ක්සැන්ඩරයාගේ කොලම

හිට්ලර් ගේ බ්‍රිතාන්‍යය.

noreply@blogger.com (ක්සැන්ඩරයා) — Tue, 27 Sep 2016 12:54:00 +0000

" පසුගිය සතියේ 5 වැනි දින එංගලන්තයේ දී පැවැත්වීමට යෙදුනු මහා යුධ ජයග්‍රහණ පෙළපාලිය සමගින් බ්‍රිතාන්‍යය මහා ජර්මානු අධිරාජ්‍යයට යටත්වීමට කටයුතු යෙදුනු අතර ඊට සමගාමීව යටත්විජිත භාර ලේකම් තුමා මගින් යටත් විජිත සඳහා අවි බිම තබා ජර්මානු රයික් ආණ්ඩුවට යටත් වීමට ලිපි රේඩියෝ පණිවිඩ මගින් එවා ඇත.

ලංකාණ්ඩුවේ යටත්වීමත් සමගින් අප ජර්මානු රයික් අධිරාජ්‍යයේ කොටසක් බවට පත්වූ බව දැනුම් දීමට සතුටු අතර මේ සමගින් අපේ නව පාලනය ඇල්බර්ට් බර්ග්මාන් මහතා භාර ගනු ඇත.."

මේ 2014 දී මම ඔබට හිට්ලර් ගේ බ්‍රිතාන්‍යය ගැන කියන්නට පටන්ගත් මොහොතේ ගෙන ආ ඇරඹුම් වැකි පෙළයි. එදා කිසිදා නොලියු ලියවිලි අතරට එක්වූ ඒ ලියවිල්ල පුරා වසර දෙකකට පසුව සංස්කරණ කීපයක් සමගින් ලඟදි ම ඔබ වෙත තිලිණ කරන්නටයි මේ සුදානම.

එහෙනම් රැඳී ඉන්න, හිට්ලර් ගේ බ්‍රිතාන්‍යය ගෙන එනතුරු.

කොළඹ වාහන තදබදය සහ විසඳුම්

noreply@blogger.com (ක්සැන්ඩරයා) — Sat, 24 Sep 2016 01:17:00 +0000

පාඨක ජනතාවට පළමුව මාගේ ස්තුතිය. බ්ලොගේ ලියපු කාලෙට වඩා නොලියපු කාලේ කියවපු ප්‍රමාණය වැඩියි. ලංකාවේ සිංහල කියවීම් වැඩිවෙලාදෝ මට හිතෙනවා. කොහොම වුනත් ස්තුතියි සහ සතුටුයි.

කොළඹ, යන්න ගියත් ට්‍රැෆික් තියන ගියාම ඊට වඩා ට්‍රැෆික් තියන ලංකාවේ තියන අංක එකේ නගරය තමා කොළඹ. කොළඹ ට්‍රැෆික් ඇයි? මෙන්න මේ ප්‍රශ්නයට පිළිතුර ඇතුලේ තදබදයට පිළිතුරකුත් තියනවා.

පොඩ්ඩක් හිතන්න කොළඹ නගරයට රැකිරක්ෂා සඳහා දිනකට විශාල ප්‍රමාණයක් මිනිසුන් පැමිණිය යුතු ය. පාසල් සිසුන්, සහ වෙනත් විවිධ අධ්‍යාපනයන් ලබන සිසුන් පැමිණිය යුතු ය. කාර්යාල කටයුතු බොහොමයක් ඉටු කරගැනුම සඳහා මිනිසුන් විශාල සංඛ්‍යා කොළඹ පැමිණිය යුතු ය. වරායන් සහ ගුවන්තොටුපල කටයුතු කොළඹට ආසන්න වීම නිසා බොහොමයක් භාණ්ඩ ප්‍රවාහන වාහන ද කොළඹ අවට විශාල ලෙස පොදී කෑමත් , බොහොමයක් ප්‍රධාන කාර්යාල, (ප්‍රධාන නගරයේ පිහිටීම අනවශ්‍ය ආයතන පවා) කොළඹ පිහිටීම නිසා දෛනිකව නගරයට පැමිණීම ගන්නේ ඉතාම විශාල අගයක්. ඒ එක්කම මේ පිරිස නගරයෙන් පිටවන්නේත් විවිධ වේලාවන් වල. ඒ අතරේ පාසල් සහ කාර්යාල වේලාවන් කියන්නේ තදබදය වැඩිම වේලාවන්. එයට මුලිකවම හේතුන් ලෙස පාසල් වේලාවන් තුල පාසල් අසල පොදී කන සෙනග මෙන්ම පාසල් වෑන්, බස්රථ වැනි වාහන වල පැමිණීම, මාර්ග අවහිර වන සේ නවතා සිටීම, සෙනග පැටවීම බෑම වැනි ක්‍රියාකාරම් පෙන්වා දිය හැක. මෙයට සමාන ක්‍රියාවලියක් කාර්යාල වෙලාවේදී සිදුවන අතර එහිදී තවත් යමක් සිද්ධ වේ. එනම් පෞද්ගලික වාහන මගින් නිවෙස් වෙත / කාර්යාල වෙත යන ජන කොට්ඨාශයක් මාර්ගයට අවතීර්ණ වීමත් එමගින් මාර්ගයේ ඉඩ අනවශ්‍ය ලෙස නාස්තිවීමත් ය. වෙසෙසින්ම ජීප් රථ මෝටර් කාර් රථ වැනි වාහන මාර්ගයේ තමන්ගේ රථයේ මුළු පැටවුම් ප්‍රමාණයවත් නැතිව ධාවනය වීම තුලින් අනවශ්‍ය ලෙස සහ ඉතාම කෑදර ලෙස මාර්ග ධාරිතාවය භාවිතාකිරීම මෙම කාලය තුල සිද්ධ වේ.

මිනිසුන් 60ක ප්‍රවාහනය සඳහා මාර්ග ඉඩ වැයවීම

ඉඳින් මෙයට විකල්ප නැතිද?

බහුලවම කතාබහට ලක්වන විකල්පය නම් නගරය තුල බස් ධාවනය කිරීමේ සංකල්පයයි. ප්‍රායෝගිකව මෙය ඉතාම හොඳ විසඳුමක් ලෙස දක්වාලිය හැකි අතර එහි දුර්වලතා ද පෙන්වා දිය හැක. මේ ක්‍රමය යටතේ නගරයට පිවිසෙන ද්වාර අසල ඇති විශාල මෝටර් රථ නැවතුම් මගින් නගරයට පැමිණෙන සියලුම / හෝ ආසන සංඛ්‍යාවක් නොපිරුණු, බස් නොවන රථවාහන උරාගෙන (නවත්වා) ඒ වාහන වල සිටින සෙනග පොදු බස් සේවා මගින් නගරයේ ස්ථාන වෙත ප්‍රවාහනය කිරීමත් නැවත රථගාල් වෙත රැගෙන ඒමත් සිද්ධ කරයි. මෙහි වන සාධනීය ලක්ෂණය නම් නගරය තුල අනවශ්‍ය ලෙස වාහන ගමන්කිරීමක් සිද්ධ නොවීම නිසා මාර්ගයේ ඉඩ සාධනීය මට්ටමකින් ඉතිරිවීමයි. මේ ගැන වටහා ගන්න ඉහල උදාහරණය බලන්න, මිනිසුන් හැටක් වෙනුවෙන් වන ප්‍රවාහන ධාරිතාව බස් රථයක් සමගින් කොතරම් කුඩා ද?

තවත් විකල්පයක් වන්නේ බයිසිකල් ධාවනය සඳහා ඉඩ හසර වෙන්කිරීමත් බයිසිකල් ප්‍රවාහනය නගරයේ දිරිමත් කිරීමත් ය. මේ ඔස්සේ ලබා ගැනීමට බලාපොරොත්තු වන්නේ ප්‍රවාහන ඉඩ පමණක් නොව හරිත නගර සංකල්පය ක්‍රියාවට නැංවීම ද වාතය යම් පමණකට හෝ පිරිසිඳු ලෙස තැබීම ද මෙම සංකල්පයේ අරමුණු වේ. යුරෝපයේ බොහොමයක් රටවල් මේ ක්‍රමය ක්‍රියාවට නංවමින් සිටීම වර්තමානයේ දකින්නට හැකිය.

බයිසිකල් ධාවන ඉඩ පෙන්වන අවස්තාවක්.

තව දුරටත් සලකා බැලීමේ දී පොදු ප්‍රවාහන ක්‍රම වන දුම්රිය සේවා දියුණු කිරීම, උමං දුම්රිය ඇති කිරීම, කාර්යාලිය අනුග්‍රාහක ප්‍රවාහන සේවා (office sponsored transports) ලෙස බස් රථ ප්‍රවාහනය සැපයීම දක්වාලිය හැක.

ශ්‍රී ලංකාවේ තත්වය.

ශ්‍රී ලංකාවේ තදබදය පිරි ඉතිරී ගිය නගර ලෙස කොළඹ නගරය ද එතරම් නොවුව ද තදබදය පවතින නගර ලෙස අවශේෂ ගාල්ල මහනුවර වැනි නගර ද පෙන්වා දිය හැකි වේ. මෙයිනුත් කොළඹ නගරය වාණිජ කේන්ද්‍රස්ථානය ලෙස ප්‍රධාන තැනක් ගනියි. කොළඹ නගරය තුල ඇති අනවශ්‍ය ආයතන නගරයෙන් පිට වෙනත් ස්ථාන වල ස්ථාපිත කිරීම මෙම ගැටලුව දිර්ඝකාලින ලෙස සුව කල හැකි එකක් බවට පත් කරගත හැකිය. මෙම කුලකයට බැංකු ප්‍රධාන කාර්යාල, නුතන ආයතන (call centers, outsourcing offices) වැනි දෑ මෙන්ම රජයේ දෙපාර්තමේන්තු, අමාත්‍යංශ ද අයත් වේ. මේවා එක්කෝ නිට්ටඹුව - පස්යාල ප්‍රදේශයේ ස්ථාපිත කල යුතු ය, නොඑසේ නම් මහනුවර පොල්ගොල්ල හෝ ගන්නොරුව ප්‍රදේශයේ හෝ ස්ථාපිත කල යුතු ය. ඒවා වෙත දුම්රිය සහ බස් මාර්ග යන දෙකොටසම පැවතීම මගින් පොදු ප්‍රවාහන සේවා වලින් එම ස්ථාන වෙත පිවිසීම දිරිමත් කල යුතු ය. පැමිණෙන ජනයාට අවශ්‍ය සියලු දෑ එම ස්ථානයේ ම පවත්වාගෙන යාම මගින් ජනතාව නැවත ප්‍රධාන නගරය සමග එක්වීම වැළැක්වීමත් මෙහි සැලසුමේ ම පැවතිය යුතු ය.

අද දින වන විට ලංකාවේ යටිතල පහසුකම් ඉතාම හොඳින් පැවතෙන නිසා මෙය සිදුකිරීම ද අපහසු නොවනු ඇත. එසේම මෙවැන්නක් ස්ථාපනය කිරීම මගින් රජයට ද වාසි අත්වනු ඇත්තේ කෙටිකාලීනව නොවනු ඇත. පෞද්ගලික අංශයට තමන්ගේ ආයතන මෙවන්වූ ප්‍රදේශවල පිහිටුවීමට බලපෑම් කිරීම රජයක් ලෙස සිද්ධ කිරීම මගින් අනවශ්‍ය තදබදය මගහැරවීම මෙන්ම සියළු ප්‍රදේශ සංවර්ධනය කිරීම ද සිද්ධ කල හැකිවනු ඇත.ජනඝනත්වය අනවශ්‍ය ලෙස නැති නිසා ව්‍යවසන තත්වයන්ගේ දී ද, සංවර්ධන කටයුතු වල දී ද මෙන්ම රෝග පාලන සහ පහසුකම් සැලසීම ආදී සියලු අවස්ථා වල දී පහසුවක් වනු ඇත.

ඔබේ අදහස් මොනවාද? අපි සංවාදයක් ගොඩ නගමු.

තාර බර ඇරලා කෙට්ටු වෙන්න ඕනෙද? මෙන්න ක්‍රමේ..

noreply@blogger.com (ක්සැන්ඩරයා) — Tue, 30 Aug 2016 04:54:00 +0000

මේ ලඟදි අපේ විචාරකතුමා ගේ බ්ලොගර් එකේ මගේ තුන් මාසේ බර අඩුවීම ගැන කියල සටහනක් දැම්මම බ්ලොග් ලියන ගස් ලබ්බා සහ ඩුඩ් මගෙන් ඉල්ලීමක් කළා ඒ ගැන කියන්න කියල. සටහන පොඩි නැති නිසා පෝස්ට් එකක් ම දැම්ම. ඉතින් මෙහෙමයි වැඩේ වෙන්න ඕනේ ..

( අඃ.. ලංකාවේ ඉද්දි නම් මේ කියන විදියට කන්න අමාරු වේවි. මොකද මෙහෙ ඉතිං හැම එකම හරි අඩුයි නේ. මම මේ ක්‍රමය කලේ මැදපෙරදිග දී.ඒ නිසා මට මේ පෝස්ට් එක කියවලා මේ කොටස නොකියවා ඉන්න අයට නෝ ඩිස්ක්ලේමර් ඈ..)

සම්පුර්ණ මාස තුනක් ඇතුලේ,

තෙල් සහිත ඕනෑම කෑමක් නතර කරන්න. පිටි සහිත කෑම සහ බත්. නතර කරන්න. විශේෂයෙන් රාත්‍රී ආහාරය සඳහා බත් අනුභව කරන්නේ නම් නවත්වන්න. පැණිබීම ජාති නම් කටේ තියන්න හිතන්නත් එපා. අරක්කු? එපා.

මේ ටික පුරා තුන් මාසයක් හෙවත් දින සියයක් (අනුවක් වගේ තමා, ඒත් තව දින දහයක් දාගන්න වෙනවා ) කරන්න බැරි නම්, මේ පෝස්ට් එක ඔබට නොවේ. මෙතැනින් එහාට යාමට දැඩි අධිෂ්ඨානයක් අවශ්‍ය වේ.

ඔබ මේ ටිකත් කියවන්නේ නම් ඉතිරි කොටස වෙත සාදරයෙන් පිලිගන්නවා.

තරබාරු වෙන්නේ ඇයි?

ශරීරයේ අවශ්‍යතාවට වඩා වැඩිපුර කැලරි පරිබෝජනය කිරීම තමා ප්‍රධාන හේතුව. අතිරික්ත කැලරි මේදය විදියට ශරීරය සකසා අපේ ඉන වටා, උදරය වටා අතුරා ටිකෙන් ටික අපේ ශරීරය පුරාම අතුරනවා. සීණි, පිටි වගේම තෙල් යන සියල්ල ගෙනියන්නේ කැලරි සංචිත. ඉතින් මේවා කෑමට ගන්න ප්‍රමාණ වැඩි වුණාම නොදැනීම තරබාරු වෙනවා.

හරි. මුලින්ම කියන්නේ කන්න ඕනේ දේවල්. වේල් වල පිළිවලින්.

උදේ කෑම.

මේ වෙලාවට ඔබට කන්න පුළුවන් කෝන් ෆ්ලෙක්ස් එකක්, කිරි ටිකක් එක්ක යම්තම් සීනි දාල ඔබට කන්න පුළුවන්. එහෙමත් නැතිනම් එළවලු. පලතුරු දාල හදන සැලඩ් එකක් නම් තවත් හොඳයි. මතක ඇතුව සැලඩ් එකට ගාලික් පේස්ට් යහමින් රස පමණින් එකතු කරන්න. ලුණු එහෙම දාන්න එපා. ඕට්ස් වගේ කන්නත් පුළුවන්

උදේ කන්නේ කොන්ෆ්ලෙක්ස් හරි ඕට්ස් වගේ නම් ග්‍රෑම් 200ක් (කිරි සමග මුළු බර) වෙන්න කන්න හැකියාව තියෙනවා. සැලඩ් නම් ඉතින් ග්‍රෑම් 250 - 300 ක් කෑවා කියල අවුලක් නෑ. තව ඔබේ රුචිකත්වය මත ඇපල් ගෙඩියක් විතරක් වගේ කන්නත් පුළුවන්. ඔව්, උදේ තේ එක නම් නෑ.

ඊට අමතරව කිසිවක් කන්න කියා මා ඔබට කියන්නේ නෑ. බීම වෙනුවට වතුර පානය කරන්න. බිමක් අවශ්‍යම නම් කැලරි 60කට වඩා අඩුවෙන් ඇති බිමක් තෝරා පානය කරන්න. (ලේසියෙන් හම්බවෙයි කියල නං හිතන්න එපා ඔන්න.)

මේ කික් ස්ටාටර් එක.

දවල් කෑම.

ඔන්න දැන් වැඩ කරලා බඩගිනි වෙන වෙලාව. ස්ටීම් කරපු චිකන් බ්‍රෙස්ට් ග්රෑම් 300ක් වගේ එකක් එක්ක අර උදේ හදපු සැලඩ් එක නම් මරු.

සැලඩ් එක හදන විදිය කියන්න වෙනවා. තක්කාලි අත්‍යාවශ්‍යයි, ගෙඩියක් හැමදාම කෑවත් පාඩු නෑ. ගාලික් පේස්ට් එක අවශ්‍යයි. එළවලු විදියට නම් කොළ වර්ගයක්, බේබි කෝන්, කැරට්, බ්‍රොකොලි එහෙම හොඳයි. වට්ටක්කා, රතු අල එහෙම නම් ගන්න එපා. පිටි ගතිය වැඩියි. අර්තාපල් පොඩ්ඩක් අවුලක් නෑ නමුත් හැමදාම නම් හරියන්නේ නැතිවෙයි. පොඩි වෙනසක් වෙන්න පාට පාට බෙල් පෙපර් ටිකක් දාගන්න. ඔලිව් (කැලරි අඩු වෝට බේස්ඩ් ඔලිව්) ෆෙටා චීස් ටිකක් එහෙමත් මේකට අවශ්‍යයි. උදේ කෑමට හදනවා නම් ටුනා (වයිට් ෆින් - වෝටර් බේස්ඩ්) ටිකක් දාගන්න. බේබි කෝන්, කැරට් සහ බ්රෝකොලි ස්ටීම් කරගන්න.

රාත්‍රී කෑම.

මේකට මම ගොඩක් වෙලාවට කන්නේ කොන්ෆ්ලෙකස් ග්‍රෑම් 200ක් වගේ.

මෙතුවක් දුර කියවූ ඔබට ස්තුතියි. මම පෝෂණවේදියෙක් නම් නෙවෙයි එත් මේ වැඩේ කලේ ගොඩක් කාලයක් මට වද දුන් මගේ තරබාරුව නැති කරන්න ගොඩක් දුර කියවලා ගත්තු දැනුම එකතු කරගෙන. කිලෝ 98ක් ව හිටි මම කිලෝ 80ක් දක්වා බර අඩු කරගත්තේ මේ කෑම වේල් වලින් විතරක් කිව්වොත් ඔබ විශ්වාස කරනවාද ?

මේ කෑම වේල් සියල්ලේම කැලරි එකතුව කැලරි 2500ක් කිට්ටු කරන්නේ නෑ. ඒ නිසා ශරීරය තමන්ට ශක්තිය සැපයීමට මදි වන කැලරි ප්‍රමාණය සපයා ගන්නේ ශරීරයේ ඇති සංචිත වලින්. මුලින්ම ඔබේ මුහුණ කෙට්ටුවී යනු ඇති. ක්‍රමානුකුලව මාස තුන ඇතුලත ඔබට හිතාගැනීමට අපහසු ලෙස ඔබව කෙට්ටු වේවි.

මුලිකවම පළමු සති දෙක ඔබට යම්තම් බඩගින්නක් දැනේවි. සමහර විටක එය දින කීපයක් වෙන්න පුළුවන්. ඔබට අනිකුත් සාමාන්‍ය කෑම ඉතා සුවඳින් දැනේවි. ඒවා මදකට යටපත් කරගන්න. මාස තුනකින් ඔබ කෙට්ටු වූ පසු ඔබට ඒ කෑම කෑමට හැකිවේවි. එහෙත් ඒ කෑම කන විට ඔබට මහා ගොඩක් කෑමේ අවශ්‍යතාව මතු නොවේවි. ඒ එක්කම ඔබට අපුරු සැහැල්ලුවක් එක්ක මනා සෞඛ්‍ය සම්පන්න බවක් දැනේවි.

ඔන්න ඉන්ස්පයරේෂන් එකක් විදියට මං තුමා ගේ ෆොටෝ තුනක්. පළමු එක 2014 ජුනි මාසේ වගේ ඊට පස්සේ එක ඒ අවුරුද්දෙම සැප්තැම්බර් වල. තුන්වෙනි එක 2015 ජනවාරි මාසේ දී. මාස හතරකින් පොඩ්ඩක් ව්‍යායාම එහෙම කරල අවශ්‍ය පමණට ඉන්නකොට ගත්ත එකක් ඒ.

රැකියා නොමැති ඉන්දීය තොරතුරු තාක්ෂණ වෙළඳපල.

noreply@blogger.com (ක්සැන්ඩරයා) — Wed, 24 Aug 2016 10:52:00 +0000

රස්සාවක් සොයා.. බොහෝවිටම මේ පුද්ගලයින් දෙතුන්දෙනෙකු සඳහා වන හිඟයක් විය හැක.

ඉන්දියානු තොරතුරු තාක්ෂණ වෙළඳපල තුල මෘදුකාංග ඉන්ජිනේරුවෙකුට නම් රැකියාවක් සෙවීම අතිශය අපහසු සහ දුෂ්කර කාර්යයක් ලෙස මා සඳහන් කලොත් ඔබ ඇතැම්විට මවිත වනු ඇත. එය එසේ ය. ඉන්දියානු විශ්ව විද්‍යාල සහ තාක්ෂණ විද්‍යාල පද්ධතිය මගින් වසරකට බිහි කරන උපාධිධාරීන් ගණන මිලියන 1.5ක් වන අතර ඔවුන්ගේ බහුතරය තාක්ෂණ උපාධිධාරීන් වේ. ඒ අතුරෙන් රැකියා සඳහා වසරකට සුදුසුකම් ලබනුයේ මිලියන භාගයකටත් වඩා අඩු ප්‍රමාණයක් බව ඉන්දියානු සංඛ්‍යාලේඛන පෙන්වා දේ.වසර 2015 වන විට වූ 3345ක් පමණ ඉන්දියානු තාක්ෂණ ආයතන (විශ්ව විද්‍යාල සහ අනුබද්ධ තාක්ෂණ විදුහල්) වලින් බහුතරයක් වූ ආයතන 700 කට එහා පිහිටා තිබුනේ අන්ද්‍රා ප්‍රදේශය තුලය.

ඉන්දියානු බහුතරය අද දින රැකියා වෙළඳපල තුල අතරමං වී සිටින අතර ඔවුන්ට තිබු පහසුම පිහිට වුයේ ඉන්දීය බහුතරයක් වෙසෙන මැදපෙරදිග කලාපයයි. බහුතර ඉන්දියානුවන් පෙර දී ඇමරිකානු සිහිනයේ ජිවත් වූ නමුදු ඇමරිකාවේ 2008 ආර්ථික අවපාතයත් සමගින් එම සිලිකන් වැලි සිහිනය බොඳවී යාම ඇරඹිණි. මැදපෙරදිග ද විසා කෝටා අහිමිවීමත් (රටක් විසින් වෙනත් රටක පුරවැසියන් හට පැමිණ නවාතැන් ගැනීමට දී ඇති ප්‍රමාණය) සමග ඔවුන්ගේ බහුතරයට දැන් රැකියා විරහිතව සිටීමට හෝ ඉතා සුළු වැටුප් සඳහා රැකියා කිරීමට සිදුව ඇත.

මේ ගැටළුව තවත් ඔඩු දුවන්නේ ඉන්දීය තොරතුරු තාක්ෂණ ශිල්පින් රජයට විශාල බරක් වීමත් ඔවුන් ගේ ප්‍රතිශතය එන්න එන්නම වැඩි වීමත් නිසා මධ්‍යම ආණ්ඩු වෙත එල්ල වන පීඩනය වැඩිවීමත් නිසාවෙනි. රැකියා උත්පාදනය කිරීම සඳහා ඉන්දියාව සිදු කල විශාලතම කාර්ය භාරය වූ කෝල් සෙන්ටර් (විදේශ ව්‍යාපාර වල දුරකථන ඇමතුම් පිළිතුරු දීමේ සිට පාරිභෝගික සේවා ඇමතුම් කටයුතු දක්වා සිදු කිරීම). තම රට තුලට විශාල ලෙස ගෙන්වා ගැනීමේ සිට විශාල ලෝ ප්‍රකට සමාගම් සඳහා ඉතා ඉහල පහසුකම් සහිතව භුමිය බදු දීම (මයික්‍රොසොෆ්ට්, ඩෙල් වැනි ආයතන) දැක්විය හැකි වුවද පවත්නා තත්වය සමනය කිරීමට එය ප්‍රමාණවත් නොවීම ඉතාම ඛේදනීය තත්වයක් සේ පෙනේ.

ඉන්දියානු කෝල් සෙන්ටර් ව්‍යාපාර.

මෙම තත්වය තුල ලංකාව ඉන්දියාවේ ඉතාම ආසන්න පහසුතම ගොදුර බවට පත්වන්නේ අපේ රටේ සීග්‍ර තොරතුරු තාක්ෂණ වර්ධනය සමගින් ඉහල වටුප්තල වෙත අතවනනා රැකියා විවර වීම සහ ඉතාම උගත්, එමෙන්ම බුද්ධිමත් තොරතුරු තාක්ෂණ ශිල්පින් අප රටේ බිහිවීම තුලින් බොහෝ ලෝක ව්‍යාප්ත ආයතන ලංකාවේ තම ආයතන ස්ථාපිත කරමින් ඉන්දීය රැකියා වෙළඳපල අකුලාගෙන අප රටට පැමිණීම මත වන තත්වයේ ප්‍රතිපල ලෙසය. එවන් වූ තත්වයක් මත ඉන්දීය රජය රාජ්‍ය මැදිහත්වීමක් සිද්ධ කරමින් එක්ටා වැනි ගිවිසුම් හරහා මේ පිඹුරුපත් සකසන්නේ ඔවුන්ගේ ශ්‍රමිකයන් හට ගිලිහෙන වෙළඳපල බලහත්කාරයෙන් හෝ රඳවා තබා ගැනීමට ය.

