ደጀ ሰላም Deje Selam

(ታሪክ በዚህ ሳምንት) - “መስለህ አስተምር በሚለው የመናፍቃን የማስተማር ዘይቤ” የሃይማኖት ሕጸጽ ባሰራጩ ሰባክያን ላይ ቅ/ሲኖዶስ የወሰደው ርምጃ ሲታወስ

2011-07-11T03:41:00.001-04:00

“ቅዱስ ሲኖዶስ በቤተ ክርስቲያናችን ዙሪያ የሚታየውን ችግር የማስወገድ አቅሙን እያጎለበተ በመምጣቱ ቤተ ክርስቲያኒቱን ከመናፍቃን ወራሪ ነጻ በማውጣት የሚካሄደው የሥራ እንቅስቃሴ በአጀንዳ ከቀረቡለት የወቅቱ ጥያቄ አንዱና ዋነኛው ሆኖ ተመዝግቧል” (የቅዱስ ሲኖዶስ የ1990 ዓ.ም ውሳኔ መግቢያ)

ሕገ ወጥ ሰባክያኑ (አሰግድ ሣህሉ፣ በጋሻው ደሳለኝ) በጠቅላይ ቤተ ክህነት የተለያዩ መምሪያዎች ውስጥ ለመቀጠር ማመልከታቸው እየተነገረ ነው፤

(ደጀ ሰላም፤ ጁላይ 11/2011/ TO READ IN PDF CLICK HERE)፦ 13 ዓመት ወደ ኋላ፤ ወርኀ ግንቦት 1990 ዓ.ም - በመንበረ ፓትርያርክ ጠቅላይ ቤተ ክህነት ስብከተ ወንጌል አዳራሽ የከተተው የአዲስ አበባ ከተማ ምእመን ዐይኖች በአዳራሹ ውስጥና ዙሪያ በተደረደሩ ከ20 ያላነሱ ቴሌቪዥኖች ተከብቧል፡፡ ምእመናኑ የጽርሐ ጽዮን አንድነት ማኅበር ቤተሰብ በሆነው እንደ መ/ር ታዬ አብርሃም ባሉ ቀናዒ ኦርቶዶክሳውያን መምህራን አስተባባሪነት ቀደም ሲል በመንበረ ልዑል ቅዱስ ማርቆስ ቤተ ክርስቲያን የተሰበሰቡ ሰባክያነ ወንጌል በወሰኑት መሠረት በተመሳሳይ ቀንና በአንድ ላይ በዐውደ ምሕረትና በተለያዩ መንገዶች ባደረጉት ቅስቀሳ ጥሪ የተላለፈላቸው ነበሩ፡፡

(ጽጌ ስጦታው)

የቴሌቪዥኖቹ መሳክው /መስኮቶች/ ሚያዝያ 28 ቀን 1990 ዓ.ም በአዲስ አበባ ኤግዚቢሽን ማእከል ቆባቸውን እንደ ባርኔጣ እያወለቁና እያጠለቁ፣ ምንኩስናንና ኦርቶዶክሳዊነትን እያንኳሰሱ፣ ቤተ ክርስቲያንን በ”አሮጊቷ ሣራ…” ዲስኩራቸው እያሳነሱ እብደታቸውን በአደባባይ የገለጡትን የእነ ‹አባ› ብእሴ ሰላምንና ‹አባ› ዮናስን ጩኸትና ግርግር ለምእመናኑ ዐይኖች አሳይቷል፡፡ በዚያው ጉባኤ ወቅት ራሱን “የኦርቶዶክስ ተሐድሶ መነኮሳት ኅብረት” እያለ የሚጠራውና ከቅዱስ ጳውሎስ ከፍተኛ መንፈሳዊ ት/ቤት በወጡና በእነርሱ አስኮብላይነት ከልዩ ልዩ ቦታዎች ፆር ጸንቶባቸው ከገዳማት ወጥተው በተሰበሰቡ የስም መነኮሳት ላይ ቋሚ ሲኖዶስ ያስተላለፈው የውግዘት ርምጃ በብፁዕ አቡነ ገሪማ በንባብ ተሰምቷል፡፡

“የተሐድሶ መነኮሳት ኅብረቱ” አባላት የቤተ ክርስቲያናችንን የማዕርገ ምንኩስና ክብር መግለጫና መለያ የሆነውን ቀሚስና ፈረጅያ ለብሰው፣ ቆብ ደፍተው፣ የቤተ ክርስቲያናችንን ቋንቋ ተጠቅመው በፕሮቴስታንቶች የገንዘብ ድጋፍ ምእመናንን ግራ ለማጋባትና ለማስኮብለል የተላኩ ነበሩ፡፡ እነዚህ ሐራጥቃዎች በውግዘት ከቤተ ክርስቲያን ከተለዩ በኋላ የተበታተነ ሲሆን ዛሬ እኩሎቹ ከሀገር ውጭ በአሜሪካ በተለያዩ ስቴቶች ቤተ ክርስቲያንን በመከፋፈል እኩይ ሥራ ሲጠመዱ በሀገር ውስጥም ሕዝቡ ምንኩስናን እንዲጸየፍ፣ ኦርቶዶክሳዊ እምነት እንዲጠላና እንዲዋረድ ለማድረግ የእነርሱ የግብር ወንድሞች ብዙ አሳፋሪ ድርጊቶችን በስውርና በአደባባይ ሳይቀር በመፈጸም ላይ ይገኛሉ፡፡

የዛሬ 13 ዓመት ግንቦት ወር በእኒህ የስም መነኮሳት ላይ አስቸኳይ ውሳኔ የሰጠው ቅዱስ ሲኖዶስ በዚሁ ዓመት ሐምሌ 2 ቀን 1990 ዓ.ም ደግሞ በእነ ግርማ በቀለና ጽጌ ስጦታው መዝገብ ክስ በቀረበባቸው አምስት ግለሰቦች ላይ ታሪካዊ ውሳኔ አሳልፏል፡፡ “በቤተ ክርስቲያናችን የሥራ ዘርፍ ተመድበው እየሠሩ የወር ደመወዝ እየተከፈላቸው ሳለ የባዕድ እምነት ተከታዮችና አስፋፊዎች ሆነው ተገኝተዋል፤ የመናፍቅነት ጠባይ አሳይተዋል፤ በዚህም የክርስቶስን ተማላጅነትና የቅዱሳንን አማላጅነት የደመሰሰ፣ የእመቤታችንን የቅድስት ድንግል ማርያም ክብር የቀነሰ፣ በአጠቃላይም ቀኖና ቤተ ክርስቲያንን ያፋለሰ የሃይማኖት ሕጸጽ ትምህርት አሰራጭተዋል፤ ይህም በጥቆማ ተደርሶባቸው፣ ሊቃውንት ጉባኤ በ51 ገጽ አቀናብሮ ባቀረበው የሰውና የጽሑፍ ማስረጃ ተረጋግጦባቸዋል፤” ይላል የውሳኔው መግለጫ፡፡

በአምስቱ ሰባክያን ላይ ከቀረበውና በማስረጃ ከተረጋገጠው 34 የክስ ጭብጥ መካከል፡- “ክርስትናን በኢትዮጵያ ዙሪያ አትመልከቱ፤ የኢትዮጵያን ቤተ ክርስቲያን ተወት አድርጋችሁ ሌሎችን ተከተሉ፤ ተኣምረ ማርያም ጠቅሳችሁ አስተምሩ ብትባሉ ባታምኑበትም ማስተማር አለባችሁ፤ ክርስቶስ ሰው የሆነው ለአማላጅነት ነው፤ ማርያም ጥንተ አብሶ አለባት፤ አቡነ ተክለ ሃይማኖት እግራቸው የተቆረጠው ከይኩኖ አምላክ ጋራ ሲዋጉ በጦርነት ላይ ነው ይባላል፤ ኦርቶዶክስ በመሆን ማንም ገነት አይገባም፣ ካቶሊክ በመሆን ማንም ሲኦል አይወርድም፤ የእነ ዮሐንስ አፈ ወርቅ፣ ባስልዮስና ጎርጎርዮስ ስብከት ለአሁኑ ትውልድ ተራ ነው፤ ዛሬ ቢኖሩ ትምህርት ቤት መግባት ይኖርባቸው ነበር፤ ታቦተ ጽዮን ወደ ኢትዮጵያ አልመጣችም፣ ዛሬም በአክሱም የለችም፤ ክርስቲያን የሆንክ ወገን ሁሉ የእምነት ቅጽሮቿ ወደፈረሰባት ቤተ ክርስቲያንህ ተመለስ” የሚሉ ይገኙባቸዋል፡፡

በተለያዩ ስውር የስብሰባ መድረኮች የመናፍቃኑን ትምህርት ሲያሰራጩ በካሴት ተቀርፆ የተገኘው የሰባክያኑ ድምፅ፣ ከሊቃውንት ጉባኤ በቃል ለቀረበላቸው የእምነት ክሕደት ጥያቄ በሰጡት መልስ፣ በጽሑፍ ለቀረበላቸው ጥያቄ መዝግበውና ፈርመው ባቀረቡት የመልስ ሰነድ፣ በተለያዩ ጊዜያት በጻፏቸው መጽሔቶች፣ ቴአትሮችና ልዩ ልዩ ፓምፍሌቶችና በድምሩ ሃያ ዘጠኝ ሰዎች በሰጡት የምስክርነት ቃል የሰባክያኑ የክስ ጭብጥና የተሳሳተ አባባላቸው ተጣርቶ ሊታወቅ እንደቻለ በቅዱስ ሲኖዶስ ውሳኔ ላይ የተጠቀሰውና በ51 ገጾች የተመዘገበው የሊቃውንት ጉባኤ አስተያየትና የውሳኔ ሐሳብ አረጋግጧል፡፡

በሊቃውንት ጉባኤ ተመርምሮ በበቂ ማስረጃ ተጣርቶ በቀረበለት የውሳኔ ሓሳብ መሠረት ቀኖናዊና አስተዳደራዊ ርምጃ መውሰድ የሚቻል መሆኑን በውሳኔው ያመለከተው ቅዱስ ሲኖዶስ፣ ሰባክያኑ ምናልባት በፈጸሙት ኢ-ቀኖናዊ ድርጊትና የተሳሳተ አባባል ተጸጽተው የሚመለሱ ቢሆን ያልተረዱትንና የረቀቃቸውን ምሥጢር አብራርቶ ለማስረዳት፣ ለማስተማር፣ ለመምከርና ለማስተካከል እንዲቻል በቅድሚያ ከያሉበት ቦታ ተፈልገው ለጥያቄ እንዲቀርቡና በሕጉ መሠረት የተከሳሾችን የመፋረጃ ሐሳብ ተቀብሎ መወሰን ማስፈለጉን ያስረዳል፡፡ በዚህም መሠረት እያንዳንዱ ተከሳሽ የቀረበበት የክስ ጭብጥና የሰጠው የመቃወሚያ መልስ የተመዘገበበት ማስረጃ ቀደም ሲል የሊቃውንት ጉባኤ ካሳለፈው የውሳኔ ሐሳብ ላይ እየተነበበ የጥያቄና መልስ መርሐ ግብር ተከፍቶለት በሐዲስ ኪዳን፣ በብሉይ ኪዳንና በአጠቃላይም ቤተ ክርስቲያናችን በምትቀበላቸው ቅዱሳት መጻሕፍት የሰፈረው አከራካሪ ነጥብ ሁሉ በቅዱስ ሲኖዶስ አባላት አስረጅነት እየተተረጎመና እየተብራራ የጠመመውን በማቃናት የተዛባውንም በማስተካከል ለማስረዳት ጥረት መደረጉን ይገልጣል፡፡

ለዘለቄታውም የተወሰኑ ብፁዓን ሊቃነ ጳጳሳትና ሊቃውንተ ቤተክርስቲያን ተመድበውላቸው በመማር ማስተማሩ መርሐ ግብር የበለጠ በመረዳት ከስሕተት ታርመው እንዲመለሱ እንደሚደረጉ ለተከሳሾቹ በተገለጸው መሠረት፣ እያንዳንዱ ተከሳሽ ስሕተቱን አምኖ የቀኖና ቅጣት መፈጸም ይቻል ዘንድ በመጀመሪያ መንፈሳዊ ሕይወቱንና የቤተ ክርስቲያን ልጅነቱን በሚገልጽ ማመልከቻ ይቅርታ እንዲጠይቅ መመሪያ መሰጠቱን የውሳኔው መግለጫ ዘግቧል፡፡

ይሁንና ለሲኖዶሱ ከቀረበው የተከሳሾቹ ማመልከቻ መካከል ዲያቆን ግርማ በቀለ ባቀረበው ማመልከቻ፣ “ከመጽሐፍ ቅዱስም ሆነ ከሌሎች የቤተ ክርስቲያናችን መጻሕፍት በመጥቀስ ትክክለኛ ትርጉማቸውንም ባለመረዳት ስለተናገርኩት መልስ ቅዱስ ሲኖዶስ ይቅርታ ያደርግልኝ ዘንድ በታላቅ ትሕትና እጠይቃለሁ፤” ሲል ዲያቆን ጽጌ ስጦታውም “ያስተማርኩት፣ የተናገርኩትና የጻፍኩት ሁሉ ስሕተት መሆኑን ስለ አመንኩ ይህን ሁሉ ስሕተቴን ቅዱስ ሲኖዶስ ተረድቶልኝ ይቅርታ እንዲያደርግልኝና ትምህርቱን እንድማር ይፈቅድልኝ ዘንድ በታላቅ ትሕትና አመለክታለሁ፤” በማለት ጠይቀው ነበር፡፡ በዚህም ወደፊት ግለሰቦቹ ከሚሰጣቸው ትእዛዝና መመሪያ ውጭ እንደማይሠሩና እንደማያስተምሩ፣ በየደረጃውም ከቤተ ክርስቲያኒቱ ማእከላዊ አስተዳደር በተዋረድ የሚተላለፈውን ሁሉ ተግባራዊ እንደሚያደርጉና የተመደቡበትን የቤተ ክርስቲያን ሥራ በመንፈሳዊ ስሜት እንደሚሠሩ ገልጸው ባለፉት ወራት ለፈጸሙት ኢ-ቀኖናዊ ድርጊት ሁሉ ምልአተ ጉባኤ ይቅርታ ያደርግላቸው ዘንድ በአጽንዖት መማፀናቸው በቃለ ጉባኤው ላይ ተገልጧል፡፡

በዚሁ መሠረት እነ ግርማ በቀለ አምስት ሠራተኞች በፈጸሙት የኑፋቄ ትምህርት ተጸጽተው መመለሳቸውን በቃልም ሆነ በጽሑፍ ካረጋገጡ በኋላ ቀኖና ቤተ ክርስቲያን በሚያዝዘው ድንጋጌ መሠረት ንስሐ ገብተው የረቀቃቸውን ትምህርተ ሃይማኖት እየተከታተሉ እንዲታረሙና እንዲስተካከሉ ማድረግ ከቤተ ክርስቲያኒቱ የሚጠበቅ ድርሻ በመሆኑ በአምስቱ ሰባክያን ላይ ውሳኔ መስጠቱን የሲኖዶሱ ውሳኔ ያብራራል፡፡ በውሳኔው በአንደኛ ተራ ቁጥር በተለመከቱት ዲያቆን ግርማ በቀለና ዲያቆን ጽጌ ስጦታው ላይ በተላለፈው ውሳኔ የሚከተለው ሰፍሯል፤

“እስከ ሐምሌ 27 ቀን 1990 ዓ.ም ድረስ በታሪክና ሥነ ጽሑፍ ማደራጃ መምሪያ/በሊቃውንት ጉባኤ/ እየተማሩ እንዲቆዩ፤ ይሁንና ግለሰቦቹ ለጥያቄ በቀረቡ ጊዜ ከብፁዓን አበው ሊቃነ ጳጳሳት መምህራን እንደሚመደቡላቸው በተገባላቸው ቃል መሠረት፤

ብፁዕ አቡነ አብርሃም ሊቀ ጳጳስ፣ ብፁዕ አቡነ መቃርዮስ፣ ብፁዕ አቡነ ዘካርያስና ብፁዕ አቡነ ገብርኤል እስከ ተጠቀሰው ቀን ድረስ በሊቃውንት ጉባኤ ቢሮ እየተገኙ ከአባላቱ ጋራ በማስተማሩ ሥራ እንዲረዱ፤

ሀ/ ከሐምሌ 28 ቀን 1990 ዓ.ም ጀምሮ ለአዳሪ ተማሪዎች የተፈቀደውን የድርጎ ሒሳብ በየወሩ እያገኙ በደብረ ሊባኖስ ገዳም በመጻሕፍተ ሐዲሳት ቤት ገብተው የተከሰሱበትን ትምህርተ ሃይማኖት እንዲከታተሉ ሆኖ ከዚህም ጋራ የቤተ ክርስቲያኒቱን ሥርዐትና ገዳማዊ ሕይወት እያጠኑ እስከ ጳጉሜን 5 ቀን 1990 ዓ.ም ድረስ የረቀቃቸውን ምሥጢር እያደላደሉ እንዲቆዩ፤

ለ/ የደብረ ሊባኖስ ገዳም ጽ/ቤትም የእነ ግርማ በቀለን የትምህርት ይዘት እየተከታተለና እየተቆጣጠረ የተወሰነው የጊዜ ገደብ ሲጠናቀቅ በተከሳሾቹ መንፈሳዊ ሕይወት ስላለው ሁኔታ ሪፖርት እንዲያቀርብ፤

ሐ/ የሥራ ምደባው ግን ከግለሰቦቹ የቀኖና ቅጣት ፍጻሜ በኋላ በሚቀርበው ሪፖርት አፈጻጸማቸው ተመርምሮ እንዲወሰን የሚል ይገኝበታል፡፡

ቅዱስ ሲኖዶስ ሃይማኖትና ቀኖና ቤተ ክርስቲያን እንዳይፋለስ ለመጠበቅና ለማስጠበቅ ባለበት ዓላማ ከላይ በተገለጸው መልኩ ያሳለፈውን ውሳኔ አፈጻጸም ለመንበረ ፓትርያርክ ጠቅላይ ጽ/ቤት መርቶት ነበር፡፡ በ13 ዓመታት ሂደት የታየው እውነታ ግን ግርማ በቀለ ከ17ቱ የፕሮቴስታንታዊ-ተሐድሶ-ማኅበራት አንዱ የሆነው “የእውነት ቃል አገልግሎት” ድርጅት መሥራች መሆኑ ነው፡፡ ድርጅቱ የቴዎሎጂ ምሩቃንና ተማሪዎች ላይ አተኩሮ ወስዶ እያሠለጠነ መልሶ በማስገባት በተናጠልም በቡድንም የኑፋቄ ትምህርቶችን በየአቅጣጫው ያሰራጫል፤ ተልእኮውም ዐውደ ምሕረቱን መቆጣጠር ነው፡፡“የርቀት ትምህርቶችን በማስተማር፣ በራሪ ጽሑፎችን በማሰራጨትና ቤተ ክርስቲያናችንን የሚነቅፉ መጻሕፍት በማሳተምና በማሰራጨት በርብርብ እየሠራ ይገኛል፤ በአዲስ አበባና በሰሜን ኢትዮጵያ ከተሞች ላይ ቢሮ ከፍቶ እየሠራ ይገኛል፤”/የተሐድሶ መናፍቃን ዘመቻ በኢትዮጵያ ቤተ ክርስቲያን ላይ፤ ገጽ 81/፡፡ ጽጌ ስጦታውም ከ17ቱ የተሐድሶ ኑፋቄ አራማጅ ማኅበራት አንዱ የሆነውን “የጽዋ ኮኔክሽን ቸርች” በማቋቋም የጽዋ ማኅበራትን ለመበከል በመሥራት ላይ ይገኛል፤ “አሁንም ኦርቶዶክስ ነኝ” እያለም መርከብ በተሰኘ የግል ጋዜጣው ኑፋቄውን ሲያስፋፋና የግለሰቦችን ስም ሲያጠፋ በሕግ ተጠያቂ ሆኖ ዘብጥያ ወርዶም ነበር፡፡

ከ13 ዓመት በፊት የመንበረ ሐዋርያት ወራሽ የሆነበትን ሓላፊነት የመወጣት ችሎታ የነበረው ቅዱስ ሲኖዶስ ችግር ያለባቸው የፕሮቴስታንታዊ-ተሐድሶ-ኑፋቄ መልእክተኞች ቢያንስ ጥፋታቸው ታውቆ ተወግዘው እንዲለዩ፣ ገሚሶቹም ስሕተታቸውን አምነው በትምህርት የሚታረሙበትን ታላቅ ተግባር ፈጽሟል፡፡ ዛሬ ግን ለተመሳሳይ ድርጊቶች ምን ዐይነት ምላሽ እየሰጠ እንዳለ ማሰቡ ተገቢ ነው ብለን እናምናለን፡፡

ሰሞኑን ከጠቅላይ ቤተ ክህነቱ አካባቢ እንደተሰማው “ክርስቶስ ዛሬ በአብ ቀኝ ቆሞ ይማልዳል” በማለት የሚታወቀው አሰግድ ሣህሉ በሰንበት ት/ቤቶች ማደራጃ መምሪያ፣ “ሥላሴ አትበሉ ተባለ እንጂ በሥላሴ አትመኑ አልተባለም፤ ጠበል፣ መስቀል አያድኑም” ብሎ በአንደበቱ የነገረን በጋሻው ደሳለኝ በስብከተ ወንጌልና ሐዋርያዊ ተልእኮ መምሪያ በተዘዋዋሪ ሰባኪነት ለመቀጠር በወ/ሮ እጅጋየሁ በየነ አማካይነት ለመንበረ ፓትርያክ ጠቅላይ ቤተ ክህነት ጽ/ቤት ጥያቄ የማቅረባቸው ዜና ተጠናክሮ እየተሰማ ነው፡፡ ከእነርሱም ጋራ በሪሁን ወንድወሰን፣ ትዝታው ሳሙኤል፣ ያሬድ አደመ ተመሳሳይ ጥያቄ ማቅረባቸው ተሰምቷል፡፡ ጥያቄያቸው ከፓትርያርኩ ቢሮ ለዋና ሥራ አስኪያጁ ቢሮ መመራቱም ተነግሯል፡፡ የመቀጠር ሙከራው በውጭና በዐውደ ምሕረት ያልተሳካላቸውን የጥፋት እንቅስቃሴ ሕጋዊ ለማድረግ ከማለም የተነሣ እንደሆነም ተገምቷል፡፡

ባሳለፍነው ሳምንት ውስጥ በእኒህ ሕገ ወጥና የፕሮቴስታንታዊ-ተሐድሶ-ኑፋቄ ምንደኞች በሆኑ ግለሰቦች ላይ የሚታየው ሕዝባዊ ቁጣ እያየለ መሆኑን ከዲላና እና ከአዲስ አበባ ከደረሱን ዘገባዎች ተረድተናል፡፡ በዲላ ጻድቁ አቡነ ገብረ መንፈስ ቅዱስ ቤተ ክርስቲያን “በማኅበረ ቅዱሳን ላይ የምንሰጠው ገለጻ አለን፤ ጠላቶቻችንን ልናሳያቸው ነው፤ ውጊያው ሊጀመር ነው፤” እያሉ ብጥብጥ ሊያስነሡ የሞከሩት በጋሻው ደሳለኝ፣ ትዝታው ሳሙኤልና ተረፈ አበራ ከሌሎች 13 ግለሰቦች ጋራ በፖሊስ ቁጥጥር ሥር እንዲውሉ ተደርጓል፤ ያሬድ አደመ በግርግር ተሰውሯል ተብሏል፡፡ ኀሙስ ዕለት በአዲስ አበባ ከተማ 22 ካልዲስ ካፌ አካባቢ በጋሻው ደሳለኝን በድንገት የከበቡት ወጣቶች “የንፍሮ ቀቃይ ልጅ! ከወንጌሉ ይልቅ በዕድር ደንብ ነው ያለነው” ሲል በተናገረው ድፍረት ተጠይቋል፤ በስሕተቱ የሚቀርብበትን ተቃውሞ “ረብሻ፣ ጫጫታ፣ ዝላይ” በማለት የሚገልጸው በጋሻው ግን በድፍረት ስለተናገረው ቃል ይቅርታ ከመጠየቅ ይልቅ ስሕተቱን ማብራራት በመምረጡ በወጣቶቹ ሊደርስበት ከነበረው ጥቃት በገላጋዮች ብርታት እንደተረፈ ተዘግቧል፡፡

ሐምሌ 5 ቀን 2003 ዓ.ም ብፁዕ ወቅዱስ አቡነ ጳውሎስ 19^ኛ ዓመት በዓለ ሢመታቸውን ያከብራሉ፡፡ ሙስናና ኑፋቄ ተሳስረውና ተመጋግበው በጎለበቱበት የአምስተኛው ፓትርያርክ የሁለት ዐሥርት ዓመት ዐምባገነናዊ አስተዳደር ቤተ ክርስቲያናችን በቅርብ ታሪኳ ባላየችው መጠን የቤተ ክህነቱን መዋቅር አልፈስፍሶታል፡፡ በዚህም በመጠቀም እኒህ አጉራ ዘለልና የፕሮቴስታንታዊ-ተሐድሶ-ኑፋቄ መልእክተኞች ሠልጥነው ቆይተዋል፡፡ ይሁንና ለሃይማኖታቸው ቀናዒ በሆኑ አገልጋዮችና ምእመናን መነሣሣትና መቀናጀት ኀይላቸው እየተዳከመ ቢሆንም ቀደም ሲል በተገለጸው መልኩ በአንዳንድ ስፍራዎች እየተሹለከለኩ በሚፈጽሙት ምእመኑን የሚያስቆጣ ተግባር ሁኔታው ወዳልተፈለገ ውጤት ከማምራቱ በፊት ሊታሰብበት ይገባል፤ ወደ ጠቅላይ ቤተ ክህነቱ የውስጥ መዋቅር ለመግባት አቅርበውታል የተባለው ጥያቄ ተፈጻሚ ከሆነም የሚከተለውን ጥፋት ማንም ሊገምተው እንደማይችል በተለይም ለፓትርያርክ አቡነ ጳውሎስ ግልጽ ሊሆን ይገባል፡፡

የደብረ ናዝሬት ቅዱስ ዮሴፍ ቤተ ክርስቲያን አስተዳደር ሕገ ወጥ ሰባክያንን አገደ

2011-07-06T03:00:00.002-04:00

የአዲስ አበባ ሀ/ስብከት የአጥቢያውን የስብከተ ወንጌል አገልግሎት በተመለከተ ‹‹በበላይነት መምራትና ማስተዳደር አልቻለም›› ባለው የደብሩ አስተዳደር ጽ/ቤት ላይ አስተዳደራዊ ውሳኔ እንደሚሰጥ አስጠንቅቆ ነበር
ሰንበት ት/ቤቱ በሕገ ወጥ ሰባክያኑና የእነርሱ ተባባሪ በሆኑት የአጥቢያው ስ/ወንጌል ሓላፊዎች የሚመራው የስብከተ ወንጌል አካሄድ ‹‹ወዳልተፈለገ ግጭት›› እንደሚያደርስ በመጥቀስ ለሀ/ስብከቱ አቤቱታ አቅርቦ ነበር
በሙሰኛነቱና ባለበት የሥነ ምግባር ችግር ተቃውሞ የተነሣበት ናሁ ሠናይ ነጋ የተባለው የአጥቢያው ስብከተወንጌል ሓላፊ የእገዳውን ምክንያትና ፋይዳ ለማስተባበል እየተፍጨረጨረ ነው።
“ሥላሴ አትበሉ ብያለሁ፤ ሥላሴን አትመኑ ግን አላልሁም” (በጋሻው ደሳለኝ- በኢ.ቢ.ኤስ ቴሌቪዥን)

