CHALAM

భగవాన్ స్మృతుల్లో చలం

2009-05-27T20:02:00.000+05:30

యీ జగత్తుకీ జీవితానికీ ఓ అర్థం వుంటే, వీటి వెనక ఓ సత్యం వుంటే, పరస్పర విరుద్దమైన యీ విలువలకీ ఓ సమన్వయముంటే, దాన్ని తెలుసుకునే మార్గం లేదనీ, మానవుడి మనసుకి అంతశక్తి లేదు గనక,ఎంత తరిచి చూసినా, అది ఓ గుడ్డి వలయంలో తిరగడం తప్ప, ఇంకేమీ సాధింపలేదనీ నిశ్చయించుకున్నాను. కాని ఎప్పుడూ అన్వేషించడం మాత్రం మానుకోలేదు. . . . . .
*
పాత భక్తులూ, ఘరానా వాళ్ళూ భగవాన్ కి దగ్గిరగా కూచునేవారు. నేను చిట్ట చివర కూచుని ఆయన కళ్లలోకే చూస్తో వుండేవాడిని. ఒకసారి భగవాన్ తన దగ్గిర వున్నవాళ్ళని అడిగారు, అందరూ లేచిపోయినా కదలక కూచున్న నన్ను చూపి,

'ఎందుకు అన్ని గంటలూ అట్లా కూచుంటాడు ' అని.
వాళ్ళేదో అన్నారు. అది నా కర్థం కాలేదు. నాకేం కావాలి? ఆధ్యాత్మికోన్నతి. ఆ సంగతి భగవాన్ కి తెలీదా ? . . . .
*
వొయ్యి చచ్చిపోయిన తొందరలోనే అరుణాచలం వెళ్ళలని నిశ్చయించుకున్నాం. . . . భయం పుట్టించే వొంటరితనంలోనూ భగవాన్ మమ్మల్నిఆదుకుని, అర్థంగాని ధైర్యమిచ్చి రక్షించారు. భగవాన్ వెళ్ళేముందు తాను ఇక్కడే వుంటానన్నాడు.నా ఆరోగ్యమూ సన్నగిల్లుతోంది. చివరి దశను సమీపిస్తున్నాను.

[read complete story]

చలం, చలం గురించీ ఇతర సైట్లల్లో, బ్లాగుల్లో | Updated | చలం గారి జాతక విశ్లేషణ

2009-05-18T17:05:00.000+05:30

చలం గారి గురించి ఇతరుల అభిప్రాయాలూ, ఆయన, ఆయనపై వచ్చిన పుస్తకాల పై సమీక్షలు, ఆయన భావోద్రేకాలూ, అభిప్రాయాలూ, అంతరంగాలూ, ఇంటర్వ్యూలూ , అయన గొంతు వినాలనుకునేవాళ్ళకీ వగైరా వగైరా references కి ఇతరుల బ్లాగుల్లో, సైట్లల్లో ఈ కింద పట్టీలో చూడగలరు. యింకేమైనా మీకు లింక్స్ కనిపిస్తే పంపించగలరు.

“చలం సాహిత్యంలో స్త్రీ” పుస్తకం పి.హెచ్.డి. పరిశోధన కోసం డా. వెన్నవరం ఈదారెడ్డి గారు రచించినది. ఇతను చలం సాహిత్యంతో పాటు కొడవటిగంటి కుటుంబ రావు, రంగనాయకమ్మ, అల్లం రాజయ్య వంటి వారి సాహిత్యం కూడా చదివారు. చలం గారు మొదట బ్రహ్మ సమాజికుడుగా ఉండేవారు. బ్రహ్మ సమాజం వారికున్న సైద్ధాంతిక పరిమితులు అధిగమించి బ్రహ్మ సమాజం వారి కంటే గొప్ప స్త్రీవాదిగా ఎదిగారు చలం గారు. చలం గారి స్త్రీవాదం యొక్క ఎదుగుదల, అందులోని పాజిటివ్ కోణాలపై ఈ పుస్తకంలో రివ్యూలు వ్రాసారు ఈదారెడ్డి గారు.

చలం సాహిత్య నేపథ్యం: బ్రిటిష్ వారి కాలంలో ఇండియాలో మూఢ నమ్మకాలు చాలా ఎక్కువ ఉండేవి. ఈ మూఢ నమ్మకాల వల్ల ఎక్కువగా బాధ పడింది స్త్రీలు, దళితులు. మూఢ నమ్మకాలతో బాగా కుళ్ళిపోయిన సమాజాన్ని సంస్కరించడానికి బ్రహ్మ సమాజం అనే సంస్కరణవాద సంస్థ ఆవిర్భవించింది. బ్రహ్మ సమాజం వారి డిమాండ్ ప్రకారం బ్రిటిష్ వారు 1956 విధవ పునర్వివాహాలని అనుమతిస్తూ ...

[...read more...]

చలం గారి జాతక విశ్లేషణ

చలం గారు 19-5-1894 వైశాఖ పూర్ణిమ రోజున జన్మించారు. జనన సమయం దొరకలేదు. కాని జనన కాల సవరణ చేయబడినది. అది ఎలా చేశాను అనేది తరువాత వ్రాస్తాను. ఆయన పుట్టిన సమయానికి గ్రహ స్థితి ఈ విధంగా ఉంది.

రవి, బుధ , గురువులు వృషభం.
శని , కేతువులు కన్యా
చంద్రుడు వృశ్చికం
కుజుడు కుంభం
రాహు, శుక్రులు మీనం

లగ్నం నా అంచనా ప్రకారం, తుల కావచ్చు. శని వారం. నక్షత్రం అనూరాధ-1 పాదం. లాహిరి అయనాంశ వాడాను.

ఫలిత విశ్లేషణ:

పూర్ణిమ రోజు గాని దాని దగ్గరలో గాని పుట్టిన వారికి దాంపత్య జీవితం బాగుండదు అనటానికి అనేక ఉదాహరణలు ఇవ్వవచ్చు. వారి వైవాహిక జీవితంలో ఏదో విధమైన లోపము, దిగులు, కష్టాలు లేదా వెలితి తప్పక ఉంటుంది. దానికి కారణం ఏమనగా, జీవితానికి వెలుగు ఇవ్వ వలసిన సూర్య చంద్రులు ఒకరి కొకరు సమ సప్తకంలో ఉండటమే. అనేక జాతకాలలో

[...read more...]

“చలం - స్త్రీవాదం” పుస్తకం చలం గారి స్త్రీవాదం పై పలువురు స్త్రీవాద రచయితలు, రచయిత్రుల అభిప్రాయాలు గల వ్యాసాల సంకలనం. ఇందులో ఏటుకూరి బలరామ మూర్తి, డా. చందు సుబ్బారావు, డా.ఎన్. రామచంద్ర, డా. సంజీవమ్మ, డా. రావి భారతి, డా. ఆలూరు విజయ లక్ష్మి, డా. అల్లూరు రాజ కుమారి, డా. ఎస్.వి. సత్యనారాయణ, పరకాల పట్టాభి రామారావుల వ్యాసాలు ఉన్నాయి. ఈ రచయితలు, రచయిత్రులు (పరకాల పట్టాభి రామారావు తప్ప అందరు) చలం గారు గొప్ప స్త్రీవాదే అని అంగీకరించారు కానీ ఏటుకూరి బలరామ మూర్తి గారు, చందు సుబ్బారావు గారు కొన్ని విషయాలలో చలం గారిని తీవ్రంగా విమర్శించడం జరిగింది. వారు చలం గారిని విమర్శించినప్పటికీ చలం గారి సాహిత్యంలోని పాజిటివ్ అంశాలని అంగీకరించారు.

ఏటుకూరి బలరామమూర్తి గారి దృష్టిలో చలం గారు గొప్ప స్వేచ్ఛావాదే కానీ స్వేచ్ఛకి కొన్ని పరిమితులు ఉండాలని బలరామమూర్తి గారి వాదన. పశ్చిమ దేశాలలో కొంత మంది స్వేచ్ఛ పేరుతో బరితెగింపు తిరుగుళ్ళు తిరగడం జరుగుతోంది. ఇండియాలో కూడా కొంత మంది ఆ చెడు తిరుగుళ్ళ సంస్కృతిని ఆదర్శంగా తీసుకుంటున్నారు. స్వేచ్ఛకీ, విచ్చలవిడి తనానికీ ఉన్న తేడాని చలం గారు స్పష్టంగా వివరించలేకపోయారని బలరామమూర్తి గారి అభిప్రాయం. చలం గారి సాహిత్యాన్ని ఫిల్టర్ చెయ్యాలని చందు సుబ్బారావు గారు కూడా...

[...read more...]

మా తాతయ్య చలం - ఓ మనవరాలి అంతరంగం

దేశం పట్టనంత పేరున్న రచయిత గురించి లోకానికి తెలియని విషయాలను వారితో చెట్టపట్టాల్ పట్టుకొని తిరిగిన వారు చెబితే, నిజంగానే ఆసక్తికరంగా ఉంటుంది. తండ్రో, తాతో రచయిత అయితే ఆయన పుస్తకాలను ప్రచురించడం తన కర్తవ్యంగా భావించి ఆ పనిచేస్తే వారిపట్ల కర్తవ్యాన్ని నెరవేర్చిన వారవుతారు. విశ్వనాథ పట్ల విశ్వనాథ పావనిశస్త్రి, నాయని సుబ్బారావు పట్ల నాయని కృష్ణకుమారి, దేవులపల్లి పట్ల ఆయన సంతానం. ఇలా ఎందరో ఈ విద్యుక్త ధర్మాన్ని నేరవేర్చినవారే. అయితే చలం మీద చలం గురించి ఏ సభ జరిగినా అక్కడ ప్రత్యక్షమయ్యే సీనియర్ రచయిత్రి తురగా జానకిరాణి చలం గురించి, ఆయన రచనల గురించి ఏవేవో విషయాలు ముచ్చటిస్తుంటే చలం అభిమానులు ఆసక్తి ప్రదర్శించిన మాట వాస్తవం. అయితే ఆమె అభిమానుల్ని ఉత్సాహపరిచే ముచ్చట్లతో పాటు, కొంత నిరుత్సాహానికి గురిచేసే విషయాలు చెబుతున్నారు. 'మా తాతయ్య చలం' పేరుతో ఆమె పంచుకొంటోన్న సంగతులు కొన్ని విందాం.

1. చలం నన్ను ఒక రచయిత్రి గా చూడలేదు. నాకు చాలా భయం. ఆయనకి నేను వ్రాసినవి చూపాలంటే.