ඉහත ඔබට විස්තර කල ලෙස මේ ගිවිසුම් සාර්ථක වුව හොත් මිලියන ගණනක විරකියාවකින් පෙලෙන ඉන්දීය තොරතුරු තාක්ෂණ ශිල්පින් නුදුරේම ලංකාවේ දී ඉතා අඩු මුදලට ඔවුන්ගේ සේවා සැපයීම වෙනුවෙන් පැමිණෙනු ඇත. ව්‍යාපාරික දෘෂ්ඨි කෝණයෙන් බලන විට එය මහත් වූ ලාභ සඳහා අත වනන කාරණයක් නිසා බොහෝ ආයතන ඔවුන්ගේ සේවා සපයා ගනු ඇත. එමෙන් ම ලාංකීය විදේශ විනිමය ඉතාම මහත් සේ විදේශයකට ඇදී යාම වේගයෙන් සිද්ධ වනු ඇත.

පේනවා නේ තත්වේ? සෝචනීයයි..

එමෙන්ම ලාංකීය තොරතුරැ තාක්ෂණ ශිල්පින් හට මේ ගැටලුවේ දී නිසි පිළියම් නොලැබී යාම නිසා ශ්‍රම අතිරික්තයක් කෘතිමව ඇතිවන අතර ඔවුන්ගේ වැටුප් ලෙස ලංකාවට ලැබූ යම් මුදලක් වේ ද, එය නොලැබී යාම තුලින් ලාංකීය ආර්ථිකය ද කෘතීම තත්වයක් යටතේ අඩපණ වනු ඇත. අපේ රටේ දැනටමත් ශ්‍රම අතිරික්තයක් ඇති බව මැදපෙරදිග වැනි රටවල් වෙත තොරතුරු තාක්ෂණ ශිල්පින්, ගණකාධිකාරීවරු, ඉංජිනේරුවන් වැනි වෘත්තිකයන් ගේ පිවිසීම වැඩිවීම මත හඳුනාගත හැක. එයට හේතුන් වන්නේ එම වෘත්තීන් වෙත නිසි පරිදි ගෙවීම් නොලැබීම සහ අඩු වැටුප් මත වැඩ කිරීමට සිදුවීම නිසාවෙනි. බොහෝ විටම අඩු වැටුප් ලැබෙනුයේ ඉල්ලුමට වඩා සැපයුම ඇති අවස්ථාවල ය.

එසේ නම් ඉන්දීය ප්‍රවේශය මත සිද්ධ වන තත්වය කෙබඳු වේ ද?

ගුගල් යුනිකෝඩ් අපලය.

noreply@blogger.com (ක්සැන්ඩරයා) — Fri, 26 Feb 2016 14:59:00 +0000

ක්‍රෝම් අපලය යනු ගුගල් ක්‍රෝම් හරහා සිංහල කියවීම / ලිවීම සිදු කරන සියල්ලන්ටම පොදුවේ ඇති ගැටළුවකි. එනම් සිංහල අකුරු නිසියාකාරව නොපෙනීම නැතිනම් font rendering නිසියාකාරව නොවීම.

සිංහල බ්ලොග්කරුවෙක් / කමෙන්ට් කරන්නෙක් / පාඨකයෙක් විදියට ඔබටත් ක්‍රෝම් අපලය තිබේද? එසේ නම් අපි සියල්ලෝම එකතුවී ඒ ගැන ගුගල්ට කියමුද?

ගුගල් ක්‍රෝම් යනු මේ වන විට වැඩියෙන්ම භාවිතා වන අන්තර්ජාල පිවිසුම් මෙවලමක් වී හමාරය. එකක් එහි වේගවත්බව නිසාත් භාවිතයේ පහසුව නිසාත් බොහෝ දෙන මෙය වත්මනේ භාවිතා කරයි. (මේ ගැන නං ගොඩක් විවේචන ඇත. ඇත්තෙන්ම එහි වේගය පරිඝනකයේ මතකය කා දමන්නක් වුවද නව සංස්කරණය සහ වේගය ගැන පැවසීමේදී එය වැඩිදියුණු කර තිබෙනු දැකිය හැකි අතරම මතක භාවිතය ද මදක් අඩු වී ඇත..)

නව සංස්කරණයක් පැමිණීම ඔස්සේ ගුගල් ක්‍රෝම් ද සිංහල බ්ලොග් ලියන කියවන සැමට කොකා පෙන්වමින් යන කාලයක අපේ එකමුතුව පෙන්වා මේ අඩුව නිවැරදි කරගන්නට උත්සාහයක් නොදරන්නේ ඇයි ද මට සිතේ. ඒ නිසා මේ පෝස්ටුව මගේ බ්ලොග් කටුවේ එල්වීමට මට සිතිනි.

හරි, අටුවා ටීකා ටිප්පනි ඉවරයි කරන්න ඕනේ මෙච්චරයි, ක්‍රෝම් එකේ දකුණු පස ඇති මෙන්න මේ වගේ බොත්තම වෙත යන්න. එය ක්ලික් කල පසු ලැබෙන මෙනුවේ අවසාන තේරීමට කලින් එක (අන්තිම එකේ සිට එකක් ඉහලට) තෝරන්න. ඔව්, හෙල්ප් (Help) කියල තියන එක තමා, J. එහි තේරීම් තුනක් තිබෙන අතර අවසාන තෝරාගැනීම කරන්න(Report an Issue) , නැතිනම් කෙටි පාර Alt + Shift + I

මේ ඔස්සේ ඔබට මේ දෝෂය ගැන ගුගල්ට කීමට හැකියාවක් ඇත.

ඉතිං අපි ගුගල්ට එහෙමවත් කියල හැදෙන්න කියමු නේද?

රැල්ල, තරුණ පරපුර සහ මතවාද? රට යන්නේ කොයිබටද?

noreply@blogger.com (ක්සැන්ඩරයා) — Mon, 04 Jan 2016 13:35:00 +0000

අද ශ්‍රී ලංකාවට අවශ්‍ය වන්නේ මතවාදී වෙනසකි.අද පවතින්නේ බොහොම පරිහානියට පත්වූ සමාජ ක්‍රමයක් බව රටේ තරුණ රැල්ල දෙස බැලීමෙන් තේරුම් ගත හැක. පලදාවක් නැති දෑ ගැන බොහෝ ප්‍රබෝධමත්ව කතා බහ කරන ඔවුහු සාහිත්‍ය,කලාව,රසාස්වාදය ගැන මෙලෝ හසරක් නොදනිති. තර්කයට ඔබින දෑ වටිනා දෑ සමග දැනුම ඔවුහු ළඟ නැත්තේමය. හුදෙක් හර සුන් අරුත් විරහිත දෑ පසුපස පන්නන සමාජය තුල විචාර බුද්ධිය යනු හුදෙක් කට වචනයටම සීමා වුවක් බව පසක් කරයි.

බොහෝ තරුණ කොටස් අද දින අලවි වන්නේ වෙළඳපල අලවි වන භාණ්ඩ හා සේවා පරදවා ය. ඔවුන් අලවි වන්නේ දේශපාලන කණ්ඩායම් මත අතකොලු ලෙසය. තරුණ ජවය අවිය කොටගෙන සියලු දේශපාලකයින් අද ආගම්, ජාතින් භේද කරවමින් සිය දේශපාලන අභිමතාර්ථ සපුරාගැනීමට අහිංසක තරුණ පරපුර බිලිගනිමින් සිටීම ඉතා ඛේදනීය වන අතර එයින් මිදීමට තරුණ පරපුර ශක්තිමත් නොවීම දුර්භායකි.

ඒ සඳහා හේතු ලෙස, අධ්‍යාපනය පිරිහීම සහ අඩපන කිරීම කාලයක සිට දේශපාලන උවමනා මත සිදුකිරීම නිසා වූ අතුරුපලයක් ලෙස මට හැඟෙයි. ඉතිහාසය නොදත් සාහිත්‍යය කලාව සහ රසය නොදන්නා තැනකට පත්කළ පරපුරකින් මීට වඩා දෙයක් බලාපොරොත්තු විය හැකිද යන්න ද ගැටළුවකි.

පන්සල / පල්ලිය හුදෙක් දේශනා වලට මිස ආධ්‍යාත්මය දියුණු කිරීමට උදව් වන ස්ථාන නොවීම මගින් තව දුරටත් මේ පරිහානිය සීග්‍ර කිරීමක් සිද්ධ වේ. ආගමික නායකයින් සියලුම දෙනා තමන්ගේ ආගම දේශනා මගින් කියාදීම පමණක් නොව ආගම තුල වන හරය ඉතා සරලව කියන්නේ නම් මේ විනාශය මීට වඩා යම්තාක් දුරකට හෝ අඩු කරගත හැකිව තිබුණු අතර තවමත් ඒ සඳහා ප්‍රමාදයක් මම නම් දකින්නේ නැත.

කැමැත්තෝ සිතත්වා.. දකිත්වා..

අධ්‍යාපනයේ කෙටි කතාවක්..

noreply@blogger.com (ක්සැන්ඩරයා) — Wed, 01 Apr 2015 12:58:00 +0000

අ.පො.ස. සාමාන්‍යපෙළ ප්‍රතිඵල නිකුත් වී තිබේ.. පොඩ්ඩන් කීප දෙනෙකු දිස්ත්‍රික් පදනමින්, පාසල් පදනමින්, සහ ජාතික පදනමින් ඇගයීම් ලබනු පෙනේ. ඔවුන්ට මගේ හදපිරි සුභාශිංසන පිරිනමමින් කතාව වෙනතක ගෙන යමි.

ඊයේ දින මා දුටු දෙයක් වූයේ සාමාන්‍යපෙළ ගණිතය අසමත් සිසුවියක් ගෙළ වැළලාගෙන ඇති බවය. මෙවන් සිද්ධීන් අද වන විට ඇසීමට ඇතත් මීට දශකයකට පෙර දී නම් අප අත්දුටුවේ නැති බව කීමට අවැසි වේ. ඒ එදා සිසු පරපුර අතර ද තරඟයක් නොවී නොව, වැඩිහිටියන් එදා තරමක් දුරට ළමා සමාජය සමගින් ඇති ගැවසීම වැඩිවීමත් ළමයින් හට මෙවන් දෙයක් ලෝක විනාශය ලෙස දකින්නට අවකාශ නොදීමත් යන කාරණා ගෙනහැර දැක්වීමට මට සිතේ. නමුදු සත්‍යය එය ම දැයි කීමට මා පරීක්ෂණ නොකළ නිසා මෙතැනින් නවතිමි.

අද වන විට දී සිසුන් විෂය ධාරාව අසමත් වීම ලෝක විනාශයක් ලෙස දකින්නේ දෛවයේ සරදමකින් දෝ මට සිතේ. ඒ අද අධ්‍යාපනය සකස්වී ඇති අයුරෙනුත් විවිධ විෂයන් හදාරා පිටව යන සිසුන් වෙනුවෙන් ඉහල අධ්‍යාපනය හැදෑරීමට ද මෙවන් දෑ බාදාවන් ලෙස තිබීමත් මම දකින්නේ දෛවයේ සරදමක් සින් නිසාය. මන්ද යත් උසස් අධ්‍යාපන පාඨමාලාවට යන්නවුන්ගෙන් අසන්නේ ද සාමාන්‍යපෙළ හෝ උසස්පෙළ සමත් ද යන්න ය, නමුත් උසස් අධ්‍යාපන පාඨමාලාව ඇත්තෙන්ම ගිරාපෝතකයින්ට නොව බුද්ධිමතුන් හට වන දෙයක් බව මගේ මනස කියා පායි. ඒ නයින් බලන කල අද දිනයේ උසස් අධ්‍යාපනය සඳහා සුදුසුකම් ලබන අයට මෙන්ම සුදුසුකම් නොලත් අය සතුව ද බුද්ධිය එක ලෙස තිබිය හැකි බැව් මම කියමි.

නමුත් අද අධ්‍යාපන ක්‍රමය ගැන කතා කරන්නේ නම් එහි දී සිද්ධ වන්නේ ළමයාගේ තාර්කික බුද්ධිය මෙහෙයවා පිළිතුරු සැපයීම කල යුතු හෝ පිළිතුරු ගොඩනැගිය යුතු ප්‍රශ්න සමුහයකින් ළමා මනස කෙතරම් තාර්කිකද විචාර බුද්ධිමත් ද යන්න මැනීම නොව, ළමයා කෙතරම් ප්‍රමාණයක් දරාගන්නේ ද නො එසේ නම් මතකය මගින් කිව හැකිද යන්න පිලිඹද කරන මතක පරීක්ෂණයක් බවයි, මම මේ ගැන කියන්නේ අද දිනයේ දකින බොහොමයක් අධ්‍යාපන ප්‍රශ්න සකස්වී ඇති රටාවෙන් ඔබට පරණ ප්‍රශ්න පත්‍ර සියයක් හෝ දහසක් ගෙන බැලුවොත් ඒ ප්‍රශ්න පත්‍ර වල ගැබ්වී ඇති ප්‍රශ්න ම පෙරලා ඇසීමත්, පිළිතුරු පොතේ පරිදි ම නොවුනහොත් අසමත් කිරීමත් යන පදනමිනි.

ඉතිං මෙසේ වූ අධ්‍යාපනයක් ඇසුරින් බිහිවන ළමුන් තර්කානුකුලව වැඩ කරාවිද යන්න සිතීම ද මේ ක්‍රමය වෙනස්වීමට කාලය මේ ද යන්න සිතීම ද මම ඔබට භාර කරමි. ඔබ දකිනා දරුවන් හෙට දිනයේ රට මෙහෙයවන්නේ ද මේ ක්‍රමයට ම නොවන්නේ ය කියා කෙසේ නම් සිතිය හැකිවේද?

ජායාරුපකරණය 6 :: පසු සැකසුම් කළාව.

noreply@blogger.com (ක්සැන්ඩරයා) — Wed, 18 Mar 2015 12:20:00 +0000

ගොඩක් දවසකින්. කොළමේ නම මාරු කරන්න හිතිලා තියෙන්නේ මටත් දැන්. ක්සැන්ඩරයාගේ යල මහ කොලම කියල දැම්මනං හොඳයි නේද? මොනවා කරන්නද, රාජකාරි බහුල නිසා වැඩිම කාලයක් යොදවන්නේ ඒ වැඩට.

අද කතා කරන්න බලාපොරොත්තු වෙන්නේ පසු සැකසුම් ශිල්පය ගැන පොඩි දේවල් ටිකක්. ඉතිං මොකද්ද මේ පසු සැකසුම කියන්නේ? පසු සැකසුම එහෙමත් නැතිනම් පොස්ට් ප්‍රොසෙසින් විදියට හඳුන්වන කළාව ජායාරුපකරණයට ගසට පොත්තක් සේ බැඳී තිබෙන කලාවක් නැතිනම් කාර්යයන් ගණනාවක එකතුවක්. මේ කළාව ජායාරුපයකට කැමරාවෙන් පමණක් කල නොහැකි එනමුත් එයට අවශ්‍ය, තවත් අගයක් එකතුවන, යම් වෙනස්කම්, අඩුපාඩු මගහැරවීම් වැනි බොහෝ දෑ සිදු කරන පරාසයක ගමන් කරනවා.

මුල්ම කාලයේ දී සේයා පටල මගින් ජායාරුප ගන්නා කාලයේ දී අඳුරු කාමරයක සිට සිදු කල මේ පසු සැකසුම් කළාව අද වන විට ඩිජිටල් තාක්ෂණය හරහා ඩිජිටල් සේයාරූ ගැනීමත් සමගින්ම පරිඝණකය වෙත ලඟා විට තිබෙනවා. ඒ අනුව පරිඝණක උපාංග මෙන්ම මෘදුකාංග ද මේ කළාව වෙනුවෙන් අද වන විට සැකසී තියනවා.

ඇඩෝබි සමාගම තමයි වෙළඳපල දැනට සිටින ඩිජිටල් ඩාක් රූම් හෙවත් ඩිජිටල් අඳුරු කාමර නිර්මාණය කිරීමේ ප්‍රමුඛයා වන්නේ. ඩිජිටල් අඳුරු කාමරයක් යනු තවත් එක (හෝ කිහිපයක් වූ) පරිඝණක මෘදුකාංගයක් (හෝ කීපයක්) වන අතර ඒ මෘදුකාංගයන් හරහා ඔබට සැබෑ ලොවේ දී අඳුරු කාමරයක පටල සේදීමේ සිට සේයාරූ මුද්‍රණය දක්වා සිදු කල සියලු කාර්යයන් සහ තවත් බොහෝ දෑ සිදුකීරීමට අවස්ථාව සලසා දෙනවා. ඔවුන් විසින් නිර්මිත ඇඩෝබි ෆොටෝෂොප් සහ ඇඩෝබ් ලයිට්රුම් මේ මෘදුකාංග අතරින් ලොව ප්‍රධාන වෙනවා. මේ මෘදුකාංග දෙක හරහා ම සේයාරූ වල පසු සැකසුම් කල හැකි අතර ඇඩෝබි සමාගමේ කැමරා රෝ නම් මෘදුකාංගය (ෆොටෝෂොප් සමගින් භාවිතා කල හැකි) මගින් බොහොමයක් ලයිට්රුම් සෙටින්ග්ස් භාවිතා කිරීමට හැකියාව ලබා දී තිබෙනවා. මේ මෘදුකාංග දෙක දෙකක් ලෙසටත් (වෙන වෙනමමත්) එකක් ලෙසටත් (එක මෘදුකාංගයක සිට අනිකට මාරු වෙමින්) භාවිතා කල හැකි ලෙස නිමවා ඇති අතර බොහෝමයක් දෙනා ඒ මෘදුකාංග දෙක වෙන වෙනම භාවිතා කරනවා. මෙම මෘදුකාංග හරහා සේයාරූ වල තීව්‍රතාව, දෝෂ නිරාකරණය, වර්ණ ගැලපුම්, ආලෝක පාලනය, රාමු සැකසීම වෙබ් ගත කිරීමේ පහසුකම් වැනි සැකසුම් රාශියක් භාවිතා කිරීමට ඒවා කරන්නා වෙත ලබා දී තිබෙනවා.

Adobe Lightroom මෘදුකාංගය

Adobe Photoshop මෘදුකාංගය

ඊට අමතරව බොහොමයක් වෘත්තිමය ජායාරුප ශිල්පීන් මේ මෘදුකාංග සමගින් ප්ලගින්ස්, එහෙමත් නැතිනම් මේ මෘදුකාංග සමගින් එක්ව භාවිතා කල යුතු/හැකි වෙනත් මෘදුකාංග ද සේයාරූ පසු සැකසුම් සඳහා භාවිතා කරනවා. ඒ අතරින් ගූගල් සමාගම විසින් නිර්මිත නික් ටුල්ස් නම් මෘදුකාංග කට්ටලය ප්‍රධාන තැනක් ගන්නවා. තවද ටොපෑස් මෘදුකාංග කට්ටලය, මැක්ෆුන් කට්ටලය යනාදී මෘදුකාංග මේ කර්තව්‍යය සඳහා ප්‍රසිද්ධියක් උසුලනවා. මේවා බොහෝවිට විශේෂිත යෙදවුම් සඳහා භාවිතා කරනු ලබනවා.

ඩිජිටල් ඩාර්ක් රූම් එකක් බොහෝවිටම එක පරිඝණකයක් ප්‍රින්ටරයක් සමගින් සෑදී ඇති අතර මේ සඳහා ද විශේෂිත උපකරණ සහිත තිර කීපයක් ඇති වැනි විශේෂිත පරිඝණක භාවිතා කරන අවස්ථා ද දකින්නට පුළුවන්. මේ පරිඝණක සඳහා වෘත්තිමය ජායාරුප ශිල්පීන් ඇපල් පරිඝණක වෙත ඉතා කැමැත්තක් දක්වන අතර වින්ඩෝස් මෙහෙයුම් පද්ධතිය භාවිතා කරන අය ද මේ අතර නැතිවා ම නොවේ.

හොඳයි, එහෙනම් දැනට තවත් පින්තුර ටිකක් ගන්නකම් මම අදට සමුගන්නවා. නැවතත් ලයිට්රුම් ගැන ලිපි පෙළක් එක්ක සම්බන්ධ වෙන්න බලාපොරොත්තුව. එහෙනම් ආයුබෝවන්.

මෙන්න ඔබට දෝහා නගරය සැන්දෑ කලට දිස්වන අයුරු පෙන්වන මගේ තවත් සේයාරුවක්. මේ සේයාරුව ගත්තේ දෝහා වල තුන්වන උසම කුළුනේ නැගෙනහිර අන්තයේ සිට. මේ සඳහා විශේෂ ස්තුතිය මගේ පාසල් මිත්‍රයා ඉම්රාන් ඛාන් වෙත තිලිණ කරන්න කැමතියි,.

කැමති අය මෙතනින් එකතුවෙන්න මගේ සේයාරූ පිටුව එක්ක.

දෝහා නගරය, 2014 දෙසැම්බර් 20 වැනි දින සවස දිස්වූ අයුරු.

ජායාරුපකරණය - 5 :: කොහොමද හොඳ පින්තූර ගන්නේ?

noreply@blogger.com (ක්සැන්ඩරයා) — Sat, 24 Jan 2015 19:42:00 +0000

දැන් ඉතිං සෑහෙන දවසක් වුණා නේද මම ෆොටෝග්‍රැෆි ගැන කතා කරන්න අරගෙන. කී දෙනෙක් කැමරා එහෙම අරගෙන ඉන්නවද?? ඈ.. කවුරුත්ම නොගත්තු කෙනෙක් නැද්ද?? අන්න හොඳයි.. එහෙනං අද බලමු කොහොමද හරියටම ෆොටෝ එකක් ගන්නේ, මොනවාද මුලිකාංග වන්නේ කියල.

ඇතැම් ජායාරුප දැක්කම අපේ නෙත් පිනා යනවා නේද? ඇතැම් ඒවා ඇත්තෙන්ම සේයාරුවක් විතරක් වෙනවා නේද? මේ වෙනස වෙන්නේ කොහොමද? අන්න ඒ ගැන ටිකක් කතා කරන්න තමා මම අද හදන්නේ. සේයාරුවක් හොඳ එකක් වන්නට බලපාන්නේ මිනිසාගේ ඇස කියන දේ කොහොමද පිනවන්නේ කියන කාරණය. එතැනදී වර්ණ හැඩතල සහ රූප කියන දේ ප්‍රධාන වෙනවා.

මුලින්ම, මානව රූප සහ සත්ව රූප ගැන බලමු. මානව සහ සත්ව රූප කියන දේ වෙත මිනිස් ඇස ඉතා ඉක්මනින්ම ඇදිල යනවා. ඒ කියන්නේ මිනිස් ඇස හරිම සංවේදී මේ සේයාරූ වලට. එතැනදී මානව රූපයක් හෝ සත්ව රූපයක් ගත්තම අපි පුළුවන් හැමවෙලාවකම (බොහෝවිටම සමීප රූප වලදී.) ඒ රුපයේ ඇස්වෙත අපේ ෆෝකස් එක එහෙම නැතිනම් අපේ අවධානය යොමුවෙන විදියට ගන්න ඕනේ. එතැනදී අපි ඒ ඇස්වල ඇති ශාප්නස් එහෙමත් නැතිනම් තීව්ර බව ගැන ගොඩක් අවධානය යොමු කරන්න ඕනේ. ඇතැම් වෘත්තිමය ශිල්පීන් ඇස පසු සැකසුම් මගින් තීව්ර බව වෙනස් කරනවා වගේම වර්ණ පවා එකතු කරනවා මේ ඇසේ තීව්ර බව ලබාගන්න.

දෙවනුව භුමි දර්ශන වලදී අපි මොකද කරන්න ඕනේ? අපේ ඇස්දෙක රුපය වෙත හෝ අපිට අවශ්‍ය දිසාව වෙත රැගෙන යන්න නම් අපි භාවිතා කරන්න ඕනේ දේවල් තියනවා. ඒවා අතුරින් රේඛා සහ හැඩතල කියන්නේ ඉතාම වටිනා දේවල්. රේඛාවන් විදියට අපිට ගන්න පුළුවන් බොහෝ දේ ස්වභාවිකව හෝ මිනිසා විසින් නිර්මිත දේ තුල තියනවා. උදාහරණයක් ලෙස නුවර දළදා මාලිගාවේ වලාකුළු බැම්ම එක්තරා ආකාරයක රේඛාවක්. මේ රේඛාව දිගේ ගමන්ගන්නා ඇස අපිට අවශ්‍ය ස්ථානයක ඇති දෙයක් වෙත යොමු කරන්න පුළුවන්.උදාහරණයකට මාර්ගයක් ගන්න. මාර්ගය කෙළවර වන ස්ථානයේ ඇති ගොඩනැගිල්ල අපි සේයාරුවට නගන්නේ නම් අපිට මාර්ගය සමගින් එය කරන්න පුළුවන්. එවිට මාර්ගය රේඛාවක් වී ඇස වෙත ගොඩනැගිල්ලට පාර කියනවා. මේ දේට අපි ජායාරුපකරණයේදී ලීඩ් ලයින් එකක් එහෙමත් නැතිනම් ඇස ගෙනයන මාර්ගයක් විදියට හඳුන්වනවා. හැඩතල කියන්නෙත් ඒ වගේම දෙයක්. හැඩතල වලදී ඇස බොහෝවිටම සමමිතිය කියන දේ ඔස්සේ ගමන් කරනවා. මේ ඇසුරෙන් තමයි ඔරලෝසු වල 10:10 ලෙස වෙලාව සටහන් කර සේයාරූ තියෙන්නේ. එතැනදී අපිට ඔරලෝසු මුහුණතේ සමමිතික හැඩතල මගින් බෝහොකොටම නිෂ්පාදනයේ වර්ගය ඔසවා පෙන්වනවා.

දැන් බලමු තවත් දෙයක් ගැන. ඒ තමයි පසුබිම සහ පෙර බිම කියන සංකල්ප දෙක. අපිට සේයාරුවට නගන්න අවශ්‍ය දේ අපි ගත්තොත් ඒ හැම එකකම පසු හා පෙර බිමක් දකින්නට තියනවා. මානව රුපයක් ගත්තොත් එතැනදී පසුබිම විදියට ඒ පුද්ගලයා ඉන්න භුමිය දකින්න පුළුවන්. පෙර බිම විදියට පුද්ගලයා හෝ වෙනත් වස්තුවක් හෝ තිබෙන්න පුළුවන්. මේ සංකල්පයේ දී අපි හැමවිටම වාගේ පසුබිමේ සහ පෙරබිමේ දී ඇති වස්තුන් වෙත අවධානය යොමුවන විදිය ගැන සලකා බලනවා. උදාහරණයකට මානව රුපයක් මල් වත්තකදී ගන්නේ ය සිතන්න. මල් ගොමුවක් පසුපස සිටිනා කෙනෙක් සහ ඒ පසුපසින් වන ගස් වැනි දෑ ඔබට සිතන්න මම යෝජනා කරනවා. දැන් ඔබ ගන්නා සේයාරුවේ මල් වෙත ඔබේ කැමරාවේ තීව්‍රතාව යොමු කොට පුද්ගලයා මදක් හෝ බොඳවූ ස්වභාවයෙන් යුතුවත් පසුබිම තවත් බොඳ වූ ස්වභාවයෙනුත් දිස්වන්නේ නම් ඔබ ඒ සේයාරුව ගැන නැවත සිතනවා නේද?

