ضعیف اور موضوع احادیث

٭ خاص 15 شعبان کی رات مغفرت کی رات - نصف شعبان سے متعلق ضعیف روایات

noreply@blogger.com (Ibn Hoor) — Fri, 16 Feb 2024 22:50:00 +0000

خاص پندرہویں شعبان کی رات مغفرت کی رات

عائشہ رضی اللہ عنہا کی روایت ہے کہ رسول اللہ ﷺ نے ارشاد فرمایا:

إِنَّ اللَّهَ عَزَّ وَجَلَّ يَنْزِلُ لَيْلَةَ النِّصْفِ مِنْ شَعْبَانَ إِلَى السَّمَاءِ الدُّنْيَا فَيَغْفِرُ لأَكْثَرَ مِنْ عَدَدِ شَعْرِ غَنَمِ كَلْبٍ

” اللہ تبارک و تعالیٰ شعبان کی پندرہویں شب کو آسمان دنیا پر نزول فرماتا ہے ، اور قبیلہ کلب کی بکریوں کے بال سے بھی زیادہ کی تعداد میں لوگوں کی مغفرت فرماتا ہے۔“

(ترمذی :۷۳۹ )

ضعیف: یہ روایت ضعیف ہے ،کیونکہ؛
۱: حجاج بن ارطاۃ ضعیف اور مدلس راوی ہے۔

۲: یحیی بن ابی کثیر بھی مدلس ہے۔
٭اس روایت کے سلسلے میں امام ترمذی رحمہ اللہ فرماتے ہیں کہ :

وَسَمِعْتُ مُحَمَّدًا يُضَعِّفُ هَذَا الْحَدِيثَ وَقَالَ يَحْيَى بْنُ أَبِي كَثِيرٍ لَمْ يَسْمَعْ مِنْ عُرْوَةَ وَالْحَجَّاجُ بْنُ أَرْطَاةَ لَمْ يَسْمَعْ مِنْ يَحْيَى بْنِ أَبِي كَثِيرٍ

"میں نے امام بخاری کو یہ فرماتے ہوئے سنا ہے کہ یہ حدیث ضعیف ہے، اسے یحیی (بن ابی کثیر) نے عروہ سے نہیں سنا اور نہ حجاج بن ارطاۃ نے نے اسے یحیی (بن ابی کثیر) سے سنا ہے۔" (سنن الترمذی:۷۳۹)

٭شیخ البانی نے بھی اس روایت کو ضعیف قرار دیا ہے۔ (ضعیف الترمذی)

صحیح حدیث (ہر رات مغفرت کی رات ہے)

باری تعالیٰ ہر رات کو پچھلے پہر آسمان دنیا پے نزول ہوفرماتاہے جیسا کہ صحیحین وغیرہما کی متواتر احادیث سے ثابت ہے۔

رسول اللہ ﷺ کا فرمان ہے:

"ہمارا رب تبارک وتعالیٰ ہر رات آسمان دنیا پر آتا ہے ۔ اس وقت جب رات کا آخری تہائی حصہ باقی رہ جاتا ہے اور کہتا ہے کہ مجھے کون بلا تا ہے کہ میں اسے جواب دوں ‘ مجھ سے کون مانگتا ہے کہ میں اسے عطا کروں ‘ مجھ سے کون مغفرت طلب کرت
ا ہے میں اس کی مغفرت کروں ؟"

(صحیح بخاری: 7494)

٭ کیا نبی کریم ﷺ کا سایہ مبارک نہیں تھا ؟

noreply@blogger.com (Ibn Hoor) — Tue, 13 Feb 2024 23:48:00 +0000

نبی کریم ﷺ کا سایہ نہیں تھا!

ایک روایت میں آتا ہے کہ:

أنّ رسول اللہ صلی اللہ علیه وسلم لم یکن یُریٰ له ظلّ فی شمس ولا قمر
”نبی کریم ﷺ کا سایہ نہ سورج کی روشنی میں نظر آتا تھا نہ چاند کی چاندنی میں“

(الخصائص الکبریٰ للسّیوطی: 71/1)

موضوع (من گھڑت):یہ روایت جھوٹ کا پلندہ ہے:

٭ اس روایت کی سند درج ذیل ہے: ”عبد الرحمٰن بن قیس الزّعفرانیّ عن عبد الملک بن عبد اللہ بن الولید عن ذکوان“
۱: اس کا راوی عبد الرحمٰن بن قیس الزعفرانی ”متروک و کذاب“ ہے۔ (تقریب التہذیب: ۳۹۸۹)
۲: عبد الملک بن عبد اللہ کو ملا علی قاری نے ”مجہول“ کہا ہے۔ (شرح الشفاء: ۲۸۲/۳، طبع مصر)
۳: ذکوان تابعی ہیں، اور وہ یہ روایت صحابی کے واسطے کے بغیر بیان کررہے ہیں، لہٰذا یہ ”مرسل“ ہے، اس لیے قابلِ حجت نہیں ہے۔
۳: نیز یہ روایت صحیح احادیث کے مخالف بھی ہے، جس سے نبی کریم ﷺ کے سایہ مبارک کا ثبوت ملتا ہے۔

نبی ﷺ کےسائے کےمنکرین کے عقلی دلائل کا رد

منکرینِ سایہ یہ کہتے ہیں کہ آپﷺ نور تھے اور نور کا سایہ نہیں ہوتا اور یہ بھی کہتے ہیں کہ حضورﷺ کا سایہ اِس لیے نہیں تھا کہ اگر کسی کا حضورﷺ کے سایہ پر قد م آجا تا تو آپﷺ کی توہین ہوتی اِس لیے اﷲ نے آپﷺ کا سایہ پیدا ہی نہیں کیا ۔

جہاں تک پہلی بات کا ذکر ہے کہ آپﷺ نور تھے (حالانکہ آپ ﷺ بشر تھے)اور نور کا سایہ نہیں ہوتا، یہ سراسر غلط ہے۔
نوریوں کا سایہ صحیح حدیث سے ثابت ہے جب سیّد نا جابر رضی اللہ عنہ کے والد عبدﷲ رضی اللہ عنہ غزوۂ اْحد میں شہید ہوگئے تو اْن کے اہل و عیال اْن کے گرد جمع ہوکر رونے لگے تو رسول اﷲ صلی اللہ علیہ وسلم نے فرمایا:

’’کہ جب تک تم انہیں یہاں سے اْٹھا نہیں لیتے اْس وقت تک فرشتے اِس پر اپنے پرّوں کا سایہ کیے رکھیں گے۔‘‘

(بخاری ، کتاب الجنائز : ۱۲۴۴)

اور دوسری بات بھی خلافِ واقع ہے کیونکہ سایہ پاؤں کے نیچے آہی نہیں سکتا جب کبھی کوئی شخص سائے پر پاؤں رکھے گا تو سایہ اْس کے پاؤں کے اْوپر ہوجائے گا نہ کہ نیچے ۔

لہٰذا ان عقلی اور نقلی دلائل کہ خلاف یہ بے عقلی کی اور بے سند باتیں حقیقت کے ساتھ کوئی تعلق نہیں رکھتیں۔

٭ نبی ﷺ کےسائے کےمنکرین کے عقلی دلائل کا جائزہ

noreply@blogger.com (Ibn Hoor) — Tue, 13 Feb 2024 23:46:00 +0000

رسول اللہ ﷺ کا سایہ نہیں تھا

رسول اللہ ﷺ کا سایہ نہ تو سورج کی دھوپ میں نظر آتا تھا اور نہ ہی چاند کی چاندی میں۔

موضوع(من گھڑت) :

