དེ་ཡང་ཤེས་རིག་ལས་ཁུངས་ཀྱི་མཐུན་འགྱུར་ལམ་སྟོན་འོག་ཧི་མཱ་ཅལ་མངའ་ཁོངས་དྷ་ས་དང་དེའི་ཉེ་འཁོར་གྱི་བོད་སློབ་ཁག་དང་། ལ་དྭགས་བོད་ཁྱིམ་བཅས་ཁྱོན་སློབ་གྲྭ་ཁག་བརྒྱད་ཀྱི་སློབ་མ་རྣམས་བཞུགས་སྒར་དྷ་སྟེང་བོད་ཁྱིམ་དུ་ལྷན་འཛོམས་ཀྱིས། ཕྱི་ཚེས་ ༨ ནས་ ༡༠ བར་ཉིན་གྲངས་གསུམ་གྱི་རིང་། རྩོམ་རིག་དང་རིག་གཞུང་འདུ་འཛོམས་ཤིག་དབུ་འཛུགས་གནང་ཡོད་པ་དང་། འདུ་འཛོམས་འདིའི་དབུ་འབྱེད་མཛད་སྒོར་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག་སྐུ་མགྲོན་གཙོ་བོར་ཕེབས་ཞུགས་གནང་ཡོད། སྐབས་དེར་ཤེས་རིག་བཀའ་བློན་མཆོག་གིས་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་དགོངས་དོན་ཤེས་ཡོན་སློབ་སྦྱོང་སྤྲོད་པའི་དམིགས་ཡུལ་བཞི་སྟེ་རང་དབང་དང་། གཞན་ཕན། རྒྱུན་འཛིན། གསར་གཏོད་བཅས་ཀྱི་སྐོར་འགྲེལ་བརྗོད་གནང་ཡོད། ལྷག་པར་ཤེས་རིག་བཀའ་བློན་མཆོག་གིས་བཙན་བྱོལ་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ཕྱི་ནང་གི་མཐུན་རྐྱེན་སྣ་འཛོམས་ཡོད་པའི་བོད་སློབ་ཁག་གི་སློབ་མ་ཚོས། གོ་སྐབས་དམ་འཛིན་གྱིས་ཤེས་ཡོན་སློབ་སྦྱོང་ལ་ཧུར་བརྩོན་དགོས་པ་མ་ཟད། རྒྱ་ནག་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེར་གདོང་ལེན་དུ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་བཅས་པ་མི་ཉམས་རྒྱུན་འཛིན་ཐོག་ཤུགས་སྣོན་འཕར་མ་བསྐྱོན་དགོས་པའི་ཞབས་བསྐུལ་གནང་ཡོད།དྷ་སྟེང་བོད་ཁྱིམ་དུ་འཚོགས་བཞིན་པའི་རྩོམ་རིག་དང་རིག་གཞུང་འདུ་འཛོམས་འདིའི་ཐོག་ཧི་མཱ་ཅལ་མངའ་ཁོངས་དྷ་ས་དང་དེའི་ཉེ་འཁོར་གྱི་བོད་སློབ་ཁག་དང་། དེ་བཞིན་ལ་དྭགས་བཅས་ནས་ཁྱོན་སློབ་གྲྭ་ཁག་བརྒྱད་ཀྱི་སློབ་མ་གྲངས་ ༡༨༣ ལྷན་འཛོམས་ཀྱིས། བོད་སྐད་དང་ཨིན་སྐད་ཐོག་བགྲོ་གླེང་དང་། སྙན་ཚིག་འགྱེར་འདོན། གཏམ་བརྗོད་གཟིགས་འབུལ། དེ་བཞིན་སྲོལ་རྒྱུན་གཞས་སྣ་འཁྲབ་སྟོན་གནང་གི་ཡོད་པ་རེད།
གཞི་རྩའི་ཤེས་རིག་ལས་ཁུངས་ནས་སློབ་ཕྲུག་གི་རྒྱུན་ལྡན་སློབ་ཚན་ཙམ་མ་ཡིན་པར་རྩོམ་རིག་དང་རིག་གཞུང་གི་ནུས་རྩལ་ཡར་རྒྱས་དང་། སློབ་ཕྲུག་རང་ཉིད་ཀྱི་རིག་རྩལ་དང་འཇོན་ཐང་། ནུས་པ་གོང་སྤེལ་གཏོང་ཐབས། དེ་བཞིན་སློབ་ཕྲུག་ཕན་ཚུན་དབར་ཤེས་ཡོན་གྱི་ཉམས་མྱོང་བརྗེ་རེས་ཀྱི་སྡིངས་ཆ་བསྐྲུན་རྒྱུ་སོགས་ལ་དམིགས་ཏེ། ཕྱི་ལོ་ ༢༠༢༣ ལོ་ནས་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་འདི་གོ་སྒྲིག་གནང་བཞིན་ཡོད།

དྷ་ས་ཁུལ་དུ་སློབ་གྲྭ་ནང་ཁུལ་རྩོམ་རིག་དང་རིག་གཞུང་འདུ་འཛོམས་ཀྱི་ལས་འཆར་འདི་དང་འབྲེལ། བོད་མིའི་སྒྲིག་འཛུགས་ཤེས་རིག་ལས་ཁུངས་ནས་སྡེ་ར་ལྡུན་ཁུལ་དང་། བྱང་ཤར་ཁུལ། ལྷོ་ཕྱོགས་ཁུལ་དུའང་བོད་སློབ་ཁག་གི་རྩོམ་རིག་དང་རིག་གཞུང་འདུ་འཛོམས་འཚོགས་ཀྱི་ཡོད།།

༄༅། །ཕྱི་ལོ་ ༢༠༢༦ ཟླ་བ་ ༠༩ ཚེས་ ༠༧ ཉིན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་

དེ་ཡང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༣ པའི་དབུ་འབྱེད་ཐོག་སྐུ་ཞབས་ཝོལ་ཀེར་ཊུརྐ་མཆོག་གིས་འཛམ་གླིང་སྟེང་དམག་འཁྲུག་དང་། སྤྱི་ཚོགས་ཀྱི་རང་དབང་ལ་སྟངས་འཛིན། མི་རིགས་དབྱེ་འབྱེད། ཉམ་ཐག་དང་གྲངས་ཉུང་མི་རིགས་ལ་བརྩི་མེད་རྡོག་རོལ་སོགས་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་གསལ་སྟོན་གནང་ཡོད།

དེ་བཞིན་ཁོང་གིས་དམིགས་བསལ་བོད་མི་རྣམས་ཀྱི་ཆོས་དད་རང་དབང་ལ་དབྱེ་འབྱེད་བཞིན་པའི་དམ་དྲག་ནི་ཧ་ཅང་སེམས་འཚབ་སྐྱེ་གཞི་ཞིག་ཡིན་ཞེས་གསུངས་པ་དང་། བོད་མི་ཐོག་འཛིན་པའི་སྲིད་བྱུས་དེ་དག་འཕྲལ་དུ་འགྱུར་བ་གཏོང་དགོས་པའི་འབོད་སྐུལ་ཞུས་ཡོད།

བོད་ནང་ཆོས་ལུགས་དང་། རིག་གཞུང་གི་ཐོབ་ཐབ་ལ་བཀག་སྡོམ་བྱེད་བཞིན་པའི་ཐད་སེམས་འཚབ་ཇེ་ཆེར་འགྲོ་བཞིན་པའི་སྐབས་སུ་སྐུ་ཞབས་ཝོལ་ཀེར་མཆོག་གི་བསྒྲགས་གཏམ་འདི་ནི་གལ་གནད་ཆེན་པོ་ཞིག་ཆགས་ཀྱི་ཡོད། ཁོང་གི་འབོད་སྐུལ་འདིས་བོད་མིའི་གཞི་རྩའི་ཐོབ་ཐང་ལ་གུས་བརྩི་དགོས་པ་དང་། བོད་མི་རྣམས་ལ་བཀག་སྡོམ་མེད་པར་རང་གི་ཐོབ་ཐང་དང་རང་དབང་བཀོལ་སྤྱོད་བྱ་རྒྱུའི་གལ་གནད་མཚོན་གྱི་ཡོད།

སུད་སི་སྐུ་ཚབ་དོན་ཁང་གིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་དོ་སྣང་གནང་བར་དགའ་བསུ་ཞུས་པ་དང་ཆབས་ཅིག རྒྱལ་སྤྱིའི་སྟེང་བོད་ཀྱི་ཆོས་དང་། རིག་གཞུང་། དེ་བཞིན་གཞི་རྩའི་ཐོབ་ཐབ་སྲུང་སྐྱོབ་བྱ་རྒྱུའི་གལ་ཆེའི་རང་བཞིན་བསྐྱར་ནན་གནང་ཡོད། སྐུ་ཚབ་དོན་ཁང་ངོས་ནས་མཉམ་འབྲེལ་རྒྱལ་ཚོགས་ཀྱི་ལྷན་ཁང་དང་། ཕྱི་འབྲེལ་ལས་དོན། རྒྱལ་སྤྱིའི་མཐུན་གྲོགས་བཅས་དང་མུ་མཐུད་འབྲེལ་བ་གནང་སྟེ་བོད་ནང་གི་ཡར་རྒྱས་དེ་དག་རྒྱལ་སྤྱིའི་འགྲོ་བ་མིའི་ཐོབ་ཐང་གི་བགྲོ་གླེང་ནང་ཚུད་པ་བྱ་རྒྱུ་ཡིན་པ་གསུངས།

མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་མཆོག་གིས། འགྲོ་བ་མིའི་ཐོབ་ཐང་ནི་རྒྱལ་སྤྱིའི་མཉམ་ལས་དང་། འགན་ཁུར། ཡུན་རིང་ཞི་བདེའི་ཆེད་མེད་དུ་མི་རུང་བ་ཞིག་ཡིན་པ་བསྐྱར་ནན་གནང་བ་དང་། སྤྱི་ཡོངས་ཀྱི་འགྲོ་བ་མིའི་ཐོབ་ཐང་གིས་དེང་རབས་འཛམ་གླིང་གི་དཀའ་ངལ་ལ་གདོང་ལེན་བྱེད་པའི་སྒྲོམ་གཞི་ཞིག་མཁོ་སྤྲོད་བྱེད་ཀྱི་ཡོད་པ་ནན་བརྗོད་གནང་།།

༄༅། །ཕྱི་ལོ་ ༢༠༢༦ ཟླ་བ་ ༠༩ ཚེས་ ༠༣ ཉིན་སུད་སིར་རྟེན་གཞི་བྱས་པའི་

ནོར་བཟང་ཐེབས་རྩ་ནི་བོད་མིའི་སྨན་བཅོས་ལྟ་སྐྱོང་ལས་གཞིའི་ཡུན་རིང་རྒྱབ་སྐྱོར་བ་ཞིག་དང་། དུས་རྒྱུན་དུ་འཕྲོད་བསྟེན་ལས་ཁུངས་སུ་གཟིགས་སྐོར་ཕེབས་དང་ཕེབས་མུས་ཡིན་པ་རེད། ཐེབས་རྩ་འདིས་བོད་མིའི་སྤྱི་ཚོགས་ཀྱི་འཕྲོད་བསྟེན་དགོས་མཁོ་ལ་དམིགས་ནས་ལོ་ལྟར་དཔལ་འབྱོར་ཞལ་འདེབས་བརྒྱུད་སྨན་བཅོས་ལྟ་སྐྱོང་ལས་གཞིའི་ཚོགས་མི་རྣམས་ཀྱི་སྨན་བཅོས་དང་དགོས་མཁོ་ཁག་ལ་རྒྱབ་སྐྱོར་གནང་བཞིན་ཡོད།

དེ་ཡང་ནོར་བཟང་ཐེབས་རྩའི་ཚོགས་མི་རྣམས་འཕྲོད་བསྟེན་ལས་ཁུངས་སུ་ཕེབས་འབྱོར་སྐབས་འཕྲོད་བསྟེན་བཀའ་བློན་པདྨ་མཚོ་མཆོག་དང་། འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས། དྲུང་འཕར་བསྟན་འཛིན་ནོར་བུ་ལགས། དྲུང་གཞོན་ཡེ་ཤེས་སྒྲོལ་མ་ལགས་གཙོས་པའི་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ལས་གཞིའི་འབྲེལ་ཡོད་ལས་བྱེད་བཅས་ནས་ཕེབས་བསུ་ཞུས།དེ་རྗེས་བཀའ་བློན་པདྨ་མཚོ་མཆོག་གིས་འཕྲོད་བསྟེན་ལས་ཁུངས་ཀྱི་འགྲོ་བཞིན་པའི་ལས་གཞི་དང་འབྲེལ་འཆིན་ནད་དུག་ཐབས་ཁ་པའི་ལས་གཞི་དང་། མ་དང་བྱིས་པའི་ལས་གཞི་ཚུད་པའི་གལ་ཆེའི་ལས་གཞི་ལས་འཆར་ཁག་ངོ་སྤྲོད་གནང་ཡོད།

དེ་མཚུངས་འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས་ཀྱིས་ལས་ཁུངས་ཀྱི་སྒྲོམ་གཞི་དང་། ལས་དོན་བྱེད་ཕྱོགས། སྨན་བཅོས་ལྟ་སྐྱོང་ལས་གཞི་བཅས་ཀྱི་སྐོར་ངོ་སྤྲོད་མདོར་བསྡུས་གནང་བ་དང་སྦྲགས། ཁོང་གིས་ལས་གཞིའི་གལ་གནད་དང་། ལྷག་པར་ནོར་བཟང་ཐེབས་རྩ་ལྟ་བུའི་དཔལ་འབྱོར་མཐུན་འགྱུར་གནང་མཁན་ཚོའི་རྒྱབ་སྐྱོར་ལ་བརྟེན་ནས་དགོས་མཁོ་ཆེ་བ་དང་ཛ་དྲག་གི་སྨན་བཅོས་དགོས་པ་རྣམས་ལ་དུས་ཐོག་སྨན་བཅོས་ཞབས་ཞུ་ཐོབ་ཐུབ་པར་བསྔགས་བརྗོད་གནང་ཡོད།

ནོར་བཟང་ཐེབས་རྩའི་འགན་འཛིན་ཁི་རི་ཤན་ལགས་ཀྱིས་ཐེབས་རྩའི་དམིགས་ཡུལ་སྐོར་ངོ་སྤྲོད་གནང་ཞིང་། ཁོང་གིས་ཐེབས་རྩ་འདི་ཉིད་ཀྱི་ཉེ་ཆར་བལ་བོད་ཀྱི་ས་མཚམས་སུ་བྱུང་བའི་ཆུ་ལོག་ཁྲོད་གནོད་འཚེ་ཕོག་པའི་བོད་མི་དང་། དེ་བཞིན་ལུང་ཁུག་ཏུ་གནས་སྡོད་བོད་མི་ཚུད་པའི་དགོས་མཁོ་ཅན་ལ་རོགས་སྐྱོར་བྱ་རྒྱུའི་ཆོད་སེམས་བསྐྱར་ནན་གནང་ཡོད། གཞན་ཡང་སྐབས་དེར་འཕྲོད་བསྟེན་ལས་ཁུངས་དང་ནོར་བཟང་ཐེབས་རྩ་གཉིས་བར་མ་འོངས་མཉམ་ལས་དང་རྒྱབ་སྐྱོར་རྒྱུན་མཐུད་གནང་རྒྱུའི་ཐོག་བཀའ་མོལ་གནང་ཡོད།

མཐར་འཕྲོད་བསྟེན་བཀའ་བློན་པདྨ་མཚོ་མཆོག་གིས་ནོར་བཟང་ཐེབས་རྩ་ངོས་ནས་བོད་མིའི་སྤྱི་ཚོགས་ཀྱི་བདེ་དོན་ཐོག་རྒྱུན་མཐུད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། ཐུགས་རྗེ་ལེགས་འབུལ་མཚོན་ཆེད་མཇལ་དར་དང་ཕྱག་རྟགས་ཕུལ་ཡོད།

གཟིགས་སྐོར་འདི་བརྒྱུད་ནོར་བཟང་ཐེབས་རྩ་དང་འཕྲོད་བསྟེན་ལས་ཁུངས་གཉིས་ལ་མ་འོངས་མཉམ་ལས་སྲ་བརྟན་གཏོང་རྒྱུ་དང་། བོད་མི་རྣམས་ཀྱི་འཕྲོད་བསྟེན་ཞབས་ཞུ་དང་བདེ་དོན་ཐོག་རྒྱབ་སྐྱོར་བྱ་རྒྱུའི་གོ་སྐབས་གཞན་གྱི་ཐོག་གྲོས་བསྡུར་གནང་ཐུབ་ཡོད་པ་བཅས།།

༄༅། །ཕྱི་ལོ་ ༢༠༢༦ ཟླ་བ ༠༩ ཚེས་ ༠༤ རེས་གཟའ་པ་སངས་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་དུ་༸ཞབས་སོར་བདེ་བར་འཁོད་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༡༥ ཙམ་ལ་མགོན་པོ་གང་ཉིད་མཆོག་ལ་དྭགས་ནང་དུ་ཟླ་གྲངས་གཉིས་ལྷག་གི་མཛད་འཕྲིན་ཁག་རེ་ཞིག་ལེགས་པར་གྲུབ་སྟེ། ལ་དྭགས་ནས་མཁའ་ལམ་བརྒྱུད་དྷ་སའི་ཉེ་འགྲམ་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་དཔལ་ལྡན་ཁྲིམས་ཞིབ་ཆེ་བ་ཡེ་ཤེས་དབང་མོ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག དཔལ་ལྡན་སྲིད་ཚབ་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག་དང་།  དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་གཙོས་དད་ལྡན་མི་མང་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

དེ་ནས་ཆིབས་འཁོར་བརྒྱུད་བཞུགས་སྒར་༸རྒྱལ་བའི་ཕོ་བྲང་དུ་ཆིབས་བསྒྱུར་སྐབས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམ་པས་གཙོས་དྷ་སའི་སེར་སྐྱ་མི་མང་དང་། ཕྱི་ནང་གི་དད་ལྡན་པ་རྣམས་ནས་ལག་ཏུ་དཀར་གཙང་མཇལ་དར་དང་བདུག་སྤོས་ཐོགས་ཏེ་དགའ་དད་སྤྲོ་གསུམ་གྱི་སྒོ་ནས་ཕེབས་བསུ་དང་༧སྐུའི་ཞལ་མཇལ་ཞུས་ཡོད་ལ། བཞུགས་སྒར་༧རྒྱལ་བའི་ཕོ་བྲང་གཟིམ་ཆུང་ཉེ་འགྲམ་ཏུ་དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་།  དཔལ་ལྡན་ཁྲིམས་ཞིབ་པ་གཞན་ཟླ་བ་ཕུན་སྐྱིད་མཆོག་དང་། ཁྲིམས་ཞིབ་པ་གཞན་འཕགས་པ་ཚེ་རིང་མཆོག ནང་སྲིད་བཀའ་བློན་དཔལ་ལྡན་དོན་གྲུབ་མཆོག དཔལ་འབྱོར་བཀའ་བློན་གྱང་གསར་ཚེ་རིང་དོན་གྲུབ་མཆོག ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག འཕྲོད་བསྟེན་བཀའ་བློན་པདྨ་མཚོ་མཆོག དབུས་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག  སྤྱི་ཁྱབ་རྩིས་ཞིབ་ལས་ཁང་གི་འགན་འཛིན་བཀྲ་ཤིས་སྟོབས་རྒྱལ་མཆོག བོད་མི་མང་སྤྱི་འཐུས་རྒྱུན་ལས་རྣམ་པ།  ལྷན་ཁང་ཁག་གི་དྲུང་ཆེ་རྣམ་པ་བཅས་ནས་ཕེབས་བསུ་གཟབ་རྒྱས་ཞུས་ཡོད།།

