची बाजारपेठ या दृष्टीने सर्व आघाडीच्या कंपन्यांनी पाऊल टाकण्यास सुरुवात केली आहे.

अ‍ॅपलने 2003 मध्ये म्युझिक डाऊनलोड सेवेच्या विक्रीची सुरुवात केली होती. त्यानंतर आतापर्यंत अ‍ॅपलची यामध्ये मक्तेदारी राहिली आहे. अमेरिकेतील ऑनलाइन म्युझिक विक्रीमध्ये अ‍ॅपलचा वाटा 80 टक्के इतका आहे. मात्र यूट्यूब आणि सर्च इंजिनच्या माध्यमातून गुगलला यामध्ये मोठी संधी आहे. गुगलद्वारे सुरू करण्यात येणा-या या सेवेमुळे अ‍ॅपलची ही मक्तेदारी टिकेल का, याचं उत्तर मिळण्यासाठी डिसेंबपर्यंत वाट पाहावी लागणार आहे.

अ‍ॅप्लिकेशन्स एका क्लिकवर

2010-09-12T09:38:00.000+05:30

संगणकाची अ‍ॅप्लिकेशन डाऊनलोड करायची म्हणजे खूप वेळकाढू काम असतं. आणि प्रत्येक अ‍ॅप्लिकेशन किंवा सॉफ्टवेअर एकाच ठिकाणी मिळत नाही. त्याची शोधाशोधही करावी लागते. अशा वेळी एका क्लिकमधून ही अ‍ॅप्लिकेशन डाऊनलोड करता आली तर किती बरं होईल. अशा काही वेबसाइट्स आहेत ज्यांच्यावरून तुम्ही अ‍ॅप्लिकेशन्स डाउनलोड करून घेऊ शकता.

नवा संगणक घेतला की त्यामध्ये अनेक महत्त्वाची अ‍ॅप्लिकेशन आवश्यक असतात. उदा- Google chrom, firefox, antivirus programs, firewall, Google Talk, Skype, FileZilla, Adobe Reader, Flash plugin, Open office, Silverlight, Adobe AIR आदी. मात्र हे किंवा अन्य अ‍ॅप्लिकेशन डाऊनलोड करून घ्यायचे असतील तर प्रत्येक अ‍ॅप्लिकेशन स्वतंत्रपणे डाऊनलोड करून घ्यावं लागतं. कधी कधी संगणक अथवा लॅपटॉप format करताना आधी असलेली सगळी अ‍ॅप्लिकेशन्स पुन्हा डाऊनलोड करावी लागतात. मात्र ही सर्व अ‍ॅप्लिकेशन एका क्लिकवर डाऊनलोड करता आली तर वेळही वाचेलच त्याचबरोबर अ‍ॅप्लिकेशनची शोधाशोधही करावी लागणार नाही.

तुमच्या नव्या संगणकासाठी लागणारी सर्व आवश्यक अ‍ॅप्लिकेशन्स http://allmyapps.com या

वेबसाइटवर एकत्रितपणे देण्यात आली आहेत. आणि ही अ‍ॅप्लिकेसन्स एकाच वेळी डाऊनलोडही करता येतात. या वेबसाइटवर अ‍ॅप्लिकेशन डाऊनलोड करण्यासाठी एक

registration देण्यात आला आहे. त्याद्वारे तुम्ही अ‍ॅप्लिकेशन डाऊनलोड करू शकता. मात्र यासाठी या साइटवर registration करावं लागतं. अर्थात, ते मोफत आहे.

यातही तुमची सोय बघितली गेली आहे. प्रत्येक संगणकाची ऑपरेटिंग सिस्टीम वेगळी असते. कोणतंही अ‍ॅप्लिकेशन डाऊनलोड करताना सिस्टीम बघणं महत्त्वाचं असतं. या वेबसाइटवरून अ‍ॅप्लिकेशन डाऊनलोड करताना तुमच्या संगणकातील ऑपरेटिंग सिस्टम कोणती आहे त्यानुसार ही अ‍ॅप्लिकेशन डाऊनलोड करू शकता. या साइटवर Graphics, Video, Audio, Science,Games, System, educati

on Accessibility, web, Communication, Security, Utilities, office, Imaging, File sharing, Development

अशी विभागानुसार अ‍ॅप्लिकेशनची यादी देण्यात आली आहे. तुमच्या गरजेनुसार तुम्ही हवी ती अ‍ॅप्लिकेशन डाऊनलोड करू शकता.

अगदी नवीन संगणकातही तुम्हाला हवी असलेली अ‍ॅप्लिकेशन्स तुम्ही या साइटवरून डाऊनलोड करू शकतात.