(ደጀ ሰላም፤ ጁላይ 6/2011, Read in PDF.)፦ በአዲስ አበባ ሀገረ ስብከት የደብረ ናዝሬት ቅዱስ ዮሴፍ ቤተ ክርስቲያን አስተዳደር ጽ/ቤት በቅዱስ ሲኖዶስ፣ በጠቅላይ ቤተ ክህነት ጽ/ቤት እና በሀገረ ስብከት ያልተፈቀደላቸው ሰባክያን ከሰኔ 24 ቀን 2003 ዓ.ም ጀምሮ በአጥቢያው እንዳይሰብኩ መታገዳቸውን አስታወቀ፤ ጽ/ቤቱ ይህን ያስታወቀው የእገዳውን ውሳኔ ተቀብለው ተግባራዊ እንዲያደርጉ የደብሩ ስብከተ ወንጌል ሓላፊዎች ለሆኑት መ/ር ናሁ ሠናይ ነጋ እና መ/ር ታሪኩ አበራ በቁጥር 6020/03 በቀን 28/10/03 በጻፈው ደብዳቤ ነው፡፡

የሰበካ ጉባኤው ጽ/ቤት በቁጥር 4561/71/03 በቀን 24/10/03 የሀገረ ስብከቱ ጽ/ቤት ለደብሩ አስተዳደር የጻፈውን ትእዛዝ በመጥቀስ በጥብቅ እንዳስታወቀው ውሳኔው በደብሩ የስብከተ ወንጌል ሓላፊዎች ተግባራዊ የማይደረግ ከሆነ በሀገረ ስብከቱ ጽ/ቤት መመሪያ መሠረት አስተዳደራዊ ርምጃ ለመውሰድ እንደሚገደድ አስጠንቅቋል፡፡

በዚህ የእገዳ ውሳኔ መሠረት ላለፉት ሦስት ዓመታት የደብሩን አስተዳደር በተለያዩ መንገዶች ባዳከሙት የአጥቢያው ስብከተ ወንጌል ሓላፊዎች ተባባሪነት የፕሮቴስታንታዊ-ተሐድሶ-ኑፋቄ ምንደኛ እና ጥቅመኛ በሆኑት በእነበጋሻው ደሳለኝ ሕገ ወጥ ስምሪት ሥር የቆየው የደብረ ናዝሬት ቅዱስ ዮስፍ ቤተ ክርስቲያን ዐውደ ምሕረት ትላንት ማክሰኞ፣ ሰኔ 28 ቀን 2003 ዓ.ም ኣርነት(ሓራ) መውጣቱ ተረጋግጧል፤ በዚህም ሕገ ወጥ ሰባክያኑ እና ዘማርያኑ በአዲስ አበባ ሀገረ ስብከት በሚገኙ አጥቢያ አብያተ ክርስቲያን ያሏቸውን የመጨረሻ ምሽጎች እያጡ ስለመሆናቸው ከመቼውም ጊዜ በላይ ግልጽ ሆኗል፡፡

ይሁንና የደብሩ ስብከተ ወንጌል ሓላፊ የሆነው ናሁ ሠናይ ነጋ በሕገ ወጥ ሰባክያኑ ላይ የተላለፈው ውሳኔ ተግባራዊነት በተረጋገጠበት በትላንቱ የሠርክ ስብከተ ወንጌል መርሐ ግብር ላይ፣ ‹‹ምእመናን፣ ከባድ ፈተና ገጥሞናል፤ ወንድሞቻችን በጠቅላይ ቤተ ክህነት ስብሰባ ላይ ስለሆኑ ነው ያልመጡት›› በሚል የመታገዳቸው ውሳኔ በግልጽ ከማሳወቅና በተለይ በጋሻው ደሳለኝ በየሳምንቱ ማክሰኞ ከሚገኝበት መድረክ የመወገዱን ምክንያት ለማስተባበል ሲሞክር ታይቷል፡፡ ቀደም ሲል በነበረባቸው የጎፋ ካምፕ ኪዳነ ምሕረት እና የገርጂ ቅዱስ ጊዮርጊስ አጥቢያ አብያተ ክርስቲያን ስብከተ ወንጌል ክፍሎች ቆይታው ወቅት ከእነ አሰግድ ሣህሌ ጀምሮ ዛሬ በሀገር ውስጥ እና በውጭ ከሚገኙት የለየላቸው የተሐድሶ ኑፋቄ አቀንቃኞች ጋራ በሚያደርገው ጥብቅ ግንኙነትና እስከ አስገድዶ መድፈር ድረስ በተረጋገጠበት የሥነ ምግባር ችግር የሚታወቀው ይህ የደብሩ የስብከተ ወንጌል ሓላፊ በቤተ ክርስቲያን ያለው ትምህርት ያልተረጋገጠ ከመሆኑም በላይ ወደ ደብረ ናዝሬት ቅዱስ ዮሴፍ ሲመጣ የመቃብር ስፍራዎች ተቆጣጣሪ ነበር፡፡

ቀስ በቀስ የደብሩ ስብከተ ወንጌል ሓላፊ እስከ መሆን ደርሶ የአጥቢያውን ጠቅላላ አስተዳደር በቁጥጥሩ ሥር ስለማስገባቱ የሚነገርለት ግለሰቡ በጋሻው ደሳለኝ ከሁለት ዓመታት በላይ በሕገ ወጥ መንገድ ተሰማርቶ ከቆየበት ዐውደ ምሕረት ቢታገድ ቤተ ክርስቲያኑን ከሀገረ ስብከቱ አስተዳደር ተገንጥሎ በቦርድ እንደሚተዳደር እስከመዛት ደርሶ እንደነበር ይነገርለታል፡፡ በመዝገብ የሚታወቀው ወርኀዊ የገቢ አቅሙ ከሚፈቅደው በላይ የአንድ ትልቅ ቪላ ቤት፣ የአንድ የቤትና የሥራ መኪና ‹ባለቤት› ስለመሆኑ የሚነገርለት ‹ናሁ ሠናይ› በቤተ ክርስቲያኑ ቅጽር የእግረኞች መረማመጃ በሸክላ አሠራለሁ በሚል ከዋጋው ውጭ እስከ ብር ዘጠኝ መቶ ሺሕ ውጪ እንዲደረግ ምክንያት መሆኑ ተጠቁሟል፡፡

የደብሩ ስብከተ ወንጌል ምክትል ሓላፊ የሆነው መ/ር ታሪኩ አበራ፣ ‹‹ተሐድሶ የለም፤ በተሐድሶ ስም የወንድሞቻችን ስም እየጠፋ ነው፤ ምእመናን ተረጋጉ፤ የበጋሻውን ዐሥሩንም ቪሲዲ አይቸዋለሁ፤ አንዳችም አላገኘሁበትም›› በሚለው የተለመደ መወራጨቱ የሚታወቅ ነው፡፡ በዚህም ሳቢያ በበርካታ መድረኮችና አጋጣሚዎች በተለያዩ መምህራንና ምእመናን ምክርና ማሳሰቢያ ሲሰጠው ቆይቷል፡፡

የአዲስ አበባ ሀገረ ስብከት በቤተ ክርስቲያኑ አስተዳደር ሥር የሚገኙ ንኡሳን ክፍሎች በቃለ ዐዋዲው ሕግና ደንብ መሠረት እንዲሠሩ፣ የደብሩ ሰባክያነ ወንጌልም ከደብሩ አስተዳደር ጽ/ቤትና ሰንበት ት/ቤት የሥራ አመራር አመራር አባላት ጋራ በመመካከርና በመግባባት የበላይ አካል መምሪያ በመጠበቅ እንዲሠሩ ማስጠንቀቂያ በሰጠበት ደብዳቤ ላይ እንደተመለከተው፣ ካለፈው አንድ ዓመት ጀምሮ የደብሩ ስብከተ ወንጌል ምክትል ሓላፊ የሆነው መ/ር ታሪኩ አበራ ‹‹ያልተፈቀደላቸውን መምህራን በዐውደ ምሕረት በመጋበዝ፣ በዐውደ ምሕረት ላይ ያልተፈለጉ ቃላትን በመናገር፣ በቃለ ዐዋዲው ሕግና ደንብ በተቋቋመው ሰንበት ት/ቤት ውስጥ ጠብና ክርክር እንዲፈጠር›› ምክንያት በመሆኑ ተጠያቂ አድርጎታል፡፡ በቅርብ ምንጮች መረጃ ከሆነ መ/ር ታሪኩ የአቋም መሻሻል ምልክቶች እያሳየ መሆኑ ተጠቁሟል፡፡

የደብሩ አስተዳዳሪና ጽ/ቤትም ‹‹የቤተ ክርስቲያኑን ዐውደ ምሕረት በቸልተኝነት በመመልከትና ቀደም ሲል በቅዱስ ሲኖዶስና በጠቅላይ ቤተ ክህነት ጽ/ቤት ያልተፈቀደላቸው ሰባክያነ ወንጌል በመድረክ እንዳይሰብኩ የተላለፈውን መመሪያ ባለማስከበራቸውና በወቅቱም አስተዳደራዊ መፍትሔ ባለመስጠታቸው›› ከተጠያቂነት እንደማይድኑ የሀገረ ስብከቱ ጽ/ቤት አመልክቷል፡፡

የእነበጋሻው ሕገ ወጥ ቡድን የታገደበት ርምጃ የተወሰደው ሰኔ 20 ቀን 2003 ዓ.ም በሀገረ ስብከቱ መሰብሰቢያ አዳራሽ የደብሩ ሰበካ ጉባኤ አባላት፣ የደብሩ አስተዳዳሪና ፀሃፊ፣ የደብሩ ሰባክያነ ወንጌል፣ የደብሩ ሰንበት ት/ቤት አመራር አባላት፣ የሀገረ ስብከቱ የሰንበት ት/ቤቶች አንድነትና የደቡብ ክፍለ ከተማ ሰንበት ት/ቤቶች ኅብረት አመራሮች በተገኙበት ከሀገረ ስብከቱ ጽ/ቤት ጋራ በተደረገው ውይይትና በተደረሰበት የጋራ ስምምነት መሠረት ነው፡፡ ቅዱስ ሲኖዶስና የመ/ፓ/ጠ/ቤ/ክ በስብከተ ወንጌልና ሐዋርያዊ ተልእኮ መምሪያ ፈቃድ ባልተሰጣቸው ሕገ ወጥ ሰባክያንና ዘማርያን ላይ የእግድ መመሪያ ካስተላለፈበት ከየካቲት ወር 2001 ዓ.ም አኳያ የደብሩ ርምጃ በእጅጉ የዘገየ ቢሆንም የፕሮቴስታንታዊ-ተሐድሶ-ኑፋቄ ምንደኞች በአዲስ አበባ አጥቢያ አብያተ ክርስቲያን ደረጃ ያላቸውን የመጨረሻ ምሽግ/መሠረት እያጡ መሆኑን እንደሚያመለክት አስተያየት እየተሰጠበት ይገኛል፡፡

ትናንት በዐውደ ምሕረቱ በየሳምንቱ ማክሰኞ የለመደውን ፕሮግራም ማካሄድ ያልተቻለው በጋሻው በግንቦት ወር አጋማሽ ከናዝሬት ጻድቁ አቡነ አረጋዊ ቤተ ክርስቲያን ያለስብከተ ወንጌሉና አስተዳደሩ ዕውቅና ከተጠራበት ጉባኤ በምእመናን ፊት ከዐውደ ምሕረት ተባሯል፡፡ ለሰኔ 12 የቅዱስ ሚካኤል ክብረ በዓል ወደ ክብረ መንግሥት እያመራ ሳለ አለታ ወንዶ ከተማ ፖሊስ በቁጥጥር ሥር ውሎ የተቆጣው ምእመን ብትር ሳያርፍበት በመጣበት እግሩ እንዲመለስ ተደርጓል፡፡ ካለፈ ድርጊት የመማር ሰብአዊ/ኣእምሯዊ ችሎታ የጎደለው በጋሻው ግን በሳምንቱ መጨረሻ በተላለፈው አንድ ‹ቃለ ምልልሱ› ‹‹ሥላሴ አትበሉ ብያለሁ፤ ሥላሴን አትመኑ ግን አላልኩም፤. . .ከልጅነታችን ጀምሮ ስለ ሥላሴዎች ስንማር ነው ያደግነው…..›› እያለ ከመወሻከት አልታቀበም፡፡ እየገጠመው ያለው ተቃውሞ የተደራጀና በመጠናከር ላይ ስለመሆኑ ያመነው በጋሻው ከዚህ በኋላ ለሚነሣበት ተቃውሞ ሁሉ በቪሲዲ ምላሽ መስጠትን ተግባሩ እንደሚያደርግ ዝቷል!!!

የማ/ቅዱሳን ዋና ፀሐፊ መምህር ሙሉጌታ ኃ/ማርያም፤ ከ“ዕንቁ” መጽሔት ጋር ያደረጉት ቃለ ምልልስ

2011-07-05T00:16:00.000-04:00

Dear all,

Most of our readers have complained that the interview was not readable. Here (click) we tried to get a better copy, with better clarity. We thank you for your comments and suggestions.

DS Team

የማ/ቅዱሳን ዋና ፀሐፊ መምህር ሙሉጌታ ኃ/ማርያም፤ ከ“ዕንቁ” መጽሔት ጋር ያደረጉት ቃለ ምልልስ: (PDF)::

“ጳጳሶቹ አይረቡም … (ቤተ ክህነቱ) ወደ ሞት አፋፍ እየሄደ ነው” (አቦይ ስብሐት ነጋ)

2011-07-02T18:28:00.000-04:00

(ደጀ ሰላም፤ ጁላይ 1/2011, To Read in PDF, click HERE)፦ የሕወሐት/ኢሕአዴግ የፖለቲካ መሐንዲስ መሆናቸው የሚነገርላቸው አረጋዊው አቶ ስብሐት ነጋ ስለ ቤተ ክህነት በሰጡት ግልጽ አስተያየት ላይ “ጳጳሶቹ አይረቡም”፣ ቤተ ክህነቱም “ወደሞት አፋፍ እየሄደ ነው” ሲሉ ተናገሩ። ዛሬ አርብ ሰኔ 24/2003 ዓ.ም በወጣው “ፍትሕ” ጋዜጣ ላይ ረዥም ጽሑፍ ያስነበቡት አቶ ስብሐት ነጋ (በተለምዶ አቦይ ስብሐት ይባላሉ) ስለ ቤተ ክህነቱ በከፋ አስተዳደራዊ ብልሽት ውስጥ መውደቅ ምክንያቱ “ራሱ ቤተ ክህነቱ” እንጂ መንግሥት አለመሆኑን አብራርተዋል።

ባለፈው ሳምንት አርብ ሰኔ 17/2003 ዓ.ም ወጥቶ በነበረው የፍትሕ ጋዜጣ ላይ አቶ ተመስገን ደሳለኝ የተባሉ ግለሰብ ለሰጡት አስተያየት መልስ በሆነው በዚህ የአቶ ስብሐት ማብራሪያ ቤተ ክህነት ከጥንት ዘመን ጀምሮ ከመንግሥት ጋር ተጣብቃ እንደኖረች፣ አጼ ኃ/ሥላሴ “ቅዱስ ተብለው ታቦት ተቀርጾላቸው እንደነበር”፣ ለዚህ ደግሞ በዋነኛነት ተጠያቂው ቤተ ክህነቱ ራሱ መሆኑን ዘርዝረዋል። “ኦርቶዶክስ ከመንግሥት ሳይለያይ ለመቆየቱ ዋናው ተጠያቂዎች የቤተ ክህነት ኃላፊዎች የነበሩ ሰዎች ናቸው። መንግሥታቱ በሁለተኛ ደረጃ ይጠየቃሉ። ‘ፕሮፌሰሮቹ (እነ ፕሮፌሰር መስፍንን ለማለት ይመስላል) እና ሌሎች አማኞች ያን ጊዜ ባለመናገራቸውና ባለመጻፋቸው በምን ደረጃ ይጠየቃሉ?’ የሚል ጥያቄም ሊነሣ ይገባዋል” ሲሉ ጽፈዋል።

“ዋናው ነገር ቤተ ክህነት ከመንግሥት ተጣብቆ በመቆየቱ፣ የሃይማኖት ተቋምነቱ እየወደቀ መጥቷል። አሁንስ ሃይማኖትና ፖለቲካ በሕገ መንግሥቱ ደረጃ በጽኑ እምነት ከተለየበት ወዲህ (ቤተክህነቱ) ከደረሰበት ድቀት እያንሰራራ ነው ወይስ በነበረበት ጉዳት ደረጃ ነው ያለው? የአሁኑ ፓትርያርክ ሥራ ከጀመሩ ጀምሮ ስለ ቤተ ክህነቱ የሚወራው እጅግ በጣም ዘግናኝና አሳፋሪ የአስተዳደር ጉድለት ተነሥተን ወደ ሞት አፋፍ እየሄደ ነው የሚያሰኝ ነው” ብለዋል።

በመቀጠልም “የቤተ ክህነቱ አስተዳደር ብልሽት የሚባሉ ዘርፈ ብዙ ናቸው። አማኝ ሐቁን የመስማት መብት ያለው ይመስለኛል። ሌሎች ሃይማኖቶች እንደ ቤተ ክህነት ለምን ክፉ ወሬ አይወራባቸውም። በራሱ ውስጣዊ ድክመት እየተጎዳ የመታ ቢሆንም ኦርቶዶክስቤተ ክርስቲያን በታሪኩ የሀገር ፀጋ ሆኖ ነበር የቆየው፤ ፀጋነቱ በዚህ ደረጃ መውደቅ የለበትም ነው የምለው በዚህ አጋጣሚ” ሲሉ አበክረው አሳስበዋል።

ብዙ ጊዜ እንደሚነገረው “የቤተ ክህነቱ አሳዛኝ ቦታ መውደቅ ተጠያቂው መቶ በመቶ ራሱ (ቤተክህነቱ)ነው። ሕገ መንግሥት ከፖለቲካ ነጻ አድርጎት እያለ ለምን?” ሲሉ ይጠይቁና “ባይኖርስ (ከፖለቲካ ነጻ ባይሆንስ?) ለእምነታቸው ለምን አይሠሩም? ጳጳሳቱ አይረቡም ያልኩበት ምንክንያት ከዚህ አጠቃላይ መርሕ ብቻ ተነሥቼ አይደለም። አብዛኞቹ ከድሮ ጀምረው በአቡነ ጳውሎስ አስተዳደር እንደሚያለቅሱ አውቃቸዋለሁኝ። ነገር ግን ትርጉም ያለው ሥራ አልሠሩም። ለዚህ ነው አይረቡም ያልኩበት ምክንያት። አሁንም ልጨምርበትና ለእምነታቸው አልረቡም።” ብለዋል።

ስለ ማ/ቅዱሳንም እግረ መንገዳቸውን ያነሡት አቶ ስብሐት “እኔ እንደሚመስለኝ፣ ባለኝ ቀጥተኛ ትዝብትም፣ ማህበረ ቅዱሳን የቤተ ክህነት እዳ ነው። ቀጥተኛ ትዝብቴ፣ የቤተ ክህነትን አስተዳደር ለማሻሻል መጠነኛ እንቅስቃሴ ሲጀመር ገንቢ ተራ (ገንቢ ሚና) ከመጫወት አፍራሽነት ይበዘበታል። አልፎ አልፎም ብልሽት እያዩ ዝምታ ይበዛል። የተቃዋሚ ፖለቲካ መድረክነትም እንዳለበት ይወራል። ይህ ትክክል ከሆነ እጅግ በጣም የሃይማኖት ብቻ ሳይሆን የሃገር ስርዓት ማለት ህገ መንግስት የመጣስ ክህደት ነው” ሲሉ ተናግረዋል።

“ቤተ ክህነት የራሱን ድክመት እንዳያይ ማድረግ … ቤተ ክህነቱንም በጣም ይጎዳል። … ቤተ ክህነትን ፖለቲካዊ ጣልቃ ገብነት ነው የመዳከምህ ምክንያት አንበለው። ድክመቱ የራሱ የውስጡ ሁለገብ አስተዳደራዊ ብልሽት ነው። ተደጋግሞ አቤቱታ ቀርቦለት ያላጣራው ከሆነ አሁንም ብልሽቱ የራሱ ነው።” ሲሉ አብክረው ገልጸዋል።

ሁለት ሊነበቡ የሚገባቸው ቃለ ምልልሶች

2011-07-02T12:54:00.001-04:00

Dear all, We know the scanned pages are blurred, but that is all we have. We apologize for the inconvenience. በአዲስ አበባ ከሚታተሙት መጽሔቶች መካከል ሁለቱ ማለትም "ዕንቁ" እና "አርሒቡ" ደጋግመን ስንዘግባቸው በቆየናቸው ርዕሰ ጉዳዮች ዙሪያ የማ/ቅዱሳን ዋና ፀሐፊ የሆኑትን መምህር ሙሉጌታ ኃ/ማርያምን እና ዘማሪ እስጢፋኖስን ቃለ መጠይቅ አድርገውላቸዋል።

መምህር ሙሉጌታ ከዕንቁ ጋር ያደረጉት ቃለ ምልልስ ለማንበብ (PDF) ይህንን ይጫኑ፤
ዘማሪ እስጢፋኖስ ከአርሒቡ ጋር ያደረገውን ለማንበብ (PDF) ይህንን ይጫኑ፤

በ“ሰባት ወይራ ሆቴል” አስተዳደር ጉዳይ የቅዱስ ላሊበላ ደብር እና ጠቅላይ ቤተ ክህነት እየተወዛገቡ ነው

2011-07-02T01:10:00.001-04:00

አስተዳዳሪውን ያባረሩት የምስካየ ኅዙናን መድኃኔዓለም ገዳም ማኅበር በብፁዓን ሊቃነ ጳጳሳት ሽምግልና አስተዳዳሪው “ለተወሰነ ጊዜ ወደ ገዳሙ ማረፊያቸው ገብተው በክብር እንዲወጡ” በሚል ተስማምተዋል፤ ወ/ሮ እጅጋየሁ በየነ በበኩላቸው “ሳልበታትነው” በሚል በገዳሙ ማኅበር አንድነት ላይ መዛታቸው ተሰምቷል፤

(ደጀ ሰላም፤ ጁላይ 2/2011, TO READ THE NEWS IN PDF, CLICK HERE)፦ የቅዱስ ላሊበላ ደብር እና የጠቅላይ ቤተ ክህነት የቤቶችና ሕንጻዎች አስመላሽ ኮሚቴ በ“ሰባት ወይራ” ሆቴል አስተዳደር ጉዳይ እየተወዛገቡ ነው፡፡
የደብሩ አስተዳዳሪ ቆሞስ አባ ገብረ ኢየሱስ መኮንን በጠቅላይ ቤተ ክህነት ዋና ሥራ አስኪያጅ ብፁዕ አቡነ ፊልጶስ ፊርማ ተጠርተው ወደ አዲስ አበባ ከመጡ በኋላ ትናንት ሰኔ 23 ቀን 2003 ዓ.ም ወደ ኮሚቴው ቀርበው “በሰባት ወይራ ሆቴል ጉዳይ ሕዝቡን እያነሣሱ ነው” በሚል “ተግሣጽና ምክር” ተሰጥቷቸዋል ተብሏል፡፡

“ተግሣጽና ምክር” ተደርጎበታል በተባለውና የደብሩ አስተዳዳሪ ከአራት ተወካዮች ጋራ በተገኙበት ስብሰባ በጉዳዩ ላይ “ብቻዬን አልወስንም” ያሉት ብፁዕ አቡነ ፊልጶስ፣ “የሆቴሉ ባለቤትነትና አስተዳደር ጉዳይ በቋሚ ሲኖዶስ ተጠንቶ መፍትሔ ይሰጥበታል” በማለት ወደ ቅዱስ ሲኖዶስ ጽ/ቤት እንደመሩት ተዘግቧል፡፡

የደብሩ አስተዳዳሪ ቆሞስ አባ ገብረ ኢየሱስ መኮንን በስብሰባው ላይ፣ “የባለቤትነት ጥያቄ የጠየቀው ሕዝቡ ነው፤ እኔ አይደለሁም፤ ደብዳቤ ጻፉና (ኮሚቴውን) ካስፈለገ በሕዝብ ፊት ይነበብ፤ ሕዝቡ ይጠየቅ” በማለት አቋማቸውን አጠንክረው እንዲገልጹ አደራ ካሏቸው ምእመናን ተቃራኒ አካሄድ መከተላቸው ተገልጧል። ከፓትርያርኩ ጋርም ሳይገናኙ እንዳልቀረ እየተነገረ ይገኛል፡፡ አስተዳዳሪው ቆሞስ አባ ገብረ ኢየሱስ በርክበ ካህናት ቅዱስ ሲኖዶስ ምልአተ ጉባኤ ለኤጲስ ቆጶስነት ከታጩት 30 ያህል ቆሞሳት አንዱ የነበሩና ለወደፊቱም ተስፈኛ በመሆናቸው የምእመኑን ጥያቄ “ጉዳዩ የእኔ አይደለም” በሚል መንፈስ እንዳቀረቡት ተደርጎ ተወስዶላቸዋል - አንድም ኤጲስ ቆጶስነቱ ታስቦ እንዳይቀር፣ ዳግመኛም ከእልቅናቸው እንዳይነሡ፡፡

የደብሩ አስተዳደርና የከተማው ምእመናን ሆቴሉ እንዲመለስላቸው ለረጅም ጊዜ አበክረው ሲጠይቁ የቆዩ ቢሆንም ሆቴሉ የሚገኝበት ሥፍራ የዓለም ቅርስ የሆነው ሕንጻ ላሊበላ በሚገኝበት አቅራቢያ በመሆኑ በቅርቡ ይፈርሳል ተብሏል፡፡

የግርማዊ ቀዳማዊ ዐጼ ኀይለ ሥላሴ የልጅ ልጅ የሆኑት የልዕልት ኂሩት ደስታ ንብረት የነበረውና ልዕልቲቱ በ1963 ዓ.ም “ለቅዱስ ላሊበላ ደብር መርጃ ይሁን” በሚል የሰጡት የሰባት ወይራ ሆቴል ባለቤትነት የቅዱስ ላሊበላን ደብር አስተዳደርን ከመንበረ ፓትርያርኩ የቤቶችና ሕንጻዎች አስመላሽ ኮሚቴ ጋራ እያወዛገበ ያለው ሆቴሉ ልዕልቲቱ ደብሩ ሆቴሉን በባለቤትነት ይዞ እያስተዳደረ ገቢውን ለማስቀደሻ እና ለጧፍ እንዲጠቀምበት የጻፉትን ደብዳቤና በሕይወት የሚገኙ የዐይን እማኞችን ምስክርነት፣ የመንግሥት ፕራይቬታይዜሽን ኤጀንሲ በ1991 ዓ.ም የሆቴሉ ንብረትነት የደብሩ መሆኑን ያረጋገጠበትን ሰነድ እንዲሁም ደብሩ ለፍ/ቤት ባቀረበው የይገባኛል ጥያቄ መሠረት የባለቤትነት መብቱን ያረጋገጠበትን ውሳኔ በማስረጃነት ይጠቅሳሉ - ለደብሩ የሚሟገቱ ምንጮች፡፡

