കാവാലം സൂര്യ യുവജന ക്ഷേമകേന്ദ്രം

അമ്മയ്ക്കൊരോണം

2012-08-28T01:43:00.000-07:00

കാവാലം സൂര്യ യുവജനക്ഷേമ കേന്ദ്രത്തിന്റെ ഓണോല്സവത്തോട്‌ അനുബന്ധിച്ച് നടത്തുന്ന മനുഷ്യ സ്നേഹത്തിന്റെ മഹത്തായ വിളംബരം. ഓരോ മനുഷ്യന്റെയും ഉള്ളിന്റെയുള്ളില്‍ എന്നും നിറഞ്ഞു നില്‍ക്കുന്ന ഹൃദയ വികാരം.....അമ്മ.

ജീവിത യാത്രയില്‍ നമ്മെ കൈപിടിച്ച് നടത്തിയവര്‍ അനേകര്‍ ഉണ്ടാകാം. സ്നേഹം നല്‍കി , എല്ലാം നല്‍കി നമ്മെ നാമാക്കിയ പിതാവിനെ മറക്കുന്നില്ല . എന്നാല്‍ എല്ലാതിനെയും പിന്തള്ളുന്ന നാമമല്ലേ എല്ലാവര്‍ക്കും അമ്മ.

ആധുനിക കാലത്ത് ജീവിക്കാനുള്ള നെട്ടോട്ടത്തില്‍ സ്വന്തം അമ്മയ്ക്ക് പോലും സ്നേഹം നല്കാന്‍ കഴിയാത്ത കാലത്ത് മഹത്തായ ഒരു ഉദ്യമം.. അതായിരുന്നു കാവാലം സൂര്യ കഴിഞ്ഞ വര്‍ഷം ആദ്യമായി സംഘടിപ്പിച്ച അമ്മയ്ക്കൊരോണം. ജീവിത സായാഹ്നത്തില്‍ തനിച്ചായി പോയ അമ്മമാരെ പൊന്നോണ നാളില്‍ ഒരു വേദിയില്‍ അണിനിരത്തി അവര്‍ക്ക് പുതു തലമുറയുടെ സ്നേഹാദരം.

രോഗാതുരരും വിധവകളും ഒക്കെയായ അമ്മമ്മാര്‍ക്കും അമ്മൂമാര്‍ക്കുമോപ്പം കഴിഞ്ഞ തവണ കലാ രംഗത്ത്‌ ശ്രദ്ധേയരായ അമ്മമാര്‍ അടക്കം 116 പേര്‍ പങ്കെടുത്തു. കാവാലം പഞ്ചായത്തിലെ എല്ലാ വാര്‍ഡുകളില്‍ നിന്നുമുള്ള നന ജാതി മതങ്ങളില്‍ പെട്ട അമ്മമാര്‍ അതിര്‍വരമ്പുകള്‍ ഏതുമില്ലാതെ ഒത്തു ചേര്‍ന്നു. അവര്‍ ഗത കാല സ്മരണകള്‍ അയവിറക്കി. ഓണക്കളികള്‍ അവതരിപ്പിച്ചു. ഒരു മിച്ചു ഓണ സദ്യ ഉണ്ടു. ഉദാരമതികളുടെ സഹായത്താല്‍ എല്ലാവര്‍ക്കും ഓണ പുടവകളും സമ്മാനിച്ചു.

മുഖ്യ അതിഥി ആയി പങ്കെടുത്ത പ്രസിദ്ധ സിനിമ താരം കൊല്ലം തുളസി പറഞ്ഞത് ഇതുപോലെ ഹൃദയത്തെ സ്പര്‍ശിച്ച ഒരു പരിപാടിയിലും പങ്കെടുത്തിട്ടില്ലെന്നാണ്. ജന്മനാട്ടിലെ പുതു തലമുറയുടെ ഈ സ്നേഹാദരവില്‍ അഭിമാനിക്കുന്നുവെ ന്നയിരുന്നു ഉദ്ഘടകനായിരുന്ന പദ്മഭൂഷന്‍ കാവാലം നാരായണ പണിക്കരുടെ അഭിപ്രായ പ്രകടനം.

ജനകീയമായ അമ്മയ്ക്കൂട്ടായ്മ രണ്ടാം തവണ കുട്ടനാടിന്റെ വിവിധ ഭാഗങ്ങളില്‍ നിന്ന് ഗ്രാമ പഞ്ചായത്തുകള്‍ മുഖാന്തിരം കണ്ടെത്തുന്ന അമ്മമാരെ പങ്കെടുപ്പിച്ചു വരുന്ന ഓഗസ്റ്റ്‌ 31 നു രാവിലെ 10 . 30 നു നടത്തുകയാണ് . ആഭ്യന്തര മന്ത്രി തിരുവഞ്ചൂര്‍ രാധാകൃഷ്ണന്‍ ഉദ്ഘാടനം ചെയ്യും. ഏവരെയും പരിപാടിയിലേക്ക് സ്നേഹ പൂര്‍വ്വം ക്ഷണിക്കുന്നു. സഹായങ്ങള്‍ നല്‍കി മുന്‍കാലങ്ങളില്‍ സൂര്യയ്ക്ക് കരുത്തു പകര്‍ന്ന പ്രിയപ്പെട്ടവര്‍ക്ക് നന്ദിയുടെ നറുമലരുകള്‍....

അമ്മയ്ക്കൊരോണത്തി നും ഓണോല്സവം 2012 നും സംഭാവനകള്‍ നല്കാന്‍ ആഗ്രഹിക്കുന്നവര്‍ക്ക് കാവാലം സൂര്യ ക്ലബ്ബിന്റെ കാവാലം എസ് ബി ടി ബ്രാഞ്ചിലെ എസ്. ബി 57061160880 എന്ന അക്കൗണ്ട്‌ നമ്പറിലേക്ക് പണം അയക്കാം.Bank IFSC- SBTR0000229.

എല്ലാ പ്രിയപ്പെട്ടവര്‍ക്കും ഓണശംസകളോടെ

സെക്രട്ടറി , കാവാലം സൂര്യ

ഓണോല്സവം 2012

2012-08-14T13:32:00.001-07:00

പ്രീയപ്പെട്ടവരേ ,

മണ്ണിലും മനസ്സിലും വസന്തം വിരിയിച്ചു വീണ്ടുമൊരോണം വിരുന്നെത്തുന്നു .മലയാളക്കര ദേശീയോത്സവം കൊണ്ടാടുമ്പോള്‍ കുട്ടനാടിനിത് അതിരുകളില്ലാത്ത ആഹ്ലാദത്തിന്റെ പൂക്കാലമാണ്.ഓളപ്പരപ്പില്‍ കളിവള്ളങ്ങളുടെ മത്സരക്കുതിപ്പ്. കരയില്‍ വള്ളം കളിയുടെ ആരവം.

ദൂരെ കായലില്‍ മുങ്ങിത്തപ്പി

ചേറിന്‍ പാളികള്‍ കുത്തിപ്പൊക്കി

വയലിനു ചുറ്റും കൊട്ടവളച്ച

കരിമാലയന്മാര്‍ ജീവന്‍ നല്‍കിയ കുട്ടനാട് .......എന്ന് വയലാര്‍ പ്രകീര്ത്തിച്ച പ്രൌഡമായ ചരിത്രഭൂമിയില്‍ കാവാലം സൂര്യ യുവജനക്ഷേമാകേന്ദ്രം നിസ്വാര്‍ത്ഥ ജനസേവനത്തിന്റെ മുഖമായി നിശബ്ദപ്രയാണം തുടങ്ങിയിട്ട് 17 സംവത്സരങ്ങള്‍ പൂര്‍ത്തിയാക്കുന്നു.ഒരേ താളത്തില്‍ ഒരേ ആയത്തില്‍ ഒരേ ലക്ഷ്യത്തിലേക്ക് ഒരുമയോടെ തുഴയെറിഞ്ഞ് മുന്നേറുന്ന നമ്മുടെ ചിന്താമണ്ഡലങ്ങളില്‍ അനന്യമായ ചലനം സൃഷ്ട്ടിച്ചു പുതു സാമൂഹ്യവ്യവസ്ത്ഥിതിയുടെ മാര്‍ഗം തെളിയിച്ച മഹാരാധന്മാര്‍ക്ക് പ്രണാമം. സംഘസക്തിയും ഐക്യബോധവും ഊട്ടിയുറപ്പിച്ചു നാടിന്റെ വിളക്കായി നാളകളെ പ്രകാശഭരിതമാക്കുവാന്‍ ഞങ്ങള്‍ ഉണ്ടാകും. അനുഗ്രഹങ്ങളും സ്നേഹവാത്സല്യങ്ങളുമായി അണിനിരന്നവര്‍ക്ക് നന്ദി. ഈ വര്‍ഷത്തെ ഓ ണോല്‍സവത്തിലേക്ക് ഏവരുടെയും സാന്നിധ്യവും സഹകരണവും പ്രതീക്ഷിച്ചു കൊള്ളുന്നു.

ഓണോല്സവം 2012 ലെ കാര്യപരിപാടികളെ കുറിച്ചറിയാന്‍ താഴെ കൊടുത്തിരിക്കുന്ന ചിത്രങ്ങളില്‍ ക്ലിക്ക് ചെയ്യുക .

അമ്മയ്ക്കൊരു ഓണം

2012-08-14T12:42:00.001-07:00

കാവാലം സുര്യ യുവജനക്ഷേമ കേന്ദ്രത്തിന്റെ 17 -)o വാര്ഷികത്തിന്റെയും ഓണാഘോഷ പരിപാടികളുടെയും ഭാഗമായി 2011 ആഗസ്റ്റ് 31-)o തീയതി വെള്ളിയാഴ്ച "അമ്മയ്ക്കൊരു ഓണം"എന്ന ഒരു കൂട്ടായ്മ സംഘടിപ്പിക്കുന്നു

വീടിന്റെയും നാടിന്റെയും സമസ്ത ഐശ്വര്യങ്ങള്‍ക്കും കാരണക്കാരായ നമ്മുടെ അമ്മമാര്‍ക്കായി കാവാലം സുര്യ സംഘടിപ്പിക്കുന്ന ഈ കൂട്ടായ്മയില്‍ ബഹുമാനപ്പെട്ട ആഭ്യന്തരമന്ത്രി ശ്രീ തിരുവഞ്ചൂര്‍ രാധാകൃഷ്ണന്‍ അമ്മമാരെ ആദരിക്കും. ബഹുമാനപ്പെട്ട MLA ശ്രീ ജി സുധാകരന്‍ മുഖ്യാതിഥി ആയിരിക്കുന്ന പ്രസ്തുത ചടങ്ങ് രാഷ്ട്രീയ സാംസ്‌കാരിക രംഗങ്ങളിലെ പ്രമുഖരുടെ സാന്നിധ്യത്താല്‍ സമ്പന്നമായിരിക്കും. ഈ ചടങ്ങിലേക്ക് നല്ലവരായ എല്ലാവരെയും ഹൃദയപൂര്‍വം സ്വാഗതം ചെയ്തുകൊള്ളുന്നു.

