PGBWU

EA-OU circular dt.12.02.2010

2011-06-25T18:57:00.000+05:30

பாண்டியன் கிராம வங்கி ஊழியர்கள் சங்கம்

பாண்டியன் கிராம வங்கி ஆபிஸர்ஸ் யூனியன்

விருதுநகர்

அருமைத் தோழர்களே!

வணக்கம்.

7.2.2010 அன்று கூட்டப்பட்ட நமது அவசரப் பொதுக்குழு ஒரு உற்சாகமான, தெளிந்த மனநிலையை நமக்கு தந்திருந்தது. கடந்த ஒரு மாதகாலம் இந்த வங்கியில் நடந்து வரும் நிகழ்வுகளைத் தொகுத்து, நமது வழிகளை ஆராயும் முயற்சியாக அமைந்தது.

ஒரே ஒருநாள் அவகாசத்தில் தோழர்களுக்கு தெரியப்படுத்தினோம். ஆணால் 250க்கும் மேற்பட்ட தோழர்கள் வந்திருந்து ஒற்றுமையையும், உறுதியையும் காட்டி இருக்கின்றனர். பாண்டியன் கிராம வங்கி அலுவலர்கள் சங்கத் தலைவர் முத்துவிஜயன் அவர்களும், உதவிப் பொதுச்செயலாளர் தோழர்.நரேன் அவர்களும் மற்றும் சில அலுவலர் சங்கத் தோழர்களும் நம் அவசரப் பொதுக்குழுவில் பங்கேற்று ஆதரவைக் காட்டினர். BEFIயின் தமிழ் மாநிலப் பொதுச் செயலாளர் தோழர்.கே.கிருஷ்ணன் வழிகாட்டி, திசைகளை தீர்மானிக்க வருகை தந்திருந்தார்.

சஸ்பென்ஷன்கள், உயர்நீதிமன்றத்தில் ஸ்டே ஆர்டர்கள், சார்ஜ் ஷீட்கள் சமபளப்பிடித்தங்கள் இவைகளைத் தொடர்ந்து ஐ.ஓ.பி நிர்வாகத்துடன் அகில இந்தியப் பொதுச்செயலாளர் தோழர் திலீப் குமார் முகர்ஜி அவர்களின் பேச்சுவார்த்தை என நடந்தவை யாவும் விளக்கப்பட்டது. வதந்திகளுக்கும், சந்தேகங்களுக்கும் இடமளிக்காமல் உண்மைகள் தெளிவுபடுத்தப்பபட்டன. ஒற்றுமையும், உறுதியுமே நமது பாதை என்பது தெளிவுபடுத்தப்பட்டது. மிக உற்சாகமான மனநிலையில் தோழர்கள் பொதுக்குழுவிலிருந்து, திரும்ப ஒரு அற்புதமான எழுச்சியாக இருந்தது.

இந்த நிலையில் 12.2.2010 அன்று ஐ.ஓ.பியின் பொதுமேலாளர் திரு மிஸ்ரா அவர்கள் நமது தலைமையலுவலகம் வருவதையறிந்து அவரை சந்திக்க அவகாசம் கேட்டோம். அன்று மாலை 4 மணிக்கு சந்திக்க வருமாறு அழைப்பு வந்தது. திரு.மிஸ்ரா அவர்களோடு நமது சேர்மன், இரு போதுமேலாளர்களும் பேச்சு வார்த்தையில் கலந்து கொண்டனர்.

பேச்சுவார்த்தை மிக சுமூகமாகவும், பரஸ்பரம் விஷயங்களை நேர்மையாகவும், வெளிப்படையாகவும் பகிர்ந்துகொள்வதாக இருந்தது என்பதை இங்கு குறிப்பிட வேண்டும். நாம் சில கோரிக்கைகளை முன்வைத்தோம். நிர்வாகமும் சில கோரிக்கைகளை முன் வைத்திருக்கிறது. இருதரப்பிலும் மீண்டுமொருமுறை உட்கார்ந்து, பேசி, இந்த வங்கியில் தொழில் அமைதியைக் கொண்டு வருவது எனவும், போர்க்கால நடவடிக்கைகளாக வங்கிக்காக அனைவரும் ஒன்றிணைந்து மார்ச் மாதத்தில் பணியாற்றுவது எனவும் நம்பிக்கைகள் தெரிவிக்கப்பட்டன.

பேச்சுவார்த்தையை உன்னிப்பாக கவனித்தும், அவ்வப்போது சில தெளிவுகளைத் தந்தும் உடன் இருந்த ஐ.ஓ.பி பொதுமேலாளர் திரு.மிஸ்ரா அவர்களின் பங்கு சிறப்பானது. வங்கியின் வணிகம் குறித்து இவ்வளவு கவலையும், அக்கறையோடும் கொண்டிருக்கும் உங்களால் வங்கியை நன்றாகக் கொண்டு வரமுடியும் எனத் தாம் நம்புவதாக நம்மிடம் தெரிவித்தார். சேர்மன் அவர்களும் “நல்ல potential உள்ள வங்கி இது. இவர்கள் நினைத்தால் இந்த வங்கி பல சிகரங்களைத் தொடும்” என்றார். நம்மை உற்சாகப்படுத்தும் complimentகள் இவை.

நமது இரு சங்கத்தின் முன்னணித்தலைவர்களும் அகில இந்திய மாநாட்டிற்காக இராஜஸ்தான் செல்வதால் அடுத்தக் கட்ட பேச்சுவார்த்தையை மார்ச் 1ம் தேதி வைத்துக்கொள்வது என குறிக்கப்பட்டு இருக்கிறது. மாநாட்டிற்கு செல்லும் தோழர்களின் லீவு சாங்ஷன் செய்யப்பட்டு, டெபுடேஷன் ஏற்பாடு செய்வதற்கும் பொதுமேலாளர்கள் தயாராக இருப்பத தெரிவித்தனர். மார்ச் 1ம் தேதி வரையிலும், சார்ஜ்ஷீட்களுக்கான பதிலைக் கொடுக்க வேண்டுமென நிர்ப்பந்திக்கவில்லை என்றும், பேசித் தீர்த்துக் கொள்ளலாம் என நம்பிக்கை தெரிவிக்கப்பட்டுள்ளது.

தோழர்களே! இது ஒரு நல்ல ஆரம்பமாகவும், நல்லெண்ண சமிக்ஞையாகவுமே நாம் புரிந்து கொள்கிறோம். நடப்பவை நன்றாகவே நடக்கும் என் நம்புகிறோம்.

அகில இந்திய மாநாட்டிற்குப் பின்னர் சந்திப்போம்…..

EA-OU circular dt.26.04.2010

2011-06-25T18:38:00.000+05:30

பாண்டியன் கிராம வங்கி ஊழியர் சங்கம்

(360/RMD) (இணைப்பு :AIRRBEA & BEFI)

பாண்டியன் கிராம வங்கி ஆபிஸர்ஸ் யூனியன்

(144/KMR) (இணைப்பு: AIRRBEA)

விருதுநகர்

அருமைத் தோழர்களே!

வணக்கம்.

சிறிது காலதாமதத்திற்கு பின்னர் உங்களை சந்திக்கிறோம்.

சதிகள், சூழ்ச்சிகள், வன்மங்கள் நிறைந்த காட்சிகள் அரங்கேறி இருக்கின்றன. ஊழியர்களுக்கும் அலுவலர்களுக்கும் ஆதரவாக இனி இங்கு குரல்கள் எழக் கூடாது என சிலர் கங்கணம் கட்டிக்கொண்டு களம் இறங்கி இருக்கின்றனர். நிர்வாகத்திற்கு எதிராக இனி கோரிக்கைகள் வைத்து போராடக் கூடாது என்று வியூகங்கள் வகுக்கப்பட்டு இருக்கின்றன. சூரியனை மறைத்துவிடலாம் என்னும் பேதமையையும், அஞ்ஞானத்தையும் என்னவென்பது? வரலாற்றிலிருந்து எந்தப் பாடத்தையும் படிக்காத அல்லது படிக்க விரும்பாத மூடர்களை என்ன செய்வது?

நிர்வாகத்தின் தயவில் குளிர் காய்வதும் காரியங்கள் சாதிப்பதும்தான் தொழிற்சங்கமென அவர்களே பீற்றிக்கொள்ளட்டும். ’சிங்கம் நாய் தரக்கொள்ளுமோ நல்லரசாட்சியை’ என்னும் மகாகவி பாரதியின் கவிதை வரிகளே அவர்களுக்கு தக்க பதிலாக ஒலிக்கட்டும்.