በደርግ/ኢሕዴሪ መንግሥት ተወርሶ ከለውጡ በኋላ ከ1991 - 1997 ዓ.ም በፕራይቬታይዜሽን ኤጀንሲ ሥር የቆየው ሆቴሉ በ1997 ዓ.ም ነበር ከደብሩ ጋራ ርክክብ ለማድረግ የወሰነው፡፡ በዚህ ወቅት “በደርግ መንግሥት ተወርሰው የነበሩትን ቤቶችና ሕንጻዎች የማስመለሰው እኔ ነኝ፤ የሰባት ወይራም ጉዳይ ማለቅ ያለበት በእኔ ሥር ነው” ያለው በጠቅላይ ቤተ ክህነት የቤቶችና ሕንጻዎች አስመላሽ ኮሚቴ ከፕራይቬታይዜሽን ኤጀንሲ ተረክቦ ለሰሜን ወሎ ሀገረ ስብከት፣ ሀገረ ስብከቱም ለደብሩ ሊሰጥ ስምምነት ተደርሶ ነበር፡፡ ይሁንና በዚሁ በ1997 ዓ.ም አስመላሽ ኮሚቴው ሆቴሉን ለማከራየት ጨረታ ያወጣበታል፤ ለደብሩም “የባለቤትነት” በሚል ብር 2500 ለመስጠት ይወስናል፡፡

በጨረታው መሠረት ቸሩ አበበ የተባሉ ምእመን በየወሩ ብር 32,000 በማቅረብ ከፍተኛውን የኪራይ ዋጋ ቢያቀርቡም ብር 25,000 ኪራይ ላቀረቡትና የአቡነ ጳውሎስ ዘመድ ናቸው ለተባሉት ለአቶ አምኃ ኀይለ ሥላሴ ይፈቀዳል፡፡ ይህ የኪራይ ዋጋ እንደተባለው በየወሩ ለቤተ ክህነቱ መከፈሉን እንደሚጠራጠሩ የሚገልጹት ምንጮቹ፣ ለደብሩ ባለቤትነት ተብሎ የሚከፈለው ብር 2 ሺህ 500 በታኅሣሥ 2003 ዓ.ም ወደ ብር 5000 ከፍ ቢልም በየጊዜው ሲስተጓጎል መቆየቱን ያስረዳሉ፡፡

በየዓመቱ በቅዱስ ላሊበላ ደብር በድምቀት በሚከበረው የልደት በዓል ወቅት ብቻ ከብር አንድ ሚልዮን በላይ ገቢ እንደሚያስገኝ በተመለከተው የሰባት ወይራ ሆቴል ሥራ ከ1997 ዓ.ም ጀምሮ ዳጎስ ያለ ገቢ ሲያካብቱ የቆዩት ግለሰቡ ለመንግሥት የሚከፍሉት ግብር አልነበራቸውም፤ “የቦታ ግብርና የአከራይ ተከራይ ተጠይቀውም አያውቁም፡፡” ጉዳዩን ያጠና የሚመስለው የገቢዎች ጽ/ቤትም ባለቤትነት የሚለው አካል ብር 216,000 ውዝፍ ግብር እንዲከፈል ያዝዛል፡፡

ይህ በእንዲህ እንዳለ በዓለም የቅርስ ይዞታዎች መስፈርት መሠረት “ኮር ዞን” ውስጥ የሚገኝ ማንኛውም ግንባታ እንዲፈርስ/እንዲጸዳ የሚያዝዝ በመሆኑ በ”ኮር ዞን” ውስጥ ያረፈው ሰባት ወይራ ሆቴልም ተነሥቶ ምትክ ቦታ እንዲሰጠው ይወሰናል፡፡ የአቶ አምኃ ኀይለ ሥላሴ ተወካይ ሆነው ሆቴሉን የሚያስተዳድሩት ግለሰብም ሆቴሉ ፈራሽ መሆኑን በመረዳት የሆቴሉን ጥንታዊ ዕቃዎች በአሸተን ማርያም አቅራቢያ ወዳሠሩት ሎጅ ማጋዝ ይጀምራሉ፤ እጅ ከፍንጅ ተይዘውም በደብሩ ጽ/ቤት ክስ ይመሠረትባቸዋል፡፡

በዚህ ወቅት የጠቅላይ ቤተ ክህነቱ የቤቶችና ሕንጻዎች አስመላሽ ኮሚቴ ሊቀ መንበር መጋቤ ካህናት ኀይለ ሥላሴ ዘማርያም በተልእኮ ገሥግሰው ሄደው፣ “መክሰስ ያዋጣል ወይ? ብንስማማ አይሻልም ወይ? ሆቴሉ ይመለስልን ካላችሁም 100,000 እንስጣችሁ …” በማለት ለማግባባት ይሞክራሉ፡፡ የደብሩ አስተዳደር ጽ/ቤትም የቅዱስ ላሊበላ ከተማን ምእመን ድምፅ/አደራ በመያዝ የመጋቤ ካህናቱን ማባበያ ይቃወማሉ፤ ስለተቃውሟቸው ከመጋቤ ካህናቱ የተሰጣቸው ማስፈራሪያም “አንለቃችሁም፤ ክስ የትም አያደርሳችሁም፤ ምድር ትገባላችሁ!!” የሚል እንደነበር ምንጮቹ አጋልጠዋል፡፡

የቤቶችና ሕንጻዎች አስመላሽ ኮሚቴ ከተቋቋመበት ከ1987 ዓ.ም አንሥቶ እስከ አሁን ድረስ በቀድሞው መንግሥት ተወርሰው ከነበሩት ቤቶችና ሕንጻዎች 700 ያህሉን በማስመለሱ የተመሰገነ የሥራ አፈጻጸም ያላቸው መጋቤ ካህናቱ እንዲህ ያለ ዛቻ በመናገራቸው የደብሩን አስተዳደርና ምእመኑን ክፉኛ አሳዝነዋል ተብሏል፡፡ ከእርሳቸው በባሰ አኳኋን ለሕግ የበላይነት እንዲቆሙ የሚጠበቅባቸው የጠቅላይ ቤተ ክህነቱ ነገረ ፈጅ “ስለ ተሰረቀው ንብረት ምን አገባችሁ!” በማለት ለመገሠጽ መሞከራቸው ግርምትን ፈጥሯል፡፡

በሌላ በኩል እሑድ፣ ሰኔ 19 ቀን 2003 ዓ.ም የምስካየ ኅዙናን መድኃኔዓለም ገዳም አስተዳዳሪ መልአከ ሰላም አባ ተክለ ማርያም ዘውዴ ከወጡበት ተመልሰው እንዳይገቡ በማገድ ርምጃ የወሰዱት የገዳሙ ማኅበር አባላት፣ አስተዳዳሪው ወደ ገዳሙ ተመልሰው የተወሰነ ቆይታ ካደረጉ በኋላ ከሓላፊነታቸው እንዲነሡ ጉዳዩን ከሸመገሉት አባቶች ጋራ ስምምነት ላይ መድረሳቸው ተገልጧል፡፡ “የገዳሙን ት/ቤት፣ ክሊኒክና ኬክ ቤት እንዲሁም ለሙዓለ ሕፃናትና ሁለገብ አገልግሎት የተሠራውን ሕንፃ አስተዳደር ከገዳሙ በመለየት ለብዝበዛ አጋልጠዋል፤” በሚል ባለፈው ሳምንት እሑድ ከቅዳሴ በኋላ አስተዳዳሪውን በወጡበት ያስቀሩት 67 የገዳሙ ማኅበር አባላት የአስተዳዳሪውን መኖሪያ ቤት አሽገውና ስልካቸውን ቆርጠው የውስጥ ዙሪያ ጥበቃቸውን በማጠናከር የሚመጣውን ተጽዕኖ ለመቀበል ተዘጋጅተው ነበር፡፡

ይሁንና ሰኔ 22 ቀን 2003 ዓ.ም ጠዋት የገዳሙ የበላይ ጠባቂ በሆኑት ብፁዕ አቡነ ገሪማ፣ ብፁዕ አቡነ አረጋዊ፣ ሊቀ ካህናት ብርሃኑ ገብረ አማኑኤልና ቀሲስ በላይ መኮንን አማካይነት በተደረገው ውይይት አስተዳዳሪው ወደ ገዳሙ ተመልሰውና ከማንኛውም ሓላፊነት ተገልለው በማረፊያቸው ጥቂት ቆይታ ካደረጉ በኋላ በሌላ እንዲተኩ ስምምነት መደረሱ ተዘግቧል - “የመፍትሔው አካሄድ አለቃው በወጡበት ከቀሩ ሌላ የሚቀበለን ደብር አይኖርም የሚል ይመስላል፤” ብለዋል የጉዳዩ ታዛቢዎች፡፡

በዚህም መሠረት ወደ ገዳሙ ማረፊያቸው ሲመለሱ ከ67 ማኅበር መካከል በሁለት ወዳጆቻቸው ብቻ አቀባበል የተደረገላቸው አስተዳዳሪው ከፍተኛ መረበሽ ይታይባቸው እንደነበር ተመልክቷል - “አስታርቁኝ እንጂ” ሲሉ ሽማግሌዎቹን ቢማፀኑም “የለም፣ እኛ አድርሱ ነው የተባልነው፤ የቀረውን እርስዎ ይጨርሱ” በሚል ተመልሶላቸዋል፡፡ አስተዳዳሪው ለምን ያህል ጊዜ በገዳሙ እንደሚቀመጡ የተወሰነ ቀነ ገደብ የለም፡፡ መልአከ ሰላም አባ ተክለ ማርያም በግንቦቱ ርክበ ካህናት ለኤጲስ ቆጶስነት ከታጩት ቆሞሳት መካከል አንዱ እንደነበሩ ተጠቁሟል፡፡

ቀደም ሲል በአሜሪካ የ12 ዓመት ቆይታ እንዳላቸው የሚነገርላቸውና በዚያ በተደረገላቸው የወ/ሮ እጅጋየሁ በየነ መስተንግዶ ውለታ እንዳለባቸው፣ አሁንም ከዚያ ተጠርተው እንዲሾሙ ሚና በተጫወቱት ወይዘሮዋ አስተዋፅኦ ውለታው ጭራሽ የከበደባቸው መልአከ ሰላም አባ ተክለ ማርያም፣ የገዳሙን የልማት ተቋማት አስተዳደር በእጅ አዙር በወይዘሮዋ ተጽዕኖ/ቁጥጥር ሥር እንዲወድቅ በማድረጋቸው ይወቀሳሉ፡፡ በእርሳቸው አስተዳደር የገዳሙ ት/ቤት አክሳሪ መሆኑን የሚናገሩት የገዳሙ አለቃ አሁን ከተሠራው አዲሱ ሁለገብ ሕንጻ የሚገኘው ገቢ ት/ቤቱን ለመደጎም እንጂ ለገዳሙ የሚያደርገው ፈሰስ እንደማይኖር በመግለጽ አስተዳደሩን ከገዳሙ ለይተዋል፤ በዚህም የሕንፃውና የት/ቤቱ ሠራተኞች ከገዳሙ ማኅበር ጋራ የጥቅም ግጭት ውስጥ እንዲገቡ በማድረግ በመካከላቸው ቅራኔ ፈጥረዋል፡፡

አሁን የገዳሙ ማኅበር አባላት ቀዳሚ ጥያቄ ለረጅም ጊዜ ኦዲት ሳይደረግ ለሙስና ተጋልጦ የቆየው የት/ቤቱ፣ የክሊኒኩ፣ የኬክ ቤቱ ሒሳብ እና የንስሓ ልጆቻቸውን እያስተባበሩ ያሠሩት የአዲሱ ሁለገብ ሕንፃ ሥራ ዲዛይንና ግንባታ ወጭ በውጭ ኦዲተር እንዲመረመር፣ ለልማት ተቋማቱ የተመራጭነት እሴት የሚሰጠው የገዳሙ መንፈሳዊ አገልግሎት ከተቋማቱ አሠራር ጋራ በአንፃራዊ አሠራር ተደጋግፎ የሚተዳደርበት ዘይቤ እንዲመቻች ነው፡፡

ይኸው የገዳሙ ማኅበር ጥያቄ ያስቆጣቸው ወ/ሮ እጅጋየሁ ተቃውሞ ከተጠናከረበት ቀን አንሥቶ በማግባባት ስም በሚልኳቸው የተለያዩ ግለሰቦች አማካይነት “ማኅበሩን እንደሚበታትኑት” መዛታቸው ተሰምቷል፡፡ ሆኖም ማክሰኞ ሰኔ 21 ቀን 2003 ዓ.ም ሁለት ጊዜ ከብፁዕ ወቅዱስ ፓትርያርኩ ጋራ የተወያዩት የማኅበሩ ተወካዮች ቀድሞም ጉዳዩ እልባት እንዲበጅለት ሲያቀርቡ የቆዩትን ጥያቄ ግልጽ በማድረግ እንዲህ ነበር ያሏቸው - “ገዳሙ ተከብሮ የቆየ ነው፤ ማኅበሩ በሴትዮዋ ጣልቃ ገብነት/በእጅ አዙር አይተዳደርም፤ የነበሩት አለቃ የሚመለሱ ከሆነ እስከ ደም መፋሰስ እንደርሳለን፤ የሚመጣውም አለቃ ቢሆን አቋሙን ግልጽ እንዲያደርግና ቃል እንዲገባ የምናደርገው ጥያቄ ይኖረናል፡፡”

(ሰበር ዜና) - የምስካየ ኅዙናን መድኃኔዓለም ገዳም መነኮሳት አስተዳዳሪውን አባረሩ

2011-06-29T03:29:00.002-04:00

To Read in PDF, Click HERE.
ፓትርያርኩ በወ/ሮ እጅጋየሁ በየነ ልመና አስተዳዳሪውን በኀይል ለማስገባት ደብዳቤ መጻፋቸው ተሰምቷል፤
በአሁኑ ሰዓት የገዳሙ የውስጥ ጥበቃ በመጠናከሩ “ይመጣል” ከተባለው የፖሊስ ኀይል ፍጥጫ እንዳይፈጠር ተሰግቷል፤
ለገዳሙ ገቢ ለማስገኘት የተሠራው አዲሱ ሁለገብ ሕንጻ ከተቀመጠለት ዲዛይን ውጭ እና ከተገመተው ዋጋ በላይ ያወጣ ነው፤

(ደጀ ሰላም፤ ጁን 29/2011)፦ የምስካየ ኅዙናን መድኃኔዓለም ገዳም ማኅበረ መነኮሳት “የገዳሙን ት/ቤት እና ሁለገብ የአገልግሎት ሕንጻ ከገዳሙ አስተዳደር በመለየት ከወ/ሮ እጅጋየሁ በየነ ጋራ በዝብዘዋል” ያሏቸውን አስተዳዳሪውን መልአከ ሰላም ተክለ ማርያም ዘውዴን አባረሩ።

ከትናንት በስቲያ የማኅበረ መነኮሳቱን ተወካዮች ያነጋገሩት ብፁዕ ወቅዱስ ፓትርያርክ አቡነ ጳውሎስ፣ “አስተዳዳሪው ቢያንስ ለሦስት ቀናት በገዳሙ ቅጽር በሚገኘው ቤታቸው አድረው ከዚያ በኋላ በሌላ አስተዳዳሪ እንደሚተኩ” ያቀረቡላቸውን “መፍትሔ መሰል ማዘናጊያ” ሳይቀበሉ ቀርተዋል፡፡ እንዲያውም ማኅበረ መነኮሳቱ የገዳሙን የፊት ለፊት በር ብቻ ለእግረኛ ክፍት አድርገው ሌሎች ደጃፎቻቸውን በመዝጋት የውስጥ ጥበቃቸውን አጠናክረዋል፡፡ “ገዳሙ የተከበረ ነው፤ ማኅበሩ በሴትዮዋ የእጅ አዙር አገዛዝ ውስጥ አይወድቅም፤ አስተዳዳሪው የሚመለሱ ከሆነ ደም ይፋሰሳል” ብለዋቸዋል - ለአቡነ ጳውሎስ፡፡ የገዳሙ አስተዳዳሪ በቅርቡ ለኤጲስ ቆጶስነት ሹመት ከታጩት ቆሞሳት አንዱና “እጅጋየሁ እያለችልኝ ምን አሆናለሁ” በሚል አዘውትረው በሚናገሩት ማስፈራሪያ የሚታወቁ ናቸው፡፡

ይህ ዜና በሚጠናከርበት ሰዓት አቡነ ጳውሎስ ለፖሊስ የጻፉትን ደብዳቤ መነሻ በማድረግ አስተዳዳሪው በፖሊስ ታጅበው እንደሚመጡ እየተጠበቀ ሲሆን በአንጻሩ ደግሞ የገዳሙን በሮች ለእግረኛ ተሳላሚ ምእመናን ብቻ ክፍት በማድረግ የገዳሙ ጥበቃ መጠናከሩ ተስተውሏል፡፡

የምስካየ ኅዙናን መድኃኔዓለም ገዳም በአዲስ አበባ ከተማ ውስጥ ከሚገኙት ቀደምት አብያተ ክርስቲያናት መካከል የሚቆጠር ሲሆን በአአገልግሎት ጥንካሬው፣ በልማት ሥራው እና በጥንቁቅ አሠራሩ ሲመሰገን የቆየ ነው። ገዳሙ የራሱ ት/ቤት በመመሥረት ለሌሎች አብያተ ክርስቲያናት አርአያ የሆነ መሆኑም ይታወቃል።

“የኢትዮጵያ ቤተ ክርስቲያን ሚና በአየር ንብረት ለውጥ” የተሰኘ ጥናታዊ የውይይት መድረክ ተካሄደ

2011-06-28T01:14:00.001-04:00

TO READ IN PDF CLICK HERE.
“ቤተ ክርስቲያን ከአየር ንብረት ለውጥ ፈንዶች (ካርቦን ንግድ) ተጠቃሚ ልትሆን ይገባል”፤
በዓመት እስከ ከ150,000 - 200,000 ሄ/ር ደን ይራቆታል፤ በመልሶ ማልማት የሚተካው ከ2000 ሄክታር አይበልጥም፤ ለብሔራዊ ፓርኮች መጀመርና ለመንግሥት ደኖች መከለል መሠረት ለሆኑት የቤተ ክርስቲያን ተፈጥሯዊ የደን ይዞታዎች መንግሥት የሕግ ከለላ እንዲሰጥ ተጠይቋል፤
በሐዲስ ኪዳን ውስጥ ብቻ ለ1733 የበሽታ ዐይነቶች ፈውስ ሊሰጡ የሚችሉ 4200 የሚደርሱ የዕፀዋት ዓይነቶች መጠቀሳቸውን ተወስቷል፡፡
ለቅብዐ ሜሮን የሚሆኑት ዕፀዋት ውጤቶች በአብዛኛው ከግብፅ እና ከሱዳን የሚመጡ ናቸው፤ በሀገር ውስጥ የማልማቱ ጅምር እንዳለ ተጠቁሟል፤

(ደጀ ሰላም፤ ጁን 28/2011)፦ የአየር ንብረት ለውጥን አሉታዊ ተጽዕኖዎች በመቀነስ እና ለውጡን በመግራት ተስማሚ የአኗኗር ሁኔታን ለመፍጠር በሚደረገው ሀገር አቀፍ የአካባቢ ጥበቃ ጥረት የኢትዮጵያ ኦርቶዶክስ ተዋሕዶ ቤተ ክርስቲያን ዋነኛ አጋር ልትሆን እንደምትችል ተመለከተ፡፡
ለአካባቢ ጥበቃ እና ክብካቤ ከፍተኛ ትኩረት ያለው የቤተ ክርስቲያኒቱ አስተምህሮ እንዲሁም የተፈጥሮ አካባቢን በመጠበቅ ረገድ ቤተ ክርስቲያኒቱ በተጨባጭ የምታበረክተው ድርሻ ተገቢው እውቅና እንዲሰጠው፣ የአየር ንብረት ለውጥን ምንነት ለማስጨበጥ የሚቀርቡ አስረጅዎች ኅብረተሰቡ በችግሩ መንሥኤዎች እና መፍትሔዎች ላይ የሚኖረውን አመለካከት የሚወስኑ በመሆናቸው ከአግባብነት አኳያ ጥንቃቄ እንዲደረግባቸውም ተጠይቋል፡፡

በኢትዮጵያ ኦርቶዶክስ ተዋሕዶ ቤተ ክርስቲያን የሰንበት ት/ቤቶች ማደራጃ መምሪያ ማኅበረ ቅዱሳን የጥናት እና ምርምር ማዕከል “የኢትዮጵያ ቤተ ክርስቲያን ሚና በአየር ንብረት ለውጥ” በሚል ርእስ ትናንት በብሔራዊ ሙዝየም አዳራሽ ባካሄደው የሙሉ ቀን ጥናታዊ የውይይት መድረክ ላይ እንደተጠቆመው፣ ቤተ ክርስቲያን የደን ሽፋን መራቆት ተባብሶ በሚታይባቸው በሰሜናዊ እና መካከለኛ የኢትዮጵያ ክፍሎች አገር በቀል ዛፎችን በመጠበቅ እና በመከባከብ እንዲሁም ለአገር በቀል ዕፅዋት የዘር ምንጭ በመሆን “የደን ደሴት” ፈጥራ መቆየቷ እምነት እና የአካባቢ ጥበቃ ያላቸውን ቁርኝት እንደሚያሳይ ተገልጧል፡፡

“የአየር ንብረት ለውጥ እና ሃይማኖታዊ እሳቤ” በሚል ርእስ ጥናት ያቀረቡት በአካባቢ ሳይንስ የግል አማካሪ የሆኑት አቶ ወንድወሰን ሚቻጎ፣ የአየር ንብረት ለውጥ ተጽዕኖዎችን ለመቆጣጠር “የጉዳት መጠኑን መቀነስ” /Mitigation/ ወይም “ተጽዕኖውን በመግራት ተስማሚ ተፈጥሯዊ አካባቢን መፍጠር” /Adaptation/ የተሰኙ ሁለት ዋነኛ አማራጮች መኖራቸውን አስረድተዋል፡፡ የአየር ንብረት ለውጥ ተጽዕኖን በመግራት ተስማሚ ተፈጥሯዊ አካባቢን መፍጠር የተሻለ ትኩረት የሚሰጠው መሆኑን የተናገሩት አማካሪው፣ ኅብረተሰቡ ስለ አየር ንብረት ለውጥ ተጨባጭ እና ታሳቢ ተጽዕኖዎች ትክክለኛ አመለካከት እና አረዳድ ይዞ ተፈጥሯዊ አካባቢውን እንዲጠበቅ እና እንዲከባከብ በማስቻል /shaping public understanding and perception of climate change adaptation/ ረገድ ቤተ ክርስቲያን ከፍተኛ ሚና እንዳላት አብራርተዋል፡፡ ለዚህም “ቤተ ክርስቲያን በአስተምህሮዋ የአየር ንብረት ለውጥን እንዴት ነው የምታየው?” የሚለው ወሳኝ መሆኑን አማካሪው ጠቁመዋል፡፡ በአሜሪካው ያሌ ፕሮጀክት በአየር ንብረት ለውጥ ግንዛቤ ዙሪያ በሠራው ጥናት እስከ 63 በመቶ አሜሪካውን የዓለም ሙቀት መኖሩን ቢያውቁም የሙቀት መጨመሩን ትክክለኛ መንሥኤ እንደማያውቁት፣ ይህም ጥቂቶች የሙቀት መጠኑ ስለ መጨመሩ የሚቀርበውን መረጃ እስከ መጠራጠር ሲያደርሳቸው ሌሎችም ስለ ችግሩ መነሻ ያልተሟላ ግንዛቤ እንዲይዙ እንዳደረጋቸው በቀረበው ጽሑፍ ላይ ተመልክቷል፡፡

ቀደም ሲል ስለ ኤች.አይ.ቪ/ኤድስ ምንነት የተላለፈበት መንገድ ቆይቶ ከቫይረሱ ጋራ በሚኖሩት ወገኖች ላይ አድልዎ እና መገለል እንዲደርስ በማድረግ በውስን አቅማችን በመከላከሉ ላይ አተኩረን እንዳንሠራ ውድ ዋጋ እንዳስከፈለን ያስታወሱት ጥናት አቅራቢው፣ ዛሬም በአየር ንብረት ለውጥ ሳቢያ የሚታየውን የድርቅ እና የጎርፍ መጥለቅለቅ ከፈጣሪ ቁጣ ወይም አንድ ጊዜ ከተወሰነ ተፈጥሯዊ ሂደት ጋራ ብቻ ተወስኖ እንዲታይ የሚያደርጉ አቀራረቦች የሰው ልጅ በቀውሱ ዙሪያ ያለበትን ሓላፊነት እንዳይወጣ የሚያዘናጉና ተነሣሽነቱን የሚያመክኑ በመሆናቸው ጥንቃቄ እንደሚያሻቸው መክረዋል፡፡ የዓለም አብያተ ክርስቲያናት በአየር ንብረት ለውጥ ጉባኤያት መሳተፍ ከጀመሩበት እ.አ.አ ከ1988 ዓ.ም ጀምሮ በተካሄዱት ስብሰባዎች የአየር ንብረት ለውጥንና የብዝሐ ሕይወት ጥበቃን ቴዎሎጂያዊ እና ኤቲካል መሠረተ ሐሳቦች ከማብራራት በቀር አማኞች በአየር ንብረት ለውጥ ላይ ስላላቸው አመለካከት እና አረዳድ ትኩረት እንዳልተሰጠው አቶ ወንድወሰን ተናግረዋል፡፡

ከዚህ አንጻር በብዙ ሚልዮን የሚቆጠሩ ምእመናንና በርካታ የዘላቂ ልማት ፕሮጀክቶች ያሏት የኢትዮጵያ ኦርቶዶክስ ተዋሕዶ ቤተ ክርስቲያን ለአካባቢ ጥበቃ የሚያስፈልጉ ቁሳዊ እና መንፈሳዊ ሀብቶች ያሏት በመሆኑ በምእመናን አመለካከት እና አረዳድ ላይ መሥራት የሚቻልና የሚገባ ስለ መሆኑ በአቶ ወንድወሰን ጥናት ላይ ተመልክቷል፡፡ ብዙዎቹ ምእመናኗ በአካባቢ መራቆት እና በአየር ንብረት ለውጥ በተጠቁት አካባቢዎች እንደ መገኘታቸውም መጠን፣ እኒህ ሀብቶቿ ወቅታዊ ይዞታቸው ታውቆና የተቀናጀ የአጠቃቀም ዕቅድ ተዘጋጅቶላቸው ስለ ችግሩ ምንነት፣ መንሥኤ እና መፍትሔ ትክክለኛ ግንዛቤ/The Right framing of perceptions on Climate Change for effective and efficient Adaptation and Implementation/ ለመፍጠር በሚያስችል አኳኋን መደራጀት እንደሚገባቸው አማካሪው አሳስበዋል፡፡

የአማካሪውን ጥናት መነሻ ያደረገውን ውይይት የመሩት ዶ/ር መኩሪያ አራጋው በበኩላቸው፣ “መሬት በተፈጥሯዊ ዑደቷ ወደ በረዷማነት እየቀዘቀዘች እንደምትሄድ ይገምት የነበረ ቢሆንም በሰው ልጅ በተለይም ያደጉት አገሮች ኢንዱስትሪያዊ ስምሪት ወደ አካባቢ አየር በሚለቋቸው ጋዞች ምክንያት ሙቀቷ እየጨመረ ነው፡፡ በኢትዮጵያ ከ350 ዓ.ዓ ጀምሮ ድርቅ ስለመኖሩ በታሪክ የተመዘገበ ቢሆንም የአየር ንብረት ለውጡ ግን በዋናነት የካርቦን ልቀትን መንሥኤ ካደረገው የዓለም ሙቀት መጨመር ጋራ የሚያያዝ ነው፡፡ ይህም ቢያንስ ከ1970 ዓ.ም ጀምሮ በተወሰዱት ሜትሮሎጂያዊ መረጃዎች ተረጋግጧል፤” ብለዋል፡፡

አንድ የውይይቱ ተሳታፊ በሰጡት አስተያየት፣ “ተፈጥሮ የእግዚአብሔር ስጦታ ናት፤ ስጦታ ደግሞ ጥበቃና ክብክቤን ይሻል፤ ተፈጥሮን መከባከብ አዳማዊ ሐላፊነትና ተግባር ነው፤ ከቅርብ ጊዜ ወዲህ ግን ‹እንደምን ማሸነፍ ትችላለህ?› እየተባሉ ከሚተረጎሙት መጻሕፍት ጀምሮ የማያቸው ነገሮች ሁሉ ለተፈጥሮ አካባቢ መጠበቅ አስተዋፅኦ ካለው ማኅበራዊ መተሳሰብ ይልቅ ግለሰባዊ አሸናፊነትን/የበላይነትን/ የሚያበረታቱ ካፒታሊስታዊ አካሄዶችን ነው፡፡ ይህም ለ'Tragedy of the Common' አደጋ ይዳርገናል፤” ይሆናል ሲሉ ተናግረዋል፡፡ እኚሁ የውይይት ተሳታፊ በአስተያየታቸው ማጠቃለያ ላይ አንድ ጥያቄ አዘል ሐሳባቸውን ሰንዝረዋል - “ቅዱስ ጴጥሮስ በካልኣይ መልእክቱ ምዕ.3 ቁጥር 8 ላይ የሰማይ ፍጥረት በትልቅ ትኩሳት ይቀልጣል፤ ምድርም በእርሷም ላይ የተደረገው ሁሉ ይቃጠላል፤ የሚል ቃል መስፈሩን በማስታወስ እየሞቀች ሄዳ በታላቅ ትኵሳት ወደምትፈታዋ ዓለም መሄዳችን ቀድሞ የተጻፈና አይቀሬ ነው፤ ስለዚህ እንሁን የምትሉት?”

