Uda bat markaberritzeko

@didabrand — Tue, 24 Jul 2018 07:16:02 +0000

Uda bat markaberritzeko

Atsedena lanaren parte da. Are garrantzitsuagoa asmo berriz beteriko lanurte baten aurreko udan. Indar berriturik itzuli nahi dugu datorren irailean, eta, aurretik, agentzia itxi egingo dugu abuztuaren 4tik 19ra bitartean.

Berezia izango da guretzat uda hau. Hemezortzi urte bete ondorengo oporraldia. Bidaia iniziatikoak amesteko baliatu gura dugu aurtengo abuztua: gutaz, gure inguruneaz eta gure egitekoaz (in)kontzientzia hartzeko, egunerokotasunera itzultzean nor izango garen hobeto zehaztu ahal izateko.

Hasi ginenetik honainoko ibilbidea, gure bezeriaren markak eta egitasmoak, eskaintzen ditugun zerbitzuak eta lan-taldea, beste sortzaile eta aditu batzuekin egindako elkarlanak… Hori guztia daramagu gurekin oporretan. Hori guztia eta bulegotik irten bezain laster bururatzen joango zaizkigun asmorik ederrenak ere bai.

Gure burua txunditzeko moduko ametsak egin ondoren esnatu nahi genuke.

Irailean itzuliko gara marka berritu batekin, eta gure agentzia berposizionatuko dugu. Gaur egungo gure izaera, bezeria eta merkatua islatuko duten nortasuna eta kontakizuna aurkeztuko ditugu orduan, aldi berri bati ekiteko.

Oporraldi ona eta datorren lanurte berrirako asmo eta indarrik handienekin itzultzea desio dizuegu zuei guztioi ere.

The post Uda bat markaberritzeko appeared first on .

Berritu ala hil

@didabrand — Tue, 17 Jul 2018 05:52:06 +0000

Beste edozein enpresak eta markak bezala, merkatu lehiakor batean dihardugu guk ere, testuinguru profesional berrietara egokitzen etengabe. Horregatik, horretarako egin dugu marka azterketa, bezeroei galdetzetik hasita.

Joan zen urte amaieran bidali genien on-line galdetegia kudeatzen ditugun marketako arduradunei, eta hainbat balio onetsi zizkiguten: marka nortasunen eraikuntza eta komunikazio euskarrien sorkuntza maila, gaitasun profesional, gertutasuna eta inplikazioa, besteak beste. Hobetzekoen artean, berriz, markagintza digitaleko zerbitzuak eta egitasmoetan aholkularitza jarraituagoa egitea nabarmendu zizkiguten bezeroek.

Bezeroen premiei erantzuteko erabakimenez, lan-taldea handitu dugu. Hamaika lagun gara gaur egun. 24 urte ditu gazteenak eta 51 eskarmenturik handienekoak. Sei dira gizonezkoak eta bost andrazkoak. Zazpi bizkaitarrak, hiru gipuzkoarrak eta bat nafarra. Eta guztiok liluratzen gaitu markagintza lan on eta pasiodunak.

Lan-lekua eta baliabideak hobetzeko ekinean ere ari gara. Bulegoko espazioak berregokitu ditugu: bilera gela handitu, lan-mahaiak aldatu, ordenagailu berriak erosi eta, guztiarekin, hobeto lan egin ahal izateko baldintzak ezarri.

Hori guztia egunero kudeatzen ditugun markekin batera berritzen eta hazten jarraitzeko.

The post Berritu ala hil appeared first on .

Errementariaren etxean…

@didabrand — Tue, 10 Jul 2018 04:44:15 +0000

Bezeroei eskaintzen dieguna geuretzat hartuz, gure marka aztertu eta datozen urteei begirako estrategia berritu dugu lanurte honetan zehar.

On-line galdetegiaren bitartez hainbat bezeroren iritziak jaso ondoren, agentziako langileekin talde-eztabaidak eta markagintzan aditu diren kolaboratzaileekin sakoneko elkarrizketak egin ditugu; baita merkatuaren eta lehiakideen azterketa ere.

