என்றும் அன்புடன்

மன இறகுகள்

noreply@blogger.com (Unknown) — Fri, 20 Feb 2015 15:56:00 +0000

புத்தகத்தினூடே ஒளித்து வைக்கும்
மயிலிறகைப் போல்
வலிகளையெல்லாம் புன்னகைக்குள்
மறைத்து வைக்கிறேன் !
ஒவ்வொரு பக்கத்தின் மயிலிறகும்
உன்னால் எடுத்து
அன்பால் முத்தமிடப்படுகிறது !
எல்லாம் சேர்த்து மயில் தோகையாக்கி
பரிசளித்துச் சிரிக்கிறேன் !
இந்த சிரிப்பும் உன் அன்பும்
எப்போதும் போல்
வாழ்க்கையை எனதாக்கி
பூக்கள் தூவிச் செல்கிறது !!

சிநேகம்

noreply@blogger.com (Unknown) — Sat, 08 Nov 2014 17:49:00 +0000

அன்பை அமுதமாய் அளிக்கும்
ஆற்றல் எல்லோருக்கும் இருப்பதில்லை !
மனிதர்களை அவர்களின் மனதிற்காக
நேசிக்கும் உள்ளங்கள் மிகக் குறைவே !
கேட்காமல் கிடைத்த வரமாய்
அடைமழையாய்ப் பொழியும் அன்போடு
குறைகள் கடந்து
பேதங்கள் மறந்து
உயிரோடு உறவாடும் திறன்
நட்பிற்கு மட்டுமே சாத்தியம் !

செல்ல நாய்க்குட்டி

noreply@blogger.com (Unknown) — Mon, 29 Sep 2014 14:51:00 +0000

வழக்கமான வழித்தடத்தில்

பழக்கமில்லாத நாய்க்குட்டியொன்று

வாலாட்டிக்கொண்டு வருகிறது..
எடுத்துக்கொஞ்சவும் வழியில்லை
விட்டுச்செல்லவும் மனமில்லை !

எங்கோ தொலைத்த அன்பெல்லாம் தெரிகிறது

செல்ல நாய்க்குட்டியின் சின்ன கண்களில்!!

மெல்லிய இசை

noreply@blogger.com (Unknown) — Mon, 25 Aug 2014 14:41:00 +0000

மழைநாள் பொழுதில்

மனதிற்கு இதமாய் ஒலிக்கும்

இசையாய் இருக்கிறது

உள்ளத்தின் ஆழத்தில்

எப்போதும் கேட்டுக்கொண்டிருக்கும்

உன் மென்மையான குரல் !!

கொஞ்சம் காதல் நிறைய அன்பு

noreply@blogger.com (Unknown) — Thu, 24 Jul 2014 16:41:00 +0000

என் உயிரெங்கும் வியாபித்திருக்கும் உன்னை

ஊரெங்கும் தேடித்திரிவது போல்

போலித்தனம் ஏதுமில்லை !

கனவுகளிலும் கற்பனையிலும்

சேகரிக்கும் நினைவுகளை பொக்கிஷமாக்கி

பிறவிகள் கடந்து சுமந்து பார்க்கவே

ஆசைப்படுகிறது இந்த மனம் !

வாழ்தல் எனும் சொல்

noreply@blogger.com (Unknown) — Thu, 05 Jun 2014 11:21:00 +0000

ஆடுமந்தை மக்கள் கூட்டத்திலிருந்து விலகி

காட்டுமல்லிப்பூ போல் கானகத்தில் வாழ்ந்திருந்து

கிடைக்கும் கனிகளை உணவாக்கி

அடித்துச்செல்லும் ஆற்றில் நீராடி

மரம் செடியோடு உரையாடி

நட்சத்திரங்களை எண்ணிக்கொண்டு

புல்மெத்தையில் படுத்துறங்குபவர்கள்

வாழ்க்கையை வரமாகப் பெற்றவர்கள் !!

பெற்றோருடன் வாழ்ந்து

உற்றார் உறவினருடன் உறவாடி

பண்டிகைகளைக் கொண்டாடி

பாதுகாப்பான சூழலில்

பதற்றமில்லாமல் வாழ்பவர்கள்

வாழ்வை ரசித்து வாழ்கிறார்கள் !!

