कामाचा दर्जा आणि वेळेचे भान ठेवून प्रकल्प वेळेत पूर्ण करा – महसूल राज्यमंत्री योगेश कदम

भारजा नदीवरून मिळणार दररोज प्रतिमाणसी १३५ लिटर शुद्ध पाणी

रत्नागिरी, दि. १० (जिमाका): मंडणगड शहरवासीयांची गेल्या अनेक वर्षांपासूनची पाणीटंचाई आता इतिहासजमा होणार असून शहराच्या विकासात एक नवा अध्याय सुरू झाला आहे. केंद्र व राज्य शासनाच्या संयुक्त ‘अमृत २.०’ अभियानांतर्गत मंजूर झालेल्या तब्बल ४१ कोटी ६९ लाख रुपये खर्चाच्या भव्य नळपाणी पुरवठा योजनेचे भूमिपूजन महसूल राज्यमंत्री योगेश कदम यांच्या हस्ते आज झाले. या महत्त्वपूर्ण प्रकल्पामुळे मंडणगडची प्रदीर्घ पाण्याची समस्या कायमस्वरूपी सुटणार असून नागरिकांना हक्काचे शुद्ध आणि मुबलक पाणी उपलब्ध होणार आहे. या सोहळ्यात दूरदृश्यप्रणालीद्वारे सहभागी होत पालकमंत्री डॉ. उदय सामंत यांनी, राज्यमंत्री योगेश कदम यांच्या सातत्यपूर्ण पाठपुराव्यामुळेच नागरिकांना ही दिवाळीची अविस्मरणीय भेट मिळाल्याचे गौरवोद्गार काढले.

भूमिपूजन प्रसंगी मार्गदर्शन करताना राज्यमंत्री कदम यांनी कामाच्या गुणवत्तेबाबत आणि कालमर्यादेबाबत अत्यंत ठाम भूमिका मांडली. मंडणगड ग्रामपंचायतीचे नगरपंचायतीत रूपांतर झाल्यानंतर शहरात पायाभूत सुविधांचा मोठा अभाव होता. जलशुद्धीकरण केंद्र व टाकीसाठी आवश्यक असणारी आरोग्य विभागाची जागा मिळण्याबाबतचा चार वर्षांचा तिढाही अवघ्या काही दिवसांत सोडवण्यात आला. कंत्राटदारांनी हे काम मार्च २०२७ पर्यंत दिलेल्या मुदतीतच गुणवत्तापूर्वक करावे.

पालकमंत्री डॉ. उदय सामंत हे दूरदृश्यप्रणालीद्वारे सहभागी झाले होते. ते म्हणाले, एखाद्या लोकप्रतिनिधीने मंत्री झाल्यानंतर आपल्या मतदारसंघाचा कायापालट कसा करावा, याचा वस्तुपाठ दापोली मतदारसंघात पाहायला मिळतो. योगेश कदम हे २४ तास जनतेच्या सेवेत कार्यरत असून थेट कार्यकर्त्यांच्या घरापर्यंत पोहोचून काम करणारे ते राज्यातील आघाडीचे नेते ठरले आहेत. शहरात सुरू असलेल्या या चौफेर विकासकामांमुळे आगामी काळात नगरपंचायतीवर विकासाचा भगवा डौलाने फडकेल, असा विश्वासही त्यांनी यावेळी व्यक्त केला.

आधुनिक तंत्रज्ञान, सौरऊर्जा आणि ३० वर्षांचे नियोजन

सध्या शहरात जुन्या वाहिन्यांमधील गळतीमुळे दर चार ते पाच दिवसांआड केवळ अर्ध्या भागाला पाणीपुरवठा होत होता. या नव्या योजनेमुळे संपूर्ण चित्रात आमूलाग्र बदल होणार आहे. या प्रकल्पासाठी केंद्र सरकारचा ५० टक्के (२०.८५ कोटी), राज्य सरकारचा ४५ टक्के (१८.७६ कोटी) आणि नगरपंचायतीचा ५ टक्के (२.०८ कोटी) असा एकत्रित निधी खर्च केला जात आहे. योजनेअंतर्गत भारजा नदीवर जॅकवेल उभारून २.५० एमएलडी क्षमतेचे आधुनिक जलशुद्धीकरण केंद्र उभारले जाईल. तेथून नागरिकांना दररोज प्रतिमाणसी १३५ लिटर शुद्ध पाणी पुरवले जाणार आहे. पाण्याच्या साठवणुकीसाठी ३.२४ लाख लिटरची मुख्य संतुलन टाकी उभारण्यासह शिवाजी नगर, दुर्ग वाडी, गांधी नगर आणि कोंझर या भागात नव्या टाक्या बांधल्या जातील. शहरात ३५.२८ किलोमीटर लांबीचे वितरण जाळे अंथरून २,८४० घरगुती व ३१६ व्यावसायिक नळजोडण्या दिल्या जाणार आहेत. विशेष म्हणजे, भविष्यातील विजेची बचत व्हावी, यासाठी १५० किलोवॅट क्षमतेचा पर्यावरणपूरक सौर ऊर्जा प्रकल्प (सोलर प्लांट) बसवण्यात येणार असून, या प्रकल्पामुळे वर्ष २०५६ पर्यंत म्हणजेच पुढील ३० वर्षांची पाण्याची गरज पूर्ण होणार आहे.

यावेळी जिल्हा परिषद अध्यक्ष अस्मिता केंद्रे, पंचायत समिती सभापती प्रणाली चिले, शशिकांत चव्हाण, प्रताप घोसाळकर, जिल्हा परिषद सदस्य सचिन धाडवे, उपसभापती दीपक मालुसरे, दापोली नगराध्यक्ष कृपा घाग, माजी नगराध्यक्ष राजू पेटकर यांच्यासह स्थानिक नगरसेवक, नगरसेविका, विविध पदाधिकारी, शासकीय अधिकारी आणि मंडणगडकर नागरिक मोठ्या संख्येने उपस्थित होते.

०००

• भगवान बिरसा मुंडा यांच्या 151 व्या जयंतीनिमित्त विविध लोककल्याणकारी उपक्रमांचे आयोजन

धुळे, दि. १० नोव्हेंबर २०२६ (जिमाका वृत्त) : आदिवासी समाजाचा समृद्ध सांस्कृतिक वारसा, स्वातंत्र्यलढ्यातील अमूल्य योगदान आणि विकासाची नवी दिशा यांचा संगम घडविण्यासाठी धुळे जिल्ह्यात ११ ते १८ नोव्हेंबर २०२६ या कालावधीत ‘जनजातीय गौरव सेवा सप्ताह-२०२६’ साजरा करण्यात येणार आहे. क्रांतिसूर्य भगवान बिरसा मुंडा यांच्या १५१ व्या जयंतीनिमित्त आयोजित या सप्ताहात आदिवासी बांधवांच्या सर्वांगीण विकासाला चालना देणारे विविध लोककल्याणकारी उपक्रम राबविण्यात येणार असल्याची माहिती राज्याचे पणन व राजशिष्टाचार मंत्री तथा धुळे जिल्ह्याचे पालकमंत्री जयकुमार रावल यांनी आज दोंडायचा येथे पत्रकारांशी संवाद साधताना दिली.

पालकमंत्री रावल म्हणाले की, आदिवासी समाजाचे हक्क, जल-जंगल-जमिनीचे रक्षण आणि देशाच्या स्वातंत्र्यलढ्यात अतुलनीय योगदान देणारे क्रांतिसूर्य भगवान बिरसा मुंडा यांचे कार्य नव्या पिढीपर्यंत पोहोचविणे आवश्यक आहे. त्यांच्या १५१ व्या जयंतीनिमित्त १५ नोव्हेंबर हा दिवस ‘जनजातीय गौरव दिन’ म्हणून साजरा करण्यात येणार आहे. या दिनाचे औचित्य साधून आदिवासी समाजाच्या विकासासाठी राबविण्यात येणाऱ्या शासकीय योजनांची माहिती आणि त्यांचे प्रत्यक्ष लाभ नागरिकांपर्यंत पोहोचविण्यावर विशेष भर देण्यात येणार आहे.

या सेवा सप्ताहाच्या यशस्वी आयोजनासाठी सर्व शासकीय यंत्रणा, स्थानिक स्वराज्य संस्था, स्वयंसेवी संस्था आणि नागरिकांचा सहभाग महत्त्वाचा ठरणार असल्याचे सांगून पालकमंत्री रावल म्हणाले की, विविध सामाजिक, सांस्कृतिक, आरोग्यविषयक आणि लोककल्याणकारी उपक्रमांच्या माध्यमातून आदिवासी समाजाच्या विकासाला अधिक गती देण्याचा प्रयत्न करण्यात येणार आहे.

 

११ व १२ नोव्हेंबर : जनजागृती आणि प्रसिद्धी

सप्ताहाची सुरुवात ११ व १२ नोव्हेंबर रोजी जनजागृती आणि प्रसिद्धी उपक्रमांनी होणार असल्याचे पालकमंत्री श्री. रावल यांनी सांगितले. जिल्हा मुख्यालयात तसेच आदिवासीबहुल तालुका मुख्यालयांमध्ये पत्रकार परिषदांचे आयोजन करून सप्ताहाची माहिती सर्वसामान्य जनतेपर्यंत पोहोचविण्यात येणार आहे. या माध्यमातून आदिवासी बांधवांना सप्ताहातील उपक्रमांची माहिती मिळून त्यामध्ये अधिकाधिक सहभाग घेता येईल, असे त्यांनी स्पष्ट केले.

 १३ नोव्हेंबर : कल्याणकारी योजनांचा लाभवाटप दिन

आदिवासी बांधवांना शासनाच्या योजनांचा लाभ सुलभतेने मिळावा, यासाठी १३ नोव्हेंबर रोजी विशेष उपक्रम राबविण्यात येणार असल्याचे पालकमंत्री रावल यांनी सांगितले. आदिवासी विकास विभागाच्या न्यूक्लिअस बजेट योजनेंतर्गत पात्र लाभार्थ्यांना धनादेशांचे वाटप करण्यात येईल. तसेच नवीन अर्जांचे संकलन केले जाणार आहे.

याच दिवशी धरती आबा जनजातीय ग्राम उत्कर्ष अभियान (DA-JGUA), प्रधानमंत्री जनजातीय आदिवासी न्याय महाअभियान (PM-JANMAN) आणि महिला बचत गटांना विविध शासकीय योजनांचा लाभ मिळवून देण्यासाठी मार्गदर्शन करण्यात येणार आहे. कृषिपूरक व्यवसाय, सिंचन सुविधा आणि स्वयंरोजगाराच्या संधींबाबत आदिवासी बांधवांना माहिती व मार्गदर्शन उपलब्ध करून देण्यात येईल. या उपक्रमातून आदिवासी कुटुंबांच्या आर्थिक स्वावलंबनाला चालना मिळेल, असा विश्वास त्यांनी व्यक्त केला.

१४ नोव्हेंबर : स्वच्छता, दीपोत्सव आणि संस्कृती दर्शन

आदिवासी समाजाची संस्कृती, परंपरा आणि ऐतिहासिक योगदान नव्या पिढीसमोर यावे, या उद्देशाने १४ नोव्हेंबर रोजी विशेष कार्यक्रमांचे आयोजन करण्यात येणार असल्याचे पालकमंत्री रावल यांनी सांगितले. जिल्ह्यातील सर्व आदिवासी समाजाचे व महापुरुषांच्या पुतळ्यांची स्वच्छता करण्यात येईल. सार्वजनिक ठिकाणी भव्य दीपोत्सव आयोजित केला जाणार आहे.

यासोबतच आदिवासी लोकसंस्कृती, देव-देवता आणि परंपरांचे दर्शन घडविणारे सांस्कृतिक कार्यक्रम पार पडतील. या उपक्रमांमुळे आदिवासी समाजाच्या सांस्कृतिक वैभवाची ओळख व्यापक स्तरावर होण्यास मदत होईल, असेही त्यांनी सांगितले.

१५ नोव्हेंबर : भगवान बिरसा मुंडा जयंतीचा मुख्य सोहळा

क्रांतिसूर्य भगवान बिरसा मुंडा यांच्या १५१ व्या जयंतीदिनी १५ नोव्हेंबर रोजी जिल्हा व तालुकास्तरावर भव्य कार्यक्रमांचे आयोजन करण्यात येणार असल्याचे पालकमंत्री रावल यांनी सांगितले. या दिवशी भगवान बिरसा मुंडा यांच्या प्रतिमेस व स्थानिक आदिवासी महापुरुषांच्या प्रतिमांना पुष्पहार अर्पण करून आदरांजली वाहण्यात येणार आहे.

