وصلني قبل كم من يوم إهداء جميل من الأخ المدون الإماراتي خالد السويدي ..

والهديه عبارة عن نسخه موقعه من كتابة الجديد ” بطل رغم أنفي ” ..

والكتاب عباره عن مجموعة من القصص من تأليف الكاتب .. تحكي الواقع اللي يعيشه المواطن ..

وكلنا نعرف خالد واسلوبه الساخر

وأحلى ما في القصص .. قصة ” إسماعيل شاكليته ” هههههههه جد يا خالد وش كثرهم هالأشكال

وشكراً كبيراً كثيراً على هالهديه يا خالد وعقبال ما تهديني بانشي

——————-

في بداية الكتاب كان هناك هذا الإهداء من الكاتب ..

الإهداء

إلى كل من تؤرقه هموم الوطن والمواطن

إلى كل إنسان بسيط ذاق طعم المعاناة

إلى محمد وعائشه وعمر ومريم وأسماء

هذا الكتاب مني لكم

————————–

لمعرفة المزيد عن الكتاب وطريقة الحصول عليه تفضل بزيارة هالموضوع

في تاريخ 24 يونيو 2008 يعني قبل سنه بالضبط .. كان وزيرنا المقدام القصيبي صاحب الفكره الذهبيه في السعوده السفليه .. كان قرسون
والسنه هذي وبنفس التاريخ .. طلع لنا بزي مقدم الطلبات وقدم الجبن والزيتون للمتسوقين ..

وكل هذا من أجل ان ينجح مشروعه في السعوده السفليه ..

طبعاً من يوم طلع لنا وزيرنا الموقر العنيد اللي بالغصب تنجح خططه .. ما سمعته ولا يوم تكلم عن الجنسيات الجنبيه اللي تشغل المناصب في الشركات الخاصه .. والمافيا اللي هي مسويتها من اعلى الشركه الى اسفلها وفي الأخير وعن العين والنفس سعودو الحارس والسواق ..

ما سمعناه يتكلم عن المهندسين العاطلين واللي يشتغلون بوظائف غير وظائفهم بسبب انشغال وظائف الهندسه بالهندي والباكستاني والفلبيني ..

ما قال لنا كيف بيقدر يعيش مقدم الطلبات في ديرتنا؟

ما ادري هل يعرف وزيرنا الموقر ان سعودة مثل هذي الوظائف الدونيه اللي راتبها ما يزيد عن 1500 ريال هو في صالح الشركات فقط .. منها محسوبه لهم سعوده .. وبنفس الوقت اوفر لهم من العامل الاجنبي اللي مكلفين باكله وشربه وسكنه واقامته وتجديد اقامته وتذاكر سفره .. بينما السعودي ماهم ملزومين يوفرون له هالاشياء ..

يا وزيرنا الموقر .. انا على استعداد كامل اني اشتغل زبال واخلي الابتسامه تملى وجهي .. اذا اني داري اني في آخر اليوم راح اركب سيارتي الالمانيه الفاخره وارجع لمكتبي في وزارتي .. وفي نهاية يومي برجع لقصري واشرب لي ذاك الفنجال بين عيالي اللي خدودهم ورديه من زود النعمه ومن زين الوظائف اللي هم فيها .. هذاك مدير شركه والثاني مهندس في اطلقها شركة و بنتي في احلى وظيفه واتخنها ..

فلبس مقدم الطلبات وجلستي ورا الكاشير يوم واحد ماهو ذاك الانجاز .. اذا قارناه بعدد العاطلين من اصحاب الكفاءات ..

ولو انك سائلني كان قلت لك ياليتك رجعت لنفس المطعم اللي صورت فيه العام وقلت لنا وش أخبار السعوديين اللي صورت معاهم العام .. وش اللي صار على حالهم .. وايش اللي تحسن وتغير في حياتهم .. وهالتصرف كان بيثبت لنا انك مهتم في مستقبل الشاب السعودي ..

لكن انا بالنسبه لي اعتبر اللي قاعد تسويه يا وزيرنا الموقر مجرد تمثيل على الشعب وخيانه لهم .. ومجرد محاوله فاشله من قبلكم لإنجاح مشروعكم في السعوده السفليه ..

سعادة الوزير نبيك تنزل للعالم وتسمع منهم وتعرف وش يعانون منه ..

وانت بتصرفاتك هذي تذكرني بسالفة اللي كان يشتكي من ضيق ثوبه للخياط .. والخياط يقوله بس وش رايك في لونه؟؟

وفي حالتك .. المواطن يشتكي من قل الوظايف ومن المافيا في الشركات وانت رايح وراجع على معلم الشاورما ومقدم الطلبات ..

سعادة الوزير ..

خططكم أنتجت لنا ..

سوق سوداء في فيز الاقامه ..

انتشار الرشوه في مكتب العمل ..

ارتفاع رواتب العماله ..

الكثير من المشاريع الصغيره اعلنت افلاسها ..

ارتفاع مستويات البطاله .. مما نتج عنه ارتفاع مستوى السرقه ..

وكالعاده أقول .. واللسته تطول ..

تدري يا سعادة الوزير .. اني تحسفت اني قريت جريدة الوطن اليوم .. لان الموضوع اللي فيه صورتك غثني .. وخصوصاً يوم قلت لي ان الموظف السعودي لا يهمه زيادة الراتب .. بل يهمه معرفة مستقبله ..

سعادة الوزير .. أكرهك وما ابي اصير صديقك

(أدري إن الأغلاط الإملائيه مليون .. بس ماني مراجعها لأني مابي انغث من الكلام اللي كاتبه)

_______

تدوينه سابقة :

في الأمس كنت أتابع فلم WHERE IN THE WORLD IS OSAMA BIN LADEN? .. عن شخص أمريكي يبحث عن أسامه بن لادن ..

وتجول في رحلته في عدة دول منها السعوديه , أفغانستان و باكستان ..

وكان في تتبعه يعتمد على انه يربط بين الناس المتوقع انهم يعرفون مكان أسامه بن لادن .. بحيث انه يبداء من نقطه الى نقطه حتى يصل الى أسامه ..

طبعا كان فيه نوع من الكوميديا .. واخراجه كان جميل ..

ولكن اللي عبته على هالفلم انه كل ما يجيب طاري الارهاب , أو أحد ضيوفه يتكلم عن الارهاب .. يجيب في الخلفيه صوت الأذان وناس تصلي ..

بحيث انه يربط بين الإرهاب وبين الدين ..

عموما سواء هذا قصده أو لا .. فهو شخص أمريكي غير مسلم وغير سعودي بالتأكيد ..

ويهمه انه يطلع صورة أمريكا بأجمل شكل .. و يمكن من مفهومه وتأثره بالإعلام ربط بين الاسلام والصلاه والأذان والإرهاب ..

لكن اللي غثني في الفلم .. إنه وأثناء بحثه عن أسامه بن لادن .. استضاف شخصيه .. والظاهر انه من عشاق النساء وكارهين المطاوعه اللي يسمون نفسهم الليبرالييون السعوديين ..

لأنه كل ما سئل صاحبنا الأمريكي عن أي أمر في السعوديه  .. نقز له ” أبو لبرل ” وقاله .. هذا بسبب المتشددين .. وان السياسه في السعوديه تدخل في المتشددون وسبب الارهاب هم المتشددون ويجب إبعاد “ المتدينون ” من أي شئ له علاقه في السلطه والسياسه .. ولا تنجح أي دوله يوجد فيها متدينون يتقلدون مناصب سياسيه .. وخلى الدنيا واللقاء واسامه بن لادن وضيفه الامريكي وطاح لك في المتدينون ..

طيب يا عزيزي يا أبو لبرل .. ماعاد تقدر تفرق بين الأمور .. خلاص من يوم تشوف كاميرا ومايك تبداء تتكلم عن المتدينون اللي في أول أمرك كنت تقول عنهم متشددون بس بعدين طلع اللي بقلبك وبديت تتكلم عن المتدينون وليس المتشددون ..

طبعاً للعلم في كل اللقاءات كان صاحبنا الأمريكي متفاعل مع الضيوف .. إلا مع هذا الشخص .. لأنه والله العالم حتى الأمريكي حس ان الشخص هذا غير منصف .. وواضح ان بقلبه غل ..

طبعاً الفلم تنقل بين شخصيات مختلفه وجنسات ومواقع مختلفه … وكلهم كان كلامهم منطقي … سواء الفلاح او سواق الباص او الشيخ او العالم او السياسي او الدكتور سواء كان يوافقون أسامه بن لادن أو ضده …

إلا صاحبنا أبو لبرل .. غثيث وكلامه ما ينبلع وممل ولا له لا طعم ولا ريحه .. والأكثر مللاً هو جلسته المنطعجه وثوبه الشفاف ..

بس اللي برد خاطري .. ان حتى المخرج ما كتب اسمه:)

وفي آخر الفلم تكلم صاحبنا الأمريكي ان الموضوع كله مايسوى البحث عنه .. لأن المشكله ماهي في أسامة فقط .. المشكله في الفكر .. وبدا يتكلم عن أمريكا ويقول ان الناس اللي كنا خايفين منهم ونتوقع انهم وحوش مفلوته .. طلعو ناس مثلنا مثلهم يبون يعيشون بسلام .. فيجب علينا ان نصحح فكرتنا تجاه العالم لكي نستطيع ان نعيش بسلام ..

وعاد أدراجه الى أمريكا وزوجته اللي على وجه ولاده … وفي آخر الفلم ولدت زوجته وجابت ولد .. وقربو الصوره على الولد إشاره منهم إن المستقبل هو المهم لهؤلاء الأطفال ..

