வசந்தகால பறவை

மிடில்கிளாஸ்

2026-09-22T21:14:37.327-07:00

மிடில்கிளாஸ் தம்பதியின்
வாழ்வில்
கோடிட்ட இடங்கள் நிறைய,

   ஒரு மைசூர் ட்ரிப்
   ஒரு காலி மனை
   சொந்த வீடு
   சேமிப்புகள்
   உதிரி வருமானம்
   நிறைய புதுத்துணிகள்
   சமைக்காத ஞாயிறுகள்,
   இத்யாதி இத்யாதி..

வாழ்வின் விடுபட்ட
வசதிகளுக்கு பின்னால்
சில தவிர்க்க முடியாத காரணங்கள்
இருக்கும்,
அந்த கோடிட்ட இடங்களை
மேடிட்ட காதல் கொண்டு
நிரப்பி முன்னெடுத்து
செல்கிறது வாழ்க்கை,

வாழ்வெனபது நிறைவான
மனநிலைதானே
என்றால்,
ஆமாம் ஆமாம் என்று கல்மிஷமாய்
வெடித்து சிரிப்பாய்
உன் சிரிப்பின் இசையில்
காதலின் தயவில்
இந்த வாழ்வு
செழிக்கிறது...
வசதிகள்
நிராசைகள்
இரண்டாம்பட்சமாய்
பின் வரிசையில்
காத்திருக்கிறது....

வாழ்வெனபது நிறைவான
மனநிலைதானே...

இனிய பிறந்தநாள் நல்வாழ்த்துக்கள்
நிறைவே...

நகை

2026-09-22T20:52:28.008-07:00

கால்செயின் என்பாய்
கொலுசு என திருத்துவேன்,

கழுத்து செயின் என்பாய்
இவளை திருத்த முடியாதோ
என யோசிப்பேன்,

ஆன்ட்டிக் என்பாய்
பழசு பட்டுதானே என்பேன்,
சோக்கர் என்பாய்

அதெல்லாம் போட்டுகிட்டா
வல்லு வதக்குன்னு
சாப்பிட முடியாது
என்பேன்,

ஒட்டியாணம் பக்கமெல்லாம்
நீ போனதே இல்லை,
உனக்கு வைரம் மிகப்பிடிக்கும்
அடமானம் வைக்க முடியாதே
என்பேன்,

நீ வேண்டுவன வாங்கித்தரும்
வசதியில் நானில்லை,
நான் வாங்கித்தருவதில்
வாழ்ந்துகொள்ளும்
உயரத்தில்
நீ இருக்கிறாய்...

இனிய பிறந்தநாள் நல்வாழ்த்துக்கள்
நகைகனவே...

ஊடல் முதல் காதல் வரை

2026-09-22T20:21:08.290-07:00

எல்லோரையும் போலவே
நான் வாதிடுகிறோம்,
நீ கண்ணீரும்
நான் மௌனமும்
அணிவோம்,
நம் காதல் வெட்டவெளி
ஆலமரம் போல் காத்திருக்கும்,

ஊடலுக்கு பின்
ஓரிரு நாட்களில்
உடைந்த நாம்
ஊடலின் சாரலில்
மெல்ல கனிந்து,
காதல்
நிறைமாத கர்ப்பிணி
கணக்காய்
ஒரு பெருந்தவிப்பை
சுமந்துகொண்டு,
வேடிக்கை பார்க்கும் போது,

நான் என்னையும்
நீ உன்னையும்
தூக்கி எறிந்துவிட்டு
நாம் நம்மை
உயர்த்திபிடிப்போம்,
அந்த அன்பின்
வடிவத்தில்
நிதானத்தின் நேர்த்தியில்
நம் காதல்
வாழ்கிறது...

இனிய பிறந்தநாள் நல்வாழ்த்துக்கள்
காதல் காளியே....

ஆடுகள், கோழிகள் மனிதங்கள்

2026-07-04T23:35:49.803-07:00

நேற்றிரவு "தி ஷீப் டிடெக்ட்டிவ்ஸ்(the Sheep detectives)" படம் பார்த்தோம் நானும் சபர்மதியும். லினியே ஸ்வானின் "த்ரீ பேக்ஸ் புல்" என்ற நாவலை தழுவி எடுக்கப்பட்ட பிரிட்டிஷ் படம்..டைரக்டர் கைல் பால்டா...

இன்று காலை சமையல் அறையில், துருவிய தேங்காயை தின்று கொண்டே ஜன்னலை வெறிக்கையில், சபர்மதி கேட்டாள், என்ன ஆழ்ந்த சிந்தனை?
நேற்றைய படத்தை பற்றித்தான்,
எனக்கு பிடிக்கலைபா என்றாள்...
ம்ம்ம் ப்ளாஸ்ட், கருப்பு மாதிரியான அடிதடி படங்களின் ரசிகைக்கு
நுண்ணூர்வுகள் வழி நகரும் இந்த படம் போரடிப்பதில் ஆச்சர்யமில்லை..

இந்த பதிவை எழுதும் போது, எந்த கேள்விக்கான பதிலை நான் எழுதுகிறேன் என் மகன் கேட்டான், ஏன் இதை எழுத விழைகிறேன் என சரியாக சொல்ல தெரியவில்லை, ஆனால் இந்த படம் மனதை எதோ செய்கிறது...

படத்தில் ஜார்ஜ் ஒரு ஷெப்பர்ட், ஒரு ஆட்டுமந்தையை சொந்தமாக வைத்திருக்கிறான், அதுகளுடன் மிக அன்பாக இருக்கிறன், ஆடுகளும் அவன் மீது மிக அன்பாக இருக்கிறன. ஒவ்வொரு ஆட்டுக்கும் ஒரு பெயர்,
அதுகளுடன் பேசுகிறான், ஆடுகளும் அவன் பேசுவதை புரிந்துகொள்கிறது, தனிமையில் ஒரு கேரவேனில் வாழும் ஜார்ஜ்க்கு எல்லாம் ஆடுகள்தான், தினமும் டிடெக்டிவ் கதைகள் படித்து மாலையில் ஆடுகளுக்கு அதை விளக்குகிறான், சில நேரங்களில் இன்றைய கதையில் சஸ்பென்ஸ் வைத்து நாளை முடிக்கிறான்,

இரவு தூங்கபோகுமுன் ஆடுகள் கதை மாந்தர்களையும், கதையில் யார் கொலைகாரனாய் இருப்பான் என்பதையும் யூகிக்கின்றதாய் கதை நீள்கிறது..
தீடீரென ஜார்ஜ் ஒரு நாள் கொலைசெய்யப்படுகிறான், அவன் வளர்த்த ஆடுகள் அந்த கொலையை எப்படி துப்பறிகின்றன என்பது மீதி கதை..

கதையில் ஒரு இடத்தில், தேவாலயத்திற்கு செல்லும் ஆடுகள், தங்களுக்குள் பேசிக்கொள்ளும் சம்பாஷணைகள்,
" இங்க யாரு இருக்கா?
யாரோ கடவுள்ன்னு ஒருத்தர் இருக்காராம்,
அவரும் ஷெப்பர்ட்தானம்"
ஆடுகளின் பார்வையில் உலகத்தை பார்ப்பது ஒரு புது அனுபவம்,
****************************************

ஜெயக்குமார் எங்கள் கல்லூரி தோழன், அன்பு, கட்டுக்கோப்பு, சரி, தவறுகள் பற்றிய அவனது தீர்க்கமான பார்வை, அன்பின் கனிவு, எதார்த்தம், எள்ளல் என்று அவனிடம் இருக்கும் நேர்த்திகளுக்காகவே, 25 வருடங்களுக்கு முன்பாகவே அவனை ஜெம்(Gentle man ) என்றுதான் அழைப்போம், இன்று வரை அவன் அப்படியேதான் வாழ்கிறான்...

