பேராதனை நினைவுகள்

பல்கலை வாழ்க்கை ....

2012-05-15T01:57:00.000-07:00

பிறந்த குழந்தையை அரவணைக்கும் தாயைப்போல
நம்மை அரவணைத்த நம் ராமநாதன் விடுதி

முதலாண்டில் கழுகாய் நம்மை கொத்திச்
செல்ல முயன்ற சீனியர் மாணவர்கள்

நம்மை Albert Einstein-களாக மாற்ற
முயன்ற புரொபஸர்கள்

நம்மை கட்டுக்கோப்புடன் நடத்த முயன்று
வெற்றிக்கனியை பறிக்காத விடுதி Warden

common room இல் படிக்க சென்று

மற்றவர்களுடன் நாம் இட்ட சண்டைகள்

பரீட்சைக்கு முந்தைய இரவு நாம் நடத்திய
பட்டிமன்றங்கள் மற்றும் அரட்டை அரங்கங்கள்

1ம் வருடத்தில் குறைய result எடுத்து

அழுத நண்பியின் கண்ணீர் துளிகள்

வெட்டிக் கதைகளும் இணைய தளமுமாக
நாம் கழித்த அர்த்தமற்ற ராத்திரிகள்

பல்லேகலவில் நாம் பார்த்து ரசித்த

பாக்-நியூ கிரிக்கெட் போட்டி

சனி ஞாயிறுகளில் பல்கூட துலக்காமல்
நாம் குடிக்கும் ஒன்றரை கப் tea

கூட்டம் கூட்டமாக ஒரே அறையில் நாம்
கண்டுகளித்த வண்ணமயமான திரைப்படங்கள்

ஒராண்டு முடிந்ததும் பழிவாங்கும் படலமாக
நம் Juniors-ஐ நாம் படுத்திய பாடு

lecturer hall இல் மெய் மறந்து தூங்கி

நாம் போட்ட குறட்டைகள்

பொறுப்பற்று சுற்றிய நம்மை ஆறு மாதத்திற்கு
ஒருமுறை நெறிப்படுத்திய Semester Exam

வீட்டிற்கு செல்ல அங்கங்கே நாம்
ஒதுக்கும் ‘சின்னஞ்சிறு’ விடுமுறைகள்

உயிருக்கு போராடிக் கொண்டிருக்கும் Cellphone-ல்
விடிய விடிய நாம் ‘வறுத்த’ கடலைகள்

எப்போதுமே கடைசி நாளில் நாம்
சமர்ப்பிக்கும் Recordகள், Assignment-கள்

நிலஅதிர்ச்சியாலும் சுனாமியாலும்கூட அசைக்க முடியாத
நம்மை அதிர வைத்த University Result-கள்

நாமிட்ட தேவையற்ற சச்சரவுகளும் அதில்
இருந்து கற்ற கசப்பான பாடங்கள்

அக்பர் பாலத்தில் நாம் நின்று

ரசித்த இயற்கை காட்சிகள்

வெள்ளி கிழமைகளில் குறிஞ்சி குமரனில்

நாம் கட்டி பழகிய மாலைகள்

தினந்தோறும் வகுப்பிற்கு லேட்டாக சென்று
நாம் ‘maintain’ செய்த Punctuality

கஜினி முகமது போல Training க்காக விடாமுயற்சியுடன்
நாம் ஏறி இறங்கிய Company-கள்

மூன்றே மாதங்களில் முடிக்க வேகவேகமாய்
நாம் செய்து ‘வாங்கிய’ Project-கள்

உலகம் சுற்றும் வாலிபர்களாக நாம்
சுற்றிக் களித்த வருட சுற்றுலாக்கள்

வகுப்புக்கு மட்டம் போட தினமும் Technique-ஆக
நாம் கொண்டாடிய Birthdayகள்

வைத்திருக்கும் எல்லா Equipment-யும்
பொசுக்கி நாம் செய்த Lab வகுப்புகள்

பார்த்து எழுதி notice board இல் தொங்கிய

நம் lab reports என்று எல்லாமே

இப்போது திரும்பி பார்த்தால் “குறும்பு” செய்தது
போன்ற உணர்வை ஏற்படுத்தினாலும் இவையெல்லாம்
தான் எனக்கு “வாழ்க்கையை” சொல்லி கொடுத்தது.

கலிஸ்ரஸ் பிறந்த நாள் நினைவாக....

2011-09-19T02:36:00.000-07:00

பல்கலை வாழ்வில் இரு வருடங்கள் எம்முடன் பயணித்து இன்று எம்மை விட்டு பிரிந்தும் எம் நினைவுகளில் கலந்து விட்ட எம் நண்பன் அன்ரன் யோகராஜா கலிஸ்ரஸ் கயேந்திரனின் ( கலிஸ்) பிறந்த நாள் நினைவாக E/07 மாணவ நண்பர்கள் கடந்த சனிக்கிழமை திருகோண மலையிலுள்ள சிவானந்த தபோ வனத்துக்கு சென்றிருந்தார்கள். அங்கு சென்ற மாணவர்கள் அங்குள்ள சிறுவர்களுக்கு மதிய போசனம் வழங்கி அவர்களுடன் அளவளாவி அன்றைய பொழுதை செலவிட்டு மகிழ்ந்தார்கள். எம் நண்பன் முன்னெடுத்துச் சென்ற பணியை தொடர்ந்து, ஆத்மா சாந்தி அடைய பிரார்த்திப்போம்.

கலிஸ்ரஸ்-சுஜீவன் ஞாபகார்த்த கிரிக்கட் தொடர்

2011-09-16T10:28:00.000-07:00

E/07 மாணவர்களான கலிஸ்ரஸ்,சுஜீவன் நினைவாக நடை பெற்ற 12 ஓவர்கள் கொண்ட மென் பந்து கிரிக்கட் தொடரில் E/07 மாணவர்கள் வெற்றிக் கிண்ணத்தை சுவீகரித்துக்கொண்டனர்.

கடந்த வியாழக்கிழமை (15 -09 -2011) பேராதனை பல்கலைக் கழக மைதானத்தில் மின்னொளியில் E/08 மாணவர்களால் நடாத்தப்பட்ட இத்தொடரில் 5 அணிகள் மோதின. இதில் இறுதிச் சுற்றுக்கு E/07- E/08/A அணியினர் தெரிவு செய்யப் பட்டனர்.

விறுவிறுப்பாக நடை பெற்ற இறுதிப் போட்டியில் நாணயச் சுழற்சியில் வெற்றிபெற்ற E/07 அணியினர் களத்தடுப்பில் ஈடுபட தீர்மானித்தனர். இதற்கமைய முதலில் துடுப்பெடுத்தாடிய E/08 அணியினர் 12 ஓவர்கள் முடிவில் சகல விக்கட்டுகளையும் இழந்து 62 ஓட்டங்களை பெற்றனர். பதிலுக்கு களமிறங்கிய E/07 அணியினர் 63 ஓட்டங்களை பெற்று 4 விக்கட்டுகளால் வெற்றி பெற்றனர். இறுதிப் போட்டியின் ஆட்ட நாயகனாக நிரஞ்சன் தெரிவு செய்யப் பட்டார்.