طبعاً هالكلام بيزعل أبو لبرل

—————————–

هالصنف من عشاق النساء وكارهين المطاوعه .. يجيبون لي الهم ويذكروني بالواحد المتعلث اللي يدور سبه على الشخص .. وكرههم للمطاوعه مخليهم يطلعون بشكل غبي إلا عند الأشخاص اللي على شاكلتهم ..

أذكر واحد منهم كان كاتب مقال يصارخ فيه لدرجة ان الجريده كانت تهتز من حماسه .. والمقال كان يتكلم عن حصة الرياضه في مدارس البنات .. وصدقوني ماطرح في الموضوع اي نقطه .. وما قال اي شئ علشان يوضح الشئ اللي يبيه .. واكتفى بس با ستهزاءه بالمتدينين .. وهذا الشئ اللي خلاني أعرف ان القصد كل القصد من هذا المقال ومن هذا الصراخ هو ان يجد شئ على المتدينين طبعاً الجهه التنفيذيه هي الوزاره والوزير … يعني مفروض يتكلم عن الوزاره حتى لو كانو المتدينين معارضين هالشئ .. مفروض انه يتكلم عن الوزاره ويوجه كلامه للوزير وللمسؤولين .. ولا الموضوع شخصي بينك وبين المتدينين؟

———————–

طبعاً مثل مافيه بهذي الجهه من عشاق النساء وكارهين المطاوعه التافهين .. فيه بالجهه الأخرى كارهين الابتسامه وعاشقين الحزن ممن يتصيدون للشله السابقه الذكر في الرايحه والجايه والطعن في أي قرار جديد بأنه ناتج عن أيدي خبيثه تريد بنا وبأمة الإسلام الشر والفساد .. ويقصد أبو لبرل بكلامه هذا ..

وبين هالفئتين المتقاتلتين الشعب ضايع وماعمري سمعتهم يتكلمون عن شئ لمصلحة الشعب .. فهم يدفع لهم للقيام بهذا الدور فقط

والشرهه ماهي عليهم .. الشرهه على اللي مخليهم يتهاوشون قدام العالم …

وما اقول الا ياليت أمركم في يدي

—————————

عموماً أنا كان قصدي من كل هالتدوينه .. أقولكم شوفو الفلم تراه جيد

—————————

مواضيع قد يكون لها علاقه :

فلاش (5)

سؤال المليون :-

ماهو سبب الإبتسامة الشقاقيه للمليحين الثلاثه اللي في الصوره؟

هالابتسامه سببت للشعب السعودي الزعل .. فهل عرفتو السبب؟

سبق وبينت عن انتمائي وحبي لبرنامج مراحب وهذا الحب قديم ولاعب في قلبي لعب ..

يخرب الحب شو بيزل

بس حب مراحب ما ” يزل ” إلا يثقف ويعلمك اسلوب الحوار وتقبل الأفكار ويفتح أمامك أبواب جديده ..

وبما إني مرحباوي ومتعصب بعد .. وكما جرت العاده على أن عشاق الأنديه يتابعون أخبار ناديهم ويحضرون مبارياته ..

فأنا أيضاً كوني متعصب فأنا أتابع أخباره وأحضر مبارياته .. وقبل اسبوعين كانت لي فرصه لحضور إحدى مبارياته التي كانت في ملعب مجمع المهلب ..

وكانت المباراه بين المذيع المتألق يوسف جوهر وبين محبين برنامج مراحب ..

وكان الحكم هو المخرج عبدالله اليوسف .. وحكم الرايه هو مساعده خليفه محمد صاحب الدردور

وأجمل مافي هذه المباراه هو انه لا يوجد خاسر فالكل فائز ..

وهذا اللقاء الجماهيري يعتبر بادره من اذاعة الكويت ممثله في برنامج مراحب والقائمين عليه .. للتواصل مع متابعين البرنامج .. ويكون هذا التواصل عن طريق لقاء شهري يتم في أحد المجمعات التجاريه ويكون اللقاء على الهواء مباشره ..

ومثل ماقلت لكم كانت لي زياره لهذي الفعاليه .. وهذي أول مره أقابل القائمين وأشوفهم .. فبعد متابعه ومشاركه لمدة سنوات .. تم اللقاء

أول ما دخلت المجمع وشفت من بعيد الشباب قاعدين يجهزون للبث .. لأن الساعه قاربة على الساعه 9:30 اللي هي وقت بث البرنامج ..

ووقتها حسيت بالاحراج .. كأني وحده مخطوبه .. تقولون ليه ؟ والله ما ادري ..

مع اني بالعاده جريئ في مثل هالسوالف بس يمكن لأنه أول مره أحضر حسيت بالاحراج ..

وعلى طول توجهت لجهة المعدين وسلمت عليهم وعرفتهم بنفسي .. و بعدها شفت الشاب الحليوه أبو يعقوب قاعد يجرب المايك ومنشغل في اللابتوب .. وقلت للمخرج اليوسف .. هذا اللي جابنا من السعوديه وضحك وقتها المخرج وعرفني على ابو يعقوب ..

أبو يعقوب كانت تدور بيني وبينه مناقشات أثناء البرنامج .. ومن الأشياء اللي تميز الأستاذ يوسف جوهر .. إنه ما ينسى اللي يشاركون .. فأول ما عرفني عليه المخرج وقاله هذا ابراهيم القحطاني من السعوديه .. كان وقتها مشغول .. لكن أول ما خلص اللي بيده ناداني وجلسني جمبه على الطاوله ورحب و هلا فيني وكأنه يعرفني شخصياً .. وهذا ان دل فيدل على طيب أصله .. وبدون مقدمات سمعته يقدمني بشكل رسمي وحسيت وقتها انهم بدو البث على الهواء .. وكانت أول المشاركات مشاركتي .. وتجاذبنا الكلام عن متابعتي للبرنامج وعن البرنامج وعن موضوع ذيك الحلقه .. اللي هو كان عن ” الحريم وبلاويهم “ وطبعاً كانت لي مشاركة في هالموضوع عقلانيه .. لأني أدري ان خالتي أم المدام تسمع البرنامج  .

وكان من الأشياء اللي حمستني على الحضور .. هو رغبتي في اني اشوف كيف يديرون البرنامج .. وكيف تكون طريقة البث ..

واللي شفته تناغم كبير وتفاهم أكبر بين فريق البرنامج .. يكفي الاشارات .. والى الآن أنا ماني فاهم حركة الاصبعين اللي يسويها المخرج عبدالله اليوسف للمذيع يوسف جوهر .. بس الزبده ان ابو يعقوب فاهمها .. وهذا بالتأكيد من أسباب نجاح البرنامج و هذي الفعالية ..

و قابلت بعض المتابعين القدامى من نساء ورجال .. وكان منهم النوخذه عبدالله الفيلكاوي وتشرفت بمقابلته وبالحديث معه .. وعبدالله الفيلكاوي من يوم وصل للموقع وانا حاس انه هو .. لأنه على طول اتجه لفريق البرنامج ووزع عليهم باقات الورد والابتسامه شقاقي .. واللي يتابع البرنامج بيعرف مدى العلاقه بين عبدالله وبين فريق البرنامج ..

وبعدها دار حديث بيني وبين المخرج عبدالله اليوسف .. وتكلمت معاه عن مشروع خاص لبرنامج مراحب ووافق على فكرتي و إن شاء الله هالمشروع بيشوف النور قريب  ..

وبعد انتهاء الحلقه سلمت على الجميع وخصوصاً الاستاذ يوسف جوهر .. وكان هذا نهاية اللقاء الجماهيري ..

وهنا أحب أن أشكر كل من :

• المخرج عبدالله اليوسف
• مساعده خليفه محمد
• المتألق يوسف جوهر
• المذيعه فريدة دهراب .. واللي كانت في العمره (تقبل الله)
• ياسمين الحسن
• والنوخذه عبدالله الفيلكاوي .. وأقوله تراني الى الآن أنتظر
• و إذاعة الكويت عامه
• وجميع المشاركين

على إنجاحهم لهذا اللقاء ..

وهذي بعض الصوره اللي التقطتها في ذاك اليوم ..

يوسف الجوهر يحاور أحد الضيوف

يوسف جوهر يحاور عبدالله الفيلكاوي( يمين الصوره)

المخرج عبدالله اليوسف ومساعده خليفه محمد و فريق البث الخارجي

المتألق يوسف جوهر يجهز أوراقه قبل بداية البث

سيارة البث الخارجي

عبدالله اليوسف يمين الصوره وخليفه محمد

وشكراً لزوجتي العزيزه اللي سلفتني جوالها علشان التقط هالصور .. لأن جوالي باقي له يومين ويدخل العنايه المركزه بعد معاناه لمدة اسبوعين من مرض الزهايمر .. بدون مقدمات ينسى انه صور .. ويمسح الصوره بكيفه

روابط :

الاحتفال بالملتقى الأول لجمهور «المرحباوية»

تأكيداً للتواصل “مراحب” يكرم مستمعيه

• عزيزي الطالب .. بما إن الإمتحانات على الأبواب أحب أقولك إن كانك تبي تفلح وتتفوق وتتخرج بنسبه زي الناس تؤهلك انك تدخل جامعه سنعه وتتخرج وتلقى لك وظيفه محترمه وتتزوج متى ما تبي وتسافر وين ما تبي .. فأنا أقولك شد حيلك .. وإن كانك ماتبي تذاكر .. بقولك باللي ما يردك والوعد مكتب التوظيف وانت تطر فلان وفلان يشوف لك دبره ..

