Castelo Deporte

A Xunta de Galicia recoñece a contribución da asociacion Castelo Deporte á mocidade

2012-02-17T14:22:00.000+01:00

A entidade cullerdense forma parte, desde esta semana, do censo de entidades xuveniles e prestadoras de servizos á mocidade da Dirección Xeral de Xuventude. Trátase dun importante recoñecemento, que da resposta a unha demanda constante por parte da asociación

A inscrición da asociación Castelo Deporte na Secretaría Xeral de Presidencia da Xunta de Galicia compleméntase desde esta semana co rexistro no Censo de Entidades Xuveniles, dependente da Consellería de Traballo e Benestar da mesma administración. A solicitude da asociación cullerdense recibe deste xeito unha resposta positiva, que abre unha nova vía de traballo en colaboración con diferentes institucións públicas.

Castelo Deporte é, desde a súa fundación no ano 2008, unha entidade de carácter social, sen ánimo de lucro, e prestadora de servizos deportivos e culturais á poboación en xeral, pero nomeadamente ao sector da mocidade, co que habitualmente traballa en colaboración co Concello de Culleredo.

A solicitude cursada perante a Xunta de Galicia foi coordinada pola directora de Actividades da asociación, Alba Taboada, a raiz da asistencia de varios membros da directiva a un foro organizado pola área de xuventude do ente autonómico.
A resolución en sentido positivo desta demanda de Castelo Deporte permitirá que a entidade cullerdense poida presentar un proxecto para a liña de axudas 'Iniciativa Xove', que promove a propia consellería.

O Castelo Non Para terá lugar do 10 ao 11 de marzo cun premio económico de 1000 euros para o campión

2012-02-12T23:26:00.001+01:00

Desde esta medianoite están abertas as inscricións a través da web oficial do evento, que informará puntualmente sobre todas as novidades relativas ao maratón. Ata o domingo 4 de marzo é posible anotar equipos de entre cinco e doce xogadores.

Con toda probabilidade o evento terá lugar no polideportivo de Tarrío (Culleredo), aínda que a concellería de Deportes confirmará nestes días o recinto definitivo. Destaca da convocatoria o elevado premio económico para o equipo campión, a posta polas novas tecnoloxías (a inscrición será exclusiva a través de internet) e a estrutura organizativa coa que a asociación pretende contar.

Iníciase ademais unha campaña a través das redes sociais e a pegada de carteis para aumentar a participación en relación ao campionato do pasado ano.

Durante case un mes permanecerán abertas as inscricións para todos aqueles equipos que desexen participar na segunda edición do maratón deportivo vintecatro horas 'Castelo Non Para', que a asociación Castelo Deporte, en colaboración co Concello de Culleredo, organizará os vindeiros días 10 e 11 de marzo no polideportivo municipal de Tarrío.

Reúnese a Comisión de Deportes da asociación para definir as características do Castelo Non Para

2012-02-11T00:45:00.001+01:00

A segunda edición está previsto que se celebre do 10 ao 11 de marzo nun recinto polideportivo municipal por definir. Varios deportistas da comarca colaboran no deseño do maratón

Este sábado reúnese no Burgo a Comisión de Deportes da asociación Castelo Deporte, co obxectivo de determinar as características da segunda edición do maratón vintecatro horas Castelo Non Para. O responsable da área, Carlos Martínez, contará na organización do evento con dous dos xogadores de fútbol sala máis coñecidos de Galicia como son Javier Suárez e Jacobo Torres.

O Concello de Culleredo colaborará no evento coa cesión do polideportivo municipal, aínda por definir. Na pasada edición, foron doce os equipos inscritos nun innovador formato que se desenvolveu en Tarrío. O obxectivo para este ano é o de manter o nivel de participación, e aumentar a calidade do evento tanto na súa organización como nos aspectos relacionados coa difusión e a publicidade do mesmo.

Está previsto que ao longo da próxima semana se abran as inscricións a través da web oficial do evento.

School Riders Team e Castelo Deporte organizarán o II Descenso ao Xalo de BTT o 14 e o 15 de abril

2012-02-11T00:17:00.000+01:00

O clube cullerdense encargarase do circuíto, quedando para a asociación a administración, a loxística e a difusión dunha proba que pretende superar a participación na primeira edición

FOTO: JOSÉ DOMÍNGUEZ

O éxito de participación nunha das catro probas do Open de Galicia Novacaixagalicia de descenso, que o pasado ano congregou a máis de 180 corredores no monte Xalo, anima ao clube School Riders Team e á asociación Castelo Deporte a preparar, xa con data oficial os días 14 e 15 de abril, a segunda edición do evento.

A frutífera colaboración entre ambas entidades favorece un reparto de tarefas no que o clube será o encargado da construción do circuíto, dada a experiencia de moitos dos seus membros entre os que destacan o tamén cullerdense Aaron Caballero, que precisamente foi o gañador dunhas categorías na primeira edición e é na actualidade unha das grandes promesas do descenso a nivel nacional.

