தேவாவின் தேடுதல்...

பதிவர் திருவிழா 2013

2013-09-05T12:02:00.000+05:30

இந்த பேஸ்புக் என்ற கொடிய அரக்கனால் நான் எழுதி(?!) வளர்த்த வலைப்பூவை மறந்தே போன நிலைமையிலதான் வராது வந்த மாமழை போல் சங்கவி அண்ணன் போன் பண்ணி வலைப்பதிவர் சந்திப்புக்கு கூப்டாரு...ஐயம் ஆல்வேஸ் பிஸின்னு கவுண்டர் ஸ்டைல்ல சொல்லலாம்தான்...ஆனா,எதுவுமே எழுதாம இருந்தா வலைப்பூ கருகிப்போற அபாயத்த நெனச்சி உடனே வர்றேன்னு சொல்லிட்டேன்.

இந்ததடவை முதல்முறையா குளுகுளு ரயில் பயணம் வேற...குளிர்ல படுத்திருந்திட்டு சென்னைல வந்து இறங்குனா...ஸ்ஸ்ப்பா...என்னா வெயிலு..என்னா புழுக்கம்.வண்டில போற எல்லாரும் முகமூடி திருடங்க மாதிரி போக வேண்டியிருக்கு...சென்னை மக்கள நெனச்சா பாவமா இருக்கு.

சேலத்துலயும் பஸ்களுக்கு நம்பர் கொடுத்திருக்காங்க...ஆனாலும்,சென்னைல இருக்கற மாதிரி இனிஷியல் எல்லாம் இல்ல...புதுசா வர்றவங்க பஸ் நெம்பர நோட் பண்ணும்போது குழம்பாம இருக்கணும்.

AVM ஸ்டுடியோ எதிர்லதான் தங்கற இடம் இருந்தது.ஸ்டுடியோ வாசல்ல சுத்திட்டு இருக்கற உருண்டைய நான் பார்த்த பார்வையில அங்க இருந்த வாட்ச்மேன் ஒரு நாளைக்கு பத்து பேராவது கிராமத்துலருந்து வந்திடறானுங்கன்ற மாதிரியே பார்த்தார் என்பது குறிப்பிடத்தக்கது.

அப்புறம் எங்களுக்கு கொடுத்த ரூம்ல "பின்னூட்டப்புலி" பதிவுலகில் "DD" என்று செல்லமாக அழைக்கப்படும் "திண்டுக்கல்" தனபால் அண்ணனைப் பார்த்ததில் மகிழ்ச்சி.போலவே அண்ணன்கள் சைதை அஜீஸ்,திருப்பூர் ஜோதி,குடந்தை சரவணன்,ஸ்கூல்பையன்,பட்டிக்காட்டான் ஜெய் போன்ற பதிவுலக பிரபலங்களை கண்டதும் மகிழ்ச்சியான நிகழ்ச்சி. அதிகாலையிலேயே எழுந்து ஒரு இளைஞருக்குண்டான உற்சாகத்துடன் விழாவிற்கு கிளம்பிவந்த பழனிகந்தசாமி அய்யாவைப் பார்த்து எனக்குள்ளும் ஒரு புத்துணர்ச்சியை உண்டாக்கிட்டாரு.

பேஸ்புக்கில் 1000 நண்பர்கள் இருந்தும் 50ரூ சொந்தக்காசை போட்டு காலை சிற்றுண்டி முடிக்க வேண்டிய துர்பாக்கிய நிலைக்கு தள்ளப்பட்டேன்.சென்னைக்கு வர்றேன்னு ஸ்டேட்டஸ் போட்டதும் எல்லாரும் ஆப்லைனுக்கு போய்ட்டாய்ங்க... :(

விழா அரங்கத்திற்குள் நுழையும் போதே வரவேற்புக் குழுவிற்குண்டான கடமையுடன் "புது மாப்பிள்ளை" பிலாசபி பிரபா ஜிகுஜிகுவென்ற சந்தன கலர் சட்டையுடன் வாசலிலேயே நம்மை வரவேற்றார்.ஆரூர் மூனா அதுக்கும் மேல...ஒரு வித்தியாசமான கலர்ல வேட்டியும் சட்டையும் போட்டுகிட்டு மாலை எல்லாம் போட்டுட்டு இருந்தாரு...சபரிமலைக்கு போறீங்களா பாஸ்ன்னு கேட்டேன்.கேப்டன் விஜயகாந்த் மாதிரி அழகா சிரிச்சாரு.கூட இருந்த கே.ஆர்.பி செந்தில் அண்ணன்தான் இது தஞ்சாவூர் ஸ்டைலுன்னு சொன்னாரு...கேப்டன் இனிமே நடிக்க மாட்டேன்னு சொல்லிட்டாரு...அவரு இடத்துக்கு தாராளமா இவர போடலாம்.மெட்ராஸ்பவன் சிவக்குமார் சட்டையெல்லாம் தொப்பலா நனைய வேலை செஞ்சிட்டு இருந்தாரு...கடமைன்னு வந்துட்டா கடமைக்குன்னு செய்ய மாட்டாரு போல...என்ன தனியா ஒரு போட்டோ வேற எடுத்தாரு..(எதுக்காருக்கும்)

எனக்கு பிடித்த எழுத்தாளர்களில் ஒருவரான திரு.பாரதிமணி அவர்களை சந்திச்சதும் இன்ப அதிர்ச்சியா இருந்தது.டிஸ்கவரி புக் பேலஸில் "பலநேரங்களில் பல மனிதர்கள்" புத்தகம் கேட்டேன்.வந்துட்டே இருக்குன்னு சொன்னாரு...மனசுக்குள்ள பலநூறு புத்தகம் இங்க இருந்தாலும் இல்லாத புத்தகத்ததான் கேப்பானுங்கன்னு வேடியப்பன் நெனச்சிருப்பாரு. :)

பதிவுலகின் நகைச்சுவை அரசன் சேட்டைக்காரனையும் கண்டேன்.அவரும் எளிமையா பழகுவதற்கு இனிமையா இருந்தாரு.இந்த அமைதியான முகத்திற்கு பின்னால் எத்தனை (வார்த்தை) சேட்டைகள்.அவரோட புத்தகமும் அன்னிக்கு வெளியிட்டாங்க...அண்ணனோட ஆட்டோகிராப்போட வாங்கிட்டு வந்துட்டேன்.அட்டையில் எழுத்தாளரோட படத்தையே கேலி பண்ணி போட்ட முதல் புத்தகம் இதுவாதான் இருக்கும்ன்னு நெனைக்கிறேன்.

கேபிளின் கதை புத்தகத்தை வாங்கி கேபிள் அண்ணன்கிட்ட ஆட்டோகிராப் வாங்கியாச்சு...படிக்க ஆரம்பிச்சா அவ்வளவு சுவாரஸ்யம்.எனக்கு பிடித்த தொழில்நுட்ப தகவல்கள் கொட்டி கிடக்கு.

பதிவர்கள் அஞ்சு அஞ்சு பேரா அறிமுகப்படுத்திக்க சொன்னாங்க...அதுல எல்லாரும் ப்ளாக்கர் டெம்ப்ளேட் மாதிரி ஒரே மாதிரி அறிமுகப்படுத்திகிட்டோம். "தல" "கோகுலத்தில் சூரியன்" வெங்கட் போன்ற சில சி(ரி)றப்பு பதிவர்கள்தான் வித்தியாசமா அறிமுகப்படுத்திகிட்டாங்க.

புதுசா வலைப்பூ ஆரம்பிக்கறவங்களுக்கு அ முதல் ஃ வரை சொல்லித்தர்ற தொழில்நுட்ப பதிவர்கள் பிளாக்கர் நண்பனையும், பிரபு கிருஷ்ணாவையும் முதல் முறையா சந்திச்சது மிக மகிழ்ச்சியா இருந்தது.மேடையில் இவர்கள் இருவரையும் தனியா ஸ்பெஷலா அறிமுகப்படுத்தியிருக்கலாம்ன்னு தோணுச்சு...

மேடையில் சிறப்பு விருந்தினர்களாக எழுத்தாளர்கள் பாரதிமணி,பாமரன்,கண்மணி குணசேகரன்,வா.மு.கோமு போன்றோர் பேசிய பேச்செல்லாம் வாய தொறந்து கேட்டுட்டு இருந்தேன்.பாமரன் பேசியபோது சுயஎள்ளல் கலந்த பேச்சு அனைவரையும் கவர்ந்துச்சு...பேச்சுக்கு நடுவுல பேஸ்புக்க ஓட்டு ஓட்டுன்னு ஓட்னாரு...கண்ட கண்ட நாயோடல்லாம் போட்டோ எடுத்துட்டு பேஸ்புக்ல அப்டேட் பண்றானுங்க...இவ்ளோ ஏன் என் கூடக்கூட போட்டோ எடுத்துக்கறாங்கன்னா பாருங்களேன் சொன்னாரு.அவ்ளோ கேவலமா சொன்னாலும் அவரு கூட நின்னு போட்டோ எடுத்துகிட்டேன். :)

வா.மு.கோமு எழுத்தாளர்ன்ற பந்தா எல்லாம் பண்ணாம நட்புணர்வுடன் பழகியது ஆச்சர்யமா இருந்தது.அவருடைய கிராமத்து வாழ்க்கை அவர மாத்தாம வச்சிருக்குன்னு நினைக்கிறேன்.அவருடைய மேடைப்பேச்சிலும் கூட சென்னை நகர வாழ்க்கைய பத்தி கிண்டலா சொன்னாரு.

அண்ணன் சுரேகாதான் நிகழ்ச்சியை அவருக்கேயுரிய சிறப்புடன் தொகுத்து வழங்குனாரு...மேடை நிகழ்ச்சிக்கு தேவைப்படும் அந்தந்த சமயத்திற்கு ஏற்ற ரசிக்கும்படியான விமர்சனங்கள் அவரிடமிருந்து அப்பப்ப வந்துட்டே இருந்தது.அவருடைய ஆளுமைத்திறன் வளர்ப்பு புத்தகங்கள் 2 வாங்கிட்டு வந்துருக்கேன்.அடுத்த வருட விழாவிற்குள் படிச்சிரணும். :)

மொத்தத்தில் இந்த பதிவர் திருவிழாவை மறக்க முடியாத சந்திப்பாக மாற்றிய விழாக்குழுவினரோட உழைப்புக்கு நன்றி சொல்லியே ஆகணும். குறையொன்றுமில்லை(எனக்கு). அடுத்த விழாவில் சந்திப்போம்.

Bicycle Memories

2013-01-16T22:57:00.000+05:30

Bicycle Thieves படம் ஒரு ஒலகப்புகழ் பெற்ற திரைப்படம்.பல விருதுகளை குவிச்ச படம்.சிறந்த 100 படங்கள் லிஸ்ட்ல இந்தப்படமும் ஒண்ணுன்னு படிச்சிருக்கேன்.பாத்ததில்ல...யூடியூப்ல இருக்கும் பாத்துக்கலாம். அந்தப்படத்தப்பத்தி நம்ம திரைவிமர்சகபதிவர்கள் பிரிச்சி பூட்டியிருப்பாங்க... அத அங்க போய் படிச்சுக்கோங்க...இந்தப்பதிவு நம்மளோட சின்ன வயசு சைக்கிள் ஞாபகங்களைப்பத்தி...

சமீபத்தில் ஸ்ரீகாந்த் நடித்த பாகன் திரைப்படம் பார்க்க நேர்ந்தது.(3 மாசத்துக்கு முன்னாடி வந்த படத்த இப்ப பாத்துட்டு சமீபமாம்).அதில் ஒரு மிதிவண்டி...வேணாம்...சைக்கிள்ன்னே வச்சிக்குவோம். ஒரு சைக்கிள் தன் முதலாளியோட (ஸ்ரீகாந்த்) கதைய வாய்ஸ் ஓவர்ல சொல்ற மாதிரி கதை அமைச்சிருப்பாங்க...சில பல நல்ல அம்சங்கள் இருந்தும் அந்த படம் பஞ்சரானது கொஞ்சம் வருத்தமான விஷயம்தான்.எப்டியும் தமிழ்புத்தாண்டுக்கு சன் டிவில போடுவாங்க...அப்ப பாருங்க...இன்னும் கொஞ்சம் நல்லா திரைக்கதையும்,விளம்பரங்களும் அமைச்சிருந்தா படம் ஓடியிருக்கும்ன்னு நெனைக்கிறேன்.

