ഫായസം | FAAYASAM

സർപ്രൈസ് ബുഫേ

2015-12-14T14:31:00.002+03:00

"സൂറാ ഞാനിപ്പൊ വീട്ടിലെത്തുംട്ടാ.. ഇയ്യ് റെഡിയായിട്ട് നിന്നോ.. ഒരു സ്ഥലത്ത് പൂവ്വാനുണ്ട്?"
"എങ്ങട്ടാ മൻഷ്യാ..?? ഇക്ക് കുളിക്ക്യൊക്കെ വേണം.."

"അന്റെ ഒടുക്കത്തെ കുളി..!! ഇക്കറിയാടി പോത്തേ.. അതോണ്ടാ ഇപ്പ തന്നെ വിളിച്ച് പറഞ്ഞേ..."

"പിന്നേ.. വീട്ടിലു വേലക്കാരെ നെരത്തി നിർത്തീക്കല്ലേ ഇവ്ടത്തെ പണികളു നോക്കാൻ.. ഇങ്ങളിന്നെകൊണ്ടൊന്നും പറയിക്കെണ്ട.. "

ഇനീം അധികം പറഞ്ഞാ ചെലപ്പോ ഇന്നു തന്നെ വീട്ടിലു വല്ല വേലക്കാരേം നിർത്തി കൊടുക്കേണ്ടി വരും.. ഈ പിശാശിനെ കൊല്ലാൻ പിടിച്ചാലും വളർത്താൻ പിടിച്ചാലും ഒരേ സ്വഭാവമാണല്ലോ... തൽകാലം അടക്കി നിർത്തുന്നതാണു ബുദ്ധി..

"ഇയ്യൊന്നടങ്ങിന്റെ സൂറാ.."

"അല്ല മൻഷ്യാ.. എങ്ങട്ടാ പോണേന്നു പറ.. ഇന്നിട്ട് ബേണം ഇക്ക് ഡ്രെസ്സ് തീരുമാനിക്കാൻ.."

"അതു സർപ്രൈസാ.. ഇയ്യു നല്ല തുണ്യൊക്കെ ഉടുത്ത് തന്നെ നിന്നോ.. ഞാൻ അര മണിക്കൂറോണ്ടെത്തും.."

"ന്റെ റബ്ബേ.. ഇങ്ങക്കു പ്രൈസടിച്ചാ..??"

"ഹോ.. അന്റെ വീട്ടിലിജ്ജാതി വേറില്ലാഞ്ഞത് ഭാഗ്യം.."
അത്രേം പറഞ്ഞ് ജബ്ബാർ ഫോൺ കട്ട് ചെയ്തു..

വീടിന്റെ മുന്നിലെത്തുന്നതിനു മുന്നേ തന്നെ ജബ്ബാറു സൂറാക്ക് മിസ്കോളടിച്ചു.. എന്തായാലും എത്തി പിന്നേം അര മണിക്കൂറു തെറി പറഞ്ഞാലെ അവൾടെ ഒടുക്കത്തെ ഒരുക്കം കഴിയൂ.. ഒരു സിഗരറ്റ് വലിക്കാനുള്ള സമയം എന്തായാലും ഉണ്ടെന്നുറപ്പിച്ച് വീടിന്റെ മുന്നിലെത്തിയ ജബ്ബാറിനെ ഞെട്ടിച്ചു കൊണ്ട് ഗെയിറ്റ് തുറന്ന് സൂറ ഇറങ്ങിവന്നു. നല്ല വെള്ളയിൽ പലതരത്തിലുള്ള കല്ലുകൾ പതിപ്പിച്ച ഒരു ഉശിരൻ ചുരിദാറുമിട്ട്, അതേ ഡിസൈനിലുള്ള വെള്ള തട്ടവുമിട്ട് പടിയിറങ്ങി വരുന്ന സൂറാനെ കണ്ടപ്പോ തന്നെ ജബ്ബാറു വാ പൊളിച്ചു.. കണ്ണു രണ്ടും വെളിയിൽ ചാടാൻ പാകത്തിനുരുണ്ട് കേറി വന്നു..

സുബർക്കത്തിലെ ഹൂറിയിറങ്ങി വരുന്ന ചേലിൽ വരുന്ന സൂറാനെ കണ്ട് ഡോർ അൺലോക്ക് ചെയ്യാൻ പോലും മറന്ന് വായും പൊളിച്ചിരിക്കുന്ന ജബ്ബാറിനെ ഡോറിൽ തട്ടി വിളിക്കേണ്ടി വന്നു സൂറാക്ക്.. ഡോറു തുറന്നകത്ത് വന്ന സൂറാ ഉണ്ടക്കണ്ണുരുട്ടി ജബ്ബാറിനെ നോക്കി..

"ന്റെ മൻഷ്യാ.. ഇന്ങളേന്തിനാ പന്തം കണ്ട പെരുച്ചാഴീന്റെ കണക്കിരുന്ന് ആലോയ്ച്ചേ..? വെയിലു കൊണ്ട് ഇന്റെ മോത്തെ പൗണ്ടറും ചുണ്ടത്തെ ലിഫ്റ്റിക്കുമെല്ലാം പോയേനേ.. "

ഹോ.. കണ്ടാൽ സുബർക്കത്തിലെ ഹൂറിയൊക്കെ തന്നെ..
പക്ഷേ.. മിണ്ടിയാൽ സകലതും പോയി... മിണ്ടെണ്ട...!!
"ഇയ്യൊന്നു മിണ്ടാണ്ടിരിക്ക് ന്റെ സൂറാ.. അന്നെ കണ്ട സന്തോഷത്തിൽ ഞാനീ ദുനിയാവു പോലും മറന്നതാണ്ടീ.."

"ഒന്നു പോ മൻഷ്യാ.. ഇങ്ങളാാപ്പീസിലെ ആ വെള്ളച്ചി പിശാശിനെ ഓർത്തിരുന്നതാവും.. ഇക്കറിയാം.."

"ന്റെ മുത്തേ.. നല്ലോരു കാര്യത്തിനു പോവുമ്പോ നീ അതും ഇതു പറഞ്ഞ് അലമ്പുണ്ടാക്കല്ലെ... ഇക്കിയ്യു മാത്രല്ലേ ഒള്ളൂ.. ന്റെ സൂറാ.."

"ഉം.. അങ്ങനെ ആയാൽ ഇങ്ങക്ക് കൊള്ളാം.. ഇല്ലെങ്കി ഇങ്ങളേ ഞാനീ ദുനിയാവീന്നു പറഞ്ഞയക്കും.."

"ഏഹ്...? അതെന്താടീ.??"

"ഇങ്ങളേ ഞാൻ കൊല്ലുംന്ന്.. കിന്നരിച്ചോണ്ട് നിക്കാണ്ട് വണ്ടിയെടുക്ക് മൻഷ്യാ.. അല്ല മൻഷ്യാ.. ഇങ്ങക്കെന്തു പ്രൈസാ അടിച്ചേ..??"

"ന്റെ റബ്ബേ.. " ജബ്ബാറു വണ്ടി സ്റ്റാർട്ട് ചെയ്തു തലയിൽ കൈ വെച്ചു.. എന്നിട്ട് തുടർന്നു..

"പ്രൈസും പിണ്ണാാക്കുമൊന്നുമില്ല.. നമ്മക്കിന്ന് ഒരു ഹോട്ടലീ പോയി ഭക്ഷണം കഴിക്കാം..അതിനാ..!!"

"ഇതിനാണോ മൻഷ്യാ ഇന്നെ കൊണ്ടീ വേഷമെല്ലാം കെട്ടിച്ചത്..? അട്ത്താഴ്ച്ച ആ മറ്റേ വമ്പത്തീന്റെ അനിയത്തീടെ നിശ്ചയത്തിനു പോവുമ്പോ ഇടാൻ വെച്ച ചുരിദാറാ.. പ്രൈസു വാങ്ങാൻ പോവല്ലേ.. കൊറേ ആൾക്കാരൊക്കെ ണ്ടാവൂലേന്ന് വചാരിച്ചിട്ടാ ഞാനിതിട്ടത്.. "
"അതിനെന്താ.. വന്നിട്ട് മാറ്റിയിട്ടാ മതി.. അടുത്താഴ്ച ഇടാം.."

"ഇന്റെ പട്ടിയിടും ഇതെന്നെ. ഇക്കിന്നു തന്നെ പുത്യേതു
വാങ്ങിത്തരണം.."

അപ്പഴേക്കും സൂറാന്റെ കണ്ണിൽ മുത്തുമണികൾ ഉരുണ്ടു കൂടി.. മുഖം വീർപ്പിച്ചു.... തെളിഞ്ഞിരുന്നിരുന്ന ആകാശത്ത് കാർമേഘം ഉരുണ്ട് കേറിയ പോലെയായപ്പോ തന്നെ ജബ്ബാറിനു ടെൻഷൻ ആയി.. അതിന്റെ പ്രതിഫലനമെന്നോണം ജബ്ബാർ ആക്സിലെറേറ്ററിൽ ആഞ്ഞു ചവിട്ടി.. അപ്രതീക്ഷിതമായ ആ ആക്രമണം താങ്ങാൻ പറ്റാതെ കാറൊന്നു മുരണ്ടു.. പിന്നെ കുറെ പൊട്ടലും ചീറ്റലും. കരിയും പുകയും..

"ഇയ്യിനി അതിനു കരഞ്ഞ് ഇന്നത്തെ ദിവസം പണ്ടാരടക്കെണ്ട.. അന്റെ ഒടുക്കത്തെ ഒരു നിശ്ചയവും കല്യാണവും... ഏതു തെണ്ടിയാണാവോ ഈ നിശ്ചയം കണ്ടു പിടിച്ചത്..."

"അല്ലെങ്കിലും....."

"എന്തൂട്ടാ അന്റെ അല്ലെങ്കിലും ഇല്ലെങ്കിലും..."

"ഇങ്ങക്കിന്നോട് ഒട്ടും ഇഷ്ടല്ല്യാ.. അതെന്നെ..!!"

റേസ്റ്റോറന്റിലെത്തിയ ജബ്ബാറിനേം സൂറാനേം മാന്യമായി തന്നെ അവരു വരവേറ്റു.. സപ്ലയറു ചെക്കൻ വന്നു മെനു കൊടുത്തു..

"ഇതിന്റൊന്നും ആവശ്യല്യ.. ഇപ്പൊ റെഡി ഫ്രെഷ് ആയിട്ടെന്താ ഉള്ളേ.. അതു പറഞ്ഞാ മതി.."

" അതു പിന്നെ സാറേ.. അങ്ങനാണേൽ ബുഫേ ഉണ്ട്.. പെർ ഹെഡ് നാപ്പത്തേഴ് റിയാലേ ഒള്ളൂ.. അതു നോക്കിയാലോ...??"

ജബ്ബാർ സൂറാനെ നോക്കി.. "ന്നാ പിന്നെ അതായാലോ സൂറാ..??"

"ഇക്കതൊന്നും വേണ്ട.. ഇങ്ങളു കഴിച്ചോ..!!"

പണ്ടാരം.. ഇവളാ ചുരിദാറിന്റെ കേസിപ്പഴും വിട്ടിട്ടില്ലാന്നാ തോന്നുന്നത്.. വാങ്ങി കൊടുക്കാന്നു പറഞ്ഞതാണാല്ലോ.. പിന്നേം എന്താണാവോ പ്രശ്നം ആലോചിച്ചിട്ട് ഒരെത്തും പിടിയും കിട്ടാത്ത ജബ്ബാർ, തീരുമാനിച്ചിട്ട് വിളിക്കാന്നു പറഞ്ഞ് സപ്ലയറു ചെക്കനെ പറഞ്ഞു വിട്ടു.. അവൻ സ്ഥലം വിട്ട പാടെ സൂറാനെ നോക്കി കണ്ണുരുട്ടി കയറ്റം കയറുന്ന പെട്ടിയോട്രഷ പോലെ മുരണ്ടു..

"ഡീ ബലാലേ.. ന്താപ്പൊ അന്റെ പുത്യേ പ്രശ്നം.. ഇന്നെന്നെ ചുരിദാറു വാങ്ങിത്തരാന്നു പറഞ്ഞതല്ലെ..?"

"ന്റെ മനുഷ്യാ.. ഇങ്ങളെന്തിന്നാ ന്നെ തിന്നാൻ വരണേ.. ഇക്ക് ബുഫേ വേണ്ടാന്നല്ലേ പറഞ്ഞേ..?"

" അതെന്താ അനക്ക് വേണ്ടാത്തെ..??"

"ഇക്ക് പരിചയില്ലാത്തതൊന്നും കയ്ച്ചാ വയറ്റീ പിടിക്കൂല മൻഷ്യാ.. ഇക്ക് വല്ല പൊറോട്ടയോ ബിരിയാണിയോ മതി.."

ഇവളെയിനി എന്തൂട്ടാ ചെയ്യേണ്ടതെന്നു കരുതി മീശ വിറപ്പിച്ച് പല്ലു കടിച്ച് ജബ്ബാർ പറഞ്ഞു..

"ന്റെ കരളേ.. ബുഫേന്നു പറഞ്ഞാ തിന്നുന്ന സാധനമല്ല.. എന്നു വെച്ചാ അവ്ടെ പോയി അനക്കിഷ്ടമുള്ളതൊക്കെ എടുത്ത് കഴിക്കാന്നാ അർത്തം.. നാട്ടിലു നീ കല്യാണത്തിനൊന്നും കണ്ടിട്ടില്ലേ..? അതു പോലെ..!!"
കേട്ട പാടെ ചാടിയെണീറ്റ് സൂറ ചോദിച്ചു..

"ഏഹ്.. അപ്പൊ ഫ്രീയാ..ന്നാ ബാ കയിക്കാം..??"
ഫ്രീയെന്നു കരുതി ചാടിയെഴുന്നേറ്റ സൂറാന്റെ കൈ പിടിച്ച് തിരിച്ച കസേരയിലേക്ക് തന്നെ വലിച്ചിട്ടു ജബ്ബാർ..

"ഉം.. അന്റെ ബാപ്പാന്റെ ഹോട്ടലല്ലെ ഇത്.. അപ്പൊ ഒരാൾക്ക് 47 റിയാലെന്ന് ആ ചെക്കൻ പറഞ്ഞത് നീ കേട്ടില്ലേടീ പോത്തേ.."

"ഉം ശെരി.. ബുഫേങ്കി ബുഫേ..!!"

ബൊഫേ ഹാളിലെത്തി അവിടെ നിരത്തി വെച്ചിരിക്കുന്ന ഭക്ഷണ സാധനന്ങളും ഡെക്കറേഷനും ലൈറ്റുമെല്ലാം കണ്ട സൂറാന്റെ കണ്ണിൽ പൂത്തിരി കത്തി..

"ന്റെ റബ്ബേ.. ഇതെന്തായീ കാണണേ.. ഇതൊക്കെ നമ്മക്ക് തിന്നാനാ..??"

"പിന്നല്ലാണ്ട്.. എല്ലാറ്റീന്നും എടുത്ത് വയറു നിറച്ചും കഴിച്ചോ. കാശു മുതലാക്കാനുള്ളതാ.."

"അള്ളാ.. ഇതൊക്കെ കൂടെ എങ്ങനാ കഴിക്ക്യാ.. മൻഷ്യാ.. ഇന്റെ പള്ള പൊട്ടും.."

"അനക്ക് പറ്റണതൊക്കെ കഴിച്ചോ ന്റെ സൂറാ."

"ഇക്കെല്ലാം തിന്നണം.. പക്ഷേ. ഇങ്ങളൊന്നാലിചിച്ച് നോക്യേ..?? എല്ലാം കൂടി ഇങ്ങളെ കൊണ്ടും പറ്റൂലാ.."
"ന്തെങ്കിലും ആകട്ടെ സൂറാ.. ഇയ്യ് സമയം കളയാണ്ട് തിന്നാൻ നോക്കെടീ... പറ്റണത് കഴിച്ചാ മതി.."

" അപ്പൊ ഇങ്ങളല്ലെ കാസു മുതലാക്കണംന്നു പറഞ്ഞേ..? ആ അതേ.. ഒരു കാര്യം ചെയ്യാം.. "

"എന്തൂട്ട്..??"

അപ്പോഴേക്കും അങ്ങോട്ടേക്ക് കയറി വന്ന സപ്ലയറെ ശൂ.. ശൂ എന്നു പറഞ്ഞ സൂറ അടുത്തേക്ക വിളിച്ചു.. എന്താ കാര്യംന്നു ചോദിക്കാൻ വന്ന ജബ്ബാറിനെ തടഞ്ഞ് സൂറ സപ്ലയറോട് പറഞ്ഞു...

"അതേ ഞങ്ങക്കിച്ചിരി തെരക്കുണ്ടേ,, അതോണ്ട് ഞങ്ങക്ക് രണ്ട് ബുഫേ പാർസൽ എടുത്തോ..!!"

ഇതു കേട്ടതോടു കൂടെ സപ്ലയറു പയ്യന്റെ കയ്യിലിരുന്ന ട്രേ താഴെ വീണു.. കയ്യിലിരുന്ന ടിഷ്യൂ പേപ്പർ ചുരുട്ടി പല്ലുകടിച്ച് ജബ്ബാർ സൂറാനെയും താഴെ വീണ ട്രേയെടുക്കാൻ മറന്ന സപ്ലയറേയും മാറി മാറി നോക്കി..

ഞാൻ പറഞ്ഞതിലെന്തെങ്കിലും കറക്റ്റുണ്ടോ എന്ന മട്ടിൽ ജബ്ബാറിനേ നോക്കി നിൽകുന്ന സൂറാ..
അപ്പൊ തന്നെ ജബ്ബാറിനെ പിന്നേം ഞെട്ടിച്ചു കളഞ്ഞു സപ്ലയരു ചെക്കൻ...

"എന്തായാലും നിങ്ങടെ ബുഫേ ഞാൻ പാർസൽ തരാം..
വേറാരോടും പറയെണ്ട.."

തന്നെ നോക്കി കണ്ണിറുക്കി ചിരിച്ച് പാർസലെടുക്കാൻ പോകുന്ന ചെക്കനെ നോക്കി നിസ്സഹായനായി അടുത്ത് കണ്ട കസേരയിലേക്ക് ചായുകയായിരുന്നു ജബ്ബാർ..!!

പല്ലാസ്പത്രി

2015-04-09T12:22:00.003+03:00

പല്ലു വേദന സഹിക്കാന്‍ വയ്യാതായപ്പോള്‍ മരുന്നു വാങ്ങിക്കണമെന്ന മോഹവുമായി എത്തി പെട്ടത് ഒരു പല്ലാസ്പത്രിയിലെ ഡോക്ടര്‍ സഫ്‌വാന്‍ ഡെന്റല്‍ സര്‍ജന്റെ മുന്നില്‍.. ആവശ്യമറിയിച്ചപ്പോള്‍ ഐഡി വെക്കാന്‍ പറഞ്ഞു.ഊരും തെണ്ടി ഓട്ടപ്പല്ലും വെച്ച് ചെന്ന നുമ്മ ഖത്തറില്‍ എത്തിയപാടെ റെസിഡന്‍സ് പെര്‍മിറ്റ് അടിച്ചു തന്നെ മിനിസ്റ്ററി ഓഫ് ഇന്റീരിയേര്‍സിനെ മനസ്സില്‍ ധ്യാനിച്ച് ഐഡി എടുത്ത് കൊടുത്തു.. ഐഡി വായിച്ചു മുഴുമിപ്പിച്ചില്ല.. അതിനു മുന്നേ തന്നെ അതു നഴ്സിന്റെ കയ്യില്‍ കൊടുത്ത് ഫോട്ടോ കോപ്പി എടുക്കാന്‍ പറഞ്ഞു. അവ്ടെ കേറി കെടെന്നു വാ പൊളിക്കാന്‍ പറഞ്ഞ് കസേരയുമല്ല ബെഡുമല്ലാത്ത ഒരു സാധനം ചൂണ്ടിക്കാണിച്ചു തന്നു.. പല്ലു വേദനയുമായി തലമുതല്‍ കഴുത്തു വരെ വേദനിച്ച് പണ്ടാരമടങ്ങി ചെന്ന ഞാന്‍ നേരെ അതിലേക്ക് പൊത്തിപ്പിടിച്ച് കയറി മലര്‍ന്നു കെടെന്ന് വാ പൊളിച്ചു..

ഡോകടര്‍ ഒരു തുണിയെടുത്ത് സ്വന്തം വായും മൂക്കുമെല്ലാം മൂടിക്കെട്ടി, രണ്ടു കയ്യിലും ഗ്ലൗസിട്ട് അതിന്റെ ഇലാസ്റ്റിക് വലിച്ച് ടക് ടക് എന്ന ശബ്ദമുണ്ടാക്കി അടുത്ത് വന്നു.. അതു കണ്ടപ്പോള്‍ എനിക്കൊരു ടെന്‍ഷന്‍, പല്ലു വേദനയുമായി വന്ന എന്നെ കയ്യില്‍ ഗ്ലൗസെല്ലാം ഇട്ട് ഇയാളെന്തു ചെയ്യാന്‍ പോകുകയാണെന്ന് മനസ്സിലാകാതെ കണ്ണു തള്ളി.. വായിന്റുള്ളില്‍ നിന്നും ഗ്ലും എന്ന സൗണ്ട് എഫെക്റ്റോടെ കൊറേ ഉമിനീരും ഓക്സിജനുമെല്ലാം കൂടെ വയറ്റിലേക്കിറങ്ങി പോയി..

"കമിഴ്ന്നു കെടക്കണോ ഡോക്ടറേ..?"
എന്റെ ചോദ്യം കേട്ട ഡോക്ടര്‍ വായില്‍ കെട്ടിയ തുണിയഴിച്ച് വാ പൊളിച്ച് എന്നെ നോക്കി.. "ഡോ.. തനിക്ക് പല്ലു വേദനയാണെന്നല്ലേ പറഞ്ഞത്.. മൂലക്കുരു അല്ലല്ലോ..? ഇയ്യെന്താണ്ടാ തമാശാക്കാ..??"

'ഏഹ്..? അല്ല... ഇതു പോലെ ഗ്ലൗസിട്ട് ടക് ടക് എന്ന് ഇലാസ്റ്റിക് വലിച്ച് ഒച്ചയുണ്ടാക്കി വഷളന്‍ നോട്ടവുമായി വരുന്ന ഒരു ഡോക്ടറെയേ ഞാന്‍ കണ്ടിട്ടൊള്ളു.. പണ്ട്.. വീട്ടിലെ പശൂനു ഗര്‍ഭണ്ടോന്നു നോക്കാന്‍ വന്ന ഡോക്ടറെ' എന്നു പറയാന്‍ മുട്ടിയതാ.. ഒന്നും മിണ്ടാണ്ട് പിന്നേം വാ പൊളിച്ചു..

വായിന്റെ ഉള്ളില്‍ സ്റ്റീലിന്റെ കയിലു പോലെയുള്ള ഒരു സാധനവും ഒരു ചെറ്യേ കുന്തവും വെച്ച് ഇളക്കി ഉള്ള പല്ലിലൊക്കെ ചെണ്ട കൊട്ടുന്ന പോലെ കൊട്ടാന്‍ തുടങ്ങി.. ഇങ്ങേരിതെന്താ വീടു പൊളിക്കുമ്പോ കട്ട തല്ലിയിളക്കുന്ന പോലെ ഇട്ടു കൊട്ടി ഉള്ള പല്ലു മുഴുവനും തട്ടിപ്പൊട്ടിക്കാന്‍ പോവുകയാണോ പണ്ടാരം.. വേദനയടുത്തപ്പോള്‍ കയ്യും കാലുമെല്ലാം ഇളക്കി ഡോക്ടറുടെ ശ്രദ്ധയാകര്‍ഷിക്കാന്‍ ശ്രമിച്ചെങ്കിലും വിജയിച്ചില്ല. വായില്‍ കണ്ട സാധങ്ങളെല്ലാം കുത്തികയറ്റി വെച്ചത് കൊണ്ട് മിണ്ടാനും പറ്റുന്നില്ല.

അവസാനം പടച്ചോന്റെ കുദ്‌റത്ത് കൊണ്ട് വേദനയുള്ള അണപ്പല്ലില്‍ വന്നു കൊട്ടവസാനിപ്പിച്ചു.. എന്നിട്ട് ഏ ആര്‍ റഹ്മാന്റെ പാട്ടിനു ഡ്രംസടിച്ച് കഴിഞ്ഞ ആശ്വസിക്കുന്ന ശിവമണിയുടെ പോലെ എന്നെ നോക്കി ഒരു ചിരി..

"ഇവനാണു പ്രശ്നക്കാരന്‍ അല്ലേ..?" അതേ എന്ന അര്‍ത്ഥത്തില്‍ മുക്കിയും മൂളിയും ഞാന്‍ അപ്രൂവല്‍ കൊടുത്തു. പിന്നെ ആ പല്ലിന്റെ പൊറത്തായി അഭ്യാസം മുഴുവനും.. ഒരു ഡില്ലിങ്ങ് മെഷീന്‍ എടുത്തോണ്ട് വന്ന് പല്ലൊക്കെ കുത്തി തൊരന്ന് ഗുഹ പോലെ ആക്കി.. ആകെപ്പാടെ ഒരു തരിപ്പും പൊകച്ചിലും പുളിയും.. എല്ലാം സഹിക്കാം.. പക്ഷേ പല്ലിനും ഇക്കിളിയാകും എന്നു മനസ്സിലായത് അപ്പഴായിരുന്നു. ചിരിക്കണോ കരയണോ എന്നൊന്നും അറിയാത്ത അവസ്ഥ..

"റൂട്ട് കനാല്‍ പറ്റൂല.. എല്ലാറൂട്ടും പോയി കിടക്കുവാ.. നമുക്കിവനെ അങ്ങട്ട് എടുത്താലോ.. ഇല്ലെങ്കില്‍ വേദന മാറൂല കോയാ.."

പല്ലുമ്മെ ഇക്കിളിയായി ചിരി വന്നിട്ട് വയ്യ.. എല്ലാം കൂടെ കുത്തി പൊട്ടിച്ചിട്ട് അതും ഇതു പറഞ്ഞിട്ടെന്ത് കാര്യം..എന്തു പണ്ടാരമെങ്കിലും കാണിക്ക് എന്ന അര്‍ത്ഥത്തില്‍ പിന്നേം കയ്യാട്ടി അനുവാദം കൊടുത്തു. ഒരു സിറിഞ്ചെടുത്ത് വന്നു ചുണ്ട് പിടിച്ച് വലിച്ച് പൊട്ടിക്കാന്‍ പാകത്തിനു അകത്തി ഒരു ക്ലിപ്പിട്ട് മറ്റേ പല്ലിന്റെ താഴെ ഒരു കുത്ത്.. കൊറച്ച് കഴിഞ്ഞപ്പോല്‍ ഇക്കിളി പോയി.. പിന്നെ വായവിടെ തന്നെ ഉണ്ടോന്നായി സംശയം.. ഞാന്‍ കവിളു ചൊറിയുന്ന പോലെ പതുക്കെ ഒന്നു തൊട്ടു നോക്കി.. ഭാഗ്യം.. എല്ലാം അവിടെ തന്നെ ഉണ്ട്..

പിന്നെയായിരുന്നു കലാ പരിപാടി.. കുന്തമെടുത്ത് കുത്തുന്നു വലിക്കുന്നു.. പിന്നേം കുത്തുന്നു.. എന്നിട്ടു നഴ്സിനോടു പറയുന്നു.. ആ വണ്ണമുള്ളതെടുക്ക്.. കൊറച്ച് കഴിയുമ്പോള്‍ ഇതു പോരാ.. കുറച്ചൂടെ ബലമുള്ളതെടുത്തേ.. അതല്ല മറ്റേത്.. മൂര്‍ച്ചയുള്ളത്.. എന്നൊക്കെ പറയുമ്പോള്‍, കമ്പിപ്പാരയെടുക്ക്.. വടിവാളെടുക്ക് അമ്പും വില്ലുമെടുക്ക് എന്നൊക്കെ കേള്‍ക്കുന്ന ഫീലിങ്ങാണു വരുന്നത്. എല്ലാം കൂടെ എടുത്ത് വായിലിട്ടിളാക്കി ദമ്മ് പൊട്ടിച്ച ബിരിയാണിചെമ്പില്‍ മസാല മിക്സ് ചെയ്യുന്ന പോലെ ഒരു മാതിരി കളി...

ഡോക്ടറുടെ നെറ്റിയൊക്കെ വിയര്‍ത്തു തുടങ്ങി.. ഇടക്ക് എന്റെ വായില്‍ ടോര്‍ച്ചടിച്ചു നോക്കുന്നു.. നഴ്സിനെ നോക്കുന്നു.. പിന്നേം വായിലേക്ക് നോക്കുന്നു.. എന്നെ നോക്കുന്നു.. എന്നിട്ട് ഒരു ചവണ വെച്ച് വലിക്കുന്നു.. പിന്നേം കുത്തിയിളക്കുന്നു.. ഒരു രക്ഷയുമില്ല.. റ്റിഷ്യൂ പേപ്പറെടുത്ത് നെറ്റിയിലെ വിയര്‍പ്പെല്ലാം തുടച്ച് ചോര നിറഞ്ഞ ഗ്ലൗസ് മാറ്റി അടുത്ത ഗ്ലൗസ് ഫിറ്റ് ചെയ്തു.. പിന്നേം ടക് ടക്.. ഈ ടക് ടക് ശബ്ദം തൃശൂര്‍ പൂരത്തിന്‍ പൊട്ടിക്കുന്ന ഗര്‍ഭം കലക്കി അമിട്ടിനേക്കാള്‍ എഫെക്റ്റിലാണു എന്റെ ചെവിയില്‍ വന്നലക്കുന്നത്.

"ഒരു ട്രിപ്പൂടെ നോക്കാം.. ഇല്ലെങ്കില്‍ പിന്നെ മോണ പൊട്ടിക്കേണ്ടി വരും.." വാശിയാണെങ്കില്‍ വാശി.. ഇന്നിവനെ എടുത്തിട്ടേ എനിക്കു വിശ്രമമൊള്ളു എന്ന മട്ടില്‍ കയ്യിന്റെ വിരലൊക്കെ മടക്കി പൊട്ടിച്ച് ആയുധങ്ങള്‍ എടുത്തു..

കത്തിയെടുത്ത് പല്ലിന്റെ അടിയില്‍ ഒരു കീറു കീറി.. ഡോകടറുടേ ഇടതു കൈ എടുത്ത് എന്റെ നെഞ്ചത്ത് കുത്തിപ്പിടിച്ചു.. പിന്നെ വലത് കാല്‍ മുന്നോട്ട് വെച്ച്കസേരക്കാലില്‍ കുത്തി കാല്‍ മുട്ട് മടക്കി മറ്റേ കാല്‍ പിന്നോട്ട് വലിച്ച് വെച്ച് സ്റ്റെപ്പെടുത്തു. ഇതും കൂടെ ആയപ്പോള്‍ പല്ലു വേദനയുടെ കൂടെ നെഞ്ചു വേദനയും ശ്വാസം മുട്ടലും.. വായില്‍ ആക്രിക്കടയില്‍ നിരത്തി വെച്ച പോലെ കുന്തവും വടിവാളും കമ്പിപ്പാരയും കെട്ടു കമ്പിയുമൊക്കെ കുത്തി കയറ്റി വെച്ചിട്ട് ശ്വാസം വിടാന്‍ വയ്യാത്ത അവസ്ഥ. ഇടക്കിടക്ക് പമ്പു വെച്ച് വായില്‍ നിന്നും വാട്ടര്‍ ഇറിഗേഷനും നടത്തുന്നുണ്ട്. ഹോ.. ഒരു തെങ്ങു പറിക്കാന്‍ ഇണ്ടാവില്ല ഇത്ര കഷ്ടപ്പാട്..

ഈ കലാപരിപാടിയുടെ അനുബന്ധമെന്നോണം ചവണയെടുത്ത് പല്ലില്‍ പിടിച്ചു.. എന്നിട്ട് എന്തോ മന്ത്രിച്ച് കണ്ണുമടച്ച് ഒരൊറ്റ വലി.. ഹാവൂ.. സമാധാനം.. ഇത്തവണ സാധനം ഊരി കയ്യില്‍ പോന്നു.. "സക്സസ്.." എന്നലറി തുള്ളിച്ചാടിയ ഡോക്ടരുടെ ചിരി സ്വന്തം കയ്യിലേക്ക് നോക്കിയപ്പോള്‍ വോള്‍ട്ടേജ് പോയ പണ്ടത്തെ ടിവി പ്രോഗ്രാം പോലെ ആയി..ഊരി പോന്നത് പല്ലല്ല.. ചവണയുടെ റബ്ബര്‍ ഗ്രിപ്പ്..

"തന്റെ വായിലെന്താണ്ടോ ഷോപ്പിങ്ങ് കോമ്പ്ലെക്സ് പണിയാന്‍ വല്ല പ്ലാനും ഉണ്ടായിരുന്നോ..? പില്ലറടിച്ച് ഫൗണ്ടേഷന്‍ ഇട്ട പോലെയാണല്ലോ പല്ലു ഫിറ്റ് ചെയ്തിരിക്കുന്നത്..?" എന്നൊരു ആത്മഗ്തത്തോടേ അടുത്ത ചവണയെടുത്ത് മേല്‍ പറഞ്ഞ കളരി സ്റ്റെപ്പെല്ലാമെടുത്ത് ഒരു വലി കൂടി വലിച്ചപ്പോള്‍ ഡോക്ടര്‍ ജെയിച്ചു.. പല്ലു തോറ്റു.. സന്തോഷം കൊണ്ട് ഡോക്ടറുടെ കണ്ണുകളില്‍ ആനന്ദാശ്രു പൊടിഞ്ഞു. കൊറെ പഞ്ഞിയെടുത്ത് എന്റെ വായില്‍ കുത്തിക്കയറ്റി വെച്ച് പുറം കൈ കൊണ്ട് സ്വന്തം നെറ്റിയിലെ വിയര്‍പ്പു തുടച്ച് എന്റെ തോളത്ത് തട്ടി പറഞ്ഞു.. "വെല്‍ഡണ്‍ മൈ ബോയ്.. വെല്‍ഡണ്‍..."

ഇതെന്തിനാ ഇപ്പോ എനിക്ക് വെല്‍ഡണ്‍ എന്നാലൊചിച്ച് തല ചൊറിഞ്ഞ് എണീറ്റ ഉടനെ ഒരു ഏ ഫോര്‍ സൈസ് പേപ്പറില്‍ കൊറെ മരുന്നിനെഴുതി ഒരു കവറു നിറച്ച് പഞ്ഞിയും തന്ന് പോയി രണ്ട് ഐസ്ക്രീമൊക്കെ കഴിച്ച് വിശ്രമിക്ക് എന്നും പറഞ്ഞ് വിട്ടു. ഇപ്പ ദാ രണ്ട് ലോഡ് ആന്റിബയോട്ടിക്കും മൂന്നാലു ലിറ്റര്‍ ഐസ്ക്രീമും വാങ്ങി വീട്ടില്‍ വന്ന് ഐസ്ക്രീം കഴിച്ച് സില്‍മയും കണ്ട് വിശ്രമവേള ആനന്ദകരമാക്കി കൊണ്ടിരിക്കുന്നു.

സ്വിമ്മിങ്ങ് സ്യൂട്ട്

2015-04-09T12:22:00.002+03:00

ഡിഗ്രിക്കു പഠിക്കുമ്പോൾ‍ സ്വിമ്മിംഗ് ടീമില്‍ ഉണ്ടായിരുന്നു.. ടീമിലുണ്ടായിരുന്ന ഓരോരുത്തര്‍ക്കും സ്വിമ്മിംഗ് സൂട്ടും തന്നു. കണ്ണടച്ച് ചെറുപ്പത്തിലേ നീന്തല്‍ പഠിപ്പിച്ച ഗുരുകരണവന്മാരേ മനസ്സില്‍ ധ്യാനിച്ച് വലതു കൈ കൊണ്ട് പീട്ടി സാറിന്റെ കയ്യില്‍ നിന്നും അതേറ്റു വാങ്ങുമ്പോള്‍ അതിനു കേടുപാടുകളൊന്നും ഇല്ലാതെ കണ്ട് ബോധിച്ച് കൈപറ്റി എന്നു എഴുതി ഒപ്പിട്ടു കൊടുത്തു..

നീന്തലും പരിപാടികളുമെല്ലാം കഴിഞ്ഞ് കൊല്ലാവസാനം ടിസി ആപ്ലിക്കേഷന്‍ കൊടുക്കുമ്പോഴാണു യഥാര്‍ത്ഥ ചൊറ വരുന്നത്.. എല്ലാ ഡിപ്പാര്‍ട്ട്മെന്റില്‍ നിന്നും നമ്മള്ങ്ങോട്ടു ഫീസോ മരു സ്ഥാവര ജംഗമ വസ്തുക്കളോ കൊടുക്കാനില്ലെന്നു ഡിപ്പാര്‍ട്ട്മെന്റ് ഹെഡുകളില്‍ നിന്നും സൈന്‍ വാങ്ങിക്കണം. ബി ബി ഏ കാരായ ഞങ്ങള്‍ക്കുള്ള മെയിന്‍ തലവേദന ലൈബ്രറിയും ഫിസിക്കല്‍ എഡ്യൂക്കേഷന്‍ ഡിപാര്‍ട്ട്മെന്റും തന്നെ...

എല്ലായിടത്തു നിന്നും സൈന്‍ വാങ്ങി അവസാനം പീടി സാറിന്റെ അടുത്തെത്തി. മൂപ്പരെന്റെ രെജിസ്റ്റെര്‍ എടുത്ത് നോക്കിയിട്ട് ഒരു കള്ളച്ചിരി..

"എടോ ഫയാസേ.. തന്റെ സ്വിമ്മിങ്ങ് സ്യൂട്ട് തിരിച്ച് കിട്ടിയില്ലല്ലൊ..."
" അതു പിന്നെ സാറേ.. അതു തിരിച്ചു തരാനുള്ളതാണോ..??"

"അല്ലതെ പിന്നെ.. അതു കോളേജ് പ്രോപ്പെര്‍ട്ടിയല്ലേടോ.. ഡിപ്പാര്‍ട്ട്മെന്റ് കാശു കൊടുത്ത് വാങ്ങിച്ചതാ.. തിരിച്ചേല്പ്പിക്കണം.."
"ഇതെന്തൂന്നാണു സാറേ.. ഒരു കൊല്ലം ഇട്ടു ഊപ്പാട് വന്ന ഷഡ്ഡി തിരിച്ചേല്പ്പിക്കണം എന്നൊക്കെ പറഞ്ഞാല്‍.. അതിനി ആര്‍ക്കിടാനാണു സാറേ..?"

"അതൊന്നും താനറിയെണ്ട.. ഒരെണ്ണത്തിനു 75 രൂപയാണു.. അല്ലാണ്ട് ഇരുപതുർപ്പ്യേടെ കുന്നത്ത് ഷഡ്ഡിയല്ല ഇതു.."

"ആഹ് അതൊക്കെ കീറിപ്പോയി സാറെ.."
"എന്നാ ഒരു കാര്യം ചെയ്യ് ഒരു 75 രൂപ അടച്ചോ.. ഒപ്പിട്ടു തരാം.."
"അപ്പൊ ഒരു കൊല്ലം ഉപയോഗിച്ചതിന്റെ ഡിപ്രീസിയേഷന്‍..?? അതു കുറക്കണ്ടേ സാറേ..??"
"എറങ്ങിപ്പോടോ.. തനിക്കൊപ്പിട്ടു തരാന്‍ എനിക്ക് സൗകര്യമില്ല... എം കോം കാരനായ എന്നെയാണു താന്‍ ഡിപ്രീസിയേഷന്‍ പറഞ്ഞ് പേടിപ്പിക്കുന്നത്.. !!"

പിറ്റേ ദിവസം സാറിന്റെ റൂമിന്റെ മുന്നില്‍ വന്‍ ആള്‍ക്കൂട്ടം ചിരി..ബഹളം.. ഞാന്‍ പോയി നോക്കിയപ്പോള്‍ "പീട്ടി സാറിന്റെ പീഡനത്തില്‍ മനം നൊന്ത് ഞാന്‍ ആത്മഹത്യ ചെയ്യുന്നു.." എന്ന ഒരു ആത്മഹത്യാ ക്കുറിപ്പിനോടൊപ്പം കീറിപ്പറിഞ്ഞ ഒരു ഷഡ്ഡി ഡോറിന്റെ മുന്നില്‍ തൂങ്ങിക്കിടന്നാടുന്നു..

എന്റെ പൊന്നോ..!! അതിനു ശേഷം ആ ഫോമൊന്നൊപ്പിട്ടു കിട്ടാന്‍ പെട്ട പാടു.. ഷഡ്ഡിയെ തല്ലി കൊന്ന് കെട്ടിത്തൂക്കിയത് ഞാനല്ല എന്നു ആയിരത്തഞ്ഞൂറു പ്രാവശ്യം കരഞ്ഞു പറഞ്ഞിട്ടും അവരു സമ്മതിച്ചില്ല.. അന്വേഷണ കമ്മീഷന്‍ റിപ്പോര്‍ട്ട് വന്നപ്പോള്‍ സാഹചര്യത്തെളിവുകളുടേ അടിസ്ഥാനത്തില്‍ എന്നെ കുറ്റക്കാരനാക്കി പ്രഖ്യാപിച്ചു.. പിന്നെ 150 രൂപ ഫൈനും മാപ്പു പറച്ചിലുമൊക്കെ കഴിഞ്ഞിട്ടാണു എനിക്കു ടിസി കിട്ടിയത്..

പതിനഞ്ചു കൊല്ലം മുന്നു 150 ഉർപ്പ്യാന്നൊക്കെ പറഞ്ഞാൽ അതു വലിയൊരു സൂംഖ്യ തന്നെ ആയിരുന്നൂട്ടോ.. നുമ്മളൊക്കെ ചെയ്തു കൂട്ടിയ ചെയ്ത്തുകളും കുരുത്തക്കേടുകളുമെല്ലാം കൂട്ടി നോക്കിയാൽ ഈ സാറുമ്മാരൊന്നും നമ്മളോടിങ്ങനെ ചെയ്താൽ പോരാ...!!

