கவிதை பூங்கா

மீண்டும் ஒரு முறை

2013-04-19T23:24:00.001-07:00

இமை திறக்காமல் இருளிலும்

இதமாய் எதிர்நீச்சல் பழகிய

தாயின் கருவறை பருவம்

முற்றும் துறந்த முனிவரும்

மயங்கி பேராசை கொள்ளும்

மாசற்ற மழலை பருவம்

வண்ணத்துப் பூச்சியாய் வானில்

வட்டமடித்து நண்பனே உலகமென்று

பண்பாடும் பள்ளிக்கல்லுரி பருவம்

திரைக்கடலோடி திரவியம் தேடி

விரல்நுனியில் உலகை சுற்றத்துடிக்கும்

இளைப்பறியா இளமை பருவம்

காலத்தின் சுழற்சியால் கடந்தபின்

கனக்கிறது மனம் கடந்தபருவங்கள்

மீண்டும்ஒருமுறை திரும்பக் கிடைக்காதாயென்று

நேரமில்லை - இன்றைய மனிதனின் வாக்குமுலம்

2011-03-23T22:33:00.000-07:00

பூக்கள் பூக்கும் புதுவிடியல்

புன்னகையை கண்டு பூரித்ததுண்டா - நேரமில்லை

சிறுபிள்ளை தீட்டிய ஓவியமாய்

முகில் கூட்டங்களின் நடுவே மழைமேகம்

வரைந்த வானவில் கண்டுகளித்ததுண்டா - நேரமில்லை

தவமாய் தவமிருந்து பெற்றெடுக்கும்

மழலையின் மழலைமொழி ரசித்ததுண்டா - நேரமில்லை

அறுசுவைஉணவானாலும்

அரைவயிறுஉணவானாலும்

ஆற அமர இருந்து புசித்ததுண்டா - நேரமில்லை

இயற்கையின் கோரதாண்டவத்தில்

ஆழிப்பேரலையில் அடித்துசெல்லப்படும்

அவலம் கண்டு கலங்கியதுண்டா - நேரமில்லை

வாழ்வை வாழ எத்தனிக்கா இந்த

வேக ஓட்டம் எதற்காக சிந்தித்ததுண்டா - நேரமில்லை

காரணம்

நாங்கள் இயந்திர மேய்ப்பனின்

மேய்ச்சலில் உள்ள ஆட்டுமந்தைகள் .

- லலிதாசுந்தர்

உணர்வு கொள்

2011-02-24T00:35:00.000-08:00

அலைவரிசை சமிக்கைகளுக்கு

தலையசைக்கும் இயந்திரமாயில்லாமல்

கோலைகண்டதும் வாலையாட்டும்

ஐந்தறிவு ஜந்துகாலாயில்லாமல்

முடநம்பிக்கைக்குள் வாழ்வை தொலைக்கும்

நவீனயுக முடர்கலாயில்லாமல்

மனிதா நீ

பண்பில் தழைத்து

அன்பில் திகைக்க வைக்கும்

பகுத்தறிவு பெற்ற

மனிதன் எனும் உணர்வு கொள்.

தன்னம்பிக்கை துணைகொண்டு

தடைகளை தகர்த்தெறிய துணிவுகொள்

இன்பமும் துன்பமும் நிறைந்த

வாழ்வை அனுபவித்து வாழ கற்றுகொள்

- லலிதாசுந்தர்

புத்தாண்டே நீ வருக

2010-12-29T20:36:00.000-08:00

இயற்கை சீற்றமில்லா

இழப்புகள் ஏதும் நேரா

                         புத்தாண்டே நீ வருக

பொருளாதார வீ ழ்ச்சியில்லா

பணவீக்கம் ஏதுமில்லா

                       புத்தாண்டே நீ வருக

முதியோர் இல்லங்கள் ஒன்றுமில்லா

மனங்களை மதிக்கும் மனிதர்களாக்க

                      புத்தாண்டே நீ வருக

கல்வியை வியாபார கலப்படமில்லா

சேவை என கற்றுத்தரும் நிலையங்களாக்க

                     புத்தாண்டே நீ வருக

இந்த

வரங்கள் அனைத்தும் தரும்

வரலட்சுமியாக நீ வருக - உன்

                    வரவு நல்வரவாக

                     புத்தாண்டே நீ வருக

- லலிதாசுந்தர்.

