CHERRYMYODAW DHAMMA

(ဘယ်တော့မှမမှားဘူး)

2012-02-06T20:30:00.002+00:00

ဘယ်တော့မှမမှားတဲ့ စကားတစ်ခွန်းရှိတယ်။
အဲဒါက အမေဟာ အမေပဲ။ အဖေဟာ အဖေပဲ။

(အပြန်အလှန်စောင့်ရှောက်မှု)

2012-02-06T20:23:00.002+00:00

မိဘနှင့်သားသမီး အပြန်အလှန်လုပ်ကျွေးဖို့ထက်အရေးကြီးတာက
အရွယ်မရောက်ခင် မိဘကသားသမီးကို Look After လုပ်မှုနှင့်
အိုမင်းသွားတဲ့မိဘကို သားသမီးကပြန်လည် Look After လုပ်မှုဆိုတဲ့
Interdependence (အပြန်အလှန်အမီှသဟဲပြုခြင်း) ယဉ်ကျေးမှုပင်ဖြစ်သည်။

(ကလေးလိုပြန်ဖြစ်သွားတဲ့မိဘ)

2012-02-06T20:22:00.001+00:00

မိဘနှစ်ပါးအိုမင်းသွားတဲ့အခါ လူကြီးဖြစ်သွားတာမဟုတ်ဘူး
ကလေးလိုပြန်ဖြစ်သွားတာ။ သူတို့သားသမီးလေးတွေရဲ့
အပြုအစုအယုအယကို တိတ်တခိုးမျှော်လင့်ကြလိမ့်မယ်။
မိဘသဖွယ်အားကိုးကြလိမ့်မယ်။ သားသမီးကောင်းတို့အတွက်
လူကြီးလိုဆက်ဆံပေးပြီး(DIGNITY) ကလေးလိုစောင့်ရှောက်ပေးရုံမှတစ်ပါး
အခြားမရှိဘူးထင်ပါတယ်။

(ကျေးဇူးရှင်နှစ်ပါး)

2012-02-06T20:21:00.003+00:00

ဒီကနေ့ကနေ မသေခင်အချိန်ကာလလေးလောက်ပဲ
ကျွန်တော်တို့မိဘဖြစ်ခွင့်ရှိတော့တဲ့ ကျေးဇူးရှင်နှစ်ပါးကို
မရောက်ဖူးတဲ့နေရာတွေကို ရောက်သွားစေချင်တယ်။
မမြင်ဖူးတာတွေကို မြင်သွားစေချင်တယ်။
မစားဖူးတာတွေကို စားသွားစေချင်တယ်။
မလုပ်ဖူးတာတွေကို လုပ်သွားစေချင်တယ်ဗျာ.....

(ကျွန်တော်တို့လိုလားတာက)

2012-02-06T20:20:00.003+00:00

- ဆေးလိပ်၊အရက်၊ကွမ်း စသည်တို့ကြောင့်
အဖိုးတန်တဲ့လူ့ဘဝ သက်တမ်းတိုတောင်းသွားမှာကို
ကျွန်တော်တို့ မလိုလားပါဘူး။
- အပျော်အပါးလိုက်စားမိလို့ ရလာတဲ့ရောဂါဆိုးကြောင့်
အဖိုးတန်တဲ့လူ့ဘဝ ပျက်ဆီးသွားမှာကို
ကျွန်တော်တို့ မလိုလားပါဘူး။
- ဘူတာဆုံးရင် လမ်းခွဲကြရမယ့်
ချစ်လှစွာသော ဇနီး၊သားသမီးတို့အပေါ်ထားတဲ့
သံယောဇဉ်ကြောင့် အပါယ်ဘဝ ရောက်ရမှာကို
ကျွန်တော်တို့ မလိုလားပါဘူး။
(အသက်ရှည်ရှည်၊ကျန်းကျန်းမာမာ နဲ့
အသေမဦးခင် ဉာဏ်ဦးဖို့ကိုပဲ လိုလားပါတယ်။)

(ဘဝကိုဓမ္မနဲ့တည်ဆောက်)

2012-02-06T20:19:00.004+00:00

လူ့ဘဝ ဒုက္ခသစ္စာကို တော်လှန်ပစ်မယ်ဆိုပြီး
ဘဝကို ဓနနဲ့ တည်ဆောက်ဖို့ ကြိုးစားခဲ့တယ်။
တိုင်းတစ်ပါးမှာ အငှားခန္ဓာ မြောင်ရတဲ့အခါ
စိတ်ဓါတ်တွေ အောက်ပြုတ်ကျတော့မှ
ဘဝကို ဓမ္မနဲ့ပါ တွဲပြီးတည်ဆောက်ဖို့
လိုနေပါလားဆိုတာ သိလာခဲ့ရတယ်။

(လူတွေဘယ်လိုသေလဲ)

2012-02-06T20:18:00.004+00:00

သေခါနီးလူတွေကို ကျွန်တော် သေသေချာချာ
ထိုင်ကြည့်ဖူးတယ်။ ခန္ဓာကိုယ်အစိတ်အပိုင်းတွေရဲ့
လုပ်ငန်းတွေ တစ်ခုပြီးတစ်ခု ရပ်ဆိုင်းကုန်တယ်။
မျက်လုံးအလုပ်မလုပ်တော့ရင် မြင်တဲ့စိတ်ပါတစ်ခါတည်းချုပ်တယ်။
နားအလုပ်မလုပ်တော့ရင် ကြားတဲ့စိတ်ပါတစ်ခါတည်းချုပ်တယ်။
အဲ့ဒီလို ရုပ်နှင့်စိတ်တစ်ခုပြီးတစ်ခု ချုပ်သွားပြီး အားလုံးကုန်ရင်
တစ်ဘဝပြီးသွားပြီ။ ဘာဝိဉာဉ်မှမရှိဘူး။
(သေသူရဲ့ ကုသိုလ်၊အကုသိုလ် ကံပေါ်မူတည်ပြီး
ရုပ်သစ်၊နာမ်သစ်နဲ့ ဘဝသစ်တစ်ခု တည်ဆောက်သွားတယ်။
အဲ့ဒီလိုဘဝသစ်တစ်ခု မတည်ဆောက်တော့ရင် နိဗ္ဗာန်ဝင်ပြီ။)