பணத்தை இலக்காகக் கொண்டு

பகட்டாய் வெளிக்காட்டி

சொந்த மண்ணை எட்டிப் பார்க்க நேரமில்லாமல்

அடுத்தவன் ஊரைச் சுற்றிப்பார்க்க

விசா தேடி அலைந்து

பதிவிறக்கம் செய்யப்பட்ட மென்பொருளாய்

மனித இயந்திரம் போல் மாறிக்கொண்டு

‘வாழ்தல்’ என்னும் சொல்லுக்கு அர்த்தமறியாமல்

காலத்தைக் கடத்திக்கொண்டிருக்கிறோம் !!

அன்பின் வரம்

noreply@blogger.com (Unknown) — Mon, 19 May 2014 06:15:00 +0000

கண்ணிமைக்கும் மணித்துளியில்

மாறக்கூடும் வாழ்கையில்

வன்மமில்லா மனமும்

இயல்பான சிரிப்புமே

ஆகச்சிறந்த அன்பின் வரம் !

Photoshop Courtesy - Kowsalya Jeyabalan

முரண்பாடுகள்

noreply@blogger.com (Unknown) — Thu, 17 Apr 2014 09:57:00 +0000

அளவில்லா மகிழ்ச்சியை

அழகாய் வெளிப்படுத்தும்

சின்ன சின்ன கண்ணீர்த் துளிகள்!

மாறாத சோகத்தை

மெல்லிய புன்னகையில்

மறைத்து வைக்கும் இதழ்கள்!

தீர்க்கமான முடிவுகளை

அழுத்தமாக சொல்லிவிடும் மௌனம்!

காயம் தந்த நெஞ்சை

அமைதியாக நேசிக்கும் உள்ளம்!

இமைகள் கடந்து

இதயத்தில் பதியும் எல்லாமே

அழகிய முரண்பாடுகள் தான்!

Photo Courtesy: https://www.facebook.com/SurenPhotography

நிகழ்காலம்

noreply@blogger.com (Unknown) — Wed, 26 Mar 2014 08:09:00 +0000

நினைவுகளைத் தகர்த்து
நிஜங்களின் மடியில் சரணடையும்போது
ஏழு வர்ணங்களில்
எல்லா அழகையும் வெளிப்படுத்தும்
வானவில் போல் மாறிப்போகிறது
இந்த வாழ்க்கை !

காதல் புதையல்

noreply@blogger.com (Unknown) — Fri, 14 Mar 2014 06:00:00 +0000

காணாமல் போன நாட்களில்

உன்னோடு பேசிய வார்த்தைகளை

நெஞ்சோடு சேர்த்து வைக்கையில்

புன்னைகையும் விழிநீரும் சேர்ந்து

உனக்கான அன்பில்

இன்னும் அதிக

காதலை மனதிற்குள் புதைத்து வைக்கிறது !

மாறாத மாற்றங்கள்

noreply@blogger.com (Unknown) — Sun, 12 Jan 2014 08:02:00 +0000

அடுத்தடுத்து வந்து கால் நனைத்துச் செல்லும்
கடலலை போல
புதுப் புது உறவுகளாய் வந்து
உள்ளம் தொட்டுச் செல்லும் நண்பர்கள்
எப்போதும் உடனிருக்கும் அவர்களின்
சின்னச் சின்ன மாற்றங்கள் கூட
நிம்மதியை பதம் பார்த்து விடுகிறது !
மாற்றங்களும் அழகு
மனிதர்களும் அழகு
கொஞ்சம் விட்டுக் கொடுத்து
புரிந்து கொள்ள முற்பட்டால்
வாழ்க்கையும் அழகு !