වර්ණ. වර්ණ සහ හැඩතල යනු ජායාරුප වලදී නිතරම දකින්න තියන දෙයක්. එතැනදී වර්ණයන් තද හෝ වඩා තීව්ර වන විට දී ඇස හැඩතල වලින් වර්ණ වෙත ද වර්ණයක් වඩා ලා පැහැයන් හෝ අඩු වශයෙන් තීව්ර වන විට දී වඩාත් ඇස වර්ණ වලින් හැඩතල වෙත ද ගමන් ගනු ලබයි.

ඉතිං මේ කතා කලේ සේයාරුවක් තැනෙන මුලිකාංග ටිකක් ගැන. පුංචි ඇඩ් එකකුත් දාන්නං කෝ මේ ගමන් ම. ඔන්න මගේ ම සේයාරූ පිටුවක් තියනවා මුණුපොතේ. කැමති කෙනෙක් ඉන්නවා නං එතනට ඇවිත් මගේ එක්ක එකතුවෙලා සේයාරූ රසවිඳින්න පුළුවනි. එහෙනම් නැවත හමුවෙමු. එතකං ඔබට මෙන්න දෝහා නගරයෙන් මතක සටහනක්.

මගේ සේයාරූ පිටුව වෙත මෙතනින් එන්න.

Sleeping in Peace - Doha from the Parcel one - The Pearl.

දෙවොල් කවි.

noreply@blogger.com (ක්සැන්ඩරයා) — Wed, 19 Nov 2014 07:24:00 +0000

Picture by Google Search. All rights are on original photographer/website.

පුරා තෙවසර වෙහෙසිලා මා

තැනුවෙමි දෙවොලක්

තනා මලසුන් පුදන්නට එහි

තැබුවෙමි එක පුදසුනක්

තනා එ දෙවොල තබන්නට එහි

වෙහෙසවුවෙමි දෙව් රුවක්

තබා දෙව්රුව පුදන්නට එහි

පැමිණි විට මා එක දිනක්

දෙවිඳු පැනගොස්

දෙවොල පාළුය

මලසුනේ ඇත

මල් ටිකක්...

ජායාරුපකරණය සිංහලෙන් - 4 - ලෙන්සයක් මිලදී ගනිමු.

noreply@blogger.com (ක්සැන්ඩරයා) — Fri, 01 Aug 2014 12:00:00 +0000

මොකක් හරි හේතුවක් හින්ද මට පේන්නේ මේ පෝස්ට් එක කොහෙවත් අප්ඩේට් වෙන්නේ නෑ වගේ. ඒ නිසා රී පෝස්ට් කරන්නත් බැරි එකේ, ඔන්න මම ආයෙම ලින්ක් එකක් විදියට දානවා..

ජායාරුපකරණය සිංහලෙන් - 4 - ලෙන්සයක් මිලදී ගනිමු.

ජායාරුපකරණය - 4 ලෙන්සයක් මිලදී ගනිමු.

noreply@blogger.com (ක්සැන්ඩරයා) — Mon, 28 Jul 2014 12:23:00 +0000

අද කතා කරන්න බලාපොරොත්තු වෙන්නේ ලෙන්ස් එකක් මිලදී ගන්න විදිය..

කලින් කොටසේ දී අපි කැමරා බොඩි එකක් ගන්නේ කොහොමද කියල කතා කළා ඔබට මතක ඇති. අද අපි කතා කරන්න බලාපොරොත්තු වෙන්නේ ඒ කැමරාවට කොහොමද හරියන ලෙන්ස් එකක් ගන්නේ කියලා..

ලෙන්ස් ගැන කතා කරනකොට අපිට ලෙන්ස් ප්‍රධාන වශයෙන් කොටස් දෙකකට කඩා වෙන් කරන්න පුළුවන්. එකක් ක්‍රොප් මෝඩ් ලෙන්ස් එහෙමත් නැතිනම් DX (නිකොන්) හෝ EF-S (කැනොන්) ලෙන්ස් සහ ෆුල්ෆ්‍රේම් FX නිකොන් සහ EF (කැනොන්) ලෙන්ස් විදියට මේ වර්ග හඳුන්වන්න පුළුවන්.

මීට අමතරින් තවත් ලෙන්ස් වර්ග තිබෙනවා. ලෙන්ස් මම මේ ආකාරයට බෙදා වෙන් කලද ඔබ තවදුරටත් හදාරන විට දී මීට වඩා වෙනත් වර්ගීකරණයන් දකින්නට ලැබේවි.

මිල අනුව ගත්විට සාමාන්‍ය EF හෝ FX ලෙන්ස් මිලෙන් ඉතා අධික බව නම් කියන්නම ඕනේ. හේතුව මේ ලෙන්ස් වෘත්තිමය අවශ්‍යතා සඳහා ඉතාම සීරුවෙන් නිපදවූ ඒවා වීමත් ඒ සදහා භාවිතා කරන වීදුරු සහ අනිකුත් දෑ ඉතාම උසස් ඒවා වීමත් කියන කරුණු.

ඉතිං මේ ලෙන්ස් ගැන කියද්දී ලෙන්ස් මවුන්ට් එක එහෙමත් නැතිනම් කැමරාවට ලේන්සය සවි වන කොටස ගැන පොඩි සඳහනක් කරන්න අවශ්‍යයි. ලෙන්ස් මවුන්ට් එක සෑදීම සඳහා කිසිදු අන්තර්ජාතික මිනුම් දඬු භාවිතා වන්නේ නෑ. මේ නිසා ඔබට කැනොන් හි දී EF-S ලෙන්සයක් කැනොන් ෆුල් ෆ්‍රේම් බොඩි එකක දී භාවිතා කරන්න බැහැ. එසේ සවි කල හැකි වීම වළකාලන්න ෆුල් ෆ්‍රේම් කැමරා සකස්කරන්න කැනොන් සමාගම කටයුතු කරනවා. ඒ EF-S ලේන්සයක් ක්‍රොප් බොඩි එකක සවි කල විට ලෙන්ස් මවුන්ට් එක කැමරා බොඩි එක ඇතුලට යන ප්‍රමාණය වැඩි නිසා කැමරාවට හානි සිද්ධ වීම වළකාලීම පිණිසයි. නමුත් කැනොන් ක්‍රොප් බොඩි කැමරාවකට කැනොන් ෆුල්ෆ්‍රේම් ලෙන්ස් (EF-S ) ලෙන්ස් සවි කිරීමට හැකියාව තියනවා.

නිකොන් වලදී මේ ගැටළුව නෑ. ඔවුන් සතුව තියෙන්නේ නිකොන් F මවුන්ට් නම් එකම ලෙන්ස් මවුන්ට් එකක්. මේ නිසාම නිකොන් වලදී ඔබට ඔබ සතු DX ලෙන්ස් භාවිතා කල හැකිවාක් වගේම ඒ සඳහා ෆුල් ෆ්‍රේම් බොඩි සහය දැක්වීමක් ලෙස ලෙන්ස් ඉබේම අඳුනාගෙන ඒ සඳහා කැමරාව සකස්කර දෙන්න DX මෝඩ් එකකුත් ඇතුලත් කරන්නට නිකොන් සමාගම පියවර ගෙන තියනවා. හැබැයි DX මෝඩ් එක සහය දක්වන්නේ කුඩා මෙගා පික්සෙල් ප්‍රමාණයක් සඳහා පමණයි. (D610 ෆුල් ෆ්‍රේම් කැමරාවේ මෙය මෙගාපික්සල 10ක අගයක්.)

නිකොන් කැනොන් වර්ග දෙකට අමතරව ඔබට ටොකිනා (Tokina), සම්යන්ග් (Samyang), සිග්මා (Sigma) ටැම්රෝන් (Tamron) යන වර්ග වලින් ලෙන්ස මිලදී ගන්නට පුළුවන්. මේ ලෙන්ස ඇතැම්විට නිකොන් හෝ කැනොන් සමාගම් වල ලෙන්සයන් අභිබවා යන මට්ටමේ හෝ ඊට සමාන මට්ටමේ දක්ෂතා පෙන්වනවා.

හොඳයි, ඉතිං අපි බලමු මොනවාද ලෙන්ස් එකක් ගන්නා විට සැළකිලිමත් වෙන්න ඕනේ කරුණු කාරනා කියල.

මුලින්ම බ්‍රෑන්ඩ් නිව් එහෙමත් අලුත් ම අලුත් ලෙන්ස් එකක් ගන්නා විට, ඔබ සතුව ඇති කැමරාව කුමක්ද යන්නත් ඔබේ අවශ්‍යතාව කුමක්ද යන්නත් තෝරා බේරා ගතයුතු වෙනවා. ඒ කියන්නේ ඔබ සතු කැනොන් හෝ නිකොන් කැමරාවක් නම් ඉහත සඳහන් කල විස්තරය ඔබට ප්‍රමාණවත්. ඉන් අමතරව වගකීම් කාලය සහ වගකියන්නේ කුමන අවස්ථා වලද කියා පැහැදිලිව විමසන්න. ඊට එහායින් නම් ඔබට බලන්නට ඇත්තේ මිල ගැන පමණයි. ඇතැම් ලෙන්සයන් ද ඔන්ලයින් මාර්ගයෙන් අඩු මිලට මිලදී ගත හැකියි (භාණ්ඩ ගෙන්වාගැනීමේ ගාස්තු සමගින්ම) ඒ නිසා වෙළඳපල රවුමක් ගිහින් ගන්නවා නම් හොඳයි.

ඔබේ අවශ්‍යතාව වන්නේ පවුලේ සේයාරූ ගැනීම සඳහා නම් ඔබට මිලෙන් අඩු DX ලේන්සයක් තෝරාගත හැකියි. එසේ නොවී ඔබට වෘත්තිමය සේයාරූ සඳහා (උදා: මංගල සේයාරූ වැනි) කටයුත්තක් සඳහා නම් FX ලේන්සයක් මිලදී ගැනීම සුදුසුයි කියා මම යෝජනා කරනවා. නමුත් මෙවැන්නක් අත්‍යාවශ්‍ය නෑ. DX ලෙන්ස් වලින් මෙන්ම සමහර පොයින්ට් ඇන්ඩ් ෂුට් වලිනුත් දක්ෂයා වැඩ ගන්නවා මම දැකල තිබෙනවා.

ලෙන්ස් එකක් සෙකන්ඩ් හෑන්ඩ් එහෙමත් නැතිනම් නැවත මිලදී ගන්නවා නම් ඔබේ සැලකිල්ල ඉතාම අවශ්‍ය වන කරුණු පහත දක්වා තිබෙනවා.

දුවිලි සහ පුස් බැඳුනු ලෙන්ස.

ලෙන්ස් නිසිපරිදි ගබඩා කොට නොතිබීම නිසා පුස් බැඳීමට හැකියාව තිබෙනවා. ඒ ලෙන්ස් නිරතුරුවම තෙත් පරිසරයකට ආවරණය වී තිබීම මගින්. මේ පුස් ඔබේ පින්තුරු මත රටා ලෙස දිස්වන අතර ඒවා සුද්ධ කිරීම ඉතා අසීරු කටයුත්තක් වෙනවා. මේ තියෙන්නේ ලෙන්ස් එකක් මත වන පුස්. ඔබ මිලදී ගන්නා ලෙන්සය ඉතා පරිස්සමට පිරික්සා බලන්න එහි ඇහැට පෙනෙන පුස් තිබේ ද කියා.

ලෙන්සයේ ඇති පුස් ආලෝකයේ දී දිස්වන අයුර

වැටීම් සහ පලුදු වීම ඇති ලෙන්ස

මේවා පියවි ඇසට නොපෙනෙන නමුත් විපරම් කල විට දැකගත හැකි දෝෂ සහිත ලෙන්සයන් වේ. ලෙන්සය ගෙන එහි සූම් කරන්නට පහසුකම ඇතිනම් සූම් කර බලන්න. ඒකාකාරී ලෙස ලෙන්සය එහිදී හැසිරිය යුතුයි. එහි යම් ගැප් එකක් එහෙමත් නැතිනම් හිරවීමක් දැනුනොත් ලේන්සය සියුම් ව පිරික්සා බලන්න එහි යම් තැලීමක් දකින්නට හැකිද කියා. බොහෝවිට මෙවැනි ලෙන්සයන් වැටීම් නිසා වන හානි සහිත ඒවායි. මේ දෝෂ සමනය කල හැකි සහ නොහැකි ලෙස තිබෙන නිසා පරිස්සම් වීම වඩා හොඳයි නේද? මොකද මෙවන් ලෙන්සයන්ගේ අභ්‍යන්තර දෝෂ පවතිනවා.

මෙන්න මේවටයි හානි වෙන්නේ. ඒවා පිටට පේන්නේ නෑ.

ලෙන්සය මත වන හීරීම් සහ තුවාල වීම

ඔබේ පින්තුරු සඳහා කෙලින්ම බලපෑම් කල හැක්කේ ලේන්සයේ වීදුරු මත වන සීරීම් සහ පලුදු වීම් වලටයි. ඒ නිසා ඒවා විපරමින් බලන්න.

පේනවාද පොඩි සීරුම? පොඩි වුනත් පින්තුරේ හරි මැදින් ඉරක්??

අද වෙළඳපොලේ භාවිතා කල ලෙන්ස මිල අඩුවෙන් සොයාගන්න හැකියාව තියනවා. මමත් එවැනි ලෙන්සයන් දෙකක හිමිකරුවෙක්. ඒ කිසිවක දෝෂ නෑ. ඔබ කලින් දුටු සේයාරූ සහ අද ඔබට තිලිණ කරන සේයාරුව ඒ ලෙන්ස භාවිතා කර ගත්තු ඒවායි. භාවිතා කල ලෙන්සයක් මිලට ගන්නට යන සෑම විටකම ඔබේ කැමරාව රැගෙන යන්න. ඉර එලිය හොඳින් පවතින විටක යන්න. ඔබට බොහෝ දෑ එවිට පෙනේවි. හැකි නම් ලැප්ටොප් පරිඝනකයක් රැගෙන යන්න. එය ඔබට විශාල උදව්වක් වේවි පින්තුරු සියුම්ව නිරීක්ෂණය කරන්න.

මීට වඩා තවත් බොහෝ කරුණු ඇතත්, ඔබේ ඉල්ලීම මත ලියන්නට ඉඩ තබානැවත හමුවන තෙක් දෝහා නගරයට හිරු බසින දර්ශයනක් ඔබට තිලිණ කරමින් අදට සමුගන්නවා....

දෝහා නගරයේ සැන්දෑ හිරු රැස් පතිතවන ආකාරය MIA පාක් හි සිට - සේයාරුව මගෙන් :)

ලෙන්ස් සඳහා සේයාරූ ගූගල් වෙතින්..

ජායාරූපකරණය ගැන සිංහලෙන් - 3

noreply@blogger.com (ක්සැන්ඩරයා) — Wed, 09 Jul 2014 17:29:00 +0000

හොඳ කැමරාවක් ගමු ද එහෙනං?

පින්තුරය : ගූගල් වෙතින්..

අද කතා කරන්න බලාපොරොත්තු වෙන්නේ හොඳ කැමරාවක් ගන්නේ කොහොමද සහ ඒ ගැන දැනගෙන ඉන්න ඕනේ දේවල් සමුහයක් ගැන. හොඳ කැමරාවක් විදියට මම මෙතන හඳුන්වා දෙන්න යන්නේ අපි කතාකරපු DSLR වර්ගයේ කැමරාවන්.

මොකද මේ DSLR එකක්ම?

මේ වර්ගයේ කැමරා වලදී කැමරාවේ ද්වාර වේගය, කාච විවරය සහ පටල වේගය (Shutter Speed, Aperture and ISO) පාලනය කරන්න වෙන වෙනම හැකියාව තියනවා. ඒ එක්කම තවත් අතිරේකව කැමරාවේ නිරාවරණ මීටරය මගින් සහ ආලෝක මීටර මගින් කැමරාවෙන් හොඳ තත්වයේ රූපරාමු ලබාගන්න අවශ්‍ය වෙනස්කම් සිද්ධ කරන්න හැකියාව මේ සමගින් ලැබෙනවා.

තව දුරටත් කතා කරද්දී මේ වර්ගයේ කැමරා වල අපිට පෙර සැකසුම් කර නැති, ගොනුව හකුළුවා නැති දල රූප (lossless uncompressed RAW) විදියට පින්තුරු ලබාගන්න පුළුවන්. මේ පින්තුරු වලින් අපිට ඇඩෝබි ලයිට්රූම්, ඇඩෝබි කැමරා රෝ සහ ඇඩෝබි ෆොටෝෂොප් වලදී අවශ්‍ය පරිදි සංස්කරණය කරන්න, සැකසුම් සිද්ධ කරන්න ඉතාම ඉහල හැකියාවක් ලැබෙනවා.

මිල පරාසයන් ගත්තොත්?

ලංකාවේදී නම් මිල රුපියල් 30000 සිට ඉහළට දකින්න පුළුවන්. ඉතාම ඉහල මට්ටමේ වෘත්තීය කැමරා නම් රුපියල් ලක්ෂ හතකට (Nikon D4s | Canon 1Dx) වඩා වැඩි මුදලක් වෙනවා. එත් අපිට අවශ්‍ය සරල කැමරා. ඔබට පසුව ඔබේ අවශ්‍යතා මත වෙනත් කැමරාවකට මාරු වෙන්න පුළුවන්.

ඔබට අවශ්‍ය නම් ඔන්ලයින් ඒ කියන්නේ අන්තර්ජාලය හරහා ද ඇනවුම් සිදු කරන්න පුළුවන්. මිල නම් ටිකක් අඩුයි එත් වගකීම් සහතික ගැන නම් බොහෝ තැන්වලදී කියන්න බෑ. එත් වැදගත් තැනකින් මිලට ගත්තොත් වගකීමක් ද සහිතයි. වැඩේ තියෙන්නේ

මොනවාද ඉතිං හොඳ කැමරා ජාති?

වඩා ප්‍රසිද්ධ නං ඉතිං කැනොන් හෝ නිකොන් කියන වර්ග දෙක. එත් ඒ දෙකෙනුත් වඩාත්ම හොඳ එක තෝරනවා කියන්නේ නං සංකීර්ණ ප්‍රශ්නයක්. බොහෝ වේලාවට අපි දකින දෙයක් තමයි කැනොන් කැමරා මෙන්ම නිකොන් කැමරා ද එක හා සමාන ලෙස වෘත්තීය මට්ටමේ දී භාවිතා වෙනවා කියන දේ. ඇත්තෙන්ම කැනොන් කැමරා මිලෙන් ටිකක් අධිකයි. ඒ වගේම ලෙන්ස් වල ද මිල ටිකක් නිකොන් වලට වඩා ඉදිරියෙන් ඉන්නවා. ඒ එක්කම බොහොමයක් කැමරා ඉහල පටල වේගවලදී වඩා හොඳ සංවේදීතාවයක් දක්වනවා. තව දෙයක්, කැනොන් කැමරා තමන්ගේ ෆුල්ෆ්‍රේම් කැමරා බොඩි වලට ක්‍රොප් මෝඩ් ලෙන්ස් භාවිතාව සඳහා සහය දක්වන්නේ නෑ.

නිකොන් කැමරා ද මීට දෙවැනි වන්නේ නෑ. එහෙම නැතිනම් ඉතිං ඔවුන්ට ද පැවැත්මක් නෑ නේ? ඔවුන්ගේ මිල මට්ටම ටිකක් පහලින් තියන අතර ලෙන්ස් ද සාපේක්ෂව මිල අතින් පහලින් තියනවා. නිකොන් වර්ගයේ කැමරා තමන්ගේ ෆුල්ෆ්‍රේම් කැමරා බොඩි සඳහා ක්‍රොප් මෝඩ් ලෙන්ස් භාවිතය අනුමත කරන අතර ඒ ලෙන්ස් කැමරාව විසින්ම හඳුනාගෙන ඊට අනුකූලව කැමරා බොඩිය සකස් කරනවා.

මේ සියල්ලටම පසුව ඒ ඒ නිෂ්පාදකයා තමන්ගේ එක් එක් කැමරා මොඩලයන් සඳහා විවිධ පහසුකම් සලසා දෙන අතර ඒවා ද අවශ්‍යතා මත එකිනෙකාගේ තෝරාගැනීම් වෙනස් කරන්න සමත් වෙනවා., උදාහරණයක් ලෙස, නිකොන් D610 කැමරාවේ ක්ෂනිකාලෝකයක් (ෆ්ලෑෂ්) එකක් අඩංගු අතර කැනොන් 6D හි ඒ පහසුකම ලබා දි නෑ. එසේම නිකොන් D610 කැමරාවේ ක්ෂනිකාලෝක පද්ධතිය දුරස්ථ ක්ෂනිකාලෝක පද්ධති (Off camera Flash commander) මෙහෙයවීම සඳහා සහය ලබා දෙනවා. කැනොන් හි දී ඒ පහසුකම ද ලබා දී නෑ.

පාවිච්චි කල එකක් ගන්න බැරිද?

මොකද බැරි? ඒත් ඒ සඳහා ඔබ දැනුවත් වී සිටිය යුතුයි. ඒ කියන්නේ ඇතැම් කැමරා වල නිෂ්පාදන දෝෂ මත වන දොස් තියෙන්න පුළුවන්. ඒ නිසා ඒවා වෙළඳපලට අඩු මිලට එනවා වෙන්න පුළුවන්. මීට හොඳම උදාහරණය නිකොන් සමාගමේ D600 කැමරාව. මේ කැමරාවේ ෂටරයේ තෙල් / දුවිලි අංශු බැඳීමක් සිද්ධ වෙනවා. ඒ නිෂ්පාදන දෝෂයක් විදියට. ඉතිං අද මේ කැමරා ගන්න කෙනෙක් නෑ. නිෂ්පාදකයා මේ මොඩලය තවදුරටත් විකුනන්නෙත් නෑ. ඒ හේතුවෙන් භාවිතා කල, දෝෂ සහිත කැමරා අද බොහෝ දෙනා විකිණීමට උත්සාහ කරන කාලයක්.

නමුත් ඇතැම් දෙනා මේ දෝෂය සලකන්නේ නෑ. මේ දෝෂය ෆොටෝෂොප් මගින් ඉවත් කරන්න හැකිය කියන තැන ඔවුන් ඉන්නවා. එත් ඉතිං දෝෂ තියන කැමරාවක් මොකට ගන්නවද නේද?

ඉතිං ඔය දේවල් පේනවද?

ඔව්. මේ දුවිලි / තෙල් අංශු නම් පේන්නට තියෙනවා. එත් ඒ සඳහා සේයාරුවක් ගෙන පරික්ෂා කරන්න ඕනේ. ඒකත් පරිඝනකයෙන්. මොකද කැමරාවේ ඩිස්ප්ලේ එකේ දී දැක්කට අපිට මේ දෝෂ හරියටම පේන්නේ නෑ. නමුත් සෙන්සරය මත ඇති දුවිලි බැඳීම්, කැමරාවේ වැටීම් තැලීම් නම් බලන්න පුළුවන්.

සෙන්සරයේ දුවිලි පරික්ෂා කරන්න නම් කැමරාවේ සෙන්සරය තිබෙන කුටිය විවර කර පරික්ෂා කරන්න ඕනේ. සාමාන්‍යයෙන් සෙන්සරය තියෙන්නේ කැමරාවේ ටිකක් ඇතුලේ, ඒ කියන්නේ ෂටර් කර්ටන් එක සහ දර්පණ කොටසකට පසු. ඉතිං ඒ නිසා කැමරාවේ සෙන්සරය ක්ලීනිග් මෝඩ් එකට දාල තමයි බලන්න වෙන්නේ.

දෙවනුව කැමරාවේ පවසන ආයු කාලය හා සාපේක්ෂ ගෙවීම් සීරීම්. ඒ ගැන නම් ඉතිං බලන්න ඕනේ කැමරාවේ පිටත පෙනුම. විශේෂයෙන්ම කැමරාවේ පටිය හා ඒ ආසන්න කොටස්. මේවා ක්ෂය වෙලා නම් කැමරාව භාවිතයේ හොඳින්ම තිබුණු එකක්. බොහෝ විට පටිය අලුත් මෙන් පෙනුනද ඒ ආසන්නයේ ගෙවීම් දකින්න පුළුවනි.

තව එකක්, කැමරාවේ ෂටරයේ සටහන් වෙනවා එයින් ලබාගත් පින්තුරු ගණන. මේ තුලින් කැමරාවේ ෂටරයේ ආයුකාලය සහ භාවිතයේ දී (නිෂ්පාදකයා කියා තිබෙන පරිදි ෂටරයේ ආයු කාලයට සාපේක්ෂව ) කොතරම් පින්තුරු ගණනක් ලබාගෙන ඇතිද යන වග සොයාගන්න පුළුවන්.මේක බලන්න ඕනේ නං කැමරාවෙන් ගත් පින්තුරයක් මේ පහල සටහන් කර ඇති වෙබ් අඩවි වෙත ගොස් ඒ ඇති මෘදුකාංග භාවිතා කරලා ලබාගන්න පුළුවන්. නමුත් මේ කාලයන් සාපේක්ෂයි. ඔබ වාසනාවන්ත නම් මේ කාලයට වඩා කාලයක් ඔබට ඔය කැමරාව භාවිතා කරන්න පුළුවනි. අවාසනාවකට හෝ මේ කාලය තුලදීම ෂටරය දෝෂ සහිත වුවොත් කරන්න තියෙන්නේ ෂටරය මාරු කරන එක. හරිම සිම්පල් ප්ලෑන් එකක් නේ?

වැදගත් දේවල් ටිකක්...

කැමරාවක් ගන්න වෙලාවක ටිකක් ඒ ගැන දන්නා කෙනෙක් ඒ වගේම විශ්වාසවන්ත කෙනෙක් එක්ක යන්න. විශේෂයෙන් භාවිතා කල එකක් ගන්නවා නම්. ඒ එක්කම මතක තියාගන්න, ලෝකේ තියන හොඳම කැමරාවට බෑ හොඳම ජායාරුප ශිල්පීන් බිහි කරන්න. නමුත් ලෝකේ තියන නරකම කැමරාව වුනත් හොඳ ඇහැක් තියන ශිල්පියෙක් ගත්තොත් ඒ කැමරාව භාවිතා කරලා හොඳ මට්ටමේ සේයාරූ නම් ලබා ගනීවි. ඒ කියන්නේ ඔබ අතේ තියන කැමරාව තමා හොඳම කැමරාව..