पद्म पुरस्कार विजेते, ‘मन की बात’मध्ये गौरव झालेले आदिवासी समूह, समाजसेवक, बुद्धिजीवी आणि स्वातंत्र्यसैनिकांच्या नातेवाईकांचा जिल्हास्तरावर विशेष सत्कार करण्यात येईल. आदिवासी समाजाच्या उन्नतीसाठी योगदान देणाऱ्या व्यक्तींच्या कार्याचा गौरव करण्याचा हा प्रयत्न असल्याचे पालकमंत्री श्री. रावल यांनी नमूद केले.

तसेच चौक, रस्ते व उद्यानांना आदिवासी महापुरुषांची नावे देण्याचे प्रस्ताव हाती घेण्यात येणार आहेत. आदिवासी समाजाच्या प्रेरणादायी इतिहासाचे स्मरण पुढील पिढ्यांना कायम राहावे, हा यामागील उद्देश असल्याचे त्यांनी स्पष्ट केले.

१६ नोव्हेंबर : नागरिकांना शासकीय सेवा आणि योजनांचा लाभ

शासकीय योजनांचा लाभ घेण्यासाठी नागरिकांना विविध कार्यालयांत वारंवार जाण्याची गरज भासू नये, यासाठी १६ नोव्हेंबर रोजी नागरी सेवा व शासकीय कामकाज शिबिरांचे आयोजन करण्यात येणार असल्याचे पालकमंत्री रावल यांनी सांगितले.

नगरपालिकांच्या औद्योगिक व कामगार वस्त्यांमध्ये तसेच ग्रामपंचायतस्तरावर विशेष शिबिरे आयोजित करण्यात येतील. या शिबिरांमध्ये वनपट्टेधारकांना लाभवाटप, कृषी योजनांची ऑनलाइन नोंदणी, पीकविमा आणि ई-सेवांबाबत प्रत्यक्ष प्रात्यक्षिके दाखवून नागरिकांना मदत करण्यात येणार आहे. शासकीय सेवा अधिक सुलभ आणि लोकाभिमुख करण्यासाठी या उपक्रमाचा उपयोग होईल, असे त्यांनी सांगितले.

१७ नोव्हेंबर : आरोग्य व पोषण जनजागृती

आदिवासी बांधवांचे आरोग्य आणि पोषण ही विकासाची महत्त्वाची बाजू असल्याचे नमूद करून पालकमंत्री रावल म्हणाले की, १७ नोव्हेंबर रोजी आरोग्य विभागाच्या सहकार्याने भव्य आरोग्य तपासणी शिबिरे आयोजित करण्यात येणार आहेत.

या शिबिरांमध्ये सिकलसेल (Sickle Cell) आजाराविषयी जनजागृती व तपासणी, रक्तदाब तपासणी, मधुमेह चाचणी, माता-बाल संगोपन तसेच स्थानिक पौष्टिक तृणधान्ये आणि आहाराबाबत मार्गदर्शन करण्यात येईल. आरोग्यविषयक जागरूकता वाढविण्यासोबतच नागरिकांना आवश्यक तपासणी सुविधा उपलब्ध करून देण्यावर भर राहील, असे त्यांनी स्पष्ट केले.

१८ नोव्हेंबर : रोजगार, कौशल्य विकास आणि सप्ताहाचा समारोप

आदिवासी युवक-युवतींना रोजगाराच्या संधी उपलब्ध व्हाव्यात आणि त्यांच्यातील कौशल्यांना योग्य दिशा मिळावी, यासाठी १८ नोव्हेंबर रोजी विशेष कार्यक्रमांचे आयोजन करण्यात येणार असल्याचे पालकमंत्री रावल यांनी सांगितले.

सप्ताहाच्या अखेरच्या दिवशी युवक-युवतींसाठी रोजगार मेळावा, आयटीआय व कौशल्य विकास प्रशिक्षण, शिष्यवृत्ती मार्गदर्शन, बँक खाते आणि डिजिटल आर्थिक साक्षरता मार्गदर्शन शिबिरे आयोजित करण्यात येतील. या उपक्रमांच्या माध्यमातून आदिवासी युवकांना शिक्षण, कौशल्य आणि रोजगाराच्या नव्या संधींची माहिती मिळेल. याच दिवशी सप्ताहाचा समारोप करण्यात येणार असल्याचे त्यांनी सांगितले.

आदिवासी बांधवांनी सप्ताहात सक्रिय सहभागी व्हावे

जनजातीय गौरव सेवा सप्ताह हा केवळ कार्यक्रमांचा उत्सव नसून आदिवासी बांधवांपर्यंत विकासाच्या संधी पोहोचविण्याचा महत्त्वपूर्ण उपक्रम असल्याचे पालकमंत्री रावल यांनी सांगितले. आदिवासी समाजाच्या सांस्कृतिक अस्मितेचा सन्मान राखत शिक्षण, आरोग्य, रोजगार, शेती आणि स्वावलंबनाच्या माध्यमातून त्यांच्या प्रगतीला चालना देण्यासाठी शासन प्रयत्नशील आहे.

धुळे जिल्ह्यातील सर्व आदिवासी बांधव, शेतकरी, युवक, महिला भगिनी आणि नागरिकांनी या सप्ताहातील विविध उपक्रमांमध्ये सक्रिय सहभाग घ्यावा. शासनाच्या विविध योजनांचा लाभ घ्यावा आणि जनजातीय गौरव सेवा सप्ताह यशस्वी करण्यासाठी सहकार्य करावे, असे आवाहन पालकमंत्री जयकुमार रावल यांनी यावेळी केले.

००००००००००

नाशिक, दि. १० (जिमाका): दिवाळी म्हणजे केवळ दिव्यांची रोषणाई नव्हे, तर माणसा-माणसांतील नाती उजळविण्याचा, आनंद वाटण्याचा आणि आपुलकीची ऊब देण्याचा सण! समाजातील शेवटच्या घटकाच्या चेहऱ्यावरही आनंद फुलावा, प्रत्येकाच्या घरात दिवाळीचा दीप उजळावा, या संवेदनशील भावनेतून राज्याचे शालेय शिक्षण मंत्री दादाजी भुसे यांनी मालेगाव तालुक्यातील गाळणे येथील नवादे वस्तीला भेट देत आदिवासी बांधवांसोबत दिवाळीचा आनंद साजरा केला. त्यांच्या सुख-दुःखात सहभागी होत, त्यांच्यासमवेत भोजनाचा आस्वाद घेत आणि स्थानिकांशी अहिराणी भाषेतून संवाद साधत त्यांनी आपुलकीचा नवा दीप उजळविला. दुष्काळाचे सावट असले, तरी समाजातील प्रत्येकाच्या घरात दिवाळीचा आनंद पोहोचावा, हाच आपला संकल्प असल्याची भावना व्यक्त करत संकटाच्या काळात राज्य शासन जनतेच्या पाठीशी खंबीरपणे उभे राहील, अशी ग्वाहीही मंत्री दादाजी भुसे यांनी दिली.

दुष्काळी परिस्थिती आणि आर्थिक अडचणींच्या पार्श्वभूमीवर सणाचा आनंद कोणापासूनही हिरावला जाऊ नये, हीच या भेटीमागील संवेदनशील भूमिका होती. मंत्री भुसे यांनी नवादे वस्तीवरील आदिवासी बांधवांशी मनमोकळा संवाद साधत त्यांच्या अडचणी, अपेक्षा आणि परिस्थिती जाणून घेतली. केवळ औपचारिक भेट न ठेवता त्यांच्यासोबत स्नेहभोजन करून सामाजिक बांधिलकीचा प्रत्यय दिला. लोकप्रतिनिधी आणि सामान्य नागरिक यांच्यातील जिव्हाळ्याचे नाते अशा भेटींमधून अधिक दृढ होत असते, याची प्रचिती यावेळी आली.

संकटकाळात शासन खंबीरपणे पाठीशी!

निसर्गाच्या लहरीपणामुळे निर्माण होणाऱ्या संकटांचा सामना करताना नागरिकांनी खचून जाऊ नये. राज्य शासन प्रत्येक संकटाच्या काळात आदिवासी बांधवांसह सर्वसामान्य जनतेच्या पाठीशी खंबीरपणे उभे राहील, असा विश्वास मंत्री दादाजी भुसे यांनी व्यक्त केला. दुष्काळाचे सावट असले तरी प्रत्येकाच्या घरात दिवाळीचा आनंद पोहोचला पाहिजे. समाजातील कोणताही घटक सणाच्या आनंदापासून वंचित राहू नये, हाच आपला संकल्प असल्याचे त्यांनी सांगितले.

अंगणवाडीत चिमुकल्यांच्या कवितांनी फुलविला आनंद!

नवादे वस्तीवरील अंगणवाडी केंद्राला भेट देताना शालेय शिक्षण मंत्री भुसे यांनी चिमुकल्यांशी संवाद साधला. त्यांच्या निरागस चेहऱ्यावरील हास्य, उत्साह आणि उत्सुकता अनुभवताना त्यांनी मुलांशी आस्थेने गप्पा मारल्या. यावेळी चिमुकल्यांनी गोड आवाजात कविता सादर केल्या. त्यांच्या छोटेखानी सादरीकरणाला मंत्री भुसे यांनी उत्स्फूर्त दाद दिली. बालपणातील या निरागस क्षणांनी दिवाळीच्या भेटीला एक वेगळाच गोडवा प्राप्त झाला.

अहिराणीच्या गोडव्यातून जुळली आपुलकीची नाळ!

गाळणे येथे ग्रामस्थांशी संवाद साधताना मंत्री भुसे यांनी गावातील विविध प्रश्न, स्थानिकांच्या अडचणी आणि विकासाच्या अपेक्षा जाणून घेतल्या. ग्रामविकासाच्या विविध मुद्द्यांवर त्यांनी ग्रामस्थांशी चर्चा केली. विशेष म्हणजे, स्थानिकांशी संवाद साधताना त्यांनी अहिराणी भाषेचाही सहज वापर केला. आपल्या मातीतील भाषेतून साधलेला हा संवाद ग्रामस्थांच्या मनाला भावणारा ठरला. भाषेतील आपलेपणा आणि संवादातील सहजता यामुळे ग्रामस्थांशी एक जिव्हाळ्याचे नाते निर्माण झाले.

दिवाळीच्या प्रकाशात सामाजिक बांधिलकीचा संदेश!

एखाद्या वस्तीला दिलेली भेट ही केवळ कार्यक्रमाची औपचारिकता नसते, तर तेथील माणसांच्या आयुष्यात डोकावण्याची, त्यांच्या अडचणी समजून घेण्याची आणि त्यांना विश्वास देण्याची संधी असते. नवादे वस्तीवरील दिवाळीचा हा स्नेहसोहळा त्याच सामाजिक जाणिवेचे प्रतीक ठरला.

सण-उत्सवांचा खरा आनंद समाजातील प्रत्येक घटकाला सोबत घेऊन साजरा करण्यात असतो. दिवाळीच्या निमित्ताने आदिवासी बांधवांच्या चेहऱ्यावर हास्य फुलविण्याचा, त्यांच्या मनात विश्वास निर्माण करण्याचा आणि शासन आपल्या पाठीशी असल्याची जाणीव करून देण्याचा प्रयत्न मंत्री दादाजी भुसे यांच्या या भेटीतून झाला.

दिवाळीच्या दिव्यांचा प्रकाश प्रत्येकाच्या घरापर्यंत पोहोचावा, आनंदाचा क्षण प्रत्येकाच्या वाट्याला यावा आणि माणुसकीची ऊब समाजातील शेवटच्या घटकापर्यंत पोहोचावी, हाच नवादे वस्तीवरील या दिवाळी भेटीचा खरा संदेश ठरला!

०००

विशेष वृत्त

विलास बोडके, जिल्हा माहिती अधिकारी, नाशिक

रायगड-अलिबाग,दि. १० (जिमाका): आईच्या निधनानंतर गेल्या १० ते १२ वर्षांत दिवाळीचा सण मनापासून गोड वाटला नव्हता. मात्र, कर्नाळा येथील कलेगाव ग्रामपंचायत हद्दीतील आखाडवाडी आदिवासी बांधवांसोबत दिवाळीचा फराळ घेताना बालपणीच्या आठवणी जाग्या झाल्या आणि अनेक वर्षांनंतर दिवाळीचा खरा आनंद अनुभवता आला, अशी भावुक व आपुलकीची भावना सांस्कृतिक कार्यमंत्री ॲड.  आशिष शेलार यांनी व्यक्त केली. रायगड जिल्ह्यातील पनवेल तालुक्यामधील कलेगाव येथे आयोजित दिवाळी स्नेहमेळाव्यात ते बोलत होते.

