دي حياتي ...

How to Install HYSYS V8.

noreply@blogger.com (Ahmad M. Mokhtar) — Sat, 02 Feb 2013 12:51:00 +0000

Assalamu alaykom Wa Rahmatu Allah Wa Barakato

(Peace be upon you and ِAllah's mercy and blessings)

Dear all,
Here's a video tutorial showing you how to install the latest version of Aspen HYSYS (Version 8).

The video is in English language ... Why?!
Just as a test to use English (Inshaa ALLAH) in the next videos, not instead of Arabic but side by side with Arabic.

To download AspenOne V8. DVD1, download the following link which is for a torrent file use it to download AspenOne V8 with all its files needed for the installation.

The Link

And Now with the video

Thanks,

and waiting for your reviews.

كل عـــــــام وأنتـــم بخيــــر

noreply@blogger.com (Anonymous) — Mon, 20 Aug 2012 23:51:00 +0000

إلحق... أمسك شعبان

noreply@blogger.com (Anonymous) — Wed, 13 Jul 2011 20:08:00 +0000

السلام عليكم ورحمة الله وبركاته،

إيه؟ أنت لسة نايم؟ لسة مش واخد بالك؟ لسة مش عارف إيه إللي بيحصل؟

ياعم فوق وصحصح، دا إحنا بقينا في نص شهر شعبان، أه والله، أنهاردة ليلة 13 من شعبان، يعني كلها أسبوعين ويومين كدة وتلاقي رمضان هل هلاله، وأنت برضو لسة نايم...!!!

يا عمي دا المسلسلات خلصوا تصويرها وإعلانتها شغالة من زمان، وأنت لسة مامسحتش التراب من على المصحف؟!!

الفضائيات حطت خريطتها، وأنت لسة ما صومتش ولا يوم من شعبان؟؟؟

يا نهار ياجدعان، يا ناس فوقوا شوية، خلاص الوقت بيجري والعد التنازلي بدأ من زمان، إلحق سخن وشحم قلبك وهمتك قبل ما يجي عليك رمضان تبص تلاقي أكتر من نصه رايح في تهيئة نفسك على الخيرات، ولا أنت أصلاً مش ناوي تغير من نفسك حاجة في رمضااان؟؟؟

معلش لهجة بتاعت خناقات شوية، بس بجد الوقت أزف وإحنا لسة نايميين في العسل ( إلا من رحم الله)، عشان كدة كان لازم أخش شمال على طول عشان نفوق بسرعة وندرك ما يمكن إدراكه.

شهر شعبان زي ما قال النبي صلى الله عليه وسلم : هو شهر يغفل عنه الناس بين رجب ورمضان.
وأيضاً هو شهر ترفع فيه الأعمال، فشعبان له فضائل عدة، وبعدين دا شهر رمضان وراه على طول، يعني لو مستعدتش فيه لرمضان هتستعد أمتى...

التدوينة دي حاجة كدة على السريع، حبيت بس أنبه فيها الناس بشهر شعبان وأنه خلاص بيلم ورقه وماشي أهو، فيالا نلحق كدة نسخن بشوية حاجات، ونبدأ من بكرة...
1. بكرة إن شاء الله 13 شعبان، فياريت نحاول نصوم الثلاث أيام 13 و 14 و 15 وهم الخميس والجمعة والسبت، وتنويه مهم وهو إننا هنصوم الأيام دي إن شاء الله عشان النبي صلى الله عليه وسلم كان بيصوم الثلاث الأيام دول من كل شهر، يعني مش بنية الأحتفال بالنصف من شعبان، وإنما هو زيهم زي 13 و 14 و 15 من رجب، و 13 و 14 و 15 من محرم، وهكذا، واعلم أن الإحتفال بليلة النصف من شعبان من البدع المحدثة، وفضل ليلة النصف من شعبان لم يثبت فيها شيء صحيح (راجع كلام الشيخ بن باز رحمه الله من هنا).

2. لو أنت كنت متعود تصوم أثنين وخميس من كل أسبوع، أو ليك أي عادة أخرى من صيام الأيام (كصيام يوم ويوم) فكمل صيام بعد كدة لغاية آخر الشهر ماعدا اليوم الأخير، لأن النهي إنما هو لمن لم يكن له عادة في الصيام.

3. قوم يالا ومن دلوقتي هات المصحف بتاعك وأبدأ أقرأ فيه، وحاول تقرأ ختمة كاملة قبل الشهر ما يخلص ( عادي يعني لو كل يوم جزئين).

4. أقرأ واسمع بعض الدروس والخطب عن فضل شهر شعبان وكيفية استغلاله والإستعداد فيه لرمضان، وموقع طريق الإسلام هتلاقي من الصفحة الرئيسية مجموعة كبيرة من المواد المسوموعة والمقروءة.

5. حاول برضو قبل رمضان تقرأ/تسمع شيء مختصر عن أحكام الصيام.

6. يا سلام لو كل يوم كدة تصليلك ركعتين أو أربعة أو أكتر على حسب مقدرتك، قياماً بالليل، هتفرق معاك جامد وهتنعش قلبك وتخليك متشوق لقيام رمضان، ولما يجي رمضان هتبقى مستعد لطول القيام فيه دون تعب أو شيء آخر.

7. الدعاء، اجتهد في الدعاء والذكر والإستغفار عسى الله أن يتقبل ويغفر لك من الذنوب قبل رمضان فتستقبل رمضان بقلب طاهر من الذنوب بإذن الله، ولا تنسى الدعاء لله بأن يبلغنا رمضان، فقد لا نبلغه، وكمان... أوعى تنساني من صالح دعائك.

كفاية كدة وربنا يعيننا على فعل الطاعة.

اللهم بلغنا رمضان، وأكتب لنا فيه المغفرة والعتق من النار

آمييين

____________________________________________

* تدوينة قديمة كتبتها في نفس الوقت ده من السنة الماضية.

كيف تستيقظ لصلاة الفجر

noreply@blogger.com (Anonymous) — Sat, 02 Jul 2011 16:49:00 +0000

السلام عليكم ورحمة الله وبركاته

مع دخول شهر شعبان، ومع التقصير في كثير من الطاعات من كثيرين مننا الفترة إللي فاتت إلا من رحم الله، فكان لازم نبدأ ومن بدري كمان بالاستعداد لقدوم شهر رمضان المبارك، ومن أهم ما يستعد به الحفاظ على الصلاة، وبخاصة صلاة الفجر إحدى أثقل صلاتين على المنافقين.

وكنت لقيت قبل كدة مقال أعجبني بيتكلم عن إزاي نقوم لصلاة الفجر، رغم إنه كان بالإنجليزي، لكن وجدت فيه كلام جميل، فقمت بترجمته بشيء من التصرف، وطبعاً خليته باللغة العامية كعادة تدويناتي، وقلت نقرأه مع بعض لعلنا نستفيد.

وقبل الدخول في المقال في معلومة مغلوطة أوي عند الناس حبيت أوضحها بمناسبة الموضوع عن صلاة الفجر، وهي ما هو وقت صلاة الفجر؟ لأن في ناس كتيير بيتهيألها إن وقت صلاة الفجر من طلوع الفجر لغاية الظهر!!

أنا مش هتكلم من عندي لكن هاذكر فقط الحديث إللي النبي صلى الله عليه وسلم قالنا فيه وقت صلاة الفجر وجميع الصلوات:

" وقت الظهر ما لم يحضر العصر . ووقت العصر ما لم تصفر الشمس . ووقت المغرب ما لم يسقط ثور الشفق . ووقت العشاء إلى نصف الليل . ووقت الفجر ما لم تطلع الشمس"[رواه مسلم]

ودلوقتي اترككم مع المقال...

____________________________________________________

كيف تستيقظ لصلاة الفجر

إزاي تقدر تقوم لصلاة الفجر؟ وأنا لا أقصد إنك تقوم يوم ولا أثنين، لكن أقصد إنك إزاي تواظب على القيام لصلاة الفجر على طول، وكل يوم، من غير أي تقصير.

إخوتي في الله، إحنا كل يوم بقرأ قول الله عز وجل "إياك نعبد وإياك نستعين" في سورة الفاتحة على الأقل 17 مرة يومياً، فأنت لو كنت عايز تعبد ربنا " إياك نعبد " فأنت محتاجله ومحتاج لمساعدته " إياك نستعين ".

طيب، أنت عايز تقوم لصلاة الفجر؟

أكيد...

يبقى عليك أن تلجأ لله، فأنت وأنا وكل واحد لن ولن وكمان واحدة لن نستطيع القيام لصلاة الفجر إلا بمساعدة الله تعالى لنا وعونه، عشان كدة اسأل نفسك: أعمل إيه عشان أوري ربنا إن أنا فعلاً بكل صدق وعزم ويقين عايز أقوم لصلاة الفجر؟

في دايماً سيناريوهين بيحصلوا معانا في موضوع صلاة الفجر ده:-

السيناريو الأول: بتحس بارتفاع الإيمانيات عندك وأنك في أحسن حالاتك الإيمانية، صليت الوتر وقرأت شوية قرآن، وحتى ممكن يكون مش فاضلك إلا ساعتين تنامهم لغاية صلاة الفجر، وع ذلك فأنت على يقين إنك هتقوم للفجر، عشان أنت جهزت نفسك وعقلك وقلبك وهيأتهم على كدة، على إنك هتقوم للفجر. دا أنت ممكن كمان تلاقي نفسك قلقت في وسط الليل تبص حواليك هو الفجر جه ولا لسة خوفأ من إنه يفوت عليك. لو ماكنتش جربت الشعور ده مع صلاة الفجر، فممكن تتخيله لما بيكون وراك معاد مهم جداً لصبح بدري أوي، محتاج مثلاً تلحق أوتوبيس أو قطار أو طيارة، وإزاي إنك بتكون مظبط جسمك وعقلك وتفكيرك على إنك لازم تلحق الميعاد ده، مش مهم هتنام قد إيه ولا كام ساعة، المهم إنك هتقوم وتلحق الميعاد...

السيناريو الثاني: بتحس كدة إنك مش عايز تقوم، وبتتمنى تروح عليك نومة قال يعني عشان تأنيب الضمير وإنك متحسش إنك غلطان أوي عشان غصب عنك راحت عليك نومة، ومع ذلك ممكن برضو ربنا يرحمك ويخليك تصحى في وقت الصلاة، وساعتها تبدأ خناقتك المعتادة مع المنبه ونظام الغفوة snooze واشتغالة الشيطان المعتادة " خمس دقايق بس كمان... ".

هنتعرض مع بعض شوية توجيهات وطرق تساعد على تحقيق السيناريو الأول على طول بإذن الله تعالى وتقوم كل يوم لصلاة الفجر إن شاء الله، مع توضيح إن الطرق دي كلها حاجات روحية وإيمانية بعيداً عن الطرق والوسائل المادية المستخدمة في الوصول لكدة لأن الطرق المادية دي منتشرة أوي ومعروفة للكل:-

الطرق والوسائل الروحية الإيمانية:

اعرف من هو الله: ودا هو المفتاح الأولي والطريقة الأساسية لتحقيق الاستيقاظ للفجر. لو عرفت بجد أنت بتعبد مين على الحقيقة، وبعد كدة عرفت إنه بيطلب منك إنك تقوم كل يوم الفجر عشان تصلي... هتقوم. للأسف إحنا عندنا نفص في معرفتنا بربنا وده إللي بيخلينا نروح على السيناريو الثاني. ارعف مين هو ربك، هو ده المفتاح.

النية والإخلاص: خليك مخلص في الموضوع ده، متقلش لنفسك " شيء كويس لو قدرت أقوم للفجر انهارده"، لكن خليك مخلص وبيت النية بقوة وعزم وقول " أنا هقوم للفجر". لقيت إنه من المفيد في بعض الأحيان إني اكلم نفسي قبل ماروح أنام واقول " أنا هقوم انهاردة الفجر، مش مهم إزاي، المهم إني هقوم".

الوضوء قبل النوم: عن عبد الله بن عباس قال، قال رسول الله صلى الله عليه وسلم: "طهروا هذه الأجساد طهركم الله فإنه ليس من عبد يبيت طاهرا إلا بات معه في شعاره ملك ولا ينقلب ساعة من الليل إلا قال اللهم اغفر لعبدك فإنه بات طاهرا" (إسناده جيد – الترغيب والترهيب)، فهل تعتقد إن واحد زي ده بتدعيله الملائكة ممكن تروح عليه نومة ومايصليش الفجر؟

صلاة الوتر + الدعاء: اتأكد إنك ماتنمش أبداً قبل ما تصلي الوتر، وفي صلاتك تضرع لربنا وادعيله إنه يساعدك ويقويك على الفيام لصلاة الفجر، وخليك دايماً فاكر قوله تعالى " إياك نعبد وإياك نستعين ".

اقرأ شوية قرآن: إنك تنهي يومك بقراءة القرآن أكيد هيحط تركيزك وبكل تأكيد على الصحيان لصلاة الفجر، وقد ورد عن النبي محمد صلى الله عليه وسلم قراءة سورتي السجدة والملك فبل النوم (وإن كان فيه ضعف).

اذكر ربنا قبل النوم: وده يعتبر جزء من النقطة الأولى إللي قلناها، وتقدر طبعاً تعرف كل الأذكار الخاصة بالنوم من أي كتاب أذكار (زي حصن المسلم مثلاً)، وممكن في البدياة تحتاج إنك تقرأهم من الكتاب، بس في خلال أسبوع ولا أثنين هتلاقي نفسك حفظتهم وبتقولهم من غير كتاب ولا حاجة.

افتكر فضل صلاة الفجر: منحيث إنك مش هتكون من المنافقين، وربنا هيجعلك نور بين يديك يوم القيامة، وتفضل طول اليوم في حفظ الله ورعايته، دا غير إنك بتبقى نشيط ومصحصح بقيت اليوم. فكر في الفضائل دي وخليك فاكرها وإن شاء الله هتقوم للصلاة.

طرق وأساليب أخرى للمساعدة على القيام لصلاة الفجر:-

وصي حد من معارفك إنه يصحيك: ودي ممكن تكون من أهم الطرق لناس كتير، وصي حد قريبك أو أمك أو أخوك أو صاحبك إنكم تساعدو بعض في الصحيان، هو يصحيك، وأنت لو قمت بدر بلاش ندالة وصحيه هو كمان.

قاعدة الساعة ونص نوم: ودي بقى من الأسرار الخاصة، ففي نظرية بتقول إن كل إنسان بيكمل دورة نوم كلماة في 1.5 ساعة، وعليه فلو قدرت إنك تقوم من نومك بعد دورة كاملة ( يعني بعد 1.5 ساعة أو مضاعفاتها زي 3 و 4.5 و 6 ) فهتقوم نشيط ومصحصح، وإلا فهتقوم كسلان ومش قادر. فلو كان الفجر مثلاً على الساعة 3 وأنت هتنام الساعة 10 بلليل، فظبط منبهك على الساعة 2.5 عشان تقوم في نهاية دورة النوم ( 4.5 ساعات).

خدلك قيلولة: ودي نقطة من وحي السنة، دا غير إن في ناس كتير من المجربين بينصحوا بيها أوي، حاول على قد ما تقدر إنك تاخدلك قيلولة بعد الظهر ولو لـ 20 دقيقة، أيوة تلت ساعة، هتكفى وهتساعدك كتير في تجديد نشاطك باقي اليوم.

أوعد نفسك بفطار جادم لو قمت: وكتير من الناس ممكن تكون النقطة دي مؤثرة معاهم لو كانوا من الحريصين على الفطار كل يوم، فهتكون دي نقطة مهمة أوي ومشجعة ليهم، وممكن يفضلوا مستنيين الفطار من الليلة إللي قبله.

___________________________________________

*رابط المقال الأصلي:

Productive Muslim

مش كفاية بقى ولا إيه

noreply@blogger.com (Ahmad M. Mokhtar) — Mon, 20 Jun 2011 18:17:00 +0000

السلام عليكم ورحمة الله وبركاته

مش كفاية بقى ولا إيه؟

بقالي كتير أوي متوقف عن التدوين

طب مش كفاية بقى ولا إيه؟

الحمد لله ربنا أنعم علينا بفضل وخير كثير بعد ثورة 25 يناير، يكفي فيها زوال الظلم (أو كثير منه) وطواغيته (أو كثير منهم)، بس من أيام الثورة ولحد دلوقتي تقريباً والعملية مش متظبطة...

معظم الناس إلا من رحم الله، انشغل بأحداث الثورة والتطور والتحرر وإللي اتسجن وإللي هرب و.. و... وجه على حساب الدين

جه على حساب علاقته بربنا

جه على حساب فعل كثير من الطاعات

جه على حساب الاهتمام بأولويات حياته

طب وبعدين، مش كفاية بقى ولا إيه؟

مش كفاية ويالا نرجع لربنا تاني

مش كفاية خناقات وفتن ونرجع بسلام مع بعض تاني

مش كفاية زبالة الفضائيات ويهدو علينا تاني

مش كفاية مظاهرات ومطالب ونرجع للشغل تاني

مش كفاية نقول للبلد هاتي ونرجع نقولها خدي من تاني

مش كفاية؟

أنا متهيألي إنه كفاية... وكفاية قوي

______________________________________________

* لم آخذ القرار بالإنتظام من جديد في المدونة، ولكن ستكون هناك تدوينات على فترات غير منتظمة، وغير مرتبطة ببعضها

أصوات بشرية بالإشتغالات الصوتية

noreply@blogger.com (Ahmad M. Mokhtar) — Fri, 24 Dec 2010 17:24:00 +0000

السلام عليكم ورحمة الله وبركاته

إيه الأخبار؟ تمام...

