مجھے ہے حکم اذاں

شریکِ حیات کے نام۔

2020-09-11T02:53:00.000+03:00

شریکِ حیات کے نام۔

ہمارے معاشرے میں بیوی کے سوا ہر شخص کی تعریف کی جاتی ہے حالانکہ پیدا کرنے والے نے میاں بیوی کو ایک دوسرے کا لباس قرار دیا ہے۔ فرمایا کہ تم ایک دوسرے کا زوج ہو یعنی دو جزو جن سے ایک جوڑا بنتا ہے۔ یہ فضیلت کسی اور رشتہ کو نہیں دی گئی لیکن اس کے باوجود ہمارے ہاں والدین، بہن بھائیوں، اولاد، رشتہ داروں اور دوستوں کی جیسے چاہے تعریف کریں کسی کو معیوب نہیں لگے گی لیکن جونہی آپ نے اپنی شریک حیات کے لئے تعریف کے دو بول کہہ دیئے تو پھر دیکھیں کیسی درگت بنتی ہے۔ اس "رسک" کے باوجود مجھے یہ کالم اپنی رفیقہ حیات کے لئے لکھنا ہے اور انہیں سالگرہ کہ مبارک باد دینا ہے۔ قبل ازیں ان کی محبت میں چند تحاریر لکھ چکا جس کے لیے قارئین کی طرف سے پذیرائی ملی جبکہ کچھ لوگوں کی طرف سے طعنے کی شکل میں پیغامات بھی موصول ہوئے۔

ایک دن ہم آپس میں بات کر رہے تھے کہ محبت کیا ہے تو بیگم صاحبہ نے سادہ سے الفاظ میں جو کہا میں ان جذبات کو اپنے الفاظ میں بیان کرتا ہوں کہ "محبت یہ ہے کہ جو آپ کا محبوب چاہے، آپ بھی وہی چاہو۔ جو محبوب کرے، تم بھی وہی کچھ کرو۔ اگر ایک بھوکا پیاسا ہو تو دوسرا بھی اسی حالت میں ہو۔ محبوب جس حال میں ہو، تم بھی اسی حال میں رہو، جو چیز ایک کو پسند ہو، دوسرا بھی وہی پسند کرے اور جس سے ایک کو نفرت ہو دوسرا بھی اس سے نفرت کرے اس طرح دونوں میں ہم آہنگی پیدا ہوجائے اور کوئی فرق نہ رہے۔" واہ کیا خوبصورت انداز میں محبت کی وضاحت کردی یعنی "میں تے ماہیا اک جندڑی تے اونج ویکھن نو دو" (میں اور میرا محبوب یک جان ہیں صرف دیکھنے میں دو نظر آتے ہیں)۔ یہ سن کر مجھے اپنی قسمت پر رشک آیا، مجھے محبت کا دعوی ہے تو دوسری طرف سراپا عشق ہے۔ واقعی محبت ایک اعلیٰ و ارفع جذبہ ہے اور ایسی زندگی خدا کی عطا اور فضل ہے۔ خدا اپنے بندوں سے بہت محبت کرتا ہے اور اس کے بندے بھی محبت الہی سے سرشار ہوتے ہیں۔ قرآن حکیم میں ہے کہ تم وہی چاہو جو خدا چاہیے۔ اپنی مرضی کو خدا کی مرضی کے تابع کر دو اور پھر وہ مقام آتا ہے کہ خدا ان سے راضی ہوجاتا ہے اور وہ خدا سے راضی ہوجاتے ہیں۔ اخلاص ہو تو عشق مجازی سیڑھی بن کر عشق حقیقی کی منزل تک لے جاتا ہے۔ محبت جینے کے آداب سکھا دیتی ہے۔ میری آنٹی نے پچھلی تحریر پڑھ کر تبصرہ کیا تھا اور میں سمجھتا ہوں کہ واقعی :دنیا کسی کے پیار میں جنت سے کم نہیں" اور اپنی تو کیفیت بقول فراز یہ ہے کہ

ہم محبت میں بھی توحید کے قائل ہیں فراز

ایک ہی شخص کو محبوب بنائے رکھنا

یہ مارچ کی 6 تاریخ اور سن 2010 تھا جب ہمارا نکاح مسنونہ شادی خانہ آبادی ہوئی۔ ہماری رفاقت کے گیارہ سال ہونے والے ہیں، تب سے زندگی کے دکھ سکھ، غمی خوشی اور دھوپ چھاؤں میں ایک ساتھ ہیں اور حالات کیسے بھی آئے دونوں مل کر سامنا کرتے ہیں۔ شادی کے بعد چار ماہ پاکستان رہنے کے بعد دونوں کویت منتقل ہوئے۔ ایک نیا ملک جہاں نہ کوئی جاننے والا اور نہ ہی مستقبل کے حالات کا اندازہ تھا۔ مجھ یاد ہے وہ 30 ستمبر 2010 کی ایک گرم صبح تھی جب میں نے کویت کے بین الاقوامی ہوائی اڈے پر اس کا استقبال کیا۔ اس دور میں جب کبھی افسردہ اور متفکر بھی ہوا، تو پاس آکر حوصلہ دیتے ہوئے کہا پریشانی کی کیا بات ہے، خدا پر بھروسہ رکھیں، ہر طرح کے حالات میں میں آپ کے ساتھ ہوں۔ پھر ہر معاملہ میں میری ڈھارس بندھائی، خانگی زندگی ہو یا معاشرتی معاملات، بہن بھائیوں اور رشتہ داروں سے تعلق ہو یا دوست احباب سے معاملات، ہم واقعی یک جان دو قالب کی صورت ہیں اور دعا ہے کہ پروردگار حسد اورنظر بد سے بچائے۔ ہم خدا کے فضل و کرم اور عنائیات پر اس کے حضور شکریہ کے ساتھ جھکے ہوئے ہیں۔ فوزیہ نے زندگی میں کبھی گلے شکوے نہیں کیے، مشکل حالات صبر و برداشت سے گزارے، کبھی بڑی خواہشات نہیں کیں بلکہ ہمیشہ صرف ایک ہی خواہش کا اظہار کیا کہ یونہی پہلو میں بیٹھے رہو۔

خالق کائنات نے قرآن حکیم میں اہل ایمان کی اس آرزو کو ہمیشہ کے لئے محفوظ کرلیا ہے جس کا اظہار وہ حضور باری تعالیٰ میں یوں کرتے ہیں کہ "اے ہمارے رب ہماری بیویوں اور اولاد کی طرف سے آنکھوں کی ٹھنڈک عطا فرما اور ہمیں پرہیزگاروں کا پیشوا بنا دے" (فرقان 74)۔ بیوی اگر دل کا قرار ہے تو شوہر کڑی دھوپ میں شجر سایہ دار ہے۔ بہت سے لوگوں کو دیکھا ہے کہ اگر کبھی خدا ناخواستہ مالی یا صحت کی شدید پریشانی لاحق ہوجائے تو صرف میاں بیوی ہی ایک دوسرے کا سہارا بنتے ہیں۔ دوست احباب بس تھوڑی دیر کے لئے آئے اور خبر گیری کرکے چلتے بنے، ایک دوسرے کے لئے صرف میاں بیوی ہی جیتے ہیں۔ مشاغل، عادات اور دلچسپیاں مختلف ہونے کے باوجود محبت اور خوشیوں بھری زندگی گزاری جاسکتی ہے۔ ہر انسان دوسرے انسان سے مختلف ہوتا ہے اور ہمیں ایک دوسرے کو خوبیوں اور خامیوں سمیت قبول کرنا ہوتا ہے۔ رسول اکرم کی ازدواجی زندگی ہمارے لئے مشعل راہ ہے اور آپ نے بیوی سے بہترین سلوک کرنے کی تاکید کی ہے۔ قارئین اس رشتہ کو وہ اہمیت اور مقام دیں جس کا یہ متقاضی ہے۔ اپنی شریک زندگی کی تعریف کریں، اسے وہ مقام اور عزت دیں جس کی وہ حق دار ہے۔ اپنے قرابت داروں میں اپنی اہلیہ کو کبھی فراموش نہ کریں اور ہی نظر انداز کریں۔ اس کی خدمات کا برملا اعتراف کریں، ایک گھنے سایہ کی طرح اس پر چھاؤں رکھیں اور اس کی ڈھال بن کر رہیں۔ میاں بیوی کے درمیان کوئی بات بھی پوشیدہ نہ ہو اور ایک دوسرے سے کبھی بھی غلط بیانی سے کام نہ لیں۔ خوشگوار اور کامیاب زندگی بسر کرنے کے لئے یہی اصول کارگر ہیں۔

فوزیہ آپ کو سالگرہ بہت مبارک ہو!

تم سلامت رہو ہزار برس

ہر برس کے ہوں دن پچاس ہزار

محمد فیصل

فِضائے بَدّر پیدا کر

2020-05-10T18:03:00.005+03:00

فضائے بدر پیدا کر فرشتے تیری نصرت کو

اتر سکتے ہیں گردوں سے قطار اندر قطار اب بھی

مولانا ظفر علی خاں کا یہ شعر (جوعلامہ اقبال کے نام سے منسوب کیا جاتا ہے) امت مسلمہ کو میدان عمل کی اصل حکمت سمجھاتا ہے کہ "فضائے بدر" پیدا کرنا آپ کو میدان عمل میں جرأت، بہادری اور وہ تقوی عطا کرے گا جو ایک مومن کی شان ہے اور مسلمان ایمان کے اس درجے پر ہوں گے جہاں مالک کائنات خود اپنے ملائکہ کے ذریعے اپنے بندوں کے لیے مدد و نصرت اتارے گا۔ مسلمان کس طرح الله کی حمایت حاصل کر سکتا ہے؟ کیوں کہ اگر نصرت خداوندی اور رضاۓ الہی شامل حال ہو تو کسی میدان میں پسپائی کا سوال ہی پیدا نہیں ہوتا خواہ وہ میدان جنگ ہو یا اقوام عالم کے معاملات اور یہ بات تو طے ہے کہ مسلمان اگر صرف اپنے زور بازو اور قوت پر بھروسہ کر کے جنگ جیتنا چاہے گا تو ہمیشہ ہی نا مراد لوٹے گا۔ جسکی اعلٰی مثال امیر المومنین حضرت عمر رضی الله تعالی عنہ نے حضرت خالد بن ولید کو کمانڈر انچیف کے عہدے سے معزول کر کے سمجھائی تھی کہ جب لوگ یہ سمجھنے لگے کہ شاید مسلمانوں کو فتوحات حضرت خالد بن ولید کی شجاعت، اعلیٰ جنگی حکمت عملی، اور لیڈر شپ کی خصوصیات کی وجہ سے ملتی ہے۔

فضائے بدر کیا تھی؟ بظاہر تو دو لشکر آمنے سامنے تھے۔ ایک لشکر سامان حرب سے لیس ایک ہزار جنگجوؤں پر مشتمل اور دوسرا لشکر الله کی رضا و دین اسلام کی سربلندی کے لیے الله کے آخری نبی صلی الله علیہ وسلم کے ساتھی صرف ٣١٣ نفوس جنکے پاس نہ تو تلواروں کی تعداد، نہ کھانے کو وافر، نہ ان کے پاس سواریاں۔ مگر پھر بھی تاریخ گواہ ہے کہ بنا وافر جنگی سازو سامان کے الله کے رسول کا لشکر فتح پا گیا۔علامہ محمّد اقبال نے فرمایا کہ

کافر ہے تو شمشیر پر کرتا ہے بھروسہ

مومن ہے تو بے تیغ بھی لڑتا ہے سپاہی

فضائے بدر کے ظاہری پہلو کے علاوہ قابل فکر، قابلِ غور پہلو اُن مسلمانوں کی اعلیٰ اخلاقی تربیت، الله پر توکل اور جذبہء شہادت و نبی پاک صلی الله علیہ وسلم سے محبت ہے۔ یہ وہ جذبۂ اخلاص ہے جو ایک عظیم تربیت نے پیدا کیا، جس تربیت نے سبق دیا کہ مسلمان وہ ہے جس کے ہاتھ اور زبان سے دوسرے مسلمان محفوظ رہیں۔ مسلمان کون ہے؟ کردار مسلم کیا ہونا چاہیے؟ کیا آج ہم سیرت و کردار میں مسلمان کہلانے کے حقدار ہیں؟ انفرادی عبادات اپنی جگہ اہمیت رکھتی ہیں جتنا زیادہ آپ اللہ کی عبادت کریں گے اتنا درجات میں بلندی پائیں گے مگر ہمارے اندر موجود کچھ معاشرتی بیماریاں ایسی ہیں جس سے معاشرہ برائے راست متاثر ہوتا ہے تو کیا معاشرے کو تباہ کرنے والے کی عبادت بھی الله کا قرب عطا کر سکتی ہے؟ کیا ہم معاشرے کو بگاڑ کر اپنا گھر محفوظ رکھ سکتے ہے؟ آج فضاۓ بدر کی تلاش میں ہمیں اس تقابلی جائزے کی ضرورت نہیں کہ ان ٣١٣ اصحاب کے کردار اور ان کے کردار کا معاشرے پر اثر کیا تھا اور آج ہمارے کردار کا معاشرے پر کیا اثر ہے؟ کم تولنے والا،جھوٹ بولنے والا،اپنے بھائیوں کی، غریبوں، بیواؤں اور یتیموں کی جائداد ضبط کرنے والا، معصوم بچوں، بچیوں کے ساتھ زیادتی کرنے والا، انہیں بے دردی سے قتل کرنے والا، فحاشی کو فروغ دینے والا، وعدہ خلافی کرنے والا، لوگوں پر طنز کرنے والا، نا انصافی کرنے والا اور تہمت لگانے والا معاشرے پر کیا اثرات مرتب کرے گا؟ فضاۓ بدر پیدا کیسے ہو گی؟ ہمیں یاد رکھنا ہو گا کہ ہمارے انفرادی و اجتماعی کردار کی عظمت کے ساتھ اللہ اور الله کے رسول صلی الله علیہ وسلم کے فرمان پرعمل کرنے سے فضائے بدر پیدا ہو سکتی ہے۔

ہم اپنی اور اپنی قوم کی حالت دیکھ لیں کہ وہ کونسی اخلاقی و معاشرتی بیماری ہے جس کا ہم شکار نہیں۔ وہ کونسا گناہ ہے جو اس قوم کو اپنی لپیٹ میں نہیں لیے ہوئے۔ اسلامی جمہوریہ پاکستان میں اخبار کی شہ سرخی بنتی ہے کہ شرح سود کم کر کے ٩ فیصد کر دی گئی ہے، یعنی سود کھا کھا کر اللہ کے ساتھ جنگ کرنے والی قوم کیسے اللہ کی مدد حاصل کر سکتی ہے؟ ہم سب جانتے ہیں کہ سود اللہ کے ساتھ براہ راست جنگ ہے۔ درج بالا جرائم کے علاوہ حکمرانوں کی کرپشن، اقربا پروری، اور ججوں کی نہ انصافی سے لیکر ملاوٹ، ناجائز منافع خوری، ذخیرہ اندوزی اور رشوت دینے اور لینے کے کارناموں کی فہرست بنا لیں تو یہ لسٹ ہی بہت طویل ہو جاۓ. اگر ان کی تفاصیل کو احاطہ تحریر میں لانے کی کوشش کی جاۓ تو شاید الفاظ ختم ہو جائیں مگر اس قوم کی حالت زار کی کہانیاں ختم نہ ہوں۔ دنیا پر غلبہ پانے کی تیاری صرف جدید ہتھیار بنانے سے نہیں ہوگی بلکہ ہمیں اپنے کردار بہتر بنا کر صحیح معنوں میں مسلم قوم بننا ہوگا تب ہی فرشتے اتریں گے مدد کو۔ ہتھیاروں پر بھروسہ کرنے سے اللہ کی تائید نہیں ملا کرتی اسکی مثالیں بھی تاریخ سے بے شمار مل جائیں گی۔

جس دن ہم نے اور ہمارے حکمرانوں نے اپنے اندر فضائے بدر پیدا کرلی تو ہماری حالت وہ ہو گی جس کا نقشہ علامہ محمّد اقبال علیہ رحمہ نے یوں بیان کیا

یہ غازی، یہ تیرے پُر اسرار بندے

جنھیں تُو نے بخشا ہے ذوقِ خدائی

دونیم ان کی ٹھوکر سے صحرا و دریا

سِمٹ کر پہاڑ ان کی ہیبت سے رائی

دو عالم سے کرتی ہے بیگانہ دل کو

عجب چیز ہے لذّتِ آشنائی

شہادت ہے مطلوب و مقصودِ مومن

نہ مالِ غنیمت نہ کِشور کشائی

الله ہمیں فضاۓ بدر پیدا کرنے کی توفیق عطا فرماۓ۔ ١٧ رمضان، یوم بدر آپ سب کو مبارک ہو۔

مجھے ہے حکم اذاں

محمّد فیصل

مولانا نرغے میں۔

2020-04-28T00:40:00.000+03:00

مولانا نرغےمیں

عہدِ حاظر میں چند غیر متنازعہ علماۓ دین میں سے ایک مولانا طارق جمیل بھی ہیں اور مخلوق خدا سے ان کی محبت کا عالم یہ ہے کہ تقریباً ہر مکتب فکر سے تعلق رکھنے والے پاکستانی کے موبائل فون میں مولانا طارق جمیل صاحب کا کوئی نہ کوآڈیو یا ویڈیو کلپ ضرور ہو گا۔ گزشتہ تین دن سے لائیو ٹیلی تھون نشریات میں مانگے جانے والی دعا کے اثرات بریکنگ نیوز کی شکل اختیار کر چکے ہیں، ٹالک شو ہوئے، تجزیے، تبصرے، گرما گرم بحث و مباحثے ہوئے، میڈیا کی پاکدامنی کو ثابت کرنے کے لیے زمین و آسمان کے قلابے ملائے گئے اور حد تو یہ ہے کہ طاہر اشرفی جیسی شرابی کبابی شخصیت بھی مولانا کی دعا اور اعمال و افعال کا پوسٹ مارٹم بدنام زمانہ اینکرز کے شانہ بشانہ کرتا نظر آیا۔ مولانا طارق جمیل کا یہ کہنا کہ میڈیا جھوٹ پھیلاتا ہے اور میں سمجھتا ہوں کہ اس میں رتی بھر بھی مبالغہ آرائی بھی نہیں، بڑے میڈیا ہاؤسز باقاعدہ پارٹی پوزیشنز لے چکے ہیں۔ کسے یاد نہیں قومی اسمبلی کے فلور پر میاں نواز شریف نے چوہدری نثار کو خصوصی تاکید کی تھی کہ جنگ/جیو کا نام لے کر کریڈٹ دیا جائے۔ میرشکیل الرحمن کے نوازشریف سے تعلقات کسی سے ڈھکے چپھے تو نہیں، حکومتی اشتہارات میں جنگ گروپ سب سے زیادہ مال بناتا رہا۔ اس کے نام نہاد بڑے صحافی عمران خان کی کِردار کشی کرتے رہے اور اُس کی ازدواجی زندگی کے بخیے ادھیڑتے رہے۔ اخبارات کی شہ سرخیاں وہ خبریں بنیں اور وہ باتیں ہوئیں جو شرفاء تو شاید خلوت میں بھی نہ کریں۔ اب بھی جیو کے بڑے اینکر اپنے بغض کا برملا اظہار کرتے ہیں۔ یہ کہاں کی صحافتی اقدار ہیں؟ کیا انہیں صحافی بھی قرار دینا چاہیے؟

دوسری جانب موجودہ حکومت کا بڑا حمایتی چینل اے آر وائی بھی اسی ڈگر پہ ہے۔ ان کا جیو کے ساتھ جس کا کوئی نظریاتی اختلاف نہیں بلکہ اختلاف کی وجہ مارکیٹ پر قبضہ کی لڑائی ہے۔ سیاسی جماعتوں نے صحافیوں کے روپ میں بندے پلانٹ کیے ہوۓ ہیں جو ان کا ایجنڈا آگے بڑھاتے ہیں۔ بڑے نامور صحافی کبھی اپنے بارے سروے کروا کر دیکھ لیں، خلق خدا ان کے بارے کیا راۓ رکھتی ہے، لگ پتا جاۓ گا۔ اب تو آپ صحافی کا نام لیں، لوگ خود بتا دیتے ہیں کہ یہ حکومتی کیمپ میں ہے یا مخالف کمیپ میں، یہ کس جماعت کا کس گروہ کا کن نظریات کا حامی ہے۔غیرجانبدار صحافی ڈھونڈنا ایسے ہی ہے جیسے بھوسے میں سے سوئی کھوجنا، کیونکہ صحافیوں کے بارے تو یہ تاثر عام ہے کہ وہ ایک تنخواہ اپنے اس ادارے سے لیتے ہیں جس میں کام کرتے ہیں اور دوسری تنخواہ اپنی اس سیاسی جماعت سے بٹورتے ہیں جن کے کہنے پر سچ کو جھوٹ اور جھوٹ کو سچ کرنے کا کاروبار کرتے ہیں۔ جس کے ہاتھ میں مائیک اور شکل ٹی وی سکرین پر آ رہی ہے وہ جو چاہے تمہت لگاۓ، کسی کی پگڑی سرعام اچھال دے- ثبوت کی ضرورت اور نہ قانون کا ڈر۔ آخرت کے ڈر کا تو سوال ہی پیدا نہیں ہوتا، مولانا نے سچ بول کر گویا بھڑوں کے چھتے میں ہاتھ دے دیا اور پھر ان کے شر سے بچنے کے لیے معافی بھی مانگ لی مگر آپ دل پر ہاتھ رکھ کر بتائیں کہ کیا اس قسم کا طوفان بدتمیزی اٹھانے سے مولانا طارق جمیل کی کہی ہوئی بات جھٹلائی جا سکتی ہے؟ کیا ہمارا معاشرہ ایک راست باز اور شرم و حیا سے لبریز معاشرہ ہے؟ اگر آپ کا جواب ہاں میں ہے تو کوئی بھی پاکستانی نجی نیوز یا انٹرٹینمنٹ چینل بہنوں بیٹیوں کے ساتھ بیٹھ کر چند منٹ دیکھ لیں۔ اگر آپ کو لگتا ہے کہ ہمارے صحافی راست گو ہیں اور ہمارے ملک کے نجی چینلز بے حیائی نہیں پھیلا رہے تو آپ مولانا کو ضرور غلط کہیں، لیکن اگر آپ جانتے ہیں کہ مولانا نے سچ کہا ہے تو انھیں نرغے میں لا کر چرب زبانی سے ذلیل کرنے کی بجاۓ اپنے آپ کی اصلاح کی کوشش کریں۔

"مجھے ہے حکم اذاں"

محمّد فیصل

ماہِ صیام اور چِڑی روزہ۔

2020-04-27T07:21:00.000+03:00

ماہِ صیام اور چِڑی روزہ

مجھے ہے حکم اذاں ۔ محمد فیصل

"روزے دارو!
اللہ تے نبی دے پیارو!
سحری دا وقت ختم ہون چہ ایک گھنٹہ رہ گیا جے،
جلدی جلدی اٹھ کے روزہ رکھ لو۔"