या कार्यक्रमाला आमदार प्रशांत ठाकूर, आमदार महेश बालदी, पनवेल महापौर नितीन पाटील, जिल्हा परिषद अध्यक्ष मंगेश वाकडीकर, पनवेल पंचायत समिती सभापती श्रीमती रंजना वास्कर, उपसभापती भूपेंद्र पाटील, जिल्हा परिषद व पंचायत समिती सदस्य तसेच आदिवासी विकास प्रकल्प पेणच्या प्रकल्प अधिकारी तेजस्विनी गलांडे आदी मान्यवर उपस्थित होते.

संकट काळात बळीराजाच्या पाठीशी शासन..

यावेळी मंत्री ॲड. शेलार म्हणाले की, राज्यातील ३०५ तालुक्यांमध्ये पावसाच्या कमतरतेमुळे दुष्काळसदृश परिस्थिती निर्माण झाली आहे. अशा बिकट परिस्थितीत शेतकऱ्यांना तातडीचा दिलासा देण्यासाठी मुख्यमंत्री देवेंद्र फडणवीस यांनी दिवाळीपूर्वीच पात्र शेतकऱ्यांच्या बँक खात्यात प्रत्येकी ५ हजार रुपयांची मदत जमा केली आहे. तसेच, पनवेल तालुक्यातील शेतकऱ्यांनाही दुष्काळग्रस्त घोषित करण्यासाठी आपण मंत्रिमंडळात जोरदार मागणी करणार असल्याचे त्यांनी स्पष्ट केले. आदिवासी समाजाची लोककला, पारंपरिक नृत्य, गायन आणि त्यांचे निसर्गाशी असलेले नाते जपण्याचे आवाहन करत त्यांच्या सर्वांगीण विकासासाठी विशेष योजना राबविण्यात येतील, असेही त्यांनी नमूद केले.

विकासकामांच्या माध्यमातून सर्वसमावेशक प्रगती..

आमदार ठाकूर म्हणाले की, पंतप्रधान नरेंद्र मोदी यांच्या ‘सबका साथ, सबका विकास’ या संकल्पनेतून आदिवासी व दुर्गम भागातील शेवटच्या घटकापर्यंत पक्की घरे, गॅस सिलिंडर, शौचालय, सौरऊर्जा आणि विविध शासकीय योजनांचे लाभ पोहोचत आहेत. कोविडसारख्या महामंदीच्या काळातही गरीब कुटुंबांना आर्थिक मदत व मोफत अन्नधान्य पुरविण्यात आले. आदिवासी वाड्यांमध्ये रस्ते, समाजमंदिरे, घरकुल आणि विविध विकासकामे करण्यासाठी सर्व लोकप्रतिनिधी कटिबद्ध असल्याचे त्यांनी सांगितले.

आखाडवाडीत घरगुती फराळाचा आनंद व शेतीपूरक साहित्य वाटप..

मंत्री ॲड. शेलार यांनी आखाडवाडी आदिवासी वाडीतील रोशन वाघमारे यांच्या घरी जाऊन सहपरिवार दिवाळीच्या फराळाचा आनंद घेतला. या स्नेहमेळाव्यात जिल्हा परिषदेच्या १५ टक्के निधीतून सात आदिवासी वाड्यांतील ३८९ कुटुंबांना शेतीपूरक अवजारांचे वाटप करण्यात आले. तसेच, आदिवासी बांधवांनी सादर केलेल्या पारंपरिक नृत्य व लोककलेच्या सादरीकरणाने संपूर्ण कार्यक्रमात एक वेगळाच उत्साह निर्माण केला.

शेतकऱ्यांच्या बांधावर प्रत्यक्ष भेट आणि शेतीची पाहणी..

कार्यक्रमानंर मंत्री ॲड. शेलार व अन्य मान्यवरांनी शिरढोण येथील शेतामध्ये जाऊन प्रत्यक्ष पाहणी केली आणि दुष्काळामुळे अडचणीतील शेतकऱ्यांसोबत संवाद साधला. तसेच, आद्य क्रांतिकारक वासुदेव बळवंत फडके यांच्या पूर्णाकृती पुतळ्यास पुष्पहार अर्पण करून आदरांजली वाहण्यात आली.

प्रशासकीय आणि लोकप्रतिनिधींच्या या थेट सहभागामुळे शासन आपल्या दारी आणि पाठीशी असल्याचा दृढ विश्वास रायगडमधील शेतकरी व आदिवासी बांधवांच्या मनात निर्माण झाला.

०००

 

 

छत्रपती संभाजीनगर, दि. १० (जिमाका) : क्रांतिसूर्य भगवान बिरसा मुंडा यांच्या जयंतीनिमित्त ११ ते १८ नोव्हेंबर २०२६ या कालावधीत जनजातीय गौरव सेवा सप्ताहाचे आयोजन करण्यात आले आहे. या सप्ताहाच्या माध्यमातून आदिवासी समाजातील पात्र लाभार्थ्यांपर्यंत शासनाच्या विविध योजनांचा लाभ पोहोचविणे, आवश्यक कागदपत्रांची पूर्तता करणे, आरोग्यविषयक जनजागृती करणे तसेच आदिवासी संस्कृती आणि जननायकांच्या ऐतिहासिक योगदानाचे जतन करण्यासाठी एकात्मिक आदिवासी विकास प्रकल्प, छत्रपती संभाजीनगर यांच्या वतीने विशेष कृती आराखडा तयार करण्यात आला आहे.

आदिवासी विकास मंत्री डॉ. अशोक वुईके यांच्या संकल्पनेतून आणि प्रकल्प अधिकारी  चेतना मोरे यांच्या मार्गदर्शनाखाली छत्रपती संभाजीनगर, जालना, बीड आणि लातूर या चार जिल्ह्यांत विविध उपक्रम राबविण्यात येणार आहेत. स्थानिक प्रशासन, लोकप्रतिनिधी आणि संबंधित शासकीय विभागांच्या समन्वयातून या सप्ताहाची अंमलबजावणी करण्यात येणार आहे.

सप्ताहाच्या माध्यमातून आदिवासी बांधवांना शासकीय योजनांची माहिती देण्याबरोबरच जात प्रमाणपत्र, आधार कार्ड, रेशन कार्ड आणि मतदार नोंदणीसारख्या आवश्यक कागदपत्रांसाठी विशेष सेवा शिबिरे आयोजित केली जाणार आहेत. तसेच रक्तदान, आरोग्य तपासणी, पोषणविषयक जनजागृती आणि लाभार्थ्यांना योजनांच्या माहिती पुस्तिकांचे वितरण करण्यात येणार आहे. आदिवासी स्वातंत्र्यसैनिकांच्या स्मारकांचे सुशोभीकरण, स्वच्छता आणि दीपोत्सवाचे आयोजन करून त्यांच्या कार्याला अभिवादन करण्यात येईल.

सप्ताहातील प्रमुख कार्यक्रम

११ नोव्हेंबर रोजी सेवा सप्ताहाच्या प्रसिद्धी व प्रचाराचा प्रारंभ करण्यात येणार आहे. १२ नोव्हेंबर रोजी छत्रपती संभाजीनगर येथे पालकमंत्री संजय शिरसाट आणि प्रकल्प अधिकारी चेतना मोरे यांच्या उपस्थितीत पत्रकार परिषद होईल. तसेच बीड, लातूर, जालना आणि छत्रपती संभाजीनगर जिल्ह्यांतील विविध तालुक्यांतही पत्रकार परिषदांचे आयोजन करण्यात येणार आहे.

१३ नोव्हेंबर रोजी अंबड तहसील कार्यालयात न्यू.ब.यो. अंतर्गत पात्र लाभार्थ्यांना धनादेश वितरणासह अनुसूचित जमातीच्या विविध योजनांची माहिती देण्यात येईल. १४ नोव्हेंबर रोजी छत्रपती संभाजीनगर व जालना जिल्ह्यांतील आदिवासी स्वातंत्र्यसैनिकांच्या स्मारकांचे सुशोभीकरण, वेरूळ येथे दीपोत्सव तसेच जाफ्राबाद, शिवूर बंगला, चोकाळा आणि कन्नड येथील स्मारकांची स्वच्छता करण्यात येईल.

१५ नोव्हेंबर रोजी भगवान बिरसा मुंडा यांच्या जयंतीनिमित्त छत्रपती संभाजीनगर येथे झाल्टा फाट्याजवळील अंबिका लॉन्स, आडगाव फाटा येथे मुख्य शासकीय कार्यक्रम आयोजित करण्यात आला आहे. पालकमंत्री संजय शिरसाट यांच्यासह स्थानिक मंत्री, खासदार, आमदार आणि आदिवासी बांधवांच्या उपस्थितीत अभिवादन व गौरव कार्यक्रम होणार आहे. यावेळी आदिवासी स्वातंत्र्यलढ्यातील क्रांतिकारकांच्या कार्याचे स्मरण करण्यात येणार आहे.

१६ नोव्हेंबर रोजी शिरूर कासार येथे आधार कार्ड व इतर आवश्यक शासकीय कागदपत्रांसाठी सेवा शिबिर आयोजित करण्यात आले आहे. १७ नोव्हेंबर रोजी सिल्लोड येथे लोकप्रतिनिधींच्या उपस्थितीत भव्य मेळावा, आरोग्य तपासणी आणि पोषण जनजागृती शिबिर होणार आहे. या कार्यक्रमास मंत्री, खासदार, आमदार, जिल्हाधिकारी जालना, उपविभागीय अधिकारी व तहसीलदार उपस्थित राहणार आहेत. १८ नोव्हेंबर रोजी प्रकल्प कार्यालय, छत्रपती संभाजीनगर येथे सप्ताहाचा समारोप होईल.

यासोबतच आदिवासी समाजातील लाभार्थ्यांशी थेट संवाद साधून त्यांना मिळालेल्या शासकीय लाभांची माहिती संकलित केली जाणार आहे. लाभार्थ्यांच्या यशोगाथा चित्रफितींच्या माध्यमातून समाजमाध्यमांवर प्रसारित करून योजनांची माहिती व्यापक स्तरावर पोहोचविण्यात येईल. पारंपरिक कला, लोकनृत्य आणि सांस्कृतिक कार्यक्रमांनाही या सप्ताहात प्राधान्य देण्यात येणार आहे.

शासकीय योजनांचा लाभ समाजातील शेवटच्या घटकापर्यंत पोहोचविणे, आदिवासी बांधवांच्या समस्या जाणून घेऊन त्यांचे निराकरण करणे आणि आदिवासी अस्मिता व संस्कृतीचे संवर्धन करणे हा या सप्ताहाचा प्रमुख उद्देश आहे. या उपक्रमांच्या प्रभावी अंमलबजावणीसाठी एकात्मिक आदिवासी विकास प्रकल्प, छत्रपती संभाजीनगर कटिबद्ध असल्याचे प्रकल्प अधिकारी  चेतना मोरे यांनी सांगितले.

000000

नाशिक, दि. ९ (जिमाका): एका बाजूला दुष्काळाच्या झळा, पाण्याची चिंता आणि प्रतिकूल परिस्थितीशी झुंजणारे ग्रामीण जनजीवन… अशा वातावरणात सणांचा आनंदही अनेकदा परिस्थितीच्या मर्यादेत अडकून पडतो. मात्र, परिस्थिती कितीही कठीण असली तरी चिमुकल्यांच्या चेहऱ्यावरील हास्य हरवू नये, त्यांच्या बालविश्वात आनंदाचे रंग भरले जावेत, या भावनेतून शालेय शिक्षण मंत्री दादाजी भुसे यांनी मालेगाव तालुक्यातील गाळणे गावच्या नवादे वस्तीवरील अंगणवाडी केंद्राला भेट दिली. या भेटीतून त्यांनी केवळ बालकांची विचारपूस केली नाही, तर त्यांच्या आनंदात सहभागी होत मायेचा दिवाळीचा दिवाही उजळविला.

दिवाळी सारख्या सणासुदीचा आनंद प्रत्येक घरापर्यंत पोहोचावा आणि विशेषतः बालकांच्या निरागस बालपणावर परिस्थितीच्या सावल्या पडू नयेत, ही संवेदनशील भावना या भेटीतून अधोरेखित झाली.

मंत्री भुसे अंगणवाडीत पोहोचताच चिमुकल्यांनी मोठ्या उत्साहात त्यांचे स्वागत केले. कुणाच्या चेहऱ्यावर कुतूहल, कुणाच्या डोळ्यांत उत्सुकता, तर कुणाच्या ओठांवर स्वागताचे गोड शब्द… अशा निरागस वातावरणात अंगणवाडीचा परिसर आनंदाने फुलून गेला. बालकांनी विविध कविता सादर करून मंत्री भुसे यांच्यासह उपस्थितांची मने जिंकली. त्यांच्या चिमुकल्या आवाजातील कवितांनी जणू दुष्काळाच्या गंभीर वातावरणात आनंदाची एक प्रसन्न लकेर उमटविली.