2004 ல் ஒருமுறை அவன் கிராமத்து வீட்டிற்கு சென்றபோது , நானும் அவனும் கயிற்று கட்டிலில் வாசலில், அவனது அம்மா வாசற்படியில் அமர்ந்து அருவாமனையில் காய்கறிகளை வெட்டிக்கொண்டிருந்தார்,நாம் பேசும்போது எள்ளலாய் கவுண்டர்(எதிர்வாதம்) செய்வதில் ஜெம்மும் அவனது அம்மாவும் phd முடித்தவர்கள், அவர்களுடனான பேச்சு மிக யதார்த்தமாய், சுவாரஸ்யமாய் இருக்கும், எதையும் பெருசாக அலட்டிகொள்ளமால் இலகுவாய் வாழ்க்கையை எதிர்கொள்ளும் ஒரு துணிவு போக்கு அது,

இரண்டு கலர்கோழிகள் எம்முன் வந்தத்து, இதென்ன வயசான கோழியா இருக்கு, பொதுவாய் இந்த வயது கோழிகளை விற்றோ, சமைத்தோ விடுவார்களே? என்றேன்!
அதை அங்க கேளு என்றார் அம்மா!
ஜெம் மெல்ல சிரித்து கோழிகளை பார்த்தான், ஜெம் எல்லா நேரமும் பேசமாட்டான், சில நேரங்களில் மௌனமாய் பார்ப்பான், சிரிப்பான், நாம் பதிலை புரிந்து கொள்ளவேண்டும்,
இந்த சூழலில் எனக்கு ஒன்னும் புரியவில்லை,

அம்மா தொடர்ந்தார்,
இவன் சிறுவனாய் இருக்கும் போது சந்தையில் வாங்கிவந்த கலர்கோழிகுஞ்சுகள் இது, மிக பாதுகாப்பாய், அன்பாய் வளர்த்த இவன்,
இது சாகும் வரை நம்ம வீட்லேயே இருக்கட்டும், இதை விற்றால் வேறு யாராவது இதை கொன்று விடகூடும், நாமே அதன் கடைசிகாலம் வரை நன்றாக பார்த்துக்கொள்வோம் என்று கட்டளை என்றார்!
எனக்கு ஆச்சர்யம் தாங்கவில்லை, நான் ஜெம்மை பார்த்தேன்
ஆமாடா என்றான்....
********************
முன் சொன்ன படத்தில் ஜார்ஜ் ஒரு சைவன்(vegan ), அவன் இறைச்சிக்காக அல்லாமல் ஆட்டின்ரோமங்களுக்காக(wool ) மட்டுமே ஆடுகளை வளர்க்கிறான், இறைச்சிக்காக ஆடுவளர்க்கும் ஒருவன் மீதும், கறிக்கடைக்காரன் மீதும் ஒரு வித ஒவ்வாமையுடன் இருக்கிறான், ஆடுகளின் தீராத ஒரு நோய்க்கு மருந்துகண்டுபித்து அதன் ஆயுளை நீட்டிக்கிறான்... ஆடுகளுக்கும் இறப்பு என்றால் என்னே என்று தெரியாமல்தான் வாழ்கின்றன...
*****************
வேள்பாரி கதையில், பாரியும் ஆதினியும் நாக குகைக்குள் சென்று மறுநாள் திரும்பும்போது, நேற்றிரவு நிறுத்திய தேரில் இரண்டுபுது முல்லைக்கொடிகள் படர்வதை கண்டு அதை விலக்க மனமில்லால், தேர் இங்கேயே இருக்கட்டும் என்று சொல்லி குதிரைகளை அவிழ்த்து
கூட்டிக்கொண்டு நெடுந்தொலைவு நடந்தே வீடு வருவான்,
*****************
நண்பர்களே ,
ஜார்ஜ், ஜெம், பாரி மூவரும் ஒரு நேர்கோட்டில் இணைகிறார்கள் அது அன்பு.
உண்மையில் யோசித்தால் சகஉயிர்கள், மனிதர்கள் மீது நமக்கு அன்பு இருக்குமானால்,

கருணை, நேர்மை, கனிவு என்ற மற்ற குணங்கள் தானாய் வந்துவிடும் போல....

அன்புடன்

2026-03-25T22:27:00.000-07:00

இனிய பிறந்தநாள் நல்வாழ்த்துக்கள் முகிலா,

உன் முதல் அழுகையன்றுதான் நான் கடைசியாக அழுதது,

முதல்முறை நீ சிரிக்கும்போது, சிணுங்கும்போது, முறைக்கும் போது,
உன்னுடன் சேர்ந்து நான் குழந்தையான நாட்கள் கோடி,
முத்தங்கள் கேட்டால்,

ஸ்பரிசங்கள் தருவாய்
ஸ்பரிசங்கள் கேட்டால்
பால்வாசனை தருவாய்
பேச சொன்னால்,
சைகைகள் தருவாய் ,

மிகசரியான உன்னை நாங்கள் திரும்ப திரும்ப சரிசெய்கிறோமோ என்ற சந்தேகம் வந்ததும் உன்னை சரி செய்வதை நிறுத்திவிட்டேன், எல்லா இடங்களிலும் நீ சரியாய் இருப்பது சற்று நெருடலாககூட இருக்கிறது, கொஞ்சம் குறும்பு செய்யேன்...

எனக்கு பயமாய் இருக்கிறது என ஆதித்யா சொன்னபோது, முகில் இருக்க பயமேன் என்றேன், நீ எங்கள் நம்பிக்கை, தைரியம், ப்ரியம், பெருமை

ஏன் அடையாளமும் கூட,

இந்த கவிதை இன்று(9 வயது) உனக்கு புரியாது, உனக்கும் புரியும்போது,
உனக்கும் எனக்கும் பதின்மத்தின்(teeanage) பிணக்குகள் ஆரம்பித்திருக்கும்,
நான் தவறென நீயும்,
நீ தவறென நானும்,
சண்டையிடுவோமோ என்னவோ!
காலம் பதில் சொல்லட்டும்..

என்னவானாலும் சரி
நீ வழக்கம்போல் மனது நிறைய "அப்பா" என அழைப்பதை மட்டும் நிறுத்தாதே
ஆயுசுக்கும் நெகிழும் அந்த சத்தத்தில் இந்த ஆன்மா...

இப்படிக்கு
அன்புடன் அப்பா...

முன்பொரு நாள்

2026-03-08T19:07:00.000-07:00

முன்பொரு நாள்
முன்பனி காலத்தில்
நம் காதல்
சூழ் கொண்ட நாள் இது,

நீ வேண்டும்,
நீ மட்டுமே வேண்டுமென்ற என்னையும்,
நான் சரியா
குழப்பத்திலிருந்த உன்னையும்,
கை சேர்க்க
காலம் தயாரானது,

இலக்கணங்கள்
திருத்தி எழுதி
அன்பின் சாட்சியாய்
காதலுக்கு நாம்
நேர்ந்துக்கிட்டோம்,

புது புது அர்த்தங்களுடன்
நித்தம் பூக்கும்
நம் காதல் புன்னகைகளும்,
போர் கோபத்தில்
தவறவிடாத நம்
நிதானங்களும் ,
காதலுக்கு
நாம் செலுத்தும்
நேர்த்திக்கடன்கள்...

வாழ்க காதல்
வளர்க நேர்த்திக்கடன்கள்,
நன்றி காதலியே
நன்றி நல்லவர்களே...

காதல்

2026-02-13T23:39:00.000-08:00

விவாகரத்தான இருவர் காதலித்து பின் பதிவு திருமணம் செய்வதென முடிவானது, கூட இருந்த நானும் அவர்களுக்கு உதவ முன் வந்தேன், பதிவு திருமண சட்ட சிக்கல்கள் களைந்து அவர்களின் திருமணத்தில் உதவுவதாய் உறுதியளித்தேன்.