நண்பர்களின் நினைவாக....

2011-08-08T02:31:00.000-07:00

எமது நெஞ்சில் வாழ்ந்து கொண்டிருக்கும் எம்மை விட்டுப் பிரிந்த பேராதனைப் பல்கலைக்கழக பொறியியல் பீட 2007 பிரிவு மாணவர்களான சுஜீவன் - கலிஸ்ரஸ், இருவரின் நினைவாக எமது மாணவர்கள் யுத்தத்தால் பெற்றோரை, அனைத்து சொந்தங்களை இழந்த சிறார்களுக்கு ஒரு சிறிய உதவிக்கரம் வழங்க ஏற்பாடு செய்திருந்தார்கள். அதன் நிமித்தம் சென்ற சனிக்கிழமை ( 06 - 08 - 2011 ) வவுனியவிலுள்ள புனித டொண் பொஸ்கோ சிறுவர் பராமரிப்பு இல்லத்திற்கு சென்ற மாணவர்கள் எமது நண்பர்களின் நினைவாக அவர்களின் ஆன்ம அமைதி வேண்டி அருட்தந்தை ஜோன்சன் அடிகளாரின் தலைமையில் ஒரு சிறிய இறைவேண்டுதலுடன் நிகழ்வை ஆரம்பித்தனர். அதை தொடர்ந்து அருட்சகோதரிகளின் உதவியுடன் சிறார்களுக்கு கல்வி உபகரணங்கள்,விளையாட்டுப் பொருட்கள் மற்றும் உடைகள் போன்ற அடிப்படை அன்பளிப்புகளை வழங்கினார்கள். இந்நிகழ்வுக்கு பூரண ஒத்துழைப்பு வழங்கிய அனைத்து E-07 மற்றும் ஏனைய பிரிவு மாணவ நெஞ்சங்களுக்கும் எமது நன்றிகள்.

நீங்காத நெஞ்சங்கள்...

2011-07-25T22:54:00.000-07:00

கணணியில் மால்வேர் வைரஸ்களை தடுப்பதற்கு: System Sweeper

2011-07-12T00:44:00.000-07:00

இன்றைய தகவல் தொழில் நுட்பம் பல்வேறு பிரிவுகளில் வளர்ந்து நம் அன்றாட வாழ்க்கைக்கு உதவி செய்து வருகிறது.இதன் வளர்ச்சியின் பரிமாணங்கள் ஒன்றுக் கொன்று தொடர்புடையதாய் பின்னப்பட்டு இருப்பதால் இந்த வலையமைப்பிற்குள் மால்வேர் வைரஸ் எனப்படும் நமக்குக் கெடுதல் விளைவிக்கும் வைரஸ்கள் மிக எளிதாக வழி கண்டு நம் பயன்பாட்டினை முடக்குகின்றன. எனவே நமது கணணியைப் பாதுகாப்பாக இந்த வைரஸ்களிடமிருந்து வைத்துக் கொள்ள ஆண்டிவைரஸ் மென்பொருள்கள் தேவைப்படுகின்றன. மேலும் படிக்க...

கவர்ந்திழுக்கும் வெளிநாட்டு பல்கலைக் கழகங்கள்

2011-07-07T00:11:00.000-07:00

ஒரு மேற்கத்திய நாட்டின் நூலகத்தில், புத்தகங்களிலும், லேப்டாப்களிலும் தங்களின் கவனத்தை பதித்து அமர்ந்திருக்கும் பல்வேறு நாட்டின் முகங்களை பார்க்கையில் உலகமயமாக்கலின் விளைவுகளை புரிந்து கொள்ளலாம்.
யுனெஸ்கோ மதிப்பீட்டின் படி, உயர்கல்விக்காக தங்கள் நாட்டை விட்டு வெளிநாடுகளில் சென்று படிப்பவர்களின் எண்ணிக்கை கடந்த காலங்களை விட எதிர் காலத்தில் பன் மடங்கு உயரும் என்று உத்தேசிக்கப்பட்டுள்ளது. இதுபோன்று பல்வேறு நாட்டு பல்கலைக்கழகங்களில் மாணவர்கள் சென்று பயில்வதன் மூலமாக, உலகளாவிய அறிவு சுழற்சி ஏற்பட்டு பல நாடுகளுக்கும் நன்மை ஏற்படுகிறது. மேலும் படிக்க....

உலகின் மிகப் பெரும் பெண்கள் பல்கலைக் கழகம்!

2011-07-05T22:25:00.000-07:00

உலகில் ஒவ்வொரு நாடுகளும் தங்கள் நாட்டின் கல்வி வளர்ச்சியில் மிகவும் முனைப்புடன் திகழ்ந்து வருகிறது. காரணம் சிறந்தக் கல்விதான் ஒரு சிறந்த சமுதாயத்தை உருவாக்க முடியும் என்பதை நாம் அனைவரும் நன்றாக அறிவோம். அந்த வகையில் உலகமே திரும்பிப் பார்க்கும் ஒரு பிரமிப்பை கல்வி சார்ந்தத் துறையில் ஏற்படுத்தி இருக்கிறது சவூதி அரேபியா ரியாத் தலை நகரில் என்றால் நம்புவீர்களா !? மேலும் படிக்க...

இலங்கையில் தனியார் பல்கலைக் கழகங்கள் அவசியமா?

2011-06-28T04:10:00.000-07:00

"எண் என்ப ஏனை எழுத்தென்ப இவ்விரண்டும் கண் என்ப வாழும் உயிர்க்கு"