திசை அறியும் பறவைகள்

2010-12-23T20:50:00.000-08:00

வாழ்க்கை நதியின் இரு கரைகள்

வெற்றியும் தோல்வியும்

இணைந்தே பயணம் செய்யும்

மரணக்கடலில் கலக்கும் வரை

தோல்விகள் நம் வெற்றி எல்லையின்

மைல்கல்கள்

தூரத்தையும், நேரத்தையும் காட்டும்

அறிவிப்பு பலகைகள்

வெற்றியின் எல்லை தொட

தன்னம்பிக்கையுடன் ஓட துணிந்தவன்

சாதனையாளன்

திசை அறியும் பறவைகளாய்

பறந்திடுவோம்

தோல்வியை கண்டு தடம் மாறாமல்

நம் இலட்சிய எல்லையை நோக்கி ..

--லலிதாசுந்தர்

தமிழ் அன்றும் இன்றும்

2010-12-23T20:44:00.000-08:00

வளையாபதி, குண்டலகேசி

தொல்காப்பியம் என

வரலாற்று இலக்கியத்திலும்

கட்டிளம் மங்கை நீ

அனுமதி சீட்டு இல்லாமல்

கம்பியில்லா தொழில்நுட்பத்தின் வழியே

கண்டம் விட்டு கண்டம் பறக்கும்

புதுக்கவிதை வடிவிலும் மங்கையாய் நீ

உன் இளமையின் ரகசியம் என்னவோ

சிற்றின்ப வெண்பாவா

பேரின்ப ஆசிரியப்பவா

கொடியிடை இடையினமா

பூவிதழ் மெல்லினமா

நடையழகின் வல்லினமா

நீ

அன்றும் இன்றும் என்றும்

ஆண்கள் மட்டுமல்ல

பெண்களும் காதலிக்கும்

உலக மொழி பேரழகி .

- லலிதாசுந்தர்.

என் மனக்கரையோரம்

2010-12-23T19:54:00.000-08:00

இளமை துள்ளலோடு

இறுமாப்பும் கைகோர்த்த

உலகை விரல் நுனியில்

சுற்ற நினைத்த

உல்லாச பருவம்

தேர்வும் தேவையில்லை

தேர்வு விடுமுறையும்

தேவையில்லை - என்று

நண்பர்களுடன் கூடித்திரிந்த பருவம்

கல்லூரியே உலகமென்று

கண்கள் மூடாமல்

கனவுகள் கண்ட

கல்லூரி பருவம்

பேருந்தில்

என் கல்லூரிக் கடக்கையில்

செல்லரித்த சுவடுகள் சில

கண்சிமிட்டி விட்டு சென்றன

என் மனக்கரையோரம் .

- லலிதாசுந்தர் .

தாஜ்மஹால்

2010-12-23T19:31:00.000-08:00

அறியாத வயதில்

புரியாதா பருவத்தில்

துளிர்விட்டு பூ பூத்து

யாரும் அறியாமல் ஆழ்மனதில்

புதைந்து போன காதல்கள்

ஆயிரமாயிரம் .

சொல்ல நினைத்து

ஆயிரம்முறை பரிசோதனை செய்து

நெஞ்சுக்கும் தொண்டைக்கும்

இடையே சிக்கிக்கொண்டு

சொல்லாமல் விட்டுப்போன காதல்கள்

ஆயிரமாயிரம் .

காதலின் ஆழம் உணர்த்த

காதலர்கள் தங்கள் உயிரை

பரிசாக தந்து

உலகை உலுக்கிய காதல்கள்

ஆயிரமாயிரம் .

எது எவ்வாறாயினும்

உண்மை காதல் புனிதமானது

என்பதற்கு

காதலியின் கல்லறை - இன்று

காதலின் சின்னமாக்கிய - இந்த

வெள்ளை தாஜ்மஹாலே சாட்சி .

