Mizo Khawvel

Angelina Jolie-in A Hnute Paih!

noreply@blogger.com (Mizo Khawvel) — Wed, 15 May 2013 09:01:00 +0000

Khawvel lemchan thiam leh nu hmel tha, Refugee tanpuina kawnga mi inpezo leh nu tlawmngai tak Pi Angelina Jolie, kum 37 chuan hnute cancer natna laka inven nan a hnute pahnihin a paih hmiah mai. Pi Jolie-i hian hnute cancer a neihnatur chhance chu 87% niin chhul cancer ina a tlakbuaknatur chhance pawh 50% a nih thu a doctor chuan a hrilh a. Chu chanchin lawmawm lo tak chuan he thutlukna harsa tak hi a siamtir ta a ni.

"Ka dinhmun dik tak doctor in min hrilh ni atang khan heng cancer natna lak atang hian theih tawpa invenna siam turin thutlukna ka siam ta a. Ka chhul lam aiin ka hnute lam hi cancer vei theihna chances a tam zawk avangin hnute atang ka tan a.

February thla atang khan kan siam tan a, ka hnute chu a pahnihin min paih sak a, tichuan hnute lem min vuah sak leh ta a. April 27, 2013 khan tluang takin kan zo fel thei hram a ni.He tia thla thum chhung tlawng kan buai hlan hian tumah hriattir lovin ka hna lam pawh ka chhunzawm leh thei a ni", tiin Pi Jolie chuan tun hnaia a hun tawn chu chanchinbu mite hnenah a sawi.

A pasal hual, a kawppui lemchan thiam Brad Pitt pawhin Jolie chu a fak hle a, "Pasaltha, Nu huaisen" a nih thu sawiin, a rei hmain official-a inneihna pawh buatsaih thuai an tum thu a sawi bawk. "Ka nupui hian kei leh ka fate nen rei tak min dampui theih nan hetianga thutlukna siama a hlen chhuak thei hi a ropui a, tun hun hi kan chhungkaw hlimlai hun a ni e", tiin Pitt-a hian Evening Standard chanchinbu mite hnenah a sawi. Pi Jolie pawhin tuntuma hun harsa tak a tawn mek lai hian a partner Brad Pitt chu a fak hle bawk.

Jolie-i nu, pi Marcheline Bertrand pawhin 2007 khan cancer natna vangin kum 56 mi niin a boral tawh a. A nu thihna hian a barakhaih hle a, hei vanga hetianga thutlukna siam pawh a ni.

Angelina Jolie-i hnute paih chanchin hian khawvel ngaihven a hlawh hle a, Australia Prime Minister Pi Julia Gillard pawhin, "he chanchin ka hriat hian min barakhaih hle a, mahse he thil thleng hian khawvel hmeichia ten hnute check-up siam pawimawh zia a lantir a, hnute cancer vei hlauhthawnawm dinhmuna dingte tan pawh Jolie-i hian inven dan kawng min kawhhmuh a ni", tiin a sawi.

Australia ah chuan kum tin hmeichhia mi 15,000 velin hnute cancer an vei thin a. Heng hnute cancer veite zinga tam zawk chu nau an neihin, an mawina hloh an hlauh vangin nau hnute tui an pe phal thin lo va. Chu chuan nu hnute cancer vei hlauhthawnawm dinhmunah a dintir thin niin cancer natna chhuimite chuan an sawi.

KAN MAMAWH SIAM THAR LEHNA

noreply@blogger.com (Mizo Khawvel) — Fri, 10 May 2013 15:58:00 +0000

By. B. Zosangliana

1. Thuhmahruai: Khawvelah mihring kan pung chak em em a, kum 1800 khan maktaduai 1000 an awm a, kum 1960-ah maktaduai 3000, kum 1999-ah maktaduai 6000, tunah chuan maktaduai 7000 zet kan lo awm ta a. Khawvela mihring pun chak dan hi hnam dam khawchhuahna nen a inkungkaih avangin ngaihthah chi a ni lo va, eibarzawnna leh ram inrelbawl danah thuk takin nghawng a nei mek a ni. Hnam tenauten hnam lian zawkte chim ral nih kan hlau em em a; hnam lian leh thiltitheite pawhin hnam tenau zawkten an um phak an hlau ve em em a.

Chutianga ram pakhat leh pakhat, hnam pakhat leh pakhat inhruipawhna khawvela cheng kan ni. Myanmar-ah hian sakhuaah mi tlem zawk (minority) kan ni a, hnam thilah pawh a tlem zawk lamah tho kan awm avangin Mizote (Chin-te) hian hnam pum huapa kan din chhuahna turin kawng hrang hranga siam thar lehna kan mamawh tak zet a ni.

2. Tunlai khawvel: Mihring khawsak phungin hma a sawn chak em em a, khawvela ram hnufual fal zingah kan awm chung pawhin hna thawhna hrang hrang leh ni tin mamawh siamnaah khawl changkang kan hmang nasa ve sawt em em a. Mi tam takin tun hmaa kan hman phak loh khawl thil tam tak kan chul nel ve tawh a ni. Chhungkua pawh ram pakhata khaw hranah mai ni tawh lovin ram hrang hrangah kan awm darh ta sung mai a. Mahse, kan taksa inhlat taka a awm hranna chuan kan inbiakpawhna a dal pha ta hauh lo.

Tunlai hmasawnna hian thalaite nunah nghawng a nei na zual a, kan taksa pianphung leh kan tawngte chu danglam mah se, nunphung pakhat (mono culture) min siamsak a, kan silhfen inbel atang ringawt phei chuan kan hnam a hriat hran hleih theih tawh lo a ni ber. Ram pakhat leh pakhat pawh a thawm ring chia indo lovin internet-a thiam thil (thluak) hmangin an inbei a, eibarzawnnaa a tawng sang apiangten ram tam tak zingah thu an nei larh mai a, an hausakna leh chakna hmangin mi an awp a. Mi dangte aia chan tha zawk chan duh avangin thil engkimah inhuphurhna a na sawt em em a, chu chuan thiltithei zawk nih tuma intlansiakna a hring a, inrahbehna pawh a her chhuahpui mek a ni.

3. Hmasawn nan remna leh muanna:

Innghirnghona hian mihring than a tithu a, hmasawnna daltu lian tak a ni. Ram chhungah buaina a chhuah fo chuan ramin hma a sawn hlei thei lo va, eibarzawnnain a tuar a, ram a tihnufual thin. Chhungkuaah pawh intihthemthumna a tam phawt chuan chhungkuain a tlakhniam phah a, chhungkua a keh duh khawp mai. Chutiang chiah chuan keiniho pawh hi kan inngeih lohva kan innghirngho fo chuan keimahni leh keimahni kan inteite tihna a ni. Pawn lam atanga beihna aiin chhung lama mahni leh mahni inbeihna hian nghawng a nei thuk thei zawk fo va, thil hlauhawm tak a ni. Kan hnam pum huapin hma a sawn theihna tur chuan inrem taka kan khawsak ho dial dial a pawimawh a ni.

4. Min then hrangtute:

Tlangmite (Chin-te) min then hrangtu langsar tak chu hnam hming, kohhran pawl, tawng leh chi bing inthliarna hi a ni a. Chin state-ah khian mihring nuai nga leh singli vel an awm a, a chhunga chengte chu Chin tia koh an ni a, Sawrkar pawhin Chin tiin a chhinchhiah a. Chin hnahthlak hnam peng hrang thahnem tak a awm a, tawng pawh an nei hrang thliah a. A then chu inhnaih tak a ni a, a then erawh chu inhriatpui tawn har tak a ni thung. Chin state ang thovin, Kalay leh Kabaw phaiah pawh Chin hnahthlak hnam kan awm nual a, kan inneih pawlh nasa hle bawk. Thlahtu bul chu hmunkhatah kan chhui lut deuh vek na a, inpumkhatna erawh kan nei chau hle thung a, thawh hona phei chu kan nei tha tawk lo hle niin a lang. Kohhran pawl hian min thliar sin na sa em em bawk a, innghirnghona pawh a tichhuak nasa hle. Tawng khat hmang pawh hmelmaah min siam fo va, tun thlengin min la then hrang a ni.

5. Impumkhatna hmanrua turte:

(1) Hmelma thuhmun: Myanmar-ah hian mihring maktaduai 60 atanga 70 vel awm nia hriat a ni a, maktaduai khat pawh tling lo Chin hnahthlakte chu tam lama chhut chuan langsar lo tak kan ni. Tawng hran hmang hnam peng lah chu kan thahnem fu si a; kan tan rual loh chuan kan chak tawk dawn lo tih chu lei kan ben thelh thei lo tluka chiang a ni. Hnam pakhat anga ruh taka kan intel khawm thiam a pawimawh a, hnam pum huap hmasawnna tura kan chakna kan thawh khawm a pawimawh hle. Keimahni leh keimahni kan innek fo chuan sawrkar laipui pawhin min zah lo vang a, mahni hnam bil rilru fir tak kan put hmang hian min bawh thlu fo thei a, kan dikna leh chanvo pawh humhalh zo lovin kan sawngnawi reng lo vang tih a sawi theih loh. Kan inpumkhatna daltu apiang chu hnam pum hmelmaa kan ngaih theih hunah kan intel ruh thei ang a, chu chuan chakna thahrui min siamsak dawn a ni.

(2) Tawng intawm: Tlangmite (Chin-te) zingah tawng intawm (common language) kan la nei lo va; mahni hnam tawng theuh tihlal kan tum avang leh intluktlang vek nia kan inhriatna hian mi dang tawng min tawmtir thei lo niin a lang. Inpumkhatna tur chuan tawng intawm neih hi thil pawimawh tak a ni. Mahse, keiniho zingah chuan dan anga pawm theih tawng intawm neih hi kan la harsat rih hmel hle niin a lang.

Tuna a lan dan mai chuan Mizo tawng hi Chin hnahthlak tawng zinga tawng thiam rawn ber niin a lang. Hei hi Chin state-in eibarzawnna kawng hrang hranga Mizoram a tangkaipui vang a ni. Electronic leh print media, literature leh tawng lama a chungnunna hian Chin hnahthlakte min chim nasa hle a, tawng intawm kan neih theihna tura kawngpui pakhata min hnuk kaltu a ni a, a la kal tluang rih hle niin a lang. Mizo tawng hi eibarzawnnaa tawng tangkai a nih chhoh zel chuan tawng intawmah kan la neih theih ngei a beiseiawm hle. Sap tawng thiam turin Saphovin min fuih ngai lo va, min nawr lui ngai hek lo. Sap tawng thiam chu a tangkai em avanga thiam loh hlauva kan phi ruai ang hian Mizo tawng hi zirna leh eibarzawnnaah a tangkai ngat chuan Chin hnahthlak hnam peng hrang hrangte hian an la thiam vek dawn a ni. Chu vangin, Tlangmi (Chin) hnam pum khaikhawmtu hmingah Mizo tih hi hmang thei rih lo mah ila, tawng intawmah chuan kan hmang thuai thei ngeiin a rinawm.

(3) Kohhran rawngbawltute: Chin hnahthlak zingah chuan kohhran rawngbawltute hian mipui rilru an hneh thei ber a. Tunah rih chuan, mi thiam kan neihte pawh kohhran huang chhungah an la buk hle. Kohhrana tlatlum vak lo chu khawtlangah pawh an tlatlum vak lo va, kohhran ngaihsan loh chu khawtlang pawhin a ngaisang lem lo bawk. Biak In hi a huhova kan inhmuh zin berna hmun a nih avangin Biak Ina thuneitute chu khawtlang mipuite pawhin an thu leh hla an ngaichang a ni.

Chuvangin, kohhran rawngbawltute hi inpumkhatna siam thei bertu an ni a; lehlamah chuan, inthenna thlentu an ni thei bawk. Kohhran hruaitute hian rilru hrisel leh hnam pum huap damna ngaihtuah sela, hnam thila inlak bingna leh intainate hi do ngam sela chuan Chin hnahthlakte hi tun aiin inpumkhatna kawngah ke kan pen chak ngeiin a rinawm.

(4) Huapzo politics: Kan ram a zalen chho zel a, ram mipuite dinhmun pawh a tha chho mek a, politician-te pawh an pawimawh tual tual ang. Mipuite aw a lal tual tual a, tunah phei chuan mipuite thlan tlinte ngeiin ram an hruai ta. Chin hnahthlak zingah hnam pum huap politics ngaihtuah phak lo politician-ten min hruai chuan inpumkhatna kawng kan zawh thui thei lo vang. Dik tak chuan, Chin hnahthlak zinga hnam peng pakhat chauh rinchhan hian kawng sut en mai chu a har ang. Chin hnahthlak zawng zawngte hi kan tan rual thiam poh leh kan chak dawn a ni. Inpumkhatna hian thil engkimah hmun khata inchhunkhawm emaw, engkim intawm emaw a kawk hran lo va, hnam pum huap hmasawnna tur dah lal ber leh hnam peng hrang hrangte hamthatna tura thawh hona lam a kawk zawk a ni. Kan hranna lai sawi uar ai chuan kan inanna lai sawi uar hian inunauna tha a siam zawk a ni.

(5) Inzah tawn thiam: Mi dangte hmuhsitna leh ngaihnepna hi inunauna tichhetu lian tak a ni. Kan tawng inhnaih tak tak, hrang site hi inzah tawnsak ila, inthiampui tawn bawk ila, tun ai hian kan inhnaih sawt ang. Inpawhna tha tak kan neih theih nan tawng inthiampui tawn phei chu hmanraw tangkai tak a tling. Mahni hnam bil nunphung tha hmanga mi dangte delh kan chin chuan kan inkuah khawm thei lo vang. Kan tawngkam pawh kan fimkhur a ngai. Mi dangte hmuhsitna rawngkai tawngkam kan hman fo chuan kan inunauna a chhe thei a ni.

6. Ram leilung humhalh:

Eng hnam pawh a nghehna tur chuan ram leilung a neih a ngai a ni. Kan nunphung, kan tawng leh kan thu leh hlate hi hausa viau mah se, chenna bik ram leilung kan neih loh chuan kan dinhmun a derthawng reng ang a, kan chhuan em em kan hla tha pui puite nen lam hian kan la boral thei a ni. Myanmar-a Mizote hian tuna kan chen bit bikna hmun Kalay leh Kabaw phaite hi chhuahsan lova kan hum reng a pawimawh. Ram hmasawnnain company lian pui pui a rawn hruai lut tan mek a, kan hmun leh ramte hi man to tak takin an la rawn lei thei zel dawn a ni. Hnam pum huap himna tur ngaihtuah lova mimal hlawkna ngawt kan en chuan kan pi leh pute lu phumna hmunte hi hnam dang kutah a la awm vek ang a, chhuan lo la awm turte chuan tah leh ha thialna hun thim tak an la hmachhawn dawn a ni. China sawrkar-in mahnia ro inrel duh Tibet-ho a dolet dan chu Tibet hnam pawlh dal a ni. Tibet-ho chu a hlanga an awm theih loh nan hnam lian leh tam zawk thahnem tak Tibet-ah a pem luhtir a, hetiang hian a ram chhunga hnam pakhat pawh a tudai der tawh nia. Tuna kan hmunhma neihte hi kan hum tang tang a pawimawh a, kan hralh a nih pawhin hnam dang hnenah hralh lovin kan mi leh sate kutah kan hlan chhawn zel a pawimawh a ni. Tunlai hian kan nula leh tlangval, pavalai leh nuvalai, lehkhathiam tak takte ram dangah an kal chhuak (pem) nasa em em a, hma kan sawn phahna lai awm mah se, hnam damna tak tak atan chuan thil tha ber a ni kher lo vang. Kan hmun leh ramte hi keimahni ngeiin kan luah a pawimawh a ni.