கல்வி ஒவ்வொரு மனிதனுக்கும் இன்றி அமையாத ஒன்று. இலங்கையை பொறுத்த வரையில், இது கல்வி தரத்தில் உயர் நிலை வகிக்கும் நாடு. விருத்தி அடைந்த நாடுகளுக்கு நிகராக இலங்கையின் கல்வி அறிவு வீதம் காணப்பட நாட்டின் இலவச கல்வியே பிரதான காரணம். இலவச கல்வியானது நாட்டின் தேசிய தலைவர்களின் முனைப்பான தொடர் போராட்டங்களின் விளைவாக நடைமுறைக்கு வந்தது. இங்கு, c.w.w.கன்னங்கரா விதந்து குறிப்பிட வேண்டியவர். இதன் விளைவாக 1947 களின் பின் நாம் பாலர் வகுப்பு முதல் பல்கலைக் கழகம் வரை இலவசக் கல்வியை பெற முடிந்தமை நாட்டின் ஒவ்வொரு பிரஜைக்கும் கிடைத்த வரப்பிரசாதம் என்றே கூற வேண்டும். இக் கல்வி முறை உலகளாவிய ரீதியில் தனித்துவம் மிக்கது. இலங்கை உயர் கல்வி அறிவு வீதம் கொண்ட நாடாக இருந்த போதிலும் அதன் கல்வி தரம் சர்வதேச நாடுகளுக்கு நிகராக இல்லை எனவும், நடைமுறைக்கு பொருத்தம் குறைந்த கல்வி எனவும் சில கருத்து நிலைகள் உலா வருகின்றன. இலங்கையை பொறுத்த வரை பெருமளவில் தரமான கல்வி அரசினால் மட்டுமே வழங்கப் பட்டு வருகிறது. இருப்பினும் தற்போது தனியார் பல்கலைக் கழகங்களை ஆரம்பிப்பதில் அரசு பெரும் முனைப்பு காட்டி வருகிறது. இதற்கு ஆதரவாகவும் எதிராகவும் பல கருத்து நிலைகள் பல தரப்பினரிடையேயும் நிலவுகின்றது. எனவே தனியார் பல்கலைக்கழகங்களின் வருகை இலங்கையின் கல்வி புலத்தில் எவ்வாறான மாறுதலை உண்டு பண்ணும் என்பதனை ஆராய்வதே இக் கட்டுரையின் நோக்கம். மேலும் படிக்க...

நெருடல்கள்..!

2011-06-24T22:46:00.000-07:00

சிட்டுக்குருவியின்

வண்ண இறக்கைகளை...

திருப்பி தந்தான்

இறைவன்

சீண்டிப் பார்த்தேன்...

தடவிப் பார்த்தேன்...

அத்தனையும் - என்

தோழர்கள்....

தோழிகளின்....

நெருடல்கள்..!

பல்கலை நட்பு..!

2011-06-24T01:25:00.000-07:00

பல்கலைக்கழகம்.....புதியதொரு உலகம்

புதிய அறிமுகங்கள்.....அதில் சில தெரிந்த முகம்

புதிய நட்புகள் பிறந்தது சில குறும்புகளுடன்

முதலாம் வருட நட்பு.... மறக்கமுடியுமா..?

இடைவேளையில் சிற்றுண்டிகள் பலவிதம்

நண்பர்களுடன் பகிரும் ஆனந்தம் இனி வருமா...?

பரீட்சை அண்மையில் ஒன்றாக படித்த காலம்

புரியாத புதிர்களுடன் தெளிந்த காலம்....!

இது போல் ஒரு காலம் வருமா....!

அது ஒரு அழகிய இனிய காலம்....!

முதலாம் வருட விடுமுறை.... !

புதிய முகங்களுடன் குதூகலம்....சுற்றுலா..!

ஆஹா ஆஹா..... இனி வருமா...???

இரண்டாம் வருட ஆரம்பம்.....!

பழைய நினைவுகளுடன் கூடி வந்து

மூன்றாம் வருடமும் தொடர்கிறது....

இடைநேரம்.... அரையாண்டு பயிற்சி

சிறியதொரு பிரிவு நிரந்தரமில்லாப் பிரிவு

சிற்சில காயங்கள்..... ஆனால்

அது பிரியாது தொடரும் நட்பு..!

தொடர்கிறது எம் பயணம்...!

2011-06-24T00:49:00.000-07:00

கண்கள் முழுதும்

கனவுகளுடன்..

எதிர்காலம் நோக்கி...

எம் கால்களும்

நினைவுகளுமாய்....

இனிய நட்பின்

நெருடல்களுடன்...

தொடர்கிறது எம் பயணம்...!

இங்கிருந்து சில புள்ளிகள்.....!

2011-06-21T02:48:00.000-07:00

சொர்க்கங்களின் சில வாசல்களும்

நரகங்களின் பல வடிவாய்களும்

இங்கே தான்

படிப்பில் ஆன்மாவின் தொலைவும்

படிப்பில் ஆன்மாவின் தேடலும்

இங்கே தான்

மனிதனின் - மகான்களும்

மனிதனின் - போலிகளும்

இங்கே தான்

நீயும் - நானுமாக நானும் - நீயுமாக

புரிந்து கொள்வதும் இங்கே தான்

பிரிந்து கொள்வதும் இங்கே தான்

இங்கு வந்தபின் தான் - என்னில்

பல நாங்களை - அறிந்து கொண்டேன்

மொத்தத்தில் என் ஆன்மாவின்

கோலங்களுக்கு

இங்கிருந்து சில புள்ளிகள்....!

பேராதனை மாணவர் விடுதிகள்

2011-06-20T04:16:00.000-07:00

இலங்கையில் உள்ள பெரும் பாலான பல்கலைக் கழகங்களில் மாணவருக்கான விடுதிகள் உள்ளன. இவை பல்கலை கழக சட்ட

திட்டங்களுக்கு அமைவாக மாணவர் சேவைக் கிளையினால் நிர்வகிக்கப்பட்டு வருகிறது.

பல்கலைக் கழக வாழ்க்கையில் விடுதி வாழ்க்கை என்பது மறக்க முடியாதது.காலத்தால் அழியாத நினைவுகளை விட்டுச் செல்லும். அந்த வகையில் பேராதனைப் பல்கலைக்கழகமானது பெரும்பாலான மாணவர்களுக்கு தங்குமிட வசதியை வழங்கி வருகிறது. இங்குள்ள 15 மண்டபங்களிலும் 4 பிக்கு விடுதிகளிலும் சுமார் 3000 க்கு மேற்பட்ட மாணவர்கள் தங்கி தமது பட்டப் படிப்பை மேற்கொள்கின்றனர். அத்துடன் மகா இலுப்பலமாவில் உள்ள விவசாய பீட வளாகத்தில் உள்ள விடுதியானது 1ம் வருட மாணவர்களுக்கு தங்குமிட வசதியை வழங்குகிறது. இது பேராதனையில் இருந்து சுமார் 130km தூரத்தில் அமைந்துள்ளது. விடுதிகளின் ஒழுக்கங்களை பேணுவதில் விடுதி காப்பாளர்களின் பங்கு அளப்பரியது. இவர்கள் கல்வி சார், சாரா உழியர்களாக இருப்பார்கள்.

விடுதிகள் கல்வி கற்கும் வசதியுடைய படுக்கை அறைகளைக் கொண்டது.ஒவ்வொரு அறைகளிலும் சராசரியாக 3 மாணவர்கள் மாணவர்கள் தங்கி இருப்பார்கள். பேராதனைப் பல்கலைக்கழக விடுதிகளை பொறுத்த வரை தவணைக் கட்டணமாக 750 ரூபா அறவிடப்படுகிறது. அத்துடன் இங்குள்ள சிற்றுண்டிச் சாலைகளில் குறைந்த விலைகளில் சாப்பாடுகள் வழங்கப் பட்டு வருகிறது.