(ပုဂ္ဂိုလ်သတ္တဝါမဟုတ်)

2012-02-06T20:17:00.003+00:00

တကယ်တော့ ကျွန်တော်တို့သည် ပုဂ္ဂိုလ်၊သတ္တဝါမဟုတ်ကြပါဘဲနဲ့
ပုဂ္ဂိုလ်၊သတ္တဝါဟု ရှုမြင် သုံးသပ် ဆင်ခြင်နေကြ၍သာ
သေခြင်းတရားကို ခွင့်မလွှတ်နိုင်စရာလို့ ထင်မှတ်နေကြခြင်းဖြစ်ပါသည်။
(Will Durant)

(ဗုဒ္ဓဘာသာသည်အားလုံးအတွက်)

2012-02-06T20:16:00.003+00:00

ဗုဒ္ဓဆိုသူက ဗုဒ္ဓဝါဒကိုတီထွင်ခဲ့တာမဟုတ်ဘူး။
ဗုဒ္ဓဘာသာကိုတည်ထောင်ခဲ့တာလည်းမဟုတ်ဘူး။
တိမ်မြုပ်ကွယ်ပျောက်နေတဲ့ အမှန်တရား၊အရှိတရားတွေကိုသာ
ပြန်လည်ဖော်ထုတ်ပေးခဲ့တာဖြစ်တယ်။ ဒါ့ကြောင့်
ဗုဒ္ဓဘာသာ၊ဗုဒ္ဓဝါဒဟာ ဗုဒ္ဓဘာသာဝင်တွေသာ
လိုက်နာလေ့ကျင့်ခွင့်ရှိတဲ့ တရားတွေမဟုတ်ဘူး။

(ရှက်ဖို့ကောင်း)

2012-02-06T20:15:00.004+00:00

ရခဲလှတဲ့ လူ့ဘဝကိုလည်း ရခဲ့ပါတယ်။
ဖြစ်ခဲလှတဲ့ ဗုဒ္ဓဘာသာဝင်လည်း ဖြစ်ခဲ့ပါတယ်။
ဒါပေမယ့် သေတဲ့အခါ အပါယ်ကို
ပြန်ခုန်ဆင်းသွားရတယ် ဆိုတာကတော့
တော်တော်ရှက်စရာကောင်းပါတယ်။

(ဖန်ဆင်းရှင်)

2012-02-06T20:14:00.005+00:00

ကျွန်တော်တို့တတွေကို တစ်စုံတစ်ယောက်က
ဖန်းဆင်းလိုက်တယ်ဆိုရင် အဲ့ဒီတစ်စုံတစ်ယောက်ကို
မည်သူကဖန်ဆင်းလိုက်ပါသလဲ။
မည်သူကမှသူ့ကိုမဖန်ဆင်းဘူး သူ့ဖာသာသူ
သဘာဝအတိုင်းဖြစ်နေပြီး ထာဝရတည်နေတယ်ဆိုရင်
သူ့လိုပဲ ကျွန်တော်တို့တတွေလည်း
သဘာဝအတိုင်းဖြစ်လာနိုင်ရမှာပေါ့။

(ကံဆိုး၊ကံကောင်း)

2012-02-06T20:14:00.004+00:00

ကံဆိုးလိုက်ပုံများ သဲစုမကဘုရားတွေ တစ်ဆူပြီးတစ်ဆူ
ပွင့်သွားတာတောင်မှ မဆုံလိုက်မိတဲ့ကျွန်တော် အပါယ်လေးဘုံမှာ
ချိုးကပ်နေခဲ့ရတာ သေချာပါတယ်။
ကံကောင်းလိုက်ပုံများ လူပြန်ဖြစ်လာတာတောင်မှ
ရဟန္တာနှင့်ပုဂ္ဂိုလ်ထူးတွေ ပို့ချသွားတဲ့ နိဗ္ဗာန်ရောက်ကြောင်း
သင်ခန်းစာတွေကို မြန်မာလိုအားရပါးရ လေ့လာနိုင်ဖို့
မြန်မာလူမျိုးဖြစ်ရတာကို အရမ်းဝမ်းသာပါတယ်။

(ပထမဖယောင်းတိုင်မီး နှင့် ဒုတိယဖယောင်းတိုင်မီး)

2012-02-06T20:11:00.003+00:00

ပထမဖယောင်းတိုင် မီးမငြိမ်းမီ ဒုတိယ ဖယောင်းတိုင်ကို မီးကူးထားသည်။
ခဏကြာတော့ ပထမ ဖယောင်းတိုင် မီးငြိမ်းသွားသည်။
သို့သော် ဒုတိယ ဖယောင်းတိုင်မီးမှာ ဆက်လက်၍ လင်းနေသည်။
ကျန်နေသော ဒုတိယ ဖယာင်းတိုင်မီးမှာ ပထမ ဖယောင်းတိုင်မီးမဟုတ်ပါ။
ပထမ ဖယောင်းတိုင်မီး မရှိဘဲ ဒုတိယ ဖယောင်းတိုင်မီး ဖြစ်မလာနိုင်ပါ။
ဒုတိယ ဖယောင်းတိုင်မီး နှင့် ပထမ ဖယောင်းတိုင်မီးသည် အကြောင်းတရားမကင်းပါ။

(သေခြင်းတရား)

2012-02-06T20:10:00.003+00:00

သေခြင်းတရားသာမရှိရင် ဒီလောကဟာ
လူပြည့်နေတဲ့ လူအိုရုံကြီးတစ်ခုလိုဖြစ်လာပြီး
နောက်ထပ်မွေးဖွားလာတဲ့ လူသစ်တွေအတွက်
နေစရာနေရာကို ရှိတော့မှာမဟုတ်ပါဘူး။

(ဦးဆန်းလွင်)

(မဟာဂန္ဓာရုံဆရာတော်ဘုရားကြီး၏ဆုံးမစာ)