مسجد کے لاوڈ اسپیکر سے وقفے وقفے سے ان اعلانات کی گونج کے پس منظر میں سے امی جان کی واضح آواز سنائی دیتی، "اٹھ میرا پتر تے دہی لے آ"، امی جان جلدی جلدی پراٹھے پکاتیں جاتیں اور ہم سب کو آوازیں لگاتی جاتیں، ایسے میں ماں جی کی آواز پر سب سے پہلے بڑے بھائی ان کی مدد کو جاگتے اور ہم ادھ کھلی آنکھوں سے آخری پراٹھا پکنے کا انتظار کرتے۔ جب سب چیزیں دستر خوان پر آ موجود ہوتیں تو بڑے بھائی کی گونجدار آواز سنائی دیتی "ہن اٹھ وی جا"، بس پھر نیند فورا ہی کہیں بھاگ جاتی اور ہم یوں اچانک بستر سے نکل کر منہ ہاتھ دھونے نکل کھڑے ہوتے جیسے ہم جیسا مستعد اور فرماں بردار کبھی پیدا ہی نہ ہوا ہو۔ سب کے لئے پراٹھے اور کوئی سا بھی سالن، دہی لسی اور آخر میں امی جان کے ہاتھ کی چائے جسے پیالوں میں انڈیلنا بڑے بھائی (جو چاۓ کے سب سے زیادہ رسیا ہیں) کی ڈیوٹی ہوتی تھی، چائے دیتے ہوئے کہتے، "لو جی گلے دی ٹکور کر لو"، افطاریوں کی سب باتیں بھول سکتیں ہیں مگر جامع مسجد کے موذن کی آواز کہ "روزے دارو، الله تے نبی دے پیارو، روزہ کھول لو" اور وہ شربتِ روح افزا کا بڑا کمنڈل جس میں برف تیر رہی ہوتی تھی اب تک نہیں بھولتا۔ پاکستان کی گرمیوں کے روزے اور ٹھنڈا ٹھار لال رنگ کا شربت جو ٹھنڈ کلیجے میں ڈالتا تھا اس کیفیت کے بھی کیا کہنے۔
وہ ابتدائی روزے جب پورا روزہ رکھنے کی ہمت نہ ہوتی تھی امی جی کہتی تھیں "چڑی روزہ رکھ لو"، سحری کے ثواب کے اتنے فضائل بیان ہوتے تھے کہ بنا روزہ رکھے بھی ثواب کے لئے اٹھنا ہی پڑتا تھا۔ مجھے بہت زیادہ چڑی روزے بھی یاد نہیں کیونکہ بہت شروع سے ہی میں نے روزے رکھنے کا آغاز کر دیا تھا۔ تب مجھے سمجھ نہیں آتی تھی کہ ہمارے گھر میں اس شد و مد سے روزے رکھنے کا اہتمام کیوں کیا جاتا ہے۔ وہ بچپن کے دن بھی کیا خوب دن تھے جب کوئی فکر نہ تھی ایسے میں ہمیں جو ایک اور سہولت میسر تھی وہ تھی روزے میں رعایت، جس کو ہم چڑی روزہ کہتے تھے۔ ایک سمبولک روزہ اور ہم خود کو روزہ دار سمجھتے تھے۔ آج میرا بیٹا سحری و افطاری کا انتظار کرتا ہے اور جس طرح ہمیں بچپن میں رعایت میسر تھی میں بھی اسی انداز میں بچوں کی حوصلہ افزائی کرتے ہوئے سوچتا ہوں کہ یہ چڑی روزہ آج کی روایت تو نہیں۔ یہ تو تربیت کا ایک انداز تھا ہم جب چاہتے کھا پی لیتے تھے صرف عیش ہی عیش تھی لیکن اگر کوئی پوچھتا تو کہہ دیتے جی ہاں میں روزے سے ہوں، اس چڑی روزے کی سمجھ آج اتنے سالوں کے بعد آئی کہ گرمیوں کے سخت روزے بھی چھوڑنے کا خیال نہیں آتا یہ اسی چڑی روزے کی پریکٹس کا نتیجہ ہے۔ لیکن آج کل اس چڑی روزے کا تقریباً رواج ختم ہو گیا ہے، اور حالت یہ ہے کہ اب روزے میں لوگ سرِعام کھانے پینے کو عاربھی نہیں سمجھتے کیونکہ شاید آج بہت سے بچے چڑی روزے کے نام سے بھی شائد واقفیت نہ رکھتے ہوں۔ اگر بچوں کو روزے کی عادت ڈالنی ہے تو چڑی روزے کی پریکٹس شروع کرانی ہو گی۔ اگر میں چڑی روزے کو تربیت کا نام دوں تو مناسب ہو گا، والدین کے لیے یہ ایک توجہ دلاؤ تحریر کے طور پر لکھ رہا ہوں کہ جو بچے بچپن میں چڑی روزہ نہیں رکھتے اور والدین انھیں ماہ صیام کی اہمیت و برکت نہیں بتاتے، وہ بچے بڑے ہو کر چڑی روزہ رکھنا شروع کر دیتے ہیں اور فرض روزے کو بھی چڑی روزہ سمجھ کر جب جہاں جی چاہا کھا پی لیا مطلب روزہ نہیں رکھتے۔ ہمیں یاد ہے کہ وہ بھی کیا دن تھے جب بھوک لگتی تو ماں کہتی بیٹا روزہ منہ سے نکال کر کان میں رکھ لو اور کھا پی کر دوبارہ منہ میں رکھ لینا، لیکن آج ننھے دماغوں کو آنے والے وقت کیلئے تیار ہی نہیں کیا جاتا۔ آج کی ماؤں کو چڑی روزے کی اصطلاح میں تربیت کا یہ پہلو یاد ہی نہیں کہ اس میں بچے کو کھانے پینے کی چھوٹ بھی ہوتی ہے اور ذہنی طور پر وہ روزہ دار بھی ہوتا ہے اور روزہ دار ہونے کے ناتے وہ ماں باپ کی حوصلہ افزائی کا حقدار بھی ہوتا ہے۔ یقین کریں اس تربیت کا فائدہ بڑے ہو کر ہوتا ہے اور روزہ تو جسم کے ساتھ ساتھ ایمان کو بھی فائدہ دیتا ہے لہٰذا ہمیں اپنے چھوٹے بچوں کو چڑی روزے کی عادت ڈالنا ہو گی، اس تربیت کا اثر ضرور ہو گا۔ مجھے یاد نہیں کہ ہم بہن بھائیوں میں سے کسی نے کبھی روزہ چھوڑا ہو۔ ایک مقابلہ سا ہوا کرتا تھا۔ بڑے بھائی جان زیادہ روزے رکھنے والوں کی عیدی میں بھی اضافہ کیا کرتے تھے۔ عیدی سے مجھے یاد آیا کہ ہمیں عیدی بھی کچھ قابل ذکر نہ ملا کرتی تھی۔ رشتہ دار امی جان کو اکھٹی عید دے جایا کرتے تھے اور امی جان اس عیدی کو دیگر ضروریات کے کھاتے میں ڈال کر برابر کر دیا کرتی تھیں۔ ہم امی جان اور بڑے بھائی سے ضد کر کے کچھ عیدی بٹورا کرتے تھے۔ کوشش کر کے مرحوم ثاقب بھائی کی جیب سے بھی پانچ دس روپے نکلوا لیا کرتے تھے لیکن پھر بھی کچھ خاطر خواہ اکٹھا نہ ہوتا تھا قریبی رشتہ داروں ماموں، چچاوں نے کبھی اتنا قربت کا موقع ہی نہیں دیا کہ ضد کر کے کچھ روپے اُن سے بھی نکلوا لیتے۔

ہمارے دور میں روزہ کشائی وغیرہ کا بھی رواج نہیں ہوتا تھا۔ میں نے یہ لفظ سنا ہی چند برس پہلے ہے وہ بھی شاید میڈیا کے توسط سے۔ اس لئے مجھے یاد نہیں پڑتا کہ پہلا روزہ کب رکھا تھا۔ لیکن یہ پکی بات ہے رمضان کا ہی مہینہ تھا۔

محمّد فیصل

میں نے اقبال کو مرتے دیکھا

2020-04-21T21:08:00.000+03:00

"میں نے اقبال کو مرتے دیکھا"

علامہ محمد اقبال کی موت بے شک برصغیر پاک و ہند کے تمام مسلمانوں کے لیے اک سانحہ عظیم تھی۔ خصوصاً خطبہ آلہ باد کے بعد سے آپ مسلمانوں کے دلوں کی دھڑکن بن چکے تھے۔ علامہ کی وفات پر چند سطریں سر محمد شفیع کے قلم سے اور انہی کی کتاب "میں نے اقبال کو مرتے دیکھا" سے چند اقتباسات پیش کرتا ہوں۔

علامہ اقبال کی موت 21 اپریل 1938ء کو صبح پانچ بجے واقع ہوئی، اور مجھے اس بات کا شرف حاصل ہے کہ میں اُن تین اشخاص میں سے ایک ہوں جو علامہ کی موت کی شہادت دے سکتے ہیں، علامہ مرحوم کے انتقال کے وقت میرے سوا اور دو اشخاص بھی تھے جن میں سے ایک تو علی بخش تھا اور دوسرے دیوان علی تھے۔ علی بخش علامہ مرحوم کا ایک وفادار نوکر تھا جو کوئی چالیس برس سے علامہ کے ہاں ملازم تھا۔ علامہ اقبال کی موت سے کوئی چوبیس گھنٹے پیشتر ہی تمام گھر والے اور عزیز و اقارب پریشان تھے، ان کے خاندان کا ہر فرد اس غم میں برابر کا شریک تھا۔ علامہ اقبال کا آخری دن اُن کی کئی ایک خصوصیات کا اظہار بھی کر رہا تھا، گو کہ کسی وقت وہ شدت ِدرد سے بیتاب ہو جاتے تھے تاہم ان کے چہرے پر خوشی اور مسرت کی جھلک بھی دکھائی دیتی تھی، وہ موت کی آخری گھڑی تک باصحت تھے۔ ان کی موت ایک ایسی رات کو واقع ہوئی جس میں وہ بہت کم سوئے۔ موت سے ایک دن قبل دوپہر ایک بجے علامہ اقبال نے کہا کہ اُن کے پیٹ میں شدید درد ہو رہا ہے۔ میں نے انہیں ایک خوراک دوا پیش کی جس کو ان کے پرائیویٹ ڈاکٹر نے تجویز کیا تھا۔ یہ نیند آور دوا تھی، لیکن انہوں نے اسے پینے سے انکار کر دیا اور کہا:’’میں اس کی ایک خوراک بھی نہیں پیوں گا" اس میں افیون ہے اور میں نے تہیہ کرلیا ہے کہ مرتے وقت بے ہوش نہیں رہوں گا۔ پانچ بجنے میں ابھی دس منٹ باقی تھے کہ علامہ اقبال نے شربت کا ایک گلاس پینے کی خواہش ظاہر کی۔ میں نے گلاس میں تھوڑا سا شربت انڈیلا اور اسے اُن کے ہاتھوں میں دے دیا۔ انہوں نے کہا: ’’لیکن یہ تمام میں کیونکر پی سکتا ہوں؟‘‘ اور پھر وہ خود بولے: ’’خیر میں اسے پی لوں گا۔‘‘ اور پھر وہ ایک ہی سانس میں سارا گلاس پی گئے۔ چند لمحوں بعد علامہ کے سینے میں شدید درد ہونے لگا اور انہوں نے اپنے سینے پر ہاتھ رکھ دیا اور آہستہ سے ’’ہائے‘‘ کہا۔ علی بخش فوراً اٹھ بیٹھا اور سیدھا علامہ کے بستر کے قریب جاپہنچا اور انہیں اپنے ہاتھوں سے سہارا دیا، تب علامہ اقبال نے کہا ’’مجھے یوں محسوس ہورہا ہے جیسے کوئی میرے دل میں کوئی چیز چبھو رہا ہے۔‘‘ اور اس کے بعد انہوں نے اپنی بند آنکھیں کھول دیں اور چھت کی طرف دیکھتے ہوئے کہا ’’اللہ‘‘۔ اور یہی وہ آخری لفظ ہے جو اُن کی موت سے قبل اُن کے منہ سے نکلا۔ علی بخش فوراً علامہ سے لپٹ گیا اور دھاڑیں مار مار کر رونے لگا۔ علامہ اب بستر پر دراز ہوچکے تھے، جیسے ہی اُن کا سر تکیہ سے لگا علی بخش نے فوراً آپ کا چہرہ قبلہ کی طرف پھیر دیا اور اس کے چند ہی لمحوں بعد شاعرِ مشرق کی روح قفسِ عنصری سے پرواز کر گئی۔

اپنی موت سے ایک دن قبل علامہ اقبال علیہ رحمہ روزمرہ کی طرح جلد اپنے بستر سے اٹھ بیٹھے اور پھر ایک پیالی چائے پی، وہ چائے پیتے رہے اور میں انہیں اخبار پڑھ کر سناتا رہا، کچھ دیر بعد حجام آیا اور آپ کی داڑھی بنائی، اس وقت علامہ میں کوئی نمایاں تبدیلی نہیں دکھائی دے رہی تھی سوائے اس کے کہ میں نے آپ کی آنکھوں میں چند لال لال ڈورے دیکھے، پھر اقبال اپنے دفتر چلے گئے جو کہ ملاقاتی کمرے سے ملحق تھا اور وہاں جا کر بستر پر لیٹ گئے، آپ تکیے کے سہارے بہت دیر بستر پر لیٹے رہے، آپ کو شدید کھانسی ہونے لگی بعض دفعہ تو اتنی شدت سے کھانسی ہوتی کہ آپ کا چہرہ سرخ ہوجاتا اور آپ بالکل بے بس و لاچار دکھائی دیتے۔

آپ کی رحلت سے ایک دن قبل ایک ایسا واقعہ پیش آیا جس سے علامہ اقبال بہت مسرور اور خوش دکھائی دیئے۔ ہوا یہ کہ آپ کا پرانا ساتھی اور ہم جماعت ’’بیسرنؔ‘‘ آپ سے ملنے آیا جوں ہی وہ کمرے میں داخل ہوا علامہ نے اٹھنے کی کوشش کی اور اپنے پرانے ساتھی کو خوش آمدید کہا، سب سے پہلے بیسرنؔ نے علامہ کو وہ دن یاد دلائے جب کہ وہ اور علامہ ایک ساتھ میونخ یونیورسٹی میں تعلیم حاصل کیا کرتے تھے۔ پرانے واقعات کو یاد کرکے علامہ بہت خوش ہوئے اور ان کا چہرہ دمک اٹھا، علامہ اقبال نے اپنے پرانے ساتھی پر سوالات کی بوچھاڑ کر دی انہوں نے لیڈی بیسرنؔ، بیسرن کی بیٹی اور اپنے کئی دیگر ساتھیوں کے متعلق حالات دریافت کیے۔ اس کے بعد دونوں میں خاصی دلچسپ گفتگو ہوتی رہی ان کی بات چیت سے میں نے اندازہ لگایا کہ بیسرنؔ افغانستان جانا چاہتا تھا اور علامہ اقبال جنہیں کابل کے متعلق بہت کچھ معلوم تھا، سو علامہ اقبال افغانستان کے دلفریب مناظر، میوے، پھلوں اور موسم کے متعلق باتیں کرنے لگے۔ بیسرن نے آپ سے کابل کے مشہور مقامات کے متعلق بھی بات چیت کی، وہ لوگ جنہیں علامہ سے گفتگو کرنے کا موقع ملا ہے بخوبی جانتے ہیں کہ ان کی باتیں بڑی دلچسپ ہوتی تھیں، اور وہ باتیں کرتے ہوئے تھکتے نہیں تھے، اسی موقع پر علامہ نے بیسرنؔ سے جرمن فلسفہ سے متعلق بھی بحث چھیڑ دی اور اُس کے بعد وہ دونوں سیاسیات پر باتیں کرنے لگے، بیسرنؔ نہیں چاہتا تھا کہ ایک ایسے وقت وہ اپنی گفتگو کو طول دے جبکہ علامہ کی صحت ٹھیک نہیں تھی۔ اس نے کہا ’’شاید میری اس غیر متوقع مداخلت سے آپ کی صحت پر برا اثر پڑ رہا ہو گا۔‘‘ اقبال نے فوراً جواب دیا "یہ بالکل ہی دوسرا راستہ ہے میرے دوست، آپ کی ہر سانس میرے لیے مرہم کا کام کررہی ہے"
یہ دلچسپ گفتگو کوئی ڈیڑھ گھنٹے بعد اختتام کو پہنچی اور بیسرنؔ چلا گیا۔

اسی شام کا ایک قصہ بانو سے متعلق ہے۔ بانو علامہ اقبال کی چھوٹی بیٹی کا نام ہے، وہ تیز تیز دوڑتی ہوئی علامہ کے کمرے میں داخل ہوئی اور خاموشی سے آپ کے پہلو میں بیٹھ گئی، علامہ کی نظر کافی کمزور ہو چکی تھی، آپ نے بچی کے سر پر ہاتھ رکھا اور پیار سے کہا "کون آیا ہے، شاید بانو ہوگی" جیسے ہی بانو کمرے سے باہر نکلی آپ نے فرمایا "وہ بخوبی جانتی ہے کہ اس کے باپ کی موت کی گھڑی قریب آچکی ہے" بانو حسب معمول اپنے باپ سے ملنے کے لیے تین دفعہ آیا کرتی تھی۔ ایک تو مدرسہ جاتے وقت، دوسرے واپسی کے وقت، تیسرے سونے سے قبل، علامہ اقبال بانو سے اکثر کھانے کے متعلق دریافت کیا کرتے تھے "تم نے آج کیا کھانا کھایا اور کتنا کھایا"

"اتنا کھایا" بانو معصومیت سے اپنے ہاتھ کے اشارے سے جواب دیتی اور شاعرِ مشرق مسکرانے لگتے۔ وہ اکثر کہا کرتے تھے کہ چھوٹے بچوں سے صرف کھانے پینے کے بارے میں پوچھنا چاہیے، اور یہی وہ آسان طریقہ ہے جس سے بچے کا دل موہ لیا جاسکتا ہے۔

موت سے ایک دن قبل دوپہر کے وقت بانو آپ سے بغل گیر ہو گئیں نہ جانے اُس دن اقبال کو کیا ہوگیا تھا، وہ رو رہے تھے اور بانو حیرت سے آپ کا منہ تک رہی تھیں، اُس وقت سورج غروب ہو رہا تھا اور اس کی ارغوانی شعاعیں علامہ مرحوم کے مکان کو چھوتی ہوئی آہستہ آہستہ آگے بڑھ رہی تھیں۔ علامہ کا بستر اُن کے دیوان خانے میں بچھا دیا گیا، اسی موقع پر ایک تانگہ راستے سے گزرا تانگے والا ایک غمگین پنجابی گیت الاپ رہا تھا، شاعرِ مشرق نے جب اس کی درد بھری آواز سنی تو ایک سرد آہ بھری اور چھت کو گھورنے لگے۔ اس واقعہ کے کچھ ہی دیر بعد فاطمہ بیگم بهی علامہ اقبال سے ملنے آئیں، فاطمہ ایک مقامی اناث کالج کی پرنسپل تھیں، علامہ نے آپ سے لڑکیوں کے متعلق مذہبی مسائل پر بات چیت کی، آپ نے کہا کہ "مسلمان لڑکیوں کو سختی سے اسلام کی تعلیم دینا چاہیے" اس وقت آپ کے سارے دوست احباب اور رشتہ دار جمع ہو چکے تھے۔ وہ تمام جانتے تھے کہ اب اقبال کا وقت قریب آچکا ہے، وہ ایک دوسرے سے دبی آواز میں پوچھتے، کیا آج رات اقبال زندہ رہ سکیں گے؟ اور یہی ایک سوال تھا جو ہر ایک دماغ کو پریشان کر رہا تھا اسی لمحہ جاوید اندر آیا، جاویدؔ، اقبال کی تیسری بیوی کا پہلا بیٹا ہے۔ جیسے ہی وہ کمرے میں آیا، اقبال نے کہا "یہ کون آیا ہے؟"

اور جب انہیں بتایا گیا کہ جاوید آیا ہے تو آپ نے جاوید کو بیٹھنے کے لیے کہا اور پھر فرمانے لگے، "جاوید کے معنی فارسی میں غیر فانی کے ہیں"

محمد حسین کو جو آپ کے ایک قریبی دوست تھے، مخاطب کرتے ہوئے ایک بار علامہ نے فرمایا تھا کہ "جاوید کے پیدا ہونے کے تھوڑے ہی دنوں بعد میں مجدد شاہ کے مقبرے پر جو سرہند میں واقع ہے، حاضر ہوا تھا جہاں میں نے خدا سے دعا فرمائی تھی کہ وہ نومولود کو زمانے کی خراب باتوں کی ناپاکی سے پاک کر دے" واضح رہے کہ مجدد شاہؒ عہدِ جہانگیر کے ایک مشہور ولی اور ایک مشہور شاعر گزرے ہیں۔

اُس دن گرمی کی شدت کچھ زیادہ تھی اور علامہ نے خواہش کی کہ ان کا بستر صحن میں منتقل کر دیا جائے یہاں پر تین مشہور ڈاکٹروں نے آپ کا معائنہ کیا وہ جاتے وقت وعدہ کر گئے کہ وہ کل دوبارہ انجکشن دینے آئیں گے۔ علامہ محمد اقبال علیہ رحمہ نے ڈاکٹروں سے کہا کہ وہ بلا کھٹکے ان کی صحت سے متعلق حالات کہہ دیں کیونکہ وہ کسی چیز سے نہیں ڈرتے رات کے قریب بارہ بجے ہوں گے کہ علامہ کی بے چینی میں اضافہ ہو گیا اور انہیں دوبارہ اُن کے دیوان خانے میں لایا گیا۔ علی بخش آپ کے ہمراہ تھا، اس سے آپ کی یہ حالت نہ دیکھی گئی اور وہ بے اختیار رونے لگا۔ جب اقبال کی نظر اپنے وفادار نوکر کے بہتے ہوئے آنسوئوں پر پڑی تو آپ نے فرمایا کہ "علی بخش! مجھے یوں معلوم ہوتا ہے کہ اب ہماری 40 سال کی دوستی عنقریب ختم ہونے والی ہے" رات تقریباً آدھی بیت چکی تھی اور اقبال نیند نہ آنے کی وجہ سے بہت بے چین ہوگئے تھے۔ آپ کے دوست احباب اُس وقت بھی آپ کے قریب تھے اُن میں سے ایک نے یہ تجویز پیش کی کہ آپ نیند آور دوا کی ایک خوراک بھی پی لیں تو رات کا باقی حصہ نہایت اطمینان سے گزر جائے گا اس دفعہ بھی انہوں نے اس دوا کو پینے سے انکار کردیا۔ اُس کے بعد دوستوں سے آپ نے اجازت چاہی اور آپ سونے کے لیے چلے گئے آپ کو غیر متوقع طور پر جلدی نیند آگئی، لیکن ابھی گھنٹہ بھر بھی سونے نہ پائے تھے کہ پھر سے بیدار ہوگئے اور کہا کہ پیٹ میں شدید درد ہورہا ہے۔

عبدالقیوم نے جو آپ کے ایک قریبی رشتے دار تھے، پھر سے آپ سے درخواست کی کہ آپ نیند آور دوا پی لیں، مگر آپ برابر انکار کرتے رہے وقت تیزی سے گزرتا رہا اور علامہ کی بے چینی اور اضطراب میں اضافہ ہوتا گیا، شاید یہ آخری رات تھی جس میں انہوں نے حقہ نہیں پیا، اس موقع پر اب ہم صرف تین اشخاص باقی رہ گئے تھے علیؔ بخش، دیوان علی اور میں، وہ منظر بڑا ہی جگرسوز اور دلخراش تھا جبکہ علامہ نے ہم سے دردبھری آواز میں کہا کہ ہم اُن کے نزدیک بیٹھ جائیں اور جب ہم میں سے کوئی اونگھنے لگتا تو وہ کہتے "تمہیں صرف آج رات ہی جاگنے کی تکلیف گوارا کرنی ہوگی" اس کے بعد انہوں نے دیوان علی سے کہا کہ وہ انہیں ایک پنجابی صوفیانہ کلام سنائیں دیوان علی خوشی سے گانے کے لیے راضی ہوگئے اب علامہ محمد اقبال علیہ رحمہ کی موت کو صرف چار گھنٹے باقی تھے، لیکن اب بھی اُن کے ہوش و حواس قائم تھے، دیوان علی نے پنجاب کے مشہور شاعر بابا بلھے شاہ کے چند گیت الاپے، ان گیتوں سے شاعر بہت متاثر دکھائی دیتے تھے اور بالآخر میں نے دیکھا کہ ان کی آنکھوں سے آنسو بہہ نکلے۔ رات کے تین بجے ان کی حالت انتہائی خراب ہوگئی اور انہوں نے مجھ سے کہا کہ حکیم محمد حسین قریشی کو بلا لاوں جو کہ لاہور کے ایک نامی گرامی طبیب تھے ان کا مکان کوئی ڈیڑھ میل کے فاصلے پر تھا میں سائیکل پر نہایت تیز رفتاری کے ساتھ ان کے مکان پر پہنچا اور اپنی پوری قوت سے انہیں آواز دی لیکن وہ اپنے بنگلہ کی تیسری منزل پر سورہے تھے۔ میری آواز بے کار ثابت ہوئی اور مجھے مایوس واپس لوٹنا پڑا اقبال نے جب مجھے بغیر حکیم کے دیکھا تو کہا کہ اب کیا کیا جائے؟ تھوڑے ہی وقفہ کے بعد شاعرِ مشرق نے یوں محسوس کیا کہ درد میں کمی ہو رہی ہے اور اس طرح انہیں سکون مل رہا ہے، لیکن آہ! جلتی ہوئی چنگاری کی یہ آخری چمک تھی۔ اس وقت صبح کے پانچ بجنے والے تھے کہ ان کے درد میں اچانک شدت پیدا ہو گئی لیکن انہوں نے صبر و استقلال سے اُسے برداشت کیا۔ بجائے آہ و فغاں کرنے کے انہوں نے ہم سے کہا کہ ان کا بستر ان کے دار المطالعہ میں منتقل کردیا جائے جہاں انہوں نے سالہا سال فلسفہ اور ادب پر غور و فکر کرتے ہوئے گزارے تھے۔ یہ اُن کا پسندیدہ کمرہ تھا۔ وہ "اللہ" کہتے ہوئے بستر پر لیٹ گئے اور پھر شاعرِ مشرق موت کی آغوش میں ہمیشہ ہمیشہ کی نیند سو گئے۔ مجھے یاد پڑتا ہے کہ اپنی موت سے ایک ہفتہ قبل اقبالؔ نے یہ تحریر اپنے بھائی کے ہاں روانہ کی تھی جو آپ کی بیماری سے سخت پریشان تھے اور اکثر پوچها کرتے تهے کہ سچے مسلمان کی نشانی کیا ہے؟ علامہ نے ان کو جواب لکها کہ "مجھے اجازت دیجئے کہ میں ایک سچے مسلمان کی خصوصیات آپ پر ظاہر کردوں، وہ یہ کہ جب وہ مرے تو مسکراتے ہوئے چہرے سے موت کو خوش آمدید کہے" اور میں نے اچھی طرح اندازہ لگایا کہ اقبالؔ نے بسترِ مرگ پر اپنے اس کہے پر پوری طرح عمل کیا۔ جب اُن کی آخری گھڑی آن پہنچی تو میں نے دیکھا کہ اُن کے لبوں پر ایک مسکراہٹ کھیل رہی تھی۔