பேராதனைப் பல்கலைக்கழகத்தில் உள்ள விடுதிகள் வருமாறு:

ஆண்களுக்கானது:-

ஜேம்ஸ் பீரிஸ் மண்டபம்

அருணாச்சலம் மண்டபம்

அக்பர்- நெல் மண்டபம்

மார்கஸ் மண்டபம்

சரசவி உயன மண்டபம்
ஜெயதிலகே மண்டபம்

ஹிந்தகல மண்டபம்

புதிய அக்பர் மண்டபம்

சார் ஐவரர் ஜென்னிங்க்ஸ் மண்டபம்

பெண்களுக்கானது:-

ஹில்டா ஒபெயேசெகரா மண்டபம்

விஜேவர்தன மண்டபம்

ராமநாதன் மண்டபம்

சங்கமித்த மண்டபம்

பிக்குகளுக்கானது:-

சங்கரமைய
கேஹெல்பன்னால மண்டபம்

பேராதனைப் பல்கலைக் கழகம்

2011-06-18T10:42:00.000-07:00

இலங்கையின் கடைசி இராஜதானியின் தலைநகராக விளங்கிய கண்டி நகருக்கு அண்மையில் பேராதனைப் பல்கலைக் கழகம் அமைந்துள்ளது. இலங்கையின் முதல் பல்கலைக் கழகத்தின் இன்றைய வாரிசாக விளங்குவதும் இதுவே. பல்கலைக்கழகத்திற்கான நிதியுதவி பல்கலைக்கழக மானியங்கள் ஆணைக்குழு (UGC) இடமிருந்து பெறப்படுகின்றது.

இலங்கையின் தலைநகரான கொழும்பில் இருந்து 110 கிலோமீட்டர்தூரத்திலும், கண்டி நகருக்குச் சுமார் 8 கிமீ. தொலைவிலும் உள்ள பேராதனை என்னும் இடத்தில் ஹந்தானை மலைச் சாரலில் இப் பல்கலைக்கழகம் அமைந்துள்ளது. பேராதனை இயற்கை அழகு வாய்ந்த ஒரு பகுதியாகும். இலங்கையின்சுற்றுலா முக்கியத்துவம் உடையதாக விளங்கும் பேராதனை தாவரவியற் பூங்காவும் இங்குதான் அமைந்துள்ளது. இப் பல்கலை கழகத்துக்கான பிரதான நுழைவாயில் கலாஹா வீதி ஆகும். மகாவலி ஆற்றின் ஒரு பக்கம் பொறியியற் பீடமும் மறு பக்கம் ஏனைய பீடங்களும் அமைந்துள்ளன. அனைத்து பீடங்களையும் இணைக்கும் நோக்கில் ஒற்றைத் தூணின் உதவியுடன் பாலமொன்று பேராசிரியர் துரைராஜா அவர்களால் நிர்மாணிக்கப்பட்டது. இதுவே தற்காலத்தில் "அக்பர் பாலம்" என்று அழைக்கப்படுகிறது.

இலங்கையின் முதலாவது பல்கலைக் கழகம், இலங்கைப் பல்கலைக்கழகம்(University of Ceylon) என்ற பெயரில் 1942 ஆம் ஆண்டு ஜூலை மாதம் முதலாம் திகதி கொழும்பில் ஆரம்பித்து வைக்கப்பட்டது. பத்து ஆண்டுகளுக்குப் பின்னர் 1952 ஆகஸ்ட் 6 ஆம் நாள் பேராதனைக்கு இடம் மாறியது. அன்றிலிருந்து 1972 இல் இலங்கையிலிருந்த அனைத்துப் பல்கலைக் கழகங்களையும் இலங்கைப் பல்கலைக் கழகம் (University of Sri Lanka) என்ற ஒரே அமைப்பின் கீழ்க் கொண்டுவரும்வரை, இலங்கைப் பல்கலைக் கழகம், பேராதனை (University of Ceylon, Peradeniya) என அழைக்கப்பட்டது. 1972 இல், இலங்கைப் பல்கலைக் கழகம், பேராதனை வளாகம் (University of Sri Lanka - Peradeniya Campus) எனப் பெயர் மாற்றப்பட்டது. 1978 ஆம் ஆண்டு பல பகுதிகளிலும் அமைந்திருந்த இலங்கைப் பல்கலைக் கழகத்தின் வளாகங்கள் தனித்தனியான பல்கலைக் கழகங்கள் ஆனபோது, இது பேராதனைப் பல்கலைக் கழகம் ஆகியது.

"Knowledge is the eye unto all” என்பது மகுட வாசகமாகும். இங்கே விவசாய பீடம், கலைப் பீடம், பல்மருத்துவப் பீடம், பொறியியல் பீடம், மருத்துவப் பீடம், விஞ்ஞான பீடம், இணைந்த சுகாதார விஞ்ஞான பீடம் என்பவற்றுடன் கால்நடை முருத்துவமும், கால்நடை அறிவியலும் இணைந்த ஒரு பீடமும் உள்ளன. ஏறத்தாழ 6600 மாணவர்கள் பட்டப் படிப்பை முடித்துக்கொண்டு வருடாந்தம் வெளியேறுகின்றனர்.

பேராதனையில் அருள்பாலிக்கும் குறிஞ்சிக்குமரன் ஆலயம்

2011-06-18T09:56:00.000-07:00

பேராதனை பல்கலைக்கழக குறிஞ்சிக் குமரன் ஆலயம் பேராதனையில் குறிஞ்சி நிலத்தில் குன்றின் மேல் இந்த கோயில் அமைந்துள்ளது. சரஸ்வதியின் உறைவிடமாக வர்ணிக்கப்படும். பேராதனை பல்கலைக்கழகமே இங்கு இலங்கை பல்கலைக்கழகங்களில் அதிக பீடங்கள் அமைந்த பல்கலைக்கழகமாகும். இங்குள்ள இந்து சமூகம் – விரிவுரை யாளர்கள், கல்விசார், கல்விசாரா ஊழியர்கள், மாணவர்கள், வணங்கும் ஒரு கோயிலாகவும் கண்டி வர்த்தக சமூகம் – பேராதனை, உட பேராதனை மக்கள் வணங்கும் ஆலயமாகவும் இந்த ஆலயம் விளங்குகிறது.

1977, 1983 இனக் கலவரங்களில் அதிகம் பாதிக்கப்பட்ட இந்த கோயில் மீண்டும், மீண்டும் முருகன் அருளால் சிறப்புப் பெற்றுக் காணப்படுகிறது.அரசாங்க பாடப் புத்தகத்திலும் ஒரு அம்சமாக இக் கோயில் இடம் பிடித் துள்ளது. இந்த பல்கலைக்கழகத்திற்கு வருகை தரும் அனைத்து இந்து மாணவர்களும் இந்த கோயிலில் தொண்டு புரிவதாலேயே இக் கோயில் சிறப்புப் பெற்று வருகிறது.