٭ اس روایت کی تحقیق یہاں پڑھیں: کیا نبی کریم ﷺ کا سایہ نہیں تھا؟

نبی ﷺ کےسائے کےمنکرین کے عقلی دلائل کا رد

سیّد الانبیاء محمد رسول اﷲ صلی اللہ علیہ وسلم اﷲ کے برگزیدہ نبی اور انسان تھے ۔ اﷲ تعالیٰ نے آپ صلی اللہ علیہ وسلم کو سلسلہ انسانیت سے پیدا کیا تھا اور انسان ہونے کے اعتبار سے یہ بات عیاں ہے کہ انسان کا سایہ ہوتا ہے۔

قرآن مجید میں اﷲتعالیٰ نے ایک مقام پر فر ما یا ہے کہ :

’’اور جتنی مخلو قا ت آسمانوں اور زمین میں ہیں خوشی اور نا خوشی سے اﷲ تعالیٰ کے آگے سجدہ کر تی ہیں اور اْن کے سائے بھی صْبح و شام سجدہ کرتے ہیں ۔‘‘

(الرعد :۱۵)

ایک اور مقام پر فرمایا :

’’کیا اْنہوں نے اﷲکی مخلوقات میں سے کسی کو بھی نہیں دیکھا کہ اْس کے سائے دائیں اور بائیں سے لوٹتے ہیں ۔ یعنی اﷲ کے آگے ہو کر سر بسجود ہوتے ہیں۔‘‘

(النحل : ۴۸)

اِن ہر دو آیات سے معلوم ہو تا ہے کہ آسمان و زمین میں اﷲ نے جتنی مخلوق پیدا کی ہے اْن کا سایہ بھی ہے اور رسول اﷲ صلی اللہ علیہ وسلم بھی تو اﷲ کی مخلوق ہیں لہٰذا آپ صلی اللہ علیہ وسلم کا بھی سا یہ تھا ۔

آپ صلی اللہ علیہ وسلم کے سائے کے متعلق کئی احادیث موجود ہیں جیسا کہ :

سیّدنا انس رضی اللہ عنہ فرماتے ہیں کہ ایک رات نبی کریم صلی اللہ علیہ وسلم نے ہمیں نماز پڑھائی اور بالکل نماز کی حالت میں اپنا ہاتھ اچانک آگے بڑھایا مگر پھر جلد ہی پیچھے ہٹالیا ہم نے عرض کیا کہ اے اﷲ کے رسول صلی اللہ علیہ وسلم آج آپ صلی اللہ علیہ و سلم نے خلافِ معمول نماز میں نئے عمل کا اضافہ کیا ہے ۔آپ صلی اللہ علیہ و سلم نے فرمایا نہیں ۔بلکہ بات یہ ہے کہ میرے سامنے ابھی ابھی جنت پیش کی گئی میں نے اِس میں بہترین پھیل دیکھے تو جی میں آیا کہ اِس میں سے کچھ اْچک لوں مگر فوراً حکم ملا کہ پیچھے ہٹ جاؤ میں پیچھے ہٹ گیا پھر مجھ پر جہنم پیش کی گئی۔ ((حَتّٰی رَأَیْت ظِلِیّ وَظِلِیّ وَظِلَّلکْمْ)) اِس کی روشنی میں میں نے اپنا اور تمہارا سایہ دیکھا ۔ دیکھتے ہی میں نے تمہاری طرف اشارہ کیا کہ پیچھے ہٹ جاؤ۔

(مستدرک حاکم ۴ / ۴۵۶)

٭ امام ذہبیؒ نے تلخیص مستدرک میں فرمایا :” یہ حدیث صحیح ہے۔“

اِسی طرح مسند احمد ۶/۱۳۲‘۶/۳۳۸طبقات الکبریٰ ۸/۱۲۷‘مجمع الزوائد۴/۳۲۳ پر ایک حدیث میں مروی ہے کہ:
سیدّہ زینب رضی اللہ عنہا اورسیدہ صفیہ رضی اللہ عنہا ایک سفر میں رسول اﷲ صلی اللہ علیہ وسلم کے ساتھ تھیں‘ صفیہ رضی اللہ عنہا کے پاس ایک اْونٹ تھا اور وہ بیمار ہو گیا جب کہ زینب رضی اللہ عنہا کے پاس دو اونٹ تھے ۔ رسول اﷲ صلی اللہ علیہ وسلم نے فرمایا کہ تم ایک زائد اونٹ صفیہ رضی اللہ عنہا کو دے دو تو اْنہوں نے کہا میں اْس یہودیہ کو کیوں دوں ؟ اِس پر رسول اﷲ صلی اللہ علیہ وسلم ناراض ہوگئے ۔ تقریباً تین ماہ تک زینب رضی اللہ عنہا کے پاس نہ گئے حتیٰ کہ زینب رضی اللہ عنہا نے مایوس ہو کر اپنا سامان باندھ لیا۔ سیدہ زینب رضی اللہ عنہا فرماتی ہیں کہ :

’’اچانک دیکھتی ہوں کہ دوپہر کے وقت نبی کریم صلی اللہ علیہ وسلم کا سایہ مبارک آرہا ہے ۔‘‘

عقلی طور پر بھی معلوم ہوتا ہے کہ سایہ مرئیہ فقط اْس جسم کا ہوتا جو ٹھوس اور نگر ہو نیز سورج کی شعاعوں کوروک ہی نہیں سکتا تو اِس کا سایہ بلاشبہ نظر نہیں آتا ۔ مثلاً صاف اور شفاف شیشہ اگر دھوپ میں لایا جائے تو اْس اک سایہ دکھائی نہیں دیتا کیونکہ اِس میں شعاعوں کو روکنے کی صلاحیت ہی نہیں ہوتی ۔

بخلاف اِس کے نبی کریم صلی اللہ علیہ وسلم کا جسد اطہر نہایت ٹھوس اور نگر تھا اْس کی ساخت شیشے کی طرح نہیں تھی کہ جس سے سب کچھ ہی گزر جائے۔ لا محالہ آپﷺ کا سایہ تھا ۔

اگر جسم اطہر کا سایہ مبارک نہ تھا تو کیا جب آپﷺ لباس پہنتے تو آپﷺکے مبلوسات کا بھی سایہ نہ تھا اگر وہ کپڑے اتنے لطیف تھے کہ اْن کا سایہ نہ تھا تو پھر اِن کے پہننے سے ستر وغیرہ کی حفاظت کیسے ممکن ہوگی؟

منکرینِ سایہ یہ کہتے ہیں کہ آپﷺ نور تھے اور نور کا سایہ نہیں ہوتا اور یہ بھی کہتے ہیں کہ آپﷺ کا سایہ اِس لیے نہیں تھا کہ اگر کسی کا آپﷺ کے سایہ پر قد م آجا تا تو آپﷺ کی توہین ہوتی اِس لیے اﷲ نے آپﷺ کا سایہ پیدا ہی نہیں کیا ۔
جہاں تک پہلی بات کا ذکر ہے کہ آپﷺ نور تھے (حالانکہ آپ ﷺ بشر تھے)اور نور کا سایہ نہیں ‘ سراسر غلط ہے۔ نوریوں کا سایہ صحیح حدیث سے ثابت ہے ۔

جب سیّد نا جابر رضی اللہ عنہ کے والد عبداﷲ رضی اللہ عنہ غزوۂ اْحد میں شہید ہوگئے تو اْن کے اہل و عیال اْن کے گرد جمع ہوکر رونے لگے تو رسول اﷲ صلی اللہ علیہ وسلم نے فرمایا:

’’کہ جب تک تم انہیں یہاں سے اْٹھا نہیں لیتے اْس وقت سے فرشتے اِس پر اپنے پرّوں کا سایہ کیے رکھیں گے۔‘‘

(بخاری ، کتاب الجنائز : ۱۲۴۴)