ஒவ்வொருத்தர் வாழ்க்கையையும் சைக்கிள் இல்லாம கடந்துருக்க மாட்டாங்க...சின்ன வயசுல கத்துக்குற டைம்ல சைக்கிள்தான் பல விழுப்புண்களை நமக்கு முதல்ல தரும். நமக்கு உயரம் பத்தலேன்னாக்கூட கூட்டாளிங்க யாராவது ஓட்டிட்டா உடனே நாமளும் அதை செஞ்சாகணும். கொஞ்சநஞ்சம் தர்ற பாக்கெட்மணிய சேத்து வச்சு நமக்கு சைக்கிள் கத்து தர்றதுக்குன்னு பந்தா பண்ற அண்ணன்,அக்காக்களுக்கு கொடுத்தது போக மீதி சைக்கிள் கடையில் வாடகைக்காக கொடுத்து அந்த தேஞ்சு போன,ஒழுங்கான டயர் இல்லாத,பிரேக் இல்லாத,காத்து இல்லாத, லொட லொடன்னு சவுண்ட் வர்ற சைக்கிள ஓட்ற சொகம் இருக்கே...BMW கார் சொந்தமா வாங்கி ஓட்டும்போது ஒரு பெருமிதம் வரும் பாருங்க...அதுக்கு சளைச்சதில்ல.... :)

1 மணி நேரத்துக்கு வாடகை சைக்கிள் எடுத்துட்டு அந்தக் கடையையே சுத்தி சுத்தி வந்து அண்ணா..மணியாயிடுச்சா...மணியாயிடுச்சான்னு 10 தடவை கேட்டு சைக்கிள் கடைக்காரரை நோகடிச்சது. அவரு வேகமா ஓடற கடிகாரத்த வச்சிகிட்டு 5 நிமிஷமாவது நம்மள ஏமாத்தறது. சின்ன சைக்கிள கால் கீழ ஊன்றாம ஓட்டிட்டா அடுத்து அப்பாவோட பெரிய சைக்கிள்ல குரங்கு பெடல் டிரை பண்றது.அத ஓட்டும்போது செயின்ல கால் மாட்டிகிட்டு பல ரத்தக்காயங்கள் பாத்தது.மறந்துபோய் பூட்ட திறக்காம சக்கர போக்ஸ் கம்பிங்களை உடைச்சது.லைட் இருந்தா அத எரிய வைக்கிறேன்ற பேர்ல பின்னாடி சக்கரத்த சுத்தி சுத்தி படம் காமிச்சது.இருபதடி இருக்கற மளிகைக்கடைக்கு கூட சைக்கிள் ஓட்ற சுகத்துக்காக பல தெருவ சுத்திட்டு வந்து வீட்டுக்கு எடுபிடி வேலை செஞ்சதுன்னு அது ஒரு சைக்கிள் காலம். :)

ஹிஹி...மேல இருக்கற படம் மாதிரி(சைக்கிள் படம் கிடைக்கல) நம்ம டபுள்ஸ் சோதனைக்கு நாம பலிகடா ஆகறது...இல்ல நம்மள நம்பி வர்றவங்க பலிகடா ஆகறதுக்கு உதாரணம். நமக்கு மாட்ற கூட்டாளிங்க உசிலமணி மாதிரியே இருப்பாங்க...நாமளோ ஓமக்குச்சி நரசிம்மன் மாதிரியே இருப்போம்.இதுக்கு நம்ம வீட்ல சர்ட்டிபிகேட் கொடுப்பாங்க...குண்டா இருக்கறவங்க கள்ளம்கபடம் இல்லாதவங்களாம் ஒல்லியா இருந்தா வினையாம். வினை புடிச்சவனே... உனக்கு உடம்பே ஏறாதுரான்னு நம்மள கேவலப்படுத்தறது. :(

எனக்கு தெரிஞ்சு பேப்பர் போடற பசங்களுக்கு பிற்கால வாழ்க்கைல ஒரு கால ஒழுங்கும்,உழைக்கும் பணத்தோட அருமையும் தானாகவே வந்துரும். உடம்பும் கட்டுக்கோப்பா இருக்கும்.அது மாதிரி நிறைய பேர பாத்திருக்கேன்.

சின்ன வயசுல தொழிலுக்காக அதை பயன்படுத்திட்டு பிற்காலத்துல வசதி வந்த பிறகும் அதை மறக்காம விக்காம பூஜை பண்ணறவங்களையும் பாத்திருக்கேன்.(அண்ணாமலை படம் ஞாபகம் வருதா..?!)

என்னோட பள்ளி காலங்களும், IIT ச்சீ...ITI படிச்சப்பயும் சைக்கிள்லயே (போக வர) 28 KM ஓட்னதால உடம்பு ஏறவே இல்ல...படுத்தா அப்டி தூக்கம் வரும். இந்தக்கணினி சார்ந்த வேலைக்கு எப்ப வந்தேனோ அப்பயே உடம்பு ஊத ஆரம்பிச்சிருச்சு...லைட்டா முதுகு வலி ஆரம்பிச்சிருச்சு.. சோம்பேறித்தனம்தான்... முழிச்சுக்கோங்க மக்களே... உடற்பயிற்சிக்கு ஒரு மணி நேரமாவது ஒதுக்குங்க...(அப்பா..மெஸேஜ் சொல்லியாச்சு...யாரும் மொக்க பதிவு,வேஸ்ட் பதிவுன்னு சொல்லிரக்கூடாதுல்ல)

இதே மாதிரி உங்களோட சைக்கிள் ஞாபகங்களையும் பகிர்ந்துக்கோங்க.....

படங்கள் கடன்: கூகிளாண்டவர் (Images Credit : Google) :)

இரு மலர்கள்

2013-01-14T02:44:00.001+05:30

வேலைப்பளு சற்று அதிகமாக போட்டு அழுத்துகிறது. ட்விட்டரும்,பேஸ்புக்கும்,கூகிள் ப்ளஸூம் வலைப்பூ எழுதுவதற்கான நேரத்தை ஆக்ரமித்துக்கொண்டது. இது ஒரு நொண்டிச்சாக்குதான்....:) நேரத்தை திட்டமிட்டு ஒதுக்க தெரியவில்லை.அவ்வளவே...தியானம் செய்தால் ஏற்படும் ஒருவித மனஅமைதி இந்த வலைப்பூவில் எழுதுவதால் (அது உங்களுக்கு மொக்கையாகவே இருந்தாலும்) எனக்கு கிடைக்கிறது. :)

சென்ற வெள்ளிக்கிழமை (4-1-2013) எனக்கு இரண்டாவதாக ஒரு மகள் பிறந்தாள். வெள்ளிக்கிழமையா...மகாலட்சுமியே பொறந்துருக்கா...நீ எங்கேயோ போக போற...இனிமே டாப்தான்...தொழில் அமோகமா இருக்கும். இதுபோன்ற பல கலவையான வாழ்த்துரைகள்.நேரில் சொன்னவர்கள் முகத்தைப்பார்க்கையில் (இரண்டாவதும் பொண்ணா...என்ற பார்வையில் ) சற்று அனுதாபத்துடனே கூறியது போன்று ஒரு உணர்வு. :)

99% உங்களுக்கு பையன்தான் என்று சொன்ன சோதிடர் கூட மேற்சொன்ன வாழ்த்துரைகளை ஒருவித சமாளிப்புடன் பிறந்த மகளுக்கு நேரம் கணிக்கச்சென்றபோது சொன்னார். இதற்குதான் சொன்னேன் ஜாதகத்தை நம்பக்கூடாதென்று... :)

எப்படியோ சிறுவயதில் கூட விளையாடுவதற்கும்,வளரும் வயதில் ஒரு தோழியாகவும் இருக்க என் மகளுக்கு ஒரு தங்கை பிறந்துவிட்டாள்.இந்த வலைப்பூவை என் முதல் மகள் பிறந்த சமயத்தில் துவங்கி எழுத ஆரம்பித்தேன்.பிற்காலத்தில் அவளது மலரும் நினைவுகளை புரட்டிப்பார்க்கும் ஒரு தளமாக இது இருக்கவேண்டும் என்று ஆசைப்பட்டு,அவ்வப்போது அவள் சார்ந்த நிகழ்வுகளையும்,புகைப்படங்களையும் பதிந்து வந்தேன்.இப்போது சின்ன மகளுக்கும் சேர்த்து பதிய வேண்டும். :)

இந்த சமயத்தில் எனது கணினியில் ஏற்பட்ட ஒரு கொடுமையை சொல்லவேண்டும்.எனது பெரிய மகள் செய்யும் ஒவ்வொரு புதிய செயலையும் புகைப்படங்களாகவும், காணொளியாகவும் பதிவு செய்து ஒரு வன்தட்டில்(அதாங்க Hard Disk) வைத்திருந்தேன். நன்றாகவே வேலை செய்து கொண்டிருந்த அது திடீரென்று மோட்சம் அடைந்து விட்டது.அதை மிட்பதற்குண்டான பல வழிகளில் முயன்றும் அதில் உள்ள புகைப்படங்கள் கிடைக்கவில்லை. :(

எனவே,நண்பர்கள் தாங்கள் முக்கியமானதாக நினைக்கும் கோப்புகளையும், படங்களையும் வன்தட்டில் வைத்திருந்தால் அதை இரண்டு DVD-க்களில் பதிவு செய்து வைத்துக்கொள்ளவும். அல்லது தற்போது பிரபலமாகிவரும் மேகக்கணினியகம் முறையில் கூகிள் ட்ரைவிலாவது சேமித்துக்கொள்ளவும். வரலாறு முக்கியம். :)

விவசாயிகள் கொண்டாடும் முக்கியப்பண்டிகையான பொங்கல் தற்போதுள்ள சூழ்நிலையில் அவர்கள் அதற்குண்டான மனநிலையில் இருப்பார்களா என்றால் சந்தேகம்தான்....பருவமழை பொய்த்துவிட்டது. இறையாண்மை மிக்க தேசம் என்று பெருமை அயல்நாடுகளில் சொல்வதற்கு மட்டுமே பயன்படுகிறது.இங்குள்ள மாநிலங்களுக்கிடையேயான நதிநீர்ப்பங்கீட்டு சண்டைகளைப் பார்த்தால் அப்படி ஒன்று உள்ளதா என்ற சந்தேகம் எழுகிறது.விவசாயிகளின் தற்கொலைகள் வருத்தத்தைத் தருகிறது.எப்படிப்பட்ட நிலையில் இந்த முடிவை எடுத்திருப்பார்கள்..?! :(

வாழ்த்துகள் சொல்வது ஒரு சம்பிரதாயமாக ஆகிவிட்டது.இப்போதுள்ள சூழ்நிலையில் அது அபத்தமாக படுகிறது.சென்ற வருடம் நாசர் அவர்கள் அளித்த இந்த ஆவேசமான பேட்டி இப்போதும் பொருந்துகிறது. நதிநீர்ப்பிரச்சினையும்,மின்வெட்டும் கூட சேர்ந்து கொண்டது.

இருந்தாலும் நமது ஊர் தொலைக்காட்சிகள் அந்த சோகங்கள் தெரியாமல் நம்மை வைத்திருக்க பாடுபடுவதை நினைத்தால்....
என்னமோ போங்க.... Happy Pongal.

ஹேப்பி தீவாளி..!!

2012-11-12T06:07:00.000+05:30

போன வருஷம் போட்ட பதிவா இருந்தாலும் இந்த தீபாவளிக்கும் அப்படியே மேட்ச் ஆகுது.படிக்காத புது வாசகர்களுக்காகவும்,பழைய வாசகர்கள் மறுபடியும் ரீகால் பண்றதுக்காகவும் மறுபடியும் மீள் பதிவு :) (புதுசா எழுத சோம்பேறித்தனப்பட்டு சப்பைகட்டு கட்டுது பாரு...) பதிவு Open ஆனதும் ஒரு Music வரும் பயந்துராதீங்க...கீழ இருக்கற Flash File-ல Mute பண்ணிருங்க... :)

தீபாவளி வரப்போவுது...எல்லாருக்கும் சந்தோஷம் தர்ற பண்டிகை.

இப்ப இருக்கற பசங்க தலையில எண்ணை வைக்கறதே இல்ல...காலையில தூக்கம் கலையறதுக்கு முன்னாடி எழுப்பி விட்டு தலையில சொத்சொத்துன்னு எண்ணைய அடிப்பாங்க பாருங்க...கண்ணெல்லாம் எரியும்.அதுவும் அந்த எண்ணை 5 எண்ணைகள் கலந்ததாம்.ஒரு எண்ணை இல்லைன்னா பசு மாட்டோட கோமியத்தையும் கலந்துப்பாங்க...உவ்வே...ன்னு வருதா..?!மருத்துவ குணம் நிறைந்ததுங்க...

அப்புறம் அந்த தீபாவளிக்குன்னே கண்டுபிடிச்ச இனிப்பு குலோப்ஜாமூன் செய்றதுக்கு நல்ல டேஸ்ட்டா,ஸ்மூத்தா வர்ற கம்பெனியோடது வாங்கணும்ன்னு நினைக்காம யாரு பெரிய பக்கெட்,பேசன் தர்றாங்ன்னு பாத்து வாங்கிட்டு வருவாங்க...ஓடாத கம்பெனிகாரன் இதை ப்ரீயா தந்து வருஷம் ஒருநாள் எல்லா சரக்கையும் ஓட்டிருவான்.கடைசில குலோப்ஜாமூன் உருண்டையா வராது.உதிரியாதான் வரும்.நமக்கு பிச்சுபிச்சு சாப்டறது பிடிக்காது.அப்டியே முழுசா முழுங்குனாதான் பிடிக்கும். இலவசங்கள் தர்றது தமிழ்நாட்டோட பொது மனநிலையாப் போச்சு...முறுக்கு வீட்ல சுடலாமான்னு கேட்டா புரட்சித்தலைவி கூட்டணி கட்சிக்காரங்கள பாக்கற மாதிரியே கேவலமா பாக்குறாங்க.ஸ்வீட் கடைக்காரங்களுக்கு கொண்டாட்டம்தான்.

பட்டாசு வெடிக்கற ஆர்வம் குழந்தைகளுக்கு குறைஞ்சுட்டு வர்ற மாதிரி ஒரு ஃபீலிங்.பாப்பாவுக்கு கம்பிமத்தாப்பு,சங்குசக்கரம்,புஸ்வாணம் எல்லாம் வாங்கியாச்சு...அது என்னங்க MRP 700ரூபாய் போட்ருக்கு.ஆனா,கடையில 195ரூபாய்க்கு தந்தாங்க.அதுலயும் லாபம் இல்லாமலா தருவாங்க..?!உண்மையான ரேட் என்னன்னு தெரியல...மொத்தத்துல காசை கரியாக்குறோம். (வயசாயிடுச்சுன்னா இப்டிலாம் தோணும்)இந்த பட்டாசு வெடிச்சு விழுப்புண்கள் வாங்காதவங்களே இருக்க முடியாது.அதுலயும் போலிகள் இருந்து தொலைக்கும்.ஊசிப்பட்டாசு வெச்சா அது வெடிக்காம சங்குசக்கரம் மாதிரி சுத்தி நம்மள குழப்பும்.ராக்கெட் மேல போய் வெடிக்காம நம்ம வீட்லயோ,அக்கம்பக்கம் இருக்கற நம்ம எதிரிங்க வீட்லயோ போய் வெடிக்கும்.புஸ்வாணம் வச்சா அது ரொம்ப நேரம் பொங்காது.என்ன ஆச்சுன்னு பக்கத்துல போய்ப்பாத்தா நம்ம மூஞ்சில பொங்கும்.அப்புறம் தீபாவளி இல்ல... தீபா"வலி"தான்...