वरील साइटप्रमाणेच http://ninite.com हीदेखील अशाच स्वरूपाची साइट आहे. फरक इतकाच की, या साइटवर तुम्हाला साइन-अप अथवा registration करावं लागत नाही. मात्र यावर केवळ विंडोजमध्येच चालणारी अ‍ॅप्लिकेशन्स दिली आहेत.

पिंगची झिंग अन् सोशल नेटवर्किंग

2010-09-07T15:16:00.000+05:30

माणूस हा समाजप्रिय प्राणी आहे. अगदी सुरुवातीच्या काळापासून तो समूहात राहात आला आहे. आपापसात संवाद साधण्यासाठी त्याने सुरुवातीला हातवा-यांचा आणि चिन्हांचा वापर केला. नंतर भाषेचा जन्म झाला आणि माणसामाणसांतील संवाद अधिक स्पष्ट आणि प्रभावी होत गेला. टेलिफोन, मोबाइल आणि इंटरनेटच्या शोधाने या संवादाला अंतराच्या मर्यादेतून मुक्त केले. इंटरनेटवरून होणा-या संवादाला सर्वात व्यापक व्यासपीठ मिळवून दिले आहे सोशल नेटवर्किंगने. मात्र एकमेकांशी संपर्क-संवाद-संभाषण साधण्याचे माध्यम बनलेले ‘सोशल नेटवर्किंग’ आता केवळ गप्पाटप्पा करणे किंवा ओळखीपाळखीपुरते उरलेले नाही, तर त्यामागील खरा अर्थ ‘समाजसंपर्क’ आता उमगू लागला आहे. मुंबई पोलिसांनी सुरू केलेली फेसबुकवरील कम्युनिटी असो वा काही दिवसांपूर्वी रिक्षा-टॅक्सीचालकांच्या मनमानीविरोधात छेडण्यात आलेली ‘मीटर जॅम’ ही मोहीम असो, ‘सोशल नेटवर्किंग’ने समाजात होणा-या चळवळींना व्यापक, वेगवान आणि तितकेच सुलभ व स्वस्त माध्यम उपलब्ध करून दिले आहे.

सोशल नेटवर्किंगचे हेच माध्यम आता आणखी उपयुक्त बनत चालले आहे. केवळ संवादापुरते मर्यादित न राहता आता त्याने माहिती-तंत्रज्ञान यांच्या देवाण-घेवाणीचे दालन नेटिझन्सना उपलब्ध करून दिले आहे. याचीच प्रचिती गेल्या आठवड्यात घडलेल्या दोन घटनांनी दिली आहे. एक म्हणजे गुगलने मोबाइल आणि स्मार्टफोनसाठी गेम्स तयार करणा-या सोशल डेस्कने ही वेबसाइट विकत घेतली आणि आयपॅड, आयफोन उत्पादन क्षेत्रातील आघाडीच्या अ‍ॅपलने‘पिंग’ या अ‍ॅप्लिकेशनद्वारे सोशल नेटवर्किंग क्षेत्रात पाऊल ठेवले आहे.

सोशलडेस्क मोबाइल आणि सोशल नेटवर्किं ग वेबसाइटसाठी गेम्स तयार करते. याआधी सोशलडेस्कने फेसबुक, अ‍ॅपलचा आयफोन आणि ब्लॅकबरीसाठी तयार केलेले गेम्स प्रसिद्ध आहेत. गुगलने ही कंपनी किती डॉलरमध्ये विकत घेतली, हे अद्याप जाहीर झाले नसले तरी सोशल नेटवर्किंगमध्ये गुगल आपले स्थान बळकट करण्यासाठी ही वेबसाइट विकत घेतल्याची चर्चा आहे.

अ‍ॅपल पिंगचे नेहमीच्या सोशल नेटवर्किंगप्रमाणे नसून ते आयट्यून्सवर आधारित अ‍ॅप्लिकेशन आहे. याद्वारे यूझर आपले आवडते संगीत ऐकू शकतील, त्याचबरोबर आपले मित्र कोणते संगीत ऐकत आहेत,याचे अपडेट मिळवू शकतील.‘पिंग’द्वारे जगभरातील म्युझिक बँड्स नव्या गाण्याचे अपडेट, त्याचे रिव्ह्यू कळणार आहेत. या बँड्सचे कार्यक्रम कोठे होणार आहेत, याची माहिती पिंगच्या माध्यमातून मिळणार आहे. तसेच आपल्याला आवडणारे संगीतही ते ऑनलाइन विकत घेण्याची सोय यामध्ये देण्यात आली आहे. पिंगच्या माध्यमातून युझर आपल्या आवडत्या संगीतकारांना आणि ग्रुपला फॉलो करू शकतात. अ‍ॅपलकडून याचे वर्णन Facebook meets Twitter for music असे करण्यात आले आहे. सध्या ऑर्कुटमधील कम्युनिटीज किंवा फेसबुकमधील ग्रुप याप्रमाणेच पिंगचे स्वरूप असून यामध्ये प्रामुख्याने संगीत आणि त्याच्याशी आधारित अन्य उपक्रमांना स्थान देण्यात आले आहे.