• عزيزي الموظف : إن كان تبي العمر يعدي على خير وان كان تبي تقوم الصباح مرتاح وتمسك الطريق وانت مبسوط ومبتسم وتوصل دوامك وتسلم على ربعك وتصبح عليهم … فأنا أقولك حب دوامك أو حاول تحبه .. وان كانك مانت قادر قدم استقالتك ودور لك وظيفه ثانيه , وما تدري رزقك وين.
• عزيزتي الزوجه : إن كانك تبين تعيشين حياه سعيده مع زوجك وفيها رومنسيه وطلعه رايقه والزوج مشتاق لشوفتك والقعده معك … فأنا أقولك تسنعي وخلك مَره راعية بيت وخلي عنك نصايح فلانه وعلنتانه ولا تاخذين الشور  من وحده بيتها دمران او عايشه في جحيم .. وتذكري دايم ترى السعيده في بيتها ما تتكلم عن سعادتها في المجالس .. و إن كانك ما تبين باللي ما يردك وابشري بزوج ينكد حياتك ويجيب لك الضغط والسكر ..
• عزيزي الزوج : إن كانك تبي تعيش حياه سعيده رومنسيه فيها راحة البال واذا رجعت البيت لقيت لقمتك جاهزه و اذا صحيت العصر لقيتها مزينه لك ذيك القهوه والشاي واذا ضاق صدرك لقيت من يواسيك ويحن عليك ويطلعك من ضيقتك .. فأنا أقولك عامل زوجتك مثل ما تحب أن تعاملك , وإبتعد عن الفوقيه في التعامل وترى هذي زوجتك ماهي عبده عندك وعزها من عزك وكرامتها من كرامتك .. وان كانك ماتبي ابشر ببيت يضيق الصدر وضيقة خلق من يوم تقبل على بيتك ..

هذي اربع نصايح من اخوك الضعيف وببلاش ..

وان كانك تبي الأربع الباقيه أرسل مسج على الرقم المرادف لبلدك و الظاهر يسار الشاشه

مصدر الصوره

• أن يكون مسلماً
  
• أن يكون سالماً من البدعة المكفرة
  
• أن يكون ذكرا
• أن يكون على طهارة
• أن يكون عاقلاً: فلا تصح الصلاة خلف مجنون
• أن يكون قادراً على الإتيان بأركان الصلاة من قيام وركوع وسجود
• أن يكون قادراً على تلاوة الفاتحة وما تصح به صلاته
• أن لا يكون مأموماً في الحال أو في الأصل كالمسبوق إذا قام لقضاء ما فاته

و هذا اللي لقيته من شروط .. مع وجود بعض التفصيل في بعضها

لكن أنا متأكد انه في كل المراجع مافيه شرط يقول :

• أن يكون سعودياً

من وين جونا بهالشرط؟

—————–

فلاشات

في الامس كنت استمع الى برنامج الافتاء على اذاعة القرآن الكريم السعوديه ..

وكانت الاتصالات كالعاده عن حكم لبس البنطلون للمرأه و حكم التشقير وقيادة المرأه ..

وبعدها كان هناك اتصال من أحد المقيمين وهو سوداني الجنسيه يشتغل راعي في احد العزب ..

وكان سؤاله للمفتي العام .. إن أهل الحلال والعزبه لما يجوون في نهاية الأسبوع علشان يقضون وقت ..

يسهرون في الليل .. و يقول أنا مافيني على السهر فأخليهم واروح أنام ..

وفي ثاني يوم لما اجي محلهم القاهم خلو بعض الاغراض ما خذوها معهم ..

فهل يجوز اني آخذها؟

سئلة الشيخ آل الشيخ عن الأغراض اللي خلوها وش تطلع..

فرد عليه الراعي بأن الأغراض عباره عن مشروبات غازيه وجبن وخبز …

رد عليه الشيخ وبصوته واضحه الابتسامه و قاله يجوز يجوز خصوصا اذا انهم يدرون ان بتجي وتاخذها …

وهنا ارتاح صاحبنا الراعي وقال للشيخ الله يجزاك خير و انقطع الاتصال ..

—————–
بعد سؤال هالراعي جاء في بالي الناس اللي تسرق الملايين وتسرق دول وشعوب ..

وشلون يهنى لهم بال؟؟ وشلون ذا الراعي البسيط كان شايل هم هالجبن والبيبسي ..ولا ارتاح الا لما سمع ان الشئ اللي قاعد يسويه مافيه شئ وانه يجوز

وانتم قادرين تاكلون الحرام وتتفاخرون فيه بعد …

وهالسوداني يبي يتاكد من لقمته هل هي حلال ولا لا … مع انها مجرد بيبسي وجبن ..

وحسيت ان هذا الشئ هو سبب ابتسامة الشيخ ..

————–

الله يجزاه خير هالراعي على حرصه … وياويلكم من الله ياللي كليتو حلال العالم

وخصوصاً انت يا راعي تشغيل الاموال ياللي قاعد تتفاخر بتبرعات وشركاتك ومساهماتك ..

اذا جاء وقت الحساب بتتمى انك الراعي السوداني

—————-

الله يبعدنا عن الحرام

اللي يعرفني بيلاحظ اني شخص قليل التغيير ..

يعني أطبق نظرية ” حطني تلقاني ”

عندي وفاء لممتلكاتي … سواء كان جوال أو نظاره أو ساعه أو طاقيه أو شماغ أو نبيطه … دام الشئ اللي معاي شغال وماشي حاله وماهو مأذيني ما احب أغيره أو أرميه .. يمكن البعض لما قرا سالفتي مع العسكري ظن اني الى الآن أملك جوال برج العرب .. طبعاً السالفه صارت لي قبل 7 سنوات … لكن لو ان الجوال ما مات .. كان الى الآن بتلقونه معي .. واللي معي الحين n70 وشاريه قبل ثلاث سنين تقريباً ولو انه هالأيام ماهو قاعد يخرف ويكحكح ولا ماني مغيره ..

والنظاره والساعه نفس الطريقه … وطبعاً هذا الشئ ناتج عن اني احب احافظ على غريضاتي .. حريص

حتى الأشياء اللي أستعملها أو يكون لها موقف معي أحب أحتفظ فيها .. يعني مثلاً عندي فاتوره لشغله معينه لها 6 سنوات .. وعندي تذاكر سينما لها 5 سنين .. و عندي كرتون كامل فيه دفاتر قديمه من أيام الإبتدائي .. وأغراض مغبره .. أحب أقلب فيه من فتره الى فتره .. مدري ليه بس أحب أستذكر الأيام ..

و عندي وفاء للعادات .. خلاص اذا تعودت اقوم الخميس بدري .. فمعناه اني لازم اقوم الخميس بدري لو ان النوم شاق عيني … ومافيه اشكال ارجع ارقد بعدين .. بس اهم شئ الشكشوكه يوم الخميس .. وخصوصاً اذا اخوي مشعل يشاركني الفطور .

جاتني فترة .. تقريباً حوالي الثلاث سنين … كنا نقعد في نفس الكوفي وفي نفس المكان … الى درجة ان اللي يشتغلون في الكوفي صرت أعرف أسماء أمهاتهم ..

عندي وفاء عجيب للأكل .. يعني اذا حبيت وجبه معينه مستحيل أغيرها ولا أزيد عليها ولا أنقص منها .. وهذا اللي مخليني أجاكر بيكهام في الرشاقه ..

ونفس الشئ ينطبع على أخوياي ( شلة اللهو الخفي ) نفسهم هم هم من 9 سنين .. وما احب ولا يحبون انهم يدخلون ناس جدد في اللسته .. ومالي نيه أغير صحبتهم .. مع إنهم هالأيام طايحين بالهارلي ومخليني بسيكلي الصتي .. ويمكن مع الأيام ألحقهم .. بس يبي لي وقت

وأكثر شئ أكره إني أغيره هو ستايلي ( طيب يا ستايلي ) يعني اذا قرعت فاحط في بالك اني بستمر على هالموضوع اقل شئ 5 سنين , واذا خليت الدقن عوارض نفس الموضوع .. لكن سالفة اني كل اسبوع بشكل هذي انسى .. واستغرب من اللي كل اسبوع يطلع له بشكل .. يوم سكسوكه يوم بدون شنب يوم زلفه شابك مع سنبه ويوم دقنه شابك مع حواجبه .. هالشئ مستحيل أسويه وما أعرف أغير ..

طبعي هذا يخلي البعض يحسون اني انسان ممل .. ويكرر نفسه .. وأنا على العكس أشعر براحه ما تنوصف اذا اني تعودت على شئ معين .. وما اشوف انه فيه اي داعي اني اغير .. سواء كان طبع أو جهاز أو صفه .. وبنفس الوقت أستغرب من الناس اللي يغير شكله ولبسه و طبعه بل بعضهم حتى أخوياه يغيرهم

السؤال :- هل انت تحب التغيير؟ ولماذا؟ و هل كيف ؟

أفيدوني بنظرتكم يامال العافيه

—————————

العنوان مأخوذ من سنفور غضبان

الحادثه الأولى :

قبل 7 سنوات تقريباً كنت طالع من الجبيل في وقت متأخر من الليل .. وانا على الطريق جاني النوم .. وأنا النوم عندي ما يلاعب ..

يعني اذا جاني ينقض علي إنقضاض “سنوكا ”

علشان كذا أنا ما أحارشه …

فلما أحس بالنوم أقوله إن شاااااء الله واصفط على جمب واسدح السيت واستسلم له …

اللي صار اني وقفت على يمين الخط .. مقابل تحلية الجبيل .. وقلت خلني آخذ لي غفوه ..