በአዲስ አበባ ዩኒቨርስቲ የአካባቢ ሳይንስ ባለሞያ የሆኑት አቶ ቱሉ ቶላ ቶራ፣ “የኢትዮጵያ ቤተ ክርስቲያን አስተዋፅኦ የካርቦን ልቀትን ለመቆጣጠር” በሚል ርእስ ባቀረቡት ሌላ ጥናት፣ ከ35,000 በማያንሱት የቤተ ክርስቲያኒቷ አድባራት እና ገዳማት ይዞታዎች ውስጥ ተጠብቀው የሚገኙት የአገር በቀል ዛፎች በሌላው የሀገሪቱ ክፍል ከሚገኙት የደን ሽፋኖች በላቀ መልኩ ለዓለም ሙቀት መጨመር ከፍተኛ አስተዋፅኦ ያለውን የካርቦን ጋዝ አቅበው የማስቀመጥ/Carbon Sequestration/ ከፍተኛ አቅም እንዳላቸው፣ ይህም ለካርቦን ንግድ/Carbon trade/ ምቹ ሁኔታ በመፍጠር ቤተ ክርስቲያንንና ሀገርን የጋራ ተጠቃሚ እንደሚያደርግ በጥናታቸው ማረጋገጣቸውን አስረድተዋል፡፡ ባለሞያው በአዲስ አበባ ከተማ የተለያዩ አቅጣጫዎች የሚገኙ የሰባት አጥቢያ አብያተ ክርስቲያናትን/ብርሃናተ ዓለም ጴጥሮስ ወጳውሎስ፣ ገነተ ጽጌ ቅዱስ ጊዮርጊስ፣ ደብረ ቀራንዮ መድኃኔዓለም፣ ርእሰ አድባራት እንጦጦ ቅድስት ማርያም፣ ቀጨኔ ደብረ ሰላም መድኃኔዓለም፣ መንበረ ጸባኦት ቅድስት ሥላሴ ካቴድራል እና የካ ደብረ ሣህል ቅዱስ ሚካኤል/ የተፈጥሮ ደን ይዞታዎች በዝርያ፣ ከመሬት በላይና ከመሬት በታች ባላቸው ዕድገት፣ ስፋትና የሽፋን መጠን በመለየት የካርቦን መጠንን አቅበው ለመያዝ ስላላቸው ጠባይ የመስክ እና የቤተ ሙከራ ምርምሮችን አካሂደዋል፡፡

በሌሎች የሀገሪቱ ስፍራዎችና በዓለም ደረቅና ርጥብ የትሮፒካል አካባቢ ከሚገኙ ተመሳሳይ ቁመና ካላቸው የደን ሽፋኖች ጋራ አነጻጽረዋል፡፡ በውጤቱም በሀገሪቱ ሌሎች ስፍራዎች ከሚገኙ ደኖችና ከውጭ ከመጡት ዝርያዎች ይልቅ ምርምሩ በተደረገባቸው አጥቢያ አብያተ ክርስቲያናት ያሉት የአገር በቀል ዛፎች ዝግ ያለና ጥንክርና ያለው የዕድገት ጠባይ ብዙ ካርበን/ከ515.30 - 2496.79 ቶን ካርቦንዳይኦክሳይድ ጋዝ በሄክታር/ አቅበው ለመያዝ ያስችላቸዋል፡፡ ይህም በከተማው የካርቦንን ልቀት በመቀነስ የአየር ንብረት ተጽዕኖውን ለመግራት፣ የከተማውን አረንጓዴ ልማት በማገዝ ለብዝሐ ሕይወት ጥበቃ ተመራጭ እንደሚያደርጋቸው ባለሞያው አስረድተዋል፡፡ ስለዚህም እንደ ወይራ፣ ዋርካ፣ የሐበሻ ጥድ፣ ኮርች፣ አርዘ ሊባኖስ፣ ግራር፣ ጠመንጃ ዛፍ፣ ዘንባባ፣ የሐበሻ ባሕር ዛፍና የመሳሰሉት ዛፎች በቆየው የቤተ ክርስቲያኒቱ አስተምህሮ መሠረት በራሳቸው ስላላቸው ዋጋ ሲባል መጠበቅ እንደሚገባቸው ባለሞያው አስገንዝበዋል፡፡ በተጨማሪም የቤተ ክርስቲያን ተፈጥሯዊ ደኖች “የዘራፊ መሸሸጊያ ሆነዋል” በሚል መመንጠራቸውን፣ በምትኩ የገበያ አዋጭነት በሚል በአትክልትና ፍራፍሬ ልማት መተካታቸውን፣ ከሰል ለማክሰል በሚል መቃጠላቸውን በመከላከል ቤተ ክርስቲያን ለአካባቢ ጥበቃ ባላት አስተዋፅኦ ፋይናንሳዊ ጥቅም/Payment for environmental services/ የሚያስገኙበትን ሁኔታ ማመቻቸት እንደያስፈልግ ባለሞያው አሳስበዋል፡፡

የቤተ ክርስቲያን ተፈጥሯዊ ደኖች አገር በቀል ዛፎች ለዘር ተርፈው የሚገኙባቸው “የደን ደሴት” መፍጠራቸውን ያስረዱት የቅርስ ጥናትና ጥበቃ ባለሞያው አቶ ተስፋዬ አራጌ፣ ቤተ ክርስቲያንዋ ያለውን አገር በቀል ዛፍ መጠበቅ ብቻ ሳይሆን አዲስ ችግኞችን በመትከልና በመከባከብ የተፈጥሮ አካባቢን በመጠበቅ የላቀ አስተዋጽኦ እያበረከተች እንደምትገኝ ገልጸዋል፡፡ በዚህ የተነሳ ቤተ ክርስቲያንዋ የራስዋን ቅጥር በደን ከመሸፈን አልፋ ዛሬ በሰሜኑ የአገራችን ክፍል ለሚገኙ ብሔራዊ ፓርኮች መመሥረት ምክንያት እንደ ሆነች መረጃዎች ያስረዳሉ፡፡ የሰሜን ብሔራዊ ፓርክ ለመመሥረቱ ከሚጠቀሱት ምክንያቶች አንዱ የቅዱስ ያሬድ ቤተ ክርስቲያን በቦታው መኖሩ ነው፡፡ በደቡብ ወሎ ዞን የደንቆሮ ደን ብሔራዊ ፓርክ መነሻው የምስካበ ቅዱሳን ማርያም ገዳም መሆንዋ እንዲሁም በጣና ደሴት ለሚገኘው የተፈጥሮ ደን ጥበቃ ዋነኛው የገዳማቱ መኖር ነው፡፡ ከዚህ በተጨማሪ ጥናት በተደረገባቸው የደቡብ ጎንደር ሦስት ወረዳዎች እንደታየው፣ እንደ ሊቦ ከምከም ጣራ ገዳም እና በፋርጣ ወረዳ የሚገኘው የዓለም ሳጋ የመንግሥት ደኖችና በዳራ ወረዳ የመካነ ሰማዕት ገላውዴዎስም ከገዳማት ይዞታዎች የተወሰዱና ዛሬም ከገዳማቱ ጋራ የተቆራኙ ናቸው፡፡

በቤተ ክርስቲያን የሚገኙ ደኖችን መቁረጥ በቃለ ዐዋዲ የተከለከለና የተወገዘ ነው፡፡ ምእመኑ የቤተ ክርስቲያን ዐጸድን መቁረጥ የሚያስቀስፍ እንደሆነ ስለሚያምን አይደፍርም፤ እንሰሳትንም አያስገባም፡፡ “ዐጸድ የሌለው ደብር ጽሕም የሌለው መምህር፣ ለሰው ጨርቅ ነው ልብሱ፤ ለቤተ ክርስቲያን ደን ነው ሞገሱ፣ ጥምጣም የሌለው ካህን፤ ጥምጣም የሌለው ካህን፣ አጸደ የሌለው ቤተ ክርስቲያን፤” የሚሉት የማኅበረሰቡ ብሂሎች የቅዱሳን መጠለያና መጠጊያ ሆኖ ለኖረው የቤተ ክርስቲያን የተፈጥሮ ደን ምእመናን ያላቸውን አመለካከትና አክብሮት የሚያጠይቁ ናቸው - እንደ አቶ ተስፋዬ ማብራሪያ፡፡

በአንጻሩ በአንዳንድ አካባቢዎች የጥቅም መጋጨት እና ከመንፈሳዊ ክብር ይልቅ ለቁሳዊ ጥቅም ዋጋ እየተሰጠው መምጣቱ፤ ምእመኑ እና የሃይማኖት መሪዎች በደንና አካባቢ ጥበቃ ላይ እያበረከቱ ያለውን ተግባር ያለመገንዘብ፣ በመንፈሳዊ መሪዎችና በግብርና ጣቢያ ሠራተኞች መካከል ደንን በመጠበቅ የጋራ ግንዛቤ ያለመፍጠር፤ መንፈሳዊ ቅርሱ/እምነቱ/ የተፈጥሮ አካባቢን ለመጠበቅ የሚያበረክተውን ድርሻ ያለመረዳት፤ የኢትዮጵያ ኦርቶዶክስ ተዋሕዶ ቤተ ክርስቲያን የተፈጥሮ አካባቢን በመጠበቅ የምታበረክተውን አስተዋፅኦ ያለመገንዝብና እውቅና ያለመስጠት በድክመት የሚጠቀሱ መሆናቸው በጽሑፍ አቅራቢው ተመልክተዋል፡፡ መንፈሳዊ መሪዎችና ቤተ ክርስቲያንዋ የተፈጥሮ አካባቢን በመጠበቅ ስለሚያበረክቱት ድርሻ ዕውቅና መስጠት፣ መንግሥትና የሃይማኖት ተቋማት በጋራና በመመካከር መሥራት፣ ለቤተ ክርስቲያን የደን ክልል በመንግሥት በኩል የሕግ ሽፋን መስጠት፣ እምነት እና የአካባቢ ጥበቃ ያለውን ቁርኝት መገንዘብ በጥናቱ የተጠቆሙ የመፍትሔ ሐሳቦች ናቸው፡፡

ለአንድ ቀን በተካሄደው በዚሁ ጥናታዊ የውይይት መድረክ ላይ ከአዲስ አበባ ዩኒቨርስቲ የአካባቢ ሳይንስ መምህራንና ተማሪዎች፣ ከአካባቢ ጥበቃ ባለሥልጣንና ከአየር ንብረት ለውጥ ጋራ ተያያዘ የሚሠሩ ልዩ ልዩ መንግሥታዊ የሆኑና መንግሥታዊ ያልሆኑ ድርጅቶች ተወካዮች፣ ሊቃውንተ ቤተ ክርስቲያን እንዲሁም የሚዲያ አካላት ተገኝተዋል፤ ከተሳታፊዎች ለቀረቡ ጥያቄዎችም በባለሞያዎቹ ምላሽ ተሰጥቶባቸዋል፡፡

ቃለ ምልልስ ከመጋቤ ሐዲስ እሸቱ ዓለማየሁ ጋር

2011-06-26T16:34:00.000-04:00

“አዲስ ጉዳይ” መጽሔት

ከመጋቤ ሐዲስ እሸቱ ዓለማየሁ ጋር ያደረገው ድንቅ ቃለ ምልልስ ስለ “ተሐድሶዎች” እና በቤተ ክርስቲያን ላይ ስለደቀኑት አደጋ::

(Click HERE to read in PDF).

ነጋድራስ ጋዜጣ ስለ ዘማሪ እስጢፋኖስ

2011-06-25T00:36:00.000-04:00

Read in PDF.
የደብረ አሚን ጻድቁ አቡነ ተክለ ሃይማኖት አጥቢያ ወጣቶች “በአስተሳሰባቸው ትክክል ናቸው” ብሏል፤
ከሕገ ወጥ ቡድኑ አባላት ጋራ “በሃይማኖትም እንደማይገናኝ” መስክሯል፤
የቅኔ፣ የድጓ እና የመጻሕፍት ሊቃውንት በየበረሓው ወድቀው እኛ ግን በገንዘብ ከብረናል፤ በስምም ታውቀናል፤ መተዳደሪያችንም ቤተ ክርስቲያን ናት፤ ሆኖም ተሐድሶ በሚል ስያሜ የቤተ ክርስቲያንን መሠረት ለመናድ መሞከር አሳዛኝ ገጽታ ነው፡፡” (ዘማሪ እስጢፋኖስ ለነጋድራስ ጋዜጣ)

(ነጋድራስ ጋዜጣ፤ ዐርብ፣ ሰኔ 17 ቀን 2003 ዓ.ም)፤ ከኦርቶዶክስ ዘማርያን አንዱ የሆነው እስጢፋኖስ ሣህሌ (ቄሴ)፣ “የቤተ ክርስቲያንን ዶግማ፣ ቀኖና እና ትውፊት ለመለወጥ ከተሰለፉ ተሐድሷውያን ጋራ አለመሆኔ ይታወቅልኝ” ሲል ገለጠ፡፡

እስጢፋኖስ (ቄሴ) ለነጋድራስ እንደገለጠው፣ ሥርዐተ ቤተ ክርስቲያንን የጠበቁ ዝማሬዎችን ሲያቀርብ መቆየቱን አስታውሶ፣ ይሁንና ራሳቸውን “ተሐድሶ” ብለው ከሚጠሩ ወገኖች ጋራ በቅርብ መታየቱ በሚያውቁት ምእመናን እና አባቶች ዘንድ ቅሬታ እንዳስነሣበት ተናግሯል፡፡

“ደጆችሽ አይዘጉ” በሚል በሚሌኒየም አዳራሽ ተካሂዶ በነበረው መርሐ ግብር በንቃት እንደተሳተፈ የገለጠው እስጢፋኖስ (ቄሴ)፣ “ያኔም ሆነ አሁን በምታወቅበት የዝማሬ አገልግሎት ስሕተት የሚገኝበት መዝሙር አልዘመርኩም፤ ምስክሮቼም ሊቃውንተ ቤተ ክርስቲያን እና ምእመናን ናቸው” ብሏል፡፡

እንደ እስጢፋኖስ (ቄሴ) ከሆነ፣ ግንቦት 27 ቀን 2003 ዓ.ም በደብረ አሚን ተክለ ሃይማኖት ቤተ ክርስቲያን በጓደኛው የተክሊል ሥርዐት ላይ በሚዜነት በተገኘበት ወቅት በእርሱና በሁለት ጓደኞቹ ላይ ወጣቶች ተቃውሞ እንዳቀረቡባቸው ተናግሯል፡፡ የወጣቶቹ ተቃውሞ “ተሐድሶ ነን ከሚሉት ጋራ ግንኙነት አለህ” በሚል ሲሆን የደረሰበት ሁኔታ ስሜቱን እንደነካው ነው የገለጠው፡፡ “ጓደኝነት ሌላ ሃይማኖት ሌላ” የሚለው እስጢፋኖስ፣ “ቀደም ሲል በተሐድሶነት ከተጠረጠሩት ወንድሞች ጋራ የነበረኝ ግንኙነት ከተቋረጠ ቆይቷል፡፡ “በእምነቴም ከእነርሱ ጋራ የሚገናኝ ምንም ዐይነት ሁኔታ እንደሌለ ይታወቅልኝ” ነው ያለው፡፡

“በቤተ ክርስቲያን ተቃውሞ ያቀረቡብኝ ወጣቶች በአስተሳሰባቸው ትክክል ናቸው፤ ይሁንና በማወቅም ይሁን ባለማወቅ የተሳሳቱ ወንድሞችን መመለስ የሚቻለው በፍቅር ነው፤ ስለዚህም አላግባብ የተቃወሙኝን ወጣቶች በእግዚአብሔር ፍቅር እወድዳቸዋለሁ” ብሏል፡፡

እስጢፋኖስ (ቄሴ) ጨምሮ እንደገለጸው የቅኔ፣ የድጓና የመጻሕፍት ሊቃውንት በየበረሓው ወድቀው ሳለ እኛ ግን በገንዘብ ከብረናል፤ በስምም ታውቀናል፤ መተዳደሪያችንም ቤተ ክርስቲያን ናት፤ ሆኖም ተሐድሶ በሚል ስያሜ የቆየውን የቤተ ክርስቲያን መሠረት ለመናድ አሳዛኝ ገጽታ ነው” ሲል አብራርቷል፡፡ “ከዚህ በኋላ የእኔ ትግል ቤተ ክርስቲያኗን ከከበቧት ከለባት ጋራ ነው” ያለው እስጢፋኖስ (ቄሴ)፣ “ተመራጩ መንገድ በትሕትና መመላለስ እንጂ ከሥርዐት ያለፈ ነገር ማካሄድ ለማንም አይጠቅምም” ሲል ተናግሯል፡፡

ዘማሪ እስጢፋኖስ ሣህሌ (ቄሴ) ምእመኑን ይቅርታ እየጠየቀ ነው

2011-06-24T12:28:00.002-04:00

Read this News in PDF.
“እኛ የአባቶችን አገልግሎት ለማስረሳት ሠራን፤ የእነርሱም ኀዘን እኛን ጣለን፡፡›› (እስጢፋኖስ ሣህሌ)
በተለያዩ አህጉረ ስብከት ሕገ ወጥ ሰባክያንንና እና ዘማርያንን የመከላከሉ ጥረት ተጠናክሮ ቀጥሏል፤
በጋሻው ደሳለኝ “በቪሲዲ የተሰራጨብኝ ማስረጃ በአኒሜሽን የተቀናበረ ነው!!›› አለ
በቅዱስ ሚካኤል ክብረ በዓል ዋዜማ በሜጋ - ሞያሌ መንገድ የመኪና አደጋ የደረሰባቸው ምርትነሽ ጥላሁን እና አሰግድ ሣህሉ በሕክምና ላይ ናቸው

(ደጀ ሰላም፤ ጁን 24/2011)፦ በደብረ አሚን ጻድቁ አቡነ ተክለ ሃይማኖት ቤተ ክርስቲያን አጥቢያ ወጣቶች ግንቦት 27 ቀን 2003 ዓ.ም የአካላዊ ቅጣት ርምጃ ከተወሰደባቸው መካከል አንዱ የነበረው ዘማሪ እስጢፋኖስ ሣህሌ (በቅጽል ስሙ ቄሴ) የሕገ ወጥ ‹ሰባክያን› እና ‹ዘማርያን› አካል እና አባል በመሆን ባደረጋቸው እንቅስቃሴዎች የተጸጸተ መሆኑን በመግለጽ ካህናት እና ምእመናን ይቅርታ እንዲያደርጉለት እየጠየቀ ነው፡፡ “እኔ ከእነርሱ የተለየሁት ከአንድ ዓመት ከመንፈቅ በፊት ነው፤በዘማሪ ፈቃዱ አማረ የጋብቻ ሥነ ሥርዐት ዕለት ወጣቶቹ የወሰዱት ርምጃ ስለ ቅንዐተ ቤተ ክርስቲያን የፈጸሙት እንጂ በግል ጥላቻ ወይም በስሜታዊነት ተነሣስተው አለመሆኑን አምኜበታለሁ” ያለው ዘማሪ እስጢፋኖስ ከሕገ ወጥ ቡድኑ ጋራ ለረጅም ጊዜ አብሮ ስለቆየበት ሁኔታ ለቀረበለት ጥያቄ ሲመልስ “ከዛሬ ነገ የተሻለ ነገር አያለሁ በሚል ተስፋ በማድረግ ነበር” ብሏል፡፡

ዘማሪ እስጢፋኖስ ሕገ ወጥ ‹ሰባክያኑ› እና ‹ዘማርያኑ› ዐውደ ምሕረቱን የሣቅ ቀን/መድረክ ሲያስመስሉ፣ ካህናቱን እና መሪጌቶቹን በስድብ ሲያሸማቅቁ፣ ራስን ባለመግዛት የተለያዩ አስነዋሪ ድርጊቶችን ሲፈጽሙ በግልጽ ይቃወማቸው እንደ ነበር ለማስረዳት በመሞከር ላይ ይገኛል፡፡ ከሁሉም ነገር በላይ ለሰዓታቱ፣ ለማሕሌቱ እና ለቅዳሴው እንዳይተጋ “ባዶ ቤተ ክርስቲያን ሄደህ ምን ታደርጋለህ?›› እያሉ ያደረሱበት ጫና፣ ይሄዱባቸው በነበሩ አጥቢያዎች በአብዛኞቹ ካህናቱ እና መዘምራኑ የእነርሱን ሽሙጥና ዘለፋ በመሸሽ በመንደር ርቀው ይቆዩ የነበሩበት ሁኔታ በእጅጉ እንደሚያሳዝነው ተናግሯል - ዘማሪ እስጢፋኖስ፡፡ መሠረተ እምነትን በማፋለስ፣ ሥርዐተ ቤተ ክርስቲያንን በመጣስ በሚፈጽሙት ድርጊት መቼም ተባብሯቸው እንደማያውቅ ያስረዳው ዘማሪው፣ “በየዋህነት፣ በትምህርት ማነስ ምክንያት እስከ ቅርብ ጊዜ ድረስ አብሬያቸው በመቆየቴ በፈጸምሁት ስሕተት ቤተ ክርስቲያኔን አሳዝኛለሁ፤ በውስጣቸው ብቆይም በአቋም መለየቴን ገልጬ ማሳየት ነበረብኝ” ብሏል፡፡

“ተሐድሶ የለም›› እያሉ በዐውደ ምሕረት ለማስተባበል የሚሞክሩትን የሕገ ቡድኑን አባላት የተቃወመው ዘማሪ እስጢፋኖስ፣ “የእነርሱ ዋነኛ ዓላማ የአባቶችን አገልግሎት ማስረሳት ነው፤ እኛ የአባቶችን አገልግሎት ለማስረሳት ሠራን፤ የእነርሱም ኀዘን እኛን ጣለን” በማለት የተሰማውን ቁጭት ገልጧል፡፡ የይቅርታ ጥያቄውን ለብዙኀን መገናኛዎች በሚሰጣቸው ቃለ ምልልሶችና በተለያዩ አጋጣሚዎች እያቀረበ የሚገኘው ዘማሪ እስጢፋኖስ ከጥቃቱ ወዲህ በተለይም አገልግሎቱ ሙሉ በሙሉ የተቋረጠ መሆኑን በመግለጽ ወደ አገልግሎቱ ተመልሶ ለበደሉ መካስ እንደሚሻ ተናግሯል፡፡

በደብረ መዊዕ ቅዱስ ሚካኤል ካቴድራል እና በደብረ ገሊላ ቅዱስ ዐማኑኤል ሰበካዎች ባሉ ካህናት እና ምእመናን ዘንድ የሚታወቀው ዘማሪ እስጢፋኖስ ሦስት ካሴቶች ለብቻው፣ አምስት ደግሞ በጋራ የሠራቸው የ”መዝሙራት›› ሥራዎች አሉት፡፡ “ቄሴ” የሚለውን ቅጽል ስም ያገኘው በልጅነት ዕድሜው በአምሳለ ካህን ጠምጥሞ ጠበል በመርጨቱ፣ በክብረ በዓላት በአጥቢያ አብያተ ክርስቲያን እየዞረ በመዘመሩ መሆኑን በቅርብ የሚያውቁት ይናገራሉ፡፡ በማለዳው ባጣቸው ወላጆቹ ምትክ የሁለቱ አጥቢያ ምእመናን አባትም እናትም ሆነው ያሳደጉት ዘማሪ እስጢፋኖስ ወደ ገዳማት በሚደረጉ ጉዞዎች ላይ በጨረታ በሚሰበሰቡ የርዳታ ማስተባበር ተግባራት የተመሰገነ ስጦታ እንዳለው ብዙዎች ይመሰክሩለታል፡፡ “ለአገልግሎት መሰሰት አይታይበትም፤ ልግመኝነትን አያውቅም›› የሚሉት የቅርብ ወዳጆቹ በሐመረ ኖኅ ማኅበር በኩል ለቅዱስ ፊልጶስ ቤተ ክርስቲያን/አዲስ አበባ/፣ በማኅበረ አቡነ አሮን መንክራዊ አማካይነት ለአቡነ አሮን ገዳም በተደረገው የርዳታ ማሰባሰብ ሥራ ያደረገውን ተሳትፎ ያስታውሳሉ፡፡

በተያያዘ ዜና የቅ/ሚካኤልን በዓል ለማክበር በሜጋ - ሞያሌ መንገድ ላይ በመጓዝ ላይ የነበሩት ምርትነሽ ጥላሁን እና አሰግድ ሣህሉ የመኪና አደጋ ደረሰባቸው በኋላ አሁን በሕክምና ላይ መሆናቸው ሲታወቅ ወዲያው ወደ ያቤሎ ሆስፒታል ተወሰድው ርዳታ እንደተደረገላቸው ተገልጿል። ቀጥሎም በሐዋሳ ሆስፒታል የታከሙ ሲሆን ምርትነሽ አዲስ አበባ በሚገኘው በቅ/ገብርኤል ሆስፒታል ተጨማሪ ሕክምና እንደተሰጣት ምንጮቻችን አብራርተዋል።

በሌላ በኩል በጋሻው ደሳለኝ በበኩሉ በተለያዩ ሚዲያዎች እየወጡ ያሉ የስሕተት ትምርቶቹን እርሱ እንዳልተናገራቸው ይልቁንም እርሱ እንደተናገራቸው ተደርጎ “በአኒሜሽን” መቀናበራቸውን ለማስተባበል በመሞከር ላይ ነው።

ሁሉንም እግዚአብሔር ይማራቸው።

ሲኖዶሱ እየሠራ ነው፤ እኛስ? ለፓትርያርክ ጳውሎስ ፲፱ኛ በዐለ ሲመት የተበከረተ

2011-06-24T08:42:00.001-04:00

ከዚህ በታች ያለው ጽሑፍ ከፌስቡክ የተገኘ ሲሆን ፀሐፊው ቀሲስ ወንድምስሻ አየለ ናቸው። መልካም ንባብ።

+++++++++++++++++++++++++++++++++++++++++++++++++++++++++++++++

ታሪከ-ጡመራ

በዓመት ፪ ጊዜ በሚደረገው የቅዱስ ሲኖዶስ ጉባኤ የሚወሰኑ ውሳኔዎች ለሕዝብ መገለጥ ያለባቸውን ያህል ሳይገለጡ በመቆየታቸው ብዙ ችግሮች በወረቀት ላይ እንጂ በተግባር ባለመፈታታቸው ሲደመሩ ቆይተዋል። ፈጣሪ ፈቀደና ደጀሰላምም ፋና ወጊ ሆና ስለውሳኔዎቹ መስማትና ሀሳቡን መከታተል ተጀመረ፤ በእርግጥ ጥቂት ውሳኔዎች በሬድዮኖች በጣም ጥቂቱ ዘገባ ደግሞ በጋዜጦች ሲቀርቡ ቆይተዋል። ከዚያ ወዲህ ምእመናን የትኛው ሀሳብ ለምን ተወሰነ? ይኼኛው ለምን ቀረ? ወዘተ እስከማለት ደርሰዋል። በዚህም ሁላችንም የየግላችንን ሀሳብ ተለዋውጠናል። የእስከዛሬውን ወጥ አድርገን ብንገመግመውስ ለነገውም ጭምር የሚጠቅም አይመስላችሁም?

