Na-agum eon ku beinte (20) ka mga resipiente it libreng wheelchair nga mga inunga sa banwa it Kalibo nga indi makatikang hatud man ku mga baeatian kaparehas it mga Cerebral Palsy ag iba pang mga physical disabilities. Ro beinte ka mga wheelchairs hay naghalin sa mayad-ayad nga kabubut-on it Children International Phils. Incorporated (CIPI) kun sa siin natigayon man nga ha-angkon it kalibo halin sa pagtinguha ni Mayor William Lachica. Ro mga inunga hay naghaealin pa sa 16 ka mga kabaranggayan sa Kalibo ag ro iba kara hay mga inunga man nga ginatatap it Stimulation and Therapeutic Activity Center (STAC) nga ginpili it Municipal Social Welfare Development Office sa pagpamuno ni Ms. Lolly Espino, base man sa mga klasipikasyon nga ginhathat it CIPI.

Ginpasaeamatan gid it Alkalde rong CIPI pina-agi sa anda karang representante nga si Ms. Rebecca Fuellos, Chief Program Director it CIPI. Ginapangamuyo man it Alkalde nga makaron nga buean it Oktubre hay hikata-o gihapon it CIPI ro ginapangayo it Kalibo nga mga bueong, mga bitamina ag mga bag-ong libro.

Nagpahayag man it pagpasaeamat si Vice Mayor Madeline Regalado kaeakip ro mga miyembro it Sangguniang Bayan it Kalibo sa maalwan nga kabubut-on it CIPI tungod nga mabahoe ro nangin bulig kara sa mga ginikanan it mga Children With Disabilities. Dugang kara, ginbasa man it bise alkalde rong resolusyon nga ginpasar it Sangguniang Bayan it Kalibo bilang pagpakita it pagpasaeamat sa gindonar nga mga wheelchair. Rong CIPI hay nakataeana man nga magta-o it wheelchairs sa banwa it Ibajay ag Nabas.

Nag-umpisa eon kahapon ro entry meeting para sa implementasyon it EBPLS E-GOV project sa munisipyo it kalibo bilang benepisaryo. Rong EBPLS E-GOV project hay sangka joint project ku League of the Municipalities of the Phils. Ag E-Government for Municipal Development (EGOV4MD) kun sa siin suportado man it Dept. Of the Interior and Local Government, National Computer Center, Canadian Executive Service Organization (CESO) ag Dept. Of Trade and Industry. Kaibahan man nga maga-install ag magaturo ku paggamit it software hay ro French nga si Mr. Benoit “Ben” Bouchard, isaeang ka information technology advisor, Project Management, Security Adviser sa Information Technology, intrusion, auditing, firewall management, virtual private network ag disaster recovery plans.

Masuwerte gid ro LGU kalibo suno kay Mayor William Lachica bangud nga sambilog ra sa nangin benepisaryo it rondayang programa. Samtang nagpaabot man it pagpasaeamat si Mr. Bouchard sa Alkalde it Kalibo bangud ku prebilihiyo nga makatrabaho nana kara ro mga empleyado it Kalibo sa sueod it mga 2 dominggo, agud nga ma-streamline rong E-BPLS application. Suno kana, sa bulig it mga empleyado it Business Permits and Licensing Division, sa pagpamuno ni Ms. Heide Concepcion, ag Treasurer’s Office sa pagpamuno ni Ms. Elsa Tabuena, ag ku Information Technology Unit hay magiging madinaeag-un gid ro paghimo nga ma-streamline rong E-BPLS application sa banwa it Kalibo.

Sa pag-eksplekar man ni Ms. Heide Concepcion, Licensing Officer I it Business Permits and Licensing Division it Kalibo, mas madasig pa rong pag-proseso it mga business permit tungod nga magiging konektado eon rong monitoring ku anang opisina ag ku Treasurer’s Office. Magiging madasig man rayon ro proseso it Mayor’s Permit, mapabaskug pa rong collection, madasig nga paghimo it mga reports ag maeomo nga pag-klasipika it mga nature of business sa 16 ka mga kabaranggayan sa Kalibo.