7. Mihring tha tihchak:

Engtik lai pawha mar pata tan kan lak rengna tur chu mihring tha (human resource) tihchakna kawngah hian a ni. Zirna hi mihring tha tihchakna hmanruate zinga tangkai ber a tih theih ang a, Chin hnahthlak zingah lehkhathiam kan pun deuh deuh theih nan beihpui kan thlak tak tak a ngai a ni. Mahni intodelh tur leh mi dangte tana tangkai phak tura intihchak kan mamawh. Juda-ho chu ram hrang hrangah awm darh nuaih mah se, hman tlak leh hna thawk thiama an inchher chhuah vek avangin an awmna hmun apiangah hnam lian zawkte huphurh leh er thamin an chak zel a ni. Kan thiamna leh finnate hi kan hnampuite zingah kan sem darh thiam a pawimawh. Hnam pum huapa hma kan sawn loh chuan mi tlemte hausakna leh thiamna chuan hnam damna tluantling a thlen zo lo vang. Mi hausaten an hausaknain mi rethei zawkte an dawm kan a, mi thiamten zir mekte an tanpui zel chuan rual takin hma kan sawn ang a; chutichuan, hnam zahawm leh chak tak kan lo ni thei dawn a ni. Hnam tlem te kan nihna hi chak taka kan than chhoh theihna tura remchang a nihna hi kan hman tangkai thiam a pawimawh tak zet a ni.

8. Tlangkawmna:

Mi tumahin an tuh loh rah an seng ngai lo. Keiniho pawhin kan tuh rah ngei kan seng mek a, kan la seng zel dawn a ni. Chhuan tam tak lo la awm tur tan thlai chi tha kan tuh a pawimawh a, kum tam tak lo la awm tur kan hmuh lawk phak a ngai a ni. Hnam tlem te ni mah ila, hnam rinawm leh taima, hnam lehkhathiam leh tang rual kan nih phawt chuan hnam lian zawkten min sawi nghing mai mai lo vang a, pawn lam atanga thli chhiain min chhem thlu thei ngai lo vang. Kan hnam hmasawnna tur leh din chhuahna tur hi tuna nungdama awmte kovah a innghah tlat avangin kan theihnate thawh khawma engtik lai pawha tan kan lak a ngai a ni.

(He thu hi Zo Bawm bu 6-na, kum 2013 March-a Tahan Literary Circle leh Mizo Academy of Letters huaihawt International Mizo Language Seminar, Tahana tlangzarah chhuah a ni)

BIBLE THLAVÀNG HAUH A NGAI EM NI?

noreply@blogger.com (Mizo Khawvel) — Wed, 08 May 2013 11:17:00 +0000

By K.Lalreia, Aizawl

2010 October ni 20a chhuak Vanglai Ni ami “Bible thlavàng hauh a ngai e” tih kha ka han chhiar a, a ziaktu tinzâwn nia ka hmuh chu “BSI rin ngam hi a finthlâk a ni” a tih avangin, BSI-in a tih ang ang hi pawm mai ila, ahrana lo tih ve a ngailo tih hi a ni. BSI zâra Bible kan nei ve hi a lâwmawmzia inhrilh nawn a tûllo ang. A ziaktu kha Pro Pastor niin an sawi a, a zahawm hle nain, “BSI rin ngam fin thlâk” a tih telin a thuziak chungchangah khan inrawlh ve ka duh si a, a nihna a tarlanglo bawk a, Pu Lalbiakhlira ti mai ila, lo bih ngun se ka duh khawp mai! Aizawl Post 2011 Jany. 22a chhuakah RE Ralte intiin (hmeichhia nge mipa?)

1. “Mizo Bible (BSI) Hnualsuatna” tih thupui hmangin, “BSI-in Bible min pek hi kan duhtâwk loh chuan kan pherh lehzual zel dâwn a ni thei ang... BSI hi ring zo ila... lo duhthawh vak ngaiin a lang lo... Greek leh Hebrai a tûl dân ang zela zira râwn reng chunga lehlin a ni. Hei aia tha zâwk a awm chuang lo” a rawn ti bawk

a. An thuziak han chhiarin hriatna zàu hmèl tak an nih tehlul nen, hetiang thu pawimawh ziaka mahni Mizo hming ziak dân dik pangngaia dah duhloho hian enge an tum aw! “Hei aia thazâwk awm chuanglo” an tih hi siam thata, a dik zâwka dah tûl ngawih ngawiha hretu thangthar an tam tawh tehlul nen hian!

2. Dikber leh nibera an lo ngaih thin Dân Thupek “Ti rawh, ti suh” tih kha khawngaihna thiltih zâra Thlarau Thianghlim hnathawh chuan mihring thinlung chhûngrilah Dân thupek zawm duhna a dah tih hi BSI hnathawh zârah kan lo hre ve ta a, a lâwmawm a. Mahse Niin lei a hel an tih kha Leiin Ni a hel a lo ni a, Mt Everest ft 29,029 an tih pawh ft 29,017 a ni zâwk an tih pek kha. A zirtirte zing amiin a mantîr dâwn tih a sawi khan, “Lalpa, keimah em ni?’ an ti theuh a” tiha kan lo hriat bèl tawh kha, “Lalpa, kei chu ka ni lãwng chu maw?” (Mt 26: 22,25; Mk 14:19) tihin Mizo Study Biblein, BSI lehlin kha BSI lehlin vek hmangín a rawn thaichhia a, a dik zâwk ta mah lehnghal a. “Bible zirtirna dik thupboin a diklo zâwk mite hriattir chu taksa mai niloin thlarau lam khawih thil a ni ang tih a rinhlelhawm loh” an tih kha BSI-in hun rei tak a tihdân a lo nih tawh lawi si kha mawle!

Hetiang chi hre duh chu ziak tlar dul khawp ka lo kawhhmuh thei ang che u. Hebrai atanga Sâp tawnga an dah dikloh te, Aramaic atanga Greeka dah fuhloh te, Greek atanga Sâp tawnga dah dikloh te, Sâp tawng atanga Mizo tawnga dah fuhloh te nen phei chuan a za tel tehmeuh ka lo kawhhmuh thei ang che u. Diklo

hi Pathian thu a ni theilo a, ka mâwl ang anga kum sâwm chhûng lai tûl dang dah thaka chhùn-zàna Bible ka chhui hnu hi chuan BSI rin mai hi finthlâkah kei chuan ka ngai ngawt ngam ve talo a ni tih ka han sawi tel kher pek a nih hi.

3. “Uain hlui in rui tawh chuan a thar an duhlo a, a hlui hi a tha zâwk an ti tlat thin” reng a. “Bible zahawmna humhim kawngah Mizo Kristiante kan harh chhuak zel a, a lâwmawm takzet a ni” tih kha ka man thiamlo. BSI tih a nih avanga lehlin dik tâwklo pawh tan bur hi harh chhuak kan inti em ni? A ziaktute khan Bible thlavàng an hauh niloin BSI hminga Mizo tawnga lehlin thlavàng an hauh a ni em? An sawi chhan a lo nih tâkin, (a lehlin dik leh dikloh chu thudang) Parallel Bible hian Bible a eplo a, NKJV lehlin a ni mai. “Lehlin fuh tâwklo a lo awm a nih chuan Sâp tawng Bible rintlâk tak atang pawhin hriat theih chu a ni meuh mai a, a diklo tak tak tihna erawh a ni vek chuang lo” han tih talh te kha, a eng hi nge rintlâk a, a eng hi nge rintlâkloh in tih chu? Fuh tâwklo hi chu Pathian thu a ni ngailo ang. “Ni chu ni, nilo chu nilo” a ni mai.

4. “A hman hmanin lehlin kan tum ta emaw tih tûr a ni” tih teh vak kha ka lo îp deuh a. Hebrai leh Greek tawng thiam anga insawi nazah zawng “Chaw ei ka la châk meuhlo e, ka ra a sò ùl mai” tihna pawh hre bîkloho hi tawng lehlin thuah chuan chuti takin ring llm suh u. Pastor pension tawh, thawh bîk leh buaipui nei

lemlo, tlawngãwl leh la chak tha tak site pawh hian lehlin an tum lemlo a nih hi.

Ni e, a hman hmanina tih chi a nilo, tih theih pawh a nilo, an peih bawk heklo ang. “Mahni sakhaw bu zir chiangber leh hreber kan ni ang” tih te kha a zialo e. Hria emaw intiin kan sakhaw bu hi kan hrelo hlawm hle a, kan kâwmngeih heklo a, kan lei tûn tûn naa fûr hunah phei chuan kan dah hmuar lo chauh a nih hlawm si hi! A mipui nâwlpui chu sawi loh kan Pastorte pawh hian châng za tal vawn bel-sa han sàwi mai theih an nei hlawm na maw chu? Pastor senior tak pakhat pawh “Elijaha kha enginnge vânah lachho?” tiin ka zâwt a, “Mei tawlailîrin?” a tih pek kha, meitawlailirin vânah a chhohpui tih Bible-ah a awm silo, (Lalte II Bung 2).

Islam zuitute hi chuan an Koran hi an vawng chhuak fur mai a. Mite hian tûnlai hunah chuan thil an chhût keuh keuh a, ril tak tak thlengin an kher chip nasa tawh a, tawng bâkah thuziak pawh hi fimkhur a ngai tawh a nih hi.

5. Tûnhnaia Parallel Bible lochhuak ngaimawh vanga rawn ziak niah ka puh deuh ngawt a, dik tak maw? Kan Bible hman laiin a tih fuhloh tihdik a neih nual avang hian kei chu ka lo lâwm phawt a, chuti chung chuan a chhuah hnuah a letlingtu hian lo endik ve tûra kei akâr min ngen leh hnuhnawh avangin ka chhiar tawh nain

ka han chhiar nawn leh ngat a, lehlin fuh tâwklo nia ka hriat ngaihmawhawm zual nia ka ngaih point za thuak ka pe tawh a, chûng chu kan Bible hman laiah pawh a dikloa dah a ni tho mai. Mahse Greek atanga Englisha an dah fuhloh te, Aramaic atanga Greeka an dah fuhloh Mathaia ziak bîk Englisha diklo ve ta zel te, Parallel

Bible lehlin nâna an hman New KJVin dik anga a dah ve mai site erawh chu ka tàrlansak ta lemlo, NKJV letling mai a ni miau bawk si a. Dr PC Biaksiaman Parallel Bible-a a rawn tihfuh hi tha tak tak a awm nual a, tlem azâwng lo târlang ta ila:-

6. Mk 2:28: (a) “Mihring Fapa hi Chawlhni lal a ni” tih SB-in “Mihring Fapa hi sabat chungah lam pawh Lal a ni” tiha a rawn uar hlak hi, “Mihring Fapa hi Shabbat Lalpa pawh a ni bawk asin” tihin a dah dik a, “lam pawh” tih hi chuan kawh dang a nei thei a, “Shabbat Lalpa a ni bawk” tiin Shabbat nen an inzawmzia a sawi a ni.

(b) Mk 7:19: Study Bible-in, “Chutiang chuan ei tûr tinreng a sawi thiang ta vek a” tia thalo taka kan Lalpa a puh chu (New English version etc.tihdan a ni), “dailennaah a chhuah leh thin avangin, eitûr tinreng a tithianghlim thin” tihin a dah dik a. Mahse “eitûr” niloin “a thil ei tawh a pum ami kha” a pumpui khâwlin a tithianghlim a ti a ni tih hrethiam ngei ila.

(c) Lk 19:30; Jh 12:14,15: “Sabengtung no” tih kha “Sabengtung tuai” tihin a rawn dah bawk a, Sâp tawngah pawh “colt” an hmang hlawm reng a.

(d) Lk 23:42: “I ram i thlen hunah mi hrereng ang che” tih kha, “I lalrama i lokal hunah min hrereng ang che” tihin a rawn tidik bawk.

(e) Jh 10:7: “Kawngkhar” tiha kan neih thin kha Study Biblein “kawngka” tihin a rawn dahdik ta angin “Keimah hi berâm kawngka chu ka ni” a rawn ti bawk.

(f) Jh 15:2: Study Biblein “Ka zawmpui peng rahlo apiang a paih thin a, a rah apiang a thianfai thin” a tih chu, “a rah zâr apiang chu a thianfai” a rawn ti kher a, a thazâwk a. Mahse “paih” tih hi Greekah chuan, a rahlo zâr kha chawr tawh miahlo tûra a ar-khela kuaibal tih kâwk kher tawngkam a ni. “A rahna zâr thianfai” tih lai hi Sâpin “prune” an ti a. Thianfai ni mailoin “hlâwi, chepchhum, sâtchhum” tihna a ni. A rahna zâr an “hlâwi, sahchhum” atang chuan rah chhuah chi zîk tamtak a rawn chawr ang a, chutiang chu beiseia “sâtchhum, hlãwi, hliám tuartîr, khawih-ná” thin a nih thu sawina a ni a, thianfai tih mai hian a tum tak a phawkzolo a ni:

(thununna chuan rahtha a chhuah a beiseiawm thin avanga khawih a ni).

(g) Jh 16:33: “Khawvelah hian hrehawmin in awm thin” tih kha, “Hrehawmna in tâwk thin ang” tihin a rawn dah a, a dik deuh ta. Mahse “hrehawm” tih hi a inanglo thei hle mai a, “harsatna, buaina” tih ni sela a la tha

lehzual àwm e.

(h) Rom 2:14: “For when Gentiles, who donot have the law, by nature do the things in the law; these, although not having the law, are a law to themselves” tih hi, “Dân thu tum chu an pianphung rem zâwng a nih avangin an ti a” Study Biblein a tih hi a diklo nasa a, Gentailte chu chhandam pawh ngailo hiala mawiah a chhuah a nih hi! “Dânin a phût ang tho, anmahni rilru puakchhuak anga an tih chuan, dân neilo mah sela, anmahni tân chuan dân a ni chawp ve mai” tihin a rawn dah a, a thazâwk nain, “An pianpui atangin dân thilte chu an lo zâwn ve mai a, dân neilo mah ni se, an awmphung chu dânah an neih a ni” tih hi kei chuan ka la thlang zâwk cheu mai.

(i) Rom 8:1: “Tûnah zawng Krista Isuaa awmte tân chuan, thiamloh chantîrna reng a awm tawh lo” tih kha, “Tûn atang chuan, Krista Isuaa awm reng mite, tisa duhzâwng niloin, Thlarau duhzâwnga awmte tân chuan thiamloh channatûr reng reng a awm talo” a ti a, a tha ta viau a, thenkhatin an telhloh nen a rawn let kim ta a ni.

(j) Rom 8:28: Chhiar zâwnga thlûk sual hlawh fo thin, “an thatna tûrin engkimin a thawhsak thin tih kan hria” tih kha, “an thatna tûrin engkim hi an thawkho vek tih kan hria” a rawn ti a, thlûk sual pawh a hlauhawm talo.

(k) Pet II 1:20: “Lehkha thua hrilhlâwkna thute hi mahni ngaihdân maia hrilhfiah tûr a nilo tih hre hmasa phawt ula” tih chu, “Hei hi hria ula, Pathian Lehkhabua hrilhlâwkna thu reng reng hi mimal ngaihdân puanchhuah thil mai mai a nilo” a rawn ti a, a thuin a tum a rawn hrût tha ta deuh a, a lâwmawm khawpin ka hria.

(l) Juda châng 8: “Zel an hmu chawp a, an taksa an tibawlhhlawh a” tih kha, “Suangtuahna khawlo nei mite chuan anmahni tisa ngei pawh an tibawlhhlawh a” tihin a rawn dah ta bawk a, a hahdamthlâk ta huai a ni lãwm ni?

(m) Thup 3:15: “Vawt lo, lum hek lo” tih aiah, “I vawh emaw i sat emaw” tihin a rawn dah dik ta bawk a, “hot” hi “lum” tihna a nilo ti rawh? Mahse a hlui ngaina tlat hi an tam a, mihring hi kan inngaitlâwm îr-er hlawm si a!