اور دوسری بات بھی خلافِ واقع ہے کیونکہ سایہ پاؤں کے نیچے آہی نہیں سکتا جب کبھی کوئی شخص سائے پر پاؤںرکھے گا تو سایہ اْس کے پاؤں کے اْوپر ہوجائے گا نہ کہ نیچے ۔

لہٰذا ان عقلی اور نقلی دلائل کہ خلاف یہ بے عقلی کی اور بے سند باتیں حقیقت کے ساتھ کوئی تعلق نہیں رکھتیں۔

٭ رمضان کے بعد کون سا روزہ افضل ہے؟

noreply@blogger.com (Ibn Hoor) — Sun, 11 Feb 2024 22:36:00 +0000

سب سے افضل روزہ رمضان کی تعظیم میں شعبان کا روزہ

انس رضی اللہ عنہ سےروایت ہے کہ:

سُئِلَ النَّبِيُّ صلى الله عليه وسلم أَىُّ الصَّوْمِ أَفْضَلُ بَعْدَ رَمَضَانَ فَقَالَ ‏"‏ شَعْبَانُ لِتَعْظِيمِ رَمَضَانَ ‏"
اللہ کے رسول ﷺ سے پوچھا گیا کہ رمضان کے بعد کون سا روزہ افضل ہے، تو آپ ﷺ نے فرمایا:
"رمضان کی تعظیم میں شعبان کا روزہ"

(سنن ترمذی:۶۶۳ ، شرح معانی الآثار: ۸۳/۲ ، شرح السنۃ للبغوی : ۶۲۹/۶)

ضعیف:

٭ امام ترمذی نے اس روایت کو "غریب" قرار دیتے ہوئے فرماتے ہیں: صدقہ بن موسیٰ محدثین کے نزدیک زیادہ قوی راوی نہیں ہیں۔

۱: علامہ ہیثمی رحمہ اللہ فرماتے ہیں: "ضعفه الجمهور" (مجمع الزوائد: ۲۸۶/۵)

٭ امام منذری رحمہ اللہ نے اس حدیث کی تضعیف کی طرف اشارہ کیا ہے (الترغیب:۷۹/۱)

٭ علامہ ابن الجوزی نے "غیر صحیح "قرار دیا ہے (العلل المتناھیۃ:۹۱۴)

٭ شیخ البانی رحمہ اللہ نے بھی اسے ضعیف قرار دیا ہے۔ (ارواء الغلیل: ۳۹۷/۳)

تو پھر رمضان کے بعد افضل روزہ کونسا ہے؟

ماہ محرم، جو کہ ہجری سال کا پہلا مہینہ ہے اس کا روزہ رمضان کے روزوں کے بعد سب سے افضل ہے۔ کیونکہ یہ سال کی ابتداء ہے اور اس کا آغاز روزے جیسے بہترین عمل سے کیا جاتا ہے۔

٭ ابو ہریرہ رضی اللہ عنہ سے روایت ہے کہ رسول اللّٰہ ﷺ نے فرمایا:

أَفْضَلُ الصِّيَامِ، بَعْدَ رَمَضَانَ، شَهْرُ اللهِ الْمُحَرَّمُ، وَأَفْضَلُ الصَّلَاةِ، بَعْدَ الْفَرِيضَةِ، صَلَاةُ اللَّيْلِ

”رمضان کے بعد سب سے افضل روزے اللّٰہ کے مہینے “محرم “کے ہیں اور فرض نماز کے بعد سب سے افضل نماز رات (تہجد) کی نماز ہے “۔

(صحیح مسلم:۲۷۵۵)

ہر مسلمان کےلیے ضروری ہے کہ وہ اس کے روزوں کا اہتمام کرے اور بغیر عذر کے یہ روزے نہ چھوڑے۔ آپ ﷺ کا یہ فرمانا کہ ”شَهر الله“ (اللہ کا مہینہ ہے) یہ دوسرے مہینوں کی بنسبت اس کی قدر و منزلت پر دلالت کرتا ہے۔

دعا عبادت کا مغز ہے حدیث صحیح ہے؟

noreply@blogger.com (Ibn Hoor) — Mon, 09 Jan 2017 14:16:00 +0000

دعا عبادت کا مغز ہے

ہمارے ہاں عام طور پر دعا کے فضائل میں ایک حدیث مشہور ہے کہ دعا عبادت کا مغز ہے لیکن یہ روایت اصول حدیث کی روشنی میں ضعیف ہے۔ اس حدیث کی تحقیق نیچے تصویر میں موجود ہے۔

جبکہ صحیح سند سے ایک حدیث دعا کے فضائل میں ملتی ہے جو کچھ اس طرح ہے:

نبی اکرم صلی اللہ علیہ وسلم نے فرمایا:

” دعا عبادت ہے، تمہارا رب فرماتا ہے : مجھ سے دعا کرو ، میں تمہاری دعا قبول کروں گا۔ “ ( سورۃ غافر : ۶۰ )

(سنن ابی داود: 1479)

جمعہ یا شب جمعہ سورہ الدخان کی تلاوت کرنا

noreply@blogger.com (Ibn Hoor) — Thu, 05 Jan 2017 12:09:00 +0000

www.facebook.com/DaeefHadiths

جمعہ یا شب جمعہ سورۂ الدخان کی تلاوت کرنا

"من قرأ حم الدخان في لیلة الجمعة أو یوم الجمعة بنی اللہ له بیتا فی الجنة."

جس نے جمعہ کی رات یا جمعہ کے دن سورهٔ حم الدخان کی تلاوت کی اللہ تعالیٰ اس کے لیے جنت میں گھر بنائیں گے۔

(المعجم الکبیر: ۲۶۴/۸، حدیث: ۸۰۲۶)

سخت ضعیف: یہ روایت سخت ضعیف ہے:

٭امام ہیثمی رحمہ اللہ نے فرمایا ہے کہ اس میں فضال بن جبیر راوی "بہت زیادہ ضعیف" ہے۔ (مجمع الزوائد: ۳۰۱۷)

٭محدث العصر علامہ البانی رحمہ اللہ نے اس روایت کو سخت ضعیف کہا ہے۔ (ضعیف الترغیب، ۴۴۹، ضعیف الجامع الصغیر: ۵۷۶۸، سلسلة الأحادیث الضعیفة: ۵۱۱۲)

ایک نوجوان کا مرنے کے بعد دوبارہ زندہ ہونا

noreply@blogger.com (Ibn Hoor) — Thu, 05 Jan 2017 10:01:00 +0000

ایک انصاری نوجوان کا مرنے کے بعد دوبارہ زندہ ہونا

سیدنا انس بن مالک رضی اللہ عنہ نے فرمایا:

"میں ایک انصاری نوجوان کی عیادت کیلئے گیا (لیکن وہاں جانے کے بعد) وہ جلد ہی فوت ہوگیا۔ ہم نے اس کی آنکھیں بند کیں اور اس پر چادر ڈال دی، ہم میں سے بعض نے اس کی ماں کو کہا: اس کے ثواب کی امید رکھ،ا س نے کہا: وہ فوت ہوگیا؟ ہم نے کہا: ہاں۔ اس نے کہا: کیا تم صحیح کہہ رہے ہو؟ ہم نے کہا: جی ہاں، اس نے اپنے ہاتھ آسمان کی طرف پھیلائے اور کہا: اے اللہ! بے شک میں تیرے ساتھ ایمان لائی اور تیرے رسول کی طرف ہجرت کی، پس جب مجھے کوئی مصیبت پہنچی اور مین نے تجھ سے دعا کی، تو نے اسے دور کردیا۔ میں تجھ سے سوال کرتی ہوں: اے اللہ! آج کے دن یہ مصیبت مجھ پر نہ ڈال۔ انھوں (انس رضی اللہ عنہ) نے فرمایا: اس (میت) نے اپنے چہرے سے کپڑا ہٹایا ہم اس سے جدا نہیں ہوئے حتیٰ کہ ہم نے کھانا کھایا اور اس نے بھی ہمارے ساتھ کھانا کھایا۔"