2. మనుషులతో గెట్ ఆన్ కావడం మంచిదే. కాని వాళ్లతో గెట్ ఆన్ కావడం కోసం, మన స్వతంత్ర్యాన్ని, మన కన్విక్షన్స్ ని వొదులుకోవడం, కాంప్రమైజ్ కావడం సూసైడల్. వాళ్ల మీది ప్రేమ వల్ల వొదులుకో. (నిజమైన ప్రేమకన్న గొప్పది లేదు) వాళ్లకి జడిసి కాదు. వాళ్లిచ్చే స్నేహానికీ, షాలో అఫెక్షన్ కీ, వాళ్ల వర్త్ నే కాదు. వొంటరిగా నుంచోడానికి జడిసి కాదు. వాళ్లని ప్రేమించు. లొంగిపోకు.

3. నువ్వు శృంగార రచనలు చేశావు. స్త్రీ, పురుష సంబంధాలను గురించి విప్లవాత్మకంగా , ఎంతో పచ్చిగా..

[...read more...]

చలం వ్యక్తికాదు. ఒక సాహితీ విప్లవం. ఒక సామాజిక ఉద్యమం.నిర్ధిష్టమైన prescribed విలువల్లో కుంచించుకుపోయిన మానవతలోని ఒక పార్శ్వాన్ని తన రచనలతో ఉద్దీపనం చేసిన ఋషి. మనుషులూ,మనసులూ,విలువలూ,నమ్మకాలూ,ఆకర్షణలూ,ఆవేశాలూ అన్నీ మారతాయని చెప్పిన చలం, తన విధానాన్ని మార్చుకుంటే నిరసించాల్సిన అవసరం లేదు. ఇలాంటి వ్యక్తులు వ్యక్తిగత,వైవాహిక,సాంఘిక జీవితంలో పెద్ద విఫలురిగా కనిపిస్తారు. అది మన సాధారణ కోణంలోంచీ చూస్తే అలాగే అనిపిస్తుందికూడా. కానీ Their contribution will be measured by a collective consciousness of a society.

చలం సాహిత్యం over rated అనుకునేవాళ్ళకు ప్రపంచసాహిత్యంతో పరిచయం లేదనుకోవాలి. James joeys తన stream of consciousness శైలిలో కుస్తీలు పడుతున్న సమయానికి చలం "మ్యూజింగ్స్" రాసేశాడు. ప్రపంచ సాహిత్యం Absurd,abstract, magic realism అనే మాటలు వంటబట్టించుకున్న సమయంలో చలం "మైదానం" సృష్టించాడు.

చలం ఇంగ్లీషులో రాయలేదుగాబట్టి ఈ ఖర్మగానీ, లేకపోతే ...

[...read more...]

ఈ మధ్య నేను రాసిన ‘చలం గురించి నేను’ అనే టపా చదివి మిత్రుడొకరు ‘చలాన్ని అనుభవిస్తాను. చర్చించను. అనే వాడివి, హఠాత్తుగా ఈ మూర్ఖత్వం ఎందుకు చేసావ్?’ అని ప్రశ్నించాడు. నిజానికి నేను నా బ్లాగులో రాసింది ప్రత్యేకమైన టపా కాదు. ఒక బ్లాగులో చలం గురించి జరిగిన చర్చల్లో నేను చేసిన వ్యాఖ్యల్ని, ఒకటిగా కూర్చిపెట్టుకునే ప్రయత్నం మాత్రమే. కానీ ఆ మిత్రుడు, ఆ తరువాత అన్న మాటలు నన్ను మరింత ప్రభావితం చేసాయి. ‘కనీసం ఒంటరిగానైనా, కనీసం చీకటి గదిలోనైనా, తమ నగ్న దేహాన్నీ, మనసునీ ఆసాంతం పరికించి,పరీక్షించి, ప్రశ్నించికోని ఈ జనాలకి చలాన్ని చెప్పాలనుకోవడం మూర్ఖత్వం.చెప్పినా అర్థం చేసుకుంటారనుకోవడం దురాశ. అర్థం చేసుకున్నా, ముసుగుల్లో బ్రతికెయ్యడానికి అలవాటుపడ్డవారు అంగీకరిస్తారనుకోవడం వెర్రితనం.’ ఈ మాటలు విన్న తరువాత నా మూర్ఖత్వాన్ని మరింత ముందుకు తీసుకెళ్ళాలనే కోరిక కలిగింది.
నేను అనుభవించిన చలంని, తార్కికంగా అక్షరాల్లోకి కుదించాలనుకోవడం నా సామర్ధ్యాన్ని మించిన పని. ఇలాంటప్పుడే భాషలోని మితి,పరిమితులు తేటతెల్లమవుతాయనుకుంటాను. అనుభవాల్ని అక్షరీకరించడం, ఆలోచనల్ని తెలియజెప్పడమంత తేలిక కాదు. మనసునీ మెదడునీ ఏకకాలంలో ఆక్రమించి, హత్తుకుని, కుదిపివేసి, జీవితానికి కొత్త అర్థాల్ని అందించే అనుభవాల్ని పదాల్లో చెప్పాలంటే...

[...read more...]

To be continued...

రమణస్థాన్ నుంచి | 10-5-1950 | అరుణాచలం |

2009-05-18T09:54:00.000+05:30

10-5-1950 అరుణాచలం

మీ కార్డు. మీ జవాబుకి ముందు ఉత్తరంలో నేనేం రాశానో జ్ఞాపకం లేదు. నా రూపమా?

వారానికోసారి స్నానం. 15 రోజులికి క్షవరం. చిరిగిన బనియను. మరకల చీర ముక్కలుంగీ. షర్టులు అసలు లేవు. ఏమీ చదవను. ఈ కార్డులే రాత. అట్లా ఎండలోకి చూస్తో కూచుంటాను. రాత్రులు చాలాహాయి ఐనగాలి, గాఢమైన నిద్ర , వారానికి రెండు సార్లు కూరలకి, బియ్యానికీ, ఊళ్ళోకి ప్రయాణం. రెండేళ్ళిట్లా వుంటే మాటలూ, అక్షరాలూ, మర్చిపోవచ్చు.

నిన్ననే ఒక తెలుగు admirer ఆ వేపుల్నించి వొచ్చి, న్యూస్ పేపర్లోని రెండు మూడు కబుర్లు చెప్పాడు. ఎన్ని గొడవలూ, ఆలోచనలూ, స్థలం మార్పుతో పోయినాయి. అందుకనే పూర్వం అడవుల్లోకి పోయేవారు గావును, లోకంలో జరిగే మార్పులు చదివేదీ, అవన్నీ మన స్వంత వ్యవహారాలే అనుకుని గొప్పపడేదీ! కాకపోతే వూళ్ళోనో, ఇరుగు పొరుగునో జరిగేవి. వాటిని చర్చించేదీ. నిందించేదీ, తమ ఆధిక్యతను స్థిరపరచుకుని!

ఉన్నాయి కాని చాలా తేలిక పడ్డది బతుకు, ఏ ఆపదలూ రాకుండా, భగవాన్ దయ! పొద్దున్నా, సాయంత్రం, భగవాన్ సమాధి దగ్గర మగవాళ్ళల్లో నేనొక్కణ్ణి regular గా కూచునేవాణ్ణి! నేనుగాక నలుగురు హిందూ ముసలమ్మలూ, యిద్దరు ఇంద్లీషు యువకులూ, నర్తకీ, మా కుక్క సీతాయాబూ! ఏదో పూర్వపు కథల్లో బుద్దుడి సమాధి దగ్గర ధ్యానించే శిస్యులు జ్ఞాపకం వస్తారు.

అవును కొద్దిరోజుల్లో వెళ్ళాలని చూస్తున్నారు. ఆ కొత్త స్వామిగారిని చూడాలని. ముఖ్యం. మా చిత్ర కూతురు డాలీని చూడాలని కూడాను. అందమైన బంగళా దొరికింది, electricity etc.. అన్నీ comforts తో, కాని అద్దె యిచ్చుకుంటూ దాంటో కూడ వుండటంలేదు.

రమణస్థాన్ నుంచి | 8-5-1950 | చలం ఉత్తరాలు

2009-04-23T00:26:00.000+05:30

8-5-1950. అరుణాచలం

ఇదేమిటి, మీ కార్డుకి అప్పుడే జవాబు రాశానే! ఇదన్నా అందుతుందా? భగవాన్ చచ్చిపోయి ఇంకా దగ్గిరైనారు. నిరంతరం ఆ ప్రయత్నంలోనే ఉన్నాను. ఆరోగ్యమే తిప్పలు పెడుతూ వుంటుంది.

అవును ఇదంతా ఎడారి ఐపోయింది. ఈ ఆత్మ విద్య ప్రయత్నంలోనే పశుమలై వెళ్ళాలనుకుంటున్నాను. ఉత్తరాలు ఇక్కడికే రాయండి. ఏదో కోర్టు బెజవాడనుంచి నూజివీడు వస్తోందట. నా మిత్రులు ప్లీడర్లు నూజివీడికి మారుతున్నారు. మీరూ వున్నారు. ఈ కాలంలో నేను నూజివీడిలో ఉంటే ఎంత బావుండేది అనుకుంటాను. శలవులిచ్చారుగా. మీ పిల్లలూ వాళ్లూ వొచ్చివుంటారు. మీకు మనశ్శాంతిగా వుంటుంది.

ఈ ఆత్మాన్వేషణ అంత కష్టమైనదీ, విలువైనదీ, చిత్రమైనదీ, interestingగా వుంటేదీ ఇంకేం లేదనిపిస్తుంది. దొరక్కపోయినా ఈ వేట చాలా సరదాగా, బాధగా వుంది. ఈ ప్రయత్నమంటే అర్థం - చేతులారా శరీరాన్ని కాక మనసుని హత్య అన్నమాట.

ఈ ప్రదేశమంతా యోగులమయం. దొంగయోగులు లేరు. ఏమీలేని బోలుయోగులూ, ఏదో కొంతవరకు సాధించి స్థిమితపడ్డ మహనీయులూ కనపడేవారు చాలా కొంచెం. చాలామంది కనపడరు.