(n) Thup 22:14: “An puante sufaite chu an nihlawh e” tih kha “A thupekte zâwmtute chu an nihlawh e” a ti a. “Blesseth are those who do his commandments” tih aiah RE Ralte sawimawi viau NIV te, New English etc te chuan “wash their robes” an lo ti ve mai reng a: engpawh ni se Pathian duhdân kan hnaih zelah i ngai phawt mai ang.

7. Parallel Bible hian diklo tamtak a rawn thianfai a tih theih tûrah kei chuan ka lo ngai, chu chu a tha viau lãwm ni? Nge BSI kutchhuak a nihloh hrim hrim chuan tu tih pawh ni se kan thinhrik zel mai dâwn? Adik adik chuan BSI kutchhuak kan tihah hian hmân atang tawhin (kum 1959) lehlin diklo, Pathian pawi sawi khawp hi kei akâr pawh hian ka hmu teuh mai. Mahse, chàwm-päng-kâr ami thu hi bärhah an khawn duh chi a nih siloha, Pathian Thu hi a nih anga a dik kan duh bawk si chuan lehlin that ve mai chu tihtûr awmchhun a va ni mai àwm ve?

Thuthlung Thar chauh leltlinga kum kua tawp hun hmangtu Fundamental Baptistin an lehlin, vaimîm pi-ha-beuh ang maia inkhàt-hleih zung mai pawh kha phuai viauin Pu JFa tihdân takin “Tin Bible” tih mai àwm mah ni se, Lk 2:49a, “Ka pa hnate thawk tûr ka ni tih in hrelo em ni?” tih kha, kan hman lai ai hi chuan a dik

zâwk a, Greek tawng atanga en pawhin Biak In-a awm veng veng thu a nilo. Lehlin fuhlo thlavàng hauh hlur hi a tha em ni?

8. “Hebrai leh Greek tawng zir ve hawt siloa, Bible kan letling ve ngawt a nih chuan kan inenfiah hle a ngai tihna a ni” tih khan thil a duhtui tih a tilang a, a lâwmawm a ni. Mahse han ti leh talh ila, kei, Aramaic leh Latin chu sawi loh, Hebrai leh Greek tawng te zir lemlo, sâp tawng thiam dan pawh phuai tak hian, ka phâk tâwkin kan Bible hi ka bih kual ve thin a. Kan mi hmasate kha fakawm ka ti a, mahse kan mi tûnlaiho, Hebrai leh Greek tawnga lehkhabu ziak thei hiala thenkhatin an ngaihten Bible min lehlinsak (revised) dân en ngun hian Hebrai te, Greek te an ráwn vaklo tih hi ka chal tih tluka chiangin ka hmu lawi a. Entir nân chauh Jh 20:1-a “khua a la thim laiin” tih hi Greek-ah chuan “skotia eti ouse” a ni a, chu chu “darkness yet tobe” “khua a thim hma” tihna ngei zawng a ni. Sâp tawng Bible tam berin “yet dark” /“still dark” tih te an hmang miau a, “khua a la thim laiin” tihin kan lo nei ve hi a dik mawlh silo. Mk 16:2a “Ni pawh a chhuak tawh a” tiha kan neih hi “anateilantos tou helio” a ni a, “Ni a tla tawh” emaw “Ni tlâk hnuah chuan” tihna ngei a ni bawk si: hetiang chi hi a tam mai a, diklo thlavàng hauh vak hi kei chu ka ngam zâwng a ni velo.

9. Sâp tawng ngau ngau lehlin thuah pawh, “For it was not the season for figs” tih chu “Theipui rah hun a nilo reng a” tihin an dah a ni (Mk 11:13). Mahse “Theipui seng hun a la ni silo” an tihna a ni si. Cycamore theipui hian hnah a neih hluah chuan a rah hun a ni tihna a ni a, Kan Lalpa pawh khan a rah hmuh beiseiin a pan

reng a nih kha. A rah hun nilo se, kan Lalpa kha Pathian mâwl tak a ni hial ang chu, rah hun niloa a rah hmuh beisei tlat mai kha! Rah hunloh laia a rah hmuhloh vanga han hauhlum te deuh deuh kha, Pathian thin tërtëk tak, zui ngam pawh a ni dâwn em ni le! Mahse “For it was not the season for cotton” tih hi “La pàr hun a nilo, emaw La rah hun a nilo” an tihna a nilo a, “La seng hun/en hun/deh hun a la nilo” an tihna a ni. E, taka, Sâp tawng zirna Class siam ve tehchai tûr ka nilo tak e.

Mahse ka sawi hi chu a dik ngei a, in duh leh Greek tawng thiam takzette ruai ula, Palestine-ah te Greek ramah te zu kal ula zâwt teh u; heta ka sawi hi an hnial ka ringlo. Khawvel huapa mithiam, Greek leh Hebrai leh Aramaic leh Latin thiamte lehkhabu siam an lexicon lehkhabute hi tawng thuah chuan rintlâkah ka ngai a ni: mahse BSI hminga Bible chhuah apiang hi kei chuan thil ka han chhui chian tâkah hi chuan rinawmah ka ngai vek mai ngamlo thung ta a ni. Kan hotu leh Pastorte hian an khawhawi an tihzau deuh a hun ve tawh em?

Bible Society ngaihnep lam niloin, Bible Society hminga tih a nih avanga lehlin dik chiang niallote pawh tan

hlur ai chuan Pathian Thudik hmuchhuak leh humhalh zâwnga chak taka hma kan lâk hi a dik zâwk ang. Sawi tûr tûl a tam, mahse kan sawi seng mawlh silo.

10. “Mimal, Pâwl leh sawrkâr hmalâkna leh dinhmun sawhngheh nâna Bible thu duh lai lai thurchhuaka, a sawi tum leh kawh ni hauh lo zâwnga lo hman chiam chin hi bansan thuai a tûl takmeuh meuh hle bawk” te an ti a, an duhthawh bawk a, a dik thui thei khawp ang, kan Pastorte pawh hi fuih tel ve law law ula a tha lãwm ni ka tih phah rum rum a! Isaia 60:12 ami “I rawng bâwl duhlo hnam leh lalram chu an boral dâwn si a” tih pawh hi, Pathian rawng bâwl tha duhlo nia an ngaih dem nân tak, Pulpit atangin mite chhuktümna hmanrua atân an hmang fo mai. Pathianin a rawng bâwl duhlo hnam leh lalram chungchâng thu helaiah hian Isaia a sawitîrlo a, ama hnam thlan Israel a duatzia leh an thlavàng a hauhna a ni.

A lehlamah Pathian sawina ni si mihring lamah min belsak fo thung lawi a. Sam 74:20a “Thuthlung kha ngai pawimawh ang che” tihte hi mihring infuih nân, Pathian thuthlung ngai pawimawh tûra infuih nân an lachhuak chàmchî a. Sam ziaktu hian chutiang zâwng kâwkin a ziaklo a, Pathian hnenah Ama thuthlung (mihringte tâna A thutiam) hrereng tûra a ngenna a ni. Thuhriltu bung 12 chu “dynamic equivalent translation” an tih angin a awmzia nia an ngaihin an letling vak mai. A kâ keu la, cheng hnih i hmu ang” tih Aramaic-a Mathaian a ziak atangin Greek-ah, Greek atangin English leh a dang dangah, a ngialnganin an let zel lawi a; a tum tak, a awmzia a khuhbo hmiah si! Aramaic tawnga “a kâ keu” an tih hi “hralh la, sumah chantîr la” an tih vena a ni miau. Habakuka pawh “Theipui pâr vul” an ziaktîr pek a. An theipui khu a hnah a chawr ruala a tang panga a rah rawn sen ve nghal chi a ni a, a pâr ngailo asin mawle! Sâp tawngah pawh “bloom” tiloin “blosom” an hmang reng a ni. E khai, Pastorte meuh han zirtîr ve ngiala Pathian thu sàwikhum ve ngawt tûr ka nilo tih kei “layman” satliah hi ka inhrechhuak leh lawi si tak e.

11. Mahse, a tâwp nân takzet pakhat leh chiah mai aw, min lo hrethiam hrâm teh u. Mizoram Office tin maiah Bible châng mawi fahrana lang, lehlin diklo ni si Amosa 5:24, “Rorelna dik chu lui angin luang sela, felna chu luipui kang ngailo angin luang rawh se” tih an târ chuai mai a. Han en mai chuan a mawi khawp mai. Kan Bibleah hian thu mawi tak tak, uar uchuak avanga a awmzia pel rawka lehlin, Pathian thudik ang maia kan hriat than tawh si hi a lo tam mai a! Rorelna dik hi lui anga luantîr tûrin zâwlnei Amosa hi Pathianin a tawngtîrlo a, lui ang niloin “tui” anga luantîr tûrin a ti a ni. Tui hian a zâwl dik chiah, “water seeks its own level” tih anga a luahkhat hmasa zel ang hian rorelna dik chu a kal tûr a ni tihna a ni. Mistiriho pawhin a záwl dik en nân pipe-ah (lui niloin) tui thunin an endik thin hi. Lui lian deuh phei chu a luang hlãwm ko zuãi zuãi thei, chutiang chu a sàwi hi a nilo. Lui hi tui a ni ngei a, mahse tui apiang hi lui a nilo. Rorelna chu a dik tûr a ni tih sawi nân lui niloin “tui” kher hi a hmang a ni tih i chiang ang u, a pawimawh ru riau a ni.

12. “Felna chu luipui kang ngailo angin” tih pawh hi uar uchuak thil bawk a ni a, hetiang hián Pathianin zâwlnei Amosa a tawngtîrlo. Felna niloin “dikna” (righteousness) a ti. I account kha a landânah chuan a fel thlap thei, Auditorten a diklohna an hmuchhuaklo pawh a ni mahna, mahse fel thlipthlepah khan diklo a

inzep teuh thei si! Chutiang felna chu Pathianin a zawnglo, chatuan thleng pawha Pathianin a hnâwlloh tûr chu dikna a ni. “Luipui kang ngailo angin” tih hi Bible text-ah a tello. Sâp tawngah “Mighty Stream” tih tein an dah a, a kawh chu “tuizangkhauh” a ni. Luite a nih chuan chak taka luang, luipui “river” a nih pawhin a

luang chak lai, tuifinriat/tuipui (ocean/sea pawh) lo ni se, kawng neia (a pawnlângah pawh tui thûk chhûngrialah pawh) chak taka a hlâwma luang bîk lai (ocean current) sawina “stream” a ni. Dan rualloha chak taka luang ang mai hian dikna chu lal leh thuneitu ni rawh se tihna a ni.

13. Thiamber, hreber ang hrimin kan iak leh ta hrep mai si a, kan nau duhtak R.Vanhnuaithanga Bethlehem te angin kan tawngkam ngaimawh fe fe an awm leh ang chu! Ni e, mihring lam en chuan zahthlâk rum rum thei, Pathian lamah erawh chuan zah sawi theih siloh a nih hi. Pathian thu-nung inziakna Bible hi a hlu takzet a ni tih tuman kan hailo a, Dân thua tawngkam pakhat te pawh boral thianglo, chatuana awm tûr a tih hi diklo nîl-niãl hi chu a huàmtèl a rinawmlo a ni. Pathian thu awmzia nilo baksaka lehlin te hi Pathian thu tihbawrhbànna leh

tihhminghliauna chiang tak a ni zâwk a, a lehlin dik tâwklo ni na na na, a thlavàng lo hauh chiam hi Pathian pawi sawina a ni mah zâwk thei mai lãwng maw? A nau thiltih tha Pathian pawhin a läwma a pawm, mahse thîkthua lo latu fa-û zâwk. Kaina te kha kan lo ang hial mai palh thei angem le kan ti a nih hi! Kan tawngkam hi a lo na ta deuh a nih pawhin Bible lehlin dik tâwklo humhalha lungàwipui hrãm tûr zâwng hi chuan kan infuih velo a, Pathian thudik hmuchhuaka, humhalh tûra inhrilh hriat duhna avanga hetiang hi rawn ziak ka ni

tih min lo hriatsak theih chuan ka lâwm hle ang. Ka lâwm lâwk phawt mai e.

*****

Vaphai mipuiten Saikhumphai Khua an hâl

noreply@blogger.com (Mizo Khawvel) — Wed, 01 May 2013 09:39:00 +0000

April 29, 2013 chhun dar 11 vel khan Vaiphai khuate chuan High Court thutluknaa an lungawi loh avangin Saikhum khuaa Biak In leh Health Sub-Centre tih loh in ding zawng zawng 40 chuang an hâl ral vek.

Nimin zing dar 6:00 khân Vaphai JAC te chuan emergency meeting neiin Saikhum khua chungchânga High Court thutlûkna duh lovin Saikhuma khaw awm hian Ralthuam leh ruihhlo tawlhna remchâng a siam niin an ngai a, Saikhum khaw thiah an rêl ta a ni.

Zing dar 6:30-ah Tlangau au tirin mi tumah zin chhuak lo tur leh ram tangchin zawng zawng chu Saikhum thiat tura thawk chhuak turin an inhriattir a, Vaphai khua te hian Vaphai panna kawng – Samthang nên an inkârah kawngchhak leivung hmangin kawng an hnawh ping a, Zing dar 9-ah thawk chhuak tanin Saikhum panna kawngah hian Police te’n Vaphai mipui te chu lo dangin an kal luih chuan kahah an vau a, mipui ten ram tana thil tha zawk a ni a, ram leh hnam hmangaih vanga thiah a ngai a ni tiin tan an khawh a, Police ho nên hian an innêk buaiin mi 6 in hliam an tuar a, Police te chuan an dang zo ta lova, thulakna chuan Vaphai khua hi mi 1200 vel an thawk chhuak niin a tarlang.

Vaphai khuate hian Saikhum khuate chu an bungbel, mutbu leh Buh te chu senghawi tura an hriattir thu an sawi a, hetih lai hian Saikhum khua te hian senghawi lovin an hâl tel vek nia thu dawn a ni bawk. Mihring lam chu engmah intihpalh leh intihlêt a awm lo bawk niin thu dawnna chuan a tarlang.

Tarlan tawh thin angin, Mizoram sawrkar Local Administration Department-in Champhai district-a Vaiphai ram chhunga Saikhumphai Bawk nikum October ni 31-a sawn chhuah tura thupek a siam chu Gauhati High Court Aizawl Bench-a judge, Justice Ujan Bhuyan chuan Zirtawpni khan a thiat a, hetianga Court thutlukna thar a awm tak avang hian boruak thalo awm thei palh veng turin Champhai District thuneitute chuan Saikhumphai bawk lamah Police thahnem tham tak an tir nghal a. High Court Bench-in thutlukna a siam hma hian Police silai keng platoon khat dah sa an ni a, court thutlukna puan a nih hnu hian platoon 2 dang dah belh leh a ni.

Saikhumphai hi Vaphai Village Council ram huam chhunga din a ni a, sawrkar chuan he khua hi phalna nei lo leh dan kalha din a ni tiin kum 2012 October ni 31 hmaa chhuahsan turin a khaw mite chu thu a pe a.

India khua leh tuite chu Vaphai khuaa insawn tur leh Myanmar khua leh tuite chu an rama kir tura tih an ni a, amaherawhchu duh lo an awm avangin Saikhumphai khaw mite hian LAD thupek hi High Court-ah an

khing a, nikum November ni 22 khan High Court chuan sawrkar thupek hi kengkawh rihloh turin thupek a siam leh a, hemi hnua thupek puitling High Court Aizawl Bench-in a siamah hian sawrkarin Saikhumphai Bawk a awmte sawn chhuahna tur thupek a chhuah chu dân kalh a ni a ti a ni. Court thupekah chuan, Mihring chenna In thiah tawhte chu Champhai district DC-in endikin siam that leh na’n sum leh an mamawh dangte thla 2 chhunga pe turin a ti a. Saikhumphai khaw mite court-a an kalna senso atan `20,000/- pe turin Champhai DC chu thu a pe bawk.