டிவியே வீட்ல இல்லைன்னா அந்த தீபாவளி எப்படி இருக்கும்ன்னு நெனச்சி பாருங்க...முன்னல்லாம் புதுப்படம் போட்டா ஆர்வமா வாய பொளந்து பாத்துகிட்டு இருந்தோம்.இப்ப உலகத்தொலைக்காட்சிகளில முதன்முறையாகன்னு சொன்னாவே அடப்போங்கைய்யா...ன்னு இருக்குது. இந்த படத்த வந்த ஒரு மாசத்துலயே பாத்தாச்சு...(திருட்டு DVD புண்ணியத்துல)ஒரே பேட்டர்ன்தான் பல வருஷமா ஓடிகிட்டு இருக்கு.காலையில் மங்கள இசை,யாராவது சாமியாரோட ஆசி,அப்புறம் புதுப்பாடல்கள்,பட்டிமன்றம்,நடிகர்(அ)நடிகையோட பேட்டி,புதுப்படம், மறுபடியும் பேட்டி,படம்ன்னு ஒரே போர்ர்ர்ர்தான் போங்க...விஜய்டிவி கொஞ்சம் பரவால்ல...இருந்தாலும் அவங்க விளம்பரத்துக்கு நடுவுலதான் நிகழ்ச்சியே போடுவாங்க...அதுதான் பிரச்சினை.

ஒகே..நம்ம கதை போதும்.குழந்தைகளை பாதுகாப்பா வச்சிகிட்டு வெடி வெடிங்க...கண்ல பட்ற போவுது.ஹேப்பி தீவாளி...(ஹி..ஹி..இப்டி சொன்னாதான் தமிழன்னு ஒத்துக்குவாங்க)

பட்டாசு படங்கள் பற்றிய பதிவுக்கு இங்கு செல்லவும். Take Diversion. அய்யா ஜாலி..ஒரே க்ளிக்குல இரண்டு பதிவுக்கு ஹிட்ஸ். :) அப்டியே கீழ இருக்கற Flash File-ஐயும் Play பண்ணிப்பாருங்க....

என்ன மாதிரி சமூகத்தில் வாழ்கிறோம் நாம்..?!

2012-09-06T15:15:00.001+05:30

காலம் காலமாக பகுத்தறிவு இல்லாமல் வாழும் மக்களுக்காக பயங்கர அறிவுடன் எழுதும் என்னைப் போன்ற இணைய எழுத்தாளர்களை எப்படி மதிக்க வேண்டும், எப்படி கொண்டாட வேண்டும் என்று கூட இந்த மக்களுக்கு தெரிய வில்லையே..?! இந்தக் கொடுமையை என்னவென்று சொல்ல..?! இதையே நான் ஆப்கானிஸ்தானில் ஆரம்பித்து ஜிம்பாப்வே வரை உள்ள 196 வெளிநாடுகளில் (அவ்ளோ நாடுகள்தான் இருக்காம்.நெட்ல பாத்துட்டேன்) எழுதியிருந்தால் கிடைக்கும் மரியாதை அளப்பற்கரியது.

கோடிக்கணக்கான பேர் படிக்கும்,தமிழர்களின் எண்ண ஓட்டத்தை பிரதிபலிக்கும், என்றும் இளமையான, இளைஞர்களுக்கும்,பெரியவர்களுக்கும் பிடித்த ஆயிரம் வார இதழ்கள் வந்தாலும் மக்கள் மனதில் என்றும் நெ.1 வார இதழான ஆனந்த விகடனுக்கு(அப்பா..செமையா பாராட்டியாச்சு...இன்னும் ஒரு வாரத்துக்கு என் பகுதியை தூக்க மாட்டாங்க) தெரிந்தது இந்த மக்களுக்கு தெரியவில்லையே... என் செய்வேன்..?!

இந்நேரம் ஒரு ஆயிரம் பேராவது நேரிலோ,போனிலோ,மின்னஞ்சல் வழியாகவோ வாழ்த்தியிருக்க வேண்டாமா..?! நூறு பேராவது நேரில் வந்து சால்வை போர்த்தியிருக்க வேண்டாமா..?! அல்லது பார்சலாவது அனுப்பியிருக்க வேண்டாமா..?! குறைந்தது 10 பாராட்டு கூட்டங்களுக்காவது அழைப்பு வந்திருக்க வேண்டாமா..?! பொற்கழுகு (ஹி..ஹி...பொற்கிழி(ளி) சின்னதா இருக்கும்) பரிசளித்திருக்க வேண்டாமா..?!

ஒருவன் தன் புகழை தானாகவே எவ்வளவு நாளைக்குதான் கூவிக் கொண்டிருப்பது..?! "தானே கூவிய தானைத்தலைவன்" என்ற பட்டம் வரலாற்றில் இடம் பிடித்து விட்டால் என் செய்வது..?!என்னமோ பொங்கல்..ச்சீ... போங்கள்.

இவ்வளவு கூவிய பிறகும் எதற்கு கூவுகிறான் என்று கேட்டு வயிற்றெரிச்சலை வாங்கிக்கட்டிக் கொள்ள வேண்டாம். (சொன்னாதாண்டா தெரியும்.மேட்டருக்கு வா...) இந்த வார விகடன் இணையத்தளத்தில் என் விகடன் பகுதியில் தமிழகத்தின் தலைசிறந்த எழுத்தாளர்களில் ஒருவனான என்னையும் மதித்து வலையோசை பகுதியில் கௌரவித்துள்ளார்கள். இப்பவாவது போய்ப் பாத்துட்டு ஒரு அற்புத எழுத்தாளர் வெளிநாட்டுக்கு போய்டாம ஏதாவது ஒண்ணு உடனடியா செய்ங்க....அப்புறம் உங்களுக்குதான் நஷ்டம். :)

இதுவும் கடந்து போகும்...

2012-09-05T22:32:00.000+05:30

நம்ம அரசு இயந்திரத்தோட தாரக மந்திரம் இதுதான்...துயரம் ஏற்படுவதை தடுக்காமல் அது நடந்த பிறகு அரசு நடந்து கொள்வது இந்த வார்த்தையின் அடிப்படையில்தான்....

இன்னும் ஒரு வாரத்துக்கு சிவகாசியில் உள்ள பட்டாசு ஆலைகள் முழுவதையும் கடமையே கண்ணாக சோதனை செய்வார்கள். அடுத்த மாதமே பழைய கதைதான்...சென்ற மாதங்களில் நடந்த குழந்தைகள் விபத்துகளின் சோதனைகள் போன்றுதான் இதுவும் இருக்கும். பரபரப்பு பசியோடு திரியும் ஊடகங்கள் மீண்டும் இது போன்ற விபத்துகள் நடக்காமல் இருக்க அரசு என்னென்ன தொடர்ச்சியான நடவடிக்கைகள் எடுக்கின்றன என்பதை தொடர்ந்து கண்காணித்து மக்களுக்கு தெரியப்படுத்தலாம். ம்ஹீம்...அதெல்லாம் நம் நாட்டில் நடக்கவே நடக்காது.

நமது குழந்தைகளின் ஆசைக்காக பட்டாசு வெடித்து நாம் கொண்டாடும் தீபாவளி பண்டிகைக்காக வருடம் தோறும் சிவகாசியில் சில குடும்பங்கள் உயிரிழப்பது வாடிக்கையாகி விட்டது. சட்டங்களை மதிக்காமல் அதில் உள்ள ஓட்டைகளை மட்டும் தெரிந்து வைத்திருக்கும் சில பட்டாசு தொழிற்சாலை முத(லை)லாளிகளுக்கும் ,அவர்கள் கொடுக்கும் லஞ்சப்பணத்தை வாங்கிக்கொண்டு இது போன்ற பாதுகாப்பற்ற ஆலைகளை நடத்த அனுமதி தரும் அதிகாரிகளும் இருக்கும் வரை இந்த துயரம் வாடிக்கையாகத்தான் இருக்கும். அமீரக நாடுகளைப்போல் இங்கும் சட்டங்கள் கடுமையாக்கப்படவேண்டும். இவர்கள் தரும் நிவாரணப் பணம் போன உயிர்களை திருப்பித்தருமா..?! என்னமோ போங்க... :(

ஆண்ட்ராய்டும்,பதிவர் திருவிழாவும்..

2012-08-27T22:35:00.000+05:30

சாதாரண வசதிகள் கொண்ட மொபைலைக் கண்டாலே ஐய்ய்..போனுன்னு சிட்டிகாரங்க சிறுத்தைய பாக்கறமாதிரி பாப்பேன். (ஹி..ஹி...ஒரு சேஞ்சுக்கு....எவ்ளோ நாளைக்கு பட்டிக்காட்டான் முட்டாயின்னு சொல்றது)இதுல ஐ-போன் எல்லாம் நான் இதுவரைக்கும் பாத்தது கூட இல்லைன்றதுதான் நெசம்.

முந்தாநாள் என் பிறந்தநாள்.(ஹி..ஹி...மறந்து போனவங்க இதுக்கு மேலயும் கிப்டோ, கேக்கோ அனுப்பினாலும் பெருந்தன்மையா ஏத்துக்கற மனசு என்னுது) எங்க டாடி எனக்கு சர்ப்ரைஸா 8400 ஓவா போட்டு சேம்சங் கேலக்ஸி ஒய் டூயல் சிம் வசதி கொண்ட, இரண்டு பெட்ரூம் வசதி கொண்ட ச்சே.. ஒரு ஃப்ளோவுல வந்திருச்சு.. ஒரு மொபைல் வாங்கித் தந்தாரு...அதுல இருக்கற ஆன்ட்ராய்ட் வசதிய மூணுநாளா நோண்டி நோண்டி வியக்கேன். இந்த கூகிள்காரனுக்குதான் என்னா மூளை.எதிர்காலத்துல இணையமே மொபைல்லதான்றத மனசுல வச்சி செமையா ரெடி பண்ணிருக்காங்க...அதுலயும் லட்சக்கணக்கான அந்த பயன்பாடுகளை (APPS) பாக்கும் போது உண்மையிலேயே பிரம்மிப்பா இருக்கு.நம்ம பிரபல தொழில்நுட்ப பதிவர்கள் பிளாக்கர் நண்பன், பிரபு கிருஷ்ணாவின் கற்போம்,சசிகுமாரின் வந்தேமாதரம் தளங்களுக்கு போய் ஆண்ட்ராய்டு பதிவுகளா படிச்சிட்டு இருக்கேன்.நீங்களும் இதுவரைக்கும் வாங்கலைன்னா ட்ரை பண்ணுங்க...

நேற்று நடந்த பதிவர் சந்திப்புக்கு வேலையின் நிமித்தம் போகமுடியாம நானே நொந்து போயிருக்கேன். போயிட்டு வந்த பதிவர்கள் போடற பதிவுகள பாக்கும் போது தீயற வாடை வருது. (ஸ்டமக் பர்னிங்) இதுநாள் வரைக்கும் யூத்துன்னு நெனச்சி படிச்சிட்டு இருந்த அண்ணன்..தப்புதப்பு...பெரியவர் சேட்டைக்காரன் அவர்களும் கலந்துகிட்டத படிச்சபோது நொந்துட்டேன். அவரோட சந்திப்ப மிஸ் பண்ணிட்டமேன்னு...போட்டோவ பாத்தவுடனே படையப்பா வசனத்த நெனச்சுகிட்டேன். :)

வயதில்தான் பெரியவர்.எழுத்தில் என்றும் யூத் சேட்டைக்காரன் என்னும்
திரு.ராஜாராமன் அவர்களின் புகைப்படம்

மொத்தத்துல ஹிட்ஸ் வாங்கற பதிவர்களோட விழா ஹிட் ஆனதுல மகிழ்ச்சி.

மதுபானக்கடை

2012-08-19T10:03:00.000+05:30

தமிழகம் போற்றும் வரலாற்று சிறப்பு வாய்ந்த காவியத்தை நேற்று பார்த்து விட்டேன்.சினிமாவை இயக்குனர்கள் அவர்களுடைய கருத்துகளை சொல்வதற்கான பிரச்சாரத்திற்கு பயன்படுத்துவதை பொழுதுபோக்கிற்காக தியேட்டருக்கு வரும் சாமான்யர்கள் யாரும் விரும்புவதில்லை.அந்தப்படங்கள் வணிகரீதியாக வெற்றி பெற்று ஓடுவதும் இல்லை.

குழந்தைகளுக்கு மருந்தில் தேன் தடவி கொடுப்பதை போல தமிழக அரசின் பொருளாதாரத்திற்கு துணை நிற்பவர்களுக்கான(?!) பெரும் குடி மகன்களின் ஒரு நாள் பார் வாழ்க்கையை களமாக வைத்து அதில் தற்போதைய சமூக நிலையையும்,மனிதர்களின் பல்வேறு முகங்களையும் யதார்த்தத்தை அதிகம் மீறாமல் காட்டிய விதம் பாராட்டுதலுக்குரியது.

பிறமொழி படங்களிலிருந்து காப்பி அடிக்கிறோம் என்ற கூச்சம் இல்லாமல் இயங்கும் இயக்குனர்கள் மத்தியில் எழுத்தாளர் நாஞ்சில் நாடன் அவர்களின் உண்ணற்க கள்ளை கதையை அடிப்படையாக கொண்டது என்று குறிப்பிட்ட விதமும் பாராட்டத்தக்கது.

