དེ་ཡང་མཛོད་སྒོའི་ཐོག་མར་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་སྤྱི་ནོར་གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་དང་མར་མེ་ཞལ་ཕྱེ་གནང་རྗེས་ཕྱི་རྒྱལ་ཡུལ་གྲུ་ཁག་ནས་ཕེབས་པའི་སློབ་མ་རྣམས་དང་ཁྱིམ་བདག་བཅས་ཚོགས་མི་ཡོངས་ལ་རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས་པ་དང་། བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ནས་དབྱར་དུས་བོད་ཀྱི་ཟློས་གར་ཟབ་སྦྱོང་དང་འབྲེལ་བའི་ངོ་སྤྲོད་གསུང་བཤད་གནང་བ་རྗེས། སྐུ་མགྲོན་གཙོ་བོ་ཆོས་རིག་བཀའ་བློན་མཆོག་ནས་བཀའ་སློབ་གནང་བའི་ནང་། ད་ལན་དབྱར་དུས་བོད་ཀྱི་ཟློས་གར་སྒྱུ་རྩལ་ཟབ་སྦྱོང་ཐེངས་བཞི་པའི་ནང་མཉམ་ཞུགས་གནང་མཁན་སློབ་ཕྲུག་ཚོས་སློབ་གྲྭའི་གུང་གསེང་དང་བསྟུན་ཏེ་བོད་ཀྱི་ཟློས་གར་རིག་གཞུང་སློབ་སྦྱོང་གནང་བར་ཕེབས་པར་འཚམས་འདྲི་ཞུ་རྒྱུ་དང་། དེ་བཞིན་སློབ་ཕྲུག་ཚོར་རྒྱབ་སྐྱོར་གནང་མཁན་གྱི་ཕ་མ་ཡོངས་ལ་ཐུགས་རྗེ་ཆེ་ཞུས་གནང་སོང་།སྤྱིར་སློབ་ཕྲུག་རྣམ་པས་བོད་ཀྱི་ཟློས་གར་སྒྱུ་རྩལ་ཐོག་ཟླ་བ་གཅིག་རིང་སློབ་སྦྱོང་གནང་སྐབས་ངེས་པར་དུ་སློབ་ཕྲུག་ཕན་ཚུན་བཀའ་མོལ་གནང་སྐབས་བོད་སྐད་ཀྱི་ལམ་ནས་གནང་རྒྱུ་གལ་ཆེན་པོ་ཡིན་པ་དང་། ད་སྐབས་བོད་ནང་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ཞིག་དང་། བཅའ་སྡོད་སློབ་གྲྭའི་གནས་སྟངས་འོག་བོད་ནང་རང་མི་རིགས་ཀྱི་སྐད་ཡིག་དང་རིག་གཞུང་རྩ་མེད་བཟོ་རྒྱུའི་སྲིད་བྱུས་སྤེལ་དང་སྤེལ་བཞིན་པར་སོང་། ང་ཚོ་བཙན་བྱོལ་དུ་ཡོད་པའི་གཞོན་ནུ་ཚོས་རང་མི་རིགས་ཀྱི་སྐད་ཡིག་ལ་ཐུགས་སྣང་གནང་དགོས་པ་དང་། དེ་བཞིན་བོད་ཀྱི་ཟློས་གར་རིག་གཞུང་སྤྱི་དང་རྐང་བྲོ་གླུ་གཞས་སོགས་ལ་དོ་སྣང་དང་འབད་བརྩོན་གནང་བ་དང་ལྷུན་དུ་རང་ཉིད་ཀྱི་འཕྲོད་བསྟེན་ལའང་ཐུགས་སྣང་དགོས་པའི་གསུང་བཤད་གནང་གྲུབ་མཚམས་བོད་ཀྱི་ཟློས་གར་ཚོགས་པའི་དྲུང་ཆེ་བསོད་ནམས་ཆོས་འཕེལ་ལགས་ཀྱིས་ཐུགས་རྗེ་ཆེ་གསུང་བཤད་གནང་སྟེ་མཛད་རིམ་རྒྱལ་ཁའི་ངང་གྲུབ་ཡོད།

སྤྱིར་ད་ལན་དབྱར་དུས་བོད་ཀྱི་ཟློས་གར་སྒྱུ་རྩལ་ཟབ་སྦྱོང་འདི་ཉིད་ཕྱི་ཟླ་ ༧ ཚེས་ ༠༡ ནས་ ༣༡ བར་ཚོགས་ཀྱིན་ཡོད་པ་དང་། ཟབ་སྦྱོང་འདིའི་ནང་ཕྱི་རྒྱལ་ཡུལ་གྲུ་ཁག་བཞི་ཙམ་ནས་སློབ་ཕྲུག་བཅུ་བདུན་ཙམ་མཉམ་ཞུགས་གནང་ཡོད། །

༄༅། །ཕྱི་ལོ་ ༢༠༢༦ ཟླ་བ་ ༧ ཚེས་ ༡ ཉིན་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་སྐུ་བལྟམས་ནས་ལོ་ངོ་བདུན་བརྒྱ་འཁོར་བའི་བཀའ་དྲིན་རྗེས་དྲན་གྱི་མཛད་སྒོར་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཕེབས་ཞུགས་གནང་ཡོད།

དེ་ཡང་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་གི་སྐུའི་ཕྲེང་བ་འཛིན་པ་༧སྐྱབས་རྗེ་སླེ་ལུང་རིན་པོ་ཆེ་མཆོག་གི་རྐང་འགན་ཁུར་འོག་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་སྐུ་བལྟམས་ནས་ལོ་ངོ་བདུན་བརྒྱ་འཁོར་བའི་བཀའ་དྲིན་རྗེས་དྲན་གྱི་མཛད་སྒོ་ཞིག་བོད་ཀྱི་ཟློས་གར་ཚོགས་པར་ཚོགས་ཡོད་པ་དང་། མཛད་སྒོའི་ཐོག་༧སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་ཆེ་མཆོག་གིས་དབུས་པའི་མཁན་བླ་སྤྲུལ་རྣམ་པ་དང་། ཆེས་མཐོའི་ཁྲིམས་ཞིབ་ཁང་གི་དཔལ་ལྡན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། ཡུལ་ལུང་འདྲ་མིན་ནས་ཕེབས་པའི་ཚོགས་བཅར་བ་སོགས་ལྷན་ཞུགས་གནང་ཡོད།མཛད་སྒོའི་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་པའི་དཔལ་༧སྐྱབས་མགོན་ས་སྐྱ་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག སྔ་འགྱུར་རྙིང་མའི་བསྟན་པའི་གསལ་བྱེད་༧སྐྱབས་རྗེ་སྨིན་གླིང་མཁན་ཆེན་རིན་པོ་ཆེ་མཆོག་བཅས་ནས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་སྐུ་བལྟམས་ནས་ལོ་ངོ་བདུན་བརྒྱ་འཁོར་བའི་བཀའ་དྲིན་རྗེས་དྲན་གྱི་མཛད་སྒོར་སྩལ་བའི་གསུང་འཕྲིན་སྒྲོགས་སྦྱང་གནང་ཡོད།

སྐབས་དེར་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྒྲོལ་མ་ཚེ་རིང་མཆོག་གིས་དེ་རིང་ཕྱི་ཟླ་ ༧ ཚེས་ ༡ ཉིན་མོ་འདི་བཞིན་རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་ལག་བསྟར་འོག་འཛུགས་ཡིན་ལུགས་ཀྱི་ཉིན་མོ་ཞིག་ཡིན་སྐོར་དང་འབྲེལ། ཁྲིམས་ཡིག་གསར་པ་དེ་མིང་ལ་མི་རིགས་མཐུན་སྒྲིལ་དང་ཡར་རྒྱས་གོང་འཕེལ་ཡིན་ལུགས་བརྗོད་ཀྱི་ཡོད་ཀྱང་། དོན་དངོས་སུ་བོད་གཙོ་བོར་བྱས་པའི་དབང་སྒྱུར་འོག་ཡོད་པའི་གྲངས་ཉུང་མི་རིགས་རྣམས་ཀྱི་སོ་སོའི་ཁྱད་ཆོས་ཙམ་ཡང་ཉར་ཚགས་ལ་དམ་བསྒྲགས་ཇེ་ཆེར་གཏོང་བའི་ཁྲིམས་ཤིག་ཡིན་སྐོར་འགྲེལ་བརྗོད་གནང་བ་དང་སྦྲགས། བཙན་བྱོལ་རང་དབང་ལུང་པར་གནས་འཁོད་བོད་མི་རྣམས་ནས་རང་མི་རིགས་ཀྱི་ཁྱད་ནོར་གཅེས་འཛིན་དགོས་ལ། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་ཕ་མ་རྣམས་ནས་རྒྱལ་ཁབ་དང་མི་རིགས་ཀྱི་བཀུར་བའི་འོས་འགན་ཤེས་པའི་ཐོག་ནས་ཆེ་བཞག་ཆུང་སྐྱུར་གྱིས། བོད་སྐད་བོད་ཡིག་ཤེས་མཁན་གྱི་བུ་ཕྲུག་གསོ་སྐྱོང་དགོས་པའི་ཞབས་སྐུལ་གནང་ཡོད་པ་རེད།ཕྱོགས་མཚུངས་མཛད་སྒོའི་ཐོག་བོད་མིིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་མིང་སྙིང་རྗེ་བོ་ཞིག་འོག་པའི་ངན་བྱུས་བཤམས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ། བོད་མིའི་ཆོས་དང་རིག་གཞུང་། སྐད་ཡིག་བཅས་པ་མི་རིགས་ཀྱི་ངོ་བོ་རྩ་མེད་གཏོང་བའི་སྲིད་བྱུས་ཤིག་ཡིན་པར། ཁྲིམས་ཡིག་གསར་པ་དེ་ཁྲིམས་དང་བཟང་སྤྱོད་གཉིས་ཀའི་ཐོག་ནས་འགལ་ཡོད་པ་གསལ་འདོན་དང་འབྲེལ། བོད་མིའི་སྒྲིག་འཛུགས་ངོས་ནས་རྒྱལ་སྤྱིའི་གཞུང་དང་གྲོས་ཚོགས། ཚོགས་སྡེ་ཁག་ལ་རྒྱ་ནག་གི་ཁྲིམས་ཡིག་གསར་པ་དེས་བོད་ཙམ་དུ་མ་ཟད། འཛམ་གླིང་ཁྱོན་ཡོངས་ལ་ཉེན་ཚབས་ཆེ་བའི་སྐོར་གསལ་བཀྲོལ་གྱིས་ཁྲིམས་ཡིག་དེར་དགག་པ་དང་བསྐྱར་ཞིབ་ཡོང་རྒྱུར་ཞུ་སྐུལ་གྱི་ལས་འགུལ་མུ་མཐུད་སྤེལ་རྒྱུ་ཡིན་སྐོར་གསུངས་ཡོད་པ་མ་ཟད། དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ངོས་ནས་རྒྱལ་སྤྱིའི་སྟེང་བོད་དོན་རྒྱབ་སྐྱོར་གྱི་གནས་བབས་སྲ་བརྟན་དུ་གཏོང་རྒྱུར་འཐུས་ཤོར་མེད་པར་འབད་པ་ཧུར་སྐྱེད་གནང་རྒྱུའི་ཆོད་སེམས་བརྟན་པོ་ཡོད་པ་བསྐྱར་ནན་གནང་ཡོད།སྐབས་དེར་༧སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་སྐུ་བལྟམས་ནས་ལོ་ངོ་བདུན་བརྒྱ་འཁོར་བའི་དུས་སྟོན་འདི་བཞིན་སྤྱིར་བོད་གངས་ཅན་ལྗོངས་ཀྱི་བསྟན་འགྲོ་དང་ཁྱད་པར་དུ་རི་བོ་དགེ་ལྡན་པའི་བསྟན་པའི་རྗེས་འཇུག་ཡོངས་ལ་གལ་འགངས་ཆེ་བའི་དུས་ཚིགས་ཤིག་ཡིན་སྐོར་གསུངས་ཤིང་། ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་ནི། བོད་བརྒྱུད་ནང་བསྟན་ཁྲོད་དམིགས་བསལ་གྱི་མཛད་རྗེས་ཡོད་པའི་སྐྱེས་ཆེན་དམ་པ་ཞིག་ཡིན་ལ། དམ་པ་ཁོང་ནི་རྗེ་ཙོང་ཁ་པ་ཆེན་པོ་མཆོག་གི་ཡོངས་འཛིན་གཙོ་གྲས་ཤིག་ཡིན་སྐོར་དང་འབྲེལ། ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་གི་རྣམ་ཐར་རྗེས་དྲན་ཞུས་པ་གཅིག་པུ་མ་ཡིན་པར་རང་ཉིད་རྣམ་ཐར་རྗེས་སུ་སློབ་དགོས་པའི་གལ་འགངས་ཆེན་པོ་ཡིན་པའི་ལམ་སྟོན་གནང་ཡོད། །