Hemezortzi urte bete ditugu ekainean, eta heldutasunera heldu garela esateko moduan gaude. Hamarkada hasieran krisiak gogor jo zuen komunikazio arloan ere, eta ez dira gutxi urteotan itxi egin behar izan duten agentziak. Di-dak ere testuinguru profesional berrietara egokitu behar izan du. Hala ere, norabide estrategikoari eutsi egin diogu, eta gure poza agertu nahi dugu.

Urteotako bezeroekin egindako lanei esker, duela bost urte ezarritako helburua lortu dugu: zerbitzu osoko euskal markagintza agentzia izatea. Gaur egun, marka estrategia, on eta off markagintza eta komunikazio kanpaina zerbitzuak eskaintzen dizkiegu gizarte zein administrazio erakundeei, zerbitzu zein industria enpresei eta euskal marka komertzialei.

Datozen urteetan ere, egitasmo bakoitzaren premiak zehaztea izango da gure abiapuntua, marka bakoitzaren beharrei erantzuteko lan-talderik onena osatzen jarraitzeko, agentzian egunero dihardugun lankideak eta aditu kolaboratzaileak bilduz.

The post Errementariaren etxean… appeared first on .

… eta di-da batean, 18 urte!

@didabrand — Tue, 03 Jul 2018 04:58:42 +0000

Joan zen ekainaren 26an bete genituen hemezortzi urte. Helburuz, ahaleginez eta lorpenez beteriko ibilbide luzea.

Hemezortzi urte. Dozenaka bezero. Ehunka egitasmo. Mila batzuk izen, logotipo, eslogan, argazki, ilustrazio, kartel, animazio, spot, webgune, sare sozial, ekitaldi, prentsaurreko, azoka, etab.

Zenbat bilera eta ibilera!

Diseinugintza grafiko eta itzulpen zerbitzuak eskaintzen hasi ginen, eta zerbitzu osoko komunikazio agentzia izatera heldu gara. Gure bezeroek eta lankideek ekarri gaituzte honaino. Eta orain, hemen, jauzi estrategiko berri bat egiteko bultzada, nahia eta indarra daukagu, urteotan egindako bidean ikasitakoa egitasmo berriak sustatzen baliatu hala izateko erabakimenez.

Betiko bezeroek premia berriak dituztelako. Azken urte hauetan etorritakoek bestelako egitasmoak dakartzatelako. Behar ezberdin horiei guztiei erantzuteko gero eta lankide gehiago izan ditugulako bidelagun. Eta lankide bakoitzarekin gehiago ikasten goazelako.

Horregatik ditugu etorkizuneko helburu berriak. Marka estrategiei eta komunikazio sormenari denbora gehiago eskaintzea. Egitasmoen kudeaketa eta lanen kalitatea hobetzea. Profesionaltasuna eta lan-giro ona geroago eta oreka handiagoan uztartzea. Labur esanda, gure bezeroen markekin batera haztea.

Adinez nagusitu gara. Eta, aldi berean, hasi berriak sentitzen gara. Mundu oso bat dugu ibiltzeko sorkuntzaren lurraldean.

The post … eta di-da batean, 18 urte! appeared first on .

AEK-ren Udako Ikastaroetan sartu-irten bat egin eta Telefónican lana aurkitu zuen gaztea

@didabrand — Thu, 10 Nov 2016 18:27:51 +0000

Ez gara di-dan gure lanetarako argazkiak eta ilustrazioak irudi-bankuetan erosteko oso zale. Ez bakarrik sorkuntza aldetik egokiagoa, kalitate hobekoa eta eraginkorragoa deritzogulako behar dugun irudi jakina ondoen egingo duen profesionalarekin gauzatzeari, baita beste batzuek berdin-berdin erosi ditzaketen irudiak sarean erosteak arrisku nabarmenak dituelako ere.

Edonola ere, denbora- edo diru- kontuengatik, edo biengatik, geuk ere jotzen dugu, tarteka, zerbitzu horietara. Oraingoz ez dugu istripurik izan, baina ia-ia.

AEK Euskaltegien udako ikastaroak iragartzeko kanpainarako Getty Images etxearen iStock zerbitzura jo genuen joan zen ekainean, “Ikasi eta bizi izandakoa ez duzu ahaztuko” leloari irudia ipintzeko. Oroimin atseginez irribarretsu azalduko ziren lau pertsonaren lehen planoak behar genituen; hainbat adin eta sexutakoak eurak, eta euskal herritartzat jo zitezkeenak.