பேராதனை பல்கலைக்கழகம் 1942 ம் ஆண்டு ஆரம்பிக்கப்பட்டது. முதலா வது உபவேந்தர் சேர் ஐவர் ஜெனிங்ஸ் காலத்திலேயே சகல மதங்களுக்கும் வழிப்பாட்டு தலம் வேண்டும் என்ற கோரிக்கை முன்வைக்கப்பட்டது. இதன் பின் 1951 ம் ஆண்டு பேராசிரியர் த. நடராசா இந்து ஆலயம் அமைக்கப்பட வேண்டும் என்ற ஆவலில் தனது தாயார் திருமதி சிவானந்தம் தம்பையாவின் ஞாபகார்த்தமாக உபவேந்தர் சேர் ஐவர் ஜெனிங்ஸ்சிடம் ரூபா 25 ஆயிரம் ரூபாவை வழங்கினார். பேராசிரியர் த. நடராசாவுடன், சேர். கந்தையா வைத் தியநாதன் இணைந்து இந்து மாணவர் சங்க ஆதரவுடன் கோயில் அமைக்கும் முயற்சியில் ஈடுபட்டனர். சேர் கந்தையா வைத்தியநாதன் கொழும்பின் பிரபல வர்த்தக நிறுவனமான செட்டிநாட் கோர்பரேஷனில் 15 ஆயிரம் ரூபாவை நன்கொடையாக பெற்றுள்ளார்.

1961 ஆம் ஆண்டு விஞ்ஞான மருத் துவ பீடங்களும், 1964 இல் பொறியியற் பீடமும் இங்கு ஆரம்பிக்கப்பட்ட பின் இந்து மாணவர்களின் தொகை அதிகரி த்தது. தற்காலிக பஜனை அறையில் வழிபாட்டுகளை செய்து வந்தவர்கள் மாணவர் தொகை அதிகரிப்பால் பஜனை அறையிலும் இட நெருக்கடி ஏற்படவே, கண்டி நகருக்கு வழிபாடுகளுக்காக செல்லத் தொடங்கினர். 1966 களில் கோயில் ஒன்றின் அவசியம் பெரிதும் உணரப்பட்டது. இக் காலத்தில் பெளத்த, இந்து, முஸ்லிம், கத்தோலிக்க, கிறிஸ்தவ மதத்தலங்கள் அமைப்பதற்கு இடம் ஒதுக்கும் நடவடிக்கையும் நடைபெற் றுள்ளது. அப்போது முருகன் அருளால் தற்போது கோயில் அமைந்துள்ள குன்றே திருவுலச் சீட்டு மூலம் கிடைத்துள்ளது. இந்து மாணவர் சங்க தலைவராக முன்னர் கடமையாற்றிய பேராசிரியர் பேரம் பலம் கனகசபாபதி மற்றும் இந்து மாணவர் சங்க தலைவரான பொறியியற் பீட மாணவன் து. அப்புலிங்கம் ஆகியோரது அயராத முயற்சியால் 1966 இல் அடிக்கல் நாட்டப்பட்டது. 1974ம் ஆண்டு வரை இந்து மாணவர் சங்கத் தலைவராகத் திகழ்ந்த பேராசிரியர் பே. கனகசபாபதி இந்த கோயில் முன்னேற்றத்திற்கு பெரிதும் பாடுபட்டவர்.

பேராசிரியர் த. சிவப்பிரகாசபிள்ளை, பேராசிரியர் கைலாசநாதக்குருக்கள், கலாநிதி கோ. சுந்தரமூர்த்தி, பல்கலைக் கழக நூலகர் சி. முத்துவேள் ஆகியோரது ஆரம்பகால சேவை சொல்லிலடங்காதவை. பின்னர் இக் கோயில் சிவன் கோயிலா? முருகன் கோயிலா? என்ற வாதம் எழுந்தபோது குன்றிலே முருகனை குடிவைப்பது என தீர்மானிக்கப்பட்டது. பிரதிஷ்டா திருவுருவங்கள் மாவிட்டபுரத் திலிருந்து திருவுலாவாக வழியெங்கும் பூஜையுடன் பேராதனைக்கு எடுத்து வரப்பட்டது.

1968 ம் ஆண்டு ஜுன் ஆறாம் திகதி முன்னேஸ்வர பிரம்மஸ்ரீ சு. பாலசுப்ர மணியக் குருக்கள் தலைமையில் மகா கும்பாபிஷேகம் குடமுழுக்கு செய்யப் பட்டுள்ளது. இதன் பின் வெள்ளைக் காரப் பாதிரியான ரமேஷ் சுவாமிகள் ஸ்தம்ப மண்டபம் அமைக்க பத்தாயிரம் ரூபாவை வழங்கியதோடு தான் தங்கியி ருக்க 20,000 செலவில் தங்கு மடம் ஒன்றையும் நிறுவியுள்ளார். இதன் பின் பேராசிரியர் நந்தி மற்றும் குழுவினர் தயாரித்த “குரங்குகள்” நாடகமும் பேராசிரியர் அ. துரைராஜா தலைமை யிலும், பேராசிரியர் சி. தில்லைநாதன் கதை, கதை வசனம் அமைத்து தயாரி த்த “கானல் நீர்”, “தகுதி” ஆகிய நாட கங்களும் ஈ.ஒ.ஈ. பெரேரா அரங்கிலும், கண்டியிலும் அரங்கேற்றப்பட்டு நிதி சேகரிக்கப்பட்டுள்ளது. கண்டி இந்து மாமன்றத்தினராலும் மண்டபம் அமைக்கப்பட்டது. 1977 இல் சிவகாமி அம்மை சமேத நடராஜப் பெருமானுக்கு குடமுழுக்கு செய்யப்பட்டுள்ளது. 1977 ஆடி இனக் கலவரத்தில் ஆலய கதவு உடைக்கப்பட்டு சேதப்படுத்தப்பட்டு, களவாடப்பட்டது. இதே ஆண்டு முருகன் அருளால் நவம்பர் 14 இல் புனராவர்த்தன மகா கும்பாபிஷேகம் நடைபெற்றது. இந்த பாதிப்புக்கு அரச நஷ்ட ஈடாக 1,23,525 ரூபா வழங்கப்பட்டுள்ளது. மீண்டும் 1979 இல் பாலஸ்தானம் செய் யப்பட்டு மாணவர்களினால் யாழ்ப்பாண த்திலும், கண்டியிலும் கலை நிகழ்ச்சி கள் நடத்தப்பட்டு பொது மக்களிடம் நிதி பெற்று புது பொலிவுடன் மீண்டும் ஆலயம் புனரமைக்கப்பட்டது. 1980 ம் ஆண்டு ஜுன் இரண்டாம் திகதி குறிஞ்சிக்குமரன் ஆலயம் முன்றாவது மகா கும்பாபிஷேகம் கண்டது. மீண்டும் 1983 இனக் கலவரத்தில் ஆலயம் பாரிய சேதத்துக்குள்ளானது. குருக்கள் வதிவிடம், நூலகம் மாணவர் சங்க மற்றும் பொக்கிஷங்கள் அனைத்தும் எரித்து சூறையாடப்பட்டன. கலவரத்தின் பின் பேராசிரியர் சி. பாலசுப்பிரமணி யத்தின் முயற்சியால் விக்கிரகங்கள் கண்டி கட்டுக்கலை ஸ்ரீ செல்வவிநாயகர் ஆலயத்தில் பாதுகாப்பாக வைக்கப்பட் டன. இதனோடு ஆலயத்தை மீளமைப் பதற்கான ஆர்வமும் நலிவடைந்தது. எனினும் முயற்சிகள் மீண்டும் உயிர் பெற்றன.

