MUSIKA

BADATOR SANTA AGEDA!

noreply@blogger.com (maitane urberuaga) — Sun, 20 Jan 2008 15:58:00 +0000

OTSAILEAREN 4AN, DENOK ABESTERA!!!

Euska l Herrian, aspalditik ospatzen da Santa Ageda bezperako jaia. Jai honek, jatorri paganoa du, eta iristear dauden inauteriekin du zerikusia.

Garai batean, inauteri inguruan baserriz baserri ibiltzen ziren koplak kantatzen mutil ezkongabeak, eta horren truke jatekoa enaten zieten baserritarrek. Santa Ageda bezperan, beren amodioaren berri ematen zuten bikotekidea aurkitu zutenek, eta baserritarrek emandako jakiekin afari oparoa egiten zuten lagun eta senideekin. Ospakizun garrantzitsua izaten zen.

Horrela bada, kristau doktrinak giro lizun hura gaitzesten zuen, eta ondorioz, Santa Ageda besperako jaia antolatu zen. Dena dela, orduz geroztik, gauzak dezente aldatu dira.

Gaur egun, esaterako, gizonezkoez gain emakumezkoak ere ateratzen dira eskean. Horrez gain, jatekoa eta edatekoa ez ezik, dirua ere ematen diete koplatan aritzen direnei.

Beraz, egun horretan, gabonetatik armairuan gordeta dauden baserritarren arropak atara, jantzi eta kalera irtetzeko eguna da, koplak abesten. Hori bai, egun honetan ezin du inork etxean makila utzi!!!

1) Zorion etxe hontako denoi,
oles egitera gatoz:
aterik ate ohitura zaharra
aurten berritzeko asmoz.
ez gaude oso aberats diruz
ez-ta ere oiñetakoz;
baña eztarriz sano gabiltza
ta kanta nahi degu gogoz.

2) Santa Ageda bezpera degu
Euskalerriko eguna,
etxe guztiak kantuz pozteko
aukeratua eguna.
Santa maitea gaur hartu degu
gure bideko laguna;
haren laguntzaz bete gentzake
egun ontakojarduna.

DANBOR HOTSA KALEAN

noreply@blogger.com (maitane urberuaga) — Sun, 20 Jan 2008 15:30:00 +0000

Helduen danborrada noiz sortu zen argi ez baldin badago ere, haurrak1927ko urtarrilaren 20an- San Sebastian jaia-, ibili ziren lehen aldiz Donostiako kaleak musikaz betetzen. Izugarrizko arrakasta lortu zuen, dena dela, gerra garaian ez zen danbor hotsik entzun kaleetan zehar. Hala eta guztiz ere, gerra bukatu bezain laster, aurreko urteetan zuten gogo eta indar guztiekin atera ziren kalera.

Urtetik urtera, ugalduz joan zen eta gaur egun ere, hala doa danborradako parte hartzaileen kopurua, eta jadanik, Donostiako ikastetxe eta ikastola gehienek, beraien bataloia osatzen dute.

Aurtengoari dagokionez, urtarrilaren 18an aurkeztu zuten Haur Danborrada, eta danborrada egunean bertan, (urtarrilaren 20an), 45ikastetxe eta elkartek hartuko dute parte. Guztira, 4.666 haurrek hartuko dutelaik parte desfilean.

Donostiako danborradaz gain, Azpeitian ere izaten da, eta hemen ere izugarrizko jende multzoa biltzen da festa giroan.

TUTORIALA

noreply@blogger.com (maitane urberuaga) — Thu, 17 Jan 2008 17:23:00 +0000

Lauhileko honetan, Gotzonek eta biok, Unibertsitatean egin behar izan dugun tutoriala Freerip programaren ingurukoa izan da, bideoan ondo agertzen den moduan. Horrela bada, bideo honetan, hau erabiltzeko zenbait pauso azaltzen dira. Arina eta erraza da!

http://www.youtube.com/watch?v=2tgiDI1BBec

HAUR-MUSIKA TOPAKETAK MARTXAN!

noreply@blogger.com (maitane urberuaga) — Tue, 15 Jan 2008 10:07:00 +0000

Jadanik, III. Haur-musika topaketak antolatuko dira Bilboko Kafe Antzokian. Bertan adin eta leku ezberdinetako haurrek hartzen dute parte; batzuk musika tresnak joko dituzte, beste batzuk abestu... Hori bai, den-denek, musika eta kanturako duten zaletasuna eta trebetasuna adieraziz.

