قصاقيص صور

فوتوغرافيا سهر

noreply@blogger.com (Mostafa Al Sayed) — Fri, 07 Sep 2012 23:47:00 +0000

سهر فوتوجرافى ، او فوتوغرافا سهر ، كنت عامل اللوجو ده من فترة بس كسلت انزله هنا ع البلوج
هو ماخبيش عليكم فيه حاجات تقليدية كتير بالنسبة للمصورين
زي اللوجو التقليدى بتاع الكاميرا

كمان انا ماكدبش عليكم انا باميل اكتر لاستخدام اللغة العربية ، و مش مستعد انى اكتب حمادة فوتوجرافى و الكلام الفاضى ده

فبالتالى دورت ع النت شوية و شفت تصميم لـ nikas culinaria ألهمنى بالرمز اللى هاستخدمه فى الصورة و هو العدسة بتاعت الكاميرا
و كلمه فوتوجرافى اللى مكانتش نازلة من زورى شفت ان المصرى بتاعها هي فوتوغرافيا ، و دى الكلمة المصرية المرادفة لها .

و بس كده يا سيدى ، و اللوجو طبعا ً معجبش صاحبته عشان بالعربى ، بس انا فخور بيه !

عن الكروت الشخصية

noreply@blogger.com (Mostafa Al Sayed) — Fri, 31 Aug 2012 18:34:00 +0000

الكروت الشخصية او business card زي ما الخواجات بيقولو عليه ، بتبقى حاجة عادية جدا بتساعدك ان الناس اللى حواليك تقدر انت مين و تبنى على اساس ده طريقة تعامله معاك .
بس كلنا عندنا آلاف الكروت الشخصية ف بيتنا لناس كتتير منعرفهمش او نعرفهم ، و غالبا بنرمى كروت كتير منهم ، فعشان تعمل كارت يبقى مميز و الناس تبقى عايزة تحتفظ بيه لازم يبقى فكرته مبتكرة ، مثلا ً فى مصر غالبا لما حد يحب يعمل حاجة زي كده ، بيقوم عامل فكرة اتهرست ف اربعين فيلم قبل كده و هي الكارت اللى فيه عدسة مكبرة
زي ده كده :

المهم يعنى ، اتطلب مننا كروت شخصية لاحد شركات التسويق العقارى ، و عندنا شوية نقط كده هنقلك عليها لو التزمت بيها هتعمل كروت احسن .

1- ألتزم بالهوية البصرية للشركة : يعنى لازم وانت بتعمل الكروت تبقى ملتزم باللون الرئيس للشركة و اللوجو بتاع الشركة ، و متنساش تحط البيانات الاساسية بتاعت الشركة زي الموقع الاليكترونى كده

2- فكر خارج الصندوق : هو تقريبا انك تفكر برة الصندوق دها اهم حاجة فى التصميم بشكل عام مش فى الكروت بس ، يعنى الكارت طول عمرنا بنشوفه بالعرض ، مفيهاش حاجة لو عملت انت تصميم لكارت بالطول ، مانت عشان تعمل حاجة تتحفر فى الذهن لازم تبقى مختلفة ، و ابداعية بنفس الوقت .

3- اعرف انت بتصمم لايه : اهم حاجة انك تعرف التصميم اللى انت بتعمله ده بخصوص ايه ، يعنى لو بتصمم لشركة موبايل مثلا ، فانت ممكن تحط الكارت على شكل شريحة محمول يعنى مش مستطيل تماما ً لكن فيه حته مشطوفة على الحرف كده ، لو بتصمم لشركة كمبيوتر ممكن تعمل الكارت على شكل شاشة كمبيوتر مثلا ً و هكذا ، و احنا هنا بنصمم لشركة تسويق عقارى فعملنا احد نماذج الكروت على شكل كوخ او بيت .

4- متعملش زحمة : الكارت الشخصى مهم انه يكون واضح و صريح ده كارت لمين ، و وظيفته ايه فلو حضرتك بقى لسة مصمم مبتدئ شوية و فرحان بامكانيات الفوتوشوب الخارقة بالنسبة لك ، فياريت متعملش زحمة فى الكارت ، يعنى مينفعش مصلا تحط فى الكارت على جنب شوية صور لحاجات ليها علاقة بالشركة ، زي التصميم الجامد ده اللى لقيته ع النت .