പണി പാളീട്ടാ...

2015-04-09T12:22:00.001+03:00

കുറെ നാളുകളായിട്ടുള്ള ഒരു ദുരാഗ്രഹമായിരുന്നു കവിത എഴുതണമെന്ന്.. ഇന്നലെ രാത്രി മുതല്‍ ഒരു ത്രെഡ് വന്നു മനസ്സില്‍ വീണു പൊട്ടി മുളച്ച് കവിതയായി പുറത്ത് ചാടാന്‍ വെമ്പല്‍ കൊള്ളുകയാണ്. പക്ഷേ സംഭവം ഇങ്ങട്ട് ചാടുന്നില്ല.. ആകെപ്പാടെ അസ്വസ്ഥത.. ആ വേദനയില്‍ ഇരിക്കുമ്പഴാണു ഓഫീസിലെ സെയില്‍സ് ടീമിലെ പയ്യന്‍ വന്നത്..

"സാറേ... ഒരു ഹെല്പ് വേണം.."
ഹും.. മനുഷ്യന്‍ ഇവിടെ കവിത എഴുതാന്‍ മുട്ടി ഇരിക്കുമ്പഴാ അവന്റെ ഒരു ഹെല്പ്പ്..
"പോഡേയ് പോഡേയ്.. ഇന്ന് ഹെല്പ്പില്ല.. വീക്കെന്റ് ആണു.."
"എമര്‍ജെന്‍സി ആണു സാറേ.. പെട്ടെന്നു റിപ്ലൈ ചെയ്യേണ്ട മെയിലാ.."

"ഞാന്‍ ഒരു സീരിയെസ് കാര്യം ചെയ്തോണ്ടിരിക്കുവാ.. please don't disturb.."
"വല്ല ടെണ്ടര്‍ പ്രിപ്പെറേഷനും ആണോ...?"
"നോ നോ..!! ഞാന്‍ ഒരു കവിത എഴുതാന്‍ ശ്രമിക്കുവാ.."
അതു കേട്ടപ്പോള്‍ അവനത്ഭുതം..
"ഏഹ്.. അപ്പോ സാറു കവിത എഴുതുമോ..?"

ദുഷ്ടന്‍.. Stupid Fellow ഒരു കവിയോട് ഒരിക്കലും ചോദിക്കാന്‍ പാടില്ലാത്ത ചോദ്യം.. സാരമില്ല.. തല്‍ക്കാലം ക്ഷമിക്കാം..
"ശ്ശ്ശ്ശ്ശ്ശ്ശ്ശ്... മിണ്ടല്ലെടാ.. കവിത തെറ്റിപ്പോകും.."

കമ്പ്യൂട്ടറില്‍ ടൈപ്പ് ചെയ്യുന്നതിനേക്കാള്‍ പേപ്പറില്‍ എഴുതുന്നതാണു കവിതയുടെ ഭംഗി.. മാത്രമല്ല സിനിമയിലൊക്കെ കാണുന്ന പോലെ എഴുതിയിട്ട് ശെരിയാകാതെ ചുരുട്ടിക്കൂട്ടി താഴെയിടണം.. അവസാനം വെട്ടി തിരുത്തി തിരുത്തി മനോഹരമായ ഒരു കവിത പൊട്ടി മുളക്കും എന്നുള്ളതില്‍ ഒരു സന്ദേഹവും വേണ്ട..

അവസാനം പേനയിലെ മഷിയും കൊറേ പേപ്പറും വേയ്സ്റ്റായല്ലാതെ നാലു വരി പോലും ശെരിയായില്ല.. ഇതു നമുക്ക് പറ്റിയ പണിയല്ലെന്നു തീരുമാനിച്ച് പേന താഴെ വെച്ചു കസേരയിലൊന്നു ചാരി കയ്യും കാലും നിവര്‍ത്തി ഒരു ദീര്‍ഘ നിശ്വാസമങ്ങു പെടച്ചു..

"എന്തായി സാറേ.. വല്ലതും നടന്നോ..?"
"നോ... ഞാന്‍ നിര്‍ത്തി.. ഇതൊന്നും നമ്മളെകൊണ്ട് പറ്റുന്ന പണിയല്ലെഡേയ്.."
"എന്താ സബ്ജക്റ്റ്.."
"As usual.. പ്രണയം..!! ലവ്.. നിനക്ക് കാണണോ..??"
"എനിക്ക് വായിക്കാനറിയൂല.."

ഹാവൂ ഭാഗ്യം.. എന്നാല്‍ എഴുതിയെടത്തോളം വായിച്ച് കേള്‍പ്പിച്ച് ഇവനെ കൊല്ലാം.
"എന്നാ നീയിവിടെ വന്നിരിക്ക്.. ഞാന്‍ കവിത വായിക്കാം "

മുരടനക്കി ചെറുതായി ഒന്നു ചുമച്ച് തൊണ്ട ശെരിയാക്കി ഞാന്‍ കവിത ചൊല്ലാനുള്ള സ്റ്റെപ്പെടുത്തു

"'നിഴലായ് നീ കൂടെയുണ്ടാകുമെങ്കില്‍
ഇരുട്ടാണെനിക്കിഷ്ടം..
എന്നെ പൊതിയുന്ന ഇരുട്ട്..' - എങ്ങനെയുണ്ട്..?"
എന്തോ വലിയ സംഭവം ആണെന്ന മട്ടില്‍ കസേരയില്‍ ഒന്നു ഞെളിഞ്ഞിരുന്ന് ഞാന്‍ കഴുത്തില്‍ മുറുകി കിടന്നിരുന്ന ടൈ ഒന്നു ലൂസാക്കി

"കൊള്ളാം.. പക്ഷേ ഇതിലെവിടെ പ്രണയം..?"
ആഹാ.. മലയാളം വായിക്കാനറിയാത്ത ഇവന്‍ പ്രണയം എന്നൊക്കെ പറയാനായാ..?? "ഡാ പൊട്ടാ.. പണ്ടത്തെ കവികള്‍ പാടിയിട്ടില്ലെ.. കരയുമ്പോള്‍ കൂടേ കരയാന്‍ നിന്‍ നിഴല്‍ മാത്രം വരും എന്നു..?"
"ഞാന്‍ കേട്ടിട്ടില്ല.."
"ആഹ് എന്നാല്‍ അങ്ങനെ ഉണ്ട്.. അതായത്.. നമ്മുടെ നല്ല കാലത്തും കഷ്ടകാലത്തും നമ്മുടെ നിഴല്‍ മാത്രമേ കൂടെയുണ്ടാകൂ എന്നു.."
"ഉം..."
"അപ്പോ കാമുകി പറയുകയാണു എന്നും കൂടെയുണ്ടാകുന്ന നിഴല്‍ ആയി വരാമെന്നു.."

"എന്നിട്ട്..?"

കൊള്ളാം.. ചെക്കനു ആവേശം മൂത്തു വരുന്നുണ്ട്.. ഒരു കവിയുടെ എല്ലാ ശക്തിയും ആവാഹിച്ച് ഞാന്‍ വിശദീകരിക്കാന്‍ തയ്യാറെടുത്തു..
"അപ്പോള്‍ കാമുകന്‍ പറയുന്നു.. എങ്കില്‍ നീ നിഴലാകെണ്ട.. ഇരുട്ടായാല്‍ മതി.."
"ഇതു പ്രണയമല്ലല്ലോ.. കാമം അല്ലേ.. നല്ലസ്സലു സെക്സ്..?"
ചെക്കന്‍ വിചാരിച്ചോടത്ത് നിക്കും എന്നു തോന്നുന്നില്ല.. മിക്കവാറും ഇവനെന്നേം കൊണ്ടേ പോകൂ..
"ഏഹ്..??"
"ഇരുട്ട് രാത്രിയല്ലേ.. നിഴല്‍ പകലും.. അപ്പോ പെണ്ണിനെ രാത്രി മാത്രം മതി എന്നാണോ കാമുകന്‍ ഉദ്ധേശിച്ചത്..? രാത്രി മാത്രം എന്നു പറഞ്ഞാല്‍..."

ഇതും പറഞ്ഞ് മുഖത്തൊരു പുച്ചഭാവത്തോടേ ഇരിക്കുന്നു അവന്‍.. പടച്ചോനേ... ഇങ്ങനെയെല്ലാംചിന്തിക്കാന്‍ മാത്രം ബുദ്ധി ഇവനുണ്ടായിരുന്നോ..? ഇവനെ ജോലീന്ന് പിരിച്ചു വിടുന്നതായിരിക്കും ബുദ്ധി..

"നീ ശെരിയാവൂല.... പോയേ പോയേ.. ഞാനില്ല ഈ കളിക്ക്.."
എന്റെ മുഖഭാവം കണ്ടിട്ടാണോ എന്തോ.. ഒന്നും മിണ്ടാതെ അവന്‍ എഴുന്നേറ്റ് പോയി..

എന്നാലും അങ്ങനെ വിടാന്‍ പറ്റില്ലല്ലോ.. മാത്രമല്ല വെല്യ കവിയാണെന്നും പറഞ്ഞിരുന്ന എന്നെ മലയാളം പോലും വായിക്കാനറിയാത്ത ഒരു ചീളു പയ്യന്‍ ആക്കി പോകുക എന്നൊക്കെ പറഞ്ഞാല്‍..?? എന്തായാലും ഒന്നു മാറ്റി പിടിച്ച് നോക്കാം.. കുറച്ച് കഴിഞ്ഞപ്പോള്‍ അവനെ പിന്നേയും വിളിച്ചു..

"ഡാ ഇങ്ക്ട് വന്നേ.. ഞാന്‍ മാറ്റിയെഴുതി.. ദാ കേട്ടു നോക്ക്.."
ഇപ്രാവശ്യം വെല്യ താല്പര്യമില്ലാത്ത രീതിയിലാണാവന്‍ വന്നത്.. ഞാന്‍ അതു മൈന്‍ഡ് ചെയ്യാതെ പിന്നേയും കവിത വായിക്കാന്‍ തുടങ്ങി.. ഞാനും സീരിയെസ്സായി.."

'എനിക്കെന്നും നിന്‍ നിഴലായ് കൂടെയുണ്ടാകണം..'
'അങ്ങനെയെങ്കില്‍
ഒരു ഭാഗത്ത് മാത്രം ഒതുങ്ങുന്ന നിഴലാകുന്നതിനേക്കാള്‍ നീയിരുട്ടാകുന്നതാണെനിക്കിഷ്ടം..
എന്നെ പൊതിയുന്ന ഇരുട്ട്..' - ഇതെങ്ങനെയുണ്ട്..??"

അടുത്ത ചോദ്യം ചോദിച്ചു.. അവനെന്നെ പിന്നേം ഞെട്ടിച്ചു
"സാറെന്തിനാണീ ഈ ഇരുട്ടില്‍ കേറി പിടിച്ചേക്കുന്നത്.. ഇരുട്ട് എന്നു പറഞ്ഞാല്‍ darknessഅല്ലേ..? Darkness is the symbol of Sorrow and agony.. So sad...!! "

ഓഹ്.. ഇവന്‍ ഇപ്പൊ English ല്‍ പിടിച്ചായ കളി..
"ആണല്ലേ.. എന്നാ നീ പൊയ്ക്കോ.. ഞാന്‍ കവിത എഴുതല്‍ നിര്‍ത്തി.. ന്നെ കൊണ്ട് നടക്കൂല.." പിന്നെയും പേന താഴെ വെച്ചു കീഴടങ്ങി..
"ഹേയ്.. അല്ലല്ല സാറിനെ കൊണ്ട് പറ്റും.. നിര്‍ത്തെണ്ട.. Try something pleasant.."

ഹോ ഇവനിന്നെന്നെ മോട്ടിവേറ്റ് ചെയ്തു കൊല്ലും എന്നാണു തോന്നുന്നത്.. പണ്ടാരം.. പക്ഷേ ഞാന്‍ പ്രതികാരദാഹിയായി മാറി.. ഇത്രേം ഹൃദയ ഭേദകമായി പരിശുദ്ധ പ്രണയത്തെ വിവരിക്കാന്‍ ശ്രമിച്ച എന്റെ കവിതയെ വെറും കാമമാക്കി മാറ്റിയ ഇവനെ വെറുതെ വിടാന്‍ പാടില്ല..

"ആണല്ലേ.. ദിപ്പ ശെര്യാക്കിത്തരാട്ടാ..."
"Okay.. All the very best sir..!!."
അവന്‍ Thumbs Up കാണിച്ചു പിന്നേ സീറ്റിലേക്ക് പോകാന്‍ എണീച്ചു..

"ആഹാ.. നിക്ക് നിക്ക്.. അങ്ങനങ്ങു പോകാതെ.. ഞാന്‍ പണ്ടെഴുതിയ ഒരു സന്തോഷ കവിതയുണ്ട്.. കേക്കണോ..??"
"ആണോ.. Lets hear it then.. "
"പിന്നല്ലാണ്ട്..? ദാ കേള്‍ക്ക് മോനേ.."
"Okay"

"അത്തള പുത്തള തവളാച്ചീ..
ചുക്കുമരിക്കണ ചൂളാപ്പാ..
മറിയം വന്നു വിളക്കൂതി..
ഫൂ.. ഫൂ.. ഫൂ..." - എങ്ങനെയുണ്ട് മോനേ..??"

ഇതു കേട്ട് ചമ്മിയ മുഖത്തോടേ ഇരിക്കുന്ന അവനേ നോക്കി ചിരിക്കാനുള്ള ക്രൂരമോഹവുമായിഞാൻ അവന്റെ മുഖത്തേക്ക് നോക്കി.. പക്ഷെ അവന്റെ മുഖത്ത് ഒടുക്കത്തെ സീരിയെസ്നെസ്..

"പോരാ..!!"
"ഏഹ്..?" ഇവനെന്നെ കളിയാക്കുന്നതാണോ..??

"This is again Sad.. So Negative."
അവനിപ്പഴും സീരിയസ്സായിട്ട് തന്നെ..
"Why..??"
"വിളക്കൂതിയാല്‍ പിന്നേം Darkness അല്ലെ.. in that point of view, this is negative.."
"ന്റെ റബ്ബേ...!!" എനിക്ക് വിളിക്കാതിരിക്കാന്‍ കഴിഞ്ഞില്ല..
" Why don't you change it to മറിയം വിളക്ക് കത്തിച്ചു എന്നു ..? it would be positive.. വെളിച്ചം വരുന്നതല്ലെ..?"

ഇവന്‍ പൊട്ടനാണോ അതോ എന്നെ പൊട്ടനാക്കാന്‍ ശ്രമിക്കുന്നതാണോ എന്ന് എത്ര ശ്രമിച്ചിട്ടും പിടി കിട്ടുന്നില്ല.. പിന്നൊന്നും നോക്കാണ്ട് ഒരു കാച്ചങ്ങ് കാച്ചി...

"അതേയ് ഒരു കാര്യം ചെയ്യ് നീ വീട്ടീ പൊയ്ക്കോ.. ഇന്നു നിനക്ക് പേയ്ഡ് ലീവ്... എഞ്ചോയ് യുവര്‍ വീക്കെന്റ്.."

ലോ ഓഫ് ഇനെര്‍ഷ്യ

2015-04-09T12:22:00.000+03:00

"ഇക്കാ.. ഇങ്ങളല്ലേ പറഞ്ഞത് ഈ ഫിസിക്സും കെമിസ്ട്രിയുമൊന്നും പഠിച്ചിട്ടൊരു കാര്യവുമില്ലാ.. ഇതിനൊക്കെ നിത്യ ജീവിതത്തിലൊരു ഉപകാരവും ഇല്ലാന്നൊക്കെ??"

ഏഹ്.. ഇവള്‍ക്കെന്താ ഇപ്പ പെട്ടെന്നിങ്ങനെയൊക്കെ തോന്നാന്‍..?? എന്താണെന്നറിയാന്‍ ആകാംഷയുണ്ടായിരുന്നിട്ടും ജാടയൊട്ടും വിടാതെ തന്നെ മറുപടി കൊടുത്തു..
"അതേടീ.. നിത്യ ജീവിത്തില്‍ മാനേജ്മെന്റിനേക്കാള്‍ ഉപകാരപ്രധമായ മറ്റൊന്നും ഇല്ല.... എന്തോരം ആള്‍ക്കാരെയാണു ഞാന്‍ ഡെയ്‌ലി മാനേജ് ചെയ്യുന്നതന്നറിയാമോ..?" ഒരു എഞ്ചിനീയര്‍ വന്നിരിക്കുന്നു... നമ്മള്‍ടെ അടുത്താ കളി..

"എന്നാ കേട്ടോ.. ഇന്നു ഫിസിക്സ് തിയറി പ്രയോഗിച്ച് ഞാന്‍ ഒരു അപകടത്തില്‍ നിന്നും രക്ഷപ്പെട്ടു.."
ഏഹ്.. ഇവളെന്നോടുള്ള വാശിക്ക് ഇമ്മാതിരി പണിയൊക്കെ ചെയ്തു തുടങ്ങിയോ..? അധികം മൈന്‍ഡാക്കെണ്ടാ.. സംസാരത്തില്‍ മാക്സിമം നിസ്സംഗത വരുതി..
"ഉവ്വ നീ ഒലത്തി.."
"അധികം ആളു കളിക്കാണ്ട് ഇതു കേള്‍ക്ക് മനുഷ്യാ.."
"ഉം പറ.."
"ഉപ്പ ഇന്നെന്നെ റെയില്‍‌വേ സ്റ്റേഷനിലേക്ക് ആക്കാന്‍ വന്നപ്പോ ഭയങ്കര ബ്ലോക്ക്.."
"ഉം.. അപ്പൊ ബ്രേക്ക് പാടിന്റെ ഫ്രിക്ഷനും നിന്റുപ്പാടെ കാലിന്റെ ഫോര്‍സും കൂടെ അങ്ങട്ട് ഉരുട്ടിക്കൂട്ടി പ്രയോഗിച്ച് കാറു നിന്നൂന്നാകും.."
"ഒലക്കേടെ മൂട്...!! അതല്ല മനുഷ്യാ.. ഇങ്ങക്ക് കേക്കാന്‍ സൗകര്യമുണ്ടോ..?"

അവള്‍ടെ സംസാരത്തിലെ മയമെല്ലാം പോയിതുടങ്ങീന്നായപ്പോള്‍ സമാധാന കാംഷിയായ വെറുമൊരു സാധാരണ ഭര്‍ത്താവായി മാറാന്‍ എനിക്കധികം സമയം വേണ്ടി വന്നില്ല.. വെറുതെ അവള്‍ടെ വായിലിരിക്കുന്നത് വാങ്ങിച്ച് വെക്കണ്ട..

"ഉം ശെരി.. പറഞ്ഞോ..."
"അപ്പോ ഞങ്ങള്‍ വേറെ റോട്ടീക്കൂടെ വന്ന് ഇപ്പുറത്ത് നിര്‍ത്തി.. അവിടുന്നു ഒരു ഇടവഴീക്കൂടെ കേറിയാല്‍ പെട്ടെന്നു സ്റ്റേഷനില്‍ എത്തും എന്നു ഉപ്പ പറഞ്ഞു..."
"ഉം.. മൂപ്പര്‍ക്കീ ഇടവഴിയെല്ലാം എങ്ങനെ അറിയാടീ...?"
"ആഹ് അതു നിങ്ങ ചോയിച്ചൂന്ന് ഞാനുപ്പാനോട് പറയാട്ടാ.."
"അള്ളോ വേണ്ടാ.. നീ കാര്യത്തിലേക്ക് വാ.. എന്നിട്ട്..?"
"ചെറിയ ഇരുട്ടായി തുടങ്ങി.. വഴിയില്‍ ആരും ഇല്ല.. വോള്‍ട്ടേജില്ലാത്ത സ്ട്രീറ്റ് ലൈറ്റിന്റെ പ്രകാശം മാത്രം... ചുറ്റും ചീവീടുകളുടെ കാതടപ്പിക്കുന്ന ശബ്ദം.."

അവളുടെ വിശദീകരണവും സംസാരത്തിലെ ഭാവവുമെല്ലാം ആയപ്പോള്‍ എനിക്കു പേടിയായി തുടങ്ങി..
" ഹോ.. എന്നിട്ട്..?? നീ പേടിച്ചോ..??"
"ഹേയ് അപ്പൊ പേടിച്ചില്ല.. പക്ഷെ കുറച്ച് കഴിഞ്ഞപ്പോള്‍..."
"കുറച്ച് കഴിഞ്ഞപ്പോള്‍...??"
"കഴിഞ്ഞപ്പോള്‍ പിന്നില്‍ നിന്നും ഒരു ചെക്കന്‍.."
"ചെക്കന്‍ നിന്നെ എന്തെങ്കിലും ചെയ്തോ.. അവനെ കണ്ടാലെങ്ങനിരിക്കും..?"
"ഇല്ലല്ല.. അവന്‍ എന്നോട് ചോദിച്ചു.."
വളരെ സീരിയസ്സായി പതിഞ്ഞ ശബ്ദത്തില്‍ പറഞ്ഞ് അവളൊന്നു നിര്‍ത്തി..
"നീ വേഗം കാര്യം പറയെടീ.."
"എന്നോട് ചോദിച്ചു..എഞ്ചിനീയറിങ്ങ് കോളേജിലേക്കാണോ എന്നു.."

ഹോ.. നെഞ്ചില്‍ കെട്ടി നിന്ന ശ്വാസമെല്ലാം കൂടെ ഒന്നാകെ ഓട്ട വന്ന ബലൂണീന്നു കാറ്റു പോകുന്ന പോലെ ഒറ്റ പോക്കങ്ങു പോയി...
"ആഹ്.. അതാണോ.. വെല്യ കാര്യം..? നിന്നെ കണ്ടപ്പോ അവന്റെ കൂടെ പഠിക്കുന്ന വല്ല കുട്ടികളുടെയും ഉമ്മയാണെന്നു കരുതി ചോദിച്ചതാകും.. പക്ഷേ ഇതിലെവിടേടീ നിന്റെ ഫിസിക്സ്..??"
"അടങ്ങു.. ഞാന്‍ അവനു മറുപടിയൊന്നും കൊടുക്കാതെ വേഗം നടന്നു.. അപ്പോ അവനും വേഗം നടന്നു..
"അതവനു തെരക്കായിട്ടായിരിക്കും.. നീ വെറുതെ പാവം ചെക്കന്മാരെ തെറ്റിദ്ധരിക്കരുത്.."
"അല്ലല്ല.. അപ്പോ ഞാന്‍ സ്പീഡ് കൂട്ടി.. "
"അതു നന്നായി.."
"അപ്പോ അവനും സ്പീഡ് കൂട്ടി.."
"ഏഹ്...?"
"പിന്നേം ഞാന്‍ സ്പീഡ് കൂട്ടി നടന്നു.."
"ആഹാ.."
"അവനും സ്പീഡ് കൂട്ടി നടന്നു.."

ആകാംഷയുടെ നിമിഷങ്ങള്‍.. അവള്‍ പറയുന്നത് കേട്ട് മൂളി മൂളി എനിക്ക് പിന്നേം ശ്വാസം മുട്ടി തുടങ്ങി.. മനസ്സില്‍ പേടിപ്പിക്കുന്ന ബാക്ക്ഗ്രൗണ്ട് മ്യൂസിക് എല്ലാം വരാന്‍ തുടങ്ങി..
"പണ്ടാരം.. നിര്‍ത്ത് നിര്‍ത്ത്.. നടന്നത് മതി... ഇങ്ങനെ നടന്നു നടന്നു ഒരു മാതിരി അമല്‍ നീരദിന്റെ പടം പോലെ ആക്കല്ലെ.. നീ ഫിസിക്സ് കൊണ്ടു വാ.."
"ആഹ്.. ദാ വരുന്നിക്കാ സംഭവത്തിന്റെ ട്വിസ്റ്റ്.."
"ട്വിസ്റ്റെങ്കില്‍ ട്വിസ്റ്റ്.. പോരട്ടെ.."
"പെട്ടെന്നാണു എനിക്കു ന്യൂട്ടന്റെ ലോ ഓഫ് ഇനെര്‍ഷ്യ ഓര്‍മ്മ വന്നത്.."
"ച്ചേയ്..!!"
"ഏഹ്.. എന്താണിക്കാ..??"
"വഷളത്തി.. നീ ന്യൂട്ടന്റെ എന്തോന്നു ഓര്‍ത്തെന്നാ..??"
"ന്യൂട്ടന്റെ ഇനെര്‍ഷ്യ.." അവളുടെ സംസാരത്തില്‍ ഒടുക്കത്തെ നിഷ്കളങ്കത..
"ഹോ.. ഈ സമയത്ത് നിനക്കിതൊക്കെ ഓര്‍മ്മ വന്നോ...?"
"ത്ഫൂ.. വൃത്തികേട് പറയാതെ മനുഷ്യാ.... ഇതതല്ല.."
"ഏഹ്.. ഇതതല്ലേ..? പിന്നെ നീയെന്താ ചെയ്തത്.."
"ഞാനാരാ മോള്‍.. അപ്പൊ തന്നെ ഞാനത് പ്രയോഗിച്ചു..."

ഹും.. ഇനിയിതുമ്മെ പിടിച്ചു തൂങ്ങി എനിക്കു ഇതു പോലും അറിയില്ലാന്നവളെകൊണ്ട് പറയിക്കെണ്ട.. ഇല്ലെങ്കില്‍ പിന്നെ മാനേജ്മെന്റ് പറഞ്ഞു അടിച്ചൊതുക്കാന്‍ പറ്റില്ല.. ഇനെര്‍ഷ്യയല്ല... ഇനെര്‍ഷ്യയുടെ മൂത്താപ്പയാണെങ്കിലും എനിക്കു പുല്ലാണെന്നു വരുത്തുന്ന രീതിയില്‍ ചോദിച്ചു..
"നിന്റെ ബാഗെടുത്ത് അവനെ അടിച്ചോ.?"

"ന്റെ മനുഷ്യാ അതു ഫോര്‍സില്‍ വരുന്ന കാര്യങ്ങളല്ലേ..? ഇങ്ങക്ക് ന്യൂട്ടന്‍സ് ലോ ഓഫ് മോഷനിലെ, ലോ ഓഫ് ഇനെര്‍ഷ്യ അറിയില്ലാ..??" അവള്‍ക്കത്ഭുതം..
"പിന്നേ.. മോഷനല്ലേ..? അതു ഞാന്‍ അഞ്ചാം ക്ലാസില്‍ പഠിച്ചതാ.."
"ഏഹ് അഞ്ചിലോ..??"
"ആഹ് അഞ്ചായാലും പത്തായാലും.. അതവിടെ നിക്കട്ടെ.. പിന്നെ ഒരു ലോ ആകുമ്പോള്‍ അതു പല രീതിയിലും പ്രയോഗിക്കാമല്ലോ.. അതു കൊണ്ടാ ഞാന്‍ ബാഗെടുത്തടിച്ചോന്നു ചോദിച്ചത്...."

"ആഹ്... അതു പോട്ടെ.. ഞാന്‍ കുറച്ചൂടെ സ്പീഡ് കൂട്ടീട്ടാ.. അപ്പോ.."
പണ്ടാരടങ്ങാനായിട്ട് അവളു ദാ വീണ്ടും നടക്കാന്‍ തുടങ്ങിയിരിക്കുന്നു.. ഇങനെ നടന്നാല്‍ ബാക്കിയുള്ളോരിവിടെ ശ്വാസം മുട്ടി ചാകും.. അതു കൊണ്ട് നേരെ ചാടി സംസാരം ഇന്റെര്‍ഫിയര്‍ ചെയ്തു..
"അവനും സ്പീഡ് കൂട്ടി.. അത്രല്ലേ ഒള്ളു..?"
"ശെടാ ചൂടാകല്ലിഷ്ടാ.. ഞാന്‍ അങ്ങനെ സ്പീഡ് കൂട്ടി നടത്തം മാറി ഓട്ടം ആകുന്ന ആ പോയിന്റില്‍ ആയപ്പോള്‍ പെട്ടെന്നു നടത്തം നിര്‍ത്തി.."
ഹോ ഭാഗ്യം.. നടത്തതിനൊരവസാനം വന്നല്ലോ.. എനിക്ക് ശ്വാസം വിടാനുള്ള ഗ്യാപ്പ് കിട്ടി..
"ഓഹ്.. വെല്യ കാര്യം.. എന്നിട്ട്..?"
"അതേ.. വെല്യ കാര്യം തന്നെ.. ഇങ്ങനെ കളിയാക്കാന്‍ ആണെങ്കില്‍ ഞാനില്ലാട്ടാ.."

"ശ്ശെടാ.. കളിയാക്കിയതല്ല.. ഞാനൊന്നാശ്വസിച്ചതാ.. നീ നിന്നിട്ട്..??
"ഞാന്‍ നിന്നപ്പോള്‍ ലവന്റെ ഇനെര്‍ഷ്യ കാരണം അവനു നിക്കാന്‍ പറ്റിയില്ല.. അവന്‍ അതേ സ്പീഡില്‍ നേരെ മുന്നോട്ട് തന്നെ പോയി.. ഹി ഹി ഹി.."
"ശ്ശോ.. ഇതിലെന്തൂട്ടിത്ര കിണിക്കാന്‍.. എന്നിട്ട്..?"
"ന്റെ മനുഷ്യാ.. അതാണു ഫിസിക്സ്.. അസ് പെര്‍ ദി ലോ ഓഫ് ഇനെര്‍ഷ്യ.. എൻ ഒബ്ജെക്റ്റ്‌ ഇൻ മോഷൻ സ്റ്റേയ്സ്‌ ഇൻ മോഷൻ വിത്‌ ദി സെയിം സ്പീഡ്‌ ആന്റ്‌ ഇൻ ദി സെയിം ഡയറക്ഷൻ അൺലെസ്സ്‌"
"ന്റെ റബ്ബേ.. മതി നിര്‍ത്ത്... നീ നിന്നു അവന്‍ മുന്നിലോട്ട് പോയി.. ഇതില്‍ നീയെങ്ങനെ രക്ഷപ്പെട്ടു..?"

"ന്റെ മന്‍ഷ്യാ.. ഇങ്ങളെന്തൂട്ട് മാനേജ്മെന്റാ..? അവനു പിന്നെ മനപ്പൂ‌ര്വം സ്പീട് കുറക്കാനോ ഞാന്‍ അവനെ ഓവെര്‍ടേക്ക് ചെയ്ത് പോകുന്നത് വരെ വെയിറ്റ് ചെയ്യാനോ അവന്റെ അഭിമാനം അനുവദിക്കുമോ..?"
"ഹമ്പടി കേമീ...."
"എനിക്കിനി സാവധാനത്തില്‍ പോയാ പോരെ.. അവന്‍ ചമ്മി..
"ഹോ സമ്മതിച്ചു..."
"ഇങ്ങളു പറ.. എങ്ങനുണ്ടായിരുന്നു ഫിസിക്സ് കൂട്ടിക്കലര്‍ത്തിയുള്ള എന്റെ സൈക്കോളാജിക്കല്‍ മൂവ്..??"
"ഹോ.. വെള്‍ഡണ്‍ മൈ ബോയ്.. വെരി വെല്‍ഡണ്‍.. ഫിസിക്സ് നീണാള്‍ വാഴട്ടെ.."

ഇതാണു പറഞ്ഞത്.. നമ്മളേക്കാള്‍ ബുദ്ധിയും വിവരവുമുള്ള പെണ്ണിനെ കെട്ടാന്‍ പാടില്ലാന്നു.. സത്യത്തില്‍ ഇപ്പഴും എനിക്കിതു വരെ ഈ ലോ ഓഫ് ഇനെര്‍ഷ്യ എന്താണെന്നു ഒരു എത്തു പിടിയും കിട്ടീട്ടില്ല. ന്യൂട്ടന്‍ എന്നു കേള്‍ക്കുമ്പോഴും ഇടക്കിടക്കു ലൂസ് മോഷന്‍ വരുമ്പഴുമാണീ ലോ ഓഫ് മോഷന്‍ ഓര്‍മ്മ വരുന്നത്.. അതിന്റെ ഉള്ളില്‍ ഇയ്യാളെന്തിനാ ഈ ലോ ഓഫ് ഇനെര്‍ഷ്യയും കൂടെ കുത്തിക്കയറ്റി വെച്ചത്..?

എന്നാലും, എന്തായിരിക്കും ന്യൂട്ടന്റെ ലോ ഓഫ് ഇനെര്‍ഷ്യ..???

യൂ റ്റൂ യൂട്ട്രസ്...

2015-04-09T12:21:00.003+03:00

ബാത്ത്റൂമില്‍ നിന്നും പൊത്തോന്നുള്ള ശബ്ദവും 'ന്റള്ളോ'ന്നുള്ള നിലവിളിയും കേട്ടിട്ടാണു അടുക്കളയില്‍ നിന്നും സൂറ ബേജാറോടെ ഓടി വന്ന് ബാത്ത്റൂമിന്റെ കതകില്‍ തട്ടിയത്. വാതില്‍ തുറന്ന് ഉണ്ടക്കണ്ണു ചുവപ്പിച്ച് സൂറാനെ തള്ളിമാറ്റി പുറത്തേക്ക് വന്ന ജബ്ബാര്‍ അലറി.. "അന്നോട് ഞാനെത്ര പ്രാവശ്യം പറഞ്ഞിട്ടുണ്ടെടീ ബലാലേ ബാത്ത്റൂമീ വെള്ളമുണ്ടെങ്കില്‍ അതൊന്നു തൊടച്ചിടണം എന്നു..??"

"അയ്നിപ്പം എന്തൂട്ടാണ്ടായേ മന്‍ഷ്യാ..? ഇങ്ങളു ജിന്നു കേറ്യ പോലെ നിന്നു തുള്ളാണ്ട് കാര്യം പറ.." സൂറ ഒന്നും മന്‍സിലാകാതെ കയ്യിലിരുന്ന പത്തിരിക്കോലു കൊണ്ട് തല ചൊറിഞ്ഞു..

"ബാത്ത്റൂമിലെ വെള്ളത്തീ ചവ്ട്ടി ഞാന്‍ ഊരേം തല്ലി വീണു പോത്തേ.. അന്നെ കൊണ്ടുള്ള ഓരോരോ എടങ്ങേറുകള്.." ജബ്ബാര്‍ തന്റെ നടുവിന് കൈ താങ്ങി തോളു രണ്ടു സൈഡിലേക്കും തിരിക്കാന്‍ ശ്രമിച്ചു..

"പടച്ചോനേ.. ഇങ്ങളതിനുള്ളീത്തെ സാമാനങ്ങളു വല്ലോം പൊട്ടിച്ചാ..??" ബാത്ത്റൂമിന്റുള്ളിലേക്ക് തലയിട്ടു നോക്കാന്‍ ശ്രമിച്ച സൂറാനെ പിടിച്ചു പുറത്തേക്ക് നിര്‍ത്തി.. "മന്‍ഷ്യനിവിടെ വീണു നടുവേതാ പുറമേതാന്നറിയാണ്ട് നിക്കുമ്പഴാ അവള്‍ടെ ഒരു ബാത്ത്റൂം ഇന്‍സ്പെക്ഷന്‍.."

താനെന്ത് തെറ്റാ ഇപ്പ ചെയ്തത് എന്ന മട്ടില്‍ സൂറ പിന്നെയും തല ചൊറിഞ്ഞു."ഇങ്ങടെ ദേഷ്യം കണ്ടാ തോന്നും ഞാനാ വന്നു ഇങ്ങളെ ഉന്തി തള്ളിയിട്ടതെന്ന്.." സൂറാടെ കണ്ണു നിറഞ്ഞ് വന്നു..
"അനക്കാ ബാത്ത്റൂമൊന്നു തൊടച്ചിട്ടൂടെ ന്റെ സൂറാ.. അന്നോടിതെത്ര പ്രാവശ്യം പറയണം..?"
"ന്റെ മന്‍ഷ്യാ.. ഞാനിവിടെ എന്തൊക്കെ നോക്കണം.. മക്കളെ കുളിപ്പിച്ച് ഉടുപ്പിടീപ്പിച്ച് ഭക്ഷണം കൊടുത്ത് അവരെ ഉസ്കൂളീ വിടണം.. ഇങ്ങടെ കാര്യങ്ങള്‍ നോക്കണം.. ഇയ്നൊക്കെ ഞാനൊറ്റ ഒരുത്തി അല്ലേ ഒള്ളൂ..??" സൂറ മൂക്ക് പിഴിഞ്ഞു
"ഇതല്ലാണ്ട് പിന്നെ അനക്കെന്താണ്ടീ ഇവ്ടെ വേറെ പണി..??" ജബ്ബാറീന്റെ ദേഷ്യം അടങ്ങുന്നില്ല..

"ഉം.. ഇങ്ങളിങ്ങനത്തെ ഒരു മൂശേട്ട ആകല്ലെ മന്‍ഷ്യാ.. പണിക്കൊരു വയസ്സായ പെണ്ണിനെ ഏര്‍പ്പാടാക്കി തരാന്‍ പറഞ്ഞാല്‍ ഇങ്ങക്കതും പറ്റൂല..."
"ഉം.. വയസ്സായ തള്ളേനെ കൊണ്ടന്നട്ട് വേണം പിന്നെ ഞാന്‍ അതിനു കൊട്ടം ചുക്കാദി തൈലം അന്വേഷിച്ച് നടക്കാനും അനക്ക് അതിന്റെ നടൂം കൂടെ തിരുമ്മിക്കൊടുക്കാനും.."

"അല്ലാണ്ട് പിന്നെ.. ചെറുപ്പക്കാരി പെണ്ണുങ്ങളേം കൊണ്ട് വന്നാ ഈ പൊരേന്റെ ഏഴയലൊക്കത്ത് ഞാന്‍ കേറ്റുംന്നു ഇങ്ങള്‍ പ്രതീക്ഷിക്കെണ്ടാ.."
"ന്റെ സൂറാ.. അന്റെ വര്‍ത്താനം കേട്ടാ തോന്നും ഞാനിവിടെ.... "
"ഉം എന്തേ നിര്‍ത്തീത്.. കാലത്തെണീച്ച് പാലു വാങ്ങിച്ചോണ്ട് വരാന്‍ ഞാനിവിടെ നൂറു വിളി വിളിച്ചാ ഒറക്കത്തീന്നെണീക്കാത്ത മന്‍ഷ്യനല്ലേ നിങ്ങള്‍."
"ഇയ്യ് വിളിക്കുന്നത് കേക്കാഞ്ഞിട്ടല്ലേ.. ന്റെ സൂറാ.. ?"
"എന്നിട്ടെങ്ങനാ മന്‍ഷ്യാ അപ്പര്‍ത്തെ വീട്ടിലെ പെണ്ണ് ചൂലെടുത്ത് മുറ്റമടിക്കുന്ന ശബ്ദം കേക്കുമ്പ സുച്ചിട്ട പോലെ ഇങ്ങളെണീറ്റ് പാലു വാങ്ങാന്‍ പോണത്..??"

ഇനിയും എന്തെങ്കിലും മിണ്ടാന്‍ നിന്നാന്‍ ശെരിയാവൂലാന്നു മനസ്സിലായപ്പോള്‍ നിസ്സഹായതയോടെ തിരിഞ്ഞപ്പോഴാണു വീണ്ടും ജബ്ബാറിന്റെ നടു മിന്നിയത്.. അതോടെ തൊട്ടപ്പുറത്ത് കിടന്ന കസേരയില്‍ തനെ തൊണ്ണൂറ്റഞ്ച് കിലോ ഭാരം ഉറപ്പിച്ച് സൂറാനെ നോക്കി.. ജബ്ബാറിന്റെ ആ നോട്ടത്തില്‍ നിന്നു തന്നെ നല്ല വേദനയുണ്ടെന്നു മനസ്സിലായ സൂറ വേഗം ത്ന്റെ ദേഷ്യവും അടുക്കളയില്‍ പരത്തി ചുടാന്‍ വെച്ചിരിക്കുന്ന പത്തിരികളെപോലും മറന്ന് ജബ്ബാറിന്റടുത്തിരുന്ന് പുറം തടവിക്കൊടുക്കാന്‍ തുടങ്ങി..

"പോത്തു പോലെ ബളര്‍ന്നല്ല മന്‍ഷ്യാ.. ഇങ്ങക്കൊന്നു നോക്കീം കണ്ടും നടന്നൂടെ..? "
പോത്തു പോലെ വളര്‍ന്നത് അന്റെ മൂത്തപ്പയാണ്ടീ ഇബ്ലീസേ എന്നു മനസ്സില്‍ പറഞ്ഞ് ജബ്ബാര്‍ തലതിരിച്ചു..
"ഇങ്ങക്ക് നല്ല വേദനണ്ടാ മന്‍ഷ്യാ..? അല്ലാണ്ട് ഇങ്ങളിങ്ങനെ ഇരിക്കൂലാന്നിനിക്കുറപ്പാ.."
"പിന്നെ വേദനല്യാണ്ട്.. ഇയ്യെന്താ വിചാരിച്ചേ..?"
"ന്നാ വേഗം എണീക്ക് മന്‍ഷ്യാ.. നമ്മക്കാ ബാലഷ്ണന്‍ ഡോക്ടറെ കാണാന്‍ പൂവാം.."
"ഹേയ് അതിന്റൊന്നും ആവശ്യല്ല.."
"ഇല്ലല്ല.. വേഗം പോകാം.. ഒന്നു സ്കാന്‍ ചെയ്യിക്കാം.. ഇങ്ങടെ യൂട്രസ്സിനു വല്ലോം പറ്റീട്ടുണ്ടെങ്കിലോ.."

ഇതു കേട്ട് ഓട്ടോമാറ്റിക്കായി തുറന്ന് പോയ വായടക്കാന്‍ പോലും മറന്ന് ജബ്ബാര്‍ കുറച്ച് നേരം അങ്ങനെ തന്നെ ഇരുന്നു.. ഇതു കണ്ട സൂറ വായടക്ക് മന്‍ഷ്യാ എന്നും പറഞ്ഞ് കയ്യിലിരുന്ന പത്തിരിക്കോലു കൊണ്ട് താടിക്കൊരു കുത്തു കുത്തി ജബ്ബാറിന്റെ വായടച്ചുകൊടുത്തു.... കുത്തു കൊണ്ട് വേദനയെടുത്തെങ്കിലും സൂറ പറഞ്ഞ യൂട്രസ്സിന്റെ കെട്ടു വിടാത്തത് കൊണ്ട് ജബ്ബാറത് കാര്യമായെടുത്തില്ല..

