Dawrpui Veng

Zun kawng hnai nei (UTI)

noreply@blogger.com (A_es) — Fri, 17 Feb 2012 18:02:00 +0000

Mizote hi a bikin zun kawng lawng, hnai awm tih vel hi kan ngah em em mai a. A chhan pakhat chu tui kan in tlem lutuk hi a ni ber mai. Zun kawng fai tha tur chuan Kal (Kidney) a fai that a ngai a, tuihawk luankawr ang deuh hi a ni ber. Thil chhia, taksa-in a mamawh loh luan chhuahna a ni a, tuihawk luan kawr pawh tui a tlem chuan bawlhhlawh a tang a, a bal bawk thin a, chumi tifai tur chuan tui tam deuh han leih puat la, a fai duak ang mai hi a ni.

Kan kal (Kidney) hian bawlhhlawh a thlifim a, paih ngai zawng zawng a luang thei chi chu a paih chhuak ta thin a ni. Taksa-ah tui a tlem lutuk chuan a luang tha thei lova, a in thlifim tha thei lo thin a ni. Kan hriat tur chu, kan ek leh zunah hian natna hrik, ek-ah phei chuan Tetanus hrik leh natna hrik dang tam tak a chhuak tel ve reng a. Hei hi Kal-in a thlitfim that loha tui a tlem chuan Phing-ah a inthlah pung ve leh a, chu chuan hnai a siam ta thin a ni. Thingpui no khatah Chini fian ruk vel han pawlh la, a thlum em em anga, i bun chhuah vek hnu-ah pawh a chhung kha han zut la, han liak la, a la thlum em em tho ang hian, kha no khat kha tui litre khatin han pawlh leh la, sil em em ngai lovin a no chhung pawh a fai vek mai dawn a ni. Hetiang thil ho lutuk hi ven harsa pawh a ni lova, tui in tam, tui kan tih
hian tuisik a ni ber lova, tui lam chi reng reng (Liquid) in tam a ngai a ni.
Zun kawnga hnai nei deuh fo reng ho hi chuan, thingpui sen hang te in tam tum sela, tui lam chi hrim hrim - Dal, Antam tui te pawh no-ah thli khera chaw ei laia in tel mai tur. I in Exam (Check) theihna awlsam ber chu i zun kha en la, a fim kar reng tur a ni. Eng damdawi emaw ei avanga a sen deuh leh a eng deuh chu i hre hrang mai dawn a ni. Cheng tam tak senga zun exam tir sek ngai lovin i inhre ve mai dawn a ni. Tin, zun a fim that kar reng chuan Kal pawh a hrisel a, lungte awm turte a veng bawk a, amah a chak phah bawk a ni.
A bikin, pitar leh putar (Kum 70 chin) chaw ei a chawm te, tui in tamte hi an hreh riau a, enge a chhan ka hre bik lo, tar hri a ni ber awm e. Kan upat poh leh tui kan mamawh nasa zawk tih hi hriat a tha. Tui luankawr pawh siam thar tirh, kum hnih khat chu eng vak a tih loh pawhin a fai deuh reng a, kum sawm hnu lamah chuan phiah fai paha tuia leih fai a ngai thin ang hi a ni ber mai. Chuvangin tui in teuh theilo mah la, thingpui sen hang te, thil tuiril lam chak vang pawh ni lovin in tam tum ang che.Gout nei tan phei chuan tui lam in tam hi a venna chikhat a ni mai. Tui, thingpui sen hang kan in tam hian taksa/vun te pawh a mawi a, tunah phei chuan hmai leh taksaa hnawih tur Cream/Lotion -ah te pawh an rawn telh nual tawhin, Multivitamin tha ho phei chuan an telhna a rei tawh mai.
A buaithlak lai chu, kan ram hi tui kan in vak vakna turin khua te a lum lem lova, hei vang hi a ni bera, a tihdan awmchhun chu, i hnathawhna-ah a thu deuh reng chi i nih chuan, tui inchhawp la, a bur i zuk hmuh apiangin tlem han in la, in deuh reng mai la. Bur khat (750ml) hi ni khatah a zo ve mai. “ENKAWL DAM AI CHUAN INVEN A HLAWK ZAWK”.

- Dr Thangchungnunga, MS (Ortho)

MS-a kan chan ta

noreply@blogger.com (A_es) — Fri, 17 Feb 2012 17:52:00 +0000

Tv. Malsawmdawngliana (K 42) Thana tlang chu February ni 16, 2012 (Ningani) zan dar 9:40 khan Thluak TB avangin a boral a. Lumenpui niin a tuk February ni 17 (Zirtawpni) chhun dar 12 khan Dawrpui Thlanmualah Dawrpui Bial Pastor Rev. R. Vanlalnghaka'n a vui liam.

Sap Upa & Pu Buanga-Mizo Hnam Inchei

noreply@blogger.com (A_es) — Sat, 11 Feb 2012 16:54:00 +0000

Rev. F.W. Savidge (Sap Upa) leh Rev. J.H. Lorrain (Pu Buanga)