Kontua da lau horiek aukeratzeko gehiagorekin egin genituela zirriborroak. Ia-ia aukeratu genituenen artean egon zen post honen goiburuan ageri den gaztea. Eskerrak ez genuen azkenean argazki hura erabili!, ze AEK-ren kanpaina kaleratu zen garai berberean Telefónicak egin zuen kanpainan ere erabili zuten gazte horren antzeko argazki bat, eta pare-parean gertatuko ziren behin baino sarriago.

The post AEK-ren Udako Ikastaroetan sartu-irten bat egin eta Telefónican lana aurkitu zuen gaztea appeared first on .

Eta zuk, nolako komunitate digitala nahi duzu?

@didabrand — Thu, 22 Sep 2016 07:42:44 +0000

di-dak hiru ondasunetan oinarrituriko komunitate digitala osatu nahi du: euskal esparruko ondasun soziala, komunikazio arloko jakintza ondasuna, eta eraldaketarako balioekiko talde-ondasuna.

Izan ere, komunikazio sistema telematikoak bitartekoa dira, baina ez dute komunitate digital bat egiten.

Komunitate digitala interesetan, proiektuetan, pasioetan eta beste hainbat kidetasunetan oinarrituz antolatu daiteke. Aurrez ezarritako sareko egiturak eurenganatzen eta erabiltzen dituzten norbanakoen ekimen ugarien batura da. Eta muga geografikorik ez dagoen arren, erreferentzia fisiko jakinak daude sare zabalean. Ondorioz, komunitate digitalek hainbat mailako ondasuna sortzen laguntzen diote sareko biztanleari: jendartea, jakintza eta taldetasuna.

Sareak, erabiltzaileen bidez, hitzezko zein ikus-entzunezko diskurtsoa sortzeko aukera eskaintzen digu. Hitzezko eta ikus-entzunezko informazio hori aberatsa bada, diskurtso hori erraz zabalduko da, eta diskurtso horren bidez nortasuna garatuko dugu: identifikazio sinbolikoa ahalbidetzen digu eta ikuspegi ezberdinen arteko komunikazioa ere bai. Guztiarekin, norbanakoen zein taldeen kokapen eta egituratze berri bat joango da gauzatzen; sarean, zein saretik kanpora.

Horregatik, komunitate digitalak pentsatzerakoan, guri gehiago interesetzan zaigu sorturiko ondasun horien araberako definizioa, enpresen eta kontsumoaren ikuspegitik eginikoak baino.

– Ondasun soziala esparru geografiko fisiko bati edo aisialdiko zaletasun bati loturiko harreman sareak sortzen duena da.

– Jakintza ondasuna ezagutza arlo jakinen gaineko informazioa zabaltzeak eta lantzeak sortzen duena da.

– Talde-ondasuna emozio karga handia lortu dezaketen gaiek, nortasunek eta balioek sortzen dutena da.

Guk euskal komunikazio esparruan partekatu, eztabaidatu eta baliatu nahi ditugu mundu zabalean egunetik egunera berrituz doazen markagintza eta publizitate arloko jakintzak, gure bezeroekin elkarlanean eraldaketa sozialerako balioak sustatzeko eta indartzeko.

Eta zuk, nolako komunitate digitala nahi duzu?

The post Eta zuk, nolako komunitate digitala nahi duzu? appeared first on .

Zer CMS aukeratuko dut?

@didabrand — Tue, 02 Jun 2015 11:51:11 +0000

Zer da CMS bat?

Noizbait webgune bat sortu edo kudeatu baduzu, ez da berria izango zuretzat CMS hitza. CMS hitza ingelesetik datorren definizioa da (Content Management System), edukien kudeaketarako sistema, alegia. Baina zertarako balio du? Webgune batean txerta daitekeen sistema bat da, eta bere funtzio nagusia webguneak duen diseinua eta webgunean sartzen diren edukiak banatzea da, eta era berean, webguneak izan ditzakeen edukiak forma dinamiko batean kudeatzea.

Beraz, CMS batek webgune batean dauden edukiak kudeatzen ditu, webgunearen diseinuan eragin gabe.

Zein CMS erabili?