طيب الحمد لله... ونخش بقى في الموضوع.

طبعاً كلنا ملاحظين وعايشين مع بعض التطور والإنتشار الكبير للقنوات الفضائية الإسلامية، وإلي من ضمن ما قد ساهمت في زيادته هو الأناشيد الدينية، سواء كانت القنوات دي بتعرضه بين فقراتها وبرامجها المختلفة، أو النشيد نفسه بيكون تتر لمقدمة/نهاية البرنامج، وده شيء جميل والحمد لله وهي بديل طبيعي للحاجة الغنائية عندنا.

المهم إن مع إنتشار الأناشيد دي، بدأ استخدام الأصوات البشرية كخلفية للإنشاد لكي تضيف جمالاً للنشيد، وتكون بديلاً عن استخدام الموسيقى، وده برضو شيء كويس وجميل.

طب أنت إيه إللي مزعلك؟

أنا مفيش حاجة من إللي فاتت ده مزعلاني، ولكني بدأت من فترة ألاحظ تتطور كبير جداً في هذه الأصوات البشرية وبمساعدة المؤثرات الصوتية حتى إني بالفعل بعض هذه الأناشيد أو تترات البرامج عندما سمعتها أحسست أنها موسيقى حقيقية وليست مجرد أصوات ناس، وده يدل على مدى التقدم والتقنية العالية المستخدمة والإتقان في التفنن و ..... لأ

أولاً: أحب أوضح إني مش كاتب التدوينة دي لعرض أو مناقشة قضية حكم الأغاني المصاحب لها موسيقى، أو حكم الموسيقى بوجه عام، ولكن أنا كاتب التدوينة دي لعرض تساؤل عن هذا الموضوع ولكن من زاوية أخرى.

دلوقتي الناس إللي بتحط أصوات بشرية بدل الموسيقى، ماهو يا إما شايف إن الموسيقى حرام عشان كدة بيستخدم أصوات بشرية بدل منها، أو موضوع الموسيقى ده مش فارق وإنما هو شايف إن الأصوات البشرية دي في خلفية الغناء أو الإنشاد بتكون أحسن وأحلى فعشان كدة بيستخدمها.

طيب، هنمسك حاجة حاجة:

نبدأ بالشخص التاني، وإللي العملية معاه مش حلال وحرام، وإنما الحكاية إن الأصوت البشرية هو شايف إنها بتدي أداء وجو أحلى من الموسيقى، فلما يجي هو يستخدم الأصوات البشرية ويعدل عليها ويمكسها لحد ماتبقى زي الموسيقى بالظبط، تبقى كدة فرقت إيه؟ وراحت فين الحلاوة إللي فيها وإلي بتميزها عن الموسيقى؟؟ ولزمتها إيه اتعب نفسي وأنفخ الناس معايا لما هي كدة كدة هتطلع زي الموسيقى والناس مش هتقدر تفرق بينهم؟؟؟

أما بالنسبة للشخص الأول: فهو شايف إن الموسيقى حرام ولا يجوز استخدامها والسماع إليها، شيء جميل، طب هي فرقت إيه الآلة الموسيقية عن صوت البني آدم لما أنت رحت جاي ومظبطها ولاعب فيها لغاية لما بقت زيها زي صوت الألة؟ يعني لما اسمع تتر لبرنامج ما ولولا إن القناة تصرح دائماً بعدم استخدام الموسيقى، وأنا ألتمس فيهم الصدق، أنا كنت مستعد أقسم على أن هذا الصوت هو موسيقى وليست أصوات بشرية.

طب هو الشخص ده سمع عن حاجة أسمها البيت بوكس beat box، ده يا سيدي بإختصار الناس إللي بتعمل أصوات موسيقية ببقها وبس، بصوته بيقدر يقلد صوت أي آلة، وعليه بيقدر يعزف أي موسيقى، وبوجود أكثر من شخص من دول مع بعض أو شخص واحد ولكن على كذا مرة بيقدر يعمل صوت موسيقي زي الموسيقى الحقيقية بالظبط، وهنا السؤال يطرح نفسه، إيه الفرق بين دول؟ وهل أنت يالي أنت شايف إن الموسيقى حرام شايف إن البيت بوكس ده حلال؟؟؟

بصراحة أنا محتار ومش عارف إيه الحكاية بالظبط.

يا عمي لو أنت من الشخص الأول أو الشخص التاني، ففي كلا الحالتين لو هتستخدم أصوات بشرية سيبها زي ما هي، خليني أحس من أول مرة إنها فعلاً أصوات بشرية من غير ما أقعد أركز أوي وأسمع كذا مرة عشان أشوف هي موسيقى ولا بني آدميين...

كفاية كدة بقى أحسن بدأت أسخن

اللهم اهدنا واهدي بنا واجعلنا سبباً لمن أهتدى

آميييييييييييييين

حجب المواقع الإباحية من خلال ال DNS / OpenDNS

noreply@blogger.com (Anonymous) — Sun, 05 Dec 2010 19:17:00 +0000

السلام عليكم ورحمة الله وبركاته

موضع النهاردة تقني شوية، وطويل شويتين، لكن الكل بيحتاج له، نظراً لأنه عن موضوع بيشغل بال الكثير منا، ألا وهو إزاي نمنع فتح المواقع الإباحية على الأنترنت من خلال الكمبيوتر بتاعنا، سواء بقصد أو بغير قصد كما يكون الحال في الإعلانات من بعض المواقع، وخصوصاً مواقع رفع/تنزيل الملفات، ولا سييما إذا كان اللينك من منتدى أجنبي.

طيب، كدة عرفنا الهدف من المقال، هو منع فتح المواقع دي، الخطوة إللي جاية هي معرفة طريقة القيام بذلك.

أولاً أود الإشارة إلى أن فكرة الموضوع كان الأساس فيها موضوع لأخي صبحي صاحب مدونة الدرب بعنوان " طريقة حجب المواقع اللاأخلاقية والمؤذية بدون أي برامج إضافية "، ولكن تدونتي دي لا تعتبر قص ولصق ولا سرقة موضوع ولا حاجة، وده لسببين:

1. أنا أخذت الفكرة فقط، ولكن فيه زيادة لتفصيل وتوسع في التحكم بهذه الطريقة.

2. مدونة الدرب مختصة في البرامج المفتوحة واللينوكس، ولذلك ركز أخي صبحي على عرض الطريقة في نظام أبونتو/لينوكس، على العكس هنا وهو إني هركز على الشرح لنظام ويندوز، ويمكن ده سبب لوضعي رابط موضوع مدونة الدرب لكي يكون هناك تكامل للموضوع على نظامي التشغيل.

نخش في الموضوع...

من عنوان التدوينة نستنتج إننا هنستخدم حاجة اسمها ال DNS لحل هذه المشكلة، وعليه فلازم في البداية نعرف يعني إيه DNS.
باختصار شديد وبكل بساطة، ال DNS ده اختصار ل Domain Name system... شفت الموضوع سهل إزاي D:

معنى ال DNS هو زي أجندة أرقام التليفونات إللي عندنا، وأنا عن نفسي بحب اشبهها بسكرتيرة سويتش التليفونات، وتعالوا نشوف المثال ده:

عايزين نتصل بشركة س للخدمات، هترفع سماعة التليفون وتقول للسكرتيرة اطلبيلي شركة س للخدمات، هتروح هي جايبة رقم الشركة ومتصله بيه، وبعدين تحولك على الخط.
المثال ده فيه النقاط التالية:
1. أنت أردت الإتصال بشركة معينة عارف اسمها.
2. التليفونات (متمثلة في السنترال و التليفون نفسه) مايعرفش أسماء شركات وإنما كل ما يستطيع التعامل معه هو أرقام للتليفونات وبس.
3. لذلك لجأت للسكرتيرة، وهي بدورها طلعت الرقم الخاص بالشركة إللي أنت عايزها واعطته للتليفون فتم الإتصال.
4. في النهاية أنت اتكلمت مع الشركة إللي أنت عارف اسمها، ومن غير ما تعرف رقمها ....

ده بالظبط إللي بيحصل في النت مع الكمبيوتر وال DNS:
1. أنت عايز تتصل بموقع معين عارف اسمه ولكن de7ayaty.blogspot.com، والاسم ده بيطلق عليه Domain.
2. الأنترنت (متمثل في شبكة الأنترنت والكمبيوتر نفسه) مايعفش أسماء المواقع، وإنما كل إللي يعرفه رقمهم (الآي بي)، ويكون 1 و 0 وبس.
3. لذلك نلجأ لل DNS، وهو بدوره بيحول اسم الموقع إلي الآي بي المقابل له ويعطيه للنت فيتم الإتصال.
4. في النهاية أنت اتصلت بالموقع إللي أنت عارف اسمه ومن غير ما تعرف الآي بي بتاعه...

أظن معدتش محتاجة أي توضيح.

بعد كل الرغي ده (كعادتي) نيجي بقى للطريقة، وهي بتتمثل في إننا بنظبط إتصال الأنترنت عندنا عشان يستخدم DNS معين فيه خاصية فلترة المواقع فيمنع المواقع الإباحية وغيرها.
الوضع الإفتراضي لإتصال الأنترنت إنه بيعين ال DNS اوتوماتك، يعني أول DNS فاضي يلاقيه في وشه يستخدمه، وده مش تمام لأن ممكن ال DNS ده يكون بطيء أو مفهوش فلترة ( وده الغالب) عشان كدة إحنا بنستخدم DNS محدد.

من اِشهر مقدمي خدمة ال DNS هم:

OpenDNS

DynDNS

وطبعاً جوجل مابتسبش حد في حاله

Google Public DNS

وأنا إن شاء الله هشرح الاستخدام ل OpenDNS، بسم الله نبدأ.

1. روح على My network places، واختار View Network connections.
2. اختار الكونكشن إللي أنت شغال عليها (لأن أحياناً في ناس بيكون عندها اكثر من كونيكشن) وكليك يمين وأختار Properties.

3. من صفحة properties إللي اتفتحت اختار internet protocol (TCP/IP) ثم اضغط properties.

4. من الصفحة التي ستظهر اختار use the following DNS server adresses، ثم أدخل الأرقام التالية في مكانها المبين في الصورة

preferred DNS server: 208.67.222.222

alternate DNS server : 208.67.220.220

5. بعد كدة دوس ok ثم ok ثم close.
وبس كدة.

استنى لمدة 3:5 دقائق وجرب عشان تشوف النتيجة، وطبعاً مش هقولك على موقع من إياهم، ولكن خش على الرابط ده، ولو كانت الخدمة اتفعلت معاك فعلاً هتلاقي الصفحة بتقولك إنك بتستخدم OpenDNS. (الصفحة دي OpenDNS هي إللي عاملاها)
وللتوضيح، فكل إللي عملناه إننا وضعنا رقم إي بي السيرفير بتاع openDNS عشان يستخدمه ك DNS server، ومن ذلك نستنتج إن الخطوات مع باقي الشركات بتكون متشابه، مع تغيير ارقام الأي بي للرقم الخاص بالشركة، يعني مثلاً خدمة جوجل أرقامها بتكون:

8.8.8.8

8.8.4.4

شوفتوا الواسطة ... D:

بكدة تكون خليت جهازك يستخدم DNS مميز، ومن أهم مميزات سيرفرات ال DNS غير إنها بتمنع المواقع الإباحية والمضرة وإللي فيها فيروسات وخلافه، إنها بتزيد من سرعة التصفع وسرعة الوصول للمواقع.

بس فيه خطوة كمان فاضلة، وإن كان البعض لا يراها ضرورية، لكن أنا شايفها مهمة ومفيدة، وهي إنك تشترك على موقع OpenDNS، وده ليه عدة فوائد من أهمها، إنك تقدر تحدد مستوى الحماية إللي أنت عايزه، وكمان لو فيه موقع معين مش عايزه يفتح وهو بيفتح، تقدر تضيفه لقايمة تمنع فتح المواقع التي فيها، والعكس أيضاً.

عشان كدة هنشرح مع بعض طريقة التسجيل في الموقع :

1. طبعاً روح للموقع بتاع OpenDNS من هنا.
2. من أعلى الصفحة اختار Create account.
3. اختار OpenDNS basic عشان هو الحساب المجاني، ودوس sign up.

4. قم بملء البيانات المطلوبة ثم اضغط continue، ولحد هنا يكون الحساب قد تم انشاءه، ويبقى إن فيه رسالة تأكيد هتوصلك على الإيميل بتاعك عشان تأكد بيها الحساب.

الصفحة إللي هتجيلك بعد كدة هتكون بالمنظر ده:

وفيها ثلاث اختيارات:
1. computer: وده هيدخلك على صفحة ترشدك لطريقة استخدام OpenDNS لجهاز الكمبيوتر، بالظبط ذي ما عملنا مع بعض من شوية، ولكن تفرق في إنه في شرح لتطبيق الطريقة على جميع أنواع انظمة التشغيل المختلفة.
2. Router: وده هيدخلك على صفحة تشرحلك إزاي تقدر تستخدم ال OpenDNS على الروتر كله، بحيث إن كل الأجهزة إللي واخده نت من الروتر ده هتستخدم OpenDNS.
3. Server: ودي لأصحاب السيرفرات.

بعد كدة بقى هنظبط الحساب بتاعنا على مزاجنا من خلال الخطوات التالية:
1. من صفحة الموقع الرئيسية هندخل بالحساب بتاعنا وندخل على ال dashboard.
2. نختار بعد كده Settings.
3. من الصفحة إللي هتفتح هنكتب عنوان الأي بي بتاعنا الموجود في أعلى الصفحة في المكان المحدد تحت كلمة add network.

4. بعد كدة اضغط على add Network.
*واحنا بنعمل كدة عشان نقدر نظبط الإعدادات إللي عايزنها من مستوى حماية ومنع/إباحة مواقع معينة إلى آخره.

5. بعد إضافة الأي بي، هندخل على الشبكة إللي ضفناها، عشان نظبط الاعدادات، وهتكون صفحة الإعدادات بالشكل ده:

6. من الجزء الأول في الصفحة تحت عنوان choose your filtering level تقدر تختار مستوى الحماية إللي أنت عايزه، وتقدر تعمل لأي مستوى فيهم view عشان تشوف هيعمل إيه بالظبط، وكمان تقدر تختار customize عشان تحدد الإختيارات إلي أنت عايزها بنفسك.
وبعد كدة تدوس Apply

7. في الجزء الثاني تحت عنوان Manage Individual Domains، ودي تقدر تكتب فيها أي موقع ثم تختار Always block عشان يحجب هذا الموقع من الظهور لديك، أو never block عشان يفضل شغال معاك على طول.

8. لو بصينا في الجنب الشمال كدة، هنلاقي عدة اختيارات منهم مثلاً customization، ودي تقدر من خلالها تعديل أو تظبيط الصفحة إللي هتظهر عند محاولة الوصول لموقع تم حجبه، فممكن تختار صورة تحملها تكون اللوجو للصفحة بدلاً من لوجو الموقع، والرسالة إللي بتبقى مكتوبة،... إلى آخره.

أخيراً وبعد إطالة كبيرة، يبقى إني أقولك، يستحسن إنك تحمل البرنامج الخاص بالموقع لعمل تحديث اوتوماتك للأي بي بتاعك في حالة إنه اتغير (وده أكيد هيحصل لو أنت من مصر لأن الأي بيهات عندنا في مصر ديناميكية Dynamic IPs ) فهو بيعمل تحديث للأي بي أول ما يتغير.
لتحميل البرنامج: اضغط هنا.

ووووووووووووويييييييييييو

الحمد لله أنا كدة خَلصت، و خِلصت

أشوفكم على خيرفي المرة إللي جاية

وتصبحوا على خيييييييييير.

بتحب تفهم ولا تحفظ ؟

noreply@blogger.com (Anonymous) — Mon, 22 Nov 2010 20:59:00 +0000

السلام عليكم ورحمة الله وبركاته،

كيفكم، وإيه الأخبار؟

نخش بقى في الموضوع على طول...

حوار دايماً بيدور بين الشباب، وبخاصة في المرحل الدراسية المختلفة سواء مدارس أو جامعات، وهو يا ترى أنت فهييم ولا حفييظ؟

يعني بتحب تفهم الحاجة ولا تحفظ؟

وبتدور بقى حوارات كتير وتعصب والفهم أحسن.. لا الحفظ أسهل.. أنتوا مابتفهموش.. اهو أنت ... تيييييييييييت.

وعشان أكون صريح من البداية، فأنا من المتعصبين (شوية يعني) للفهيمة، بس ده مش هيقصر على عرضي للموضوع إن شاء الله وهكون حيادي، وهحاول اختصار الموضوع في فقرات قصيرة.

أولاً: ينفع أعيش بالحفظ فقط من غير فهم خالص؟

طبعاً لأ

طب ينفع أعيش بالفهم فقط من غير حفظ خالص؟

برضو طبعاً لأ (مش قولتلك حيادي)

ومثالين بإختصار عشان محدش يعترض على الكلام: حضرتك مينفعش تحفظ إنك لو حاسس بالحر هتشغل المروحة أو تشرب حاجة ساقعة، ومينفعش برضو تفهم اسمك إيه، ولا تفهم تاريخ ميلادك أمتى !!!

أظن واضح.