2009-07-09T05:14:00.001+01:00

အိုးမဖုတ်ခင် အိုးလုပ်စဉ်ဝယ်
အိုးတွင်နှိပ်ခတ် တံဆိပ်မှတ်ကား
မပြတ်မစဲ အိုးပင်ကွဲလည်း
အမြဲမသွေ တည်ရှိနေသို့
ထိုထိုသွေးသား ကလေးများသို့
ဘုရားတံဆိပ် ဘာသာစိတ်ကို
ခပ်နှိပ်နိုင်မှ သက်ဆုံးကျအောင်
ဗုဒ္ဓဝါဒီ စွဲ၍တည်မည်
ကိုယ်စီတံဆိပ် ခပ်နှိပ်သောဝ်။ ။

(မိုးကုတ်ဆရာတော်ဘုရားကြီး၏သြဝါဒကထာများ- ၂)

2009-07-09T04:50:00.003+01:00

၁။ ငါသည် မုချသေရမည်၊ အချိန်ပိုင်းသာ လိုတော့သည်။
၂။ ရခဲလှတဲ့ လူ.ဘဝကို အလွဲသုံးစား အချိန်တွေ မဖြုန်းလိုက်ပါနဲ.။
၃။ ခန္ဓာကိုယ်ဟာ မွေးကတည်းက အသေဘက်ကို ပြေးနေတယ်။
၄။ သက်တမ်းတိုတဲ့ ဘဝကလေးမှာ တရားအားမထုတ်ဘဲ အချောင်ခိုနေရင် အသေစောက ကိုယ်ကျိုး နည်းလိမ့်မည်။
၅။ မနေ.ကထက် ယနေ. သေဖို. တစ်ရက်နီးသွားပြီ။
၆။ မမျှော်လင့်ဘဲ ဖြုန်းခနဲ နာလည်းနာနိုင်သည်။ သေလည်း သေနိုင်သည်။
၇။ ခန္ဓာ၏ ဝတ္တရားက အသေရှာတာ၊ ဉာဏ်၏ ဝတ္တရားက အသေရှောင်တာ။
၈။ အသေမဦးမီ ဉာဏ်ဦးစီးပြီး ဝိပဿနာတရား အားထုတ်ပါ။
၉။ အပြေးမရပ်တဲ့ ခန္ဓာကိုယ် သုဿန်မရောက်ခင် မဂ္ဂင်အလုပ် အမြန်လုပ်ပါ။
၁၀။ သာသနာနဲ.ကြုံမှ သစ္စာလေးပါး ထွက်မြောက်ရေး တရားပေါ်မယ်။
၁၁။ ကိစ္စဟူသရွေ. မဂ်တား- ဖိုလ်တားလို. မှတ်ပါ။
၁၂။ တဏှာ- လောဘ ခိုင်းတာလုပ်နေလျှင် သေတဲ့အခါ အပါယ်ရောက်မယ်။
၁၃။ အဝိဇ္ဇာ - တဏှာ ကိန်းလာရင် အရှက်အကြောက် မရှိတော့ဘူး။
၁၄။ အလကားနေသရွေ.၊ အအားနေသရွေ. အမှားနဲ.နေခြင်းလို. မှတ်ပါ။
၁၅။ တဏှာကို အဖော်မလုပ်ဘဲ ဉာဏ်ကို အဖော်လုပ်ပါ။
၁၆။ ရက်ရာဇာ၊ ပြဿဒါး ရက်မရွေးနဲ.၊ သူတော်ကောင်း အလုပ် လုပ်နေတဲ့ အချိန်ဟာ မင်္ဂလာအချိန်လို. မှတ်ပါ။
၁၇။ ကိုယ့်ကိုယ်ကို သနားရင် ဝိပဿနာလုပ်ကြ၊ ကိုယ့်ကိုယ်ကို မသနားရင် သားရေး၊ သမီးရေး၊ စီးပွားရေး လုပ်ကြ။
၁၈။ သစ္စာတရားကို နာမှ သိမယ်၊ သိမှ ကျင့်မယ်။
၁၉။ နားက တရားကိုနာပါ၊ ဉာဏ်က ခန္ဓာကို လှည့်ပါ။
၂၀။ နိဗ္ဗာန်သည် ကံ၏ အကျိုးမဟုတ်၊ ဉာဏ်၏ အကျိုးသာ ဖြစ်တယ်။
၂၁။ တရားနာနေသည့် အချိန်ဟာ မတရားအလုပ် မလုပ်တဲ့ အချိန်ပဲ။
၂၂။ မိမိခန္ဓာရဲ. အရှိဖြစ်ပျက်ကို အသိမဂ်နဲ. တကယ်သိအောင်လုပ်ပါ။
၂၃။ ရှေ.စိတ်ကို နောက်စိတ်က ကြည့်တာ ဝိပဿနာ။
၂၄။ တစ်(၁) စိတ်ကို နှစ်(၂) စိတ်နဲ.ကြည့်တာ ဝိပဿနာ။
၂၅။ ရှေ.အသေကို နောက်အသေနဲ.ကြည့်တာ ဝိပဿနာ။
၂၆။ အရှိကို အသိလိုက်တာ ဝိပဿနာ။
၂၇။ ရှေ.က ဖြစ်ပျက်ပြီးတာ အနိစ္စ၊ နောက်က ပျက်မှန်းသိတာ မဂ္ဂ။
၂၈။ အရှိက ဖြစ်ပျက်ဓမ္မ၊ အသိကတော့ မဂ္ဂ။
၂၉။ ခန္ဓာက လောင်စာ၊ ဇရာ မရဏက မီး။
၃၀။ ဘယ်ခန္ဓာရရ၊ လောင်စာနဲ.မီး တွဲလျက်ကြီး။
၃၁။ လောင်စာသိမ်း၍ မီးငြိမ်းတာ နိဗ္ဗာန်။
၃၂။ ဒုက္ခခပ်သိမ်း ချုပ်ငြိမ်းတာ နိဗ္ဗာန်။
၃၃။ ကိလေသာ အပူဓာတ်တွေ အေးငြိမ်းတာ နိဗ္ဗာန်။
၃၄။ ခန္ဓာက အနိစ္စ၊ တွေ.တာက မဂ္ဂ၊ သေတာက သမုဒယ၊ ဆိုက်ရောက်တာက နိရောဓ။
၃၅။ ဖြစ်ပျက်သမျှ သင်္ခါရ ဒုက္ခသစ္စာမှတ်၊ သင်္ခါရကို ငါကောင်ထင် ခင်မင် သမုဒယ၊ ရုပ်နာမ် အားလုံး ဖြစ်ပျက်သုဉ်း ချုပ်ဆုံး နိဗ္ဗာန်မှတ်၊ ချုပ်ဆုံးမှုတွင် ဉာဏ်သက်ဝင် သိမြင် မဂ်ဟုမှတ်။