விதிமுறைகள் உண்மையில் எனக்கும் தெரியாது, சரி தெரிந்துகொள்வோம் என்ற நோக்கில் மாமாவிடம் நிகழப்போவதை சொன்னேன், அவரும் எனக்கு தெரிந்து ஒரு வக்கீல் இருக்கிறார் காதல் ஜோடிகளுக்கு பதிவு திருமணங்கள் பல செய்து வைத்தவர், என் கூறி அவர் வீட்டிற்கு அழைத்து சென்றார்.

குக்கிராமம் அது, பசுமையான பட்டிக்காடு, பைக்கில் வளைந்து நெளிந்து பயணித்து அவர் வீடடைந்தோம், ஒரு பழைய முண்டா பனியன், சவரம் செய்யாத 5 நாள் தாடி, பழைய வேட்டி, சின்ன மேல்துண்டு, 50 வயது மதிக்கத்தக்க மனிதர், ஒரு முழுமையான விவசாயியை, வக்கீல் என் அறிமுகபடுத்தினார் மாமா....

வீட்டிற்குள் அழைத்தார் வக்கீல், வாசற்படியை அடைத்து இரண்டு கட்டில்கள் குறுக்கும், நெடுக்குமாக இருந்தது, ஒரு வயதான நாய் எனக்கென்ன என்பதுபோல் தலையை தூக்கி பார்த்து பின் தூக்கத்தை தொடர்ந்தது,
உள் அழைத்தவரிடம் விவரங்கள் சொன்னோம், வாழ்த்தினார், மகிழ்ந்தார், என்னென்ன டாக்குமெண்ட்கள் வேண்டுமென்ற விவரங்கள் சொன்னார், மாமா கொஞ்சம் கொடுக்க சொன்னார், கொடுத்தேன்.

வீட்டை நோட்டமிட்டேன், ஒரு சுவர் மட்டும் அடர் வாடாமல்லி கலரில் தனியே இருந்தது, இரு செங்கற்களை ஒரு நேர்க்கோட்டில் வைத்ததுபோன்ற இரு அறைகள், பக்கவாட்டில் சுவர் மட்டும் வைத்து மற்றொரு அறை, ஒரு வளைவு நெளிவில்லாமல், ஒரு பிளான் இல்லாமல் கட்டப்பட்ட வீடு போன்றுஇருந்ததது... முதல் அறையில் இரண்டு சேர்கள் ஒரு கயிற்றுகட்டில், அதன் மேல் ஒரு நேர்த்தியான பெட்ஷீட், அதன் மேல் அமர்ந்துதான் அவர் பேசிக்கொண்டிருந்தார், உள் அறையிலும் பெரிய பொருட்களில்லை, துடைத்தது வைத்தார் போலிருந்தது, பெரிதாய் உபையோகபடுத்தாத வீடாகப்பட்டது....

வீட்டைசுற்றி பெரிய பராமரிப்பில்லை, வெளியே ஒரு கொட்டாயில்(குடிசை) ஒரு பாட்டி குத்துக்காலிட்டு ஒரு சின்ன கல்லின் மேல் அமர்ந்து காலத்தை விட்டேத்தியாய் பார்த்து கொண்டிருந்தது, அம்மா நலமா என்றார் மாமா, அடையாளம் தெரியலயே என்றது பாட்டி, என் அம்மாவும் நீயும் நல்ல தோழிகள், நீங்கள் இருவரும் கதைபேசி சிரித்து மகிழ்ந்த நினைவுகள் இன்னும் என்னுள்ளே இருக்கிறதென சொல்லி , நான் இன்னாரின் மகன் என்றார்..

அட அவளின் மகனா நீ ? சௌக்கியமா அப்பா? என்ற நலம் விசாரிப்புகளை சற்று சுரத்து குறைந்த, தேய்ந்துபோன மனநிலையை தேற்றிகேட்டது ஆயா!!!

வீடு வரும் போது, மாமாவிடம் கேட்டேன், யார் இவர், இவரின் குடும்பம் எங்கே?பெண்கள் இல்லாத ஒரு பராமரிப்பற்ற வீட்டை போலவே இருக்கிறது என்றேன்?
மாமா ஒரு 20 நொடி மௌனத்திற்கு பிறகு ஒரு கதை சொன்னார்....!!!
//கதையை பின்னால் சொல்கிறேன்,

பின் வந்த நாட்களில் அலைபேசியில் திருமணநிகழ்வுகளின் முன்னேற்றம் எப்படியென வெவேறு நாட்களில் அவரிடம் கலந்து பேசினேன், ஒரு கட்டத்தில் தடுமாறினர் அவரால் அதை செய்துகொடுக்க முடியவில்லை என் தோன்றியது எனக்கு, பேச்சின் இடைவெளியில் ஒரு சிறு மௌனம் பின் நான் வேண உங்களிடம் வாங்கிய பணத்தை திருப்பி அனுப்புகிறேன் என்றார் ...நான் பதறி சிதறி இல்லை வேண்டாம் நீங்கள் தொடர்ந்து முயற்சியுங்கள் என்றேன்....

பின் வேறொரு பத்திரப்பதிவர் பிடித்து, திருமணம் முடித்து காரில் எங்கோ செல்லும்போது யுகேந்திரன் கேட்டார், அந்த பணம்(வக்கீலிடம் கொடுத்தது) என்னானது !
மதிய உணவில் ரசம் ஊற்றிய லாவண்யா கேட்டது அந்த பணம் என்னது!

இருவருக்கும் ஒரு மாமா சொல்லிய அந்த கதை சொன்னேன்,

சுமார் 30 வருடங்களுக்கு முன்னாள், இவரும்(வக்கீல்) அந்த பொண்ணும் தீவிரமாய் காதலிக்க, அந்தஸ்து, ஜாதியின் உட்ப்பிரிவு, கெளரவம், வேற்று ஈகோ என எண்ணற்ற காரணங்களால் பெண் வீட்டார், கட்டயமாய் அந்த பெண்ணை வேறு ஒருவருக்கு திருமணம் முடிக்க, திருமணம் முடிந்த இரண்டு மாதங்களில் அந்த பெண் மருந்து குடித்து தற்கொலை செய்துகொண்டு இறந்துவிட்டார்...

அன்றிலிருந்து இன்றுவரை திருமணமே செய்து கொள்ளாமல் அவள் நினைவாகவே வாழ்கிறார் இவர்... 5 ஏக்கர் தோட்டம், ஓரளவு வருமானம், ஓரளவு சம்பாத்தியம் எல்லாம் இருந்தும் காதலுக்காக மட்டுமே வாழும் ஒருவரை காதல் கடவுளாக பார்க்கிறேன், அந்த காதல் கடவுளுக்கு நான் கொடுத்த சிறு காணிக்கையாக என் பணம் அவரிடமே இருக்கட்டும் என்றேன்....இருவரும் பதிலேதும் பேசவில்லை....

மற்றொரு நாள் மதியம், ரசம் முடிந்து தயிர் ஊற்றும் தருணத்தில், லாவண்யா பதற்றத்துடன் வந்து அவர் இறந்துவிட்டார் என்றது?
யார்?
அந்த வக்கீல்!
ஏன் என்னாச்சு ?
மல்லிகை மலர் ஏற்றி வந்த மினி லாரி மோதி, சம்பவ இடத்தியிலேயே
இறந்துவிட்டாராம்...!!

திக்கென இருந்தது, ஏற்கனவே ஒரு மலர் மோதி 30 வருடங்களுக்கு முன் இறந்தவரை. ஒரு மலர் லாரி மோதி கொல்ல வேண்டிய அவசியம் என்ன இந்த கடவுளுக்கு என கேட்க தோன்றியது.....