Dawrpui Local Council Candidates 2012

noreply@blogger.com (A_es) — Sat, 11 Feb 2012 16:47:00 +0000

Tanpui Ngaite Tanpuitu

noreply@blogger.com (A_es) — Sat, 11 Feb 2012 16:34:00 +0000

(Thlirna tlang dang atangin) - Ziakkima Pachuau

Mizote hi YMA din hma atang tawha hnam tlawmngai, mite tanpui an ngaihna lai apianga tanpui duh hnam kan ni thin. Tlawmngaihna leh lek phei hi chu khawvel hnam dangte neih ve miah loh, hnam dang tawng pawha thumal pakhata sawi fiah theih miah loh kan neih bik, a bik taka mizote tana Pathianin min pek a ni a, kan vannei bik ngei mai. Vawiin thlenga tanpui ngaite tanpuitu kan nihna kan la chhunzawm zel thei hi a lawmawm a, paih bo chi leh theihnghilh phal chi a ni lova, chhawm nung zel tur pawh kan ni reng a ni.
Tun hnai maiah vanduaithlak takin Saiha Bazar vengah (Mi awmtha duhlo pakhat thil tih ni ngeia hriat) kangmei a chhuak vak mai a, mi tam takin In leh lo an chan a, an bungrua pawh chuh hman lovin an neih zawng zawng a kang ral a, an va lainatawmin an va khawngaihthlak em! He chhiat tawh thu hria apiang Sorkar leh NGO pawl hrang hrangten mut mawh hnar mawh a nei in, tanpui theih dan kawng hrang hrangin an ngaihtuah nghal chuk chuk a, tunah chuan tanpuina pawh a lut thahnem tawh thawkhat hle tura ngaih a ni. He thu hi Mizorama pawl lian ber Central YMA pawhin alo hriatin Feb 2, 2012 chawhnu khan CEC
Emergency Meeting a ko chuk chuk a, Aizawl town huamchhunga Branch hrang hrangte mahni Branch theuhah he kang tuarte tanpui nan hian pawisa fai khawn theuh nise tiin thuthlukna an siam ta a ni. Tichuan branch hrang hrangten CYMA ah an khawn ang angte thehlutin hriat theih chinah Nuai 30 chuang zet a lut khawm a ni. A va lawmawm em.
YMA mai ni lo pawl hrang hrangte pawhin he chhiat tawkte tanpui nan tiin Aizawl khawpui chhung hmun hrang hrangah thil eng eng emaw tiin vehbur an khawn ve bawk a, a lawmawm hle mai. Amaherawhchu mizote hi kan thil tih reng reng a tawk chauh aiah a leha luakchhuaka thil tih ching hi kan ni ve reng rengin ka hria. Aizawl khawpui chhung YMA branch zawng zawng ten kan branch huam chhung In tinah lutin kan khawn tawh a, Aizawla cheng chhung tin ten kan phal ang tawk leh kan remchan ang tawk chu kan thawh tawh tihna a ni. Chutih laia pawl thenkhat ten vehbur khawna bawm an dawh kual ang chi hi chu Pawl tih hmingthat tumna lam a kawk mah mah em aw ka ti deuh. Kan pawlin tanpui duhna rilru kan pu tak tak anih chuan midang tibuai kher lovin kan neih ang tawkin i tanpui zawk mai ang u. Pathian pawhin kan neih tawk ang bak hi chu min phut miah lo a nia, mal pawh a sawm zawk ngeiin ka ring. Mite tana malsawmna nih kan tum lutukna lamah hian midangte tan harsatna kan thlen ve thei a ni tih hi i hre thar theuh ang u. Krismas leh kumthar vuakvet lai pawh khan pawl tam takin kan veng chhungah ‘Mi chanhai zawk ten Krismas hlim taka an hman ve theih nan’ tiin bawm an dawh kual a, mite tanpuina tur anihna lai chauh thlir chuan thil tha tak a ni. A lehlam zawnga thlir chuan, heng hunpuite hi chhung tinte induhthawh hun lai, sum leh pai mamawh tam zual hun lai te alo ni a, mi thil tih that tlingkhawm hmang khan pawl pakhat hming alo tha zawk lel thei a ni. A thawhtute hming a lang tawh lova, a petute pawl hming chiah a lang tawh thin si a. Chuvang chuan, hetiang hi chu mite hmanga pawl pakhat hming tih that tumna a ang lek lek in ka hria. Kan sawi tak ang khan, mi harsa te tanpui duhna rilru tak tak kan pu a nih chuan kan neih atang ngei hian i tanpui thin ang u.

Mihringte rohlu ber, Hriselna

noreply@blogger.com (A_es) — Sat, 11 Feb 2012 16:00:00 +0000

He thupui hmang hian thu tam tak kan rawn tarlang tawh a. Tunah chuan NEWSTART kan tih series hnuhnung ber, T-Trust in God (Pathian rin tlatna) tih hian kan rawn titawp tawh ang. Hriselna tur thil chi hrang hrang leh Pathian thilsiam inkaihhnawihna lam chi pawh kan rawn sawi tam tawh a, tunah erawh chuan Amah Pathiana rinna hi a thilsiam mihringte tana damna anih thu a tawp ber atan kan han tiri leh dawn a ni.

Kan sawi tak zawng zawngte zinga kan taksa leh thlarau damna atana pawimawh ber mai chu Pathiana rinna nghah tlatna leh a thu zawmna hi a ni. Hmeichhe thiput hnenah Isuan, “Ka fanu, thlamuang takin awm rawh, i rinna hi i dampui a ni e,” (Matt.9:22) tia a sawi ang khan, damna tak tak leh hriselna tluan tling chu Pathian atanga chhuak a ni a, chu chu rinna nung neih tlatna leh Amah rinchhan tlatna atanga hmuh a ni. Khang hriselna dan (principle) te kha fimkhur taka kan zawm tlat chuan tun aiin kan lo hrisel zawk ang a, kan dam rei zawk bawk ang a, Pathian tan pawh hna kan thawk thei zawk ngei ang.
Kan taksa tichhe thei zuk leh hmuam, ruihhlo chi hrang hrang kan tih thin avangin kan taksa hi a lo
bawrhsawm thin a, hei hi thil pawi tak a ni mai nilovin ‘Tualthahna’ a ni. Pathian chu Hmangaihna a ni a, tualthah, mite nunna lak a phal lo. ‘Tual i that tur a ni lo’ a tih mai bakah, ‘Tualthat chatuan nunna pai reng reng an awm lo’ tih ziak a ni bawk. Midangte tihhlum mai nilovin ‘mahni inthat’ pawh tual that tho a ni. Kan thil chin tha lo avanga natna lo tuar a, kan thih phah anih ngat chuan mahni inthat kan ni dawn tho tho. Johana sawi angin tualthat chatuan nun pai lo kan ni ve mai dawn a ni ang.
Kan Bible-in “Thlarau Thianghlim In a ni tih in hre lo em ni? Mahni ta pawh in ni lova, mana lei in ni tawh asin, chuvangin in taksaah chuan Pathian chawimawi rawh u …” a tih angin kan lo hmui ngil a, kan dam rei na turin fimkhur takin i nungin i che ang u. Lal Isua Krista thisena man to taka lei tawhte hi pamhmai takin i insiam lovang u tih hi Kumthar-2012 bultan nana kan insawmna a ni e, Lalpan mal min sawm theuh rawh se.