༄༅། །ཕྱི་ལོ་ ༢༠༢༦ ཟླ་བ་ ༠༩ ཚེས་ ༠༣ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་། འཚེ་མེད་ཞི་བའི་ལམ་ལུགས་ཀྱི་ཐེབས་རྩ། བོད་ཀྱི་ཐེབས་རྩ་བཅས་མཉམ་འབྲེལ་ཐོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་ལྟེ་གནས་ཁང་དུ་བོད་ཀྱི་དུས་སྟོན་གོ་སྒྲིག་གནང་ཡོད། སྐབས་དེར་མཁས་དབང་དང་། སྲིད་བྱུས་འཆར་འགོད་པ། རྩོམ་པ་པོ། ཆོས་ལུགས་ཀྱི་དབུ་ཁྲིད། དེ་བཞིན་མི་མང་བཅས་འདུ་འཛོམས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་གྷན་དི་དྲན་རྟེན་ཐང་ཆེན་ (Gandhi-King Memorial Plaza) དུ་དབུ་འབྱེད་མཛད་སྒོ་ཚོགས་ཡོད་ཅིང་། སྐབས་དེར་དགེ་འདུན་བཞི་གྲས་ཤིས་བརྗོད་གསུང་འདོན་གནང་བསྟུན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དབུ་འབྱེད་གནང་ཡོད།དབུ་འབྱེད་མཛད་སྒོའི་ཐོག་དཔལ་ལྡན་སྲིད་སྐྱོང་མཆོག་གིས་ཚོགས་བཅར་བ་རྣམས་ལ་རྒྱ་ནག་གི་ཡར་རྒྱས་ཀྱི་གནས་སྟངས་ཐོག་དོ་སྣང་གནང་དགོས་པ་དང་། ལྷག་པར་ཉེ་ཆར་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་དང་། དེས་བོད་མི་དང་རྒྱ་ནག་ནང་གི་མི་རིགས་གཞན་རྣམས་ལ་ཤུགས་རྐྱེན་ཇི་ལྟར་ཐེབས་མིན་ཐད་དོགས་ཟོན་གནང་དགོས་པ་གསུངས། དེ་བཞིན་ཁོང་གིས་ཁྲིམས་ཡིག་འདི་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ཁྲིམས་ལུགས་ཀྱི་སྒྲོམ་གཞི་ནང་འཁོད་པའི་ཁས་ལེན་དམ་བཅའ་དང་འགལ་གྱི་ཡོད་པ་ནན་བརྗོད་གནང་།

རྒྱ་ནག་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་དེས་ཡིད་ཆེས་དང་བར་སྡུམ་བྱ་རྒྱུ་མ་ཡིན་པར། རྒྱལ་ཡོངས་མཐུན་སྒྲིལ་གྱི་མིང་འདོགས་ཏེ་མི་རིགས་སིམ་སྒྱུར་གྱི་སྲིད་བྱུས་དེ་ཁྲིམས་མཐུན་བཟོ་རྒྱུར་དམིགས་ཡོད་པ་མ་ཟད། གྲོས་མོལ་ཚབ་ཏུ་བཙན་ཤེད་དང་། སྣ་མང་རང་བཞིན་ཚབ་ཏུ་སྒོ་བསྟུན་བྱ་ཐབས་ཡིན་པ་འགྲེལ་བརྗོད་གནང་།ཉིན་དང་པོའི་གཏམ་བཤད་ལས་རིམ་གྱི་བརྗོད་གཞི་ Civilisational Confluence, Present Realities, and Strategic Horizons ཐོག་ཐབས་བྱུས་གནད་དོན་དང་། གསར་འགྱུར་བརྒྱུད་ལམ། ཤེས་ཡོན་སྡེ་ཚན། རྒྱ་ནག་ཐོག་སློབ་གཉེར་གནང་མཁན་བཅས་རྒྱབ་ལྗོངས་མི་འདྲ་བའི་མི་སྣ་ཕེབས་ཡོད།

སྐབས་དེར་གསུང་བཤད་པའི་ཁྲོད་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། རྒྱ་གར་དུས་བབས་ (The Indian Express) གསར་ལས་ཁང་གི་རྩོམ་འབྲི་པ་སྐུ་ཞབས་སི་རཱ་ཇཱ་མོ་ཧན་ལགས། རྩོམ་པ་པོ་དང་རྒྱ་ནག་ཐོག་མཁས་པ་སྐུ་ཞབས་ཨན་ཤུ་མན་ན་རང་ལགས་བཅས་ཡོད་པ་དང་། རྩོམ་པ་པོ་དང་གསར་འགོད་པ། རྒྱལ་ཡོངས་བདེ་འཇགས་དབྱེ་ཞིབ་པ་སྐུ་ཞབས་ནི་ཏིན་ ཨེ་ གྷོ་ཁ་ལེ་ལགས་ཀྱིས་ལས་རིམ་གཙོ་སྐྱོང་གནང་ཡོད།

ཚོགས་འདུ་དེར་བོད་ཀྱི་དཔལ་ཡོན་དང་། ད་ལྟའི་གནས་སྟངས། དེ་བཞིན་ས་ཁམས་ཆབ་སྲིད་ཀྱི་འགྱུར་གྲོས་ཐོག་རྒྱ་ཆེ་བའི་ཐབས་བྱུས་ཀྱི་གལ་གནད་བཅས་ཀྱི་སྐོར་གླེང་སློང་གནང་ཡོད།ཉིན་གསུམ་རིང་གི་དུས་སྟོན་ཐོག་བོད་ཀྱི་རིག་གཞུང་དང་། ལོ་རྒྱུས། ཆོས་ལུགས། ཁོར་ཡུག་སོགས་དང་འབྲེལ་བའི་བགྲོ་གླེང་དང་། གསུང་བཤད། དངོས་བྱུང་གློག་བརྙན་གཟིགས་འབུལ་བཅས་ཀྱི་ལས་རིམ་གོ་སྒྲིག་གནང་ཡོད།

ཉིན་དང་པོའི་ཐོག་ལྡི་ལི་ནེཧ་རུ་ Jawaharlal Nehru University གཙུག་ལག་སློབ་གཉེར་ཁང་གི་རིགས་སྡེ་འགན་འཛིན་སློབ་དཔོན་ཨ་མི་ཏཱབྷ་ མ་ཊཱུ་ (Amitabh Mattoo) ལགས་དང་། རྒྱ་གར་གཞུང་གི་གྲངས་ཉུང་མི་རིགས་ཀྱི་རྒྱལ་ཡོངས་ལྷན་ཚོགས་ཀྱི་འགན་འཛིན་ཟུར་པ་སྐུ་ཞབས་ཝ་ཇ་ཧཊ་ ཧ་བི་བུལླཱ་ (Wajahat Habibullah) ལགས། རྩོམ་པ་པོ་དང་རྒྱ་གར་འཁྲབ་སྟོན་པ་སྐུ་ཞབས་ཀ་བྷིར་ སྦེ་ཌི་ (Kabir Bedi) ལགས། ལྡི་ལི་བོད་ཁང་གི་འགན་འཛིན་དགེ་བཤེས་རྡོ་རྗེ་དགྲ་འདུལ་ལགས་བཅས་ཕེབས་ཞུགས་གནང་ཡོད། ཁོང་རྣམ་པས་བོད་དོན་དང་འབྲེལ་བའི་གནད་དོན་དང་། བོད་ཀྱི་རིག་གཞུང་། དེང་དུས་དང་འབྲེལ་བ་ཇི་ལྟར་ཡོད་མེད་ཀྱི་ཐོག་གསུང་བཤད་གནང་།དེ་བཞིན་དུས་སྟོན་ཐོག་བོད་བརྒྱུད་ནང་བསྟན་གྱི་རྡུལ་མཚོན་དཀྱིལ་འཁོར་དང་། རིག་གཞུང་འཁྲབ་སྟོན། བོད་ཀྱི་སྲོལ་རྒྱུན་ལག་རྩལ་འགྲེམས་སྟོན། བོད་ཀྱི་ལོ་རྒྱུས་དང་ཆབ་སྲིད་འཕེལ་རིམ་གྱི་དཔེ་དེབ་འགྲེམས་སྟོན་སོགས་གོ་སྒྲིག་གནང་ཡོད།

བོད་ཀྱི་དུས་སྟོན་གྱི་ཉིན་དང་པོའི་ཐོག་ཚོགས་བཅར་བ་དང་མི་མང་ཁྱོན་ ༥༠༠ ལྷག་ཕེབས་ཏེ་རིག་གཞུང་འགྲེམས་སྟོན་དང་། འཁྲབ་སྟོན། བགྲོ་གླེང་བཅས་ནང་མཉམ་ཞུགས་གནང་ཡོད་པ་བཅས།།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༦ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ལ་དྭགས་སུ་ཆིབས་བསྒྱུར་བཀའ་དྲིན་བསྐྱངས་པ་དང་། ཕྱི་ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ཉིན་ལ་དྭགས་ནང་པ་ཚོགས་འདུ་དང་ལ་དྭགས་དགོན་པ་ཡོངས་ཀྱི་ཚོགས་པ། བོད་མིའི་སྒྲིག་འཛུགས་བཅས་ཀྱིས་ལ་དྭགས་ཞི་བའི་ཚལ་གསུང་ཆོས་རྭ་བར་སྐུའི་འཁྲུངས་སྐར་གཟབ་རྒྱས་སྲུང་བརྩི་ཞུས་པར་མགོན་པ་གང་ཉིད་མཆོག་ཆིབས་བསྒྱུར་བསྐྱངས་ཏེ་བཀའ་སློབ་བཀའ་དྲིན་སྩལ། ཕྱི་ཚེས་ ༡༩ ཉིན་ལ་དྭགས་ཏོག་ཡུལ་གྱི་ཐུབ་དབང་སྐུ་བརྙན་ཆེན་མོར་མཆོད་མཇལ་དུ་ཆིབས་བསྒྱུར་གྱིས་ལ་དྭགས་དམག་སྡེའི་ཁྲོད་ཀྱི་ཏོག་གི་སྐོར་སྲུང་དམག་མི་ཟུར་པས་གཙོས་དད་ལྡན་མི་མང་ལ་བཀའ་སློབ་དང་ཆོས་འབྲེལ་བཀའ་དྲིན་སྩལ་ཡོད།

དེ་བཞིན་ཕྱི་ཟླ་ ༨ ཚེས་ ༩ ཉིན་ལ་དྭགས་ལྕོག་ལམ་སར་གྱི་ཉེ་ཁུལ་དུ་རྟེན་གཞི་བྱས་པའི་མ་ཧཱ་བྷོ་དྷི་རྒྱལ་སྤྱིའི་སྒོམ་སྒྲུབ་ལྟེ་གནས་ཁང་དུ་ཆིབས་བསྒྱུར་གྱིས་སངས་རྒྱས་སྟོང་སྐུར་རབ་གནས་བྱིན་རླབས་དང་། ལྟེ་གནས་ཀྱི་བགྲེས་ཁང་ལུས་སྟོབས་ཉམས་ཆུང་ཀུན་གྱི་ཁྱིམ་ཞེས་པའི་རྨང་རྡོ་འཇོག་གནང་མཛད་ཡོད་པ་དང་། ཕྱི་ཚེས་ ༡༦ ཉིན་བོད་དང་རྒྱ་གར་གྱི་ས་མཚམས་ཀྱི་དམག་སྡེ་(ITBF)ཡི་སྤྱི་ཁང་གསར་པ་དབུ་འབྱེད་བྱིན་རླབས་དང་། གླེ་ཡི་དགོན་པ་གྲོང་སྡེའི་སྟོན་པའི་སྐུ་བརྙན་ཆེན་མོར་གནས་གཟིགས་དང་རབ་གནས་མཛད། ཕྱི་ཚེས་ ༢༣ ཉིན་མང་སྤྲོ་དགོན་པར་ལ་དྭགས་དབྱར་ཆོས་ཆེན་མོ་ཐེངས་བཅུ་གཉིས་པའི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་སྟེ་ཆོས་འབྲེལ་བཀའ་དྲིན་སྩལ་བ་དང་། ཕྱི་ཚེས་ ༣༠ ཉིན་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་ཚོགས། ལ་དྭགས་བསོད་ནམས་གླིང་གཞིས་ཆགས་བཅས་ནས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་ཞི་བའི་ཚལ་གསུང་ཆོས་ར་བར་བརྟན་བཞུགས་བསྟར་འབུལ་ཞུས་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༢༦ ཟླ་ ༦ ཚེས་ ༢༨ ནས་ཟླ་ ༩ ཚེས་ ༤ བར་ལ་དྭགས་ས་གནས་སུ་ཆིབས་བསྒྱུར་བཀའ་དྲིན་བསྐྱངས་ནས་གོང་གསལ་མཛད་འཕྲིན་ལས་གཞན་ལ་དྭགས་ཕོ་བྲང་དགེ་འཕེལ་གླིང་དུ་ཁྱོན་ཉིན་གྲངས་ ༤༩ རིང་ཕྱི་རྒྱལ་ཡུལ་གྲུ་ཁག་དང། ཧི་མ་ལ་ཡའི་རི་རྒྱུད། རྒྱ་གར། ས་གནས་མི་མང་། བོད་མི་མང་ཚོགས་བཅས་ཁྱོན་མི་གྲངས་ ༢༡༥༧༢ ལ་མཇལ་མང་སྩལ་ཡོད་པ་དང་། ཟླ་ ༩ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་གླེ་ཞི་བའི་ཚལ་དུས་འཁོར་ལྷ་ཁང་དུ་ལ་དྭགས་ནང་པའི་ཚོགས་འདུ་དང་དགོན་ཚོགས་བཅས་ནང་པའི་ཚོགས་པ་དང་། ལ་དྭགས་ཨན་ཇུ་མན་ཨི་མ་མི་ཡ། (Anjuman Immamia) ཨན་ཇུ་མན་མོ་ཡིན་ཨུལ་ཨི་སི་ལཱམ་ (Anjuman Moin-Ul Islam)བཅས་ཁ་ཆེའི་སོ་ནི་དང་ཤི་ཡ་ཆོས་ཚོགས། དེ་བཞིན་གླེ་ཡི་ཡི་ཤུའི་ཚོགས་ (Christian Community of Leh) བཅས་ཐུན་མོང་ནས་གོ་སྒྲིག་ཞུས་པའི་གུས་བསྟོད་གསོལ་སྟོན་ལ་ཆིབས་བསྒྱུར་བསྐྱངས་ཡོད་པ་རེད།

ཚོགས་ཆུང་ནང་ཨ་རི་དང་། ཁེ་ན་ཌ། ཨིན་ཡུལ། ཇར་མན་ནི། ནི་ཐར་ལན་ཌི། ཨོསྟྲེ་ལི་ཡཱ། ཉི་འོང་། ཐེ་ཝན། ལྷོ་སོག རྒྱ་གར་སོགས་ནས་ཕེབས་པའི་རྒྱ་རིགས་ཤེས་ཡོན་ཅན་དང་། ལས་འགུལ་འགོ་ཁྲིད་པ། མང་གཙོའི་སྤྱི་ཚོགས་ཀྱི་ལས་འགུལ་བ་དང་ཆེད་ལས་མི་སྣ་སོགས་ཡོད་པ་རེད། 