ده مثال للتصميم السئ

5- متعملش دربكة فى الخلفية : اه مهم ان الكلام يبقى واضح جدا و لو التصميم اخدك لعمل دربكة فى الخلفية فعليك و على تحديد الكلام stroke و يا ريت يبقى لونه ابيض ، عشان الابيض بيبرز الكلام اللى جواه .

6- متحطش صورة : بص بقى لو العميل عايز يحط صورته فى الكارت ، حاول تقنعه ان ده غلط ، و المفروض ان الكارت ميبقاش فيه شكل الشخص صاحبه لأنه مش بطاقة ID ده كارت يعنى المفروض لما الناس تشوفه تعرف مكانتك من اسمك و وظيفتك و تحكم عليك على اساسها ، انما لما بتحط صورتك فانت بتدى للناس فرصة انهم يحكمو على مظهرك و خلاص .
7- شوف الخواجات عملوها ازاي : كتير من المصممين الاجانب بيحط تصاميم ابداعية على النت ، و عشان كده لو عايز ألهام ، تدخل على جوجل و تعمل بحث على اللى انت عايزة بالانجليزى ، لأن للاسف حتى المصممين العرب المبدعين بيحطو تصميماتهم بالانجليزى ، لما هتدور على افكار ع النت هتلاقى نفسك بتلاقى افكار جديدة خاصة بيك .
و اخيرا ً بقى دى الكروت اللى احنا صممناها للشركة؛ اضغط على الصور لتكبيرها !

اعلان تويت ندوة كلام عن الدستور

noreply@blogger.com (Mostafa Al Sayed) — Sun, 15 Apr 2012 06:08:00 +0000

عملنا تصميم لتويت ندوة بحزب التحالف الشعبى الاشتراكى ، لو حد داخل عشان تفاصيل الايفينت مش عشان التصميم ذاته يعنى فده لينك الايفينت على الفيس بوك
http://www.facebook.com/events/268844896539166
هي هتبقى يوم الاتنين الساعة 8

قتل الناس بقى مجرد حوادث عادية!

noreply@blogger.com (Mostafa Al Sayed) — Fri, 03 Feb 2012 02:51:00 +0000

اولا عزاء واجب لجنود الالتراس البواسل اللى فى الحقيقة كانو عصب الثورة و جيشها المنظم ،
ثانيا ً كل الخزى و العار لطراطير المجلس العسكرى ، تعليق المشير حسين طنطاوى عن مقتل اكتر من 70 شاب ان دى حجات عادية و بتحصل فى كل الدول .
ثالثاً لا مجال للمقارنة ما بين سيدنا عمر و بين القتلة و ولاد الوسخة معتادى الاجرام ، بس الهدف اننا نذكر الناس انه كان ف يوم من الايام فيه حكام عادلين

لا افكار تستحق الشرح !

الحرية لضباط 8 ابريل و 27 مايو

noreply@blogger.com (Mostafa Al Sayed) — Wed, 01 Feb 2012 07:23:00 +0000

ضباط 8 ابريل ، خير اجناد الارض ، مجموعه من ضباط الجيش المعتقلين سياسياً بسبب ارائهم المناهضة للمجلس العسكرى قصتهم هتلاقيها فى الفيديو ده

و لأننا مؤمنين بعدالة قضيتهم بنهديهم التصميمين دول

عيار طايش

noreply@blogger.com (Mostafa Al Sayed) — Wed, 01 Feb 2012 07:15:00 +0000

حمامة طايرة بأمل .. مش عايشة ع الهامش

ضربها صياد وقال: ... أسف عيار طايش

رفع عينيه للسما .. شاف غيرها مكمل

حمامة ماتت .. لكن سرب الحمام عايش !

للشاعر أشرف توفيق

الافكار اللى استخدمتها فى التصميم ده :1- الحمام اللى طاير ده عبارة عن فرشة جاهزة لسرب حمام ممكن تلاقيها فى الموقع الاشهر للفرش http://www.brusheezy.com

2- الراجل الامور ده صورة انا مصورها و عملتها جرافيتى بمساعدة فلتر stamp على الفوتوشوب

3- البندقية صورة على الانترنت و حولتها جرافيتى بالاداة السالف ذكرها
4- الخلفيه مش محتاجة يعنى دى تدريج لونى عادى من رصاصى لأبيض