Euskaldunok, beti, dantzatzeko eta abesteko zaletasun handia izan dugu, eta ohitura honekin jarraitu nahi dute antolatzaileek. Horregatik, eskoletan, txokoetan, abesbatzetan edo musika eskoletan egiten dutena Bilboka Kafe Antzokian taularatuko dute.

Topaketa hauetan, esku-hartzen duten haurren adina 5-6 urtetik 14-15 urtera bitartekoak izango da. Topaketa hauetako interpretazioak desberdinak izan daitezke; musikalak, bakarrik ahotsez eginikoak edo biak konbinatuz egindakoak, hau da, musika tresnak eta ahotsak, alegia. Azkenik, parte hartze banaka, binaka edo taldeka egin daitezke.

Beraz, haur hauek ikusi nahi dituenak, badauka zita egina!

Topaketa hauek APIRILAREN 26an eta 27an BURUTUKO DIRA, arratsaldeko 18:00etan Bilboko Kafe Antzokian!!!

MUSIKOTERAPIA PRAKTIKAN!

noreply@blogger.com (maitane urberuaga) — Tue, 15 Jan 2008 09:50:00 +0000

Musikoterapia, beste zenbait artikuloetan ere aipatu izan dudan bezala, gaixotasunak, ezintasunak...gainditzeko modu bat izan daiteke, bai haurren kasuan baita helduen kasuan ere.
Horrela bada, hona hemen, You Tu Be-n testuinguru honen barruan aurkitu dudan bideo bat:

http://mx.youtube.com/watch?v=cbkTLHXN_SY

HEZKUNTZA ETA MUSIKA

noreply@blogger.com (maitane urberuaga) — Tue, 15 Jan 2008 09:05:00 +0000

Gaur eguneko gizartean, gizakion eguneroko bizitzako egoera askotan presente dago musika. Musika kontsumoa handitu egin da, eta gure bizitzetan leku nabarmena hartzen du. Komunikabideek eta teknologia berrien aurrerakadak, musika hedatzen eta honek, erabilpen erraza izan dezan lagundu dute.

Horrela, musikak ikasleengan duen garrantziaren jakitun da eskola eta horregatik, kalitatezko musika hezkuntza bermatu behar du.

Musika hezkuntzak ikasleei hezibidea ematen die behaketan, esperimentazioan, analisian eta errealitatearen hautematean, entzumena eta sormena garatuz, baita adierazpen eta komunikazio trebetasunak ere. Gainera, musika jardueretan parte hartuz, eta ahotsa, instrumentuak edo mugimendua eta dantzaren bitartez, sozializazioa bultzatzen da.

Euskal Herrian, musika elementu soziokultural nabarmenetako bat izan da eta gaur egun ere, horrelaxe jarraitzen du. Kultura guztien modura, euskaldunek kantuaren, instrumentuen, interpretazioaren eta dantzaren bitartez espresioa bideak jarraitu dituzte. Hori dela eta, musikak rol garrantzitsua betetzen du beste adierazpide batzuen aurkikuntzan eta horien erabilpen eta funtzio ezberdinen ezagutzan.

Musikaren bitartez, elkarbizitza-egoerak sortzen laguntzen duten musika-kulturen aniztasunaren ikuspegi zabal eta ireki bat garatzeko aukera ematen da, etorkizuneko gizartekideak pertsona konprometitu, kritiko eta solidario izan daitezen lagunduta.

Musika Hezkuntzak, zuzenean esku hartzen du oinarrizko hezkuntza eremuetan eta musika trebatzeaz haratago doa, ikasleen heziketa osoan laguntzen duelako gaitasun psikologiko, soziologiko, psikomotor eta intelektualak sustatuz. Honenbestez, musika arloan eragiteaz gain, ikasleen nortasunaren dimentsio garrantzitsu bat ere betetzen du eta arlo ezberdinetako ahalmenen garapenean laguntzen du, ikaste nabarmena eta interdiziplinarioa sustatuz.

