கல்விக்குயில்

அரசு பள்ளிகளில் கழிப்பறை வசதி உள்ளதா அறிக்கை தாக்கல் செய்ய உத்தரவு.

2026-07-13T06:52:08.456+05:30

'அரசு பள்ளிகளில் குறிப்பாக பெண்கள் பள்ளிகளில் போதிய கழிப்பறை உள்ளிட்ட அடிப்படை வசதிகள் உள்ளனவா. இல்லையெனில் பூர்த்தி செய்ய மேற்கொண்ட நடவடிக்கை குறித்து தமிழக அரசு தரப்பில் அறிக்கை தாக்கல் செய்ய வேண்டும்,' என, உயர்நீதிமன்ற மதுரை கிளை உத்தரவிட்டது.

ராமநாதபுரம் மாவட்டம் உப்பூர் திருமுருகன் தாக்கல் செய்த பொதுநல மனு:

மதுரை ஒத்தக்கடையில் அரசு மாதிரி பெண்கள் மேல்நிலைப் பள்ளி உள்ளது. போதிய கழிப்பறை வசதி இல்லை. நிரந்தர துாய்மை பணியாளர்கள் இல்லை.

பள்ளி நிர்வாகம் ஒப்பந்த அடிப்படையில் பணிபுரியும் தற்காலிக துாய்மை பணியாளர்களையே நம்பியுள்ளது. கழிப்பறைகளை சரியாக சுத்தம் செய்வதில்லை. 'சானிட்டரி நாப்கின்'களை அகற்றுவதற்கான வசதி இல்லை. சுகாதார பிரச்னைகள் உருவாகின்றன. மாணவிகளின் உடல்நலம் பாதிக்கப்படுகிறது. உடற்கல்வி ஆசிரியர்கள் பற்றாக்குறை உள்ளது.

போதிய கழிப்பறை, குடிநீர் உள்ளிட்ட அடிப்படை வசதிகளை நிறைவேற்ற வேண்டும். சுற்றுச்சுவர் அமைக்க வேண்டும். போதிய உடற்கல்வி ஆசிரியர்கள், துாய்மை பணியாளர்கள், காவலர்களை நியமிக்க தமிழக பள்ளிக் கல்வித்துறைக்கு உத்தரவிட வேண்டும்.

இவ்வாறு அவர் குறிப்பிட்டார்.

மனுதாரர் தரப்பில் வழக்கறிஞர் அழகுமணி ஆஜரானார்.

நீதிபதிகள் ஏ.டி.ஜெகதீஷ் சந்திரா, ஆர்.பூர்ணிமா அமர்வு பிறப்பித்த உத்தரவு:

அரசு பள்ளிகளில் குறிப்பாக பெண்கள் பள்ளிகளில் போதிய கழிப்பறை உள்ளிட்ட அடிப்படை வசதிகள் உள்ளனவா. போதிய துாய்மை பணியாளர்கள் உள்ளனரா. இல்லையெனில் பூர்த்தி செய்ய மேற்கொண்ட நடவடிக்கை குறித்து தமிழக பள்ளிக் கல்வித்துறை இயக்குனர் ஜூலை 30ல் அறிக்கை தாக்கல் செய்ய வேண்டும் என்றது.

புத்தகங்கள் பற்றாக்குறையா? கல்வித்துறை விளக்கம்!

2026-07-13T06:50:38.987+05:30

தமிழகத்தில் சில மாவட்டங்களில், ஒன்றாம் வகுப்பு முதல் மூன்றாம் வகுப்பு வரையிலான மாணவர்களுக்கு, புதிய பாடப்புத்தகங்கள் வழங்கவில்லை. எண்ணும் எழுத்தும் புத்தகம், ஆசிரியர் கையேடு வழங்கப்படவில்லை என புகார்கள் எழுந்தன.

இது குறித்து, பள்ளிக் கல்வித்துறை நேற்று வெளியிட்ட விளக்கம்:

பாடப்புத்தகங்கள் அச்சிடுதல் அல்லது ஆரம்ப கட்ட வினியோகத்தில், எந்தவித தாமதமும் ஏற்படவில்லை.

கல்வியாண்டு தொடங்குவதற்கு முன், பள்ளிகள் வழங்கிய மாணவர்கள் எண்ணிக்கை அடிப்படையில் புத்தகங்கள் அச்சிடப்பட்டு, பள்ளிகளுக்கு வழங்கப்பட்டன.

பள்ளிகள் திறக்கப்பட்ட பின், புதிதாக மாணவர் சேர்க்கை நடந்தது. அதன் அடிப்படையில், 80,000 கூடுதல் புத்தகங்கள் தேவைப்பட்டன.

அவற்றை அச்சிட்டு, வினியோகிக்கும் பணி, இறுதி கட்டத்தை எட்டி உள்ளது. சில பள்ளிகளில், பாடப்புத்தகங்கள் பற்றாக்குறை என்பது, கல்வியாண்டு தொடங்கிய பின் மேற்கொள்ளப்பட்ட புதிய மாணவர் சேர்க்கையே தவிர, துறையின் திட்டமிடல் குறைபாடு காரணம் அல்ல.

இவ்வாறு அதில் கூறப்பட்டுள்ளது.

உதவி பேராசிரியர் தேர்வில் குழப்பம்: மதிப்பீடு முறையை ஆய்வுக்கு உட்படுத்த வலியுறுத்தல்.

2026-07-13T06:49:45.294+05:30

உதவி பேராசிரியர் பணியிடங்களை நிரப்புவதற்கு நடந்தத் தேர்வு முடிவுகளில் பல குழப்பங்கள் மற்றும் சந்தேகங்களையும் எழுந்துள்ளதாக 'வீ தி லீடர்ஸ்' அமைப்பின் நிறுவனர் அண்ணாமலை தெரிவித்துள்ளார்.

இது தொடர்பாக அவர் வெளியிட்ட அறிக்கையில் கூறியுள்ளதாவது:

தமிழக அரசு கலை மற்றும் அறிவியல் கல்லூரிகளில், 2,708 உதவி பேராசிரியர் பணியிடங்களை நிரப்புவதற்காக, ஆசிரியர் தேர்வு வாரியம், கடந்த 2025ஆம் ஆண்டு டிசம்பர் 27 அன்று போட்டித் தேர்வை நடத்தியது. சுமார் 42,000 தேர்வாளர்கள் பங்கேற்ற இந்தத் தேர்வுகள், 48 பாடப்பிரிவுகளுக்கு நடைபெற்றன. கடந்த 25.06.2026 அன்று வெளியிடப்பட்ட இந்தத் தேர்வுகளின் முடிவுகள், பல குழப்பங்களையும், சந்தேகங்களையும் எழுப்பியுள்ளன.

பாடப்பிரிவுகளுக்கு 150 மதிப்பெண்களுக்கான தேர்வும், விளக்கவுரைக்கு 50 மதிப்பெண்களுக்கான தேர்வும் நடைமுறைப்படி நடத்தப்பட்டுள்ளன. இந்த நிலையில், தமிழ்த் துறையில், 150 மதிப்பெண்களுக்கு 111 மதிப்பெண் பெற்று முதலிடம் பிடித்த தேர்வாளருக்கு, விளக்கவுரை தேர்வில், பூஜ்ஜியம் மதிப்பெண்கள் மட்டுமே வழங்கப்பட்டுள்ளது.

இதே போல, கணினி அறிவியல் துறையில் 107/150 மதிப்பெண்கள் பெற்றவருக்கு, விளக்கவுரை தேர்வில், 1/50 மட்டுமே கிடைத்திருக்கிறது. அதே நேரத்தில், இயற்பியல் பாடப்பிரிவில், 54/150 பெற்றவர், விளக்கவுரை தேர்வில், 49/50 பெற்றிருக்கிறார்.

இப்படி, மொத்தம் 43 பாடப்பிரிவுகளில், பாட மதிப்பெண் அதிகம் பெற்றவர்களுக்கு, விளக்கவுரை தேர்வில் மிகக் குறைந்த மதிப்பெண்ணும், பாட மதிப்பெண் குறைவாகப் பெற்றவர்களுக்கு, விளக்கவுரை தேர்வில் மிக அதிக மதிப்பெண்களும் வழங்கப்பட்டுள்ளது பல கேள்விகளை எழுப்பியிருக்கிறது.

மேலும், விளக்கவுரை மதிப்பெண்களில், 8.25, 24.75 என தசம, எண்ணிலான மதிப்பெண்கள் வழங்கப்பட்டுள்ளன. இது எப்படி சாத்தியம் என்ற கேள்வியும், தேர்வாளர்கள் மத்தியில் எழுந்துள்ளது. இப்படி, தேர்வு மதிப்பீட்டு முறையின் குழப்பத்தால், பல தேர்வாளர்களின் தரவரிசையில், பல நூறு இடங்கள் மாற்றம் ஏற்பட்டுள்ளது. மேலும், இந்த மதிப்பீட்டு முறையின் வெளிப்படைத் தன்மை குறித்தும், நம்பகத்தன்மை குறித்தும் பெரும் சந்தேகம் எழுந்துள்ளது.

உதவிப் பேராசிரியர் பணிக்காக, தமிழக இளைஞர்கள் பல ஆண்டுகளாக தங்கள் கடுமையான உழைப்பை வழங்கியிருக்கிறார்கள். தேர்வு மதிப்பீட்டில் இத்தனை குழப்பங்கள் ஏற்புடையது அல்ல. எனவே, இந்த விளக்கவுரை தேர்வு மதிப்பீடு முறையை ஆய்வுக்குள்ளாக்க வேண்டும். இந்தத் தேர்வை முழுமையாக மறு மதிப்பீடு செய்ய வேண்டும் என்றும், தமிழக அரசை வலியுறுத்துகிறேன்.

மேலும், கடந்த 2024ஆம் ஆண்டு வெளியிடப்பட்ட அரசாணையில், 4000 உதவிப் பேராசிரியர் பணியிடங்களை நிரப்ப உத்தரவு பிறப்பிக்கப்பட்டது. ஆனால், 2708 பணியிடங்களுக்கு மட்டுமே தேர்வு நடைபெற்றுள்ளது. சென்னை உயர்நீதிமன்றம், கடந்த மே மாதம், 4000 பணியிடங்களையும் ஆறு மாதங்களில் நிரப்ப உத்தரவிட்டுள்ளது. எனவே, மீதமுள்ள பணியிடங்களையும் நிரப்ப தமிழக அரசு உடனடியாக நடவடிக்கை எடுக்க வேண்டும் என்றும் கேட்டுக் கொள்கிறேன்.

இவ்வாறு அந்த அறிக்கையில் அண்ணாமலை தெரிவித்துள்ளார்.

அரசு பள்ளிகளில் மாணவர் சேர்க்கை 3 ஆண்டுகளில் 7.39 லட்சம் வீழ்ச்சி - அன்புமணி ஆதங்கம்.

2026-07-13T06:46:39.092+05:30

“தமிழக அரசு பள்ளிகளில் மாணவர் சேர்க்கை 3 ஆண்டுகளில் 7.39 லட்சம் வீழ்ச்சியடைந்துள்ளது. அரசு பள்ளிகளில் ஒரு லட்சத்துக்கும் கூடுதலான வகுப்பறைகளுக்கு ஆசிரியர்கள் இல்லாத சூழலில் அரசு பள்ளிகளை எவ்வாறு மேம்படுத்த முடியும்?” என பாமக தலைவர் மருத்துவர் அன்புமணி ராமதாஸ் கேள்வி எழுப்பியுள்ளார்.