Os aspectos fundamentais do circuíto serán presentados nas próximas semanas, e aínda que hai modificacións en relación á pasada edición do evento, manterase a espectacularidade dun trazado que pretende atraer a numeroso público á ladeira do monte Xalo.
O remate da proba será de novo no lugar de Peiro de Arriba, na parroquia de Celas de Peiro, e o Concello de Culleredo colaborará no acondicionamento dos remontes, compromiso adquirido polo alcalde Julio Sacristán cando no remate da primeira edición manifestou a súa satisfacción pola organización do evento.

Haberá de novo categoría de promoción, dirixida aos corredores non federados. A medida sitúase na liña de difusión do deporte de base que Castelo Deporte pretende para cada un dos seus eventos. Segundo está previsto, o sábado 14 de abril haberá adestramentos oficiais á tarde, quedando a proba para a mañá do domingo. Xa antes, desde o venres, o circuíto estará habilitado para adestramentos libres dos participantes na proba, iso si, sen remontes da organización.

Está previsto manter o prezo da inscrición na primeira edición, que será lixeiramente máis elevado para a categoría de promoción, por contar cun seguro de accidentes exclusivo, que no caso das categorías federadas cubre a propia Federación Galega de Ciclismo.

Ademais da web, a páxina en Facebook da proba informará puntualmente sobre toda a actualidade relacionada co evento.

A directiva de Castelo Deporte aproba os compromisos de austeridade da nova tesoureira

2012-02-10T21:49:00.000+01:00

A asociación non reeditará ninguna actividade que durante o presente exercicio presente resultados deficitarios. Da medida sálvase unicamente o tradicional maratón deportivo do verán

María Pérez quere reducir o déficit de Castelo Deporte o antes posible. Foi a principal conclusión da proposta que presentou na reunión da Xunta Directiva celebrada o pasado venres no Burgo, á que asistiron todos os membros do máximo órgano de goberno da asociación agás o vicepresidente.

A área económica da asociación cullerdense quere evitar que non se valoren pequenas cantidades cando se traballa cun orzamento de máis de 30.000 euros. Por esta razón, a tesoureira liderou a oposición á proposta da presidencia de invertir 380 euros nun proxecto de promoción e publicidade, que finalmente foi modificado, e que se anunciará nos próximos días.

Porén, a decisión máis relevante das determinadas pola directiva na súa última xuntanza foi a de non repetir todas aquelas actividades que no exercicio 2012 sexan deficitarias. O pasado ano, o Castelo Deporte 2011 e o Castelo Non Para foron os dous únicos eventos que supuxeron un desenvolso para a entidade cullerdense. Por unha emenda da vicepresidenta segunda, Alba Taboada, sálvase da nova normativa o maratón deportivo do verán, que este ano chega á súa sétima edición: manterase a posibilidade de repetilo sexa cal sexa o seu resultado económico.

O presidente de Castelo Deporte, Álvaro Pérez Becerra, deu conta do acordo da directiva aclarando que a medida pretende "provocar unha maior implicación por parte da organización", e ao mesmo tempo manifestou a súa preocupación pola continuidade do Castelo Non Para, a primeira actividade do ano, e a menos rendible no apartado económico. "Temos que facer un esforzo de austeridade e aforro se queremos continuar con cada unha das actividades que organizamos, a implicación da organización é asumible, pero a económica supón un risco que no actual momento non podemos soportar", declarou.

Castelo Deporte solicita a inscrición no rexistro da Dirección Xeral de Xuventude da Xunta de Galicia

2012-02-10T21:22:00.000+01:00

Con esta decisión a entidade cullerdense pretende participar das actividades promovidas pola área de mocidade da Administración Autonómica e solicitar así apoio económico e institucional

A participación de Alba Taboada e Álvaro Pérez Becerra, responsable de actividades e presidente de Castelo Deporte respectivamente, nun foro organizado pola Dirección Xeral de Xuventude da Xunta de Galicia, motivou a decisión que a asociación cullerdense ven de tomar: a inscrición como entidade prestadora de servizos á mocidade no rexistro administrativo correspondente.

Na actualidade, a entidade está inscrita no rexistro xeral de asociacións da Secretaría Xeral de consellería de Presidencia, sobre o que desenvolve actividades en diferentes ámbitos. Non obstante, a inscrición na área de mocidade da Xunta de Galicia non supón a especialización exclusiva de Castelo Deporte: máis ben permite o acceso a diferentes procedementos administrativos nos que a entidade cullerdense pretende actuar ao longo do 2012.

Pablo Sánchez Castiñeira, responsable de mocidade na asociación, será o encargado de coordinar todas as actividades derivadas desta área, entre as que se contempla a posibilidade de solicitar as axudas correspondentes ao programa Iniciativa Xove, que a Xunta de Galicia ten previsto convocar nas próximas semanas.

Este e outros asuntos serán tratados na xuntanza que o próximo mércores manterán responsables de Castelo Deporte coa concelleira de Mocidade, Marta Iglesias.