Azkenik, adin txikienetik, musikaren ikaste prozesua, esperimentazio, esplorazio eta manipulazio ikuspegi batetik ulertu behar da, eta honekin batera gozamen eta sormen maila bilatuko da, sentipenak piztuz eta pertsonaren garapen prozesuak sustatuz.

URBIETAREN NONDIK NORAKOAK

noreply@blogger.com (maitane urberuaga) — Sun, 13 Jan 2008 18:35:00 +0000

Imanol Urbieta musikagile eta musika irakaslea Zarautzen jaio zen 1934an. Arantzazun eta Erroman ikasi ondoren, Filosofia ikasketak egin zituen Valentziako Unibertsitatean. Musika ikasketak, aldiz, Donostiako Musika Kontserbatorioan egin zituen.

Gazterik sartu zen musika munduan, Zarauzko Irrintzi taldean 1957 inguruan. Horrez gain, abesbatza eta musika taldean sortu zituen, horien artean Oleskariak zortzikotea, Naya orkestra... 1960ko hamarkadaren bueltan hasi zen haurrekin lanean, kantak eta ipuinak kontatzen, eta hortik sortu zen haurrentzat euskaraz egin den lehen grabazioa: Haur Kantariak (1967). Ondoren, Zarautzen musika eskola bat sortu zuen, Hernanin beste bat eta Donostian beste bat: Xirula Mirula, alegia.

Imanol Urbietarentzat, musika ez da inoiz helburua izan, baizik eta bitartekoa. Horrela bada, Zarauzko Udalak 1996an, Zarauzko Kultur Merezimenduaren saria eman zion, Urbietaren urte eta arlo askotako lana sarituz.

Hori dela eta, hona hemen Imanol Urbietak eginiko lanen zerrenda:

Haur kantariak (haurrentzako euskaraz egin den lehen diskoa: 1967)

Haur kantarien birlorak: Liburuxka eta 4 zinta

Nire lehen hitzak euskaraz: zinta bat

Xirula Mirula: liburu bat eta 4 zinta

Kriskitin kraskitin: LP/ zinta bat

Atotxa giroan: zinta bat

Xixupika 1: liburua eta 6 zinta/LP

Txalo Pintxalo: zinta bat

Ikusi Makusi: zinta bat

Bertsolaritzako doinu zaharrak: zinta 2

...

Goiko horiez gain, beste hainbeste lan egin ditu Urbietak, eta ez soilik euskaraz, baita gaztelaniaz ere. Gainera, musikaz gain, bideoak ere egin izan ditu, bai hizkuntza lantzeko, baita musika lantzeko asmoarekin ere. Horrez gain, ipuin libururen bat edo beste ere argitaratu ditu Urbietak.

Beraz, ezin genezake esan gizon hau, bere urte guzti horietan lo egon denik, ezta gutxiagorik ere!

MUSIKA LANTZEN

noreply@blogger.com (maitane urberuaga) — Sun, 13 Jan 2008 12:05:00 +0000

Aurreko artikuluan ere esan dugun bezala, musika komunikatzeko tresna bat da, adierazteko beste mintzaira mota bat, alegia. Musika, artea da. Horren haritik, Suchonulski-k zera dio: Arteari esker, jendeak bere mundu propioak sor ditzake forma eta kolorez, doinu eta hitzez, gertakari eta arazoez, esperientzia eta atxikipenez, sentiberatasun sozial eta pertsonalez.

Ildo berdinetik jarraituz eta musikara gehiago hurbilduz C.D. Fregtman-ek beste hau dio: Egoera emozionalen sortzaile eta bideratzaile gisa, musika gertakariaren bideari hasiera ematea guri dagokiguke, -irakasleei-.

Musikariek adierazteko, gure ahotsa edo beste musika tresnaren bat erabiltzen dugu. Dena dela, zein da musika tresna horren motorra?

Gorputzaren garrantzia

Bitartekariak

GORPUTZAREN GARRANTZIA

Musikarien abiapuntua gure gorputza da, eta ez guregandik dagoen musika tresna. Izan ere, musika tresna horren benetako motorra gure gorputza da. Hori dela eta, gorputzaren garrantzia azpimarratu beharra dago. Hau da, gure gorputzaren egoera fisikoaz, arnasketaren egoeraz, ahotsaren egoeraz, gure barneko sentsazioen egoeraz...kontziente eginaraztea litzateke musikarien helbururik nagusiena, gure gorputza baitugu sentitu eta adierazteko tresna nagusia.

