Bookmaya

परिमळ हा

noreply@blogger.com (Preeti Kamat - Telang) — Fri, 27 Mar 2026 02:24:00 +0000

अमेरिकेत यंदाचा वसंत ऋतू आला आणि हिवाळ्यात वठलेल्या जीर्ण झाडापेडांवर उमलू लागली ती नवी हिरवीगार पालवी आणि मधुर सुवासाने आकर्षित करणारी वासंतिक फुले पाहून मनात रुंजी घालू लागलाय तो...परिमळ हा...

आजच्या मराठी भाषा गौरव दिनानिमित्त मनःपूर्वक शुभेच्छा!

noreply@blogger.com (Preeti Kamat - Telang) — Fri, 27 Feb 2026 18:03:00 +0000

माय मराठीच्या उदरी

माय मराठीच्या उदरी शब्दांचीच रत्ने, दरबारी रत्नांची खाण

आमच्या माय मराठीच्या उदरी ना कशाची वाण

उखाणे, श्लोक, म्हणी, अभंग, ओव्या,

सुभाषिते, गीते, नाटक, कथा, लावण्या किती गाव्या

जिची साऱ्या विश्वी विराजे यश कीर्ति

केले सालंकृत ज्ञानियाने, संतांनी ती ही माय मराठी

भक्तगण सच्चे आम्ही तिचे, भाग्य हे ललाटी

गातो, वाचतो, ऐकतो, जगतो मराठी, जगतो मराठी

-सौ. मेधा श्रीश कामत,

२७ फेब्रुवारी २०२६, मराठी भाषा गौरव दिन

लक्ष लक्ष ज्योति

noreply@blogger.com (Preeti Kamat - Telang) — Wed, 05 Nov 2025 16:00:00 +0000

त्रिपुरारी पौर्णिमेनिमित्त आज सादर करत आहोत अंतरीच्या दिवाळीची आणखी एक कविता.. लक्ष लक्ष ज्योति

काव्य रचना: सौ. मेधा श्रीश कामत

लक्ष लक्ष ज्योति

आज त्रिपुरारी लावूया लक्ष लक्ष वाती

लखलखले विश्व, लक्ष लक्ष ज्योति

पणती पहा इवलीशी उजळे प्रकाश

करी जागृत संवेदना मनामनात संदेश

उजळूनीया दशदिशा तम लोपवी

देई प्रेरणा सकला स्वसामर्थ्ये तोषवी

भरुनीया वाहे काठोकाठ आनंदे सरीता

आसमंत हर्षभरीत आरास ही पाहता

ना चिंतेचा मग मना लवलेश शिवे

जेव्हा विवेके लावितो लक्ष लक्ष दिवे

उजळता दिवे रोमरोम होई पुलकित

प्रकटे नारायण येई अधिक सन्निध

शोभे नभीचा आकाशदीप तेजोमय

अवनीवरी नाचे हर्षॉल्हास आनंदमय

करी क्रिडा दीपलक्ष्मी देई वरदान

सौन्दर्य सृष्टीचे, तेजाची की उधळण

सुसंस्कारे मायपित्याच्या करीतो आम्ही साजरे सण

भक्तित परमपित्याच्या होतो सदा रममाण

- --सौ. मेधा श्रीश कामत

तेजोमय गुढीपाडवा

noreply@blogger.com (Preeti Kamat - Telang) — Tue, 09 Apr 2024 17:00:00 +0000

बुकमाया परिवारातर्फे मराठी वर्षप्रतिपदेच्या आणि गुढीपाडव्याच्या हार्दिक शुभेच्छा!