མཇལ་འཕྲད་སྐབས། སྤྱི་འཐུས་རྒྱུན་ལས་ཆོས་གྲགས་རྒྱ་མཚོ་ལགས་དང་། ཚོགས་དྲུང་བསོད་ནམས་རྡོ་རྗེ་ལགས་རྣམ་གཉིས་མཉམ་ཞུགས་གནང་བ་དང་། དེ་བཞིན་རྒྱ་རིགས་ཚོགས་ཆུང་དང་ལྷན་བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་། ཨོསྟྲེ་ལི་ཡཱ་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་རྣམ་གཉིས་ལྷན་བཅར་ཞུས་འདུགསྐབས་དེར་དཔལ་ལྡན་ཚོགས་གཙོ་མཆོག་གིས་ཐོག་མར་འཚམས་འདྲི་དང་སྦྲགས། ཕྱི་ལོ་ ༡༩༨༩ ལོར་རྒྱ་ནག་པེ་ཅིང་གནམ་སྡེ་སྒོ་མོ་ཆེ་ཐང་ཆེན་དུ་སློབ་ཕྲུག་གིས་ཞི་བའི་ངོ་རྒོལ་ལས་འགུལ་སྤེལ་སྐབས་འགོ་ཁྲིད་གཙོ་གྲས་སྐུ་ཞབས་ཝང་དན་ (Wang Dan) ལགས་ཀྱིས་གཙོས་པའི་རྒྱ་རིགས་མང་གཙོ་དོན་གཉེར་བ་རྣམས་ནས་མུ་མཐུད་རྒྱ་ནག་ནང་མང་གཙོ་ཡོང་ཐབས་དང་། གཞི་རྩའི་འགྲོ་བ་མིའི་ཐོབ་ཐང་ཐོག་རྩོད་ལེན་བྱེད་བཞིན་པར་བསྔགས་བརྗོད་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཕུགས་རྒྱང་རིང་པོའི་ཁེ་ཕན་ལ་དགོངས་ཏེ། བོད་མིའི་སྒྲིག་འཛུགས་རིམ་པས་ཆ་ལག་ཚང་བའི་མང་གཙོའི་ལམ་ལུགས་སུ་བསྒྱུར་གནང་མཛད་པའི་སྐོར་དང་། ད་ལྟའི་རྒྱ་ནག་དམར་གཞུང་གི་གདུག་རྩུབ་ཅན་གྱི་སྲིད་བྱུས་འོག བོད་ནང་འགྲོ་བ་མིའི་ཆེ་མཐོང་ལ་གནོད་སྐྱོན་དང་། དད་པ་ནག་ཉེས་སུ་བརྩི་བ། དངོས་ཡོད་གནས་ཚུལ་བཀག་སྡོམ་དང་ལོག་འགྲེལ་བྱེད་པ་སོགས་འཛུགས་བསྐྲུན་ཡར་རྒྱས་ལ་ཁ་གཡར་ཏེ། སྡུག་སྦྱོང་མནར་གཅོད་བཏང་དང་གཏོང་བཞིན་ཡོད་པའི་གནས་སྟངས་སྤྱི་དང་། ལྷག་པར་ཉེ་ཆར་རྒྱ་ནག་དམར་གཞུང་གིས་མི་རིགས་མཐུན་སྒྲིལ་ཡར་རྒྱས་སྐུལ་འདེད་ཀྱི་ཁྲིམས་ཡིག་ཟེར་བ་ལག་བསྟར་བྱེད་འགོ་བཙུགས་ཤིང་། ཁྲིམས་ཡིག་དེའི་མིང་ལ་མཐུན་སྒྲིལ་ཡར་རྒྱས་ཞེས་བེད་སྤྱོད་བྱས་ཡོད་ཀྱང་དོན་ལ། བོད་རིགས་ཚུད་པའི་རྒྱའི་བཙན་དབང་འོག་ཡོད་པའི་མི་རིགས་གཞན་རྣམས་ཀྱི་སོ་སོའི་ཐུན་མོང་མ་ཡིན་པའི་ཆོས་དང་། སྐད་ཡིག རིག་གཞུང་། མི་རིགས་ཀྱི་ངོ་བོ་དང་བཅས་པ་རྩ་མེད་གཏོང་རྒྱུའི་ཁྲིམས་ཡིག་ཅིག་ཡིན་པ་དང་། ཁྲིམས་ཡིག་དེའི་ནང་། ཕྲུ་གུ་ཆུང་དུས་འཚར་ལོངས་སྐབས་ཤེས་ཡོན་གྱི་འགན་འཁྲི་ཕ་མས་འཁུར་དགོས་པ་དང་། གལ་སྲིད་ཕ་མས་ཁྲིམས་ཡིག་གཞིར་བཟུང་རྒྱ་སྐད་མ་བསླབ་ཚེ། ཕྲུ་གུས་གོང་རིམ་ལ་སྙན་སེང་ཞུ་དགོས་སྐོར་སོགས་ཕ་མ་དང་ཕྲུ་གུའི་དབར་གྱི་ཡིད་ཆེས་དམ་ཚིག་ལ་གནོད་འཚེ་གཏོང་བ་དང་། དེ་བཞིན་ཁྲིམས་ཡིག་དེའི་ཐོག་ནས་རང་དབང་ལུང་པའི་ནང་ཡོད་པ་རྣམས་ལའང་རྒྱལ་མཚམས་ལས་བརྒལ་བའི་དྲག་གནོན་བྱེད་བཅུག་གི་ཡོད་པ་སོགས་ཁྲིམས་ཡིག་དེའི་ཉེན་ཚབས་སྐོར་དང་། རྒྱ་གཞུང་གིས་བོད་ནང་འཛུགས་བསྐྲུན་འདྲ་མིན་བྱས་པར་བརྟེན་ནས་ཚོར་སྣང་སྐྱེན་པའི་མཐོ་སྒང་བོད་ཀྱི་རང་བྱུང་ཁོར་ཡུག་ལ་གནོད་འཚེ་ཕོག་གི་ཡོད་པ་དང་། ཉེ་ཆར་བལ་བོད་ས་མཚམས་སུ་ཆུ་རུད་བྱུང་སྐབས། རྒྱ་གཞུང་གིས་གནོད་འཚེ་ཕོག་ཡུལ་སྐྱིད་གྲོང་ཁུལ་གྱི་གནས་ཚུལ་རྣམས་གསང་བ་བྱས་ཏེ་ཕྱིར་བསྒྲགས་མ་བྱས་པའི་སྐོར་སོགས་བོད་ནང་གི་ད་ལྟའི་ཛ་དྲག་གནས་སྟངས་སྐོར་ཞིབ་ཕྲ་ངོ་སྤྲོད་དང་། ཆབས་ཅིག་རང་དབང་ལུང་པའི་ནང་ཡོད་པའི་བསམ་ཕྱོགས་མཐུན་པ་ཚང་མས་རྒྱ་གཞུང་འོག་གདུག་སྦྱོང་མནར་གཅོད་མྱོང་མཁན་རྣམས་ཀྱི་མགྲིན་ཚབ་བྱས་ཏེ་མཉམ་རུབ་ཀྱི་ལས་དོན་སྤེལ་དགོས་སྐོར། བོད་མིའི་སྒྲིག་འཛུགས་ཀྱི་ཐོག་ནས་བོད་རྒྱ་གཉིས་ཀའི་ཁེ་ཕན་ལ་དམིགས་ཏེ། གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱའི་དཀའ་རྙོག་ཞི་བའི་ཐོག་ནས་སེལ་ཐབས་ཀྱི་འབད་བརྩོན་བྱེད་བཞིན་ཡོད་སྐོར་སོགས་གསུངས་སོང་། དཔལ་ལྡན་ཚོགས་གཞོན་མཆོག་གིས་ཐོག་མར་འཚམས་འདྲི་དང་། དེ་ནས་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་། ཕྱི་ལོ་  ༡༩༩༡ ལོར་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་བ། སྔོན་རྩིས་གྲོས་ཚོགས་དང་ལས་བསྡོམས་གྲོས་ཚོགས་བཅས་གྲོས་ཚོགས་ཚོགས་དུས་གཉིས་ཀྱི་སྐོར་བཅས་ངོ་སྤྲོད་དང་སྦྲགས་གསུངས་དོན། སྤྱིར་ལོ་རྒྱུས་ཐོག་བལྟས་པ་ཡིན་ན། བོད་དང་རྒྱ་ནག་རྒྱལ་ཁབ་ནི་སོ་སོའི་ལོ་རྒྱུས་ཡུན་རིང་ལྡན་པ་དང་རིག་གཞུང་ཕྱུག་པོ་ཡོད་པའི་མི་རིགས་མི་འདྲ་བ་གཉིས་ཡིན་ཡང་། དུས་རབས་ཉི་ཤུ་པའི་ནང་རྒྱ་ནག་རྒྱལ་ཁབ་དམར་ཤོག་གིས་དབང་བསྒྱུར་བྱས་རྗེས། རྒྱ་ནག་ནང་རིག་གཞུང་དང་མི་རིགས་ཀྱི་གོམས་གཤིས། ཡ་རབས་བཟང་སྤྱོད་ཐད་ཉམས་ཆག་ཆེན་པོ་ཕྱིན་ཡོད་པ་དང་། ལྷག་པར་དུ་བོད་ལ་ནང་ཆོས་མ་དར་བའི་སྔོན་ལ་རྒྱ་ནག་ལ་ནང་ཆོས་དར་ཡོད་ཀྱང་། ད་ཆ་རྒྱ་ནག་ཞིང་ཆེན་ཁག་ནང་སྐུ་འདྲ་རྙིང་པ་མཇལ་རྒྱུ་ཡོད་པ་མང་ཆེ་བ་འཕྲོ་བརླག་ཕྱིན་ཡོད་པ། བོད་ལ་ཆ་མཚོན་ན། དགོན་སྡེ་དྲུག་སྟོང་ལྷག་གཏོར་སྐྱོན་དང་། གདུག་རྩུབ་ཅན་གྱི་སྲིད་བྱུས་ལག་བསྟར་མུ་མཐུད་བྱས་དང་བྱེད་བཞིན་པ་སོགས་བོད་ཀྱི་ཆོས་དང་། རིག་གཞུང་ཐད་ཉམས་རྒུད་ཆེན་པོ་བཏང་དང་གཏོང་བཞིན་ཡོད་པ། ༧རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ལའང་ཐེ་བྱུས་བྱེད་ཀྱི་ཡོད་པ་སོགས་རྒྱ་ནག་དམར་གཞུང་དེ། ཆོས་དང་། རིག་གཞུང་། སྐད་ཡིག་རྩ་མེད་གཏོང་མཁན་གྱི་ཉེས་ཅན་པ་ལྟ་བུར་ངོས་འཛིན་བྱེད་ཀྱི་ཡོད་ཅེས་དང་། རྒྱལ་གཅེས་པ་རང་བཙན་བློ་དགའ་ལགས་ལྟ་བུར་མཚོན་ན། རྒྱ་ནག་དམར་གཞུང་གིས་བོད་ས་བཙན་འཛུལ་བྱས་པའི་རྗེས་ལ་སྐུ་འཁྲུངས་ཀྱང་། བོད་རྒྱལ་ཁབ་དང་མི་རིགས་ཆེད་ཨ་རིའི་གྲོང་ཁྱེར་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་བ་སོགས་རྒྱ་ནག་དམར་གཞུང་གིས་བོད་ནང་གདུག་རྩུབ་ཅན་གྱི་སྲིད་བྱུས་མུ་མཐུད་ལག་བསྟར་བྱེད་བཞིན་པར་བོད་མི་རྣམས་བཟོད་ཐབས་བྲལ་ཏེ་འ་ཆད་འུ་ཐུག་གིས་རང་ལུས་མེར་སྲེག་བཏང་བཞིན་ཡོད་པའི་སྐོར་དང་། བོད་མིའི་སྒྲིག་འཛུགས་ཀྱི་ཐོག་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་འབྲེལ་མོལ་བརྒྱུད་སེལ་ཐབས་བྱེད་བཞིན་ཡོད་ཀྱང་། དེར་རྒྱ་ནག་དམར་གཞུང་ངོས་ནས་ཡ་ལན་རྩ་བ་ནས་བྱེད་ཀྱི་མེད་པའི་སྐོར། ཉིན་གྲངས་གསུམ་རིང་མང་གཙོའི་རྒྱ་ནག་དང་བོད་ཀྱི་མ་འོངས་པའི་གླེང་སྟེགས་ཞེས་པའི་ཚོགས་འདུ་ཚོགས་པའི་ཐོག་བསྒྲགས་གཏམ་སྤེལ་བའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ཐོག་གི་བདག་དབང་ཆ་ཚང་༸གོང་ས་མཆོག་དང་དགའ་ལྡན་ཕོ་བྲང་ཡིད་ཆེས་དགེ་རྩ་ལ་ཡོད་པ་ལས། རྒྱ་ནག་གཞུང་ལ་གནད་དོན་འདིའི་ཐོག་ཐེ་བྱུས་དང་། བར་འདུམ། ཡང་ན་མཉམ་ཞུགས་བྱ་རྒྱུའི་ཐོབ་ཐང་མེད་པའི་སྐོར་དང་། དེ་བཞིན་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་ཕྱིར་འཐེན་དགོས་པའི་འབོད་སྐུལ་ཞུས་པ་སོགས་བཀོད་ཡོད་པར་བསྔགས་བརྗོད་དང་། མ་འོངས་པར་ཡང་མུ་མཐུད་གྲོས་ཆོད་དེ་ལྟར་ལག་བསྟར་ཡོང་བའི་འབོད་སྐུལ་བཅས་ཞུས་རྗེས།  ཚོགས་བཅར་བ་རྣམས་ཀྱི་དོགས་འདྲི་ཕུལ་བ་ཁག་ལ་ལན་འདེབས་གསལ་བཤད། མཐར་སྐུ་མགྲོན་རྣམ་པ་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་དང་། ཁོང་རྣམས་ལ་བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་གནང་ཡོད་པ་བཅས། །

༄༅། །ཕྱི་ལོ་ ༢༠༢༦ ཟླ་བ་ ༠༨ ཚེས་ ༣༡ ནས་ཕྱི་ཟླ་ ༠༩ ཚེས་ ༠༢ བར་ཉིན་གྲངས་གསུམ་རིང་དྷ་རམ་ས་ལར་བྱང་ཨ་རིའི་སྐུ་ཚབ་དོན་ཁང་གི་བོད་མིའི་སྤྱི་ཚོགས་ཡར་རྒྱས་ཐེབས་རྩ་དང་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་མང་གཙོའི་རྒྱ་ནག་དང་བོད་ཀྱི་མ་འོངས་པའི་གླེང་སྟེགས་ཞེས་པའི་ཚོགས་འདུ་

དེ་ཡང་གླེང་སྟེགས་ཐོག་མང་གཙོ་དང་། འགྲོ་བ་མིའི་ཐོབ་ཐང་། བོད་ཀྱི་མ་འོངས་བཅས་ཀྱི་གནད་དོན་ཐོག་གྲོས་མོལ་གནང་རྒྱུ་དང་། བོད་མི་དང་རྒྱ་ནག་མི་རིགས་གཉིས་ཀྱི་བར་གཉིས་མོས་བསམ་ཤེས་དང་ཡིད་ཆེས་གོང་མཐོར་གཏོང་རྒྱུར་དམིགས་ཡོད། དེ་བཞིན་ཡུན་གནས་འབྲེལ་ལམ་དང་། དངོས་ཡོད་མཉམ་ལས་བརྒྱུད་ནས་གཏན་འཇགས་མཉམ་ལས་འཛུགས་རྒྱུ་དང་ཆབས་ཅིག འཚེ་མེད་ཞི་བའི་ཞུ་གཏུག་ཐབས་བྱུས་མདུན་བསྐྱོད་བྱ་རྒྱུ་བཅས་ཡིན་པ་རེད།

མང་གཙོ་རྒྱ་ནག་དང་བོད་ཀྱི་མ་འོངས་པའི་གླེང་སྟེགས་ཀྱི་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕེབས་ཞུགས་ཀྱིས་གསུང་བཤད་གནང་ཡོད་ཅིང་། སྐབས་དེར་ཁོང་གིས་བོད་རྒྱའི་དཀའ་རྙོག་དང་། དབུ་མའི་ལམ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད། བོད་རིགས་དང་རྒྱ་རིགས་བར་མཉམ་ལས་ཀྱི་གལ་གནད་བཅས་ཀྱི་གནད་དོན་ཐོག་གསུང་བཤད་གནང་ཡོད།

ཐེངས་འདིའི་གླེང་སྟེགས་ཐོག་བསྒྲགས་གཏམ་ལྔ་གཏན་འབེབས་གནང་ཡོད་པ་དང་། བསྒྲགས་གཏམ་དེ་དག་གི་ནང་འཚེ་མེད་ཞི་བ་དང་། མཉམ་སྤྱོད་ཀྱི་མང་གཙོའི་མ་འོངས་པ། བོད་ཀྱི་མང་གཙོ་དང་ལོ་རྒྱུས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་གི་ཁྲིམས་མཐུན་ཤུགས་རྐྱེན་བཅས་ཀྱི་གནད་དོན་སྐོར་བརྗོད་ཡོད།

བསྒྲགས་གཏམ་དང་པོའི་ནང་། འཚེ་མེད་ཞི་བ་ནི་ཐུན་མོང་གི་གཞི་རྩའི་རྩ་དོན་ཡིན་པ་བསྐྱར་ནན་གནང་ཡོད། མཉམ་ཞུགས་པ་རྣམས་ཀྱིས་བོད་རྒྱའི་དཀའ་རྙོག་དེ་བཞིན་ཞི་བདེ་དང་། ཁ་ཡོད་ལག་ཡོད། གྲོས་མོལ་བཅས་ཀྱི་ཐབས་ལམ་བརྒྱུད་ནས་སེལ་དགོས་པའི་གལ་གནད་སྐོར་ནན་བརྗོད་གནང་བ་དང་སྦྲགས། བོད་དང་རྒྱ་ནག་གི་མང་གཙོའི་ལས་འགུལ་གཉིས་ཀའི་ཐུན་མོང་གི་རྩ་དོན་ནི་འཚེ་མེད་ཞི་བའི་འགོག་རྒོལ་ཡིན་པ་ངོས་འཛིན་གནང་ཡོད།

བསྒྲགས་གཏམ་གཉིས་པའི་ནང་། མང་གཙོའི་མ་འོངས་པའི་ཆེད་ཐུན་མོང་གི་དམིགས་ཡུལ་ཞིག་དགོས་པ་བརྗོད་ཡོད། མཉམ་ཞུགས་པ་ཚོས་བཙན་བྱོལ་བོད་མི་དང་རྒྱ་ནག་གི་མང་གཙོ་ཚོགས་པ་དང་མི་སྒེར་བར་འབྲེལ་ལམ་དགོས་གལ་དང་སྦྲགས། བཙན་བྱོལ་བོད་མིའི་མང་གཙོའི་ཉམས་མྱོང་གོང་འཕེལ་གཏོང་རྒྱུ་དང་། རྒྱ་ནག་ནང་རྒྱ་ཆེ་བའི་མང་གཙོའི་བརྒྱུད་རིམ་ལ་རྒྱབ་སྐྱོར་བྱེད་དགོས་པ་གསལ་སྟོན་གནང་ཡོད།

བསྒྲགས་གཏམ་གསུམ་པའི་ནང་། བོད་ཀྱི་མང་གཙོ་དང་། ལོ་རྒྱུས། བོད་རྒྱའི་འབྲེལ་ལམ། དབུ་མའི་ལམ་བཅས་ཀྱི་གོ་རྟོགས་གཏིང་ཟབ་གཏོང་རྒྱུར་དམིགས་ཡོད། གླེང་སྟེགས་འདིའི་ཐོག་རྒྱ་རིགས་མཉམ་ཞུགས་པ་ཚོར་བོད་མིའི་མང་གཙོའི་ལམ་ལུགས་དང་། ལོ་རྒྱུས་ཐོག་བོད་མིའི་སྣང་ཚུལ་སྐོར་ཤེས་རྟོགས་བྱུང་ཡོད་པ་མ་ཟད། བོད་མི་རྣམས་ལ་རྒྱ་ནག་གི་མང་གཙོའི་ལས་འགུལ་ཐོག་གོ་རྟོགས་གོང་མཐོར་གཏོང་བར་ཕན་ཐོགས་བྱུང་ཡོད། སྐབས་དེར་དབུ་མའི་ལམ་གྱི་གལ་གནད་དང་། བོད་རྒྱའི་དཀའ་རྙོག་དེ་བཞིན་ཞི་བའི་ཐོག་སེལ་ཐབས་ལ་འབྲེལ་བ་ཇི་ཡོད་སྐོར་གླེང་སློང་གནང་ཡོད།

བསྒྲགས་གཏམ་བཞི་པའི་ནང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཐོག་རང་དབང་ཅན་གྱི་རྒྱ་རིགས་རྣམས་ཀྱི་མཐོང་ཚུལ་བརྗོད་ཡོད། མཉམ་ཞུགས་པ་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ཐོག་གི་བདག་དབང་ཆ་ཚང་༸གོང་ས་མཆོག་དང་དགའ་ལྡན་ཕོ་བྲང་ཡིད་ཆེས་དགེ་རྩ་ལ་ཡོད་པ་ལས། རྒྱ་ནག་གཞུང་ལ་གནད་དོན་འདིའི་ཐོག་ཐེ་བྱུས་དང་། བར་འདུམ། ཡང་ན་མཉམ་ཞུགས་བྱ་རྒྱུའི་ཐོབ་ཐང་མེད་ཅེས་ཐུན་མོང་གིས་གཏན་འབེབས་གནང་ཡོད།