Sangka resolusyon nga gin-proponer ni Hon. Arnaldo Tejada it Kalibo Sangguniang Bayan rong gin-aprubahan it konseho it Kalibo may kaangtanan sa paghinyo kay Gov. Carlito S Marquez agud nga usoyan it paagi nga hika-implementar rong nga gin-aprubahan ku Setyembre 14, 1998. Rondayang Provincial Ordinance hay nagamando ku pagta-o it 20% discount para sa mga Senior Citizens ag Disabled Person sa andang pagbayad it basic realty taxes due sa andang mga house and lot nga gin-proponer man anay ni Hon. Romeo P Inocencio. Raya hay ginduso ni Hon. Tejada bilang pagsunod sa hinyo it Federation of Senior Citizens of the Phils. Aklan Chapter para i-presentar ra kaibahan rong follow-up letter sa Gobernador nga ma-usoyan nana it paagi nga hika-implementar.

Sa kaungdan ku nasambitan nga resolusyon nagasaad nga rong nagaka-angot man sa Local Govt. Code of 1991 partikular rong section 192 nga naga-ta-o it otoridad sa tanan nga mga LGUs nga magta-o it exemption, privileges, incentives or reliefs. Nagpaabot kara it suporta si Hon. Soviet Dela Cruz daea man ro pag-suherer nga i-implementar man ra ku LGU Kalibo paagi man sa sangka resolusyon iga-address kay Mayor William Lachica sa kabangdanan nga rong ordinansa ngara hay gin-aprubahan it probinsya kung sa siin rong munisipalidad it Kalibo hay sakup. Sa eksplekasyon ni Hon. Tejada, ro Gobernador hay dapat nga mag-preparar it mga guidelines para sa husto kara nga implementasyon. Ginpabutyag pa ni Tejada nga ro mga inunga ag eredero ku mga tag-iya it real properties nga senior citizens ag disabled persons rong sigurado nga makabenepisyo kara, pananglitan nga raya hay hika-patuman it Gobernador.

Nangin co-sponsors man sa rondayang resolusyon sanday Hons. Nilda Tambong, Rodilio Policarpio, Ariel Fernandez ag George Quimpo. Sanda ra tanan hay nagasalig nga pamatian ra it Gobernador para sa ikamayad ku mga senior citizens ag disabled persons.

Madinaeag-un nga gin-selebrar rong Senior Citizens Week ku nagtaliwan nga Oktubre 1 hasta it 7 sa munisipalidad it Kalibo. Pina-agi sa sangka simple pero makahueogan nga programa ku Lunes, nag-umpisa ra sa sangka misa ag parada. Ku adlaw man nga Biyernes, madinaeag-un nga gin-koronahan nanday Hon. Arnaldo Tejada ag Atty. Diego Luces rong Senyora 2011 nga si Mrs. Pastora R Dela Cruz, it Brgy. Estancia, Kalibo, kaeakip man rong 4th runner up nga sanday Mrs. Jenita Macabante, it Brgy. Mobo, 3rd runner-up – Mrs. Luzbella Apolinario it Brgy. Tinigao, 2nd runner – up – Mrs. Mila Billones, it Brgy. Tigayon ag 1st runner – up si Mrs. Consuelo De Felipe it Brgy. Andagao.

Ginpahayag ni Hon. Tejada, FSCAP President ag Sangguniang Bayan Member ro anang pagpanginbulahan sa Office of the Senior Citizens Affairs sa pagpamuno ni Ms. Aurora Ignacio sa pagselebrar it Senior Citizens Week sa tema nga:” Nakakatanda tanglaw ng bayan kaagapay sa matuwid na daan”. Gindugang pa ni Tejada nga ro mga senior citizens ngara kat mabakud pa hay nagpanarabaho ag nagpanerbisyo man sa gobyerno rason nga nangin mayad-ayad ro banwa. Tungod man rikara, rayang mga senior citizens hay may benepisyo eon sa gobyerno base sa konstitusyon. Sandig man sa mandato, ro mga senior citizens hay ginataw-an it share sa Internal Revenue Allotment (IRA) ku banwa it kalibo kun sa siin sanda ra hay may share nga .5% sa 1% share halin sa IRA samtang ro probinsya man hay may mandato man nga makarondaya. Ginpaabot pa ni tejada nga ro gobyerno probinsyal hay nagata-o it P 1,000 sa mga senior citizens bilang financial assistance kun ma-ospital ag nagapabaeon man kun may mga nagapanaw.