ውሳኔዎችና እኛ

ብዙዎች የውሳኔዎችን ጥንካሬ የምንመለከተው ለእውነት ያለውን ግልጥ ድጋፍ ወይም ለስህተት ያለውን የፈጠጠ ተቃውሞ ይመስላል። ለምሳሌ «ሐውልቱ ይፍረስ» የሚለው ውሳኔ ብዙዎችን ያስፈነደቀና «ጀግናው ሲኖዶስ» ያስባለ ሲሆን የ«አባ» ሠረቀ/ሰረቀ አለመነሣት፣ /ፊደሉ ሰ ይሁን ሠ አላጣራሁም፤ ትርጉሙ ግን እንደሚለያይ አውቃለሁ/ የ«ሊቀካህናት» ጌታቸው ዶኒ አለመወገዝና የፓትርያርክ ጳውሎስ አለመነካት ብዙዎችን አላስደሰተም፤ «ሲኖዶሱ ታሪክ መሥራት አልቻለም፤ የሚፈሩት ነገር አለ...» ያልንም አለን። ሌላም፣ሌላም።

እዚህ ጋር ወጥነት ያለውና የተንኮል ዕቅድ ላይ መሰናክል የሚፈጥሩ፣ በአጸፋው የሚያወግዙና የቤ/ክ/ንን ሞገስ የሚጠብቁ፣ ጊዜውን ያገናዘበ መርሕ የሚከተሉና በግልጥ ባለማስቀመጥ ብዙዎችን የሚያድኑ ሊባሉ ይችላሉ፤ ሳብራራው ጊዜያችሁን አልወስድም። በአጭሩ ለመግለጥ ያህል፡- የተሐድሶን የማንሸራተት ስልት የአዳራሽና የስታዲየም ጉባኤን በመከልከል ማገድ፣ አድራሻ የሌላቸውን የግል ሰባኪዎች «ሕገወጥ» በማለት፣ ለቤ/ክ/ መዳከምና ለተሐድሶ መጠናከር ድጋፍ የሚያደርጉበትን የፓትርያርክ ጳውሎስን ሥረወጥ አካሄድ ማንነትን በሚያጣጥል መጠን «ሐውልተ ስምዑ»ን እንዲፈርስ፣ ቢል ቦርዶች እንዲነቀሉ፤ በፓትርያርክ ጳውሎስ የተሾሙትን ጌታቸው ዶኒ፣ «አባ» ሰ/ሠረቀና የሐዋሳ ገብርኤል አለቃን ከምድባቸው በማንሣት/የሚነሡበት ጥያቄ ውስጥ በማስገባት፤ ወዘተ ብናያቸው በቂ ውሳኔዎች ናቸው። አብዛኛዎቻችን ደግሞ የየራሳችን ደስታና ሐዘን፤ ኩራትና የአፈጻጸም ጥርጣሬ ውስጥ ገባን እንጂ ትንታኔውን አላየነውም እናም የሚቀረን፣ ያልገባን አለ ባይ ነኝ ።

ሲኖዶስና ምሥጢረ ክህነት

ቅዱስ ሲኖዶስ የቤተክርስቲያን ጠባቂና የበላይ መሪ በመሆኑ እንደ አንድ አካል ፍጹሙ ካህን ነው፤ ሥልጣኑም የማይገሠስና ሉዐላዊ ነው። በምድር የወሰነው በሰማይ የሚጸና ያለምንም ለውጥ ሁሉም /ፓትርያርኩ ጭምር/ ሊያከብሩት የሚገባ የመንፈስ ቅዱስ ውሳኔ ነው፤ «እኛና መንፈስ ቅዱስ ፈቅደናልና፤» እንዲል። ግብ ፲፭፥፳፰ ይህን የመፈጸምና የማስፈጸም ኃላፊነት የሁሉም ግዴታና ድርሻ ነው፤ ከፓትርያርኩና ብፁዓን አባቶች እስከ ምእመን ድረስ። ለዚህ ውሳኔ የሚታዘዝ ጌታችን «ስለዚህ ይህን ቃሌን ሰምቶ የሚያደርገው ሁሉ ቤቱን በዓለት ላይ የሠራ ልባም ሰውን ይመስላል።» ያለውን የሚፈጽም ነው፤ ቸል የሚልም ይህንም ቃሌን ሰምቶ የማያደርገው ሰው ሁሉ ቤቱን በአሸዋ ላይ የሠራ ሰነፍ ሰውን ይመስላል። ዝናብም ወረደ ጎርፍም መጣ ነፋስም ነፈሰ ያንም ቤት መታው፥ ወደቀም፥ አወዳደቁም ታላቅ ሆነ።» ማቴ ፯፥፳፮ እንዳለ ለእኛም በመጠኑ እንደምንረዳው የ፫፻፲፰ቱ ሊቃውንት መሰብሰቢያ ቁስጥንጥንያ የዛሬዋን የቱርኳ ኢስታንቡል፣ የስምኦን ባለመስቀሉና ብዙ ቀኖናዎች የተደነገጉባት ቀሬና የሸሪኣዋ የዓለም ስጋት ሊቢያን እንዳስገኙ የዛሬዋ አክሱም ጽዮን ወደ ሙዚየምነት፣ አዲስ አበባም እንደባግዳድ፣ እነ፬ ኪሎ ቅድስት ሥላሴም የአውሮፓዎቹ አዳራሾቹን እንዳይሆኑ ማለትም ወቅታዊ የመጽሐፉ አንድምታ ነው። አወዳደቃቸው/አወዳደቃችን ታላቅ እንዳይሆን «ቤተክርስቲያናችንን እንደ አንድ ልብ መካሪ እንደ አንድ ቃል ተናጋሪ ሆነን ለመጠበቅ ለምን የሲኖዶሱን ውሳኔ አንፈጽምም?» ብለን ራሳችንን መጠየቅ አለብን፤ ያለመታዘዝ ውጤቱ እንደቃሉ ነውና። ይህ የሲኖዶስን ሥልጣነ ክህነት ላመነ ደግሞ አብሮት የሚሠራ መንፈስ ቅዱስ አለና በአንድስ እንኳ ሊጠራጠር አይገባም።

እኛ

አሁን ደጋፊና ተቃዋሚ በመሆን ሳይሆን፣ ከየግላችን ቅድመ ግምት በመስማማቱና በመለያየቱ ከመተቸት ወጥተን ነገሮችን በሰከነ ልቦና በማድመጥ የቅዱስ ሲኖዶስን ውሳኔ በጥብዓት መፈጸምና ማስፈጸም ይጠበቅብናል። የሚቸግረን የሚመስለን በስም ያልተጠቀሱ ጉዳዮችና ግለሰቦች ሊሆኑ ይችላሉ። ግን ጌታ ራሱ ምልክትን አልሰጠንም? ድንግል አልጸነሰችም? ከጠላት ቀስት የምናመልጥበት መስቀል አልተሰጠንም? ከፍሬያቸውስ አንለያቸውም? የቤ/ክ/ አንድነት በሚጠብቀው፣ ወጣኒውን በሚያተጋውና ፍጹሙን በትሕትና በሚገዛው ቀኖና ላይ ሲያላግጡብን፣ የራሴ የሚሏትን ቤ/ክ/ በየመድረኩና በየኅትመቶቻቸው ሲተቹ የተባበሯቸው አልነበሩም? ምንኩስናውንና ክህነቱን አቃለው የተናገሩበትንና ራሳቸውን አዲስ ጥቅም ያደረጉበትን አሠራር ከዐይናችን ሊሰውሩ እንኳ መች ፈሩ? «ከፍሬያቸው ታውቋቸዋላችሁ። ከእሾህ ወይን ከኩርንችትስ በለስ ይለቀማልን? እንዲሁ መልካም ዛፍ ሁሉ መልካም ፍሬ ያደርጋል፥ ክፉም ዛፍ ክፉ ፍሬ ያደርጋል። መልካም ዛፍ ክፉ ፍሬ ማፍራት፥ ወይም ክፉ ዛፍ መልካም ፍሬ ማፍራት አይቻለውም።» ማቴ ፯፥፲፭-፲፰ የተባለውን የግድ መመርመሪያው ጊዜ አሁን ነው።

ፓትርያርክ ጳውሎስና ብፁዐን አበው

የጥቂቶች ትግል ፈተና ውስጥ የወደቀበት ያለፈው ዘመን ይበቃናል። አሁን ፓትርያርክ ጳውሎስም ይጠየቁ፡- ለምን ሲኖዶሱን ሲበጠብጡና ሲቃወሙ፣ ሊቃውንትን ሲያስወግዱና ወዳጆችዎን ሲሰገስጉ ከረሙ? ተማሩ የተባሉትን ፒኤችዲ የሚገልጥ የቤ/ክ/ንን አሠራር ማዘመን ትተው የአደረጃጀትና የኢኮኖሚ /አንጻራዊ/ ግዙፍ ውድቀት ሲግተለተል ምነው ማየት የተሣኖ? ምነውስ አንድ እንኳ መጽሐፍ ማበርከት ተሣኖ? ነጭ መልበሱና ከቢል ቦርድ እስከሐውልት ሲያስተክሉ ያልደከሞትን ለመምህሮችዎ የአብነት መምህራን ምነው መልሚያቸውን ባለማቀድ መጥፊያቸውን አበዙባቸው? ምናልባት ከጥቂቶቹ ወይም ከአንዱ ጋር በዓላማ ብትስማሙም ከአሜሪካዎቹ አበው ጋር እንዲፈጸም የተደከመበትን ዕርቅ በማጓተት ልዩነት እንዲስፋፋና እንዲጠናከር ምነው በተዘዋዋሪ ረዱ? የአንዲት ቤ/ክ/ አንድ ፓትርያርክና አንድ ቅዱስ ሲኖዶስን አክብሮ የሚኖረውና ዘመኑን ለመዋጀት የሚታትረው ማኅበረ ቅዱሳን ለምን የጠዋት ማታ ራስ ምታት ሆነብዎ? በመቅደሱ የኖረ ሳይወድ ፈሪሐ እግዚአብሔርን የሚረዳበት ቀኖና ሞልቶለት እያለ ምነው ድፍረትዎ በዝቶ እስከመቃብር ዘገዩ? ዛሬ እንኳ ሲደክሙ የሚቃወሞትን ኅሊና እና የሥልጣን ባለቤት መንፈስ ቅዱስ ለምን አይታመኑለትም? ይህን ሁሉ ግፍ ለፈጸሙበት በዐለ ሲመቶም ቅኔ ለሚያበረክቱልዎ የወርቅ ሽልማት የሰጠኁዋቸው ይመስለኛል፤ ምናልባት በቅኔዎቹ ሰም ብቻ የሚደሰቱበት ቀን ፲፱ኛው በዐልዎት ላይ ቢበቃስ?

ብፁዓን አበውም በሕይወታችሁ የለፋችሁለትን ክህነት በቸርነቱ ሃይማኖታችሁን በመጠበቅና በማስጠበቅ እስካሁን የተጋችሁ እንዲሁ ደግሞ አሁንም በርቱ፣ ጠንክሩ፣ ፍጹማንም ሁኑልን፤ ጊዜው መሥዋእት እንድትከፍሉ ስለሚጠይቃችሁ ስለጌታ ክርስቶስ ሁሉን መተዋችሁ እንደጥንቱ ዛሬም ጥቅም ይሁንላችሁ። ስህተቶችን ካልተቹ አይታረምምና ብዙዎች ውስጥ የተደበቃችሁና ተቆርቋሪ ብቻ ሳይሆን ዐዋቂም ለመምሰል ፍሬ አልባ መጻሕፍትን በማግተልተል፣ ከስህተትና ጉድለት ጋር ራሳችሁን ባስተዋወቃችሁባቸው ፊልሞች የዋሑን ማሳመን የሞከራችሁም ተመከሩ፤ ያደረጋችሁት የማያዋጣ ሞኝነት ነው፤ ጳጳስ ላይ አትዳፈር እያሉን ብናድግም «አባ» ጳውሎስን ያየ ለምን ዝም ይላል?» እላቸዋለሁ። ጊዜ ሲያገኙ ስለሥልጣን ሽኩቻ ሳይደክሙ የሚለፉ፣ ራሳቸውንም ስለዕውቀታቸውና ጠንካራ ተቆርቋሪነታቸው የሚያስተዋውቁ ጳጳሳት/ጳጳስ የግድ «አርፋችሁ ተቀመጡ፤ እናውቃችኋለን፣ ካልቻላችሁ ወደየመጣችሁበት አድራሻችሁ ተመለሱ» ልንላችሁ ያስፈልጋል።

ቤተክህነት

ታላቂቱን ሰማያዊት የክርስቶስ አካል ለማስተዳደር በየዘርፉና በየደረጃው የተመደባችሁም የተቀላቀለውን አሠራርና ሠራተኛ ለዩ፤ ሁሉን በፍቅር አድርጉት። ሳያውቁ የተጠለፉ አሉና ከእሳትም ነጥቃችሁ አድኑ። ሞት የሚገባውን ደግሞ ለሳኦል ያልራራ እግዚአብሔርን ጨካኝ አታድርጉት። እንግዲህ ከፓትርያርክ ጳውሎስ እርሾዎችና አሻራዎች ተጠበቁ እንጂ የአባቶቻችሁን ቀኖና ቸል አትበሉ።

በክርስቶስ ታናሽ ወንድማችሁ፣ በአንዲት ቅድስት ቤተክርስቲያን አባሏ/የአካል ብልት፣ በፍርዱ ዙፋን ፊት እኩያችሁ ተፈራጅ

ዕጼ ምድር፣ ኃጥእ ገብር ቀሲስ

"ቅዱስ ሲኖዶስ ሲባንን" (የዜና ቤተ ክርስቲያን ጋዜጣ ርእሰ አንቀጽ)

2011-06-16T14:41:00.002-04:00

To Read in PDF Click HERE.

(መጋቤ ምስጢር ወልደ ሩፋኤል ፈታሒ፤ የዜና ቤተ ክርስቲያን ጋዜጣ ዋና አዘጋጅ፣ 56^ኛ ዓመት ቁጥር 120፣ ግንቦት 2003 ዓ.ም)፦ የዘንድሮው ርክበ ካህናት ቅዱስ ሲኖዶስ ሲኖዶስ ጉባኤ በየፈርጁ ያሳለፋቸው ወቅታዊ ውሳኔዎች ለቤተ ክርስቲያናችን ህልውና መጠበቅና መጠናከር የሚበጁ፤ ሐዋርያዊ ተልእኮዋን በተገቢው መንገድ ለመወጣት የሚያስችሉ ከላይ እስከ ታች ሰላምንና መረጋጋትን የሚያሰፍኑ ተገቢ ውሳኔዎች ናቸው፡፡

በብፁዕ ወቅዱስ ፓትርያሪኩ ርእሰ መንበርነት የተመራው ይኸው የቅዱስ ሲኖዶስ ምልዓተ ጉባኤ ካሳለፋቸው ወቅታዊ ውሳኔዎችም ዋና ዋናዎቹን ብንጠቅስ ከመንበረ ፓትርያሪኩ ጀምሮ እስከ አህጉረ ስብከት ያለው የሥራ ብልሽት የሚፈጠረው ማእከላዊነትን ባልጠበቀ አሠራር በመሠራቱ መሆኑ ግልጽ ነው፡፡ ከላይ ወደ ታች የመጣውንም ሥራ ከታች ወደ ላይ ለማስተካከል እጅግ በጣም አስቸጋሪ እና ጊዜ የሚፈጅ ይሆናል፡፡
ይህም በመሆኑ ከመንበረ ፓትርያሪኩ ጀምሮ እስከ አህጉረ ስብከት ያለው ማእከላዊነትን ያልጠበቀ አሠራር ከእንግዲህ ወዲህ መቀጠል እንደሌለበት (እንዲያከትም) የተላለፈው ውሳኔ በተግባር ከተተረጎመ ችግር አስወጋጅና መፍትሔ ሰጭ ውሳኔ ነው፡፡

የቤተ ክርስቲያናችን ዋና የደም ሥር የስብከተ ወንጌልና ሐዋርያዊ ተልእኮ መምሪያ ነው፤ ሰበካ ጉባኤና ሰንበት ት/ቤቶችም የተፈጠሩትና ዛሬ እግር ተክለው ራሳቸውን ችለው መጓዝ የጀመሩት በስብከተ ወንጌልና ሐዋርያዊ ተልእኮ መምሪያ ሞግዚትነት መሆኑን ሁሉም የሚያውቀውና ሊያስተባብለው የማይችል ሐቅ ነው፡፡ ስለሆነም የስብከተ ወንጌልና ሐዋርያዊ ተልእኮ መምሪያ ሳይሸራረፍ በማንኛውም ግብረ ኃይል እንዲጠናከርና በቂ ትምህርት ሳይኖራቸው፣ በእምነታቸውም አጠራጣሪዎች ሲሆኑ በየትኛውም ቤተ ክርስቲያን ተቆጣጣሪ የሌለውና የቦዘነ ዐውደ ምሕረት ስላገኙ ቤተ ክርስቲያኒቱን የገቢ ምንጭ፣ ተከታዮቿ ምእመናንንም ያልተጣራ ሸቀጣ ሸቀጣቸው ማራገፊያ (ማጣሪያ) ባደረጉ ሰርጎ ገብ ሰባክያን ላይ ጥብቅ ቁጥጥር እንዲደረግና ተገቢው ርምጃ እንዲወሰድባቸው የተላለፈውም ውሳኔ እጅግ አንገብጋቢ ውሳኔ ነው፡፡ በመሆኑም ለተግባራዊነቱ የኦርቶዶክስ ተዋሕዶ ተከታይ ነኝ የሚል ሁሉ ሊረባረብበት የሚገባ የወቅቱ ዐቢይ ጉዳይ ነው፡፡

ኧረ ለመሆኑ የስብከተ ወንጌልና ሐዋርያዊ ተልእኮ መምሪያ ሰርጎ ገብ ሰባክያንን እንዲቆጣጠር ተላልፎ የነበረውን ትእዛዝ መልሶ የሻረው ማን ነው? በአዲስ አበባም ሆነ በአህጉረ ስብከት ርእሰ ከተማ ዐውደ ምሕረቱን ሁሉ ሰርጎ ገብ ሰባክያን የገበያ ማእከል ሲያደርጉት የአብያተ ክርስቲያናት አስተዳዳሪዎችና ወርሐዊ ደመወዝ የሚከፈላቸው መደበኞቹ ሰባክያነ ወንጌልስ የማንን ጎፈሬ ነው የሚያበጥሩት? ምናልባት እንደ ኤሳው ብኵርናቸውን በምስር ንፍሮ ሽጠውት ይሆን?

ሌላው በጋዜጣችን ተደጋግሞ እንደተጻፈው የቱሪስቶች መስሕብ የሆኑት እንደ ርእሰ አድባራት ወገዳማት አክሱም ጽዮን፣ ቅዱስ ላሊበላ፣ የጣና ሐይቅንና የጻድቃኔ ማርያምን የመሳሰሉት ታሪካውያን ሥፍራዎች ከጎብኝዎች በሚያገኙት ገቢና በሌላውም የልማት ውጤታቸው ለቤተ ክርስቲያኒቱ በጀት አጋዥ ኃይል ሊሆኑ ሲገባቸውና በመሬት ላራሹ ዐዋጅ የተጎዱትን ገዳማትና በገቢ እጥረት የተቸገሩትን የገጠር አብያተ ክርስቲያናት መደጎም ሲችሉ ለእውነተኞቹ መናንያን ሳይሆን ለቀበሮ መናንያን መጠቀሚያና ለመንገደኛ አስተርጓሚዎች ሲሳይ በመሆን ዘመናትን ማሳለፋቸው ከማንም የተሰወረ ምስጢር አይደለም፡፡

ስለዚህ ከወጭአቸው በላይ ገቢ የሚያስገኙትን ታሪካውያን ሥፍራዎችን (ቅዱሳት መካናትን) ለማስጎብኘትና ብርቅና ድንቅ የሆኑ ቅርሶቿን ጠብቆ ለትውልደ ትውልድ ለማስተላለፍ በብፁዕ ወቅዱስ ፓትርያሪኩ ልዩ ጥረት በዘመናዊ መልክ ለተቋቋመው የቅርሳ ቅርስ ጥበቃ መምሪያ የሥራ ማከናወኛ ዓመታዊ በጀት በመፍቀድ የተላለፈው ውሳኔ ሊደገፍ የሚገባው ነው፡፡ ለርእሰ አድባራት ወገዳማት አክሱም ጽዮን ታሪካዊ ሙዝየም ግንባታ በቋሚ ሲኖዶስ የተፈቀደውም የሥራ ማስጀመሪያ የሚያስመሰግን ነው፡፡ በከሣቴ ብርሃን ሰላማ ስለሚሰጠው የነገረ መለኮት ትምህርት ጥራት መጠበቅ የተላለፈውም ውሳኔ የሚጠበቅ ውሳኔ ነው፡፡

እንደ ስብከተ ወንጌልና ሐዋርያዊ ተልእኮ መምሪያ፣ እንደ ትምህርትና ማሠልጠኛ መምሪያ፣ እንደ ሰንበት ት/ቤቶች ማደራጃ መምሪያ የመሳሰሉት አስፈላጊ መምሪያዎችም ከአዲሱ የቅርሳ ቅርስ መምሪያ ትምህርት ወስደው በባለሞያ በማስጠናት ዓመታዊ የሥራ ማስኬጃ በጀታቸውን በቅዱስ ሲኖዶስ ካላስፈቀዱ በስም ብቻ ወይም ከሀገረ ስብከት ወደ ሀገረ ስብከት እየተዘዋወሩ ሊሠራ የሚገባው በዚህ መልክ ነበር ብሎ በመለፈፍ ብቻ ተልእኳቸውን ሊፈጽሙ አይችሉም፤ ወይም በጥቅማ ጥቅም በመታለል ሌሎች ማኅበራት በአዘጋጁት ትምህርታዊ ጉባኤ ላይ እየተገኙ በማስተማር ብቻ ሓላፊነታቸውን በትክክል ሊወጡት አይችሉም፡፡ ሳይደራጁ ሌሎች መብታችንን ወሰዱብን ወይም በመብታችን ተጠቀሙበት ብሎ መንፈራገጥም ትርፉ መላላጥ ብቻ ይሆናል፡፡

የቅዱስ ሲኖዶስ ምልአተ ጉባኤ ያሳለፈው ጠቃሚ ውሳኔ ይህ ብቻም አይደለም፡፡ በባንኮ ዲሮማ አካባቢ የሚገኘው የቤተ ክርስቲያናችን ክፍት ቦታ ዘመናዊ ሕንጻ ተገንብቶበት ገቢ እንዲያስገኝና ወርሐዊ ኪራይ ሳይከፍሉ በቤተ ክርስቲያኒቱ ሕንጻዎች በነጻ የሚጠቀሙት አቅም ያላቸው ድርጅቶች ሁሉ ቢሮ ሠርተው በራሳቸው ቢሮ እንዲጠቀሙ፣ በብላሽ የያዙትም ሕንጻ ተከራይቶ ለቤተ ክርስቲያናችን የገቢ ምንጭ እንዲሆን የተላለፈውም ውሳኔ ይበል የሚባል ውሳኔ ነው፡፡

ወደፊትም መንግሥት የሠራተኛውን የመኖሪያ ቤት ችግር ለመቅረፍ ከሚያደርገው ጥረት ጎን በመቆም በመንበረ ፓትርያሪኩ ዙሪያ ባለው ክፍት ቦታ ቤተ ክርስቲያን የመኖሪያ ሕንጻ አሠርታ ተገቢውን ክፍያ እየከፈሉ በኅብረት እንዲኖሩ የጠቅላይ ቤተ ክህነት ሠራተኞች ያቀረቡት አቤቱታ ወቅታዊ ስለሆነ ተቀባይነትን አግኝቶ ተግባራዊ እንዲሆንና እንደ ትንሣኤ ዘጉባኤ ማተሚያ ቤት የመሳሰሉት የቤተ ክርስቲያኒቱ የማምረቻ ተቋማትም የግንባታ መርሐ ግብር ተዘጋጅቶላቸው በዘመናዊ መልክ ተደራጅተው ራሳቸውንና ቤተ ክርስቲያኒቱን ይበልጥ እንዲጠቅሙ የቅዱስ ሲኖዶስ ውሳኔ ይጠበቃል፡፡

ያም ሆነ ይህ የዘንድሮው ርክበ ካህናት የቅዱስ ሲኖዶስ ጉባኤ ያሳለፋቸው ወቅታዊ ውሳኔዎች አብዛኞቹ ለቤተ ክርስቲያናችን ጠቀሜታ ያላቸውና ማእከላዊነትን ያልጠበቀ ብልሹ አሠራርን ሊያስወግዱ የሚችሉ በመሆናቸውና አምናም ሆነ ታችአምና፣ ከዚያ በፊትም በቅዱስ ሲኖዶስ ምልዓተ ጉባኤ የተወሰኑት ጠቃሚ ውሳኔዎች ሁሉ ውኃ በልቷቸው የሚቀሩት አስፈጻሚ አካል በመታጣቱ ስለሆነ በየደረጃው የምንገኝ የቤተ ክርስቲያኒቱ አባላት ሁላችን ማለት ከመንበረ ፓትርያሪኩ ጀምሮ የጠቅላይ ቤተ ክህነት ባለሥልጣናት ሠራተኞች፣ የየአህጉረ ስብከቱ ብፁዓን ሊቃነ ጳጳሳትና ሠራተኞች፣ የየድርጅቱ የሥራ ሓላፊዎች እና ሠራተኞች፣ የወጣት መንፈሳውያት ማኅበራትና የቤተ ክርስቲያናችን ተከታዮች ምእመናንም ጭምር ለውሳኔው ተግባራዊነትና ከውሳኔው ውጭ ለሚፈጸሙ ተግባራት ተቃውሞ በነፍስ ወከፍ ልንረባረብና ቅዱስ ሲኖዶስ ሲባንን እኛም አብረን ልንባንን ይገባናል፤ መንግሥት የሕገ መንግሥት ተገዥ እንደሆነ ሁሉ ቤተ ክርስቲያንም የሕገ ቤተ ክርስቲያን ተገዥ መሆን ይገባታልና፡፡

/ዜና ቤተ ክርስቲያን፣ 56^ኛ ዓመት ቁጥር 120፣ ግንቦት 2003 ዓ.ም/

ስለ ቅ/ሲኖዶስ ጉባኤ የዜና ቤተ ክርስቲያን ጋዜጣ ዘገባ

2011-06-16T05:14:00.001-04:00

To Read in PDF, click HERE.

(ዜና ቤተ ክርስቲያን ጋዜጣ)፦ በመቐለ ቅዱስ ፍሬምናጦስ አባ ሰላማ ከሣቴ ብርሃን ኮሌጅ የሚሰጠው ትምህርት ‹‹የርዳታ ሰጭ ፈረንጆች የመጽሐፍ ቅዱስ ትምህርት›› እንጂ ለከፍተኛ ትምህርት ተቋማት እንዲሰጥ በሲኖዶሱ የተፈቀደው የትምህርት መርሐ ግብር ባለመሆኑ ጉዳዩን ቅድሚያ ሰጥተውና በሚገባ አጣርተው ለሐምሌው ጉባኤ ሪፖርት የሚያቀርቡ የምሁራን ኮሚቴ በቋሚ ሲኖዶስ እንዲመደቡ ከግንቦት 10 - 16 ቀን የተካሄደው የርክበ ካህናት ቅዱስ ሲኖዶስ ጉባኤ መወሰኑን ዜና ቤተ ክርስቲያን ጋዜጣ ዘገበ፡፡

ጋዜጣው ባለፈው ሳምንት መጨረሻ ለኅትመት ባበቃው የግንቦት ወር፣ 56^ኛ ዓመት ቁጥር 120፣ 2003 ዓ.ም እትሙ የቅዱስ ሲኖዶስ ዋና ጸሐፊ ብፁዕ አቡነ ሕዝቅኤል ስለ ጉባኤው ውሳኔዎች የሰጡትን ዝርዝር ውሳኔዎች መሠረት አድርጎ እንደዘገበው የትምህርት መርሐ ግብራቸው አፋጣኝ ጥናት ከሚያስፈልጋቸው የቤተ ክርስቲያኒቱ ከፍተኛ ትምህርት ተቋማት መካከል የመቐለው ቅዱስ ፍሬምናጦስ አባ ሰላማ ከሣቴ ብርሃን ኮሌጅ ‹‹ጊዜ የማይሰጠው›› ነው፡፡ ብፁዕነታቸው በጋዜጣው በተጠቀሰው ሰፊ መግለጫቸው፣ ‹‹የሌሎች ኮሌጆችና የአብነት ትምህርት ቤቶች ጉዳይም በሂደት ተጣርቶ እንዲቀርብ፣ ለዚህም በቤተ ክርስቲያኒቱ ትምህርትም ሆነ በዘመናዊ ትምህርት የበሰለ ዕውቀት ያላቸው አባላትን ያካተተ አጥኚ ኮሚቴ በቋሚ ሲኖዶስ እንዲቋቋም ምልዓተ ጉባኤው ወስኗል፤›› ብለዋል፡፡

ቀደም ሲል ከመንበረ ፓትርያሪኩ ምንጮች ባገኘነውና የፕሮቴስታንታዊ-ተሐድሶ-ኑፋቄን ሤራ በሚያጋልጠው ሰፊ ዘገባችን ሲም/Serving in Mission/ የተባለው አሜሪካዊ የፕሮቴስታንት እምነት ድርጅት ‹‹የተሐድሶን እንቅስቃሴ የትምህርት ጥረቶች ለማገዝና ለማጠናከር፣ ለመደገፍና ለማበረታታት›› አልሞ ከዚሁ ከመቐለ አባ ሰላማ ከሣቴ ብርሃን ኮሌጅ አስተዳደር ጋራ በመስማማት መምህራኑን ማሰማራቱን፣ ይህም ምእመናንንና ካህናትን በማስቆጣቱ ከፍተኛ ተቃውሞ መቀስቀሱን መግለጻችን ይታወሳል፡፡ ጋዜጣው አጀንዳው በሲኖዶሱ ቀርቦ ይህን መሰሉ ውሳኔ እንዲተላለፍ የተደረገው የኮሌጁ ቦርድ አባላት በሆኑ ሊቃነ ጳጳሳት ጥረት መሆኑን ጨምሮ አመልክቷል፡፡

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ በአክሱም ጽዮን ለሚሠራው የታሪካውያን ቅርሶች ማከማቻና መከባከቢያ ሙዚየም ሥራ ማስጀመሪያ ብር 15 ሚልዮን ለመስጠት መወሰኑን ይኸው ዜና ቤተ ክርስቲያን ጋዜጣ ዘግቧል፡፡ የሙዚየሙ ሥራ በብፁዕ ወቅዱስ ፓትርያሪኩ ጸሎተ ቡራኬ የተጀመረው ሚያዝያ 11 ቀን 2003 ዓ.ም መሆኑን ያስታወሰው ጋዜጣው፣ በወቅቱ ቅዱስነታቸው በሰጡት ቃለ ቡራኬ ሙዚየሙ ከሦስት ሺሕ ዓመት በላይ ዕድሜ ያላቸው ታሪካውያን ቅርሶች የሚቀመጡበትና ለጎብኚዎች ምቹ የሚደረጉበት በመሆኑ ለሙዝየሙ ሥራ የሚያስፈልገው ጠቅላላ ወጭ ከምእመናንና ጉዳዩ ከሚያሳስባቸው ለጋሽ ድርጅቶች እንደሚጠበቅ ማስገንዘባቸውን አመልክቷል፡፡ በሙዚየሙ ከወርቅ እና ብር የተሠሩ የጥንታውያን ነገሥታት ዘውዶች፣ የብርና ነሐስ፣ የወርቅ መስቀሎች፣ በወርቅ የተለበጡ ጥንታውያን የብራና መጻሕፍት፣ አልባሳትና የጥንታውያን ነገሥታት ኮርቻዎች የሚቀመጡበት እንደሆነ ተገልጧል፡፡ በርእሰ አድባራት ወገዳማት አክሱም ጽዮን ቤተ ክርስቲያን በስተጀርባ ሰሜናዊ ምሥራቅ አቅጣጫ የሚሠራው ይኸው ሙዚየም ባለሦስት ፎቅ ሲሆን 4975 ካሬ ሜትር ይዞታ እንዳለው ጋዜጣው ጨምሮ ዘግቧል፡፡

በተያያዘ ዜና ከግንቦት 10 - 16 ቀን 2003 ዓ.ም የተካሄደው የርክበ ካህናት ቅዱስ ሲኖዶስ ጉባኤ ከጠቅላላ ገቢያቸው የ35 ከመቶ ፈሰስ በመላክ ለመንበረ ፓትርያሪኩ ፋይናንሳዊ አቅም መሠረት ለሆኑት አህጉረ ስብከት በሚያከፋፍለው ድጎማ ላይ ጭማሪ እንዲደረግ መወሰኑን በዚሁ የጋዜጣው እትም ላይ ተገልጧል፡፡ በዚሁ መሠረት ከግንቦት አንድ ቀን 2003 ዓ.ም ጀምሮ ለሁሉም አህጉረ ስብከት በወር ብር 235,000.00/ለእያንዳንዱ አህጉረ ስብከት በወር ብር 5000/ በአጠቃላይ በዓመት ብር 2,820,000.00(ሁለት ሙልዮን ስምንት መቶ ሃያ ሺሕ ብር) ክፍያ እንዲፈጸም ምልአተ ጉባኤው በሙሉ ድምፅ ወስኗል፤ ለጠቅላይ ቤተ ክህነት የተደረገውን የደመወዝ ጭማሪም ያጸደቀ መሆኑ ተመልክቷል፡፡

“ዐገቱኒ ከለባት (ውሾች ከበቡኝ)” - የተባለ አዲስ መጽሐፍ ታተመ

2011-06-15T15:15:00.001-04:00

To Read in PDF, Click HERE.

(ደጀ ሰላም፤ ጁን 15/2011)፦ ወጣቱ ትውልድ በሃይማኖቱ ተነቃቅቶ አምልኮተ እግዚአብሔርን እያጸና፣ የቅድስት ድንግል ማርያምን አማላጅነት እየተማፀነና እየመሰከረ የቅድስት ቤተ ክርስቲያንን አስተምህሮና ትውፊት ለመጠበቅ በሚተጋበት በአሁኑ ወቅት ወጣቱን የፕሮቴስታንታዊ-ተሐድሶ-ኑፋቄ ሰለባ ለማድረግ በኑፋቄው የውስጥ አቀንቃኞች የሚፈጸመው ደባ ኦርቶዶክሳዊውን ወጣት ከመድፈርና በወጣቱ ላይ ከመሳለቅ ተለይቶ እንደማይታይ “ዐገቱኒ ከለባት - ውሾች ከበቡኝ” በሚል ርእስ በሊቀ ትጉሃን ወንደሰን ተገኝ ተዘጋጅቶ ለገበያ የዋለው ባለ 35 ገጽ መጽሐፍ አከል ጽሑፍ አሳሰበ፡፡

በጽሑፉ ላይ እንደተገለጸው፣ የሉተርን ትምህርት በቃል እቃወማለሁ እያሉ በተግባር የሉተርን ኑፋቄ የሚያራምዱ፣ የሉተርን ‹መጽሐፍ› ለይምሰል እያቃጠሉ ‹ቅጂው›ን አባዝተው ለምእመኑ የሚቸበችቡ፣ ካባቸው የተዋሕዶ ድምፃቸው የተሐድሶ፣ መነሻቸው ኢየሱስ መድረሻቸው ዲያብሎስ የሆነ፣ ስንኳን ንግግራቸው የሚለብሱት ሰናፊል ቀሚስ የኦርቶዶክስ ስፌት እና አሠራር ያልሆነ የተሐድሶ-ኑፋቄ አቀንቃኞች በየዐውደ ምሕረቱ እያቀረሹ ምእመናንን ግራ እያጋቡ ነው፡፡ ጽሑፉ “ኢትዮጵያዊ ኤራስሞስ” የሚላቸውና በጉያችን ሆነው የቤተ ክርስቲያንን አስተምህሮ በመናድ ጥቅማቸውን የሚያራምዱ የተሐድሶ-ኑፋቄ አቀንቃኞች የመጨረሻ ግብ “አብያተ ክርስቲያናት ሁሉ ወደ ጭፈራ ቤት እንዲቀየሩ” ማድረግ ነው፡፡ ይህ ግብ በዓለማችን ያሉ የስለላ ድርጅቶች ዋና ዓላማ እንደሆነ የሚናገረው ጽሑፉ፣ “እግዚአብሔርን እየጠሩ በመጨረሻ ሰይጣንን ማመስገን፣ አብያተ ክርስቲያናትን ወደ መሸታ ቤት መቀየር ተሐድሶ ተወልዶ ባደገባት አውሮፓ እንጂ ወር እስከ ወር፣ ዓመት እስከ ዓመት የሥላሴ አንድነት ሦስትነት፣ የድንግል ማርያም አማላጅነት በሚሰበክባት ኢትዮጵያ ሤራው ይሳካልናል ብሎ መልፋት ውጤቱ መልፋት ብቻ ሆኖ ይቀራል፡፡”

ምንኩስናን እና ገዳማዊ ሕይወትን የሚቃወሙ፣ መዳን በእምነት እና በምግባር ሳይሆን በእምነት ብቻ ነው የሚሉ፣ የ81 ቅዱሳት መጻሕፍትን ቀኖናዊነት የማይቀበሉ፣ የቅድስት ድንግል ማርያም አማላጅነትን የሚክዱ፣ ሥልጣነ ክህነትን የሚያቃልሉ የፕሮቴስታንታዊ-ተሐድሶ-ኑፋቄ ቡድኖች በተለያየ ጊዜ ወደ ኢትዮጵያ መግባታቸውን ያመለከተው ጽሑፉ፣ በ1830 ዓ.ም እንደ ሳሙኤል ጎባት እና ክርስቲያን ኩግለር ያሉትን የተሐድሶ ቡድኖች ወደ ኢትዮጵያ የላከው የእንግሊዙ “ቸርች ሚሽነሪ ሶሳይቲ” እንደነበረ አስታውሷል፡፡ ጽሑፉ የአብዛኞቹ የተሐድሶ-ኑፋቄ ልኡካን ዕጣ ፈንታ በየአጋጣሚው መገደል እንደነበር በማብራራት ዛሬም የኢትዮጵያን ቤተ ክርስቲያንን ታሪክ ለማዳከም፣ የቅዱስ ያሬድን ዜማ ለማጥፋት በአጠቃላይ የተዋሕዶን እምነት ለማናጋት ከዚያው ከእንግሊዝ ሀገር ተሐድሶውያንን እያሠለጠነ ወደ ኢትዮጵያ እየላከ የሚያበጣብጠው በሃይማኖት ስም የተደራጀው የሰይጣን መልእክተኛ መኖሩን ጠቁሟል - “እኛ የቅድስት ቤተ ክርስቲያን ልጆች ግን ቅዱስ አትናቴዎስ አርዮስን የረታባትን፣ ቅዱስ ቄርሎስ ተዋሕዶን ያብራራባትን ንጽሕት ቅድስት ሃይማኖት እስከ ሞት ድረስ ለመጠበቅ የታመንን እንሆናለን” ብሏል፡፡

ጽሑፉ የሮም ካቶሊክ በማርቲን ሉተር የፕሮቴስታንታዊ ተሐድሶ ፓርቲ በታመሰችበት በ16^ኛው መ/ክ/ዘ በደች/ኔዘርላንድስ የተነሣው ዴስደሪየስ ኤራስሙስ ዘሮተርዳም (ከኦክቶበር 27፣ 1466 - ጁላይ 12፣ 1536) የሥላሴን አንድነት ሦስትነት የሚያስረግጡ የቅዱስ መጽሐፍ ክፍሎችን በመፋቅ፣ ድንግል ማርያም ከፈጣሪ በታች ከፍጡራን በላይ መሆኗን በመቃወም፣ ቅዱስ ቁርባንን እና ምሥጢረ ንስሓን የተመለከቱ የሥርዐተ ቤተ ክርስቲያን ክፍሎችንና የተቀደሰውን ክርስቲያናዊ ትውፊት በማቃለል መላ ዘመኑን ያቀነቀነውን ፖሊቲካ እና ዘረኝነት የተቀላቀለበት ስሑት ትምህርት የትንታኔው አስኳል በማድረግ የተጠናቀረ ነው፡፡

ዴስደሪየስ ኤራስሙስ ዘሮተርዳም (በአጭሩ ኤራስሙስ) የላቲኑን ቩልጌት መጽሐፍ ቅዱስ ለማቃናት በሚል ወደ ግሪክ ቋንቋ በመለሰውና “Textus Receptus” እየተባለ በሚታወቀው የግሪክ ሓዲስ ኪዳን ትርጉሙለማርቲን ሉተር ፕሮቴስታንታዊ-ተሐድሶ-ኑፋቄ መስፋፋት ቅልዝ መሬት እንደፈጠረ በሮም ካቶሊኮች ዘንድ ይወቀሳል፡፡ ማርቲን ሉተር በተራ-ተርታ ዘይቤ ወደ ጀርመንኛ በመተርጎም ኑፋቄውን ያስፋፋበት የግሪክ መጽሐፍ ቅዱስ ቅጂ ያገኘው በእጅጉ ያደንቀው ከነበረው ኤራስሙስ ነው፡፡ በዚሁም የኤራስሙስ የሓዲስ ኪዳን ግሪክ ትርጉም በቅዱስ ዮሃንስ ቀዳማይ መልእክት ምዕራፍ 5 ቁጥር 7 ላይ፣ “በሰማይ የሚመሰክሩ ሦስት ናቸው፤ አብ፣ ቃሉ እና መንፈሱ፤ እሊህ ሦስቱ አንድ ናቸው” የሚለው ኀይለ ቃል ተፍቋል፡፡ በወቅቱ ኤራስሙስ ለዚህ የሰጠው ምክንያት ኀይለ ቃሉን እርሱ ባመሳከራቸው ሌሎች ምንጮች ላይ አለማግኘቱን በመጥቀስ ነበር፡፡ ይሁንና በዮርክ የካቶሊክ ጳጳስና የኤራስሙስ የዕድሜ ልክ ተፃራሪ የነበረው ኤድዋርድ ሊ ምለሳው ምስጢረ ሥላሴን የሚያናጋ መሆኑን በማብራራት እንደተቃወመው ጽሑፉ ያትታል፡፡ ይሁንና ሌሎች ምንጮች ኤራስሙስ በሮም ካቶሊክ ውስጥ የተፈጸመው ሥነ ምግባራዊ ዝቅጠትና እርሱ በብልሃት የተፈጠሩ ሰው ሠራሽ የሚላቸው ልማዶች እንዲታረሙ የጣረ፣ ካቶሊካዊነቱን ያልካደ የሞራል ተሐድሶ(Moral Reformer) አቀንቃኝና የዘመነ አብርሆ የብሉይ ፍልስፍና አስተምህሮዎች እና ድርሳናት(Classical thought and Classical Literatures) ምሁር መሆኑን በመጥቀስ ሉተራዊ የፕሮቴስታንት-ተሐድሶ-ኑፋቄ ፊታውራሪ መባሉን ይቃወማሉ፡፡

ጽሑፉ በኣንፃር ኤራስሙስ “ሥላሴ አትበሉ፤እግዚአብሔር አትበሉ፤ኢየሱስ በሉ” በሚል የቤተ ክርስቲያንን አስተምህሮ እየናደ፣ ክርስቲያናዊ ትውፊቷን እያቃለለ የሚገኘውን ጥቅመኛውን እና የተሐድሶ-ኑፋቄ መልእክተኛውን በጋሻው ደሳለኝን በአመልካች ጣት ጠቁሞ የማሳየት ያህል ስም ሳይጠቅስ አብራርቷል፡፡ በጽሑፉ በጋሻው “ኤራስሙስን ተክቶ የሚንቀሳቀሰው የተሐድሶው ፊት አውራሪ” ተብሏል፡፡ ተቺዎች የኮሌጅ ሁለተኛ ዓመት ትምህርቱን መዝለቅ ተስኖት የተባረረውን በጋሻውን ቢያንስ በብሉይ ፍልስፍና እና አስተምህሮ ጥናት ካለውና የቋንቋ ችሎታው ጎልቶ ከሚነገርለት ኤራስሙስ ጋራ ማነፃፀሩ ተገቢ እንዳልሆነ ይናገራሉ፡፡ ይሁንና ጽሑፉ የተሐድሶ ኑፋቄ አቀንቃኝ በሆነ ግብራቸው ያስተካከላቸውን ሁለቱን ግለሰቦች እንደሚከተለው ገልጧቸዋል፤

“. . . ኤራስሞስ የተባለው የተሐድሶ መሪ በመጀመሪያው ቅዱስ ኦገስጢኖስ ከሚባል ገዳም ገባ፡፡ ውሎ ሳያድር የገዳሙ የአኗኗር ሥርዐት ከባድና ሊወጣው እንደማይችል ስለገባው ‹የገዳም ሥርዐት ካልታደሰ፣ ካልተሻሻለ ገዳም አያስፈልግም አለ፡፡ እንደ አጋጣሚ ባፉ ቅልጥፍና የካምብሪጅ ጳጳስ ጠራውና ሥራ እና ነጻ የትምህርት ዕድል በመስጠት ፓሪስ ውስጥ በሚገኘው በሞንቲያጎ ዩኒቨርስቲ እንዲማር ፈቀደለት፡፡ ይሁን እንጂ በዚያም የትምህርት ቤቱን ሥርዐትና ደንብ ባለማክበሩ ከትምህርት ቤቱ ተባረረ፡፡ በዚህን ጊዜ ቁጭቱንና ስንፍናውን ለመደበቅ ገዳም አያስፈልግም፤ ጳጳስ የለም፤ ነጻነት ያስፈልገናል በሚል የፖሊቲካ ቅስቀሳው ሥላሴን የሚቃወም አዲስ ኪዳን እንዳሳተመ ከቤተ ክርስቲያኗ ወጣ፡፡

የግጥምጥምና የታሪክ ራሱን መድገምም በሃገራችን ይታያል፡፡ የኤራስሞስን ቦታ ተክቶ የሚንቀሳቀሰው የተሐድሶው ፊት አውራሪ ከሰንበት ት/ቤት እንኳን ሊያስገባው የሚያስችል ዕውቀት ባይኖረውም እንደ ኤራስሞስ ባገኘው የትምህርት ዕድል መጠቀም የሚያስችል በቂ ችሎታ ስላጠረው የትምህርት ቤቱን ሥርዐትና ደንብ ማቃወስ ጀምሯል፡፡

በዚህ አካሄዱ ስንፍናውን ለመሸፈን ሲል ብቻ በዋናነት “ሲኖዶስ የለም” በማለቱ ከትምህርት ገበታው ተባረረ፡፡ ከዚህ በኋላ ነው እንግዲህ ወደ ዋና ዓላማቸው የገቡት፡፡ በስብከቶቻቸው በመጣጥፎቻቸው የተሐድሶውን የኤራስሙስን ፈለግ በመከተል - ሥላሴ አትበሉ፤ ለጠላቶቼ(ለአጋንንቱ) ሁሉ ምስጋናዬን አቀርባለሁ፤ ስለ እመቤታችን ስሟን መጥራት ባለመፈለግ ከአንዲት ሰማያዊት ተወለደ የሚል የንቀት ዐረፍተ ነገርና ኦርቶዶክሳዊ ያልሆነ አገላለጽ በመጠቀም የቅድስት ቤተ ክርስቲያንን አስተምህሮ በመናድ የግል ጥቅማቸውን የሚያራምዱ ዛሬም በጉያችን አይጠፉም፤. . .በርገጠኝነት የመጨረሻ ግባቸው አብያተ ክርስቲያናት ወደ ጭፈራ ቤት እንዲቀየሩ ለማድረግ ነው፡፡

ዛሬ በየዐውደ ምሕረቱ ካባው የተዋሕዶ፣ ድምፁ የተሐድሶ፣ መነሻው ኢየሱስ መድረሻው ዲያብሎስ የሆነ ስንት አለ መሰላችሁ?...ዛሬ በእናት ቤተ ክርስቲያን ውስጥ ያለውን ውበት፣ ጥቅም፣ ማንነት ለመንጠቅና ሳይጠራ ተጠርቼአለሁ፤ መንፈስ ቅዱስ ላከኝ፣ አዘዘኝ በማለት የተሐድሶዎችን የስብከት ዘዴ በመቃኘት በቅድስት ቤተ ክርስቲያን ዐውደ ምሕረት የሚያቀረሸው ስንቱ ነው? መቼም እንደ ይሥሓቅ አርጅተን ሳይሆን በሥራ ብዛትና በተለያየ የኑሮ ውጣ ውረድ ደንዝዘን የሰበከውን ድምፅ የተሐድሶ መሆኑን ብንለየውም አለባበሱና ሰው ሠራሽ ትሕትናው ግራ የሚያጋባና ለውሳኔ የሚያስቸግረን ስንቱ ተሐድሶ በየዐውደ ምሕረቱ አለ መሰላችሁ? አንድ ቀን ማታለል ይቻላል ሁልጊዜ ግን ማታለል ግን ማታለል ግን አይቻልም፡፡

. . .ዕጣን እያሸተትን ስና ስቀድስ ያደግነው፣ የጻድቃን ሰማዕታት ቅዱሳን መላእክትን ዝክር ዳቦ እየደፋን ንፍሮ እየቀቀልን ለተራቡት በማብላት፣ ለተጠሙት በማጠጣት የምንዘክረው ሃይማኖታችን የቤተ ክርስቲያናችን አስተምህሮ ስለሆነ እንጂ ዘመናዊነት ሳይገባን ቀርቶ አይደለም፡፡

አንዳንዶች ያወቁ እየመሰላቸው ነገር ግን የታወቁ ሰዎች አያድንም፤ ከንቱ ልፋት ነው፤ ዝም ብሎ ንፍሮ መቀቀል ጉልባን ማገንፋት ብለው ሊተቹንና ሊሰድቡን ይሞክራሉ፡፡ ዳሩ ግን መቼም የኢትዮጵያ ቤተ ክርስቲያንን ሊበርዟት ምእመኖቿን ማዳከም አይቻላቸውም፡፡ በተለይ ድንግል ማርያም ስሟ በማይጠራበት ሁኔታ ስለ ተዋሕዶ ትምህርት መናገር ኦርቶዶክሶች ነን ቢሉን አንቀበላቸውም፡፡…”

የጽሑፉ አዘጋጅ የሆኑት ሊቀ ትጉሃን ወንድወሰን/በቅጽል ስማቸው ኮረንቲ/ የመዝሙር ሥራዎችን በማሰራጨት የሚተዳደሩ ሲሆኑ ራሳቸውን ችለው ለማገልገል በሚበቁበት መጠን ነባሩን የቤተ ክርስቲያን ትምህርት ተምረዋል፤ በአሁኑ ወቅት በሰዋስወ ብርሃን ቅዱስ ጳውሎስ ማሠልጠኛ ኮሌጅ በተከታታይ ትምህርት መርሐ ግብር/ሴሚናሪ/ የመጀመሪያ ዓመት ተማሪ መሆናቸው ተገልጧል፡፡ የፕሮቴስታንታዊ-ተሐድሶ-ኑፋቄ አቀንቃኞችን ፊት ለፊት በመጋፈጥ እና በመገሠጽ የሚታወቁት ሊቀ ትጉሃን ወንድወሰን ጽሑፉን እንደሚያሳትሙ ከተሰማበት ጊዜ ጀምሮ ይህ ዘገባ በሚዘጋጅበት ሂደት ከእነ ትዝታው ሳሙኤል የማያባሩ ስልኮች ሥነ ልቡናዊ ጫና የሚፈጥሩ የስም ማጥፋት እና ማስፈራሪያ አዘል ዛቻዎች እየተደረገባቸው መሆኑ ተገልጧል፡፡ ይሁንና ሊቀ ትጉሃን ወንድወሰን በእጃቸው በሚገኙና በምስል ወድምፅ የተደገፉ ማስረጃዎችን ለኅትመት በመዋል ማጋለጣቸውን እንደሚቀጥሉ መናገራቸው ተገልጧል፡፡ ይህም የፕሮቴስታንታዊ-ተሐድሶ-ኑፋቄ ለመከላከል በጥቅምት ወር 2003 ዓ.ም በጥምረት የተጀመረው እንቅስቃሴ ሰፊ መሠረት የመያዙ መገለጫ እንደ ሆነ ተመልክቷል፡፡