"ന്റെ റബ്ബേ.. യൂട്രസ്സാ...?? അനക്കിതെവ്ടുന്നു കിട്ടി..സൂറാ..?"
"ഇന്നാളു ഞാന്‍ മുറ്റത്ത് വീണ് നടുവുളുക്കിയപ്പോള്‍ ഈ ബാലഷ്ണന്‍ ഡോട്ടറു തന്നെയാ പറഞ്ഞത് യൂട്രസ്സിനു വല്ലോ പറ്റിയോന്നു സ്കാന്‍ ചെയ്ത് നോക്കാന്‍.."
"അതും ഇതും തമ്മിലെന്താണ്ടീ ബലാലെ ബന്ധം..??"
"മുറ്റത്ത് വെറും മണ്ണിലു വീണ ഇന്റെ ഇന്റെ യൂട്രസ് സ്കാന്‍ ചെയ്യാന്‍ പറഞ്ഞിട്ടുണ്ടെങ്കി കുളിമുറീലെ ടൈലില്‍ നടൂം തല്ലി വീണ ഇങ്ങടെ യൂട്രസ്സിന്റെ ഗതി എന്തായിട്ടുണ്ടാകും ന്റെ മന്‍ഷ്യാ.."

ഡിം...!!!
ബേജാറോടു കൂടിയുള്ള സൂറാന്റെ വര്‍ത്താനം കേട്ട് അപ്പത്തന്നെ ജബ്ബാറിന്റെ ബോധം ആ ജില്ല കടന്നു...

സൈക്കോസിസില്‍ നിന്നും ന്യൂറോസിസിലേക്ക്

2015-04-09T12:21:00.002+03:00

എനിക്കിതിന്റെ വല്ല ആവശ്യവും ഉണ്ടായിരുന്നോ..? അവന്‍ പറയുന്നതെല്ലാം കേട്ട് മൂളി തലയാട്ടി എന്റെ പണീം നോക്കി ഇരുന്നാ പോരെ.. നേരം കെട്ട നേരത്ത് അറിയാതെ സൈക്കോളജി പഠിച്ചിട്ടുണ്ടൊ എന്നൊന്നു ചോദിച്ചു പോയി. പിന്നെ യെന്റമ്മോ..

എന്തിനു പറയുന്നു മനുഷ്യ മനസ്സിന്റെ ഉള്ളില്‍ കേറി അതിന്റുള്ളീന്നു തേങ്ങയും മാങ്ങയും മാറാലയും പോരാതെ ഒരുളുപ്പുമില്ലാതെ മുന്നൂറു ദശലക്ഷം കോടി ന്യൂറോണുകളാണു വലിച്ചെടുത്ത് അവനെന്റെ എന്റെ മേശപ്പുറത്തേക്കിട്ടത്. ഹ്യൂമൺ സൈക്കോളജി പഠിച്ചില്ലെങ്കിൽ നമുക് കല്ല്യാണം പോലും കഴിക്കാന്‍ പറ്റില്ലാത്രെ.. ലോകത്ത് തൊണ്ണൂറ്റൊമ്പത് ശതമാനം വിവാഹ മോചനവും നടക്കാന്‍ കാരണം ആളുകള്‍ക്ക് സൈക്കോളാജിയില്‍ വേണ്ടത്ര പരിജ്ഞ്ഞാനമില്ലായ്മയാണെന്നും ഇല്ലെങ്കില്‍ ജീവിതം തന്നെ കട്ടപ്പൊകയാകും എന്നൊക്കെ പറഞ്ഞതു കേട്ട് മൂക്കത്ത് വിരലും വെച്ച് ഞാനിരുന്നു.. ഈ തെണ്ടീടെ പ്രാന്തു കാരണം ഇവനു പെണ്ണു പോലും കിട്ടീട്ടില്ല. എന്നിട്ടാ അവനിങ്ങനെ...

കൂട്ടത്തില്‍ അതി ശക്തമായ മറ്റൊരു പ്രഖ്യാഖനം കേട്ട് ശെരിക്കും ഞാന്‍ ഞെട്ടി.. ഭൂഗോളത്തിന്റെ സ്പന്ദനം മാത്ത മാറ്റിക്സിലല്ലത്രെ.. സൈക്കോളജിയിലാണു കമ്പ്ലീറ്റ് സ്പന്ദിക്കുന്നതെന്നും കൂടെ പറഞ്ഞപ്പോ സഹിക്കാന്‍ പറ്റിയില്ല. ഞാനപ്പത്തന്നെ രണ്ടൂ മൂന്നു മാർക്കെറ്റിങ്ങ്‌‌ തിയറീസും എക്കണോമിക്സുമെല്ലാം എടുത്തങ്ങ്‌ വീശി..

ഇതൊന്നും അവനൊരു പ്രശനമല്ലെന്ന മട്ടിലുള്ള ആറ്റിറ്റ്യൂഡ് കണ്ടപ്പോ അവന്റെ സോക്കോളാജിക്കെതിരായി ഒരു 'പാര'സൈക്കോളാജിക്കല്‍ മൂവ്മെന്റ് കെട്ടഴിച്ചു വിടാന്‍ തീരുമാനിച്ചൊരു ചോദ്യമങ്ങോട്ടെക്കെറിഞ്ഞു കൊടുത്തു..

"എന്നാ ഞാൻ നിന്നോടോരു ചോദ്യം ചോദിക്കാം.. സൈക്കോളജി തന്നെയാ.."
എറിഞ്ഞു കൊടുത്ത ആ ചോദ്യം അവന്‍ ചാടിപ്പിടിച്ച് കക്ഷത്ത് വെച്ച് എന്നെ നോക്കി പുച്ചിച്ചു.. ഇവനെന്തൂട്ട്‌ ഒലത്താനാ എന്നായിരിക്കും ആലോചന..
"ഓഹ്‌.. ശെരി.. എന്തു വേണമെങ്കിലും ചോദിച്ചോ..."

"ഒരു മനുഷ്യൻ ന്യൂറോസിസിൽ നിന്നും സൈക്കോസിസിലേക്കെത്തുന്നതെപ്പഴാ?"
അവന്റെ വാ പൊളിഞ്ഞു കണ്ണൂ തുറിച്ച്‌ താഴോട്ട്‌ വീഴണോ വേണ്ടേ എന്ന മട്ടിൽ നിന്നു "ഏഹ്‌...?"
"ആഹ്‌ അതെന്നെ.. എപ്പഴാ...?"
"ഇതു ഔട്ടോഫ്‌ സിലബസ്സാ....!"
"അയ്യേ.. മോശം.. ലോകത്ത്‌ ഏതൊരു മലയാളിക്കും ഈസിയായിട്ടു ഉത്തരം പറയാൻ പറ്റുന്ന ചോദ്യം...? സോക്കോളജിയുടെ അന്തരാങ്ങളില്‍ കയറിച്ചെന്ന് ആറ്റിക്കുറുക്കിയെടുത്ത നിനക്കതറിയില്ലെന്നോ.. മോശം മോശം..!!"

"ഹും.. മൂന്നുകൊല്ലം സൈക്കോളജി പഠിച്ച എനിക്കു അറിയാത്തതല്ലെ സാധാരണക്കാരായ ബ്ലഡീ മല്ലൂസിനറിയുന്നത്.. ഉത്തരം പറ.."

ഹും തോട്ടു തുന്നംപാടാനായിട്ടും ലവന്റെ അഹങ്കാരത്തിനൊട്ടും കുറവില്ല.. ദുഷ്ടന്‍.. ഞാനെന്റെ കണ്ണു രണ്ടും ഉരുട്ടി അവന്റെ കണ്ണുകളിലേക്കുറ്റു നോക്കി.. എന്നിട്ടു പതിഞ്ഞ ശബ്ദത്തില്‍ പറഞ്ഞു..

"അല്ലിക്ക് ആഭരണം എടുക്കാൻ പോകെണ്ടാന്നു പറയുമ്പോൾ...!"

അതു പറഞ്ഞ് കഴിഞ്ഞപ്പഴാ എനിക്ക്‌ മനസ്സിലായത്‌‌, സൈക്കോളജി എന്നും പറഞ്ഞ്‌ ഇവന്മാരു കോളെജീന്നു പഠിക്കുന്നത്‌ മുഴുവനും പച്ചത്തെറികളാണെന്നു..

ഒന്നു വെര്‍തെ വിടോ..?

2015-04-09T12:21:00.001+03:00

ഹം തേരെ ബിന്‍ അബ്‌ രഹ്‌ നഹി സക്‌താ.... തേരെ ബിനാ ക്യാ വജൂദ് മേര..

"മതി മന്‍ഷ്യാ, നിര്‍ത്ത്.. നന്നായി പാടുന്നുണ്ട്..ഇങ്ങക്ക് സില്‍മേ പാടിക്കൂടെ..?"
"ഏഹ്..?"

"അല്ല പിന്നെ കാലത്ത് തന്നെ മന്‍ഷ്യനെ എടങ്ങേറാക്കാനായിട്ട് വന്നേക്കുവാ.."
"മിണ്ടൂല പോ..."

"അയ്യോ.. ഇങ്ങളു നന്നായി പാടുന്നുണ്ട്.. സിനിമേ പാടെണ്ട.. ഇപ്പ സമാധാനായോ..?"
"പക്ഷേ എന്നാലും എന്റെ പാട്ടത്ത്രക്കങ്ങ് പോരാടി.."

"ആരു പറഞ്ഞു?"
"ഞാന്‍ തന്നെ.. പാട്ടു പഠിച്ചാലോന്നാലോചിക്കുവാ"

"അതിനെന്താ പഠിച്ചോ.."
"അതോ ഗിറ്റാര്‍ പഠിക്കണോ..?"

"പഠിച്ചോ.."
"അല്ലെങ്കില്‍ വയലിന്‍ പഠിക്കാലേ.."

"പഠിക്കാലോ.."
"ശെരി.. തബല.."

"അതും പഠിച്ചോ.."
"എല്ലാം കൂടിയോ..? എന്നെ കൊണ്ട് പറ്റ്വോ..?"

"ഇങ്ങക്ക് പറ്റാണ്ട് പിന്നാര്‍ക്കാ പറ്റാ..?"
"ഹേയ് എല്ലാം കൂടെ പറ്റൂലാടി.."

"മന്‍ഷ്യാ ഓരോന്നോരോന്നായിട്ട് പഠിച്ചാ മതി.. എല്ലാം കൂടെ എടുക്കാന്‍ ആകെ രണ്ടു കയ്യല്ലേ ഒള്ളൂ..?"
"ഹോ വല്ല രാവണന്‍ ആയാ മത്യാരുന്നു..."

"ഏഹ്.. ഇതെവ്ടുന്നാ ഈ രാവണന്‍ വന്നത്..?"
"മൂപ്പരാകുമ്പോ ഒരു ഗാനമേളാ ഒറ്റക്കു മാനേജ് ചെയ്യാലോ.."

"അതെങ്ങനെ..?"
"പത്തു തലേം പത്തു കയ്യുമല്ലേ...?"

"ഹേയ് അല്ല.. പത്തു തല കേട്ടിട്ടുണ്ട്... പക്ഷേ കൈ രണ്ടെണ്ണമല്ലേ ഒള്ളൂ..?"
"അല്ലല്ല.. പത്തു തലേം പത്തു കയ്യും ഉണ്ട്.."

"പ്ക്ഷേ ലോജിക് ശെര്യാവുന്നില്ല മന്‍ഷ്യാ.."
"വൈ സോ..?"

"ഒരു തലക്കു രണ്ടു കൈ അല്ലേ കണക്ക്.."
"അതേ.."

"അപ്പൊ പത്തു തലക്ക്, പത്തേ ഗുണം രണ്ട് ഈക്വെല്‍ റ്റു റ്റ്വെന്റി.. ഇരുപത് കൈ വേണ്ടേ..?"
"പണ്ടാരം.. അങ്ങേര്‍ക്കു കൈ ഇല്ല.. പത്തു തല മാത്രമേ ഒള്ളൂ..."

"അപ്പോ ഇക്കാടെ രാവണനാകണം എന്ന വിഷ് വേയ്സ്റ്റല്ലേ..?"
"ഒലക്കപ്പിണ്ണാക്ക്... അതെങ്ങനെ വേയ്സ്റ്റാകും..?"

"മന്‍ഷ്യാ പത്ത് തല മാത്രം വെച്ച് ഇയാളെങ്ങനെ ഒരു ഗാനമേള ഒറ്റക്ക് മാനേജ് ചെയ്യും..? വേണേലൊരു കോറസ് മാനേജ് ചെയ്യാം.. പക്ഷേ ഇന്‍സ്ട്രുമെന്റ്സ്..?"
"ആഹ്.. അതു സാരമില്ല.. ഇന്‍സ്ട്രുമെന്റ്സ് എല്ലാം തലകൊണ്ട് ചെയ്തോളാം.. തബലയും മൃദംഗവും ഡ്രംസുമെല്ലാം ഓരോ തല വെച്ച് അടിക്കും.."

"അല്ലാ.. ഇങ്ങളോടയാളു വല്ല തെറ്റും ചെയ്തിട്ടുണ്ടോ..?"
"ആരു..??"

"രാവണൻ..."
"ഉം... ഞാനയാളെ കണ്ടിട്ടു പോലുമില്ല..."

"ഞാനോ..?"
"ഇല്ല.. "

"എന്നാ പിന്നെ എന്നേം ആ പാവം രാവണനേം വെറുതെ വിട്ട് ഓഫീസിലെ പണി വല്ലോം ഉണ്ടെങ്കി ചെയ്യ് മനുഷ്യാ.."

പ്ലിംങ്ങ്...!!

ഗുരുത്വാകര്‍ഷണം എന്നാല്‍...

2015-04-09T12:21:00.000+03:00

"നീയൊക്കെ എന്തിനാടാ ഇങ്ങനെ നടക്കുന്നത്‌..? നിന്റെയൊക്കെ പ്രായത്തിൽ കഷ്ടപ്പെട്ടു പഠിച്ചിട്ടാ ന്യൂട്ടൻ ഇതൊക്കെ കണ്ടു പിടിച്ചത്‌.."

"ഈ ഗുരുത്വാകര്‍ഷണം കാണാൻ പറ്റുമൊ ടീച്ചറെ..?" എന്ന തികച്ചും നിഷ്കളങ്കമായ ഒരു ചോദ്യമേ ഞാന്‍ ചോദിച്ചൊള്ളൂ.. അതു കാണാന്‍ പറ്റുന്നതല്ലാന്നു പറഞ്ഞപ്പൊ മറ്റൊരു ന്യായം ചോദിച്ചു.. "ഈ കാണാൻ പറ്റാത്ത സാധനം കണ്ടു പിടിച്ചു എന്നു പറയാൻ പറ്റുമോ..??"

ഇത്റേ അവ്ടെ സംഭവിച്ചൊള്ളു.. അതിനാ മേൽപറഞ്ഞ ആ ഡയലോഗിനൊപ്പം ടീച്ചറെന്റെ ചെവി പിടിച്ചു തിരിച്ചത്‌. ഈ ന്യൂട്ടനെ കൊണ്ടുള്ള ശല്യം ഒരു ഒഴിയാ ബാധയായി കൂടിയിട്ട്‌ കുറേ കാലമായി.. ന്യായമായ എന്തെങ്കിലും സംശയം ചോദിച്ചാൽ മതി... വിളിക്കാത്ത കല്യാണത്തിനു വന്നിരുന്നു തിന്നുന്ന പോലെ ഈ ന്യൂട്ടൻ എവിടുന്നെങ്കിലും ചാടിക്കേറി വരും..

അന്നു വീട്ടിലെത്തിയിട്ട് എനിക്കൊരു സമാധാനവും കിട്ടുന്നില്ല.. ചെയ്യാത്ത തെറ്റിനാ കശുവണ്ടി മുരുങ്ങുന്ന പോലെ ആ ടീച്ചറെന്റെ ചെവി പിടിച്ച് തിരിച്ചത്. ആ തിരിയില്‍ ഞാന്‍ പമ്പരം കറങ്ങുന്ന പോലെ കറങ്ങുന്നത് കണ്ട് വാ പൊത്തി ചിരിച്ച സിന്ദുവും പ്രിയയും നിഷയും.. അതങ്ങനെ വിടാന്‍ പറ്റില്ല.. ഒരുപാടാലോചിച്ചു.. ഈ ഗുരുത്വാകര്‍ഷണം എന്നു പറയുന്ന സാധനം ഇല്ലാത്തതല്ല, അതു കാണാൻ പറ്റുന്നത് തന്നെ. ഇല്ലെങ്കിൽ അങ്ങേർക്കതു കണ്ടെത്താനാകില്ല..!! ചെറുപ്പം മുതലേ എനിക്കൊടുക്കത്തെ ബുദ്ധിയായതു കൊണ്ടാകും, ആരെന്തു പറഞ്ഞാലും ചാടിക്കേറി വിശ്വസിക്കാറില്ലായിരുന്നു. ഈ സാധനം ഒന്നൂടെ കണ്ടു പിടിച്ചിട്ടേയൊള്ളു കാര്യം എന്നുറപ്പിച്ചു..

അന്നു രാത്രി എല്ലാരും ഉറങ്ങി കഴിഞ്ഞപ്പോൾ ഞാൻ മെല്ലെ എഴുന്നേറ്റു.. ലക്ഷ്യം മറ്റൊന്നുമല്ല.. ഈ ഗുരുത്വാകര്‍ഷണമൊന്നു കാണണം.. ആരുമറിയാതെ പതുങ്ങി പതുങ്ങി നടന്നു ഫ്രിഡ്ജിനടുത്തെത്തി..ആരും കാണുന്നില്ലെന്നുറപ്പ്‌ വരുത്തി... ശബ്ദമുണ്ടാക്കാതെ ഫ്രിഡ്ജ് തുറന്ന് അതിൽ നിന്നും ഉള്ളതിൽ മുഴുത്ത ഒരാപ്പിൾ നോക്കിയെടുത്തു..

ഉമ്മ കണ്ടാൽ മകന്റെ ശാസ്ത്രീയ പരീക്ഷണങ്ങളെ അപ്രീഷ്യേറ്റ് ചെയ്യാനോ ഐസക് ന്യൂട്ടനെ ചാലെഞ്ച് ചെയ്യുകയാണെന്നോ ഒന്നും നോക്കൂല.. 250 ഉർപ്യ വിലയുള്ള ആപ്പിളെടുത്ത്‌ നീയൊരു പിണ്ണാക്കും കണ്ടു പിടിക്കെണ്ടാന്നും പറഞ്ഞ്‌ കയ്യീ കിട്ടുന്നതെടുത്ത് കീച്ചിക്കളയും.

അങ്ങനെ ആപ്പിളുമെടുത്ത് മന്ദം മന്ദം തിരിച്ച്‌ റൂമിലെത്തി റൂമിന്റെ നടുവിൽ വന്നു നിന്നു. എന്നിട്ട് ആപ്പിൾ നേരെ മുകളിലേക്കെറിഞ്ഞ്‌ താഴെ വീഴുന്ന ആപ്പിൾ നോക്കി നെറുകം തല അങ്ങു വെച്ചു കൊടുത്തു. നീയുന്നം നോക്കി കഷ്ടപ്പെടാനൊന്നും നിക്കെണ്ട.. ഏതീക്കൂടെ പോയ്യാലും നിന്റെ തല കണ്ടാല്‍ അതു കണ്ടില്ലെന്നു നടിക്കാന്‍ എന്നെ കൊണ്ടാകില്ല.. അയാം ദി സോറി അളിയാ എന്നും പറഞ്ഞ് സാധനം നേരെ എന്റെ തലേ തന്നെ വന്നു വീണു..

പിന്നെ കൊറേ നേരം കഴിഞ്ഞാണു കണ്ണു തുറന്നത്‌.. ബോധം പോയതൊന്നും അല്ലാട്ടാ.. അത്രേം നേരം ഗുരുത്വാകര്‍ഷണാവും കണ്ട് ഈ ലോകം തന്നെ മറന്നു കിടക്കുകയായിരിന്നു ഞാൻ.. അടക്കാനാകാത്ത സന്തോഷത്തോടെ ഞാൻ തുള്ളിച്ചാടി.. നാളെ സ്കൂളിൽ എത്തുമ്പോൾ കാണാൻ പോകുന്ന സയിൻസ്‌ ടീച്ചറുടെ ചമ്മിയ മുഖമായിരുന്നു എന്റെ മനസ്സിൽ.. ക്ലാസ്‌ മേയ്റ്റ്സിന്റെ മുന്നിൽ വെച്ച്‌ എന്നെ കളിയാക്കിയ ടീച്ചറുടെ അവസ്ഥ.. ഹോ... കോൾമയിർ കൊള്ളാൻ ഇതിൽ കൂടുതൽ വല്ലതും വേണോ..?

ന്യൂട്ടനാണു പോലും ന്യൂട്ടൻ.. ഗുരുത്വാകര്‍ഷണം ഉണ്ടെന്ന് പറഞ്ഞതല്ലാതെ അതെങ്ങനെ ഇരിക്കും എന്നു വിവരിക്കാൻ ആ പൊട്ടനു കഴിഞ്ഞില്ലല്ലോ..? അതും പോരാഞ്ഞിട്ട്‌ ബാക്കിയുള്ളോരെ എടങ്ങേറാക്കാനായിട്ട്‌ സൂത്രവാക്യങ്ങൾ എന്നും പറഞ്ഞ്‌ കൊറെ കണക്കുകളും കൊണ്ടു വന്നേക്കുന്നു.. വേദനയുള്ള തലയും തടവി ന്യൂട്ടനെ പുച്ചിച്ച്‌ ഞാൻ എന്റെ സയിൻസ്‌ നോട്ട്‌ ബുക്കെടുത്തു എഴുതി.

ഗുരുത്വാകര്‍ഷണം എന്നാല്‍ ഏറോപ്ലെയിൻ കണക്കെ വൃത്തികെട്ട ഒരു മൂളലോടു കൂടി പച്ച, മഞ്ഞ, നീല, ചുമപ്പ്‌ തുടങ്ങി നമുക്കറിയുന്നതും അറിയാത്തതുമായ പല നിറങ്ങളിലും പറന്നു നടക്കുന്ന നക്ഷത്രങ്ങളും, കണ്ടാൽ ഈച്ചയെന്നു തോന്നിപ്പിക്കുന്ന സ്വർണ്ണ നിറത്തിൽ പറക്കുന്ന കുറേ ചെറു പ്രാണികളുമാകുന്നു..!!

സില്‍മാനടന്‍

2015-04-09T12:20:00.002+03:00

"ഡീ സൂറാ.. അന്റെ കയ്യോണ്ടൊരു ഗ്ലാസ് വെള്ളം കിട്ടീട്ട് ഇനിക്ക് മരിക്കാൻ പറ്റോ..?"

ജബ്ബാറിന്റെ മീശ വിറച്ചു.. കയ്യും കാലും തരിച്ചു.. കഷണ്ടിത്തലയിൽ നിന്നും വിയർപ്പു തുള്ളികൾ നെറ്റിയിലേക്ക് ഒലിക്കാൻ തുടങ്ങി. ആ തിളങ്ങുന്ന നെറ്റിയും തലയും വിയർപ്പുമെല്ലാം കണ്ടപ്പോൾ ഫ്രൂട്ട്സ് കടയിൽ ഫ്രെഷ്നസ് തോന്നാനായി വെള്ളം സ്പ്രേ ചെയ്തു വെച്ചിരിക്കുന്ന ആപ്പിള്‍ പോലെയാണു സൂറാക്ക് തോന്നിയത്.

എന്നും കാണുന്ന ആ തലയും കണ്ടോണ്ടിരുന്നാൽ ടിവീൽ വല്ലപ്പോഴും വരുന്ന മമ്മൂട്ടി അങ്ങേരുടെ പാടും നോക്കി പോകും. അതു കൊണ്ട് സൂറ വെള്ളത്തിനു വേണ്ടിയുള്ള ജബ്ബാറിന്റെ ദീന രോദനം മൈന്റ് ചെയ്യാതെ കണ്ണുരുട്ടി. കൊള്ളുന്നെങ്കിൽ കൊള്ളട്ടെ എന്ന മട്ടിൽ ഒരു മറുചോദ്യം അങ്ങോട്ടേക്കെറിഞ്ഞ് കൊടുത്തു..

"ന്റെ മൻഷ്യാ.. അവ്ടെ കെടെന്ന് കരയാണ്ട് ഇങ്ങക്കെന്നെ പോയി അങ്ങട്ട് എടുത്ത് കുടിച്ചാ പടച്ചോൻ ഇങ്ങളേ സ്വർഗത്തീ കേറ്റാണ്ടിരിക്കോ..?"

ആ ചോദ്യം വിചാരിച്ചോടത്ത് കൊള്ളാതെ എങ്ങോട്ടോ പോകും എന്ന മട്ടിലായപ്പോഴേക്കും ജബ്ബാറത് ചാടിപ്പിടിച്ചെടുത്ത് ചുരുട്ടി കൂട്ടി ഒരു മൂലക്കിട്ടു.

"സൂറാ.. അന്നോടൊരു ഗ്ലാസ് വെള്ളല്ലേ ചോയ്ച്ചൊള്ളൂ..??" ജബ്ബാര്‍ നെറ്റിയിലേക്കൊലിച്ചു വന്ന വിയര്‍പ്പ് വിരലു കൊണ്ട് വടിച്ച് കുടഞ്ഞ് ദേഷ്യം പ്രകടിപ്പിച്ചു..

"ഉം പിന്നെ... ഒന്നു പോ മൻഷ്യാ.. കാലത്തെന്നെ എങ്ക്ടാ കെട്ടിയൊരുങ്ങി ഫ്രേയും പൂശി പോണതെന്നു പടച്ചോനിക്ക് മാത്രേ അറിയൂ.... ഇങ്ങടെ ഫോണില്‍ എപ്പ വിളിച്ചാലും ബിസിയാണല്ലോ..? "

ഇനീം അതുമ്മേ കേറി കെട്ടി മറിയാൻ നിന്നാൽ പിന്നെ സൂറാ ഓഫീസിലെ പെണ്ണുങ്ങൾടെ കാര്യം പറഞ്ഞ് തലേ കേറി ഞരങ്ങാൻ തുടങ്ങും. അതു കൊണ്ട് ജബ്ബാറു തന്നെ എണീറ്റ് ഡൈനിങ്ങ് ടേബിളിൽ നിന്നും ജഗ്ഗെടുത്ത് വായിലോട്ട് കമഴ്ത്തി.

എന്നിട്ടൊരു ദീര്‍ഘ നിശ്വാസവും ഫിറ്റ് ചെയ്ത് സോഫയിലേക്ക് വരുമ്പോ കണ്ടു.. സ്ക്രീനിൽ പാട്ടും പാടി, ഇതൊന്നും തനിക്കു പറ്റിയ പണിയല്ല എന്ന മട്ടിൽ അറ്റന്‍ഷനില്‍ നിന്ന് അരയിട്ടു കുലുക്കി ഡാന്‍സ് കളിക്കുന്ന മമ്മൂട്ടി..

ഒരു ചാൻസ് കിട്ടിയാൽ ഇപ്പൊ തന്നെ സ്ക്രീനിന്റെ ഉള്ളിലേക്ക് കേറി പോയി നായികേനെ തട്ടി താഴെയിട്ട് താൻ ഡാൻസ് ചെയ്യും എന്ന മട്ടിൽ മുന്നോട്ടാഞ്ഞ് കണ്ണു തുറിപ്പിച്ച് വായും പൊളിച്ചിരിക്കുന്ന സൂറാനെം കൂടെ കണ്ടതോടെ ജബ്ബാറിനു പിന്നേം തരിച്ചു കേറി..

"ഡീ.. നീയാ സ്ക്രീനീൽക്കും നോക്കി വെള്ളമിറക്കിയിരിക്കുന്ന ഓനുണ്ടല്ലോ..? ഓനേക്കാൾ ഗ്ലാമെർ എനിക്കെന്നാ.. ഓൻ വിഗ്ഗ് വെക്കുന്നു ഞാൻ വെക്കുന്നില്ലാന്നുള്ള വ്യത്യാസേ ഒള്ളു.."

"അതിനാണു മന്‍ഷ്യാ നാട്ടാരു അസൂയാന്നു പറയണത്.."

"ഒന്നു പോടീ പോത്തേ.. ഇയ്യിന്റെ മീശേമ്മേല്‍ക്കൊന്നു നോക്ക്യേ.. ഞാനെങ്ങാനും അഭിയനയിക്കുവായിരുന്നെങ്കില്‍ ഇപ്പോ ഇയ്യല്ല അന്റുമ്മ വരെ ഇന്നേം നോക്കി ഇയ്യിപ്പൊ ഇരിക്കണ ഈ ഇരിപ്പിരുന്നേനേ.."

ഇതു കേട്ട് മുഖമൊന്നു കോട്ടി, ഹും ഇങ്ങളു സില്മേലഭിനയിച്ച് ഇമ്മിണി ഒലത്തും എന്ന മട്ടിൽ തല വെട്ടിച്ച് സൂറ വീണ്ടും സ്ക്രീനിലേക്ക് നോക്കി.. അപോഴേക്കും ടിവിയിൽ ഡാൻസ് കഴിഞ്ഞ് ക്ഷീണിച്ച മമ്മൂട്ടി ക്ലോസപ്പ് ഷോട്ടിൽ ചിരിക്കുന്നു.. അതു കണ്ട് നാണിച്ച് തല താഴ്ത്തുന്ന സൂറ..

അതു തന്റെ നേരെയുള്ള കൊഞ്ഞനം കുത്തലായിട്ടാണു ജബ്ബാറിനു തോന്നിയത്.. പിന്നൊന്നും നോക്കാതെ ഓതിരം മറിഞ്ഞ് നൂറേ നൂറിൽ തിരികടകം എടുത്ത് ചാടിയമർന്ന് സൂറാന്റെ കയ്യിലിരുന്ന റിമോട്ട് തട്ടിപ്പറിച്ച ജബ്ബാർ ചാനൽ മാറ്റി ഡിസ്കവറി ചാനൽ വെച്ചപ്പോ അതീന്നു കൊറെ കൊരങ്ങന്മാർ സൂറാനെ നോക്കി കൊഞ്ഞനം കുത്താൻ തുടന്ങി.. ജബ്ബാര്‍ ഹാപ്പി..

"ഇങ്ങളാ സില്മ മാറ്റല്ലെ മൻഷ്യാ.. ഇക്ക് കാണണം.." സൂറ ചിണുങ്ങി..

"സത്യം പറ.. അനക്ക് മമ്മൂട്ടീനെ കാണാനാ സില്മ കാണാനാ.. എന്തിനാന്നു പറഞ്ഞോ വേഗം.."

"ന്റെ മൻഷ്യാ.. ഇക്ക് മമ്മൂട്ടീം കുമ്മട്ടീം ഒന്നും കാണണ്ട.. ആ സില്മ കണ്ടാ മതി.."

"പിന്നെന്തൂട്ടിനാണ്ടീ ഇയ്യ് മമ്മൂട്ടീന്റെ പടം മാത്രം ഇങ്ങനെ വായും പൊളിച്ചിരുന്ന് കാണുന്നത്.. അനക്ക് യാസീനോതുമ്പോ പോലും ഇത്രേം ശ്രദ്ധയില്ലല്ലോ.."

"അതു പിന്നെ.. ഇന്റെ മൻഷ്യാ.. മമ്മൂട്ടീക്കന്താ ഒരു കൊറവ്.. എന്തൊരു മൊഞ്ചാ മൂപ്പരെ കാണാൻ.."

സൂറന്റെ മുഖത്തത് എല്‍ ഇ ഡി ബള്‍ബിട്ട പോലെ ‍ഒരു പ്രകാശം പരന്നോ എന്ന് ജബ്ബാറിനു സംശയമായി.. നെഞ്ചു കത്താന്‍ തുടങ്ങി.. തന്റെ പെണ്ണു മറ്റൊരു ആണിനെ പൊക്കി പറയുമ്പോള്‍ ലോകത്തേത് ആണിനാണു സഹിക്കാന്‍ പറ്റാ..

"@#%$@##$^" ജബ്ബാര്‍ കൈ രണ്ടും ചുരുട്ടി.. പല്ലു കടിച്ചു..

"എന്നു വെച്ച് ഞാൻ അങ്ങേരെ കെട്ടാനൊന്നും പോണില്ലല്ലാ.. ഇങ്ങക്കെന്തിന്റെ കേടാ ന്റെ മൻഷ്യാ.. ഇങ്ങളല്ലേ ന്റെ എല്ലാം..? "

രക്തം കണ്ണിലേക്കിരച്ച് കയറി കണ്ണു രണ്ടും ബള്‍ബായ ജബ്ബാര്‍.. പിന്നെ ചാനൽ മാറ്റാനൊന്നും നിക്കാതെ നേരെ ടിവി ഓഫാക്കി റിമോട്ടെടുത്ത് പോകെറ്റിലിട്ടു കയ്യും കെട്ടി മുഖവും വീർപ്പിച്ചിരുന്നു.. ഇനി നീ ടീവി ഓണാാക്കുന്നതും ചാനലു മാറ്റി ഓന്റെ മോന്തയും നോക്കി വെള്ളമിറക്കുന്നത് എനിക്കൊന്നു കാണണം എന്ന മട്ടിൽ സൂറാനെ നോക്കി നാക്കു കടിച്ചു.

"ഇയ്യിനി ഈ ജന്മത്ത് മമ്മൂട്ടീന്റെ പടം കണ്ടാ പിന്നെ ഈ ടീവീം ഞാന്‍ തല്ലിപ്പൊട്ടിച്ചു കളയും.. ഇന്നെന്നെ ഞാന്‍ കോടതീ കേസ് കൊടുക്കാന്‍ പൂവാ മൂപ്പരെ കൊണ്ട് ഇനി അഭിനയിപ്പിക്കരുതെന്നും പറഞ്ഞിട്ട്.."

സൂറായും വിട്ടില്ല.. ടിവി കണ്ടില്ലെങ്കിലും ഇനിക്ക് പുല്ലാ മൻഷ്യാ എന്ന ഭാവത്തിൽ മൂന്നു പ്രാവശ്യം സൂറയും കൊഞ്ഞനം കുത്തികാണിച്ചു.. എണീറ്റ് പോയീ ടേബിളിൽ ബാക്കിയുണ്ടായിരുന്ന വെള്ളം മുഴുവനും കുടിച്ച് തീർത്ത് തിരിച്ച് വന്നു അപ്പുറത്തെ സോഫയിൽ ഇരുന്ന് നഖം കടിക്കാൻ തുടങ്ങി.

കുറെ നേരം ആ ഇരുപ്പിരുന്നിട്ടും സൂറാന്റെ മൗനയുദ്ധം ഈ അടുത്തെങ്ങും അവസാനിക്കുന്ന മട്ടില്ലെന്നു ജബ്ബാറീനു മനസ്സിലായി.. പാവം സൂറ.. ദേഷ്യമൊന്നടങ്ങിയപ്പോള്‍, ഓള്‍ടേ ആഗ്രഹമല്ലെ കണ്ടോട്ടേ എന്നു കരുതി വീണ്ടൂം ടി വി ഓണ്‍ ചെയ്തു പഴയ ചാനല്‍ തന്നെ വെച്ചു..

"ഇന്റെ പൊന്നേ.. ഇയ്യീ ഇരുപ്പിരിക്കണത് കണ്ടിട്ട് ഇക്ക് സഹിക്കണില്ലെന്റെ മുത്തേ.. ഇയ്യു കണ്ടോട്ടാ.." ജബ്ബാറിന്റെ ഭാഗ്യമാണോ നിര്‍ഭാഗ്യമാണോ എന്നറിയില്ല ടിവിയില്‍ പടവും കഴിഞ്ഞ് ആരൊണ്ടൊക്കെ വന്നു കുക്കെറി ഷോ നടത്താന്‍ തുടങ്ങിയിരുന്നു...

"ഹും ഇക്കറിയാ മന്‍ഷ്യാ.. ഇങ്ങളിങ്ങനെ മയ്യത്തുമ്മെ കത്തിയെടുത്ത് കുത്തുന്ന മാതിരി പണി കാണിക്കുമെന്നു.."

"ഇപ്പ ടിവി വെച്ച് തന്നത് കുറ്റായാ.??"

"പടം തീര്‍ന്നു എന്നായപ്പോ ഇന്നെ കളിയാക്കാനല്ലെ ഇങ്ങളു ടി വി പിന്നേം വെച്ചത്..? "

"ഇയ്യെന്താണ്ടീ ബലാലേ കൈത മുള്ളാണോ.. മേപ്പട്ടുക്കും താഴത്തുക്കും ഉഴിയാന്‍ പറ്റൂലല്ലോ.."

സ്വതവേ രണ്ടു പിരി ലൂസാണെന്നു ആള്‍കാരൊക്കെ പറയാറുണ്ടെങ്കിലും ഇപ്രാവശ്യം മിനിമം നാലു പിരിയെങ്കിലും ക്ലച്ച് പിടിക്കാത്ത അവസ്ഥയിലായി ജബ്ബാര്‍.. ഇതു കുക്കറി ഷോ അല്ല.. തന്റെ പതിനാറടിയന്തിരത്തിനു വെളമ്പാനുള്ള ഭക്ഷണമാടീ നീയൊക്കെ ഉണ്ടാക്കുന്നത് എന്നു പല്ലു കടിച്ച് മുറുമുറുത്ത് ഇവളേ ഇനി എന്തുന്നും പറഞ്ഞ് സമാധാനിപ്പിക്കും എന്നായി ആലോചന..

"ന്റെ സൂറാ സത്യായിട്ടും ഞാന്‍ ഇതൊന്നും അറിഞ്ഞിട്ടല്ല.. ഇയ്യ് വെഷമിച്ചിരിക്കണ കണ്ടപ്പോ സില്‍മ കണ്ടോട്ടേന്ന് വിചാരിച്ച് ടി വി വെച്ചതാ.. ഇയ്യെന്താണ്ടീ ഇങനെ..?"

"ഹും.. ഇങ്ങക്കിന്നോട് ഒട്ടും ഇഷ്ടല്യാ... ഇക്കറിയാം..." സൂറാന്റെ മുഖത്ത് തുലാ വര്‍ഷത്തിനുള്ള കോളു കണ്ടു തുടങ്ങിയപ്പോള്‍ ജബ്ബാര്‍ അടവു മാറ്റി..

"മുത്തേ സൂറാ.. ഇയ്യ് വെഷമിക്കെണ്ട.. അനക്ക് വേണ്ടി ഞാന്‍ സില്‍മേലഭിനയിക്കാന്‍ തീരുമാനിച്ചു... ഞാന്‍ പണ്ടുപേക്ഷിച്ച ഇന്റെ പൂതിയാണ്ടീ അനക്കു വേണ്ടി പിന്നേം എടുത്ത് മനസ്സീ വെച്ചത്.. ഇയ്യിനി മമ്മൂട്ടിക്കു വേണ്ടി കാത്തിരിക്കെണ്ട. അന്റെ ജബ്ബാര്‍ക്ക അഭിനയിക്കും.. "

"ഹും ദിവസോം കാണുന്ന ഇങ്ങടെ മോന്ത തന്നെ ടീവീലും കാണാന്‍ ഇന്റെ പട്ടി വരും.. ഇനി ഇപ്പൊ അതിന്റേ കൂടെ കൊറവല്ലേ ഒള്ളൂ.. ഇങ്ങളിപ്പൊ ഇന്റടുത്ത് കാണിക്കണ അഭിനയം മാത്രം മതി.. "

"ഏഹ്.. ഇയ്യെന്തൂട്ട് ഹലാക്കിന്റെ വര്‍ത്താനാണ്ടീ പറയണേ..??"

"അതെന്നാ ഞാനും പറഞ്ഞേ.. ഇങ്ങളേഎ ഹലാക്കിന്റെ സില്‍മാന്നും പറഞ്ഞ് കണ്ട അവളുമാരുടെയും തോളീ കയ്യിട്ട് പാട്ടും പാടി കെട്ടി മറിയാനല്ലേ മന്‍ഷ്യാ.. ഇക്കറിയാം.."

ഇതു പറഞ്ഞ് സൂറ.. പഠാണിക്കടല വായിലിട്ട പൊലെ പല്ലു കടിക്കാന്‍ തുടങ്ങി.. സൂറ നിക്കുന്നതിന്റെ വെറും രണ്ടടി മാത്രം അകലത്തില്‍ കിടക്കുന്ന മേശപ്പുറത്ത് സീരിയല്‍ കാണുമ്പോള്‍ പച്ചക്കറിയരിയാന്‍ വെച്ചിരിക്കുന്ന കത്തിയങ്ങാനും ഈ പഹച്ചി എടുക്കുമോ എന്നു പേടിച്ച് അതില്‍ തന്നെ കണ്ണു നട്ട് സൂറാനെ സമാധാനിപ്പിക്കാന്‍ ശ്രമിച്ചു..

"അന്നോടാരാണ്ടീ ഇതൊക്കെ പറഞ്ഞ് തന്നത്.. അതൊക്കെ ക്യാമറാ ടെക്നിക്കാണിന്റെ സൂറാ.. അല്ലാണ്ടു ശെരിക്കും കെട്ടിപ്പിടിക്ക്യൊന്നുമില്ല.."

"കാമറേലായാലും ശെരിക്കായാലും.. ഇങ്ങളു വേറേ പെണ്ണിനെ തൊട്ടാ ഇക്ക് സഹിക്കൂല മന്‍ഷ്യാ.. ഒന്നു നോക്ക്യാ പോലും ഇക്ക് സങ്കടം വരും.." ഇതും പറഞ്ഞ് പല്ലുകടി നിര്‍ത്തി സൂറ ഏങ്ങി ഏങ്ങി കരയാന്‍ തുടങ്ങി..