༄༅། །ཕྱི་ལོ་ ༢༠༢༦ ཟླ་བ་ ༦ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་པདྨ་མཚོ་མཆོག་དབུ་བཞུགས་ཐོག་བོད་མིའི་དང་བླངས་འཕྲོད་བསྟེན་ཚོགས་པའི་འགན་འཛིན་ལྷན་ཚོགས་ཀྱི་ཚོགས་འདུ་ཐེངས་ ༣༢ བསྐོང་ཚོགས་གནང་ཡོད།

དེ་ཡང་ཚོགས་འདུའི་ཐོག་མར་འཕྲོད་བསྟེན་ལས་ཁུངས་ཀྱི་ཟུང་དྲུང་བདེ་སྐྱིད་སྒྲོལ་དཀར་ལགས་ཀྱིས་ཕེབས་བསུའི་གསུང་བཤད་གནང་བ་དང་སྦྲགས། གསར་དུ་བསྐོ་གཞག་གནང་བའི་འགན་འཛིན་ལྷན་ཚོགས་ཀྱི་ཚོགས་མི་རྣམས་ཚོགས་གཙོ་མཆོག་ལ་ངོ་སྤྲོད་ཞུས་ཡོད་པ་མ་ཟད། ཐེངས་འདིའི་ཚོགས་འདུའི་གྲོས་གཞི་ཁག་སྤྱན་བསྟར་ཞུས་ཡོད།

འགན་འཛིན་ལྷན་ཚོགས་ཀྱི་ཚོགས་གཙོ་འཕྲོད་བསྟེན་བཀའ་བློན་པདྨ་མཚོ་མཆོག་གིས་དབུ་འབྱེད་གསུང་བཤད་གནང་དོན། ཁོང་རང་ཉིད་བཀའ་བློན་གྱི་ཕྱག་ལས་གནང་ནས་བདུན་ཕྲག་བཞི་འཁོར་ཡོད་པ་དང་། བདུན་ཕྲག་དང་པོའི་ནང་བདེ་ལེགས་སྨན་ཁང་དང་། ལྷ་རྒྱལ་རི་ནད་གསོ་སྐྱོང་ཁང་དུ་གཟིགས་སྐོར་གནང་སྟེ་འབྲེལ་ཡོད་ལས་བྱེད་དང་ནད་པ་རྣམས་དང་མཇལ་འཕྲད་གནང་ཡོད་སྐོར་དང་། དེ་བཞིན་མ་འོངས་པར་ས་གནས་འཕྲོད་བསྟེན་སྨན་ཁང་དང་། མངོན་དགའ་བོད་ཕྲུག་དམིགས་བསལ་དགོས་མཁོ་ཅན་གྱི་སློབ་གྲྭ་བཅས་ལ་གཟིགས་སྐོར་གནང་སྟེ། དེ་དག་གི་ཕྱག་ལས་གནང་ཕྱོགས་དང་དཀའ་ངལ་ཁག་ལ་རྒྱུས་ལོན་གཏིང་ཟབ་གནང་རྒྱུའི་འཆར་གཞི་ཡོད་སྐོར་གསུངས་ཡོད།

ཚོགས་འདུའི་ཐོག་ཕྱི་ལོ་ ༢༠༢༦ ཟླ་བ་ ༢ ཚེས་ ༢༧ ནས་ཕྱི་ཟླ་ ༦ ཚེས་ ༢༦ བར་གཏན་ལ་ཕབ་པའི་གྲོས་ཆོད་ཁག་ལ་བསྐྱར་ཞིབ་དང་གཏན་འབེབས་གནང་བ་དང་ཆབས་ཅིག ཕྱི་ལོ་ ༢༠༢༦ ཟླ་བ་ ༣ ཚེས་ ༢ ཉིན་འགན་འཛིན་ལྷན་ཚོགས་ཐོག་བཞག་པའི་གྲོས་ཆོད་ཁག་ལག་བསྟར་བྱུང་བའི་སྙན་ཐོ་ཁག་བསྐྱར་ཞིབ་གནང་ཡོད། གཏན་ལ་ཕབ་པའི་གྲོས་ཆོད་ཕལ་མོ་ཆེ་ནི་ལས་བྱེད་བསྐོ་གཞག་དང་། ལས་བྱེད་དགོངས་ཞུ། བར་བརྒལ་བཀའ་འཁྲོལ་གཏན་འབེབས་བཅས་ཀྱི་ཐོག་ཡིན་པ་ཚོགས་མི་ཚོར་གསལ་བཤད་གནང་ཡོད།བགྲོ་གླེང་སྐབས་ད་ལྟ་འཕྲད་བཞིན་པའི་མིའི་ནུས་ཤུགས་སྐྱེད་སྲིང་གི་དཀའ་ངལ་དང་། ལྷག་པར་ཆོད་གན་ཅན་གྱི་སྨན་ཞབས་ལས་བྱེད་ཡང་ཡང་བརྗེ་སྒྱུར་འགྲོ་བཞིན་པའི་གནད་དོན་ཐོག་གླེང་སློང་གནང་ཡོད། གཞན་ཡང་ཆེས་མཐོའི་རྩིས་ཞིབ་པ་ (Chartered Accountant) དང་། ཁྲལ་སློབ་སྟོན་པ་ (Tax Consultant) ཞིག་བསྐོ་གཞག་བྱ་རྒྱུའི་འཆར་གཞིའི་སྐོར་ཡིན། ཚོགས་མི་ཚོས་ཁྲལ་གྱི་གནད་དོན་འཛིན་སྐྱོང་བྱ་རྒྱུ་ཇེ་རྙོག་ཏུ་འགྲོ་བཞིན་པ་དང་། དེའི་ཆེད་དུ་ཆེད་ལས་པའི་རྒྱབ་སྐྱོར་དགོས་གལ་ཆེ་བའི་སྐོར་ལ་བགྲོ་གླེང་གནང་ཡོད། འཕྲོད་བསྟེན་རྩིས་པས་ཞབས་ཞུའི་ཁྱབ་ཁོངས་དང་། གླ་ཆའི་ཚད་གཞི། ལས་གནས་འདི་དག་བསྐོ་གཞག་བྱས་པ་ལས་བྱུང་བའི་རྩིས་ཀྱི་འགྲོ་གྲོན་བཅས་ཀྱི་གནས་སྟངས་སྙན་སྒྲོན་ཞུས་པ་དང་སྦྲགས་ཚོགས་མི་ཚོའི་དྲི་བར་ལན་འདེབས་ཞུས་ཡོད།

དེ་བཞིན་ཧུན་སུར་རབ་རྒྱས་གླིང་དུ་དམིགས་བསལ་དགོས་མཁོ་ཅན་གྱི་སྡོད་གནས་མངོན་དགའ་སློབ་གྲྭའི་ལས་གཞིའི་ཡར་རྒྱས་གནས་སྟངས་སྐོར་ཚོགས་མི་ཚོར་སྙན་སྒྲོན་ཞུས་ཡོད་པ་མ་ཟད། ལྷག་པར་གསར་དུ་བསྐོ་གཞག་བྱུང་བའི་འགན་འཛིན་ལྷན་ཚོགས་ཀྱི་ཚོགས་མི་དང་ཚོགས་གཙོ་མཆོག་ལ་སྤྱན་བསྟར་ཞུས་པ་ཞིག་རེད།  གཞན་ཡང་ཐེངས་ ༨ པའི་འཕྲོད་བསྟེན་བསྐྱར་ཞིབ་ཚོགས་འདུ་དེ་ཕྱི་ལོ་ ༢༠༢༦ ཟླ་བ་ ༨ པའི་ཟླ་མཇུག་ཏུ་ཚོགས་རྒྱུའི་གཏན་འབེབས་གནང་ཡོད། འགན་འཛིན་ལྷན་ཚོགས་ཀྱི་ཚོགས་འདུའི་མཇུག་སྡོམ་དུ་ཚོགས་གཙོ་བཀའ་བློན་པདྨ་མཚོ་མཆོག་གིས་ཚོགས་མི་ཡོངས་ཀྱིས་ལས་འགུལ་ནང་མཉམ་ཞུགས་ཧུར་ཐག་གནང་བ་དང་། རྩ་ཆེའི་དགོངས་འཆར་ལྷུག་པོར་གནང་བ། དེ་བཞིན་མུ་མཐུད་མཉམ་ལས་གནང་བར་བསྔགས་བརྗོད་དང་ཐུགས་རྗེ་ཆེ་ཞུས་ཡོད། ཚོགས་འདུ་དེ་བཞིན་ཐུགས་རྗེ་ཆེ་ཞུའི་གསུང་བཤད་དང་བཅས་ལེགས་པར་གྲུབ་ཡོད་པ་བཅས། །

༄༅། །ཨིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་ (All-Party Parliamentary Group) ནས་རྒྱ་ནག་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བར་སྐྱོན་བརྗོད་ནན་པོ་གནང་བ་དང་། ཁྲིམས་གསར་འདིའི་བརྒྱུད་རྒྱ་ནག་གཞུང་གི་བཙན་ཤེད་ཀྱི་རིག་གཞུང་གཅིག་གྱུར་བཟོ་བའི་སྲིད་བྱུས་དེ་ལམ་ལུགས་ཅན་དུ་བཟོ་བཞིན་པ་མ་ཟད། རྒྱ་ནག་གི་ཕྱི་ནང་གཉིས་སུ་ཡོད་པའི་བོད་མི་དང་མི་རིགས་གཞན་ཁག་ལ་ཉེན་ཚབས་ཆེན་པོ་བཟོ་བཞིན་ཡོད་པའི་ཉེན་བརྡ་བཏང་ཡོད།

ཕྱི་ལོ་ ༢༠༢༦ ཟླ་བ་ ༧ ཚེས་ ༡ ཉིན་ཁྲིམས་གསར་དེ་ཉིད་ལག་བསྟར་མ་བྱས་གོང་ཟླ་བ་ ༦ ཚེས་ ༣༠ ཉིན་སྤེལ་བའི་བསྒྲགས་གཏམ་ནང་། ཨིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཁྲིམས་གསར་དེར་སེམས་འཚབ་ཆེན་པོ་ཡོད་པ་གསུངས་པ་དང་། ཁྲིམས་གསར་པའི་མིང་བྱང་འདྲ་ཆགས་པོ་ཇི་ཙམ་ཡོད་མིན་ལ་མ་ལྟོས་པར་དོན་དངོས་སུ་རྒྱ་ནག་གཞུང་གི་མི་རིགས་སིམ་སྒྱུར་གྱི་སྲིད་བྱུས་བྱེད་ཤུགས་ཆེ་རུ་གཏོང་བའི་ཉེན་ཚབས་ཆེ་བའི་ཁྲིམས་ལུགས་ཀྱི་ལག་ཆ་ཞིག་ཡིིན་པར་འགྲེལ་བརྗོད་གནང་ཡོད།

ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཁྲིམས་གསར་འདིས་བོད་མི་གཅིག་པུ་མ་ཡིན་པར་ཡུ་གུར་བ་དང་། སོག་རིགས་སོགས་ཚུད་པའི་མི་རིགས་གཞན་ཁག་ལ་དམིགས་འབེན་བཟུང་སྟེ། བཙན་དབང་གིས་རྒྱ་ཡིག་དང་རྒྱ་སྐད་ཀྱི་སློབ་གསོ་སྤྲོད་པ་དང་། ལྟ་ཞིབ་ནན་པོ་བྱེད་པ། མི་འབོར་བཀོད་སྒྲིག དེ་བཞིན་ལྟ་བར་ཚོད་འཛིན་བཅས་བརྒྱུད་གྲངས་ཉུང་མི་རིགས་ཀྱི་ཆོས་དང་རིག་གཞུང་། སྐད་ཡིག ངོ་བོ་བཅས་པར་ཉེན་ཁ་བསྐྲུན་བཞིན་ཡོད།

ཨིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་ནས་བོད་མིའི་སྒྲིག་འཛུགས་ཀྱིས་ཁྲིམས་ཡིག་དེར་དཔྱད་ཞིབ་བྱས་པ་ལུང་འདྲེན་གྱིས་བོད་མིའི་སྒྲིག་འཛུགས་ཀྱིས་ཁྲིམས་གསར་འདི་ནི་བོད་མིའི་རང་སྐྱོང་གི་ཐོབ་ཐང་ལ་ཉེན་ཁ་སྤྲོད་བཞིན་པ་གསལ་སྟོན་གནང་ཡོད་པ་དང་། དེ་བཞིན་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་གི་དོན་ཚན་ ༦༣ དེ་བཞིན་རྒྱ་ནག་གི་ཕྱི་ཕྱོགས་སུ་ཡོད་པའི་ཚོགས་སྡེ་དང་མི་སྒེར་ནས་མི་རིགས་མཐུན་སྒྲིལ་ཡར་ཐོན་སྐུལ་འདེད་ལ་གཏོར་བརླག་གཏོང་བ་དང་། མི་རིགས་ཁ་བྲལ་གྱི་བྱ་སྤྱོད་སྤེལ་རིགས་ལ་ཁྲིམས་ལྟར་ཁྲིམས་འབྲེལ་ཁུར་འཁྲི་བརྡ་འདེད་གཏོང་རྒྱུ་ཞེས་པ་འཁོད་ཡོད་པ་དང་། དེའི་རྐྱེན་པས་ཨིན་ཡུལ་ནང་གཞི་རྩའི་རང་དབང་དང་ཐོབ་ཐང་ལོངས་སུ་སྤྱོད་བཞིན་པའི་བོད་མི་དང་། འགྲོ་བ་མིའི་ཐོབ་ཐང་སྲུང་སྐྱོབ་པ། ཉམས་ཞིབ་པ། གྲོས་ཚོགས་འཐུས་མི་བཅས་ལ་དོ་ཕོག་ཐེབས་ངེས་ཡིན་པའི་ཉེན་བརྡ་བཏང་ཡོད།

ཨིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཁྲིམས་ཡིག་དེར་མཐའ་གཅིག་ཏུ་སྐྱོན་བརྗོད་གནང་བ་དང་སྦྲགས། ཨིན་ཇིའི་སྲིད་གཞུང་གིས་རྒྱ་ནག་གཞུང་ལ་གཞུང་འབྲེལ་གྱི་སྒོ་ནས་དགག་པ་གནང་དགོས་པ་དང་། རྒྱལ་ཁབ་གཞན་དང་མཉམ་འབྲེལ་ཐོག་རྒྱལ་མཚམས་ལས་བརྒལ་བའི་དྲག་གནོན་ལ་ངོ་རྒོལ། དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚད་གཞི་དང་། མང་གཙོ། རང་དབང་། ཁྲིམས་ཀྱི་དབང་བསྒྱུར་བཅས་དང་མཐུན་པའི་སྒོ་ནས་ཁྲིམས་ཡིག་དེར་ཕྱིར་འཐེན་བྱེད་དགོས་པའི་འབོད་སྐུལ་ཞུ་དགོས་པའི་རེ་སྐུལ་ཞུས་ཡོད།

བསྒྲགས་གཏམ་འདི་ཉིད་ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཁི་རི་སི་ལོ་ (Chris Law) ལགས་ཀྱིས་མཚན་རྟགས་བཀོད་ཡོད་པ་དང་། ཕྱི་ལོ་ ༢༠༢༦ ཟླ་བ་ ༦ ཚེས་ ༣༠ ཉིན་འདོན་སྤེལ་གནང་བ་ཞིག་ཡིན། །

༄༅། །ཇར་མན་ཕྱི་སྲིད་བློན་ཆེན་ལས་ཁུངས་ནས་ཕྱི་ལོ་ ༢༠༢༦ ཟླ་བ་ ༧ ཚེས་ ༡ ཉིན་ལག་བསྟར་བྱ་རྒྱུ་ཡིན་པའི་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བར་ཐུགས་ཚབས་ཤུགས་ཆེ་བསྟན་པ་དང་སྦྲགས། ཁྲིམས་ཡིག་འདིས་སྔར་ལྷག་བཙན་དབང་གི་མི་རིགས་མཉམ་བསྲེས་དང་གྲངས་ཉུང་མི་རིགས་ཀྱི་ངོ་བོར་རྩ་མེད་གཏོང་རྒྱུ་ཡིན་པ་མ་ཟད། ཡུ་རོབ་དང་ཇར་མན་ཚུད་པའི་རྒྱ་ནག་ཕྱི་ཕྱོགས་ཀྱི་མང་ཚོགས་ལ་རྒྱལ་མཚམས་ལས་བརྒལ་བའི་དྲག་གནོན་བྱ་རྒྱུ་ཡིན་པའི་ཉེན་བརྡ་བཏང་ཡོད།

དེ་ཡང་གནས་ཚུལ་འདི་ནི་ཕྱི་ལོ་ ༢༠༢༦ ཟླ་བ་ ༦ ཚེས་ ༢༩ ཉིན་བསྐོང་ཚོགས་གནང་བའི་སྲིད་གཞུང་གི་གསར་འགོད་ལྷན་ཚོགས་ཐོག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་སེ་བྷ་སི་ཊི་ཡན་ཧིན་ཊར་སེ་ཧར་ (Sebastian Hinterseher) ལགས་སུ་ཁྲིམས་གསར་དེ་དང་འབྲེལ་བའི་བཅར་འདྲི་གནང་བའི་སྐབས་བྱུང་བ་ཞིག་དང་། གཞུང་ཁོངས་མ་ཡིན་པའི་ཚོགས་སྡེ་ཁག་གིས་ཁྲིམས་གསར་དེའི་ནུས་པ་དང་རྒྱ་ཁྱབ་ནི་རྒྱ་ནག་གི་རྒྱལ་མཚམས་ལས་བརྒལ་ཏེ་ཤུགས་རྐྱེན་ཐེབས་སྲིད་པའི་ཉེན་བརྡ་བཏང་ཡོད།

ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧིན་ཊར་སེ་ཧར་ལགས་ཀྱིས་ཇར་མན་གཞུང་ནས་རྒྱ་ནག་གཞུང་ལ་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་གསར་ཚུད་པའི་རྒྱུན་དུ་འགྲོ་བ་མིའི་ཐོབ་ཐང་གི་གནད་དོན་ཐོག་ཐུགས་འཚབ་བསྟན་བཞིན་པ་འགྲེལ་བརྗོད་གནང་བ་དང་། ཁྲིམས་ཡིག་འདིའི་བརྒྱུད་ད་ཡོད་རྒྱ་ནག་གཞུང་གི་མི་རིགས་ཐོག་བཟུང་བའི་སྲིད་བྱུས་ལ་ཁྲིམས་ལུགས་ཀྱི་གཞི་རྩ་རྒྱ་བསྐྱེད་གཏོང་བ་མ་ཟད། ལྷག་པར་ཆོས་ལུགས་རྒྱ་ནག་ཅན་དུ་བསྒྱུར་རྒྱུའི་སྲིད་བྱུས་ལ་ཁྲིམས་མཐུན་བཟོ་བཞིན་ཡོད་པ་གསུངས།

དེ་བཞིན་ཁྲིམས་འདིའི་འོག་ནས་རྒྱ་ནག་གིས་རྒྱལ་མཚམས་ལས་བརྒལ་བའི་བྱ་འགུལ་ཤུགས་ཆེ་རུ་སྤེལ་ངེས་ཡིན་པ་ལྟར་ཁྲིམས་འདིའི་རྒྱ་ནག་ནང་ལོག་ཙམ་མ་ཟད། རྒྱལ་ཁབ་གཞན་གྱི་མང་ཚོགས་ཀྱིས་གནས་བབས་ལའང་དོ་ཕོག་གཏང་རྒྱུ་ཡིན་པའི་སྐྱོན་བརྗོད་ཤུགས་ཆེ་གནང་། ཧིན་ཊར་སེ་ཧར་ལགས་ཀྱིས་ཇར་མན་ནས་རྒྱལ་མཚམས་ལས་བརྒལ་བའི་དྲག་གནོན་ཇི་འདྲ་ཞིག་ཡིན་རུང་ངོ་རྒོལ་མཐའ་གཅིག་ཏུ་བྱེད་རྒྱུ་ཡིིན་པ་བསྐྱར་ནན་གནང་ཡོད།

དེ་སྔོན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་བོད་ནང་དྲག་གནོན་བྱེད་ཤུགས་ཆེ་རུ་གཏོང་བཞིན་པའི་གནད་དོན་ཐོག་གོ་རྟོགས་སྤེལ་ཐབས་སུ་ཕྱི་ཟླ་ ༦ ཚེས་ ༡༡ ནས་ ༡༤ བར་སྦར་ལིན་དང་ཕེ་རེངྐ་ཕོཌ་ (Frankfurt) དུ་གཞུང་འབྲེལ་འཚམས་གཟིགས་ཀྱིས་གྲོས་ཚོགས་འཐུས་མི་དང་། གཞུང་འབྲེལ་མི་སྣ། སྤྱི་དམངས་ཚོགས་སྡེ་ཁག་གི་འགོ་ཁྲིད་བཅས་དང་མཇལ་འཕྲད་གནང་ཡོད། དེ་ཡང་དཔལ་ལྡན་སྲིད་སྐྱོང་མཆོག་གིས་བོད་ནང་རྒྱ་ནག་གཞུང་གི་འཆར་གཞི་ལྡན་པའི་མི་རིགས་སིམ་སྒྱུར་གྱི་སྲིད་བྱུས་ལ་ཐེར་འདོན་གནང་བ་དང་། རྒྱ་ནག་ཕྱི་ཕྱོགས་སུ་ཡོད་པའི་བོད་མི་རྣམས་ལ་རྒྱལ་མཚམས་ལས་བརྒལ་བའི་དྲག་གནོན་ཇེ་ཆེར་འགྲོ་བཞིན་པ་འགྲེལ་བརྗོད་གནང་ཡོད།

ཁྲིམས་ཡིག་འདིའི་བརྒྱུད་བོད་པ་དང་། ཡུ་གུར་བ། དེ་བཞིན་གྲངས་ཉུང་མི་རིགས་གཞན་ཁག་གི་ཐོབ་ཐང་ལ་སྔར་ལྷག་དོ་ཕོག་ཤུགས་ཆེ་འགྲོ་ངེས་ཡིན་པས་འགྲོ་བ་མིའི་ཐོབ་ཐང་ཚོགས་སྡེ་ཁག་ནས་དོ་སྣང་དང་ཞིབ་འཇུག་ནན་པོ་བྱེད་བཞིན་ཡོད་པ་དང་། གནད་དོན་དེ་དང་འབྲེལ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཛམ་གླིང་ཡོངས་ཀྱི་སྲིད་གཞུང་ཁག་དང་། ཕྱི་སྲིད་ལྷན་ཁང་། གྲོས་ཚོགས་འཐུས་མི། བསམ་མཛོད་བསྟི་གནས་ཁང་། གཞུང་ཁོངས་མ་ཡིིན་པའི་ཚོགས་པ་བཅས་ནས་ཁྲིམས་གསར་དེར་ཞིབ་དཔྱོད་དང་གཟིགས་ཞིབ། དེ་བཞིན་ཕྱིར་འཐེན་ཡོང་ཐབས་གནང་དགོས་པའི་འབོད་སྐུལ་ཞུས་ཡོད།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཁྲིམས་གསར་འདི་ནི་དོན་དངོས་སུ་མི་རིགས་མཐུན་སྒྲིལ་ཡར་ཐོན་སྐུལ་འདེད་མ་ཡིན་པར་རྒྱ་ནག་གཞུང་གིས་གྲངས་ཉུང་མི་རིགས་ཀྱི་ཆོས་དང་རིག་གཞུང་། སྐད་ཡིག་བཅས་པ་དང་། དེ་བཞིན་རྒྱ་ནག་གི་ཕྱི་ལོགས་སུ་གནས་པའི་མི་སྒེར་དང་ཚོགས་སྡེ་ཁག་ལ་སྟངས་འཛིན་སྲ་བརྟན་གཏོང་རྒྱུའི་སླད་ཡིན་པ་དང་། ཇར་མན་ནས་དེ་ལྟ་བུའི་རྒྱབ་སྐྱོར་གནང་བར་དགའ་བསུ་དང་སྦྲགས། ཇར་མན་དང་ཡུ་རོབ་རྒྱལ་ཁབ་ནས་བོད་མི་ཚུད་པའི་ཡུལ་གྱར་སྤྱི་ཚོགས་གཞན་གྱི་ཐོབ་ཐང་ལ་སྲུང་སྐྱོབ་དང་། མཉམ་འབྲེལ་ཐོག་རྒྱ་ནག་ལ་ཕྱི་འབྲེལ་གྱི་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད་པ་བཅས། །