የመጽሐፉ ዋና ዋና ነጥቦች በአጭሩ፦

በጽሑፉ በጋሻው ደሳለኝ ህልውና ሥላሴን የሚያጠይቁ ኀይለ ቃሎችን ከቅዱስ መጽሐፍ ለመፋቅ ከሞከረው ተሐድሶው ኤራስሞስ ጋራ እየተነጻጸረ ቀርቧል፤ “ካባው የተዋሕዶ ድምፁ የተሐድሶ፤ መነሻው ኢየሱስ መድረሻው ዲያብሎስ” የተባለው በጋሻው ደሳለኝ በዐውደ ምሕረት በተናገረው ኑፋቄው ተጠርቶ እንዲመረመር አልያም ተወግዞ እንዲለይ ተጠይቋል፡፡
ተሐድሶዎች የቆሎ ተማሪዎችን ወደ ከተማ አስኮብልለው ዳዊታቸውን እያስጣሉ ሎቶ(ሎተሪ) አዟሪ በማድረግ፣ ዓላማና መሠረታዊ ትምህርት የሌላቸውን ደቀ መዛሙርት “ኢየሱስ ብቻ ከበቂ በላይ ነው፤ ከመጽሐፍም መጽሐፍ ቅዱስ ብቻ ከበቂ በላይ ነው” በማሰኘት፣ የአስተዳደር ሠራተኞችን ዳጎስ ባሉ ጥቅማጥቅሞች እና በውዳሴ ከንቱ አባብለው ሥራቸውን እያስለቀቁ ወደ ራሳቸው ድርጅት በማስገባት አብነት ት/ቤቶችን፣ ኮሌጆችን እና ቤተ ክህነቱን እያዳከሙ ኑፋቄያቸውን በማስፋፋት ላይ ናቸው፡፡
“የተሐድሶ መልእክተኞች በአንድ ወቅት ቴዎዶስዮስ የተባለውን የግብፅ ቤተ ክርስቲያን ፓትርያሪክ ‹ድንግል ማርያም የአዳም ኃጢአት አለባት› በሚለው ኢ-ኦርቶዶክሳዊ ትምህርት በማሳመናቸው የግብፅ ኦርቶዶክስ ተዋሕዶ ቤተ ክርስቲያን ድንግል ማርያምን በተመለከተ የተምታታ ትምህርት እንዲኖራት አድርገዋል፡፡ በዚህም በተወሰነ ደረጃ የተሳካላቸው ይመስላል፡፡ በኢትዮጵያ ግን እስከ አሁን ድረስ እየተነሡ ይፈርጣሉ፤ እየተገነጠሉ ይወጣሉ እንጂ የቤተ ክርስቲያኒቱን አስተምህሮም ሆነ መዋቅር ለመለወጥ እና ለመበረዝ አልተሳካላቸውም፡፡” (ጽሑፉ፣ ገጽ 27)
“ከወር እስከ ወር፣ ከዓመት እስከ ዓመት የሥላሴ አንድነት ሦስትነት፣ የድንግል ማርያም አማላጅነት በሚሰበክባት ቅድስት ሀገር የተሐድሶ ኑፋቄ ሤራ ይሳካል ብሎ መልፋት ውጤቱ መልፋት ብቻ ሆኖ ይቀራል፡፡” (ጽሑፉ፣ ገጽ 18)
የጽሑፉ አዘጋጅ ከእነ ትዝታው ሳሙኤል የስልክ ማስፈራሪያ ተደርጎባቸዋል ተብሏል፤
ጽሑፉ የፕሮቴስታንታዊ-ተሐድሶ-ኑፋቄን ለመከላከል የሚደረገው የተቀናጀ እንቅስቃሴ ሰፊ መሠረት የመያዙ መገለጫ እንደ ሆነ ተመልክቷል፤

አትሌት ኃይሌ የለንደን ኦሊምፒክ ማራቶንን ካሸነፈ ሽልማቱን ለገዳም እንደሚሰጥ ቃል ገባ

2011-06-15T11:39:00.000-04:00

(ዘሪፖርተር ጋዜጣ/ Wednesday, 15 June 2011):- አትሌት ኃይሌ ገብረ ሥላሴ በሚቀጥለው ዓመት የሚካሄደውን የለንደን ኦሊምፒክ ማራቶን ካሸነፈ የሚያገኘውን ሽልማት በአማራ ክልል ሰሜን ሸዋ ዞን ለሚገኘው ጥንታዊው የአቡነ መልከ ጸዴቅ ገዳም በስጦታ እንደሚያበረክት ቃል ገባ፡፡

ከጥቂት ሳምንታት በፊት ገዳሙን የጎበኘው ኃይሌ በገዳሙና በገዳሙ ቅርሶች እጅግ ተደምሟል፡፡ በተለይ ከብዙ መቶ ዓመታት በፊት በገዳሙ የተቀበሩ አስከሬኖች ሳይበሰብሱና ሳይፈርሱ መቀመጣቸው አስገርሞታል፡፡

‹‹ኢትዮጵያ ውስጥ ብዙ ያልተጎበኙ ቦታዎች አሉ፡፡ በዚህ ገዳም ለብዙ ዓመታት ሳይፈርሱ የተቀመጡ አስከሬኖች ይገኛሉ፡፡ ይህ ከሳይንቲስቶች ምላሽ ያልተገኘለት ነው፡፡ እኔ እጅግ ደንቆኛል፤ በማለት በገዳሙ መደነቁን ለሪፖርተር ገልጿል፡፡

የአቡነ መልከ ጸዴቅ ገዳም በዞኑ ሚዳ ወረሞ ወረዳ ውስጥ ስራቲ ቀበሌ ይገኛል፡፡ የቦታው አቀማመጥ እጅግ ተራራማና በግዙፍ ቋጥኞች የተከበበ ሲሆን፣ ገዳሙም የሚገኘው በተራራማ ቋጥኝ ሥር በሚገኝ ዋሻ ውስጥ ነው፡፡

ሪፖርተርም ማየት እንደቻለው በገዳሙ ውስጥ የሚገኙ አስከሬኖች አልፈረሱም፡፡ አፈር አልበላቸውም፡፡ ኃይሌም ሁኔታው አስደንቆት ለንደን ማራቶን ላይ ካሸነፈ ለገዳሙ ወርቁን እንደሚያበረክት ቃል ገብቷል፡፡

የዚህ ጥንታዊ ገዳም ቤተክርስቲያን በአሁኑ ወቅት ሕንፃው ከእርጅና ብዛት ፈርሶ በአዲስ መልክ እየተገነባ ነው፡፡ ይሁንና የተሠራበት የኮንስትራክሽን ግብዓት ጥንታዊነቱን የሚያንፀባርቅ ሳይሆን የአሁኑን ዘመን ጥበብ የተላበሰ ነው፡፡

ባለሙያዎች፣ የቅርስ ጥናትና ጥበቃ ባለሥልጣን በጉዳዩ ላይ ትኩረት መስጠት እንዳለበትና በተቻለ መጠን የጥንቱን ይዘት ባልለቀቀ መልኩ መሠራት እንደሚኖርበት ይጠቁማሉ፡፡

በውድነህ ዘነበ

Deje Selam Back to Service

2011-06-11T14:36:00.000-04:00

Deje Selam "blocking" solved.

The service is back to normal now. Our technical team diagnosed the problem hindering our availability. Please inform all readers in Ethiopia to start using the blog.

የማ/ቅዱሳንን ሕትመቶች የሚገመግሙ ሊቃውንት ተመደቡ

2011-06-09T23:03:00.000-04:00

To Read, Print and Share this Message, click HERE (PDF). ይህንን መልእክት በPDF ለማንበብ፣ ለማተም እና ለሌሎች ለማዳረስ ይህንን ይጫኑ።

(ደጀ ሰላም፤ ጁን 9/2011)፦ በማ/ቅዱሳን እና ከበላዩ ባለው በሰንበት ት/ቤቶች ማ/መምሪያ መካከል ለዓመታት ለዘለቀው አለመግባባት በመምሪያው በኩል በምክንያትነት የሚቀርበውን “ማህበሩ ሕትመቶቹን ለመምሪያው አያሳይም” የሚለውን ሰበብ ለመዝጋት ጠቅላይ ቤተ ክህነቱ ባደረገው እንቅስቃሴ ከሊቃውንት ጉባኤ ሦስት ሊቃውንትን መመደቡን በድጋሚ አስታወቀ።

በጠቅላይ ቤተ ክህነት ዋና ሥራ አስኪያጅ በብፁዕ አቡነ ፊሊጶስ ተፈርሞ ዛሬ በወጣው ደብዳቤ ማ/ቅዱሳን “የሚያሰራጫቸው የሕትመት ውጤቶችና የሚዲያ ስርጭቶች ሁሉ በሊቃውንት እየታዩና እየታረሙ እንዲታተሙና እንዲሰራጩ በተወሰነውና በታዘዘው መሠረት ከሊቃውንት ጉባኤ … ከተመደቡት በመ/ታቦር ተሾመ ዘሪሁን፣ በመ/ብሉይ እዝራ ለገሠ እና በመ/ር አእመረ አሸብር እየታዩና እየታረሙ ከሥራ ላይ እንዲውሉ … የማህበረ ቅዱሳን ጽ/ቤትም ከላይ እንደተገለጸው ከሰኔ 1 ቀን 2003 ዓ.ም ጀምሮ ሳያስመረምር ሕትመትና ስርጭት ላይ እንዲያውል በድጋሜ በዚህ ደብዳቤ ግልባጭ” ታዟል።

ጠቅላይ ቤተ ክህነቱ በሁለት በኩል ተወጥሮ ባለበት ሁኔታ ችግሩን በመጠኑ ለማቃለል ይህንን ደብዳቤ ይጻፍ እንጂ በሦስት ሰዎች በወር ሁለት ጊዜ የሚወጣ ስምዐ ጽድቅ ጋዜጣ እና በየወሩ የሚወጣ ሐመር መጽሔት እንዲሁም ሌሎች የሕትመት ውጤቶችን ለማረም እነዚህ ሦስት ሊቃውንት ምን ያህል ጊዜ ሊያገኙ እንደሚችሉ ከአሁኑ የሚያሰጋ ነው። ነገሩ በተፈለገው መልኩ የማይሄድ ከሆነ እና ሕትመቶቹ ከሚታተሙበት ጊዜ እንዲዘገዩ የሚያስገድድ ነገር ቢፈጠር አሁን የተዳፈነው ችግር ድጋሚ መፈንዳቱ እንደማይቀር መገመት ይቻላል።

ማ/ቅዱሳን መጽሔት እና ጋዜጣ ማሳተም ከጀመረበት ከ1985 ዓ.ም ጀምሮ ባሳተማቸው የሕትመት ውጤቶች አንድም ጊዜ በነገረ ሃይማኖት ጥፋት ተገኝቶበት እንደማያውቅ አምና ከፍተኛ የመንግሥት ባለሥልጣናት በተገኙበት “ማ/ቅዱሳንን የመክሰስ” ሸንጎ ላይ የተገለጸ ሲሆን በወቅቱ በነአባ ሰረቀ እንደ ጥፋት የተቆጠረበት አንድ ጉዳይ ሕትመቶቹ ፖለቲካንም በስውር ይጠቅሳሉ የሚለው ክስ እንደነበር መዘገባችን ይታወሳል። እነ አባ ሰረቀ በዚያ ክሳቸው የመንግሥት ባለሥልጣኑ አቶ ተፈራ ዋልዋ “ቤተ ክርስቲያን የነፍጠኞች ዋሻ ናት” ማለታቸውን ለመጠየቅ የተደረገላቸውን አንድ ቃለ ምልልስ በአስረጂነት አቅርበዋል። በእምነት በኩል ግን ሕትመቶቹ ጥፋት አጥፍተዋል የሚባል አንድም ነጥብ ሳይገኝባቸው ቀርቷል።

ጠቅላይ ቤተ ክህነት አሁን በጀመረው መልኩ በመቀጠል በተለያዩ የቤተ ክርስቲያኒቱ አካላት የሚታተሙ መጽሔቶች እና ጋዜጦች ተመሳሳይ የሊቃውንት እርምትና ክትትል እንዲደረግባቸው በማድረግ መዝለቅ ቢችል ለወደፊቱ ሊበጅ የሚችል ተግባር ሊሆን ይችላል።

Leave Voice Message to Deje Selam

2011-06-09T11:02:00.006-04:00

ደጀ ሰላም:- በቤተ ክርስቲያን ጉዳይ ዜናዎችን፣ አስተያየቶችን፣ ጥያቄዎችን፣ መልሶችን የምታወጣ የጡመራ-መድረክ ናት። ግለሰቦች ለሚጽፏቸው ጽሑፎች “ደጀ ሰላም” ኃላፊነቱን አትወስድም። ደጀ ሰላም ራሷ ያዘጋጀቻቸውን ጽሑፎች “ደጀ-ሰላም” ብላ ትጠቅሳለች። ላፊነቱን የምትወስደው ለነዚያ ጽሑፎች ብቻ ነው። ቸር ወሬ ያሰማን፣ አሜን

dejeselam@gmail.com/ Or call at (+1) 703 776-9824

ተስፋ ኪ/ምሕረት የተባለው ማኅበር ተፈረደበት፤

2011-06-09T10:47:00.002-04:00

To Read, Print and Share this Message, click HERE (PDF). ይህንን መልእክት በPDF ለማንበብ፣ ለማተም እና ለሌሎች ለማዳረስ ይህንን ይጫኑ።

የወሰደውን ገንዘብ እንዲከፍል ተወሰነበት፤

(ደጀ ሰላም፤ ጁን 9/2011)፦ ተስፋ ኪዳነ ምሕረት የፀረ ኤች.አይ.ቪ/ኤድስ እና ልማት ማኅበር የሚባለውና በቅርቡ በሐዋሳው የአብያተ ክርስቲያናት ብጥብጥ ስሙ ጎልቶ የሚጠራው ማኅበር ወላጆቻቸውን ያጡ ልጆችን እረዳለሁ በሚል ከሜሪ ጆይ ኢትዮጵያ የወሰደውንና በምንጥቅም ላይ እንዳዋለው ማስረጃ ያላቀረበበትን 73 ሺህ ብር እንዲከፍል፣ እንዲሁም ንብረቱ እንዲታገድ ሲል የሐዋሳ ከፍተኛ ፍርድ ቤት ወሰነ።

ፍርድ ቤቱ ትናንት ከሰዓት በስቲያ ባሳለፈው በዚሁ ውሳኔው መሠረት አብያተ ክርስቲያናትን በመበጥበጥ፣ የምዕመናንን አፍንጫ በመስበር በሌሎች ወንጀሎች የተፈረደበት የቀድሞ የማኅበሩ ሊቀመንበር በቁጥጥር ሥር የዋለ ሲሆን ሌሎች ሁለት የማኅበሩ አመራር አባላት ደግሞ እየተፈለጉ ነው ተብሏል።

በሐዋሳ ያለውን ችግር ለአንዴም ለመጨረሻውም ለመፍታት በቅዱስ ሲኖዶስ የተቋቋመው ኮሚቴ ይህንን ማኅበር ልክ እንደ ቤተ ክርስቲያን አካል በመውሰድ ሪፖርት ከማድረጉም በላይ ከማ/ቅዱሳን ጋር በማስተካከል “ሁለቱም እንዲታገዱ” የመፍትሔ ሐሳብ እንዳቀረበ ይታወሳል። ብፁዕ አቡነ ፋኑኤል፣ በጋሻው ደሳለኝን እና ያሬድ አደመን በመደገፍ የከተማውን አንዳንድ ወጣቶች ለብጥብጥ በመቀስቀስ የድብደባ ወንጀል የፈፀመው ይህ ከቤተ ክርስቲያን ጋር ምንም ግንኙነት የሌለው ማኅበር በሕግ በመጠየቁ በሐዋሳ ያለውን የምዕመናን ልብ ያሳርፋል ተብሎ ይጠበቃል።

የተወደዳችሁ የ ቪኦኤ አዘጋጆች

2011-06-09T09:39:00.000-04:00

(ጸጋ ብሩክ ነኝ ከአሜሪካ):- የፕሮግራማችሁ የዘወትር ተከታታይ ነኝ:: ስለዝግጃትችሁ ሁለ ገብነት እና አስተማሪነት ሁሌም ቢሆን በልበ ሙሉነት የምመሰክረው ሃቅ ነው:: በ6/08/2011 ዝግጅታችሁ ላይ አለማየሁ ከተባሉ አድማጭ የተላከ መልዕክት ብላችሁ ስለ ማኅበረ ቅዱሳን ያስተላለፋችሁት መልዕክት ግን እጅጉን አሳዝኖኛል:: ደብዳቤው የያዘውን ጭፍን ወቀሳ እና ክስ፣ ጭብጥ የሌለው በማስረጃ ያልተደገፈ አስተያየት ምንም ሳትመዝኑና የሚመለከተውን ወገን ለጥያቄ ወይንም ላስተያየት ሳታዘጋጁ የዚህ ማኅበር አባልና ደጋፊ የሆኑ አድማጮቻችሁን ከግምት ሳታስገቡ በማቅረባችሁ ምንም እንኳን የጋዜጠኝነት ሙያ ባይኖረኝም እጅግ ስህተት እንደሰራችሁ ይሰማኛል::

ስለ ማኅበረ ቅዱሳን የማውቀውን ያህል ለመናገር እና ለመመስከር ያህል፣

ማኅበረ ቅዱሳን ከተመሰረተበት ጊዜ አንስቶ እኔን ጨምሮ በሺዎች የሚቆጠሩ ብዙ የከፍተኛ ትምህርት ተማሪዎች በወጣትነት ሊያጋጥማቸው ከሚችል የአፍላነት ፈተና በመታደግ ወደ ክርስትና እንዲመለሱ ያደረገ፣ ወጣቱ ትውልድ ዲግሪ፣ ዲፕሎማ ይዞ የቤተክርስቲያን አስቀዳሽ፣ ዘማሪ፣ አገልጋይ መባልን እንደ እፍረት ሳይሆን እንደ ሕይወት መርህ አድርጎ እንዲይዝ ያደረገ፣ መቀደሻ ጧፍ ዕጣን አጥተው ሊዘጉ የደረሱ ገዳማት እና አድባራትን በልማት ራሳቸውን እንዲችሉ እያደረገና ከተመጽዋችነት ያወጣ፣ አገልጋይ አባላቱ ዛሬ ዛሬ እንደተነሱት በየከተማው በሁለትና ሶስት መኪና እየተንደላቀቁ ይሄን ያህል ካልተከፈለን ጉባኤ ላይ አንገኝም ሳይሉ በእግር እና በፈረስ ሕይወታቸውን ሰውተው ለወንጌል አገልግሎት የሚተጉ፣ ከቤተክርስቲያን ተወልደው የቤተ ክርስቲያንን ዶግማ እና ቀኖና እናድሳለን ከሚሉ ወገኖች ጋር ታግሎ የቤተክርስቲያንን ህልውና ለማስጠበቅ ከአባቶቹ የተሰጠውን አደራ በተለያዩ ጊዜ በመፈጸም የቤተክርስቲያን ህልውና እንዲጠበቅ ያደረገ ማኅበር ነው::

አቶ አለማየሁ የተባሉ አድማጫችሁ ያነሱትን ነጥቦች መሰረት ቢስ መሆናቸውን ለማየት ያህል:-

በአገር ውስጥ ያሉትን ጳጳሳት የማኅበረ ቅዱሳን ደጋፊ እና ተቃዋሚ በማለት ማኅበሩ ለሁለት እንደሚከፍል የተናገሩት ምንጭዎ ምን እንደሆነ ባላውቅም ማኅበሩ ደጋፊ እና ተቃዋሚ ብሎ ያሰለፋቸው ጳጳሳት የሉም። እርስዎ እንዳሉትም ጳጳሳት በሲኖዶስ እንዲጨቃጨቁ የማድረግ ማኅበሩ ሥልጣንም አቅምም የለውም። በተለያዩ የማኅበሩ ሚዲያዎች ላይ እንዳነበብነው ማኅበሩ በቤተ ክርስቲያን ውስጥ አንድ ትልቅ የአገልግሎት ማኅበር እንደመሆኑ መጠን ለሥራዬ እንቅፋት ሆነውብኛል ያላቸውን የሰንበት ትምህርት ቤት ማደራጃ መምሪያ ሐላፊውን የአባ ሰረቀን ጉዳይ እልባት እንዲያገኝለት ለቅዱስ ሲኖዶስ በጽሑፍ አቅርቧል። ቅዱስ ሲኖዶስም ጥያቄውን ተቀብሉ አጣሪ ኮሚቴ ሰይሟል:: ከዚህ በቀር ግን በዜናዎች ላይ እንዳነበብነው እና ከአባቶች እንደተረዳነው ሁሉም አጀንዳ የቀረበው እና የሲኖዶስ አባላት የተወያዩበት በቅዱስ ሲኖዶስ የስብሰባ ሥርዓት እንጂ ማኅበረ ቅዱሳን በሰጣቸው መመሪያ አይደለም::

ስለ ደጀ ሰላምም አንስተዋል፣ ክስዎ ደጀ ሰላምን ከሆነ በደጀ ሰላም ላይ የሚወጡትን ጽሑፎች መተቸት ይችላሉ።አስተያየትም መስጠት ይችላሉ:: ደጀ ሰላም የማኅበረ ቅዱሳን ነው ለሚለው ድምዳሜ ማስረጃዎ ምን እንደሆነ ባላውቅም፣ እንደኔ እንደኔ ደጀ ሰላምን ልክ እንደ አንድ የመረጃ ምንጭ በማየት የሚጠቅመንን በመውሰድ ትክክል ያልመሰለንን ደግሞ አስተያየት በመስጠት ወይንም ባለመቀበል ልናልፈው ይገባል እንጂ የማኅበረ ቅዱሳን አገልግሎት ከደጀ ሰላም ጋር በማያያዝ እልህ መወጫ ማድረግ ግን ተገቢ አይመስለኝም:: አቶ አለማየሁ ቅንነቱ ካለዎት በተለይ እንዳሉት አዲስ አበባ ካሉ ለምን የማኅበሩን አገልግሎት በየገዳሙ እና በየአድባራቱ እየሄዱ አያዩም ምን አልባት ገዳማቱ እና አድባራቱ እንዲኖሩ ከማይፈልጉት ወገን ካልሆኑ በማኅበሩ ስራ እጅግ እረክተው ይህን ደብዳቤ በሌላ እንደሚተኩት እርግጠኛ ነኝ::

አቶ አለማየሁ የቤተ ክርስቲያንንም መዋቅር የሚከሱትንም ማኅበር መዋቅር በቅጥ የሚያውቁት አልመስለኝም፣ በአንደኛው ክስዎ ላይ ማኅበሩ የሰንበት ትምህርት ቤት አባል አይደለም ሲሉ ይሰማሉ፣ የሰንበት ት/ቤት አባል የሚሆ ነው እኮ ግለሰብ ነው እንጂ ማኅበር አይደለም። ማኅበሩ ይህን ከርስዎ የተሻለ ስለተረዳ የማኅበሩ አባላት የሆኑ ግለሰቦች በማኅበሩ አባል ሆነው ለማገልገል በየአጥቢያ ቤተ ክርስቲያናቸው የሰንበት ት/ቤት ወይንም የሰበካ ጉባኤ አባል የመሆን ግዴታ አለባቸው::

ማኅበሩም የራሱ ቃለ አዋዲ እንዳለው ጠቅሰዋል፣ ይሄ በሬ ወለደ ስለሆነ ለማስረዳትም ጭብጥ ስለሌለው አልፈዋለሁ:: ግለሰቦችን ተሃድሶ እና ጴንጤ እያለ ስም ሲያጠፋ በተጨባጭ በሊቃውንት ጉባኤ ሳይሆን በእኔ ስም ማጥፋት ይወገዙልኝ ይላል ያሉት ግን እጅግ መሰረተ ቢስ ነው:: እኔ እስከማውቀው ማኅበሩ በ1990 ዎቹ ዓመታት የቤተ ክርስቲያንን ዶግማ እና ቀኖና አፋልሰዋል ያላቸውን ያቀረበው ለሊቃነ ጳጳሳት እና ለቤተክርስቲያን ሊቃውንት ሲሆን እንዲወገዙ ወይንም በቀኖና ቤተክርስቲያን እንዲመለሱ ያለው ማኅበሩ ሳይሆን የሊቃውንት ጉባኤ ነው:: የማኅበሩ ድርሻ መረጃዎችን አቀነባብሮ ለቤተክርስቲያን አባቶች ማቅረብ ነው:: እርስዎ ድንገት ቢያስቡት ይህ ማኅበር እኮ ብዙ የተማሩ የሕግ እና የአሰራር ባለሙያዎችን የያዘ ነው፣ እነ እከሌ ስሜን አጥፍተዋል ይወገዙልኝ ብሎ የሚደክመው የትኛው የቤተ ክርስቲያን ጉባኤ ጆሮ ሰጥቶ እንዲሰማው ነው? ነገሩ ለየቅል ነው፣ የማያዋጣ ሥራ ውስጥ በመግባት ለመዳከር ማኅበሩ ጊዜ ያለው አይመስለኝም:: በነገራችን ላይ፣ በአሁኑ ሰዓት ማኅበሩ ማንንም ተሃድሶ ብሎ አልወነጀለም። ግን ሁላችንም እንደምረዳው ቤተ ክርስቲያን በጥቅም እና በእናድሳላን ባይ ወገኖች እየታመሰች እንደሆነ እያየን ነው:: በዚህ ጊዜ ማኅበሩ ዝም ብሎ ይቀመጣል የሚል እምነት የለኝም:: እርስዎም እሱ አስፈርቶዎት ከሆነ መፍትሔው ንስሃ መግባት እንጂ እውነትን ጥላሸት በመቀባት የቤተ ክርስቲያን ምዕመናንን ማምታታት አይደለም::

አቶ አለማየሁ፣ ማኅበሩ በኢትዮጵያ እና ውጪ ባለው ሲኖዶስ መካከል እርቅ እንዳይፈጸም እንቅፋት እንደሆነ አንስተዋል፣ እንዳሉት ኢትዮጵያ ካሉ የአሜሪካውን ችግር በደንብ ላይረዱት ስለማይችሉ አስተያየት ባይሰጡ ጥሩ ነው:: ማኅበሩ በሁለቱ አባቶች ያለው እርቅ እንዲሰምር በሽምግልና ከሚደክሙ አባቶች እና ወንድሞች ጋር ያቅሙን አስተዋጽኦ በማድረግ ላይ ነው:: ይህን ለበለጠ ለመረዳት የሽምግልና ኮሚቴውን ማነጋገር በቂ ይሆናል::

ማኅበሩ በሁሉ ቦታ ላይ መግባቱ እንዳሰሰብዎትም ይገልጻሉ በጽሁፍዎ፣ የማኅበሩ አገልግሎት መስፋት እጅግ ካሳሰብዎት ያ እንግዲህ የተመሰረተበት ዓላማ ነውና አሁን ብንከራከር ምንም አንፈይድም:: ግን መንግስት ወይንም ቤተ ክርስቲያን አንድ እልባት ሊሰጡ ይገባል ላሉት ግን፣ መንግስት ለአገር እና ለወገን የሚያስብ ከሆነ ይሄ ማኅበር ብዙ ጥሩ ዜጋዎችን ያፈራ ደሃ የሚበድሉ ሳይሆን ለድሃ የሚያዝኑ፣ ጉቦ የሚቀበሉ ሳይሆን ለተቸገሩ የሚለግሱ፣ ሆዴ ይሙላ ደረቴ ይቅላ እንጂ እኔ ምን ገዶኝ የሚሉ ሳይሆኑ ለሃገር ለወገን የሚያስቡ ፈሪሃ እግዚአብሄር ያላቸው ዜጋዎችን ያፈራ ማኅበር ስለሆን በእንክብካቤ ሊይዘው ይገባል ባይ ነኝ:: ቤተ ክርስቲያንማ እንደሚያስፈልጋት አምናበት መተዳደሪያ ደንብ ሰጥታው ከሥሯ ይዛዋለች::

ማኅበሩ በቃለ አዋዲ እንደማይመራ ደጋግመው ሲጠቅሱ ሰምቻለሁ ግን ማኅበሩ እኮ የሚተዳደረው በቅዱስ ሲኖዶስ በጸደቀለት የራሱ የመተዳደሪያ ደንብ ነው:: ከመክሰሰዎ በፊት ማኅበሩ የሚተዳደርበትን ደንብ ቢያዩ ና እየሰራ ያለውን ነገር ከመተዳደሪያው አንጻር ቢገመግሙ ገንቢ አስተያየት ለመስጠት የሚያግዝዎ ይመስለኛል::

ለአቶ አለማየሁ የምሰጠውን አስተያየት በዚህ ላብቃና ቪኦኤዎች ግን የሚመለከተውን ሁሉ በማነጋገር ስለ ማኅበረ ቅዱሳን በማስረጃ የተደገፈ ዝግጅት ብታቀርቡና አደማጮቻሁ እውነታውን ቢያውቁ ጥሩ ነው እላለሁ::

ሠላም ሰንብቱ!!