Castelo Deporte traslada ao concelleiro de Deportes as intencións da entidade para 2012

2012-02-10T21:00:00.001+01:00

Bernardo Peiteado comprometeuse a seguir apoiando as accións da asociación, advertindo non obstante sobre o mal momento económico e as prioridades do concello

O concelleiro de Deportes e Participación Cidadá do Concello de Culleredo, Bernardo Peiteado, recibiu a pasada semana a parte da directiva da asociación Castelo Deporte nas instalacións de Servizos Múltiples (O Burgo). Álvaro Pérez Becerra, Alba Taboada e Carlos Martínez aproveitaron para trasladar as principais peticións da entidade ao Goberno Local, entre as que se atopan o apoio institucional ás actividades promovidas pola asociación, unha solución definitiva para a polideportiva de Castelo ou mesmo axudas puntuais para a organización dos eventos previstos no plan de actividades.

O presidente de Castelo Deporte amosou a súa preocupación polo estado de desatención da instalación municipal da polideportiva de Castelo, que pola súa ubicación sofre un deterioro constante. Neste sentido, Pérez Becerra sinalou a necesidade de transformar o recinto de cara á III Travesía do Xalo para achegar unha boa imaxe á enorme participación coa que conta a proba. Incidiu ademais no "interese común" para asociación e concello.

A directiva da entidade quixo comentar ademais o sentimento de "comprensión" co que supón xestionar un concello como Culleredo na actual situación económica. "Non pedimos cartos porque non é o momento de pedir cartos, pero é importante que se recoñeza a tarefa que realiza a asociación". Peiteado amosou o apoio da súa concellería, e comprometeuse a facilitar os medios materiais dispoñibles para facilitar o traballo de Castelo Deporte.

A xuntanza co concelleiro de Deportes enmárcase nunha serie de encontros cos titulares das áreas nas que a asociación actúa de xeito directo. A próxima semana o responsable de Mocidade, xunto coa directora de Actividades e o propio presidente da entidade reunirase coa concelleira Marta Iglesias.

Os outros compromisos para 2012

2012-01-05T19:00:00.000+01:00

Un paso máis adiante, onde remata a liña dos obxectivos fundamentais de Castelo Deporte, nacen outra serie de compromisos sociais que convén ter presentes e non esquecer nunca...

MEDIO AMBIENTE | A RÍA DO BURGO
A carreira que Castelo Deporte organizará no mes de maio polo paseo da ría será a mellor aportación á defensa do maior recurso natural que ten Culleredo xunto co monte Xalo. O estado de desprotección e abandono dun ecosistema de tanta importancia para a nosa contorna merece unha resposta potente por parte dos que formamos parte do tecido social da área metropolitana coruñesa. Obrigar aos responsables políticos a adquirir compromisos concretos é o obxectivo esencial.

LINGUA | O GALEGO NO NOSO DÍA A DÍA
Ademais do emprego exclusivo da lingua galega en todas as nosas comunicacións oficiais, tanto orais e escritas, a través da área de cultura procuraremos promover iniciativas para difundir a importancia de manter vivo o galego, especialmente a través da mocidade. Por outra banda, e na mesma liña de actuación do Concello de Culleredo, concordamos na importancia de normalizar desde a normalidade, sen grandes campañas, sen publicidade. Falando en galego mantemos viva a nosa lingua.

CONTRA OS RECORTES EN EDUCACIÓN, CIENCIA E INNOVACIÓN
A crise non pode ser o argumento para dar por perdidos algúns dos piares fundamentais da nosa sociedade. Participaremos de xeito activo na defensa da educación pública e de calidade, da promoción de todo proxecto de investigación científica, o mellor investimento a longo prazo.

CASTELO, NO CORAZÓN
Non deixar de lado a nosa orixe é un compromiso adquirido coa nosa parroquia. Traballamos de xeito conxunto coa Asociación de Veciños de Castelo para mellor as condicións de vida das veciñas e veciños.

Trinta e dúas persoas compoñen o equipo co que Castelo Deporte recibe o seu ano de maior actividade

2012-01-04T19:00:00.000+01:00

Cunha media de idade que non supera os 20 anos, a asociación convértese nun referente a nivel autonómico no relativo a dinamización cultural e promoción de actividades deportivas

A chegada de 2012 e o comezo dun novo exercicio de actividades na asociación Castelo Deporte ven asociada a un importante incremento no equipo de voluntarios que habitualmente participan na organización das actividades que promove a entidade cullerdense. Desde os pouco máis de vinte que conformaban o grupo en 2011, o equipo aumenta ata os trinta e dous compoñentes, o que permitirá planificar máis proxectos e desenvolvelos cunha maior eficacia, garantindo actividades de calidade técnica e organizativa ao longo de todo o ano.

Para a etapa que comeza, a asociación ten previsto poñer en práctica un sistema de comisións que permitirá organizar o traballo dun xeito máis eficaz e participativo. Desta forma, Carlos Martínez (deportes), Clara Pérez (cultura) e Pablo Sánchez (mocidade), presidirán as comisións das súas respectivas áreas, que estarán formadas por varios compoñentes do equipo, e que se reunirán de xeito periódico. A súa tarefa, sempre baixo a coordinación da directora de actividades de Castelo Deporte, Alba Taboada, será a de propoñer os equipos de organización para cada unha das actividades, validar os orzamentos e avaliar a execución dos proxectos.

