:: ஈர்த்ததில்

சிங்கப்பூர் ’தமிழ் முரசு’ - நாடகம் பற்றிய செய்தி

noreply@blogger.com (Nilavan) — Mon, 19 Dec 2011 07:14:16 PST

இன்று (01-12-2011) நாடகம் தொடங்குவதைத் தொடர்ந்து சிங்கப்பூர் தமிழ் முரசு நாளிதழில் வெளிவந்த செய்திக் கட்டுரை.

ரோம்ஸ் & ஜூல்ஸ் - சிங்கப்பூர் தமிழ் நாடகம்

noreply@blogger.com (Nilavan) — Mon, 28 Nov 2011 08:09:28 PST

சிங்கப்பூரில் வருகிற டிசம்பர் 1, 2 மற்றும் 3ம் தேதிகளில் அவந்த் தியேட்டரின் படைப்பில் ரோம்ஸ் & ஜூல்ஸ் எனும் தமிழ் நாடகம் நடைபெற உள்ளது. திரு செளந்திராஜனின் எழுத்தில் உருவாக்கப்படும் இந்நாடகத்தை சிங்கப்பூரில் ஏராளமான நாடகங்களைப் படைத்த செல்வா அவர்கள் இயக்குகிறார். 20க்கும் மேற்பட்ட தொழில்நுட்பக் கலைஞர்களின் உழைப்பில், வசந்தம் பிரபலங்கள் நடிகர் புரவலன். , கார்த்திக் உட்பட்ட 18 நாடக நடிகர்களின் உழைப்புடன் உருவாகும் இந்நாடகம் சிங்கப்பூர் நாடக வரலாற்றில் ஒரு மைல்கல்லாக அமையும் என ரோம்ஸ் & ஜூல்ஸ் நாடக குழு நம்பிக்கை தெரிவிக்கிறது.


செல்வா	செளந்தர்ராஜன்

ரோம்ஸ் & ஜூல்ஸ்

இந்நாடகமானது ஷேக்ஸ்பியரின் ரோமியோ ஜூலியட்டின் நாடகத்தை அடிப்படையாகக் கொண்டு உருவாக்கப்பட்டாலும் நாடகம் முழுவதும் நகைச்சுவை ததும்பளவுக்கு “துன்பம் இவ்வளவு நகைச்சுவையாக இருந்ததில்லை” எனக் கூறுமளவுக்கு கடந்த இரண்டரை மாதங்களாக நடந்த ஒத்திகைகளில் கொஞ்சம் கொஞ்சமாக மெருகூட்டப்பட்டு நல்லதொரு வடிவத்திற்கு வந்துள்ளது. அழகான தமிழில், அடுக்கடுக்கான வசனங்களில் அனுபவமிக்க நாடகக் கலைஞர்களின் திறமையான நடிப்பில் உருவாகும் இந்நாடகம் உங்களை நிச்சயம் கவரும் என்பதில் மாற்றமில்லை.

வெரோனா நகரின் மொண்டேக்யூ, கெபியுலட் ஆகிய இரு குடும்பங்களும் வெகுகாலமாய் பகைகொண்டு, இக்குடும்பத்தில் உறவுகளும் ஆதரவாளர்களும் அவ்வப்போது சண்டையிட்டு வருகின்றனர். இதற்கிடையில் நகரில் நடக்கும் விருந்தில் அறிமுகமாகும் மொண்டேக்யூ குடும்பத்தைச் சேர்ந்த ரோம்ஸுக்கும் ஜூல்ஸ்க்கும் காதல் மலர்கிறது. பகைக் குடும்பத்தில் மலரும் காதல் ஒரு துயரத்தை எட்டுகிறது. அது அடையும் துயரத்தை கலகலப்புடன் ஒரு புதியதொரு நாடகத்திற்குரிய அமைப்புடன் ரோம்ஸ் & ஜூல்ஸ் படைக்கவிருக்கிறது.

இடம்

தோபி காட் ரயில் நிலையம் அருகிலுள்ள ஸ்கூல் ஆஃப் ஆர்ட்ஸ் (SOTA) எனும் கலையரங்கில் இந்நாடகம் வரும் டிசம்பர் 1, 2, 3 ஆகிய தேதிகளில் இரவு 8 மணி முதல் 9:15 வரை நடைபெறுகிறது. சிறப்பாக வடிவமைக்கப்பட்ட கலையரங்கில், அழகான ஒளி, மற்றும் ஒலி அமைப்புக்களுடன் சிறப்பாக நடைபெறும் இந்நாடகத்தை அனைவரும் கண்டு ரசிக்க வேண்டிக் கேட்டுக் கொள்கிறேன்.

1 Zubir Said Dr, Singapore 227968

நுழைவுச் சீட்டுக்கு ..

நாடகத்தினைக் காண விரும்புபவர்கள் நுழைவுச் சீட்டிற்கு 82685 105 எனது எண்ணைத் தொடர்பு கொள்ளவும்.

சிறுகுறிப்பு: மொண்டேக்யூ பெருமகனார், கெபியுலட் பெருமகனார், கெபியுலட் மனைவி, ரோம்ஸ், ஜூல்ஸ், பெங்வோலியோ, டைபோல்ட், பெரீஸ், மெர்க்கூஷோ, பால்தாசர், சோனியா, சாம்சன், கிரேகரி, எஸ்கலஸ், லாரன்ஸ், பீட்டர் என நீளும் பாத்திரங்களில் பால்தாசர் எனும் ஒரு சிறிய பாத்திரத்தில் நானும் நடிக்கிறேன்.

திருமண அழைப்பிதழ் !

noreply@blogger.com (Nilavan) — Sun, 29 May 2011 21:14:09 PDT

அன்பு நண்பர்கள் அனைவருக்கும் வணக்கம் !

நிகழும் வைகாசி மாதம் 25ம் தேதி புதன்கிழமை(ஜூன் 8) காஞ்சியிலுள்ள ஸ்ரீ நாராயண குருபூஜை மண்டபத்தில் செல்வி. கௌரியுடன் திருமணம் நடைபெறவுள்ளது. இப்பதிவின் மூலம் எனது நண்பர்கள் அனைவருக்கும், இப்பதிவின் வருகையாளர்கள் அனைவருக்கும் அழைப்பிதழ் விடுவித்து திருமணத்திற்கு வருகை தந்து வாழ்த்தியருளுமாறு கேட்டுக் கொள்கிறேன்.

திருமண அழைப்பிதழ் மற்றும் இன்னபிற விபரங்களை எனது http://mywedding.nilavan.net வலைத்தளத்தில் காண்க..

அன்புடன்,

தமிழ்நிலவன் (எ) விஜயலட்சுமணன்

கௌரி

இனிய தமிழ்ப் புத்தாண்டு நல்வாழ்த்துக்கள் !

noreply@blogger.com (Nilavan) — Wed, 13 Apr 2011 09:04:10 PDT

எ கலப்பை 3.0 - புதிய வெளியீடு

noreply@blogger.com (Nilavan) — Mon, 13 Dec 2010 13:29:56 PST

நான் பிளாக்கில் எழுத ஆரம்பித்த போது எனக்கு தமிழில் எழுத கை கொடுத்தது எ கலப்பை எனப்படும் தமிழ் எழுதி தான். எ கலப்பை மென்பொருளை தமிழ்மணத்தில் இடப்பட்டுள்ள ஒரு சுட்டியின் மூலம் தேர்ந்தெடுத்து தரவிறக்கம் செய்வது வழக்கம்.

அதன்பின் பரவலாய் தமிழை கணிப்பொறியில் பயன்படுத்த ஆரம்பித்த போது பயன்படுத்தப் படும் ஒவ்வொரு கணிப்பொறியிலும் முதலாவதாய் எ கலப்பை மென்பொருளை உள்ளீடு செய்வது தான் எனது முதல் வேலையாயிருக்கும். எ கலப்பை மென்பொருளை க்ளிக் செய்தவுடன் அதில் முகுந்த் எனும் பெயரும் ஆழமாய் பதிந்துவிட்டது எனலாம். பின்னொரு நாளில் நண்பர் முரளியின் அறிமுகத்தின் மூலம் முகுந்த் அவர்கள் பெங்களூரிலே இருக்கிறார், அறிமுகம் கிடைக்கும் என எதிர்பார்க்கவில்லை. முகுந்த் தற்சமயம் ஆஸ்திரேலியாவில் பணிபுரிகிறார்.

எ கலப்பை மென்பொருளானது வின்டோஸ் விஸ்டா, கூகிள் குரோம் ஆகியவற்றில் பயன்படுத்த முடியாததாகி இருந்தது. வளரும் தொழில்நுட்பத்திற்கேற்ப தன்னை மேம்படுத்த வேண்டிய கட்டாயத்தில் எ கலப்பை இருந்தது. முகுந்த் அவர்கள் சேது, விஜய் குப்தா, அருணன், வெங்கடேஷ், குணசேகர் ஆகியோர்களின் பங்களிப்புடன் சேர்ந்து எ கலப்பை 3.0 வெளியிட்டிருக்கிறார்.