రమణస్థాన్ నుంచి | 4-5-1950 | చలం ఉత్తరాలు

2009-04-18T17:36:00.002+05:30

4-5-1950

అరుణాచలం

ఇపుడే మీ కార్డు, మీరు హడావుడిగా ఈ ఎండల్లో తిరుగుతున్నారన్నమాట! ఇవాళే 'షౌ ' వాళ్ళూ వొచ్చారు. మళ్ళీ వెళ్ళిపోతున్నారు. ఇంక వాళ్ళు ఈ వూళ్ళో వుండరేమో! ఇక్కడికి 50 మైళ్ళలో ఓ స్వాములవారు ఉన్నారు. ఆయన వీళ్ళందరినీ తన దగ్గరే వుండమన్నారు. అక్కడ చాలా హాయిగా అంది వాళ్ళకి. అందుకని అక్కడే ఉంటున్నారు. అడవిలో ఆయన వేసిన పాకల్లో - అంటే కొండల బయలులోనట. నన్నూ రమ్మన్నారు. భగవాన్ ను వొదిలి వెళ్ళలేక పోయాను అప్పుడు. నేను వొంటరిగా వుంటానని నాతో నర్తకి ఉండిపోయింది. నర్తకికీ వెళ్ళాలనే వుంది. ఇంకా భగవాన్ సమాధిని వదలేకుండా వున్నాను, అందరూ వెళ్ళిపోయినా. అది కాక మా సామానులన్నీ యిక్కడే ఉన్నాయి. ఆ స్వాములవారితో వుంటే పక్కలు కూడా ఉండవట. చాపలే. బెజవాడనుంచి తెచ్చుకున్న ఈ సామానులు ఎవరైనా కొంటారేమో చూసి, ఒక్క పెట్టెతో వెళ్ళాలి. చదవడానికి పుస్తకాలన్నా లేకుండా ఉండగలనా అని యోచిస్తున్నాను. ఇప్పుడు రోజుకో గంట చదవలేకుండా ఉండలేకపోతున్నాను. అంత అలవాటయింది చదువు జీవితమంతా!

నా ఆరోగ్యం ఇదివరకన్న నయం. కాని ఆ స్వాములవారితో వుంటే ఏ జబ్బూ ఉండదట. 'షౌ ' కి తలనొప్పులు లేవు. స్నానాలు, పరుపులు, శుభ్రమైన బట్టలు - అన్నీ వుత్త జ్ఙాపకాలై పోతున్నాయి. 15 రోజులకి గడ్డం గొరుక్కోవడం ! Haircut లేనేలేదు. ఇక్కడికి వచ్చాక. ఈ దేశంలో యోగులూ, మహిమలూ, ధ్యానాలూ తప్ప ఇంకేం ఆలోచనా లేదు. ఇంక ఒక్క 10 నెలల తరువాత ఇంక నేనుండనని జాతకంట! చాలా interesting గా వుంది జీవితం;

ఆ వూళ్ళూ సినిమాలూ , పత్రికలూ, హడావిడీ, మంచి భోజనాలూ, నాజూకులూ, శుభ్రాలూ
అన్నీ ఏదో ఇంకో జన్మ! ఎప్పటిదో కల!

భగవాన్ అస్తమయం || - 2

2009-04-16T21:03:00.001+05:30

contd from previous post

(భగవాన్ మృతికి)

ఇంకా మీ ప్రశ్నలు ఉన్నాయి. 'హరీన్ ' పాపం చాలా గోలపడ్డాడు. ఎంత హడలిపోయినాడో! చాలా sentimental man లాగా ఉన్నాడు. ఆ రాత్రి పాడాడుట పీనిగముందు చాలా గొప్పగా. నేను ఇంటికి వచ్చి నిద్రపోయినాను. పెద్ద నక్షత్రం పడ్డది తెలుసా? ఎంత బాధ పడితే నేం 'హరీన్ ' వెళ్ళిపోయినాడు. తన మామూలు జీవితంలోకి, ఆశ్రమం వొదిలి. హరీన్ మద్రాసునించి రేడియోలో భగవాన్ మీద హాయిగా మాట్లాడేడు మొన్నరాత్రి.

కాని నాకింకేం లేదు. భగవాన్ రాకపోతే -- ఇట్లా పడి వుండడమే - ఎదురుచూస్తో - సమాధిని తయారుచేస్తున్నారు. భగవాన్ పోగానే తగాదాలు ఆశ్రమంలో! బ్రాహ్మణ, అబ్రాహ్మణ, అరవ, ఆంధ్ర, పరదేశీయులు ఒక జట్టు ఐనారు. లేచిపోతున్నారు. త్వరలోనే భగవాన్ ని తెచ్చుకుని, మీకు సంతోషంగా ఉత్తరం రాయగలనని నమ్మకం. ప్రస్తుతం అంతే .

P.S.-- రౌడీలు, పోలీసు కాపలాలు - ఒక్క ఆత్మ మౌనమైన రూపుతో ఇన్నేళ్ళు పరిపాలించిన ఆశ్రమం. కృష్ణుడు పోగానే అర్జునుడు ఏడ్చిన ఏడుపు జ్ఙాపకం వొస్తోంది. ద్వారక ఏమయిందో - ఆనాడు - నిజంగానో, కవి హృదయంలోనో, అట్లావుంది లోకం నాకు!

భగవాన్ అస్తమయం ||

2009-04-16T07:23:00.000+05:30

20-04-1950
అరుణాచలం.

మీ కార్డు, భగవాన్ మరణం సీనులు చాలా అద్భుతం. ఆ సమయానికి world's second best photographer వున్నాడు. ఫోటోలు తీశాడు. అవి సరే. మా మనసుల్లో ఆ ఘోరమైన దృశ్యాలు మరపుకు రావు. ఇప్పుడు ఆశ్రమం పిశాచం మల్లే, వొక కలమల్లే వుంది. ఎక్కడివాళ్ళక్కడ లేచిపోయినారు. చాలా వొంటరితనం. మా వాళ్ళు 15 రోజులకిందటే వెళ్ళిపోయినారు. అదో చిత్రమైన వ్యవహారం 'చే ' బొంబాయిలో, 'షౌ ' మద్రాసులో, 'చిత్ర ' పశుమలైలో తక్కినవాళ్ళెక్కడ వున్నారో తెలీదు. ఎప్పుడు వస్తారో రారో తెలీదు. ఎవరైనా నన్ను గుర్తించి పలకరిస్తే చాలునన్నంత దీనావస్థలో!

ఎంత హాయిగా వుండేదో? భగవాన్ ని తలుచుకుంటే ఆయన పీనిగ మొహం గుర్తుకు వస్తోంది. కదలలేను. ఈ ఎడారిలో... వూరు రెండు మైళ్ళదూరం ఆశ్రమానికి బళ్ళు రావడం మానేశాయి. ఇవాళనే కొంచెం తెరిపి. నా హృదయంలో నే భగవాన్ ఉంటే ఇంకేం ! మీ అందరికీ శాంతి నివ్వగల దక్షత వుండేది కాదా? కాని భగవాన్ నన్ను వొదలరు. వొస్తారు మళ్ళీ. నాకు తెలుసు. నన్ను ఆయన వొదలడమే జరిగితే సూర్యుడి వెలుగు కూడా ఉత్త అబద్దమవుతుంది.ఎంత పరిగెత్తుకుపోవాలనిపించినా, అందుకనే ఇక్కడ వున్నాను. అదిగాక ఎక్కడికి పోను? పిల్లలెవరైనా వొస్తారేమో ? ఇక్కడ మళ్ళీ వుండాలని. సాధించాలి. లేక సాధనలోనే మరణించాలి.

రెండేళ్ల కిందట బెజవాడ, నూజివీడు, ఈవాళ!... తమాషా !

[To be contd...]

చెలం 1950 లో తిరువణ్ణామలై వెళ్ళిపోయారు రు. అక్కడే స్థిర నివాసం ఏర్పరచుకొన్నారు. రమణ మహర్షి ఆశ్రమానికి ఎదురుగా వున్న 'మహాస్థాన్ ' ఆవరణ ఇంట్లో అద్దెకి వున్నారు. ఆ తరవాత అక్కడ ఒక ఇంటిని కొన్నారు. దాని పేరే రమణస్థాన్. యీ పై ఉత్తరం భగవాన్ చనిపోయిన తరువాత కొన్నిరోజులకు తన మిత్రుడు చిన్నారావుకు రాసింది.

రమణస్థాన్ నుంచి చలం | 16-04-1950 అరుణాచలం

2009-04-15T20:39:00.000+05:30

16-04-1950
అరుణాచలం

భగవాన్ చచ్చిపోయినారని పేపర్లో చూచి వుంటారు. ఆ దేహానికి అంత్యక్రియలు హడావుడి జరుగుతున్నది ఆశ్రమమంతా! చాలా interesting కలుసుకుంటున్నాను. 'సౌరిస్ ' వాళ్ళూ 15 రోజుల్నించి ఇక్కడ లేరు. ఇక్కడో కొండలపక్క ఊరికి వెళ్ళారు. సౌరిస్ చాలా ఆనందంగా వుంటోంది.

మిత్రులు వొస్తున్నారు ఇక్కడికి, వాళ్ళతో కులాసాగా పొద్దుపోతోంది. హరీన్, భార్యా ఉన్నారు ఇక్కడ కొద్ది రోజుల్నించి, ఇవాళే వెళ్ళారు. భగవాన్ లేరు కళ్ళ ఎదుట. హృదయంలో ఉన్నారో లేదోనని భయపడ్డాను. కాని ఉన్నారు. ఇక్కడే నాతోనే ఉన్నారు. చాలా బావుంటోంది మళ్ళీ. మాటల్లో ఇదంతా భ్రమలాగో, ఆటలాగో అనిపిస్తుంది. కాని నాకు అన్నిటికన్న ఎంత వాస్తవం! ఎంత ఆకర్షణ. ఎంత ముఖ్యం!

చలం ఉత్తరాలు | ఇంకా గుంటూరే 8-7-1930

2009-04-09T21:33:00.001+05:30

ఇంకా గుంటూరే 8-7-1930

Dear నశ్యాఘ్రాతకా !

తమాషాసంగతి. మీ బ్రాహ్మసమాజపు గృహస్తులేడూ రా- , ఆయనా, నా కీకథ చెప్పిన ఆయినా ఒక రైలు పెట్టెలో ప్రయాణం చేస్తున్నారు. ఇద్దరూ నిద్రపోతున్నారు. ఇంతలో పక్క బల్లమీద పడుకున్న ఒకమ్మాయి కేకవేస్తో రా- ని తిడుతో లేచింది.

'ఏంచేశావురా, లం-కొడకా!'
రా- ఇంకా నిద్రపోతోనే వున్నాడు.
'చూడండి, దొంగవెధవ, నిద్రపోతున్నట్టు ఎట్లా పడుకున్నాడో...'
రా- లేచి తానేమి ఎరగనంటాడు.

కాని ఆమె మాత్రం అతను తన రొ-- పట్టుకున్నాడని గోలపెట్టింది.
వెం- తమ మోటారుతో సహా పుట్టినట్టు నటిస్తున్నాడు. ఆమె యాభై యేళ్ళ్వయసుతో పుట్టినట్లు కనపడుతోంది పాపం?