ശതാഭിഷേക നിറവില് കാവാലം !!!!

2012-05-13T09:57:00.000-07:00

കുരുന്നുകൂട്ടം 2012

2012-05-13T09:32:00.002-07:00

കേന്ദ്ര സംഗീത നാടക അക്കാദമിയുടെ സഹകരണത്തോടെ തിരുവനന്തപുരം സോപാനം, കാവാലം സൂര്യ, കടുംതുടിക്കൂട്ടം എന്നിവയുടെ ആഭിമുഖ്യത്തില് കാവാലം ഗവ എല് പി സ്കൂളില് ഏപ്രില് 1 മുതല് 10 വരെ കുരുന്നുകൂട്ടം കലാ പരിശീലന കളരി നടന്നു.

150 ലേറെ കുട്ടികള് പങ്കെടുത്ത ഈ കലാ പരിശീലന കളരിക്ക്, പദ്മ ഭൂഷന് കാവാലം നാരായണ പണിക്കര്നേതൃത്വം നല്കി.

കുരുന്നുകൂട്ടത്തിലെ ചില ചിത്രങ്ങള് :

മഹാത്മാ ക്വിസ് - 2011 വിജയികള്‍

2011-10-03T08:31:00.000-07:00

മഹാത്മാ ക്വിസ് - 2011

2011-10-03T08:09:00.000-07:00

അമ്മയ്ക്കൊരോണം - ചിത്രങ്ങള്‍

2011-09-24T01:30:00.000-07:00

അവര്‍ മറക്കാത്ത ഓണം

2011-09-20T10:55:00.000-07:00

ആ അമ്മമാര്‍ക്കു മാത്രമല്ല, അതിനു സാക്ഷിയായവര്‍ക്കും ഒരിക്കലും മറക്കാത്ത ഒന്നായിരുന്നു അമ്മയ്ക്കൊരോണം എന്ന പരിപാടി, ഒരുകൂട്ടം ചെറുപ്പക്കാരുടെ മാതൃകാപരമായ സംരംഭം.

കാവാലം ശശികുമാര്‍

ഏകദേശം പത്തുവര്‍ഷം മുമ്പാണ്, ആ തിരുവോണത്തിന് ബദരിനാഥിലേക്കുളള യാത്രയിലായിരുന്നു ഞങ്ങള്‍, ചില പത്രപ്രവര്‍ത്തക സുഹൃത്തുക്കള്‍...ഇന്‍ഡ്യാ-ചൈനാ അതിര്‍ത്തിയിലെ അവസാന ഗ്രാമമായ മനാ... ബദരീനാഥില്‍നിന്ന് മൂന്നു കിലോ മീറ്റര്‍ അകലെ അവിടെ ഒരു പഴയ കെട്ടിടത്തില്‍ ഏതാനും അമ്മമാര്‍. അവര്‍ ആഘോഷത്തിലാണ്. ഞങ്ങള്‍ അവരുമായി സംസാരിച്ചു. കേരളം ഇന്‍ഡ്യയുടെ അങ്ങേമൂലയാണെന്നും ഞങ്ങള്‍ക്കും ആ ദിവസം ആഘോഷത്തിന്‍റേതാണെന്നും നാട്ടില്‍ ഞങ്ങളെ പിരിഞ്ഞ് അമ്മമാര്‍ കാത്തിരിക്കുന്നുവെന്നുമെല്ലാം വിശദീകരിച്ചപ്പോള്‍ ഞങ്ങള്‍ സമാനമനസ്കരായി. ഇന്‍ഡ്യയില്‍ ഏറ്റവും കൂടുതല്‍പേര്‍ സൈനിക സേവനത്തിലേര്‍പ്പെട്ടിട്ടുളള ഉത്തരാഖണ്ഡ് സംസ്ഥാനത്തിലെ ഈ അമ്മമാരുടെ മക്കളും സൈനികരാണ്. അവരെവിടെയോ ആണെന്നല്ലാതെ കൂടുതലൊന്നുമറിയാത്ത അവര്‍ ഒത്തുചേര്‍ന്നത് സ്വാതന്ത്ര്യ ദിനത്തിന്‍റെ (അന്ന് ആഗസ്റ്റ് 15 ആയിരുന്നു) ആഘോഷങ്ങള്‍ക്കായിരുന്നു; അന്നുതന്നെ അവരുടെ തികച്ചും പ്രാദേശികമായ ഒരുത്സവദിവസവും. അവര്‍ പറഞ്ഞു, നിങ്ങള്‍ അമ്മമാരില്‍നിന്ന് അകന്നു നില്‍ക്കുന്നു, ഞങ്ങളുടെ മക്കള്‍ അകലെ ഞങ്ങളെ പിരിഞ്ഞു കഴിയുന്നു. നമുക്ക് അമ്മയും മക്കളുമാകാം.... അവര്‍ പാകം ചെയ്ത പായസം ഞങ്ങള്‍ക്കു തന്നു. അവരോടൊപ്പം പാടിയും ആടിയും ആ ഓണം ഞങ്ങള്‍ അര്‍ത്ഥപൂര്‍ണമാക്കി....

ഓണത്തിന് ഒരുക്കെല്ലാംകൂട്ടി അമ്മയും മക്കളുമൊത്തുചേരുമ്പോളാണ് ആഘോഷം സമ്പൂര്‍ണമാകുന്നതെന്ന് പറയാറുണ്ട്... പക്ഷേ അമ്മയെ വഴിയില്‍ ഉപേക്ഷിക്കുന്ന മക്കളും മക്കളെ ഞെക്കിക്കൊല്ലുന്ന അമ്മയും നിത്യവാര്‍ത്തകളാകുന്ന കാലമാണിത്. ആധുനികകാലം അടുക്കളയില്‍നിന്ന് സ്ത്രീകളെ അരങ്ങിലെത്തിച്ചപ്പോള്‍ മറുവശത്ത് ‘അസൂര്യംപശ്യ’കളായി മാറുന്ന സ്ത്രീ വാര്‍ദ്ധക്യം ഇക്കാലത്തിന്‍റെ സങ്കടമായി മാറുന്നു. വൃദ്ധസദനങ്ങളില്‍ ജന്മദിനവും ഉത്സവദിനങ്ങളും ആഘോഷിക്കുന്ന അമ്മമാരും അച്ഛന്മാരും ഏറുന്ന ഈ കാലവും അതിനു കാരണമാകുന്ന സമൂഹവും ഈ കാലഘട്ടത്തിന്‍റെ അസ്വസ്ഥതയാ കുമ്പോള്‍ അമ്മമാര്‍ക്കായി ഒരു ഓണാഘോഷം ഏതുതരത്തിലും മാതൃകയായി. അതായിരുന്നു 16 വര്‍ഷമായി ആലപ്പുഴ ജില്ലയിലെ കുട്ടനാട്ടില്‍ കാവാലം ഗ്രാമത്തില്‍ പ്രവര്‍ത്തിച്ചു വരുന്ന സൂര്യ യുവജനക്ഷേമ കേന്ദ്രം നടത്തിയ ഈ വര്‍ഷത്തെ ഓണാ ഘോഷത്തിന്‍റെ പ്രത്യേകത- അമ്മയ്ക്കൊരോണം.

ഓണാഘോഷത്തിന്‍റെ ബാക്കിപത്ര മായി മദ്യത്തിന്‍റെയും ഇറച്ചിയുടെയും സ്വര്‍ണ്ണത്തിന്‍റെയും ഉപഭോഗക്കണക്കുകള്‍ ‘പ്രധാന വാര്‍ത്തയാകുമ്പോള്‍’ നന്മയുടെ കിരണങ്ങള്‍ എത്ര പ്രകാശം പരത്തിയാലും കണ്ണില്‍ പതിക്കാത്ത കാലം കൂടിയാണിത്. 106 അമ്മമാര്‍, അവര്‍ ആ ഗ്രാമത്തിലെ വിവിധ വിഭാഗങ്ങളില്‍ പെട്ടവരാണ്, ഏതെങ്കിലും തരത്തില്‍ പരാധീനത അനുഭവിക്കുന്നവരാ ണ്, വൈധവ്യം, മാറാവ്യാധി, തീരാദു:ഖം തുടങ്ങിയവയ്ക്ക് വിധേയരായവരാണ്. അത്തരത്തില്‍ ഉളള 65-നും 80-നും ഇടയ്ക്കു പ്രായമുളളവരെ കണ്ടെത്തി, അവരെ പ്രത്യേകം ക്ഷണിച്ച് ആഘോഷ വേദിയില്‍ കൊണ്ടുവന്ന് ആദരിച്ച് ഓണപ്പുടവയും ഓണ സദ്യയും നല്‍കി. അവര്‍ക്കു വേണ്ടി കുട്ടികള്‍ തിരുവാതിര കളിച്ചും നാടോടി നൃത്തം ചെയ്തും നാടന്‍ പാട്ടുപാടിയും അവരെ ആഹ്ലാദിപ്പിച്ചു. അംബേദ്കര്‍ ഗ്രാമത്തിലെ വനിതകളുടെ വഞ്ചിപ്പാട്ട് ഏറെ ആകര്‍ഷകമായിരുന്നു. ഒരുപക്ഷേ നൂറിലേറെ വീടുകളില്‍ അമ്മമാര്‍ക്കു കിട്ടുമായിരുന്ന ആഹ്ലാദത്തിലുമധികമായിരുന്നു ആ വേദിയില്‍ പങ്കുവെയ്ക്കപ്പെട്ടതെന്നു പറഞ്ഞാല്‍ ഒട്ടും അതിശയോക്തിയല്ല അത്.