சாவகாசமாய் அவரிடம் அமர்ந்து.
"ஏன் வேறுமணம் செய்துகொள்ளவில்லை?
இந்த வைராக்கியத்தின் பின்னாள் யாருக்காவது எதையாவது சொல்ல விரும்புகிறீறா?
ஒரு விதவைக்கு வாழ்ககை கொடுத்திருகாலமே "
என்றான தர்க்க நியாங்கள் அற்ற,

"உங்கள் காதலை பற்றி சொல்லுங்கள்" என்ற தட்டையான ஒற்றை கேள்வியை கேள்வியை மட்டும் அவர் முன் வைத்து, தவம் இருக்கும் முனிவன் போல் அமர்ந்து அவரின் காதல் கேட்க ஆசைப்பட்டேன்...

இன்று அவர் இல்லை
இன்று காதலர் தினம்
மழையிலே கரையுதே இரண்டு மனங்களின் தூரம் என்ற பாடல் வரி காற்றில் கேட்கிறது ...

மரணத்திலே கரையட்டும் இரண்டு மனங்களின் தூரம் என் சொல்ல தோன்றுகிறது.. யாரிடம் இதை சொல்ல!

மருந்து குடித்தோ,
மலர் வண்டி மோதியோ,
சாகடிக்க முடியாத அவரின் காதல்
ஒரு வாடாத மல்லி...

தேவதை

2025-09-22T21:08:00.000-07:00

நீ ஒரு தேவதை தெரியுமாடி
என்றாள்,
இரு பாத்திரம்
விளக்கீட்டுவரேன்
என்று ஓடிவிடுவாய்,

நீ ஏன்பிறந்தாய் தெரியுமா

என்றாள்,

இளைவன் பாத்ரூம் போகனுமென்பான்,

நாம் சரிஜோடியா! என்றாவது சிந்ததுண்டா என்றாள்,

மூத்தவன் முறுக்கு எங்கே காணம் என்பான்,

பாத்திரம், மூத்திரம், சோத்திரம்(ஸ்னேக்ஸ், பால்,உணவு) தாண்டி,

ஒரு கைகுழந்தைகாரி

காதலிப்பதெல்லாம்

கனவாடி என்றாள்?

சின்ன கண்களில்

செல்லமாய் சிரித்து

காதல் தீ பற்றவைப்பாள்..

இனிய பிறந்தநாள் நல்வாழ்த்துக்கள்

இனிப்பு கேசரியே...

கல்

2025-09-22T21:07:00.000-07:00

சிலநேரங்களில் சிந்திபதுண்டு
மூச்சுமுட்ட வாழக்கை இவளை அழுத்துகிறதோ?

சமைப்பதும்,

துவைப்பதும்

வீட்டுப்பாடம் முடிக்கவைப்பதும்,

மலைகள் அல்ல என்ற

பொதுபுத்தியின் மீது

நானே கல்லெறிந்துவிட்டு,

கிடப்பதெல்லாம் கிடக்கட்டும்

என் கைபிடி

மைசூர் போலாம்

மேகம், வானம், அணைகள், அரண்மனைகள், கடைவீதிகளெங்கும்

சுற்றி திரியலாம்

வேண்டுவன வாங்கு,

நினைப்பதெல்லாம் உன்,

நிழலில் விளையாடு,

என்று வாழதோன்றுகிறது,

எதார்த்த வாழ்வின் இடியாப்ப சிக்கல்கள்

இழுத்து வைத்து குத்துகிறது,

நானென்ன செய்யட்டும்

சொல், பிரியம்வதா...

குடும்பம்

2025-09-22T21:06:00.000-07:00

சதா பாத்திரங்களுடன்
மல்லுகட்டுகிறாள்,

சந்தை நெறிசலில்,

காய்கறிகளை தேடிவாங்கி, வீடடையும் முன் வதங்கிபோகிறாள்

மூச்சிறைக்க மூத்தவன் பள்ளிகிளம்புமுன் சமைக்கிறாள்,

அழுக்கு துணி கூடையும் வாஷிங்மெசினும்

கொடியில் காயந்து தொங்கும் துணிகளும்,

நாற்காலியில் மடிக்காமல் கிடக்கும்

துணிகளும் , மடித்தும் நாற்காலியிலேயே

தங்கியருக்கும் துணிகளும்

நூல்களாக மாறி

அவள் கைகால்களை கட்டிபோடுவாதய் பொறுமுகிறாள்,

மூத்தவன் மூட்டை வீட்டுபாடத்தை

இவள் தலையில் திணித்துவிட்டு;

விட்டேத்தியாய் வேடிக்கை பார்ப்பதை, நானும் கவனிக்கிறேன்,

இரவில்,இளையவன் இட்லி சமைத்தால்

தோசை கேட்பதும,

தோசையென்றால் இட்லி கேட்பதும்,

இட்லியும், தோசையும் சேர்த்து சமைத்தால், சப்பாத்தி என்பதும் வாடிக்கை,

22 வருட தொடர் மெனக்கடல்களில்

தாஜ்மஹால் உருவாகியது வரலாறு,

ஒவ்வொரு

குடும்பதலையின் தொடர்

மெனக்கடல்கள்,

தாஜ்மஹாலை தாண்டிய

குடும்பம் என்றமைப்பு

கட்டமைக்ப்படுகிறது,

நன்றியுடன்,

இனிய பிறந்தநாள் நல்வாத்துக்கள்

பிரியம்வதா...

மழை இரவுகள்

2025-08-08T12:37:00.000-07:00

மழை இரவுகள்
மழை சாரல் மிதமாய்
நனைத்த
ஜன்னல் வழியே

விளார் விளாராய்

மின்னுகிறது ஒளி,

எதிர்வரும் வாகனங்களின்

புண்ணியத்தில்,

வச்சகண் மாறம

வேடிக்கை பார்க்கிறேன்

நீயென்னை மூன்றாம்முறை

பார்த்தது போல்...

தும்பிச்சங்கை

2025-08-08T12:04:00.000-07:00

தும்பிச்சங்கை(யானை தும்பி்க்கை)
மக்யாநாள்(நாளை மறுநாள்)
பொழுதோட(மாலை நேரம்)
அவிங்க(அவர்கள்)
மறுக்கா(மறுபடியும்)
திலிப்பி திலிப்பி(திரும்ப திரும்ப)

பழையசோத்துநேரம்(காலை 9 மணி)

பள்ளிகுடம்(பள்ளி, கல்லூரி, அலுவலகம் எல்லாத்துக்குமான பொதுப்பெயர்)

பிள்ள(காதலி),

என் தமிழை உனக்கு

தமிழில் மொழிபெயர்க்க வேண்டியுள்ளது,

நானும் நீயும்

வேறுவேறு

தழிழ்வடிவங்கள்,

வேறுவேறு நம்பிக்கை

படிமங்கள்,

எந்த தையரித்தில்

என் கைபிடித்தாயென

தெரியவில்லை!

உன் நம்பிக்கை வீணாகவில்லை

என யாரிடமோ சொல்லிக்கொண்டிருந்தாய்,

ஒட்டுகேட்ட காதல்,

இதென்னாடி கங்காட்சியாய்(கண்கட்டு வித்தை)

இருக்கிறது என்கிறது,

இதென்னடா புதுவார்த்தையென

புருவம் உயர்த்துகிறாள்

புதுக்கவிதை அவள்....

கதை

2025-08-08T11:34:00.000-07:00

கதை சொல்லு இப்ப
என குட்டி டிராகன்
சுட்டி பிளேட்டை
இழுத்துவந்து
பக்கத்தில் உட்கார்ந்தான்,

ஒரு ஊரில்

ஒரு நரிஇருந்துச்சாம்

என ஆரம்பித்தால்!

மீதி நரியெல்லாம் எங்கே?

குட்டி நரியா, பெரிய நரியா?

நரி கூட பூனையும் பாம்பும்

இருந்துச்சா?

நரி ஏன் தனியாக இருந்துச்சு?

நரி புளூகலரா?