ह्या नववर्षारंभानिमित्ताने सादर करत आहोत कविता "तेजोमय गुढीपाडवा"

नव्या पहाटे फाकली नवी उषःप्रभा,

तेजाळत दशदिशा भूवरी उजळीत नभा ||

नववर्षाचे स्वागत करुनि थोरांसी वंदन,

बांधूनी मांगल्याचे दारी तोरण ||

विवेकाची गुढी चढविली अंबरी,

सजविली पताका सदाचाराची घरोघरी ||

नवोदय केला साजरा नववर्षाचा,

सण तेजोमय गुढीपाडवा हर्षोल्हासाचा ||

नव्या पर्वाची आस जनी उत्साह नवा,

गाभारी मनाच्या तम सरो, प्रकाश नवा ||

रुजवूनी प्रेम स्नेह वाढवू नात्यात गोडवा,

गोड ह्या सणाचा आनंद सदा लाभावा ||

जोडोनिया कर दोन्ही ईशचरणी,

तेज सद्भक्तिचे उफाळो केली आळवणी ||

-सौ. मेधा श्रीश कामत

कविता - रंगपंचमीस साक्ष

noreply@blogger.com (Preeti Kamat - Telang) — Sat, 30 Mar 2024 16:37:00 +0000

रंगपंचमीनिमित्त हार्दिक शुभेच्छांसह सादर करीत आहोत कविता "रंगपंचमीस साक्ष"

रंगपंचमीस साक्ष उभा सत्पुरुष प्रत्यक्ष,

शेला पांघरूनी केशरी फुलांचा पळस वृक्ष ||

गरम हवा उष्ण झळा सोसवेना,

फेरा ऋतुचक्राचा उन्हाळा साहवेना ||

मन होता निरस विषण्ण उदास,

उन्हामाजी उभा पळस प्रफुल्लीत करी त्यास ||

केशरी उधळण अहा फुलांची आरास,

पाहता पळस असा पळे हो आळस ||

उत्सव होळीचा रंगपंचम करीतसे दंग,

केशरी कुसुमांचा पळसाच्या, बनविता रंग ||

झळाळी पाहता ही आनंदती लोचन,

हरखूनी नाचे मन होऊनी उन्मन ||

देवाजीची किमया सारी सोनसळा तेजोमय,

दिव्यत्व वातावरणी उजळे ज्योतिर्मय ||

- सौ. मेधा श्रीश कामत

noreply@blogger.com (Preeti Kamat - Telang) — Fri, 14 Jul 2023 18:33:00 +0000

बुकमाया परिवारातर्फे सर्व भारतीय युवा मित्रमंडळींना जागतिक युवा कौशल्य दिनाच्या खूप खूप हार्दिक शुभेच्छा!

घ्या ध्यास

लाभले चैतन्यमयी हे यौवन जीवनी

युवकानो सारे या रे पुढे सरसावूनी!

नाही जरी गुरुजी, नाही शिक्षक

नाही अभ्यासिका, शिबीर, वर्ग

किडे मकोडे माशी अवतीभवती विहंग

बांधिती घरटी कौशल्ये घांदल लगबग!

नाही लाभली दहा बोटे, दोन हात

परि कौशल्य लाविती पणास तेही बुद्धिवंत

गळा दिधला देवाजीने अमृतवाणी

युवकानो विलसे करी माय सरस्वती

तुम्ही शिल्पकार जीवनाचे घडविता देवाजीला

दान दिले भरभरुनी बुद्धीकौशल्य ज्याने तुम्हाला!

फडकेल ध्वज विजयाचा तुमच्या त्रिखंडात

ज्ञानसंस्कारे दिग्गजांच्या, तुमचा होईल जयजयकार!

यशोशिखराच्या दिव्यांची अहा आरास

खुणाविते पहा करी लुकलुक, घ्या ध्यास!

सौ. मेधा श्रीश कामत

बुकमाया परिवारातर्फे सर्वाना ७३व्या भारतीय प्रजासत्ताक दिनानिमित्त हार्दिक शुभेच्छा!!

