වැට නැති කට

ඉන්ටපෝල් එකෙන් හොයන අපේ අසංගයා

noreply@blogger.com (මද්දු) — Mon, 06 Dec 2010 12:38:00 +0000

මාර වැස්සකි.පුත්තලමට ගං වතුර දමා ඇත.වෙනදා වැඩිම වර්ශාපතන රෙකෝඩ් එක තැබූ උඩරට පසු කරමින් කොලඹ ඒ තැනට පත් වී ඇත.ඇසෙන කොටත් උණකට්ට නගින වන්නියේ කට්ටිය දැන් නිදා ගන්නෙ ජර්සිත් ඇදගෙනය.මේ හදිසි වෙනසට හේතුව සෙවීමට කිසියම් පියවරක් ගත යුතුමයි මට සිහියට ආවේ ඊයේ රාත්‍රියේ මදුරුවෝ තල තල රෙද්ද පොරෝගන්න අතරතුරදීය.නිදහස් අධ්‍යාපනයෙන් ඉගෙන ගනිමින් දෙමාපිය යැපුමින් ජීවත් වෙන මා වැන්නෙකුට එවැනි අදහසක් ප්‍රාප්ථ වීම මාදකින්නෙ ආසියාවේ ආශ්චර්යය මා තුලින්ම ආරම්භ වූවා සේය.

කාලගුණේට කතා කොට වැඩක් නැත අනිවාර්යයෙන් හෙට වහි නැත්තන් නොවහි යන්න අහගන්නට උපහාර බිල කපාගෙන වැඩක් නැත.මනෝ පාරක් ගහගෙන ඔහේ ජාලයෙ කාලයාව මර මර සිටිද්දි යාහූ ගොය්යගෙ චැට් බොක්සයක් මතු කරගෙන ආවේ දැකල තියා අහලවත් නැති පොරකි.මුලින්ම ඌ සුද්දෙකි.සුද්දෙක් යනු කොටින්ම හම සුදු එකෙකි.ඉතින් අපේ කට්ටිය ආගන්තුක සත්කාර කියන බෝතලයට දාල තියන හද්දා පරණ සුද්දාව දැක්කාම දෙකට නැවීමේ වයින් එක මා තුලද වැඩ කරන්නට පටන් ගත්තේය.දත කට මැද ගෙන හෙලෝ සර් කියාගෙනම මම වැඩට බැස්සෙමි.
"තමුසෙ මාව අදුරනවද?"
සුද්දා සිංහලෙන් චැට්ය.හොල්මන්ද පොල්කොලය.මූත් කෙල්ලන්ගෙ පොටෝ එකක් හොයා ගන්න බැරිවුන වේලෙන කොල්ලෙක්වත්ද?එහෙනන් මොකද මේ රස්ති භාෂාව.මම් කෙටියෙන්ම කට් ශෝර්ට් වීමට උත්සාහ දැරීමි.
"නෑ"
"උබ මද්දුව නේද?"
යකෝ මූ මගෙ මගෙ නමත් දන්නව.දැන්නන් නිකම්ම ශේප් න්‍යාය අනුගමනය කල නොහැක.
"ඔය කවුද"
"යකෝ මං මේ අසංග බං.... අසංග.."
අසංග..කවුද යකෝ අසංග...අපේ කාලයේ නමකි.අසංගලා නන් කීයක්ද.වින්කලේ අසංගය වත් පොල් කඩන එකාවත් විය නොහැක.උන් දෙන්නට ජාලයෙ චැට් කෙරිල්ල තියා රිමොට් කොන්ට්‍රෝලය පාවිච්චි කිරීමටත් කටු දුවන ඔරලෝසුවකින් වෙලාව බැලීමටවත් නොහැක.එහෙනන් එකට දුස්සංතගෙ මැට් ක්ලාස් ගිය බඩ මහත අසංගයාවත්ද?ඌව එදායින් පසු දැක්කේම නැත.ගුරුන්ගේ කීම අසා පසුකාලීනව මැටි ආශ්‍රිත ස්වයං රැකියාවකට ඌ යොමු ඌ බව ආරංචිය.

"උබ බඩ අසංගද"
දැන් මගෙ ඇගේ මාලු ටික යථා තත්වයට පැමිනෙමින් සිටියි.

"නෑ බං.....ඇයි බං එකට උම්බලකඩ වඩෙ කකා මීගමුවෙ ඇන්ඩ්‍ර එකෙ ෆිල්ම් බලපු...විභාගෙට කලින් දා වලි දාගෙන උබත් එක්ක පිස්සු නැටුව අසංගයව මතක නෑ...යකෝ මං ලෑලි අසංග බං..."

අම්මටසිරි..මේ..ලෑල්ලා නේද...ලෑල්ලකට සම කල හැකි සරීර කූඩුවට පිංසිද්ධ වෙන්න ලැබුනු කාඩ් එක ඇරුනු කල බෝතල් අඩි කණ්නාඩි දෙකෙන් ඕනෑම අයෙක් අදුනන ලෑල්ලා "ඔන්ලයින්ය".හොද මීටරයක් වූ ලෑල්ලා කොයි වෙලෙත් අපේ බයිට් එක වෙන්නට සැදී පැහැදී උන්නෙකි.අපොස සාපෙන් පසු ගිය ආපු මං සොයාගත නොහැකි වූ අසංගයා දැන් "ඔන්ලයින්ය".ඒත් මූ මොකද සුද්දෙක්ගේ පාර්ට් ඇක්ට් කරන්නෙ.
"අඩෝ..මචන්..අසංග...එක පාරට මීටර් වුනේ නෑ බං..ඉතිං.. ඉතිං..කොහෙද ඉන්නෙ?මොකද කරන්නෙ?"
"මචං මං ගැන ආරන්චි නැද්ද..අපූ...මහ ලොකුවට ඉන්නෙ නෙට් එකේ...මං මහ කරදරේක වැටිල බං ඉන්නෙ"
"ඈ..ඒ මොකක්ද බං ඒ.."
"මචං මාව ඉන්ටපෝල් එකෙන් හොයනව බං..නැද්ද හැන්ගෙන්න තැනක්"

මට සුලුදිය පහකරන්නට අවශ්‍යතාවක් හදිසියේ පැන නැගි හෙයින් පොඩ්ඩක් ඉන්නයි අසංගයාට කියා කර්ත්ව්‍යය කරගෙන පැමිනියෙමි.

"මොකක්...උබ ඉස්සෙල්ල කොහෙද ඉන්නෙ කියහන්...?"

"මචන් මේකයි සීන් එක..ඒ කාලෙම මං මචන් වෙන්නප්පුවෙන් බෝට්ටුවෙ නැගල ඕස්ට්‍රේලියාවට ආවනෙ බං...මෙහෙ මච හොද කොම්පියුටර් බුවෙක් ලග තමා මං වැඩට සෙට් වුනේ..ඌ මචන් ලීක්ස්ද අර්තපල්ද මොකක්ද කියල සයිට් එකක් කරනව...මට තියෙන්නෙ ඌ ඉල්ලන ඉල්ලන වෙලාවට කෝපි එකක්..හොට් ඩෝග් එකක්..පත්තරෙ එහෙම ගෙනෙල්ල දෙන එක...පස්සෙ පස්සෙ මටත් හිතුන මේම ඉදල හරියන්නෙ නෑ නෙ මාත් මේ භාණ්ඩෙ පොඩ්ඩක් පුරුදු වෙන්න ඕනෙ කියල.මූ මචන් කරන්නෙ නිව්ස් දාන එක.මාත් දවසක් එහෙන් මෙහෙන් ඔට්ටු වෙලා බොසා නැති වෙලාවක් බලල
පොඩ්ඩක් ඔබල බැලුව .ඒක මාර සයිට් එකක් බං.හැමෝම බලනව,මාර පිලි ගැනීමක් තියෙන්නෙ.ඉතින් මාත් මගේ ටිකිරි මොලෙන් කල්පනා කරල බැලුව අපේ රජතුමා කියනව වගේ රටට පිටින් ඉදල වුනත් රටට වැඩක් කරන්න ඕන කියල.කෝමත් මට ඒදවස්වල ඉදල ඔය ඇමරිකාවත් එක්ක මාර වයිරයක්නෙ බං තියෙන්නෙ..ඇය් බං උන් එහෙට ගානව..මෙහෙට ගානව..එහෙම බෑ නෙ..මාත් ඉතින් බැලුවෙ නෑ..ඇරල ඇරිය..සුද්දගෙ කලිසන් ගැලවෙන්නම."

"හැබයි මචං වැඩෙ චොර උනේ බොසා ආවාම...ඌ මාව නොමරපු එක විතරයි බං...අන්තිමේදි ඌට හොදටම මල පැනල මට කියනව දැන් මේ දාපු නිවුස් ඔක්කොම ප්‍රසිද්ධ වෙලා ඉවරයිලු...ඇමරිකාව කුලප්පු වෙලා සයිට් එකෙ අයිතිකාරයව හොයනවලු එල්ලන්න...මටනං වගකීම ගන්න බෑ...උබ ඕන දෙයක් කොර ගනින්...මේකෙ අයිතිකාරය විදිහට මං උබේ නම දානව කිව්ව...ඉතින් බං..මාත් යටි හිතින් මාර හැපි එකේ හිටියෙ එක රැයින් ප්‍රසිද්ධ වෙන්න..ඒත් බමුණුකුල අසංග කියල දාන එක නිකන් කැතයි වගෙ හින්දා...හොර පාස්පෝට් එකේ තිබ්බ ජූලියන් අසංග කියලම දැම්ම..ටිකක් රෑ වෙද්දි තමයි තේරුනේ..මං නිදා ගන්න තැන වටේට සයිරන් නලා ඇහෙද්දි...පස්සෙ මං මේ එහෙන් මෙහෙන් බේරිලා එන ගමන් බං...පස්සෙ දැන ගත්තේ වැඩේ දරුනු වෙලා බං..බයේ බෑ ඕයි...
උබලගෙ අර දෙණියෙ කැලේ තාම තියනව නෙ...ඒ මචන් මට එතන සෙට් කරල දීහං කෝ..."
අමර කතාවකි.අදහන්න වටින පොරකි.මොනා වුනත් මූ රටට කරපු සේවය වෙනුවෙන් ජ්‍යෙෂ්ඨ ඇමති කමක්වත් දියයුතු පොරකි.
"ඕකෙ මචන් මං බලන්නන්..උබ කොහොමද එන්නෙ..."
"ඒව හරි මචන්...මං අපෙ රත්තරන්ට කියල වැඩෙ සෙට් කරන් ඉන්නෙ ...මිනිහ කලුතර ඉදන් එනව කිව්ව අලුතෙන් හදපු වරායට මාව ගන්න..බෝට්ටුව රෙඩි.."
"එහෙනන් බං අපි මොකටද...උබට රාජ්‍ය ආරක්ශාවම හම්බවෙයිනෙ..."
මම නක්කලේට මෙන් පැවසුවෙමි.
"මේ පිස්සු කෙලින්න එපා..අම්මෝ...කොයි වෙලේ කට්ටිය මාව අල්ලල දීල ලකුනු දා....ඩෝං...දඩෝන්...අරපං දොර...අරපන් බං....යකෝ අටටත් කිට්ටුයි..අද කැම්පස් යන්නෙ නැද්ද නැගිටහන්..."
ලකියා පැමින දොරට තඩි බායි.සීතලට ඔලුව බර ගතියක්ද දැනෙන්නට විය.ඇකිලී ගිය රෙද්ද නැවත හිස තෙක්ම පොරවා අනිත් පැත්ත හැරුනේ කොට්ටය දෙකට නමා ඒ තුල හිස ඔබා ගනිමින්ය.