བསྒྲགས་གཏམ་ལྔ་པའི་ནང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཐོག་ཁྲིམས་མཐུན་དང་འགྲོ་བ་མིའི་ཐོབ་ཐང་གི་ལྟ་ཚུལ་ནས་དཔྱད་ཞིབ་གནང་ཡོད། མཉམ་ཞུགས་པ་རྣམས་ཀྱིས་ཁྲིམས་ཡིག་དེའི་བོད་མི་དང་། ཡུ་གུར། ལྷོ་སོག དེ་བཞིན་གྲངས་ཉུང་མི་རིགས་གཞན་གྱི་སྐད་ཡིག་དང་། རིག་གཞུང་། ངོ་བོ་བཅས་ལ་དོ་ཕོག་འགྲོ་རྒྱུའི་ཉེན་ཁ་ལ་སེམས་འཚབ་བསྟན་པ་དང་ཆབས་ཅིག ཁྲིམས་ཡིག་དེ་ཕྱིར་འཐེན་དགོས་པའི་འབོད་སྐུལ་ཞུས་ཡོད།

གླེང་སྟེགས་ཀྱི་ཉིན་མཐའ་མར་མཉམ་ཞུགས་པ་རྣམས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་མང་གཙོའི་དུས་ཆེན་གྱི་གཞུང་འབྲེལ་མཛད་སྒོར་ཆེད་ཕེབས་གནང་ཡོད། སྐབས་དེར་སྐུ་ཞབས་ཝང་དན་ལགས་ཀྱིས་མཉམ་ཞུགས་པའི་ཚབ་ཞུས་ཏེ་གསུང་བཤད་གནང་ཡོད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྒྲོལ་མ་ཚེ་རིང་མཆོག་གིས་རྒྱ་རིགས་མཁས་པ་དང་རྩོམ་པ་པོ་ཁག་གཅིག་གིས་བྲིས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཐོག་རྒྱ་གཞུང་གིས་ཐེ་བྱུས་བྱ་རྒྱུའི་ཐོབ་ཐང་མེད་ (Chinese Authorities Have No Right to Interfere on the Reincarnation of the Dalai Lama) ཅེས་པའི་སྙན་ཐོ་ཕྱོགས་སྒྲིག་དབུ་འབྱེད་གནང་ཡོད།

གླེང་སྟེགས་ཀྱི་མཇུག་བསྡོམས་མཛད་སྒོར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་ཀྱིས་གསུང་བཤད་གནང་སྟེ་མཇུག་སྒྲིལ་ཡོད། གླེང་སྟེགས་འདི་བརྒྱུད་གཏན་འབེབས་གནང་བའི་བསྒྲགས་གཏན་ལྔ་དེ་དག་གིས་མ་འོངས་མུ་མཐུད་བྱེད་སྒོ་དང་། མཉམ་ལས། འཚེ་མེད་ཞི་བའི་ཞུ་གཏུག་གི་སྒྲོམ་གཞི་ཞིག་མཁོ་སྤྲོད་བྱེད་ཀྱི་ཡོད་པ་དང་ཆབས་ཅིག མང་གཙོ་ཅན་དུ་སྒྱུར་རྒྱུར་མཐོང་རྒྱ་ཆེ་རུ་གཏོང་བ་དང་། བོད་རྒྱའི་དཀའ་རྙོག་དེ་བཞིན་ཞི་བའི་ཐོག་ནས་སེལ་ཐབས་ལ་ཕན་ཐོགས་གྲུབ་ཡོད་པ་བཅས།།

༄༅། །བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ཨོ་རྒྱན་བསྟན་འཛིན་མཆོག་དང་། ཤེས་རིག་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་དྷ་ས་ཉེ་འདབས་ཀྱི་བོད་པའི་སློབ་གྲྭ་ཁག་ཏུ་གཟིགས་སྐོར་ཕེབས་འགོ་བཙུགས་ཡོད་པ་ལྟར། ཕྱི་ལོ་ ༢༠༢༦ ཟླ་བ་ ༠༨ ཚེས་ ༣༡ ཉིན་དྷ་སྟེང་བོད་ཕྲུག་ཁྱིམ་སྡེ་དང་། ཕྱི་ཟླ་ ༠༩ ཚེས་ ༠༡ ཉིན་གྷོ་པལ་པུར་བོད་ཕྲུག་ཁྱིམ་སྡེ་བཅས་སུ་འཚམས་གཟིགས་གནང་ཡོད།

དེ་ཡང་ཤེས་རིག་བཀའ་བློན་མཆོག་དང་ཤེས་རིག་དྲུང་ཆེ་རྣམ་གཉིས་སློབ་གྲྭར་ཕེབས་འབྱོར་སྐབས་སློབ་གྲྭའི་ངེས་སྟོན་པ་དང་། སློབ་སྤྱི། དགེ་ཆེ། དགེ་ལས་སློབ་ཕྲུག་བཅས་ནས་ཕེབས་བསུ་ཞུས་གྲུབ་བསྟུན་བཀའ་བློན་མཆོག་གིས་འཛིན་ཁང་དང་། བོད་ཀྱི་སྐད་ཡིག་ཁང་། ཨང་རྩིས་ཁང་། གློག་ཀླད་ཁང་། དཔེ་མཛོད། སློབ་ཕྲུག་སྡོད་ཁང་། འཛིན་སྐྱོང་ལས་ཁུངས་བཅས་སུ་གཟིགས་སྐོར་གནང་ཡོད།དེ་རྗེས་ཤེས་རིག་བཀའ་བློན་མཆོག་གིས་སློབ་གྲྭའི་ཚོགས་ཁང་དུ་དགེ་ལས་སློབ་ཕྲུག་རྣམས་ལ་གསུང་བཤད་གནང་། ཁོང་གིས་ཐོག་མར་གཞི་རིམ་ཤེས་ཡོན་སྲིད་བྱུས་ཀྱི་གལ་གནད་ཐོག་ནན་བརྗོད་གནང་ཞིང་། ཤེས་ཡོན་སྲིད་བྱུས་ནི་བོད་མིའི་ཤེས་ཡོན་ལམ་ལུགས་ཀྱི་རྨང་གཞི་ལྟ་བུ་ཡིན་ཞེས་དང་། སྲིད་བྱུས་འདི་ནི་བོད་ཀྱི་སྲོལ་རྒྱུན་རིན་ཐང་དང་། དེང་རབས་ཤེས་ཡོན་ལག་ལེན་གཉིས་ཟུང་འབྲེལ་གྱི་ཤེས་ཡོན་ཞིག་སྤྲོད་ཐབས་ཡིན་པ་གསུངས། གཞི་རིམ་ཤེས་ཡོན་སྲིད་བྱུས་དེ་ཡང་ཚོགས་འདུ་དང་བགྲོ་གླེང་རིམ་པ་མང་པོའི་བརྒྱུད་མཐར་ཕྱི་ལོ་ ༢༠༠༤ ལོར་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེའི་སྐབས་སུ་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་ཡོད་པ་འགྲེལ་བརྗོད་གནང་།དེ་ནས་བཀའ་བློན་མཆོག་གིས་འཕྲོད་བསྟེན་དང་སྒེར་གྱི་གཙང་སྦྲ་རྒྱུན་འཁྱོངས་བྱ་རྒྱུའི་ཐོག་ནན་བརྗོད་གནང་བ་དང་། འཕྲོད་བསྟེན་ལྡན་པའི་འཚོ་བའི་གོམས་གཤིས་འཇགས་ཐབས་སུ་ཟས་བཅུད་ལྡན་པའི་ཟས་དང་ཤིང་ཏོག་སོགས་མཆོད་དགོས་པའི་སྐུལ་མ་གནང་། དེ་བཞིན་ཁོང་གིས་བཙན་བྱོལ་དུ་བོད་ཀྱི་སྐད་ཡིག་དང་། རིག་གཞུང་། ངོ་བོ་སྲུང་སྐྱོབ་དང་ལྷན་དུ་འགྲོ་བ་མིའི་རིན་ཐང་དང་། ཡ་རབས་བཟང་སྤྱོད་རྒྱུན་འཁྱོངས་གནང་དགོས་པ་དང་འབྲེལ། སློབ་ཕྲུག་ཚོས་དགེ་རྒན་དང་། ལས་བྱེད་རྣམས་ལ་གུས་བརྩི་དགོས་པ་དང་། སྤྱི་ཚོགས་ལ་འགན་ཁུར་གྱི་འདུ་ཤེས་སྐྱེད་སྲིང་བྱེད་དགོས་པ། དེ་བཞིན་དཔྱད་ཞིབ་ཀྱི་བསམ་བློ་ལྡན་པའི་ཐོག་སློབ་སྦྱོང་ཧུར་ཐག་བྱེད་དགོས་པའི་ལམ་སྟོན་གནང་།

དེ་མཚུངས་སློབ་ཕྲུག་ཚོས་སློབ་གྲྭའི་མཐུན་རྐྱེན་རྣམས་ལོངས་སུ་སྤྱོད་དགོས་པ་དང་། ལྷག་པར་དཔེ་མཛོད་ཁང་དང་བོད་ཀྱི་སྐད་ཡིག་ཁང་བཅས་སུ་ཕེབས་ཏེ་རང་ཉིད་ཀྱི་ཤེས་བྱ་ཡོན་ཏན་དང་། བོད་ཀྱི་སྐད་ཡིག་གི་ཚད་གཞི་མཐོ་རུ་གཏོང་དགོས་པའི་ནན་སྐུལ་གནང་། དེ་ནས་བཀའ་བློན་མཆོག་གིས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་སྐོར་འགྲེལ་བརྗོད་གནང་སྟེ་ཁྲིམས་ཡིག་འདིའི་དམིགས་ཡུལ་གཙོ་བོ་ནི་བོད་རིགས་ཚུད་པའི་རྒྱ་ནག་ནང་གི་གྲངས་ཉུང་མི་རིགས་ཀྱི་སྐད་ཡིག་དང་། རིག་གཞུང་། ཆོས་ཕྱོགས་ཀྱི་ལམ་སྲོལ་བཅས་རྩ་གཏོར་གཏོང་རྒྱུ་ཡིན་སྟབས་བཙན་བྱོལ་དུ་སློབ་ཕྲུག་ཚོར་སོ་སོའི་སྐད་ཡིག་དང་། རིག་གཞུང་བཅས་སྲུང་སྐྱོབ་ཐོག་ལས་འགན་གལ་ཆེན་ཞིག་ཡོད་པ་གསུངས།།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩  ཐོག་ཁྲི་བརྟན་གླིང་དང་། བཀྲ་ཤིས་སྟེང་། འཆི་མེད་གླིང་བཅས་སུ་བགྲེས་སོང་ཉམ་ཐག་འགའ་ཐུག་འཕྲད་དུ་ཕེབས་རྗེས། སིམ་སྤྱི་ལས་ཁུངས་སུ་དྲྭ་ཐོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་འགན་འཛིན་ལྷན་ཚོགས་སུ་མཉམ་ཞུགས་གནང་རྗེས་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ་མཆོད་མཇལ་དང་འབྲེལ་དགོན་པའི་མཁན་པོ་ལྷན་ཆོས་རིག་ལས་ཁུངས་ཀྱི་ལས་གཞི་འགྲོ་བཞིན་པ་གནས་སྐོར་མཉེན་ཆས་དང་། བོད་ཀྱི་གྲངས་འཛིན་དཔེ་མཛོད་ཀྱི་ལས་གཞི་ངོ་སྤྲོད་གནང་གྲུབ་མཚམས་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དང་ཁྱབ་ཁོངས་རྒས་གསོ་ཁང་དུ་འཚམས་གཟིགས་སུ་ཕེབས་ཡོད།དེ་ནས་ཉིན་གུང་གསོལ་ཚིགས་རྗེས་སངས་རྒྱས་ཆོས་གླིང་དུ་འཚམས་གཟིགས་སུ་ཕེབས་ཤིང་ཚོགས་ཁང་ནང་མི་མང་དང་ཐུག་འཕྲད་ཀྱིས་གསུང་བཤད་གནང་དོན། བརྒྱ་དཔོན་གྱི་གཞིས་སྒར་ནང་ཉམ་ཐག་མེད་པ་དང་། ད་བར་བོད་མིའི་སྒྲིག་འཛུགས་ལ་རོགས་རམ་ཡོང་བའི་སྙན་བསུན་བཟོ་མི་དགོས་པ་གཙོ་འདོན་བྱེད་བཞིན་པའི་སྐོར་སྙན་སྒྲོན་ཞུས་པར་ཡི་རང་བསྔགས་བརྗོད་གནང་ཡོད། དེ་རྗེས་རང་བཙན་གྲོང་སྡེར་འཚམས་གཟིགས་སུ་ཕེབས་ཡོད།

ཕྱེད་ཡོལ་ཆུ་ཚོད་ ༣ པའི་ཐོག་སིམ་ལ་སཾ་བྷོ་ཊ་གཏན་ཉིན་སློབ་གྲྭར་ཕེབས་ཤིང་། སློབ་གྲྭའི་སློབ་སྤྱི་དང་དགེ་ལས་སློབ་ཕྲུག་རྣམས་ནས་རྔ་རོལ་རུ་སྒྲིག་གིས་ཚོགས་ཁང་ནང་ཕེབས་བསུ་ཞུས་རྗེས་སློབ་སྤྱིས་སློབ་གྲྭའི་ལས་བསྡོམས་སྙིང་བསྡུས་དང་བཀའ་བློན་མཆོག་སློབ་གྲྭར་ཕེབས་པར་དགའ་བསུ་ཞུས། དེ་ནས་ཕྲུག་རྣམས་ནས་བོད་ལྗོངས་ང་ཚོའི་ཕ་ཡུལ་གཟིགས་འབུལ་ཞུས་གྲུབ་བསྟུན་ཆོས་རིག་བཀའ་བློན་མཆོག་གིས་སློབ་ཕྲུག་དགེ་ལས་རྣམས་ལ་གསུང་བཤད་གནང་དོན། སློབ་གྲྭར་སློབ་སྦྱོང་གི་ཆེད་དུ་ཡོང་གི་ཡོད་པར་བརྟེན་སློབ་སྦྱོང་ལ་ཧུར་བརྩོན་གནང་དགོས་པ་དང་། དེང་དུས་སློབ་སྦྱོང་མཐར་འཁྱོལ་བ་གནང་རྒྱུ་ཧ་ཅང་གལ་ཆེན་པོ་ཡིན་པ། སློབ་སྦྱོང་མཐར་འཁྱོལ་བར་ད་ལྟ་ནས་སློབ་སྦྱོང་ཡག་པོ་བྱེད་དགོས་པ། ཁང་པའི་རྩིག་རྨང་ཡག་པོ་མེད་ན་ཁང་པ་བརྟན་པོ་མེད་པ་བཞིན། གཞི་རིམ་སློབ་གྲྭའི་སྐབས་སློབ་སྦྱོང་ཡག་པོ་མ་གནང་ན་མཐོ་སློབ་ཏུ་སླེབ་དུས་དཀའ་ངལ་ཆེན་པོ་འཕྲད་ངེས། སློབ་གྲྭའི་སྒྲིག་གཞི་ཁག་བརྩི་སྲུང་བྱེད་དགོས་པ་དང་། དགེ་ལས་རྣམས་ལ་གུས་བརྩི་དང་དགེ་རྒན་གྱི་གང་གསུངས་པ་རྣམས་ཡིད་ལ་བཅངས་པའི་ཐོག་ནས་ཕྱག་བསྟར་དགོས་པ། དེ་བཞིན་སློབ་སྦྱོང་གི་བརྒྱུད་རིམ་ནང་ལུས་སེམས་བདེ་ཐང་ངེས་པར་དགོས་ཤིང་། ལུས་སེམས་བདེ་ཐང་ལ་གཙང་སྦྲ་འཕྲོད་བསྟེན་གལ་ཆེན་པོ་ཆགས་ཡོད་པ་དང་། འཕྲོད་བསྟེན་ཡག་པོ་མེད་ན་སློབ་སྦྱོང་གི་གོ་སྐབས་འཐུས་ཤོར་འགྲོ་ངེས་ཡིན་པ་བཅས་ཀྱི་སྐོར་གསུང་བཤད་གནང་བ་དང་། དགེ་ལས་ཚོར་ད་ལྟ་བར་དུ་ཕྱག་ལས་ཧུར་ཐག་གནང་བ་བཞིན་མུ་འཐུད་གནང་རྒྱུའི་འབོད་སྐུལ་ཞུས་ཤིང་། སློབ་ཁྲིད་གནང་སྐབས་སྐད་ཡིག་གང་བསྐྱོན་ནའང་སྲེ་ལྷད་མེད་པར་གཙང་མ་བསྐྱོན་ཐབས་གནང་དགོས་པ། དེ་བཞིན་སློབ་ཕྲུག་མིག་དཔེ་ཡར་བལྟ་གནང་ས་དགེ་ལས་རྣམས་ཡིན་པར་བརྟེན། དགེ་ལས་རྣམས་ནས་སྒོ་གསུམ་ཀུན་སྤྱོད་ལ་ཐུགས་སྣང་གནང་གལ་བཅས་གསུང་བཤད་གནང་ཡོད་པ་བཅས་སིམ་ལ་ས་གནས་ཀྱི་ཁྱབ་ཁོངས་དགོན་སྡེ་ཁག་དང་སྡེ་ཚན་ཁག མི་མང་ཐུག་འཕྲད་བཅས་ཀྱི་འཚམས་གཟིགས་གནང་རྒྱུ་ལེགས་གྲུབ་བྱུང་བ་བཅས།།

དེ་ནས་ཕྱི་ལོ་  ༡༩༨༩ ལོར་རྒྱ་ནག་པེ་ཅིང་གནམ་སྡེ་སྒོ་མོ་ཆེ་ཐང་ཆེན་དུ་སློབ་ཕྲུག་གིས་ཞི་བའི་ངོ་རྒོལ་ལས་འགུལ་སྤེལ་སྐབས་ཀྱི་འགོ་ཁྲིད་གཙོ་བོའི་གྲས་ཝང་དན་ (Wang Dan) ལགས་ཀྱིས་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བརྩི་ཆེན་པོ་དང་སྦྲགས། རྒྱལ་གཅེས་པ་རང་བཙན་བློ་དགའ་ལགས་ཀྱིས་ཉེ་ལམ་ཨ་རིའི་གྲོང་ཁྱེར་ནིའུ་ཡོག་ཏུ་རང་ལུས་མེར་སྲེག་བཏང་བའི་སྐོར་གསལ་སྟོན་གྱིས་དེས་སླར་ཡང་བོད་ཀྱི་གནས་སྟངས་ཐོག་རྒྱལ་སྤྱིའི་སྤྱི་ཚོགས་ཀྱིས་དོ་སྣང་སླེབས་ཡོད་པ་གསུངས། དེ་བཞིན་ཁོང་གིས་རྒྱ་གཞུང་གིས་བོད་བཙན་བཟུང་བྱས་རྗེས་བོད་མི་རྣམས་བཙན་བྱོལ་དུ་མང་གཙོའི་ཆབ་སྲིད་གསར་འཛུགས་གནང་སྟེ་དྲང་བདེན་དང་རང་དབང་ཐོག་མུ་མཐུད་འཐབ་རྩོད་བྱེད་བཞིན་ཡོད་པ་དང་འབྲེལ་བཙན་བྱོལ་བོད་མིའི་མང་གཙོའི་འཕེལ་རིམ་ཐོག་གསུང་བཤད་གནང་།

