就係佢打開櫃門既一刻，一大舊黑色既物體從櫃中撲出，由於樓梯比較黑，太太比呢舊黑色野嚇到花容失色，尖叫起來！

太太同老公一齊跑到樓下，係大閘附近發現原來係一隻貓！貓貓衝出鐵閘直奔出去，跑到村屋既欄杆下停低，於是村民們就圍住隻貓等佢唔好再走失。

太太見到原來係一隻灰色既貓貓，點解可以匿埋到入個鞋櫃裡面呢？而樓下又大閘一道鎖住，隻貓係邊到黎呢？太太去到pizza鋪買野既時候就同老細講左呢件事，好心既老細就走去八卦下，見到呢隻貓貓嚇到騰騰震的瑟縮於一個角落，四圍有好多人圍觀，甚至連村屋二樓既居民都探頭張望。

大家你眼望我眼又望貓貓，貓貓繼續震，老細發覺大家都得個望字，咁點先，都要有人做野架，但大家又唔多似想做野嗃，一股熬血汨汨的流在老細身上，於是佢決定攬起隻貓上身，帶佢返鋪頭！本住我攬貓就攬到底既精神，照顧佢。

貓貓震震下咁實在我見猶憐，好在老細都有養狗，總算搵到個籠安置貓貓，等佢訓係鋪頭既房入面，師傅通宵陪貓貓，聽到貓貓係個寵到叫下叫下，嘈到拆天，真係心酸到訓都訓唔著呀。

第二日好心的師傅見貓貓係個寵到無自由失自由，於是放佢係房入面行下，間房雜物多就必然的，雖然貓貓年紀大而且成隻狗仔咁大隻，但佢依然可以極速搵到窿罅收埋自己，於是師傅同老細女友每次入房，都以為唔見左貓，係一間100呎都冇既房入面搵貓都例必搵成幾分鍾，無論佢地點樣努力填好哂ｄ窿窿罅罅，但貓貓都可以搵到位匿埋，彷彿無數紙盒入面有個迷宮，只有佢自己先知道。有時又會係一D放左好重野既盒下面，郁都唔郁，大家都以為Ｄ盒責暈左佢，於是不停地搬開哂Ｄ野，貓貓就望住兩個傻瓜搬野。

更令人擔憂既係貓貓彷彿放棄自己唔食野唔飲水，可能佢以為主人唔要佢（但其實係佢自己離家出走，不過貓貓都未必記得誰是誰非），繼而作出自殺式行為，各位街坊亦都好人到非常，拎各式各樣既貓糧用品比老細，而且上網尋親，通街既貼街招，都係為搏貓貓一笑，最後貓貓捱到夜晚先肯食野，真係望穿秋水呀。成日大家既心就懸於呢隻老貓身上，做做下野都要入房睇睇佢，殊不寂寞。老細既愛貓女友眼見想養貓但老細唔比養，今次老細自己執隻貓返黎仲唔係天意黎？發達咯，女友係呢兩日已經對老貓產生感情，由憐生愛，就算係肥係老貓都唔會放棄佢。決定如果三日內冇人認領貓貓就據為己有，一個星期後就唔駛旨意佢交返隻貓出黎，佢就可以養呢隻可憐既老貓到老。

當然啦，個天就緊係唔會比呢個傻婆發達啦，第三日貓貓既主人現身喇，原來主人一家初黎報到，住係印尼夫婦樓上，仔仔出街唔小心打開左到門，MIMI（即係貓貓）就走左出落樓匿係印尼鞋櫃入面。貓貓見到弟弟都即時貓叫兩聲打個招呼，而弟弟真係抹一把汗，因為錫MIMI錫到燶既媽媽又喊又叫黑哂口面，鬧到佢飛起。

CYT今朝送貓送到西，見到MIMI返到屋企賓至如歸，肥大既尾巴搖搖下，大字型訓係走廊到，內心都好安慰。但一陣陣既失落又上心頭，諗起假期過後返到鋪頭就冇得再心掛掛喇… …實在好空虛。