اللہ عزوجل آپ کے درجات بلند فرمائے۔ آمین

محمد فیصل

قانون کی لاٹھی یا لاٹھی کا قانون؟

2020-02-23T03:20:00.005+03:00

قانون کی لاٹھی یا لاٹھی کا قانون؟

جُوں جوں زمانہ بدل رہا ہے حالات، سوچیں، انسانی و معاشرتی اقدار بھی تو بدل رہی ہیں۔ انسان کبھی کبھی سوچتا ہے کہ کیوں نہ ان اقدار کے بدلنے کے ساتھ ساتھ وہ اقوال وہ محاورے بھی بدل دئیے جائیں جو ہمارے بزرگوں نے مرتب کر رکھے ہیں اور ہمیں بچپن سے ہی سکھا دیئے جاتے ہیں، بچپن میں کہاوت سنا کرتے تھے کہ سانچ کو آنچ نہیں! اور میں نے آج تک آنکھیں بند کیے اس قولِ زریں پہ ایمان رکھا۔ پر اب جو حالات دیکھتے ہیں تو یوں معلوم ہوتا ہے کہ تمام اقوالِ زریں کسی دیوار میں چُن دیے گئے ہیں اور اب ان پر نئے سرے سے غورکیے جانے کی اشد ضرورت ہے۔ مثلاً اب آپ با آسانی اپنے بچوں کو سکھا سکتے ہیں "سانچ میں ہی آنچ ہے!" "غرور کا سر بہت اونچا ہے" "جھوٹ کے پاؤں ہی نہیں پر بھی ہوتے ہیں" "کر برا ہو بھلا" "ڈوبتے کو تنکا بھی نہ دو" "باتوں کے بھوت لاتوں بلکہ ڈنڈوں سے ہی باز آتے ہیں" سو دن چور کے تو ایک دن بھی چور کا" یقین مانیں اِس سے اور کچھ نہیں تو ہمارے بچوں کو کتابی لفظوں کے درد ناک معنی و حقائق سے آشنائی ضرورنصیب ہو گی۔

سنا ہے کہ غیر ترقی یافتہ دور اچھا تھا جب قومی رہنما اور بڑے لوگ اپنے قول و فعل میں اس بات کا خاص خیال رکھتے تھے کہ ان کے بولے ہوئے کسی لفظ اور اٹھائے ہوئے کسی قدم سے سننے اور دیکھنے والوں خصوصاً نوجوان نسل کے اخلاق و کردار پر کوئی منفی اثر نہ پڑے۔ عوام اپنے رہن سہن اور گفتار وکردار میں اپنے رہنماؤں کی اور بچے اپنے بڑوں کی تقلید کرتے ہیں۔ بادشاہ کسی باغ سے گزرتے ہوئے ایک پھل توڑ لے تو اس کا لشکر سارا باغ ہی اجاڑ دیتا ہے اس لئے رہنما اور بزرگ لوگ ایسی باتوں سے اجتناب برتا کرتے جو آنے والی نسلوں کیلئے مثال بننے کی بجائے بگاڑ کا سبب بنیں لیکن آج حالات یہ ہیں کہ قانون کی پاسداری کی نصیحت تو قانون دان کرتے ہیں لیکن خود کو قانون سے بالا تر تصور کرتے ہیں۔کیا سارے اقوال زریں صرف لائیک اور شیئر کرنے کے لیے ہی ہوتے ہیں؟ جس کی لاٹھی اس کی بھینس کے قانون پر چلنے والے اس ملک خداداد میں کیا صرف حکمران اپنی حدود سے تجاوز کئے ہوئے ہیں یا ہر شخص اپنے اپنے دائرے میں ایک ننھا منا سا فرعون ہے؟ اپنی دکان کے سامنے فٹ پاتھ پر پیدل چلنے والے کا راستہ بند کرنے والا اسے اپنا حق سمجھتا ہے، اس کا کہنا ہے کہ اس فٹ پاتھ پر چھابڑی رکھنے کا کرایہ وہ الگ سے کمیٹی کو دان کرتا ہے، بڑی گاڑی والا چھوٹی گاڑی والے کو گالی دیتا ہے اور اس کو سڑک سے گاڑی اتار لینے پر مجبور کر دیتا ہے، چھوٹی گاڑی والے کو موٹر سائیکل والے کیڑے مکوڑے محسوس ہوتے ہیں اور موٹر سائیکل والے کو سائیکل سوار سڑک پر پسند ہی نہیں، وکیل ڈاکٹر سے لڑتے ہیں تو جان مریضوں کی نکالتے ہیں لیکن جب انہیں قانون کے کٹہرے میں لانے کی بات کریں تو ان کے اپنے بھائی بند احتجاج کرتے ہیں۔ سیاست دان کرپشن سے مال بناتا ہے اور جب اسے کٹہرے میں لایا جاتا ہے تو یا جج کو خریدا جاتا ہے یا پھر جج بدلنے کی درخواست کی جاتی ہے۔ شاہی کے دن اسی ملک میں گزارے جاتے ہیں اور جب سو دن چور کے ایک کوتوال والا معاملہ ہوتا ہے تو قانون بھی بدل دیا جاتا ہے۔ ایک جج، غریب آدمی سے لیکر سیاست دان تک سب کے گناہ دیکھتا ہے فیصلے کرتا ہے، سزائیں جزائیں اسی کے قلم سے تحریر ہوتیں ہیں مگر جب جج کو کٹہرے میں آنا پڑے تو اٹارنی جنرل تک فارغ کر دئیے جاتے ہیں۔ کس کا گلہ کس سے کیا جائے؟ جب یہ طے ہی نہیں کہ حق پر کون ہے اور ہم جیسے معاشروں میں جیت صرف طاقتور کی ہوتی ہے۔ کمزور کے لئے ایک ہی قانون رائج ہے جو علامہ محمّد اقبال نے یوں بیان کیا تھا کہ

تقدیر کے قاضی کا یہ فتوی ہے ازل سے

ہے جرم ضعیفی کی سزا مرگ مفاجات

ایسے تمام واقعات چند دن اخبار کی سرخیوں یا بریکنگ نیوز میں لوگوں کے لہو گرماتے ہیں مگر چائے کی پیالی کا یہ طوفان کسی بھی تبدیلی کا پیش خیمہ ثابت نہیں ہوتا، ان سب مسائل کا حل بس قانون کی حکمرانی ہے، قانون جو سب کے لئے برابر ہو، جس کے شکنجے سے کوئی بچنے نہ پائے، کیا غریب کی عزت و آبرو کا کوئی قانون یہاں نافذ بھی ہے؟ کیا قانون کی عملداری کے لئے حکومت یا عدلیہ کوشاں بھی ہے؟ اس قانون میں امیر اور طاقتور کے لئے چور دروازے میسر ہیں اس لئے وہ کبھی اس کو تبدیل نہیں کریں گے مگر سوال ان لوگوں سے ہے جو ایک عام طبقہ سے اٹھ کر قانون کے قلم دان کے مالک و مختار بنتے ہیں۔ کیا ہم یہ دروازہ بھی بند سمجھیں؟ کیا واقعتاً انصاف اس ملک سے رخصت ہو گیا؟ کیا ظالم کا ہاتھ روکنے والا کوئی نہیں؟ کلمہ حق کہنے والوں کی زبانیں خاموش کیوں ہیں؟ یہ معاشرہ کب اپنی تعمیر کی طرف توجہ دے گا؟ ہمیں یہ یاد رکھنا ہو گا کہ ظالم ابن ظالم اور مظلوم ابن مظلوم نسلیں اسی سلسلہ کی پروردہ ہیں، اور ایسے گھٹن زدہ معاشرے اپنی موت آپ مر جاتے ہیں۔ معاشرے کے فیصلہ سازوں کو سمجھنا ہو گا کہ صرف اور صرف قانون کی بالادستی میں اس ملک کے مسائل کا حل ہے. ایسا قانون جو سب کے لئے برابر ہو، ایسا قانون جو کتابوں کے علاوہ میدان عمل میں بھی موجود ہو۔

محمّد فیصل

مکڑی کا جالا

2020-02-09T04:28:00.002+03:00

غریب اور کمزور کے لیے اپنا حق مانگنا اور حق حاصل کرنا جنگل کے قانون کی طرح ہے.

درخت جنگل میں بھی اگتے ہیں اورباغ میں بھی، لیکن جنگل میں جانے سے انسان ڈرتا ہے اورباغ میں جانے کو جی للچاتا ہے، اس کی وجہ یہ ہے کہ جنگل کی کوئی دیکھ بھال نہیں کرتا لیکن باغات کی دیکھ بھال کی جاتی ہے چنانچہ جنگل میں درخت بغیر کسی ترتیب، قاعدے اورقانون کے اگ جاتے ہیں جب کہ باغ میں درخت ترتیب، قاعدے اورقانون سے لگائے جاتے ہیں، جنگل میں خوف کی وجہ یہ بھی ہے کہ نجانے کس درخت کی کھوہ سے سانپ نکل آئے، نجانے کس بل سے بچھو یا کوئی اور موذی جاندار نکل آئے لیکن باغات کے سبزے پر انسان بے خوف و خطر آرام سے جا بیٹھتا ہے. جنگلی قوانین کے بارے بھی آپ جانتے ہیں کہ طاقتور اپنی مرضی کا مالک بلکہ جنگل کا ہی مالک ہوتا ہے. اس کے علاوہ مختلف جانور اپنے ہم نسلوں کے ساتھ جتھے بنا کر رہتے ہیں، بیل، بیلوں کے ساتھ. ہاتھی، ہاتھیوں کے ساتھ اور لومڑی لومڑیوں کے ساتھ لیکن انسانی معاشرت عدل و انصاف پر مبنی ہوتی ہے اور یہی کسی معاشرت کی بقاء کا سبب ہو سکتا ہے. جن معاشروں میں عدل و انصاف نہ ہو وہ معاشرہ کہلاتے کیسے ہیں؟ یہی مثال انسان کی ہے اگراسے دنیا میں بغیر کسی قاعدے اورقانون کے رہنے دیا جائے تو یہ دنیا کی زندگی ایک جنگلی زندگی میں بدل جائے گی اوراگر اسے کسی قاعدے اورقانون کا پابند بنایا جائے تو دنیا کی یہی زندگی امن وامان کا گہوارا بن جائے گی۔

انسانی زندگی میں انہی قواعد و ضوابط کو قانون کہا جاتا ہے، جو انسانی زندگی کی حفاظت اور معاشرے کی بقاء کا ضامن ہوتا ہے، لیکن کچھ لوگ ایسے بھی ہیں جو ہماری اس انسانی زندگی کے امن وامان کو تباہ کرنے کی کوششوں میں لگے رہتے ہیں۔ انکی خواہش یہ ہوتی ہے کہ ایسے تمام قوانین ختم ہونے چاہیں جو انکے نفس کو گراں گزرتے ہیں۔ یہ لوگ کبھی مذہب کا انکار کرتے ہیں تو کبھی قانون کا، پھر اپنے انکار کو عقلمندی ودانشمندی کی چادر پہنانے کے لئے مختلف حیلے بہانے ڈھونڈے میں لگے رہتے ہیں، جہاں اعتراض کی گنجائش نہیں بنتی تو دور کی کوڑیاں لاتے ہیں، کمسن بچوں کے ساتھ زیادتی کے خلاف قانون سازی کے لیے قومی اسمبلی میں پیش کی گئی قرارداد فواد چوہدری، شیریں مزاری اور پاکستان پیپلز پارٹی کی پرزور مخالفت کے باوجود پاس ہوئی تو وزیر قانون بھی میدان میں تشریف لے آئے اور فرمایا کہ قرارداد تو منظور ہو گئی مگر ایسا کوئی قانون نہیں بننے دوں گا. حال ہی میں جب زینب زیادتی و قتل کیس سامنے آیا تو اسی قسم کے ممبران قومی اسمبلی ٹالک شوز اور میڈیا میں بیانات دیتے ہوئے نظر آتے تھے کہ مجرموں کو سرعام پھانسی کی سزا دی جاۓ. جب سے بچوں کے ساتھ جنسی زیادتی کے واقعات زیادہ ہائی لائٹ ہونا شروع ہوئے ہیں تو سب نے وقتی طور پر مسئلے کا ایک ہی حل ڈھونڈا تھا کہ مجرم کو سرعام پھانسی پر لٹکا دو، دراصل ہمارے ہاں سوچنے سمجھنے کا زیادہ رجحان نہیں ہے، اس لئے جب بھی کوئی مسئلہ کھڑا ہوتا ہے اس کے فوری تدارک کے کیلئے ماردو، کاٹ دو، لٹکا دو جیسی صدائیں بلند ہونا شروع ہوجاتی ہیں اور اب جبکہ قانون سازی کے لیے موثر قدم اٹھایا گیا تو اسی قبیل کے چند لوگوں کے اعتراضات بھی سامنے آ گئے. ہمارے یہاں انسانوں کے قانون کا حال بھی جنگل جیسا ہے. اس میں بھی صرف طاقت، سرمایہ اور تعداد کو دیکھا جاتا ہے. غریب اور کمزور کے لیے اپنا حق مانگنا اور حق حاصل کرنا جنگل کے قانون کی طرح ہے. اس لیے یہاں پر بھی خود کو محفوظ بنانے، اپنا حق حاصل کرنے کے لیے یہاں کے شہریوں کو اپنا جتھا بنانے کی ضررت ہوتی ہے

یہ طاقتور جتھے اپنی مرضی اور من مانی کے قائل ہیں. جنگل میں جانوروں کے جتھے نسلی تعلق سے بنتے ہیں اور ملک خداداد میں یہ جتھے قبائل کے نام پر، برادری کے نام پر، سیاسی پارٹیوں کے نام پر، ہم پیشہ لوگوں یعنی ڈاکٹروں، وکیلوں، تاجروں یا مل مالکان کے نام پر، یا پھر ڈیپارٹمنٹ کے نام پر بنتے ہیں. مقصد دونوں جتھوں کا ایک ہی ہے کہ اپنے آپ کو نقصان سے بچانا، اپنی زندگی، اپنے مفادات کا تحفظ اور اپنی من مانی. ان جتھوں سے بچنے اور ان کو کمزور کرنے کا طریقہ ہے اور وہ طریقہ ہے اس کمہار کے حکم کی طرح چور کا ہاتھ اور چور کی سفارش کرنے والے وزیر کی زبان کاٹ دی جاۓ یعنی قانون کا اطلاق، قانون کی عملداری اور قانون کی بالا دستی، اور ایسا قانون جو طاقتور کے لیے مکڑی کا جالا ثابت نہ ہو. قانون کی حکمرانی میں سب سے بڑی رکاوٹ مروجہ نظام سیاست کے ہی پرزے ہیں. چاہے وہ حکومت میں ہوں یا اپوزیشن میں، ارباب اختیار سے گزارش ہے کہ اس سرزمین کو جنگل نہ بننے دیں کیونکہ ہم اپنے بچوں کو بتا رہے ہیں کہ

"یہ چمن تمہارا ہے تم ہو باغباں اس کے"

محمّد فیصل

غداروں کی جنت

2020-01-30T15:12:00.002+03:00

مجھے ہے حکم اذاں

غداروں کی جنت

سازش اور غداری کے مجرموں کا خون قاہرہ کی ریت نے ابھی اپنے اندر جذب نہیں کیا تھا کہ سلطان صلاح الدین ایوبی کا بھائی تقی الدین اُس کے بلاوے پر دو سو منتخب سواروں کے ساتھ قاہرہ پہنچ گیا۔ سازش کے مجرموں کو گردنیں کاٹی جا چکی تھیں اور یوں نظر آتا تھا جیسے قاہرہ کی ریت ان مرے ہوئے غداروں کا خون اپنے اندر جذب کرنے سے گریز کر رہی ہے جو صلیبیوں کے ساتھ مل کر سلطنت اسلامیہ کے پرچم کو سرنگوں کرنے کی کوششوں میں مصروف تھے۔ سلطان صلاح الدین ایوبی نے ان سب کی لاشیں دیکھیں ان کے کٹے ہوئے سر ان کے بے جان جسموں کے سینوں پر رکھ دئیے گئے تھے۔ صرف ایک لاش تھی جو سب سے بڑے غدار کی تھی اور جس پر سلطان صلاح الدین ایوبی کو کبھی کلی طور پر اعتماد تھا۔ اس لاش کا سر اس کے ساتھ ہی تھا۔ ایک تیر اُس کی شہہ رگ میں داخل ہو کر دوسری طرف نکلا ہوا تھا۔ یہ قاہرہ کا نائب "مصلح الدین" تھا۔ فوج کے سامنے جب اس کا جرم سنایا جا رہا تھا تو ایک جوشیلے سپاہی نے کمان میں تیر ڈال کر مصلح الدین کی شہہ رگ سے پار کردیا تھا۔ سلطان صلاح الدین ایوبی کے سپاہی کی یہ حرکت ڈسپلن کے خلاف تھی، مگر صرف اس لیے نظر انداز کرکے معاف کر دیا تھا کہ کوئی بھی صاحب ایمان مسلمان غداری برداشت نہیں کرسکتا۔ اور سلطان صلاح الدین ایوبی نے ہی اپنی فوج میں ایمان کی یہ قوت پیدا کی تھی۔

ان لاشوں کو دیکھ کر سلطان کے چہرے پر خوشی کی ہلکی سی بھی جھلک نہیں تھی کہ اُس کی صفوں اور نظام حکومت میں سے اتنے زیادہ غدار اور سازشی پکڑے گئے اور انہیں سزائے موت دے دی گئی ہے۔ اُس کے چہرے پر اُداسی اور اس کی آنکھیں گہری سرخ تھیں، جیسے وہ آ نسو روکنے کی کوشش کر رہا ہو۔ غصہ تو تھا ہی جس کا اظہار اس نے ان الفاظ میں کیا کہ "ان میں سے کسی کا جنازہ نہیں پڑھایا جائے گا۔ ان کی لاشیں ان کے رشتہ داروں کو نہیں دی جائیں گی، تا کہ انہیں کفن بھی نہ پہنائے جائیں۔ رات کے اندھیرے میں انہیں ایک ہی گہرے گڑھے میں پھینک کر مٹی ڈال دو اور زمین ہموار کر دو۔ اس دُنیا میں ان کانشان بنی باقی نہ رہے"۔

وطن عزیزپاکستان کو غداروں کی جنت کہنا غلط نہیں ہو گا کہ جس طرح ہم چند سال میں کوئی نہ کوئی بڑا اور نامور غدار تخلیق یا دریافت کرتے ہیں اس پر عدالتوں میں مقدمات چلاتے ہیں اور بلآخر قانونی طور، معزز عدالتوں کے ذریعے اس کے ماتھے سے غداری کا داغ دھو کر زندہ باد زندہ باد اور مبارک سلامت کی صدائیں بلند کرتے ہیں اس پر ہمیں واقعی کوئی بڑا انعام ملنا چاہیے. پچھلے چند سالوں پر ہی ایک نظر دوڑائیں تو اندازہ ہو جاۓ گا کہ ایسے لوگوں کی پیداوار میں ہم کافی حد تک خود کفیل ہیں. اکثر تو کلبوشن جیسے لوگ ہماری صفوں سے پکڑے جاتے ہیں اور جو کلبوشن جیسے ابھی نہیں پکڑے گئے وہ ہماری صفوں سے اپنے جیسے تلاش کرتے ہیں اور انہیں تیار بھی کرتے ہیں. کبھی ہمارے یہاں طلبہ یونین کے نام پر، کبھی حسین حقانی کی شکل میں، کبھی پولیو کے قطرے پلانے والے شکیل آفریدی جیسے، کبھی مہاجر کارڈ کے نام پر الطاف حسین جیسے، کبھی ڈان لیکس کی اسٹوری چھاپنے والے سرل المیڈا اور اس کو اسٹوری دینے والے اور پھر اس کو بچانے والے لوگوں کی شکل میں اور اب انسانی حقوق کے نام پر پشتین جیسے بندے کی گرفتاری. اس کی گرفتاری پر پاکستان سے زیادہ احتجاج اور غم و غصہ تو افغانستان میں پایا جاتا ہے اور اب تو اس کی پشت پناہی ڈھکے چھپے لفظوں سے نہیں بلکہ افغان حکومتی سطح پر کی جا رہی ہے. لیکن ہمیشہ کی طرح جب پانی سروں کے اوپر سے گزر جاۓ، جب "سیل خوں شہر کی گلیوں" تک آ جاۓ، جب ہمارے شہر خون میں نہا جائیں۔ پھر ایک دم خیال آتا ہے۔ یہ تو بُرا ہو گیا۔

سمجھ نہیں آتی کہ ریاست کے محافظ کسی سانحہ کسی حادثہ کا انتظار کیوں کرتے ہیں؟ کونسی عقل ہے جو خودسوزی کو پاکستانیوں پر جائز کر دیتی ہے؟ جس طرح کے حالات سے پاکستانیوں کو گزرنا پڑتا ہے بلاوجہ غداروں کو زندہ رہنے دینے پر کیا یہ کسی غداری سے کم ہے؟

آپ نے لغت میں غداری‘ ملک دشمنی‘ بغاوت اور اس مفہوم کے کئی دیگر الفاظ دیکھے اور پڑھے ہونگے۔ ہوسکتا ہے کہ ہر شخص ان الفاظ کی تشریح اپنے انداز میں کرتا ہو اور کچھ لوگوں کی نظروں میں غدار درحقیقت غدار نہ ہوں اور ملک دشمن اصل میں ملک دشمن نہ ہوں۔ ہمارے پاس الفاظ کے کچھ ایسے ذخیرے بھی ہیں جو خطرناک سے خطرناک اصطلاحوں کے مفہوم تبدیل کرڈالتے ہیں‘ مثلاً انسانی حقوق اور جمہوری امنگیں وغیرہ وغیرہ۔ لیکن میرے خیال میں یہاں ہمیں رہنمائی اپنی تاریخ سے لینی چاہئے۔

اگر سرنگاپٹم کے قلعہ میں محصور ٹیپو سلطان شہید کے ساتھ اس کا دست راست میر جعفر غداری نہ کرتا تو آج برصغیر پاک و ہند کا یہ جغرافیہ ہوتا جو آپ کے سامنے ہے؟ اسی لیے علامہ اقبالؒ نے بھی میر جعفر کو ننگ ملت‘ ننگ دیں اور ننگ وطن کے ناموں سے یاد کیا ہے۔ اگر شریف مکہ کی غداری کے نتیجے میں خلافت عثمانیہ کا خاتمہ نہ ہوتا تو آج دنیا بھر میں مسلمانوں کی یہ حالت زار ہوتی جو آپ دیکھ رہے ہیں؟ اقبالؒ نے تاریخ کے اس موڑ پر بھی ببانگ دہل کہا ’’بیچتا ہے ہاشمی ناموس دین مصطفیٰؐ‘‘ بحیثیت مسلمان تاریخ میرے ہاتھ میں قدم قدم پر غداروں کی ایک فہرست تھما دیتی ہے اور جو قومیں اپنے غداروں کوسزا دینے میں کوتاہی برتا کرتی ہیں انہیں اس عمل کی قیمت بڑی بھاری ادا کرنی پڑتی ہے۔

