അമ്മ മലയാളം സാഹിത്യ മാസിക

ആദരാഞ്ജലികള്‍!...

2013-07-31T06:15:00.000-07:00

ഇത് പൊട്ടില്ല!.
ഇത് ചില്ലല്ല!
ഇത് ലോഹമാണ്!.
ഇത് ആറന്മുള കണ്ണാടി!.

അമ്മയ്ക്ക് ഒരു സ്മാരകം

2013-02-08T01:19:00.000-08:00

അമ്മ മരിച്ചിട്ടേറെയായി
ആദ്യമാദ്യം ഓര്‍മ്മ പെരുകി
കണ്ണീര്‍ തടാകം കരകവിഞ്ഞു
ദിവസങ്ങള്‍ മ്ലാനമായിലോകത്തില്‍ ഒറ്റയായെന്നു
ഉള്‍വലിഞ്ഞു.
വേനലിലെ ഒറ്റമരത്തിന്റെ
ഉപമ നിര്‍മ്മിച്ചു.
വാക്കുകള്‍ വിതുമ്പിവീണു
എത്രവേഗം ചിദാകാശം തെളിഞ്ഞു.
ദിവസങ്ങള്‍ പറന്നകന്നു.
സന്തോഷം പതഞ്ഞു.
മറവിയുടെ പുകമഞ്ഞ്‌
പ്രചോദനമായി
അമ്മ ഒഴുകിയകന്നു.
പക്ഷെ ഞാന്‍ നന്ദി കെട്ടവനല്ല
ഓര്‍മ്മയുടെ വാര്‍ഷികത്തില്‍
ഫേസ്ബുക്കില്‍ ഒരു അക്കൌണ്ട് എടുത്തു.
പാസ് വേഡായി കൊടുത്തു
'എന്റെ അമ്മയുടെ പേര് .'

ജാതി ഭ്രാന്തരുടെ സ്വന്തം നാട്

2012-08-14T04:15:00.000-07:00

എഴുതിയത് മുഹമ്മദ് സഗീര്‍ പണ്ടാരത്തില്‍

പണ്ടിവിടെ
വോട്ടെത്രയെന്ന്
ചൊല്ലിയിരുന്നത്,
മാർക്കിസ്റ്റുകോൺഗ്രസ്സുബിജെപി-
യെന്നായിരുന്നെങ്കിലിന്നത്;
നായരീഴവലത്തീങ്കത്തോലിക്ക-
സുറിയാനിവഹാബിമുജാഹിദ്
സുന്നിയെന്നെല്ലാമാണ്!
ഇത് ജാതി ഭ്രാന്തരുടെ സ്വന്തം നാട്!.

കാറ്റില്‍ ഉയരെ ...

2012-05-29T23:36:00.002-07:00

നല്ല കാറ്റുള്ള ദിവസമായിരുന്നു അന്ന്..

പോസ്റ്റുമാന്‍ മുട്ടിയപ്പോള്‍ തന്നെ അമ്മ വാതില്‍ തുറന്നു .കൈയ്യില്‍ വാങ്ങുന്നതിന് മുന്‍പ് തന്നെ കാറ്റ് കത്തിനെ വീടിനകത്തേക്ക് പറത്തിക്കളഞ്ഞു...വാതില്‍ വലിച്ചടച്ച് അമ്മ കത്തിന് പിറകെ ഓടിയെത്തി ...

ജനല്പാളികള്‍ അടച്ചും തുറന്നും കളിക്കുകയായിരുന്ന കുഞ്ഞു ടോം അമ്മയെ നോക്കി "ഞാന്‍ പുറത്തു പോയി കളിച്ചോട്ടേ?"

"സൂക്ഷിക്കണം... പുറത്തു ഭയങ്കര കാറ്റാണ്‌."മുഴുവന്‍ കേള്‍ക്കാന്‍ കാത്തു നില്‍ക്കാതെ ജനലരികില്‍ നിന്നും ഊര്‍ന്നിറങ്ങിയ ടോം വാതില്‍ ഒച്ചയോടു കൂടി വലിച്ചു തുറന്നു. കാറ്റ് വീടിനകത്തെയ്ക്കു പാഞ്ഞ് കയറി അമ്മയുടെ കൈയ്യിലെ കത്തിനെ വീണ്ടും പറത്തിക്കളഞ്ഞു.

"ഓ..."അമ്മ കത്തിന് പിറകെ ഓടുമ്പോള്‍ കുഞ്ഞ്‌ ടോം വീടിനു പുറത്തു കടന്നു വാതില്‍ ആഞ്ഞടച്ചു.
ശക്തമായ കാറ്റില്‍ ആടി ഉലയുന്ന മരങ്ങളില്‍ നിന്നും ഇലകള്‍ പറന്ന് വരുന്നുണ്ടായിരുന്നു ., പച്ചയും,മഞ്ഞയും ചുവപ്പും കലര്‍ന്ന ഇലകളുടെ കാറ്റ് ...
അവ വീടിന്റെ മേല്‍ക്കൂരയില്‍ നിന്നു മുറ്റത്തെയ്ക്കും തിരിച്ചും പറന്ന് കളിച്ചു ...
ഒരു ചെറിയ ചുഴിയില്‍ പെട്ട് കറങ്ങി കൊണ്ടെന്ന വണ്ണം കുറെ ഇലകള്‍ പരസ്പരം കലപില കൂട്ടികൊണ്ട് ആഹ്ലാദത്തോടെ തെരുവിലേക്ക് ഒഴുകി പോകുന്നുണ്ടായിരുന്നു.
ടോം അവയെ ആഹ്ലാദത്തോടെ നോക്കി നിന്നു
" ഒരു ഇലയായിരുന്നെങ്കില്‍ എനിക്കും അവയോടൊപ്പം പറന്ന് കളിക്കാമായിരുന്നു.." ഇങ്ങനെ പറഞ്ഞു കൊണ്ട് കുഞ്ഞ്‌ ടോം പറന്ന് നടക്കുന്ന ഇലകളുടെ നിറങ്ങളുടെ ഇടയിലേക്ക് ഉയര്‍ന്നു പോയി !!

"ടോം നിന്റെ കമ്പിളി കുപ്പായമിടൂ.." അമ്മ അവനെ ഉറക്കെ വിളിച്ചു കൊണ്ട് വരാന്തയിലേക്ക്‌ വന്നു .പക്ഷെ ടോം മുറ്റത്ത്‌ ഉണ്ടായിരുന്നില്ല ."ടോം ..."അമ്മ അവനെ കൂടുതല്‍ ഉച്ചത്തില്‍ വിളിച്ചു.

കുഞ്ഞ്‌ ടോമാകട്ടെ ഒരു ഇലയായി മാറിക്കഴിഞ്ഞിരുന്നു.തെരുവിലെ മറ്റു ഇലകള്‍ക്കൊപ്പം പറക്കുമ്പോള്‍ അവന്‍ കാറ്റിനോടൊപ്പം ഉയരുകയും താഴുകയും ചെയ്തു .നിര്‍ത്തിയിട്ട വണ്ടികളിലും ഇലക്ട്രിക് പോസ്റ്റുകളിലും അവന്‍ ഉരുമ്മി.ഒരു പേരമരത്തിന്റെ ഇല അവനെ തൊട്ടു കടന്നു പോയി.