- Vanhmingliana, Dawrpui

Saihaa kangmei tuarte tanpuina

noreply@blogger.com (A_es) — Sat, 11 Feb 2012 15:57:00 +0000

February 1, 2012 zana Saiha khawpui kangmei tuarte tanpuina atana vengchhunga vehbur khawnah kan neih te uilova sum leh pai lo petu te zawng zawng chungah Dawrpui Branch YMA chuan lawmthu a sawi tak meuh meuh a, midangte tana malsawmna ni chhunzawm zel turin veng mipuite duhsakna sangber kan hlan che u a ni. Heng a hnuaia mi ang hian Section hrang hranga kan pawisa thawhkhawm dan chu a ni.

Chawngbawla Section : Rs. 25,210/-
Taitesena Section : Rs. 14,900/-
Vanapa Section : Rs. 17,075/-
Total : Rs. 57,185/-

Pi Lalbiaki kan chan ta

noreply@blogger.com (A_es) — Sat, 11 Feb 2012 06:00:00 +0000

Pi Lalbiaki (K-90) m/o Pu Rochungnunga (Dawrpui Br. YMA Vice President) Medical Quarter chu tukin (ie.11 Feb) zing dar 7:00 khan a boral a, vawiin chawhnu dar 2:00 ah vui a ni ang.

M-a kan chan ta

noreply@blogger.com (A_es) — Fri, 10 Feb 2012 17:56:00 +0000

Pu Lalremsanga (M-a) Kum 31 S/o Pu Vanlalthanga(L), Dawrpui West, Pu Pazawna Building chu thin thalo avangin Vawiin (ie. February ni 10) chawhnu dar 3:45 khan Durtlang Hospital-ah a boral. A ruang hi tlaivarpui a ni ang a, naktuk (ie. Feb. ni 11) chhun dar 12:00-ah vui a ni ang.

Result

noreply@blogger.com (A_es) — Fri, 27 Jan 2012 19:31:00 +0000

Kum 2011 chu kan hmangral ta der mai a, han hawikir leh mah la tih tawh loh tur thil i hmu teuh ang. Chutih laiin nula tlangval, tleirawlte sualna lama luhna hunpui a ni ber thinin a lang. Zawlaidi in ngai lovin an in tan a, kum alo kal zel a, zu-ah a chhova, drugs nen. Hmeichhia nise inphalrai hun ni berin an hria nge, enge a chhan? Kum 2012 Feb/March ah chuan nau tih tlak tur nitin an awm leh zut mai dawn tih a hriat sa reng mai. Hetianga kan hunpui sual tih tanna a kan hmang tlangpui mai hi eng rilru nge kan put? Kristian ram nisi-ah hian enge a chhan? Nula tlangval zawng zawng an sual lova, a tha tam tak awmte hi a thalo pahnih khat lek awmte hian a ti hmelhem zo thin a ni ber mai. Thil mak tak chu, hlim viau mah ila Krismas vanga piangthar nun danglam ta hi an vang hle. Hei hian kan Krismas awmzia hi kan thinlungah a thleng zo lo a ang hle.

Naute hi a lo insiam hian thla 3 anih chiahin mihring pangngai alo ni a, hemi huna paih hi chu tualthat an ni mai. Chutiang tho chuan Pathian fin zia hi mihringte chhui chhuah sen loh a nih zia chu, serhtan ni 8-naah tihte, kan taksaa thisen tikhaltu, kan in tihpalh pawha thi chhuak a reh ve leh mai na (Clothing factor) hi ni 7 ni hian a insiam famkim a, ni 8-na atangin a thawk tak tak ta a ni. Ni lo sela chuan thi putin kan thi ngei ang. Hengte hi Pathian fin zia kan hmuchhuak leih leih chauh a nih hi. Cloning an thiam a, Beram an clone (Siam) a, khawvel thil ropui hmuhchhuah an tih laiin, Pathianin Eden huanah khan Adama nak ruh atangin Cloning chu a lo ti daih tawh a, tlai khaw hnu-ah kan thiam ve chauh zawk a ni. Pathian atna hi mihringte finna sang ber pawn a phak lo anih hi.

- Dr. Thangchungnunga MS (Ortho)

Pu Zotea kan chan ta

noreply@blogger.com (A_es) — Fri, 27 Jan 2012 19:22:00 +0000

Pu R. Zothansanga (K 59) hi Pu R. Vanlawma leh Pi Lalchhungi te karah a lo piang a, an unau hi pasarih niin, an unau zingah a pathumna a ni. Kum 1980 khan Lallunghnemi Hmar nen inneiin fanu pakhat leh fapa pahnih an nei a, tu pathum a nei bawk.