Merkatuan hainbat CMS daude aspalditik, batzuk ezagunak eta beste batzuk ez hain ezagunak. Merkatuan dauden CMS guztiak aztertzeko, blog oso bat beharko genukeenez, guk ezagunenak aztertuko ditugu, eta CMS ezaugarriak aipatuko ditugu, betiere gure esperientzian oinarrituta, hots, egingo dugun azterketa hau ez da guztiz objektiboa.

Esan bezala, CMS ugari daude, baina guk hiru erabilienak aztertuko ditugu:

WordPress
Joomla
Drupal

Honek ez du esan nahi besteak txarragoak edo hobeak direnik, bakoitzak bere abantailak eta gabeziak ditu. Beraz, norberaren beharrizanetara gehien egokitzen denarekin lan egitea merezi duela kontuan izanik, hurrengoko 5 galderak egin beharko lizkioke erabiltzaile bakoitzak bere buruari CMS bat aukeratzerakoan:

1. Zure beharrizanak kontuan izanik zer webgune mota behar duzu?

Webgunearen helburua kontuan izanik, bertan izango den informazioa aldiro eguneratuko den edo informazio estatikoa izango den aztertu beharko litzateke ezer baino lehen. Blog, foro, albisteak edo egunero berritu daitekeen edozelako atal bat izatea nahi bada, komenigarria da CMS bat edukitzea, lana asko erraztuko baitu. Bestalde webgune estatikoa baldin bada, hau da, enpresa bateko informazioa eta kontaktua soilik eman nahi baldin baduzu, ziurrenik CMSrik ez duzu behar izango.

2. Zure beharrizanak aldatzen doazen heinean webgunea handitzeko aukera behar duzu?

Azken lerroan esan bezala, baliteke webgune estatiko bat nahi izatea, bisita-txartel bat balitz bezala, bertan dagoen informazioarengatik eguneratzeko kezkarik ere ez izatea. Baina ondo aztertu beharko litzateke etorkizunean izan daitezkeen joerak eta norberaren beharrizanak. Gerta liteke, hasieran eduki dinamikoen premiarik ez sentitzea, baina aurrerago, webguneak eskain ditzakeen aukera guztiez jabetuta, bezeroak erakartzeko blog, foro edota denda birtual bat sortzea erabakitzea. Halakoetan, webguneak hasieratik CMS bat badauka, edozein momentutan modu erraz batean funtzionalitateak gehitu ahal izango ditugu.

3. Laguntza jasotzeko foroak al ditu CMSak?

CMS bat aukeratzerakoan eta erabiltzen hastean, garrantzitsua izaten da sor litezkeen zalantzak argitzeko komunitate edo foro bat izatea.

4. Erabiltzen erraz ikas al daiteke?

Askotan hobe izaten da erabiltzeko erraza eta arin ikasi daitekeen CMS bat erabiltzea, konplexuagoa den batek eman ditzakeen arazoekin jardutea baino.

5. Zenbat balio du CMSa jartzeak?

Ongi neurtuta izan behar da zenbateko aurrekontua onartuko den eta zer funtzionalitate nahi den webgunerako. CMS batzuk konplexuagoak dira jarri eta mantentzeko, eta horrek beharrezkoa ez den galera bat ekar dezake.

CMS bat zer den eta zer izan behar den kontuan azalduta, gehien erabiltzen diren CMSak aztertuko ditugu:

WORDPRESS:

Munduko CMSrik erabiliena da (% 70). Bere potentzia blog motorrean datza, hasieran horretarako soilik sortua izan zen, baina gaur egun hainbat funtzionalitate dituenez edozein webgunetarako balio du. Erabiltzeko oso erraza da, denbora gutxian ikas daiteke eta bere interfazea oso intuitiboa da erabiltzaile ororentzat. Diseinurako hainbat txantiloi existitzen dira, asko doakoak, eta plugin asko ditu. Pluginak webguneari funtzionalitateak gehitzeko balio du, forma erraz batean, eta txantiloiak webgunearen itxura jartzeko izaten dira. Ez da beharrezkoa programatzaile edo garatzaile bat izatea WordPressa kudeatzeko eta diseinu eta itxura erakargarri bat mantentzeko CMS horren bitartez. Gainera, Foro eta komunitate handi bat du atzetik lanean eta dokumentazio asko dago WordPressari buruz.