Musikako irakasleen beste helburuetariko bat, edozein musikarenganako irekitasun kritikoa sortaraziz, aditu, sentitu eta biziaraztea da. Musika ez dugu soilik, entzumenarekin entzuten, gorputz osoarekin baizik. Gainera, entzuteaz gain, sentitu eta bizi egiten dugu.

Beraz, gorputzak musika arloan bi funtzio nagusi betetzen ditu. Alde batetik, hartu, entzun, aditu, hauteman, sentitu... eta beste alde batetik, sortu, egin, birproduzitu...Honetarako, gure gorputza zenbat eta esnatuago egon, orduan eta bizipen maila handiagoa izango du, inplikazio handiagoa eta azkenik, ulermen maila handiagoa.

BITARTEKARIAK

Gure helburuak lortze bidean, musikarekin zerikusia duen edo ez duen edozein objektu edo tresna bitartekari bat izan daiteke, zerbait adierazteko balioko diguna, hain zuzen ere.

Bitartekarien ezaugarriak honako hauek dira:

-Musika ez bezala, ikusi eta uki daitekeen gauza konkretu bat da.

-Besteei zerbait komunikatzeko bidea ematen digu.

-Gure beharretara egokitzen da.

-Ikasleari egin behar duen lana errazten dio.

Musika hezkuntzan, irudimena erabiliz hainbat bitartekari erabil daitezke. Txikienekin oso beharrezkoak da, beraiek musika oso gertutik bizi baitute, baina aldi berean oso abstraktua gertatzen zaie; tinbrea, altuera, iraupena...

Musika Hezkuntzan horien ulermenerako, bitartekariek laguntza aparta eskaintzen dute. Hona hemen adibide bat:

Isiltasuna eta ozentasuna

Haur Hezkuntzako hiru urteko gela batean egina da esperimentu hau. Hemen, bitartekari bezala, globoak eta musika erabiliz, haurren entzumen maila eta arreta esnatzea da.

Horretarako, gela bat globoz bete behar da, eta ondoren kontsigna sinplea luzatzen zaia haurrei "Musika hastean, globo guztiak airean egon behar dute, eta musika isiltzen den bakoitzean globo guztiak lurrean egon behar dute". Lehenengoz musika kentzen denean, hainbat haurrek jarraituko dute globoekin jolasten, baina azkenerako, isiltasunean globo guztiak lurrera jausten hasiko dira.

Ariketa hau oso gustuko dute, globoaren ludikotasunarenatik. Musikako irakasle bezala, azken helburua, bitartekari bezala musika soilik erabiliz, musika eta isiltasunaren arteko egoeraz haurra kontzientze egitea izango litzateke.

MUSIKAREN TERAPIA

noreply@blogger.com (maitane urberuaga) — Sun, 13 Jan 2008 11:15:00 +0000

Haurraren bizitzan, musika komunikatzeko tresna bat da, "musika, haurrek eta guk hitzegiten dugun hizkuntza komuna da. Hor, haurrak bere erritmoa erakusten digu, eta guk bere erritmoarekin bat egiten badugu, komunikazioa erraza izango litzateke. Dena dela, musika eskola batera doanean haurra, ez zaio esaten zein den berak jo behar duen instrumentua. Gaur egun, bi oinarri ditugu.

Txirula Mirulan, adibidez, euskararen berezitasuna dago alde batetik eta musikoterapia edo psikomotrizitateko ariketen bidez haurra laguntzea, bestetik."

Azken finean, musikaren helburua ez da musikariak sortzea, baizik eta musikaz baliatzea norberaren inhibizioak eta ezinak gainditzeko.

Haurrak, bere erritmo propioa izango du. Honek, amaren hitzak ere musika kontsideratuko ditu, gure hitzen doinua musika da berarentzat. Haurrak, melodia baino lehenago, hitzen grazia eta erritmoa sentitzen ditu. Beraz, pentsa euskarak zenbat erritmo eta musika dituen.