പണ്ടാരം ഇന്നാരെയാണാവോ കണി കണ്ടത്.. ഇതെങനെയൊന്നു കോമ്പ്ലിമെന്റ്സ് ആക്കും ന്റെ റബ്ബേന്നും വിചാരിച്ച് പെട്ടെന്ന് വായീ വന്ന ഡയലോഗെടുത്തങ്ങ് വീശി ജബ്ബാര്‍..

"ഡീ അയ്നു ഞാന്‍ നായകനാവൂല.. വില്ലനായിക്കോളാം.. അപ്പൊ പിന്നെ പാട്ടും പാടി പെണ്ണുങ്ങടെ തോളീ കയ്യിടാന്‍ പറ്റൂലല്ലാ.."

എങനുണ്ട് ന്റെ ഐഡിയ എന്ന മട്ടില്‍ ജബ്ബാര്‍ സൂറാനെ നോക്കി ഒരു പൊട്ടിച്ചിരിയോടേ സൂറാന്റെ തോളില്‍ തട്ടി സമാധാനിപ്പിക്കാന്‍ ശ്രമിച്ചു.. ഇതും കൂടെ കേട്ടതോടെ സൂറ തന്നെ തൊടാന്‍ വന്ന കൈ തട്ടിത്തെറിപ്പിച്ച് കരച്ചിലിനൊപ്പം നെഞ്ചത്തിട്ട് അടിക്കാനും കൂടെ തുടങ്ങി..

"ന്റെ റബ്ബേ.. ഞാനെന്താണീ കേക്ക്ണത്.. ഇതൊന്നു പറയാന്‍ ഇവിടാരേം കാണുന്നില്ലല്ലോ പടച്ചോനേ.."

"എന്തൂട്ടാണ്ടീ പിശാശേ.. ഇപ്പോ അന്റെ പ്രശ്നം..??"

"ഇന്നാളും കൂടെ ഞാന്‍ വനിതേലു വായിച്ചതാ.. പെറ്റു കഴിഞ്ഞാല്‍ പിന്നെ കെട്ട്യോന്മാര്‍ക്കു ഭാര്യയോടുള്ള ഇഷ്ടം പോയി കണ്ട പെണ്ണുങ്ങടെ പിന്നാലെ ചുറ്റാന്‍ തുടങ്ങും സൂക്ഷിക്കണമെന്നു.. "

പണ്ടാരമടങ്ങാനായിട്ട്.. ഓരോരുത്തന്മാരു ഓരോന്നെഴുതി വിട്ടോളും ബാക്കിയുള്ളോന്റെ കുടുമ്പം കൊളം തോണ്ടാനായിട്ട്.. ന്റെ സൂറാ.. അതിനു വില്ലനായാലെന്താണ്ടീ പോത്തേ പ്രശ്നം.. അനക്കെന്തിന്റെ പിരാന്താണിന്റെ സൂറാ... ഇയ്യൊന്നടങ്ങ്"

കരച്ചിലിന്റെ ശക്തിയും നെഞ്ചത്തടിയുടെ ഊക്കും കണ്ട് നാട്ടുകാരു കേട്ട് പുലിവാലാകുമെന്നു തോന്നിയപ്പോള്‍ ജബ്ബാറോടിപ്പോയി ജനവും വാതിലുമെല്ലാം അടച്ച് സൂറാന്റടുത്തേക്ക് ഓടി വന്നു..

"ഇക്കറിയാം മന്‍ഷ്യാ ഇങ്ങടെ മനസ്സിലിരിപ്പെന്താണെന്നു..." നെഞ്ചത്തുള്ള ഇടിക്കു പുറമേ കിട്ടിയ ചാന്‍സിനു സൂറാ ജബ്ബാറിന്റെ ചെവിയും പിടിച്ചൊരു വലി കൊടുത്തു..

പ്രതീക്ഷിക്കാണ്ട് കിട്ടിയ ആ പ്രയോഗത്തില്‍ ജബ്ബാറിന്റെ പാതി ജീവന്‍ പോയി.. "യെന്റുമ്മാ... ന്റെ മനസ്സിലിരിക്കുന്നത്‌ രണ്ട്‌.. ഇയ്യെന്നെ കൊണ്ട്‌ പറയിപ്പിക്കെണ്ടാട്ടാ സൂറാ.."

"ഹും.. വില്ലനായിട്ട് വേണം ഇങ്ങക്ക് കണ്ട പെണ്ണുങ്ങളെയെല്ലാം തട്ടിക്കൊണ്ട് പോയി ബലാല്‍സംഘം ചെയ്യാന്‍ ല്ലേ....?"

ഇതും കൂടെ കേട്ടതോടേ ജബ്ബാര്‍ ഇനിയെന്തു പറയണമെന്നറിയാതെ വായും പൊളിച്ച് നിന്നു.. ഹും.. ഒരു ഗ്ലാസ് വെള്ളം ചോദിച്ചതിനാണു പ്രേം നസീറാകാന്‍ വന്ന ഇന്നെ ഇവളു കെപി ഉമ്മെറാക്കി മാറ്റിയത്.. ദാഹിച്ച് മരിച്ചാലും ശെരി.. ഇനി വെള്ളം കുടിക്കുന്ന പരിപാടിയേ ഇല്ലാന്നൊരു കഠിന പ്രതിജ്ഞയും അങ്ങ് പാസ്സാക്കി അന്നത്തെ നിയമസഭ പിരിച്ചു വിട്ടു

ഹും.. എന്നോടാ കളി..

2015-04-09T12:20:00.001+03:00

ഇന്നലെ ആയിഷാനെ വിളിച്ചപ്പോള്‍ പുള്ളിക്കാരി ജോലി കഴിഞ്ഞ് ഓട്ടോയില്‍ റെയില്‍‌വേ സ്റ്റേഷനിലേക്ക് പോയി കൊണ്ടിരിക്കുകയായിരുന്നു. എല്ലാ ദിവസവും ഓഫീസില്‍ പോകുമ്പോഴും വരുമ്പോഴുമെല്ലാം ചെന്നൈയിലെ ഓട്ടോക്കാരോട് കാശിന്റെ കാര്യത്തില്‍ അടിയുണ്ടാക്കുന്നത് കേള്‍ക്കാറുണ്ട്.. അവരമ്പത് പറയും ഇവളു ഇരുപതില്‍ തുടങ്ങും.. ഇങ്ങനെ കുറേ നേരമുള്ള ലേലം വിളിയില്‍ ഒന്നുകില്‍ കച്ചവടം അലസി പോകും ഇല്ലെങ്കില്‍ ഒരു മുപ്പത് നാല്പത് റേഞ്ചില്‍ പിടിച്ച് അവസാനിപ്പിക്കും.. ഓട്ടോക്കാരുടെ അന്യായങ്ങളെ പറ്റി വാ തോരാതെ പ്രസംഗിച്ചു കൊണ്ടിരിക്കുന്നതിനിടയില്‍ റെയില്‍‌വേ സ്റ്റേഷന്‍ എത്തിയെന്നു തോന്നുന്നു..

"ഇക്കാ ഒന്നു ഹോള്‍ഡ് ചെയ്യ് കേട്ടോ സ്ഥലമെത്തി..."
"ശെരി..."

ഹോള്‍ഡ് ചെയ്യലല്ലാതെ അപ്പുറത്ത് നിന്നും അനക്കമൊന്നുമില്ല.. രണ്ട് മൂന്നു മിനിറ്റ് കഴിഞ്ഞപ്പോള്‍ ദേഷ്യത്തില്‍ എന്തൊക്കെയോ പിറുപിറുക്കലും കൂട്ടത്തില്‍ അവളുടെ ഹേലോയും..

"ഇതെന്താ ഒരു ഓട്ടോയീന്നെറങ്ങാന്‍ ഇത്രേം നേരമോ...??"
"അതിനു ഞാന്‍ ഇറങ്ങിയില്ലല്ലോ.."

"പിന്നെ നീയെന്തൂട്ട് പൂരം കാണാനാ അതിന്റുള്ളീ ഇരിക്കണെ...?"
"എത്തി.. പക്ഷേ.. ഇറങ്ങീട്ടില്ല.."

"ഉം പിന്നേ.. ഇതു എയറോ പ്ലെയിന്‍ ആണല്ലോ ലാന്റ് ചെയ്ത് റണ്‍വേ മുഴുവനും ഓടിയെത്തീട്ടു ഇറങ്ങാന്‍.. മൂന്നു ചക്രമുള്ള ഓട്ട്രഷാന്നു പറയുന്ന സാധനം തന്നെ അല്ലെ അത്..?"
"ദേ മന്‍ഷ്യാ ബാക്കിയുള്ളോരിവിടെ ദേഷ്യം വന്നിരിക്കുമ്പൊ അവിഞ്ഞ ജോക്കടിക്കല്ലേട്ടാ.. ഇല്ലെങ്കിലീ അണ്ണാച്ചിക്ക് കൊടുത്ത വഴക്കിന്റെ ബാക്കി ഞാന്‍ തരും.."

"ശ്ശെടാ.. നീ കാര്യം പറ.."
"പതിനഞ്ചു രൂപയുടെ ഓട്ടം പോലുമില്ലാത്ത ദൂരത്തിനാണു എന്നോട് നാല്പത് പറഞ്ഞത്.. ഞാന്‍ പിന്നേയും കൊറെ നേരം വായിട്ടലച്ച് തല്ലു കൂടീട്ടാ ഇരുപത്തഞ്ചാക്കിയത്.. "

"എന്തായാലും ഇപ്പൊ സ്ഥലമെത്തിയില്ലേ.. നീ പറഞ്ഞ കാശും കൊടുത്ത് ഇറങ്ങെടീ....??"
"ഇവിടെ എത്തിയപ്പോ പറയുന്നു ഇവന്റേല്‍ ചേഞ്ചില്ലാന്നു.. ചേയ്ഞ്ചാക്കി തരാന്‍ പറഞ്ഞപ്പോ അവന്‍ ഓട്ടോയീന്നെറങ്ങുന്നില്ല.."

"അള്ളാ.. നീയൊന്നടങ്ങെടീ.. അഞ്ചുറ്പ്യല്ലേ...?"
"ആഹാ.. ഇതിങ്ങനെ വിട്ടു കൊടുക്കാന്‍ ഞാന്‍ തീരുമാനിച്ചിട്ടില്ല.."
"ഹോ.. നിനക്കിത്രയൊക്കെ തന്റേടം വന്നോടീ...??"
"മിണ്ടാണ്ടിരുന്നോട്ടാ.. എന്റെ വായീന്ന് കേള്‍ക്കെണ്ടാ.. എന്തായാലും ഞാന്‍ അവനോട് പറഞ്ഞു എന്റെ ബാക്കി കാശു തരാണ്ട് എറങ്ങൂലാന്നു.. എന്റെ തല പെരുത്തു വരുന്നുണ്ട്.."

"അവന്റേല്‍ ചേയ്ഞ്ച് ഇല്ലെങ്കില്‍ നിനക്കെങ്ങനെ തരും..? നീ വല്ല കടേന്നും ചേയ്ഞ്ചാക്കി കൊടുക്ക് "
"പിന്നേ.. എന്റെ പട്ടി ചേയ്ഞ്ചാക്കി കൊടുക്കും.. അവനല്ലേ ചേയ്ഞ്ച് തരേണ്ടത്..?? ഇവനെ ഞാനിന്ന് വിടൂല.. ട്രെയിന്‍ മിസ്സായാലും സാരമില്ല.... "

പിന്നെ കുറച്ച് നേരത്തേക്ക് അനക്കമൊന്നുമില്ല.. അവളെന്തോ ആലോചിക്കുകയാണെന്നു തോന്നുന്നു.. ഓട്ടോക്കാരന്റെ ഒച്ചയും ഇല്ല.. ഇവള്‍ടെ ദേഷ്യം കണ്ടിട്ട് അങ്ങേരെറങ്ങി ഓടിയോ എന്തോ..

"ഡീ.... നീയെന്തെടുക്കുവാ.. ഓട്ടോക്കാരന്‍ നിന്നെ തല്ലിയോ അതോ നീ ഓട്ടോക്കാരനെ.."
" നിക്ക് മനുഷ്യാ.... ഒന്നു ഹോള്‍ഡ് ചെയ്യ് "

പിന്നെയും ഒടുക്കത്തെ ദേഷ്യം.. ഹോ.. ഇവളൊരു പുലിയാണല്ലോ.. സാധാരണ ഇവളെന്നോട് ഒച്ചയെടുത്ത് സംസാരിച്ചാല്‍ എന്റെ വായീന്നു നല്ലത് കേള്‍ക്കേണ്ട സമയം കഴിഞ്ഞിരുന്നു.. ഇന്നെന്തോ എനിക്കു ദേഷ്യമൊന്നും വരുന്നില്ല.. പിന്നെയും രണ്ട് മിനിറ്റ് കഴിഞ്ഞപ്പോള്‍ അപുറത്ത് നിന്നും അവളുടെ തമിഴ് കേട്ടു..

"അണ്ണാച്ചീ ഉങ്കളുടേ പേരെന്താ..??"
അയാളെന്തോ പേരു പറയുന്നത് കേട്ടു.. എനിക്ക് മനസ്സിലായില്ല..
"നിജമാ ഉങ്കിട്ടെ ചെയ്ഞ്ചില്ലാ..??"
"എത്തന വാട്ടി സൊല്ലിയാച്ച് മാഡം.. ഇല്ലൈ ഇല്ലൈ..."

"ആഹ് എന്നാലേ അണ്ണാച്ചി ഒരു കാര്യം ച്യ്യെങ്കോ.... സ്ട്രെയിറ്റാ പോയി അന്ത യൂടേണ്‍ എടുത്ത് തിരുമ്പി വന്ത് എന്നെ ഇങ്കെ ഡ്റോപ് പണ്ണുങ്കോ... അപ്പോ ഈ ബാലന്‍സ് അഞ്ചു രൂപ ശെരിയാകും.."

ഹോ എന്റെ ഭാര്യയുടെ കാഞ്ഞ ബുദ്ധി തന്നെ... അതെല്ലാം പോട്ടെ കണ്ടാല്‍ പച്ചപാവം പോലിരിക്കുന്ന ഇവളാണോ ഇത്ര തന്റേടവും ധൈര്യവും എല്ലാം കാണിച്ച് അങ്ങു ചെന്നൈയില്‍ ഒറ്റക്ക് കണ്ണീകണ്ട ഓട്ടോക്കാരോടെല്ലാം ഇമ്മാതിരി തല്ലു കൂടുന്നത്..? അപാര ധൈര്യശാലി തന്നെ.. എന്റെ ഭാര്യയുടെ ബുദ്ധിയിലും ധൈര്യത്തിലും എനിക്ക് വല്ലാത്ത അഭിമാനവും അഹങ്കാരവുമെല്ലാം വന്ന് ആകെപ്പാടെ രോമാഞ്ച കഞ്ചുകമായിപ്പോയി....

കൂട്ടത്തില്‍ ചെറിയൊരു പേടിയും.. കാരണം ഇനി മുതല്‍ ഇവളെ ചീത്ത വിളിക്കുമ്പോള്‍ ഞാന്‍ സൂക്ഷിക്കേണ്ടിയിരിക്കുന്നു.. എങ്ങാനും ഇവക്ക് ദേഷ്യം വന്ന് എന്നെ എടുത്തിട്ടലക്കിയാല്‍ അന്നത്തോടേ എന്റെ സകല എടപാടും തീരും.. ഇനി തല്‍ക്കാലം അധികം മിണ്ടാതെ ഫോണ്‍ വെക്കുന്നതാണു ബുദ്ധി..

"ആഹ് ഡീ എന്നാ ഞാന്‍ വെക്കട്ടേട്ടാ.. ഫ്രീ ആകുമ്പോ മിസ് കാള്‍ അടി.."
"അള്ളോ.. എന്റെ പൊന്നാരിക്കാ ചതിക്കല്ലേ.."
"ഏഹ്. എന്ത്യേടീ..?"
ഞാന്‍ ഫോണ്‍ വെക്കുന്നതിനു ഇവളെന്തിനാ ഈ കരയുന്നത്.. ഇത്രേം നേരം തല്ലാന്‍ വരുന്ന മട്ടിലായിരുന്നല്ലോ...

"ഈ ഓട്ടോയുടേ നമ്പരും, ഡ്രൈവറുടെ പേരും, ഈ ഏരിയായുടെ പേരും പോലീസ് ഹെല്പ് ലെയിന്‍ നമ്പരും ഞാന്‍ വാട്ട്സാപ്പ് ചെയ്തിട്ടുണ്ട്.."
"ഇതൊക്കെ ഞാന്‍ എന്തൂട്ട് കാട്ടി പണ്ടാരമടക്കാനാണ്ടീ...??"

അപ്പുറത്ത് നിന്നും മറുപടി വന്നു...
"ഇക്ക ഫോണിലുള്ള ധൈര്യത്തിലാ ഞാനീ അടിയെല്ലാം ഉണ്ടാക്കിയത്.. എങ്ങാനും ഇയ്യാളെന്നെ വല്ലതും ചെയ്താല്‍ അപ്പോ തന്നെ പോലീസ് സ്റ്റേഷനില്‍ അറിയിച്ചേക്കണം.. ഞാന്‍ ട്രെയെനീ കേറീട്ട് ഫോണ്‍ വെച്ചാ മതി.."

ഞാന്‍ പതുക്കെ കയ്യിലും കാലിലുമെല്ലാം രോമാഞ്ചിച്ച് നിന്നിരുന്ന രോമമെല്ലാം തടവി പൂര്‍‌വസ്ഥിതിയിലാക്കി.. ഒരു ദീര്‍ഘ്നിശ്വാസവും ഫിറ്റ് ചെയ്ത് യു ടേണ്‍ അടിച്ച് വരുന്ന ഓട്ടോയും മനസ്സില്‍ കണ്ട് കാത്തിരുന്നു..!!

കറന്റ് ബില്‍

2015-04-09T12:20:00.000+03:00

ഇങ്ങക്കൊരു കത്ത്ണ്ടല്ലാ ജബ്ബാര്‍ക്കാന്നു ആ ബലാലു വന്നു പറഞ്ഞപ്പോ ഇത്രക്കും പ്രതീക്ഷിച്ചില്ല.. സൊസൈറ്റീന്നു വല്ല ജപ്തി നോട്ടീസായിരിക്കും എന്നാണ് ആദ്യം വിചാരിച്ചത്.. അല്ലെങ്കിലും നാട്ടിലെ സൊസൈറ്റിക്കാരു ഇന്റെ ദുബായ് അഡ്രസില്‍ കത്തയക്കോ..? കത്ത് പൊട്ടിച്ചപ്പൊ ഞെട്ടിപ്പോയീന്ന് പണ്ട് കത്ത് പാട്ടിലൊക്കെ കേട്ടിട്ടുണ്ട്.. ഇതിലെന്തൂട്ട് പണ്ടാറാണാവോ.. ജബ്ബാര്‍ കത്ത് പൊട്ടിച്ചു..

"ഇന്റെ മന്‍ഷ്യാ.. "
ഹോ.. ആദ്യത്തെ ആ വാചകം വായിച്ചപ്പോ തന്നെ ജബ്ബാറിന്റെ രോമകൂപങ്ങളെല്ലാം എഴുന്നേറ്റ് നിന്നു.. റബ്ബേ.. ഇന്റെ സൂറാന്റെ കത്താണല്ലാ.. ഇവക്കെന്താ പിരാന്തായാ..?? ആഹ് അതൊക്കെ പിന്നെ ആലോചിക്കാം ജബ്ബാര്‍ ആര്‍ത്തിയോടെ കത്തു വായിക്കാന്‍ തുടങ്ങി..

"എപ്പ വിള്‍ച്ചാലും ഇങ്ങക്ക് തെരക്കെന്നെ തെരെക്ക്.. ഇപ്പ തിരിച്ച് വിളിക്യാന്നു പറഞ്ഞ് ഒരു പോക്കു പോയാല്‍ പിന്നെ ഇങ്ങടെ പൊക പോലും കാണാന്‍ പറ്റൂല.. ന്തെങ്കിലും അത്യാവശ്യണ്ടെങ്കില്‍ മിസ് കോളടിക്കാനൊക്കെ ഇങ്ങള്‍ വെല്യ വീമ്പ് പറഞ്ഞ്യീനല്ലോ.. ന്നിട്ടെന്തായി.. ?"

ആദ്യത്തെ വാചകം വായിച്ച് തല്ലാന്‍ നിക്കുന്ന പോലെ നെഞ്ചും വിരിച്ച് എണീറ്റ് നിന്ന രോമമെല്ലാം കൂടെ പത്തിക്കടിക്കിട്ടിയ പാമ്പിനെ പോലെ തല താഴ്ത്തി.. ഇതിലും ഭേദം ജപ്തി നോട്ടീസായിരുന്നു..
"ദീനത്തിനു പാലു വാങ്ങാന്‍ പോയോന്‍ അടിയന്ത്രത്തിനു മോരുമ്പെള്ളോം കൊണ്ട് വന്നൂന്നു പറഞ്ഞ പോലല്ലെ മന്‍ഷ്യാ ഇങ്ങടെ കാര്യം ..? വടക്കന്‍ വീരഗാഥ സില്‍മേല്‍ ഞമ്മടെ മമ്മുട്ടിക്ക പറഞ്ഞ പോലെ അവസാനം മിസ് കാളടിക്കാന്‍ മാത്രം സൂറാന്റെ ജീവിതം ബാക്കീന്നും പറഞ്ഞ് ഞാന്‍ ഇബ്ടെ കരഞ്ഞ് നടക്കുംന്നു ഇങ്ങളു വിചാരിച്ചാ..?"

ഏതു ഹമുക്കുല്‍ ബഡൂസാണാവോ ഇവള്‍ക്ക് ഇതു പോലൊരു ഐഡിയ പറഞ്ഞ് കൊടുത്തത്.. വര്‍ത്താനം പറയുമ്പ പോലും സ്പെല്ലിങ്ങ് മിസ്റ്റേക്ക് വരുത്തുന്ന ബലാലിന്നെ ചീത്ത വിളിച്ച് കത്തെഴുതുമ്പോള്‍ ഒരു തെറ്റും കാണാനില്ലല്ലോ.. ജബ്ബാര്‍ തലയില്‍ കൈ വെച്ചു..

"അങ്ങനെ ബെശമിച്ചിരിക്കുമ്പഴാ ഇന്റെ ബാപ്പ ഇന്നോട് പറഞ്ഞത്.. 'ആ ഹിമാര്‍ അന്നെ ഫോണ്‍ ബിളിക്കുന്നില്ലെങ്കില്‍ ഇയ്യൊരു കത്തെഴ്ത് സൂറാന്ന്..' പിന്നെ ഇക്കൊന്നും ആലോയ്ക്കാനുണ്ടായിരുന്നില്ല.. കുത്തിരുന്നങ്ങട്ട് എഴുതി.. ഇങ്ങളെന്തായാലും ഈ കത്ത് വായിക്കാണ്ട് വിടൂലാന്നിക്കറിയാം.."

ആഹാ... അപ്പൊ മൂപ്പാരിപ്പോഴും ഇനിക്ക് പണി തരുന്ന പരിപാടി നിര്‍ത്തീട്ടില്ല.. മരുമോനെങ്ങനെയൊക്കെ പണി കൊടുക്കാം എന്നു ഇപ്പഴും പഠനം നടത്തി കൊണ്ടിരിക്കുകയാണല്ലേ.. ഇങ്ങക്കുള്ള അടുത്ത ഏറു ഞാന്‍ നെയ്യത്താക്കീട്ട്ണ്ട് ബാപ്പാ. ജബ്ബാര്‍ മീശ പിരിച്ചു..

"ഇങ്ങക്കറിയോ.. ഇനിക്കിവിടെ എങ്ങട്ട് തിരിഞ്ഞാലും ഇങ്ങടെ വിചാരം തന്നെയാ.. വടക്കേലെ ആ മൂശേട്ട പെണ്ണ് ഓള്‍ടെ മാക്സി അലക്കി അയലുമ്മലിടണ കണ്ടാ ഇക്കപ്പോ ഇങ്ങടെ ഓര്‍മ്മ ബരും.."

ഇവളിതെന്താ ഈ പറഞ്ഞോണ്ട് വരുന്നത്.. ജബ്ബാര്‍ വാപൊളിച്ചു..
"ഇത് വായിച്ച് ഇങ്ങള് തൊള്ള തൊറക്കെണ്ട മന്‍ഷ്യാ.. അതടച്ച് വെക്ക്.."
ഓട്ടൊമാറ്റിക്കായിട്ട് തന്നെ ജബ്ബാറിന്റെ വായടഞ്ഞു..
"ഞാനെപ്പ ഇങ്ങടെ ലുങ്കി മുണ്ട് കയ്കി ഒണക്കാനിടുമ്പഴും ഓള്‍ടെ ആ മാക്സി പറന്നു വന്ന് ഇങ്ങടെ മുണ്ടിന്റെ മേല്‍ക്കു വീഴാറല്ലെ പതിവ്..? ഇങ്ങ പോയേനു ശേഷം ആ മാക്സി കാറ്റത്ത് പറക്കുന്നില്ലാന്നു മാത്രമല്ല ഒന്നു ആടുന്നു പോലുമില്ല.. ഇരുമ്പും കട്ട കെടക്കുന്ന പോലെ ബലം പിടിച്ച് അയലുമ്മെ കെടക്കുന്നത് കാണാം.. ഇല്ലെങ്കിലെന്തായിരുന്നു അയ്ന്റെ ഒരു എളക്കം.."

ഹോ.. ഓളിന്റെ വള്ളി നിക്കറലക്കി വടക്കേപ്പുറത്തിടാഞ്ഞത് പടച്ചോന്റെ കുദ്‌റത്ത്..

"പണ്ടിങ്ങളിനിക്ക് വിവരമില്ലാന്നു പറഞ്ഞ് കൊറെ പറ്റിച്ചിട്ടുള്ളതല്ലെ.. ഇനീങ്ങക്കിന്നെ അങ്ങനെ പറ്റിക്കാന്‍ കയ്യൂലാട്ടാ.. ഇംഗ്ലീഷ് വായിക്കാന്‍ വിവരമുള്ളോരും ഇന്നോട് സ്നേഹള്ളോരും എല്ലാം ഇപ്പ ഇന്റെ കൂടെ ഇണ്ട്.. ഇങ്ങക്ക് മാത്രേ ഇന്നെ ഇപ്പം ബേണ്ടാത്തേ.."

റബ്ബുല്‍ ആലിമീനായ തമ്പുരാനേ.. ചീത്തവിളിയൊക്കെ നിര്‍ത്തി ഓളിപ്പോ സെന്റിമെറ്റലായി ഇന്നേം കൂടെ കരയിപ്പിക്കും എന്നാ തോന്നുന്നത്.. തോളില്‍ കിടന്നിരുന്ന തോര്‍ത്തെടുത്ത് ഒരു കയ്യില്‍ പിടിച്ച് ജബ്ബാര്‍ കണ്ണു തുടക്കാന്‍ തയ്യാറെടുത്തു..

"അന്നിങ്ങളു ഫോണ്‍ വിളിക്കാത്തേനു എന്തൂട്ടാ കാരണം പറഞ്ഞേ.. ബില്ലടക്കാഞ്ഞിട്ട് ഫോണ്‍ കട്ടായി കെടക്കാണെന്ന് അല്ലെ..? ഇക്ക് ഇംഗ്ലീഷ് വായിക്കാന്‍ അറിയൂലാന്ന് വിജാരിച്ച് കറന്റ് ബില്ല് അയച്ച് തന്ന് ഇന്നെ പറ്റിക്കാന്നു വിചാരിച്ചൂലെ..?"

കറന്റ് ബില്ലോ.. അതെപ്പോ..? ഫോണ്‍ ബില്ലിന്റെ സ്ക്രീന്‍ ഷോട്ടാണല്ലോ അയച്ചത് പണ്ടാരം.. കയ്യില്‍ പിടിച്ചിരുന്ന തോര്‍ത്തു മുണ്ട് ചുരുട്ടി കൂട്ടി മുറിയുടെ മൂലക്കലേക്കെറിഞ്ഞു.. ഓനെന്തിനാ ഇപ്പെന്നെ എടുത്തെറിഞ്ഞതെന്ന് മനസ്സിലാവാതെ ഒന്നു തലപൊക്കിയ തോര്‍ത്ത് എന്തു കുന്തമെങ്കിലുമാകട്ടെ എന്ന മട്ടില്‍ അവിടെ തന്നെ ചുരുണ്ട് കൂടി..

"ഞാനിങ്ങളയച്ചന്ന ആ ഫോട്ടം ന്റെ ബാപ്പാക്കു കാണിച്ചപ്പൊ ബാപ്പ അതില്‍ എഴുതിയേക്കുന്നത് ഇക്ക് ബായിച്ചു തന്നു.. കറന്റ് ബില്‍ ഡീറ്റെയില്‍സ് എന്നു....!! ഇങ്ങക്കൊക്കെ ദുബായില് ഫോണ്‍ ബിളിച്ചാ കറന്റ് ബില്ലാണോ വരാ മന്‍ഷ്യാ..??"

ജബ്ബാര്‍ അന്നയച്ച വാട്ട്സപ്പ് മെസേജെടുത്ത് നോക്കി.. അതില്‍ വെണ്ടക്കാ അക്ഷരത്തില്‍ എഴുതിയിരിക്കുന്നു, 'Current Bill Details, Dhs 699.92' ഹോ.. അതു കണ്ടാലെങ്കിലും ആ കാട്ടു പോത്തൊന്നടങ്ങും എന്നു വിചാരിച്ചതാ.. ദാ കെടക്കുന്നു...!! ഓളും ഓള്‍ടെ ബാപ്പയും.. ന്റെ റബ്ബേ.. എല്ലാം ഹലാക്കിന്റെ അവുലും കഞ്ഞീന്നു പറഞ്ഞ പോലായിപ്പോയല്ലോ.

ദേഷ്യത്തോടെ കൈ ചുരുട്ടി മേശയില്‍ രണ്ടടിയടിച്ച ജബ്ബാര്‍ ഫോണെടുത്ത് പല്ലു ഞെരിച്ച് സൂറാന്റെ നമ്പര്‍ സ്ക്രോള്‍ ചെയ്ത് കാള്‍ കൊടുത്തു ചെവിയോടടുപ്പിച്ചു.. അപ്പുറത്ത് നിന്നും മനോഹരമായ ഒരു സ്ത്രീ ശബ്ദം ജബ്ബാറിന്റെ ചെവിയിലേക്കൊഴുകിയെത്തി
"ഡിയര്‍ കസ്റ്റമര്‍.. യുവര്‍ ഔട്ട് ഗോയിങ്ങ് ഫെസിലിറ്റീസ് ആര്‍ ടെമ്പറെര്‍ലി ഡിസ്കണക്റ്റട്.. പ്ലീസ് കോണ്ടാക്റ്റ് കസ്റ്റമര്‍ കെയര്‍.. റ്റു പേ ദി ബില്‍ ബൈ ക്രെഡിറ്റ് കാര്‍ഡ് പ്ലീസ് പ്രെസ്..."

ട്ടേ.. അപ്രതീക്ഷിതമായി ചുമരില്‍ വന്നിടിച്ച ഫോണ്‍ എന്താണു സംഭവിച്ചതെന്നു മനസ്സിലാക്കാനുള്ള സമയം കിട്ടുന്നതിനു മുന്നേ തന്നെ അഞ്ചെട്ടു പീസുകളായി തറയില്‍ റെസ്റ്റ് ഇന്‍ പീസെസ് ആയി അന്ത്യവിശ്രമം കൊണ്ടു..

ഉച്ചക്കഞ്ഞി

2015-04-09T12:19:00.002+03:00

ദിവസവും വീട്ടീന്നിറങ്ങുമ്പോള്‍ കരച്ചിലോടു കരച്ചില്‍. കരഞ്ഞ് കണ്ണും തിരുമ്മി മൂക്കു പിഴിഞ്ഞ് ട്രൗസറിന്റെ മൂട്ടില്‍ കൈ തുടച്ച് ഇസ്ട്രുമെന്റ് ബോക്സും ബുക്കുകളും എടുത്തു വെച്ച അലുമിനിയപെട്ടിയും താങ്ങി കേറ്റി പിടിച്ച മോന്തയുമായി വീട്ടീന്നെറങ്ങും..

ടാറു ചെയ്യാതെ ചളി നിറഞ്ഞ് ചുവന്നു കലങ്ങി കിടക്കുന്ന റോഡ്. അല്പമെങ്കിലും ചളിയില്ലാത്ത തെളിഞ്ഞു കിടക്കുന്ന വെള്ളം കണ്ടാല്‍ ഒന്നും നോക്കാതെ നേരെ അതിലേക്ക്ചാടും.. അതും ഒറ്റക്കാലില്‍.. ഒരു കാല്‍ കുത്തിച്ചാടി വെള്ളം പൊങ്ങുമ്പോള്‍ മറ്റേ കാലുകൊണ്ട് ശക്തിയായി അടിച്ച് പടക്കം പൊട്ടുന്ന പോലെ ശബ്ദമുണ്ടാക്കും..

അടിക്കുന്ന സമയത്തെങ്ങാനും ഉന്നത് തെറ്റിയാല്‍ മറ്റേകാലും കൂടെ പൊങ്ങി മൂടും കുത്തി വെള്ളത്തില്‍.. മിക്കവാറും ഉദ്ധേശം പടക്കം പൊട്ടിക്കലായിരിക്കില്ല. ആ പേരും പറഞ്ഞ് കൂടെ നടക്കുന്നവരുടെ ദേഹത്തേക്ക് വെള്ളം തെറിപ്പിച്ച് ഉമ്മാനോടുള്ള ദേഷ്യം തീര്‍ക്കുക എന്ന ദുരുദ്ധേശം. മറ്റൊന്ന്, സ്വന്തം ഉടുപ്പില്‍ ചളിയാക്കി, ഒരു മകന്റെ ആഗ്രഹം മനസ്സിലാക്കാതെ കരയിപ്പിച്ച് സ്കൂളിലേക്ക് വിടുന്ന ഉമ്മാക്കിട്ട് പണി കൊടുക്കലും

സ്കൂളും വീടും തമ്മില്‍ പത്ത് മിനിറ്റ് നടക്കാനുള്ള ദൂരമേ ഒള്ളു.. അതു കൊണ്ട് ഉച്ചഭക്ഷണത്തിനു വീട്ടിലെത്തണം. എനിക്കാണെങ്കില്‍ സ്കൂളില്‍ നിന്നു കൊടുക്കുന്ന ചോറും കറിയും കഴിക്കണം. ജീവന്‍ പോയാലും അതിനുമ്മ സമ്മതിക്കില്ല. വീട്ടീന്നു നല്ലസ്സലു ചോറും കറിയും വൃത്തിയോടും വെടിപ്പോടും കഴിക്കാനുള്ള അവസമുള്ളപ്പോള്‍ എന്തിനാടാ സ്കൂളീന്ന പുഴുവും ചെള്ളും നിറഞ്ഞ് ഉപ്പിട്ട് പുഴുങ്ങിയെടുക്കുന്ന ചോറും കറിയും തിന്നുന്നതെന്ന് ഉമ്മാടെ ചോദ്യം.. ചോദ്യം മാത്രമോ.. നല്ല പിച്ചും കിട്ടും. ശെരി, സ്കൂളിലെ ചോറു കഴിക്കില്ല, സ്കൂളില്‍ കൊണ്ട് പോയി കഴിക്കാന്‍ എനിക്ക് ടിഫിന്‍ ബോക്സില്‍ ചോറു തരണം എന്നു പറഞ്ഞാല്‍, അതും സമ്മതിക്കില്ല. കാരണം ഉമ്മാക്കറിയാം ആ ചോറും കറികളും പൈപ്പിന്റെ മൂട്ടിലോ തെങ്ങിന്റെ തടത്തിലോ അന്ത്യ വിശ്രമം കൊള്ളുമെന്ന്.

ആകെ ഒരു മണിക്കൂറിനടുത്ത് കിട്ടുന്ന ലഞ്ചു ബ്രേക്കില്‍ വീട്ടില്‍ പോകുന്ന ഈ ഒരു പരിപാടി കൊണ്ട് മാത്രം നഷ്ടമാകുന്ന ഒരുപാട് കാര്യങ്ങളുണ്ട്. പെട്ടെന്നു കഴിച്ച് കഴിഞ്ഞാല്‍ പിന്നെ ബെല്ലടിക്കുന്ന വരെ പമ്പരം കൊത്തിക്കളിക്കാം, രാശിക്കാ കളിക്കാം, ഓടി തൊട്ട് കളിക്കാം, സാറ്റെണ്ണിക്കളിക്കാം, തീപ്പെട്ടിപ്പടം കളിക്കാം.. പക്ഷേ വീട്ടിലേക്ക് നടന്നു പോയി ഭക്ഷണം കഴിച്ച് തിരിച്ച് നടന്നു സ്കൂളിലെത്തുമ്പോഴേക്കും ബെല്ലടിച്ചിട്ടുണ്ടാകും. അപ്പൊ ഉച്ചക്കലത്തെ കളികള്‍ ഗോവിന്ദ. അതിലെല്ലാമുപരി സ്കൂളില്‍ നിന്നു കൊടുക്കുന്ന ചോറും കറിയും മിസ്സാകുന്നതിലായിരുന്നു.

സ്കൂളില്‍ നിന്നു വിളമ്പുന്ന ആവി പറക്കുന്ന കുത്തരിച്ചോറും എരിവു കുറച്ച് നന്നായി നീട്ടി വെച്ച ചെറുപയറു കറിയും. ഉച്ച ബെല്ലടിക്കാറാകുമ്പോള്‍ അവിടുത്തെ ചേച്ചിയും ഔസേപ്പ് ചേട്ടനും കൂടെ വലിയ ചെമ്പില്‍ തിളക്കുന്ന ചോറു തോര്‍ത്തു മുണ്ട് കൂട്ടി പിടിച്ച മുള കൊണ്ട് നെയ്ത ചെറിയ കൊട്ടകൊണ്ട് കോരി ഊറ്റും.. കുത്തരി ചോറു വെന്ത ആവി പറന്ന് ഒരനുസരണയുമില്ലാതെ നേരെ തൊട്ടപ്പുറത്തെ ഞങ്ങളുടെ ക്ലാസിലേക്ക് വരും. എപ്പഴെങ്കിലും ഇന്നു ക്ലാസിലേക്ക് പോകാതെ വേറെ വല്ല വഴിക്കും പോകാന്‍ ആവി തീരുമാനിച്ചാല്‍ അതിനു സമ്മതിക്കാതെ, കറക്റ്റു സമയത്ത് എവിടെ നിന്നില്ലാതെ കുരുത്തം കെട്ട ഒരു തെക്കന്‍ കാറ്റു വന്നു ഞങ്ങളുടെ ക്ലാസിലേക്ക് തന്നെ ഉന്തി തള്ളി വിടും..

ചോറൂറ്റി കഴിഞ്ഞ് ബെല്ലടിക്കുന്നതിനു തൊട്ടു മുന്നേ ചെറുപയറു കറിയുടെ ചെമ്പും കൂടെ തുറക്കും. ആ രണ്ടു മണവും കൂടെ മൂക്കിലേക്കടിച്ച് കയറുമ്പോള്‍ പിന്നെ സഹിക്കാന്‍ പറ്റാതാകും. പുസ്തകമെല്ലാം ഇലാസ്റ്റിക്ക് ഇട്ട് പെട്ടിയില്‍ വെച്ച് വിശന്നു പൊരിഞ്ഞ് വെല്ലടിക്കാന്‍ കാത്തിരിക്കുന്ന ഞങ്ങളുടെ വയറ്റില്‍ നിന്നും ആവി വരാന്‍ വലിയ താമസമൊന്നും ഉണ്ടാകില്ല..

ബെഞ്ചിന്റെ അടിയില്‍ ഭദ്രമായി വെച്ചിരിക്കുന്ന അരികു വളഞ്ഞ് സ്റ്റീല്‍ പാത്രമെടുത്ത് എടുത്ത് കൂടെയുള്ളവര്‍ ചോറും പയറും വാങ്ങിക്കാന്‍ പോകുമ്പോള്‍ ഞാന്‍ അസൂയയോടെ നോക്കി നില്‍ക്കും. കൂടെയിരിക്കുന്നവനു കളര്‍ പെന്‍സിലിന്റെ പൊട്ടോ പൊടിയോ, വല്ല ഒട്ടിപ്പോ നെയിം സ്ലിപ്പോ കൊടുത്ത് മയക്കി ശെര്യാക്കി വെച്ചത് കൊണ്ട് ബെല്ലടിച്ചാലും വീട്ടിലേക്ക് തിരിക്കാതെ ക്ലാസില്‍ തന്നെ കാത്തിരിക്കും. അവന്‍ വാങ്ങിയ സാധനങ്ങള്‍ക്കുള്ള നന്ദി കാണിക്കും.. പാത്രത്തില്‍ ആവി പറക്കുന്ന ചോറും ചോറിനു നടുവില്‍ വട്ടത്തില്‍ വിളമ്പിയ ഇളം പച്ച കലര്‍ന്ന മഞ്ഞ നിറത്തിലുള്ള ചെറുപയറു കറിയുമായി അവന്‍ വരും.

ചൂടു വക വെക്കാതെ, ആവി പറക്കുന്ന ചോറിലേക്ക് വിരലു താഴ്ത്തും.. പൊള്ളിയ കൈ വലിച്ച് ഔ.. എന്ന ശബ്ദത്തോടെ രണ്ടു മൂന്നു കുടയലു കുടഞ്ഞ് കയ്യിലേക്ക് ഊതിയാല്‍ ആ ചൂടു പോകും.. അങ്ങനെ മൂന്നു നാലു പ്രാവശ്യം ചെയ്യുമ്പോഴേക്കും ചൂടു പോയി വാരി വലിച്ച് ചോറു തിന്ന് കൈ കഴുകി നേരെ വീട്ടിലേക്കോടും. വീട്ടിലെത്തുമ്പോള്‍ ഉമ്മ ചൂടോടെ വിളമ്പി വെച്ചിരിക്കുന്ന മീന്‍ കറിയും ചോറും കഴിക്കാന്‍ സ്കൂളിലെ ചോറും കറിയും നിറച്ച് വെച്ചിരിക്കുന്ന എന്റെ കുഞ്ഞി വയറ്റിലെവിടെ സ്ഥലം..?