ഇത് കൊള്ളാമല്ലോ .. അവന് തോന്നി .പേരയുടെ തളിരിലയുമായി ഒരു പറക്കല്‍ മത്സരം ആയാല്‍ എന്താ...?
അവന്‍ പേരയിലയുടെ തൊട്ടു പിറകേ കുതിച്ചു പറഞ്ഞു.തുടുത്ത പച്ച നിറമായിരുന്നു അതിന്.അവന്റെ ദേഹത്തെ പച്ച ഞരമ്പുകള്‍ തെളിഞ്ഞു കാണാമായിരുന്നു.സൂര്യന്റെ വെളിച്ചം കുഞ്ഞ്‌ ടോമിലയുടെ കണ്ണുകളില്‍ തട്ടി. അവര്‍ രണ്ട് പേരും ഉറക്കെ ചിരിച്ചു കൊണ്ടിരുന്നു.
"നമ്മള്‍ എവിടെക്കാണ്‌ പോകുന്നത് ..?" ടോം കൂട്ടുകാരനോട് ചോദിച്ചു.
"എവിടെക്കായാലെന്താ ..?"കൂട്ടുകാരന്‍ പറഞ്ഞു "പോകാവുന്നിടത്തോളം നന്നായി രസിക്കണം എന്നെ എനിക്കുള്ളൂ "
"അങ്ങനെ അല്ല കൂട്ടരേ" അപ്പോള്‍ അവരോടൊപ്പം പറന്നെത്തിയ പ്ലാവില പറഞ്ഞു."യാത്ര ചെറുതായിരിക്കും പക്ഷെ അതിനെ ആവുന്നത്ര മനോഹരമാക്കുന്നതിലാണ് കാര്യം..മാത്രവുമല്ല അവസാനം എന്നത് വേറെ പലതിന്റെയും തുടക്കവും ആയേക്കാമല്ലോ "
'ഒരു ഇലയ്ക്ക് ചിന്തിക്കാന്‍ കഴിയുന്നതിലും ഏറെ വലിയൊരു കാര്യം' കുഞ്ഞ്‌ ടോമില ആലോചിച്ചു
"നമ്മള്‍ എവിടെയാണ് അവസാനം എത്തുക?" അവന്‍ വീണ്ടും ചോദിച്ചു.

"കാറ്റ് ഈ ദിശയിലാണെങ്കില്‍ നഗരത്തിലെ ചവറു കൂനയില്‍ ആണ് നമ്മള്‍ എത്തുക " പ്ലാവില പറഞ്ഞു .
"അയ്യേ... എനിക്കങ്ങോട്ട് പോണ്ടാ .." ടോം പറഞ്ഞു
"ങെ ചവറു കൂനയിലെക്കോ അവിടെ എന്റെ കുറെ കൂട്ടുകാര്‍ ഉണ്ടല്ലോ നീ എന്റെ കൂടെ വാ ..നല്ല രസമായിരിക്കും " പേരയില ടോമിനെ വിളിച്ചു.

"നോക്ക് ..ഈ ദിശയിലേക്കു പറന്നാല്‍ കാറ്റ് നമ്മളെ മുകളിലേക്ക് ഉയര്‍ത്തും.ഇത് വരെ കാണാത്ത പല കാഴ്ചകളും നമുക്ക് കാണാം " തന്റെ ചുവപ്പും മഞ്ഞയും ഇട കലര്‍ന്ന ശരീരം വേറൊരു ദിശയിലേക്കു തിരിക്കാന്‍ ശ്രമിച്ചു കൊണ്ട് പ്ലാവില പറഞ്ഞു.
ടോം എന്തു വേണമെന്ന് ചിന്തിച്ചു.കാറ്റ് അപ്പോഴും അവരെ പറത്തുകയായിരുന്നു.
"ചവറുകൂനയ്ക്ക് അരികില്‍ പുതിയ കൂട്ടുകാരോടൊപ്പം കളിക്കാന്‍ എന്തു രസമാണെന്നോ "പേരയില അവനോടു പറഞ്ഞു.
"അത് ശരിയാണ് ..പക്ഷെ മുകളില്‍..." ടോം തല ഉയര്‍ത്തി നോക്കി..കാറ്റ് അവന്റെ മുഖത്തേയ്ക്ക് ആഞ്ഞു വീശി ..കണ്ണു തുറക്കാന്‍ പോലും അവന്‍ പ്രയാസപ്പെട്ടു.
"ഓ അല്ലെങ്കില്‍ തന്നെ ഈ മുടിഞ്ഞ കാറ്റില്‍ ദിശ മാറ്റുന്നതൊന്നും അത്ര എളുപ്പമാവില്ല " പേരയില വീണ്ടും പറഞ്ഞു
"ശരി തന്നയാണ് കൂട്ടുകാരാ...,നമുക്ക് വേഗം ചവറു കൂനയുടെ അരികില്‍ എത്താം... " അവന്‍ പേരയിലയോടൊപ്പം പറക്കാന്‍ തീരുമാനിച്ചു.കാറ്റും അവരെ അങ്ങോട്ട്‌ തന്നെയാണ് പറത്തിയിരുന്നത് .
പ്ലാവിലയാകട്ടെ അവരോടൊപ്പം ചേരാതെ കെട്ടിടങ്ങളുടെ ഇടയിലേക്ക് ചെരിഞ്ഞു പറന്നു.കാറ്റ് അതിനെ പെട്ടന്ന് ഉയരങ്ങളിലേക്ക് പറത്തി .
" ഹായ് ..ഇവടെ നിന്നും കാഴ്ചകള്‍ കാണാന്‍ എന്തു രസമാണെന്നോ..വേഗം എന്നോടൊപ്പം വരൂ .."ടോമും പേരയിലയും അയാള്‍ക്ക്‌ ചെവി കൊടുത്തില്ല .

"നോക്ക്... എനിക്ക് ചവറു കൂന കാണാന്‍ ഉണ്ട്... " പ്ലാവില മുകളില്‍ നിന്നു വിളിച്ചു പറയുന്നുണ്ടായിരുന്നു. " ഹേയ് അവിടെ എന്തോ കുഴപ്പമുണ്ടല്ലോ..എനിക്ക് പുക കാണാനുണ്ട്...അയ്യോ ! അവിടെ തീയുണ്ട്‌ ..അവര്‍ പറന്നു വരുന്ന ഇലകളെ അടിച്ചു കൂട്ടി തീയിലേക്ക് ഇടുകയാണ് !! " പ്ലാവിലയുടെ ശബ്ദത്തില്‍ പേടി ഉണ്ടായിരുന്നു.
"ഓ.. എനിക്കൊന്നും കാണാന്‍ ഇല്ല... ഈ ബോറന്മാരുടെ ഒരു കാര്യം ..അവര്‍ക്ക് ഒരു കാര്യത്തിലും രസം കാണാന്‍ അറിയില്ല... എല്ലാത്തിനും പേടിയും.."പേരയില ഉറക്കെ ചിരിച്ചു കൊണ്ട് പറഞ്ഞു .
"ശരി തന്നെ " കുഞ്ഞ്‌ ടോമിലയും അവനോടു യോജിച്ചു.
ചവറു കൂനയ്ക്ക് ചുറ്റും ഒരു മതിലുണ്ടായിരുന്നു. 'വേഗം അവിടെ എത്തി കളിക്കണം' അതായിരുന്നു അവന്റെ മനസ്സില്‍.