As comisións parten dun plan de actividades inicial sobre o que traballar. A partir dese momento poderán nomear os equipos de organización dos diferentes eventos, que comezarán a traballar para poder presentar ao responsable de área un proxecto e un orzamento, que o director xeral da asociación e a directora de actividades valorarán. Coa aprobación do mesmo, os equipos encargaranse da organización de todas as actividades, recibindo ademais unha proposta da área de comunicación (para a promoción e difusión do evento) e outra da área de innovación (que realizará en todo caso unha serie de recomendacións para cumprir co obxectivo de modernidade e presenza das novas tecnoloxías en todas as actividades de Castelo Deporte).

Con esta nova metodoloxía de traballo a asociación adoita unha estrutura organizativa propia dunha entidade de certa magnitude, co obxectivo de compartir responsabilidades e participar dun xeito máis activo nos proxectos e actividades.

A candidatura de Álvaro Pérez Becerra gaña as eleccións e presidirá Castelo Deporte dous anos máis

2012-01-03T19:00:00.000+01:00

Co 75% dos votos favorables e ningún voto en contra, aínda que con unha reducida participación na asemblea de socios. Alberto Ferreño, Alba Taboada, Carlos Martínez e María Pérez completan a nova Xunta Directiva, que tomará posesión a próxima semana

Non houbo sorpresas e o equipo que leva dirixindo Castelo Deporte desde a súa fundación continuará dous anos máis na entidade deportiva e cultural máis activa de Culleredo. Os socios votaron o pasado xoves en Asemblea Extraordinaria convocada a tal efecto e dicidiron, cun 75% dos votos a favor e un 25% de votos en branco, que a directiva da asociación sexa de novo a da candidatura continuista.

O presidente electo, Álvaro Pérez Becerra, agradeceu na propia asemblea a confianza dos socios e manifestou a súa intención de promover unha asociación máis participativa e activa. Alberto Ferreño, Alba Taboada e Carlos Martínez continuarán na directiva, mentres que a coruñesa María Pérez substituirá a Lorenzo Domínguez na tesourería da entidade.

Pérez Becerra, en declaracións a Radio Culleredo, asegurou o venres que as liñas de actividade da asociación seguirán a ser as mesmas, e avanzou o plan de actividades de cara a 2012, no que como novidades destacou a celebración do tradicional campionato de fútbol sala en Castelo para o mes de xullo, ou mesmo a celebración dunha carreira polo Burgo e Vilaboa no mes de maio.
Ademais, e preguntado sobre os seus desexos para 2012, quixo facer referencia ao obxectivo último de Castelo Deporte, o de darlle á xente, especialmente á máis nova, algún motivo para nos tempos que corren ser un pouco máis feliz facendo cousas diferentes.

Raúl Espasandín será o novo responsable de innovación da asociación Castelo Deporte

2011-12-28T16:20:00.000+01:00

Impulsará unha nova metodoloxía de traballo que terá por obxectivo achegar un carácter innovador a cada unha das actividades que Castelo Deporte organice ao longo do ano. Yago Mosquera e Álvaro Pérez Becerra completarán o equipo de novas tecnoloxías.
Raúl Espasandín (1992), é estudante da enxeñería de Caminos, Canais e Portos na Universidade da Coruña, e leva tres anos colaborando coa asociación cullerdense en proxectos de innovación e aplicación de medios audiovisuais ás actividades organizadas pola entidade. A área de innovación será a terceira das coordinadas por Alberto Ferreño desde a secretaría xeral. A nova estrutura pretende facer máis efectivo o traballo en novas tecnoloxías.

A nova estrutura da asociación Castelo Deporte para o 2012 continúa a facerse pública. Como publicaba onte a web da entidade, Alberto Ferreño farase cargo nunha secretaría xeral de tres grandes áreas, a financeira (coordinada por María Pérez), a de comunicación (dirixida por Álvaro Pérez Becerra) e a de innovación, da que hoxe se coñece o nome do seu responsable. Será Raúl Espasandín Lacalle, membro do equipo da asociación desde hai varios anos, que será o encargado de poñer en práctica a nova estratexia de novas tecnoloxías que Castelo Deporte proxecta para o novo exercicio.

A proposta da nova directiva vai dirixida a incrementar o papel innovador da entidade en cada unha das súas actividades. Deste xeito, o equipo coordinado por Espasandín realizará unha avaliación previa a cada actividade propoñendo diferentes elementos relacionados coa innovación e as novas tecnoloxías, que postos en práctica o non, pasarán a formar parte dunha memoria anual que a asociación pretende desenvolver desde este ano. Estas fichas pasarán ao equipo organizador de cada actividade, que analizará as posibilidades para poñer en práctica as recomendacións do grupo de innovación en función do personal dispoñible, os medios técnicos e os orzamentos. De aplicarse, un dos membros da área será o encargado de coordinar coa organización do evento a posta en práctica.

Esta nova metodoloxía súmase ao traballo organizado por comisións nas áreas de cultura, deportes e mocidade, co que Castelo Deporte quere facer máis participativo e efectivo o seu traballo en cada unha das actividades que ten previsto organizar ao longo do ano.