(မိုးကုတ်ဆရာတော်ဘုရားကြီး၏သြဝါဒကထာများ- ၁)

2009-07-09T04:40:00.006+01:00

၁။ ဖြစ်ပျက်သမျှ ၊ သင်္ခါရ ၊ ဒုက္ခ သစ္စာ မှတ်၊ ဖြစ်ပျက်မှုတွင် ၊ ငါကောင်ထင် ၊ ခင်မင်သမုဒယမှတ် ၊ ရုပ်နာမ် အားလုံး ၊ ဖြစ်ပျက်သုဉ်း၊ ချုပ်ဆုံး နိဗ္ဗာန်မှတ် ၊ ချုပ်ဆုံမှုတွင် ၊ ဉာဏ်သက်ဝင် ၊ သိမြင်မဂ်ဟုမှတ် ။
၂။ ယုံကြည်ကျမ်းမာ ၊ စိတ်ဖြောင့်စွာ ဖြင့် ၊ လွန်စွာ အားထုတ် ၊ နာမ် နှင့် ရုပ်ကို ၊ ဖြစ်ချုပ်ဉာဏ်မြင်၊ ဤငါးအင်၊ မှန်ပင်မဂ်ရကြောင်း။
၃။ မစွန့်ကာမ ၊ ဆရာမရှိ ၊ ဝီရိယလျှော့၊ အားအင်ပျော့ခါ ၊ လွန်စွာယူမှား ၊ဤငါးပါး ၊ တရားမဂ်ဖိုလ် ဝေးလေသတည်း။
၄ ။ သူတော် ဆည်းကပ်၊ မြတ်တရားနာ ၊ လျော်စွာအကျင့် ၊ မဂ်ဖိုလ်ခွင့်၊ ရလင့်ဧကန်သာ ။
၅ ။ ငါသည် မုချ သေရမည်၊ အချိန်ပိုင်းသာ လို တော့ သည် ။