MUSIKA LASAIA FETUARENTZAT

noreply@blogger.com (maitane urberuaga) — Sun, 13 Jan 2008 10:40:00 +0000

Jaio aurretik, haurra oraindik fetua denean, kanpokoa entzuten omen du, neurri batean. Baieztapen hau, ikertzaile-talde batek ardiak aztertu ondoren konprobatu duena da. Izan ere, ardien eta gizakien umetokiek, antzeko akustika dute.

Ikertzaile hauen arabera, fetuak ongi bereizten ditu soinu baxuko hotsak -bokalak esaterako-, baina ez soinu altukoak, kontsonanteak, hain zuzen ere. Horrela bada, pianoko notekin ere gauza berbera gertatzen da, soilik nota baxuak bereizten baititu.

Haurdunaldian, helduek musika jartzen diote fetuari, orokorrean musika hori lasaia izaten da, eta ekintza horretan, fetuaren entzumena garatzen da.

MUSIKOTERAPIA, NON LANDU DAITEKE?

noreply@blogger.com (maitane urberuaga) — Sat, 12 Jan 2008 11:44:00 +0000

Musikoterapia hainbat pertsonekin landu daiteke, eta hainbat onura dakartza. Horrela bada, hona hemen musikoterapia landu daitekeenen zerrendatxo bat:

- Gaixotasun psikikoak dituzten pertsonekin
- Garapenerako gaitasun eza duten pertsonekin
- Helduekin
- Adizkzioak dituztenekin
- Buru urritasuna dutenekin
- Gaixotasun kronikoak dituztenekin
- Fisikoki ezgaitasuna dutenekin

Horrela bada, musikoterapiak guzti hauetan badu eraginik. Esaterako, gaixotasun psikikoak dituzten pertsonekin landuz gero, bakarkako zein taldeko esperientziak estimulatzen dira, sentimendu eta emozioak aztertuz. Horrela, norbere burua eta norberaren autoestimua hobeto ulertzen laguntzen du.

Bigarrenik, garapenerako gaitasun eza duten pertsonekin lantzean,mugimendua landuko da. Ondorioz, musikaren bitartez, mugimendu trebeziak edo trebezia kognitiboak bilatuko dira, eguneroko bizitzarako egokiak direnak, hain zuzen ere.

Horrez gain, helduekin ere landuko da, eta hauek, musikaren laguntzaz oroimena landuko dute, hau bizkortuz eta memoria landuz.

Adikzioak dituzten pertsonek errekuperazioan laguntzeko, musikoterapiak hainbat teknika erabiltzen ditu: entzunaldiak, inprobizazioak, kantak sortu...Adikzioak dituzten pertsonez gain, buru-erritasuna duten pertsonei ere laguntzen die terapia honek, besteak beste, autoestima, komunikazioa eta sozializazioa indartzeko, eta garapen kognitiboa bultzatzeko, musikako sormen edo inprobizazio taldeak antolatzen dira.

Guzti hauez gain, gaixotasun kronikoak dituzten pertsonei eta fisikoki ezgaituak diren pertsonei laguntzeko ere balio du. Esaterako, gaixotasun kronikoak dituztenekin, musika entzunaldiak eta bibroakustikako saioak eginez. Eta azkenik, fisikoki ezgaitasuna duten pertsonekin, motibazioa areagotzeko eta errehabilitazio helburuak betetzeko interesa lantzen dute, baita ere, frustazioa ekiditeko ahalegina ere egiten dute teknika hauek.

AHOTSAK LASAITZEKO ORDUA!

noreply@blogger.com (maitane urberuaga) — Sat, 12 Jan 2008 10:26:00 +0000

Jada gabonak pasatu dira, eta orain ahotsak lasaitzeko unea da. Opor hauetan, zenbat aldiz abestu ote dugu, gabon kantaren bat edo beste? Olentzero, gabon gaba bezperan, koplaren bat edo beste...

Izan ere, gabonetan kaleak abestiz betetzen dira, haur, gazte zein helduek kantatzen baitute. Horrela bada, abenduaren 23an, gabon gaba bezperan, kalera irten eta abesteko ohitura handia dago Euskal Herriko zenbait lekutan.