noreply@blogger.com (Preeti Kamat - Telang) — Wed, 26 Jan 2022 05:41:00 +0000

साभार छायाचित्र: Jpoonnolly at en.wikipedia ह्यांच्या सौजन्याने

जय भारता जय भारता

जय भारता जय भारता

सुजलाम् सुफलाम् भारता

वाढवू शान तुझी सर्वदा

जय भारता जय भारता

गाऊ विजयगान आम्ही सदा

जय भारता जय भारता

स्वातंत्र्यसूर्य तळपत राहो त्रिकाल

जय भारता जय भारता

चिरकाल अशरण ध्वज हा झळको तिरंगा

जय भारता जय भारता

नाही धर्म-जातिभेद येथे

जय भारता जय भारता

एक पंथ एक जात “भारतीय” आम्ही

जय भारता जय भारता

नररत्ने वीररत्ने प्रसवली कुशीत

जय भारता जय भारता

करू साजरा अमृत सोहळा हा

जय भारता जय भारता

कलागुणी बुद्धिवंत राखती विश्वी बहुमान

जय भारता जय भारता

विजय गान हे देई धैर्य, देई स्फूर्ति

जय भारता जय भारता

जयहिंद !!!

दे कोकिळे आम्हा नवचैतन्य

noreply@blogger.com (Preeti Kamat - Telang) — Wed, 01 Apr 2020 04:33:00 +0000

दे कोकिळे आम्हा नवचैतन्य

ऐकिली साद तुझी गोड कुहुक

अवतरलीस सखे वसंत सन्मुख

नितवर्षी आपण गळ्यात घालूनी गळे

भेटलो बागेत तू नि मी मंजुळे

परि साद मी ऐकूनी तुझी कानी

ना धावत आले आज अंगणी

दशदिशा कापती भये मृत्युचे थैमान

जगती वेगे आज महामारीचा फैलाव

देवदूत तू आळव हो प्रभूसी

मिळो वरदान निरामय जीवन आम्हासी

आप्तेष्ट-स्वजनांसंगे ऐकू हो गीत तुझे

लाभो आम्हा भाग्य नाते चैत्रपालवीचे

नववर्ष आगमने होऊनी प्रफुल्लीत

उभारू गुढी घरी-दारी सजवू आरास फुले रंगीत

दे कोकिळे दे आम्हा नवचैतन्य

दशदिशा उजळो तेजे जन्म सफल धन्य

सौ. मेधा श्रीश कामत

शोधीत पाऊलखुणा

noreply@blogger.com (Preeti Kamat - Telang) — Tue, 31 Dec 2019 05:00:00 +0000

शोधीत पाऊलखुणा

रोजचाच तोच तुडवित रस्ता

रोजच्याच ह्या पायवाटा

हातात घेऊनी हात सख्याचा

घेत मागोवा सरत्या वर्षाचा

शोधीत चालले मी पाऊलखुणा

क्षणक्षण आठवित वेचीते कणाकणा

दिनरात देशील ना रे तू साथ

राहू दे हातात तुझाच रे हात

रोजच्याच नाही परि अपरिचित

नेतील सत्वरी परतीच्या पथावरी अवचित

-सौ. मेधा श्रीश कामत

बुकमाया परिवारातर्फे गुढी पाडवा आणि नविन वर्षाच्या खूप खूप हार्दिक शुभेच्छा!!

noreply@blogger.com (Preeti Kamat - Telang) — Sat, 06 Apr 2019 03:15:00 +0000

नंदादीप

noreply@blogger.com (Preeti Kamat - Telang) — Sat, 16 Mar 2019 02:29:00 +0000

नंदादीप

देहाच्या कुडीत

पंचप्राणांचा विसावा

मनाच्या गाभारी

बुद्धीचा दिवा दिसावा

त्यात जो घालेल

विचारांचे तेल

सारासार निर्भेळ,

नको घालमेल

भिजवाया त्यात

जो थोडा वेळ

अहंभावाची वात

हसत वळेल

विवेकी भावनेचा

खडा जो घासेल

स्फुल्लिंग ज्ञानाचं

त्यातून चेतवेल

जव मी पणा जळेल

तव मायामोह गळेल

स्वार्थ सारा सरेल

चिद्शक्ती उमलेल

त्याच्या ठायी प्रकाशेल

नवल की उलगडेल

उजेडात त्याला अनंताचे

आत्मदर्शन घडेल

मग स्वतःचे स्वतःशी

संधान जुळेल

भेटता त्यासी त्याची

खूणगाठ ही पटेल

नंदादीप हा जेथ तेवेल

भय ते अवघे नुरेल

तम तळी चैतन्यवेल

तेथ दिवाळी उजळेल

-सौ. प्रीति कामत-तेलंग

बुकमाया परिवारातर्फे तुम्हा सर्वांना मराठी भाषा दिनाच्या खूप खूप शुभेच्छा !!