பேராசிரியர் சி. தில்லைநாதன் தலைமையில் மாணவர்கள், பொறுப்பான்மைக் குழுவினர், இந்து கலாசார அமைச்சினதும், உயர் அதிகாரிகளினதும் ஒத்துழைப்போடு 1986 இல் ஆலயம் மீண்டும் புனரமைக்கப்பட்டது. பிரம்மஸ்ரீகா.து. சிவசுப்பிரமணியக் குருக்கள் தலைமையில் 1986ம் ஆண்டு ஜுலை மாதம் மீண்டும் கும்பாபிஷேகம் செய்யப்பட்டது.

பின்னர் 1.7.1998 இல் மீண்டும் புனரா வர்தன மகா கும்பாபிஷேகம் நடை பெற்றதோடு 12 வருடங்களின் பின்னர் மீண்டும் இவ்வாண்டு கும்பாபிஷேகம் நடைபெறுகிறது. 2003 ஆம் ஆண்டில் ஆலய தரிசனத்திற்கு மலை ஏறுவதற்கு வசதியாக படிகட்டுகளும், 2007ம் ஆண்டு ஆலய குருக்கள் தங்கும் விடுதியும் சிறப்பாக அமைக்கப்பட்டன.

2008ம் ஆண்டு மாணவர்கள், பொறுப் பான்மைக் குழுவினர், இந்து பட்டதாரி கள் சங்கம் ஆகியோரைக் கொண்ட கும்பாபிஷேக குழு அமைக்கப்பட்டது. 2010 இல் தமது கடமையை அவர்கள் சரிவர நிறைவேற்றியுள்ளனர்.

இந்த ஆலயத்தில் 1986ம் ஆண்டு தொடக்கம் கடமையாற்றும் சிவாச்சாரி யார் நித்தியானந்தன் குருக்களது சேவையும் இங்கு குறிப்பிடத்தக்கதாகும். பூஜைகள், உற்சவங்கள் கிரமமாகவும், மிகச் சிறப்பாகவும் நேர்த்தியாகவும் நடைபெற இவரது பங்களிப்பும் முக்கியமானதாகும். மாணவர்கள் கல்வி கற்றுலுடன் நின்றுவிடாது வழிபாடு, நந்தவனம் அமைத்தல், கோயில் பராமரிப்பு, சிரமதானம், வருடாந்த கோயில் சுற்றுலாக்களை சிறப்பாக மேற்கொண்டு வருகின்றனர். இந்த கும்பாபிஷேகப் பணியில் ஈடுபட்ட பொறுப்பான்மைக்குழு அங்கத்தவர்களான பேராசிரியர் வை. நந்தகுமார் (தலைவர்), இராசையா மகேஸ்வரன் (செயலாளர்), உறுப்பினர்களான வ. தர்மதாசன் பேராசிரியர் சி. சிவயோகநாதன், கலாநிதி த. சிவானந்தவேள், கணக்காளர் ஏ. அரியரட்னம், கலாநிதி எஸ். சிவகுமார், இந்து பட்டாரிகள் சங்க தலைவர் கலாநிதி வ. மகேஸ்வரன், அகில இலங்கை இந்து மாமன்ற செயலாளர் கந்தையா திருநீலகண்டன், மத்திய மாகாண இந்து மாமன்ற தலைவர் துரைசாமிபிள்ளை சிவசுப்பிரமணியம் ஆகியோரது சேவை குறிப்பிடத்தக்கது

மனதை விட்டகலாத மாமேதை பேராசிரியர் துரைராஜா

2011-06-18T04:54:00.000-07:00

பேராசிரியர் அழகையா துரைராசா அவர்கள் 1934ம் ஆண்டு கார்த்திகை மாதம் 10ம் திகதி யாழ்ப்பாணம் வடமராட்சி உடுப்பிட்டிப் பகுதியில் பிறந்தார். இவர் தனது ஆரம்பக் கல்வியை உடுப்பிட்டி அமெரிக்கன் மிசன் பாடசாலையிலும் இடை நிலைக் கல்வியை பருத்தித்துறை ஹாட்லிக் கல்லூரியிலும் பயின்றார்.

இலங்கைப் பல்கலைக்கழகத்தில் குடிசார் பொறியியற் கற்கை நெறியை நிறைவு செய்தார். அன்றைய காலத்தில் கொழும்பில் இயங்கிய இலங்கைப் பல்கலைக்கழகத்திலேயே பொறியியற்பீடம் இயங்கியது.

தன்னுடைய பட்ட மேற்படிப்பை கேம்பிறிஜ் பல்கலைக் கழகத்தில் 1962ம் ஆண்டு கலாநிதிப் பட்டத்துடன் நிறைவு செய்தார். ‘துரை விதி’ என்னும் மணல் துறை சார்ந்த விதி ஒன்றையும் நிறுவினார். இன்றும் கூட குடிசார் பொறியியலில் கற்பிக்கப்படும் Cam- clay locus ஆனது துரை விதியிலிருந்தே பெறப்பட்டது.

தொடர்ந்து இலங்கைப் பல்கலைக் கழகத்தில் விரிவுரையாளராக நியமிக்கப்பட்டார். பின்னர் பேராதனைப் பல்கலைக்கழகத்தில் பொறியியற்பீடம் ஆரம்பிக்கப்பட்டதும் அங்கும் விரிவுரையாளராகக் கடமையாற்றினார். தொடர்ந்து பேராதனைப் பல்கலைக்கழக பொறியியற்பீட பீடாதிபதியாகவும் கடமையாற்றினார்.