இதுவரை மருந்தில் தேன் என்ற கொள்கையை வைத்து படங்களை கொடுத்த எனக்குப்பிடித்த இயக்குனர்களான சிம்புதேவன்,ஜனநாதன் அவர்கள் வரிசையில் கமலக்கண்ணனும் சேர்ந்து விட்டார்.வாழ்த்துகள்...

பெட்டிசன் மணியாக நடித்த என்.டி.ராஜ்குமார் அவர்கள்தான் அனைத்து பாடல்களையும் எழுதியிருக்கிறார்.நடிப்பிலும்.பாடல்களிலும் கலக்கி எடுத்திருக்கிறார்.

வாய்ப்பிருந்தால் பார்த்து உணருங்கள்.

வாழ்த்துகள் உயர்திரு.பிரணாப் முகர்ஜி அவர்களே...

2012-07-24T22:07:00.000+05:30

நான் முன்பே கணித்தது போல் (இவரு பெரிய காழியூர் நாராயணன் பாரு...கணிக்கிறாராம்) பிரணாப் முகர்ஜி அவர்கள் இந்தியத்திருநாட்டின் முதல் குடிமனாக தேர்ந்தெடுக்கப்பட்டு விட்டார்.இதுகாறும் பாராளுமன்றத்தில் ஒரு பெரியவர் வயது முதிர்ச்சியின் காரணமாக தூங்குவதை கூட ஜூம் செய்து பெரிது படுத்தி காட்டிய செய்தி நிறுவனங்களுக்கு சவுக்கடியாக அமைந்தது இந்த முடிவு என்றால் அது மிகையில்லை.இனிமேல் மக்கள் நலத்திட்டங்கள்,விவாதங்கள் என்ற பெயரில் வாசிக்கப்படும தூக்கம் வரவழைக்ககூடிய உரைகளைக் கேட்கத் தேவையில்லை.சுதந்திரமாக தூங்கலாம்.வெளிநாடுகளுக்கு ராஜமரியாதையுடன் சென்று வரலாம்.(என்ன இருந்தாலும் நமது முன்னாள் குடியரசுத்தலைவர் போல் வெளிநாட்டுப்பயண சாதனையை இனி எந்த இந்திய குடியரசுத்தலைவராலும் முறியடிக்க முடியாது)மத்திய அரசின் முன்முடிவெடுக்கப்பட்ட திட்டங்களுக்கு அவ்வப்போது கையெழுத்திடலாம்.

இங்க இப்டி...ஈரான் நாட்ல ஒரு தலைவர் இருக்காராம்.பிழைக்கத் தெரியாத மனுசனா இருப்பார் போல...

1. அவருடைய மாத வருமானம் 1200 டாலர். இது ஒரு வளர்ச்சியடைந்த நாட்டு தனிநபருடைய வருமானத்தை காட்டிலும் குறைவானது.

2. அவர் இன்னமும் வாழ்வது அவரது அப்பா கட்டிய 40 வருடம் பழமையான வீட்டில்தான்...

3. இவரது விருப்ப உணவு தன் மனைவியின் கையால் சமைத்தவை மட்டுமே..

4. படிப்பு : அறிவியல் , தொழில்நுட்ப போக்குவரத்து பொறியியல் மற்றும் திட்டமிடல்.
PhD in Transportation Engineering and Planning from Iran University of Science and Technology

5. இவரது வங்கி நிலுவை 0

6. இவரிடம் இருந்த ஒரே ஒரு வண்டி ஈரானிய உற்பத்தியாகும். தற்போது அதையும் விற்று தன் நாட்டு மக்களுக்கு பங்கிட்டுள்ளார்.

7. அவர் ஜனாதிபதி ஆகிய பின் தன் சொந்த ஜெட் விமானத்தையும் ஈரானிய விமானப்படைக்கு அன்பளிப்பு செய்துள்ளார்.

8. பிரார்த்தனையில் ஈடுபடும் போது விஷேடமாக இடம் அமைத்து இருந்தாலும் சாதாரண மக்கள் தொழும் இடத்திலேயே பிரார்த்தனைகளில் ஈடுபடுவார்..

9. பெட்ரோல் உற்பத்தி செய்தாலும் அதனை சேமிக்க வேண்டி எந்தவொரு படை பட்டாளம் இன்றியே தனியொரு வாகனத்தில் பயணம் செய்வார்.

10. தன் காரியாலயத்திலும், வீட்டிலும் உள்ள விலை அதிகமான திரைச்சீலைகளை ஈரானிலுள்ள ஒரு மசூதிக்கு அன்பளிப்பு செய்துவிட்டார்.

11. நிலத்தில் உறங்க நாட்டமுள்ள இவர் ஐந்து நட்சத்திர விடுதியில் தங்கினாலும் நிலத்திலேயே உறங்குவாராம் ..

சொந்தக்கதையும்,புகைப்படக்கலையும்...

2012-07-14T13:30:00.002+05:30

யாரும் தலைப்பு சொல்லாவிட்டாலும் பரவாயில்லை.பின்தொடர்பவர்கள் பின்வாங்காதது ஆறுதல் அளிக்கிறது.

இதுவரை வீட்டில் ஆஸ்பெஸ்டாஸ் சீட்டின் கானல் கொடுமையை அனுபவித்து கொண்டிருந்த நான் நேற்றுதான் அதற்கு மேல் தென்னங்கீற்றை வேய்ந்தேன்.நேற்றிரவிலிருந்து மழைக்காலம் ஆரம்பித்து விட்டது. :) இயற்கைக்கும் என்னைக்கண்டால் சிரிப்பாக இருக்கும் போல...

இந்த வாரத்தில் ஒரு பயனுள்ள புகைப்படக்கலை பயிற்சி வகுப்புக்கு செல்லும் வாய்ப்பு கிட்டியது.வெளிப்புற புகைப்படக்கலை (அதாவது அவுட்டோர் போட்டோஃகிராபி.தமிழ்..தமிழ்...)வகுப்பை பிரபல புகைப்பட நிபுணர் திரு.ஜீவா சுப்ரமணியம் அவர்கள் கற்றுக்கொடுத்தார். எங்களுக்கு தோரணை காட்ட(அதாவது போஸ் கொடுக்க...தமிழாக்க உபயம் கூகிள் ட்ரான்ஸ்லேட்)பிரபல மாடல் ரீத்தி மங்கள் வந்திருந்தார். சிறப்பாகவும், சிரிப்பாகவும் (மாடலை பார்த்து அல்ல) அமைந்தது வகுப்பு. அங்கு நான் எடுத்த புகைப்படங்களை இங்கு சென்று பார்த்து மகிழுங்கள். அப்படியே அந்த பேஜை லைக்குங்கள் (ஹி..ஹி...ஒரு வௌம்பரம்)

அரசியல்,அனுபவம்,ஆதரவு இவைகளை தவிர்த்து குடியரசுத்தலைவர் பதவிக்கென்று ஒரு முகம் தேவைப்படுகிறது.(நீ அதுக்கு சரிப்பட மாட்ட..வடிவேல் சோக்கு ஞாபகத்துக்கு வருது.) அந்த முகம் திரு.சங்மா அவர்களுக்கு இல்லை என்றே நினைக்கிறேன்.நம்மூர் படங்கள்ல வர்ற வட்டிக்கடை சேட்டு மாதிரியே இருக்காரு. அதிசயம் நடக்குமா..?! நீங்க என்ன நினைக்கறீங்க..?!

இந்த பதிவ எழுதிட்டு இருக்கும்போது வந்த குறுஞ்செய்தி.லேப்டாப் விலையில்லாம (அ) இலவசமா (ரெண்டும் ஒண்ணுதான்.ஆனா,அவங்க மாத்தி சொல்வாங்க....)தர்ற அரசாங்கம் உயிர் காக்கும் ஹெல்மேட்டை ஏன் ஃப்ரீயா தரக்கூடாது..?! நியாயமான கேள்விக்கு பதில் சொல்லுங்க...

பேஸ்புக்ல இந்த படத்த பாத்ததிலிருந்து வாந்தி வாந்தியா வருது. நம்மூரு கறிக்கடைகள்ல ஞாயிற்றுக்கிழமை ஆட்ட தொங்க விடற மாதிரி சைனாவுல நாய்களை தொங்க விட்ருக்காங்க...பாம்பையே திங்கறவங்களுக்கு இது எம்மாத்திரம்..?! ஒவ்வொரு மனுசனுக்கு ஒவ்வொரு டேஸ்ட்...உவ்வே... :)

வந்துட்டமுல்ல...

2012-07-06T03:13:00.000+05:30

அப்பப்ப நம்ம பிளாக்கர் நண்பன் கூகிள் அந்த சேவையை நிறுத்தப்போகிறது. இந்த சேவையை நிறுத்தப்போகிறதுன்னு பதிவெழுதி பீதிய கிளப்பறாரு.... தொடர்ச்சியாக 3,4 மாதங்கள் பிளாக்கரில் பதிவுகள் எழுதாமல் இருந்தால் அவங்க பீஸ் புடுங்கப்படும்ன்னு சொல்லிட்டா இவ்ளோ வருஷம் கஷ்டப்பட்டு(?!) எழுதிய பதிவுகளையும், இஷ்டப்பட்டு சேர்ந்த பின்தொடர்பவர்களையும் இழக்க நேரிடும்ன்றதால நிறையப்பதிவர்கள் கடைபிடிக்கும் ஒரு சிறந்த வழியான கொத்துபுரோட்டா, கூட்டாஞ்சோறு, கலவைசாதம், மினீ மீல்ஸ், சாப்பாட்டுக்கடை, நொறுக்கல், கலக்கல், கலைடாஸ்கோப் மாதிரி நம்ம வலைப்பூவிலும் ஆரம்பிக்கலாம்ன்னு இருக்கேன்.இதைப்பாராட்டியோ,மகிழ்ச்சி தெரிவித்தோ பின்னூட்டம் போடலைன்னா கூட பரவால்ல...இருக்கற நூத்தி சொச்சம் பின்தொடர்பவர்கள் யாராவது விலகி பஞ்சுல தண்ணிய ஊத்திராதீங்க...(எவ்ளோ நாளைக்கி நெஞ்சுல நெருப்ப அள்ளி போட்றாதீங்கன்னு பழைய பழமொழிய சொல்றது...அதான் வித்தியாசமா...ஹி..ஹி...)

இப்ப பதிவுக்கு வருவோம். பத்பநாபசாமி கோயில் 5வது ரகசிய அறைய(அதான் தொறந்துட்டாங்கல்ல...அப்புறம் என்ன ரகசியம்) திறந்துட்டாங்களாம்.அந்த அறையில 10 இலட்சம் கோடி அளவுல தங்கம்,வைரம் எல்லாம் இருக்குதாம்...இனிமே நம்ம மக்கள் அங்க இருக்கற செல்வம் பத்தாதுன்னு இவங்க பங்குக்கு போய் இன்னும் கொட்டப்போறாங்க...மனுசங்கள்ல பணக்காரங்களுக்கு மதிப்பு தர்ற மாதிரி சாமியில் கூட பணக்காரசாமிக்குதான் மவுசு. இனிமே திருப்பதி அளவுக்கு கூட்டம் கூட ஆரம்பிச்சுரும்...இவங்களையெல்லாம் எத்தன பெரியார்....சரி வேணாம் விடுங்க....

அப்புறம் எனக்கு ஒரு டவுட்டுங்க...விஞ்ஞானம் இன்டர்நெட், இமெயில், வீடியோகாலிங்ன்னு எவ்ளோ வளந்துட்டாலும் இன்னும் இந்த மாநில முதல்வர்கள்லாம் ஏன் பிரதமருக்கு கடிதமே எழுதிட்டு இருக்காங்க...?! சரி முன்ன கலைஞர் அய்யாதான் எவ்ளோ படுகொலைகள் நடந்தாலும் உடனே ஆற அமர கண்டனக்கடிதம் எழுதுவாரு...இப்ப புரட்சித்தலைவியாவது அதிரடி பண்ணுவாங்கன்னு பாத்தா எதுக்கெடுத்தாலும் கடிதம் எழுதிகிட்டு....என்னத்த சொல்ல....?!

அப்புறம் பேஸ்புக்ல மேஞ்சிகிட்டு இருந்தப்ப மேல இருக்கற படத்த பாத்து வருத்தமா இருந்தது. இவ்ளோ பெரியவரு இந்த குடிமகன்கள் கால்ல விழுந்து கெஞ்சறத பாத்தா பாவமா இருக்கு...செவிடன் காதில் ஊதிய சங்கு போலன்னு சொல்வாங்களே...அது மாதிரி குடிமகன்கள் அவங்க வீட்ல இருக்கறவங்க எத்தனையோ தடவை கால்ல விழுந்து கெஞ்சி கேட்டும் திருந்தாதவங்க இவரு சொல்லி திருந்துவாங்கன்னு நம்பிக்கை இல்ல...காந்தி பிறந்த ஊரான குஜராத் மாதிரி மதுவிலக்கு கொண்டுவந்தா தமிழ்நாட்டு தாய்மார்கள் பலரோட வயிறும் நிறையும். மனசும் குளிரும். இந்த ஒரு விஷயத்துக்காகவே மோடி பிரதமர் ஆகணும்ன்னு ஆசைப்படறேன்.(உடனே இந்துத்வா முத்திரை குத்திராதீங்க...பொதுவா சொன்னேன்.)சட்டம் ஒழுங்கையும் அரசே கவனிக்கும்.மதுவையும் அரசே விற்கும்.சரியான காமெடிங்க....