இதுகுறித்து அவர் வெளியிட்ட அறிக்கையில், ‘தமிழ்நாட்டில் தனியார் பள்ளிகளில் பயிலும் மாணவர்களின் எண்ணிக்கை கடந்த ஓராண்டில் 1.77 லட்சம் அதிகரித்திருப்பதாகவும், அதே நேரத்தில் அரசு பள்ளிகளில் பயிலும் மாணவர்களின் எண்ணிக்கை 2.07 லட்சம் வீழ்ச்சி அடைந்திருப்பதாகவும் மத்திய அரசு வெளியிட்டுள்ள புள்ளி விவரங்கள் தெரிவிக்கின்றன. இதை தமிழ்நாடு அரசு எச்சரிக்கை மணியாக எடுத்துக் கொள்ள வேண்டும்.

ஒருங்கிணைந்த மாவட்ட கல்வி தகவல் அமைப்பு வெளியிட்ட தரவுகளில் தான் இந்த புள்ளிவிவரங்கள் இடம் பெற்றுள்ளன. கைப்புண்ணுக்கு கண்ணாடி தேவையில்லை என்பதைப் போல, அரசு பள்ளிகளில் மாணவர் சேர்க்கை ஆண்டுக்கு ஆண்டு குறைந்து வருவது பாட்டாளி மக்கள் கட்சிக்கு தெரிந்த ஒன்று தான் என்பதால் இந்த புள்ளிவிவரங்கள் அதிர்ச்சியளிக்கவில்லை.

இன்னும் கேட்டால் தொடர்ந்து இரண்டாவது ஆண்டாக அரசு பள்ளிகளில் மாணவர் சேர்க்கை குறைந்து வருவதாக மத்திய அரசின் புள்ளிவிவரங்கள் தெரிவிக்கின்றன. ஆனால், உண்மையில் கடந்த 10 ஆண்டுகளாகவே சில விதிவிலக்குகளைத் தவிர இதே நிலை தான் தொடர்கிறது.

அரசு பள்ளிகளில் பயிலும் மாணவர்கள் எண்ணிக்கை கடந்த 2024-25ஆம் ஆண்டில் 45 லட்சத்து 10,612 ஆக இருந்தது. 2025-26 ஆம் ஆண்டில் இந்த எண்ணிக்கை 43.03 லட்சமாக குறைந்து விட்டது. அதாவது ஒரே ஆண்டில் அரசு பள்ளிகளில் பயிலும் மாணவர்கள் எண்ணிக்கை 2.07 லட்சம் குறைந்துள்ளது.

இதற்கு முன் 2022-23 ஆம் ஆண்டில் அரசு பள்ளிகளில் பயிலும் மாணவர்கள் எண்ணிக்கை 50 லட்சத்து 42,026 ஆக இருந்தது. அதனுடன் ஒப்பிடும் போது 3 ஆண்டுகளில் அரசு பள்ளி மாணவர்கள் எண்ணிக்கை 7.39 லட்சம் குறைந்துள்ளது

2015-16 ஆம் ஆண்டில் அரசு பள்ளிகளின் மாணவர்கள் எண்ணிக்கை 75.52 லட்சமாக இருந்தது. ஆனால், 11 ஆண்டுகளில் மாணவர் சேர்க்கை 32 லட்சத்து 49 ஆயிரம் குறைந்திருக்கிறது. அதாவது 11 ஆண்டுகளில் அரசு பள்ளிகளில் பயிலும் மாணவர்கள் எண்ணிக்கை 43.02% குறைந்துள்ளது.

அதே நேரத்தில் கடந்த ஆண்டில் மட்டும் தனியார் பள்ளிகளின் மாணவர்கள் எண்ணிக்கை 60.26 லட்சத்திலிருந்து 62.03 லட்சமாக, அதாவது 1.77 லட்சம் அதிகரித்துள்ளது. கடந்த 11 ஆண்டுகளைக் கணக்கில் கொண்டால் 36.56 லட்சமாக இருந்த தனியார் பள்ளிகளின் மாணவர்கள் எண்ணிக்கை இப்போது 62.03 லட்சமாக அதிகரித்து விட்டது. அரசு பள்ளிகளின் வீழ்ச்சியில் தான் தனியார் பள்ளிகள் வளருகின்றன. இதை நினைத்து கவலைப்படாமல் இருக்க முடியாது.

அரசு பள்ளிகளில் போதிய கட்டமைப்பு வசதிகள் இல்லாததும், ஆசிரியர்களின் எண்ணிக்கை குறைந்து வருவதும் தான் இதற்கு காரணம் ஆகும். அரசு பள்ளிகளில் ஒரு லட்சத்திற்கும் கூடுதலான வகுப்பறைகளுக்கு ஆசிரியர்கள் இல்லாத சூழலில் அரசு பள்ளிகளை எவ்வாறு மேம்படுத்த முடியும்? எவ்வாறு புத்துயிரூட்ட முடியும்? இந்த உண்மையை உணர்ந்து கொண்டு அரசு பள்ளிகளில் கட்டமைப்பை வலுப்படுத்தவும், ஆசிரியர்களின் எண்ணிக்கையை அதிகரிக்கவும் நடவடிக்கை எடுக்கப்பட வேண்டும்.’ எனத் தெரிவித்துள்ளார்

கல்விக் கட்டண விவகாரத்தில் நீதிமன்ற உத்தரவை மீறும் தனியாா் பள்ளிகள் மீது கடும் நடவடிக்கை: அமைச்சா் ராஜ்மோகன் எச்சரிக்கை.

2026-07-11T09:43:14.167+05:30

கல்விக் கட்டணங்களை அறிவிப்புப் பலகையில் வெளியிட வேண்டும் என்ற சென்னை உயா்நீதிமன்றத்தின் உத்தரவைப் பின்பற்றாத தனியாா் பள்ளிகள் மீது கடும் நடவடிக்கை எடுக்கப்படும் என பள்ளிக்கல்வித் துறை அமைச்சா் ராஜ்மோகன் எச்சரிக்கை விடுத்துள்ளாா்.

தமிழ் வளா்ச்சித் துறை சாா்பில் அறிவியல் தமிழறிஞா் மணவை முஸ்தபா பிறந்த நாள் விழா நிகழ்ச்சிகள் சென்னை ஓமந்தூராா் அரசு பன்னோக்கு மருத்துவமனை அரங்கில் வியாழக்கிழமை நடைபெற்றது. இதில், அமைச்சா் ராஜ்மோகன் கலந்துகொண்டு அந்த வளாகத்தில் அமைக்கப்பட்டிருந்த அறிவியல் தமிழ் புத்தகக் காட்சியைத் திறந்து வைத்தாா்.

இதைத் தொடா்ந்து, அவா் விழாவையொட்டி நடத்தப்பட்ட விநாடி-வினா போட்டிகளில் வெற்றி பெற்ற மாணவா்களுக்கு சான்றிதழ்களை வழங்கி பேசியதாவது:

மணவை முஸ்தபா அறிவியல் தமிழின் தந்தை என போற்றப்படுகிறாா். அறிவியல், மருத்துவம், கணினி, தொழில்நுட்பம் போன்ற பல்வேறு துறைகளில் அவா் 10 லட்சத்துக்கும் மேற்பட்ட கலைச் சொற்களை உருவாக்கி அகராதிகளைத் தொகுத்துள்ளாா் என்றாா் அவா்.

இதைத் தொடா்ந்து செய்தியாளா்களிடம் அமைச்சா் ராஜ்மோகன் கூறியதாவது:

மணவை முஸ்தபா குறித்த தகவல்களை பள்ளித் பாடத் திட்டத்தில் இடம்பெறச் செய்வது குறித்து பாடத்திட்டக் குழுவின் தலைவா், உறுப்பினா்கள் முடிவு செய்வா். மாவட்டங்களில் ஏற்கெனவே நடைபெற்று வரும் புத்தகக் காட்சியில் மாணவா்கள் பங்கேற்கும் அறிவியல் கண்காட்சியை இடம்பெறச் செய்வது குறித்து ஆலோசித்து முடிவெடுக்கப்படும். தமிழகத்தில் பள்ளி மாணவா்கள் தங்களது தாய்மொழியான தமிழில் அதிக மதிப்பெண் பெறுவதற்கான செயல்பாடுகள் மேற்கொள்ளப்படும்.

பள்ளிகளில் கட்சி நிகழ்வுகள்... அரசுப் பள்ளிகளில் எந்தக் கட்சியைச் சோ்ந்தவா்களாக இருந்தாலும் அவா்கள் கட்சி சாா்ந்த கட்சிக் கொடிகள் உள்ளிட்ட அடையாளங்களுடன் செல்வதை முற்றிலும் தவிா்க்க வேண்டும். கட்சிகள் சாா்ந்த நிகழ்ச்சிகளையும் நடத்தக் கூடாது. அதையும் மீறி நடத்தினால் கடுமையான நடவடிக்கை எடுக்கப்படும்.

தமிழகத்தில் பல பள்ளிகளில் உடற்கல்வி ஆசிரியா் பணியிடங்கள் நிரப்பப்படாமல் இருந்தன. இதுகுறித்து ஆசிரியா் தோ்வு வாரியத்துக்கு தெரிவிக்கப்பட்டு நடவடிக்கை எடுக்கப்பட்டுள்ளது. இதேபோன்று ஆசிரியா்கள், ஆய்வக உதவியாளா்கள் உள்ளிட்ட பல்வேறு காலிப் பணியிடங்கள் கண்டறியப்பட்டு அவை அரசியல் தலையீடு இல்லாமல் நிரப்பப்படும்.

மூடப்பட்ட பள்ளிகள்... கடந்த திமுக ஆட்சியில் 207 பள்ளிகள் மூடப்பட்டன. சம்பந்தப்பட்ட பள்ளிகளில் மாணவா் சோ்க்கை இல்லாவிட்டாலும் சோ்க்கைக்கான அவகாசத்தை நீட்டிக்க உத்தரவிட்டுள்ளேன். இந்தப் பள்ளிகளில் மாணவா்கள் சேரும் நிலையில், மூடப்பட்ட பள்ளிகள் உடனடியாகத் திறக்கப்படும்.

மாற்றுச் சான்றிதழ் வழங்குவதில்... தனியாா் பள்ளிகளில் கல்விக் கட்டணத்தை முறையாகச் செலுத்தவில்லை; ஆசிரியா்களை எதிா்த்துப் பேசிவிட்டனா் உள்ளிட்ட ஒழுங்கு நடவடிக்கைகள் நிலுவையில் உள்ளன; விரும்பத் தகாத செயலில் ஈடுபட்டனா் போன்ற காரணங்களுக்கான பள்ளி நிா்வாகங்கள் மாணவா்களுக்கு மாற்றுச் சான்றிதழ் (டிசி) வழங்குவதை தாமதிக்கக் கூடாது. பள்ளிகள் மனிதாபிமானத்துடன் நடந்துகொள்ள வேண்டும். சென்னை உயா்நீதிமன்றத்தின் உத்தரவின்படி தனியாா் பள்ளிகள் தங்களது கல்விக் கட்டணத்தை வெளிப்படையாக அறிவிப்பு பலகையில் வெளியிட வேண்டும். மீறும் பள்ளிகள் மீது கடும் நடவடிக்கை எடுக்கப்படும் என்றாா் அவா்.

முன்னதாக, இந்த நிகழ்ச்சியில் தமிழ் வளா்ச்சித் துறை இயக்குநா் ந.அருள் வரவேற்றாா். தொடா்ந்து, துறையின் செயலா் வ.தட்சிணாமூா்த்தி, ஓமந்தூராா் மருத்துவக் கல்லூரி மருத்துவமனை முதல்வா் டாக்டா் ஹரிஹரன், ஓமந்தூராா் பல்நோக்கு மருத்துவமனை இயக்குநா் டாக்டா் மணி, கீழ்ப்பாக்கம் அரசு மருத்துவக் கல்லூரி முதல்வா் டாக்டா் கவிதா, ஸ்டான்லி அரசு மருத்துவக் கல்லூரி முதல்வா் டாக்டா் அரவிந்த், மணவை முஸ்தபாவின் மகன் மருத்துவா் மு.செம்மல், உள்ளிட்டோா் வாழ்த்திப் பேசினா். விழாவையொட்டி அறிவியல் தமிழ்க் கல்வி! கனவு மெய்ப்படும்! என்ற தலைப்பில் அறிவியல் தமிழ்க் கருத்தரங்கம் நடைபெற்றது.