Ginbalita man nana sa mga Senior Citizens nga naghinyo imaw kay Mayor William Lachica nga kun pwede nga ro baybayon it Brgy. Briones hay himuon nga Sunrise Park. Ro mga senior citizens kuno ro malimpyo sa lugar ag butangan it comfort rooms, para mangin pamasyaran it mga magueang. Kadungan man ku selebrasyon it senior citizens week, ginpatigayon man ro sangka free medical mission para kanda ku adlaw nga Martes, Oktubre 4, 2011.

Maga-pirmahan eon it memorandum of agreement rong LGU Kalibo sa pagpamuno ni Mayor William Lachica ag Gov. Carlito Marquez it probinsya it Aklan sa paea-abuton nga mga inadlaw. Raya hay tungod ku pagka-apruba ku pagta-o it otorisasyon sa Alkalde it Kalibo para magpirma it MOA sa tunga ku probinsya it Aklan para sa repair ag re-painting it street names ag traffic signages sa munisipalidad it Kalibo base man sa resolusyon nga gin-proponer ni Hon. Ariel Fernandez.

Sa pagpahayag ni Hon. Fernandez, ku mga nagtaliwan nga binuean nagpasar ro Sangguniang Bayan it Kalibo it resolusyon ni Hon. George Quimpo nga nagapangayo it financial assistance para sa repair ag re-painting it mga street signs ag traffic signages kanday Hon. Rodson Mayor, Hon. Nemesio Neron, Hon. Daisy Briones, Hon. Jean Rodriguez ag Hon. Jonna Morales – Torres. Sa rondaya nga kabangdanan, rayang mga Sangguniang Panlalawigan Members kaibahan ro Gobernador it Aklan hay nag-alokar it P 170,000.00 para sa nasambit nga proyekto.

Rong P 170,000.00 hay naghalin man sa pondo ku rondayang mga SP members nga kun higamit eon para sa nasambitan nga proyekto hay may mayad-ayad nga epekto sa mga motorista, sumaeakay ag publiko sa kabilugan, partikular ro mga turista, bisita ag mga umaeagi nga nagahimo it mga tours, Lakbay Aral, personal ag business transactions sa munisipalidad.

Tungod ku madinaeag-un nga pagkadakup ku mga suspetsado sa serye it mga panakaw sa mga apartments sa banwa it Kalibo, isaeang ka resolusyon ro ginpasar it Kalibo Sangguniang Bayan para ipa-abot ro pagpanginbulahan sa mga katapo it Kalibo Philippine National Police. Rong resolusyon hay gin-proponer ni Hon. George quimpo, nga nagasaad sa uwa it kagauy nga pagtinguha it Kalibo Police partikular rong intelligence unit kara sa direktang superbisyon ni PSUPT. Aden Lagradante, hadakpan gid ro pilang ka mga indibidwal halin sa Misamis Occidental nga mga suspetsado sa mga robbery cases.

Ginpaabot ni Hon. Quimpo nga rong pagkadakup sa rondayang mga suspek hay nagta-o it kalinong sa paino-ino it mga Kalibonhon kamana man nga nakata-o it hustisya sa mga biktima.

Ro paglobo man ku populasyon it Kalibo ro isaea sa mga hangkat para sa kapulisan it Kalibo, daea man ku madasig nga development sa kondisyon ku ekonomiya it Kalibo, pero sa pihak ku maisot nga numero it personnel, natigayon gihapon nanda nga ma-solusyonan rondayang problema nga pilang buean eon nga nagata-o it perwisyo sa mga kalibonhon.

Samtang, sa parte mat-a it munisipyo it Kalibo, pinaagi sa pamunuan ni Mayor William S. Lachica, hugot ro suporta kara sa katuyuan it Kalibo PNP nga ma-eliminar ro anuman nga sahi it krimen sa banwa it Kalibo.

Maga-umpisa eon sa sueod it rondayang dominggo ro konstruksyon it Men and Women Comfort Room sa Kalibo Transport Terminal sa Oyo Torong St., Kalibo. Raya rong ginpahayag ni Engr. Emerson Lachica, Municipal Engineer it munisipyo it Kalibo, bilang sambilog sa mga resource persons sa ginhimo nga Committee Hearing on Transportation ku adlaw nga Lunes sa Kalibo Sangguniang Bayan. Ro nasambitan nga committee hearing hay ginpatawag it Chairman it Transportation and Communication and Energy Committee Hon. George Quimpo ag Hon. Ariel Fernandez bilang Co-Chairman ag Committee on Rules, Laws & Ordinances sa pagpanguna ni Hon. Arnaldo Tejada para man ma-tratar rong hinyo ku transport sector partikular ro mga naga-gamit it transport terminal sa Oyo Torong kaparehas it FAIPTI, MTPFRC.