मंत्री भुसे यांनीही बालकांमध्ये रमून त्यांच्याशी आपुलकीने संवाद साधला. त्यांच्या कविता ऐकल्या, बालसुलभ प्रश्नांना प्रतिसाद दिला आणि त्यांच्या निरागस अभिव्यक्तीचे कौतुक केले. यावेळी बालकांना नवीन कपडे, भेटवस्तू आणि खाऊचे वाटप करण्यात आले. भेटवस्तू हातात पडताच चिमुकल्यांच्या चेहऱ्यावर उमटलेला आनंद, डोळ्यांतील चमक आणि ओठांवरील हसू या क्षणाला अधिकच अविस्मरणीय करून गेले.

बालकांच्या चेहऱ्यावर आनंदाचे हास्य फुलविण्याचा हा छोटासा प्रयत्न मनाला स्पर्शून जाणारा ठरला. कारण संकट कितीही मोठे असले तरी बालपणाचा आनंद हिरावला जाऊ नये, हीच समाजाच्या संवेदनशीलतेची खरी कसोटी असते. सणाचा खरा अर्थ केवळ घराघरांत दिवे लावण्यात नसून, दुसऱ्याच्या आयुष्यात आनंदाचा प्रकाश निर्माण करण्यात आहे, याची जाणीव या भेटीने करून दिली.

महिला आणि बालकांशी संवाद साधत त्यांच्या अडचणी, अपेक्षा आणि भावना जाणून घेण्याचा प्रयत्नही यावेळी करण्यात आला. दुष्काळाच्या पार्श्वभूमीवर ग्रामीण भागातील कुटुंबांच्या पाठीशी आपुलकीने उभे राहण्याचा आणि बालकांच्या चेहऱ्यावर आनंद फुलविण्याचा शासनाचा आणि लोकप्रतिनिधींचा हा जिव्हाळ्याचा उपक्रम ठरला.

परिस्थितीच्या उन्हातही बालपण कोमेजू नये, त्यांच्या निरागस हास्याला काळजीची किनार लाभू नये आणि प्रत्येक चिमुकल्याच्या आयुष्यात आनंदाचे रंग भरले जावेत, हाच या भेटीमागील संवेदनशील भाव होता, असे मंत्री भुसे यांनी सांगितले.

दुष्काळाच्या सावटात शासनाच्या मायेचा हात देत उजळविलेला हा आनंदाचा दीप चिमुकल्यांच्या मनात निश्चितच सुखद आठवण बनून राहणारा ठरणार आहे.

०००

दिवाळी हा आनंद, उत्साह आणि मांगल्याचा सण. मात्र, यंदा महाराष्ट्रातील अनेक शेतकरी कुटुंबांसाठी दुष्काळाच्या संकटामुळे या सणाचा आनंद काहीसा कमी झाला आहे. अनियमित पाऊस, पिकांचे नुकसान, पाणीटंचाई आणि आर्थिक अडचणी अशा परिस्थितीत ग्रामीण भागातील शेतकरी कुटुंबे सण साजरा करीत आहेत. अशा वेळी राज्य शासनाने केवळ आर्थिक मदत आणि प्रशासकीय निर्णयांपुरती आपली भूमिका मर्यादित न ठेवता, प्रत्यक्ष शेतकऱ्यांच्या घरापर्यंत पोहोचून त्यांच्या सुख-दुःखात सहभागी होण्याचा प्रयत्न केला आहे. एका बाजूला शेतकऱ्यांच्या बँक खात्यांत आर्थिक मदत जमा होत असताना, दुसऱ्या बाजूला मुख्यमंत्री, उपमुख्यमंत्री आणि मंत्रिमंडळातील सहकारी ग्रामीण भागात जाऊन शेतकरी कुटुंबांसोबत दिवाळी साजरी करीत आहेत. शासनाच्या या दोन्ही कृतींतून प्रशासनाचा संवेदनशील आणि मानवी चेहरा अधोरेखित होत आहे.

मंत्र्यांचे दौरे ही नियमित प्रशासकीय बाब आहे. मात्र, यावेळचे ग्रामीण भागातील दौरे हे केवळ विकासकामांचा आढावा घेणे किंवा अधिकाऱ्यांच्या बैठका घेणे एवढ्यापुरते मर्यादित नाहीत. शासकीय शिष्टाचार आणि औपचारिकतेच्या पलीकडे जाऊन या भेटींमधून संवेदनशीलतेचा प्रत्यय येत आहे. संकटाच्या काळात कुणीतरी आपल्या सोबतीला आहे, आपली विचारपूस करीत आहे, ही भावनाच सामान्य माणसाला मोठा दिलासा देणारी असते. मुख्यमंत्र्यांसह मंत्रिमंडळातील सदस्यांनी महाराष्ट्रातील विविध ग्रामीण भागांत पोहोचून या भावनेला बळ देण्याचा प्रयत्न केला आहे.

विशेष म्हणजे, या भेटी केवळ आश्वासनांपुरत्या मर्यादित नाहीत. दुष्काळग्रस्त शेतकऱ्यांना तातडीचा दिलासा मिळावा, यासाठी राज्य शासनाने पात्र शेतकऱ्यांना प्रत्येकी पाच हजार रुपयांची अग्रीम मदत देण्याचा निर्णय घेतला. थेट लाभ हस्तांतरणाच्या माध्यमातून ही रक्कम शेतकऱ्यांच्या खात्यांत जमा करण्यात येत आहे. ५ नोव्हेंबरपर्यंत राज्यातील ८७ लाख ४५ हजार ६६९ शेतकऱ्यांच्या खात्यांत ४ हजार ३७२ कोटी ८३ लाख रुपयांची मदत जमा झाली आहे.

दिवाळीसारख्या आनंदाच्या सणात आर्थिक अडचणींचा सामना करणाऱ्या शेतकरी कुटुंबांना हा दिलासा महत्त्वाचा ठरला आहे. सामान्य माणसाच्या आयुष्यात दिवाळी हा आनंद, भेटीगाठी आणि विरंगुळ्याचा सण असतो. अशा वेळी आर्थिक मदतीसोबतच शासनाने संवेदनशीलतेचाही परिचय दिला आहे.

राज्य शासनासोबतच केंद्र शासनाच्या प्रधानमंत्री किसान सन्मान निधी योजनेचा २४ वा हप्ता ३० ऑक्टोबर रोजी वितरित करण्यात आला. या हप्त्यांतर्गत देशातील ९ कोटी ३४ लाख पात्र शेतकरी कुटुंबांना १८ हजार ६९० कोटी रुपयांहून अधिक निधी थेट बँक खात्यांत जमा करण्यात आला. केंद्र आणि राज्य शासनाच्या या आर्थिक सहाय्याच्या माध्यमातून शेतकऱ्यांना आर्थिक आधार देण्याचा प्रयत्न होत आहे.

याशिवाय, दुष्काळग्रस्त भागातील शेतकऱ्यांसाठी पीककर्जाचे पुनर्गठन, कर्जवसुलीला स्थगिती, शैक्षणिक शुल्कात सवलत, पिण्याच्या पाण्याची उपलब्धता, जनावरांसाठी चारा आणि पाण्याचे नियोजन अशा विविध उपाययोजना राबविण्यात येत आहेत. पात्र शेतकऱ्यांना पुण्यश्लोक अहिल्यादेवी होळकर शेतकरी कर्जमुक्ती योजनेचाही लाभ देण्यात येत आहे. आर्थिक मदत, विविध सवलती आणि स्थानिक पातळीवरील उपाययोजनांच्या माध्यमातून शेतकरी कुटुंबांना दिलासा देण्याचे प्रयत्न सुरू आहेत. या निर्णयांमधून शासन शेतकऱ्यांच्या पाठीशी ठामपणे उभे असल्याचा विश्वास निर्माण होत आहे.

या संवेदनशील भूमिकेचे प्रत्यंतर मुख्यमंत्री देवेंद्र फडणवीस यांच्या नागपूर जिल्ह्यातील भेटीतून आले. नरखेड तालुक्यातील लोहारी सावंगा येथील शेतकरी रामभाऊ बालपांडे यांच्या घरी मुख्यमंत्र्यांनी दिवाळी साजरी केली. विशेष म्हणजे, त्यांनी केवळ सदिच्छा भेट देऊन परत न जाता बालपांडे कुटुंबीयांसोबत वेळ घालवला आणि त्यांच्या घरी मुक्कामही केला. कुटुंबीयांशी संवाद साधताना शेतीची परिस्थिती, ग्रामीण भागातील अडचणी आणि पाण्याचे प्रश्न जाणून घेतले. अरुणाताई बालपांडे यांनी मुख्यमंत्र्यांचे औक्षण केले. घरगुती भोजनाचा आस्वाद घेत त्यांनी कुटुंबीयांसोबत दिवाळीचा आनंद अनुभवला.

राज्याचा प्रमुख आपल्या घरी येतो, आपल्या अडचणी समजून घेतो, आपल्या कुटुंबीयांशी आपुलकीने संवाद साधतो, हा सामान्य कुटुंबासाठी वेगळाच अनुभव असतो. अशा भेटींमधून शासन आणि नागरिक यांच्यातील संवादाला आत्मीयतेची जोड मिळते. या भेटीचे महत्त्व केवळ औपचारिक सदिच्छा भेटीपुरते मर्यादित नसून ग्रामीण भागातील वास्तव जाणून घेण्याच्या दृष्टीनेही ते महत्त्वाचे आहे. 

मुख्यमंत्र्यांनी या भेटीला प्रशासन आपल्या दारी या संकल्पनेचे स्वरूप दिले. यावेळी शेतातील बोअरवेल खोदण्यावरील निर्बंध १५ डिसेंबरपर्यंत शिथिल करण्याबाबत घोषणा करण्यात आली. ही शिथिलता विशिष्ट क्षेत्रांतील फळबागांसाठी आवश्यक परवानगी आणि प्रशासकीय देखरेखीच्या अधीन असेल. तसेच स्थानिक जलसंधारण, सिंचन आणि पायाभूत सुविधांसंबंधीच्या प्रश्नांवरही चर्चा करण्यात आली. मुख्यमंत्र्यांचा शेतकरी कुटुंबातील मुक्काम हा ग्रामीण भागातील नागरिकांसाठी आत्मीयतेचा आणि विश्वासाचा अनुभव ठरला.

उपमुख्यमंत्री एकनाथ शिंदे यांनीही जालना तालुक्यातील भिलपुरी येथे दुष्काळग्रस्त शेतकरी अंबादास तांगडे यांच्या घरी भेट देऊन कुटुंबीयांसोबत दिवाळी साजरी केली. केवळ एक एकर शेतीवर उदरनिर्वाह अवलंबून असलेल्या या कुटुंबाची परिस्थिती त्यांनी जाणून घेतली. कुटुंबीयांशी संवाद साधत त्यांच्या आर्थिक अडचणी आणि शेतीची स्थिती समजून घेतली. यावेळी त्यांनी ग्रामीण भागातील साध्या घरगुती भोजनाचा स्वीकार करीत कुटुंबीयांसोबत दिवाळीचा आनंद अनुभवला. शेतकऱ्यांना कोणत्याही परिस्थितीत वाऱ्यावर सोडणार नाही, अशी ग्वाहीही त्यांनी यावेळी दिली.

मुख्यमंत्री आणि उपमुख्यमंत्र्यांप्रमाणेच मंत्रिमंडळातील अन्य सदस्यांनीही विविध जिल्ह्यांमध्ये शेतकरी आणि गरजू कुटुंबांपर्यंत पोहोचण्याचा प्रयत्न केला. पालकमंत्र्यांनीही आपल्या जिल्ह्यांतील दुर्गम भागांमध्ये जाऊन दिवाळी भेटींच्या माध्यमातून नागरिकांशी संवाद साधला. या उपक्रमातून शासन आपल्या पाठीशी आहे आणि सामान्य नागरिकांच्या हितासाठी कटिबद्ध आहे, हा विश्वास तळागाळापर्यंत पोहोचविण्याचा प्रयत्न झाला आहे.