༄༅། །ཨ་རིའི་གྲོས་ཚོགས་གོང་མའི་ནང་ཨ་རིའི་སྲིད་དོན་ཤོག་ཁག་ཟུང་སྦྲེལ་གྱིས་རྒྱ་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་གསར་ལ་སྐྱོན་བརྗོད་ཀྱིས་གྲོས་འཆར་ཞིག་ཆེད་འདོན་གནང་ཡོད།

དེ་ཡང་ཨ་རིའི་གྲོས་ཚོགས་གོང་མའི་འཐུས་མི་ཇེ་ཀི་རོ་སེན་ (Jacky Rosen)  ལགས་དང་། གྲོས་ཚོགས་གང་མའི་འཐུས་མི་ཇེཕ་མར་ཁི་ལི་ (Jeff Merkley) ལགས། གྲོས་ཚོགས་གོང་མའི་འཐུས་མི་ཇོན་ཁུ་རི་སི་ (John Curtis) ལགས། གྲོས་ཚོགས་གོང་མའི་འཐུས་མི་ཇིམ་བྷེན་ཀེ་སི་ (Jim Banks) ལགས་བཅས་ནས་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཚོགས་སུ་གྲོས་འཆར་ཆེད་འདོན་གནང་ཡོད། གྲོས་འཆར་འདིས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་སྐྱོན་བརྗོད་དང་། རྒྱ་ནག་གཞུང་གིས་གྲངས་ཉུང་མི་རིགས་ལ་དྲག་གནོན་དང་ལྷན་ཨ་རིའི་མི་མང་ལ་དམིགས་པའི་རྒྱལ་མཚམས་ལས་བརྒལ་བའི་དྲག་གནོན་ལས་འགུལ་ཁག་མཚམས་འཇོག་དགོས་པའི་འབོད་སྐུལ་གནང་ཡོད།

གྲོས་ཆོད་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་གྲངས་ཉུང་མི་རིགས་ལ་དམིགས་ནས་རྩ་ཁྲིམས་ནང་སོ་སོའི་སྐད་ཡིག་དང་རིག་གཞུང་སྲུང་སྐྱོབ། ཆོས་དད་རང་དབང་བཅས་ལ་འགན་ལེན་བྱས་ཡོད་པ་མ་ཟད། རྒྱ་ནག་ནི་བྱིས་པའི་ཐོབ་ཐང་དང་། རྒྱལ་སྤྱིའི་གན་རྒྱ་ཁག་ལ་མིང་རྟགས་འགོད་མཁན་གྱི་རྒྱལ་ཁབ་ཅིག་ཡིན་ཡང་། རྩ་ཁྲིམས་དང་རྒྱལ་སྤྱིའི་ཁས་ལེན་དམ་བཅའ་དག་ཡོད་བཞིན་དུ་རྒྱ་ནག་གཞུང་གིས་འཆར་གཞི་ལྡན་པའི་སྒོ་ནས་སྲིད་བྱུས་ལག་བསྟར་གྱིས་གྲངས་ཉུང་མི་རིགས་རྣམས་གནས་སྤོས་དང་། བོད་ཕྲུག་རྣམས་རྒྱ་གཞུང་གིས་ཆེད་འཛུགས་བྱས་པའི་མི་སེར་སྤེལ་ཡུལ་གཏན་སྡོད་སློབ་གྲྭར་བཙན་བཅུག་གིས་ནང་མི་དང་ཁ་བྲལ་གཏོང་བ། གྲངས་ཉུང་མི་རིགས་ཀྱི་སྐད་ཡིག་བཀོལ་སྤྱོད་ལ་ཚད་བཀག གཞུང་གི་སྟངས་འཛིན་འོག་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་དང་ཉམས་དམས་སུ་གཏོང་བ། དེ་བཞིན་རྒྱ་ནག་དམར་ཤོག་ཚོགས་པའི་ལྟ་བ་དང་མཐུན་ཐབས་བྱེད་དུ་བཅུག་བཞིན་ཡོད་བཅས་འཁོད་ཡོད།

སྲིད་བྱུས་འདི་དག་བརྒྱུད་བོད་པ་དང་། ཡུ་གུར་བ། སོག་པོ། ཡེ་ཤུ་བཅས་ཚུད་པའི་གྲངས་ཉུང་མི་རིགས་ཀྱི་ཐོབ་ཐང་དང་རང་དབང་ལ་ཉེན་ཁ་བཟོ་བཞིན་ཡོད་པ་དང་། གྲོས་ཚོགས་གོང་མའི་འཐུས་མི་རྣམས་ནས་ཁྲིམས་གསར་དེར་སྐྱོན་བརྗོད་དང་སྦྲགས། དོ་ཕོག་ཐེབས་མཁན་གྱི་སྤྱི་ཚོགས་ཁག་ལ་རྒྱབ་སྐྱོར་ཡོད་པ་བསྐྱར་ནན་གནང་བ་མ་ཟད། ཁྲིམས་གསར་དེ་བཞིན་ཕྱིར་འཐེན་དགོས་པ་དང་མཐུན་གྲོགས་རྒྱལ་ཁབ་ཁག་མཉམ་འབྲེལ་ཐོག་ཁྲིམས་གསར་འདིའི་ཤུགས་རྐྱེན་ལ་ལྟ་ཞིབ་བྱེད་དགོས་པའི་འབོད་སྐུལ་ཞུས་ཡོད།

དེ་བཞིན་གྲོས་ཆོད་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་བྱེད་ཕྱོགས་ཀྱི་གནད་དོན་དང་འབྲེལ། ཡང་སྲིད་ངོས་འཛིན་ཀྱི་ཐག་གཅོད་འདི་བཞིན་བོད་བརྒྱུད་ནང་བསྟན་གྱི་དབུ་ཁྲིད་དང་བོད་མི་གཅིག་པུར་ཡོད་པ་གསལ་སྟོན་གནང་བ་དང་། རྒྱ་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་མགོན་པོ་གང་ཉིད་མཆོག་གི་སྐུ་ཚབ་དང་ལྷན་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་བསྐྱར་དུ་གྲོས་མོལ་འགོ་འཛུགས་གནང་དགོས་པའི་འབོད་སྐུལ་ཞུས་ཡོད་པ་བཅས། །

༄༅། །ཨི་ཊ་ལཱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཚོགས་གཞོན་གཙོས་པའི་གྲོས་ཚོགས་འཐུས་མི་ཁག་གཅིག་ནས་བརྙན་ཐུང་འདོན་སྤེལ་བརྒྱུད་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལ་སྐྱོན་བརྗོད་ཀྱིས་བསྒྲགས་གཏམ་སྤེལ་བ་དང་སྦྲགས། ཁྲིམས་ཡིག་འདི་ནི་བཙན་དབང་གི་མི་རིགས་སིམ་སྒྱུར་བྱེད་པའི་ལག་ཆ་ཞིག་དང་། བོད་པའི་སྐད་ཡིག་དང་། ངོ་བོ། རིག་གཞུང་བཅས་ཀྱི་གསོན་གནས་ལ་ཉེན་ཚབས་ཆེན་པོ་སྤྲོད་བཞིན་ཡོད་པ་བརྗོད་ཡོད།

དེ་ཡང་ཨི་ཊ་ལཱིའི་ཕྱི་སྲིད་བློན་ཆེན་ཟུར་པ་ཇི་ཡུ་ལིའོ་ཊར་ཛི་ (Giulio Terzi) མཆོག་གིས་ཁྲིམས་ཡིག་འདི་ནི་བཙན་ཤེས་ཀྱིས་རིག་གཞུང་སིམ་ཡལ་བྱེད་པའི་ལག་ཆ་ཞིག་ཡིན་པ་དང་། རྒྱ་སྐད་དེ་བཞིན་གཞུང་འབྲེལ་ཡི་གེར་གཏན་འབེབས་བྱས་པ་ལས་བོད་མིའི་སྐད་དང་ངོ་བོ་རྩ་བརླག་ཏུ་གཏོང་རྒྱུའི་བྱེད་ཤུགས་ཆེ་རུ་གཏོང་གི་ཡོད་པ་གསུངས། དེ་བཞིན་བོད་ཕྲུག་ས་ཡ་གཅིག་ལྷག་ཙམ་མི་སེར་སྤེལ་ཡུལ་གྱི་གཏན་སྡོད་སློབ་གྲྭར་བཙན་བཅུག་གིས་སོ་སོའི་ཁྱིམ་ཚང་དང་ཁ་བྲལ་བཏང་བའི་གནད་དོན་གླེང་སློང་གནང་བ་མ་ཟད། ཕྱི་ལོ་ ༢༠༢༦ ཟླ་བ་ ༦ ཚེས་ ༡༥ ཉིན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་སྐུ་ཞབས་ཝོལ་ཀེར་ཊུརྐ་ (Volker Türk) མཆོག་དང་། དེ་བཞིན་ཡུ་རོབ་གྲོས་ཚོགས་ནས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་གསར་དེ་ཕྱིར་འཐེར་བྱེད་དགོས་པའི་འབོད་སྐུལ་ལ་རྒྱབ་སྐྱོར་དང་། རྒྱལ་སྤྱིའི་སྤྱི་ཚོགས་ནས་ཁ་ཁུ་སིམ་པོར་བསྡད་པར་སྐྱོན་བརྗོད་གནང་ཡོད།

ཨི་ཊ་ལི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཨེན་ཌི་རེ་ཡ་ཌི་པི་རི་ཡ་མོ་ (Andrea De Priamo) ལགས་ཀྱིས་ཁྲིམས་ཡིག་དེས་གྲངས་ཉུང་མི་རིགས་ཀྱི་ཐོབ་ཐང་དང་། ངོ་བོ། རང་སྐྱོང་བཅས་ལ་དོ་ཕོག་གཏོང་བཞིན་པ་དང་། འགྲོ་བ་མིའི་ཆེ་མཐོང་དང་། ཆོས་དད་རང་དབང་། གཞི་རྩའི་ཐོབ་ཐང་བཅས་སྲུང་སྐྱོབ་བྱ་རྒྱུའི་ཁལ་ལེན་བསྐྱར་ནན་གནང་ཡོད།

ཨི་ཊ་ལི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཨི་ལེ་ནི་ཡ་ (Ilenia Malavasi) ལགས་ཀྱིས་ཕྱི་ལོ་ ༢༠༢༦ ཟླ་བ་ ༧ ཚེས་ ༡ ཉིན་ལག་བསྟར་བྱ་རྒྱུ་ཡིན་པའི་ཁྲིམས་གསར་དེས་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་རིམ་གྱི་རྩ་མེད་དུ་གཏོང་རྒྱུ་ཡིན་པའི་ཉེན་བརྡ་བཏང་བ་དང་། འདི་ནི་འགྲོ་བ་མིའི་ཐུན་མོང་གི་རིག་གཞུང་ཤུལ་བཞག་གསོན་གནས་ལ་ཉེན་ཁ་བཟོ་བཞིན་ཡོད་པ་གསུངས།

