संगठन समाचार

गाडी जुध्दा दुईको मृत्यु, २० घाइते

2011-06-02T02:10:00.000-07:00

आज, जेष्ठ १९ -पूर्व पश्चिम राजमार्गको सर्लाही खण्डमा पर्ने मिलनचोकमा बिहीबार बिहान भएको सवारी दुर्घटनामा दुईजनाको मृत्यु भएको छ । मृत्यु हुनेमा धनुषा जिल्ला सबैला गाबिस घर भएका नेपाल टेलिकमका कर्मचारी जयप्रकाश साह र भारतीय नागरिक बलराम गुप्ता भएको प्रहरीले जनाएको छ । गुप्ताको उपचारार्थ वीरगंज लैंजादैं गर्दा बाटोमै र साहको नारायणी उपक्षेत्रीय अस्पताल पुर्‍याएपछि मृत्यु भएको प्रहरी निरीक्षक केपी शर्माले जानकारी दिए । वीरगंजवाट जनकपुर तर्फ जाँदै गरेको ना ३ ख ६८८४ नम्बरको यात्रुबाहक बस र विपरीत दिशाबाट आएको ना ३ ख ७०६३ नम्बरको ट्रक आपसमा ठोक्किंदा २० जना घाइते भएका थिए । हरिऔन इलाका प्रहरी कार्यालयका निरीक्षक शर्माका अनुसार दुर्घटनाग्रस्त बस अन्य सवारीलाई ओभरटेक गर्दै तिव्र गतिमा चलाएका कारण ट्रकसंग जुधेको थियो ।घाइते मध्ये तीनजनाको नमुना अस्पताल हरिऔनमा, तीन जनकपुर र अन्यलाई थप उपचारार्थ वीरगंज पठाइएको प्रहरीले जनाएको छ ।