ཁོང་གིས་བཙན་བྱོལ་དུ་ཡོད་པའི་རྒྱ་རིགས་མང་གཙོ་དོན་གཉེར་བ་ཚོས་རྒྱ་ནག་ལྷན་ཚོགས་ (China Congress) ཞིག་ཆེད་འཛུགས་གནང་རྒྱུའི་གྲ་སྒྲིག་བྱེད་བཞིན་ཡོད་པ་ངོ་སྤྲོད་གནང་ཞིང་། རྒྱ་ནག་ལྷན་ཚོགས་ཀྱིས་བོད་མི་མང་སྤྱི་འཐུས་ལྷན་ཚོགས་ནས་མིག་དཔེ་བླངས་དགོས་པ་མ་ཟད། མ་འོངས་པའི་རྒྱ་ནག་མང་གཙོ་ནས་རྒྱ་ནག་དམར་ཤོག་གཞུང་གིས་ལག་བསྟར་བྱས་པའི་དྲག་གནོན་དང་སིམ་སྒྱུར་གྱི་སྲིད་བྱུས་མ་ཡིན་པར། བོད་ཀྱི་ཆོས་དང་། རིག་གཞུང་། སྐད་ཡིག རྒྱལ་ཁབ་ཀྱི་ངོ་བོ། ཞི་བའི་གྲོས་མོལ་བཅས་ལ་གུས་བརྩི་ལྡན་པ་ཞིག་བསྐྲུན་དགོས་པ་ནན་བརྗོད་གནང་།དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་དབུས་རང་ཁོངས་ལས་བྱེད་པ་སངས་རྡོ་རྗེ་ལགས་དང་། པདྨ་ཚེ་རིང་ལགས་རྣམ་གཉིས་ལ་ཞབས་ལོ་ ༢༥ ཧྲིལ་པོ་ལོན་པར་གཟེངས་རྟགས་ཕྱག་འཁྱེར་དང་། ཤེས་རིག་ལས་ཁུངས་ནས་སྒྲིག་ཞུགས་རིགས་གཅིག་རྐང་འཛིན་སློབ་མཐར་ཕྱིན་པའི་སློབ་ཕྲུག་བདུན་ལ་འབུམ་ཪམས་པའི་ཆེ་བསྟོད་ལག་འཁྱེར་དང་ལེགས་སྐྱེས། དེ་བཞིན་ཤེས་རིག་ལས་ཁུངས་ནས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཡིག་རྒྱུགས་སུ་ཕྱོགས་བསྡོམས་ཆ་སྙོམས་བརྒྱ་ཆ་ ༩༥ ཡན་ལོན་པའི་སློབ་ཕྲུག་བཞི་ལ་ཕུལ་བྱུང་བྱ་དགའ་དང་ལེགས་སྐྱེས་སུ་པང་ཐོག་ཀམ་པཱུ་ཊར་རེ་གནང་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གིས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་སློབ་ཚན་གསུམ་གྱི་རྩེ་ཕུད་ཨང་རིམ་དང་པོ་དང་། གཉིས་པ། གསུམ་པ་སོན་པའི་སློབ་ཕྲུག་བཅུ་ལ་དགའ་ལྡན་ཕོ་བྲང་བྱ་དགའ་གནང་བ་དང་། རྒྱ་རིགས་ཁག་གཅིག་གི་དཔྱད་རྩོམ་ཕྱོགས་བསྡུས་དཔེ་དེབ་རྒྱ་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་ཐོག་ཐེ་ཇུས་བྱེད་དབང་མེད་ཅེས་པའི་རྒྱ་ཡིག་ཏུ་ཡོད་པ་དབུ་འབྱེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མང་གཙོ་དང་། སྤྱི་འཐུས་ལྷན་ཚོགས་སུ་བསྩལ་བའི་བཀའ་སློབ་ཁག་ཕྱོགས་བསྒྲིགས་དང་། བཙན་བྱོལ་བོད་མིའི་མང་གཙོའི་བྱུང་བ་བརྗོད་པ་དེབ་ཕྲེང་གསུམ་པ་བཅས་དབུ་འབྱེད་གནང་།དེ་ནས་དཔལ་ལྡན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་སྤྱི་ཟུར་བློ་བཟང་ཤཱསྟྲཱི་ལགས་ནས་རྩོམ་སྒྲིག་གནང་བའི་བོད་ཀྱི་ཕྱི་འབྲེལ་ལོ་རྒྱུས་དང་དེའི་ཐབས་བྱུས་ཀྱི་དོན་ཆེན་ལོ་ཚིགས་རིམ་བྱུང་སྟར་ལ་རྒྱུས་པའི་གཏམ་བྱུ་རུའི་ཕྲེང་བ་ཞེས་པའི་ཕྱག་དེབ་ཨིན་སྒྱུར་ཞུས་པ་དཔེ་དེབ་ A Chronicle of Tibet’s Foreign Relations & Policy (7th-21stCentury) ཅེས་པ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་དཔེ་དེབ་བོད་དང་ཁྱིམ་མཚེས་རྒྱལ་ཁབ་དབར་གྱི་འབྲེལ་ལམ་ལོ་རྒྱུས་ཞེས་པ་དབུ་འབྱེད་གནང་།

དེ་ཡང་བཙན་བྱོལ་དུ་འབྱོར་མ་ཐག་ཕྱི་ལོ་ ༡༩༦༠ ཟླ་ ༢ ཚེས་ ༣ ཉིན་གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཙན་བྱོལ་བོད་མིའི་གནས་ཡུལ་ས་ཁུལ་ཡོངས་ནས་སེར་སྐྱ་མང་ཚོགས་ཀྱིས་བརྟན་བཞུགས་བསྟར་འབུལ་དང་འབྲེལ་བླང་དོར་ཞུ་བྱའི་མནའ་གན་མཐུ་མོ་ཆེ་འབུལ་ལམ་ཞུས་སྐབས། ༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་ཕེབས་དོན་དུ། “བོད་འདི་སྔར་ལྟར་མ་ཡིན་པར་བོད་ཆོས་སྲིད་གཉིས་ལྡན་མང་གཙོའི་གཞུང་ཞིག་དགོས་པ་གལ་ཆེར་བརྟེན་རྒྱ་ཆེའི་མི་མང་གི་ངོ་ཚབ་མང་མོས་འོས་འདེམས་བྱས་པའི་འཐུས་མིའི་ལྷན་ཚོགས་ཤིག་དགོས་གཤིས་སྔ་འཕྲོས་ཆོས་ལུགས་ཆེན་པོ་བཞི་ནས་འཐུས་མི་རེ་དང་། ཆོལ་ཁ་གསུམ་ནས་འཐུས་མི་གསུམ་རེ་བཅས་ཁྱེད་རང་རྣམས་ཁུངས་སོ་སོར་ཕྱིར་ལོག་ཟིན་འཕྲལ་མི་མང་གི་ཁྲོད་དུ་ཤེས་ཡོན་འབྱོན་ཐང་དང་། རྒྱལ་གཅེས་ལྷག་བསམ་ལྡན་ལ་མང་ཚོགས་ཀྱི་ཡིད་ཆེས་བློ་གཏད་འཕེར་བ་ཇི་ཡོད་ནས་འོས་འདེམས་ཀྱིས་མིང་ཐོ་འོས་གྲངས་འཕྲལ་འབུལ་དགོས་” ཞེས་ཇི་ལྟར་བཀའ་སློབ་ཕེབས་དགོངས་བཞིན་བོད་མིའི་འདུས་སྡོད་ས་གནས་ཁག་ནས་ཆོལ་ཁ་རེ་ནས་མི་འཐུས་གསུམ་རེ་དང་། ཆོས་བརྒྱུད་ཆེན་པོ་བཞི་སོ་སོ་ནས་མི་འཐུས་རེ་བཅས་དྲག་འདེམས་ཀྱིས་མིང་ཐོ་འབུལ་ལམ་ཞུས་པར་ཕྱག་རྟགས་ཕེབས་གསལ་ལྟར་སྐབས་དང་པོའི་བོད་མི་མང་སྤྱི་འཐུས་བསྐོ་གཞག་བྱུང་སྟེ་ཁོང་རྣམས་ནས་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་ཞོགས་པ་ཆུ་ཚོད་ ༩ པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་དུ་མཇལ་ཕྱག་དམ་འབུལ་ཞུས་པ་དང་འབྲེལ། ཆོས་སྲིད་གཉིས་ལྡན་གྱི་བོད་མིའི་མང་གཙོའི་གཞུང་ཐོག་མར་དབུ་བརྙེས།

བོད་ཀྱི་མང་གཙོ་ནི་དབང་ཆའི་འཐབ་རྩོད་བྱས་ནས་ཐོབ་པ་ཞིག་མ་ཡིན་པར་གཟིགས་རྒྱང་རིང་བའི་དབུ་འཁྲིད་༸གོང་ས་ཡིད་བཞིན་ནོར་བུས་མི་མང་གི་ནུས་པར་གདེང་འཇོག་གིས་གསོལ་རས་གནང་བ་ཞིག་ཡིན་པས། དེ་རིང་གི་ཉིན་མོ་འདི་ནི་བདག་ཅག་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་བསྐལ་༸གོང་ས་ཡིད་བཞིན་ནོར་བུ་མཆོག་གི་བཀའ་དྲིན་དྲན་བཞིན་དུ་བཙན་བྱོལ་ནང་མང་གཙོའི་ཁེ་དབང་ལོངས་སུ་སྤྱོད་རྒྱུ་ཡོད་པས་དགའ་གུས་ཞུ་བ་དང་མཉམ། མང་གཙོའི་ལམ་སྲོལ་དེ་སྔར་ལས་འཕེལ་རྒྱས་འགྲོ་བའི་མུར་རང་རང་སོ་སོའི་འགན་འཁྲིར་མཉམ་ཞུགས་བྱེད་པ། དེ་བཞིན་ང་ཚོས་བཙན་བྱོལ་ནང་སྦྱངས་པའི་མང་གཙོའི་རང་དབང་དེ་མ་འོངས་གཞིས་བྱེས་མཉམ་འཛོམས་སྐབས་བོད་ཀྱི་མང་གཙོ་དང་། ཞི་བདེ། ཐུན་མོང་གི་གུས་བརྩི་བཅས་ཀྱི་གཞི་རྩ་ཞིག་ཏུ་འགྱུར་ཐུབ་པ་བྱེད་དགོས།

ཕྱི་ལོ་ ༡༩༦༡ ལོར་མ་འོངས་བོད་ཀྱི་རྩ་ཁྲིམས་སྙིང་དོན་དང་། ༡༩༦༣ ལོར་བོད་ཀྱི་རྩ་ཁྲིམས་ཡོངས་ཁྱབ་གསལ་བསྒྲགས་གནང་། ཕྱི་ལོ་ ༡༩༩༡ ལོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་མི་མང་སྤྱི་འཐུས་ལྷན་ཚོགས་མིང་དོན་མཚུངས་པའི་ཁྲིམས་བཟོ་ལྷན་ཚོགས་སུ་བསྒྱུར་གནང་མཛད་པ་ལྟར། སྤྱི་འཐུས་སྐབས་བཅུ་གཅིག་པས་གཏན་ལ་ཕབ་པའི་བཙན་བྱོལ་བོད་མིའི་བཅའ་ཁྲིམས་ལ་ཕྱི་ལོ་ ༡༩༩༡ ཟླ་ ༦ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོག་མཆན་སྩལ་ཉིན་ནས། བཙན་བྱོལ་བོད་གཞུང་འདི་གཞི་རྩའི་ཁྲིམས་ཡིག་ལྡན་པའི་དེང་རབས་མང་གཙོའི་འགྲོ་ལུགས་ཞིག་ཏུ་བསྒྱུར་གནང་མཛད། ཕྱི་ལོ་ ༢༠༠༡ ལོར་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར། བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱས་ཏེ། མང་གཙོའི་འཕེལ་རིམ་ནང་མདུན་བསྐྱོད་ཆེན་པོ་ཞིག་བྱུང་ཡོད། བོད་མིའི་འཐབ་རྩོད་གང་ཟག་གཅིག་ལ་བརྟེན་མི་དགོས་པར་འཕྲལ་ཡུན་དགག་དགོས་དུ་མར་གཟིགས་ཏེ། ཕྱི་ལོ་ ༢༠༡༡ ལོར་ྋགོང་ས་ྋསྐྱབས་མགོན་ཆེན་པོ་མཆོག་ནས་གཞུང་ས་དགའ་ལྡན་ཕོ་བྲང་གིས་བོད་སྤྱིའི་ཆབ་སྲིད་ཀྱི་མངའ་དབང་ལོ་བཞི་བརྒྱར་ཉེ་བའི་རིང་བསྐྱངས་པའི་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་ཐད་ཀར་འོས་འདེམས་བྱས་པའི་འགོ་འཁྲིད་ཚོར་སྩལ་གནང་གིས་བོད་མིའི་སྒྲིག་འཛུགས་དེ་བཞིན་མང་གཙོའི་ཆ་ལག་ཡོངས་སུ་ཚང་བའི་སྒྲོམ་གཞི་ཚད་ལྡན་ཞིག་ཏུ་སྐྲུན་གནང་བཀའ་དྲིན་བསྐྱངས་བ་ཙམ་དུ་མ་ཟད། བཙན་བྱོལ་བོད་མིའི་སྒྲིག་འཛུགས་དེ་བཞིན་རིགས་རུས་དང་། དབུལ་ཕྱུག སྟོབས་ཤུགས་ཆེ་ཆུང་སོགས་ཀྱི་དབྱེ་བ་མེད་པར་སོ་སོའི་ཤེས་འཇོན་དང་ཉམས་མྱོང་སོགས་ལ་གཞིགས་ཏེ་མི་མང་གིས་ཐད་ཀར་འོས་བསྡུའི་ལམ་ནས་འདེམས་བསྐོ་གནང་བཞིན་པ་དང་། སྤྱི་པའི་ལས་དོན་མཐའ་དག་གང་ཟག་གི་ད བང་བསྒྱུར་མིན་པར་ཁྲིམས་ཀྱི་དབང་བསྒྱུར་མཛད་པ་ནི་བོད་མིའི་མང་གཙོའི་རིན་ཐང་དང་གཟི་བརྗིད་ཆེན་པོ་ཞིག་ཆགས་ཡོད།

གཞིས་ལུས་བོད་རིགས་སྤུན་ཟླ་རྣམས་ནི་མང་གཙོའི་ལམ་སྲོལ་ལོངས་སྤྱོད་བྱ་རྒྱུ་ཕར་བཞག་རྒྱ་ནག་དམར་གཞུང་གིས་གཞི་རྩའི་འགྲོ་བ་མིའི་ཐོབ་ཐང་ཡོངས་སུ་འཕྲོག་སྟེ་ཆོས་དད་དང་། འགྲོ་འོང་། སྨྲ་བརྗོད། སྐད་ཡིག་རྒྱུན་འཛིན་དང་དར་སྤེལ་སོགས་ཀྱི་རང་དབང་གཏན་ནས་མེད་པར་གནས་ཡོད། ཕྱི་ལོ་ ༡༩༤༩ ལོར་རྒྱ་ནག་དམར་གཞུང་གིས་བོད་ནང་བཙན་འཛུལ་གྱིས་ཕྱི་ལོ་ ༡༩༥༩ ལོར་བོད་རྒྱལ་ཁབ་ཆེན་པོའི་མངའ་དབང་ཡོངས་སུ་རྫོགས་པ་ཧམ་ཟོས་བྱས་པ་ནས་བཟུང་། བོད་ཡུལ་སྟོད་སྨད་བར་གསུམ་གང་སར་གཏེར་ཁ་སྔོག་འདོན་དང་། ནགས་ཚལ་གཅོད་འབྲེག ལྷོ་ཆུ་བྱང་འདྲེན། གློག་ཁང་གསར་རྒྱག གཙང་པོ་བཀག་སྐྱིལ་དང་ཁ་བསྒྱུར་སོགས་ཀྱིས་རང་བྱུང་ཁོར་ཡུག་ལ་གཏོར་སྐྱོན་ཚབས་ཆེན་བཏང་དང་གཏོང་མུས་མ་ཟད། བོད་མིའི་རྩ་ཆེའི་ཆོས་རིག་གི་ལྟེ་གནས་དགོན་ཁག་དྲུག་སྟོང་ལྷག་གཏོར་བཤིག་བཏང་བ་དང་། བོད་ཀྱི་ཆོས་དང་རིག་གཞུང་། གོམས་གཤིས་སྲོལ་བཟང་རྩ་གཏོར་བཏང་སྟེ་མི་སྤྱོད་ལས་འདས་པའི་སྡུག་སྦྱོང་སྣ་ཚོགས་འོག་བོད་མི་འབུམ་བཅུ་གཉིས་ལྷག་གི་ཚེ་སྲོག་ཤོར་བ་བྱུང་ཡོད་ལ། དུས་ད་ལྟའང་གཞིས་བཞུགས་བོད་མི་ཚོར་རང་དབང་གཏན་ནས་མེད་པར་བོད་མི་མང་པོ་དམར་གསོད་དང་། འཛིན་བཟུང་། བཙོན་འཇུག  བཀག་ཉར་སོགས་ཚད་ལས་བརྒལ་བའི་སྡུག་བསྔལ་མྱངས་བཞིན་པར་བརྟེན། བོད་ནང་དུ་འགྲོ་བ་མིའི་ཐོབ་ཐང་མེད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དུ་ཞབས་སོར་འཁོད་དགོས་པ། བོད་ལ་རང་དབང་རང་བཙན་དགོས་པ་སོགས་ཀྱི་དགོས་འདུན་འོག་རྒྱ་གཞུང་ལ་ཞི་རྒོལ་རིམ་པ་བྱས་ཤིང་། ལྷག་པར་དུ་ཕྱི་ལོ་ ༢༠༠༩ ནས་བཟུང་བོད་ནས་ཤེས་རྟོགས་ར་འཕྲོད་གསལ་པོ་བྱུང་བ་བོད་མི་རྒྱལ་གཅེས་དཔའ་བོ་དཔའ་མོ་གྲངས་ ༡༥༧ གྱིས་སྔ་རྗེས་སུ་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་དགོས་བྱུང་ཡོད།

