Cartoonist TK Sujith's Blog വര@തല=തലവര

മുഴുപേജിൽ ആഘോഷിച്ച കേരളത്തിന്റെ അറുപതാം പിറന്നാൾ

2025-03-12T12:10:00.002+05:30

കാർട്ടൂണിൻ്റെ വഴികൾ-13

*********************

വാരാന്ത്യ കൗമുദിക്കു വേണ്ടി തയ്യാറാക്കിയ സ്പെഷ്യൽ കാർട്ടൂണുകളെക്കുറിച്ചാണല്ലോ കഴിഞ്ഞ കുറെ ലക്കങ്ങളായി സംസാരിച്ചത്. അപൂർവ്വമായി പത്രത്തിന്റെ മുഖ്യപേജുകളിലേക്കും ഇത്തരം മുഴുപേജു കാർട്ടൂണുകൾ കടന്നു വരാറുണ്ട്.എഴുതിഫലിപ്പിക്കാനാകാത്തവിധം വിപുലമായ ഒരു വിഷയത്തിന്റെ ദൃശ്യവൽക്കരണസാധ്യത പരിഗണിച്ചാണ് പത്രത്തിന്റെ മുഖ്യപേജുകളിൽ ഒന്ന് മുഴുവനായും കാർട്ടൂണിനായി നീക്കിവെക്കുന്നത്.

2016 നവംബറിൽ കേരളം അറുപതാം പിറന്നാൾ ആഘോഷിക്കുന്ന വേളയിൽ ഏതു തരത്തിൽ ഈ വിഷയം പത്രത്തിൽ നൽകാമെന്ന ചിന്തകൾക്കൊടുവിലാണ് പത്രത്തിന്റെ എഡിറ്റോറിയൽ പേജിന്റെ ചുമതലയുള്ള ഡെപ്യൂട്ടി എഡിറ്റർ വി.എസ്. രാജേഷ്, ഒരു മുഴുവൻ പേജ് കാർട്ടൂൺ വരയ്ക്കാമോ എന്നു ചോദിക്കുന്നത്. എഡിറ്റോറിയൽ പേജു പോലെ വളരെ ഗൗരവമുള്ള പേജിലേക്ക് കേരളത്തിന്റെ അറുപതാം പിറന്നാൾ പോലെ വളരെ വിശാലമായ മാനങ്ങളുള്ള വിഷയത്തെ അടിസ്ഥാനമാക്കി കാർട്ടൂൺ വരക്കേണ്ട വെല്ലുവിളി ആവേശത്തോടെയാണ് സ്വീകരിച്ചത്. കേരളത്തെ സംബന്ധിച്ച് കാർട്ടൂണിൽ ഉൾപ്പെടുത്തേണ്ട ആറു പതീറ്റാണ്ട് കാലത്തെ പ്രധാന സംഭവങ്ങൾ മൊബൈലിലെ ഇന്റർനെറ്റിൽ പരതുന്നതിനിടയിൽ നമ്മുടെ സമൂഹത്തിൽ ഏറ്റവും സ്വാധീനം ചെലുത്തുന്ന മൊബൈൽ ഫോണിനെക്കുറിച്ച് ചിന്ത ഉയർന്നു.ഒരു തലമുറയുടെ ചിന്തയെയും ഭാവനയെയും ജീവിതത്തെ തന്നെയും മൊബൈൽ ഫോൺ അത്രമേൽ സ്വാധീനിച്ചു കൊണ്ടിരുന്ന ഈ കാലത്ത് ഇതൊന്നുമില്ലാതിരുന്ന കേരളത്തിന്റെ പഴയ കാലത്തിലേക്ക് ചിന്ത കടന്നു ചെന്നു.

അന്ന് വിവരങ്ങൾ ലഭിച്ചിരുന്നത് മുതിർന്നവർ പകർന്നു നൽകുന്ന കഥകളിലൂടെയും പാട്ടുകളിലൂടെയുമായിരുന്നു. അന്ന് കുടുംബങ്ങളിൽ മുതിർന്നവർ പ്രത്യേകിച്ചു മുത്തശ്ശിമാർ കുട്ടികൾക്ക് കഥകൾ പകർന്നു കൊടുക്കുമായിരുന്നു. കഴിഞ്ഞ തലമുറയുടെ ഭാവനയും ചിന്തയുമൊക്കെ വികസിച്ചത് ഇത്തരം മുത്തശ്ശിക്കഥകളിലൂടെയായിരുന്നു.പരസ്പരം സംസാരിക്കാൻ സമയമില്ലാതെ വീടുകളിൽ പോലും ഓരോ വ്യക്തിയും അവരവരുടെ മൊബൈലിലേക്ക് തലകുനിച്ചിരിക്കുന്ന ഒറ്റപ്പെട്ട തുരുത്തുകളായി മാറുന്ന കാഴ്ചയാണ് ഇന്നു നാം കാണുന്നത്. അന്നും ഇന്നും എന്ന രണ്ട് വിഭാഗങ്ങളിലായി കേരളീയ കുടുംബങ്ങൾക്കു വന്ന ഈ മാറ്റത്തെ ചിത്രീകരിച്ചാൽ നന്നായിരിക്കുമെന്നു തോന്നി.

കേരളത്തിന്റെ അറുപതുവർഷത്തെ ചരിത്രസംഭവങ്ങളെ ചിത്രീകരിക്കുന്നതിനു പകരം ഇതുപോലെ നമ്മുടെ സാമൂഹിക സാംസ്കാരിക രാഷ്ട്രീയ മണ്ഡലങ്ങളിൽ ആറുപതീറ്റാണ്ടിനിടയിൽ പൊതുവായി വന്ന മാറ്റങ്ങളെ ചിത്രീകരിക്കുകയാണ് ഉചിതം എന്നു തോന്നി. കേരളം കടന്നു വന്ന മറ്റ് രാഷ്ട്രീയ സാമൂഹ്യ സംഭവങ്ങളെ ഒറ്റ പേജിലേക്ക് ഒതുക്കുന്നത് വളരെ ശ്രമകരമാണ് എന്നതു കൊണ്ടാണ് ഈ രീതിയിൽ പൊതുവായ ഒരു തെരഞ്ഞെടുപ്പ് വേണ്ടി വന്നത്. പിന്നിട്ട അറുപതാണ്ട് നമ്മുടെ നാടിനും നഗരത്തിനും വ്യക്തിക്കും സമൂഹത്തിനും വരുത്തിയ മാറ്റങ്ങളുടെ ദൃശ്യത്തിലേക്ക് ഒരു കാർട്ടൂൺ സഞ്ചാരം നടത്താം എന്ന ശ്രമമായിരുന്നു പിന്നീട്.

കുറെയേറെ വെട്ടിത്തിരുത്തലുകൾക്കു ശേഷം പ്രകൃതി, നാട്, നഗരം, കുടുംബം, തെരുവ്, സമൂഹം, രാഷ്ട്രീയം എന്നിങ്ങനെ ഏഴുവിഭാഗങ്ങളിലായി കേരളത്തിന്റെ മാറ്റങ്ങൾ ചർച്ച ചെയ്യാം എന്നു തോന്നി.

പ്രകൃതി എന്ന വിഭാഗത്തിൽ പരശുരാമൻ മഴുവെറിഞ്ഞ് കേരളം കടലിൽ നിന്ന് വീണ്ടെടുത്ത ഐതിഹ്യത്തിലേക്കാണ് സൂചനകൾ നൽകിയത്. പരശുരാമൻ മഴുവെറിഞ്ഞ് വീണ്ടെടുത്ത കേരളീയപ്രകൃതി ഇന്ന് എല്ലാം വെട്ടിപ്പിടിക്കാനൊരുങ്ങുന്ന ഭൂമാഫിയയുടെ മഴുവിനു കീഴിൽ വിറങ്ങലിച്ചു നിൽക്കുന്ന കാഴ്ച ആദ്യ ചിത്രത്തിൽ വരച്ചു. കേരവൃക്ഷങ്ങളുടെ നാടായ കേരളം മൊബൈൽ ടവറുകളുടെ നാടായി മാറുന്ന കാഴ്ചയാണ് നാട് എന്ന വിഭാഗത്തിൽ വരച്ചത്.

പണ്ട് നഗരത്തിൽ ആഡംബര കാർ പ്രത്യക്ഷപ്പെടുന്നത് വളരെ അതിശയമായിരുന്നു. എന്നാൽ ഇന്ന് വാഹനപ്പെരുപ്പം മൂലം വാഹങ്ങൾക്കിടയിൽ കുരുങ്ങി നിൽക്കുന്ന കാൽനടയാത്രികനെയാണ് നഗരം എന്ന വിഭാഗത്തിൽ വരച്ചത്. കുടുംബം എന്ന തലക്കെട്ടിനു താഴെ കഥ പറഞ്ഞ് കുട്ടികളെ കയ്യിലെടുക്കുന്ന അന്നത്തെ മുത്തശ്ശിയേയും ഇന്ന് സ്വന്തം മൊബൈൽ ഫോണിലേക്ക് കണ്ണുംനട്ടിരിക്കുന്ന കുടുംബത്തിലെ വ്യക്തികളെയും ചിത്രീകരിച്ചു. വാക്കിങ്ങ് സ്റ്റിക്കുകളുമായി സ്വന്തം ചുവടുവെപ്പുകളിൽ ജാഗ്രതയോടെ വായനശാലകളിലേക്ക് നടന്നു നീങ്ങിയിരുന്ന പഴയതലമുറയേയും സെൽഫിസ്റ്റിക്കുമായി മുകളിലേക്കു നോക്കി സ്വന്തം മുഖം സെൽഫിയിൽ പകർത്തുന്ന യുവതലമുറയെയാണ് സമൂഹം എന്ന തലക്കെട്ടിനു താഴെ വരച്ചത്.

ദൈവത്തിന്റെ സ്വന്തം നാട് അഥവാ ഗോഡ്സ് ഓൺ കൺട്രി എങ്ങനെ ഡോഗ്സ് ഓൺ കൺട്രിയായി എന്ന കാഴ്ച തെരുവ് എന്ന തലക്കെട്ടിനു താഴെ ചിത്രീകരിച്ചു.പരശുരാമനിൽ തുടങ്ങിയ കാർട്ടൂൺ അവസാനിച്ചതും ഒരു മിത്തിലൂടെയായിരുന്നു. മൂന്നടി ദാനം ചോദിച്ച വാമനനു വേണ്ടി തന്റെ ശിരസ്സുകുനിച്ചു നൽകിയ മഹാബലിചക്രവർത്തിയുടെ കഥ ആണ് രാഷ്ട്രീയം എന്ന തലക്കെട്ടിൽ വരച്ചത്. പഴയ മഹാബലിയ്ക്കുപകരം ഇന്ന് മതം,അസഹിഷ്ണുത, അഴിമതി, തീവ്രവാദം,ലഹരി, കള്ളപ്പണം അന്ധവിശ്വാസം,ക്രൈം തുടങ്ങി ഒരുപാട് വാമനന്മാരുടെ കാലടിക്കുകീഴിൽ ദു:ഖിതയായി നിൽക്കുന്ന കേരളത്തെയാണ് ചിത്രീകരിച്ചത്. കേരളത്തെ ചവിട്ടി താഴ്ത്താൻ ഒരുങ്ങുന്ന ഈ അഭിനവ വാമനന്മാരുടെ ചിത്രത്തിലാണ് കാർട്ടൂൺ അവസാനിപ്പിച്ചത്.

നിരന്തരം മാറ്റങ്ങൾക്ക് വിധേയമാകുന്ന കാലത്തിന്റെ ക്യാൻവാസിൽ നമ്മളെല്ലാവരും സ്വന്തം ജീവിതം കൊണ്ട് അടയാളപ്പെടുത്തുന്ന ഈ ദൃശ്യങ്ങൾക്ക് 2016 നവംബർ ആദ്യവാരത്തിൽ കേരളം അന്നും ഇന്നും എന്ന തലക്കെട്ടിൽ കേരളകൗമുദി എഡിറ്റോറിയൽ പേജിൽ ഗംഭീര ഡിസ്പ്ലേ ലഭിച്ചു. വായനക്കാർ നല്ല രീതിയിൽ ഈ കാർട്ടൂണിനെ സ്വീകരിക്കുകയും നല്ല വാക്കുകൾ പറയുകയും ചെയ്തു. 2016ലെ ഏറ്റവും മികച്ച കാർട്ടൂണിനുള്ള സംസ്ഥാന സർക്കാറിന്റെ മാധ്യമ അവാർഡ് ഈ കാർട്ടൂണിനു ലഭിച്ചു.

ക്ലിക്കാകാതെ പോയ ദശാവതാരം

2025-03-04T11:10:00.003+05:30

കാർട്ടൂണിൻ്റെ വഴികൾ-12

***************

കോടിക്കണക്കിനു രൂപ മുതൽമുടക്കിൽ പുറത്തിറക്കുന്ന പല വലിയ സിനിമകളും പ്രേക്ഷകരുടെ മുന്നിൽ ദയനീയമായി പരാജയപ്പെടുന്ന കാഴ്ച നമ്മൾ പലപ്പോഴും കണ്ടിട്ടുണ്ട്. കാർട്ടൂണുകളിലും ഇതു ബാധകമാണ്. വളരെ പഠനങ്ങൾ നടത്തി, വളരെ തയ്യാറെടുപ്പോടെ വലിയ കാൻവാസിൽ വരക്കുന്ന കാർട്ടൂണുകളും ചിലപ്പോൾ വായനക്കാർ വേണ്ടത്ര സ്വീകരിക്കാറില്ല. അത്തരമൊരു കാർട്ടൂണിന്റെ കഥയാണ് ഇനി.

2008, 2009 വർഷങ്ങളിൽ വർഷാന്ത്യ അവലോകന കാർട്ടൂൺ വരച്ചതുപോലെ 2010 ലും ഇത്തരം ഒരു കാർട്ടൂണിനായുള്ള ആവശ്യം ഉയരുകയുണ്ടായി. 9 എന്ന അക്കത്തിൽ നിന്നു നവരസങ്ങളിലേക്ക് ഒരു ചിന്ത വികസിച്ചതുപോലെ 10 എന്ന അക്കത്തിൽ നിന്ന് എന്തു ചെയ്യാം എന്നായി ആലോചന. 10 എന്നാൽ ദശം ആണല്ലോ. 9 എന്ന അക്കം നവരസവുമായി ബന്ധപ്പെടുത്തിയപ്പോൾ 9 സംഭവങ്ങൾ തെരഞ്ഞെടുത്തതു പോലെ 2010 ലെ പത്തു പ്രധാന സംഭവങ്ങളെ തെരഞ്ഞെടുത്ത് ദശാവതാര കഥകളുമായി ബന്ധപ്പെടുത്തി വരക്കാം എന്നായി പിന്നീടുള്ള ചിന്ത. അതിനായി ദശാവതാര കഥകൾ വീണ്ടും വിശദമായി വായിക്കുകയും മനസ്സിലാക്കുകയും ചെയ്തു.

മുൻവർഷത്തിലേതുപോലെ 2010 ലെ പ്രധാനപ്പെട്ടതും ചർച്ചചെയ്യപ്പെട്ടതുമായ 10 സംഭവങ്ങൾ തെരഞ്ഞെടുക്കുകയും അവയുടെ പട്ടിക തയ്യാറാക്കുകയും ചെയ്തു. ഇവയെ ഏതൊക്കെ അവതാരങ്ങളുമായി ബന്ധപ്പെടുത്താം എന്നും ധാരണയായി.

ഹയഗ്രീവൻ എന്ന അസുരനിൽ നിന്നും വേദങ്ങൾ വീണ്ടെടുക്കാനായി ആണല്ലോ മഹാവിഷ്ണു മത്സ്യാവതാരം കൈക്കൊണ്ടത്. വൈവസ്വതമനു മൺകുടത്തിൽ വളർത്തിയ മത്സ്യം വളർന്ന് പൊയ്കയിലോ പുഴയിലോ ഗംഗാനദിയിലോ സമുദ്രത്തിലോ ഉൾക്കൊള്ളാനാവാത്ത വിധം വളരുന്ന കഥ മത്സ്യാവതാര കഥയിൽ വളരെ വിശദമായി പ്രതിപാദിക്കുന്നുണ്ട്. ലോട്ടറി മാഫിയയുമായി ബന്ധപ്പെട്ട വിവാദങ്ങളായിരുന്നു വി.എസ്.അച്യുതാനന്ദൻ സർക്കാറിനെ ഏറ്റവും കൂടുതൽ പിടിച്ചു കുലുക്കിയത്. തോമസ് ഐസക്കിന്റെ മൺകുടത്തിൽ വീണ ലോട്ടറി മാഫിയ എന്ന മത്സ്യം അദ്ദേഹത്തിന് ഉൾക്കൊള്ളാനാവാത്ത വിധം വളർന്ന് പീന്നീട് അദ്ദേഹത്തിനെ തന്നെ വിഴുങ്ങുന്ന അവസ്ഥയിലേക്ക് എത്തുന്നതാണ് മത്സ്യാവതാര കഥയുമായി ബന്ധപ്പെട്ട് വരച്ചത്.

പാലാഴിമഥന സമയത്ത് മഹാവിഷ്ണു കൂർമ്മമായി അവതരിച്ച് മന്ദര പർവ്വതത്തിനെ താങ്ങിയ കഥയുമായി ബന്ധപ്പെടുത്തിയത് സ്മാർട്ട് സിറ്റി വിഷയമായിരുന്നു. സ്മാർട്ട് സിറ്റിയിൽ വടം വലി തുടരുന്ന ടീകോമിനേയും വ്യവസായമന്ത്രി എസ്. ശർമ്മയേയും പദ്ധതി വെള്ളത്തിലാവാതെ താങ്ങി നിർത്തുന്ന കൂർമ്മമായി മുഖ്യമന്ത്രി വി.എസ്. അച്യുതാനന്ദനെയുമാണ് വരച്ചത്.

കർണ്ണാടകയിൽ ഭൂമി കുംഭകോണവുമായി ബന്ധപ്പെട്ട് യെദ്യൂരിയപ്പ സർക്കാർ വിമത പക്ഷത്തിന്റെ ഭീഷണി മറികടന്ന് വിശ്വാസവോട്ട് നേടുന്നതാണ് വരാഹ അവതാരവുമായി ബന്ധപ്പെട്ട് വരച്ചത്.

കേന്ദ്രത്തിൽ കോമൺവെൽത്ത്, 2ജി, ആദർശ് ഫ്ലാറ്റ് തുടങ്ങിയ വിവിധ അഴിമതി കേസുകൾ പാർലമെന്റിന്റെ തൂണുതകർത്ത് പുറത്തുചാടി മൻമോഹൻ സിങ്ങ് സർക്കാരിന്റെ മാറു പിളർക്കുന്നതായാണ് നരസിംഹാവതാരവുമായി ബന്ധപ്പെട്ട് വരച്ചത്.

ആ വർഷം ഇന്ത്യ സന്ദർശിക്കാൻ എത്തുന്ന അമേരിക്കൻ പ്രസിഡന്റ് ബരാക്ക് ഒബാമയെ ഇന്ത്യൻ വിപണി കാണിച്ച് സ്വീകരിക്കുന്ന മഹാബലിയായി മൻമോഹൻ സിങ്ങിനെ ചിത്രീകരിക്കുന്ന കാർട്ടൂണാണ് വാമനാവതാരവുമായി ബന്ധപ്പെട്ട് വരച്ചത്. ചെറിയ രൂപം പൂണ്ട് വരുന്ന ഒബാമ ഭാവിയിൽ ഭീമാകാരനായി ഇന്ത്യൻ വിപണിയെ കീഴടക്കുമെന്ന ധ്വനിയും കാർട്ടൂണിൽ ഉണ്ടായിരുന്നു.

നടൻ തിലകനും അമ്മ താരസംഘടനയുമായി അഭിപ്രായഭിന്നതകൾ ഉണ്ടാകുകയും സംഘടന തിലകനു വിലക്ക് ഏർപ്പെടുത്തുകയും ചെയ്തതുമായി ബന്ധപ്പെട്ട വിവാദങ്ങൾ നിറഞ്ഞു നിന്ന സമയമാണ് 2010. അമ്മ സംഘടനക്കെതിരെ നിരന്തരം പ്രസ്താവനകൾ മാധ്യമങ്ങളിലൂടെ പങ്കു വെക്കുന്ന തിലകനെ അമ്മയെ വധിച്ച പരശുരാമനുമായാണ് ബന്ധപ്പെടുത്തിയത്.

എൽ.ഡി.എഫ് ബന്ധം ആകുന്ന വില്ല് ഒടിച്ച് കെ.എം.മാണിയോട് ലയിച്ച രാമനായി പി.ജെ. ജോസഫിനെ ചിത്രീകരിച്ചു.

2010 ഒക്ടോബറിൽ കാസർകോട് നടന്ന ഒരു സെമിനാറിൽ കേന്ദ്ര കൃഷി സഹമന്ത്രിയായിരുന്ന കെ.വി.തോമസ്, എൻഡോസഫാൻ മനുഷ്യനിൽ ആരോഗ്യപ്രശ്നങ്ങൾ ഉണ്ടാക്കുന്നതായി തെളിയിക്കപ്പെട്ടിട്ടില്ല എന്നൊരു പ്രസ്താവന നടത്തുകയും ഇത് കക്ഷിരാഷ്ട്രീയഭേദമെന്യേ ഒരുപാട് വിവാദങ്ങൾക്ക് വഴി തെളിയിക്കുകയും ചെയ്തു. ഇതിനെതിരെ ഏറ്റവും ശക്തമായി പ്രതിഷേധിച്ചത് വി.എം.സുധീരനായിരുന്നു. പ്രതിഷേധത്തിന്റെ കലപ്പ ഉയർത്തി ഹെലികോപ്ടറിൽ എൻഡോസൾഫാൻ തളിക്കാൻ എത്തുന്ന കെ.വി. തോമസിനെ തടയുന്ന സുധീരനെയാണ് ബലരാമൻ എന്ന അവതാരവുമായി ബന്ധപ്പെട്ട് വരച്ചത്.

