دائرہ

جو جیکسن اور بھتہ

ساجداقبال — Mon, 07 Dec 2009 04:46:49 +0000

بی بی سی والے بھی کبھی کبھی کبھار صحیح لطیفے لگاتے ہیں۔ پچھلے دنوں یہ خبر کئی دنوں تک فن و فنکار صفحے کی زینت بنی رہی۔

عیدمبارک

ساجداقبال — Fri, 27 Nov 2009 11:51:13 +0000

میرے بلاگ کے تمام بھولے بسرے قارئین کو دلی عید مبارک۔

بچپن نامہ: ایک واقعہ

ساجداقبال — Sat, 15 Aug 2009 13:34:54 +0000

بچپن کی یادیں ہندی فلموں سے زیادہ منٹو کے افسانے ہوتے ہیں۔۔۔چھوٹی چھوٹی۔۔۔سو کوئی طویل واقعہ تو لکھنا مشکل ہے لیکن چھوٹے چھوٹے کئی واقعات ایسے ہیں جو 'یادگار'(کم ازکم میرے لئے) کہے جاسکتے ہیں۔ ایسا ہی ایک واقعہ جو مجھے کبھی نہیں بھولتا:
ہمارے گاؤں سے تھوڑے دور، پنڈی جانے والے سڑک کے کنارے ہمارے کھیت (اب منی فارم)ہیں۔ 12/13 سال پہلے کی بات ہے۔ جب گرمیوں کی چلچلاتی دھوپ میں ہمارا پسندیدہ مشغلہ آوارہ گردی تھا۔ گھر میں ادھر بڑے سوتے تھے اور ادھر ہم پچھلے دروازے سے فرار۔ کبھی ہمارے دل کو برساتی نالے ميں نہا کر چین آتا اور کبھی فاختاؤں کے بچے چرا کر سکون۔ اسکے علاوہ بھی کئی شوق تھے جو فی سیزن بدلتے رہتے تھے۔ ان معرکوں میں ہمارے(میں اور کچھ محلے کے لڑکوں) کے سردار میرے مرحوم بھائی(حکمت اقبال) ہوتے تھے۔ گو وہ عمر میں مجھ سے سال ہی بڑے تھے لیکن گھر سے باہر انکا تجربہ کافی وسیع تھا۔اوائل عمری میں کافی ساری چیزوں کے بارے میں مجھے انہی کے توسط سے معلوم ہوا۔
بات شروع ہوئی ہمارے کھیتوں سے، وہیں چلتے ہیں۔ ایک دفعہ گرما کی دوپہر میں ہمیں اپنے ان کھیتوں کی سیر کی سوجھی۔ ٹیم سائیکلوں پر روانہ ہوئی(ایسے میں ریسنگ تو واجب ہوتی تھی)۔ منزل پر پہنچے ادھر ادھر کا فضول جائزہ شروع ہوا۔ اتنے میں ایک ٹویوٹا ہائی لکس رکی۔ اسمیں سے کچھ افراد نکلے اور وہاں موجود ہمارے کنوئیں کا جائزہ لینے لگے۔ ہم ان سے تھوڑے ہی فاصلے پر تھے۔ ہمارے بڑے بھائی سرگوشی میں سب سے مخاطب ہوئے کہ یہ ڈاکو ہیں اور ہمیں اٹھا لے جائینگے۔ یہ سننا تھا کہ ہم سب نے سرپٹ گاؤں کیطرف دوڑ لگا دی۔ میرے جیسے ایک دو کانپتے ہوئے دوڑنے لگے۔ کئی ایک بار کسی کی چپل پیچھے رہ گئی اور وہ ہیبت میں چپل اٹھاتا اور بھاگنے لگتا۔ مجھے یقین ہے کہ ان لوگوں کو، جن کے ڈر سے ہم بھاگے تھے، حیرت ہوئی ہوگی کہ ان لڑکوں کو کھڑے کھڑے کیا ہوگیا کہ سائیکلیں چھوڑ کر بھاگنے لگے۔ گاؤں کے گرڈ سٹیشن کے برابر پہنچے تو وہی ہائی لکس برابر ميں رکی اور اسمیں سے کسی شخص نے آواز لگائی کہ وہ سائیکلیں تو لیتے جاؤ۔ ہم اسے جھانسا سمجھ کر مزید تیز بھاگنے لگے اور گاؤں کے بازار ميں جا کے دم لیا کہ اب تو محفوظ جگہ پر آگئے ہیں۔ جب اچھی طرح اطمینان ہو گیا کہ ڈاکو حضرات تشریف لے جا چکے تو واپس کھیتوں پر جاکر سائیکلیں لیں اور گھر واپس آگئے۔ بعد میں کئی دفعہ ہم اس واقعے کو یاد کر کے ہنستے رہے۔
بظاہر اس واقعہ میں ایسا کچھ خاص نہیں لیکن وہ گھبراہٹ اور دوڑنا آج بھی جب یاد آتا ہے تو بے اختیار ہونٹوں پر مسکراہٹ آجاتی ہے۔
بچپن زندہ باد!
یہ تحریر شگفتہ کی تجویز پر منظرنامہ کے زیرنگرانی شروع کیے گئے سلسلے "ہفتہ بلاگستان" کیلیے لکھی گئی۔