"ഏയ്‌ പതുക്കെ .." കുഞ്ഞ്‌ ടോമിന്റെ അമ്മയുടെ ശബ്ദമായിരുന്നു അത് "ചവറു കൂനയുടെ അടുത്ത് കളിക്കരുതെന്ന് നിനക്കറിയില്ലേ അവിടെ നിന്നും പുക വരുന്നത് കണ്ടോ ? അവിടെ തീയുണ്ടാകും ..." ഓടി വരുന്നതിനിടയില്‍ അവര്‍ വിളിച്ചു പറഞ്ഞു .
പേരയില മതില് കടക്കാന്‍ ശ്രമിക്കുകയായിരുന്നു.ടോം അതിന്റെ ഒപ്പമെത്താന്‍ ശ്രമിച്ചു...
പക്ഷെ അപ്പോഴേയ്ക്കും അമ്മ അവര്‍ക്കരികില്‍ എത്തി
അവര്‍ ആ ഇല കയ്യിലെടുത്തു.
" ഇനി വീട്ടില്‍ എത്തും വരെ ഇതിനൊന്നും പറ്റാതെ നോക്കണം" അവര്‍ ആ ഇല കുഞ്ഞ്‌ ടോമിന്റെ പോക്കറ്റില്‍ തിരുകി കൊടുത്തു. ടോം അമ്മയെ നോക്കി ചിരിച്ചു.അമ്മയുടെ കയ്യും പിടിച്ച് വീട്ടിലേക്കു നടക്കുമ്പോള്‍ അവന്‍ തിരിഞ്ഞു നോക്കി
"ആ പ്ലാവില ഇപ്പോള്‍ എവിടെ എത്തിക്കാണും....അവന്‍ കണ്ട കാഴ്ചകള്‍ ഇനിയൊരിക്കല്‍ ഞാനും തീര്‍ച്ചയായും കാണും !! "

Original :High and Lifted Up
by Mike Krath

വിവര്‍ത്തനം : ബി മധു

പ്രണയ പാത

2012-04-29T18:39:00.004-07:00

എത്ര നടന്നിട്ടും

പുതുമ പോകാത്തതാണ്

നിന്നിലേക്കുള്ള വഴികള്‍

പെയ്തു തോരാത്ത

ഇലക്കണ്ണുകള്‍......

ഉമ്മകള്‍ ഒളിപ്പിച്ചു വെച്ച

നിഴലിടങ്ങള്‍.......

പ്രണയഗന്ധം ചുരത്തുന്ന

ചെമ്പക മുടിക്കാടുകള്‍....

ഒരിയ്ക്കലും നിന്നിലേക്ക്‌

എത്താതിരിക്കണേ

എന്നാണു

എന്റെ പ്രാര്‍ത്ഥന !

ഗ്രഹണം

2012-02-14T02:03:00.000-08:00

എന്റെ നിഴല്‍ വീണു ആണോ
നിന്റെ മുഖം മറഞ്ഞതെന്നു
തര്‍ക്കിച്ചു തര്‍ക്കിച്ചു
രാവു തീര്‍ന്നപ്പോഴേക്കും
പുലരിവണ്ടിയുടെ കൂക്ക് കേട്ടു.
തിരക്കില്‍ ഭ്രമണം തുടരാം നമുക്കിനി
അടുത്ത ഗ്രഹണകാലം വരേയ്ക്കും.

പുസ്തകവിചാരം: അനന്ത പദ്മനാഭന്റെ മരക്കുതിരകള്‍

2011-12-26T00:19:00.000-08:00

പുസ്തകവിചാരം: അനന്ത പദ്മനാഭന്റെ മരക്കുതിരകള്‍: പുസ്തകം : അനന്ത പദ്മനാഭന്റെ മരക്കുതിരകള്‍ രചയിതാവ് : ഷാഹിന.ഇ.കെ പ്രസാധകര്‍ : പൂര്‍ണ്ണ പബ്ലിക്കേഷന്‍സ് , കോഴിക്കോട് അവലോകനം : റഹ്മാന്‍ ...

ബലിമൃഗം!!

2011-11-01T07:12:00.001-07:00

രാധയോ,മേരിയോ ,ഫാത്തിമയോ ?
നിനക്കെന്തു പേര്‍ ചൊല്ലിയും
വിളിച്ചീടാം !!
കാരണം ,അവളൊരു സ്ത്രീയെന്ന
പരമാര്‍ത്ഥത്തില്‍ ഇല്ല തന്നെ
ജാതിയും,ഉപ ജാതിയും!!

പെറ്റുവീഴുന്നേരം ,പെണ്ണാണേല്‍
വല്ലവനു മുള്ളതെന്ന പതം
പറച്ചിലിന്നൊടുവില്‍
കുഞ്ഞു സ്വരത്തില്‍
കാറിയാണവളുടെ വരവ്!!
നേര്‍ച്ചകോഴിയെന്ന പോല്‍
തീറ്റ കൊടുത്ത് വളര്‍ത്തലാണിനി!

മുഴുത്ത തീറ്റ കൊടുക്കിലോ
മൂപ്പെത്തും മുന്നേ മൂപ്പെത്തുമെന്നതോന്നലാല്‍
-ആണ്‍കുഞ്ഞിനും താഴെ തട്ടില്‍
വീറോടെ- കട്ടുറുമ്പ് പോല്‍കടിച്ചു
കരേറേണമിനി!

അഴകോലും പെണ്‍പിറാവായ്‌പറക്കുവാന്‍ ,
ഇനിയും കടമ്പകള്‍ഏറെ കടക്കണം !
ഇടന്നാഴിയില്‍ പിറക്കും കരങ്ങളെ
തട്ടി മാറ്റുവാന്‍ മനമിനിയും കടുക്കണം !

ഇനിയും പഠിക്കണമെന്നാശയെ
പത്തു കടന്നാലും ,മജിസ്ട്രേറ്റായാലും
കൈപിടിക്കാന്‍ ആണൊരുത്തന്‍ വന്നല്ലേ ഒക്കൂ !
എന്ന ചോദ്യത്തിന്നൊടുവില്‍
കിട്ടിയവനെ കെട്ടാന്‍ തയ്യാറെടുക്കണം !
കന്യയായ്‌ ജീവിച്ചു കൊതിയാറും മുന്നേ
അമ്മയായ്‌ ,അമ്മമ്മയായ്‌, മുത്തശ്ശിയായ്‌
സ്വപ്നത്തിന്‍ നിറമേതുമില്ലാത്ത ഇരുളിന്‍ അറയില്‍ ,
ബലിയായ്‌തേങ്ങുമോരാത്മാവായ്‌
അലിഞ്ഞങ്ങു തീരേണം!!