Leku batzuetan, gauean ateratzen dira kalera, eta beste batzuetan egun osoak ematen dituzte abesten, auzo eta etxeak alaituz. Gainera, kantatzen joaten direnak diru eskea ere erabiltzen dute. Honako ohitura hau, hainbat urte atzeragotik dator.

Emakumezkoak, gizonezkoak, neskak, zein mutilak baserritar janzten dira egun honetan, eta makila eskuan harturik abestu eta abestu jarduten dute, nekatu arte.

Horrez gain, Olentzero egunean bertan ere -abenduaren 24an-, kalean koroak kanta batzuk abesten ditu zenbait herritan edo beste zenbaitzutan Olentzerori ongi etorria fanfarriarekin egiten diote. Tokian tokiko harrera egiten baitiote gizon honi.

Azkenik, eta hasieran esan dudana berretsiz, gabonak eta musika elkarri loturik daude. Iazkoak bukatuta, aurtengo urtekoen zain geratzen gara!

URTE BERRI ON!!!

HORRA HOR GURE OLENTZERO!!!

noreply@blogger.com (maitane urberuaga) — Tue, 18 Dec 2007 17:01:00 +0000

Gero eta egun gutxiago falta dira, urtero bezala gure Olentzero kalean goitik-behera pasatzen ikusteko, eta ez hori bakarrik, kalean goitik-behera doan bitartean inguruan dituen haurrak agurtu eta ondoren, gozokiren bat edo beste ere ematen die Olentzerok. Honez gain, gauean etxerik etxe joaten da opariak bere astoaren gainean ipinita, ondo portatu direnei erregaluak uzten eta gaizki portatutakoei ikatza!

Honela bada, gabon egunarekin batera zoriona etortzen da Euskal Herriko etxe askotara, haurrak zein helduak abesten eta dantzan igarotzen baitituzte oporrak. Izan ere, nork ez du noizbait,-urtero ez esatearren-, abestu Olentzeroren abestia?

Olentzero joan zaigu,
mendira lanera
intentzioarekin
ikatza-egitera.

Aditu zuenean,
Jesus jaio zela
lasterka etorri zen

berri ematera!

Horra, horra gure Olentzero

pipa hortzian duela

eserita dago,
kapoiak ere baditu
arrautzatxoakin
bihar merendatzeko
botilla arduakin!!!

Baina nondik dator Olentzero eta nor dugu?. Betidanik, bizitzea asko maite duen pertsona baten gisara aurkezten zaigu, ikazkina da Olentzero eta urtean behin, menditik jaisten da herrira Jesus jaio dela esan, eta haurrei opariak banatzera.

Olentzeroren mitoak Bidasoako eskualdean du jatorria, eta mito hau mendez-mende hedatu da eta gaur eguneko ezaugarrietara egokitu. Esan beharrik ere ez dago, egun Euskal Herri osoak ezagutzen duela, batez ere haurrek. Bestaldetik, nahiz eta Olentzeroren mitoak Bidasoako eskualdean izan jatorria, Olentzerok berak Lesakan du bere benetako jatorria, Nafarroako ipar-mendebaldean, hain zuzen ere.

Horrela bada, Euskal Herrian ohitura dago Abenduaren 23an etxez-etxe kantu-eskean pasatzeko, eta ondoren, abenduaren 24ean Olentzeroren etorrerarekin batera kalean abesteko.

Azkenik, nahiz eta haur batzuk Olentzero gizon maitagarritzat eduki, beste haur batzuentzako beldurgarria izango da. Dena dela, gizon misteriotsu honek urtea amaitzera doala eta haize berriek ordezkatuko dutela adierazteko.

GOAZEN DENOK OLENTZEROREKIN!!!

MAISUETAN MAISUA!

noreply@blogger.com (maitane urberuaga) — Sat, 15 Dec 2007 22:23:00 +0000


 Imanol Urbietak txiki-txikitatik musika izan du bere inguruan. Euskal Herriko herri eskola eta ikastola guztiek ezagutu dituzte Imanolek haurrei eginiko ehunka kantu, horrela euskal kulturan eta hezkuntzan haurrentzako zegoen hutsunea betez. Ondorioz, hona hemen Imanolek eginiko zenbait lan: Alaken!; Ranroberra!; Euskera oi euskera!; Akerra ikusi nuen!; Txiki-txiki-txikia!...