‘അമ്മയ്ക്കൊരോണം’ പരിപാടിയുടെ ഉദ്ഘാടനം നിര്‍വഹിച്ചത് കാവാലം നാരായണപ്പണിക്കരായിരുന്നു. ഗ്രാമങ്ങളില്‍ നടക്കുന്ന ഇത്തരം തനിമയുളള ആചാരങ്ങളും ആഘോഷങ്ങളുമാണ് ഒരു സമൂഹത്തെ സാംസ്കാരിക സമ്പന്നമായി നിലനിര്‍ത്തുന്നതെന്നു പറഞ്ഞ അദ്ദേഹം കൂടുതല്‍ കൂടുതല്‍ സംഘടനകള്‍ വ്യാപകമായ തോതില്‍ ഇത്തരം സാംസ്കാരിക പ്രകടനങ്ങള്‍ നടത്തേ ണ്ടതുണ്ടെന്ന് വിശദീകരിച്ചു. അമ്മമാരെ ആദരിക്കാന്‍ പഠിക്കുകയും ശീലിക്കുകയും ചെയ്യുന്നത് സ്വന്തം തിരിച്ചറിവിന്‍റെ തെളിവാണെന്നും വരുംവര്‍ഷങ്ങളില്‍ ഇത് ഒരു സമൂഹപൂജയായി മാറണമെന്നും അദ്ദേഹം പറഞ്ഞു. ദാനം ചോദിച്ച വാമനനു മുന്നില്‍ ശിരസു കുനിച്ചതിലൂടെ എക്കാലത്തും ഉയര്‍ന്ന ശിരസുമായി നില്‍ക്കുന്ന ഒരു മികച്ച ഭരണാധികാരിയായി മാനവ മനസില്‍ നില്‍ക്കുന്ന മഹാബലിയുടെ സ്മരണനിറഞ്ഞ ഓണത്തിന് ഇത്തരമൊരു ചടങ്ങു നടത്താനായത് ധന്യതയാണെന്ന് അദ്ദേഹം പറഞ്ഞു.

സിനിമാ-സീരിയല്‍ നടന്‍ കൊല്ലം തുളസിയായിരുന്നു അമ്മയ്ക്കൊരോണം പരിപാടിയില്‍ അമ്മാര്‍ക്ക് ഓണക്കോടി വിതരണം ചെയ്തത്. സിനിമയിലും സീരിയലുകളിലും കൂടി തനിക്കു ലഭിച്ചിട്ടുളള വില്ലന്‍ പരിവേഷം ഇല്ലാതാക്കാനും ഇന്നുതന്നോടൊപ്പമില്ലാത്ത പെറ്റമ്മയുടെ ഓര്‍മ്മയും അനുഭവവും നിങ്ങള്‍ക്കൊപ്പമിരിക്കുമ്പോള്‍ വീണ്ടും കിട്ടുവാനുമാണ് അവിടെയെത്തിയതെന്നു പ്രസ്താവിച്ച കൊല്ലം തുളസി പ്രതീകാത്മകമായി മൂന്നു മുതിര്‍ന്ന അമ്മമാരെ പൊന്നാടയണിയിച്ച് കാ ല്‍വന്ദിച്ചു. എല്ലാ അമ്മമാര്‍ക്കും ഓണക്കോടി വിതരണം ചെയ്തു. അമ്മമാരെ തിരികെ വീടുകളിലെത്തിക്കാനും സൂര്യയുടെ പ്രവര്‍ത്തകരായ ചെറുപ്പക്കാര്‍ ശ്രദ്ധ കാണിച്ചു.

ഒരുപക്ഷേ കേരളത്തില്‍ ഓണക്കാലത്ത് ഇതുവരെ നടത്തിയിട്ടുളള ആഘോഷങ്ങളില്‍നിന്നു തികച്ചും വ്യത്യസ്തമായ ഒന്നായിരുന്നു ‘അമ്മയ്ക്കൊരോണം’ പരിപാടി. കൂടുതല്‍ വിപുലമായ രീതിയില്‍ വരും കാലങ്ങളില്‍ ഈ പരിപാടി നടത്തുമെന്നു മാത്രമല്ല അമ്മമാരില്‍ അര്‍ഹതപ്പെട്ടവര്‍ക്കായി കൂടുതല്‍ ക്ഷേമ പ്രവര്‍ത്തനങ്ങള്‍ നടത്തുമെന്നും പ്രഖ്യാപിച്ച് സൂര്യ യുവജനക്ഷേമകേന്ദ്ര പ്രവര്‍ത്തകര്‍ പ്രതിബദ്ധത പ്രകടിപ്പിച്ചപ്പോഴാണ് പുതിയ തലമുറയുടെ സമൂഹത്തോടുളള കരുതല്‍ വ്യക്തമായത്. സൂര്യ ജനറല്‍ സെക്രട്ടറി ഹരികൃഷ്ണന്‍ ടിഎസ് ഐ യോടു പറഞ്ഞു, “ഒട്ടേറെ പേരുണ്ട് ഈ ആശയം മുന്നോട്ടു വെച്ചവരും അതിനു വേണ്ടി അഹോരാത്രം പ്രവര്‍ ത്തിച്ചവരുമായി. ഇതിനു വേണ്ടുന്ന സാമ്പത്തിക സഹായങ്ങള്‍ നല്‍കിയ സന്മനസുകളും ഏറെയുണ്ട്. കഴിഞ്ഞ 16 വര്‍ഷത്തിനിടയിലെ പ്രവര്‍ത്തനങ്ങളില്‍ ഏറെ പേര്‍ അനുമോദിച്ച സൂര്യയുടെ ഒരു സംരംഭമാണിത്. ഇതിന്‍റെ തുടര്‍നടപടികള്‍ ഞങ്ങള്‍ ആസൂത്രണം ചെയ്യും. വര്‍ഷത്തിലൊരിക്കലുളള ഒരു പ്രോഗ്രാമായി മാത്രം ഞങ്ങള്‍ ഇതിനെ ചുരുക്കു കയില്ല. കലുഷിതമായ സമൂഹത്തിന് ഒരു കൂട്ടം ചെറുപ്പക്കാരുടെ സന്ദേശമാണിത്. അതു വ്യാപകമാക്കും. സമൂഹത്തിന്‍റെ സേവനം ആവശ്യമായ അമ്മമാരുടെ, മുതിര്‍ന്നവരുടെ പരിരക്ഷയ്ക്കു വേദിയാകണമെന്നാണ് ഞങ്ങളുടെ ആഗ്രഹം. അതിനു മനസുളളവരുടെ സംയോജകരാകാന്‍ ഞങ്ങളെന്നുമുണ്ടാകും.”

http://thesundayindian.com/ml/story/unforgettable-onam-experience/25/1410/

അമ്മയ്ക്കൊരോണം (മലയാള മനോരമ)**

2011-09-14T11:05:00.000-07:00

**കടപ്പാട് - മലയാള മനോരമ

അമ്മയ്ക്കൊരോണം (മാധ്യമം ദിനപ്പത്രം )**

2011-09-14T10:52:00.000-07:00

കാവാലം സൂര്യ യുവജന ക്ഷേമകേന്ദ്രം സംഘടിപ്പിച്ച ‘അമ്മക്കൊരു ഓണം’ പരിപാടി വേറിട്ട ഓണാഘോഷത്തിന്‍െറ വേദിയായി. ജീവിതസായാഹ്നത്തില്‍ തനിച്ചായ നൂറിലേറെ അമ്മമാര്‍ ഏകാന്തതയില്‍നിന്ന് ആഘോഷത്തിന്‍െറ വേദിയിലേക്ക് ശാരീരിക അവശതകള്‍ മറന്ന് എത്തി.അവര്‍ നാടന്‍പാട്ടുകളും വഞ്ചിപ്പാട്ടും തിരുവാതിരക്കളിയുമൊക്കെയായി ഓണം ആഘോഷിച്ചു.

നാടകാചാര്യന്‍ കാവാലം നാരായണപ്പണിക്കര്‍ ഓണാഘോഷം ഉദ്ഘാടനം ചെയ്തു. മറ്റുള്ളവര്‍ക്കുവേണ്ടി അടുക്കളയിലും വീടുകളിലുമായി ജീവിതത്തിന്‍െറ ഏറിയ പങ്കും നീക്കിവച്ച് വാര്‍ധക്യത്തില്‍ ആരോരുമില്ലാതാകുന്ന സ്ത്രീയുടെ ദുരവസ്ഥക്ക് മാറ്റമുണ്ടാകാന്‍ സമൂഹമനഃസാക്ഷി ഉണരണമെന്ന് അദ്ദേഹം പറഞ്ഞു.സിനിമാനടന്‍ കൊല്ലം തുളസി അമ്മമാര്‍ക്ക് ഓണപ്പുടവകള്‍ വിതരണം ചെയ്തു. കാവാലം ബി. ശ്രീകുമാറിനെ ചടങ്ങില്‍ അനുമോദിച്ചു.
കാവാലം ഗ്രാമപഞ്ചായത്ത് പ്രസിഡന്‍റ് മോളമ്മ സതീശന്‍ അധ്യക്ഷത വഹിച്ചു. ശോഭന ഉദയകുമാര്‍, ബി. മോഹനന്‍ നായര്‍ ആടിക്കോണിക്കല്‍, പി. ഉദയകുമാര്‍, കാവാലം അനിയന്‍, ഓമനക്കുട്ടന്‍, കാവാലം ഗോപകുമാര്‍, കെ.പി. ഷാജി, ജി. ഹരികൃഷ്ണന്‍, വിഷ്ണുകുമാര്‍ എന്നിവര്‍ സംസാരിച്ചു.കലാപരിപാടികളും ഗാനമേളയും നടന്നു.

***കടപ്പാട് : മാധ്യമം ദിനപ്പത്രം

തിരുവാതിരകളിയും നാടന്പാട്ടുമായി അമ്മമാരും മുത്തശ്ശിമാരും ഓണം ആഘോഷിച്ചു**

2011-09-14T10:43:00.000-07:00

**കടപ്പാട് : ദീപിക ദിനപ്പത്രം

അമ്മയ്ക്കൊരോണം (മംഗളം ദിനപ്പത്രം)**

2011-09-14T10:32:00.000-07:00

കാവാലം: ഓണനാളില്‍ ഗ്രാമത്തിലെ അമ്മമാരും മുത്തശിമാരും ഒത്തുകൂടി നാടന്‍പാട്ടുകളും വഞ്ചിപ്പാട്ടും തിരുവാതിരകളിയുമായി ഓണം ആഘോഷിച്ചു.

കാവാലം സൂര്യ യുവജന ക്ഷേമ കേന്ദ്രത്തിന്റെ ആഭിമുഖ്യത്തില്‍ സംഘടിപ്പിച്ച അമ്മയ്‌ക്കൊരു ഓണം പരിപാടിയാണു വേറിട്ട ആഘോഷത്തിന്റെ വേദിയായത്‌. ജീവിത സായാഹ്നഹ്നത്തില്‍ തനിച്ചായിപ്പോയ നൂറിലേറെ അമ്മമാരാണു ഏകാന്തതയില്‍നിന്ന്‌ ആഘോഷത്തിന്റെ വേദിയിലേക്കു ശാരീരിക അവശതകള്‍ക്കു പോലും അവധി നല്‍കി എത്തിയത്‌.

സ്വന്തം ഗ്രാമത്തില്‍ ഒരുക്കിയ അമ്മമാരുടെ ഓണാഘോഷം ഉദ്‌ഘാടനം ചെയ്‌തത്‌ തനതു നാടകവേദിയുടെ ആചാര്യനായ കാവാലം നാരായണപണിക്കരായിരുന്നു.