சரி இன்னக்கி இது போதும். நம்ம மிக்ஸிங் பதிவுக்கு எதாவது நல்ல டைட்டிலா சொல்லுங்க...சிறப்பு பரிசு காத்திருக்கு. (இந்தியா மறைமுகமா 100ரூ புடிங்கிகிட்டு 10 ரூ பரிசு கொடுத்தா நம்ம மக்கள் சிரிச்சுகிட்டே போட்டில கலந்துக்குவாங்க...சரி கோடி..ச்சீ ரெடியா..?!) :)

அம்புலி 3D

2012-03-23T18:25:00.000+05:30

ஒரு படத்துக்கு என்ன மாதிரி இவ்ளோ சீக்கிரம் விமர்சனம் எழுதி பாத்திருக்க மாட்டிங்க...இருந்தாலும் வந்ததுக்கு படிச்சிட்டு போய்டுங்க...நமக்கு அட்ராசக்க சிபி அண்ணன் மாதிரி தியேட்டர்ல படம் பாத்துகிட்டே விமர்சனம் எழுதற திறமை இன்னும் வரல...(டேய்..அவரு நெ.1 பதிவர்டா)

திருட்டு டிவிடி பிரச்சினைக்கு சரியான மாற்றா 3D படங்களும் இருக்கும்ன்றது என்னோட நம்பிக்கை. (சொல்லிட்டாரு நாட்டாமை) ரொம்ப நாளைக்கு பிறகு 3D படம் வந்தத கேள்விப்பட்ட பின் மனம் மகிழ்ச்சியில் குதித்தது. (பாத்து ஓடிரப்போவுது) கடைசியா மை டியர் குட்டிச்சாத்தான் தியேட்டரில் கண்ணாடியோடு பார்த்த ஞாபகம். இப்ப புது முயற்சியா அம்புலி படம் 3D கேமராவுலயே எடுத்து வெளியிடறதால இன்னும் நல்ல அனுபவமா இருக்கும் குழந்தைகளுக்கு...

என்னதான் புது டெக்னாலஜி வந்திருந்தாலும் இன்னும் அந்த 3D கண்ணாடிய மாத்தல பாருங்க.அப்ப சிகப்பு கலர் ஒரு பக்கம், நீலக்கலர் ஒரு பக்கம் இருக்கற கண்ணாடிய குடுத்தாங்க...இப்ப சிவாஜி,எம்.ஜி.ஆர் காலத்து பிரேம் வச்ச கருப்புக்கண்ணாடிதான் கொடுத்தாங்க...

படத்துல வர்ற காமெடிய விட கூட்டிட்டுப்போன தங்கமணிய இந்தக்கண்ணாடியோட பாக்கறதுதான் பெரிய காமெடி. பாப்பா வேற என்ன இந்தக் கண்ணாடியோட பாத்து பயந்துகிச்சு.கூட்டிட்டுப்போய் மந்திரிக்க வேண்டியதாப்போச்சு.(உன்ன எல்லாம் கண்ணாடி இல்லாம பாத்தாலும் பயமாதான் இருக்கும்)

புது முயற்சியா கதைச்சுருக்கத்தை டைட்டில்லயே சொல்லி சுவாரஸ்யமாக திரைக்கதை அமைத்து திரில்லர் படம் எடுத்திருந்தாலும் பாடல்கள் படத்தோட வேகத்துக்கு தடையா இருக்கற மாதிரி ஒரு ஃபீலிங். ஒரு நல்ல மெலடி பாட்டு இருந்தாலும் அது படத்தோ ஒட்டல. நாங்க போன வார நாள்லயே வந்திருந்த கூட்டத்த பாத்தா படத்துக்கு போட்ட காச எடுத்திருப்பாங்கன்னுதான் தோணுது. அந்த உற்சாகத்துல அடுத்த பாகத்த இன்னும் சுவாரஸ்யமா எடுப்பாங்கன்னு நினைக்கிறேன்.

செல்வராகவனோட "ஆயிரத்தில் ஒருவன்" பட கெட்டப்ல பார்த்திபன் கூட நடிச்சிருக்காரு.ஒரு படம் அப்டி நடிச்சிட்டா அதே மாதிரி கெட்டப் கொடுத்து கொல்லுவாங்க.

படத்துல வர்ற அம்புலிய விட இவங்க நடிப்ப பாக்கறப்பதான் எனக்கு பயமா இருந்துச்சு.10ரூவாய்க்கு நடிங்கன்னு சொன்னாக்கூட 100ரூவாய்க்கு நடிப்பாங்க...

படம் பாத்த நிறையபேர் அம்புலி வர்றப்ப பயங்கரமா கத்தி கூச்சல் போட்டாங்க...நான் கத்தவே இல்லயே...அம்புலி கூடவே வாழ்றவங்கடா நாங்க...(தங்கமணி ப்ளாக் படிக்காம இருக்கறது எவ்ளோ நல்லது நமக்கு) ஹி.ஹி..ஹி...

குழந்தைங்க பரீட்சை லீவு வரைக்கும் கூட ஓடும்ன்னு நெனைக்கிறேன்.மிஸ் பண்ணாம போய்ப்பாருங்க...(அம்புலி மட்டும் கிங்காங் படத்துல வர்ற குரங்கு மாதிரியே இருக்கும்ன்னு குழந்தைகள முன்னாடியே தயார் படுத்திருங்க)

நானும் விகடனும்

2012-02-25T14:09:00.001+05:30

இல்லல்ல...அது சரியா வராது.விகடனும் நானும்-ன்னுதான் சொல்லணும். அவங்கதான் சீனியர். இப்டியே போனா சீக்கிரமா அந்த பகுதிய என்னையும் எழுதச்சொல்லுவாங்கன்னு நினைக்கிறேன்.(எதுக்கு இவ்ளோ பில்டப் கொடுக்கறான்)

உலகப்பத்திரிக்கை வரலாற்றில் இரண்டாவது முறையாக விகடன் பெருமைப்பட்டுவிட்டது. (எப்படி..?) சமூகவலைத்தளங்களில் வரும் ஈர்க்கக்கூடிய கருத்துகளை ஆனந்தவிகடன் வலைபாயுதே என்ற தொடராக வெளியிட்டு வருவது உங்களுக்கு தெரிந்ததே...

ஒரு சமூக வலைத் தளங்களை கூட விடாமல் பங்களித்து சேவை செய்து வரும் (வெட்டிவேலை செய்யும்ன்னு சொல்றா டேய்) சேலம்தேவா அவர்களையும் (நான்தான்.. நான்தான்..) நீங்கள் அறியாமல் இருக்க மாட்டீர்கள். இல்லைன்னாலும் இப்ப தெரிஞ்சிக்கோங்க...

அத்திப்பூ பூப்பது போல் நான் சில தத்துவ முத்துகளை அவ்வப்போது உதிர்ப்பதுண்டு. போனவருடவாக்கில் முதல்முறையாக என் ட்விட் ஒன்று விகடனில் வந்து அதை நீங்கள் விழாவாக கொண்டாட நினைத்து அதை நான் வேண்டாமென்று மறுத்தது நினைவிருக்கிறதா..?! (இல்லை.அதுக்கு என்ன இப்ப..?) சரி..அதை விடுங்கள்.

இந்த வருடமும் விகடனுக்கு தோன்றியுள்ளது நாம் இந்த மேதையை (நான்தான்..நான்தான்) கவுரவித்து ஒரு வருடமாகி விட்டதே என்று இந்த வார இதழில் வலைபாயுதேவில் என்னுடைய அனுபவத்தில் விளைந்த ஒரு நல்முத்தை ஏற்றியுள்ளார்கள். படிக்க வேண்டும் என்று நினைப்பவர்கள் விகடன் புத்தகத்தை வாங்கி படித்துக்கொள்ளுங்கள். (ஹி..ஹி...விகடன் விற்பனைக்கு ஏதோ நம்மால முடிஞ்ச ஒரு உதவி) (டேய்..இதெல்லாம் ரொம்ப ஓவர்.உன் ட்விட்ட போய் போட்டாங்க பாரு...அவங்களுக்கு இதுவும் வேணும்.இன்னமும் வேணும்)

இந்த ட்விட் என் சிந்தனையில் தோன்றிய விதத்தை தெரிந்து கொள்ள என் வாசகர்களாகிய நீங்கள் ஆவலாயிருப்பீர்கள். (நாங்க எப்படா சொன்னோம்..?!) உங்கள் விருப்பத்திற்கிணங்க அந்தப்பதிவு அடுத்த வாரத்திற்குள் உங்கள் பார்வைக்கு பதிவாக வரும். (ஹி..ஹி...டிரைலர்)

ஸ்வீட்(நீங்களே காசு கொடுத்து வாங்கி) எடுங்க...கொண்டாடுங்க... ஹி..ஹி...

சர்க்கஸ்

2012-01-18T13:56:00.000+05:30

இந்தமுறை பொங்கல் விடுமுறை நீண்ண்ண்ண்ட நாட்கள் இருந்ததுபோல் ஒரு உணர்வு.பொழுதுபோக்கிற்கு தொலைக்காட்சியை விட்டால் வேறு போக்கிடம் இல்லாமல் போய்விட்டது.

காணும் பொங்கல் அன்று பெரியவர்கள், நண்பர்களை கண்டு மகிழ்ச்சியை பரிமாறிக்கொள்ளாமல் தொலைக்காட்சியை கண்டு கொண்டு இருக்கிறோம்.

புதிதாக வந்த திரைப்படங்களை திரையரங்கில் பார்க்கலாம் என்றால் திரையரங்கத்தினர் ஒரு வாரத்திற்குள் போட்ட பணத்தை எடுக்கும் பொருட்டு விலையை அவர்கள் விருப்பத்திற்கு உயர்த்தி விடுவார்கள்..அதுவும் ரசிகர்கள் இடும் கூச்சலில் படம் பார்த்த திருப்தியே வராது.

இந்தமுறை பலவருடங்கள் கழித்து சர்க்கஸ் சென்றோம். சர்க்கஸின் கூரையில் உள்ள கிழிசல்களே அவர்களின் வறுமை நிலையை உணர்த்துகிறது. குழந்தைப்பருவத்திற்கு திரும்பிவிட்டாற்போன்று ஒரு உணர்வு. ஆனால், விலங்குகள் நலவாரியத்தின் புண்ணியத்தால் நான் சென்றபோது சர்க்கஸில் இருந்த விலங்குகள் இப்போது 10 சதவீதம் கூட இல்லை. 1 யானை,2 குதிரை,2 ஒட்டகம்,3 நாய்கள் இவை மட்டுமே காண முடிந்தது. இவைகளை விலங்குகள் பட்டியலில் இருந்து தூக்கிவிட்டார்களா தெரியவில்லை.அவைகளும் பார்க்க பரிதாபமான நிலையில்தான் இருந்தது.

பிழைப்புக்காக மனிதர்கள் உயிரைப் பணயம் வைத்து அந்தரத்தில் செய்யும் சாகச விளையாட்டுகளை காணும்போது சற்று வருத்தமாகத்தான் இருந்தது. குள்ள மனிதர்களை பார்க்கும்போது அபூர்வசகோதரர்கள் கமல்தான் நினைவுக்கு வந்தார்.பரிகசிக்கும் இளைஞர்களை பொருட்படுத்தாமல் நிறைவாக சிரித்தமுகத்துடனும், குறைவான ஆடைகளுடனும் வந்த பெண்களின் நிலை உண்மையிலேயே பரிதாபத்திற்குரியது.

நீண்ட கத்தியை இருதயம் வரை சொருகுவது,கத்திப்படுக்கையின் மேல் படுப்பது.சைக்கிள் சாகசங்கள்,மரணகூண்டில்(அப்படிதான் அறிவித்தார்கள்) மோட்டார் சைக்கிள் சாகசம்,ஒரு சாகசக்காரர் 1 லிட்டர் தண்ணீரை குடித்து விட்டு மீண்டும் அதை வாய்வழியே அதை சிறிது சிறிதாக வெளியேற்றுகிறார்.இருவேறு வண்ணங்கள் கொண்ட தண்ணீரை குடித்து அதை தனித்தனியாக வெளியேற்றியது வியப்பூட்டுவதாக இருந்தது. (இந்தப்பயிற்சி யோகக்கலையின் மூலம் சாத்தியம் என்று நினைக்கிறேன்.தெரிந்தவர்கள் பகிரவும்)இப்படி இரண்டரை மணி நேரக்காட்சியை ஓட்டுவதற்கு பாடுபடுகிறார்கள்.

குழந்தைப்பருவத்தில் இருந்த குதூகலங்கள் மறைவது வயதாவதை நினைவுறுத்துகிறது.என் மகளை யானை வரும் என்று சொல்லியே தூங்கவிடாமல் பார்த்துக்கொண்டேன்.உங்கள் ஊரில் சர்க்கஸ் நடைபெற்றால் நம்முடைய குழந்தைகளுக்காகவும்,சர்க்கஸில் உள்ள கலைஞர்களுக்காகவும் ஒருமுறை சென்று வாருங்கள். மகளுக்கு மகிழ்ச்சியுமாய்,மனதுக்கு நெகிழ்ச்சியுமாய் நேற்றைய பொழுது கழிந்தது.

குறிப்பு: பதிவில் இருக்கும் படங்கள் கூகிளின் வழியே எடுத்தது.சர்க்கஸ் உள்ளே படம் எடுக்க அனுமதி இல்லையாம்.

நண்பன்-அதிரடி விமர்சனம்

2012-01-14T08:22:00.000+05:30

தேவாவின் தேடுதல் வலைப்பூவின் வாசகப்பெருமக்களுக்கும்(?!), ரசிககண்மணிகளுக்கும்(??!!) இனிய பொங்கல் திருநாள் நல்வாழ்த்துகள்..!!

குட் காம்பினேஷன்..!! :)

வருடம் பூராவும் திங்க புடிக்கற பொங்கல், பொங்கல் திருநாள் அன்னிக்கு மட்டும் புடிக்ககாது.ஏன்னா,அன்னிக்கே சாப்பாடே அதுதான்.(கொஞ்சமா தின்னா ஆகும்.) இதுவரை புரிபடாத ரகசியம் கோவில்ல கொடுக்கற பொங்கல் மட்டும் எப்டி அவ்ளோ டேஸ்ட்டா இருக்கு..?!