He thil thleng avanga Saikhumphai mipui te eitur buhfai leh dailuah te chu nimin vek khan Champhai DC chuan a thawn nghal a, Khawbung BDO awmsa pui turin magistrate 2 tirh belh leh an ni bawk a, inbiakpawhna that tawk loh avangin chanchin kimchang a hriat hleih theih loh a ni.

WORLD'S TOP SMARTPHONE : SAMSUNG GALAXY S4

noreply@blogger.com (Mizo Khawvel) — Mon, 29 Apr 2013 19:54:00 +0000

Tunlai khawvel smartphone intlansiakna hmahruaitu, Korea company Samsung chuan April 26, 2013 khan an smartphone chhuak hnuhnung ber GALAXY S4 chu vantlang hman theihin a vawrh chhuak leh ta uar uar mai. Galaxy S4 hi khawvela smartphone hmahruaitu a nih thu uar taka sawiin Samsung president J.K. Shin, Korea pachal chuan he smartphone thar hi a tlangzarh a. 2012 khan Apple hian phone maktaduai 135.9 an hralh chhuah laiin Samsung hian maktaduai 215.8 tlawng mai an hralh a ni.

Galaxy S4 hi 1.9 Gigahertz quad-core (Galaxy s3, 1.4 Ghz ) khawl nen meuha run a ni a, RAM pawh GB 2 lai an hmang bawk. A hmai pawh hi 5 inches ( S3 4.8 inches ) a hlaiin update a ni a, Full-HD Super AMOLED (1920x1080) 441ppi-a siam a ni. Android Jelly Bean 4.2.2 hmangin an run a, camera pawh 13 megapixel (S3 kha 8 megapixel a ni ) thlawt a keng tel a, midang thlalak emaw video record emaw laiin mahni leh mahni pawh a inlak ve nghal theih bawk. Galaxy S3 aiin 0.7mm in a pan zawk a, gram 3 in a zang zawk bawk. A kawr erawh plastic hman a ni thung.

Phone screen dai lovin a chunga kut vai mai mai pawhin Internet a hawn zung zung theih a, Universal remote control programme an thun tel avangin TV remote control nan pawh Galaxy S4 hi a hman theih bawk. Memory 16GB a keng tel a, upgrade duh tan microSD slot 64GB belh theih a ni a. Battery pawh 2,6000mAh a chak an hmang a, 4G networks hmang thei tura siam a ni.

India ah chuan S4 hi Rs 41,500 a zawrh mek a nih laiin; India rama Samsung company pawhin an Noida facility ah ( Made in India: Galaxy S4 ) ngat siam chhuah ve an tum thu Samsung Mobile and Digital Imaging Country Head Vineet Taneja chuan a sawi a. Made in India erawh hi chu RS 20,000 velin an zuar ang. Noida facility hian kum tin Smartphone maktaduai 35 - 40 lai an lo siam chhuak ve thin a ni awm e.

Galaxy S4 hi Australia ah chuan $899 a zawrh a ni a, hralh a tla tha hle. Tunlai Smartphone khawvela S4 rawn thlawp pha ho chu HTC One, Sony Experia Z etc...te an ni.

Samsung hian a rei hmain Galaxy S4 Active tia an koh, tui lut thei lo chi pawh an siam chhuak thuai dawn niin Wall Street Journal ah tarlan a ni bawk.

Ka Zinna Ram Burma- Part 1 ( By Sangzela Tlau )

noreply@blogger.com (Mizo Khawvel) — Sun, 28 Apr 2013 14:25:00 +0000

Pu Sangzela Tlau, tlawmngaihna leh thahnemngaihna zarah Burma rama Mizo khawpui Tahan leh a chhehvel khua te, Khampat bungpui, kan pi leh pu ten thlang an tlak hmaa an lo khawsakna hmun leh ram te, thlang tlak hnuah pawh Mizo pi leh pu ten rawn kir leh a vangkhua an lo din thar leh dan thu te chu thlir ve rawh le.

Mi tam tak ten rilrua kan vei em em thin khawvel hmun tin ram tina khawsa mek Zofaten hnam khat thlah khat kan nihna chiang zawka kan inhriatfiah a, inpawhtawnna tha zawk kan neih ni tur chu kawlah a eng mek a. Chutianga unau piang tlang, politics leh International ramri kham vanga hmel inhai mek ten zai khata kan luanza leh theihna tur chuan MEDIA hi hmanrua pawimawh tak a ni reng a. Hetiang Video tangkai tak en tur kan nei hi kan nihlawh a ni.

He Video hi ka thlir chhuak parh a lung te pawh a tilengin rilru a hneh hle a, Part II chhuah leh theih hun tur pawh nghahhlelhawm tak a ni.

Tarmit Computer: Google Glass A Chhuak Dawn!

noreply@blogger.com (Mizo Khawvel) — Sat, 27 Apr 2013 09:15:00 +0000

By: Ela Khiangte.
Kan khawvel hun tawng hi mak tak a ni ringawt mai. Computer leh Internet khawvelah kan chheng tawh mai ni lovin Computer chu a bunin kan bun fur tawh dawn a ni ber e. Khawvela Internet Search engine lar ber GOOGLE chuan Computer Tarmit ( Google Glass ) an siam pek a. Nikum lam atang tawh khan google glass hi siam a ni tawh a, google company-a thawktute thenkhat chuan he thil thar hi an hmang nual tawh nghe nghe a, an duh thu a la sam loh avangin video record-na leh thlalaknate chiang zawka en nawn leh turin an product chu software designer te hnenah thawn leh rih a ni a; mipui vantlang lei theih tur chuan hun engemaw chen chu nghah a la ngaih tur thu Google company chairman Eric Schmidt-a chuan 27/4/2013 khan a sawi.

Google Tarmit Computer hian thlalakna 5 megapixel leh a chhung khawl (internal storage) 16GB a keng tel ang a, Android 4.0.4 Ice Cream Sandwich hmanga run a ni ang. RAM hi 682MB emaw 1GB emaw an hmang ang a, CPU pawh Samsung Galaxy Tab 2.0. a an hman ang OMAP 4430 chipset (dual core) a keng tel bawk dawn a, US $ 1500 man vel tur a ni a.

Privacy: Australia Prime Minister Pi Julia Gillard-i pawh Google palai ten he tarmit hi an buntir chhin a, mawtawr khalh pah pawhin a bun chhin a. Comment erawh engmah a pe lo. Mi tam tak chuan he Tarmit Computer hi an lawm lem lo va. A chhan chu mihringte hlutna privacy a khawih pawi dawn ni a an hmuh vang a ni. Mawtawr khalh pah leh khawlai len pah pawhin hetiang computer tarmit hmangtute chuan tute thla pawh an la zung zung thei tawh dawn a, video pawh an duh duh an la zung zung mai dawn a; an lakate lah chhuan an hre dawn si lo va. A bikin Credit card numbers record nan leh business thil atan te a hlauhawm zual dawn niin an sawi bawk.

Privacy hlauhthawn thil avang hian US, West Virginia ah chuan mawtawr khalh chunga he device hi hmang lo turin khap an tum nghe nghe a. Mahse Heng thilah hian Google company chuan privacy khawihpawi thei thil reng reng chu an device hmanga khap a nih tur pawh an puang lawk ve bawk a.

Google tarmit buntute chuan tarmit hmangin email an thawn thei ang a, Internet thil engkim an ti thei ang a, mawtawr khalh pah pawhin an tarmit computer chu khawih ngai lovin an awin an control dawn a ni. Google chuan a tarmit computer chu en a mawi deuh nan tiin Sun glass company nen lam tangruala design a tum bawk.

Mars Planet-ah Reality TV Show Siam Dawn!

noreply@blogger.com (Mizo Khawvel) — Tue, 23 Apr 2013 12:45:00 +0000

Mars one tia an koh Dutch reality show company chuan Mars planet ah reality show buatsaih an tum a, a tel duhte tan dilna theh luh theih a nih thu an puang ta phawng mai le. Mak tak maiin he chanchin hian thalaite beng a verh hle a, khawvel ram hrang hrang 100 chhuang atangin email-a dilna theh lut mi 10,000 lai an awm tawh niin an company dintu Bas Landsdorp chuan New York hotel a news conference an neih tumah a sawi. Tun atanga kum 10 ah an mission hmasa ber chu an tir chhuak ang.

Mars reality show a tel tur chhuan kum 18 chunglam nih a ngai a, mi hrisel pangai leh sap tawng pawh thiam tha tak nih a ngai. 2023 atang khian group 6 kah chhuah tum a ni a, group khatah hian mi pali zel an ni ang a; Trip khat hian thla sarih chhung zel an thang ang a, kum hnih dan zel ah tirh chhuah an ni ang.

Mars one company hian hlawhtling taka an thil tum an hlen theih chuan Mars leilungah khian ram awp bial hial neih an tum thu an sawi bawk. Tun tuma an mission hmasa berah ngawt pawh hian $US6 billion lai an seng ang. "Sumpai hi tam tham viauin a lang a, tam pawh a tam reng a. Mahse mihring ten Mars leilung an rah ngat chhuan khawvel mihring zawng zawngin hmuh kan duh dawn a ni", tiin Landsdrop chuan a sawi bawk.

2012 August thla khan NASA ten $2.5 billion seng meuhin Mars leilungah hian robotic rover khawl an kap lut a ni. Mars leilung hi mihring tumahin an la rap lo a ni. Mars planet sen, Degree minus 55C khawvel ah mihringte han khawsa tur chu an chham chhung hian engtinnge thaw an thawk ang a, eng nge an eiin an in ang? Kan khawvel ah hian nung damin an rawn kir leh thei meuh ang em? tih te chu zawhna lian tak tak an ni a. Heng zawhna trihbaiawm tak tak chhang theitu tur chu 1999 kum a physics Nobel lawmman hial dawngtu Dutch pachal Gerard't Hooft a ni a. Mr Hooft hian he project hi thlawpin project hautak tham tak a nih thu a sawi ve bawk.

NASA Kepler Mission Ten Mihring Khawsak Theihna Tur Khawvel Pahnih An Hmuchhuak!

noreply@blogger.com (Mizo Khawvel) — Sun, 21 Apr 2013 10:45:00 +0000

Kepler tia an koh, NASA ten van sang boruak ( kan solar system pawn )ah mihring khawsak theihna khawvel a awm leh awm loh zawgtu mission an thlah chhuah chuan tun hnai mai khan mihring khawsak theihna tur nia an ngaih khawvel pahnih an hmuh chhuah thu 18/4/2013 khan an puang a. Kepler mission hi kum li kalta atang khan van boruakah khawvel dang dap tura thlah a ni a, thla 22 chhung zet khawvel dang (planet) an dap hnuin khawvel ni thei awma an ngaih 2,740 lai mai an hmuchhuak a, chung zingah chuan 114 chu khawvel (planets) an nih chian thu an finfiah tawh bawk.

Thlalaka kan hmuh ang khian, NASA Kepler mission ten tun hnaia an khawvel hmuh chhuah thar chu Kepler-62 leh Kepler-69 tiin hlawm hnihin an then a. Kepler-62 hi kan chenna khawvel atang eng kum 1,200 a hlaa awm a ni.

Kepler-62 system tia an kohah hian khawvel panga a awm a, panga zingah pahnih chu mihring khawsak theihna (habitable zone) chhunga awm a ni. Mihring khawsak theihna khawvel ni a an ngaih pahnih chu Kepler-62e leh Kepler-62f tiin hming an vuah a. Kepler-62e khi kan leilung aia 60% a lian niin, ni 122 chhung chauhin Ni khi a hel chhuak a; Kepler-62f hian ni 267 ah Ni khi a hel chhuakin kan chhenna leilung ai 40% in a lian bawk. He khawvel thar pahnih hi NASA mithiam ten mihring khawsak theihna tur ni awma an ngaih chu a ni.

Kepler-69 system ve thung hi kan khawvel atanga eng kum 2,700 a hla ah a awm a, G hawrawp ang deuh hian a awm a; he system ah hian khawvel (planets) pahnih lian tak tak an awm. Kepler-69b leh Kepler-69c tiin an ko a. Kepler-69b hian Ni khi a hnaih hle a, ni 13 chhung lekah Ni khi a hel chhuak thin a, kum khat a tling hma khawp ang. Kepler-69c tia an koh pawh kan khawvel ai 70% a lian a ni a, mihring khawsak theihna tur anih leh nih loh finfiah mek a ni.

Kan tunlai khawvel Technology thiamna thlen chin sang ber level a chhutin mihring ten darkar khatah km 25,000 a chakin an thlawk thei a, Kepler-62 system han thleng chho tur chuan kum maktaduai 30 ( 30000000 ) lai rei a tul a ni.

KHAWVEL THAR VIDEO THLIR RAWH LE!

North Korea vs America: World War III A Alh Chhuak Thei Mai Ang Em?

noreply@blogger.com (Mizo Khawvel) — Thu, 04 Apr 2013 08:57:00 +0000

North Korea leh USA inhrausakna chuan zual kai lam a pan zel a, khawvel a nghawng chhuak hial ta. Tun tum buaina hian eng chen nge ram a zauh zel dawn tih chu tu mahin sawih theih a ni ta lo. North Korea president Kim Jong-un chuan America leh South Korea do turin thupek a chhuah hmiah mai. North Korea chu Sipai nuai engemaw zat, Neuclear leh ral thuam hlauhawm tinreng te nen indo tur chuan a inpuahchah ta un un mai. North Korea hian Guam, Hawai leh U.S. mainland ngei pawh do turin a inluling a.

Khawvel ram lian 8, G 8 tia kan hriat lar te meuh pawhin North Korea chungchangah hian beng sikin ro an rel a, N. Korea in ke a pen chhoh dan en a hma lak zel a nih tur thu an sawiho a. Tin, US president Obama ngei pawhin a ram mipuite humhim nan a tul ang anga chet a nih tur thu sawiin N. Korea chu warning a pe hmiah bawk. Khawvel ram liante vona pawh ngai pawimawh lovin N. Korea lah chu a la inluling reng a, neuclear ralthuam hlauhawm pui pui chu kap chhuak turin a inpeih ran tawh mai bawk.

U.S. chuan inven nan indo lawngpui thahnem tawk Korea tuipuiah a sawn tawh a, F-22 stealth fighter jets, B-52 leh a indo thlawhna a neih that ber zinga mi B-2 bombers, darkar khatah km 1010 hiala chak thlawk thei pahnih pawh South Korea lamah a chhawp chho tawh bawk.

Australia chuan South Korea ram chhunga Australian citizen mi 7000 lai chu hruai haw hna a thawk mek bawk.

North Korea hi nuih san mai theih a ni lo va. Neuclear thu ah chuan America do tham khawp nei rih lo mahse sipai a ngah em em mai a, khawvela sipai ngah ber ram ngana a ni pha hial a ni.

North Korea leader, Kim Jong-un hian December 2011 atang khan, a pa thih ve leh apa ai awhin North Korea ram hruai hna a thawk tan a. Amah hi kum 30 mi a ni. January 24 khan Kim Jong-un hian an hmelma South Korea unau U.S. chu bomb leh neuclear ralthuam te hmang a do a tum thu a puang nghal pang a. Chawlhkar tam pawh a liam hmain Kim Jong-un chuan a ram chu indona ramah a chantir ta a ni.

Russia chuan America chu a chet danah fimkhur tura warning a pek laiin Japan pawhin a ram chhunga North Korea thlawhna lut apiang chu kah thlak hmiah hmiah a tum thu a sawi tawh bawk.