മറ്റുള്ളവര്‍ക്കു വേണ്ടി അടുക്കളയിലും വീടുകളിലുമായി ജീവിതത്തിന്റെ ഏറിയ പങ്കും നീക്കിവച്ച്‌ വാര്‍ധക്യത്തില്‍ ആരോരുമില്ലാതാകുന്ന സ്‌ത്രീയുടെ ദുരവസ്‌ഥയ്‌ക്കു മാറ്റമുണ്ടാകാന്‍ സമൂഹ മനസാക്ഷി ഉണരുകയാണു വേണ്ടതെന്ന്‌ അദ്ദേഹം പറഞ്ഞു. നടന്‍ കൊല്ലം തുളസി അമ്മമാര്‍ക്ക്‌ ഓണപ്പുടവകള്‍ വിതരണം ചെയ്‌ത് ആദരിച്ചു. കാവാലം ബി. ശ്രീകുമാറിനെ അനുമോദിച്ചു.

കാവാലം ഗ്രാമ പഞ്ചായത്ത്‌ പ്രസിഡന്റ്‌ മോളമ്മ സതീശന്റെ അധ്യക്ഷതയില്‍ ചേര്‍ന്ന യോഗത്തില്‍ ശോഭന ഉദയകുമാര്‍, ബി. മോഹനന്‍ നായര്‍ ആടിക്കോണിക്കല്‍, പി. ഉദയകുമാര്‍, കാവാലം അനിയന്‍, ഓമനക്കുട്ടന്‍, കാവാലം ഗോപകുമാര്‍, കെ പി ഷാജി, ജി. ഹരികൃഷ്‌ണന്‍, വിഷ്‌ണുകുമാര്‍ തുടങ്ങിയവര്‍ സംസാരിച്ചു.

കടപ്പാട് : മംഗളം ദിനപ്പത്രം**

അമ്മയ്‌ക്കൊരോണം**

2011-09-12T09:19:00.000-07:00

അവശത അനുഭവിക്കുന്ന അമ്മമാര്‍ക്ക് യുവജനങ്ങള്‍ കൈത്താങ്ങാവണമെന്ന സന്ദേശം ഉയര്‍ത്തി കാവാലത്ത് അമ്മമാരെ ആദരിച്ച് ഓണക്കൂട്ടായ്മ. കാവാലം സൂര്യ യുവജന ക്ഷേമകേന്ദ്രമാണ് ഓണത്തോടനുബന്ധിച്ച് സമൂഹത്തിന് വേറിട്ട സന്ദേശമേകി ഗ്രാമത്തിലെ വയോധികരായ 106 അമ്മമാരെ ആദരിച്ചത്.

വിധവകളും, നിത്യരോഗികളും, ആലംബഹീനരുമായ അറുപത്തിയഞ്ച് വയസ്സിനും എണ്‍പത് വയസ്സിനുമിടയില്‍ പ്രായമുള്ള ഗ്രാമത്തിലെ അമ്മമാരെയാണ് ഇതിലേക്കു തിരഞ്ഞെടുത്തത്. 'അമ്മയ്‌ക്കൊരോണം' എന്ന പേരിലാണ് പരിപാടി സംഘടിപ്പിച്ചത്. കാവാലം നാരായണപ്പണിക്കര്‍ ഇതിന്റെ ഉദ്ഘാടനം നിര്‍വഹിച്ചു.

മലയാളി സമൂഹത്തിന്റെ ഏറ്റവും മനോഹരമായ സങ്കല്പമാണ് സ്ത്രീകളെ ആദരിക്കലെന്ന് അദ്ദേഹം പറഞ്ഞു. അതില്‍ അമ്മമാരെ ആദരിക്കലിന്റെ മഹത്വം ഒന്നു വേറെ തന്നെയാണ്. ശിരസ്സുകുനിച്ചു നില്കുന്നയാളിനു മാത്രമേ ശിരസ്സുയര്‍ത്തി നില്‍ക്കാനാവൂ. മഹാബലിയുടെയും വാമനന്റെയും കഥ നല്‍കുന്ന ഗുണപാഠമിതാണെന്ന് കാവാലം ചൂണ്ടിക്കാട്ടി.

സിനിമാ സീരിയല്‍ താരം കൊല്ലംതുളസി അമ്മമാരെ പൊന്നാടയണിയിച്ച് കാല്‍തൊട്ട് വന്ദിച്ചു. കാവാലം ഗ്രാമപ്പഞ്ചായത്ത് പ്രസിഡന്റ് മോളമ്മ സതീശന്‍ അധ്യക്ഷത വഹിച്ചു. കാവാലം ഗോപകുമാര്‍ പരിപാടി വിശദീകരിച്ചു. ബി. മോഹനന്‍ നായര്‍ സേവന സന്ദേശം നല്‍കി. കാഞ്ചികാമകോടി ആസ്ഥാന വിദ്വാന്‍ പുരസ്‌കാരം നേടിയ തവില്‍ വിദ്വാന്‍ കാവാലം ബി. ശ്രീകുമാറിനെ കാവാലം നാരായണപ്പണിക്കര്‍ പൊന്നാടയണിയിച്ച് ചടങ്ങില്‍ ആദരിച്ചു.

ബ്ലോക്ക് പഞ്ചായത്ത് അംഗം ശോഭന ഉദയകുമാര്‍, ഗ്രാമപ്പഞ്ചായത്ത് അംഗം പി. ഉദയകുമാര്‍, അനിയന്‍ കാവാലം കെ.പി. ഷാജി, എ.കെ. തങ്കപ്പന്‍ എന്നിവര്‍ പ്രസംഗിച്ചു. ക്ലബ് സെക്രട്ടറി ജി. ഹരികൃഷ്ണന്‍ സ്വാഗതം പറഞ്ഞു. തുരുത്തി സന്തോഷ്, രാഖി രാജു എന്നിവരുടെ നേതൃത്വത്തിലുള്ള ടീമിന്റെ സ്വാഗത ഗാനത്തോടെയാണ് പരിപാടി തുടങ്ങിയത്. അമ്മമാരെ ആദരിക്കല്‍ ചടങ്ങിനുശേഷം അമ്മമാര്‍ക്ക് വിഭവസമൃദ്ധമായ ഓണസദ്യ വിളമ്പി. തുടര്‍ന്ന് അമ്മമനസ്സുകള്‍ക്ക് ആനന്ദമാകാന്‍ കുട്ടികളുടെ തിരുവാതിര, നാടോടി നൃത്തം, കാവാലം രംഭയുടെ നാടന്‍ പാട്ട്, അംബേദ്കര്‍ ഗ്രാമത്തിലെ വനിതകളുടെ വഞ്ചിപ്പാട്ട് എന്നീ കലാപരിപാടികള്‍ സ്റ്റേജില്‍ അരങ്ങേറി. പരിപാടികള്‍ക്കുശേഷം ക്ലബിലെ അംഗങ്ങള്‍ തന്നെ അമ്മമാരെ വീടുകളിലെത്തിച്ചു.

അവശത അനുഭവിക്കുന്ന വൃദ്ധസമൂഹത്തിന് യുവജനങ്ങള്‍ കൈത്താങ്ങാവണമെന്ന സന്ദേശം സമൂഹത്തില്‍ വ്യാപിപ്പിക്കാന്‍ വിവിധ പ്രദേശങ്ങളില്‍ അമ്മക്കൂട്ടായ്മകള്‍ സംഘടിപ്പിക്കാനുള്ള ശ്രമത്തിലാണ് കാവാലം സൂര്യ യുവജന ക്ഷേമകേന്ദ്രo.

**കടപ്പാട് : മാതൃഭൂമി

കായംകുളത്തിന്റെ ഓളപ്പരപ്പില്‍ ശ്രീഗണേശന്‍ ജലരാജാവ്‌ !!!

2011-08-29T12:17:00.000-07:00

രണ്ടാമത്‌ കായംകുളം ജലോത്സവത്തില്‍ ശ്രീഗണേശന്‍ ജലരാജാവായി. ഷാജി ചേരമന്‍ ക്യാപ്‌റ്റനായുളള കാവാലം കരുമാടിക്കുട്ടന്‍ ബോട്ട്‌ ക്ലബാണ്‌ ശ്രീഗണേശന്‍ തുഴഞ്ഞത്‌.

അമ്മയ്ക്കൊരു ഓണം

2011-08-29T11:17:00.000-07:00

കാവാലം സുര്യ യുവജനക്ഷേമ കേന്ദ്രത്തിന്റെ 16 -)o വാര്ഷികത്തിന്റെയും ഓണാഘോഷ പരിപാടികളുടെയും ഭാഗമായി 2011 സെപ്റ്റംബര്‍ 11-)o തീയതി ഞായറാഴ്ച "അമ്മയ്ക്കൊരു ഓണം" എന്ന ഒരു കൂട്ടായ്മ സംഘടിപ്പിക്കുന്നു

വീടിന്റെയും നാടിന്റെയും സമസ്ത ഐശ്വര്യങ്ങള്‍ക്കും കാരണക്കാരായ നമ്മുടെ അമ്മമാര്‍ക്കായി കാവാലം സുര്യ സംഘടിപ്പിക്കുന്ന ഈ കൂട്ടായ്മ പദ്മശ്രീ. കാവാലം നാരായണപ്പണിക്കര്‍ ഉദ്ഘാടനം ചെയ്യും. അഭിവന്ദ്യനായ കഥകളി ആചാര്യന്‍ ശ്രീ. മാത്തൂര്‍ ഗോവിന്ദന്കുട്ടി മുഖ്യാതിഥി ആയിരിക്കുന്ന പ്രസ്തുത ചടങ്ങില്‍ പ്രശസ്ത സിനിമ താരം ശ്രീ. കൊല്ലം തുളസി അമ്മമാരെ ആദരിക്കും. രാഷ്ട്രീയ സാംസ്‌കാരിക രംഗങ്ങളിലെ പ്രമുഖര്‍ പങ്കെടുക്കുന്ന ഈ ചടങ്ങിലേക്ക് നല്ലവരായ എല്ലാവരെയും ഹൃദയപൂര്‍വം സ്വാഗതം ചെയ്തുകൊള്ളുന്നു.

ഓണോല്സവം 2011

2011-08-25T20:33:00.000-07:00

പ്രീയപ്പെട്ടവരെ കര്‍ക്കിടകം പെയ്തൊഴിഞ്ഞു ചിങ്ങവെയിലും ഓണനിലാവും പരക്കുന്നു. മലയാള നാടിനിതു വസന്തകാലം. എണ്ണമറ്റ സ്മരണകളുടെ ഇതിഹാസ ഭൂമിയില്‍ സത്യസന്ധവും ഊര്‍ജസ്വലവുമായ പ്രവര്‍ത്തന മികവുമായി കാവാലം സൂര്യ യുവജനക്ഷേമ കേന്ദ്രം ഈ ചെത്ര മാസത്തില്‍ പതിനാറാം വര്‍ഷത്തിലേക്ക് കാലൂന്നുകയാണ്‌.