அன்பின் வழியது உயிர்நிலை

noreply@blogger.com (Unknown) — Sun, 12 Jan 2014 07:26:00 +0000

ஒன்றாக சேர்ந்து வாழ்வதுதான்
காதலின் வெற்றி என்று சொல்லும்
சிறுபிள்ளைத்தனம் கொண்ட
மனிதர்கள் மத்தியில்
நாடித் துடிப்பில் சேர்த்து வைத்து
நாளெல்லாம் நேசிக்கும் அன்பெல்லாம்
மூடத்தனமாகவே பார்க்கப்படுகிறது !

பனிவிழும் மலர்வனம்

noreply@blogger.com (Unknown) — Sun, 12 Jan 2014 07:24:00 +0000

தேய்பிறை கண்ட இரவில்

நிலவின் ஆளுமையில்லா பொழுதில்

நட்சத்திரங்கள் அனைத்தும்

ஆர்ப்பரித்துச் சிரிக்கிறது !

எல்லா விண்மீன்களிடமும்

உன்னைப்பற்றித் தான் பேசினேன்

அத்தனையும் சேர்ந்து

உன் பெயரைச் சொல்லி

என்னைப் பரிகாசம் செய்யத் தொடங்கியதும்

கொட்டித் தீர்க்கிறது

இந்த மார்கழிப் பனிமழை !

வாழ்க்கைப் பக்கங்கள்

noreply@blogger.com (Unknown) — Mon, 25 Nov 2013 15:32:00 +0000

வீசியடிக்கப்படும் புயல் காற்றைப்போல்
வேகமாக நகர்ந்துகொண்டிருக்கிறது வாழ்க்கை..
நினைத்துப் பார்க்கவோ, ரசித்துச் சிரிக்கவோ
நினைவுகளை சேமிக்க மறந்து கொண்டிருக்கிறேன்..
மனித இயந்திரமாய் மாறிப்போன வாழ்க்கையில்
மறைந்திருக்கும் பழைய நினைவுகளும்
உடன் வந்து உயிர் கொடுக்க மறுக்கிறது..
வாழ்க்கை புத்தகத்தின் புதிய பக்கங்களை எழுத
வார்த்தைகளும் இல்லை
மங்கிப்போன பழைய நினைவுகளின் சுவடுகளும் இல்லை..
கேள்வி பதிலாய் இருக்கும் நாட்கள் மாறி
அத்தனையும் அன்பாய் வாழும் பதிவுகளுக்காக
அமைதியாக காத்துக்கொண்டிருக்கின்றன
வாழ்க்கைப் பக்கங்கள் !

நீயின்றி அமையாது உலகு !

noreply@blogger.com (Unknown) — Thu, 03 Oct 2013 13:37:00 +0000

வேதனைகளின் வலி குறைக்க
விரல் கோர்த்து சொல்லும் ஆறுதலிலோ,
குழப்பங்களின் குடியிருப்பாய் மாறிய மனதின்
மாய பிம்பங்களை உடைத்தெறிந்து
உடன் நிற்கும் போதோ
வெளிப்படாத ஒன்று ,
கண் சிமிட்டல்களில் கடந்து உதிரும்
கண்ணீர்த் துளிகளில் புதைந்திருக்கிறது..
நீ தான் உலகமென்ற உண்மை !!

புன்னைகையில் பூத்துக்கிடக்கும் காதல்

noreply@blogger.com (Unknown) — Mon, 23 Sep 2013 09:33:00 +0000

உன் கண்களுக்குள்
தொலைந்து போன என்னை
நானே தேடிக் கொண்டிருக்கையில்
உன் மூச்சு காற்றின் தாக்கமும் சேர்ந்து
என்னை மறந்து நிற்கையில் பூக்கும்
ஒரு சின்ன சிரிப்பில்
மறைத்து விடுகிறேன்
உனக்கான அத்தனை அன்பையும்..!!!

நினைவுப் பரிசு

noreply@blogger.com (Unknown) — Tue, 03 Sep 2013 13:13:00 +0000

பிரிவில்லா உறவுகளில்லை என்றாலும்
ஒருசில உண்மையான அன்பை
நிரந்திரமாக பிரிந்துசெல்லும் சூழ்நிலை வருமென்று
முன்பே தெரிந்தால்
உங்களின் ஏராளமான நினைவுகளை
தாராளமாக தந்துவிடாதீர்கள் !
உங்களுடைய நினைவுகளே
அவர்களின் நிம்மதியை கொன்றுவிடும் !