او عذرا جاناں: ایک خوبصورت افغان لوک گیت

ساجداقبال — Wed, 10 Jun 2009 07:00:39 +0000

عرصہ ہوا پاکستان کے پشتو گلوکار تخلیقی جمود کا شکار ہیں۔ اکثر گلوکار ایک ہی طرز کے اور دوسروں کی موسیقی چھاپہ مار کے گاتے ہیں۔ افغان ہمیشہ سے اس معاملے میں تخلیقی صلاحیتوں کے حامل ہیں۔ ایک خوبصورت افغانی لوک گیت پیش خدمت ہے:

آخری سچائی

ساجداقبال — Mon, 18 May 2009 11:25:16 +0000

واپسی

ساجداقبال — Sun, 17 May 2009 05:45:36 +0000

ایک دفعہ پھر سے میرے بلاگ پر خوش آمدید!
بلاگنگ میں چلنا، رکنا (start, pause) تو لگا ہی رہتا ہے، لیکن جس تواتر سے اس عادتِ بد پر میں کاربند ہوں شاید ہی کوئی اور ہو۔ لیکن اس دفعہ "ہوئی تاخیر تو کچھ باعثِ تاخیر بھی تھا" کے مصداق ہمارے پاس بھی 'ودھیا' بہانہ ہے۔ جی ہاں آپ میں سے کئی احباب جانتے ہی ہونگے کہ پچھلے ماہ ہماری زندگی میں شادی نامی خوشگوار واقعہ(یا حادثہ) رونما ہوا۔ جاننے والوں، دوستوں اور دوسرے احباب کے ڈراوے "کچھ نہ دوا نے کام کیا" ہو گئے اور ہم مورخہ 12 اپریل 2009ء کو اس دریا میں کود ہی گئے۔ تادمِ تحریر شادی ایک خوشگوار تجربہ ہے اور رب کریم سے دعا ہے کہ 'خوشگوار' ہی رہے۔ اٰمین

بیگم

بیگم کا کچھ تعارف کراتا چلوں۔ میری بیگم کا تعلق ہمارے گاؤں کے قریب ایک دوسرے گاؤں "گنڈیالی" سے ہے۔ تعلیم ان کی بی-اے تک ہے اور وہ اپنی گاؤں کی واحد بی-اے کرنے والی خاتون ہیں۔ عمر تقریباً میرے برابر ہی ہے، وگرنہ گاؤں میں اکثر 4 تا 5 سال کا فرق میاں بیوی کی عمر میں عام ہے۔

واپسی کے بعد

گو کام پر میری واپسی شادی کے ایک ہفتہ بعد ہی ہو گئی تھی لیکن اسکے بعد تک کے عرصے(اور شادی سے پہلے بھی) میں دفتری کاموں میں پھنسے رہنے کی بناء پر اپنے بلاگوں پر کچھ نہیں لکھ سکا۔ دفتری مصروفیات ابھی بھی وہی کی وہیں ہیں تاہم امید ہے کہ تھوڑے بہت فارغ اوقات میں اپنے بلاگوں پر کچھ نہ کچھ لکھتا رہوں گا۔ ان شاء اللہ