பின்னர் 1988ம் ஆண்டு புரட்டாதி மாதத்திலிருந்து 1994ம் ஆண்டு சித்திரை மாதம் வரை யாழ்ப்பாணப் பல்கலைக்கழக துணை வேந்தராக கடமையாற்றினார். யாழ்ப்பாணப் பல்கலைக்கழகத்தில் பொறியியற்பீடம் ஒன்று நிறுவப்படும் என்ற பல்கலைக்கழக மானியங்கள் ஆணைக்குழுவின் உறுதி மொழியையடுத்தே பேராசிரியர் யாழ் பல்கலைக்கழகத் துணைவேந்தரானார். ஆனால் இன்று வரை யாழ்ப்பாணப் பல்கலைக் கழகத்தில் பொறியியற்பீடம் ஆரம்பிக்கப்படவேயில்லை.

பேராதனைப் பல்கலைக்கழகத்தில் காணப்படும் ‘அக்பர் பாலம்’ பேராசிரியரினால் நிர்மாணிக்கப்பட்டது. சிங்களப் பேராசிரியர் ஒருவரின் சவாலை ஏற்று மகாவலி ஆற்றில் ஒரேயொரு தூணை மட்டும் நிறுவி இப்பாலம் கட்டப்பட்டது. ‘துரைராசா பாலம்’ என அழைக்கப்பட வேண்டிய அந்தப் பாலம் இன்று ‘அக்பர் பாலம்’ என்றே அழைக்கப்படுகிறது. தமிழர்களாகிய எங்கள் பலருக்கே இந்த விடயம் தெரியாது.

நாங்களாவது அந்தப் பாலத்தின் பெயரை ‘துரைராசா பாலம்’ என அழைப்பதன் மூலம் பேராசிரியரின் திறமைகளை மறைக்காமல் நினைவு கூறப்பட வேண்டியவரை நினைவு கூர்ந்து உண்மைகளை அடுத்த சந்ததியினருக்கு கடத்துவோம்.

யாழ்ப்பாணப் பல்கலைக் கழகத்தில் கடமையாற்றிய போது உடுப்பிட்டியிலிருந்து ஏறக்குறைய முப்பது கிலோ மீற்றர்கள் தூரமுள்ள யாழ்ப்பாணப் பல்கலைக்கழகத்திற்கு துவிச்சக்கர வண்டியிலேயே சென்று வந்தார்.

போர் மேகங்கள் வடமராட்சிப் பகுதியை அதிகமாகச் சூழ்ந்திருந்த அந்தக் காலப்பகுதியிலும் வல்லை வெளியினூடாகப் பயணம் செய்து தன்னுடைய பணியைத் தவறாது செய்தார். மிகவும் எளிமையான வாழ்க்கை வாழ்ந்தார். எல்லோரிடமும் மிகவும் அன்பாகவும் பண்பாகவும் பழகும் ஒழுக்க சீலர். அதனால் எல்லோருக்குமே பேராசிரியர் துரைராசாவை மிகவும் பிடிக்கும்.

தமிழரின் போராட்டத்துக்காக அளப்பரிய சேவைகள் செய்த மாமனிதர் பேராசிரியர் அழகையா துரைராசா அவர்கள் நோயின் கொடிய பிடியில் சிக்கி 1994ம் ஆண்டு ஆனிமாதம் 11ம் திகதி இறைவனடி சேர்ந்தார்.

இவர் நினைவாக "பேராசிரியர் துரைராசா கிண்ணம்" போட்டி வருடா வருடம் நடைபெற்று வருகிறது. இதில் கொழும்பு, மொரட்டுவ,பேராதனை பல்கலைக் கழகங்கள் பங்கு பற்றுகின்றன. பெருமைப் பட வேண்டிய விடயம் என்னவெனில் கடந்த 5 வருடங்களாக பேராதனை பல்கலை கழகமே வெற்றிக் கிண்ணத்தை சுவீகரித்து வருகிறது.

இங்கு குறிப்பிட வேண்டிய முக்கியமான விடயம் யாதெனில் இந்தப் போட்டித் தொடரை எல்லோரும்

துரையப்பா கிண்ணம்’ என்றே அழைக்கிறார்கள். அது முற்றிலும் தவறு. ‘பேராசிரியர் துரைராசா கிண்ணம்’ என்றே அழைக்கப்பட வேண்டும். (துரையப்பா என்பவர் யாழ் நகர மேயராக இருந்தவர் – யாழ் துரையப்பா விளையாட்டு மைதானம் இவரின் நினைவாகப் பெயரிடப்பட்டுள்ளது.) தமிழர்களாகிய நாம் உண்மையை மறைக்காமல், பெயர்களை மருவ விடாது, சரியான வகையில் நினைவு கூருவதன் மூலமே இந்நாட்டில் தமிழ் நிலைக்கவும் தமிழர்கள் நினைவு கூறப்படவும் வழி வகைகள் செய்யலாம். இனி மேலாவது சரியான சொற்களைப் பழக்கத்திற்கு எடுத்துக் கொள்வோமா?

தமிழியல் ஆய்வுத் துறையை செழுமைப்படுத்திய பேரறிஞர் சிவத்தம்பி

2011-06-17T20:24:00.000-07:00

இலக்கிய விமர்சனம் இவை பற்றிய வரலாறுகள் எழுதப் படும் போது பேராசிரியரின் பங்களிப்புக்கு அவற்றில் கணிசமான இடமுண்டு. தமிழியல், தமிழ் இலக்கணம், இலக்கியம், விமர்சனம் என்று வரம்புக்குட்பட்ட துறைகளை, அவ்வரம்புக்குள் நின்று மட்டும் நோக்காது வரலாறு அரசியல், பொருளியல், சமூகவியல், மானிடவியல் எனினும் பல்வேறு புலமை சார் துறைகளின் பின் புலத்தில் நின்று, தமிழிலக்கிய வளர்ச்சியை நோக்கிய தமிழியல் ஆய்வுக்கு ஒரு பன்னெறி ஆய்வு கலாசார அணுகுமுறையைப் பயன்படுத்தி, அவ்வாய்வுத் துறையைச் செழுமைப்படுத்தியவர் பேராசிரியர் கா. சிவத்தம்பி அவர்கள்.

பேராசிரியர் கா. சிவத்தம்பி அவர்கள், பண்டிதரும், சைவப் புலவருமான ஆசிரியர் பொ. கார்த்திகேசு, வள்ளியம்மைக்கும், 10.05.1932 மகனாகப் பிறந்தார்.

ஆரம்பக் கல்வியை கரவெட்டி விக்னேஸ்வராக் கல்லூரியிலும், இடைநிலைக் கல்வியை கொழும்பு ஸாஹிராக் கல்லூரியிலும் கற்றுத் தேர்ந்து உயர் கல்வியை பேராதனைப் பல்கலைக் கழகத்தில் பெற்ற பின் சில காலம் கொழும்பு ஸாஹிராக் கல்லூரியில் ஆசிரியராகப் பணிபுரிந்தார்.