பள்ளிக் கல்வியில் தேசிய அளவில் தமிழகம் தொடா்ந்து முன்னிலை: மத்திய அரசின் ஆய்வறிக்கையில் தகவல்.

2026-07-10T07:39:20.907+05:30

பள்ளி மாணவா் சோ்க்கை, இடைநிற்றல் குறைவு, உள்கட்டமைப்பு போன்ற பள்ளிக் கல்வியின் பல்வேறு முக்கிய குறியீடுகளில் தேசிய அளவில் தமிழகம் சிறந்து விளங்குவதாக மத்திய அரசின் ஆய்வறிக்கையில் தெரிவிக்கப்பட்டுள்ளது.

இது குறித்து பள்ளிக் கல்வித் துறைச் செயலா் பி.சந்தரமோகன் வியாழக்கிழமை வெளியிட்ட செய்திக்குறிப்பு: மத்திய கல்வி அமைச்சகம் ஒருங்கிணைந்த மாவட்ட கல்வி தகவல் மேலாண்மை என்ற பெயரில் கல்வி மேலாண்மை (யுடிஐஎஸ்இ) அறிக்கையை ஆண்டுதோறும் வெளியிட்டு வருகிறது. அந்த வகையில், 2025-26-ஆம் கல்வி ஆண்டுக்கான கல்வி மேலாண்மையை அறிக்கையை அண்மையில் வெளியிட்டுள்ளது.

அந்த அறிக்கையில், பள்ளிக் கல்வியின் பல்வேறு முக்கியக் குறியீடுகளில் தமிழ்நாடு தொடா்ந்து முன்னணி மாநிலமாகத் திகழ்வது உறுதி செய்யப்பட்டுள்ளது. மாணவா் சோ்க்கை, இடை நிற்றல் குறைவு, ஆசிரியா் எண்ணிக்கை, கல்வி உள்கட்டமைப்பின் பயனுள்ள பயன்பாடு மற்றும் பத்தாம் வகுப்புக்கு பிந்தைய கல்வித் தொடா்ச்சி உள்ளிட்ட பல்வேறு துறைகளில தேசிய அளவில் தமிழகம் சிறப்பான முன்னேற்றத்தை எட்டியுள்ளது.

யுடிஐஎஸ்இ அறிக்கையின்படி தமிழகத்தில் 57,566 பள்ளிகள், 1 கோடியே 24 லட்சத்து 2,872 மாணவா்கள், 5 லட்சத்து 69,909 ஆசிரியா்கள் உள்ளனா். மாநிலத்தின் மாணவா்-ஆசிரியா் விகிதம் விகிதம் 22:1ஆக இருந்து, தேசிய சராசரியான 24:1-ஐ விட சிறப்பாக உள்ளது. மேலும், ஒரு பள்ளிக்கு சராசரியாக 215 மாணவா்கள் மற்றும் 10 ஆசிரியா்கள் இருப்பது கல்வி உள்கட்டமைப்பு திறமையாகப் பயன்படுத்தப்பட்டு வருவதை எடுத்துக் காட்டுகிறது.

தொடக்க நிலை, நடுநிலைப் பள்ளிகள் இடைநிற்றல் பூஜ்ஜியம் சதவீதமாக பதிவாகியுள்ளது. இடைநிலைக் கல்வியில் இது 6.2 சதவீதம் மட்டுமே ஆகும். இது தேசிய சராசரியான 9.5 சதவீதத்தைவிடக் குறிப்பிடத்தக்க அளவில் குறைவாகும். மொத்த சோ்க்கை விகிதத்திலும் தமிழகம் தேசிய அளவில் முன்னணியில் உள்ளது. தொடக்கநிலையில் 92.2 சதவீதம், நடுநிலைப்பள்ளிகள் 95.2 சதவீதம் இடைநிலையில் 97.4 சதவீதம், மேல்நிலைப் பள்ளிகளில் 85.1 சதவீதம் எனப் பதிவாகியுள்ளது

கல்வி உள்கட்டமைப்பின் பயன்பாட்டிலும் தமிழகம் சிறப்பாகத் திகழ்கிறது. தேசிய அளவில் ஒரு பள்ளிக்கு சராசரியாக 169 மாணவா்கள் உள்ள நிலையில், தமிழகத்தில் ஒரு பள்ளிக்கு 215 மாணவா்கள் உள்ளனா். பள்ளி இடை நிற்றல் குறைத்தல், மாணவா் சோ்க்கையை உயா்த்தல், போதுமான ஆசிரியா் எண்ணிக்கை உறுதி செய்தல், கல்வி உள்கட்டமைப்பை திறமையாகப் பயன்படுத்துதல் மற்றும் பத்தாம் வகுப்புக்குப் பிந்தைய பல்வேறு கல்வி வாய்ப்புகளை உருவாக்குதல் ஆகியவற்றில் தமிழகம் சிறந்து விளங்குகிறது.

இவ்வாறு, மாணவா்களின் முழுமையான வளா்ச்சியை நோக்கமாகக் கொண்டு தரமான கல்வி, எண்ம கல்வி உள்கட்டமைப்பு, அனைவரையும் உள்ளடக்கிய கல்வி, தொழில்நுட்பத் திறன் மேம்பாடு மற்றும் எதிா்காலத் தேவைகளுக்கேற்ற கற்றல் சூழலை உருவாக்கும் பணிகளில் தமிழக அரசு தொடா்ந்து மேற்கொண்டு வரும் முயற்சிகளுக்கு மத்திய அரசின் அறிக்கை வலுவான அங்கீகாரமாக அமைந்துள்ளது என அதில் தெரிவிக்கப்பட்டுள்ளது.

தமிழகத்தில் பள்ளி இடைநிற்றல் தேசிய சராசரியை விட குறைவு.

2026-07-10T07:34:43.286+05:30

'மத்திய கல்வித்துறையின் கல்விக்கான ஒருங்கிணைந்த மாவட்ட தகவல் முறைமை வெளியிட்ட அறிக்கையில், தமிழகத்தில் பள்ளி இடைநிற்றல், தேசிய சராசரியை விட குறைவாக உள்ளது' என, பள்ளி கல்வித்துறை தெரிவித்துள்ளது.

மத்திய கல்வித்துறை வெளியிட்ட கல்விக்கான ஒருங்கிணைந்த மாவட்ட தகவல் முறைமை அறிக்கை 2025 - 26ல், பல்வேறு முக்கிய குறியீடுகளில் தமிழகம் முன்னணி மாநிலமாக திகழ்கிறது.

மாநிலத்தின் மாணவர் - ஆசிரியர் விகிதம் 22: 1 என்ற நிலையில் உள்ளது . இது, தேசிய சராசரியான 24:1 என்பதை விட சிறப்பாக உள்ளது. மேலும், தொடக்க நிலை மற்றும் நடுநிலைப்பள்ளிகளில் இடைநிற்றல் இல்லை. இடைநிலை கல்வியில் இடைநிற்றல் விகிதம் 6.2 சதவீதம்; இது, தேசிய சராசரியான 9.5 சத வீதத்தை விட குறைவு.

மாணவர் சேர்க்கையிலும் தமிழகம் தேசிய அளவில் முன்னணியில் உள்ளது. 10ம் வகுப்புக்கு அடுத்த மேல்நிலை கல்வியில் மாணவர் சேர்க்கை 85.1 சதவீதமாக உள்ளது. இவ்வாறு அதில் கூறப்பட்டுள்ளது.

பொது ‘டெட்’ தேர்வு அறிவிப்பு வெளியாவதில் தாமதம்: டிஆர்பி மீது ஆசிரியர்கள் அதிருப்தி.

2026-07-10T07:32:17.814+05:30

பொது ‘டெட்’ தேர்வுக்கான அறிவிப்பு வெளியிடாமல் டிஆர்பி காலதாமதம் செய்து வருவதாக இடைநிலை ஆசிரியர் பயிற்சி முடித்தவர்கள், பி.எட் பட்டதாரிகள் அதிருப்தியில் உள்ளனர்.

மத்திய அரசின் இலவச கட்டாயக் கல்வி உரிமைச் சட்டத்தின்படி ஒன்று முதல் 8-ம் வகுப்பு வரை பணியாற்றும் இடைநிலை ஆசிரியர்களுக்கும், பட்டதாரி ஆசிரியர்களுக்கும் தகுதித்தேர்வு (‘டெட்’) தேர்ச்சி கட்டாயமாக்கப்பட்டுள்ளது. தேசிய ஆசிரியர் கல்வி கவுன்சில் (என்சிடிஇ) விதிமுறையின்படி, ஆண்டுக்கு 2 தடவை கட்டாயம் ‘டெட்’ தேர்வு நடத்தப்பட வேண்டும். இந்த விதிமுறையின்படி, மத்திய அரசு பள்ளிகளுக்கான ‘சி-டெட்’ தேர்வு ஆண்டுக்கு 2 தடவை திட்டமிட்டபடி நடத்தப்படுகிறது.

ஆனால், தமிழகத்தில் ‘டெட்’ தேர்வு நடத்தும் ஆசிரியர் தேர்வு வாரியமோ (டிஆர்பி) இந்த விதிமுறையை இதுவரை எந்த ஆண்டிலும் அமல்படுத்தல்லை. ஆண்டுக்கு ஒரு ‘டெட்’ தேர்வு நடத்தப்பட்டாலே பெரிய விஷயமாகப் பார்க்கப்படுகிறது. கடைசியாக ‘டெட்’ தேர்வு கடந்த 2025-ம் ஆண்டு நவம்பரில் நடத்தப்பட்டது.

ஆசிரியர் தேர்வு வாரியம் வெளியிட்ட 2026-ம் ஆண்டுக்கான வருடாந்திர தேர்வு அட்டவணையின்படி, இந்த ஆண்டுக்கான முதலாவது பொது ‘டெட்’ தேர்வுக்கு கடந்த மே மாதம் அறிவிப்பு வெளியிடப்பட்டு ஜூலை மாதத்தில் தேர்வு நடத்தப்பட்டிருக்க வேண்டும். 2-வது தேர்வுக்கான அறிவிப்பு அக்டோபர் மாதம் வெளியிடப்பட்டு டிசம்பரில் தேர்வு நடத்தப்பட வேண்டும். ஆனால், முதலாவது தேர்வுக்கான அறிவிப்புகூட இன்னும் வெளியிடப்படவில்லை.

இதற்கிடையே, பணியில் உள்ள ஆசிரியர்களுக்கான சிறப்பு ‘டெட் தேர்வு ஜூலை 4,5-ம் தேதிகளில் தேர்வு நடத்தப்பட்டது. இந்தத் தேர்வுக்கு பணியில் இல்லாத ஆசிரியர்கள் அனுமதிக்கப்படவில்லை. தற்போது பள்ளிகளில் பணிபுரியாத இடைநிலை ஆசிரியர்கள், பட்டதாரி ஆசிரியர்கள், இந்த ஆண்டு இடைநிலை ஆசிரியர் பயிற்சி மற்றும் பி.எட் முடித்தவர்கள் பொது ‘டெட்’ தேர்வுக்கான அறிவிப்பை எதிர்பார்த்துக் கொண்டிருக்கிறார்கள்.