ثانياً: كل الناس بتعرف تفهم، وكل الناس بتعرف تحفظ، بس طبعاً في تفاوت كبير بين كل شخص والآخر، ففي واحد قدرته على الفهم عالية ولكنه في الحفظ مش ولابد، وفي ناس العكس بتقدر تحفظ كتير وفي وقت قليل بس فهمها برضو مش ولا بد، وفي ناس ما شاء الله عندها الأتنين سوبر (اللهم لا حسد يعني).

فدي قدرات، أحياناً بتكون طبيعية، يعني ده قدر الله وحكمته من إعطائه القدرات دي، وأحياناً أخرى بيكون برغبة شخصية أو كسل أو تعود من الشخص نفسه (وبرضو بقدر الله طبعاً).

ثالثاً: في حاجات لا يصلح لها إلا الفهم، وفي حاجات لا يصلح لها إلا الحفظ، وده تقريباً وضح من المثالين في أولاً.

وهنوضح من خلال أمثلة في العلوم الدنيوية والدينية أيضاً.

يعني المعلومات التاريخية، تواريخ وأسماء أشخاص، الأدب شعر بقى ونثر، اللغات كلماتها وتعبيراتها ... إلخ كل ده مينفع يتفهم، وماينفعش غير إنه يتحفظ.

الأيات القرءانية والأحاديث وسير العلماء، محتاجة برضو للحفظ.

ومن ناحية أخرى، تطبيق النظريات الرياضية لازم يفهم، التخطيط لمشاريع وتصميم أي شيء (وحدات صناعية، منازل، دائرة كهربائية). كل ده لازم يتفهم وماينفعش يتحفظ.

رابعاً (من أهم نقطتين): محاولة فهم ما يجب حفظه أو حفظ ما يجب فهمه بيودي في داهية.

لأن إللي بيحفظ ما يجب فهمه بيحط نفسه في مأزق من غير ما ياخد باله، لأن مجرد حفظه للحاجة هيخليه يتنح لو أي ظرف أو أي حاجة تغيرت عما كان متوقعه(او عما كان يحفظه بمعنى أصح) يعني لو ملقاش الأمور ماشيا زي ما حفظ، شكراً.

وبرضو إللي هيحاول يفهم ما يجب حفظه، هيضيع وقت طويييييييل، وفي الآخر مش هيوصل للمطلوب. يعني تخيل لو حد حاول يفهم تاريخ قيام الحرب العالمية؟!

خامساً (تاني أهم نقطة): أفهم واحفظ، هتعيش بسهولة.

زي ما قلت في الأول في ناس مصرة على إنها متحفظش أي حاجة، هو بالفعل بيحفظ حاجات وحاجات كتير، بس من غير ما ياخد باله، أو عامل مش واخد باله، وعلى العكس برضو للناس إللي بتحفظ.

وده عين الغلط، لأن زي ما قلت في حاجات لازم تتحفظ، وفي حاجات لازم تتفهم، وفي حاجات عايزة الأثنين، وهما دول المقصودين بالنقطة دي.

لو حاجة محتاجة فهم وحفظ، متكتفيش بأحدهم فقط، لأن ده هيضيع عليك كتير.

كل حاجة حاول تلاقي طريقة للوصول للطريقتين معاً، دا هيخليك متمكن أكتر منها.

احفظ التاريخ وأحداثه، بس حاول تفهم الأحداث وأسبابها وما أدت له...

احفظ المعادلات والقوانين (القليل منها من وجهة نظري)، بس لازم تفهم إزاي تتمكن من تسخيرها لاستخدامها

احفظ القرآن، بس افهم المقصود من الآيات ومعانيها ودلالاتها

...

الخلاصة، الحفظ ممكن يكون أسهل، بس مش عند كل الناس، والفهم كذلك

الفهم ممكن يكون أكثر ثباتاً وميتنسيش بسرعة، بس برضو مش عند كل الناس

سواء فهم أو حفظت، المهم تعرف إزاي تستفيد من العلم إللي تحصلت عليه بأي طريقة كانت...

عيدكم مبارك إن شاء الله

noreply@blogger.com (Ahmad M. Mokhtar) — Mon, 15 Nov 2010 17:28:00 +0000

كل عام وأنت جميعاً بخير

وعيد أضحى مبارك إن شاء الله

وإن شاء الله السنة اللي جاية نكون جميعاً على عرفات

خواطر مع بدء ذي الحجة

noreply@blogger.com (Ahmad M. Mokhtar) — Mon, 08 Nov 2010 20:04:00 +0000

السلام عليكم ورحمة الله وبركاته،

الحمد لله، والصلاة والسلام على رسول الله - صلى الله عليه وسلم -،

بدأ الشهر الكريم المبارك، شهر ذي الحجة العظيم، لتهب معه نسائم الرحمات علينا، رحمة وفضل من الله الكريم المنان.

ومع بداية الشهر الكريم، ومن قبله بفترة، تتوالى علىّ عدة خواطر وأفكار، أحببت تدوين بعضها ومشاركتها معكم، في ثلاث أو أربع خواطر متفرقة قليلة وموجزة غير مملة.

1. كن له إبراهيم، يكن لك إسماعيل (عليهما السلام):-

في خطبة الجمعة إللي فاتت، ومما ذكره الخطيب الحديث عن سيدنا إبراهيم - عليه السلام - وقصته مع ولده إسماعيل - عليه السلام -، ومش عارف إيه إللي فكرني بقصة سمعتها - على ما اعتقد كانت من الشيخ محمود المصري - إن راجل حب يشوف حب أبنه ليه ومدى طاعته له، فقاله إنه حلم إنه بيدبحه، طبعاً أنا مش فاكر القصة بالظبط لأنها كانت من زمان، بس الواد يا إما شتم أو قال ده مجنون أو حاجة زي كدة، المهم إن الشيخ قال ساعتها، لو عايز ابنك يكون زي سيدنا إسماعيل - عليه السلام - فلازم تحاول تكون أنت زي سيدنا إبراهيم - عليه السلام - الأول.

ودي فعلاً نقطة جميلة، وإستفادة عظيمة من قصة سيدنا إبراهيم وولده إسماعيل - عليهما السلام - وقلما تحدث عنها أحد، وهي إنك ماتتوقعش من إبنك إنه يكون في قمة البر بك وبأمه وقمة في الأخلاق مع الناس، وأنت أصلاً لم تحسن تربيته، ولم تكن له قدوة في تعاملك مع الناس، أبنك أنت مسئول عنه منذ ولادته، ولازم تحسن في تربيته من البداية، ونركز مع بعض على البداية دي، لأن كتيير من الناس يكون أبنه بيعمل حاجة غلط ولا كدة وكدة، ويقولك سيبه يعيشله يومين... سبحان الله، هو مينفعش يعيش اليومين دول إلا بالغلط، طب أنت واخد بالك أنت بتقول إيه، سيبه يعيش يومين، يعيش على الغلط، يعني كأنك بتقول سيبه يعصي ربه يومين، وبعدين هينصلح حاله، طب افرض يا أخي إنه مات قبل ما يخلص اليومين إلي كان بيعيشهم، هتقول لربنا إيه لما يسألك سبته ليه يعصاني وأنت مسئول عنه و كما قال النبي - صلى الله عليه وسلم - "كلكم راعٍ وكلكم مسئول عن رعيته"؟؟

والمهم إن نفس الأب ده إللي ترك الولد والبنت يعيشوا يومين، وساب البيت يمشي على حاله، يرجع يقول الولد باظ، الواد بيبجح في وشي، الواد رفع إيده عليا، الواد... الواد... الواد....... ضيعت حقه فلم يعطيك حقك.

سيدنا إبراهيم لما جاله الشيطان يثنيه عن تنفيذ أمر الله، رجمه سيدنا إبراهيم - عليه السلام - ، وبس كده؟ لا، كمان زوجته وولده رجموه لما ذهب لهم، لييه؟ لأن سيدنا إبراهيم - عليه السلام - لم يصلح من نفسه فقط وقال هما منهم لنفسهم أو إلي بينصلح بينصلح لنفسه أو ما شابه، وإنما أسس الأسرة بأكملها على طاعة الله فكانت النبتة الصالحة.

أنت كمان، هتكون زي سيدنا إبراهيم - عليه السلام - وتصلح من أسرتك، وتربي أبنك على الطاعة، وتكون أمامه قدوة لما تقول، هتلاقي منه مثل ما لاقى سيدنا إبراهيم من ولده إسماعيل - عليهماالسلام -، وغير ذلك، فلا تلومن إلا نفسك.

2. حج معهم وإن لم تذهب:

بجد بجد نفسي أحج، اللهم أرزقني الحج والعمرة، آمين.
شوق رهيب وكبير جداً بدأ يتمكلني للذهاب للحج أو العمرة، نفسي أروح في أقرب فرصة، وأرجوا الله أن تكون قريبة.
بس لحد ما ربنا ييسر الموضوع، ياترى ممكن نكون معاهم هناك زي ما بيقولوا مشاركة وجدانية؟

لو نفتكر حديث غزوة تبوك، أن رسول الله صلى الله عليه وسلم رجع من غزوة تبوك ، فدنا من المدينة ، فقال : ( إن بالمدينة أقواما ، ما سرتم مسيرا ، ولا قطعتم واديا إلا كانوا معكم ) . قالوا : يا رسول الله ، وهم بالمدينة ؟ قال : ( وهم بالمدينة ، حبسهم العذر ) .رواه البخاري.

إذن هم أناس، لم يستطيعوا الخروج معهم لعذر ما، ولكن كانت نيتهم صادقة في الخروج في سبيل الله لو استطاعوا ذلك، فكتب لهم مثل ما كان للمجاهدين.
يبقى أهم حاجة لازم نأكد عليها ومن دلوقتي، النية، نعقد النية ومن دلوقتي على الحج والعمرة، نية خالصة صادقة لوجه الله إننا نذهب للحج أو العمرة أول ما يتوفر لنا المقدرة على ذلك.

وبعدين لحين تيسير ذلك، وإلى جانب النية الصادقة، في أعمال لها ثواب كثواب الحج، أنقلها لكم من موقع صوت السلف:

1- أن يذهب المرء إلى المسجد لحضور درس علم أو ليُعلـِّم علمًا؛ ففي الحديث: (مَنْ غَدَا إِلَى الْمَسْجِدِ لا يُرِيدُ إِلا أَنْ يَتَعَلَّمَ خَيْرًا أَوْ يَعْلَمَهُ، كَانَ لَهُ كَأَجْرِ حَاجٍّ تَامًّا حِجَّتُهُ) (رواه الطبراني في الكبير، وصححه الألباني).

2- أن يذهب المرء إلى المسجد على وضوء؛ ليصلي فيه المكتوبة؛ ففي الحديث: (مَنْ خَرَجَ مِنْ بَيْتِهِ مُتَطَهِّرًا إِلَى صَلاَةٍ مَكْتُوبَةٍ فَأَجْرُهُ كَأَجْرِ الْحَاجِّ الْمُحْرِمِ وَمَنْ خَرَجَ إِلَى تَسْبِيحِ الضُّحَى لاَ يُنْصِبُهُ إِلاَّ إِيَّاهُ فَأَجْرُهُ كَأَجْرِ الْمُعْتَمِرِ) (رواه أبو داود، وحسنه الألباني).

3- أن يصلي المرء في المسجد صلاة الصبح في جماعة، ويمكث في المسجد يذكر الله -تعالى- حتى تطلع الشمس، ثم يمكث حتى يصلي ركعتي الضحى؛ ففي الحديث: (مَنْ صَلَّى الْغَدَاةَ فِي جَمَاعَةٍ ثُمَّ قَعَدَ يَذْكُرُ اللَّهَ حَتَّى تَطْلُعَ الشَّمْسُ ثُمَّ صَلَّى رَكْعَتَيْنِ كَانَتْ لَهُ كَأَجْرِ حَجَّةٍ وَعُمْرَةٍ تَامَّةٍ تَامَّةٍ تَامَّةٍ) (رواه الترمذي، وحسنه الألباني)، وفي رواية: (من صلى الصبح ثم جلس في مجلسه حتى تمكنه الصلاة كان بمنزلة عمرة وحجة متقبلتين) (رواه الطبراني في الأوسط، وصححه الألباني).
انتهى النقل.

مع ملاحظة طبعاً أن هذه الأعمال لها من الثواب مثل ثواب الحج، إلا أنها طبعاً لاتسقط الفرض.

3. عودة لسيدنا إبراهيم - عليه السلام - وقصة الذبح:

عودة مرة أخرى لقصة سيدنا إبراهيم - عليه السلام -، وعند نقطة ذبحه أو بمعنى أصح شروعه في ذبح أبنه، إزاي إنه مستعد لتنفيذ أمر ربه حتى ولو كان في قتل فلذة الكبد، ونرى من خلال هذا الإمتثال العجييب لأوامر الله ليس فقط الطاعة المطلقة لله، وإنما نستشف منها الثقة المطلقة بالله.

أيوة الثقة، وده شيء قليل أوي عندنا إلا من رحم الله، فنجد في موقف سيدنا إبراهيم - عليه السلام- إنه عنده ثقة لا نهائية بالله وأن الله لا يأمره بشيء إلا وفيه الخير له والمصلحة، حتى وإن كان الظاهر له منها أن بها من الشر الكثير.

ويا ريت نلاقي في نفسنا ولو قليل القليل من هذه الثقة في الله، وأن طاعته هي مفتاح النجاة، وأن أوامره ما شرعها ولا أمر بها إلا لصلاح الناس جميعاً، حتى وإن كنا لا نرى نحن هذه الخير، ولكن نثق تمام الثقة في أن الله لن يضيعنا أبداً ما دمنا في طاعته.

أكتفي بثلاث خواطر، وكل سنة وأنتم طيبين، ولا تنسوا الصيام والإكثار من الأعمال الصالحة وأخيراً اترك لكم هذه الروابط:

وليالٍ عشر (تدوينة سابقة).

مقال: الأعمال التي يعادل ثوابها ثواب الحج.

من أهم الفيديوهات عن العشر من ذي الحجة.

عدنا بفضل الله

noreply@blogger.com (Ahmad M. Mokhtar) — Fri, 05 Nov 2010 14:27:00 +0000

السلام عليكم ورحمة الله وبركاته

الحمد لله، والصلاة والسلام على رسول الله صلى الله عليه وسلم.

أخيراً وبعد فترة إنقطاع طوييييييييييييييلة دامت لما يقرب من ثلاث شهور عدت إلى مدونتي الحبيبة بشوق وحماس، أفكار كثيرة ومواقف وقليل من التجارب الحياتية ستكون مصدر للعديد من الندوينات في الفترة القادمة إن شاء الله.

لن أتحدث عن سبب الإنقطاع وملابسات الموقف، فلا تبكي على اللبن المسكوب، ولكن سأركز نظري على ما هو قادم بإذن الله.

قمت ببعض التغيرات الطفيفة في المدونة، ولكن التغييرات الأكثر ستلاحظ من خلال التدوينات والتطرق لمواضيع جديدة إن شاء الله.

أخيراً، حمد الله على سلامتي، وأهلاً بكم مجدداً في المدونة،

وإلى لقاء قريب إن شاء الله ...

أهلاً رمضان

noreply@blogger.com (Ahmad M. Mokhtar) — Wed, 11 Aug 2010 21:09:00 +0000

نذكركم بمواعيد بعض المسلسلات :

في تمام الساعه 7:30 تلتقوم مع كارتون(لوث أفكار عيالك )

وفي تمام ال 8:30 تلتقون مع مسلسل (انسي التراويح )

و في تمام الساعه ال 10:00 تلتقون مع المسلسل (ضيع عمرك )

أما في تمام الساعه ال 3:30 نلتقي مع المسلسل المتميز (نام وابقي اصحي قبل الفجر)

وأخيراً، فموعدنا مع المسلسل الذي تذيعه أكثر من 100 قناة... عريبة وهو (مبروك رمضان فاتك) وهذا في اخر 10 ايام من شهر رمضان (وكله حصري).

*******

إيه رأيكم في الكلام ده؟؟
بداياً هو مش كلامي، وإنما دي كانت رسالة قرأتها، فوجد فيها تجسيد حقيقي لما يخطط له في كثير من القنوات التلفزيونية.

البعض ممكن يشوفها حاجة لذيذة ومضحكة، ولكن هي في الواقع حقيقة مؤلمة لكل مسلم يستوعب حقيقة الوضع وأن هناك كثيييير من المسلمين لا يخرجون من رمضان بأكثر مما ذكر سواء بتضييع الأوقات في ما لاينفع، بل ومنه ما يضر، وما يصل للإلهاء عن الصلاة وذكر الله وقراءة القرآن.
وإن كان كما نقول رب رمضان هو رب كل شهر ورب كل شيء، فهذا ليس معناه أن تظل على الحالة الأقل، وإنما هي دعوة للإكثار من الخير والطاعات في رمضان وترك ما حرم الله وتعويد النفس على فعل الخيرات وترك المنكرات، ومن ثم الحفاظ على هذا السلوك وهذا العمل بعد رمضان، لأن المحرمات التي تجتنبها في رمضان هي محرمات في غيره، ولأن رب رمضان هو رب السنة كلها...