རྒྱ་ནག་དམར་གཞུང་གིས་མཐུན་སྒྲིལ་དང་ཡར་རྒྱས་ལ་ཁ་གཡར་ཏེ་མི་རིགས་རྩ་མེད་བཟོ་རྒྱུའི་ངན་བྱུས་ཀྱི་ཁྲིམས་ཡིག་ “མི་རིགས་མཐུན་སྒྲིལ་ཡར་ཐོན་བསྐུལ་འདེད་ཀྱི་ཁྲིམས་ཡིག་” ཟེར་བ་ལག་བསྟར་གྱི་ཉིན་གཉིས་པ་སྟེ། ཕྱི་ལོ་ ༢༠༢༦ ཟླ་ ༧ ཚེས་ ༢ ཉིན་བོད་ཀྱི་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་བོད་རང་དབང་རང་བཙན་སླར་གསོའི་ཆེད་རྒྱ་ནག་དམར་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད། ཁྲིམས་ཡིག་དེ་ནི་བོད་མི་རིགས་དང་རྒྱ་ནག་དམར་གཞུང་འོག་མྱངས་དང་མྱོང་བཞིན་པའི་མི་རིགས་དེ་ཚོ་གཅིག་པུའི་གནས་ཚུལ་ཞིག་མིན་པར། མི་རིགས་ཤིག་གི་ངོ་བོར་ཉེན་ཁ་བྱུང་ཚེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲོམ་གཞིའི་གཞི་རྟེན་ལའང་ཉེན་ཁ་བཟོ་བཞིན་ཡོད་མེད་རྟོགས་ཞིབ་དགོས་པ་ཡིན། དེ་བཞིན་ཁྲིམས་དེས་རྒྱལ་མཚམས་ལས་བརྒལ་བའི་དྲག་གནོན་བྱེད་ཤུགས་ཆེ་རུ་གཏོང་ཉེན་ལ་སོང་། རང་དབང་ལུང་པའི་ནང་བདེན་པ་དང་། འཚེ་མེད་ཞི་བའི་ཐོག་ནས་རང་དབང་སླར་གསོའི་ཆེད་ལས་འགུལ་སྤེལ་མཁན་དང་རྒྱབ་སྐྱོར་བྱེད་མཁན་རྣམས་ལ་སྲུང་སྐྱོབ་དགོས་པའི་འབོད་བསྐུལ་ཞུ་རྒྱུ་ཡིན། རང་དབང་ལུང་པའི་ནང་གནས་པའི་གཞིས་ལུས་རྒྱ་ཆེ་མང་ཚོགས་ཀྱི་མགྲིན་ཚབ་པ་རྣམས་ནས་ཀྱང་དཔའ་བོ་དཔའ་མོའི་བློས་གཏོང་རྣམས་ཡིད་ལ་བཅངས་ནས་རྒྱ་ནག་དམར་གཞུང་གི་སྲིད་བྱུས་འདིའི་ཐོག་རྒྱུས་ལོན་གྱིས་སོ་སོའི་ས་གནས་སུ་གོ་རྟོགས་སྤེལ་བ་བརྒྱུད་བོད་དོན་རྒྱབ་སྐྱོར་ཐོབ་ཐབས་སུ་ཞུ་སྐུལ་མུ་མཐུད་སྤེལ་ཐུབ་པ་བྱ་དགོས།

རྒྱལ་གཅེས་དཔའ་བོ་རང་བཙན་བློ་དགའ་དམ་པ་ཁོང་གི་མཐའ་མའི་ཞལ་ཆེམས་ནང་ “ང་ཚོར་མང་གཙོ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཕགས་པ་སྤྱན་རས་གཟིགས་ཀྱིས་དངོས་གནས་དྲང་གནས་མང་གཙོ་ཚད་ལྡན་གནང་བར་ང་ཚོར་དངོས་གནས་དྲང་གནས་དཔེ་མི་སྲིད་པའི་བཀའ་དྲིན་ཆེན་པོ་རེད། དེ་ག་ནང་བཞིན་གྱིས་ང་ཚོ་མི་རྒྱུ་གཉིས་ཀྱིས་འགྲོ་སོང་གང་ཡང་གཏོང་མི་དགོས་པའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོ་མར་གནང་ནའང་ང་ཚོས་མི་དགོས་ཟེར་ནས་ཡར་ཕུལ་བསྡད་པ་རེད། ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོ་ཚད་ལྡན་ཞིག་གནང་བཞག་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོ་གནང་བ་དེ་གང་རེད་ཟེར་ན། ནང་ལོགས་ལ་ནང་འཛིང་དགོས་པའི་ཆེད་དུ་རྩ་བ་ནས་མ་རེད། དེ་བོད་མི་རིགས་ཀྱི་ཆེད་དུ། བོད་རྒྱལ་ཁབ་ཀྱི་ཆེད་དུ་ཡར་རྒྱས་ཤིག་འགྲོ་ཐུབ་ན།” ཞེས་གསུངས་པ་ལྟར་མང་གཙོའི་ལམ་ལུགས་ནང་ལོ་ལྔ་རེའི་མཚམས་ནས་བོད་མིའི་ཆབ་སྲིད་ཀྱི་འགོ་འཁྲིད་རྣམ་པ་བརྗེ་སྒྱུར་བྱ་རྒྱའི་དུས་སྐབས་རེ་འཁེལ་གྱི་ཡོད་པ་མཁྱེན་གསལ་ལྟར། ང་ཚོས་བཙན་བྱོལ་ནང་ལག་བསྟར་བྱས་པའི་མང་གཙོ་འདི་རང་དགར་ཐོབ་པའི་ཁེ་ཕན་ཞིག་ཏུ་མི་བརྩི་བར། དེ་ནི་ང་ཚོའི་འགན་འཁྲི་དང་གཅེས་སྲུང་བྱ་དགོས་པའི་རིན་ཐང་ཞིག་ཏུ་བརྩིས་ནས་མང་གཙོ་ལག་ལེན་བསྟར་སྐབས་ཕན་ཚུན་གུས་བརྩི་དང་། བཟོད་བསྲན། ཁྲིམས་ལ་བརྩི་སྲུང་། འགན་འཁྲི་དང་དྲང་བདེན་བཅས་གཞིར་བཞག་དགོས་པ་ཡིན། རྒྱལ་ཁབ་རང་བཙན་ཡོད་པའི་ནང་སྲིད་དོན་གྱི་འགྲན་སྡུར་ཡོང་གི་ཡོད་ཀྱང་། རང་ཅག་ནི་བཙན་བྱོལ་བའི་གནས་སྟངས་འོག་མང་གཙོ་ལག་བསྟར་བྱེད་བཞིན་པ་ཡིན་པས་མི་མང་གི་མཐུན་སྒྲིལ་དང་མང་གཙོའི་འགན་ཁུར་ནི་ཡུན་རིང་གནས་དགོས་པ་ཡིན་པ་ཚང་མས་ཐུགས་ལ་བཅངས་དགོས།

བཙན་བྱོལ་དུ་གནས་ཡུན་རིང་རྒྱ་གར་གཞུང་མང་གཉིས་ཀྱིས་གཙོས་བོད་དོན་འཐབ་རྩོད་དང་བོད་མིའི་མང་གཙོ་འཕེལ་རྒྱས་ཐོག་རྒྱབ་སྐྱོར་གནང་མཁན་ཡོངས་ལ་སྙིང་དབུས་ནས་བཀའ་དྲིན་ཆེ་ཞུ་རྒྱུ་ཡིན།

མཐའ་དོན་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ། འཛམ་གླིང་ཞི་བདེའི་དེད་དཔོན་གཞིས་བྱེས་བོད་མི་ཡོངས་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་རླབས་ཆེན་ཐུགས་ཀྱི་དགོངས་བཞེད་རྣམས་ལྷུན་གྱིས་འགྲུབ་པ་དང་། བོད་དོན་བདེན་མཐའ་གསལ་ཞིང་གཞིས་བྱེས་མཉམ་འཛོམས་ཀྱི་ཉིན་མོ་མྱུར་དུ་འཆར་བའི་སྨོན་འདུན་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༢༦ ཟླ་ ༩ ཚེས་ ༢ ལ།།

]]> https://bod.asia/2026/09/%e0%bd%96%e0%bd%bc%e0%bd%91%e0%bc%8b%e0%bd%98%e0%bd%b2%e0%bd%a0%e0%bd%b2%e0%bc%8b%e0%bd%98%e0%bd%84%e0%bc%8b%e0%bd%82%e0%bd%99%e0%bd%bc%e0%bd%a0%e0%bd%b2%e0%bc%8b%e0%bd%91%e0%bd%b4%e0%bd%a6-14/ Wed, 02 Sep 2026 06:54:08 +0000 https://bod.asia/?p=282698 ༄༅། །བཙན་བྱོལ་ནང་བོད་མིའི་མང་གཙོའི་ལམ་བཟང་སྲོལ་བཏོད་དེ་མི་ལོ་ ༦༦ ཧྲིལ་པོ་འཁོར་བའི་དུས་ཆེན་མཛད་སྒོའི་འདིའི་ཐོག །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་སྟེང་ནས་གཤམ་དུ་མང་གཙོའི་ལམ་ལུགས་འཛུགས་སྐྲུན་ལ་སྣེ་ཁྲིད་དང་སྐུལ་འདེད་མཛད་ཅིང་། མགོན་པོ་མཆོག་ལ་དབུ་འོག་དཔུང་འདེགས་ཞུ་མཁན་གྱི་མི་རབས་རྒན་པ་ཚོར་བཀའ་དྲིན་ཚོར་ཤེས་དང་ཆབས་ཅིག དུས་ཆེན་མཛད་སྒོར་མཉམ་ཞུགས་བྱེད་མཁན་སྐུ་མགྲོན་རྣམ་པ་དང་། སེར་སྐྱ་མང་ཚོགས་བཅས་པར་འཚམས་འདྲི་བཀྲ་ཤིས་བདེ་ལེགས་ཞུ་གི་ཡོད།

མི་ལོ་ ༦༦ གོང་། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དང་། གང་གི་ཕེབས་རྗེས་སྙེགས་མཁན་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་གཅིག་ཀྱང་མ་འགོར་བར། གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། བོད་ཆོལ་ཁ་གསུམ་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་གྱི་ཕུང་པོ་གཅིག་ཏུ་བསྒྲིལ་ཏེ། མང་ཚོགས་ནས་རང་ཁོངས་ཆོལ་ཁ་ཆོས་ལུགས་ཀྱི་སྐུ་ཚབ་འདེམས་གཏོང་དགོས་པའི་བཀའ་སློབ་བསྩལ་དོན་བཞིན། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་བོད་མི་མང་སྤྱི་འཐུས་ལྷན་ཚོགས་གསར་འཛུགས་བྱུང་ཡོད་པ་དང་། ཕྱི་ལོ་ ༡༩༦༡ དང་། ༡༩༦༣ ལོ་སོ་སོར་མ་འོངས་བོད་ཀྱི་རྩ་ཁྲིམས་སྙིང་བསྡུས་དང་། བོད་ཀྱི་རྩ་ཁྲིམས་ཁྱབ་བསྒྲགས་གནང་བ་མ་ཟད། རིམ་པས་གཞུང་གི་སྒྲིག་འཛུགས་དང་། ལས་ཀྱི་སྣེ་མོ་བ་བསྐོ་གཞག་འཕོ་ལེན་བཅས་པར་ལེགས་བཅོས་དང་། ཟླ་དྲུག་ལས་བསྡོམས་ཚོགས་ཆེན་དང་། ལོ་འཁོར་ལས་བསྡོམས་ཚོགས་ཆེན་བརྒྱུད། བཙན་བྱོལ་བོད་མིའི་ཆབ་སྲིད་དང་འཛིན་སྐྱོང་མང་གཙོའི་ལམ་ལུགས་ཐོག་སྣེ་ཁྲིད་མཛད་ཅིང་། ཕྱི་ལོ་ ༡༩༩༡ ལོར་བཙན་བྱོལ་བོད་མིའི་བཅའ་ཁྲིམས་གཏན་འབེབས་ཀྱིས་མང་གཙོའི་ཀ་བ་གསུམ་དང་། རང་དབང་ལྡན་པའི་སྡེ་ཚན་གསུམ་བཅས་མང་གཙོའི་ཆ་ལག་ཡོངས་སུ་གྲུབ་པར་བགྱིས་ཤིང་། ཕྱི་ལོ་ ༢༠༠༡ ལོར་བཅའ་ཁྲིམས་བསྐྱར་བཅོས་ཀྱི་ལམ་ནས་བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་དང་། ཕྱི་ལོ་ ༢༠༡༡ ལོར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་དེ། བོད་མིའི་སྒྲིག་འཛུགས་འདི་ཉིད་མངའ་དབང་ལྡན་པའི་གཞིས་བྱེས་བོད་མི་ཡོངས་ཀྱི་ཁྲིམས་མཐུན་གྱི་དབང་ལྡན་འཛིན་སྐྱོང་པ་དང༌། ངོ་ཚབ་ཡིན་པའི་ངོ་བོ་རྒྱུན་སྐྱོང་ཐོག །སྲི་ཞུ་སྒྲུབ་པའི་ནུས་ལྡན་དུ་བཀོད་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༦༠ ནས་ཕྱི་ལོ་ ༢༠༡༡ བར་བཙན་བྱོལ་བོད་མི་རྣམས་གོམ་པ་རིམ་བརྒྱུད་ཀྱིས་མང་གཙོའི་ལམ་ལུགས་སུ་སྣེ་ཁྲིད་མཛད་པའི་དམིགས་དོན་ནི། དུས་རབས་དང་མཐུན་པའི་སྒྱུར་བཅོས་ཙམ་ཞིག་མ་ཡིན་པར། མི་མང་རང་གིས་འོས་འདེམས་བྱས་པའི་སྐུ་ཚབ་བརྒྱུད་ནས་འཛིན་སྐྱོང་བྱེད་པའི་ཚད་ལྡན་གྱི་མང་གཙོའི་སྤྱི་ཚོགས་ཤིག་བསྐྲུན་ཐབས་དང་། མང་གཙོའི་ཀ་བ་གསུམ་གྱི་ཆ་ལག་ཚང་བའི་སྒོ་ནས་སྒྲིག་འཛུགས་ཀྱི་ལས་དོན་རྣམས་ཕྱི་གསལ་ནང་གསལ་དང་འགན་ཁུར་ཐུབ་པ། མ་འོངས་པའི་གནས་སྟངས་གང་འདྲ་ཞིག་གི་འོག་ཏུའང་བོད་མིའི་སྒྲིག་འཛུགས་འདི་ཉིད་བོད་དོན་བདེན་མཐའ་མ་གསལ་བར་དུ་རང་ཚུགས་ཐུབ་པའི་ངང་བརྟན་གནས་ཐུབ་པའི་ཆེད་དུ་ཡིན།

འཛམ་གླིང་སྟེང་བཙན་བྱོལ་བའི་སྤྱི་ཚོགས་ཇི་སྙེད་ཅིག་ཡོད་ནའང་། མང་གཙོའི་སྒྲོམ་གཞི་ཆ་ཚང་བ་ཡོད་པའི་སྒྲིག་འཛུགས་ནི་བོད་མིའི་སྒྲིག་འཛུགས་འདི་ཁོ་ན་ཡིན་ལ། བཙན་བྱོལ་གྱི་གནས་སྟངས་འོག་ཏུའང་། མི་མང་གི་མངོན་འདོད་དང་མཐུན་པར་ཁྲིམས་ཀྱིས་དབང་བསྒྱུར་གྱི་ལམ་ནས་སྤྱི་ཚོགས་འཛིན་སྐྱོང་འཐུས་སྒོ་ཚང་བའི་སྒོ་ནས་བྱེད་ཐུབ་པ་འདི་ནི་རྒྱལ་སྤྱིའི་ཐོག་མིག་དཔེེ་བལྟ་ཡུལ་ཞིག་ཏུ་གྱུར་ཡོད།

མང་གཙོའི་ལམ་སྲོལ་གྱི་སྲོག་ཤིང་ནི། ཁྲིམས་ཀྱིས་དབང་བསྒྱུར་འོག་སྒྲིག་འཛུགས་དབར་འགན་དབང་དབྱེ་བགོས་ལག་བསྟར་ཚུལ་མཐུན་བྱ་རྒྱུ་དེ་ཡིན་ལ། ཆེས་མཐོའི་ཁྲིམས་ཞིབ་ཁང་ནས་བཅའ་ཁྲིམས་དང་དེར་གསལ་མི་མང་གི་གཞི་རྩའི་ཐོབ་ཐང་སྲུང་སྐྱོབ་དང། སྤྱི་འཐུས་ལྷན་ཚོགས་ནས་ཁྲིམས་བཟོ་དང་འཛིན་སྐྱོང་ལ་སྟངས་འཛིན། བཀའ་ཤག་ནས་ཆབ་སྲིད་དང་འཛིན་སྐྱོང་ལ་འགན་ཁུར་བཅས་རང་འཁྲིའི་ལས་འགན་སྒྲུབ་དགོས་པའི་ཐོག །འདས་པའི་ལོ་ངོ་དེ་སོང་གི་ཉམས་མྱོང་ལས་བསླབ་བྱ་བླངས་ཏེ། བཅའ་ཁྲིམས་ཀྱིས་བསྐུར་བའི་རང་རང་སོ་སོའི་འགན་དབང་གི་ས་མཚམས་གསལ་པོ་བཟུང་སྟེ། ནང་ཁུལ་རྩོད་རྙོག་མེད་པ་དང་། ལས་དོན་ཚགས་ཚུད་ཡོང་བ། སྒྲིག་འཛུགས་ཀྱི་ནུས་པ་གོང་སྤེལ་གཏོང་རྒྱུའི་ཁ་ཕྱོགས་སུ་བསྐྱོད་ཐུབ་ཐབས་སུ། འགན་འཁུར་མཁན་ཡོངས་ནས་ཁྲིམས་སྒྲིག་གི་དགོངས་དོན་ཐོག་ནུས་པ་མཉམ་སྤུངས་བྱེད་དགོས་པ་ནི་དུས་ཀྱི་དགོས་མཁོ་ཡིན།

དེང་སང་རྒྱལ་སྤྱིའི་སྡིངས་ཆའི་སྟེང་གི་འཐབ་རྩོད་མངོན་གསལ་དོད་ཤོས་ཤིག་ནི། རང་དབང་མང་གཙོའི་ལམ་ལུགས་དང་སྲིད་དབང་སྒེར་གཅོད་ལམ་ལུགས་དབར་གྱི་དཀའ་རྙོག་དེ་ཡིན་པ་ཀུན་གྱིས་མཐོང་ཆོས་ལྟར། རྒྱ་དམར་གཞུང་གིས་གཙོས་པའི་སྒེར་གཅོད་རྒྱལ་ཁབ་ཁག་ངན་པ་ཁ་མཐུན་གྱིས། བྱེད་ཐབས་སྣ་ཚོགས་བརྒྱུད་སྒེར་གཅོད་ཀྱི་ལྟ་གྲུབ་དང་། ལམ་ལུགས་ཁྱབ་སྤེལ་བྱས་ཏེ། མང་གཙོའི་རྒྱལ་ཁབ་ཁག་ལ་ཁ་གཏད་དང་འགྲན་རྩོད་བྱེད་བཞིན་ཡོད། ང་ཚོའི་བོད་དོན་འཐབ་རྩོད་ཀྱང་གོ་ལ་ཧྲིལ་པོའི་རང་དབང་དང་སྒེར་གཅོད་དབར་འཐབ་རྩོད་ཀྱི་ཆ་ཤས་ཤིག་ཆགས་ཀྱི་ཡོད་སྟབས། ང་ཚོས་མང་གཙོ་ཚད་ལྡན་ཞིག་ལག་བསྟར་ཐུབ་པ་བྱ་རྒྱུ་ནི། སྲིད་དབང་སྒེར་གཅོད་ལམ་ལུགས་ལ་གདོང་ལེན་བྱེད་པའི་ཐབས་ལམ་ཡག་ཤོས་ཤིག་ཡིན།