இதுகுறித்து இடைநிலை ஆசிரியர் பயிற்சி மற்றும் பி.எட் முடித்தவர்கள் கூறும்போது, “என்சிடிஇ விதிமுறையின்படி, ‘சி-டெட்’ தேர்வு ஆண்டுக்கு 2 தடவை திட்டமிட்டபடி நடத்தப்படுகிறது. ஆனால், டிஆர்பி மட்டும் ஆண்டுக்கு ஒரு டெட் தேர்வைகூட நடத்த காலதாமதம் செய்வது ஏன் என்று தெரியவில்லை. எனவே, இனியும் காலதாமதம் செய்யாமல் பொது ‘டெட்’ தேர்வுக்கான அறிவிப்பை உடனே வெளியிட வேண்டும். அதேபோல் தேர்வு முடிவையும் விரைந்து வெளியிட வேண்டும்” என்றனர்.

“பள்ளி வளாகங்களில் தேவையின்றி வேறு யாரும் நுழைய அனுமதியில்லை” - அமைச்சர் ராஜ்மோகன் அதிரடி.

2026-07-09T21:57:21.577+05:30

‘வகுப்பு நடைபெறும் நேரத்தில் எந்தக் காரணத்துக்காவும் யாரும் பள்ளிக்குள் நுழைவதோ, மாணவ, மாணவியரை நேரடியாகச் சந்திப்பதோ முற்றிலும் தவிர்க்கப்பட வேண்டும். இனிவரும் காலங்களில் பள்ளி வளாகங்களில் தேவையின்றி வேறு யாரும் நுழைய அனுமதியில்லை’ என தமிழக பள்ளிக் கல்வித் துறை அமைச்சர் ராஜ்மோகன் தெரிவித்தார்.

இது குறித்து அவர் வெளியிட்டுள்ள அறிக்கையில், ‘கல்விக் கூடங்கள் காட்சிக் கூடங்கள் அல்ல. அரசியலின் மேடை அல்ல. அடுத்த தலைமுறைகளை உருவாக்கும் அறிவுப் பண்ணையாகும். இனிவரும் காலங்களில் பள்ளி வளாகங்களில் தேவையின்றி வேறு யாரும் நுழைய அனுமதியில்லை.

அரசு சார்பில் நடத்தப்படும் அதிகாரப்பூர்வ நிகழ்வுகளைத் தவிர்த்து, பிறந்தநாள் விழாக்களோ அரசு சாராத நிகழ்வுகளோ நடத்தக் கூடாது. எந்த அரசியல் கட்சியினரும், எந்தத் தனியார் அமைப்பினரும் நேரடியாக மாணவர்களைச் சந்திக்க அனுமதியில்லை.

மாணவச் செல்வங்கள் வகுப்பறையில் அமர்ந்து கற்கும் ஒவ்வொரு நொடியும், அவர்களின் வாழ்க்கையை மட்டுமல்ல, இந்த நாட்டின் வருங்காலத்தை வடிவமைக்கும் பொன்னான நேரமாகக் கருதப்படுகிறது. அந்த நேரம் வெறும் பாட நேரமல்ல; கனவுகள் விதைக்கப்படும் நேரம், சிந்தனைகள் செழுமையாக்கும் நேரம், அறிவு பெருகும் நேரம், வருங்காலத் தமிழகம் தன் எண்ணங்களை வண்ணமயமாக செதுக்கும் நேரம்.

எனவே, வகுப்பு நடைபெறும் நேரத்தில் எந்தக் காரணத்திற்காகவும் யாரும் பள்ளிக்குள் நுழைவதோ, மாணவ, மாணவியரை நேரடியாகச் சந்திப்பதோ முற்றிலும் தவிர்க்கப்பட வேண்டும். மாணவர்களின் கவனமும், ஆசிரியர்களின் கற்பித்தல் பணியும் எவ்வித இடையூறுமின்றித் தொடர்வதே நம் முதன்மைப் பொறுப்பு.

பள்ளி வளாகங்கள் விழாக்களின் கூடாரமாக அல்ல, அறிவுத் தெளிவின் விழிப்புணர்வின் சிந்தனை மண்டபமாக மிளிர வேண்டும். புகழ் பரப்பும் இடமாக அல்ல, எதிர்காலத்தைப் படைக்கும் இடமாகத் திகழ வேண்டும்.

எண்ணங்களைத் துளிர்விட்டு, கனவுகளுக்கு இறக்கை கட்டி, எண்ணுவதையெல்லாம் நனவாக்கும் ஆற்றலைப் பெறும் நம் அரசுப் பள்ளி மாணவ, மாணவியர் இன்னும் இன்னும் உயரப் பறக்கட்டும்.

அறிவிலும், பண்பிலும், சாதனைகளிலும் உலகம் வியக்கும் உயரங்களை எட்டட்டும். அரசுப் பள்ளிகளில் நடைபெறும் அனைத்து நிகழ்வுகளுக்கும் உரிய ஒழுங்கு, பாதுகாப்பு மற்றும் கல்விச் சூழலை உறுதிசெய்யும் வகையில் விரிவான நெறிமுறைகள் பள்ளிக் கல்வித்துறை சார்பில் விரைவில் வெளியிடப்படும். அன்பு மாணவச் செல்வங்களே... நல்லதைப் படியுங்கள். நன்றாகப் படியுங்கள்’ எனத் தெரிவித்துள்ளார்.

முன்னதாக, அமைச்சர் கீர்த்தனா சமீபத்தில் அரசுப் பள்ளி ஒன்றுக்கு சென்று, மாணவியிடம் ஆங்கிலத்தில் பேசச் சொல்லி நடந்துகொண்ட விதம் பெரும் சர்ச்சையானது. அதேபோல், அரசுப் பள்ளிகளில் புகுந்து மாணவர்களிடம் ஆய்வு செய்வது, முதல்வர் விஜய்யின் படத்தை மாட்டுவது என தொடர்ந்து வெளிவரும் ரீல்ஸ்கள் தவெகவின் பெயரை டேமேஜ் செய்து வந்ததும் கவனிக்கத்தக்கது.

உயா் கல்வியில் மாணவா் சோ்க்கை 31.5% அதிகரிப்பு!

2026-07-09T06:32:02.701+05:30

கடந்த 2014-ஆம் ஆண்டுமுதல் நாட்டில் உயா் கல்வியில் மாணவா் சோ்க்கை 31.5 சதவீதம் அதிகரித்துள்ளதாக மத்திய அரசின் அறிக்கையில் தெரிவிக்கப்பட்டுள்ளது.

2022-23, 2023-24-ஆம் ஆண்டுக்கான அனைத்து இந்திய உயா் கல்வி ஆய்வறிக்கையை மத்திய கல்வி அமைச்சகம் புதன்கிழமை வெளியிட்டது. இந்த அறிக்கையின்படி, கடந்த 2014-15-ஆம் ஆண்டில் உயா் கல்வியில் 3.42 கோடியாக இருந்த மாணவா் சோ்க்கை, 2022-23-ஆம் ஆண்டில் 4.46 கோடியாகவும், 2023-24-ஆம் ஆண்டில் 4.50 கோடியாக அதிகரித்துள்ளது. அதாவது 2014-15-ஆம் ஆண்டுமுதல் உயா் கல்வியில் மாணவா் சோ்க்கை 31.5 சதவீதம் அதிகரித்துள்ளது.

2014-15-ஆம் ஆண்டு உயா் கல்வியில் மாணவிகள் சோ்க்கை 1.57 கோடியாக இருந்தது. இது 2022-23-இல் 2.18 கோடியாகவும், 2023-24-இல் 2.24 கோடியாகவும் அதிகரித்துள்ளது.

2014-15-ஆம் ஆண்டு உயா் கல்வியில் பட்டியலின மாணவா்கள் சோ்க்கை 46.07 லட்சமாக இருந்த நிலையில், இது 2023-24-இல் 69.72 லட்சமாக உயா்ந்துள்ளது.

2014-15-ஆம் ஆண்டு உயா் கல்வியில் பழங்குடியின மாணவா்கள் சோ்க்கை 16.41 லட்சமாக இருந்தது. இது 2023-24-இல் 28.83 லட்சமாக அதிகரித்துள்ளது.

2014-15-ஆம் ஆண்டு உயா் கல்வியில் சோ்ந்த இதர பிற்படுத்தப்பட்ட வகுப்பு மாணவா்களின் எண்ணிக்கை 1.13 கோடியாக இருந்த நிலையில், அது 2023-24-இல் 1.80 கோடியாக உயா்ந்துள்ளது.

மத்திய கல்வி அமைச்சகத்தின் ஒருங்கிணைந்த மாவட்ட கல்வி தகவல் அமைப்பின் 2025-26-ஆம் ஆண்டுக்கான அறிக்கையின்படி, 2023-24 மற்றும் 2025-26-ஆம் ஆண்டுகளுக்கு இடையில், நாட்டிலுள்ள அரசுப் பள்ளிகளில் மாணவா் சோ்க்கை எண்ணிக்கை சுமாா் 86 லட்சம் சரிந்தது. இதே காலகட்டத்தில் தனியாா் பள்ளிகளில் 88 லட்சத்துக்கும் அதிகமான மாணவா்கள் சோ்க்கப்பட்டுள்ளனா்.

அரசுப் பள்ளி மாணவர்கள் 7.5% ஒதுக்கீட்டில் மருத்துவ படிப்புக்கு விண்ணப்பிக்க ‘போனஃபைடு’ சான்று கட்டாயம் இல்லை.

2026-07-07T18:20:18.181+05:30

எம்பிபிஎஸ், பிடிஎஸ் படிப்புகளுக்கு 7.5 சதவீத உள் இடஒதுக்கீட்டில் விண்ணப்பிக்கும் அரசுப் பள்ளி மாணவர்களுக்கு ‘போனஃபைடு’ சான்றிதழ் கட்டாயம் இல்லை என்று மருத்துவக்கல்வி இயக்குநரகம் தெரிவித்துள்ளது.

தமிழகத்தில் எம்பிபிஎஸ், பிடிஎஸ் படிப்புகளுக்கான மாணவர் சேர்க்கை கலந்தாய்வுக்கு விண்ணப்பிப்பது சுகாதாரத் துறை இணையதளத்தில் (www.tnmedicalselection.org) கடந்த 29-ம் தேதி தொடங்கி நடைபெற்று வருகிறது. ஆன்லைனில் மாணவ, மாணவிகள் ஆர்வத்துடன் விண்ணப்பித்து வருகின்றனர்.

எம்பிபிஎஸ், பிடிஎஸ் படிப்புகளில் அரசுப் பள்ளி மாணவர்களுக்கு 7.5 சதவீத இடஒதுக்கீடு வழங்கப்பட்டு வருகிறது. இந்த இடஒதுக்கீட்டில் சேரும் அரசுப்பள்ளி மாணவர்கள், தாங்கள் படித்த பள்ளிகளில் ‘போனஃபைடு’ சான்றிதழ் பெற்று விண்ணப்பித்து வந்தனர்.

அந்த பள்ளியில் படித்த மாணவர்தான் என்பதை உறுதிப்படுத்த, இச்சான்றிதழ் பெறப்பட்டது. இந்நிலையில், மருத்துவப் படிப்புகளுக்கு விண்ணப்பிக்க, ‘போனஃபைடு’ சான்றிதழ் தேவையில்லை என அறிவிக்கப்பட்டுள்ளது.

இதுதொடர்பாக மருத்துவக் கல்வி, ஆராய்ச்சி இயக்ககத்தின் மாணவர் தேர்வுக் குழு வெளியிட்ட செய்திக்குறிப்பில், ‘மருத்துவப் படிப்பில் 7.5 சதவீத உள் இடஒதுக்கீட்டில் சேரும் மாணவர்களில், 2022- 23-ம் ஆண்டு மற்றும் அதற்கு பிந்தைய ஆண்டுகளில் பிளஸ் 2 படித்த மாணவர்கள் விண்ணப்பத்தில், ‘போனஃபைடு’ சான்றிதழ் இணைக்கத் தேவை யில்லை.