أنا مش هطول كتيير، ورمضان بدأ خلاص، وغاباً مش هكتب حاجة إلا بعد رمضان ما يخلص (إلا في الضرورة القصوى)، ولكن ممكن نسيب برضو تذكرة بسيطة للناس من خلال تدوينات قديمة لي:

ادعية ووصايا رمضانية

وليالٍ عشر

وكدة كفاية أوي

وكل سنة وأنتم طيبيبن

إلحق... أمسك شعبان

noreply@blogger.com (Ahmad M. Mokhtar) — Sat, 24 Jul 2010 20:08:00 +0000

السلام عليكم ورحمة الله وبركاته،

إيه؟ أنت لسة نايم؟ لسة مش واخد بالك؟ لسة مش عارف إيه إللي بيحصل؟

يا عمي دا المسلسلات خلصوا تصويرها وإعلانتها شغالة من زمان، وأنت لسة مامسحتش التراب من على المصحف؟!!

الفضائيات حطت خريطتها، وأنت لسة ما صومتش ولا يوم من شعبان؟؟؟

معلش لهجة بتاعت خناقات شوية، بس بجد الوقت أزف وإحنا لسة نايميين في العسل ( إلا من رحم الله)، عشان كدة كان لازم أخش شمال على طول عشان نفوق بسرعة وندرك ما يمكن إدراكه.

شهر شعبان زي ما قال النبي صلى الله عليه وسلم : هو شهر يغفل عنه الناس بين رجب ورمضان.
وأيضاً هو شهر ترفع فيه الأعمال، فشعبان له فضائل عدة، وبعدين دا شهر رمضان وراه على طول، يعني لو مستعدتش فيه لرمضان هتستعد أمتى...

التدوينة دي حاجة كدة على السريع، حبيت بس أنبه فيها الناس بشهر شعبان وأنه خلاص بيلم ورقه وماشي أهو، فيالا نلحق كدة نسخن بشوية حاجات، ونبدأ من بكرة...
1. بكرة إن شاء الله 13 شعبان، فياريت نحاول نصوم الثلاث أيام 13 و 14 و 15 وهم الأحد والأثنين والثلاثاء، وتنويه مهم وهو إننا هنصوم الأيام دي إن شاء الله عشان النبي صلى الله عليه وسلم كان بيصوم الثلاث الأيام دول من كل شهر، يعني مش بنية الأحتفال بالنصف من شعبان، وإنما هو زيهم زي 13 و 14 و 15 من رجب، و 13 و 14 و 15 من محرم، وهكذا، واعلم أن الإحتفال بليلة النصف من شعبان من البدع المحدثة، وفضل ليلة النصف من شعبان لم يثبت فيها شيء صحيح (راجع كلام الشيخ بن باز رحمه الله من هنا).

2. لو أنت كنت متعود تصوم أثنين وخميس من كل أسبوع، أو ليك أي عادة أخرى من صيام الأيام (كصيام يوم ويوم) فكمل صيام بعد كدة لغاية آخر الشهر ماعدا اليوم الأخير، لأن النهي إنما هو لمن لم يكن له عادة في الصيام.

3. قوم يالا ومن دلوقتي هات المصحف بتاعك وأبدأ أقرأ فيه، وحاول تقرأ ختمة كاملة قبل الشهر ما يخلص ( عادي يعني لو كل يوم جزئين).

4. أقرأ واسمع بعض الدروس والخطب عن فضل شهر شعبان وكيفية استغلاله والإستعداد فيه لرمضان، وموقع طريق الإسلام هتلاقي من الصفحة الرئيسية مجموعة كبيرة من المواد المسوموعة والمقروءة.

5. حاول برضو قبل رمضان تقرأ/تسمع شيء مختصر عن أحكام الصيام.

6. يا سلام لو كل يوم كدة تصليلك ركعتين أو أربعة أو أكتر على حسب مقدرتك، قياماً بالليل، هتفرق معاك جامد وهتنعش قلبك وتخليك متشوق لقيام رمضان، ولما يجي رمضان هتبقى مستعد لطول القيام فيه دو تعب أو شيء آخر.

7. الدعاء، اجتهد في الدعاء والذكر والإستغفار عسى الله أن يتقبل ويغفر لك من الذنوب قبل رمضان فتستقبل رمضان بقلب طاهر من الذنوب بإذن الله، ولا تنسى الدعاء لله بأن يبلغنا رمضان، فقد لا نبلغه، وكمان... أوعى تنساني من صالح دعائك.

كفاية كدة وربنا يعيننا على فعل الطاعة.

اللهم بلغنا رمضان، وأكتب لنا فيه المغفرة والعتق من النار

آمييين

البرامج الحرة والمفتوحة المصدر 2

noreply@blogger.com (Ahmad M. Mokhtar) — Tue, 20 Jul 2010 18:26:00 +0000

السلام عليكم ورحمة الله وبركاته،

في التدوينة إللي فاتت دي على طول وإللي كانت بعنوان البرامج الحرة والمفتوحة المصدر، بدأت الكلام عن الموضوع ده، وإن كنت حاولت إني اختصر في الكلام، لكن كعادتي رغاي شوية والموضوع فتح مني، فاضطررت لعمل جزء تاني أكمل فيه الكلام.

وكنت المرة إللي فاتت توقفت في الكلام عند البرامج الحرة والمؤسسة بتاعتها وفكرتها إيه، وختمت الكلام ببعض ملاحظاتي (تقدر تقول مؤاخذاتي) عن المؤسسة دي والكلام بتاعهم، وقلت إني لقيت حاجة تانية بتعدل من فكرة البرامج الحرة عشان تتناسب مع ملاحظاتي، ألا وهي البرامج مفتوحة المصدر، وبمعنى أصح مبادرة البرامج مفتوحة المصدر.

لو حبيت تعرف الفرق بين الأثنين، هتلاقي العملية صعبة شوية، لأن كل واحدة فيهم حاطة شروط للتعريف، لو بصيت فيهم شوية كدة هتحس إنهم حاجة واحدة تقريباً، رغم إن البرامج الحرة عشر شروط والمصادر المفتوحة أربعة بس، بس هتلاقي نفس الكلام تقريباً، وناس كتيير بتقول إنهم وجهان لعملة واحدة، أمال بقى إيه الفرق...

أولاً، هو بالفعل فيه فرق، ويكفي إن مؤسس البرمجيات الحرة بيرفض إلى الآن أن يطلق على مؤسسته أو نسبتها للبرامج مفتوحة المصدر، لأنه متأكد تماماً أن المصادر المفتوحة لها أهداف تخالف ما يريده.

ثانياً، المصادر المفتوحة بتنظر للعملية من وجهة علمية تكنولوجية، بعكس البرامج الحرة إللي وجهة نظرها فلسفية ومثالية زيادة عن اللزوم زي ما قلت المرة إللي فاتت.

ثالثاً، ودي من أهم النقاط، إن المصادر المفتوحة شايفة إننا ممكن نعيش مع البرامج الحرة والغير حرة في نفس الوقت، يعني حبايب وأخوات، بعكس البرامج الحرة إللي شايفة إننا لازم نقضي على البرامج الغير حرة والمملوكة، وإن العالم كله لازم يبقى برامج مفتوحة المصدر.

وهي دي بذرة الزتونة ((: هو ده إللي كنت بقول عليه، إني مش لازم اتحول بنسبة 100% للبرامج المفتوحة، وإن لازم تكون لي الحرية في اختيار البرنامج إللي عايز استخدمه سواء كان حر أو غير حر، وكمان لازم تكون عندي الحرية في تشغيل برامج حرة من أنظمة تشغيل غير حرة ، وتشغيل برامج غير حرة من أنظمة تشغيل حرة.

كدة أنا استريحت لما لقيت الكلام ده، وكدة تكون التدوينة شبه أنتهت، بس فيه حاجة أخيرة هختم بيها، وهي تلخيص للتدوينتين والفكرة منهم في بعض النقاط السريعة بعضها مستوحاة من رد صديقي العزيز أحمد القصص على التدوينة السابقة، والبعض الآخر من أفكار وملاحظات متناثرة تعتبر هي قلب فكرة التدوينتين:

1. لايمكن أبداً إنكار مكانة شركة مايكروسوفت، وإنها شركة عملاقة في مجالها، وفعلاً بتقدم خدمات وحلول كبيرة وقوية، وإن كانت بالفلوس ومش حرة، بس زي ماقلت أنا مش ضد البرامج المغلقة المصدر أو المملوكة، ولكن بقول إنها تخف من شروطها شوية ... وبس.

2. في ناس لما بتيجي تتكلم عن البرمجيات الحرة بتخش شمال في مايكروسوفت وغيرها، وبتصورهم إنهم شوية نصابين أو ماشابه، ودا كلام مانوا زيين D:

3. بعض الكلام إللي بيتقال عن مايكروسوفت ومثيلاتها مفهوش غلط، وإنما فيه وجهة نظر محترمة، وهي إن مايكروسوفت بتساعد على نشر الويندوز وحتى النسخ المكركة منه، عشان بعد كدة تستغل حقوق الملكية بعد مانكون منقدرش نستغنى عنها وتصبح هي المتحكمة كيفما تشاء، ودي وجهة نظر لابد أن تأخذ في الإعتبار.

4. في بعض الأخوة العرب بلاقيهم متحمسين زيادة عن اللزوم للبرامج المفتوحة وواخدين وجهة نظر مؤسس البرمجيات الحرة بطريقة صعبة أوي، لدرجة إني لقيت واحد بيقول إنه ترك استخدام توزيعة الأبونتو من لينوكس وراح لتوزيعة تانية، قال إيه عشان توزيعة الأبونتو لا تمانع من استخدام برامج غير حرة من خلالها، بقة ده اسمه كلام يا عالم...

5. الحكاية مش حكاية أنا مع البرامج الحرة ولا مع المصادر المفتوحة ولا مع البرامج المملوكة، هي تكنولوجيا متاحة وتوفر لنا في الفلوس، وتزيد من الحماية وبعض الخواص الأخرى، فناخد من كل واحد الحلو إللي فيه، ونسيب الوحش،لأن كل حاجة أكيد فيها الحلو وفيها الوحش، والعملية مش شروة واحدة يا تاخدها كلها يا تسيبها كلها.

مش عارف أنا نعدش عندي كلام تاني أقوله، أو بمعنى أصح مش قادر أكتب أكتر من كده، فالموضوع كدة كفاية أوي، وممكن بعد كدة أبقى اكتب عن بعض تجاربي مع اللينوكس وأخواته...

وسلام بقى

البرامج الحرة والمفتوحة المصدر

noreply@blogger.com (Ahmad M. Mokhtar) — Fri, 09 Jul 2010 20:24:00 +0000

السلام عليكم ورحمة الله وبركاته،

منذ عدة أشهر ( من أول سنة 2010 تقريباً ) كنت بدأت أسمع كثيراً عن البرامج الحرة والمفتوحة المصدر، وكنت قبل كدة بسمع عنها على خفيف كدة من خلال معرفتي الضئيلة جداَ جداَ بنظام التشغيل لينوكس، لكن خلال الفترة دي قرأت كتير عن البرامج الحرة ومفتوحة المصدر بوجه عام وعن نظام التشغيل لينوكس بوجه خاص باعتباره اشهر حاجة بيتكلم عنها لما تيجي سيرة البرامج الحرة، وكانت طبعاً توزيعة الأبونتو هي ما كنت اقرأ عنها من ضمن توزيعات اللينوكس المختلفة.

لو جبت الموضوع من الأول، فأنا قبل الدخول في القراءة عن مواضيع البرامج الحرة وماشابهها كنت بدأت اسجل اعتراضي عن بعض ما يتعلق بتراخيص البرامج، وبدأ الموضوع معايا لما كنت بتكلم مع واحد صاحبي عن نسخ الويندوز الأصلية،لأنه كان عايز يشتري واحده، فسألني: "طيب يعني لما أنا المفروض اسجل للنسخة من خلال النت (وخصوصاً الفيستا إللي كان الكلام عليها)، وهم عندهم هيتسجل إن النسخة دي بتاعت الشخص ده صاحب الجهاز ده... طب أفرض حبيت أغير جهازي، أو اشتريت لاب توب، أو جهازي ولع ومحتاج واحد تاني، معنى كدة إني مفروض أجيب له نسخة جديدة؟؟؟"
بصراحة أنا تنحت شوية، وبعدين لقيت مفيش غير رد واحد: "لو عايز تفضل مستخدم بنسخة أصلية مش مسروقة، يبقى أاااه، لازم تجيب له نسخة جديدة"

مش فاكر هو قالي إيه بالظبط بعدها، بس إللي فاكره إنه سابني ومشي، ومشتراش نسخة أصلية لحد دلوقتي.....

وبعد الموقف ده، بدأت افتكر تاني كل المناوشات إللي كانت بتحصل بيني وبين نفسي عن النسخ الأصلية للبرامج، والشروط إللي الواحد لازم يمشي عليها، أو بمعنى أصح بتفرض عليه لما يشتري أي برنامج.

هو يمكن الموضوع عندنا مش واضح أوي لأننا تقريباً نسبة إللي بيستخدموا نسخة ويندوز أصلية تكاد تكون معدومة، فكلنا شغال على النسخ المكركة والذي منه، دا غير إن فيه ناس معتقدة إن ده هو الطبيعي، وإن الخمسة عشرة جنيه إللي بيدفعها في الإسطوانة هو ده الثمن، وبس.

عشان كدة أنا ومن دلوقتي بوضح إن كلامي هيكون على إللي مفروض يحصل وإللي بينص عليه التعاقد في رخص البرامج، وكل شوية هوضح الحكاية دي في وسط الكلام عشان الناس إللي بتنسى.

التدوينة دي مش لشرح البرامج الحرة والمفتوحة المصدر بالتفصيل، وإنما هعرض فيها بشكل سريع كدة الفكرة في البرامج الحرة والمفتوحة المصدر مع كتابة بعض ملاحظاتي عن الموضوع ده عند الحاجة لذلك، أما إللي عايز يقرأ بالتفصيل عن المواضيع دي فممكن يشوف أي رابط من دول:

موقع مؤسسة البرمجيات الحرة

موقع مشروع جنو

موقع مبادرة المصادر المفتوحة

البرمجيات الحرة من ويكيبيديا

المصادر المفتوحة من ويكيبيديا

كل المواقع دي بالإجليزي طبعاً، ولو حد عايز معلومات بالعربي، ببساطة شديدة يكتب " البرمجيات الحرة" أو "البرامج مفتوحة المصدر" أو "لينوكس" في جوجل وهيشوف اللي ماشفهوش، وأنا انصح بالدخول لمجتمع اللينوكس العربي لأنه بجد منتدى جامد أوي ومفيد جداً في الموضوع ده.

نرجع بقى لموضوعنا، إيه هي حكاية البرامج الحرة دي.
باختصار شديد، الفكرة كلها إن مؤسسة البرمجيات الحرة دي قامت على فكرة إن البرامج يجب أن تكون حرة وغير مملوكة لأحد، يعني كل واحد له الحق في استخدام البرنامج ونشره والإطلاع على الكود بتاعه (ودي من أهم الحاجات) وكده يعني.
وبسرعة وقبل ما حد يفهمني غلط، في عدة نقاط لازم أوضحهم:

1. أولاً الموضوع كله عن البرمجيات وبس، ملوش دعوة بحاجة تانية.
2. البرمجيات الحرة تعتبر في الأساس زي ماتقول كدة حركة اجتماعية اكثر منها تقنية وبرمجية، فهم ينظرون للمسألة من ناحية فلسفية نوعاً ما.
3. أكثر ما دفع مؤسسي هذه المنظمة للفكرة هي تمادي الشركات أصحاب البرامج الإحتكارية في الشروط التي توضع على استخدام برامجهم وإللي هم شافوا إنها بتقيد حرية الناس ( زي ماقلنا الحرية المتعلقة بالبرمجيات وبس).
4. العملية مش سبهللة، يعني فيه برضو شروط وقواعد وقوانين للبرامج الحرة، والتي يعد اختراقها بالظبط زي اختراق قوانين أي برنامج احتكاري آخر.

طيب بعد الكلام ده، مفهمناش برضو هم عملوا إيه؟؟

هم قالوا إن البرمجيات لازم تكون حرة، وفي شوية شروط كدة (تقريباً عشرة) لازم تتوافر في البرنامج عشان يبقى حر، من أهمها إن البرنامج يكون متوفر الكود المصدري له لأي حد يطلع عليه (إللي هو الكود البرمجي إللي اتكتب بيه البرنامج)، ويكون أي حد له الحرية في إعادة توزيع البرنامج والتعديل عليه وإعادة نشر هذه النسخة المعدلة.

دي أهم النقاط تقريباً، وإللي هيقرأ عن الموضوع بالتفصيل من أي رابط أنا كتبته في أول التدوينة أو من أي حتة تانية أكيد هيلاقي الشروط دي مرصوصة ومشروحة بالتفصيل.

وزي ماقلت من كام سطر فاتوا، في النقطة 4 بالتحديد، إن العملية مش سبهللة، يعني كل فرد له حق الإطلاع على الكود المصدري للبرنامج والتعديل، بس لا يحق له أخذ الكود وتحويل البرنامج لنسخة مغلقة المصدر أو ينسبه لنفسه دون تعديل، وكمان لو عمل تعديل يغير في الاسم ولازم يذكر البرنامج الأصلي إللي بنى نسخته الجديدة على أساسه، ومخالفة كل ذلك تعتبر مخالفة قانونية لرخصة البرنامج بالظبط زي أي مخالفة لتراخيص البرامج مغلقة المصدر مع فرق المخالفة.... مش قلتلك العملية مش سبهللة.