2011-10-24T05:54:00.000-07:00

ഒരു ലണ്ടന്‍ ഡയറി ...! / Oru London Dairy ...!

ലണ്ടന്മാര്‍ മണ്ടനില്‍

ഭാഗം ഒന്ന്.

ഒരു ലണ്ടന്‍ ഡയറി :-
( ഭൂലോകത്ത് ബൂലോഗം ഉണ്ടാകുന്നതിന് മുമ്പ് , അതായത് കുറച്ച് കൊല്ലങ്ങൾക്ക് മുമ്പ് , ലണ്ടനിൽ എത്തിപ്പെട്ട ഒരു എ‘മണ്ടൻ എഴുതിയ ഡയറി കുറിപ്പുകളിലെ കുറച്ച് ഭാഗങ്ങളാണ് ഇത്തവണ ഞാനിവിടെ കട്ട് - പേസ്റ്റ് ചെയ്ത് വെക്കുന്നത് കേട്ടൊ
ബോറഡിച്ചാലും ഇല്ലെങ്കിലും ഇതങ്ങട് ജസ്റ്റ് ഒന്ന് വായിച്ചുനോക്കൂ... )

ലണ്ടനിൽ അടുത്തവർഷം നടക്കുന്ന ഒളിമ്പിക്സിന്റെ സ്റ്റേഡിയങ്ങളിലൊന്ന്...

അന്ന് ഒരു ഞായറാഴ്ച്ച ആയിരുന്നു.. ശനിയാഴ്ച്ചയുടെ പിറ്റേ ദിവസം ..
ജെറ്റിന്റെ ഒരു ബോയിങ്ങ് വീമാനം ...
ലോകത്തിലെ ഏറ്റവും തിരക്കേറിയ ലണ്ടൻ ഹീത്രൂ എയർ പോർട്ടിൽ
ഓരോ മൂന്നുമിനിട്ട് കൂടുമ്പോഴും , ലോകത്തിലെ എല്ലാ പറവയാന കമ്പനികളുടെയും ജെറ്റുകള്‍ താഴുകയും , പൊന്തുകയും ചെയ്തുകൊണ്ടിരിക്കുന്നയിടത്ത്...
റണ്‍വ്വേയില്‍ , കിഴക്കേലെ കണ്ടന്‍ പൂച്ചയേ പോലെ
നാലുകാലില്‍ നിലത്തു ചാടി ഇറങ്ങിയിട്ട് ഓടിവന്ന് നിന്നു ...
സമയം പുലര്‍ച്ചെ നാലുമണി കാണിക്കുന്നുണ്ടെങ്കിലും എങ്ങും പകലിന്റെ വെട്ടം ..
ഓ.. ഇതാണല്ലേ സൂര്യന്‍ അസ്തമിക്കാത്ത രാജ്യം !
ശനിയാഴ്ചായുടെ ഹാങ്ങ്‌ ഓവറില്‍ നിന്നും ഈ മഹാനഗരം ഉണര്‍ന്നിട്ടില്ല എന്ന് തോന്നുന്നു ..
ആകെ ഒരു നിശ്ശബ്ദത ...
അനേകം കൌണ്ടറുകള്‍ സ്ഥാപിച്ചിട്ടുള്ള ചെക്ക് ഔട്ട് കളില്‍ കൂടി അര മണിക്കുറിനുള്ളില്‍ പുറത്ത്‌ .

ലണ്ടൻ ഹീത്രോ എയർപോർട്ട്

വളരെ ഔപചാരികതയോടെ ഒരു ചൈനീസ് സുന്ദരി ഏര്‍പ്പാടാക്കി തന്ന ടാക്സിയില്‍
പായുമ്പോള്‍ ഉള്ളില്‍ ചെറിയൊരു ഭയം ...
ഡ്രൈവര്‍ തൊപ്പിയും,കൂളിങ്ങ്ഗ്ലാസും ധരിച്ച ഒരു ആഫ്രിക്ക കാരനാണെന്നുതോന്നുന്നു ?
കമ്പ്യൂട്ടറും ,ബ്ലൂചിപ്പും കൊണ്ടു അമ്മാനമാടുന്ന മോഹന്‍ തോമസിന്റെ
ഡല്‍ഹിയില്‍ നിന്നും വന്ന ഞാനെന്തിനു പേടിക്കണം അല്ലേ ?
തനി സായിപ്പുസ്റ്റൈലില്‍ ഇംഗ്ലീഷില്‍ ഒരു ശരാശരി മലയാളിയുടെ
സ്ഥിരം കത്തികള്‍ ഞാനവനുമേല്‍ പ്രയോഗിച്ചു ...
സ്ഥലത്തെത്തിച്ചു വാടക കൊടുത്തപ്പോള്‍
അടിവയറ്തൊട്ടൊരാളല് ‍(നാല്‍പ്പതു പൌണ്ട് -മൂവ്വയിരത്തില്‍ മേലെ രൂപ ).
"ശരി എന്നാല്‍ ....പിന്നെ കാണാം ...ഭായ്"
ഡ്രൈവറുടെ വക ഒരു യാത്രാമൊഴി !
എടാ മഹാപാപി .....
"മലയാളിക്ക് മലയാളി പാര" എന്നു പറയുന്നത് ഇതിനെയാണ് ..അല്ലേ

ഇവിടെ വന്നിട്ട് ആദ്യദിവസങ്ങളില്‍ പ്രഭാതഭക്ഷണം ഹോട്ടലില്‍ നിന്നായിരുന്നു ...
ഫുള്‍ ഇംഗ്ലീഷ് ബ്രേക്ക്ഫാസ്റ്റ് --- ഒരു പ്ലേറ്റ് നിറയെ കുറെ വിഭവങ്ങള്‍ ...
ചിലതിനു ഭയങ്കര പുളി മാത്രം , ചിലതിനു എരിവും, മറ്റു ചിലതിനു ഉപ്പും ഒക്കെ ...
ഞാന്‍ കുറച്ചു ബുദ്ധിമുട്ടിയാനെന്കിലും ഓരോന്നായി കഴിച്ചു .
ഇങ്ങനെ കുറെ ദിവസങ്ങള്‍ കഴിച്ചു കഴിഞ്ഞു ...

ഒരു ദിവസം ഒരു മദാമ്മ കഴിക്കുന്നത്‌ കണ്ടപ്പോഴാണ് ഞാന്‍ മനസ്സിലാക്കിയത് ......
അത് ഓരോന്നായി കുറേശ്ശെ എടുത്തു , കത്തിയും ഫോര്‍ക്കും
ഉപയോഗിച്ചു ശബ്ദം പുറപ്പെടുവിക്കാതെ "മിക്സ് " ചെയ്താണ് കഴിക്കേണ്ടിയിരുന്നത് എന്ന് !
പിറ്റേ ദിവസം അങ്ങിനെ കഴിച്ചു നോക്കി ...
ഹാ നല്ല ടേസ്റ്റ് !