CYT趁今日休息，出去金魚街睇下D貓貓，得閒就拎貓貓張相出黎慰藉下… …諗起呢隻萍水相逢貓，真係帶比CYT好多漣漪… …

cyt實在感激facebook，當你有d野想買而唔好意思講出口既時候(尤其係明知自己親手跌欄幾千蚊電話之後)，facebook可以幫到你！將你既願望post上去吧！有心既人就會做野架喇！

黑色鋼琴面既omnia望上去真係靚到出塵，佢既面積比3600大但係薄好多。而cyt實戰左部機呢個段段既日子，暫時可以用五個字去形容：「客家佔地主！」

cyt係呢個手提到搵到有優點，有缺點，尤其係設計上既缺點最多，而又最令人苦惱，因為會用得好唔方便，如果大家發現cyt講既問題係有得解決，請大家幫幫手！

部野靚唔靚就各花入各眼啦，基本上佢既設計好乾淨的，但d制就太簡單了，首先佢冇十字制，冇左襟上下左右既功能，唔可以一手操控部機，一定要用筆，都幾唔方便，尤其係睇書既時候就更加不便。其實佢側邊都有兩個制，但只可以用黎較大細聲，cyt攪黎攪去都搵唔到令佢地可以邊成上下制既設定，感覺好死板，其他制都可以set其他功能啦，點解唔順便放埋呢兩個呢？另外支筆係附於機身外的，cyt以前用開係部機到忟支筆出黎，有d唔習慣，不過講開支筆都真係幾型啊～

規格方面，800MHz  CPU、WVGA、行Windows Mobile 6.1， 500萬像素鏡頭+閃光燈、藍芽 2.0 + EDR、WIFI、HSDPA 7.2Mpbs再黎多個收音機，真係夫復何求！內置8GB記憶令隨機附送既4GB咭感到自卑。成部機Samsung都好積極地用自己既版面，就咁睇真係以為自己唔係用緊WM機，主版面Samsung都提供大量Widget裝飾自己既today畫面，令到個畫面熱鬧到非常，好靚好開心的樣子，但開心的背後cyt感覺到d widget拖慢左部機，所以最後都係用返傳統既wm畫面算了。

程式集都係有Samsung版面的，所有程式都分門別類，好似iphone咁，用手指一橫就可以shift去另一版程式集到，都係好值得一讚的，至少唔會成堆程式堆哂係一版到。 

 基本上SAMSUNG既版面都係好動感的，就連關閉工作程式都型Ｄ。

（仲有好多操作上既野想同大家分享下，待續）

就如cyt一樣，cyt就極害怕蟑螂的，恐懼的程度，cyt由小時候開始就害怕蟑螂，害怕得蟑螂出現過的地方，cyt也不會涉足，小時候試過廁所有蟑螂出沒，媽媽已經將蟑螂處理了，但cyt寧願人有三急得快要爆炸也死不入廁所解決，害得媽媽將cyt罵得流淚眼對流淚眼收場。到現時cyt晚上口渴時，情願落街買水仍然不能到廚房自斟自飲，要麼就要等媽媽回家。所以在cyt的家裡，媽媽的地位舉足輕重，因為無論cyt，cyt的姐姐們，甚至cyt的爸爸，都不能克服蟑螂。（我想這是遺傳）

到cyt長大了，恐懼的情況已漸漸減低，但在盛夏的街cyt依然邊尖叫邊狂奔，來避過一隻隻橫行霸道的蟑螂，cyt男友曾笑說要cyt跑步做運動很容易，小強一隻就攪掂。

當然cyt對於此類笑話極度反感。cyt對於此類恐懼是絕對認真的，絕不能用來玩笑，而cyt是個小氣的人。曾經有小學同學用蟑螂t開了玩笑一個：將一隻蟑螂放在cyt面前搖晃，而身型比cyt高大的同學更捉住cyt不讓cyt逃走，於是cyt痛哭一場之後與此同學絕交至今，而且不介意向所有同學甚至他本人面斥絕交後的原因，並決心繼續絕交下去。要是有「朋友」用你的恐懼如此變態地嚇你，絕交吧，避開吧，順便唱衰佢吧。這是不折不扣的壞人，和這類人建立任何關係都肯定會蝕底，利用朋友的弱點來尋開心的人，是賤的。