- லலிதாசுந்தர்

நெருடல்

2010-12-21T00:21:00.000-08:00

அந்தி மாலை பொழுதொன்றில்

மலரிதழ் விரல்களில் காகிதம்

                                                          பிடித்து

மனதில் பதிந்த நினைவுகள்

                                                         சேர்த்து

வானவில் வண்ணங்களில் தூரிகை

                                                      நனைத்து

அழகாய் ஒரு சித்திரம்

மரச்சோலைகளின் நடுவே விடோன்று -அதன்

                      முற்றத்தில் குருவிகூடொன்று - என

                       இது தன் கனவு வீடென்று

                         காண்பித்தால் என் மகள்

அற்புதம், அழகு என கொண்டாடி மகிழ்ந்தேன்

ஏனோ

நெஞ்சம் மட்டும் நெரிஞ்சில் தைத்த பாதம்போல்

                                                                                  நெருடியது

முன்னிரவில் களைத்தெறிந்த குருவிக்கூட்டின்

                                                                              நினைவுகளால்

- லலிதாசுந்தர்

காகிதக்கப்பல்

2010-11-30T21:52:00.000-08:00

காலத்தின் வேகத்தால்

கடல் கடந்து

கப்பல் பட்டறையில் பணிநியமனம் கிடைத்து

- முதல் நாள்

கப்பலில் கால் வைத்த பொழுது

அப்பா குடைபிடிக்க

அம்மா கைபிடித்து

மழையில் கவிழாமல் செல்ல

மாரியம்மனுக்கு லஞ்சம் கொடுத்து

மழலையில் மழையில் விட்ட

காகிதக்கப்பல் ஞாபகம்

கண்ணில் நீர் ததும்ப மிதந்து சென்றது.

- லலிதாசுந்தர்.

கற்று தந்த காடுகள்

2010-10-25T20:33:00.000-07:00

அந்நிய நிறுவனங்களின்
தொழிற்சாலை கட்டமைப்புக்கு - உனை
தத்து கொடுத்துவிட்டு
மழை வேண்டி பூஜை செய்து
காத்து கிடந்த தருணத்தில் - விளங்கியது
நியுட்டனின் மூன்றாம் விதி .

- லலிதாசுந்தர்

கடலில் சிந்திய எண்ணை

2010-09-02T07:38:00.001-07:00

ஆழ்குழாய் வடிவமைப்பில் செய்த தவறு
கடல்மேல் மிதக்கிறது எண்ணை கிணறு

வரைபடத்தில் வல்லரசுக்கு உட்பட்ட எல்லை
                       பணத்திற்கு பஞ்சம் இல்லை
யாரறிவார் உருவகலாம் ஒரு செயற்கை கடல்
மீண்டும் பழைய நிலை திரும்புமோ இந்த
                                                        இயற்கை கடல்

                                                       - லலிதாசுந்தர்

மனம் ஒரு குரங்கு

2010-09-02T07:34:00.000-07:00

தங்கச்சிக்கு கல்யாணம்
ஒரு வீடு கட்டனும்
இருசக்கர வாகனம் வாங்கணும்
மனம் சொன்னது
நாலு வருஷம் வெளியூர்
              போனால் போதும்

ஐந்து வருடம் போனது
கடமைகள் முடிச்சாச்சு
மூளையின் யோசனை
ஊருக்கு போயிடலாம்
மனம் கொக்கரித்தது
இன்னும் கொஞ்சம் காசு
    சேர்த்துகிட்டு போயிடலாம்

வருடங்கள் கடந்தது
அமேரிக்கா கிரீன் கார்டு
       கிடைச்சா நல்லாயிருக்கும்
ஊதியம் அதிகம்
இரண்டு வருடம் போனால் போதும்
மீண்டும் மனம் ஏவியது

பணம் என்றால்
மனம் குரங்காய் இல்லைங்க
கொரில்லாவகவே மாறிவிடும்
மனிதர்களே எச்சரிக்கை

                                             - லலிதாசுந்தர்

ஹைக்கூவில் வாழ்க்கை

2010-06-28T02:07:00.000-07:00

என்னில் பாதி
உன்னில் பாதி
நம்மில் பாதியானது
காதல்

என்னை உனக்காய்
உன்னை எனக்காய்
பரிசளித்த தருணம்
திருமணம்

என்னில்
உன்னை நிரப்பிய
அடையாள சின்னம்
குழந்தை .