Hala ere desabantaila batzuk ere baditu, gehien erabilia den CMS bat denez, eraso gehien jasotzen duen CMSa da. Honek ez du esan nahi ez dela segurua, baina aztertzen ari garen CMSetatik segurtasun txikiena eskaintzen duena da. Bisita kopuru oso handiak jasotzeko ez dago beste CMSak bezain prestatua.

Beraz, zer kasutan erabili daiteke CMS hau? Gehien bat blogetarako eta informazio bolumen ertaina dutenentzat oso egokia da, batez ere sarri eguneratzen badute informazioa eta funtzionalitateak gehitzeko orduan autosufizientzia bat eduki nahi baldin bada, nantentze lanen kostua merkatuz.

JOOMLA:

Denbora asko darama merkatuan, baina WordPress baino askoz gutxiago erabiltzen (% 15). Webguneak sortzeko eta webguneak moduluen bitartez kudeatzeko sortu zen, funtzionalitate jakin batzuekin, honek esan nahi du WordPressegaz alderatuta, webgune bati funtzionalitateak jartzeko ez dela hain aberatsa. WordPress baino zailtasun handiagoa du erabiltzerakoan eta itxura emateko txantiloiak eta funtzionalitatez hornitzeko ez da WordPress bezain erraza eta anitza; kasu batzuetan funtzionalitateak gehitzeko programatzaile edo garatzaile baten beharra izaten da. CMS honi buruz dokumentazio nahikotxo ere badago, WordPressak bezala, foroa eta komunitate ere baditu.

Segurtasun arloan WordPressa baino bisita kopuru handiko webguneak kudeatzeko sendotasuna izan arren, bere desabantaila nagusia da funtzionalitateak gehitu edo handitzeko konplexuagoa dela eta ez dela beti jasangarria.

Informazio bolumen handia eta bisita kopuru handiak dituzten webguneetarako egokia, nahiz eta funtzionalitateak gehitzerakoan mugatuagoa izan.

DRUPAL:

WordPress eta Joomla beste erabili ez arren (% 7), aztertzen gabiltzan CMSetatik seguruena da, bisita eta erabilera bolumen handiak jasan ditzake. Bere desabantaila da, besteekin alderatuz, erabilera zailagoa duela eta edozein funtzionalitate edo itxura aldatu nahi bazaio, gutxieneko programazio-ezagupenak eduki behar direla. Azkenean, aukerarik garestiena bihurtzen da, garatzaile edo programatzaile baten beharra baitu aldaketa handietarako.

CMS hau oraindik ez dago hain zabaldua, baina informazio bolumen erraldoiak eta bisita kopuru oso handietarako oso prestatua dago. Eragozpena da, ordea, funtzionalitatea eta itxurak gehitzerakoan garatzaile baten beharra duela eta horrek mantentze-lana garestitzen duela.

The post Zer CMS aukeratuko dut? appeared first on .

Sorkuntza-prozesua: estrategiatik ideiara

@didabrand — Wed, 20 May 2015 09:33:32 +0000

Komunikazio eta diseinu grafikoko agentzia batentzat, lan bakoitzaren argibideetan oinarrituriko estrategiaren ondoren funtsezko elementu erabakigarria dator: sorkuntza-prozesua; etengabe aritzen baikara proiektuak sortzeko eta definitzeko jarraibideak aplikatzen. Dokumentazioa bilatu dugu gure irizpidea kontrastatzeko, eta bilaketaren emaitza argia eta zehatza da, sorkuntza-prozesuak lau fase dituela ondoriozta daiteke: prestaketa, inkubazioa, argi-unea eta egiaztapena. Eskuliburu orokor gisa, ondo, baina sorkuntza-prozesua oso gauza pertsonala da, gutako bakoitzak bere metodoa du, eta sorkuntza-prozesua kaosari lotua egoten da askotan. Eta kaos hori orrazten joaten gara ideia marraztu arte. Ondoren, ideiak komunikazio estrategia ondo betetzen duen ala ez aztertu beharko da.