புதியதொரு பரிமாணத்தில் எ கலப்பை மென்பொருள் இணைய உலகில் நடைபோட்டு வருகிறது. ஏராளமான தரவிறக்கங்களைக் கொண்டு வருகிறது என முகுந்த் அவர்களின் மூலமும் கேள்வியுற்றேன். இப்புதிய வெளியீட்டில் தமிழ் 99, பொனடிக், டைப்ரைட்டர், பாமினி, இன்ஸ்கிரிப்ட் ஆகிய விசைப் பலகைகளை செயல்படுத்த முடியும்.

எ கலப்பை உள்ளீடு செய்வது எப்படி?

1. தமிழா.காம் இணையப் பக்கத்திற்கு செல்லவும்.

2. இணையப் பக்கத்தில் Projects சொடுக்கி, பின் e Kalappai சொடுக்கவும்,

3. தரவிறக்க சுட்டியை சொடுக்கி தரவிறக்கம் செய்யவும்.

4. தரவிறக்கம் செய்யப்பட்ட ஃபோல்டரில் சென்று eKalappai-3.0-installer.exe யை செயல்படுத்தவும்.

5. காணப்படும் பெட்டியில் தேர்வு செய்து Install செய்யவும்.

6. உங்களுடைய Desktop ல் கீழ்க்கண்ட ஐகான் கிடைக்கலாம். ஐகானை செயல்படுத்தினால் விண்டோஸின் வலதுகீழ்ப் பக்கத்தில் உள்ள ட்ரேயில் எ கலப்பை ஐகான் கிடைக்கும்.

7. அதனில் சென்று மௌஸின் இடது பொத்தானை செலுத்தி Settings தெரிவு செய்து விருப்பப்பட்ட விசைப்பலகை வடிவங்களையும், அதனை தெரிவு செய்ய சுருக்கக் குறியீடுகளையும் தேர்வு செய்து கொள்ளலாம்.

இப்புதிய எ கலப்பை வெளியீட்டினைப் பயன்படுத்துமாறு கேட்டுக்கொள்கிறேன். மேலதிக விபரங்கள், கருத்துக்களுக்கும் mugunth@gmail.com முகவரியில் தொடர்பு கொள்ளலாம். உங்களின் நண்பர்களுக்கும் தெரியப்படுத்துங்கள். அத்துடன் தமிழா.காம் தமிழ் தொடர்பான மென்பொருள்களை உருவாக்கும் முயற்சியில் ஈடுபட்டுள்ளது. ஜாவா, டாட் நெட், பிஹெச்பி போன்றவற்றில் திறமை உள்ளவர்கள் தமிழா.காமின் திட்டங்களில் பங்கெடுத்துக் கொள்ளலாம்.

சிங்கப்பூர் - ஒரு பார்வை ஒரு பயணம்

noreply@blogger.com (Nilavan) — Sun, 07 Nov 2010 15:48:52 PST

சிங்கப்பூர் வந்து ஒரு மாதமும் முடிந்து விட்டது. இங்குள்ள இடங்கள், வழிகள், மக்கள் என ஓரளவு பழக்கமாகிக் கொண்டு வருகிறது. உலக வரைபடத்தில் சிறு புள்ளியைப் போல் காணப்படும் சிங்கப்பூரில் வியத்தக்க மாற்றங்களைக் கொண்டு நாடு இயங்கிக் கொண்டு வருவதை கண்கூடாகக் காணமுடிகிறது. சொர்க்கமே என்றாலும் அது நம்மூரைப் போல வருமா என ராமராஜன் ஒரு படத்தில் சிங்கப்பூரை சுற்றிக் காண்பிப்பார், எப்போதோ ஒரு முறை அந்த நாளில் சிங்கப்பூரை சினிமா படங்களில் பார்த்து அதிசயித்திருக்கிறேன்.

அன்றாட சிங்கப்பூர் மக்களின் வாழ்க்கை முறையில் தவிர்க்க முடியாத ஒன்றாக எம்.ஆர்.டி யைச் சொல்லலாம். நாட்டின் அனைத்து பாகங்களும் சரியாக இணைக்கப்பட்டு எந்த மூலைக்கும் எளிதில் பயணம் செய்ய ஏதுவாகிறது. வடக்கு தெற்கு,வடக்கு கிழக்கு, மேற்கு கிழக்கு, வட்டப்பாதை என திசைகளுக்கு ஒன்றாக 3 (அ) 5 நிமிடங்களுக்கு ஒன்றாக குறுக்கும் நெடுக்குமாக ரயில் சென்று கொண்டே தான் இருக்கின்றன. இந்த ரயில்கள் சந்திக்கும் இடங்களில் ஒரு இடத்தில் இருந்து மற்றொரு திசைக்கு மாற்றிச் செல்லவும் வழிவகைகள் செய்யப்பட்டுள்ளன. ஆகையினால் எங்கும் சிரமப்படாமல் ஒரு இடத்திலிருந்து மற்ற இடத்திற்கு செல்ல எளிமையாக வழியமைக்கப்பட்டுள்ளது.

நான் தற்போது சிங்கப்பூரின் வடக்குப் பகுதியிலுள்ள மார்சிலிங்கில் தங்கியிருக்கிறேன். மார்சிலிங்கில் இருந்து நான் வேலை பார்க்கும் ராஃபில்ஸ் பிளேசஸுக்கு 40 நிமிட பயணம் நேரமாகும். ரயில் பயணங்கள் குளிரூட்டிகளாக உள்ளதால் இதமானதாக இருந்தாலும், அலுவலக நேரங்களில் சற்றே நெரிசலாக இருக்கும், ஆனால் ஒருவர் மற்றொருவரை உரசாத அளவுக்கு தூரம் உள்ள வகையில் பயணம் செய்கின்றனர். ரயில் பயணத்துக்கென ஈஸிலிங்க் (அ) நெட்ஸ் அட்டைகள் விற்கப்படுகின்றன. இந்த அட்டைகளின் மூலம் செல்போன்களுக்கு டாப்அப் பணம் ஏற்றி வைப்பது போல ஏற்றிக்கொண்டு ரயில் நிலையத்தின் நுழைவு வாயிலுள்ள இயந்திரத்தில் தேய்த்து விட்டு உள்ளே போனால் சேருமிடத்தின் வெளிவாசல் வரைக்குமான கட்டணத்தை தானாகவே அட்டைகளிலிருந்து எடுத்துக் கொள்கிறது.

இது மாதிரியான நுட்பத்தை பெங்களூர் மெட்ரோ ரயிலிலும் அறிமுகப் படுத்தப் போகிறார்கள் என ஏற்கனவே படித்ததை இங்கே பார்த்தவுடன் உணர முடிந்தது. எனக்குத் தெரிந்து ஷ்ரேயா, த்ரிஷா மினி ஸ்கர்ட்டில் சினிமாவில் பார்த்திருக்கிறேன். ஷுட்டிங் நடக்கையில் எப்படித்தான் அந்த ஆடையைப் போட்டி போட்டிக் கொண்டு நடிக்கிறார்களோ, சினிமா விழாக்களில் வரும் சிலர் எப்படித்தான் உட்காருகிறார்களோ என தேவையற்ற கவலையும் பட்டிருக்கிறேன், உங்களில் சிலரும் ஆதங்கப்பட்டிருக்கலாம். ஆனால் இங்கே மினி ஸ்கர்ட்டில் வரும் பள்ளிப் பெண்கள், அலுவலகம் செல்லும் பெண்கள், திருமணமான பெண்கள் என சகலரும் மினி ஸ்கர்ட்டில் உலா வருவது சாதாரண்மாக உள்ளது. ஆனால் மினி ஸ்கர்ட் ரொம்ப அழகாய்த் தான் இருக்கிறது(!).