تعانقنى احزانى

noreply@blogger.com (Mostafa Al Sayed) — Wed, 01 Feb 2012 06:58:00 +0000

فاكرين التصميم العظيم بتاع الملاك الباكى ، لو مش فاكرينه اضغط هنا عشان تشوفه المهم يعنى انى وظفته فى تصميم جديد و هو لوحة شعرية للشاعرة الواعدة كريستين ، يا رب ينول اعجابكم

و طبعاً زى ما انتو شايفين كأن الصورة مرسومة عشان الشعر او الشعر مكتوب عشان الرسمة

مفيش اى افكار تقنية جديدة فى التصميم

كل الشكر

فليسقظ بشار

noreply@blogger.com (Mostafa Al Sayed) — Wed, 01 Feb 2012 06:29:00 +0000

و مازال بشار المستبد يقعمع شعبه فى سوريا ، اهدى للشعب السورى هذا التصميم

الافكار اللى فى التصميم :

صورة الاسد من فيلم ديزنى الشهير نارنيا ، صورة بشار انا اللى راسمها بس ناقل النسب و الالوان من صورة له على الانترنت

بس كده

صائد الفراشات حر رغم انف الجنرالات

noreply@blogger.com (Mostafa Al Sayed) — Wed, 01 Feb 2012 06:02:00 +0000

احمد دومة الذى اشتهر بصائد الفراشات استمر حبسه لمده 15 يوم على ذمة التحقيق بتهمة الدفاع عن النفس فى وجه السلطة الجائرة ، كان دومة قد اعترف على الهواء فى احد البرامج الفضائية الشهيرة انه كان يدافع عن نفسه اثناء احداث مجلس الوزراء الاخيرة .
جدير بالذكر ان دومة قد تم ادانته عدة مرات سابقة قبل الثورة بتهم اشد سخافة ، ككسر الحصار على اخواتنا فى غزة و حبس على اثرها ثلاث سنوات بالسجن الحربى ، و الدفاع عن النفس امام جحافل الامن المركزى .

نتمنى لاخونا دومة الحرية

الأفكار اللى تم استخدامها فى التصميم كلها تقريباً بدائية ، مفيش غير رسمة الفراشة اللى باللبنى و دى بفرشة خاصة بالفراشات هتلاقوها فى اللينك ده
http://www.brusheezy.com/Brushes/24929-Flowers-Brushes-

اسبوع الجرافيتى العنيف ،mad graffiti week

noreply@blogger.com (Mostafa Al Sayed) — Wed, 11 Jan 2012 19:09:00 +0000

" السلطات تخشى من هؤلاء الذين يرسمون على الابنية العامة لأن هذه هى اول خطوة فى طريق استعادتهم لها "

نادين العلالى ، كاتبه بريطانية من اصول مصرية

الناس كلها بتشتمنى عشان بارسم جرافيتى على ابنية عامة ، و عشان باعتبر ان الشخبطة اللى ع الحيطان دى فن زيها زي ارقى انواع الرسم ، فقررت انى اسرد وجهه نظرى فى الجرافيتى و احط كام رسمة كده علشان اللى عايز يشارك ف " اسبوع الجرافيتى العنيف " من 18 لـ 25 يناير ، و ده كدعوة للنزول يوم 25 يناير .

لنتفق اولا ان الجرافيتى هو فن وليس شخبطة ، حتى اللى انت شايفه بسيط منه ، ده فن مش شخبطة ، لأنك متقدرش تحط معايير محددة للفن ، حتى الراجل اللى كاتب كلام بشكل عشوائى و بخط وحش ، ده فن ، لانه ببساطة مفيش معايير محددة للفن ، قولى طريقة تقيس بيها درجة الفن و انا هوافقك ان ده مش فن .

لنتفق ثانياً ان الجرافيتى مثله مثل اى فن هو وسيلة تعبيير عن الرأى يستطيع ان يستخدمها الفنان للتعبير عن رأيه ، تمام ؟

لنتفق ثالثاً ان حريية التعبيير عن الرأى باى طريقة مدامت لم تتعدى على حريات الاخرين هى حق فوق دستورى مكفول لاى انسان بلا تمييز ,

لنتفق رابعا ان الجرافيتى مثل اى وسيلة اخرى للتعبير عن الرأى كالمظاهرات و الاضرابات و الاعتصمات قوته هى الحاق الضرر بمصالح الاخرين ، حتى وسائل التعبير اللى انت شايفها سلمية ، زى مثلا الجرايد ، ماهو نا لما باقول فكرة معينة ضد فكرة تانية ، فانا بضر الفكرة التانية و اصحابها صح ؟