noreply@blogger.com (Preeti Kamat - Telang) — Wed, 27 Feb 2019 14:23:00 +0000

मराठीचे थोर सुपुत्र , कविवर्य कुसुमाग्रजांना विनम्र अभिवादन करुन आजच्या मराठी भाषा दिनाच्या निमित्ताने सर्व मराठी भाषा प्रेमींसाठी मनःपूर्वक शुभेच्छांसह “मराठी भाषेचे मनोगत” सांगणारी माझ्या आईने (सौ. मेधा कामत) रचलेली ही कविता सहर्ष सादर करतेय:

मी मराठीमाता

विश्वाची ह्या, सालंकृत मी मराठीमाता

उत्कर्षे तुमच्या खुलूनी येई माझी चारुता

संतमहंत आणि थोर विद्वज्जन

लेकरे माझी ती, करती प्रबोधन

ऐकूनी त्यांची विजयगाथा

सुखवे अंतरी माझा पान्हा

धन्य मी थोरवी लेकरांची ऐकता

लेकुरवाळी मी कुटुंबवत्सल माता

पाठ फिरवूनी गेलात दुर्लक्षून जर

आशेने पाहू कोणाकडे सांगा तर

रंगमय रसमय कूस माझी समृद्ध

नसांतूनी वाजे ताल लय आणि नाद

वाढविण्या साज माझा झटती जे आजही

यशोदालने खुली त्यांना अन् दिशा दहाही

जयजयकारे तुमच्या तळपे माझे तेज

पुण्यवान मी, कृतार्थ मी, भाग्य हेच

का? कशास होऊ मी दीनवाणी?

वर्षाव यशाचा, माझे हृदयी अमृतवाणी

शब्दसुमनांचा फिरवूनी विशाल कुंचला

माझी मुले देती मला नवा तजेला

हेवा करोत कोणी माझ्या वैभवाचा

ऐश्वर्यसंपन्न मी, हात नित्य आशीर्वादाचा

तळपत रहाती जोवरी चंद्रसूर्य

चिरकाल खुलेल माझे हे सौंदर्य

-सौ. मेधा श्रीश कामत

बोरीवली (पूर्व)

मुंबई

बुकमाया परिवारातर्फे तुम्हा सर्वांना मराठी दिनाच्या खूप खूप शुभेच्छा !!

noreply@blogger.com (Preeti Kamat - Telang) — Tue, 27 Feb 2018 05:21:00 +0000

बुकमाया परिवारातर्फे तुम्हा सर्वांना मराठी दिनाच्या खूप खूप शुभेच्छा !!

आज २७ फेब्रुवारी..आज ज्ञानपीठ पुरस्काराने सन्मानित साहित्यिक आणि कविवर्य कै. वि. वा. शिरवाडकर उर्फ कुसुमाग्रज यांचा जन्मदिवस. ह्या प्रतिभावंताने आपल्या कर्तृत्वाने मराठी साहित्यात अत्यंत मोलाची भर घातली आहेच. त्याही पुढे जाऊन मराठी भाषेला राष्ट्रीय आणि जागतिक स्तरांवर महत्वाचे स्थान मिळावे याकरिता त्यांनी निर्भीडपणे मांडलेले विचार आणि खेडोपाडी मराठीची गोडी रुजविण्यासाठी त्यांनी घेतलेले परिश्रम खरोखरच मौल्यवान आहेत. दरवर्षी त्यांच्या जन्मदिवशी आपण सर्व मराठी जन 'मराठी भाषा दिवस' आनंदात साजरा करतो हा जणू मराठी भाषेचाच गौरव आहे. मराठीच्या ह्या सुपुत्राला विनम्र अभिवादन !! मराठी भाषा दिनानिमित्ताने सादर करत आहोत एक काव्यपुष्प...