======================================================

၁။ သစ္စာလေးပါး ဆိုတာ - သမုဒယသစ္စာ ၊ ဒုက္ခ သစ္စာ ၊ မဂ္ဂသစ္စာ ၊ နိရောဓသစ္စာ ။
၂။ ရခဲတဲ့ဘဝ လေး မှာ အလကား အချိန်တွေ မဖြုန်းလိုက်ပါနဲ့ ။
၃။ နားက တရားနာ ပါ ၊ ဉာဏ်က ခန္ဓာလှည့်ပါ ။
၄။ တရားနာတာသည် မိမိ အရေး ၊ တရားအားထုတ်တာ သည် မိမိအရေး ။
၅။ နားကြီးကြီးနဲ့ တရားနာပါ ။
၆။ ဝိပဿနာ အားမထုတ်ဘဲနဲ့ နေ့ရွှေ့ ရက်ရွှေ့ ရွှေ့ နေတာသည် ဉာဏ်ကမဦးဘဲ အသေက ဦးသွားရင် ကိုယ့် အတွက်နာမယ် ။
၇။ ဝိပဿနာ အားထုတ်တဲ့ အခါမှာ ကိလေသာ ကြားမခိုစေနဲ့ ။
၈။ ပဋိစ္စ သမုပ္ပါဒ် ဆိုတာ စာထဲမှာ ရှိတာမဟုတ်ဘူး ။ မိမိခန္ဓာ ထဲမှာ ရှိတဲ့ တရား။
၉။ မိမိ ခန္ဓာ ထဲမှာ ရှိတဲ့ ပဋိစ္စ သမုပ္ပါဒ် ကိုမိမိ ဉာဏ်နဲ့ ရှင်းအောင်လုပ်ပါ ။
၁၀ ။ စာပဋိစ္စ သမုပ္ပါဒ် သိတာ သည် သညာသိ ၊ ခန္ဓာပဋိစ္စ သမုပ္ပါဒ် သိတာမှ ပညာသိ ။
၁၁။ သညာသိ နဲ့ နိဗ္ဗာန်မရောက်နိုင်ပါ ၊ ပညာသိမှ နိဗ္ဗာန် ရောက်နိုင်မယ် ။
၁၂။ ရှေ့ - နောက်ခွဲတတ်ပါစေ ။ မိမိ အရေး က ရှေ့ထား ၊ သားရေး သမီးရေး စီးပွါးရေး က နောက်ထား ။
၁၃။ ဘဝ ကူးကောင်းအောင် မလုပ်ပါနဲ့ ၊ ဘဝ ချုပ်ငြိမ်းအောင်လုပ်ပါ ။
၁၄။ဒါန က သံသရာ ရှည်တာလား ၊ ဒါန နောက်က အသိ မလိုက်လို့ သံသရာ ရှည်တာလား ။
၁၅။ ဒါန နောက်က အ သိ မလိုက်လို့ သံသရာ ရှည်တာပါ ။
၁၆။ သစ္စာ သိလျှင် ခန္ဓာရောင်းလှူပါ ၊ သစ္စာ မသိလျှင် သစ္စာ သိအောင် အလျင်လုပ်ဦး။
၁၇။ အိုရာက နာရာ မရောက်ခင် ဝိပဿနာလုပ်ပါ ။
၁၈။ အရှိ နဲ့ အသိ ကိုက်အောင် လုပ်တာ ဝိပဿနာ။
၁၉။ ရှေ့စိတ်ကို နောက်စိတ်နဲ့ ရှု တာ ဝိပဿနာ ။
၂၀။ ရှေ့ နာမ်ကို နောက်ဉာဏ် နဲ့ ရှု တာ ဝိပဿနာ။
၂၁။ ရှေ့ အနေ ကို နောက်အနေ နဲ့ ရှုတာ ဝိပဿနာ။
၂၂။ အသေဖြစ်ပျက် ၊ အရှင်က မဂ် ၊ အပျက်နဲ့ မဂ် နဲ့ ကိုက်အောင် ရှုတာ ဝိပဿနာ။
၂၃။ ရှေ့ က ဖြစ်ပျက်၊ နောက်ကမဂ်နဲ့ ကိုက်အောင် ရှုတာ ဝိပဿနာ။
၂၄။ အသေ ကို အရှင်ကကြည့် နေတာ ဝိပဿနာဖြစ်မည် ။
၂၅။ အသေ က ဖြစ်-ပျက်၊ အရှင် က မဂ်၊ အပျက်နဲ့ မဂ် ကိုက်အောင် ကြည့်တာ ဝိပဿနာ။
၂၆။ သူများစိတ် အကဲမခတ်နှင့် ၊ မှားသော်ရှိ မှန်သော်ရှိ ကိုယ့်စိတ် ကို ကိုယ် အကဲခတ်တာမှအမှန်ရမည် ။
၂၇။ အလုပ်ကြည့်ချင် ရင် ခန္ဓာ ကြည့်၊ အလုပ်စဉ် ကြည့်ချင်ရင် မှတ်တမ်းကြည့် ။
၂၈။ ကိုယ့်စိတ် ဖြစ်တာ ကိုယ်မ သိတာ အရုပ် အဆိုးဆုံး ။
၂၉။ ကိုယ့်စိတ် ဖြစ်တာကိုယ် အကဲ ခတ်နိုင်မှ ဝိပဿနာ ။
၃၀။ ခန္ဓာ ကိုယ်ဟာ မွေးကတည်းက အသေဘက်ကို ပြေးနေတယ် ။
၃၁။ ဘယ် ဗေဒင်မှ မယုံကြနဲ့ ၊ ခန္ဓာက သူ့လမ်း သူ ပြေးနေတော့ မနေ့ ကထက် ယနေ့ သေဖို့တရက်ပိုနီးသွားပြီ ဆိုတာ သာ ယုံလိုက်ပါ ။
၃၂။ ခန္ဓာ ၏ဝတ္တရား က အသေရှာတာ ၊ ဉာဏ်၏ ဝတ္တရား က အသေရှောင်တာ ။
၃၃။ ခန္ဓာ က အပြေးသွားနေတော့ သေ ကဦး၍ ဉာဏ် က နောက်ကျသွားလိမ့်မည်။
၃၄။ အပြေး မရပ်တဲ့ ခန္ဓာ ကိုယ်၊ သုဿန်မရောက် ခင် မဂ္ဂင် အလုပ် မြန်မြန်လုပ်ပါ ။
၃၅။ အသက်တမ်း ခပ်တိုတိုလေးမှာ ခပ်ခိုခိုလုပ်နေမယ် ဆိုရင် အသေစောသွားရင် ကိုယ်ကျိုးနည်း လိမ့်မယ် ။
၃၆။ သာသနာ နဲ့ ကြုံမှ သစ္စာ လေးပါး တက်မြောက်ရေး တရားပေါ်တယ် ။
၃၇။ ကိစ္စ ဟူသရွေ့ သည် မဂ်တား ဖိုလ်တားလို့ မှတ်ပါ ။
၃၈။ ဒကာ - ဒကာမ တွေဟာ တဏှာ( လောဘ) ခိုင်းတာ ကို ကျွန်သားပေါက် ပီပီ လုပ်နေကြတာပဲ ။
၃၉။ တဏှာကို အဖော်မလုပ်နဲ့ ၊ ဉာဏ်ကို အဖော်လုပ်ပါ ။
၄၀။ အလကား နေသရွေ့ အအားနေသရွေ့ အမှားချည်းသာ လို့ မှတ်ပါ ။
၄၁။ ယခု သားနဲ့ သမီးနဲ့ ဆွေနဲ့ မျိုးနဲ့ ပစ္စည်း ဥစ္စာ တွေနဲ့ မသိ ပြုံး - ပြုံးနေသလောက်၊မသိပျော် ပျော် နေသလောက် နောင်သေခါနီး အိပ်ရာ ညောင်စောင်းမှာ မျက်ရည်ကျရပါလိမ့်မည် ။
၄၂။ ကိုယ့်ကိုကိုယ် သနားရင် ဝိပဿနာလုပ်ကြ၊ ကိုယ့်ကိုကိုယ်မသနား ရင်
သားနဲ့ မယား - အလုပ်လုပ် ကြ ။
၄၃။ အသက်ကြီးလေလေ ကံမွဲ - ဉာဏ်မွဲ လေလေ မှတ် ၊ ကံမွဲတာ အရေးမကြီး ၊ ဉာဏ်မွဲရင်နိဗ္ဗာန် မရောက်။
၄၄။ ကံကို ဉာဏ်က ဖြတ်မှ နိဗ္ဗာန် ရမှာ ၊ ဉာဏ်မပါရင် ကံက ချယ်လှယ်သွားလိမ့်မည်။
၄၅။ နိဗ္ဗာန် သည် ကံ၏အကျိုး မဟုတ် ၊ ဉာဏ် ၏အကျိုး ဖြစ်တယ် ။
၄၆။ လူပြော - သူပြောတွေ မယုံနဲ့ ၊ မိမိခန္ဓာ က ပြောတာကိုသာ အယုံကြီး ယုံလိုက်ပါ ။
၄၇။ ခန္ဓာကြီး ရဲ့ စွမ်းရည် သတ္တိ ပင်ကို သဘော က ဖြစ်မှု - ပျက်မှု ပဲ ရှိတယ် ။
၄၈။ ဝိပဿနာ က ခန္ဓာမလို ချင်အောင် ရှုတာ ။
၄၉။ ဒါန သီလ သည် ကိလေသာရောဂါ သက်သာရုံ ရမယ် ၊ ဝိပဿနာ အလုပ်ပါ လုပ်မှသာ ရောဂါ ပျောက်မည်။
၅၀။ အလုပ် တရား ဆိုတာ ခန္ဓာ အရှိနဲ့ ဉာဏ်အသိ နဲ့ ကိုက်အောင် လုပ်တာ ။
၅၁။ ခန္ဓာ နဲ့ ငါ နဲ့ မရောပါနဲ့ ။
၅၂။ တရားနာ တယ် ဆိုတာ ဒီ အချိန်မှာ မတရားအလုပ်ကို မလုပ်တဲ့ အချိန်ပဲ ။
၅၃။ ကြားတဲ့ တရားနဲ့ သိတဲ့ တရား နှစ်ခု ထပ်ရင် သောတာပန် တည်နိုင်တယ် ။