Pila sa mga concerns o problema nga ginduhoe it grupo it transportasyon hay ro kawad-an it comfort rooms sa nasambitan nga parking area nga nagadaea it bukon it komportableng pamatyagan sa mga pasahero ag mga drivers. Suno kay Mr. Felix Sepres, FAIPTI President, may mga pasahero nga naga-usoy it comfort room matapos it mahaba nga biyahe ag sanda ra hay nahuya nga uwa it ginapakita nga comfort rooms sa terminal.

Suno kay Engr. Emerson Lachica, indi matapos rondayang dominggo ag ma-umpisahan eon ro konstruksyon it comfort room sa nasambitan nga terminal. Ginpahayag nana nga rayang comfort room hay para sa babaye ag eaeaki kun sa siin may 2 urinals, 2 water closet ag lavatory para sa mga eaeaki ag 3 water closet, 2 lavatory para sa mga babaye nga kung sa siin nagabalor tanan ro proyekto ngara it P 378,037.

Sa adlaw nga Lunes, Oktubre 10, 2011 igapanupod ku munisipyo it Kalibo sa pagpamuno ni Mayor William Lachica ro 20 units it mga wheelchairs para sa mga benepisaryo nga ginpili ku munisipyo it Kalibo para sa mga inunga nga indi makatikang hatud ku andang mga baeati-an halin pa ku pagkatawo. Sandig sa plano, rong pag-turn-over it 20 units it wheelchairs hay pagahimuon sa presensya kung Children International Philippines Incorporated (CIPI) sa Kalibo Sangguniang Bayan Office sa Lunes.

Sa rondayang kabangdanan, ginapanawagan sa mga ginikanan ku 20 ka mga Children With Disabilities nga mag-adto eamang sa munisipyo it Kalibo sa nakataeana nga petsa para i-claim ro andang mga wheelchairs: Elija Jirah Cipriano- Caano, Kalibo, Aklan, Cedric Quito – D. Maagma St., Kalibo, Aklan, Marvin Balbino – Linabuan Norte, Kalibo, Aklan, Steven Rey Laurente – 0805 M. Laserna St., Kalibo, Hansley G Gambe – Bakhaw Norte, Kalibo, Aklan, Jelly Ann Ticar – Bachao Sur, Kalibo, Aklan, Brigeth Baltazar – Old Buswang, Kalibo, Aklan, Christine Joy Rucia – Pook, Kalibo, Aklan, Andrea Sauza – Old Buswang, Kalibo, Aklan Ag Oliver Cuison – No. 173 N. Villanueva Road, Linabuan Norte, Kalibo, Aklan.

Samtang ro mga Children With Disabilities it Stimulation and Therapeutic Activity Center (STAC) hay ginapa-adto man sa Lunes kamana nanday: Jaymar Sacramento – Kalibo, Aklan, Gerald Sacramento – Kalibo, Aklan, Rogielyn Soguilon – Oyo Torong St., Mark Henrie Manares – C. Laserna St., Jomarie Tolentino – Andagao, Kalibo, Aklan, Kyla Nepumuceno – Andagao, Kalibo, Aklan, Divine Rose Potato – Linabuan Norte, Kalibo, Aklan, James Nabalde – Purok 5 C. Laserna St., Kalibo, Aklan, Andrea Sauza – Old Buswang, Kalibo, Aklan Ag Ninel Tolentino – Purok 2 C. Laserna St., Kalibo, Aklan.

Madinaeag-un nga gintanum ro may kapin sa 7,500 ka mga seedlings it mahogany ag Narra trees sa 10 hektarya nga bukid sa Sitio Angeles, Brgy. Kinalangay Viejo, Malinao, Aklan kahapon Oktubre 4, 2011. Pina-agi sa suporta ku munisipyo it Kalibo sa pagpamuno ni Mayor William Lachica, rong Community Broadcast Information System it munisipyo it Kalibo hay nakapatigayon nga magpartisipar sa KBP-Aklan Chapter project nga Broadcastreeing bilang pagpakita it suporta ku tanan nga KBP member stations sa Aklan sa programa it national government nga National Greening Program (NGP) ni Presidente Benigno Simeon Aquino III pinaagi sa Department of Environment And Natural Resources (DENR).