(دلائل النبوۃ للبیهقي: ج۶ص۵۱، الکامل لابن عدي: ۹۵/۵، البدایة و النهایة: ۱۷۱/۶)

موضوع (من گھڑت): اس واقعہ کا مرکزی راوی صالح المری "منکر الحدیث" ہے۔

٭ امام احمد بن حنبل رحمہ اللہ نے کہا: "وہ قصہ گو تھا قصے بیان کرتا تھا۔ وہ صاحب آثار و حدیث نہیں ہے اور نہ وہ حدیث کو پہچانتا۔" (الجرح والتعدیل:۳۹۶/۴ )

٭امام یحییٰ بن معین رحمہ اللہ نے کہا: "ضعیف الحدیث" (الجرح والتعدیل:۳۹۶/۴ )

٭امام بخاری رحمہ اللہ نے کہا: "منکر الحدیث" (الجعفاء الصغیر: ۱۶۹)

٭امام نسائی رحمہ اللہ نے کہا: "متروک الحدیث" (الضعفاء والمتروکون: ۳۲۱)

٭حافظ ابن حجر رحمہ اللہ کہا: "ضعیف" (التقریب: ۲۸۴۵)

٭ اس کے علاوہ بھی علماء نے اس پر جرح کی ہے۔ دیکھئے الکامل لابن عدي وغیرہ

تنبیہ: ان تمام علماء کے مقابلے مین صرف امام ابن شاہین رحمہ اللہ نے اس کے بارے میں کہا: لیس به بأس۔ (أسماء الثقات: ۶۰۲)

لیکن جمہور علماء کے مقابلے میں ہونے کی وجہ سے اس کی کوئی حیثیت نہیں۔ لہٰذا یہ سارا واقعہ من گھڑت ہے جو لائق التفات نہیں۔

عصر کے بعد سونے سے عقل کم ہونے کا خدشہ

noreply@blogger.com (Ibn Hoor) — Fri, 23 Sep 2016 13:55:00 +0000

www.facebook.com/DaeefHadiths

من نام بعد العصر فاختلس عقلہ فلا یلومن الا نفسہ

” جوشخص عصر کے بعد سویااور اس کی عقل ميں فتور پیدا ہو جائے (عقل کم کردی جائے)تووہ صرف اپنے آپ کو ہی ملا مت کرے ۔“

سخت ضعیف: یہ حدیث بہت ہی زيادہ ضعیف ہے ، نبی صلی اللہ علیہ وسلم سے ثابت نہیں ہے، دیکھیں:

٭ سلسلة الأحادیث الضعیفةو الموضوعة (۳۹)

٭ " الموضوعات " لابن جوزي ( ۶۹/۳ )

٭ " اللآلی المصنوعۃ " للسیوطي (۲۷۹/۲)

٭ اور " ترتیب الموضوعات " للذھبي ( ۸۳۹ )

عصر کے بعد سونا جائز اور مباح ہے، اس وقت میں سونے کے بارے میں نبی صلی اللہ علیہ وسلم سے کچھ بھی چیز ثابت نہیں ہے۔

جشن میلاد النبی ﷺ پر جھنڈے لگانا

noreply@blogger.com (Ibn Hoor) — Thu, 17 Mar 2016 14:57:00 +0000

حضرت آمنہ رضی اللہ عنہا فرماتی ہیں:

"وَرَأَيْتُ ثَلَاثَ أَعْلَامٍ مَضْرُوبَاتٍ: عَلَمٌ فِي الْمَشْرِقِ , وَعَلَمٌ فِي الْمَغْرِبِ , وَعَلَمٌ عَلَى ظَهْرِ الْكَعْبَةِ"

میں نے دیکھا کہ تین جھنڈے نصب کئے گئے، ایک مشرق میں، دوسرا مغرب میں، تیسرا کعبے کی چھت پر اور حضور اکرم ﷺ کی ولادت ہوگئی۔ (دلائل النبوة لأبي نعيم الأصبهاني : ج۱، ص۶۱۰ رقم ۵۵۵)

سخت ضعیف: یہ سخت ضعیف (یاپھر موضوع)روایت ہے، کیونکہ؛

۱: اس کا راوی یحییٰ بن عبد اللہ البابلتی ضعیف ہے۔

٭ حافظ ابن حجر رحمہ اللہ نے اس ضعیف قرار دیا ہے۔ (تقریب التہذیب: ۷۵۸۵) اور (تہذیب التہذیب: ج۱۱،ص۲۴۰ رقم: ۳۹۳)

۲: یحییٰ بن عبد اللہ کا استاد ابو بکر بن ابی مریم سخت ضعیف راوی ہے ۔

٭ اسے امام احمد ، ابوداود ، ابو حاتم ، ابو زرعۃ ، یحیی بن معین، دارقطنی ، النسائی رحمھم اللہ علیھم اجمعین اور اس کے علاوہ بھی کئی دیگر محدیثین نے ضعیف و مجروح قرار دیا ہے۔ (تقریب التہذیب: ۷۹۷۴) اور دیکھئے: (تہذیب التہذیب: ج۱۲،ص۲۸ رقم: ۱۳۹)

چند دیگر ضعیف اور موضوع روایات:

٭ ربیع الاول کے مہینے کی مبارکباد سب سے پہلے دینے والے پر جہنم حرام

٭میلا النبی ﷺ پر خاص تارے کا طلوع

٭ اولاد کی کمی ہو تو پیاز کھاؤ

noreply@blogger.com (Ibn Hoor) — Thu, 31 Dec 2015 12:45:00 +0000

اولاد کی کمی ہو تو پیاز کھاؤ

شَكَا رَجُلٌ قِلَّةَ الْوَلَدِ فَأَمَرَهُ أَنْ يَأْكُلَ الْبَيْضَ وَالْبَصَلَ.

"ایک آدمی نے اولاد کی کمی کی شکایت کی تو آپ ﷺ نے اسے انڈا اور پیاز کھانے کا حکم دیا۔ "

ایک دوسری رویت میں ہے کہ:

عَلَيْكُمْ بِالْبَصَلِ فَإِنَّهُ يُطَيِّبُ النُّطْفَةَ ، وَيُصْبِحُ الْوَلَدَ .

"پیاز ضرور استعمال کرو کیونکہ یہ نطفہ صاف کردیتا ہے اور بچہ پیدا ہوجاتاہے۔"

موضوع (من گھڑت): یہ جھوٹی اور من گھڑت روایت ہے۔

۱: : امام ابن جوزی رحمہ اللہ نے اسے موضوعات میں ذکر کیا ہے۔ (۱۶/۳)

۲: علامہ شوکانی رحمہ اللہ نے فرمایا ہے کہ یہ حدیث موضوع ہے۔ (الفوائد المجموعة: ص ۱۳۷)

۳: ملا علی قاری (الاسرار المرفوعة:ص۴۳۹)، امام ابن قیم (المنار المنیف: ص ۶۴) اور علامہ طاہر پٹنی (تذکرة الموضوعات: ۱۳۴) رحمہم اللہ نے بھی اسے موضوعات کے ضمن میں ذکر کیا ہے.