မိုးကုတ် ဩဝါဒ ကထာ ပြီး၏ ။

(အောင်ခြင်းရှစ်ပါးကဗျာများ)

2008-12-18T02:21:00.005+00:00

၁။ ခြောက်ဘုံပိုင်ငြား မာရ်နတ်သားမှာ၊
တစ်ထောင်လက်ရုံး သူ့ဘုန်းဖန်ကာ။
နတ်စစ်သည်ပေါင်း ထောင်သောင်းနှင့်သာ၊
ပလ္လင်တွက် စစ်ဖက်ပြိုင်လုလာ။
မြတ်ဘုရားက ဒါနညွှန်ရာ၊
မြေ လေခြိမ့်အုံး ထစ်ချုန်းလာကာ။
ကြောက်လန့်မာရ်ယုတ် နောက်ဆုတ်ပြေးခွာ၊
အခေါင်နင်း အောင်ခြင်း ပထမ မင်္ဂလာ။

၂။ မာရ်နတ်သားထက် ဆထက်လွန်ကာ၊
အာဠာဝက ကြမ်းလှမှန်စွာ။
ညဉ့်သုံးယံလုံး ပစ်မှုန်းလေကာ၊
လက်နက်စွဲ ပြိုင်ပွဲသူပြုလာ။
သည်းခံစိတ်သုံး ရွှင်ပြုံးကြည်သာ၊
မြတ်ဘုရားက ဆုံးမလေရာ။
ထံတော်ပါးသို့ ၀တ်တွားဝင်လာ၊
အခေါင်နင်း အောင်ခြင်း ဒုတိယ မင်္ဂလာ။

၃။ နာဠာဂီရိ မည်ရှိကြေငြာ၊
ကြမ်းတမ်းလေငြား ထင်ရှားမှန်စွာ။
မုန်ယိုယစ်မူး ရူးတဲ့အခါ၊
စေလွှတ်ငြား ဘုးရားထံသို့သာ။
ရာဟုလာသား မခြားမှန်စွာ၊
ဗုဒ္ဓမြတ်ဖျား ထားငြားမေတ္တာ။
ဆင်ပြောင်ကြီးက ဦးချနေရှာ၊
အခေါင်နင်း အောင်ခြင်း တတိယ မင်္ဂလာ။

၄။ အင်္ဂုလိမာ နာမကြေငြာ၊
လူမြင်ရာဖမ်း ကြမ်းတမ်းသတ်ကာ။
လက်ညိှုးပန်းများ ဆင်ထားမှန်စွာ၊
မြတ်ဘုရား သတ်ငြားသူလိုက်ရှာ။
လိုက်ရင်းတွေးဆ ဗုဒ္ဓထံမှာ၊
ခိုဝင်ဝပ်လျှိုး ရှိခိုးလေရာ။
ဧဟိဘိက္ခု ခေါ်ပြုမှန်စွာ၊
အခေါင်နင်း အောင်ခြင်း စတုတ္ထ မင်္ဂလာ။

၅။ စိဥ္စမာန အလှကညာ၊
ဆရာတိတ္ထိ စိတ်ရှိစေရာ။
ကိုယ်ဝန်ဟန်ထား သစ်သားကိုသာ၊
လူ့ဘုရား မုသားစွပ်စွဲလာ။
ငါနှင့်မယ်မင်း ဖြစ်ခြင်းကိုသာ၊
သိစေသားဟု ဘုရားမိန့်ရာ။
နတ်တို့ဖျက်ချ ရှက်ရစိဥ္စာ၊
အခေါင်နင်း အောင်ခြင်း ပဥ္စမ မင်္ဂလာ။

၆။ သစ္စကပရိဗိုဇ် သူမိုက်နာမာ၊
ပြိုင်သူဖက်ကင်း ထက်ခြင်းပညာ။
၀ါဒပြိုင်ပွဲ ဆင်နွဲမည်သာ၊
လူ့ဘုရား ထံပါးလာကြရှာ။
အနတ္တနှင့် အတ္တဆိုရာ၊
အနတ္တစစ် ဖြစ်တော့လေကာ။
ဆရာသစ္စက ရှုံးရသည်သာ၊
အခေါင်နင်း အောင်ခြင်း ဆဋ္ဌမ မင်္ဂလာ။

၇။ နနေ္ဒာပနန္ဒ နာမထန်စွာ၊
မြင်းမိုရ်တောင်လုံး ပတ်ဖုံးခွေကာ။
ကြောက်ဖွယ်ကြီးမား ပြုငြားမှန်စွာ၊
လူ့ဘုရား စော်ကားလေတော့တာ။
သားတော်ရှင်မောဂ် တင်မြှောက်ထိုခါ၊
နည်းလမ်းပြ၍ ဆုံးမစေရာ။
လူ့သွင်ဖန်ဆင်း ၀ပ်ဆင်းဝင်လာ၊
အခေါင်နင်း အောင်ခြင်း သတ္တမ မင်္ဂလာ။

၈။ ဗကမည်ငြား မှတ်သားဗြဟ္မာ၊
ပစျာန်ဘုံသား ဖြစ်ငြားမှန်စွာ။
စည်းစိမ်ယစ်မူး အထူးသာယာ၊
သူ့စိတ်ထဲ ဒါဘဲပြည်ခေမာ။
ဗြဟ္မာဘုံသို့ ကြွလို့မှန်စွာ၊
သင်္ခါရလမ်း မျှော်မှန်းစေရာ။
မှားတာဝန်ချ ဗကဗြဟ္မာ၊
အခေါင်နင်း အောင်ခြင်း အဋ္ဌမ မင်္ဂလာ။

အောင်စေကြာင်း ဆုတောင်းအောင်စေပါ။

(၃၈ ဖြာမင်္ဂလာတရားတော်ကဗျာများ)