當然，無懼的人面對恐懼的人態度也自然的輕佻，因為針不到肉不知痛，總是瀟洒的，或是若無奇事的冷冷的一句：「有咩好驚呀？」或是懷疑的：「唔駛咁驚嘛？」，要是你的朋友因為昆蟲／人／動物／物怕的要哭時，請別說話，幫助他們將之消滅，或是帶他們離開現場，再說吧，他們的恐懼你不明白，也別要明白，更別要幫他們克服，幫幫他們離開恐懼就好了。

同事們的心事內容乏善足陳，都是上司沒有賞識自己啦，在公司工作已久卻得不到鼓勵啦等等，但最令cyt納罕的就是舊上司對一眾舊同事們的評語真是負面辛辣得來又夠直接，整個部門無一倖免。cyt對同事都有點點的認識，同事們也許偶有閃失，但未致於犯過大錯，面對千軍萬馬的工作量（回想起那時的工作量真多得叫人心酸），一班舊同事雖未有安裝「摩打手」快速清理所有工作，但起碼有責任感，不完成當日的工作是不會離開的，工作態度都相當的牛。要是他們真的如舊上司所說的不濟，火爆的cyt早已和他們一刀兩斷了。真的要驚嘆：「唔通佢地變左……?」

但回想起舊上司的為人嘛…又明白同事們的委屈感覺，印象中舊上司是個主觀而不易動搖的人，上司問cyt對某同事的意見，cyt無論講的是好是壞，上司要是覺得這個同事不好，任憑cyt施展混身解數力撐，他都會說：「我都係覺得佢唔係幾掂。」，而他喜歡的同事呢，雖然cyt（甚至上司自己）已經被該位同事折磨到死去活來執手尾食死貓差點暈倒時，他都會回cyt一句：「…佢都有可取既地方既…。」起初cyt以為上司針對的是自己（問完人地個情況又唔信係要唱反調！），後來師傅同事才告訴cyt：「佢不嬲都係咁，我都化左。」cyt才明白過來。

「一眼定生死」確實叫一眾打工仔痛苦萬分，你都尚未出招，老闆已經一下子將你ko，又或者你做錯了點點（真的，世上哪有人沒有做錯過？），老闆就一輩子的將你記住，你本來很有心有力，老闆卻當你隱形，叫人永不超生。

也許老闆資歷深經驗多，閱人無數，哪個劣質員工自不能逃出自己的法眼，然而很多時候便將「預期變成結果」，你越覺得他不滯，行為上就扼殺了他的機會，久而久之，員工們不是另謀高就，就是變了笨蛋一個。於是老闆更相信自己當初的眼光了。

這樣的想法既主觀，而且自私，尤其在上司在公司的地位已經不可動搖之時，很多有潛質的員工就這樣一個個死亡，到最後，整個部門剩下沒有多少人，而留下的員工就像「十個救火的少年」，快要被日益繁重的工作活生生燒死。

cyt再往回想和這個舊上司的關係也算不俗，好幾次他也會借cyt的雙耳收收風，了解一下同事們的問題，cyt見上司問得誠懇，又持住自己在上司面前還可以多說兩句話，於是抱著「你地唔敢講等我講！」的義氣作風，將大家潛藏的問題和不快直接上呈！（當然是婉轉而又經過少少包裝咁上呈啦，老細誠懇地問唔代表自己可以就咁講嘛！）其實內客不算太特別，都是工作量越來越多和客人的要求日漸繁複，如此一來同事們的心理自然有點影響。cyt沒有講出改善的方法，心想，累贅的說話不必多講，解決方法大家都心神領會吧。但每次舊上司都會一句：「我唔覺得好多野做者。」，「我唔覺得ｄ野好難做，應該好快就攪得掂啦，係多，但都好容易架」幾次過後，cyt都乖乖地閉咀好了。