لحد كدة والكلام كويس أوي، بس واحد يسأل كويس في إيه؟؟
أقولك أنا ( ودي وجهة نظري الشخصية):

أولاً: هتلاقي البرامج غالباً مجانية بجد مش مسروقة ( أنا قلت غالباً لأن اتفاقية البرامج الحرة لاتمنع من بيع البرامج بمقابل مادي)، ولو البرنامج بيتباع، فلو أي حد اشتراه وإداه لزملائه أو حتى رفعه على النت لكل الناس فهو كدة مبيعملش حاجة غلط، لأنه له الحق في إعادة توزيع البرنامج، حتى لو أخد مقابل على كدة، ودي نقطة حلوة جداً وهتبعدنا عن الخلاف في حكم استخدام البرامج المسروقة وخلافه، والواحد فعلاًُ بيحس إنه ماشي صح ومحدش له عنده حاجة.

* النقطة دي كتير مننا مش هيحس بيها ولا هتفرق معاه لأني زي ما قلت في البداية الغالبية العظمى عايشة على البرامج المكركة وحاسة إن ده الطبيعي، وكمان عدم تطبيق قوانين حماية الملكية الفكرية مساعد على كدة، لكن لو واحد في امريكا مثلاً أكيد عارف أهمية الكلام ده لأنه ممكن بسهولة يقبض عليه عشان نسخة الويندوز بتاعته مش أصلية!!!

ثانياً: وهي متعلقة بأولاً وبالملحوظة بتاعتها، وبكلامي مع صديقي إللي قلته في الأول، وهي التخلص من غباوة الشروط المستبدة احياناً لإتفاقية تراخيص البرامج الغير حرة، وهو إني لو عندي جهازين أو جهاز ولاب توب، فأنا قانوناً محتاج لكل جهاز نسخة لو بستخدم برنامج مملوك غير حر، بينما نسخة واحدة من البرنامج الحر تشبرئني أنا والعيلة كلها، يعني حتى لو بفلوس أنا برضو الكسبان.

ثالثاً: ودي نقطة مهمة أوي، وهي الحماية والأمان وضيف عليهم الإطمئنان، بمعنى إن حضرتك مثلاً وأنت قاعد دلوقتي على النت (شيء طبيعي أنك دلوقتي على النت طالما بتقرأ في المدونة) ماتعرفش جهازك بيعمل إيه، ولا هو بيبعت حاجة لحد أو بيتجسس عليك ولا لأ، هتقوللي إزاي ياعم، مهو مفيش حاجة بتتبعت قدامي أهي، أو ما أنا عارف كام كود دوس كدة ممكن يقولي، أو حتى عندي أنتي فايروس جامد بفاير وول خرافي، هقولك صباح الخيييييييييييير ....
كل إللي بتقوله ده ملوش أي لازمة، مفيش حاجة باينة أو أوامر الدوس بتقول مفيش حاجة بتحصل، دا زي بالظبط واحد حاطط قنبلة في علبة وكاتب عليها "عيش حياتك"، لأن الشركة صاحبة البرنامج (وفي الحالة دي مع الويندوز هتكون مايكروسوفت) هي الوحيدة إللي بتعرف إيه إللي بيحصل وبتظهرلك بس إللي عايزاك تشوفه، ومتقدرش تجبرها على غير كدة.
أما موضوع الأنتي فايروس والفاير وول، فدا برضو مشابه للي قبله، لأن الشركات المصنعة للأنتي فايروس لاتعلم شيئاً عن الأكواد الخاصة بالويندوز، ولا يمكن تكتشف حاجة برضو مايكروسوفت مش عايزاها تعرفها، وشوف بنفسك لو إن فيه فايروس جامد ضرب جهازك ومكنش عليه أنتي فايروس، وروحت مسطب الأنتي فايروس بعد ما الجهاز اتضرب، ولا كأنك عملت حاجة ومش هيعرف يشيل الفايروس لأنه خلاص اتمكن من الجهاز، وهيشتغل البرنامج ومش هيعرف يجيبه، فمابالك بالشركة المصنعة لنظام التشغيل نفسه.
أما في البرامج الحرة، فكود البرنامج معاك وتقدر تعرف كل فسفوسة البرنامج بيعملها وبيعملها ليه وإزاي، وحتى لو مكنتش بتعرف أي حاجة في البرمجة، فبرضو هتكون مطمأن، لأن فيه آلاف من محترفي البرمجة هيشوفو الكود بتاع البرنامج ده، ولو فيه أي ثغرة هتتعرف على طول، كما أن نشر الكود في حد ذاته هيخللي المبرمج عمره ما يفكر في وضع أي حاجة كدة في الاستخبس لأنه عارف إن في آلاف هيشوفوا الكود ده ومنهم ناس محترفين.

رابعاً: ودي تهم المبرمجين أكثر من أي حد، وهي نشر أكواد البرامج يساعد المبرمجين على تطوير مهاراتهم وقدراتهم، كما أن المشاركة في تحديث البرامج هتخللي البرامج دائماً في تطور كبير.

لحد كدة والكلام كويس زي ماقلت، وإن كان الكلام إللي فات يعتبر متحيز نوعاً ما للبرمجيات الحرة، وجيت على مايكروسوفت شوية، بس لأني فعلاً معجب ومتحمس لموضوع البرمجيات الحرة، ولكن على النقيض فيه برضو شوية ملاحظات على البرمجيات الحرة دي وهي:

1. أنا شايف أنهم محبكنها شوية، يعني حكاية إن البرامج كلها لازم تكون حرة صعبة شوية، خصوصاً على المبرمج إللي كتب البرنامج، أنا بصراحة مش معاهم في كدة، يعني أنا فعلاً مخنوق من البرامج الغير حرة في تعنتهم في الشروط الخاصة بإتفاقيات التراخيص للبرامج، ولكن برضو مش لازم الشركة تديني الكود بتاع برنامجها، يكفي إنها تغير وتطور من بنود الإتفاقية بحيث متبقاش خنقة أوي كدة، وتكون بحبوحة شوية (:

2. مؤسسة البرمجيات الحرة ترفض أن يتم استخدام برامج مغلقة واحتكارية على منصاتها ( انظمة تشغيلها يعني) وتبرر ذلك بأن عدم الإستخدام سيؤدي لتطوير برامج مماثلة وحرة، وده مبدأ مازال يصمم عليه مؤسس هذه المنظمة بالرغم من تطور بعض الأنظمة أو بمعنى أصح التوزيعات للينوكس بحيث أنها تسمح بتسطيب هذه البرامج الغير حرة ولكن دون دعم منها، طيب هو أنا افضل صايع كدة ومستني لحد ماواحد يتعطف عليا ويعملي برنامج زي إللي عايزه ويكون حر.. وبعدين طالما هم بينادوا بالحرية للمستخدم فمن حرية المستخدم إنه يكون حر في تشغيل أي برنامج، زي ما البرامج الإحتكارية بتسمح بتشغيل البرامج الحرة، يبقى البرامج الحرة تسمح بتشغيل البرامج الغير حرة.

3. زي ما قلت في الأول إنهم بيميلوا للقيم ومثالية زيادة عن اللزوم في موضوع الحرية ده، وإللي من الصعب تطبيقه في كل شيء، ممكن يعمم على أغلب البرمجيات، بس هيفضل في برمجيات غير حرة ومش هتقدر تبقى حرة، يعني حاجة زي الهايسيس ده ( معلش بقى التخصص بيغلب على الواحد) لا اعتقد ابداً إن شركة أسبن ممكن تفتح مصدره وتتيح كوده للناس..!!!

4. برضو من ضمن تشددهم اللي مش بالعه، إنهم مثلاً في البرمجة، لو اخذت برنامج مفتوح المصدر وعدلت عليه واضفت ليه، لازم اتيح النسخة الجديدة برضو بنفس الإتفاقية وإللي بتلزمني إني افتح كود البرنامج بما فيه التعديل إللي أنا عملته.. طب البرنامج الأول ماشي عشان هو أصلاً حر فلازم يفضل حر، لكن افرض إني مش عايز أكشف الكود للإضافات إللي أنا وضعتها، مش أنا برضو حر أظهرها أو لأ؟؟

مع وجود ملاحظاتي دي على البرمجيات الحرة، لقيت حاجة تانية وهي مبادرة المصادر المفتوحة، وإللي بعتبرها تعديل للبرمجيات الحرة عشان تبقى على مزاجي ((:

بس بصراحة أنا شايف إن التدوينة بقت طويلة شوية، فكفاية كدة وهبقى أكمل المرة إللي جاية...

أشوفكم هناك

يا أمة الإسلام أفيقي.....طب وأنت هتفوق أمتى

noreply@blogger.com (Anonymous) — Sat, 05 Jun 2010 20:31:00 +0000

السلام عليكم ورحمة الله وبركاته

بصراحة مش عارف أقول إيه ولا إيه، الوضع مؤلم وموجع وفي نفس الوقت محرج ومؤسف، نتوجع ونتألم لما يحدث لإخواننا المسلمين المستضعفين في الأراضي المقدسة، ونأسف ونحرج على التخاذل المستمر من جميع الدول والعالم بأجمع، سواء دول إسلامية أو عربية أو حتى غير ذلك من مدعي السلام والحرية.

يا الله، تأخرت كثيراً في كتابة شيء عما حدث هناك مع أسطول الحرية، وما يحدث باستمرار في فلسطين، وما كنت سأتكلم لأني معروف بثقلي في الكتابة، ممكن أتكلم كتير وأقرأ كتير، بس كتاباتي مش قد كدة، وحتى مع التدوينة دي مش هتكلم كتير غير بالتذكير بالقليل، والإرشاد لكثير من المقالات والملفات المهمة لمن يريد أن يقرا عن هذا الموضوع.

إللي عايز اتكلم عليه، هو تذكير بما يجب علينا فعله، أيوة تاني كلام في نفس الموضوع، معلش أنا بركز على النقطة دي دائماً، بس ده لرؤيتي أنها من أهم النقاط، وهي دور الفرد، صحيح إحنا بننصح الآخرين، ونطالب المسئولين بما يجب عليهم فعله، بس لازم نرجع تاني ونأكد على دور كل فرد فينا.

بصراحة كدة وعلى بلاطة، عشان نخش في حرب، الموضوع مش في أيدينا (أقصد الأفراد العوام من الناس) فده موضوع أكبر مننا ومنقدرش نتحكم فيه، طب يبقى ندور على الشيء المتاح في أيدينا عمله، ونأتي منه ما نستطيع، وللإنجاز هكتب ما أراه ممكناً في نقط سريعة:

1. الدعاء، أيوة الدعاء، وهفضل برضو كل مرة أركز عليه ومش هزهق ولا همل، ومتقوليش هي كل حاجة تقلنا الدعاء الدعاء، يا عمي دا أقوى سلاح تملكه، لا يرد القضاء إلا بالدعاء، والدعاء هو العبادة كما قال النبي صلى الله عليه وسلم، فلا تبخل على إخوانك بالدعاء بفك الكرب والنصرة والعزة للإسلام والمسلمين جميعاً.

2. تقديم المساعدة، أي طريق تلاقيه قدامك لتقديم مساعدات لإخوانك هناك فلا تتردد، مساعدات مادية ومالية وعينية وكل حاجة، وماتستقلش حاجة، ممكن المبلغ إللي هتساهم بيه ده يكون على قلته ثمن لعلاج مريض فيهم أو طعام لسد جوع أحدهم أو أو أو ...

3. التوعية بالقضية، الموضوع مش غزة وبس، الموضوع فلسطين كلها، الموضوع ولاء للمسلمين في كل أنحاء العالم وبراء من اليهود وكل من عادى الإسلام وكفر بالله.

4. الإصلاح من النفس، ودي برضو كل مرة بقول عليها، أيوة لازم تبص لنفسك، أنت ينفع تكون ممن ينصر الله بهم هذا الدين؟؟ مفكرتش إن ممكن يكون بلاء ما في الأمة بسبب معاصيك كما كان يقول الصحابة وتابعيهم عن أنفسهم وهم من هم؟؟

مش هطول في النقاط وكدة كفاية.

وممكن للقراة عن الموضوع وبعض ما يتعلق به من ملف فلسطين عموماً:

على الصفحة الرئيسية لموقع طريق الإسلام روابط العديد من المقالات الجيدة.

على الصفحة الرئيسية لموقع الطريق إلى الله روابط للعديد من الدروس لمختلف المشايخ

ملف أقتحام المسجد الأقصى... موقع طريق السلف

ملف أسطول فك الحصار ... موقع طريق السلف

ملف فلسطين جرح غائر وأمل يتجدد ... موقع صوت السلف

اللهم انصر أخواننا المستضعفين في كل مكان

اللهم أعز الإسلام والمسلمين

اللهم أذل الشرك والمشركين

اللهم أعلي كلمة الدين

اللهم لا تؤاخذنا إن نسينا أو أخطأنا

اللهم لا تحملنا ما لا طاقة لنا به

أمين أمين أمين

كتاب تعلم الهايسيس HYSYS 3.2

noreply@blogger.com (Ahmad M. Mokhtar) — Wed, 26 May 2010 13:01:00 +0000

السلام عليكم ورحمة الله وبركاته،

عودة مرة أخرى لشرح برنامج الهايسيس، ولكن بصراحة مفيش كلام جديد.

الحكاية إني كنت قدمت دورة في منتدى البترول العربي بعنوان " الدورة المفتوحة لتعلم الهايسيس"، وكنت أعلنت عنها هنا في وقتها.

المهم إن الدورة دي خلصت من فترة، وكنت بقدم فيها الدروس كل درس مكتوب في ملف منفصل ومستقل، ففكرت أن أجمع هذه الدروس سوياً في كتاب واحد ليكون الشرح مكتمل في مكان واحد.

وكمان عدلت في بعض الأشياء( مش كتير يعني) وزودت كلام في بعض الفصول وخصوصاً الفصل الأخير بتاع ال Optimization لأني أيام الدورة مكنتش شرحته بالكامل، وإنما كنت معتمد على الفيديو، فكملت كتابته عشان يبقى كل شيء مكتوب لو حد مكنش متاح ليه مشاهدة الفيديوهات.

لا أحب أن أطيل الكلام في تدوينات شرح الهايسيس، عشان أخش في المقصود على طول.

أنا عملت الكتاب والحمد لله، وتفاصيل الكتاب كالتالي:

الاسم: دليلك لتعلم المحاكاة باستخدام برنامج HYSYS 3.2 خطوة بخطوة.

عدد الصفحات: 207 صفحة (شاملة الغلاف والفهرس والذي منه)

نوع الملف: PDF

حجم الملف: 10 ميجا.

لتحميل الكتاب: أضغط هنا

ولتصفحه من على النت: أضغط هنا

أتمنى أن يكون الكتاب على المستوى المطلوب.

أنت السبب

noreply@blogger.com (Anonymous) — Sun, 16 May 2010 12:44:00 +0000

السلام عليكم ورحمة الله وبركاته،

كنت قاعد مع أمي بنشوف برنامج بيتكلوا فيه عن المشكلة المرورية وإزاي نحلها وكدة، فأمي قالتلي: "نفسي المكروباصات والأوتوبيسات تمشي من غير ما يكون فيها ناس واقفيين، السوائق من دول مايرضاش يطلع من الموقف إلا لما يكون الأتوبيس مليان كراسي وطرقة وباب وكله"، فأنا قلتها : "فعلاً، بس السواق لوحده مش هو السبب"...

فعلاً السواق غلطان، بس مش هو لوحده السبب في كدة، الناس إللي بترضى تقف بين الكراسي وعلى الباب هما كمان سبب في كدة، بل وعليهم مسئولية أكبر، لأن طول ما السواق بيلاقي ناس مستعدة تعمل كدة، هو كمان هيفضل على نفس الحال ويحمل أكتر، هو حجته إنه عايز ناس أكتر عشان يزود المكسب لأن المكسب من الشغلانة دي ضعيف، والناس حجتها إنهم مستعجلين وعادي ومفيش مشكلة من كدة.

التدوينة دي طبعاً مش كلها عن الأتوبيس، دا بس كان الموضوع إللي فتحني في الكلام، لكن المشكلة أكبر من كدة، والموضوع بوضوح أكثر عن المسئولية، وتفلت كل واحد من تحمل أي خطأ، وإن دائما في حد تاني هو الغلطان وهو السبب، المهم إن أحنا براءة، مع إننا أحياناً بنكون المسئولين بنسبة 100%.

وبرضو الموضوع مش قفش كدة، لأن غالباً أي مشكلة موجودة في حياتنا ومجتمعاتنا مفيش حد بعينه أو جهة معينة هي التي تتحمل المسئولية كاملة بنسبة 100%، وإنما غالباً هنلاقي الأدوار موزعة ذي ما بيقولوا، كل واحد ليه دور ولازم يعمله، لاااااازم يعمله...

وهنا بقى مكمن المشكلة، وهي إن كل واحد أوكل جهة يرى الدور والمسئولية الخاصة بالطرف الآخر ولا يرى شيء عليه، أو يظن ظناً أنه قد قام بما عليه وزيادة، فتكون النتيجة إن كل واحد يقول للتاني أنت السبب، أو فلان السبب، وغالباً بنقول كلمة حلوة أوي... " الناس هي السبب" !!!

كأن الناس دول هم كل البشر إلا المتكلم، هو البريمو إللي مابتطلعش منه العيبة، مع إنه قد يكون لا يقوم بأي شيء مما هو واجب عليه إلا من رحم الله.