அவர்களது தகுதி உள்ளிட்ட விவரங்கள், பள்ளிக்கல்வித் துறையின் ‘எமிஸ்’ தகவல் அமைப்பு மூலம் உறுதி செய்து கொள்ளப்படும்’ என்று கூறப்பட்டுள்ளது.

சி.ஏ., தேர்வு முடிவுகள் வெளியீடு!

2026-07-05T10:30:54.494+05:30

பட்டயக் கணக்காளர் நிறுவனமான ஐ.சி.ஏ.ஐ., கடந்த மே 2026ல் நடத்திய சி.ஏ., பவுண்டேஷன் தேர்வு முடிவுகளை அதிகாரப்பூர்வமாக வெளியிட்டுள்ளது. இத்தேர்வில் ஒட்டுமொத்தமாக 20.09 சதவீத மாணவர்களே தேர்ச்சி பெற்றுள்ளனர்.

இம்முறை மகாராஷ்டிர மாநிலத்தைச் சேர்ந்த மாணவ, மாணவிகள் தேசிய அளவிலான தரவரிசைப் பட்டியலில் முதல் மூன்று இடங்களைக் கைப்பற்றி அசத்தியுள்ளனர்.

தேசிய அளவில் முதலிடத்தைப் பிடித்து நாசிக் நகரைச் சேர்ந்த சாக்ஷி ஜெயின் என்ற மாணவி சாதனை படைத்துள்ளார். இவர் மொத்தம் 400 மதிப்பெண்களுக்கு 371 மதிப்பெண்கள் (92.75%) பெற்று அகில இந்திய அளவில் முதலிடத்தைப் பிடித்து அசத்தியுள்ளார்.

அவரைத் தொடர்ந்து, சந்திராப்பூர் பகுதியைச் சேர்ந்த அயனப்பாஸ் அஜானி 367 மதிப்பெண்களுடன் (91.75%) இரண்டாம் இடத்தையும், புனேவைச் சேர்ந்த ராதா உன்மேஷ் முலே 365 மதிப்பெண்கள் (91.25%) பெற்று மூன்றாம் இடத்தையும் தன்வசப்படுத்தியுள்ளனர்.

இந்தியா மற்றும் வெளிநாடுகளில் உள்ள மொத்தம் 609 தேர்வு மையங்களில் இந்த மே மாதத்திற்கான சி.ஏ., பவுண்டேஷன் தேர்வுகள் மிகக் கடுமையான கட்டுப்பாடுகளுடன் நடத்தப்பட்டன.

இத்தேர்வெழுத மொத்தம் 1 லட்சத்து 06 ஆயிரத்து 144 மாணவர்கள் பதிவு செய்திருந்த நிலையில், 90 ஆயிரத்து 217 பேர் தேர்வில் பங்கேற்றனர். அதில் 18 ஆயிரத்து 124 மாணவர்கள் தகுதி பெற்று அடுத்த கட்டத்திற்கு முன்னேறியுள்ளனர்.

மேலும், டாப் ரேங்க் பெற்ற மாணவர்களிடையே மிகக் குறைந்த மதிப்பெண் வித்தியாசமே உள்ளதால், இந்த ஆண்டு போட்டி மிகவும் கடுமையாக இருந்துள்ளது என்பது குறிப்பிடத்தக்கது.

தொடர்ந்து, தேர்வு முடிவுகள் மற்றும் மதிப்பெண் பட்டியலை மாணவர்கள் ஐ.சி.ஏ.ஐ.,யின் அதிகாரப்பூர்வ இணையதளத்தில் தங்களின் பதிவு எண் மற்றும் ரோல் நம்பரை உள்ளிட்டு சரிபார்த்துக் கொள்ளலாம் என அறிவிக்கப்பட்டுள்ளது

உதவி பேராசிரியர் தேர்வு: ஆசிரியர் தேர்வு வாரியம் புகார்கள் குறித்து விளக்கம்.

2026-07-05T10:21:31.798+05:30

அரசுக் கல்லூரி உதவி பேராசிரியர் தேர்வு முடிவுகள் தொடர்பாக எழுப்பப்பட்ட 2 புகார்களுக்கு ஆசிரியர் தேர்வு வாரியம் விளக்கம் அளித்துள்ளது.

தமிழகத்தில் உள்ள அரசு கலை, அறிவியல், கல்வியியல் கல்லூரிகளில் உதவி பேராசிரியர் பதவியில் 2,708 காலி இடங்களை நிரப்ப ஆசிரியர் தேர்வு வாரியம் (டிஆர்பி) கடந்த 2025 டிச.27-ம் தேதி எழுத்துத் தேர்வு நடத்தியது. 42,064 பேர் பங்கேற்றனர். டிஆர்பி இணையதளத்தில் தேர்வு முடிவுகள் ஜூன் 25-ம் தேதி வெளியிடப்பட்டன. இதில் பல குளறுபடிகள் உள்ளதாக புகார்கள் எழுந்தன. மதிப்பெண் பட்டியலில் ஒரு தேர்வரின் பிறந்த ஆண்டு 2006 என்று இருந்தது. 20 வயது மட்டுமே நிரம்பிய ஒருவர் எப்படி முதுநிலைப் படிப்பை முடித்து, உதவி பேராசிரியர் பணிக்கு தேர்வு எழுத முடியும் என்றும் கேள்வி எழுந்தது.

இந்நிலையில், புகார்களுக்கு விளக்கம் அளிக்கும் விதமாக டிஆர்பி தலைவர் எஸ்.ஜெயந்தி நேற்று வெளியிட்ட செய்திக்குறிப்பு: இணையதளத்தில் 56 பாடங்கள் தொடர்பான மதிப்பெண் பட்டியல் வெளியிடப்பட்டது. அதில் ஒரு தேர்வர் தனது ஆன்லைன் விண்ணப்பத்தில் பிறந்த தேதியை குறிப்பிடும்போது 1991-க்கு பதிலாக 2006 என்று தவறாக பதிவேற்றம் செய்துள்ளார். அவர் குறிப்பிட்ட தேதியுடன் மதிப்பெண் பட்டியல் வெளியிடப்பட்டுள்ளது.

இன்னொரு தேர்வர் தனது விண்ணப்பத்தில் பெயருக்கு பதிலாக, தவறுதலாக 10-ம் வகுப்பு மதிப்பெண் சான்றிதழ் எண்ணை பதிவேற்றம் செய்துள்ளார். கடந்த டிச.22-ம் தேதி தனது பெயரில் திருத்தம் கோரி டிஆர்பிக்கு விண்ணப்பித்தார். அவர் அளித்த விவரம் உறுதி செய்யப்பட்டு, தேர்வு எழுதவும் அனுமதிக்கப்பட்டார். எனினும், அவர் ஏற்கெனவே சமர்ப்பித்த பெயர், விவரங்கள் அடிப்படையிலேயே ஹால் டிக்கெட் வழங்கப்பட்டு, தேர்வு மதிப்பெண்ணும் வெளியிடப்பட்டது.இவ்வாறு அவர் தெரிவித்துள்ளார்.

பணியில் உள்ள ஆசிரியர்களுக்கு சிறப்பு ‘டெட்’ தேர்வு தொடக்கம்.

2026-07-05T10:20:15.850+05:30

பணியிலுள்ள ஆசிரியர்களுக்கான சிறப்பு ‘டெட்’ தேர்வில் முதல் தாள் தேர்வு வினாத்தாள் மிகவும் கடினமாக இருந்ததாக தேர்வர்கள் தெரிவித்தனர்.

பள்ளிகளில் ஆசிரியராக பணிபுரிய மற்றும் பதவி உயர்வு பெற ஆசிரியர்தகுதித் தேர்வில்(‘டெட்’) தேர்ச்சி பெறுவதை உச்ச நீதிமன்றம் கட்டாயமாக்கியது. மேலும், இதுவரை தேர்ச்சி பெறாத ஆசிரியர்கள் தேர்வெழுதி தேர்ச்சி பெறவும் உத்தரவிட்டது. இதையடுத்து, தமிழகத்தில் அரசு, அரசு உதவிபெறும் பள்ளிகளில் பணியாற்றும் சுமார் 1.75 லட்சம் ஆசிரியர்கள் ‘டெட்’ தேர்வில் தேர்ச்சி பெற வேண்டிய நிலை ஏற்பட்டது. அதனால், ஆசிரியர்களின் வசதிக்காக நடப்பாண்டு 3 சிறப்பு ‘டெட்’ தேர்வுகள் நடத்தப்படும் என்று பள்ளிக் கல்வித்துறை அறிவித்தது.

அதன்படி, பள்ளிகளில் பணியாற்றி வரும் ஆசிரியர்களுக்கான முதல் சிறப்பு ‘டெட்’ தேர்வு நேற்று தொடங்கியது. தமிழகம் முழுவதும் முதல் தாள் தேர்வை 59,535 ஆசிரியர்கள் எழுதினர். 1,851 பேர் தேர்வில் பங்கேற்வில்லை. சென்னையில் 3 ஆயிரத்துக்கும் மேற்பட்டோர் தேர்வெழுதினர். தேர்வெழுத வந்த ஆசிரியர்களை போலீஸார் முறையான சோதனைகளுக்கு பிறகே தேர்வு மையத்துக்குள் செல்ல அனுமதித்தனர். அம்பத்தூரில் அமைக்கப்பட்டிருந்த தேர்வு மையங்களை பள்ளிக்கல்வித் துறை செயலர் பி.சந்திரமோகன் நேரில் சென்று பார்வையிட்டார்.

இதற்கிடையே, முதல்தாள் தேர்வு வினாத்தாள் கடினமாக இருந்ததாகவும், முந்தைய ‘டெட்’ தேர்வு வினாத்தாள்களை ஒப்பிடுகையில், இதில் சவாலான கேள்விகள் கேட்கப்பட்டிருந்ததாகவும் ஆசிரியர்கள் தரப்பில் கூறப்பட்டது. இதைத் தொடர்ந்து 2-ம் தாள் இன்று (5-ம் தேதி) நடைபெறுகிறது. இந்த தேர்வை 1,67,743 பேர் எழுதுகின்றனர். தேவையான ஏற்பாடுகளை ஆசிரியர் தேர்வு வாரியம் (டிஆர்பி)மேற்கொண்டுள்ளது.

பொறியியல் தரவரிசை பட்டியல் வெளியீடு: 53 பேர் 200-க்கு 200 கட் ஆஃப் மார்க் | பொது கலந்தாய்வு ஜூலை 20-ல் தொடக்கம்.

2026-07-01T22:32:13.366+05:30

பொறியியல் படிப்புக்கான தரவரிசை பட்டியல் வெளியிடப்பட்டுள்ளது. இதில் 53 மாணவர்கள் 200-க்கு 200 கட் ஆஃப் மதிப்பெண் பெற்றுள்ளனர். பொது பிரிவினருக்கான கலந்தாய்வு ஜூலை 20-ம் தேதி தொடங்கி ஆகஸ்ட் 30 வரை நடைபெற உள்ளது.

நடப்பு கல்வி ஆண்டில் பொறியியல் படிப்பில் அரசு ஒதுக்கீட்டு இடங்களில் சேர 2 லட்சத்து 36 ஆயிரத்து 17 மாணவர்கள் விண்ணப்பித்தனர். அவர்களுக்கு ரேண்டம் எண் ஒதுக்கீடு செய்யப்பட்டு அவர்களின் கல்விச் சான்றிதழ்கள் ஆன்லைனில் சரிபார்க்கப்பட்டன.