அவர்கள் எப்படி வந்தாலும் வம்பிலுப்பது, கலாய்ப்பது, தேவையற்ற சேட்டைகள் செய்வது என எந்தப் பிரச்சனையும் பெண்களுக்கு ஏற்படுவதில்லை, ஏனெனில் பெண்களைப் பாதுகாப்பதற்கென சட்டங்கள் கடுமையாக இருப்பதால் மக்களும் அதை உணர்ந்து ஒழுக்கமாக உள்ளனர் என்றே நினைக்கின்றேன். ரயிலில், ரயில் நிலையங்களில், அலுவலகங்களில், மின்தூக்கிகளில், சாலைகளில் என ஒவ்வொரு இடங்களிலும் பொருத்தப்பட்ட காமிராக்கள் கண்காணித்துக் கொண்டே இருக்கின்றன. எம்.ஆர்.டி ரயில்களில் தண்ணீர் குடிக்கக் கூடாது, சாப்பிடகூடாது, புகை பிடிக்கக் கூடாது, ரயில் பாதை தண்டவாளங்களில் இறங்கக்கூடாது, ரயில் செல்லும் இடத்திலிருந்து எவ்வளவு தூரம் தள்ளி நிற்க வேண்டும், மாற்றுத் திறனாளிகள், பெரியவர்களுக்கு இடம் கொடுப்பது, வரிசையாய் செல்வது, வாசலில் நிற்காமல் உள்ளே செல்வது என ஒவ்வொன்றும் அறிவுப்புகள், தொலைக்காட்சியில், வானொலிகளில் அறிவுறுத்தப்படுகிறது (அ) விழிப்புணர்வு ஏற்படுத்தப்படுகிறது. தீவிரவாதம் நுழைய வாய்ப்புகள் இல்லாத வகையில் கட்டுப்பாடாக உள்ள நாட்டில் “சந்தேகப்படும் வகையிலான நபரோ, பொருளோ பார்த்தால் உடனே அதிகாரிகளூக்கு தெரியப்படுத்துங்கள்” என்று அடிக்கடி அறிவுறுத்தப்படுகிறார்கள். அந்த அளவுக்கு பொறுப்புமிக்கதாக தமது நாட்டினை கண்காணித்து வளர்ச்சிப் பாதைக்கு எடுத்துச் செல்கிறார்கள்.

சிங்கப்பூரின் பிரதான மற்றும் முதன்மை மொழியாக ஆங்கிலம் உள்ளது. அது தவிர மலாய், மாண்டரின்(சீன மொழி), தமிழ் ஆகிய மொழிகள் அலுவலக மொழிகளாக உள்ளது. பேருந்துகள் ரயில்கள் உள்ள அறிவுப்புகள், குறிப்புகள் என அனைத்தும் நான்கு மொழிகளில் கொடுக்கப்பட்டுள்ளன. தமிழனாக இருந்து நமது மொழி சிங்கப்பூர் நாட்டில் அங்கீகாரம் பெற்றிருப்பது பெருமைக்குரிய விடயமாகும். இங்குள்ள இந்தியர்களில் 55 விழுக்காட்டினர் தமிழர்கள் இருக்கின்றனர். சிங்கப்பூர் பற்றிய மேலதிகத் தகவல்களை அடுத்த கட்டுரையில் பார்க்கலாம், தற்சமயம் சிங்கப்பூரில் நான் கலந்து கொண்டு இரண்டு தமிழ் நிகழ்வுகளைப் பற்றிய செய்திகளைப் பகிர்ந்து கொள்கிறேன்.

சிங்கை லவண்டர் பகுதியில் அமைந்துள்ள உமறுப்புலவர் தமிழ் மையத்தில் பட்டிமன்றம் நடக்க இருப்பதை அறிந்து சிறீதரன், நடராஜ் ஆகியோருடன் கடந்த ஞாயிறு(அக் 31) மாலை 6 மணிக்கெல்லாம் சென்றோம். தொலைக்காட்சி நிகழ்ச்சிகள் தீபாவளியின் சிறப்பை உணர்த்துகின்றன, உணர்த்துவது இல்லை எனும் தலைப்பில் தமிழ்ப் பட்டிமன்ற கலைக் கழகத்தின் சார்பில் நடத்தப்பட்டது. இந்த கலைக் கழகமானது சிங்கப்பூரில் 50 பட்டிமன்றங்களை சிறப்பாக முடித்து 51வது பட்டிமன்றமாக இது நடைபெற்றது. பட்டிமன்றத்தின் நடுவராக திரு. ஜோதி மாணிக்கவாசகமும் உணர்த்துகின்றன எனும் தலைப்பில் திரு. குமாரசாமி, திருமதி அகிலா, திருமதி நிஷா ஆகியோரும், உணர்த்துவதில்லை எனும் தலைப்பில் திரு அஜ்மீர், செல்வி பல்கீஸ், திரு கோபிநாத் ஆகியோரும் பேசினார்கள். தொலைக்காட்சிகளிலேயே பட்டிமன்றம் பார்த்துப் பழகிப்போன எனக்கு இந்த நேரடிப் பட்டிமன்றம் கலகலப்பான அனுபவத்தைத் தந்தது. நடுவர் தான் சும்மா உட்காருந்து தான் இருக்கப்போகிறேன் என ”சும்மா..சும்மா..” என விசுவின் பாணியில் ஆரம்பத்திலேயே கலகலப்பூட்டினார். அடுத்து ஆரம்பித்த குமாராசாமியில் ஆரம்பித்து அனைவருமே யாருக்கும் சளைத்தவர்கள் இல்லை எனச் சொல்லும் வகையில் தங்களின் பேச்சுத் திறமையையும், வாதத் திறமையையும் வெளிக்காட்டினார்கள்.

இறுதியில் பார்வையாளர்கள் இருவர் யாராவது கருத்துச் சொல்லலாம் என வாய்ப்பளிக்கப்பட்டது. அந்த இருவரில் ஒருவராக நான் எழுந்து தொலைக்காட்சி நிகழ்ச்சிகளானது தொலைக்காட்சி இல்லாத சமயங்களில் அதிகாலையில் எழுந்து, எண்ணெய்க் குளியலிட்டு, புத்தாடை அணிந்து, பட்டாசு வெடித்து, இனிப்புக்கள் சாப்பிட்டு, நண்பர்கள் பார்த்து, உறவுகள் கூடிக் கொண்டாடிய நிலையை நம்மில் இருந்து மறைத்து நம்மை தொலைக்காட்சிக்கு முன் அமரவைத்து காசு சம்பாதிக்கும் ஒரு தொழிலாக நடத்துகிறார்கள் தவிர, தீபாவளியின் சிறப்பை உணர்த்துவதில்லை எனும் கருத்தைக் கூறினேன். நடுவர் தனது முடிவுரையாக தொலைக்காட்சி நிகழ்ச்சிகள் நமக்குள் மகிழ்ச்சியைத் தரலாம் ஆனால் தீபாவளியின் சிறப்பை உணர்த்துவதில்லை எனத் தீர்ப்பு கூறினார்.

இன்று மாலை 6 30 மணிக்கு கவிஞர் ந.வீ. விசயபாரதியின் மூன்று நூல்கள் வெளியீட்டு விழா நடக்கிறது என்பதனை தங்கமீன்.காம் எனும் இணையதளத்தின் மூலம் அறிந்தேன். அலுவலகம் முடித்து நேராக செரங்கூனில் அமைந்துள்ள பி.ஜி.பி மணிவிழா மண்டபம் சென்றேன். ந.வீ.விசயபாரதி அவர்களைப் பற்றி அதிகம் எனக்குத் தெரியாது எனினும் அவரது வலைத்தளம், சிறுகதைகள் என வெளிவந்தது பார்த்து ஓரளவு தெரிந்து வைத்திருந்தேன். மேலும் விபரங்கள் தெரிந்தால் அடுத்த பதிவுகளில் எழுதுகிறேன். பூட்டுக்கள், புலமைக்கு மரியாதை, பூக்கள் உடையும் ஓசை எனும் மூன்று நூல்கள் பற்றிய ஆய்வுரையை தங்கமீன் மணிமாறன், சோமசுந்தரம், விஜி ஜகதீசன் ஆகியோர் பேசினார்கள். மனித மனங்களுக்குள் நம்பிக்கையின்றி மனித நேயங்களை பூட்டி வைத்திருக்கும் மனிதர்கள், அந்தப் பூட்டுக்களை புறக்கணிக்க வழிகள் எனும் வகையில் அமைந்துள்ள கவிதைகளை பூட்டுக்கள் நூலிலும், இலக்கியங்களில் கவஞர்கள் கூறியவற்றினை எளிய தமிழில் விளக்கும் வகையில் புலமைக்கு மரியாதை நூலும், தமிழ், காதல், தாய், இயற்கை, கோபம், மனம் ஆகியவற்றை மையமாகக் கொண்ட கவிதைகளாக பூக்கள் உடையும் ஓசை நூலும் அமைந்துள்ளதை உரையாற்றிய ஆய்வுரையின் மூலம் அறிய முடிகிறது.

விழாவில் கலந்து கொண்டவர்களுக்கு அன்பளிப்பாய் கத்தரிக்காய், வெண்டைக்காய், பீன்ஸ், கேரட், ஆப்பிள் அடங்கிய பை ஒன்று கொடுத்தது புதுமையாகவும், சிறப்பாகவும் அமைந்தது. இம்மாதிரியான விழாக்கள் மனதிற்கு மகிழ்ச்சியாகமும், தமிழின் சுவையை, உரையை, நுட்பங்களை அறிவதற்காகவும் இனிமையாக அமைந்து விடுகின்றன. இனிவரும் காலங்களில் கிடைக்கின்ற நேரங்களில் சென்று கலந்துகொள்ள வேண்டும் எனும் ஆவலையும் ஏற்படுத்துகிறது. மற்றொருமொரு கட்டுரையில் உங்களை மீண்டும் சந்திக்கிறேன்.