அவன் அம்மா டிராகனும்

இப்படித்தான் வளைத்து

வளைத்து கேள்வி கேட்டு,

வெறும் வாழ்வை

கவிதையாக்குவாள்,

குட்டி, 16 அடி பாய்கிறது,

ஒரே ஒரு குறை

சோறுதிங்க விடமாட்றான்,

மத்தபடி கவிதைக்கு பஞ்சமில்லை...

குழம்புகள்

2025-08-08T11:19:00.000-07:00

பாகற்காய் குழம்பை போய்
எப்படி ருசியாக வைக்கமுடியும்,
நானும், தங்கை விஷாலியும்
வியப்பாய் கேட்டோம்,

பூரிக்குழம்பு ருசியில்

தூக்கி வாரிப்போடுகிறது,

முதல்முறை வைத்த காலிபிளவர்

குழம்பை, குழப்பி அடித்தான் சின்னவன்,

அவசரமாய்தான் வைத்தேன்

அட்ஜஸ்ட் பண்ணிக்கோவென

நீ ஊற்றும் சட்னியில்

ஊர் மணக்கும்,

ஒருவேளை எனைமயக்க

சமையலில் சொக்குபொடி

போடுகிறாளோ!

நானில்லா நேரத்தில்

நதிஅவளை உன்னிப்பாய்

கவனிக்கசொல்லி

குட்டி கடம்பனையும்

சுட்டி இடும்பனையும்

ஏவி விட்டிருக்கிறேன்,

இன்னும் இருநாட்களில்

பூனைக்குட்டி(உண்மை)

வெளிவந்துவிடும்....

பின்னிரவு தனிமை

2025-08-08T11:00:00.000-07:00

வீட்டில்
திலொத்தமையையும்
துவாரக பாலகர்களையும்

தனியேவிட்டு

ஒரு நெடும்பயணம்,

நள்ளிரவு நெருங்கியும்

உறக்கம் கைகூடவில்லை

இருவருக்கும்,

தனித்தனியே தலையணையிடம்

பேசுகிறோம்,

பகலைகூட சாமளித்துவிடுவேன்

இரவை என்ன செய்யவென கேட்கிறாள்?

குரட்டைவிட்டு எழுப்புகிறாய்

தும்மலிட்டு எழுப்புகிறாய்,

தண்ணீர்பாட்டில் உருட்டி எழுப்புகிறாய்,

விடியற்காலையிலேயே எழுப்புகிறாய்,

7 மணிக்கு இன்னும் 5 நிமிடம் இருக்க

இப்போதே ஏன் எழுப்பினாய்,

எத்தனை விதமாய் எழுப்புவதாய்

அழுத்துக்கொண்டவள்,

அத்தனை விதமாய் எழுப்பவும்

நான் வேண்டுமென

அடம் பிடிக்கிறாள்...

பேருந்து பயணத்தில்,

கும்மிருட்டை வெறித்து பார்த்துக்கொண்டே,

காதல் ஒளிவெள்ளத்தில் மிதக்கிறேன்...

முதல்நாள் இன்று..

2025-05-30T21:42:00.000-07:00

அரசு பணியிலிருந்து ஓய்வு பெறும் அரசன் பழனிச்சாமி அண்ணாவுக்கு சமர்ப்பணம்....

−−−−−−−−−−−−−−−−−−−−−−−−−−−

முதல்நாள் இன்று

இரும்பு சிறகுகள்(பணிச்சுமை)

ஏந்தி உயரப்பறந்த

அன்பின் உன்னதம்,

அன்பின் கூட்டிற்கு

திரும்புகிறது

முதல்நாள் இன்று...

சேய்குஞ்சுகள்
தம்குலத்தின்
மூத்த ஆசான்
அன்பின் ஆதிஒளி

வீடடைவதை கண்டு

மகிழ்வில் திளைக்கும

முதல்நாள் இன்று...

கூட்டுப்புழு

பட்டாம்பூச்சியாவதைப்போல்

பணிச்சுமை தளர்ந்த

நீங்கள்

பட்டாம்பூச்சியாய்

அன்பின் வானத்தில்

பறக்க,

முதல்நாள் இன்று...

சந்திக்கும்

எல்லோருக்குமான

அன்பை எப்படி

உங்கள் குட்டி இதயத்தில்

பதியன்போட்டு

வளர்த்தீர்கள் என்ற

கேள்விகளுடன்

விசாலமாய் நாங்கள்

உங்களுடன் உரையாடப்போகும்

எதிர்காலத்தின்

முதல்நாள் இன்று...

நன்றிமறவாமையின்

இலக்கணங்கள் பலபடித்தோம்,

ஆனால் நீங்கள்

வாழ்ந்துகாட்டினீர்கள்,

நிச்சயம் உங்களுக்கு

வலிகள் அதிகம்,

வெளியே

சொன்னதேயில்லை..!

நாங்கள் உங்கள் மேன்மையின்

விஸ்வரூபம் கண்டு

விதிர்த்துபோனோம்

நெகிழ்ச்சியில் உறைந்தோம்,

"எந்நன்றி கொன்றார்க்கும் உய்வுண்டாம் உய்வில்லை செயந்நன்றி கொன்ற மகற்கு"

−இத்திருக்குறளின் எதிர்கரையில் நின்றுபார்த்தால்

"செய்ந்நன்றி மறவாதவர்க்கு வாழ்வில் தாழ்வேயில்லை" என்று பொருள்படும்..

நீங்கள் நீண்டஆயுளுடனும்,

உடல்நலத்துடனும், நிறைமதியாய், நிம்மதியாய் வாழப்போவதை சொல்கிறது இக்குறள்...

நீங்களும் உங்கள் வழித்தோன்றல்களும் எதிரிகளால்(விதியால்) தாக்கப்படமுடியாத கர்மாவின் இரும்புகோட்டையை உங்கள் மேன்மையின் செயல்கள் கொண்டு

கட்டியுள்ளீர்கள்.....

வானத்தில் பறந்து

அதீத சாகசங்கள்

நிகழ்த்தும் சினிமா மனிதர்களை ஹீரோ என கொண்டாடுகிறோம்..!

சத்தமில்லாமல்

பலர்வாழ்க்கையில்

கல்வி ஒளியேற்றி

கைபிடித்து வாழ்வில்

கரைசேர்த்தவரை

எப்படி கொண்டாட

என்ன பெயர்சொல்லலாம்

என்று கேட்டேன்

உங்கள்

அன்பில் நனைந்தவர்களை,

கோரசாக

கடவுள் என்றார்கள்,

"""நன்றி கடவுளே...."""

----------------------------------------------------------------

-சிவமஞ்சுநாதன்

மீன்குழம்பு

2024-09-23T21:11:00.000-07:00

பக்கத்துவீட்டில்
மீன்குழம்பு வாசனை,
கொதிக்கிறாள்
கொற்றவை,
பாலைப்போல..

புரட்டாசி பரிதாபங்கள்....

நண்பர்கள்

2024-08-04T00:09:00.000-07:00

உறவா, நட்பா என்தொரு பட்டிமன்றத்தில் சாலம்ன பாப்பையா அய்யா சொன்ன தீர்ப்பு,

"சொந்த ஊரில் வாழ்கிறவர்களுக்கு உறவுகள் உதவலாம், ஆனால் ஊரை தாண்டி,

ஒரு பெருநகருக்குள்,

ஒரு புது நாட்டிற்க்குள் நுழையும்

ஒவ்வொரு தனிமனிதனையும் நண்பர்கள்தான்

கைதாங்கி கரைசேர்க்கிறார்கள்"...

200% உண்மை...

இனிய நணபர்கள் தின

நல்வாழ்த்துக்கள்...

