平凡人日記

My 1st Day in Fine Art

2012-06-18T09:00:00.000-07:00

回顧 @ 2019 Oct

辭左工1個月多少少, 好快就搵到份好工(冇記錯見左3-4份工左右), 希望可以工作順利.
係黃埔甲級寫字樓返工真係有D緊張, 而且好新鮮, 因為以前多數都係工廠大廈或者工業區商廈.
仲要今次係Buying office, 有head office 係UK, 而且benefit好過以前好多, 仲要返5 day, 正!

感謝主, 感恩!

TRI KING Last Day

2012-05-11T18:00:00.000-07:00

回顧 @ 2019 Oct

今日係我係依間公司last day.
由2009年初入黎到依家都3年多, 係度學多左好多野識多左公司的內部鬥爭同對自己行業認識多左, 而且發生左好多人生ga大事: 結婚, 生仔, 主動同老闆要求加薪, 炒iphone, 裸辭
希望可以盡快搵到新工.

估神筆記: 調整參考

2012-02-01T22:07:00.000-08:00

估神筆記: 調整參考: 如以黃金比例作反彈目 , 現在已接近頂部 ( 跟長期降軌吻合 ). 再以之前幾次大調整作參考 , 如再有一次大調整 , 目標大概在 15000-16000 (似2000年調整), 跟之前提及的長期升軌吻合 . 如突破降軌 , 令作別論 ~ Risk off 不要持有...

小兒誕生的一天

2011-11-03T06:00:00.000-07:00

回顧 @ 2019 Oct

好想記底返 Ryker 出世時的經歷:
已經過左預產期幾日
仲記得2號個晚突然穿左羊水, 咁老婆就沖埋涼先入院.
入到院Settle左後差唔多係零晨, 咁老婆就叫我返去瞓一陣先, 因為醫生咁冇咁快出世.
咁我就返左屋企, 點知返到屋企沖完涼諗住瞓個陣就有電話黎話要入產房.
跟住我立刻返醫院, 冇記錯應該零晨4點左右入產房, 諗住好快會出世, 點知一等就等左十幾個鐘, 真好估唔到而且好深刻.

感謝主, 比Ryker同老婆都平平安安, 健健康康

迪士尼一日遊

2010-07-16T20:56:00.000-07:00

今日, 我請左假同老婆去左Disneyland. 真係好開心.

今朝一早我地先食個KFC早餐, 十點左右出發, 當然係搭地鐵la! 因為都唔知有乜野交通工具, 我地買左本雜誌打發一下時間, 估唔到車程比我想像中快. 去到迪士尼站見到勁多人, 心想唔係呀! 已經成十一點都仲咁多人, 唔知入到去會唔會仲多人? 去到迪士尼詀仲要行成5-8分鐘先到, 好心就用黎擴建個欒園啦!

一入到去立即拿地圖, 因為我係搭地鐵個陣用我部索愛X10上網做功課. 一入到去唔理個美國小鎮大街, 即刻去左SPACE Mountain拿個fast pass 先. 之後好似話有個巡遊, 咪過去睇下law, 點知超悶, 立刻拉老婆去影下相同玩BUZZ 歷險,(全個樂國最好玩.).

出返黎之後就去左等史迪仔個SHOW, 都OK. 因為有得涼下冷氣. ha ha ha.

睇完史迪仔, 立刻去排駛車天地, 好似都幾好玩. 但係就等左好耐, 臨上車前決定同老婆分開車玩, 一來可以互拍相影相, 二來好似有得楂車好玩d, 點知比前面個對慢駛情侶阻q住, 佢地開得超慢阻住晒後面d人, 又停車自拍, 真係玩都玩得唔開心. 算數…

返到出黎有d 餓, 所以就決定食隻大熱狗, ha ha ha.
真係好Q大隻架, 而且味道唔錯 - GOOD. 食完 hot dog, 我地即刻用我地張fast pass去左玩 Space Mountain. 估唔到係迪士尼士尼都有咁激ga遊戲. 玩完出黎有d頭暈.

定左落黎之後, 我地離開左”未來世界區", 去左”森林區”, 去到就睇左Lion King Show. 我見個d人評語好好, 以為好睇,,,,點知有d悶. 好彩只係排左一陣間ja, 冇浪費我d時間.

睇完獅子王, 我本來諗住去玩泰山屋同遊個船河, 點知老婆話唔好, 因為佢話個度好似多大陸人, 同佢地好臭又成身汗. 因為咁我地就離開左”森林區”, 去到”夢幻世界區.