నా భవిష్యత్ కీర్తి మందిరానికి వొచ్చేవారం పునాది వెయ్యబోతున్నాను. అంటే ఒక పాఠశాల స్థాపిస్తున్నాను. ఒక తరగతి, ఒక ఉపాధ్యాయుని, ఒక విద్యార్థిని, ఆ సంస్థకు నేను ప్రిన్సిపాల్ - మాలతీబాయిగారు వైస్ ప్రినిస్పాల్. బోర్డర్లని కూడా తీసుకుంటాము. ఈ యేటికి 5-7 మధ్య వయసుపిల్లల్ని.

చలం స్వాతంత్ర్యసమరంలో ఎందుకు దూకలేదు ? పిరికివాడిగా ఎందుకు మిగిలిపోయాడు ?

2009-04-07T22:23:00.000+05:30

బెజవాడ 25-05-1930

నా మౌనాన్ని ఉపేక్ష చేసి మీరు వ్రాసిన ఉత్తరం అందింది. మీకు వ్రాయాలని అనుకోని రోజు లేదు. కాని వ్రాయడానికి ఏమీ లేదనిపించేది. ఒక్కటే వార్త, పూర్నమ్మ పరిచయం అయింది.

చాలా విశ్వాసంగా రోజూ సూర్యనమస్కారాలు చేస్తున్నాను. వినాయకుణ్ణి, అతని తండ్రినీ స్తుతిస్తున్నాను - తరువాత నిద్రపోతాను , లేక బద్దకంగా పడుకుంటాను - ఏమీ చెయ్యటం లేదు, రాత్రంతా నిద్రపోతాను. ఈ నిద్ర నాకు మంచి చేస్తోంది.

వ్రాయడమా? ఎందుకు ? ఏం ఉపయోగం ? ఎవరికి ? వ్రాయడానికి అర్హత వుందా నాకు ?

ఒక్కసారి తెంచేసుకుని జైళ్ళకు వెళ్ళేవాళ్ళతో కలవడం నా ధర్మంకాదా ? ఏ కొన్ని శతాబ్దాలకో, దేశాన్ని సంచలింపచేసే ఉద్రేకాన్ని చూస్తే నా కేమీ ప్రేమలేదు. కాని - ఎందుకూ కొరగాని వాళ్ళు క్షుద్రులు భీరులు ప్రవాహంలో దూకి ఎదురీదుతో ఆ గాలివేగానికి సంతోషిస్తోవుంటే, దగ్గిరకి వెళ్ళడానికి భయపడి, వొడ్డున చూస్తోనుంచున్నాను. దొంగలు, నీచులు, అబద్ధులు, రౌడీలు, వీళ్ళందరూ త్యాగంచేసి, ఆ వొక్కత్యాగంతో, నాకన్న ఆధిక్యతను పొందారు. వెయ్యి సాహసమైన ఆలోచనలకన్న ఒక్క సాహసకార్యం శక్తివంతమైది. ఇతరులకి 'ప్రీచ్ ' చెయ్యడానికి నాకేమి అర్హత వుంది? తొలగి - మరుగుపడి, చూస్తో, ఆశీర్వదించడం వుత్తమం.

కాని ... నవ్వుతో ఒక మిత్రుడితో ' జైలుకి వెళ్ళడం కన్న యీ ముగ్గురిపిల్లల్ని భరించడం కష్టమైనపని ' అన్నాను. నిజం కాదా ? ఇక్కడ ఒక వాలంటీరు వున్నాడు. అతనిపిల్లకి జబ్బుగా వుంది. 'నాకు వ్యవధిలేదు. ఈ పిల్లజబ్బు నా దేశసేవకి ఆటంకంగా వుంది' అని వెళ్ళిపోయినాడు. ఆ పిల్లని పూర్తిగా ఉపేక్షచేశారు బంధువులు. చాలా బాధపడ్డది. చివరికి చచ్చిపోయింది. ఇది హరిశ్చంద్రుడి త్యాగాల మూర్ఖం కాదా ? కొత్తవారి ఇంటో నాపిల్ల డబ్బు లేకపోవడంవల్ల, బాధల పాలవుతోందంటే భరించగలనా ?

నా పిల్లలకంటే నేను దేశాన్ని అధికంగా ప్రేమించటంలేదు. నేనొకవేళ చచ్చిపోతే, అప్పుడు పిల్లలు నిస్సహాయులు కారా అంటే! ఇప్పుడు మరి నేను బుద్ధి పూర్వకంగా వాళ్ళని కష్టాలకి వొదులుతున్నాను కదా ! మృత్యువు నా చేతుల్లో లేదు. వాళ్ళని అన్యాయం చేస్తున్నానని నేను నిందించుకోను అప్పుడు.

నా ఆలోచనలిట్లా వున్నాయి. ప్రతి విషయాన్ని ఇట్లా చీల్చి ఆలోచించే శక్తినిచ్చిన యీ చదువే లేకుండా వుండి, ఏ సంకోచమూ లేకండా ఇటూ అటూ చూడకుండా , తన పిల్లని చంపుకుని దేశసేవకి పోయిన ఆ వాలంటీరుమల్లే, గుడ్డిగా, సంకుచితంగా, నా ధర్మమని మంచికో చెడ్డకో, వెళ్ళిపోగలిగినట్టయితే, ఎంత బావుండేది అనుకుంటాను చాలాసార్లు. కాని నా పిల్లల్ని రక్షించుకుని, , దేశాన్ని నా దేశస్తుల్ని హత్య చెయ్యటంలేదా?

అయినా, నాకు సమరం మీదనే ప్రేమ - కాని నా దేశం cause, దేశస్తులమీద గాని ఏ ప్రేమా లేదు. వాళ్ళ స్ట్రగుల్ మీద నా ప్రేమ, వారి మీద కాదు. వాళ్ళతో చేరనందుకు సిగ్గుపడతాను నాకూ తెలుసు, మీకూ తెలుసు, ఏదో లెక్చర్లు ఇవ్వడమూ, జైలుకువెళ్ళడం, మహా గొప్ప heroic పనికాదని . కాని ప్రజలు చచ్చిపోతున్నారు. నాకు చావంటే భయం లేదనుకుంటాను . కాని చావాలని లేదు, జీవితమంటే ప్రేమ నాకు. దేవుళ్ళోకాని, బతుకు తరూవాతి బతుకులోకాని , దేశంలో గాని నాకు విశ్వాసం లేదు. సమరంలో చేరనందువల్ల పిరికి వాణ్ణేమో నుకోడం పిరికితనంకాదా? అక్కడికి వెళ్ళి దేశానికి నేను చెయ్యగల ఉపకారంకంటే, వెళ్ళకండా ఉండడం వల్ల నా వాళ్ళకి చేసే ఉపకారం చాలా యెక్కువ. M.R. అన్నట్టు యీ త్యాగం out of proportion.

ఇదంతా తన భీరుత్వాన్ని సమర్దించుకోడానికి నా మనసు అల్లుకున్న వేదాంతమేమో? ఇట్లా ఆలోచించుకుంటో నిర్వీర్యుణ్ణిగా వుంటున్నాను. నా యోచన మీకు అర్థమయిందనుకుంటాను. నన్ను ప్రోత్సహించే ఆలోచన ప్రేమ కాదు. పిరికినని నన్ను నేనే నిందించుకోడంవల్ల కలిగే బాధ. కాని యీ ఉద్యమం మొదటిరోజుల్లో శిబిరాల్లోని మహోత్సాహాన్ని చూసినపుడు, గొప్ప అనుభవాన్ని మిస్ అవుతున్నాననిపించింది. ప్రతికక్షుల అన్యాయాన్ని, అబద్దాన్ని చదివినప్పుడు నా రక్తం వుడుకుతుంది... కాని వారివల్ల బాధితులైనవాళ్ళ మీద జాలి అన్నా కలగదు నాకు. గాంధీ గారు కాక ఇంకెవరు మాట్లాడినా నాలో ఏ సంచలనమూ కలగదు.

డాక్టరు ఉద్యమంలో పనిచేస్తున్నారు. జైలుకి చాలా దగ్గిరగా వున్నారనిపించింది ఆమె. కాని నా నిరుత్సాహం ఆమె మనసు మీద పనిచేసినట్టుంది. మాలతీబాయుగారు చాలా ఉత్సాహం చూపుతున్నారు మాటలతో. షౌ, వసంత్, అందరూ orthodox. డాక్టరు రోజూ రెండుగంటలు వొడుకుతారు. మీరు వొచ్చి మమ్మన్ని చూడకూడదూ? మీ పద్యాలతో, మీ ఆత్మనించి మాధుర్యంతో నిండిన మీ కవిత్వంతో వొచ్చి , మాలో నవజీవనం కల్పించరాదూ? మిమ్మన్ని రమ్మనడం స్వార్థం. డబ్బు దొరికితే, వొచ్చేవారం అక్కడికి రావడానికి ప్రయత్నిస్తాను. కాని ఎక్కడా వుండలేను. home sick అవుతాను. కొత్త ఇళ్ళలో వూళ్ళలో నాకు చాలా ఇబ్బందిగా వుంటుంది.

దీక్షితులుగారికి చెలం రాసిన ఉత్తరంలోంచి

చలం ఉత్తరాలు | గుంటూరు 9-4-1930

2009-04-02T20:45:00.000+05:30

గుంటూరు 9-4-30 రాత్రి 9 గంటలు

Dear apple of my eye, or orange of my ear or పంపరపనస of my nose,

బైట అందమైనవెన్నెల మీ పెద్దమంచం మీరు వేసుకునే చోటనే నేను కూచుని వ్రాస్తున్నాను. మనం విటమినులు తిన్నచోట మీరూ, నేనూ, సన్నీ, ముగ్గురం. విటమిను బాంబులూ, ఫిరంగులూ - Happy days.

సభాపతి బైట పేక ఆడుతున్నారు - ఏకతారగాళ్లతో , అతని నవ్వులో ఏదో పేచీ వుంది. Your editor of pra- is terribly parasiting on Ramaseshu, the god and weak. The later's women complaing to my Zenana.

నా పాలమనిషివొచ్చి నాకోఅమ్మాయినిస్తానంది. మధ్యాన్నం ఇంకో అమ్మవొచ్చింది. ముసలమ్మవెనక ఒక పడుచు ఆమెతో. She too offers her services. ఆ మంత్రసాని ఇంకా నాకు ఇంటిపనిచేస్తుంది. చరకాతో ఆమెని సంస్కరింపలేక పోయినాము. ఉప్పుసత్యాగ్రహానికి పంపి చూద్దామా?

చావుపుటకల సమస్య గురించి | చెలం

2009-04-01T07:57:00.000+05:30

The following article in pdf can be downloaded from here

'శశిరేఖ ' గురించి రాస్తూ శ్రీ శివశింకరశాస్త్రి తన పీఠికలో-'ప్రేమ శాశ్వతమా చంచలమా అని కొందరు ప్రశ్నిస్తారు. గాడానురాగం శాశ్వతము కాదని యెవరనగలరు? అయితే జీవితంలో ప్రేమ ఒకసారి కలుగుతుందా, అనేక పర్యాయములు ఉదయిస్తుందా? ఈ విషయంలో భేదాలున్నవి. ప్రేమామృత ఝరి హృదయంలో నిరంతరమూ ప్రవహించేవారు ఎక్కువసార్లు ప్రేమించగలరు. ఏక కాలములో ఇద్దరు వ్యక్తులను మాత్రము సమానముగా ప్రేమించడం అసంభవం. ఒకరిమీద అనురాగం సడలిపోయిన తర్వాత ఇంకొకరిమీదికి ప్రసరించవచ్చును ' అని కథానాయికను జాగ్రత్తగా సమర్థిస్తూ ' ఈ కథానాయిక సామాన్య స్త్రీ కాదు. ఈమె ప్రేమైక జీవిని. అందుచేతనే తనకు యోగ్యుడైన ప్రియునికోసమై ఎట్టి త్యాగమైనా చేసింది. స్వాతంత్ర్యములేని సామాన్య స్త్రీలవంటి పతివ్రత ఈమె కాదు ' అని రూలింగ్ యిచ్చారు.

రామ్మూర్తి రత్నమ్మ, చలం-కృష్ణశాస్త్రి. సత్యవతి వీరి సంబంధాలను వ్యావహారిక జగత్తు నుంచి విడదీసి చూడడానికి తాత్త్వికమైన ప్రాతిపదికను శాస్త్రిగారు తమ పీఠికలో తెచ్చియిచ్చారు. శశిరేఖ గురించి చలమే ముగింపులో దేవదూతచేత యిలా అనిపిస్తాడు. 'అవును, యీమె ఆ లోకంలో వుండతగినది కాదు. ఎక్కడ ప్రేమకు అంతంలేదో, అంతా ప్రేమమయమో, యెక్కడ ప్రేమకు నీతిదుర్నీతి అనునవి లేవో, అట్టి లోకానికి వొస్తోందీమె. తన మనోకల్పితములైన దివ్య ప్రేమమూర్తులతో లీలలకై యీమెకు వరమీయబడినది. ప్రేమించినవారికి పాపములేదు. ప్రేమ మూర్తి, ప్రేమాగ్నిలో తప్తమైన పరిశుద్దమైన దీమె ఆత్మ. ధన్యురాలు, ప్రేమించినది’

రామ్మూర్తి కలకత్తా వెళ్ళకముందు ఓసారి నేనూ అతనూ మాట్లాడుకుంటున్నాము.
'రామ్మూర్తీ! నాకు తిరిగి తిరిగి ఓ సందేహం వొస్తో వుంటుంది. ఎక్కడైనా ఏ అందమైన స్త్రీలను చూసినా నేను చాలా attract ఔతాను. అది పాపమంటావా నువ్వు?'

'పాపమనే అంటాను నేనూ’ అన్నాడు అతను.

'పాపకార్యాలమీద చాలా రోతనాకు. ఒక అబద్దం చెప్పాననుకో ఎంత బాధపడిపోతానో! నన్ను నేను అసహ్యించుకుంటాను. సిగ్గుపడతాను. పశ్చాత్తాప్పడతాను. ఏ పాప కార్యమైనా నా కంతే. కాని స్త్రీకై నేను పడే ఆకర్షణలో నాకు సంతోషం తప్ప ఏ బాధారాదు. '

'ఔను, ఆ ఆకర్షణతో అంతమైతే అందాన్ని చూసిన బాధ తప్ప అంతకన్నా కోర్కె లేకపోతే దాంట్లో తప్పేముంది. ' అన్నాడు.

'అమ్మడితో ఆగదె. ఆమెను కావిలించుకోవాలని, ముద్దులు పెట్టుకోవాలనీ గొప్ప ఆశ కలుగుతుంది. ఒకవేళ ఆమె కూడా నన్ను యిష్టపడ్డట్లయితే నా ఆనందానికి మేరలేదు. ఇంత ఆనందమిచ్చే పని, పాపం, తప్పు అంటే నేను నమ్మలేకుండా వున్నాను. పాపంలో అంత ఆకర్షణ ఉంటుంది అంటావా?'

'తప్పకుండా వుంటుందీ '

'ఔను, నాకు తెలుసు. పురాణాలు, శాస్త్రాలూ, పెద్దలు, మన బ్రహ్మ సమాజపు గురువులు అందరూ గట్టిగా ఖండిస్తారు. వారు చెప్పేదంతా నిజం రావొచ్చు. కాని నాకు నిజమనిపించదు. మనం కులాల్ని విగ్రహారాధనల్ని, తద్దినాల్ని, వీటన్నిటిని అతిక్రమించాం. ఈ నీతులకి మాత్రం ఎందుకు లొంగిపోవాలి? ఎప్పుడన్నా దేవుడు ఈ పనులన్నీ చెడ్డవని చెప్పాడా?'

'కాని నీ అంతరాత్మ ఏమైంది?'

'నా అంతరాత్మ దీంట్లో ఏమీ తప్పు లేదని చెపుతోందీ '

ఏమోనబ్బా నాకు తెలియదు. ' అన్నాడు రామ్మూర్తి..

గోదావరి ఒడ్డున గడిపిన సాయంకాలాలలో అతను అనుభవించిన సంఘబహిష్కరణను తనతో పాటు పాట్లు పడుతున్న రంగనాయకమ్మగారి పట్ల జాలిని వ్యక్తం చేస్తాడు చలం !
ఆమెకు కావలసింది జాలి మాత్రమేనా -' నా మీద ఎంత కోపం వుండనీ, నన్ను నమ్మి ఈ నిర్భాగ్య జీవితంలో నాతో నిలిచి వుంటుంది రంగనాయకమ్మగారు. లోపల పిల్ల కదిలే పెద్ద పొట్టతో అన్ని పనులు చేసుకుంటోంది. వెలిపడ్డ మాకు దాసీ వుండదు. చాకలి వుండదు. కొన్ని సమయాల్లో విరోధం తక్కువగా వున్నప్పుడు నవ్వుకుంటూ యిద్దరం అంట్లు తోముకునే వాళ్లం. బట్టలు వుతుక్కునేవాళ్లం . స్నేహంగా పలకరింపులు లేకుండా అర్థం చేసుకునే చూపైనా లేకుండా బతుకుతున్నాము. ఏటి పొడుగునా మమ్మల్ని పలకరించే వాళ్ళులేరు. మమ్మల్ని విజిట్ చేసేవాళ్ళు అసలు లేరు. తను వొంటరి. నన్ను వొదిలిపోదామంటే తనకి ఎవరూలేరు తన బంధువుల్లో. నన్ను నమ్మి నాతో తను వెలిపడ్డది. నాకు మాత్రం ఎవరు తోడు? నాకు దేవుడూ లేడు.

గది గుమ్మంలో కూచుని అంతా నిద్రపోయాక చీకట్లోకి
చూస్తూ చావుపుటకల సమస్య గురించి కనపడని అర్థం కోసం తర్కిస్తూ
ఆలోచిస్తూ గడిపే వాడు చలం.

వివేకానంద | చలం_ఉత్తరాలు | బెజవాడ, 24-8-1935

2009-03-31T06:56:00.001+05:30

బెజవాడ, 24-8-35

...చాలా యేళ్ళ కిందట నేను
వివేకానంద చదవటానికి ప్రయత్నించాను.
ఆయన వుపన్యాసాలు;
తక్కువ రకం మేధావులకి పనికి వచ్చేట్టు,
బాగా నీళ్ళు కలిపినట్టు కనబడ్డాయి. మళ్ళీ ప్రయత్నిస్తాను.
పోయిన Sunday Times లో అరవింద అనుబంధం వేశారు.
అతని యోగ అభిప్రాయాలతో ఏకీభవించను.
కాని చదివినప్పుడల్లా ఏదో నిర్మల వాయువులు
వింత పరిమళాలతో నా పైన వీచినట్లయింది.
ఆకాశం కొత్త అందంతో వెలిగింది...

జాతకం | చలం ఉత్తరాలు | గుంటూరు, 14-03-1930

2009-03-29T21:34:00.000+05:30

గుంటూరు,
14-03-30

my dear pendulum,

మీ వుత్తరానికి వెంటనే జవాబువ్రాసితీరాలనిపిస్తోంది. అంతపని తొందరలో వ్రాసినా
మీ వుత్తరం సోడామల్లె పొంగుతోంది. పెట్టిపోయిన ఆ మూర్ఖపు గొడవనతా ఒక్కసారిగా మానేశాను.
సూర్యనమస్కారాలు ముఖ్యం. అలసిపోయినాను. ఏ మాత్రం లేదు Inspiration , బైటనించి గాని, లోపల్నించి గాని.

మా హెడ్మాష్టరు కుదర్చడానికి రోగుల్ని వెదకడంలో నిమగ్నుణ్ణి ప్రస్తుతం. కొంతశక్తి వుంది ఆయనకి. కాని వుత్త nonsense మాట్లాడుతాడు. ఆ సాహేబు, ఎన్నేళ్ళకిందో చచ్చిపోయిన యీవూరి ఉర్సుమస్తానుని కలుసుకొని మాట్లాడానంటాడు.

రోజూ నేనూ సుబ్బారావూ జాగ్రత్తగా జరుగుతున్న సంగతుల్ని గమనించి గాంధీగారిని చర్చించుకుంటున్నాము.
నా వుత్సాహాన్ని అణిచిపెట్టడం కష్టంగా వుంది. ఏ నిమిషానో తెంచుకుని ఆయనతో చేరి పోతానేమో ? ఎవరికి తెలుసు ?

మొన్న రైల్లో సౌరిస్ టాగూరుగార్ని కలుసుకుంది. ఆయన షౌ చేతిని పట్టుకున్నారు.
ఆయన్ని గురించి Rave చేస్తోంది.

అచ్చుకి కథలు తయారు చేస్తున్నాను. బెజవాడలో మీకు యోగాసనాలు నేర్పుతాను. మీ వెన్నెముక తాగుతుంది వాటిని.