اذا اتفقنا على هذه الاسس الاربعه سنجد ان الجرافيتى مثله مثل المظاهرات هو فعل يقوم به مجموعه ايجابية تحاول اقناع الاخرين برأيها ، المجموعه الايجابية دى مش شرط تكون اغلبية ، بس هي ايجابية ، معنديش مشكلة ان حد يعمل جرافيتى لمبارك ، هو حر ، بس هو ايجابى و اشتغل عشان يعبر عن رأيه و بيحاول يقنع بيه الناس التانية

الاتهام الجاهز للجرافيتى – خصوصاً داخل اسوار الكليات – انه غير معبر عن رأى الجميع ، لو خايف ان الجرافيتى بتاعى يبقى معبر عن رأى مصر كلها رغم انه ربما يعبر عن قله فليه مخفتش ان التحرير يعبر عن مصر كلها وقت الثورة .

لو انت شايف ان الجرافيتى هو فن قبيح ، يبقى متلومش اللى بيعمله ، لوم المجتمع اللى اخرج هذا الفن، الفن يا سادة هو لسان حال المجتمع .

اخر مدرسة عظيمة فى الفن هي الفن الحديث ، و دى بمدارسها المختلفة " زى الواقعية و السيريالية و التكعيبية ..." فكرتها الاساسية هي ببساطة انه بيواجه المجتمع بمدى البشاعة اللى هو فيها ، بعد الحرب العالمية الاولى ، و بعد كل الدمار و الخراب اللى حصل فى اوربا ، كان المجتمع مستنى الفنانين يرسمولهم ورد و انهار و مناظر طبيعية و حجات حلوة ، بس الفنانين مكنوش قادرين انهم يضحكو على نفسهم ، و يرسمو انهار خمر بينما الحقيقة ان فيه انهار دم ، و عشان كده كان الفن الواقعى بيصفه النقاد انه فن " جرئ و وحشى " الكلمتين دول هما الطريقة المهذبة عشان تقول انه فن قبيح بمعيارك عزيزى المواطن الشريف .

لو هتشيل كل جرافيتى وتبيض فوقه، يبقى روح المتاحف و قطع لوح سليفادور دالى اللى كان بيقدم فن قبيح عشان يقول ان العالم بهذا القبح .

دى مشاركات من المدونة ف اسبوع الجرافيتى العنيف :)

الجنزورى منتهى الصلاحية

بكرة الثورة التانية تقوم مش هتسيب ع الكتف نجوم

عيش حرية عدالة اجتماعية ، او نهلك دون ذلك

اضغط ع الصور لتكبيرهم ،
هتلاقى طريقة رش الجرافيتى و رسومات تانية كتير من صنع الرفيق فادى شريف فى اللينك ده

اللى هيسألنى اللينك فين هاشتمه ، اضغط على كلمة اللينك يا ذكى :)

وداعاً ابراهيم اصلان

noreply@blogger.com (Mostafa Al Sayed) — Sun, 08 Jan 2012 11:27:00 +0000

توفي امس السبت الكاتب والأديب المصري إبراهيم أصلان عن عمر يناهز 77 عاما.

رحم الله الكاتب و الروائى العظيم .

الحقيقة ان للموت جلال يفوق اى شئ أخر ، دى تصميمات انا عملتها لما سمعت الخبر ، يا ريت كلنا نحطها بروفايل بيكتشر و نعرف الناس بالاديب الراحل و روياته ، للاسف لأننا هنا فى المدونة بنراعى حقوق الملكية الفكرية مش هقدر اديكم روابط لكتبه ، بس لو دورت على جوجل هتلاقى كل كتبه موجوده .

بالنسبة للتقنيات المستخدمة فى التصاميم ، معتقدش ان فيها حاجة جديدة ، التصميم كلها سيمبل جدا فمش هشرح حاجة .