Julian Assange-http://en.wikipedia.org/wiki/Julian_Assange

සෝන් ද පෝල් මලයට පිං සිද්ද වෙන්න යාන්තන් ලිපියක් ලියා ගතිමි.

noreply@blogger.com (මද්දු) — Fri, 12 Nov 2010 16:24:00 +0000

මාර කම්මැලි දවස් ටිකක්...මාසෙකට එකක් හරි වෙන්න දාගෙන ආපු ලිපි ටිකේ රිදම් එකට හානියක් වෙන බව මටත් ටිකක් දැනුනා.ඒත් හත්වලාමේ මොනා කරන්නද?මොනා කියල ලියන්නද?කොහෙද දැන් ලියන්න කියල එහෙමට ප්‍රශ්ණ තියනවද?ආසියාවේ ආස්චර්වේ මොන ප්‍රශ්නද?තියන පෝර්න් ස්ටාර් ප්‍රශ්ණ, ගංවතුර ප්‍රශ්න අපේ කට්ටිය තියාගෙන හම ගහනව.අර පත්තරේ දැම්මයි කියපු අහිංසක හුරතල් ගෑණු දැරිවියන්ගේ මූනු ටික බල බල(තව මොනා නොබලනව ඇද්ද ) අපේ කට්ටිය හිටු කියල ආණ්ඩුවට බනිනවා.ඒ ලමයින්ගේ දෙමාපියන්ටවත් ඇතිවෙයි කියල හිතන්න බැරි සත්ව කරුනාවකින් අපේ කට්ටිය ලියන දේවල් දැකල අපිටත් මාරදුකක් තමයි ඇති වෙන්නේ.මොනා කරන්නද..?ඒව නන් කමක් නෑ කියමුකො,වැස්ස වළාහක දෙය්යන්ගේ ටයර් මාරුකරන එකාගෙ ඉදල උන්ගෙ අම්ම අප්ප මතක් කර කර බනින්න පටන් ගත්තෙ ඊයෙ ඉදන්..එක්කෝ හුලගට ගේ ගහගෙන ගිය එකෙක්..නැත්තන් අකුනක් වැදිලා ගෙදර ටීවී එක පිච්චෙච්ච එකෙක්..අඩුම තරමෙ තමන්ගෙ ජීප් එක ගංවතුරට ගහගෙන ගිය සංගාවත් කෑ ගහනවන් දුක නෑ.ඒ විතරයැ..නගර සභා කුනු ගෙනියන සෙල්වම් අය්යගේ ඉදන් ඩී ඇස් සේනානායක වෙනකම්ම පාලන තන්ත්‍රයට බනින එක..හැබැයි ඒක නන් එච්චර පුදුම වෙන්න දේකුත් නෙමේ..අල්ලපු වත්තේ මිනිහට පඩයක් ගියත් රාජපක්ශ පවුල් පාලනයට හරි රනිල්ගේ රට පාවාදීමට හරි බනින මිනිස්සු ඉන්න රටක ඕවත් වැඩද?

ඉතින් මොනා හරි ලියන්න කියල ඉන්න කොට තමා දැක්කේ සෝන් ද පෝල් ද මොකාද කියල හාදයෙක් අද ලංකාවට ආවලු.පොටෝ වගයක් එහෙම දාල තිබුන,හොද හයේ හතරෙ පොරක් වගේ පෙනුම.කොහෙද ඉතින් ඔය ජැමෙයිකාව පැත්තෙලුනේ මිනිහගේ ගෙවල් දොරවල්.පත සයිස්...මතකනෙ අර කොදෙව් ක්‍රිකට් පිලේ කට්ටිය එහෙම.

මිනිහටත් හැමෝටම අන්දන්න දෙන උඩරට නැට්ටුවෝ සෙට් එකයි,පොල් තෙල් පහනයි,අර දම්පාට මල්මාලයයි දාල පිලිගත්තලු.මිනිහා මාධ්‍ය සාකච්චාවකුත් තියල කිව්වලු ලංකාව හරි හොද රට,මිනිස්සු ඔදයි,ලස්සොන හිනාව ඔදයි,ආගන්තුක සත්කාරය ඔදයි කියල.කෝමද බටර් පාර...අපිනන් අහුවෙයි ඕවට...මාත් මේ දවස් වල මිනිහගේ වීඩියෝ හිටු ගාල බලනව ළමා සාරියක්වත් ඇද ගත්ත බිල්බෝර්ඩ් එකක්වත් තියනවද කියල..ඊටත් වඩා දැන් හොයන්න ඕන මූන වහගත්ත සිට්ටිමනී කෙනෙක් හරි මුස්ලිම් පල්ලියක් හරි ගෑවිලාවත් තියනවද කියල.හැබයි තිබුනොත් පුතෝ (වීසා කැන්සෙල් කරන්නනන් වෙන්නේ නෑ ,ඇවිල්ල ඉවරනේ )...උබව @#$%^ කරල (*&^% කරල තමයි පස්ස බලන්නේ.සැකනන් අහපන් සාරුකයගෙන්.ඔහොම නෙමේ සාරුකය මුදවපු කිරි ගාලත් බැරිවුනා බෝම්බ පාරෙන් බේරෙන්න,මෙයා එනව බටර් ගාන්න,කල්කිරිත් එක්ක චීස් වත් ගාල බලහන්.

කෙසේ වෙතත් වැරදිලාවත් අමතක වෙලා වගේ ඔය චූටි වැරද්දක් වෙලා තියනවනන් එක ක්‍රමයක් තියනවා ඒක හරි ගස්සවා ගන්න.19 වෙනකන් ඉදල ලොක්කගේ ප්‍රාප්තිය දවසේ ඉංග්‍රීසියෙන් දේශාභිමානී ගීතයක් කියල සීනි නැති කලු කෝපි කෝප්පයක් බීල පොටෝ එකකට ඉන්න පොරොන්දු වෙනවනන් ඔන්න අපිටත් පුලුවන් ඔය හිතල කොරපු වැරද්දක් නෙමේ කියල,එහෙම නැත්තන් ජනතාව නොමග යවන්න කරපු වැඩක් කියල හඩ්ඩට කියල ඔප්පු කරවන්න.හැබයි පුතෝ...උබ ප්‍රාප්තිය දවසේ ලොක්ක එක්ක සින්දු කියපු එක ඔලුවට අරන් ඔබාම අය්යට එහෙම චැලෙන්ජ් කරන්න එහෙම යනව නෙමෙයි,අන්තිමේදි උබට ගෙවල් ලගම ගුවන්තනමෝ එකේ නවාතැන් හම්බවෙයි.ඊට පස්සෙ අපි ලගට එහෙම එන්නේ නෑ නාහෙන් අඩාගෙන..කොටින්ම අපි අනුන්ගේ අභ්‍යන්තර ගැටලු වලට ප්‍රතිපත්තියක් විදිහට අත පොවන්නෙ නෑ.

දැන් කස්ටිය බලන්න යන්න එහෙම ඉන්නවද දන්නෙ නෑ සෝන් මලයව..අඩුම ටිකැට්ටුව රුපියල් වලින්ම පන්දාහක් පමනි.හැබයි මාගේ අවවාදය, සෝ එක පටන් ගන්න අවසන් තත්පරය දක්වා ටිකට් ගන්න එක පමා කරනවනන් හොදයි.නැත්තන් ආයෙ සෝ එකට කෙල වුව හොත් සල්ලි ඉල්ලනවා නන් බොරුය.ඒකෙන් මේකෙන් යාන්තන් මේ මාසෙට පෝස්ටයක් සෝන් කොලුවාට පින් සිද්ද වෙන්නට දා ගතිමි.

ලංකාවේ හොදම ගායිකාව මෙන්න

noreply@blogger.com (මද්දු) — Sat, 09 Oct 2010 15:36:00 +0000

කාලය ඉතා වේගයෙන් ගමන් කරනවා.පසුගිය මාස දෙකේම විභාග හා වැඩ කන්දකට මැදිවී සිටි මට යාන්තම් සති දෙකක ඉස්පාසුවක් ලැබීමෙන් අනතුරුවයි මම ලිපියක් ලියන්නේ.

විවිධ වැඩ කටයුතු වලට කොතරම් මැදිවී සිටියත් ඒ අතරේ එක් පුරුද්දක් මං ප්‍රගුණ කලා,හොද ගීත සොයාගෙන රසවිදීම කොතරම් රසවත් වැඩක්ද කියල තේරුනේ ඉන් පසුවයි.මෙතැනිදී හොද ගීත කියා හැදින්වීම ගැන එතරම් තැකීමක් කරන්න එපා,නරක ගීත කියා දෙයක් නොමැති බවයි මගේ හැගීම.ගීතයක හොද හෝ නරක බව අසන්නාට සාපේක්ශ්‍යයි.තනුව,පද රචනය ගායන හැරුනු විට ගීතයක ගුණාත්මක භාවය අසන්නාගේ වයස,සමාජය හා බුද්ධි මට්ටම අනුවද වෙනස් වනවා.මදකට හිතන්න ඔබ වයස 12-15 කාලයේදී,ඒ කියන්නේ යමක් කමක් තේරුම් ගත හැකි පලමු භාගයේදී ඔබේ ප්‍රියතම ගීත මොනවාද?මගේ නම් කණ්ඩායම් සංගීතය එකල ඉතා හිත් ගත් සංගීතයක වූවා,පසුව වයස 16-18 පමන වෙද්දී බටහිර සංගීතය පසුපස අප හමාගියා,නමුත් දැන් සමහරවිට එකල අපි සිතුවේවත් නැති සංගීතයක් දැන් රස විදිනවා.කාලයයි මෙයට හේතුව!

මේකට හොදම උදාහරනයක් ලෙසට මම කාලයක් තිස්සේ නිරීක්ශනය කල ලාංකීය ගුවන් විදුලි පෙරලිය හදුන්වන්න පුලුවන්.

මෙරට ප්‍රථම ජනප්‍රිය ආරේ ගුවන් විදුලිය වූ සිරස ගුවන් විදුලිය එය ආරම්බයේ විවිද ඇනුම් බැනුම් වලට ලක් වූයේ එහි ගුවන්ගත වන ගීත වල ප්‍රමිථිය සැලකීමට ලක්වෙමින්ය.එවකට නව යොවුන් වියේ පසුවූ සිරස කාර්ය මණ්ඩලය හා බලධාරීන් තමන්ට රිසි සේ නව ආකරයේ රැඩිකල් ගමනක් පටන් ගත් ආකරයයි ඒ.නමුත් අද ඒ කාර්ය මණ්ඩලය වසර 15කින් පමණ වයසට ගොස් ඇත.අද සිරසෙ වැඩ පටන් ගන්නේ පිරිත් ඇස්සවීමෙන්ය,බහුලව යන්නේ 70,80 දශකයේ ගීතය කොටින්ම පෝය දවස්වල ආදර ගීතවත් ඔවුන් ප්‍රචාරය කරන්නේ නැත.මෙයයි කාලයේ හාස්කම.

කෙසේ නමුත් මගේ ලිපියේ අරමුන හොද නරක ගීත සංසන්දනය කිරීම නොව නියමිත පිලිතුරක් නොමැති ප්‍රශ්නයක් ගැන සාකච්චා කිරීමය.

ලංකාවේ හොදම ගායිකාව කව්ද?

නන්දා මාලිනී,ලතා වල්පොල,සුජාතා අත්තනායක,ඇන්ජලීන් ගුණතිලක,දීපිකා ප්‍රියදර්ශනී හෝ නිරෝශා විරාජනී හෝ වෙනයම් අයෙක්ද?

ගීතයක සාර්ථකත්වයට පද රචනය,සංගීතය හා ගායනය යන මේ තුන් පෙලම සාර්ථක විය යුතුවේ.නමුත් ඔබ දන්නවාද ඉතා අනර්ග ගායන හැකියාවක් නැතත් හොද ගීත රචනා හා තනු මාලා යොදා ගනිමින් පමනක් සාර්ථක වුනු ගායිකාවන් සිටින බව.එසේම තම අනර්ග ගායන පරාසයට හා හැකියාවට, රසයෙන් අඩු පද රචනා හා තනු හේතුවෙන් නිසිතැන නොලැබී ගිය ගායිකාවන්ද සිටින බව මගේ හැගීමයි.