தற்சமயம் சிங்கப்பூரிலிருந்து....

noreply@blogger.com (Nilavan) — Sun, 24 Oct 2010 19:04:00 PDT

அனைவருக்கும் இனிய வணக்கம்,

எனது வலைப்பக்கத்தில் வலைப்பதிவேற்றி அதிக நாட்கள் ஆகின்றது. வேலைப்பணி காரணமாகவும் மற்றசில தனிப்பட்ட காரணங்களினாலும் செய்ய முடியாததாகி விட்டது. நான் பெங்களூரில் பணியாற்றிக் கொண்டிருந்தேன் என்பதை அறிவீர்கள். ஆனால் தற்சமயம் சிங்கப்பூரில் உள்ள ஒரு நிறுவனத்தில் கணிப்பொறி நிபுணராய் பணியாற்றி வருகிறேன்.

சிங்கப்பூர் உங்களனைவருக்கும் அறிமுகமான நாடு. சுத்தமான, சுகாதாரமான, மிகவும் கட்டுப்பாடுள்ள நாடு எனக் கேள்விப்பட்டிருப்பீர்களெனினும் நமக்கான சிறப்பம்சம் என்னவெனில் தமிழ் மொழியை அலுவலக மொழியாகக் கொண்டுள்ள நாடு. ஆக நம்ம ஊரில் இருப்பதைப் போன்றதொரு நினைவை நம்முள் நிறுத்தும் பண்பான நாடு சிங்கப்பூர். இந்த மாதம் அக்டோபரில் இருந்து இங்கே பணிசெய்து வருகிறேன் எனபதைத் தெரிவித்துக் கொள்கிறேன்.

விரைவில் சிங்கப்பூர் பற்றிய பதிவுகள்...

நன்றி வணக்கம்.

லினக்ஸ் மற்றும் சைபர் கிரைம் விழிப்புணர்வு கருத்தரங்கு

noreply@blogger.com (Nilavan) — Thu, 05 Aug 2010 23:34:35 PDT

புதுமைக்கு வித்திட்ட வேலூர் லினக்ஸ் பயிலரங்கு மற்றும் சைபர் கிரைம் விழிப்புணர்வு கருத்தரங்கு

கடந்த 1ம் தேதி வேலூர் ஊரிசு கல்லூரியில் லினக்ஸ் பயிலரங்கு மற்றும் சைபர் கிரைம் விழிப்புணர்வு கருத்தரங்கு சிறப்பான முறையில் நடைப்பெற்றது.
இப்பயிலரங்கு மற்றும் கருத்தரங்கினை விசுவல் மீடியா குழுமம், மேக்சிமைஸ் டெக்னாலஜிஸ் மற்றும் ஊரிசு கல்லூரியின் கணினித்துறை இணைந்து ஏற்பாடு செய்திருந்தன.
இதில் வேலூர் , கிருஷ்ணகிரி , சித்தூர் ஆகிய மாவட்டங்களில் இருந்து ஏரளமான மாணவ, மாணவியர் மற்றும் தொழில்நுட்ப ஆர்வலர்கள் 350 க்கு மேற்பட்டோர் கலந்துகொண்டர். இதில் பெரும்பாலோனோர் வேலூரை சுற்றியுள்ள 10க்கு மேற்பட்ட பொறியியல் கல்லூரி மாணவ, மாணவியர்கள்.
மேலும் பல ஊர்களில் இருந்து மாணவ, மாணவியர்கள் சிலர் காலை 6 மணிக்கெல்லாம் ஊரிசு கல்லூரி வளாகத்திற்கு வந்திருந்தனர். மேலும் நிகழ்ச்சி நடக்கும் நாளான ஞாயிறு அன்று அதிகாலை 5 மணிக்கு இணையத்தில் தகவல்களை கண்டு ஒரு நண்பர் அப்போதே சென்னையில் இருந்து புறப்பட்டு விழாவில் கலந்துகொண்டார்.
காலை 9 மணிக்கெல்லாம் நிகழ்ச்சி ஆரம்பிக்கப்பட்டது. உபுண்டு தமிழ்குழுமத்தின் ஒருங்கிணைப்பாளர் திரு.இராமதாசன் கலந்துகொண்டு லினக்ஸ் பற்றியும் அதை எவ்வாறு நிறுவுவது என்றும் பயிற்சி அளித்தார்.
மாணவ, மாணவியர்கெல்லாம் ஏற்கனவே லினக்ஸ் பற்றி தெரிந்திருந்தது என்றாலும் அவர்களுக்கு முறையாக நிறுவுவது மற்றும் நிறுவும்போது ஏற்படும் பிரச்னைகள், பயன்பாட்டு ப்ரசனைகள் போன்றவற்றில் ஏராளமான சந்தேகங்கள் கேட்கப்பட்டன. மேலும் மாலையில் அடியேன் சைபர் கிரைம் பற்றியும் அதனால் ஏற்படும் ப்ரச்னைகள் பற்றியும், நம்முடைய மின்னஞ்சல்களை எப்படி பாதுகாப்பது என்றும் விளக்கினேன். அப்போது சமீபத்தில் தொழில்நுட்ப வலைப்பதிவாளரான திரு.சூர்யாக்கண்ணன் அவர்களின் ஜிமெயில் முகவரி திருடப்பட்டது பற்றியும் விவாதிக்கப்பட்டது.

நிகழ்ச்சியில் கலந்துகொண்ட மாணவ/மாணவியர்கள் தங்கள் கல்லூரிகளில் லினக்ஸ் பயனர் குழுமத்தை ஆரம்பிக்க உள்ளோம் என்று ஆர்வத்துடன் கூறினார்கள்.
இதில் குறிப்பிட்டத்தகுந்த விசயம் என்னவெனில் கணினியில் தமிழ் பற்றிய நிறைய மாணவ/மாணவியர்களுக்கு தெரிந்திருக்கவில்லை. எனவே கணினியில் தமிழ் உருவான விதம் மற்றும் கணினியில் தமிழ் சார்ந்த பயன்பாடுகள் பல பயன்பாடுகள் உருவாக்கப்பட்டுள்ளது என்றும் விவரித்து எடுத்துரைத்தோம்.

விழாவில் கலந்துகொண்டவர்களுக்கு லினக்ஸ் விளக்க கையேடும், அரசின் சிடாக் -ல் இருந்து வெளிவரும் பாஸ் லினக்ஸ் டிவிடி அனைவருக்கும் இலவசமாக வழங்கப்பட்டது.
இப்பயிலரங்கு மற்றும் கருத்தரங்கு பற்றி மாணவ/மாணவியர்களிடம் கேட்டறிந்தபோது, நிகழ்ச்சி சிறப்பாக இருந்தது என்றும், ஓபன் சோர்ஸ் என்றால் என்ன என்று அறிந்துகொண்டோம் என்றும், இதுபோன்று இன்னமும் பயிலரங்குகளை தொடர்ந்து வழங்கும்படி கேட்டுக்கொண்டனர்.

இறுதியாக மேக்சிமைஸ் டெக்னாலஜிஸ் நிறுவனத்தின் இயக்குநர் திரு.தியாகராஜன் அனைவருக்கும் நன்றி கூறினார்.

வேலூரில் வரும் ஆக 1ம் லினக்ஸ் மற்றும் சைபர் கிரைம் கருத்தரங்கு

noreply@blogger.com (Nilavan) — Thu, 29 Jul 2010 05:03:46 PDT

இந்திய சுதந்திரத்திற்கே வித்திட்ட வேலூரில் வரும் ஆக 1ம் லினக்ஸ் பயிலரங்கு மற்றும் சைபர் கிரைம் விழிப்புணர்வு கருத்தரங்கு நடைபெறுகிறது. இந்த கருத்தரங்கினை இணையம் தொடர்பான சேவைகளை வழங்கி வரும் விசுவல் மீடியா நிறுவனம், வேலூரில் உள்ள மேக்சிமைஸ் நிறுவனம் இணைந்து நடத்துகின்றன.

வேலூர் ஊரிஸ் கல்லூரி வளாகத்தில் உள்ள காப் வளாகத்தில்நடைபெறும் இக்கருத்தரங்கில் கட்டற்ற (open source) மென்பொருள்களின் அறிமுகம், அதனுடைய அவசியம் விளக்கப்படவுள்ளது. அடுத்ததாக லினக்ஸ், நம் அரசின் சார்பில் சீடாக் நிறுவனத்தினால் வெளியிடப்பட்டு உள்ள பாஸ் லினக்ஸ் இயங்கு தளம், பெடோரா லினக்ஸ், உபுந்து போன்ற ஆபரேட்டிங் சிஸ்டங்களைப் பற்றிய அறிமுகமும், அவற்றை கணிப்பொறியில் எவ்வாறு நிறுவுவது, பயன்படுத்துவது எப்படி என்பன போன்ற விபரங்களையும் விளக்கப்படவுள்ளது. லினக்ஸ் பயன்படுத்துவதால் என்னென்ன நன்மைகள் நமக்கு உண்டாகும், அவற்றிலுள்ள மேலும் பயன்படுத்ததக்க வகையிலுள்ள மென்பொருள்கள் பற்றியும் அவற்றை விளக்கவும் உள்ளனர். இப்பயிற்சியினை சென்னையில் அமைந்துள்ள கட்டற்ற மற்றும் திறந்த மூலமென்வள தேசிய மையத்தின் திட்டப்பொறியாளர் ராமதாஸ் அவர்கள் வழங்கவுள்ளார்.