Pope Thar Francis-an Krista Nun Zir

noreply@blogger.com (Mizo Khawvel) — Fri, 29 Mar 2013 10:57:00 +0000

Pope thar Fancis-a chuan a hma a pope nihna chelh tawhte ang lo takin hmeichhe ke sil sakin a fawh sak a, mi tam takin entawntlak ti a an fak laiin mi then khat chuan mawi lo ti tawk pawh an awm bawk. Nimin khan Pope Francis chuan Rome khawpui chhunga Juveline lungin chu a tlawh a, thalai rualho an ke a sil sak a, puana a hruk hul hnuin a fawp zel bawk a.

Kan Lal Isua pawh in a zirtirte ke a sil a, chu chuan rawngbawltu a nihna, a mite tan chhiahhlawh a nihna a lantir a. Chutiang bawkin kei pawn mipuite chhiahhlawh, mipuite rawngbawltu ka nih zia lantir nan ka chetziain ka lantir a ni tiin heng mitangte ke hi a sil sak a ni.

Hetianga Pope meuhin Krista nun zira ke a pen hian mi tam takte rilru a khawihin Vatican pawhin rawngbawltu mi inngaitlawm tak an nei hi vannei an inti hle a ni.

GOOD FRIDAY

noreply@blogger.com (Mizo Khawvel) — Wed, 27 Mar 2013 13:59:00 +0000

Jesus Die On The Cross to Save The World!

2013 Good Friday, kan Lal Isua thih champha chu kan lo chuang kai leh ta reng mai. Kan Lalpa chuan a hmangaih hringfaten chatuana a hnena kan awm theih nan hmuhsit leh chil chhak, tihnawmnah leh endawngna tinreng a lo phur a. A mihring siamte ngeiin an vua a, nuihza siamnan an hmang a. Leilung pian tirh ata Pa chatuan remruat chu tih famkima a lo awm theih nan kan Lal Isua chuan a thihna tur thing Kross chu zo leh zo lovin a phur a nih kha. Zawlneiin a lo ziak ang khan, inthawina ropui ber, Isua thisen inthawina zarah chuan hringfa ten Pa ngaihdamna kan chang a, a vuakna vualah te chuan tih damin kan awm ta a.

Tunlai khawvel chak taka inher cho zelah hian kan Lalpa tawrhna lehmangang au aw kha khawiah emaw tal sawi a hlawh em aw??? Hla siamtu chuan, "Khawiah emaw tal chu mi chu, Min tawrh sak leh a chauh sawi em ni? ", tiin a lo au chhuak hial a.

Unau duh tak, kan thiam ang tawk leh kan theih ang tawkin kan Lalpan min tawrh sakna zozai hi i sawi puang fo ang u. Kan Lalpan kan phur rit min phurh sak zawng zawng hi i puang zarh ang u khai. Kan Lalpa, thi a tho leha hnenah chuan kan malsawm dawn zawng zawng vang te ni mai lovin, thisen chhuak meuha chantuan nunna min hlan vang hian lawm thu i sawi fo ang u. A hmangaihna chu thi khawp hiala nun min peknaah khan tih famkimin a awm si a. Kan Lalpa Isua hmaah khup tinreng an thing thita, lei tinreng an inpuan hun a thlen hma ngeiin he tawrhna leh thawhlehna thu hian hringfate khawvel hi fan chhuak mawlh rawh se!

Pope Benedict XVI Inhnukdawk Dawn

noreply@blogger.com (Mizo Khawvel) — Tue, 12 Feb 2013 13:51:00 +0000

Pope Benedict XVI chuan February 28, 2013 ni khian Pope nihna dinhmun atang a inhnukdawk dawn. Amah hi kum 85 a ni tawh a, a tar tawh em avanga inhnukdawk tum niin a insawi a. Pope rawngbawlhna a chawlhsan tur thu hian khawvela Catholic mipui 1.3 billion te beng a verhin Media hrang hrang leh khawvel mipuite ngaihven a hlawh hle. Catholic-ho zingah pawh ngaihdan chihnihin an inthen a; a thenin a thiltum hi an thlawp a, a then thung chuan engtinnge Pathian mithlanin a hna a chawlhsan mai theih ang tiin an lung nilo bawk a.

Pope Benedict XVI hi Roman Kohhran Pope inkaihhruaina hun chhung kum 600 chhungah rawngbawlna bansan hmasa ber a ni dawn a. Mak dangdai tak maiin hetia Pope in rawngbawl hna a chawlhsan tur thu a puan atanga darkar khat emaw lekah Vatican City a St Peter biakinpui chu a chhip zum lai takah tekin a deng awn awn mai a. Mi tamtak chuan he thil thleng hi van lam atang Pathian kut rawn lang niin an ngai hial a ni.

Lalpan a rawngbawl tura a kohte, mawhphurhna a pek ten an nghawngkawl phurh bansana chawlh an la thin hi nang engtin nge i ngaih ve le?

Chunglam Atang Thilmak Thleng

HAPPY NEW YEAR 2013

noreply@blogger.com (Mizo Khawvel) — Mon, 31 Dec 2012 15:46:00 +0000

MIZOKHAWVEL: Pathian zahngaihna leh khawngaihna zarah kum 2013 chu kan lo chuang kai leh der ta mai. Happy New Year 2013, tiin Mizo khawvel min hlut sak tute zawng zawng duhsakna kan hlan che u a; he kum thar duhawm tak hi in tan in malsawm dawn kum lo ni mawlh rawh se.

He kum thar hi mi tam tak tan chuan chhung kim lenlai ngaia luai thlipui hnulna hun a nih rualin mi tam tak erawh damlohna khum atanga he hun hmang hi an awm a rinawm a; enga pawh chu lo ni se, mi zawng zawng tan he hun hi hlimna ni, kum thar, hun thar a ni miau a. Lalpa, he hun hlu tak min chuankaitirtu hretute tan phei chuan he kum thar hi a hlu a ni. Kan awmna hmun theuhah theih ang angin Lalpa i fak ang u.

Australia lama an kumthar hmuahna thu tlem han tarlang i la. Australia khawpui hrang hrangah zan dar 12 a rik chiah khan van boruakah minutes 15/20 chhung vel firework an kap eng tuar tuar a. Sydney lamah chuan he fire work kahna ringawt pawh hi maktaduai 6 lai an seng a, mipui maktaduai khat leh achanve lai he kum thar hmuahna mei eng en hian an pung khawm hmur mai a.

Melbourne Khawpui Chhunga Firework, 2012

Melbourne khawpuiah pawh kum thar mei eng en tur hian mipui nuai nga leh a chanve vel Dockland, federation square, Treasury leh Flagstaff garden velah an pungkhawm bawk. Chutiang bawk chuan Adelaide leh Australia khawpui dang dangah pawh zanlaiah van boruak kap eng thei tur khawp firework ropui tak tak enin mipui engemaw zat kan pungkhawm hmur mai.

Zofate khawvel leh sapho khawvelin kum thar kan hmuah dan hi chu tlem chuan a dangdai deuh zawng a nih ber hi!

Happy New Year !

Sydney Firework lo thlir ve rawh u.....

Soup Thak Lutuk Ei Vangin Pumpui Pawp

noreply@blogger.com (Mizo Khawvel) — Fri, 28 Dec 2012 11:05:00 +0000

China rama Restaurant pakhatah chuan customer pakhat kum 26 mi hian an menu zinga thak ber, Mala soup tia an koh chu a chah nawlh mai a. Soup a hawp zawh rei vak lo atang chuan a pum chu a na tan a, a tirah chuan ei sual palh vanga pum nuam lo satliah emaw a ti a; mahse a rei deuh deuh a pum na satliah a ni hauh ta lo mai.

Tawk fang hnu chuan thiin a luak ta a. Rang mang khengin Local damdawiinah an tlanpui nghal a, chutah daktorte chuan a thil ei thak lutuk vanga pumpui kang pawp a nih an hmu chhuak a ni. He dam lo hian a hmain pumpui lam damlohna a nei sa lo.

Rocket news tiah an koh Japan chanchinbu a an tarlan dan chuan, pumpui na vanga damdawiin tleng zinga 15% chu chaw thak lutuk ei vang a ni an ti.

Rinna Leh Beiseina Ze Nghet

noreply@blogger.com (mizokhawvel) — Sun, 02 Dec 2012 03:36:00 +0000

By. Nl Machhuangi

Thuhma:

“Eng ber hian nge I HringNun khalh kal thin che?” tiin ka thian tha tak pakhat, hmanni deuh maia a nupuiin cancer natna vanga chatuan ram pansan ta leh amah ngei pawh a hnathawhna Company atrang rokhawlhna vanga chawl tur(laid-off)ni bawk chu zawhna ka siam a. Ti hian a ni chuan min chhang a. “ Lalpain chiangtakin min hmu a, amah rinchhan chiah tih theih ka neih chhun ani.A chhan chu ka tan hian kawng hi a tawp tak meuh a ni ” a ti a. A dik khawp mai! Kan kawng thim mup tieng turin Lalpa chauh lo chu rinchhan tur kan neilo. Buaina leh manganna chhumpui a lo zinin emaw, kan hmangaihten min kal/phat san bawk si chuan innghahna tur nghet zawngin kan vanruai ngei ang. Chungtiang hun khirh leh harsatna hmunah chuan tuinnge kan Nun hruai thin le?

Nun inphah hniam leh entawn tlak

Mualpho leh zahna tawp khawk a nih tur pawh hailova, Lalpa thu ang zelin lo thleng rawhse tia, mahni inphat leh rinna thuk nei; Nula thianghlim Mari nun atrang hian hringnun harsatna chi hrang hrangte zir tur a rawn pawchhuak hnem hle. Harsatna kan tawnte inang lo mahse, Nula thianghlim Mari anga Rinnaah kan ngheh tlat chuan midang te pawhin Khawvel Chhandamtu hmel duhawm hi an la hmu ve ngei dawn ani.

Beiseiloh tak chanchin rawn thleng

Chanchin beidawn thlak emaw, Chhungte/thiante chanchin lawmawm loh leh mahni hmangaih/kawppui ngeiten an phatsan vangte, khawvel hnuchhawna an kal san tak vangte hian rilru a chiai in khawvel hi thim mup ta anga ngaihtuahna a lut duh viau ang. Nula thianghlim Mari ngei pawh a hmangaih leh nupa kawp chawi ni ngei tura thu an thlun vek tawh han kalsan tur chu hreawm a van ti dawn em! Chumai bakah a pasal hual Josefa leh a chhungte pawhin engtinnge an ngaih ang? Tuin nge chu Nula thianghlim thusawi chu ring tawh ang?

Mahse, vantirhkoh chuan a hnenah, "Mari, hlau suh; Pathian ngaihsak zawng i ni e. Pathian thu chhuak reng reng thil tithei lovin a awm lo vang,"a ti a. (Lk. 1:30;37). Chu velleh chuan Mari rilru chu lo danglamin, Rinna nghet tak thinlung a rawn thlen a. Vantirkoh puan anga hun lo thleng tur hmachhawn zawk turin “Ngai teh, Lalpa bawinu ka ni, I thu ang zelin ka chungah thleng rawh se," tiin a inbuatsaih ta zawk a (Lk.1:38).

Amah chuahva tuar chu thil harsa ani tih hriain a laizawnnu Elizabethi hnenah thla thum a awm ta a ni. Chutiangin Hringnunah harsat, mangan leh beidawnna a lo thlenin mahni chuahva tuar mailova, kan lainate emaw thianthate hnenah thlena; tuar dam theih zir hi Mari nun a trang a hmuh fiah theih.

Harsatna Zinkawng

Mari rai teuh chung leh a pasal hual Josefa chu Kaisara Augustan khawvel zawng zawng hming ziak tur thu a pek angina Judai ram Bethehem hmun ah chuan kal a lo tul leh ta a. Rai teuh chunga an kal chu a hah thlak dawn teh reng nen, khual buk an changlo zui a. Hringnunah buaina hi a in phaman duh tak hle mai! Ei leh in tur mangan laia, Natna khirh takin a rawn tlakbuak phei chuan beiseina eng chu a chau duh khawp ang. Mahse Nula thianghlimMari anga“I thu ang zelin ka chungah thleng rawh se" ti thei turin Rinna khawnvar mitlo tura chit eng hi ringtuten kan tih tur ani si a.

Nauthar piang leh Bultanna

Khawvel chhandamtu, Nausen lo piang ranchaw pekna thlenga han zal tir mai chu Nu thinlai a hnim duh ngei ang. Amah erawh Khawchhak mi fingte leh berampu ten thil pek kenga Lal thar lo piang lawmna chibai an rawn buk erawh chuan Nula thianghlim zahna chhumpui chu lak kiana awmin Hringtunu thinlai chu Hlimnain a khatlo thei lo. Chu chhungkua bultan thar hlim leh lawm lai mek chu Lal nunrawng leh tihbaihawm Heroda hlauh avangin a zan a zana Aigupta ram hla tak maia tlanpui chu Mari, nula thianghlim nau hring hlim tan chuan a hahthlakin a van chau dawn tak em!! A hreawm emaw a nuam zawk emaw pawh nise, Lalpa remruata in nghat tlattu Nu anih vangin thupek anga kal mai chu an himna tur leh Khawvel lawmna tura lo kal a Fapa a hmangaih tan a lo ni reng mai.

Tlipna:

Hreawmna leh Lungngiahna chuan Nula thianghlim Mari nun chu chimbuai thin mahse, Rinna leh Beiseina nghet taka dingin, harsatna tin reng atrang englaimahin a tlan chhe ngailo. Fakna hlamawisain “Mi chak khan ka chungah thil ropui tak mi tihsak a, A hming pawh a thiang hlim a ni”(Lk.1:49). Tuarna leh zahna phena Vohbik Chibai hlana awmin, Thangthar zawng zawng zinga nihlawh ber chawimawina Lal Lukhum chu a khum ta zawk a. Amah atanga Khawvel chhandamtu Isua, kan sual zawng zawng phurtu tur lo pianna bul leh; Imanuela kan hnenah Pathian a awm reng theihna tura Rinna kawnga Nu entawn tlak ber chu chawimawina hlanin awm rawh se!

A ringnu pawh a eng a thawl a ni, a hnena Lalpain thu a sawi kha a thleng dawn si a,” a ti a.(Lk.1:45)

Mizo hmeichhia zinga IES tling hmasa ber LALRAMDINPUII KAWMNA

noreply@blogger.com (Mizo Khawvel) — Wed, 21 Nov 2012 09:21:00 +0000

Mizo nula chhuanawm tak mai chu Lalramdinpuii Renthlei, Lunglei Bazar Veng ami chu tunhnaiah Indian Economic Service (IES)-ah a tling hlauh mai a. An inah lenchilhin kan va inkawm ta a ni. Kan inkawmna kan tarlan hmain Ramdini inziak tlinna Indian Economic Service hi enge anih i han sawichiang dawn phawt teh ang.

Indian Economic Service (IES)

Indian Economic Service (IES) hi Central Service Group "A" a ni a. UPSC kal tlangin All India Competitive Examination hmanga lak thin a ni. IAS te, IFS te anglo takin IES hi Specialised service anih avangin Economics, Econometrics leh Business Economics a Master Degree nei chin tan chauh he exam hi a pek theih a ni. Central Sawrkar a Ministry hrang hrang, Planning Commission leh Autonomous body-ah an in zar phah a, hengah hian policy division-ah an awm deuh ber thin. Economic policy awmze nei taka kalpui a ngaih chhoh zel avangin state tam tak atangin IES rawih duhna thlen anih avangin tunah hian All India Service anih theih nana hma lak mek a ni a. Amaherawhchu IES officer tam zawk hi Delhi a inbengbel leh Delhi a awm reng duh annih avangin All India Service anihna tur a duhlo leh dang pawl an thahnem viau rih a ni. IES official website (www.ies.gov.in) a alan dan chuan IES hi kum 1961 atanga lak tan niin an sanctioned strength hi 511 (471 duty post leh 40 leave reserve) a ni. Tihlen tum mek anih avangin tun hma a batch size 5-15 lek lek nithin kha kumin atang hian 20 chuang a ni chho ta a ni.