ཨི་ཊ་ལཱིའི་གྲོས་ཚོགས་གོང་མའི་འཐུས་མི་ཟུར་པ་རོ་བྷར་ཊོ་རཱམ་པི་ (Roberto Rampi) ལགས་ཀྱིས་རྒྱ་ནག་གཞུང་གིས་སྐད་ཡིག་སྣ་མང་གི་རང་བཞིན་ལ་དྲག་གནོན་བྱེད་པའི་ཚབ་ཏུ་དེ་དག་སྲུང་སྐྱོབ་དང་གོང་སྤེལ་གཏོང་དགོས་པ་གསུངས་ཡོད།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཨི་ཊ་ལི་གྲོས་ཚོགས་འཐུས་མི་རྣམ་པའི་གཅིག་གྱུར་གྱི་ལངས་ཕྱོགས་ལ་དགའ་བསུ་ཞུས་པ་དང་སྦྲགས། ཁྲིམས་ཡིག་དེ་བཞིན་ལག་བསྟར་མ་བྱས་གོང་ཨི་ཊ་ལི་གཞུང་ཚུད་པའི་རྒྱལ་སྤྱིའི་སྲིད་གཞུང་ཁག་ནས་རྒྱ་ནག་གཞུང་ལ་ལག་ལེན་དངོས་ཀྱི་གནོན་ཤུགས་སྤྲོད་དགོས་པའི་འབོད་སྐུལ་ཞུས་པ་དང་། གལ་ཏེ་རྒྱ་སྐད་དེ་བཞིན་གཞུང་འབྲེལ་སྐད་ཡིག་བཟོས་ཚེ་བོད་ཀྱི་རིག་གཞུང་དང་ངོ་བོའི་སླར་གསོ་བྱེད་མ་ཐུབ་པའི་གནོད་འཚེ་བསྐྲུན་ངེས་ཡིིན་པ་བཅས་གསུངས་ཡོད། །

༄༅། །ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་ཁག་གཅིག་ནས་རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་གསར་ལ་སྐྱོན་བརྗོད་ཀྱིས་བསྒྲགས་གཏམ་སྤེལ་བ་དང་སྦྲགས། ཁྲིམས་ཡིག་འདིའི་བརྒྱུད་བོད་མི་ཚུད་པའི་གྲངས་ཉུང་མི་རིགས་ཀྱི་ཆོས་དང་རིག་གཞུང་། སྐད་ཡིག་བཅས་པར་དམ་བསྒྲགས་ཇེ་ཤུགས་ཆེ་རུ་གཏོང་རྒྱུ་ཡིན་པའི་ཉེན་བརྡ་བཏང་ཡོད།

དེ་ཡང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་གསུམ་གྱིས་བརྙན་ཐུང་བརྒྱུད་བསྒྲགས་གཏམ་ཞིག་སྤེལ་བའི་ནང་། ཁྲིམས་གསར་འདིའི་ཐོག་ཐུགས་འཚབ་ཆེན་པོ་བསྟན་པ་དང་སྦྲགས་རྒྱལ་སྤྱིའི་སྤྱི་ཚོགས་ནས་གནད་དོན་དེའི་ཐོག་དོ་སྣང་གནང་དགོས་པའི་འབོད་སྐུལ་གནང་ཡོད།

ཅེཀ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སྐུ་ཞབས་ཧ་ཡ་ཊོ་ཨོ་ཀ་མུ་ར་ (Hayato Okamura) ལགས་ཀྱིས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལ་ཐུགས་འཚབ་ཤུགས་ཆེ་བསྟན་པ་དང་སྦྲགས། ཁྲིམས་ཡིག་འདིའི་བརྒྱུད་བོད་མི་རྣམས་ཀྱི་ཆོས་དང་རིག་གཞུང་། སྐད་ཡིག་བཅས་པར་སྔར་ལྷག་དམ་བསྒྲགས་ཇེ་ཆེར་གཏོང་རྒྱུ་ཡིན་པ་གསུངས་ཡོད།

ཅེཀ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཅེཀ་གྲོས་ཚོགས་གོང་མའི་འཐུས་མི་པེ་རེམ་སིལ་ར་བྷ་སི་ (Přemysl Rabas) ལགས་ཀྱིས་རྒྱལ་ཁབ་ཀྱི་སྟོབས་ཤུགས་ནི་རྒྱ་ཁྱོན་ཆེ་ཆུང་ཙམ་མ་ཡིན་པར་མི་རིགས་དང་རྒྱལ་ཁབ་གཞན་ལ་བརྩི་འཇོག་དང་བཟོད་བསྲན་བྱེད་སྟངས་ལ་རག་ལས་པ་ཞིག་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་གཏན་འབེབས་བྱས་པའི་མི་རིགས་མཐུན་སྒྲིལ་དང་ཡན་ཐོན་སྐུལ་འདེད་ཀྱི་ཁྲིམས་ལུགས་འདི་ནི་གྲངས་ཉུང་མི་རིགས་ཀྱི་རིག་གཞུང་རྩ་མེད་གཏོང་བྱེད་ཀྱི་ལག་ཆ་ཞིག་ཡིན། རྒྱ་ནག་གཞུང་ནས་ལོ་རྒྱུས་དང་། སྒྱུ་རྩལ། རིག་གཞུང་། སྐད་ཡིག དེ་བཞིན་བོད་མི་བཅས་ལ་བརྩི་འཇོག་བྱེད་ཐུབ་པའི་རེ་བ་བྱེད་ཀྱི་ཡོད་ཅེས་གསུངས།

ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཡི་རི་ཨོ་སྦར་ཕལ་ཛར་ (Jiří Oberfalzer) མཆོག་གིས་ཁྲིམས་གསར་འདི་ནི་རྒྱ་ཆེ་བའི་བཙན་དབང་གིས་མི་རིགས་སིམ་སྒྱུར་གྱི་སྲིད་བྱུས་ཀྱི་ཆ་ཤས་ཤིག་དང་། རྒྱལ་སྤྱིའི་ཁྲིམས་དང་ལྷག་པར་རྒྱ་ནག་གི་རྩ་ཁྲིམས་དང་རྒྱབ་འགལ་དུ་འགྲོ་ཡི་ཡོད་པ་གསུངས།

བརྙན་ཐུང་བརྒྱུད་བསྒྲགས་གཏམ་སྤེལ་བ་འདི་དག་ནི། ཕྱི་ལོ་ ༢༠༢༦ ཟླ་བ་ ༣ ཚེས་ ༢༥ ཉིན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་རྣམས་ནས་རྒྱ་ནག་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་གསར་ལ་སྐྱོན་བརྗོད་དང་། བོད་བརྒྱུད་ནང་བསྟན་གྱི་སྲོལ་རྒྱུན་ཡང་སྲིད་ངོས་འཛིན་བྱེད་ཕྱོགས་ཐད་རྒྱབ་སྐྱོར་གྱི་གྲོས་ཆོད་གཏན་འབེབས་གནང་བའི་རྗེས་འདོན་སྤེལ་གནང་བ་ཞིག་ཡིན་པ་དང་། གྲོས་ཆོད་འདི་ནི་ཕྱི་ཟླ་ ༣ ཚེས་ ༢༤ ཉིན་གྱི་ཚོགས་འདུ་རྗེས་གྲོས་ཚོགས་ཀྱི་ཤེས་ཡོན་དང་། ཚན་རིག རིག་གཞུང་། འགྲོ་བ་མིའི་ཐོབ་ཐང་། ཞུ་གཏུག་གི་ལྷན་ཚོགས་ (Senate’s Committee on Education, Science, Culture, Human Rights, and Petitions) ནས་རྒྱབ་སྐྱོར་གནང་བ་དང་། གྲོས་ཚོགས་འཐུས་མི་པེ་རེམ་སིལ་ར་བྷ་སི་ལགས་ཀྱིས་གྲོས་ཚོགས་ཐོག་སྙན་སྒྲོན་གནང་སྟེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་བྱེད་པར་ཁྲིམས་མཐུན་གྱི་དབང་ཆ་མེད་པ་དང་། གནད་དོན་འདི་ནི་བོད་མི་ཁོ་ནར་རག་ལས་ཡོད་པ་གསལ་བསྒྲགས་བྱས་པ་དང་། གྲོས་ཆོད་ནང་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་འབྲེལ་ལྷན་ཁང་ཚུད་པའི་ཅེཀ་གཞུང་ནས་༸རྒྱལ་བ་རིན་པོ་ཆེའི་སྐུ་ཕྲེང་ ༡༥ སྲིད་གཞུང་གཞན་གྱི་ཐེ་བྱུས་མེད་པར་རང་དབང་གི་སྒོ་ནས་ངོས་འཛིན་བྱེད་རྒྱུར་རྒྱབ་སྐྱོར་བྱེད་དགོས་པའི་འབོད་སྐུལ་ཞུས་ཡོད།

དེ་བཞིན་གྲོས་ཆོད་ནང་རྒྱ་ནག་གི་ཡང་སྲིད་ངོས་འཛིན་གྱི་ཆབ་སྲིད་དང་། མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་གསར་གཉིས་དབར་ཐད་ཀར་འབྲེལ་བ་ཡོད་པ་བསྟན་པ་མ་ཟད། ཕྱི་ལོ་ ༢༠༢༦ ཟླ་བ་ ༣ ཚེས་ ༡༢ ཉིན་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་གསར་འདིས་མི་རིགས་སིམ་སྒྱུར་གྱི་སྲིད་བྱུས་ལ་མངོན་གསལ་འདོད་པོས་རྒྱབ་སྐྱོར་བྱེད་ཀྱི་ཡོད་པ་དང་། གྲངས་ཉུང་མི་རིགས་ཀྱི་རིག་གཞུང་དང་། ཆོས་དང་རང་དབང་། སྐད་ཡིག་བཅས་ལ་དམ་བསྒྲགས་བྱེད་ཤུགས་ཆེ་རུ་གཏོང་བ་མ་ཟད། ཁྲིམས་ཡིག་འདི་ནི་རྒྱ་ནག་གཞུང་གིས་གྲངས་ཉུང་མི་རིགས་ཐོག་གཏན་འབེབས་བྱས་པའི་རྩ་ཁྲིམས་དང་རྒྱབ་འགལ་དུ་འགྲོ་ཡི་ཡོད་པ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ནས་ཀྱང་སྐྱོན་བརྗོད་གནང་ཡོད།

ཕྱོགས་མཚུངས་ཁྲིམས་ཡིག་འདིའི་བརྒྱུད་རྒྱ་ནག་གི་མངའ་ཁུལ་ལས་བརྒལ་ཏེེ། ཨ་རི་དང་ཡུ་རོབ་མཐུན་ཚོགས་ཚུད་པའི་ཕྱི་ཕྱོགས་སུ་གནས་པའི་བོད་དོན་རྒྱབ་སྐྱོར་བ་རྣམས་ནས་མི་རིགས་མཐུན་སྒྲིལ་ཐད་གནོད་སྐྱོན་གཏོང་བའམ། ཁ་བྲལ་རིང་ལུགས་ཁྱབ་སྤེལ་བྱེད་པར་ངོས་འཛིན་བྱས་ཚེ་ཁྲིམས་མཐུན་གྱི་སྒོ་ནས་ཉེས་འཛུགས་བྱེད་སྲིད་པའི་ཉེན་བརྡ་བཏང་བ་དང་། དེ་བཞིན་གྲོས་ཆོད་ནང་ཅེཀ་སྤྱི་མཐུན་རྒྱལ་ཁབ་དང་བོད་མི་བར་ཡུན་རིང་གྱི་འབྲེལ་བ་དམ་ཟབ་ཡོད་པ་གསལ་སྟོན་གནང་ཞིང་། གྲོས་ཆོད་ནང་དེ་སྔོན་ཕྱི་ལོ་ ༢༠༢༥ ཟླ་བ་ ༡༢ ནང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དང་། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་པེ་ཊར་པ་ཝེལ་ (Petr Pavel) མཆོག་སོ་སོ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་པ་ཁག་དྲན་གསོ་ཞུས་ཡོད།