കായല്‍ രാജാവ്‌ മുരിക്കന്‍ തീര്‍ത്ത കണ്ണെത്താദൂരം പരന്ന കായല്‍ നിലങ്ങള്‍........പണിക്കര്‍ ത്രയം കലയുടെയും സാഹിത്യത്തിന്റെയും വിസ്മയം വിരിയിച്ച പൂക്കൈതയാറിന്‍ തീരം.........വെല്ലുവിളികളെ വള്ളപ്പാടുകള്‍ക്ക് തുഴഞ്ഞു തോല്‍പ്പിക്കുന്ന കുട്ടനാടന്‍ കൈക്കരുത്ത്.....മണ്ണില്‍ പൊന്നു വിളയിക്കുന്ന തൊഴിലാളി ഐക്യം......നാടിന്റെ പൈതൃകങ്ങള്‍ നെഞ്ചിലേറ്റി നന്മയുള്ളവര്‍ ചൊരിഞ്ഞ അകമഴിഞ്ഞ പിന്തുണയുമായി കാവാലം സൂര്യ യാത്ര തുടരുന്നു..... ഗ്രാമത്തിന്റെ ഹൃദയത്തുടിപ്പുകള്‍ തേടി, നന്മകള്‍ തേടിയാണീ പ്രയാണം....നാടിനെ ഗ്രസിക്കുന്ന വിപത്തുകള്‍ക്കെതിരെ നമ്മുക്ക് ഒരുമയുടെ മനുഷ്യമതില്‍ തീര്‍ക്കാം. ഒപ്പം ഓണോല്സവം ഹൃദയത്തിലേറ്റാന്‍ ഏവരേയും സ്നേഹപൂര്‍വ്വം ക്ഷണിക്കുന്നു.

ഓണോല്സവം 2011 ലെ കാര്യപരിപാടികളെ കുറിച്ചറിയാന്‍ താഴെ കൊടുത്തിരിക്കുന്ന ചിത്രങ്ങളില്‍ ക്ലിക്ക് ചെയ്യുക

കാവാലം സുര്യയ്ക്ക് പുതിയ ലോഗോ

2011-05-16T09:04:00.000-07:00

കര്‍മപഥത്തില്‍ പതിനാറാം വര്‍ഷത്തിലേക്ക് കാലൂന്നുന്ന കാവാലം സുര്യയ്ക്ക് പുതിയ ലോഗോ.ആകര്‍ഷകമായ ലോഗോ ഇന്റെര്‍നെറ്റിലെ വിവിധ സോഷ്യല്‍ നെറ്റ്വര്‍ക്കിംഗ്‌ സൈറ്റുകളിലൂടെ 2011ഏപ്രില്‍ 27നാണു പ്രകാശനം ചെയ്തത്.

കുങ്കുമ വര്‍ണമുള്ള ഉദിച്ചുയരുന്ന സൂര്യനാണ് മുകളില്‍.നന്മയുടെയും സംഘശക്തിയുടെയും കലാകായിക സാംസ്‌കാരിക സാമൂഹിക രംഗങ്ങളിയെയും വികസന സുര്യന്‍ ഭൂമിക്കുമേല്‍ ഉദിച്ചു വരുന്നതായാണ്ചിത്രീകരണം.പ്രതീക്ഷയുടെ ഈ പൊന്‍സുര്യന്‍ ഉദിക്കുമ്പോള്‍ തിരയടങ്ങാത്ത കടല്‍ പോലും ശാന്തയാകുന്നു. മധ്യഭാഗത്ത് കടലിനെ സൂചിപ്പിക്കുന്ന നീല വര്‍ണത്തിലാണ് കാവാലം സുര്യ എന്ന് ആലേഖനം ചെയ്തിരിക്കുന്നത്.

ശാന്തിയും സമാധാനവും സൂചിപ്പിച്ചു സൂര്യന്റെ പ്രതിബിംബം അതേപോലെ താഴെ പ്രതിധ്വനിക്കുന്നത് കാണാം.ഒപ്പം ഐക്യമാണ് ശക്തിയെന്ന് ആലേഖനം ചെയ്തിരിക്കുന്നു.

കോട്ടയം മൂലേടം സ്വദേശിയായ ഗോപകുമാര്‍ ആണ് ലോഗോ രൂപകല്‍പന ചെയ്തത്.

ക്രിയേറ്റീവ് ഐഡിയ- ജി ഹരികൃഷ്ണന്‍

കുരുന്നുകൂട്ടം 2011

2011-05-16T08:55:00.000-07:00

കേന്ദ്ര സംഗീത നാടക അക്കാദമിയുടെ സഹകരണത്തോടെ തിരുവനന്തപുരം സോപാനം, കാവാലം സൂര്യ, കടുംതുടിക്കൂട്ടം എന്നിവയുടെ ആഭിമുഖ്യത്തില്‍ കാവാലം ഗവ എല്‍ പി സ്കൂളില്‍ ഏപ്രില്‍ 1 മുതല്‍ 10 വരെ കുരുന്നുകൂട്ടം കലാ പരിശീലന കളരി നടന്നു.

150 ലേറെ കുട്ടികള്‍ പങ്കെടുത്ത ഈ കലാ പരിശീലന കളരിക്ക്, പദ്മ ഭൂഷന്‍ കാവാലം നാരായണ പണിക്കര്‍നേതൃത്വം നല്‍കി. സമാപനച്ചടങ്ങില്‍ തിരുവനന്തപുരം സോപാനം അവതരിപ്പിച്ച തെയ്യ തെയ്യം നാടകം കാണികള്‍ക്ക് വിരുന്നായി. കുരുന്നുകൂട്ടത്തിലെ ചില ചിത്രങ്ങള്‍ നിങ്ങള്ക്ക് വേണ്ടി ഇവിടെ നലികിയിരിക്കുന്നു.

ചിത്രങ്ങള്‍ക്ക് കടപ്പാട് : കാവാലം ശശികുമാര്

‍

കലയുടെ കളരിയൊരുക്കി കാവാലം വീണ്ടും**

2011-04-04T09:27:00.000-07:00

കാവാലം: അവധിക്കാലത്ത് കലയുടെ ലോകത്തേക്ക് കൂട്ടിക്കൊണ്ടുപോകാന്‍ നാടകാചാര്യന്‍ കാവാലം നാരായണപ്പണിക്കര്‍ കുരുന്നുകൂട്ടവുമായെത്തി. നൂറോളം കുട്ടികള്‍ക്കാണ് കാവാലം ഗവ. എല്‍.പി. സ്‌കൂളില്‍ കളരി ഒരുക്കിയിരിക്കുന്നത്. പത്തുദിവസത്തെ കളരിയില്‍ നൃത്തം, നാടകം, സംഗീതം, ചിത്രകല എന്നിവയില്‍ പരിശീലനം നല്‍കും.

കഴിഞ്ഞ ആറുവര്‍ഷമായി സ്വന്തം ഗ്രാമത്തിലെ കുട്ടികള്‍ക്കായി കലാപരിശീലനക്കളരി കാവാലം സംഘടിപ്പിക്കുന്നുണ്ട്. കേന്ദ്രസംഗീതനാടക അക്കാദമിയുടെ സഹകരണത്തോടെ തിരുവനന്തപുരം സോപാനം, കാവാലം സൂര്യ യുവജനക്ഷേമ കേന്ദ്രം, കടുംതുടിക്കൂട്ടം കാവാലം എന്നിവയുടെ ആഭിമുഖ്യത്തിലാണ് കുരുന്നുകൂട്ടം നടക്കുന്നത്.

കളരിയുടെ ഭാഗമായി കേരള സംഗീതനാടക അക്കാദമി ചെയര്‍മാനും നടനുമായ മുകേഷ് ഉള്‍പ്പെടെയുള്ളവര്‍ കുട്ടികളുമായി സംവദിക്കാനെത്തും. കളരിയുടെ സമാപനദിനമായ ഏപ്രില്‍ 10ന് വൈകീട്ട് കാവാലത്തിന്റെ 'തെയ്യത്തെയ്യം' എന്ന നാടകത്തിന്റെ അവതരണം നടക്കും.

കുരുന്നുകൂട്ടത്തിന്റെ ഉദ്ഘാടനം കാവാലം ഗ്രാമപ്പഞ്ചായത്ത് പ്രസിഡന്റ് മോളമ്മ സതീശന്‍ നിര്‍വഹിച്ചു. ചാലയില്‍ വേലായുധപ്പണിക്കര്‍ അധ്യക്ഷത വഹിച്ചു. വെളിയനാട് എ.ഇ.ഒ. മാരിയത്ത് ബീവി, കെ. സജി, ജി. ഹരികൃഷ്ണന്‍, രാഖി രാജു, ജയഹരി എന്നിവര്‍ പ്രസംഗിച്ചു.

**കടപ്പാട് - മാതൃഭൂമി ദിനപത്രം

ഗ്രാമങ്ങള്‍ കലയുടെ വിളനിലങ്ങള്‍: കാവാലം നാരായണപ്പണിക്കര്‍*

2011-04-04T08:51:00.000-07:00

ഗ്രാമങ്ങള്‍ കലയുടെ വിളനിലങ്ങളാണെന്നു നാടകാചാര്യന്‍ കാവാലം നാരായണപ്പണിക്കര്‍. കാവാലം ഗവ. എല്‍.പി. സ്‌കൂളില്‍ ആരംഭിച്ച കുട്ടികള്‍ക്കായുള്ള കുരുന്നുകൂട്ടം കലാപരിശീലനക്കളരിയുടെ ഉദ്‌ഘാടന സമ്മേളനത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.

നാട്ടിന്‍പുറങ്ങള്‍ നന്മകളാല്‍ സമൃദ്ധമാണ്‌. എന്നാല്‍ നാട്യം നിറഞ്ഞ നഗരത്തിന്റെ അധിനിവേശം ഗ്രാമങ്ങളിലും ഇന്നു കാണാം. ഇതിനിടയിലും നന്മയെയും സംസ്‌കാരത്തെയും കലകളെയും പ്രചോദിപ്പിക്കാന്‍ നമുക്കാകണം. പാടങ്ങളിലെ വിളവെടുപ്പിനുശേഷമുള്ള കലയുടെ വിളവെടുപ്പാണു കുരുന്നുകൂട്ടത്തിന്റെ ലക്ഷ്യമെന്നു അദ്ദേഹം പറഞ്ഞു.

