தேவதேவன் கவிதைகள்

நோயாளி

noreply@blogger.com (Sakunthala ) — Sun, 01 Nov 2026 18:30:00 +0000

இரத்தக் குழாய்களின்
அடைப்பு நீக்கும் மருத்துவத்தால்

இதயம் பலவீனமாகிவிட்டாலும்

மடிந்துவிடமாட்டோம் எனும் தைரியத்தில்

காதலின் ஒரு முகம் இது என

மென்மையையும் பொறுமையையும்
அமைதியையும்
நடிக்கிறது காண் நெஞ்சு!

அவனுடன்...

noreply@blogger.com (Sakunthala ) — Thu, 29 Oct 2026 18:30:00 +0000

புல்தளத்தைவிட
அவன் அமர்ந்திருக்கும்
சிமெண்ட் பெஞ்சைவிட
நெருங்கிவரும்
அந்தி இருளைவிட
இருள் போர்த்தத் தொடங்கியிருக்கும்
இந்த மரங்களை விட
நடைப் பயிற்சி முடித்துக் கொண்டிருக்கும்
மனிதர்களைவிட
இந்த கொசுக்கள் அவனுடன்
மிக நெருக்கமாக...!

நகை

noreply@blogger.com (Sakunthala ) — Tue, 27 Oct 2026 18:30:00 +0000

இந்த நகையை
ஒரு பெண்ணின்
கழுத்திலணிந்து பார்க்க வேண்டும்
இல்லையெனில் கடைக்காரனைப் போல்
ஆழ்ந்து இருண்ட
ஒரு வண்ணப் பேழையில்
நன்றாய்ப் பார்த்து
மூடி வைக்க வேண்டும்.

அப்படித்தான் நான் இந்த நகையைப்
பாதுகாத்துக்கொண்டு
எப்போதும் நான் உன் முகத்தையே
தேடிக்கொண்டிருக்கிறேன்.
எங்கும் உன் முகத்தையே
எப்போதும் நான் தேடிக்கொண்டிருக்கவேண்டும்.
எனும் நோக்குடனேதானே
வானத்தில் ஒளிரும் நட்சதிரங்களாயும்
பெருநகரங்களின் இரவுமின்விளக்குகளாயும்
கானகத்து மலர்ச் செறிவுகளாயும்
நீ சூடிக் கொண்டிருக்கும்
கழுத்தணியை மட்டுமே காட்டுகிறாய்!

உன்னை நான் கண்டு கொள்ளும்போதெல்லாமும்
அங்கே நீ உன் கழுத்தணியோடே நின்று
சிரிப்பதையே பார்க்கிறேன்.
ஓடிப்போய் நான் என் பேழையைத்திறந்துபார்க்க
ஆழ்ந்து இருண்ட அதன் வெறுமைதான்
எத்துணை பரவசப்படுத்துகிறது என்னை!

முத்துக்கள்

noreply@blogger.com (Sakunthala ) — Sun, 25 Oct 2026 18:30:00 +0000

அவன் பேசும் முத்துக்கள் எல்லாம்
எதிர்நின்று கேட்போர்
அணிகளாகமட்டுமே மாறிவிட்டன!

உதிராத முத்துக்களை
தன் உள்ளேயே வைத்துக் கொண்டவன்போல்
அவன் பேசாமலானான்
அவன் கண்களில் ததும்பின காண்
அந்த முத்துக்கள்!

காண்பவர்களால் மட்டுமே
காண்பவர்களாயும்
காணப்படுபவைகளாயும்
காதலாயும்
காதலின் செயல்களாயும்
உலவின காண் முத்துக்கள்!

காட்டின் நடுவே ஒரு வீடு

noreply@blogger.com (Sakunthala ) — Thu, 22 Oct 2026 18:30:00 +0000

தன் வண்டியின் ஒளியால்தான்
பிரதிபலிக்கும் ஒளியில்
தன்னைக் காட்டிக் கொண்டு செல்லும்
பாதையும் வண்டியும்
திடீரென்று நின்று விட்டது,
அடர்ந்து இருண்ட
அந்தக் காட்டில் தன்னந்தனியாய்
விளக்கெரிந்து கொண்டிருந்த ஒரு வீட்டின்முன்!

என்ன ஒரு கேள்வி,
என்ன ஒரு பசி, தாகத்துடன்?