محمّد فیصل

آج کی جنرل رانیاں

2020-01-01T11:37:00.000+03:00

مجھے ہے حکم اذاں

آج کی جنرل رانیاں

آجکل ہمارے ملک کی سیاست میں ایک نیا سیاسی بھونچال آیا ہوا ہے، اس کی وجہ کوئی اپوزیشن، عدلیہ، نیب یا کوئی سیکورٹی ادارہ نہیں بلکہ جنرل رانی کی معنوی اولاد حریم شاہ اور صندل خٹک نامی خواتین ہیں. چند دن پہلے موصوفہ نے وزیر ریلوے جناب شیخ رشید احمد کی ایک غیر اخلاقی ویڈیو کال پیش کی اور کل وزیر اطلاعات پنجاب جناب فیاض الحسن چوہان صاحب کی ایک آڈیو منظر عام پر آئی. اس سے پہلے محترمہ نے وزارت خارجہ کے دفتر میں بھی کچھ ویڈیوز ریکارڈ کر کے ملک و قوم کو وزیروں اور بیورو کریسی کی ترجیحات و دلچسبی سے اچھی طرح آگاہ کیا. حریم شاہ کے علاوہ صندل خٹک صاحبہ کی طرف سے بھی مختلف انکشافات کا سلسلہ جاری ہے، اور امید بلکہ یقین ہے کہ ان حضرات کے مداح اپنے سیاسی بتوں کو پاش پاش کرنے کی بجاۓ ان کا پر خلوص دفاع بھی کرتے ہوں گے. ہماری بدقسمتی ہے کہ پچھلے ستر سالوں سے مختلف ادوار میں ہمارے حکمرانوں اور وزراء کے ایسے درجنوں سکینڈل آتے رہے لیکن عوام کے قلوب و اذہان میں یہی ہے کہ جو جتنا بڑا چور اتنا بڑا لیڈر، اخلاقی و مالی طور پر جتنا کرپٹ ہے وہ معاشرے میں اتنا ہی معتبر ہے. ماضی کے اسکینڈلز مختلف نوعیت کے رہے، کبھی تو سیاسی رقابت کی آگ میں جلتے سیاسی مخالفین اپنے حریفوں کی کردار کشی کرتے رہے جیسے مرحومہ محترمہ بینظیر بھٹو کی غیر اخلاقی تصاویر بذریعہ ہیلی کاپٹر اہلیان پاکستان تک پہنچانے کا سہرا جناب نواز شریف کے سر تو ہے ہی مگر اقتدار کی غلام گردشوں میں چلتے پھرتے مہرے اس سیاسی حمام میں سب ننگے ہیں. کون ایسا ہے جو ایک دوسرے کی حرکتوں سے واقف نہیں؟ ایک دفعہ کا ذکر ہے کہ ایک جمشید دستی ہوا کرتا تھا، اس نے سوچا کہ پارلیمنٹ لاجز میں چلنے والی شراب و شباب کی کہانیاں عوام کے سامنے لائی جائیں، پھر چشم فلک نے اسی جمشید دستی کو پابہ زنجیر دیکھا، اس کی والدہ کا انتقال ہوا تو ماں کے جنازے پر بھی جانے نہ دیا گیا. پھر وہی جمشید دستی میڈیا پر روتا کرلاتا اور بین کرتا ہوا اور انہی خبیشوں سے سر عام معافی مانگتا ہوا دکھایا گیا کہ جن کو بے نقاب کرنے کا خبط اس کے ذہن پر سوار تھا

جنرل رانی ہماری حکومتی تاریخ کا ایک ضخیم لیکن رنگین باب تھی۔ اس کے سینے میں کئی راز ہائے سربستہ دفن تھے۔ وہ واحد’’ دلیر عورت‘‘ تھی جو یہ بتا سکتی تھی کہ کس کس دور میں اس کی کون کون سی ’’معاصر‘‘ ہم جولیوں نے ایوان ہائے اقتدار میں شراب و شباب کی محافل آراستہ کرنے کی ذمہ داری لے رکھی تھی۔ وائے افسوس ! یہ راز اُن کے پیوند خاک ہوتے ہی رزقِ خاک بن گئے۔ ان’’ جگردار‘‘ اور ’’چٹخارے دار‘‘ خواتین کو جنرل نیازی ’’خوشبودار دیوداسیاں‘‘ کہا کرتے تھے۔ ان دیو داسیوں نے اس معاشرے اور مملکت میں ’’پنج تارا ادا فروشی اور حیا فروشی‘‘ کو متعارف کروایا جس کے سب سے بڑے گاہک حکمران، وزراء اور جرنیل ہوا کرتے تھے. جنرل رانی ’’پنج تارا ادا فروشی‘‘ کی بانیوں میں سے ایک تھیں، جنرل یحییٰ خان کے عہد اقتدار میں جنرل رانی کا چرچا ہوا۔ ’’راجہ رانی‘‘ کی رنگ رلیوں اور چونچلوں کی ہوش ربا داستانیں یحییٰ خان کے ایوان اقتدار سے رخصت ہونے کے بعد منظر عام پر آئیں۔ رانی اور یحییٰ خان کے مابین گل و بلبل اور شمع و پروانہ کا سا تلازماتی تعلق تھا۔ یحییٰ خان ’بوجوہ‘ ان پر جان چھڑکتے تھے، اس دور کی بیورو کریسی اور سیاست کے کئی دیگر جرنیل بھی اقلیم اختر عرف جنرل رانی کی چشمِ سرمگیں سے شرابِ التفات کشید کرتے رہے۔ جنرل رانی کی رقابت اگر کسی سے تھی تو وہ ملکہ ترنم نور جہاں تھیں۔ اب یہ ایک کھلا راز ہے کہ یحییٰ خان کی محافل شبینہ میں نور جہاں بھی ساقی گری کے فرائض بحسن و خوبی ادا کرتی رہیں۔

وقت کے حکمران ان کے آستانے پر جبینِ نیاز لے کر حاضر ہوتے اور اپنے ’’شرارتی من‘‘ کی مرادیں پاتے۔ کھر گورنر بنے تو اس قسم کی اطلاعات موصول ہونا شروع ہوئیں کہ جنرل رانی کی ’’جلوہ گاہِ جمال و وصال‘‘ سازشوں کا گڑھ بن رہی ہے۔ نیلے آسمان کی بوڑھی آنکھوں نے اس طاقتور عورت کی دہلیز پر جانے وقت کے کتنے اعلیٰ افسران کو ناصیہ فرسائی کرتے دیکھا۔ آسمان نے رنگ بدلا، حالات نے پلٹا کھایا، لیل و نہار کی گردش نے کروٹ لی اور وہ کہاوت اپنا آپ منوا گئی کہ سدا بادشاہی صرف میرے رب کی ہے سو وہ بادشاہ بھی رزق خاک ہوئے وقت بدلا حکومتیں بدلیں، حکمران بدلے، وزراء بدلے مگر ایوان اقتدار کا چلن نہ بدلا. کبھی کسر شاہی کی زینت طاہرہ سید بنی تو کبھی گلوکارہ ترانہ، کبھی اداکارہ ریما تو کبھی ماڈل گرل آیان علی. اب جب حکومت بدلی ہے تو اب کہ فلم اسٹارز مہوش حیات کے علاوہ جدید دور کی ٹک ٹاک اسٹارز وزارت خارجہ کے دفاتر سے لیکر وزراء کے پرائیویٹ کمروں تک پائی جاتیں ہیں، افسوس سے کہنا پڑتا ہے کہ وقت بدل گیا مگر سیاست دانوں کے چلن نہیں.

شاید خواجہ ناظم الدین، لیاقت علی خان، چودھری محمد علی، محمد خان جونیجو اور جنرل ضیاء الحق کے سوا پاکستان کے اکثر حکمران کسی نہ کسی جنرل رانی کے زیر اثر رہے۔ ہر دور کسی نہ کسی جنرل رانی اور اس کی ’’بٹالین‘‘ کی حکمرانی کا دور ہے۔ جنرل رانی مر چکی مگر وہ مطمئن ہے کہ اس کی روح زندہ ہے۔ وہ مطمئن ہے کہ اس کے بعد بھی اقتدار کے ایوانوں میں کسی نہ کسی جنرل رانی کے قہقہوں اور چہچہوں پر دل و جان نثار کرنے والے رنگیلے یحییٰ خان کی باقیات موجود رہیں گی۔ جنرل رانی صرف ایک نام نہیں، وہ صرف ایک عورت نہیں بلکہ وہ ایک استعارہ اور ادارہ تھی۔ یہ ادارہ ناقابل تسخیر حد تک مستحکم ہو چکا ہے۔ جنرل رانی نے مقتدر طبقات کے ایوانوں کو ہرنیوں، تتلیوں، بلبلوں اور میناؤں سے سجانے کا فن متعارف کروایا تھا۔ یہ فن اب مکمل بالغ ہوتا نظر آتا ہے۔ جنرل رانی کل بھی ایوان اقتدر پر قابض تھی اور اس کی تربیت یافتہ کئی دیگر ’’کاریگر اور فنکار رانیاں‘‘ آج بھی ایوان ہائے اقتدار کی ’’انٹریئر ڈیکوریشن‘‘ میں مصروف ہیں۔ ایک تقریر کے دوران پاکستان کے زوال اور سقوط مشرقی پاکستان کا ذکر کرتے ہوئے آغا شورش کاشمیریؒ نے کہا تھا کہ "اس کے ذمہ داران ان گنت ہیں لیکن ان میں انگور کا پانی اور جنرل رانی نمایاں ہیں". الله پاکستان کے حکمران طبقے کو ہدایت دے. آمین

محمّد فیصل

تبدیلی آئی رے،

2019-12-17T16:09:00.002+03:00

مجھے ہے حکم اذاں

کاش کوئی آگے بڑھے اور سوشل میڈیا پر چلتی پولیس تشدد میں جاں بحق سانحہ ساہیوال کے مقتولین یا پولیس تشدد سے مرنے والے صلاح الدین کی ویڈیو ڈیلیٹ کر دے۔ اگر نہیں تو کم از کم وزیراعظم پاکستان جناب عمران خان ہی اپنی ٹویٹ کو ڈیلیٹ کر دیں، وہ بیانات وہ دبنگ اسٹائل اور غصیلہ لہجہ چند لمحوں کا تحفظ تو دے گیا مگر اس کے بعد مسلسل مایوسی دے رہا ہے۔ کبھی کبھی خالی الذہنی کے عالم میں، کبھی انٹرنیٹ یا سوشل میڈیا کی سرچ میں یہ ویڈیو سامنے آتی ہے تو مایوسی ، خوف اور رنج سے دل رکنے لگتا ہے۔ کاش کوئی یہ ویڈیو ڈیلیٹ کردے۔ اک قلمکار ہی نہیں کون ایسا ہوگا جس نے انسانی روپ میں ان باوردی درندوں کے قہقہے ماڈل ٹاؤن، ساہیوال اور صلاح الدین کیس میں نہ سنے ہوں؟ جو وہ اپنے ایسے گوشت پوشت کے انسانوں کو جانوروں کی طرح مارتے ہوے تفریح طبع کے لئے لگاتے تھے۔ لیکن نئے پاکستان میں کچھ ایسے بے حس لوگ بھی ہیں جو اشارہ ملنے پر ہر اس جرم کے دفاع کیلئے اتر آے ہیں جس کی کم از کم مذمت کرنا ہر ذی شعور پر لازم ہے۔ حاکم وقت کی خوشنودی کیلئے ہوتے ہیں کچھ ایسے لوگ بھی۔ حب جاہ، دولت دنیا، عہدہ منصب کا لالچ ایسے لوگوں کو لشکر یزید میں جا کھڑا کرتا ہے۔ سو اب ایسے رضاکار میدان میں اترے ہیں۔ وہ بھی سوشل میڈیا پر پولیس تشدد کا نشانہ بننے والوں کو کبھی دہشت گرد اور کبھی کسی ذہنی معذور شخص کو چور ثابت کرنے کی کوشش میں ہیں۔ کوئی اس کو کسی بڑے گینگ کا کارندہ ثابت کرنے کی کوشش میں ہلکان ہورہا ہے۔ ایک وہ رحیم یار خان کا ڈاکٹر ہے۔ طبیب کیا بس پیسے کمانے کی مشین ہے۔ جس نے لکھ دیا کہ مقتول پر کوئی تشدد نہیں ہوا۔ پھر وہ پولیس کا اعلیٰ افسر ہے۔جو یقینی طور سول سروس کا اعلی ترین امتحان اچھی پوزیشن میں پاس کرکے پولیس فورس میں آیا ہوگا۔حیرانگی ہوئی اس کو ٹی وی چینل پر شستہ انگریزی میں اس جرم کا دفاع کرتے ہوئے۔ ایک ویڈیو میں صلاح الدین کے مردہ دریدہ بدن کی تصویریں چل رہی تھیں۔ اور دوسری جانب اس اعلیٰ تعلیم یافتہ پولیس افسر کا انکار کہ تشدد تو ہوا ہی نہیں۔ بے غیرتی اور پیشہ وارانہ بے حسی کا ایسا نمونہ اپنی زندگی میں کبھی نہیں دیکھا ہوگا۔ وہ جو کسی نے کہا تھا کہ کوئی شرم ہوتی ہے کوئی حیا ہوتی ہے۔ لیکن ایسے تنخواہ داروں میں بالکل نہیں ہوتی۔ بس اگلے عہدے پر ترقی کی خواہش ہوتی ہے۔ اور اپنے سے کمزوروں پر طاقت کے اظہار کی جبلت۔ درندوں کی مانند۔ انسانیت کی اس سے بڑی تذلیل اور کیا ہوگی کہ تشدد سے چور آخری سانسیں لیتا، پانی مانگتا ہے۔ اور آگے فرمائش آتی ہے کہ کتے کہ طرح بھونک کر دکھاؤ۔ ڈھٹائی ، بے خوفی ، بے شرمی کا یہ عالم کہ اس سارے غیر انسانی تشدد کی ویڈیو بھی بنتی ہے۔ کیونکہ یہ نیا پاکستان ہے۔ پرانے پاکستان سے بھی زیادہ زبوں حال۔ سسکتا روتا کرلاتا پاکستان۔ پولیس مقابلے ، پولیس حراست میں ہلاکتیں بھی ہوتی تھیں. عمران خان ایک نئی امید کی کرن بن کر نکلا اور انتخابی کمپین کے دوران ہمیں بتایا گیا کہ بس اقتدار میں آتے ہی بیورو کرسی کو نکیل ڈال دی جائے گی۔ تھانہ اور پٹواری کلچر تبدیل ہوجائے گا۔ ہر خاص و عام کو انصاف ملے گا، پولیس تمھاری محافظ ہو گی، کرپشن و رشوت کا خاتمہ ہو گا، لیکن ڈیڑھ سال میں سب سے بڑے صوبے کی حالت یہ ہے کہ پولیس حراست میں ہلاکتوں کا سکور درجنوں تک پہنچ چکا۔ نہ جانے خفیہ نجی عقوبت خانوں میں کتنے بے جان لاشے منتظر ہیں کہ کوئی خفیہ ویڈیو منظر عام پر آئے اور ان کے لواحقین کو خبر ہوجائے۔ نئے پاکستان میں تو ہر شہری کو اپنے پاس ، ارد گرد کسی ویڈیو کیمرہ کا بندوبست رکھنا ہوگا۔ تاکہ جرم کا ، ظلم کا کوئی ثبوت تو ہو۔ ورنہ تو تاریک راہوں میں موت کی گھاٹ اتر جائیں گے اور کسی کو خبر بھی نہیں ہوگی۔ صلاح الدین کے دانستہ متشدد قتل کا سراغ بھی کبھی نہ ملتا۔ سوشل میڈیا پر شور مچا تو پنجاب کے وسیم اکرم پلس کا نظام انصاف حرکت میں آیا۔ کمیٹیاں بن رہی ہیں۔ کمشن قائم ہورہے ہیں۔ بیانات داغے جارہے ہیں۔ نیا پاکستان کی ایک ندرت یہ بھی ہے کہ اب حاکم وقت مظلوم کے آنسو پونچھنے کیلئے ، داد رسی ، پرسے دلا سے کیلئے اس کو اپنے گھر بلاتا ہے۔ کمال ہے۔ ہے ناں نیا پاکستان۔ سانحہ ساہیوال کے مظلوموں کو بھی ایک روز گورنر ہاؤس بلایا گیا۔ جہاں بنی گالا سے آئے حاکم وقت نے ان بچوں کے ساتھ فوٹو سیشن کیا۔ ان بچوں کے ساتھ جن سے اس نے ماہ جنوری میں بذریعہ ٹویٹ وعدہ کیا تھا۔ ان کو ہی نہیں پوری قوم سے کہا تھا۔ قطر سے واپسی پر ظالموں کو عبرت کی مثال بنا دوں گا۔ کوئی اچھا فوٹو گرافر جائے اور تصویر بنائے۔ عبرت کی تصویر وہ معصوم بچ گئے ہیں یا ان کے قاتل؟ جن میں سے کچھ عہدوں پر بحال بھی ہونے کی اطلاع ہے۔ پنجاب میں کئی آئی جی تبدیل ہوگئے۔ اصلاحاتی کمیٹی کا سربراہ مستعفی ہوچکا۔ ہر روز تبادلوں کے جھکڑ چلتے ہیں۔ حکومت یا وزیروں سے نسبت رکھنے والے کسی فرد کی پیشانی پر بل آجائے تو پولیس افسر بیک جنبش قلم تبدیل ہوجاتا ہے۔ کچھ دن میڈیا پر وا ویلا مچتا ہے۔ اور پھر سارا معاشرہ چپ کی چادر اوڑھ لیتا ہے۔ اگلے سانحہ کے انتظار میں۔ کسی نئی تحقیقاتی کمیٹی کے انتظار میں۔ کسی نئے کمیشن کی خبر سننے تک۔ حاکم وقت کی انصاف پسندی کیلئے پروگرام کرنے کی غرض سے۔ ساہیوال میں پولیس قتل عام کرتی ہے، صلاح الدین پر تشدد پولیس کرتی ہے. اس سے پہلے بھی ایسا ہی ہوتا رہا کہ سیالکوٹ میں دو بھائی سرعام تشدد کر کے ہلاک کر دیئے گئے۔ ماڈل ٹاون کے نام پر شیخ شعبدہ نے خوب سیاست کی۔ انجام کار کچھ بھی نہ ہوا۔ آج تک کسی پولیس حراست قتل ، کسی جعلی پولیس مقابلے کے مرتکب افسر کو سزا نہیں ملی۔ آئندہ بھی نہیں ملے گی۔ جب تک پولیس اصلاحات نہیں کی جاتیں۔ جب تک منہ زور پولیس اہلکاروں کو حاصل اندھے اختیارات کو قانون کی لگام نہیں ڈالی جاتی۔ جب تک پولیس اہلکاروں کو انسانی جان کی حرمت کا سبق نہیں پڑھایا جاتا۔ جب تک تفتیش اور سراغ رسانی کیلئے ٹیکنالوجی کی مدد نہیں لی جاتی۔ یہ سب کچھ ہوگا معلوم نہیں۔ کون کرے گا۔ معلوم نہیں۔

محمّد فیصل

ہمارا اقبال بلند ہو۔

2019-11-23T20:36:00.001+03:00

مجھے ہے حکم اذاں

’ﮨﻤﺎﺭﺍ اقبال بلند ﮨﻮ‘

"ہمارا اقبال بلند ہو" ایک "پڑهے لکهے" ﺳﯿﺎﺳﺘﺪﺍﻥ ﺻﺎﺣﺐ (جن کا نام نہیں لکهنا) ﻧﮯ ﺍﺳﭩﯿﺞ ﭘﺮ آتے ﮨﯽ ﯾﮧ نعرہ بلند ﮐﯿﺎ تو ﻣﯿﮟ ﺗﻮ حیران رہ ﮔﯿﺎ، کہ یہ کیا..؟ ﯾﮧ پہلا ﺷﺨﺺ ﺗﮭﺎ ﺟﻮ ﺍﭘﻨﮯ نعرے ﺧﻮﺩ لگا ﺭﮨﺎ ﺗﮭﺎ مگر ﺑﻌﺪ ﻣﯿﮟ علم ﮨﻮﺍ ﮐﮧ حکیم الامت علامہ ﻣﺤﻤﺪ ﺍﻗﺒﺎﻝؒ ﮐﮯ یوم وفات ﮐﮯ ﺣﻮﺍﻟﮯ ﺳﮯ منعقدہ ﺍﯾﮏ خصوصی تقریب ﻣﯿﮟ ﺳﯿﺎﺳﺘﺪﺍﻥ ﺻﺎﺣﺐ مہمان خصوصی تهے ﺍﻭﺭ ’’ﮨﻤﺎﺭﺍ اقبال‘‘ ﺳﮯ ﺍﻥ ﮐﯽ مراد علامہ ﺍﻗﺒﺎﻝؒ ﺗﮭﮯ. علامہ اقبال ﮐﯽ شاعری ﮐﺎ ﯾﮧ رخ میرے ﻟﯿﮯ ﮐﭽﮫ ﻧﯿﺎ نہیں ﺗﮭﺎ کیونکہ ﺍﺱ ﻗﻮﻡ ﮐﮯ لیے علامہ اقبال ﮐﯽ شاعری اُس اُس مقام ﭘﺮ سننے ﮐﻮ ﻣﻠﺘﯽ ﮨﮯ ﮐﮧ....... الامان الحفیظ. مثلاًً بازار ﺳﮯ گزرتے ہوئے ﯾﮧ فقرہ سننے ﮐﻮ ﻣﻼ ﮐﮧ

"ہے ﺩﯾﮑﮭﻨﮯ ﮐﯽ چیز ﺍﺳﮯ بار بار ﺩﯾﮑﮫ"

میرے جیسے عام آدمی ﮐﮯ ﻟﯿﮯ ﺍﺱ طرح ﮐﮯ "اشعار" ﺍﻭﺭ ﺍﻥ ﮐﺎ مقام ﺳﻤﺠﮭﻨﺎ کافی مشکل کام ﮨﻮﺗﺎ ﮨﮯ مگر

"مومن ﮐﯽ فراست ہو ﺗﻮ کافی ﮨﮯ اشارہ"

اگرچہ "ذوق دید" ﻧﮯ ﺍﺑﮭﯽ مجهے "دیدہ بینا" عطا نہیں کی اور میری ﺁﻧﮑﮭﯿﮟ ﻧﮩﯿﮟ کهولیں مگر ﺟﺲ "چیز" کے بارے ﻣﯿﮟ ﯾﮧ ﮐﮩﺎ ﺟﺎ ﺭﮨﺎ ﺗﮭﺎ ﺍﺳﮯ ﺩﯾﮑﮭﻨﮯ ﮐﮯ ﺑﻌﺪ واقعی ﺍﻧﺪﺍﺯﮦ ﮨﻮ ﮔﯿﺎ کہ ﺩﻧﯿﺎ میں فقط

"مرداﻥِ حر ﮐﯽ آنکھ ﮨﮯ بینا"

اس کے علاوہ بهی اقبالؔ رحمۃ اللہ علیہ کی مظلومیت کی حد ہے کے جس کو جو شعر اچها لگا اسے اقبالؔ کے سر تهوپ دیا اور اس کی بے شمار مثالیں آجکل سوشل میڈیا پر موجود ہیں.... خصوصاً کسی عام شاعر کے مصرع کے آخر میں "اے اقبال" لکهنے کے بعد حضرت علامہ اقبالؔ کی تصویر سے چسپاں کیا جاتا ہے اور ہمارے علم کی حد تو یہ ہے کہ ہم لوگ بهی بغیر سوچے سمجھے اس کو بڑی سعادت مندی سے اپنے دوستوں تک پہنچا دیتے ہیں....