འདས་པའི་མི་ལོ་ ༦༦ ལ་ཕྱིར་ལྟ་བྱེད་སྐབས། ང་ཚོར་ངེས་ཤེས་རྙེད་པའི་ཉམས་མྱོང་ཞིག་ནི། ཕ་རོལ་པོའི་མ་རུང་བའི་བསམ་སྦྱོར་ལ་ཁ་གཏད་དང་། སྤྱི་ཚོགས་སྐྱོན་བྲལ་ངང་ཡར་རྒྱས་འགྲོ་བའི་རྨང་གཞི་གཙོ་བོ་ཞིག་ནི། མང་གཙོའི་ལྟ་གྲུབ་ལ་མོས་གུས་དང་། མང་གཙོ་ལམ་ལུགས་ལག་བསྟར་བྱ་རྒྱུ་དེ་ཡིན་པ་དང་། དེ་ཡང་མང་གཙོ་ནི་མི་མང་གིས་དབང་སྒྱུར་བྱེད་པ་ཁོ་ན་མིན་པར། མི་མང་གི་སྐུ་ཚབ་ཀྱིས་གཏན་ལ་ཕབ་པའི་ཁྲིམས་ཀྱིས་དབང་སྒྱུར་བྱེད་དགོས་པའི་རྩ་དོན་རྒྱུན་འཁྱོངས་དང་། ང་ཚོ་མི་རེ་ངོ་རེར་བཅའ་ཁྲིམས་ཀྱིས་འགན་སྲུང་བྱས་པའི་གཞི་རྩའི་ཐོབ་ཐང་ཡོད་པ་དང་མཉམ་དུ། སྤྱི་ཚོགས་ཀྱི་བདེ་འཇགས་དང་རྩ་དོན་ལ་སྲུང་སྐྱོབ་བྱེད་པའི་བཅའ་ཁྲིམས་ཀྱིས་བསྐུར་བའི་ལས་འགན་ཡང་ཡོད་པ་དེ་ངེས་པར་དུ་གོ་རྟོགས་ཡོད་དགོས།

མང་གཙོའི་སྤྱི་ཚོགས་ནང་བསམ་ཚུལ་མི་མཐུན་པ་ཡོང་རྒྱུ་ནི་ཆོས་ཉིད་ཡིན་ལ། དེང་སང་སྤྱི་ཚོགས་དྲ་རྒྱའི་དུས་རབས་འདིར། རང་དབང་བེད་སྤྱོད་ལོག་པར་བཏང་སྟེ། ཁ་གཏད་གཅོག་ཡུལ་ངོ་མ་དེ་ཟུར་དུ་བཞག་ནས། ང་ཚོའི་སྤྱི་ཚོགས་ནང་ཁུལ་དུ་ཕར་ཚུར་དམའ་འབེབས་དང། ཆོལ་ཁ་དང་ཆོས་ལུགས་ཀྱི་འཐེན་ཁྱེར། དཀྲོག་གཏམ་དཀྲུགས་ཤིང་འགྲེམས་སྒྲོགས་རྒྱུན་མཐུད་ཡོང་བཞིན་ཡོད་པའི་ཁོངས། རྒྱ་དམར་གཞུང་གི་དངུལ་དངོས་ཀྱི་ཁེ་ཕན་རྗེས་འབྲངས་བྱེད་མཁན་དེ་ཚོར་གདོང་ལེན་མཐའ་གཅིག་ཏུ་བྱ་རྒྱུ་ལས་གདམ་ག་གཞན་མེད་ལ། །དེ་མིན་ང་ཚོ་ནང་ཁུལ་ནས་ལས་གཞི་གང་ཞིག་སྤེལ་སྐབས་དང་། སྐད་ཆ་གང་ཞིག་ཤོད་སྐབས། གཞིས་ལུས་མི་མང་སེམས་ཤུགས་ཆགས་གཞི་དང་། ཕར་ཕྱོགས་ཁ་གཏད་ཀྱི་གྲོགས་སུ་འགྱུར་གཞིའི་དགྲ་དགའ་གཉེན་སྡུག་ཇི་ཆགས་ངེས་པར་དུ་བསམ་བློ་གཏོང་ཐུབ་དགོས།

འཛམ་གླིང་སྤྱི་དང་བོད་ཀྱི་ཆབ་སྲིད་འཐབ་རྩོད་ཀྱི་བྱུང་རིམ་དུ། ནང་ཁུལ་རྡོག་རྩ་ཆིག་སྒྲིལ་བྱུང་ན་རྒྱལ་ཁ་ཐོབ་ཀྱི་ཡོད་པ་དང་། དེ་མིན་ནང་ཁུལ་གྱི་རྙོག་དྲ་ནང་དུ་ཐིམ་ནས། ཕ་རོལ་པོར་ཁ་གཏད་གཅོག་པའི་ནུས་པ་ཉམས་དམས་སུ་སོང་ན་ཕམ་ཁ་འབྱུང་རྒྱུ་ལས་མེད་པས། ང་ཚོ་བོད་མི་ཚོས་དེ་ལས་བསླབ་བྱ་བླངས་ཏེ། ང་ཚོའི་བོད་དོན་འཐབ་རྩོད་ཀྱི་ནུས་སྟོབས་ཉམས་དམས་དང་། ནང་ཁུལ་གྱི་ཆིག་སྒྲིལ་གཏོར་བཤིག་གཏོང་བའི་གཏམ་སྤྱོད་རིགས་ལ་གདོང་ལེན་བྱ་རྒྱུར་བོད་མི་ཚང་མས་སྤྱང་གྲུང་དོད་པོ་དང་། རྣམ་དཔྱོད་རྩལ་སྤྲུགས་བྱེད་དགོས།

ཉེ་བའི་བདུན་ཕྲག་ཁ་ཤས་རིང་། སྐབས་ ༡༧ པའི་བཀའ་ཤག་ལྷན་ཚོགས་རིམ་བསྟུད་དུ་ཚོགས་ཏེ། འཛིན་སྐྱོང་གི་ཕུགས་དམིགས་ཡིག་ཆ་བོད་ཀྱི་མ་འོངས་འགན་སྲུང་དང་། བཀའ་ཤག་སྐབས་འདིའི་ལས་རྒྱུན་རིང་འཛིན་སྐྱོང་བཀའ་ཤག་གི་སྤྱི་ཡོངས་དང་། ཆབ་སྲིད། སྤྱི་ཚོགས་བདེ་དོན། འཛིན་སྐྱོང་བཅས་ཀྱི་ལངས་ཕྱོགས་དང་། ལས་དོན་བྱེད་སྒོ་བཅས་ཀྱི་ཡིག་ཆར་བཀའ་བསྡུར་ཞིབ་ལྷུག་བྱས་ཏེ་གཏན་འབེབས་ཟིན་ཡོད་པས། འཛིན་སྐྱོང་གི་ལས་ཀྱི་སྣེ་མོ་རྣམས་བསམ་ཕྱོགས་དང་ལས་དོན་ལག་བསྟར་བྱེད་ཕྱོགས་གཅིག་གྱུར་ཡོང་ཆེད། རིམ་བཞིན་ལས་བྱེད་དང་མང་ཚོགས་ལ་འགྲེལ་བཤད་བྱ་རྒྱུ་ཡིན།

རྒྱ་དམར་གཞུང་གིས་བོད་ས་བཙན་བཟུང་བྱས་པ་ནས་ད་བར་བོད་མི་རིགས་རྩ་མེད་གཏོང་བའི་སྲིད་བྱུས་རྒྱུན་མཐུད་སྤེལ་ཡོད་པ་དང་། ལྷག་པར་ཉེ་བའི་ལོ་ངོ་བཅུ་ཕྲག་ལྷག་ཙམ་གྱི་གོང་ནས་ཇེ་སྡུག་ཇེ་ཐུར་སོང་བའི་སྐོར་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་སྤྱི་ཚོགས་ནས་སྙན་ཐོ་རིམ་པར་བཏོན་ཏེ་རྒྱལ་སྤྱིའི་ཁྲིམས་དང་མ་མཐུན་པའི་ཁུངས་སྐྱེལ་བྱས་ཡོད་པ་ལྟར། ང་ཚོའི་ངོས་ནས་དེར་དགག་པ་དང་ངོ་རྒོལ་ཡོད་ཅེས་འབོད་ཚིག་བསྒྲགས་པ་ཙམ་གྱིས་མི་འདང་བར། རྒྱ་དམར་གཞུང་གི་ངན་བྱུས་རྣམས་རྒྱུས་ལོན་ཡོད་པའི་ཐོག་ནས་ཐེར་འདོན་དང་གདོང་ལེན་བྱེད་དགོས་པ་ཡིན་པས། བོད་མིའི་སྒྲིག་འཛུགས་ནས་གདོང་ལེན་བྱེད་སྒོ་ཁག་ལ་མང་ཚོགས་ནས་ཀྱང་མཉམ་རུབ་དགོས་གལ།

རྒྱ་དམར་གཞུང་གིས་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་ཀྱི་ཁྲིམས་ཡིག་ཟེར་བ་ཕྱི་ཟླ་ ༧ ཚེས་ ༡ ནས་ལག་བསྟར་འགོ་འཛུགས་བྱས་པ་དེར་ཚད་ལྡན་གྱི་གདོང་ལེན་ཡོང་ཆེད། དེའི་ནང་། བོད་ཀྱི་སྐད་ཡིག་བཀོལ་སྤྱོད་བཀག་སྡོམ་དང་། ལོ་རྒྱུས་དང་མི་རིགས་ཀྱི་ངོ་རྟགས་རྫུན་བཟོ། སྤྱི་ཚོགས་གཞི་རིམ་གྲོང་གསེབ་བར་དུ་ལུགས་བསྒྱུར་སྲོལ་བརྗེ། བོད་བརྒྱུད་ནང་བསྟན་རྒྱ་བསྒྱུར། མི་རིགས་འདྲེས་སྡོད་དང་མཉམ་བསྲེས་ལ་ཤུགས་སྣོན། འཕྲུལ་རིག་གི་ལྟ་སྲུང་། ཆབ་སྲིད་དང་སྤྱི་ཚོགས་འཛུགས་སྐྲུན་གྱི་གནོན་ཤུགས། བོད་རིགས་ལས་བྱེད་པར་ཆབ་སྲིད་ཞིབ་བཤེར། རང་སྐྱོང་གི་ཐོབ་ཐང་བརྩི་མེད་དང་། རྒྱ་ནག་གི་ས་མཚམས་ལས་བརྒལ་ཏེ་ཚོགས་སྒེར་སུ་རུང་ཁྲིམས་ཡིག་དེའི་ཁྱབ་ཚད་འོག་བཙན་འཇུག་བྱ་འཆར་སོགས་ཀྱི་ངན་གཡོའི་བསམ་སྦྱོར་རྣམས་བཀའ་ཤག་གི་གཏམ་བཤད་ཁག་ཅིག་ཏུ་འགྲེལ་བཤད་བྱས་ཡོད་པ་དང་། ད་དུང་གལ་ནན་དུ་བརྩིས་ཏེ་བརྙན་ཐུང་གི་ལམ་ནས་ངོ་སྤྲོད་བྱེད་འཆར་ཡིན།

རྒྱ་དམར་གཞུང་གིས་བོད་མི་རིགས་རྩ་གཏོར་གྱི་དམིགས་གཏད་གཙོ་བོར་བོད་ཀྱི་ཆོས་རིག་དང་སྐད་ཡིག་རྩ་མེད་གཏོང་རྩིས་ཡིན་པ་ལྟར། ང་ཚོ་གཞིས་བྱེས་གཉིས་ནས་སྒེར་སོ་སོའི་ཁྱིམ་ཚང་ནང་བོད་སྐད་ཤོད་པ་དང་། བོད་ཡིག་ཀློག་འདོན། བོད་བརྒྱུད་ནང་བསྟན་གྱི་བྱམས་བརྩེའི་བསླབ་བྱ་ངོ་སྤྲོད་དང་། རྒྱུན་ལྡན་ཆོ་ག་ལག་ལེན། སྲོལ་རྒྱུན་དུས་སྟོན་བརྩི་སྲུང་དང་། ཆས་གོས་དང་སྒྱུ་རྩལ་ལ་གོམས་འདྲིས་བསྟེན་ཐབས་ཐོག །དེར་མཐུན་གྱི་སྤྱི་ཚོགས་དང་སྒྲིག་འཛུགས་ཀྱི་བྱེད་སྒོ་ཁག་ནང་མཉམ་ཞུགས་ཡོང་ཐབས་འབད་བརྩོན་བྱ་རྒྱུ་ནི་གཞན་གྱི་གནོན་ཤུགས་ཀྱིས་ཁ་ལོ་བསྒྱུར་ཐུབ་པ་ཞིག་མིན་པས། ཕ་མ་སོ་སོས་ཕྲུ་གུའི་དགེ་རྒན་དང་པོ་རང་ཉིད་ཡིན་པའི་འགན་ཁུར་ལེན་ཐུབ་དགོས།

ཕྱི་ལོ་ ༢༠༠༩ ནས་བཟུང་བོད་ནང་རང་ལུས་མེར་སྲེག་གཏོང་མཁན་ཤེས་རྟོགས་བྱུང་བ་ ༡༥༧ དང་། བཙན་བྱོལ་ནང་ཉེ་ལམ་བློ་དགའ་རང་བཙན་དམ་པ་དེ་ཉིད་ཚུད་པའི་བོད་མི་ ༡༡ ནས་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་སྲེག་བཏང་ཡོད་པ་དང་། བོད་ནང་ྋཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་མཆོག་གིས་གཙོས་པའི་ཆབ་སྲིད་བཙོན་པ་བརྒྱ་ཕྲག་དུ་མ་བཙོན་འོག་ཏུ་བཅུག་ཡོད་པ་མ་ཟད། ཁོར་ཡུག་དང་། སྐད་ཡིག །རིག་གཞུང་ལ་སོགས་སྲུང་སྐྱོབ་ཀྱི་ལས་འགུལ་སྤེལ་མཁན་རིགས་ལ་བཀག་བསྐྱིལ་དང་། འདྲི་གཅོད། རྒྱུ་དངོས་གཞུང་བཞེས་སོགས་བརྙས་བསུན་སྣ་ཚོགས་བཟོས་དང་བཟོ་བཞིན་པ་ནི། རྒྱ་དམར་གཞུང་གིས་འགྲོ་བ་མིའི་བཟང་སྤྱོད་དང་། ལྷན་སྐྱེས་ཀྱི་ཐོབ་ཐང་བརྩི་མེད་རྡོག་རོལ་གཏོང་རྒྱུར་རྒྱལ་སྤྱིའི་སྤྱི་ཚོགས་ལ་འཛེམས་ཟོན་གཏན་ནས་བྱེད་ཀྱི་མེད་པའི་དཔང་རྟགས་ཡིན།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་ལས་བྱུང་ཞིང་། ད་དུང་རྒྱུན་སྐྱོང་བྱེད་བཞིན་པའི་བོད་མིའི་མང་གཙོའི་ལམ་བཟང་འདི་ང་ཚོ་བཙན་བྱོལ་སྤྱི་ཚོགས་ཡུན་གནས་དང་། བོད་དོན་འཐབ་རྩོད་རྒྱུན་སྲིང་གི་རྩིག་རྨང་གལ་ཆེན་ཞིག་ཡིན་པས། མང་གཙོའི་ལམ་སྲོལ་འདིར་དགའ་མོས་དང་། གཅེས་སྤྲས་བྱས་པའི་ཐོག་ནས། འཐུས་ཚང་དང་ཡར་རྒྱས་ཡོང་ཐབས་ལ་གདུང་ཤུགས་ཆིག་སྒྲིལ་དང་ནུས་པ་མཉམ་སྤུངས་ཡོང་བའི་འབོད་སྐུལ་ཞུ་བཞིན་ཡོད།

མཐའ་དོན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་འཛམ་གླིང་ཞི་བདེ་དང་། འགྲོ་བ་མིའི་བདེ་སྐྱིད་ཀྱི་མགོན་དཔུང་དམ་པར་སྐུ་ཚེ་ྋཞབས་པད་བསྐལ་བརྒྱར་བརྟན་ཅིང་། བོད་དོན་བདེན་མཐའ་མྱུར་དུ་གསལ་བའི་སྨོན་འདུན་བཅས། བཀའ་ཤག་གིས་ཕྱི་ལོ་ ༢༠༢༦ ཟླ་ ༩ ཚེས་ ༢ ཉིན། །

]]> https://bod.asia/2026/09/%e0%bd%91%e0%bd%94%e0%bd%a3%e0%bc%8b%e0%bd%a3%e0%be%a1%e0%bd%93%e0%bc%8b%e0%bd%96%e0%bd%bc%e0%bd%91%e0%bc%8b%e0%bd%98%e0%bd%b2%e0%bc%8b%e0%bd%98%e0%bd%84%e0%bc%8b%e0%bd%a6%e0%be%a4%e0%be%b1-183/ Tue, 01 Sep 2026 15:31:52 +0000 https://bod.asia/?p=282717

གསར་འདེམས་བྱུང་བའི་སྲི་ཞུའི་ལས་བྱེད་རྣམས་ཀྱི་ཟབ་སྦྱོང་དེ་བཞིན་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་ཕྱི་ལོ་ ༢༠༢༦ ཟླ་བ་ ༩ ཚེས་ ༡ ནས་ ༡༩ བར་འཚོགས་རྒྱུ་ཡིན་འདུག་པ་བཅས། །