ཅེཀ་གྲོས་ཚོགས་འོག་མའི་བོད་དོན་རྒྱབ་སྐྱོར་ཚོགས་པ་ནས་ཀྱང་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་སྐྱོན་བརྗོད་ཀྱིས་བསྒྲགས་གཏམ་སྤེལ་ཡོད།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་བསྒྲགས་གཏམ་དེ་དག་ལ་འཚམས་འདྲི་ཞུས་པ་དང་སྦྲགས། ཅེཀ་གྲོས་ཚོགས་ནས་དེ་ལྟ་བུའི་བསྒྲགས་གཏམ་སྤེལ་བ་ལས་རྒྱ་ནག་གིས་བོད་མིའི་ངོ་བོ་ལ་དམ་དྲག་ཤུགས་ཆེ་རུ་གཏོང་བཞིན་པའི་སྐབས་དེར་མང་གཙོའི་རྒྱལ་ཁབ་ཁག་ནས་ལྟ་ཞིབ་ནན་པོ་བྱེད་བཞིན་པ་གསལ་སྟོན་བྱེད་ཀྱི་ཡོད་པ་དང་། མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ནི་མི་རིགས་སིམ་ཡལ་བྱེད་པའི་ལག་ཆ་ཞིག་ཡིན་པ་དང་། ཅེཀ་སྤྱི་མཐུན་རྒྱལ་ཁབ་བཞིན་རྒྱལ་ཁབ་གཞན་གྱི་གྲོས་ཚོགས་འཐུས་མི་རྣམས་ནས་ཁྲིམས་གསར་དེའི་ཐོག་སྐྱོན་བརྗོད་ཀྱི་བསྒྲགས་གཏམ་སྤེལ་དགོས་པའི་འབོད་སྐུལ་ཞུས་ཡོད་པ་བཅས། །

༄༅། །སུད་སི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཕྱི་ལོ་ ༢༠༢༦ ཟླ་བ་ ༣ ནང་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་དེ་བཞིན་ཕྱི་ལོ་ ༢༠༢༦ ཟླ་བ་ ༧ ཚེས་ ༡ ཉིན་ལག་བསྟར་བྱ་རྒྱུ་ཡིན་པར་ངོ་རྒོལ་ཤུགས་ཆེ་གནང་ཡོད།

སུད་སི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཁྲིམས་ཡིག་འདིའི་བརྒྱུད་བོད་ཀྱི་ཆོས་དང་རིག་གཞུང་། སྐད་ཡིག་བཅས་ལ་གནོད་འཚེ་བཏང་ངེས་ཡིན་པ་དང་། རྒྱ་ནག་ཀྲུང་ཧཱ་མི་མང་གཙོ་བོར་བཟུང་བའི་ཐོག་རྒྱལ་ཁབ་ཀྱི་ངོ་བོ་སྲ་བརྟན་དུ་གཏོང་གི་ཡོད་པར་ནན་བརྗོད་དང་སྦྲགས། འདི་ནི་མཐུན་སྒྲིལ་གྱི་ཐབས་ལམ་ཞིག་ཏུ་མ་ཡིན་པར་དེ་ལས་ལྡོག་སྟེ་བཙན་ཤེས་ཀྱིས་མི་རིགས་རྩ་མེད་བཟོ་ཐབས་དང་། བོད་པའི་ངོ་བོ་འཆར་གཞི་ལྡན་པའི་ཐོག་རྩ་མེད་གཏོང་བྱེད་ཀྱི་ལག་ཆ་ཞིག་ཡིན་པར་ངོས་འཛིན་གནང་ཡོད།

སུད་སི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཁྲིམས་གསར་འདིའི་འོག་ཤེས་ཡོན་དང་མི་མང་གི་འཚོ་བར་གཞུང་གི་སྟངས་འཛིན་བྱེད་ཤུགས་ཆེ་རུ་བཏང་བ་དེ། རྒྱ་ནག་གི་ཆེད་འཛུགས་བྱས་པའི་མི་སེར་སྤེལ་ཡུལ་གཏན་སྡོད་སློབ་གྲྭའི་ལམ་ལུགས་འོག་ཁྱིམ་ཚང་དང་ཁ་བྲལ་བཏང་ཟིན་པའི་བོད་ཕྲུག་ས་ཡ་གཅིག་ལྷག་ཙམ་གྱི་གནས་སྟངས་ཇེ་སྡུག་ཏུ་གཏང་རྒྱུ་ཡིན་པའི་ཉེན་བརྡ་བཏང་ཞིང་། རྒྱ་ནག་གཞུང་གི་གསར་འགྱུར་བརྒྱུད་ལམ་ཁག་གི་གནས་ཚུལ་ལུང་འདྲེན་གྱིས་རྒྱ་ནག་གཞུང་གིས་ཐ་ན་བུ་བཅོལ་ཁང་གི་བོད་ཕྲུག་ཡིན་ཆད་ལ་དམར་ཤོག་དང་བཅིངས་འགྲོལ་དམག་ལ་བསྟོད་བསྔགས་བྱེད་པའི་དྲིལ་བསྒྲགས་གྱི་སློབ་གསོ་སྤྲོད་བཞིན་པ་འདི་དག་ནི་བོད་པའི་མི་རབས་གཞོན་པ་ནས་འགོ་འཛུགས་ཀྱིས་བོད་ཀྱི་ངོ་བོ་རྩ་མེད་གཏོང་བའི་ཐབས་ཤེས་ཤིག་ཡིན་པ་བརྗོད་ཡོད།

ཚོགས་པའི་བསྒྲགས་གཏམ་ནང་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཊི་ཡ་ན་མོ་སེར་ (Tiana Moser) ལགས་དང་། གྲོས་ཚོགས་འོག་མའི་འཐུས་མི་ལི་ཨོ་ནོར་བྷོར་གྷེ་སི་ (Léonore Porchet) ལགས། གྲོས་ཚོགས་འཐུས་མི་ཕ་བི་ཡན་མོ་ལི་ན་ (Fabian Molina) ལགས། མངའ་སྡེ་གྲོས་ཚོགས་འཐུས་མི་མ་ཇ་གྷི་རབ་ (Maya Graf, National Councilor) ལགས་བཅས་ནས་སུད་སི་ནས་རྒྱལ་སྤྱིའི་ཚོགས་སྡེ་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ནང་ཁྲིམས་ཡིག་ལ་ངོ་རྒོལ་བྱེད་པའི་འབད་བརྩོན་ལ་རྒྱབ་སྐྱོར་གནང་རྒྱུའི་དམ་བཅའ་དང་། མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་མཁས་པ་རྣམས་ནས་ཁྲིམས་གསར་འདིའི་འོག་བོད་དང་། ཡུ་གུར། དེ་བཞིན་རྒྱ་ནག་གི་མངའ་འོག་ཏུ་གནས་པའི་གྲངས་ཉུང་མི་རིགས་གཞན་རྣམས་ཀྱི་ཆོས་དང་རིག་གཞུང་། སྐད་ཡིག་བཅས་ཀྱི་རང་སྐྱོང་གི་ཐོབ་ཐང་ལ་ཉེན་ཁ་བཟོ་བཞིན་ཡོད་པའི་ཉེན་བརྡ་བཏང་སྐོར་གསལ་སྟོན་གནང་ཡོད།

སུད་སི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་སུད་སི་གྲོས་ཚོགས་ཀྱི་ཕྱི་དྲིལ་ལས་དོན་ཚོགས་ཆུང་ནང་གནད་དོན་དེ་བཞིན་གླེང་སློང་བྱ་རྒྱུ་ཡིན་པ་དང་། སུད་སི་གཞུང་ལ་རྒྱ་ནག་གཞུང་གི་བོད་ཀྱི་ཆོས་དང་རིག་གཞུང་། ངོ་བོ་བཅས་ཚུད་པའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འགན་འཁྲི་དག་དྲན་སྐུལ་བྱེད་དགོས་པར་སྐུལ་འདེད་གཏོང་རྒྱུ་ཡིན་པ་བརྗོད་པ་མ་ཟད། གལ་ཏེ་གནད་དོན་དེའི་ཐོག་ཐེ་བྱུས་མ་བྱེད་ཚེ་བོད་པའ་ིངོ་བོ་དེ་བཞིན་མི་རབས་གཅིག་གི་ནང་ཚུད་དུ་རྩ་མེད་འགྲོ་ཉེན་ཡོད་པའི་ཉེན་བརྡ་བཏང་ཡོད།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སུད་སི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་ནས་ཉག་ཕྲ་བའི་དུས་སྐབས་དེར་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་འདི་ནི་རྒྱ་ནག་གིས་མི་རིགས་སིམ་ཡལ་བྱེད་པའི་སྲིད་བྱུས་དེ་དག་བོད་ནང་གི་སློབ་གྲྭ་དང་། སྤྱི་ཚོགས། ཁྱིམ་ཚང་བཅས་ཀྱི་ནང་དངོས་སུ་ཁྱབ་གདལ་ཤུགས་ཆེ་གཏོང་གི་ཡོད་པ་མ་ཟད། དེ་སྔོན་རྒྱ་ནག་གཞུང་གིས་ཆེད་འཛུགས་བྱས་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭར་བོད་ཕྲུག་ས་ཡ་གཅིག་ལྷག་ཙམ་ཁྱིམ་ཚང་དང་ཁ་བྲལ་དུ་གཏོང་བཞིན་པའི་ཐོག་ཁ་སྣོན་ཞིག་ཡིན་པ་དང་། སུད་སི་གྲོས་ཚོགས་འཐུས་མི་རྣམས་ནས་གནད་དོན་དེའི་ཐོག་གླེང་སློང་དང་བོད་མི་རྣམས་ལ་རྒྱབ་སྐྱོར་བྱེད་པ་ལས། རྒྱལ་སྤྱིའི་སྤྱི་ཚོགས་ནས་གནད་དོན་འདིའི་ཐོག་དོ་སྣང་བྱེད་བཞིན་པ་དང་། བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་སྲུང་སྐྱོབ་བྱེད་དགོས་པར་ཡིད་ཆེས་ཡོད་པ་གསལ་སྟོན་ཐུབ་ཀྱི་ཡོད་ཅེས་གསུངས་ཡོད་པ་བཅས། །

དེ་ཡང་གསུང་འཕྲིན་ནང་འཁོད་དོན། ཝེ་ནེ་ཛུ་ལའི་ས་ཁུལ་དུ་ས་ཡོམ་གྱི་གོད་ཆག་ཁྲོད་ཚེ་སྲོག་ཤོར་བ་དང་། མི་མང་པོ་ཞིག་ལ་རྨས་སྐྱོན་ཕོག་པར་ཐུགས་ཕམ་བྱུང་ཞེས་དང་། ས་ཡོམ་ཁྲོད་རྐྱེན་འདས་སུ་འགྱུར་མཁན་རྣམས་ལ་བསྔོ་སྨོན་དང་། དོ་ཕོག་ཐེབས་མཁན་ལ་གདུང་སེམས་མཉམ་སྐྱེད་དང་མྱ་ངན་ཞུ་བཞིན་ཡོད་ཅེས་དང་།

མགོན་པོ་གང་ཉིད་མཆོག་གིས་སྤྱིར་ང་ཚོ་འགྲོ་བ་མི་ཚང་མ་གཅིག་མཚུངས་ཡིན་པས། ང་ཚོས་བདེ་སྐྱིད་འདོད་ཅིང་སྡུག་བསྔལ་མི་འདོད་པའི་འགྲོ་བ་མིའི་གཞི་རྩའི་རིན་ཐང་གི་ཐོག་ནས་ཕན་ཚུན་རམ་འདེགས་དང་རྒྱབ་སྐྱོར་བྱེད་པར་འགན་ཁུར་གྱི་འདུ་ཤེས་ཤིག་ཡོད་ལ། ད་ལྟའི་ཛ་དྲག་གི་དུས་ཚོད་འདིར་རྒྱལ་སྤྱིའི་མྱུར་སྐྱོབ་ལས་བྱེད་མང་དག་ཅིག་གིས་རོགས་འདེགས་བྱེད་མུས་ཡིིན་པ་ཤེས་རྟོགས་བྱུང་བར་དགའ་ཚོར་ཆེན་པོ་བྱུང་ཞེས་དང་།