വാപ്പാക്കു കത്തെഴുതുമ്പോഴും വീട്ടില്‍ സ്വന്തക്കാരു വന്നാലും, വല്ല പനിയോ വയറ് വേദനയോ വന്നു ഡോക്ടറുടെ അടുത്ത് പോയാലും ഉമ്മാക്ക് ഒരു കമ്പ്ലെയിന്റ് മാത്രം.. ചെക്കന്‍ ഭക്ഷണം കഴിക്കുന്നില്ല.. തല്ലീട്ടും ഭീഷണിപ്പെടുത്തീട്ടും വായിലേക്ക് കുത്തിക്കയറ്റീട്ടും ഭക്ഷണത്തിനോട് വിരക്തി വെറുപ്പ്.. ചില തൊഴുത്തില്‍ കുത്തുകാര്‍ എനിക്കു വിരയുടെ അസുഖമാണെന്നു പറഞ്ഞത് വിശ്വസിച്ച് ഉമ്മ ഇടക്കിടക്ക് രാവിലെയോ രാത്രി ഉറങ്ങാന്‍ നേരത്തോ നിര്‍ബന്ധിച്ച് വിരയിളക്കാനുള്ള മരുന്ന് കുടിപ്പിക്കും.. രാവിലെ നന്നായി വയറിളകും എന്നല്ലാണ്ടു വേറെ യാതൊരു ഗുണവും ആ മരുന്നു കൊണ്ട് ഞാന്‍ കണ്ടിട്ടില്ല. എനിക്കു പിത്തമാണെന്നു പറഞ്ഞു പരത്തിയ ചില മൂരാച്ചികളുമുണ്ടായിരുന്നു.

കണ്ണിനു മുന്നില്‍ ഇന്നും മിഴിവോടു കൂടെ നില്‍ക്കുന്ന ആ കാഴ്ചകള്‍.. ആവി പറക്കുന്ന കുത്തരിച്ചോറും ചെറുപയറു കറിയും...!!!

ലവ് യൂ...

2015-04-09T12:19:00.001+03:00

ചില സമയത്തങ്ങനെയാ.. നമ്മള്‍ സ്നേഹിക്കുന്നവരെ നമ്മളോര്‍ക്കുന്ന സമയത്ത് തന്നെ അവരും നമ്മളെ പറ്റി ഓര്‍ക്കും..

ഒരു ഏട്ട് വയസ്സുകാരന്‍ കുഞ്ഞു പെങ്ങളെ കൈ പിടിച്ച് നടത്തിയതും, കുളിപ്പിച്ച് ഒരുക്കി കൊടുക്കുന്നതും, തോടും പാടവും പശുവിനെയും ആടിനെയും കാണിച്ച് കൊടുക്കുന്നതും.. സ്കൂളില്‍ കൊണ്ടു പോകുന്നതും എല്ലാം ഇന്നു നടക്കുന്ന പോലെ തന്നെ..

"മോളേ.. ഇക്കാക് കെട്ടിപ്പിടിച്ചൊരുമ്മ തരോ..?"
"ഉമ്മ തരാം.. പക്ഷെ എന്നെ ഉത്സവം കാണിക്കാന്‍ കൊണ്ട് പോണം.."
"മോളേ ഇക്ക കൊണ്ടോവാട്ടോ.. മലയാറ്റില്‍ അമ്പലത്തില്‍ ഉത്സവം തുടങ്ങട്ടെ.."
"അവ്ടെ ഇനിച്ച് വരണ്ട.. "
"അതെന്തു പറ്റി..?"
"ഇനിച്ച് പേടിയാ.."
"അതെന്തിനാ മോളേ..?"
"അതേ അവ്ടെ ഉത്സവത്തിനു ഇടിവെട്ടുണ്ടാകും..."

ആ പ്രായത്തിലവള്‍ക്ക് പലിയ പടക്കം പൊട്ടുന്ന പോലെയുള്ള ഏതു ശബ്ദവും വെളിച്ചവും ഇടിവെട്ടായിരുന്നു. രാത്രി ഭക്ഷണം കഴിഞ്ഞാല്‍ ഉമ്മ കയ്യിലൊരു ചൂരലുമായി എന്നെയും അനിയനെയും പെങ്ങളെയും അടുക്കളയില്‍ നിരത്തി നിര്‍ത്തും.. ദിനേനയുള്ള പാലു കുടിപ്പിക്കല്‍ ചടങ്ങാണാവിടെ നടക്കാന്‍ പോകുന്നത്.. തല്ലിയും ഭീഷണിപ്പെടുത്തിയും അങ്ങനെ ഏതൊക്കെ മാര്‍ഗ്ഗത്തിലൂടെയാണോ, ആ വഴികളെല്ലാം ഉമ്മ പ്രയോഗിച്ച് ഞങ്ങളേ കൊണ്ട് പാലു കുടിപ്പിക്കും. എന്തു ചെയ്തിട്ടും നിസ മാത്രം കുടിക്കുന്നില്ല.. വെറുതെ നിന്ന് കരച്ചിലോട് കരച്ചില്‍ തന്നെ.. അവസാനം സഹികെട്ട ഉമ്മ ചോദിച്ചു..

"നീയെന്തിനാണ്ടീ കരയുന്നത് നിന്റെ ആരെങ്കിലും മരിച്ച് പോയാ..?"
ഏങ്ങിയേങ്ങി കരഞ്ഞ് ഉരുണ്ട് വീഴുന്ന കണ്ണീരും മൂക്കും പുറം കൈ കൊണ്ട് തുടച്ച് അവള്‍ പറഞ്ഞു...

"ഉമ്മ എല്ലാ ദിവസവും ബൈജുക്കാക്കും അന്‍സ്ക്കാക്കും ചില്ലിന്റെ ഗ്ലാസില്‍ കൊടുക്കും ക്കും... ഇനിച്ച് മാത്രം ലീസ്റ്റിന്റെ ഗ്ലാസ്സില്‍ തരും..."
ഇതു കേട്ട് ദേഷ്യം മാറി ചിരി തുടങ്ങിയ ഉമ്മ അവളെ തിരുത്താന്‍ പോയില്ല.. കിട്ടിയ ചാന്‍സിനു ഒരു ചില്ലു ഗ്ലാസ് എടുത്ത് പാലതിലേക്ക് പകര്‍ന്നു കൊടുത്തു.

കണ്ണീരു തുടച്ച് ചില്ലു ഗ്ലാസ്സില്‍ കിട്ടിയ പാല്‍ അവള്‍ ചുണ്ടോടാടുപ്പിച്ചതും ആ ഗ്ലാസ് അവളുടെ കയ്യില്‍ നിന്നും വീണു പൊട്ടി ചിതറി.. അതോടോപ്പാം ഞാന്‍ സ്വപ്നത്തില്‍ നിന്നും. പിന്നെ ഉറക്കം വന്നില്ല.. എണീറ്റ് കമ്പ്യൂട്ടര്‍ ഓണ്‍ ചെയ്ത് അവര്‍ ഖത്തറില്‍ വന്നപ്പോള്‍ എടുത്ത ആയിരക്കണക്കിനു ഫോട്ടോകള്‍ എടുത്ത് നോക്കാന്‍ തുടങ്ങി. പിന്നീടെപ്പഴോ കമ്പ്യൂട്ടെറിന്റെ മുന്നില്‍ തന്നെ ഇരുന്ന് ഉറങ്ങിപ്പോയി. ഉറക്കമെല്ലാം കഴിഞ്ഞ് എഴുന്നേറ്റപ്പോഴാണ് ഇന്നലെ നടന്നതൊക്കെ ഓര്‍മ്മ വന്നത്.. അവളേ വിളിച്ചു നോക്കി.. ഫോണേടുത്തില്ല.. പിന്നെ ഇന്നലെ നോക്കിയ പടങ്ങളില്‍ നിന്നും എനിക്കേറ്റവും ഇഷ്ടപ്പെട്ട ഒരെണ്ണം എടുത്ത് ഞാന്‍ അവള്‍ക്കയച്ച് കൊടുത്തു..

കുറച്ച് കഴിഞ്ഞപ്പോള്‍ നിസയുടെ മെസ്സേജ് വന്നു..
"ഞാന്‍ ഒറങ്ങായിരുന്നു..."
"ഒ കെ.."
"ഇന്നലെ രാത്രി ഞാന്‍ ഇരുന്ന് ഈ പടങ്ങളൊക്കെ ഇരുന്ന് നോക്കുകയായിരുന്നു.."
"ഏഹ്..? സത്യം..??"
"അതെ..."
"ഡീ അപ്പൊ സെയിം പിച്ച്ട്ടാ... ഞാനും ഇന്നലെ ഈ പടങ്ങള്‍ നോക്കുകയായിരുന്നു.."
"ആണോ..."
"ഡീ..."
"എന്തെ....?"
"ലവ് യൂ...."

അതു പറഞ്ഞപ്പോല്‍ മൊബൈലിന്റെ സ്ക്രീനിനൊരു മങ്ങല്‍.. കണ്ണു തിരുമ്മിയപ്പോള്‍ രണ്ടുമൂന്നു തുള്ളി കണ്ണീര്‍ താഴെ പോയി.. കണ്ണ് തുടച്ച് നോക്കിയപ്പോഴും നിസയുടെ മറുപടിയൊന്നും വന്നിട്ടില്ല.. ഞാന്‍ അവളോട് ചോദിച്ചു..

"ഇപ്പ നിന്റെ കണ്ണീന്നു വെള്ളം വന്നാ...?"
കുറച്ച് കഴിഞ്ഞപ്പോല്‍ അവള്‍ രണ്ട് സ്മൈലി തിരിച്ച് തന്നു..
"ഡീ.. പിന്നേം സെയിം പിച്ച്ണ്ട്ട്ടാ.. അപ്പോ ശെരി ബൈ.. നമുക്ക് പിന്നെ മിണ്ടാംസ്.."
"എന്റെ കണ്ണീന്നിപ്പഴും കണ്ണീരു വരുന്നു.. ടൈപ്പ് ചെയ്യാന്‍ പറ്റണില്ലിക്കാ.. ബൈ.."

ലവ് യൂ സോ മച്ച് ഡിയര്‍..!! മിസ്സ് യൂ...!!

ചിരിയില്‍ വിരിഞ്ഞ മഴവില്ല്

2015-04-09T12:19:00.000+03:00

വര്‍ഷങ്ങള്‍ ഒരുപാട് കഴിഞിരിക്കുന്നു. ഇന്നും ഇടക്കിടെ അവളെന്റെ സ്വപ്നങ്ങളില്‍ വരും.. തെല്ലു പോലും വളര്‍ന്നിട്ടില്ല അവളിന്നും.. അതേ രൂപം.. അതേ ഉടുപ്പ്.. എന്നെ നോക്കി അവളുടെ കൊച്ചു വെള്ളാരം കല്ലു പോലെ നിരയൊത്ത പല്ലുകള്‍ കാണിച്ച്, ഇടയില്‍ അവിടവിടെ പല വര്‍ണ്ണങ്ങളോടെ, ഒരു വശത്ത് മാത്രം നുണക്കുഴിയുള്ള ചിരി ചിരിക്കും. കാണാന്‍ നല്ല ചന്തമുള്ള ചിരി. കാക്കപുള്ളി പോലെ ഈര്‍ക്കില്‍ വട്ടത്തില്‍ കറുത്ത ഒരു കുഞ്ഞു പൊട്ട് എന്നും അവളുടെ പുരികക്കൊടികള്‍ക്കു നടുവില്‍ കാണുമായിരുന്നു. .

കേട്ടെഴുത്തിനു ശേഷം,സ്ലേറ്റ് നോക്കി മാര്‍ക്കിട്ട് കഴിഞ്ഞ് കിട്ടിയ ബാക്കി സമയത്ത് ഒച്ചയും ബഹളവുമുണ്ടാക്കാതെ, ഞങ്ങള്‍ക്കിഷ്ടമുള്ള ചിത്രം വരക്കാന്‍ വരക്കാന്‍ പറഞ്ഞ്, സംസാരിക്കുന്നവരുടെ പേരെഴുതി വെക്കാന്‍ ക്ലാസ് ലീഡറെ ഏല്പിച്ച ടീച്ചര്‍ രണ്ടു കയ്യും മുന്നിലെ മേശയില്‍ പിണച്ച് അതിനുള്ളിലേക്ക് മുഖം പൂഴ്ത്തി. സ്ലേറ്റില്‍ എഴുതിയത് കൈ കൊണ്ട് എത്ര മായ്ച്ചാലും മുന്‍പ് എഴുതിയിരുന്നത് മങ്ങി കാണുന്നുണ്ടാകും. അതിന്റെ മുകളില്‍ പൂവിനെയും കിളികളെയും വരച്ചാലും ഒരു ഭംഗി ഉണ്ടാകില്ല.

ട്രൗസറിന്റെ പോക്കറ്റില്‍ നിന്നും മദ്രസയില്‍ പോകുന്ന വഴിക്കുള്ള ഇല്ലിക്കൂട്ടത്തില്‍ നിന്നും പൊട്ടിച്ചെടുത്ത മുളയുടെ ഇളം തണ്ടെടുത്തു. അതിന്റെ അറ്റമൊന്നു ഒന്നു കടിച്ച് ചതച്ച് സ്ലേറ്റ് മായ്ക്കുന്ന സമയത്താണ്, എന്റെ ഇടത് വശത്ത് ഇരുന്നിരുന്ന അവളെന്നെ നോക്കുന്നത് ഞാന്‍ ആദ്യമായി ശ്രദ്ധിക്കുന്നത്. ഞാന്‍ കയ്യിലിരുന്ന മുളന്തണ്ട് അവള്‍ക്കു നേരെ നീട്ടി..

"സ്ലേറ്റ് മായ്ക്കാന്‍ മഷിത്തണ്ട് വേണോ..?" അവള്‍ നോക്കിയതല്ലാതെ മറുപടിയൊന്നും പറഞ്ഞില്ല.. "ഇന്നാ എടുത്തോ.. എന്റെ കീശേല്‍ ഒന്നൂടെ ഉണ്ട്.." അവള്‍ ചിരിച്ച് കൊണ്ട് കൈ നീട്ടി. ഞാന്‍ അതവളുടെ കയ്യിലേക്ക് വെച്ചു കൊടുമ്പോള്‍ ചിരിച്ച് കൊണ്ടവള്‍ പറഞ്ഞു..

"ചെക്കാ ഇത് മഷി തണ്ടല്ല.. ഇല്ലിത്തണ്ടാ.. മഷി തണ്ട് ഞാന്‍ നാളെ കൊണ്ടന്ന് തരാട്ടോ..." മുന്‍പൊരിക്കല്‍ ക്ലാസില്‍ അടുത്തിരിന്നിരുന്ന രാജേഷ് ചെക്കാ എന്നു വിളിച്ചതിനു എനിക്ക് അവന്റെ മൂക്കിടിച്ച് പരത്താന്‍ പാകത്തിന് ദേഷ്യം വന്നിരുന്നു. അവന്റെ അച്ചന്റെ കയ്യില്‍ മരം മുറിക്കുന്ന വലിയ വാളും കോടാലിയുമെല്ലാം ഉള്ള കാര്യം അവന്‍ രണ്ടു ദിവസം മുന്‍പ് പറഞ്ഞതോര്‍ത്ത് ഞാന്‍ ഒന്നും ചെയ്യാതെ വിട്ടു.

ആദ്യമായിട്ട് അവളുടെ ചിരി ഞാന്‍ ശ്രദ്ധിക്കുകയായിരുന്നു.. അതിനിടയില്‍ അവളുടെ ചെക്കാന്‍ എന്ന വിളിക്കധികം പ്രാധാന്യം കൊടുത്തില്ല.. നനുനനുത്ത പച്ച രോമങ്ങള്‍ക്കിടയില്‍ മുത്തു മണികള്‍ പോലെ തിളങ്ങുന്ന വെയര്‍പ്പു തുള്ളികളുള്ള മേല്‍ചുണ്ട് കോട്ടി ചിരിക്കുമ്പോള്‍ അവളുടെ പല്ലുകള്‍ക്കിടയില്‍ പച്ചയും പിങ്കും നീലയും പല പല നിറങ്ങള്‍ കണ്ടത് എന്നെ ശെരിക്കും അത്ഭുതപ്പെടുത്തി..

'മഴവില്ലൊളിപ്പിച്ച നിന്റെയീ ചിരി കാണാന്‍ എന്തൊരു ചന്തമാണു പെണ്ണേ' എന്നു പറയാമായിരുന്നെന്ന് ഞാന്‍ ആലോചിച്ചത് പിന്നെയും ഒരു പാട് നാളുകള്‍ കഴിഞ്ഞ് ആദ്യമായി മഴ വില്ലു കണ്ട നാളിലായിരുന്നു.. അന്ന് ഞാനും അവളും ബാക്കി കൂട്ടുകാരുമെല്ലാം കൂടി സ്കൂള്‍ വരാന്തയില്‍ , "വെയിലും മഴയും കാട്ടിലെ കുറുക്കന്റെ കല്യാണവും" എന്നു പാടി കയ്യടിച്ച് അടുത്ത ബെല്ലടിക്കുന്ന വരെ തുള്ളിച്ചാടി. ഓടില്‍ നിന്നും ഇറ്റു വീഴുന്ന വെള്ളത്തുള്ളികല്‍ രണ്ടു കൈകളും നീട്ടി എടുത്ത് മുഖം കഴുകി..

പിറ്റെ ദിവസം മറക്കാതെ അവളെനിക്ക് മഷിത്തണ്ട് കൊണ്ടു വന്നു തന്നു.. തീരെ വണ്ണമില്ലാത്ത, എന്നാല്‍ നല്ല ഭംഗിയുള്ള, കണ്ടാല്‍ കടിച്ച് തിന്നാന്‍ തോന്നുന്ന തരത്തിലുള്ള ഒരു വിരലിനേക്കാള്‍ നീളം കുറഞ്ഞ ചെറിയൊരു തണ്ടായിരുന്നു അത്.. സ്ലേറ്റില്‍ തൂക്കുന്നതിനു മുന്‍പ് ആ പൂതി മാറ്റാന്‍ ആരും കാണാതെ അതൊന്നു കടിച്ചു ചവച്ചു നോക്കി. ഇല്ലിത്തണ്ടില്‍ ഉള്ള പോലെ ഇളം മധുരം അതിനുണ്ടായിരുന്നില്ല. മറ്റാരും കണ്ടില്ലെങ്കിലും അവളതു കണ്ടു.. എന്റെ വിരലില്‍ പിടിച്ച് തിരിച്ച് അവള്‍ പറഞ്ഞു..

"ചെക്കാ.. ഇതു മണ്ടക്കന്‍ ഇല്ലിത്തണ്ടല്ല.. മഷിത്തണ്ടാ.. കടിക്കാതെ തന്നെ മായ്ക്കാം..." ഇപ്രാവശ്യവും അവളുടെ ചെക്കാ എന്നുള്ള വിളിയും വിരലുകള്‍ ഞെരിഞ്ഞ വേദനയുമൊന്നും എന്നെ ദേഷ്യം പിടിപ്പിച്ചില്ല.. മഴവില്ലൊളിപ്പിച്ച അവളുടെ ചിരി തന്നെയായിരുന്നു കാരണം.. പിന്നീടെന്നും അവളുടെ ചിരി കാണും.. കാണും തോറും എനിക്കത്ഭുതം വര്‍ദ്ധിച്ചു വന്നു.. ഒരു ദിവസം അവള്‍ ചിരിച്ചപ്പോള്‍ അടുത്തിരിക്കുന്ന രാജേഷിനെ തോണ്ടി ഞാന്‍ പറഞ്ഞു..

"നോക്കെടാ.. അവള്‍ ചിരിക്കുമ്പോള്‍ കൊറേ നിറങ്ങളില്ലേ..?" അവനതൊന്നു നോക്കുക പോലും ചെയ്യാതെ പറഞ്ഞു.. "പുഴുപ്പല്ലായിരിക്കും..." എനിക്ക് ദേഷ്യം വന്നു.. ഇപ്രാവശ്യവും അവന്റെ അച്ചന്റെ കയ്യിലുള്ള വലിയ കോടാലിയും കത്തിയും അവനെ രക്ഷിച്ചു.. പിന്നീട് അത് ഞാന്‍ ആരൊടും പറയാന്‍ പോയില്ല. എനിക്കു മാത്രമുള്ള തോന്നലാണെങ്കില്‍ അതിന്റെ നാണക്കേടോര്‍ത്ത് ഞാന്‍ ചോദിക്കാതെ വിട്ടു..

ഒരു ദിവസം അവളെന്തോ പറഞ്ഞത് കേട്ട് ഞാന്‍ ചിരിച്ചപ്പോള്‍ പിന്നെയും എന്റെ വിരലുകള്‍ പിടിച്ച് തിരിച്ചെന്നെ വേദനിപ്പിച്ചു "അയ്യേ.. ചെക്കാ.. നിന്റെ പല്ലിനിടയില്‍ ഉമിക്കരിയിരിക്കുന്നു.."

അവള്‍ തൊട്ടു കാണിച്ച ഭാഗത്ത് നാക്കു കൊണ്ടുഴിഞ്ഞ് തുപ്പിക്കളഞ്ഞ് ഞാന്‍ അവളോട് ചോദിച്ചു.. "എന്നും നിന്റെ പല്ലിനിടയില്‍ എന്താ പല നിറങ്ങളില്‍ പറ്റി പിടിച്ചിരിക്കുന്നതെന്നു.. " അല്ലെങ്കില്‍ എന്തു ചോദിച്ചാലും ഒന്നിനു പത്തായി മറുപടി തരുന്ന അവളതിനു മാത്രം മറുപടി പറഞ്ഞില്ല.. മാത്രമല്ല അവളുടെ ചിരിയും കുറഞ്ഞു. രണ്ടു മൂന്നു ദിവസം കഴിഞ്ഞപ്പോള്‍ ഒരു വെള്ളിയാഴ്ച രാവിലെ മദ്രസയില്ലാത്തതു കൊണ്ട് നേരത്തേ ക്ലാസിലെത്തി.. അന്നവള്‍ മാത്രം ഉണ്ട് ക്ലാസില്‍.. അവള്‍ ചിരിച്ചില്ല..
എന്നെ കൈ കാട്ടി വിളിച്ചു..

"ചെക്കാ.. ഇങ്ങു വന്നേ.. ഒരു സൂത്രം കാണിക്കാം..." അടുത്ത് ചെന്ന എന്റെ അടുത്തേക്ക് കുറച്ച് കൂടി ചേര്‍ന്ന് നിന്നു.. എന്നേക്കാള്‍ കുറച്ച് കൂടെ പൊക്കം കുറവുള്ള അവളുടെ മുടിയിലെ മണമാണു ഞാന്‍ ശ്രദ്ധിച്ചത്.. ഹോ.. ഇതു കുറച്ചു ദിവസം മുന്‍പായിരുന്നെങ്കില്‍ തലയില്‍ വെളിച്ചെണ്ണ തേച്ചപ്പോള്‍ കരഞ്ഞതിനു ഉമ്മാടെ കയ്യില്‍ നിന്നും അടി വാങ്ങിക്കാതെ സന്തോഷത്തോടെ നിന്നു കൊടുത്തേനെ ഞാന്‍.. അന്നു മുതലാണെന്നു തോന്നുന്നു ഞാന്‍ വെളിച്ചെണ്ണയുടെ മണം ഇഷ്ടപ്പെട്ട് തുടങ്ങിയത്.

"ഇങ്ങട്ട് നോക്ക് ചെക്കാ.." എന്നു പറഞ്ഞ് അവള്‍ ബാഗ് തുറന്നപ്പോഴാണ് ഞാന്‍ ചിന്തയില്‍ നിന്നും ഞെട്ടിയുണര്‍ന്നത്.. ബാഗിന്റെ ഉള്ളില്‍ ഒരു വശത്ത് മറ്റൊരു കീശയും കൂടെയുണ്ട്. അവളതു തുറന്ന് അതിനുള്ളില്‍ കയ്യിട്ട് ഒരു പിടി ചോക്ക് കഷ്ണങ്ങള്‍ എന്റെ കയ്യിലേക്ക് വെച്ച് തന്നു.. പല പല നിറങ്ങളിലുള്ളവ.. അതു കിട്ടിയ സന്തോഷത്തില്‍ അവള്‍ക്കൊരു ചിത്രം വരച്ച് കാണിക്കാനുള്ള ആഗ്രഹത്തില്‍ സ്ലേറ്റ് എടുത്ത ഉടന്‍ അവളെന്റെ വിരലില്‍ പിടുത്തമിട്ടു.. അവളെന്റെ വിരലുകള്‍ പിരിച്ച് വേദനിപ്പിക്കുന്നതിനു മുന്നേ കൈ വലിച്ച് ഞാന്‍ പറഞ്ഞു.. "ഞാന്‍ ചിത്രം വരക്കാന്‍ പൂവായിരുന്നു..."

"ഇതു ചിത്രം വരക്കാനുള്ളതല്ല ചെക്കാ.." പിന്നെയും അവള്‍ ചിരിച്ചു.. ഇപ്രാവശ്യം അവളുടെ ചിരിയില്‍ ഒരു കള്ളത്തരമുള്ള പോലെ എനിക്കു തോന്നി.. ശെരിയാണല്ലോ.. ഇതു വരെ ആയിട്ടും ഇവളുടെ സ്ലേറ്റില്‍ സാധാരണ പെന്‍സിലിന്റേതല്ലാതെ മറ്റൊരു നിറവും ഞാന്‍ കണ്ടിട്ടില്ല.. പിന്നീടന്ന് മുതല്‍ ഞങ്ങളുടെ ചിരികള്‍ക്ക് ഒരേ നിറങ്ങളായിരുന്നു..!

സെയിം പിച്ച്..

2015-04-09T12:18:00.002+03:00

നട്ടുച്ച..
നല്ല ചൂട്..
ശുക്കൂര്‍ വെശന്നെടങ്ങേറായി ഉച്ചക്ക് ഊണു കഴിക്കാന്‍ വീട്ടിലേക്ക് കാറോടിച്ച് വരുന്ന വഴിയാണു ഒരു ഫിലിപ്പീനി പെണ്ണ് കൈ കാണിച്ചത്.. അല്പം പ്രായമുണ്ടെങ്കിലും നല്ല മുഖശ്രീയുള്ള പെണ്ണ്.. വെറുതെ വെയിലു കൊണ്ട് കരിയെണ്ടാന്നു കരുതി കാറു നിര്‍ത്തി കേറിക്കോളാന്‍ പറഞ്ഞു.

സാമാന്യ മരാദ പ്രകാരം ശുക്കൂറ് ചോദിച്ചു "എങ്ങോട്ടാ..?"
"ചോറുണ്ണാന്‍ വീട്ടിലേക്ക് പോകുവാ.."
"ആണോ..? സെയിം പിച്ച്.. സെയിം പിച്ച്.. ഞാനും ചോറുണ്ണാന്‍ പോകുവാ.."

ചോറുണ്ണാന്‍ പോകുവാണെന്നു പറഞ്ഞതിനു ഇത്രയും എക്സൈറ്റെഡ് ആകാന്‍ മാത്രമെന്താണെന്ന് മനസ്സിലാകാതെ കണ്ണുമിഴിച്ച് വാ പൊളിച്ച പെണ്ണിനെ മൈന്റാക്കാതെ ഷുക്കൂര്‍ അടുത്ത ചോദ്യം പൊട്ടിച്ചു..

"വീട്ടിലെന്താ കറി..?"
"മീന്‍ ആയിരിക്കും.. "
"ആഹാ.. പിന്നേം സെയിം പിച്ച്.. എന്റെ വീട്ടിലും മീന്‍ തന്നെ ആയിരിക്കും.." ശുക്കൂറീനു പരമ സന്തോഷം..
"ഞാന്‍ ചോറു തിന്നിട്ട് കെടന്നൊറങ്ങും.. നീയെന്തു ചെയ്യും...?"
"ഞാനും കെടന്നൊറങ്ങും.." ഒരു ദീര്‍ഘ നിശ്വസത്തോടെ പെണ്ണു തുടര്‍ന്നു.. "അല്ലാണ്ടെന്തു ചെയ്യാന്‍.."

ഷുക്കൂറും നീട്ടിയൊരു ദീര്‍ഘ നിശ്വാസം പെടച്ച് പെണ്ണിനൊരു കമ്പനി കൊടുത്ത്.
"ഹ ഹ ഹ. സെയിം...." പിച്ചെന്നു മുഴുവന്‍ പറയുന്നതിനു മുന്നേ തന്നെ പെണ്ണ് എടേക്കേറി പറഞ്ഞു.. "സെയിം പിച്ചല്ലേ എനിക്കറിയാം.."

ശ്ശോ.. അല്പം ഓവെറായെന്നു തോന്നുന്നു.. എന്നാലും സാരമില്ലെന്നുറക്കെ പ്രഖ്യാപിച്ച് ഒരു കുലുക്കവുമില്ലാതെ ഇരിക്കുകയാണു ശുക്കൂര്‍.. ഇടക്കൊന്നു നിശബ്ദനായി താടി ചൊറിഞ്ഞ് സ്റ്റിയറിങ്ങില്‍ രണ്ട് തട്ടൊക്കെ തട്ടി ചോദിച്ചു..
"എന്തായാലും നമ്മളു രണ്ടാളും വീട്ടീ പോയി തിന്നാന്‍ പോണാതും ചെയ്യാന്‍ പോണാതുമെല്ലാം ഒരേ കാര്യം തന്നെയല്ലേ...?"
"അതേ...!!"
"എന്നാ നമുക്കൊരു കാര്യംചെയ്താലോ..?"
"എന്താ..?"
"നമുക്ക് എന്റെ വീട്ടീ പോയി മീന്‍ കറീം കൂട്ടി ചോറൊക്കെ തിന്ന്... സെയിം പിച്ചാക്കിയാലോ.."

ഹോ.. എത്ര സന്മനസ്കനായ ചേട്ടന്‍.. കാറില്‍ ലിഫ്റ്റ് തരുന്നു.. വീട്ടിലേക്ക് ക്ഷണിക്കുന്നു.. ഉറങ്ങാന്‍ സൗകര്യം ചെയ്തു തരുന്നു.. പെണ്ണിനു സന്തോഷം.. നാണം..
"ആ.. അതു നല്ല ഐഡിയ.. എല്ലാം ചേട്ടന്റെ ഇഷ്ടം പോലെ.."

ഇപ്പോ തന്നെ കണ്ട തന്നെ ഇത്രക്കും വിശ്വസിച്ച് ഒരു പേടിയുമില്ലാതെ തന്റെ ക്ഷണം സ്വീകരിച്ചതില്‍ ശുക്കൂറിനു പരമ സന്തോഷം.. സന്തോഷം ഒട്ടും കുറക്കാതെ തന്നെ വീടിനു മുന്നില്‍ വണ്ടി പാര്‍ക്ക് ചെയ്യാന്‍ തിരിച്ചപ്പോഴാണു ആകാംഷയും അത്ഭുതവും സന്തോഷവും എല്ലാം കൂടെ കുത്തി നിറച്ച് പെണ്ണിന്റെ ചോദ്യം വന്നത്..

"ദൈവമേ.. ഇതു നമ്മുടെ പോക്കര്‍ക്കാടെ വീടല്ലേ...??"
ഏഹ്.. ചോദ്യം കേട്ടപ്പോ ഡബിള്‍ അത്ഭുതം ശുക്കൂറിനു..
"അതേലോ... മൂപ്പരെ എങ്ങനെ അറിയും..? എന്റെ വാപ്പായാ..!!"

അപ്പ തന്നെ നിഷ്കളങ്കമായ മറുപടിയും വന്നു..
"പണ്ടൊക്കെ മൂപ്പരും എനിക്കിത് പോലെ ലിഫ്റ്റ് തരാറുണ്ടായിരുന്നു...!!"

അല്‍കുല്‍ത്ത് കോമ്പ്രമൈസ് - PART 3

2015-04-09T12:18:00.001+03:00

വീട്ടിലെ ബെല്ലു നിര്‍ത്താതെ അടിക്കുന്നത് കേട്ടിട്ടാണു അടുക്കളയില്‍ നിന്നു സൂറ പാഞ്ഞു വന്നത്.. തുറന്ന വാതിലിനു മുന്നില്‍ വിയര്‍ത്തു കുളിച്ച് ദേഹത്താകെ ചളി പുരണ്ട്. എടങ്ങേറായി നിക്കുന്ന ജബ്ബാര്‍.. അനക്കിന്നെ തല്ലാന്‍ ധൈര്യണ്ടോടീ എന്ന ഭാവത്തില്‍ നെഞ്ചും വിരിച്ച് ജയനെ പോലെ നിക്കാറുള്ള മന്‍ഷ്യനാ.. അതുമല്ലെങ്കില്‍ മുഖം നിറയെ സ്നേഹമൊളിപ്പിച്ച ചിരിയോടെ പ്രേം നസീര്‍.. ഇതു രണ്ടുമല്ലാതെ ഇദാദ്യായിട്ടാ ക്ലൈമാക്സ് സ്സീനില്‍ നിന്നു കയറി വരുന്ന വില്ലന്റെ പോലെ നിക്കുന്നത്..

"ഇന്റള്ളാ.. ഇങ്ങക്കിതെന്താ പറ്റ്യേ..? ഇങ്ങളു ഓപ്രഷന്‍ ചെയ്യാന്‍ പോയതാണോ അതോ കിളിമാസു കളിക്കാന്‍ പോയതാണോ..?? സത്യം പറ.."
"ഇയ്യൊരു മൊന്ത വെള്ളമിങ്ങോട്ടെടുക്ക്.."
"ഇങ്ങളു കാര്യം പറയിന്റെ മന്‍ഷ്യാ..? ഞാനപ്പഴേ പറഞ്ഞതല്ലേ ആവശ്യല്ലാത്ത പണിക്കു പോണ്ടാന്നു.. ഇങ്ങളു കേട്ടാ...??"

സൂറ നെഞ്ചത്തടിയും നെലോളിയും തുടങ്ങിയത് കണ്ട ജബ്ബാറ് തന്നെ പോയി വെള്ളമെടുത്തു കുടുച്ചു തിരിച്ചു വന്നു.. എന്നിട്ടും സൂറാക്കൊരു കുലുക്കവുമില്ല.. എടുത്ത കോണ്ട്രാക്റ്റ് പൂര്‍ത്തിയാക്കാതെ ഒരു അടി പോലും മുന്നോട്ടില്ലാ എന്ന മട്ടില്‍ ആഞ്ഞു കരയുകയാണു സൂറ. വല്ലതും പറഞ്ഞു തുടങ്ങിയാലും കരഞ്ഞു തുടങ്ങിയാലും പിന്നെ കെട്ട്യോന്‍ മരിക്കാന്‍ പോകാണെങ്കില്‍ പോലും ഓളു തീരുമാനിച്ചത്രയും പറയാണ്ടും കരയാണ്ടും നിര്‍ത്തൂല

സഹികെട്ട ജബ്ബാര്‍ എണീച്ച് പോയി ഒരു ഗ്ലാസ് വെള്ളം എടുത്ത് സൂറാക്കും കൊടുത്തു.. വെള്ളം കുടിക്കാന്‍ കരച്ചില്‍ നിര്‍ത്തിയ ഗ്യാപ്പില്‍ ജബ്ബാര്‍ ഗോളടിച്ചു..

"ഇനി മേലില്‍ ഇയ്യെന്നെ ഉപദേശിക്കാന്‍ വരരുത്..!!"
എന്തും സഹിക്കാം.. പക്ഷേ ഒരു ഭര്‍ത്താവിനെ ഉപദേശിക്കാനുള്ള ഭാര്യയുടെ അവകാശത്തിന്റെ കടക്കല്‍ കത്തി വെച്ചാല്‍ ഏതു ഭാര്യ സഹിക്കും..?? സൂറയും പ്രതികരിച്ചു..
"ഹും.. അതിങ്ങളു വേറെ പെണ്ണു കെട്ടീട്ട് ഓളോടു പറഞ്ഞാ മതി.."
"എന്നാ പിന്നെ അങ്ങനാകാം.. ഇയ്യ് കരഞ്ഞോ..."

നേരത്തെ കരഞ്ഞ കരച്ചിലിന്റെ ക്ഷീണം പൂര്‍ണ്ണമായിട്ടും മാറീട്ടുണ്ടായിരുന്നില്ല.. പക്ഷേ ഇങ്ങനെയൊക്കെ കേട്ടാല്‍ പിന്നെ കരയാണ്ട് ഒരു ഭാര്യയായിരിക്കുന്നതിലെന്താണര്‍ത്ഥം.. ക്ഷീണമൊന്നും വകവെക്കാതെ സെല്‍ഫെടുക്കാത്ത ഡീസല്‍ എഞ്ചിന്‍ സ്റ്റാര്‍ ചെയ്യുന്ന പോലെ 'ഇക്കറിയാം മന്‍ഷ്യാ.... ഇങ്ങളു വേറെ കെട്ടൂന്ന് ഇക്കറിയാം.. ഇക്കിനിയാരുണ്ടേ...' എന്നു പറഞ്ഞ് വീണ്ടും നെഞ്ചത്തിടിയും നിലവിളിയും ആരോംഭിക്കുന്നതിനു മുന്നേ തന്നെ ജബ്ബാര്‍ സൂറാന്റെ വായ് പൊത്തി എഞ്ചിന്‍ ഓഫ് ചെയ്തു..

"ഹോ ഒന്നു നിര്‍ത്തെടീ പോത്തേ.. ഞാനിവ്ടെ ജീവന്‍ പണയപ്പെടുത്തി അതി സാഹസികമായി വന്നിരിക്കുമ്പോ അനക്കെന്താ തമാശ കളിയാണോ..?"
"അല്ലെങ്കിലും ഇങ്ങക്കീ പണയം വെക്കുന്ന പരിപാടി ഒരു ഹരമല്ലേ.. ഇപ്പ ഉള്ള ജീവനും കൂടേ കൊണ്ടോയി വെച്ചാ..??"

പണയം എന്നു കേട്ടതോടെ കരച്ചില്‍ ഒന്നൊതുക്കി സൂറ അലെര്‍ട്ടായി.. ഹോ ഇവള്‍ടെ ഒരു കാര്യം.. ചെല സമയത്ത് വായീന്നെന്തെങ്കിലും വീഴാന്‍ കാത്തു നില്‍ക്കും.. കാര്യം ആളു നിഷ്കളങ്കയാണെങ്കിലും ഇങ്ങനത്തെ കാര്യങ്ങള്‍ക്കു ഒരു നിഷ്കളങ്കത്തവും വിവരക്കുറവും ഇല്ല.. ഇനിയീ പണയത്തുമ്മേ കേറി പിടിച്ച് കുറിക്കമ്പനീലും സൊസൈറ്റീലുമെല്ലാം പണയം വെച്ചിട്ടുള്ള ഓള്‍ടെ സ്വര്‍ണ്ണത്തിന്റെ കണക്കു ബുക്കിപ്പ തുറക്കും.. അതിനു മുന്നു രക്ഷപ്പെടാനൊരു വഴി കാണിക്കിന്റെ റബ്ബേ...

"ഹും.. അന്റൊരു ബുദ്ധിയും തേങ്ങേന്റെ മൂടും.. ഇയ്യ് പറഞ്ഞ ബുദ്ധി പ്രയോഗിച്ചിട്ട് ഇന്റെ ജീവന്‍ പോയേനേ.. ആ പാത്തൂന്റേം..."

മന്ദ ബുദ്ധികള്‍ പോലും തന്റെ ബുദ്ധിയെ കുറ്റം പറഞ്ഞാല്‍ പ്രതികരിക്കും.. അപ്പോ പിന്നെ സാമാന്യ ബുദ്ധി പോരാതെ അത്യാവശ്യം കുരുട്ടു ബുദ്ധികൂടെ കയ്യിലുള്ള സൂറാ വിടുമോ..?
"ഹും.. ന്നാ പിന്നെന്തൂട്ട്നാ മന്‍ഷ്യാ ഇന്നെ കെട്ടി കൊട്ന്നത്..? ഇതൊക്കെ നോക്കീട്ട് കെട്ട്യാ പോരായിരുന്നോ...?"
"ഹും.. ഇയ്യിത് കേക്കിന്റെ പൊന്നേ... അടങ്ങ്.."
ജബ്ബാര്‍ അവിടെ ചെന്നതു മുതല്‍ സൈക്കിളും തള്ളി ഓടിയത് വരെ വിവരിച്ചു.. എല്ലാം കേട്ടു കഴിഞ്ഞ സൂറ പറഞ്ഞു..

"ഇതിന്റെ ബുദ്ധിയുടെയോ ഇങ്ങടെ ബുദ്ധിയില്ലായ്മയുടേയോ കൊഴപ്പല്ല മന്‍ഷ്യാ.."
ആഹാ കിട്ടിയ ചാന്‍സില്‍ ഇവളു താങ്ങുകയാണല്ലോ... അതിനു മറുപടി പറയാന്‍ വന്ന ജബ്ബാറിന്റെ ചൂണ്ടു വിരലില്‍ നിര്‍ത്തി തടഞ്ഞ സൂറ പ്രഖ്യാപിച്ചു..

"വില്ലന്‍ ഇങ്ങടെ ട്റൗസറു തന്നെ.."
"അതിനിക്കും തോന്നി.." ജബ്ബാര്‍ തല ചൊറിഞ്ഞു കണ്ണുരുട്ടി..
"ന്നിട്ടെന്തിനാ മന്‍ഷ്യാ ഇങ്ങളിന്റെ ബുദ്ധിയേ കുറ്റം പറഞ്ഞത്..?"
"പോത്തേ.. അവിടുന്നു തിരിച്ചോടുന്ന വഴിക്കാടീ ശെരിക്കും ആലോയ്ച്ചത്.."
"ന്റെ റബ്ബേ.. അപ്പഴെങ്കിലും ഇന്നൊന്നു ഓര്‍ക്കാന്‍ തോന്നിയല്ലോ..." സൂറാക്കു സന്തോഷം.. ജബ്ബാറിനു ദേഷ്യം വന്നെങ്കിലും പറയാന്‍ വന്നതു നിര്‍ത്തീല..
"ഇന്നെയല്ല പോത്തേ.. ഇയ്യ് പറഞ്ഞ കാര്യം..."
"ഓഹ്..."
"ഇയ്യ് പറഞ്ഞത് വെച്ച് നോക്കിയാല്‍ ഇന്റെ രാശിയൂടെ ശുക്രനും വള്ളി ട്റൗസറിന്റെ കുചനും തമ്മില്‍ ഒട്ടും യോചിക്കാന്‍ സാധ്യതയില്ലാ .."