Castelo Deporte prepara unha reestruturación do organigrama da asociación para a chegada de 2012

2011-12-27T20:32:00.003+01:00

A directiva que saia das eleccións deste xoves reformulará o cadro de responsabilidades na entidade. O cambio na área financeira coa chegada de María Pérez será a principal novidade

Castelo Deporte prepara un novo organigrama para afrontar o ano de maior actividade da súa historia. A candidatura á directiva da asociación, que este xoves será proclamada como gañadora das eleccións ao máximo órgano de goberno, ten previsto reorganizar a estrutura da entidade para facela máis efectiva e áxil, aínda que o maior participación de todo o equipo será o obxectivo fundamental.

María Pérez Muñoz colle as rendas da xestión financeira

A nova tesoureira de Castelo Deporte será a encargada de levar todas as contas da asociación. A directiva ten previsto unificar os cargos relativos á economía da entidade para acadar os obxectivos orzamentarios previstos e reducir a débeda. A financeira será unha das tres grandes áreas que coordinará Alberto Ferreño, que repite como secretario xeral.

Comunicación divídese en tres áreas

Outra das seccións da secretaría será a de comunicación. Estará dirixida polo actual presidente da asociación, Álvaro J. Pérez Becerra, e aglutinará tres áreas, a de publicidade (que xestionará Laura Castro), a de prensa (que seguirá en mans de Pilar Mera) e a de información (que levará Laura Rodríguez). Con esta medida, Castelo Deporte pretende potenciar as diferentes áreas de difusión do traballo da asociación. O equipo de comunicación quedará así conformado por profesionais das áreas de comunicación dixital, deseño, xornalismo e marketing.

Lorenzo Domínguez, asesor no nivel máis alto

O actual tesoureiro en funcións de Castelo Deporte pasará a exercer unha tarefa de asesoramento á dirección xeral, baixo o cargo de adxunto á dirección da entidade. Domínguez participará deste xeito na toma de decisións relativa aos aspectos máis importantes do día a día da asociación.

A área de actividades funcionará a través de comisións

Alba Taboada seguirá a dirixir as actividades da asociación, e contará con Carlos Martínez, Clara Pérez e Pablo Sánchez como responsables de deportes, cultura e mocidade respectivamente. As tres áreas contarán con comisións, que organizarán o traballo derivado das súas correspondentes actividades. Deste xeito, cada comisión será a encargada de escoller o equipo encargado de organizar cada un dos eventos.

A intención da nova directiva será a de anunciar o novo organigrama na primeira xuntanza de 2012, para comezar os traballos de cara á organización da primeira actividade do ano xa sobre a nova estrutura.

Xunta un pouco de tempo para ser feliz

2011-12-24T19:40:00.000+01:00

De parte de todos os que facemos posible o Castelo Deporte, desexámosvos unhas boas festas e unha mellor entrada no ano 2012 en boa compañías, tamén na nosa

Chega outro Nadal no que agradecervos un ano cheo de emocións, soños e boas sensacións. O noso lema para estas festas 'xunta un pouco de tempo para ser feliz', ten un significado evidente, pero ao mesmo tempo moi asociado ao que pensamos que ten que ser a nosa actividade social: se tanta xente, todos os que éramos no inicio e todos os que somos hoxe, podemos xuntar un pouco do noso tempo para dedicalo a Castelo Deporte, facémolo porque así somos felices.

Facendo xuntos unha aventura que semella non querer rematar, temos por obxectivo facervos felices tamén a vos. Polo momento, a disfrutar destas festas coa vosa xente. Bo Nadal ;)

Castelo Deporte colabora na campaña de recollida de xoguetes organizada polo Concello de Culleredo

2011-12-24T19:26:00.000+01:00

A asociación dispuxo catro grupos de voluntarios durante unha semana para colaborar na limpeza, empaquetado e selección dos xoguetes que foron entregados ás familias con maiores dificultades económicas e sociais de Culleredo

A concellería de Xuventude do Concello de Culleredo, xestionada por Marta Iglesias, organizou un ano máis a tradicional campaña de recollida de xoguetes na que nesta ocasión solicitouse a colaboración da asociación Castelo Deporte. O resultado foi sorprendente, con centos de veciños que quixeron facer a súa aportación para contribuír a un Nadal mellor nas familias con maiores necesidades económicas do concello.

Durante toda unha semana, e en catro grupos, voluntarios da asociación Castelo Deporte asistiron á Casa da Mocidade do Burgo para participar na limpeza, empaquetado e posta en marcha dos xoguetes recibidos, que posteriormente foron seleccionados e entregados baixo a coordinación da concellería de Servizos Sociais.

Castelo Deporte, a través da súa directora de actividades, Alba Taboada (que ademais coordinou a participación da asociación na campaña), quixo amosar o seu agradecemento e a felicitación da asociación ao Concello de Culleredo pola boa marcha da campaña e o excelente traballo conxunto desenvolvido entre as concellerías. Do mesmo xeito, amosou a disposición de Castelo Deporte para colaborar en todas cantas actividades deste tipo se desenvolvan en Culleredo.

A segunda edición do Castelo Non Para será a primeira actividade de Castelo Deporte en 2012

2011-12-24T19:13:00.000+01:00

Celebrarase nunha das instalacións polideportivas cubertas do Concello de Culleredo a segunda fin de semana do mes de marzo. Javier Suárez, Sergio Sande, Brais Regueiro e Jacobo Torres, coñecidos deportistas da comarca, deseñarán e coordinarán o evento

Castelo Deporte prepara xa a súa primeira actividade para o 2012. Será a segunda edición do maratón 24 horas 'Castelo Non Para', que o pasado ano tivo lugar no polideportivo municipal de Tarrío (Culleredo), e que rematou con máis de dez equipos participantes e unha notable asistencia de público.