युथफोर्सद्वारा अदालतमै आक्रमण

2011-06-01T23:10:00.000-07:00

खिलानाथ ढकाल, विराटनगर, जेठ १९ -पेसी बयानका लागि अदालत लगिएका हत्याका बन्दीलाई निशाना बनाउँदै एमाले युवा संगठन युथफोर्स कार्यकर्ताले बुधबार अदालत परिसरमै अन्धधुन्द आक्रमण गर्दा बन्दी र प्रहरीसहित नौ घाइते भएका छन्। करण यादवको हत्या अभियोगमा क्षेत्रीय कारागार झुम्कामा रहेका अभिषेक गिरीलाई बयानका लागि जिल्ला अदालत मोरङ पुर्‍याउनासाथ आक्रमण ठूलो संख्यामा रहेका युथफोर्स कार्यकर्ताले ढुंगामुढा गरेका थिए। दिउँसो १ बजे भएको योजनाबद्ध घटनामा बन्दी यादवसहित प्रहरी नायब निरीक्षक राजु श्रेष्ठ, अशोककुमार राई, प्रहरी सहायक निरीक्षक डिल्ली कटवाल, प्रहरी हवल्दार राजेन्द्र कार्की, प्रहरी जवान दधिराम मगर, जुतिन बस्नेत र क्षेत्रीय कारागारका कार्यालय सहायक राजेन्द्र कार्की घाइते भएका छन्। घटनामा युथफोर्स कार्यकर्ता मुकेश बुढाथोकी पनि घाइते छन्। गिरीलाई टाउकोमा चोट छ भने प्रहरीका शरीरभरि चोट छन्।
युथफोर्स कार्यकर्ताले अभियुक्त ल्याइएको को१च ३३०३ नम्बरको भ्यानमा अदालतभित्रै लाठी र ढुंगामुढाले आक्रमण गरेपछि 'स्थिति नियन्त्रणमा लिन' प्रहरीले ११ राउन्ड गोली चलाएको थियो।
'अभियुक्तलाई अदालत ल्याउनुअघि नै ठूलो संख्यामा युथफोर्स कार्यकर्ता भेला भएर बसेका थिए, भ्यान अदालतभित्र पस्नेबित्तिकै आक्रमण गरे,' प्रत्यक्षदर्शी जिल्ला अदालतका कर्मचारी विकास श्रेष्ठले नागरिकसँग भने, 'कोही पनि निस्किन नभ्याउँदै भकाभक हाने। फायरिङपछि अदालतमा केहीबेर तनाव भएको थियो। प्रहरी र कारागारको छुट्टै गाडी नभएकाले बन्दी गिरीलाई क्षेत्रीय कारागारबाट निजी भ्यान भाडामा लिएर प्रहरी सहायक निरीक्षक डिल्ली कटवालको नेतृत्वमा टोली अदालत आएको थियो। अदालतमा जिल्ला प्रहरी कार्यालय मोरङले छुट्टै टोली परिचालन गरेको थियो। 'प्रहरी र अभियुक्तमाथि आक्रमण भयो, स्थिति तनावपूर्ण बन्यो, ज्यान जाने सम्भावना बढेपछि स्थिति नियन्त्रण लिन फायरिङ गर्नुपरेको हो,' जिल्ला प्रहरी कार्यालय मोरङका प्रहरी नायब उपरीक्षक सहकुलबहादुर थापाले भने।
प्रहरी र अभियुक्तमाथि आक्रमण भएपछि सहायक निरीक्षक अशोक राईले फायर खोल्न निर्देशन दिएपछि एसएलआरबाट प्रहरीले लगालग ११ राउन्ड गोली चलाएका थिए। गोली चलेपछि युथफोर्स कार्यकर्ता भागेका थिए। विराटनगर-११ का गिरी दुई वर्षअघि जिल्ला विकास समितिको ठेक्का विवादमा स्थानीय यादवलाई तरबार प्रहार गरी हत्या गरेको अभियोगमा एक वर्षदेखि झुम्का कारागारमा छन्। उनी प्रहरीको नजरमा खतरनाक अपराधी हुन्। जेलबाटै अपहरण, कल बाइपासलगायत अपराधमा उनी यसअघि बारम्बार पक्राउ परेर छुटेका थिए। आक्रमणको सुइँको पहिल्यै पाएको बताउँदै गिरीले प्रहरीले सुुरक्षा दिन नसकेको बताए। 'कडा सुरक्षामा लैजान भनेको थिएँ, असुरक्षित तरिकाले ल्याइयो,' उनले भने। युथफोर्स कार्यकर्ता मनोज खड्का र बुढाथोकीले आक्रमण नेतृत्व गरेको उनले बताए।
घटनापछि अदालतमा गिरीको बयान बुधबार स्थगित भएको छ।
गिरीलाई अदालत ल्याइँदै गरेको सूचना पाएपछि युथफोर्स मोरङ अध्यक्ष पर्शुराम बस्नेतले कार्यकर्ता परिचालन गरेका थिए। अदालतमा कार्यकर्ता परिचालन गरेको स्विकार्दै अध्यक्ष बस्नेतले भने, 'अदालतले चलखेल गरेर अपराधी छुटाउन लागेकाले त्यसलाई रोक्न कार्यकर्ता खटाएको हुँ, मार्न होइन।' प्रहरीले दमन गरेर कार्यकर्तामाथि दमन गरेको उनले आरोप लगाए।
प्रहरी उपरीक्षक ठाकुरसिंह बर्तौलाले आक्रमणमा जुनसुकै समूह संलग्न भए पनि कसैलाई नछाड्ने बताए। 'घटनाको प्रकृति हेर्दा मार्ने योजना बनाएर आएको देखिन्छ,' बर्तौलाले भने, 'शंकास्पद चारजनालाई पक्राउ गरेर अनुसन्धान थालेका छौं।' प्रहरी सुरक्षामा ठाडै चुनौती दिइएको घटनामा संलग्नलाई कारबाही गर्न कुनै कसर बाँकी नराख्ने उनले बताए। प्रमुख जिल्ला अधिकारी सुरेश अधिकारीले 'घटना नियोजित र अपराध मेट्ने हिसाबले' भएको प्रतिक्रिया दिए। 'संलग्नलाई छिटो पक्राउ गरी कारबाही गर्न सुरक्षा निकायलाई निर्देशन दिएको छु,' उनले भने।

गिरी-बस्नेत साथी

अभियुक्त गिरी र युथफोर्स अध्यक्ष बस्नेत पुराना साथी हुन्। ठेक्कापट्टादेखि विभिन्न काममा उनीहरू साझेदार थिए। साझेदारीमा बिस्तारै खटपट आएपछि उनीहरू अलग भए। ठेक्कापट्टामा दुवैका समूह मोरङमा उत्तिकै सक्रिय छन्।
साझेदारीबाट छुट्टिएपछाडि बस्नेतलाई मार्न डेढ वर्षअघि गिरीकै समूहले गोली हानेको प्रहरी दाबी छ। बस्नेतले त्यही रिसिइबी साँध्न उनलाई सिध्याउन टोली पठाएको प्रहरी आशंका छ। 'ठेक्कापट्टामा विवाद भई सम्बन्ध बिग्रिएपछि उनीहरूको रिसिइबी बढेको हो,' स्रोतले भन्यो, 'अदालतको बयानबाट बस्नेतका हरेक गतिविधि सार्वजनिक हुने डरले उनलाई बीचमै मार्न खोजिएको देखिन्छ।'
गिरीलाई भरपर्दाे सुरक्षाबिनै अदालत ल्याउन लागिएको सूचना युथफोर्सले पहिल्यै पाएको थियो। प्रहरीलाई पनि यो भेउ थियो। जे पनि हुन सक्ने भनेर प्रहरीले अदालतमा छुट्टै टोली पनि खटाएको थियो। 'गेटबाट भित्र पसेपछि आक्रमण हुने भय भएन तर उनीहरू तयारी अवस्थामा रहेछन्, गाडीबाट निस्किनै नपाउँदै आक्रमण भयो,' सुरक्षार्थ खटिएका एक प्रहरीले भने। युथफोर्स आक्रमणले भ्यानका सबै सिसा फुटेका छन्।

संविधान सभा भवन क्षेत्रको निषेधित क्षेत्र घटाइयो

2011-06-01T07:16:00.001-07:00

काठमाडौं, जेठ १८ (नागरिक)- काठमाडौं जिल्ला प्रशासन कार्यालयले संविधान सभा भवन क्षेत्रमा लगाएको निषेधित क्षेत्र घटाएको छ। अब बानेश्वर चोकदेखि संविधान सभा भवनको पश्चिमतर्फ थापा गाउँ जाने बाटोसम्म दायाँ-बायाँको क्षेत्रलाई मात्र निषेधित क्षेत्र तोकिएको छ।
जिल्ला सुरक्षा समितिबाट जेठ १६ मा यस्तो निर्णय भएको उक्त कार्यालयले जनाएको छ। स्थानीय प्रशासन ऐन, २०२८ (सं.सं.) को दफा ६ (३) बमोजिम यो सूचना जारी गरिएको पनि कार्यालयले जनाएको छ।