ചാലയില്‍ വേലായുധപ്പണിക്കരുടെ അധ്യക്ഷതയില്‍ ചേര്‍ന്ന യോഗത്തില്‍ കാവാലം ഗ്രാമപഞ്ചായത്ത്‌ പ്രസിഡന്റ്‌ മോളമ്മ സതീശന്‍ കലാപരിശീലനക്കളരിയുടെ ഉദ്‌ഘാടനം നിര്‍വഹിച്ചു.

വെളിയനാട്‌ എ.ഇ.ഒ. മാരിയത്ത്‌ ബീവി, കെ. സജി, ജി. ഹരികൃഷ്‌ണന്‍, രാഖി രാജു, ജയഹരി എന്നിവര്‍ പ്രസംഗിച്ചു. കേരള സംഗീത നാടക അക്കാദമി ചെയര്‍മാന്‍ കുരുന്നുകൂട്ടം സന്ദര്‍ശിക്കാനെത്തും. സമാപനദിവസമായ പത്തിന്‌ വൈകിട്ട്‌ കാവാലത്തിന്റെ തെയ്യത്തെയ്യം നാടകാവതരണം ഉണ്ടായിരിക്കും.

കാവാലം നാരായണപ്പണിക്കരുടെ നേതൃത്വത്തില്‍ കേന്ദ്ര സംഗീത നാടക അക്കാദമിയുടെ സഹകരണത്തോടെ തിരുവനന്തപുരം സോപാനം, കാവാലം സൂര്യ, കടുംതുടിക്കൂട്ടം കാവാലം എന്നിവയുടെ ആഭിമുഖ്യത്തിലാണ്‌ കുരുന്നുകൂട്ടം സംഘടിപ്പിക്കുന്നത്‌.

*കടപ്പാട് - മംഗളം ദിനപത്രം

കാവാലത്തു പടയണി കോലങ്ങള്‍ ഒരുങ്ങുന്നു; കാരണവരായി കാവാലവും

2010-12-21T07:41:00.000-08:00

കലയുടെ പശിമയുള്ള കാവാലത്തിന്റെ മണ്ണ്‌ പടയണി കോലങ്ങളുടെ എഴുന്നള്ളിപ്പിനൊരുങ്ങുന്നു. പതിറ്റാണ്ടുകള്‍ക്കുശേഷം കാവാലത്ത്‌ പടയണിക്കു അരങ്ങൊരുക്കുന്നതു നാടകാചാര്യന്‍ കാവാലം നാരായണപ്പണിക്കരാണ്‌. വിഖ്യാതമായ കടമ്മനിട്ട പടയണി കാവാലത്ത്‌ അവതരിപ്പിക്കാന്‍ എത്തുന്നതാകട്ടെ പ്രഫ. കടമ്മനിട്ട വാസുദേവന്‍ പിള്ളയുടെ നേതൃത്വത്തിലുള്ള സംഘവും.

ഡിസംബര്‍ 22ന്‌ രാത്രിയില്‍ കാവാലം മേജര്‍ പള്ളിയറക്കാവ്‌ ദേവീ ക്ഷേത്രമാണു പടയണിക്കു വേദിയാകുന്നത്‌. ക്ഷേത്ര നടയില്‍ രാത്രി ഒമ്പതിനു ചടങ്ങുകള്‍ ആരംഭിക്കും. കാവാലം നാരായണപ്പണിക്കരുടെ തറവാടായ ചാലയില്‍നിന്നു പടയണിക്കോലങ്ങള്‍ ഘോഷയാത്രയായി ക്ഷേത്രത്തിലെത്തും. പാള, കുരുത്തോല, ചൂട്ടുകറ്റ തുടങ്ങി പടയണിക്കാവശ്യമായ സാധനങ്ങള്‍ ഒരുക്കിക്കഴിഞ്ഞു. തന്റെ കുട്ടിക്കാലത്ത്‌ കാവാലത്ത്‌ പടയണി അരങ്ങേറിയിരുന്നതായി കാവാലം നാരായണപ്പണിക്കര്‍ സ്‌മരിക്കുന്നു.

പടയണി ആഘോഷമാക്കാന്‍ നാട്ടുകാരെല്ലാം ആവേശത്തോടെയുണ്ട്‌. പടയണിയുടെ താളത്തിലേക്കു നടന്നടുക്കുകയാണു കാവാലം ദേശം. ചടങ്ങുകള്‍ക്കു കാരണവരായി കാവാലം നാരായണപ്പണിക്കരും നാട്ടുകാര്‍ക്കൊപ്പം ഒരുക്കങ്ങളില്‍ മുഴുകിയിരിക്കുകയാണ്‌.

കാവാലത്തിന്റെ സാമൂഹ്യ-സാംസ്കാരിക ചരിത്രം

2010-12-10T05:57:00.000-08:00

ആലപ്പുഴ ജില്ലയിലെ കുട്ടനാട് താലൂക്കില്‍ വെളിയനാട് ബ്ളോക്കു പരിധിയില്‍ വരുന്ന ഒരു ഗ്രാമപഞ്ചായത്താണ് കാവാലം. ഈ പഞ്ചായത്തിന് 17.25 ചതുരശ്ര കിലോമീറ്റര്‍ വിസ്തൃതിയാണുള്ളത്. കുട്ടനാടന്‍ നെല്ലറയുടെ നായകസ്ഥാനം വഹിക്കുന്ന കാവാലം ഗ്രാമം കായല്‍ രാജാവെന്ന പേരില്‍ അറിയപ്പെട്ടിരുന്ന മുരിക്കന്റെ നാടാണ്. മലയാളത്തിലെ പുകഴ്പെറ്റ പല കലാകാരന്മാരുടേയും ജന്മദേശം കൂടിയാണ് ഈ ഗ്രാമം. ദ്വീപിന് സമാനമായ സ്ഥലം അശ്രാന്ത പരിശ്രമത്തിലൂടെ ആയിരങ്ങള്‍ക്ക് അന്നം വിളയിക്കുന്ന ഭൂമിയാക്കി രൂപപ്പെടുത്തിയെടുത്ത ഈ ഗ്രാമം മനുഷ്യ വിഭവശേഷിയുടെ ഉത്തമ മാതൃകയാണ്. പമ്പാനദിയുടെ കൈവഴിയും ഇതോട് ചേര്‍ന്നുകിടക്കുന്ന മറ്റു ജലാശയങ്ങളും നാടിനെ ജലസമൃദ്ധവും ഫലഭൂയിഷ്ഠവുമാക്കുന്നു. 2 വലിയ കായലുകളും എട്ടു പാടശേഖരങ്ങളും ഇവിടെയുണ്ട്. വടക്കുഭാഗത്ത് കരിയൂര്‍ മംഗലം പ്രദേശവും, തെക്കുഭാഗത്ത് വണ്ടകപ്പള്ളി തോടും കിഴക്കുഭാഗത്ത് പുളിമൂട് ഉച്ചേത്തറ തോടും പടിഞ്ഞാറുഭാഗത്ത് ആറ്റുമുഖം തരിശുകായല്‍ എന്നിവയുമാണ് പഞ്ചായത്തിന്റെ അതിരുകള്‍ . കായല്‍ രാജാക്കന്മാരുടെ ദേശമായി അറിയുന്ന ഈ ഗ്രാമത്തില്‍പ്പെട്ട പാടത്താണ് ആദ്യമായി ചക്രങ്ങള്‍ക്കു ശേഷം വെള്ളം വറ്റിക്കാനുള്ള നീരാവി യന്ത്രം പ്രവര്‍ത്തിപ്പിച്ചത്. നാടന്‍ കലകളുടെ ഉപാസകനായി അറിയപ്പെടുന്ന ഈ നാടിന്റെ സ്വന്തം പുത്രനായ കാവാലം നാരായണപ്പണിക്കര്‍ നാടക രചനയിലും ഗാന രചനയിലും പുതിയ മാനങ്ങള്‍ കണ്ടെത്തിയ പ്രതിഭയാണ്. കാവാലം ഗ്രാമം നിരവധി സാഹിത്യ നായകന്‍മാരുടേയും സാംസ്കാരിക നായകരുടേയും ജന്മഗൃഹമാണ്. വള്ളംകളി പ്രേമികളുടെ മനസ്സില്‍ എക്കാലവും മായാതെ നില്ക്കുന്ന കാവാലം ചുണ്ടന്‍ എന്ന മത്സരവള്ളം ഈ നാടിന്റെ അഭിമാനമായി നിലകൊള്ളുന്നു.