٭جبکہ دوسری روایت کوعلامہ طاہر پٹنی رحمہ اللہ نے اسے موضوعات میں شمار کیا ہے۔(تذکرة الموضوعات: ص۱۴۹)

تنبیہ: یہ بات کسی طبیب کی تو ہوسکتی ہے لیکن نبی کریم ﷺ سے ایسی کوئی حدیث یا حکم ثابت نہیں۔

٭ ربیع الاول کے مہینے کی مبارک باد دینے والے پر جہنم حرام

noreply@blogger.com (Ibn Hoor) — Fri, 11 Dec 2015 13:15:00 +0000

ربیع الاول کے مہینے کی مبارک باد دینے والے پر جہنم حرام

کچھ لوگ ماہِ ربیع الاول کے آتے ہی ایک حدیث نشر کرنا شروع کر دیتے ہیں:

"جو بھی اس فضیلت والے ماہ کی مبارک باد سب سے پہلےدے گا، اس پر جہنم کی آگ حرام ہو جائے گی۔ "

موضوع (من گھڑت): یہ جھوٹی اور من گھڑت روایت ہے۔

اس روایت کی سند حدیث کی کتابوں میں نہیں ملی، اور خود ساختہ اور من گھڑت ہونے کی علامات اس حدیث پر بالکل واضح ہیں، اس لئے اس کی نبی صلی اللہ علیہ وسلم کی طرف نسبت کرنا جائز نہیں ہے، کیونکہ یہ آپ کے بارے میں جھوٹ باندھنے کے زمرے میں آتا ہے، اور آپ صلی اللہ علیہ وسلم پر جھوٹ باندھنا کبیرہ گناہوں میں سے ہے، اور رسول اللہ صلی اللہ علیہ وسلم کا فرمان ہے:"جس شخص نے میری طرف منسوب کوئی حدیث بیان کی، اور وہ خدشہ بھی رکھتا تھا یہ جھوٹ ہے، تو بیان کرنے والا بھی دو جھوٹوں میں سے ایک ہے) مسلم نے اسے اپنی صحیح مسلم کے مقدمہ میں بیان کیا ہے۔

امامنووی رحمہ اللہ اس حدیث کی شرح میں فرماتے ہیں:

"اس حدیث میں نبی صلی اللہ علیہ وسلم پر جھوٹ بولنے کی سنگینی بیان کی گئی ہے، اور جس شخص کو اپنے ظنِ غالب کے مطابق کوئی حدیث جھوٹی لگی لیکن پھر بھی وہ آگے بیان کر دے تو وہ بھی جھوٹا ہوگا، جھوٹا کیوں نہ ہو؟! وہ ایسی بات کہہ رہا ہے جو آپ صلی اللہ علیہ وسلم نے نہیں فرمائی" انتہی (شرح صحيح مسلم : ۱/۶۵)

اور اس حدیث میں ذکر کیا گیا ہے کہ ماہِ ربیع الاول کی جس شخص نے مبارکباد دی تو صرف اسی عمل سے اس پر جہنم کی آگ حرام ہو جائے گی، یہ بات حد سے تجاوز، اور مبالغہ آرائی پر مشتمل ہے، جو کہ اس حدیث کے باطل اور خود ساختہ ہونے کی علامت ہے۔

چنانچہ ابن قیم رحمہ اللہ کہتے ہیں:

"خود ساختہ احادیث میں اندھا پن ، بے ڈھب الفاظ، اور حد سے زیادہ تجاوز ہوتا ہے، جو ببانگ دہل ان احادیث کے خود ساختہ ہونے کا اعلان کرتا ہے، کہ یہ حدیث رسول اللہ صلی اللہ علیہ وسلم کے نام پر خود گھڑی گئی ہے" انتہی (المنار المنيف : ص۵۰)

٭ صفر کے مہینے کی اختتام کی خبر دینے والے کیلئے جنت

noreply@blogger.com (Ibn Hoor) — Thu, 26 Nov 2015 09:06:00 +0000

صفر کے مہینے کی اختتام کی خبر دینے والے کیلئے جنت

مَنْ بَشَّرَنِي بِخُرُوجِ صَفَرٍ، بَشَّرْتُهُ بِدُخُولِ الْجَنَّةِ .

"جو کوئی مجھے صفر کا مہینا گزر جانے کی خبر دے گا میں اسے جنت میں جانے کی بشارت دوں گا۔ "

موضوع (من گھڑت): یہ جھوٹی اور من گھڑت روایت ہے۔

۱: ملا علی قاری نے لکھا ہے: لا أصل له "اس کی کوئی اصل نہیں۔" (الموضوعات الکبریٰ: ۳۳۷/۱)

۲: علامہ الصغاني نے اسے اپنی کتاب الموضوعات (۱۰۰) میں ذکر کیا ہے۔

۳: قاضی شوکانی لکھتے ہیں: قال الصنعانی؛ موضوع، و کذا قال العراقی۔

«اسے علامہ صنعانی اور علامہ عراقی نے موضوع کہا ہے۔» (الفوائد المجموعة: ۴۳۸/۱)

٭ ہفتے کے روز ناخن کاٹنا شفاء کا ذریعہ

noreply@blogger.com (Ibn Hoor) — Sat, 31 Oct 2015 12:19:00 +0000

ہفتے کے روز ناخن کاٹنا شفاء کا باعث

من قلم أظفارہ یوم السبت خرج منه الداءُ و دخل فیه الشفاء.
"جس نے بروز ہفتہ ناخن کاٹے اس سے بیماری نکل جاتی ہے اور اس میں شفاء داخل ہوجاتی ہے۔"

موضوع (من گھڑت): یہ جھوٹی اور من گھڑت روایت ہے۔

۱: امام شوکانی رحمہ اللہ نے فرمایا ہے کہ یہ روایت موضوع ہے کیونکہ اس کی سند میں دو راوی حدیثیں گھڑنے والے ہیں اور کچھ مجہول بھی ہیں۔ (الفوائد المجموعة: ص۱۹۷)

:امام ابن جوزی رحمہ اللہ نے بھی اسے موضوعات میں ذکر کیا ہے۔ (۵۳/۳)

فائدہ:ناخن کاٹنے (تراشنے) سنت ہیں۔ اور ان کو کاٹنے کے لئے کوئی دن یا مخصوص طریقہ نبی کریم سے ثابت نہیں ہے۔ جس طرح آسانی ہو آپ تراش سکتے ہیں۔ زیادہ سے زیادہ چالیس دن مدت ہے۔ اس سے زیادہ دن گزرنے پر ناخن نہ تراشنا گناہ ہے۔

ناخن تراشنا فطرت ہے:سیدنا ابو ہریرہ رضی اللہ عنہ کا بیان ہے کہ رسول اللہ ﷺ نے ارشاد فرمایا:

"پانچ چیزیں فطرت ہیں؛ ۱: ختنہ ۲: زیر ناف بالوں کی صفائی ۳: مونچھیں ہلکی کرنا ۴: ناخن تراشنا ۵: بغلوں کے بال اکھاڑنا۔" (صحیح البخاری: ۵۸۹۱، صحیح مسلم: ۲۵۷)

چالیس دن کے اندر ناخں تراشنا: سیدنا انس بن مالک رضی اللہ عنہ بیان کرتے ہیں:

"رسول اکرم ﷺ نے ہمارے لیے مونچھیں کاٹنے ، ناخن تراشنے، بغلوں کے بال اکھاڑنے اور زیر ناف بالوں کی صفائی کا (زیادہ سے زیادہ) وقت چالیس دن مقرر فرمایا۔" (صحیح مسلم: ۲۵۸)

چالیس دنوں سے زیادہ ناخن نہ تراشنا حرام و ناجائز ہے، کیونکہ یہ رسول اللہ ﷺ کے حکم اور سنت کی مخالفت ہے، جو سراسر ہلاکت و بربادی کا باعث ہے۔

ناخن تراشنا سنت ہے:سیدنا عبد اللہ بن عمر رضی اللہ عنہما بیان کرتے ہیں کہ رسول اللہ ﷺ نے فرمایا: "مونچھیں کاٹنا، بغلوں کے بال اکھڑنا اور ناخن تراشنا (واجبی) سنت ہے۔" (السنن الکبریٰ للبیھقي: ۱۴۹/۱، وسندہ صحیح)