பால்கனி

2024-07-31T18:35:00.000-07:00

எதிர்பாரா ஒரு காலை வேளையில்,
எங்கோ கால்மாட்டி இழுத்து அடிபட்ட புறா, பறக்கமுடியாமல் நகரமுடியாமல், அப்பார்டுமெண்டு வாசலில் கடக்கும் மனிதர்களை மருண்டு பார்த்துகிடந்தது,;

சேர்த்தணைத்து வீடுஅடைந்தேன்,
இனி இந்த கூடு புறாவுக்குமானது
என்றேன் செவ்வந்தியிடம்,
பால்கனியில் வைத்தோம், இரண்டு நாள் உணவு, தண்ணீர், நடக்கவும், பறக்கவும் முடியவில்லை,

முதல் கால்நடை ஆஸ்பத்தரி டாக்டர் இல்லை
2வது,
புறாவுக்கெல்லாம் நாங்கள்
வைத்தியம் பார்ப்பதில்லை
3வது,
மருத்துவர் house visit போயிருக்கார், appointment வாங்கிட்டு வரவும்,

சோர்வில் வீடடைந்தேன், பணிச்சுமை,
சனிக்கிழமை மீண்டும் சென்றோம்,
ஏசி முக்த்திலறைய, எங்கும் பார்த்தாலும் தூய்மை, வெண்மை நிறம்பிய அதிநவீன ஆஸ்ப்த்தரி,
லிப்ஸ்டிக் பெண்கள் வரவேற்க...
கொஞ்சம் தயக்கம்தான், மாத கடைசி வேறு,

கழுத்தைபிடி, இப்படி பிடி, அப்படிபிடி, லாவகமாய் பிடித்தாலும் பயம் மிருட்சி அவன்"கண்களில்,
முன்னும பின்னும் கால்நீட்டி மடக்கி பார்த்தார்,
இந்த மருந்தில் நடந்தால் உண்டு, இல்லையேல் கடைசிவரை இவனை நீங்கள் பாதுகாக்க வேண்டிவரும்,
இதுவளர்ப்பு பிரிணியா அல்லது மீட்டெடுத்ததா!?!
மீட்டெடுத்தது...

புறாவை தூக்கிகொண்டு கலவையான மனநிலையுடன் நடக்கும்போது,
எவ்ளோ என்றார் அட்டெண்டர்,

இவரிடம் காசு வாங்காதே!!

கொடுத்த மருந்தை
கவனமாய் கொடுத்தோம்,
பாத்ரூம் பைப்புக்கு பக்கத்திலிருந்த shaft-ல் வைத்து பாதுகாத்தோம்,

ஒரு சின்னஓட்டை வழியாக, கீழ் வீட்டில் விழுந்துவிட்டான், தரைதளத்தில் பதறிசென்றால் வீட்டில் யாருமில்லை பூட்டிக்கிடக்கிறது,
4 நாட்கள் மேலிருந்து உணவும் தண்ணீரும் மருந்தும் இரண்டு டப்பாக்களில் இறக்கினோம்,

எட்டிப்பார்த்தால் 15 அடிபள்ளத்தில

தெரிகிறான், பிடிக்கவும் வழியில்லை, பறக்கவும் முடியவில்லை,

5வது நாள் கீழ்வீட்டார் ஊர்திரும்பியதும்

நடந்ததை சொல்லி புறாவை மீட்டெடுத்து

மீண்டும் பால்கனி வாசம்,

கொஞ்சம் தெளிந்திருத்தான்,

அலுவலகம் சென்றதும் அடைமழை

செவ்வந்தி, புறாவுக்கு தேவையான பாதுகாப்பு செய்திருத்தாள் நிறைவு,

6வது நாள் மருந்திட்டதும், இங்கும் அங்கும் நடந்தான், பால்கனி விளிம்பில் இருந்தான், தலைதிருப்பி, திருப்பி பார்த்தான்,

மெல்ல பறந்து கீழிறங்கி, புல்வெளியில் அமர்ந்தான்,

புல்வெளியில்

ஒரு 50 முறை எட்டி எட்டி பார்த்தேன்,

51வது முறை பார்க்கும்போது

பறந்திருந்தான் சுபாஷ்...

"உண்டான காயமெங்கும் தன்னாலே ஆறிப்போன மாயமென்ன" இளையராஜா

காற்றில்....

வண்ணங்கள்...

2024-07-30T17:34:00.000-07:00

சுட்டி குழந்தை
முதலில் பேப்பரில்தான்
வரைந்து பழகினான்,

பின் தலையாட்டி பொம்மை,
தரை
கார்,
கரடியின் கண்கள்,

சுவர்,
அவன் கை, கால்கள்
ரமணரின் புகைப்படம்,
எல்லா இடங்களிலும்
ஸ்கெட்ச் வண்ணங்களை
பூசி திரிந்தான்,

வீட்டில் வண்ணங்கள்
ஆட்சியை பிடித்தது,

நீ அவனை
கூட்டி வந்து புகார்
வாசித்தாய்,
நான் அவனை கண்டித்தாக
வேண்டுமென்று
அடம்பிடித்தாய்,

நீ பேசும்
அழகில் மயங்கிய
வண்ணங்களும்
நானும், அவனும்,
இமைக்காமல் உன்னை
வேடிக்கை பார்த்திருந்தோம்,

உன் வார்த்தைகளின்
அழகில் மயங்கிய
வண்ணங்கள்,
தானாய் நடத்துபோய்
வெவ்வேறு பொருள்களில்
கிறுக்கி வந்து
உன்னை பேசவிட்டு
வேடிக்கை பார்த்ததாய்,
பின்பொருநாள் வண்ணங்களின்
தலைவி சொன்னாள்,

அடப்பாவிகளா!

"வண்ணங்கள் கெஞ்சும்
பேரழகி அவள்"
என்று கண்சிமிட்டியபடியே,
நீல வண்ணம்
குட்டி குறும்பனின்
கையிலேறி அமர்ந்தது,

அவன் மீண்டும் வரைய
ஆரம்பித்தான்,
நீ வந்தாய்,

இடுப்பில் கைவைத்து

முறைப்பதால்

எல்லாம் மாறிவிடுமா

என்றான் மஞ்சள் ஸ்கெட்ச்...

முடிவற்ற சொற்கள்

2024-07-29T17:50:00.000-07:00

முடிவற்ற சொற்கள்
வழியாக ஒரு தீராத
உரையாடலுக்குள்
இறங்கி நடந்தோம்,

இன்றைய,
நேற்றைய
முந்தா நாளைய
அடர் மவுனங்களில்
காயந்து
அன்பு இறுகிப்போயிருந்தது,

நாம் கைகள் கூட
கோர்த்துக்கொள்ளவில்லை,

கண்ணியமான தர்க்கத்தின்

கைபிடித்து,
அன்பின் நெடுஞ்சாலையில்
நிறைய தூரம்
நடந்து,
நிறைவின் வீட்டை
அடைந்திருந்தோம்,

கைகள் கோர்த்தபடி
எதுவும் பேசாமல்
உன்னை வேடிக்கை
பாரத்துக்கொண்டிருந்தேன்,

ஒரு நூறு திருவிழா
சிறுமிகளின் குதூகலத்தை
எப்படி
ஒரு குட்டி முகத்திற்க்குள்
ஒளித்து வைக்கிறாய்
நீ,

பேரன்பை, பெரும் காதலை
மவுனத்திற்க்குள்,
புன்னகைக்குள்,
சமையலுக்குள்
ஒளித்து வைக்கும்போதே
கண்டுபிடித்து தொலைத்திருந்தால்,

இவ்வளவுநாள் களித்து
இத்தனை காதலா என
வாய் பிளக்க
வேண்டியிருக்காது,
வித்தக செல்வி.....

Manjummel Boys

2024-03-10T18:06:00.000-07:00

மஞ்சும்மள் பாய்ஸ், அரை தசாப்தம் தாண்டி தியேட்டரில் பார்க்கும் முதல் மலையாள படம். கடைசியாக நான் தியேட்டரில் பார்த்த படம், பாகுபலி-1!!!

அரங்கம் நிறைந்த காட்சிகள், முழு அரங்கமும் நிரம்பி வழிந்து, குடும்பம் குடும்பமாக படத்தை பார்த்துகொண்டிருந்தனர்...