اللي صار اني فتحت النوافذ وسدحت السيت وبديت أشاخر ..

المهم وأنا نايم حسيت فيه حركه حولي وبديت احس فيه واحد يتنفس قريب مني ..

فتحت عيني وانا منسدح داخل السياره ..

وش شفت؟؟

شفت ذاك العسكري اللي مدخل نص جسمه وصاير فوقي مباشره ..

أول ما فتحت عيني طلع جسمه من السياره .. وقالي وهو معصب وش عندك؟؟ وش قاعد تسوي؟؟

أنا النوم كان شاق وجهي ولاني مركز ..

قلت له وش رايك ؟ وش شايفني قاعد اسوي ؟؟ جاني النوم ونمت فيها شئ؟؟

قالي اخلص وحرك النوم هنا ممنوع !!

المهم وركب سيارته بسرعه وحرك .. انا رجعت بكمل نومتي .. وبعدين بديت انتبه !!

الحين هو وش مدخله داخل السياره بجسمه؟؟ ليه ما نبهني ولا ناداني وهو واقف ؟؟ وش عنده مدخل راسه ونص جسمه بالسياره ؟؟

قلت يمكن يبي يبوسني؟؟  هههههه ( مانت عاقل يا ابراهيم عجرم )

المهم طير النومه من راسي وقعدت افكر بسالفة ذا العسكري ..

بعدين انتبهت ان جوالي من نوع (برج العرب) كان عند القير وواضح ..

والظاهر حبيبنا .. رجل الأمن العيون الساهره .. كان يبي يلطش الجوال

ويوم قمت ما عرف وش يسوي .. قام صرف لي من عنده ان النوم ممنوع في هالمنطقه ..

جد مصيبه ان كان مثل هالأشكال نأمنها على بلدنا ..

وهذا اذا قالو لك حاميها حراميها ..

المهم رجعت وكملت نومتي .. بس هالمره سكرت النوافد وفتحتها على خفيف .. الواحد حتى في البر ما يأمن على نفسه

———————-

الحادثه الثانيه :

ولد عمي صاد له هندي داخل البيت على وقت المغرب في رمضان ..

كان ناوي يسرق البيت ..

المهم مسكه وعطاه من نصيبه من الحب والحنان

وربطه عند الباب وسلمه للشرطه يوم جوه ..

المهم ثاني يوم بعد التراويح .. طلع ولد عمي من المسجد إلا يلقى الهندي يبيع مساويك قدام المسجد ..

ولد عمي يطالع في الرجال ومشكك !! هو ولا مو هو ؟؟

وراح عنده وقاله أنا ماني ماسكك أمس ومسلمك للشرطه ؟؟

الهندي قال لولد عمي خلاص بابا أنا مافي سوي مشكل مره ثاني ..

قاله ولد عمي انت وشلون طلعت؟؟

قال الهندي بابا .. هذا شرطه مافيه مشكل .. هو كلام فيه 200 ريال انا خلي انت روح ..

وأبد عطاهم 200 ريال وأطلقو سراحه اللي اصلا ما انمسك

قاله ولد عمي .. خلاص يا صديق .. أنا سوي اتفاق ..

انتا يبغى يصير حرامي مافيه مشكل ..بس أهم شئ لا عاد اشوفك جاي لبيتنا ولا حارتنا ..

واتفقو على كذا وانفض المجلس

وصرنا على آخر الزمان وبعد ما كنا بلد الأمن والأمان … صرنا نتفاوض مع الحراميه

وهذا تطبيق للمثل القائل .. حاميها حراميها ..

————————

وأنا متأكد انكم مريتو بقصص مشابهه .. ولكن هذا الكلام لا يشمل الجميع .. فهناك من هم المخلصين الصادقين اللي تهمهم مصلحة بلدهم .. وهذا بسبب معدنهم الطيب … و لو خليت خربت

الكاتب:- عبدالله القحطاني

أحب أشطح بخيالي بعيد .. و من الأشياء اللي أفكر فيها أيش ممكن نقول في المستقبل عن الفترة اللي عايشين فيها اللحين ..

مثلا مرات نسمع ناس تتكلم عن فترة الصحوة .. و ماقبل و ما بعد الصحوة .. و عصر  الراديو الترانزيستور .. وبعدين التلفزيون و الفضائيات وغيرها .. أعجبني كلام للأستاذ علي الشدي في مقاله عام الشكوى .. والمجتمع المظلوم ..  في المقال يصف العام هذا بعام الشكوى من كثر ما إشتكي الناس .. اللي يشتكي من غلاء المعيشه ، و اللي يشتكي من هضم حقوقه ، و الخ …

فعلا محل ماتروح تلاقي الناس تشتكي .. معقولة كل شي سيء زي ما تتصور وانت جالس في أي مجلس من مجالسنا .. حتى أني بدون ما أحس صرت استانس لما تصير لي مشكلة .. عشان يكون فيه عندي سالفة لما أجتمع مع ربعي يوم الثلاثاء !!

هل كثر الشكوى مؤشر على قل صبرنا؟ و الا دليل على حبنا للمثالية و الأتقان مع الافتقاد لهما ؟ أو هو مؤشر على ترفنا لدرجة أن الواحد نسى أخطاءه و التفت لعيوب الغير ؟ أعرف ان كلامي راح يسعد المسؤولين -خصوصا الخدماتيين- و لو أن الجميع يفترض أنه يخدم العامة , و بنفس الدرجة راح يزعل الناس مني ..

طيب مو الناس اللحين ماعندها إلا هذي الوسيلة .. فلا مجلس شورى منتخب يدغدغ مشاعر الناس و ينفس عليهم بدلاً منهم .. و لا وزارات تلقي اهتمام لهذي الشكاوى .. الناس تشتكي من الخلل ليل نهار و الخلل صامد أمد الدهر! يعني أنت اللحين تبي تصك على الناس مرة !

عموما عشان ما أخسر جزء من شعبيتي الضحله راح اتبنى موقف دبلوماسي ضبابي فأقول و بالله التوفيق ..

أنا أعتقد أنه من الطبيعي جداً أن الأنسان يشتكي أو يتذمر من شيء .. لكن اللي مو طبيعي أن كل الناس تشكتي طول الوقت

في مرات كثيره صرت أتهرب من بعض الناس لانه دايما يزيد أحباطي أحباط ..

تتلاقيه يشتكي من الشوارع المحفرة .. و سوء النظافة  و تعجرف رئيسنا في العمل , و الظلم اللي صار لناديه في قرارت الرئاسة .. وكيف ان المياه اللي نشربها ملوثه و غير صالحه للاستهلاك الآدمي .. و كيف أن الفساد الأداري ساهم في أرتفاع أسعار العقار .. و يتكلم عن الحراميه و السرقات و المؤامرات و الدسائس !!!

باختصار أقترب من الانتقال من مرحلة التفكير في الإنتحار الى الرغبه في تنفيذها !!

عشان كذا ابتكرت طريقه تساعدني على تقليل الأثر السلبي لكثرة شكاوى بعض الناس .. و الفكرة لحد الآن مجانية بس ممكن في المستقبل آخذ رسوم على استخدامها !

صرت أدور على أخطاء في حياتي تشبه شكوى المشتكي و أحاول تفادي الخطاء أو تقليله ..

مثلا لما يتكلم واحد عن الشوارع السيئه .. أفكر في واجهة بيتنا هل هي نظيفه و الحوش مغسول ؟ أرتب كراسي الجلسه .. باختصار أدور علي أي شي يحسن و ضع حوشنا العتيد  ..

لما شخص يتكلم عن سوء تعامل دائرة حكوميه … أفكر كيف تعاملي مع بعض الشيبان اللي يستخدمون صرفات السحب الآلي , و يطولون وهم ينفذون عملياتهم .. هل أنا أصبر عليهم , و أتحمل بطئهم في التعامل معها .. هل أتعمد أحسسهم بضيقي من الإنتظار ؟

طبعاً القصد ليس حجب سوء الخدمة .. و لكن القصد التخفيف من موجات  , أو بالأصح طوفان , الإحباط المنتشرة في هذا العام ..

الصباح عنوان للصفاء وللطيور وللبهجه ..

ولكن اذكر أيام دراستي في كل المراحل ..

وخصوصا الإبتدائيه ..

كان بعض العيال يجيون المدرسه بشكل يلوع الكبد ..

اللي يجيك وكشته نافشه ..

وبعضهم يجيك و هو مزبد من عند الشفايف تقول كأنه بعير.. بسبب بقايا الحليب اللي طفحه على الصباح ..

وبعضهم عنده حب المشاركه .. بحيث انه يحب يخليك تشوف اللي كلاه في اليوم السابق

يعني بعضهم يجيك وعليه بقعه لونها برتقالي .. فهذا تدري انه متعشي مرقوق ..(وش البزر اللي يتعشى مرقوق)

وبعضهم تلقى عليه بقع مخلوطه .. يعني أحمر على أصفر شوي .. وهذا معناه انه متعشي شكشوكه ..

ونستفيد من هالعينه انهم مايغيرون ملابسهم طول اليوم الى ان ينامون ..

وغير بعضهم يجي ويضحك بوجهك .. ومن يوم تطلع أسنانه تشوف بقايا البقصم ( الشابوره ) اللي مفطر عليها ..

وغير الروائح ..

بلاوي بلاوي ..

وبالجهه المقابله ..

يجونك ذا العيال المرتبين ..

اللي أمه مسبحته الصباح .. وماشطه شعره وكادته على جمب .. وصاير كأنه رشدي أباظة صغير ..