٭عمامہ باندھ کر نماز پڑھنے کی فضیلت

noreply@blogger.com (Ibn Hoor) — Tue, 27 Oct 2015 13:23:00 +0000

عمامہ باندھ کر نماز پڑھنے کی فضیلت

صَلَاۃٌ عَلَی کَوٌرِ الٗعَمَامَةِ یَعٗدِلُ ثَوَابُهَا عِنٗدَ اللہِ غَزٗوَۃ فِی سَبِیٗلِ اللهِ.
” پگڑی کے بَل پر نماز کا ثواب اللہ کے ہاں جہاد فی سبیل اللہ کے برابر ہے۔“

موضوع (من گھڑت): یہ جھوٹی اور من گھڑت روایت ہے۔

(الفوائد المجموعة: ص ۱۸۸، تذکرۃ الموضوعات: ص ۱۵۶)

٭علامہ ابن عراق رحمہ اللہ نے فرمایا ہے کہ اسے ابراہیم بن عبد اللہ بن ہمام راوی نے گھڑا ہے۔ (تنزیعہ الشریعة: ۱۴۲/۲)

٭ابن طاہر المقدسی رحمہ اللہ فرماتے ہیں کہ ابراہیم راوی منکر الحدیث ہے۔ (ذخیرۃ الحفاظ: ۳۴۰۸)

قربانی کے تین دن یا چار؟ محدث زبیر علی زئی رحمہ اللہ

noreply@blogger.com (Ibn Hoor) — Tue, 22 Sep 2015 08:06:00 +0000

Qurbani Kay 3 Din ya 4 Din.pdf by Salafi Ibn

ڈاؤنلوڈ لنک

٭ گلاب کی تخلیق نبی ﷺ کے پسینے سے

noreply@blogger.com (Ibn Hoor) — Sun, 16 Aug 2015 19:06:00 +0000

گلاب کی تخلیق نبی ﷺ کے پسینے سے

لَيْلَةَ أُسْرِيَ بِي إِلَى السَّمَاءِ سَقَطَ إِلَى الأَرْضِ مِنْ عَرَقِي فَنَبَتَ مِنْهُ الْوَرْدُفَمَنْ أَحَبَّ أَنْ يَشُمَّ رَائِحَتِي فَلْيَشُمَّ الْوَرْدَ .
” جس رات مجھے سیر کرائی گئی (یعنی شب معراج) اس رات زمین پر میرا کچھ پسینہ گر گیا پھر اس سے گلاب کا پھول اگا، پس جو چاہتا ہے کہ میری خوشبو سونگھے وہ گلاب کو سونگھ لے۔“

موضوع (من گھڑت): یہ جھوٹی اور من گھڑت روایت ہے۔

٭ ملا علی قاری اور امام شوکانی رحمہما اللہ نے اس روایت کو موضوع کہا ہے۔ (الاسرارالمرفوعة: ص ۳۷۷، الفوائد المجموعة: ص ۱۹۶)

٭علامہ سیوطی اور امام ابن جوزی رحمہما اللہ نے بھی اسے موضوع قرار دیا ہے۔ (اللآلی المصنوعة: ۲۳۳/۲، الموضوعات: ۶۱/۳)

مزید دیکھئے: کشف الخفاء (۲۵۹/۱) ، تنزیعه الشریعة (۳۳۱/۲)

٭ گلاب کی تخلیق نبی ﷺ کے پسینے سے

noreply@blogger.com (Ibn Hoor) — Sun, 16 Aug 2015 19:03:00 +0000

گلاب کی تخلیق نبی ﷺ کے پسینے سے

إِنَّ الْوَرْدَ خُلِقَ مِنْ عَرَقِ النَّبِيِّ صَلَّى اللَّهُ عَلَيْهِ وَسَلَّمَ.
” یقیناً گلاب کا پھول نبی کریم ﷺ کے پسینے سے پیدا کیا گیا ہے۔“

موضوع (من گھڑت): یہ جھوٹی اور من گھڑت روایت ہے۔

٭ امام نووی رحمہ اللہ نے اس روایت کو غیر صحیح کہا ہے، جبکہ حافظ ابن حجر رحمہ اللہ نے اسے موضوع کہا ہے۔ (کما فی کشف الخفاء: ۲۵۸/۱، المقاصد الحسنة: ص۲۱۶)

٭علامہ احمد العامری رحمہ اللہ فرماتے ہیں کہ اس کی کوئی اصل نہیں۔ (الحد الحثیث: ص ۲۵۲)

٭ عقیق کی انگوٹھی میں خیر و بھلائی

noreply@blogger.com (Ibn Hoor) — Sun, 16 Aug 2015 18:59:00 +0000

عقیق کی انگوٹھی میں خیر و بھلائی

مَنٗ تَخَتَّمَ بِالٗعَقِیٗقِ لَمٗ یَزَلٗ یَرَیٗ خَیٗرًا.
” جس نے عقیق کی انگوٹھی پہنی وہ ہمیشہ خیر و بھلائی دیکھتا رہے گا۔“

موضوع (من گھڑت): یہ جھوٹی اور من گھڑت روایت ہے۔

٭ امام ابن جوزی رحمہ اللہ نے اسے موضوعات میں ذکر کیا ہے۔ (۵۷/۳)

٭ علامہ ناصر الدین البانی رحمہ اللہ نے بھی اسے موضوع کہا ہے۔ (السلسلة الضعیفة: ۲۳۰)

مزید دیکھئے: الفوائد المجموعة (ص۱۹۴) ، تذکرۃ الموضوعات (ص۱۵۸)

٭ حج کرنے سے پہلے شادی کرنا

noreply@blogger.com (Ibn Hoor) — Sat, 15 Aug 2015 19:00:00 +0000

حج کرنے سے پہلے شادی کرنا

مَنْ تَزَوَّجَ قَبْلَ أَنْ يَحُجَّ فَقَدْ بَدَأَ بِالْمَعْصِيَةِ.
” جس نے حج کرنے سے پہلے شادی کی اس نے معصیت و نافرمانی شروع کردی۔“

(الکامل لابن عدی: ۲۰۹/۲)

موضوع (من گھڑت): یہ جھوٹی و من گھڑت روایت ہے، کیونکہ؛

٭امام ابن جوزی رحمہ اللہ نے اسے موضوعات میں ذکر کیا ہے۔ (الموضوعات: ۲۱۳/۲)

٭ علامہ طاہر پٹنی رحمہ اللہ نے فرمایا ہے کہ اس میں ایک راوی ہے جو موضوعات بیان کرتا تھا۔ (تذکرۃ الموضوعات: ص ۷۳)

٭علامہ شوکانی اور سیوطی رحمہما اللہ نے نقل فرمایا ہے کہ اس کی سند میں محمد بن ایوب راوی ہے جو موضوع روایتیں بیان کرتا تھا اور احمد بن جمہور متہم بالکذب ہے۔ (الفوائد المجموعة : ص ۱۰۳، اللآلی المصنوعة: ۱۰۱/۲)

٭ علامہ البانی رحمہ اللہ نے بھی اسے موضوع کہا ہے۔ (سلسلة الأحاديث الضعيفة والموضوعة : ۲۲۲)

٭ حج اور عمرہ

noreply@blogger.com (Ibn Hoor) — Sat, 15 Aug 2015 17:22:00 +0000

حج اور عمرہ

الْحَجُّ جِهَادٌ ، وَالْعُمْرَةُ تَطَوُّعٌ.