பெருகிவரும் சைபர் கிரைம் குற்றங்களில் இருந்து தனிநபர் பாதுகாப்புகளை எப்படி ? அவ்வாறு ஏதேனும் நடந்தால் அவற்றை சமாளிப்பது எப்படி என்று விரிவாக விளக்கப்பட உள்ளது.
இறுதியாண்டுகளில் படிக்கு மாணவ/மாணவிகள் தங்கள் பிராஜெக்ட்களை கட்டற்ற நிரல்களை கொண்டு எப்படி உருவாக்குவது என்றும் பயிற்சி அளிக்கப்படுகிறது.
இந்த கருத்தரங்கின் ஒருங்கிணைப்பாளர்கள் திரு.செல்வமுரளி,திரு.தியாகராஜன் செய்தியாளர்களிடம் தெரிவித்ததாவது : இக்கருத்தரங்கம் அதிக விலை கொடுத்து ஆபரேடிங் சிஸ்ட உரிமையை வாங்க முடியாமல் அவற்றை உபயோகப்படுத்திக் கொண்டிருக்கும் தனிநபர் கணிப்பொறி பயனாளர்கள், இணைய மையங்கள், கடைகளில் கணிப்பொறி பயன்படுத்துவோர்கள், சிறுதொழில் கூட கணிப்பொறி பயனாளர்கள், தொழிற்சாலைக் கணிப்பொறி பயனர்கள் பலருக்கும் இந்த கட்டற்ற மென்பொருளைப் பயன்படுத்துவது பற்றிய விழிப்புணர்வு ஏற்படுத்தினால் தம் கணிப்பொறிகளில் தைரியமாய் நிறுவி, சுதந்திரமாய் செயல்பட முடியும் என நம்புகிறோம்.

முற்றிலும் இலவசமாக நடைபெறும் இந்த கருத்தரங்கிற்கு அனைவரையும் வரவேற்கிறோம் என தெரிவித்தார். இந்த கருத்தரங்கின் போது ஓப்பன்சோர்ஸ் மென்பொருட்கள் அடங்கிய டிவிடி அனைவருக்கும் விநியோக்கப்பட உள்ளது .

மேலும் விபரங்களுக்கு 99430-94945, 96000-75672

இலங்கையின் இனப்படுகொலையை மறைக்கும் இந்தி(ய) திரைப்பட உலகமும், இந்திய முதலாளிகள் சம்மேளனமும்!

noreply@blogger.com (Nilavan) — Sun, 23 May 2010 19:45:33 PDT

பெங்களூரு மே 23, இனப்படுகொலை செய்த நாடான இலங்கையில் இந்திய திரைப்பட சங்கமும், இந்திய முதலாளிகள் சம்மேளனமும் இணைந்து நடத்தும் கலைச் சேவை மற்றும் வணிக ஒப்பந்தங்களை கண்டித்து பெங்களுரு மகாத்மா காந்தி சாலையில் கண்டண ஆர்ப்பாட்டம் நடைபெற்றது. சேவ் தமிழ் பெங்களூரு கிளை தகவல் தொழில்நுட்ப இளைஞர்கள் மற்றும் கர்நாடக தமிழ் மக்கள் இயக்கமும் இணைந்து நடத்திய இக்கண்டன ஆர்ப்பாட்டத்தில் நூற்றுக்கும் அதிகமான இன உணர்வாளர்கள் கலந்து கொண்டு இனப்படுகொலையை மறைக்கும் இந்தி(ய) திரைப்பட உலகம் மற்றும் இந்திய முதலாளிகள் சம்மேளனத்திற்க்கும் தமது கண்டனங்களை பதிவு செய்தனர்.
இந்நிகழ்வில் சிறப்பு அழைப்பாளர்களாக திரு. இராசன் (தலைவர் .க‌ர்நாட‌க தமிழ் மக்கள் இயக்கம்), திரு.பாலன் (கர்நாடக உயர் நீதி மன்ற வழக்கறிஞர்), திரு. சிவ சுந்தர் (கன்னட ஊடகவியலாளர்) ஆகியோர் க‌ல‌ந்து கொண்ட‌ன‌ர்.

ஆர்ப்பாட்ட‌ நிக‌ழ்வில் ஊட‌க‌விய‌ளால‌ர் திரு.சிவ‌ சுந்த‌ர் , உல‌க‌ ஊட‌க‌வியாள‌ர்க‌ள் இல‌ங்கை அர‌சின் போர்குற்ற‌த்தை வெளிக்கொண‌ரும் இவ்வேளையில் இந்திய‌ திரைப்ப‌ட‌ விருது வ‌ழ‌ங்கும் விழாவை கொழும்பில் ந‌ட‌த்துவ‌த‌ன் மூல‌ம் இன‌வெறி பிடித்த‌ இல‌ங்கை அர‌சை, ந‌ல்ல‌ர‌சு என்று ந‌ற்சான்றித‌ழ் வ‌ழ‌ங்கும் முய‌ற்சியில் இந்திய‌ அர‌சு ஈடுப‌ட்டுள்ளது என்றும், த‌டைசெய்ய‌ப்ப‌ட்ட‌ ஆயுத‌ங்க‌ளை அப்பாவி த‌மிழ‌ர்க‌ளின் மீது பிர‌யோகித்து கொன்று குவித்த‌ இன‌வெறி அர‌சுட‌ன் இந்திய‌ அர‌சு கொண்டுள்ள‌ உற‌வான‌து, இந்திய‌ர்க‌ளும் த‌மிழ‌ன ப‌டுகொலையில் ப‌ங்கேற்ற‌தாக‌ பொருள் கொள்ளவும், இந்தியர்கள் அனைவரது கரங்களிலும் த‌மிழ‌ர்க‌ளின் இர‌த்த‌க்க‌றை ப‌டிந்துள்ள‌து எனவும் கூறினார்.