الاشتراكيين الثوريين اول فيلم لقصاقيص صور

noreply@blogger.com (Mostafa Al Sayed) — Fri, 06 Jan 2012 06:14:00 +0000

من سنة 90 واحنا ع البيدج قاعدين نقول احنا بتوع كل حاجة ليها علاقة بالفن ، و الميديا بشكل عام ، و فى هذا الاطار انتجنا فيلم عن الاشتراكيين الثوريين ، بما اننا مؤمنين ان الفن بيدخل ف السياسة و ف كل حاجة ، و بما ان الاشتراكيين الثوريين المجلس السمكرى عامل عليهم حملة ، فاحنا عملنا فيديو تعربفى قصير ليهم ،
الفيديو فكرة : ميرنا هشام
صوت : احمد طلعت
مونتاج و اخراج : مصطفى السيد
صور ثابتة : حسام الحملاوى و ماجى اسامة

اه الفيديو نزل من فترة و عمل ضجة و الحمد لله وكنت مكسل انزله ع المدونة :) معلش بقى

الملاك الباكى

noreply@blogger.com (Mostafa Al Sayed) — Fri, 06 Jan 2012 06:00:00 +0000

ازيكم؟؟

كنا وعدناكم اننا هنديكم مثال على رسم بالرصاص و بعدين ازاى ندخله ف رسمة جرافيك ، احنا اخترنالكم رسمة الملاك الباكى و دى رسمة كويسة كبداية ، الموضوع بسيط خالص ، بصو اولاً رسم الرسمة بالرصاص و ده بيحتاج موهبة ما و احنا غالباً هنقول ازاى بتترسم بس ان الرسمة تطلع مظبوطة فده بيعتمد على موهبتكم
أول حاجة هنرسم الرسمة سواء من دماغنا او هننقلها من حته ، و طبعاً يا ريت نعمل جدول نراعى فيه النسب ،
ثانياً : هنرسم الخطوط الخارجية بخط خفيف
ملحوظة
لو عايزين نعدل علي اي حط مش نمسح وبعدين نرسم تاني
احنا نعمل فوقية التعديل وبعد كدة نمسح الاول
ــــــــــــــــــــــــــــــــــــــــــــــــــــــ
القلم المستعمل
2B

بعد كده
هنظللل الجسم الاول كلة بلون واحد كانة مصطح وبعدين نبدا نغمق الجوانب
ــــــــــــــــــــــــــــــــــــــــــــ
القلم المستخدم
(HB)للجسم
(B)للتغميق

بعد كده هي الجناحات
الاول هنحدد الخطوط الخارجية بقلم غامق وبعدين هنظلل داخل الجناحات بقلم فاتح
ــــــــــــــــــــــــــــــــــــــــــــــــــــــــــــــ
الاقلام المستخدمة
(6B) OR ( 8B) للجناحات
(HB) OR ( F) OR ( H) التظليل داخل الجناحات

واخر خطوة بالنسبة للرسم هى هنتقل تاني علي كل حاجة عملنها لحد ما تبقي غامقة
والشعر عنرسم خط خط لفوق
والخلفية هنستخد جومة فحم علشان نقتح ونغمق
ـــــــــــــــــــــــــــــــــــــــــــــــــــــــــــ
الاقلام المستخدمة
(6B) الخلفية
(3B)الشعر

بعد كده هناخد الصورة سكانر او حتى نصورها بكاميرا كويسة بس نحافظ على جودة الاضاءة

بعدين نبدأ نشتغل عليها بالفوتو شوب الشغل المعتاد بتاعنا
هنغير خلفية و نضيفلها فلاتر ، بس كده و دمتم سالمين

تياترووووو : المسرح

noreply@blogger.com (Mostafa Al Sayed) — Thu, 15 Dec 2011 13:05:00 +0000

المسرح : فن من ارقى الفنون اللى فى الكون ده كلها ، اه و الله صدقونى ، انا باعشق المسرح .
فاكر و انا ف اعدادى اشتركت فى جماعة المسرح فى المدرسة ، و عملنا مهلبية ابوقير و ابوصير ، اه و النعمة كانت مهلبية مش مسرحية ، و من يومها وانا يائس من المسرح المدرسى ، لأن دايماً اللى ماسكه بيبقى اقدم مدرس عربى فى المدرسة ، و بيبقى كل معلوماته عن المسرح هو مشاهدته لمدرسة المشاغبين ايام ما كان شباب .