या सर्व भेटींचे महत्त्व केवळ सण साजरा करण्यापुरते मर्यादित नाही. शासनातील सर्वोच्च पदावरील व्यक्ती सामान्य शेतकऱ्याच्या घरात जाऊन त्याच्या कुटुंबीयांशी संवाद साधते, त्यांच्या अडचणी जाणून घेते आणि त्यांच्या भोजनाचा स्वीकार करते, तेव्हा शासन आणि सामान्य नागरिक यांच्यातील संवादाला आत्मीयतेची जोड मिळते. मंत्र्यांचा साधेपणा, कुटुंबीयांशी साधलेला संवाद आणि ग्रामीण जीवनाशी जोडून घेण्याचा प्रयत्न यामुळे संबंधित कुटुंबांसह परिसरातील नागरिकांनाही विश्वास आणि समाधानाचा अनुभव मिळतो. शासनाच्या योजना आणि निर्णयांची माहिती नागरिकांपर्यंत पोहोचविण्याबरोबरच त्यांच्या प्रत्यक्ष अडचणी समजून घेण्याची संधी अशा उपक्रमांमुळे निर्माण होते.

दुष्काळ हा केवळ शेतीच्या उत्पादनावर परिणाम करणारा प्रश्न नसून त्याचे परिणाम शेतकरी कुटुंबातील शिक्षण, आरोग्य, रोजगार, विवाह आणि ग्रामीण अर्थव्यवस्थेवरही होतात. त्यामुळे अशा संकटाच्या काळात आर्थिक मदतीसोबतच सामाजिक आणि भावनिक आधार देणेही महत्त्वाचे ठरते. अर्थात, या भेटींमधून व्यक्त झालेला विश्वास प्रत्यक्ष मदतीच्या सातत्यपूर्ण अंमलबजावणीतून अधिक दृढ होणे आवश्यक आहे. पात्र लाभार्थ्यांपर्यंत मदत वेळेत पोहोचणे, पिण्याच्या पाण्याची आणि जनावरांच्या चाऱ्याची उपलब्धता कायम ठेवणे, तसेच शेतीच्या पुनर्बांधणीसाठी प्रभावी उपाययोजना करणे, हीदेखील तितकीच महत्त्वाची जबाबदारी आहे.

शेतकऱ्यांच्या खात्यांत आर्थिक मदत जमा करणे, त्यांच्या प्रश्नांवर निर्णय घेणे आणि त्याच वेळी त्यांच्या घरापर्यंत पोहोचून सुख-दुःखात सहभागी होणे, या दोन्ही गोष्टींमधून शासनाची भूमिका स्पष्ट होते. संकटाच्या काळात शेतकरी एकटा नाही, शासन त्याच्या पाठीशी आहे, हा विश्वास निर्माण करणे हीच या उपक्रमांची महत्त्वाची फलश्रुती आहे.      

यासोबतच ग्रामीण भागातील या भेटींमधून भविष्यातील विकासाचे प्राधान्यक्रम निश्चित करण्याची संधीही उपलब्ध झाली आहे. अनेक वर्षांपासून कोणत्या पायाभूत सुविधा अपुऱ्या राहिल्या आहेत, पाणी साठवण, सिंचन, जलसंधारण, शेतीपूरक व्यवसाय आणि ग्रामीण रोजगाराच्या क्षेत्रांत कोणत्या सुधारणा आवश्यक आहेत, याचा प्रत्यक्ष अनुभव शासनाच्या सर्वोच्च स्तरावरील नेतृत्वाला मिळणे महत्त्वाचे आहे. हवामान बदलामुळे निर्माण होणाऱ्या अनिश्चिततेचा विचार करून शाश्वत उपाययोजना आखणे गरजेचे आहे. भविष्यात कितीही भीषण दुष्काळ पडला, तरी ग्रामीण जीवनाची घडी विस्कटणार नाही, अशी सक्षम व्यवस्था निर्माण करण्यासाठी या भेटी दिशादर्शक ठरू शकतात. त्यामुळे या उपक्रमांचा दुहेरी फायदा आहे. एकीकडे संकटग्रस्त कुटुंबांना भावनिक आधार मिळतो, तर दुसरीकडे भविष्यातील विकासाचे नियोजन करण्यासाठी शासनाला वास्तवाचे आकलन होते.

दिवाळीच्या प्रकाशात दुष्काळग्रस्त कुटुंबांच्या आयुष्यात आशेचा किरण निर्माण करण्याचा हा प्रयत्न आहे. आर्थिक मदतीला माणुसकीची जोड देत शासनाने सामान्य माणसाच्या जीवनाशी नाते जोडण्याचा प्रयत्न केला आहे. शेतकऱ्यांच्या घरातील पणती तेवत ठेवण्यासाठी त्यांच्या खात्यांत निधी पोहोचत आहे आणि त्याच वेळी शासनाचे प्रतिनिधी त्यांच्या दारात पोहोचत आहेत. हाच आहे संवेदनशील प्रशासनाचा दुष्काळातील मानवी चेहरा!

०००

 -प्रवीण टाके,(उपसंचालक) विभागीय माहिती कार्यालय, छत्रपती संभाजीनगर

मुंबई, दि. १० : राज्यातील साखर कारखान्यांचा गाळप हंगाम सुरू झाल्याच्या पार्श्वभूमीवर ऊसतोड मजुरांसोबत स्थलांतरित होणाऱ्या बालकांच्या आरोग्याची विशेष काळजी घेण्यासाठी त्यांच्या तात्पुरत्या वस्त्यांवर ‘बालसंजीवनी’ अभियान राबविण्यात येणार आहे. या अभियानांतर्गत कारखाना परिसर तसेच उसाच्या शेतांमध्ये जाऊन बालकांची आरोग्य तपासणी, आवश्यक उपचार आणि लसीकरण करण्यात येणार असल्याची माहिती सार्वजनिक आरोग्य राज्यमंत्री मेघना साकोरे-बोर्डीकर यांनी पत्रकाद्वारे दिली.

राज्यातील विविध साखर कारखान्यांचा गाळप हंगाम सुरू झाल्याने ऊसतोड मजूर कामासाठी आपल्या कुटुंबासह घराबाहेर पडले आहेत. कारखाना परिसरात आणि शेतांमध्ये त्यांच्या तात्पुरत्या वस्त्या तयार झाल्या आहेत. या मजुरांसोबत मोठ्या संख्येने लहान मुलेही स्थलांतरित होत आहेत. मात्र, स्थलांतराच्या काळात या बालकांना नियमित आरोग्य सेवा, तपासणी आणि लसीकरणाच्या सुविधा मिळण्यात अडचणी येतात. ही बाब लक्षात घेऊन आरोग्य विभागामार्फत विशेष अभियान राबविण्यात येणार आहे.

कुपोषण, रक्तक्षयासह विविध आजारांची तपासणी

राष्ट्रीय बाल स्वास्थ्य कार्यक्रमांतर्गत (RBSK) स्थलांतरित प्रत्येक बालकाची आरोग्य तपासणी करण्यात येणार आहे. यामध्ये कुपोषण, रक्तक्षय, बालविकासातील विलंब, जन्मजात व्यंग तसेच संसर्गजन्य आजारांची तपासणी करून आवश्यकतेनुसार उपचार केले जातील. या मोहिमेत संबंधित भागातील आरोग्य कर्मचारी, आरोग्य सेवक, आशा स्वयंसेविका, अंगणवाडी सेविका तसेच साखर कारखान्यांच्या व्यवस्थापनाचा सहभाग घेतला जाणार आहे.

कारखानानिहाय नियोजन करण्याचे निर्देश

अभियानाची प्रभावी अंमलबजावणी करण्यासाठी राज्यातील सर्व साखर कारखान्यांची यादी तयार करणे, कारखाना परिसरातील कामगारांच्या पालांचे आणि तात्पुरत्या वस्त्यांचे सर्वेक्षण करणे, तसेच याच ठिकाणी बालकांचे आवश्यक लसीकरण करण्याबाबत आरोग्य विभागाच्या प्रधान सचिवांना राज्यमंत्री बोर्डीकर यांनी निर्देश दिले आहेत.

बालकांच्या आरोग्यासाठी मजुरांची फरफट थांबविणार

ऊसतोड मजूर अनेक दिवस कुटुंबासह घरापासून दूर राहतात. अशा परिस्थितीत मुलांच्या आजारपणात उपचारांसाठी आरोग्य केंद्रापर्यंत जाणे, नियमित तपासणी करणे आणि लसीकरण करून घेणे मजुरांना शक्य होत नाही. कामाच्या व्यापामुळे बालकांच्या आरोग्याकडेही दुर्लक्ष होण्याची शक्यता असते. त्यामुळे आरोग्य यंत्रणेने थेट मजुरांच्या पालांपर्यंत पोहोचून सेवा देणे आवश्यक आहे. बालकांच्या आजारपणात पालकांची होणारी धावपळ आणि फरफट थांबविणे, तसेच स्थलांतरित बालकांना दर्जेदार आरोग्य सुविधा उपलब्ध करून देऊन त्यांचे आरोग्य सुदृढ ठेवणे, हा ‘बालसंजीवनी’ अभियानाचा मुख्य उद्देश असल्याचे राज्यमंत्री मेघना साकोरे-बोर्डीकर यांनी स्पष्ट केले.

०००

गजानन पाटील/विसंअ

धुळे, दि. 9 नोव्हेंबर 2026 (जिमाका वृत्त) :

दुष्काळाने शिवारातील हिरवळ हिरावली असली, तरी शेतकऱ्यांच्या मनातील उद्याची आशा कायम आहे. यंदाची दिवाळी शेतकरी कुटुंबांसाठी आव्हानात्मक असली, तरी या संकटातून सावरण्यासाठी शासन त्यांच्या पाठीशी ठामपणे उभे आहे. बळीराजाच्या कष्टाला आधार देणे, त्याच्या हक्काची मदत वेळेत पोहोचवणे आणि पाण्याच्या शाश्वत व्यवस्थेतून शेतीला पुन्हा उभारी देणे, यासाठी शासन कटिबद्ध आहे. दुष्काळाचे सावट दूर करून शिवार समृद्ध कृरण्यासाठी सर्वतोपरी प्रयत्न करण्यात येतील, असा विश्वास राज्याचे पणन व राजशिष्टाचार मंत्री तथा धुळे जिल्ह्याचे पालकमंत्री जयकुमार रावल यांनी व्यक्त केला.

 

शिंदखेडा तालुक्यातील आच्छी व दत्ताणे येथे आयोजित दिवाळी भेट व अन्नधान्य वितरण कार्यक्रमात पालकमंत्री श्री. रावल बोलत होते. यावेळी बाजार समितीचे सभापती नारायण पाटील, धुळ्याचे माजी महापौर प्रदीप कर्पे, माजी स्थायी समिती सभापती सुनील बैसाणे, माजी सभापती जिजाबाराव पाटील, माजी सरपंच अण्णा इंगळे, माजी पंचायत समिती सदस्य नारायणसिंग गिरासे, राहुल पाटील, विश्वनाथ पाटील, दिनेश पोद्दार, तहसीलदार नितीनकुमार देवरे, तालुका पुरवठा अधिकारी नितीन नंदावार, पुरवठा निरीक्षक धनराज पाटील यांच्यासह शेतकरी, युवक व ग्रामस्थ उपस्थित होते.

 

यावेळी त्यांनी शेतकरी बांधवांशी संवाद साधून त्यांच्या अडचणी जाणून घेतल्या. दिवाळीच्या निमित्ताने शेतकरी कुटुंबांच्या दिवाळी फराळाच्या आनंदात सहभागी होत त्यांनी शासनाच्या विविध मदत व विकास योजनांची माहिती दिली.

 

मदत वेळेत देण्यास प्राधान्य

पालकमंत्री श्री. रावल म्हणाले की, यंदा पावसाअभावी जिल्ह्यात निर्माण झालेल्या दुष्काळी परिस्थितीची दखल घेऊन मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांनी सप्टेंबर महिन्यातच मदतीचा निर्णय घेतला. दुष्काळी परिस्थितीच्या पहिल्याच यादीत धुळे जिल्ह्यातील चारही तालुक्यांचा समावेश करण्यात आला. दिवाळीपूर्वी पात्र शेतकऱ्यांच्या बँक खात्यांत प्रत्येकी 5 हजार रुपयांची अग्रीम मदत जमा करण्यास सुरुवात करण्यात आली. शेतकऱ्यांना मदत मिळण्याबरोबरच ती योग्य वेळी मिळणेही महत्त्वाचे आहे. त्यामुळे सणाच्या काळात शेतकरी कुटुंबांना आर्थिक आधार मिळाला आहे. पुढील टप्प्यातील मदतही पात्र लाभार्थ्यांपर्यंत पोहोचवण्यासाठी शासन प्रयत्नशील असल्याचे पालकमंत्री श्री. रावल यांनी सांगितले.