நாம் இங்கு ஊழியர்களுக்கும், அலுவலர்களுக்கும் மரியாதை வேண்டுமென்கிறோம். கிளைகளில் இருக்கும் கடும் வேலைப்பளுவை நிர்வாகம் புரிந்து கொள்ள வேண்டும் என்கிறோம். பெண் ஊழியர்களை மரியாதையுடன் நடத்த வேண்டும் என்கிறோம். தற்காலிகமாக பணிபுரியும் ஊழியர்களை நிரந்தரமாக்க வேண்டும் என்கிறோம். அனைவருக்கும் newspaper allowance வழங்கப்பட வேண்டும் என்கிறோம். புதிதாக பணிநியமனம் செய்யப்பட்ட ஊழியர்களுக்கும், அலுவலர்களுக்கும் உரிய சலுகைகள் வழங்கப்பட வேண்டும் என்கிறோம். வருடா வருடம் கொடுக்கப்பட்டு வந்த compliment தொடர்ந்து கொடுக்கப்பட வேண்டும் என்கிறோம். இது நிர்வாகத்திற்கு பிடிக்காமல் போகலாம். ஆனால் தொழிற்சங்கங்களுக்கு எப்படி பிடிக்காமல் போகும்?

இந்த கோரிக்கைகள் வைத்து போராடிய நம்மை நிர்வாகம் முடக்குவதற்கும், அடக்குவதற்கும் பெரு முயற்சிகள் செய்தது. அதை நம்மால் புரிந்துகொள்ள முடிகிறது. நிர்வாகத்தோடு தொழிற்சங்கங்கள்

என்ற பேரில் சிலர் கூட்டு சேர்ந்து கொண்டு, போராடுகிறவர்களுக்கு எதிராக கிளம்புவதை எப்படி புரிந்து கொள்வது? இந்த மண்ணில்தான் வீரபாண்டிய கட்ட பொம்மனும் இருந்தான், அவனைக் காட்டிக் கொடுத்த எட்டப்பனும் இருந்தான். இப்படித்தன் வரலாறு நமக்கு உண்மையையும், போலிகளையும் அடையாளம் காட்டுகிறது.

தங்கள் சுயநலத்திற்காக ஊழியர்களின் கோரிக்கைகளை புறந்தள்ளி விட்டு, நிர்வாகத்தை கட்டித் தழுவும் கருங்காலிகளும், கயவர்களும் வரலாற்றின் குப்பைத் தொட்டியில் வீசியெறியப்படுவார்கள் என்பதுதான் அனுபவம். அதுவும் இங்கு நடக்கும்.

போராடுகிறவர்களுக்கு சார்ஜ் ஷீட்களும், சஸ்பென்ஷன்களும் வழங்கும் நிர்வாகம், போராடாதவர்களுக்கு மெரிட் சர்டிபிகேட் என்று ஒன்றை வழங்குகிறது. அதை சிலர் பெருமிதத்தோடு பார்த்துக் கொண்டு இருக்கின்றனர். அது உழைக்கும் மக்கள் மீது பூசப்பட்ட சேறு என்பதையும், அது ஒரு அவமானச் சின்னம் என்பதையும் பலர் இங்கு புரிந்தே வைத்திருக்கின்றனர். இப்படி பாகுபடுத்துவது Industrial dispute Actக்கு எதிரான நடவடிக்கை என்பதை நிர்வாகம் அறியாமல் இருக்கலாம். ஆனால் நாம் அதை தெளிவுபடுத்தியே ஆக வேண்டி இருக்கிறது. இப்படியொரு இழிந்த காரியத்தைச் செய்த நிர்வாகத்தை prosecute செய்யவேனுமென நாம் ALCக்கு complaint செய்திருக்கிறோம். அதுகுறித்து நிர்வாகத்திற்கு விளக்கம் கேட்கப்பட்டு இருக்கிறது. நிர்வாகம் பதில் சொல்லியே ஆகவேண்டும்.

சார்ஜ் ஷீட்கள் கொடுக்கப்பட்டவர்களுக்கு இன்கிரிமெண்ட் வெட்டு இருக்குமென்றும், கடுமையான தண்டனை கொடுக்கப்படும் என்றும் சிலர் இங்கு பூச்சாண்டி காட்டிக்கொண்டு இருக்கின்றனர். எதோ நமக்கு staff service regulation பற்றி எதுவும் தெரியாது என்றும், Disciplinary Proceedings பற்றி ஞானம் இல்லாதது போலவும் சில கிணற்றுத் தவளைகள் கூப்பாடு போட்டுக்கொண்டு இருக்கின்றன. நமது பொறுமையையும், சகிப்புத்தன்மையையும் கண்டு தப்புக்கணக்கு போடுகின்றனர். வங்கி, அதன் நிலைமை கருதி BEFI மற்றும் AIRRBEA அறிவுறுத்தியதின் பேரிலேயே நாம் அமைதி காத்தோம். அதை சரியாக நிர்வாகம் புரிந்துகொள்ளுமானால் இந்த வங்கியில் தொடர்ந்து அமைதி நிலவும். பழிவாங்குவதற்கும், தொழிற்சங்கங்களை முடக்குவதற்கும் இதுதான் தருணம் என நிர்வாகமும், அதன் கைக்கூலிகளும் நினைத்தால், நாம் தொட்டால் சுடும் நெருப்பு என்பதை புரியவைக்க வேண்டி வரும்.

போராடுகிறவர்களைக் கொச்சைப்படுத்தி, நிர்வாகத்திற்கு வாலாக இருந்த சங்கத்தின் தலைமையொன்றிற்கு நிர்வாகம் சென்ற மாதத்தில் நன்றியாக சில மாறுதல்களை போட்டது. போராடியவர்களை எதிர்த்ததற்கு கிடைத்த அந்த எலும்புத்துண்டுகளைக் காட்டி, “பார்த்தீர்களா நிர்வாகம் நம்பக்கம்” என பீற்றிக்கொண்டு சிலர் தங்கள் சங்கத்திற்கு ஆள் பிடிக்க கிளம்பிவிட்டனர். வெட்கம் கெட்ட அவர்களுக்கு நம் தோழர்கள் பலர்

”சூடு சொரணை இருக்கிறதா உங்களுக்கு” என கேள்வி கேட்டு முகத்தில் அறைந்திருக்கின்றனர். அது எதுவுமற்ற ஜென்மம் ஒன்று “உங்கள் காலில் வேணுமானாலும் விழுகிறேன். கையெழுத்துப் போடுங்கள்” என கேட்டு கெஞ்சி இருக்கிறது. புதிதாக பணிக்குச் சேர்ந்த பெண் தோழர்கள் வீட்டிற்குச் சென்று, அவர்களை வற்புறுத்தி இருக்கிறார்கள். எல்லாம் இந்த நிர்வாகத்தின் பேரைச் சொல்லியே நடந்திருக்கிறது. அதையும் நாம் உரிய இடத்திற்கு தெரிவிக்க இருக்கிறோம்.

போராடிய காலத்தில் நம்மோடு இருந்த அலுவலர் சங்கத் தலைமை, நிர்வாகத்தின் தயவோடு இங்கு அகற்றப்பட்டு இருக்கிறது. அந்த சங்கத்தின் உள் முரண்பாடுகளுக்குள் நாம் ;போக வேண்டியதில்லை. ஆனால், அந்த சங்கத்திற்கு சம்பந்தமில்லாத ஒரு தாதா உள்ளே சென்று, நம்மோடு போராட்டத்தில் கூட இருந்த தலைவர்களில் ஒருவரை நாற்காலியோடு மிதித்துத் தள்ளி அடித்து தள்ளியிருக்கிறான். அவனுடைய கார் டிரைவரும் நம் அலுவலரை அடித்து இருக்கிறான். தன்னுடைய சீட்டுக் கம்பெனியில் பணம் வாங்கிக் கட்டாதவர்களை ஒரு கந்துவட்டிக்காரன் இப்படி அடித்து நொறுக்குவதை நாம் கேள்விப்பட்டு இருக்கிறோம். ஆனால் ஒரு சக வங்கி அலுவலர் மீது எப்படி காட்டுமிராண்டித்தனமான தாக்குதலை தொடுக்க முடியும்? அவனுக்கு அந்த அதிகாரத்தை யார் கொடுத்தது? இந்த வங்கியில் ஒரு வன்முறைக் கலாச்சாரம் விதைக்கப்படுகிறது என்றே நாம் இதனைப் புரிந்துகொள்கிறோம். எல்லாம் தெரிந்த நிர்வாகம் இங்கு கடைவாயில் புன்னகை பூக்க பார்த்துக் கொண்டு இருக்கிறது. தோழர்கள் அனைவரிடமும் இதனை அம்பலப்படுத்தி, எச்சரிக்கை செய்யப் போகிறோம்.

