• Ek het besluit om algaande my internet nicks te harmoniseer. Ek staan op verskeie plekke op die net bekend as sparrows, Sparrowhawk (of Sparrohawk, of ander variasies), bloute, bloumistiek, winterkind, ScarletSpittings en nog meer. Sparrows is die een wat ek die meeste gebruik, maar dit is dikwels gevat, en dit is Engels, wat nie so lekker op Afrikaanse saits werk nie. Ek kies nou winterkindt. Die ‘t’ is omlat ‘winterkind’ in uitsonderlike gevalle ook gevat is. Dit ‘t’ help ook vir Ingelse en ander vreemdes om dit min of meer reg uit te spreek.
• Soos julle kan sien het ek besluit om weer te blog. Ek is egter nog nie behoorlik geïnspireer nie. Dit vat gewoonlik ‘n tydjie. Bekyk hierdie spasie.
• Ek oorweeg dit om nog al die e-posse uit te stuur vir my verwaarloosde eksperiment. Dink julle mense sal nog reageer?
• Ek het heeltemal te veel werk vir myself geskeduleer vir hierdie vakansie.
• Sedert my weggaan is daar ‘n paar baie nice nuwe blogs. Dis mooi om te sien. Die blogroll is vervolgens bygewerk.

Wanneer iets vanaf Engels na Afrikaans vertaal word is dit effe belangrik dat die vertaler Afrikaanssprekend is, en verkieslik die gepaste opleiding het. Nie ‘n Engelsman wat Afrikaans in matriek deurgeskraap het en ‘n tweetalige woordeboek in die hand gestop is nie.

Advertensie op News24:

‘n Gratis Facebook poke vir die een wat die oorsprong van die titel kan raai.

Om deel te neem sal op die meeste 10 minute van jou tyd opneem. Hier is hoe dit sal werk: Jy gee my jou sterreteken, en ek sal vir jou drie persoonlikheidsbeskrywings stuur wat jy op ‘n skaal van 0 tot 10 punte moet toeken vir hoe goed dit jou beskryf (0 vir heeltemal af, 10 vir heeltemal akkuraat).

Om deel te neem, los ‘n asseblief comment op hierdie post, en verskaf jou sterreteken (in Engels, asseblief - ek ken nie die Afrikaanse name nie). As jy nie weet wat joune is nie, gee net jou verjaarsdag. Sê ook op ‘n skaal van 0 tot 5 hoeveel jy van jou sterreteken af weet. Jy kan gerus ‘n skuilnaam gebruik - ek benodig net jou korrekte e-pos adres om die inligting vir jou te stuur. Elke beskrywing sal ‘n kode-letter hê (om dinge vir my te vergemaklik), so jou respons sal omtrent so iets wees:

A 8; F 4; T 6.

(Die letters is lukraak)

Baie belangrik: Moenie die beskrywings wat jy ontvang met enigiemand anders bespreek voordat julle albei vir my julle response gestuur het nie. Moet dit ook nie met bestaande beskrywings vergelyk voor jy punte toegeken het nie, of voor die tyd gaan oplees oor jou sterreteken nie.

Hoe meer mense reageer, hoe beter, so vertel gerus vir jou maatjies hiervan. Afhangende van hoeveel mense reageer, sal ek seker oor so week die comments sluit, of wanneer ek dink ek het genoeg.

Nota: Ek weet hierdie is dalk nie heeltemal wetenskaplik of statisties korrek nie, maar dit sal darem ‘n idee gee.

Die Woordfees is mos nou aan die gang hier in Stellenbosch. Dis fantasties - basically ‘n mini-KKNK, albeit sonder die moerse feesatmosfeer, maar die gemiddelde IK van die feesgangers is heelwat hoër. Dit beteken geen Kurt Darren, Nicholis Louw, Dowwe Dolla of ander derglikhede nie. Gisteraand was dit die beurt van Troebatoer by die Klein Libertas Teater se buiteverhoog, ‘n aand van musiek deur Rian Malan, Valiant Swart en Koos Kombuis, en die voorlees van ‘n paar skrywes oor reise tussenin. Dis die eerste keer wat ek Rian Malan gehoor het saam met sy female vocalist - sy gee ‘n strelende gevoel aan sy musiek, en maak dit meer volledig. Dis hoog tyd dat hy nog ‘n CD uitbring. Valiant se akoestiese set was ook lekker om te kyk, maar ek dink hy werk beter saam met ‘n band. Maar almal was natuurlik daar om vir Koos te kom kyk.