लोडसेडिङ बिरुद्ध प्रदर्शन, एक दर्जन सवारी तोडफोड

2011-06-01T07:14:00.001-07:00

मिथिलेश यादव, राजविराज, जेठ १८ -लोडसेडिङको बिरोध गर्दै सप्तरी कल्याणपुरका स्थानीयले पूर्व पश्चिम राजमार्गमा चक्का जाम गरी प्रदर्शन गरिरहेका छन्। प्रदर्शनकारीले एक दर्जन सवारी तोडफोड गरेपछि अवस्था असमान्य बनेको छ। स्थानीयको प्रदर्शनका कारण कल्याणपुर बजार बन्द भएको छ।
प्रहरी र प्रदर्शनकारीबीच झडप भैरहेको छ भने अबस्था नियन्त्रणमा लिन कल्याणपुरमा सशस्त्र र नेपाल प्रहरीको तैनाथी बढाइएको छ। आन्दोलनका कारण पूर्वमा सप्तरीको रुपनी र पश्चिममा कडरबोनामा गाडीहरु रोकिएका छन्। बन्दकर्ताहरुले सडकम टायर बालेर यातायात आवागमन रोकेका हुन्।
आक्रोशित प्रदर्शनकारीले प्रेसका गाडी समेत चल्न दिएका छैनन्।
लोडसेडिङ्गको समय घटाएर ६ घण्टा गरेपनि सप्तरीमा २२ घण्टा सम्म लोडसेडिङ भएपछि स्थानीय आक्रोशित भएर बिरोधमा उत्रेका हुन्।

मोरङ अदालत परिसरमा गोली चल्यो, ५ जना घाइते

2011-06-01T07:13:00.000-07:00

खिलानाथ ढकाल, विराटनगर, जेठ १८- मोरङ जिल्ला अदालतमा गोली चल्दा ५ जना घाइते भएका छन्। सुनसरी कारागारमा रहेका हत्या अभियुक्त अभिषेक गिरीको पेशीका लागि आएका पक्ष र विपक्षबीच झडप भएपछि स्थिति नियन्त्रणमा लिन प्रहरीले गोली चलाएको छ।
गोली चल्दा प्रहरीतर्फ ४ जना र अन्य एक जना घाइते भएका छन्। गोली चल्नुअघि प्रहरीले झडप साम्य पार्न ८-१० राउण्ड हवाइ फायर गरेको थियो। त्यसले नरोकिएपछि गोली चलेको हो।

गिरी करण यादवलाई हत्या गरेको अभियोगमा एक वर्षदेखि कारागारमा छन्। उनी कुख्यात् अपराधीका रुपमा चिनिन्छन्।

दाहालका छोराले सगरमाथा चढ्ने

2011-06-01T07:08:00.001-07:00

काठमाडौं, जेठ १७ (नागरिक)- माओवादी अध्यक्ष पुष्पकमल दाहालका छोरा प्रकाशले अर्को वर्ष सगरमाथा चढ्ने घोषणा गरेका छन्। उनको टोलीमा केन्द्रीय सदस्य तथा सर्वहारा कोषका अध्यक्ष कृष्ण केसी र जनमुक्ति सेना तथा दाहालका अंगरक्षक युवराज दुलाल रहने छन्। ‘प्रयास गर्ने हो। सफल-असफल भन्ने कुरा त्यहीँ थाहा हुन्छ,' सर्वहारा कोषले गरेको विश्व कीर्तिमानधारी सगरमाथाआरोही आप्पा शेर्पाको सम्मान कार्यक्रममा प्रकाशले भने। विश्वभरिका कम्युनिस्ट पार्टीका तर्फबाट सर्वोच्च शिखरमा झन्डा गाड्ने उद्देश्यसहित आरोहण गर्न लागेको उनले बताए। उनले सगरमाथा आरोहण गर्ने सपना बाल्यकालदेखि साँचेको बताए। उनले आफूहरुले आरोहणको तयारी गरिनसकेको भए पनि आउँदो सिजनमा पर्वतारोहणको प्रशिक्षण लिने बताए।
नेपाल पर्वतारोहण संघका पूर्व अध्यक्ष आङ छिरिङ शेर्पाले सगरमाथा आरोहण गर्न प्रकाश, दुलाल र केसीलाई सहयोग गर्ने वचन दिए।
कार्यक्रममा अध्यक्ष दाहालले आप्पालाई सम्मान गरेपछि समयमै संविधान बनाउन नसकेकोमा आत्मालोचना गर्दै भने- ‘२१ पटक सगरमाथा चढेर तपाईं आफैं सगरमाथा बन्नुभयो। हामी नेताहरू भने बेसक्याम्पसम्म त पुग्छौं, त्यहाँभन्दा माथि जान सक्दैनौं।‘
उनले अबको तीन महिना देशको निम्ति ‘अग्निपरीक्षा' भएको बताएका छन्।
‘यो तीन महिना अग्निपरीक्षा हो। सहमतिलाई सदुपयोग गरेनौं भने मुलुक ठूलो दुर्घटनामा पर्नसक्छ,' उनले भने, ‘निकै कसरतपछि यो तीन महिना आएको हो।'