അങ്ങിനെ ദിവസങ്ങള്‍ കഴിയും തോറും
പലകാര്യങ്ങളും പഠിക്കുവാന്‍ തുടങ്ങി ...
കൂട്ടത്തില്‍ മണ്ടത്തരങ്ങളുടെ എണ്ണവും കൂടാന്‍ തുടങ്ങി ....

ഒരുദിവസം" ലഞ്ച്‌ ടൈം "ആകാറായപ്പോള്‍ഒരു സഹപ്രവര്‍ത്തകന്‍ എന്നോടു ചോദിച്ചു

"Are you coming to Barbeque ?"

"No... No... am not coming" ഞാന്‍ പറഞ്ഞു .
ഛെ...
അത്തരം വൃത്തികെട്ട പരിപാടിക്കൊന്നും എന്നെ കിട്ടില്ല ...ഞാന്‍ മനസ്സില്‍ പറഞ്ഞു .
ഓഫീസിലുള്ള എല്ലാവരും പോകുന്ന കണ്ടപ്പോള്‍ ...
ഞാന്‍ dictionery എടുത്തു നോക്കി .
ബാര്‍ബിക്ക്യൂ ഒരു ഭക്ഷണം കൊടുക്കുന്ന പരിപാടി ആണെന്ന് അപ്പോള്‍ ആണ് മനസ്സില്‍ ആയത്‌ . പിന്നീട് കുറച്ചു ചമ്മിയിട്ടാനെങ്കിലും , ഞാനും പതുക്കെ പോയി കേട്ടോ ....

ഓഫീസിലെ സായിപ്പുമാര്‍ പലതമാശകളും എന്നോടു പറഞ്ഞിട്ട് ...ചിരിക്കും .
ഇവിടെ ഉള്ള സായിപ്പുമാര്‍ക്ക് നമ്മുടെ പോലെ ഇംഗ്ലീഷ് ശരിക്കും അറിയാത്തത്
കൊണ്ട് എനിക്കത് മനസ്സിലാക്കാന്‍ ബുദ്ധിമുട്ടാണ് !
ഒന്നും മനസ്സില്‍ ആയില്ലെങ്കിലുംഞാനും കൂടെ ചിരിക്കും ...
അല്ലെങ്കില്‍ അവര്‍ വിചാരിക്കും എനിക്ക് ഇംഗ്ലീഷ് അറിയില്ല എന്ന് ...
പക്ഷെ ഞാന്‍ മറുപടി പറയേണ്ട തമാശകളോമറ്റോ ആണെങ്കില്‍ഞാന്‍ പെടും !
അപ്പോള്‍ എന്റെ ചിരി പതുക്കെ ,മോഹന്‍ലാലിന്റെ മാതിരി ചമ്മിയചിരിയായി മാറും ..!

ഞാന്‍ ജോലി ചെയ്യുന്ന കെട്ടിടത്തിലെ റിസപ്ഷിനിസ്റ്റ്‌
എന്നെ കാണുമ്പോള്‍ എന്നും ഒരു വല്ലാത്ത ചിരി ...
ആദ്യം ഞാന്‍ കരുതി ആ മദാമ്മ കുട്ടിക്ക് എന്നോട് എന്തോ ഇത് തോന്നിയിട്ടാണ് എന്ന് ...
പിന്നീടാണ് മനസ്സിലായത് ഞാന്‍ ചെയ്ത ഒരു ബഹുമണ്ടത്തരം
ഓര്‍ത്താണ് ആ കുട്ടി ചിരിച്ചുകൊണ്ടിരിക്കുന്നത് എന്ന് ....(തല്ക്കാലം അത് ഇവിടെ പറയുന്നില്ല - എന്റെ മാനം പൂവും !)

പിന്നെ മിക്കവാറും ദിവസങ്ങളില്‍ എനിക്ക് ഇവിടെ
ആരുടെയെങ്കിലുംകൈയ്യില്‍ നിന്നും എന്തെങ്കിലും കിട്ടും !
ആദ്യദിവസം തന്നെ ഭൂമിക്കടിയില്‍ കൂടി പോകുന്ന ട്യുബുട്രെയിനില്‍
നമ്മുടെ നാട്ടിലെ ബസ്സിലെ പോലെ ചവിട്ടി ക്കൂട്ടി നടന്നതിനു ഒരു മദാമ്മ എന്റെ കാലില്‍ ആഞ്ഞുചവിട്ടി.
നമ്മുടെ ഗാന്ധിജിക്ക് സൌത്ത് ആഫ്രിക്കയില്‍ വച്ചു കിട്ടിയ പോലെ !

ഒരു ട്യൂബ് ട്രെയിൻ / അണ്ടർ ഗ്രൌണ്ട് തീവണ്ടി

പിന്നെ ഒരു ദിവസം "ടേക്ക് അവേയ് " ഭക്ഷണം വാങ്ങിയിട്ട് ...
തുക , നമ്മുടെ നാട്ടിലെ ചായക്കടയിലെ പോലെ മേശയില്‍ എറിഞ്ഞു കൊടുത്തതിന്,
ഇവിടെ എമൌണ്ട് കൈയ്യില്‍ കൊടുക്കണമത്രെ !

എന്തിന് പറയുന്നു ...
ഇവിടെ ടോഇലെറ്റ് കഴുകാന്‍ വന്ന കറുമ്പി വരെ എന്നെ തെറി വിളിച്ചു !
അവര്‍ ടോയിലെറ്റ് കഴുകികൊണ്ടിരുന്നപ്പോള്‍ ,ഞാന്‍ ആയത്‌ ഉപയോഗിച്ചത് തെറ്റാണത്രെ!
ഓ ..എത്രയെത്ര ആചാരങ്ങളും ,നിയമങ്ങളും .....
പിന്നെ എന്ത് തെറ്റിനും ഇവര്‍ തന്നെ കണ്ടുപിടിച്ചിട്ടുള്ള
സോറി എന്ന രണ്ടക്ഷരങ്ങള്‍ തല്ലിക്കൂട്ടി പറഞ്ഞു എല്ലാത്തില്‍ നിന്നും ഒരുവിധം തടി തപ്പുന്നു ...!
സോറി യുടെ കാര്യം പറഞ്ഞപ്പോഴാണ് ഓര്‍ത്തത് ...
ഇവിടെ എന്തിനും , ഏതിനുമ് സോറി പറയണം . തുമ്മുന്നതിന് ,ചുമക്കുന്നതിന്,...,...
എന്തിന് ഒന്നു കോട്ടുവായ ഇടുന്നതിനു വരെ സോറി പറയണം ...
സോറി പറയാനുള്ള ബുദ്ധിമുട്ട്‌ കാരണം കോട്ടുവായ വന്നാലും ഞാന്‍ പിടിച്ചിരിക്കും!