- லலிதாசுந்தர்

சிறு கைமாறு

2010-06-25T00:39:00.000-07:00

ஈன்ற பொழுதை விட
தன்பிள்ளை சான்றோன்
என கேட்டால்
பெரிதுவப்பால் அன்னை
என்றது வள்ளுவம்
ஆனால்
செம்மொழி நிலையடைந்த தாயே
எங்கள் தமிழ் மொழியே
உன் பிள்ளைகளாய் பிறந்ததே
நாங்கள் பெற்ற பெரும் பேறு

பிழையில்லாமல் உச்சரிப்பதே
உன்னை மகிழ்விக்க
நாங்கள் செய்யும் சிறு கைமாறு

- லலிதாசுந்தர்

குற்றவாளி

2010-05-22T02:22:00.000-07:00

இணையத்தில் ஒரு விளம்பரம்

இராக்கில் குண்டுவெடிப்பு

தலையில்லா குழந்தையின் புகைப்படம்

உடனே செய்திகள் பெற கிழே

வலைதள முகவரி

மனிதநேயம் இங்கு

வணிகமயமாகிபோனது யார் குற்றம்

விடுமுறை கிடைக்கவில்லை என்று

தந்தையின் இறுதி ஊர்வலம்

நேரடி ஒளிபரப்பாகிறது

கம்பியில்லா தொழில்நுட்பத்தின் வழியே

பந்தங்கள் இன்று

பரமாகிபோனது யார் குற்றம்

கண்டங்கள் கடந்து நண்பர்கள்

தினமாயிரம் நலம் விசாரிப்புகள்

டிவிட்டரிலும் , பேஷ்புக்கிலும் - ஆனால்

பெற்றோரும் பிள்ளைகளும்

வாழ்த்துக்கள் பரிமாறிகொள்வதோ

மின்தூக்கி காத்திருப்பின் இடைவெளியில்

உறவுகள் இங்கு

அந்நியமாகிப்போனது யார் குற்றம்

விஞ்ஞான வளர்ச்சியின் குற்றமா ?

தொழில்நுட்பத்தின் குற்றமா?

பாசம் தொலைத்து மனிதநேயம் மறந்து

இயந்திரமாய் மாறி போன

மனிதனின் குற்றமா

யார் இங்கே குற்றவாளி ?

- லலிதாசுந்தர்

வெற்றியை உன் இலக்காக்கு

2009-07-09T22:28:00.000-07:00

தன்னம்பிக்கை மனிதனின்
முதுகெலும்புகள் அல்ல
உயிர் நாடிகள்

தோல்விகளை தூக்கியெறியாதே
அவற்றை உன்னுள் புதைத்துவிடு
அவைகளே உன்னை வெற்றியை
நோக்கி செலுத்த உதவும் கருவிகள்

தோல்விகள் அவமானங்கள் அல்ல
அவைகள் உன் முயற்சியை
அளக்க உதவும் அளவுகோல்கள்

நூறுமுறை தோற்றாலும் முயற்சிசெய்
நூற்றியொன்றாவது முறை வெற்றி
கிடைக்குமென்ற நம்பிக்கையுடன்

தோல்விகளால் துவண்டுபோனதாக
விலங்குகளுக்கு கூட வரலாறில்லை .

போராடு உன் இலக்கை
அடையும் வரை போராடு

-லலிதாசுந்தர்

திரும்ப கிடைக்குமா

2009-04-16T20:50:00.000-07:00

கட்டிய மஞ்சள் கயிறின் வாசனை
மாறும் முன்னே -
கட்டியவளை கண்ணீரில் கரைத்து விட்டு
கடனடைத்து காடு கரை வாங்கி சேர்க்க,
கடல் கடந்து நாடு கடந்து
கட்டியவளை நினைத்து கட்டிலுக்கு முத்தமிட்டு
தலையணையை கட்டிக் கொண்டு உறங்குகிறாயே!

கோடிகோடி கட்டி தங்கங்களை கொட்டினாலும்
நீ வாழ மறந்த
வசந்தகால வாழ்க்கை கிடைக்குமா?

பணம் எனும் உணவு தேவைதான் - ஜீரணிக்கிறேன்
வாழ்க்கை எனும் உடலே இல்லையெனில்
உணவு எனும் பணம் உபயோகப்படாதே?

இளைஞனே!
திரும்பிப் பார்!
நீ அனுபவிக்க மறந்த
உன் வாழ்க்கை பாதச் சுவடுகளை ...

- லலிதா சுந்தர்

அன்பென்னும் உயிர் வளர்ப்போம்.

2009-04-16T19:54:00.000-07:00

பணமும் பொருளும் நிரப்பா
மன இடைவெளியை நிரப்புவது
அன்பு மட்டுமே

கோடிகள் கைகளில் புரண்டாலும்
எங்கோ ஓர் கோடியில் மனம்
ஏங்குவது
அன்பிற்கு மட்டுமே.

உடற்காயங்களுக்கு மருந்துகள்
பல உண்டு.
மனகாயத்திற்கு மருந்து
அன்பு மட்டுமே.

நரம்புகள் தளர்ந்தாலும்
உடல் கவர்ச்சி குறைந்தாலும்
அறுபதிலும் அழகாக தெரிவது
அன்பு மட்டுமே.

ஆகவே,
அன்பென்னும் உயிர்
வளர்ப்போம்.

- லலிதாசுந்தர்

செல்லரிக்கச் செய்வோம்

2009-04-03T01:34:00.000-07:00

அவசர யுகத்தில் அன்புகூட
தவணைமுறையில் பரிமாறப்படுகிறது

கணவன்-மனைவி வசிப்பது ஓரேவீட்டில்
இருவரும் சந்தித்து வாரம் கடந்திருக்கும்
குறுஞ்செய்தி வழியாக ஊஞ்சலாடிக்
கொண்டிருக்கிறது - அன்பு
தொலைத்தொடர்பு கோபுரங்களின்
உச்சியில்

திருமண அழைப்பிதழ்
கடன்பற்று அட்டை அல்ல
நினைத்ததும் வங்கிபெயரை
மாற்றிகொள்ள

மந்திரங்கள் ஓத மேளதாளம் முழங்க
உற்றார்களின் நடுவில் நிச்சயிக்கப்படும்
பந்தம்
மரக்கூண்டுகளின் நடுவே
சுத்தியல் ஓசை முழங்க அறுக்கப்படுகிறது

புரிந்துணர்வும் விட்டுக்கொடுத்தலும்
மனிதப்பண்புகள்
மனிதர்களாக பிறந்தோம்
மனிதர்களாக வாழப்பழகுவோம்

விவாகரத்து வழக்குகளை
செல்லரிக்கச் செய்வோம்

- லலிதாசுந்தர்

ஆகாய ஊஞ்சல் (பாராசூட்)

2009-04-03T01:22:00.000-07:00

தென்றல் தாலாட்டும்
வான்வெளி ஊஞ்சல்
இறக்கை முளைத்த
பறக்கும் காளான்
விமானம் புகாயிடுக்குகளிலும்
வலம்வரும்
தரையிறங்க ஓடுதளம்
தேவையில்லை
கட்டுபாட்டு அறை
தேவையில்லை
விமானியும் நீயே
பயணியும் நீயே
வசதிபடைத்தவர்களின்
பொழுதுபோக்கு வாகனம்
2050-ல் ஒவ்வொரு வீட்டிலும்
இன்றியமையா இருக்கும்
ஏர்கார்.

- லலிதாசுந்தர்.