அதன் பின்னர் பாராளுமன்ற சமகால மொழிபெயர்ப்பாளராகப் பணியாற்றிய காலத்திலே வித்தியோத யப் பல்கலைக் கழகத்தில் உதவி விரிவுரையாளராக 1965ம் ஆண்டு தனது சேவையை இலங்கைப் பல்கலைக் கழகத்தில் ஆரம்பித்து பின்னர் படிப்படியாக பதவி உயர்வு பெற்று மூத்த பேராசிரியராக (Senior Prof.)1994ம் ஆண்டு தொடக்கம் 1998ம் ஆண்டு வரை கடமை புரிந்து பல் துறைகளிலும் ஆய்வுகள் செய்துள்ளார்.

பெர்மிங்காம் (Birmingham) பல்கலைக்கழகத்தில் (Phd) பேராசிரியர் தொம்சனின் கீழ் “Drama in Ancient Tamil Society”என்ற தலைப்பில் ஆய்வு செய்து பட்டம் பெற்றார்.

பேராசிரியர் கா. சிவத்தம்பி அவர்கள் தஞ்சை பல்கலைக் கழகம், ஸ்கண்டினேவியா பல்கலைக் கழகம், உப்சலா பல்கலைக் கழகம், அமெரிக்காவிலுள்ள கலிபோர்னியா, பெர்கினி, விஸ்கான்ஸியன், ஹாவார்ட் பல்கலைக் கழகங்களில் வருகை தரு பேராசியராக பணியாற்றியுள்ளார்.

கொழும்பு, ஸாகிரா கல்லூரியில் இருக்கும் போதே சிவத்தம்பி அவர்கள் இலங்கை வானொலியின் நாடகங்களில் நடித்துள்ளார். இதில் ‘விதானையார் வீடு’ என்ற தொடர் நாடகத்தில் நகைச்சுவை மிகுந்த பாத்திரங்களில் நடித்து நேயர்கள் மத்தியில் பெயர் பெற்றிருந்தார்.

பேராதனைப் பல்கலைக் கழகத்தில் பேராசிரியர் கணபதிப்பிள்ளை அவர்கள் எழுதிய ஏராளமான நாடகங்களில் முக்கிய பாத்திரமேற்று நடித்திருந்தார். இந்நாடகங்களில் முக்கியமானது உடையார் மிடுக்கு’ என்ற வானொலி நாடகமாகும். பல்கலைக் கழகங்களில் நாடகமும் அரங்கியலும் என்ற பட்டப் படிப்பு பாடநெறியினை அறிமுகம் செய்து நாடக ஆய்வு பாரம்பரியம் ஒன்றினை உருவாக்கினார்.

இவர் இது வரை வெளியிட்ட நூல்கள் பல. இவற்றை எல்லாம் இங்கு பட்டியலிட இடம் காணாது. இருந்தும் சுருங்க கூறினால் இலங்கையிலும், இந்தியாவிலும் சுமார் 60க்கு மேற்பட்ட நூல் தமிழ் மொழியிலும், ஆங்கில மொழியிலும் வெளிவந்துள்ளன.

ஈழத் தமிழ் இலக்கியத்தின் திரும்புமுனையாக அமைந்த முற்போக்கு எழுத்தாளர் சங்கம், மரபுப் போராட்டம் ஆகியவற்றில் பேராசிரியர் கைலாசபதியுடன் இணைந்து இவர் ஆற்றிய பணி மகத்தானது. மார்க்சிய ஒளியில் தமது விமர்சனப் பார்வையைச் செலுத்தும் பேராசிரியர் தமிழ் விமர்சனத் துறையிலும் பல புதிய கோணங்க ளுக்கு வெளிச்சமிட்டுக் காட்டியவர்.

தமிழ் மொழி மாநாடு உலகில் எங்கு நடந்தாலும் அங்கு பேராசிரியரின் பங்களிப்பு இருக்கும் அதற்கு உதாரணமாக 2010 தமிழ்நாடு கோவையில் நடந்த செம்மொழி மாநாட்டின் சிறப்பு சொற்பொழிவாளராக எமது பேராசிரியர் கா. சிவத்தம்பியை அழைத்தது எமக்கெல்லாம் பெருமை அளிக்கும் விடயமாகும்.

அண்மையில் கொழும்பில் (2011 ஜனவரி) சர்வதேச தமிழ் எழுத்தாளர் மாநாட்டிற்கும் தகுந்த ஆலோசனை வழங்கி வழி நடத்தியதுடன் சிறப்பு சொற்பொழி வாளராக கலந்துகொண்டு காத்திரமான ஒரு சொற்பொழிவையும் நிகழ்த்தினார்.

பொதுவாக பேராசிரியர்கள் என்றால் தமது துறை சார்ந்த ஒரு கூறினை ஆய்வு செய்து அத்துறையில் அறிஞர்களாக இருப்பார்கள். ஆனால் பேராசிரியர் சிவத்தம்பி அவர்களோ தமது பல்துறைச் சங்கம் ஆய்வு (Multi Disciplinary Apporach)காரணமாக பல்வேறு துறைகளில் இயங்கிப் புகழ்பூத்த பன்முக ஆளுமையாளராகத் திகழ்கின்றார்.

இன்று பல்கலைக் கழகங்களில் உள்ளோரும், ஏனையோரும் தமக்கு ஏற்படும் புலமைசார் சந்தேகங்களுக்குத் தீர்வுகாணப் பேராசிரியரைச் சந்தித்தோ அல்லது அவருடன் தொலைபேசி மூலம் தொடர்பு கொண்டோ ஆலோசனை பெறுகின்றனர். எவருக்கும் எவ்வேளையிலும் அறிவை வழங்கும் அட்சய பாத்திரமாக அவர் திகழ்கிறார்.

பேராசிரியர் கா. சிவத்தம்பி அவர்கள் ஆற்றிய பணிகளுக்காகப் பல விருதுகளைப் பெற்றுள்ளார். அவற்றுள் தமிழக அரசின் அதியுயர் விருதான ‘திரு. வி. க. விருது’ பெருமை மிக்கது. இவ்விருதினைப் பெற்ற ஒரே இலங்கைப் பேராசிரியர் கா. சிவத்தம்பி அவர்கள் மட்டுமே.

கடந்த வருடம் கொடகே புத்தக நிறுவனம் இவருக்கு வாழ்நாள் சாதனையார் விருது வழங்கி கெளரவம் செய்தது.

இவர் வாழும் காலத்தில் நாமும் வாழ்ந்து தமிழ் இலக்கியத்தின் மூலம் ஊடாட்டம் கொள்கிறோம் என்ற பெருமை கொள்ள வைக்கிறது.