अ‍ॅपलशिवाय अन्य पॅनडॉरा आणि झुएन सोशियल या माक्रोसॉफ्टने म्युझिक शेरिंग अ‍ॅप्लिकेशन आहेत,मात्र यामध्ये अ‍ॅपलला मोठी संधी आहे. कारण अ‍ॅपलच्या आयट्यून्सचे जगभरातील 23 देशांमधून 160 दशलक्ष युझर्स आहेत.

अ‍ॅपलच्या पिंगला पहिल्या दोन दिवसांत जबरदस्त प्रतिसाद मिळाला असून, सुमारे दहा लाख युझर्स पिंगचे सदस्य झाले आहेत. पिंगमुळे फेसबुक आणि अ‍ॅपलमधील स्पर्धा आणखी तीव्र झाली आहे. सोशल नेटवर्किंगमध्ये फेसबुकने प्रवेश केल्यानंतर ‘मायस्पेस’च्या युजरची संख्या कमी झाली. आता पिंगमुळे फेसबुकला हीच भीती वाटत असावी. यामुळेच अन्य नेटवर्किंगद्वारे माहिती शेअर करण्यावर बंदी घालणा-या फेसबुकने अ‍ॅपलच्या पिंगची ही सेवा ब्लॉक केली आहे. याआधी फेसबुकने ट्विटरवरून माहिती शेअर करण्यावर बंदी घातली होती. फेसबुकवरील युजरची माहिती मिळवण्यासाठी त्याच्या application programming interfaces ने मान्यता द्यावी लागते. सध्या फेसबुककडे अशा अनेक कंपन्यांकडून माहिती मिळवण्यासाठी परवानगी मागितली जाते. मात्र अ‍ॅपलला अशी परवाणगी दिली जाईल का, याबद्दल शंका आहेत. अ‍ॅपल आणि फेसबुकमध्ये या संदर्भात चर्चा सुरू असल्याचे वृत्त आहे.

अ‍ॅपलच्या आयट्यून्सचा वापर करणारे सर्व जण पिंगचा वापर करतील, हे आताच सांगता येणे शक्य नसले तरी पिंगमुळे सोशल नेटवर्किंग वेबसाइटमध्ये सध्याच्या स्वरूपामध्ये बदल होणार आहेत. हे बदल फेसबुक, ऑर्कुट, मायस्पेस आणि ट्विटरच्या माध्यमातून पाहायला मिळतील. सोशल नेटवर्किंगच्या बाजारपेठेत सध्याच्या घडीला अ‍ॅपल ही एकमेव कंपनी आहे, जी फेसबुकला टक्कर देऊ शकते. त्यामुळे भविष्यात या दोन्हींमधील स्पर्धा आणखी वाढणार आहे. याशिवाय गुगलही आपल्या ऑर्कुटच्या माध्यमातून या स्पर्धेत आहेच.

गेल्या आठवड्यात बोस्टन कन्सल्टिंग ग्रुपने प्रसिद्ध केलेल्या अहवालानुसार भारतातील इंटरनेट वापरणा-यांची संख्या 2015 पर्यंत 24 कोटींवर पोहोचणार आहे. तर ब्राझील, रशिया, चीन, इंडोनेशिया या देशांमधील इंटरनेट वापरणा-यांची संख्या 61 कोटी होईल. कॉम स्कोअर या कंपनीच्या अहवालानुसार जुलै महिन्यात भारतात फेसबुकने ऑर्कुटला मागे टाकत अव्वल स्थान पटकावले आहे. या अहवालांतून इंटरनेट आणि सोशल नेटवर्किंगच्या वाढत्या वापराची कल्पना येते. जगभरात एकाच वेळी उपलब्ध होऊ शकणारे हे एकमेव माध्यम असल्याने स्वत:चे वर्चस्व राखण्यासाठी या वेबसाइट बनवणा-या कंपन्यांमधील व्यावसायिक स्पर्धाही तीव्र होत चालली आहे. मात्र या स्पर्धेमुळे यूजर्सचाच फायदा अधिक होत आहे. त्यामुळे ही स्पर्धा अशीच कायम राहिली, तर भविष्यात सोशल नेटवर्किंग हे शिक्षण, आरोग्य आणि प्रशासन यांच्यासाठीही प्रभावी माध्यम ठरण्यास हरकत नाही.