தீபாவளிக்கு ஒருமுறை,பொங்கலுக்கு ஒருமுறை பதிவு போடும்போது கூட என்னை விட்டு விலகாத ஃபாலோயர்ஸ்களை நினைத்தால் ரத்தக்கண்ணீர்.ச்சீ...ஆனந்தக்கண்ணீர் வருகிறது.(ரொம்ப பில்ட்அப் பண்ணி இருக்கறவங்களும் போய்டப்போறாங்கடா டேய்...)

ஜல்லிக்கட்டுக்கு இந்த தடவையும் 76 விதிமுறைகளை போட்டு தமிழர்களின் வீரத்தை உரசி பாக்கறாங்க..(டிவில ஜல்லிக்கட்டு பாக்கறதுக்கே இதுக்கு இவ்ளோ வீரமா..?!)

கொம்ப பாருங்க...குத்துனா டைரக்டா சொர்க்கம்தான்.

7ம்அறிவு படத்துல சூர்யா க்ளைமாக்ஸ்ல அட்வைஸ் பண்றப்போ போகி பண்டிகையே நம்ம பழங்காலத்து பொக்கிஷங்களான ஓலைச்சுவடிகளை அழிக்கறதுக்கு வெள்ளைக்காரன் கண்டுபுடிச்சதுன்னு சொல்வாரே அதப்பத்தி என்ன நினைக்கறீங்க..?!(அப்பா..உருப்படியா ஒரு சந்தேகம் கேட்டாச்சு)

சட்டைய கழட்டுனா லைட்டா நான் கூட இப்டிதான் இருப்பேன். :)

சரி..4 பாரா தாண்டியும் தலைப்புக்கும் பதிவுக்கும் சம்பந்தமே இல்லன்னு யோசிக்கிறிங்களா..?! (உன் பிளாக்ல அதெல்லாம் எதிர்பார்க்க முடியுமா..?!) இப்டி ஹாட்டாபிக் தலைப்பு வச்சாதான் உள்ள வருவீங்க அதுக்குதான்...கோச்சுக்காதிங்க... :) நண்பன் படம் நல்லா இருக்காம்ல...எல்லா விமர்சனங்களும் அததான் சொல்லுது. ஷங்கர் படம்ன்னா சும்மாவா..?! நான் எப்பயும் புதுப்படம் வந்தா தியேட்டரை விட்டு தூக்கறதுக்கு முதல் நாள்தான் பாப்பேன். முதல்நாள் போனா படம் பாக்கவே விட மாட்டானுங்க ரசிகர்கள். dts எபக்ட்ல விசில் அடிச்சே கொல்லுவானுங்க. So, நான் விமர்சனம் எழுதறதுக்குள்ள உலகத்தொலைக்காட்சியிலேயே போட்ருவாங்க... ALL IS LOL. :)

"தலை"க்கு மேல வேலை..!!

2011-12-13T15:59:00.000+05:30

வேற ஒண்ணும் இல்ல...ஹேர்கட் பண்ணப்போறதுதான் அது.

சலூன் கடைக்குப் போகாதவங்க ஒண்ணு மொட்டைத்தலையா இருக்கணு ம்.

இல்லைன்னா சொட்டைத்தலையா இருக்கணும்.

அதுவும் இல்லைன்னா சாமியாருங்களா இருக்கணும்.அதுக்குன்னு நம்ம நித்தி மாதிரி நினைச்சிரக்கூடாது.அவர் ஆங்கிலப்பட ஹீரோக்கள் கணக்கா இருப்பாரு.(செய்ற வேலையும் அப்டியே)

நான் சொன்னது நம்ம பிரேமானந்தா மாதிரி...இவங்கதான் ஹேர் கட் எல்லாம் பண்றதே இல்ல.

இப்ப எதுக்கு இந்த வியாக்யானம்ன்னு நீங்க நெனைப்பீங்க...சலூன் பத்தி பதிவு போடும்போது கொஞ்சம் இன்ட்ரோ கொடுக்கறதுக்காக இந்த ஃபில்(ட்)அப். ஹி.ஹி..ஒரு மாசம் கழிச்சி போடற பதிவு கொஞ்சமாச்சும் நீளமா இருக்கணுமில்ல...

இந்த பெண்கள் அழகு நிலையத்த பாத்திங்கன்னா ஸ்டார் ஹோட்டல் மாதிரியும், ஆண்கள் அழகு(?!)நிலையமெல்லாம் தட்டுவிலாஸ் ஹோட்டல் மாதிரியும்தான் இருக்கும்.

ஒவ்வொரு சலூன்லயும் அங்கங்க வெட்டி கீழ கிடக்கற @#$% (ஹி..ஹி...என் பிளாக் கொஞ்சம் டீஸன்ட்டானது), டிவி, எப்.எம், தமிழ்நாளிதழ்களில் நெ.1(?!) தினத்தந்தி, 20 வருஷத்துக்கு முன்னாடி ஓனரோட தாத்தா கொடுத்த பூர்வீக சொத்தான கத்தி,கத்திரிக்கோல் இதெல்லாம் நீங்க பாக்கலாம்.இப்ப ஏஸி, மியுசிக் சிஸ்டம் எல்லாம் வச்சு அதுக்கு ஆன செலவையும், கரன்ட் பில்லையும் நம்மகிட்டயே வாங்கறாங்க... :(

ஞாயித்துக்கிழமை அன்னிக்கு இன்று ஹேர் கட்டிங் செய்வதற்கு ஏற்ற நாள்ன்னு காலண்டர்ல போடாததுதான் பாக்கி.அன்னிக்குதான் நிறைய கூட்டம். 2 கட்டிங், 3 சேவிங் பண்றதுக்காக என்னை காக்க வச்ச இடைவெளியில் எனக்கு தோன்றிய சந்தேகங்கள்தான் இவை...

கட்டிங் பண்றதுக்கு முன்னாடி நம்ம மேல போத்தற துணிய என்னிக்காவது துவைச்சிருப்பாங்களா..?!(என்னா கப்புடா சாமி)

மூஞ்சில ஸ்ப்ரே பண்ற தண்ணி நல்ல தண்ணியா..?! போர்ல அடிச்ச தண்ணியா..?!

பிளேடு புதுசா போடுவாங்களா..?!

கீறல்,தளும்பு,வெட்டுக்காயம் இல்லாம வேலைய முடிப்பாங்களா..?!

தினத்தந்தி பேப்பர என்னிக்காவது முழுசா படிக்க முடியுமா..?!

கத்திய கழுத்துல வச்சிகிட்டு டிவிய பாத்துகிட்டே வேலை செய்றது, மூஞ்சிய கிட்டக்க வச்சிகிட்டு பல்லு வௌக்காத வாய்ல தொணதொணன்னு அரசியல், சினிமாவைப் பத்தி நம்மகிட்ட விளக்கம், விமர்சனம், கேள்வி கேக்கறது.

சேவ் பண்ணி முடிச்ச பிறகு கூலா இருக்க ஒரு கல்ல மூஞ்சில தேக்கறாங்களே... அது தேயவே தேயாதா..?!

கடைசில மஸாஜ் பண்றேன்ற பேர்ல நம்ம தலையில தட்றது மஸாஜா..?! இல்ல நம்மள அடிக்கறதுக்கு சான்ஸா..?!

இப்டி எல்லாம் இவங்க நம்மள கொடுமைப்படுத்தினாலும் மாசாமாசம் இத செய்லன்னா நம்ம மூஞ்சிய நாமளே பாக்க முடியாது. இவர் ஏன் இந்த விஷயத்த செய்றதே இல்லன்னு என்னிக்காவது யோசிச்சிங்களா..?!

ஹி...ஹி....தெரிஞ்சா சொல்லுங்க...

படங்கள் உதவி : கூகிளார்

பட்டாசு பதிவு..!!

2011-10-27T13:18:00.000+05:30

ஹி..ஹி...இன்னோரு பிளாக்குக்கு வௌம்பரம். இங்க போய்ப்பாருங்க...

ஹேப்பி தீவாளி..!!

2011-10-24T17:02:00.000+05:30

தீபாவளி வரப்போவுது...எல்லாருக்கும் சந்தோஷம் தர்ற பண்டிகை.

www.latestgreetingcards.com

சிற்றுலா

2011-09-25T11:16:00.000+05:30

நான்கு நாட்கள் மேல் ஊர்சுற்றினால் சுற்றுலா.ஒரேநாள் மட்டும் சுற்றினால் சிற்றுலா..ஹி..ஹி..

சேலத்தில் பொழுதைபோக்குவதற்கு சொல்லிக்கொள்ளும்படி எந்த இடமும் இல்லை.மேட்டூர் பக்கத்தில் இருந்தாலும் ஊரில் எந்த ஆறும் ஓடுவதில்லை.எல்லாம் பல கிலோ மீட்டர் தள்ளி ஓடி கடுப்பேற்றுகிறது.இருக்கும் ஒரே ஆறு திருமணிமுத்தாறுதான்.பேருதான் ஆறு.ஆனால்,அதை சாக்கடையாக்கி நாறுகிறது.ஆற்றின் கரையை ஆட்சிமாறி மாறி கட்டிக்கொண்டே இருக்கிறார்கள்.சரி விடுங்கள்...இந்த பதிவில் எதற்கு அரசியல்..?!

சேலத்தில் இருக்கும் கோவில்கள்,ஏற்காடு,அண்ணாபூங்கா,வருடாவருடம் நடக்கும் அரசுப்பொருட்காட்சி என்று இந்த இடங்களில் கூடும் கூட்டத்தை கண்டால் சேலம் மக்களின் பொழுதுபோக்கு இல்லாத ஏக்கம் தெரியும். :(

பராமரிப்புக்காக மின்தடை ஏற்படுத்தும் நாட்கள் வனபோஜனம்(picnic) (நன்றி:கூகிள் ட்ரான்ஸ்லேட்) செல்வதற்கு ஏற்ற நாள்.:)சேலத்திலிருந்து ஆத்தூர் செல்லும் வழியில் உடையாப்பட்டியில் கந்தாஸ்ரமம் என்ற கோவில் உள்ளது.பக்திமான்களுக்கு நல்ல இடம்.இயற்கையை ரசிப்பவர்களுக்கு இன்னும் நல்ல இடம்.

மற்ற கோவில்களில் உள்ளது போல் தட்சணை போடாவிட்டால் முகத்தை காட்டும் அர்ச்சகர்கள் இல்லாமல் கனிவான அர்ச்சகர்கள் உள்ளனர்.உண்டியலும் கிடையாது.தியானம் செய்வதற்கு ஏற்ற மிக அமைதியான இடம்.

தெய்வசிற்பங்கள் மிகவும் நுட்பமாக,அழகாக செய்யப்பட்டுள்ளது.கல்லிலே கலை வண்ணத்தை காணலாம்.மிக பிரம்மாண்ட முறையில் சிலைகளை வடித்துள்ளனர்.தியான மண்டபம் தனியாக உள்ளது.அங்கு சித்தர்கள் மற்றும் ஞானிகளுடைய சிலைகளையும் காணலாம்.கோவிலின் உள்ளே புகைப்படம் எடுக்க அனுமதி இல்லை.வெளித்தோற்றம் மட்டுமே எடுத்தேன்.

உணவுப்பொருட்கள் கொண்டுசென்றால் முன்னோர்களிடமிருந்து காத்துக்கொள்வது அவரவர் சாமார்த்தியம்.

கோவிலின் முகப்புக்கு இடதுபுறம் சற்று கீழே கன்னிமார் கோவிலும்,ஓடையும் உள்ளது.நகரத்தில் இருப்பவர்களின் சோகமான நீச்சல் தெரியாததை பொருட்படுத்தாமல் குதிப்பதற்கு உயரம் குறைவான ஓர் ஓடை உள்ளது.நாங்கள் சென்றிருந்தபோது பள்ளிக்கல்வி பிடிக்காமல் இயற்கைக்கல்வி கற்க வந்திருந்த சில மாணவர்களை பார்த்தோம்.ஹி..ஹி...(அதாங்க ஸ்கூல் கட் அடிக்கறதுன்னு டீஸன்ட் இல்லாம சொல்வாங்களே..)

பெற்றவர்கள் பார்க்காமல் இருந்தால் சரி..!! :)

குடும்பத்துடன் நன்றாக பொழுது கழிந்தது.தண்ணீர் இருக்கும் இடங்களுக்கு(ஆறு,குளம்,கடல்) சென்றால் நம் மனதில் குதூகலம் தோன்றுவதின் உளவியல் காரணம் என்னவென்று தெரியவில்லை.

குடும்பத்துடன் அவ்வப்போது வெளியே செல்வது மனமகிழ்ச்சியையும்,புத்துணர்ச்சியையும் தரவல்லவை.குழந்தைகள் வெளி இடங்களை தொலைக்காட்சிகளை பார்த்து தெரிந்துகொள்வதற்கு பதில் நிஜத்தை பார்த்து அறிந்துகொள்வதற்கும் ஏதுவாக இருக்கும்.புத்தகங்களில் குரங்கு,ஆடு,மாடு என்பதை காட்டுவதை விட நேரில் அவற்றை காணும்போது இன்னும் சிறப்பாக இருக்கும்.

ஆடா,நானா ஒரு கை பார்த்து விடுவோம் என்று ஆட்டிடம் சண்டை போடும் என் செல்ல மகள்...

மாதாமாதம் இதே போன்று வனபோஜனம் செல்லவேண்டும் என்று முடிவெடுத்துள்ளேன்.சேலத்தின் இதுபோன்ற இடங்களை புகைப்படங்களாக பார்ப்பதற்கு தனி வலைப்பூ ஒன்றை தொடங்கியுள்ளேன்.பார்த்து கருத்து தெரிவித்தால் மகிழ்வேன்.