O 10 de marzo é a data elexida para un maratón que contará coa dirección técnica de catro futbolistas recoñecidos da comarca, e membros do equipo da asociación Castelo Deporte. Brais Regueiro, Jacobo Torres e Javier Suárez (Mera F.S.) e Sergio Sande (U.D. Carral) serán os encargados de dispoñer o calendario de competición, as escoller árbitros e apuntar as modificacións nas normas habituais de fútbol sala. Segundo comunicou a dirección de actividades da entidade, o feito de contar con catro nomes tan coñecidos na coordinación técnica do evento fará que o 'Castelo Non Para' teña unha mellor acollida.

Unha única candidatura participará o xoves 29 de decembro nas eleccións de Castelo Deporte

2011-12-24T18:24:00.000+01:00

Está formada por catro dos cinco membros da actual. María Pérez substitúe a Lorenzo Domínguez, que pasará a ser asesor na dirección xeral da asociación.

O xoves 29 de decembro será a data na que os socios da asociación Castelo Deporte escollan de novo directiva. Dous anos despois da última convocatoria electoral, e cun nivel de afiliación en máximos históricos, unha única candidatura concorrerá aos comicios ao que están chamados a votar todos aqueles socios ao corrente nos pagamentos anuais de taxas.

Álvaro Pérez Becerra, Alberto Ferreño, Alba Taboada, Carlos Martínez e María Pérez forman parte da candidatura da continuidade, que ven gobernando a asociación desde a súa fundación no ano 2008. Cáese por decisión propia Lorenzo Domínguez, actual tesoureiro en funcións, que é substituído pola coruñesa María Pérez Muñoz. O troco pretende potenciar o control do déficit que na actualidade rexistra a entidade cullerdense. A estes efectos, a nova tesoureira ten previsto reunirse nas próximas semanas coa directiva actual para analizar polo miúdo o detalle das contas da asociación.

As eleccións terán lugar no marco da Asemblea Extraordinaria de Socios, que complementará a unha reunión ordinaria na que se fará balance das actividades realizadas durante o ano 2011 e se presentará o balance económico. As xuntanzas terán lugar no Centro Social Folgueira - Castelo a partir das 20.00 horas (convocatoria ordinaria) e desde as 20.45 horas (convocatoria extraordinaria).

A Maratón de Culleredo posponse ata o outono para non perxudicar á carreira na Coruña do 15 de abril

2011-11-15T20:43:00.000+01:00

A organización da proba mantén a súa intención de facela cando o calendario o permita.
O 6 de maio celebrarase no seu lugar unha carreira pedestre nas parroquias de Rutis e O Burgo

Castelo Deporte decide posponer a primeira edición da Maratón de Culleredo, pero non deixa de lado o proxecto. A proba, inicialmente proposta para o 6 de maio, non se celebrará nesa data logo das múltiples chamadas e correos electrónicos de corredores interesados en participar advertindo sobre a proximidade co Campionato Galego de Maratón programado na Coruña para o 15 de abril.

É o motivo fundamental polo que a asociación cullerdense decide variar a data da que pasaría a ser unha das probas máis importantes celebradas no concello nos últimos anos. Organizarase previsiblemente en outono, aínda que a data non se concretará ata os primeiros meses de 2012. Castelo Deporte xustifica no "obxectivo común da promoción do deporte" o cambio de plans, e a través dun portavoz desexa "o maior dos éxitos" á proba que a Federación Galega de Atletismo e o Concello da Coruña levarán á cidade herculina a mediados de abril.

Carreira pedestre por Rutis e O Burgo
O cambio na data da maratón non significa que o 6 de maio quede baleiro no calendario de actividades de Castelo Deporte. A entidade prepara xa unha carreira pedestre de entre quince e vinte quilómetros que percorrería boa parte das parroquias do Burgo e Vilaboa, e na que a organización agarda unha ampla participación.

O número de Castelo Deporte: 70.211

2011-11-05T19:14:00.001+01:00

Coa chegada do Nadal, a asociación Castelo Deporte retoma a tradición da lotería do 22 de decembro co número 70.211, á venda en participacións de dous euros a partir deste martes

A dous meses do remate do ano, a asociación Castelo Deporte prepara xa as iniciativas relacionadas coa época do Nadal, neste caso con participacións de lotería co número 70.211, á venda a partir do martes 8 de novembro en Casa Rodríguez (Castelo), Centro Social de Castelo e Pensión Angelita (Tabeaio). Nos próximos días anunciaranse outros puntos nos que adquirir as participaciones, de 2 euros e 1 euro de donativo para a entidade cullerdense.

Ademais, a asociación ten previsto distribuir participacións entre colaboradores e patrocinadores dos eventos, coa que agradecer un impagable traballo realizado ao longo de 2011, o ano de maior éxito na historia de Castelo Deporte.
Tamén a través de internet, a partir do mesmo día, será posible reservar as participacións de lotería na propia páxina web da entidade. A imaxe de Sergio Sande, novo membro do equipo de voluntarios da asociación e participante en todos os eventos organizados en Castelo desde hai anos, está presente a través dunha curiosa fotografía nos billetes de lotería.