தொட‌ர்ந்து பேசிய வழக்கறிஞர் பால‌ன் அவ‌ர்க‌ள், கொள்ளை அடிப்ப‌தும், கொன்றொழிப்ப‌தும் ஏகாதிப‌த்திய‌த்தின் கொள்கைக‌ளாக‌ உள்ள‌ன‌. இந்திய‌ ஏகாதிப‌த்திய‌ம் ப‌சுமை வேட்டை என்ற‌ பெய‌ரில் ப‌ழ‌ங்குடி ம‌க்கள் வாழும் நில‌ப்ப‌ர‌ப்பில் உள்ள‌ வ‌ள‌ங்க‌ளை கொள்ளை அடிக்க‌, அங்குள்ள‌ ம‌க்க‌ள‌னைவ‌ரையும் ந‌க்ச‌ல்க‌ள் என்ற‌ போர்வையின் கீழ் கொன்ற‌ழிப்ப‌தை போல‌, த‌மிழ‌ர் நில‌ங்க‌ளை இந்திய‌ வ‌ர்த்த‌க‌ முத‌லாளிக‌ள் கொள்ளை அடிக்க‌ இன‌வெறி சிங்க‌ள‌ அர‌சுட‌ன் சேர்ந்து இந்திய‌ ஏகாதிப‌த்திய‌ம் இணைந்து அங்கு வாழ்ந்த‌ த‌மிழ‌ர்களை தீவிரவாதிகள் என்று குற்றம் சுமத்தி கொன்று குவித்த‌ன‌ர். உல‌க‌ அர‌ங்கில் இல‌ங்கையின் போர் குற்ற‌ம் வெளிப்ப‌ட்டால் இந்தியாவின் கூட்டு ச‌தியும் வெளி வ‌ருமென்ற‌ அச்ச‌த்தில் இந்திய‌ ஏகாதிப‌த்திய‌த்தின் கைக்கூலிக‌ளான‌ திரை உல‌கின் உத‌வியுட‌ன் இல‌ங்கையில் அமைதி நில‌வுவ‌தாக‌ ஒரு பொய் தோற்ற‌த்தை ஏற்ப‌டுத்த‌ முனைகிறார்க‌ள் என‌க் கூறினார்.
அத‌ன் பிற‌கு பேசிய‌ க‌ர்நாட‌க‌ த‌மிழ் ம‌க்க‌ள் இய‌க்க‌ த‌லைவ‌ர் இராச‌ன், அப்பாவி த‌மிழ் பெண்க‌ள், குழ‌ந்தைக‌ள் என‌ப் பாராம‌ல் ந‌ச்சுக் குண்டுக‌ள் வீசி கொலை செய்த‌ கொடும் சிங்க‌ள‌வ‌ர்க‌ளை புற‌க்க‌ணிக்க‌ வேண்டிய‌து த‌மிழ‌ர்க‌ள் மாத்திர‌ம‌ல்ல‌ மாந்த‌ நேய‌ம் உள்ள‌ அனைவரது க‌டமையாகும். உல‌க‌த்தாரிடமிருந்து சிங்க‌ள‌வ‌ர்க‌ள் செய்த‌ இன‌ப்ப‌டுகொலையை ம‌றைக்க‌ முனையும் இந்திய‌ அர‌சு இந்திய‌ திரைப்ப‌ட‌ துறையின் மூல‌ம், அவ‌ர்க‌ளின் விருது வ‌ழ‌ங்கும் விழாவை கொழும்பில் அவ‌ச‌ர‌ அவ‌ச‌ர‌மாக‌ ஏற்பாடு செய்துள்ள‌து. அதே போல உல‌கெங்கிலும் உள்ள‌ த‌மிழ‌ர்களிடமிருந்து மே மாத‌த்தில் ந‌டைபெற்ற‌ இன‌ப்ப‌டுகொலையை ம‌ற‌க்க‌டிக்க‌ இன‌த்துரோகி க‌ருணாநிதியின் த‌லைமையில் செம்மொழி மாநாடு ந‌டைபெறுகின்ற‌து. உல‌க‌ங்கிலும் வாழ‌க்கூடிய‌ த‌மிழ‌ர்க‌ள் இல‌ங்கையை புற‌க்க‌ணிக்கும் அதே வேளையில், துரோகிக‌ளால் ந‌ட‌த்த‌ப்ப‌டும் செம்மொழி விழாவையும்,விருது வ‌ழ‌ங்கும் விழாவில் ப‌ங்கு கொள்ளும் திரை உல‌கின‌ரையும் புற‌க்க‌ணிக்க‌ வேண்டும் என‌க் கூறினார்.
மேலும் நிக‌ழ்வில் கீழ்காணும் கோரிக்கைக‌ள் வைக்க‌ப்ப‌ட்ட‌ன‌‌.
1. விருது வ‌ழ‌ங்கும் விழாவின் இட‌த்தை மாற்று
2. இந்திய‌ முத‌லாளிக‌ள் சம்மேள‌ன‌மே, இன‌ப்ப‌டுகொலை ந‌ட‌ந்த‌ நாட்டோடு வ‌ர்த்த‌க‌ உற‌வு கொள்ளாதே
3. கமல் ஹாசன் அவர்களே இன‌ப்ப‌டுகொலை செய்த‌ நாட்டோடு வ‌ர்த்த‌க‌ உற‌வு கொண்டுள்ள‌ FICCI யின் பொழுதுபோக்கு துறைத் த‌லைமை ப‌த‌வியிலிருந்து வில‌குங்க‌ள்.
4. அமிதாப் ம‌ற்றும் ச‌ல்மான் கான் அவ‌ர்க‌ளே த‌மிழ‌ர் இர‌த்த‌க்க‌றை ப‌டிந்த‌ இல‌ங்கையில் ந‌டைபெறும் விருது வ‌ழ‌ங்கும் விழாவை புற‌க்க‌ணியுங்க‌ள்.
5. மாந்த‌ நேய‌முள்ள‌ ச‌மூக‌மே போர்குற்ற‌ம் புரிந்த‌ இல‌ங்கை புற‌க்க‌ணியுங்க‌ள்.

பாலிவுட்டுக்கு எதிராக பெங்களூரில் போராட்டம்

noreply@blogger.com (Nilavan) — Sat, 22 May 2010 08:27:42 PDT

இலைங்கையில் போர் எனும் பெயரில் தமிழினத்தை அழிக்கும் நோக்குடன் ஆயிரக்கணக்கான அப்பாவி மக்கள் படுகொலை செய்யப்பட்டு ஒரு வருடம் ஆகின்ற இந்நேரத்திலும், போரில் பாதிக்கப்பட்ட மக்களுக்கு எந்தவித நிவாரணப் பணிகளையும் செய்து முடிக்காத இலைங்கையை கண்டிக்க வக்கின்றி இலங்கைப் பொருளாரத்தை முன்னேற்றும் வகையிலும், போர்க்குற்றங்களை மறைக்கின்ற வகையில் இந்தித் திரைப்பட விருது விழாவான ஐஐஎஃஃப்ஏ 2010 ஐ கொழும்புலிருந்து மாற்றக்கோரி கர்நாடகா தமிழ் மக்கள் இயக்கமும், தமிழர் பாதுகாப்பு இயக்கமும் இணைந்து இப்போராட்டத்தை நடத்துகின்றன.

இப்போராட்டத்தில் கலந்து கொண்டு நம்முடைய எதிர்ப்புக்கிற்கு வலுசேர்க்க வரவேற்கிறேன்.

இரத்தத்தட்டு தானம் !

noreply@blogger.com (Nilavan) — Mon, 17 May 2010 18:26:27 PDT

இரத்த தானம் பற்றி அனைவரும் கேள்விப் பட்டிருப்பீர்கள் என நினைக்கின்றேன். இரத்ததட்டு தானம் பற்றிக் கேள்விப் பட்டு இருக்குறீர்களா ?

இரத்தத் தட்டு என்பது இரத்தத்தின் ஒரு வகையான அணுத்துகளாகும். நமது இரத்தம் உறைந்து போதலில் இந்தத் தட்டுக்கள் பெரும்பங்காற்றுகின்றன. இந்த இரத்தத் தட்டு நமது உடலில் சீராக இருப்பது மிக அவசியமாகும். இவை அதிகரிக்கும் சமயத்தில் இரத்தக்கட்டு ஏற்படவும், குறைகின்ற சமயங்களில் இரத்தம் வழிதலும் ஏற்படுகின்றது. இரத்ததட்டானது 1.5 முதல் 3.0 மைக்ரோ மீட்டர் விட்டம் கொண்ட தட்டையான வடிவத்தைக் கொண்டதாக உள்ளது, மேலும் இரத்தச் சிவப்பணுக்களைப் போன்று அணுக்கரு அற்றவையாகவும் இது உள்ளது.

காயம் ஏற்படும் நேரங்களில் இரத்தமானது நமது உடலுக்குள் உறைந்தால், கட்டி போன்று ஆகி விட்டால் பெரும் பாதிப்பை ஏற்படுத்துவது உண்டு. அதே நேரத்தில் இரத்த வழிதலானது விபத்துக் காயம், மகப்பேறு போன்ற தருணங்களில் அதிகமான இரத்த இழைப்பை சந்திக்க நேரிடுகிறது. இவ்வகையான இரத்ததட்டுக்களை குறைவாக உள்ளவர்களுக்கு அளிப்பதே இரத்தத்தட்டு தானமாகும்.

எனது நெருங்கிய உறவினர் ஒருவர் மதுரை மீனாட்சி மருத்துவமனையில் மகப்பேறு சிகிச்சைக்காக அனுமதிக்கப் பட்டிருந்தார். அவரைச் சந்திக்க சென்றிருந்த நேரத்தில் அவருக்கு இரத்தத் தட்டு குறைவாக இருக்கின்ற காரணத்தினால் நண்பர்கள் மூலமாக இரத்ததட்டு தானம் கொடுப்பதற்கான ஏற்பாடுகள் நடைபெற்றுக் கொண்டிருந்தது. இதனை அறிந்து நானும் இரத்தத்தட்டு தானம் கொடுக்க முன்வந்தேன். இரத்தத்தட்டானது நமது இரத்தத்திலிருந்து பிரித்தெடுக்கப் படுகிறது. இதனைப் பிரித்தெடுப்பதற்கென ஒரு இயந்திரம் மீனாட்சி மருத்துவமனையில் பிரத்தியோகமாக அமைக்கப்பட்டுள்ளது. சாதரண இரத்ததானமானது நமது உடலில் இருந்து 350 மி.லி அளவு எடுக்கப்படும், ஆனால் இவ்வகை இரத்தத்தட்டில் நமது உடலிலிருந்து எடுக்கப்படும் இரத்தம் இயந்திரத்தில் அனுப்பப்படுகிறது. இயந்திரம் தட்டை மட்டும் பிரித்தெடுத்து சேகரித்துக் கொள்கிறது. அதன்பின் இரத்தம் வேறொரு குழாயின் வழியாக நமது உடலுக்குள் செலுத்தப்படுகிறது.

இரத்தத்தட்டானது 24 மணிநேரத்தில் நமது உடலுக்குள் மறுபடியும் உற்பத்தியாகிக் கொள்கிறது. இதனால் நமது இரத்தத்தில் உள்ள தட்டுக்கள் குறைந்து போய்விடும் எனற பயமும் இல்லை. இச்செயல்முறை 1:30 மணிநேரம் முதல் 2:30 மணி நேரம் வரை செயல்படும். இதுவரை இவ்வகையான தானத்தை அறிந்திருக்கவில்லை. அவற்றை தாங்களுடன் பகிர்ந்து கொள்ளவே இந்தப் பதிவு.