 

अन्नधान्य व साड्यांचे वाटप

दुष्काळाच्या पार्श्वभूमीवर शेतकरी कुटुंबांना दिवाळीचा सण आनंदात साजरा करता यावा, या उद्देशाने आच्छी व दत्ताणे येथे अन्नधान्य आणि भेटवस्तूंचे वाटप करण्यात आले. शिंदखेडा तालुक्यातील 14 हजार 314 अंत्योदय महिला लाभार्थ्यांना साड्यांच्या वाटपाचा शुभारंभ करण्यात आला. यावेळी काही महिलांना प्रातिनिधिक स्वरूपात साड्यांचे वितरण करण्यात आले. तसेच पुरवठा विभागाच्या निर्देशानुसार तालुक्यातील प्रत्येक गावात दिवाळीपूर्वी अन्नधान्याचे वाटप पूर्ण करण्यात आले असून, सुमारे 1 लाख 95 हजार लाभार्थ्यांपर्यंत ज्वारी, गहू, साखर, तांदूळ आदी अन्नधान्य दिवाळीपूर्वी पोहोचवण्यात आल्याचे सांगत पुणे मर्चंट चेंबरच्या सहकार्यानेही दिवाळी भेटवस्तू उपलब्ध करून देण्यात आल्याबद्दल पालकमंत्री श्री. रावल यांनी संस्थेचे आभार मानले. संकटाच्या काळात गरजू कुटुंबांना मदतीचा हात देणे ही सामाजिक बांधिलकी असून, अशा उपक्रमांमुळे समाजातील आपुलकी आणि सहकार्याची भावना अधिक दृढ होते, असे त्यांनी नमूद केले.

 

जलसंधारणाला विशेष प्राधान्य

दुष्काळावर दीर्घकालीन उपाययोजना करण्यासाठी जलसंधारणाच्या कामांना प्राधान्य देण्यात येणार असल्याचे पालकमंत्री श्री. रावल यांनी सांगितले. तालुक्यातील नदी-नाले खोल व रुंद करणे, पावसाचे पाणी अडवून जमिनीत जिरवणे आणि भूजलपातळी वाढवण्यासाठी नियोजनबद्ध प्रयत्न करण्यात येतील. तापी नदीवरील प्रकाशा, सारंगखेडा आणि सुलवाडे प्रकल्पांसाठी केलेल्या पाठपुराव्याच्या आठवणी त्यांनी यावेळी सांगितल्या. बुराई नदी बारमाही करण्याचे काम, विविध सिंचन प्रकल्प आणि मतदारसंघातील सुमारे 10 हजार विहिरींच्या माध्यमातून शेतीसाठी पाणी उपलब्ध करून देण्याच्या प्रयत्नांचाही त्यांनी उल्लेख केला.

 

पाइपलाइनद्वारे पाणी वितरण व्यवस्था (पीडीएन) आणि अन्य सिंचन प्रकल्पांच्या माध्यमातून शेतीला अधिक सक्षम पाण्याचा आधार देण्यावर भर देण्यात येत आहे. आगामी 4 ते 6 महिन्यांतील पिण्याच्या पाण्याची गरज, उपलब्ध जलसाठा आणि संभाव्य टंचाई लक्षात घेऊन आवश्यक नियोजन करण्याच्या सूचना प्रशासनाला देण्यात आल्याचे पालकमंत्री श्री. रावल यांनी स्पष्ट केले.

 

 

 

 

पात्र शेतकऱ्यांना मदतीची हमी

दुष्काळी मदतवाटपासाठी महसूल, कृषी आणि ग्रामविकास विभागाच्या यंत्रणांनी केलेल्या कामाचे पालकमंत्री श्री. रावल यांनी कौतुक केले. कृषी सहाय्यक, तलाठी आणि ग्रामसेवक यांनी रात्रंदिवस विशेष प्रयत्न करून शेतपिकांच्या नुकसानीचे 100 टक्के पंचनामे पूर्ण केले.

 

तसेच मदत व पुनर्वसन विभागाच्या संकेतस्थळावर बँक खाते क्रमांक, आयएफएससी क्रमांक, शेतकरी ओळख क्रमांक (फार्मर आयडी) आणि ॲग्रीस्टॅक नोंदणीसंबंधी आवश्यक कार्यवाहीचेही 100 टक्के काम पूर्ण करण्यात आले. जिल्हाधिकारी, उपविभागीय अधिकारी, तहसीलदार आणि संबंधित कर्मचाऱ्यांच्या समन्वयामुळे मदतवाटपाच्या प्रक्रियेला गती मिळाल्याचे पालकमंत्री श्री. रावल यांनी सांगितले. 2 लाख रुपयांपर्यंतच्या कर्जमाफीचा लाभ अद्याप न मिळालेल्या पात्र शेतकऱ्यांना लाभ मिळवून देण्यासाठी संबंधित यंत्रणा आणि स्थानिक कार्यकर्त्यांनी पुढाकार घ्यावा, असे आवाहनही त्यांनी केले.

 

शेतीमालाला योग्य बाजारभाव

शेतकऱ्यांच्या उत्पादनाला योग्य बाजारभाव मिळणे आवश्यक असून, त्यासाठी सक्षम बाजारव्यवस्था निर्माण करण्यावर भर देण्यात येत असल्याचे पालकमंत्री श्री. रावल यांनी सांगितले. भारतीय कापूस महामंडळाच्या (सीसीआय) माध्यमातून राज्यात सुमारे 125 कापूस खरेदी केंद्रे सुरू करण्यात आली आहेत. कापूस आणि मक्याला खुल्या बाजारात चांगला भाव मिळत असल्यास शेतकऱ्यांना त्याचा लाभ होत असल्याबद्दल त्यांनी समाधान व्यक्त केले.

 

शेतीमालाला व्यापक बाजारपेठ उपलब्ध करून देण्यासाठी महाराष्ट्रात जागतिक दर्जाची बाजार समिती उभारण्याचा संकल्पही पालकमंत्री श्री. रावल यांनी व्यक्त केला.

 

विकासकामे व रोजगाराला गती

शिंदखेडा तालुक्यातील विकासकामांचा आढावा घेताना पालकमंत्री श्री. रावल यांनी दोंडाईचा-शिंदखेडा, दोंडाईचा-सोनगीर रस्ते, शिंदखेडा ग्रामपंचायतीचे नगरपालिकेत रूपांतर, पाणीपुरवठा योजना, प्रशासकीय इमारती, वसतिगृहे आणि गावांमधील रस्त्यांच्या कामांची माहिती दिली.

 

स्थानिक रस्त्याच्या कामासाठी सुमारे 95 लाख रुपये मंजूर करण्यात आले असून, 400 मीटर डांबरीकरण आणि 400 मीटर सिमेंट काँक्रिटीकरणाचे काम लवकरच सुरू करण्यात येणार असल्याचे त्यांनी सांगितले.

 

गेल्या 3 महिन्यांत 156 शिक्षकांची नियुक्ती झाल्यामुळे मतदारसंघातील जिल्हा परिषद शाळांमधील शिक्षकांची कमतरता दूर झाल्याची माहिती देताना पालकमंत्री श्री. रावल यांनी अभियांत्रिकी, तंत्रनिकेतन, औषधनिर्माणशास्त्र आणि शिक्षक शिक्षणाच्या सुविधा विकसित करण्यात आल्या असून, नरडाणा औद्योगिक वसाहत तसेच सुमारे 2 हजार एकर क्षेत्रावरील औद्योगिक विकासाच्या माध्यमातून स्थानिक युवकांना रोजगाराच्या अधिक संधी उपलब्ध करून देण्यावर भर असल्याचे सांगितले.

 

शेतकऱ्यांशी जिव्हाळ्याचे नाते

आच्छी व दत्ताणे येथील कार्यक्रमात पालकमंत्री श्री. रावल यांनी आपल्या सार्वजनिक जीवनातील आठवणींना उजाळा दिला. पूर्वी तापी नदी ओलांडून गावोगावी केलेला प्रवास, नागरिकांच्या सुखदुःखात सहभागी झाल्याचे प्रसंग आणि गेल्या 2 दशकांत तालुक्यात झालेल्या विकासकामांचा त्यांनी उल्लेख केला. तालुक्यातील शेतकरी, कष्टकरी आणि सर्वसामान्य नागरिक हे आपल्या मोठ्या परिवाराचे सदस्य आहेत. त्यामुळे दिवाळीचा आनंद त्यांच्यासोबत द्विगुणित करण्यासाठी येथे आलो असल्याची भावना त्यांनी व्यक्त केली.

 

दुष्काळाच्या परिस्थितीत शेतकऱ्यांना आवश्यक मदत देण्याबरोबरच शेतीच्या शाश्वत विकासासाठी शासन कटिबद्ध आहे. शेतकऱ्यांची जिद्द, शासनाची साथ आणि प्रशासनाच्या समन्वयातून या संकटावर मात करून शिवार समृद्ध करण्यासाठी प्रयत्न करण्यात येतील, असा विश्वास व्यक्त करत पालकमंत्री श्री. रावल यांनी उपस्थितांना दिवाळीच्या शुभेच्छा दिल्या.

 

मदतवाटपात शिंदखेडा प्रथम

प्रास्ताविक करताना तहसीलदार नितीनकुमार देवरे म्हणाले की, धुळे जिल्ह्यातील एकूण 3 लाख 65 हजार 11 शेतकऱ्यांपैकी सुमारे 2 लाख 59 हजार शेतकऱ्यांच्या मदतीला मंजुरी मिळाली आहे. उर्वरित पात्र शेतकऱ्यांच्या मदतीला पुढील आठ दिवसांत मंजुरी मिळेल, असे यावेळी सांगण्यात आले. शिंदखेडा तालुक्यातील 83 हजार 216 खातेदारांपैकी 69 हजार 142 शेतकऱ्यांच्या मदतीला मंजुरी मिळाली असून, हे प्रमाण सुमारे 83 टक्के आहे. या कामगिरीत शिंदखेडा तालुका जिल्ह्यात प्रथम क्रमांकावर आहे.

तालुक्यातील 50 हजार 792 शेतकऱ्यांच्या बँक खात्यांत प्रत्येकी 5 हजार रुपयांची अग्रीम मदत जमा झाली आहे. उर्वरित पात्र शेतकऱ्यांच्या खात्यांतही पुढील आठ दिवसांत मदतीची रक्कम जमा करण्यासाठी आवश्यक कार्यवाही गतीने सुरू असल्याचेही तहसीलदार श्री. देवरे यांनी यावेळी सांगितले.

 

00000000

-आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ठरली दिवाळी भेट

 

मालेगाव, दि. ९ नोव्हेंबर (उमाका वृत्तसेवा) : दिवाळीच्या मंगलपर्वात माणसांच्या भेटीगाठींना, आपुलकीच्या संवादाला आणि स्नेहबंधांच्या जपणुकीला विशेष महत्त्व असते. दिव्यांच्या रोषणाईने घराघरांत उजेड पसरत असताना माणुसकीच्या नात्यांमधील जिव्हाळाही अधिक उजळत असतो. याच स्नेहभावनेचा प्रत्यय मालेगाव तालुक्यातील गाळणे गावात आज आला. शालेय शिक्षण मंत्री दादाजी भुसे यांनी दिवाळीनिमित्त गावाला भेट देत ग्रामस्थांसमवेत आनंदाचे क्षण व्यतीत केले. श्री गुरु गोरक्षनाथ शिवपंचायतन मंदिरातील आध्यात्मिक प्रवचनास उपस्थिती, ग्रामस्थांशी मनमोकळा संवाद आणि स्नेहभोजन अशा विविध माध्यमांतून त्यांनी गावकऱ्यांशी आपुलकीचा संवाद साधला. यावेळी गावाच्या सर्वांगीण विकासाच्या वाटचालीबाबतही चर्चा करण्यात आली.

 

*पाणी आणि वाणी कमी वापरा*

 

गाळणे येथील श्री गुरु गोरक्षनाथ शिवपंचायतन मंदिराच्या सभागृहात आयोजित कार्यक्रमात श्रावण महाराज कुकाणेकर यांचे प्रवचन झाले. मानवता, अहिंसा, संस्कार, शिक्षण आणि निसर्गसंवर्धन या जीवनमूल्यांची महती त्यांनी आपल्या ओघवत्या विचारांतून विशद केली. माणसाने माणसाशी माणुसकीने वागावे, निसर्गाचे संवर्धन करावे आणि पुढील पिढीला संस्कारांची समृद्ध शिदोरी द्यावी, असा संदेश त्यांनी दिला.

 

दुष्काळसदृश परिस्थितीच्या पार्श्वभूमीवर पाण्याचे महत्त्व अधोरेखित करत ‘पाणी आणि वाणी कमी वापरा’ हा मोलाचा संदेशही त्यांनी दिला. पाण्याचा प्रत्येक थेंब जपण्याबरोबरच शब्दांचा वापरही संयमाने करण्याची शिकवण देणारे हे विचार उपस्थितांसाठी चिंतनाचा विषय ठरले.