இந்நிலையில், சென்னை கிண்டியில் உள்ள மாநில தொழில்நுட்பக் கல்வி இயக்குநர் அலுவலகத்தில் புதன்கிழமை நடைபெற்ற நிகழ்ச்சியில், பொறியியல் படிப்புக்கான தரவரிசை பட்டியலை உயர் கல்வித் துறை அமைச்சர் பி.விஸ்வநாதன் வெளியிட்டார். தொடர்ந்து, 200-க்கு 200 கட் ஆஃப் மதிப்பெண் பெற்ற 53 மாணவர்களின் பட்டியலையும் வெளியிட்டார்.

பின்னர் செய்தியாளர்களிடம் அமைச்சர் விஸ்வநாதன் கூறியது: “பொறியியல் படிப்புக்கு விண்ணப்பித்த மாணவர்கள் தங்கள் தரவரிசையை www.tneaonline.org என்ற இணையதளத்தில் அறிந்துகொள்ளலாம்.

தரவரிசை பட்டியலில் 53 பேர் 200-க்கு 200 கட் ஆஃப் மதிப்பெண் எடுத்துள்ளனர். அவர்களில் மாநில பாடத்திட்ட மாணவர்கள் 39 பேர். சிபிஎஸ்இ உள்ளிட்ட இதர வாரிய பாடத்திட்ட மாணவர்கள் 14 பேர். தருமபுரி மாணவி எஸ்.அக்‌ஷிதா முதலிடத்தையும், திருப்பூர் மாணவர் ஏ.ரோஹித் பாலன் 2-ம் இடத்தையும், நாமக்கல் மாணவர் ஏ.வெங்கடகிருஷ்ணன் 3-ம் இடத்தையும் பிடித்துள்ளனர்.

அரசுப் பள்ளி மாணவர்களுக்கான 7.5 சதவீத உள்ஒதுக்கீட்டுக்கான தரவரிசையில் 46,604 பேரும், விளையாட்டு பிரிவினருக்கான தரவரிசையில் 3,210 பேரும், முன்னாள் ராணுவத்தினரின் வாரிசுகளுக்கான தரவரிசையில் 1,176 பேரும், மாற்றுத் திறனாளிகள் பிரிவில் 500 பேரும் இடம்பெற்றுள்ளனர்.

பொறியியல் படிப்புக்கு விண்ணப்பித்து தரவரிசையில் பெயர் விடுபட்டிருந்தாலோ அல்லது வேறு ஏதேனும் குறைகள் இருந்தாலோ மாணவர்கள் ஜூலை 6-ம் தேதிக்குள் தங்கள் இருப்பிடத்துக்கு அருகில் உள்ள தமிழ்நாடு பொறியியல் மாணவர் சேர்க்கை சேவை மையத்தை (TFC) நேரில் அணுகி குறைகளை பதிவுசெய்து நிவர்த்தி செய்துகொள்ளலாம்.

அதேபோல், 7.5 சதவீத உள்ஒதுக்கீடு கோராமல் விடுபட்ட அரசு பள்ளி மாணவர்களும் (6-ம் வகுப்பு முதல் பிளஸ் 2 வரை அரசு பள்ளியில் படித்தவர்கள்) மேற்கண்ட மையத்துக்கு நேரில் சென்று பெயரை இணைத்துக்கொள்ளலாம்.

முதல்கட்டமாக 7.5 சதவீத உள்ஒதுக்கீட்டுக்கான கலந்தாய்வு சிறப்பு பிரிவினருக்கு (மாற்றுத் திறனாளிகள், முன்னாள் ராணுவத்தினரின் குழந்தைகள், விளையாட்டு வீரர்கள்) ஜூலை 13, 14-ம் தேதிகளிலும், சிறப்பு பிரிவினருக்கான பொது கலந்தாய்வு ஜூலை 15 முதல் 18-ம் தேதி வரையும் இணையவழியில் நடைபெறும்.

பொது பிரிவினருக்கான கலந்தாய்வு இணையவழியில் ஜூலை 20-ம் தேதி தொடங்கி ஆகஸ்ட் 30-ம் தேதி வரை தொடர்ந்து 40 நாட்கள் நடைபெற உள்ளது. துணை கலந்தாய்வு உள்ளிட்ட அனைத்து கலந்தாய்வுகளும் செப்டம்பர் 10-ம் தேதிக்குள் முடிக்கப்படும்.

கூடுதல் கட்டணம் வசூலித்தால் நடவடிக்கை:

பொறியியல் படிப்பில் 2 லட்சத்து 65 ஆயிரத்து 594 இடங்கள் உள்ளன. இந்த ஆண்டு கூடுதலாக 19,657 இடங்கள் உருவாக்கப்பட்டுள்ளன. இந்த இடங்களில் அரசு ஒதுக்கீட்டுக்கான இடங்களின் பொறியியல் கல்லூரிகளின் ஆய்வுப் பணிக்கு பிறகு தெரிய வரும். தனியார் பொறியியல் கல்லூரிகளில் அரசு நிர்ணயித்த கட்டணத்தை விட கூடுதல் கட்டணம் வசூலித்தால் கடும் நடவடிக்கை எடுக்கப்படும். கல்லூரிகள் கட்டாய நன்கொடை வாங்கக் கூடாது என்பது விதிமுறை.

துணைவேந்தர் நியமன விவகாரம்:

பல்கலைக்கழக துணைவேந்தர் நியமனம் தொடர்பான நீதிமன்ற வழக்கு ஜூலை 29-ம் தேதி விசாரணைக்கு வருகிறது. துணைவேந்தர் நியமனம் தொடர்பாக முதல்வருடன் கலந்தாலோசித்தேன்.

ஒரு பல்கலைக்கழகத்தின் தலைமை பதவி துணைவேந்தர் பதவிதான். துணைவேந்தர் நியமன பிரச்சினை குறித்து சட்ட நிபுணர்கள் பங்கேற்கும் சிறப்பு கூட்டம் விரைவில் நடத்தப்படும். ஏற்கெனவே பல பல்கலைக்கழகங்களில் துணைவேந்தர்கள் இல்லை.

வரும் டிசம்பரில் 2 துணைவேந்தர்களின் பதவிக் காலமும் அடுத்த ஆண்டு ஜனவரியில் இன்னொரு துணைவேந்தரின் பதவிக் காலமும் முடிவடைகிறது. எனவே, அனைத்து பல்கலைக்கழகங்களிலும் துணைவேந்தர்கள் இல்லாத சூழல் ஏற்படும்.

அரசு கலை கல்லூரிகளில் ஏறத்தாழ 8 ஆயிரம் கவுரவ விரிவுரையாளர்கள் பணியில் உள்ளனர். அவர்களுக்கு தற்போது வழங்கப்பட்டு வரும் சம்பளத்தை உயர்த்தலாமா அல்லது நிரந்தர விரிவுரையாளர்களை நியமிக்கலாமா என்பது குறித்து ஆலோசித்து வருகிறோம்” என்று அமைச்சர் விஸ்வநாதன் கூறினார்.

அரசு பாலிடெக்னிக் கல்லூரிகளில் 5 புதிய டிப்ளமா படிப்புகள் விரைவில் அறிமுகம்.

2026-06-29T12:48:19.654+05:30

அரசு பாலிடெக்னிக் கல்லூரிகளில் 5 புதிய டிப்ளமா படிப்புகள் விரைவில் அறிமுகப்படுத்தப்பட உள்ளன. தமிழகத்தில் 55 அரசு பாலிடெக்னிக் கல்லூரிகளும், 32 அரசு உதவிபெறும் பாலிடெக்னிக்குகளும், 400-க்கும் மேற்பட்ட தனியார் சுயநிதி பாலிடெக்னிக் கல்லூரிகளும் உள்ளன.

இவற்றில் 25 விதமான டிப்ளமா படிப்புகள் வழங்கப்படுகின்றன. பாலிடெக்னிக் கல்லூரிகளில் 50 ஆயிரத்துக்கும் மேற்பட்ட மாணவ-மாணவிகள் கல்வி பயின்று வருகின்றனர்.

இந்நிலையில், தற்போதைய வேலைவாய்ப்புச் சூழலை கருத்தில் கொண்டு அரசு பாலிடெக்னிக் கல்லூரிகளில் பேக்கேஜிங் டெக்னாலஜி, பெட்ரோகெமிக்கல் இன்ஜினியரிங், ஃபுட்வேர் டெக்னாலஜி, லெதர் மற்றும் ஃபேஷன் டெக்னாலஜி, ஃபேஷன் மற்றும் குளோத்திங் டெக்னாலஜி ஆகிய 5 புதிய டிப்ளமா படிப்புகளை அறிமுகப்படுத்த தொழில்நுட்பக் கல்வி இயக்ககம் முடிவுசெய்துள்ளது.

அவற்றுக்கான வரைவு பாடத்திட்டம் தொழில்நுட்பக் கல்வி இயக்ககத்தின் இணைய தளத்தில் (https://dte.tn.gov.in/) வெளியிடப்பட்டு இருக்கிறது. இது தொடர்பான கருத்துகளை curriculumspecial2023@gmail.com என்ற மின்னஞ்சல் முகவரிக்கு ஜூன் 30-ம் தேதி வரை அனுப்பலாம் என்று தொழில்நுட்பக் கல்வி இயக்குநர் கூறியுள்ளார்.

அரசுப் பள்ளிகளில் ஜூலை 10-ம் தேதி ‘மகிழ் முற்றம்’ மாணவர் குழு பதவியேற்பு.

2026-06-29T12:43:14.796+05:30

கற்பித்தல் செயல்பாடு: ஆய்வு செய்ய வழிகாட்டு நெறிமுறை.

2026-06-28T10:28:20.333+05:30

பள்ளிகளில் புதிய பாடத்திட்ட கற்பித்தல் செயல்பாடுகளை ஆய்வு செய்ய வழிகாட்டு நெறிமுறைகள் வெளியிடப்பட்டுள்ளன. இதைப் பின்பற்றி துறை அலுவலர்கள் ஆய்வு செய்ய வேண்டுமென பள்ளிக்கல்வித் துறை உத்தரவிட்டுள்ளது.

இதுகுறித்து, பள்ளிக்கல்வித் துறை இயக்குநரகம் சார்பில், அனைத்து மாவட்ட முதன்மைக் கல்வி அலுவலர்களுக்கு அனுப்பப்பட்டுள்ள சுற்றறிக்கை: தமிழகத்தில் 1 முதல் 12-ம் வகுப்பு வரையான பாடத்திட்டத்தை மாற்றி அமைக்குமாறு மாநில கல்வியியல் ஆராய்ச்சி நிறுவனத்துக்கு (எஸ்சிஆர்டிஇ) உத்தரவிடப்பட்டுள்ளது. அதன்படி, முதல்கட்டமாக நடப்பு (2026-27) கல்வியாண்டில் 1 முதல் 3-ம் வகுப்புகளுக்கு முதல் பருவத்துக்கான புதிய பாடநூல்கள் அறிமுகப்படுத்தப் பட்டுள்ளன

இந்த வகுப்புகளில் ஆய்வு மேற்கொள்ளும் அனைத்து விதமான துறைசார்ந்த அலுவலர்களுக்கான வழிகாட்டு நெறிமுறைகள் தற்போது வெளியிடப்படுகிறது. அத்துடன் ஆசிரியர் பதிவேடு குறித்த விவரங்களும், பாடவாரியான ஆய்வுப் படிவங்களும் இணைக்கப்பட்டுள்ளன. கல்வி அலுவலர்கள் இந்த வழிகாட்டுதல்களை முறையாக பின்பற்றி, வகுப்பறை கற்பித்தலை ஊக்குவிக்கும் வகையில் ஆய்வு மேற்கொள்ள வேண்டும். இவ்வாறு அதில் கூறப்பட்டுள்ளது.