ཕྱི་ལོ་ ༡༩༩༢ ལོར་ཝེ་ནེ་ཛུ་ལཱར་ཉིན་གྲངས་བཞིའི་རིང་ཆིབས་བསྒྱུར་གནང་སྐབས་ས་གནས་ཀྱི་ཁྱབ་ཁོངས་འདྲ་མིན་གྱི་མི་སྣ་ཚོས་བྱམས་བརྩེ་དང་། སྙིང་རྗེ། ཆོག་ཤེས། ཚུལ་ཁྲིམས། ཆོས་ལུགས་མཐུན་སྒྲིལ་བཅས་ཀྱི་རིན་ཐང་ལ་དགའ་མོས་དང་གདེང་འཇོག་ཆེན་པོ་གནང་བའི་རྣམ་པ་དེ་དག་ད་ལྟའང་ཐུགས་དྲན་གསོ་གསལ་པོ་གནང་གི་ཡོད་པ་མ་ཟད། མི་མང་གི་བསམ་བློའི་ནུས་པ་དང་བྱམས་བརྩེའི་སྙིང་སྟོབས་དེས་ད་ལྟའི་དཀའ་ངལ་ཆེན་པོ་འདི་ལས་འགྲོལ་ཐུབ་པའི་ཐུགས་རེ་དང་ཐུགས་སྨོན་གནང་གི་ཡོད་པ་གསུང་འཕྲིན་ནང་འཁོད་ཡོད། །

༄༅། །ཨ་རིའི་གྲོས་ཚོགས་གོང་མའི་འཐུས་མི་ལིནཌ་སེ་གྷརམ་ (Lindsey O. Graham) ལགས་དང་མང་གཙོ་ཚོཊ་པའི་ཨ་རིའི་གྲོས་ཚོགས་གོང་མའི་འཐུས་མི་ཤེལ་ཌོན་ཝཡེཊ་ཧའོསི་ (Sheldon Whitehouse) ལགས་རྣམ་གཉིས་ཀྱིས་ཨ་རིའི་རྒྱལ་སར་གནས་འཁོད་རྒྱ་ནག་གཞུང་ཚབ་པ་ཞེ་ཧྥེང་( Xie Feng) ལ་ཕྱག་བྲིས་ཤིག་གནང་སྟེ། རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་ཐུགས་འཚབ་བསྟན་པ་དང་སྦྲགས། བོད་མི་དང་ཡུ་གུར། སོག་པོ་བཅས་ཀྱི་ཐུན་མོང་མ་ཡིན་པའི་ངོ་བོ་དང་། ཆོས་དད་རང་དབང་། གཞི་རྩའི་འགྲོ་བ་མིའི་ཐོབ་ཐང་བཅས་ལ་ཉེན་ཁ་བཟོ་ངེས་ཡིན་པའི་ཉེན་བརྡ་བཏང་ཡོད།

དེ་ཡང་ཨ་རིའི་གྲོས་ཚོགས་གོང་མའི་འཐུས་མི་རྣམ་གཉིས་ཀྱིས་ཡུ་རོབ་མཐུན་ཚོགས་ནས་ཕྱི་ཟླ་ ༧ ཚེས་ ༡ ཉིན་ལག་བསྟར་བྱ་རྒྱུ་ཡིན་པའི་རྒྱ་ནག་གི་ཁྲིམས་ཡིག་དེར་ངོ་རྒོལ་གྱིས་སྐྱོན་བརྗོད་བྱེད་པར་མོས་མཐུན་གྱིས། རྒྱ་ནག་གཞུང་གི་ངོས་ནས་ཁྲིམས་དེར་ཕྱིར་འཐེན་བྱ་དགོས་པ་དང་ཡང་ན་བསྐྱར་བཅོས་དགོས་པའི་སྐུལ་མ་བཏང་ཡོད། དེ་བཞིན་རྒྱ་ནག་དམར་ཤོག་གཞུང་གིས་ཁྲིམས་ཡིག་དེར་ལག་བསྟར་བྱེད་ཕྱོགས་དང་བྱེ་བྲག་ཏུ་གྲངས་ཉུང་མི་རིགས་དང་། རྒྱ་ནག་གི་ཕྱི་ལོགས་སུ་གནས་པའི་མི་སྒེར་ལ་དོ་ཕོག་ཇི་ཞིག་འཐེབ་མིན་ཐོག་ལྟ་ཞིབ་ནན་པོ་བྱ་རྒྱུ་ཡིན་པ་གསུངས། 

ཕྱག་བྲིས་ནང་གསལ་སྟོན་བྱས་པའི་སེམས་འཚབ་ཀྱི་གནད་དོན་གཙོ་བོ་ནི། ཁྲིམས་ཡིག་འདིའི་དོན་ཚན་ ༦༣ དེ་ཡིན་ཞིང་། དེའི་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་མངའ་ཁོངས་ཕྱི་རོལ་གྱི་སྒྲིག་འཛུགས་དང་མི་སྒེར་ནས་མི་རིགས་མཐུན་སྒྲིལ་ཡར་ཐོན་སྐུལ་འདེད་ལ་གཏོར་བརླག་གཏོང་བ་དང་། མི་རིགས་ཁ་བྲལ་གྱི་བྱ་སྤྱོད་སྤེལ་རིགས་ལ་ཁྲིམས་ལྟར་ཁྲིམས་འབྲེལ་ཁུར་འཁྲི་བརྡ་འདེད་གཏོང་རྒྱུ་ཞེས་པ་དེའི་ཐོག་ཡིན་ཞིང་། གྲོས་ཚོགས་གོང་མ་རྣམ་གཉིས་ནས་གལ་ཏེ་རྒྱ་ནག་གཞུང་གིས་དོན་ཚན་འདིའི་འོག་ནས་ཨ་རིར་གནས་སྡོད་སྒྲིག་འཛུགས་དང་མི་སྒེར་ལ་སོ་ལྟ་དང་། འཇིགས་སྐུལ། ཡང་ན་གནོན་ཤུགས་སོགས་ཀྱི་བྱ་སྤྱོད་གང་རུང་བརྩམས་ཚེ། དེ་ནི་ཨ་རིའི་བདག་དབང་ལ་རྩིས་མེད་རྡོག་རོལ་བཏང་བ་ཞིག་ཡིན་པས་ནམ་ཡང་ཁས་ལེན་བྱེད་ཐབས་མེད་ཅེས་གསུངས།

དེ་བཞིན་ཕྱག་བྲིས་ནང་གྲོས་ཚོགས་འཐུས་མི་རྣམ་གཉིས་ནས་རྒྱ་ནག་གཞུང་གིས་མཐར་ལྷུང་རིང་ལུགས་དང་ཁ་བྲལ་རིང་ལུགས་ལ་ཁ་གཡར་གྱིས་ཆོས་དད་རང་དབང་ལ་བཀག་སྡོམ་བྱེད་པའི་སྲིད་བྱུས་ལ་སྐྱོན་བརྗོད་གནང་ཡོད་ཅིང་། དེའི་ནང་ཆོས་དད་ལ་དམ་བསྒྲགས་དང་། བཙན་གྱིས་རྒྱལ་ཞེན་སློབ་གསོ་སྤྲོད་པ། དེ་བཞིན་སྤྱི་ཚོགས་ནང་སོ་སོའི་ཆོས་ཕྱོགས་ཀྱི་སྲོལ་རྒྱུན་རིག་གཞུང་དོར་བའམ་ཉམས་དམས་སུ་གཏོང་དགོས་པའི་གནོན་ཤུགས་སྤྲོད་པ་སོགས་ཀྱི་བྱེད་ཐབས་ཚུད་ཡོད་པ་དང་། དེའི་བརྒྱུད་བོད་བརྒྱུད་ནང་བསྟན་དང་། ཁ་ཆེ། ཡེ་ཤུ། དེ་བཞིན་གཞན་ཆོས་ལུགས་ཀྱི་སྤྱི་ཚོགས་ལ་ཤུགས་རྐྱེན་ཐེབས་ཡོད་ཅེས་འཁོད་ཡོད།

བོད་པའི་སློབ་ཕྲུག་རྣམས་ཀྱི་ཐོབ་ཐང་ལ་སེམས་འཚབ་བསྟན་པ་དང་སྦྲགས། མི་སེར་སྤེལ་ཡུལ་གྱི་གཏན་འཇགས་སློབ་གྲྭའི་ལམ་ལུགས་བརྒྱུད་བོད་ཕྲུག་ས་ཡ་གཅིག་ལྷག་ཙམ་བཙན་གྱིས་སོ་སོའི་ཁྱིམ་ཚང་དང་། སྐད་ཡིག རིག་གཞུང་གི་ཤུལ་བཞག་དང་ཁ་བྲལ་དགོས་བྱུང་བའི་གནས་སྟངས་ཐེར་འདོན་དང་། ཁྲིམས་གསར་འདི་བྱིས་པའི་ཐོབ་ཐང་སྲུང་སྐྱོབ་བྱེད་པའི་རྒྱལ་སྤྱིའི་ཚད་གཞི་དང་མཐུན་མིན་ཐོག་ཚོད་ལྟ་བྱ་རྒྱུ་ཡིན་པ་བརྗོད།

ཕྱོགས་མཚུངས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་ནི་བོད་མི་རིགས་དང་། ཡུ་གུར་བ་སོགས་ཀྱི་ཐུན་མོང་མ་ཡིན་པའི་ངོ་བོ་རྩ་མེད་གཏོང་ཐབས་བྱེད་པའི་གནོད་ཚབས་ཅན་གྱི་ཁྲིམས་ལུགས་ཤིག་རེད་ཅེས་དང་། ཁྲིམས་གསར་འདི་ནི་རྒྱ་ནག་གཞུང་གི་རྩ་ཁྲིམས་དང་། ཕྱི་ལོ་ ༡༩༨༤ ལོའི་ས་གནས་མི་རིགས་རང་སྐྱོང་ཁྲིམས་དང་། དེ་བཞིན་རྒྱ་ནག་གི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁས་ལེན་དང་རྒྱབ་འགལ་དུ་འགྲོ་གི་ཡོད་པ་མངོན་ཡོད།

ཨ་རིའི་གྲོས་ཚོགས་གོང་མ་རྣམ་གཉིས་ནས་ཨ་རིའི་ས་ཐོག་ཏུ་གནས་པའི་མི་སྒེར་དང་བྱིས་པའི་ཐོབ་ཐང་། ཆོས་དད་རང་དབང་སོགས་ལ་རྡོག་རོལ་གཏོང་ཚེ་གདོང་ལེན་གྱི་ཐེར་འདོན་བྱ་རྒྱུ་ཡིིན་པ་བསྐྱར་ནན་དང་། རྒྱ་ནག་གཞུང་གིས་ཁྲིམས་ལུགས་དེའི་འོག་ནས་སྲིད་བྱུས་གང་ཞིག་སྤེལ་བ་དེར་འགན་འཁྲི་ཡོད་པ་ཞིག་བཟོ་བའི་ཆེད་ཁོང་རྣམ་པ་གཉིས་ནས་ཨ་རིའི་གྲོས་ཚོགས་དང་ཁྲིམས་ཡིག་དེ་འབྲེལ་གྲོས་ཚོགས་ལ་སྙན་ཐོ་འགོད་འབུལ་དགོས་པའི་ཁྲིམས་ཡིག་གཏན་འབེབས་བྱེད་བཞིན་ཡོད་ཅེས་འཁོད་ཡོད།

སྲིད་དོན་ཤོག་ཁག་ཟུང་འབྲེལ་ཐོག་ཕུལ་བའི་ཕྱག་བྲིས་འདིའི་བརྒྱུད་རྒྱལ་སྤྱིའི་སྤྱི་ཚོགས་ནང་བོད་ཚུད་པའི་རྒྱ་ནག་གི་དབང་བསྒྱུར་མངའ་ཁུལ་དུ་མི་རིགས་སིམ་སྒྱུར་གྱི་སྲིད་བྱུས་ལ་སེམས་འཚབ་ཇེ་ཆེར་འགྲོ་བཞིན་པ་མངོན་གསལ་ཐུབ་ཀྱི་ཡོད་པ་བཅས། །