Ro ginhugpong nga grupo it CAFGU, 12 IB Phil. Army nga ginpamunuan ni Capt. Villaruel, Malinao PNP nga ginpamunuan ni PINSP Bernard Ufano, STI-NSTP students, 1 Ganap Guardians Kalibo Chapter ag KBP – Aklan chapter sa pagpamuno ni Chairman Jerome Vega it RMN – DYKR, DYYM Katribu Radyo, DYIN Bombo Radyo, IBC DYRG, Yes FM boracay ag Radyo Boracay kaibahan ro mga estudyante it Kinalangay Viejo Integrated School ag LGU Malinao sa pagpamuno ni Mayor Ariel Igoy hay sumaka sa bukid it Sitio Angeles it Kinalangay Viejo, Malinao para ipakita ro andang suporta ag pag-ulikid sa aton nga palibot.

Ginpahayag ni Mr. Ayben Reyes, OIC PENRO – DENR Aklan nga ro pagpananum it mga puno it kahoy hay kaparte ku 6 years project ni Presidente Aquino kun sa siin tuyo kara nga magpananum 1.5 billion trees ag fruit trees sa bug-os nga nasyon. Iya sa Aklan, target it DENR, LGU, militar, media ag private citizen nga makatanum sa mga 502 hectares nga eogta sa makaron nga dag-on. Sa kada plastic bag nga ginpana-o sa mga nagpartisipar hay may sueod nga 10 seedlings it narra ag mahogany. Rondayang mga seedlings hay ginbakae it denr sa haega nga P 1.9 million agud nga itanum sa bilog nga aklan. Ginpahayag ni Reyes nga ro probinsya sa gihapon hay may sadyaan pa nga forest cover nga pangaywa sa Palawan. Raya hambae ni reyes ro pangontra naton sa climate change ag sa baha kaparehas sa mga natabo sa ibang lugar nga uwa eon it mga kagu-eangan.

Haeos positibo ro mga komento it Provincial Assessment Team para sa Search for Excellence in Local Governance 2011 sa anda karang ginhimo nga pag-ebalwar sa mga dokumento bilang Excel Instruments ku munisipyo it Kalibo may kaangtanan sa Good Governance, innovations ag mga awards. Rong Provincial Assessment Team hay ginakomponehan it sari-saring mga ahensya it gobyerno nga nakabase sa probinsya it Aklan nga nagpangusisa sa sari-saring aspeto it local governance it lokal nga gobyerno it Kalibo kamana ku environmental management, economic sector, entrepreneurship business and industry promotion condition, disaster risk management reduction condition and compliance ag pati man ro peace & order, revenue generation effort, status it social welfare and development, health and nutrition, local legislation, education sector ag agriculture sector.

Kaeabanan kara kanda hay na-impress sa ginpakita nga pagpamuno nanday Mayor William Lachica ag Vice Mayor Madeline Regalado tungod man ku pagiging haum it mga key employees sa pagta-o it ginakinahang-ean nga mga dokumento nga kinahang-ean sa evaluation. Bumilib man ra sanda sa mga innovations ag mga awards may una ro LGU Kalibo kaparehas ku pag-establisar it Stimulation And Therapeutic Activity Center (STAC), One Stop Shop ag maabo pang iba. Ginpahayag pa it Provincial Assessment Team nga ro LGU Kalibo hay may una nga mga pasilidad ag stratehiya kun ro pagabasehan hay good governance eabi gid sa revenue generation and revenue collection. Rong partisipasyon man it tanan nga pumoeoyo sa Kalibo hay imbolbado gid sa mga programa ku munisipyo.

Parehas nga ginpasaeamatan nanday Mayor William Lachica ag Vice Mayor Madeline Regalado ro mga evaluators sa andang mga rekomendasyon ag obserbasyon. Nagpasalig gid sanda nga iga-improbar pa it munisipyo ro pagta-o it serbisyo sa mga Kalibonhon.