2008-12-11T16:33:00.005+00:00

(၁)
လူမိုက်ဆိုလျှင်၊ ရှောင်သွေလဲွှလို့
မမီှဝဲနှင့်၊ ကင်းအောင်နေ။
ပညာရိှကို၊ အရှည်တွဲလို့
မီှဝဲဆည်းကပ်၊ နည်းယူစေ။
သုံးပါးရတနာ၊ မိဘများနှင့်
ဆရာသမားကို၊ ပူဇော်လေ။
ချမ်းသာကိုပေး၊ ဆက်ဆံရေး
မျှော်တွေးသုံးချက်ပေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၂)
ကုသိုလ်ပညာ၊ ဥစ္စာရဖို့
သင့်ရာဒေသ၊ အမြဲနေ။
ရှေးကတင်ကူး၊ ပြုခဲ့ဖူးသည့်
ကောင်းမှုအထူး၊ ရိှပါစေ။
မိမိကိုယ်ကို၊ ကောင်းအောင်ထိန်းလို့
မတိမ်းစေနှင့်၊ ဆောက်တည်လေ။
ဥစ္စာကိုပေး၊ နေထိုင်ရေး
မျှော်တွေးသုံးချက်ပေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၃)
တတ်ကောင်းတတ်ရာ၊ ဟူသမျှကို
ကြား, မြင်, သုတ၊ ရိှပါစေ။
အိုးအိမ်တည်ထောင်၊ ၀မ်းစာရေးနှင့်
အသက်မွေးဖို့၊ အတတ်သင်လေ။
လူနှင့်ဆိုင်ရာ၊ ကျင့်ဝတ််များကို
ကောင်းစွာသင်ကြား၊ နားလည်စေ။
မှန်ကန်ယဉ်ကျေး၊ ချိုသာအေး
ဆိုရေးတတ်ပါစေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၄)
မြင်းမိုရ်ရွှေတောင်၊ မိဘ, ကြွေးကို
ကောင်းစွာဆပ်ပေး၊ ၀တ်ကျေကျေ။
ကြွေးသစ်ချကာ၊ သားနှင့်မယားကို
မြှောက်စားချီးမြှင့်၊ ၀တ်ကုန်စေ။
အလုပ်တာဝန်၊ မလစ်ဟင်းနဲ့
အပြစ်ကင်းအောင်၊ လုပ်ပါလေ။
စည်းစိမ်ကိုပေး၊ ပြုစုရေး
မျှော်တွေးသုံးချက်ပေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၅)
သုံးတန်စေတနာ၊ ဖြူစင်လန်းလို့
ပေးကမ်းဝေငှ၊ လှူနိုင်စေ။
ကိုယ်နှုတ်စိတ်ကြံ၊ မမိုက်မှားန့ဲ
သုစရိုက်တရားကို၊ ကျင့်ပါလေ။
ဆွေမျိုးတွေကို၊ပစ်မထားနဲ့
သင်္ဂဟတရားနှင့်၊ ချီးမြှောက်လေ။
သန့်စင်ပြစ်မျိုး၊ လူထုအကျိုး
သည်ပိုးဆောင်ရွက်စေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၆)
မကောင်းမှုတွေ၊ ဟူသမျှကို
မတွေ့ခင်က၊ ရှောင်ကြဉ်လေ။
တွေ့ကြုံလာလျှင်၊ မလွန်ကျူးနဲ့
အထူးသဖြင့်၊ စောင့်စည်းနေ။
အရက်သေစာ၊ မသောက်စားနဲ့
မှောက်မှားတတ်တဲ့၊ အရာပေ။
လုပ်ကိုင်ပြောကြား၊ သတိထား
တရားမမေ့စေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၇)
အသက်ဂုဏ်ဝါ၊ ကိုယ့်ထက်ကြီးက
ဆည်းကပ် ခစား၊ ရိုသေလေ။
မာနတံခွန်၊ ဂုဏ်မကြွနှင့်
ကိုယ့်ကိုနိှမ့်ချ၊ အမြဲနေ။
လောဘအပို၊ လိုမလိုက်နဲ့
ကိုယ်ထိုက်တာနဲ့၊ ကျေနပ်လေ။
ကိုယ့်ပေါ်ပြုဖူး၊ သူ့ကျေးဇူး
အထူးသိတတ်စေ။
ကောင်းကျိုးဆင့်ပွား၊ မြတ်တရား
နာကြားမပြတ်ပေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၈)
စားဝတ်နေထိုင်၊ ရန်ခပ်သိမ်း
စိတ်ကိုချုပ်ထိန်း၊ သည်းခံလေ။
ကျိုးကြောင်းပြညွှန်၊ ဆုံးမစကားကို
ပြောကြားလာက၊ နာလွယ်စေ။
သူမြတ်ပုဂ္ဂိုလ်၊ ဟူသမျှကို
မကြာခဏ၊ တွေ့ဆုံလေ။
သဘာဝတွေး၊ မှန်ကန်ရေး
ဆွေးနွေးမပြတ်ပေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၉)
လောကီအာရုံ၊ ဇိမ်ယစ်မူးလို့
ပျော်မကြူးနဲ့၊ ခြိုးခြံလေ။
မေတ္တာဗြဟ္မစိုရ်၊ လက်ကိုင်သုံးလို့
သူမြတ်ကျင့်ထုံး၊ ယွင်းမသွေ။
လေးပါးသစ္စာ၊ ဉာဏ်မြင်ကြည့်လို့
အမှန်သိအောင်၊ ကြိုးစားလေ။
ဒုက္ခလွတ်ကင်း၊ နိဗ္ဗာန်ချဉ်း
အလင်းပေါက်နိုင်စေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၁၀)
ဆင်းရဲချမ်းသာ၊ သဘာဝကို
တွေ့ကြုံနေကျ၊ လူတိုင်းပေ။
ကောင်းဆိုးနှစ်တန်၊ အစုံတွဲလို့
တလှည့်စီလဲ၊ အမြဲနေ။
လောကဓံကြုံ၊ မဖြုံတမ်းပေါ့
မတုန်လှုပ်စမ်းနဲ့၊ စိတ်ခိုင်စေ။
သောကကိုထိန်း၊ ရမ္မက်သိမ်း
အေးငြိမ်းချမ်းသာနေ။
အဲဒါမှ(ဗုဒ္ဓဝါဒ)ကမ္ဘာ့မင်္ဂလာတွေ။