ﺁﭖ ﮐﺴﯽ ﺑﮭﯽ ﺩﻥ ﺷﺎﻡ ﮐﺎ ﮐﻮﺋﯽ پاکستانی اخبار ﭘﮑﮍ لیں اخبار ﻣﯿﮟ طرح طرح ﮐﮯ’’ﺭﻧﮓ‘‘ ﺩﯾﮑﮭﻨﮯ ﮐﮯ ﺑﻌﺪ ﺁﭖ کو ﺑﮭﯽ یقین ﮨﻮ جائے گا ﮐﮧ ﺍﻗﺒﺎﻝؒ ﻧﮯ بالکل درست فرمایا تھا کہ

"وجود زن ﺳﮯ ﮨﮯ تصویر ﮐﺎﺋﻨﺎﺕ ﻣﯿﮟ ﺭﻧﮓ"

حد تو ﯾﮧ ﮨﮯ ﮐﮧ گرلز کالج ﮐﮯ ﺑﺎﮨﺮ کهڑے ﮨﻮﻧﮯ ﻭﺍﻟﮯ منچلے ﺑﮭﯽ اقبال ﮐﻮ ﮨﯽ ﯾﺎﺩ ﮐﺮﺗﮯ ہوئے "ﻣﺤﺒﺖ ﻓﺎﺗﺢ ﻋﺎﻟﻢ" ﮐﯽ ﮔﺮﺩﺍﻥ ﺍﻻﭘﺘﮯ ﮨﯿﮟ. ﺍﻭﺭ ﺍﻥ ﮐﮯ’’ﯾﻘﯿﻦ ﻣﺤﮑﻢ ﺍﻭﺭ ﻋﻤﻞ ﭘﯿﮩﻢ‘‘ ﺳﮯ ﯾﮧ ﺍﻧﺪﺍﺯﮦ ﺑﮭﯽ ﮨﻮ ﺟﺎﺗﺎ ﮨﮯ ﮐﮧ ﻭﮦ ﮐﺲ ﺩﺭﺟﮧ ﺍﻗﺒﺎﻝؒ ﮐﮯ ﻋﺎﺷﻖ ﭘﺎﺋﮯ ﮔﺌﮯ ﮨﯿﮟ. ﺍﮔﺮ ﺁﭖ ﺍﻗﺒﺎﻝؒ ﻓﮩﻤﯽ ﺍﻭﺭ ﺍﻗﺒﺎﻝؒ ﺷﻨﺎﺳﯽ ﮐﯽ ﻣﻨﺰﻟﻮﮞ ﺳﮯ ﺁﺷﻨﺎ ﮨﻮﻧﺎ ﭼﺎﮨﺘﮯ ﮨﯿﮟ ﺗﻮ ﯾﻮﻡِ ﺍﻗﺒﺎﻝؒ ﮐﮯ ﺣﻮﺍﻟﮯ ﺳﮯ ﮐﺴﯽ ﺑﮭﯽ ﺗﻘﺮﯾﺐ ﻣﯿﮟ ﭼﻠﮯ ﺟﺎﺋﯿﮟ، ﺍﮔﺮ ﻣﺎﺋﯿﮏ ﮐﯿﻤﻮﻧﺴﭧ ﺻﺎﺣﺐ ﮐﮯ ﮨﺎﺗﮫ ﻣﯿﮟ ﮨﮯ ﺗﻮ ﭘﮭﺮ ﺗﻘﺮﯾﺮ ﮐﺎ ﺁﻏﺎﺯ

"ﺍﭨﮭﻮ ﻣﯿﺮﯼ ﺩﻧﯿﺎ ﮐﮯ ﻏﺮﯾﺒﻮﮞ ﮐﻮ ﺟﮕﺎ ﺩﻭ"

ﺟﯿﺴﮯ ﻗﺎﺗﻞ ﻣﺼﺮﻋﮯ ﺳﮯ ﮨﻮ ﮔﺎ ﺍﻭﺭ ﭘﻮﺭﮮ ﺯﻭﺭﻭﮞ ﭘﺮ ﺛﺎﺑﺖ ﮐﯿﺎ ﺟﺎﺋﮯ ﮔﺎ ﮐﮧ ﺍﻗﺒﺎﻝؒ ﻧﮧ ﺻﺮﻑ ﮐﯿﻤﻮﻧﺴﭧ ﻓﮑﺮ ﮐﮯ ﺣﺎﻣﻞ ﺗﮭﮯ ﺑﻠﮑﮧ ﯾﮧ ﻧﻈﻢ ﺑﮭﯽ ﺍﻧﮩﻮﮞ ﻧﮯ "ﻟﯿﻨﻦ"، "ﺳﭩﺎﻟﻦ" ﺍﻭﺭ "ﻣﺎﺅﺯﮮ ﺗﻨﮓ" ﮐﮯ ﮐﮩﻨﮯ ﭘﺮ ﻟﮑﮭﯽ ﺗﮭﯽ ﺗﺎ ﮐﮧ ﮨﻨﺪﻭﺳﺘﺎﻥ ﻣﯿﮟ ﺑﮭﯽ ﮐﯿﻤﻮﻧﺰﻡ ﮐﯽ ﺑﻨﯿﺎﺩ ﺭﮐﮭﯽ ﺟﺎ ﺳﮑﮯ، ﻭﮦ ﺗﻮ ﺑُﺮﺍ ﮨﻮ ﯾﮩﺎﮞ ﮐﮯ ﻟﻮﮔﻮﮞ ﮐﺎ ﮐﮧ ﻭﮦ ﺍﻗﺒﺎﻝؒ ﮐﻮ صرف اقبال ﺳﻤﺠﮫ ﺳﮑﮯ، ﺍﺱ ﮐﮯ ﺑﻌﺪ ﺍﯾﮏ ﻣﺬﮨﺒﯽ ﺭﮨﻨﻤﺎ ﺁﺋﯿﮟ ﮔﮯ ﺍﻭﺭ ﻓﺮﻣﺎﺋﯿﮟ ﮔﮯ ﮐﮧ ﺍﻗﺒﺎﻝؒ ﺩﺭﺍﺻﻞ ﺻﺎﺣﺐِ ﺭﺍﺯ ﺍﻭﺭ ﺻﺎﺣﺐِ ﺣﺎﻝ ﺗﮭﮯ، ﻭﮦ ﺗﻮ ﺧﻼﻓﺖ ﮐﮯ ﺣﺎﻣﯽ ﺗﮭﮯ ﺍﺱ ﻟﺌﮯ ﺳﻘﻮﻁِ ﺧﻼﻓﺖِ ﻋﺜﻤﺎﻧﯿﮧ ﭘﺮ ﺁﭖ ﻧﮯ ﻓﺮﻣﺎﯾﺎ ﮐﮧ

"ﭼﺎﮎ ﮐﺮ ﺩﯼ ﺗُﺮﮎِِ ﻧﺎﺩﺍﮞ ﻧﮯ ﺧﻼﻓﺖ ﮐﯽ ﻗﺒﺎ"

"ﺳﺎﺩﮔﯽ ﻣﺴﻠﻢ ﮐﯽ ﺩﯾﮑﮫ، ﺍﻭﺭﻭﮞ ﮐﯽ ﻋﯿﺎﺭﯼ ﺑﮭﯽ ﺩﯾﮑﮫ"

ﺁﭖ ﮐﯽ ﺗﻮ ﺷﺎﻋﺮﯼ ﻣﯿﮟ ﺟﺎ ﺑﺠﺎ ﯾﮩﯽ ﭘﯿﻐﺎﻡ ﻣﻠﺘﺎ ﮨﮯ، ﺍﺳﯽ ﻟﺌﮯ ﮐﮩﯿﮟ آپ

"ﺍﯾﮏ ﮨﻮﮞ ﻣﺴﻠﻢ ﺣﺮﻡ ﮐﯽ ﭘﺎﺳﺒﺎﻧﯽ ﮐﮯ ﻟﺌﮯ

ﻧﯿﻞ ﮐﮯ ﺳﺎﺣﻞ ﺳﮯ ﻟﯿﮑﺮ ﺗﺎﺑﺨﺎﮎ ﮐﺎﺷﻐﺮ"

ﮐﺎ ﭘﯿﻐﺎﻡ ﺩﯾﺘﮯ ﮨﯿﮟ ﺍﻭﺭ ﮐﮩﯿﮟ ﭘﺮ

"ﺍﭘﻨﯽ ﻣﻠﺖ ﭘﺮ ﻗﯿﺎﺱ ﺍﻗﻮﺍﻡ ﻣﻐﺮﺏ ﺳﮯ ﻧﮧ کر

ﺧﺎﺹ ﮨﮯ ﺗﺮﮐﯿﺐ ﻣﯿﮟ ﻗﻮﻡ ﺭﺳﻮﻝ ﮨﺎﺷﻤﯽ"

ﮐﯽ ﺗﺮﻏﯿﺐ ﺩﯾﺘﮯ ﮨﯿﮟ... ﺍﻗﺒﺎﻝ ﺗﻮ وحدتِ ﺍﻣﺖ ﻣﺴﻠﻤﮧ ﮐﮯ ﻗﺎﺋﻞ ﺗﮭﮯ ﻣﮕﺮ ﺑُﺮﺍ ﮨﻮﺍ ﺍﺱ ﺍﻣﺖ ﮐﺎ ﺟﻮ ﺍُﻥ ﮐﺎ ﭘﯿﻐﺎﻡ ﻧﮧ ﭘﺎ ﺳﮑﯽ... ﺍﮔﻠﮯ ﻟﻤﺤﮯ ﺟﯿﺴﮯ ﮨﯽ ﻣﺎﺋﮏ ﮐﺴﯽ ﻧﯿﺸﻨﻠﺴﭧ ﺭﮨﻨﻤﺎ ﮐﮯ ﮨﺎﺗﮫ ﺁﺋﮯ ﮔﺎ، ﺁﭖ ﮐﻮ ﺳﺐ ﺳﮯ ﭘﮩﻠﮯ

"ﭼﯿﻦ ﻭ ﻋﺮﺏ ﮨﻤﺎﺭﺍ ﮨﻨﺪﻭﺳﺘﺎﻥ ﮨﻤﺎﺭﺍ" ﺟﯿﺴﺎ ﻣﺼﺮﻋﮧ ﺳﻨﻨﮯ ﮐﻮ ﻣﻠﮯ ﮔﺎ ﻟﯿﮑﻦ ﮐﭽﮫ ﺩﯾﺮ ﺑﻌﺪ ﺍﯾﮏ ﺩﻭﺳﺮﮮ ﻟﯿﮉﺭ ﺻﺎﺣﺐ

"ﺍﻥ ﺗﺎﺯﮦ ﺧﺪﺍﺅﮞ ﻣﯿﮟ ﺑﮍﺍ ﺳﺐ ﺳﮯ ﻭﻃﻦ ﮨﮯ

ﺟﻮ ﭘﯿﺮﮨﻦ ﮨﮯ ﺍﺱ ﮐﺎﻣﺬﮨﺐ ﮐﺎ ﻭﮦ ﮐﻔﻦ ﮨﮯ"

ﮐﮯ ﺫﺭﯾﻌﮯ ﺁﭖ ﮐﻮ ﺍﯾﺴﯽ ﺑﮭﻮﻝ ﺑﮭﻠﯿﻮﮞ ﻣﯿﮟ ﮔﻢ ﮐﺮﯾﮟ ﮔﮯ ﮐﮧ ﺁﭖ ﺳﻮﭼﺘﮯ ﺭﮦ ﺟﺎﺋﯿﮟ ﮔﮯ ﮐﮧ ﮐﯿﺎ ﻭﺍﻗﻌﯽ علامہ محمد ﺍﻗﺒﺎﻝؒ ﻧﻈﺮﯾﺎﺕ ﮐﺎ ﻣﻐﻠﻮﺑﮧ ﻗﺴﻢ ﮐﯽ ﺷﺨﺼﯿﺖ ﺗﮭﮯ.....؟ جی نہیں ! بلکہ بالکل نہیں..... ان تمام اشعار اور نظریات کو سمجهنے کے لیے آنکهوں سے فرقے واریت، تعصب، قومیت، اور بغض و عناد کی عینک اتارنی ہو گی.... مگر ﮨﻤﺎﺭﮮ ﯾﮩﺎﮞ ﺗﻮ ﺍﻗﺒﺎﻝ ﺑﮭﯽ ﺍﮎ ﺟﻨﺲ ﺑﺎﺯﺍﺭ ﮐﯽ ﻃﺮﺡ ﺑﮑﺘﮯ ﮨﯿﮟ... ﺻﺒﺢ ﺷﺎﻡ ﺟﻤﮩﻮﺭﯾﺖ ﮐﺎ ﺭﺍﮒ ﮔﺎﻧﮯ ﻭﺍﻟﻮﮞ ﻧﮯ ﺍﻗﺒﺎﻝ ﮐﻮ ﺑﺲ

"ﺳﻠﻄﺎﻧﯽ ﺟﻤﮩﻮﺭ ﮐﺎ ﺁﺗﺎ ﮨﮯ ﺯﻣﺎﻧﮧ

ﺟﻮ ﻧﻘﺶ ﮐﮩﻦ ﺗﻢ ﮐﻮ ﻧﻈﺮ ﺁﺋﮯ ﻣﭩﺎ ﺩﻭ"

ﺗﮏ ﮨﯽ ﭘﮍﮬﺎ ﮨﮯ ﻣﮕﺮ ﻣﺎﺭﺷﻞ ﻻﺀ ﮐﮯ ﺣﺎﻣﯿﻮﮞ ﻧﮯ ﺗﻮ ﮐﻠﯿﺎﺕ ﺍﻗﺒﺎﻝؒ ﻣﯿﮟ "ﺩﯾﻮ ﺍﺳﺘﺒﺪﺍﺩ ﺟﻤﮩﻮﺭﯼ ﻗﺒﺎ ﻣﯿﮟ ﭘﺎﺋﮯ، کب ﺗﻮ ﺳﻤﺠﮭﺘﺎ ﮨﮯ ﯾﮧ ﺁﺯﺍﺩﯼ ﮐﯽ ﮨﮯ ﻧﯿﻠﻢ ﭘﺮﯼ"

ﺍﻭﺭ

"ﺟﻤﮩﻮﺭﯾﺖ ﺍﮎ ﻃﺮﺯ ﺣﮑﻮﻣﺖ ﮨﮯ ﮐﮧ ﺟﺲ ﻣﯿﮟ ﺑﻨﺪﻭﮞ ﮐﻮ ﮔﻨﺎ ﮐﺮﺗﮯ ﮨﯿﮟ، ﺗﻮﻻ ﻧﮩﯿﮟ ﮐﺮﺗﮯ"

ﺟﯿﺴﮯ ﺍﺷﻌﺎﺭ ﺑﮭﯿﭙﮍﮪ ﺭﮐﮭﮯ ﮨﯿﮟ، ﻣﺬﮨﺐ ﮐﮯ ﻧﺎﻡ ﭘﺮ، ﺟﮩﺎﺩﯼ ﻟﯿﮑﭽﺮ ﮐﮯ ﻧﺎﻡ ﭘﺮ، ﺳﯿﺎﺳﺖ ﮐﺮﻧﮯ ﻭﺍﻟﮯ

"ﺟﺪﺍ ﮨﻮ ﺩﯾﮟ ﺳﯿﺎﺳﺖ ﺳﮯ ﺗﻮ ﺭﮦ ﺟﺎﺗﯽ ﮨﮯ ﭼﻨﮕﯿﺰﯼ" ﺟﯿﺴﮯ ﺍﺷﻌﺎﺭ ﭘﺮ ﻋﺎﺷﻖ ﮨﯿﮟ ﺍﻭﺭﺟﻮ ﺫﺭﺍ ﺳﯿﮑﻮﻟﺮ ﻗﺴﻢ ﮐﮯ ﻟﻮﮒ ﮨﯿﮟ ﻭﮦ

"ﯾﮧ ﺑﺘﺎﻥِ ﻋﺼﺮ ﺣﺎﺿﺮ ﮐﮧ ﺑﻨﮯ ﮨﯿﮟ ﻣﺪﺭﺳﮯ ﻣﯿﮟ ﻧﮧ ﺍﺩﺍﺋﮯ ﮐﺎﻓﺮﺍﻧﮧ، ﻧﮧ ﺗﺮﺍﺵ ﺁﺯﺭﺍﻧﮧ" ﺟﯿﺴﮯ ﺍﺷﻌﺎﺭ ﺳﮯ ﺁﮔﮯ ﻧﮩﯿﮟ ﺑﮍﮪ ﺳﮑﮯ ۔ ﺍﮨﻞ ﺗﺼﻮﻑ ﮐﮯ ﮨﺎﮞ ﺍﻗﺒﺎﻝ ﮐﮯ ﮐﻞ ﮐﻼﻡ ﮐﺎ ﺣﺎﺻﻞ ﺻﺮﻑ ﯾﮧ ﺍﯾﮏ ﺷﻌﺮ ﮨﮯ ﮐﮧ

"ﮔﻼ ﺗﻮ ﮔﮭﻮﻧﭧ ﺩﯾﺎ ﺍﮨﻞ ﻣﺪﺭﺳﮧ ﻧﮯ ﺗﯿﺮﺍ ﮐﮩﺎﮞ ﺳﮯ ﺁﺋﮯ ﺻﺪﺍ ﻻ ﺍﻟﮧ ﺍﻻ ﺍﻟﻠﮧ" ﻣﮕﺮ ﺟﮩﺎﺩ ﮐﮯ ﺩﺍﻋﯿﻦ ﺍﻟﻔﺎﻅ ﻭ ﻣﻌﻨﯽ ﻣﯿﮟ ﺗﻔﺎﻭﺕ ﻧﮩﯿﮟ ﻟﯿﮑﻦ

"ﻣﻼ ﮐﯽ ﺍﺫﺍﮞ ﺍﻭﺭ ﻣﺠﺎﮨﺪ ﮐﯽ ﺍﺫﺍﮞ ﺍﻭﺭ"

ﺟﯿﺴﮯ ﺍﺷﻌﺎﺭ ﮐﻮ ﮨﯽ ﺍﻗﺒﺎﻝ ﮐﺎ ﮐﻞ ﺍﺛﺎﺛﮧ ﻭ ﮐﻞ ﮐﺎﺋﻨﺎﺕ تصور ﮐﯿﮯ ﺑﯿﭩﮭﮯ ﮨﯿﮟ. ﻏﺮﺽ ﺁﭖ ﮐﺎ ﺗﻌﻠﻖ ﮐﺴﯽ ﺑﮭﯽ ﺷﻌﺒﮧ ﺯﻧﺪﮔﯽ ﺳﮯ ﮨﻮ ﺁﭖ ﮐﻮ اور مجهے ﻗﻄﻌﺎً ﮐﺴﯽ ﻓﮑﺮ ﮐﯽ ﺿﺮﻭﺭﺕ ﻧﮩﯿﮟ ﮨﮯ ﮐﯿﻮﻧﮑﮧ ﺍﻗﺒﺎﻝؒ ہمارے ہی تهے ہمارے ہی ہیں، ﺁﭖ ﮐﺴﯽ ﺑﮭﯽ ﻓﮑﺮ، ﮐﺴﯽ ﺑﮭﯽ ﻧﻈﺮﯾﮯ ﮐﮯ ﺣﺎﻣﻞ ﮨﻮﮞ، ﮐﻮﺋﯽ ﻓﺮﻕ ﻧﮩﯿﮟ ﭘﮍﺗﺎ ﮐﯿﻮﻧﮑﮧ ﺍﻗﺒﺎﻝؒ ﻧﮯ ﺍﭘﻨﮯ ﮐﻼﻡ ﻣﯿﮟ ﺁﭖ ﮐﯽ ﻓﮑﺮ ﻭ ﺳﻮﭺ ﮐﯽ ﺗﻘﻮﯾﺖ ﮐﺎ ﺗﻤﺎﻡ ﺳﺎﻣﺎﻥ ﻣﮩﯿﺎ ﮐﯿﺎ ﮨﮯ. ﺑﺲ ﺍﮔﺮ ﺿﺮﻭﺭﺕ ﮨﮯ ﺗﻮ ﺍﺱ ﮐﻼﻡ ﮐﻮ ﮐﮭﻮﻟﻨﮯ ﺍﻭﺭ ﭘﮍﮬﻨﮯ ﮐﯽ... اس اقبالؔ فہمی کی برکت سے ہی بغض و عناد کا خاتمہ ممکن ہے اسی میں بقاء کا راز ہے، در خود شناسی ہی خدا شناسی ہے.

"اپنے من میں ڈوب کر پا جا سراغِ زندگی"

یقین کریں کہ ﺍﮔﺮ اپنے من میں ڈوب کر ہم لوگ سراغِ زندگی پا گئے یا ﺍﯾﮏ ﺑﺎﺭ ﺁﭖ ﮐﻮ اور مجهے ﺍﻗﺒﺎﻝ ﻓﮩﻤﯽ ﮐﯽ ﻣﻨﺰﻝ ﻋﻄﺎ ﮨﻮ ﮔﺌﯽ ﺗﻮ ﭘﮭﺮ ہم ﺑﮭﯽ ﯾﮧ ﮐﮩﺘﮯ ﮨﻮﺋﮯ ﻧﮧ ﺗﮭﮑﯿﮟ ﮔﮯ ﮐﮧ "ﮨﻤﺎﺭﺍ ﺍﻗﺒﺎﻝ ﺑﻠﻨﺪ ﮨﻮ"

اور سچ میں ہمارا اقبال بلند ہو گا اقوام عالم میں..... دو جہانوں میں....