അതുപോലെ ഇവിടെ ഞാന്‍ അഭിമുഖികരിക്കുന്ന മറ്റൊരു പ്രശ്നമാണ് "ട്യാങ്ക്യു" ...
ആരും ഒരു സഹായവും ചെയ്തിലെങ്കിലുംട്യാങ്ക്യു പറയണം !
എന്തെങ്കിലും സഹായം ചെയ്തവരെ തെറിവിളിച്ചു ശീലിച്ച
നമുക്ക് ഇത് വല്ലാത്ത വെല്ലുവിളി തന്നെയാണ് ...!

സായിപ്പുമാരുടെ ഇംഗ്ലീഷ് ആക്ക്സന്റ് രസകരമാണ് ...
ഞാനും അതുപോലെ പറയാന്‍ ശ്രമിച്ചു നോക്കി ...
നടക്കുന്നില്ല , ചെറുപ്പം മുതല്‍ നാക്ക് വടിക്കല്‍ ശീലം തുടര്‍ന്നത്
മണ്ടത്തരമായെന്ന് ഇപ്പോള്‍ തോന്നുന്നു !

അതുപോലെ ഇവിടെയുള്ള മീശയില്ലാത്ത സുന്ദരകുട്ടപ്പന്മാരായ ആണുങ്ങളെ കണ്ടപ്പോള്‍ ...
അവരെ പോലെയാകാന്‍ ആഗ്രഹം തോന്നിയിട്ട് ...
ഞാനും എന്റെ മീശ വടിച്ചു കളഞ്ഞു ...
പക്ഷെ ..മറ്റുള്ളവരെപോലെ സുന്ദരനായില്ല ...
പകരം ഒരു "സോമാലിയന്‍ " ലുക്ക് ആയിപ്പോയി...
ഇപ്പോള്‍ തോന്നുന്നു ഒരു പഴുതാരെയേ പോലെ ഇരുന്നതാണെങ്കിലും ,
ആ മീശ ഉണ്ടായിരുന്നെങ്കില്‍ ഒരു മലയാളി ഗമയെങ്കിലും ഉണ്ടായിരുന്നേനെ എന്ന്!

ഇനി വഴിയോര കാഴ്ചകളെ കുറിച്ച്.....
ഒറ്റവാക്കില്‍ പറഞ്ഞാല്‍ പെറ്റ തള്ള കണ്ടാല്‍ സഹിക്കില്ല !
നടുറോഡില്‍ ഉമ്മവെച്ചു കളിക്കുന്നവര്‍ ...
പാര്‍ക്കുകള്‍ ബെഡ് റൂം ആണെന്ന് കരുതുന്നവര്‍ ...
ആണും ,പെണ്ണും പ്രകോപനപരമായ രീതികളിലാണ്‌
പ്രത്യേകച്ച് ഈ സമ്മറിൽ വസ്ത്രധാരണം .
മറ്റൊരു പ്രത്യേകത നമുക്ക് അണ്ടര്‍ വെയേര്‍സ് ഇട്ടവരെയും ,
ഇടാത്തവരെയും തിരിച്ചറിയാന്‍ പറ്റും എന്നുള്ളതാണ് ...
ഇട്ടിട്ടുള്ളവര്‍ അത് പുറത്തു കാട്ടാതിരിക്കില്ല !

പിന്നെ പൌണ്ട് കള്‍ വിളഞ്ഞുനില്ക്കുന്ന മനോഹരമായ പാടങ്ങള്‍ ...
അവിടെ കൊയ്ത്തിനു വന്നിരിക്കുന്ന വിവിധദേശക്കാരും ,
ഭാഷക്കാരുമായ യോഗ്യരുമായ പലതരം ജനങ്ങള്‍ ....
അങ്ങിനെ ലോകത്തിന്റെ സാസ്കാരിക തലസ്ഥാനമായ ഈ പട്ടണത്തിന്റെ
മായക്കാഴ്ചകളില്‍ ,മായാത്ത സ്മരണകളുമായി ഞാനും , ഒരു തനി മലയാളിയായി ഇപ്പോള്‍ ഒഴുകി നടക്കുകയാണ് ...

ഒഴിവുസമയങ്ങളില്‍ ഞാൻ ചിലപ്പോള്‍
ഓരോ ലണ്ടന്‍ ജങ്ഷനുകളിലും പോയി നിൽക്കും...

ഇവിടെ ജിമ്മിച്ചേട്ടന്റെ തയ്യൽക്കടയോ , ഗംഗേട്ടന്റെ ബാര്‍ബര്‍
ഷാപ്പോ ,ഹാജിയാരുടെ കാപ്പിക്കടയോ ഇല്ലാ...കേട്ടൊ

പകരം നിറയെ ചായയെക്കാൾ വിലകുറവിന് കിട്ടുന്ന ബിയറുകളും
മറ്റും നിറയെ ഉള്ള പബ്ബുകള്‍ ആണ് , പിന്നെ വാതുവെപ്പ് കേന്ദ്രങ്ങളായ ക്ലബ്ബുകളും ,..,..
മാലപോലെ നിരന്നു കിടക്കുന്ന ഓട്ടോകളോ , ഡോറില്‍ അടിച്ചു ശബ്ദമുണ്ടാക്കി ചീറി പാഞ്ഞു വരുന്ന ബസ്സുകള്ളോ , ബൈക്കുകളില്‍ ചെത്തി വരുന്ന പയ്യന്മാരോ ഇല്ലാ ....
പകരം നിലത്തുമുട്ടിപ്പോകുന്ന ട്രാമുകളും ,ഡബ്ബിള്‍ ഡക്കര്‍ ബസ്സുകളും ,ഡ്രൈവര്‍ ഇല്ലാതെ മുകളില്‍ കൂടി പോകുന്ന ട്രെയിനുകളും (DLR) , ഭൂമിക്കടിയില്‍ക്കൂടി തുരങ്കങ്ങളില്‍ കൂടി ഊളിയിട്ടുപായുന്ന തീവണ്ടികളും /അണ്ടര്‍ ഗ്രൌണ്ട് സ്റ്റെയ്ഷനുകളും.....
പിന്നെ കൈയ്യില്‍ മടക്കി പിടിച്ചു കൊണ്ട് നടക്കാവുന്ന പാവം, പാവം സൈക്കിളുകളും ...