මෙතනදී කැමරා කියා අප හඳුන්වා දී ඇත්තේ කැමරා බොඩිය පමණක් වන බව සලකත්වා. හේතුව කැමරාව තරමක් වෘත්තිමය පැත්තට බර වූ විට කැමරාව සමග බොහෝවිට ලේන්සයක් නොලැබේ. ඔබට ඒ සඳහා අවශ්‍ය ලෙන්ස් මිලදීගත යුතු වේ. ලේන්සයන් සමගින් කැමරා පැකේජ ඇතත් ඒ මුදල බොහෝ විට වෙනත් දෙයක් සඳහා යොදාගත හැකිය.

එහෙම නම් ඊලග කොටසෙන් හමුවෙමු ලෙන්ස් ගැන කතා කරන්න.... එතෙක් ආයුබෝවන්.

කැමරාවේ ෂටරයේ ආයුකාලය දැනගන්න මෙතනට යන්න..

http://www.camerashuttercount.com/

ජායාරූපකරණය ගැන සිංහලෙන් 2

noreply@blogger.com (ක්සැන්ඩරයා) — Mon, 30 Jun 2014 08:40:00 +0000

ජායාරුපකරණය ගැන සටහන් මාලාවක් ලෙසින් ඔබ වෙත එන ලිපි පෙළක දෙවැන්න මේ.

මුලින්ම අපි බලමු කොහොමද කැමරාවකින් ගන්නා පින්තුරයක් කැමරාවේ සටහන් වෙන්නේ කියල.

කැමරාවේ ෂටර් බොත්තම එබූ සැනින් අපිට ඇහෙන්නේ ක්ලික් ශබ්දයක් නේ. ඩිජිටල් කැමරාවක දී නම් වෙන්නේ කැමරාවේ කාචය මත වන ප්‍රතිබිම්බය ආලෝක සංවේදී පරිපථයක් මතට පතිතවී එතනින් එය සැකසුම් වලට ලක්වී මතක ගබඩාවට සේයාරුවක් විදියට යවන එක. නමුත් ඇනලොග් කමරාවකදී මේ දේ සේයා පටලයක් මතට ප්‍රතිබිම්බය වැටීමෙන් සේයා පටලයේ රසායනික වෙනස්කමක් මගින් ආලෝක සංවේදී භාවය ලැබීම වෙන්නේ,.

ඉතිං මෙහෙම ගන්න සේයා රූ ගන්න අද වෙද්දී ගොඩක් අය භාවිතා කරන්නේ ඩිජිටල් කැමරා. ඇනලොග් කැමරා භාවිතා කරන සේයාරූ ගන්නා අයත් නැතුවාම නෙවෙයි. නමුත් එයාල මේ දේ කරන්නේ වෘත්තිමය අවශ්‍යතා වලට හෝ විනෝදාංශයක් විදියට.

ඇනලොග් සහ ඩිජිටල් කැමරා වලදී ඇති ප්‍රධාන වෙනස තමයි ඇනලොග් කැමරාවෙන් ගන්න පින්තුරයක පෙර දැක්මක්, එහෙම නැතිනම් ප්‍රීවිව් එකක් බලාගන්න බෑ. ඒ වගේම ආලෝකය රඳවා ගන්න ඒ ඒ ආලෝකයට අවශ්‍ය තීව්‍රතාවට සරිලන පටල අවශ්‍ය වෙනවා. ඉතිං ඇනලොග් කැමරාවක පින්තුර ගත්තට පස්සේ අවසාන අදියරේ දී පටල මුද්‍රණය කරන්න ගියාම තමයි බලාගන්න වෙන්නේ මොකක්ද ෆොටෝ ටිකට වුනේ කියලා. ඩිජිටල් කැමරාවකින් ගන්න පින්තුරයක ඒ මොහොතේම සජීවී දර්ශනය බලන්නත් ඒ ඇසුරෙන් අවශ්‍ය සුදානම සිද්ධ කරන්නත් අවසානයේ ගන්න පින්තුරය කොහොම එකක් ද කියල බලන්නත් ඒ මොහොතේම අවශ්‍යනම් පින්තුරය මකා දමා නැවත ගන්නත් හැකියාව තියනවා. ඒ වගේම පටල සංවේදීතාවය පාලනය කරන්න ඒ මොහොතේම හැකියාව තියනවා.

ඉතිං ඇනලොග් කැමරා භාවිතය අසීරුයි. ඊට වඩා ඩිජිටල් කැමරා භාවිතාව පහසුයි. මේ පහසුකම නිසා අද වෙද්දී ඇනලොග් කැමරා භාවිතයට නොගන්න තරම්,. ඇනලොග් කැමරාවක රාමුව සාමාන්‍ය විදියට 36×24 mm පමණ වෙනවා. මේ ප්‍රමාණයට ඩිජිටල් කැමරා වලදී කියන්නේ Full Frame (Nikon : FX) එහෙමත් නැතිනම් සාමාන්‍ය ඇනලොග් කැමරා රාමුවේ ප්‍රමාණය කියල.

මෙතනට ආවාම ඔයාල අහයි එහෙනම් අනිත් ඒවා මොනවාද කියල. ෆුල්ෆ්‍රේම් DSLR වලට පස්සේ ගොඩක් තියෙන්නේ Nikon: DX mode එහෙමත් නැතිනං Crop Mode කියන රාමු ගන්න පුළුවන් කැමරා. මේවත් DSLR විශේෂයක් වුනත් මේ කැමරා මිලෙන් සාපේක්ෂව ෆුල් ෆ්‍රේම් කැමරාවකට වඩා අඩුයි. ඊට පස්සේ එන්නේ බ්‍රිජ් කැමරා සහ පොයින්ට් ඇන්ඩ් ෂුට් වර්ගයේ කැමරා. මේ අවසාන එකට ජංගම දුරකථන කැමරා ඇතුලත් කරන්නත් පුළුවන්

ක්‍රොප් මෝඩ් එක ගැන කියද්දී ලාබයි කිව්වනේ..දැන් ඉතිං හිතන්න එපා "ඈ.. ලාබයි නං හිලක් ඇති" කියල.. "හිලක් නැති පුනීලෙන් වැඩක් නෑ නේ මුදලාලි" කිව්වා වගේ මේ කැමරා වලිනුත් ගන්න වැඩ එමටයි. මේ කැමරා බෝහොකොටම වනසතුන් ගේ සේයාරූ ගන්න අය වගේම ක්‍රීඩා වල සේයාරූ ගන්න අය භාවිතා කරනවා. හේතුව මේ කැමරා ලෙන්ස් බොහෝ කොටම FX කැමරාවකදී ඒ සමාන කාච ඇති ලෙන්ස් එකක නාභි දුර මෙන් 1.6 ගුණයකින් (මේ අගය විවිධ කැමරා වලදී වෙනස්වීමකට ලක්වන බව සලකන්න) වැඩි දුරක් ආවරණය කරන නිසා. ඉතිං වැඩි විස්තර පසුවට කතාකරන්න තියල අපි යමු ඊළඟ කොටසට.

බ්‍රිජ් සහ පොයින්ට් ඇන්ඩ් ෂූට් වර්ගයේ කැමරා වලදී අපිට අවශ්‍ය විදියට ලෙන්ස් මාරු කරන්න හැකියාවක් බෝහොකොටම නෑ. ඒ එක්කම අපිට ජායාරුපකරණයේ දී අවශ්‍ය වන අනිකුත් සීරුමාරු කිරීමේ හැකියාවන් ද බොහෝ දුර්වලයි. ඒ නිසා මම මේ දෙක ගැන කතා කරන්නේ නෑ.

මෙතැනදී අපි කැමරා ගැන කතා කරන්න අදහස් කරන්නේ ෆුල් ෆ්‍රේම් එහෙමත් නැතිනම් ක්‍රොප් මෝඩ් කියන දෙවර්ගයේ සැකසුම්, පහසුකම් සහ භාවිතයන් ගැන විතරක් කියල සටහන් කරන්න කැමතියි.

ඉතිං, දැනටම ඔයාල දන්නවා ඇති කැමරා නිෂ්පාදකයින් ගොඩක් දෙනෙක් ගැන. කැනොන්, නිකොන්, සෝනි වගේ සමාගම් මේ අතරේ ඉන්නවා. ඊට අමතරව තවත් කැමරා මෝස්‌තර නිෂ්පාදනය කරන්න සමාගම් කීපයක් ම ඉන්නවා. ඒ අතරේ සැම්සුන්ග්, ෆුජි වගේ ආයතනත් Hassleblad, Leica වගේ ආයතනත් Pentax කැමරා හදන Ricoh සමගමත් අපිට ගන්න පුළුවනි. (මේ සමහර නම් ඔබට හා මට හුරු නිසා සිංහලෙනුත් අනිත් නම් ඇතැම්විට කියවන විදියේ වෙනසක් වේ දෝ කියා ඉංග්‍රීසියෙනුත් සටහන් කර ඇති බව කරුණාවෙන් සලකන්න.)

මේ එක එක කැමරා වල පොඩි පොඩි වෙනස්කම් තිබුණද ඒවා සියල්ල තුල අඩංගු වන පොදු කාරණා කීපයක් තිබෙනවා,.

ඒ ආලෝක පටල සංවේදීතාව හෙවත් නුතන ISO (පෙර ASA), ෂටරයේ ද්වාර වේගය (Shutter Speed) සහ Aperture (මේ වචනයට කියන සිංහල තේරුම මම ඇත්තෙන්ම දන්නේ නෑ. දන්නා කෙනෙක් සිටි නම් පවසන්නයි ඉල්ලා සිටිනවා.) කියන සැකසුම් තුන. මේ තුන හරියටම පාද තුනක් වගේ. මේ පාද තුන සමබරව තියේ නම් අපිට මුලික මට්ටමේ හොඳ සේයාරුවක් ගන්න හැකියාව තියනවා. ඒ සේයාරුව තවත් එක ස්නැප් ෂොට් එකක් නොවෙන්න මෙතනින් එහාට දේවල් ටිකක් දැනගන්න අවශ්‍ය වෙනවා.

එහෙනං ඒ කොටස එක්ක ඊළඟට හමුවෙමු. එතකං බලන්න රෑ අහසේ මැවුණු සිත්තමක් දිහා..

ක්ෂීරපථය දෝහා වෙත ජුනි 26 වෙනිදා මැදියම් රෑ ඉකුත්වෙද්දී පෙනුණු හැටි
ජායාරුප අයිතිය: මගේ සහ තරිඳු රොඩ්රිගෝ ගේ.

(මගේ අලුත් ලැප් එක නිසා මට සිංහල ලියන්න විදියක් නෑ. ඒ නිසා මගේ ලිවීම ටිකක් ප්‍රමාද වෙනවා. ඇපල් වල සිංහලෙන් ලියන්න දන්නා කෙනෙක් ඉන්නවානං (මට යතුරු පුවරුව සිංහලෙන් හුරු නෑ. ගූගල් පාවිච්චි කරන්නේ මේකේ.) පොඩ්ඩක් කියල දෙන්න. ලොකු උදව්වක් වේවි.)

ජායාරූපකරණය ගැන සිංහලෙන්

noreply@blogger.com (ක්සැන්ඩරයා) — Wed, 28 May 2014 17:14:00 +0000

The '7', යකඩින් නිර්මිත මූර්තිය - දෝහා ඉස්ලාම් කළා කෞතුකාගාර ජැටිය මත

අලුත් වැඩකට අතගැහුවා මේ ටිකේ. ඒ තමා සිංහලෙන් කියන ෆොටෝග්‍රැෆි නැත්තං ඉංග්‍රීසියෙන් කියන ජායාරූපකරණය කියන විෂයය.

මේක ටිකක් වියදම් යන ඒ වගේම මුදල් හොයන්න පුළුවන් විෂයක්. මම මේකට විෂයයක් කියල කියන්නේ, මේ කලාව පොටෝ එකක් ගැහුවා ඉවරයි කියන තැනින් ඔබ්බට විහිදෙන පුළුල් පථයක් තියන ගැඹුරක් තියන දෙයක් නිසාවෙන්.

මේ ගැන හදාරන්න වෙනමම කාලයක් ගතවෙන දෙයක්. මමත් ඉතිං පහුගිය කාලේ කලේ මේ විෂය ටිකක් ගැඹුරින් හදාරපු එක. තවමත් මම ඒ ගැන හදාරනවා. ඉතිං ඒ අතරේ මම කල්පනා කළා මම හදාරන දේවල් ටිකක් සිංහලෙන් ලියන්න කියල.

කොහොමද හරි විදියට ෆොටෝ එකක් ගන්නේ කියන තැන ඉඳල ෆොටෝ වල ෆයිනල් ප්‍රොසෙසින් එහෙම නැත්තං පොස්ට් ප්‍රොසෙසින් කියන කොටසත් කැමරා වල සෙටින්ග්ස් ටිකක් කරගන්නේ කොහොමද වගේ දේවලුත් මම ලියන්න බලාපොරොත්තු වෙනවා.

ඒ අනුව ලියවෙන ලිපි මාලාවක් ඉදිරියේදී බලාපොරොත්තුවන්න කියන ගමන්ම මම ඔබට මතක් කරන්න කැමතියි, මේ ලියවෙන්නේ ආධුනිකයෙක් අතින් වන ලියවිල්ලක් බව.

හිට්ලර් ගේ බ්‍රිතාන්‍යය..

noreply@blogger.com (ක්සැන්ඩරයා) — Thu, 22 May 2014 19:16:00 +0000

කාලෙකින් පස්සේ ලියන්න හිතුනා. ඒ හිතුන එකේ අලුතෙන්ම දෙයක් ලියන්න ඕනේ කියලත් හිත කිව්ව නිසා නතර කරපු කතාව පස්සේ කියන්න හිතාගෙන මම අලුත් තැනකින් ම පටන් ගන්න හදන්නේ.

හිට්ලර් කියන්නේ මගේ බ්ලොග් එකේ ගොඩක් ජනප්‍රිය වෙලා හිටපු කෙනෙක් නෙව. ඒ හින්දා අද මම එතැනින්ම පටන්ගන්න හිතාගත්තා.

හිට්ලර් බ්‍රිතාන්‍ය අත්පත් කරගන්න සැලසුම් කලේ ප්‍රංශය අල්ලන්න පටන්ගන්නත් ඉස්සර වෙලා කියල ඇතැම් තැන්වල කතා බහ වෙනවා. ඒ කොහොම වෙතත් හිට්ලර් බ්‍රිතාන්‍යය අත්පත් කරගන්න විතරක් නෙවෙයි බ්‍රිතාන්‍යය පාලනය කරන්න පාලන සැලසුම් පවා සකස් කර තිබුණා.

මේ පාලන සැලසුම් අතරේ හිට්ලර් සතුව ඔහුට පක්ෂපාත වීමට කැමති, ඒ කියන්නේ ඔහුගේ මතය පිළිගන්නා අය, එසේ පිළිගනීවි යයි විශ්වාස කල අය, ඔවුන් සතු කාර්යභාරයන් වගේම ඔවුන්ගේ ලිපිනයන් පවා තිබුණා කිව්වොත් ඔබ විශ්වාස කරනවද?

ඔව් ඇත්තෙන්ම ඔහු සතුව මේවා තිබුණා. ඒ වගේම ඔහු සතුව ගිනිතබා විනාශ කල යුතු පොත් පත් පවත්නා පුස්තකාල වල ලයිස්තුත් තිබුණා. සංවිධාන වගේම ඒ සංවිධාන වල සාමාජිකයන් හා ඔවුන්ගේ කාර්යයන් පිළිඹඳ ඔහු මැනවින් දැන සිටියා. ඉනුත් ඔහු මුලින්ම මරාදැමීමට හෝ අඩපන කිරීමට අවශ්‍ය අය වෙන්කර හඳුනාගෙන තිබුණා.

හිට්ලර් තමන්ගේ බ්‍රිතාන්‍ය පාලනය තමන් වෙනුවෙන් පවරන්නත් සිවිල් පරිපාලනය බ්‍රිතාන්‍ය සිවිල් නිලධාරින් ලවා කරවාගැනීමට ඔහුට පක්ෂපාත වන කොටස් පවා වෙන්කරගෙන හිටියා කිව්වොත් ඒක මං හිතන්නේ අලුත්ම ආරංචියක් වේවි.

ඉතින්, වැඩ ගොඩක් මැද්දේ හිරවෙලා වසරක් නිහඬ වෙලා ඉඳල මේ පටන්ගන්න දෙවැනි වාරයට හැකි හැමෝම ඇවිත් යාවි කියල හිතනවා. වැඩ රාජකාරි බහුල වෙලා බ්ලොග් ගැන කලකිරිලා ලියන්නත් එපා වෙලා හිටියට මේක අබිං කෑවා වගේ වැඩක් කියල තේරෙන්නේ ලියන්න ගත්තම තමා..

එහෙනම් විස්තර සහිත ලිපි මාලාවක ඇරඹුමක් එක්ක එකතුවෙන්න ක්සැන්ඩරගේ කොළම එක්ක..

ජපානය කඩදාසි බැලුන් බෝම්බ යොදා ඇමරිකානු භුමිය වෙත බෝම්බ හෙලයි..

noreply@blogger.com (ක්සැන්ඩරයා) — Thu, 07 Feb 2013 09:05:00 +0000

මේ දෙවන ලෝක යුද්ධය ගැන ලියවෙන ලිපි මාලාවක 6 වැනි ලිපියයි.

ගූගල් දෙයියෝ පිස්සුවක් කෙළලා බ්ලොග් රෝල් වල බ්ලොගේ අප්ඩේට් වෙන්නේ නැති අය මෙතනින් ඒ ලිපියට යන්න ==>

දෙවැනි ලෝක යුද්ධය ගැන ලියැවුණු සම්පුර්ණ ලිපි මාලාවට මෙතැනින් යන්න. ==>

සිදු වූ අපහසුතාවට සමාව......

ජපානය කඩදාසි බැලුන් බෝම්බ යොදා ඇමරිකානු භුමිය වෙත බෝම්බ හෙලයි..

noreply@blogger.com (ක්සැන්ඩරයා) — Sun, 03 Feb 2013 13:31:00 +0000

ජපානය කඩදාසි බැලුන් බෝම්බ යොදා ඇමරිකානු භුමිය වෙත බෝම්බ හෙලයි..

යුද්ධයේ නවතම තතු බලාපොරොත්තු වන්න..

මේ 1940 දශකයේ පලවිය හැකිව තුබූ එක්තරා ප්‍රවෘත්ති සිරස්තලයක්. එහෙත් එකල උපායමාර්ගික ඇමරිකානු පුවත් වාරණ නිසා පල නොවූ පුවතක්..

ඔබ දන්නවාද ෆු ගෝ (FU-GO) ගැන? අහලා තියනවාද බැලුන් බෝම්බ ගැන? එසේනම් එන්න කියවන්න දැනගන්න.. ජපානයේ කඩදාසි බැලුන් ව්‍යාපෘතිය හෙවත් ෆූ ගෝ ගැන.. මේ බොහෝ ඇමරිකානුවන් අදටත් නොදන්නා කතාවක්..

ෆුගෝ බැලුන් බෝම්බය ක්‍රියාකාරිව.
පින්තුරය ගත්තේ මෙතනින්

ඇමරිකාව එක්ක ජපානයට තිබුනේ මම කලිනුත් කීවා වගේ උපාය මාර්ගික සටනක්. ඒත් ඇමරිකානු ස්ථාවරය වුනේ යුද්ධයට වඩා ලෝක පොලිස්කාරයාගේ ජවනිකාව රඟදක්වන චේතනාවක්. ඒ නිසා මුලදී ඇමරිකාව ලෝක යුද්ධයේ පාර්ශව කරුවෙක් වුනේ නෑ. ඒත් පර්ල් වරාය සිද්ධිය මත පදනම්ව 1942 දෙසැම්බර් 8 වැනිදා ඉඳං ඇමරිකාව දෙවැනි ලෝක යුද්ධයේ සක්‍රිය දායකත්වයක් දරනවා.

මේ යුද්ධයේදී ජපානය ඇමරිකාව වෙත එල්ල කරන්නේ අසමාන වූ ප්‍රහාරයන්. එයින් බොහෝ ඇමරිකානු භටයන් මිය යනවා වගේම ඇමරිකාව න්‍යෂ්ටික බෝම්බය ජපානයට එරෙහිව භාවිතා කරන්නත් පොළඹවනවා. ඒ එක්කම මේ සටනේ දී බොහෝ විට සියලුම පාර්ශවයන් ඉතාම වෙනස්ම වූ ආකාරයේ යුධ අවි සැලසුම් භාවිතා කරනවා. එයින් එකක් වන්නේ ඇමරිකානු වවුල් බෝම්බය. (කියවපු නැති කෙනෙක් ඉන්නවා නම්මෙතන කොටන්න. ඊට අමතරව ජර්මානු පාර්ශවය ගැන දැනගන්න ඔබට මෙන්න මෙතැනින් පුළුවන්.)

ජපානය 1943 නොවැම්බර් 3 වැනිදා:

ජපානයේ හොන්ෂු දිවයිනේ චෝෂි සහ කමිසු යන නගර දෙක ආසන්නව වෙරළ තිරයේ සිට විශාල කඩදාසි බැලුන් විශාල සංඛ්‍යාවක්‌ ගුවන් ගත වනවා. මේ සුදෝ සුදු බැලුන් සමුහය පෙනුමින් කාලගුණ බැලුනවල හැඩය ගත්තත් ඒවා යටින් කාලගුණ දත්ත ගන්නා උපකරණ වෙනුවට ඇත්තේ බෝම්බ කීපයක්, වැලි මළු එල්ලූ රවුම් බයිසිකල් රෝදයක හැඩය ගත් යමක් සහ තවත් උපකරණ කීපයක් පමණයි.

ඒ බැලුන වල අවසාන ගමනාන්තය ඇමරිකානු එක්සත් ජනපදයයි.

ජපානය ඇමරිකාවට සැතපුම් 6000 කට ආසන්න දුරකින් පිහිටන දුපත් සමුහයකින් හෙබි රටක්. එහි සිට දින 8 – 12 අතර දින ගණනක නාවික ගමනකින් තමයි ඇමරිකාව පිහිටා තිබෙන්නේ. එවන් වූ දුරකින් හෙබි රටකට ඔවුන් කඩදාසි බැලුන මගින් පහරදීමට උත්සාහ කිරීම ඇතැම්විටක ඔබට පුදුමයක් ඇති කරනු ඇති.

ජපානය 1943:

පාසල් යන ගැහැණු ළමුන් කණ්ඩායම් ඇතුළු විවිධාකාර පිරිසක් විසින් සුමෝ ශාලා කබුකි නෘතය ශාලා වැනි ස්ථාන වලට එක්වී අඩි 2 x 2 ප්‍රමාණයේ වෂී ( Washi) ලෙස හඳුන්වනු ලැබූ මල්බෙරි කඩදාසි වලින් මේ බැලුන් සකස් කරන ලද අතර ඒවා යොදා සාදන ලද බැලුන අඩි තිස් දෙකක වටප්‍රමාණයකින් සමන්විත වුනා. බැලුන වල ඉහල කොටස කඩදාසි තට්ටු හතරක් වන ලෙසටත් පහල කොටස කඩදාසි තට්ටු තුනක් වන ලෙසටත් කොන්යක් (Konjak) අල වලින් සාදන ලද මැලියම් තට්ටු වලින් අලවනු ලැබුවා.

මුලින්ම මේ බැලුන් නිර්මාණය සඳහා ඔවුන් භාවිතා කලේ රබර් මිශ්‍රිත සිල්ක් රෙදි. ඒත් පරීක්ෂණ වලදී ඔවුන් හොයාගත්තේ ඒ රෙදි වල හයිඩ්රිජන් කාන්දුවක් තිබෙන බවයි. ඒ නිසා බලාපොරොත්තු වන ඉලක්කයට කරා බැලුනය ගමන්කරවීමට නොහැකිවන බව ඔවුන් තේරුම්ගත් අතර ඉන්පසු කලේ පාසල් ළමුන් ඇතුළු පිරිස් යොදවා මල්බෙරි කඩදාසි බැලුන තැනීමයි.

තමා කරන්නේ කුමක්ද කියා නොදැන සිටි බොහෝ ජපාන දරුවන් දවසට පැය හයක හෝ හතක ශ්‍රමය මේ සඳහා වියදම් කළා.

මෙසේ සාදනු ලැබූ බැලුන වලට අඩි 35000 ඉහල අහසේ රැඳෙන්නට හැකියාව තිබුණු අතර රාත්තල් 400 ක බරක් ද මුහුදු මට්ටමට ආසන්නයේදී රාත්තල් 450 ක ප්‍රමාණයක්ද බර දරාගන්නට හැකියාව තිබුනා. මේ බැලුන කිලෝ 15 ක පුද්ගල නාශක බෝම්බයක් ද තවත් කිලෝ 12 බැගින් වන ඉන්සින්ඩ්යරි බෝම්බ 2 ක්ද තමන්ගේ පේ ලෝඩ් ඩිලිවරි එක නොඑසේ නම් ප්‍රහාරක බලය ලෙස රැගෙන ගියා. ඊට අමතරව බැලුනය සතුව තවත් එක ෆ්ලෑෂ් බෝම්බයක් එහි බඳෙහි අලවා තිබුණු අතර එය බැලුනයේ ප්‍රධාන පරිපථයේ සිට මීටර් කීපයක් දිග ෆියුස් එකක් හෙවත් වෙඩි නුලක් ආධාරයෙන් රඳවා තිබුනා. ඒ සියල්ල සමගින් බැරෝ මීටරයක් ද සංකීර්ණ ක්‍රමයකින් යා කරන ලද වැලි මළු සමුහයක් බයිසිකල් රෝදයක් වැනි ඇටවුමකද අටවා තිබුනා.

මේ බැලුන වල පාලන ක්‍රමය ස්වයංක්‍රීය වුවක් වූ අතර එය ද ඉතා අපුර්ව වුවක්. එමගින් බැරෝ මීටරයක සහය ඇතිව බැලුනයේ උස ගණනය කරමින් උස නියතියක (අසන්න වශයෙන්) පවත්වාගන ගිය අතර එහිදී අඩි 35000353500035000ක හෙවත් කිලෝමීටර් 11.5 ක ඉහල අහසේ බැලුනය හැම විටකම රැඳෙන ලෙසත්, ඔරලෝසුවක ආධාරයෙන් දින හතර හමාරක් ගණනය වන ලෙසට සැකසු ටයිමරයක් මගින් බෝම්බ අත් හැරීමටත්, එසේ ඉලක්කය සපුරාගත් විගස බැලුනය ඉහල අහසට නැග පුපුරා විනශ වන ලෙසත් මේවා සැලසුම් කර තිබුණා. අඩි 35000 ඉක්මවන විටක බලුනයේ තිබු ස්වයංක්‍රීය පාලන උපකරණ ආධාරයෙන් බැලුනය තුල වන හයිඩ්‍රජන් පිට කර හරිනු ලබන අතර බැලුනය අඩි 35000 වඩා පහල යන විට බැලුනය එහි වූ වැලි මළු වලින් දෙක බැගින් අතහරිමින් උස සකසා ගන්නවා. මේ ක්‍රියාවලිය ඔස්සේ බැලුනය එහි උස පවත්වාගන යාමට ක්‍රියා කරමින් අඩි තිස්පන්දහසේ රැඳී ඉන්නවා.