சூழ்நிலை

noreply@blogger.com (Unknown) — Tue, 03 Sep 2013 13:03:00 +0000

இரத்த சொந்தங்களுக்காக
எதையும் தூக்கியெரிபவர்களைப்
பார்க்கும்போதுதான் தோன்றுகிறது..
உயிரான நட்பும்
உண்மையான காதலும்
உள்ளத்தை உரசினாலும்
ஜெயிப்பதென்னவொ
உரிமை கொண்டாடும்
உறவுகள்தானென்று !

பதில்

noreply@blogger.com (Unknown) — Tue, 03 Sep 2013 12:22:00 +0000

பதிலளிக்க விருப்பமில்லா கேள்விகளை
எதிர்கொள்ளும்போது மட்டும்
மௌனமும் புன்னைகையும் இணைந்து
பதிலாக அமைந்துவிடும் அற்புதம் நிகழ்கிறது !!!

நினைவூஞ்சல்

noreply@blogger.com (Unknown) — Mon, 02 Sep 2013 07:30:00 +0000

சோர்வோ சுகமோ
தளர்ந்து போகும் தனிமையோ
என்னை அழகாய்த் தாங்கிப் பிடிக்க
உன் நினைவுகளைத் தவிர
அற்புதமானது எதுவுமில்லை !

நிழல் துணை

noreply@blogger.com (Unknown) — Mon, 02 Sep 2013 07:12:00 +0000

நிஜங்களின் ஸ்பரிசத்தில் மட்டுமே
வாழ்க்கை நகருமென்றால்
வெறுமைதான் மிஞ்சியிருக்கும் !
எதிர்பார்புகளும் கனவுகளும்
அவ்வப்போது அணைக்காவிட்டால்
வாழ்நாள் எல்லாம்
ரசிக்காமல் முடிந்துவிடும் !

செல்லக் காதலும் சின்ன கோபமும்

noreply@blogger.com (Unknown) — Thu, 29 Aug 2013 06:40:00 +0000

வழியறியா பாதைகளில் பயணித்து
நாம் சந்திக்கும்போதும்
பிரிவை மறந்து
பிரியம் காட்டி நிற்கும் போதும்
உன் காதல் அழகானதா
இல்லை
என் கனவுகள் அழகானதா
என்ற யுத்தம்
எப்போதும்போல் எட்டிப் பார்த்து சிரிக்கிறது !!!

பூவனம்

noreply@blogger.com (Unknown) — Sun, 25 Aug 2013 06:00:00 +0000

ஒவ்வொரு முறையும்
போராடி தோற்று போகும்போதுதான்
மனதிற்கு புரிகிறது…
வாழ்க்கை என்பது போர்க்களம் அல்ல
வாழ்க்கை ஒரு அழகான பூவனம்
நடப்பதை ஏற்றுக்கொண்டு நகர்ந்தால்
இன்பமும் துன்பமும்
இயல்பாய் பழகிவிடுமென்பது !

மருந்தாகும் கனவுகள்

noreply@blogger.com (Unknown) — Sun, 25 Aug 2013 05:58:00 +0000

உறவுகளின் மேல் உள்ள
உரிமைகளை எல்லாம்
இழந்த பின்புதான்
வருந்துகிறோம்..
காலமும் கடவுளும்
எவ்வளவு கொடுமையானவர்களென்று..
சேர்ந்து சிரித்த நாட்களெல்லாம்
ரணமாய் மாறிப்போக
காயங்கள் ஆற கனவுகளை
சேமித்துக் கொண்டிருக்கிறோம் !!

விமர்சனங்கள்

noreply@blogger.com (Unknown) — Fri, 23 Aug 2013 09:01:00 +0000

விமர்சிப்பதும் விமர்சனத்திற்குள்ளாவதும்
எளிதாகத்தான் இருக்கிறது...
அதைப் பொருட்படுத்தாமல்
கடந்து செல்வதுதான்
கடினமாக இருக்கிறது.. !