محمد فیصل

علامہ محمد اقبال اور عید میلاد النبی صلی اللہ علیہ وسلم

2019-11-10T16:10:00.000+03:00

"کفایت شعاری"

2019-11-08T11:25:00.005+03:00

مجھے ہے حکم اذاں

"کفایت شعاری"

کسی سیانے کا قول ہے کہ "تعلیم کی کمی کو تربیت اچھی طرح ڈھانپ لیتی ہے مگر تربیت کے شگاف کو تعلیم کبھی پورا نہیں کر سکتی"

اسلام آباد میں جاری آزادی مارچ میں شامل مدارس کے طلباء کی میڈیا سے کی گئی گفتگو کی ویڈیوز آج کل سوشل میڈیا پر گردش کر رہی ہیں جس میں ٹیلی ویژن چینل کا نمائندہ لانگ مارچ اور دھرنے کے شرکاء سے عمومی سوال پوچھتا ہے کہ استعفی کیوں مانگتے ہو؟ اور جواب میں کہا جاتا ہے کہ عمران خان یہودی ایجنٹ ہے اور اس کے بچے امریکہ میں ہیں۔ پوچھا آپکو کیسے پتہ کہ یہ یہودی ایجنٹ ہے تو فرماتے ہیں کہ ہمارے اساتذہ و قائدین نے ہمیں بتایا۔ دو دن تک ویڈیو گردش کرتی رہی جس کے نتیجے میں علماء کرام نے اپنے مریدوں، شاگردوں کو منع کیا کہ میڈیا سے بات نہ کی جائے تاکہ نیا کوئی نمونہ دنیا کے سامنے نہ آ جائے۔

مدارس میں پڑھنے والے ایسے افراد کو دیکھ کر افسوس ہوا کہ دنیا کا سب سے اعلی علم یعنی علم دین حاصل کرنے والے مسلمانوں کی ذہنی حالت کیسی ہے؟ مدارس میں دینی تعلیم کے ساتھ ساتھ تربیت کا معیار کیا ہے اس کا نمونہ دارالحکومت کی سڑکوں پر نظر آ رہا ہے۔

‏ہماری خوراک صرف وہی نہیں ہوتی کہ جو ہم کھاتے پیتے ہیں، بلکہ ہم جو دیکھتے، سنتے اور پڑھتے ہیں، جنکے ساتھ اٹھتے بیٹھتے ہیں رابطے رکھتے ہیں. ‏اسی طرح ہم کن معاملات کو اپنے دل و دماغ میں جذباتی، نفسیاتی جگہ دیتے ہیں کیونکہ یہ سب بھی ہماری خوراک ہی کا حصہ ہوتا ہے! کچھ مدارس کا معاملہ تو یہ ہے کہ یہاں طالبعلموں کی شکل میں اسلام کی سربلندی کے لیے مسلمان نہیں بلکہ مختلف مسالک کے اندھے پیروکار، سوچنے سمجھنے کی صلاحیت سے عاری اور لکیر کے فقیر غلام پیدا کیے جا رہے ہیں۔ جو پیر یا مدرس نے کہہ دیا وہی حرف آخر ہے۔

ان "پیروں علماء کے ذریعے مریدوں" کی جس طرح تربیت ہو رہی ہے وہ بھی انتہائی اذیت ناک ہے، پیر صاحب جونہی اپنے دولت خانہ کی دہلیز سے باہر یا اپنی قیمتی گاڑی سے باہر قدم رکھتے ہیں تو دروازے پر نظریں گاڑے مریدین اور شاگردوں پر گویا نزع کی کیفیت طاری ہو جاتی ہے۔ ہاؤ ہو کی صدائیں بلند ہوتی ہیں، کوئی شوں شوں کی آواز نکالتا ہے کوئی تالیاں بجاتا ہے، کوئی درود و سلام پڑھتا ہے، کوئی نعرے لگاتا ہے کوئی جوتے اتارتا ہے۔ کوئی کچھ کرتا ہے اور کوئی کچھ کرتا ہے۔ اب ملاقات کا سلسلہ شروع ہوتا ہے، پیر صاحب مریدوں کے جراثیم سے بچنے کے لئے ہاتھوں پہ دستانے چڑھا لیتے ہیں، کوئی مرید قدموں میں گرا ہوا ہے، کسی نے گھٹنے تھام رکھے ہیں، کوئی کندھوں کو بوسے دے رہا ہے، کوئی پشت سے چمٹا ہوا ہے، کوئی ہاتھ چومنے کے چکر میں ہے۔ غرضیکہ ایک ہنگامہ بپا ہے اور دھکم پیل ہو رہی ہے۔ جبکہ پیر صاحب نے بڑی شان بے نیازی سے ہاتھ آگے کیا ہوا ہے کسی کو ایک ہاتھ ملاتے ہیں تو کسی کے لئے سر ہلاتے ہیں، جعلی پیر یا جھوٹے عالم کی آمد و رفت پر بار بار کی اٹھک بیٹھک ہوتی ہے۔ ہاتھ جوڑ جوڑ کر بات کی جاتی ہے جان کی امان طلب کی جاتی ہے۔ کوئی حالت قیام میں ہے تو کوئی حالت رکوع میں، کوئی التحیات میں بیٹھا ہوا ہے۔ اگر خدانخواستہ آپ نے ان کے ہاتھ چومنے میں ذرا سی کوتاہی کر لی تو بس! پیر صاحب کا غیظ و غضب دیکھنے والا ہوتا ہے، آنکھیں شعلہ بار ہو جاتی ہیں اور جسم تھرتھرانے لگتا ہے۔ آپ ایک نظر کی جنبش میں مریدین سے مرتدین کی صف میں شامل کر لئے جاتے ہیں۔ اسی طرح اگر آپ نے کسی مجبوری کے تحت نذرانہ کی ادائیگی میں کچھ پس و پیش کی ہے تو آپ ہمیشہ کے لئے پیر صاحب کی نظروں میں کھٹک جاتے ہیں، توجہات و تصرفات سے محرومی کا سلسلہ شروع ہوتا ہے، زمین و آسمان کی تمام آفات و بلیات آپ کے گھر کا مقدر ٹھہرتی ہیں۔ اب ایسے لوگوں کو یہ سوچنے کی بھی اجازت نہیں کہ اگر میں دال سبزی کھا رہا ہوں تو پیر کے پیالے میں مٹن قورمہ، مرغ، اور حلوہ کیوں ہے؟

ٹی وی پر ایک ٹاک شو میں بات کرتے ہوئے باریش بزرگ کو یہ کہتے سنا کہ "میں پاکستان کا ذہین ترین آدمی ہوں" پتہ چلا موصوف کسی مدرسے کے مفتی ہیں۔ اگلے لمحے فرمانے لگے کہ "وکی لیکس والا وکی جمائما کا کزن ہے۔" بس مجھے سمجھ آ گئی جہاں استاد، معلم، عالم اور مفتی ایسا ہے تو ان کے "زیر تسلط" مرید اور شاگرد کیسے ہوں گے؟

‏جس ملک میں مذہب سکھانے کے لئے مفتی کفایت اللہ جیسے جاہلوں کو عالم سمجھا جائے، اس ملک میں جاہلوں کی ایک پوری نسل پیدا ہوجائے گی۔ ‏جسکا نتیجہ آج آپ کے سامنےہے۔

جے یو آئی ف کے کارکنان نے کل اسلام آباد نام نہاد آزادی مارچ میں خاتونِ اوّل محترمہ بشریٰ بی بی کا پتلا بناکر اس کے ساتھ غلط حرکتیں کرتے رہے۔ اب ان "علماء کرام اور دین کے طالب علموں" کے بارے کچھ کہیں تو لوگ کہتے ہیں کہ علماء اور دین دار لوگوں کے خلاف بات نا کرو گناہ گار ہوجاؤ گے۔محمد فیصل۔

زاغوں کے تصرف میں عقابوں کے نشیمن

2019-10-31T22:00:00.000+03:00

مجھے ہے حکم اذاں

زاغوں کے تصرف میں عقابوں کے نشیمن

حقائق تصوف کے بارے کچھ جاننے، سیکھنے سمجھنے کی کوشش میں تھا، ایک محب صادق و عزیز دوست نے علمی مواد کتابی شکل میں فراہم کیا۔ چراغ گولڑہ پیر سید نصیر الدین نصیر مرحوم کا ایک جملہ نظر سے گزرا کہ
"ہر پیر کا بیٹا پیر نہیں ہوتا اور ہر نبی کا ہر بیٹا نبی نہیں ہوتا۔"

یہ جملہ پڑھ کر اپنے معاشرے کی یہ "روحانی شکل" سامنے آ گئی کہ یہاں تو معاملہ ہی اور ہے۔ یہاں تو گدیاں وراثت کی صورت اگلی نسلوں کو ملتیں ہیں، گدیوں کے لیے خون سفید ہو جاتے ہیں، لڑائی جھگڑے اور مار دھاڑ ہوتی ہے۔ ایک وقت تھا جب مدرسہ تعلیم کے لیے تھا، خانقاہ تزکیۂ نفس کے لیے، جبکہ آج یہ دونوں کاروبار اور متاع دنیا کے حصول کا ذریعہ بن گئے تو پھر تعلیم باقی رہی نہ تزکیہ۔ اب جو باقی ہے اس کے مظاہر ہمارے ارد گرد بکھرے ہوئے ہیں۔ یہ ایک آدھ مدرسے یا ایک آدھ خانقاہ کا معاملہ نہیں۔ یہ ایک وبا ہے جو پھیل چکی ہے۔بلاشبہ آج یہ اربوں روپے کی معیشت ہے۔اس پر عالمی و علاقائی سیاست کے اثرات بھی ہیں۔ ایک حلقہ انتخاب میں ہر امیدوار ووٹوں کے لیے پیروں کو خوش کرتا ہے۔

اب اس کے سوا کوئی چارہ نہیں کہ ریاست اس مدرسہ و خانقاہ کو کسی نظام کے تابع کرے ۔ مدرسہ کو کسی نظم کا پابند کرنا آسان ہے۔ اس کاایک نصاب ہے، ایک نظام ہے۔ لیکن خانقاہ کا معاملہ البتہ پیچیدہ ہے۔” روحانیت‘‘ کا کوئی پیمانہ نہیں، جس سے اسے ماپ لیا جائے۔

مگر اب یہاں بھی مدرسے کی طرح باپ کے بعد بیٹا گدی پر بیٹھتا ہے۔ کوئی کسی کو پوچھنے والا نہیں۔ پرانے دور میں اولیائے کرام اپنے کسی لائق مرید کو اپنا خلیفہ مجاز مقرر کیا کرتے تھے۔ ایک روایت میں رہنے والا ہی پیر بنتا تھا۔ آج اگر اسی روایت کو ہی بحال کر دیا جائے تو شاید کچھ بہتری آ جائے۔ اس کے لیے ضروری ہے کہ اہل اللہ ان خانقاہوں کے معاملات ایمانداری اور دیانتداری سے نبھائیں اور وہی سجادہ نشین ہو جو شریعت مطاہرہ کا پابند ہو۔ اس سے خانقاہ کی روایت سے وابستہ سب قباحتیں تو ختم نہیں ہوں گی لیکن امید ہے کہ بہت حد تک کم ضرور ہو جائیں گی۔ پھر پیران عظام کی ان گدیوں میں بھی مال و جائیداد کی طرح وراثت چل نکلی ہے (کیونکہ یہ بھی اب ایک منافع بخش کاروبار بن چکا ہے) باپ کی گدی پر اولاد ہی بیٹھے گی خواہ وہ کیسی ہی نکمی کیوں نہ ہو۔ کسی مرید کی کیا مجال کہ وہ پیر مغاں کی سجادگی کا حقدار ٹھہرے خواہ وہ کیسا ہی رازی و غزالی کیوں نہ ہو اور یہی نااہلی اور وراثت سب سے بڑا سبب ہیں خانقاہی نظام کی تباہی کا۔ علامہ اقبال علیہ رحمہ نے اس بات کی یوں منظر کشی فرمائی کہ،

زاغوں کے تصرف میں عقابوں کے نشیمن

روحانیت کو کاروبار کا درجہ دینے دوسرا اہم سبب وہ جاہل مرید ہیں جو پیر صاحب کے ہر عمل پر ایمان اور ہر حرکت کو ولی اللہ کی ادا سمجھتے ہیں۔ اور یہ بات تصور کر لی گئی ہے کہ جس طرح کارخانے دار کا بیٹا اس کے کارخانے کا، اور جاگیر دار کا بیٹا اس کی جاگیر کا وارث ہے بالکل اسی طرح پیر صاحب کا بیٹا پیر ہی ہو گا۔ اندھی عقیدت و تقلید کا جذبہ انہیں پالنے میں پلنے والے شیر خوار بچوں کے نام کے ساتھ صاحبزادہ، پیرزادہ، اعلی حضرت جناب، عالی مقام جیسے القابات کے گاڑھے شیرے میں ڈبو کر رکھتے ہیں اسی لیے جب یہ بچے پالنے سے نکلتے ہیں تو اپنے نام کے ساتھ یہی القاب تکبر و رعونت سے لگاتے ہیں۔ سوشل میڈیا کی تمام ویب سائٹس آپ کو پیران عظام کے بچوں کے ناموں سے بھری ملیں گی۔

میں نے ایک پیر صاحب سے پوچھا سرکار آپ کا بزنس کیا ہے؟ تو چونک کر میری جانب حیرت سے دیکھنے لگے، میں نے صفائی پیش کرتے ہوئے عرض کیا جناب یہ نئی گاڑی، گاڑی کا خرچہ، ڈرائیور، گن مین یہ قیمتی زرق برق لباس۔۔۔ خرچے کیسے پورے ہوتے ہیں؟ کہنے لگے "بس جی اللہ کا کرم ہے۔" میں نے پوچھ لیا کہ اللہ کا ایسا کرم کسی اور پر کیوں نہیں؟ پیر صاحب تو نہیں بولے مگر پاس بیٹھے ان کے مرید مجھے پھاڑ کھانے والی نظروں سے تکنے لگے۔ میرا خیال ہے کہ بعض مرید اپنی گدی کے اسی پیر سے زیادہ تعلقات بنا کے رکھتے ہیں جس سے وقتاً فوقتاً کچھ مفادات حاصل کئے جا سکیں اور پیر صاحب کی نگاہ لطف بھی صاحب ثروت مریدوں پر عام مریدوں سے تھوڑی سی زیادہ ہوتی ہے۔

بہرحال پیری مریدی ایک خالصتاً نفع بخش کاروبار اور بہترین ذریعہ روزگار ہے۔ اس میں خسارے کا سودا بالکل نہیں۔ کوئی بھی شخص پیر بن کے بیٹھ جائے اس کی جھگی کا خرچہ بغیر کسی محنت کے بیٹھے بٹھائے چلتا رہتا ہے بلکہ مزید آسامیاں پھنسانے کے لئے لنگر کے پیسے بھی وافر مقدار میں ملتے رہتے ہیں۔ اسی لئے اقبال علیہ رحمہ نے کہا تھا کہ،

نذرانہ نہیں سود ہے پیران حرم کا

یقینا آپ سوچ رہے ہوں گے کہ اتنا منافع بخش کاروبار یقینا بڑی محنتوں اور مشقتوں کے بعد ہی چلتا ہو گا، نجانے کتنے پاپڑ بیلنے پڑتے ہوں گے اور کہاں کہاں کی خاک چھاننی پڑتی ہوگی۔ حالانکہ پیر بننا پاکستان میں آسان ترین کام ہے۔ اگر آپ کسی پیر خاندان یا سید خاندان سے تعلق رکھتے ہیں تو پھر تو آپ بنے بنائے سکہ بند پیر ہیں۔ پیری مریدی آپ کا خاندانی اور موروثی حق ہے، جسے کوئی مائی کا لعل بھی آپ سے چھین نہیں سکتا، ہینگ لگے نہ پھٹکری اور رنگ بھی چوکھا آئے۔

پیر بن جانے کے بعد زندگی کے وارے نیارے تو پکے ہیں، مرنے کے بعد بھی قل خوانی، چہلم، عرس، مزار، خانقاہ اور اولاد کی سرپرستی وغیرہ کے متعلق فکر مند ہونے کی قطعاً کوئی ضرورت نہیں، سب کچھ خود بخود (Automatically) ہوتا چلا جائے گا۔

نذرانہ نہیں، سود ہے پیران حرم کا

ہر خرقہء سالوس کے اندر ہے مہاجن

میراث میں آئی ہے انھیں مسند ارشاد

زاغوں کے تصرف میں عقابوں کے نشیمن

مٹی نہ پھرول فریدا، یار گواچے نئیں لبدے ''آہ'' رمیض جاوید

2019-07-03T21:26:00.000+03:00

مٹی نہ پھرول فریدا

یار گواچے نئیں لبدے

آہ'' رمیض جاوید''

2 جولائی 2019 کو 29 برس کی عمر میں داغِ مفارقت دینے والے رمیض جاوید کو سپرد خاک کر دیا گیا لیکن ابھی بھی اُس کی موت کا یقین نہیں آتا ہے ایسے معلوم ہوتا ہے کہ چہرے پر مُسکراہٹ سجائے اور خوبصورت لباس میں ملبوس ابھی سامنے آنے والا ہے۔

رمیض صرف دوست ہی نہیں ایک وفا شعار اور عظیم ساتھی بھی تھا۔ جب اور جہاں ملتا اپنی مُحبتوں سے دل موہ لیتا۔ کبھی کبھی نمکین جملوں کا تبادلہ بھی ہوتا تو اس میں بھی احترام کا دامن ہاتھ سے نہ چھوڑتا چونکہ عمر میں سب قریبی دوست اس سے بڑے تھے اور ہم سب رمیض کو دوست کی بجائے چھوٹا، پیارا بھائی کہتے۔

رمیض ایک زندہ دل انسان تھا کبھی کسی غم اور تکلیف میں اسے مُرجھایا ہوا نہیں دیکھا۔ مسکراتا چہرہ، روشن آنکھیں، دل موہ لینے والی گفتگو، خوبصورت لب و لہجہ، پیار سے ملنے کا انداز، کبھی زیر لب مسکراہٹ اور کبھی بھر پور قہقہ لگاتا ہوا، دوستوں کا یہ گمان ہمیشہ میرے لیے قابل فخر رہا ہے کہ دوستوں میں وہ سب سے زیادہ میرے قریب تھا اور ایسا قریب کے سب اُسے میرے بیٹے مُحّمد علی کا لنگوٹیا دوست کہتے۔ مجھ سے جب بھی ملتا تو اور کسی کا ذکر کرتا یا نہ کرتا مگر اپنے چھوٹے مرحوم بھائی ایشان جاوید کی موت سے گھر خصوصاً والدین پر پڑنے والے اثر کا ذکر ضرور کیا کرتا۔ وہ اکثر اوقات قریبی دوستوں اور ساتھیوں کی تعریفیں ضرور کرتا۔ بشری تقاضا ہے کہ کوئی بھی انسان کامل نہیں مگر وہ ہمیشہ دوستوں کی خوبیاں دیکھتا اور خامیوں سے صرفِ نظر کرتا۔ دوستوں کو جوڑے رکھنے کا جو کمال رمیض میں تھا شاید وہ ہم میں سے کسی میں نہیں ناصر کاظمی نے شاید ایسے ہی دوست کے بارے کہا ہو گا کہ

"دوستوں کے درمیاں، وجہِ دوستی ہے تُو”

کبھی مبشر کا ذکر چھڑتا تو اس کی بہت تعریفیں کرتا اور اکثر کہتا تھا کہ ہمارے سب دوستوں میں موبی (مبشر خان) اللہ کا ولی ہے۔

رمیض دوستوں کا دوست تھا، اس کی رفاقت میں انسان کبھی بور نہیں ہوتا تھا۔ اس شخصیت کو اگر چند الفاظ میں بیان کیا جائے تو وہ ایک خوش مزاج، خوب صورت، خوش گفتار، خوش لباس اور مُجسمِ محبت اور عجر و انکسار کا پیکر تھا۔

ہائے رمیض یارا ابھی تو پیارا بیٹا راحم پنگوڑے میں ہے اور ابھی اسے حافظ قرآن بننے میں سالوں لگیں گے، اسے اعلی تعلیم دلوانا تھی تمہیں، ابھی تو اپنی پیاری بہن اور خاندان کی بیٹیوں کو اپنی دعاوں تلے رخصت کرنا تھا۔

رمیض خاندان میں کم عمر لیکن فہم فراست کے لحاظ سے بزرگ کا درجہ رکھتا تھا۔ رمیض میرے دوست تم جیسی صفات کسی میں نہیں۔ رمیض دوستوں مان تھا اس کے قریبی دوستوں میں مبشر خان، عامر روشن، شوکت، عمران، نوید، صداقت، ریاض انجم، حمزہ، حسام، اعظم اور جھوٹا سگا بھائی ایشان جسے وہ دوست سمجھتا تھا اور دیگر مجھ سمیت سب دوستوں پر جان نچھاور کرتا تھا۔ مشکل وقت پر دوستوں کے ساتھ رمیض ایک مثالی کردار ادا کرتا لیکن آج نوحہ پُرسہ کس کو دوں؟

اجڑتی جاتی ھے چوپال اور نہیں معلوم،

کہاں گئے جو یہاں داستاں سناتے تھے

رمیض اگر میں شاعر ہوتا تو تیری موت پر نوحے لکھتا۔ معروف شاعر ڈاکٹر بیدل حیدری کا نوحہ میرا ترجمان ہے

کس قدر سادہ و معصوم نظر آتا تھا

چاند لکھوں کہ تجھے چاند کا ٹکرا لکھوں

تیرے معصوم تبسم سے سحر ہوتی تھی

اپنے قصبے کا تجھے کیوں نہ اجالا لکھوں

تو کہ تھا پورے علاقے کا ابھرتا سورج

اب کوئی تجھ سا نظر آئے تو تجھ سا لکھوں

میں نے دیکھا ہے تجھے خون کے طوفانوں میں

یہ غلط ہے ،تجھے پیاسا، سر صحرا لکھوں

اے خدا ایسی اجل اب نہ کسی کو آئے

آج کے بعد کسی کا بھی نہ نوحہ لکھوں

مرنے والا میرا بیٹا تو نہیں تھا بیدل

دل یہ کہتا ہے مگر اپنا ہی بیٹا لکھوں۔

مُحّمد فیصل

ضمیر بہرحال ضمیر ہے

2019-06-23T08:41:00.000+03:00

مجھے ہے حکم اذاں

عام انسانوں کے علاوہ بڑے بڑے بادشاہوں کی اوقات بھی بدلتے دیکھا ہے۔ یہ اک تلخ حقیقت ہے کہ وقت بدلتے دیر نہیں لگتی۔ نصیب بھی بدلتے ہیں۔ اور نصیب بدلنے میں اللہ تعالی نے انسان کو بھی کسی حد تک اختیار دیا ہے

انسان بھی عجیب شے ہے۔ جیتا ہے تو اس طرح کہ جیسے کبھی مرنا ہی نہیں اور مرتا ہے تو اس طرح جیسے کبھی زندہ بھی نہیں تھا۔ جس زندگی پر انسان اکڑتا اورگھمنڈ کرتا ہے وہ فقط کچی مٹی کا دیا ہے جوہوا کے ایک جھونکے سے بجھ جاتا ہے اورپھر اوقات فقط اتنی سی ہے کہ مٹی، مٹی میں مل کر مٹی ہوجاتی ہے۔ دولت، اقتدار، اختیار، عہدہ اور شہرت گھر کی چاردیواری میں داخل ہوں تو انسان اپنی اوقات بھول جاتا ہے۔ دوسروں کو کم تر اور ہیچ سمجھنے لگتا ہے، اس کی ہر ادا اورہر حرکت سے غرور یوں ٹپکنے لگتا ہے اور انسان اس وہم میں مبتلا ہو جاتا ہے جیسے قیامت تک اسی کّروفر کے ساتھ دندناتا رہے گا۔ بہت سے لوگ دولت کے انبار پر بیٹھے ہوئے ہیں، غرور و پندار میں مبتلا ہیں، اقتدار کی بلند پہاڑی پر جلوہ افروز ہیں، دولت کے بل بوتے پر حصول اختیارات اور حصول شہرت کی لہروں پر سوار ہیں یا دنیا کے فریب ِنظر میں مبتلا ہیں ان سب کے چمکدار چہروں پر خلش کی سلوٹیں دیکھی جا سکتی ہیں اوروہ خلش زندہ، نیم مردہ یا تقریباً مردہ ضمیر کا کارنامہ ہوتا ہے۔ حصول شہرت و اختیارات کی ہوس بعض اوقات انسان کو اپنا ہی تھوکا ہوا چاٹنے پر مجبور بھی کر دیتی ہے.

مردہ ضمیر بھی کبھی کبھی خلش پیدا کرتا ہے کیونکہ ضمیر بہرحال ضمیر ہے چاہے اسے خوف ِخدا سے زندہ رکھا جائے یا ہوس دنیا سے مردہ کردیا جائے۔یہ بھی حقیقت ہے کہ زمین بڑے بڑے فرعون، بڑے بڑے قارون اوربڑے بڑے نمرود کھا گئی ہے آج ان کا نام بھی مٹ چکا ہے اوریاد بھی، اس لیے انسان نہ دولت کے نشے میں بہک کر غرور کرے، نہ جھوٹ بول کر دوسروں کو دھوکہ دے۔ اسی لئے توکہا جاتا ہے کہ موت کو یاد رکھو لیکن کبھی موت کی آرزو نہ کرو کیونکہ موت کی یاد انسان کے بہت سے نشےاتار دیتی ہے اور اس کے غروروتکبر کو کھا جاتی ہے۔

اے کاش! ہم یہ کبھی نہ بھولیں کہ زمین کھا گئی آسماں کیسے کیسے۔

محمّد فیصل

کیسے کہہ دوں کہ مجھے چھوڑ دیا ہے اس نے

2019-03-05T05:00:00.000+03:00

مجھے ہے حکم اذاں

پاکستان بھی وہی ہے، ہندوستان بھی وہی ہے، دشمن افواج بھی ویسے کی ویسے اور ہماری پاک افواج بھی پہلی جیسی جرأت مند اور جذبہ شہادت سے سرشار ہیں، بس فرق بس اتنا ہے کہ اب پاکستان کا حکمران عمران خان ہے اور یہ شاید اسی ایماندار حکمران کی ہی برکت ہے کہ اب کی بار دشمن اپنی بچھائی ہوئی چال میں پھنس جاتا ہے، ہر نئے جھوٹ پر اس کو ایک نئی ہزیمت کا سامنا کرنا پڑتا ہے، ابھی کل ہی کی بات ہے کہ کارگل کی جنگ ہم جیت کر بھی ہار گئے تھے اور آج یہ جنگ ہم لڑے بغیر ہی جیتنے والی پوزیشن پر ہیں. خدا کا فضل و کرم کیسے کسی کے سارے مسئلے مسائل حل کرتا ہے چاہے دنیاوی دلیلیں اس کے خلاف ہی کیوں نہ ہوں اس کے لئے آپ کو صرف پچھلے 20 دنوں کی پاکستان اور بھارت کی صورت حال دیکھ لینا چاہئے ابھی چند ماہ پہلے سیاسی مخالف، تجزیہ کار، دانشور،مبصر اور سابقہ حکمران کہتے تھے چلو امریکہ جائے گا جیسا کہ راویت تھی کئی عشروں سے کہ ادھرحلف اٹھایا اور ماتھا ٹیکنے کے لیے امریکہ بھاگ جاتے، لوگ کہتے تھے کہ حاضری دینے یہ بھی جائے گا کیوں کہ گرتی ہوئی معیشت کو سہارا دینے کے لیے امریکہ بہادر کے ذریعے کوئی ریلیف تو لینا پڑے گا مگر ناقدین بھی حیران ہیں کہ آج سات ماہ گزر گئے اور امریکہ جانے کا نام نہیں لے رہا عجیب حکمران بنا اب کے.