കുട്ടനാടന്‍ നെല്ലറയുടെ നായകസ്ഥാനം വഹിക്കുന്ന കാവാലം ഗ്രാമം കായല്‍ രാജാവിന്റെയും പ്രശസ്ത കലാകാരന്മാരുടേയും ജന്മദേശമാണ്. ചെമ്പകശ്ശേരി രാജഭരണത്തിന്റെ ചിരസ്മാരകങ്ങളായി നില്‍ക്കുന്ന ക്ഷേത്രങ്ങളും, പഴയ തറവാടുകളിലെ നെല്ലറകളും ഈ ദേശത്തിന്റെ സാസ്കാരിക പരിച്ഛേദങ്ങളാണ്. ദ്വീപിന് സമാനമായ സ്ഥലത്തിനെ അശ്രാന്ത പരിശ്രമത്തിലൂടെ ആയിരങ്ങള്‍ക്ക് അന്നം വിളയിക്കുന്ന ഭൂമി രൂപപ്പെടുത്തിയ ചരിത്രമാണ് കാവാലം എന്ന ഈ ഗ്രാമത്തിന്റേത്. മനുഷ്യ വിഭവശേഷിയുടെയും അധ്വാനത്തിന്റേയും ഉത്തമ മാതൃകയാണ് കാവാലം ഗ്രാമം. പമ്പാനദിയുടെ കൈവഴിയും ഇതോട് ചേര്‍ന്നുകിടക്കുന്ന മറ്റു ജലാശയങ്ങളും നാടിനെ ഫലഭൂയിഷ്ഠമാക്കുന്നു. കര്‍ഷകരും കര്‍ഷക തൊഴിലാളികളും അധിവസിക്കുന്ന ഈ ഗ്രാമത്തിന്റെ കഥ അദ്ധ്വാനത്തിന്റെ കഥ മാത്രമാണ്. കായല്‍ രാജാവെന്ന് പുകള്‍പെറ്റ മുരിക്കന്റേയും ആദ്യനാളില്‍ കായലുകള്‍ രൂപപ്പെടുത്തുന്നതിന് മുഖ്യ പങ്കുവഹിച്ച ചാലില്‍ ഇരയി രാമകൃഷ്ണ പണിക്കരുടേയും പേരുകളും പ്രവൃത്തികളും ആര്‍ക്കും മറക്കാന്‍ കഴിയില്ല. സാഹിത്യ നയതന്ത്ര രംഗങ്ങളില്‍ വ്യക്തിമുദ്ര പതിപ്പിച്ച സര്‍ദാര്‍ കെ.എം.പണിക്കര്‍ ഈ ഗ്രാമത്തിന്റെ അഭിമാനമായിരുന്നു. കവിയും ആട്ടക്കഥാകാരനുമായ ഇട്ടിരാരിശ മേനോന്‍ , ഡോ. കെ.പി.പണിക്കര്‍ , ഡോ. കെ.അയ്യപ്പപ്പണിക്കര്‍ , കാവാലം നാരായണ പണിക്കര്‍ , കാവാലം വിശ്വനാഥക്കുറുപ്പ്, കാവാലം ബാലചന്ദ്രന്‍ , കാവാലം ജോസഫ്, കാവാലം ശ്രീകുമാര്‍ തുടങ്ങി ഒട്ടനവധി കലാകാരന്മാരുടേയും ജന്മദേശമാണിവിടം. രാജഭരണകാലത്ത് എട്ട് കുടുംബക്കാരാണ് ഈ ഗ്രാമത്തിന്റെ ഭരണത്തിന് ചുക്കാന്‍ പിടിച്ചിരുന്നത്. കായല്‍ രാജാക്കന്മാരുടെ ദേശമായി അറിയുന്ന ഈ ഗ്രാമത്തില്‍പ്പെട്ട പാടത്താണ് ആദ്യമായി ചക്രങ്ങള്‍ക്കു ശേഷം വെള്ളം വറ്റിക്കാനുള്ള നീരാവി യന്ത്രം പ്രവര്‍ത്തിപ്പിച്ചത്. ജോര്‍ജ് ബ്രണ്ടന്‍ സായിപ്പിന്റെ നേതൃത്വത്തില്‍ മണ്ണെണ്ണ ഉപയോഗിച്ചുള്ള എഞ്ചിന്‍ പ്രവര്‍ത്തിപ്പിച്ചുകൊണ്ടാണ് മാറ്റത്തിന് തുടക്കമിട്ടത്. കാവാലം പഞ്ചായത്തിലെ 1370 ഏക്കര്‍ വരുന്ന രാമരാജപുരം കായലാണ് ആദ്യമായി ചാലയില്‍ ഇരവി രാമകൃഷ്ണ പണിക്കര്‍ മുന്‍കൈ എടുത്ത് രൂപപ്പെടുത്തിയത്. 196- ലെ ഭൂപരിഷ്കരണ നിയമത്തിന്റെ ഫലമായി 15 ഏക്കറില്‍ കൂടുതല്‍ ഭൂമി ഒരാള്‍ കൈവശം വയ്ക്കരുതെന്ന് നിയമം വരികയും ഭൂരഹിതരായ അനേകംപേര്‍ക്ക് സര്‍ക്കാര്‍ ഏറ്റെടുത്ത മിച്ചഭൂമി പതിച്ചു നല്‍കുകയുമുണ്ടായി. 32000 പറനിലം സ്വന്തമായി കൃഷി ചെയ്ത് 300 കുടുംബങ്ങള്‍ക്ക് നിത്യവും കൃഷിപ്പണി നല്കിയ ആളായിരുന്നു കായല്‍ രാജാവെന്നു പില്‍ക്കാലത്ത് അറിയപ്പെട്ട മുരിക്കുംമൂട്ടില്‍ തൊമ്മന്‍ ജോസഫ്. കാവാലം ഗ്രാമത്തിന്റെ പ്രഥമ പഞ്ചായത്തു പ്രസിഡന്റു കൂടിയായിരുന്ന ഇദ്ദേഹം കാര്‍ഷിക മേഖലയ്ക്ക് നല്‍കിയ സംഭാവനകള്‍ ശാസ്ത്രജ്ഞന്മാര്‍ക്കു തന്ന ഇന്ന് അദ്ഭുതമുളവാക്കുന്നവയാണ്. ശ്രീ ചിത്തിര തിരുനാള്‍ മഹാരാജാവിന്റെ ഭരണകാലത്ത് അദ്ദേഹത്തിന്റെ സഹായവുംകൂടി കൃഷിയിടം രൂപപ്പെടുത്താന്‍ ലഭിച്ചപ്പോള്‍ കേരളത്തിന്റെ നെല്ലറയെന്ന് പേരുകേട്ട കുട്ടനാടന്‍ നെല്‍പാടങ്ങളുടെ കൂട്ടത്തില്‍ റാണി, ചിത്തിര, മാര്‍ത്താണ്ഡം എന്നീ കായലുകളും കൂടി രൂപപ്പെട്ടു. ചാലയില്‍ കുടുംബത്തിലെ പ്രധാനികളില്‍ ഒരാളായ കേശവ പണിക്കരും കാവാലം പഞ്ചായത്ത് പ്രസിഡന്റായിരുന്നു. ഒരൊറ്റ ആട്ടക്കഥ എഴുതി പ്രസിദ്ധനായ വണ്ടകപ്പള്ളി ഇട്ടിരാരിശ്ശ മേനോനും ഈ ഗ്രാമവാസിയായിരുന്നു. സന്താന ഗോപാലം കഥകളി എഴുതി സാഹിത്യ രംഗത്ത് വ്യക്തിമുദ്ര പതിപ്പിച്ച കലാകാരനായിരുന്നു ഇദ്ദേഹം. പ്രസിദ്ധകവി അയ്യപ്പ പണിക്കരും കാവാലവുമായുള്ള ബന്ധം അഭേദ്യമാണ്. ഓലിക്കല്‍ തറവാട് അംഗമായ അയ്യപ്പപ്പണിക്കര്‍ വിശ്വസാഹിത്യത്തില്‍ അദ്വിതീയ സ്ഥാനം അലങ്കരിക്കുന്ന വ്യക്തിയായി മാറി. നാടന്‍കലകളുടെ ഉപാസകനായി അറിയപ്പെടുന്ന കാവാലം നാരായണപ്പണിക്കര്‍ നാടക രചനയിലും ഗാന രചനയിലും പുതിയ മാനങ്ങള്‍ കണ്ടെത്തിയ പ്രതിഭയാണ്. വള്ളംകളി പ്രേമികളുടെ മനസ്സിലും മായാതെ നില്ക്കുന്ന കാവാലം ചുണ്ടന്‍ കാവാലം ഗ്രാമത്തിന്റെ സാംസ്കാരികാടയാളമാണ്. നൂറ്റാണ്ടുകള്‍ പഴക്കമുള്ള വിദ്യാഭ്യാസ സ്ഥാപനങ്ങളും തറവാടുകളും ഈ ഗ്രാമത്തിന്റെ പാരമ്പര്യം വിളിച്ചോതുന്നു. കേരളത്തില്‍ ഏറ്റവും ഡിമാന്റുള്ള വീല്‍ ബീഫ് ഉല്പാദിപ്പിക്കുവാനുള്ള കാളക്കുട്ടികളെ കുറഞ്ഞ ചെലവില്‍ വളര്‍ത്താവുന്ന ഒരു പ്രദേശമാണ് കാവാലം. 1939 വരെ ഒന്നിടവിട്ട വര്‍ഷങ്ങളില്‍ മാത്രമാണ് ഇവിടെ നെല്‍കൃഷി ചെയ്തിരുന്നത്. പഴയ നിലകൃഷി എന്നാണ് ഈ രീതിയെ വിളിച്ചിരുന്നത.് പത്തിരുപത് മാസം വെള്ളത്തിനടിയില്‍ തരിശായി കിടക്കുന്നതു മൂലം പ്രകൃതിതന്ന കിഴക്കന്‍ മലകളിലെ എക്കല്‍മണ്ണ് വെള്ളപ്പൊക്കത്തിലൂടെ ഈ കൃഷിസ്ഥലത്തെത്തിച്ചിരുന്നു. 1939-ല്‍ രണ്ടാം ലോകമഹായുദ്ധ കാലത്ത് ബര്‍മ്മയില്‍ നിന്നും അരിയുടെ വരവ് നിശേഷം നിലച്ച് രൂക്ഷമായ ഭക്ഷ്യക്ഷാമം നേരിട്ടപ്പോഴാണ് വര്‍ഷംതോറും കൃഷി എന്ന രീതി ആരംഭിച്ചത്. ഞാറ്റുപാട്ടിന്റെയും തേക്കുപാട്ടിന്റെയും ചക്രം ചവിട്ടുപാട്ടിന്റെയും ഈണം മുഴങ്ങുന്ന കാവാലം നിരവധി സാഹിത്യ നായകന്മാരുടെയും സാംസ്കാരിക നായകന്മാരുടേയും ജന്മഗൃഹം കൂടിയാണ്. അദ്ധ്വാനഭാരം ലഘൂകരിക്കുന്നതിനുവേണ്ടി ഉള്ളില്‍ നിന്നു ഉതിര്‍ന്ന ഈ ശീലുകളില്‍ നിരവധി ഐതിഹ്യങ്ങളും ചരിത്ര സത്യങ്ങളും തെളിഞ്ഞു നില്‍ക്കുന്നു. ആദ്യകാലങ്ങളില്‍ കുടിപ്പള്ളിക്കൂടങ്ങളിലാണ് കുട്ടികളെ പഠിപ്പിച്ചിരുന്നത്. വെള്ളത്താല്‍ ചുറ്റപ്പെട്ട ഗ്രാമമായതിനാല്‍ ഇവിടുത്തുകാര്‍ക്ക് യാത്ര എന്നും ബുദ്ധിമുട്ട് ഉളവാക്കിയിരുന്നു. 1990-നടുത്താണ് കുട്ടനാടിനെ കീറിമുറിച്ച് കടന്നുപോകുന്ന പള്ളിക്കൂട്ടുമ്മ-നീലംപേരൂര്‍ റോഡിന്റെ ഭാഗമായി രണ്ടര കിലോമീറ്ററോളം റോഡ് കാവാലം ഗ്രാമത്തില്‍ കൂടി കടന്നുപോകുന്നതിന് നടപടിയായത്.