ఈ Mrs. భూషణం నా బతుకుని చెడ్డకలగా మారుస్తోంది.
ఒకటేగొడవ, ఆ శుకుడి జాతకం పట్టుకుని,

"నేను సుఖంగా వుంటానని వుంది, కాదూ?"
"అవును."
"సుఖంగా అంటే ?"
"అంటే, సుఖంగా అన్నమాట."
"ఎట్లా?"
ఏం చెప్పను ??
"మరి నా నలభై మూడోయేట ఏం జరుగుతుందో చెప్పలేదే?, మేషలగ్నం అంటే ఏమిటి?"

నాకేం తెలుసు ? మేషంవొచ్చి ఆమెకు లగ్నం చేస్తుందనా?
ఆ జతకం అతను మోసాలమారిట. నన్ను వెళ్ళి అతన్ని తన్నమంటుంది.
లేకపోతే తానేవొచ్చి అతన్ని తంతానంటోంది.
ఇంక అతను ఆడవాళ్ళకి జాతకాలు చెప్పడనుకుంటాను.

యముడితో చలం

2008-07-28T23:44:00.001+05:30

యముడి ముందు చలం -- గుడిపాటి వెంకట చలం గారు రాసిన ఈ స్కెచ్ 1948 నాటిది

[ You can download this article in pdf from here ]

చలం : ఎవరూ ? యముడా?
యముడు : అవును.
చలం : ఉన్నావా ? లేవనుకున్నాను.
యముడు : అనుకోలేదు. అనుకున్నాననుకున్నావు.
చలం : అన్ని మతాల వాళ్ళూ ఇక్కడికి రావలసిందేనా?
యముడు : యముడి లో నమ్మకం ఉన్నవాళ్ళు
చలం : తక్కిన వాళ్ళూ ?
యముడు : వాళ్ళ నమ్మకం ప్రకారం
చలం : అసలు నమ్మకం లేక పోతే ?
యముడు : ఏమీ లేదు. దేంట్లోనూ నమ్మకం లేని వాళ్ళకి.
చలం : మరణం తరవాత జీవితంలోనే నమ్మకం లేకపోతే ?
యముడు : మరణం తోనే ఆఖరు !
చలం : నాకూ నమ్మకం లేదే ! చాలా మందికి లేదు ఇప్పుడు.
యముడు : లేదంటే చాలదు. నిజంగా, నిస్సందేహంగా లేక పోవాలి. లేని వాళ్ళ జీవితమే వేరు. మృగాలకి లేదు. వాటికి మృత్యువు తోనే అంతం. మరణంతో నిజంగా అంతంఅనుకునే మనిషికి జీవితంపైన ఆ పట్టు ఉండనే ఉండదు. అ రాతలు, ఆ వాదాలూ, ఆ ప్రేమలూ, ద్వేషాలూ నిలచి పని చెయ్యవు. నువ్వు చెప్పేదే నిజమని నమ్మకం. అవన్నీ ఏమిటి ? ఏదీ నిలవక ప్రతి నిముషం బూడిదై పొయ్యే ప్రపంచం లో సత్య మనేది ఎక్కడ వుంది ?
చలం : కానీ మానవ జాతి అభివృద్ధి, సత్యానికి కళ్ళు తెరవగల…
యముడు : ఏం మానవజాతి ? పదేళ్ళ తరవాత ప్రపంచం వుంటుందని ఆ విశ్వాస మేమిటి ? సత్యమేదో తెలుసుకుంటుందని ఆ ఆశ ఏమిటి ?
చలం : అట్లా అయితే ఈ విశ్వాసాలేం లేకుండా స్వార్ధంగా బతికేవాడికి ఇక లోకం లేదన్న మాట !
యముడు : స్వార్ధంగా బతికే వాడికి వుంది. వాడు దేనికో బతుకుతున్నాడు గనుక.
చలం : మరి ఎవరికి లేదూ ?
యముడు : అంటే అందరికీ వుంది. కాని అనేక విధాలుగా వుంది.
చలం : నాకు యముడు అనే వాడిలో ఎన్నడూ నమ్మకంలేదు.
యముడు : అయితే యముడివా అని నన్నెందుకు అడిగావు ? యముడని నన్నెందుకు అనుకున్నావు ?
చలం : అవునేమో, అనుకున్నాను.
యముడు : అందుకనే అయినాను.
చలం : అనుకోకపోతే ?
యముడు : యముణ్ణి కాను.
చలం : అప్పుడు ఎవరు ?
యముడు : నువ్వెవరని అనుమానిస్తే వాణ్ణి.
చలం : తరవాత ?
యముడు : తరువాత నువ్వేమని అనుకుంటున్నావో, అది !
చలం : ఏమీ అనుకోవటం లేదు.
యముడు : అబద్ధమాడకు. (నవ్వుతున్నాడు). నేను చెప్పనా ? నీకు స్వర్గమా, నరకమా? అనుకుంటున్నావు . అవునా ?
చలం : నాకు స్వర్గనరకాలలో నమ్మకం లేదు.
యముడు : అదంతా సరేలే. అది భూలోకంలో. పుస్తకాలలో. ఇక్కడ నన్ను చూసి అనుకున్నావా లేదా ?
చలం : మరి యముడు గనక తరవాత అంతేకదా నేను అనుకోవలసింది !
యముడు : అవును. అంతే కదా. అదే నిజం !
చలం : సరే, స్వర్గమా, నరకమా ?
యముడు : నేను యముణ్ణయినప్పుడు, నరకమే గా నీకు ?
చలం : నాకు నరకం లో ఎప్పుడూ నమ్మకం లేదు.
యముడు : లేదు. కాని నీ ఊహలూ, రాతలూ, పనులూ, ప్రపంచం లో ఏ మార్పు తెస్తాయనుకున్నావో ? ప్రపంచం లోని వాడివేగా నువ్వూను ? నీలో అవి తెచ్చే ఫలితమే నరకం ?
చలం : స్వర్గం కాకూడదా ?
యముడు : కావచ్చు. కాని నరకాన్ని ఏరుకున్నావు.
చలం : ఎప్పుడు ?
యముడు : ఇప్పుడే, అంటే నీ జీవితమంతా అన్నమాట!
చలం : అంటే ?
యముడు : ఇప్పుడనేది - పూర్వం ఎప్పుడూ అనే దాని పర్యవసానం - ఏ కార్యానికైనా ఫలితంవుంటుంది అనే నమ్మకంవుంటే, మరి ఫలితం వుండకుండా వుండదు. మిగిలిపోయిన ఫలితాలు అక్కడ అనుభవించాలి.
చలం : ఆ నమ్మకం లేకపోతే?
యముడు : లేకపోతే స్వర్గం లేదు, నరకం లేదు. కాని ఫలితం కలగదని పనులు చేసే వాళ్ళెవరు ?
చలం : నేను యముడననీ, నరకమనీ ఎందుకు అనుకున్నానంటే, చిన్నప్పటి భయాలూ, అలవాట్లూ వొదలక. అంతే కానీ నమ్మకం వుండి కాదు.
యముడు : మరి ఏం విశ్వసించావు ?
చలం : నాకేం తెలీదన్నాను.
యముడు : సరే, ఇప్పుడు నేర్చుకుంటావు.
చలం : ఏం నేర్చుకుంటాను ?
యముడు : ఏం నేర్చుకోవాలని వుంటే అదే !
చలం : ఏం లేద నా!
యముడు : అదే నేర్చుకుంటావు. నరకం లో.
చలం : మరి ఈ శిక్ష ఎందుకు ?
యముడు : నీ అవినీతి కార్యాల ఫలితంగా.
చలం : అట్లా రండి. నీతి అంటే ఏమిటి ? అవినీతి అంటే ఏమిటి ?
యముడు : నీకు తెలుసా ?
చలం : నాకు తెలీదు. తెలుసునన్నవాళ్ళతో వాదిస్తాను.
యముడు : నీ వాదాలు నాకు తెలుసు.
చలం : నా పుస్తకాలు చదివారా ?
యముడు : నిన్ను చదువుతున్నానుగా ఇప్పుడు !
చలం : నేను చాలా సార్లు మారాను.
యముడు : అన్ని మార్పులతోటీ స్పష్టంగా నిన్ను చదువుతున్నాను.
చలం : మరి చెప్పండి నీతి అంటే ఏమిటో ?
యముడు : నువ్వేమంటే అదే !
చలం : అయితే నాకు శిక్ష ఎందుకు ?
యముడు : నువ్వనే నీతికే నువ్వు విరుద్ధంగా చాలాసార్లు ప్రవర్తించావు గనక. కాదా ?
చలం : అవును. కానీ నా ఆదర్శం చాలా ఉన్నతం.
యముడు : కాని, నీ నీతి కీ, నీ ఆదర్శానికీ నువ్వు అపకారం చేసుకున్నావు. దానికి పరిశాంతి ఈ నరకం !
చలం : అసలు ఏ ఆదర్శం లేకుండా శాస్త్రాల్లోదీ, పొరుగువారనేదీ నీతిగా తీసుకుని బతికే వారికి నీతి గా వుండడం సులభం.
యముడు : అవును.
చలం : మరి వాళ్ళకి ?
యముడు : స్వర్గం
చలం : స్వర్గమా ? ఎందుకు ?
యముడు : నీతి గా బతికారు గనక. వాళ్ళ మనసులో అవినీతి చేశామనే నేరభావంలేదు గనక.
చలం : నేరభావం లేక పోతే చాలునన్న మాట. ఇక నేరమనేది లేదా?
యముడు : అదేగా రాసావు ఇన్నాళ్ళూ? పాప పుణ్యాలు లేవనీ, మనసు కల్పించుకుంటోదనీ, ఎవరి అంతరాత్మ వారికి ధర్మకర్త అనీ!
చలం : అంటే స్వర్గ నరకాలకి మనసులే ఆధారమా ?
యముడు : అవును. అంతే. నువ్వు రాసిన మాటలే. కాని నీకు నమ్మకం లేదన్న మాట.
చలం : మరి వీటి ని నిర్ణయించే దేవుడు ?
యముడు : దేవుడూ అంతే. కావాలంటే వున్నాడు. అఖ్కర్లేక పోతే లేడు !
చలం : మరి ఇదంతా నిర్ణయించే దెవరు ?
యముడు : నువ్వే !
చలం : తక్కినవాళ్ళనీ ?
యముడు : వాళ్ళే !
చలం : మరి నువ్వూ !
యముడు : నువ్వు వున్నావంటే వున్నాను అని చెప్పాను కదూ !
చలం : చాలా అన్యాయంగా వుంది వ్యవహారం.
యముడు : ఏమిటి ?
చలం : లేని దేవుడిలో స్వర్గం నమ్మితే, స్వర్గమా ?
యముడు : ఆ !
చలం : నేను చూసిన దొంగ భక్తులకీ, మూఢులకీ, పురుగు ల్లాంటి క్షుద్రులకీ ?
యముడు : వాళ్ళకీ అట్లాంటి స్వర్గమే. అంటే, వాళ్ళు కోరుకునేలాంటి స్వర్గం. వారు ఆరాధించే దేవుడు.
చలం : విష్ణు భక్తులకీ ?
యముడు : వైకుంఠం.
చలం : ఎంత బుద్ధి హీనుణ్ణి ! నేనూ ఓ దేవుణ్ణి నమ్మితే …
యముడు : ఏం లాభం ? నువ్వు నమ్మలేవు. అయినా ఇప్పుడైనా మించిపోయిందేమీ లేదు. గట్టిగా కోరుకుంటే వైకుంఠానికి వెళ్ళవచ్చు. కాని త్వరలోనే నరకానికి పోవాలని కోరుకుంటావు.
చలం : ఎందుకు ?
యముడు : భరించలేక. నీ స్వభావం అట్లాంటిది గనక.
చలం : ఏం చేస్తారు వైకుంఠం లో ?
యముడు : ఏం చెయ్యాలని ఆ భక్తులు కోరుకుంటారో అదే !
చలం : భజన ! పిడి భజన !
యముడు : అవే… భరిస్తావా ?
చలం : వాళ్ళూ ?
యముడు : (నవ్వుతో) అదేదో గొప్పపని అని మీ లోకం లో ప్రార్ధిస్తారు. నీ సాన్నిధ్యం లో చేర్చుకో. ఇంక మాకేమీ అవసరం లేదని! కాని అన్ని అవసరాలూ వుండనే వుంటాయి. వెడతారు వైకుంఠానికి. రాత్రింబగళ్ళు భజనే భజన !
చలం : వాళ్ళకి శాంతి అది !
యముడు : అనుకుంటారు.. భజన్లు, విష్ణుసాన్నిధ్యం శాంతి నిస్తుందని, భేషజాలకి భక్తి కోరుకుంటారు. కాని దాంటో నిలవలేక యాతన పడతారు.
చలం : నిజం గా భక్తి మాధుర్యం కలవాళ్ళో ?
యముడు : వాళ్ళకి ఫరవాలేదు. కాని వాళ్ళెందరున్నారు ? చాలా మంది కోరుకునే స్వర్గాలు అంతే, అసలు వాళ్ళకి ఇక్కడ ఏం కావాలో తెలిసిన వాళ్ళెంతమంది ?
చలం : మరి వాళ్ళేమౌతారు ?
యముడు : అట్లా తెలీక వెతుక్కుంటూ వుంటారు, అయోమయం గా తెలుసుకున్న దాకా.
చలం : మరి నరకంలో బాధలు పెడతారు కదా ?
యముడు : ఎవరన్నారు ? నువ్వు కోరుకున్నవన్నీ నరకం లో ఉన్నాయి. అందుకని అక్కడికి వెడుతున్నాము. మేమేం బాధ పెట్టము. ఆ బాధలేవో నువ్వే పెట్టుకుంటావు !
చలం : ఎందుకు పెట్టుకుంటాను ?
యముడు : భూలోకం లో ఎందుకు పెట్టుకుంటావు ? అక్కడా అంతే !
చలం : నాకు కావలసిన వన్నీ ఇక్కడా వుంటాయిగా ?
యముడు : అదే బాధ ! కావలసినవన్నీ వుండే బాధ. పైగా అవి నిన్నో పట్టాన వదలవు. స్వర్గం లో భజనలు మల్లేనే తలుచుకో. నీ పుస్తకాలూ, నీ కలలూ….
చలం : మరి ఇంక ఆ లోకానికీ, ఈ లోకానికీ వ్యత్యాసమేముంది ?
యముడు : ప్రయత్నాలూ, ఆశలూ ఫలించే లోకం ఇది. అంతే. ఆ లోకం లో మిగిలి పోయినవన్నీ.
చలం : ఈ నరక కాలం అయిపోయింతరవాత ఏమవుతాను ?
యముడు : ఏం లేదు. కానీ అనుకోకుండా వుండవు.
చలం : అప్సరస తో తిరుగుతో వుండాలనుకుంటే… ?
యముడు : అపుడెందుకు ? ఇప్పుడూ తిరగగలవు. అట్లా కోరుకుంటే. కానీ అక్కడంతా శాంతీ, సుఖం అనుకోటం లోనే మనుషులు చేసే పొరపాటు. వాళ్ళ మనసు వాళ్ళ తోటే వుంటుంది.
చలం : చాలా అర్ధంకాకుండా వుంది.
యముడు : అంతేలే. ఈ జన్మల్ని ఎవరూ నీ మీద రుద్దడం లేదు.
చలం : మరి సత్యం, న్యాయం, పద్ధతీ, అభివృద్ధీ…
యముడు : అవన్నీ వున్నాయి. కాని నువ్వు అనుకునేట్టు సంకుచితంగా కాదు. విలువలున్నాయి. కాని అవి కనబడవు నీకు. స్వార్ధంగా, క్రూరంగా బతికే మనుషులకి జీవితం లోంచి ఏమొస్తుంది? ఇతరుల కన్నీళ్ళలో బాధ పడే వాడికి, ఒక్క చిరునవ్వు లోంచి వచ్చే మాధుర్యం ఎవరెరుగుదురు ? బైట ఏం జరుగుతోందని కాదు - వాటి నించి నీ లోపల ఏం జరుగుతోందనే దృష్టి నీకు కలిగిన రోజున సమన్వయం ఎక్కువగా కలుగుతుంది.
చలం : మరి ఈ జనన మరణాల్నించి తప్పించుకోవాలని చేసే సాధకులు - మూర్ఖులేనా?
యముడు : వాళ్ళకింకా జీవించాలని వుంది. నిజంగా అఖ్కర్లేక పోతే, జనన మరణాల్నించి తప్పించుకోవడం ఒక్క నిముషం పని. జీవితం లో తాము కల్పించుకున్న బాధల్ని తామే పడలేక, ఏదో ముక్తి కావాలనే ఏడుపు ఆ సాధన అంతా.
చలం : మరి ఈశ్వరుడు ఆనందమయుడు, ఆత్మ ఆనందస్వరూపం అంటారు, అదేమిటి ?
యముడు : దేని మీదా ఆధార పడని ఆనందం కావాలనుకున్న నిమిషాన అదీ సిద్ధం గానే వుంది.
చలం : మరి అందరూ ఆ ఆనందాన్ని ఎందుకు కోరుకోరు ?
యముడు : వాళ్ళకి అఖ్కర్లేదు గనక !
చలం : ఎందుకు అఖ్కర్లేదు ?
యముడు : నీకెందుకు అఖ్కర్లేదు ?
చలం : అఖ్కర్లేకేం ? దొరక్కగానీ !
యముడు : దొరకడ మేముంది ? నువ్వు గట్టిగా ఇంకో దృష్టి లేకుండా వాంఛించాలి అంతే. నిజంగా యోచించుకో. ఆనందం అనేటప్పటికి నీ మనసు ఏం వాంఛిస్తుంది ? నీ పుస్తకాలు తెప్పించనా ? ఆ ఆనందమే పుష్కలంగా దొరుకుతుంది నీ కిక్కడ ! ఆ రూపాన ఆనందం వద్దని నువ్వు మొర పెట్టిందాకా ?
చలం : నా మొర ని ఎవరు వింటారు ?
యముడు : నువ్వే !
చలం : విని ?
యముడు : విని, ఇంకో రకమైన ఆనందాన్ని కోరుకుంటావు ?
చలం : తరువాత ?
యముడు : అది సిద్ధిస్తుంది. అంతే.. నిరంతరంగా అంతే…. అది ఇవ్వలేదనీ, ఇచ్చాడనీ, దేవుణ్ణీ, విధినీ, లోకాన్నీ, కర్మనీ తిడుతో బతుకుతారు. ఎవరు వాంఛించేది వాళ్ళకి తటస్థించి తీరుతుంది. అంతకన్న కరుణ గల విషయం ఆలోచించుకో గలవా ? వెళ్ళు. వాళ్ళందరూ నీ కోసం ఎదురు చూస్తున్నారు.
చలం : ఎవరు ?
యముడు : నీ కధా నాయికలు. నువ్వు వాంఛించి, ఊహించి కల్పించుకున్న ఆదర్శ వ్యక్తులు.
చలం : అమ్మో !
యముడు : (నవ్వుతో) చూశావా ? నీ నరకం ఇక్కడే ప్రారంభమయింది !
చలం : పోనీ స్వర్గానికి పోనీరా ?
యముడు : నిరభ్యంతరంగా . కానీ అక్కడ మునులూ, రాంభజన గాళ్ళూ.
చలం : ఆడవాళ్ళూ?
యముడు : రాజ్యలక్ష్ములూ, కాంతం, హృదయేశ్వరులూ, సవితలూ వుంటారు.
చలం : వద్దులేండి. నరకానికే పోతాను.
యముడు : నాకు తెలుసు గా ! అంటే నీకు తెలుసుగా !