Amah hi pa tawng tam tih tur ni lo mahse fiamthu duh tak a ni a, fiam dawl tak niin pa hlim thei tak a ni. A nupui fanaute leh a tu leh fate a ngaihtuah em em a, a tute sikul kal pawh a hruai zat zat thin.
Pa zaidam, thenrual huikhawm thiam tak, thu leh hla thiam tak a ni. Kum 1986 atangin ‘Huapzo’ Chanchinbu
enkawlin Editor a ni thin a, sap tawng a thiam nal hle bawk. Chanchinbu a chawlhsan hnu-ah Politics lamah inhmangin Dawrpui VC Member leh Secretary-te pawh a lo ni tawh thin. Hun rei tak chhung Congress Party Unit President lo ni tawh in, rinawm taka hruaitu lo ni ngar ngar thin a ni. Tunah hian Vice President nihna a chelh mek bawk.
Rawngbawlna lamah pawh a phak ang tawk tawkin a inhmang ve thin a, kum 1981 - 1993 chhung khan Sande Sikul Department hrang hrangah Zirtirtu a ni a. Kum 1994 - 1995-ah Puitling Sande Sikul Secretary a ni bawk.
A mah hi pa hrisel tha tak thin a ni a, nat lawkna em em a nei hran lova Jan 19, 2012 (Ningani) tlaiah khan a thil ei a hak sual hlauh mai a, a thaw a buai a. Damdawi In panpui nghal niin Doctor leh Nurse ten theihtawp an chhuah chungin an chhan zo ta lova, hemi ni tlai dar 6:30 khan chatuan ram min lo pan san ta a ni.

Zoramchhana kan chan ta

noreply@blogger.com (A_es) — Fri, 27 Jan 2012 19:19:00 +0000

Pu Zoramchhana (Kum -41) hi Pu R.Dova leh Pi Ngurvapi (L) te inkar ah Kum 1970 khan Darlawnah a piang a, a pianpui unau pakhat Pi Zamveli W/o R.Lalhlunchhunga (L) chauh hi a nei a amah hi a naupan lai atangin naupang thuawih thei leh nungchang tha tak a ni thin a, thenrual kawm thiam tak a ni.

Mizoram Polytechnic Lunglei ah Diploma in Civil Engineering a zir a, a zir zoh hnu hian kum 1996 khan Juniour Engineer in P.H.E. Department ah a lut a, Tuikhuahtlang-ah Post a nih hnu in hmun dang dang ah post leh a ni a, tunah hian Mamit Division Tuidam Section-ah a thih ni thleng hian a thawk ani.
Kum 1995 khan Zoliani D/o H.Lalnghaka nen in neiin fa 3 an nei . A mah hi mi tlawmngai tak leh Hotute hlau
thiam em em mi a ni a, A hna pawh hi a thulh khat hle a ni. A damloh hle tawh hnu pawh hian an Pu te hi la be hram hram in hna a kal thei lo te poh a in thlahruing em em a ni.
Mi tuarchhel tak a ni a, a natna pawh hi a chhungte hnena sawi zen zen lova mahnia tuar mai chi a ni a, a taksa a chak loh viau hnu pawh hian a hna a thulh phah ngai chuang lova mahse he a natna hi a lo nasat em toh avangin Dated 12.01.2012 khan Kawrthah Damdawiinah dah luh a ni a, ziaawm lam a pan theih meuh loh avangin Dated 14.1.2012 khan Aizawl lamah phurh chhoh a ni a, Vaivenga Hospital-ah dah luh nghal a ni a, Doctor te leh Nurse ten theihtawp an chhuah laiin Dt. 20.01.2012 Chhun dar 12:00 khan A nupui fanau te leh chhhungkhat laina ten an thlakhleh em em laiin alo peihloh san ta a ni.

Lalhlima kan chan ta

noreply@blogger.com (A_es) — Fri, 27 Jan 2012 19:01:00 +0000

Pu Lalhlimpuia (38) S/o Lalsangliana, Jail veng chu Jan 8, 2012 (Pathianni) chawhma dar 10:20 khan Mitliam avangin a boral a, hemi zan hian lumen niin a tuk Thawhtanni khan vuiliam a ni.
A chanchin : Pu Lalhlimpuia hi Pu Lalsangliana leh Pi Khawliani te fa hmingkoh ni turin Nov. 10, 1973 khan Civil Hospital, Aizawl ah a lo pianga, Pianpui unau mipa 1 leh hmeichhia 2 a nei.
R.B School, Zarkawt-ah zirna bul a tana, Pawl 9 thleng K.M High School-ah a kal. Lalrinkimi nen inneiin fapa 1 leh fanu 1 an nei a, kum 2011 atang khan an nupa hi an awm hrang ani.
A nun siam that duhin vawi tam tak Camping a lut a, Home-ah te pawh enkawl a ni thin a. Nunthar pawh a
chang fo reng a. Thawkkhat lai phei kha chuan Pathianin Tihdamnate pawh a pe a, Silchar leh a chhehvelah he tihdamna hmang hian rawngbawlna pawh a lo nei ve tawh a ni. Mahse, a nun ngai bawk kawng chu zawh lehin, a nunah hian harsatna hian a tibuai hle thin a ni. Amah pawh hian a harsatna a chiang a, Pathian pawh a mamawh zia a inhrechiang em em thin a ni.
Nov. 2011 vel atang khan a Mitliam a nasa a, in lamah enkawl a ni a, a ziaawm chhoh tan viau laiin Dec. 22, 2011 zing khan Thiin a luak vak mai a, Damdawi In panpui niin an lo admit nghal a. A pum a puar nasain a thawk a harsa bawka, a pum puar pawh vawi 3 lai siakchhuah ani. Uluk tak leh duat taka doctor leh nurse ten an enkawl laiin Jan. 8, 2012 (Pathianni) zing dar 8:00 vel khan thiin a luak leh a, a dinhmun hi a inhria pawh a ni ang? In lama hawnte a ngen hial a. Mahse, a natna hi a lo nasa tawh em a, hetia harh angreng taka a awm mek lai hian chawhma dar 10:20 ah he khawvel hi a lo chhuahsan ta ani. A nu hnena a thusawi hnuhnung ber chu “Khawvel hi bo mah se, Isua ka nei tih hla hi hla buah a awm em kha?” a ti a. A nu chuan, “Awm e, nakinah kan la sa dawn nia, damdawi ka’n lei phawt ang e...” a ti a, rei lo te hnuah a liam ta ani.