சிறப்பு(சத்தியமா)ஆன்மிகபதிவு..!!

2011-08-31T08:10:00.000+05:30

பிரியாணியும் உண்போம்.கொழுக்கட்டையும் தின்போம். :)

மதநல்லிணக்கம் காண்போம்.

ரம்ஜான் பெருநாள் கொண்டாடும் மார்க்கவழி வாழும்

நண்பர்களுக்கு வாழ்த்துகள்..!! Eid Mubarak

எளியவர்களுக்கெல்லாம் எளியவராய் விளங்கும் விநாயகர் பெரும்பாலும் அரச மரத்தடி, குளக்கரை போன்ற இடங்களில் அமர்ந்துதான் தரிசனம் தருகிறார். இவருக்கு படைக்கப்படும் பொருட்களும் எளிமையானவையே.

கவனிப்பாரற்று காட்டில் பூத்துக் கிடக்கும் எருக்கம் பூ, வாய்க்கால் வரப்புகளில் பரவலாக முளைந்திருக்கும் அறுகம்புல் போன்ற மிக எளிமையான பொருட்களைத் தாம் ஏற்றுக் கொண்டு, தன் பக்தர்களுக்கு அருளை வெள்ளமென பெருக்கி அருள்கிறார். இவருக்கு இருபத்தோரு திருநாமங்கள் உள்ளதாக புராணங்கள் சொல்கின்றன. என்ன அவை?

கணேசன்:

உலக உயிர்களுக்கும், பிரம்மத்துக்கும் தலைவன்.

ஏகதந்தன்:

ஏக எனில் மாயை; தந்தன் எனில் மறைந்திருப்பவன். மாயைக்கு ஆட்படாமல் விலகி நிற்பவன் இவன். ஏகம் என்றால் ஒன்று என்றும் ஒரு பொருள் உண்டு. வியாசர் சொல்லச் சொல்ல, மகாபாரதத்தை, தன் தந்தம் ஒன்றை உடைத்து எழுதியதால், எஞ்சிய ஒரு தந்தத்துடன் விளங்குபவர் என்றும் கொள்ளலாம்.

சிந்தாமணி:

சிந்தை - மனம்; மணி - பிரகாசம். பக்தர் தம் மனதில் அஞ்ஞான இருள் நீக்கி, ஒளி பரவச் செய்பவன்.

விநாயகன்:

வி - நிகரற்ற; நாயகன் - தலைவன். தனக்கு யாரும் நிகரில்லாத தலைவன்.

டுண்டிராஜன்:

மோட்சத்தை அடைய விரும்புவோருக்கு வழிகாட்டுபவர்.

மயூரேசன்:

வணங்காதவரை மாயையில் மூழ்கச் செய்தும், பக்தர்களை மாயை நெருங்காமலும் செய்பவன்.

லம்போதரன்:

உலகினையே உள்ளடக்கியிருப்பதால் பெரிதாகக் காணப்படும் வயிற்றினை உடையவன்.

கஜானனன்:

ஆணவம் எனும் யானையை அடக்கும் வல்லமை உள்ளவன், யானைமுகன்.

ஹேரம்பன்:

ஹே - கஷ்டப்படுபவர்கள். ரம்ப - காப்பவன் ஆகிய பிரம்மன். துன்பப்படுவோரைக் காத்து ரட்சிப்பவன்.

வக்ர துண்டன்:

பக்தர் தம் வாழ்வில் வரும் தீமைகளை தடுப்பவன். பிள்ளையாருக்கு இப்பெயரை அன்னை உமாதேவி வைத்தார்.

ஜேஷ்டராஜன்:

ஜேஷ்டன் - முன்னவன், அனைத்துக்கும் முதல்வனாக, முதற் பொருளாகத் தோன்றி, அனைத்து உயிரினங்களையும் வழிநடத்திச் செல்பவன்.

நிஜஸ்திதி:

உலகில் உள்ள அனைத்து உயிர்களாகவும் இருப்பவன்.

ஆசாபூரன்:

எல்லோரது ஆசைகளையும் நிறைவேறச் செய்பவன். இப்பெயரை கணபதிக்கு சூட்டியவர் புருசுண்டி முனிவர்.

வரதன்:

வேண்டுவோர் வேண்டும் வரமளிப்பவன்.

விகடராஜன்:

மாயையான உலகில், உண்மை பரம்பொருளாகத் திகழ்பவன்.

தரணிதரன்:

பூமியை ஆபரணமாக அணிந்து எப்போதும் காப்பவன்.

சித்தி - புத்தி பதி:

சித்தி எனும் கிரியா சக்திக்கும், புத்தி எனும் இச்சா சக்திக்கும் இடையே அவற்றின் தலைவனாக இருந்து ஞானத்தை அளிப்பவன்.

பிரும்மணஸ்தபதி:

இப்பெயர், பிரம்மாவினால் வைக்கப்பட்டது. பிரும்மம் என்றால் சப்தம். வேத சப்தத்திற்கு ஆதாரமாக விளங்குபவர்.

மாங்கல்யேசர்:

அழியக்கூடிய உலகில், தான் மட்டும் அழியாமலிருந்து அனைத்தையும் பரிபாலிப்பவர்.

சர்வ பூஜ்யர்:

எங்கும் எத்தகைய பூஜைகளிலும், எல்லா தெய்வ வழிபாட்டின் போதும் முன்னதாக பூஜிக்கப்படக்கூடியவர். எல்லோராலும் வணங்கப்படுபவர்.

விக்னராஜன்:

தன்னை வணங்கும் பக்தர்கள் அனைவரது வாழ்விலும் எந்த விக்னமும் ஏற்படாமல் காப்பவர்.

எழுத்தாளருடன் நான்...

2011-08-15T08:28:00.001+05:30

பதிவுலகிலும்,ட்விட்டரிலும்,இன்னபிற சமூகவலைத்தளங்களிலும் உலகமறிந்த(?!) பிரபலமாக நான் இருப்பது ஏற்கனவே நீங்கள் அறிந்த விடயம்.(மறுபடியும் ஆரம்பிச்சிட்டான்யா) அதற்குண்டான வழிமுறைகளை எற்கனவே என் வலைப்பூவில் இட்டு அந்தப்பதிவு பிரபலமானதும் உங்களுக்கு தெரிந்ததே....

பதிவுலகமும்,ட்விட்டரும் எனக்கு பல நண்பர்களை தந்திருக்கிறது.அந்த நண்பர்கள் வட்டத்தில் பல புகழ்பெற்ற எழுத்தாளர்களும் உள்ளனர் என்பது எனக்கு பெருமையளிக்ககூடிய விஷயம்.அதில் ஒருவரான கிழக்கு பதிப்பகத்தில் பல புத்தகங்களை எழுதியவரும்,புகழ்பெற்ற ட்விட்டருமான திரு.என்.சொக்கன் அவர்களை அறியாதவர்கள் எழுத்துலகில் இருக்க வாய்ப்பில்லை.அவர் இந்த வாரத்தில் சேலம் வந்திருக்கும்போது சேலத்திலிருந்து ட்விட்டும் அன்பர்களை சந்திக்க விருப்பம் கொண்டு ட்விட்டரில் தெரிவித்தவுடனே ஆர்வமாக அதை செயல்படுத்தி அந்த சந்திப்பையே ஒரு மாநாடு போல நடத்த பேராவல் கொண்டேன்.ஆனால்,அவரையும் அவர் சகோதரரையும் தவிர்த்து மூன்று பேர் மட்டுமே கலந்து கொண்டதால் மாநாடு நடத்த முடியவில்லை.அடுத்த தடவை முன்னரே அவர் வருவது தெரிந்தால் அதை மாநாடாக நடத்த உறுதி பூண்டுள்ளேன். :)

எழுத்தாளர் என்றவுடன் தமிழ்சினிமா எனக்களித்த கொடையான கணிப்புத்திறனை வைத்து ஒரு முட்டிக்கால் வரை நீளும் ஜிப்பாவும்,அதற்கு மேட்ச்சாக ஒரு வெள்ளை பேண்ட்டும்,விரலைவிட பெரிதான ஒரு இங்க்பேனாவும்,முக்கியமாக ஒரு ஜோல்னாப்பையும்,தடிமனான கருப்புநிற பிரேம் கொண்ட கண்ணாடியும் போட்டுக்கொண்டு வருவார் என்று நினைத்திருந்தால் என் நினைப்பில் மண். ஃபார்மலாக வந்து தமிழ்சினிமாவின் பார்முலாவை உடைத்துவிட்டார் சொக்கன். ஏனென்றால் அவர் சினிமாவே பார்ப்பதில்லையாம். :)

அவருடன் பேசிக்கொண்டிருந்த போது எழுத்தாளர் என்ற பந்தா இல்லாமல் நண்பர்களுடன் பழகுவதுபோல்தான் இருந்தது . கூடவந்த நண்பன் கார்த்தி புண்ணியத்தில் Iphone, Apple, Nokia, Microsoft, Bill gates, Android, Oracle, E-book reader, Kindle, Nook, NHM, SLR, Edu-comp, etc., அவருடைய தமிழ்இலக்கியவலைப்பூ என்று இரண்டு மணி நேரத்தில் இவ்வளவையும் அலசினோம்.மற்ற சேலம் நண்பர்கள் தவறவிட்ட அருமையான சந்திப்பு இது. ஞாயிற்றுக்கிழமை அன்று காதலர்கள் மட்டுமே வரும் சேலம் அண்ணாபூங்காவில் எழுத்தின் மீது கொண்ட காதலால் இந்த சந்திப்பு இனிமையாகவும்,பயனுள்ளதாகவும் அமைந்தது.

சந்திப்பின்போது எடுத்த பிரத்யேக படங்கள் உலக வலைப்பூ வரலாற்றில் முதல்முறையாக உங்கள் சேலம்தேவாவின் வலைப்பூவில் மட்டுமே காணக்கிடைக்கும்.(வேற யாரும் கேமரா எடுத்துட்டு வராதது நல்லதாப்போச்சு)

எஸ்.சொக்கன்,என்.சொக்கன்,ஸ்ரீனிவாசன்,கார்த்திக்

இதில் வலப்புறம் கடைசியில் நான்

அண்ணாபூங்கா முன்பு

சேலத்துக்கு வரும் எழுத்தாளர்கள் ஒரு வாரத்துக்கு முன்பே தெரியப்படுத்தினால் இதுபோன்ற சந்திப்புகளை மாநாடாக நடத்த ஏதுவாக இருக்கும் என்பதை பணிவுடன் தெரிவித்துக்கொள்கிறேன். :)

ஆடித்திருவிழா

2011-08-10T10:04:00.001+05:30

திருவிழாக்கள் பண்டையகாலத்திலிருந்து எல்லா மதத்தினராலும் விதம்விதமாக கொண்டாடப்படுகிறது.திரு என்ற அடைமொழி சேர்த்து விழாக்களுக்கும் மரியாதை கொடுப்பது நமது பண்பாடாக விளங்குகிறது.எதையும் கொண்டாட்டத்துடன் அணுகும் முறை இந்தியர்களுக்கு இயல்பாகவே அமைந்துள்ளது.எப்போதும் பாடுபடும் பாட்டாளிகளுக்காக ஒரு மாறுதல் வேண்டும் என்பதற்காக தெய்வ நம்பிக்கையையும் சேர்த்து திருவிழாக்களை உருவாக்கி வைத்துள்ளனர்.சொந்தங்கள் சேர்வதற்கும்,மனமகிழ்ச்சிக்காகவும்,விழாக்கள் சார்ந்த தொழில் செய்பவர்களுக்கு வருமானத்திற்காகவும் திருவிழாக்களை உருவாக்கி வைத்துள்ளனர் முன்னோர்கள்.திருவிழாக்கள் நடக்கும் ஊர்களின் பண்பாடு,கலாச்சார குறியீடுகளை அறிந்து கொள்ள திருவிழா ஒரு வழியாக இருந்தது.ஸ்ஸ்ஸ்ப்பா...தூக்கம் வருதில்ல..

ஹி.ஹி..தவறி வேற எதாவது வலைப்பூவுக்கு வந்துட்டமோன்னு பயப்படாதீங்க...ஸ்கூல் படிக்கும்போது எதைப்பத்தியாவது கட்டுரை எழுதச்சொன்னா இப்டி பக்கம்பக்கமா அடிச்சி வுடுவேன்.இது ஒரு சாம்பிள்தான்...வேற ஒண்ணுமில்லீங்க.சேலத்துல ஆடித்திருவிழா நடக்குது.பதிவுலக நண்பர்களை சேலம் திருவிழாவுக்கு அன்போடு அழைக்கிறேன்.

கோட்டை மாரியம்மன் கோவில் கோபுரம்

பதினெட்டுபட்டிக்கும்(?!) தலைமை மாரியம்மன் கோட்டை மாரியம்மன் கோவில்ல ஆரம்பிச்சி ஊர்ல எந்த பக்கம் திரும்பினாலும் கோவில்களா இருக்கும்.அதுல எல்லாக் கோவில்லயும் ஆடி மாசம் பண்டிகையா இருக்கும்.அரசுப்பொருட்காட்சி வேற போட்ருக்காங்க.சேலமே ஜெகஜோதியா இருக்கும்.ஒரு வாரத்துக்கு சேலம் ரத்தபூமியா மாறிடும்.முதல்வர் அம்மா இலவசமா கொடுக்கறதுக்கு வெளி மாநிலங்கள்ல ஆடு,மாடு வாங்கறதுக்கு காரணமே சேலம் மக்கள்தான்.ஏன்னா அப்டி தின்னுவோம்.ஹி..ஹி...