Hik Hasi aldizkarian eginiko elkarrizketaren arabera, Imanolek Magisteritza ikasi zuen eta Magisteritza Eskolan hasi zen pedagogo bezala. Bere helburua argia zen, musika aldetik ongi pasatzea; musikaren sentsibilitatea landuz, kantatuz, instrumentuak landuz...

Berak musikarekin haurrei laguntza eskaini nahi die, haurrek haur izan daitezen. 

Bestaldetik, Imanol bere bizitzan saltsa guztietan sartuta egon izan da. Hasteko, akolito izan zen, koadrila ezberdinekin ibiltzen zen eta musika taldeak osatu zituen. Honez gain, Zarauzko Orkeslariak zortzikoa eta abesbatza zuzendu zituen, eta musika eskola sortu zuen, Xirula Mirula... Hori gutxi balitz, haur taldeak kantu txapelketetara eramaten zituen.

Amaitzeko, aurrera begira bi lan aurreikusten ditu. Alde batetik, musika klasikoaren inguruan hasitako lana bukatzea, eta bestetik, 0-3 urteko haurrekin egin beharreko lan bat da baina oraindik esperimentatzen dabil.

HAURRAK KANTUAN!

noreply@blogger.com (maitane urberuaga) — Tue, 11 Dec 2007 18:07:00 +0000

YouTube-tik hartutako bideo honetan, Venezuelako haur bat ageri da abesti bat kantatzen. Kantu hori, haur horrek asmatutakoa edo inprobisatutakoa da, eta hor ikusten da, haurrek sortzeko...duten abilezia. Ez hori bakarrik, sortu ostean, besteei erakusteko ausardia ere helduok baino gehiago edukitzen dute. Izan ere, adinean aurrera egin ahala, badirudi, lotsak ere gora egiten duela.
Dena dela, oso garrantzitsua da haurra gauza berriak sortzera bultzatzea, eta hori lantzeko jarduerak zein jolasak egitea.

http://www.youtube.com/watch?v=sR9qre4iOs8

ZER DA MUSIKOTERAPIA?

noreply@blogger.com (maitane urberuaga) — Wed, 05 Dec 2007 17:11:00 +0000

Antibiotikoak eta pilulak ez dira depresioari edo ezintasun fisiko bati aurre egiteko modu bakarra. Adituek, geroz eta argiago dute melodia lasaigarri bat edo gure barnetik ateratako adierazpen artistikoa mesedegarria izan daitekeela sendatze prozesuan. Ildo horretatik hainbat terapia jaio dira, baita musikoterapia bera ere.

Musikoterapia, melodia ezberdinek gure gorputzean sortzen dituzten sentsazioez baliatuz, musikaren bidez osasun arazoak saihesteko erabiltzen den teknika terapeutikoa da. Horrela, musikoterapiak, melodia ezberdinen bitartez, gaixotasunak sortzen dituzten kinadak erlaxatzen dituzten beste batzuk sortu eta bidaltzea du helburu.

Funtsezko lan eskemak 3 ezaugarrik osatzen dute:

Gaixoaren elkarrekintza positiboa beste izakiekiko

Autoestima

Erritmoaren erabilera energiaren sortzaile bezala

Musikoterapiak, autoestimaren garapenean motibazio gisa jokatzen du autoerrealizazio sentsazioa sortzen duten teknikekin, autokonfiantza, autoasetasuna eta bakoitzak berekiko segurtasun handia lortzeko.

Bestetik, nahiz eta gaixotasunik ez izan, mota horretako jarduerak gomendagarriak suerta daitezke gure gorputza eta burua hobeto ulertzeko eta ditugun behar fisiko eta sentimentalak askatzeko. Hala, geroz eta ohikoagoak dira musika, dantza edo antzerkia erabiliz edozeini zuzenduta antolatzen diren ikastaroak, ume zein nagusi.

Pixkanaka-pixakanaka, terapia alternatiboak beren bidea egiten ari dira gure artean.