அந்த அலுவலர் சங்கத் தலைமையை ஆட்டுவிக்கும், அல்லது அதனை வழிகாட்டும் அமைப்பாக இந்த வங்கியில் உள்ள பெரும்பாலான Regional managerகள் இருக்கின்றனர். நிர்வாகத்தின் ஒரு பகுதியாக இருக்கும் அவர்கள் ஒரு சங்கத்தை வழிநடத்துபவர்களாக எப்படி இருக்க முடியும்? நிர்வாகம் சங்க நடவடிக்கைகளுக்குள் அத்துமீறி கை நுழைப்பதாகவே இதனைப் பார்க்க வேண்டி இருக்கிறது. அவர்கள் அனைவரும் Regional manager பதவியில் மேலும் நீட்டிக்கும் தகுதியை இழந்துவிட்டனர். அவர்கள் குறித்து உரிய இடத்தில் விரைவில் பிரச்சினை எழுப்ப இருக்கிறோம்.

தோழர்களே!

சகல அநியாயங்களையும், அநீதிகளையும் இந்த நிர்வாகமே முன்னின்று நடத்துகிறது. அதனுடைய எல்லா விளைவுகளுக்கும் நிர்வாகமே பொறுப்பேற்க வேண்டுமென எச்சரிக்கிறோம்.

வங்கியில் இன்று நிலவும் முக்கியப் பிரச்சினை குறித்து அக்கறை கொள்ளாமல், அவைகளைத் தீர்ப்பதற்கான வழிமுறைகளை ஆராயாமல், தொழிற்சங்க முரண்பாடுகளுக்குள் மூக்கை நுழைத்துக் கொண்டு இருக்கிறது நிர்வாகம் என குற்றஞ்சாட்டுகிறோம். பழிவாங்குவதை மட்டுமே சர்வகாலமும் யோசிக்கிற நிர்வாகம், வங்கியின் எதிர்காலத்தை கேள்விக்குறியாக்குகிறது என பகிரங்கமாக அறிவிக்கிறோம்.

AJL க்கு அநியாயமாக வட்டி போட்டுக்கொண்டு இருக்கிறது நம் கம்ப்யூட்டர்கள். அந்த programme- இல் பெரும் தவறு இருக்கிறது. இதனைச் சுட்டிகாட்டி, மூன்று வாரங்களாகின்றன. இன்றுவரை அது தீர்க்கப்படவில்லை. வாடிக்கையாளர்களை வஞ்சித்து நம் லாபத்தை கூட்டிக் காண்பிப்பது சரியல்ல. எல்லா கிளைகளிலும் இதே கதிதான். Manualஆக வட்டிக் கணக்கு எத்தனை நாட்கள் போட முடியும். பல சிரமங்களை கிளைகளில் நம் தோழர்கள் சந்திக்கின்றனர். பல வாடிக்கையாளர்களை இழக்க வேண்டிய நிலைமைக்கு வங்கி தள்ளப்பட்டு இருக்கிறது. இதுகுறித்து, வங்கியைப் பற்றி சதா நேரமும் கவலைப்படுபவர்கள் வாயைத் திறக்கக் காணோம். நாம் இதனை, வங்கியின் எதிகாலம் குறித்து பிரச்சினையாகப் பார்க்கிறோம். இதனை உடனடியாக நிர்வாகம் சரிசெய்ய வேண்டுமென்று கோருகிறோம். இதுவரை, ஏற்பட்ட இழப்புகளுக்கும், முறைகேடுகளுக்கும் நிர்வாகமே பொறுப்பேறக் வேண்டுமென வலியுறுத்துகிறோம்.

ஒரு முறையோ, தெளிவோ, தேவையான சூழலோ இல்லாமல் நிர்வாகம் கணிணி மயமாக்குவதை நாம் கண்டிக்கிறோம். ALPMலேயே இங்கு பல பிரச்சினைகளை தினமும் கிளைகள் எதிர்கொண்டு வருகின்றன. அவைகளை சரிசெய்யாமல் நிர்வாகம் வேகவேகமாக TBA முறைக்கு கிளைகளை கொண்டு சென்றது. சர்வர்களில் ஏராளமான பிரச்சினைகளை இப்போது தினமும் சந்திக்கிறோம். அதற்குரிய infrastructure ஐ உருவாக்காமல், திடுமென இப்போது CBS என்கிறது. ஒரு முறையிலிருந்து இன்னொரு முறைக்குக் கொண்டு செல்ல்லும்போது அதன் பிரச்சினைகளை ஆராயாமல் செல்வது பெரும் குழப்பங்களையே உருவாக்கும். வங்கியின் அன்றாடப்பணிகள் சம்பந்தப்பட்ட ஒரு விஷயத்தில் நிர்வாகம் எடுத்தோம், கவிழ்த்தோம் என்றே நடந்து கொள்கிறது. இந்த நிலைமை நீடிக்குமானால், வங்கி மிகப்பெரிய சோதனைகளை விரைவில் சந்திக்க நேரிடும் என எச்சரிக்கிறோம்.

தோழர்களே!

நாம் நேர்மையானவர்கள்.

நாம் உண்மையானவர்கள்.

நாம் ஊழியர்களின், அலுவலர்களின் பிரச்சினைகளை பேசுகிரவர்கள்.

நாம் வங்கியின் பிரச்சினைகளைப் பேசுகிறவர்கள்.

நாம் மான, ரோஷமிக்க மனிதர்கள்.

மீண்டும் சந்திப்போம்.

airrbea-tn circular,dt 01.11.2010

2011-06-25T17:24:00.000+05:30

அன்பிற்கினிய தோழர்களே!

வணக்கம். 1978ஆம் ஆண்டு முதல் கிராம வங்கி ஊழியர்களின் உரிமைகளுக்காக போராட துவங்கிய நமது அகில இந்திய சங்கத்தின் போராட்ட பயணம் இன்றும் தொய்வில்லாமல் தொடர்ந்து கொண்டிருக்கிறது. நமது இந்த நீண்ட நெடிய போராட்ட பயணம் நமக்கு உணர்த்துவதெல்லாம் ஒன்றே ஒன்று தான்......

நியாயமான கோரிக்கைகளுக்காக சரியான திசையில் எடுத்துச்செல்லப்படும் எந்த ஒரு போராட்டமும் பலனற்று போய்விடாது. வேண்டுமானால் நமது இறுதி இலக்கை அடைய சிறிது கால தாமதமாகலாம். ஆனால் சமரசமற்ற உறுதியோடு நமக்கான இலக்கை நோக்கி நாம் போராட்ட பாதையில் முன்னேறும் போது வெற்றிகள் நம் வசமாவது நிச்சயம்.

உதாரணமாக.....

1980ஆம் ஆண்டு “சம வேலைக்கு சம ஊதியம்” வேண்டும் என்ற கோரிக்கையோடு நாம் இயக்கம் துவங்கினோம். பத்து ஆண்டுகளுக்கும் மேலாக தொடர்ந்த நமது இடைவிடாத போராட்டத்தின் விளைவாகவே 1990 ஆம் ஆண்டு ஏப்ரல்30 அன்று கிராம வங்கி ஊழியர்களுக்காக AWARD அறிவிக்கப்பட்டது. இத்தகைய நமது பழைய வரலாறுகள் தான் தற்போதைய போராட்டக் களங்களில் நாம் தளர்ச்சியின்றி முன்னேற நமக்கு உத்வேகம் அளித்து வருகிறது. நமது நீண்ட நாள் கோரிக்கையான பென்ஷன் திட்டமும் தற்போது நமது கைகெட்டும் தூரத்தில் வந்துவிட்டது என்பதனையும் இங்கு மகிழ்ச்சியோடு பகிர்ந்து கொள்ள விரும்புகிறோம். இந்தச் சூழலில் நாம் பென்ஷனுக்காக கடந்த காலங்களில் நடத்திய போராட்டங்களையும், எடுத்துக் கொண்ட முயற்சிகளையும் இங்கு நினைவு கூறுவது அவசியமாகிறது.....

பென்ஷன் ஒரு நெடிய போராட்டம்:

வங்கித்துறைக்கு பென்ஷன் திட்டம் அறிமுகமானது 1993-95ஆம் ஆண்டுகளில் தான். அப்போது மூன்று லட்சத்திற்கும் அதிகமான வங்கி ஊழியர்கள் அத்திட்டத்தை தேர்ந்தெடுக்கவில்லை. மாறாக அவர்கள் வருங்கால வைப்பு நிதி (PROVIDENT FUND) திட்டத்தையே சிறந்ததாக கருதி தேர்ந்தெடுத்தார்கள். ஏனென்றால் அப்போது வங்கிகளில் சேமிப்புக்கான வட்டிவிகிதங்கள் 14% வரை இருந்தது. அதாவது பணி நிறைவின் போது வருங்கால வைப்பு நிதியில் இருந்து மொத்தமாக கிடைக்க கூடிய பணத்தை வங்கிகளில் முதலீடு செய்தால் அதன் மூலம் கிடைக்க கூடிய வட்டி என்பது பென்ஷனாக அப்போது வழங்கப்பட்டு வந்த தொகையை விட அதிகாமானதாக இருந்ததே அதற்கு காரணம்.