சக்திஅழைக்கறதுன்ற பேர்ல ஒருத்தருக்கு காளியாத்தா மூஞ்சி கொண்ட மாஸ்க் எல்லாம் வச்சு எட்டு கை வச்சி அழைச்சுட்டு வருவாங்க.பம்பை மேளத்தோட அவரு ஆடி வரும்போது ஆல் லேடிஸ் சாமி வந்து ஆடுவாங்க.ஒரே பக்திப்பரவசமா இருக்கும்.தலைவர் கவுண்டமணி பூமிதிச்ச கதை உங்களுக்கு தெரியும்.அதுமாதிரி இங்க எல்லாக்கோயில்லயும் மிதிப்பாங்க.அந்தப்பக்கமே போக மாட்டேன்.எவனாவது நம்மள மிதிக்கச்சொல்லிட்டா..?!பூச்சட்டின்னு சொல்லிட்டு நெருப்புசட்டிய தூக்கிட்டு தலையில வச்சிகிட்டு ஆடுவாங்க.உள்ள சுட்டாலும் வெளிய காமிக்காம செமயா டான்ஸ் ஆடுவாங்க.எனக்கு தெரிஞ்சு ஒருத்தருக்கு தலையெல்லாம் வெந்திருக்கு.ஆர்வக்கோளாறுல தலையில சேப்டி பிரிகேசன்ஸ் எல்லாம் பண்ணாம ஆடிட்டாரு.ஹி..ஹி...

அலகு குத்தறதுன்ற பேர்ல நல்ல கூரான வேலை வாய்ல இந்தப்பக்கம் குத்தி அந்தப்பக்கம் இழுத்து அந்த வலியிலயும் டான்ஸ் ஆடிகிட்டு வருவாங்க.ஆட்டோ,ஆம்னிவேன்,ஆட்டுக்கல் இந்தமாதிரி இழுக்க முடிஞ்ச பொருட்களை கயித்துல கட்டி கொக்கி போட்டு முதுகில குத்தி இழுத்துட்டு வருவாங்க...வேண்டுதலாமாம்.புல்டோசர்,லாரி மாதரி பெரிய பொருள்லாம் இழுக்க மாட்டாங்க.ஹி..ஹி...முதுகு கிழிஞ்சிருமுல்ல.வித்தியாசமா வேண்டுதல் நிறைவேத்தறதுல சேலம் வழி எப்பவும் தனிதான்.

வியாழக்கிழமை குகைப்பகுதியில்(சேலத்துல ஒரு ஏரியா) வண்டிவேடிக்கை நடக்கும்.ஒரே வேடிக்கையா இருக்கும்.புராண காட்சிகள்,சாமி வேஷம் எல்லாம் போட்டுகிட்டு பெரிய வண்டிங்க வரும்.சாமிங்க எல்லாம் நமக்கு ஹாய்...சொல்லிட்டு வரும்.டே..பீமா..நல்லா தெம்பா உக்காந்து வாடா...சிவனுக்கு சீக்கு வந்தமாதிரி வர்றான் பாரு...அனுமார் வேஷத்துக்கு அவனுக்கு மேக்கப்பே தேவையில்ல.ஏற்கனவே அந்த மாதிரிதான் இருக்கான்.ராமர் வேஷம் போட்டுகிட்டு எல்லாப்பொண்ணுங்களுக்கும் டாட்டா காட்டிகிட்டு வர்றான் பாரு...இந்தமாதிரி வேஷம் போட்டுகிட்டு வர்றவங்கள செமயா கலாய்ப்பாணுங்க.குசும்பு புடிச்ச (சேலம்) பயலுவ.

இதெல்லாம் பாக்கும்போது பெரியார் அப்பப்ப மைண்ட்ல வந்துட்டு போவாரு.இந்த செலவுகளை ஏதாவது இல்லாத குழந்தைகளுக்கோ,முடியாதவங்களுக்கோ உதவி பண்ணலாம்ன்னு நெனைக்கத்தோணும்.பண்ண மாட்டாங்க...சாமிக்கு கூட அதுதான் பிடிக்கும். பக்தி எனக்கும் இருக்கு. நம்மை மீறிய ஒரு சக்தி நம்மள இயக்குதுன்ற நம்பிக்கை மட்டுமே.மத்ததெல்லாம் மற்றவங்க விருப்பத்துக்காகத்தான் பண்ணிகிட்டு இருக்கோம்.ஆத்திகர்களுக்கு பக்தியாகவும்,நாத்திகர்களுக்கு கேலியாகவும் தோன்றும்.ம்ம்ம்...வளரும் சூழ்நிலைதான் தீர்மானிக்குது.

இதுபோன்ற காட்சிகள்,கலாய்ப்புகளை நேரில் காண வருக.. வருக.. வருக... என அன்போடு அழைப்பது உங்கள் சேலம் தேவா..தேவா..தேவா..ஹி..ஹி... எக்கோ எபக்ட்டோட படிங்க(இதுக்கு ஒண்ணும் குறைச்சல் இல்ல)

சென்னையில் நான்...

2011-07-31T00:13:00.000+05:30

இருங்க.. இருங்க... அவசரப்படாதீங்க. உடனே என்னை நேரில் பார்க்கும் ஆர்வத்துடன் சென்னை வாசகர்கள்(?!) எனக்கு மெயிலவோ,போன் பண்ணவோ ஆரம்பிச்சிராதீங்க.சென்னையில் ஒரு நிகழ்ச்சிக்கு வெள்ளிக்கிழமை வந்துட்டு ஊர் திரும்பிட்டேன்.எனக்கு எங்க தலைவர் வெங்கட் மாதிரி பப்ளிகுட்டி பிடிக்காது.

சென்னை நந்தம்பாக்கம் டிரேட்சென்டரில் பைசெல் நிறுவனத்தாரால் வருடாவருடம் நடத்தப்படும் அகில உலக புகைப்படகண்காட்சிக்கு என்னை சிறப்பு விருந்தினராக அழைக்காவிட்டாலும் நானாகவே போய்டுவேன்.ஹி..ஹி...நாளைக்கு ஒரு நாள்தான்(ஞாயிற்றுக்கிழமை) நடக்கும். நேரமிருந்தா போய் பாருங்க வாசகர்களே..!!சினிமாவுக்கு பயன்படுத்தப்படும் கேமராக்கள்,உபகரணங்களை நேரில் பார்க்கலாம்.

சேலத்துலருந்து சென்னைக்கு ஓட்டிகிட்டு இருந்த ப்ளைட் வேற கேன்சல் பண்ணிட்டாங்க...ஆன்லைன்ல ரயில் டிக்கெட் புக் பண்றதுக்கு ஸ்பெஷல் கோர்ஸ் படிக்கணும் போல...அதனால பஸ்ல வரவேண்டியதா போச்சு.

ஊராங்க அது. எங்க பாத்தாலும் ஒரே மக்கள்கூட்டம்.அதுக்கு மேல ஆட்டோ கூட்டம்.கண்ண கட்டி கண்மாய்ல தள்ளிவிட்டமாதிரி இருந்துச்சு.அங்க வண்டி ஓட்டணும்ன்னா தியானவகுப்புக்கெல்லாம் போயிருக்கணும்.இல்லைன்னா டென்சன்ல BP எகிறிடும்.சேலத்துலதான் ஆட்டோ அதிகம்ன்னு நெனச்சா சென்னையில...அடேங்கப்பா...மெட்ரோ ரயிலுக்காக அங்கங்க டிராபிக் திருப்பிவிட்ருக்காங்களாம்.ஆட்டோக்காரர் வேஸ்ட் திட்டம்ன்னு திட்னாரு.என்ன கடுப்போ..?!

அடுத்த தடவை வந்தா மேப்போடதான் வரணும்ன்னு முடிவு பண்ணிட்டேன்.திருப்பதி போய் லட்டு வாங்காம வரக்கூடாதோ அது மாதிரி சென்னைக்கு போய்ட்டு தி.நகர் போகாம வரக்கூடாது.ஹி.ஹி.. என்னா கூட்டம்.அங்காடித்தெரு படம் எந்த கடையில எடுத்துருப்பாங்கன்னு தெரியல.கடையில வேல பாக்கற யார பாத்தாலும் அந்த படம் ஞாபகத்துக்கு வந்து இம்சை பண்ணிச்சு.

அடுத்த தடவை சென்னை வரும்போது கண்டிப்பா உங்களுக்காக நேரம் ஒதுக்கி அனைவரையும் சந்திப்பேன் என்பதை மிக்க மகிழ்ச்சியுடன் தெரிவித்து கொல்கிறேன்.ச்சீ..கொள்கிறேன்.

சென்னை வாசகர்கள் சென்னையை சுற்றிப்பார்ப்பதற்கு உதவி செய்யும் இணையதளத்தை பின்னூட்டத்தில் பகிர்ந்தால் மற்ற ஊர் வாசகர்கள் பயனடைவார்கள்.ஹி..ஹி... நானும்தான்.

தெய்வத்திருமகள்..!

2011-07-27T16:47:00.000+05:30

கண்ணு பட்ருமுல்ல... அதனால கோட்டோவியம்.

போன வருஷம் இதே நாளில் என் மகள் பிறந்தநாள்.கூடவே உங்களுக்கு ஒரு தொல்லையும் பொறந்துச்சு..ஹி.ஹி.. நான் பிளாக் எழுத ஆரம்பிச்சத சொன்னேன்.

எங்கேயோ படித்த ஞாபகம்.ஒரு வரி நாம் எழுதுவதாக இருந்தால் நான்கு வரிகளை படித்திருக்கவேண்டுமாம்.நான் ஃபாலோ பண்றவங்க லிஸ்ட்ட பாத்தீங்கன்னா தெரியும் நான் ஏன் அதிகம் எழுதறதில்லைன்னு..அவ்ளோ பேரையும் படிச்சிட்டே இருந்தா எங்க எழுதறது..?! இப்டியே போனா நம்ம பிளாக்க கூகிளார் இழுத்து மூடிடுவாருன்னுதான் இந்த பதிவு.ஏன்னா...நம்மளயும் நம்ம்ம்ம்ப்ப்பி ஒரு 73 பேர் பின்தொடர்றத நெனச்சா தெய்வத்திருமகள் படம் பாத்து அழுதத விட அதிகமா அழுகை வருது.

இன்னிக்கு என்னோட தெய்வத்திருமகளோட பர்த்டே...நாட்ல (கேக்) விலைவாசி எவ்ளோ ஏறிப்போச்சு. அம்மா ஆட்சிக்கு வந்தும் இதெல்லாம் கண்டுக்க மாட்றாங்களே...தேன்கூட்ல கைய வச்ச மாதிரி சமச்சீர் கல்வி திட்டத்த அமுல்படுத்தறதுல சொதப்பி பெத்தவங்க வயித்தெரிச்சல வாங்கி கட்டிகிட்டாங்க.யாரை குத்தம் சொல்றதுன்னே தெரியல..என் பொண்ணுக்கு ஒரு வயசு இன்னிக்கு.ஸ்கூல் சேத்தறதுக்குள்ள ஒரு நல்ல முடிவா எடுத்துட்டா பரவால்ல...ஹி..ஹி... ஒவ்வொரு மனுசனுக்கு ஒவ்வொரு பீலிங். வந்ததும் வந்தீங்க.. வாழ்த்திட்டு போங்க... என்ன இல்லீங்க... என் மகளை..!!

மிஸ் பண்ணாம மிஸ்டுகால் கொடுங்க..!!

2011-06-16T15:03:00.000+05:30

போனைக் கண்டுபிடித்தவனுக்கு மிஸ்டுகாலைப் பற்றி சொல்லிக்கொடுத்த நமக்கு ஒரு சிறந்த வாய்ப்பு.வழக்கமா நாம மிஸ்டுகால் கொடுத்தா எதிர்ல இருக்கறவங்ககிட்ட கன்னா பின்னான்னு திட்டு வாங்குவோம்.

ஆனா, இப்ப நாம கொடுக்கப்போற மிஸ்டுகாலால நம்ம சந்ததியினருக்கு நல்லது நடக்க வாய்ப்பிருக்கு என்று நெனைக்கிறேன்.

ஊழலுக்கு எதிரா சட்டம் இயற்ற சொல்லி உண்ணாவிரதம் இருந்த அன்னாஹசாரே,பாபா ராம்தேவைப் பற்றி எல்லாம் படிச்சிருப்பீங்க...நிம்மதியா உண்ணாவிரதம் கூட இருக்க விட மாட்றானுங்க.காந்திய வழியில உண்ணாவிரதம் இருந்தா அவரோட காங்கிரஸ் கட்சிகாரங்களே போலீஸை வச்சி அடிக்கிறாங்க...என்ன கொடுமை இது..?!

இப்ப புதுசா அந்த சட்டத்த தட்டி கழிக்க ஒரு திட்டம் கொண்டு வந்திருக்காங்க.ஊழல் ஒழிப்பு மற்றும் வெளிநாடுகளில் இருக்கும் நம் நாட்டு கருப்பு பணத்தை மீட்பதற்குண்டான சட்டத்தை இயற்ற மக்களின் ஆதரவை சோதிக்கறாங்களாமாம். 02261550789 இந்த எண்ணுக்கு குறைஞ்சது 25 கோடிபேராவது மிஸ்டுகால் கொடுத்தா சட்டம் இயற்ற அடுத்த முயற்சி எடுப்பாங்களாம்.ஓட்டு போடறதுக்கு லீவு கொடுத்தாலும் இன்னும் 70,80 சதவீதத்தை தொட முடியல...இதுவாச்சும் செஞ்சு பாப்பமே..!! மிஸ்டுகால் கொடுக்கறதுதான் நமக்கு கைவந்த கலையாச்சே..!! ஹி.ஹி..

நம்ம இத்தன வருஷம் ஓட்டு போட்டே ஒண்ணும் நடக்கல..இது மட்டும் நடந்திருமான்னு சந்தேகப்படாதீங்க.எல்லாம் ஒரு நம்பிக்கைதான்.காசெல்லாம் இல்ல.ப்ரீதான்..செக் பண்ணிட்டேன்.ஹி.ஹி..