Mizo zingah IES offcier mi 4 an lo awm tawh a. Pu J.H.Ramfangzauva (1979), Pu C.Laldinliana (1981), Pu Rengliansawta (1987), Pu C. Vanlalramsanga (2001). Vanduai thlak takin Pu J.H. Ramfangzaua, Pu C. Laldinliana leh Pu Rengliansawta te hian chantuan ram min pansan tawh a. Pu C. Vanlalramsanga hi tunah Deputy Secretary, Ministry of Finance a awm mek a. Nl Ramdinpuii Renthlei hi Mizoram atanga IES tling 5 na a ni ta a ni. India ram pum a IES officer 500 vel chauh zingah Mizo a lut thei hi a lawmawm tak meuh a ni. Awle i han kawm tan ang hmiang-

Gilbert: A hmasain inkawmna hun tha tak min pe a, kan lawm hle mai. IES i tling tih kan lo hriatin ka lo lawm ve em em a, i kal zelna turah pawh lawmpuina ka han hlan hmasa phawt teh ang che.

Ramdini: Kei pawh ka lawm hle mai

Gilbert:Awle, han in zawt tan mawp mawp mai ila. A hmasain in chhungkaw chanchin leh i pianni te min hrilh thei em?

Ramdini: Ka Pa hi R. Laltlanthanga niin ka nu hi Sangkungi a ni a, unau panga niin Mipa pathum leh hmeichhe pahnih , kei hi naupang ber dawttu ni turin January 10, 198... khan Lungleiah ka piang.

Gilbert:Anih leh i unau dangte hian enge an tih hlawm? Tute nge an hming?

Ramdini: Ka sawi tawh angin kan unau hi panga kan ni a. Kan upa ber R Lalbiakhluna hi Baptist Higher Secondary School, Serkawn-ah zirtirtu hna a thawk a, a dawttu hi R Lalbiaknunga niin Small Service Business lam a buaipui ve thung a, a pathumna chu R Lalhmunzauva a ni a, a ni hi HDFC Pvt. Ltd., Aizawl-ah Assistant hna a thawk a, chuan kan naupang ber R Lalrinngheti hian Asst. Professor hna Govt. Serchhip College, Serchhip-ah a thawk mek bawk.

Gilbert: Eheu! In unau chu in puitling tlang hle mai. Anih leh lehkha i zir chhoh dan min hrilh thei ang em?

Ramdini: Kg 1 atanga HSLC thleng hi Sacred Heart School, Lungleiah ka lut a, Baptist Higher Secondary School atangin HSSLC ka zo ve thung. B.A hi Lady Keane College, Shillong atangin ka zo a, MA pawh hi Department of Economics, NEHU, Shillong atang vek in ka zir zo a ni.

Gilbert: Anih leh chung i zirchhoh lai chuan result chhuanawm deuh han sawi tur te i nei em?

Ramdini: Chhuanawm tia han sawi tur em em chu ni lo mahse HSSLC exam-ah khan vanneihthlaktakin Mizoramah 6-na ka ni ve hlauh mai a. Chuan B.A. (Economics) kha NEHU hnuaiah 1^st Division-ah ka pass bawk a, M.A economics pawh Gold Medallist niin tha takin ka passed chhuak ve a ni.

Gilbert:Anih leh tuna IES exam i pek lai hian zir i nei em? Nge IES Coaching class i kal? Engtin nge kal zel i tum?

Ramdini: IES exam atan hian a hranpain Coaching class ka kal lo va, ka hmachhawn ve tawp mai a ni. IES Exam ka pek lai hian Ph.D hi Jamia Millia Islamia (JMI), New Delhi atangin ka bei mek a, mahse hei vanneihthlak tak maiin IES-ah ka tling ta hlauh mai a, ka kal zel dan tur chu Pathian thu thu aniang chu.

Gilbert: Anih leh Ph.D. chu zawh hram i tum ang em?

Ramdini: Tunah hian training neiturin Hyderabad ka pan phawt dawn a, kum khat leh tlem a awh ang. Pathian hruaina in Ph D. pawh hi zawh a, Doctorate Degree neih ngei chu ka tum alawm, amaherawhchu hun a duh deuh ang

Gilbert: Anih leh IES exam hmachhawn tura i inbuatsaih dan tlem min hrilh leh la

Ramdini: Indian Economic Service hi Class 12 ka zirlai atangin ka lo hmelhriat ve tawh a. Economics lam hi ka subject a lo ni bawk nen, he exam hi hmachhawn ve a, tlin ngei tumin M.A. ka zirlai atangin ka bei tawh a ni. Ka rilru leh thlarau (iti mai ang) hian ka vei tawp a, tin Ph.D , New Delhi boruak ka hip hian tran min pe leh zual a. Chhunah Research lam tiin tlai leh zan hi IES Exam inbuatsaih nan hun ka hmang thin.

Gilbert: Anih leh IAS exams te i lo pe tawh em? Engvanga IES kher han hmachhawn nge i nih?

Ramdini: UPSC hnuaia IAS exam hi ka la pe ngailo. IES exam tur hian Post graduate degree Economics/Business Economics/Econometrics ah neih bik a ngai a. He exam pe tur hian MA economics ka zir atangin ka rilru ka siam fel. IES ka han tumzawn na pawh MA economics ka zirna hi hman tangkai theihna ber a niin, tin subject dang han zir leh vak a ngaihloh vang a ni. A hna hian a huam zauin, administration mai bakah India ram economy kalphung (policy making) duangtu te ani a, heng zinga tel ve thei han nih hi a chakawm ka ti.

Gilbert: Mizo mipui tam zawkin kan hmelhriat chu IAS, IPS leh IFS te hi a ni mai a, IAS, IPS leh IES danglam bik deuhna min hrilh thei em?

Ramdini: IAS, IPS hi All India Service an ni a, State Cadre nei an nih avangin State sawrkar hnuaiah an thawk deuh ber a. IES hi Central Service anih angin central sawrkar hnuaiah an thawk ani. Tun hnaiah economic policy te a pawimawh chhoh tak em avangin state 7 te chuan regular takin IES officer an state a thawk turin an dil/chhawr a ni. All India service anih theih nana proposal awm mek a awm bawk.

Gilbert:A nih leh enge IES te hi an tangkai theihna tur?

Ramdini: IES te hi Ministry hrang hrnag leh Planning Commissionah an awm ber a. Central Sawrkar hnuai a Officer tam tak hi state sawrkar dawr ber an nih avangin state sawrkar atana tangkai thei tak tur an ni hlawm.

Gilbert:Chuan IES exam neih thin dan min han hrilh leh la

Ramdini: IES Written Exam hi December thla a neih niin a ni thum chhung awh ani. Written result May/June ah chhuakin, a tlingte chu Interview/ Personality test tura koh an ni a. Tin, medical test neih nghal ani bawk. Written leh Interview a tling ta te hian medical test an hmachhawn leh thin a ni.

Gilbert:Mizo hmeichhe zinga IES tling hmasa ber i ni a, i chhuanawm hle mai. Mizo zingah hian tunah IES service lai an awm em?

Ramdini: Ka lawm e, tunah hian Pu Vanlalramsanga Chawngthu (IES) Deputy Secretary, Department of Economic Affairs ah awm in, Ani lo hi Mizo dang an awm lo. Mizo zingah hian IES Officer mi 4 an lo awm tawh a, Pu Vanlalramsanga Chawngthu tih loh hi chuan mual min liam san tawh a ni.

Gilbert:Anih leh han ti ta daih ila, Central Service-a Mizo te kan tlin theih tak mang lohna chhan hi enge niin i hriat?

Ramdini: Kan thiltiha kan lungawi hma lutuk leh Mizoram nuam kan ti lutuk hi ani ber mai. Kan value system hi ani leh bawk a, thalai tam tak thil puarpawleng mai mai buaipuiin chu chu kan thamral phah thin ani. Taihmakna leh tih/beih hram hramna (perseverence) kan neih chuan UPSC/MPSC..engpawh hmachhawn ila, kan tlin theih lohna tur awm in ka hrelo.

Gilbert:A lawmawm e. Bible chang i ngainat ber min hrilh thei em?

Ramdini: Bible thu hi a tha em em vek a, amaherawhchu chutia min zawh takah chuan Josua Bung 1: 9, “Thu ka pe che a ni lawm ni? Chak tak leh huai takin awm rawh hlau suh la, zam hek suh, Lalpa i Pathian chu i kalna apiangah i hnenah a awm zel dawn alawm,” tih thu hi huaisenna min petu leh kawng bumboh leh harsa tak ka zawh changa min fuih thartu Bible chang a ni a, ka duh hle a ni.

Gilbert: Awle, kan inkawm hun chu duh tawk dawn ila. A tawp nan he interview chhiartu thalaite hnena chah duh deuh bikte i nei em?

Ramdini: Thalaite leh zirlaite kan mawhphurhna a sang hle mai. Nakin lawka ram hruaitu tur kan nih avangin exam-na a pass nan ringawt ni lo, thiamna tak tak neih tum a lehkha kan zir a pawimawh. Zirlaite’n kan zirlai hi Pathian rawngbawlna a ni tih hriaa kan zir hian keimahniah Pathian ropuina a lo lang thin a, kan dil/beih aia nasain min vur let thin a ni. Mizoram hi hmangaihna dik taka kan hmangaih a , engemaw zawng talin kan ram tan Contribution neih ve hi kan tum ber tur a ni. Engpawh zir ni ila, taihmakna leh tum tlatna hian rah tha (ber) a chhuah ngei ngei tih hi i vawng tlat ang u.

Thulakchhawnna: Gilbert Renthlei

Pornstar atanga Pathian rawngbawltu Shelley Lubben

noreply@blogger.com (Mizo Khawvel) — Mon, 05 Nov 2012 10:01:00 +0000

Shelley Lubben

Tun tuma a chanchin leh a rawngbawlna kan sawi tur Shelley Lubben hi nu ropui tak a ni a, puitling film chang thin nimahse piantharna a chang a, puitling film chang thin dangte rawngbawl sakin he suala awk laklawh tawh tlanchhuah ngaihna hre tawh si lo nun beisawng em em te chhanchhuahna hna ropui a thawh dan hi a ngaihnawm a, mi fel sawmkua leh pakua sim tur nei chuang si lo aia mi sual pakhat sim, Pathian lam hawi ta chunga Pathian lawm dan tur leh mi dang leh zel sim tura a puih dan hi a ropui tak meuh meuh a ni. Awle chhunzawm ang.

Pian leh Murna : Shelley Lubben hi May 18, 1968 khan Pasadena, California-ah a piang a, an chhungkua hi Kristian chhungkaw pangngai tak an ni a, a naupan lai atang pawhin Isua Krista a hmangaih hle thin niin a sawi. Chutianga Kristian chhungkaw tha taka an awm ho lai chuan hmundangah an insawn a tul ta tlat mai. Chutia khawdanga an insawn tak avang leh a nu leh pa hnathawhna thar avang te chuan an chhungkua chuan Biak in te an hlat telh telh a, TV an en nasain chu chuan an chhungkua pawh a nghawng a, Shelley pawh chu Primary school a kal laiin TV ah chuan a in lan ve nghe nghe a ni.

Chutianga a nitin nun a hman chhoh lai chuan naupang duhawm tak mai Shelley chu kum 9 mi a nih laiin mipa tleirawl pakhatin vanduai thlak takin a pawngsual hlauh mai le. Chu chuan a nun a thlak danglam ta dawrh a, tunlai angin taksa leh rilru lam thlenga inenkawlna tha, pawngsual a tawh avang hian a dawng ve lo va. Nasa takin chu a vanduaina chuan a nun a nghawng a, amah chu bawlhhlawh ngawih ngawiha inngaihna te nei chhovin, mi mit lak chakna leh mipa ngaihvenna a nei chho ta.

A tleirawl chho ta chu a za ve har mai. Kum 16 anih in mipat hmeichhiatna a hmang tan a, inlamah te chuan Playboy playmates te inchei dana incheiin a lo len leh deuh hnu chuan zu leh damdawi a ti chho tan ta. A chhungte chuan han buaipui ngaihna vak an hriat loh avangin kum 18 anih chuan an in atang chuan an hnawtchhuak ta a.

Chutianga baihvai taka a chhuah hnu chuan San Fernando-ah ei leh in tur pawh nei lovin a thleng hlawl a, chutia a tei kual lai a hmuh chuan mi pakhat hian a bula khawsa turin a sawm a, mipat hmeichhiatna hmanpui turin. In atanga hnawhchhuah a nih tawh avang chuan pawisak nei tawh hek lo, a vawikhatna atan Dollar 35 in a inhralh tan ta a ni.

Shelley chuan chutiang chuan Nawhchizuar nun chu a hmang chho tan ta. Thil tam tak rapthlak tak tak nawhchizuar dangte tawrh thin chu a tuar chho ve mawp mawp zel a, mahse pawisa ber a neih miau avang chuan a chhunzawm zel a, sawn te a pai a, nawmsipbawlna hrang hrangah a inhnamhnawih a, mahse a nun chu a beidawng em em thin.

“Hetianga hun ka hman lai hian ka naupan laia ka ngainat em em thin Isua chuan ka thinlung hi a rawn kik reng a, mahse kei chuan ka lo hre lo der thin a. Pathian chuan min ngaihsak lo niin ka hriat avangin ka dam khawchhuah theih nan chuan engmah tih hreh ka nei ngai lo,” tiin Shelley chuan hetih hunlaia a nundan a sawi.

Nawhchizuara sum a tuak chuan pawngsual leh nghaisak te, risk te a tawk nasa hle a, a sum hmuh ang ang chu zu leh drugs lei nan a hman bawk si avangin chu nawhchizuar nun chu kalsanin Porn Industry lamah Puitling film chang turin a inher ta. Kum 24 mi anihin Puitling film a chang tan a, kum 1993-1994 khan puitling film 30 chuang a chang hman a ni. Mahse hetianga mipat hmeichhiatna a hman kual atang hian sex atanga inkaichhawn theih natna Herpes leh Human Papilloma virus (HPV)kai bawk a, chu chuan a nun a ti beidawngin zu leh drugs a thlah theih chuan siloh avang chuan a nun a beidawng hle thin. Hetia Herpes a vei atang hian zawi zawiin Porn Industry chu a kalsan ta a.

A pasal nen

Chhanchhuahna: Tichuan Kum 1994 khan bar pakhatah tlangval fel tak mai a hnua a pasal nita Garret-a nen an in tawng a. Garret-a chuan date atan sawmin an inzui chhuak a, thian tha tak an ni ta. Garret-a hi Kristian hnuchham enkawlna atanga seilian, Kristian sikula kal, piangthar tha tak mai a ni a. Shelley hnenah chuan a nun atanga chhanchhuah a duh leh duh loh a zawt a, nun beidawng tak Shelley chuan a duh chiang hle mai. Tichuan theihtawpin Garret-a tanpuina hnuaiah Zu leh Drugs te chu a sim chho zel a, piantharna dik tak a chang ta. Tichuan Garret leh Shelley Lubben te chu February 14, 1995-ah an innei ta a ni.

Hetianga an inneih hnu hian tunhmaa nun buarchuar taka lo hmang thin Shelley leh Kristian tlangval Garret te chuan harsatna pawh an tawk nasa ngei mai. Mahse Pathian an en tlat a, kohhran bel tlatin Tacoma, Washington-a Champions Centre kohhranah chuan theihtawpin an in hmang chho ta a, hemi chungchangah hian Shelley chuan, “Pathian nen chuan, ka sual zawng zawng hi ngaihdamin ka awm tih ka inhria a, mi thar ka ni ta. Pathian chuan ka tunhma nun theihnghilhin tawp chin nei lovin min hmangaih tih ka hria a, ka hmalam hun atan min lo buatsaih nasa hle hi a lo ni,” tiin a sawi.