कविता : मायबोली मराठी मी

कवयित्री: सौ. मेधा श्रीश कामत

काव्यवाचन : सौ. प्रीति तेलंग

मायबोली मराठी मी

मायबोली मराठी मी, कळवळून ना मारीत हाका,

नाही मी दुर्बल, प्रसंग मात्र तुम्हांवर बाका

अमृत प्राशून माझे, तुम्ही घडला विद्वान थोर

जीवनरस तो अक्षय पिऊनी, आता का होता निष्ठूर?

मार्ग ना दाविला, करतील काय पांथस्थ ?

घृणा ही ना स्वतःची, ना वाटे तुम्हा खंत ?

आठवा ती नररत्ने, ती स्फूर्तिस्थाने,

गाऊनी कवने, पोवाडे, केली जागृति त्यांनी लेखणीने

होऊनी दुर्बल नका ओढवू विकोप विनाशक,

तुम्ही अनुयायी थोरांचे, तुम्ही ज्ञानाचे साधक

बंधमुक्त झालात शृंखला परक्यांच्या तोडूनी,

आज ते ही गाती थोरवी माझी माझ्या चरणी

करा तुम्हीही यत्न -प्रयत्न, नको मज नैवेद्य आणि धुप

उभी सामोरी मी अभिजात, मूर्त सालंकृत रुप

ही तळमळ अंतरीची होऊनी प्रबळ, सावरेल जेव्हा एकमेकां,

वाजू द्या नगारे - दुंदुभी, आता जयजयकार माझा ऐका

-सौ. मेधा श्रीश कामत

‘वीज म्हणाली धरतीला’ ह्या नाटकातील राणी लक्ष्मीबाईची ऐतिहासिक घोषणा

noreply@blogger.com (Preeti Kamat - Telang) — Tue, 10 May 2016 15:13:00 +0000

१८५७ सालच्या भारताच्या पहिल्या स्वातंत्र्य समराच्या पर्वाचे स्मरण करताना त्या समरातील अग्रणी योद्धा असलेल्या राणी लक्ष्मीबाईंचे स्मरण झाले. कै. वि. वा. शिरवाडकरांनी राणीच्या युद्धकालीन चरित्रावर लिहिलेल्या ‘वीज म्हणाली धरतीला’ ह्या नाटकातील राणी लक्ष्मीबाईची ऐतिहासिक घोषणा आज सादर करते.

मराठी मेवा - दिवस पंधरावा - क्रमांक १५

noreply@blogger.com (Preeti Kamat - Telang) — Fri, 15 Jan 2016 14:54:00 +0000

मराठी मेवा - दिवस पंधरावा - क्रमांक १५

कविता : मी सूर्याची किरणशलाका

रचना व काव्यवाचन : प्रीति कामत तेलंग

मराठी मेवा - दिवस चौदावा - क्रमांक १४

noreply@blogger.com (Preeti Kamat - Telang) — Thu, 14 Jan 2016 17:43:00 +0000

मराठी मेवा - दिवस चौदावा - क्रमांक १४

कथा: गोपाल भारची करामत (बंगाली लोककथेचा मराठीत स्वैर अनुवाद)

अनुवाद आणि कथाकथन: प्रीति कामत तेलंग

मराठी मेवा - दिवस तेरावा - क्रमांक १३

noreply@blogger.com (Preeti Kamat - Telang) — Wed, 13 Jan 2016 14:37:00 +0000

मराठी मेवा - दिवस तेरावा - क्रमांक १३

कविता : नमस्ते कुसुमाग्रजा

कवयित्री: सौ. मेधा श्रीश कामत

काव्यवाचन : सौ. यामिनी तेलंग

कविवर्य कुसुमाग्रजांच्या स्मृतींना विनम्र अभिवादन!

नमस्ते कुसुमाग्रजा!

नमस्ते कुसुमाग्रजा! सय ठेवूनी गेलात

गोड हिरव्या मखमली नि रेशीम बंधनात

किमया तुमच्या जादूभऱ्या शब्दांतुनी

जगता सजविले कुसुमे तुम्ही पसरुनी

हळूवार प्रेमभावना त्यातुनी स्रवती

आजही चिरतरुण मने हृदयस्पर्श अनुभवती

भवतीच्या ऋतुंची किमया रुजविली मनोमनी

त्या सामर्थ्ये आजही फुले गंधित फुलती जीवनी

निष्पर्ण रानी फुलविली कधी प्रेममाया

कधी जागविली वीरता ललकारुनी धैर्या

ऋषीतुल्य तुम्ही, गुरुस्थानी आम्हा

वारसा दिधला वंद्य तुम्ही आम्हा

द्या गोडवा वाणीचा नि लेखणी तेजाची

जन्मलो या भारती, सेवा करु मराठी मायबोलीची

द्या आशीर्वाद, कवीश्वर तुम्ही प्रतिभावंत

पूज्य तुम्ही, करतो मानाचा मुजरा आम्ही भाग्यवंत

सौ. मेधा श्रीश कामत

मराठी मेवा - दिवस बारावा -क्रमांक १२

noreply@blogger.com (Preeti Kamat - Telang) — Tue, 12 Jan 2016 12:40:00 +0000

आज स्वामी विवेकानंदांची जयंती अर्थात आपला राष्ट्रीय युवा दिन आपण आज साजरा करत आहोत. त्यानिमित्ताने भावी युवा पिढीला अत्यंत अनमोल शिकवण देणारी स्वामी विवेकानंदांचीच एक गोष्ट आज सादर केली आहे. जरूर ऐका

मराठी मेवा - दिवस बारावा -क्रमांक १२

कथा : मुलाचे पाय पाळण्यात दिसतात

कथाकथन : प्रीति कामत तेलंग

थोर माणसांचे गुण लहानपणीच त्यांच्या वागण्यात दिसतात त्यावरूनच ‘मुलाचे पाय पाळण्यात दिसतात’ अशी म्हण प्रचलित झाली आहे. गरीब मित्राला मदतीचा हात पुढे करण्याच्या छोट्या नरेंद्राच्या साध्या कृतीतून त्याची कनवाळू वृत्ती पाहून त्याची आई काय करते ते ऐका ह्या कथेतून. तुम्हाला ही कथा कशी वाटली ते आम्हाला जरुर सांगा.

मराठी मेवा - दिवस अकरावा - क्रमांक ११

noreply@blogger.com (Preeti Kamat - Telang) — Mon, 11 Jan 2016 14:38:00 +0000

मराठी मेवा - दिवस अकरावा - क्रमांक ११

कविता - माझा गाव

कवी : कै. बा. भ. बोरकर

काव्यवाचन : प्रीति कामत तेलंग

मराठी मेवा - दिवस दहावा -क्रमांक १०

noreply@blogger.com (Preeti Kamat - Telang) — Sun, 10 Jan 2016 13:17:00 +0000

मराठी मेवा - दिवस दहावा -क्रमांक १०

ललित : सूर्याचे दूरदर्शन

लेखन आणि वाचन : प्रीति कामत तेलंग

मराठी मेवा - दिवस नववा -क्रमांक ९

noreply@blogger.com (Preeti Kamat - Telang) — Sat, 09 Jan 2016 11:44:00 +0000

मराठी मेवा - दिवस नववा -क्रमांक ९

आज ऐकुया काव्यवाचन …. आमची आई स्वतः सिद्धहस्त शीघ्र कवयित्री आहे. बालकविता, प्रेमकविता यांसोबतच तिने रचलेल्या काही विचारनिष्ठ मुक्तकविता देखील वेळोवेळी विविध नियतकालिकांतून प्रसिद्ध होत असतात. तिच्या अशाच मुक्तकवितांपैकी ‘अनंतकाळची माता’ ही एक कविता २०१४ च्या संस्कारदीप दिवाळी अंकात प्रसिद्ध झाली होती. ती फार गाजली देखील. आज तीच कविता तुम्हाला ऐकवताना पुनर्भेटीचा आनंद होतोय.

कविता : अनंतकाळची माता

कवयित्री: सौ. मेधा श्रीश कामत

काव्यवाचन: सौ. प्रीति कामत तेलंग

अनंतकाळची माता

हे शक्ति, हे नारी वंद्य तू विरांगना

किती म्हटले जरी तू ना अबला ललना

असे सत्य ऐकण्या कठिण, काही पुरुषांना

अवतीभवती, तुमच्या घरी पहाता त्या वावरताना

पुरुषाला जन्मही स्त्रीच देते

तुमची मर्दुमकी येथे फोल ठरते

कळा यातना भोग का तिला देता

ती नीच आम्हीच मोठे म्हणून मिरविता

पुरुषांनो, एवढे असाल जर स्वयंभू-बलशाली

तुम्हीच वाढवा तर पोटी तुमच्या वंशावळी

छळून पिडून घेता तिचा नाहक बळी

हीच म्हणे खूण पुरुषार्थाची आगळी वेगळी

अंश प्रसावूनी तू मानव घडविणे गोष्ट नाही खरी

नको बनूस दानव, जगती माननीय आहे नारी

खजील होई विधाता पाहूनी तुमचा ताठा

ज्याने दिला बहुमान स्त्रीला बनवूनी

अनंतकाळची माता

- सौ. मेधा श्रीश कामत

मराठी मेवा - दिवस आठवा -क्रमांक ८

noreply@blogger.com (Preeti Kamat - Telang) — Fri, 08 Jan 2016 16:08:00 +0000

मराठी मेवा - दिवस आठवा -क्रमांक ८

बालकथा: पराक्रमी गंपू ( लोकसत्ता - रविवार वृत्तमानस मधून साभार)

लेखक : विनायक कुळकर्णी

कथाकथन: प्रीति कामत तेलंग

मराठी मेवा - दिवस सातवा - क्रमांक ७

noreply@blogger.com (Preeti Kamat - Telang) — Thu, 07 Jan 2016 17:17:00 +0000

आजचा मराठी मेवा - दिवस सातवा - क्रमांक ७

जैसी हरळांमाजि रत्नकिळा ।

कि रत्नांमाजि हिरा निळा ।

तैसी भासांमाजि चोखळा । भासा मराठी ॥

जैसी पुस्पांमाजि पुस्पमोगरी ।

कि परिमळांमाजि कस्तुरी ।

तैसी भासांमाजि साजिरी । मराठिया ॥

पखयांमधे मयोरू । वृखियांमधे कल्पतरू ।

भासांमधे मानु थोरू । मराठियेसि ॥

तारांमधे बारा रासी । सप्त वारांमधे रवी-ससी ।

या दिपिचेआं भासांमधे तैसी । बोली मराठिया ॥

- फादर स्टीफन्स

( ख्रिस्तपुराण )

मराठी मेवा - दिवस सहावा - क्रमांक ६ एकतेचे बळ

noreply@blogger.com (Preeti Kamat - Telang) — Wed, 06 Jan 2016 15:44:00 +0000

मराठी मेवा - दिवस सहावा - क्रमांक ६ एकतेचे बळ

बुकमायाच्या प्रिय बालमित्रांची ही आवडती कथा कथन केली आहे खास तुमच्यासाठी लोकाग्रहास्तव पुन्हा एकदा!!

कथाकथन : यामिनी तेलंग

चित्रफित संकल्पना: डॉ. अजिंक्य कामत

छोटे छोटे पक्षीदेखील एकत्र मिळून मोठी कामगिरी कशी करतात ते ऐका ह्या कथेतून : एकतेचे बळ

मराठी मेवा - दिवस पाचवा - क्रमांक ५

noreply@blogger.com (Preeti Kamat - Telang) — Tue, 05 Jan 2016 11:35:00 +0000

मराठी मेवा - दिवस पाचवा - क्रमांक ५

उतारा वाचन - सौ. श्यामल टिपरे यांची डायरी

वाचक : प्रीति कामत तेलंग

पुस्तक : अनुदिनी

लेखक : दिलीप प्रभावळकर