കടപ്പാട് : കാവാലം ഗ്രാമ പഞ്ചായത്ത്

എന്‍ എസ്സ് എസ്സ് ഹയര‍ സെക്കണ്ടറി സ്കൂള്‍

2010-12-10T05:34:00.000-08:00

കാവാലം എന്ന അതിമനോഹരമായ ഗ്രാമത്തിന്റെ ഹൃദയ ഭാഗത്ത് സ്ഥിതി ചെയ്യുന്ന ഒരു സരസ്വതീക്ഷേത്രമാണ് എന്‍ എസ്സ് എസ്സ് ഹയര‍ സെക്കണ്ടറി സ്കൂള്‍ . കുട്ടനാട് വിദ്യാഭ്യാസ ജില്ലയില്‍ ഉള്‍പെടുന്ന ഈ സ്ക്കൂള് ചങ്ങനാശ്ശേരി പട്ടണത്തില്‍ നിന്ന് ഏകദേശം 18 കിലോമീറ്റര്‍ പടിഞ്ഞാറായി സ്ഥിതി ചെയ്യുന്നു . 1927 ജൂണ്‍ 16 ന് ഒരു മിഡില്‍ സ്കൂള്‍ ആയിട്ടാണ് സ്കൂള്‍ പ്രവര്‍ത്തനമാരംഭിച്ചത് . ഓലിക്കല്‍ കുഞ്ഞന്‍ പണിക്കരും ,ശ്രി മന്നത്തു പത്മനാഭനും തമ്മിലുണ്ടാക്കിയ ഒരു കരാറിന്റെ അടിസ്ഥാനത്തില്‍ നായര്‍ സര്‍വീസ് സൊസൈറ്റി ആണ് സ്കൂള്‍ ആരംഭിച്ചത്. ചാലയില്‍ ,ഓലിക്കല്‍ എന്നി കുടുംബങ്ങള്‍ സൗജന്യമായി നല്‍കിയ സ്ഥലത്തു പ്രവര്‍ത്തിക്കുന്ന ഈ സ്കൂളിന്റെ മുന്‍ സാരഥികളില്‍ ചിലരാണ് ശ്രീ . റ്റി കെ പരമേശ്വരന്‍ പിള്ള ,ശ്രീ. പരമേശ്വരന്‍കൈമള്‍ ,ശ്രീ. പി എന്‍ പരമേശ്വരന്‍നായര്‍ , ശ്രീമതി.സി കെ കുഞ്ഞുകുട്ടിയമ്മ എന്നിവര്‍. കാവാലം നാരായണപ്പണിക്കര്‍, ഡോ. കെ അയ്യപ്പപണിക്കര്‍, കാവാലം വിശ്വനാഥക്കുറുപ്പ് തുടങ്ങിയ പല പ്രശ്തരും ഈ സ്കൂളിലെ പൂര്‍വ വിദ്യാര്‍ത്ഥികളാണ്. ഇവരെ കൂടാതെ സമൂഹത്തിന്റെ വ്യത്യസ്തതലങ്ങളില്‍ വിജയിച്ച ധാരാളം പേരെ ഈ സ്കൂള്‍ സംഭാവന ചെയ്തിട്ടുണ്ട് .

സാമൂഹികമായും സാമ്പത്തികമായും പിന്നോക്കം നിന്നിരുന്ന ഈ പ്രദേശത്തിന് ഒരു സഹായമായി മാറാനും ജാതിമതവ്യത്യാസങ്ങള്‍ക്കതീതമായി സാധാരണ ജനതയുടെ വിശ്വാസമാര്‍ജിക്കാനും ആ വിശ്വാസം കാത്തു സൂക്ഷിക്കാനും ഈ വിദ്യാലയത്തിനു കഴിഞ്ഞു എന്ന് നിസംശയം പറയാം. പമ്പാ നദിയുടെ കൈവഴീ തീരത്തു തലയെടുപ്പോടെ നിലകൊള്ളുന്ന ഈ സരസ്വതീക്ഷേത്രം സാംസ്കാരിക കുട്ടനാടിന് തിലകക്കുറിയായി ശോഭിക്കുന്നു . 5 മുതല്‍ 10 വരെ ക്ലാസുകളില്‍ മലയാളം മീഡിയം പ്രവര്‍ത്തിച്ചുവരുന്നു കൂടാതെ +1,+2 ക്ലാസ്സുകളുമുണ്ട് . ഈ സ്കൂളിന്റെ പ്രഥമ ഹെഡ് മാസ്റ്റര്‍ ശ്രീ . റ്റി കെ പരമേശ്വരന്‍ പിള്ളയും ,ആദ്യകാല മലയാളം അദ്ധ്യാപകനായ ശ്രീ .പി ആര്‍ പരമേശ്വരന്‍ പിള്ളയും ഇതിന്റെ വളര്‍ച്ചയില്‍ നിര്‍ണായകമായ പങ്കു വഹിച്ചിട്ടുണ്ട് .

ഭൗതികസൗകര്യങ്ങള്‍

മൂന്ന് ഏക്കര്‍ ഭൂമിയിലാണ് വിദ്യാലയം സ്ഥിതി ചെയ്യുന്നത്. ഹൈസ്കൂളിന് 6 കെട്ടിടങ്ങളിലായി 25 മുറികളും ഹയര്‍ സെക്കണ്ടറിക്ക് ഒരു കെട്ടിടത്തിലായി 6 ക്ലാസ് മുറികളുമുണ്ട്. അതിവിശാലമായ ഒരു കളിസ്ഥലം വിദ്യാലയത്തിനുണ്ട്.ഹൈസ്കൂളിനും ഹയര്‍സെക്കണ്ടറിക്കും വെവ്വേറെ കമ്പ്യൂട്ടര്‍ ലാബുകളുണ്ട്. രണ്ട് ലാബുകളിലുമായി ഏകദേശം 20 കമ്പ്യൂട്ടറുകളുണ്ട്. രണ്ട് ലാബുകളിലും ബ്രോഡ്ബാന്റ് ഇന്റര്‍നെറ്റ് സൗകര്യം ലഭ്യമാണ്.

പാഠ്യേതര പ്രവര്‍ത്തനങ്ങള്‍

സ്കൗട്ട് & ഗൈഡ്സ്.
എന്‍.സി.സി.
ബാന്റ് ട്രൂപ്പ്.
ക്ലാസ് മാഗസിന്‍. വിവിധ ക്ലാസ്സുകളില്‍ വിവിധ വിഷയങ്ങളുടെ മാഗസിനുകള്‍ തയ്യാറാക്കി പ്രദര്‍ശിപ്പിച്ചു .
വിദ്യാരംഗം കലാ സാഹിത്യ വേദി.
ക്ലബ്ബ് പ്രവര്‍ത്തനങ്ങള്‍. വിവിധവിഷയങ്ങളുടെ ക്ലബ്ബുകള്‍ കാര്യക്ഷമമായി പ്രവര്‍ത്തിക്കുന്നുണ്ട് .

മുന്‍ സാരഥികള്‍

സ്കൂളിന്റെ മുന്‍ പ്രധാനാദ്ധ്യാപകര്‍ :

ശ്രി .ടി.കെ പരമേശ്വരന്‍ പിള്ള

പരമേശ്വരന്‍കൈമള്‍

പി എന്‍ പരമേശ്വരന്‍നായര്‍

സി .കെ കുഞ്ഞുകുട്ടിയമ്മ

,പി . പരമേശ്വരന്‍നായര്‍

പി .ഡി പ്രഭാകരകര്‍ത്ത

എം .പി രാമകൃഷ്ണപണിക്കര്‍

കെ എസ്സ് നാരായണപിള്ള

കെ പി യശോദാമ്മ

ഗംഗാധരന്‍ നായര്‍

ജി കുസുമകുമാരി അമ്മ

ബി രാധാമണിയമ്മ

കെ എന്‍ ശാരദാമ്മ

കെ പുരുഷോത്തമന്‍ പിള്ള

പി വിജയലക്ഷ്മി

പി എസ്സ് രാജശേഖരന്‍ പിള്ള

പി എന്‍ വിലാസിനി

കെ പി ലക്ഷ്മി ദേവി

കെ എസ്സ് ഗോപിനാഥ്

എം റ്റി ഉമാദേവി

ഉഷാഗോപിനാഥ്

പ്രശസ്തരായ പൂര്‍വവിദ്യാര്‍ത്ഥികള്‍

കാവാലംനാരായണപ്പണിക്കര്‍

ഡോ. കെ അയ്യപ്പപണിക്കര്‍

കാവാലം വിശ്വനാഥക്കുറുപ്പ്

വെളിയനാട്ട് ഗോപാലകൃഷ്ണന്‍

കാവാലം ചുണ്ടന്‍ നീറ്റിലിറക്കുന്നത്തിന്റെ ദൃശ്യങ്ങള്‍

2010-08-28T23:26:00.000-07:00

കാവാലം സൂര്യ യുവജന ക്ഷേമകേന്ദ്രം

അമ്മയ്ക്കൊരോണം

ഓണോല്സവം 2012

അമ്മയ്ക്കൊരു ഓണം

ശതാഭിഷേക നിറവില് കാവാലം !!!!

കുരുന്നുകൂട്ടം 2012

മഹാത്മാ ക്വിസ് - 2011 വിജയികള്‍

മഹാത്മാ ക്വിസ് - 2011

അമ്മയ്ക്കൊരോണം - ചിത്രങ്ങള്‍

അവര്‍ മറക്കാത്ത ഓണം

അമ്മയ്ക്കൊരോണം (മലയാള മനോരമ)**

അമ്മയ്ക്കൊരോണം (മാധ്യമം ദിനപ്പത്രം )**

തിരുവാതിരകളിയും നാടന്പാട്ടുമായി അമ്മമാരും മുത്തശ്ശിമാരും ഓണം ആഘോഷിച്ചു**

അമ്മയ്ക്കൊരോണം (മംഗളം ദിനപ്പത്രം)**

അമ്മയ്‌ക്കൊരോണം**

കായംകുളത്തിന്റെ ഓളപ്പരപ്പില്‍ ശ്രീഗണേശന്‍ ജലരാജാവ്‌ !!!

അമ്മയ്ക്കൊരു ഓണം

ഓണോല്സവം 2011

കാവാലം സുര്യയ്ക്ക് പുതിയ ലോഗോ

കുരുന്നുകൂട്ടം 2011

കലയുടെ കളരിയൊരുക്കി കാവാലം വീണ്ടും**

ഗ്രാമങ്ങള്‍ കലയുടെ വിളനിലങ്ങള്‍: കാവാലം നാരായണപ്പണിക്കര്‍*

കാവാലത്തു പടയണി കോലങ്ങള്‍ ഒരുങ്ങുന്നു; കാരണവരായി കാവാലവും

കാവാലത്തിന്റെ സാമൂഹ്യ-സാംസ്കാരിക ചരിത്രം

എന്‍ എസ്സ് എസ്സ് ഹയര‍ സെക്ക​ണ്ടറി സ്കൂള്‍

ഭൗതികസൗകര്യങ്ങള്‍

പാഠ്യേതര പ്രവര്‍ത്തനങ്ങള്‍

മുന്‍ സാരഥികള്‍

കാവാലം ചുണ്ടന്‍ നീറ്റിലിറക്കുന്നത്തിന്റെ ദൃശ്യങ്ങള്‍

എന്‍ എസ്സ് എസ്സ് ഹയര‍ സെക്കണ്ടറി സ്കൂള്‍