Hetianga nun thar a neih hnu hian Shelley chuan Web Desingning lam a zir ta. Hemi bakah hian college a lut tha leh a, Pathian thu zirin Theology leh Counselling lamah Bachelors Degree a nei ta bawk. Tichuan kum 8 kalta a nawhchizuar teng hneng tak Champions Centre beltu chu Champions Centre a rawngbawltu pawimawh tak a lo ni chho ta a. Pathian chuan zu leh drugs ngawl a lo vei tawhna te, a hun liam ta duhawm lo tak te, rilru natna hrang hrang te, mipat hmeichhiatna ngawl a lo vei tawhna te, a hun liam ta avanga a zah ngawih ngawihna thin lak atang te chuan chhanchhuakin chutiang tuarte tana rawngbawl tur chuan a buatsaih tih inhre chungin rawng a bawl ta a. Mi tam tak harsatna hrang hrang neite tan tanpuitu niin mi tam tak a chhanchhuak a, a hnaah chuan a inpe zoin a tui hle.

Pink Cross Foundation: A naupan lai chuan Shelley hian Pathian thu hriltu nih a chak thei hle. Mahse a nuna vanduaina hrang hrang a tawrh hnuah Pathianin a chhanchhuak a, tunah chuan Bachelors Degree neiin mi hrang hrang hnenah a nun atanga a thil tawn leh Pathianin a chhanchhuahna thute chu a sawi kual ta. Tichuan kum 2005 atang khan internet lama Social Networking site hmang tangkaiin a harsatna ang tawk, Sex industry-a tang mek te chhanchhuah hna chu a thawk tan ta a. Kum 2008-ah pawl pakhat Pink Cross Foundation chu a din ta bawk a. He Pink Cross Foundation hian a tum ber chu Porn Industry(puitling film siamna)-a inhnamhnawih a changtu (pornstar) te zinga nun beidawng te chhanchhuah chu a ni. He hna kalpui tur hian a website kaltlangin donation a khawn a, hmuh pawh a hmu tha hle mai. Chumi hmang chuan Pornstars te chu thilpek hlanin a thilpek funah chuan Bible te, Pathian thu ziakna te, Gospel Music CD te, duhsakna cards te leh a tawngtai pui reng a ni tih leh amah biak pawh a an harsatna te an hrilhna tur lehkha te chu a thun tel thin a. Tin he a website kaltlang bawk hian Porn movies en thin mi tam tak te chu Pornstar te dinhmun dik tak leh an khawngaihthlak zia te, tanpui an ngaihzia te hrilh hriain Pornstar te pawh sim an duh leh duhloh an zawt a, porn industry tlansan a nun thar neih duh te chu kawng tinrengin an tanpui thin bawk a ni.

Shelley family

Tunah hian Shelley Lubben hi a pasal Garret nen fa pathum neiin a rawngbawl hna a chhunzawm zel a. Jail ah te, TV , Radio, Film, Conference leh Pink Cross Foundation kal tlanga chhanchhuahna hna an thawh kaltlangte in Pathian thu a auchhuah pui a mi dangte tan a nun a hmang nitin a ni. Shelley Lubben hian Porn Industry nihna tak pholana he industry hi sawrkarin a khuahkhirh theih nan nasa takin hma a la a, California legislator Charles Calderon nen pawh an thawk dun nasa hle. June 2010 khan US House of Representatives-a Senate te hmaah thu a sawi a, tin TV Show lar tak tak Howard Stern show, ABC news Nightline, The 700 Club, Fox 11 News, AP News leh show lar tak takah te a tunhma nun leh a nun beidawng tak atanga Pathianin a chhanchhuah dan thu te a tlangau pui thin a ni.

Sawi tawh angin Shelley Lubben hian a website www.shelleylubben.com leh www.pinkcross.org hmangin nasa takin rawng a bawl a. He website-ah hian Pornstar lar tak tak te nun dan leh an pianthar dan an testimony, anmahni ziak ngei te tarlan a ni a, Sex leh porn industry atanga natna hlauhawm tak tak vei theih chungchang te tarlan a nih bakah Pinkcross Foundation rawngbawl dan te, an thlalak te leh thil tam tak dah a ni.

Zep thu a chang law, tunlai khawvelah Porn Industry hi sumdawnna hlawk ber pawl leh mipuite bawh ber a tling tawh a. Helai ram kilkhawr takah pawh hian internet hmangin sap nula leh tlangval ten hlim hmel taka engmah pawisa lo va an in kreinch lai te kan enin kan download ve thei reng tawh a ni. Pornography hi addict awlsam tak, thlarau nun leh nupa inkar te khawih chhe vek thei anih avangin Kristian thalai te pornography lakah kan inven a tul tak zet ta. Internet-ah porn website tam tak click chhuah mai theihin a awm a, a download thei reng tih te kan hre awm e. Mahse DUHTHLANNA thiang tak kan nei a, internet kan hman pawhin website tha lo te thlir kual lo va kan rilru leh thlarauin a hlawkpui theih tur zawng website tha tam tak en zawk thei tura kan DUHTHLANNA kan hman thiam a pawimawh hle a ni.

Thulakna: Gilbert Renthlei

Mizo novel-a kawl ram zofate kutchhuak zir chianna

noreply@blogger.com (Mizo Khawvel) — Mon, 29 Oct 2012 11:09:00 +0000

TAHANTIMES: Mizo pi pute a hlawm lian berin kum 1700 A.D. vela Burma ram an chhuahsan hnu khan, thenkhat chu kum 1820 velah an kir leh a, Chin state hmar lamah an cheng a, kum 1972 – 73 vel khan khaw 56-ah an awm darh hlawm a. Tin, Kawl phai tia hriat lar Kabaw valley-ah kum 1914 khan Mizoram atangin an pem lut tan leh a, kum 1972-73 khan khaw 23 lai an tling. Sipaiah te tangin, sawrkar hna hrang hrang thawkte pawh an thahnem ve viau a, Burma ram laili hmun hrang hrangah an khawsa ve hlawm bawk a. Kum 1972-73 khan mi sing nga vel tlinga hriat a ni.

An zingah hian hla phuah thiam te, ziak mi te leh Novel phuah thiam te an awm ve nual a. Novel pawh bu sawm (10) aia tlem lo an tichhuak ve tawh a. Chumi chungchang chu sei lutuk lo, kimchang ve deuh hlekin chhui kan tum dawn a. Hriat a nawm zawk nan, a mal te tein zir chiang ila a tha awm e.

1. Capt.C.Khuma (1914-1990) hian a thawh hlawk hle a, lehkhabu ‘Pasarih’ lai a ziak a, chung zinga ‘Pali’ chu Novel a ni a. Chungte chu tawi deuhin lo sawi ila.
a) Maymyo Sanapui hi kum 1946-a a ziak, kum 1950-ah a bua a chhuah, a kawma lemziak mawi tak hman a ni a. Tuna kan hriat theih chinah, Mizo Novel bu mala Press-a chhut chhuak hmasa ber leh a kawma lemziak tha tak hmang hmasa ber a ni a, a chhinchhiah tlak ve khawp mai. He Novel hi khawvel indopui 2-na leh Mizoten an mahni khua ang maia an neih Maymyo khawpuia innghat a ni a. A changtu ber ‘Liana’leh Kawl nula ‘Ma Hla Kyi’ (Mah Hlah Chi tia lam tur) inkara hmangaihna leng vel, khawvel indopui 2-na kara harsatna tam tak hnuaiah pawh rinawm taka an awm dan ngaihnawm taka phuahna a ni a. Mizo thawnthu phuahtu dangte ang bawkin a phuahtu hian a tawpah Mizo tlangval leh hnam dang nula hi a inneihtir lo. Mizo Novel-a hnam dang nula leh Mizo tlangval inngaihzawnna hmasa ber a ni nghe nghe. College-ah P.U.C. class-ah kum 1983 vel atang khan rei deuh tak zir laia hman a ni.
b) In In Chu Ka In a Ni (Your house is my home) hi kum 1963 khan Burma ram Mizote zinga chanchinbu lar ber Ram Thar-ah serial-a chhuah a nih hnuin a bua chhuah a ni a; a lehkhabu ziakte zinga te ber a ni thung. He short story hi Pathlawi leh nula inngaizawng, nula chhungte avanga harsatna tam tak tawk, a nulain thih hial pawh a thlan phah khawpa boruak rit tuar, mipain an tana a that zawk ringa Burma sipaia a luh phah hial thu leh, rinawm leh chhel taka an awm ve ve fan fan avanga innei ta,’ In in chu ka in a ni’ tia nulain a sawi theih tak chungchang phuahna a ni a. He thawnthu tawi tluk-a hmangaihna sawi thuk thei hi a tam lo hle. Kum 1987 khan Mizo Novel kan lakhawm a, bu 80 chuang kan khawm a. Chungah te chuan kan Novel ziaktute hian pathlawi leh nula emaw, nuthlawi leh tlangval emaw inngaizawng an ziak ngai lo a. A takah erawh chuan an awm nual si a, a mak angreng viau! Chu tianga mite phuah lem loh, a taka an zinga awm ve reng si hi Capt. C. Khuma hian a phuah mial a, a chhinchhiah tlak ve hle a tih theih awm e.
c) Phu Loh Zun Leng hi kum 1950 hma hreta a ziak a ni a, lal fanu leh michhe tlangval inngaihzawn thu a ni a. Zoram buai lai khan fimkhur thu-ah a paih a, a buin a chhuak ta lo, chuvangin sawi thui lo mai ila a tha ang e.
d) Chhingkhual Lungdi Novel hi a tobul leh a bua a ziak chhuah dan hi a ngaihnawm em a, kimchang deuhin sawi ila a tha awm e. C. Khuma hi kum 15 a nih, a tleirawl laiin Lunglei-ah a zina, dawr pakhata a thut laiin, a pain dawra a kalpui tleirawl pakhat hi a hmu fuh hlauh mai a. He lai thu hi a thawnthu-ah hian, “…Kei chuan Chhingkhual Lenmawii ka ti mai ang… kha nula nen kha chuan hremhmun pawh ka cho zak mai…” tiin a changtupa Chala chu a sawi chhuahtir nghe nghe.
C. Khuma hi kum 1934 khan Burma sipaiah a tang a, Maymyo-a an awm laiin a thianpa kuta mi, chu tleirawl thlalak chu a hmu fuh hlauh mai a. Chu lai tak chu a thawnthuah hian a changtupa Chala-ah belin,”… Chala chuan a keng a, thil dang pawh ngaihtuah thei ta lo chuan a’n en hluin a’n en hnai leh thin a, eng tizawng pawhin en se a lung a tiawi hliah hliah mai a… E khai, he nu hian min hip zo vek mai, engtin nge ka tih tak ang aw…” a tih chhuahtir vawng vawng mai a ni.
C. Khuma chu kum 1949 khan Reiekah chawl turin a haw a. Kum sawm lai liam taa Lungleia a hmuh tleirawl, a thlalak a buaipui em em chu a pa nen Calcutta-a an zin chu a tawng fuh hlauh mai a; hetih lai hian ani chu sipai naran mai a la ni rih. Kan sawi tak atang-a innghat khan Novel rilru khawih tak Chhingkhual Lenmawii chu a lo phuah ta a. Hei pawh hi Zoram buai lai khan fimkhur thu-ah a bua a chhuah hmain a paih leh ta.
Kum 1987 khan C. Khuma chu a fate kanin Aizawlah a zin a, May thlah chhuanlam eng emaw siamin Pangzawl khuaah a zin vang vang a. A zin chhan ka zawh chuan, a fate an awm hnaih leh hnaih loh a en te te a, zawi deuh sap hian, “Chhingkhual Lungdi ka va chibai alawm maw le,” a ti sar sar a. Lungleia an inhmuh hmasak bera tleirawl – kum 58 ral hnu, Calcutta-a an inhmuha nula – kum 48 liam hnu, a va hmuha pitar tawh chu a hnuhnung ber atan a va chibai ngat a, a tak a, a khun bawk a, a lunglen thlak turzia hi mihring tawngin a sawi fiah phak hauh lo! Amaherawhchu vawi eng emaw zat ka zawt naa ‘Chhingkhual Lungdi’ hming hi ka zawt chhuak zo hauh lo nia, cha-tuanin thup hlen a ni dawn ta.
Tichuan, “Hei i rilru tithartu i nei tha ta bawk a, rawn ziakleh ngei ngei rawh aw,” tiin ka ngen a. Rangoon a thlen leh hnu chuan a ziakleh ta ngei a, a ziak thu pawh mi rawn hrilh a. Min rawn thawn vang vang a, mahse a thih hnu ni 78-ah ka hmu chauh a. A hming ‘Chhingkhual Lenmawii’ tih chu a rawn thlak a, “Chhingkhual Lungdi’ (Calcutta Khawimawlai Thingpui Dawrah) a ti ta zawk a. Kum 1991 khan, a fapa lemziak thiam tak sulhnu a kawm lemziak mawi tak nen kan chhuah ta a ni.
Hla phuahthiam hming-thang P.S.Chawngthu chuan Aizawl Upper Khatla kawng, Khuma Travels building leh Dr J.V.Hluna building inkarah hian mikhual nula a tawk a. Chumia innghat chuan hla lar reh thei lo ‘Chhingkhual len mawi’ tih hi kum 1960 khan a phuah a.
C. Khuma thung chuan kum 1929-ah Lungleia a hmuh tleirawl Calcutta-a a tawn leh nula chu mitthla chungin kum 1952 khan Novel a phuah a. An thil tawnna hmun leh hun inang lo tak, nula pawh dang daih chu suangtuahna rilru fim tak thuhmun neiin ‘Chhingkhual Lenmawii’ tih an hmang ve ve hi a mak danglam hle a. Capt. C. Khuma hian P.S. Chawngthu aiin he hming mawi tak hi kum sawm lai a hmang hmasa zawk nghe nghe.
Chhinchhiah tlak ve tak dang chu, Maymyo Sanapui thawnthuah khan a changtupa chu ‘Liana’ a ni a. Chhingkhual Lungdi- ah chuan a changtu chu ‘Chala’ a ni thung a. A phuahtu ‘Capt. C. Khuma’ hming pum
chu ‘Challiankhuma’ a ni a. Mitvarten an hmuh thiama an chhuichhuah theih tur leh an hriatreng theih nan a hming phel zel a phum a ni mai thei. He thawnthu hi M.A. (Mizo) zirlaibuah hman mek a ni.
2. Rev. Zokima (b.1928- ) ziak ‘Pathian Samsuih’ hi Novel chhiar nuam leh tha tak, kawppui zawng lai leh la zawng zel turte tana tangkai tur leh inneihna leh nupa nun hriatna kawnga kaihruaitu Novel a ni a, 1970-a chhuah a ni. Tin, kum 1940 hma lama thingtlang Mizo khaw nun tluang leh hlim-awm te, Zawlbuk kalphung leh lo neih dan tea innghatin he Novel hi kalpui a ni a, chhiar a manhla hle. Hengte vang hi a ni ngei ang, Mizoram Board of School Education pawhin kum 2009 atang khan Class IX zir laiah an seng lut a ni.
3. Zorama, B.Ag. ziak ‘Chhaktiang Ainawn’ hi Novel danglam ve deuh tak, a anpui vang tak a ni a. Kum 1979 khan Kawl ram Mizote zinga Thawnthu inphuahsiakna hmasa ber neih a ni a. Lawmman dawngtute chu
Chapchar Kut lawmna Tahanah ni 23 March 1980 khan mipui tam tak hmaah hlan a ni a. He Novel hi chu lawmman ‘Pi Hmuaki Prize’ dawnna a ni.
He Novel-ah hian thing-tlang lo neiha eizawng thin Mizoten leilet neia ei leh bar zawnga an inthlakthleng dan te, Tahan chheh vela hnam dangten an chin ve ngai loh, Zo nunah erawh chuan bet tlat ‘Inlawm’ ho chunga hlim em ema hna hahthlak tak tak pawh nui rawi rawi chunga an thawh dan te kan hmu a. Tin, Zikpuii Pa ziak, C.C.Coy No. 27 Novel ngaihnawm takah, kum 1940 hma lama Shillong-a sikul kai Mizo naupang thenkhat zing-ah, a awm hluite a awm thar laka an inlek dan leh an lalzia te tarlan a ni a. Mandalay University-a kai Mizote chuan, kai tharte an lo lawm thin dan te he thawnthuah hian kan hmu thung, a inang lo hle. He Novel hi Mandalay University-a Mizo zirlaite nuna innghat a ni a. India ram College tha tak tak leh University-a zir Mizo nula leh tlangvalte hian an awmdan leh boruaka inghatin phuah ve sela a duhawm hle. He Chhaktiang Ainawn Novel hi chu-tianga phuah ve tura chona tha tak a tih theih awm e. He Novel-in chhiartute kawhhmuh a tum ber chu ‘Mihring takna’ a ni nghe nghe.
Novel bu dang R.L.Rina ziak Lungtiawii leh Parchuailova tih leh Lungngaihna Virthli te, C.L.Dinga ziak Hmangaihna Khawhai te leh Rairahtea ziak Par Huan Vengtu tih te pawh a la awm a. A sei lutuk loh nan luhchilh zel tawh lo mai ila a tha awm e. A tlang i lo kawm dawn tawh teh ang.
Kawl ram Zofate hi Mizo Thu leh Hla tih hmasawn leh tih changtlun kawngah an thawh hlawk ve ang reng hle. Hetiang hian lo chhui ila. Mizo Novel hmasa ber L.Biakliana hnuhma Hawilopari chu 1936-a ziak, kum 1983-ah
chauh mipui chhiar theiha chhuah a ni a. L. Biaklianan 1937-a ziak bawk Lali leh Kap-hleia sulhnu Chhingpuii, kum 1939-a ziak chu, J.Malsawma lak khawm Zo nun buah kum 1963 khan Press-a chhut a ni a.
Heng bu thum te hi College zir tura thlan a nih avanga Press-a chhut a ni nghe nghe. Tin, mipui nawlpui leh thalaiten khawi hmunah pawh an sak chi Thalaite Hla Bu, Rokunga buatsaih pawh kum 1952-ah chhuah a ni bawk. Novel dang Vanlalropuia ziak: Chawngpui A Ti Vawl Vawl, 1964-ah, H. C. Sapthankhuma phuah Senhripari chu 1967-ah Press-a chhut a ni a. Hengte hi a hmasa fal deuh te niin a hriat a.
Kawl ram Zofate sulhnu, Novel lamah Capt. C. Khuma ziak Maymyo Sanapui, 1950- ah, In In Chu Ka In A Ni, 1963-ah; R.L. Rina ziak Lungtiawii leh Parchuailova, 1961-ah, Lungngaihna Virthli te Press-ah chhuin mipui chhiar theiha chhuah a ni hlawm. Tin, Capt. L.T. Vuta, Capt. C. Khuma leh Thanghleia te buatsaih, Lengzem hla leh Hla Leng-lawng dah khawmna Mizo Tlang Zai Bu kum 1949-ah Press-ah chhut a ni bawk. Hengte kan thlir kual hian Kawl ram Zofate hi Mizo Thu leh Hlaah an thawh hlawk ve hle a tih theih a, an thangharh hma ve hle a ni.