එසේ අඩි තිස්පන්දහසක ම මේ බැලුන වලට රැඳී ඉන්නට අවශ්‍ය වුයේ ඇයි?

ඒ ප්‍රශ්නයට දෙන උත්තරය පසුපස මේ බැලුන වල සම්පුර්ණ කතාවම රැදී තිබෙනවා ය කිව්වොත් ඔබ සමහර විටක මාව විශ්වාස නොකරාවි.

1940 දශකයේ කිසිවෙකු ඒ වන විට ඒ තරම් නොදන්නා දෙයක් ජපනුන් ඒ වෙද්දීත් යුද්ධය සඳහා භාවිතා කරගෙන තිබුණා. ඒ ජෙට් සුළං ප්‍රවාහයක්. මේ සුළං ප්‍රවාහය මධ්‍යම ජපානය හරහා පැසිෆික් සාගරය මතින් ඇමරිකාවට දෙසට ඇදෙන අතර ඒවා ඉතා වේගවත් වනවා. වර්තමානයේ ජෙට් සුළං ධාරා (Jet Streems) ලෙස හඳුන්වන මේ සුළං ප්‍රවාහ කොටස් දෙකකින් යුතු වෙනවා. ඒ කොටස් දෙක Sub Tropical Jet Streems සහ Polar Jet Streems ලෙස අද හඳුන්වනවා. මෙයින් Subtropical Jet සුළං ධාරා වලින් එකක් ජපානයේ මැදින් හමා ගොස් ඇමරිකාව මැදින් වන්නට හමා යනවා. මේ ප්‍රවාහය හමා යන්නේ අඩි 35000 ක උසකින් වන අතර ඒ සුළං ධාරා බොහෝ විටම පැයට සැතපුම් 90 ත් 300 ත් අතර වේගයකින් හමා යනවා.

ජපනුන්ගේ ගණනය කිරීමට අනුව මේ ජෙට් ප්‍රවාහය ජපාන වෙරළ තීරුවේ සිට ඇමරිකානු වෙරළ තීරය දක්වා ගමන්ගන්නට දින හතරක සිට පහ දක්වා කාලයක් ගන්නවා.

ඉතින් මෙන්න මේ කරුණු එක්ක ජපානය සැලසුම් කරන්නේ සුළං ප්‍රවාහ ඔස්සේ යවන බැලුන මාර්ගයෙන් ඇමරිකාව වෙත ප්‍රහාරයක් එල්ල කිරීමටයි. ඉතා ලාභදායි ලෙස සැලසුම් කරන මේ සඳහා ඔවුන් යොදා ගන්නේ බැලුන මගින් සිදු කරන ප්‍රහාරයන් මාලාවක්.

ජපාන ජෙනරාල් කුසාබා සුඑයොශි (Kusaba Sueyoshi) ගේ නායකත්වයෙන් ඇරඹෙන මේ මහා ව්‍යාපෘතිය යටතේ 1943 සිට 1944 දක්වා බැලුන 9000 පමණ ප්‍රමාණයක් ගුවන් ගත කරනු ලබන අතර ඒවා ඇමරිකාවේ වොෂින්ටන් (මේ නැගෙනහිර වෙරළාසන්න මේරිලන්ඩ් හි ඇති වොෂින්ටන් ඩී. සී. නොවේ) ඔරිගොන් කැලිෆෝනියා වැනි වෙරළබඩ ප්‍රදේශ වල සිට ක්‍රමිකව රටේ අභ්‍යන්තර කොලරාඩෝ යුටා මොන්ටානා ඉඩහෝ වැනි ප්‍රදේශ වලටත් ඉන් පසුව රටේ ඉහල කොටසේ කැනඩාවට මායිම් වන කොටස් ඩකොටා මිචිගන් අයෝවා වැනි ප්‍රදේශ වලට මේ බැලුන වලින් ප්‍රහාර එල්ල වෙනවා. එසේම සමහර බැලුන මැක්සිකෝව සහ කැනඩාවේ දකුණුදිග ප්‍රදේශ වලත් ප්‍රහාර ඇති කල බවට වාර්තා තිබෙනවා.

ජපාන ජෙනරාල් කුසබා සුඑයෝෂි
පින්තුරය ගත්තේ මෙතනින්

කෙසේ වුවත් මේ ප්‍රහාර තැන තැන කුඩා ප්‍රමාණයේ වනාන්තර ගිනි ගැනීම් සහ වෙනත් සුළු සිද්ධි හැරුණකොට සිදු කර තිබෙන අලාභය ඉතාම සුළු වුවක්. එහෙත් ඇමරිකානු භුමිය තුල දෙවැනි ලෝක යුද්ධයේ දී වාර්තා වූ එකම සිවිල් මරණ වලට හේතුව නම් මේ බැලුන බෝම්බයක්. එයට බිලිවුයේ කුඩා දරුවන් 5 දෙනෙකු සමග පල්ලියක චාරිකාවකට ගිය ගැබිණි මවක්. ඒ 1945 මැයි මස 5 වැනිදා. ඒ දකුණු දිග ඔරිගන් ප්‍රාන්තයේ ග්‍රේට් හාට් කඳුවැටියේ දී. එහිදී ද මේ පිරිස වෙත බලුනයෙන් කෙලින්ම එල්ලවූ ප්‍රහාරයකට වඩා සිදුවී තිබුනේ එහි වූ කුඩා දරුවන් අතුරින් අයෙකු ගසක පැටලී තිබු මේ බැලුනයක් බිමට ඇදීමට උත්සාහ කිරීමේදී එහි වූ බෝම්බයක් පිපිරී සිද්ධ වූ අනතුරක් ලෙසයි. මේ පහත ඇත්තේ ඔවුන් අනතුරට ලක්වූ ස්ථානයේ වන සමරු ඵලකයයි.

කෙසේ වුවද ඇමරිකාව මේ අනපේක්ෂිත අහසින් වැටෙන තර්ජනය ගැන සුළු කොට තැකුවේ නෑ.

1943 දෙසැම්බර් 6 වැනිදා :18 :15 පැය..

ඇමරිකාවේ වයෝමින්ග් හි තර්මොපොලිස් හි සිටි පතල් කම්කරුවන් තිදෙනෙක් පතලට පිටින් යම්කිසි කාර්යයක දී සිටිනවා. එහි වූයේ පිරිමින් දෙදෙනෙකු සහ ගැහැනියක්. එහි වුන් විස්තර කරන පරිදි හවස හයයි කාලට පමණ ඔවුන්හට ඉහල සිට යමක් අත්හැරෙනවිට නැගෙන විසිල් ශබ්දයක් ඇසී තිබෙනවා. ඊට මොහොතකට පසු ඔවුන් හට ඇසුනේ පිපුරුම් ශබ්දයක්. ඒ සමගින් ඉහල බලන ඔවුන් දකින්නේ පොලවට ඉතා ඉහලින් වූ ගිනි ජාලාවක් සහ පැරෂුටයක් වැනි යමක් පොලවට පහත්වන දසුනක්. ඒ කුමක්ද යන්න ඔවුන් කිසිවෙකු සතුව අදහසක් තිබුනේ නෑ.

මේ සිද්ධියෙන් සතියක් ගතවීමටත් පෙර මොන්ටානා ජනපදයේ කැලිස්පෙල් හි වනාන්තරයක දී මිනිසුන් දෙදෙනෙකු විසින් විශාල බැලුනයක යයි සිතිය හැකි සුන්බුන් සහ අවශේෂ කොටස් සොයාගන්නා අතර එහි වූ ජපන් අක්ෂර නිසා ඔවුන් එය ඇමරිකානු ආරක්ෂක ඒකක වෙත දැනුම් දෙනවා.

ඇමරිකානු FBI ආයතනයේ පරික්ෂාවට ලක්වෙන මේ සිද්ධිය ගැන ක්‍රමිකව අදහසක් ගැනීමටත් පෙර 1943 දෙසැම්බර් 19 වැනිදා ද මෙවන් සිද්ධියක් ඇමරිකාවේ කැලිෆෝනියාවෙන් වාර්තා වෙනවා. එසේ වුවද එහිදී පරීක්ෂකයන්ට කිසිවක් හමුවන්නේ නෑ. එහෙත් දෙසැම්බර් 31 වැනිදා වන විට ඔවුන්ට ඔරිගොන් හි ටස්කාඩා ආසන්නයේ වූ ගසක පැටලී තිබෙන කඩාවැටුණු බැලුනයක් හමුවෙනවා. එහි බොහෝ කොටස් නිරුපද්‍රිතව පැවතුනා.

පරීක්ෂණ වලදී ඒ කොටස් ජපානයේ සිට ආ ඒවා බවට ඔවුන් එක විටම සිතුවේ නෑ. කෙසේ හෝ ඔවුන් සිතුවේ ඇමරිකාවේ වූ ජපන් ප්‍රජාව විසින් මෙය සිද්ධ කරන ලද දෙයක් බවයි. ඒ එහි වූ වැලි මළු සාමාන්‍ය ජපනුන් භාවිතා කරන සහල් මළු නිසාවෙන් සහ එතරම් දුරකට (ජපානයේ සිට ඇමරිකාවට) මෙතරම් සරල බැලුනයකට යා නොහැකි නිසාවෙන්. එහෙත් තව දුරටත් කරන ලද පරීක්ෂණ වලදී ඔවුන් තේරුම් ගත්තේ මේවා ජපානයේ දී ම එකලස් කර ඇමරිකාව වෙත එවන්නාවූ බැලුන බවයි. ඒත් එහිදී ද ඒවා ඇමරිකාව වෙත ගෙන එන තාක්ෂණය ගැන ඔවුන් එතරම් දැනුවත් වුයේ නෑ. එවන් වූ සරල උපකරණ භාවිතා කරමින් ඔවුන් ලොව ප්‍රථම ක්‍රියාකාරී අන්තර්මහද්වීපික ප්‍රහාරක බෝම්බ හෙලන අවිය නිපදවා තිබුණු අතර එය මගින් ඇමරිකාව ත්‍රස්ත කරන්නට ඔවුන්ට හැකි වුනා.

ජපානය ඇන්ත්‍රක්ස් නම් වූ විෂ බීජය නිපදවන බව එවකට ඇමරිකාව දැන සිටියා. ඒ ජපානය ඇන්ත්‍රක්ස් විෂ චීනයේ පතුරුවා තිබුණු බැවින්. ඒ නිසා මේ අමුතු තර්ජනය ඇමරිකාවේ ඇස අරවන්නක් මෙන්ම දැඩිව රිදවන්නක් වුනා.

ඇමරිකානුවන් මෙයට දැක්වුයේ කිනම් ප්‍රතිචාරයක්ද? බලාපොරොත්තුවන්න ක්සැන්ඩරගේ කොලම තුලින්..

සකල සිරින් පිරි සිරි ලංකාවේ හෙට දවස

noreply@blogger.com (ක්සැන්ඩරයා) — Wed, 21 Nov 2012 12:24:00 +0000

ලම්බෝගිනි ගලාඩෝ ගන්නට
පෙරුම්පුරයි අපි දැන් රැල්ලට
ඒත් කොස්සකි එහෙම ගන්නට
නැත්තේ පාරකි අපිට යන්නට

ගමට එන අප පාර
කැඩිලා සත් වසකි ඒපාර
හදලා දුන්නොත් පිනකි මාර
පදින්න මගේ ෆෙරාරිය දාර

පුංචි ගානකි යන්නේ
ඕවා මෙහෙ ලාබ නෑ නේ
කියමිනි සුද්දෝ එන්නේ
අනේ මම හීනද දකින්නේ

මරුටියම දහ අටයි
දැන් නම් ටිකක් වැඩි වෙයි
ඒත් පෝසේ එකම විස්සයි
ඉතිං මොකටද මරුටි? අපි ගයි!!

ටැක්ටර ගත්තේ හාන්නට
රටට බත් ටික දෙන්නට
දැන් ඉතිං ඒ ගානට
ගනිමි රේසිං කාර් හානට

අම්මප යම් දිනක ඉදිරියට
ඉන්දියන් කාර් දකින්නට
යන්න වෙන්නේ කටුගෙට
හොරුත් යන්නෑ එය කඩන්නට

බස් රේඩියෝව සහ බ්ලොග් සම්මාන උළෙල.

noreply@blogger.com (ක්සැන්ඩරයා) — Sat, 29 Sep 2012 13:50:00 +0000

බස් රේඩියෝව බ්ලොග් සම්මාන උළෙලක් පැවැත්වුයේ මේ මම දන්නා මුල්ම වරය. ඇත්තෙන්ම බ්ලොග් සම්මාන උළෙලක් දියත් කරන එක නම් ඇත්තෙන්ම හොඳ දෙයක් ය. ඒ එමගින් ඇගයීමක් සමග බ්ලොග් කරුවන් දිරිමත් වීමක් සිද්ධ වන නිසා ය.

එහෙත් බස් රේඩියෝ බ්ලොග් සම්මානයේ මුල සිටම අවුල් තිබුණි. ඔවුන් සම්මාන උළෙල සැලසුම් කලේ පසුගිය ජුලි මාසයේ දිනයක් යොදාගෙන ය. එහෙත් සංවිධාන කටයුතු වල වූ අසංවිධානය මැනවින් පෙන්වමින් එය සැප්තැම්බර් මස තෙක්ම දිග ඇදෙමින් ඇවිත් අද දින සම්පුර්ණ වන්නේය.

බ්ලොග් සඳහා කැටගරි කීපයක් ඔවුන් නම් කල අතර එහිදී ලියාපදිංච් වුවන් සඳහා රේඩියෝ වැඩසටහන් පවත්වන ලදී. එය හොඳ දෙයක් වුවත් ඔවුන් ඉතා ඉක්මනින් කලේ කැටගරි වෙනස් කිරීමක් සිද්ධ කිරීමයි. සංවිධානය නිසි සේ වුවා නම් කැටගරි වෙනස් කරන්න සිද්ධ වෙන්නේ නැත.

බ්ලොග් ඇගයීම සඳහා වන විනිසුරු මඩුල්ල නම් කරන්නට ඔවුන්ට මසකට වඩා කල් ගියේ ඇයිදැයි ඔවුන් නිසි හේතුවක් දැක්වුයේ නැත. එය රහසක් ව තබා ගන්නට උවමනා කරුණක් බව මට නොපෙනෙතත් ඔවුන් එය රහසක් ලෙස අවසන් මොහොත තෙක්ම තබා ගත්තේ තමන්ගේ සංවිධානයේ අසංවිධානය වසාගන්න ගසනා තුරුම්පුවක් ලෙස බව මට සිතුනි.

මේ අතරම ඔවුන් පාඨක ජන්දය ගැනීමට ෆේස්බුක් ජන්ද පෝරමයක් දියත් කලත් තාක්ෂණික දෝෂ මත පැය කීපයකින් හකුලා ගන්නා ලදී. එයද මා දකින්නේ අසංවිධානයේ තවත් ඉමක් ලෙසය. ඉන් අනතුරුව ඔවුන් තමන්ගේ ඇගයීම් සඳහා වූ බ්ලොග් ලැයිස්තුවත් එහි ලියාපදිංචි වී සිටි බ්ලොග් වල සටහනකුත් ඉදිරිපත් කරන ලදී. ඒත් එතනත් දෝෂ සහිත බව ඔප්පු වුයේ ඒ සඳහා මගේ බ්ලොග් අඩවිය පෙනෙන්න නොමැති වීම නිසා ය. (මා දන්නේ මගේ අඩවිය ගැන පමණි. ඒ නිසා මා පාදක කරගත් මිනුම එයයි.)

දැන් කෙනෙකුට පෙනෙනු ඇත්තේ මේ සටහන හුදෙක් හිත අමනාපයෙන් ලියුවක් බවයි. නැත. හිතේ අමනාපයක් නැත. එහෙත් මට සිතුන විවේචනය මා සටහන් කලෙමි. එපමණකි.

ඇමරිකානු වවුල් බෝම්බය

noreply@blogger.com (ක්සැන්ඩරයා) — Fri, 10 Aug 2012 17:55:00 +0000

වවුලන් යොදාගෙන තනන ලද අපුරු සමුල ඝාතක අවියක් ගැන ඔබ අසා තියනවාද? ඇමරිකානු නිෂ්පාදනයක් වූ මෙය ඔවුන් තැනුවේ ජපානයට එරෙහිවයි.

එහෙනම් අද අපි කතා කරන්න යන්නේ ඉතිහාසයේ තවත් එක හැරවුම් ලක්ෂයක් වීමට තිබුණු තැනක් ගැනයි.එහෙනම් එන්න, කියවන්න, ඉතිහාසයේ සැඟවුණු තැන් අතරේ ඇති ඇමරිකානු වවුල් බෝම්බය ගැන.

පැසිෆික් යුද්ධය (Pacific War) , දෙවැනි ලෝක යුද්ධයේ තවත් එක කඩඉමක් සටහන් කරන සුවිශේෂී යුද්ධයක්.

ජපානය, 1941 දෙසැම්බර් මාසයේ 8 වැනිදා (ජපාන වේලාවෙන් ) ජපාන නාවික හමුදා ප්‍රහාරයක් ඇමරිකානු පර්ල් වරායට එල්ල වෙනවා. විශ්මය දනවන ලෙස සිදුවන මේ ප්‍රහාරය සමගින්ම ඇමරිකාව සක්‍රීයව ජපානයට විරුද්ධව යුද්ධ ප්‍රකාශ කරනවා. ඒ දෙවැනි ලෝක යුද්ධයේ තවත් හැරවුමක් සටහන් කරමින්.

ඇමරිකාව මුල්ම වතාවට ජපානය සමග මුහුණට මුහුණ ගැටෙද්දී ජපාන සොල්දාදුවන් නිර්භීතව එහෙත් ඇතැම්විටක මරු පෙනී පෙනී සටන් වදිනවා. ගරිල්ලා උපක්‍රම හා සතුරා විශ්මයට පත් කිරීමේ උපක්‍රම (Elimant of Surprise) යොදා පහර දෙන ජපාන හමුදා ප්‍රහාර ඇමරිකානු මරණ සංඛ්‍යාව ජර්මානු පෙරමුණේ දී සිදුවූ ස්ථානීය මරණ ප්‍රමාණය අභිබවා යන්නට සලස්වනවා.

ඒ වගේ සටන් සිදුවූ ප්‍රදේශ දෙකක් තමයි ඔකිනාවා දුපත (Battleof Okinava) සහ ග්වන්දල් කනාල් දුපතේ සටන (Guandalcanal Campaign). මේ හේතුව නිසා ඇමරිකාවට ජපානයේ ප්‍රධාන දුපත් ආක්‍රමණය කිරීමට යාමේදී විශාල මිලක් ගෙවන්නට සිද්ධ වෙන බව පැහැදිලිවම පෙනුණු කරුණක්.

ප්‍රහාරයට පෙර ජපාන භුමිය (Japanese Main Land) තුල විශාල විනාශයක් කිරීම මතින් එක්කෝ ජපාන ශක්තිය අඩපණ කරගන්නට හෝ ජපානය යටත්වීමටක පෙළඹ වීමට යන දෙකෙන් එකකට එළඹෙන්න අවශ්‍ය කරන සාධක ඇති කිරීම ඇමරිකාවට අවශ්‍ය වුවා.

1941 දෙසැම්බර් 7 වෙනිදා: ලිට්ල් ඇඩම්ස් (Lytle Adams)නමැති දන්ත වෛද්‍යවරයා සිය නිවාඩුව ඇමෙරිකාවේ නිව් මෙක්සිකෝ හි කාල්ස්බෑඩ් හි ගතකර තම නිවස බලා ගමන් කරනවා. ඔහුට ඒ රථ ධාවනයේ යෙදෙන අතරතුර සිහිවන්නේ තමන් පෙරදිනවල දුටු විශාල වවුලන් සමුහය ගැනයි. එසේ සිතමින් යන විට ඔහුට රථයේ රේඩියෝව හරහා අහන්නට ලැබෙන්නේ පර්ල් වරායට ජපානය පහරදුන් පුවතයි. එයින් කම්පාවට පත්වන මේ හැට හැවිරිදි වෛද්‍යවරයා සැලසුම් කරන්නේ ඇමරිකාව වෙනුවෙන් අවියක් තනා එයින් ජපානයට පහරදීමටයි.

කිසිම හමුදාමය පසුබිමක් නැති සාමාන්‍ය දන්ත වෛද්‍යවරයෙක් වූ වෛද්‍ය ලිට්ල් මේ සඳහා සැලසුම් කරන්නේ තමන් දුටු ලක්ෂ සංඛ්‍යාත වවුලන් යොදාගෙන ඉන්සින්ඩ්යරි වර්ගයේ බෝම්බයක් ජපානය වෙත මුදා හැරීමටයි. ඔහුගේ න්‍යාය සරලයි.

වවුලන් පරිසරයෙන් අවශ්‍ය තරම් නොමිලේ සොයාගන්නට පුළුවන්.

වවුලන් සිය පැටවුන් රැගෙන යන අයුරින් කුඩා බෝම්බයක් රැගෙන යනු ඇති,

ඒ බෝම්බය රැගෙන යන වවුලන් දිවා කාලයේ නිදහස් කළහොත් ඔවුන් වහලවල් තුරු මුදුන් සහ පාලම් වැනි ස්ථාන වල සැඟවී අඳුරට එක්ව සිටිනු ඇති.

මේ වවුලන් ගෙනයන බෝම්බය කාල බෝම්බයක් ලෙසින් සකස් කළහොත් එයින් ඉතා කෙටි කලක් තුල ලී වලින් සාදන ලද ජපන් නිවාස හා බොහොමයක් ගොඩනැගිලි ගිනි ජාලා වලට පත්කළ හැකිය.

තනි පුද්ගලයෙක් ලෙස ඔහු වෙත මුදල් සහ උපකරණ ඇතුළු සම්පත් නොමැති වීම හරහා මෙය කල නොහැක්කක් වුවත් ඒ සඳහා රාජ්‍ය අනුග්‍රහය ලබා ගැනීම සිදු කල හැකිව තිබුනා. එහෙත් සාමාන්‍ය දන්ත වෛද්‍යවරයෙක් හට ඒ උදෙසා ද ඉතා ඉහල සම්බන්ධතා අවශ්‍ය වෙනවා. ඒ සඳහා ද ඔහු අපුරු ක්‍රමයක් භාවිතා කරනවා. ඒ ඉහලම පෙලේ සම්බන්ධතාවක්. ඒ සම්බන්ධතාව වෙන කිසිවකුත් නොව එලිනෝර් රුසවෙල්ට්, ජනාධිපති ෆ්‍රැන්ක්ලින් රුසවෙල්ට් (Franklin Roosevelt) ගේ බිරිඳ. ඇගේ සහයෝගයද ඇතිව ඔහු මේ සැලසුම 1942 ජනවාරි 12 වෙනිදා ධවල මන්දිරයට ඉදිරිපත් කරනවා.

ධවල මන්දිරයේ දී මේ සැලසුම් කියවා බලන ජනාධිපති රුසවෙල්ට් ඒ සැලසුම සිය ලේකම්වරයා මගින් විලියම් ඩොනවන් (William “Wild Bill” Donovan) හට යවන්නේ මේ සටහනත් එක්කයි.

“ Have a look in to this Bill, this man is not a nut case.”

මේ සටහනත් සමගින් ඇරඹෙන මේ කතාව ඇමරිකානු යුධ සැලසුම් සේවා කාර්යාලය මගින් අනුමත වෙනවා. ඉන් පසු එය එවකට එක්සත් ජනපද යුද හමුදාවේ සිටි ජෙනරාල් හෙන්රි ආර්නල්ඩ් (Gen. Henry Harley “Hap” Arnold) යටතේ ක්‍රියාත්මක වෙන්නට පටන්ගන්නවා.

එලෙස ඇරඹුණු මේ ව්‍යාපෘතිය වෙත කාර්යමණ්ඩල සහ පර්යේෂකයින් බඳවා ගන්නා අතර ඔවුන් නිව් මෙක්සිකෝ හා ටෙක්සාස් ජනපද වල වවුල් ගුහා පීරමින් සුදුසු වවුලන් වර්ග සොයනවා. 1943 මාර්තු මාසය වන විට වවුලන් ගණනාවක් නිරීක්ෂණය කර ඒ අතුරින් ඔවුන් තෝරාගන්නේ මෙක්සිකන් ෆ්‍රී ටේල් (Mexican Free Tail)නමැති වවුල් වර්ගයයි. මේ වවුලා අවුන්ස භාගයක් පමණ වන අතර අවුන්සයක බරක් දරාගෙන පියාසැලීමට සමත් වනවා.

වවුලන් රැඳවූ කුටියක්‌

මෙහිදී ඔවුන් මුහුණ දෙන ලොකුම අභියෝගය වන්නේ අවුන්සයක බරට ඉන්සින්ඩ්යරි වර්ගයේ බෝම්බයක් නිපදවා ගැනීමයි. ඒ එවකට තුබූ කුඩාම ඉන්සින්ඩ්යරි බෝම්බයත් අවුන්ස දෙකකට එහා ප්‍රමාණයේ වීමයි. මේ ගැටලුවේදී ඔවුන්ගේ පිහිටට එන්නේ සුප්‍රකට මිලිටරි නාපාම් බෝම්බයේ නිෂ්පාදකයා වන ලුවිස් ෆයිසර් (Louis Fieser). ඔහු ග්රෑම් 17 (අවුන්ස 0.6) බර නාපාම් බෝම්බයක් සහ අවුන්සයක් බර නාපාම් බෝම්බයක් මේ සඳහා ම සාදන්නේ මේ ව්‍යාපෘතිය කොතරම් වැදගත් එකක්ද යන කියාපාමින්.

එසේ සාදන ලද බෝම්බය සැත්කමක් මගින් වවුලන්ගේ පපුවට තබා සවි කරනු ලබන අතර වවුලන්ව ඉන් අනතුරුව උෂ්ණත්ව පාලනය මගින් නිදිගන්වනු ලබනවා.

බෝම්බ බැඳී වවුලෙක්.

දැන් තිබුනේ වවුලන් බෝම්බයක් ලෙස පොලවට පතිත කිරීමේ ක්‍රියාවයි. එහිදී සාමන්‍ය බෝම්බයකට වඩා වෙනස් ලෙස වවුලන් රැගෙන යාමට සහ බෝම්බය තුල වන නිදිගැන්වූ වවුලන් හට පොලවට පතිතවීමට පෙර පියාසලා යාමට හැකි වන ලෙස බෝම්බයක් සෑදීමේ අවශ්‍යතාව මතුවූ අතර එයට පිලියමක් ලෙස විශේෂිතව සකස්කළ බෝම්බ සැලසුමක් වෛද්‍ය ලිට්ල් විසින්ම ඉදිරිපත් කළා.