المشاكل كتير أوي حوالينا، في كل حاجة، خد مثلاً مشكلة القمامة، أوففف، دي مشكلة بجد "زبالة"، أنا فاكر إني كنت في معرض توظيف من فترة وقابلت شاب هناك بيعمل زي حملة من أجل التوعية بالموضوع ده وإفهام الناس إن المشكلة دي بتنبع مننا وإننا لازم أول من يساهم في حلها، بجد عجبني وعجبتني الفكرة، دايماً نقول الشوارع مش نظيفة وعربيات الزبالة مبتجيش تاخد الزبالة بإنتظام ومفيش صناديق ... إلخ، وفعلاً الكلام ده كله موجود، بس تعالى بص بقى من الناحية التانية إللي هيبص منها بتوع الزبالة وشركات النظافة...

ناس وهي ماشية عمالة تاكل في حاجات وترمي الورق في الشارع -في نص الشارع كدة حتى مش على جنب- ناس تاكل بيتزا وبيبسي وتطوح العلب والكنزات من العربية، دا حتى إللي بيروح يرمي الزبالة في الصندوق يعيني مستخسر يحط الزبالة جوة الصندوق، فإما يركنه جنب الصندوق أو يطوحه من بعيد وزي ما تيجي تيجي بقى، دا غير إللي بيرمي الزبالة بالعربية فيحط الكيس على كبوت العربية ويمشي لحد مايوصل قدام الصندوق ويروح كابس فرامل يقوم الكيس متدحرج ومرمي - لأ سويق ياد- وغيره وغيره

دا غلط ودا غلط، الزبالين وبتوع النظافة غلطانين، والناس كمان غلطانة، ولازم نعترف بكدة، مينفعش كل واحد يدور على أي حد مخطيء في حق ما عليه من واجبات ليحمله المسئولية كاملة ويجعلها حجة للتهرب من مسئولياته هو الشخصية.

مثال تاني، وهو الإنحطاط الديني والأخلاقي المنتشر في كل الشوارع، بجد قلة أدب فعلاً، بس نرجع ونقول كل واحد لو دور على نفسه أكيد هيلاقيله دور في ده، إما بمسئوليته عمن هم تحت رعايته ومسئوليته، أو بنصح من يرى منه سوء خلق أو سوء أدب، أو بالتحسين من نفسه وخلقه هو.

مثال أخير، وكتيير أوي بيتكلموا عليه، وهو القضية الفلسطينية، برضوا كل واحد بيرمي الحمل على غيره، يفضلوا ينادوا بالقضية وضرورة الإهتمام بها ومحدش فيهم بيعمل حاجة، والحجة هي مفيش حاجة نعملها... ممم طب ما تفكر كدة شوية، يعني مفيش كدة دعوة حلوة كدة بعمق وصدق ويقين، أنت ليه مستهين بحاجة زي كدة، أنت متعرفش أن الدعاء سلاح الؤمن ( وإن كان في الحديث ضعف )، متعرفش إنه لا يرد القضاء إلا الدعاء، يا أخي غيرك مبيعملش حاجة ورامي العملية في الأرض أعمل أنت إللي تقدر، أصلح من نفسك وممن حولك وساعد في إخراج أناس صالحين مصلحين يتحملوا فعلاً هم هذا الدين وهذه الأمة.

الأمثلة كتير أوي، وذي ما قلت إحنا مش لوحدنا إللي غلطانين أو مقصرين، لكن بدل ما نقعد نعدد أخطاء الغير، ندور على واجباتنا أولاً ولنبدأ بأنفسنا، عشان منبقاش أحنا السبب...

حمد الله على السلامة

noreply@blogger.com (Anonymous) — Thu, 13 May 2010 10:55:00 +0000

السلام عليكم ورحمة الله وبركاته،

يااااااااه، بقالي فترة كبيرة أوي يعني مدخلتش على النت، منقطع رغماً عني منذ حوالي شهر، بسبب مشكلة مع مزود الخدمة ذي ما بيقولوا عليهم، أصلي للأسف مشترك مع أسوأ سرفرات فيكي يا مصر، وبلاش ذكر الاس منعاً للفضايح (:

المهم إن الموضوع بدأ مع العطل الأخير في الكابلات البحرية ( أو اعتقد أنه من قبل العطل بفترة) والعطل ده خلى بعض خطوط النت تضعف أو تنقطع لفترة قصيرة ( يومين كدة ولا حاجة )، لكن على مين، إحنا التميز كله، فضل العطل ما يقرب من شهر، وكل شوية معلش عطل، لأ معلش السرفرات مهنجة، لأ مش عارف إيه، وفالآخر طلعولنا بحاجة جديدة...

قالولنا إن حصل تجديدات وتعديلات في السرفرات ( أو في السنترال مش فاكر يعني) ونوع الروتر بتاعكوا معدش بيشتغل مع الخطوط بتاعتنا، ونوع تاني كمان معدش شغال.... تييييييييت
أصلاً النوعين إللي بيقول عليهم دول أشهر نوعين في السوق، المهم كنا قررنا نشتري دماغنا... ونشتري معاها روتر جديد ... D:
وحبينا قبل ما نتدبس في روتر جديد نجرب نوع من عندهم.. جابولنا روترين أحلى من بعض وولا واحد فيهم اشتغل، وفالآخر طلع العيب فيييين؟؟؟ العطل كان إن سيادتهم غيروا في أرقام تعريف وضبط الروتر (configuration) ومحدش فيهم قالنا، لأ دول كمان كانوا لسة بيقولولنا على الأرقام القديمة... أووووفففففففف

بس الحمد لله أهو العملية اتصلحت وكله بقى تمام.

المهم إن خلال فترة الإنقطاع دي، كنت مخنوء أوي أوي يعني، مش عارف أتابع أي حاجة من إللي كنت متابعها، حاجات كتير بحتاج ابعتها واستقبلها من الإيميل، دا غير متابعة أخبار الشغل والذي منه، ومتابعة بعض الشروحات والمنتديات و و و، كل ده مفيش، وكان الحل الوحيد إني من حين لآخر ادخل من على الموبايل اشيك على الميل على السريع... وشكراً.

لكن من ناحية أخرى، وجدت فعلاً إني بعيش عادي يعني من غير نت، ما متش ولا حاجة يعني، بل بالعكس في حاجات كتير اتحسنت في حياتي، وأهمها طبعاً الوقت وحسن استغلاله لأننا طبعاً عارفين إن النت بيحرق الوقت بطريقة غير طبيعية ( هولوكوست للوقت يعني)، فبما إني معنديش نت فلقيت وقت كتيير أوي توفر معايا، وعملت فيه حاجات كتير والحمد لله، وفعلاً كانت فرصة جميلة أوي خصوصاً وإني قبلها بفترة قصيرة ( قبل إنقطاع النت يعني) كنت فعلاً بدأت في تنظيم وقتي ومحاولة استغلاله جيداً. ( من أيام تدوينة "الوقت كالسيف" تقريباً )
الواحد فعلاًُ في حاجات بتكون مهمة في حياته وهو مش حاسس بيها وبيسبها تضيع منه ومبيحسش بقمتها غير لما يتزنق فيها أو تضيع منه خالص ( ذي الوقت كده )، وفي حاجات تانية بتكون أهميتها مش ملحة أوي ولا حاجة بس الواحد معتقد إنه ميقدرش يعيش من غيرها بس أول مايجرب غصب عنه أنه يعيش من غيرها بيحس فعلاً بقيمتها الحقيقية ويديها على قد قيمتها ( زي الأنترنت كده ).
الانترنت فعلاً مهم جداً هذه الأيام، وأستخداماته مهمة أوي ومفيدة، وأنا فعلاً مقدرش استغنى عن الأنترنت في حاجات كتير أوي، بس عرفت وتأكدت إني أقدر أعيش من غيره، أو أقدر أعيش على استخدام متباعد وعادي، لأن الحياة مش جزء من الأنترنت وإنما الأنترنت هو إللي جزء من الحياة.
بعد رجوع الأنترنت ليا مرة أخرى اتمنى أن أواظب على حياتي بطبيعة واستطيع فعلاً أن استخدمه كما يجب، واعطي له من وقتي ما أريده له لا مايريده هو...
إن شاء الله الفترة القادمة فيها نشاط لا بأس به سواء من خلال المدونة أو حاجات تانية في حياتي وأتمنى أن يكون مفيد.

سلااااااااااااام

الوقت كالسيف ...

noreply@blogger.com (Anonymous) — Sat, 27 Mar 2010 12:39:00 +0000

السلام عليكم ورحمة الله وبركاته

منذ فترة طويلة وأنا منقطع عن التدوين نوعاً ما، وبقول إني مشغول، ودي فعلاً حقيقة إنني لدي أشياء كثيرة احتاج إلى الإنتهاء منها، ولكن خلال هذه الفترة ( فترة الإنشغال ) تدبرت موضوع خطير جداً، ألا وهو ... أهمية الوقت.

الموضوع ممكن تحس إن تقليدي، بس هحاول أتكلم من زاوية أخرى قد تكون مختلفة نوعاً ما.

ولكن في البداية يجب أن أبدأ بالمعتاد، وهو ذكر بعض الأدلة على أهمية الوقت، فيكفيه أهمية قسم الله تعالى به في أكثر من موضع في القرآن مثل: والضحى، والفجر، والليل، وغيرهم من مواضع القسم في القرآن بألفاظ مختلفة كلها تعبر عن الوقت.

ويأتي بعد ذلك كلام النبي صلى الله عليه وسلم في عدة أحاديث أيضاً عن أهمية الوقت منها:

" لا تزول قدما عبد يوم القيامة حتى يسأل عن أربع : عن عمره فيم أفناه ؟ وعن علمه ماذا عمل به ؟ وعن ماله من أين اكتسبه ، وفيم أنفقه ؟ وعن جسمه فيم أبلاه ؟"

" اغتنم خمسا قبل خمس : حياتك قبل موتك ، و صحتك قبل سقمك ، و فراغك قبل شغلك ، و شبابك قبل هرمك ، و غناك قبل فقرك"

" نعمتان مغبون فيهما كثير من الناس : الصحة والفراغ"

وأخيراً فهناك من أقوال الناس مثل" الوقت كالسيف، إن لم تقطعه قطعك"

طبعاً الكل هيقول: "كلنا يعلم أهمية الوقت"... بس للأسف الكلام ده غلط !!!

إحنا بس عرفين الكلام عن أهمية الوقت ( زي الكلام إللي ذكرته في أعلى )، وفرق كبيير أوي بين الوضعين، فكثير منا قرأه وقرأ ما هو أكثر منه بكثير عن أهمية الوقت، ولكن ينقصنا ما هو أهم، وهو تطبيق هذا الكلام بالفعل في حياتنا.

إللي أنا فعلاً وجدته خلال الفترة السابقة، هي إن الواحد مننا مابيحسش بقيمة الوقت إلا لما يحتاجله ويتزنق فالوقت، بمعنى طول ما الواحد فاضي وموراهوش حاجة... ولا حاسس بالدنيا أصلاً يوم ورا يوم يعدي ومش فارقة حاجة ومش حاسس بتفلت الوقت من يديه، لكن أول ما يكون فيه حاجة معينة عايز ينجزها... يبدأ فعلاً يعرف إن في حاجة أصلاً أسمها وقت.

وعشان الكلام يبقى منظم شوية ومقعدش ألف ودور، وكمان حتى لا يطول الكلام، هتكلم من خلال نقاط سريعة هجمع فيها الأفكار إللي تجمعت في رأسي عن هذا الموضوع:

1. العمر ينقص ولايزيد:

دي أهم حاجة الواحد مفروض يحطها أمام عينيه، إن عمره محسوب ومقدر له، وكل يوم يمر عليه فهذا نقصان في ما بقي له، يعني لازم تعرف إنك لو أجلت حاجة لبعديين.. ممكن متلحش تعملها لأنه ممكن يكون مفيش بعدين عندك.
عشان كدة لازم الواحد يفضل دائماً أمامه هدف وغاية، هدف عام على مستوى حياته كلها ( وطبعاً ليس هناك هدف لنا جميعاً خلال الحياة أكبر من الجنة )، وهدف أو عدة أهداف أخرى خلال حياته الدنيا يحققها واحد تلو الآخر.

2. الهدف والغاية أساس أستغلال الوقت:

ودي من الحاجات الأساسية إللي قفزت لدماغي القترة السابقة، بمعنى إنك طول مأنت معندكش هدف معين عايز توصل ليه وتحققه، أعرف أتوماتك كدة إن وقتك ضايع 100%، لأنك ببساطة طالما مفيش هدف قدام عينيك عايز توصله فبالتالي مش هتحاول تعمل حاجة معينة، وإنما هتقعد تتنطط من حاجة للتانية من غير ما تحقق أي حاجة أصلاً، يعني مجرد بتضيع وقت أو زي ما بيقولوا "أدينا بنتسلى".

3. الوقت كتير بس أنت جرب:

والكلام ده مش عكس النقطة الأولى ولا حاجة، بس ده المقصود به الناس إللي عايزة تعمل حاجات كتير بس حاسة إنه مفيش وقت يكفي واليوم قصير وكلام من ده، وه غالباً بيجي بعد النقطة السابقة، فبعد ما حدد هدف، وجد إنه يحتاج لعمل أشياء كثيرة في نفس الوقت، ولكنه حاسس إن اليوم مش هيكفى لكل ده، فيحبط ويقعد من غير ما يعمل حاجة فيهم، وده أقوله، جرب بس ومع التجربة خش على النقطة التالية.

4. التنظيم ثم التنظيم:

و النقطةدي الواحد لازم يحطها في أعتباره بدرجة كبيرة، لازم تنظم نفسك، لقيت حاجات كتير لازم تعملها، أوك مفيش مشكلة، أقعد مع نفسك شوية صغيرة كدة وحاول ترتب الأعمال دي وتوزعها على اليوم الواحد أو على مدار الأسبوع حسب دماغك وأهمية الموضوع.

مش هقولك حدد لكل حاجة فيهم بالورقة والقلم من الساعة كذا للساعة كذا، لأن كدة كلكعة على الفاضي، ولكن على الأقل حط الفترة الزمنية، يعني الموضوع الأول هعمله في الفترة بين الظهر والعصر، والتاني بعد العصر، وكده يعني.

5. واحدة واحدة:

بمعنى تدرج في استغلال الوقت، يعني واحد قاعد بقاله كتير مبيعملش حاجة ووقته كله فالهوا، لو جه مرة واحدة وحط حاجات كتير أوي هيلاقي نفسة اشتغل كام يوم كدة وبحماس شديد، بس للأسف بعد كدة هيقع وهيلاقي نفسه رجع كما كان، فالتدرج مطلوب بشدة في هذا حتى لا نمل.

دي كانت الأفكار الأساسية إللي تجمعت عن هذا الموضوع في دماغي خلال الفترة السابقة، وإللي فعلاً حسيت فيها بكلام النبي صلى الله عليه وسلم : " نعمتان مغبون فيهما كثير من الناس : الصحة والفراغ"، بجد والله إحنا مش حاسين بقيمة الوقت ولا بمدى استهتارنا به، ولو كل واحد قعد مع نفسه وشاف بيعمل إيه خلال اليوم، هيعرف إنه غالباً... مابيعملش حاجة.

حوار حول الإحتفال بالمولد النبوي للشيخ لألباني

noreply@blogger.com (Anonymous) — Sun, 21 Feb 2010 18:43:00 +0000

السلام عليكم ورحمة الله وبركاته

منذ فترة ليست بقصيرة وأنا منقطع عن التدوين نوعاً ما وذلك لإنشغالي قي أشياء أخرى ومازلت حتى الآن، ولكن مع أقتراب الثاني عشر من ربيع الأول وكثرة الحديث المتجدد كل سنة عن المولد النبوي وحكمه، وجدت هذا الحوار الهاديء والجميل للشيخ الألباني -رحمه الله- على موقع طريق السلف فأحببت أن أنقله لكم، ولمن أراد المزيد عن هذا الموضوع فيوجد أيضاً في الموقع ملف خاص عن المولد النبوي به العديد من المقلات والدروس لمعظم المشايخ فضلته أيضاً لجمعه معظم ما قيل في هذا الموضوع والرد على الشبه لمختلف المشايخ لأن المرأ أحياناً يريد سماع الكلام من شيخ بعينه.

.... والآن أترككم مع الحوار

حوار حول الإحتفال بالمولد النبوي للألباني

دار الحوار التالي بين الإمام الألباني رحمه الله تعالى وبين أحد الإخوة :

الشيخ الألباني :

الاحتفال بالمولد النبوي الشريف هل هو خير أم شر ؟

محاور الشيخ :

خير .

الشيخ الألباني :

حسناً ، هذا الخير هل كان رسول الله صلى الله عليه وسلم وأصحابه يجهلونه ؟

محاور الشيخ :

لا .

الشيخ الألباني :

أنا لا أقنع منك الآن أن تقول لا بل يجب أن تبادر وتقول : هذا مستحيل أن يخفى هذا الخير إن كان خيراً أو غيره على رسول الله صلى الله عليه وسلم وأصحابه ونحن لم نعرف الإسلام والإيمان إلا عن طريق محمد صلى الله عليه وسلم ؛ فكيف نعرف خيراً هو لم يعرفه ! هذا مستحيل .

محاور الشيخ :

إقامة المولد النبوي هو إحياء لذكره صلى الله عليه وسلم وفي ذلك تكريم له .

الشيخ الألباني :

هذه فلسفة نحن نعرفها ، نسمعها من كثير من الناس وقرأناها في كتبهم ؛ لكن الرسول صلى الله عليه وسلم حينما دعا الناس هل دعاهم إلى الإسلام كله أم دعاهم إلى التوحيد ؟

محاور الشيخ :

التوحيد .