தேசிய நல்லாசிரியர் விருதுக்கு ஜூலை 10-க்குள் விண்ணப்பிக்கலாம்.

2026-06-27T07:33:08.822+05:30

அனைத்து மாவட்ட முதன்மை கல்வி அதிகாரிகளுக்கு பள்ளிக்கல்வி இயக்குநர் எஸ்.கண்ணப்பன் அனுப்பியுள்ள சுற்றறிக்கை: 2026-ம் ஆண்டுக்கான தேசிய நல்லாசிரியர் விருதுக்கு தங்கள் மாவட்டத்தில் அனைத்து வகை பள்ளி ஆசிரியர்களும் ஜூலை 10-க்குள் ஆன்லைனில் விண்ணப்பிக்குமாறு அறிவுறுத்த வேண்டும்.

ஒவ்வொரு மாவட்டத்திலும் மாவட்ட தேர்வுக்குழு அமைக்கப்பட்டு ஆசிரியர்களை தேர்வுசெய்து தேர்வு பட்டியலை ஜூலை 14 முதல் 21-ம் தேதிக்குள் ஆன்லைனில் அனுப்ப வேண்டும்.

மாவட்ட தேர்வுக்குழுவில் சம்பந்தப்பட்ட மாவட்டத்தின் முதன்மை கல்வி அதிகாரி தலைவராகவும், மாநில பிரதிநிதியாக மாவட்ட ஆசிரியர் கல்வி மற்றும் ஆராய்ச்சி நிறுவனத்தின் முதல்வரும், மாவட்ட ஆட்சியரின் பிரதிநிதியாக சிறந்த கல்வியாளர் ஒருவரும் இடம்பெறுவர்.

உரிய வழிகாட்டு நெறிமுறைகளை பின்பற்றி எவ்விதமான புகாருக்கும் இடமில்லாமல் செயல்பட வேண்டும். இவ்வாறு அவர் கூறியுள்ளார்.

உதவி பேராசிரியர் தேர்வில் முறைகேடு; கவுரவ விரிவுரையாளர்கள் குற்றச்சாட்டு.

2026-06-27T07:30:38.455+05:30

'உதவி பேராசிரியர் பணிக்கான போட்டித் தேர்வில், மதிப்பெண் வழங்கப்பட்டதில் முறைகேடு நடந்துள்ளது' என, கவுரவ விரிவுரையாளர்கள் குற்றம் சாட்டியுள்ளனர்.

தமிழகத்தில் அரசு கலை மற்றும் அறிவியல் கல்லுாரிகளில், 2,708 உதவி பேராசிரியர் பணியிடங்களை நிரப்ப, ஆசிரியர் தேர்வு வாரியம் சார்பில், கடந்த டிசம்பரில் தேர்வு நடந்தது. மொத்தம், 42,064 பேர் தேர்வு எழுதினர். கடந்த பிப்ரவரியில், ஐந்து பாடப்பிரிவுகளுக்கான முடிவுகள் வெளியாகின. மீதமுள்ள, 56 பாடப்பிரிவுகளுக்கான தேர்வு முடிவுகள் நேற்று முன்தினம் வெளியாகின.

இந்நிலையில், உதவி பேராசிரியர் பணிக்கான போட்டித் தேர்வில், மதிப்பெண் வழங்குவதில் குளறுபடிகள் நடந்திருப்பதாக, கவுரவ விரிவுரையாளர்கள் குற்றம்சாட்டி உள்ளனர்.

தமிழ்நாடு அனைத்து அரசு கல்லுாரி, யு.ஜி.சி., தகுதி பெற்ற கவுரவ விரிவுரையாளர்கள் சங்க மாநில தலைவர் தங்கராஜ்: உதவி பேராசிரியர் தேர்வில், முதற்கட்டமாக வெளியிடப்பட்ட முடிவின்படி, பணி நியமன ஆணை பெற்ற ஐந்து பேரில், இருவரின் பணி அனுபவ மதிப்பெண்கள், ஆசிரியர் தேர்வு வாரியத்தால் திருத்தம் செய்யப்பட்டுள்ளன.

ஒரு தேர்வரின் பணி, அனுபவ மதிப்பெண் சான்றிதழ் சரி பார்ப்புக்கு முன், 11 ஆக இருந்தது. சான்றிதழ் சரிபார்ப்புக்கு பின், 13 ஆக உயர்ந்தது. அதேபோல, மற்றொருவருக்கு, பணி அனுபவ மதிப்பெண், பூஜ்ஜியத்தில் இருந்து, 15 ஆக திருத்தம் செய்யப்பட்டுள்ளது.

தற்போது, வெளியிடப்பட்ட தேர்வு முடிவில், கட்டுரை வினாக்களுக்கு பதில் அளித்தவர்களுக்கு, 50க்கு பூஜ்ஜியம் மதிப்பெண்கள் வழங்கப்பட்டுள்ளன. சிலருக்கு 50க்கு 49 மதிப்பெண் வழங்கப்பட்டுள்ளது. இந்த வினாக்களுக்கு, விடைக்குறிப்பு ஏதும் தேர்வு வாரியத்தால் வெளியிடப்படவில்லை. ஆசிரியர் தேர்வு வாரிய செயல்பாடுகளில் நம்பிக்கை இல்லை. இதுகுறித்து, உரிய விசாரணை நடத்த வேண்டும்.

பொறியியல் மாணவா் சோ்க்கை தரவரிசைப் பட்டியல் ஜூலை 1இல் வெளியீடு.

2026-06-24T05:46:28.377+05:30

தமிழ்நாடு பொறியியல் மாணவா்கள் சோ்க்கைக்கான தரவரிசைப் பட்டியல் (டிஎன்இஏ 2026) வரும் ஜூலை 1-ஆம் தேதி வெளியிடப்படும் என தமிழக உயா் கல்வித்துறை அமைச்சா் பெ.விஸ்வநாதன் தெரிவித்துள்ளாா்.

இது குறித்து அவா் செவ்வாய்க்கிழமை வெளியிட்ட செய்திக் குறிப்பு: நிகழாண்டு மத்திய இடைநிலைக் கல்வி வாரியம் (சிபிஎஸ்இ) பிளஸ் 2 வகுப்பு மறு மதிப்பீட்டு முடிவுகள் (ஜூன் -21) தாமதமாக வெளியானது. இதனால், தமிழ்நாடு பொறியியல் மாணவா்கள் சோ்க்கைக்கான தரவரிசைப் பட்டியல் வரும் ஜூன் 29-ஆம் தேதி வெளியிடப்படவிருந்த நிலையில், தாமதமாக வரும் ஜூலை 1- ஆம் தேதி மாணவா் சோ்க்கைக்கான தரவரிசைப்பட்டியல் வெளியிடப்படும்.

மேலும், பொறியியல் சோ்க்கைக்கான கலந்தாய்வு (கவுன்சிலிங்) தேதிகளும் ஜூன் 1-ஆம் தேதி அறிவிக்கப்படும். வெளியிடப்படும் தரவரிசைப் பட்டியலில் ஏதேனும் குறைகள் இருந்தால் அவற்றைச் சரிசெய்வதற்கான குறைதீா்ப்பு கால அவகாசம் ஜூலை 1 முதல் ஜூலை 5- ஆம் தேதி வரை வழங்கப்படும்.

இந்தக் காலகட்டத்தில் மாணவா்கள் குறைகளை நிவா்த்தி செய்துகொள்ளலாம். குறிப்பாக, தங்களுக்கு அருகிலுள்ள தமிழ்நாடு பொறியியல் மாணவா் சோ்க்கை சேவை மையங்களை அனுகி தீா்வு காணலாம் என அதில் தெரிவித்துள்ளாா் அவா்.

நிகழாண்டு சிபிஎஸ்இ பிளஸ் 2-ஆம் வகுப்பில் 1.6 லட்சத்துக்கான அதிகமான மாணவா்கள் மறு மதிப்பீடுகளுக்கு விண்ணப்பித்திருந்தனா். புதிய ‘திரையில் மதிப்பிடுதல்’ (ஓஎஸ்எம்) நடைமுறையில் புகாா்கள் வந்தன. விடைத்தாள்கள் சரியாக ஸ்கேன் செய்யப்படவில்லை என பல புகாா்களை மாணவா்கள் முன்வைத்தனா்.

இதனால் வழக்கத்தைவிட அதிகமான மாணவா்கள் மறு கூட்டல் , மறு மதிப்பீடுகளுக்கு விண்ணப்பிக்க தாமதமானது குறிப்பிடத்தக்கது.

தள்ளிப் போகிறது பொறியியல் கலந்தாய்வு - சிபிஎஸ்இ குளறுபடி, நீட் மறுதேர்வு தாக்கம்.

2026-06-23T18:36:54.178+05:30

சிபிஎஸ்இ பிளஸ் 2 விடைத்தாள் மதிப்பீடு குளறுபடி மற்றும் நீட் மறுதேர்வு காரணமாக இந்த ஆண்டு பொறியியல் படிப்புக்கான கலந்தாய்வு தள்ளிப்போகும் நிலை ஏற்பட்டுள்ளது.

அரசு பொறியியல் கல்லூரிகள், அரசு உதவி பெறும் பொறியியல் கல்லூரிகள், அண்ணா பல்கலைக்கழக துறைசார் கல்லூரிகளில் வழங்கப்படும் பிஇ, பிடெக் இடங்களிலும், தனியார் சுயநிதி பொறியியல் கல்லூரிகளில் அரசு ஒதுக்கீட்டு இடங்களிலும் சேர இந்த ஆண்டு 2.23 லட்சம் மாணவர்கள் விண்ணப்பித்துள்ளனர். அவர்கள் பதிவேற்றம் செய்த சான்றிதழ்கள், ஆவணங்களை ஆன்லைனில் சரிபார்க்கும் பணி ஜூன் 8-ம் தேதி தொடங்கி நடந்து வருகிறது.

இந்தப் பணிகள் முடிந்து, வரும் 29-ம் தேதி மாணவர்களின் தரவரிசைப் பட்டியல் வெளியிடப்பட உள்ளது. பொறியியல் கலந்தாய்வு தேதி 29-ம் தேதி அறிவிக்கப்படும் என உயர் கல்வித் துறை அமைச்சர் விஸ்வநாதன் ஏற்கெனவே தெரிவித்துள்ளார்.

ஆண்டுதோறும் பொறியியல் கலந்தாய்வு ஜூலை 2-வது வாரத்தில் தொடங்கி, ஆகஸ்டில் முடிவடையும். ஆனால், இந்த ஆண்டு சிபிஎஸ்இ பிளஸ் 2 விடைத்தாள் ஆன்லைன் மதிப்பீட்டில் ஏற்பட்ட குளறுபடி மற்றும் நீட் மறுதேர்வு நடத்தப்பட்டதன் காரணமாக பொறியியல் கலந்தாய்வு தள்ளிப்போகும் நிலை ஏற்பட்டுள்ளது.

வினாத்தாள் கசிவு காரணமாக நீட் தேர்வு ரத்து செய்யப்பட்ட நிலையில், நீட் மறுதேர்வு கடந்த 21-ம் தேதிதான் நடந்துள்ளது. நாடு முழுவதும் 22 லட்சத்துக்கும் மேற்பட்டோர் தேர்வு எழுதியுள்ளனர்.