(၁၁)
သုံးဆယ့်ရှစ်ဖြာ၊ မင်္ဂလာကုံးကို
လိုက်နာကျင့်သုံး၊ ပန်သူတွေ။
စီးပွားချမ်းသာ၊ ကျက်သရေတိုးလို့
ကောင်းကျိုးစည်ပွင့်၊ တဝေဝေ။
ဘေးရန်ကင်းကွာ၊ ချစ်သူပေါလို့
စိတ်ရောကိုယ်ရော၊ ချမ်းသာမလေ။
ပြောဆိုကြံဆ၊ ဆောင်သမျှ
အောင်ရမည်ကိန်းသေ။
အဲဒါကြောင့် ပန်ကြ, ဆင်ကြ, (မင်္ဂလာ့) ပန်းခိုင်တွေ။

(၁၁)
သုံးဆယ့်ရှစ်ဖြာ၊ မင်္ဂလာတရားကို
ပျက်ပြားနေကြ၊ ကမ္ဘာ့မြေ။
ဟိုတိုင်း ဒီပြည်၊ ရန်စစ်ခင်းလို့
လူနှင့်လူချင်း၊ သတ်ကာနေ။
ငြိမ်းချမ်းပါစေ၊ အာသီသန့ဲ
စွမ်းနိုင်ရာက၊ ကူညီသလေ။
သုံးဆယ့်ရှစ်ပါး၊ မင်္ဂလာတရား
ရေးသားဖြန့်ကာဝေ။
အဖိုးတန်တ့ဲ(ဗုဒ္ဓဝါဒ)ကမ္ဘာက သိပါစေ။

(ကံသာလျှင်အမိ၊ကံသာလျှင်အဖ)

2008-12-10T21:53:00.008+00:00

၁။ သူ့ကိုသတ်ဖြတ်၊ သက်တိုတတ်၊ မသတ်အသက်ရှည်။
၂။ ညှဉ်းဆဲသူကား၊ အနာများ၊ သနားကျန်းမာသည်။
၃။ ဒေါသမီးလျှံ၊ အကျည်းတန်၊ သည်းခံ လှပသည်။
၄။ မနာလိုမှာ၊ ခြွေရံကွာ၊ ကြည်သာ ခြွေရံစည်။
၅။ မပေးလှူက၊ မွဲပြာကျ၊ လှူမှ ပေါကြွယ်သည်။
၆။ မရိုမသေ၊ မျိုးယုတ်ချေ၊ ရိုသေမျိုးမြတ်သည်။
၇။ မမေးမမြန်း၊ ဉာဏ်မြင်ကန်း၊ စုံစမ်းဉာဏ်ကြီးသည်။
၈။ ဆိုးတာပြုက၊ ဆိုးတာရ၊ ကောင်းမှကောင်းစားသည်။
၉။ ဆိုးကောင်းနှစ်တန်၊ကံစီမံ၊ ခံစံကြရသည်။

(သာသနာနှင့်တွေ့ရခိုက်)

2008-12-10T21:48:00.004+00:00

ဘုရားသာသနာတော်တွင်းမှာလူဖြစ်ပါလျက် ၀ိပဿနာကုသိုလ်မှရမသွားဘူးဆိုရင်
သာသနာတော်နှင့် တွေ့ရကျိုးမနပ်ဘူး။ ဘာကြောင့်လဲဆိုတော့
ဒါန၊ သီလ၊ သမထ ကုသိုလ်ဆိုတာတွေက သာသနာပမှာလည်းရှိတယ်။
၀ိပဿနာကတော့ သာသနာပမှာမရှိဘူး။---- ဒါ့ကြောင့်ပါပဲ။

(မဟာစည် ဆရာတော်ဘုရားကြီး)

(ဆုတောင်းတိုင်းပြည့်လိုသော်)

2008-12-10T21:42:00.004+00:00

ထိုထိုများစွာ၊ သတ္တဝါ၌၊
သဒ္ဓါ၊ သီလ၊ သုတ၊ စာဂ၊ ပညာတရား၊
ဤငါးပါးနှင့်၊ ပြည့်ငြားသူသာ၊
လိုရာရာလျှင်၊ ပတ္တနာဆုတောင်း၊
တောင်းတိုင်းမုချ၊ ရတက်စွတည်း။

(မဃဒေဝ)

(ဆုံးမစာ)

2008-12-10T21:39:00.002+00:00

မကောင်းမှုရှောင်၊ ကောင်းမှုဆောင်၊ ဖြူအောင်စိတ်ကိုထား၊
ဘုရားတိုင်းသာ၊ ဟောခဲ့တာ၊ သုံးဖြာ ဤစကား၊
ခုလည်းချမ်းသာ၊ နောင်ချမ်းသာ၊ ကျင့်ပါ ဤတရား။

(ပညာပြည့်ဝနှလုံးလှ)

2008-12-10T21:30:00.002+00:00

ပညာပြည့်ဝ၊ နှလုံးလှသော်
ကိစ္စကြီးငယ်၊ ဆောက်သဖွယ်လျှင်
ကျင်းကျယ်ထွင်းဖောက်
ဖြတ်တောက်လိုရာ၊ ပြီးနိုင်စွာ၏။

( မဃဒေဝ )

(ရှင်မဟာရဌသာရဆုံးမစာ- ၂)

2008-12-10T21:17:00.004+00:00

မှတ်ဖွယ်မှတ်ရာ၊ ထိုထိုစာကို
ရှာ၍မပျက်၊အိမ်တွင်ဖတ်
ဖတ်ပြန်သော်ကား၊ ဖတ်ဖန်များက
သားမယားပင်၊ သိမြင်ကင်းကွာ
မလိမ္မာလည်း၊ စာပေစကား
နေ့တိုင်းကြားက
ထူးခြားလိမ္မာ ရှိသည်သာတည်း။

(ရှင်မဟာရဋ္ဌသာရဆုံးမစာ)