காணாததைக் கண்டுவிட்டதேபோல் ?

இனி போகவேண்டிய தூரம்
என்று ஒன்றில்லை!
இடம் என்று ஒன்றில்லை!

இனி எங்கிருந்தாலும் சரி
தான் இருக்கும் இடத்திற்கும்
சேர வேண்டிய இடத்திற்குமிடையே
பிரிவு என்பதே இல்லை!

பெருவெள்ளம்

noreply@blogger.com (Sakunthala ) — Tue, 20 Oct 2026 18:30:00 +0000

எத்தகைய அநீதியைக் காண்கையிலும்
ஆபாசமான குழாயடிச் சண்டையில் கலக்காமல்
அம்மா தண்ணீர்க்குடத்துடன் வந்து கொண்டிருக்கும்
அழகைப் பார்த்துக்கொண்டிருக்கிறார் மகள் நவீனா!

எப்படி அம்மா இது உன்னால் இயல்கிறது?

கோபமும் வெறுப்பும் கூப்பாடும் மிக்க
மாற்றுக் கட்சியாகிவிடாமல்
நாம் ஒருநாளும் இரண்டாகப் பிரிந்துவிடாமல்
அநீதியைக் கண்டுகொள்ள முடிந்தால்
அநீதிகள் அகன்று விடாதா?

மூன்றாம் மனிதன் என
நடுநிலையாளன் என வரும் ஒருவனும்
அநீதிக்குச் சோரம் போகிறவனாயிருந்தால்?
மூன்றாம் மனிதனும் வெளியிலிருந்துவராமல்
நம் ஒவ்வொருவருக்குள்ளுமிருந்து வந்தால்?
எல்லோரும் நவீனாவின் அழகான
அம்மாவாகிவிடுவார்களில்லையா?

குழாயடியில்தான் சண்டைவருமோ
பெருவெள்ளம் ஒன்று
நமக்குள்ளே கண்டடையப்பட்டிருந்தால்?
அதனை
எந்தச் சொற்களாலும் விக்கிரகங்களாலும்
வழிபாடுகளாலும் சடங்குகளாலும் கோயில்களாலும்
தேக்க முடியாது என அறிந்திருந்தால்?

அன்பு

noreply@blogger.com (Sakunthala ) — Sun, 18 Oct 2026 18:30:00 +0000

அன்பு நவீனா,
என் மீதுள்ள உன் அன்பின்
காரணத்தைச் சொல்
எந்த ஒரு காரணம் இருந்தாலும்
அது அன்பு அல்ல, இல்லையா?

என்மிது ஒரு கோபமோ வெறுப்போ
இருந்தால் அதைச் சொல்
கண்டிப்பாக ஒரு காரணம் இருக்கும்
அதைக் கண்டுபிடித்துச் சொல்
நம் பார்வை அதனை அகற்றிவிடும்

முதலில் நாம் கண்டுகொள்ள வேண்டியது
இந்த உலகில் ஒரே ஒரு பிரச்னைதான்
இருக்கிறது என்பதைத்தான்!

பின்னலான விஷயங்கள்...

noreply@blogger.com (Sakunthala ) — Thu, 15 Oct 2026 18:30:00 +0000

பின்னலான விஷயங்கள் எல்லாம் உலகில்
சிக்கலாகத்தான் இருக்க வேண்டுமா, என்ன?

பின்னிவிட்டிருந்த தனது நீள் நெடுங் கருங்கூந்தலை
முன்னெடுத்து மார்மீதுபோட்டு_ அவர்
சிரித்துக்கொண்டு நிற்பதைப் பாருங்கள்!

அழகு

noreply@blogger.com (Sakunthala ) — Tue, 13 Oct 2026 18:30:00 +0000

அகலத் திறந்த
முதுகின் முழுநிலா

எதற்கான ஓர் உவமையுமல்ல, அல்லவா?

அழகின்மீது
அடுக்கடுக்காய் விழுந்துகொண்டேயிக்கும்
பூவிதழ்கள்போல்
மூடப்படவே முடியாததோர் அழகு!

அழிவில்லாத ஒன்றை
அறிவித்துக் கொண்டேயிருக்கும் ஒரு சொல்!

கவிதை என்பதால்
வேறு ஒரு வழியில்லாமல்
தோன்றிவிட்ட ஒரு படிமம்!