الشيخ الألباني :

أول ما دعاهم للتوحيد ، بعد ذلك فُرضت الصلوات ، بعد ذلك فُرض الصيام ، بعد ذل فُرض الحج ، وهكذا ؛ ولذلك امشِ أنت على هذه السنة الشرعية خطوة خطوة .

نحن الآن اتفقنا أنه من المستحيل أن يكون عندنا خيرٌ ولا يعرفه رسول الله صلى الله عليه وسلم .

فالخير كله عرفناه من طريق رسول الله صلى الله عليه وسلم وهذه لا يختلف فيها اثنان ولا ينتطح فيها كبشان ، وأنا أعتقد أن من شك في هذا فليس مسلماً .

ومن أحاديث رسول الله صلى الله عليه وسلم التي تؤيد هذا الكلام :

1. قوله صلى الله عليه وسلم : (( ما تركتُ شيئاً يقربكم إلى الله إلا وأمرتكم به )) .

فإذا كان المولد خيراً وكان مما يقربنا إلى الله زُلفى فينبغي أن يكون رسول الله صلى الله عليه وسلم قد دلنا عليه . صحيح أم لا ؟ أنا لا أريد منك أن توافق دون أن تقتنع بكل حرف مما أقوله ، ولك كامل الحرية في أن تقول : أرجوك ، هذه النقطة ما اقتنعت بها .

فهل توقفت في شيء مما قلتهُ حتى الآن أم أنت ماشٍ معي تماماً ؟

محاور الشيخ :

معك تماماً .

الشيخ الألباني :

جزاك الله خيراً .

إذاً (( ما تركت شيئاً يقربكم إلى الله إلا وأمرتكم به ))

نحن نقول لجميع من يقول بجواز إقامة هذا المولد :

هذا المولد خيرٌ – في زعمكم - ؛ فإما أن يكون رسول الله صلى الله عليه وسلم قد دلنا عليه وإما أن يكون لم يدلنا عليه .

فإن قالوا : قد دلنا عليه .

قلنا لهم : ( هَاتُوا بُرْهَانَكُمْ إِنْ كُنْتُمْ صَادِقِينَ) . ولن يستطيعوا إلى ذلك سبيلاً أبداً .

ونحن قرأنا كتابات العلوي وغير العلوي في هذا الصدد وهم لايستدلون بدليل سوى أن هذه بدعة حسنة !! بدعة حسنة !!

فالجميع سواء المحتفلون بالمولد أو الذين ينكرون هذا الاحتفال متفقون على أن هذا المولد لم يكن في عهد الرسول صلى الله عليه وسلم ولا في عهد الصحابة الكرام ولا في عهد الأئمة الأعلام .

لكن المجيزون لهذا الاحتفال بالمولد يقولون : وماذا في المولد ؟ إنه ذكر لرسول الله صلى الله عليه وسلم ، وصلاة عليه ونحو ذلك .

ونحن نقول : لو كان خيراً لسبقونا إليه .

أنت تعرف حديث الرسول صلى الله عليه وسلم (( خير الناس قرني ثم الذين يلونهم ثم الذين يلونهم )) وهو في الصحيحين . وقرنه صلى الله عليه وسلم هو الذي عاش فيه وأصحابه ،ثم الذين يلونهم التابعون ، ثم الذين يلونهم أتباع التابعين . وهذه أيضاً لا خلاف فيها .

فهل تتصور أن يكون هناك خير نحن نسبقهم إليه علماً وعملاً ؟ هل يمكن هذا ؟

محاور الشيخ :

من ناحية العلم لو أن رسول الله صلى الله عليه وسلم قال لمن كان معه في زمانه إن الأرض تدور

الشيخ الألباني :

عفواً ، أرجوا عدم الحيدة ، فأنا سألتك عن شيئين علم وعمل ، والواقع أن حيدتك هذه أفادتني ، فأنا أعني بطبيعة الحال بالعلم العلم الشرعي لا الطب مثلاً ؛ فأنا أقول إن الدكتور هنا أعلم من ابن سينا زمانه لأنه جاء بعد قرون طويلة وتجارب عديدة وعديدة جداً لكن هذا لا يزكيه عند الله ولا يقدمه على القرون المشهود لها ؛ لكن يزكيه في العلم الذي يعلمه ، ونحن نتكلم في العلم الشرعي بارك الله فيك . فيجب أن تنتبه لهذا ؛ فعندما أقول لك : هل تعتقد أننا يمكن أن نكون أعلم ؛ فإنما نعني بها العلم الشرعي لا العلم التجربي كالجغرافيا والفلك والكيمياء والفيزياء . وافترض مثلاُ في هذا الزمان إنسان كافر بالله ورسوله صلى الله عليه وسلم لكن هو أعلم الناس بعلم من هذه العلوم هل يقربه ذلك إلى الله زُلفى ؟

محاور الشيخ :

لا .

الشيخ الألباني :

إذاً نحن لانتكلم الآن في مجال ذلك العلم بل نتكلم في العلم الذي نريد أن نتقرب به إلى الله تبارك وتعالى ، وكنا قبل قليل نتكلم في الاحتفال بالمولد ؛ فيعود السؤال الآن وأرجو أن أحضى بالجواب بوضوح بدون حيدة ثانية .

فأقول هل تعتقد بما أوتيت من عقل وفهم أنه يمكننا ونحن في آخر الزمان أن نكون أعلم من الصحابة والتابعين والأئمة المجتهدين في العلم الشرعي وأن نكون أسرع إلى العمل بالخير والتقرب إلى الله من هؤلاء السلف الصالح ؟

محاور الشيخ :

هل تقصد بالعلم الشرعي تفسير القرآن ؟

الشيخ الألباني :

هم أعلم منا بتفسير القرآن ، وهم أعلم منا بتفسير حديث الرسول صلى الله عليه وسلم ، هم في النهاية أعلم منا بشريعة الإسلام .

محاور الشيخ :

بالنسبة لتفسير القرآن ربما الآن أكثر من زمان الرسول صلى الله عليه وسلم ؛ فمثلاً الآية القرآنية ((وَتَرَى الْجِبَالَ تَحْسَبُهَا جَامِدَةً وَهِيَ تَمُرُّ مَرَّ السَّحَابِ صُنْعَ اللَّهِ الَّذِي أَتْقَنَ كُلَّ شَيْءٍ إِنَّهُ خَبِيرٌ بِمَا تَفْعَلُونَ)) (النمل:88) فلو أن رسول الله صلى الله عليه وسلم قال لأحد في زمانه إن الأرض تدور هل كان سيصدقه أحد ؟! ما كان صدقه أحد .

الشيخ الألباني :

إذاً أنت تريدنا – ولا مؤاخذة – أن نسجل عليك حيدةً ثانية . يا أخي أنا أسأل عن الكل لا عن الجزء ، نحن نسأل سؤالاً عاماً :

الإسلام ككل من هو أعلم به ؟

محاور الشيخ :

طبعاُ رسول الله صلى الله عليه وسلم وصحابته .

الشيخ الألباني :

هذا الذي نريده منك بارك الله فيك .

ثم التفسير الذي أنت تدندن حوله ليس له علاقة بالعمل ، له علاقة بالفكر والفهم . ثم قد تكلمنا معك حول الآية السابقة وأثبتنا لك أن الذين ينقلون الآية للاستدلال بها على أن الأرض تدور مخطؤون لأن الآية تتعلق بيوم القيامة (( يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ وَبَرَزُوا لِلَّهِ الْوَاحِدِ الْقَهَّارِ) .

لسنا على كل حال في هذا الصدد .

وأنا أسلِّم معك جدلاً أنه قد يكون رجلاً من المتأخرين يعلم حقيقة علمية أو كونية أكثر من صحابي أو تابعي الخ ؛ لكن هذا لا علاقة له بالعمل الصالح ؛ فاليوم مثلاً العلوم الفلكية ونحوها الكفار أعلم منا فيها لكن مالذي يستفيدونه من ذلك ؟ لاشيء . فنحن الآن لا نريد أن نخوض في هذا اللاشيء ، نريد أن نتكلم في كل شيء يقربنا إلى الله زلفى ؛ فنحن الآن نريد أن نتكلم في المولد النبوي الشريف .

وقد اتفقنا أنه لو كان خيراً لكان سلفنا الصالح وعلى رأسهم رسول الله صلى الله عليه وسلم أعلم به منا وأسرع إلى العمل به منا ؛ فهل في هذا شك ؟

محاور الشيخ :

لا ، لا شك فيه .

الشيخ الألباني :

فلا تحد عن هذا إلى أمور من العلم التجريبي لا علاقة لها بالتقرب إلى الله تعالى بعمل صالح .

الآن ، هذا المولد ما كان في زمان النبي صلى الله عليه وسلم - باتفاق الكل – إذاً هذا الخير ماكان في زمن الرسول صلى الله عليه وسلم والصحابة والتابعين والأئمة المجتهدين ،

كيف خفي هذا الخير عليهم ؟!

لابد أن نقول أحد شيئين :

علموا هذا الخير كما علمناه – وهم أعلم منا – ، أو لم يعلموه ؛ فكيف علمناه نحن ؟!

؛ فإن قلنا : علموه ؛ - وهذا هو القول الأقرب والأفضل بالنسبة للقائلين بمشروعية الاحتفال بالمولد - فلماذا لم يعملوا به ؟! هل نحن أقرب إلى الله زلفى ؟! –

لماذا لم يُخطيء واحدٌ منهم مرة صحابي أو تابعي أو عالم منهم أو عابد منهم فيعمل بهذا الخير ؟!

هل يدخل في عقلك أن هذا الخير لا يعمل به أحدٌ أبداً ؟! وهم بالملايين ، وهم أعلم منا وأصلح منا وأقرب إلى الله زُلفى ؟!

أنت تعرف قول الرسول صلى الله عليه وسلم _ فيما أظن _ :

(( لا تسبوا أصحابي ؛ فوالذي نفس محمد بيده لو أنفق أحدكم مثل جبل أُحدٍ ذهباً ما بلغ مُدَّ أحدهم ولا نَصيفَهُ )) .

أرأيت مدى الفرق بيننا وبينهم ؟!

لأنهم جاهدوا في سبيل الله تعالى ، ومع رسول الله صلى الله عليه وسلم ، وتلقوا العلم منه غضاً طرياً بدون هذه الوسائط الكثيرة التي بيننا وبينه صلى الله عليه وسلم ، كما أشار صلى الله عليه وسلم إلى مثل هذا المعنى في الحديث الصحيح :

(( من أحب أن يقرأ القرآن غضاً طرياً فليقرأهُ على قراءة ابن أم عبد )) يعني عبد الله بن مسعود .

" غضاً طرياً " يعنى طازج ، جديد .

هؤلاء السلف الصالح وعلى رأسهم الصحابة رضي الله عنهم لايمكننا أن نتصور أنهم جهلوا خيراً يُقربهم إلى الله زلفى وعرفناه نحن وإذا قلنا إنهم عرفوا كما عرفنا ؛ فإننا لا نستطيع أن نتصور أبداً أنهم أهملوا هذا الخير .

لعلها وضحت لك هذه النقطة التي أُدندنُ حولها إن شاء الله ؟

محاور الشيخ :

الحمد لله .

الشيخ الألباني :

جزاك الله خيراً .

هناك شيء آخر ، هناك آيات وأحاديث كثيرة تبين أن الإسلام قد كَمُلَ _ وأظن هذه حقيقة أنت متنبه لها ومؤمن بها ولا فرق بين عالم وطالب علم وعامِّي في معرفة هذه الحقيقة وهي : أن الإسلام كَمُلَ ، وأنه ليس كدين اليهود والنصارى في كل يوم في تغيير وتبديل .

وأذكرك بمثل قول الله تعالى : ((الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْأِسْلامَ دِيناً))

الآن يأتي سؤال : وهي طريقة أخرى لبيان أن الاحتفال بالمولد ليس خيراً غير الطريقة السابقة وهي أنه لو كان خيراً لسبقونا إليه وهم – أي السلف الصالح – أعلم منا وأعبد .

هذا المولد النبوي إن كان خيراً فهو من الإسلام ؛ فنقول : هل نحن جميعاً من منكرين لإقامة المولد ومقرِّين له هل نحن متفقون - كالاتفاق السابق أن هذا المولد ماكان في زمان الرسول صلى الله عليه وسلم – هل نحن متفقون الآن على أن هذا المولد إن كان خيراً فهو من الإسلام وإن لم يكن خيراً فليس من الإسلام ؟

ويوم أُنزلت هذه الآية : ((الْيَوْمَ أَكْمَلْتُ لَكُمْ دِينَكُمْ)) لم يكن هناك احتفال بالمولد النبوي ؛ فهل يكون ديناً فيما ترى ؟

أرجو أن تكون معي صريحاً ، ولا تظن أني من المشائخ الذين يُسكِّتون الطلاب ، بل عامة الناس : اسكت أنت ما تعلم أنت ما تعرف ، لا خذ حريتك تماماً كأنما تتكلم مع إنسان مثلك ودونك سناً وعلماً . إذا لم تقتنع قل : لم أقتنع .

فالآن إذا كان المولد من الخير فهو من الإسلام وإذا لم يكن من الخير فليس من الإسلام وإذا اتفقنا أن هذا الاحتفال بالمولد لم يكن حين أُنزلت الآية السابقة ؛ فبديهي جداً أنه ليس من الإسلام .

وأوكد هذا الذي أقوله بأحرف عن إمام دار الهجرة مالك بن أنس : قال :

" من ابتدع في الإسلام بدعة – لاحظ يقول بدعة واحدة وليس بدعاً كثيرة – يراها حسنة فقد زعم أن محمداً صلى الله عليه وسلم خان الرسالة " .

وهذا شيء خطير جدا ً ، ما الدليل يا إمام ؟

قال الإمام مالك : اقرؤا إن شئتم قول الله تعالى :

((الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْأِسْلامَ دِيناً))

فما لم يكن يومئذٍ ديناً لا يكون اليوم ديناً . انتهى كلامه .

متى قال الإمام مالك هذا الكلام ؟ في القرن الثاني من الهجرة ، أحد القرون المشهود لها بالخيرية !

فما بالك بالقرن الرابع عشر ؟!

هذا كلامٌ يُكتب بماء الذهب ؛ لكننا غافلون عن كتاب الله تعالى ، وعن حديث رسول الله صلى الله عليه وسلم ، وعن أقوال الأئمة الذين نزعم نحن أننا نقتدي بهم وهيهات هيهات ، بيننا وبينهم في القدوة بُعد المشرقين .

هذا إمام دار الهجرة يقول بلسانٍ عربيٍ مبين : "فمالم يكن يومئذٍ ديناً ؛ فلا يكون اليوم ديناً".

اليوم الاحتفال بالمولد النبوي دين ، ولولا ذلك ما قامت هذه الخصومة بين علماء يتمسكون بالسنة وعلماء يدافعون عن البدعة .

كيف يكون هذا من الدين ولم يكن في عهد الرسول صلى الله عليه وسلم ولا في عهد الصحابة ولا في عهد التابعين ولا في عهد أتباع التابعين ؟!

الإمام مالك من أتباع التابعين ، وهو من الذين يشملهم حديث :

(( خير القرون قرني ثم الذين يلونهم ثم الذين يلونهم )) .

يقول الإمام مالك : " ما لم يكن حينئذٍ ديناً لا يكون اليوم ديناً ، ولا يَصلُح آخر هذه الأمة إلا بما صَلُح به أولها " .

بماذا صلح أولها ؟ بإحداث أمور في الدين والُتقرب إلى الله تعالى بأشياء ما تقرب بها رسول الله صلى الله عليه وسلم ؟!

والرسول صلى الله عليه وسلم هو القائل :

(( ما تركتُ شيئاً يُقربكم إلى الى الله إلى وأمرتكم به )) .

لماذا لم يأمرنا رسول الله صلى الله عليه وسلم أن نحتفل بمولده ؟! هذا سؤال وله جواب :

هناك احتفال بالمولد النبوي مشروع ضد هذا الاحتفال غير المشروع , هذا الاحتفال المشروع كان موجوداً في عهد رسول الله صلى الله عليه وسلم بعكس غير المشروع ،مع بَون شاسع بين الاحتفالين :

أول ذلك : أن الاحتفال المشروع عبادة متفق عليها بين المسلمين جميعاً .

ثانياً : أن الاحتفال المشروع يتكرر في كل أسبوع مرة واحتفالهم غير المشروع في السنة مرة .

هاتان فارقتان بين الاحتفالين : أن الأول عبادة ويتكرر في كل أسبوع بعكس الثاني غير المشروع فلا هو عبادة ولا يتكرر في كل أسبوع .

وأنا لا أقول كلاماً هكذا ما أنزل الله به من سلطان ، وإنما أنقل لكم حديثاً من صحيح مسلم رحمه الله تعالى عن أبي قتادة الأنصاري قال :

جاء رجل إلى النبي صلى الله عليه وسلم فقال :

يا رسول الله : ما تقول في صوم يوم الإثنين ؟

قال (( ذاك يومٌ وُلِدتُ فيه ، وأُنزل القرآن عليَّ فيه .))

ما معنى هذا الكلام ؟

كأنه يقول : كيف تسألني فيه والله قد أخرجني إلى الحياة فيه ، وأنزل عليَّ الوحي فيه ؟!

أي ينبغي أن تصوموا يوم الاثنين شكراً لله تعالى على خلقه لي فيه وإنزاله الوحي عليَّ فيهِ .