కొన్నె కరుణాకర్ గారి బ్లాగు సౌజన్యంతో...

చలం జీవితకథ రాసిన పురాణం సుబ్రహ్మణ్యం శర్మ E-book 'తెలుగువెలుగు ' - 1

2007-12-05T10:02:00.000+05:30

'ఈ ఆనందం ఎక్కడ దొరుకుతుంది?' చలం అంటాడు: 'నిజమైన ఆధ్యాత్మికానుభవమంటే తనని, తన ఆత్మో, ఏదో, తను అనే దాన్ని ఈ విశ్వ చైతన్యంతో ఏకం చెయ్యగలగడం-లోకంలోని ఆనందాన్నంతా తనదిగా అనుభవించడం. అది అందనప్పుడు అట్లా తనని మరచి ఐక్యమయ్యే ఆనందం ఈ ప్రేమలోనూ, కొంతవరకు శ్రంగారంలోనూ గాక ఎక్కడా దొరకదు. మామూలు మనుషులు సాధించగలిగే ఆనందమంతా శృంగారంలో వుంది . ప్రేమ అంటారా? ప్రేమ దొరకడం చాలా కష్టం. దొరికినా అది ఒక అగ్ని. అది వొక తపస్సు. అది కలిగిన నిమిషాన, ఏ కవులూ, ఏ కలలూ దాని ఔన్నత్యాన్ని అందుకోనంత వెలుగులు కనపరుస్తుంది; కాలుస్తుంది. కాని ఎంత గొప్ప ఆనందానికి, అతి మహిమలకి, ఐశ్వర్యాలకి, వెలుగులకి కళ్లు తెలుస్తుంది; .... దాంటో, దాని గొప్పలో, అది ఇవ్వగల శాంతిలో విశ్వసించండి. బతకడం అందుకోసమే. అశాంతినీ, ఆనందాన్నీ పొందడమే ననుకోండి. ఈ ప్రపంచంలో తక్కిన సుఖాలు చెత్త దాని ముందు ... '
-------------------------------------------------------------------
చలం జీవితకథ రాసిన పురాణం సుబ్రహ్మణ్యం శర్మ E-book 'తెలుగువెలుగు ' - 1
Download Link here
http://www.sharelor.com/v/2485349/teluguveluguchalamvol1.djvu.html

Download this software to read the above E-Book
http://www.sharelor.com/v/7680024/djvucntl_61_en.exe.html

Report Bad Link to : dearsridhar@gmail.com

చలం-కొన్ని అరుదైన ఫోటోలు

2007-11-13T06:35:00.000+05:30

చలానికి సంబంధించి కొన్ని అరుదైన ఫోటోలు ఇక్కడ చూడండి.
Plz click on them to view in full

చలం సమాధి

చలం-షౌ గురించి కొన్ని ఆసక్తికరమైన విషయాలు

2007-11-11T09:02:00.000+05:30

'షౌ! నీకేం కావాలి?'
'పూలు '
పూలు కాకుండా ఇంకేవన్నా అడిగితే నువ్వు షౌ వి కాదనేదిట.
చలం-షౌ గురించి కొన్ని ఆసక్తికరమైన విషయాలు

Plz click on the images to view in Full

చలం-తన కుటుంబం-తను సహవాసం చేసిన స్త్రీలు-PHOTOS

2007-11-08T22:36:00.000+05:30

Please click on the images below to view in full.

దమనం

2007-11-04T11:04:00.000+05:30

మహారాణి పేట , 3-5-37 ,

...మీరు వ్రాసిన విషయం నిజం. నా నిరీశ్వరదినాల ప్రారంభం నుంచి, విద్యకోసం ప్రజలు పెట్టే యీ గోలకి నేను వ్యతిరేకం. పొలం నుంచి బడికి, ఏటినుంచి పుస్తకానికి From the field to the school, from the brook to the book. పిల్లల్ని విడదీసి తీసుకొచ్చి, బడి అనే మురికిగుంటలో ఖైదు చేసి, జీవంలేని, అర్థం లేని, మూర్ఖపు అక్షరాలతో, అతన్ని చంపడమన్నమాట .

Now the masses, hitherto,

they even exploited by the priest and the capitalist

Now the congressman exploits them for election

The communist for revelution
The educationalist for promotion
And the story writer for reputation.

... మొన్న ఒక great philanthrophic public woman worker నాకు వ్రాసింది. నాకో అనాథ శరణాలయం వుంది. పిల్లలు లేరు. అనాథలైన పిల్లల్ని పంపండి, అని, నేను జవాబు వ్రాశాను. ఆ శరణాలయాన్ని మూసేసి, ఆ ధనంతో అనాథలైన తల్లిదండ్రులు వుండి తిండిలేక మాడే బీద పిల్లల్ని చేర్చుకుని పోషించరాదా?అని. ప్రత్యుత్తరం లేదు. కాని త్వరలోనే ఆమె కాళ్లు పట్టుకోవలసి వచ్చింది. హిందూ మహమ్మదీయ సంబంధం వల్ల పుట్టిన యెవరికీ అఖ్కర్లేని పాప, మాకు భారం కావడం చాత, శరణాలయంలోకి తీసుకోమని నేనే బతిమాలవలసి వొచ్చింది. మనుష్యుల పిల్లల్ని ఇట్లా బంగీలమల్లే పంపించెయ్యడం నా గుండె చీల్చినట్టుంటుంది. మా ఇంట్లో పుట్టే ఈ దిక్కులేని పిల్లలందర్నీ జాగ్రత్తగా పెంచగల ఆరోగ్యమో లేక ధనమో నాకు వుండకూడదూ ?

...కామనిరోధాన్ని బోధించే గాంధీగారిని చూస్తే నాకు కోపంగా వుంది. నేను అవినీతిని బోధించనీ, ఆదరించనీ, నాకు మొనాగమీలోనూ, దమంలోను విశ్వాసం . కాని ఆ ఆదర్శ శిఖరాలెక్కడ, మనమెక్కడ? పోనీ వాటిని ఆదర్శాలుగా పెట్టుకుని, జీవితంలో వాటికై ప్రయత్నించరాదా? అంటారా మీరు? గాంధీగారితో నాకు విరోధమెక్కడ అంటే దమనం ఏ రోజునైనా సరే, ఎవరికైనా సరే చాలా సులభ సాధ్యమైనట్టు మాట్లాడతారు, ఆయన. He is misleading people and landing them into moral aberations neurotic, vagaries and self deception. సాధ్యంగాని ఆదర్శానికై బలవంతపరిస్తే పర్యవసానం ఘోరం. ఆయన మాటని విచక్షణ లేకుండా నమ్మేవాళ్లు వేనకు వేలు వుండవచ్చు.

భగవాన్

2007-10-16T00:41:00.000+05:30

బెజవాడ, 3-2-37,

... గుంటూరు కవులు - ఆ సభ అంతా హాస్యంగా వుంది (గిడుగు)రామ్మూర్తి గారు తప్ప.Those people in their sense of (their own)importances have lost their sense of humour.

అవును. నిన్న 'Who am I?'(నేనెవరు?) అనే పుస్తకం చదువుతున్నాను. యింక యోగులు చాలు మనకు. మొత్తానికి నాకు. భగవాన్ వల్ల లాగెయ్యబడ్డానని బెజవాడలో వదంతి. భగవాన్ ని గురించి నా అభిప్రాయం యిద్దరడిగారు. నేను ఆ విషయం మాట్లాడకుండా వుంటే బావుంటుంది. ఆయనకి గాని, నాకుగాని న్యాయం జరగదు, నా మాటల్లో. కొంచెం కొంచెంగా-చాలా నెమ్మదిగా అనిపిస్తోంది. నా లోపల - చాలా స్వల్పంగా అనుకోండి-ఏదో ఉన్నతమైంది ఉదయిస్తోందా అని.

మోక్షం

2007-10-14T10:40:00.000+05:30

బెజవాడ 1932,

...బహుశా మీరు నవ్వుకుంటో 'ఏ రోజో ఎప్పుడో నువ్వు తిరిగి ఈశ్వరుడు కావాలంటావులే'అనుకుంటున్నారేమో?

ఏమో చెప్పలేను. కాని ఇప్పుడు దేవుడు నన్ను 'నీకు అత్యున్నతమైన మోక్షం కావాలా, ప్రస్తుత జీవితం కోరుకుంటావా?' అంటే,

'నాకు జీవితమంటే ప్రేమ. కన్నీళ్లతో, నవ్వులతో, నీచత్వంతో, త్యాగాలతో, స్వార్థంతో, ఔదార్యంతో, విషాదంతో, ఆనందంతో -ఈ జీవితమే మంచిది. మళ్లీ మళ్లీ అనంతంగా పుడుతో, పెళ్లి చేసుకుని సంపాయించి, పిల్లల్ని కని, పాపాలు చేసి, ప్రేమించి, ద్వేషించి, నవ్వి, మూలిగి, కానీ నీ మోక్షం అక్కర్లే'దంటాను నిశ్చయంగా ఈనాడు.

స్త్రీ

2007-10-14T10:30:00.000+05:30

బెజవాడ, 11-1-37,

... భగవాన్ బోధించే వేదాంతమూ, ఆయన 'ప్రిస్క్రిప్షన్లూ' నాకు సమ్మతం కావు. ఆయన గంభీరత్వంలోనూ, లోకం మీద ఆయనకి వున్న సంపూర్ణ నిర్లక్ష్యం మీదా గౌరవం నాకు. ఆయన ఆత్మ సౌందర్యం ఆయన ప్రేమా నేను వొప్పుకుంటాను. మీ బాధ నాకర్థమవుతోంది. నేను నిరంతరమూ అనుభవించే బాధే అని. కాని నాకు స్త్రీ వుంది. మీకు దేవుడున్నాడు.

I am bitter

2007-10-13T13:10:00.000+05:30

బెజవాడ, 1-7-31,

...యిప్పటికన్నా మీకు తెలిసివొచ్చిందా, గాంధీ, అంతగా సిన్సియర్ రిలిజియస్ మాన్ కాదనీ, మంచి రాజకీయవేత్త అనీ, he is tactful . I am bitter. ప్రజల్ని ఎంతకొంచెం చూస్తే అంత మంచిది. మనుషుల్ని (నాతో కలిపి) చూసినకొద్దీ అసహ్యం పుడుతోంది.

పిఠాపురం హంబగ్-నాయుడుగారు సగం వాళ్లని చూసి భయపడి వాళ్ల రాగానికి నాట్యం చేసే, వాళ్ల రుచులకి వంట చేసే కృష్ణశాస్త్రీ, అంత మధురమైన కవిత్వం వ్రాయడానికి వీల్లేదు.ఏదో శాంతంగా వున్న మూలకిపోయి, ఉరిబోసుకుని swan song కానియ్యరాదూ? నేను పూజలన్నీ మానాను.

మళ్ళీ red hot నిరీశ్వరవాదినైనాను.

మృత్యువు

2007-10-10T20:34:00.000+05:30

బెజవాడ, 28-6-35,

నేను వ్రాసిన 'మృత్యువు 'ని గురించి - Thanks for your assurance. ఏమిటంటే, నేను ప్రేమ కథ వ్రాసినపుడు దాని విలువని నేను తెలుసుకోగలను. కాని ఆధ్యాత్మిక విషయాలు, అర్థం లేని చత్త వ్రాశానేమోనని భయమేస్తుంది. అందుకని ఇతర్ల అభిప్రాయాన్ని అడుగుతాను.

ఏ మనిషి యిచ్చే పరిష్కారాలైనా ఈ ప్రపంచ సమస్యల్ని తీర్చగల సత్యాలైతే, ( ముఖ్యంగా నా solutions) ఈ ప్రపంచం చాలా స్వల్పమైన ప్రపంచమూ, దివాలా ఐన దేవుడూ ఐ వుండాలి. కాని నేను నిశ్చయంగా తెలుసుకోవాలనుకున్నదేమిటంటే, అది (మృత్యువు) ఆలోచించేట్టు చేస్తుందా-మనుష్యులకీ, పనులకీ వాళ్లు కలగనలేని కొత్త విలువలు వున్నాయని తెలుసుకునేట్టు చేస్తుందా అని.

కొత్త అన్వేషణానికి మీ వుత్తరం నాకు కొత్త ధైర్యాన్ని ఇస్తోంది.