cyt此刻想起那舊電影青蛇，希望同事們不要變成白素貞，亦不希望上司繼續做法海，非要消滅這班他心中是妖但其實是善良的同事們而弄至滿地屍骸才好。

又難怪香港小姐選舉的收視每況愈下，看完港男又覺得港姐認真唔易做：一位位女孩要穿著比堅尼去扮淑女，還要美貌與智慧並重，樣子身材差少少的就被報紙雜誌彈得一文不值，上台答無聊問題答得不夠大方得體泳衣穿歪露了少少又要上c1頭條，還要初選又複選再決賽，長時間只能保持微笑雙手叉腰挺胸，憑你如何天生麗質聰明絕頂都只會變成悶蛋一件，真叫人苦不堪言。

反觀港男選舉不需要智慧不需要說話，甚或樣貌亦未算最重要，最緊要個body夠照！全場的女士要求只有一個：肌肉！肌肉！肌肉！而且各位型男完全拋開身段，自動除衫濕身摸胸撥頭髮，還半裸走到評判團面前任睇任摸，總之你叫得開心，型男們越放心，開朗的大笑露齒笑多麼豪爽可愛，要是港姐在台上大笑？你死梗了。而且港男選舉夠簡單，一take過，大家參觀完body就講講點向dodo姐求婚再錫錫佢手仔，投票比分頒獎，輕輕鬆鬆兩小時，而港女左選右選娶媳婦般凝重，實在叫人太沉悶。

君不見港男選舉氣氛多麼熱烈，任你們如何怒罵港男觀眾評判多麼急色教壞細佬，全場話知你，大家完全不想錯過吸收這班少男盛男的一絲一寸日月精華，港男們一舉手一投足，甚至只是一個傻笑加可愛迷人酒渦，已叫在全人士情緒失控，叫吧！將你們對男性美好身段的慾望叫出來吧！讚美聲此起彼落：「佢好可愛呀！」，「佢好大隻呀！」，「嘩個胸肌咁大既？」港男們完全接受，沉醉在大家一片尖叫聲中。但你敢在現場用同類用詞讚港姐嗎？你有沒有見過任何一個評判，呀某某總理會讚12號住麗雙腳修長胸部迷人嘛？你敢講你死緊了，而港姐聽到都可以順便開記者招待會，哭訴某某評判性集中她的身材，令她感到不安，夜夜失眠。

就像看電視劇一樣，幗國梟雄固然劇力萬鈞，但有時叫人看得太沉重，看看王老虎搶親叫自己笑到碌地又不錯嘛。

飲水小休時師兄就問cyt：「而家放lunch呀?」

cyt：「唔係呀，我今日放假。」

隔左一陣，師兄話：「哦，而家開始放暑假喇嘛？」

cyt：「咩暑假？」

師兄：「你唔係讀緊書咩？」

cyt：「師兄我三十歲都黎緊喇嗃，你以為我幾多多歲呀？」

師兄：「… …中五掛… …」

哈，多謝師兄！於cyt出拳賜腿都用力d。

有一晚，弟弟送完外賣想拎個錢袋出黎埋下數時，赫然發現冇左個錢袋！弟弟好驚，因為入面大嗱嗱五百幾蚊呀！於是弟弟周圍去搵，搵到唔知時間，鋪入面大家都好心急，以為弟弟出了事。終於弟弟都返左黎自首，口震震咁同大家宣佈：頭先做既orders都係白做了！由於外賣弟弟本身係老實乖寶寶一名，大家都明白佢唔係有心的，所以冇炳佢不特止仲安慰佢，叫佢小心ｄ好了。最後弟弟心好唔安落咁收工。