ട്രാം

ഇവിടുത്തെ ട്രാഫിക് നിയമങ്ങളും രസകരമാണ് .
വഴിയാത്രക്കാര്‍ സീബ്രല്യ്നില്‍ കാലെടുത്തുവെച്ചാല്‍ പിന്നെ
വാഹനങ്ങള്‍ എല്ലാം നിറുത്തിത്തരും!
ഇത് അറിയാതെ ഞാന്‍ ഒരുദിവസം സീബ്രലയിനില്‍ നിന്നുകൊണ്ട്
എന്തോ ആലോചിച്ചു കൊണ്ടുനില്‍ക്കുകയായിരുന്നൂ ...
എന്റെ നാലുവശത്തും വാഹനങ്ങള്‍ നിറുത്തിയിടുവാന്‍ തുടങ്ങി .
ഇവയെല്ലാം നിറുത്തിയിട്ടിരുന്നത് , ഞാന്‍ സീബ്രലയിന്‍ cross ചെയ്തിട്ട് കടന്നുപോകാന്‍ വേണ്ടിയായിരുന്നു എന്ന് മനസ്സിലാക്കിയപ്പോഴേക്കും ആ ലണ്ടന്‍ junction മുഴുവന്‍ ഒരു വലിയ ട്രാഫിക് ജാം ആയി കഴിഞ്ഞിരുന്നു!
വേറെയൊന്നുള്ളത് ഭക്ഷണം കഴിക്കുമ്പോഴുള്ള ഏറെ പ്രശ്നങ്ങളാണ്...
ഫോര്‍ക്കുകൊണ്ടു കോര്‍ത്തിട്ടു കിട്ടാതെ വരുമ്പോള്‍ കൈക്കൂട്ടി കോര്‍ക്കുന്നത്
കാണുമ്പോള്‍ മറുനാട്ടുകാര്‍ കുടുകുടെ ചിരിക്കും ....

ഭക്ഷണത്തെ കുറിച്ച് പറയുമ്പോള്‍ മഞ്ഞപ്പിത്തം
പിടിച്ചവര്‍ക്ക് കഴിക്കാവുന്ന ഫുഡ് ആണ് ഇവിടെ കിട്ടുന്നത് .
കറിമസാലകള്‍ (ഉപ്പുമു ളകുമ ല്ലിമഞ ....) തൊട്ടുതീണ്ടാത്തവ ....

ആട് തിന്നുന്നപോലെ കുറെ
ഇലകളും മറ്റും ചവച്ചരച്ചു തിന്നണം !
ഇതൊക്കെ തിന്നാല്‍ സായിപ്പ് ആകുമെങ്കില്‍ ആവട്ടെ എന്ന് കരുതി ഞാനും തിന്നും !

ഇന്ത്യന്‍ രൂപയില്‍ എല്ലാ‍സാധനങ്ങള്‍ക്കും തീപിടിച്ച വിലയാണ് ...
പഴത്തിന്റെ വില ഓര്‍ക്കുമ്പോള്‍ തൊണ്ട് കൂടി തിന്നാലോ എന്നാലോചിക്കും !

ആകെ വില കുറവുള്ളത് കള്ളിന് മാത്രം !
അതിനുപിന്നെ ബീവറെജില്‍ പോയി നീണ്ട വരിയില്‍
നില്‍ക്കേണ്ട ആവശ്യവും ഇല്ല....
ഏത് പെട്ടിക്കടയിലും കിട്ടും ...!

അത് കൊണ്ട് ഞങ്ങള്‍ മലയാളികള്‍ ഇവിടത്തെ വെട്ടിരിമ്പുകളായ
(പത്തു പൌണ്ടിനും ഇരുപതു പൌണ്ടിനും ഇടക്ക് വിലയുള്ളവ ) vat 69,
martel, smirnoff, captain morgan, chivas regal,black label,...
മുതലായവയുമായി സല്ലപിച്ചു ആശ്വാസം കൊണ്ടുകൊണ്ടിരിക്കുന്നു ...!

പിന്നെ ഇവിടെ ഗേള്‍ ഫ്രണ്ട്സ് നെ കിട്ടാന്‍
വളരെ എളുപ്പമാണെന്ന് പറയുന്നു ...
വെറുതെ കേറി മുട്ടിയാല്‍ മതി ..കിട്ടുമത്രേ !
എന്റെ അടുത്ത മുറിയില്‍ താമസിക്കുന്ന ഒരു ഇറ്റാലിയന്‍ സുന്ദരിയെ ഞാന്‍ ഒന്നു മുട്ടി നോക്കി .
വാതിലിനു പുറത്തു നിന്നുംകൊണ്ടു അവളോടു വലിയ ഡയലോഗൊക്കെ വിടും...
അവസാനം ഒരു ദിവസം എന്നെ അവള്‍ പിസ കഴിക്കുവാന്‍ അകത്തേക്ക് ക്ഷണിച്ചു ...
സൂചി കടത്താന്‍ ഇടം നോക്കി നിന്ന ഞാന്‍ അവസരം പാഴാക്കിയില്ല ...!
അകത്ത് കടന്നപ്പോള്‍ ഒരു എരപ്പാളി കറപ്പന്‍ ,ഘാനക്കാരന്‍ കിടയ്ക്കയിലിതാ
നീണ്ടു നിവര്‍ന്നു പഴയ "പവര്‍ മാള്‍ട്ട് "പരസ്യത്തിലെ ആണിനെ പോലെ കിടക്കുന്നു !
അവള്‍ അപ്പോഴേക്കും വൈന്‍ ഗ്ലാസ് നിറച്ചു എനിക്ക്
നീട്ടിയെങ്കിലും ,ഞാന്‍ കഴിക്കാറില്ല എന്ന് പറഞ്ഞു...
അരമണിക്കൂര്‍ കൊണ്ടു കഴിക്കുന്ന പിസ അഞ്ചു മിനിട്ട്കൊണ്ട്
അവസാനിപ്പിച്ചു സ്ഥലം കാലിയാക്കി കൊടുത്തു ...
ഭാഗ്യം...
ഘാനക്കാരന്റെ കൈയ്യില്‍ നിന്നും
മുട്ടാന്‍ പോയെങ്കില്‍എനിക്കും കിട്ടിയേനെ ...
ഇന്ത്യയെ ഓര്‍ത്തുമാത്രം ഞാൻ വിട്ട്കൊടുത്തതാണ് കേട്ടൊ
ആഫ്രിക്കകാരന്റെ കൈയ്യില്‍ നിന്നും ഇടി കിട്ടിയാല്‍ നാണക്കേട് ഇന്ത്യക്കല്ലേ ..അല്ലേ ?
എന്നാലും ഈ എല്ലാ പെണ്ണുങ്ങളും ഈ കറമ്പന്‍
മാരുടെ പിന്നാലെ പോകുന്നതിന്റെ ഗുട്ടൻസ് എന്താണ് ...ആവൊ ! ?

ഇവിടെ ജീവിക്കുമ്പോള്‍ സത്യത്തില്‍ എന്തൊക്കെയോ മിസ് ചെയ്യുന്ന പ്രതീതിയാണ് ...
സ്ഥിരം ഹര്‍ത്താലുകള്‍ ആഘോഷമാക്കുന്ന ഒഴിവുദിനങ്ങള്‍ ...
നമ്മുടെ പൊട്ടി പൊളിഞ്ഞ റോഡുകള്‍ ...
തിക്കിതിരക്കിയുള്ള ചീറി പായുന്ന ബസ്സുകളിലെ യാത്ര ...
ചുട്ടു പൊള്ളിക്കുന്ന സൂര്യന്‍ ...
.പിന്നെ ...പിന്നെ..മാന്യമായി വസ്ത്രം ധരിച്ച നമ്മുടെ സുന്ദരികളായ പെണ്‍കുട്ടികള്‍ ....