 

शालेय शिक्षण मंत्री श्री. भुसे यांनी ग्रामस्थांसमवेत प्रवचनाचे श्रवण केले. यावेळी महंत डॉ. योगी विलास नाथ, सरपंच बापू बिचकुले, ग्रामसेवक अशोक शेवाळे यांच्यासह गाळणे गावातील ग्रामस्थ मोठ्या संख्येने उपस्थित होते.

 

आध्यात्मिक विचारांच्या या मंगल वातावरणानंतर मंत्री श्री. भुसे यांनी ग्रामस्थांशी गावाच्या विकासाबाबत संवाद साधला. गावाच्या गरजा, स्थानिक प्रश्न, पायाभूत सुविधांची आवश्यकता आणि प्रस्तावित विकास कामांच्या नियोजनाविषयी त्यांनी माहिती जाणून घेतली. सिंहस्थ कुंभमेळ्याच्या पार्श्वभूमीवर परिसराच्या विकासाला चालना देण्यासाठी आवश्यक असलेल्या नियोजनाबाबतही चर्चा झाली. ग्रामस्थांच्या अपेक्षा जाणून घेत स्थानिक गरजांनुसार विकासकामांची दिशा ठरविण्याच्या दृष्टीने हा संवाद महत्त्वपूर्ण ठरला.

 

या भेटीतील स्नेहाचा आणखी एक सुंदर क्षण म्हणजे ग्रामस्थांसमवेत झालेले स्नेहभोजन! मंदिर परिसरात सर्वांसोबत भोजनाचा आस्वाद घेताना मंत्री श्री. भुसे यांनी ग्रामस्थांशी मनमोकळ्या गप्पा मारल्या. सणाच्या निमित्ताने एकत्र आलेली माणसे, परस्परांतील जिव्हाळा आणि सामूहिक आनंदाची अनुभूती यामुळे मंदिर परिसरात आपुलकीचे वातावरण निर्माण झाले. गावाची सांस्कृतिक परंपरा, सामाजिक एकोपा आणि पाहुणचाराची भावना या निमित्ताने अनुभवायला मिळाली.

 

*आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ही दिवाळी भेट*

 

दिवाळीचा प्रकाश केवळ पणत्यांमधूनच नव्हे, तर माणसांच्या मनातील आपुलकीतूनही उजळत असतो. गाळणे येथील या भेटीत प्रवचनातून जीवनमूल्यांचा संदेश, ग्रामस्थांशी संवादातून विकासाचा ध्यास आणि स्नेहभोजनातून नात्यांमधील जिव्हाळा अनुभवायला मिळाला. आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ही दिवाळी भेट ग्रामस्थांच्या स्मरणात राहणारी ठरली.

 

0000000

सोलापूर, दिनांक 9 : दुष्काळामुळे झालेल्या नुकसानीचे शासनाने सरसकट पंचनामे केले असून, शेतकऱ्यांना दिवाळी सण साजरा करता यावा, यासाठी दिवाळीपूर्वी पाच हजार रुपयांची अग्रीम आर्थिक मदत देण्याचा निर्णय घेतला. त्यानुसार लाखो शेतकऱ्यांच्या खात्यावर मदतीची रक्कम जमा होण्यास सुरुवात झाली आहे. तांत्रिक अडचणींमुळे ज्या शेतकऱ्यांच्या खात्यावर पैसे जमा झाले नाहीत, त्यांनाही लवकरच मदत मिळेल. दुष्काळी परिस्थितीत शासन शेतकऱ्यांच्या पाठीशी ठामपणे उभे असल्याचे प्रतिपादन पालकमंत्री जयकुमार गोरे यांनी केले.

 

रेडे्डे तालुका मंगळवेढा येथील नागरिकांशी संवाद साधताना पालकमंत्री जयकुमार गोरे बोलत होते.यावेळी आमदार समाधान आवताडे, जिल्हाधिकारी एस. कार्तीकेयन, उपविभागीय अधिकारी अमित माळी, तहसीलदार मदन जाधव यांच्यासह विविध पदाधिकारी, अधिकारी आणि ग्रामस्थ उपस्थित होते.

 

पालकमंत्री श्री. गोरे पुढे म्हणाले की, तहसीलदार आणि गटविकास अधिकारी यांनी तांत्रिक बाबींचा आधार घेऊन दुष्काळी उपाययोजनांच्या अंमलबजावणीत अडथळे निर्माण करू नयेत. शेतकरी आणि नागरिकांच्या वेदना समजून घेऊन अधिक संवेदनशीलतेने काम करावे. पाणीटंचाई असलेल्या गावांमध्ये किमान 24 ते 48 तासांच्या आत टँकर सुरू करावेत. गावातील प्रत्येक वाडी-वस्ती आणि गल्लीपर्यंत टँकर पोहोचेल, याची दक्षता घ्यावी. गावातील रस्ते ची परिस्थिती लक्षात घेऊन मोठा किंवा लहान टँकर उपलब्ध करून द्यावा. दुष्काळी परिस्थितीत एकही तलाठी अथवा ग्रामसेवक मुख्यालय सोडून जाणार नाही, याची जिल्हा प्रशासनाने काळजी घ्यावी, असे निर्देश त्यांनी दिले.

 

नागरिकांच्या पिण्याच्या पाण्याबरोबरच गावातील पशुधनाची संख्या लक्षात घेऊन जनावरांसाठीही पुरेसा पाणीपुरवठा करण्याचे नियोजन करावे. चारा उपलब्धतेबाबत प्रशासनाने तातडीने उपाययोजना कराव्यात. राज्यातील चारा डेपो, चारा छावण्या सुरू करणे किंवा शेतकरी व पशुपालकांना चारा खरेदीसाठी अनुदान देणे याबाबतचा प्रश्न आगामी मंत्रिमंडळ बैठकीत मांडून तो मार्गी लावण्यात येईल, अशी ग्वाहीही पालकमंत्री गोरे यांनी दिली.

 

जिल्ह्यातील नागरिक आणि शेतकऱ्यांच्या अडचणी तातडीने सोडवण्यासाठी सोलापूर शहरातील नियोजन भवन येथील पालकमंत्री कार्यालयामार्फत 24 तास सुरू राहणारी हेल्पलाइन सुरू करण्यात येणार आहे. या हेल्पलाइनवर नागरिकांनी आपल्या अडचणी मांडल्यानंतर संबंधित प्रशासनाकडून तातडीने उपाययोजना करण्यात येतील, असे त्यांनी सांगितले.

 

 

 

जिल्हाधिकारी आणि जिल्हा प्रशासनाने कोणत्या गावांमध्ये चारा उपलब्ध आहे, तसेच कोणत्या गावांना तातडीने चाऱ्याची गरज आहे, याची माहिती त्वरित सादर करावी. शासनाने सरसकट पंचनामे केले असून, दिवाळीपूर्वी अग्रीम मदत शेतकऱ्यांच्या खात्यावर जमा करण्यास सुरुवात झाली आहे. उर्वरित मदतही लवकरच देण्यात येईल. तसेच अन्नधान्याची कमतरता निर्माण झाल्यास शासनाकडून त्याचाही पुरवठा केला जाईल, असे पालकमंत्री गोरे यांनी स्पष्ट केले.

 

मंगळवेढा तालुक्यातील एकूण गावांपैकी निम्म्यापेक्षा अधिक गावे दुष्काळी परिस्थितीचा सामना करीत आहेत. या गावांमध्ये चाऱ्याची उपलब्धता कमी असून, नदीकाठच्या गावांमध्ये तुलनेने चारा उपलब्ध आहे. त्यामुळे गाव हा घटक मानून चारा आणि पाण्याचे नियोजन करावे, असे त्यांनी सांगितले. म्हैसाळ सिंचन योजना आणि 24 गाव पाणीपुरवठा योजनेची कामे तातडीने पूर्ण करण्यासाठी प्रयत्न केले जातील. या योजनांसाठी आवश्यक निधी उपलब्ध करून देण्यासाठी शासनस्तरावर पाठपुरावा करण्यात येईल, असेही त्यांनी नमूद केले.

 

यावेळी आमदार समाधान आवताडे यांनी मंगळवेढा तालुक्यातील दुष्काळी परिस्थितीची माहिती दिली. तालुक्यातील जवळपास 47 गावांना टँकरद्वारे पाणीपुरवठा सुरू असून, नदीकाठची गावे वगळता अन्य गावांमध्ये चाऱ्याची परिस्थिती अत्यंत बिकट आहे. पशुपालकांना इतर ठिकाणांहून चारा विकत आणावा लागत आहे. म्हैसाळ पाणीपुरवठा योजना तसेच 24 गाव पाणीपुरवठा योजनांची कामे पूर्ण झाल्यास तालुक्यातील सर्व गावांना किमान पिण्याचे पाणी शंभर टक्के उपलब्ध होऊ शकेल. यासाठी आवश्यक निधी शासनस्तरावरून उपलब्ध करून द्यावा, अशी मागणी त्यांनी केली.

 

यावेळी उपस्थित ग्रामस्थांनी जनावरांसाठी पिण्याचे पाणी व चारा उपलब्ध करून देण्याची मागणी केली. तसेच लहान गावांमध्ये मोठे टँकर जाणे शक्य नसल्याने अशा गावांसाठी लहान टँकरची व्यवस्था करावी, अशी मागणीही करण्यात आली.

 

यावेळी पालकमंत्री जयकुमार गोरे यांनी सर्व ग्रामस्थांना दिवाळीच्या शुभेच्छा दिल्या तसेच त्यांच्या समवेत दिवाळीच्या फराळ ही घेतला.

 

00000

जालना, दि.9(जिमाका) : राज्यात दुष्काळाचे संकट निर्माण झाले असले, तरी शेतकरी बांधवांनी खचून जाऊ नये. राज्य शासन शेतकऱ्यांच्या पाठिशी खंबीरपणे उभे असून, त्यांना आवश्यक ती सर्व मदत टप्प्याटप्प्याने उपलब्ध करून दिली जाईल. शेतकऱ्यांना कोणत्याही परिस्थितीत वाऱ्यावर सोडणार नाही, अशी ग्वाही उपमुख्यमंत्री एकनाथ शिंदे यांनी जालना तालुक्यातील भिलपुरी येथे दिली.

जालना तालुक्यातील भिलपुरी येथील दुष्काळग्रस्त शेतकरी अंबादास तांगडे यांच्या घरी भेट देऊन उपमुख्यमंत्री शिंदे यांनी त्यांच्या कुटुंबीयांसोबत दिवाळी साजरी केली. यावेळी त्यांनी तांगडे कुटुंबीयांशी संवाद साधत शेतीची परिस्थिती, आर्थिक अडचणी आणि शासनाकडून मिळणाऱ्या मदतीची माहिती घेतली. याप्रसंगी त्यांनी कुटुंबासोबत पारंपरिक बेसन, बाजरीची भाकरी, गावरान ठेचा आणि चटणी अशा ग्रामीण जेवणाचा आस्वाद घेतला.

यावेळी बोलताना शिंदे म्हणाले की, मी देखील शेतकरी कुटूंबातील आहे. त्यामुळे तांगडे यांच्या घरी आल्यासारखे वाटत नसून स्वतःच्याच घरी आल्याची भावना आहे. शेतकऱ्यांवर मोठे संकट आले असून, या परिस्थितीत समाजातील प्रत्येकाने मदतीचा हात पुढे करणे आवश्यक आहे. शासनाने दुष्काळग्रस्त शेतकऱ्यांना तातडीने दिलासा देण्यासाठी पाच हजार रुपयांची अग्रीम मदत देण्याचा निर्णय घेतला असून, अनेक शेतकऱ्यांच्या खात्यांत ही रक्कम जमा झाली आहे. तसेच दुष्काळ जाहीर केल्यानंतर बारा कलमी सवलतींची अंमलबजावणी करण्यात येत आहे. नुकसान भरपाईसह पीक कर्जाचे पुनर्गठन, सक्तीच्या वसुलीला स्थगिती, शैक्षणिक शुल्कात सवलत आणि पिण्याच्या पाण्याची व्यवस्था अशा उपाययोजनांचा लाभ शेतकऱ्यांना मिळणार आहे.

अंबादास तांगडे यांच्याकडे केवळ एक एकर शेती असून, पत्नी मंदाबाई, दोन मुली, एक मुलगा आणि आई अशा कुटुंबाचा उदरनिर्वाह या शेतीवर अवलंबून आहे. कुटूंबाची परिस्थिती जाणून घेतल्यानंतर शिंदे यांनी तांगडे यांच्या मुलीशी संवाद साधला. तिला भविष्यात पोलीस अधिकारी व्हायचे असल्याचे समजल्यानंतर तिच्या शिक्षणापासून विवाहापर्यंतची संपूर्ण जबाबदारी स्वीकारत असल्याचे त्यांनी जाहीर केले.