如是者過左一個星期，期間弟弟都知pizza鋪一定唔會扣佢糧，於是打算慳ｄ洗儲返錢比鋪頭，又或者把心一橫… …出去問朋友借，而住係小島既同學仔都幫弟弟四圍搜尋，但希望都係落空。

鏡頭轉去一個晚上，一對夫妻剛剛係小島既飯店飲飽食醉拍拖散步時，隻腳踢到d異物，原來係一個透明袋仔，入面仲有d錢，於是老公就諗，咩人會跌左咁既袋呢？又唔係銀包但入面又有錢，唔通係一個婆仔跌既？於是佢地就拎去差館，點知發覺差館冇人（因為小島入面係冇24小時既警察），正常人都會笠左d錢去算喇，但呢對夫妻諗都冇諗過，太太就話：「不如我地寫張紙貼係我地執到個袋既附近啦！」，於是呢對夫妻就印左幾張通告貼係附近，之後先再交多次去差館。

今日，當cyt經過籃球場返鋪頭既時候就見到呢張通告，見到寫住「錢袋」都覺得應該係佢喇！即時打比好心人老公，好心人仲特登拎返個錢袋黎鋪頭。個天都念在弟弟係一個乖寶寶份上，等佢唔駛拎d老婆本出黎。

所以今日弟弟送貨都送得特別落力，不過之後就多左個花名，我地而家叫佢做婆仔，越叫越順口，仲整多左個排袋比佢掛係心口，個樣更戇直更寶寶。

放屁乃身體一大正常現象，試問人生在世那個不放屁？在水中放屁，可能大家都試過，尤其是小時在泳池或者海灘游泳，有需要時也忍不住來一下，舒緩一下又沒有人會知道，就像做人有時也要偷偷的做些見不得光或早不為世人所接受的行為（雖然人人都會做，但有些事情是不可以在人前做的，例如放屁，例如貪小便宜，等等等等）。但世上總有人愛戮人臭屁，人家放屁關你叉事，偏要張揚人家的事出去，順手將自己揭人私事的行為正義化，結果好奇心殺死貓兒，臭死了自己。

家長又指出課本中一句：「第二課有關媽媽偷看女兒日記的文章中，提及故事主角嫌媽媽常問問題，「真希望明天回家時媽媽不在家！」她質疑有誤導小孩「爸媽好煩」的觀念。」此句真的有問題，為甚麼媽媽會偷看女兒的日記？為人父母不知何為私癮？兩母女的關係為何惡劣得媽媽要偷看女兒日記，而女兒又不想見到媽媽？CYT恐怕小孩看完會以為天下間所有媽媽都會偷看自己的日記，於是徨徨不可終日，影響成長心理，要麼家長讀完之後以為偷看人家日記乃天經地義，到時真的道德淪亡了。

PIZZA店位於一個小島上面，由於交通唔算太方便，所以cyt都好少出街，主要就看鋪，原來都幾困身的，因為無論有冇生意都好，都需要有人係鋪到stand by，人家話做生意要「守」，係真的。

於是cyt都手多多學下整pizza。

當然，認識cyt或者有睇之前既blog的話，都應該知道cyt煮野食有幾勁，cyt識整個皮有成吋厚既雷沙湯圓，同埋海鹽蛋糕（即係唔小心將鹽當做糖落去整蛋糕），於是，朋友聽到cyt有份整pizza，都好擔心店既生意。

不過大家可以放心，cyt都好安落，因為餅底同醬汁係師傅整的，cyt只係將d材料放係個pizza到，之後師傅就會放入爐，又會記得拎返出黎，而材料係唔駛煮，所以唔會存在pizza質素既問題！放心食啦！於是無聊聊的時候cyt就會入去廚房砌下pizza，師傅叫cyt做「賣大包女郎」，因為次次cyt都喪落料去個pizza到，攪到個pizza成呎厚。

有時係炎熱既下午，係一條寧靜既小村入面，cyt係店入面靜靜的砌pizza，耳仔又聽下歌，好舒服，落雨既時候就睇下門外既街景，與世無爭的都不錯。