ہر کوئی سوچ رہا تھا اتنی بڑی اپوزیشن کے ہوتے ہوئے یہ شخص کیسے چل پائے گا؟ لیکن اپوزیشن کو سمجھ نہیں آرہی کرنا کیا ہے اس کے خلاف اور اپوزیشن ذلیل و رسوا بھی ہو رہی ہے. آج سے پہلے جتنے بجٹ آتے ساتھ ہی ملک میں مافیاز بھی متحرک ہو جاتے کہ مہنگائی آئے گی لوٹ مار کریں گیں لیکن وہ بجٹ لایا اور مافیاز کو سمجھ نہیں آ رہی یہ کیا کر دیا اس نے تو کئی ٹیکس ہی معاف کر دیے اب کیا کریں؟ ساہیوال کا واقعہ ہوا مخالفین نے کہا کہ اب تو خوب بینڈ بجائیں گے اسکی اور اس نے اس طرح کے ایکشن لے کر دیکھائے کہ مخالفین کو اپنے ماضی کا جواب دینا مشکل ہو گیا، ابھی کل ہی کی بات ہے کہ معیشیت دان کہتے تھے حالات ہمارے حق میں نہیں ہیں. اپوزیشن نے پہلے ہی شور مچا دیا کہ او لٹے گئے، مارے گئے، مگر اس نے ہرکسی کو حیران کردیا اور معشیت کو سہارا بھی دے دیا اور پاکستان کو دنیا میں ایک مرتبہ پھر دوسرے ملکوں کے سامنے منوانا شروع کر دیا. کئی سالوں سے بردار اسلامی ملک سعودی عرب میں ہزاروں پاکستانی معمولی جرائم پر جیلوں میں قید تھے اور سوشل میڈیا پر ان کی درد ناک آہ و فغاں بھی کئی برس سے ہر پاکستانی نے سنی مگر ان کی داد رسی کسی نے نا کی، مگر اس شخص کی ایک درخواست نے وہ کام کر دیا. سڑکوں، پارکوں اور کھلی جگہوں پر سونے والے پاکستانیوں کی بے بسی پر کسی نے کبھی دھیان نہیں دیا مگر اس شخص کو ان کی تکلیف بھی اپنی ہی محسوس ہوئی اور ان کے لیے چھت، بستر، روٹی اور دوائی کا انتظام کر دیا. بھارت کی طرف سے سرحد پر ہونے والی دہشت گردی بھی نئی نہیں ہے مگر اب کے جو جواب دیا گیا اور جس طرح مادر وطن کی طرف اٹھنے والی آنکھوں کو نوچا گیا اس سے ''ہم اہل صفا مردود حرم'' لوگ ان تمام حالات کو ایماندار اور دلیر قیادت کی برکت ہی سمجھیں گے. پچھلی 2 دہائیوں سے لگتا تھا درد مندوں کے نصیب میں کڑھنا ہی لکھا ہے جو کہ اس بندہ خدا کے آنے کے پہلے سال ہی 180 کے زاویے سے تبدیل ہو گیا۔ اگلے چوہدری اور بدمعاش بن کر آئے تھے اس نے بالوں سے پکڑ کر منہ مٹی میں رگید دیا۔ اچھی طرح رگیدنے کے بعد ٹھنڈا پانی بلا کر رخصت بھی کر دیا۔ پچھلے ادوار میں کی گئی سرجیکل اسٹرائیک پراپوگنڈہ کا مناسب جواب دیا جاتا تو شاید حالات کافی دیر پہلے ہی بہتر ہو جاتے مگر سابقہ حکمرانوں نے اس سرجیکل اسٹرائیک کا جواب ڈان لیکس جیسی بے شرمی سے دیا۔ دوبارہ اسٹرائیک کا سوچنے والو،

ابھی تو ابتدا عشق ہے روتا ہے کیا،

آگے آگے دیکھیے ہوتا ہے کیا۔

مزا تو جب آئے گا جب اس سرجیکل سٹرائیک سے مایوس ہو کر وہ پچھلے والے کی طرف لوٹیں گے تو ثبوتوں کا یہی سوال بھوت بن کر دوبارہ ان کو ہی چمٹ جاۓ گا۔

رہا ہونے والا ''ابھی نندن'' آجکل پروین شکر کا یہ شعر سب کو سناتا ہو گا

کیسے کہہ دوں کہ مجھے چھوڑ دیا ہے اس نے

بات تو سچ ہے مگر بات ہے رسوائی کی

محمّد فیصل

الفاظ کا تقدس

2019-01-01T11:17:00.001+03:00

مجھے ہے حکم اذاں

الفاظ کا تقدس

الله غریق رحمت فرماۓ ہمارے استاد محترم سید منیر حسین ہاشمی صاحب فرماتے تھے
کہ "جگہ، یا املا کی تبدیلی سے الفاظ کے معانی و مطلب تبدیل ہو جاتے ہیں" جیسے لفظ گولی کا معنی اسلحہ کی دکان پہ مختلف اور میڈیکل سٹور پہ بالکل مختلف ہو جاتا ہے۔ یہی لفظ گولی سائیکل مرمت کی دکان پر بولا جائے تو یکسر مختلف معنی ادا کرے گا. کبھی کبھی وقت کا بدلاؤ بھی الفاظ کے معانی بدل ڈالتا ہے. لفظ موبائل، موبائل فون کی ایجاد سے پہلے صرف متحرک کے معنوں میں استعمال ہوتا تھا آج کل اس کا معنی بالکل بدل چکا ہے. لفظ سکرین کبھی صرف پردے کے لیے استعمال ہوتا تھا اب دیگر معنی بھی رکھتا ہے. اسی طرح کچھ الفاظ اپنے متصل الفاظ یا انداز سے پہچانے جاتے ہیں جیسے ''ادا'' کہیں تو نجانے یہ ناز نخرے والی ادا ہے یا قرضہ ادا کرنے کی بات ہے؟ ''ملکہ'' کہیں تو شاید یہ بادشاہ کی مونث ہو یا کسی کام میں کمال حاصل کرنے کا نام ہو؟ ''ہار'' کا ایک معنی شکست اور دوسرا گلے میں پہنایا جانے والا ہار؟ ''سونا'' ایک قیمتی دھات یا پھر آرام کرنا؟ ''آرا'' کہیں تو لکڑی کاٹنے والا اوزار یا پھر راۓ کی جمع؟ ''سودا'' کا مطلب جنون یا گھر کی سبزی ترکاری وغیرہ؟ یعنی الفاظ اور ان کے مفاہیم کا اندازہ زمان و مکان، حالات و واقعات سے ہی کیا جا سکتا ہے. وہ معاشرہ جو معتبر الفاظ کے معنی نیچ قسم کے متعین کر دیتا ہے دراصل اخلاقی اور فکری اعتبار سے زوال پزیری کا شکار ہوتا ہے. اور یہ بہت بڑا لمحہء فکریہ ہے. لفظ استاد اپنے معنی اور مرتبے کے حساب سے کتنا معزز اور معتبر ہوا کرتا تھا. آج کے دور میں ہم لوگ استاد اس آدمی کو کہتے ہیں جو اپنے اندر استرے جیسی صفات رکھتا ہو۔ یعنی جرم پیشہ یا مکار آدمی کے لیے ہم لفظ استاد استعمال کر کر کے اس کے معنی نیچ کر چکے ہیں. لفظ بچی کتنا معصوم اور پاکیزہ سا لفظ ہے جس کے معنی سوچ کر ہی دماغ میں ایک معصوم بیٹی کے تقدس کا احساس جاگتا ہے. لیکن ہمارے معاشرے میں آج جس لڑکی کو اوباشوں، لفنگوں نے تاڑنا ہو اسی غلیظ کام کے لیے یہ بچی کا لفظ استعمال ہوتا ہے. حالت یہاں تک پہنچ جائیں گے اور ہم بحیثیت معاشرہ اس لفظ کے معنی اتنے گرا دیں گے کہ بالآخر اپنی بہن بیٹیوں کے لیے یہ لفظ ہی ترک کرنا پڑے؟ کیا یہ ہماری اخلاقی پستی کی انتہا ہے یا مزید اس سے بھی کچھ آگے؟؟ اس کے علاوہ اب سوشل میڈیا پر لفظ باجی، ماں اور بہن کا تقدس ہم لوگ ختم کر رہے ہیں، بیٹی، ماں، بہن وغیرہ جیسے لفظ آخری حد ہوتے ہیں۔ جب ایسے الفاظ کا تقدس ہی برقرار نہ رہے تو رشتوں کا تقدس کہاں برقرار رہے گا؟ کیا کریں کہ آج ''اُلو دا پٹھا'' ''ماں دی سری''، ''پین دی سری'' ''پاگل دا پُتَر'' وغیرہ کو گالی نہیں سمجھا جاتا کیوں کہ رہنماؤں نے یہ الفاظ بے دھڑک بولے اور ایسے رہنماؤں نے جو کچھ کہا ہم لوگ بے حس بن کر سینوں پر لیے پھرتے ہیں. خدارا رشتوں کے تقدس کو پامال ہونے سے بچائیں جسے بہن اور بیٹی کہیں اسے بہن اور بیٹی ہی سمجھیں۔ بہ صورتِ دیگر آنے والے کل میں لفظ بہن اور بیٹی کا بھی وہی حال ہو گا جو ہم استاد اور بچی جیسے عظیم الفاظ کا دیکھ رہے ہیں۔ لفظ باجی، ماں اور بہن حد سے زیادہ احترام کا متقاضی لفظ ہے۔ جسے حد سے زیادہ احترام دے سکتے ہیں اسی کو بہن کہیں اور کبھی بھی رشتوں کی تقدیس سے خیانت مت کریں آج ان الفاظ کی تقدیس پامال کرتے ہوئے خیال رکھیں کہ ہمیں بھی اپنی ماں، بہن اور بیٹی کے ساتھ اسی معاشرے میں رہنا ہے. بہتر ہے کہ ایسی بیہودہ اور ننگ آدمیت سنگتوں، مجلسوں سے خود بھی بچیں، اپنی اولاد کو بھی بچائیں اور الفاظ کے مقدس پیالوں میں غلیظ جذبات کبھی نا انڈیلیں. بلآخر آپ بھی اس کا شکار ہو سکتے ہیں

محمّد فیصل

میرے بیٹے ہیں کہاں، اردو زبان پوچھتی ہے

2018-12-27T09:08:00.001+03:00

مجھے ہے حکم اذاں

میں نے کیا ہجر میں مرنا ہے یہ ماں پوچھتی ہے

میرے بیٹے ہیں کہاں اردو زبان پوچھتی ہے

ایک عظیم مُلک پاکستان کی صورت، نعمتِ خداوندی کے طور پر ہمارے پاس موجود ہے۔ ہم نے یہاں اپنے مذہب و ثقافت کے ساتھ جو حال کیا اس سے کہیں برا حال اپنی قومی زبان اردو کے ساتھ کیا۔ ہم نے ملک میں اردو کے بجائے انگریزی زبان نافذ کردی اور گزشتہ تہتر سال سے یہی زبان نافذ ہے۔ سرکاری و پرائیویٹ دفاتر، تعلیمی ادارے اور عوامی مقامات انگریزی زبان سے ہی بھرپور ہیں۔ اردو زبان ہر بچہ معاشرے سے سیکھ لیتا ہے، اس کے بعد اسے انگریزی سیکھنے کےلیے محنت کرنی پڑتی ہے۔ اگر اس کے سیکھنے میں کچھ کمی رہ جائے یا نہ سیکھ پائے تو اس کےلیے جینا مشکل ہوجاتا ہے کیونکہ ملک میں تو ہر جگہ انگریزی کا راج ہے اردو زبان کو پوچھتا ہی کون ہے؟ وہ جیسی کیسی بھی بول یا سمجھ لی تو کام چل جاتا ہے لیکن انگریزی میں کسی قسم کی کمی پائی گئی تو کتنا ہی محب وطن کیوں نہ ہو راندہ درگاہ ہوجاتا ہے۔ اس کی کہیں جگہ نہیں رہتی۔ دفاتر میں جائے تو وہاں انگریزی میں خطوط پکڑا دیے جاتے ہیں جنہیں پڑھنے اور سمجھانے کےلیے انگریزی دان کی ضرورت پیش آتی ہے۔ عوامی مقامات پر انگریزی اشارات پر مشتمل بورڈ لگے ہوتے ہیں جنہیں ایک ناخواندہ یا کم تعلیم یافتہ شخص کےلیے پڑھنا نہایت مشکل بلکہ ناممکن ہوتا ہے۔

ایک اور چیز دیکھنے میں آئی ہے کہ ہمارے یہاں حاملینِ اسناد (ڈگری ہولڈرز) تو بہت ہیں مگر ماہرینِ فن نہیں ہیں۔ اردو ہماری قومی زبان سہی مگر یہ نام نہاد اپر کلاس کی زبان ہرگز نہیں اور نا ہی یہ سرکاری و دفتری زبان ہے۔ اردو کا اثر ہمارے دل و دماغ پر کتنا ہی گہرا کیوں نہ ہو ہم ماڈرن بننے کے لیے اپنی گفتگو میں انگریزی کے الفاظ استعمال کر کے اپنی زبان کو زخمی کر لیتے ہیں تا کہ سننے والے کو پتہ چل جائےکہ میں بھی پڑھا لکھا ہوں۔ سمندر پار بسنے والے پاکستانیوں کی ایک مجبوری ہے کہ ہر کوئی اردو نہیں سمجھتا تو انہیں مقامی زبانوں میں بات کرنی پڑتی ہے لیکن پاکستان میں بسنے والے پاکستانیوں کی حالت بھی یہ ہے کہ ڈاکٹر سے کوئی بات بھی کہنی ہو، کوئی تکلیف بتانی ہو تو انگریزی کا سہارا لے کر بات کریں گے۔ اس کی وجہ جاننے کی کوشش کریں تو پتہ چلے گا کہ ان کے نزدیک اپنی زبان میں کہی گئی بات زیادہ سنگین ہوتی ہے، یہی وجہ ہے کہ کچھ دوست انگریزی مغلظات کا بھی برا نہیں مانتے۔ ہو سکتا ہے کہ اردو بولنے، لکھنے اور پڑھنے والے کچھ دوست میری بات سے اختلاف کریں اور دیگر زبانوں کو ہی جذبات کے اظہار کا بہترین ذریعہ سمجھتے ہوں۔ زمانہ ہی کچھ ایسا ہے کہ انگریزی بولنا ہی باعثِ فخر سمجھا جاتا ہے اگر آپ چاہتے ہیں کہ دیگر پاکستانی آپ سے مرعوب ہو جائیں تو اس کا آسان نسخہ یہ سمجھا جاتا ہے کہ منہ ٹیڑھا کر کے ایک خاص ادا سے انگریزی کے لفظ چبا چبا کر ادا کریں اور بالفرض آپ کی انگریزی کمزور ہے تو اس کا حل یہ ہے کہ دوران گفتگو انگریزی کے بھی ہاتھ پاؤں توڑیں اور بار بار کہیں کہ ''سوری میری اردو ذرا کمزور ہے.'' ذرا اندازہ تو کیجیے کہ مصنوعی پن جتنا زیادہ ہو گا اتنی قدر ہو گی آپ کی لیکن اہل فکر و دانش کے نزدیک معیار کچھ اور ہیں۔

یاد رہے کہ ترقی کسی زبان کے سیکھنے سے نہیں ہوتی بلکہ ترقی کے لیے علوم و فنون میں ماہر ہونا ضروری ہے۔ اگر صرف انگریزی ہی اعلیٰ تعلیم کا معیار ہوتی تو یورپ و امریکا میں ریڑھی بان بھی روانی کے ساتھ انگریزی بولتے ہیں لیکن انہیں تو تعلیم یافتہ خیال نہیں کیا جاتا لیکن ہمارے معاشرے میں علم کا معیار ہی کچھ اور ہے۔ بحیثیتِ قوم ہمیں سوچنا ہو گا کہ ہم انگریزی بول سکیں یا نا بول سکیں ہمیں اپنی زبان میں گفتگو کا سلیقہ تو ہونا ہی چاہیے۔ میرے قارئین یہ نا سمجھ لیں کہ میرے نزدیک انگریزی یا دیگر زبانیں بولنا کوئی معیوب بات ہے بلکہ میں یہ کہنا چاہتا ہوں کہ اپنی زبان کو کمتر سمجھنا معیوب ہے۔ عرب ممالک، ایران، فرانس، ترکی، تھائی لینڈ، اٹلی، اور جرمنی وغیرہ دنیا میں کتنے ایسے ممالک ہیں جہاں لوگ صرف اپنی زبان بولتے ہیں اور اس پر فخر بھی کرتے ہیں، اپنے معمولات میں اپنی زبان استعمال کرتے ہوئے کسی بیزاری کا اظہار بھی نہیں کرتے۔ آپ کو چاہے پچاس زبانوں پر عبور ہو اپنی زبان کو کبھی نہ چھوڑیں کیوں کہ اس کی مہک میں اخلاق و محبت کا وہ رچاؤ ہے جو ہمیں کسی اور زبان میں نہیں ملتا۔ سب انسان مختلف رشتوں کی ڈور سے ایک دوسرے کے ساتھ بندھے ہوتے ہیں مگر زبان کا رشتہ، سب سے اہم ہے اس کا اندازہ تب ہوتا ہے جب پردیسی کو دیار غیر میں کوئی اپنی زبان بولنے والا مل جائے۔ بحثیت قوم ہم نے اردو ہی نہیں اپنا ہر اثاثہ خود اپنے ہاتھوں تباہ کیا ہے جس میں مذہب، ثقافت، زبان و اخلاقیات و احساسات سب شامل ہیں. ہم پچھلے 73 سالوں سے ترجیحی بنیاد پر انگریزی سیکھ رہے تھے اور اب مزید یہ کہ ہم ہندی اور چینی بھی سیکھ رہے ہیں اور یہ سب کی سب نقل برائے نقل ہے۔ بس نہیں سیکھ رہے تو اردو کیونکہ اسے ہم گھر کی لونڈی کی طرح قدموں میں جگہ دیتے ہیں حالانکہ اس کی قدر تو ماں کی طرح کرنی چاہیے تھی لیکن ہم اپنے اس قیمتی اثاثے پر بس شرمندہ ہیں کیونکہ ہم شرمندہ قوم ہیں.
لائق تحسین ہیں وہ شعرا و ادباء حضرات جو اپنی فکر سے، اپنی ادبی تخلیقات سے اس قابل قدر زبان کو زندہ رکھنے میں اپنا کردار ادا کر رہے ہیں۔

محمّد فیصل

بھیک یا محنت؟

2018-12-02T07:45:00.000+03:00

بھیک دینے سے غریبی ختم نہیں ہوگی

کسی سماجی سائنسدان نے دو جوان لڑکوں کو لیا ایک کو پرانے کپڑے پہنا کر بھیک مانگنے بھیجا اور دوسرے کو مختلف چیزیں دے کر فروخت کرنے بھیجا، شام کو بھکاری لڑکا آٹھ سو اور مزدور لڑکا ڈیڑھ سو روپے کما کر لایا اس سماجی تجربے کا نتیجہ واضح ہے۔ دراصل بحیثیت قوم، ہم لوگ خدا خوفی کے جذبے سے لبریز بھیک کی حوصلہ افزائی کرتے ہیں

مزدوری کی حوصلہ شکنی کرتے ہیں. ہوٹل کے ویٹر، سبزی فروش اور محنت کشوں کے ساتھ ایک ایک پائی کا حساب کرتے ہیں

اور بھکاریوں کو دس بیس بلکہ سو پچاس روپے دے کر سمجھتے ہیں کہ جنت واجب ہوگئی، ہونا تو یہ چاہئے کہ مانگنے والوں کو صرف کھانا کھلائیں

اور مزدوری کرنے والوں کو ان کے حق سے زیادہ دیں. الله مغفرت فرماۓ ہمارے استاد محترم سید منیر حسین ہاشمی صاحب فرمایا کرتے تھے کہ بھکاری کو اگر آپ ایک لاکھ روپے نقد دے دیں اور اس کو محفوظ مقام پر پہنچا دیں وہ اگلے دن پھر سے بھیک مانگنا شروع کر دیتا ہے اس کے برعکس

اگر آپ کسی مزدور یا سفید پوش آدمی کی مدد کریں تو وہ اپنی جائز ضرورت پوری کرکے زیادہ بہتر انداز سے اپنی مزدوری کرے گا. کیوں نہ گھر میں ایک مرتبان رکھیں؟ بھیک کے لئے مختص سکے اس میں ڈالتے رہیں، مناسب رقم جمع ہو جائے تو اس کے نوٹ بنا کر ایسے خود دار آدمی کو دیں جو بھکاری نہیں، اس ملک میں لاکھوں طالب علم، مریض، مزدور اور

خواتین ایک ایک ٹکے کے محتاج ہیں، صحیح مستحق کی مدد کریں تو شاید ایک روپیہ بھی آپ کو پل صراط پار کرانے کے لئے کافی ہو سکتا ہے. یاد رکھئے بھیک دینے سے گداگری کبھی ختم نہیں ہوگی، بلکہ بڑھتی ہے، بہت اچھی بات ہے کہ آپ خیرات دیں صدقہ دیں ہمیں فخر ہے کہ اس مادی دور میں بھی بھی خدا ترس اور نیک لوگ ہیں، نادارغریب لوگوں اور یتیم بچوں کی امداد کرتے ہیں، اللہ کا خوف ھمارے معاشرہ میں ہے، صدقہ خیرات زکوۃ دینے والوں کی بھی کمی نہیں، بے شک نادارغریب یتیموں کی مدد کرنا اسلامی تعلیمات ہیں، لیکن کچھ منصوبہ بندی محنت کش طبقے کی حوصلہ افزائی کے لیے بھی کیجیے اور احتیاط کے ساتھ، اس طرح دنیا بھی بدل سکتی ہے اور آخرت بھی باقی مرضی آپ کی