കോൺഗ്രസ്സ് പു:നപ്രവേശനത്തിനായി ഉരലുമായി മുരളിയൂതി മുന്നോട്ടു പോകാൻ ശ്രമിക്കുന്ന കൃഷ്ണനായി കെ.മുരളീധരനെയും ഉമ്മൻചാണ്ടി, രമേശ് ചെന്നിത്തല, എന്നീ വന്മരങ്ങൾക്കിടയിൽ ഉരൽ തടഞ്ഞു നിൽക്കുന്നതായും കൃഷ്ണാവതാരത്തിൽ ചിത്രീകരിച്ചു.

മന്ത്രിസഭയിലും മുന്നണിയിലും ഒരുപാട് വിവാദങ്ങളുയർത്തിയ റവന്യൂ വകുപ്പുമായി ബന്ധപ്പെട്ട നിയമന തട്ടിപ്പ് പ്രശ്നമാണ് കൽക്കി അവതാരവുമായി ബന്ധപ്പെട്ട് വരച്ചത്. അന്നത്തെ റവന്യൂ മന്ത്രി കെ.പി. രാജേന്ദ്രനെ കുടുംബം കലക്കി എന്നു വിശേഷിപ്പിക്കുന്ന സി.പി.ഐ. സംസ്ഥാന ജനറൽ സെക്രട്ടറി സി.കെ. ചന്ദ്രപ്പനേയും കാർട്ടൂണിൽ കാണാം.

ഏറെ പ്രതീക്ഷയോടെ വലിയ രീതിയിൽ 2010 ഡിസംബർ 19ന് അച്ചടിച്ച ഈ കാർട്ടൂൺ ദയനീയമായി പരാജയപ്പെടുകയാണുണ്ടായത്. വായനക്കാർ ഈ കാർട്ടൂണിനെ സ്വീകരിച്ചില്ല.കാർട്ടൂൺ ലളിതമാകണം എന്ന അടിസ്ഥാനപാഠം മറന്നതാകാം കാരണം. ഒരു കാർട്ടൂൺ പിറവിയെടുക്കുമ്പോൾ അതിന്റെ പിന്നാമ്പുറത്ത് നടത്തിയ തയ്യാറെടുപ്പുകളും പഠനങ്ങളും വായനക്കാർക്ക് അറിയേണ്ട ആവശ്യമില്ലല്ലോ. ഒരു കാർട്ടൂണിൽ നിന്നും ആളുകൾ പ്രതീക്ഷിക്കുന്നതിലും ദുർഗ്രഹമായിപ്പോയി അതിലെ ആശയങ്ങൾ എന്നതാവാം ഈ കാർട്ടൂണിന്റെ പരാജയ കാരണം. കാർട്ടൂൺ എത്രയും പെട്ടെന്ന് ആശയവിനിമയം ചെയ്തില്ല എങ്കിൽ വായനക്കാരൻ അത് അപ്പാടെ തള്ളിക്കളയുമെന്ന വിലപ്പെട്ട പാഠം ഈ കാർട്ടൂൺ പഠിപ്പിച്ചു.

ശാന്തനായ വി.എസ്,ശൃംഗാരവുമായി പിണറായി: രാഷ്‌ട്രീയനേതാക്കളവതരിപ്പിച്ച നവരസങ്ങൾ

2025-02-28T19:01:00.000+05:30

കാർട്ടൂണിൻ്റെ വഴികൾ-11

ദൈനംദിന രാഷ്ട്രീയവാർത്തകളോട് ബന്ധപ്പെടുത്തി മൂന്നു കോളത്തിൽ ഒതുങ്ങാതെ രാഷ്ട്രീയവിശകലനം എന്ന രീതിയിൽ കാർട്ടൂണുകൾ കൂടുതൽ വലിയ ഇടങ്ങളിലേക്ക് വ്യാപിക്കുന്നതിനേക്കുറിച്ചാണല്ലോ കഴിഞ്ഞ കുറിപ്പിൽ എഴുതിയത്. ഇത് ജനങ്ങൾക്ക് ഇഷ്ടമാകുന്ന രീതിയിലുള്ള പരീക്ഷണമാണ് എന്നും എഴുതി.

2008 ഡിസംബർ അവസാനം വാരാന്ത്യ കൗമുദിയിൽ പ്രസിദ്ധീകരിച്ച വിചിത്ര പ്രദർശനം എന്ന അരപേജ് കാർട്ടൂണിന്റെ മാതൃകയിൽ 2009 ഡിസംബർ മാസത്തെ അവസാനത്തെ വാരാന്ത്യകൗമുദിയിലും ഒരു അവലോകന കാർട്ടൂൺ വേണമെന്ന ആവശ്യം വേണുവേട്ടൻ (വി.വി വേണുഗോപാൽ) പറഞ്ഞു.

അവലോകന കാർട്ടൂൺ വരക്കുന്നതിന് ആ വർഷം നടന്ന പ്രധാന രാഷ്ട്രീയ സംഭവങ്ങളുടെ പട്ടിക തയ്യാറാക്കുകയാണ് ആദ്യം വേണ്ടത്. ജനങ്ങൾ ആ വർഷം ഏറ്റവും കൂടുതൽ ചർച്ച ചെയ്ത വിഷയങ്ങളാണ് പട്ടികയിൽ ഉൾപ്പെടുത്തുന്നത്. പട്ടിക തയ്യാറാക്കിയതിനു ശേഷം ഏത് പശ്ചാത്തലത്തിലും ക്രമത്തിലുമാണ് ഇത് അവതരിപ്പിക്കേണ്ടത് എന്നതിനെക്കുറിച്ചാണ് ചിന്തിക്കുന്നത്. മികച്ച രീതിയിൽ ജനങ്ങൾക്ക് ആശയവിനിമയം സാധ്യമാകുന്ന തരത്തിലുള്ള ഒരു വിഷ്വൽ കണ്ടുപിടിക്കുക എന്നതാണ് ഇത്തരം അവലോകന കാർട്ടൂണുകളുടെ പ്രധാന വെല്ലുവിളി. ജനത്തിനു പരിചിതമായ ദൃശ്യം ലഭ്യമായില്ല എങ്കിൽ വലിയ കാൻവാസിൽ വരക്കുന്ന ഇത്തരം കാർട്ടൂണുകൾക്ക് ഉദ്ദേശിച്ച ഫലം ലഭിക്കാതെ പോകും.

2009 എന്ന വർഷത്തെ പ്രധാന സംഭവങ്ങളാണ് വരക്കേണ്ടത് എന്നതിനാൽ 9 എന്ന സംഖ്യ മനസ്സിൽ ഉടക്കി. (2009 നെ ‘09’ എന്ന് എഴുതുമല്ലോ). ഒൻപതിൽ നിന്ന് നവവർഷത്തിലേക്ക് എന്ന ആശയത്തിൽ നിന്ന് നവം എന്ന പദം മനസ്സിൽ വന്നു. ഇതിനു തുടർച്ചയായി ഒൻപതുമായി ബന്ധപ്പെട്ട് കഥകളിയിലെ നവരസങ്ങൾ ഓർമ്മ വന്നു. കഴിഞ്ഞ വർഷത്തെ ഒൻപത് പ്രധാന സംഭവങ്ങൾ മാത്രം തിരഞ്ഞെടുത്ത് നവരസങ്ങളിലൂടെ അവതരിപ്പിച്ചാൽ നന്നായിരിക്കും എന്നൊരു ചിന്തയും മനസ്സിൽ വന്നു.

ഒൻപതു ഭാവങ്ങൾക്ക് അനുസൃതമായി കഴിഞ്ഞ വർഷത്തെ പ്രധാന സംഭവങ്ങളുടെ പട്ടികയിൽ നിന്നും ചേരുന്ന വിഷയങ്ങൾ ഏതാണെന്നു കണ്ടുപിടിക്കലാണ് അടുത്തതായി ചെയ്തത്. ശാന്തം, കരുണം, ശൃംഗാരം, അത്ഭുതം, വീരം, ഭയാനകം, ഹാസ്യം, രൗദ്രം, ബീഭത്സം എന്നിങ്ങനെ ഒൻപത് രസങ്ങൾക്ക് ചേർന്ന സംഭവങ്ങളെ അതിനോട് ചേരും പടി ചേർക്കുന്നതിനായി ഈ പട്ടിക ആഴത്തിൽ പരിശോധിക്കുകയുണ്ടായി. കാർട്ടൂണിൽ നവരസങ്ങൾ വരുമ്പോൾ കൃത്യമായും ആ ഭാവം കാർട്ടൂണിൽ ഉണ്ടാകണമെന്നു നിർബന്ധമുണ്ടായിരുന്നു.ഇതിനായി പ്രശസ്തനായ കഥകളി കലാകാരന്മാർ അവതരിപ്പിച്ച നവരസങ്ങളുടെ ചിത്രങ്ങൾ റഫർ ചെയ്ത് പഠിച്ചു. ഇത്തരം തയ്യാറെടുപ്പുകൾക്ക് ശേഷം കാർട്ടൂണിൽ ഉൾപ്പെടുത്തേണ്ട ഒൻപത് രാഷ്‌ട്രീയ സംഭവങ്ങൾ ഒൻപത് ഭാവങ്ങളുമായി ബന്ധപ്പടുത്തി.

മുഖ്യമന്ത്രി വി.എസ്. അച്യുതാനന്ദൻ പാർട്ടിയിൽ നിന്നും അച്ചടക്ക നടപടി ഏറ്റുവാങ്ങി ഭരണത്തിൽ തുടരുന്ന കാലം.പാർട്ടിയുടെ അച്ചടക്ക നടപടി എന്ന മുൾക്കസേരയിൽ ശാന്തനായി ഭരണം നടത്തുന്ന വി.എസിനെയാണ് ശാന്തം എന്ന രസവുമായി ബന്ധിപ്പിച്ചത്.

കോൺഗ്രസ്സിൽ നിന്നും കലാപമുണ്ടാക്കി പുറത്തു പോവുകയും സ്വന്തം പാർട്ടി ഒരിടത്തുമെത്താതെ എൻ.സി.പി.യിലേക്ക് ചേക്കേറുകയും പിന്നീട് മാതൃസംഘടനയിലേക്കു തിരിച്ചു വരാൻ ഒരുങ്ങുന്ന മകനായ കെ.മുരളീധരനുവേണ്ടി ഇതിനകം കോൺഗ്രസ്സിലേക്ക് തിരിച്ചെത്തിയ കെ.കരുണാകരൻ എ.ഐ.സി.സി. നേതൃത്വത്തിനു നിരന്തരം കത്തുകൾ എഴുതുമായിരുന്നു. ഒരച്ഛൻ മകനുവേണ്ടി എഴുതിയ കത്തുകൾ എന്ന പേരിൽ കത്തുകളുമായി ഇരിക്കുന്ന കെ. കരുണാകരനെയാണ് കരുണം എന്ന രസവുമായി ബന്ധപ്പെടുത്തിയത്.

കണ്ണൂർ നിയമസഭാമണ്ഡലത്തിൽ നടന്ന ഉപതിരഞ്ഞെടുപ്പിൽ സി.പി.എമ്മിന്റെ എം.വി. ജയരാജനെ അട്ടിമറിച്ചുകൊണ്ട് അബ്ദുള്ളക്കുട്ടി വിജയിച്ചു. അബ്ദുള്ളക്കുട്ടിക്ക് അത്ഭുതക്കുട്ടി എന്നൊരു വിളിപ്പേരുകൂടി ഉണ്ടല്ലോ. ഈ അട്ടിമറി വിജയത്തെ ബന്ധിപ്പിച്ചാണ് അത്ഭുതം എന്ന രസം ചിത്രീകരിച്ചത്.

2009ൽ നടന്ന പാർലമെന്റ് ഇലക്ഷനിൽ പൊന്നാനി ലോക്സഭാ മണ്ഡലത്തിൽ നടത്തിയ പുതിയ പരീക്ഷണത്തിന്റെ ഭാഗമായി പി.ഡി.പി നേതാവ് അബ്ദുൾ നാസർ മഅദ്നിയുമായി സി.പി എമ്മിന്റെ സംസ്ഥാന സെക്രട്ടറിയായിരുന്ന പിണറായി വിജയൻ ഒരേ വേദി പങ്കിട്ടതിന്റെ ഓർമ്മ പുതുക്കുന്നതായി ശൃംഗാരം എന്ന രസം. ലോക്സഭാ ഇലക്ഷനുമായി ബന്ധപ്പെട്ടു തന്നെ കോഴിക്കോട് സീറ്റ് നിഷേധിച്ചതിന്റെ പേരിൽ എം.പി. വീരേന്ദ്രകുമാറിന്റെ ജനതാദൾ എസ് ഇടതു മുന്നണി വിട്ട് യു.ഡി.എഫിലേക്ക് ചേക്കേറിയതിനെയാണ് വീരം എന്ന രസവുമായി ബന്ധിപ്പിച്ചത്.

സംസ്ഥാനത്ത് ഏറെ വിവാദം ഉയർത്തിയ മുത്തൂറ്റ് പോൾ വധക്കേസും ‘എസ്’ കത്തി വിവാദവും ഭയാനകം എന്ന തലക്കെട്ടിനു താഴെ ചിത്രീകരിച്ചു. ലോക്സഭാ തെരെഞ്ഞെടുപ്പിൽ പ്രസക്തി നഷ്ടപ്പെട്ട മൂന്നാം മുന്നണിയെ ഹാസ്യം എന്ന രസവുമായും ബന്ധിപ്പിച്ചു.ബി.ജെ.പി.യ്ക്കുമേൽ ആർ.എസ്.എസിന്റെ തീവ്ര ഹിന്ദുത്വ ആശയങ്ങൾ അപ്രമാദിത്വം നേടുന്നതിനെ രൗദ്രം എന്ന രസവുമായും മുല്ലപ്പെരിയാർ വിഷയത്തിൽ കേരളത്തിലെ ജനങ്ങളുടെ സുരക്ഷ തെല്ലും വകവെക്കാതെ തമിഴ്നാടിന്റെ സ്ഥാപിത താല്പര്യങ്ങൾക്കു വേണ്ടി മാത്രം നിലകൊള്ളുന്ന തമിഴ്നാട് മുഖ്യമന്ത്രി എം.കരുണാനിധിയെ ബീഭത്സം എന്ന രസവുമായും ബന്ധിപ്പിക്കുകയുണ്ടായി.

ഇങ്ങനെ,അധികം വാക്കുകൾ ഇല്ലാതെ കരുണം എന്നത് കരുണാകരനുമായും അത്ഭുതമെന്നത് അത്ഭുതക്കുട്ടിയുമായും വീരം എന്നതു വീരേന്ദ്രകുമാറുമായൊക്കെ ബന്ധിപ്പിച്ച് സന്ദർഭത്തിനു ചേരുന്ന ഭാവങ്ങളിലും ശ്രദ്ധിച്ച് അവതരിപ്പിച്ച ഈ കാർട്ടൂൺ ഏറെ ചർച്ച ചെയ്യപ്പെട്ടു.

2009 ഡിസംബർ 27 ന് വാരാന്ത്യകൗമുദിയിൽ അരപ്പേജിൽ പ്രസിദ്ധീകരിച്ച ഈ കാർട്ടൂൺ ആ വർഷത്തെ സംസ്ഥാന സർക്കാറിന്റെ ഏറ്റവും മികച്ച കാർട്ടൂണിനുള്ള അവാർഡ്, കേരള ലളിതകലാ അക്കാഡമിയുടെ സംസ്ഥാന അവാർഡ്, തിരുവനന്തപുരം പ്രസ്ക്ലബ് അവാർഡ് ഇങ്ങനെ മൂന്ന് അവാർഡുകൾ നേടിത്തന്നു.

ഡാവിഞ്ചിയുടേയും രവിവർമ്മയുടേയും വിചിത്ര പ്രദർശനം

2025-02-27T06:29:00.002+05:30

കാർട്ടൂണിൻ്റെ വഴികൾ-10

മൂന്നു കോളം എന്ന പരിമിതിയിൽ ഒതുങ്ങാതെ കാർട്ടൂണുകൾ വലിയ ഇടങ്ങളിലേക്ക് വികസിക്കുന്ന കാര്യമാണല്ലോ കഴിഞ്ഞാഴ്ച എഴുതിയത്. പലപ്പോഴും ഇത് പെട്ടെന്ന് സംഭവിക്കുന്നതായിരിക്കും. പ്രത്യേക രാഷ്ട്രീയ സാഹചര്യം ഉരുത്തിരിഞ്ഞു വരുമ്പോൾ അതിനനുസരിച്ച് അത് എങ്ങനെ പത്രത്തിൽ പിറ്റേ ദിവസം വായനക്കാരുടെ മുന്നിൽ അവതരിപ്പിക്കാം എന്ന ചിന്തയിൽ നിന്നായിരിക്കാം ഇത്തരം കാർട്ടൂണുകൾ പിറക്കുന്നത്.

ഇതല്ലാതെ വളരെ മുന്നൊരുക്കങ്ങളോടു കൂടി, രാഷ്ട്രീയ അവലോകനം എന്ന രീതിയിൽ കാർട്ടൂണുകൾ തയ്യാറാക്കുന്ന രീതിയും പലപ്പോഴും നിത്യനിദാന കാർട്ടൂണിസ്റ്റുകൾ അവലംബിക്കാറുണ്ട്. അത്തരം ഒരു കാർട്ടൂണിന്റെ കഥയാണ് ഇനി പറയാൻ പോകുന്നത്.

വർഷം അവസാനിക്കുമ്പോൾ സാധാരണയായി പത്രത്തിൽ നൽകിവരുന്ന രാഷ്ട്രീയ അവലോകനങ്ങളുടെ സ്വഭാവത്തിൽ എങ്ങനെ ഒരു കാർട്ടൂൺ അവതരിപ്പിക്കാം എന്ന ചിന്തയാണ് ഇത്തരം ഡിസ്പ്ലേ കാർട്ടൂണുകളുടെ പിറവിക്ക് വഴിയൊരുക്കിയത്. സാധാരണ ദിവസങ്ങളിൽ പത്രത്തിൽ അരപേജോ മുഴുപെജോ വരുന്ന കാർട്ടൂണിനു സ്ഥലം ലഭിക്കില്ല എങ്കിലും വിശകലന സ്വഭാവമുള്ള ഒരു കാർട്ടൂൺ സ്പെഷ്യൽ പേജുകളിലോ വാരാന്ത്യപ്പതിപ്പിലോ നൽകുന്നത് എളുപ്പമായിരിക്കും.

രണ്ടായിരത്തി എട്ടിൽ ആ വർഷത്തെ പ്രധാന സംഭവങ്ങളെക്കുറിച്ച് വിശകലന സ്വഭാവത്തിലുള്ള ഒരു കാർട്ടൂൺ തയ്യാറാക്കാമോ എന്ന് അന്നത്തെ വാരാന്ത്യപ്പതിപ്പിന്റെ എഡിറ്റർ ആയിരുന്ന വി.വി. വേണുഗോപാൽ ആണ് ചോദിച്ചത്. അരപ്പേജിൽ എങ്ങനെ ഒരു ആശയം വളരെ വ്യത്യസ്തമായി പറയാം എന്ന ചിന്തിക്കുകയും ഒപ്പം കാർട്ടൂണിൽ വേണ്ട സംഭവങ്ങൾ എന്താണെന്നു ലിസ്റ്റ് ചെയ്യുകയും ചെയ്തു. പാർട്ടിയ്ക്ക് തലവേദനയുണ്ടാക്കുന്ന തീരുമാനങ്ങൾ എടുത്തിരുന്ന മുഖ്യമന്ത്രി വി.എസ്. അച്യുതാനന്ദനെ സ്വതന്ത്രനായി പ്രവർത്തിക്കാൻ അനുവദിക്കാതെ ഭരണത്തിൽ നിയന്ത്രണങ്ങൾ ഏർപ്പെടുത്തി പ്രൈവറ്റ് സെക്രട്ടറിയേയും പൊളിറ്റിക്കൽ സെക്രട്ടറിയേയും പാർട്ടിയുടെ ഔദ്യോഗിക വിഭാഗം നിശ്ചയിച്ച സമയം. രാജ്യത്തിനെ മുഴുവൻ ബാധിച്ച സാമ്പത്തിക പ്രതിസന്ധിയിൽ കേന്ദ്ര സർക്കാർ ബുദ്ധിമുട്ടിയിരുന്ന കാലമായിരുന്നു അത്. രാഹുൽ ഗാന്ധി ആ വർഷമാണ് എ.ഐ.സി.സിയുടെ ജനറൽ സെക്രട്ടറി ആയി മാറിയത്. പാർട്ടി വിട്ട് എൻ.സി.പി.യിൽ ചേക്കേറിയ കെ.മുരളീധരൻ കോൺഗ്രസ്സിലേക്ക് തിരിച്ചു വരാനുള്ള ശ്രമങ്ങൾ തുടങ്ങിയതും ശാസ്ത്ര രംഗത്ത് ചാന്ദ്രയാൻ എന്ന മഹത്തായ ദൗത്യം വിജയകരമായി പൂർത്തീകരിച്ചതും ഒബാമ അമേരിക്കയുടെ പ്രസിഡന്റായി വരുമെന്നുറപ്പായതും 2008 അവസാനത്തോടെയാണ്. ഇടതുപക്ഷത്തിന്റെ എല്ലാ എതിർപ്പുകളേയും മറികടന്ന് ഇൻഡോ-അമേരിക്കൻ ആണവ കരാറുമായി മൻമോഹൻ സിങ്ങ് സർക്കാർ മുന്നോട്ടു പോയതും ആ വർഷത്തെ പ്രധാന വാർത്ത ആയിരുന്നു.