സൂറ അഭിമാനത്തോടെ തലയൊന്നു പൊക്കി തട്ടത്തിനെ രണ്ടറ്റവും പിടിച്ചൊന്നു വലിച്ച് നേരെയാക്കി പുഞ്ചിരിച്ചു..
"കണ്ട കണ്ട..ഇന്നിട്ടെന്തായി..?"
"അങ്ങനെ ഞാന്‍ നേരെ പൊഴക്കരേലെ ആ ഒഴിഞ്ഞ പറമ്പിലേക്ക് സൈക്കിള്‍ തിരിച്ചു.."
"അതന്തിനാ മന്‍ഷ്യാ...??"
"ന്നിട്ട് ഇനി ഇയ്യും ഞാനും തമ്മില്‍ ഒരു ബന്ധവുമില്ല ഹിമാറേന്നും പ്റഞ്ഞ് ന്റെ നിക്കറൂരി പൊഴേല്‍ക്കെറിഞ്ഞു.."
"നല്ല കാര്യം... ഇപ്പഴാ ഇക്ക് സമാധാനായത്.. ഇനിയിങ്ങളു നിക്കറിടൂലല്ലാ.."
"പക്ഷേ സൂറാ.. നിക്കറൂരിയപ്പഴാ പ്രശ്നായത്..."
"ഏഹ..?"
"പിന്നെ, ഇന്നെ തല്ലാന്‍ ന്നാട്ടാരു മുഴുവനും ഓടി വന്നപ്പഴാ ഞാനറിഞ്ഞത്... കടവത്ത് പെണ്ണുങ്ങള്‍ കുളിക്കുന്നുണ്ടായിരുന്നൂന്ന്.."

"ന്റെ റബ്ബേ.. ഇയ്യിതൊന്നും കാണുന്നില്ലെ പടച്ചോനേ.." യാതൊരു സ്റ്റാര്‍ട്ടിങ്ങ് ട്രബളുമില്ലാതെ തന്നെ എഞ്ചില്‍ സ്റ്റാര്‍ട്ടായി സൂറ കരയാന്‍ തുടങ്ങി.. ഇപ്രാവശ്യം അത്യാവശ്യം ശ്കതിയായ കരച്ചില്‍ തന്നെ.. പക്ഷേ കരച്ചില്‍ കേട്ട് ജബ്ബാറിനു പ്രാന്തു പിടിച്ചില്ല.. തന്നോടുള്ള സ്നേഹമല്ലേ ഓളീ തൊണ്ട കീറി പ്രകടിപ്പിക്കുന്നത്..? ഓള്‍ടെ മനസ്സു തൊര്‍ന്ന് എത്ര വേണോങ്കിലും ഓളു കരയട്ടെ.. ന്റെ സൂറാക്കിന്നോടിത്രേം ഇഷ്ടണ്ടായിരുന്നാ..? സന്തോഷം കൊണ്ട് ജബ്ബാറിന്റെ കണ്ണുകള്‍ നിറഞ്ഞു.. ഹൃദയം ആനന്ദ നൗകയിലേറി എങ്ങോട്ടെന്നില്ലാതെ അലയാന്‍ തുടങ്ങി..

"ഇയ്യ് കരയെണ്ടാ സൂറാ.. ഇക്കൊന്നും പറ്റീലല്ലോ..??" സൂറാനെ തന്റെ നെഞ്ചോട് ചേര്‍ക്കാന്‍ ശ്രമിച്ച ജബ്ബാറിനെ തള്ളിമാറ്റി സൂറ.. എന്നിട്ട് തന്റെ കൈകൊണ്ട് ജബ്ബാറിന്റെ നെഞ്ചത്ത് നാലിടി.. ഇടിയോടോപ്പം ഇടിയുടെ താളത്തില്‍ കരച്ചിലിന്റെ സംഗതികളും മാറി വന്നു.. കണ്ണില്‍ നിന്നും ഒലിച്ചിറങ്ങിയ കണ്ണീരു പുറം കൈ കൊണ്ട് തുടച്ച് തുടച്ച് മൂക്കു പിഴിഞ്ഞ് തന്റെ തട്ടത്തിന്റെ തുമ്പില്‍ തുടക്കാന്‍ പോയ കൈ ഒന്നു സ്റ്റക്കായി.. പിന്നെ ഡയറക്ഷന്‍ മാറി നേരെ ജബ്ബാറിന്റെ ഷര്‍ട്ടില്‍ തേച്ചു..

"ഇങ്ങക്ക് തല്ല് കിട്ടേ കിട്ടാണ്ടിരിക്കേ ചെയ്യട്ടെ.. അതല്ല ഇന്റെ പ്രശ്നം..."
"ഏഹ്...??" വഴിതെറ്റി അലഞ്ഞ ആനന്ദ നൗക ഒരൊറ്റ നിമിഷം കൊണ്ട് സുനാമിയില്‍ പെട്ട പോലെ ആയി..
"ഇയ്യ് പിന്നെന്തൂട്ടിനാടീ ഇത്രേം കരഞ്ഞ് എടങ്ങേറായത്..?"

"ഇങ്ങളവ്ടെ പെണ്ണുങ്ങളു കുളിക്കുന്നത് കണ്ടിട്ട് തന്നല്ലേ മന്‍ഷ്യാ ട്രൗസരൂരിയത്...??" നെഞ്ചത്തടിച്ച് പൊട്ടിക്കരയുന്ന സൂറാനെ എന്തു ചെയ്യണമെന്നറിയാതെ തലയില്‍ കൈ വെച്ച് ജബ്ബാറിരുന്നു..
"ന്നാലും ന്റെ സൂറാ....!!"

(നിർത്തി... ഇനി തുടരുന്നില്ല)

അല്‍കുല്‍ത്ത് കോമ്പ്രമൈസ് - PART 2

2015-04-09T12:18:00.000+03:00

വീട്ടുകാരെല്ലാവരും കൂടെ സംസാരിച്ച് കൊളമായി ഒരു മൂന്നാം ലോക മഹായുദ്ധം പൊട്ടിപ്പുറപ്പെടും എന്ന മട്ടില്‍ നിക്കുമ്പഴാണ് യുനൈറ്റെഡ് നാഷന്‍ പ്രതിനിധി പോലെ ജബ്ബാറിന്റെ അരങ്ങേറ്റം നടന്നത്. വന്ന പാടെ അരയില്‍ നിന്നും നഖംവെട്ടിയെടുത്ത് ഹാളില്‍ കിടന്നിരുന്ന ടീപ്പോയിലേക്കിട്ടു തലയുയര്‍ത്തി മീശ പിരിച്ച് നെഞ്ചു വിരിച്ച് എല്ലാവരേയുമൊന്നു നോക്കി..

നഖം വെട്ടി കണ്ടിട്ടു ആള്‍ക്കാര്‍ക്കൊരു കുലുക്കവുമില്ലെന്നു കണ്ട് ഒന്നു ചമ്മിയ ജബ്ബാര്‍ അവരെ ഞെട്ടിക്കാനുള്ള അടുത്ത കരുനീക്കം നടത്തി
ഇങ്ങളീ തല്ലും ബഹളവും ഒന്നു നിര്‍ത്തുന്നുണ്ടോ..?
"ന്താ ജബ്ബാറെ അന്റെ പ്രശ്നം..?"
"ഇറാക്കിലെ കാര്യം ഇത്ര വഷളായതെന്താ..?"
"ഏഹ്..?" ഇവനിതെന്തൂട്ടാ പറയുന്നത് എന്ന് കരുതി എല്ലാവരും പരസ്പരം നോക്കി... ആരും ഒന്നും മിണ്ടുന്നില്ല.. ആവേശം മൂത്ത ജബ്ബാര്‍ തൊട്ടപ്പുറത്ത് പെങ്ങളുടെ കാര്യം ആലോചിച്ച് വിഷമിച്ച് നിന്നിരുന്ന ഇളയവന്റെ രണ്ടു തോളിലും പിടിച്ച് രണ്ടു കുലുക്കു കുലിക്കി വെടി പൊട്ടുന്ന ശബ്ദത്തില്‍ അടുത്ത ചോദ്യം പൊട്ടിച്ചു..
"ഡാ ശുക്കൂറെ.. സിറിയയില്‍ എന്താ പറ്റിയേ..?"

പെട്ടെന്നുള്ള കുലുക്കലും ശബ്ദവും ടെന്‍ഷനും എല്ലാം കൂടെ ആയപ്പോള്‍ ഷുക്കൂറു ഞെട്ടി ഇപ്പ കരയും എന്ന മട്ടിലായി..
"ന്റെ പൊന്നു ജബ്ബാറിക്കാ.. സിറിയയില്‍... സിറിയിയയില്‍.." ഷുക്കൂര്‍ പൊട്ടിക്കരയാന്‍ തുടങ്ങി.. ജബ്ബാറിനു പരമ സന്തോഷം.. ആ കരച്ചില്‍ ശ്രദ്ധിക്കാതെ നേരെ അവിടെ ഇരുന്നിരുന്ന കാര്‍ന്നോരെ തോണ്ടി..

"മമ്മാലിക്കാ.. ഇങ്ങളു പറ... ശ്രീലങ്കയിലെന്താ പറ്റ്യേ..? അതിങ്ങക്കറീയോ..?"
ചെവിക്കു പതം വന്നു തുടങ്ങിയ മമ്മാലിക്കാടെ ഇയര്‍ഡ്രം ജബ്ബാറിന്റെ അട്ടഹാസം നോര്‍മലായിട്ടാണു ഡീകോഡ് ചെയ്തെടുത്തത്.. മൂപ്പരു നിസ്സംഗതയോടെ ജബ്ബാറിനെ നോക്കി..

"ജബ്ബാറെ ഇയ്യൊന്നടങ്ങ്.. ഇവ്ടെ അഷര്‍പ്പും പാത്തുമ്മയും നമ്മിലെന്താ നടന്നേന്നു ചോയിക്ക്.. അന്റൊരു ഒലക്കമ്മേലെ ശ്രീലങ്ക.."
"ന്റെ മമ്മാലിക്കാ.. ഇവിടെയെല്ലാം ബാഹ്യ ശക്തികളുടെ എടപെടലുകളാണു.. പ്രശ്നങ്ങളും യുദ്ധവും ഉണ്ടാക്കിയത്.."
"അതിനു..?"
മമ്മാലിക്കാക്കു വീണ്ടും നിസ്സംഗത.. ഇപ്രാവശ്യവും മമ്മാലിക്കാക്കു ഒരു കുലുക്കവും കാണാതായപ്പോള്‍ വീണ്ടു ശുക്കൂറിനു നേരെ തിരിഞ്ഞു.. ചെക്കനാണെങ്കില്‍ കരച്ചിലൊക്കെ നിര്‍ത്തി ഒന്നു നോര്‍മലായി വരികയായിരുന്നു.. വീണ്ടും തന്റെ നേരെ തിരിഞ്ഞ ജബ്ബാറിനെ കണ്ടപ്പോള്‍ റിപ്പര്‍ ലോറി കണ്ട ഓട്ടോക്കാരെ പോലെ അവന്‍ വേഗം വാതിലിന്റെ പിന്നിലേക്ക് സൈഡായി..

"ശുക്കൂറെ.. അത് പോലെ ഇവിടെയും ബാഹ്യ ശക്തികള്‍ ഇടപെട്ടു കൂടാ.. അപചയം സംഭവിക്കാന്‍ സാധ്യതയുണ്ട്.. ഓരു രണ്ടാളും കൂടെ ഒറ്റക്ക് ഒരു സന്ധി സംഭാഷണം നടത്തി അന്തര്‍ധാര സജീവമാക്കട്ടെ... അനക്ക് മനസ്സിലായാ..?"

വാതിലിന്റെ മറവിലേക്ക് ഒന്നൂടെ ചാഞ്ഞ് നിറ കണ്ണുകളോടെ ഷുക്കൂര്‍ പറഞ്ഞു.."ഇങ്ങളെന്തു പ്രാന്താണു ജബ്ബാര്‍ക്കാ ഈ പറയുന്നത്.. മലയാളത്തീ പറയീന്‍.."
ഹും ഒരു മധ്യസ്ഥന്റെ സാങ്കേതികത്വം നിറഞ്ഞ വാക്കുകള്‍ക്ക് അല്പം പോലും മനസ്സിലാക്കാന്‍ കഴിയാത്ത വിവരദോഷികള്‍ എന്നു മനസ്സില്‍ പറഞ്ഞ് ജബ്ബാര്‍ തുടര്‍ന്നു..

"അവരെ രണ്ടാളേം ഒരു റൂമിലാക്കി വാതിലടക്ക്.. എന്നിട്ട് അവരു സംസാരിക്കട്ടെ ആദ്യം.."
"അതു വേണ്ട.. ഇവ്ടെ വെച്ചെന്നെ രണ്ടാലും ത്ലല്ലാന്‍ പോയതാ.. "

മദ്ധ്യസ്ഥന്റെ വാക്കുകള്‍ക്ക് പുല്ലുവില പോലും കല്പിക്കാതെയുള്ള ആള്‍ക്കാരുടെ ആറ്റിറ്റ്യൂഡ് കണ്ട ജബ്ബാറിനു സഹിച്ചില്ല.. മീശ വിറപ്പിച്ച് കണ്ണുരുണ്ട് ചുവന്നു വന്നു.. നെറ്റിചുളിച്ചു..

"ജബ്ബാറാ പറയണത് ഇങ്ങക്കിന്നെ വിശ്വാസമില്ലേ..?"
"ഉം.. എന്തെങ്കിലും പറ്റോ.. ജബ്ബാര്‍ക്കാ.." മൂത്ത ആങ്ങളക്കു ടെന്‍ഷന്‍..
"ഒന്നും പറ്റൂല.. എന്തെങ്കിലും സംഭവിച്ചാല്‍ ബാക്കി ഞാനേറ്റു.."
ഹും.. ന്റെ പെങ്ങക്കെന്തെങ്കിലും പറ്റ്യാ അന്റെ അവസാനം ഞങ്ങളു കഴിക്കും.. കള്ള ജബ്ബാര്‍ക്കാ എന്നു മനസ്സില്‍ പറഞ്ഞ് എല്ലാ ആങ്ങളമാരും ഒന്നിച്ച് തലയാട്ടി..

ശെരി എന്നും പറഞ്ഞ് ജബ്ബാര്‍ അഷര്‍പ്പിനേയും പാത്തുമ്മാനേയും വിളിച്ച് ഒരു റൂമിലാക്കി.. നിങ്ങളു രണ്ടാളും കൂടെ സമാധാനത്തില്‍ സംസാരിച്ച് ഒരു തീരുമാനത്തിലെത്ത് നിങ്ങടെ ജീവിതമാണെന്നു മറക്കെണ്ട എന്ന ഒരു ബെല്യക്കാട്ട് ഉപദേശവും കൊടുത്ത് വാതില്‍ പുറത്ത് നിന്നും അടച്ചു.. എന്നിട്ട് എങ്ങനുണ്ടെന്ന മട്ടില്‍ എല്ലാവരേയും നോക്കി ഒന്നുകൂടെ കണ്ണുരുട്ടി..

രണ്ടു പേരും കൂടെ റൂമില്‍ കയറി എന്തൊക്കെയോ സംസാരിച്ച് തുടങ്ങി.. ജബ്ബാര്‍ വാതിലില്‍ ചെവിയോര്‍ത്ത് നിന്ന് കേള്‍ക്കാന്‍ ശ്രമിച്ചെങ്കിലും എന്താണു സംഭവമെന്നു മനസ്സിലാകുന്നില്ല.. ആകാംഷാ ഭരിതമായ നിമിഷങ്ങള്‍.. ഇടക്ക് ഉച്ച കൂടുന്നുണ്ട്.. പെട്ടെന്നു റൂമില്‍ നിന്നും "ടപ്പേ.." എന്നൊരു ശബ്ദവും ഒപ്പം പാത്തൂന്റെ കരച്ചിലും കേട്ട് എല്ലാവരും കൂടെ വാതില്‍ തുറന്ന് അകത്തേക്കോടി.. അകത്ത് കയ്യും തിരുമ്മി നില്‍ക്കുന്ന അഷര്‍പ്പ്.. മുറിയുടെ ഒരു മൂലയില്‍ നിന്ന് മുഖം പൊത്തിക്കരയുന്ന പാത്തുമ്മ.. എന്താണു നടന്നതെന്നു എല്ലാവര്‍ക്കും ഒരുവിധം മനസ്സിലായപ്പോഴാണു അഷര്‍പ്പ് ഓടിവന്നു ജബ്ബാറിന്റെ കെട്ടി പിടിച്ചു..

"ന്റെ ജബ്ബാര്‍ക്കാ ഇങ്ങളു മുത്താണ്.. കൊറേ നാളായി ഇവളെ ഇന്റെ കയ്യകലത്തില്‍ ഇത്രയും സൗകര്യത്തിനു ഒന്നു കിട്ടീട്ട്.. നന്ദിയുണ്ട് ജബ്ബാര്‍ക്കാ..."

ഇതു കേട്ടപാടെ അഷര്‍പ്പിനെ തള്ളിമാറ്റി പിന്നിലേക്ക് വലിഞ്ഞു ജബ്ബാര്‍.. പാത്തൂന്റെ ആങ്ങളമാര്‍ അഷര്‍പ്പിന്റെ കോളറില്‍ പിടിച്ച് വലിച്ച് നെഞ്ചാം കൂട് കലക്കുന്ന സമയത്ത് ആരോ വിളിച്ചു പറഞ്ഞു.. മധ്യസ്ഥം പറയാന്‍ വന്ന അ ഹമുക്കിന്റെ ഇങ്ങട്ട് പിടിക്കെന്ന്.. ഇതു കേട്ടപാടെ, മധ്യസ്ഥനെ അംഗീകരിക്കാനും ബഹുമാനിക്കാനും അറിയാത്ത വിവരദോഷികളുള്ള ഈ കളിക്ക് ഞാനില്ല എന്നു പ്രഖ്യാപിച്ച് ജബ്ബാര്‍ പുറത്തേക്കോടി..
(ഇനീം തുടരും... നോക്കിക്കോ..)

അല്‍കുല്‍ത്ത് കോമ്പ്രമൈസ് - PART 1

2015-04-09T12:17:00.000+03:00

പാത്രത്തില്‍ ഒട്ടിപ്പിടിച്ചിരിക്കുന്ന ചായക്കറയും ചാരം മുക്കിയ ചകിരിയും തമ്മിലുള്ള യുദ്ധം മുറുകിയ സമയത്താണു അകത്തു നിന്നും എന്തൊക്കെയോ തട്ടി മറിയുന്ന ശബ്ദം സൂറാന്റെ ചെവിയില്‍ വന്നലച്ചത്..

ഒച്ച കേട്ട സൂറ കയ്യിലിരുന്ന പാത്രവും ചകിരിയും കൂടെ വാഷ് ബേസിനിലെ വെള്ളത്തിലേക്കിട്ട് അകത്തേക്കോടി. ഓടുന്ന ഓട്ടത്തില്‍ അടുക്കള സ്ലാബിന്റെ മുകളില്‍ അന്നത്തേ തേങ്ങ വെട്ടു കഴിഞ്ഞ ക്ഷീണത്തില് വിശമിച്ച് മൂളിപ്പാട്ടും പാടി കിടന്നിരുന്ന വെട്ടുകത്തിയും കൂടെ വലിച്ചെടുത്ത് "ഇന്നന്റെ മാര്‍ക്കം ഞാന്‍ കഴിക്കും കള്ളപ്പൂച്ചേ.. കളിച്ച് കളിച്ച് ഇന്റെ ബെഡ് റൂമിലായാ അന്റെ കളി..." എന്നു ചോദിച്ച് പാഞ്ഞു വന്ന സൂറ ബെഡ്റൂമിലെ കാഴ്ച കണ്ട് സഡന്‍ ബ്രേക്കിട്ടു. സൂറ അറിയാതെ തന്നെ കയ്യിലിരുന്ന വെട്ടുകത്തി ടിം എന്ന ശബ്ദത്തോടേ താഴെ വീണു..

സ്ലാബിന്റെ മുകളില്‍ ഒരു ശല്യവുമില്ലാതെ കിടന്നിരുന്ന എന്നെയെന്തിനാ അവിടുന്നു എടുത്ത് ഇവിടെ കൊണ്ടു വന്നിട്ടതെന്നു മനസ്സിലാകാതെ ഒന്നു തലപൊക്കിയ വെട്ടുകത്തി കിട്ടിയ ചാന്‍സില്‍ വീണിടത്ത് തന്നെ കിടന്ന് വീണ്ടും ഉറങ്ങനുള്ള വട്ടംകൂട്ടി.

റൂമില്‍ അലമാരയിലെ തുണികളെല്ലാം വലിച്ച് താഴെയിട്ട് അതിന്നുള്ളില്‍ വെച്ചിരുന്ന പഴയ ഇരുമ്പുപെട്ടി തുറന്ന് തന്റെ പഴയ വള്ളി നിക്കറെടുത്ത് കുടയുന്ന ജബ്ബാറിനെയാണു സൂറ കണ്ടത്. കല്യാണം കഴിഞ്ഞ അന്ന് ഇനിയൊരിക്കലും അതെടുക്കില്ലെന്നു സത്യം ചെയ്യിച്ച് പെട്ടിയിലിട്ടു പൂട്ടിയ നിക്കറാണത്. തീര്‍ന്നില്ല ജബ്ബാറതാ ടവ്വലില്‍ കെട്ടി സൂക്ഷിച്ചു വെച്ചിരുന്ന കരിങ്കല്‍ ചീളുകള്‍ എടുക്കുന്നു.. തന്റെ പ്രധാന ആയുധം കൂടെ എടുക്കുന്നത് കണ്ടപ്പോള്‍ സൂറാന്റെ ബാക്കി ജീവനും കൂടെ പോകുമെന്ന അവസ്ഥയായി..

സൂറ ഓടിച്ചെന്ന് ജബ്ബാറിന്റെ കയ്യില്‍ കേറിപ്പിടിച്ചു..
"ഇങ്ങളിതെന്തു ഭാവിച്ചാ മനുഷ്യാ..?? എന്താ ഇങ്ങടെ ഉദ്ധേശം..??"
"അനക്കെന്താണ്ടീ പോത്തേ.. മനുഷ്യന്‍ ഒരു നല്ല കാര്യത്തിനെറങ്ങുമ്പഴാണോ അന്റെ ഒരു അല്‍കുല്‍ത്ത് വര്‍ത്താനം..?"

"ന്റെ മന്‍ഷ്യാ ഇങ്ങളു തല്ലുണ്ടാക്കാന്‍ പോകുമ്പഴല്ലേ ഈ നിക്കറിടുന്നതും കല്ലെടുത്ത് കീശേലിടുന്നതും.. ഇന്നാരോട് തല്ലുണ്ടാക്കാനാ ഇങ്ങടെ ഈ പൊറപ്പാട്..?"

"ഇയ്യൊന്നു മിണ്ടാണ്ടിരിക്കിണുണ്ട സൂറാ.. ഞാനാരോട് തല്ലുണ്ടാക്കീന്നാ ഇയ്യീ പറയണത്..?"

"ഇങ്ങളീ ട്രൗസറിടുമ്പോ ഇക്ക് പേടിയാ.. മര്യാദക്കിങ്ങളതൂരിക്കോ.."
ഇതും പറഞ്ഞ് സൂറ നിക്കറിന്റെ വള്ളിയില്‍ കേറിപ്പിടിച്ചു.. അപ്രതീക്ഷിതമായ ആക്രമണം താങ്ങാനാകാതെ താഴേക്കു പോണോ അതോ ജബ്ബാറിന്റെ അരയില്‍ തന്നെ അള്ളിപ്പിടിച്ച് നിക്കണോ എന്ന കണ്‍ഫ്യൂഷനില്‍ നിന്ന നിക്കറിനു സപ്പോര്‍ട്ട് കൊടുത്ത ജബ്ബാര്‍ നിക്കര്‍ വലിച്ചു കയറ്റി വള്ളിതിരിച്ചു വാങ്ങി അരയില്‍ കെട്ടിയുറപ്പിച്ചു.

സൂറാ നിന്നു കരയാന്‍ തുടങ്ങി.. കരച്ചില്‍ കണ്ട ജബ്ബാര്‍ ഒന്നൊതുങ്ങി..
"ഇയ്യൊന്നടങ്ങ് പൊന്നേ.. ഞാനൊരു പ്രശ്നത്തിനു പോണില്ല.."
"ന്റിക്കാ.. ഇങ്ങളൊരു പ്രശ്നത്തിനും പോണ്ടാ.. ഈ വള്ളിസൗസറിട്ടാ പ്രശ്നം ഇങ്ങടടുത്തേക്ക് വന്നോളും. അതോണ്ടാ ഇങ്ങളിനി ഇതിടരുതെന്നു ഞാന്‍ സത്യം ചെയ്യിച്ചത്.."
"അനക്ക് പിരാന്താടീ.."

"പിരാന്തൊന്നുമല്ല.. ഇങ്ങളു പണ്ട് ഇന്നോട് ഇഷ്ടാന്നു പറയാന്‍ വന്നതോര്‍മ്മണ്ടാ..?"
"ഉം.. ഇണ്ട്.. അന്റെ മാമാന്റെ മോന്റെ കല്യാണം കഴിഞ്ഞു വരുമ്പ.."
"അന്നിങ്ങടെ വര്‍ത്താനം കേട്ട് പേടിച്ച് ഞാന്‍ ഇന്റുപ്പാന്നുറക്കെ വിളിച്ച് കരഞ്ഞപ്പോ, ഉപ്പ വരുന്നൂന്നു വിചാരിച്ച് ഇങ്ങളു പേടിച്ചോടീലേ..?"
"അതു ഞാന്‍ പേടിച്ചോടീതല്ല.. ഇച്ചിരി തെരക്കുണ്ടാര്‍ന്നതോണ്ട് സ്പീഡില്‍ നടന്നതാ.. ഇയ്യ് കാര്യം പറ.."

"ഹും.. ഇന്നിട്ട് ഇന്റെ മുന്നില്‍ മൂക്കും കുത്തി വീണു മൂക്കീന്നു ചോര വന്നില്ലേ.. അന്നു ഇങ്ങളിട്ടിരുന്നത് ഈ വള്ളി ട്റൗസറായിരുന്നു..."
"ഇയ്യെന്തൂട്ട് തേങ്ങ പിണ്ണാക്ക് കാണാനാണ്ടീ ഞാന്‍ വീണപ്പോ ഇന്റെ ട്രൗസറു നോക്കീത്.." എന്നു പറഞ്ഞ് ജബ്ബാററിയാതെ തന്നെ തന്റെ മൂക്കു തടവി..

"അതു മാത്രല്ല.." സൂറ പിണക്കത്തോടെ മുഖം കോട്ടി...
"പിന്നെ..?"
"ന്നെ കെട്ടിച്ച് തരൂലാന്നു പറഞ്ഞ ദേഷ്യത്തിനു ഇന്റുപ്പാനെ കല്ലെടുത്തെറിയാന്‍ ഇങ്ങളാ കലുങ്കിന്റെ അപ്പര്‍ത്തെ തെങ്ങിന്റെ താഴെ ഒളിച്ചിരുന്നപ്പോ തലേല്‍ ഒണക്ക മടലു വീണു ബോധം കെട്ടില്ലേ..?"
"ന്റെ റബ്ബേ..." അറിയാതെ തന്നെ തലയിലേക്ക് പോയ കയെടുത്ത് അരയില്‍ കുത്തി ജബ്ബാര്‍
"അന്നു ഓടിക്കൂട്യോരുടെ കൂട്ടത്തില്‍ ഞാനും ഇണ്ടായിരുന്നു.. അന്നും ഇങ്ങളിട്ടിരുന്നത് ഈ ട്രൗസറു തന്നെയാ.."
"ഹോ..."
"ഇനീംണ്ട് പറയാന്‍.. ഇങ്ങളു പണ്ടു പാടത്ത് ഫുട്ട്ബാളു ഹെഡ് ചെയ്യാന്‍ ചാടിയപ്പോ ചളീ ചവിട്ടി ഊരേം കുത്തി വീണേന്റന്നും ഇതെന്നെയായിരുന്നു ഇങ്ങളിട്ടിരുന്നത്.."
"പണ്ടാരം മതി.. അന്റെ ട്രൗസര്‍ പുരാണം.. ഇയ്യൊന്നു മന്‍സിലാക്കിക്കോ.. ഇന്റെ വീഴ്ചകളും ഈ വള്ളി ട്രൗസറും തമ്മില്‍ യാതൊരു ബന്ധവുമില്ല.. പിന്നെ ഞാന്‍ പ്രധാന ഓപ്പെറേഷനുകള്‍ക്കെല്ലാം പോകുമ്പോ ഇതിടുന്നു എന്നേ ഒള്ളൂ..."

"ആഹാ.. ഇന്നിങ്ങളാരെ ഓപ്പ്രഷന്‍ ചെയ്യാനാ പോണത്..?"
"കുന്തം.. നമ്മടെ കഴിഞ്ഞ അഷര്‍പ്പും പാത്തുമ്മയും തമ്മില്‍ നല്ല തല്ലാണത്രെ.. അവരു മിണ്ടാറില്ല.. ഇന്നതു ഒത്തു തീര്‍പ്പാക്കാന്‍ സ്വന്തക്കാരും ബന്ധൂക്കാരും എല്ലാം കൂടുന്നുണ്ട്.. ഇന്നെയാ മധ്യസ്ഥം പറയാന്‍ വിളിച്ചേക്കണേ.."

"അയ്നെന്തൂട്ടിനാ ഇങ്ങളീ കരിങ്കല്ലും പണ്ടാറോം കൂടെ കൊണ്ടോണാത്.. തല്ലാനല്ലല്ലോ ഇങ്ങളു പോണത്.. ആണോ..?"
"അതല്ലെടീ പോത്തേ.. ആ പാത്തൂന്റെ ആങ്ങളമാരു തടിമാടന്മാരു ശെരിയല്ല.. ഇപ്പ അവരാണു നാടു ഭരിക്കുന്നത്.. പിന്നെ പണ്ട് ഇന്റെ കൂടേ കൊറെ നടന്നതിന്റെ ബഹുമാനത്തിലാ ഇന്നെ വിളിച്ചേക്കണത്.."
"ന്നാ ശെരി.. ഇങ്ങളു നിക്കറിട്ടോ.. കല്ലു കൊണ്ടോണ്ടാ.. " എന്നും പറഞ്ഞ് ജബ്ബാറിന്റെ കയ്യിലിരുന്ന കല്ലുകെട്ടിയ കിഴി തട്ടിപ്പറിച്ചു വാങ്ങി... അലമാരയിലേക്കിട്ടു..

ആ ഗ്യാപ്പിനു സൂറ കാണാതെ മേശപ്പുറത്തിരുന്നിരുന്ന നഖംവെട്ടിയെടുത്ത് അതിലെ കത്തി നിവര്‍ത്തി തന്റെ മീശയുടെ ഒരു രോമം ചെത്തി മൂര്‍ച്ച ഉറപ്പു വരുത്തി പെട്ടെന്നു തന്നെ അരയില്‍ താഴ്ത്തി.. ഒരു ധൈര്യത്തിനിതിരിക്കട്ടെ എന്നു മനസ്സില്‍ പറയുകയും ചെയ്തു.. കല്ലൊളിപ്പിച്ച് കഴിഞ്ഞ് സൂറ തിരിഞ്ഞു..

"ന്റെ മന്‍ഷ്യാ ഒരു കാര്യം പറയാം.. ഈ കെട്ട്യോനും കെട്ട്യോളും തമ്മിലുള്ള തല്ലെല്ലാം കൂടുന്നത് സ്വന്തക്കാരു എടപെടുമ്പഴാണു.."
"അതു അനക്കെങ്ങനെ അറിയാം..?"
"ഹും.. അതൊക്കെ ഇക്കറിയാം.. ഞാനേ ഈ സീരിയലുകളു മുഴുമേനും കാണണത് വെര്‍തെയല്ല.. ഇങ്ങളീ കാര്യത്തില്‍ ഞാന്‍ പറയണ പോലെ ചെയ്യോ..?"
"അതെന്തൂട്ടാടീ...? പെണ്‍ ബുദ്ധി പിന്‍ബുദ്ധീന്നാ പറയാറു.. ന്നാലും ഇന്റെ മുത്തൊരു കാര്യം ചോയ്ചതല്ലേ.. പറ കേള്‍ക്കട്ടെ.."

ഇതു കേട്ടപ്പോള്‍ സൂറാക്കുഷാറു കൂടി.. തന്റെ മനോഹരമായ കണ്ണുകള്‍ വിടര്‍ത്തി ജബ്ബാറിന്റെ അടുത്ത് വന്ന് കാര്യ ഗൗരവത്തോടേ പറഞ്ഞു..
"ഇങ്ങളിന്നൊരു കാര്യം ചെയ്യ്.. അവ്ടെ ചെന്നിട്ട് എല്ലാരും കൂടെ സംസാരിക്കുന്നതിനു മുന്നേ ചെക്കനും പെണ്ണും കൂടേ ഒറ്റക്ക് സംസാരിക്കട്ടെ എന്നു പറ.. എന്നിട്ടെന്താകുംന്നു നോക്കലോ..?"

ആഹാ.. ഇവളു കൊള്ളാലോ.. ന്നാലും ഇന്റെ സൂറാന്നു പറഞ്ഞ് കെട്ടിപ്പിടീക്കാന്‍ പോയപ്പഴേക്കും ജബ്ബാറ് കണ്ട്രോള്‍ ചെയ്തു.. ഇവളീപറഞ്ഞതിനു വെല്യ വില കൊടുക്കെണ്ട.. കൊടുത്താല്‍ പിന്നെ അഹങ്കാരം കൂടി ഇന്റെ തലേ കേറിയിരിക്കും..

"ആഹ്... ഇതാണാ അന്റെ വെല്യ ആഗോള ബുദ്ധി.. നോക്കട്ടെ.." എന്നും പറഞ്ഞ് ഒരു പുച്ചം കലര്‍ത്തി വീട്ടീന്നെറങ്ങി.. കോലായില്‍ ചാരി വെച്ചിരുന്ന തന്റെ പഴേ സൈക്കിളെടുത്ത് ഇടത്തോട്ടും വലത്തോട്ടും ചരിഞ്ഞ് ആഞ്ഞു ചവിട്ടി ഗെയ്റ്റ് കടന്നു പോയി..

(തുടരും)

യോഗയും യോഗവും

2015-04-09T12:15:00.001+03:00

"ഞാനില്ലാണ്ടായാ അനക്കത് സഹിക്കാന്‍ കയ്യോ ന്റെ സൂറാ...??" ഓഫീസില്‍ നിന്നും വന്നു കയറിയ പാടേ പതിവു കൊഞ്ചലും കുറുകലുമില്ലാതെ ജബ്ബാറിന്റെ ചോദ്യം കേട്ട് സൂറയൊന്നു പകച്ചു..

"ഇങ്ങളെന്തു പിരാന്താ മന്‍ഷ്യാ ഈ പറയുന്നത്..? ഇമ്മാതിരി ചങ്കീ കുത്തണ വര്‍ത്താനൊന്നും പറയല്ലിന്റെ പൊന്നേ..."

വന്ന സ്പീഡില്‍ തന്നെ അടുക്കളയില്‍ പോയി ഒരു കവറെടുത്ത് കൊണ്ട് വന്ന് ഫ്രിഡ്ജിന്റെ‍ ഡോര്‍ തുറന്ന് ജബ്ബാര്‍ മറുപടി പറഞ്ഞു "ന്റെ സൂറാ.. ഞാന്‍ കാര്യത്തില്‍ ചോയ്ച്ചതാണ്ടീ.. ഇന്ന് ഇക്കൊരു നെഞ്ചു വേദന വന്നു.. സഹിക്കാന്‍ പറ്റാണ്ടായപ്പ ഡോക്ടറെ കാണാന്‍ പോയി ചെക്കപ്പ് ചെയ്തു."

സൂറാന്റെ നെഞ്ചൊന്നു കത്തി. ഇരുന്നിടത്ത് നിന്ന് ചാടിയെഴുന്നേറ്റ് ഓടി വന്ന് ജബ്ബാറിന്റെ നെഞ്ചു തടവാന്‍ തുടങ്ങി.. കൂട്ടത്തില്‍ രണ്ടു മൂന്നു തുള്ളി കണ്ണീര്‍ തറയിലിറ്റിക്കാനും സൂറ മറന്നില്ല.
"ന്റെ റബ്ബേ.. നെഞ്ചു വേദനാന്നു പറയുമ്പ ഹാര്‍ട്ടറ്റാക്കല്ലേ മന്‍ഷ്യാ..? ന്നിട്ട് ഇങ്ങക്കൊന്നും പറ്റീലേ..? ഇങ്ങക്കിപ്പ കൊഴപ്പം വല്ലതുംണ്ടാ..?"

"കൊഴപ്പൊന്നൂല്യ, ഗ്യാസിന്റാണെന്നാ ഡോക്ടറു പറഞ്ഞത്.. പക്ഷേ കൊളാസ്ട്രോളു കൂടുതലാ.. "
"ഹും ഇങ്ങക്കങ്ങനെ തന്നെ വേണം മന്‍ഷ്യാ.. കാലത്തെന്നെ ഞാന്‍ കഷ്ടപ്പെട്ട് ഓരോന്നും ഇണ്ടാക്കി വെച്ചാലും നേരം വൈകീന്നും പറഞ്ഞ് കയിക്കാണ്ട് ഓടീട്ടല്ലേ..? ഒരു ഗ്യാസും കൊണ്ട് വന്നേക്കുന്നു"

മുഖം കോട്ടി ജബ്ബാറിന്റെ നെഞ്ചത്ത് നിന്നും അഞ്ചാറു രോമം പറിച്ചെടുത്ത് സൂറ പരിഭവം തീര്‍ത്തു.. '

"ഹും.. അതെന്താ ഗ്യാസാണേന്നു പറഞ്ഞപ്പോ അനക്കൊരു നിരാശ..?"
ഫ്രീസറില്‍ ഉള്ള ഇറച്ചിയും മുട്ടയുമെല്ലാം കയ്യിലിരുന്ന കവറിന്നുള്ളിലേക്ക് എടുത്തിടുന്നതിനിടയില്‍ ജബ്ബാര്‍ ചോദിച്ചു..

"ഇങ്ങളൊന്നു മിണ്ടാണ്ടിരിക്ക്ണുണ്ടാ.. ഇങ്ങനെ തിന്നാണ്ടും കുടീക്കാണ്ടും നടന്നിട്ട് ഇങ്ങടെ വയറു ഗ്യാസും കുറ്റിയാക്കാന്നു വല്ല നേര്‍ച്ച നേര്‍ന്നിട്ടുണ്ടോ..?"
ജബ്ബാറതൊന്നും ശ്രദ്ധിക്കാതെ താന്‍ ചെയ്തു കൊണ്ടിരുന്ന പണിയില്‍ തന്നെ വ്യാപൃതനായി...

"അല്ല, ഇങ്ങട്ട് നോക്ക് മന്‍ഷ്യാ.. ഇങ്ങളീതൊക്കെ ഫ്രിഡ്ജീന്നെടുത്ത് എങ്ങട്ട് കൊണ്ടോവാ..??"

"ഡീ ബലാലേ.. എറച്ചീം മൊട്ടേം തൊട്ടു പോകരുതെന്നാ ഡോക്ടറു പറഞ്ഞേക്കുന്നത്.. ഇതൊക്കെ തിന്ന് തിന്ന് തടി കൂടീട്ടാണാത്രെ. തടി കൊറഞ്ഞാ കൊളാസ്ടോളു കൊറയുംന്നാ ഡോക്ടറു പറഞ്ഞത്. അതു കൊണ്ട് ഇന്നു മുതല്‍ ഈ വീട്ടില്‍ പച്ചക്കറി മാത്രം ഇണ്ടാക്കിയാ മതി.."

ഈ പ്രഖ്യാപനം കേട്ട് സൂറയുടേ സപ്ത നാഡികളും സ്തംഭിച്ചു.. പകച്ച് കണ്ണും തുറിച്ച് വായും തുറന്ന് ഒരു നിമിഷം ശ്വാസം കിട്ടാതായ സൂറ പെട്ടെന്നു തന്നെ പോയ ബോധം വീണ്ടെടുത്ത് നേരെ ജബ്ബാറിന്റെ കയ്യില്‍ ഇരുന്നിരുന്ന കവറില്‍ ചാടി പിടിച്ച് വലിച്ച് ഒരു വമ്പന്‍ ചോദ്യം ജബ്ബാറിനു നേരെ തൊടുത്തു വിട്ടു..

"അയ്നു ഞാനും മക്കളും എര്‍ച്ചീം മൊട്ടേം തിന്നാല്‍ ഇങ്ങക്കെങ്ങനാ മന്‍ഷ്യാ കൊളാസ്ട്റോളു കൂടുന്നത്.." തികച്ചും ന്യായമായ ചോദ്യം തന്നെ.. പക്ഷേ ജബ്ബാറത് സമ്മതിച്ചു വിട്ടു കൊടുക്കാന്‍ തയ്യാറായില്ല...
"ആ.. അതു കൂടും.. അങ്ങനിപ്പോ ഞാന്‍ തിന്നാണ്ട് നിങ്ങളു മാത്രം തിന്നു സുഖിക്കെണ്ട.. ഞാന്‍ സമ്മയ്ക്കൂല.."