Kannan Khuaah Saphaiin Sakhi A Dawlh Lai An That!

noreply@blogger.com (Mizo Khawvel) — Thu, 18 Oct 2012 10:48:00 +0000

By. Ko Lala

Tunlaia kan zofa te khua,Kanan-a mihring mantu ni lo; sangha mantu tena an thil man chuan khawtlang mipuite mit a ti tlaiin beng varna nasa tak a pe niin ka hria. Chuchu eng nge tih chuan Rul lian pui an man tih hi a ni. Entu an tamin nutling pathling thenkhat te chuan ha-hipin an sawi chamchi leh ngei dawnah ka ngai.

Date 16/10/2012 ( Tues-) ni hian Pu. Pahre a fapa Ramngahthanga leh an thianpa Lalramzauva te chuan khawthen awm lawk Kanmagyi lui hnara chi-rit (Battary ) nen a sangha manna nen sangha man tura an ram chhuak a. Zing lam dar 11:30 velah a ni a, an kalna kawngah chuan he rulpui hi a lo in kham ruah mai a, a lem chauha kan hmuh thin kha a takin Ramnghahthangate thiandun chuan an va hmu ta a ni.

Rulpui hi Saphai kan tih ang chi hi a ni a. An han hmuh lai hian Sakhi a lo dawlh mek a, a ke pahnih hi a ka atanga la lawr ve ve hi an hmu thei a ni awm e. An sawi danin, " Kan han hmu thut chu kan phu nasa khawp mai an ti." He rul pui hi a che chang lo khawp mai a. Thawm dim tak leh inring tak chuan an han hnaiha a luah tukin an ti hlum ta a ni.

Sakhi hi a lo dawlh hlim hlawl ni awm tak a ni a, a la rimchhia lova Sakhi-la a ni awm e. Rulpui hi a len lam zawng hi a lian lai a pum kualin Inches 18 a ni a. A sei zawng hi Feet 13 leh a chanve a ni.

PS: A chunga thlalak khi GOOGLE hmanga hai chhuah kan han tar lang mai mai a nia.

CFL Hmingthanga Kan Chan Ta!

noreply@blogger.com (Mizo Khawvel) — Sun, 23 Sep 2012 11:46:00 +0000

CF Laihmingthanga hi TB natnain September ni 9,2012 Inrinni zan dar 10:25 pm khan Khawbung PHC-ah a boral a,a ruang hi nimin zing dar 1:00 khân an mahni khaw lam Samthang panpui a ni a, nimin khan vui nghal a ni.

CFL-a hi kum 45 niin Khamliana(L) leh Tâwksungi(L) te fapa a ni. Rokhawlhna avangin lehkha hi Pawl 6 thleng chauh a zir a. A thlen phâk tâwkah chuan mi vêngva ve tak a ni. Kum 1983 ah mipui hriatah a zai tan a, 1991-ah a album hmasa ber a siam a. 1992 ah AIR ah Grade B artist ah a tling ta a, Radio ah hian hla 30 vel a record a, Grade B High ah a kaisang leh a ni.

Mizo lungkuai zawng taka zai thiam leh hla phuah thiam tak a ni . Hla hi 100 chuang zet a phuah a. Music Video leh Audio Album 13 zet a siam bawk a. 'Zaithiam' tia hriat lâr thin a ni a. Hla phuah thiam tak niin hla thu hman leh a thu mil-a hla thlùk siam thiam tak a ni bawk. Music lamah hian a tuiin Tuipuiral huap zai intihsiakah te lawmman a lak fo tawh bâkah Tuipuiral Beat Contest an neih ṭhin lai pawhin 'Zoawi Virthlileng Musical Club' indinin Lead Guitarist a lo ni bawk thin a, lawmman engemawzat alo lakpui tawh.

Kum 1992 a LPS Cable TV in 'Top Ten Count Down' a buatsaihah a hla lar 'Intawng leh ngei ang aw' tih chu a zawnin vawi thum no.1 nihna a hauh nghe nghe a ni.

Zai lama a hlawhtlin chhoh hnu hian hlawhtlinna a hmuh zât zet khawvel thilin a bawhbuai ve ṭhin a, Hun engemaw ti aṭang khan Chuap TB natna in a tlakbuak a, Khawbung PHC panpui a ni a, TB natna mai bâkah pum nâ te'n a tlâkbuak zui ta zel a. September 7 (Zirtawpni) khan Khawbung PHC panpui lehin damdawi inah hian admit a ni a, a ṭhat chhuah leh mai inbeiseiin a nâ pawh chuan zual lam lutuk a pan lêm lova. Pathianni Sept 9 tlai lam khan a nâ hi rawn zualin damdawi lam thawktu te'n theih tâwp chhuahin an enkawl a, zan Dar 10:25 pm khan a boral ta a ni.

A thih thu hriat a nih vêlah hian amah lainattu ṭhenrual ṭha leh khawtlâng, YMA nula tlangvâl te chu Khawbung Damdawiin lam panin an tlân khawm a, Khawbung Branch YMA te'n kuang siamin Samthâng lam panpui turin an in buatsaih ta a ni. Zinglam 1:00pm velah an khua Samthâng hi panpuiin 'Tuipuirâl Lelte' tia koh ṭhin chu ropui takin an khua Samthâng chuan an lo hmuak a ni.

A hla sakte hi ama phuah deuh vek a ni a, ccassette vol.I atanga vol. X thleg a siam tawh ah hian ama phuah deuh vek a sak avangin hla za dawn lai a phuah tawh niin a
lang.

A cassette siam tawhte chu:

1. Ngaihlai Masang
2. Roosena Hmeltha
3. Chhanlet loh Hmangaihna
4. Kur Diam Diam
5. Min Hriatchhuahtir
6. Lam Dun Ang Aw
7.Tu Nge Hmelthaber
8. Hlim La Nui Rawh
9. Hla Inchhang Special
10.Lemchanna Khawvel

Heng a cassette siamte hi 1993-2003 inkara tih chhuah vek an ni.

CFL-a hla then khat han tar lang ila:

1. Bawihte Nang Nen
2. Chhan Let Loh Hmangaihna
3.Chhuahtlang Hmun Hlui
4.Duhaisam a Kim
5. Dawn Tisei
6. Hmangaihna Rose Par
7. Hmangaihin Hmangaihna
8. Hmangaihnaa Phuar
9.Hmangaih CFL
10. I Mawi Chuang E
11.In Tawng Leh Ngei Ang Aw
12. I Tan Ka Lo Kir Leh
13. I Tlai Lua
14.Ka Star No.1
15.Ka Di Tawn Hun Tur
16. Ka Lung A Leng Mang E
17.Kan Duhaisam
18. Ka Nau Vala
19.Ka Thian Ngaihawm
20. Ka Thianghlim Tawh Lo
21.Khuavang Kallai
22. Khuavang Chhinchhiah
23.Kan Hlim Lai Ni
24. Ka Hmangaih Ber I Ni
25.Lanu Lungmawl
26. L.D. Hmeltha
27.Min Kalsan Suh
28. Min Thlah Liam Ang Che
29.Mitthla Alang Hlimthla
30.Muttui Mangtha
31. Min Hriatchhuahtir
32.Nang Chauh Ka Hmangaih Che
33. Ngaihlai Masang
34.Phu Loh D Chhai Zawng A Ho Mai Mai
35.Phu Loh Dawn Thar
36.Rau Thla Di
37.Thang Nui Hiauvi
38.Tawn Ni I Awm Si Lo
39. Then Che Ka Hlau Ber Mai
40.Then Lohna Ram
41.Tah Loh Mittui Tlak
42.Valtin Lawri
43. Zo Nunmawi
44.Zawlaidi
45. Zo Khaw Tleitir
46.Kur Diam Diam....etc..etc

Sources: Leihringnun & Tuivar

noreply@blogger.com (Mizo Khawvel) — Sat, 15 Sep 2012 04:10:00 +0000

foxyform.com

Apple Iphone 5 Tlangzarh A Ni Ta!

noreply@blogger.com (Mizo Khawvel) — Thu, 13 Sep 2012 12:15:00 +0000

September 12, 2012 khan Apple company chuan Iphone 5 chu San Francisco, CA ah an tlangzarh fel ta hlawl mai.

Iphone 5 hi Iphone 4 leh 4S te nen a lan danah chuan danglamna teh chiam awm hran lo mahse Iphone hmasa ho ai chuan a sei hrat a, a hlai zawk bawk. Iphone 5 hmangtu ten sam khai zawka email leh message an inthawn a, web lam pawh an khawih zung zung theih nan tiin a hmai hi ti lian an nih thu Apple company chuan an sawi.

Australia ah chuan Iphone 5, 16 GB chu $ 799 in zawrh a ni ang a, 64 GB chu $ 999 a zawrh a ni ang.

Iphone hmasa aia a that zawkna pakhat chu Iphone 5 chuan processor thar chak zawk, Apple A6 processor a hmang a, tin, Internet network chak zawk 4 G LTE connection a hmang bawk.

Apple marketing team te chuan September thla chung ngawt pawh hian maktaduai 6 - 10 man hial hralh chhuah an inring a. Eng tak ang maw? Khawvel thiamna hma a sawn zel angin thil thar tha tha pawh a rawn piang chhuak zel zawng a nih hi.

Mizoram Chhungah Cell Phone Maktaduai Thum Chuang Awm!

noreply@blogger.com (Mizo Khawvel) — Fri, 07 Sep 2012 14:16:00 +0000

Mobiles, Mobiles, Mobiles

Kum 2011 thleng khan Mizoram chhungah chhungkaw tin ten Mobile phone an neih zat chawhrualin maktaduai 3.1 lai a tling niin tun hnai mai khan mobile research siamtu pawl, Statistical Abstract of Mizoram chuan an puang a.

2009 khan Mizoram chhunga mobile phone awm zat chawhrual chu 5,08,439 chauh a nih laiin, 2010 khan mobile 6,21, 417 a tling a. 2010 - 2011 kum khat chhungah ngawt pawh khan Mizoram chhungah mobile phone 6, 86, 697 lai a pun belh hman niin report h chuan tarlan a ni bawk.

Source: The Indian Time

Australia Sawrkarin Rakhine State Buaina Tanpuina Sum Maktaduai Khat ( $ 1 million )Pe Dawn!

noreply@blogger.com (Mizo Khawvel) — Sat, 01 Sep 2012 22:59:00 +0000

Australia Foreign Secretary Bob Carr

Australia chuan Rakhine sate, Myanmar-a buaina chinfel nan leh an mamawh zualpui phuhhruk nan US $ maktaduai khat dairect-in a pe dawn a; he tanpuina sum hi Rakhhine state buaina tuarte mipui 14,000 te puala pek chhuah a nih tur thu Australian Foreign Secretary Mr Bob Carr chuan a puang a.

Rakhine state buaina vang hian mi 89 laiin nunna an chhan phah tawh a, mi 119 in hliam tuarin mipui 14,000 chuang chuan an in leh lo an tlansan a; bukte khuarin an khawsa mek niin official chuan an report a. Chumai bakah in 4822, Muslim biakin 17 leh Buddist temple 15 lai hal ral a ni tawh bawk.
Rakhine state ah hian Burma sipai ten theihtawp chhuahin venhimna lam hma la mahse Muslim leh Buddist-ho inthahna chuan tawp zai a rel mai thei rih lo a ni.

He tanpuina sum hi Australia sawrkar chuan Care Australia te kutah a hhlan chhawng hmasa ang a, Care Australia chuan Rakhine State ah pu lutin hnam leh chibing, eng sakhua mah thliar hrang lovin mi harsa zualte hnenah he tanpuina sum hi an sem chhuak dawn a ni.

Care Australia hi Australia-a humanitarian pawl lian tak niin khawvel ram hrang hranga mi harsa zualte tanpuinan fund an zawng thin a, tanpui ngaite awmna hmunah anmahni ngeiin luh chhilhin an tanpui thin a. Burma ram Cyclone thlipuiin a nuai lai pawh khan hma an la nasa, tuntum Rakhain buaina thuhlaah pawh hian theih tawp an chhuah mek a ni.

Australia Foreign Secretary Bob Carr chuan International ram hrang hrang hnenah Rakhain buaina chinfelpui nana hma lakpui turin a tlangau bawk a ni.