படம் மிகபிடித்திருந்தது, ஒரு சில நெருடல்கள் தவிர,

நெருடல் : காட்டில் கண்ணா பின்னாவென குடிப்பது...

ஜெயமோகன் இப்படத்திற்கு மிககடுமையாக எதிர்வினையாற்றி ஒரு பதவிடிருந்தார்.
https://cinema.vikatan.com/mollywood/writer-jeyamohan-criticizes-manjummel-boys-malayalam-movie

சற்று கடுமையான எதிர்வினைதான், அவரின் பதிவிற்கு எதிர் சிந்தனை வைக்குமுன், அவரின் யானை டாக்டர் கதையை ஒரு முறை படியுங்கள் அல்லது இந்த காணொளியில் கதையை கேளுங்கள்

https://www.youtube.com/watch?v=ZR_Xmckmet8

YouTube-ல் தேட, கதையின் தலைப்பு

Bava Chelladurai 🐘 யானை டாக்டர்

மிக அவரசமெனில் குறை பட்சம் 21:00 டூ 31:00 நிமிடம் வரை கேளுங்கள்,

யானை ஒரு நாளைக்கு 70 கிமீ நடக்க வேண்டும், 100 கிலோ உணவு உண்ண வேண்டும், 300 லிட்டர் தண்ணீர் குடிக்க வேண்டும்,

ஒரு உடைந்த கண்ணாடி பீர் பாட்டில், பஞ்சு போன்ற கனமான யானையின்

கால்கள் மிதிக்கும் பொது, யானையின் எடைக்கு ஏற்ப, பாட்டில் யானையின் காலுக்குள் போகிறது, அப்பறம் யானை நடப்பதை நிறுத்தி தன்கால்கள் சீழ்பிடித்து அழுகுவதை, கண்கள் சுருக்கி விரித்து, சுருக்கி விரித்து,

பார்த்து பார்த்து பின் செத்துப்போகிறது,

உண்மையில் யானை ஒரு குழந்தை...

இப்படத்தின் ஆன்மா, நண்பனை காப்பாற்ற முயற்சித்தல்,

நிஜ வாழ்வில், நண்பனை காப்பதென்றால் ஒரு பேரிடலிருந்து காப்பது மட்டுமல்ல,

ஒரு மணமுறிவிற்கு பின்னான நாட்களில் அவனுடரிருத்தல்,

தீடிரென தந்தையை இழந்தவனுக்கு, ஒரு வாரம் விடுமுறை எடுத்து அவன் கூடவே பயணித்து அவனை காத்தல்,

மனைவியுடன் அதீத சண்டையிட்டு மரண மூர்க்கமான ஒரு நண்பனை,

அலை பேசியில் கடுமையாக கடிந்து அடக்கி வாழ வைத்தல்,

417 கிமீ பயணித்து சென்னை வந்தவனை, நாந்தான் உன் சென்னையின் முகம் நீ என் வீட்டில்தந்தான் தங்க வேண்டுமென விடாப்பிடியாய்

விடிய காலை 4 மணிக்கு வீட்டிற்கு அழைத்து செல்லல்,

இன்னும் எத்தனை எத்தனையோ

படம் சொல்லும் நல்ல செய்தீ,

"நல்ல நட்பு".

படம் சொல்லும் சொல்லும் கெட்ட செய்தீ,

"பொறுப்பற்று குடிப்பது சரி என்ற மனநிலை",

சினிமா அரங்கம் போல், Dr. கிருஷ்ணமூர்த்தி நினைவரங்கமும் நிரம்பி வழியவேண்டும்,

கண்டிப்பாக படமும் & மேற்சொன்ன காணொளி முழுமையாக பார்க்கவும்,,,

நம் பிள்ளைகளுக்கு நட்பின் ரத்தமும்,

காட்டின் ரத்தமும் ஒரு சேர ஏற்றுவோம்,

அம்பானியும் Online Rummy-யும்

2024-03-04T21:12:00.000-08:00

அம்பானியின் மகன் திருமணத்தை பற்றி அலுவலகத்தில் விவாதமிட்டு கொண்டிருந்தார்கள், அவன் அணிந்திருந்த கை கடிகாரத்தின் விலை 12 கோடி தெரியுமா? அவனிடம் பில் கேட்ஸ்-ன் மனைவி ஆச்சர்யமாய் கை கடிகாரத்தை பற்றி கேட்டது தெரியுமா? அனைவரையும் வோல்வோ பேருந்தில் அழைத்து வந்தார்கள் தெறியுமா ?

சக நண்பர்கள், தூய்மை பணியாளர்கள், கேன்டீன் தங்கைகள், cafteria சூப்பர்வைசர்கள், எங்கேயும் இதே விவாதம்தான்,
காதில் விழுந்ததை மட்டும் கேட்டுக்கொண்டே வந்தேன்...

என் மனம் நிறைய, ஞாயிறு காலை தூரத்து சொந்த முதிர்கன்னி அவசரமாய் அலைபேசியில் அழைத்து,நெருங்கிய உறவில் 33 வயது வாலிபன்,தூக்கிட்டு இறந்துவிட்டான், அவனது 6 வயது மகளும், இளம் மனைவியும் கதறிய சத்தத்தை கண் முன் நிறுத்தியது!

ஏன் என்ன காரணம்?
"Online Rummy"

இன்று மாலை 4:30-க்குள் 10 லட்சத்தை கட்ட வேண்டும்

இல்லையேல் நடப்பதே வேறு என்ற மிரட்டல்...

சரியாக 4 மணிக்கு பிள்ளைக்கு வளையல், மணிபர்ஸு, மனைவிக்கு செயின் மற்றும் பிறவைகள் வாங்கிக்கொடுத்து விட்டு, ஐஸ்கிரீம் திண்ண வைத்துவிட்டு

தூங்க செல்வதாய் சொல்லி சென்றவனை

தூக்கிலிருந்து இறக்கினார்களாம்,

நிற்க....

2005 கல்லூரி நாட்களில் ராஜா சொந்தமாய் online விளையாட்டுகளை வடிவமைப்பான், எங்களை போட்டிக்கு அழைப்பான், நாங்கள் ஒருபோதும் அவனை வென்றதேயில்லை,

பின்பொருநாள் ரகசியம் உடைத்தான், மச்சி இது நான் உருவாக்கிய விளையாட்டு , என் பெயரை username -ஆக உள்ளிட்டு விளையாட்டை ஆரம்பிக்கும் போது, மிக எளிதான move-களை எனக்குதரும், எதிரியின் காய்நகர்த்தல்களை system புரிந்துகொண்டு, அவன் தோற்பதற்கான காய்களை அவனுக்குதரும்,

ஒரு சிலமுறை மட்டும் என் மேல் சந்தேகம் வராமல் இருக்க உங்களை வெற்றியடையசெய்வேன் என்றான்,,,

இதுதான் நடக்கிறது தற்போதைய online rummy-ல்,

ஒரு பேருந்து பயணத்தில், மூன்றுபேர் அமரும் இருக்கையில்

சன்னலோரத்தில் நான், நடுவில் online rummy விளையாடிக்கொண்டிருந்த வாலிபன், கடைசியில் முன்பொருகாலத்தில் online rummy விளையாடி தோற்ற ஒரு நீலசட்டை பேருந்து ஓட்டுநர் மப்டியில்,

ஓட்டுநரின் அனுபவம்,

"தம்பி முன்னொரு காலத்தில், இதற்க்கு நான் முழு அடிமை, வேலை நேரம் போக மீதி நேரங்களில் இதே கதியாக கிடந்தேன், கல்யாணம், காதுகுத்து, கிடவிருந்து, சாவுவீடு எங்கு சென்றாலும் ஒரு ஓரமாய் ஒரு நாற்காலி போட்டு இதே வேலையாய் இருப்பேன்,

ஒரு முறை சம்பளம் வாங்கி வீட்டிற்கு போவதற்குள் முழு சம்பளத்தையும் இதில் இழந்தேன்,

காலை 4:30 மணிக்கு அலாரம் வைத்து எழுந்து விளையாடுவேன், ஏன்னெனில் எதிரில் விளையாடும் மனிதன் முன்னிரவிலிருந்து விளையாடலாம் இல்லையா? அவன் சோர்ந்திருக்கும் நேரம் பார்த்து ஜெயிக்க இந்த யுக்தி....