المهم يعنى جماعة المسرح بمدرسة عاطف السادات الابتدائية طلبت منى انى اعملها لوحة تعريفية عن المسرح ، وسبحان الله اللى ماسك جماعة المسرح مدرسة شابه ، ده فتح نفسى ع الشغل يعنى و عملت البانر ده :))

افكار استخدمتها فى التصميم ده :

1- العنوان ف يافطة مسرح : اللافته التقليدية للمسرح اللى دايما ً بتفكرنا بمدينة لاس فيجاس و بالمسرح الامريكى فى الثمنينات ، فكرة كويسة اوى انك تستخدمهال للعنوان
2- الخلفية : لما تبقى اللوحة كتابية بحتة ، يعنى الهدف الاوحد ليها الكتابةو القراية يبقى التصميم بيعتمد على حاجتين بس الاطار و الخلفية ، الخلفية لازم تبقى هادية و مفيهاش دوشة ياما يعنى لو خليتها لون ابيض بس او ابيض غامق شوية يعنى مثلا ً لون ( #D7D7D7 ) هيبقى كويس وانا فى الصورة استخدمت تدريج رصاصى لابيض
3- الاطار ثم الاطار ثم الاطار : اهم حاجة بقى الاطار، لازم يبقى معبر فعلا عن الكلام اللى جوة و يكون مبتكر ، انا هنا استخدمت اطار عبارة عن ستارة مسرح ، لو انت ديزاينر مبتدئ فكل الاطارات اللى فى الكون هتلاقيها ع النت ، مش لازم تشتريها يا اما ممكن ترسمها سواء ترسمها بالبين تول ع الفوتوشوب او بالقلم الرصاص و تدخلها ع الكمبيوتر .
و ف مرة قادمة باذن الله ميرنا هترسملنا تصميم بالقلم الرصاص و هاوريكم ازاى ندخله ع الكمبيوتر و نعمله تصميم :)

شكسبير

noreply@blogger.com (Mostafa Al Sayed) — Fri, 09 Dec 2011 07:27:00 +0000

تسمع عن شيكسبير ؟؟ اه طبعاً مين ميعرفش شكسبير ، احب اصدمك ، اختى مدرسة ف مدرسة بمنطقة نائية اسمها الطابية ، و مفيش طالب هناك يعرف شكسبير ده كان بيبيع ايه ، المهم جماعة المسرح فى المدرسة دى عاملة نشاط عبارة عن كذا لوحة تعرف الطلاب على تاريخ المسرح و شخصيات زى شيكسبير ، و طلبونى علشان اصمم و اطبع اللوحات دى و دى لوحة منهم و بتتكلم عن شيكسبير .

التصميم ده انا حاببه جداً رغم انى تقريباً عامله تطوعى بسعر التكلفة :) .

افكار استخدمتها فى التصميم ده :

اولاً الصورة بتاعت شكسبير عشان حبوب الملكية التفكرية بس
portrait of Shakespeare Lefteris Pitarakis/Associated Press

1- دمج الصورة فى الخلفية السوداء : فكرة انك تدمج الصورة فى الخلفية السودا دى فكرة عظيمة جداً و سهل انك تعملها عن طريق انك تحدد الصورة الاصلية بس من بعيد شوية يعنى ابعد عن وش شكسبير حوالى 100 بكسل و بعدين اعمل (تأثير الريش feather ) بتتعمل ف الفوتو شوب عن طريق ( alt + crtl + D ) و ده هينعم المنطقى المتحددة و هيدخل فيها السواد ، و بعد كده قلل ( الاضاءة lightness ) من المنطقة المحددة لحد ما الاطراف توصل للون الاسود ، و بس يا سيدى هتبقى الصورة جزء من الخلفية
الخدعة دى ممكن تعملها مع الخلفيات الملونة عن طريق تغيير ( النظام اللونى Hue ) تغير فيه لحد ما توصل للون المناسب .

لو مفهمتش حاجة قول متخفش هاشرح تانى :))
2- تدريج الكلام على كتف شيكسبير دى اظن مش محتاجة حاجة ، بتعمل الكلام فى مساحة و ف بداية كل سطر بتدوس على مسافات لحد ما يوصل المكان اللى انت عايزه

شكراً لكم

عن يفط الاهرام المستفزة بنتكلم

noreply@blogger.com (Mostafa Al Sayed) — Mon, 05 Dec 2011 04:42:00 +0000

يفط اعلانات الاهرام !!!
اليفط الغبية المتخلفة اللى مالية الشوارع ، دايماُ تلاقى مكتوب فيها حجات غريبة و مستفزة ، زى مثلا ً يقولك يا شباب مصر خلو عينكو عليها و راسمين عين ، و اختلف العلماء ف تفسير تلك اليافطة ، الدكتور توفيق عكاشة بيقول ان العين رمز من رموز الماسونية و دى مؤامرة من الاهرام على شعب مصر العظيم و يدعمه ف ذلك القول العالم الجليل احمد ظابيضر ، بس عبد المنعم الشحات بيقول ان ده اعلان للكتلة المصرية رمز العين ، التى يدعمها النصارى قاتلهم الله ، و دى مؤامرة من مؤسسة الاهرام على الاسلام و المسلمين .