Faka kan chan ta

noreply@blogger.com (A_es) — Fri, 27 Jan 2012 18:58:00 +0000

Tv. K. Lalfakzuala hi April 20, 1975 khan Pu K. Khualluna (L) leh Pi Lalringliani (L) te fa tlum ber niin Civil Hospital, Aizawl-ah a lo piang a, pianpui unau panga neiin, chungte chu:

1. K. Lalhlimpuia (L)
2. K. Thangtinliana (L)
3. K. Lalthakima H/o Lalbiakthangi (Kawk-i)
4. K. Laltanpuii (L)
5. K. Darhmingthanga (Kawla) (L)

A mah hi mi harhvang leh fiamthu duh, thenrual kawm thiam tak niin, mi thilphal, thiante lakah pawh neih ang ang ui lo mi a ni. Faka hian Sports lam pawh a tui thin hle a, Football thiam tak niin, veng tan pawh vawi tam tak a lo khel ve tawh thin.
Kan hriat theuh angin Faka hi ruihtheih thil hian nasa takin a tibuai ve a, amah pawh hian tal chhuah tumin
theihtawpin a bei ve thin a, Camp-ah te pawh lutin a hlim ve viau thin a, amaherawhchu a ruihtheih thil tih thin hian a tibuai leh thin a, amah pawh hian hrehawm a ti thin hle a ni.
Chung a thil tih thin avang chuan amah pawh natna ten an tlakbuak chhova, vawi engemawzat Damdawi In-ah te pawh a lut thin. Dec 30, 2011 khan Mitliam avangin Aizawl Civil Hospital-ah admit a ni a, Doctor leh Nurse ten theihtawp chhuaha an enkawl laiin, Jan 4, 2012 (Nilaini) chhun dar 12:50 khan chatuan ram min lo pan san ta a ni.

Pu Lalrinmawia kan chan ta

noreply@blogger.com (A_es) — Fri, 27 Jan 2012 18:47:00 +0000

Pu Lalrinmawia (1967 - 2011) hi Pu Chalthuama leh Pi. Lalthannguri te fapa upa ber a ni a. January ni 21, 1967-ah alo piang a. Unau hmeichhe pakhat leh mipa pathum a nei.
Kum 1985-ah Lalliansangi d/o Lalthanpuia nen in neiin fapa pahnih leh panu pakhat an nei. Pu Lalrinmawia hi February 16, 1994 khan Health Department Driver-ah a lut a. A hna hi a tuiin nuam a ti em em a, a hna kal hlan te hi a nghak hlel em em thin a ni.
Kum 2009 khan tuna a natna Cancer hi hmuhchhuah a ni a. Chemo pawh vawi tamtak khai a ni a, amah pawhin dam lam panin a in hria a. Zemabawka Cancer inhem turte pawh ama motor khalh lai (Deptt. Motor) ngeiin a hruai thin nghe nghe. A cancer natna hi theihtawpin amahin dolet a tum ve thin avangin he cancer natna hian a ti buai lo hle a ni.
A nat chhung hian Damdawi inah vawithum vel lai dahluh a ni a. Amaherawhchu, khumbet a mut a nei ngai
lo tluk a ni.
November ni 1, 2011-ah a hnungzang na a rawn chhuak a, hemi ni atang hian that lam a pan thei meuh lova, a khat tawkin a na a rawn chhuah leh thin avangin Doctor-te an rawn a, checkup pawh chi hrang hrang a la nual a. December 24, 2011 khan a natna a zual tak em avangin zan lamah Grace Nursing Home, Zarkawt-ah admit a ni a, that lam pan thei ta lovin a boral zui ta a ni.
Pu Lalrinmawia hi, pa fiamthu duh tak leh thian ngaina em em mai a ni a. Thenrual kawm thiam tak a nih avangin a thawhpuite leh a thiante paw'n an ngaina hle. Amah hi mi khawngaih thei tak a ni nghe nghe.

Mizorama Krismas kan hman tan dan

noreply@blogger.com (A_es) — Thu, 22 Dec 2011 19:32:00 +0000

Kan rama chanchinbu hmasa 'Mizo leh Vai' Feb.1904 leh Feb.1905-a chhuaka an ziak dan. He thu hi Thu leh Hla Dec. 1989-a chhuak, “Mizo Krismas Hmasate’ tih Pu C.Vanlallawma ziak atanga lak a ni.
Kum 1903 Krismas : Krismas hi a awmzia Isua lo pianni a ni. Kum tin-in Disembar ni 25 a awm thin.Tin, Kristian hovin chumi ni chu an ngai hlu em em mai a, “Lawmni ni bik a ni,” ti-in.Tin, chumi ni chuan awmni an kham thin.Tin, tunlai sawrkarte hi Kristian sawrkar an nih avangin chu mi ni chuan awm ni an kham thin; an hnathawk tute zawng zawng Kristian emaw, mi dang emaw pawh an chawlh tir thin.Tin, hlimna turin ruaithehna te, englo shem te, in fiamna tin reng te an shiam. Zosap leh sawrkar in, chu mi ni atan eng lo an thawh-lawm khan sebawng leh vawk ser leh fu nen an lei.