"ഇങ്ങളു തിന്നാണ്ടിരുന്നാ പോരേ..? ഇക്ക് എര്‍ച്ചീം മീനുമൊന്നുമില്ലാണ്ട് ചോറെറങ്ങൂലാന്നു ഇങ്ങക്കറിയുന്നതല്ലേ.. അല്ലെങ്കിലും ഇങ്ങക്ക് ഇങ്ങടെ കാരം മാത്രല്ലേ ചിന്തയൊള്ളു.. ഇക്കറ്യാം.. ഇങ്ങക്കിന്നോടൊട്ടും ഇഷ്ടല്ല്യ.." സൂറ പിണങ്ങി മുഖം തിരിഞ്ഞ് നഖം കടിക്കാന്‍ തുടങ്ങി

"ന്റെ മുത്തേ സൂറാ.. ഇജ്ജിങ്ങട്ടൊന്നു നോക്ക്യേ.. ഇതൊക്കെ ഇണ്ടാക്കി മേശപ്പൊറത്ത് നെരത്തി വെച്ചേകണത് കണ്ടാ ഇക്ക് സഹിക്കാന്‍ പറ്റോ..? അതു മാത്രമല്ല, ഇക്ക് തിന്നാന്‍ പാടില്ലാത്ത സാധനം കിട്ട്യാ അനക്കത് സന്തോഷത്തോടെ കഴിക്കാന്‍ പ്റ്റോ ന്റെ മുത്തേ..?"

ഈ ഇമോഷണല്‍ ബ്ലാക്ക്മെയിലിങ്ങില്‍ സൂറാന്റെ നെഞ്ചു പൊട്ടിപ്പോയി.. പിന്നെ ഒരു നിമിഷം പോലും അമാന്തിക്കാതെ സൂറായും പ്രഖ്യാപിച്ചു.. ഇന്നു മുതല്‍ ഈ വീട്ടില്‍ ഇറച്ചിയും മുട്ടയുമില്ല.. ജീവിതത്തില്‍ എന്തൊക്കെ സഹിക്കുന്നു.. പിന്നാ ഈ ഇറച്ചീം മൊട്ടേം ഇല്ലാത്ത ജീവിതം..

പ്രഖ്യാപനമെല്ലാം കഴിഞ്ഞു ആദ്യ രണ്ട് ദിവസം കുഴപ്പോന്നുമില്ലാതെ പോയി. പക്ഷേ അപ്പോഴേക്കും സൂറ ആകെ ഞെളിപിരി കൊള്ളാന്‍ തുടങ്ങി.. പച്ചക്കറി മാത്രം തിന്നു തിന്നു ആകെ ബേജാറിലായ സൂറാന്റെ കയ്യും കാലുമൊക്കെ തരിക്കാന്‍ തുടങ്ങി. ജബ്ബാറാണേങ്കില്‍ പേടിച്ചിട്ട് മീന്‍ പോലും വീട്ടില്‍ കയറ്റുന്നില്ല.. ചുരുക്കം പറഞ്ഞാല്‍ കുടി നിര്‍ത്തിയ കള്ളുകുടിയനെ പോലെയായി സൂറാന്റെ കാര്യം. അന്നു വൈകുന്നേരം ജോലികഴിഞ്ഞെത്തിയ ജബ്ബാര്‍ കാണുന്നത് റൂമില്‍ അങ്ങോട്ടുമിങ്ങോട്ടും ഉലാത്തുന്ന സൂറാനെയാണു.. നടക്കുമ്പോള്‍ കാലി തട്ടിയ കസേരയെയും മേശയേയുമെല്ലാം ചീത്ത വിളിക്കുന്നുണ്ട്..

"അല്ല മന്‍ഷ്യാ.. ഇങ്ങളോടാരാ പറഞ്ഞേ എറച്ചീം മുട്ടേമെല്ലാം തിന്നാ തടി വെക്കും എന്നു..??"
ഒരു പ്രകോപനവുമില്ലാതെ പെട്ടെന്നുള്ള സൂറാന്റെ ചോദ്യം കേട്ട് ജബ്ബാറിന്റെ കണ്ണു തുറിച്ചു..
"ഏഹ്.. ഇപ്പൊ ഇങ്ങനായാ...? അനക്കെന്തിന്റെ കേടാ..?"

"അല്ല മന്‍ഷ്യാ ഇക്കൊരും സംശയം.. ഇങ്ങളു വെല്യ ഡിസ്കവറി ചാനലിന്റെ ആളല്ലേ..?"
എന്തോ പൊട്ടത്തരമായിരിക്കും ചോദിക്കാന്‍ പോണ്ടത് എന്നുറപ്പിച്ച് അതു അത് ബ്ലോക്ക് ചെയ്യാന്‍ തയ്യാറായി ജബ്ബാര്‍
"വല്ല പൊട്ടത്തരം ആണേങ്കില്‍ ചോയ്ക്കെണ്ടാട്ടാ.. ഇക്കിപ്പോ അന്റെ മാഞാളം കാണാനുള്ള മൂഡില്ല.."

"എന്നാ പോ.. ഞാന്‍ ചോയ്ക്കണില്ല..!!" സൂറ പിണങ്ങി പിന്നേ ദേഷ്യം കസേരയോട് തീര്‍ത്തു...
"ഹെന്റെ റബ്ബേ.. എന്തു പണ്ടാറാണേങ്കിലും ഇയ്യ് ചോദിക്കെന്റെ സൂറാ.. ഇയ്യിങ്ങനെ ബേജാറാവല്ലെ.."
"ഉം.. അങ്ങനെ വഴിക്കു വാ.. ഞാന്‍ ചോയ്ക്കട്ടെ.. ഇക്ക് ബുദ്ധീണ്ടാ ഇല്ലേന്ന് ഈ ചോദ്യത്തില്‍ ഇങ്ങക്ക് മന്‍സിലാകും.."

സൂറാന്റെ കോണ്‍ഫിഡന്‍സ് കണ്ടപ്പോ ജബ്ബാറിനും ഉഷാറായി.. എന്തു ചോദ്യമായാലും അതു നേരിടാന്‍ തയ്യാറായി നെഞ്ചും വിരിച്ച് നിന്നു..
"ഉം സമ്മയ്ച്ചു... ഇയ്യ് ചോദിക്ക്.."

"ന്റെ മന്‍ഷ്യാ.. ഈ എലേം പുല്ലും മാത്രം തിന്നണ ആനേം ഹിപ്പോ പൊട്ടാമസും എല്ലാം തടിച്ച് കൊഴുത്തിരിക്കണതും.. ഇറച്ചി മാത്രം തിന്നണ സിംഹോം പുലീം കടുവേമെല്ലാം മെലിഞ്ഞ് നല്ല ജിമ്മായിട്ടിരിക്കണതും എന്തു കൊണ്ടാ..?"

സൂറാന്റെ ചോദ്യം കേട്ട് കൊറച്ച് നേരം ജബ്ബാറിന്റെ ശ്വാസം നിന്നു പോയി.. ഉത്തരം കിട്ടാതെ നാക്ക് വായീന്നെറങ്ങി ഓടി ഗേറ്റ് കടന്നു.. എന്തു പറയണമെന്നറിയാതെ അന്തിച്ച് കുന്തം പോലെ നിക്കുന്ന ജബ്ബാറിന്റെ മുന്നില്‍ റിലീസ് പടത്തിനു ആദ്യത്തെ ഷോയുടെ ആദ്യത്തെ ടികറ്റ് കിട്ടിയ ആളേ പോലെ അഭിമാനം സ്ഫുരിക്കുന്ന കണ്ണുകളോടേ സൂറ ജബ്ബാറിന്റെ നോക്കി.

"ഏഹ്.. എന്താ മന്‍ഷ്യാ.. ഇങ്ങക്ക് ഉത്തരം തരാന്‍ കയ്യിണില്ലേ..? ഇങ്ങടെ നാക്കെറെങ്ങി പോയാ..?"
ഓടിപോയി തിരിച്ച് വന്ന നാക്കെടുത്ത് വായിലേക്കിട്ട് ജബ്ബാര്‍ ഒന്നു ഉരുണ്ട് മറിഞ്ഞ് രക്ഷപ്പെടാന്‍ ശ്രമിച്ചു.. ഓളേ സമ്മയ്ച്ചു കൊടുത്തില്ലെല്‍ ഓളിനി തലേക്കേറി സൂംബാ ഡാന്‍സ് തുടങ്ങും

"ന്റെ സൂറാ.. അനക്ക് ബുദ്ധീല്ലാന്നാരാണ്ടീ ബലാലേ പറഞ്ഞത്..? അന്റെ കാലു പിടിക്കാം ഞാന്‍, ഇനി മേലില്‍ ഇമ്മാതിരി സംശയോ കൊണ്ട് വന്നേക്കരുത്..."

"അല്ല മന്‍ഷ്യാ.. ന്നാലും ഈ ആനേം പുലീം സിംഹോം.."
"ന്റെ റബ്ബേ.. പ്ലീസ്..!! വന്നു കെടന്നൊറങ്ങെടീ പോത്തേ.. അന്റെ ഹലാക്കിലെ ആനേം പുലീം മണ്ണാങ്കട്ടേം.."

അന്നു രാത്രി ഏകദേശം ഒരു രണ്ടു മണി കഴിഞ്ഞപ്പോള്‍ ഉറങ്ങാതെ എന്തൊക്കയോ ആലോചിച്ച് തിരിഞ്ഞു മറിഞ്ഞും കിടന്നിരുന്ന സൂറ ബെഡില്‍ നിന്നും ചാടിയെഴുന്നേറ്റു ജബ്ബാറീന്റെ മീശ പിടിച്ച് വലിച്ച് വയറ്റത്തൊരു കുത്തും കൊടുത്തു.. ഇല്ലെങ്കില്‍ ഭൂമി കുലുങ്ങിയാലും മൂപ്പരൊറക്കത്തീന്നെണീക്കൂല
"കിട്ടി.. കിട്ടി.. ന്റെ മന്‍ഷ്യാ. ഇങ്ങളൊന്നെണീറ്റേ.. ഇക്കൊരു ഐഡിയ കിട്ടി.."

അപ്രതീക്ഷിതമായ ആക്രമണം താങ്ങാനാകാതെ ഉറക്കത്തില്‍ നിന്നും ചാടിയെഴുന്നേറ്റ ജബ്ബാര്‍ പല്ലു കടിച്ച് അടുത്ത ആക്രമണം ബ്ലോക്ക് ചെയ്യാനുള്ള പൊസിഷനില്‍ കയ് രണ്ടും നെഞ്ചിനും വയറിനുമിടയില്‍ ക്രോസ് ചെയ്ത് വെച്ച് മുന്നോട്ടാഞ്ഞ് സൂറാനെ നോക്കി മുരണ്ടു..

"അന്റെ വെല്ലിപ്പാന്റെ ഐഡിയ.. സത്യായിട്ടും അന്നെ ഞാനിന്നു കൊല്ലും.. അന്റെ ഒടുക്കത്തെ ഐഡിയ.. ഇന്നെ എടങ്ങേറാക്കാനാ..??"
ഐഡിയ കേട്ടില്ലെങ്കില്‍ ബാക്കിയുള്ള ഉറക്കവും കൂടെ കയ്യാലപ്പൊറത്താകും എന്നുറപ്പാ.. എന്തെങ്കിലും പറയണം എന്നു വിചാരിച്ചാ പിന്നെ ഓളു വിടൂല..

"എന്താന്നറിയോ..? ഇക്കിപ്പഴാ ഒരു കാര്യം ഓര്‍മ്മ വന്നത്.. പണ്ട് ടീവീ കണ്ടതാ.. യോഗ ചെയ്താല്‍ കൊളാസ്ട്റോളും പോകും ഹാര്‍ട്ടറ്റാക്കും വരൂലാന്നു.. ഇങ്ങളു നാളേ മുതല്‍ യോഗ ചെയ്തു തൊടങ്ങിക്കോ..."
ഇപ്രാവശ്യം ശെരിക്കും കണ്ണു നിറഞ്ഞത് ജബ്ബാറിനായിരുന്നു..
"ന്റെ റബ്ബേ.. ഇന്റൊരു യോഗം.. അന്നെ കെട്ടീന്നല്ലാണ്ട് വേറെന്തു തെറ്റാണ്ടീ ഞാന്‍ ചെയ്തത് ന്റെ സൂറാ.. അന്റെ മൂത്താപ്പ വരോടീ ന്നെ യോഗ പഠിപ്പിക്കാന്‍..?"

"ഒന്നു പോ മന്‍ഷ്യാ.. ആനക്കാര്യത്തിന്റെടേലാ ഇങ്ങടെ ചേനക്കാര്യം.. ഇന്റെ വീടിന്റടുത്ത് ഒരു യോഗേന്റെ ആളുണ്ട്.. ഞാന്‍ പണ്ട് ഉസ്കൂളിലൊക്കെ പോകുമ്പോ അയ്യാളു വീടിന്റെ പൊറത്തു തല കുത്തി നിക്കണതും സര്‍ക്കസ് കാണിക്കുന്നതുമൊക്കെ കണ്ടിട്ടുണ്ട്.. അയാളും എര്‍ച്ചീം മീനും ഒന്നും കഴിക്കാണ്ട് പച്ചക്കറി മാത്രം തിന്ന് യോഗ ചെയ്യണ ആളാ.. കൊറേ ആള്‍ക്കാരെ പഠിപ്പിക്കുന്നും ഇണ്ട്.."

"ഇപ്പ തന്നെ അയാള്‍ടെ വീട്ടീ പോയി യോഗ പഠിക്കണോ ന്റെ സൂറാ.. നാളേ കാലത്ത് പോരേ...?"
"തമാശ പറയാതെ മന്‍ഷ്യാ.. ഞാന്‍ കാര്യായിട്ടാ.."
"നാളേ കാലത്ത് തന്നെ നമുക്കയാള്‍ടെ വീട്ടീ പോയി യോഗ പഠിക്കാം.. സമാധാനായില്ലെ.. ഇനി ഇയ്യ് കെടന്നൊറങ്ങ്.."
തന്റെ ഐഡിയ ജബ്ബാര്‍ സ്വീകരിച്ച സന്തോഴത്തില്‍ സൂറയും ഇനി ശല്യമുണ്ടാകില്ലല്ലോ എന്ന സമാധാനത്തില്‍ ജബ്ബാറും ഉറക്കത്തിലേക്ക് വഴുതി വീണു.

പിറ്റേന്ന് കാലത്ത് ഉടുത്തൊരുങ്ങി വന്ന് പോകാം എന്നു പറഞ്ഞപ്പോഴാണു സൂറ ഇത്രക്കും സീരിയസ് ആയിരുന്നു എന്നു ജബ്ബാറിനു മനസ്സിലായത്.. രക്ഷപ്പെടാന്‍ ഒരു പഴുതും ഇല്ലാത്തത് കൊണ്ടും അങ്ങനെയെങ്കിലും ഹാര്‍ട്ട് അറ്റാക്കില്‍ നിന്നും രക്ഷപ്പെടാന്‍ ഒരു ഓപ്ഷന്‍ ഉണ്ടെങ്കില്‍ അതു മിസ്സാക്കെണ്ട എന്ന തീരുമാനത്തിന്റെയും ഫലമായി ഓഫീസില്‍ വിളിച്ച് ലീവ് പറഞ്ഞ് സൂറാനേയും കൂട്ടി കാറെടുത്തെറങ്ങി.. യോഗാ ഗുരുവിന്റെ വീടിനെടുത്തെത്തിയപ്പോള്‍ വണ്ടി പാര്‍ക്ക് ചെയ്യാന്‍ സ്ഥലമില്ല.. മതിലിന്റെ സൈഡിലും വീടിനെ കോമ്പൗണ്ടിലുമെല്ലാം കൊറേ കാറുകളും ആള്‍ക്കാരുമെല്ലാം ഉണ്ട്..

അതു കണ്ടപ്പോള്‍ പച്ചപ്പാതിരാക്കാണേങ്കിലും സൂറാ പറഞ്ഞ ഐഡിയ കൊള്ളാലോ.. എന്തായാലും ഇത്രേം തെരക്കാണേങ്കില്‍ ആളു വെല്യ ആള്‍ തന്നെ..
"ന്റെ സൂറാ.. ഇയ്യിന്നലെ പറഞ്ഞപ്പോ ഇയാളിത്രേം വെല്യ ആളാണെന്ന് വിചാരിച്ചില്ലാട്ടാ.. ഇയാളേ കാണാന്‍ ഇത്രേം നേരത്തെ തന്നെ എന്തോരം ആള്‍ക്കാരാ.."

താന്‍ പറഞ്ഞത് ഇത്രയും കാര്യായിട്ട് സമ്മതിച്ച പുയ്യാപ്ലേന്റെ കണ്ണുകളിലേക്ക് സ്നേഹത്തോടെ നോക്കി അഹങ്കാരത്തോടെ തലയിലെ തട്ടമൊന്നൂടെ വലിച്ചു നേരെയിട്ട് സന്തോഷം തിളങ്ങുന്ന മുഖത്തോടെ പറഞ്ഞു

"ഹും ഇപ്പം മനസ്സിലായാ ഈ സൂറ ആരാണേന്നു..? അല്ലെങ്കിലും ഞാന്‍ വെറും മൂന്നാം ക്ലാസല്ലേ.. ഇങ്ങളു വെല്യ പഠിപ്പിന്റെ ആളായത് കൊണ്ട് ഞാന്‍ പറയണാതൊക്കെ ഇങ്ങളു കേക്കോ..?"

"അങ്ങനല്ലിന്റെ മുത്തേ.. അന്നോടുള്ളാ മുഹബ്ബത്ത് കൊണ്ടല്ലേ ന്റെ സൂറാ.. ഇയ്യൊരു കാര്യം ചെയ്യ്.. തെരക്കായത് കൊണ്ട് അവിടെ വല്ല ടോക്കണൊക്കെ കൊടുക്കുന്നുണ്ടാകും.. ഞാന്‍ പോയി വണ്ടി പാര്‍ക്ക് ചെയ്തു വരാം.. ഇയ്യ് പോയി ടോക്കണേടുക്ക്.."

കുറേ നോക്കിയിട്ടും പാര്‍ക്ക് ചെയ്യാന്‍ സൗകര്യം കിട്ടാതെ തിരിച്ച് വരുമ്പോ കണ്ടു ഗേറ്റ് കടന്ന് പോയതിലും സ്പീഡില്‍ തിരിച്ച് വരുന്ന സൂറ.. എന്തു പറ്റി, ടോക്കണ്‍ കിട്ടിയില്ലേ എന്ന ചോദ്യത്തിനു മറുപടിയൊന്നും പറയാതെ ചാടി വണ്ടീ കേറിയിരുന്ന് സൂറ പറഞ്ഞു..

"ഇങ്ങളു വണ്ടി വിട്ടോ മനുഷ്യാ.. യോഗയും വേണ്ടാ ഒരു കുന്തവും വേണ്ട.."
"എന്തു പറ്റി സൂറാ.. അയാളു നിന്നെ വല്ലതും പറഞ്ഞാ... എന്നാലാ ഹമുക്കിന്റെ മയ്യത്ത് ഞാനെടുക്കും.." ജബ്ബാര്‍ വണ്ടി ബ്രേക്ക് ചെയ്തു..
"ന്റെ മന്‍ഷ്യാ.. അതൊന്നുമല്ല കാര്യം.."
"പിന്നെന്താണ്ടീ ഹമുക്കേ കാര്യം.."

"ന്റെ മന്‍ഷ്യാ.. അയാള്‍ക്കു രണ്ടൂസം മുന്നു അറ്റാക്ക് വന്ന് ആസ്പത്രീ കൊണ്ടോയി ഓപ്പറേഷന്‍ കഴിഞ്ഞ് കൊണ്ട് വന്നതേയൊള്ളു.. അതു കേട്ടറിഞ്ഞ് വന്ന സ്വന്തക്കാരാ ആ നിക്കണത് മുഴുവനും.. രക്ഷപ്പെടാന്‍ ചാന്‍സൊന്നുമില്ല.. മൂന്നു കൊഴലു ബ്ലോക്കായിരുന്നത്രെ..!!"

ഇതും പറഞ്ഞ് ചമ്മിയ മുഖത്തോടെ തല തിരിച്ച് ഇരിക്കുന്ന സൂറാനെ നോക്കി വന്ന ചിരി കടിച്ചമര്‍ത്തി ജബ്ബാര്‍ വിട്ട് ആക്സിലറേറ്ററില്‍ ചവിട്ടി.. അന്നു വൈകുന്നേരം വീട്ടിലെ ഫ്രിഡ്ജില്‍ ഇറച്ചിയും മുട്ടയും മീനുമെല്ലാം വീണ്ടും നിറഞ്ഞു.. സൂറാന്റെ മുഖത്ത് തെളിഞ്ഞ പതിനാലാം രാവ് കണ്ടപ്പോള്‍ ജബ്ബാറിന്റെ മനസ്സും..!!

നൊസ്റ്റാള്‍ജിക്‍ സ്വപ്നം

2015-04-09T12:14:00.001+03:00

നല്ല ഉശിരന്‍ ഒരു സ്വപ്നം കണ്ടു...
ഇരുപതു കൊല്ലങ്ങൾക്കു മുന്നത്തെ പ്രീഡിഗ്രീ ക്ലാസ് അതേ പടി.. ഞാനിരുന്നിരുന്ന മൂന്നാമത്തെ വരി.. തൊട്ടു മുന്നില്‍ ഇരുന്നിരുന്ന പഠിപ്പിസ്റ്റുകള്‍.. പിന്നില്‍ ഇരുന്നിരുന്ന അലമ്പന്മാര്‍ wink emoticon

ഫസ്റ്റ് ഇയര്‍ അനുഭവിച്ച റാഗിംഗ്.. പേടിച്ച് വിറച്ച് കോളേജ് വിടുന്നതിനു മുന്നേ ചാടി അടുത്ത ബസ്റ്റോപ്പ് വരെ നടന്നു അവിടുന്നു ബസ് കയറിയിരുന്ന നാളുകള്‍..

കോളേജിലെ സമരം..
സമര ദിവസങ്ങള്‍ ഞങ്ങള്‍ക്കെന്നും പ്രിപ്പെട്ടതായിരുന്നു.. കാരണം തിരക്കുള്ള ബസ് റൂട്ടല്ലാത്തത് കൊണ്ട് വല്ലപ്പൊഴും മാത്രം വരുന്ന ബസ്സുകള്‍ കാത്ത് മണിക്കൂറുകളോളം ചൂള മരത്തിന്നടിയില്‍ മറ്റു ഗ്രൂപ്പുകളിലെ സെയിം ബാച്ച് പെണ്‍കുട്ടികളുമായിരുന്ന് കഥ പറയാം.. തീര്‍ച്ചയായും എന്നും കാണുന്ന സ്വന്തം ക്ലാസിലെ പെണ്‍കുട്ടികളേക്കാള്‍ ഇഷ്ടം വല്ലപ്പോഴും മാത്രം ഫ്രീ ആയി സംസാരിക്കാന്‍ കിട്ടുന്ന അടുത്ത ക്ലാസിലെ പെണ്‍കുട്ടികളോടായിരുന്നു..

അറബിക് ക്ലാസ്..
ചൂള മരങ്ങള്‍..
പരീക്ഷാ സമയത്ത് പരീക്ഷാ ഹാള്‍ ആക്കുന്നത് കൊണ്ടും, ലൈബ്ബ്രഡി കാര്‍ഡ് നിര്‍ബന്ധമായിരുന്നത് കൊണ്ട് അതെടുക്കാനും മാത്രം വര്‍ഷത്തില്‍ ഒന്നോ രണ്ടോ ദിവസം മാത്രം കയറിയിരുന്ന ലൈബ്രറി..
കോള്‍റ്ജിന്റെ ഓപ്പോസിറ്റുള്ള മാഷിന്റെ ബുക്ക് സ്റ്റോര്‍..
എസ്സെന്‍ പുരത്ത് നിന്നും കോളേജിലേക്കുള്ള ആ താടി വെച്ച് വെളുത്ത ചേട്ടന്റെ ട്രക്കറില്‍ തിക്കി തിരക്കി ശ്വാസം മുട്ടിയുള്ള യാത്ര..
കോളേജ് ടൂറെന്നും പറഞ്ഞ് വീട്ടുകാരെ പറ്റിച്ച് ഞങ്ങള്‍ കൂട്ടുകാരു മാത്രം പോയ ഊട്ടി യാത്ര..

ഫിസിക്സ് പ്രാക്റ്റിക്കലും കെമിസ്ടി പ്രാക്റ്റിക്കലും വ്യാഴാഴ്ചയും വെള്ളിയാഴ്ചയും ഉച്ചക്കായത് ഉര്‍‌വശീ ശാപം ഉപകാരമായി എന്നു പറഞ്ഞ പോലേ ആയിരുന്നു എനിക്ക്.. ബയോളജി പഠിക്കാന്‍ മെന്റലി പ്രിപ്പെയേര്‍ഡ് ആയിരുന്നത് കൊണ്ട് ആ വിഷയങ്ങള്‍ വലിയ തൊന്തരവൊന്നും ഉണ്ടാക്കിയില്ല. പക്ഷേ.., ഡോക്ടറാകാന്‍ ബയോളജി മാത്രം പോരാതെ ഫിസിക്സും കെമിസ്ട്രിയും കൂടെ പഠിക്കണം എന്നറിഞ്ഞപ്പോഴുണ്ടായ ഞെട്ടല്‍ മൂലം, ഈ രണ്ടു വിഷയങ്ങളോടും എനിക്ക് അലര്‍ജിയായിരുന്നു. അതു കൊണ്ട് തന്നെ ഈ ദിവസങ്ങളില്‍ ലാബില്‍ കയറാതെ നേരെ കൊടുങ്ങല്ലൂര്‍ക്ക് ബസ് കയറും.. മുഗളിലും മിനി മുഗളിലും നോബിളിലും ശ്രീകാളീശ്വരിയിലും എസ്സെനിലും റിലീസ് പടങ്ങളുണ്ടായിരുന്നത് കൊണ്ട് ആ ഉച്ചകള്‍ ഉഷാറാക്കി.. ശില്പി എന്ന തീയേറ്ററിന്റെ പേരു പറയുന്നത് പോലും അന്ന് പ്രശ്നമായിരുന്നത് കൊണ്ട് ആ തീയേറ്ററിന്റെ പരിസരത്തേക്ക് പോകാറില്ല.. നാട്ടിലുള്ള സകല കാര്‍ന്നോന്മാരും ഉണ്ടാകും അവിടെ ടികറ്റെടുക്കാന്‍.. wink emoticon

ആദ്യ ദിവസം കോളേജില്‍ പോയപ്പോഴുണ്ടായിരുന്ന മഴക്കാറു വന്നു തണുത്ത കടല്‍ക്കാറ്റടിക്കുന്ന ആ മൂടീക്കെട്ടിയ അന്തരീക്ഷം... കോളേജിന്റെ ഒന്നാം നിലയില്‍ ആ തണുപ്പിലും ഇരുട്ടിലും ആരംഭിച്ച ആദ്യ ദിവസത്തെ ക്ലാസ്.. തിങ്കളാഴ്ച്ച ഒന്നാമത്തെ പിരിയേഡ് റസിയ ടീച്ചറുടെ കെമിസ്ട്രി ക്ലാസ് ആയിരുന്നു എന്നാണേന്റെ ഓര്‍മ്മ.. അന്നു തുടങ്ങിയതാ തിരുമേനി കെമിസ്ട്രിയോടുള്ള ആ ഇറെവെറെന്‍സ്.. കാരണം ജനിപ്പിട്ടന്നു വരെ മുഴുവനും ഇംഗ്ലീഷായിട്ടു കണ്ട് പരിചയിച്ചിട്ടുള്ളത് ഇംഗ്ലീഷ് ടെക്സ്റ്റില്‍ മാത്രമായിരുന്നു.. മലയാളം മീഡിയത്തില്‍ നിന്നും പെട്ടെന്ന് എല്ലാം ഇംഗ്ലീഷിലേക്ക് മാറിയപ്പോഴുണ്ടായ ആ ഒരിതും, ഇംഗ്ലീഷ് മീഡിയത്തില്‍ നിന്നും വന്ന് ക്ലാസില്‍ അപാരമായി പെര്‍ഫോം ചെയ്യുന്നവരുടെ മുന്നില്‍ എന്തെങ്കിലും പറഞ്ഞാല്‍ തെറ്റിപോകുമോ എന്ന ചമ്മലും പേടിയുമായിരുന്നു എനിക്ക് എല്ലാ ക്ലാസും കട്ട് ചെയ്യാനുള്ള പ്രേരണ നല്‍കിയിരുന്നത്.. പാവം ഞാന്‍..

ആദ്യ ആഴ്ചകളില്‍ ക്ലാസിലെ പെണ്‍ പിള്ളേരോട് സംസാരിക്കാന്‍ എനിക്ക് പേടിയായിരുന്നു നഴ്സറി മുതല്‍ കൂടെ പഠിച്ചിരുന്ന സരിതയോടൊഴിച്ച്.. കാരണം വേറൊന്നുമല്ല.. എങ്ങാനും അവറ്റകള്‍ ഇംഗ്ലീഷ് മീഡിയം ആണെങ്കില്‍ പിന്നെ നമ്മളു നിന്നു ബബ്ബബ്ബബ്ബാ.. ജബാ ജബാ അടിക്കേണ്ടി വരും.. അതില്‍ പരം നാണക്കേട് വേറെന്താ ഉള്ളത്..

എന്നിട്ടും ഞാന്‍ എം ബി ബി എസ് എന്റ്രന്‍സ് എഴുതി.. അതു ഓരോ ചോദ്യ നമ്പറുകളുടെയും താഴെ എ ബി സി ഡി ഇ എന്നുള്ള അഞ്ച് ഓപ്ഷനില്‍ ഒരെണ്ണം
ചുമ്മാ ഒരു പെന്‍സില്‍ വെച്ചു കറുപ്പിച്ചു വെച്ചാല്‍ മാത്രം മതി.. എസ്സേ എഴുതെണ്ട.. ഷോര്‍ട്ട് ആന്‍സര്‍ ക്വെസ്റ്റ്യന്‍സ് ഇല്ല.. ഒറ്റ വാക്കില്‍ ഉത്തരം എഴുതേണ്ട.. എന്നിട്ടും ഇത്രേം ഈസിയായിട്ടുള്ളാ ഈ പരിപാടി ചെയ്യാന്‍ ബാക്കിയുള്ളവര്‍ ഇത്ര മാത്രം പേടിക്കുന്നതെന്തിനാണെന്നും, ഒന്നും രണ്ടും കൊല്ലം കോച്ചിങ്ങിനു പോയി കഷ്ടപ്പെടുന്നതെന്തിനാണെന്നും ആയിരുന്നു എന്റ്രന്‍സ് ഈ ഷീറ്റ് കിട്ടിയപ്പോള്‍ ഞാന്‍ ആദ്യം ചിന്തിച്ചത്.. ശാസ്ത്രം ജെയിച്ചു മനുഷ്യന്‍ തോറ്റു എന്നു പറഞ്ഞ പോലെ ഞാനും എന്റ്രന്‍സ് ജെയിച്ചു പക്ഷേ പ്രീഡിഗ്രീ തോറ്റു..

അങ്ങനെ ഓരോ സംഭവങ്ങളും സ്വപ്നത്തില്‍ മിന്നി മറഞ്ഞു.. രാവിലെ ഉറക്കത്തില്‍ നിന്നെഴുന്നേറ്റത് വളരെ സന്തോഷത്തോടെയായിരൂന്നു.. കണ്ട സ്വപ്നം വ്യക്തമായി ഓര്‍ക്കുന്നു.. കൂടെയുണ്ടായിരുന്ന ഓരോരുത്തരേയും പേരു വിളിച്ച് സംസാരിച്ചത് ഓര്‍മയുണ്ട്.. മറവിയുടെ ഇരുള്‍ മൂടി കിടന്നിരുന്ന പല മുഖങ്ങളും സ്വപ്നത്തില്‍ തെളിഞ്ഞു വന്നു.. അവരിട്ടിരുന്ന ഉടുപ്പും ഷാളും കമ്മലും പാന്റും ഷൂസും എല്ലാം ഇപ്പഴും ഓര്‍മ്മയില്‍ നില്‍ക്കുന്നു.. മുഖങ്ങളെല്ലാം വ്യക്തമായി മനസ്സില്‍ ഉണ്ടെങ്കിലും പേരുകള്‍ മാത്രം കിട്ടുന്നില്ല.. കുറച്ച് പേരുടെ ഒഴിച്ച്...

എന്റെ വിഷമം അതൊന്നും അല്ല.. frown emoticon ആണ്‍ പിള്ളേരു പോട്ടേ.. ആ പെണ്‍ പിള്ളേരുടെയെങ്കിലും പേരുകള്‍ കിട്ടിയിരുന്നെങ്കില്‍...!!

ഇതു മാത്രമാണ് പ്രണയം..

2015-04-09T12:14:00.000+03:00

ആദ്യ പ്രണയം..
അതിനെ പറ്റി ഓര്‍ക്കാന്‍ തന്നെ ഒരു സുഖമാ.. പൊട്ടി പൊളിഞ്ഞു പാളീസായി ആവണക്കെണ്ണയില്‍ വീണ പഴന്തുണി പോലെ കൊയകൊയാന്നായ പ്രണയത്തിനെ പറ്റിയാണെങ്കില്‍ പറയേം വേണ്ട.. ഉസ്കൂളീ പഠിക്കുന്ന സമയത്താണു ഇളംകാറ്റില്‍ പറന്ന് വന്ന അപ്പൂപ്പന്‍ താടി പോലെ, എന്റെ ഇച്ചിരിക്കൊളം പോന്ന കുഞ്ഞു ഹൃദയത്തില്‍ ആ പ്രണയം വന്നു വീണത്.. ചുടെണ്ണയില്‍ വീണ കടുകിനെ പോലെ അതിങ്ങനെ മനസ്സില്‍ തുള്ളിച്ചാടാന്‍ തുടങ്ങി.

സ്വപ്നങ്ങള്‍ കൊണ്ട് വെള്ളം കോരിയും.. കിനാവുകള്‍ വളമാക്കിയും ഒരു പട്ടിക്കും പൂച്ചക്കും ആടിനും പശൂനും കൊടുക്കാതെ അതിനെ വളര്‍ത്തി വലുതാക്കി.. ആരോടും പറയാതെ, എന്റെ മാത്രം സ്വകാര്യമാക്കി ഞാനത് മനസ്സില്‍ കൊണ്ട് നടന്നു. ആ നാളുകളില്‍ എന്റെ സകലമാന ചിന്തകളും സ്വപ്നങ്ങളൂം ആഗ്രഹങ്ങളും എന്നു വേണ്ട എന്റ ഉറക്കം വരെ എന്റെ പ്രണയിനി കട്ടെടുത്തു. അവള്‍ക്കു വേണ്ടി ആപത്തിലെ മിത്രമാകാനും ശക്തരില്‍ ശക്തരാകാനും കൊതിച്ചു.. ഒരു ശീമക്കൊന്നരയുടെ വടി വെട്ടി അതിന്റെ തുമ്പത്ത് നിറയെ ആണിയടിച്ച് കയറ്റിയ മച്ചിങ്ങ കുത്തി വെച്ച് ഓഹ്രീം കുട്ടിച്ചാത്തനായി.. കോസ്റ്റ്യൂംസിന്റെ കൊറവു മാത്രമേ ഉണ്ടായിരുന്നൊള്ളു.

കോസ്റ്റ്യൂംസിന്റെ കാര്യത്തിനൊരു തീരുമാനമുണ്ടാക്കിക്കൊണ്ട് എല്ലാവരെയും ഞെട്ടിച്ചു കൊണ്ട് ഞാന്‍ ഒരു വമ്പന്‍ സാക്രിഫൈസ് നടത്തി. ആ വര്‍ഷത്തെ പെരുന്നാളിനു ഷര്‍ട്ടും പാന്റും എടുക്കാന്‍ തന്ന കാശിനു ഞാന്‍ വാങ്ങിച്ചത് നെഞ്ചത്ത് ചുവന്ന നക്ഷത്രമുള്ള മഞ്ഞ ബനിയനും ചുവന്ന ഷഡ്ഡിയും.. അതോടെ ഷര്‍ട്ടിന്റെ ബഡ്ജറ്റ് സ്വാഹ.. സൂപ്പര്‍ ഹീറോകള്‍ക്കെല്ലാം പാന്റ്സിട്ടാ ചൊറിച്ചില്‍ വരും എന്ന നഗ്ന സത്യം മനസ്സിലാക്കിയ ഞാന്‍ പാന്റു വാങ്ങാന്‍ മാറ്റി വെച്ച കാശെടുത്ത് മറിച്ച് ഡിങ്കന്റെ കോസ്റ്റ്യൂമിനു കാശു തികയാതെ ഒഴിവാക്കിയ ചുവന്ന ഷാളും, മായാവിയാകാനുള്ള കറുത്ത ഷഡ്ഡി രണ്ടെണ്ണവും വാങ്ങി.

ഞാനെന്റെ ഹൃദയത്തോപ്പില്‍ നട്ടു വളര്‍ത്തിയ പ്രണയമങ്ങനെ വളര്‍ന്നു വളര്‍ന്നു ചെടിയായി. മരമായി അവസാനം അണ്ണാക്കു വരെ എത്തി ശ്വാസം പോലും വിടാന്‍ പറ്റാത്ത അവസ്ഥയിലായപ്പോള്‍ ആരോടെങ്കിലും ഒന്നു പറയാന്‍ തീരുമാനിച്ചു. ഏറ്റവും അടുത്ത കൂട്ടുകാരന്‍ അതായത് എന്റെ ബെഞ്ചില്‍ എന്റെ തൊട്ടറുത്തിരുന്നിരുന്ന തെണ്ടിയോടത് പറഞ്ഞു "ഡേയ്, നമ്മളെക്കാള്‍ പ്രായം കൂടിയവരേ പ്രേമിക്കുകയോ..." പുച്ഛത്തോടേ അവന്‍ ഫൗള്‍ വിളിച്ചു..

മനസ്സില്‍ കുളിര്‍മഴ പെയ്യിച്ച്കൊണ്ടവളെന്നും എന്റെ ക്ലാസില്‍ വന്നും പോയുമിരുന്നു.. ഒരു ദിവസം, അവളേന്നോടൊരു ചോദ്യം ചോദിച്ചു.. അപ്രതീക്ഷിത ആക്രമണമായിരുന്നത് കൊണ്ട് തന്നെ മറുപടി പറയാന്‍ സാധിച്ചില്ല. ചോദ്യത്തിന്റെ ഉത്തരം കിട്ടാതായപ്പോള്‍, ക്ലാസിലെ മറ്റു പിള്ളേരുടെ മുന്നില്‍ വെച്ച് എന്നെ ചീത്ത വിളിച്ചു.. "നീയൊക്കെ എന്തിനാണ്ടാ കെട്ടും കെട്ടി ഇങ്ങോട്ട് വരുന്നത് എന്നു ചോദിച്ചതും പോരാതെ ഇമ്പോസിഷന്‍ തന്ന് എന്നെ നാറ്റിക്കുകയും ചെയ്തു.. അന്നു ഞാനെന്റെ മഞ്ഞ ബനിയനും ചുവന്ന ഷഡ്ഡിയും വലിച്ചു കീറി കാട്ടിലെറിഞ്ഞു.. കറുത്ത ഷഡ്ഡിയൂരി അടുപ്പിലിട്ടു. എന്നിട്ട് ഞാനെന്റെ മനസ്സിലെ പ്രണയക്കൂടാരത്തില്‍ നിന്നും ആ പിശാശിനെ പടിയടച്ച് പിണ്ടം വെച്ചു.. അല്ലെങ്കിലും ഈ റ്റ്യൂഷന്‍ ടീച്ചര്‍ മാരെയൊന്നും പ്രേമിക്കാന്‍ കൊള്ളൂല...

കൊറേ വര്‍ഷങ്ങള്‍ക്കു ശേഷം കോളേജീ വെച്ച് വേറൊരു പ്രണയം തലക്കു കേറി പിടിച്ചു.. അന്നു ഞാന്‍ ഏറ്റവും കൂടുതല്‍ ആലോച്ചിച്ച് തല പുണ്ണാക്കിയിരുന്നത് ഉസ്കൂളീ വെച്ച് തോന്നീത് എന്തായിരുന്നു എന്നു മനസ്സിലാകാതെ ആയിരുന്നു.. പിന്നെ മാലപ്പടക്കത്തിനു തീ കൊടുത്ത പോലെ ഓരോന്നോരോന്നായി തലേ കുടുങ്ങുമ്പോ വിചാരിക്കും മുന്നതെന്തൂട്ട് കുന്താണാവോ ഉണ്ടായിരുന്നത്.. അപ്പോഴെല്ലാം ഞാന്‍ തീരുമാനിക്കും, മുന്നുണ്ടായിരുന്നതൊന്നും ഒന്നുമല്ല.. ഇതാണു യഥാര്‍ത്ഥ പ്രണയം.. അതെ ഇതു മാത്രമാണ് പ്രണയം.. ഇതു തന്നെയാണു പ്രണയം..!!

നസീബ്

2015-04-09T12:13:00.000+03:00

ഇന്നലെ ഉച്ചക്ക് വയറു നിറച്ചും ചോറു തിന്നു കഴിഞ്ഞപ്പഴാണു വെറുതെ ഒരു ശപഥം എടുക്കാന്‍ തോന്നിയത്. എന്തൊക്കെ സംഭവിച്ചാലും ശെരി, ഇല്ലെങ്കിലും ശെരി, ഇന്നു രാത്രി നോ ഫുഡ്.. ഓഫീസെല്ലാം കഴിഞ്ഞ് പതുക്കെ റൂമിലെത്തി ടിവി ഓണ്‍‍ ചെയ്തു.. ഏകദേശം ഒരു എട്ടു മണിയായി തുടങ്ങിയപ്പോള്‍ വയറ്റില്‍ വിശപ്പിന്റെ സൈറണ്‍ വിളിക്കാന്‍ തുടങ്ങി. രണ്ട് ഗ്ലാസ് വെള്ളമെടുത്ത് ബിസ്മിയും ചൊല്ലി അങ്ങു കുടിച്ചു ചാനലുകള്‍ മാറ്റാന്‍ തുടങ്ങി.. പത്തു മണിയായപ്പോ ഏതൊ ചാനലില്‍ ഒരു ദുഷ്ടന്‍ യാതൊരു ഉളുപ്പുമില്ലാതെ മട്ടണ്‍ ബിരിയാണി ഉണ്ടാക്കി തിന്നുന്നു.. എത്ത്നിക് പാകിസ്ഥാനി മട്ടണ്‍ ബിരിയാണത്രെ..