到左”夢幻世界區”, 我地好好彩一入到去, 4D電影就黎開映, 我地即刻睇左先. 真係好4D, 都幾好睇(起碼好過獅子王), 接住見到阿Pooh咁多人, 我地毫不遲疑就去拿個fast pass先, 見個fast pass 上時間還有好耐先到, 咁我地就去左 Small World, 係個度我地影左好多相, 仲買左個雪糕食tim, 因為佢d雪糕筒係即做架, 真係好好食, 食完又飲左杯思樂冰, 不過真係一般. 食完飲完入去Small World, 點知由頭到尾就係聽到不同語言o既”細界真細小”個支歌仔, 超悶!!但係同船小學生們就好興奮. 我心諗依家d小學生真係好, 可以去迪士尼玩, 成三百幾蚊一個人, 做人父母真艱難.

坐完個隻又慢又悶o既Small World船隻後, 我地諗住可以趕到米奇golden show. 點知想入o既時候已經折人la, 下場要等到1個鐘後, 但係winne the pooh又未夠鐘wo. 所以咪去同d迪迪尼朋友影下相先law, 我地影左高飛, 布老圖同米妮. 不過真係要等下, 因為個個都想影多幾張, 最搞笑係有d小朋友買左d簽名冊比個d 迪迪尼人物簽名. 影完相我地就去玩阿Pooh啦! 一個Pooh的故事形式之遊, 我就覺得一般. 出返黎之後我地再影左一陣相, 最估唔到係原來係回旋木馬前面影相係咁靚架! 仲有我仲影左冇乜人留意到的石中神劍. Ha ha ha.

最後我地終於去到睇最後的米奇golden show, 都唔錯. 睇完之後, 我地返去”未來世界區”搵BUZZ影相, 仲用途$10 整左個buzz銅牌, 但係d做功真係一般, 如果佢做得好d我會整多幾個. 臨走前, 有d肚餓, 所以買左個牛角包食, 味道ok, 食完行左一陣小鎮大街就走lu.

雖然, 成個行程都好smooth, 不得不讚下自己安排得幾好, 而且等待時間不多, 所以都幾好玩, 但係個樂園真係太細la, 一日都玩曬d野, 而且唔係樣樣遊戲都想玩多次. 希望佢快d擴建多d野玩啦!

7月1日回歸 / 遊行

2010-07-01T21:27:00.000-07:00

唔知大家昨日有冇去遊行呢? 我自己就冇啦!
其實去遊行ga人, 又知唔知自己做緊乜都爭取緊乜野呢?
因為本人覺得好依家好多遊行人氏有好多都開始太激烈la!!
(咁激比人睇起黎都負面d啦!)

講真”中國政府”真係比左好大自由度香港, 而且出錢出力.
香港經濟都未搞返好, 就唔好爭取d不切實際o既野啦!

如果你話因為最低工資及最高工時去遊行, 起碼都係有point.
但係你話要普選, 談何容易, 就算比你爭取到, 由普羅大眾選出o黎o個個特首又係咪真係好搞好香港先?

其實我地最終目的應該係一個和平共容o既社會, 大家一齊建立好香港同時亦出一份力去推進中國經濟發展, 共同進步共同成長. 咁唔係仲好嗎?
盲目咁去爭取民主真係可以幫助香港嗎?
胡亂發表意見, 批評政策真係可以幫助市民大眾嗎?
成日都話成香港政府唔好(講個唔好聽”好費”_), 咁個d議員係咪應該做返d實際o既野去令個政府更有效率, 推出一d合乎市民需要o既政策呢?

我諗大家真係要理智d去諗一諗以上問題.

P.S. 本人立場是中立的, 只是客觀提出自己意見.

2010-06-22T23:17:00.000-07:00

今日係一個新o既開始.
我在這個地方延續我在showhappy.net內的網上日記.
不是寄望點激率增加, 只是想找一個大眾化的坪台.

P.S. 如有興趣請到 http://diary.showhappy.net/?id=112700 參觀

My BIG DAY

2010-02-26T06:00:00.000-08:00

回顧 @ 2019 Oct

今日係我人生大日子, 我終於大個仔要結婚啦.
搵左好多兄弟姐妹黎幫手, 其實好似一大班人玩咁, 時間過得好快而且中間有好多野反應唔切, 好在有好多家人同朋友幫手, 結婚大日子真係會好攰, 但非常開心, 多謝有出席的所有人, 中有仲緊要係我老婆.

願主祝福每一個人