මගේ නිගමනය බොහේ දෙනෙකුගේ දෝශ දර්ශනයට හේතු විය හැකි නමුත් මගේ අදහස අනුව නන්දා මාලිනියන් හා දීපිකා ප්‍රියදර්ශනී වැටෙන්නේ එම පලමු කොටසටය.නන්දා මාලිනිය සුනිල් ආරියරත්නයන්ගේ ආනුභාවයෙන් හෙල අඹරේ කාන්තා හඩ ලෙස සලකුනු වූ බව මාගේ හැගීමය.දීපිකා ප්‍රියදර්ශනත් රෝහන වීරසිංහගේ මධුර තනුවල උදව්වෙන් මිස තම පරම හැකියාවෙන් ලකුනක් තැබීමට නොහැකි වූ ගායිකාවකි.

එසේම ඉහත පැවසූ දෙවන කොටසට වැටෙන අය ලෙස මා දකින්නේ ලතා වල්පොල,ඇන්ජලින් ගුණතිලක වැන්නවුන්ය.ගායන පරාසය සිතා ගැනීමටත් අපහසු තරමට ඇති ඔවුන්,තම කටහඩින් නිසි ප්‍රයෝජන නොගත් බව මගේ හැගීමයි.නිරොශා විරාජිනියත් යමින් සිටින්නේ මේ පෙරමුනට බව මගේ හැගීමයි.උරේශා රවිහාරිත් ඉතා විශාල පරාසයක් හෙබි ගායිකාවත් වුවද චිත්‍රපටි ගායනයටම ඇය කොටු වී ඇතයි මට සිතේ.

කෙසේ නමුත් හොදම ගායිකාවට අවශ්‍ය හොද කටහඩක් පමනක්මද යන්න ප්‍රශ්නයකි.

ඔබේ අදහසත්,එසේම ඔබේ කෝණයෙන් ලංකාවේ හොදම ගායිකාවත් කොමෙන්ටුවකින් දාල යන්න.

මුන්නෙශ්වරම් බිලි පූජාව හා බෞද්ධ අපේ ඇත්තන්ගේ සත්ව කරුනාව

noreply@blogger.com (මද්දු) — Tue, 24 Aug 2010 02:19:00 +0000

මේ දවස් වල විද්‍යුත් තැපෑල තුලින් ඉතා විශාල වශයෙන් කතාබහට ලක්වෙලා තිබෙන හා නොයෙක් සංවාද මණ්ඩප සාකච්චාවට බදුන් වෙලා තියෙන දෙයක් තමයි හලාවත මුන්නේශ්වරම් කොවිලේ පැවැත්වීමට නියමිත සත්ව පූජාව හා එයට විරෝදය පෑම.බෞද්දයෙකු වශයෙන් මාගේ පෞද්ගලික අදහස නම් කිසිම සත්වයෙක් අනෙකෙක් වෙනුවෙන් නිරපරාදේ මැරීම හෝ මියයන තැනට අනුබල දීම දරුණු පාපකර්මයක් බවයි,නමුත් සමහර අවස්තාවලදී අකමැත්තෙන් හෝ කැමැත්තෙන් අප අතිනුත් වැරදි සිදුනොවෙන්න නොවේ.

නමුත් මාගේ මේ ලිපියේ අරමුන හදිස්සියේම මුන්නෙශ්වරමේ ආරම්භවීමට යන බිලි පූජාවක් සම්බන්දෙයෙන් සිංහල බෞද්ද යැයි හඩනගාගත් පිරිසක් විසින් කරන ලතෝනිය හා එහි යටි අරුත වටහාගැනීමට උත්සාහ දැරීමයි.පලමුව මොවුන්ගේ උදහසට ලක්වී ඇති මුන්නේශ්වරම පිලිබදව වචනයක් කීමට කැමැත්තෙමි.වසර 800කටත් වඩා වැඩි ඉතිහාසයකට උරුමකම් කියන මෙම කෝවිල ක්‍රි.ව 1200දී පමන ගම්වරයකින් තෙවන පරාක්‍රමබාහු රජ විසින් දුන් ඉඩමක් බව එතුල ඇති ලිඛිත සන්නස් මගින් සනාථ වනමුත් බහුතර ද්‍රවිඩ ජනයාගේ අදහස නම් මුන්නෙශ්වරම රාම-රාවනා යුගයේ සිට පැවත එන බවයි."නේශ්වරම්" යන්නෙන් අවසන් වන මුන්නෙශ්වරම්,කෝනෙශ්වරම් වැනි කෝවිල් කීපයක් ලංකාවේ තැන් කීපයක පිහිටුවා ඇති අතර ආගම් බේදයකින් තොරව අප සෑම දෙනාම ඒවා වන්දනාමාන කිරීම චිරාත් කාලයක් තිස්සේ පැවතීගෙන එන්නකි.එය එසේ වුවත් එම ඇදහීම් තුලින් ජනයාට හෝ අප අදහන ආගම් වලට එමගින් හානියක් සිදුවූයේ නැතිබව මගේ හැගීමය.සිදුවුනානම් සිදුවූයේ තවත් මිනිසා තම තමන්ගේ ආගම්වලට නැබුරුවීම සහ නොපෙනෙන දෙවියන් ඇදහීම මගින් මානසික ශක්තියක් අප තුල වර්ධනය වීමය.

මේ දිනවල පැතීරීයන විද්‍යුත් තැපෑල අනුව පැවසෙන්නේ අගෝස්තු 25 වන දින සිදුවීමට යන මහාසත්ව ගාතනයක් ලෙසින් හදුන්වන එලුවන් හා කුකුලන් 500ක් පමන මරාදැමීමට එරෙහිව තම විරෝදය දුරකතනයෙන් හෝ කෝවිලට , හලාවත ප්‍රා.ලේ කාර්යාලයට දැන්වීමට සලස්වන ලෙසය.මට මෙය දැකපුවෙලේ සිට සිතට වදදුන් කාරනයක් වුයේ වසර 800ක් තිස්සේ අප බෞද්ඩ් රජවරුන් විසින් මෙනම මීටත්වඩා ආගමික ඇල්මෙන් යුතු කාලවලදී පවා කතාබහට ලන්නොවුනු සිදුවීමක් මේ හදිස්සියේ පශ්චාත් යුධ සමයකදී කරලියට බැහීමකි.පසුගිය වසරේ මෙන්ම ඊට පෙරත් ඔවැනි බිලි පූජා අනන්ත්වත් මේ ධර්ම්ද්වීපයේ සිදුවීඇත,නමුත් මේ මොහොතේ මේ කල එලිබැස්සම ඉතා සැක සහිත වන්නේ පශ්චාත් යුධ සමයකින් පසු ජාතීන් අතර සමගිතාවය ගොඩනැන්වීමේ මහගු කර්ත්ව්‍යය අප ඉදිරිපිට තියෙද්දී අන්‍ය ආගමිකයන්ගේ ආගමික සංවේදී තැන් අලලා එයට පහරදීමක සේයාවක් මෙමගින් පෙනෙන නිසාය.

සෑම ආගමකට ඔවුන්ට ආවේනික වූ චාරිත්‍ර සිරිත් විරිත් පවතින අතර ඒවා අපිට පිලිකුල දක්වන නිසාම ඔවුන් වනචාරීන් හෝ තිරිසන්නු ලෙස හැදින්වීම කැප නොවේ.ලෝකයේ විවිදත්වයක් තිබිය යුතුය,එවිටය හරවත් දේ ඉහලත් අනෙක් සැම අගාදයටත් වැටීමෙන් බෞද්ද ආගම වැනි දර්ශනයක වටිනාකම තේරුම් ගැනීමට හැකිවන්නේ.අග්නිදිග ආසියාවෙ තායිලන්තය වියට්නාමය වැනි බෞද්ද රටවල් වල ජනතාව කැරපොත්තො,මීයො,සර්පයින් හා කෘමීන් පනපිටින් බැද ආහරයට ගැනීම අපට පිලිකුල් වුවත් ඔවුන්ගේ පරිසරයට අනුව එය හොද හැඩගැසීමකි.එසේම ඔවුන් එසේ කලා කියා බෞද්දයන් මහා තිරිසන් ජාතියක් ලෙස කීමට කාටත් බැරිය.එම නිසා මේ ප්‍රචාර හරහා නැවතත් කලු ජූලියකට රට තල්ලු කිරීමේ බරපතල උත්සාහයක් කවුරුන් හෝ තුල පවතී,මෙවර මෙය ආගමික ස්වරූපයෙන් යන බව පැහැදිලිය,මෑතකදී මුස්ලිම් ආගම්

සම්බන්දයෙන්ද එකිනෙකා කුපිත කිරීමේ වෑයමක් තිබෙන බව පැහැදිලිව නිරීක්ශනයේදී ප්‍රත්‍යක්ශ වේ.

අන්‍ය ආගමික කෝවිලක් වූ පලියටම එහිසිදුවන බිලිපූජා තිරිසන් වැඩක් සේ දකින අපේ සමහර ඇත්තන්ට මතක් කර දෙන්නේ ඔය කරන විරෝධයම මෙට්‍රික් ටොන් වලින් සතියට කුකුල්ලු හරක් එලුවො මරන මස්කඩ කාරයන්ටත් යොමු කරන ලෙසය,ඒ ඉරිදට කුකුලෙක් මරන ගමේ ගොය්යන්ට නොව පුලුවන්නම් බයිරහ,කීල්ස්,වීහේන හෝ මැක්සීස් මහත්වරුන්ට විරුද්දවය.ඔය මහා පරිමාණ ෆාම් වල කුකුලන් එලුවන් ඌරන් හදන්නේ හුරතලේටවත් කරත්තේ බදින්නවත් නොව මසටය.ඒවාට විරුද්දව වචනයක් කීමට බැරි අපේ අය හදිස්සියේ දෙමලුන්ගේ ආගමික සංවේදී ස්ථාන අලලා ඉදිරිපත් කරන මෙවැනි කරුනු යට අරමුනක් සහිත පිරිසක් විසින් සංවිදාත්මකව කරන බව පැහැදිලිවේ.

මෙමගින් අපගේ නිවට නියාලු කම ප්‍රදර්ශනය වේයැයි කවුරුන් හෝ කිව්වොත් අපට කීමට ඇත්තේ අනුන්ගේ උගුල්වලට අසුවෙමින් කරන දේශ ප්‍රේමය මෝඩකමක් බවත් අතීතයේදීත් දේශපාලකයින්ගේ උගුල්වලට අසුවී එහි පල විපාක මෑතක් වනතුරුත් අප ගෙවුව බවත්ය.එකිනෙකා කිවුව පමනින් රෙද්ද උස්සගෙන යෑම මදකොට හෝ නතරකොට තාර්කිකව සිතාබලා තීරන ගන්නේ නම් මැනවි.

Facebook තහනම,අද හෙටම??

noreply@blogger.com (මද්දු) — Fri, 16 Jul 2010 14:42:00 +0000

අද උදෑසන රන් ගුවන් විදුලිය සිදුවු කතා බහ වුයේ Facebook නැත්නම් මුහුනු පොතින් සමාජයට සිදුවන විපත හා එය ලංකාව තුල තහනම් කල යුතුද යන්නයි.මෙහිදී විවිද පාර්ශව අදහස් දැක්වීම කල අතර විවිද අදහස් වලට සවන් දීමෙන් අනතුරුව මෙම ලිපිය ලියා තැබීමට සිත්විය.ඇත්තට Facebook මෙතරම් හානිකරද?මෙහි ආරම්භය ඇමරිකානු විශ්ව විද්‍යාල ශිෂ්‍යයෙකුගෙ ඉතා සරල ආශාවක් වුවත් ඔහු අද මේ නිසාම කෝටිපතියෙක් වී හමාරයි.මිනිසාගේ මූලික හැගීමක් වන සමාජ ගතවීමට ඇති ආශාව මෙහි සාර්ථකත්වයෙ හේතුවයි.අලුත් මිතුරු මිතුරියන් හදුනා ගැනීම,තමන්ගෙන් දුරස් වී ඇති සමීපතමයන් සමග සම්බන්දතා පැවැත්වීම Facebook හි ආරම්භක අරමුන වූ නමුත් දැන් එයට අමතර ලෙස වඩාත් වානිජ්‍යයමය අරමුනු එහි ක්‍රියාත්මකබව ප්‍රසිද්ද රහසක්.උදාහරනයක් ලෙස රුචිකත්වය අනුව වෙලද දැන්වීම් ප්‍රචාරය මගින් Facebook විශාල ආදායමක් ලබාගන්නව.