அதனால், தேர்வு முடிவை வெளியிட குறைந்தபட்சம் 2 வாரங்களாவது ஆகும். அதன்பிறகு எம்பிபிஸ், பிடிஎஸ் சேர்க்கைக்கான நடைமுறைகள் தொடங்கும். ஆன்லைனில் விண்ணப்பங்கள் பெற்று தரவரிசை பட்டியல் வெளியிட்டு கலந்தாய்வு நடத்த எப்படியும் ஒரு மாதம் ஆகிவிடும். இதற்கிடையே, சிபிஎஸ்இ பிளஸ் 2 மறுமதிப்பீடு முடிவுகளும் வெளியிடப்பட வேண்டும்.

பொறியியல் படிப்புக்கு விண்ணப்பித்தவர்களில் பெரும்பாலானோர் மறுமதிப்பீட்டுக்கும் விண்ணப்பித்திருப்பார்கள். மறுமதிப்பீட்டில் அவர்களது மதிப்பெண் உயர்ந்தால், அது பொறியியல் தரவரிசையிலும் மாற்றத்தை ஏற்படுத்தும்.

பொதுவாக, எம்பிபிஎஸ், பிடிஎஸ் மாணவர் சேர்க்கை முடிந்த பிறகே, பொறியியல் கலந்தாய்வு தொடங்கும். தற்போது சிபிஎஸ்இ விடைத்தாள் பிரச்சினை மற்றும் நீட் மறுதேர்வால் மருத்துவக் கலந்தாய்வு தொடங்குவதில் தாமதம் ஏற்பட்டுள்ளதால், பொறியியல் கலந்தாய்வை தள்ளிவைக்க வேண்டிய கட்டாய சூழலுக்கு தொழில்நுட்பக் கல்வி இயக்ககம் தள்ளப்பட்டுள்ளது.

இதற்கிடையே, பிளஸ் 2 விடைத்தாள் மறுமதிப்பீடு முடிவுகளை தொழில்நுட்பக் கல்வி இயக்ககத்திடம் வருகிற 25-ம் தேதி வழங்க சிபிஎஸ்இ உறுதி அளித்துள்ளதாக தெரிகிறது.

நீட் மறுதேர்வு முடிவு விரைவாக வெளியிடப்பட்டால், பொறியியல் கலந்தாய்வுக்கான ஏற்பாடுகளை மேற்கொள்ள வசதியாக இருக்கும் என தொழில்நுட்பக் கல்வி இயக்கக அதிகாரிகள் தெரிவித்தனர்.

பிளஸ் 1, பிளஸ் 2 துணைத் தோ்வு: அனுமதிச் சீட்டு இன்று வெளியீடு!

2026-06-23T07:04:42.195+05:30

பிளஸ் 1, பிளஸ் 2 துணைத்தோ்வுகள் ஜூலை மாதம் நடைபெறவுள்ள நிலையில், தோ்வுக்கான அனுமதிச் சீட்டை செவ்வாய்க்கிழமை (ஜூன் 23) பதிவிறக்கம் செய்யலாம் என தெரிவிக்கப்பட்டுள்ளது.

இது தொடா்பாக, அரசு தோ்வுகள் இயக்குநா் கே.சசிகலா வெளியிட்ட செய்திக் குறிப்பு: தமிழகத்தில் மாநில பாடத் திட்டத்தில் பிளஸ் 1, பிளஸ் 2 துணைத் தோ்வுகள் ஜூன் மற்றும் ஜூலை மாதத்தில் நடைபெறவுள்ளன. தோ்வெழுத விண்ணப்பித்த தனித் தோ்வா்களுக்கான தோ்வுக்கூட அனுமதிச் சீட்டுஅரசு தோ்வுத் துறையின் இணையதளத்தில் (www.dge.tn.gov.in) செவ்வாய்க்கிழமை பதிவேற்றம் செய்யப்படும்.

தோ்வா்கள் பிற்பகல் முதல் இணையதளத்தில் தங்கள் பதிவெண் மற்றும் பிறந்த தேதியை குறிப்பிட்டு அனுமதிச் சீட்டை பதிவிறக்கம் செய்துகொள்ளலாம்.

தாங்கள் எழுத வேண்டிய பாடங்கள் மற்றும் தோ்வு நாட்கள் சரியாக குறிப்பிடப்பட்டுள்ளதாக என்பதை தோ்வா்கள் சரிபாா்த்துக் கொள்ள வேண்டும். அனுமதிச் சீட்டு இல்லாமல் எந்தவொரு தோ்வும் தோ்வெழுத அனுமதிக்கப்பட மாட்டாா்கள்.

செய்முறைத் தோ்வு தேதி குறித்த விவரங்களை தங்களுக்கு ஒதுக்கீடு செய்யப்பட்டுள்ள தோ்வு மையத்தின் முதன்மை கண்காணிப்பாளரை அணுகி அறிந்து கொள்ள வேண்டும் என அதில் தெரிவிக்கப்பட்டுள்ளது.

மாணவர்களுக்கு மகிழ்ச்சியான செய்தி! இனி அனைத்து சனிக்கிழமைகளும் விடுமுறை!

2026-06-21T07:42:37.586+05:30

பள்ளி ஆசிரியர்கள் மற்றும் கல்வியாளர்களின் கோரிக்கையை ஏற்று, பள்ளிகளுக்கு அனைத்து சனிக்கிழமைகளிலும் விடுமுறை அறிவித்திருக்கிறது தமிழக அரசு.

தமிழகத்தில் பள்ளிக் கல்வித் துறை கட்டுப்பாட்டின் கீழ் செயல்படும் அரசு, அரசு உதவி பெறும், தனியாா் பள்ளிகளுக்கான 2026-2027-ஆம் கல்வியாண்டுக்கான அதிகாரபூா்வ நாள்காட்டியை பள்ளிக் கல்வித் துறை இந்த வாரம் வெளியிட்டிருந்தது.

அதில் மிக முக்கியமான அறிவிப்பு ஒன்றும் ஒளிந்திருக்கிறது. அதுதான், தமிழ்நாட்டில் அரசு மற்றும் அரசு உதவிபெறும் பள்ளிகள் அனைத்துக்கும், அனைத்து சனிக்கிழமைகளும் விடுமுறை என்பது. இந்த ஆண்டு ஜூலை, செப்டம்பர், டிசம்பர் மாதங்களில் தலா ஒரு சனிக்கிழமை மட்டுமே வேலை நாள் என்று அறிவிக்கப்பட்டிருப்பதன் மூலம், அனைத்து சனிக்கிழமைகளும் விடுமுறை என்பது தெரிய வந்துள்ளது.

நிகழ் கல்வியாண்டில், மொத்தம் 365 நாள்களில் வேலை நாள்கள் 210 நாள்களாகக் குறைக்கப்பட்டுள்ளது. இதுவரை 220 நாள்கள் வேலை நாள்களாக இருந்து வந்தது. விடுமுறை நாள்கள் 155- ஆக உள்ளன.

ஆசிரியர்கள் மற்றும் கல்வியாளர்களின் கோரிக்கை ஏற்கப்பட்டு நிகழ் கல்வியாண்டில் பள்ளிகளுக்கு வேலை நாள்கள் 210- ஆக நிா்ணயிக்கப்பட்டுள்ளது. ஒட்டுமொத்தமாக 22 நாள்கள் அரசு விடுமுறை நாள்கள்.

1 முதல் 12ஆம் வகுப்பு வரை அனைத்து வகுப்புகளுக்கும் காலாண்டுத் தோ்வு செப். 17 முதல் 25-ஆம் தேதி வரை நடைபெறவுள்ளது. பிறகு செப். 26 முதல் அக்.4-ஆம் தேதி வரை காலாண்டு விடுமுறை அறிவிக்கப்பட்டுள்ளது.

தொடர்ந்து அரையாண்டுத் தோ்வு டிச. 16-இல் தொடங்கி 23 வரை நடைபெறும். தொடா்ந்து, டிச. 24 முதல் ஜன. 3 வரை அரையாண்டுத் தோ்வு விடுமுறையாகும். ஜன.4-இல் பள்ளிகள் திறக்கப்படும். ஜனவரி மாதத்தில் பொங்கல் விடுமுறையும் வருகிறது.

தொடர் விடுமுறைகள் பட்டியலில், செப்.4-ஆம் தேதி வெள்ளிக்கிழமை கிருஷ்ண ஜெயந்தி கொண்டாடப்படுவதால், அடுத்து வரும் சனி, ஞாயிறு வார விடுமுறை நாள்களாக அமைகிறது. இதனால் 3 நாள்கள் தொடா் விடுமுறை கிடைக்கிறது.

அதுபோல, செப். 14 திங்கள்கிழமை விநாயகா் சதுா்த்தி கொண்டாடப்படுவதால், அதற்கு முன்னா் இருக்கும் வார விடுமுறையுடன் சோ்ந்து, தொடா்ந்து 3 நாள்கள் விடுமுறை வருகிறது.

அக்டோபா் மாதத்தில் 19 மற்றும் 20 தேதிகளில் (திங்கள், செவ்வாய்) ஆயுத பூஜை, விஜய தசமி வருவதால், அதற்கு முன்னா் இருக்கும் வார விடுமுறையுடன் சோ்ந்து, தொடா்ந்து 4 நாள்கள் விடுமுறை வருகிறது.

நவ. 8-ஆம் தேதி கொண்டாடப்படும் தீபாவளி ஞாயிற்றுக்கிழமையில் வருவதால், வார விடுமுறையாக 2 நாள்கள் மட்டுமே விடுமுறை கிடைக்கிறது.

பொங்கல் பண்டிகை ஜன. 15 முதல் 17 வரை வெள்ளி, சனி, ஞாயிறு என மூன்று நாள்கள் கொண்டாடப்படுவதால் தொடா்ந்து 3 நாள்கள் விடுமுறை கிடைக்கும்.

நிகழ் கல்வியாண்டின் கடைசி வேலை நாள் 2027- ஏப்.23-ஆம் தேதியுடன் நிறைவடைகிறது. அதன் தொடா்ச்சியாக ஏப்.24 முதல் மாணவா்களுக்கு கோடை விடுமுறை அறிவிக்கப்பட்டுள்ளது.

பிளஸ் 2, பத்தாம் மாணவா்களுக்கான பொதுத்தோ்வு மற்றும் இதர வகுப்புகளுக்கான முழு ஆண்டுத் தோ்வு தேதிகள் பின்னா் அறிவிக்கப்படும் என தெரிவிக்கப்பட்டுள்ளது

கவுரவ விரிவுரையாளர்கள் 1,000 பேர் நியமிக்க திட்டம்.

2026-06-21T07:37:54.480+05:30

தமிழகத்தில், அரசு கலை, அறிவியல் கல்லூரிகளில், புதிதாக 1,000 கவுரவ விரிவுரையாளர்களை நியமிக்க, உயர் கல்வித்துறை திட்டமிட்டு உள்ளது.

தமிழகத்தில் கல்லூரி கல்வி இயக்ககத்தின் கீழ் இயங்கும், அரசு கலை, அறிவியல் கல்லூரிகளில், 7,500க்கும் மேற்பட்ட உதவிப் பேராசிரியர் பணியிடங்கள் காலியாக உள்ளன.

சில மாதங்களுக்கு முன், 1,703 கவுரவ விரிவுரையாளர்கள் பணியமர்த்தப்பட்டனர். தற்போது, பல கல்லூரிகளில், புதிய பாடப்பிரிவுகள் தொடங்கப்பட்டுள்ளன. இதனால், பேராசிரியர் பற்றாக்குறை அதிகரித்து உள்ளது.

எனவே, மாணவர்களின் கல்வி நலனை கருத்தில் வைத்து, நிரந்தரப் பேராசிரியர்களை நியமனம் செய்யும் வரை, கூடுதலாக, 1,000 கவுரவ விரிவுரையாளர்களை புதிதாக நியமிக்க, தமிழக உயர் கல்வித்துறை திட்டமிட்டுள்ளது.