Castelo Deporte prepara unha edición especial da súa revista trimestral para primeiros de decembro

2011-11-05T18:51:00.002+01:00

A publicación incluirá toda a información sobre as intencións da asociación para 2012, unha entrevista co presidente da entidade, o equipo de voluntarios para o novo ano ao completo, e a descrición pormenorizada de todas as actividades a realizar a partir do mes de febreiro. Baixo o titular 'Trenzando o futuro', a Revista Castelo Deporte publicarase por primeira vez a toda cor e terá unha maior presenza de contidos gráficos.
Por outra banda, Castelo Deporte pretende ofrecer a revista de balde en diferentes puntos. Ademais do Centro Social de Castelo e do bar Casa Rodríguez, a publicación poderá recollerse na Casa da Mocidade de Culleredo (O Burgo).
Esta iniciativa súmase á decisión da asociación de exteriorizar o seu traballo e favorecer a posibilidade de chegar a un público máis numeroso a través de establecementos colaboradores ao longo de toda a área de influencia de Culleredo.

Castelo Deporte presenta ao Concello de Culleredo o seu plan de actividades de cara ao ano 2012

2011-10-28T21:16:00.000+02:00

Nunha xuntanza que mantiveron este venres representantes da entidade con membros do goberno local, acordouse manter a colaboración mutua no próximo ano.

A asociación Castelo Deporte inicia a súa rolda de contactos de cara á programación de actividades en 2012. A primeira xuntanza tivo lugar este venres no concello de Culleredo, e foron Álvaro Pérez Becerra, presidente da asociación, Alba Taboada, vicepresidenta segunda, e Carlos Martínez, secretario, os representantes de Castelo Deporte que quixeron facerlle chegar ao alcalde Julio Sacristán e varios concelleiros, os responsables das áreas coas que habitualmente traballa a entidade.

O presidente da asociación quixo agradecer aos membros do Concello a colaboración en todas as actividades destes últimos meses, e agás por pequenos detalles, amosouse moi satisfeito coa relación que actualmente manteñen as dúas partes.

Pola súa banda, o alcalde de Culleredo amosouse aberto a continuar coa colaboración aberta hai xa varios anos con Castelo Deporte, se ben apuntou que a situación actual fai necesario un esforzo especial por parte de todos, algo no que coincidiron os membros da asociación.

Actividades 2012

Álvaro Pérez Becerra presentou aos membros da corporación municipal a programación de actividades de cara ao próximo ano. Trátase dun completo dossier que mestura eventos relacionados coas áreas de deportes, cultura e xuventude, e no que Castelo Deporte fixo un esforzo para facer transversais a maior parte delas e así optimizar os recursos de todas as áreas do concello.

As dúas partes acordaron manter novos encontros nas próximas semanas para avanzar e concretar a colaboración en cada unha das actividades que ten previstas a asociación cullerdense.

A presentación das actividades de 2012, en rolda de prensa

No mes de decembro, Castelo Deporte ten previsto ofrecer unha rolda de prensa na que presentará o seu balance do traballo realizado ao longo do presente ano e fará público o programa de actividades para 2012. O acto será o punto de partida de cara a un exercicio co que a asociación quere marcar o inicio da súa proxección nun ámbito de actuación maior.

O Centro de Información á Muller de Culleredo organiza en Celas o I Encontro de Mulleres do Rural

2011-10-20T13:00:00.000+02:00

O programa do acto consta dunha breve conferencia, unha conversa entre tres mulleres do rural, e un pequeno recital poético amenizado por músicos do Conservatorio de Culleredo

A Casa Reitoral de Celas de Peiro acollerá este venres a partir das 19.30 horas o I Encontro de Mulleres do Rural, organizado polo CIM de Culleredo e a concellería de Igualdade. Trátase da primeira edición dun acto que pretende homenaxear a importante achega de todas as mulleres que viven e traballan no rural, algo sobre o que falará Carlos Pereira, historiador cullerdense, na primeira parte do acto que presentará a concelleira Rocío Sampedro.

A segunda parte do programa recolle unha conversa entre Ana Belén Magariños, Elena Feal e Manuela Arcas, veciñas do rural cullerdense, e que será moderada pola directora do Centro de Información á Muller.

Ao remate do acto, a poetisa Maribel Ortiz realizará un breve recital, acompañada por alumnas do Conservatorio Profesional de Música de Culleredo.

Clara Pérez, responsable de cultura de Castelo Deporte, apuntou onte a importancia deste tipo de actos para dignificar un traballo moi pouco valorado e enormemente importante na configuración da sociedade actual como é o das mulleres do rural. Por iso, quixo agradecer á concellería de Igualdade a convocatoria do encontro.