والثوب مكوي ونظيف ومسكر الياقه والولد صاير كأنه دعاية ثوب الدفه ..

وغير العطر اللي بخته على ثيابه قبل لا تودعه ..

وهذا ان دل فيدل على ان البيت مرتب وناس محترمه ..

واسئلو المدرسين والمدرسات ويقولون لكم عن البلاوي اللي يشوفونها

———

فرجاء أهتمو في ورعانكم ..

وتراهم واجهه لكم .. إن زانو من زينكم .. وان شانو من شينكم

———

طبعاً البنت اللي بالصوره لا يقاس عليها … لأنها مزيونه حتى وهي معذربه بعمرها …

———

العنوان مقتبس من الأغنيه المعروفه : نظف أسنانك تحميها .. نظفها تصبح بيضاء

حلاك زايد ..

هي عباره عن حمله يقوم بها طلاب و طالبات الطب في جامعة الملك سعود ..

الهدف منها التثقيف ونشر الوعي عن مرض السكر .. بحيث يقوم الطلاب بقياس نسبة السكر للزوار ..

ويقولك ان مرض السكر منتشر بشكل كبير في المملكه ..

ونسبتة في تزايد كبير .. فمعدل الارتفاع العالمي كل عشر سنوات هو نفس المعدل خلال سنه في دول الخليج ..

وهو مرض غير قاتل ولكن له أضرار أخرى ان لم يتم الانتباه له ..

أضرار نفسيه مثل الاكتئاب .. وأضرار صحيه .. وأضرار ماديه أيضاً ..

فأنصحكم بأنكمم تقللون من حلاكم .. لأن الحلى الزايد بيجيب لكم السكري ..

وأدعو أهل الرياض الى زيارة هذه الفعاليه ..

و ماهي شينه اذا انكم خذيتو ورعانكم واخوانكم الصغار وامهاتكم وأبائكم ..

اللي اعرفه ان المرض هذا مايميز بين الأعمار

و زيارة وقايه .. خير من ألف موعد علاج

وان كانك ماتبي تتثقف وتنتبه لصحتك.. باللي ما يردك ( خربها )

-=-=-=-=-=-=-=-=-=-=-

وشكراً للقائمين على هذه الفعاليه ..

الموقع والمكان :-

ممشى طريق الملك عبدالله – الرياض

بداية من يوم الأحد 22-5-1430هـ وحتى نهاية يوم الأربعاء 25-5-1530هـ.

من الساعه 6 إلى 10 مساءً

————-

• موقع الحمله على الفيس بوك

• على اليوتيوب

————–

دعوه للنشر عن طريق مدوناتكم وايميلاتكم من باب نشر التوعيه والتعاون على الخير

(الشيخ عبدالله السالم يتسلم الدستور من رئيس المجلس التأسيسي عبداللطيف ثنيان الغانم قبل 47 سنه)

الويكند اللي فات كنت بالكويت .. والمجالس هناك مشتعله والسوالف كلها عن الانتخابات البرلمانيه

و بعضهم يبي يصوت للأصلح وبعضهم يبي يصوت لولد عمه وبعضهم تصويته على حسب اللي فاز بالفرعيه ..

كان خليط فيه الزين وفيه الشين ..

ومن كثر متابعتي للانتخابات .. عن طريق سوالف الناس او عن طريق الإعلام ..

ووسط غفله مني ..

نسيت نفسي وتحمست .. وبغيت أروح أصوت ..

وبعدين تذكرت اني بدون ..

أقصد بدون صوت

—————————-

جد متى يجي اليوم اللي يصير عندنا مجلس تشريعي يتم انتخابه وتوصيله يكون عن طريق الناس ..

وقتها بتتغير أمور كثير في البلد ..

لأنه بيكون هم المرشحين هو متابعة أمور الناس والقيام بالمبادره لإصلاح الأخطاء ..

لأنه كل شئ مسجل في رصيده ..

لكن ان كان من يمثل الشعب يتم اختيارهم عن طريق الحكومه .. فمن الطبيعي ان يكون همهم إرضاء الحكومه ..

طبعاً إلا من رحم الله ..

فهذا حال البشر ..

بس إن شاء الله يحيينا الى ذاك الوقت ..

لأني جد فيني تصويته

يا أهل الكويت أختارو الأصلح للشأن العام واتركو المصالح الشخصيه ..

فصدقوني متى ما صلح الشأن العام بينصلح حالكم الخاص غصبن على كل عضو

————

وأنا لو كنت كويتي اليوم .. بيكون صوتي لـلمحامي محمد عبدالقادر الجاسم و للدكتوره رولا دشتي و للمحامي أحمد الشحومي و الصوت الرابع بيكون للدكتوره معصومه المبارك

بس وش يجمعهم في دائره وحده يابو خليل؟

————

مصدر الصوره

————

تحديث 17/05

فازت مالدكتور معصومه والدكتوره رولا .. و الجايات أكثر يالشحومي ويا الجاسم

لمعرفة نتائج مجلس 2009

http://election.alwatan.com.kw/VotesMaster.aspx

بس عندي قناعه اننا المركز الأول في العالم بالإصابه بالقولون والقرع والقرحه ..

وهذا من اللي اشوفه في حياتي ..

لما نكون في مناسبة عشاء .. ويسدحون المفطح والعالم تقلط عليه ..

وتشوفهم مع الحماس غترهم ترجع على ورا وتلمع القرعه ..

وفي وسط العشاء تلقى واحد يمتنع من بعض الشغلات لأن فيه قرحه ..

وبعد العشاء تلقى البعض يمسك بطنه ويضغط عليه شوي ووجهه يتلوى .. واذا قلت له وش فيك يابو فلان؟ قالك قووولوني انتفخ..

لازم ندري ان الموضوع فيه إن..

يعني هالثلاث أشياء صارت من المسلمات ..

وصار البيت مايسلم أهله .. إما قرع ولا قولون ولا قرحه ..

وبعد ما سرحت بالتفكير وبسبب انتشار هالظاهره ..

اكتشفت ان السبب في مثل هذه الأمراض والحالات ..

هو هذه الأخبار ومثيلاتها :-

السعودية تتبرع بـ 25 مليون دولار لإعادة إعمار ” نهر البارد”

“الإغاثة” السعودية تقيم حفل زواج جماعي لخمسين عريساً في لبنان

السعودية تتكفل برسوم تسجيل جميع الطلبة اللبنانيين

هالأخبار اللي فوق هي سبب الأمراض المنتشره ..

الرجال اللي وصل عمره وصل الخمسين وهو مايملك منزل لما يقرا خبر إعادة إعمار لبنان علشان العوائل اللبنانيه وهو ساكن في شقه أجار .. ما ينلام اذا طاح شعره

والعائله اللي عيالهم قاعدين في البيت لانهم مايقدرون يصرفون على عيالهم لما يسمعون خبر التكفل برسوم الدراسه للبنانيين ما يلانمون اذا جاتهم القرحه

والأعزب اللي ماهو قادر يتزوج وحالته صعبه لما يقرا عن تكفل السعوديه بزواج اللبناننين .. ما ينلام اذا انتفخ قولونه ..

أنا ما أقصد بكلامي هذا ان السعوديه مفروض ما تتبرع وتتكفل وتدق الصدر لكل بعيد وغريب وتترك عيالها ..

لا لا لا.. انا مالي الحق اني اقول هالكلام أصلاً

لكن انا اقول ان الحل لمثل هذي الأمراض ..

أن يصدر مرسوم أصلي يرنّ رنّ ..

يمنع نشر هذي الأخبار مراعاه للأقرع وأبو قرحه وللي منتفخ قولونه

وترا هذا بيوفر فلوس العلاج … وبدال ما نعالج هالحالات ونصرف فلوس على الفاضي ..

نقدر نوفرها ..

وما ندري بكره يمكن بيروت تحتاج كهرب ولا شئ ..

إلا حنا عندنا مبلغ جاهز بدال ما نقطه على علاج هالقرعان ..

وهاي اللي كان بدي أؤووله … فهمتو عليّا؟

=========================

أنا قولوني انتفخ بعد ماقريت تدوينة آلاء ..

شو خصنا ؟

=========================

في الأسواق :

السعودية للبنان؛ قلوب وسواعد

=======================

مع كامل إحترامي للشعب اللبناني .. فأرجو أن لايفهم من كلامي إني ضد الشعب اللبناني .. بل أنا لو يحصل لي خذيت الجنسيه اللبنانيه

بحبحكم كتير

بالنظر إلى إحصائيات المركز السعودي لزراعة الأعضاء، عام 1429بلغ عدد مرضى الفشل الكلوي 9000 مريض، وتقدير حالات الوفاة الدماغية هو 700 حاله سنوياً..
من هنا كانت فكرة الجمعية الوطنية لطلاب الطب بالسعودية، ممثلة بلجنة الإنسانية والسلام، بالتعاون مع المركز السعودي لزراعة الأعضاء، وفريق يلا بنات (الرياض) للمشاركة في هذا الواجب الإنساني والوطني لإنقاذ حياة الآلاف من أبناء الوطن.
وندعو جميع الجهات للتظافر معنا في سبيل منح الحياة لأولئك الذين يحتاجونها.

حمله انسانيه .. تستحق الدعم .. فهي قائمه بهدف انساني .. وجهد تطوعي .. وهالشيئين ما يجتمعون الا في خير ان شاء الله ..

الفكره باختصار , هو تبرعك بأعضائك بعد وفاتك وهو عن طريق موافقتك وتوقيع الاستماره الخاصه بذلك ..

ولا تخاف ما راح يسري مفعول الاستماره الا بعد وفاتك ..