நமது இந்திய ஆட்சியாளர்களின் புதிய பொருளாதார கொள்கைகளாலும், அதிமேதாவித்தனமான பொருளாதார திட்டங்களாலும் வங்கியின் வட்டி விகிதங்கள் யாரும் யூகிக்க கூட இல்லாத அளவிற்கு 5.5% வரை அதலபாதாளத்திற்கு வீழ்ந்தது. பென்ஷன் திட்டத்தை விடுத்து வருங்கால வைப்பு நிதி திட்டத்தை தேர்ந்தெடுத்தவர்கள் செய்வதறியாது திகைத்து போனார்கள். அதனால் வருங்கால வைப்பு நிதி திட்டத்தை தேர்வு செய்தவர்களுக்கு இரண்டாம் வாய்ப்பாக பென்ஷன் திட்டத்தையே மறுதேர்வு செய்வதற்கு மீண்டும் ஒரு வாய்ப்பு வழங்கக்கோரி 2nd option for pension என்னும் முழக்கத்தை முதன்முதலாக BEFI தொடுத்தது. ரிசர்வ் வங்கி, எல்.ஐ.சி போன்ற நிதித்துறை நிறுவனங்களில் இது போன்ற இரண்டாம் வாய்ப்புகள் பலமுறை வழங்கப்பட்டுள்ளதையும் BEFI- அப்போது சுட்டிக்காட்டியது.

ஆனால் BEFI-யின் இந்த கோரிக்கையை IBA ஏற்க மறுத்து விட்டது. வேறு எந்த சங்கத்தின் ஆதரவுமின்றி இதற்காக தனித்து இயக்கங்களை BEFI தொடர்ந்து நடத்தி வந்தது. இந்தச்சூழலில் BEFI அல்லாத மாற்று சங்க உறுப்பினர்களுக்கும் இக்கோரிக்கையின் அவசியத்தை உணரத்துவங்கினார்கள்.மேலும் ஊழியர்கள் மட்டத்தில் இக்கோரிக்கை குறித்து இருந்த ஆதரவும்,ஈடுபாடும் மாற்று சங்கத்தலைமைகளையும் யோசிக்க வைத்தது. தமது ஊழியர்களின் உணர்வுகளுக்கு மதிப்பளிக்க வேண்டிய நிர்பந்தம் மாற்று சங்க தலைவர்களுக்கு உண்டானது. இதன்விளைவாக ஐந்து ஊழியர் சங்கங்களையும், நான்கு அலுவலர் சங்கங்களையும் உள்ளடக்கிய UFBU 2nd option for pension என்னும் கோரிக்கையை தனது பிரதான கோரிக்கையாக அறிவித்து போராடத் துவங்கியது.

மிக நீண்ட தொடர் போராட்டத்திற்கு பிறகு கடந்த ஏப்ரல் மாதம் 2nd option for pension என்னும் கோரிக்கையை பொதுத்துறை வங்கி ஊழியர்கள் வென்றெடுத்தார்கள். கடந்த பத்து வருடங்களாக “PARITY OF PENSION BENEFIT" என்னும் கோரிக்கையை பிரதானமாக வைத்து போராடி வரும் நமது அகில இந்திய சங்கத்திற்கு பொதுத்துறை வங்கி ஊழியர்களின் இந்த வெற்றி புதிய நம்பிக்கையையும், உற்சாகத்தையும் அளிப்பதாக அமைந்தது.

பென்ஷனுக்காக AIRRBEA-தூவிய விதைகள்:

AIRRBEA-வின் சார்பில் பென்ஷனுக்கான முதல் வழக்கு கடந்த 2003ஆம் ஆண்டு கர்நாடகா உயர்நீதிமன்றத்தில் தாக்கல் செய்யப்பட்டது.

மாண்புமிகு மாநில நிதியமைச்சர் திரு.பவன் குமார் பன்சால் மூலம் மத்திய அரசிடம் நமது பென்ஷன் கோரிக்கை குறித்து பல கட்ட பேச்சுவார்த்தைகளை நடத்தியுள்ளோம்.

பாராளுமன்ற உறுப்பினர் திரு.பசுதேவ் ஆச்சார்யா மூலம் மாண்புமிகு பிரதமர்.மன்மோகன் சிங்கிடம் நமது அகில இந்திய பொதுச்செயலாளர் தோழர்.D.K.முகர்ஜி அவர்கள் நேரடியாக நமது பென்ஷன் குறித்து கலந்துரையாடி உள்ளார்.

நிதித்துறை செயலாளர் திரு.அருண் ராமநாதனிடம் பலமுறை நமது பென்ஷன் கோரிக்கை குறித்து கலந்துறையாடி உள்ளார் நமது அகில இந்திய பொதுச்செயலாளர்.தோழர்.D.K.முகர்ஜி அவர்கள்.

AIRRBEA-வின் சார்பாக பென்ஷன் குறித்து ஆகும் நிதிச்சுமையை கணக்கீடு செய்ய “Actuary" நியமித்து நிதிச்சுமைக்கான அறிக்கையும் சமர்பித்துள்ளோம்.

நமது தொடர் நடவடிக்கைகளின் விளைவாக மத்திய அரசாங்கம் கிராம வங்கி ஊழியர்களின் பென்ஷன் குறித்து ஆகும் நிதிச்சுமையை கணக்கீடு செய்ய “Acturay" நியமித்ததை மாண்புமிகு மாநில நிதியமைச்சர் திரு.பவன் குமார் பன்சால் அவர்கள் கர்நாடகா மாநிலம் பெல்லாரியில் வைத்து நடைபெற்ற நமது அகில இந்திய சங்கத்தின் உறுப்புச் சங்கமான கர்நாடகா ஊழியர் சம்மேளனம் நடத்திய பொதுக்குழு கூட்டத்தில் அறிவித்தார்.

பென்ஷன் கோரிக்கைகாக டெல்லியில் வைத்து பலமுறை தர்ணா போராட்டங்கள் நடத்தியுள்ளோம்.

நூற்றிற்கும் அதிகமான பாராளுமன்ற உறுப்பினர்கள் மூலம் பிரதமரிடமும்,மத்திய நிதியமைச்சரிடமும் நமது பென்ஷன் கோரிக்கைகாக சிபாரிசு செய்யவைத்தும் இரு அவைகளிலும் கேள்வி நேரத்து போதும் சிறப்பு கவன ஈர்ப்பு தீர்மானங்கள் மூலமாகவும் நமது கோரிக்கையை வலியுறுத்த செய்துள்ளோம்.

AIRRBEA-வின் உறுப்பினர்கள் அனைவரையும் பென்ஷன் கோரிக்கைகாக மத்திய நிதியமைச்சருக்கு கடிதம் எழுத வைத்துள்ளோம்.

கொல்கத்தாவிலும், டெல்லியிலுமாக தொடர்ச்சியாக ஏழுமுறை மாண்புமிகு.மத்திய நிதியமைச்சர் திரு.பிரணாப் முகர்ஜியுடன் நமது அகில இந்திய பொதுச்செயலாளர். தோழர்.D.K.முகர்ஜி அவர்களும் நமது அகில இந்திய தலைவர்களும் நமது இந்த கோரிக்கை குறித்து பேசியுள்ளனர்.

திரு.பாசுதேவ் ஆச்சார்யா,தாபன் சென்,மைனுல் ஹசன்,பிருந்தா காரத் மற்றும் சீத்தாராம் யெச்சூரி ஆகியோர்களை வைத்து பாராளுமன்ற கேள்வி நேரத்தில் சமீபத்தில் மீண்டுமொரு முறை நமது பென்ஷன் கோரிக்கைகாக கேள்விகள் எழச்செய்தோம்.

தோழர்களே!

இப்படியாக கடந்த 2000ஆம் ஆண்டு முதல் “PARITY OF PENSION" என்பதை நமது பிரதான கோரிக்கையாக வைத்து பல கட்ட போராட்டங்களையும், தொடர் பேச்சுவார்த்தைகளையும் மத்திய அரசிடம் நடத்தி வருகிறோம். தற்போது இந்த நெடிய போராட்ட பயணம் வெற்றி சிகரத்தை அடையும் தூரத்தை நெருங்கிவிட்டது. நம் கோரிக்கைகளுக்கான விடியலோடு வருகிற புத்தாண்டை நாம் எதிர்கொள்வோம் என நம்புவோம்.அது AIRRBEA-வின் மகுடத்திற்கு மேலும் ஒரு இறகாய் அமையும் என ஆவலோடு விழித்திருப்போம்.....