Castelo Deporte 'uniformarase' en 2012

2011-10-19T18:00:00.000+02:00

A asociación pretende reducir o gasto corrente nas camisetas corporativas para cada un dos eventos coa elaboración dun uniforme válido para todas as actividades que organiza

Dezasete son as camisetas que os membros de Castelo Deporte gardan nos seus armarios logo de varios anos de traballo continuado na asociación. A complexa situación económica da entidade e a necesidade de aplicar un plan de recorte do gasto corrente, levou aos membros da Xunta Directiva a decidir o deseño dun uniforme que o equipo de organización dos diferentes eventos portarán en cada unha das actividades programadas en 2012.

A asociación pretende con esta medida ofrecer unha imaxe coherente e sólida, integrando a mesma imaxe para todos os seus eventos e diferenciando dun xeito claro e sinxelo aos voluntarios da organización. Sobre as cores branco e azul, os responsables de comunicación de Castelo Deporte preparan xa un catálogo de prendas cos formado por varias pezas que partirán dunha camiseta e unha chaqueta de chandal, que recibirán de inicio todos os membros da entidade.

Venda de camisetas nas actividades de 2012

Outra das novidades relacionadas coa roupa promocional será a venda de camisetas nos diferentes eventos, unha reclamación dos participantes que Castelo Deporte fará realidade a partir de 2012. Tratarase de achegar un recorto a baixo prezo a todos aqueles que se animen a participar nos eventos da asociación.

A Xunta Directiva de Castelo Deporte proporá a María Pérez Muñoz como nova membro do órgano

2011-10-18T23:53:00.000+02:00

Castelo Deporte celebrará eleccións á Xunta Directiva a finais do mes de decembro. A candidatura do actual equipo de goberno da asociación proporá á coruñesa María Pérez Muñoz como nova tesoureira da entidade polo seu constante compromiso cos obxectivos da entidade e o seu incansable traballo nos últimos anos.
Pérez Muñoz terá como principal reto aplicar un orzamento austero co que Castelo Deporte pretende reducir a súa débeda no exercicio 2012 sen recortar a inversión en actividades e eventos. Dende mediados de novembro abrirase o prazo para presentar candidaturas aos comicios nos que a actual directiva pretende presentarse para continuar a labor dos últimos anos convertindo á entidade na máis activa de Culleredo.

A incorporación de dez novos membros amplía o equipo de Castelo Deporte ata os trinta integrantes

2011-10-11T18:06:00.001+02:00

A asociación reforza a presenza xuvenil no equipo de organización, que acada a maior participación da historia da entidade. Ningún dos membros ten máis de 22 anos.

Castelo Deporte amplía a súa plantilla de colaboradores de cara ao novo ano de actividades. A entidades máis activa de Culleredo pretende continuar e facer máis grande a súa axenda de eventos con novos membros dun equipo composto ata agora por en torno a vinte mozos e mozas do entorno da parroquia de Castelo. A previsión dun ano cargado de traballo levou á directiva da asociación a buscar novas colaboracións.

Incorpóranse á entidade dez caras novas que veñen participando das actividades de Castelo Deporte durante os últimos anos. Son os cullerdenses Rubén Domínguez, Brais Regueiro, Sergio Sande, Sara Claudia Padín e Paula Prego, o carralés Borja Gestal, os cambreses Borja López e Jacobo Torres, o arteixán Darío Gerpe e o coruñés José Vázquez. Este venres, a asociación celebrará unha primeira reunión na que se falará do plan de actividades para 2012, que a directiva pretende deixar pechado a mediados do mes de novembro.

Caras coñecidas no deporte comarcal

A chegada de novos membros ao equipo de Castelo Deporte trae caras coñecidas á plantilla da asociación. Segundo Alba Taboada, vicepresidenta da entidade, "son xente coñecida a nivel comarcal no mundo do deporte, ou incluso estudantes de disciplinas deportivas ou INEF, que de seguro aportarán cousas novas á asociación". Jacobo Torres e Brais Regueiro son dúas referencias do fútbol sala a nivel autonómico e Sergio Sande é un dos dianteiros máis destacados da súa categoría nun equipo coruñés.

Ademais, Castelo Deporte pediu tamén a través da súa vicepresidenta o apoio de todos aqueles mozos e mozas que se sintan identificados cos obxectivos de promoción do deporte e a cultura sobre os que traballa a asociación. Por iso, a través das canles habituais de contacto, Tuenti, Facebook e o correo electrónico contacto@castelodeporte.org, recibirase calquera colaboración ou idea interesante para contribuir á mellor constante do proxecto asociativo da entidade cullerdense.

O Burgo acolle o domingo 2 de outubro a I Ruta Aquama coa colaboración de Castelo Deporte

2011-09-22T17:37:00.000+02:00

O deporte sairá o domingo das instalacións de Acea da Ama para achegarse ata o Burgo na I Ruta Aquama, organizada polo propio complexo multideportivo cullerdense. Trátase da primeira edición dunha carreira pedrestre popular de 8.000 metros de lonxitude e na que poderán participar todos aqueles que o desexen.

Haberá categorías especiais para os máis novos, e na absoluta as inscricións serán de 5 euros, a rexistrar ata o xoves 29 de setembro a través da web de Aquama.

O equipo da asociación Castelo Deporte colaborará de xeito activo na organización da proba con diferentes voluntarios ao longo do percorrido, ofrecendo soporte ás tarefas loxísticas habituais deste tipo de probas deportivas.

INFORMACIÓN | Web de Aquama