மலராகிவிடுதல்!

noreply@blogger.com (Sakunthala ) — Fri, 09 Oct 2026 18:30:00 +0000

( வான்கோ பதிப்பகம் வெளியிட்ட தேவதேவனின் நிலவில் உதித்த கார்முகில் கவிதை நூலுக்கு லோகமாதேவி எழுதிய முன்னுரை)

தேவதேவன் அவர்களை 2018 ஆம் ஆண்டு காவிய முகாமில் முதன்முதலாகச் சந்தித்தேன். அமர்வுகளின் இடைவேளையில் வெயில் காய்ந்துகொண்டு பட்டுத்தலையணைகளைப் போல மலர்ந்திருந்த ஹைட்ராஞ்சியாக்களைப் பார்த்துக் கொண்டிருக்கையில் தேவதேவன் அருகிலிருந்த ஒரு அடர் ஊதா மலரைக்காட்டி, ‘இது எத்தனை அழகாருக்கு இல்லியா’ என்றார். அதற்கு முன்னர் அவரிடம் நான் பேசியிருக்கவில்லை.

முழுக் கட்டுரையையும் இங்கே படிக்கலாம்

கவிதை நூல் வாங்க இங்கே சொடுக்கவும்

கைகால் முளைத்த ஒன்றுபோல்...

noreply@blogger.com (Sakunthala ) — Thu, 08 Oct 2026 18:30:00 +0000

கைகால் முளைத்த ஒன்றுபோல்
அவர் நின்றும் நடந்தும்
இவ்வுலகைப் பார்த்துக்கொண்டிருந்தார்.

அவர் முன்னும் பின்னும் பக்கங்களிலும்
எங்குமாய் நின்று
அவரையே பார்த்துக்கொண்டிருந்தது
பூஜ்யம்!

இடையிலிருந்து நீண்ட ஒரு கால்

noreply@blogger.com (Sakunthala ) — Tue, 06 Oct 2026 18:30:00 +0000

இடையிலிருந்து நீண்ட ஒரு கால்
நேர்கோடறிந்தது
எழுந்து அடி எடுத்து வைக்கும் போது
மின்னிய அழகை
எடுத்துரைப்பதற்கோ
உவமையேயில்லை!
கவிதையே இல்லையே இதுவரை!

ஒரு சின்ன பெருமிதம்!

noreply@blogger.com (Sakunthala ) — Sun, 04 Oct 2026 18:30:00 +0000

நெஞ்சில்
ஒரு சின்ன பெருமிதம்!
ஆனாலும் தேவதைப் பெண் அவர்
நடக்கும் போதுதான் வெளிப்படுகிறது!

மானுடத் துயர்

noreply@blogger.com (Sakunthala ) — Fri, 02 Oct 2026 18:30:00 +0000

கவிதை வாசிப்பு: கவிநிலவன்

இக் கவிதையை உங்கள் குரலில் இங்கே வாசிக்கலாம்

உன் அணுக்கத்தினால்...

noreply@blogger.com (Sakunthala ) — Thu, 01 Oct 2026 18:30:00 +0000

உன் அணுக்கத்தினால்
அவன் அடைந்திருந்த ஆனந்தம் பற்றி
அவன் அறிந்ததும்
துவண்டதும்
விடுதலை பெற்றதும்
உன் விலகலினால்
அவன் அடைந்த
தாளாத் துயரத்தினால் அல்லவா?

அது நீயே அல்ல
அது உன் போலி உருவம் என்பதை
அவன் கண்டபோது அடைந்த
பெருநிறையல்லவா வேண்டற்பாலது?

உன்னை அவன் கண்டுகொள்வதற்குத்தானா
இவ்வளவு காலமாயிற்று?
இனி பிரிவு என்பதே கிடையாதபடி
அவன் உன்னைக் கண்டுகொண்டபோது
இனி அடைய வேண்டியது என
என்ன இருக்கிறது சொல்?