بعضهم ياخذ الموضوع بحساسيه زايده ويقول لا وشلون ياخذون كليتي ولا قلبي ولا دماغي ..

بقوله يابن الحلال وقتها انت بتكون ميت وما قدامك الا حساب .. وتبي شئ ينفعك في هالموقف ..

وان شاء الله بمساعدتك لشخص آخر بالنجاه من حاله حرجه تكتب لك في ميزان حسناتك ..

علشان كذا أنا أعلن توقيعي على هذه الاستماره واتبرع بجميع أعضائي بعد وفاتي ..

عاد والله ياهو بيبتلش اللي بيآخذ يدي .. بتجيب له شد عضلي في المرفق

ولا اللي بيآخذ قلبي .. بينبسط لأن قلبي أخضر

وبالنسبه لكليتي .. ان شاء الله مافيها الا العافيه .. حتى البيبسي بطلناه

وبالنسبه للقرنيه .. أقول للدكتور :

صورة عديل الروح عندك فالعيون***واخاف تقطعها بموسك ما وعيت

ولا عليك امر..اطوها تحت الجفون***وعقبه لو تقطع عيوني ما شكيت

لا حد يقولي لا تنكت في هالموضوع .. لان الموضوع ومافيه شئ كلنا مصيرنا له اللي هو الموت ..

واما تتبرع بأعضائك وتنقذ غيرك ولا مصيرها للدود ..

وبإذن الله بأقرب فرصه بمر على الإخوان وبوقع الإستماره الخاصه ..

-=-=-=-=-=-=-=-=-=-=-=-

وتحياتي للي مبتسم بالصوره المرفقه مع الموضوع

هذا خالي متعب القحطاني اللي أنا ولد أخته ( قول قسم)  .. منور الحمله أبو عبدالرحمن

-=-

كلما زاد عدد الشيبان في المسجد , ارتفعت درجة الحراره بسبب اغلاق جهاز التكييف 

-=-

كلما توجهت باتجاه الجنوب , زادت حدة التعامل عند البشر 

-=-

كلما زادت فلوسك , زادو أصحابك

-=-

كلما كان شكل شعرك كروي أكثر , كلما كنتكدشاً أكبر

-=-

كلما طاح بنطلونك أكثر , أصبحت كوووولاً أكثرر

-=-

كلما زاد وزن الشخص , زادت ملعوماتيه الغذائيه عن أنوع الريجيم

-=-

كلما كان الحجاب منتفخ أكثر , صارت الواحده عاهه أكثر

-=-

كلما كنت بعيداً أكثر , حبك يكبر ويكبر

-=-

كلما ارتفعت درجة الحراره ظهراً , انتشرت المضاربات عند الاشارات المروريه

-=-

كلما زادت الميزانيه في الدول, ارتفع مستوى الرفاهيه لدى المواطنين ( الا عند بعض الناس)

-=-

كلما كتب الناس بحريه أكبر والتزام أكثر , كلما ارتفع الخط الأحمر

-=-

كلما زادت مدة الزواج , زاد حبك في قلبي ( يمديكم على الغزل)

ملاحظه : قلبي يلفظ باللهجه الحجازيه

-=-

كلما ضاقت العبايه وتخصرت أكثر , كلما كانت قلة الحياء أكثر وأكثر

-=-

كلما طاح السعوديين في ديره معينه أكثر , كلما ارتفعت أسعارها وضاق صدر مواطنينها أكثر

-=-

كلما كنت بقربي , تنطفي نيران قلبي

-=-

كلما نمت بعد المغرب وقمت قبل العشاء , زادت عندي حالات الهلوسه بسبب الغلقه وقمت اكتب هالكلام

-=-

ما حولكم علاقات طرديه؟

عطونا من اللي حولكم

شلة أصحاب .. مالهم بالتربيه نصيب ..

عاشو طفولتهم وسط إهمال كبير من أهلهم ..

وهذا الشئ خلاهم يكونون رمز الصياعه في المرحله الإبتدائيه ..

وبما ان الطيور على أشكالها تقع .. فكانو مشكلين شلة أنس شعارها ” العقل اللئيم في الجسم السليم ” ..

وجات مرحلة المتوسطه وبداء عنفوان المراهقه .. وطاحو بالتدخين و بالصياعه اللي على عمرهم ..

وجات المرحله الثانويه وبدت مرحله العربجه .. وكانو مشكلين مافيا في المدرسه

محد يقدر يكلمهم لأنهم ” بايعينها ” وما يهمهم أكبر شنب ..

فلا أهل يخافون منهم ولا مستقبل يرتجونه والاصلاحيه تعودو عليها ..

طاحو بالحبوب والحشيش وبكل تأكيد التفحيط هي الخطوه التاليه ..

صادوهم في أحد الأيام وهم خاطفين لهم ولد عمره 10 سنين..

وتم سجنهم لمدة 6 شهور في الإصلاحيه لانهم لم يتجاوزو الــ  18 سنه ..

وبعد ما خلصو من الاصلاحيه قررو ترك الدراسه علشان ياخذون راحتهم ..

ومرت السنين وهم على هالحال .. مابين سرقه وتفحيط وتعاطي

وبعدين قررو يلقون لهم شغله تلمهم من الشارع ..

وكلن راح يدور له وظيفه .. وانقطعت اجتماعاتهم بسبب مشاغل الدنيا ..

وبعد مرور السنين قررو يجتمعون مره ثانيه وحددو الموعد في احد الإستراحات ..

ويوم تجمعو كل واحد سئل عن حال خويه ووين يشتغل  ..

طلع الأول يشتغل في المرور ..

والثاني في الشرطه ..

والثالث مراقب في دار الأيتام ..

والرابع لقى له واسطه و اشتغل في دائرة المناقصات في البلديه

والخامس يتشغل في مستشفى الأمل , وانتقل منه الى شهار كمراقب..

وعز الله أفلحنا

———–

مصدر الصوره

عايـــش لهدف : مشروع تطوعي شبابي يهدف إلى نشر ثقافة التخطيط من خلال قيــمة الهدف في المجتمع..

الموقع :-

• مجمع الراشــــد في الخبر 10-11 جمادى الأول الموافــق 5-6 مايو
• مجمع الشاطئ في الدمام 18-19 جمادى الأول الموافــق 13-14 مايو

لمعرفة المزيد تفضل بزيارة :

موقع صناع الحياه + قروب عايش لهدف في الفيس بوك

هذا البرنامج تطوعي .. فما فيه مشاكل ان كانك نشرت هذا الخبر بطريقتك …لكي تعم الفائده لأكبر عدد ممكن لاننا محتاجين مثل هذي الفعاليات ..

قواكم الله يا القائمين على هالفعاليات

ماهو وجه الشبه بين المنطقه الشرقيه هذي اليومين وبين العجوز ليلة عرسها؟

تحديث 03/04/2009

الجواب الصحيح .. هو جواب عبدالمجيد و نوفه ..

لأني شفتها أثناء زيارة الملك عبدالله وكأنها العجوز اللي عدلوها ورقعوها علشان يغشون العريس فيها … مكيجوها وقعدوها على ذاك الكرسي علشان ماتبين طريقة مشيها المتهالكه وخلو الإناره جهتها خافته علشان ما تبين عيوب المكياج اللي ما قدر يخفي آثار الزمن على ذاك الوجه الأشحب ..

هل تعلمون انه وصل فيهم الحال انهم مجمعين عمال النظافه علشان ينظفون طريق الجبيل وأطرافه !!! يقولون لك نخلو التراب وخلوه يغطي على شواطئ المالديف من نظافته ..

إلى هذي الدرجه وصل الخوف والغش؟؟

والسبب في كل هذا إن كل مسؤول خايف من المسؤول اللي اكبر منه وخايف انه يلقى عليه غلطه ..

رئيس القسم خايف من رئيس البلديه اللي هو  خايف من المحافظ اللي هو بدوره خايف من الامير اللي هو بدوره خايف من الملك ..

لكن لو كان رئيس القسم يخاف من ربه كان اختصرنا هذي السلسله ..

أنا لو اني كيميائي ما أخاف الله
وعندي قدره على انتاج فايروس جديد
وعندي ممول لهذا الإكتشاف
شرط يكون هالممول مروج مخدرات معتزل
ومروج المخدرات المعتزل هذا يكون يملك مصنع أدويه

بقوم بانتاج الفايروس وبسميه فايروس انفلونزا الجرابيع ..

و بصدر الفايروس للعالم…

وبدعمه بحمله اعلانيه ليس ترويجيه بل تخويفيه لكي ينتشر صيته..

وبعدها بعلن عن إكتشاف مصل لهذا الفايروس ..

وسوف تنهال الطلبات على هذا المصل ..

وسوف نصبح مليارديريه بكم يوم ..

والمصل بعشرة آلاف دولار والحسابه بتحسب

——————————

أنا ما استبعد ان اللي قاعد يصير في هالعالم مجرد تجارة..

كل يومين طالعه لنا انفلونزا جديده وتجي معها حمله اعلانيه تخوف الناس وتوسوس فيهم ..

مثل ما صار مع انفلونزا الطيور …

الحكومات اشترت هذي الأدويه بمئات الملايين لخوفهم من هذا المرض الجديد المنتشر ..

بينما لو شفنا الموضوع من زاويه ثانيه ..

فان عدد ضحايا مرض انفلونزا الطيور لا يقارن ابد بعدد ضحايا الأمراض المعروفه مثل الملاريا والايدز وغيرهم ..

والمفروض الخوف يكون أكبر من هالأمراض … لكن لان المرض ذا جديد ولانه له مسوقين اكبر ..

يعني الأمراض صايره هاليومين مثل صرعات الموضه ..

الجديد يأخذ الأنظار تجاهه والقديم ينسونه ..

الله يكفينا الشر ويكفينا شر الله ما يخافون الله

ذات صله :
“انفلونزا الخنازير” تحالف فيروسي ضد البشر

مصدر الصوره

دايماً نتكلم عن تجاوز الخط الأحمر سواء في الكلام أو في الكتابه ..

وقبل كم يوم سئلني أحدخوالي عن اسلوبي في المدونه ووصفه بأنه يكون أحياناً أسلوب تصعيدي..

فأستغربت انا هذا الشئ لانه على حسب نظرتي للمواضيع اللي اكتبها ان طريقتها مافيه شئ من التصعيد او محاولة التصعيد ..

فرد على استغرابي واحد من اخواني واشار الى احد المواضيع ان الاسلوب فيه كان زايد حبتين ..

وغير هالموقف يمكن دايماً نسمع في بعض المجالس لما يكون الحديث عن شئ له دخل في الدوله سواء من احوال الجتماعيه او مناقشة بعض الامور الحكوميه ..

تلقى بعض الحضور يقول ” اركد اركد ” وتراك زودتها حبتين ..

سؤالي هو .. من يحدد هذي الحبتين؟
وبصيغه أخرى …

من يحدد الخط الأحمر الذي لا يمكن تجاوزه؟

هل هي السياسات ام الشعوب؟

لأني أحيانا أجد أنظمه ديكتاتوريه يحكمون شعب لا يعرف معنى الخط الأحمر ..

وأحياناً نجد حكومه ديموقراطيه وشعبها يشتكي من الحد من حريته مع انه ماخذ راحته على الآخر لكنه يرغب في المزيد ..

وهذا هو حال امريكا وشعبها .. فدايما القاهم رافعين لوحات الحريه والحريه ولا لتكميم الأفواه !!! عنبو غيركم اي تكميم؟

لكن هذا لانهم شعب هم رفعو سقف الخط الأحمر ..

فالسؤال هنا ..

من يحدد مستوى الخط الأحمر ؟
وكيف يستطيع الشعب ان يعرف ان هذا تجاوز للخط الأحمر؟
وهل بإمكان الشعوب رفع مستوى الخط الأحمر؟

وهل الوضع في بدلنا المملكه العربيه السعوديه الى هذا الحد مرعب .. بحيث يظن البعض ان الكلام ومجرد الانتقاد غير مسموح ويعتبر تجاوز للخط الأحمر .. ام ان الشعب هم من أنزلو هذا الحد .. الى درجة أصبح اي احد يتكلم او ينتقد شئ معين يعتبرونه انه انسان سياسي وتابع لتيار خارجي ..

ترى ديرتنا بخير ونعمه … وخلونا ما نهول من المووضوع

يمكن انا قاعد اشوف ان اللي قاعد اكتبه اقل من عادي … ولكن يمكن اكون تجاوزت الخط الأحمر وأنا ما أدري ..

دلوني يا هلي عن الخط الأحمر

عاد أكره ما عندي التجاوز لمثل هذي الأشياء … أصلاً أنا من صغري يسموني المنظبط

أجي على كبر وأصير غير منظبط ؟؟ ترضونها لي؟؟

وادري ان اللي ينبهني عن مثل هذي الشغلات انه حريص علي ..

ويا حبي للحريصين علي ..

كلمات الشاعر العماني سالم بن بخيت المعشنى – الشفق

غدو يا كريم كريم
غدو يا كريم كريم
غدو يا كريم كريمً

كلما بان الفرق
بين سعدي والقلق
اختنق والياس ردً

اكتمل كل الحلق
من ضحاها للشفق
والامل ياتي نكدً

وانهمل دمع الارق
من ينابيع الحدق
والوهن شق الجلدً

كل ليله احترق
والامل عندي نفق
لكن ايماني مردً

لاجل خالد استحق
واقف يطالبني بحق
يرتجي مني مددً

رحمتك رب الفلق
يا منجًي من صدق
زيح آلامي ابدً

إهداء خاص الى صديقي بالمزاج أخوي فؤاد الفرحان
اقصد مزاج الفن طبعاً

—————-
إضغط على المربع الأزرق علشان يشتغل

جد مالكم أمان

+-+-+-+-+-+-+-+-+-+-+-+

التدوينه هذي بكتبها للمباركه لاثنين من المدونين

———————

أولاً نبداء بصاحبة الرساله , بالفتاه المسلمه العربيه الخليجيه

الفتاه اللي مثلت دولتها ودينها خير تمثيل ..

شرفت دولتها باجتهادها وبمثابرتها على الوصول الى أعلى المناصب عن جدارة .. ولم تألو جهدا في الوصول الى ما وصلت اليه ..

وشرفت دينها .. بأن كانت ثابته على عقيدتها وعلى معتقداتها وكانت سفيرها لدينها في بلاد الغرب و ما قالت لكل ديره دين ..

ويكفيني ما قرأته في ” رسائل محبة من دورة المياة ” فكانت هي المطوعه في هالرحله

و كانت في التدوين مميزه بكتاباتها عن ما يمس أبناء جلدتها وعن ملاحظاتها السياسيه منها والاجتماعيه ..

واللي تدل على ثقافه عاليه ..

تميزت في ردودها وفي تعليقاتها ..

لم نسمعها يوم تتكلم عن منصبها بل كانت تلمح له من بعيد … وهذا ان دل فيدل عن تواضعها وأن المسميات لا تعني لها شيئاً ..

بينما غيرها يتشدق بما وصل اليه بالذهاب والاياب وبحاجه وبدون حاجه ..

+-+-+-+-+

أبارك للمدونه عاشه بن بشر – صاحبة مدونة حروف

على حصولها على درجة الدكتوراه في إدارة علوم التكنلوجيا والإبداع من جامعة ما نشستر ..

مبروك للاخت عاشه وعقبال ….

ولا اقولك دكتوراه كفايه

===========================

والشخص الثاني ..

هو المكافح الفالح كما احب ان اسميه ..

شاب سعودي يعيش في استراليا الآن لإكمال دراسته الجامعيه ..

أعرفه قبل التدوين بكذا سنه .. وانقطعت عني اخباره وتافجئت لما زرت احد المدونات وشفت لقب في أحد الردود .. وقلت بخاطري هاللقب ماهو غريب ..

ولما دخلت مدونته لقيته هو صاحبي القديم ..

أحد المقاتلين القدامى ..

كان يدرس في جامعة البترول وما توفق وترك الدراسه لفتره ورجع مره ثانيه يكمل لكن بجامعه ثانيه وبديره ثانيه .. والله فتح عليه من بعدها ..

وهذا يدل ان المشكله ما كانت فيه .. المشكله كانت بجو الشرقيه .. لأنه من يوم ترك الديره أفلح و الله فتح عليه

وهذا ان دل فيدل على انه شاب طموح و صاحب هدف .. ورغم انه ظروفه كانت صعبه بحيث انه اكمل خمس سنوات في الجامعه وبعدها طلع منها , إلا انه لم يتحطم .. بل عقد العزم على ان يبداء من جديد .. وخاض التجربه مره أخرى لكن بخيارات أفضل

وان شاء الله انه يكون قدوة للكثير من أصحاب ” خلاص راحت علينا ” ..

وأبو هارون ما حب ان هالتجربه تمر على الفاضي ..

بل حب انه يوثقها ويجعل غيره يستفيد منها ..

فقام بتأليف كتاب عن الجامعه وحياتها وعن التخصصات وطرق اختيارها وغيره من الأمور اللي تهم الطالب ..

أبارك لأخوي جاسم الهارون المعروف باسمه الحركي أبو هارون ..

على إصدار كتابه الأول ” الجامعة ترحب بك! دليل الطالب الجامعي المستجد”

وبإذن الله سوف أقتني هذا الكتاب دعماً لك وعلشان اخوي فهد يستفيد من تجربتك ..

فتجربتك ماهي كلام فلسفه .. بل كلام صادر من شخص مر بتجربه .. واسئل مجرب ولا تسئل خبير

بالتوفيق يابو هارون ..

===================

و مره ثانيه لما نغيب يومين ماله داعي هالحركات من ورانا

وتراني مسيطر على الوضع وعارف وش يصير في عالم التدوين ..

حتى انت يابو سعد .. تراني ادري عن السكوتر اللي شاريه .. لا تحسبني غافل عنك

وصلني ايميل اليوم مذكور فيه انجازات قوة المداهمات الخاصه في القبض على بعض المتخلفين الغير نظاميين ..

والقبض على مروجين مخدرات , و أوكار دعاره , و مصانع للخمور , وشقق لإنتاج المنشطات الجنسيه , وشقق أخرى لإصدار أفلام جنسيه ..

وشقق لإصدار الإقامات والجوازات ..

وما بقى شئ من الردى والخياس الا موجود في هالمنطقه اللي داهموها ..

سؤالي هو ..

هل يعتبر مداهمة منطقة البطحا و إيجاد هذي المخالفات إنجاز؟

تدرون ليه انا ما اعتبره انجاز ؟

لأن أصغر واحد في الرياض يدري ان مصدر كل هالأشياء من البطحا ..

والكلام هذا ماهو من سنه ولا سنيتن .. الكلام هذا معروف من سنييييين ..

فاللي قاهرني في الموضوع انهم يقولون ” عقب البحث والتحري ” ..

أي بحث وتحري الله يرحم والدينكم !! ..

انا لو أركض من أول الى آخر البطحاء .. صدقوني ما اوصل آخرها الا وانا صايد لي بنقالي سكران وفي جيبي أفلام خليعه وفي جيبي الثاني بطل خمر ..

هذا وانا بس أركض ..

يعني لو امشي على هوني بلاقي أكثر من كذا ..

وتجون تقولون لي بحث وتحري!! ..

واذا كان الموضوع مجرد ذكر لأسماء الظباط اللي قامو بالمداهمه ..في حي البطحا ..

فأنا أنصح ظباط المنطقه الشرقيه انهم يداهمون منطقة ” الصبيخه ” ..

وبتلقون أكثر من اللي لقوه أبطال البطحا ..

و تقدرون تقولون بحث وتحري .. أهل الشرقيه وتمونون

—————————-

لما تكونون يالجهات الأمنيه في سبات طويل على مدى السنوات اللي فاتت ..

فرجاءً لما تصحون وتلقون الديره غرقانه بالبلاوي والمصايب .. وشبابنا تدمر .. وأمننا ضايع ..

وكلن يدري بمصايبنا الا انتو

فرجاءً لا تقولون بعد “ البحث والتحري ” ..

قولو ” بعد النوم والتبطح ” .. تم الإستيقاظ والقبض على كذا و كذا ..

وما فيه إشكال اذا قلتو آسف للمواطن و لأمن البلد اللي انتو قصرتو فيه ..

—————————-

عموماً يعطيهم العافيه الشباب اللي قامو بالمداهمات واللي لم تذكر أسمائهم ضمن الأبطال المداهمين ..

بل تم الإكتفاء بذكر أسماء الأبطال أبو نجمه وفوق ..

—————————-

ويا بلادي واصلي

=============

تدوينات سابقه قد يكون لها علاقة

راح الأمان

سرق الجمل بما حمل

أمن وأمان … كان يا زمان

قيل في الأمثال

” جوع كلبك , يتبعك ”

متى استخدمتو هذا المثل ؟

:حوار يدور بين شخصين

تصدق انا أهم شئ في حياتي الحمام ..

يعني جد أول شي اهتم فيه في اي مكان  هو الحمام ..

يعني بشكل ما تتخيله الحمام هو وجهتي الأولى لما أروح اي مكان .. لازم اتطمن على شكل الحمام ..

لما اسافر واروح فندق تحسبني اروح اشوف شكل الغرفه؟ لالالا أول شئ اشوفه الحمام..

تصدق مره رحت لفندق في دبي ويوم دخلت على طول رحت للحمام ..  يوم شفته طلع ضيييييق

ومن ضيقه ماتقدر تقعد على المرحاض الا وانت حاط رجل على رجل ( مدري من وين جاب هالوصف) من ضيقه ..

تحسبني قعدت؟؟ على طول رحت ادور فندق ثاني .. انا قايلك اهم شئ الحمام ..

———————

اللي يسمع هالحوار يتوقع انه كان في احد الحمامات العامه اجلكم الله .. او كان في محل للأدوات الصحيه ..

لكن للاسف انه كان في احد المطاعم ..

في احد الأيام كنت رايح اتناول جرعتي الشهريه من سقراط

مطعم سقراط للهمبرجر وفيه روايه همبنقر

ومثل مالبعض يعرف مطعم سقراط صغير وحتى طاولات مافيه وكله الكراسي الطوليه ..

يعني كل واحد يسمع اللي جمبه ..

والرجال المقرف هذا ماخذ راحته على الآخر .. وخويه الأهبل مستمتع بالحوار وكل شوي يقوله “صحيح صحيح” ..

وحسسوني انهم ساكنين بخيمه على هالتشفق على الحمامات ..

طبعاً في وسط الحوار المثير كانو اللي على يميني يضحكون ويقولون ” الصراحه سالفتهم مهمه وخطيره ”

المهم خلصت من الهمبرجر بالبيض ودفعت الحساب وطلعت ..

وقبل لا اطلع التفت و كانت في كلمه تقرقع في صدري ..

بغيت اقوله ” حبيبي اذا خلصت سالفتك اسحب السيفون ”

—————-

ياناس لازم نختار السوالف اذا كنا في الامكان العامه .. وسوالف الامراض الجلديه والحمامات والوفيات وامراض السرطان والقرحه والأشياء اللي تلوع الكبد ماتصلح ابد في المطاعم ..

اذا تبون تسولفون عن شئ في المطاعم وبصوت عالي .. سولفو عن انواع الصوص .. وعن افضل طريقه للشوي .. وعن بعض المطاعم .. يعني تشارك المواضيع في مثل هذي الامور لا بأس فيه بالمطاعم ..

اما تقعدون تسوون لي دعاية للخزف السعودي في مطعم !!! ابد ابد ما يصلح ..

تحياتي .. ادري لوعة كبود البعض .. ولكن وجب التنويه

السلام عليكم ..

صبحكم الله بالخير .. وبداية اسبوع سعيده ان شاء الله

———————–

اليوم وانا طالع للدوام في الصباح الباكر كنت استمع للاذاعه .. وكان فيه برنامج يتحدث عن سيرة عالم مسلم عربي لأول مره اسمع عنه ..

العالم هذا يقاله ابن يونس ..

وكان البرنامج عباره عن تمثلية اذاعيه تحكي قصته وقصة زوجته وبحوثه واختراعاته وعلاقته القويه والمقربه من العزيز بالله الفاطمي وابنه الحاكم بأمر الله ..

ابن يونس هذا برع في علم الفلك وعلم الرياضيات وكان له مؤلفات واختراعات في علم الفلك ..

والخليفه الفاطمي في ذاك الوقت كان مقرب العلماء منه .. وكان على علاقه وطيدة مع ابن يونس لنبوغه ..

وبنا له مرصد خاص على صخرة أعلى جبل المقطم .. وزوده بما يحتاجه من آلات ومساعدين .. وكانت تصرف له ولطلبته رواتب من الدوله ..

بحيث يتفرغون لعلم الفلك ..

وكان العزيز بالله الفاطمي حريص على ان يحدثونه بآخر المستجدات في الاكتشافات ..

وفي أحد الأيام كان ابن يونس وأحد أصحابه جالسين على قمة الجبل بالقرب من المرصد .. وشافو لهم مجموعة من الجنود اللي متوجهين لهم ..

وخافو لا يكون في حرب قامت وهالجنود جايين يعتقلونهم ..

واكتشفو ان العزيز بالله الفاطمي بنفسه جاي يتطمن عليهم وعلى مكانهم وان كل الامور ماشيه على خير ..

المهم جلس مع ابن يونس وتقهو وعينو من الله خير .. وتطمن على ادق امورهم وانهم مرتاحين .. ورجع لقصره ..

وقد ترك ابن يونس عددا من المؤلفات معظمها في الفلك والرياضيات من أهمها كتاب الزيج الحاكمي كتبه للحاكم بأمر الله الفاطمي وهو أربعة مجلدات، وكتاب الظل وهو عبارة عن جداول للظل وظل التمام، وكتاب غاية الانتفاع ويحتوي على جداول عن السمت الشمسي، وقياس زمن ارتفاع الشمس من وقت الشروق وجداول أوقات الصلاة، وكتاب الميل وهو عبارة عن جداول أوضح فيها انحراف الشمس، وكتاب التعديل المحكم وهو معادلات عن ظاهرة الكسوف والخسوف، وكتاب عن الرقاص. كما أن له كتابين آخران أحدهما في التاريخ وهو بعنوان تاريخ أعيان مصر، والآخر في الموسيقى وهو بعنوان العقود والسعود في أوصاف العود.

توفي ابن يونس في عام 399 هــ

—————–

متخيلين !!

كل هالكلام اللي قلته لكم كان قبل عام 399هــ !!

شفتو  وش كانت اهتمامات الحكام في ذاك الزمان؟

كانو مهتمين بالعلوم اللي تعتبر في ذاك الزمان علوم حديثه .. وكانت تصرف  الميزانيات على البحث العلمي ..

اللي في وقتنا هذا قاعدين يسوون له دراسة جدوى الظاهر

لا و جد ابن يونس صاحبنا يقاله يونس ابن عبد الأعلى .. وبرضو هو كان عالم فلك

من كان خويه؟

كان خويه الإمام الشافعي .. وكانو يتشاركون العلم ..

وهذا يوصلنا لسبب تخلفنا ..

فمن بعد ما كان المقربين من الحكام هم العلماء .. وكانت توضع الميزانيات لتفرغهم للابتكارات والاختراعات العلميه ..

أصبح المقربون هم الشعراء .. وأيضاً رصدت لهم الشرهات لتعينهم على التفرغ لكتابة الشعر

وصرنا بوقت الدكتور مايملك بيت .. بينما الشاعر يملك الملايين ..

بهالوقت ان كان تبي تعيش .. يا تصير شاعر ولا مغني ولا تنحرف في الرياضه ..

———————

ورحمة الله عليك يابن يونس ..

لو كنت في وقتنا هذا .. كان جاتك القرحه من اللي بتشوفه .. ولا انت طالع لا بمرصد ولا غيره

بتقعد تدور لك وظيفه .. وان كان لقيت لك اختراع .. بتصف سرى تدور لك داعم ..

وبعد ما تموت كلن بيفزع لك ويقول خسارة .. خسرنا عالم سعودي ..

لأننا تعودنا ما نكرم ولا نهتم الا بلأموات

ذات صله :

• مدونة الصعاليك-شعراء التسول

• مدونة ماشي صح – القصة المحدثه للصرصور والنملة
• ابن يونس -علماء الفلك العرب
• مقال مصور عن ابن يونس