ഇത്രയും പ്രധാനപ്പെട്ട സംഭവങ്ങളെ എങ്ങനെ രസകരമായി കാണികൾക്ക് കൗതുകം ഉണ്ടാക്കുന്ന രീതിയിൽ അവതരിപ്പിക്കാം എന്നായി ചിന്ത. ജനത്തിനു പരിചിതമായ വിഷ്വലുകളുടെ അഥവാ ചിത്രങ്ങളുടെ പാരഡിയായി ഈ ചിത്രത്തെ അവതരിപ്പിക്കാം എന്ന തോന്നൽ ഉണ്ടാകുന്നത് ലിയനാർഡോ ഡാവിഞ്ചിയുടെ പ്രശസ്തമായ അന്ത്യ അത്താഴം എന്ന ചിത്രം കാണുമ്പോഴാണ്. നിങ്ങളിൽ ഒരാൾ എന്നെ ഒറ്റിക്കൊടുക്കും എന്നു പറയുന്ന യേശുക്രിസ്തുവായി പൊളിറ്റിക്കൽ സെക്രട്ടറിയുടെയും പ്രൈവറ്റ് സെക്രട്ടറിയുടെയും നടുവിലിക്കുന്ന അച്യുതാനന്ദനെ വരച്ചു. ഇതിനു തൊട്ടു മുകളിൽ ഇതെല്ലം കണ്ട് നിഗൂഢമായ മന്ദഹാസം പൊഴിക്കുന്ന മൊണാലിസയായി അന്നത്തെ സി.പി.എം. സംസ്ഥാന സെക്രട്ടറിയായിരുന്ന പിണറായി വിജയനെയും ചിത്രീകരിച്ചു. ഡാവിഞ്ചിയുടെയും രാജാ രവിവർമ്മയുടേയും ജനപ്രിയരചനകളുടെ പാരഡിയായി ഈ ചിത്രങ്ങളെ മുഴുവൻ അവതരിപ്പിച്ചാലോ എന്നാലോചിച്ചു. തന്റെ മുന്നിൽ പുതിയ നിയോഗവുമായി വന്നെത്തിയ ഹംസമായി നിൽക്കുന്ന എ.ഐ.സി.സി. സെക്രട്ടറിയായ രാഹുൽഗാന്ധിയേയും ദമയന്തിയായി സോണിയാഗാന്ധിയേയും ചിത്രീകരിച്ച അതേ കാർട്ടൂണിൽ തന്നെ കാലിൽ ദർഭമുന കൊണ്ട് തിരിഞ്ഞു നിൽക്കുന്ന ശകുന്തളയായി കെ.കരുണാകരനെയും കാണാം. കെ.കരുണാകരൻ നോക്കുന്നത് തന്റെ മകനായ കെ.മുരളീധരൻ വാതിലിലൂടെ കോൺഗ്രസ്സിലേക്ക് കടന്നു വരുന്നുണ്ടോ എന്നാണ്. രാജാ രവിവർമ്മയുടെ വിഖ്യാതമായ ‘പോവർട്ടി’(ജിപ്സികൾ) എന്ന ചിത്രം അന്നത്തെ കേന്ദ്ര സർക്കാറിന്റെ കടുത്ത സാമ്പത്തിക പ്രതിസന്ധിയെ ചിത്രീകരിക്കാനും രവിവർമ്മയുടെ തന്നെ സീതാപഹരണം എന്ന ചിത്രം ഇടതുപക്ഷത്തിന്റെ ചിറകരിഞ്ഞ് ഇൻഡോ-യു.എസ്. ആണവ കരാറുമായി മുന്നോട്ടു പോകുന്ന അമേരിക്കൻ പ്രസിഡന്റ് ജോർജ് ബുഷിനെ ചിത്രീകരിക്കാനും ഉപയോഗിച്ചു. ‘കാത്തിരിപ്പ് എന്ന രവിവർമ്മ ചിത്രം എൽ.കെ.അദ്വാനിയുടെ പ്രധാനമന്ത്രിയാകാനുള്ള കാത്തിരിപ്പുമായി ബന്ധിപ്പിക്കുകയും ‘മിൽക്ക് മെയ്ഡ്’ എന്ന രവിവർമ്മ ചിത്രം ഒബാമ രണ്ടാമതും അമേരിക്കൻ പ്രസിഡന്റ് തെരഞ്ഞെടുപ്പിൽ മുന്നേറുന്നതിനെ സൂചിപ്പിക്കാനും ഉപയോഗിച്ചു. ജനലിനു വെളിയിൽ ഇന്ത്യ ആ വർഷം നേടിയ ശാസ്ത്രനേട്ടമായ ചാന്ദ്രയാനെ ചിത്രീകരിക്കുകയും ചെയ്തിരുന്നു. ഒരു നാടകത്തിൽ എങ്ങനെയാണോ കഥാപാത്രങ്ങളെ സംവിധായകൻ അവതരിപ്പിക്കുന്നത് എന്നതുപോലെ ഏഴോ എട്ടോ വിഖ്യാത ചിത്രങ്ങൾ ഒറ്റ ഫ്രെയിമിൽ ഒതുക്കാനായിരുന്നു ബുദ്ധിമുട്ട്. പത്തോ ഇരുപതോ കഥാപാത്രങ്ങൾ അടങ്ങിയ ഈ ചിത്രം ഒടുവിൽ അതിനു ചേരുന്ന കോമ്പോസിഷൻ കണ്ടെത്തുകയും പത്രത്തിന്റെ അരപ്പേജിലേക്ക് നൽകാവുന്ന രീതിയിൽ വളരെ വലിയ കാൻവാസിൽ വരയ്ക്കുകയുമാണ്ടായത്. സ്കാനർ ഉപയോഗിക്കാൻ പറ്റാത്തതിനാൽ ചിത്രത്തിന്റെ ഫോട്ടോ എടുത്ത് ഉപയോഗിക്കുകയായിരുന്നു.

വിചിത്ര പ്രദർശനം എന്ന് പേരിട്ട ഈ ചിത്രം ഒരു പരമ്പരാഗത കാർട്ടൂണിന്റെ സ്വഭാവം ഉള്ളതായിരുന്നില്ല. കാണികളിൽ ഒറ്റനോട്ടത്തിൽ ചിരിയുണർത്തുന്നതായിരുന്നില്ല ഈ കാർട്ടൂൺ എങ്കിലും 2008 ൽ ഏറ്റവും കൂടുതൽ ചർച്ച ചെയ്യപ്പെട്ട സംഭവങ്ങളിലേക്ക് ഒരു തിരിഞ്ഞുനോട്ടം നടത്താനായി പ്രേരിപ്പിക്കുന്നതായിരുന്നു.ഡാവിഞ്ചിയുടേയും രവിവർമ്മയുടേയും വിഖ്യാതചിത്രങ്ങളുടെ പാരഡി എന്ന നിലയിൽ അവതരിപ്പിച്ചപ്പോൾ അത് കൗതുകകരമായി. ഈ ശ്രമം വായനക്കാർക്ക് ഇഷ്ടമാവുക മാത്രമല്ല ആ വർഷത്തെ തിരുവനന്തപുരം പ്രസ്ക്ലബിന്റെയും സംസ്ഥാന സർക്കാറിന്റെയും അവാർഡുകളും സ്വന്തമാക്കി.

തെങ്ങിൽ കുടുങ്ങിയ ചിദംബരത്തിന്റെ ‘രാജ’യോഗം

2025-02-27T06:26:00.002+05:30

കാർട്ടൂണിൻ്റെ വഴികൾ_09

******************

മൂന്നു കോളത്തിൽ ഒതുങ്ങി നിൽക്കുന്ന രാഷ്ട്രീയ കാർട്ടൂണുകൾ ചിലപ്പോൾ ആ പരിമിതി ലംഘിച്ച് വിശാലമായ വലിയ പ്രതലങ്ങളിലേക്ക് വികസിക്കാറുണ്ട്. വരക്കുന്ന വിഷയത്തിന്റെ രാഷ്‌ട്രീയപ്രാധാന്യം അനുസരിച്ചോ ഫോട്ടോഗ്രാഫുകളോ മറ്റ് ഗ്രാഫിക്സുകളോ ഉപയോഗിക്കാൻ പറ്റാത്ത സാഹചര്യങ്ങളിലോ ആണ് കാർട്ടൂണുകളുടെ സാധ്യത ഇത്തരത്തിൽ ഉപയോഗപ്പെടുത്താറുള്ളത്.പത്രത്തിന്റെ ഒന്നാം പുറത്ത് മാസ്റ്റ് ഹെഡ് മുതൽ താഴെ വരെ കുത്തനെ പ്രസിദ്ധീകരിക്കുകയും പിറ്റേന്ന് തുടർച്ച സംഭവിക്കുകയും ചെയ്ത അത്തരം ഒരു കാർട്ടൂണിന്റെ കഥയാണ് ഇനി.

രണ്ടാം യു.പി.എ.സർക്കാറിനെ പിടിച്ചു കുലുക്കിയ വിവാദമായിരുന്നു 2ജി സ്പെക്ട്രം അഴിമതി കേസ്. ടെലികോം മന്ത്രിയായിരുന്ന എ.രാജയിൽ നിന്നു തുടങ്ങി ഡി.എം.കെയിലേക്കും യു.പി.എ. സർക്കാറിലെ ഉന്നതരിലേക്കും നീളുന്ന ആരോപണങ്ങളായിരുന്നു 2ജി കേസിനെ 2007 മുതൽ 2017 വരെ പത്തുവർഷക്കാലം ഇന്ത്യൻ രാഷ്ട്രീയത്തിലെ സജീവ വിവാദ വിഷയമാക്കി മാറ്റിയത്. രണ്ടാം തലമുറ 2ജി സ്പെക്ട്രം ലൈസൻസുകൾ കുറഞ്ഞ വിലയ്ക്ക് അനുവദിച്ചതുമായി ബന്ധപ്പെട്ട് 1,76,000 കോടി രൂപയുടെ അഴിമതി നടന്നു എന്നായിരുന്നു സി.എ.ജി. യുടെ കണ്ടെത്തൽ. അന്നത്തെ ടെലികോം മന്ത്രിയായിരുന്ന എ.രാജയായിരുന്നു 2ജി കേസിലെ മുഖ്യപ്രതി. സി.എ.ജി റിപ്പോർട്ടിനെത്തുടർന്ന് രാജയ്ക്ക് മന്ത്രിസ്ഥാനം രാജിവെക്കേണ്ടിവന്നു. സി.ബി.ഐ അന്വേഷണത്തിനു പിന്നാലെ രാജയെ അറസ്റ്റ് ചെയ്ത് തീഹാർ ജയിലിൽ അടച്ചു.

പ്രധാനമന്ത്രി മൻമോഹൻ സിങ്ങ് അടക്കമുള്ള കോൺഗ്രസ്സിന്റെ പല ഉന്നതസ്ഥാനീയരിലേക്കും നീളുന്ന 2ജി അഴിമതി ആരോപണങ്ങൾ യു.പി.എ. സർക്കാറിന്റെ നിലനിൽപ്പു തന്നെ അപകടത്തിലാക്കുമോ എന്ന സംശയം ഉയർത്തിയ നാളുകളായിരുന്നു അത്.

ജനതാ പാർട്ടി നേതാവായിരുന്ന സുബ്രഹ്മണ്യം സ്വാമി ആയിരുന്നു കോടതിയിൽ 2ജി കേസിനെ എക്കാലവും സജീവമാക്കി നിർത്തിയിരുന്നത്. 2ജി ലൈസൻസുകൾ കുറഞ്ഞവിലയ്ക്ക് അനുവദിക്കുന്ന സമയത്ത് ധനമന്ത്രിയും നിലവിൽ ആഭ്യന്തരമന്ത്രിയുമായ പി.ചിദംബരത്തിനേയും കൂട്ടുപ്രതിയാക്കണം എന്നാവശ്യപ്പെട്ടുകൊണ്ട് സുബ്രഹ്മണ്യം സ്വാമി നൽകിയ ഹർജിയിൽ പ്രത്യേക സി.ബി.ഐ കോടതി വിധി പറയുന്ന ദിവസമായിരുന്നു 2012 ഫെബ്രുവരി 4.വിധി എതിരാണെങ്കിൽ ചിദംബരത്തിന്റെ മാത്രമല്ല യു പി.എ. സർക്കാറിന്റെ തന്നെ ഭാവി തുലാസ്സിലാകുമായിരുന്നു.

ചിദംബരത്തിന്റെ വിധി ഇന്നുണ്ടാകും എന്ന വാർത്തയെ എങ്ങനെ കാർട്ടൂണിലൂടെ വ്യത്യസ്തമായി അവതരിപ്പിക്കാം എന്നായി ചിന്ത. സ്ഥിരം മൂന്നു കോളം ചട്ടക്കൂടിൽ ഒതുക്കാതെ കുറച്ചു കൂടെ വിശാലമായ ഫ്രെയിമിലേക്ക് ഈ വിഷയത്തെ വലുതാക്കാം എന്ന് തോന്നി.

തേങ്ങയിടാൻ തെങ്ങിൽ കയറിയ ഒരു വ്യക്തി തെങ്ങിന്റെ പകുതി ദൂരം കയറിയ ശേഷം ബോധരഹിതനായി തെങ്ങിൽ കുടുങ്ങിപ്പോയ വാർത്ത തലേന്ന് ഏറെ ചർച്ചയായിരുന്നു. നാട്ടുകാരോടൊപ്പം ഫയർഫോഴ്സും ഏറെ പണിപ്പെട്ടാണ് അദ്ദേഹത്തെ താഴെ ഇറക്കിയത്.ഈ വാർത്തയുമായി ചിദംബരത്തിന്റെ വിഷയം ബന്ധിപ്പിക്കാമെന്ന് തോന്നി.

തമിഴ് നാട്ടിലെ പ്രബല കക്ഷിയായിരുന്ന ഡി.എം.കെയിൽ നിന്ന് തുടങ്ങി കേന്ദ്ര സർക്കാറിലെ ഉന്നതരിലേക്കു നീളുന്ന ആരോപണങ്ങൾ ഉയർത്തിയ 2ജി വിവാദത്തെ സൂചിപ്പിക്കാനായി പത്രത്തിന്റെ ഇടതു മൂലയിലെ പോക്കറ്റ് കാർട്ടൂണിൽ ഡി.എം.കെ.യുമായി ബന്ധപ്പെട്ട വിഷയത്തിൽ നിന്നു ആരംഭിച്ച് പത്രത്തിന്റെ മാസ്റ്റ് ഹെഡ് വരെ വളർന്ന തെങ്ങിൽ കുടുങ്ങിപ്പോയ ചിദംബരത്തിനേയും അദ്ദേഹത്തെ രക്ഷിക്കാൻ ശ്രമിക്കുന്ന കോൺഗ്രസ് നേതാക്കളെയും വരച്ചു.

ഏറെ രസകരമായത് ‘ചിദംബരത്തിന്റെ തലവര ഇന്ന്’ എന്ന് മുഖ്യവാർത്തക്കു നൽകിയ തലക്കെട്ടായിരുന്നു. തലവര എന്നത് താഴെയുള്ള പോക്കറ്റ് കാർട്ടൂണിന്റെ പേരാണ്. വ്യത്യസ്തമായ ചിത്രീകരണ രീതിയും തലക്കെട്ടും എല്ലാം പിറ്റേന്ന് ഏറെ ചർച്ചയായി.

പക്ഷേ, കോടതിവിധി ചിദംബരത്തിനു അനുകൂലമായിരുന്നു. ചിദംബരം അധികാരദുർവിനിയോഗമോ കുറ്റകരമായ ഗൂഢാലോചനയോ നടത്തിയതിന് തെളിവില്ല എന്നും രാജയ്ക്കൊപ്പം ചിദംബരത്തെ ഈ കേസിൽ പ്രതി ചേർക്കാനാവില്ല എന്നും വിചാരണക്കോടതി വിധിച്ചു.

തലേന്ന് വലിയ ആഘോഷങ്ങളോടെ ഒന്നാം പേജിൽ കാർട്ടൂണിലൂടെ അവതരിപ്പിച്ച വാർത്തയ്ക്ക് ഒരു തുടർച്ച ഉണ്ടാകേണ്ടത് അനിവാര്യമായി. കാർട്ടൂണിലൂടെത്തന്നെ ഈ വിഷയം എങ്ങനെ അവതരിപ്പിക്കാം എന്നത് വെല്ലുവിളിയായി.

കഴിഞ്ഞ ദിവസം തെങ്ങിൽ കുടുങ്ങിപ്പോയ ചിദംബരത്തെ രക്ഷിക്കാനായി തെങ്ങ് മൂടോടെ പിഴുതു നീക്കുന്ന യു.പി.എ. നേതാക്കളെയാണ് 2012 ഫെബ്രുവരി അഞ്ചിന് ഒന്നാം പേജിലെ കാർട്ടൂണിൽ വരച്ചത്. ‘ഹാവൂ രക്ഷപ്പെട്ടു’ എന്ന് മുഖ്യ വാർത്തയുടെ തലക്കെട്ടും.തെങ്ങിൽ നിന്നും രക്ഷപ്പെട്ട ആൾ സുഖം പ്രാപിച്ചു വരുന്നു എന്ന വാർത്തയുടെ പിൻബലവും ഈ കാർട്ടൂണിന് ഉണ്ടായിരുന്നു.

ചിദംബരം രക്ഷപ്പെട്ടതിനു ശേഷം പാടുന്ന പാട്ടായിരുന്നു ഏറെ ചർച്ച ചെയ്യപ്പെട്ടത്. കിലുകിൽ പമ്പരം എന്ന ചിത്രത്തിൽ ജയറാമും ജഗതി ശ്രീകുമാറും ചേർന്ന് പാടുന്ന ‘തലവരക്കൊരു തിളക്കം വെച്ചപ്പോൾ കിടച്ച സൗഭാഗ്യം ഇത് ശനിദശയുടെ ഒടുക്കം കിട്ടിയ സാക്ഷാൽ രാജയോഗം’ എന്ന പാട്ടാണ് ചിദംബരം പാടുന്നതായി വരച്ചിട്ടുള്ളത്. തലവരക്കൊരു തിളക്കം വെച്ചപ്പോൾ എന്നത് തലേന്നത്തെ തലക്കെട്ടായ ‘ചിദംബരത്തിന്റെ തലവര ഇന്ന്’ എന്ന തലക്കെട്ടിനേയും ഇതു ശനിദശയുടെ ഒടുക്കം കിട്ടിയ സാക്ഷാൽ രാജയോഗം എന്നത് 2012 ഫെബ്രുവരി 4 ശനിയാഴ്ച ദിവസം വന്ന വിധിയിൽ രാജ മാത്രം പ്രതിയായതിനേയും ധ്വനിപ്പിക്കുന്നതായി.

പിന്നെയും വർഷങ്ങൾ നീണ്ട നിയമയുദ്ധങ്ങൾക്കൊടുവിൽ 2017 ഡിസംബർ 21ന് സുപ്രീം കോടതി 2ജി കേസിലെ എല്ലാ പ്രതികളേയും വെറുതെവിട്ടു.

ഇഷ്ടജോലി നേടിത്തന്ന “പ്രേമലേഖനം”

2025-02-27T06:25:00.005+05:30

കാർട്ടൂണിൻ്റെ വഴികൾ-08

************

2000 വർഷത്തിന്റെ അവസാനം. തൃശ്ശൂരിലെ തേക്കിൻ കാട് മൈതാനത്ത് പത്രപ്രവർത്തന സ്വപ്നങ്ങളുമായി അലഞ്ഞിരുന്ന രണ്ടു യുവ കാർട്ടൂണിസ്റ്റുകൾ ഉണ്ടായിരുന്നു.

കൂട്ടത്തിൽ പ്രവർത്തന പരിചയം കൂടുതലുള്ള കാർട്ടൂണിസ്റ്റ് സക്കീർഹുസൈൻ. കാർട്ടൂണിലെ തുടക്കക്കാരൻ ഞാനും.

കാലിക്കറ്റ് സർവ്വകലാശാലാ കലോത്സവ കാർട്ടൂൺ മത്സരങ്ങളിൽ തുടർച്ചയായി വിജയിയായപ്പോഴാണ് പത്ര കാർട്ടൂൺ രംഗത്തേക്ക് വരണമെന്ന് ആഗ്രഹം കലശലായത്. ലോ കോളജ് പഠനത്തോടൊപ്പം തൃശ്ശൂരിലെ ഒരു സായാഹ്ന പത്രത്തിൽ ദിവസവും കാർട്ടൂൺ വരയ്ക്കാനും അവസരം കിട്ടി .

പ്രതിഫലം ഒന്നുമില്ല. പക്ഷേ എല്ലാ ദിവസവും പത്രത്തിൻറെ ഒന്നാം പേജിൽ കാർട്ടൂൺ അച്ചടിച്ചു വരും. അതു കാണുമ്പോൾ

എന്തെന്നില്ലാത്ത ആത്മനിർവൃതി ആണ്.കോളേജ് വിട്ട് വീട്ടിലേക്ക്

തിരിച്ചു പോകാൻ ബസ്സിൽ ഇരിക്കുമ്പോൾ തൊട്ടപ്പുറത്ത് ഇരുന്ന് വായനക്കാരനെ കയ്യിൽ അന്നത്തെ സായാഹ്ന പത്രത്തിൽ നമ്മുടെ

കാർട്ടൂൺ കാണുമ്പോഴുള്ള ആകാംക്ഷയും കോരിത്തരിപ്പും.