එසේ සැලසුම් කල බෝම්බය තමයි ඔය පහත පින්තුරේ පෙනෙන්නේ.

මේ බෝම්බයේ තට්ටු විසි හයක එකක වවුලන් 40 බැගින් වවුලන් 1040 රැගෙන යා හැකි ලෙස නිමවා තිබෙනවා. එහි වන සිදුරු වලින් උෂ්ණත්ව පාලනය සිදු කරන අතර එය පොලවේ සිට අඩි 5000 උසක සිට අතහරින්නට සැලසුම් කර තිබෙනවා. ඉන්පසු අඩි 1000 ක උසක දී මේ බෝම්බය ස්වයංක්‍රීයව එහි ආවරණය ඉවත් කරගෙන පැරෂුටයක ආධාරයෙන් පොලව බලා ගමන් කරත්දී ස්වභාවික පරිසර උෂ්ණත්වය ලැබී නිද්‍රාවෙන් අවදිවන වවුලන් මුදා හැරීමට තට්ටු වෙන් වෙන් වශයෙන් දිග හැරී වවුලන්ට පියාසැරීමට වේදිකාවක් ලෙස සකස්වනවා. මේ වේදිකා එකිනෙකට රැහැන් මගින් සම්බන්ධ වෙනවා. බලන්න පහත පින්තුරය.

දිගහැරුණු තට්ටු සහිත වවුල් බෝම්බය.

මෙසේ මුදා හරින වවුලන් රැගෙන යන නාපාම් බෝම්බය කාල බෝම්බයක් ලෙස සකස් කර තිබෙන අතර මුදා හැර පැය භාගයක කාලයක් තුල දී බෝම්බ ක්‍රියාත්මක වී එකවිටම ගිනි ජාලා මැවෙන්නට පටන් ගන්නවා.

1. වවුල් බෝම්බය සකසමින්. (ජායාරුපයේ මැද සිටින්නේ වෛද්‍ය ලිට්ල් ඇඩම්ස් ය.)

2. වවුල් බෝම්බය බිම හෙලන අවස්තාවක්.

3. කාල්ස්බෑඩ් කඳවුර ගින්නේ වෙළෙමින්.

මේ බෝම්බය විවිධ පරීක්ෂණ වලට බඳුන් කරමින් සිටියදී කාල්ස්බෑඩ් හි හමුදා අතිරේක ගුවන් කඳවුරු මුලස්ථානය මිනිත්තු කීපයක් තුලදී ගින්නෙන් වැසී යනවා. ඒ අත්වැරදීමකින් බෝම්බ සවිකරන ලද වවුලන් කිහිපදෙනෙකු පලායාම නිසා. ඒ සිද්ධිය සමගින් මදක් පසුබාන මේ ව්‍යාපෘතිය එතැනින් පසු 1943 අගෝස්තු මාසයේ දී ඇමරිකානු නාවික හමුදාව යටතට ගැනෙනවා. ඒ සමගින්ම ඔවුන් එය එක්ස් රේ ව්‍යාපෘතිය (Project X-Ray) ලෙස නම්කරන අතර එම වසරේම දෙසැම්බර් මාසයේ දී ව්‍යාපෘතිය ඇමරිකානු මැරීන් හමුදාව වෙත පවරනවා.

ඔවුන් මේ සමගම මේ ව්‍යාපෘතිය කැලිෆෝනියාවට ගෙන යනු ලබන අතර ඩග්වේ අත්හදා බැලීමේ මධ්‍යස්ථානයේදී ජපාන පන්නයේ ගම්මානයක ආකෘතියක් වෙත මුල් වරට මේ අවිය යොදා පහර දෙනවා. එහිදී අති සාර්ථකව ප්‍රතිඵල පෙන්වන මේ අවිය ගැන ජාතික ආරක්ෂක පර්යේෂණ කමිටුව සතු වාර්තා වල මෙසේ සඳහන් වනවා.

“It was concluded that X-Ray is an effective weapon.” “Expressed in another way, the regular bombs would give probably 167 to 400 fires per bomb load where X-Ray would give 3,625 to 4,748 fires”.

කරුණු මෙසේ වුවත් මේ ව්‍යාපෘතිය 1944 පෙබරවාරි 16 වැනිදා නාවුක අද්මිරාල් අර්නස්ට් ජේ කිංග් (Fleet Admiral Ernest J King) ගේ අණින් නැවතීම සිදුවන්නේ ඒ ව්‍යාපෘතිය 1945 මැද වනතුරුම යුද්ධය සඳහා සුදානම් කල නොහැකි බව පැවසුණු නිසාවෙනි. නමුත් ඒ වන විට ද ඇමරිකාව තමන්ගේ ජපාන සතුරා වෙත පහර දීමට දැවැන්ත අවියක් තනා අවසන්ව තිබුණු අතර එය ද මේ ව්‍යාපෘතිය උපන්ගෙයිම නවතාලන්නට එක හේතුවක් වුනා. ඒ වෙන කිසිවක් නොව න්‍යෂ්ටික බෝම්බයයි.

අවසානයේ න්‍යෂ්ටික බෝම්බය හෙළු පසු වෛද්‍ය ඇඩම්ස් මෙවැන්නක් පවසා තිබුනා.

“Think of thousands of fires breaking out simultaneously over a circle of forty miles in diameter for every bomb dropped.”

“Japan could have been devastated, yet with small loss of life”

(හිතන්න බිම හෙලන සෑම බෝම්බයකටම හැතැප්ම හතලිහක ප්‍රදේශයක් තුළ දහස්ගණන් ගිනි ජාලා එකවිටම පැනනගින හැටි. මේ තරම්ම ජීවිත විනාශ නොකරම ජපානය භීතියට පත්කරන්නට තිබුණා.)

ලිපියේ මුලාශ්‍ර :

අන්තර් ජාලය | විකීපීඩියා අඩවිය | හිස්ටරි චැනලය විකාශය කල වවුල් බෝම්බය ගැන වැඩසටහන.

පැය 3 ක් සිරගත වුයෙමි.

noreply@blogger.com (ක්සැන්ඩරයා) — Sat, 14 Jul 2012 06:08:00 +0000

මේකත් සත්‍ය සිදුවීමක්. වෙලා දැනට දවස් 3 යි.

ඔන්න ඉතින් ආයෙමත් නමෝ විත්තියෙන් කටාර් රටට පැය ගැහුවේ පහුගිය 11 වෙනිදා දවල් වෙලා. ආපහු ආවට පස්සේ ඔෆිසියටත් ගිහින් එහෙම හවස් අතේ අපි නැවතිලා හිටිය විලා එකට ගිහින් කට්ටිය එක්ක පොඩි කදයක් හෙම දාල ඉඳලා මම නින්දක් ගැහුවේ කලින් දවසේ ටිකට් එක ඇවිත් බඩුත් අහුරන් එනකොටම රෑ වෙලා තිබිලා පහුවෙනිදා උදේ පාන්දර ගුවන්ගත වෙන්න එන්න තිබුණු එකේ මහන්සියත් එක්ක.

රෑ 10 විතර වෙද්දී නැගිටපු මම ආපහු කට්ටිය එක්ක කදයක් දාලා තේ එකක් බොන්න ලැහැස්ති උනා. තේ එකත් හදලා ටිකක් බොන අතරේ මොකක්දෝ මන්දා හේතුවකට "උදේ ගාගන්න හෙයා ජෙල් එකක් ගන්න බකාලෙට (කඩේට) යන්න ඕනේ" කියලා අපේ එකෙක් කිව්වා. මමත් හෙයා ක්‍රීම් එක දාලා ඇවිත් නිසා මටත් එකක් ගන්න හිතාගෙන එක පයින්ම " හරි මචන් යමු " කියලා නැගිටලා සල්ලිත් අරගෙන බාගෙට බීපු තේ එකත් තියලා කඩේට යන්න පිටත් වුනා.

අපි ඉන්න විලා එක ඉස්සරහ ම කාපට් පාර, පාරට පස්සේ විශාල කාන්තාරයක්. කිලෝමීටර් බාගෙක විතර. ඊට‍ පස්සේ තමයි ඔය කඩවල් එහෙම තියන කොටස තියෙන්නේ. කඩවල් කරන්නේ කේරල කාරයෝ. අපි ඉන්න හරියේ තියෙන්නේ ගෙවල් විතරයි. ඒ ටිකේම කඩවල් නෑ. මොකද අජ්නබී විදියට (පිටදේශ වලින් ආපු) අය විදියට ඉන්නේ අපි විතරක් නිසා. කටාරියෝ සුද්දෝ එහෙම කඩේ යන්නේ නෑ නේ අපි වගේ.

ඉතින් කඩේ යන්න පිටත් වෙලා ටිකක් දුර කාන්තාරේ දිගේ යද්දී මට මතක්වුනා "ඈ.. වීසා කොපිය ගෙනාවේ නෑ නේද" කියලා. ඒ මතක් වෙලා මම මගේ යාලුවට කිව්වා "මචෝ, පොලිසියෙන් නිකම් හරි ආවා නම් සොරි තමා, වීසා කොපිය ගෙනත් නෑ බං "කියලා. මේ රටේ නීතියේ හැටියට වීසා කොපිය හරි පතාකා එක හරි නැතුව පාරේ හිටගෙන හරි ඉන්නවා කියන්නේ කොයි මොහොතේ හරි පොලිසියෙන්ම ටොපි ලැබෙන වැඩක්. නීතිය දැනගෙන උනත් ඒ වෙලාවේ නිදිමතේ ම ඉඳල මමත් පුරුද්දට වගේ පර්ස් ඒකත් අරගෙන ඇවිත් මොකද ඉස්සර පතාකා එක තියෙන්නේ පර්ස් එක ඇතුලේ නේ.

මේ ටික කියලා ඉවර කරගන්න හම්බවුනේ නෑ එකපාරම "සලාම් අලෙයිකුම්" කියලා වාහනයක් නවත්තලා සලාම් දුන්නා. "හුටා!!!" ඒ අල්ෆසා පොලිසියෙන්. අල්ෆසා කියන්නේ කටාර් වල තියන බේරෙන්න අමාරුම පොලිසියක්. මේ නමේ තේරුම බය කරන්නෝ කියන එක. (The Scaries). ජීප් එකේම ඉඳගෙන පොලිස්කාරයෝ දෙන්නෙක් අපි දෙන්නාගෙන් ෆී පතාකා? කියලා ඇහුවා. ඒ කියන්නේ පතාකා තියනවා ද කියලා. මම කිව්වා මම බිස්නස් වීසා වලින් අද ආවේ, වීසා කොපිය විලා එකේ. ගිහින් ගෙනත් දෙන්නම් කියලා. (මේ විලා එකට පාර පනින දුර) මොන, එකපාරම වාහනෙන් බැහැපු පොලිස්කාරයෙක් අපි දෙන්නව වාහනේට දමාගත්තා. දමාගෙන දැන් ඉතින් යනවා. ඒ යන අතරේ අපි කිව්වා උන්ට කතාව. උන් අහන්නෙම නැතුව. ජීප් එකේ තව එකෙක් ඉන්නවා. ඒත් අයිඩී නැතුව ඉඳල.

මෙහෙම යනගමන් ජීප් එකට තව 3 දෙනෙක් නංගා ගත්තා. ඒත් අයි ඩී කාඩ් නැතුව ඉඳලා. ඒ අතරට කේරල ජාතිකයින් දෙදෙනෙක්, නේපාල ජාතිකයින් දෙදෙනෙක් ඇතුලත් උනා. පස්සේ මේ ජීප් එක හයාත් ප්ලාසා කියන ෂොපින් ක්ම්ප්ලෙක්ස් එක ලඟට ගිහින් නතර කළා. ඊට පස්සේ තවත් ජීප් එකක් ගෙන්නාගෙන අපි 6 දෙනා තුන්දෙනා බැගින් වෙන් කරලා පොලිසියට අරගෙන ගියා. පොලිසියේදී අපිව ටිකක් වෙලා එළියෙන් තියාගෙන හිටියා. ඔය අතරේ අපෙන් ප්‍රශ්න කළා ඇයි මේ අරගෙන ආවේ සහ හැඳුනුම්පත් කොහෙද කියලා. ඔතනදි මම ඒ පොලිස් නිලධාරියාට පැහැදිලි කළා මම ආවේ බිස්නස් වීසා වලින් බවත් ඇවිත් තවමත් පැය විසිහතරක් නැති බවත්. ඔහු මාව පසෙකට කැඳවා මගේ පාස්පෝට් අංකය ඔස්සේ පරික්ෂා කර මාව නිදොස් කර නිදහස් කල අතර මාව වෙනම රඳවා තිබ්බා. ඒත් ටිකකින් අපිව අත්අඩංගුවට ගත්තු නිලධාරියා ඇවිත් අපිව රිමාන්ඩ් කළා. වෙනම රඳවා හිටිය මමත් ඒ අතරටම ගෙනියන්න ඔහු කටයුතු කළා. දුරකථන ඇමතුමක් ගන්න ඉල්ලුවත් අපිට ඒ අවස්තාව ලබාදෙන්නත් ඔවුන් අකමැති උනා. කොහොම හරි අතේ මොබයිල් එකවත් නැතුව අපි දැන් හිරගත වෙලා.

හිර කූඩුවේ දී අපි නේපාලියා ගේ මොබයිල් එක ඉල්ලුවත් ඌ ඒක දෙන්න බෑ කිව්වා. ඒත් එතන කුඩු කේස් එකකට ගෙනාව ඉන්දියන් කාරයෙක් උගේ මොබයිල් එක දුන්නේ දෙවියෙක් වගේ. මොකද අපි අත්අඩංගුවට ගත්තු බව කවුරුත් දන්නේ නෑ. එතැනින් අපේ ආයතනයට කතා කරලා අපේ වීසා සහ පතාකා ගෙන්වා ගත්තා. එතනදිත් අපිට පැය 3 රැඳී ඉන්න උනේ පොලිසිය දුර නිසා නෙවෙයි. පොලිසිය අලුතෙන් ම හදා විවෘත කර තුබූ නිසා ඒ ගැන කිසිවෙක් දැනගෙන නොසිටීම තමයි ප්‍රශ්නය වෙලා තිබුනේ. ඒත් තත්වය නරකම අතට යන්නට තිබුනේ පාන්දර 3 වෙනකොට කිසි කෙනෙක් අපිව බේරාගන්න ආවේ නැති නම් ඔවුන් අපිව හිරගෙදරට මාරු කර දින කීපයකින් නඩු ඇසීමට යවන්නට සුදානම් වූ නිසයි.

නොදන්නා විදෙස් රටක මේවගේ දෙයක් උනාම මොකක්ද වෙන්නේ කියලා කියන්නවත් නොදන්නා කෙනෙක්ට මොනතරම් පීඩනයක් ඇති වෙයිද? රටට පයගපු මුල්ම දවස උනා නම්? ඔන්න අරාබියේ නීතිය. පහුගිය දින වල හඬ නැගුවා සවුදියේ කෙනෙකු බුදුන් වැන්දාට දඬුවම් කළා කියා. ඒත් මේ තමයි ඒ රටවල තත්වය. සල්ලි හොයන්න එන අය මේ ගැන දැනුවත් වී එනවා නම් ගොඩක් කරදර අඩු කරගන්න පුළුවනි. ඒ වගේම මතක තබාගන්න. ඔබ කටාරයට පය තැබූ මොහොතේ සිටම ඔබේ අනන්‍යතාව සහතික කරන්න පුළුවන් ලියවිල්ලක් රැගෙන යන්න. ඒ එක්කම ඔබේ වීසා හෝ හැඳුනුම්පත (කටාර් රාජ්‍යයෙන් නිකුත් කරන) ඔබ සතුව නැතිනම් පළමුව වහාම ඔබේ අනුග්‍රාහක ආයතනය දැනුවත් කරන්න.

මුලින් දැනුවත් වී පසුව හඬ නගමු.

බ්ලොග් සතිය වෙනුවෙන් ලියන ලද්දකි.
syndi.buzzradio.lk

දෙවැනි ලෝක යුද්ධය - හිට්ලර්ගේ පරාජය සහ ඊට හේතු.

noreply@blogger.com (ක්සැන්ඩරයා) — Mon, 09 Jul 2012 06:40:00 +0000

දෙවැනි ලෝක යුද්ධය තුල වූ ඉතිහාසයේ සැඟවුණු තැන් හා ඉතිහාසයේ හැරවුම් ලක්ෂ පසුබිම් කරගෙන ලියවෙන ලිපි මාලාවක තෙවැන්නයි මේ. ජර්මානු අක්ෂයේ වූ සිදුවීම් වල සැඟවුණු කතා බහ එක්ක කලින් ලිපි වලින් අපි හිට්ලර්ගේ මරණය , ඔහු පසුපසින් සිටි අදිසි හස්තයන් වගේම ජර්මානුවන් අත තිබුණු එහෙත් නිසි ඵල නෙලාගන්නට නොහැකි වූ ආයුධ ගැන එහෙම කතා කළා. මේ තියෙන්නේ ඒ ගැන කතා කල ලිපි පෙළ.

1946 අගෝස්තු මාසේ 6 වැනිදා. දෙවැනි ලෝක යුද්ධය යුරෝපා මහාද්වීපයේ දී නිමා වී මාස කීපයකට පසු ඇමරිකානුවන් ඔවුන්ගේ රහස්‍ය අවිය ජපානයේ හිරෝෂිමා ආසන්නයේ දී ක්‍රියාත්මක කරනවා. ලෝකය මුල්ම වරට (දන්නා ඉතිහාසය තුල) න්‍යෂ්ටික අවියක සැබෑ ස්වරුපය මෙහිදී දකින්නේ ඇමරිකාව නොනිල ලෝක බලවතා කරමින්.

ඇත්තටම ඇමරිකාවද මේ න්‍යෂ්ටික ආයුධ මුලින්ම දෙවැනි ලෝක යුද්දේ පාවිච්චි කලේ? ඒ ප්‍රශ්නයට උත්තරේ "ඔව්" උනත් ඇමරිකානුවන්ට පෙර සිටම ජර්මානුවන් මේ ගැන උනන්දු වුනා. ඔබ දන්නවාද හිට්ලර් සතුවත් න්‍යෂ්ටික වැඩපිළිවලක් තිබු වග? ඔව්. නට්සීන් සතුව තිබුණු සැලසුම් වලට අනුව ඔවුන් ඒ අවිය 1946 අගෝස්තු මාසයේ දී පමණ ක්‍රියාකාරී තත්වයට ගන්න බලාපොරොත්තු වුනා. ඒ බලාපොරොත්තුව ඒ ආකාරයෙන්ම සඵල වුවා නම් සහ ඔවුන්ගේ නිෂ්පාදන ක්‍රියාවලිය නිසි ලෙස තිබුනා නම් බොහෝ දුරට ඔවුන් අපි මින් පෙර ලිපියකින් කතා කල හෝර්ටන් වර්ගයේම ජෙට් එන්ජින් හයකින් යුත් යානාවකින් (Horten H.XVIII) හෝ ME 264 යානාවකින් (Messerschmitt Me 264) මේ න්‍යෂ්ටික් බෝම්බය ඇමරිකාවට හෙලන්න ඉඩක් තිබුනා. ඒ නිව්යෝර්ක් නගරයට.

Messerschmitt Me 264 - Amerika Bomber යානාව

මේ කාරණා එක්කම එහෙනම් එන්න පිවිසෙන්න ඉතිහාසයේ වෙනස්වූ තැන් සොයා යන්න..

Amerika Bomber ව්‍යාපෘතිය හා ජර්මන් පරමාණුක ශක්ති ව්‍යාපෘතිය.

හිට්ලර් හට ඇමරිකාව සමගින් යුද්ධයේ මුල සිටම වුයේ පැහැදිලිවම පටලැවිල්ලක්. ඊට හේතුව වුයේ ඇමරිකාව යුද්ධයට සාභාගී වීම ම නොව ( ඇමරිකාව යුද්ධයට නිල ලෙසින්ම සම්බන්ධ වන්නේ 1941 දෙසැම්බර් මස 8 වැනි දිනය පර්ල් වරායේ ප්‍රහාරයට පසුයි.) බ්‍රිතාන්‍ය වෙත යුධ සැපයුම් ලබා දීම නිසා ඇතිවන සංග්‍රාම උපක්‍රමයක් ලෙස ඇමරිකාව අඩපණ කිරීමේ අවශ්‍යතාවයයි. මේ නිසා ඇමරිකාවට පහර දීමට හිට්ලර් 1938 සිටම පිඹුරුපත් සකසනවා. ඒ අනුව බිහිවූ ව්‍යාපෘතියක් වන්නේ මේ Amerika Bomber ව්‍යාපෘතියයි, මේ යටතේ ඇමරිකාවට පහර දීමට අවි සැලසුම් සහ ඒ අවි දියත් කිරීමට අවශ්‍ය සැලසුම් සකස් කරනවා. මේ සලසුම් වලදී ඔවුන්ට අවශ්‍ය වන්නේ දිගු දුරක් යා හැකි බෝම්බ හෙලන යානාවක්. ඒ සමගාමිව තමයි නට්සින් සිය න්‍යෂ්ටික ව්‍යාපෘතිය ආරම්භ කරන්නේ. ඒ මේ යානා ඔස්සේ ගෙනගොස් ඇමරිකාව වෙත ප්‍රහාරයක් එල්ල කිරීම සඳහා යි.

ඉංග්‍රීසි බසින් යුරේනියම් සංගමය (Ureniam Club) ලෙස හඳුන්වන ලද ජර්මන් භාෂාවෙන් Uranprojekt ලෙසත් හඳුන්වන 1939 දී ආරම්භ කරන ලද මේ ව්‍යාපෘතිය බොහෝ කොටම න්‍යෂ්ටික ශක්ති උත්පාදනය උපදවන්නට කරන ව්‍යාපෘතියක් සේ මුලින්ම පෙනුනක් වුවත් එහි අභයන්තර අරමුණ වුයේ න්‍යෂ්ටික ශක්තිය යුද්ධයට් අවැසි ලෙස භාවිතා කරන ක්‍රමවේදයන් සොයා ගැනීමයි. මේ ව්‍යාපෘතිය 1946 වනතුරු එනම් යුද්ධය අවසාන වන තුරු තිබුණු අතර ඔවුන් යුරේනියම් බලගැන්වීම සිදු කරමින් පසු වුවා. එහෙත් විද්‍යාඥයින් ගේ හිඟයත් ඔවුන් වෙනත් යුධ කටයුතු වල දීමත් නිසා මේ ව්‍යාපෘතිය සිදු නොවුන බවට පිළිගත් මතය වුවත් මා නම් දකින්නේ ඊට වෙනස්ම මතයක්. ඒ ජර්මානු පර්යේෂණ ව්‍යුහය සහ කාර්මික ව්‍යුහය වෙනවෙනම තිබීම නිසා අන්තර් සන්නිවේදන කටයුතු වලදී වන පසුබෑම සහ එකිනෙක ව්‍යුහයන් කෙරේ වන ආකල්පමය වෙනස (උදා: විද්‍යාඥයින් කාර්මික කටයුතු කිරීමට නොපෙළඹීම නිසා සුළු කොටසක් වුවත් කාර්මිකයින් විසින්ම සිද්ධ කලයුතු වීම සහ එසේ කරන සුළු දේ වුව විද්‍යාඥයින්ට දැනුම ලබා දීමට කාර්මිකයින් අකමැති වීම) වැනි සංසිද්ධීන් නිසා ප්‍රමාද වූ බවයි.

Donner Do 335

පිස්ටන් එන්ජින් ගුවන් යානා වල අග්‍ර ඵලය ලෙස මේ යානය හඳුන්වා දුන්නොත් මම හිතන්නේ ඒක වැරදි නැතිව ඇති. ලෝක යුද්ධයේ යෙදුනු මිත්‍ර පාර්ශවය සතු වූ මොස්කිටෝ යානා වලට වඩා වේගවත් එමෙන්ම සියලු මිත්‍ර පාර්ශවික යානා අභිබවන වේගයකින් පියාසර කල හැකි පිස්ටන් එන්ජින් සහිත මේ යානාවට තියෙන්නේ අපුරු පෙනුමක්. එන්ජින් දෙකකින් යුතුව නිමවා තිබෙන මේ යානාව එක එන්ජිමක් මගින් ඉදිරියට ඇදීමටත් අනිකෙන් යානය තල්ලු කිරීමටත් කියන මුලධර්ම දෙක මගින් ක්‍රියාත්මක වුනා.

Donner Do 335 ගුවන් යානාවක්.

යුද්ධයේ අවසාන භාගයේ දී එලි දුටු මේ යානය සිය වේගය නිසාවෙන්ම යුද්ධයේදී තීරණාත්මක සාධකයක් වන්නට තිබූවක්. එහෙත් මිත්‍ර පාර්ශවික බෝම්බ හෙලීම නිසා කර්මාන්ත ශාලා අහිමි වීම, අමුද්‍රව්‍ය ප්‍රවාහනය ඇනහිටීම වගේ සාධක මතින් නිපදවාගත හැකිවූ යානා සංඛ්‍යාව 37 සේ සටහන් වුනා.

STG 44 / MP 44

මේ තමයි යුගයේ හොඳම ගිනි අවි මොඩලය විදියට මම තෝරන අවිය. Maschinenpistole 44/ Sturmgewehr 44 නමින් හඳුන්වපු මේ මොඩලය තමයි පහත දැක්වෙන්නේ.

STG 44 ගිනි අවියක්.

දැකල පුරුදුයි නේද? ඔව් මේ අපි නිතර දකිනා T56 (Type 56) නමැති චීන ගිනි අවියේ මුත්තා. රුසියානුවන් මේ STG44 (මේ අවියේ නම අග ඇති අංකය නිෂ්පාදිත වසර පිළිබිඹු කරනවා) නම් වූ ගිනි අවිය දැක ඒ අනුසාරයෙන් නිපදවූ AK47හෙවත් ක්ලිෂ්නිකොව් තුවක්කුව තමයි ඒ T56 මුල් පුරුක වන්නේ.

AK 47 ගිනි අවියක්.