رقابت

ساجداقبال — Mon, 23 Feb 2009 05:23:45 +0000

آج آفس آتے ہوئے ایف ایٹ موڑ پر ایک ہائی ایس پر نظر پڑی۔ ویسے تو گاڑیوں پر لکھے گئے سب اشعار دلچسپ ہوتےہ یں لیکن یہ شعر پڑھ کر میری ہنسی نکل گئی۔ ملاحظہ کیجیے:

نہ آنا میری میت پر ہمراہِ رقیباں
مسلمان میت کو جلایا نہیں کرتے

معذرت کہ گاڑی کی تیز رفتاری کیوجہ سے تصویر نہ لے سکا۔

میں ہی کیوں؟

ساجداقبال — Sat, 21 Feb 2009 09:40:41 +0000

ٹینس کے مشہور امریکی سیاہ فام کھلاڑی آرتھر رابرٹ ایش(1943 تا 1993)) جب دل کی سرجری کے دوران متاثرہ خون کی منتقلی سے لاحق ہونے والی ایڈز کی بیماری سے نبرد آزما تھے تو ان کے کسی مداح نے پوچھا کہ "آخر خدا نے آپ ہی کو اتنی مہلک بیماری کا شکار ہونے کیلیے کیوں چنا؟"
ایش نے جواب دیا، "دنیا میں پانچ کروڑ بچے ٹینس کھیلنا شروع کرتے ہیں، پچاس لاکھ ٹینس سیکھتے ہیں، پانچ لاکھ پیشہ ورانہ ٹینس سیکھتے ہیں، پچاس ہزار ٹینس سرکٹ میں آتے ہیں، پانچ ہزار کسی بڑے ٹورنامنٹ(Grand Slam) میں پہنچتے ہیں، پچاس ومبلڈن میں پہنچتے ہیں، چار سیمی فائنل میں پہنچتے ہیں اور دو فائنل میں۔۔۔۔جب میں ومبلڈن کپ تھامے کھڑا تھا میں نے خدا سے نہیں پوچھا تھا کہ "میں ہی کیوں؟" سو آج مجھے اس درد میں بھی نہیں پوچھنا چاہیے کہ "میں ہی کیوں؟"

آئی فون طالبان میں بھی مقبول

ساجداقبال — Thu, 19 Feb 2009 15:58:30 +0000

ہم جانتے ہیں کہ ایک دنیا ایپل کے آئی فون کی دیوانی ہے لیکن آپکو یہ سنکر حیرانگی ہو گی کہ پاکستان میں افغانستان کے سابق سفیر ملاعبدالسلام ضعیف بھی آئی فون کے دیوانوں میں شامل ہیں۔ کچھ ایسی ہی حیرت الجزیرہ کے نمائندے ہمیش میکڈونلڈ کو بھی ہوئی۔

"مجھے اپنی آنکھوں پر یقین نہیں آرہا تھا۔ جب ہم گھر میں مقید طالبان کے پاکستان میں سابق سفیر ملا عبدالسلام ضعیف کا انٹرویو کرنے آئے، وہ کمرے میں داخل ہوئے اور صوفہ پر بیٹھتے ہی اپنا آئی فون کھینچ نکالا".

یہ مزے کی روداد آپ یہاں پڑھ سکتے ہیں(نیچے آخری خبر تک سکرول کیجیے) اور اس خبر کے متعلق مزے مزے کے تبصرے یہاں ملاحظہ کریں۔

آئینے

ساجداقبال — Sun, 25 Jan 2009 13:22:19 +0000

ابنٹو پر میں نے ریموٹ ڈیسکٹاپ کنفیگر کیا، کوئی اور نہ ملا تو خود ہی سے رابطہ جوڑ لیا اور پھر میرے ڈیسک ٹاپ کی حالت کچھ یوں ہوئی: