Dechrau Newydd...

2008-04-02T09:06:00Z

Helo pawb, Julie MacMillan yw fy enw i ac eleni, enillais i ‘Dysgwr y Flwyddyn’.

Ces i fy ngeni a fy magu yn Nhynewydd, (pentre’ bach yn y Rhondda Fawr). ‘Dw i’n briod ag Owain ac mae dau blentyn gyda ni o’r enw Seren Hâf ac Elis Rhys. Mae Seren Hâf yn unarddeg oed nawr ac mae hi’n mynd i Ysgol Gyfun y Cymer. Mae Elis Rhys yn naw oed ac mae e’n mynd i Ysgol Gymraeg Ynyswen yn y Rhondda.

Dechreuais i ddysgu Cymraeg dair blynedd a hanner yn ôl. Penderfynais i ddysgu Cymraeg oherwydd fy mod i eisiau anfon fy mhant i Ysgol Gymraeg ac roeddwn i eisiau bod yn rhan o fywyd yr ysgol, felly ffoniais i Brifysgol Morgannwg i holi am eu cyrsiau Cymraeg ac roedd llawer o gwmpas ar y pryd. Penderfynais i ymuno â chwrs dwys ym Maesyreglwys ac roedd y dosbarth yn cael ei gynnal tair gwaith yr wythnos! Erbyn hyn, dydy’r cwrs ddim ym Maesyreglwys, mae cwrs wedi symud i Ysgol Gartholwg, adeilad newydd sbon. Mae’n hyfryd. Gwnes i’r holl arholiadau – Mynediad, Sylfaen, Canolradd ac Uwch a gwnes i yn eitha’ da.

Erbyn hyn dw i’n gweithio fel tiwtor i Brifysgol Morgannwg. Dysgu oedolion i siarad Cymraeg oedd fy uchelgais i, a nawr dw i wedi llwyddo. Dw i wrth fy modd yn dysgu oedolion achos dw i’n credu fy mod i’n gallu deall yn llwyr sut mae dysgwyr yn teimlo. Dydy hi ddim yn hawdd dysgu iaith newydd ond mae hi’n llawer o hwyl ac ‘dych chi’n gallu cwrdd â ffrindiau newydd fel dw i wedi’i wneud. Dw i’n credu bod unrhyw un yn gallu dysgu Cymraeg os ydyn nhw’n wir eisiau siarad yr iaith ond mae hi’n bwysig iawn i fwynhau’r dosbarth ac i ymarfer siarad ar bob cyfle.

Bydd Canolfan Cymraeg i Oedolion Morgannwg yn cynnal Sadwrn Siarad ar ddydd Sadwrn 19 Ebrill er mwyn i ddysgwyr gwrdd â dysgwyr eraill a mwynhau siarad Cymraeg – gobeithio felly y gwela i chi yno…

Hwyl

Julie

dysgu diary - Home

Dechrau Newydd...