கடைசியில் எதுவும் வேலைக்காகாது என் புரிந்த பின் இப்போது சுத்தமாய் எல்லாத்தையும் தூக்கி போட்டுட்டேன்...

பெங்களூரு ரயில் நிலையத்தில் எனக்கு பின்புறம்

இருப்பவன் online rummy விளையாடுவது

தெரியாமல் மாணிக்கம் அண்ணா எதேச்சையாய்,

online rummy சரியா என்றார்?

மிகத்தவறு என்றேன்..

அவன் என்னை ஒரு சுடுபார்வை பார்த்து,

இல்லை இது சரி என்றான் ஒரு வித வெறியுடன்,

தங்கையின் தோழியின் தம்பி, அதீத online rummy

கடனில் மூழ்கியபோது, அவன் ஆடை உருவப்பட்டு

ஒரு இரவு முழுவதும் அம்மணமாய் அடிவாங்கி

சிகரட் சூடு வாங்கி சித்தம் கலங்கி வீடு சேர்ந்தான்,

அத்தை மகன் கடைசி வினாடியில் மீண்டது,

ஒரு இளம் போலீஸ்காரர் இதில் சிக்கி

சின்னாபின்னமானது

என நூறு கதைகள் நம்மிடம் உள்ளது,

நண்பர்களே புரிந்துகொள்ளுங்கள்

online rummy -ல்,

ஏதிரிலிருப்பது

உங்கள் நண்பனல்ல...

நாம் எல்லோரும் அம்பானி ஆகவேண்டிய

அவசியமில்லை...

குறுக்கு வழியில் பெறும் வெற்றி

நிரந்தரமாகாது,

online rummy நிச்சயம் நேர்வழி அல்ல,

நீங்கள் என்னவாக வேண்டுமென்பதை

முடிவு செய்யும் உரிமை ,

உங்களுக்கு நிச்சயம்உண்டு,

அதற்கான உழைப்பும்,

அர்ப்பணிப்பும், நேர்வழியில் இருக்கட்டும்,

தீவிர தற்கொலை எண்ணத்தில் திரிந்த

என்னை, அந்தியூர் மாதன் மகன்

முனுசாமி என்ற உயிர் நண்பன் கைபிடித்து

"அப்படி இல்லடா மஞ்சு,

நான் சொல்வதை கேள்" என்றான்,
கேட்டேன்,

இன்று ஜெயித்துவிட்டேன்,

மற்றோரு உக்கிரபோர்களத்தில்

ஒரு மோசமான

குறுக்கு வழியை தேர்ந்தெடுத்து,

இதில் தான் பயணிப்பேன் என்று

பிடிவாதமாய் இருந்த என்னை,

கணவனூர் செம்மணன் மகன்

சிவகுமார் என்ற உயிர் நண்பன்,
"இது நமக்கு ஒத்துவராது நீ போய்

உன் வேலையை மட்டும் பார்" என்றான்,
அவன் சொன்னதை செய்தேன்

ஒரு மிக பெரிய அழிவிலிருந்து

என்னை தற்காத்துக்கொண்டு,

பின் ஜெயித்தேன்,

நீங்கள் யாராக எதாக வேண்டுமானலும்

ஆக முயற்சி செய்யுங்கள்,

ஒரு உண்மையான நண்பனை,

தோழியை உடன் வைத்துக்கொள்ளுங்கள்,

நீங்கள் தோற்க்க மாட்டீர்கள்,

ஒருவேளை தோற்றாலும் உங்கள்

நண்பன் உங்களை கரைசேர்ப்பன்,

செத்துபோகமாட்டீர்கள்,

என்னை பொறுத்தவரை உலகின்,

அதி உன்னத செயல்

சகமனிதனுக்கு,

சக உயர்க்கு நம்பிக்கையளிப்பது,

என் வாழ்வின் இக்கட்டான நேரத்தில்

என்னால் முடியவில்லை

என நான்சரணடைந்த இடங்கள்

ரமணாஸ்ரமம் ,

மனநல ஆலோசகர் இளமாறன்

மற்றும் உயிர் நணபர்களின் உள்ளங்கள் ...

உங்களால் முடியும் எழுந்துவாருங்கள்

என்ற அவர்களின்

மேஜிக்கல் வாய்ஸ்-ல் கட்டுண்டு

எழுந்து, நின்று, நடந்து, ஓடிக்கொண்டு,

நிறைவாய் வாழ்கிறேன்,

எவ்வளவோ பேசித்தீர்த்த பின்னும்,

ஒரு தங்கையும்,

ஒரு தோழியும் செத்துப்போவதில்

உறுதியாய் இருந்தனர்,

மனநல ஆலோசகர் இளமாறனிடம்

ஒரு முறை போனில் பேசிவிட்டு

செத்துப்போக சொன்னேன்,

இருவரும் நிறைவாய்

இரு குழந்தைகளுடன் வாழ்கிறார்கள்,

என் வாழ்வின் இக்கட்டுகளில் இருந்து

என்னை, ரமணரின் தியானமும்,

இளமாறன் அய்யாவும், முன்ஸ்-ம்,

சிவா-வும், பிரயதர்சனும்

இன்னும் பல நண்பர்களும்

மீட்டுஎடுத்தார்கள்...

உங்களுக்கும் ஒரு நெருப்பு

பாதுகாப்பு வளையம் இருக்கட்டும்....

நண்பர்களே

வாழ்கை வாழ்வதற்க்கே...

online rummy சரியல்ல

நாம் அம்பானி ஆக வேண்டிய

எந்த அவசியமும் இல்லை

நேர்மையான குறிக்கோளும்

சரியான முயற்ச்சியும்

கடுமையான உழைப்பு உங்களை உயர்த்தும்...

நிறைவாக வாழுங்கள்..

--------------------------------------------

தேவைப்பட்டால்,

இளமாறன் அய்யா

அலைபேசி எண்: 95973 87808

நேரடியாக உங்கள் பிரச்னைகள்

பேசுங்கள்,

எந்த ரெபரென்ஸும் அவரிடம்

தேவையில்லை..

யாரடி நீ பெண்ணே?

2024-02-19T21:21:00.000-08:00

நீ என் தோழியா
காதலியா
யாரடி நீ பெண்ணே?
என கேட்டபோது,

ஒரு கைப்பிடி
தாய்மையும்
சேர்த்து ஒரு
டீ தந்தாய்,

ஒரு நீண்ட
வெளிப்படையான
நிறைவான
உரையாடல் நிகழ்ந்தது,

நம்மருகில்
பால்கனியில்
ஒரு குட்டிப்புறா
வந்தமர்கிறது,

இருவரும்
சத்தமில்லாமல்
வேடிக்கை பார்க்கிறோம்,

நீண்ட மௌனத்திற்கு
பிறகு
அழகு என்கிறாய்,
ம்ம்ம்...என்றேன்...

நான் கேட்டவைகள்

2024-02-19T21:15:00.000-08:00

முன்பு பச்சைதண்ணீர்
கேட்டபோது,
சுடு தண்ணீர்
தந்தாய்,

டீ கேட்டபோது,
சியா விதைகள்
கலந்த நீர்
தந்தாய்,

சோறு கேட்டபோது
களி தந்தாய்,

காது கேளாதோருக்கான

கருவி பற்றிய

விவாதத்தில் நான்
இறங்கியபோது,

ஒரு கும்மாங்குத்தும்
ஒரு கவிதையும்
தந்தாய்....