EA சர்க்குலர் 19.10.2010

2011-06-21T08:23:00.000+05:30

அருமைத் தோழர்களே!

வணக்கம்.

புதிய ஊதிய விகிதம் அமல்படுத்தப்பட்டு, தோழர்கள் பெற்று இருப்பீர்கள். கணக்கிடுவதிலும், சில அலவன்சுகளை சேர்ப்பதிலும் இன்னும் குறைகள் இருக்கின்றன. அவைகள் குறித்தும், டிரான்ஸ்பர்கள் குறித்தும் வங்கிச் சேர்மன் அவர்களோடு 12.10.2010 அன்று பேசினோம்.

1.சஸ்பெண்ட் செய்யப்பட்டவர்கள், ஓய்வு பெற்றவர்கள், இறந்த ஊழியர்களுக்கான அரியர்ஸ் தொகையை உடனே வழங்குமாறு கேட்டுக்கொண்டோம். அதற்கான பணி துவங்கிவிட்டதாகவும், விரைவில் கிடைக்குமெனவும் சொல்லப்பட்டது.

2. கிளரிக்கல் தோழர்களுக்கு கம்ப்யூட்டர் அலவன்சு சேர்க்கப்பட்டு இருக்கிறது. ஆனால் கடந்த நான்கு மாதங்களில் இருந்து, அந்த அலவன்சில் ஆயிரம் ருபாயை, அடிப்படை ஊதியத்தில் இணைத்து கணக்கிடவில்லை. அதை உடனடியாக சரிசெய்து தருவதாக சொல்லப்பட்டு இருக்கிறது.

3. கிளரிக்கல் தோழர்களுக்கு Transport allowance புதிய ஊதிய விகிதப்படி பதினைந்து வருடம் பணி முடித்திருந்தால் ரூ.225ம், அதற்கு மேல் என்றால் ரூ.275ம் கொடுக்கப்பட வேண்டும். நமது வங்கியில் ரூ.105 மட்டுமே இன்னமும் கொடுத்திருக்கிறார்கள். இதனை பேசியபோது, ஐ.ஓ.பிக்கு எழுதியிருப்பதாக நிர்வாகம் சொன்னது. ஏற்கனவே கொடுக்கப்பட்டு வந்த அலவன்சிற்கான தொகையை உயர்த்துவதற்குமா ஐ.ஓ.பியிடம் கேட்க வேண்டும் என கேட்டோம். இதே ஐ.ஓ.பியின் ஸ்பான்ஸரில் இயங்கும் இன்னொரு கிராம வங்கியான ‘நிலாஞ்ச்சல் கிராம வங்கி’யில் இந்த அலவன்சு உயர்த்தப்பட்டு இருப்பதையும் அதற்கான சர்க்குலரையும் காட்டினோம். தாங்கள் ‘ஐ.ஓ.பிக்கு எழுதி இருக்கிறோம்’ என்பதையே பொதுமேலாளர் திரும்பத் திரும்ப சொல்லிக்கொண்டு இருந்தார். இதுதான் நிர்வாகம் ஊழியர்கள் நலனில் காட்டும் அக்கறைக்கும், முனைப்பிற்குமான சரியான உதாரணம். (விஷயம் இப்படி இருக்கையில் இந்த அலவன்சை ரூ.205/- எனக் குறிப்பிட்டு OA சர்க்குலர் வெளியிட்டு இருக்கிறது. ஒரு விஷயம் குறித்து ஞானம் இருந்தால் பேசுங்கள் அல்லது வாயை மூடிக்கொண்டு இருங்கள் என அவர்களுக்குத் தெரிவித்துக் கொள்கிறோம்.)

4. எல்லோருக்கும் Income Tax பிடிக்கப்பட்டு இருப்பதையும், பலருக்கு அது தேவையில்லை என்பதையும் சுட்டிக்காட்டினோம். புதிய பணி நியமனம் செய்யப்பட்டவர்களுக்கு பிடிக்கப்பட்ட IIncome Taxஐத் திரும்பத் தருவதாக நிர்வாகம் ஒப்புக்கொண்டுள்ளது.

5.Medical reimbursement, surrender leave போன்றவற்றில், புதிய ஊதிய விகிதப்படி differenceஐத் தருமாறு கோரிக்கை வைத்தோம். அதையும் நிர்வாகம் செய்து தருவதாக ஒப்புக்கொண்டுள்ளது.

6.பதவி உயர்வு, புதிய பணி நியமனம் குறித்துப் பேசினோம். கிளைகளில் ஆள் பற்றாக்குறையால் மிகுந்த சிரமம் ஏற்படுவதைத் தெரிவித்தோம். மிக விரைவில் அதற்கான அறிவிப்புகள் வெளியாகும் என தெரிவிக்கப்பட்டது.

7. எந்தவிதக் காரணங்களும் தெரிவிக்காமலேயே இங்கு சிலருக்கு இன்கிரிமெண்ட் கொடுக்கப்படாமல் வருடக்கணக்கில் நிறுத்தி வைக்கப்பட்டு இருக்கிறது. அது விதிகளுக்கும் முரணானது என்றும், நியாயமற்றது எனவும் தெரிவித்தோம். இதனை ஒப்புக்கொண்ட சேர்மன அவர்கள், அதனை நிவர்த்தி செய்வதாக உறுதியளித்தார்.

8. நிர்வாகம் சமீபத்தில் வெளியிட்டு இருக்கும் மாறுதல் உத்தரவுகள் குறித்துப் பேசினோம். நம் தரப்பில் பாதிப்பிற்குள்ளானவர்களுக்கு சரி செய்து தர வேண்டும் என வலியுறுத்தினோம். ‘அவர்களை ஜாய்ன் பண்ணச் சொல்லுங்கள். பிறகு அவர்களுக்கும் சேர்த்து லிஸ்ட் கொடுங்கள், பேசுவோம்” என்றார் சேர்மன். நாம் நமது அதிருப்தியை தெரிவித்தோம்.

இங்கு PGBEA சார்பில் சில விஷயங்களைச் சொல்ல வேண்டி இருக்கிறது. பொது மாறுதல்கள் குறித்து நாம் பேசிய போதெல்லாம், “புதிய பணி நியமனம், பதவி உயர்வுகள் வரும் போது, சேர்த்து மொத்தமாக போடுகிறோம்” என்று சொன்ன நிர்வாகம் இப்போது திடுமென மாறுதல்களை போட்டு இருக்கிறது. எந்த விதிகளும் இல்லாமல் excess, short என்னும் நிர்வாகப் பார்வையில் மட்டுமே இந்த மாறுதல்கள் போடப்பட்டு இருக்கின்றன. அதனால் இந்த டிரான்ஸ்பரில் பாதிப்புகள் மட்டுமே இருக்கின்றன.

சென்ற பிப்ரவரியில், சென்ற சேர்மன் நமது சங்கத்தின் மேல் உள்ள காழ்ப்புணர்ச்சி காரணமாகவும், ஒருதலைப்பட்சமாகவும், நம் சங்கம் அல்லாத 33 பேருக்கு மாறுதல்கள் செய்து கொடுத்தார். நாம் ALC முன்பு ‘இது unfair labour policy' என ஒரு தொழில்தாவா ஏற்படுத்தினோம். விசாரித்த ALC அவர்கள், “இது முறையற்றது. தண்டனைக்குரியது” என நிர்வாகத்திடம் எடுத்துரைத்தார். “நாங்கள் சரி செய்து தருகிறோம். PGBEA உறுப்பினர்களுக்கும் phased mannerல் சாதகமான டிரான்ஸ்பர்கள் செய்து கொடுக்கிறோம்” என ALCயிடம் நிர்வாகம் சொன்னது. ஆனால் இங்கு நடப்பது என்ன? phased mannerல் பாதகமான மாறுதல்கள். இதுதான் தங்கள் தவறை சரி செய்யும் முறையா?

நிர்வாகத்திடம் திரும்பவும் சொல்லிக் கொள்கிறோம். “கடந்தகாலத் தவறுகளை சரி செய்வதுதான் எதிர்காலப் பணிகளில் முதன்மையானது”.