محمّد فیصل

میں بھی مسلمان ہوں، تصدیق کر دیجیے

2018-11-05T00:03:00.000+03:00

مجھے ہے حکم اذاں

عجیب سے مناظر نگاہوں سے گزرے، سپریم کورٹ کا ایسا فیصلہ کہ جس نے عدل و انصاف کی دھجیاں اڑا دیں، جہاں ہم جیسے لوگ عدالت عالیہ کے اس فیصلے پر حیران و ششدر تھے، افسردہ و رنجیدہ ہیں وہیں کچھ بدبختوں نے اس فیصلہ پر مسرت کا اظہار کیا. ہم لوگ حیران و پریشان تھے کہ ایسا کیس جس کا فیصلہ ملک خداداد کی دو معزز عدالتیں دے چکی ہیں اور دونوں عدالتوں نے مجرمہ کو سزاۓ موت دی اور برقرار رکھی پھر یہ کیسے ہوا کہ اچانک ٩ سال بعد پاکستان کی اعلی ترین عدالت نے اس مجرمہ ملعونہ کو کیسے بری کیا؟فیصلے کی کاپی ہاتھ آئی تو یہ خدشہ بھی یقین میں بدلنے لگا کہ آج بھی ہمارا عدالتی نظام موم کی وہ ناک ہے جس کو چند ضمیر فروش گواہ اپنی مرضی کے مطابق نہ صرف موڑ سکتے ہیں بلکہ اپنی مرضی کے نتائج بھی حاصل کر سکتے ہیں. چند ہی لمحوں میں ایک مذہبی سیاسی جماعت کے ترجمان کی طرف سے سوشل میڈیا پر خبر ملی کہ سارا ملک جام کیا جا رہا ہے تمام مسلمان گھروں سے نکلیں اور نظام زندگی کو مفلوج بنانے میں اپنا کردار ادا کریں. یہ ایک اور حیرت تھی کہ یہ کیا ہو رہا ہے اور چند ہی گھنٹوں میں مسافر راستوں میں، بچے اسکولوں، کالجوں اور یونیورسٹیوں میں قید ہو گئے. ایسی صورتحال کا فائدہ اٹھانے والے لوگوں کی بھی چاندی ہو گئی اور وہ شر پسند عناصر بھی اپنا کھیل کھیلنے کے لیے میدان میں آ گئے. پھر مذہبی سیاسی جماعت کے قائد کا بیان لوگوں کا لہو گرمانے لگا کہ فیصلہ دینے والے جج واجب القتل ہیں اٹھو اور ممتاز قادری اور غازی علم الدین شہید رحمہ الله علیہ بننے کا یہ سنہری موقع جانے نہ دو، ساتھ میں تاکید بھی فرمائی کہ یہ کام شام سے پہلے پہلے ہو جانا چاہیے پھر اپنی توپوں کا رخ پاک فوج اور حکومت پاکستان کی طرف کیا اور پاک فوج کے سربراہ کے ساتھ ساتھ وزیراعظم پاکستان کو بھی جی بھر کے گالیاں دیں، حضرت کا خطاب دلوں کو گرما گیا اور بھولے بھالے کارکن اور مرید لوگ تلوار، چھری،چاقو، لاٹھی، ڈنڈہ، جو ہاتھ میں آیا لے کر سڑکوں پر آ گئے اور اپنی قیادت کو یہ مشورہ بھی نہ دے سکے کہ فیصلے پر نظر ثانی کی درخواست دیں اور دیگر قانونی راستے پر بھی توجہ فرمائیںرات کو ریاست کے وزیراعظم کا مختصر اور ٹو دی پوانٹ خطاب دھرنا مظاہرین کو مزید تڑپا گیا جس میں انہوں نے فوج کو گالیاں دینے والوں اور ججوں کو واجب القتل کہہ کر عوام الناس کو ان کے قتل کی ترغیب دینے والوں انتباہ کیا کہ ریاست سے مت ٹکرانا، اس خطاب کو جہاں دنیا بھر میں پزیرائی ملی وہیں اپوزیشن اور لبرلز کی طرف سے بھی بھرپور خیر مقدم کیا گیا اور بلاول بھٹو تو اسمبلی میں نعرے لگانے لگے کہ ''قدم بڑھاو عمران خان'' اب وہ لوگ جو عمران خان کی طبیعت سے واقف ہیں اور جانتے ہیں کہ عمران اپنی عوام پر کبھی ظلم نہیں کرئے گا اور عمران خان کے خطاب کو اس باپ کی ڈانٹ ڈپٹ قرار دے رہے تھے جو غصے میں اپنی اولاد سے کہتا ہے کہ میں ''تیریاں ہڈیاں توڑداں'' اسی دوران دھرنا مظاہرین میں شامل شر پسندوں نے بھی انتہا کر دی اور توڑ پھوڑ، جلاو گھیراو جیسے درجنوں واقعات بھی منظر پر آنے لگے. بلآخر حکومت اور مظاہرین میں جب ایک معاہدہ طے پانے کے بعد دھرنا ختم ہوا تو کافی سارے لبرلز خون کی الٹیاں کرنے لگے کہ کہاں ہے وہ آہنی ہاتھ جس سے نپٹنے کا اعلان کیا گیا تھا. اس ضمن میں وزیر براۓ داخلہ امور شہریار خان آفریدی کا بیان اہم تھا کہ جب ان سے ایکشن لینے کا پوچھا گیا تو انہوں نے یہ کہہ کر ریاست کی ذمہ داری پوری کر دی کہ میں اپنے ہی شہریوں پر فورس کیسے استعمال کروں؟یہ بات بھی قابل ذکر ہے کہ میں نے بذات خود اس مذہبی سیاسی جماعت کے جس کارکن یا قائد کو یہ مشورہ دیا کہ آپ قانونی چارہ جوئی کریں، سڑکوں پر اس طرح سرکاری و عوامی املاک کو نقصان دینا مناسب نہیں، اتنی بات سن کر وہ میرے ہی ایمان کو تولنے لگا، کفر اور مرتد ہونے کے طعنے دیے گئے جس طرح اس مذہبی سیاسی جماعت کے قائدین نے بغیر سوچے سمجھے ہر ایک پر کفر کے فتوے دیے ان کے کارکنان کے عتاب سے بھی کوئی خوش نصیب ہی بچ گیا ہو گا. نجانے کیوں یہاں ہر کوئی خود کو ہی عاشق رسول اور جو دھرنا قائدین کی بات سے اختلاف کرے وہ گستاخ رسول ہو جاتا ہے.عرض اتنی ہے کہ دوسروں کو کو بھی جینے کا حق دو ہو سکتا ہے کوئی ٹائر جلا کر، راستہ روک کر، گالیاں سے کر، سرکاری اور عوامی املاک کو نقصان دے کر یا نقصان دینے والوں کی حمایت کر کے اپنے ایمان کا ثبوت نہ دے سکتا ہو، ہو سکتا ہے اس مذہبی سیاسی جماعت کے کارکنان کے علاوہ کسی دوسری جماعت سے تعلق رکھنے والا بھی راسخ العقیدہ مسلمان ہو

محمّد فیصل

کلیجہ چبانے والا انتقام

2018-10-15T11:45:00.001+03:00

مجھے ہے حکم اذاں

ابھی دو مہینے پہلے پاکستان میں تھا تو بک اسٹال سے ایک میگزین خرید لیا لیکن پڑھ نہ سکا، کل شب کتابوں کی الماری کھولی تو وہی دو ماہ پرانا ہفت روزہ میگزین ہاتھ لگا تو ورق گردانی کرتے ہوئے یہ خبر پڑھی کہ ویٹرنری اسسٹنٹ نے اپنے آفیسر کو اس لئے قتل کر ڈالا کہ اس نے اس کے خلاف کچھ رپورٹ کیا تھا، جس کے نتیجے میں ماتحت کا تبادلہ کر دیا گیا تھا۔ یہ خبر ایک عام سے اخبار اور عام سے میگزین کی خبر ہے مین سٹریم میڈیا میں اس کو اتنی کوریج نہیں ملی کہ لوگ اس مظلوم کی حمایت کے لئے اکٹھے ہوتے۔ مقتول کی عمر اور تصویر دیکھ کر اندازہ کیا جا سکتا ہے کہ شاید ابھی اسے نئی نئی نوکری میں ملک کو سنوارنے اور پرانے نظام کو تبدیل کر دینے کی خواہشیں بدرجہ اتم موجود ہوں اور وہ ابھی نمک کی کان میں نمک نہیں ہوا ہو گا۔ اس کی بات پڑھتے پڑھتے مجھے اپنے شہید بھائی مرزا ثاقب کی یاد آ گئی الله اکبر کیا باغ و بہار شخصیت تھا جو مورخہ ٢٣ جولائی ٢٠١٨ کو صرف اس لیے ناحق قتل کر دیا گیا کہ معاشرتی ناانصافی اور ظلم کے خلاف آواز اٹھاتا تھا. جس سے برداشت نہ ہوتا کہ کسی فرد کے ساتھ اسی کا کوئی اپنا ظلم کرئے یا اس کا حق مارے. شاید وہ بھی اس نمک کی کان میں نمک نہیں ہوا تھا، ظلم دیکھ کر چپ رہنا وہ کبھی سیکھ ہی نہیں سکا، کیا کسی کو قتل کرنا کوئی اتنا معمولی کام ہے کہ اس کے لیے ایک لمحہ بھی سوچنا گوارہ نہیں کیا جاتا؟

کسی کو معمولی رنجش پر جان سے مار دینا لوگوں کے لئے ایک معمولی اور عام سا کام ہے؟ شاید چند سال پہلے اخبار کے ایک تراشے پر لکھا ہوا تھا کہ مشہور شاعر محسن نقوی کے قاتل نےکیا انکشاف کیا تھا اس نے یہ کام فقط تین ہزار روپے کے عوض کیا تھا۔ شاید پندرہ بیس سال پہلے کے تین ہزار آج کے پچاس ہزار کے برابر ہوں، لیکن کیا کسی ذاتی رنجش کی بنا پر اپنے انتقام کی آگ میں اس قدر اندھا ہو جانا اور اخلاقیات، اور انسانیت کو بالائے طاق رکھ دینا ہمارے معاشرے کا وطیرہ ہے؟

لیکن ایسے ظالم معاشرے کو کون سمجھائے، ہاں مذہب سے لگاو میں وہ طاقت ہے کہ جو انسان کو سمجھا سکتی ہے کہ بہترین وہ ہے جس کے ہاتھ اور زبان سے دوسرے لوگ محفوظ ہیں، ہاں تعلیم میں وہ طاقت ہے جو انسان کو یہ شعور بخشے کہ اس کے انتقام کی حد کہاں تک ہے۔ اپنے حقوق کے لئے آواز اٹھانے یا اگر ہمیں کوئی ظلم کرنے سے روکے تو اس کا مطلب ہرگز یہ نہیں کہ ہم اپنے مخالفین کے لئے خود ہی سزا تجویز کرتے پھریں۔

یہ سوال میں اپنے قارئین سے کرتا ہوں کہ کیا ہمارے ہاں مذہب ناکام ہو گیا ہے یا تعلیم بے سود ہو چکی کہ ہم زمانہ جاہلیت کے انتقام کی کہانیاں دہرانے لگے ہیں، جس میں اپنے دشمن کا کلیجہ چبائے بغیر سکون نہیں ملتا۔ خدا تعالی ہمارے حال پر رحم فرمائے۔ اور ہمیں یہ شعور دے کہ معاف کردینے والا ہی افضل ہے۔

محمّد فیصل

دوست اور کتاب دوست

2018-09-27T16:58:00.000+03:00

دوست اور کتاب دوست

میرے ایک قریبی دوست ہیں مطالعہ جن کا پسندیدہ مشغلہ ہے اگر ان کے سامنے اگر کوئی یہ کہہ بیٹھے کہ اسے مطالعے کی عادت نہیں یا مطالعے کے لیے وقت نہیں ملتا تو وہ پلٹ کر جواب دیتے ہیں، "اطمینان رکھیے! آپ اس معاملے میں تنہا نہیں ہیں۔ دیگر جانور بھی کتابیں نہیں پڑھتے۔ جس خرابی کو تبدیل کرنا تمہارے بس سے باہر ہے، اس کے لئے فکر کرنا فضول ہے۔"

حقیقت یہ ہے کہ جانور اور انسان دونوں کو بہت سے کام جبلت سکھاتی ہے۔ بہت سے افعال ایسے ہیں جو حواس سے حاصل شدہ علم کی بنا پر ہوتے ہیں۔ بہت سی چیزیں دونوں ماحول سے اخذ کرتے ہیں۔ لیکن یہ صرف انسان کا خاصہ ہے کہ وہ اپنے علم کے خزانے کو الفاظ کی صورت دیتا اور اسے کتاب کی تجوری میں محفوظ کر دیتا ہے تاکہ دوسرے لوگ علم کے اس خزانے سے فائدہ لیں۔ قلم و کتاب کی یہی وہ سلطنت ہے جس کی تسخیر، انسانوں پر، تسخیرِ کائنات کے تمام دروازے کھول دیتی ہے۔

کتاب پڑھنا صرف انسان اور جانور ہی کا فرق نہیں بلکہ ایک قوم اور دوسری قوم کا بھی فرق بن جاتا ہے۔ جس قوم میں قلم و کتاب کی حکومت ہو وہ قوم دوسری اقوام پر اسی طرح حکومت کرتی ہے جس طرح انسان جانوروں پر حکومت کرتے ہیں۔

تاریخ گواہ ہے کہ اسلام اور قرآن کریم نے مسلمانوں میں لکھنے پڑھنے کا ایک غیر معمولی ذوق پیدا کر دیا تھا۔ یہ ذوق مذہب کے پس منظر میں پیدا ہوا مگر ایک دفعہ پیدا ہوگیا تو صرف مذہب تک محدود نہیں رہا، بلکہ علم کی تمام شاخوں تک پھیل گیا۔جس کا نتیجہ یہ نکلا کہ ہزار برس تک مسلمان دنیا پر حکومت کرتے رہے۔ مسلمانوں کا زوال بھی جس واقعہ سے شروع ہوا وہ یہی تھا کہ بغداد اور اسپین میں مسلمانوں کی کتابوں کے ذخیرے یا تو جلا دیے گئے یا پھر مسلمانوں کی شکست کے بعد عیسائیوں کے ہاتھ لگ گئے۔ یہی کتابیں یورپ پہنچیں تو وہ آنے والے دنوں میں دنیا کے حکمران بن گئے۔

آج بھی اگر ہم ترقی کی شاہراہ پر قدم رکھنا چاہتے ہیں تو اس کا ذریعہ صرف یہ ہے کہ لوگوں میں پڑھنے کی عادت پیدا کریں۔ کیونکہ علم کی فصل قلم و کتاب کی جس زمین پر اگتی ہے اسے پڑھنے کا شوق رکھنے والے لوگ سیراب کرتے ہیں اور جس معاشرے سے مطالعے کا ذوق اور عادت ختم ہوجائے وہاں علم کی پیداوار بھی ختم ہوجاتی ہے۔جس قوم میں علم نہ ہو اس کا انجام سوائے مغلوبیت کے کچھ اور نہیں ہو سکتا۔

محمد فیصل

http://faisalpak.blogspot.com/

کیا ہم بھی کوفی ہیں..؟

2018-09-17T23:06:00.002+03:00

کوفہ کسی ایک جگہ یا شہر کا نام نہیں بلکہ جہاں جہاں ظلم ہے اور اس ظلم پر خاموش رہنے والے ہیں وہ کوفہ ہی ہے ، کوفہ ایک استعارہ بن گیا ہے بے حسی اور بے عملی کا۔ یہ ظالموں کے گروہ کا نام نہیں‌ ہے، بلکہ اس ظلم پر چپ رہنے والے مجمعے کا نام ہے۔ یہ ایک ایسے سماج کی شکل ہے جہاں کسی ایک مظلوم فرد یا گروہ کو ایک ظالم گروہ مسلسل ظلم کا نشانہ بناتا ہے، لیکن اس ظلم سے نفرت کے باوجود لوگ تماشائی بنے اپنی اپنی عافیت گاہوں میں‌ دبکے رہتے ہیں.

ہمیں اپنے آپ کا محاسبہ کرنا ہے کہ کیا ہم بھی کوفہ مزاج قوم ہیں ان کی طرح دھوکہ باز، منافق، ابن الوقت، جزباتی اور طاقتور کے آگے جھکنے والے۔ کوفہ اس شہر کا نام ھے کہ جہاں بنت حوا کو سر برہنہ کر کے پھیرایا جاتا رھا لیکن یہ قوم خاموش رہی کہ یہ میری کونسی بہن بیٹی لگتی ھے۔ گھروں میں کام کرتے بچوں پر ایسے ایسے ظلم کے پہاڑ توڑے گئے کہ بتاتے ہوئے بھی رونگٹے کھڑے ہو جاتے ہیں لیکن ہم خاموش رہے۔ کوفی قصورکے وہ لوگ ہیں جو 300 بچوں کے ساتھ زیادتی کی ویڈیوز پہ بھی خاموش رہے کہ سامنے والے طاقتور ہیں۔ کوفہ اس بستی کا نام ھے کہ جس کو مذ ہب کے نام پہ جلا ڈالا گیا لیکن ہم خاموش رہے کہ وہ کون سے مسلمان ہیں۔

کوفہ مزاج وہ قوم ھے کہ جو ہزارہ برادری کی لاشوں کو سڑکوں پہ دیکھ کے بھی بےحس رہی کہ یہ دوسرے مسلک کے لوگ ہیں۔کوفہ ایک ایسے معاشرے کا نام ہے جہاں درجنوں مسافروں کو بسوں سے اتار کر، فرقے کی شناخت کے بعد قتل کر دیا جاتا ہے، لیکن زبانوں سے اف تک نہیں کی جاتی کہ قتل ہونے والوں کا تعلق اپنے مسلک سے نہیں۔ کوفی اس شہر کے باسی ہیں کہ جہاں دو بھائیوں کو تشدد کر کے مارا گیا لیکن قوم خاموش رہی کہ یہ کون سے ہمارے بھائی، بیٹے تھے۔ کوفہ مزاج کی حامل وہ قوم ہے جہاں کئی زینب جیسی معصوم کلیوں کو ہوس کا نشانہ بنایا گیا لیکن ہم خاموش رہے کہ ہمارے بچے تو محفوظ ہیں۔کوفہ مزاج ہے وہ قوم جو اپنے اوپر ہونے والے ہر ظلم کو سہتی تو ہے لیکن آواز بلند نہیں کرتی۔ وہ ظلم معاشی ہو یا جانی۔۔۔ ہم نے خود پہ خاموشی واجب کر لی۔ یہاں جو بھی آیا لوٹ کے چلا گیا لیکن ہم لوٹنے والے کے حق میں ہی نعرے لگاتے رھے۔

نظریات اور انقلاب کی باتیں تو بہت ہوتی ہیں لیکن جب بھی کوئی طاقتور آیا ہمارے نظریات اور انقلابی سوچ کو اپنے قدموں میں روندتا چلا گیا۔سچ تو یہ ہے کہ ہم سب اپنی اپنی عافیت کے کوفوں میں آباد ہیں، خاموش تماشائوں کی طرح۔ ہماری باتیں، ہماری عبادتیں، ہماری ریاکار پارسائی کوفہ کے ان باسیوں سے زیادہ مختلف نہیں ہے جو اپنی اپنی پناہ گاہوں میں‌ چھپے خدا سے اپنی مرضی کے ان گناہوں کی بخشش مانگ رہے تھے جن کی شاید خدا کو پروا بھی نہیں تھی۔

لیکن اس دوران ظلم دیکھ کر خاموش رہ کر اتنا بڑا گناہ کر گئے جس سے رہتی دنیا تک چھٹکارہ پانا ممکن نہیں۔ ہم سب کوفہ کے رہنے والوں کا عمل دہراتے ہیں۔ ہمارا کمال صرف یہ ہے کہ ہم ہر عہد کے یزید کے دربار میں بیٹھ کر گزرے یزید کو گالیاں دیتے ہیں۔ اگر ہر دور کے کوفی خاموش رہنے کے بجائے اپنا اپنا فرض ادا کر تو شاید 61 ہجری کے بعد سے اب تک ہونے والی کئی کربلائیں وقوع پذیر نہ ہوئی ہوتیں

محمّد فیصل

جب ظلم حد سے بڑھ جاۓ،

2018-06-25T07:06:00.000+03:00

جہان کہنہ کے مفلوج فلسفہ دانوں

جب ظلم حد سے بڑھ جاتا ہے تو ریاست بھی کچھ کرنے سے قاصر رہتی ہے۔ جب پولیس رشوت لینے کو حق سمجھتی ہو کھانے پینے کی چیزیں عوام سے چھینی جاتی ہوں، گھنٹوں سڑکیں پروٹوکول کی وجہ سے بند رہتی ہوں، ہر آدمی روڈ پہ کام کرنے کو اپنا حق سمجھتا ہو، بجلی چوری کی جلائی جاتی ہو، چور سینہ تان کے چلتے ہوں، اسمبلیاں اور اس کے ممبران اپنے کاروبار کی باتیں کرتے ہوں، آئے روز ماتم ہوتے ہوں، غربا پر ظلم ہوتے ہوں، تجاوزات کو قانونی شکل دی جاتی ہو، سرکاری خزانوں کو نقصان پہنچائے جاتے ہوں، تعلیم تجارت بن جائے اور تجارت تباہ و برباد ہو جائے، گھر کو گھر کے چراغ سے آگ لگ جائے، جب دکانوں کو آگ لگے اور لوگ چوری کی نیت سے وہاں کھڑے ہوں، ہر فرد اپنے آگے والے کی موت کو اپنی ترقی کا زینہ سمجھتا ہو دوست، دوست سے خوف زدہ ہوں، بازار میں ہر چیز دو نمبر کی بکتی ہو رشتے بیگانگی کی راہ پہ چلتے ہوں، جب مٹی سے پاوُں اُکھڑ جائیں اور زندگی سے مقصد مفقود ہو جائیں، بچے والدین سے بڑے ہوجائیں جوتے بڑے بڑے شو کیسوں میں سجائے جاتے ہوں اور کتابیں فٹ پاتھوں میں رکھی جاتی ہوں، اسکولوں میں گائے بکریاں باندھی جاتی ہوں اور مردہ کتے اور گدھے کا گوشت عوام کو کھلایا جاتا ہو، جن اداروں کا کام ہر قسم کی برائی کو روکنا ہے وہی برائی کی جڑ بن جائیں تو خلق خدا کے دکھوں کا مداوا کون کرئے گا۔۔۔ وہاں پھر جس کے پاس پیسہ اور طاقت ہو گی وہ جنگل کا قانون بنا کر جیئے گا اور دوسروں کا جینا اجیرن کرئے گا۔ ایسا ہی ایک اور دلسوز واقعہ گاؤں جیٹھ پور تھانہ حجرہ شاہ مقیم کے قریب پیش آیا جہاں ایک بار پھر ظلم کی انتہا کر دی گئی، غریب مزدور کے بیٹوں کو اسکے گھر سے اسلحہ اور غنڈہ گردی کے زور پر مقامی چودھری اسلم ارائیں بمہ 9 بدمعاشوں کے ان مزدور کے گلے میں کپڑا ڈال کے گھسیٹتے ہوئے اپنے ڈیرے پر لے گیا جہاں اس مزدور کو صرف اس وجہ سے ظلم و تشدد کا نشانہ بنایا گیا کہ مزدور نے چوہدری کی زمینوں پر کام کرنے سے انکار کیا۔ اس کے جسم پر برف توڑنے والے سوئے مارے گئے۔ کہاں ہیں ارباب اختیار جنہیں خلق خدا پر ہوتا ظلم نظر نہیں آتا۔۔؟ محکوموں کے لیے یہی بڑی خبر ہوتی ہے کہ وزیراعلی، وزیراعظم یا چیف جسٹس نے نوٹس لے لیا۔۔؟ ادارے کہاں ہیں جنہیں امن و امان قائم کرنے اور مظلوموں کی داد رسی کے لیے اسی عوام کے ٹیکس سے تنخواہوں دی جاتیں ہیں۔۔؟

کاش میرے پاس اختیار ہوتا تو صرف قلم نہ اُٹھاتا بلکہ اس معاشرے کے در و دیوار ہلا ڈالتا، میرے پاس تلوار ہوتی تو سیاسی کھوپڑیوں کی بلند فصل کاٹتا جو ہر مجرم کی پشت پناہی کے منصوبے بناتیں ہیں اور انہی سیاسی کھوپڑیوں اور ان میں موجود غلیظ سوچوں کی وجہ سے ہمارا معاشرہ زوال کا شکار ہے۔

کاش مجھے اختیار ہوتا کہ میں بڑے بڑے عماموں کے پیچ کھولتا، ان کی دستار فضیلت کے پھریرے بنا کر بالا خانوں پر لہراتا اور ایوان اقتدار کے دروازے پر کھڑے ہو کر فقیہ شہر کو للکارتا اور اس کی دراز قبا پھاڑ کر اس کے ٹکڑے دریدہ عفتوں کے حوالے کرتا تا کہ وہ اپنی برہنگی ڈھانپ سکیں۔

اگر ان الفاظ سے کسی کی آنکھیں کھل جائیں تو میں سمجھوں گا کہ میرے الفاظ اور احساسات کام آ گئے اور اس کے نفس کی نیکی جاگ گئی۔ مجھے داد و تحسین کی ضرورت ہے نہ فقیہوں کی ملامت، معلموں کے قہر اور نہ سیاسی راہنماؤں کی خشونت سے ڈرتا ہوں کہ اس کرہ ارض پر اس سے زیادہ بے مایہ چیز اور کوئی ہے ہی نہیں۔

محمد فیصل

مجھے ہے حکم اذاں

شریکِ حیات کے نام۔

فِضائے بَدّر پیدا کر

مولانا نرغے میں۔

ماہِ صیام اور چِڑی روزہ۔

میں نے اقبال کو مرتے دیکھا

قانون کی لاٹھی یا لاٹھی کا قانون؟

قانون کی لاٹھی یا لاٹھی کا قانون؟

مکڑی کا جالا

غریب اور کمزور کے لیے اپنا حق مانگنا اور حق حاصل کرنا جنگل کے قانون کی طرح ہے.

غداروں کی جنت

آج کی جنرل رانیاں

تبدیلی آئی رے،

ہمارا اقبال بلند ہو۔

علامہ محمد اقبال اور عید میلاد النبی صلی اللہ علیہ وسلم

"کفایت شعاری"

زاغوں کے تصرف میں عقابوں کے نشیمن

مٹی نہ پھرول فریدا، یار گواچے نئیں لبدے ''آہ'' رمیض جاوید

ضمیر بہرحال ضمیر ہے

کیسے کہہ دوں کہ مجھے چھوڑ دیا ہے اس نے

الفاظ کا تقدس

مجھے ہے حکم اذاںالفاظ کا تقدس

محمّد فیصل

میرے بیٹے ہیں کہاں، اردو زبان پوچھتی ہے

بھیک یا محنت؟

میں بھی مسلمان ہوں، تصدیق کر دیجیے

کلیجہ چبانے والا انتقام

دوست اور کتاب دوست

کیا ہم بھی کوفی ہیں..؟

جب ظلم حد سے بڑھ جاۓ،

مجھے ہے حکم اذاں

الفاظ کا تقدس