Gure barrura begira jarri gara une batez, eta beti sormenari lotuta dagoen kaos horretan ordena apur bat jarrita, ia beti errepikatzen diren prozesuaren sei une defini daitezke:

1. BEHAKETA ETA GOGOETA: Lehenengo urrats hori mentala da beti. Beste inork eskatuta izan nahiz gure geure ekimenez izan, proiektua sortzen denean mekanismoa abian jartzen da berez. Zein da premia? Zer baliabide ditugu?

2. BURUTIK ARBELERA: Ia aldi berean, burura etortzen zaizkigun ideia eta kontzeptu guztiak arbelean (edo paperean) islatzen ditugu, bai zerrenda amaigabeak eginez, bai zirriborroak eta zirrimarrak eginez.

3. INSPIRAZIOAREN BILA: Benetan lanari ekin aurretik galdera bera etortzen zaigu beti gogora: zer konponbide eman diote honi beste batzuek? Zer nolako gauzak egin dira aurretik? Batzuen ustez, une honetan beste batzuen lana ikusteak norberaren sormena baldintzatu besterik ez du egiten, baina… inork uste al du, bada, zerbait berrian berritik sortzen dugunean, hutsetik hasten garela? Funtsean, ideiak modu adierazgarri eta originalean elkarlotzeko gaitasuna da sormena; baina sortzen dugun ezer ez da guztiz gurea. Inspiratzen gaituzten ideiak edozein tokitatik etor daitezke, modu kontziente zein inkontzientean.

4. MARRAZTU, MARRAZTU ETA MARRAZTU: Inspirazioz ase ostean, lehenengo ideiak sortzen hasiko dira, eta horiekin batera, lehenengo zirriborroak: marrazteko unea iritsi da. Batzuetan, balio dezakeen zerbaitetara iristen hasten gara fase honetan, baina ez da beti horrela izaten.

5. TRABATZE-UNEA ETA TXAKOLINA: Saihestezina da, prozesuaren une batean ez bada, beste batean, horma handi hori agertuko zaigu. Batzuetan, gainera, hain handia da ezen ez baitugu haren gainetik ezertxo ere ikusten. Baina garrantzitsuena hor ez geratzea da, apur bat lasaitu eta odola arintzeko unea da, eta zer hobe, ardo fresko bat eta barre batzuk baino? Trabatzea prozesuaren parte bat da eta, batzuetan ikusteko gai ez bagara ere, beti dago bizitza barraren beste aldean.

6. IHESA: Trabatze une hori gainditzeko modurik onena atseden hartzea da: burua pentsamenduz garbitu eta paperetik eta ordenagailutik urrundu, ahalik eta gehien. Paseo bat, lo-kuluxka bat… Eta harrigarria bada ere, ihes egiten dugun une horretan bertan, edo batzuen kasuan, ihesalditik itzuli eta berehala, ttak!, pieza bakoitzak bere lekua hartzen du.

7. SORKUNTZA: Ideien jarioa berezkoa da, elkarren atzetik isurtzen dira… eta magia dirudi. Sena edo intuizioa berebizikoa da, berak esango dizu egin duzun horrek balio duela eta zurekin bat datorrela. Eroso zaude, eta orduan gogoratzen duzu zergatik gustatzen zaizun horrenbeste egiten duzuna, egiten duzun hori edozer dela ere.

Halakoxea da sorkuntza-prozesua.

The post Sorkuntza-prozesua: estrategiatik ideiara appeared first on .

Komunikazioa hedapen eta kudeaketa tresna da

@didabrand — Thu, 23 Apr 2015 09:48:04 +0000

Enpresa edo erakunde baten marka estrategia ezartzea ardura handiarekin egiten den lana da. Marka azterketa ondo egin nahi bada, erakundearen langileengan eta egituran ondo sakondu behar da, zehaztasun txikiena ere kontuan eduki ahal izateko: barne kultura, kanpo irudia, ahots ezberdinak, xede taldeak, noiz esan zer eta noiz ez esan, euskarriak, tonua…

Komunikazio agentziak markaren unean uneko argazkia egiten du, beraz, lehenik.

Enpresa eta erakundeetako pertsonek satisfazioz bizi ohi dituzte lanketaren ondorioak, erabakiak eta egiteko moduak: barne zein kanpo komunikazioa fokatzea lortzen dugu; ahuleziak eta indarguneak, konpetentziarekiko kokapena, aliatuak zeintzuk izan daitezkeen… Komunikazio estrategia batek, azken batean, bi-hiru urtera egitea nahi genukeen argazkia zehazten du.