பேராற்றங்கரை மரங்கள் - முன்னுரை

noreply@blogger.com (Sakunthala ) — Tue, 29 Sep 2026 18:30:00 +0000

காணும் திறனும் உணர்வுத் தீவிரமுமுள்ள எந்த மனிதனுமே இந்தப் பேராறு மானுட வரலாறாகவே தன்னை உருவகப் படுத்திக்கொண்டு வந்து நிற்பதைப் புரிந்துகொள்வான். காலம் காலமாகவே மாறுதலின்றி அடித்துச் செல்லப்பட்டுக் கொண்டிருக்கும் பிணங்கள்தாமா நாம்? அல்லது அனைத்தையும் வெளியே நின்றபடி காணவும், சிந்திக்கவும், உணரவும் தெரிந்த இந்த கரையோர மரங்களா? இந்தப் பார்வையிலிருந்து இன்று முதல் தொடங்கப் போகிறோம்.

இயற்கையாகட்டும், ஒசத்தி, தாழ்த்தி, போட்டி, பொறாமை, பேராசை, புகழ், செல்வாக்கு, மேலாண்மை என போரிலும் துயரிலும் வதையுண்டு கிடக்கும் மனித சமுதாயமாகட்டும், அவர்களின் அரசியலாகட்டும் அங்கே உழன்று கொண்டே அவர்களைப் பற்றிக் கதறுவதல்ல கவிதையினுடைய செயல். கவிதைக்கு இவற்றைவிட மேலானதொரு பணி உண்டு, அதைத்தான் நாம் இங்கே பார்க்கப் போகிறோம். அதுதான் கவிதையின் மதம். அதுவே மெய்மதம். நித்தியத்திலிருந்து சுழலும் வாள் அது. அதன் பார்வையில், சுழற்சியில், மாண்டு உதிப்பதுதான் கடவுளின் ராஜ்ஜியம். மகத்தானவைகள் என்று சொல்லப்பட்டு இழிந்து கிடப்பவற்றையெல்லாம் அழித்தே அந்த மாண்பினைப் படைத்துக்கொண்டேயிருக்கும் புத்தொளி, ஞானம்.

காலமற்ற தருணங்களிலெல்லாம் தனிப்பெருங்கருணையால் நமக்குக் காட்சிதரும் பொறிகளையும், மின்னல்களையும் பற்றி நிறுத்திச் சுடராக்கி, நாம் படைத்துவிடப் பார்க்கும் ஒளி உலகம்!

நூறு கவிதைகளடங்கிய இச் சிறுநூல் ”பேராற்றங்கரை மரங்கள்”, ”மற்றுளது” என்ற ஐம்பது ஐம்பது கவிதைகளாலான இரண்டு தொகுப்புகள் இணைந்தது. தொடர்ந்து இதுபோலும் ஏறத்தாழ இருபது தொகுப்புகள் வெளிவரலாம். ஆர்வமுடன் இதனைச் செயலாக்க முன்வந்திருக்கும் எழுத்து பதிப்பகத்து அன்பர்களுக்கும், தட்டச்சு செய்து உதவிக் கொண்டிருக்கும் நண்பர்கள் சுடலைமுத்து, நவீன் ஆகியோருக்கும் எனது அன்பும் நன்றியும். இந்நூலை எனது இனிய அன்பர் ஈரோடு பாரிக்கு சமர்ப்பிப்பதில் மிகவும் மகிழ்ச்சி அடைகிறேன்.

-தேவதேவன்

கவிதை நூல் வாங்க இங்கே சொடுக்கவும்

பேராற்றங்கரை மரங்கள் - கவிதைத் தொகுப்பு

noreply@blogger.com (Sakunthala ) — Mon, 28 Sep 2026 05:21:37 +0000

கவிஞர் தேவதேவனின் புதிய கவிதைத் தொகுப்பு “பேராற்றங்கரை மரங்கள்”, எழுத்து பிரசுரம் பதிப்பகத்தால் செப்டம்பர் 2026ல் வெளியிடப்பட்டுள்ளது. கவிதை நூலைப் பெற பதிப்பகத்தை அல்லது கவிஞரைத் தொடர்பு கொள்ளலாம்

மானுடத் துயர்

noreply@blogger.com (Sakunthala ) — Tue, 22 Sep 2026 18:30:00 +0000

மானுடத் துயரத்தைத்தான்
நீள்நெடுங்கருங்கூந்தலாய்
நீ வரித்து விரித்து நடந்த காலம்முதலாய்
இந்த ஆழியும்
கூப்பாடு போடத் தொடங்கியது காண்!