‘System and Procedure' குறித்து PGBOU சார்பில், நடத்தப்பட்ட பயிற்சிப்பட்டறை மிகுந்த உபயோகமானதாகவும், எழுச்சிமிக்கதாகவும் இருந்தது. கலந்துகொண்ட சிறப்பு விருந்தினர்கள் அனைவருமே அவர்களுக்குரிய தலைப்பில் அருமையாக விஷயங்களை எடுத்துரைத்தார்கள். நாம் என்னென்ன தவறுகளை, நமது பணிகளில் செய்து கொண்டு இருக்கிறோம், அது நாளைக்கு எவ்வளவு ஆபத்தாக முடியும் என்பதை அறிந்துகொள்ள முடிந்தது. ஆரோக்கியமான விவாதங்கள் நடைபெற்றன. இதுபோல் தொடர்ந்து நடத்தப்பட வேண்டும் என்பதே அனைவரின் எதிர்பார்ப்பாகவும் இருந்தது.

மாறிவரும் புதிய பணிச்சூழலில் அதற்கான தேவைகளும் அதிகமாகவே இருக்கிறது. உரிய ஆவணங்கள் பெறாமல் Customer Id உருவாக்க வேண்டாம் எனவும், TXN post செய்யாமல் jewel loan கொடுக்க வேண்டாம் எனவும் நாம் சர்க்குலரில் தெரிவித்திருந்தோம். ‘இது businessஐப் பாதிக்கும்’ என மாற்றுச்சங்கத்தினர் சர்க்குலர் வெளியிட்டு, ‘நாம் வங்கிக்கு எதிரானவர்கள்’ போல சித்திரம் தீட்ட முனைகிறார்கள். ‘நாங்கள் என்ன சொன்னாலும் எதிர்ப்பது’ என்கிற மனோநிலையிலிருந்து முதலில் விடுபடுங்கள் என்பதே இந்நேரம் அவர்களுக்கு நாம் விடுக்கும் வேண்டுகோள். நம்மைத் தற்காத்துக் கொள்வது முதலில் முக்கியமானது. “நான் பிஸினஸ் வேண்டுமென்றுதான் சொல்வேன். அதற்காக rules and regulationsஐ மீறுவது சரியல்ல. அது மிக முக்கியம்” என பேச்சு வார்த்தையில் நமது சேர்மன் அவர்களே ஒருமுறை தெளிவாகச் சொன்னார்கள். அதைத்தான் நாங்களும் சொல்கிறோம்.

நிர்வாகம் தன் வசதிக்கேற்ப சி.பி.எஸ் நியதிகளை மாற்றியும், வளைத்தும், கேஷியரே கவுண்டரில் உட்கார்ந்து போஸ்டிங்கும் செய்ய வேண்டும் எனச் சொல்கிறது. அதெல்லாம் சாத்தியமற்ற, அதீதக் கற்பனையாகவே முடியும். கேஷியரின் தலையில் எல்லாவற்றையும் சுமத்துவது பெரும் ஆபத்துக்களில்தான் முடியும். தேவையான ஆட்கள் எடுக்க வேண்டும் என்பதே சரியான நிலைபாடாக இருக்க முடியும். சி.பி.எஸ் என்று மாறி வரும் சூழலுக்கேற்ப, நம்மை நாம் தயார் படுத்திக்கொள்ள வேண்டியிருக்கிறது. அதிலுள்ள பிரச்சினைகளையும், பொறுப்புகளையும் அறிய நவமபர் 14ம் தேதி மதுரையிலும், நவமபர் 21ம் தேதி திருநெல்வேலியிலும் PBBEA சார்பில் கூட்டங்கள் நடத்த திட்டமிட்டிருக்கிறது. இந்தியன் ஓவர்சீஸ் வங்கி உட்பட வணிக வங்கியில் பணிபுரியும் முக்கிய தோழர்கள் நம்மோடு தங்கள் அனுபவங்களை பகிர்ந்து கொள்வார்கள்.

தோழமையுடன்

EA-OU circular dt.9.9.2010

2011-06-21T08:22:00.000+05:30

பாண்டியன் கிராம வங்கி ஊழியர்கள் சங்கம்
பாண்டியன் கிராம வங்கி ஆபிஸர்ஸ் யூனியன்

சுற்றறிக்கை எண்: நாள்: 9.9.2010

அருமைத் தோழர்களே!

வணக்கம்.

உணவு தானியக் கிடங்குகளில் தேங்கி, அழுகிப்போகும், தானியங்களைக்கூட ஏழை எளிய மக்களுக்குக் கொடுக்க முடியாது என கொள்கை பேசும், பொருளாதார மேதைதான் நமது பிரதமர். இவரது தலைமையிலான மத்திய அரசின் மக்கள் விரோத கொள்கைகளுக்கு எதிராக கடும் எதிர்ப்பாக செப்டம்பர் 7ம் தேதி வேலைநிறுத்தம் நாடு முழுவதும் வெற்றிகரமாக நடந்து முடிந்திருக்கிறது. அதில் நாமும் நமது கடமையை நேர்மையாக, நிமிர்ந்து நின்று ஆற்றியிருக்கிறோம். இந்த அகில இந்திய வேலை நிறுத்தத்தில், கிளைகளை எப்படியும் திறக்க வைக்க வேண்டுமென்று நிர்வாகம் எவ்வளவு வேகமாகவும், தீவீரமாகவும் செயல்பட்டு இருக்கிறது! இதே வேகத்தை ஊழியர் நலன்களை காட்ட வேண்டும் என்றுதான் நாங்கள் எதிர்பார்க்கிறோம். இத்தனைக்கும் நடுவில் நெஞ்சுரத்தோடு வேலைநிறுத்தத்தில் பங்கேற்ற அனைத்துத் தோழர்களுக்கும் வீர வணக்கம்.

சென்ற மாதமே ஊதிய உயர்வும், அரியர்ஸும் இருக்குமென எதிர்பார்த்து ஏமாந்தோம். அரியர்ஸையாவது உடனையாகக் கொடுங்கள் என நிர்வாகத்திடம் கேட்டுக்கொண்டு இருக்கிறோம். நிர்வாகம் ஒப்புக்கொண்டுள்ளது. இந்த ஊதிய உயர்வில், கிளரிக்கல் தோழர்களுக்கு கொடுக்கப்பட வேண்டிய கம்ப்யூட்டர் ஆபரேட்டிங் அலவன்சு ரூ.1500/-. இதில் ரு.1000/- அடிப்படைச் சம்பளத்தில் இணைக்கப்பட்டும், மீதி ரூ.500/- தனியாகவும் கொடுக்கப்பட வேண்டும். நமக்கு ரூபாய்.1000/- அடிப்படைச் சம்பளத்தில் இணைக்கப்பட்டு, மீதி ரூ.500/-ஐ நிறுத்திவிடவும் யோசிக்கப்பட்டு இருக்கிறது. நாம் உடனடியாக ஐ.ஓ.பி நிர்வாகத்துடன் பேசி, இதனைச் சரி செய்திருக்கிறோம். இப்போது வணிக வங்கிகளில் வழங்கப்படுவது போலவே நமக்கும் கம்ப்யூட்டர் அலவன்சு வழங்க ஒப்புக்கொண்டுள்ளது.

நாளுக்கு நாள் பணிச்சுமை கூடிக்கொண்டு இருக்கிறது. ஆள் பற்றாக்குறையும் கடுமையாக இருக்கிறது. இதற்கும் நடுவே நாம் பெரும்பிரயத்தனங்கள் செய்து வங்கியின் தொழிலை அபிவிருத்தி செய்து வருகிறோம். இந்த வங்கியின் மீது உள்ள பிரியத்தாலும், இந்த வேலையில் உள்ள ஈடுபாட்டினாலும் வங்கியின் விதிகளை மீறியும் வாடிக்கையாளர் சேவை செய்வதைப் பார்க்க முடிகிறது. அவர்கள் அனைவரையும் இந்த நேரத்தில் எச்சரிக்கிறோம். நாளை, விதிகளை மீறுவது நமது வேலைக்கும், எதிர்காலத்துக்கும் உலை வைக்கக்கூடும். அப்போது அவர்கள் பக்கம் நாங்கள் நிற்க முடியாது என நிர்வாகத்தரப்பில் தெளிவாகச் சொல்லி விட்டார்கள். எனவே, இருக்கும் விதிகளைக் கடைப்படித்துக்கொண்டே, நாம் இந்த வங்கிக்கும், வாடிக்கையாளருக்கும் சேவை செய்ய வேண்டுமென்று உரிமையுடன் வேண்டிக்கொள்கிறோம்.