Kum 1904 Krismas : Krismas chu Mizo ramah hian Sap ho an awm avangin a lo awm ve ta a, 25-na Disembar 1904 a khan an tan a.Lunglei zosap pahnih te pawh an nupui ve ve te nen 23-12-1904 khan Aizawl an lo phei a.Zosap skul naupangte pawh in tangkan thawhlawm a.sapho pawh in cheng 50/- lai an
ngah a.Vawk pathum an lei a, thil dang nen.Disembar 27 ah ruai an theh a, nitlak dawn in zosap skul ah an inkhawm a, Lunglei zosap pahnih te chuan hmanah Mizo rama an lo kal hmasak thu, an chanchin leh lawmthu te an sawi a.Tin, a tuk 25 a bawrhsap in a sapho Pathian thu ngaithla in an inkhawm a, sap hmeichhia 6 leh mipa 9 an ni a, Mizo 11 leh Khasi 7 leh Bengali 3 pawh an tel.Sap te chuan hla an sha a, sap upa zawk in thu a shawi a, Isua lo pian tirh ata a thih thlengin a shawi a.Hemi zan hian sap ho chu bawrhsap in a an inkhawm leh a, in chhung a chuan Far kung, a hanh chawp in an phun a,a zar kin chuan khawnvar mawi tak tak an khai thluah a.Chu mi bul ah chuan sapho 15 lai chuan nasa takin hla an sha a, a mawi em avangin babu office a mi pawh an lo kal khawm a, mawi an ti hle a.Bawrhsap chuan a chaw ei dawhkan a Khasi ho thingpui tui a in tir a.Dar sava en nawm te an shiam a, dar zaiin an chaih a, a hmuh nawm hle mai.Mi lem kaih chhuk zawng a nui thei, hlawh chhoh zawng a mu hil thei te an shiam a.Desembar 26,27,28 chhung zawng in zosap skul a chuan Pathian thu an shawi leh ngai-thla in mi an awm reng a, lehkha pawh an zirlo.29 zan ah skul vek sap ho an in khawm leh a, Babu ho, Mizo te pawh a duh apiang an lo kal a, Bawrhsap in , ‘tumah chapo suh u,’ tiin mipui a zilh a, sap an zai a, Khasi hmeichhia 2 pawh in hla an sha ve.Mizo chuan pawl 4 in shiam in hla an in shak siak a, kalrem ‘Mizo kan ni lawm ilang in’ tih hi.Chhinga zirtirtu pawlin an thiam ber a, lawm man tlem an hmu.An shak na hmun an dawh kang a: puan sen an phah a, hla sha apiang an va ding, mipui an tam vei nen ! Ni 30 ah chuan sapho chu Chaltlang a an kal a, ruai te an theh leh a, January 2 a chuan Lunglei Sap te an haw phei.Kum 1905 ah pawh Pu Zosapthara (Edwind Rowlands) hovin tuna Synod Press awmna hmunah hian Krismas an hman thu report hlui thenkhat atangin a lang thei a, heng te hi Mizorama Krismas kan hman hmasakte leh hman dan tlangpui chu a ni mai awm e.

Pathian remruat-Chhandamtu tur

noreply@blogger.com (A_es) — Sun, 11 Dec 2011 19:38:00 +0000

Chhandamtu tur Isua Krista lo pian tur thu hi Zawlnei Isaia te, Mika te hian A pian hma kum 700 velah chiang takin an lo puang tawh a. Isaia leh Mika te hian Jerusalem leh Judai ramah te a rualin rawng an lo bawl tawh thin. Bethlehem khua kher kherah a lo pian tur thu pawh tihian an lo puang a, “Nang Bethlehem, Efrata, Judai khawpui zingah te hle mah la, i chhung atangin Israel roreltu ka tan alo chhuak dawn si a. A ni chu hmasang ata thlahtu bul atanga lo chhuak a ni” tiin (Mika 5:2). Zawlnei thupuan tawh hi a dik ngei theihna turin Pathianin Kaisar Augusta a hmang ta a. A ni chuan thupek chhuahin mahni pianna khua theuha hming ziah tur thupek chu a pe ta a. Mari chu a nau pai hram tawh hle mahse, Davida thlah a nih angin Davida khawpui-ah amah ngei hming ziak tura a kal a tul ta tlat si
a, chu chu a ni Pathian remruatna puitlin zelna chu!

An khawsakna Nazareth khua atanga an chhuak chu zin hah hle mahse Bethlehem-ah chuan zan khat tal chawlh hahdamna tur pawh hmu zo lovin an hnawng chhuak ta a. Ran te riahna Buk, mawl fahrana sakah erawh zawng hmun an chang ve hram a, chutah chuan Khawvel Tlantu chu alo piang ta anih chu!
Isua Krista hi a hun takah Khawvelah a lo kal : “Nimahsela a hunbi alo kim khan, Pathianin a fapa chu rawn tir chhuakin, hmeichhe lakah Dan hnuaiah alo piang a” Gal.4:4. Isua kha a remchan hun huna lo kal mai a ni lo, Pathian ruahman hun taka lo kal a ni zawk.

1. Khawvel chanchin lam atanga thlir chuan Isua lo pian laia Rom ram kha Pax Romana-Rom-ram ralmuan lai tih a ni. Kum 200 vel chhung zet chu Rom ram ngelnghet leh ralmuan hun lai a ni a, chanchintha hrilhna hun remchang a ni.
2. Mediterranean tuipui kan vela cheng mi kawlhsen leh Rom tana buaina siam reng thin ramte Rom sorkarin hnehin an ramte a la a, chu chuan an ramah muanna nasa tak a thlen.
3. Khatih hun lai khan tawng tualleng pakhat, keini mizo Mizorama cheng zawng zawngte pawhin Mizotawng kan hmang ang hian khatih laia Rom ram pakhat awp hnuaiah khan ‘Aramaic’ tawng an hmang vek a. Tin, Rom lalrama tawng tualleng ber pakhat Greek tawngin Pathian lehkha thute hrilhfiah a ni bawk a, chu chuan Chanchintha thehdarhna kawng a hawng.
4. Rom ram chhun turin kawngpui tha tak sial vek a ni. Tin, hnam ze thuhmun neihna khan Chanchintha thehdarhna atan kawng zau tak a hawng bawk.
5. Bible thlirna lam atang pawhin, Pathianin Messia lo kalna hun tura a ruat (Daniela 9:24-27) a lo ni chiah bawk.