അക്കാലത്ത് തൃശ്ശൂരിൽ നിന്ന് ഇറങ്ങുന്ന സായാഹ്ന പത്രങ്ങളിലെ മുടിചൂടാമന്നൻ ആയിരുന്നു സക്കീർഹുസൈൻ ഒരേ സമയം രണ്ടു പത്രങ്ങളിൽ ആണ് വര. പുന്നയൂർകുളത്തെ വീട്ടിൽനിന്ന് രാവിലെ

പത്രം ഓഫീസിൽ എത്തുന്ന സക്കീർ അവിടത്തെ വര കഴിഞ്ഞ് നേരെ

ജയ്ഹിന്ദ് മാർക്കറ്റിലുള്ള അടുത്ത പത്രമോഫീസിൽ എത്തും. അവിടെയും വര. ആശയം വേറേ സ്റ്റൈൽ വേറെ.

കാർട്ടൂണിന് ആത്മനിർവൃതി മാത്രം പ്രതിഫലം ആയുള്ള എന്നെ അപേക്ഷിച്ച് സക്കീർ ധനികനായിരുന്നു. ചെറുതെങ്കിലും രണ്ടിടത്തും പ്രതിഫലം ലഭിക്കും. ശിങ്കിടി ആയി ഞാൻ കൂടെ കൂടിയപ്പോൾ സക്കീറിന് ചില നഷ്ടങ്ങൾ വന്നു ജോസ് തിയേറ്ററിന് അടുത്തുള്ള ഇന്ത്യൻ കോഫി ഹൗസിൽ നിന്ന് വെജിറ്റബിൾ കട്ലറ്റും കാപ്പിയും വാങ്ങി തരുന്നത് മാത്രമായിരുന്നില്ല അത്. വരുമാനമില്ലാത്തഎനിക്ക് വേണ്ടി തൻറെ രണ്ട് പത്രങ്ങളിൽ ഒന്ന് ഒഴിഞ്ഞു തരാനും സക്കീർ തയ്യാറായി. ഒരേ ദിവസം രണ്ട് പത്രങ്ങളിൽ കാർട്ടൂൺ വരയ്ക്കുന്നത് പ്രയാസമാണ് എന്ന ന്യായീകരണവും സക്കീർ അതിന് കണ്ടെത്തി.

ഇക്കാലത്താണ് പ്രശസ്ത കാർട്ടൂണിസ്റ്റായ ബാലൻ ഞങ്ങൾക്കിടയിലേക്ക്

കടന്നുവരുന്നത് കുവൈത്ത് ടൈംസ് പത്രത്തിൽ 25 വർഷത്തോളം

സ്റ്റാഫ് കാർട്ടൂണിസ്റ്റ് ആയിരുന്നു ബാലേട്ടൻ എന്ന് ഞങ്ങൾ വിളിക്കുന്ന

കാർട്ടൂണിസ്റ്റ് ബാലകൃഷ്ണൻ. കുവൈറ്റിലേക്ക് ചേക്കേറും മുമ്പ് ശങ്കേഴ്സ്

വീക്കിലിയിൽ

ആയിരുന്നു ബാലേട്ടൻ.പൂങ്കുന്ന്നത്തെ ബാലേട്ടൻറെ വീട് ഞങ്ങൾക്ക്കാർട്ടൂണിന്റെ

വിസ്മയ ലോകങ്ങൾ തുറന്നിട്ടു.

ബാലേട്ടൻ വരച്ച കാർട്ടൂണുകളുടെ

ഒറിജിനലുകൾ, കാർട്ടൂൺ വരയ്ക്കാൻ ഉള്ള വിവിധ തരം ബ്രഷുകളും പേനകളും,

കാർട്ടൂൺ പത്രത്തിലേക്ക് വയ്ക്കേണ്ട പ്രൊഫഷണൽ രീതികൾ

എല്ലാം ഞങ്ങൾ വിസ്മയത്തോടെ മനസ്സിലാക്കിയത് ആ വീട്ടിൽ

കുട്ടികൾക്കായി ബാലേട്ടൻ വീട്ടിൽ നടത്തിയ ഒരു കാർട്ടൂൺ

കളരിയിലൂടെയായിരുന്നു നടത്തിയിരുന്നു .ഞങ്ങൾക്കും ആ കളരിയിൽ ഇടം ലഭിച്ചു

നിലത്തെഴുത്ത് ആശാൻമാരുടെ രീതിയായിരുന്നു ബാലേട്ടന്.

ഞങ്ങളുടെ ‘സീനിയോറിറ്റി’ ഒന്നും ബാലേട്ടന് പ്രശ്നമായിരുന്നില്ല. കുട്ടികളെ പോലെ

ഞങ്ങളും തറയിലിരുന്ന് വിരിച്ചിട്ട ദിനപത്രത്തിൽ വട്ടം വച്ച്

പഠിപ്പു തുടങ്ങി. ചരമക്കോളത്തിലെ അജ്ഞാതരായ വ്യക്തികളുടെ

കാരിക്കേച്ചറുകൾ അതേ പത്രത്താളിൽ തന്നെ വരച്ചിട്ടു.

എന്നും രാവിലെ ബാലേട്ടന് ഒരു വിശിഷ്ട ഫോൺ കോൾ വരും.

മിക്കവാറും അത് ക്ലാസിന് ഇടയിൽ ആവും. ആ ഫോൺ കോൾ ഞങ്ങൾക്കുംഏറെ പ്രാധാന്യമുള്ളത് ആകുന്നത് അപ്പുറത്തുള്ള വ്യക്തി പ്രശസ്ത കാർട്ടൂണിസ്റ്റ്

യേശുദാസൻ ആണ് എന്നതുകൊണ്ടാണ്. ശങ്കേഴ്സ് വീക്ക്‌ലിയിൽ ബാലേട്ടന്റെ

ഏറ്റവും പ്രിയപ്പെട്ട സുഹൃത്തായിരുന്നു യേശുദാസൻ സാർ.വർഷങ്ങൾപിന്നിട്ടിട്ടും ഊഷ്മളത തെല്ലും കുറയാത്ത സൗഹൃദം.ഇന്ത്യൻകാർട്ടൂണിസ്റ്റുകളുടെ കുലപതിയായ ശങ്കറിന്റെ കീഴിൽ വര ആരംഭിച്ചആ രണ്ട് പ്രതിഭകളുടെ സംസാരം ഇങ്ങേയറ്റത്ത് ഞങ്ങൾ കാർട്ടൂണിലെഇളമുറക്കാർ ആവേശത്തോടെ കേട്ടിരിക്കും.ബാലേട്ടന്റെ മറുപടിയിൽനിന്ന് യേശുദാസൻ സാറിന്റെ വാക്കുകൾ ഊഹിച്ചെടുക്കും.അത്തരം ഒരു ദിവസം കാർട്ടൂണിസ്റ്റ് യേശുദാസിൻറെ ഫോൺ കോളിന് ഒടുവിൽ ബാലേട്ടൻ ആണ് ഞങ്ങളോട് ആ കാര്യം പറഞ്ഞത്. തിരുവനന്തപുരത്ത് കേരളകൗമുദി ദിനപത്രത്തിലെ പ്രശസ്ത കാർട്ടൂണിസ്റ്റ് ഗോപീകൃഷ്ണൻ മാതൃഭൂമിയിലേക്ക് മാറിയിരിക്കുന്നു.

അന്നത്തെ കാർട്ടൂൺ വർത്തമാനങ്ങൾ ക്കു ശേഷം തേക്കിൻ കാട്

മൈതാനത്തിലൂടെ നടക്കുമ്പോഴാണ് മറ്റൊരു ചിന്ത ഞങ്ങൾക്കിടയിലേക്ക്കടന്നു വന്നത്. കേരളകൗമുദിയിൽ ഇനി ആരു വരയ്ക്കും?

ഇലക്ഷൻ കാലമാണ്. വിഷയങ്ങൾ ധാരാളം.

ഫ്രീലാൻസ് ആയി കേരള കൗമുദി യിലേക്ക് കാർട്ടൂൺ അയക്കാം എന്ന് ഞങ്ങൾതീർച്ചപ്പെടുത്തി.

അന്ന് വീട്ടിലെത്തിയപ്പോൾ ഒരു അത്ഭുതം എന്നെ കാത്തിരിപ്പുണ്ടായിരുന്നു. ഇളംചുവപ്പ് കവറിന് കത്ത് പേരില്ലാതെ എത്തിയ ഒരു പ്രണയലേഖനം ആയിരുന്നു അത് .വടിവൊത്ത കൈയ്യക്ഷരത്തിൽ ഇംഗ്ലീഷിൽ എഴുതിയ

വാക്കുകൾ.

I need very little to make me happy

A little sunshine

A little rain

A little laughter

A little tear

A little love

A little understanding

A little honesty

And you…

You are the all one really I need.

പ്രിയപ്പെട്ട സുജിത്തിന്,

എന്നെ ഓർമ്മയുണ്ടോ എന്നറിയില്ല,എനിക്കങ്ങനെ മറക്കാൻ കഴിയില്ലല്ലോ തന്നെ...

നല്ലൊരു കാർട്ടൂൺ പ്രതീക്ഷിച്ചുകൊണ്ട്...

With lots of love………………

-------------------

പക്ഷേ ആ കത്തിനേക്കാൾ എന്നെ ആകർഷിച്ചത് കത്തിൽ ഒട്ടിച്ച ഒരു പരസ്യം ആയിരുന്നു!കേരളകൗമുദിയിൽ കാർട്ടൂണിസ്റ്റിനെ തിരഞ്ഞെടുക്കാൻ മൽസരം നടത്തുന്നു

എന്ന പരസ്യമായിരുന്നു അത്. മത്സരത്തിൽ വിജയിക്കുന്ന കാർട്ടൂണിസ്റ്റിന് തിരുവനന്തപുരത്ത് ഒരു സ്ഥിരം ജോലി ആണ് സമ്മാനം എന്ന് സ്വപ്നതുല്യമായ വാഗ്ദാനവും പരസ്യത്തിൽ

ഉണ്ടായിരുന്നു.

തൃശ്ശൂർ വിട്ട് മറ്റൊരു ലോകം ഇല്ല എന്ന് കരുതുന്ന

സക്കീറിന് തിരുവനന്തപുരത്ത് സ്ഥിരം ജോലി എന്ന വാഗ്ദാനം

അത്ര പിടിച്ചില്ല. സക്കീർ ആ മത്സരത്തിൽ പങ്കെടുത്തില്ല.

അവസാന തീയതിക്ക് രണ്ട് ദിനം മുമ്പ് മാത്രം എൻറെ കൈയിൽ എത്തിയ അജ്ഞാത പ്രണയലേഖനം പിന്നീടുള്ള കരിയറിലേക്കുള്ള

വഴിയൊരുക്കുകയായിരുന്നു. ഇലക്ഷൻ കാലം മുഴുവൻ പത്രത്തിലേക്ക് സ്ഥിരമായി വരയ്ക്കണം എന്നായിരുന്നു മൽസരം. കാർട്ടൂൺ നല്ലതാണെങ്കിൽ പത്രത്തിൽ പ്രസിദ്ധീകരിക്കും..

അന്താരാഷ്ട്ര ചലച്ചിത്ര മേള തിരുവനന്തപുരത്ത് നടക്കുന്ന സമയം.

അതുമായി സമകാലിക രാഷ്ട്രീയം ബന്ധിപ്പിച്ച് ഒരു കാർട്ടൂൺ വരച്ച്

അന്നുതന്നെ കേരളകൗമുദിക്ക് അയച്ചു.

പിറ്റേന്ന് ബാലേട്ടൻറെ ഫോൺ കോൾ. ബാലേട്ടൻ പരിഭവത്തിൽ ആണ്. ഞാൻ കേരളകൗമുദിയിൽ ജോയിൻ ചെയ്ത കാര്യം ബാലേട്ടനോട് പറഞ്ഞില്ല എന്നാണ് പരിഭവം. യേശുദാസൻ ഇപ്പോൾ വിളിച്ചു വച്ചതേയുള്ളൂ.അന്നത്തെ കേരളകൗമുദിയിൽ കാർട്ടൂൺ ഉണ്ടത്രേ!!

ആ ഫോൺ വെച്ചതും നേരെ ടൗണിലേക്ക് പാഞ്ഞു .ബുക്ക് സ്റ്റാളിൽ നിന്ന്കേരള കൗമുദി പത്രം വാങ്ങി നോക്കി.

ഒന്നാം പേജിൽ തന്നെ അതാ എൻറെ കാർട്ടൂൺ.

ആ മാസം മുഴുവൻ നിരവധി കാർട്ടൂണുകൾ വരച്ചു. ഭൂരിഭാഗവും

പത്രത്തിൽ അച്ചടിച്ചുവന്നു ഒടുവിൽ തിരുവനന്തപുരത്തുനിന്ന്

പ്രതീക്ഷിച്ചിരുന്ന വിളി എത്തി. ഏറ്റവും അടുത്ത ദിവസത്തിൽ

തിരുവനന്തപുരത്ത് സ്റ്റാഫ് കാർട്ടൂണിസ്റ്റായി ജോയിൻ ചെയ്യണം.

സ്വപ്ന ജോലിയാണ്! പഠിച്ച രസതന്ത്രവും നിയമവും വിട്ടുകളയാൻ

ഒരു നിമിഷം പോലും ആലോചിക്കേണ്ടി വന്നില്ല. പഠനകാലത്ത്

മലയാറ്റൂർ രാമകൃഷ്ണനോട് മുൽക്ക് രാജ് ആനന്ദ് പറഞ്ഞ

വാക്കുകളായിരുന്നു ധൈര്യം.

“ഇന്ത്യയിൽ നിരവധി അഭിഭാഷകർ ഉണ്ട് പക്ഷേ

വിരലിലെണ്ണാവുന്ന കാർട്ടൂണിസ്റ്റുകളേ ഉള്ളൂ..നിങ്ങൾ വരയ്ക്കൂ..”

അന്ന് മുതൽ വരയ്ക്കാൻ ജീവിക്കുന്നു,ജീവിക്കാൻ വരയ്ക്കുന്നു.

*******

ആ…. അത് പറഞ്ഞില്ലല്ലോ. ആരായിരുന്നു ആ കത്തെഴുതിയത്?

അതൊരു കള്ളക്കത്തായിരുന്നു നാട്ടുകാരനും സുഹൃത്തുമായ പ്രശാന്ത്

തിരുവനന്തപുരത്ത് അക്കാലത്ത് താമസിച്ചിരുന്നത് പ്രശാന്തിന്റെ അച്ഛന്റെ

സുഹൃത്തായ മലയാളത്തിലെ പ്രശസ്തനായ കഥാകാരന്റെ വീട്ടിലായിരുന്നു.

കേരളകൗമുദിയിലെ പരസ്യം കണ്ടു എനിക്ക് വെട്ടി അയച്ചത് പ്രശാന്ത് ആയിരുന്നു. എന്നെ പറ്റിക്കാനുള്ള പ്രശാന്തിന്റെ കള്ളത്തരത്തിന് കൂട്ട് നിന്ന് ആ വ്യാജപ്രേമലേഖനം എഴുതിയത് സാഹിത്യകാരന്റെ മകൾ ആയിരുന്നു.പക്ഷേ അവരുടെ ആ കള്ളക്കത്തിലൂടെ യാഥാർഥ്യമായത് എൻറെ സ്വപ്നം തന്നെയായിരുന്നു.

വരയുടെ രസതന്ത്രത്തിലേക്ക് നിയമം വിട്ടൊരു ചാട്ടം!

2025-02-27T06:23:00.003+05:30

കാർട്ടൂണിൻ്റെ വഴികൾ-07

(കാർട്ടൂൺ രംഗത്ത് നിലയുറപ്പിക്കാൻ കാരണമായ രണ്ട് തിരഞ്ഞെടുപ്പ് കാർട്ടൂൺ മൽസരങ്ങളുടെ കഥ)

---------------------------------------------------------------------------------------------------------------------------

1999 ലെ ലോക‌സഭാ തിരഞ്ഞെടുപ്പ് പ്രചാരണം ഉഷാറായി മുന്നേറുന്ന നാളുകളിലൊന്നിൽ വടക്കാഞ്ചേരി വ്യാസാ കോളേജിലെ സഹപാഠിയായ ബി.ബാലഗോപാൽ(ഇപ്പോൾ മാതൃഭൂമി ന്യൂസ് ചാനലിന്റെ ഡൽഹി ബ്യൂറോയിൽ സീനിയർ കറസ്പോണ്ടൻ്റ്) വിളിച്ചു ചോദിച്ചു.

“നമുക്ക് കൊല്ലത്തെ പ്രചാരണം കാണാൻ പോയാലോ?”

ബാലുവിന്റെ അമ്മാവനായ പി.രാജേന്ദ്രനായിരുന്നു കൊല്ലത്തെ എൽ.ഡി എഫ് സ്ഥാനാർത്ഥി.

തൃശൂരിൽ നിന്ന് കൂടെ വന്നത് കാലിക്കറ്റ് സർവ്വകലാശാലാ കലോൽസവ വിജയിയായ കാർട്ടൂണിസ്റ്റാണെന്ന് ബാലുവിൽ നിന്ന് ഇലക്ഷൻ കമ്മറ്റി ഓഫീസിൽ അറിഞ്ഞപ്പോൾ എനിക്ക് പിടിവീണു. പ്രചാരണത്തിനുപയോഗിക്കാൻ കാർട്ടൂണുകൾ വേണം.

ബ്രോഷറിനായി കുറെ കാർട്ടൂണുകൾ വരച്ചു.രാഷ്‌ട്രീയ കാർട്ടൂണുകളുടെ സ്വീകാര്യത നേരിട്ടറിഞ്ഞാണ് കൊല്ലത്തുനിന്ന് മടങ്ങിയത്.

വീട്ടിൽ അവധിക്ക് വന്ന ചേച്ചിയും കുടുംബവും തിരിച്ചുപോകാനൊരുങ്ങുന്നു.ചേച്ചിയുടെ മകൻ അപ്പു യാത്രക്കിടയിൽ ചിത്രങ്ങൾ വരക്കാൻ കടലാസ് തിരയുന്നതിനിടയിൽ ഞാൻ കൊല്ലത്ത് വരച്ച കാർട്ടൂണുകളിലൊന്ന് കൈക്കലാക്കി.

റെയിൽവേ സ്റ്റേഷനിൽ, നാട്ടുകാരനും സുഹൃത്തുമായ പ്രശസ്ത കാരിക്കേച്ചർ കലാകാരൻ ജയരാജ് വാര്യരെ കണ്ടുമുട്ടി.

അപ്പുവിന്റെ കയ്യിലിരുന്ന കാർട്ടൂൺ നോക്കി ജയരാജേട്ടൻ പറഞ്ഞു. “കലക്കി,ഇത് പത്രത്തിലേക്ക് അയച്ചുകൂടേ?”

പത്രത്തിൽ പുതുമുഖങ്ങൾക്ക് അവസരമെവിടെ?

മലയാളമനോരമ സംസ്ഥാനതലത്തിൽ തിരഞ്ഞെടുപ്പ് കാർട്ടൂൺ മൽസരം നടത്തുന്നതായി വാർത്തയുണ്ടായിരുന്നു.സ്കെച്ച് പേന കൊണ്ട് വലിയ തയ്യാറെടുപ്പുകളില്ലാതെ വരച്ചതാണെങ്കിലും ജയരാജ് വാര്യരെപ്പോലൊരാൾ അഭിനന്ദിച്ച കാർട്ടൂൺ മൽസരത്തിനയച്ചു.

തിരുവനന്തപുരം വിട്ട് കെ .കരുണാകരൻ മുകുന്ദപുരത്തെ സ്ഥാനാർത്ഥിയാകുന്നതിനെക്കുറിച്ചായിരുന്നു കാർട്ടൂൺ.ഇ.എം.എസ്സിന്റെ മകനായ ഇ.എം ശ്രീധരനാണ് എതിരാളി. ലീഡർക്കു പകരം തലസ്ഥാനത്തിറങ്ങുന്നത് പുതുമുഖമായ വി.എസ് ശിവകുമാർ.മുഖ്യ എതിരാളികൾ എൽ.ഡി.എഫിന്റെ കണിയാപുരം രാമചന്ദ്രനും ബി.ജെ.പിയുടെ ഓ.രാജഗോപാലും.കഴിഞ്ഞ മൽസരത്തിൽ വോട്ടുനില ഉയർത്തിയ രാജഗോപാലിനെ ഇക്കുറി വിജയിപ്പിക്കാൻ ദുർബലനായ സ്ഥാനാർത്ഥിയെ ഇട്ടുകൊടുത്ത് പകരം മുകുന്ദപുരത്ത് കരുണാകരനെ വിജയിപ്പിക്കാൻ കോൺഗ്രസ് ബി.ജെ.പിയുമായി രഹസ്യധാരണയുണ്ടാക്കിയെന്ന് എൽ.ഡി എഫ് കേന്ദ്രങ്ങൾ പ്രചരിപ്പിച്ചു.

ഇഷ്‌ടദൈവമായ കൃഷ്‌ണന്റെ പര്യായങ്ങൾ ഉരുവിടുന്ന കരുണാകരനും പ്രാർത്ഥനയുടെ ആന്തരികാർത്ഥം വിശദീകരിക്കുന്ന നായനാരുമായിരുന്നു കാർട്ടൂണിൽ.