” حج جہاد ہے اور عمرہ نفل ہے۔“ (ابن ماجة : ۲۹۸۹)

سخت ضعیف : اس کی سند سخت ضعیف ہے، کیونکہ؛

۱: اس کا راوی عمربن قیس سندل "متروک" ہے۔ (تقریب التہذیب: ۴۹۵۹)

۲: جبکہ حسن بن یحیی الخشني "ضعیف" راوی ہے۔

٭ حافظ بوصیری رحمہ اللہ فرماتے ہیں: "اس کے ضعیف ہونے پر جمہور متفق ہیں۔" یعنی یہ جمہوف محدثین کے نزدیک ضعیف راوی ہے۔ (مصباح الزجاجة)

٭ حافظ ابن حجر اور علامہ بوصیری رحمہ اللہ نے اس روایت کو ضعیف قرار دیا ہے۔ (تلخیص الحبیر: ۴۳۲/۲، مصباح الزجاجة: ۱۹۹/۳)

٭علامہ البانی رحمہ اللہ نے اس روایت کو ضعیف قرار دیا ہے۔ (ضعیف ابن ماجه: ۶۴۵،سلسلةالأحاديث الضعيفة والموضوعة : ۲۰۰)

٭ مغرب اور عشاء کے درمیان بیس رکعات کی فضیلت

noreply@blogger.com (Ibn Hoor) — Fri, 14 Aug 2015 17:34:00 +0000

مغرب اور عشاء کے درمیان بیس رکعات کی فضیلت

مَنْ صَلَّى بَيْنَ الْمَغْرِبِ وَالْعِشَاءِ عِشْرِينَ رَكْعَةً بَنَى اللَّهُ لَهُ بَيْتًا فِي الْجَنَّةِ .
” جس نے مغرب اور عشاء کے درمیان بیس رکعات پڑھیں اللہ تعالیٰ اس کے لیے جنت میں گھر بنائیں گے۔“

(ابن ماجه: ۱۳۷۳)

موضوع (من گھڑت): یہ روایت جھوٹی اور من گھڑت ہے۔

۱ :اس کا راوی یعقوب بن ولید "کذاب" ہے۔امام احمد رحمہ اللہ وغیرہ نے اسے کذاب کہا ہے۔(تقریب التہذیب: ۷۸۳۵)

٭علامہ البانی رحمہ اللہ نے اس روایت کو موضوع قرار دیا ہے۔ (ضعیف الجامع: ۵۶۶۲)

٭ مغرب کے بعد چھ رکعات کی فضیلت

noreply@blogger.com (Ibn Hoor) — Fri, 14 Aug 2015 17:25:00 +0000

مغرب کے بعد چھ رکعات نوافل کی فضیلت

مَنْ صَلَّى بَعْدَ الْمَغْرِبِ سِتَّ رَكَعَاتٍ لَمْ يَتَكَلَّمْ فِيمَا بَيْنَهُنَّ بِسُوءٍ عُدِلْنَ لَهُ بِعِبَادَةِ ثِنْتَىْ عَشْرَةَ سَنَةً.
” جس نے مغرب کے بعد چھ رکعات پڑھیں اور ان کے درمیان میں کوئی بری بات نہ کی تو یہ رکعات اس کے لئے بارہ سال کی عبادت کے برابر ہوں گی۔“

(سنن الترمذی: ۴۳۵)

سخت ضعیف : یہ روایت سخت ضعیف ہے، کیونکہ؛

۱: اس کا راوی عمر بن أبی خثعم "ضعیف" ہے۔ (تقریب التہذیب: ۴۹۲۸)

٭امام ترمذی رحمہ اللہ فرماتے ہیں کہ : "میں نے محمد بن اسماعیل(امام بخاری رحمہ اللہ) سے سنا ہے کہ انہوں نے کہا عمر بن عبد اللہ بن ابی خثعم منکر الحدیث ہے۔"

٭ امام شوکانی رحمہ اللہ فرماتے ہین اس کی کوئی اصل نہیں۔ (الفوائد المجموعة : ص ۴۳۷)

٭امام صغانی رحمہ اللہ نے اسے موضوعات میں ذکر کیا ہے۔ (موضوعات: ص ۵۰)

حافظ عراقی رحمہ اللہ فرماتے ہیں کہ اس کی سند ضعیف ہے۔ (تخریج الاحیاء : ۲۶۱/۸)

٭ علامہ البانی رحمہ اللہ نے اس روایت کو سخت ضعیف کہا ہے۔(۴۶۹)

٭جنت کو رمضان کیلئے پورا سال مزین کیا جاتا ہے

noreply@blogger.com (Ibn Hoor) — Mon, 22 Jun 2015 17:55:00 +0000

جنت کو رمضان کیلئے پورا سال مزین کیا جاتا ہے

إِنَّ الْجَنَّةَ تُزَخْرَفُ لِرَمَضَانَ مِنْ رَأْسِ الْحَوْلِ إِلَى حَوْلِ قَابِلٍ» . قَالَ: فَإِذَا كَانَ أَوَّلُ يَوْمٍ مِنْ رَمَضَانَ هَبَّتْ رِيحٌ تَحْتَ الْعَرْشِ مِنْ وَرَقِ الْجَنَّةِ عَلَى الْحُورِ الْعِينِ فَيَقُلْنَ: يَا رَبِّ اجْعَلْ لَنَا مِنْ عِبَادِكَ أَزْوَاجًا تَقَرَّ بِهِمْ أَعْيُنُنَا وَتَقَرَّ أَعْيُنُهُمْ بِنَا . .
” جنت کو رمضان کیلئے پورا سال مزین کیا جاتا ہے۔فرمایا: جب رمضان کا پہلا دن ہوتا ہے تو عرش کے نیچے جنت کے پتوں سے ہوا چلتی ہوئی حورعین تک پہنچتی ہے تو وہ کہتی ہیں: رب جی! اپنے بندوں میں سے ہمارے شوہر بنادے، ہم ان سے اپنی آنکھیں ٹھنڈی کریں اور وہ ہم سے اپنی آنکھیں ٹھنڈی کریں۔“

(شعب الإیمان للبیهقي: ۳۶۳۳)

ضعیف : یہ ضعیف روایت ہے، کیونکہ؛

۱: اس کا راوی ولید بن ولید مختلف فیه ہے لیکن اس کا ضعیف ہونا راجح ہے۔

٭امام دارقطنی رحمہ اللہ فرماتے ہیں: اس حدیث کو روایت کرنے میں عبد الرحمٰن بن ثابت بن ثوبان عمرو بن دینار سے متفرد ہیں، اور ابن ثوبان سے روایت لینے میں ولید بن ولید متفرد ہے اور وہ منکر الحدیث ہے۔ حافظ ابن حبان رحمہ اللہ فرماتے ہیں: اس سے حجت لینا جائز نہیں۔ (العلل المتناهیة ، کتاب الصیام: ۸۸۱)

٭ اس حدیث کے بہت سے شواہد بھی ہیں جو سب کے سب باطل ہیں۔ (مشکوٰۃ المصابیح بتحقیق زبیر علی زئی: ۱۹۶۷)

٭ روزہ افطار کرنے کی دعا

noreply@blogger.com (Ibn Hoor) — Wed, 17 Jun 2015 09:00:00 +0000

روزہ افطار کرنے کی دعا

معاذ بن زہرہ رحمہ اللہ بیان کرتے ہیں کہ نبی ﷺ جب افطار کرتے تھے تو آپ ﷺ یہ دعا پڑھا کرتے ھے:

اللَّهُمَّ لَكَ صُمْتُ وَعَلَى رِزْقِكَ أَفْطَرْتُ.
” اے اللہ! تیرے ہی لیے میں نے روزہ رکھا اور تیرے ہی دیے ہوئے سے افطار کیا۔“

(سنن أبيداود کتاب الصیام باب القول عند الإفطار: ۲۳۵۸)

ضعیف : یہ روایت ضعیف ہے کیونکہ؛

۱: اس کا راوی معاذ بن زہرہ مجہول ہے۔
۲: نیز سند مرسل (ضعیف)ہے۔ کیونکہ تابعی ڈائریکٹ نبیٔ اکرم ﷺ سے روایت کررہا ہے۔