Lana bukatutakoan ematen du, beraz, enpresa edo erakunde hori bere helburuak lortzeko prestatuago dagoela; gertuago sentitzen dela helburu horietatik. Badakite zer norabide hartu behar duten, nori eta nola hitz egin. Erakundeak hartu ditu erabakiak eta diru inbertsioa egin du komunikazio plan hori zehazteko: izaera berri bat, irudi jakin bat lortzea du helburu; baloreak berrikusi eta defendatzea; marka irudia aldatzea, beharrezkoa denean.

Baina, jakina denez, pertsonoi norabidez aldatzea oso neketsua egiten zaigu.

Ohikoa da enpresek eta erakundeek norabidez aldatzeko erabaki irmoa asmorik onenez hartu duten arren, pertsonek egunerokoan ez barneratzea komunikazio helburuak eta helbideak; lehen egiten zuten bezala jarraitzea lanean. Eta lehengo norabidean eta moduan ari dira arraun egiten. Izan daiteke, kasu batzuetan, jarritako norabidean barik kontrakoan aritzea ere.

Enpresetako barne kulturaz ari gara, eta komunikazio estrategiak kultura aldaketa eskatzen du sarritan. Erakundeetan eraikitzen dugu halako “legedia” bat. Gehienetan idatzi barik dagoena, baina idatzitakoak baino garrantzia handiagoa izan dezakeena. Lan prozesuak idazten dira kanpoko laguntzarekin batzuetan, eta, egunean egunean, lanean hilabete batzuk egindakoan, lan prozesua bera ere pertsona bakoitzaren ideia edo kriterioekin harilkatu behar da. Hori ere barne kultura da. Barne kultura horrek ere laguntzen du gehienetan enpresek eta erakundeek funtzionatu dezaten.

Gure esperiantziak erakusten diguna da komunikazio plana formulatu bai, baina, formulatzeaz gainera, ezartzeko, erabakimen argia, dedikazioa eta diziplina eskatzen duela. Ez da logotipoa berritzea eta kito. Eta ezin da arin batean egin. Barneratu behar da plana ezartzeko dedikazio hori, ordaindutako profesionalak edo zerbitzuak zuzendu beharko duela gehienetan; eta zuzendaritzaren eta sail guztien lankidetza beharko duela beti.

Merkea izango da luzera begira. Zenbat eta denbora gutxiago itxaron norabidea aldatzeko, orduan eta arinago helduko gara helmugara, noraezean galdu gabe.

The post Komunikazioa hedapen eta kudeaketa tresna da appeared first on .

Mugikorretarako egokituta al dago zure webgunea?

@didabrand — Thu, 26 Mar 2015 10:42:54 +0000

Mugikorretarako egokituta dauden webguneak lehenetsiko ditu Googlek emaitzetan.

Google-k jakinarazi du datorren apirilaren 21etik aurrera hobeto posizionatuko dituela smartphonetarako egokituta dauden webguneak ez daudenak baino. Hau da, mugikorretarako egokituta ez dauden webguneek lehentasuna galduko dute bilaketa-emaitzetan. Orain arte ere irizpide hori erabiltzen zuen arren, Google-k dio, datorren apirilaren 21etik aurrera garrantzi handiagoa emango diola eta, ondorioz, erabiltzaileek emaitza hobeak izango dituztela euren dispositiboetan bilaketak egiten dituztenean.

Hortaz, SEO posizionamendurako ez ezik, oso beharrezkoa da gure webgunea mugikorretarako egokituta egotea, Googlek kontuan har gaitzan nahi badugu.

Ez dakizula zure webgunea egokituta dagoen ala ez?

Googlek tresna bat jarri digu eskura URL bat txertatu eta webgunea optimizatuta dagoen ala ez jakiteko.

Egiaztatu zure webgunea eta hartu beharrezko neurriak bilaketetatik kanpo ez geratzeko.

https://www.google.com/webmasters/tools/mobile-friendly/

The post Mugikorretarako egokituta al dago zure webgunea? appeared first on .