༄༅། །ཕྱི་ལོ་ ༢༠༢༦ ཟླ་བ་ ༦ ཚེས ༢༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དྷ་ས་ཉེ་འདབས་སུ་ཆགས་པའི་འཛིན་སྐྱོང་སྦྱོང་བརྡར་ཁང་དུ་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་བསྐོང་ཚོགས་གནང་བའི་བོད་རྒྱ་འབྲེལ་བའི་རྒྱལ་སྤྱིའི་ཚོགས་འདུའི་མཇུག་བསྡོམས་མཛད་སྒོའི་ཐོག་སྐུ་མགྲོན་གཙོ་བོར་ཆེད་ཕེབས་གནང་ཡོད་ཅིང་། ཚོགས་འདུའི་ཐོག་བོད་རྒྱའི་དཀའ་རྙོག་སེལ་ཐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེས་མཛད་ཅིང་། བོད་མི་མང་སྤྱི་འཐུས་ལྷན་ཚོགས་ནས་མང་མོས་ཐོག་གཏན་འབེབས་གནང་བའི་བོད་མིའི་སྒྲིག་འཛུགས་ཀྱི་གཞུང་འབྲེལ་སྲིད་བྱུས་དབུ་མའི་ལམ་བརྒྱུད་བོད་རྒྱ་འབྲེལ་མོལ་གྱི་ཕུགས་དམིགས་ཐོག་

དེ་ཡང་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་རྒྱ་འབྲེལ་བའི་གནས་བབས་དང་། དབུ་མའི་ལམ་གྱི་སྲིད་བྱུས་དེ་བཞིན་དུས་དང་འཚམ་པ་ཞིག་ཡིིན་པ་བསྐྱར་ནན་གནང་བ་མ་ཟད། ཞི་བདེ་དང་གཉིས་སྨན་གྱི་ཐོག་ནས་བོད་དོན་ཐོག་ཐག་གཅོད་ཡོང་སླད་རྒྱུན་མཐུད་འབྲེལ་མོལ་བྱ་རྒྱུ་ནི་གལ་གནད་ཆེན་པོ་ཡིན་པ་ནན་བརྗོད་གནང་ཡོད།

དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་གིས་ཉེ་ལམ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བར་ཐུགས་འཚབ་དང་འབྲེལ། ཁྲིམས་གསར་འདིའི་བརྒྱུད་བོད་ཀྱི་མཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ངོ་བོ་བཅས་པར་སྲུང་སྐྱོབ་ལ་ཚབས་ཆེ་བའི་ཉེན་ཁ་བསྐྲུན་བཞིན་པ་གསུངས་ཡོད། །

༄༅། །ཕྱི་ལོ་ ༢༠༢༦ ཟླ་བ་ ༦ ཚེས་ ༢༦ ཉིན་དྷ་ས་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཤེས་རིག་ལས་ཁུངས་ཀྱིས་གོ་སྒྲིག་གནང་བའི་སློབ་གྲྭ་ཁག་གི་གཞི་རིམ་བར་མའི་སྤྱི་ཚན་དགེ་རྒན་གྱི་ཟབ་སྦྱོང་དང་། སཾ་བྷོ་ཊའི་ཁྱབ་ཁོངས་གཞི་རིམ་འོག་མའི་དགེ་རྒན་གྱི་བོད་ཡིག་ཟབ་སྦྱོང་གི་མཇུག་བསྡོམས་མཛད་སྒོ་ཚོགས་གནང་སོང་། སྐབས་དེར་སྐུ་མགྲོན་གཙོ་བོར་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག་དང་། ཤེས་རིག་ཤེས་ཡོན་ཚན་པའི་འགན་འཛིན་འཇམ་དབྱངས་དབང་རྒྱལ་ལགས། ཤེས་རིག་ལས་ཁུངས་ཀྱི་བོད་ཡིག་ཤེས་ཡོན་འགན་འཛིན་དངོས་གྲུབ་བསྟན་པ་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་བགྲེས་གཞོན་རྣམ་པ་གཉིས། ཟབ་ཁྲིད་གནང་མཁན་གཙུག་ལག་རབ་འབྱམས་པའི་སློབ་དཔོན་དང་། རིག་གནས་རབ་འབྱམས་པའི་སློབ་དཔོན་བགྲེས་གཞོན། དེ་བཞིན་སློབ་སྡེ་ཁག་གསུམ་གྱི་གཞི་རིམ་བར་མ་དང་འོག་མའི་དགེ་རྒན་གྲངས་ ༤༨ བཅས་ཚང་འཛོམས་ཐོག་མཇུག་བསྡོམས་མཛད་སྒོ་དབུ་འཛུགས་གནང་སོང་།

དེ་ཡང་ཐོག་མར་ཤེས་རིག་ལས་ཁུངས་ཀྱི་བོད་ཡིག་ཤེས་ཡོན་འགན་འཛིན་དངོས་གྲུབ་བསྟན་པ་ལགས་ཀྱིས་ཟབ་སྦྱོང་གི་དམིགས་ཡུལ་དང་འབྲེལ་ཟབ་སྦྱོང་ཁྲོད་ཟབ་ཁྲིད་ཇི་ཞིག་གནང་སྐོར་བཅས་ཟབ་སྦྱོང་གི་ལས་བསྡོམས་སྙིང་བསྡུས་ཤིག་སྙན་སྒྲོན་གནང་གྲུབ་མཚམས་བོད་པའི་སློབ་སྡེ་ཁག་གསུམ་གྱི་གཞི་རིམ་བར་མ་དང་འོག་མའི་ཚོགས་བཅར་བ་དགེ་རྒན་བཞི་ནས་ཉིན་གྲངས་བཅུའི་རིང་ཟབ་སྦྱོང་གི་མྱོང་ཚོར་དང་བསམ་ཚུལ་མཉམ་སྤྱོད་དང་འབྲེལ། ཟབ་སྦྱོང་རིང་བོད་ཀྱི་བརྡ་སྤྲོད་དང་། ལོ་རྒྱུས། གཞུང་ཡིག ཡིག་གཟུགས་བཅས་ཀྱི་ཐོག་སྦྱང་རྒྱུའི་གོ་སྐབས་བྱུང་བར་ཕན་ནུས་ཆེན་པོ་བྱུང་ཡོད་སྐོར་འགྲེལ་བརྗོད་དང་སྦྲགས་མུ་མཐུད་དེ་ལྟར་གནང་སྐྱོང་ཡོང་བའི་འབོད་སྐུལ་དང་ཟབ་ཁྲིད་གནང་མཁན་དགེ་རྒན་གཙོས་པས་དངོས་ཤུགས་བརྒྱུད་གསུམ་ནས་མཐུན་འགྱུར་རོགས་རམ་གནང་མཁན་ཡོངས་ལ་ཐུགས་རྗེ་ཆེ་ཞུས་ཡོད།

དེ་རྗེས་སློབ་སྤྱི་པ་སངས་ཚེ་རིང་ལགས་ཀྱིས་ཟབ་སྦྱོང་དང་འབྲེལ་ནས་གསུང་བཤད་གནང་དོན། དགེ་རྒན་གྱི་ལས་འགན་ནི་ཧ་ཅང་གི་རྩ་ཆེན་པོ་ཞིག་ཡིན་པ་དང་། དགེ་རྒན་ཚོས་སློབ་མ་རྣམས་ལ་སློབ་ཁྲིད་གནང་སྐབས་སློབ་མའི་མ་འོངས་མདུན་ལམ་དང་བོད་རྩ་དོན་ཐོག་བསམ་བློ་གཏང་ཕྱོགས་ཐད་སློབ་གསོ་བསྐྱོན་དགོས་པའི་ནན་བརྗོད་དང་སྦྲགས་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལག་བསྟར་བྱེད་པ་བརྒྱུད་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་རྩ་མེད་གཏོང་རྒྱུ་ཡིན་སྐོར་དང་འབྲེལ་ད་ལྟའི་བོད་ནང་གི་གནས་སྟངས་ཛ་དྲག་ཅན་ཞིག་ཏུ་འགྱུར་བཞིན་ཡོད་པ་འགྲེལ་བརྗོད་ཀྱིས་བོད་པའི་སྐད་དང་རིག་གཞུང་མི་ཉམས་གོང་འཕེལ་གནང་དགོས་གལ་ཡིན་པ་བཅས་གསུངས།

དེ་རྗེས་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག་

དེ་བཞིན་དགེ་རྒན་གྱི་ཕྱག་ལས་ནི་གལ་གནད་ཆེན་པོ་ཡིན་སྐོར་དང་འབྲེལ། མི་རིགས་གཅིག་གནས་མ་གནས་དང་ཤེས་ཡོན་གི་ཁ་ཕྱོགས་གང་དུ་འགྱུར་མིན་དེ་དགེ་རྒན་ལ་རག་ལས་ཡོད་པ་དང་། ལྷག་པར་བོད་མི་རྣམས་ནི་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དང་གཞིས་ལུས་བོད་མི་རྣམས་ཀྱི་དཀའ་སྡུག་སེམས་ལ་བཅངས་པའི་ཐོག་ལྷག་བསམ་རྣམ་དག་གིས་ཕྱག་ལས་གནང་ཚེ་མི་རིགས་ལ་ཞབས་འདེགས་གྲུབ་པ་ཞིག་ཡིན་ཞེས་གསུངས།

བོད་ནང་གི་གནས་སྟངས་དང་འབྲེལ་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་གསར་གཏན་འབེབས་ཀྱིས་བོད་ནང་བོད་ཀྱི་ཆོས་དང་རིག་གཞུང་། སྐད་ཡིག་བཅས་པར་དམ་བསྒྲགས་དང་རྩ་མེད་གཏོང་བཞིན་ཡོད་པར་སོང་། བྱེས་སུ་གནས་པའི་བོད་མི་རྣམས་ནས་བོད་ཀྱི་ཆོས་དང་རིག་གཞུང་། ལྷག་པར་སྐད་ཡིག་བཅས་པར་སྔར་ལྷག་མི་ཉམས་རྒྱུན་འཛིན་དང་ཉམས་པ་སོར་ཆུད་གནང་དགོས་པའི་དུས་ཚོད་ཅིག་ཆགས་ཀྱི་ཡོད་སྐོར་དང་། དགེ་རྒན་རྣམས་ནས་སློབ་མར་རྒྱལ་ཞེན་གྱི་སློབ་གསོ་གང་མང་བསྐྱོན་དགོས་པ་མ་ཟད། མ་འོངས་པར་བོད་ཀྱི་ཆོས་དང་རིག་གཞུང་སྐད་ཡིག་བཅས་པ་མི་ཉམས་རྒྱུན་འཛིན་བྱེད་མཁན་གྱི་སློབ་མ་ཞིག་གསོ་སྐྱོང་གནང་དགོས་གལ་བཅས་ཀྱི་ཐོག་ལམ་སྟོན་གསུང་བཤད་ཟབ་ཅིང་རྒྱས་པ་གནང་གྲུབ་རྗེས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་དྲུང་ཡིག་བསྟན་འཛིན་སྨིན་ལེགས་ལགས་ཀྱིས་ཐུགས་རྗེ་ཆེ་གསུང་བཤད་གནང་སྟེ་མཇུག་བསྡོམས་མཛད་སྒོ་མཇུག་སྒྲིལ་ཡོད།

སྤྱིར་ཟབ་སྦྱོང་དེ་བཞིན་ཕྱི་ཟླ་ ༦ ཚེས་ ༡༦ ནས་ ༢༦ བཅས་ཉིན་གྲངས་བཅུ་རིང་ཚོགས་ཡོད་ཅིང་། ཟབ་སྦྱོང་ཁྲོད་དགེ་རྒན་རྣམས་ལ་བརྡ་དག་དང་། སྒྲ་ཕབ། གཞུང་འབྲེལ་ཡིག་བཟོ། ཀློག་རྩལ་སྦྱོར་བརྡར། ཡིག་གཟུགས། སྤྱི་ཚན་སློབ་དེབ་ངོ་སྤྲོད། བོད་ཀྱི་ལོ་རྒྱུས་ཁྲིད་ཐབས། སྤྱི་ཚོགས་ཚན་རིག་གི་གལ་གནད་བཅས་ཀྱི་ཐོག་ཟབ་ཁྲིད་གནང་ཡོད་པ་བཅས། །