इन्टरनेट सेवामा पनि हडताल, अब बन्द गरे कारबाही

2011-06-01T07:03:00.000-07:00

रामचन्द्र भट्ट, काठमाडौं, चैत २८- संविधानमा उल्लिखित मौलिक हकको ठाडो उल्लंघन हुने गरी इन्टरनेट सेवाप्रदायक कम्पनी (आइएसपी) हरूले आइतबार दिउँसो एक घन्टा सेवा अवरुद्ध गरेका छन्।
संविधानले सूचना प्रविधिलाई मौलिक हकको रुपमा व्याख्या गरे पनि दिउँसो १ देखि २ बजेसम्म इन्टरनेट बन्द हुँदा एक लाख उपभोक्ता प्रत्यक्ष प्रभावित भएका छन्। सेवा बन्द हुँदा उपभोक्ताले इमेल, इन्टरनेट सेवा चलाउन पाएनन्। यसअघि २०६१ माघ १९ गते तत्कालीन राजा ज्ञानेन्द्रले सत्ताकब्जा गर्ने क्रममा देशभरि इन्टरनेट सेवा बन्द गराएका थिए। त्यसपछि ०६३ सालमा काठमाडौंको उडल्यान्ड होटलका सञ्चालक हरि श्रेष्ठमाथि माओवादी कार्यकर्ताले कुटपिट गरेको विरोधमा व्यवसायीहरू आन्दोलित हुँदा आइएसपीहरूले सांकेतिक विरोधस्वरुप एक घन्टा सेवा बन्द गरेका थिए।
यसले इन्टरनेटबाट कारोबार गर्ने व्यवसायीदेखि सर्वसाधारणमा समेत असर परेको छ।
आफूहरुमाथि ‘अन्याय भएकाले सरकारको ध्यानाकर्षण गर्न' भन्दै इन्टरनेट सेवा प्रदायकहरूले बन्द गर्नुपरेको बताएका छन्। ‘हामीमाथि परेको अन्यायको कहीँकतैबाट सुनुवाइ नभएकाले यस्तो कदम उठाउन बाध्य हौँ,' इन्टरनेट सेवा प्रदायक (आइस्पान) का अध्यक्ष विनय बोहोराले भने।
प्रहरीले भिओआइपी कल बाइपास गरेको अभियोगमा इन्टरनेट सेवाप्रदायकका सञ्चालकलाई पक्राउपूर्जी जारी गरेपछि विरोधस्वरुप एक घन्टा इन्टरनेट सेवा बन्द गरेका हुन्।
राज्यले मौलिक हक भनेर मान्यता दिइसकेको सेवा रोक्नुअघि व्यवसायीले सोच्नुपर्नेमा त्यसो नगरी एक्कासी बन्द गरेकोमा अधिकांश उपभोक्ता निजी कम्पनीप्रति आक्रोशित छन्। यस्तो सेवा बन्दै गर्न नहुनेमा पर्याप्त जानकारीसमेत नदिई उपभोक्तालाई समस्यामा पारेको तिनले गुनासो गरेका छन्।
‘इन्टरनेट सेवा चलाउने व्यवसायीले आफ्नो माग पुरा गराउने नाममा उपभोक्तालाई दुःख दिने काम गरेका छन्,' इन्टरनेट उपभोक्ता विरोध आचार्यले भने। ४० वटा निजी इन्टरनेट प्रदायकले एक घन्टा सेवा रोके पनि नेपाल टेलिकमका इन्टरनेट भने सुचारु थियो। त्यस्तै युटिएल र एनसेलका उपभोक्ताले पनि इन्टरनेटमा कुनै समस्या आएन। अब बन्द गरे कारबाहीः प्राधिकरण नियामक निकाय दूरसञ्चार प्राधिकरणले प्राधिकरणले सोमबारदेखि बन्द नगर्न सेवा प्रदायकलाई निर्देशन दिएको छ र बन्द गरे कारबाही गर्ने चेतावनी पनि दिएको छ। ‘व्यवसायीले अन्तिममा प्रयोग गर्नुपर्ने तुरुप सुरुमै प्रयोग गरेका छन्,' प्राधिकरणका अध्यक्ष भेषराज कँडेलले भने। समस्यामै परेको अवस्थामा प्राधिकरणले छानबीन गरेर निकास दिने वचन दिँदा दिँदै उनीहरुले सबै बन्द गर्न नहुने उनले बताए।
आइएसपीहरूको संगठन आइस्पानले आफ्नो माग पुरा नभए दिनहुँ इन्टरनेट बन्द गर्नसक्ने संकेत दुई दिनअघि दिएको थियो। प्राधिकरणले कारबाहीको चेतावनी दिएपछि भने उनीहरू वार्ता गर्न तत्पर भएका छन्।
‘इन्टरनेट लिङ्क दिएकै आधारमा भिओआइपी वाइपास गरेको अभियोग लागेर व्यवसायीलाई अपराधी बनाइएको छ,' आइस्पान अध्यक्ष बोहोराले भने। उनले प्रहरीद्वारा मागिएको इन्टरनेट ग्राहकका सबै विवरण दिँदासमेत धरपकड अघि बढाइएकाले सरकारको ध्यानाकर्षण गराउन सांकेतिक रूपमा इन्टरनेट सेवा बन्द गर्न बाध्य भएको तर्क गरे। प्रहरीले शंका गरेका सबै ग्राहकका चार्ट आफूले दिएको दाबी आइस्पानका पदाधिकारीले गरेका छन्। प्रहरीले भने कल बाइपासमा सबैभन्दा बढी इन्टरनेट ग्राहक भएका वर्ल्ड लिङ्क र सुविसुको संलग्नता रहेको आरोप लगाएर मुद्दा दर्ता गरेको छ।
प्रहरीद्वारा मागेको सबै विवरण इमानदारीसाथ दिँदा लिङ्क दिएकै आधारमा कारबाही सुरु गरेपछि बाध्य भएर बन्द गर्नुपरेको दाबी इन्टरनेट सेवाप्रदायकको छ। आइतबारको बन्दबाट बैंक, फाइनान्स कम्पनी, एअरलाइन्सको टिकेटिङमा कुनै समस्या नपरेको बोहोराले दाबी गरे। ‘वेबसाइटमात्र बन्द गरेका हौँ, त्यो पनि ज्यादै कम चल्ने लन्च आवरको समयमा,' उनले भने, ‘यसबाट अरु समयमा जस्तो असर त्यति पर्दैन भन्ने हाम्रो विश्लेषण छ।' इन्टरनेट सेवा बन्द गर्नुलाई आइस्पानले पनि उपयुक्त कदम भने ठानेको छैन। ‘सभ्य समाजमा यो ठीक होइन, तर हामीमाथि लगातार आक्रमण भइसकेपछि बाध्य भयौं,' बोहोराले भने।
नेपालको अन्तरिम संविधान २०६३ मा ‘कानुन बमोजिम बाहेक कुनै छापा, विद्युतीय प्रसारण तथा टेलिफोनलगायतका सञ्चार साधन अवरुद्ध गर्न सकिने छैन' भन्ने उल्लेख छ। अवैध भिओआइपी कल बाइपासमा दूरसञ्चार सेवा प्रदायक कम्पनीको सिमकार्डको समेत प्रयोग हुन्छ।
आइएसपीले सिमकार्डबिना अवैध भिओआइपी हुन नसक्ने भएकोले टेलिफोन कम्पनीलाई कारबाही हुनुपर्ने माग गरेका छन्। ‘हामीले इन्टरनेट दिएबापत हामीलाई पक्राउ पूर्जी जारी हुन्छ भने टेलिफोन कम्पनीको सिमकार्ड प्रयोग गर्दा उनीहरूलाई किन केही छानबिन हुँदैन?' नेपालको पहिलो इन्टरनेटसेवा प्रदायक संस्था मर्कन्टाइलका सञ्चालक सञ्जीव राजभण्डारीले भने।
भिओआइपी कल बाइपास भएको स्थानमा छापा मार्दा नेपाल टेलिकम, एनसेल र युटिएलका सयौँ सिमकार्ड प्रहरीले बरामद गर्दै आएको छ।

छात्रा कक्षामै बेहोस हुन थालेपछि विद्यालयमा त्रास

2011-06-01T06:59:00.000-07:00

ध्रुव दङ्गाल, सिन्धुपाल्चोक, जेठ १८- पश्चिमी भेगको ज्यामिरेस्थित जनता माविका छात्राहरु बेहोस भएर कक्षा कोठामै ढल्न थालेपछि विद्यालयमा त्रास फैलिएको छ। सातादेखि देखापरेको यो क्रम नरोकिएपछि शिक्षक, अभिभावक र विद्यार्थी त्रसित बनेका हुन्। विद्यालयको पठनपाठन प्रभावित भएको छ।

पढाउँदा-पढाउँदै छात्राहरु काम्दै रुने, कराउने र एक्कासि बेहोस भई ढल्ने गरेको सहायक प्रधानाध्यापक केदार बिष्टले बताए। उनले कक्षा आठमा अध्ययनरत् छात्राहरुमा मात्रै यस्तो समस्या देखिएको भन्दै आश्चर्य जनाए। 'अहिलेसम्म १५ जनाभन्दा बढी छात्रा बेहोस भएर ढले'- उनले भने।

अधिकांश छात्रामा दोहोरिएर समस्या देखिएको उनले बताए। बिष्टका अनसार सुरुमा छात्रा कविता गिरी बेहोस भएपछि शृंखलाबद्धरुपमा अरुमा पनि फैलिरहेको छ। विद्यालयमा बेहोस हुने छात्राहरु घरमा भने सामान्य अवस्थामा हुन्छन्। घरमा केही नहुने तर विद्यालयमा भने बारम्बार बहोस भई ढल्न थालेपछि कविता विद्यालय जान छाडेकी छिन्। एकै छात्रामा बारम्बार दोहोरिएर यो समस्या देखापरिरहेको छ।

'विद्यालयमा त्रास फैलिएको छ'- बिष्टले भने। विद्यालयले भने 'मासहिस्टेरिया' को शङ्का गर्दै मनोपरामर्शका लागि विज्ञ खोजी गरेको छ। जिल्लाका विद्यालयमा गर्मी सिजनका बेला यस्तो समस्या देखा पर्दै आएको छ।

बाबुरामको नेतृत्वमा सहमतिको सरकार बन्छ : माओवादी नेता पौडेल

2011-06-01T06:57:00.000-07:00

काठमाडौं, जेठ १८ (नागरिक)- एकीकृत नेकपा माओवादी र नेपाली कङ्ग्रेसले अब बन्ने राष्ट्रिय सहमतिको संयुक्त सरकार आ–आफ्नो नेतृत्वमा बन्ने निश्चित भएको दाबी गरेका छन्। माओवादीको पोलिटब्युरो सदस्य देवेन्द्र पौडेलले भने बाबुराम भट्टराईको नेतृत्वमा सहमतिको सरकार गठन हुने निश्चित भएको दाबी गरे।