இப்போது புதிதாக CBS சிஸ்டம் அறிமுகமாகிக்கொண்டு இருக்கிறது. அதிலும், அறிந்தும் அறியாமலும் பல விதிகள் மீறி வேலை பார்க்கப்படுகிறது. நகைக்கடனை ஆபிஸர் ‘பாஸ்’ பண்ணி அனுப்பும் முன்னரே, கேஷ் கவுண்டருக்கு வவுச்சர்கள் அனுப்பப்படுகின்றன. ஏனென்றால் கஸ்டமர் ஐ.டி உருவாகி, கடன் விபரங்களை கம்ப்யூட்டரில் நிரப்ப நேரமாகிறதாம். அதுவரை வாடிக்கையாளர்களை நிற்க வைக்கக் கூடாதாம். இப்படிச் செய்வதில் இருக்கிற ஆர்வத்தை புரிந்துகொள்கிறோம். ஆனால் இனியும் இப்படியான வழக்கத்தை மேற்கொள்ள வேண்டாமென்று தோழர்களை எச்சரிக்கிறோம். மோசமான விளைவுகளுக்கு இட்டுச் செல்லும் ஆபத்துக்கள் அவைகளில் இருக்கின்றன என எச்சரிக்கிறோம்.

அதுபோலவே, கஸ்டமர் ஐ.டி என்பது மிக முக்கியமான விபரங்கள் அடங்கியது. வேகமாகவோ, எளிதாகவோ நிரப்ப வேண்டுமென்று தவறான தகவல்களால் நிரப்பி விடாதீர்கள். சம்பந்தப்பட்ட கணக்கில் எதாவது பிரச்சினையென்றால், அப்போது அந்த கஸ்டமர் ஐ.டியில் இருக்கும் தவறான தகவல்கள் நம் கழுத்தை நெறிக்கும். வேண்டிய விபரங்கள் அனைத்தையும் ஆதாரங்களுடன் வாடிக்கையாளர்களிடம் பெற்று, சரியான தகவல்களோடு கஸ்டமர் ஐ.டியை உருவாக்குங்கள்.

இந்த இடத்தில் நிர்வாகத்துக்கும் ஒரு கோரிக்கை வைக்கிறோம். ஒரு கணக்கு தொடங்க, புதிய சிஸ்டத்தில் பத்திலிருந்து பதினைந்து நிமிடங்கள் ஆகின்றன. இன்று இருக்கும் அவசர உலகத்தில், தொழில் போட்டிகளில் இது அதிகப்படியான காலம். எளிய முறைகளை ஆராய்ந்து உருவாக்கித் தரவேண்டுமென கேட்டுக் கொள்கிறோம்.

இன்னும் பல முக்கியமான விஷயங்கள் இருக்கின்றன. மாறிக்கொண்டு இருக்கும் இந்த பணிச்சூழலில், எப்படி நாம் பணியாற்றுவது, எப்படி நம்மை பாதுகாத்துக்கொள்வது என நாம் அனைவரும் உட்கார்ந்து பேச வேண்டி இருக்கிறது. அதற்கான கூட்டங்கள் ஏற்பாடு செய்யப்பட்டு வருகின்றன. இடங்களும், தேதிகளும் விரைவில் அறிவிக்கிறோம்.

தோழமையுடன்

EA-OU circular dt.28.8.2010

2011-06-21T08:21:00.000+05:30

பாண்டியன் கிராம வங்கி ஊழியர்கள் சங்கம்
(360/RMD) (இணைப்பு: AIRRBEA & BEFI)
பாண்டியன் கிராம வங்கி ஆபிஸர்ஸ் யூனியன்
(144/KMR ) (இணைப்பு: AIRRBEA)

சுற்றறிக்கை எண்: நாள்: 28.8.2010

அருமைத்தோழர்களே!

வணக்கம்.

இந்த தேசத்தின் மக்கள் மிகப்பெரும் நெருக்கடிக்குள்ளாக்கப்பட்டு வருகின்றனர். பெரும் முதலாளிகளுக்கு மட்டுமே ஆதரவாகச் செயல்பட்டு வரும் இந்த அரசின் கொள்கைகளும், செயல்பாடுகளும் சாதாரண மக்களின் அன்றாட வாழ்க்கையை சோதனையும், வேதனையும் நிறைந்ததாகக் கொண்டு வருகிறது.

அத்தியாவசியப் பொருட்களின் விலை தாறுமாறாய் உயர்ந்திருக்கிறது. ஊதிய உயர்வு என்று நாம் கொள்ளும் உற்சாகத்தையெல்லாம் இந்த விலைவாசி உயர்வு கொள்ளையடித்து விடும்.

கல்வி, வேலைவாய்ப்புகள் எல்லாம் சுருங்கிப்போக, பெருவாரியான இளைஞர்கள் திசையறியாது நிற்கின்றனர். அவர்களை அரசு கண்கொண்டு பார்ப்பதில்லை.

அணி திரட்டப்பட்டாத பல கோடி தொழிலாளர்களின் நாளைய வாழ்க்கை குறித்து எந்த நம்பிக்கையும் இல்லாமல் இருக்கிறார்கள். அவர்கள் அரசுக்கு ஒரு பொருட்டே இல்லை.

நம்மைச் சுற்றிலும் நெருப்பு வைக்கப்பட்டு இருக்கும்போது, நமக்கும் இதற்கும் சம்பந்தமில்லாதது போல வேடிக்கை பார்க்க முடியாது. இந்த சமூகத்தோடு, அதன் ஒவ்வொரு அசைவுகளோடும் நாம் பின்னிப் பிணைந்திருப்பவர்கள். நமது தலையீட்டை உறுதியாக்க வேண்டும்.

இந்த புரிதல்களோடுதான் வரும் செப்டம்பர் 7ம் தேதி ஒருநாள் அகில இந்திய வேலை நிறுத்தத்திற்கு சிஐடியு, ஏஐடியுசி, எல்பிஎப், பிஎம்எஸ், ஐஎன்டியுசி, எச்எம்எஸ், ஏஐயுடியுசி, டியுசிசி, ஏஐசிசிடியு, யுடியுசி போன்ற மத்திய தொழிற்சங்கங்கள் அறைகூவல் விடுத்துள்ளன. வங்கித்துறையில் AIBEA AIBOA, BEFI, AIRRBEAவும் இந்த வேலைநிறுத்தத்தில் கலந்துகொள்வதென தீர்மானித்திருக்கின்றன.

ஆக, நாம் வரும் செப்டம்பர் 7ம் தேதி ஒருநாள் வேலைநிறுத்தத்தில் கீழ்க்கண்ட கோரிக்கைகளை முன்னிறுத்தி பங்கேற்கிறோம்.

1.விலைவாசி உயர்வை கட்டுப்படுத்து.
2.புதிய வேலை வாய்ப்புகளையும், பணிப்பாதுகாப்பையும் உருவாக்கு.
3.பொதுத்துறைகளில் பணிகளை காண்ட்ராகட் முறையில் நிறைவேற்றுவதை நிறுத்து.
4.தொழிலாளர் நலச் சட்டங்களை அதன் அர்த்தங்களோடு உறுதியாக அமல்படுத்து.
5.அணி திரட்டப்படாத தொழிலாளர்களுக்கு சமூக பாதுகாப்பை உருவாக்கு.
6.பொதுத்துறை வங்கிகளையும், நிறுவனங்களையும் தனியார் மயமாக்குவதை நிறுத்து.

இந்தக் கோரிக்கைகளோடு நமது இன்னொரு கோரிக்கையும் இணைக்கப்பட்டு இருக்கிறது. ச்மீபத்தில் பெரும் தனியார் நிறுவனங்களுக்கு கிராம வங்கிகளை, அப்படியே தாரை வார்க்க மத்திய அரசு ஏற்பாடு செய்து வருவதாக அறிகிறோம். அதற்கான திட்ட நகலை ரிசர்வ் வங்கி வெளியிட்டு இருக்கிறது. அதை எதிர்க்கிற நமது கோரிக்கையையும் இணைத்துக் கொண்டு நாம் வேலை நிறுத்தத்தில் பங்கேற்கிறோம்.

இவை அனைத்துமே நமது வாழ்க்கையோடு நேரடியாக சம்பந்தப்பட்டவை. நம்மையும், நமது தேசத்தையும் காக்கும் மகத்தான காரியமே இந்த வேலை நிறுத்தம். நாம் அனைவரும் முழு ஈடுபாட்டுடன், பெருமிதத்துடன் இந்த வேலை நிறுத்தத்தில் பங்கேற்போம்.

தோழர்களே!
நமது இரு சங்கங்கள் மட்டுமே வேலைநிறுத்தத்தில் கலந்துகொள்ள இருப்பதால், நிர்வாகம் கிளைகளில் பணி நடக்க மாற்று ஏற்பாடு செய்யுமானால், சாவியை ஒப்படைத்து விடுங்கள். ஒரே கிளையில் இருக்கும் joint custodian இருவருக்குமே அதிகார பூர்வமான/எழுத்துபூர்வமான மாற்று ஏற்பாடு செய்யப்படுமானால், நகைகளை சரிபார்த்து சாவியை ஒப்படையுங்கள். அதுபோல, வேலைநிறுத்தம் முடிந்த பிறகு நகைகளை சரிபார்த்து சாவியை வாங்குங்கள். இந்த முறை பின்பற்றுவதற்கான அவகாசம் தரப்படவில்லையெனில், சாவியோடு வேலைநிறுத்ததில் பங்கேற்கலாம் தோழர்கள்.