“അനന്തപത്മനാഭോ..ഗോപാലാ..മുകുന്ദാ..രക്ഷിക്കണേ…” എന്ന പ്രാർത്ഥനയുടെ വ്യാഖ്യാനം ഇങ്ങനെ:

“അനന്തപുരത്ത് പത്മചിഹ്നത്തിൽ മൽസരിക്കുന്ന ഓ…ഗോപാലാ…മുകുന്ദപുരത്ത് എന്നെ രക്ഷിക്കണേ….”

ഫലം വന്നപ്പോൾ കരുണാകരനും പി.രാജേന്ദ്രനുമൊപ്പം വി എസ് ശിവകുമാറും ജയിച്ചുകയറി.വലിയ വാർത്തകൾക്കിടെ കോട്ടയത്ത് നിന്ന് എനിക്കുമൊരു ശുഭവാർത്ത കിട്ടി.ഞാനയച്ച കാർട്ടൂണിന് സംസ്ഥാന കാർട്ടൂൺ മൽസരത്തിൽ ഒന്നാം സ്ഥാനം!!

മലയാളമനോരമയുടെ ഒന്നാം പേജിൽ വാർത്ത വന്നു.അകത്ത് അഭിമുഖവും സമ്മാനാർഹമായ കാർട്ടൂണും. മുഖ്യധാരാ പത്രത്തിൽ അച്ചടിച്ചുവരുന്ന എന്റെ ആദ്യത്തെ രാഷ്‌ട്രീയ കാർട്ടൂൺ.

മൽസരവിജയികൾക്കായി കോട്ടയത്ത് നടത്തിയ കാർട്ടൂൺ ക്യാമ്പാണ് കാർട്ടൂണിന്റെ സാധ്യതകളെക്കുറിച്ച് ഗൗരവമായി ചിന്തിക്കാൻ പ്രേരിപ്പിച്ചത്.കാർട്ടൂണിസ്റ്റായി വന്ന് പത്രത്തിന്റെ എഡിറ്റോറിയൽ ഡയറക്ടറായ തോമസ് ജേക്കബ്,കാർട്ടൂണിസ്റ്റുകളായ യേശുദാസൻ,പ്രകാശ് ഷെട്ടി എന്നിവരുടേതായിരുന്നു ക്ലാസുകൾ.അവരായിരുന്നു മൽസരത്തിന്റെ ജൂറിയും.

ക്യാമ്പ് കഴിഞ്ഞെത്തിയപ്പോൾ പത്രത്തിൽ കാർട്ടൂണിസ്റ്റാകണമെന്നായി ലക്ഷ്യം.തൃശൂരിലെ ജയകാഹളം സായാഹ്നപത്രത്തിൽ വരയ്ക്കാനിടം കിട്ടി. രാവിലെ പത്രമോഫീസിൽ പോയി വരയ്ക്കുന്ന കാർട്ടൂൺ വൈകിട്ട് ലോ കോളേജിൽ നിന്ന് തിരിച്ചെത്തുമ്പോൾ ഒന്നാം പേജിൽ മാസ്റ്റ് ഹെഡിനു താഴെയായി അച്ചടിച്ചുവന്നിട്ടുണ്ടാകും.എന്തൊരു അഭിമാനം!

2001 ലെ നിയമസഭാ തിരഞ്ഞെടുപ്പുകാലത്താണ് കേരളകൗമുദിയിൽ പുതിയ കാർട്ടൂണിസ്റ്റിനെ കണ്ടെത്താൻ മൽസരം നടത്തുന്നത്.ആദ്യ റൗണ്ടിൽ തിരഞ്ഞെടുക്കപ്പെട്ടവർ അയക്കുന്നതിൽ മികച്ച കാർട്ടൂണുകൾ ഒരുമാസം പത്രത്തിൽ പ്രസിദ്ധീകരിക്കും.ഒന്നാം സ്ഥാനക്കാരനെ കാത്തിരിക്കുന്നത് ഉഗ്രൻ സമ്മാനം.തിരുവനന്തപുരത്ത് കാർട്ടൂണിസ്റ്റിന്റെ ജോലി!

എന്റെ സ്വപ്നജോലിയാണ്! ഒന്നാം സ്ഥാനമല്ലാതൊന്നും വേണ്ടെന്ന വാശിയോടെയാണ് മൽസരിച്ചത്.സ്ഥാനാർത്ഥി ലിസ്റ്റുമായി ഡൽഹിക്ക് പോകുന്ന എ.കെ ആന്റണിയെ ചലച്ചിത്രോൽസവത്തിന്റെ ഉദ്ഘാടനചിത്രത്തിലെ നായകനായ ആന്റണി ക്വിൻ ആക്കി തിരുവനന്തപുരത്തേക്ക് ഫാക്സ് ചെയ്ത ആദ്യ കാർട്ടൂൺ എന്നെ ഞെട്ടിച്ച് കേരളകൗമുദിയുടെ ഒന്നാം പേജിൽ!

നിയമസഭാ തിരഞ്ഞെടുപ്പു ഫലം വരും മുമ്പേ എഡിറ്ററുടെ ഫോൺ വന്നു. ഫുൾ ടൈം കാർട്ടൂണിസ്റ്റാകാൻ തയ്യാറാണോ എന്നറിയണം.ഇല്ലെങ്കിൽ വക്കീലായി പ്രാക്ടീസ് ചെയ്തുകൊണ്ട് തൃശൂരിൽ നിന്ന് കാർട്ടൂണുകൾ അയച്ചാലും മതി.

എനിക്ക് പത്രത്തിൽ കാർട്ടൂണിസ്റ്റാകണം,തിരുവനന്തപുരത്തേക്ക് വരാമെന്ന് ഒറ്റശ്വാസത്തിലാണ് പറഞ്ഞത്.

അങ്ങനെ, പഠിച്ച രസതന്ത്രവും നിയമവും തന്ന തൊഴിൽസാധ്യതകൾ ഉപേക്ഷിച്ച് വര പഠിക്കാതെ,പത്രപ്രവർത്തനം പഠിക്കാതെ 2001 മെയ് 14 ന് കേരളകൗമുദിയിൽ കാർട്ടൂണിസ്റ്റായി ചേർന്നു.ഒരു സ്വപ്നത്തെ പിന്തുടർന്ന് സ്വന്തമാക്കിയ അഭിമാനത്തോടെ.

അനുബന്ധം:

1.കാർട്ടൂൺ1:സംസ്ഥാന കാർട്ടൂൺ മൽസരത്തിൽ ഒന്നാം സ്ഥാനം നേടിയ കാർട്ടൂൺ മനോരമ പ്രസിദ്ധീകരിച്ചത്.

2.കാർട്ടൂൺ-2:കേരളകൗമുദിയിലെ തിരഞ്ഞെടുപ്പ് കാർട്ടൂൺ മൽസരത്തിൽ ആദ്യം പ്രസിദ്ധീകരിച്ച കാർട്ടൂൺ.

3.പത്രക്കട്ടിങ്ങുകൾ,ഫോട്ടോ.

നാലഞ്ചു വരകളിൽ നിന്നൊരു ദേശീയ അവാർഡ്

2025-02-27T06:22:00.004+05:30

കാർട്ടൂണിൻ്റെ വഴികൾ-06

2016 ഒക്‌ടോബർ ഒന്നാം തീയതി വൈകിട്ട് പി. ആർ. ഡി. യിൽ നിന്നൊരു ഫോൺ കോൾ. ഗാന്ധിജയന്തിയോടനുബന്ധിച്ച് പിറ്റേന്ന് തിരുവനന്തപുരം വി. ജെ. ടി ഹാളിൽ നടക്കുന്ന സമൂഹചിത്രരചനയിൽ പങ്കെടുക്കണമെന്നായിരുന്നു ആവശ്യം.

രാവിലെ വി.ജെ.ടി ഹാളിൽ എത്തിയപ്പോൾ പ്രശസ്ത കാർട്ടൂണിസ്റ്റ് പി. വി. കൃഷ്ണൻ മാഷ്, പ്രമുഖ ചിത്രകാരനായ കാരക്കാമണ്ഡപം വിജയകുമാർ തുടങ്ങി ഒട്ടേറേപ്പേർ വരയ്ക്കാനെത്തിയിട്ടുണ്ട്. ഹാളിനു മുന്നിൽ വലിച്ചു കെട്ടിയ വലിയ കാൻവാസിലാണ് ചിത്രങ്ങൾ വരക്കേണ്ടത്.

വര തൽസമയം കണ്ടുനിൽക്കുന്ന പൊതുജനത്തിനു മുന്നിൽ ചിത്രങ്ങളുണ്ടാക്കുന്നത് ശ്രമകരമായ കാര്യമാണ്. ആൾക്കൂട്ടത്തിനു മുന്നിൽ എളുപ്പത്തിൽ സംവദിക്കുന്നതും ലളിതവുമായ ചിത്രങ്ങൾ വരക്കുകയാണ് ഉചിതം. വളരെ പെട്ടെന്നു ആശയവിനിമയം ചെയ്യാം എന്നു മാത്രമല്ല,പെട്ടെന്ന് പണി തീർക്കുകയും ചെയ്യാം.

ചിത്രം വരക്കേണ്ടത് ഗാന്ധിജിയെക്കുറിച്ചാണ് എന്നത് കാര്യങ്ങൾ എളുപ്പമാക്കി.ലാളിത്യമാണല്ലോ മഹാത്മാവിന്റെ മുഖമുദ്ര.ലളിതമായ ചിത്രം മതി.കാർട്ടൂണിസ്റ്റ് രംഗ രണ്ട് വരകൾ കൊണ്ടു തീർത്ത പ്രശസ്തമായ ഗാന്ധിച്ചിത്രം ഓർമ്മയിൽ വന്നു.

രംഗയെ സംബന്ധിച്ച് ഒരു രാഷ്ടീയ നേതാവിന്റെ കാരിക്കേച്ചർ എന്നത് അയാളുടെ കൃത്യമായ രേഖാചിത്രമോ വെറും വക്രീകരണമോ അല്ല, രാഷ്ട്രീയ നേതാവിന്റെ അനാവശ്യമായ ഏച്ചു കെട്ടലുകളും ഉടുത്തു കെട്ടലുകളും ഒഴിവാക്കി അയാളുടെ തനതു സ്വരൂപം വെളിപ്പെടുത്തുന്നതാണ്. രാഷ്ട്രീയ നേതാവ് എത്രത്തോളം ജനകീയനാണോ അത്രത്തോളം കുറഞ്ഞ വരകളിലൂടെ അയാളെ എല്ലാവർക്കും തിരിച്ചറിയാനാകും വിധം ചിത്രീകരിക്കാം.

ഗാന്ധിജി എന്ന നേതാവ് അത്രമേൽ ജനകീയനായതുകൊണ്ടാണ് ഗാന്ധിജിയെ രണ്ടു വരകൾ കൊണ്ട് തിരിച്ചറിയും വിധം ജനഹൃദയങ്ങളിലേയ്ക്ക് എത്തിക്കാൻ രംഗയ്ക്ക് സാധിച്ചത്. രംഗയുടെ ഗാന്ധിചിത്രത്തിൽ മാറ്റങ്ങൾ വരുത്തി പല കാർട്ടൂണിസ്റ്റുകളും പല കാലങ്ങളിൽ ഗാന്ധിജിയെ വരച്ചിട്ടുണ്ട്. രംഗയുടെ മറ്റൊരു ഗാന്ധിച്ചിത്രം ഇന്ത്യൻ റിപ്പബ്ലിക്കിന്റെ അമ്പതാം വാർഷികത്തിൽ തപാൽ വകുപ്പ് സ്റ്റാമ്പ് ആയി പുറത്തിറക്കിയിട്ടുമുണ്ട്.

വി.ജെ.ടി. ഹാളിലെ വെളുത്ത കാൻവാസിനു മുന്നിൽ വരക്കാനായി നിൽക്കുമ്പോൾ ഗാന്ധിജിയുടെ പ്രധാന ആദർശമായ അഹിംസ ഓർമ്മ വന്നു. അന്താരാഷ്ട്ര ആണവായുധ നിർവ്യാപനദിനമായി ആചരിച്ച സെപ്തംബർ 26 നു പിന്നാലെ ആഗോളതലത്തിൽ സമ്പൂർണ്ണ ആണവ നിർവ്യാപന കരാർ നടപ്പിലാക്കാൻ ഐക്യരാഷ്‌ട്ര സംഘടന ശ്രമിക്കുന്നതുമായി ബന്ധപ്പെട്ട വാർത്തകൾ വന്നുകൊണ്ടിരുന്ന സമയമായിരുന്നു അത്.ഇതു സംബന്ധിച്ച പ്രമേയം ഐക്യ‌രാഷ്‌ട്രസംഘടന ഒക്‌ടോബറിൽ ചർച്ചചെയ്യുമെന്നായിരുന്നു വാർത്ത.

അഹിംസയുടെ പ്രതീകമായി ഗാന്ധിജിയുടെ ചിത്രം ഓർത്തപ്പോൾ തന്നെ യുദ്ധവും ആണവായുധങ്ങളും വിതയ്ക്കുന്ന ഹിംസയെക്കുറിച്ചും ചില രേഖാചിത്രങ്ങൾ മനസ്സിൽ രൂപപ്പെട്ടു. രണ്ടു വരകൾ കൊണ്ട് എളുപ്പത്തിൽ ഗാന്ധിജിയുടെ ചിത്രം കാൻവാസിൽ വരച്ച് അതിന് തൊട്ടടുത്ത് ഏതാണ്ട് അതേ രൂപത്തിൽ അണുബോംബും മിസൈലും കൂടെ വരച്ചു.ആണവായുധങ്ങൾക്കു മുകളിൽ ഹിംസ എന്നും ഗാന്ധിജിയുടെ ചിത്രത്തിനു മുകളിൽ അഹിംസ എന്നും എഴുതി.അര മിനിട്ടിൽ വര തീർന്നു.

പെട്ടെന്നു പണിതീർന്നല്ലോ എന്ന ആശ്വാസത്തോടെ അവിടെ നിന്നും പോകാൻ ശ്രമിച്ചപ്പോഴാണ് പി.വി. കൃഷ്ണൻ മാഷ് വിളിച്ച് ഷേക്ക് ഹാൻഡ് തന്നത്.

ഇതൊരു ഗംഭീര ആശയമാണെന്നും ഇവിടെ വന്ന പത്തോ മുപ്പതോ ആളുകൾക്കിടയിൽ ഒതുങ്ങേണ്ടതല്ലെന്നും കാർട്ടൂണായി പത്രത്തിലേക്ക് നൽകണമെന്നും മാഷ് പറഞ്ഞു.

വി.ജെ.ടി ഹാളിൽ നിന്ന് നേരേ ഓഫീസിലേക്കു പോയി വലിയ പേപ്പറിൽ ചിത്രം ഒന്നുകൂടി വരച്ചു. 2016 ഒക്‌ടോബർ മൂന്നിനു കേരളകൗമുദിയിൽ ഈ കാർട്ടൂൺ അച്ചടിച്ചു വരികയും ചെയ്തു.ഒരു ദിവസം മുമ്പ് ഈ ചിന്ത തോന്നിയിരുന്നെങ്കിൽ ഗാന്ധിജയന്തി ദിനമായ ഒക്‌ടോബർ രണ്ടിലെ പത്രത്തിൽ കാർട്ടൂൺ പ്രസിദ്ധീകരിക്കാമായിരുന്നു എന്നു പിന്നീട് തോന്നിയിട്ടുണ്ട്.

വളരെ ലളിതമായ നാലഞ്ചു വരകൾ കൊണ്ട് കഥാപാത്രങ്ങളുടെ രൂപഭാവങ്ങളൊന്നുമില്ലാതെ വരച്ച ഈ കാർട്ടൂൺ മികച്ചതാണെന്നും ഗംഭീര ആശയമാണ് സംവദിക്കുന്നതെന്നും ധാരാളം പേർ പറയുകയുണ്ടായി.ബുദ്ധിജീവി കാർട്ടൂൺ ആയിപ്പോയി എന്നും സാധാരണക്കാർക്കിടയിലേക്ക് ഇത് എത്തില്ലെന്നും പറഞ്ഞ സുഹൃത്തുക്കളും ഉണ്ടായിരുന്നു.

മാസങ്ങൾ കടന്നു പോയി.2017 എപ്രിൽ മാസത്തിൽ തിരുവനന്തപുരത്ത് നടന്ന കേരള സർവ്വകലാശാലാ കാർട്ടൂൺ മൽസരത്തിന്റെ വിധികർത്താവായി വിദ്യാർത്ഥികളുടെ കാർട്ടൂണുകൾ പരിശോധിച്ച് പുറത്തിറങ്ങിയപ്പോൾ സുഹൃത്തും മലയാളമനോരമയിലെ കാർട്ടൂണിസ്റ്റുമായ ബൈജു പൗലോസ് വിളിച്ചു. 2016 ലെ മായാ കമ്മത്ത് മെമ്മോറിയൽ ദേശീയ കാർട്ടൂൺ അവാർഡ് പ്രഖ്യാപിച്ച വിവരമാണ് ബൈജു പറഞ്ഞത്.ഒന്നാം സ്ഥാനം എന്റെ ഹിംസ –അഹിംസ എന്ന കാർട്ടൂണിന്!

പ്രശസ്ത വനിതാ കാർട്ടൂണിസ്റ്റ് ആയ മായാ കാമത്തിന്റെ പേരിൽ ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് കാർട്ടൂണിസ്റ്റ്സ് നൽകി വരുന്ന മായാ കാമത്ത് ദേശീയ അവാർഡ് ഇന്ത്യൻ കാർട്ടൂണിസ്റ്റുകൾക്കിടയിൽ ഏറെ ചർച്ച ചെയ്യപ്പെടുന്ന അംഗീകാരമാണ്. ഇന്ത്യയുടെ പല ഭാഗങ്ങളിൽ നിന്നുള്ള പ്രഗൽഭരായ കാർട്ടൂണിസ്റ്റുകൾ പങ്കെടുക്കുന്ന ആ മൽസരത്തിൽ 150 ൽ പരം എൻ‌ട്രികളിൽ നിന്നും ഈ ചിത്രം ഒന്നാമതായി തെരഞ്ഞെടുക്കപ്പെട്ടത് അഭിമാനമുയർത്തി.

പ്രശസ്ത നാടകകൃത്തും കലാകാരനും ചലച്ചിത്രതാരവുമായ ഗിരീഷ് കർണാട്, കാർട്ടൂണിസ്റ്റുകളായ ഗുജ്ജാറപ്പ, കേശവ്,ചിത്രകാരൻ എസ്. ജി. വാസുദേവ് എന്നിവരായിരുന്നു വിധികർത്താക്കൾ. ഏപ്രിലിൽ ബാംഗ്ലൂരിൽ നടന്ന പുരസ്കാരവിതരണ ചടങ്ങിൽ ഈ കാർട്ടൂണിനെക്കുറിച്ച് ഗിരീഷ് കർണാട് വാചാലനായി.ഏറ്റവും ലളിതമായ വരകൾ കൊണ്ട് ഏറെ പ്രസക്തവും ഗഹനവുമായ ആശയത്തെക്കുറിച്ച് ഒരുപാട് സംസാരിക്കുന്നുണ്ട് ഈ കാർട്ടൂൺ എന്നും ആദ്യകാഴ്ചയിൽ തന്നെ മികച്ച എൻട്രിയായി ഇത് തിരഞ്ഞെടുത്തു എന്നും അദ്ദേഹം പറഞ്ഞു.

വി.ജെ.ടി ഹാളിലെ ആൾക്കൂട്ടത്തിൽ നിന്ന് എളുപ്പത്തിൽ രക്ഷപ്പെടാൻ രണ്ടോ മൂന്നോ വരകൾ കൊണ്ട് തീർത്ത ചിത്രം ദേശീയ കാർട്ടൂൺ മൽസരത്തിൽ ഒന്നാം സ്ഥാനം നേടിയതിന്റെ അഭിമാനം കലർന്ന അമ്പരപ്പിലായിരുന്നു ഞാനപ്പോഴും.

കൊലകൊല്ലി എന്ന പാവം ക്രൂരന്റെ കഥ

2025-02-27T06:21:00.004+05:30

കാർട്ടൂണിൻ്റെ വഴികൾ-05

*************

പുരപ്പുറത്തു കയറിയ പോത്തും കിണറ്റിൽ വീണ പുലിയുമൊക്കെ കാർട്ടൂൺ കഥാപാത്രങ്ങളാകാറുണ്ട്. ഭരണാധികാരികളുടെ മർക്കടമുഷ്ടിയും രാഷ്ട്രീയ കുതിരക്കച്ചവടവും രാഷ്ട്രീയ കൊലപാതകങ്ങളിലെ ബലിയാടുകളും രാഷ്ട്രീയക്കാരുടെ മുതലക്കണ്ണീരും ചർച്ചകളിൽ നിറയുമ്പോൾ കാർട്ടൂണുകൾ പലപ്പോഴും ‘മൃഗീയം’ ആകുന്നത് സ്വാഭാവികം.

കാർട്ടൂണുകളിൽ ഏറ്റവും കൂടുതൽ കഥാപാത്രമായിട്ടുള്ള മൃഗം ആനയായിരിക്കും. അമേരിക്കൻ കാർട്ടൂണിസ്റ്റ് ആയ തോമസ് നാസ്റ്റ് ആണ് റിപ്പബ്ലിക്കൻ പാർട്ടിയുടെ പ്രതീകമായി കാർട്ടൂണിൽ ആനയെ ആദ്യമായി വരച്ചത്.പിന്നീട് ആന റിപ്പബ്ലിക്കൻ പാർട്ടിയുടെ ഔദോഗികചിഹ്നമായി. ഡെമോക്രാറ്റിക് പാർട്ടിയുടെ ചിഹ്നമായ കഴുതയും നാസ്റ്റിന്റെ കാർട്ടൂണുകളിൽ കടന്നുവന്നു. ശങ്കർ,അബു എബ്രഹാം തുടങ്ങി കേരളത്തിലെ എല്ലാ കാർട്ടൂണിസ്റ്റുകളും ഒരുപാട് ആനക്കാർട്ടൂണുകൾ വരച്ചിട്ടുണ്ട്.

ഓർമ്മയിൽ തങ്ങിനില്ക്കുന്ന ഒരു ആനക്കാർട്ടൂണിന്റെ കഥയാവട്ടെ ഇനി.

2006 ലെ വേനൽക്കാലത്ത് തിരുവനന്തപുരത്തെ പൊടിയക്കാല, പേപ്പാറ വനമേഖലകളിൽ വിഹരിച്ചിരുന്ന ‘ഭീകരനായ’ ആനയായിരുന്നു കൊലകൊല്ലി.നാട്ടിലിറങ്ങി കൃഷിയും വിളകളും നശിപ്പിക്കലായിരുന്നു കൊലകൊല്ലിയുടെ പ്രധാന വിനോദം. ഗ്രാമവാസികളിൽ പലരും കൊലകൊല്ലിയുടെ ആക്രമണത്തിന് ഇരയായി. മരണത്തിൽ നിന്നും തലനാരിഴക്ക് രക്ഷപ്പെട്ടവർ കൊലകൊല്ലിയെക്കുറിച്ച് പറഞ്ഞ കഥകൾ മൂലം പേപ്പാറയിൽ ‘അവനെപ്പേടിച്ചാരും നേർവഴി നടപ്പീലാ’ എന്ന അവസ്ഥയായി.

നാട്ടിലിറങ്ങി ചക്കയും വാഴപ്പഴവും കപ്പയുമൊക്കെ തിന്നുകയും കൃഷിനശിപ്പിക്കുകയും ചെയ്തുകൊണ്ടിരുന്ന കൊലകൊല്ലി തിരിച്ച് വനത്തിലേക്ക് കയറാതെ മനുഷ്യവാസമേഖലയിൽ ക്യാമ്പ് ചെയ്ത് അക്രമം തുടർന്നതോടെ കൊലകൊല്ലി സ്പെഷ്യൽ സ്റ്റോറികൾ പത്രങ്ങളിൽ ഇടം നേടാൻ തുടങ്ങി. ആനക്കഥകൾ ചൂടോടെ പകർത്താൻ പത്രക്കാരും ഫോട്ടോഗ്രാഫർമാരും കൂട്ടത്തോടെ പേപ്പാറയിലെത്തി. ആനയെ ഏതുവിധേനയും തളച്ച് നാട്ടുകാരുടെ ശല്യത്തിന് അറുതിവരുത്തണമെന്ന ആവശ്യം മാധ്യമങ്ങളിലൂടെ ഉയർന്നു.

എന്തിനും ഒരു മറുവശമുണ്ടാകുമല്ലോ.സമർത്ഥരായ ചില റിപ്പോർട്ടർമാരും പത്രഫോട്ടോഗ്രാഫർമാരും വെളിച്ചത്തു കൊണ്ടുവന്നത് അത്ഭുതപ്പെടുത്തുന്ന മറ്റൊരു കഥയായിരുന്നു. വെറും പാവത്താനായിരുന്ന സാധുമൃഗം ഭീകരനായ കൊലകൊല്ലിയായി മാറിയതിനു പിന്നിലെ യഥാർത്ഥകഥ.

പൊടിയക്കാല,പേപ്പാറ,അമ്പൂരി വനമേഖലകൾ വ്യാജവാറ്റുകാർ കയ്യടക്കിയ കാലമായിരുന്നു അത്. വാറ്റിനായി സൂക്ഷിച്ചിരുന്ന കോടയുടെ മദിപ്പിക്കുന്ന മണം പിടിച്ച് ഉൾക്കാട്ടിൽ നിന്നെത്തിയ ആന എങ്ങനെയോ കോട രുചിക്കാൻ ഇടയായി. മദ്യപാനികൾ ലഹരിയ്ക്ക് അടിമയാവുന്നതു പോലെ ആനയ്ക്ക് പിന്നീട് ഇത് ശീലവുമായി. കോട കുടിക്കാൻ ആർത്തിപിടിച്ചെത്തുന്ന ആന മത്തുപിടിച്ച് വാറ്റിനായി സൂക്ഷിച്ചിരുന്ന ഉപകരണങ്ങളും മറ്റും നശിപ്പിക്കുന്നത് പതിവായി. വനപാലകരുടെ കണ്ണുവെട്ടിച്ച് വളരെ ബുദ്ധിമുട്ടി കാട്ടിൽ കോട സൂക്ഷിച്ചിരുന്ന വ്യാജവാറ്റുകാർക്ക് ആന ഇവയെല്ലാം നശിപ്പിക്കുന്നത് സഹിക്കാനാവാത്ത നഷ്ടം ആയിരുന്നു.

ആനയെ തുരത്താൻ വാറ്റുകാർ കോടയ്ക്ക് സമീപം ശർക്കരയിൽ പൊതിഞ്ഞ് പടക്കം വെച്ചു. പടക്കം പൊട്ടി ആനയുടെ തുമ്പിക്കൈക്ക് പരിക്കേൽക്കുകയും ചെയ്തു. കാട്ടിൽ നിന്നും ഇര തേടാനുള്ള ബുദ്ധിമുട്ടുമൂലം ആന ജനവാസകേന്ദ്രങ്ങളിലേക്കിറങ്ങി ചക്കയും പഴവുമെല്ലാം തിന്നാൻ തുടങ്ങി.പകൽ സമയങ്ങളിൽ ഗ്രാമത്തിലിറങ്ങി വിശപ്പടക്കുന്ന ആന തക്കം കിട്ടുമ്പോഴെല്ലാം തന്റെ പതിവ് മദ്യസേവയും തുടർന്നു.ഉൾക്കാട്ടിലേക്ക് തിരിച്ചുപോകുന്ന കാര്യമേ ആന മറന്നു.

ചക്കപ്രിയനായതുകൊണ്ട് ചക്കമാടൻ എന്ന ഓമനപ്പേരിൽ അറിയപ്പെട്ടിരുന്ന ആനയുടെ ശല്യം ഒഴിവാക്കേണ്ടത് നാട്ടുകാരേക്കാൾ വ്യാജവാറ്റുകാരുടെ ആവശ്യമായിരുന്നു.ആനയുടെ ആക്രമണത്തിന്റെ കഥകൾ അവർ നന്നായി പ്രചരിപ്പിച്ചു. ഇതിനിടയിൽ പത്രങ്ങൾ ആനയ്ക്ക് നൽകിയ കൊലകൊല്ലി എന്ന പേര് ജനങ്ങൾക്കിടയിൽ ഭീകരാന്തരീക്ഷം സൃഷ്ടിക്കുകയും ചെയ്തു

ആനയെ തളക്കാനായി മയക്കുവെടി വിദഗ്ധരെത്തി. ഒരിക്കൽ ആനയെ മയക്കുവെടി വച്ച് തളച്ചെങ്കിലും രാത്രി ഇരുട്ടിവെളുക്കുമ്പോഴേക്കും ആന കെട്ടുപൊട്ടിച്ച് അതിന്റെ പാട്ടിനുപോയി. മയക്കുവെടിയിൽ മയങ്ങാത്ത ആനയെ തളക്കാനായി മയക്കുവെടി സംഘത്തെക്കൂടാതെ തമിഴ്നാട്ടിൽ നിന്നും നാലഞ്ച് കുങ്കിയാനകളും എത്തി.രണ്ടാം ശ്രമത്തിൽ കൂടുതൽ ഡോസിൽ മയക്കു വെടി വച്ച് ആനയെ വീഴ്ത്തി. വെറുതെ തളച്ചാൽ പോരാ എന്നു മനസ്സിലാക്കി തടികൊണ്ടുള്ള ആനക്കൊട്ടിൽ ഒരുക്കി കുങ്കിയാനകളെക്കൊണ്ട് ആനയെ പൊക്കി കൂട്ടിലടച്ചു. നിന്നുതിരിയാൻ പോലും സ്ഥലമില്ലാത്ത തടിക്കൂട്ടിൽ ആ കൊലകൊമ്പൻ രാവും പകലും ഒരേനിൽപ്പ് നിന്നു.

കൊലകൊല്ലി പതിയെപ്പതിയെ അവശനായി വന്നു. ഭക്ഷണം കഴിക്കാൻ വിമുഖത കാണിച്ച ആന അധികം വൈകാതെ തളർന്നു വീണു ചെരിഞ്ഞു.ആനയുടെ മരണം വൻ വിവാദമായതോടെ വനം വകുപ്പ് ഇടപെട്ട് ആനയുടെ ശരീരം പോസ്റ്റ്മോർട്ടം ചെയ്യാൻ ഉത്തരവായി. ആനയുടെ തുമ്പിക്കൈ മുതൽ ദഹനവ്യവസ്ഥ മുഴുവൻ കോട കുടിച്ചു തകരാറിലായി എന്നായിരുന്നു പോസ്റ്റ്മോർട്ടം റിപ്പോർട്ടിലൂടെ പുറത്തുവന്ന വേദനിപ്പിക്കുന്ന സത്യം.കൊടുംചൂടിൽ പകൽ മുഴുവൻ ആനക്കൊട്ടിലിൽ അനങ്ങാനാവാതെ കഴിയേണ്ടി വന്നതും രാത്രിയിൽ ആനയ്ക്ക് കാവലിരിക്കുന്നവർ കൊട്ടിലിനു സമീപം തീകായുന്നതിന്റെ ചൂടും ആ സാധുജീവിയ്ക്ക് താങ്ങാവുന്നതിലും അപ്പുറമായിരുന്നു. വളരെ കൂടിയ അളവിലുള്ള മയക്കുമരുന്നുപ്രയോഗവും ആനയെ തളർത്തിയിരുന്നു.

2006 ജൂൺ ഒന്നിനാണ് കൊലകൊല്ലിയെ പിടികൂടി കൊട്ടിലിൽ അടച്ചത്.ജൂൺ രണ്ടാം തീയതി കേരളകൗമുദിയിൽ പ്രസിദ്ധീകരിച്ച കാർട്ടൂണിൽ കൊലകൊല്ലിയെ തളച്ചെങ്കിലും പേപ്പാറയിൽ മറ്റൊരു ഒറ്റയാന്റെ സ്വൈരവിഹാരം നടക്കുന്നതായാണ് ചിത്രീകരിച്ചത്.വനം കയ്യേറി വ്യാജവാറ്റു നടത്തുന്ന മദ്യലോബിയും അതിനു കുട പിടിക്കുന്ന വനപാലകരുമെല്ലാം ചേർന്ന് ലക്ഷണമൊത്ത കൊലകൊല്ലിയുടെ രൂപം പ്രാപിക്കുന്നതായിരുന്നു കാർട്ടൂൺ. ഈ കാർട്ടൂൺ പേപ്പാറ, പൊടിയക്കാല മേഖലകളിൽ വ്യാപകമായി ചർച്ചയായി.നാട്ടുകാർ കാർട്ടൂണിന്റെ കോപ്പികൾ എടുത്ത് വിതരണം ചെയ്യുകയുണ്ടായി.ജൂൺ 16ന് കൊലകൊല്ലി ചെരിഞ്ഞു.സത്യമറിയാവുന്ന ആളുകൾക്ക് ഇന്നും കൊലകൊല്ലി നൊമ്പരപ്പെടുത്തുന്ന ഓർമ്മയാണ്.കൊലകൊല്ലിയുടെ ശരീരം ദഹിപ്പിച്ച നെല്ലിക്കപ്പാറയിലെ കുഴിയ്ക്കരികെ എല്ലാ വർഷവും ജൂൺ 16ന് ആദിവാസികൾ വിളക്ക് കൊളുത്തി പൂജകൾ നടത്താറുണ്ട്.

വാർത്തകളിലൂടെ എങ്ങനെ ഒരു ഭീകരൻ സൃഷ്ടിക്കപ്പെടുന്നു എന്നതിനു ഉത്തമോദാഹണമാണ് കൊലകൊല്ലിയുടെ കഥ. മനുഷ്യൻ വനം കയ്യേറുമ്പോൾ വനത്തിലെ അന്തേവാസികളും വനത്തിന്റെ ഉടമകളും ആയ മൃഗങ്ങൾക്ക് നാട്ടിലേക്ക് ഇറങ്ങേണ്ടി വരുന്ന അവസ്ഥയും അതിനോട് മനുഷ്യൻ നടത്തുന്ന ‘മൃഗീയമായ’ പ്രതിരോധവും അടങ്ങുന്ന ഒരുപാട് തലങ്ങളുള്ള ചർച്ചകളിലേക്ക് കൊലകൊല്ലിയുടെ കഥ നമ്മെ കൂട്ടിക്കൊണ്ടു പോകുന്നു.

ബുഷിന്റെ പോക്കറ്റടിയും മൻമോഹന്റെ ഉള്ളിലിരിപ്പും

2025-02-27T06:20:00.004+05:30

കാർട്ടൂണിൻ്റെ വഴികൾ-04

*******************

പ്രശസ്തമായ വാർത്താചിത്രങ്ങളിൽ നിന്നും ചിലപ്പോൾ കാർട്ടൂണുകൾ ഉണ്ടാവാറുണ്ട്. വായനക്കാരുടെ മനസ്സിൽ പതിഞ്ഞ വാർത്താചിത്രങ്ങളുടെ അതേ കോമ്പോസിഷനും ഫ്രെയിമും നിലനിർത്തിയാവും പലപ്പോഴും ഇത്തരം കാർട്ടൂണുകൾ വരക്കപ്പെടുന്നത്.വാർത്താചിത്രം കണ്ട വായനക്കാരന് അതിവേഗം കാർട്ടൂണിലെ ആശയം പിടികിട്ടും.

സിറിയൻ അഭയാർഥി കുടുംബത്തിന്റെ പലായനത്തിനിടെ കടൽത്തീരത്തു മരിച്ചു വീണ ഐലാൻ കുർദി എന്ന പിഞ്ചു ബാലന്റെ ചിത്രം ലോക മാധ്യമങ്ങളിൽ നിറഞ്ഞു നിന്നതിനു പിന്നാലെ മനുഷ്യ മനസ്സാക്ഷിയെ ഞെട്ടിച്ച ആ വാർത്താ ചിത്രത്തിന്റെ അതേ കോമ്പോസിഷനിൽ അഭയാർഥി പ്രശ്നത്തെക്കുറിച്ചുള്ള നിരവധി കാർട്ടൂണുകൾ ലോകമെമ്പാടുമുള്ള പത്രങ്ങളിൽ പ്രസിദ്ധീകരിക്കപ്പെട്ടു. ഒറീസയിൽ ആംബുലൻസിനു നൽകാൻ പണമില്ലാതെ ഭാര്യയുടെ മൃതശരീരം ചുമലിലേറ്റി മകൾക്കൊപ്പം ദൂരെയുള്ള വീട്ടിലേക്കു നടക്കുന്ന ദനാ മാജി എന്ന സാധു മനുഷ്യന്റെ ചിത്രവും കേരളത്തിൽ അരി മോഷ്ടിച്ചെന്ന പേരിൽ ആൾക്കൂട്ട വിചാരണക്ക് വിധേയനായി മരണത്തിനു കീഴടങ്ങിയ മധു എന്ന ആദിവാസി യുവാവിന്റെ ചിത്രവും പിന്നീട് ഇതേ വിഷയങ്ങളിൽ ശ്രദ്ധേയമായ കാർട്ടൂണുകൾക്ക് വഴിയൊരുക്കി.

കൗതുകകരമായ വാർത്താ ചിത്രങ്ങളും കാർട്ടൂണുകളായി മാറാം. വെട്ടാൻ നിർത്തിയ പോത്ത് കയറുപൊട്ടിച്ചോടി വീടിന്റെ മേൽക്കൂരയിൽ കയറിയ ചിത്രം പത്രത്തിൽ അച്ചടിച്ചു വരുമ്പോൾ അസാധാരണമായ ആ ചിത്രം പിറ്റേന്ന് ഒരു കാർട്ടൂണായി വരാനുള്ള സാധ്യത ഏറെയാണ്. ബാലകൃഷ്ണപ്പിള്ളയും യു.ഡി.എഫുമായി തർക്കങ്ങൾ നിലനിൽക്കുന്ന കാലമായതിനാൽ പിറ്റേന്നത്തെ കാർട്ടൂണിൽ യു.ഡി എഫ് യോഗം നടക്കുന്ന പുരപ്പുറത്ത് കയറി കൊമ്പുകുലുക്കിനിൽക്കുന്ന പോത്ത് ആയി ബാലകൃഷ്ണപ്പിള്ളയാണ് പ്രത്യക്ഷപ്പെട്ടത്.

വീട്ടുമുറ്റത്തെ കിണറിൽ വീണ പുലിയുടെ ചിത്രവും, തളർന്നു വീണ ആനയെ ജെ.സി.ബി. ഉപയോഗിച്ച് പൊക്കി എടുക്കുന്ന ചിത്രവുമെല്ലാം കാർട്ടൂണുകളായി വരുന്നത് സ്വാഭാവികം. ജെ സി ബി എന്നത് മൂന്നാർ വിഷയത്തോടെ ഒരു രാഷ്ട്രീയ പ്രതീകമായി മാറിയതിനാൽ കാർട്ടൂണിൽ ആന ചിലപ്പോൾ അച്യുതാനയായി മാറുമെന്നു മാത്രം.

ഇത്തരത്തിൽ വാർത്താചിത്രത്തിൽ നിന്നു പിറന്ന ഒരു കാർട്ടൂണിന്റെ കഥ പറയാം. വാർത്താ ചിത്രത്തിന്റെ പാരഡി എന്ന നിലയിലല്ല മറിച്ച് വാർത്താ ചിത്രത്തിന്റെ തുടർച്ച എന്ന നിലയിൽ ആണ് കാർട്ടൂൺ വന്നത്.

ഒന്നാം യു.പി.എ. സർക്കാരിന്റെ കാലത്ത് ഏറ്റവും വിവാദമുണ്ടാക്കിയ രാഷ്ട്രീയ തീരുമാനം ഇന്ത്യയും അമേരിക്കയും തമ്മിലുള്ള ആണവ കരാർ ആയിരുന്നു. 2005ൽ തുടങ്ങിയ ചർച്ചകൾ ഒന്നാം യു.പി.എ. സർക്കാറിന്റെ അവസാനകാലത്തോടെയാണ് പൂർത്തിയാക്കിയത്. ഈ കാലയളവിലെല്ലാം ദേശീയ തലത്തിൽ ആണവകരാറിനെ ചൊല്ലി രാഷ്‌ട്രീയ വിവാദങ്ങൾ ഉണ്ടായിക്കൊണ്ടിരുന്നു.

യു.പി.എ. സർക്കാരിനെ പുറത്തു നിന്നു പിന്തുണച്ചിരുന്ന ഇടതുമുന്നണി ആണവകരാറിന്റെ പേരിൽ പിന്തുണ പിൻവലിച്ചതോടെ മൻമോഹൻസിങ്ങ് സർക്കാറിനു പാർലമെന്റിൽ വിശ്വാസവോട്ട് നേരിടേണ്ടി വന്നു. വിശ്വാസവോട്ടിനെ ഒരുവിധം അതിജീവിച്ച സർക്കാർ വൺ ടൂ ത്രീ കരാർ എന്നറിയപ്പെടുന്ന ഇൻഡോ-യു.എസ്. ആണവകരാറുമായി മുന്നോട്ടു പോയി.

കടുത്ത സാമ്പത്തിക പ്രതിസന്ധിയിലായിരുന്ന അമേരിക്ക ആണവായുധങ്ങൾ വിറ്റഴിക്കാനുള്ള വിപണിയായി ഇന്ത്യയെ ഉപയോഗിക്കാൻ ശ്രമിക്കുന്നു എന്ന ആരോപണം ഇടതുമുന്നണി പ്രചരിപ്പിച്ചു. ഇന്ത്യയുടെ ആണവായുധങ്ങളിലുള്ള പരമാധികാരം അമേരിക്കക്ക് അടിയറ വെക്കേണ്ടി വരും എന്നും ഇടതുമുന്നണി ആരോപിച്ചു.

ഈ വിവാദങ്ങൾ അക്കാലത്തെ കാർട്ടൂണുകളിലും പ്രതിഫലിച്ചു. അധികാരമേറ്റതിന്റെ നാലാം വർഷത്തിൽ സർക്കാരിന്റെ നിലനിൽപ്പ് പോലും അപകടത്തിലാക്കി ആണവകരാർ നടപ്പിലാക്കാൻ ശ്രമിക്കുന്ന പ്രധാനമന്ത്രിയെ നാലാം വയസ്സിലെ നട്ടപ്രാന്ത് എന്ന നിലയിൽ ജൂൺ 21ന് കാർട്ടൂണാക്കി.ബുഷിനെ കാണാൻ ആണവകരാർ എന്ന അവൽപ്പൊതിയുമായി പോകുന്ന കുചേലനായി മൻമോഹൻ സിങ്ങിനെ വരച്ച് സെപ്തംബർ 25ന് പ്രസിദ്ധീകരിച്ച കാർട്ടൂൺ ഏറെ ശ്രദ്ധിക്കപ്പെട്ടിരുന്നു.അവൽപ്പൊതി കിട്ടിയിട്ടുവേണം അടുപ്പിൽ തീ പുകയാൻ എന്നു പറയുന്ന ഗതികെട്ട ബുഷ് ആയിരുന്നു കൃഷ്ണവേഷത്തിൽ.

2008 സെപ്റ്റംബർ 26ന് പ്രധാനമന്ത്രി മൻമോഹൻസിങ്ങും അമേരിക്കൻ പ്രസിഡന്റായ ജോർജ് ബുഷും ആണവകരാർ ഒപ്പു വെക്കുന്നതുമായി ബന്ധപ്പെട്ട ചർച്ചകൾക്കായി വൈറ്റ് ഹൗസിൽ കണ്ടുമുട്ടുകയുണ്ടായി.പരസ്പരം ആലിംഗനം ചെയ്തു നിൽക്കുന്ന ജോർജ് ബുഷിന്റെയും മൻമോഹൻസിങ്ങിന്റെയും ചിത്രം ലോകത്തെ എല്ലാ മാധ്യമങ്ങളിലും പ്രാധാന്യത്തോടെ പ്രസിദ്ധീകരിക്കപ്പെട്ടു.

ചിത്രം ശ്രദ്ധിച്ചു നോക്കിയപ്പോഴാണ് അതിലെ രസകരമായ അപൂർണ്ണത ശ്രദ്ധയിൽ പെട്ടത്. ചിത്രത്തിൽ കാണുന്നതിനേക്കാൾ കൂടുതലായി എന്തൊക്കെയോ വിനിമയം ചെയ്യുന്നതു പോലെ തോന്നി. ബുഷിന്റെ മുഖം ചിത്രത്തിൽ വ്യക്തമായിരുന്നില്ല. ബുഷിന്റെ വലതു കൈ മൻമോഹൻ സിങ്ങിന്റെ ഇടുപ്പിലൂടെ പുറകിലേക്കു നീളുന്നു. മൻമോഹൻസിങ്ങാവട്ടെ, ബുഷിനെ ചേർത്തു പിടിച്ചിട്ടുണ്ടെങ്കിലും ഫ്രെയിമിനു പുറത്തുള്ള മറ്റാരോടോ ചിരിച്ചുകൊണ്ട് സംവദിക്കുന്നതു പോലെ കാണപ്പെട്ടു. സൂക്ഷ്മമായി നിരീക്ഷിക്കുന്ന ഒരാൾക്ക് ഇരുവരും ഉള്ളിലെന്തോ ഒളിക്കുന്നു എന്നു തോന്നിപ്പിക്കും വിധമായിരുന്നു ആ ചിത്രം.

ഒരു കാർട്ടൂണിലേക്ക് നയിക്കാൻ ആ ചിത്രം ധാരാളമായിരുന്നു.സാമ്പത്തിക പ്രതിസന്ധി കൊണ്ടു വലഞ്ഞ ബുഷ് മൻമോഹൻസിങ്ങിന്റെ പോക്കറ്റ് അടിക്കുന്നതായാണ് കാർട്ടൂണിൽ വരച്ചത്. മൻമോഹൻസിങ്ങാകട്ടെ,ആണവകരാർ ഗവണ്മെന്റിന്റെ ഭരണനേട്ടമായി അവതരിപ്പിച്ച് ഫ്രെയിമിനു പുറത്ത് നില്ക്കുന്ന വോട്ടറെ പ്രലോഭിപ്പിക്കാനായി അംഗവിക്ഷേപം ചെയ്യുന്നതായും ചിത്രീകരിച്ചു. തലേദിവസം പത്രങ്ങളിൽ വന്ന ഫോട്ടോ ഈ കാർട്ടൂൺ ദൃശ്യത്തിൽ നിന്ന് ക്രോപ് ചെയ്തതാണ് എന്നു വായനക്കാരനു തോന്നിപ്പിക്കും വിധമായിരുന്നു രചന. ഔട്ട് ഓഫ് ദ ഫ്രെയിം എന്നു പേരിട്ട ആ കാർട്ടൂൺ 2008 സെപ്തംബർ 28ന് കേരളകൗമുദിയിൽ പ്രസിദ്ധീകരിച്ചു.

അമേരിക്കൻ പ്രതിനിധിസഭയുടെ അന്തിമാനുമതി ലഭിക്കാത്തതിനാൽ ബുഷിനും മൻമോഹൻ സിങ്ങിനും സെപ്തംബർ 26ലെ കൂടിക്കാഴ്ചയിൽ ആണവകരാർ ഒപ്പുവെക്കാനായില്ല.നടപടിക്രമങ്ങൾ പൂർത്തിയാക്കിയശേഷം 2008 ഒക്‌ടോബർ 8ന് വാഷിങ്ങ്‌ടണ്ണിൽ വച്ച് ഇന്ത്യൻ വിദേശകാര്യമന്ത്രി പ്രണബ് മുഖർജിയും അമേരിക്കൻ വിദേശകാര്യ സെക്രട്ടറി കോണ്ടലിസ റൈസുമാണ് കരാറിൽ ഒപ്പിട്ടത്.ഏറെ വിവാദമുണ്ടാക്കിയ ഇൻഡോ-യു.എസ് ആണവകരാർ പൂർണ്ണമായി നടപ്പാക്കാൻ സാധിച്ചില്ല.

മൻമോഹന്റെ വീഴ്ചയും മോദിയുടെ വാഴ്ചയും

2025-02-27T06:19:00.005+05:30

കാർട്ടൂണിൻ്റെ വഴികൾ_03

അന്തരിച്ച മുൻ പ്രധാനമന്ത്രി മൻ മോഹൻസിങ്ങ് കഥാപാത്രമായ നിരവധി കാർട്ടൂണുകൾക്ക് സംസ്ഥാനപുരസ്കാരങ്ങൾ ലഭിച്ചിട്ടുണ്ട്.അതിൽ ഒന്നിനെക്കുറിച്ചാണ് ഈ കുറിപ്പ്.

കാലം രാഷ്‌ട്രീയ കാർട്ടൂണുകളുടെ കാലനാണെന്ന് പറയാറുണ്ട്.ഒരു പ്രത്യേക രാഷ്‌ട്രീയ സന്ദർഭത്തെ അടിസ്ഥാനമാക്കി വരക്കുന്ന കാർട്ടൂണുകൾ ചിലപ്പോൾ ഒന്നോ രണ്ടോ വർഷങ്ങൾക്ക് ശേഷം അപ്രസക്തമായേക്കാം.അനുദിനം വാർത്തകൾ മാറിമറിയുന്ന സമകാലിക രാഷ്‌ടീയ പരിതസ്ഥിതിയിൽ രാഷ്‌ട്രീയ കാർട്ടൂണുകളുടെ ആയുസ്സ് ദിവസങ്ങളോ മണിക്കൂറുകളോ ആയി ചുരുങ്ങുകയും ചെയ്യാം.

ജനത്തിന്റെ മനസ്സിൽ കാലങ്ങളോളം തങ്ങിനിൽക്കുന്ന രാഷ്‌ട്രീയ കാർട്ടൂണുകൾ വരക്കുക എന്നത് ദിനപ്പത്രത്തിൽ ജോലിചെയ്യുന്ന ഏതൊരു കാർട്ടൂണിസ്റ്റിനും വെല്ലുവിളിയാണ്.ദൈനം ദിന രാഷ്‌ട്രീയത്തെ നർമ്മമധുരമായി അടയാളപ്പെടുത്തുക എന്നതിലപ്പുറം കാർട്ടൂണിസ്റ്റിനെ ജനങ്ങൾ ഓർക്കുക അദ്ദേഹം വരച്ച കാലാതിവർത്തിയായ കാർട്ടൂണുകളുടെ പേരിലായിരിക്കും.

ജനങ്ങൾ ഏറെ ചർച്ച ചെയ്ത ചരിത്രപധാനമായ സംഭവങ്ങളെ അടയാളപ്പെടുത്തുന്ന കാർട്ടൂണുകൾ കാലത്തെ വെല്ലുവിളിച്ച് ജനമനസ്സിൽ നിന്ന് മായാതെ നിലനിൽക്കും.അടിയന്തരാവസ്ഥയുടെ കറുത്ത ദിനങ്ങളെ പരിഹസിച്ച് അബു എബ്രഹാം വരച്ച ബാത്ത് ടബ്ബിലെ പ്രസിഡന്റിന്റെ കാർട്ടൂൺ ഉദാഹരണം.ഇന്ത്യാ പാക് വിഭജനത്തെക്കുറിച്ച് കാർട്ടൂണിസ്റ്റ് ശങ്കർ വരച്ച ഡേഞ്ചർ സിഗ്നൽ എന്ന കാർട്ടൂണും ചരിത്രത്തെ അടയാളപ്പെടുത്തുന്നതാണ്.ഇന്ത്യ, പാക്കിസ്ഥാൻ എന്നിങ്ങനെ രണ്ടായി പിളർന്നു പോകുന്ന റെയിൽ പാളത്തിലേക്ക് പ്രവേശിക്കാനൊരുങ്ങുന്ന ഭാരതമെന്ന ട്രെയിനിനു മുന്നിൽ അപായ സിഗ്നൽ കാണിച്ച് ട്രെയിൻ നിർത്താൻ ശ്രമിക്കുന്ന ഗാന്ധിജിയാണ് കാർട്ടൂണിൽ.

പുതുതലമുറയിലെ നിത്യനിദാന കാർട്ടൂണിസ്റ്റുകൾക്ക് ഇത്തരം കാർട്ടൂണുകൾ വരക്കുക എന്നത് വെല്ലുവിളിയാണ്.എങ്കിലും രാജ്യം മുഴുവൻ ചർച്ച ചെയ്ത വിഷയങ്ങളെക്കുറിച്ച് വരയ്ക്കപ്പെടുന്ന കാർട്ടൂണുകൾക്ക് ദൈനംദിനരാഷ്‌ട്രീയ കാർട്ടൂണുകളേക്കാൾ ‘ഷെൽഫ് ലൈഫ്’ ലഭിക്കാറുണ്ട്.അത്തരമൊരു കാർട്ടൂണിനെക്കുറിച്ചാണ് ഇത്തവണ.

2004 മുതൽ 2014 വരെയുള്ള പത്തുവർഷക്കാലം ഇന്ത്യ ഭരിച്ച മൻമോഹൻ സിങ്ങ് സർക്കാർ വീണതും മോദി യുഗത്തിന് തുടക്കം കുറിച്ചതും 2014 ലെ പൊതുതിരഞ്ഞെടുപ്പിലൂടെയായിരുന്നു. 2004 ലെ പൊതു തിരഞ്ഞെടുപ്പിൽ ഏറ്റവും വലിയ ഒറ്റക്കക്ഷിയായി മാറിയ കോൺഗ്രസ്സ് മറ്റു കക്ഷികളുമായി കൂടിച്ചേർന്ന് യു.പി.എ സഖ്യം രൂപീകരിക്കുകയും മന്ത്രിസഭക്കുള്ള തങ്ങളുടെ അവകാശം ഉന്നയിക്കുകയും ചെയ്തു. യു.പി.എ ചെയർമാൻ ആയ സോണിയാ ഗാന്ധി പ്രധാനമന്ത്രി സ്ഥാനത്തേക്ക് മൻമോഹൻ സിങിന്റെ പേരു നിർദ്ദേശിക്കുകയായിരുന്നു. ഒരു തവണ പോലും തിരഞ്ഞെടുപ്പിലൂടെ ലോക സഭയിലേക്ക് എത്താൻ കഴിയാതിരുന്ന മൻമോഹൻ സിങിന്റെ സ്ഥാനാർത്ഥിത്വം അത്ഭുതകരമായിരുന്നു. 2004 മെയ് 22 ന് മൻമോഹൻ സിംഗ് പ്രധാനമന്ത്രിയായി സത്യപ്രതിജ്ഞ ചെയ്ത് അധികാരമേറ്റു. നരസിംഹറാവു നയിക്കുന്ന കേന്ദ്രമന്ത്രിസഭയിൽ ധനമന്ത്രിയായിരുന്നപ്പോൾ താൻ തുടങ്ങിവെച്ച സാമ്പത്തിക നയങ്ങൾക്ക് പ്രധാനമന്ത്രിയായ മൻമോഹൻ സിംഗ് കൂടുതൽ കരുത്തു പകർന്നു. മൻമോഹൻ സിങും, ധനകാര്യമന്ത്രി പി.ചിദംബരവും ചേർന്ന് സാമ്പത്തിക ഉദാരവൽക്കരണ നയങ്ങൾ കൂടുതൽ കർശനമായി നടപ്പാക്കാൻ തുടങ്ങി.ഒന്നാം യു.പി.എ സർക്കാരിന്റെ അവസാനകാലത്ത് ആണവ കരാറിന്റെ പേരിൽ ഇടതുപാർട്ടികൾ പിന്തുണ പിൻവലിച്ചെങ്കിലും മൻമോഹൻസിങ്ങ് സർക്കാരിന് വിശ്വാസവോട്ട് നേടാനായി.

2009ൽ മൻമോഹൻ സിങ്ങിന്റെ നേതൃത്വത്തിൽ യു.പി എ സഖ്യം വീണ്ടും അധികാരത്തിലെത്തി.പക്ഷേ രണ്ടാമൂഴത്തിലെ പ്രധാനമന്ത്രി സ്ഥാനം സിങിന് അത്രക്ക് സുഖകരമല്ലായിരുന്നു. സർക്കാരിനെതിരേ ഒട്ടേറെ അഴിമതി ആരോപണങ്ങൾ ഉയർന്നു വന്നു.^[ജൂലൈ 2012 ലെ ടൈംമാസികയുടെ ഏഷ്യാ പതിപ്പ് മൻമോഹൻസിങിന്റെ മുഖചിത്രവുമായാണ് പുറത്തിറങ്ങിയത്. പ്രതീക്ഷക്കൊത്തുയരാത്ത ഒരാളായിട്ടാണ് മൻമോഹൻസിങിനെ ടൈം മാസിക അതിൽ ചിത്രീകരിച്ചിരിക്കുന്നത്. രാജ്യത്തെ പുരോഗതിയിലേക്കു നയിക്കുന്നതിൽ ഒരു പ്രധാനമന്ത്രിയെന്ന നിലയിൽ മൻമോഹൻസിങ് പരാജയപ്പെട്ടുവെന്ന് ടൈം ലേഖനത്തിൽ അഭിപ്രായപ്പെട്ടു.കൽക്കരി കുംഭകോണം,ടു ജി വിവാദം,കോമൺ വെൽത്ത് ഗെയിംസ് അഴിമതി തുടങ്ങിയ വിവാദങ്ങൾ കൂടാതെ ഇന്ധനവിലയിലെ രൂക്ഷമായ വർദ്ധനവും പാചകവാതകമടക്കമുള്ള സബ്‌സിഡികൾ വെട്ടിക്കുറച്ചതുമെല്ലാം കേന്ദ്രസർക്കാരിനെതിരായ ജനവികാരം രൂപപ്പെടുന്നതിൽ പങ്കുവഹിച്ചു.

ഇതിനോടുള്ള സ്വാഭാവിക പ്രതികരണമായിരുന്നു 2014 ലെ പൊതുതിരഞ്ഞെടുപ്പ് ഫലം.കോൺഗ്രസ് നയിച്ച യു.പി.എ സഖ്യം വെറും 44 സീറ്റിലേക്ക് ഒതുങ്ങി.282 സീറ്റിന്റെ മൃഗീയ ഭൂരിപക്ഷത്തോടെ 2014 മെയ് 16 ന് നരേന്ദ്രമോദി പ്രധാനമന്ത്രിയായി സത്യപ്രതിജ്ഞ ചെയ്തു.

പത്തുവർഷത്തെ മൻമോഹൻ ഭരണത്തിന് അന്ത്യം കുറിച്ച് പുതിയ സർക്കാർ വരുന്നതിനെ അടയാളപ്പെടുത്താൻ ഒരു രാഷ്‌ട്രീയ കാർട്ടൂൺ അനിവാര്യമായിരുന്നു.സർക്കാരിന് എതിരായ ജനവികാരം പ്രതിഫലിച്ച തിരഞ്ഞെടുപ്പിന് ശേഷം വൻഭൂരിപക്ഷത്തോടെ പുതിയ സർക്കാർ അധികാരമേറ്റ സന്ദർഭമായിരുന്നു ചിത്രീകരിക്കേണ്ടത്.ഒരു തുടർക്കഥ പോലെയാണ് കാർട്ടൂൺ വരച്ചത്.ജനം നൽകിയ തെങ്ങിൻ തൈ നടുന്ന മൻമോഹൻ സിങ്ങ് തൈ വളരുന്നതിനനുസരിച്ച് ഉയരങ്ങളിലേക്ക് കയറിപ്പോകുന്നതും ഉയരത്തിലിരുന്ന് ജനത്തിന്റെ അധ്വാനത്തിന്റെ ഫലമായ കരിക്ക് ആസ്വദിക്കുന്നതും ഉപയോഗശൂന്യമായ തൊണ്ട് ജനത്തിന്റെ തലയിലേക്ക് തന്നെ വലിച്ചെറിയുന്നതുമായിരുന്നു ആദ്യ ചിത്രങ്ങൾ.ജനദ്രോഹനടപടികളിൽ കുപിതനായ ജനം തെങ്ങ് കടയ്ക്കൽ നിന്നു തന്നെ വെട്ടി മൻമോഹൻ സിങ്ങിനെ വീഴ്ത്തുന്നതും നരേന്ദ്രമോദിയ്ക്ക് പുതിയ തെങ്ങിൻ തൈ നൽകുന്നതുമായിരുന്നു അവസാന ഫ്രെയിം. ജനത്തിന്റെ പ്രതീക്ഷകൾ നിറവേറ്റാനായില്ലെങ്കിൽ ഇതേ ഗതി പുതിയ സർക്കാരിനും ബാധകമാണ് എന്ന മുന്നറിയിപ്പുകൂടിയായിരുന്നു കാർട്ടൂൺ.ജനത്തെ മറക്കുന്ന എത് ഭരണാധികാരിയും ഓർക്കേണ്ട പാഠം.ആ മഴു ഇപ്പോഴും ജനത്തിൻ്റെ കയ്യിലുണ്ട്.

നരേന്ദ്രമോദി സർക്കാർ അധികാരമേറ്റതിനു പിന്നാലെ 2014 മെയ് 18ന് കേരളകൗമുദിയുടെ ഒന്നാം പേജിൽ വലിയ പ്രാധാന്യത്തോടെ പ്രസിദ്ധീകരിച്ച ഈ കാർട്ടൂൺ നല്ല ശ്രദ്ധ നേടി.2014 ലെ മികച്ച കാർട്ടൂണിനുള്ള സംസ്ഥാന അവാർഡും തിരുവനന്തപുരം പ്രസ്ക്ലബ് അവാർഡും ഈ കാർട്ടൂൺ നേടിത്തന്നു.

ആൻ ഐഡിയ കാൻ ചേഞ്ച് എ ഫ്രോഗ്സ് ലൈഫ്

2025-02-27T06:16:00.005+05:30

കാർട്ടൂണിൻ്റെ വഴികൾ-02

*********

ആൻ ഐഡിയ കാൻ ചേഞ്ച് യുവർ ലൈഫ് എന്നത് കാർട്ടൂണിസ്റ്റുകൾക്ക് വെറും പരസ്യവാചകമല്ല.നല്ല ആശയങ്ങൾ നിത്യേന ലഭിച്ചില്ലെങ്കിൽ നിത്യനിദാനകാർട്ടൂണിസ്റ്റുകളുടെ ജീവിതം തന്നെ റേഞ്ച് വിട്ടുപോകും.

ചിരിയിലൂടെ ചിന്തിപ്പിക്കുന്ന കലയാണല്ലോ കാർട്ടൂൺ.കാർട്ടൂണിസ്റ്റിന്റെ മനസ്സിൽ മിന്നായം പോലെ തോന്നുന്ന ആശയം അച്ചടിച്ചുവന്നതിനു ശേഷം കാർട്ടൂണിസ്റ്റിന് തന്നെ ചിരിക്ക് വക നൽകുന്ന ട്വിസ്റ്റുകൾ ഉണ്ടാക്കിയിട്ടുണ്ട്.അത്തരമൊരു കഥ പറയാം.

2005 മെയ് ഒന്നിനാണ് കെ.കരുണാകരൻ കോൺഗ്രസ് പിളർത്തി പുതിയ രാഷ്ട്രീയ പാർട്ടി രൂപീകരിച്ചത്.നാഷണൽ കോൺഗ്രസ് (ഇന്ദിര) എന്ന പേര് ഇന്ത്യൻ നാഷണൽ കോൺഗ്രസ് (ഇന്ദിര) എന്ന ഔദ്യോഗികവിഭാഗത്തിന്റെ പേരിനോട് സാമ്യമുള്ളതിനാൽ കോൺഗ്രസ് ഇലക്ഷൻ കമ്മീഷനിൽ പരാതി നൽകി.കരുണാകരന്റെ പാർട്ടിയ്ക്ക് ഡെമോക്രാറ്റിൿ ഇന്ദിര കോൺഗ്രസ്(കരുണാകരൻ) എന്ന് പേരുമാറ്റേണ്ടി വന്നു.

ദോഷൈകദൃക്കുകൾ DIC-K എന്നതിനെ ഡിക്ക് എന്ന് കളിയാക്കി വിളിച്ചു.

ഇടതുമുന്നണിയിൽ ചേക്കാറാനായിരുന്നു ഡിക്കിന്റെ മോഹം.പക്ഷേ സി.പി.ഐയുടെ എതിർപ്പുമൂലം അത് നടന്നില്ല.2006 ലെ നിയമസഭാ തിരഞ്ഞെടുപ്പിൽ കോൺഗ്രസുമായി ഡിക്ക് സഖ്യമുണ്ടാക്കിയെങ്കിലും തിരഞ്ഞെടുപ്പിൽ പൊട്ടിയതോടെ സഖ്യം പൊളിഞ്ഞു.ആർക്കും വേണ്ടാതെ ഡിക്ക് അനാഥമായി.

ഉച്ചിക്ക് വെച്ച കൈകൊണ്ട് ഉദകക്രിയ നടത്തി കെ കരുണാകരൻ ഡിക്ക് വിട്ട് കോൺഗ്രസിൽ തിരിച്ചെത്തി.മുരളിയുടെ അവസ്ഥ പെരുവഴിയിലായതിനു തുല്യമായി.ശരദ്പവാറിന്റെ എൻ.സി.പി യിൽ ലയിക്കാനായിരുന്നു പിന്നീട് മുരളിയുടെ ശ്രമം.

സംസ്ഥാന പാർട്ടി വന്ന് ലയിച്ചാൽ ദേശീയപാർട്ടിയായ എൻ.സി.പിയ്ക്ക് ഒന്നും സംഭവിക്കില്ല എന്ന പ്രസ്താവനയുമായി എൻ.സി.പി സംസ്ഥാന അദ്ധ്യക്ഷൻ സിറിയക് ജോൺ രംഗത്തെത്തി.മുരളി എൻ.സി.പിയിൽ വന്നാൽ സിറിയക് ജോണിന് സംസ്ഥാന പ്രസിഡന്റ് സ്ഥാനം നഷ്ടപ്പെടും എന്നായിരുന്നു വാർത്തകൾ.

ഇതായിരുന്നു വരക്കേണ്ട കാർട്ടൂണിന്റെ രാഷ്ട്രീയ പശ്ചാത്തലം.പെരുവഴിയിലായ മുരളിയ്ക്ക് എൻ.സി.പി ഇടത്താവളമാകുന്നു എന്ന ചിന്ത പാന്ഥർ പെരുവഴിയമ്പലം തന്നിലേ എന്നു തുടങ്ങുന്ന എഴുത്തച്ഛന്റെ വരികളിലേക്ക് നയിച്ചു.ആ വരികൾ മനസ്സിൽ ചൊല്ലിയപ്പോൾ ചക്ഷുശ്രവണഗളസ്ഥമാം ദർദ്ദുരം എന്ന ഇമേജ് മനസ്സിൽ തങ്ങിനിന്നു.

പാമ്പിന്റെ വായിലായ തവള!

സംസ്ഥാന പാർട്ടിയായ ഡിക്ക് എന്ന തവളയെ ആത്മവിശ്വാസത്തോടെ വിഴുങ്ങാൻ തയ്യാറാകുന്ന പാമ്പായി ദേശീയ പാർട്ടിയായ എൻ.സി.പിയെ വരക്കാമെന്ന് തോന്നി.തവളയായി ചാടിച്ചാടി വരുന്ന മുരളി.പാമ്പായി വായും പൊളിച്ച് നിൽക്കുന്ന സിറിയക് ജോൺ.

കാർട്ടൂണിൽ ഒരു ട്വിസ്റ്റ് വേണമല്ലോ.പാമ്പ് ഇപ്പോൾ തവളയെ വിഴുങ്ങും എന്ന് കരുതുന്ന നിമിഷം മുരളിത്തവള സിറിയക് ജോൺ പാമ്പിനെ വിഴുങ്ങുന്നതായിരുന്നു കാർട്ടൂൺ!

2006 ഒക്ടോബർ 18ന് ആയിരുന്നു കാർട്ടൂൺ പത്രത്തിൽ അച്ചടിച്ചുവന്നത്. അന്ന് വൈകിട്ട് മറ്റൊരു ട്വിസ്റ്റ് സംഭവിച്ചു.കോതമംഗലത്ത് കുട്ടമ്പുഴയിൽ ഒരു തവള ശരിക്കും ഒരു പാമ്പിനെ വിഴുങ്ങി.പാമ്പിനെ വിഴുങ്ങി നിൽക്കുന്ന വീരനായ തവളയുടെ ചിത്രം പിറ്റേന്ന് സകല പത്രങ്ങളിലും വന്നു.

പാമ്പിനെ വിഴുങ്ങിയ തവളയുടെ ചിത്രം തലേന്നത്തെ കാർട്ടൂണും ചേർത്തുവച്ചാണ് കേരളകൗമുദി പിറ്റേന്ന് ഒന്നാം പേജിൽ തന്നെ നൽകിയത്.കാർട്ടൂണിസ്റ്റിൻ്റെ ഭാവന യാഥാർത്ഥ്യമായി എന്ന് തലക്കെട്ടും.

കോതമംഗലത്തെ തവള എന്റെ കാർട്ടൂണിന്റെ ആരാധകനാണെന്നും രാവിലെ പത്രത്തിൽ കാർട്ടൂൺ കണ്ട് ശത്രുവിനെ നേരിടാനുള്ള ഐഡിയ പഠിച്ച തവള നേരെ പോയി പാമ്പിനെ വിഴുങ്ങുകയായിരുന്നു എന്നും ആദ്യമായാണ് ഒരു തവള കാർട്ടൂണിലൂടെ ഇൻസ്പയേർഡ് ആകുന്നത് എന്നും ഓഫീസിൽ എന്നെ കൂട്ടുകാർ കളിയാക്കിച്ചിരിച്ചു.മൈ ഐഡിയ കാൻ ചേഞ്ച് എ ഫ്രോഗ്സ് ലൈഫ് എന്നുപറഞ്ഞ് ഞാനും കൂട്ടച്ചിരിയിൽ പങ്കാളിയായി.

2006 നവംബർ 22 ന് സിറിയക് ജോണിനു പകരം മുരളി എൻ സി പി പ്രസിഡന്റായി സ്ഥാനമേറ്റു.അങ്ങനെ കാർട്ടൂൺ ഭാവന ജീവിതത്തിൽ മാത്രമല്ല, രാഷ്ട്രീയത്തിലും യാഥാർത്ഥ്യമായി.

കാർട്ടൂണിന്റെ വഴികൾ ആരറിയുന്നു?

2025-02-27T06:14:00.002+05:30

" കവിതയുടെ വഴികൾ ആരറിയുന്നു ?"എന്ന് ബാലചന്ദ്രൻ ചുള്ളിക്കാട് എഴുതിയത് വായിച്ചിട്ടുണ്ട്.ക്ഷമാപണം എന്ന കവിത എഴുതാനിടയായ സാഹചര്യം വിശദമാക്കി

ചിദംബര സ്മരണ എന്ന പുസ്തകത്തിൽ ചേർത്ത കുറിപ്പ് അവസാനിക്കുന്നത് ഈ വാചകങ്ങളോടെയാണ്.കവിയുടെ തീർത്തും സ്വകാര്യമായ ഒരനുഭവമായിരിക്കാം കവിതയായി പിറവിയെടുക്കുന്നത്.പക്ഷേ അത് അച്ചടിക്കപ്പെട്ട് വായനക്കാർക്കു മുന്നിലെത്തുമ്പോൾ കഥമാറുന്നു.വ്യത്യസ്ത സാഹചര്യങ്ങളിലിരുന്ന് ഓരോ വായനക്കാരനും കവിതയിൽ വായിക്കുന്നത് അവരവരുടെ അനുഭവമായിരിക്കും.

കാർട്ടൂണിലും ഇങ്ങനെ സംഭവിക്കാറുണ്ട്.നിത്യനിദാനകാർട്ടൂണിസ്റ്റിന്റെ ഓരോ ദിവസത്തിലും ഏതോ നിമിഷത്തിൽ കാർട്ടൂണിന്റെ ആശയം പിറവി കൊള്ളുന്നു.അത് കടലാസിൽ പകർത്തി മണിക്കൂറുകൾക്കകം അച്ചടിച്ച് അനേകം വായനക്കാരിലേക്കെത്തുന്നു.പിറ്റേന്ന് കാർട്ടൂൺ കാണുന്ന വായനക്കാരൻ അറിയാത്ത ഒരു കഥയുണ്ട്..ആ കാർട്ടൂൺ ഉണ്ടായ കഥ.

അത്തരമൊരു കഥ പറയാം.

2007 ലെ വേനൽക്കാലം.സംസ്ഥാനരാഷ്ട്രീയ അന്തരീക്ഷത്തിൽ ചൂടേറിയ വിവാദങ്ങളും ഏറെ കോലാഹലങ്ങളുമുണ്ടാക്കിയ കാലമായിരുന്നു അത്.മുഖ്യമന്ത്രിയായിരുന്ന വി.എസ് അച്ചുതാനന്ദൻ മൂന്നാറിലേക്ക് തന്റെ മൂന്ന് പൂച്ചകളെ അയച്ചത് ആയിടെയായിരുന്നു.മൂന്നാർ ഓപ്പറേഷനും സ്മാർട്ട് സിറ്റി കരാർ ഒപ്പിടുന്നതുമായി ബന്ധപ്പെട്ട് നടത്തിയ ചർച്ചകളും മുഖ്യമന്ത്രിയുടെ പ്രതിച്ഛായ വാനോളം ഉയർത്തിയ നാളുകൾ.

പാർട്ടിയിൽ നിന്നും മുന്നണിയിൽ നിന്നുമുള്ള എതിർപ്പുകൾ അവഗണിച്ച് മുഖ്യമന്ത്രി നടത്തിയ നീക്കങ്ങൾ മാധ്യമങ്ങളിൽ വെണ്ടക്കയായി.പത്രങ്ങളായ പത്രങ്ങളിലെല്ലാം ഈ വിഷയങ്ങളിൽ കാർട്ടൂണുകൾ നിറഞ്ഞുനിന്നു.

ഏതൊരു കാർട്ടൂണിസ്റ്റിനും വിഷയങ്ങളുടെ ചാകര ലഭിക്കുന്ന ഈ സന്ദർഭത്തിൽ ഞാൻ അല്പം നിരാശനായിരുന്നു. പത്രങ്ങളിൽ രാഷ്ട്രീയമടക്കമുള്ള ഹാർഡ് സ്റ്റോറികളേക്കാൾ പ്രാധാന്യം മാനുഷികപ്രശ്നങ്ങളടങ്ങിയ സോഫ്റ്റ് സ്റ്റോറികൾക്ക് ലഭിച്ചിരുന്ന അക്കാലത്ത് കാർട്ടൂണുകൾക്ക് ഇടം കുറഞ്ഞുവരുന്നതായിരുന്നു നിരാശയ്ക്ക് കാരണം. രാഷ്ട്രീയവാർത്തകൾ അകം പേജുകളിലേക്ക് ഒതുങ്ങുമ്പോൾ പലപ്പോഴും രാഷ്ട്രീയകാർട്ടൂണുകൾ തീർത്തും ഉപേക്ഷിക്കപ്പെട്ടു.

മൂന്നാർ വിഷയത്തോടെ സ്ഥിതിമാറി.രാഷ്ട്രീയം മുൻപേജ് വാർത്തകളായി നിറഞ്ഞു.എല്ലാ പത്രങ്ങളിലും മൂന്നാർ കാർട്ടൂണുകൾ പ്രത്യക്ഷപ്പെടാൻ തുടങ്ങി.എന്തോ നിർഭാഗ്യത്തിന് എന്റെ കാർട്ടൂണുകൾ അധികം വെളിച്ചം കണ്ടില്ല.

മറ്റു പത്രങ്ങളിലെ കാർട്ടൂണിസ്റ്റുകളുടെ കാർട്ടൂണുകൾ ഓഫീസിൽ സവിശേഷചർച്ചകളാകുകയും എന്റെ സൃഷ്ടികൾ പുറം‌ലോകം കാണാതിരിക്കുകയും ചെയ്യുന്ന അവസ്ഥ വല്ലാത്തതായിരുന്നു.ഞാൻ നിത്യവും വരക്കുന്നുണ്ടെന്നും കാർട്ടൂണുകൾ നൽകുന്നുണ്ടെന്നും പത്രാധിപസമിതിയിലെ കുറച്ചു പേർക്ക് മാത്രമേ അറിയുന്നുണ്ടായിരുന്നുള്ളൂ.വായനക്കാർ കാർട്ടൂൺ പ്രതീക്ഷിക്കുന്ന ഒരു രാഷ്ട്രീയകാലാവസ്ഥയിൽ ഞാനെന്തേ നിശബ്ദനായിരിക്കുന്നതെന്ന സുഹൃത്തുക്കളുടെ ചോദ്യങ്ങൾ എന്നെ വീർപ്പുമുട്ടിച്ചു.

വരയ്ക്കാനാകാതെ എന്തിനിങ്ങനെ തുടരുന്നു എന്നെനിക്കു തോന്നാൻ തുടങ്ങി.

എന്റെ മാനസികാവസ്ഥ അറിയാവുന്ന ചിലർ ഓഫീസിലുണ്ടായിരുന്നു.അതിലൊരാളായിരുന്നു അന്നത്തെ രാഷ്ട്രീയലേഖകനായ ബി.വി പവനൻ.എന്റെ പ്രതിസന്ധി മനസ്സിലാക്കി പവനേട്ടൻ പറഞ്ഞു.വിഷമിക്കേണ്ട, നമുക്കൊരു ഡ്രൈവ് പോകാം.

വൈകുന്നേരം,ശംഖും‌മുഖത്ത് കടൽക്കരയിലിരുന്ന് പവനേട്ടൻ കുറേ കഥകൾ പറഞ്ഞു.പ്രതിസന്ധികളിൽ നിന്ന് ഒളിച്ചോടാതെ ക്രിയേറ്റിവിറ്റികൊണ്ടു നേരിട്ടവരുടെ ജീവിതാനുഭവങ്ങൾ.രാത്രി ഇരുട്ടി വെളുക്കും പോലെ ഈ പ്രതിസന്ധി മറികടക്കാനാകും എന്ന് പവനേട്ടൻ ഉറപ്പിച്ചുപറഞ്ഞു.

പിറ്റേന്ന്,ഡെസ്കിന്റെ ചുമതലയുള്ള എഡിറ്റർമാരായ പത്മനാഭൻ നമ്പൂതിരിയും അജയ് മുത്താനയും എന്നെ വിളിച്ചുപറഞ്ഞു.നാളത്തെ ഒന്നാം പേജ് അവരുടെ ചുമതലയിലാണ്.ഒരു കാർട്ടൂൺ കിട്ടിയാൽ വീശി അടിക്കാം.

ആത്മവിശ്വാസത്തിന്റെ തരിമ്പുപോലും ഇല്ലാത്ത അവസ്ഥയിൽ നിന്നിരുന്ന എനിക്കു കിട്ടിയ ആശ്വാസവചനമായിരുന്നു അത്.മൂന്നാറിലെ ഒഴിപ്പിക്കലും സ്മാർട്ട് സിറ്റി കരാറും മുഖ്യമന്ത്രിയുടെ മാത്രം നേട്ടമല്ല,ഇടതുമുന്നണിയുടെ തീരുമാനം മുഖ്യമന്ത്രി നടപ്പാക്കിയതേ ഉള്ളൂ എന്ന എൽ.ഡി. എഫ് നേതാക്കളുടെ അവകാശവാദത്തെക്കുറിച്ച് ഏറെ പ്രതീക്ഷയോടെ ഞാനൊരു കാർട്ടൂൺ തയ്യാറാക്കി.

മൂന്നാറും സ്മാർട്ട് സിറ്റിയും അടക്കമുള്ള ഭരണനേട്ടം ചുമന്നുകൊണ്ടുപോകുന്ന എൽ.ഡി.എഫ് നേതാക്കളായിരുന്നു കാർട്ടൂണിൽ.മുഖ്യമന്ത്രിയ്ക്കും മറ്റ് എൽ.ഡി എഫ് നേതാക്കൾക്കും ഈ നേട്ടത്തിൽ തുല്യപങ്കാണ് എന്ന് ഒറ്റനോട്ടത്തിൽ തോന്നുമെങ്കിലും,അങ്ങനെയല്ല ഉത്തരവാദിത്തം മുഴുവൻ മുഖ്യമന്ത്രിയുടെ തോളിലാണെന്നും മറ്റുള്ളവർ നേട്ടത്തിൽ പങ്കുപറ്റി പിടിച്ചുതൂങ്ങുകയാണെന്നും സൂചിപ്പിക്കുന്നതായിരുന്നു കാർട്ടൂൺ.

കാർട്ടൂൺ കണ്ട നമ്പൂതിരിയും അജയ് മുത്താനയും മുഖത്തോടു മുഖം നോക്കി,ഇരുവരും ഒന്നും മിണ്ടുന്നില്ല.

ഞാൻ പതുക്കെ ചോദിച്ചു,കാർട്ടൂൺ കുഴപ്പമില്ലല്ലോ?

ഒന്നും മനസ്സിലാകുന്നില്ല.മുത്താന പറഞ്ഞു.നമ്പൂതിരിയും അത് ശരി വെച്ചു.

മോശമാണെങ്കിൽ കാർട്ടൂൺ ചവറ്റുകുട്ടയിലേക്ക് ഇട്ടേയ്ക്ക്,ഞാൻ വീണ്ടും നിരാശയുടെ പടുകുഴിയിൽ വീണു.

ഒന്നുകൂടി ശ്രമിക്കൂ എന്നായി ഇരുവരും.

ഞാൻ വീണ്ടും കാർട്ടൂണിലേക്കു നോക്കി.ഏറെ പ്രതീക്ഷയോടെ വരച്ച ആശയമാണിത്.എന്തേ ഇത് മനസ്സിലാകാതിരിക്കാൻ?

പെട്ടെന്നാണൊരു കാര്യം ബോധ്യമായത്.വരയിൽ ചെറിയൊരു ആശയക്കുഴപ്പമുണ്ട്.രണ്ടു ഫ്രെയിമിലാണ് കാർട്ടൂൺ. ആദ്യ ഫ്രെയിമിൽ ഭരണനേട്ടം ചുമന്നുകൊണ്ടു പോകുന്ന

എൽ.ഡി.എഫ് നേതാക്കൾ,സൂം ഔട്ട് ചെയ്ത രണ്ടാമത്തെ ഫ്രെയിമാണ് കാർട്ടൂണിന്റെ പഞ്ച്.എല്ലാവരും ചേർന്ന് ഭരണനേട്ടം ചുമക്കുകയല്ല,മറിച്ച് ഏറ്റവും പിന്നിൽ നിൽക്കുന്ന മുഖ്യമന്ത്രി മാത്രമാണ് ഭരണവും മറ്റ് നേതാക്കളേയും ചുമക്കുന്നത്.മുഖ്യമന്ത്രിയെ ഏറ്റവും പിന്നിൽ വരച്ചപ്പോൾ എല്ലാ കഥാപാത്രങ്ങളും നിൽക്കുന്നത് ഒരേ പ്രതലത്തിലാണെന്ന് തോന്നിപ്പിക്കും.ഞാൻ മനസ്സിൽ ഉദ്ദേശിച്ച ആശയവും കാർട്ടൂണിന്റെ പഞ്ചും കടലാസിന്റെ ദ്വിമാനപ്രതലത്തിലേക്ക് പകർത്തിയപ്പോൾ മറ്റുള്ളവർക്ക് മനസ്സിലാകാൻ പ്രയാസമായി.

ആദ്യം വരച്ചത് കീറിക്കളഞ്ഞു.പെൻ‌സിൽ സ്കെച്ച് പോലും ഇടാതെ പത്തുമിനിറ്റിനകം മുഖ്യമന്ത്രിയെ പിന്നിൽ നിന്ന് നടുവിലേക്ക് മാറ്റി നിർത്തി കാർട്ടൂൺ വരച്ച് ഡെസ്കിൽ നൽകി.

2007 മെയ് 20 ഞായറാഴ്ച "ആരുടെ നേട്ടം?"എന്ന ബാനർ ഹെഡ്ഡിങ്ങിനു താഴെ ഗംഭീരമായ ഡിസ്‌പ്ലേയിൽ ഈ കാർട്ടൂൺ അച്ചടിക്കപ്പെട്ടു.ഏറെ ചർച്ചചെയ്യപ്പെട്ട ഒരു കാർട്ടൂണായി മാറി അത്.

ഞാൻ ചവറ്റുകുട്ടയിലെറിയാൻ തുടങ്ങിയ ഈ കാർട്ടൂൺ,മികച്ച കാർട്ടൂണിനുള്ള ആ വർഷത്തെ സംസ്ഥാന സർക്കാരിന്റെ മാധ്യമ അവാർഡും കേരളലളിതകലാ അക്കാദമി ഓണറബിൾ മെൻഷൻ അവാർഡും നേടി.അതിലും വലിയ അവാർഡ് അജ്ഞാതനായ ഒരു വായനക്കാരൻ ഒരു ചെക്കിനൊപ്പം അയച്ച കത്തായിരുന്നു.ഈ കാർട്ടൂണിന്റെ സ്രഷ്ടാവിനുവേണ്ടി ഗുരുവായൂരപ്പനുള്ള ദക്ഷിണപോലെ ഇത് സമർപ്പിക്കുന്നു എന്നായിരുന്നു കത്തിൽ!

ആ കത്ത് ഇന്നും കാണുമ്പോൾ പഴയ കഥ ഓർക്കുന്നു.ഒപ്പം ഒരു ചോദ്യവും. കാർട്ടൂണിന്റെ വഴികൾ ആരറിയുന്നു?