ഓഹ്.. ബിരിയാണീ.. ഇതൊക്കെ നമ്മളെത്ര കണ്ടിരിക്കുന്നു..!! എന്റെ ശപഥം തെറ്റിക്കാന്‍ ഞാന്‍ ഒരു പാകിസ്ഥാനി ബിരിയാണിയെയും സമ്മതിക്കില്ല.. അപ്പൊ തന്നെ ടിവി ഓഫാക്കി കണ്ണടച്ച് കമിഴ്ന്നു കിടന്നു.. പിന്നെ ചാടിയെഴുന്നേറ്റ് രണ്ടു കയ്യും ചുരുട്ടി നെഞത്തടിച്ച് ഉച്ചക്കലത്തെ ശപഥം ഒന്നു മോഡിഫൈ ചെയ്തു.. ഇപ്രാവശ്യം എന്തൊക്കെ സംഭവിച്ചാലും നോ മോര്‍ മോഡിഫിക്കേഷന്‍സ് ഇന്‍ ദിസ് സബ്ജെക്റ്റ് എന്നു ഒരു അഡീഷണല്‍ ശപഥം കൂടെ അങ്ങട്ടലക്കി.. ഹും.. നമ്മളോടല്ലേ കളി..

ഫ്ലാറ്റിന്റെ താഴെ ഒരഞ്ച് മിനിറ്റ് നടന്നാല്‍ ഹിന്ദിക്കാരുടെ റെസ്റ്റോറന്റ് ഉണ്ട്.. പക്ഷേ അവരു പാകിസ്ഥാനികളാണോ എന്നറിയില്ല.. അതു കൊണ്ട് ചുമ്മാ ഒന്നു പോയി നോക്കാം പാകിസ്ഥാനി ആണെങ്കില്‍ മാത്രം.., പാകിസ്ഥാനി ബിരിയാണി ഉണ്ടെങ്കില്‍ മാത്രം ഒന്നു ട്രൈ ചെയ്തു നോക്കാം. അതിലിപ്പോ തെറ്റൊന്നുമില്ലല്ലോ.. അപ്പോ തന്നെ പാന്റു വലിച്ചു കയറ്റി സഫറോ കി സിന്ദഗീ ജോ കഭീ ഖത്തം ആക്കി ആഞ്ഞു നടന്നു.

ചെന്നു കേറിയ പാടെ നാഷ്ണാലിറ്റി ചോദിച്ചാല്‍ അവരു പിടിച്ച് അടിച്ചാലോ എന്നു കരുതി ആദ്യം കുറച്ച് നേരം അവിടെ ചുറ്റി പറ്റി നിന്നു.. അവരുടെ ഭാഷ കേട്ടാല്‍ മനസ്സിലാകുമല്ലോ ഏതു നാടാണെന്നു.. അവരു പരസ്പരം പറയുന്നത് കേട്ടപ്പോള്‍ ഹിന്ദിയാണെന്നുറപ്പിച്ചു.. പക്ഷേ അവരുടെ നാട്ടിലേ ഏതോ കോഴിക്കോടന്‍ സ്ലാങിലാണു പറയുന്നത്.. അവിടെ കോഴിക്കോടുണ്ടോ എന്നൊന്നു ചോദിച്ചാലോ..? വേണ്ട.. ആദ്യം ബിരിയാണി ഉണ്ടോന്നു ചോദിക്കാം.. ഇനി നടക്കുന്ന സംഭാഷണം മുഴുവനും ഹിന്ദിയിലാണു കേട്ടോ.. ഞാന്‍ ഒടുക്കത്തെ ഹിന്ദിയാ.. പറയുന്നത് അവര്‍ക്കു മനസ്സിലായാല്‍ ഭാഗ്യം..

"ചേട്ടാ.. ബിരിയാണി ഉണ്ടോ..?" ചോദ്യം കേട്ടപാടെ കടക്കാരന്‍, ഇവനെവിടുത്തു കാരനാണ്ടാ ഉവ്വേ എന്ന മട്ടില്‍ ഒരു നോട്ടം.. ഞാന്‍ മൈന്റാക്കിയില്ല..
"ക്യാ..??"
ഈ തെണ്ടിക്ക് എന്റെ ചോദ്യം മനസ്സിലായില്ലാന്നു തോന്നുന്നു..

"അരേ ഭായി.. മട്ടന്‍ ബിരിയാണി ഉണ്ടോന്നു.. പാകിസ്ഥാനി മട്ടന്‍ ബിരിയാണി.."
മൂപ്പരു കസേരയില്‍ നിന്നെണീറ്റ് മേശയില്‍ രണ്ടു കയ്യും കുത്തി കണ്ണുരുട്ടി മുന്നോട്ടാഞ്ഞ് പറഞ്ഞു..
"ഹം ബംഗ്ലാദേസീ ഹേ.. ബംഗാളി ബിരിയാണി തരാം.."

ഹും.. എന്റെ പട്ടി തിന്നും ലവന്റെ ബിരിയാണി.. വെശന്നാലും വേണ്ടൂല.. ശപഥത്തിനൊരു കുഴപ്പവും പറ്റൂലല്ലോ എന്നു സമാധാനിച്ച് പുറത്തേക്ക് നടന്നു. പുറത്തേക്ക് ഓരൊ സ്റ്റെപ്പ് വെക്കുമ്പോഴും വയറ്റിലെ സൈറണ്ടേ നിലവിളി കൂറ്റുന്നു.. അതു കൊണ്ട് തിരിച്ചു പോകുന്നേനും മുന്നു ചുമ്മാ ഒരു ക്യൂരിയോസിറ്റി തീര്‍ക്കാന്‍ അങ്ങേരോടു ചോദിക്കാന്‍ തീരുമാനിച്ചു....

"അതേ ചേട്ടാ ഈ ബംഗാളി ബിരിയാണിയും പാകിസ്ഥാനി ബിരിയാണിയും തമ്മില്‍ വല്ല അവിഹിത ബന്ധവും ഉണ്ടോ..? ഐ മീന്‍ എനി ഡിഫെറെന്‍സ്..??"

"ബന്ധമുണ്ട്.. ലേകിന്‍ അതു മാത്രമല്ല, ഉസ്മേ കോയീ ഡിഫെറെന്‍സ് നഹീ ഹേ.."
പടച്ചോനേ.. ചോദിച്ചത് പണിയായോ.. ഇവനെന്തൊക്കെയ ഈ പറയുന്നത്..

"ഏഹ്..??"

"അരേ ബായി.. രണ്ടിന്റേം പേരു ബിരിയാണി തന്നെയാണു.. ഇടുന്നതു മട്ടന്‍ തന്നെ.. പക്ഷേ സിര്‍ഫ് നാം അലഗ് രഖാ ഹേ.."

ആഹാ.. എന്നാലൊന്നു കണ്ടിട്ട് തന്നെ കാര്യം.. പക്ഷേ ശപഥം അതല്ലല്ലോ.. പാകിസ്ഥാനി ബിരിയാണീ.. അതും പാകിസ്ഥാനി ഹോട്ടെലീന്നു തന്നെയേ കഴിക്കൂ എന്നല്ലേ..? എന്നാലും ഇയാളിതിത്രയുമുറപ്പിച്ചു പറയുന്ന സ്ഥിതിക്കൊന്നു മുട്ടി നോക്കണോ..?

താടിയും ചൊറിഞ്ഞ് കണ്‍ഫ്യൂഷെനില്‍ നിക്കുമ്പോ വയറു തെറി വിളിക്കാന്‍ തുടങ്ങി.. ആലോചിച്ച് നിക്കാണ്ട് എന്തെങ്കിലും വാങ്ങിച്ചിങ്ങോട്ടിടെടാ പട്ടീ... ഇല്ലേല്‍ ഞാന്‍ നിന്റെ കൊടലു അരച്ച് ദഹിപ്പിക്കും..

"എന്നാലും ചേട്ടാ.. ഈ ബംഗാളീ ബിരിയാണീന്നൊക്കെ പറയുമ്പോ..." ഞാന്‍ വീണ്ടും തല ചൊറിഞ്ഞു..
'വേണോങ്കി ഇരുന്നു തിന്നേച്ചും പോടേയ്' എന്ന മട്ടില്‍ ഒരു നോട്ടവും ആക്കുന്ന ടോണില്‍ അങ്ങേരൊരു ചോദ്യവും.. " വേണോ.. വേണ്ടേ...? ഇല്ലേലെനിക്കു വേറേ പണീയുണ്ട്.. പോയി അവിടെ ഇരുന്നിട്ട് ആലോചിക്ക്.." എന്നും പറഞ്ഞ് ഒരു കസേരയിലേക്ക് വിരല്‍ ചൂണ്ടി...

ഏഹ്.. കസ്റ്റമര്‍ ഈസ് ദി കിങ്ങ് എന്ന ആപ്ത വാക്യം അറിയാതെ ഹോട്ടെലും തുറന്നു വെച്ചിരിക്കുന്ന പന്ന മൊതലാളീ.. എന്നോട് ഇരിക്കാന്‍ പറയുന്നോ..? ദേഷ്യം വന്ന ഞാന്‍ അതേ പോലെ തന്നെ തിരിച്ചു മറുപടി കൊടുത്തു..

"ഹും.. ഇരിക്കാന്‍ എനിക്കും സമയമില്ല.. എനിക്കു പാര്‍സല്‍ മതി..!!" ഞാന്‍ ഇവിടെ ഇരുന്നു ഇവന്റെ സല്‍ക്കാരം സ്വീകരിക്കാന്‍ വന്നതല്ലെന്നു ഇവനറിയട്ടെ...

മൂപ്പരപ്പോ തന്നെ പോത്തു കരയുന്ന രീതിയില്‍ അകത്തെക്ക് നോക്കി വിളിച്ചു പറഞ്ഞു.. "അരേ ടിക്കാറാം.. ഈ ചങ്ങായിക്ക് ഒരു മട്ടന്‍ ബിരിയാണി പാര്‍സല്‍ ദേദോ..."

എന്നിട്ട് എങ്ങനുണ്ട് എന്ന രീതിയില്‍ എന്നെ നോക്കി രണ്ടു പ്രാവശ്യം പുരികമൊന്നു വെട്ടിച്ചു.. ഞാന്‍ എന്റെ ഷോള്‍ഡര്‍ രണും രണ്ടു പ്രാവശ്യം മുകളിലേക്കും താഴോട്ടും ആക്കി കണ്ണുമടച്ച് ഒന്നുമില്ലാന്നു കാണിച്ചു.. എന്തായാലും ശപഥം കമ്പ്ലീറ്റ് പൊളിഞ്ഞ് പാളീസായി ഇനിയീ കളിക്ക് ഞാനില്ലാന്നും പറഞ്ഞ് പിണങ്ങി ഒരു ഓട്ടോ പിടിച്ച് വീട്ടിലേക്ക് പോയി. ഞാനൊറ്റക്കായി.. അങ്ങേരു പുരികം പൊക്കി ചോദിച്ച സ്ഥിതിക്ക് ഒരു കൈ നോക്കാന്‍ തന്നെ തീരുമാനിച്ചു....

"അതേ അവനോട് പറ, നല്ല വലിയ പീസു നോക്കി ഇട്ടോളാന്‍.. ഇറച്ചി കുറച്ച് കൂടീന്നു വെച്ച് എനിക്കൊരു കുഴപ്പവും ഇല്ല.."
"ഹും മലബാരി ആണല്ലേ..?" ചുറ്റുപാടും ഒന്നു നോക്കി.. തൊട്ടടുത്ത് വല്ല മലയാളിയും ആ സമയത്തുണ്ടായിരുന്നെങ്കില്‍മലയാളികളേ പറയിപ്പിക്കുന്നോടാ എന്നും ചോദിച്ച് എന്റെ ചെപ്പക്കുറ്റി അടിച്ചു മൂളിച്ചേനേ... എന്നാലും അഭിമാനം വിട്ടു കളിക്കാന്‍ നമ്മളു തയ്യാറായില്ല.. കേരളമെന്നു കേട്ടാല്‍ തിളക്കണം ചോര ഞെരമ്പുകളില്‍ എന്നാണു പഴമൊഴി.. പോരാത്തതിനു ഇപ്പോ വയറും തിളച്ചു തുടങ്ങീട്ടുണ്ട്...

"അതെ.. എന്നാലും എന്റെ പീസിന്റെ കാര്യം.." ഞാന്‍ തല ചൊറിഞ്ഞു. മുഖത്തു നിറയെ എന്തോ ഒരു ഭാവം കോരി നിറച്ച് അങ്ങേരൊരു ഫിലോസഫി അങ്ങു കാച്ചി..

"വോ നഹീ ഹോഗാ ഭായി. അയാം ദി സോറി..."
എന്റെ സകലമാന പ്ര്തീക്ഷകളും അസ്തമിച്ചു...
"ക്യൂം നഹീ ഹോഗാ...?" നിരാശ..

"ക്യൂം കി.., ഖുദാ നേ ആപ്കേ നസീബ് മേ ജോ ലിഖാ ഹേ.. ആപ്കോ സിര്‍ഫ് വോഹീ മിലേഖാ..."

ആഹാ.. ഈ ഹോട്ടലുകാര്‍ക്കെല്ലാം ഫൊലോസഫി പറയലാണോ പണി..? പണ്ടു ഉസ്താതു ഹോട്ടലിലും തിലകന്‍ പറയുന്ന കേട്ടു.. കിസ്മതെന്നോ കട്ടന്‍ കാപ്പിയെന്നോ മറ്റോ.. ഞാനും ഫിലോസഫിയില്‍ ഒട്ടും മോശമല്ല.. മാത്രമല്ല എന്റെ തീരുമാനങ്ങളാണു എന്റെ വിധി എന്ന് രണ്ടൂസം മുന്നു എഫ് ബിയില്‍ ഞാന്‍ ഷെയര്‍ ചെയ്തതുമാണു.. വിട്ടു കൊടുക്കാന്‍ പാടില്ല.."

"അങ്ങനെ ആണെങ്കില്‍ നിന്റെ നസീബില്‍ എന്റെ കച്ചോടം എഴുതീട്ടില്ല മന്‍ഷ്യാ.. ചിലപ്പോള്‍ അപ്പര്‍ത്തെ ഹോട്ടെലുകാരന്റെ നസീബിലായിരിക്കും..!! മനുഷ്യനായാല്‍ കുറച്ചെങ്കിലും കിസ്മത് വേണമെടോ.. കിസ്മത്.. അല്ല പിന്നെ.."
എനിക്കറിയാവുന്ന ഹിന്ദിയില്‍ വെച്ചു കാച്ചി, ബിര്യാണീം വേണ്ട ഒരു കോപ്പും വേണ്ടാ എന്ന് തീരുമാനിച്ച്, എന്നെ ചീത്ത വിളിച്ച് ഓട്ടോ പിടിച്ച് വീട്ടിലോട്ട് പോയ ശപഥത്തേയും തിരിച്ച് വിളിച്ച് ഞാന്‍ തിരിച്ച് നടന്നു..

പക്ഷേ കടക്കാരന്റെ അടുത്ത ഫിലോസഫി എന്നെ ഞെട്ടിച്ചു കളഞ്ഞു..

"അരേ ടിക്കാറാം.. സാബ് കോ ഒരു ഇസ്പെഷ്യല്‍ ബിരിയാണീ വെല്യേ പീസിട്ടു കൊടുക്കെടാ.. !!"

എന്തായാലും ഡയറ്റിങ്ങിന്റെ കാര്യത്തിനൊരു തീരുമാനമായി. കവറില്‍ കെട്ടിയ ബിരിയാണി ഒരു കയ്യില്‍ തൂക്കി പിടിച്ച് വീട്ടിലേക്ക് നടക്കുമ്പോള്‍ ഞാന്‍ ആലോചിക്കുകയായിരുന്നു.. ' വായീ കെടക്കണ നാക്കിനു അത്യവശ്യം ഉളുപ്പില്ലായ്മ കൂട്ടിനുണ്ടെങ്കില്‍ നമ്മുടെ നസീബ് നമുക്ക് തന്നെ തീരുമാനിക്കാവുന്നതേ ഒള്ളൂ...'

നിരപരാധി

2015-04-09T11:02:00.003+03:00

അങ്ങാടിയില്‍ പൊരിഞ്ഞ അടി.. നാട്ടില്‍ പുതിയതായി ഉദയം കൊണ്ട ഗുണ്ടകളായത് കൊണ്ട് ആര്‍ക്കും അടുക്കാന്‍ ധൈര്യമില്ല.. അടിപിടി പൊടിപൂരമായിക്കൊണ്ടിരിക്കുന്ന സമയത്താണു നാട്ടിലെ റിട്ടയേര്‍ഡ് ഗുണ്ട വന്നത്.. എല്ലാ നാട്ടിലെയും റിട്ടയേര്‍ഡ് ഗുണ്ടകളെ പോലെ തന്നെ പേര്‍ ഹൈദ്രോസ്, ജോലി ഇറച്ചിവെട്ട്, പ്ലസ് വയറു നിറച്ച് വിവരമില്ലായ്മയും.

പാവപ്പെട്ട രണ്ടുഗുണ്ടകള്‍ റോഡില്‍ കിടന്ന് അടി കൂടുന്നതും പോട്ടെ അതു നാട്ടാരു കണ്ട് രസിക്കുന്നു.. ചില മൂരാച്ചികള്‍ അതു മൊബൈലില്‍ വീഡിയോ എടുക്കുന്നു.. വെറ്തെ ഗുണ്ടേള്‍ടെ പേരു കളയാനായിട്ട്.. ഹൈദ്രോസ് നോക്കി നിന്നില്ല.. രണ്ടാളെയും പിടിച്ചു മാറ്റി കോമ്പ്രമൈസ് ചര്‍ച്ചകള്‍ ആരംഭിച്ചു..

ആ സമയത്ത് തന്നെ പോലീസ് ജീപ്പ് പാഞ്ഞ് വന്നു, ജീപ്പ്‌ നിർത്തുന്നതിനു മുന്നേ‍ ചാടിയിറങ്ങിയ എസ്സൈ ഹൈദ്രോസ് ഗുണ്ടയുടെ ചെപ്പക്കുറ്റിക്ക് ഒരു വീക്ക്.. കൂട്ടിനു നാലു പച്ചത്തെറിയും.. ഇത് കണ്ട നാട്ടുകാരിലൊരാള്‍ക്ക് സഹിച്ചില്ല.. പാവപ്പെട്ട ഗുണ്ടയേ ഒരു കാര്യവുമില്ലാതെ പോലീസുകാര്‍ തലുകയോ.. അവനിലെ പൗരബോധമുണര്‍ന്നു.. ഗുണ്ടയേ ചൂണ്ടി അവന്‍ ഉറക്കെ വിളിച്ചു പറഞ്ഞു..

"സാറെ.. അങ്ങേരു നിരപരാധിയാണു..."

പോലീസിന്റെ അടി കൊണ്ടതിന്റെ ബാക്കി പത്രമായി കിട്ടിയ നക്ഷത്രങ്ങളെല്ലാം എണ്ണി തീര്‍ന്നിട്ടും അടിയുടെ വേദന മാറാതെ മുഖം തടവി കൊണ്ടിരുന്ന ഹൈദ്രോസ്.. തന്റെ നേരെ വിരല്‍ ചൂണ്ടി ആക്രോശിക്കുന്ന നാട്ടുകാരനെ കണ്ടതോടെ അവന്റെ കോളറു പിടിച്ച് വലിച്ച് തലങ്ങു വിലങ്ങു എടുത്തിട്ട് പൂശി.. പോലീസുകാരും നാട്ടുകാരും ഇയാളെന്തിനാണീ പാവത്തിന്റെ നെഞ്ചത്ത് പൊങ്കാലയിടുന്നതെന്ന് ആലോചിച്ച് താടിയും ചൊറിഞ്ഞ് നില്‍ക്കുകയാണ്..

താഴെ വീണു കിടക്കുന്നവന്റെ നെഞ്ചില്‍ തന്റെ വലത്തേ കാലു ലാന്റു ചെയ്ത് ഹൈദ്രോസും അലറി..
"ഒരു പ്രശ്നത്തിനുമില്ലാതെ, പിടിച്ച് മാറ്റാന്‍ വന്ന ഞാനെങ്ങനെയാടാ നായിന്റെ മോനേ ഈ കേസില്‍ നിരപരാധിയാകുന്നത്..?"

ഓരോരോ ഗര്‍ഭപ്പൂതികളേ..

2014-09-30T20:57:00.000+03:00

ജബ്ബാറിന്നു ഭയങ്കര സന്തോഷത്തിലാണു.. ഓഫീസിലെ എല്ലാവർക്കും ജിലേബി കൊടുക്കുന്നു.. മിഠായി കൊടുക്കുന്നു.. എന്തിനു പറയുന്നു വല്ലപ്പോഴുമൊക്കെ തോന്നുമ്പോ തോന്നുമ്പോ പൊട്ടിച്ചു കളിക്കാൻ സൂക്ഷിച്ചു വെച്ചിരുന്ന ലഡ്ഡു വരെ എടുത്ത് കൊടുത്തു.. എന്താന്നു ചോദിച്ചപ്പോള് ജബ്ബാറിന്റ മുഖത്ത് വാക പൂത്ത പോലെ വല്ലാത്ത നാണം പൂത്ത് വിടര്ന്നു.. എപ്പോ നോക്കിയാലും ഇപ്പോ കുത്തും എന്ന മട്ടില് നില്ക്കുന്ന മീശയെല്ലാം കൂടെ വിനയ കുനിയാന്വിതനായി താഴോട്ടിരുന്നു.. കയ്യിലിരുന്ന പലഹാര പാത്രം മേശപ്പുറത്ത് വെച്ച്, തല കുനിച്ച്, കയ്യിലെ നഖം കടിച്ച് തുപ്പി രണ്ട് സൈഡിലേക്കും ആടി ഷൂസു കൊണ്ട് താഴെ ടൈല്സില് പടം വരക്കാന് തുടങ്ങി.. എന്നിട്ട് മുഖം തിരിച്ച് ഓഫീസ് സ്റ്റാഫിനെ നോക്കി കണ്ണിറുക്കി കാണിച്ച് പറഞ്ഞു..

"വിശേഷായീട്ടാ..."
"ഏഹ്.. എന്തു വിശേഷം...??"
"ഓഹ്.. ഇയ്യൊന്നു പോയെ ഒന്നും അറിയാത്ത പൊലെ.. ന്റെ സൂറാക്ക് വിശേഷായീന്ന്.."

സൂറാക്ക് വിശേഷമായി എന്നു പറഞ്ഞാൽ അതു ഒരു വിശേഷ വാർത്ത തന്നെയാണു. കാരണം കല്യാണം കഴിഞ്ഞ് വർഷങ്ങളായി ശ്രമിച്ചിട്ടും നടക്കാതെ പല പല ട്രീറ്റ്മെന്റുകളുമെല്ലാം കഴിഞ്ഞപ്പഴാണു ഈ അത്ഭുതം സംഭവിച്ചിരിക്കുന്നത്. നേരാത്ത നേർച്ചകളുമില്ല.. അവസാനം വന്നപ്പോൾ വല്ല പത്താം നിലയുടെ മുകളിൽ നിന്നും തല കുത്തി ചാടിയാൽ കുട്ടിയുണ്ടാകും എന്നു ആരെങ്കിലും പറഞ്ഞാൽ അതു ചെയ്യാനും തയ്യാറായിട്ടായിരുന്നു ജബ്ബാറീന്റെയും സൂറാന്റെയും നടപ്പ്.

സൂറായാണെങ്കിൽ ഈയിടെയായിട്ട് വല്ലാത്ത വിഷമത്തിലായിരുന്നു. ഒരു കല്യാണത്തിനോ മരിച്ച വീട്ടിലോ ഒന്നും പോകാൻ കഴിയാത്ത അവസ്ഥ. കുട്ടികളില്ലാത്ത വേദന മറക്കാൻ ശ്രമിച്ചാലും നാട്ടുകാരും ബന്ധൂക്കാരും അതു സമ്മതിക്കില്ല. ഇവരുടെയെല്ലാം ആകാംഷ കാണുമ്പോൾ തോന്നും സൂറാ പെറ്റിട്ടു വേണം അവരുടെ സ്വത്തു വകകളൊക്കെ ആ കുട്ടിക്ക് എഴുതി കൊടുക്കാൻ എന്നു. എന്തായാലും ഇപ്പോ സൂറായും ജബ്ബാറും ഹാപ്പിയാണു.. വെറും ഹാപ്പിയല്ല.. ഒടുക്കത്തെ ഹാപ്പി..

സൂറാക്ക് വിശേഷമായതോടേ ജബ്ബാർ വീടിന്റെ പരിസരത്തുള്ള എല്ലാ വീടുകളിലും പറമ്പുകളിലും ഉള്ള പുളിമരം, മാവ്, പ്ലാവ്, പതിനെട്ടാം പട്ട തെങ്ങ്, ലൂവിക്ക എന്നു വേണ്ട സകലമാന മരങ്ങളുടെയും ലിസ്റ്റ് എടുത്ത് വെച്ചു. ഈ മരങ്ങൾ നിൽക്കുന്ന പറമ്പിന്റെയെല്ലാം ഉടമസ്ഥന്മാരെ കണ്ട് ഏതു നിമിഷം വേണമെങ്കിലും ഈ മരങ്ങളിലെല്ലാം കയറാനും ആവശ്യത്തിനുള്ളത് പറിക്കാനുമുള്ള ഒരു ഉടമ്പടിയുണ്ടാക്കി അതിലൊപ്പു വെച്ച് കാത്തിരിപ്പ് തുടങ്ങി. ഒരു 3 കിലോമീറ്റർ ചുറ്റളവിലുള്ള ഹോട്ടലുകളിലെല്ലാം പോയി അവിടുത്തെ മെനു കാർഡും സംഘടിപ്പിച്ച് അതിൽ അവരെപ്പൊ തുറക്കും എപ്പോ അടക്കും എന്നെല്ലാം എഴുതി വെച്ചു. കാരണം, വിശേഷമായത് കൊണ്ട് തന്നെ നാട്ടു നടപ്പനുസരിച്ച് ഒരു സാധാരണ പെണ്ണീനുണ്ടാകാവുന്ന ഗർഭപ്പൂതി സൂറാക്കും ഉണ്ടാകും. അങ്ങനെ ഉണ്ടായാൽ അപ്പോ തന്നെ അതു സാധിപ്പിച്ചു കൊടുക്കണം. കൂട്ടുകാരും ബന്ധൂക്കാരുമെല്ലാം അവരുടെ ഭാര്യമാരുടെ പൂതിയും അതെല്ലാം സംഘടിപ്പിച്ചു കൊടുക്കാൻ അവർ പെട്ട പാടുകളുമെല്ലാം വിവരിച്ച് അങ്കം ജയിച്ച ചേകവരെ പോലെ നെഞ്ചും വിരിച്ച് നിൽക്കുമ്പോൾ ഇതൊക്കെയെന്ത് എന്ന ഭാവത്തിൽ അവരെയെല്ലാം ആക്കി ചിരിക്കുമ്പോഴും തനിക്കിതിനൊന്നുമുള്ള ഭാഗ്യം പടച്ചവൻ തരുന്നില്ലല്ലോ എന്ന വേദന ജബ്ബാറിന്റെ മനസ്സിലുണ്ടായിരുന്നു

എല്ലാ ദിവസവും സൂറാനെ കാണുമ്പോൾ ജബ്ബാർ കൊതിയോടെ നോക്കും.. എന്തെങ്കിലും പറയാൻ സൂറ വാ തുറക്കുമ്പ്ഴേക്കും ജബ്ബാർ ഓടി വല്ല മരത്തിലും കയറാൻ തയ്യാറായി സ്റ്റാർട്ടിങ്ങ് പോയിന്റിൽ വെടിയൊച്ചക്കു വേണ്ടി കാത്തു നിൽക്കുന്ന ഓട്ടക്കാരെ പോലെ സ്റ്റെപ്പെടുക്കും. പക്ഷേ ജബ്ബാറിന്റെ നിരാശനാക്കി സൂറ പറയുന്നത് അന്നത്തെ കറിക്കെന്തുണ്ടാക്കണം കറന്റു ബില്ലടച്ചില്ല, പാൽ കാരനു കാശു കൊടുത്തില്ല തുടന്ങി ജബ്ബാർ വർഷങ്ങളായി കേട്ടു കേട്ടു വെറുത്ത കാര്യങ്ങളായിരിക്കും.

അഞ്ചാം മാസമായിട്ടു സൂറാക്കു ഗർഭപൂതി വരുന്നില്ല.. ഒരു ഭാഗത്ത് നിന്നും തന്റെ പ്രതീക്ഷകളെല്ലാം പൊട്ടിപ്പൊളിഞ്ഞ് പാളീസായ നിരാശ ജബ്ബാറിനെ കാർന്നു തിന്നുമ്പോൾ സൂറാക്കെന്താ പൂതിയൊന്നും വരാത്തത്, ഇനിയിപ്പോ വയറ്റിൽ കിടക്കുന്ന കുട്ടിക്കെന്തെങ്കിലും പ്രശ്നമുണ്ടോ എന്ന ആധി വേറൊരു വശത്തു നിന്നും ആക്രമിക്കാൻ തുടങ്ങി. അങ്ങനെ ജബ്ബാറിന്റെ പതിവു ജീവിത ശൈലിയിൽ വനിത, മലയാള മനോരമ, മംഗളം, മനോരാജ്യം എന്തിനു ബാലരമയിലും പൂമ്പാറ്റയിലും വരെ ഡോക്ടറോടു ചോദിക്കുക എന്ന പംക്തിയുണ്ടോ എന്നു പരിശോധിക്കലും കൂടെ സ്ഥാനം പിടിച്ചു. ദിവസവും ഇന്നത്തെ പ്രോഗ്രാം ചെക്ക് ചെയ്തു ചാനലുകളായ ചാനലുകളിലെല്ലാം വരുന്ന ആരോഗ്യ പരിപാടികൾ മുടങ്ങാതെ കാണാൻ തുടങ്ങി. പക്ഷേ ഒരിക്കൽ പോലും സൂറാനോട് അനക്ക് പൂതിയൊന്നും ഇല്ലേടീ എന്നു ചോദിക്കാനുള്ള മനസ്സു ജബ്ബാറിനുണ്ടായില്ല. കാരണം അങ്ങനെ ചോദിച്ച് പറയുന്ന പൂതിക്കൊരു ത്രില്ലുണ്ടാകില്ല എന്നായിരുന്നു ജബ്ബാറിന്റെ പക്ഷം.

ഇടക്കൊരിക്കൽ സൂറാക്കെന്തോ ബുദ്ധിമുട്ടു തോന്നിയപ്പോൾ ഡോക്ടറേ കാണിക്കാൻ പോയപ്പോൾ അതി രഹസ്യമായി ഡോകടറോട് ഈ കാര്യം സൂചിപ്പിച്ചപ്പൊൾ ഡോക്ടർ ജബ്ബാറിന്റെ കളിയാക്കി..

"ഒന്നു പോ ജബ്ബാറെ.. അതൊക്കെ ഇത്ര കാര്യമാക്കാനൊന്നും ഇല്ല.. ഇപ്പഴത്തെ കാലം മാറിയില്ലെ.. ഈ ഗർഭപൂതിയെല്ലാം പണ്ടത്തെ പെണ്ണുങ്ങൾക്കാ.. ആ പിന്നെ കുട്ടിയുടെ പൊസിഷനിൽ ചില പ്രശ്നങ്ങൾ കാണുന്നുണ്ട്. അതു കൊണ്ട് ഒന്നു ശ്രദ്ധിച്ചേക്കണേ.. സൂറാനോട് പറഞ്ഞ് ഓളേ ടെൻഷനാക്കെണ്ട.."

അന്നു രാത്രി എന്തൊക്കെയോ സ്വപ്നങ്ങൾ കണ്ട് പേടിച്ച് വിജ്രംഭിച്ച് വിയർത്ത് കുളിച്ച് കിടക്കുമ്പഴാണു ജബ്ബാറിന്റെ തലയിൽ സൂറ മാന്തുന്നത്. കയ് തട്ടിക്കളഞ്ഞ് തിരിഞ്ഞു കിടന്നപ്പോൾ ചെവിയിൽ പിടിച്ചു വലിക്കാനും വയറ്റത്ത് ഇക്കിളിയിടാനും തുടങ്ങി.. അവസാനം സൂറ ജബ്ബാറീന്റെ മുഖം പിടിച്ച് തിരിച്ച് മൂക്കു പൊത്തിപ്പിടിച്ചതോടേ ശ്വാസം മുട്ടി ജബ്ബാർ ചാടിയെഴുന്നേറ്റു. സൈഡിലെ ബെഡ്ലാമ്പിന്റെ വെളിച്ചത്തിൽ കണ്ടു കട്ടിലിന്റെ ഹെഡ് റെസ്റ്റിൽ തലയിണ ചാരി കാലു നീട്ടി വെച്ച് ചാരിയിരുന്ന് ഒരു കൈ കൊണ്ട് വയറു തടവി മറ്റേ കൈ കൊണ്ടാണു ഈ വക വേലത്തരങ്ങളെല്ലാം ഒപ്പിച്ചത്. ആ ഇരിപ്പും നോട്ടവുമെല്ലാം കണ്ടപ്പോൾ ജബ്ബാറിനു ആധി കയറി..

"ന്തു പറ്റി മുത്തേ.. അനക്കെന്തെങ്കിലും ബുദ്ധിമുട്ടുണ്ടാ.. ഡോക്ടറെ വിളിക്കണോ..?"
"ഏയ്.. ഇക്കൊന്നും ഇല്ലിക്കാ.. ഉറക്കം വരുന്നില്ല.. ഇക്ക കെടന്നൊറങ്ങുന്നത് കണ്ടിട്ട് ഇക്ക് സഹിക്കാനും പറ്റണില്ല.."
" ന്റെ സൂറാ.. അനക്ക് ഗർഭായത് അന്റെ ഭാഗ്യ.. ഇല്ലെങ്കിൽ ഇന്റെ കയ്യിപ്പോ അന്റെ തലമണ്ടേലിരുന്നേനെ.." പലുകടിച്ച് ദേഷ്യം കണ്ട്രോൾ ചെയ്ത് ജബ്ബാർ തുടർന്നു..

" സൂറാ.. ഡീ പോത്തേ.. പടച്ചോനെ ഓർത്ത് ഇയ്യൊന്നു കെടന്നൊറങ്ങ്.. ഈ സമയത്ത് ഇങ്ങനെ ഉറക്കം കളയാൻ പാടില്ല.."
"അതല്ലിക്കാ.. ഇക്കൊറക്കം വരാത്തേനു വേറൊരു കാരണംണ്ട്.. ഇന്നലെ ആ സീരിയൽ കണ്ടപ്പം മുതൽ ഇക്ക് വല്ലാത്തൊരാഗ്രഹം.."

ഇത് കേട്ടതോടേ ജബ്ബാറിന്റെ ഉറക്കമെല്ലാം പമ്പ കടന്നു.. അടിച്ചു മോനേ.. അടിച്ചു.. അവസാനം ആറ്റു നോറ്റിരുന്ന് സൂറാക്ക് ഗർഭപ്പൂതി വന്നു.. ബെഡിൽ നിന്നും ചാടിയെഴുന്നേറ്റ ജബ്ബാർ തന്റെ പൈജാമയുടെ വള്ളിയെല്ലാം ഒന്നൂടെ അഴിച്ചു മുറുക്കി കെട്ടി സ്റ്റാന്റിൽ തൂക്കിയിട്ടിരുന്ന ടീ ഷർട്ട് എടുത്തിട്ടു.. എന്നിട്ട് അലമാരിയ്ൽ ഭദ്രമായി സൂക്ഷിച്ചിരുന്ന കയറിന്റെ കഷണമെടുത്ത് വട്ടം ചുറ്റി മരത്തേൽ കയറുമ്പോൾ കാലിലിടാനുള്ള തളപ്പുണ്ടാക്കാൻ തുടങ്ങി.. അതു വട്ടത്തിലാക്കി ഒരു തലേക്കെട്ടു പോലെ തലയില്ലിട്ടു തന്റെ ഉണ്ടക്കണ്ണുരുട്ടി മീശ വിറപ്പിച്ച് സൂറാന്റെ അടുത്ത് ചെന്നു.. മുന്നോട്ടൊന്നു കുനിഞ്ഞ് തന്റെ രണ്ടു കൈപത്തിയും സൂറാന്റെ രണ്ടു കവിളിലും സ്നേഹത്തോടേ പിടിച്ച് കണ്ണുകളിലേക്കുറ്റു നോക്കി പരുക്കൻ ശബ്ദം പരമാവധി റൊമാന്റിക് ടോണിലാക്കി പതിഞ്ഞ ശബ്ദത്തിൽ ജബ്ബാർ ചോദിച്ചു..

"ന്റെ മുത്തിനെന്താണ്ടീ വേണ്ടത്.. അനക്ക് ലൂവിക്ക വേണോ..? ചാമ്പക്കാ വേണോ..? പുളി വേണോ..? മാങ്ങ വേണോ..? കരിക്കു വേണോ.. ഇയ്യ് പറയെന്റെ മുത്തേ ഏഴു കടലും നീന്തിക്കടന്ന് അതിന്റപ്പുറത്തെ മലേന്റെ മോളിലെ ഏറ്റവും വലിയ മരത്തുമ്മേ കേറി അനക്കു ഞാൻ ഒതളങ്ങ വരെ പറിച്ചന്റെ കയ്യിലോട്ടിട്ടു തരും അന്റെ ജബ്ബാറിക്ക.."

ജബ്ബാറിന്റെ ഈ ഭാവ വ്യത്യാസവും ഉത്സാഹവും കാട്ടിക്കൂട്ടലും വെപ്രാളവും ഡയലോഗുമെല്ലാം കണ്ട് പേടിച്ച സൂറാ തന്റെ കവിളത്ത് നിന്നും ജബ്ബാറിന്റെ രണ്ട് കൈകളും പറിച്ചെടുത്ത് വലിച്ചെറിഞ്ഞ് മീശയിൽ പിടിച്ചൊരു വലി വലിച്ചു..

"ന്റെ മൻഷ്യാ.. ഇങ്ങക്കെന്തിന്റെ കേടാ.. ഒറക്കം മൂത്ത് പ്രാന്തായാ.. ഇങ്ങളെന്തൂട്ടാ ഈ കാട്ടണതും പറയണതും..? പോയി മുഖം കഴുകീട്ടു വാ ന്റെ മൻഷ്യാ.. നട്ടപ്പാതിരാക്കാ ഇങ്ങടെ ഒരു കുട്ടിക്കളി..."

ഇതോടെ ജബ്ബാറിന്റെ പാതി ഗ്യാസ് പോയി.. എന്നാലും പ്രതീക്ഷ അസ്തമിച്ചില്ല.. പാതിരാക്ക് ഉറക്കം പോലും വരാതെ എന്തെങ്കിലും ആഗ്രഹിച്ചിരിക്കുന്നുണ്ടെങ്കിൽ 100 ശതമാനവും അതു ഗർഭപ്പൂതി തന്നെയാ.. നോ ഡൗട്ട് ഇൻ ദാറ്റ്..
"അല്ല സൂറാ അനക്കെന്തോ ആഗ്രഹം ഇണ്ടെന്ന് പറഞ്ഞു.. എന്താ അന്റെ പൂതി..?"
" ആഹ് അങ്ങനെ മര്യാദക്ക് ചോദിക്ക്.. ഞാൻ പറയട്ടെ..??"

ജബ്ബാറിന്റെ കണ്ണുകൾ വിടർന്നു.. മുഖം തുടുത്തു...
"ഇയ്യെന്താണെങ്കിലും പറ ന്റെ സൂറാ.. ഞാൻ ശെര്യാക്കി തരാം.."
"അതേ,, ഇനിക്കേ... "
"ഉം അനക്ക്..."
"ഇനിക്കേ..."
"ഉം ഇയ്യ് പറയെടീ പോത്തേ. അനക്ക് എന്തൂട്ട് ഒലക്കയാ വേണ്ടത്.." ജബ്ബാറിന്റെ ക്ഷമ നശിക്കാൻ തുടങ്ങി..

"ന്റെ മനുഷ്യാ.. ഇനിക്ക് സ്കൂട്ടി ഓടിക്കാൻ പഠിക്കണം... ഇന്നെന്നെ പഠിക്കണം.. ആ സീരിയലിൽ ആ പെണ്ണെന്തു രസായിട്ടാ സ്കൂട്ടി ഓടിക്കുന്നത്.. അതു കണ്ടപ്പ തൊട്ട് ഇക്ക് പൂതി കേറീതാ..

ജനിച്ചിട്ടിന്ന് വരെ ഒരു മൂന്നു ചക്രം സൈക്കിൾ പോലും ഓടിച്ചിട്ടില്ലാത്ത സൂറാടെ ഗർഭപ്പൂതി കേട്ട് സ്വന്തം തല എവിടെ കൊണ്ട് പോയി തല്ലി പൊട്ടിക്കണം എന്നാലോചിച്ച് ഒന്നും മിണ്ടാതെ ലൈറ്റും ഓഫാക്കി കിടന്ന് തല വഴി പുതപ്പിട്ട് മൂടി. അപ്പോഴും എന്താണു സംഭവിച്ചതെന്നു മനസ്സിലാവാതെ, ഇങ്ങേർക്കിതെന്തിന്റെ കേടാണെന്നോർത്ത് മേപ്പട്ടും നോക്കി സ്കൂട്ടിയോടിക്കുന്നത് സ്വപ്നം കണ്ട് ഇരിക്കുകയായിരുന്നു സൂറ...