അട്ടക്ക് പൊട്ടക്കുളം തന്നെ എന്ന് നിങ്ങള്‍ കരുതുന്നുണ്ടാകും !
ശരിയാണ് ...
ഒരു അട്ടക്ക് പട്ടുമെത്തയില്‍ എന്ത് കാര്യം ?
കാരണം അട്ടയുടെ കൂട്ടുകാര്‍ എല്ലാം പൊട്ടക്കുളത്തില്‍ അല്ലെ ...

ഒരു നാള്‍ ഞാനും തിരിച്ചു വരും .....

കൊയ്തെടുത്ത പൌണ്ടുകളുമായി .....

നെയ്തെടുത്ത സ്വപ്നങ്ങളുമായി ....

വെള്ളക്കാരുടെ ഈ നാട്ടില്‍ നിന്നും .....

കൊള്ളക്കാരുടെ ആ നാട്ടിലേക്ക് .....

NOooooooooooooooooooooo.......

ദൈവത്തിന്റെ സ്വന്തം നാട്ടിലേയ്ക്ക്.......

"തിരികെ ഞാന്‍ വരുമെന്ന വാര്‍ത്ത കേള്‍ക്കാനായി

ഗ്രാമം കൊതിക്കാറില്ലെങ്കിലുംതിരികെ മടങ്ങുവാന്‍ .....

തീരത്തടുക്കുവാന്‍ ....ഞാന്‍ കൊതിക്കാറുണ്ടെന്നും...."

എന്ന്

സസ്നേഹം ,
ഡിന്‍ .

ലേബൽ :‌-
നർമ്മം / Copy & Paste.

നന്ദി ,ഭരണകൂടമേ!!!

2011-10-02T23:50:00.001-07:00

ഭരണകൂടങ്ങള്‍ നിശ്ചയിക്കും
ഇനിയെന്നില്‍ ഉരുവാകും
ഉറവിന്‍ ജാതകം !!

മനസ്സ് സ്വപ്നം കണ്ട
കുഞ്ഞിക്കണ്ണുകളും
തുടുത്ത കൈവിരലുകളും
ഇനിയെന്‍ ഉദരത്തിന്‍
തേങ്ങലായീടുമെങ്കിലും

നന്ദി ,ഭരണകൂടമേ
ഇനിവരുംരാവില്‍
I PILL um, SEX TOYS um
തീര്‍ക്കുമ പുതു വിസ്മയ-
കാഴ്ച്ച്കള്‍ക്ക് !!!

വില്പന

2011-09-23T07:59:00.000-07:00

ഇന്നലെയെന്റെ ബൈക്ക് വിറ്റു.
തൊണ്ണൂറുകളുടെ രാജകുമാരന്‍..

ചിരിച്ചും കരഞ്ഞും തിരക്കിട്ടോടിയും
എന്നോടൊപ്പം ഒരു പതിറ്റാണ്ടിലേറെ
ഉഴുതു തീര്‍ത്തത് ...

ഒറ്റച്ചവിട്ടില്‍ സ്റാര്‍ട്ടായി, ഇരമ്പി,
വിരല്‍ സ്പര്‍ശം ഏല്ക്കുമ്പോഴേ
ഗിയറു മാറി,
ക്ലച്ചു വിട്ടാല്‍ മനസ് കണക്കു കുതിക്കുന്ന
പഴയകാലമല്ല
അതിനിപ്പോള്‍.

സമയത്തെ അരച്ച് കളഞ്ഞു പായുന്ന
മണല്‍ ലോറികളോട്
മത്സരിച്ചു പറന്ന് ,
പെണ്‍ കോളേജിന് മുന്‍പിലൂടെ
പ്രണയ ഹോണ്‍ മുഴക്കി ഒഴുകി നീങ്ങുന്ന
വാലന്റൈന്‍ ദിനങ്ങള്‍ കഴിഞ്ഞിരിക്കുന്നു.

പിന്നെ ഇടയ്ക്കിടെ
പിണങ്ങിയും, പരിഭവിച്ചും
ഏറെ ചവിട്ടിയിട്ടും സ്റാര്‍ട്ട് ആവാതെ ,
കൈക്കരുത്താല്‍ ഗിയര്‍ മാറുമ്പോള്‍
പൊട്ടിത്തെറിച്ചും ,
അത്യാവശ്യങ്ങള്‍ക്ക് ഇറങ്ങുമ്പോള്‍
അനാവശ്യ വാശികളുമായി
അരിശം കൊള്ളിച്ചു കൊണ്ടിരിക്കുന്നതിന്നിടയില്‍
പെട്ടന്ന് മുന്നറിയിപ്പില്ലാതെ
പിണക്കം മറന്ന്
സ്കൂളിലേക്കും ഓഫീസിലേക്കും
ഫസ്റ്റ്‌ ഷോക്കും
കുടുംബത്തെ മുഴുവന്‍ ചുമന്ന്
ചുമ പോലും അടച്ചു പിടിച്ച്
ഒരു കാലം....

ഒടുക്കം തണുത്തു,തനിച്ച്
പുത്തന്‍ സാന്‍ട്രോയ്ക്ക് കാവലായി
സ്ഥലവും പണവും ചുമ്മാ
തിന്നുന്നുവെന്ന പഴി കേട്ട്,

'എന്നെയൊന്നു കൊടുത്ത് കളഞ്ഞേക്കണേ 'എന്ന്
വല്ലപ്പോഴുമുള്ള അമ്പല യാത്രകളില്‍ പ്രാര്‍ഥിച്ച്,

അമ്മ വടിയുമായി തിരികെ വിളിക്കും വരെ
തൊട്ടും തടവിയും ഗിയറു മാറ്റിയും കളിക്കുന്ന
കുട്ടികളെയും ചുമലിലേറ്റി
മനപ്പാതയിലൂടെ പാഞ്ഞ്
ഉച്ചച്ചൂടില്‍
തൊലി അടര്ന്നും
ചുളിഞ്ഞും
അവസാനിക്കുമായിരുന്നു ...

വില്പന നടന്ന തിങ്കളാകട്ടെ
ഒറ്റച്ചവിട്ടില്‍ സ്റാര്‍ട്ടായി,
ഇരമ്പി,
വിരല്‍ സ്പര്‍ശം എല്ക്കുമ്പോഴേ
ഗിയറു മാറി,
ക്ലച്ചു വിട്ടാല്‍ മനസ് പോലെ പറന്ന്
പടികടന്ന്

എന്റെ ബൈക്ക് ...

ബി മധു

കരട്

2011-09-03T01:34:00.000-07:00

ഊതി നോക്കി,

തണുത്തവെള്ളം ഒഴിച്ചു,

കണ്ണടച്ചിരുന്നു,

ഓര്‍ക്കില്ല എന്ന് ഉറപ്പിച്ചു ...

എന്നിട്ടൊന്നും പോകുന്നില്ല

നിന്നെ കുറിച്ചുള്ള വിചാരം.
ബി മധു

ഉപേക്ഷിക്കപ്പെട്ട ജന്മം

2011-08-30T19:18:00.000-07:00