रिपोर्टर्स क्लब नेपालले बुधबार आयोजना गरेको साक्षात्कारमा बोल्दै नेपाली कङ्ग्रेसका नेता डा. रामशरण महतले नेपाली कङ्ग्रेसको नेतृत्वमा राष्ट्रिय सहमतिको संयुक्त सरकार गठन गर्न माओवादी नेतृत्व पनि तयार रहेको बताए। महतले माओवादी नेतृत्वले पनि कङ्ग्रेसको नेतृत्वमा सहमतिको सरकार बने सहज हुने निष्कर्षसहित सकारात्मक प्रतिक्रिया दिएको जानकारी उनले दिए। उनको तर्क थियो– एमालेको पालो पुगिसक्यो। माओवादीले निश्चित सर्त पूरा नगरी सरकारको नेतृत्व गर्ने अवस्था छैन। त्यसैले कङ्ग्रेसको नेतृत्वमा सरकार बन्ने लगभग पक्का छ।

साक्षात्कारमा एकीकृत नेकपा माओवादीको पोलिटब्युरो सदस्य देवेन्द्र पौडेलले उपाध्यक्ष डा. बाबुराम भट्टराईको नेतृत्वमा सहमतिको संयुक्त राष्ट्रिय सरकार गठन हुने निश्चित भइसकेको दाबी गरे। उनले पार्टीभित्र पनि भट्टराईको नेतृत्वमा सहमतिको सरकार गठन गर्ने सहमति भइसकेको भन्दै घोषणामात्रै हुन बाँकी रहेको बताए। उनले अध्यक्ष प्रचण्ड पनि यसका लागि तयार रहेको ठोकुवा गरेका थिए।

भट्टराईको नेतृत्वमा सहमति बन्ने निश्चित भएको भन्दै पार्टीमा भट्टराईलाई प्रधान मन्त्री बनाउने विषयमा धेरै अघि नै छलफल गरेर टुङ्ग्याई सकिएको दाबी गरे। उनले पार्टीभित्र संसदीय दलको नेतासमेत भट्टराईलाई नै बनाउने सहमति समेत बनिसकेको साक्षात्कारमा खुलासा गरे। उनले भने– राष्ट्रिय सहमतिको सरकारका लागि सहमति बन्न सक्ने व्यक्ति पनि भट्टराई नै हो। उहाँको कुनै विकल्पै छैन।

माओवादी पदाधिकारी बैठक सकियो

2011-06-01T06:55:00.000-07:00

उजीर मगर, काठमाडौं, जेठ १८- माओवादीले माओवादी नेताहरुको दोहोरो सुरक्षा व्यवस्था तत्कालै हटाउने भएको छ। उसले अस्थायी नम्बर राखेर चलाइएका सवारी साधनका नम्बर पनि तुरुन्तै परिवर्तन गर्ने भएको छ। जसअनुसार क्याम्पभित्र रहेका गाडीमा सरकारी र बाहिर रहेका गाडीमा निजी नम्बर राखिनेछ।

यसैगरी शान्ति प्रक्रियालाई तत्काल अघि बढाउने निर्णय पनि बैठकले गरेको छ। माओवादी अध्यक्ष पुष्पकमल दाहालको निवास नयाँ बजारमा बसेको माओवादी पदाधिकारी बैठकले यस्तो निर्णय गरेको हो।

बैठकमा संविधान सभाको म्याद थपसँगै भएको ५ बुँदे त्रिदलीय सहमतिबारे बैठकले छलफल गरेको थाहा भएको छ। त्यसैगरी राष्ट्रिय सहमतिको सरकार गठनबारे पनि बैठकले छलफल भएको थियो। मुलुकको समसामयिक राजनीतिक गतिविधि र पार्टीभित्र देखिएका मतान्तरबारे पनि बैठकमा छलफल भएको जानकारी एक नेताले दिए।

दाहालले म्याद थपिएको तीन महिना माओवादीका लागि अग्नि परीक्षा अवधि भएको बताउँदै आएका छन्। यो अवधिमा उनले केही गरेर देखाउने प्रतिबद्धता पनि व्यक्त गरेका छन्। यही प्रतिबद्धता कसरी व्यावहारिक बनाउने भन्नेबारे पनि बैठकमा छलफल भएको थियो।

मजदुर सम्बंधित प्रकाशित लेख

2011-06-01T00:13:00.000-07:00