Israel hnam hruaitute, ziaktu leh Puithiam ropui tak tak te khan mawhphurhna kengkawh zel ni sela chuan, Isua pian thu lawmawm tak puangtute zinga tel ve tur an ni a, mahse lungchhiatthlak takin kal pelh an ni ta. Zawlneite leh hrilh lawkna thu lo buaipui thintu - Berampute hnenah erawh puan a n ita zawk.
Kan tana chhandamtu lo piang chu inpuahchah miahlo leh lawma Pathian fak miah lovin ka paltlang leh mai dawn nge? Berampute anga chu thu lawmawm tak mai chu Jerusalem lama pudarh ve zeltu kan ni dawn? Mahni theuh i inbih chiang ve ang u.

- Vanhmingliana

2012 Dawrpui Branch YMA OB

noreply@blogger.com (A_es) — Tue, 06 Dec 2011 18:07:00 +0000

Intensive Care Unit (ICU)

noreply@blogger.com (A_es) — Fri, 02 Dec 2011 19:52:00 +0000

Intensive Care Unit (ICU) hi Aizawl Civil Hospital-ah kan lo nei ve ta a, damlo thih mai hmabaka lang chhanchhuah pawh an tam ta hle. A mah hi mi nazawng luh theih loh anih avangin a awmzia pawh hre vak lo kan tam hle.
Thil mak ve tak chu, kan naupan lai chuan Betnesol an pe tawh an tih chuan a thi tep tawh tih sawina ang deuh a ngaih a ni. Kum 1980 hnu lamah erawh chuan Oxygen an pe tawh an tih chuan thi mai thei tihna-ah kan ngai hmiah. Kum 2006 atanga ICU kan neih hnu hi chuan, ICU-ah an dah an tih chuan a thi tep tihna ang alo ni leh ta a, kan changkang ve sawt viau e.
ICU hi Intensive Care chhum lo chat lova Doctor leh Nurse-te awmchilha enkawlna hmun, mi thi tepte chhan theih beiseia dah luhna a ni ber reng a ni. A chhungah hian khawl chi hrang hrang damlo lu bul,
bangah leh a sir velah a awm teuh a, khawlah chuan a thawk ran leh muan te, a blood pressure-te, a taksa-a oxygen tam leh tam lohte, a lungphu-te a lang nghal vek a. An thaw theilo anih pawhin hrawkah pipe an vuah a, khawlin a thawk tir mai a ni. A lung a phu tawp a nih pawhin lung tiphutu a awm a, khawlin lung chu a tiphu leh mai a ni. Tuna kan neih aia tha phai ramah phei chuan darthlalang bawm a awm a, a chhungah chuan taksa lum dan tur tawkin an tilum a, a thih theih loh a ni ber mai. Specialist ka zir lai khan kan zirtirtu pakhat fapa, a sikul kal haw engmah hre lovin a awm thut mai a. Chutiang bawmah chuan an dah a, mahse a thluak a lo chhe hman tawh a, khawl ringawt chu a nunna a ni ta a ni. Ni 4 hnu chuan tih tawp mai tur an ti a, titawptu tur an inhmu zo lo a ni ber. Khawl off tu tu kha a thih tirtu ang deuhin a lang tlat. A tawpah ni 7 na-ah Orthopadic-a kan Lecturer-in a off ta a, a thi chu a ni mai. A hma pawh khan a thi tho a, khawl hmangin a thaw a, a lung pawh a phu a, a zun pawh a inmil tawkin drip an pe a, a kal ve zel bawk. Hetiang deuh hian ICU-ah chuan boruak leh a chhung thianghlim a ngai a, mi nazawng an luh tir lo reng a ni.
I thawk a apiang khan natna hrik 80 aia tlem lo i thaw chhuak a, chutiang vel tho chu i hip lut bawk tih hria ang che. Mitthi In-a kan han thu khat hmur mai te hi chu natna hrik chi hrang hrang TB telin boruakah a za tel a leng nuai nuai reng a ni. Mahse Pathianin kan taksa hi natna hrik laka dotu (Immune) a nei tam em em a, na lovin kan haw leh mai zawk a ni. Hemi natna dotu hi AIDS veiah chuan a chhe vek a, chuvangin natna hrik an kai hlekin an thihpui nghal mai thin. AIDS thihna tam ber chu TB, Pneumonia leh kawthalo an ni ber reng a ni.
Chuvangin i taksa hi mak taka siam a ni Bible-in a tih hi a dik reng a ni. Tun Computer Age-ah pawh hian “A then pawh kan hre thei lo” tih hla ang deuhin kan la hriat loh tam zia hi kan la hre lo, chu chuan a siamtu ropuizia a lantir a ni.