صديقى اسامة الجسممى شايف انها مؤامرة على المصريين عشان يكرهوهم ف مصر فيسيبولهم البلد و يمشوا ، بيفكرنى بكلمة اللى يحب مصر ميخربش مصر ، اللى كانت القنوات المصرية حاطاها على اساس ان البلطجى الوحش هيقراها فيستيقظ ضميره و يبطل تخريب :)
المهم اسامة اقترح شوية تعديلات على يافطة كان مصورها و انا قمت بيها .

زى مانتو شايفيين اليافطة مستفزة لأقصى درجة ، عشان بنحب مصر .. كلنا مصر ، دى زى كلنا خالد سعيد مثلاً هيهيهيههي

غيرنا الكلمتين بكام كلمة من عندنا و بقت شكلها اجمل !!

افكار استخدمتها فى التصميم ده :

1- تغيير الانظمة اللونية للخلفية : بما ان الديزاين ده مش هيطبق على الواقع -الا لو تبرع رجل اعمال انه يساعد الثورة بثمن لوحة اعلانية - من الممكن تغيير الوان الخلفية ليكسب الصورة مظهر جمالى رائع و كمان ممكن نقلل (معدل كثافة الالوان stration) و ده بيدى الصورة مظهر جمالى برده .

و ممكن تحط افكار كتير جوه الاطار ده . او حتى تحط صورتك ، و لو بتعمل تصميم لحاجة دعائية مرشح مجلس شعب مثلا ً عشان تحطه على الفيس بوك ممكن تحطه ف الاطار ده عشان المشاهد من اول وهله يعرف انه اعلان.

مثلا ً

شكراُ لكم

كاريكاتير فرح يوسف و رنوة

noreply@blogger.com (Mostafa Al Sayed) — Sun, 04 Dec 2011 02:41:00 +0000

بسم الله الرحمن الرحيم

اول بوست
يوسف و رنوة

:) الاتنين اصحابى- التصميم بمناسبة فرحهم عقبال عندكم-

يوسف شعبان : مناضل اشتراكى و صحفى فى البديل تم اعتقاله مليون و ربعميت مرة ايام النظام السابق .

رنوة محمد يوسف : مناضلة اشتراكية برده و فنانة تشكيلية قد الدنيا . و على فكرة فيه افكار و اجزاء من الديزاين سارقها منها :)

افكار استخدمتها فى التصميم ده :

1- المتحابون الثوريون : يوسف و رنوة هما الاتنين ايدولوجيتهم اشتراكية ثورية ففكرت انى احول لوجو الاشتراكيين الثوريين لشئ ما يستخدم فى الديزاين ، هو اللوجو عبارة عن نجمة يعنى اشتراكية و قبضة يعنى ثورية ، و انا هنا استبدلت النجمة بقلب بنفس الدرجة من اللون الاصفر .

لوجو (شعار ) لااشتراكيين الثوريين

خد بالك : لما تحب تستخدم اى نوع من انواع العقيدة فى الديزاين بتاعك ( ايدولوجيا ، ديانة ، قومية ....الخ ) ، ممكن من غير ما تقصد حد يفهمك غلط و يعتقد انك بتسخر من العقيدة دى ، حاول تبقى حذر شوية .

2- خلفية الكاريكاتير: غالبا ً لو انت شغال على كاريكاتير، صعب عليك انك تلاقى خلفية مناسبة ، و احيانا بنسيب الخلفية بيضاء بس انت ممكن تجيب اى خلفية طبيعية - زى مانا عملت هنا - و تحط عليها الفلتر اللى انت شايفه مناسب من مجموعه الفلاتر ( رسوم sketch ) فى الفوتو شوب و انا هنا اخترت فلتر ( water paper ) .

خد بالك : لازم تكون شغال على النظام اللونى ( RGB 8 bit ) عشان تشتغل الفلاتر معاك لأنك لو شغال على (RGB 16 bit ) نظام الفوتو شوب مش هيقدر يطبق الفلاتر دى على الصورة.