ጸጋ ብሩክ ነኝ ከአሜሪካ

በስምዐ ጽድቅ ኅትመት ላይ የተጣለው እገዳ ተነሣ

2011-06-08T12:36:00.001-04:00

To Read, Print and Share this Message, click HERE (PDF). ይህንን መልእክት በPDF ለማንበብ፣ ለማተም እና ለሌሎች ለማዳረስ ይህንን ይጫኑ።

“እገዳው በአጣሪ ኮሚቴው ሥራ ላይ እንቅፋት ሊፈጥር ይችል ይሆናል፡፡” (የመ/ፓ/ጠ/ጽ/ቤት)
እነ አባ ሰረቀ ደብዳቤው ከመዝገብ ቤት እንዳይወጣ ለማሳገድ ሞክረዋል::
የዋና ሓላፊው ሕገ ወጥ እግድ ብፁዓን ሊቃነ ጳጳሳት አስቆጥቷል፤ የጠቅ/ቤ/ክ ሓላፊዎችን አሳዝኗል
የአባ ሰረቀ እግድ በዋ/ሥ/አስኪያጁ መሻሩ ዋና ሓላፊው በሕገ ወጥ መግለጫቸው በማኅበረ ቅዱሳን ላይ እወስዳቸዋለሁ ያሏቸው አስተዳደራዊ ርምጃዎች ከድብቅ ዓላማቸው የሚመነጩ ከመሆናቸው ውጪ መሠረተ እንደሌላቸው የሚያሳይ ነው::

(ደጀ ሰላም፤ ጁን 8/2011)፦ በኢ/ኦ/ተ/ቤ/ክ የሰንበት ት/ቤቶች ማደራጃ መምሪያ ማኅበረ ቅዱሳን በየ15 ቀኑ እና በየወሩ በሚያሳትማቸው የስምዐ ጽድቅ እና የሐመር መጽሔት ኅትመት ላይ በመምሪያው ዋና ሓላፊ በሕገ ወጥ መንገድ ተጥሎ የነበረው እገዳ መነሣቱን የመንበረ ፓትርያርክ ጠቅላይ ጽ/ቤት አስታወቀ፡፡

የማኅበረ ቅዱሳንን የኅትመት ውጤቶች ለረጅም ዓመታት ሲያትም መቆየቱ ለተገለጸው ለሜጋ ማተሚያ ድርጅትና ለሌሎች አምስት ማተሚያ ቤቶች እንዲሁም ለብሮድካስት ባለሥልጣን ዛሬ የተላከው የእግድ መሻሪያ ደብዳቤ በዋና ሥራ አስኪያጁ በብፁዕ አቡነ ፊልጶስ ፊርማ የወጣ ነው፡፡ በደብዳቤው ላይ እንደተመለከተው በቅዱስ ሲኖዶስ ምልአተ ጉባኤ “በሰንበት ት/ቤቶች ማ/መምሪያ ሥር ስላለው ስለ ማኅበረ ቅዱሳን የሥራ እንቅስቃሴ አጣርቶ የሚያቀርብ ብፁዓን አባቶች ያሉበት ኮሚቴ ተቋቁሞ ሥራውን ለመጀመር በዝግጅት ላይ ባለበት ወቅት ንትርክ እና ጭቅጭቅ መፈጠሩ በማጣራቱ ሥራ ሂደት ላይ ዕንቅፋት ሊፈጠር ይችል ይሆናል፡፡”

የማደራጃ መምሪያው ሊቀ ጳጳስ የእገዳው መጣል ትክክል እንዳልሆነ የገለጹትን መሠረት ያደረገው የብፁዕ ዋና ሥራ አስኪያጁ ደብዳቤ፣ አባ ሰረቀ “በመምሪያው በኩል በሊቃውንት እያስመረመረ እንዲያሰራጭ የታዘዘውን ሥራ ላይ አላዋለም” በሚል ከግንቦት 1 ቀን 2003 ዓ.ም ጀምሮ የማኅበሩ መጽሔት እና ጋዜጣ እንዳይታተም ለማተሚያ ድርጅቶች የጻፉት እገዳ መነሣቱን አስታውቋል፡፡

እግዱን የሚሽረው ደብዳቤ ዛሬ ሊወጣ የቻለው የማደራጃ መምሪያው ሊቀ ጳጳስ ብፁዕ አቡነ ቀሌምንጦስ የአባ ሰረቀ አካሄድ ከእርሳቸው አቅም በላይ መሆኑን በመግለጽ ግንቦት 29 ቀን 2003 ዓ.ም የመ/ፓ/ጠ/ቤ/ክ/ጽ/ቤት ጉዳዩን በትኩረት ተመልክቶ መፍትሔ እንዲሰጥበት የጻፉት ደብዳቤ በማኔጅመንት ኮሚቴው ከታየ በኋላ ነው፡፡ በውሳኔው የተበሳጩት የማደራጃ መምሪያው ሓላፊ አባ ሰረቀ እና ምክትል ሓላፊው መምህር ዕንቁ ባሕርይ ተከሥተ ደብዳቤው የመዝገብ ቤቱን ሥርዐት አሟልቶ ወጪ እንዳይደረግ ከመዝገብ ቤቱ ሠራተኞች ጋራ ሲነታረኩ ታይተዋል፡፡

ሠራተኞቹ ደብዳቤውን እንዲያቆዩት ሲያከላክሉ የነበሩት የመምሪያው ሓላፊዎች አፈጻጸሙን ለመከታተል በሥፍራው ከነበሩት የማኅበረ ቅዱሳን ጽ/ቤት ሓላፊዎች ጋር ኃይለ ቃል መለዋወጣቸው ተሰምቷል፡፡ ንግግራቸውን የተከታተሉት በአካባቢው የነበሩ የጠቅላይ ቤተ ክህነቱ የአስተዳደር ሠራተኞች እና መምሪያ ሓላፊዎች በአባ ሰረቀ ድርጊት ማዘናቸው ተመልክቷል፡፡ እነ አባ ሰረቀ በቃል የመዝገብ ቤቱ ሠራተኞች ደብዳቤውን ወጪ ከማድረግ ተቆጥበው እንዲያቆዩት እየተጨቃጨቁ በተመሳሳይ ጊዜ ጉዳዩ ወደ ብፁዕ ወቅዱስ ፓትርያርኩ ዘንድ እንዲደርስ ሲጥሩ እንደነበር ተገልጧል፡፡

ብፁዕ ወቅዱስ ፓትርያርኩ ሰሞኑን ከአዲስ አበባ አድባራትና እና ገዳማት አስተዳዳሪዎች፣ ጸሐፊዎች፣ ቁጥጥሮች፣ ሒሳብ ሹሞች እና ገንዘብ ያዦች የሀገረ ስብከቱ ሥራ አስኪያጅ ንቡረ እድ አባ ገብረ ማርያም ገብረ ሥላሴ ከሓላፊነታቸው ለማስነሣት ሲሰበሰብ በነበረ የአድማ ፊርማ ጉዳይ እና በሌሎችም ጉዳዮች ላይ እንደመከረ በተገለጸው የቋሚ ሲኖዶስ ስብሰባ ላይ የነበሩ በመሆናቸው ለጊዜው የእነ አባ ሰረቀ ጥረት ላይሠምር እንደ ቻለ ምንጮቹ ጠቁመዋል፡፡ ጥረታቸው ያልሰመረላቸው እነ አባ ሰረቀ ብቻ ሳይሆኑ ቋሚ ሲኖዶሱ በስብሰባ ላይ በነበረበት ሁኔታ እዚያው ቆመው ተራ በመጠበቃቸው መከፋታቸውን በስልክ ሲናገሩ የተሰሙት ወ/ሮ እጅጋየሁ ጭምር ናቸው፡፡ ተደጋጋሚ ጥሪ በሞባይል ስልካቸው እያስተናገዱ ወዲያ ወዲህ ሲሉ የታዩት ወይዘሮዋ ዛሬ በሁለት ምክንያት እዚያ እንደተገኙ ምንጮቹ ጠቁመዋል፤ አንድም - በሰዓቱ እነ አባ ሰረቀ ለነበረባቸው ጭንቀት ‹ፍጡነ ረድኤት› ለመሆን፤ ዳግመኛም ቅዳሜ ዕለት በደብረ አሚን ጻድቁ አቡነ ተክለ ሃይማኖት ቤተ ክርስቲያን ሰንበት ት/ቤት ወጣቶች ላይ አጠፌታ ለማሰጠት በቀጠለው ጥረት ተጎድተናል ለሚሉት ወገኖች አቤቱታ ለማቅረብ፡፡

የአባ ሰረቀ እገዳ ብፁዓን ሊቃነ ጳጳሳትንም ማስቆጣቱ የተጠቆመ ሲሆን ዛሬ በብፁዕ ዋና ሥራ አስኪያጁ ደብዳቤ መሻሩ ደግሞ፣ “ዋና ሓላፊው በሕገ ወጥ መግለጫቸው በማኅበረ ቅዱሳን ላይ እወስዳቸዋለሁ ያሏቸው አስተዳደራዊ ርምጃዎች ከድብቅ ዓላማቸው የሚመነጩ ከመሆናቸው ውጪ መሠረት እንደሌላቸው የሚያሳይ ነው፤” ብለዋል - ታዛቢዎች፡፡ እግዱ በማጣራቱ ሂደት ለማለፍ መያዣ መጨበጫ ያጡት ዋና ሓላፊው የአጣሪ ኮሚቴን ተግባር አስቀድመው በሚፈጥሩት ውዝግብ በመጥመድ ለማሰናከልና የመደራደሪያ አቅም ለመፍጠር የዘየዱት ሊሆን እንደሚችል የሚጠራጠሩ አስተያየት ሰጪዎች በበኩላቸው የዛሬው ውሳኔ አባ ሰረቀ፣ “በቅድመ ማጣራቱ ሂደት የተከናነቡት የመጀመሪያው የሕዝብ ግንኙነት ክስረት” ሊባል እንደሚችል ጠቁመዋል፡፡

ይሁንና ማኅበረ ቅዱሳን የገጠመውን መሰናክል እንደምን እያስወገደ ራሱን ለቀጣይ አገልግሎት በሁለንተናዊ ስልት ማዘጋጀት እንደሚገባው ተጨማሪ ትምህርት ሰጥቶ ያለፈ እንደሆነም መክረዋል፡፡

ከተጀመረ 18 ዓመታትን ያስቆጠረው እና እገዳ የተጣለበት የ18^ኛ ዓመት ቁጥር 18 እትሙ በሌላ ማተሚያ ቤት ከታተመ በኋላ ከትናንት ጀምሮ በስርጭት ላይ እንደሚገኝ መግለጻችን ይታወሳል፡፡

/ቋሚ ሲኖዶስ በአዲስ አበባ ሀገረ ስብከት ሥራ አስኪያጅ ጉዳይ የደረሰበትን ውሳኔ እንደደረሰን እናቀርባለን/

ስምዐ ጽድቅ ታተመች

2011-06-07T18:16:00.002-04:00

(ደጀ ሰላም፤ ጁን 7/2011)፦ ከሥርዓት ውጪ በተደረገ የደብዳቤ እና የስልክ ልውውጥ ሕትመቷ ተስተጓጉሎ የነበረው የኢትዮጵያ ኦርቶዶክስ ጋዜጣ ስምዐ ጽድቅ በዛሬው ዕለት በሌላ ማተሚያ ቤት ታትማ መሠራጨት ጀምራለች። ከ1985 ዓ.ም ጀምሮ በመታተም በሕትመት ብዛት እና ረዥም ዓመታት በማሳለፍ ቀዳሚ የሆነችው ይህች ጋዜጣ ለብዙ ጊዜያት ያለመታተም እንቅፋት ቢገጥማትም እንደ አሁኑ ከፍ ያለ ፈተና እንዳልደረሰባት ምንጮች አስረድተዋል። ብዙዎች ምዕመናን “መምህራችን” የሚሏት ጋዜጣዋ መቋረጧ በደጀ ሰላም ከተዘገበበት ጊዜ ጀምሮ ከፍተኛ ቁጣ መቀስቀሱን የተረዳን ሲሆን ቤተ ክህነቱ አሁን በያዘው መልኩ የሚሔድ ከሆነ ምዕመናን የራሳቸውን መፍትሔ ወደ መፈለግ እና በደብረ አሚን አቡነ ተ/ሃይማኖት ቤተ ክርስቲያን እንደታየው ዓይነት “ጉልበት ወደ መጠቀም” የመሰለ አላስፈላጊ መፍትሔ እንዳይዘዋወሩ አስግቷል።

ሰበር ዜና - የስምዐ ጽድቅ ጋዜጣ ኅትመት ታገደ

2011-06-06T15:47:00.003-04:00

To Read, Print and Share this Message, click HERE (PDF). ይህንን መልእክት በPDF ለማንበብ፣ ለማተም እና ለሌሎች ለማዳረስ ይህንን ይጫኑ።

እግዱ አባ ሰረቀ ለሜጋ ማተሚያ ኢንተርፕራይዝ የጻፉትን ደብዳቤ እና የብሮድካስት ባለሥልጣን ለኢንተርፕራይዙ ሰጥቶታል የተባለውን የቃል ትእዛዝ መነሻ ማድረጉ ተነግሯል፤

(ደጀ ሰላም፤ ጁን 6/2011)፦ ከ1985 ዓ.ም መጨረሻ ጀምሮ በሕትመት ላይ የነበረው እና በማ/ቅዱሳን የሚታተመው ስምጸ ጽድቅ ጋዜጣ እንዳይታተም እገዳ እንደተጣለበት ምንጮቻችን አስታወቁ። የጋዜጣው አሳታሚ የሆነው የማኅበረ ቅዱሳን ሥራ አመራር ጉባኤ ጽ/ቤት እና የሥራ አስፈጻሚ ጉባኤ ጽ/ቤት አባላት ከመምሪያው ሊቀ ጳጳስ እና ከብፁዕ ዋና ሥራ አስኪያጁ ጋራ ተወያይተዋል፡፡

ውይይቱን የተከታተሉት የመንበረ ፓትርያርኩ ምንጮች አባ ሰረቀ በጠቅላይ ቤተ ክህነቱ የአስተዳደር ጉባኤ ላይ እርሳቸው የመምሪያው ዋና ሓላፊ ቢሆኑም ማኅበሩ ከእርሳቸው ጋራ መወያየት እንደማይሻ፣ መምሪያውን እንደማያከብር ይልቁንም እርሳቸውን እያለፈ ቤተ ክህነቱን ለሚጠይቅበት ጉዳይ ሁሉ የብፁዕ ዋና ሥራ አስኪያጁ ጽ/ቤት ተባባሪ መሆኑ “በዋና ሓላፊነታቸው ጣልቃ መግባት” መሆኑን አዘውትረው በመጥቀስ ማኅበሩን እንደሚከሱ እና ዋና ሥራ አስኪያጁን እንደሚወቅሱ፣ ይሁንና ማኅበሩ ከእርሳቸው ጋራ ለመወያት ፈቃደኛ ቢሆን “ሁሉም ነገር ቀርቶ ችግሩ እንደሚስተካከል” እንደሚናገሩ ተገልጧል፡፡

“የጋዜጣውን ኅትመት አላግባብ ማገድ ቤተ ክርስቲያን በሕግ ያቋቋመችውን ማኅበር ያለሕግ ከመዝጋት አይተናነስም” ያሉት የማኅበሩ አመራሮች በበኩላቸው የመምሪያው ዋና ሓላፊ ሥራ ከጀመሩበት ወቅት አንሥቶ እስከ ስድስት ጊዜ ለፊት ለፊት ውይይት በደብዳቤ መጠየቃቸውን፣ ይሁንና ዋና ሐላፊው ፈቃደኛ ካለመሆናቸውም በላይ “ማኅበሩን ዐውቀዋለሁ፤ ገለጻ አያስፈልገኝም፤” በማለት የማኅበሩን የተለያዩ ጥሪዎች ከመናቅ ጀምሮ ከማኅበሩ ጋራ ለመሥራት እንደማይሹ የገለጹበትን ሁኔታ አስታወሰዋል፡፡ በቅርቡ ዋና ሐላፊው በብዙኀን መገናኛ ቀርበው በሰጡት መግለጫ ማኅበሩን መወንጀላቸውንና ይህም በአጣሪው ኮሚቴ ተግባር ላይ ተጽዕኖ ሊያሳድር እንደሚችል ያስረዱት አመራሮቹ፣ አባ ሰረቀ የማኅበሩን የሚዲያ ውጤቶች ለመገምገም ያወረዱት መምሪያ ማኅበሩ የራሱን ኤዲቶሪያል ቦርድ አቋቁሞ እንዲሠራ በቅዱስ ሲኖዶስ በጸደቀለት መተዳደሪያ ደንብ ላይ የተደነገገውን የሚተላለፍ እንደሆነ አመልክተዋል፡፡

ይሁንና ጉዳዩን በመርሕ ሳይሆን በአፈጻጸም ደረጃ ተቀብሎና ተግባብቶ ለመሥራት በሚል ከሊቃውንት ጉባኤ ለተመረጡት ሦስት የኤዲቶሪያል ልኡካን በየወሩ ለእያንዳንዳቸው ብር 1000 አበል እየከፈለ ለመሥራት በሚችልባቸው አግባቦች ላይ ምክረ ሓሳብ አርቅቆ የመምሪያው ሊቀ ጳጳስ ብፁዕ አቡነ ቀሌምንጦስ ባሉበት ከማደራጃ መምሪያው ተወካዮች ጋራ ስምምነት የተደረሰበት ውይይት አካሂደው እንደነበር፣ በሂደት ግን መምሪያው ጉዳዩን ባለመከታተሉ መስተጓጎሉን አብራርተዋል፡፡

በቅርቡ የማዳራጃ መምሪያው ዋና ሓላፊ አባ ሰረቀ ለሃገር ውስጥ እና ለውጭ ብዙኀን መገናኛ የሰጡት መግለጫ ሕገ ወጥ መሆኑን ያስታወቁት የማደራጃ መምሪያው ሊቀ ጳጳስ ብፁዕ አቡነ ቀሌምንጦስ የአባ ሰረቀ አካሄድ ከእርሳቸው አቅም በላይ መሆኑን ተናግረዋል፡፡ “የርክበ ካህናት ቅዱስ ሲኖዶስ ምልአተ ጉባኤ በመምሪያው እና በማኅበሩ መካከል ያለውን ችግር እንዲያጣራ ያቋቋመው ኮሚቴ ሥራውን በጀመረበት ወቅት የተላለፈው የአባ ሰረቀ እግድ ዋና ሓላፊው ባልተሰጣቸው ሥልጣን የፈጸሙት እና አሠራሩን ያልተከተለ ተግባር ነው” ያሉት ብፁዕነታቸው ለእግዱ መሻሪያ ተጽፎ የጋዜጣው ኅትመት እንዲቀጥል የመ/ፓ/ጠ/ቤ/ክ ዋና ሥራ አስኪያጅ ብፁዕ አቡነ ፊልጶስን ጠይቀዋል፡፡ “ከግራ ከቀኝ እሳት እየነደደብኝ ነው” በማለት በሁኔታው በእጅጉ መታወካቸውን የተናገሩት ብፁዕነታቸው በመምሪያው ሊቀ ጳጳስ የተገለጸውን በመጥቀስ ለሜጋ ማተሚያ ኢንተርፕራይዝ እንደሚጽፉ ይጠበቃል፡፡

“ውይይት በሆነ ጉዳይ ላይ ለመግባባት ወይም መረጃ ለመለዋወጥ ነው፤ አሁን አባ ሰረቀ ይሁነኝ ብለው በዓላማ የማኅበሩን አገልግሎት ለማደናቀፍ በግላጭ እየሠሩ ባሉበት ሁኔታ ግን ከእርሳቸው ጋራ የቀጥታ ውይይት ማካሄድ የማይሞከር ነው፤” ያሉት አመራሮቹ ከዚህ በኋላ በጉዳዩ ላይ ለውይይት መቀመጥ የሚቻለው ከአጣሪው ኮሚቴ ጋራ እና ኮሚቴው በሚያስቀምጣቸው አግባቦች ብቻ ነው ማለታቸው ተመልክቷል፡፡ የጋዜጣውን እግድ በተመለከተም ከጥንቱም በመተዳደሪያ ደንቡ መሠረት እንጂ አባ ሰረቀ ለማተሚያ ቤቱ ስለ ፈቀዱ የሚያሳትሙት ስላገዱ ደግሞ የሚያቆሙት ከቶም ሊሆን እንደማይችል ከሜጋ ሐላፊዎች ጋራ ባደረጉት ውይይት አስረግጠዋል - “ቀድሞም አትሙላቸው ብለው እንዳልጻፉ ሁሉ አሁንም መከልከል አይችሉም፡፡”

አባ ሰረቀ ለማተሚያ ቤቱ የጻፉት እግድ ከተቋሙ የውጭ ግንኙነት አሠራር አኳያ ሲታይ ቢያንስ ከበላያቸው ያሉትን የጠቅላይ ቤተ ክህነቱን ሁለት የመዋቅር እርከኖች(የዋና ሥራ አስኪያጁን እና የቅዱስ ሲኖዶስ ጽ/ቤትን/የብፁዕ ወቅዱስ ፓትርያርኩን) አልፎ የሄደ መሆኑን ጠቁመዋል፡፡

የዜናው ምንጮች እንደጠቆሙት ማኅበረ ቅዱሳን በየጊዜው የሚያድሰውን የሚዲያ ውጤቶቹን ፈቃድ ያገኘበት ኦሪጅናል ፈቃዱ የሚገኘው በአባ ሰረቀ እጅ ነው፡፡ አሁን ባለው የብሮድካስት ባለሥልጣን አሠራር ሕጋዊ ዕውቅና ያላቸው አብያተ እምነት እና የፖሊቲካ ፓርቲዎች የመሳሰሉት ተቋማት ዓላማቸውን ለሚያስፈጽሙባቸው የኅትመት ውጤቶች ፈቃድ ዓመታዊ እድሳት እንደማያስፈልጋቸው በ2000 ዓ.ም የወጣው የመገናኛ ብዙኀንና የመረጃ ነጻነት ዐዋጅ አንቀጽ 9 ንኡስ አንቀጽ 3 ላይ እንደሚደነግግ ተጠቁሟል፡፡ ከዚህ አኳያ ኅትመቱ የታገደው የስምዐ ጽድቅ ጋዜጣ በዚህ ዐዋጅ መሠረት በቀድሞው አሠራሩ ይቀጥል እንደሆን አልያም እንደሌሎቹ የግል ጋዜጦች በንግድ እና ኢንዱስትሪ ሚኒስቴር ተመዝግቦ ግብር እየከፈለና ዓመታዊ እድሳት እየፈጸመ ይሠራ እንደሆን ወደፊት የሚታይ ይሆናል፡፡

አንዳንድ የጉዳዩ ተከታታዮች አባ ሰረቀ ባለፈው ሳምንት አጋማሽ በብዙኀን መገናኛ ቀርበው የሰጡትና በጠቅላይ ቤተ ክህነቱ የበላይ ሓላፊዎች “ሕገ ወጥ ነው” የተባለው መግለጫ እንደ ሬዲዮ ፋና እና እንደ ኢትዮጵያ ቴሌቪዥን እና ሬዲዮ ባሉት የመንግሥት ብዙኀን መገናኛዎች ተከታታይ ሽፋን ያገኘበት አኳኋን፣ “በጉዳዩ የፓትርያርኩ ጽ/ቤት እና አንዳንድ የመንግሥት ባለሥልጣናት ግፊት/ይሁንታ እንዳለበት ያሳያል” ብለዋል፡፡ የጉዳዩ ተከታታዮች፣ መግለጫው በተጠቀሱት ሚዲያዎች እንዲሰራጭ አባ ሰረቀ የኢትዮጵያ ቴሌቪዥን ድርጅት ድረስ በመሄድና ግለሰቦችን በስም ጠርተው በመወንጀል የተጉበትን፣ ይህን ተከትሎ ከኮሚዩኒኬሽን ጉዳዮች ጽ/ቤት በኩል በተሰጠ ትእዛዝ የኤዲቶሪያል ውሳኔ ተደርጎ በፋና ሬዲዮ የተላለፈው ዜና በኢ.ቴቬ የተደገመበትን ሁኔታ እንደሚያውቁ ይናገራሉ፡፡

የማኅበረ ቅዱሳን ሥራ አመራር ጉባኤ በቅርቡ ባካሄደው ስብሰባ አባ ሰረቀ በሕገ ወጥ መግለጫቸው “ማኅበሩ በ19 ዓመት ውስጥ አንድም ጊዜ ኦዲት ተደርጎ እንደማያውቅ” በድፍረት በተናገሩበትና በሌሎችም ስም አጥፊ ጉዳዮች ላይ ክስ ለመመሥረት መወሰኑን ለመረዳት ተችሏል፡፡ ይሁንና አስተያየት ሰጪዎች ማኅበሩ በአገልግሎቱ አሁን በግልጽ እየገጠመው ካለው መሰናክል እና በቤተ ክርስቲያኒቱ ላይ ካንዣበበው አደጋ አኳያ ተመጣጣኝ፣ ሰላማዊ እና በጭብጥ የተመዘነ የአገልግሎት ስልት ለውጥ ለማድረግ በጠቅላላ ጉባኤው የወሰነውን ቀልጥፎ ወደሚተገብርበት አመራር እንዲገባ ይጠብቃሉ፡፡

ስምዐ ጽድቅ በትርጉሙ የእውነት ምስክር ማለት ሲሆን ጋዜጣ በጥር ወር 1985 ዓ.ም የተቋቋመ፣ በመንፈሳዊ እና ማኅበራዊ ጉዳዮች ላይ የሚያተኩር ጋዜጣ ነው፡፡ ለዓመታት ሳያቋርጥ የቆየው ኅትመቱ በአባ ሰረቀ እንዲታገድ የተደረገው የ18^ኛዓመት ቁጥር 18 እትም ዝግጅቱ ተጠናቅቆ ለኅትመት ከገባ በኋላ መሆኑ ተሰምቷል፡፡ የአሁኑ የጋዜጣው እትም አባ ሰረቀ በሕገ ወጥ መግለጫቸው በሰነዘሯቸው ውንጀላዎች ላይ የመምሪያውን ሊቀ ጳጳስ አስተያየት እና ሌሎች ብፁዓን አባቶች ስለ ርክበ ካህናት ቅዱስ ሲኖዶስ ጉባኤ ውሳኔ የሰጧቸውን ቃለ ምልልሶች የያዘ እንደነበር ተጠቁሟል፡፡

ብፁዕ ሥራ አስኪያጁ ለመጻፍ እንደሚቸገሩ የገለጹትን የእግድ መሻሪያ የሚገልጽ ደብዳቤ ቢጽፉም አባ ሰረቀ ጉዳዩን እንደተለመደው ወደ ፓትርያሪኩ በቀጥታ በመወሰድ ዋጋ ለማሳጣት እንደሚሞክሩ ተገምቷል፡፡ አሁን በአባ ሰረቀ የተጀመረው የጋዜጣው ኅትመት እግድ ማኅበሩ በሚያሳትማቸው የሐመር መጽሔትና ሌሎች ሥራዎች ላይ ተፈጻሚ ከመሆን አልፎ የማኅበሩ ሒሳብ እንዳይንቀሳቀስ እስከማገድ ደርሶ ማኅበሩ የአባላቱን ሞያ እና ገንዘብ ከበጎ አድራጊዎች እገዛ ጋራ በማቀናጀት የገባበትን የሁለት ዐሥርት ዓመታት አገልግሎት እንዳያስተጓጉለው ተሰግቷል፡፡