याशिवाय दुष्काळग्रस्त भागातील ज्या शेतकरी कुटूंबांतील मुलींचे विवाह ठरले आहेत, अशा कुटूंबांची माहिती संकलित करून सामूहिक विवाह सोहळा आयोजित करण्याचा निर्णयही त्यांनी यावेळी जाहीर केला. शेतकरी कुटूंबांना आधार देण्यासाठी महिलांना स्वयंरोजगारासाठी शिलाई मशीन, विद्यार्थिनींना सायकली आणि गरजू कुटूंबांना दिवाळीचा शिधा देण्याचे उपक्रम राबविण्यात येत असल्याचे त्यांनी सांगितले.

आगामी पावसाळ्यापर्यंत दुष्काळग्रस्त भागात पिण्याचे पाणी, जनावरांसाठी पाणी, चारा आणि अन्नधान्य उपलब्ध राहावे, यासाठी शासन नियोजन करीत आहे. केंद्र सरकारही महाराष्ट्रातील दुष्काळग्रस्त शेतकऱ्यांच्या पाठीशी उभे राहणार असल्याचे त्यांनी नमूद केले. शेतकरी हा शासनाच्या तिजोरीवरील पहिला हक्कदार असून, त्याला मदत करताना सरकार कोणतीही कमतरता ठेवणार नाही, असेही त्यांनी स्पष्ट केले. संकटाच्या काळात शेतकऱ्यांनी धीर सोडू नये आणि कोणताही टोकाचा निर्णय घेऊ नये, असे आवाहन त्यांनी केले.

भाऊबीजेनिमित्त मंदाबाई तांगडे यांनी उपमुख्यमंत्री शिंदे यांचे औक्षण केले. त्यानंतर शिंदे यांनी तांगडे कुटूंबातील सर्व सदस्यांना कपडे भेट दिले. यावेळी मंदाबाई यांनी त्यांना दहा किलो ज्वारी आणि दहा किलो बाजरी तसेच छत्रपती शिवाजी महाराजांची प्रतिमा भेट दिली. शासनाचे प्रमुख पदावरील व्यक्ती आपल्या घरी येऊन सुख-दुःखाची विचारपूस करतात, ही समाधानाची बाब असल्याची भावना अंबादास तांगडे यांनी व्यक्त केली.

यानंतर मौजपुरी गावातील महादेव मंदिर परिसरात उपमुख्यमंत्री शिंदे यांनी शेतकरी, शेतमजूर आणि महिलांशी संवाद साधला. त्यांच्या अडचणी जाणून घेत दिवाळीचा फराळ व शिधा देऊन महिलांचा सन्मान केला.

या वेळी केंद्रीय आरोग्य आणि कुटुंब कल्याण राज्यमंत्री प्रतापराव जाधव, उद्योगमंत्री उदय सामंत, सामाजिक न्यायमंत्री संजय शिरसाट, खासदार संदीपान भुमरे, आमदार अर्जुन खोतकर, आमदार हिकमत उढाण यांच्यासह विविध क्षेत्रांतील मान्यवर, शेतकरी, महिला आणि ग्रामस्थ मोठ्या संख्येने उपस्थित होते.

 

****

– गाळणे येथील नवादे वस्तीवर आदिवासी कुटुंबांसोबत स्नेहभोजन; सुख-दुःखात सहभागी होत जपला सामाजिक बांधिलकीचा दिवा

 

मालेगाव, दि. ९ नोव्हेंबर (उमाका वृत्तसेवा) : दिवाळीचा खरा प्रकाश केवळ घराघरांत पणत्या लावण्यात नसतो, तर संकटात असलेल्या माणसाच्या आयुष्यात आशेचा किरण निर्माण करण्यात असतो. दुष्काळी परिस्थितीमुळे पाणीटंचाईची चिंता, पशुधनाच्या चाऱ्याचा प्रश्न आणि रोजगाराची विवंचना अशा अनेक आव्हानांना सामोरे जाणाऱ्या आदिवासी कुटुंबांच्या चेहऱ्यावरही दिवाळीचा आनंद फुलावा, त्यांच्या मनातील चिंतेचे मळभ दूर व्हावे आणि शासन आपल्या पाठीशी खंबीरपणे उभे आहे, हा विश्वास त्यांच्यापर्यंत पोहोचावा, या संवेदनशील भावनेतून शालेय शिक्षण मंत्री दादाजी भुसे यांनी मालेगाव तालुक्यातील गाळणे येथील नवादे वस्तीवर आदिवासी बांधवांसोबत दिवाळी साजरी केली. केवळ सणाच्या शुभेच्छा देण्यापुरते मर्यादित न राहता त्यांनी वस्तीवरील कुटुंबांशी मनमोकळा संवाद साधला, त्यांच्या समस्या जाणून घेतल्या आणि शासनाच्या मदतीचा विश्वास दिला. मंत्री श्री. भुसे यांच्या या भेटीने वस्तीवरील नागरिकांच्या दिवाळीचा आनंद द्विगुणित झाला.

 

दुष्काळाच्या काळात सर्वसामान्य माणसाच्या आयुष्यात निर्माण होणाऱ्या अडचणी शासनाला जाणवतात. शेतकरी, शेतमजूर आणि आदिवासी कुटुंबांच्या रोजच्या जगण्यातील संघर्षाची जाणीव ठेवून शासन विविध उपाययोजना करीत आहे. अशा परिस्थितीत कोणीही एकटे नाही, शासन त्यांच्या सुख-दुःखात सहभागी आहे आणि आवश्यक मदतीसाठी ठामपणे त्यांच्या पाठीशी आहे, हा दिलासा प्रत्यक्ष संवादातून देण्याचा प्रयत्न मंत्री श्री. भुसे यांनी यावेळी केला. नवादे वस्तीवरील नागरिकांशी संवाद साधताना त्यांनी महिला, माता-भगिनी आणि ग्रामस्थांच्या अडचणी आत्मीयतेने ऐकून घेतल्या. त्यांच्या समस्या केवळ ऐकून न घेता आगामी काळात त्या प्राधान्याने सोडविण्यासाठी पाठपुरावा करण्याची ग्वाही दिली. दुष्काळामुळे निर्माण झालेल्या परिस्थितीवर मात करण्यासाठी शासन आणि प्रशासन नियोजनपूर्वक काम करीत असल्याचेही त्यांनी स्पष्ट केले.

 

पाणी, चारा आणि रोजगारासाठी वर्षभराचे नियोजन

 

दुष्काळाच्या पार्श्वभूमीवर आगामी वर्षभराचे नियोजन करण्यात आले आहे. ऑगस्टअखेरपर्यंत पिण्याच्या पाण्याची उपलब्धता कायम राहावी, पशुधनासाठी पाणी आणि चाऱ्याची व्यवस्था व्हावी, तसेच ग्रामीण भागातील नागरिकांच्या हाताला काम मिळावे, यासाठी आवश्यक उपाययोजना करण्यात आल्याची माहिती मंत्री श्री. भुसे यांनी दिली. दुष्काळाच्या संकटात नागरिकांना दिलासा देणे, त्यांच्या मूलभूत गरजा पूर्ण करणे आणि रोजगाराच्या माध्यमातून त्यांच्या कुटुंबांना आर्थिक आधार देणे, याला शासनाचे प्राधान्य असल्याचा विश्वास त्यांनी व्यक्त केला.

 

वनजमिनीच्या प्रश्नातून विकासाच्या योजनांचा मार्ग मोकळा

 

नवादे वस्तीचा परिसर पूर्वी वन विभागाच्या अखत्यारीत असल्याने येथील नागरिकांना घरकुलासह विविध मूलभूत सुविधा आणि शासकीय योजनांचा लाभ मिळविताना अडचणी येत होत्या. मात्र, काही वर्षांपूर्वी वन विभागाची कायदेशीर परवानगी घेऊन ही जागा ग्रामपंचायतीच्या नावे करण्यात आली. त्यामुळे आता येथील आदिवासी बांधवांना घरकुलांसह विविध शासकीय योजनांचा लाभ मिळण्याचा मार्ग सुकर झाला आहे. विकासाच्या मुख्य प्रवाहात प्रत्येक कुटुंबाला सहभागी करून घेण्याच्या दृष्टीने हे महत्त्वाचे पाऊल ठरले आहे.

शेतकरी कुटुंबांच्या अंगणात आपुलकीचा दिवाळी फराळ; अहिराणीतून साधला संवाद

 

मंत्री श्री. भुसे यांनी नवादे वस्तीवरील शेतकरी जीवन दाजी पवार यांच्या घरी भेट देऊन सर्वधर्मीय ग्रामस्थांसोबत दिवाळीच्या फराळाचा आस्वाद घेतला. पवार कुटुंबीयांनी औक्षण करून त्यांचे आत्मीयतेने स्वागत केले. त्यानंतर राजाभाऊ जीभाऊ पवार यांच्या घरीही त्यांनी भेट दिली. यावेळी अहिराणी भाषेतून कुटुंबीयांशी संवाद साधत त्यांनी स्थानिक बोलीभाषेतील आपलेपणा जपला. घराच्या शेणाने सारवलेल्या अंगणात सुंदर रांगोळी साकारणाऱ्या बालिकांचे त्यांनी कौतुक केले. दोन्ही कुटुंबांना दिवाळीनिमित्त भेटवस्तूंचे वाटप करण्यात आले. सर्वसामान्य कुटुंबांच्या घरातील साधेपणा, आपुलकी आणि प्रेमळ स्वागताने मंत्री श्री. भुसे भारावून गेले.

 

अंगणवाडीतील चिमुकल्यांच्या चेहऱ्यावर फुलविला आनंदाचा प्रकाश

 

नवादे वस्तीवरील अंगणवाडी केंद्रालाही मंत्री श्री. भुसे यांनी भेट दिली. चिमुकल्यांनी उत्साहात त्यांचे स्वागत केले. बालकांनी कविता सादर करून उपस्थितांची मने जिंकली. मंत्री श्री. भुसे यांनी त्यांच्याशी संवाद साधत कौतुक केले. तसेच बालकांना नवीन कपडे, भेटवस्तू आणि खाऊचे वाटप केले. या छोट्याशा भेटीने बालकांच्या दिवाळीतील आनंदात आणखी भर पडली.

 

सामाजिक एकोप्याची परंपरा जपणारे गाळणे

 

गाळणे गावात सर्व समाजांचे नागरिक गुण्यागोविंदाने राहतात. सर्व धर्मीयांचे सण आणि उत्सव एकत्रितपणे साजरे करण्याची येथील परंपरा सामाजिक सलोख्याचे सुंदर उदाहरण आहे. गेल्या चार-पाच वर्षांपासून दिवाळीनिमित्त नवादे वस्तीवर एकत्र येऊन स्नेहभोजन आणि छोटेखानी कार्यक्रम आयोजित करण्याची परंपरा जपली जात आहे. यंदा दुष्काळी परिस्थिती असतानाही ही परंपरा कायम ठेवण्यात आली. संकट कितीही मोठे असले तरी माणसांमधील प्रेम, जिव्हाळा आणि एकमेकांना आधार देण्याची भावना कायम राहिली पाहिजे, हा संदेश या उपक्रमातून अधोरेखित झाला.

 

यावेळी ग्रामसेवक अशोक शेवाळे, पर्यवेक्षिका ज्योती देसाई, अंगणवाडी सेविका सुनंदा गांगुर्डे, मदतनीस मंदा जाधव यांच्यासह नवादे वस्तीवरील ग्रामस्थ उपस्थित होते.

 

दुष्काळाच्या काळात नागरिकांच्या घरात आर्थिक अडचणी असतील, पाण्याची चिंता असेल, उद्याच्या दिवसाची काळजी असेल; मात्र अशा परिस्थितीत त्यांच्या मनात निराशा निर्माण होऊ नये, त्यांना शासनाचा आधार जाणवावा आणि सणाचा आनंद सर्वांपर्यंत पोहोचावा, हाच या भेटीमागील संवेदनशील उद्देश होता. दिवाळीच्या निमित्ताने नवादे वस्तीवर पोहोचलेला हा स्नेह केवळ एका दिवसाचा आनंद नव्हता, तर शासन आपल्या पाठीशी आहे, या विश्वासाची नवी ज्योत होती. दुष्काळाच्या अंधारात आशेचा दिवा प्रज्वलित करणारा आणि सामाजिक बांधिलकी, माणुसकी व आपुलकीचा संदेश देणारा हा दिवाळी सोहळा ठरला.

 

0000000