කෙසේ වෙතත් Facebook අපිට බලපාන්නේ කෙසේද? Facebook හි ආරම්භය වසර 2006දී වුවත් අපේ රටේ Facebook හි ජනප්‍රියත්වය හිනි පෙත්තටම නැග්ගේ පසුගිය වසර අග භාගයේ සිටය.අනිත් බොහේ දෙයක්ම මෙන් Facebook ද අපිට ලගා වුයේ ඇමරිකාවට,යුරෝපයට වඩා වසර ගනනක් ගිය පසුව,කොටින්ම ඒ රටවල් Facebook වෙතින් ඈත් වෙමින් සිටින වකවානුවක අපි Facebook වැලද ගනියි.එය හැටිය,පුදුම වීමට කරුනක් නැත.මුලින්ම නිපවපු රට තුල එය ප්‍රථමයෙන් ජනප්‍රිය වීම ස්භාවිකය.එසේම අනෙක් සෑම දෙයකට මෙන් මෙයටත් අනිත්‍යය පොදුය,විශේශයෙන් දිනෙන් දින අලුත් වන අන්තර්ජාලය තුල ජනතාව Facebook අත්හර නව තැන් සොයා යෑම අරුමයක් නොවේ.Twitterය එවැන්නකි.

නමුත් ලංකාව තුල ප්‍රශ්නය වන්නෙ මෙය තුලින් නොයෙක් අපචාර සිදුවන බවත් ඒ සදහා පුද්ගලයින් පොලබවනු ලබන්නේය යන්න.එනිසාම ලංකාව තුල කෝකටත් තෛලය ලෙස භාවිතා කරන "තහනම් කිරීම" මේ උදෙසාත් යොදා ගැනීම ගැන සදාචාරය හා සංස්කෘතිය ගැන මහා ඉහලින් කතා කරන මේ සම්බන්දව වැටහීම අවම ඉතා සුලු පිරිසක් තැත කවමින් සිටින අතර,දොම්නසට කරුන වන්නේ ඔවුන්ව බලල් අතක් ලෙස වෙනත් පාර්ශවයක් බාවිතා කරන බව නොදැනීමයි.ඒ පිලිබදව පසුව කතා කරමු.

ඇත්තටම Facebook හරහා මෙවැනි අපරාද සිදු වෙනවාද?පිලිතුර ඔව් යන්නයි.නමුත් මෙය අපේ රටට පිලිලයක් ලෙස සැලකීම මුග්දය.මක්නිසාද මෙවැනි ක්‍රියා මුලු ලොවේම සිදු වෙයි.එපමනක් නොව අපේ සෑම කරුනකටම අකමැත්තෙන් හෝ ආදර්ශ ගැනීමට යොදාගන්නා ඉංදියාවෙත් තත්වය එසේමය.වාසනාවකට අපේ රටේ Facebook සම්බන්ද එවැනි අවාසනාවන්ත කටයුතු වාර්ථා වී නොමැත.නමුත් ඒ නිසා Facebook පිලිබදව නොසලකා සිටිය නොහැකිය.දැනටමත් කාන්තා හා ලමා කර්යංශයට Facebook හා සම්බන්දව පැමිනිලි ගනනාවක් ලැබී ඇති බව පසු ගිය දවස් වල ආරංචි වුනි.එවායින් බොහෝමයක් වුයේ තමන්ගේ පින්තූර නොයෙක් අසභ්‍ය කටයුතු සදහා යොදා ගැනීමත්,විවිධ අයුතු යෝජනා Facebook හරහා ඉදිරිපත් වීමත්,තමන්ගේ දරුවන් මෙමගින් නොදන්න පුද්ගලයන් සමග අදහස් හුවමාරු කිරීමත් වැනි කරුනුය. මේ සෑම කරුනකට මූලික හේතුව වන්නේ Facebook හි මූලික සංකල්පය හරිහැටි තේරුම් නොගැනීමය යන්න මගේ හැගීමයි.

මෙම වැරැද්ද බොහෝ විට සිදුවන්නේ අන්තර්ජාලය යනු Facebook ම පමනක් යන්නත්,ජීවිතයටම අන්තර්ජාලයට පිවිසී ඇත්තේ Facebook භාවිතා කිරීමටම පමනක් වන Facebook ජිමික් එකෙන් අන්ධ වී ඇති ස්ත්‍රී පර්ශවය(බොහෝ විට ) හරහාය.බොහෝ විට ඇත්ත සමාජයෙන් තනි වී හෝ වැට කඩලු වලට මැදි වී ඇති ජීවිතයකට Facebook දිව්‍ය ලෝකයකි.එයින් උපරිම ප්‍රයෝජන ගැනීමට තමන්ගේ කෑම බීම ඇදුම් පැලදුම් ගැන පැවසීම පමනක් නොව තමන්ගේ පෞද්ගලික ජීවිතය පවා ලොවට නිරාවරනය කිරීමට ඔව්හු මැලි නොවෙති,අවංකවම ඔවුන්ට මැලි වීමට තරම් හේතුවක් ඇති බවද ඔවුන් නොදනිත්ය.මෙවන් කටයුතු හරහා තමන්ගේ නම කෙලෙසුනු පසුව ලේසියටත් පහසුවටත් හැමෝම බනින්නේ Facebookවලටය.එතැන තමන්ගේ අතින් සිදුවෙන වැරදි පිලිබදව කවුරුත් කතා නැත.අනෙක් ප්‍රධාන චෝදනාව වුයේ Facebookමගින් තමන්ට අයුතු අසභ්‍ය යෝජනා ලැබෙන බවත් එමගින් තමන්ගේ කසාද ජීවිතයට බලපෑම් ඇති වී ඇති බවත්ය.මා Facebook ගැන දන්න පමනින් කොහේවත් සිටින කාටවත් තවත් කෙනෙක්ගේ පින්තූරමත අදහස් ප්‍රකාශ කිරීමක් නොහැකිය.එනම් මේ අයතු යොජනා එවන්නෙ තමන් විසින්ම යහලුවෙකු ලෙස එකතු කරගත් අයෙක් විසින් නම් ඒ සදහා Facebook තහනම් කිරීම සාධාරනද?හැටහුටහමාරක් ජීවිතයට දැක නැති "මිත්‍රයින්" රොක් කරගෙන වැඩේ වැරදුනු පසු Facebook තහනම් කිරීමට යොජනා කිරීම සාධාරනද?අයුතු බලපෑම් ගැන කතාකරන අපේ සමහර අදහස්දක්වන්නන් පෙනී සිටින්නේ ජීවිතයට බස් එකක පාරක තොටක ගිය නැති ගානකය.ඈත පිටිසර ගමක කොල්ලන් රැලක් "ආ නංගි..අපි කලුද?" කියා පටන් ගෙන වනාතමුල්ලේ සිට බම්බලපිටියට යනතෙක් කාන්තාවන්ට සිදුවන යොජනා, අව කැපෙන කතා,බලපෑම්,අතවර කොතරම් කියා මෙය කියවන කාන්තා පර්ශවය මටත් වඩා හොදින් දන්නවා ඇත.නමුත් එය හේතුවක් කොට කාන්තාව පාරේ ගමන්කිරීම නවතා හෝ රජය විසින් තහනම් කොට නැත,කල යුත්තේ වරදකාරයාට සුදුසු දඩුවම් දීමයි.Facebook සදහාද එයම ගැලපෙයි යන්න මගේ හැගීමයි.Facebook තහනමින් බොහෝ විට අපහසුතාවට පත්වන්නේ දුර බැහැර රටවල වෙසේන අපේම සහොදර සහොදරියන්ය,දුරකතන ඇමතුමකට යන මුදල ඉතුරු කරමින් Facebook හරහා තම නිවැසියන් මිතුරන් ඇමතූ ඔවුන්ට සිදුවෙන්නේ මේ කොහේවත් නැති "ඉල්ලන් කෑමක්" නිසා අපහසුතාවයන්ට පත් වීමටය.

අවසාන චෝදනාවට නම් යම්කිසි පදනමක් ඇතිබව මගෙත් පිලිගැනීමය.පාසල් සිසුන් යනු තීරන ගැනීමට අඩු දක්ශ්‍යතාවක් පෙන්වන පිරිසකි,මෙහිදී උදව්වට පැමිනිය යුත්තේ දෙමාපියන්ය.එහිදීද දෙමාපියන් තාක්ශනය ගැන කොතරම් දැනුවත්ද යන්න සොයා බැලුව යුතු සාධකයකි.මා ඉහත කියු වැඩසටහනට සහභාගී වූ මවක් ප්‍රකාශ කරේ,තම දියනියට නව තාක්ශනයත් සමග දියුනු වීමට අවශ්‍ය පරිසරය ලබාදෙනුවස් තමන් ඇයට පරිගනකයක් හා අන්තර්ජාල සම්බන්දතාවක් ලබාදුන් බවත් නමුත් දැන් ඇය එයින් Facebookවලට ඇබ්බැහි වී අතර ඒ හරහා ප්‍රේම සම්බන්දතාවයකුත් ආරම්බ කර ඇති බවයි.එහිදීද අර මා කලින් සදහන් කල දෙමාපිය දැනුවත් බාවය පිලිබද ප්‍රශ්නයක් මතුවේ,පාසල් සිසුවියකට අන්තර්ජාල සම්බන්දතාව සහිත පරිගනකයක් ලබාදීම කම්නැත,ඇයට හොද නරක තේරුම් ගැනීමට තරම් පුලුල් මනසක් තිබෙනවානන්,එසේත් නැත්නම් එය හැසිරවීමට හැකියාවක් ඇති වැඩිහිටියෙකු සිටිනවානම්.නැතිනම් වන්නේ වදුරා දැලි පිහියෙන් කරගත් දේය.

කෙසේ වෙතත් අපරටේ ඕනෑම ආරම්භයකටම බාධක පැමිනේ,ලංකාවට මීට වසර 15කට පමන පෙර අන්තර්ජාලය පැමිනි විට අපේ සමහර ඇත්තෝ හැසිරුනේ ලෝක විනාසේ ආවක් මෙනි,නමුත් අද වන විට එයින් බොහෝ දෙනා ප්‍රයෝජන ලබති.Facebook වලටද උඩ පැන පැන විරෝදය දක්වන අපේ සදාචාර ඇත්තන් නොදන්නවා වුවත් ඔවුන් ඉටුකරන්නෙ තවත් පිරිසකගේ වුවමනාවකි.මීට මසකට පමන ඉහතදී එක්තරා ආගමික කන්ඩායමක් තම සාස්තෲවරයාට Facebookහරහා අපහාස වුයේ යැයි පවසමින් තමන්ගේ රටවල් වලින් Facebookතහනම් කරන්නැයිද එයට යොමුවීමෙන් වලකින්නයිද ප්‍රචාරයක් ගෙන ගියා.ඉන්පසු බොහෝ අන්තවාදී අදහස් ඇති රටවල් බොහෝමයක් Facebookතහනම් කිරීමට එකගවූවා.ඔබත් එසමයේදී ලන්කාව තුලත් බොහේ වෙබ් අඩවිතුලත් Facebookහි නොවැදගත්කම කාලය කා දැමීම ගැන වඩා වැඩියෙන් කතා වෙනව දකින්නට ඇති.අනෙකාගේ අදහස් වලට ගරු කිරීම වෙනුවට එවා එකහෙලා ප්‍රතික්ශේප කිරීම ප්‍රජාතන්ත්‍රවාදී මග නොවේ,එය අන්තවාදී මගයි.බැරි වෙලාවත් බලල් අතක් ලෙස යොදා ගැනෙන අපේ උන්දලෑගේ විගඩම් හේතුවෙන් Facebookඅපෙ රටේත් තහනම් වුවහොත්,Akon ලංකාවට නොවීම ගැන අපිට හිනා වුනු, පාටි දමපු දෙමල ඩයස්පොරාවට වඩා වැඩි සෙනගක් ඉදීවි අපිට හිනාවෙන්න.මෙවැනි තීරනයක ආන්ඩුව මේ මොහතේ නොයන බව මගේ විශ්වාශයයි.

ඇත්තටම වීරවංශ වැරදිද?නෑ හරි..

noreply@blogger.com (මද්දු) — Wed, 07 Jul 2010 03:09:00 +0000

මේ දවස්වල හැමතැනම වගේ අහන්න දකින්න ලැබෙන දෙයක් තමයි ශ්‍රී ලංකා ආන්ඩුවේ බරපතල අමාත්‍ය ධූරයක් හොබවන ජාතික නිදහස් පෙරමුනේ නායක විමල් වීරවංශ මහතා තවත් විශාල පිරිසක් සමග එක්සත් ජාතින්ගෙ කාර්යාලය වටලා එහි සෙවකයන්ව බිය ගන්වා,උපවාසයක් ආරම්බ කිරීම.එක එක පිරිස් මෙය එක එක ආකරයෙන් දකින බවත්,සමහරුන් කියන්නා වාලේ තම අදහස් ප්‍රකාශ කරනු ලබනු දැකීමත් නිසා මේ ලිපිය ලියා තැබීමට සිතමි.ඊයේ රාත්‍රියේ සිරස රූපවහිනි News බලපු බොහෝ දෙනෙකුට මෙන්ම,මේ වනතෙක් අදහස් ප්‍රකාශ කල සෑම දෙනාගෙම අදහස වී ඇත්තෙ විමල් වීරවංශ තරම ගොනෙක්,තකතීරුවෙක් නොමැති බවයි.UNP කරයන් උඩ පැන පැන හිනා වෙන අතර,ශ්‍රී ලන්කා කාරයින් තමන්ට උනු ලැජ්ජව මකා ගැනීමට විමල් ගොය්යාට බනින අතර පවසන්නෙ මෙයින් කැත වුනේ ජනාදිපතිතුමාගේ කීර්ති නාමය බවයි.

ඇත්තටම මෙහිදී ඔය තරමටම ලැජ්ජා වීමට දෙයක් සිදු වුනිද?ටික දවසකට පෙර ආන්ඩු පක්ශයත් විපක්ශයත් මාධ්‍ය සාකච්චා තබමින් කියා සිටියේ බෑං-කී මූන් විසින් පත්කරනු ලැබූ කමිටුවට එරෙහිව තමන්ගේ විරොධය පලකරන බවය.වීරවංශ ගොය්යත් කලේ ඒ ටිකමය,නමුත් පිලිවෙත වෙනස්ය.තාමත් සම්පූර්නයෙන්ම මැකී නැති JVP ජාන වලින් ආ විරොදතා ආකල්පය ඔස්සේ ඔහු ක්‍රියාත්මක විය.මගේ අදහස නම් වැඩේ හරි ගිය බවය.ඔහුට සෑහෙන ජන බලකායක් සොයා ගැනීමට හැකිවිය.පොලීසියත් සමග ගැටුමෙන්,උපවාසයෙන් හා තොවිලයේ පිහිටින් දේශීය හා විදේශීය මධ්‍ය වල අවධානය යොමු කරගැනීමට සමත් වීමේන් මහින්දට කියලවත් කරගත් නොහැකි උදව්වක් නොමිලේම කර දුන්නේය.එනම් ආන්ඩුවට පරිභාහිරව රට වෙනුවෙන් එලියට එන්න සූදානම් ජනතාව දාහක්,දෙදාහක් කොයි වෙලේත් "ස්ටැන්ඩ් බයි" සිටින බවය.භූමියට පිටින් සිටගෙන කොතරම් හයිරන්කම් පෑවත් ඒවාට මුහුන දීමට ශක්තියක් දෙය්යන්ගේ පිහිටෙන් අපට ඇති අතර,හදිස්සියකට රටවල් දෙක තුනක් අප වෙනුවෙන් කතා කිරීමට ඇති බවත් පැහැදිලි කරුනුය.නමුත් හදිසි හමුදා ආක්‍රමනයකදී ඔය කිසිම රටක් අප වෙනුවෙන් ඉදිරිපත්නොවන බව අපේ අය මෙන්ම එහේ ඇමරිකන් කාරයොත් දනිති,එසේම අපිට ආර්ථික සම්බාධක පැන වුවොත් එයින් රිදෙන්නේ ආන්ඩුවට නොව,මහජනයා කුලප්පු වීමෙන් ධනපති ප්‍රතිරූපයට බවද දැන් ඔවුන් දැන ගන්න්වා විය යුතුයි. එම කරුන සුද්දාට සම්ප්‍රෙශනය කිරීමෙහිලා වීරවංශ ගරු ඇමති තුමා කර ඇත්තේ විශාල මෙහෙයකි.එය එතුමා දැනුවත්ව හෝ නොදැනුවත්ව කලාද යන්න වෙනම් විමසා බැලිය ය්තු ප්‍රශ්නයකි.මෙතෙක් ඇමරිකා ප්‍රමුක බටහිරයන් අත පොවුනු ලැබූ සෑම රටක්ම ආන්ඩුව හා ජනතාව වශයෙන් දෙකට බෙදී පවතින අතර,එවන් වාතාවරනයක් සහිත් ඉරානයටත් තව ටික දොහකින් අත්වන්නේ ඉරාකයට,ඇෆ්ගනිස්තානයට අත්වූ ඉරනම බව කතාදෙකක් නැත.එවන් වාතාවරනයක ජානිපෙ ඉටුකරේ මෙහෙයකි,ඒ සදහා බැනුම් නොතරම්ය.

වීරවංශ මෙහෙය අඩු තක්සේරුවෙන් කතා කරන ඇතැමුන් නගන තවත් තර්කයක් නම්,මෙමගින් අප වටා ලේබල් වී ඇති මිලෙජ්ච් ලකුන තව තවත් තහවුරු වෙන අතර පොලීසි සමග ගැටීමත්,නීතිය අභිබවා යාමට උත්සාහ කිරීමත්,කතා කොට ප්‍රශ්න විසදා ගැනීමට නොහැකි වීමත් තුලින් ගෝත්‍රික ජනතාවක් බවට ශ්‍රී ලාංකික ජනතාව හන්වඩු ගැසෙන බවයි.මෙහිදී නැගෙන පැනය මෙම පැමිනි ජනතාව මුලු මහත් සමාජයම නියොජනය කරනවද?රටේ ආන්ඩුව සාකච්චා මට්ටමින් කරන මෙහෙයත් ගොත්‍රික සමාජයක ලක්ශනද?සෑම රටකම මෙවැනි පක්ශයක් රටක අවශ්‍යතාවයකි,ඉංදියාවේ රාජ් තැකරේ මෙයට හොදම නිදසුනකි.පෙලපාලියක් පැවැත්වූ සැනින්,පොලීසියත් සමග ගහගත් පමනින් ශ්‍රී ලාංකික ජනතාව මිලේච්ච ජාතියක් බවට පිලිගැනීමට නම් ඔහු හෝ ඇය CNN,BBC උදේ සවස නරබන,විවෘතව සිතීමට තරම් මොලය නොවැඩුනු අයෙක් විය යුතු බව මගේ හැගීමය.පසු ගිය දවස්වල G8 සමුලුව අතරවාරයේදී ඔබාමාගේ රූ පිලිස්සමින් පොලීසියත් සමග ගැටුම් ඇති කරගත් කැනඩා සුදු හම්ධාරීන් මිලෙච්චයො නොවන්නේද්,ඒව ජාත්‍යන්තර මාධ්‍ය සාධාරිනීකරනය කරන අතර ඔවුන් කියන කියන දේ පිලිගැනීමට සූදානම්ව සිටින අපේ සෘණාත්මක පිරිස් තමන්වම දකින්නේ මිලෙච්චයො ලෙසය.

මෙහිදී නැගෙන තවත් තර්කයක් වන්නේ රජයේ අමාත්‍ය ධූරයක් දරන අයෙක් මෙවැන්නක් කිරීම තුලින් රජයට අපකීර්තියක් ඇතිවන්නෙද යන්නයි.ඊයේ දහවල් සිරස ප්‍රවෘත්ති මගින් Breaking News දමමින් පෙන්වූ විමල්ගේ කතාවකින් ඔහු පැවසූයේ,මෙයින් පසුව තමන්ගේ ඇමතිකම නැති වූවත්,තමන්ව රජයෙන් අයින් කලත් තම ක්‍රියා මර්ගය අත් නොහරින බවත්ය,එසේ බලපෑම් ආවොත් තමන් මාරන්තික උපවාසයක් ආරම්භ කරන බවත්ය.එයින් ඔහු නොකියා පවසන්නේ මෙයට රජයේ අනුමැතිය නොමැති බවත් මෙය රජයට එරෙහිව යන ගමනක් බවත්ය.එසේම දැන හෝ නොදැන පොලීසිය සමග ඇතිවූ ගැටුමෙනුත් පිලිබෙව්වුයේ මෙම පෙලපාලියට රජයෙන් විරෝධය එල්ලවූ බවයි.

එසේ බලන විට සියල්ල වතුර සේ පැහැදිලිය,හරියට පෙර සැලසුම් කලාක් මෙනි.කෙසේ වෙතත් වීරවංශගේ තොවිලය මගින් ඔය කියන තරම් අපකීර්තියක් හෝ අවැඩක් සිදු නොවූ බව මගේ නිගමනය ය.සිදු වුයේ හොදක්මය.පාර්ලිමේන්තුවේ සිටින උපායෙහි දක්ශතමයාගෙන් (ඔහු මින් පෙරත් එය ඕනා තරම් ඔප්පු කර ඇත ) මෙවැන්නක් බලාපොරොත්තු විය යුතුමය.

මම සීයක් මතින් මිදෙව්වා:හිනා කතා

noreply@blogger.com (මද්දු) — Mon, 28 Jun 2010 13:14:00 +0000

මේ දවස්වල ජාලයේ මෙන්ම සමාජයෙත් ඉතාම කතා බහට ලක්වෙලා තියන කාරනා දෙකක් තමයි සමලිංගික ප්‍රශ්නය හා මත්ද්‍රව්‍ය වල මිල ඉහල යාම.බැලූ බැල්මටනන් එකිනෙක සමාන කමක් නෑ වගේ තමයි.මේ ලගදි අපි යාලුවො ටිකක් එකතු උනාම අනන් මනන් කතා කර කර ඉදිද්දි ඔය ගැනත් කතා වෙන අතරෙ මගෙ එක යාලුවෙක් පොඩි කතාවක් කිව්වා,හැබයි වැඩිහිටියන්ට පමනයි කියල මටනන් අන්තිමෙදි බනින්න එපා..!
මේක ලන්කාවෙන් නන් නෙමෙයි ආරන්චි වෙලා තියෙන්න,බොරුනන් කියොලම බලන්න,මගක් දුර යද්දි තේරෙයි කොහොමටවත් ලන්කාවෙ නෙමෙයි කියලා.
මේකයි කතාව!
අඩු වයසෙ ගැටවු දෙන්නෙක් හොරෙන් මත්ද්‍රව්‍ය පිලිබද අත්දැකීමක් ලබා ගන්න යද්දි මාට්ටු වෙලා,පොලීසියෙන් උසාවිය දක්වාම ගිහිල්ලා.අන්තිමේදි දෙමාපියන් ගෙන්වලා කාඩ් එක හොදටම කුඩු කරලා,දැන් නඩුකාර උන්නන්සෙගෙ ලෑස්තිය දඩුවම දෙන්නලු.ඔය වගෙ පලමු වැරදි වලට වැඩිය ලොකු දඩුවම් දෙන්නෙ නෑ නෙ.ඉතින් මෙයාලට දුන්න දඩුවම තමයි සතියක් ඇතුලත් දුම්බීමේ ආදීනව ගැන සමාජය දැනුවත් කරලා අන්තිමේදි කීදෙනෙක්ව මතින් මුදෙව්වදැයි ප්‍රගතිය පෙන්නන්න ඔන.

ඉතින් කෝමහරි සතියකට පස්සෙ දෙන්නව කැදවලා නඩුකාරය අහනවලු එක එක්කෙනාගේ ප්‍රගතිය.පලවෙනියා ඇවිල්ල බෝඩ් එකක් එහෙම අල්ලල එකේ ලොකු රවුමකුයි පොඩි රවුමකුයි ඇන්දලු,ඇන්දල කිව්වලු මම 22දෙනෙක්ව මතින් මිදෙව්වා කියල.එතකොට නඩුකාරතුමා ඉතා සතුටට පත් වෙලා ඇහුවලු "ඒ කොහොමද පුතා,පොඩ්ඩක් පැහැදිලි කරන්න කියලා".
"මෙහෙමයි, මන් මේ රවුම් දෙක පෙන්නල කිව්වා මේ ලොකුවට තියෙන්නෙ මත්ද්‍රව්‍ය පාවිච්චියට පෙර මොලය හා පොඩියට තියෙන්නෙ මත්ද්‍රව්‍ය පාවිච්චියට පසු රොගී වු මොලය කියල"

නඩුකාරයා බොහොම සතුටු වෙලා අනිත් බුවා දෙසට හැරුනා.
අනිකා ලෝක අන්ඩයා,ඌ සතිය පුරාම මෙලෝ වැඩක් කරල නෑ,හැබැයි පොඩ්ඩක් වෙලා කල්පනා කරපු බුවා කිව්වා "මම සතිය පුරාම 100කට වඩා කට්ටියව මතින් මිදෙව්ව"කියලා.
නඩුකාරය පුදුමයටත් සතුටත් පත් වෙලා ඇහුවා "හරිම සන්තොසයි පුතා..ඒ කොහොමද?"කියල.
කෙලින්ම අර අනිත් කොලුව ඇන්ද රවුම් දෙක අතට ගත්ත මේ කොලුව ඒක් අනිත් පැත්ත හරෝගෙන මෙහෙම කියනවලු!
"මම මේක අරන් හැමෝටම පෙන්නල මෙහෙම කිව්ව,මේ පොඩි රවුමෙන් පේන්නෙ ගංජ ගහල අහුවෙලා හිරේට යන්න ඉස්සෙල්ලා පස්ස ( ගුදය..ගුදය..),ලොකු රවුමෙන් පේන්නෙ ගිහිල්ල ආවට පස්සෙ පස්ස පැත්ත"කියල
නඩුකාරයට ඇපත් නෑලු!!!

දෙමල චිත්‍රපටියක් බලන්න සිනමා ශාලවකට ගියෙමි.

noreply@blogger.com (මද්දු) — Tue, 08 Jun 2010 16:04:00 +0000

මගේ ජීවිතේ පලමු වතාවට අද දෙමල චිත්‍රපටයක් බලන්න ශාලාවකට (හෝල් එකකට ) ගියා.ඇත්තටම මගේ වුවමනාවකට නොවුනත්,මගේ ද්‍රවිඩ මිත්‍රයෙකුගෙ බලවත් පෙරැත්තය නිසාම අද මට මේ අත්දැකීම ලබා ගන්න පුලුවන් වුනා.මේක සම්පූර්නයෙන්ම වෙනස් වගේම නොසිතූ අත්දැකීමක් කිව්වොත් නිවැරදියි.මම ගියපු ශාලාව ද්‍රවිඩ චිත්‍රපට ප්‍රදර්ශනයටම වෙන් වූවක්,ලගදීම පැමිනීමට නියමිත සිනමා නිර්මානවල පෝස්ටර රැගත් දැන්වීම් පුවරු සහිත ශාලා ඉදිරිපස ඔස්සේ අප නැරඹීමට පැමිනි චිත්‍රපටයේ පුවරුද දක්නට ලැබුනා.ඉද හිට දෙමල රූපවාහිනි නාලිකාවක යන පරන ද්‍රවිද චිත්‍රපට නරබන මාහට,නවතම ද්‍රවිඩ චිත්‍රපට පිලිබදව කිසිදු දැනුමක් තිබුනෙ නෑ.පුවත් පත් වල,විචාර වල මහා ඉහලින් රචනා කොට තිබුනේයැය් මාගේ මිත්‍රය විසින් රෙකමදාරු කරනු ලැබූ "සිංගම්" යන්න නැරඹීමට මාතුල කැමැත්තක් ඇති නොවුයේ එහි පෝස්ටරයක් දකීමත් සමගය.පොලිස් කාරයෙක්ගේ (නිලධාරියෙක්ගේ ) රුවින් සැරසුනු ප්‍රධාන නලුවා දකිද්ම මුලු කතාවම තෙරුම් ගත හැක.

එය එසේ වුවත් මුලු චිත්‍රපටය තුලම ප්‍රේක්ශකයා ඇදබැද තබා ගැනීම සදහා යොදා ඇති දෘශ්‍ය ප්‍රයෝග,සටන් ජවනිකා මෙන්ම ගීතද සාමාන්‍ය අප දකින සිංහල චිත්‍රපටියකට වඩා බෙහෙවින් තාත්විකය,මනහරය.නමුත් මෙකල නිශ්පාදනය වන සෑම සටන් ද්‍රවිඩ චිත්‍රපටයකම පොදු මිනී මරන දර්ශන නම් මෙහිදීද අඩුවක්ව තිබුනේ නැත.නිතරම කැත්තක්,මන්නයක් අතට ගත් මැරයෙක්,බෙලි කපන,බඩ කපන දර්ශන ("කපනවා" යන්න හැමතැනම )මෙහිද නිමක් නැත.විටක බොහෝ ඉන්දියානු දෙමල අයගේ අධික කෝපය,කෲර හැගීම සමග මේ සිනමා නිර්මානවලටද සම්බන්දයක් ඇතිබව හැගේ.

කෙසේ වෙතත් අපේ සටන් චිත්‍රපට(පුහ්..!) හා සසදා බලන කල මේවා ඉතා ඉදිරියෙන් සිටියි.එයට හේතුව දකුනු ඉන්දියානු ද්‍රවිඩයන්ගේ හැකියාවද නැතිනම් උතුරු ඉන්දියානු ආභාශයද යන්න එතරම් අමාරු ප්‍රශ්නයක් විය නොහැකියි.පසුගියදා නිමාවූ IIFA සැනකෙලියත් සමගම යලිත් කතාබහට ලක් වූ අපේ සිනමාව පිලිබදව නැවත හැරී බැලීමට නියම කාලය දැන් යැයි මට හැගේ.විශේශයෙන්ම ශ්‍රී ලාංකීය ද්‍රවිඩ සිනමාව,මට දැනගන්මට ලැබුනු ආකාරයට ලංකාවෙ ප්‍රථම ද්‍රවිඩ චිත්‍රපටය නිර්මානය කරඇත්තේ සිංහලයෙක් වන අතර ප්‍රථම සිංහල චිත්‍රපටය නිමවී ඇත්තේ ඉන්දියානුවෙක් අතින් .මේ පිලිබදව අජිත් ගලප්පත්ති නම් විචාරකයා පසුගිය ඉරිදා ලක්බිමට ලියූ විචාරයක සදහන් වූවා.

මේක පුලුවන්නම් කියවල බලන්න http://www.lakbima.lk/archive/last_06_06_10/index.htm

අවසන් කරන්න ඉස්සෙල්ලා තව දෙයක්.චිත්‍රපටය පටන් අරන් නලුවා(වීරයා ) මුලින්ම තිරයට එනකොට බලන්න එපාය කට්ටියගෙ චියර් එක,විසිල් ගහනව,කෑ ගහනවා.ඒ වගෙම තමයි විකටයා,කෙල්ල එනකොටත්.ඒකත් එක්ක දුශ්ටයා එනකොට,හරියට තමන්ට වැරද්දක් කරල වගෙ,බනිනවා,හූ කියනවා.අපි නන් මේවගේ ඒව අහල තියෙන්නේ ලංකාවට චිත්‍රපට ආපු මුල් දවස් වල එහෙම නැත්නම් ටීටර් වල.දවස පුරාම වෙහෙසෙච්ච් මිනිහා,විශේශයෙන්ම දෙමල මිනිහා තම්න්ගෙම ලෝකයක් හදාගෙන ඒතුල පැය තුනක් ගත කිරීම එක අතකින් පුදුම වෙන්න දෙයකුත් නෙමෙයි.

පුදුම වෙන්න එපා..මුදා නොගත් ප්‍රදේශ තාම තියනවා....!

noreply@blogger.com (මද්දු) — Tue, 18 May 2010 09:56:00 +0000

අද ශ්‍රී ලාංකිකයන් වන අපිට ඉතා වැදගත් දිනයක්.අපේ දෙවනි නිදහස් දිනය අද කියල මේක හැදින්නුවත් වරදක් නැති තරමට ඒ නිදහස අපිට වැදගත්.මේ නිදහස ගැන අපි මේ දවස් ටිකෙ හැම නාලිකාවකම,හැම බ්ලොග් සටහනකම වගේ කතා වෙනව,මේ සතිය රණවිරු සතිය නිසා ඉදිරියටත් රටේ ප්‍රධාන මාතෘකාව බවට මෙය පත්විය හැකියි.( වැස්සත් මේ දවස් වල ප්‍රධාන සිරස්තලයක් )නමුත් මම මේ කතා කරන්න හදන්නෙ හැමෝම මේ දවස් වල කතා කරන කාරනය ගැන නෙමෙයි,එහිම අතුරු කතාවක් ගැන.කොහොමටත් මගේ මාතෘකාවත් මෙතෙක් කියවපු දේත් අතර සම්බන්දය මොකක්ද කියල ඔබ කල්පනාත් කරනව ඇති.

මීට අවුරුද්දක ඉස්සෙල්ලා මුදා නොගත් කලාප ලෙස දේශපාලන මට්ටමින් කතා වුනේ ත්‍රස්තවාදීන්ගෙ ග්‍රහනයෙ පැවති,භාහිර ලෝකයත් එක්ක සම්බන්දකම් අහිමි වුනු රටේ ප්‍රධාන නීතියට පිටින් කැලෑ නීතියට යටවුනු ප්‍රදේශ.ඒ වගේම විද්වත් කතිකාවලදීත් අපිට තවත් මුදා නොගත් ප්‍රදෙශයක් ගැන අහන්න ලැබුන.වෙනමම දේශපාලන පක්ශයක් විසින් පාලනය කරන,තමන්ටම කියා නීති පද්ධතියක් අවස්තානුකූලව තනා ගෙන,තමන්ගේ පටු අරමුනු වෙනුවෙන් අහින්සකයන්ව බිල්ලට දීම සදහා සැදුනු මේ මුදා නොගත් ප්‍රදේශ රටේ විවිද පෙදෙස් වල තිබ්බත්,ඇත්තෙ එකම නමකි,එය හදුන්වන්නෙ විශ්ව විද්‍යලයය නමින්ය.

අපගේ වීරොදාර හමුදාවන්ට පින්සිද්ධ වෙන්න දැන් මුදා නොගත් ප්‍රදෙශ ගැන අහන්නවත් නැත.ඉස්සර ප්‍රවෘත්ති විකාශයන් අතරතුර නිතර කිවු වචන දෙකක් වන මායිම් හා මුදා නොගත් ප්‍රදේශ යන වචන දැන් අපගේ ශබ්ද කෝශයෙන් මැකීයනු දැකිය හැකිය.ඒ මුදා නොගත් ප්‍රදේශ මුලින් උපුටා දැමුවත්,විශ්ව විද්‍යාල වල ඇති මුදා නොගත් ප්‍රදේශ තාමත් එසේමය.නමුත් මා අද කතා කරන්න යන්නෙ ඒ පිලිබදව නොවේ,ඒ පිලිබදව නොයෙක් සංවාද ඕනාවටත් වඩා ඇතිවී ඇති බැවින් ඒ ගැන කතා කරමින් අපේ වටිනා කාලය නාස්ති කරගැනීම අපරාදයකි.මා පවසන්නට යන්නේ මේ කාරනා දෙකම එක්තැනක සිදු වූ අවස්තාවක් ගැනය,පුදුම වීමට කාරනයක් නැත.මා මේ කියන කාරනය හැරුනු කොට තවත් බොහෝ මෙවන් දේ සිදු වෙනු ඇත,වෙනස ඒවා ඔබටත් මටත් ඇසීමට දැකීමට නොලැබීමයි.