Ten spyte van die feit dat ons ‘n bietjie laat was, kon ek en Anri ‘n lekker plekkie op die gras, naby die verhoog kry. Ons het gevoel dat dit verkeerd sou wees om enigiets anders as Tassenberg by ‘n Koos gig te drink. Teen die tyd wat hy aan die beurt was, was ons al besig met ons tweede bottel (ek voel nie baie lekker vandag nie). Koos het ‘n nuwe band wat saam met hom speel, en hulle gee aan sy musiek ‘n gevoel van afgerondheid wat ek nog altyd gemis het. Dis ‘n baie unieke ervaring om hom live te sien speel. Hy het ‘n amper enigmatiese status, maar wanneer hy speel is hy steeds net die Koos wat ‘Seks, Drugs & Boeremusiek’ geskryf het.

Die aand is afgeskop by Die Mystic Boer, en is ook daar afgesluit.

Ek sou ook wou beskryf presies hoe warm dit vandag is, maar ek sou dalk lesers sensitief vir kru taal ontstig.

Geteken deur Koos Kombuis, Rian Malan en my maatjie Anri.

Eerstens, dis ‘n baie cool liedjie. Die eerste keer wat ek dit gehoor het, so begin Desember rond, het ek ook die musiekvideo gesien. Dit was effe hartroerend. Die wysie is catchy, die trommars is effe somber, en die repeterende “De la Rey, De la Rey” slaan die gemoed van die liedjie diep in jou hart in. Ek het myself eintlik, soos Koos Kombuis, verbaas dat ek actually ‘n knop in my keel gekry het. Ons het mos aanbeweeg van die vierkleur en nasionalisme en al daai goed, nie waar nie?

Ja, ons het. Die liedjie gryp ons nie aan as gevolg van ‘n versugting na die apartheid verlede nie, my liewe donner, dit gryp ons aan omdat dit beide ‘n hartseer en ‘n trotse episode van ons geskiedenis uitbeeld.

Dit is nou maar eenmaal ‘n hartseer feit dat ons ganse begrip van ons geskiedenis met ‘n nasionalistiese kwas geverf is. Dus, selfs al het die res van ons aanbeweeg, sal enige vorm van Afrikanertrots in die publiek ook by die regses aanklank vind, en hulle sal die ou vlag waai en skree, “lank leef die Boere, fok al die res!”. Selfs al word daar gewerk net vir Afrikaans, met die wittes, bruines en swartes almal ingesluit, sal die regses die ding wil kaap. Ek dink almal, en veral die media, moet nou daaraan gewoond raak. Soos hierdie artikel uitwys, die ver-regses maak maar ‘n klein deeltjie van ons volkie uit. En hulle kry heeltemal te veel publisiteit. Dit is hoogstens in individuele kwessies wat die res van ons met hulle saamstem, en in daardie gevalle moet die media ook ‘n gereelde logiese fout besef - net omdat Hitler ‘n vegetarieër was, beteken dit nie alle vegetarieërs haat Jode nie.

Dit alles gesê, De La Rey word heeltemal te veel gespeel, en die gevaar bestaan nou dat ek gatvol daarvoor raak.

Ek hou van die maan,
die maan is cool.

Dalk kan Johan kommentaar lewer?

Vir die eerste keer in omtrent twee jaar is ek heeltemal by met al my werk, en geniet ek my kursus. En ek voel al amper heeltemal tuis waar ek woon.

Ek het heelwat om te vertel, maar ek sal dit ‘n ander tyd doen. Ek is vandag net rustig, en gelukkig, en ek het gevoel ek moet dit opteken.