கடுந்துயர்க் கூந்தலைக்
கார்மேகமாய் மாற்றும் வேலையைக்
கதிரோனிடம் ஒப்படைத்த பின்தானே
ஆழியின் கூப்பாட்டொலியும் அடங்கி
பொங்கிப் பொங்கிக் களிக்கும் தேனமுதப்
பாட்டொலியாய் மாறியது?

காயும் வெயிலில்

noreply@blogger.com (Sakunthala1) — Thu, 17 Sep 2026 18:30:00 +0000

காயும் வெயிலில்
தான் இளைப்பாறுவதற்கான
நிழலை
தானே படைத்துக் கொண்டு நிற்கின்றன
மரங்கள்!

இத்தனைப் பூக்கள்!

noreply@blogger.com (Sakunthala1) — Tue, 15 Sep 2026 18:30:00 +0000

விதைத்துப்
பரவுவதற்காக மட்டும்தானென்றால்
இத்தனைப் பூக்கள்
பூக்க வேண்டுமா இந்த மரம்?

தப்பிக்க வழியுண்டோ?

noreply@blogger.com (Sakunthala1) — Sun, 13 Sep 2026 18:30:00 +0000

உருவமில்லாத முழுமையும்
பெயர் கொடுக்கப்படும் போதுதானே
துண்டுகளாக மாறிவிடுகிறது?

துண்டுகள், ஆபத்தான துண்டுகள்
எனப் புரிந்து கொள்ளப்படும் போதுதானே
முழுமைக்கே திரும்பிவிடுகிறது?

இமைப் பொழுதில் மாறிவிடும் இவற்றை
இமைக்காமல் பார்த்துக் கொண்டிருந்தால்?

துண்டுகள்

noreply@blogger.com (Sakunthala1) — Thu, 10 Sep 2026 18:30:00 +0000

மொத்த முழுமைக்கும் உருவமில்லை
துண்டுப் பகுதிகளுக்குத்தான் உருவமுண்டு

முழுமையில் எல்லாப் பகுதிகளும் இருக்கின்றன
ஆனால் துண்டுப் பகுதிகள் எதிலும்
முழுமை இல்லை. அதனால்தானே
அவற்றிற்குத் துண்டுகள் என்றே பெயர்?

முழுமையில் வாழாமல்
துண்டுகளில் வாழ்ந்து கொண்டிருக்கும் வரை
உய்வில்லை இந்த உலகிற்கு,
மேலும் இந்த உலகத் துயர்களுக்கெல்லாம்
காரணம் இவன்தான் அல்லவா?

பற்றிக் கொள்ள வேண்டியது

noreply@blogger.com (Sakunthala1) — Tue, 08 Sep 2026 18:30:00 +0000

கிடைக்கப் பெற்று
நம்மால் உண்டு செரிக்கும் போதெல்லாம் மட்டுமே
உயிர் பெற்று வாழும் ஆற்றல்கள் எவை
அவற்றையெல்லாம் பற்றிக் கொள்ளுங்கள்!

உருவம்

noreply@blogger.com (Sakunthala1) — Sun, 06 Sep 2026 18:30:00 +0000

கடவுளுக்கு உருவமில்லை
ஆனால், செயல் எனும்
உருவத்தில்தான் அவரைக் காணமுடியும்!
ஆனாலும் நிச்சயமாக அது
நாம் படைத்த உருவத்திலில்லை.
நம்மால் படைக்கப்படாத
அந்த உருவத்திலும்கூட
அவர் மாறிக் கொண்டேயிருப்பதால்
அவரைப் பற்றுதல் என்பதே
புதுமாதிரியானதாக இருக்கிறது

பகலுக்கு பரிதிபோல

noreply@blogger.com (Sakunthala ) — Tue, 18 Aug 2026 18:30:00 +0000

பகலுக்கு பரிதிபோல
இரவுக்கு வேண்டியிருக்கிறது
பிணச் சிதை நெருப்பு
நெய்யில் எரியும் சுடர்
மின்விளக்கு என
ஏதாவது ஒன்றா,
சுட்டும் விழிச்சுடர் போலும்
வான்மீன்கள் கோடி அல்லவா?

அதன் கீழ்தானே இருக்கிறது
மெய்வழிச் சாலை?
இந்த இருண்ட காட்டிடையே
பார்வையினின்றே பிறக்கும் பாதையாய்!