صحیح حدیث:ابن عمر رضی اللہ عنہما بیان کرتے ہیں، جب نبی ﷺ روزہ افطار کرتے تو آپ ﷺ یہ دعا پڑھا کرتے تھے:

ذَهَبَ الظَّمَأُ وَابْتَلَّتِ الْعُرُوقُ وَثَبَتَ الأَجْرُ إِنْ شَاءَ اللَّهُ

”پیاس جاتی رہی، رگیں تر ہوگئیں اور ثواب لازم و ثابت ہوگیا، اگر اللہ نے چاہا۔“

(سنن أبی داود: کتاب الصیام باب القول عند الإفطار: ۲۳۵۷ وسندہ حسن)

کیا مرسل حدیث حجت ہے؟

٭ جمہور محدثین کے نزدیک تابعی کی مرسل روایت ہر لحاظ سے مردود ہے۔

۱: الامام، الفقیہ، ابو بکر احمد بن اسحاق بن ایوب بن یزید بن عبد الرحمٰن بن نوح رحمہ اللہ فرماتے ہیں:

لو أن المرسل من الأخبار و المتصل سیان لما تکلف العلماء طلب الحدیث بالسماع ولما ارتحلوا فی جمعه مسموعا ولا التمسوا صحته ولکان أھل کل عصر إذا سمعوا حدیثا من عالمهم وهو یقال قال رسول اللہ ﷺ کذا و کذا لم یسألوه عن إسناده وقد روینا عن جماعة من التابعین وأتباع التابعین کانوا یسألون عن السنة ثم یقولون للتابعین هل من أثر وإذا ذکر الأثر قالواهل من قدوة وإنما یعنون بذلک الإسناد المتصل و لم یقتصروا علی قول الزهری و إبراهیم قال رسول اللہ ﷺ فکیف یقتصروا من مالک والنعمان إذا قالا رسول اللہ ﷺ.

”اگر مرسل اور متصل احادیث ایک جیسی (حجت) ہوتیں تو علمائے کرام طلبِ حدیث میں سماع کرنے کی زحمت نہ اٹھاتے، نہ ہی خود سنی ہوئی احادیث کو جمع کرنے کے لیے وہ سفر کرتے، نہ ہی وہ احادیث کی صحت کی تلاشی کے متلاشی ہوتے، نیز ہر دور کے لوگ جب اپنے عالم کو یہ کہتے سنتے کہ رسول اللہ ﷺ نے یوں فرمایا، تو اس سے سند کے بارے میں سوال نہ کرتے، حالانکہ تابعین اور تبع تابعین کی ایک جماعت سے ہم نے روایت کیا ہے کہ وہ سنتِ نبوی کے بارے میں پوچھتےتھے، پھر تابعین سے کہتے کہ کیا کوئی اثر ہے؟ کیا کوئی قدوہ ہے؟ اس سے مراد متصل سند لیتے تھے۔ وہ (محمد بن مسلم) زہری رحمہ اللہ اور ابراہیم (نخعی رحمہ اللہ) کے اس قول پر اکتفا نہیں کرتے تھے کہ رسول اللہ ﷺ نے یوں فرمایا ہے، امام مالک اور امام ابو حنیفہ اگر کہیں کہ رسول اللہ ﷺ نے یوں فرمایا ہے تو ان کی بات پر کیسے اکتفا کیا جاسکتا ہے؟ .“ (الکفایة فی علم الروایة للخطیب: ۱۲۴۵، وسندہ صحیح)

۲:امام مسلم رحمہ اللہ "مرسل " کے بارے میں فرماتے ہیں:
والمرسل فی اصل قولنا وقول اهل العلم بالاخبار لیس بحجة.

”ہمارے (محدثین) کے اصل قول اور (دوسرے) علماء کے نزدیک مرسل روایت حجت نہیں ہے۔ ”(مقدمہ صحیح مسلم ج۱ ص۲۲ بعد ح۹۲ و فتح الملہم ج۱ ص۴۱۰)

۳:امام ابن خزیمہ رحمہ اللہ فرماتے ہیں: لا نحتج بالمراسیل، ولا بالأخبار الواهیة.

"ہم مرسل اور ضعیف روایات سے حجت نہیں لیتے۔" (کتاب التوحید لابن خزیمہ: ۱۳۷/۱)

۴: امام طحاوی حنفی رحمہ اللہ لکھتے ہیں:
و ھم لا یحتجون بالمراسیل.

"وہ (محدثین) مرسل روایات سے دلیل نہیں لیتے۔" (نصب الرایة للزیلعی الحنفی: ۵۸/۱)

۵: امام شافعی رحمہ اللہ فرماتے ہیں:
ولسنا ولا إیّاک نثبت المرسل.

"نہ ہم مرسل کو صحیح سمجھتے ہیں، نہ آپ۔" (اختلاف الحدیث للشافعی: ۵۶۰)

۶:امام ابن ابی حاتم الرازی رحمہ اللہ فرماتے ہیں:
سمعت أبی و أبا زرعة یقولان : لا یحتج بالمراسیل، ولا تقوم الحجّة إلّا بالأسانید الصّحاح المتّصلة، وکذا أقول أنا.

"میں نے اپنے والد (امام ابو حاتم رحمہ اللہ) اور امام ابو زرعہ رحمہ اللہ سے سنا، وہ دونوں فرمارہے تھے کہ مرسل روایات سے حجت نہیں لی جائے گی، حجت صرف صحیح اور متصل سندوں کے ساتھ قائم ہوسکتی ہے۔ میں بھی ایسا ہی کہتا ہوں۔" (کتاب المراسیل لابن حاتم: ۷)

۷:امام دارقطنی رحمہ اللہ فرماتے ہیں:
والحدیث مرسل، لا تقوم به الحجّة.

"یہ حدیث مرسل ہے اور اس کے ساتھ حجت قائم نہیں ہوسکتی۔" (سنن الدارقطنی: ۳۹۸/۱)

۸:امام ابن المنذر رحمہ اللہ فرماتے ہیں:
المرسل من الحدیث ، لاتقوم به الحجّة.

"مرسل حدیث سے حجت قائم نہیں ہوتی۔" (الاوسط لابن المنذر: ۲۲۸/۱، ۲۷۱/۱)

جاری ہے۔۔۔۔۔

٭ رمضان میں قیدیوں کو رہا کرنا

noreply@blogger.com (Ibn Hoor) — Mon, 15 Jun 2015 07:54:00 +0000

رمضان میں قیدیوں کو رہا کرنا

ابن عباس رضی اللہ عنہما بیان کرتے ہیں:

كَانَ رَسُولُ اللهِ صَلَّى اللَّهُ عَلَيْهِ وَسَلَّمَ إِذَا دَخَلَ شَهْرُ رَمَضَانَ أَطْلَقَ كُلَّ أَسِيرٍ، وَأَعْطَى كُلَّ سَائِلٍ.
" جب ماہ رمضان آتا تو رسول اللہ ﷺ ہر قیدی کو آزاد فرمادیتے اور ہر سائل کو عطا کیا۔"

(شعب الإیمان للبیهقي: ۳۶۲۹/۳۳۵۷)

سخت ضعیف : یہ روایت سخت ضعیف ہے، کیونکہ؛

٭اس کا راوی أبوبکر الهذلي"متروک"ہے۔ (مشکوٰۃ المصابیح بتحقیق زبیر علی زئی: ۱۹۶۶)

٭ علامہ البانی رحمہ اللہ نے بھی اس روایت کو "سخت ضعیف" قرار دیا ہے۔ (مشکوٰۃ المصابیح بتحقیق الألبانی: ۱۹۶۶)