ලංකාවෙ විශ්ව විද්‍යාල අතුරින් සිංහල සුලුතරයක් ඇති විශ්ව විද්‍යාල ඇත්තේ දෙකක් පමනි.(යාපනය හා නැගෙනහිර,මා වැරදිනම් නිවරදි කරන්න ).මේ විශ්ව විද්යාල බහුතරය හා සුලුතරය කෙසේ වුවත් නඩත්තු වෙන්නෙ ශ්‍රී ලංකා ප්‍රජාතන්ත්‍රවාදී සමාජවාදී ජනරජය යටතේය.එනම් රජයේ ආයතනයකි.නමුත් ඊයේ දිනයෙදි ලංකා ආණ්ඩුව මගින් පාලනය වන,මා මේ පවසන විශ්ව විද්‍යාලයෙදී මියගිය කොටින් සමරනු වස් උත්සවයක් පැවැත්වීය.ශිශ්‍ය සංගම් මගින් සංවිධානය කරන ලද්දක් බව පෙනෙන්නට තිබුනත්,රජයෙන් පඩි කන කුලපති ඇතුලු ආචාර්යවරුන් අන්ධ බීරුන් බවට පත් වුයෙ එම සිදුවීම අනුමත කිරීමටද,නැත්නම් තමන්ට ඉදිරියෙදී තර්ජනයක් රහිතව ජීවත් වීම ගැන සිතා බලාදැයි,ඔබ තීරනයක් ගනු මැනවි.

සිංහල සිසුන් සුලුතරයක් වුවත්,මෙම කාරනය ඉවසුම් නොදෙන්නක් වුවත් කලහැකි අන්යමක් නොවුයෙ,ලියා තිබු එකම වැකිය "මියගිය අපගෙ සහෝදරයන් සිහිකරමු" යන්න පොලිස් පොතක ලිවීමට වුවත් ප්‍රමානවත් නොවු නිසාය.මෙය තේරුම් ගත් ජේශ්ඨයෝ යැයි හදුන්වන පිරිස් පවසා ඇත්තෙ වද මල් හා ඉටිපන්දම් රැගෙන විත් ඒවා දල්වන ලෙසය,දුක වේදනාව කීමට භාශාව තේරෙන බල්ලෙක් වත් නොමැති වට පිටාවක,එසේ කිව්වත් ඊට පසුව එන කරදර මත තව වසර තුනක කාලයක් විදින්නට සිදුවන දෝමනස්සයන් ගැන සිතාබලා මුවින් නොබැන ඔවුන්ට අවනත වීමට සිදුවී තිබේ.මේ එක සිදුවීමක් පමනි.තව කොතෙකුත් මෙවැනි දේ සිදු වනු ඇද්ද?

මා ඔබේ අවදානය යොමු කරවීමට උත්සාහ ගන්නෙ හුදෙක් මේ සිද්දිය දිහා පමනක් නොව,මෙයට හේතු කාරනා වු අපගේ දෙමල සහොදරයන්ගෙ අදහස් හා ආකල්ප පිලිබදවය.කවුරු කොහොම කෙසේ කීවත් ලංකාවේ ජීවත් වෙන දෙමල ජනතාවගෙන් 90% පමන ජීවත් වන්නෙ ඉහත දැක්වු වි.වි සිසුන් දරන ආකල්පයේමය.ඔවුන්ට පිරබාහරන් යනු වීරයෙකි,මරනයට බිය නැතුව රටින් පැන නොගිය පිරබාහරන්,අපට මරනයට බිය නැතුව මුහුන දුන් මද්දුමබන්ඩාර,පුරන් අප්පු සේම වීරයකි.කල යුත්තේ මා පැවසු වි.වි සොයා ගෙන ගොස්,එම ශිශ්‍යන්ගේ ශිශ්‍ය භාවය අහිමි කිරීම නොව ඔවුන්ගෙ අදහස් වෙනස් කිරීමට උත්සාහ දැරීමය.කියන තරම් පහසු නැති වුවත්,අද පටන් ගැනීම තව වසර 20කින් ඵල දැරීමට පුලුවන.ප්‍රධාන කරුන වන්නෙ ඔවුන්ට සිතීමට හෝ කිරීමට වෙන යමක් නොමැති කමය,වසර 30කට පෙර එම අඩුපාඩුව ඔවුන් හොද පැත්තට යොමු කර ගත්තෙ තමන්ට ඉතුරු වෙන කාලය අධ්‍යාපනය වැනි ප්‍රයෝජනවත් දෙයකට යොමු කිරීමය.එමගින් සිදු වුයෙ ලංකාවෙන් බිහි වූ වැඩිම උපාදිධාරීන් ද්‍රවිඩ සහෝදරවරු වීමයි.නමුත් දැන් ඔවුන් තමන්ගෙ කාලය යොදවන්නේ වෙනම රටක් ගැන සිතීමටය.දකුනේ මෙන් ඔවුන්ට නැරඹීමට වැල් නාට්‍ය නැත,ක්‍රිකට් මැච් නැත,වෙන එකක් තියා ලාංකික චැනලයක්වත් ඔවුන්ට දකින්නට නැත,තරුණ ගැහැනු හා පිරිමි ලමුන්ට සිතන්නට විලාසිතා නැත,එවා ඔවුනට ලන්වීමට මාර්ගයක් නැත.ඔවුන් ඒ මුලු කාලයම කැප කරන්නෙ වෙනම රටක් ගැන සිහින දැකීමටය.

නමුත් මාගේ අරමුන අපේ සමහර තරුණයන් මෙන් ඔවුන්වත් වල්මත් කිරීමවත්,වැල් ටෙලි වැනි හරසුන්දේ ඔවුන්වෙත යොමුකිරීමවත් නොව,එවැනි දේ උපයොගී කරගෙන ඔවුන්ගේ විනාශකාරී අදහස් නැති කිරීමය.එම සිසුන් (හො තරුණයන් ) එකට හමු වූ විට ඊයෙ රෑ "මහ ගෙදර","සෙල්වි" හි වුනු දේ හෝ ක්‍රිකට් මැච් එකෙදි සංගා ගැහූ ලකුනු ගනන ගැන කතා කිරීම,හෙට කාටද වෙඩි තියන්නෙ හෝ කොහෙද බෝම්බය පුපුරවන්නෙ යන්න ගැන කතා කිරීමට වඩා දාහකින් වටින්නෙය යන්න මගේ අදහසයි.
(කරුණාකර මම ඉහත පැවසු වි.වි හෝ එම කරුන මට ආරංචි වූ ආකාරය නොඅසනවා නම් එය මා අගය කරන අතර ,වැදගත් වන්නේ එම හුදකලා කරුන පමනක් නොවන බව කිව මනාය. )

මට ප්‍රශ්නයක්..මොකක්ද ඔබේ අදහස?

noreply@blogger.com (මද්දු) — Fri, 14 May 2010 14:02:00 +0000

සමාජයෙ සැරිසරද්දි විවිධාකාර මිනිස්සු අපිට හම්බ වෙනවා.සමහරු හරිම ආදර්ශවත් චරිත,එහෙම චරිත වැඩිපුර ගැවසෙන පෙදසක ජීවත් වෙන්න ලැබීමත් මා නන් සලකන්නෙ වාසනාවක් හැටියට,අපේ ජීවිත හැඩ ගස්සවා ගැනීමටත් එමගින් යහපත් සමාජයක් බිහිකිරීමටත් එවැන්නවුන් නොදැන වුනත් කරන්නෙ ලොකු මෙහෙයක්.ඒ වගේම ලොකු පිනක්.
ඔහොම සමාජයේ යහපත් හා ආදර්ශවත් චරිත පිලිබදව සිතමින් සිටින විට මුලින්ම පෙනෙන්නෙ ඔවුන්ගෙ රැකියාව හෝ වෙනත් ජීවන කුසලතාවන්.ඒ අතරින් මට සිතුනෙ දියුනවට,සමාජ ප්‍රශංසාවට ලක් වුවන් බොහෝ විටයම් කිසි ක්‍රෙශ්ත්‍රයක් පිලිබදව පරතෙරටම හදාරා තිබීමයි.තමා විශේශිත වු මාර්ගය තුල නොකලහැක්කක් නොමැති තරමටම ඒ මාර්ගයෙ ඔවුන් ප්‍රවීනත්වයට ලගා වී අවසන්.උදාහරන ලෙස සංගීතයෙ කෙල පැමිනි මහා ගායකයො මෙන්ම වෙනත් කලාකරුවොද,විව්ද විශේශිත විශයන් උගන්වන ආචාර්යය වරු වගේම පරිගනක සම්බන්ද රැකියා කරන අයවලුන් හැදින්විය හැකියි.

ඒ වගේම තවත් පිරිසක් සිටිනවා,උගත් නූගත් බේදයක් නොමැතිව සමාජයේ වැජබෙන චරිත.මොවුන් යම් කිසි විශයක් පිලිබදව පරතෙරට හදාරා නොමැති වුවත්,නොදන්නා දෙයකුත් නොමැති බවයි පෙනී යන්නෙ.සංගීතය නම් සංගීතයද,දේශපාලනය නම් එයද මොවුන්ට අමුතුවෙන් ඉගෙනගෙන ආයුතු නොවේ.නමුත් විශයෙහි කෙල පැමිනි අයවලුන් සමාජය තුලට ආවිට බොහෝ අපහසුතාවට මුහුන දීමට සිදුවේ.වරක් මා හදුනන භෞතික විද්‍යා ආචර්යවරයෙක් අපහසුතාවට පත්වුයේ දේශපාලනය කතාකරන්නට යාමෙන්ය,එසේම වාහනයක් තියා බයිසිකලයක් වත් පැදගනීමට,සාර්ථක පවුල් ජීවිතයක් ගතකිරීමට අපහසු සම්භාව්‍ය කලාකරුවන්ද අප අනන්තවත් දැක අත්තෙමු.එසේම සියල්ලදත්ලා හෙවත් සෑම දෙයකින්ම ටිකටික දන්නා අයවලුන් අපහසුතාවන්ට පත් වෙන්නෙ රැකියා කටයුතු ආදිය ජීවිතයේ වැදගත් තීරණ ගන්නා අවස්ථා වලදීය.තමන් යායුතු නිවැරදිම මග,තමන්ට ගැලපෙන මග තෝරාගැනීමට නොහැකිව ජීවිතය අතරමං කරගන්නා අයවලුන්ද අප්‍රමානය.

ඉතින් මාගේ ප්‍රශ්නය මෙයයි.ඔබ කැමති මේ කාන්ඩ දෙකෙන් කුමන කාණ්ඩයට යන්නද?මම මේ ප්‍රශ්නෙ මගෙන්ම ඇහුව අතර මටත් නිවරදි පිලිතුරක් හිතාගන්න බැරි විය.එකක් පරදා එකක් ලෙස දෙපැත්තටම තර්ක විතර්ක ලැබුන.
තව දෙයක් කියන්න ඕන, මේ ප්‍රශ්නය මගෙ ඔලුවට ආවෙ මගෙ මිත්‍රයෙකුගෙ මාර්ගයෙන් ඔහුට සිදුවී ඇති ප්‍රශ්නයක් ගැන සාකඡ්චා කිරීමෙදියි.ප්‍රශ්නය වුයේ,මගෙ මිතුරා කොලඹ විශ්ව විද්‍යාලයෙ BIT පාඨමාලාව හදාරන අතර පරිගනක ක්‍රමලේකන සම්බන්ද රැකියාවක් කරමින් ඉතා හොද අත්දැකීම්(මේ දවස්වල පරිගනක ආශ්‍රයේ රැකියා සදහා කොච්චර සහතික තිබ්බත් අවසානයේ බලන්නෙ පලපුරුද්ද නිසා ) ලබා ගනිමින් ඉන්නවා.ඒ අතරෙ වෘත්තිය සුදුසුකමක් ලෙස තවත් කුමක් හෝ පාඨමාලවක් හැදෑරීමට ඔහුගේ අදහස වී තියනවා.එහිදී නැගුනු පැනය නම්කරන්නෙ මොකක්ද?දැනට කරගෙන යන මාර්ගයෙ පරතෙරටම යාමට පරිගනක ආශ්‍රිත වෘත්තිය සුදූසුකමක් (Microsoft certificate වැනි) සපුරා ගන්නවාද,එසේත් නැත්නම් පරාසය(Scoop ) වැඩි කරගැනීම සදහා CIMA,CIM වැන්නක් කරනවාද යන්න ඔහුට ඇති පැනයයි.දෙවැනි මාර්ගය වන CIMA වැන්නක් කිරීමට හිත ඇති ඔහු පවසන්නෙ එමගින් වඩා වැඩි පරාසයක රැකියා අවස්තා විවර වෙන බවය.ඔබේ අදහසුත් කියන්න,සමහරවිට එය ඔහුගේ අනාගතය සාර්ථක කිරීමට දායක වෙන්නත් පුලුවන්

ගායන තරු අභිශේකයේ මෞලිමංගල්‍යය හා සිහින සැබෑ කරන තාරකා පෙලහර

noreply@blogger.com (මද්දු) — Sun, 18 Apr 2010 02:26:00 +0000

ජන්ද උන්මාදය හා අවුරුදු උණුසුම මැකීයාමට මත්තෙන්ම තවත් උන්මාදයක් ලංකා රූපවාහිනි ආයතන මගින් පටන අරගෙන තිබේ.එනම් තරු බිහිකිරීමෙ තරග වල අවසන් භාගයයි.ලංකාවෙ තරු බිහි කිරීම අලුත් දෙයක් නොවුවත් එයට ඇති සාමන්‍ය මධ්‍යම පාන්තික ජනතාවගෙ ඇල්ම කිසිලෙසකින් ඈත් වී ඇතැයි සිතිය නොහැක.නමුත් මෙවර බොහෝ භෞතික සාධක හේතුවෙන් තරු බිහි කිරීමෙ තරග වලට ඇති ජනතා අවධානය අඩු වී ඇති බව පැහදිලිවම පෙනෙන්නට තිබෙ.තරගයෙ අවසන් වට වලට පැමිනෙන්නවු තරග කරුවන්ගෙ අනාගතය කෙසෙ වුවත්,අඩු තරමෙ තරග පැවත්වෙන කාලසීමාවෙවත් ඔවුන්ගෙ ජනප්‍රියත්වය(නියම වචනය ප්‍රසිද්ධිය )හිනිපෙත්තට යන්තම් පහලින් පැමිනීම සාමන්‍ය සංසිද්ධියකි.නමුත් මෙවර එය අපේක්ශිත මට්ටමට වඩා බෙහෙවින් පහල බව පිලිගනු මනාය.ඒ සදහා නාලිකා අයිතිකරුවන් කලබල නොවිය යුත්තෙ,මේ සදහා හේතුව ඔවුන්ට පැහැදිලි බැවිනි.කෙටියෙන්ම කීවොත් විවිධ පක්ශ පාට උදෙසා පෙනීසිට ඒ වෙනුවෙන් කතා කර මොල අවුල්කරගැනීමෙන් දින සතක් ඉක්ම යාමට පෙර ශරීරයෙ තෙල් මට්ටම හා සීනි මට්ටම සීග්‍රයෙන් ඉහල යාමට හේතුවන කටයුතු වල යෙදීමෙන් කය මෙන්ම මනසද හෙම්බත් වූ ප්‍රේක්ශක පිරිසකගින් මීට වැඩි යමක් බලාපොරොත්තු වීම සාධරණ නොවීම දැක්විය හැක.

කවුරු කෙසේ පැවසුවත් ලංකාවෙ ගයන තරු බිහි කිරීමෙ තරග අතුරින් ඉදිරියෙන්ම සිටින්නෙ තරගාවලි දෙකක් පමනි,එනම් සිරස සුපර් ස්ටාර්(SSS ) සහ දෙරණ ඩ්‍රීම් ස්ටාර්( DDS) පමනි. මෙයිනුත් සිරස සුපර් ස්ටාර් අනෙකට වඩා දශමයකින් හො ඉදිරියෙන් සිටින අතර එයට එහි ලංකාව තුල ඇති වැඩිමහලු භාවයත්,මොනදේ උනත් සිරස බලන නොසැලෙන ප්‍රෙක්ශක පිරිසත් හේතුවන බව මගෙ සිතුවිල්ලය.අද වන විට මෙවර SSS හි තරු සතරක් ඉතුරු වී ඇති අතර ඔවුන් විවිධ ගායන පරාසයන් හිමි ඔවුන්ට ආවේනික වූ ගායන විදි අනුගමය කරති.සතුටු විය යුත්තෙ මෙවනි එකිනෙකට වෙනස් ගායන පරාස හිමි වෙනස් සංගීත ක්‍රම නිවරදිව අදුනාගෙන ඔවුන්ව පමනක් අවසන් හතරදෙනා අතරට ගෙන එමට තරම් විචක්ශන බුද්ධියකින් හෙබි ජනතාවක් අප අතර සිටීම කෙරෙහිය(?).කාන්තා පක්ශය නියොජනය කරමින් කාන්තාවකුත්,ශාස්ත්‍රීය ගායනා වර්ණනා කරන්නන් වෙනුවෙන් තවත් අයෙකුත්,සාමන්‍ය මහජනතාව ප්‍රියකරන සරල ගායනා විශිශ්ට ලෙස ඉදිරිපත් කරන හදවතට සමීප(ජෝතිපාල ටයිප් )පුද්ගලයෙකුත් නවක පරපුර නියොජන කරන කෙස්වැටිය කඩා ගත් සහස්‍රකයෙ ගීත අපුරුවට ගායනා කරන තවත් අයෙකුත් ගෙන් සමන්විත් මේ තරු හතර දුටු විට එක්වරම මතකෙට නැගෙන්නෙ බහු ආගමික හා බහු ජාතික දිසාවක අපෙක්ශක ලයිස්තුවය.කාන්තා ජන්ද කඩා ගැනීමට කාන්තවකුත්,මුස්ලින් ජන්ද සදහා මුස්ලිම් ජාතිකයෙකුත්,වැදගත් යැයි සම්මත අයවලුන් උදෙසා බුද්ධිමතෙකුත් තොරා ගැනීම ජනතාවගෙ කැමත්ත නොවන අතර පක්ශයෙ කැමත්ත වේ,ජන්ද දායකයා කරන්නෙ ඔවුන්ට ලැබී ඇති විකල්ප අතුරින් එකක් තොරා ගැනීම පමනි.එසෙනම් මෙම තරග හරහා සිදු වන්නේද එයමද?කෙසේ වුවත් තරග කරුවන්ගෙ හැකියාව ගැන ප්‍රශ්නය ඇති වීමට නොහැක,ප්‍රශ්නය වන්නෙ ජනතාවගෙ කැමත්තට ලැබුනු වටිනාකම කොපමනද කියා පමනි.
දෙරණ ආයතනයෙ තරගයත් මීට දෙවනි නැත.අහිංසක වෙස්මුහුන පැලද සිටියද SMS generatorහි countඑක වැඩි කර ගැනීමට උපක්‍රමයක් යොදා නොගැනිවියැයි සිතිය නොහැක.ඇත්ත වශයෙන්ම තරගකාරී වෙලද සම්ප්‍රදාය හමුවේ අහිංසකයා යනු ඩාවින්ගෙ න්‍යාය අනුව ශ්‍යයවී යාමට වඩාත්ම ඉඩක් ඇත්තාය.ලබන සෙනසුරාදා පැවත් වීමට නියමිත DDSහිද කාන්තා නියොජනයක්,ශස්ත්‍රිය නියොජනයක් හා රොක් ගායන විදියෙන් තරුණ සිත්( sms ?) ඇද බැද ගත හැකි නියොජනයත්ද ඇතුලත්ය.

එක් අතකින් මෙය සාධරනය,සංගීත බුද්ධිය අවම බහුතරයක් බාහිර ආටොපයට රැවටි බිහි කරන්නවු තරු වල අනාගතය බෙහෙවින් අදුරුය.එවන් අවස්තාවක නියම අවශ්‍යයතාව අදුරාගෙන ඔවුන්ව ඉදිරියට ගෙන ඒම පැසසිය යුත්තකි.කාරනාව එසේනම් කිමටද මේ යථාර්ථවාදී වචන, කෙටි පණිවිඩ මනාප.කෙසේ වුවත් මෙම සම්ප්‍රදායන් වෙනස් කිරීමට උත්සාහ කිරීම බීරි අලින්ට වීනා වැයීමක් වැන්නය.සති අන්තයේදි ගීතයක් රස විදීමට ඔවුන් ලබාදී ඇති අවස්ථාව අගය කලයුතු අතර ඒවා රස විදින අතරතුර මේවහි යථාර්තය නියම ලෙස වටහාගැනීමද විවෘත මනසකින් යුතුවද සිටීමෙන් වඩා වැඩි රසවින්දනයක් ලබා ගත හැකි බව මාගෙ විශ්වසයයි.

ආරම්බයක්....

noreply@blogger.com (මද්දු) — Tue, 13 Apr 2010 13:56:00 +0000

අපිට එදිනෙදා ජීවිතයෙ දකින්න වෙන දේවල් එකිනෙකාට හාත්පසින්ම වෙනස්.ඉතින් අපට ඒ සියලු අත්දැකීම් එකිනෙකා අතරෙ හුවමාරු කරගන්න පුලුවන් නන් අපිට ඒවා ජීවිතයෙ කවද හරි මොකට හරි ප්‍රයොජනවත් වෙවි.මම කාලයක් ජාලයෙ සැරිසරමින් ඔබ සැමගෙ අත්දැකීම් මම දැනගත්තා,ඒව කියෙව්ව,බොහොවෙලාවට එවයින් නව අදහස් මගෙ මනසට එකතු වුනා.නමුත් කාලයක් යද්දි මට සිතුන මගෙනුත් යමක් ජාලයට නැත්නම් මගෙ මිතුරන්ට දෙන්න අවශ්‍යයි කියා.ඒ අදහස මත ආරම්බ උන ලියවිල්ලක් තමයි "වැට නැති කට".
අපි ඔක්කොම අහල තියනවනෙ පැරණි උපහැරනය,රට වට කර වැට බැන්දත්,කට වට කර වැට බදින්න බැරි කතාව.කට වට කර වැට බදින්න පුලුවන් නන් හොදයි කේලාම්,ඕපාදුප සහ අනෙක් නොයෙක් සම්ප්‍රප්පලාබ පිටවන කටක් නන්.නමුත් අදහස් ප්‍රකාශ කිරීමෙ ප්‍රබලම මාධ්‍යය වන කට එහෙමත් නත්නම් වචනයට වැට කඩුලු බැදීම හො එසේ බැදීමට උත්සාහ කිරීම බලවත් වැරද්දක්.සෑම පුරවැසියෙකුටම තම අදහස් ප්‍රකශ කිරීමෙ පූර්ණ නීතිමය හා සදාචරාත්මක අයිතියද එවහි ගුණදොස් විචාර විවේචනය කිරීමෙ අයිතියද උපතින්ම හිමිවෙනව.ඉතින් මිතුර මාගෙ මේ වෑයමත් එවන්නක්.ඔබේද අයිතිය හා යුතුකම වන්නෙ අන්‍යයන්ගේ අදහස් වලට ගරු කරමින් මාගෙ ගුණදොස් විචාලමින් මාව දිරිමත් කිරීමයි මිතුර,ඔබට ස්තුතියි.