மனிதநேயம்

2009-04-03T01:17:00.000-07:00

பணம் எனும் மந்திரச்சாவி கொண்டு
வாழ்க்கையை திறக்க முற்படுகின்றோம்
உயிர் எனும் குகைக்குள் அது
புதைந்து கிடப்பதை மறந்து

உலகெங்கும் வன்முறை
கோரதாண்டம் ஆடிக்கொண்டிருக்கிறது
எங்கே மனிதநேயம்?
மனிதநேயம் சில அமைப்புகளுக்கு மட்டுமே
சொந்தம் என எண்ணுகின்றோம்

உலகம் நாளை இளைஞர்கள் கையில்
இன்றே அதன் வம்சங்கள்
அழிக்கபடுகின்றனவே - எங்ஙனம்
நாளைய இளைஞர்கள்
விழித்துகொள்வோம் வன்முறை
நம் வாசலில் தீ வைக்கும்முன்
புகட்டுவோம் பிள்ளைகளுக்கு
மனிதநேயத்தை
உருவாக்கிடுவோம் நாளைய நம்
சமுதாயத்தை அமைதியாக

- லலிதாசுந்தர்

இணையம்

2009-04-03T01:13:00.000-07:00

கணிணிப்பெண் கண்ணசைக்க
எலி வலைவிரிக்க
எழுத்துக்கள் விளையாடும்
டென்னிஸ் அரங்கம்

உலகிற்குள் வீடு - நிலைமாறி
வீட்டிற்குள் உலகை கொண்டுவர
போடப்படும் வலைபின்னல்

வாழ்த்துகளையும் தகவல்களையும்
மட்டுமல்ல
இருமனங்களையும் பரிமாறிக்கொள்ள
தூதுவிடப்படும்
நவீனகால புறா - இந்த இணையம்

- லலிதாசுந்தர்

நான் எங்ஙனம்

2009-04-03T01:09:00.000-07:00

என் உடல்செல்கள் அனைத்தும்
இயக்கமின்றி துருபிடித்துவிட்டது
உன் பார்வைமின்சாரம் பாயந்ததால்

நெருப்பை தீண்டினால் சுடுமென்ற
தொடுவுணர்வு இழந்து கைகள்தொடுகின்றன
நீ என்னருகேயின்றி

காதல் என்பது நோயில்லை
காதல் என்பது தவமில்லை
காதல் என்பது ஞானம்
அதுவே அனைத்தும்

தென்றலின் காதலின்றி மழையில்லை
சிப்பியின் காதலின்றி முத்தில்லை
கரையின் காதலின்றி கடலில்லை
இயற்கையே இங்ஙனமெனில்
நான் எங்ஙனம்

நீ என்னருகிலின்றி.........

- லலிதாசுந்தர்.

விடியல் உன் கையில்

2009-04-03T01:02:00.000-07:00

இரவின் மடியில் சாய்ந்து கொண்டு
விடியலுக்காக காத்திருப்பதை விட
இரவின் கைபிடித்து நடைபயணம் - செய்துபார்
விடியல் உனக்காக வரவேற்புகம்பளம்
விரித்து காத்திருக்கும்

உழைப்பென்னும் உளி கொண்டு
செதுக்கிபார் - உன் மனதை
உயிருள்ள சிற்பமாய் காட்சியளிப்பாள்
உன் வெற்றி தேவதை

வாய்ப்புகள் வாயிற்கதவை தட்டும் என
காலச்சக்கரத்தை வேடிக்கை பார்பதை விட
காலச்சக்கரத்துடன் நீயும் சுழன்று பார்
வாய்ப்புகள் உன் வாசலில் வரிசையில்
நிற்க வாய்ப்பு கேட்கும்

கற்கள் கால்களை பதம்பார்த்தாலும்
நதிகள் தன் ஓட்டத்தை நிறுத்துவதில்லை
கடலில் கலக்கும் வரை

மனிதா
நீயும் கடிவாளம் கட்டிய குதிரையாய் - ஓடிப்பார்
உன் இலட்சிய பாதையில்
உன் இலக்கு உன் கையில் ஜொலிக்கும்
நிலக்கரி பிரித்த வைரமாய்.

- லலிதாசுந்தர்