- Dr Thangchungnunga, MS (Ortho)

Central YMA Thuchhuak

noreply@blogger.com (A_es) — Sat, 26 Nov 2011 18:08:00 +0000

Assam Police ten pawisawilo Mizo 3 an sawisak : Assam Police ten an duh, an nawm an maka an tih theih loh avanga, Mizo tlangval pawisawi lo pathum-Lalhmingmawia (24), Zemabawk, 42nd Rashtrya Rifles (Srinagar-a awm), Lalawmpuia (22), Dilkawn, 7th Assam Regiment (Punjab-a awm) Zoremthara (21), East Lungdar, 7th Assam Regiment (Punjab-a awm) te Gharmura hmuna Assam Police ten ni 11.11.2011-a an chuanna Maxi Cab ti dinga an sawisa hi Central YMA chuan pawi a ti takzet a. Hetianga mi pawisawi lo chunga kutthlak tute hi Central YMA chuan a dem takzet a, thil tisualtute hi an phu tawka hremna pek ngei a phut tlat a ni. Bairabi-a kan
Branch YMA leh khawtlang mipuiin kut tuarte thlavang hauh nana an hmalakna hi Central YMA chuan a ngaihluin a thlawp tlat a, Mizo mipui ten a hun taka kan tanrualna kan lantir thin hi Central YMA chuan lawmawm a ti tak meuh a ni.

Halpuah leh Halmawi zawrh loh : Mizoram Sorkar chuan kum 2011 Krismas leh Kumthar 2012 vuakvetah Halpuah leh Halmawi zawrh leh hal a khap a. Halpuah leh Halmawite hi mihringte tana tangkaina nei lo, hriselna tichhe thei, a lo thlawna sum tam tak sen ralna a nih bawk avangin, Central YMA chuan mitinte Halpuah leh Halmawi zuar lo tur leh hal lo turin a ngen a, Sub-Hqrs./Group leh Branch zawng zawngte mahni huamchhung theuhva hma lo la turin kan inngen bawk a ni.

Silai lem a mu kahchhuah theih fate leisak loh : Silai lem a mu kahchhuah theih naupangin an hmang thin hi Central YMA chuan tha lo a ti bawk a, heng silai lem hi mi tam takin chhiat phah nan an hman tawh avangin, an fate lei sak lo turin nu leh pate kan ngen bawk a ni.

Sd/- Vanlalruata
General Secretary, Central YMA

Govt Mizo School naupangte leh zirtirtute-1950

noreply@blogger.com (A_es) — Mon, 21 Nov 2011 18:32:00 +0000

Agape Basketball Court hawn a ni

noreply@blogger.com (A_es) — Sat, 19 Nov 2011 15:25:00 +0000

19 November, 2011 (Inrinni) khan Dawrpui Bial KTP-in project-a an neih Agape Basketball Court chu Bial Chairman Upa Lalchawimawia'n ropui takin a hawng ta. He Basketball Court hi 2009 Bial Conf. rorel-in a pass ani a. Mahni Branch theuhah Basketball court puala Ip sem thin a ni a, vawi tam tak Bial huapa hnatlang anlo nei thin bawk a ni.
Hunserh hman zawhah hian Dawrpui, Saron leh Zarkawt Team 2 theuh-te Exhibition Match ropui tak an khel nghal a ni.

He Basketball court atana sum hmuh zawng zawng chu Rs. 3,99,022 ani a, sum senral zawng zawng chu Rs. 3,77,061 a ni.

Sangbera Top-Scorer

noreply@blogger.com (A_es) — Sat, 19 Nov 2011 14:56:00 +0000

Tv. Lalsangbera, Medical Quarter, Dawrpui chu Second Division Mid-Season Football Tournamnet 2011 neih zawh takah khan Top-Scorer a thlan a ni a, hetianga veng tihmingthatu vengin kan nei hi kan chhuang hle a. A kal zelna turah duhsakna kan hlan bawk e

Mit na

noreply@blogger.com (A_es) — Sat, 19 Nov 2011 10:40:00 +0000

Mitna hri a len hian fimkhur a ngai hle a. A natna chhan tam ber hi virus hrik vang a ni ber a, a damdawi a awm lem lova, mit thlawr a ti nuam tur thlawr mai tur a ni a. Mahse tulna bik a awm anih loh chuan STEROID e.g.Betnesol eye drop te hi hman loh hram hram tur, tul loah mut a ti chhuak thei a, mit hi kan nun kawng hruaitu pawimawh ber a nih avangin duat a ngai a. Heng mitna len hun lai te phei hi chuan mit a lo thak deuh a nih pawh in nuai mai lo la tui thianghlim in sil emaw, a chhungah meng la, mit khap la, chu chu a silfai dan a ni mai a. Kan nuai nghal mai hian a ti punlun thin a ni.

Tin, kut silfai that hi a pawimawh em em a. Mitna lenlai phei chuan kut hi sil deuh reng mai tur chu chuan a veng rei ber ang che. Bible pawhin Kut fai leh Thianghlim nei a ni a duh ber. Kan Bible hian in ang reng sawi pahnih a nei zel a, Taksa leh Thlarau lam, hrem hmun leh vanram pawh helaiah leh nakin hnuah a hman theih a ni. Bible-ah phei chuan Kut sil leh taksa fai a duh zia chu miin mitthi emaw ran thi emaw a khawih chuan nilengin a bawlhhlawh a ni, engmah a khawih leh tawh tur a ni lo, a inbual fai leh hma chu tihte kan hmu a, kan Bible hi zawm tha peih ila in zirtir leh vak tur pawh a awm lem lo, kan chhiar a, kan hria kan zawm silo hi kan buaina intanna chu a ni ta ber e.

- Dr Thangchungnunga, MS (Ortho)

Dawrpui KTP 56th Rising Day

noreply@blogger.com (A_es) — Wed, 16 Nov 2011 12:49:00 +0000

Dawrpui Branch KTP chuan an din champhaphak vawi 56-na chu 14 November, 2011 khan ropui takin an lawm a. Hemi denchhen hian Group hrang hrangte Zirtawp zan atang khan Intihsiakna - Beat Contest, Musical Dance, Banner insiamsiak (on the spot), Extempore Speech, Drama (on the spot) leh Solo-ah te neih a ni a. Inrinni (12 Nov) khan Fellowship Hall-ah Durtlang Hospital-a hman atan mi 54 ten thisen an pe bawk a ni.