"HAUR-JOLASEN ABESTIAK"

noreply@blogger.com (maitane urberuaga) — Tue, 13 Nov 2007 16:39:00 +0000

Gaur egun, gero eta haur gehiago dira erdara hutsean kantatzen dutenak, bai jolastokiko orduan, bai eskolaz kanpo ere. Hori dela eta, euskaraz jolasteko abestien hutsunea zegoela ikusi zuten Josi Oiarbidek eta Xabier Zabala musikariek. Ondorioz, gabezi hori betetzeko helburuarekin "haur-jolasen abestiak" izeneko kaseta eta konpak diska kaleratu dute.

Bi musikari hauek, doinu alaiez bete dute beraien lana, bizitasuna emanez grabazioari. Lan honetan, Euskal Herriko bost ikastetxeetako haurrak hartzen dute parte, beste hainbat irakaslerekin batera. Horrez gain, Nafarroan izan zuten hutsunea ikusirik, arlo honetan esperientzia duen Andoni Sagastibeltzarengana jo zuten.

Grabazio honetan, musika eta abestiak grabatu ondoren, jolasak esplikatzeko moduko gidoia prestatu zuten, eta horretarako "Takolo, Pirritx eta Porrotx" pailazoen laguntza eduki zuten.

Beraz, helburuaren parte bat beteta zuten, hau da, lana burutzea. Ondoren etorriko zen helburuaren bigarren partea izango zena, abesti horiek haurrek ikastea eta erabiltzea, hain zuzen ere. Dena dela, musikari bi hauek argi uzten dute, abesti horiek haurrengana heltzeko ezinbestekoa dela irakaslearen lana, eta aldi berean, gurasoena.

Bestaldetik, lan hau Imanol Urbietaren omenez burutu dutela aipatzen dute Hik Hasin egin duten elkarrizketan, arlo honetan egin duen guztiagatik eta egiten ari den guztiagatik.

Azkenik, lanaren gaia alde batera utzita, musika irakasgaiaren inguruan ere jardun zuten hitzegiten, eta hauen hitzetan, musikak garrantzia dauka eta haurrak horretaz jabetzeko motibazioa dela giltza deritzote.

Nire ustetan, musikak oso eragin handia du haurrengan, bai Haur Hezkuntzan zein Lehen Hezkuntzan. Dena dela, ez zaio behar duen besteko garrantziarik ematen irakasgai honeri ikastetxeetan. Azken hauen funtsezko eginbeharra haurrak motibatzea da, eta hein batean lortzen dute, baina beste zati handi batean ez. Beraz, arlo horretatik zer landu badagoela uste dut.

noreply@blogger.com (maitane urberuaga) — Mon, 29 Oct 2007 10:36:00 +0000

Hona hemen, musikaren inguruko zenbait blog interesgarri. Guztietan, musikak hezkuntzan eta umeengan duen garrantziaz hitzegiten da, eta musikoterapiaren erabileraz:

1. Bloga: HAURREN AUTOESTIMARAKO TERAPIAK

Lehenengo blog hau oso interesgarria dela iruditzen zait. Honako honetan, musikak haurrengan duen garrantzia azpimarratzen du. Horrela, honen iritziz, musikak haurren motibazioan, segurtasunean...eragin nabarmena du, eta hau lantzea komenigarritzat hartzen du.

http://haurte rapiak.blogspot.com/

2. Bloga: MUSIKA

Honako blog honetan, berriz ere musikaren garrantzia nabarmentzen du, bai haurra jaio orduko, zein jaio ondoren. Umeen garapen prozesuan ezinbesteko ezaugarria da musika, bai etxean zein eskolan.

http://hezkuntzajolasak.blogspot.com/

3. Bloga: JOLASA ETA MUSIKA

Hirugarren eta azken blog honetan, musikak hezkuntzan duen garrantzia aipatzen du. Honen hitzetan, musika haurraren garapen prozesurako funtsezkoa da, izan ere, musikaren bitartez haurrek hainbat kontzeptu lantzen dituzte (koloreak, zenbakiak...). Modu honetan, haurrak motibatuta eta pozik daude, beraien ikasketa errazago burutuz.

Azkenik aipatzekoa da, musikoterapiak, azken urteetan, izugarrizko gorakada izan duela hezkuntzan, batez ere Lehen Hezkuntzan eta Haur Hezkuntzan.

http://idoido4.blogspot.com/