وهذا على وزان صوم اليهود يوم عاشوراء ، ولعلكم تعلمون أن صوم عاشوراء قبل فرض صيام شهر رمضان كان هو المفروض على المسلمين .

وجاء في بعض الأحاديث أن النبي صلى الله عليه وسلم لما هاجر إلى المدينة وجد اليهود يصومون يوم عاشوراء ؛ فسألهم عن ذلك ؛ فقالوا هذا يوم نجى الله فيه موسى وقومه من فرعون وجنده فصمناه شكراً لله ؛ فقال صلى الله عليه وسلم : (( نحن أحق بموسى منكم )) فصامه وأمر بصومه فصار فرضاً إلى أن نزل قوله تعالى :

((شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى وَالْفُرْقَانِ فَمَنْ شَهِدَ مِنْكُمُ الشَّهْرَ فَلْيَصُمْه)) .

فصار صوم عاشوراء سنة ونسخ الوجوب فيه .

الشاهد من هذا أن الرسول صلى الله عليه وسلم شارك اليهود في صوم عاشوراء شكراً لله تعالى أن نجى موسى من فرعون ؛ فنحن أيضاً فَتَح لنا باب الشكر بصيام يوم الاثنين لأنه اليوم الذي وُلد فيه رسول الله صلى الله عليه وسلم واليوم الذي أُوحي إليه فيه .

الآن أنا أسألك : هولاء الذين يحتفلون بالمولد الذي عرفنا أنه ليس إلى الخير بسبيل أعرف ان كثيراً منهم يصومون يوم الاثنين كما يصومون يوم الخميس ؛ لكن تُرى أكثر المسلمين يصومون يوم الاثنين ؟

لا ، لا يصومون يوم الاثنين ، لكن أكثر المسلمين يحتفلون بالمولد النيوي في كل عام مرة ! أليس هذا قلباً للحقائق ؟!

هؤلاء يصدق عليهم قول الله تعالى لليهود :

((أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ))

هذا هو الخير : صيام متفق عليه بين المسلمين جميعاً وهو صيام الاثنين ومع ذلك فجمهور المسلمين لا يصومونه !!

نأتي لمن يصومه وهم قلة قليلة : هل يعلمون السر في صيامه ؟ لا لا يعلمون .

فأين العلماء الذين يدافعون عن المولد لماذا لا يبينون للناس أن صيام الاثنين هو احتفال مشروع بالمولد ويحثونهم عليه بدلاً من الدفاع عن الاحتفال الذي لم يُشرع ؟!!

وصدق الله تعالى ((أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ))

وصدق رسول الله صلى الله عليه وسلم حين قال :

(( للتتبعنَّ سَنن من قبلكم شبراً بشبر وذراعاً بذراع حتى لو دخلوا جحر ضب لدخلتموه ))

وفي رواية أخرى خطيرة (( حتى لو كان فيهم من يأتي أمه على قارعة الطريق لكان فيكم من يفعل ذلك )) .

فنحن اتبعنا سنن اليهود ؛ فاستبدلنا الذي هو أدنى بالذي هو خير ، كاستبدالنا المولد النبوي الذي هو كل سنة وهو لا أصل له بالذي هو خير وهو الاحتفال في كل يوم اثنين وهو احتفال مشروع بأن تصومه مع ملاحظة السر في ذلك وهو أنك تصومه شكراً لله تعالى على أن خلق رسول الله صلى الله عليه وسلم فيه ، وأنزل الوحي فيه .

وأختم كلامي بذكر قوله صلى الله عليه وسلم :

(( أبى الله أن يقبل توبة مبتدع )) .

والله تعالى يقول : ((يَا أَيُّهَا الرَّسُولُ بَلِّغْ مَا أُنْزِلَ إِلَيْكَ مِنْ رَبِّكَ وَإِنْ لَمْ تَفْعَلْ فَمَا بَلَّغْتَ رِسَالَتَهُ وَاللَّهُ يَعْصِمُكَ مِنَ النَّاسِ))

وقد جاء في صحيح مسلم أن أحد التابعين جاء إلى السيدة عائشة

محاور الشيخ :

قراءة سيرة النبي صلى الله عليه وسلم أليس تكريماً له ؟

الشيخ الألباني :

نعم

محاور الشيخ :

فيه ثواب هذا الخير من الله ؟

الشيخ الألباني :

كل الخير . ما تستفيد شيئاً من هذا السؤال ؛ ولذلك أقاطعك بسؤال : هل أحد يمنعك من قراءة سيرته ؟

أنا أسألك الآن سؤالاً : إذا كان هناك عبادة مشروعة ، لكن الرسول صلى الله عليه وسلم ما وضع لها زمناً معيناً ، ولا جعل لها كيفية معينة ؛ فهل يجوز لنا أن نحدد لها من عندنا زمناً معيناً ، أو كيفية معينة ؟ هل عندك جواب ؟

محاور الشيخ :

لا، لا جواب عندي .

الشيخ الألباني :

قال الله تعالى : ((أَمْ لَهُمْ شُرَكَاءُ شَرَعُوا لَهُمْ مِنَ الدِّينِ مَا لَمْ يَأْذَنْ بِهِ اللَّهُ))

وكذلك يقول الله تعالى :

((اتَّخَذُوا أَحْبَارَهُمْ وَرُهْبَانَهُمْ أَرْبَاباً مِنْ دُونِ اللَّهِ وَالْمَسِيحَ ابْنَ مَرْيَمَ وَمَا أُمِرُوا إِلَّا لِيَعْبُدُوا إِلَهاً وَاحِداً لا إِلَهَ إِلَّا هُوَ سُبْحَانَهُ عَمَّا يُشْرِكُونَ)) التوبة:31

(( لما سمع عدي بن حاتم رضي الله عنه هذه الآية – وقد كان قبل إسلامه نصرانياً – أشكلت عليه فقال: إنا لسنا نعبدهم قال: ( أليس يحرمون ما أحل الله فتحرمونه ويحلّون ما حرم الله، فتحلونه؟) ، فقال: بلى. قال : ( فتلك عبادتهم))).

وهذا يبيِّن خطورة الابتداع في دين الله تعالى .

=======

مفرغ مع بعض الاختصار من أحد اشرطة سلسلة الهدى والنور للشيخ الألباني رحمه الله تعالى . رقم الشريط 94/1(*)

خدنا الكاس.... وبعدين؟

noreply@blogger.com (Anonymous) — Mon, 01 Feb 2010 14:58:00 +0000

السلام عليكم ورحمة الله وبركاته،

امبارح فاز المنتخب المصري على غانا في نهائي كأس افريقيا، وعليه خدنا الكاس (:

ومنكرش طبعاً إني سعدت بهذا الخبر - أصلي مشفتش الماتش ولا الماتش إللي قبله بس كنت بعرف النتيجة - وكتبت النتيجة على تويتر ثم التهنئة بالفوز، ماهو شيء طبيعي إن أي حاجة كويسة لبلدي أفرح بيها، حتى لو كانت "لعبة".

طيب في إيه بقى؟

في إني لما شوفت ما وراء المباراة وما بعدها اتنرفزت أوي، طبعاً دا كان متوقع والجواب بيبان من عنوانه، ومن أول البطولة ولّا حتى من زمان أوي، بجد إحنا بقينا هايفين وتافهين أوي

اصبح الفوز في لعبة هو الإنتصار العظيم وأعظم أهداف الحياة، الناس دي عملت إللي ما يتعملش، وحققوا الإنتصار، وردو لينا كرامتنا، و....، وكلام كتير أوي يحرق الدم.

ملحوظة: أنا لا أتكلم عن شخص اللعيبة او حد منهم، أنا معرفش حد فيهم معرفة شخصية وماشوفتش من حد فيهم حاجة وحشة، بس فالأول وفالآخر... بيلعبوا.

نرجع تاني:
تبص تلاقي المصالح بتتعطل، والشوارع بتتقفل، وهيصة وزحمة، وطبعاً لا يخفى على أحد طريقة الإحتفال وما يصاحبها من كم رهيب من المخالفات.
عمالين يعملوا إحتفاليات وطبل وزمامير ونساء بترقص - ورجالة كمان والله - ومطالبة بالتكريم وجوائز و.. و.. و...

طلع الكلام بقى إن إحنا الأبطال، وحسن الفكر والتخطيط، وطول عمرنا الكبار، وإحنا إللي كان لازم نروح كاس العالم و ... وبرضوا كله لعب في لعب
فعلاً عامليين زي العيال لما يلعب أي لعة بتكون هيا حياته ومتعته وهدفه الوحيد،.. بس دول عيال.

أنا بس عايز أسأل سؤال واحد، وهو عنوان التدوينة
أخدنا الكاس... طب وبعدين؟
إيه إللي حصل لما خدنا الكاس؟
إيه الفايدة إللي عايدة علينا؟
إيه الجديد أو التطور أو الإصلاح إللي هيعود علينا وعلى البلد؟؟؟
ياترى البلد هتنهض، هيكون لينا مكانة أكبر وسط دول العالم وكلمتنا هتتسمع
ياترى هتتسدد الديون وينتعش الإقتصاد، ونشغل الشباب إللي ملأح في البيت-إن لم يكن في الشارع أو القهوة-....

طبعاً لأ، والإجابة ببساطة لأنها مجرد " لعبة "

هم كما بيقولوا دي مجرد لعبة... وإحنا معاهم
بس إللي بيعملوه ميقولش أبداً إنها لسة مجرد لعبة
التعصب والجاهلية إللي بتحصل متقولش إنها مجرد لعبة
الفلوس إللي بتتدفع بالملايين فيها ميقولش إنها لعبة
ولما الواحد يتكلم يقولولوا دي مجرد لعبة وخلي الناس تفرح!

وييجي واحد تاني يقولك إنت مش وطني ولا مش مصري أصلاً ومبتحبش البلد وكلام من ده
لأ، إسمحلي بقى
أولاً: أنا مصري غصب عنك وعني، بس الأهم عندي إني مسلم، ومبحبش العصبية الجاهلية في أي حاجة.
ثانياً: مصريتي أو وطنيتي وحبي للبلد مش بالكلام ولا بالمتشات، يعني لازم اشوف المتشات عشان أبقى وطني... مخدنهاش دي
ثالثاً: كرهي للتفاهة وكرهي لمحاولة تشتيت الأمة وتخديرها، دا لوحدة يكفي لإظهار حبي للبلد
رابعاً: لو قلنا لواحد من المصريين الجامدييين إللي بيحبوا البلد -من وجهة نظرهم- عن طريق الكرة، لو قلنا لحد فيهم هات الفلوس إللي دفعتها في شراء الأعلام أو تلوين عربيتك أو سافرت بيها ورا المنتخب، وهناخد الفلوس دي عشان نبني مشروع قومي في البلد، أو نسدد جزء من الديون، أو نشغل بيهم شوية شباب، ياترى هيكون إيه رده؟؟؟
أصل.. يعني.. وبعدين ال... وفالآخر إنسى
لأن الموضوع مش حب ووطنية واشتغالات من إللي بيقولوها وبيحاولوا يقنعوا بيها نفسهم وإنما هو الهوى وحب إتباعه وإتباع رغبات النفس وشكراً.

مش هكتر فالكلام - ولوني شكلي كترت - لأني بتخنق بسرعة من الحاجات دي، والعملية مش ناقصة أصلاً

والسلام ختام

من تدويناتي التي لها صلة بالموضوع:
بئس الكورة

هو أنا بدوّن ليه؟

noreply@blogger.com (Anonymous) — Wed, 27 Jan 2010 20:14:00 +0000

السلام عليكم ورحمة الله وبركاته،

سؤال طلع في دماغي وقعد يزن لفترة معايا وهو: أنا ليه بدوِّن؟ يعني ليه كل شوية أكتب موضوع جديد؟ وهو أنا ليه أصلاً عامل مدونة؟

بصراحة السؤال ده حيرني كثيراً وفضلت فترة بجمع عزيمتي وأعقد النية على أصل العمل ده...

في الحقيقة وبصراحة كدة أنا أول ما قررت أعمل المدونة دي كان عشان شرح برنامج الهايسيس، ده فعلاً كان الدافع الحقيقي وراء المدونة، أن أقدم ما قمت بعمله في الشرح للآخرين ليتمكنوا من الإستفادة منه.

بس بعد ما أنشأت المدونة لقيت إن ليها فايدة أكبر وممكن استخدمها بشكل أوسع وأفضل...

كان بقالي فترة طويلة مش عارف ألاقي لنفسي مجال للدعوة للآخرين، ولأني عارف إن الدعوة من أهم جوانب الدين فكان الموضوع ده فعلاً مضايقني، رغم إني كنت بشارك دعوياً بصورة أو أخرى، بس كنت حاسس إن ده مش كفاية، وبما إني علاقاتي ليست متعددة، أو بمعنى أصح مبعرفش أقف قدام واحد وأنصحه إلا إذا كنت أعرفه وبرضوا مببقاش برفكت يعني، فلقيت إن المدونة دي فرصة كويسة جداً للي ذيي تستغل في هذا المجال.

وبعد كدة قررت إن التدوين التكنيكي ميبقاش عن الهايسيس وبس ولكن يكون في معظم المجالات إللي ممكن أكون بعرف فيها، من باب برضوا تبادل الخبرات وتوصيل النفع للأخرين.

وبالتالي اصبحت دي هي المحاور الأساسية للتدوين عندي، بالإضافة لبعض التدوينات العامة من حين لآخر مع قلتها.

دا كان الحال في البداية، ولكن السؤال طلع في دماغي منذ فترة بصورة أخرى، وطبعاً لأني عارف إن مفيش ناس كتيير بتدخل المدونة ولا حاجة - يعني حاجة كدة على قد الحال -،وإن أنا عارف إن 90% من إللي بيدخل المدونة بيكون عشان شرح الهايسيس، ومفيش حد حتى من إللي بيدخل للهايسيس بيعبر...

الموضوع لما طلع في دماغي كان يقصد: إنت ليه بتكتب لما مفيش حد بيقرأ، وليه توجع دماغك وتكمل حاجة ذي كدة؟

الموضوع دة بجد كان هيوصل معايا لغلق المدونة، وبعد ما هدء شوية كان القرار بتحويل المدونة لأسم آخر وتكون للحاجات العلمية بس وخاصة الشرح خاصة ذي ماقلت إني عارف إن 90% من الزوار إن لميكن أكثر بيدخل عشان ياخد رابط الشرح وشكراً على كدة.

بس الحمد لله رجعت فكرت شوية وعقلتها، وقررت إني أسيب المدونة دي ذي ما هي، وأكمل فيها ذي مأنا ماشي، حتى لو مفيش حد بيقرأ مواضيع، مش مهم، أكيد في نسبة ولو ضئيلة جداً بتقراً شيء ما في المدونة ولو شيء قليل جداً،و لعل وعسى حد فعلاً ينتفع بأي كلمة أنا كتبتها في يوم من الأيام.

أنا والحمد لله ومن أول يوم موضوع التعليقات دا مش في دماغي، قصدي يعني لو محدش بيرد مفيش مشكلة المهم يكون أنتفع بأي كلمة أنا قلتها أو كتبتها وخلاص.

عشان كدة أنا قررت أستمرعازم النية على نفع المسلمين إن شاء الله وتقديم النصح، والمساهمة في جزء ولو ضئيل من نشر الدين الإسلامي والدعوة من أجله، وأتمنى من الله أن يتقبل هذا العمل ويجعله خالصاً لوجهه، ويكون عمل صالحاً أنتفع به في يوم الحساب بلا عمل...

اللهم آمييين

Optimization in HYSYS

noreply@blogger.com (Anonymous) — Tue, 12 Jan 2010 14:10:00 +0000

السلام عليكم ورحمة الله وبركاته،

درس جديد ومهم جداً في شرح برنامج ال HYSYS وهو لشرح أداة ال Optimizer، وهي أداة مهمة جداً ويعرف قيمتها من يعرف أهمية ال Optimization في مجال الصناعة.

تم شرح استخدام هذه الأداة في الفيديو من خلال التطبيق على درس سابق ( انتاج البروبيلين جلايكول )، كما أن مع الفيديو ملف PDF فيه شرح لبعض المعلومات التي لم اشرحها في الفيديو ونوهت لإلحاق شرحها في ملف مع الفيديو، لذلك فإن الملف مهم وضرورمع الفيديو.

نأتي للروابط:

رابط الفيديو:

http://www.mediafire.com/?zgjmmnn2jej

رابط ملف ال PDF:

http://www.mediafire.com/?wgjzznmymdm

ولا تنسوني من صالح دعائكم.

Data Record in HYSYS

noreply@blogger.com (Anonymous) — Wed, 06 Jan 2010 13:52:00 +0000

السلام عليكم ورحمة الله وبركاته،

النهاردة موضوع جديد عن برنامج ال HYSYS وهو شرح لأداة مهمة في البرنامج تستخدم في تسجيل قيم المتغيرات وتساعد على عمل ما يشبه مراقبة لمدى تأثر المتغيرات بالتغيرات التي يتم عملها في الوحدة.

الأداة دي باختصار هي ال Data Record ومن غير لف ولا دوران ذي كل مرة الشرح موجود في ملف فيديو يقوم بتعريف الأداة وكيفية استخدامها من خلال مثال سبق شرحه.

رابط الفيديو

http://www.mediafire.com/?ykhqt3miint

أتمنى أن يستفيد الجميع وأسألكم الدعااااااء