இனிய சித்திரைத் திங்கள் மற்றும் தமிழ்ப் புத்தாண்டு நல்வாழ்த்துக்கள்

noreply@blogger.com (Nilavan) — Wed, 14 Apr 2010 00:02:18 PDT

திருமணத்திற்கு முன் !

noreply@blogger.com (Nilavan) — Sun, 28 Mar 2010 00:47:23 PDT

காதல் என்பது நேற்று முளைத்ததல்ல, பன்னெடுங்காலமாய் மனிதம் தோன்றிய காலத்திலிருந்தே நம்முள் உணர்வாய், உயிராய், மூச்சாய் இருந்திருந்தாலும் இன்று வரை இளைஞர், இளைஞிகளுக்கு காதலுக்கு ஆதரவு, எதிர்ப்பு என முரண்பட்ட கருத்துக்களுடன் சாதி, மதம், இனம் கலந்து காதலை ஆதரிப்பவர்களும், எதிர்ப்பவர்களும் உள்ளனர். சில ஆண்டுகளுக்கு முன்பு வரை பணம் குவிந்துள்ள இடங்கள், மனிதர்கள் மிகக் குறைவு. ஆனால் சமீபத்திய ஐ.டி வளர்ச்சியின் மூலம் பணம் குவிந்துள்ள இடங்கள் எனபது தனது சதவிகிதத்தைக் கூட்டி மிகப்பெரும் அளவில் பரவலாக்கியுள்ளது.

இங்கே ஐ.டி வளர்ச்சி எனக் குறிப்பிடுவதால் ஐ.டி பணியாளர்களை மட்டும் குறிக்க முடியாது, ஐ.டி வளர்ச்சியின் மூலம் நிலம், வீடு, சம்பளம், சுகாதாரம், கல்வி, மளிகை, உணவு, மருத்துவம், கேளிக்கை, என அனைத்து துறைகளின் அளவும் கணிசமாய் உயர்ந்துள்ளதை மறக்க முடியாது.

காதலுக்கு ஆதரவா ? எதிர்ப்பா என இன்னும் கனந்து கொண்டிருக்கும்

இச்சமூகத்தில்

இனி,

திருமணத்திற்கு முன் இளைஞர், இளைஞிகளின் உணர்வுகளை வென்றெடுக்கும் விருப்ப புணர்வு அவசியமே, அவசியம் இல்லை, அவரவர் விருப்பமே, உரிமையே, சரி, தவறில்லை, என்பனவான ஒரு அடுத்த முன்னோட்டத்திற்கு அடிபோட்டிருக்கிறது சமீபத்திய உச்சநீதிமன்றத்தின் அதிரடித் தீர்ப்பு.

இன்னும் விளக்கமாய் யோசித்து அடுத்த கட்டுரையில் படிக்கலாம்..

பக்தி - பணம் சம்பாதிக்க மட்டும்

noreply@blogger.com (Nilavan) — Sun, 28 Mar 2010 00:18:15 PDT

நித்தியானந்தா வீடியோவை பரவச்செய்த சன் ஊடகம், அடுத்த படியாக கல்கி பகவான் ஆசிரமத்தில் நடைபெறுகின்ற கூத்துக்களையும் அரங்கேற்றியுள்ளது. நித்யானந்தா வீடியோவிற்கு ஏற்பட்ட வரவேற்பை அடுத்து கல்கி பகவானையும் அரங்கேற்றியிருக்கிறது. மிகப்பெரும் பலம் வாய்ந்த சன் மாதிரியான ஊடகங்கள் சமூகத்திற்கு தேவையான இத்தகு பணிகளை செய்தால் அவர்கள் மக்களிடம் சம்பாதிக்கும் பணத்திற்கு நன்றிக் கடனாய் அமையும்.

கல்கி பகவான் பற்றிய விளம்பரங்களை பிரபல வார இதழ்கள் தவறாமல் வெளியிடுகின்றன. அவற்றிலுள்ள விளம்பரங்களானது, எனக்கு தொழில் முன்னேற்றம் அடைந்தது, பணக்கஷ்டம் தீர்ந்தது, திருமணம் நடந்தது, நோய் குணமானது என அனுபவங்களாக வெளியிடப்படுகின்றன. கஷ்டம் இல்லாத மனிதனே இல்லை எனும் நிலையில் படிக்கின்ற வாசகர்கள் தங்களின் கஷ்டங்களை நீக்க இதை முயற்சி பண்ணுவோம் என முயன்று காசை செலவு செய்கின்றனர். காசை கொடுத்து தீட்சை பெறும் பக்தர்கள் லட்சம் பேர் இருந்தாலும், அதில் வழக்கமான முன்னேற்றத்தைக் கண்டவர்கள் அதே விளம்பரத்தில் தங்களின் மொபைல் எண்ணுடன் வர வாய்ப்புண்டு !

இது நல்ல பிஸினஸா தான் இருக்கு .. !

ஆக இன்றைய நிலையில்,

பக்தியைக் கொண்டு -

வியாபாரிகள், தொழிலதிபர்கள், பக்திமான்கள், கடவுளின் முகவர்கள், மனித தெய்வங்கள்,

பூஜை செய்யலாம்
அருளுரை வழங்கலாம்
ஆசி வழங்கலாம்
சொற்பொழிவு நடத்தலாம்
இதிகாசங்களை விளக்கலாம்
கடவுள்களின் வரலாறு பேசலாம்
புத்தகம் எழுதலாம்
தொடர் கட்டுரைகள் எழுதலாம்
தொலைக்காட்சி தொடர் தயாரிக்கலாம்

ஆனால் இவர்கள் யாருமே பக்தியை வாழ்க்கையினுள் உட்புகுத்து வாழ அனுமதிப்பதில்லை, ஆன்மிகங்களில் சொல்லியவற்றை பின்பற்ற முனைவதும் இல்லை என்னும் நிலையை நமக்குள் ஏற்படுத்திக் கொண்டிருக்கிறார்கள்.

மாயவலை - ஈர்த்ததில்

noreply@blogger.com (Nilavan) — Fri, 19 Mar 2010 03:58:36 PDT

சில தினங்களுக்கு முன்பு உ.பி யில் உள்ள ஒரு கோவிலில் நடந்த நெரிசலில் ஐம்பதிற்கும் அதிகமானோர் இறந்து போயினர். அவர்களுக்கு நஷ்ட ஈடு வழங்க உ.பி மாநில கஜானாவில் பணம் இல்லை என்றார் உ.பி முதல்வர் மாயாவதி. ஆனால் தனது கட்சியின் 25ம் ஆண்டு விழாவை 200 கோடி கொண்டு செலவு செய்து கொண்டாடியுள்ளார். இதை எதிர்க்கும் எதிர்க்கட்சியினருக்கு மாநில பட்ஜெட்டில் இருந்து ஒரு சதவிதத்துக்கும் குறைவான அளவே செலவு செய்யப்பட்டது என நியாயம் பேசுகிறார்கள். அத்துடன் மேலே உள்ள பண மலர்மாலையில் மட்டும் 5 கோடி ரூபாய் கொண்டு உருவாக்கப்பட்டுள்ளது, தொடர்ந்து இனிவரும் நாட்களில் மாயாவதிக்கு பணமாலை தான் போடப் போகிறோம் எனக் கூறி வருகிறார்கள். தலித் முதல்வர் ஒரு முன்னோடியாய் இருந்து தலித் மக்களுக்காக பாடுபடுவார் எனப் பார்த்தால் இப்படி செயல்பட்டால் எங்கே உ.பி காணப்போகிறது முன்னேற்றத்தை ?

பின் குறிப்பு : சென்ற ஆண்டு 2000 கோடி செலவில் மாநிலத்தை அழுகுபடுத்த என பூங்காக்கள் உருவாக்கப்பட்டு, மாயாவதி, கன்ஷிராம் சிலைகள், தனது கட்சி சின்னமான யானை என நிறுவி

தெலுங்கு மற்றும் கன்னட வருடப்பிறப்பான உகாதி பண்டிகைக்கு தமிழகம் முழுவதும் அரசு விடுமுறையாக உள்ளது. அத்துடன் ஒணம் பண்டிகைக்கும் அரசு விடுமுறை வழக்கில் உள்ளது. இதுபோன்ற நடைமுறைகள் நம்மைச் சுற்றியுள்ள மூன்று மாநிலங்களான கர்நாடகம், ஆந்திரா, கேரளம் ஆகிய மாநிலங்களில் ஒன்றுகூட இல்லையே. அவர்கள் தமிழ் வருடப்பிறப்புக்கு வாழ்த்துச் செய்திகளாவது அனுப்புகிறார்களா எனத் தெரியவில்லை. இது பற்றி முதல்வர் வாய் திறப்பாரா என்ன ? அல்லது இவ்வாறு அளிக்கப்படும் விடுமுறைகள் அம்மக்களின் ஓட்டுக்களைப் பெறுவதற்கான அரசியல் தந்திரமா ?!