༄༅། །ཕྱི་ལོ་ ༢༠༢༦ ཟླ་བ་ ༠༩ ཚེས་ ༠༡ རེས་གཟའ་མིག་དམར་ཉིན་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བཞུགས་སྒར་དྷ་ས་ཉེ་འཁྲིས་སུ་ཆགས་པའི་འཛིན་སྐྱོང་སྦྱོང་བརྡར་ཁང་དུ་ཉེ་ལམ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གསར་འདེམས་བྱུང་བ་རྣམས་ལ་ཟབ་སྦྱོང་དབུ་འཛུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཟབ་སྦྱོང་དབུ་འབྱེད་ཀྱི་མཛད་སྒོ་ཚོགས་ཡོད་ཅིང་། སྐབས་དེར་སྐུ་མགྲོན་གཙོ་བོ་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག་དང་། ལས་བྱེད་འདེམས་ལྷན་གྱི་དྲུང་ཆེ་བསྟན་འཛིན་ལེགས་གྲུབ་ལགས། འབྲེལ་ཡོད་ལས་བྱེད། དེ་བཞིན་ཟབ་སྦྱོང་བ་བཅས་ཚང་འཛོམས་ཀྱིས་ཐོག་མར་སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་ཕྱེ་གནང་ཡོད།དེ་རྗེས་ཟབ་སྦྱོང་བ་རྣམས་ནས་རེ་རེ་བཞིན་རང་ཉིད་ངོ་སྤྲོད་གནང་གྲུབ་བསྟུན། འདེམས་ལྷན་དྲུང་ཆེ་བསྟན་འཛིན་ལེགས་གྲུབ་ལགས་ཀྱིས་ཟབ་ཁྲིད་པ་རྣམས་ཀྱི་ངོ་སྤྲོད་དང་འབྲེལ། ཟབ་སྦྱོང་གི་སྒྲིག་གཞི་ཁག་ངོ་སྤྲོད་གནང་སྐབས་ཉེ་བའི་ཆར་བོད་མིའི་སྒྲིག་འཛུགས་ནས་སྦྱོང་བརྡར་སྤྲོད་ཕྱོགས་ཀྱི་སྲིད་བྱུས་གཏན་འབེབས་གནང་ཡོད་སྐོར་དང་། སྲིད་བྱུས་དེའི་ནང་སྲི་ཞུའི་ལས་བྱེད་རྣམས་ལ་ཐོག་མར་གསར་བསྐོའི་ཟབ་སྦྱོང་དང་། དེ་ནས་བར་མའི་ཟབ་སྦྱོང་། མཐོ་རིམ་གྱི་ཟབ་སྦྱོང་བཅས་ལས་བྱེད་ཀྱི་གནས་རིམ་ལ་གཞིགས་པའི་ཟབ་སྦྱོང་ཕུལ་བཞིན་པའི་སྐོར་ངོ་སྤྲོད་གནང་ཡོད། དེ་བཞིན་ཟབ་སྦྱོང་རིང་ཚོགས་བཅར་བ་རྣམས་ནས་དུས་ཚོད་སྟངས་འཛིན་གྱིས་རང་འགན་རང་འཁུར་ཡོང་པ་དང་ཆབས་ཅིག འཛེམས་ཟོན་མེད་པའི་ཐོག་ནས་ཆ་ཤས་བླངས་དགོས་པའི་སྐུལ་མ་གནང་།དེ་ནས་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག་གིས་ཐོག་མར་འཚམས་འདྲི་དང་འབྲེལ་ཟབ་སྦྱོང་གི་དགོས་དམིགས་དང་གལ་གནད་སྐོར་གསུང་བཤད་གནང་། ཁོང་གིས་གསར་འདེམས་ལས་བྱེད་རྣམས་བོད་མིའི་སྒྲིག་འཛུགས་ཀྱི་བཅའ་ཁྲིམས་དང་། སྲི་ཞུའི་ལས་བྱེད་པ་རྣམས་ཀྱི་བླང་དོར་སྒྲིག་གཞི་གཞིར་བཟུང་བོད་དང་བོད་མིའི་འཐབ་རྩོད་ཆེད་དུ་ལས་འགན་སྒྲུབ་དགོས་གལ་དང་། བོད་མིའི་སྒྲིག་འཛུགས་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། མི་རབས་གོང་མ་རྣམས་ཀྱི་སྐུ་ལས་ལ་བརྟེན་བཙུགས་ཐུབ་པ་ཞིག་ཡིན་པས་དེ་མུ་མཐུད་གནས་པར་མི་རབས་གཞོན་པར་འགན་ཁུར་ཆེན་པོ་ཡོད་པ་ནན་བརྗོད་གནང་། དེ་མཚུངས་དེང་སང་གཞོན་སྐྱེས་རྣམས་ཕྱི་རྒྱལ་ཡུལ་གྲུ་ཁག་ཏུ་ཕེབས་རྒྱུའི་གོ་སྐབས་ལ་མགོ་མ་འཁོར་བར་སོ་སོར་བསྐོ་བཞག་གནང་བའི་ས་གནས་སུ་སོ་སོའི་འཇོན་ནུས་དཔག་པའི་ཞབས་ཞུ་ཧུར་ཐག་གནང་དགོས་པ་སོགས་ཀྱི་ལམ་སྟོན་གནང་།མཐར་འདེམས་ལྷན་གྱི་ལས་བྱེད་བསྟན་འཛིན་བརྩོན་འགྲུས་ལགས་ཀྱིས་མཇུག་བསྡོམས་གཏམ་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད།

ཐེངས་འདིའི་ཟབ་སྦྱོང་དེ་བཞིན་ཕྱི་ལོ་ ༢༠༢༦ ཟླ་བ་ ༠༩ ཚེས་ ༠༡ ནས་  ༡༩ བར་ཚོགས་རྒྱུ་ཡིན་པ་དང་། ཟབ་སྦྱོང་རིང་ལས་བྱེད་རྣམས་ལ་ནང་ཆོས་ངོ་སྤྲོད་དང་། བོད་མིའི་སྒྲིག་འཛུགས་ཀྱི་བཅའ་ཁྲིམས་ངོ་སྤྲོད། གཞུང་འབྲེལ་ཡིག་བཟོ། སཱི་ཤེས་ཡོན། དབུ་མའི་ལམ། བརྡ་སྤྲོད། རྒྱལ་རབས་ལོ་རྒྱུས་སོགས་ཀྱི་ཐོག་ཟབ་ཁྲིད་གནང་རྒྱུ་ཡིན་པ་བཅས།།

༄༅། །ཕྱི་ལོ་ ༢༠༢༦ ཟླ་བ་ ༠༨ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་ལས་བྱེད་གསོལ་ཚིགས་ཁང་གི་ཡང་སྟེང་དུ་དབུས་བོད་མིའི་ངལ་སེལ་ཚོགས་པའི་ལོ་འཁོར་ཚོགས་ཆེན་ཐེངས་ ༡༧ བསྐོང་ཚོགས་གནང་ཡོད།

སྐབས་དེར་དབུས་བོད་མིའི་ངལ་སེལ་ཚོགས་པའི་ཚོགས་གཙོ་དང་ནང་སྲིད་བཀའ་བློན་གཅིག་ལྕོགས་དཔལ་ལྡན་དོན་གྲུབ་མཆོག་དབུ་བཞུགས་ཐོག་ཚོགས་མི་རྣམས་ཀྱིས་དེ་སྔོན་ཚོགས་ཆེན་སྐབས་ཀྱི་ཟིན་ཐོ་དང་ལས་གཞི་ལག་བསྟར་བསྐྱར་ཞིབ་དང་འབྲེལ། རྩིས་ལོ་ ༢༠༢༦་་༢༧ ལོའི་སྔོན་རྩིས་འཆར་གཞི་བཀའ་འཁྲོལ་དང་། རྩིས་ལོ་ ༢༠༢༥་་༢༦ ལོའི་འཕྲལ་སེལ་དངུལ་རྩིས་སྙན་ཐོ་བསྐྱར་ཞིབ་གནང་ཡོད།

ཚོགས་འདུའི་སྐབས་སུ་འགྲེམས་སྤེལ་བརྒྱུད་འགན་འཛིན་ལྷན་ཚོགས་དང་། འཛིན་སྐྱོང་གི་ལས་བྱེད། ལས་གཞི་གཞིར་བཟུང་བསྐོ་བཞག་བཅས་དང་འབྲེལ་བའི་གྲོས་ཆོད་གཏན་འབེབས་གནང་བའི་སྐོར་ཡང་ངོ་སྤྲོད་གནང་ཡོད།

མཐར་དབུས་བོད་མིའི་ངལ་སེལ་ཚོགས་པའི་ཚོགས་གཙོ་མཆོག་གི་བཀའ་འཁྲོལ་འོག་གནད་དོན་གཞན་ཁག་གཅིག་ལ་གཟིགས་སྐྱོང་དང་། དེ་རྗེས་ཐུགས་རྗེ་ལེགས་འབུལ་གྱི་གསུང་བཤད་གནང་སྟེ་ཚོགས་འདུ་མཇུག་སྒྲིལ་ཡོད་པ་བཅས།།

༄༅། །ཕྱི་ལོ་ ༢༠༢༦ ཟླ་བ་ ༠༨ ཚེས་ ༣༠ ཉིན་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ཁྱབ་ཁོངས་དྷ་ས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྤྱི་མཐུན་མཉམ་འབྲེལ་གྱི་གཙོ་སྐྱོང་འོག་བོད་མིའི་མཉམ་འབྲེལ་ཁག་བཅོ་ལྔའི་སྐུ་ཚབ་རྣམས་དྷ་ས་འཛིན་སྐྱོང་སྦྱོང་བརྡར་ཁང་དུ་ལྷན་འཛོམས་ཀྱིས། བོད་མིའི་མཉམ་འབྲེལ་གྱི་འཛིན་སྐྱོང་དང་ལས་དོན་ཁག་ཚགས་ཚུད་གོང་མཐོར་གཏོང་ཐབས་ཐད་གོ་བསྡུར་དང་འབྲེལ། མཉམ་འབྲེལ་གྱི་འཛིན་སྐྱོང་ཚོགས་ཆེན་ཐེངས་ཉེར་ལྔ་པ་དེ་བཞིན་མཇུག་སྒྲིལ་ཡོད།

དེ་ཡང་སྐབས་དེར་སྐུ་མགྲོན་གཙོ་བོར་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་ཕེབས་ཞུགས་ཀྱིས་གསུང་བཤད་གནང་ཡོད། ཁོང་གིས་ལས་བྱེད་ནང་ཁུལ་མཉམ་ལས་དགོས་གལ་དང་། ལྷག་པར་མཉམ་འབྲེལ་དྲུང་ཆེའི་ལམ་སྟོན་འོག་ཕྱར་གུ་མཉམ་འདེགས་གནང་དགོས་པའི་ནན་བརྗོད་གནང་ཡོད། དེ་བཞིན་མཉམ་འབྲེལ་ལས་ཁུངས་ངོས་ནས་སྤྱི་ཚོགས་ཡར་རྒྱས་གཏོང་རྒྱུ་དང་ལྷན་རྒྱུན་གནས་ཐུབ་པའི་འཕེལ་རྒྱས་ལ་རྒྱབ་སྐྱོར་གནང་དགོས་པའི་ནན་སྐུལ་གནང་།དེ་མཚུངས་བཀའ་བློན་མཆོག་གིས་མཉམ་འབྲེལ་ཚོགས་མི་དང་ལས་བྱེད་ཡོངས་ནས་འགན་ཁུར་དང་ཆོད་སེམས་བརྟན་པོའི་ཐོག་ནས་མཉམ་འབྲེལ་གྱི་ལས་དོན་ཡར་རྒྱས་དང་། རྒྱུན་གནས་ཐུབ་ཐབས་ལ་འབད་བརྩོན་གནང་དགོས་པ་དང་འབྲེལ། མི་མང་མཉམ་རུབ་ཀྱིས་ལས་ཀ་བྱེད་སྐབས་མཉམ་ལས་ཀྱི་ནུས་པ་འདོན་ཐུབ་པ་དང་། སྤྱི་ཚོགས་ཀྱི་ཡར་རྒྱས་གོང་འཕེལ་ལ་ཕན་ཐོགས་སྒྲུབ་ཐུབ་ཀྱི་ཡོད་ཅེས་གསུངས།

མཛད་སྒོའི་ཐོག་ནང་སྲིད་བློན་དཔལ་ལྡན་དོན་གྲུབ་མཆོག་གིས་འདས་པའི་ལོ་གཅིག་ནང་གྲུབ་འབྲས་དང་བྱས་རྗེས་རླབས་ཆེན་བཞག་པའི་མཉམ་འབྲེལ་ཚོགས་པ་ཁག་གཅིག་ལ་གཟེངས་རྟགས་གནང་ཡོད།

སྐབས་དེར་བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་དང་ཚོགས་གཞོན་རྣམ་གཉིས་ཀྱིས་ཚོགས་ཆེན་ཐོག་གཏན་འབེབས་གནང་བའི་གྲོས་ཆོད་ཁག་སྙན་སྒྲོན་གནང་བ་དང་། མཉམ་འབྲེལ་གྱི་འཛིན་སྐྱོང་ཚགས་ཚུད་ཡོང་སླད་མཉམ་ལས་དང་། ནུས་པ་མཉམ་སྤུངས་དགོས་གལ་ཐོག་གསལ་སྟོན་གནང་ཡོད་པ་བཅས།།

དེ་ཡང་སྔ་དྲོ་ཆུ་ཚོད་ ༡༠ ཐོག་སིམ་ལར་འབྱོར་སྐབས་ས་གནས་འགོ་འཛིན་གིས་དབུས་པའི་རྡོ་རྗེ་བྲག་དགོན་པ་དང་། ས་གནས་འཐུས་ཚོགས་ཀྱི་ཚོགས་གཙོ། སིམ་ལ་དབྱངས་ཅན་དགའ་ཚལ་གླིང་བོད་མིའི་ལག་ཤེས་བཟོ་གྲྭའི་བཟོ་འགོ། ས་གནས་རང་བདེན་ཚོགས་ཆུང་ལ་སོགས་པའི་སྡེ་ཚན་ཁག་གི་སྐུ་ཚབ་རྣམས་ནས་ཕེབས་བསུ་ཞུས།དེ་རྗེས་རྡོ་རྗེ་བྲག་དགོན་པར་མཆོད་མཇལ་ཞུས་ཏེ་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་ལ་འཚམས་འདྲིའི་མཇལ་ཁ་ཞུས་པ་དང་། དེ་ནས་སིམ་སྤྱི་ལས་ཁུངས་དང་།  ལག་ཤེས་བཟོ་གྲྭ། ས་གནས་འཐུས་ཚོགས་ཀྱི་ཚོགས་ཁང་། ས་གནས་རང་བདེན་ཚོགས་ཆུང་གི་ལས་ཁུངས། སིམ་ལ་སཾ་བྷོ་ཊ་གཏན་ཉིན་སློབ་གྲྭའི་ཡན་ལག་ཀུ་སུམ་ཀྲི་སྔོན་འགྲོ་སློབ་གྲྭ། ས་གནས་འཕྲོད་བསྟེན་སྨན་ཁང་བཅས་ལ་འཚམས་གཟིགས་སུ་ཕེབས་ཡོད་པ་དང་། དེ་བཞིན་བགྲེས་སོང་ཉམ་ཐག་རྣམ་པའི་ཁྱིམ་དུ་ཐུག་འཕྲད་དང་། སིམ་ལ་དབྱངས་ཅན་དགའ་ཚལ་གླིང་བོད་མིའི་ལག་ཤེས་བཟོ་གྲྭའི་ཚོགས་ཁང་ནང་མི་མང་ཐུག་འཕྲད་ཀྱིས་གསུང་བཤད་གནང་དོན། ས་གནས་སུ་ཕེབས་དགོས་དོན་འགྲེལ་བརྗོད་གནང་ཁོངས་དབུ་ཁྲིད་བླ་ཆེན་རྣམ་པར་འཚམས་ཞུ་དང་ཁྱབ་ཁོངས་དགོན་སྡེ་ཁག་མཆོད་མཇལ། སྡེ་ཚན་ཁག་ལ་རྟོགས་ཞིབ། མི་མང་ཐུག་འཕྲད་བཅས་ཀྱི་ཆེད་དུ་ཕེབས་པ་དང་། སྐབས་ ༡༧ པའི་བཀའ་ཤག་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་སྒྲུབ་རྒྱུ། ༸གོང་ས་མཆོག་ཐུགས་བསུན་བཟོ་མི་དགོས་པ། གཞིས་ལུས་མི་མང་བློ་ཕམ་མི་དགོས་པ་ཞུ་རྒྱུ། བཀའ་ཤག་གི་ལས་དོན་ཡོངས་རྫོགས་ཁྲིམས་སྒྲིག་གཙོ་བཟུང་ཐོག་གནང་རྒྱུ། ༸གོང་ས་མཆོག་གི་༸སྐུའི་ཉེན་སྲུང་ཞུ་སྒོ་རྒྱ་གར་གཞུང་དང་ཟུང་འབྲེལ་ཐོག་སྔར་ལྷག་དམ་དོན་ཞུ་རྒྱུ། ༸རྒྱལ་བའི་ཡང་སྲིད་གནད་དོན་ཐོག་ཨ་རི་དང་རྒྱལ་ཁབ་གྲངས་ ༣༨ ནས་རྒྱབ་སྐྱོར་ཐོབ་པ་བཞིན་མུ་མཐུད་རྒྱབ་སྐྱོར་ཐོབ་ཐབས་ཞུ་རྒྱུ། འཛིན་སྐྱོང་ངོས་ནས་མང་གཙོ་ཀ་བ་གཞན་གཉིས་དང་། རང་དབང་ཅན་གྱི་སྡེ་ཚན་ཁག་ལ་འགན་དབང་ཆ་བགོས་ལྟར་ཆེ་མཐོང་ལྡན་པའི་སྒོ་ནས་འབྲེལ་བ་ཞུ་རྒྱུ།གཞུང་ཁོངས་མིན་པའི་ཚོགས་པ་ཁག་ལ་ཆེ་མཐོང་དང་ལས་དོན་ལ་དོ་ཕོག་མི་འགྲོ་ཆེད་ཐེ་བྱུས་མི་བྱ་རྒྱུ། བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་ནི་གྲོས་ཚོགས་ནས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚན་རྟགས་འགོད་པར་ཤར་བསྐྱོད་བྱ་རྒྱུ། བོད་ཀྱི་གཞོན་སྐྱེས་རྣམས་ལ་ཟུར་དུ་ཐུག་འཕྲད་ཀྱིས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་རྣམས་མི་རབས་གསར་པས་རྒྱུན་འཛིན་གནང་དགོས་པ་དང་བོད་དོན་ཞུ་གཏུག་ལས་འགུལ་སྤེལ་ཕྱོགས་ལམ་སྟོན་གནང་རྒྱུ་སོགས་ངོ་སྤྲོད་གནང་བ་དང་།

དེ་བཞིན་ཆོས་རིག་ལས་ཁུངས་ཀྱི་འགྲོ་བཞིན་པའི་ལས་གཞི་གལ་ཆེ་བ་གནས་སྐོར་མཉེན་ཆས་དང་བོད་ཀྱི་གྲངས་འཛིན་དཔེ་མཛོད་གཉིས་ཀྱི་ངོ་སྤྲོད། བོད་ཀྱི་ཆོས་དང་རིག་གཞུང་། སྐད་དང་ཡིག ཡ་རབས་བཟང་སྤྱོད་རྒྱུན་འཛིན་གནང་གལ་བཅས་ཀྱི་གསུང་བཤད་གནང་རྗེས། མི་མང་ནས་དྲི་བ་ཁག་ལ་ལན་འདེབས་གསལ་བཤད་གནང་ཡོད་པ་བཅས།།