මේ ගිනි අවිය ඉතාම කාර්යක්ෂම ප්‍රහාරක අවියක් වුනා වගේම ඒ වන විට තිබුණු MP 40 ගිනි අවියේ කාර්යක්‍ෂම බවත් රයිෆලයක මෙන්වූ ඈතින් ඇති ඉලක්කයක් කරා වෙඩි තැබීමට වන හැකියාවත් එකසේ කැටි කරගෙන තිබුණා. ඒත් මේ අවියට අකමැති වූ ඉහලම පෙලේ ජ්ර්මානුවෙක් හිටියා. ඒ වෙන කවුරුවත් නෙවෙයි ඇඩොල්ෆ් හිට්ලර්. ඔහු මේ අවියේ ස්වරුපයට කැමැත්තක් දැක්වුයේ නෑ. ඔහුගේ අවසාන තීරණය වුනේ මේ අවිය ඉවත් කරන්නයි. ඔහු විසින් දෙවරක්ම මේ අවියේ නිෂ්පාදනය නතර කලත් හිට්ලර් ගේ ජෙනරාල් වරුන් විසින් මුලින් Sturmgewehr 43/44 ලෙස හැඳින්වූ මේ අවිය 1943 දී හා 1944 දී යුධ පෙරමුණ වෙත නිකුත් කරනවා. ඒ Maschinenpistole 43/44 නාමයෙන් (එනම් යාන්ත්‍රික පිස්තෝලයක් ලෙසින් අර්ථ දක්වමින්.) 1943 දී මේ අවි යොදාගෙන සටන් වැදුණු භට පිරිස් වල සාර්ථකත්වය නිසාම හිට්ලර් 1944 දී සිය තීරණය වෙනස් කරමින් අවිය අනුමත කරනවා.

Tiger I (PanzerkampfwagenTiger Ausf. E)

දෙවැනි යුද්ධයේදී මම නම් පුද්ගලිකව දෙවැනි ලෝක යුද්ධ භුමියේ දකින හොඳම යුධ ටැංකිය වන්නේ මේ යුධ ටැංකියයි. එකල මේ ටැංකියේ නම සඳහන් කල විටදී පවා ප්‍රතිවාදීන් බිය වුයේ එය සතුවූ ප්‍රහාරක බලය සහ සන්නාහය නිසයි.

Tiger I ටැංකියක් (ඇන්ටි මැග්නටික් ආලේපය සමගින්.)

1941 දී රුසියානු T34 ටැංකි වලට මුහුණ දීමට සාදන ලද මේ ටැංකියේ සැලසුම නම් 1937 දක්වා දිව යන්නක්. එසේම මිලිමීටර් 88 ගුවන් යානා නාශක තුවක්කුව (මුලින්ම මිලිමීටර් 88 තුවක්කු යෙදෙව්වේ ගුවන් යානා බිම දැමීමට වුවද අර්වින් රොමෙල් විසින් කාන්තාර සටන් වලදී මේ මි.මි. 88 තුවක්කුව භූමියට සමාන්තරව හරවා ප්‍රහාර එල්ල කරන්න යොදා ගෙන විශාල සාර්ථකත්වයක් ලැබුවා.) ප්‍රධාන අවිය කොටගෙන නිපදවූ මේ යුධ ටැංකියේ සුවිශේෂී භාවය වූයේ එය තනිවම යුධපිටියට යෙදවීමට හැකි වීමයි. එලෙස සාමාන්‍යයෙන් තනි ටැංකි යුධ පිටියේ භාවිතා නොකරන්නේ ඒවායේ ආරක්ෂාව ප්‍රධාන කරුණු කීපයක් නිසයි. නමුත් මේ ටැංකිය සතු වූ විශේෂිත හැකියාව ඒ තත්වයෙන් මේ ටැංකිය මුදවනු ලැබුවා.

ඉතා ඝනකම් ලෝහ තහඩු වලින් සාදන ලද ටැංකියක් වූ මෙහි ඉදිරිපස කොටසේ ලෝහ ඝනකම මිලිමීටර් 120 – 80 දක්වා වූ අතර දෙපස මිලිමීටර් 80 දක්වා ලෝහ ඝනත්වයක් තිබුනා. මේ ලෝහමය යුධ සන්නාහය ඇතැම් අවස්ථා වලදී තව දුරටත් ශක්තිමත් කරනු ලැබූයේ ඒ වටා යෙදු අතිරේක ආවරණ මගින්. ඒ ආවරණ මිලිමීටර් 60 දක්වා ඝනකම වූවා. එමෙන්ම මැෂින් තුවක්කු දෙකකින් සන්නද්ධ මේ රථයට ස්වයං ආරක්ෂාව සලස්වා ගැනීමට ද හැකිවුණා.

තනි ටැංකියක් සටනට පිවිසුන ද මේ ටැංකියේ ඇති විශිෂ්ඨ බව සටහන් කරන සාධක ද ඉතිහාසය පුරාවටම දකින්න ලැබුනා ඒ සඳහා හොඳම උදාහරණය වන්නේ දක්ෂතම ටැංකි කොමදොරුවකු වූ මයිකල් විට්මාන් (Michael Wittmann) 1944 ජුනි 13 වෙනි දින දී විලාස් බොකාජ් සටනේ දී (Battle of Villers-Bocage) තනි ටැංකියක් යොදාගෙන බ්‍රිතාන්‍ය ක්‍රොම්වෙල් ටැංකි ඇතුළු වාහන 24 කට ආසන්න සංඛ්‍යාවක් විනාශ කිරීමයි.

මෙවන් තත්වයක් යටතේ ඒ වන විට මිත්‍ර පාර්ශවයේ (රුසියානු හමුදා හැර) භාවිතා කල ෂර්මන් යුධ ටැංකි වලට ඉතාම දරුණු ප්‍රතිවාදියෙක් එක්වුණා. යුද්ධයේදී එක් ටයිගර් ටැංකියකට පහර දී අඩපණ කිරීමට අඩුම ගණනේ ෂර්මන් ටැංකි 5 ක ප්‍රමාණයක් හෝ ඇවසි වුනා. ඒත් එය සාර්ථක වූයේ ඉතා අඩු ප්‍රමාණ වලින්. ඒ ටයිගර් ටැංකියේ ශක්තිමත් යුධ සන්නාහ වලට අමතරින් වූ මිලිමීටර් 88 තුවක්කුවේ ප්‍රහාරක ප්‍රදේශය විශාල වීම (කිලෝමීටර් 1.2 සිට කිලෝමීටර් 4 දක්වා ප්‍රමාණයකට පහර දීමට හැකි වීම) නිසා මෙන්ම එහිදී භාවිතා කල උණ්ඩය ජර්මන් ටැංකි හා සංසන්දනය කරන විට ඉතා තුනී යුධ සන්නාහ තිබු ෂර්මන් ටැංකි වලට විශාල අලාභ ගෙනදීම නිසා එක පහරකින් වුව විනාශ කල හැකි වීම නිසයි.

එනමුත් යුද්ධයේදී මේ ටැංකි නිපදවාගන්නට හැකි වූයේ 1347 -1350 අතර ප්‍රමාණයක් වීමත් (ඉහල නිෂ්පාදන පිරිවැය නිසාත් සම්පත් අවම වීම නිසාත්) ප්‍රවාහනයේ වූ දුෂ්කරතාවනුත් වගේම ඉන්ධන හිඟය මත අවසාන කාලයේ අතහරින ලද යුධ ටැංකිත් ජ්ර්මානුවන්ගේ විශිෂ්ඨ නිර්මාණයක් ඵල රහිත කළා. එසේම මේ ටැංකි වල නඩත්තුව ද වියදම් අධික කටයුත්තක් වූවා.

එහෙනම් අපි බලමු මෙතෙක් ආ මග දිගේ අපිට මතු වූ පැනය ගැන, “ඉතිං මේ වගේ තාක්ෂණයක් තිබුණ ජර්මනිය යුද්ධයෙන් පරාජය වුයේ ඇයි”

නාවික ශක්තියේ වූ වෙනස්කම්

ජර්මනිය සංග්‍රාම උපක්‍රමිකව අත්ලාන්තික් සාගරයේ බලය තහවුරු කරගැනීමට මානා බැලුවේ 1930 දශකයේ අග භාගයේ සිටමයි. එයින් ඔවුන්ට එංගලන්තය සහ යුරෝපයේ පාලනය පහසුවෙන් ගෙනයාමට හැකිවෙතැයි ඔවුන් සිතුවා. මේ නිසා ඔවුන්ට අත්ලාන්තික් සයුරේ නාවික ශක්තිය ප්‍රධානකොටම අවැසි වුවා. එහිදී හිට්ලර්ගේ නාවික හමුදා ප්‍රධානින් හිට්ලර් හට යෝජනා කලේ විශාල නැව් තැනිය යුතු බවයි. එහෙත් හිට්ලර් ගේ යු බෝට් අංගන ප්‍රධානියා වූ Karl Dönitz කල ඉල්ලීම වුයේ යු බෝට් 300 ක බලඝනයකින් ඔහුව ශක්තිමත් කරන ලෙසයි.

1939 දී යුද්ධය ඇවිලෙද්දී ඔහු සතුවූ යුබෝට්‌ ගණන 79 පමණයි. එයිනුත් 57 කෙටිදුර සහ පුහුණු සබ්මැරීන වූ අතර එයින් වෙරළාසන්න ප්‍රහාර පමණක් එල්ලකළ හැකි වුවා. ඉතින් යුද්ධය ආරම්භයේදීම සතුරා අඩපණ කිරීමට ඔහුට අසීරු වුනත් ඔහු තමන් සතුවූ යුබෝට්‌ උපයෝගී කරගෙන කණ්ඩායම් ලෙස (Wolfpack) පහර දී විශාල වෙළඳ නැව් ප්‍රමාණයක් මුහුදුබත් කලේ සෑහෙන සාර්ථකත්වයක් පෙන්වමින්.

කෙසේ වුවද මේ මතභේදාත්මක සැලසුම යුධ වියදම් අතින් ගත්තද වාසිසහගත එකක් වූයේ එක් නැවකට යන වියදමෙන් යුබෝට්‌ 4 පමණ සාදා ගතහැකි වූ නිසයි. එහෙත් ඉහල නිලධාරින් වෙතින් සැලසුමට නිසි අවධානයක් යොමු නොවීම නිසා යුද්ධයේ මුල්ම කාලයේ විශාල ලෙස ප්‍රතිවාදීන් මර්ධනය කිරීමට ජර්මනියට නොහැකි වුවා. යුද්ධයේ මැද කොටසේදී එනම් 1943 පමණ ජර්මනිය සතුව යු බෝට් සබ්මැරීන 400 පමණ තිබුණත්, අත්ලාන්තික් සාගරයේ දරුණු සටන් ඇවිලී ගියත්, ඒ සටන් වලදී ඇමරිකානු සහ බ්‍රිතාන්‍ය ඩිස්ට්‍රොයර් යාත්‍රා මගින් වන ප්‍රති ප්‍රහාර නිසා මෙන්ම යුද්ධයේ අවසාන කොටසේ එනිග්මා කේත සතුරන් අතට පත්වීම නිසා ජර්මනිය විශාල පරාජයන් ලැබුවා.

බ්‍රිතාන්‍ය සමඟින් ඇතිවූ ගැටුම.

ජර්මානුවන්ට බ්‍රිතාන්‍ය හමුදාව මුල්වරට මුණගැසෙන්නේ 1940 දී ප්‍රංශ ආක්‍රමණය කරන විටදීයි. එහිදී 338,000 පමණ වන මිත්‍ර පාර්ශවයේ සෙබළුන් සංඛ්‍යාවක් 1940 මැයි මස දී ප්‍රංශයේ ඩන්ක්‍රීක් හිදී සිදුවූ සටනේ දී ජර්මානුවන් වෙතින් පලා යනවා. එතැන බ්‍රිතාන්‍ය හමුදාවේ 215,000 වූ සෙබල පිරිසකට සහ 123000 වූ ප්‍රංශ සෙබල පිරිසකට අයත් සොල්දාදුවන් සිටින අතර එහි වන සංග්‍රාමික වටිනාකම ඉතා ඉහලයි. ඒත් හිට්ලර් ඔවුන් හට නිරුපද්‍රිතව බ්‍රිතාන්‍ය නැව් 11 මගින් පලා යාමට ඉඩ හරිනවා. ඒ ඔහුගේ එවකට සිටි ඉහලම උපදේශකයෙක් වූ හර්මන් ගෝරිං ගේ උපදෙස් මත. හිට්ලර් සිය සේනාංක සහ භට පිරිස් කොටුවී සිටි මිත්‍ර පාර්ශවික හමුදා වෙතින් ඉවත් කිරීම යුද්ධයේ එක හැරවුමක් සටහන් කළා. එසේ කරන ලද්දේ ඩන්ක්‍රීක් හි පොළව සන්නද්ධ රථ සඳහා උචින නොවන බව ප්‍රකාශ කරමින්.

හර්මන් ගෝරිං හට උවමනා වූයේ ජර්මානු Luftwaffe ගුවන් හමුදාව මගින් මේ කාර්යය ඉටු කරගැනීමට වුවත් එය කල නොහැකි වනවා. නමුත් එහිදී සන්නද්ධ රථ, යුබෝට්,‌ නැව් සහ ගොඩබිමින් සටන් වදින භට පිරිස් යොදවා මේ පිරිස කොටු කර ගත්තා නම් එයින් බ්‍රිතාන්‍ය යුධ ශක්තිය අඩපණ වනවා පමණක් නොව ඔවුනගේ එඩි බල ද බිඳී යාහැකිව තිබුනා. මීට‍ අමතරව තවත් 220,000 වූ මිත්‍ර පාර්ශවික සෙබල පිරිසක් ප්‍රංශ වරායන් හි සිට ද බ්‍රිතාන්‍ය විසින් නිදහස් කරගන්නවා. එයින් සිදුවන්නේ බ්‍රිතාන්‍ය යුධ ශක්තියට එකවර පහරක් එල්ල කර හානි කිරීමට වූ අවස්තාව නැති වීමයි.

බ්‍රිතාන්‍ය සතුව 1940 අප්‍රේල් අග වනවිට සිටියේ 394,615 ක පුහුණු භට පිරිසක් පමණයි. ඔවුන් සතු වූ Home Guard නම් ඒකකයේ නුපුහුණු ස්වෙච්ජා සෙබළුන් 250,000 ට අමතරින් සිටි ප්‍රමාණය තමයි ඒ. ඉතින් එවන් වූ සංඛ්‍යා ඇතිව තිබුණු විට ඔබට තේරෙනවා නේද තත්වයේ බරපතල කම?

ඒ වගේම බ්‍රිතාන්‍ය සතු වූ වෙරළබඩ රේඩාර් පද්ධතියට අභියෝග කිරීමට‍ ජර්මානු ගුවන් හමුදාව වූ Luftwaffe අපොහොසත් වීමත් ජර්මානු පරාජයට මුල්වෙන තවත් හේතුවක් වනවා. ඒ නිසා එවකට පැවති තත්වය යටතේ එංගලන්තයට සුවසේ සිය කර්තව්‍යය කරගෙන යාමට හැකි වීමත් V2 රොකට් මගින් එල්ලකළ බලපෑම ඉතා කුඩා වීමත් නිසා බ්‍රිතාන්‍යට සිය යුධ නාවික සහ ගුවන් හමුදා ශක්තිමත් කල හැකි වනවා. ජර්මානුවන් පීනමුන්ඩේ හි සිට v2 රොකට් ගැන උනන්දු වෙමින් සිටීම අවසානයේ ඉතා කුඩා යානා සංඛ්‍යාවක් තිබු බ්‍රිතාන්‍ය ගුවන් හමුදාවට ශක්තිමත් වීමට ඉඩක් වනවා වගේම බ්‍රිතාන්‍යයේ සිට ආක්‍රමණ මෙහෙයවීමට ද හැකියාවක් ලැබෙනවා.

1942 සෝවියට් ආක්‍රමණය.

ඔපරේෂන් බාබරෝසා නමින් එලි දකින ජර්මානුවන් ගේ මේ සෝවියට් ආක්‍රමණය එතෙක් මෙතෙක් හමුදාවක් සිදු කල විශාලතම ආක්‍රමණය සේ සටහන් වෙනවා. ඉතාම අමනෝඥ වූ ක්‍රියාවලියක් බවට පත්වන මේ මෙහෙයුම් එසේ වන්නේ කාරණා කීපයකිනි. එනම්

1. රුසියානු ජනතා සහය නොලැබීම නිසා ප්‍රතිරෝධයක් ඇති වීම

2. ජපාන හමුදා මගින් රුසියාවේ නැගෙනහිර කෙළවර ආක්‍රමණය කරවා යුධපිටිය තුනී කරගත නොහැකි වීම

3. නිසි ඉලක්කගත සැලසුමක් නොවීම

යන කාරණා නිසා. අපි ඒවා පිළිවලින් ගෙන විග්‍රහ කර බලමු,

රුසියානු ජනතා සහය නොලැබීම

ජෝසෆ් ස්ටාලින් ගේ යකඩ සපත්තුවට මිරිකී සිටි රුසියානුවන්ට හිට්ලර්ගේ ආක්‍රමණ සිසිලස ගෙන දීමක් වූයේ ඉතාමත් කෙටි දින ගණනකට පමණයි. ඔවුන් හිට්ලර් හට කොන්දේසි විරහිතව සහාය දුන්නත් ඉතා කෙටි කලක දී වටහා ගන්නේ හිට්ලර් යනු ද ස්ටාලින් තරම්ම උමතු ආඥාදායකයෙක් බවයි. එතැනදී ඔවුන් සිය ජාතිකාභිමානය පෙරදැරි කරගෙන රුසියානු රතු හමුදාවේ සටන් වැදීමට එක්වනවා. ඇත්තෙන්ම හිට්ලර් ඔහුගේ මර්ධනකාරී ක්‍රියාවලිය යුද්ධයේ දිනුම තෙක් පසු කළානම් ඔහුට ඉතා විශිෂ්ඨ ජයක් ලැබෙන්නට ඉඩ තිබුණා. එහෙත් රුසියානු ජාතින් බලාපොරොත්තු නොවූ මර්ධනය ඔවුන් ජර්මානුවන් සතුරන් කරගන්නා තෙක්ම පැවතුනා.

ජපාන හමුදා මගින් නැගෙනහිර ආක්‍රමණය කරවීම.

එකවර යුධ පෙරමුණු දෙකක් සඳහා රුසියාව යොමු කිරීම මගින් නට්සීන් හට තමන්ට එල්ල වන පීඩනය අවම කරගැනීමට හැකියාවක් තිබුණා. එමෙන්ම රුසියාවේ පුහුණු සෙබළුන් සහ අතිරේක භට පිරිස් අවම කිරීමටද ඔවුන් මහාද්වීපය පුරාම කුඩා කුඩා යුධ පෙරමුණු වල තුනී වන ලෙස පැතිරවීම සිදු කිරීමටත් එයි රුසියානුවන් පීඩනයට පත් කිරීමටත් ඔවුන්ට එයින් හැකියාවක් තිබුණා. එහෙත් ඒ සම්බන්ධව නිසි උත්සාහයක් නොගැනීම නිසා මේ කාර්යය වඩා අපහසු තත්වයට පත්වුයේ පසුකාලිනවයි. ජපානය නොසිතු ඉලක්කයක් ලෙස පර්ල් වරායට පහර දීමත් සමගින් යුද්ධයට ඇමරිකාව සම්බන්ධ වීමත් මේ හරහා සිද්ධ වුනා.

ඉලක්ක ගත නිසි සැලසුමක් නොවීම.

නිසි ලෙස ශීත කාලයට සුදානම් නොවූ භට හා උපාංග වලින් සමන්විත හමුදාවක් රුසියාවේ ආක්‍රමණයට යෙදවීමත් ඔවුන් හට නිසි ඉලක්කයක් ලබා නොදීමත් නිසා හිට්ලර් හට ජීවිත හානි පමණක් නොව භුමියෙන්ද අවසානයේ තම ලෙයින් ද [?] වන්දි ගෙවීමට සිද්ධ වූයේ රුසියානු ප්‍රතිප්‍රහාර දරුණු බැවිනි.

ඇත්තෙන්ම එහි වුයේ ප්‍රති ප්‍රහාර වල දරුණු බවට වඩා රුසියානු ආක්ටික් ශීත කාලය සඳහා ජර්මානු භට පිරිස් සහ උපාංග සුදානම් නොවීම නිසා සැපයුම් ඇනහිටීම/ ප්‍රමාද වීම, ඉන්ධන සහ උපකරණ ශීතලේ දී මිදීමට ලක්වීම නිසා අඩපන වීම වැනි ප්‍රායෝගික ගැටළු මගින් යුධ පිටියේ ආහාර වල සිට පතුරොම්, ඉන්ධන ඇතුළු සියලු දෑ හිඟ වීමයි. එයට වක්‍රාකාරව බලපෑ හේතුව වුයේ ජර්මානු ආක්‍රමණය විවිධ දිශා වලට යොමු වීම නිසා පුළුල්ව පැතිරුණු යුධ පිටියක් නිර්මාණය වීමත් එයට සැපයුම් සිදු කිරීමට වූ ප්‍රායෝගික අපහසුවත් නිසයි. භට පිරිස් ස්ටාලින්ග්‍රඩ් දෙසට ආක්‍රමණයේ මුල සිටම මෙහෙයවා එය අත්පත් කරගත්තා නම් බොහෝවිට ඔවුන්ට දුම්රිය මාර්ග ආශ්‍රිතව සැපයුම් මාර්ග පවත්වාගැනීමටත් ශක්තිමත් පදනමකින් රුසියානු ප්‍රතිප්‍රහාර මර්ධනය කිරීමටත් හැකියාවක් තිබුණා. ඒ සමගින්ම පීඩනයට පත්ව සිටි රුසියානු ජනතාව දිනාගැනීමට නිසි සැලසුමක් තිබුණා නම් යුද්ධයේ රුසියානු ආක්‍රමණය මීට වඩා වෙනස්ම මුහුණුවරක් ගන්න තිබු එකක්.

ගුවන් ආක්‍රමණ වලක්වා නොගැනීම

හිට්ලර් 1944 සිට ජර්මනියට මිත්‍ර පාර්ශවයෙන් එල්ලවන ගුවන් ප්‍රහාර නවතාගැනීමට අපොහොසත් වීම ඉතාම භයානක ප්‍රතිපල ගෙන දුන්නා. ඒ සඳහා හිට්ලර් සිය ගුවන් හමුදාව ශක්තිමත් කල යුතු වුවත් ඔහුගේ උනන්දුව V2 රොකට් ව්‍යාපෘතියට යොමු වීම ඔහුට අවැසි ප්‍රහාරක යානා නිපදවීම අඩු වීමට තවත් එක හේතුවක්. එමෙන්ම ඔහු විසින් අපි ඉහත ලිපි වලින් කතා කළා වගේ නිවැරදි තීරණ ගෙන නිවැරදි යානා/උපාංග තෝරා ගත්තානම් යුද්ධයේ හැසිරීම තීරණාත්මක වීමට බොහෝ දුරට ඉඩ තිබුනා.

මේ හේතු නිසා යුධ සැපයුම් අඩපණ වුනා පමණක් නොව කර්මාන්ත ඇතුළු දේ ද අවසානයේ ජර්මානු ආක්‍රමණයේදී ද මිත්‍ර පාර්ශවයට ජර්මනිය මැදින් ඉතා ඉක්මන් ගමනක් ලබා දීමට ද අවස්ථාව උදා උනා. ජර්මානු අභිමානය බින්දුවටම බැස යන්නටද බර්ලින් නගරය බිමටම සමතලා වීමටද මේ තීන්දු තීරණ උර දුන්නා

කෙසේ හෝ හිට්ලර් අවසානයේ පරාජය ලබන්නේ පස්දෙනෙකු ගෙන් එක අයෙකු සතුව රයිෆලයක් තිබුණු උණ්ඩ 100 පස්දෙනෙකු අතර බෙදුණු හමුදාවකින් වීම අතිශයින් දෛවෝපගත සිදුවීමක් වනවා.

---- බොහෝ දෙනා බලාපොරොත්තු වූ මේ ලිපිය ප්‍රමාද වීම ගැන මගේ බලවත් කණගාටුව. ----

ක්සැන්ඩරගේ කොළම ලියන්න අරං පසුගිය 7 වෙනිදා වෙත්දී වසරක් පිරුණා. ඒ වසර පුරා ලිපි 56 ඔස්සේ රැඳී සිට ලිවීමට දිරි දුන් ඔබ සැමට ස්තුතියි.

මේ පොස්ටුව බස් රේඩියෝවේ බ්ලොග් සතිය නියෝජනය කරයි.

syndi.buzzradio.lk

ජංගම උපාංග වලින් සිංහල බ්ලොග් කියවමු - ලියමු.

noreply@blogger.com (ක්සැන්ඩරයා) — Sat, 23 Jun 2012 10:57:00 +0000

ඕනෙම දෙයක් එක දිගටම යද්දී එපා වෙනවා. ඉතින් හිට්ලරුයි එයාගේ ලෝක යුද්ධෙයි ගැන ලියන ලිපි පෙළ මැද්දෙන් ඔන්න පොඩි වෙනසකටත් එක්ක මම වෙනස් කතාවක් කියන්න අද හදන්නේ. (එහෙම කිව්වට ලිපි පෙළ නවත්තලා නෑ ඕන්..)

බ්ලොගේටත් අලුත් පෙනුමක් එහෙම දීල මේ ලැහැස්ති වෙන්නේ එහෙම කරන්නට මාව පෙලඹවූ හේතුව කියන්න තමයි. ඔව්, ටිකක් අලුත් වැඩක් තමයි.

මගේ බ්ලොග් එකේ ස්ටැට්ස් බලද්දී මම දැක්ක විශේෂ දේවල් දෙකක් තිබ්බ. ඒ තමයි දැන් ගොඩක් දෙනෙක් තමන්ගේ ජංගම දුරකථන සහ උපාංග මගින් බ්ලොග් කියවන්න වගේම කමෙන්ට් කරන්නත් පෙළඹෙන බව. අයි ෆෝන් අයි පෑඩ් වලින් සහ ඇන්ඩ්රොයිඩ් උපාංග මගින් බ්ලොග් වලට ගොඩක් අය ඇවිත් තියනවා කියලා මට පෙනුන නිසා මේ ටිකේ මමත් පොඩි පරීක්ෂණ කීපයක් කළා.

මමත් ඉතින් ඇන්ඩ්රොයිඩ් පාවිච්චි කරන හින්දා මම ඒකෙන් HSDPA ආධාරයෙන් මගේ බ්ලොග් එක වගේම තව අපේ බ්ලොග් ලියන ගොඩක් දෙනාගේ බ්ලොග් කියවලා බැලුවා. ඇන්ඩ්රොයිඩ් 2.3 ජින්ජබ්‍රෙඩ් තියෙද්දී නම් සිංහල පෙනුනේ නිකං යුද පිටියක වැටුණ බුලට් ෂෙල් වගේ. හැමතැනම.. ඒත් මම පසුගිය අප්‍රේල් මාසේ ඉඳලා SETT බ්‍රවුසරේ දාගෙන බැලුවා ඇන්ඩ්රොයිඩ් 2.3 වලට. මෙන්න.. බ්ලොග් ලස්සනට කියවන්න පුළුවන්...

ඊට පස්සේ මම මගේ ඇන්ඩ්රොයිඩ් ගැජට් එක අලුත් ඇන්ඩ්රොයිඩ්වලට (අයිස්ක්‍රීම් සැන්ඩ්විච්) අප්ඩේට් කරා නේ. එහෙම කරපු ගමන්ම වගේ මොනවත්ම ඉන්ස්ටෝල් කරන්න කලින් මම බැලුවේ බ්ලොග් ටික. අනේ යස අගේට සිංහල පේනවා. හොඳට කියවන්න පුළුවන්.


මේ ඇන්ඩ්රොයිඩ් 4.3 වලදී (ගිනි නරියා බ්‍රවුසරෙන්)

මේ ලොකු කලාම අකුරු පෙනෙන විදිය

කියෙව්වට පස්සේ කමෙන්ට් කරන්න ගියාම තමයි ඊළඟ ප්‍රශ්නේ මතුවුනේ. කොහොමද සිංහල කොටන්නේ? ඉතින් ඒ සඳහා මම විවිධ මෘදුකාංග භාවිතා කලත් අන්තිමේ පිහිටට ආවේ භාෂා ලංකා ආයතනයේ නිර්මාතෘ, බ්ලොග් රචක, ධනික සහෝදරගේ සමාගම හදපු හෙළකුරු කියන මෘදුකාංගය. සිංහල ගුගල් ට්‍රාන්ස්ලිටරේට් වල ටයිප් කරනවා වගේම ලේසියට මේ මෘදුකාංගයෙන් අකුරු ගහන්නත් ඒවගේම අවශ්‍ය විටක නොදන්නා අකුරු ටයිප් කරන හැටි හොයාගන්නත් මේ මෘදුකාංගය සහය සලසනවා.

මෙන්න මේ දේවල් ටික දැනගත්තට පස්සේ මම තීරණය කළා මගේ බ්ලොග් එක තවත් ජංගම උපාංග වලට පහසුවෙන් කියවන්න වගේම ඒ දේවල් වලට ඕනේ කරන උපාංග ටිකත් මගේ බ්ලොග් එක හරහා සම්බන්ධ කර දෙන්න. හරි. ඉතින් දැන් කියන්න යන්නේ මේ විදියට ඔබේ සිංහල බ්ලොග් අඩවියත් ජංගම උපාංග මගින් කියවන්න දෙන්න කැමති නම් ඒ දේ කරන්නේ කොහොමද කියන එක.

මේ හෙළකුරු මගින් කමෙන්ට් එකක් කොටන ගමන්

මගේ බ්ලොග් එකේ වගේම ඔයාල ගොඩක් දෙනෙකුගේ බ්ලොග් වලත් ධනික සහෝදරයා හදපු SETT deco විකේතකය විජට්ටුවක් විදියට දාගෙන ඇති. පරිගණකයේ දී සිංහල යුනිකේත අකුරු නැතුවත් බ්ලොග් කියවන්න පුළුවන් වෙන්න උදවු කරන අන්න ඒ විජට්ටුව තමයි මේ හපන්කම ජංගම උපාංග වලත් කරන්නේ. බ්ලොග් එක ජංගම උපාංග වලදී ලෝඩ් වෙනකොට අකුරු විවිධ සංකේත විදියට දිස් වුනත් ලෝඩ් වූ වහාම ඒවා අපිට කියවිය හැකි සිංහල අකුරු බවට මේ විජට්ටුව හරහා පත් වෙනවා. මේ විජට්ටුව නැති බ්ලොග් නම් කියවන්න අමාරුයි. අකුරු එහෙ මෙහෙ වෙලයි තියෙන්නේ..

ගොඩාක් බ්ලොග් මේ හරහා පහසුවෙන් කියවන්න පුළුවන්. ඒ වගේම මේ හෙළකුරු මෘදුකාංගය හරහා පහසුවෙන්ම කමෙන්ට් කරන්නත් පුළුවන්. පරිගණකයෙන් ටයිප් කළා වගේමයි කිසිම වෙනසක් නම් නෑ. නමුත් ඇතැම් බ්ලොග් වල ඇති HTML/Javascripts flash plugins මගින් ලෝඩ් වෙන වේගය නම් ඉතා අඩු කරලා ඇති බව කියන්න ඕනේ.

අන්තිමටම, ඇන්ඩ්රොයිඩ් වලින් බ්ලොග් කියවන අයට තව එක ගැජට් එකක් ගැන කියන්න ඕනේ. ෆයර් ෆොක්ස් වෙබ් බ්‍රවුසරය. මේ බ්‍රවුසරය ගොඩක් වේගවත් වගේම pdf වලින් අවශ්‍ය බ්ලොග් පිටු සේව් කරන්නත් ඔප්ෂන් දීලා තියනවා. කැමති අය මෙතනින් බාගෙන පාවිච්චි කරලම බලන්නකෝ.

ප.ලි. : SETTdeco විකේතකය වර්ඩ් ප්‍රෙස් බ්ලොග් සඳහා ක්‍රියා කරන්නේ ඒ බ්ලොග් ඔබගේම සර්වරයක පවත්වාගෙන යන්නේ නම් පමණි.

-- මෙහි වන අයිකන සහ නිෂ්පාදන සන්නාම අදාළ ආයතනයේ පුර්ණ අවසරය මත පලකොට ඇත. ඒ අයිකන, සන්නාම සතු පුර්ණ අයිතිය භාෂා ලංකා ආයතනය සතු වේ. --

දෙවනි ලෝක යුද්ධය - ඉතිහාසයේ සැඟවුණු තැන් II

noreply@blogger.com (ක්සැන්ඩරයා) — Sun, 17 Jun 2012 15:43:00 +0000

දෙවැනි ලෝක යුද්ධය තුල වූ ඉතිහාසයේ සැඟවුණු තැන් හා ඉතිහාසයේ හැරවුම් ලක්ෂ පසුබිම් කරගෙන ලියවෙන ලිපි මාලාවක දෙවැන්නයි මේ. කලින් අපි කතා කලේ හිට්ලර් ගැන වූ සැඟවුණු තතු සහ හිට්ලර් පසුපසින් වූ අදිසි හස්තයන් ගැන. ඒ එක්කම හිට්ලර්ගේ මරණය ගැන අපි කතා කළා. ඔහු සිය දිවි නසා ගත්තා ද එසේ නැතිනම් ඔහු පලා ගියාද කියලයි එහිදී අපි කතා කලේ. මේ පහල තියන ලින්ක් වලින් ඒ ලිපි ටික කියවන්න පුළුවන්.

· හිට්ලර් දිවි නසා ගත්තාද නැතිනම් පලා ගියාද?

· දෙවනි ලෝක යුද්ධය -ඉතිහාසයේ සැඟවුණු තැන් I

අතිශය බිහිසුණු හා තාක්ෂණය අතින් විශ්මිත නිමැවුම් බිහිවූ දෙවැනි ලෝක යුද්ධය වර්ථමාන යුධබිමට පවා සෙවනැලි ගෙන එනවා. ඒ යුධ අවි සහ යුධ ක්‍රම අදටත් වලංගුයි. දෙවැනි ලෝක යුද්ධය හමාර වීම සමගින්ම ඇමරිකාව සහ රුසියාව විසින් හිට්ලර්ගේ යුධ උපක්‍රම, අවි ආයුධ මෙන්ම තාක්ෂණයද භාවිතා කරනවා.

අද අපි කතා කරමු හිට්ලර්ගේ විශ්මිත ආයුධ ගැන වගේම ඒ ආයුධ වලින් වූ බලපෑම, හිට්ලර් ඇතුළු නාසින්ගේ නොසැලකිල්ල සහ නිසි ලෙස භාවිතා නොකිරීම නිසා ඔවුන්ට සිද්ධ වූ පරාජයට ඒ තීන්දු තීරණ හේතු වූ විදිය. එහෙනම් එන්න කියවන්න, Wunderwaffe des Hitler

මොනවාද මේ වුන්ඩර්වෆේ දෙස් හිට්ලර් කියන්නේ?

වුන්ඩර්වෆේ (wundarwaffe) කියන්නේ ඉංග්‍රීසියෙන් වොන්ඩර් වෙපන්ස් (wonder weapons) එහෙමත් විශ්මිත ආයුධ කියන තේරුමයි. ඇත්තෙන්ම මේ හිට්ලර්ගේ ආයුධ ඒ කාලයේ හැටියට සහ තාක්ෂණයේ හැටියට අතිශයින් ඉදිරියෙන් තිබු ආයුධයි. එයින් ඇතැම් ඒවා ඒ වන විටත් යුද්ධය සඳහා සක්‍රිය දායකත්වය ලබා දුන් අතර මුලාකෘතියට පමණක් සීමාවූ ඇතැම් ඒවා හිට්ලර්ගේ සහ යුධ ආයුධ පිළිබඳ අමාත්‍ය ඇල්බර්ට් ස්පියර් (ජර්මන් උච්චාරණය: ශ්පියර් ) ගේ නියෝග මත නවතා ලු ඒවායි. සමහර අවස්ථා ඊට වෙනස්. මෙසේ සැලසුම් කල ඇතැම් ආයුධ අතිශයින්ම විශාලිත වූ අතර ඒවායින් ජර්මන් ආර්ථිකයට හෝ යුද වියදම් වලට යහපතක් වුනේ නෑ.

අපි එයින් තෝරාගත් කීපයක් එකිනෙක විමසා බලන්න පටන්ගමු ගුවන් යානාවල ඉඳං.

මෙෂස්මිත් ME 262 (Messerschmitt Me 262)

දෙවැනි ලෝක යුද්ධයේදී මිත්‍රපාර්ශවිකයින්ගේ ගුවන් භටයින් බයෙන් මෙන්ම පුදුමයෙන් ත්‍රස්ත කරන්නට සමත්වූ ලොව පළමු ක්‍රියාන්විතයේ යෙදුනු ජෙට් ප්‍රහාරක යානය මෙෂස්මිත් ME 262 ගුවන් යානයයි. 1942 මැද භාගයේදී කරලියට පිවිසි මේ යානාව එකල තිබුණු වේගවත්ම මිත්‍ර පාක්ෂික යානාවට වඩා කිහිප ගුණයක් වේගවත් වූවා. ඒ එකල තිබු සියලු මිත්‍ර පාර්ශවයේ යානා වලට වඩා පැයට සැතපුම් 100 කට එහා වේගයක්. එමන්ම ඉතාමත් සාර්ථක ප්‍රති ප්‍රහාරක යානාවක්. (interceptor)

මෙෂර්ස්මිත් 262 යානාවක්

මේ යානාව ලෝක යුද්ධයේ අග භාගයේදී එළිදැක්වූ නිසා එය සාර්ථක නොවුණු බව කීවත් සත්‍ය තත්වය ඊට බොහෝ එහාට විහිදුනක්. මේ යානය ප්‍රති ප්‍රහාරකයක් වීම හිට්ලර්ට එතරම් ඇල්ලුවේ නෑ. ඔහුට උවමනා උනේ ඊට එහා ගිය ප්‍රහාරක යානයක් සහ බෝම්බ හෙලන යානාවක්. ඒ නිසාම මේ යානාව සැහැල්ලු බෝම්බ හෙලන යානාවක් ලෙසද වෙනස් කරනවා. ඒ වුනත් ඒ වනවිටත් ජර්මනිය සතුව විශිෂ්ඨ සැහැල්ලු බෝම්බ හෙලනයක්‌ තිබුනා. ඒ යුන්කර්ස් JU 87 යානාව (Junkers JU 87).(ජුන්කර්ස් ලෙස තිබුණත් ශබ්ද වන්නේ යුන්කර්ස් ලෙසයි,)

හිට්ලර්ගේ මේ තීන්දුව නිසා යානයේ නිෂ්පාදනය සිද්ධ වුනේ ඉතාම සෙමින්. එය මේ යානාවල සංඛ්‍යාව පහල හෙලන්නත් ඒ පහල හෙලීම නිසා ප්‍රහාරක කටයුතු වලදී ඉතා අල්පයක් වූ යානා භාවිතා කිරීමට වීම නිසා ප්‍රථිපල මද වීමත් සිද්ධ වුනා. එමගින් සිද්ධ වුනේ ජර්මනිය තුලට බෝම්බ හෙළු මිත්‍ර පාර්ශවික යානා පැමිණීම දිවා කාලයේදී හෝ නවතාලීමට නොහැකි වීමයි. එය ජර්මන් පරාජය ඉක්මන් කරන්න එක හේතුවක් වුනේ ජර්මානු යුධ නිෂ්පාදන සිද්ධ කිරීමට නොහැකි වීමත් කර්මාන්ත හා ඉන්ධන පිරිපහදු කටයුතු සිදු කිරීම ඉතාමත් අසීරු වීමෙන් යුද්ධයට අවශ්‍ය අනෙකුත් සැපයුම් අඩාල වීමත් සමගින්. ඒ එක්කම අනෙකුත් ගුවන්යානා ගුවන්ගත කිරීම පවා අසීරු වන තැනට ජර්මන් ගුවන් හමුදාව පත්වුණේ අහස මුළුමනින්ම මිත්‍ර පාර්ශවය අත්කර ගැනීමත් සමගයි.

මේ යානය මිත්‍ර පාර්ශවයට කොයිතරම් හිසරදයක්ද කියනවානම් ඔවුන් මේ යානයට පහර දුන්නේ එක්කෝ යානය ඉහලට ඔසවන්න සුදානම් වන විටදී හෝ ගොඩබාන අවස්ථාවේදීයි. අහසේදී මේ යානා බිම දැමු ප්‍රමාණය ඉතා සීමිතයි.

මේ යානයට පළමුව 1939 දී හෙයින්කල් ආයතනය HE 178 නම් යානාවක් (ලොව පළමු ජෙට් යානාව) ගුවන්ගත කලා. 1939 නොවැම්බර් මස පළවැනිදා එය ෆීල්ඩ් මාෂල් එහාඩ් මිල්ච් (Erhard Milch) සහ කර්නල් ජෙනරාල් අර්නස්ට් උඩෙට් Ernst Udet ගෙන් සමන්විත රයිච් ගුවන් සේවා අමාත්‍යාංශය වෙත සංදර්ශනයක් ඉදිරිපත් කළා. එහෙත් ඔවුන් එයින් මේ යානයේ වැදගත්කම ගැන කිසිඳු තැකීමක් සිදුකලේ නෑ. ඒ වගේම හර්මන් ගෝරින්ග් (හිට්ලර්ගේ ලුෆ්ට්වෆා :Luftwaffe ප්‍රධානියා) සාම්ප්‍රදායික ගුවන් යානා වලට තැන දීම නිසා මේ යානයේ වැදගත්කම තවත් අඩු වූවා. නමුත් මෙහිදීත් ඔවුන් මදක් දුරදිග බලා එදා ඒ තීන්දු තීරණ ගත්තා නම් බොහෝ කොටම යුද්ධයේදී ඒ තීරණය හැරවුම් ලක්ෂයක් වනවා නොඅනුමානයි.

හෝර්ටන් 229 (Horten 229)

ඉස්සරලාම පින්තුර ටිකක් බලලා ඉමු.

ජර්මානු හෝර්ටන් 229 යානාවක දුර්ලභ ජායාරුපයක්.

හෝර්ටන් 229 යානා ආකෘතියක්. (නියම ආකෘතියක් නොවේ)

ඇමෙරිකන් B2 බෝම්බ හෙලනයක්‌.

පළමුවැනි පින්තුරය සහ දෙවැන්න ජර්මන් හෝර්ටන් 229 යානාවක් (දෙවැනි පින්තුරේ නියමු කුටිය හා එන්ජින් මදක් ඉදිරියට වෙන්නයි තියෙන්නේ. එත් සැබවින්ම ඒවා තටුව මත පිහිටිය යුතුයි. මේ ආකෘතියේ ඒ කොටස නිවැරදි නෑ). තුන්වැන්න ඇමරිකන් බී 2 බෝම්බ හෙලන යානාවක්. මේ දෙකම හදල තියෙන්නේ ස්ටෙල්ත් එහෙමත් නැතිනම් රේඩාර් වලින් නොපෙනී සිටීමේ හැකියාව සහිතව ඉන්න. කොහොමද දෙකේ වෙනස?

හෝර්ටන් 229 යානය විශාල ලෙස නිපදවූ යානාවක් නෙවෙයි. මුලාකෘති දෙකක් පමණක් නිර්මිත මේ යානාවේ එක මුලාකෘතියක් පරීක්ෂණ සැසියකදී (Test Flight) විනාශ වුනා. ඉතිරි මුලාකෘතිය ඔපරේෂන් පේපර්ක්ලිප් (Operation Paperclip) යටතේ ප්‍රංශයේ චියර්බොග් වරායෙන් ඇමරිකාවට නැව්ගත කළා. ඒ ජර්මනියේ අධිආරක්ෂිතව පැවතුනු කලාපයක රහසිගත ගුවන් පථයකින් සොයාගැනීමෙන් අනතුරුව.එසේ කලේ බර්ලිනය කරා එන රුසියානු දෑත් වලින් මේ අධි තාක්ෂණික උපකරණ රැකගැනීමටයි. රුසියානුවන් දියුණු ජර්මන් තාක්ෂනය අත්පත් කරගන්නවාට ඇමරිකාව සතුටු වුයේ නෑ.

80% ලී භාවිතා කර නිපදවා තිබුණු මේ යානාවට ගල්වා තිබු මැලියම් සහ සායම් වල අඟුරු අඩංගු වෙලා තියෙනවා. ඒ රේඩාර් තරංග උරාගන්නට. යානයේ හැඩය තනි තටුවක් ලෙස නිමවීමත්, එන්ජින් සහ නියමු කුටිය ඇතුළු සියල්ල යානය තුලම පිහිටීමත් සහ යානයේ ලෝහ කොටස් අවම වීමත් යන කාරණා නිසා මේ යානාව රේඩාර් මගින් හඳුනා නොගනීවි යන උපකල්පණය යානය සැලසුම් කල හෝර්ටන් සහෝදරයෝ සිතුවා. 1930 දශකයේ සිට ග්ලයිඩර් භාවිතා කරමින් සිටි ඔවුන් මේ යානාවත් ග්ලයිඩර් සැලසුමකට අනුව ඉදිරිපත් කළා.

මේ යානාව වසර 2008 දී B2 යානය නිපදවූ නොර්තොප් කෝපරේෂන් (Northrop Corporation) ආයතනය මගින් නැවත ප්‍රති නිර්මාණය කරනවා. මේ සම්බන්ධව හිස්ටරි චැනලය(The History Channel) මගින් රූපවාහිනී වැඩසටහනක් හිට්ලර්ගේ රේඩාර් මත නොපෙනෙන ප්‍රහාරක යානය (Hitler’s Stealth Fighter) නමින් සිදු කරනවා. මේ ලින්ක් එක දිගේ ගිහින් ඔබට ඒ වැඩසටහන බලන්න පුළුවන්.

මේ යානය නිර්මාණය කලේ බ්‍රිතාන්‍ය වෙරළබඩ රේඩාර් පද්ධතියට අභියෝග කරන්නයි. හිට්ලර්ට බ්‍රිතාන්‍ය ආක්‍රමණය කරන්නට නොහැකිවූ එක බාධාවක් වූ මේ රේඩාර් පද්ධතිය විනාශ කරන්නට හිට්ලර් බොහෝ උත්සාහ කළා. මේ රේඩාර් පද්ධතිය ඇසුරින් බ්‍රිතාන්‍ය තම ප්‍රහාරක යානා ඉතා නිරවද්‍ය තොරතුරු වලින් සන්නද්ධ කළා මෙන්ම ප්‍රංශ වෙරළ තීරුව ආසන්නයෙන් එන ජර්මන් යානා කඳවුර පසුකර වෙරළට ඇතුල්වෙත්ම හඳුනාගැනීමට ද ක්‍රියාකාරී වුනා.

මේ ආකෘතිය යොදාගෙන කල පරීක්ෂණ වලින් තහවුරු වුයේ මේ යානයට එවකට බ්‍රිතාන්‍යය භාවිතා කල රේඩාර් පද්ධති වලින් අනාවරණය වීමට ඇති දුර සාම්ප්‍රදායික යානා වල දුරෙන් 20% බවයි. එනම් අනාවරණය කරගන්නා ලක්ෂයේ සිට විනාඩි නවයකින් ගමන් කල හැකි දුරක්.

එවකට ලුෆ්ට්වාෆා යානා බ්‍රිතාන්‍ය රේඩාර් පද්ධතියට හසු නොවීමට ඉතා පහලින් පියාසර කළා. (මතකද LTTE ගුවන් යානා? ඒවාත් පහතින් නේ පියාසර කලේ) ඒ පොලවේ සිට අඩි 50 ක පමණ උසකින්. මේ යානාවත් ඒ ක්‍රම අනුගමනය කළා නම් යානය රේඩාර් තිරයේ දිස්වන්නේ රේඩාර් කලාපයට විනාඩි දෙක හමාරක දුරකදී. කොහොමද වැඩේ?

ජෙට් එන්ජින් යොදාගන්න නිසා යානයේ වේගය ඉතා ඉහල අගයක් ගන්නා අතරම එවකට තිබු පිස්ටන් එන්ජින් වලින් ධාවනය කල මිත්‍ර පාර්ශවයේ වේගවත්ම යානාවට වඩා වේගවත් නිසා ඔවුන්ට කිසිවක් කල කියාගත හැකි වන්නේ නෑ. ඔවුන්ගේ ගුවන් යානා ගුවනට ඔසවන විටත් මේ යානය පහරදී අවසන්ව නැවත හැරී ගොස් තිබෙන්නට බැරි නෑ.

අරාඩෝ AR 234 (Arado Ar 234)


අරාඩෝ AR 234 මුල්ම යානා වලින් එකක්. (මේ යානාවේ රෝද වෙනුවට තිබුනේ ස්කිඩ්ස් )

අරාඩෝ AR 234 යානාව හිට්ලර්ගේ තවත් එක විශ්ම අවියක් වූ ගුවන් යානාවක්. ජෙට් එන්ජින් දෙකකින් බලගැන්වුණු මේ යානාව මුලිකවම හිට්ලර් යෙදෙව්වේ සතුරු භුමි අධ්‍යයන (reconnaissance) කටයුතු වලටයි. පසුව එය බෝම්බ හෙලන යානාවක් ලෙස ඉතා සුළු අවස්ථා ගණනකදී භාවිතා කර තියනවා. එබැවින් මේ යානාව ලෝකයේ ප්‍රථම බෝම්බ හෙලන යානාව බවට පත්කර තිබෙනවා.

ජෙට් බලගැන්වූ මේ යානාව 1944 දී බ්‍රිතාන්‍යට ඉහලින් ගමන්කළ අවසාන ජර්මානු යානාවයි. 1944 සැප්තැම්බර් මස දී හඳුන්වාදුන් මේ යානාව බෝම්බ හෙලනයක්‌ ලෙස සීමිත මෙහෙයුම් ගණනක යෙදුනත් එයින් අත්කරගත්තේ නොබිදුණු කීර්තියක්. මිත්‍ර පාර්ශවයේ යානා මගින් ගුවනේදී ප්‍රති ප්‍රහාර එල්ල කිරීම ඉතා අපහසු යානාවක් බවට මේ යානාව එකල පත්වුණේ එහි වූ අධිවේගීබව නිසයි. මේ යානවත් ඒ නිසා මිත්‍ර පාර්ශවයේ ප්‍රහාර වලට ලක්වුයේ බොහෝ කොටම භුමියේ රැඳී සිටින විට හෝ ගොඩබෑම සිදු කරන විටදීයි. මෙවන් වූ සාර්ථකත්වයක් තිබුණු මේ යානය බෝම්බ හෙලන කටයුතු වලට යෙදවීමට අකමැති වුයේ ෆීල්ඩ් මාෂල් එහාඩ් මිල්ච් විසින් ගනු ලැබූ තීරණයක් නිසා බවට කතාවක් තියෙනවා. ඒත් ඒ කතාව තහවුරු කොට නෑ මීට ඉහතදීත් අපි කතා කල මේ ෆීල්ඩ් මාෂල් එහාඩ් මිල්ච් යුදෙව්වෙක් වගේම ජර්මානු ගුවන් හමුදාවේ යානා සහ අවි සැපයුම් පිලිබදව වූ ප්‍රධානියායි.

පසු කාලින අරාඩෝ යානාවක් ගුවන් ගත කිරීමට සූදානමින්

යානාව යුද්ධයේ අවසාන භාගයේ නිෂ්පාදනය කිරීම නිසා සම්පත් හිඟ වීම ආදිය මගින් නිෂ්පාදිත ප්‍රමාණය සීමා සහිත වීමත් (යානා 210), බෝම්බ හෙලනයක්‌ ලෙස මුල සිටම භාවිතා නොකිරීමත් මේ යානාව මගින් ගත හැකිව තිබු සේවාව සහ යුද්ධයේ හැරවුම් ලක්ෂයක් වීම වලකාලනු ලැබුණා. එමෙන්ම යුද්ධයේ අවසාන භාගයේදී ලුෆ්ට්වාෆා සතුවූ ගුවන් බලය ඔවුන්ගේම නොසැලකිල්ල සහ නිසි ව්‍යපෘති සඳහා දායකත්වය ලබා නොදීම මගින් කඩා වැටී තිබුනා. මේ හේතුවෙන් මිත්‍ර පාර්ශවය ජර්මනියේ මර්මස්ථාන වෙත දැරිය නොහැකි ගුවන් ප්‍රහාර එල්ල කරමින් ජර්මන් යුධ යාන්ත්‍රණය පරාජයේ කෙළවරටම තල්ලු කළා.

1945 වන විට විවිධ අවි වර්ගයන් ආයුධ විශේෂ කීපයකින් සෑදීමට සැලසුම් කර තිබුනත් ඒ සියලු සැලසුම් පොත් වලට පමණක් සීමා කරන්නට යුද්ධය දැඩි වුවා. සැලසුම් කල යුධ අවි කෙසේ වෙතත් ඒ වන විටත් භාවිතයට යුධ අවි නිෂ්පාදනය මෙන්ම අනෙකුත් නිෂ්පාදනද නිපදවීම ගැටලුවක් ව තිබුනා.ජර්මනියට මේ වනවිට අවශ්‍ය වුයේ රාත්‍රී ප්‍රහාර සඳහා යෙදිය හැකි විශ්වාසවන්ත යානාවක්.

එවන් යානාවක් ජර්මනියට තිබුනාද? තිබුනා නම් ප්‍රහාර සඳහා යෙදෙව්වේ නැත්තේ ඇයි ? යන කරුණු එක්කම ලෝක ඉතිහාසයේ මුල් වරට දෙවැනි ලෝක යුද්ධයේදී භාවිතා කිරීමට සුදානම් වූ ජර්මන් න්‍යෂ්ටික ආයුධ ගැනත් අපි ඊළඟ ලිපියෙන් කියවමු.

(ලිපිය ආයෙත් දෙකට කැඩුවා. එපාවෙයි මාගල් කියවන එක කියල හිතලා. ඒකට සමාව භජනය කරන්න.)