நம் எதிர்காலம் காக்கும் இந்த வேலைநிறுத்தத்தை மகத்தான வெற்றியாக்குவோம்.

000

தொடர்ந்து நிர்வாகத்தோடு பலமுறை ஊதிய உயர்வு அமலாக்கம் குறித்துப் பேசினோம். ‘நிச்சயம் இந்த மாதம் புதிய சம்பளமும், அரியர்ஸும் வழங்கப்பட்டு விடும்’ என நிர்வாகம் உறுதி சொன்னது. பல கிராம வங்கிகளில் உடனடியாக வழங்கப்பட்டு விட்டதையும், அதற்கான ஆணைகளையும் எடுத்துரைத்தோம். ‘எங்கள் மேல் நம்பிக்கையில்லையா?’ என்ற பதில்களே வந்தன. ஆனால் இப்போது இந்த மாதம் புதிய ஊதியம் இல்லையென தகவல்கள் வருகின்றன. காரணங்கள் என்னவாயிருப்பினும், இந்த காலதாமதம் ஒப்புக்கொள்ள முடியாதது. வருத்தப்படுகிறோம். ஊழியர்களும், அலுவலர்களும் அதிருப்தியான பணிச்சூழலையே இதனால் உணர்வார்கள் என்பதை தவிர்க்கமுடியாமல் சொல்லிக்கொள்கிறோம்.

தோழமையுடன்

EA-OU circular dt.11.08.2010

2011-06-21T08:19:00.000+05:30

பாண்டியன் கிராம வங்கி ஊழியர்கள் சங்கம்
(360/RMD) ( இணைப்பு :AIRRBEA & BEFI)
பாண்டியன் கிராம வங்கி ஆபிஸர்ஸ் யூனியன்
(144/KMR) ((இணைப்பு: AIRRBEA)

அருமைத்தோழர்களே!

வணக்கம்.

சங்கம் தொடர்பான செய்திகளையும், தகவல்களையும் அவ்வப்போது நமது முன்னணித் தோழர்களுக்கு குறுஞ்செய்திகள் மூலம் தெரியப்படுத்தி இருக்கிறோம். அவர்கள் மூலமாக அனைத்துத் தோழர்களும் அறிந்து கொண்டு இருப்பீர்கள். சில முக்கியமான விஷயங்களை விரிவாக இப்போது பகிர்ந்து கொள்கிறோம்.

ஒன்பதாவது இருதரப்பு ஒப்பந்தப்படி, வணிக வங்கிக்கு இணையான ஊதியத்தை கிராம வங்கி ஊழியர்களுக்கு வழங்கிட மாண்புமிகு மத்திய நிதி அமைச்சர் பிரணாப் முகர்ஜி அவர்கள் அரசாணைக்கு ஒப்புதலளித்த இரண்டு நாட்களுக்குள் அந்த ஆணையின் நகலை நமது அகில இந்திய சங்கம் AIRRBEA பெற்று அனுப்பி வைத்தது. நாமும் நம் தோழர்களுக்கு அதனை அனுப்பி இருந்தோம். அரியஸ் தவணை முறையில் இல்லாமல், முழுவதும் நம் ஊதியத்தோடு பெற்றிடும் வகையில் அரசாணை இருப்பது சிறப்புக்குரிய விஷயம். ஆனால், இதர அலவன்சுகளுக்கு ஸ்பான்ஸர் வங்கியை கேட்க வேண்டும் என்னும் மோசமான ஷரத்து இன்னும் தொடர்கிறது. அதனை எதிர்ப்பது என்று முடிவு செய்திருக்கிறோம்.

இதனைத் தொடர்ந்து, நாம் நமது சேர்மன் அவர்களிடம் சென்ற வெள்ளிக்கிழமை பேச்சுவார்த்தை நடத்தினோம். மிக சுமூகமாகவும், பயனுள்ள வகையிலும் பேச்சு வார்த்தை இருந்தது.

1. இந்த மாதமே புதிய சம்பளமும், அரியர்ஸ் தொகையும் ஊழியர்களுக்கும், அலுவலர்களுக்கும் வழங்கப்பட்டுவிடும் என உறுதிபட தெரிவித்தார்.

2. புதிய பிரமோஷன் பாலிசிபடிதான் பதவி உயர்வு இருக்கும், இரண்டு மூன்று வாரங்களே காலதாமதாகும் என தெரிவித்தார். புதிய பதவி உயர்வுக் கொள்கையையும், சர்வீஸ் ரெகுலேஷனையும் சர்க்குலராக வெளியிட்டு, அதன்படி ஒவ்வொரு நிலையிலும் காலியிடங்களை அறிவித்து, பிரமோஷன் நடத்தப்படும்.

3.நம் தோழர்களுக்கு கொடுக்கப்பட்ட சார்ஜ்ஷீட்களை சுமுகமாக, எந்தவித மேல் நடவடிக்கை இல்லாமல் முடித்துத் தருவதாகச் சொன்னவர், இடைப்பட்ட காலத்தில் வேலைநிறுத்தம் தவிர்த்த விடுமுறைகளுக்கு சம்பளவெட்டு செய்திருப்பதையும் விலக்கி, அதற்குரிய ஊதியத்தைத் தரவும் சம்மதித்திருக்கிறார்.

4.பிரமோஷனையொட்டி அனைத்து நிலைகளிலும் மாறுதல்கள் இருக்கும் எனவும், அதற்கிடையில் உடல்நலம், அத்தியாவசியம் முன்னிறுத்தி சில மாறுதல்களைச் செய்து தரவும் நிர்வாகம் ஒப்புக்கொண்டுள்ளது.

மேலும், வங்கியின் பிஸினஸை நாம் அனைவரும் ஒன்றினைந்து மேம்படுத்த வேண்டுமென சேர்மன அவர்கள் வலியுறுத்தினார். நாம் நிச்சயம் ஒத்துழைப்பதாக தெரிவித்திருக்கிறோம்.

தோழர்களே!
புதிய பிரமோஷன் பாலிசி படி அனைத்து நிலைகளிலும் கூடுதல் காலியிடங்கள் இருக்கும்.

மெஸஞ்சர்த் தோழர்களுக்கு இதுவரை, மொத்தமுள்ள காலியிடங்களில் பத்து சதவீதத்திற்கு மட்டுமே பிரமோஷன் அறிவிக்கப்பட்டு, வழங்கப்பட்டு வந்தது. புதிய பாலிசி பிரகாரம் 25 சதவீதம் பிரமோஷன் வழங்கப்பட வேண்டும்.

ஸ்கேல் நான்கு நிலையில், பதினான்கு அலுவலர்க்கு ஸ்கேல் மூன்று நிலையிலிருந்து பிரமோஷம் வழங்கப்பட வேண்டி இருப்பதால், அந்தக் காலியிடங்கள் ஸ்கேல் மூன்று நிலைக்கான காலியிடங்களில் கூடும். அதுவே ஸ்கேல் இரண்டு மற்றும் ஒன்று நிலைகளிலும் தொடரும்.

இதுகுறித்த, சுருக்கமான தெளிவான விதிகள் சுற்றறிக்கையோடு இணைக்கப்படுகிறது. மேலதிக விபரங்களுக்கு தோழர்கள் சங்கத் தலைமையினை தொடர்பு கொள்ள வேண்டுகிறோம்.

புதிய சம்பள விகிதத்தில், நமது அடிப்படைச் சம்பளத்திற்கு இணையான புதிய சம்பளத்தின் அட்டவனையும் இந்த சர்க்குலருடன் இணைக்கப்படுகிறது. அதற்குரிய DA, HRA, Transportation Allowance -ஐ தோழர்கள் கணக்கிட்டுக் கொள்ளுங்கள்.

தோழர்களே!

23.7.2010 அன்று மதுரையில் நம் இரு சங்கங்களும் இனைந்து நடத்திய தொழிற்சங்க கருத்தரங்கம் மிக எழுச்சியானதாகவும், உனர்வு பூர்வமாகவும் இருந்தது. இருநூற்றுக்கும் மேற்பட்ட தோழர்கள் கலந்துகொண்டனர். நம் ஒற்றுமையையும், உறுதியையும் வலுப்படுத்துவதாக இருந்தது.

தொடர்ந்து பேசுவோம். இயங்குவோம்.

தோழமையுடன்