"ஆன்மீகமும் பிஸினஸ், மாட்டிக்கிட்டா அந்தரங்கமும்(அம்மண) பிஸினஸ்"

நித்யானந்தா - யார் செய்த தவறு ?!

noreply@blogger.com (Nilavan) — Mon, 08 Mar 2010 23:24:09 PST

உலகம் முழுவதும் கடந்த சில நாட்களாய் நித்தியானந்தாவின் செக்ஸ் லீலைகள் பரபரப்பாகி பேசப்பட்டு வருகிறது. கூகிளில் அதிகம் தேடப்பட்ட வார்த்தையாகவும், ட்விட்டரில் அதிகமாக ட்விட் செய்யப்பட்டவையாகவும், அலுவலகம், டீக்கடை, பொதுஇடம் என கூடுமிடமெல்லாம் இதைப் பற்றிய விவாதமாகவே உள்ளது.

ஆனந்த விகடன், குமுதம் போன்ற வார இதழ்களில் காணப்படும் ஆன்மீகக் கட்டுரைகள் வாழ்க்கையை வழிப்படுத்தும் பணிகளை நமக்குத் தருகின்றன. விகடன் பிரசுரத்தின் மூலம் தயானந்த சரஸ்வதி ஸ்வாமிகளின் 'மனம் மலரட்டும்' எனும் புத்தகம் வாங்கி படித்திருக்கிறேன். அதுபோலவே குமுதத்தில் வெளிவந்த 'கதவைத் திற காற்று வரட்டும்' எனும் தலைப்பில் நித்யானந்த எழுதி வந்த தொடர் எனக்கு மட்டுமல்லாமல் ஏனைய தமிழர்களுக்கும் நித்யானந்தாவை அறிமுகப்படுத்தியல் பெரும்பங்கு உள்ளது. குமுதம் கொடுத்த அறிமுகத்தில் சில நாட்களில் நித்யானந்தாவின் சொற்பொழிவு ஒன்றின் விளம்பரத்தைப் பார்த்து விசாரித்ததில் அந்த சொற்பொழிவில் கலந்து கொள்ள ரூ 500 என்றார்கள். அப்போதே நினைத்தேன், இவர்கள் பண்ணுவதெல்லாம் பணம் சம்பாதிக்கத் தான் என்று. அதே போல் கல்கி ஆசிரம தரிசனம் ஒன்றிற்கும் நண்பர் ஒருவர் சென்று வந்தார், அவரிடம் வினவியதில் தரிசனத்திற்கு ரூ 500 என்றார்கள். கல்வி நிலையங்கள் பெரும் வியாபாரமாகி அதன் மூலம் ஏற்படும் பாதிப்புக்கள் நாட்டை வேறுவழிக்கு அழைத்துச் சென்று கொண்டிருக்கிற தருணங்களில் ஆன்மீகம் கல்வி வியாபாரத்தை மிஞ்சியதாய் காணப்படுகின்றது. நித்யானந்தரின் செல்வாக்கு என்பது விரல் விட்டு எண்ணக்கூடிய ஆண்டுகளாகவே உள்ளது, ஆனால் அவரது சொத்துக்கள், ஆசிரமக் கிளைகள், பரப்பப்படும் விளம்பரங்கள் ஆகியவற்றைக் காண்கையில் ஒரு வெற்றிபெற்ற தொழிலபதிர்களுக்கு ஈடான அனைத்து விளம்பர உத்திகளும் கையாளப்பட்டு வருவதை மக்கள் யோசிக்க வேண்டும்.

சினிமாக்களிலும், கதைகளிலும் கடவுள் தோன்றி மறைந்து அருள் பாலிப்பதைப் போன்ற எந்த நிகழ்வுகளும் எந்த மதத்திற்கும் இந்த உலகில் நடப்பதில்லை. ஆனால் கடவுளின் அவதாரங்கள், மனித தெய்வம் எனச் சொல்லிக் கொள்ளும் இவ்வகை கடவுளின் முகவர்களை மக்களாகிய நாமும், நமது அரசாங்கமும் சற்றே தெளிவான பார்வையுடன் இவர்களை அணுக வேண்டும்.

நித்யானந்தா செய்த தவறு என்ன ?

சட்டப்படி வயது வந்த ஆணும், பெண்ணும் சம்மதத்துடன் நடைபெறும் எந்தவொரு நிகழ்வுகளையும் குற்றமென இந்திய அரசியலமைப்புச் சட்டம் சொல்வதில்லை. ஆனால் நம்பிக்கையை ஏற்படுத்துபவரும், நம்பிக்கையை ஏற்படுத்த சொற்பொழிவுகள் ஆற்றியும், ஏராளமான தொடர்கள், புத்தகங்கள் எழுதியும், ஆசை, ஆன்மீகம், சந்நியாசம், மனதைக் கட்டுப்படுத்துதல், கடவுளின் அவதாரம், மனித தெய்வம், தெய்வ மனிதன் என ஏனைய விளக்கங்களைக் கொடுத்து வருபவருமாகிய நித்யானந்தா, தன்னைப் பின்பற்றும் இலட்சக்கணக்கான பக்தர்களின் மனங்களுக்கு அவரின் பின்புலங்கள் அளிக்கின்ற ரகசிய அதிர்ச்சிகளே குற்றமாகும். அவர்களுக்கு ஏற்படும் மன உளைச்சல்களை அளிக்கின்ற செயல்களில் ஈடுபட்டது குற்றங்களாகும்.

தோண்டத் தோண்டத்தான் நிறைய குற்றங்கள் வரும். பூனைக்கு தற்சமயம் மணிகட்டியாகி விட்டது. இனி இது வரையில் புகார் கொடுக்கப்படாமலிருந்த ஏனைய புகார்கள் நித்யானந்தாவிடம் பாய்ந்து அவரை ஒருவழியாக்கமால் சும்மா இருக்கப் போவதில்லை. பார்ப்போம் இது எந்தளவுக்கு பாயுமென்று... அல்லது பதுங்குமென்று...

ஊடகங்கள் செய்த தவறு ?!

தமக்கு வீடியோ கிடைத்தது என்பதற்கான சிறியவர்கள் முதல் பெரியவர்கள் வரை காணும் தொலைக்காட்சியில் அத்தனை காட்சிகளையும் ஒளிபரப்பப் தேவையில்லை. வெறும் புகைப்படங்களை மட்டும் காட்டியிருக்கலாம். ( இருந்தாலும், இவர்களின் நிகழ்ச்சிகளில் வருகின்ற நடன இயங்கக்களைக் காட்டிலும், கம்மி தான்.. ) ஊடகத்தின் உச்ச கட்டமாய் முழுவீடியோவைப் பெற சந்தா கட்டுங்கள் என நக்கீரம் கூறியது தான். ஆபாச வீடியைவைக் காட்டி தமக்கு கல்லா கட்டியதை என்னவென்று சொல்வது ?! கதவைத் திற காற்று வரட்டும் என இவரை அறிமுகப்படுத்திய குமுதம் தவறான ஒருவரை தமிழக மக்களுக்கு அறிமுகப்படுத்தியதற்கு வருத்தம் தெரிவிக்காமல் கூட்டத்தில் கோவிந்தாவாக ‘நித்யானந்தாவின் செக்ஸ் லீலைகள்’ என லிங்க் கொடுப்பதும் எந்த வகை எனத் தெரியவில்லை.

அரசாங்கத்தின் தவறு என்ன ?

கட்டுக்கடங்காமல் தனது தொழிலை விரிவுபடுத்திக் கொண்டு தமக்கான சட்டதிட்டங்களை வகுத்துக் கொண்டு கொட்டிக்கிடக்கின்ற கோடி கோடியான பணங்களுக்கு கணக்கு என்னவென்பதை அரசாங்கம் நெருங்குவதுமில்லை, நெறிப்படுத்துவதும் இல்லை. மாறாக ஆளும் அரசாங்க பக்திமான்களும் ஆன்மீகவாதிகள் நடத்தும் விழாக்களில் கலந்து கொள்வதால் காவல்துறை போன்றவர்கள் இவர்களிடம் கைவைப்பதில்லை. ஆன்மீகம் எனும் போர்வையில் இவர்கள் பண்ணும் அனைத்தும் அட்டூழியங்களுக்கும் அரசாங்கம் துணை போவதற்கு அனைத்து வசதிகளையும் செய்து கொடுக்கின்றதே ?!

ஆக, அரசாங்கம் இவ்வகை ஆன்மீகப் புள்ளிகளை நெறிப்படுத்துவதற்கான சட்டமியற்ற முறையான வகையில் செய்ல்படுத்தி கண்காணிக்க வேண்டும்.

மக்களின் தவறு என்ன ?

எத்தனை முறை ஏமாந்தாலும் அந்த நோயைக் குணப்படுத்துகிறார், இந்த நோயைக் குணப்படுத்துகிறார் என்று ஆங்காங்கே கூறுவதைக் கேட்டு விட்டு சாமியார்களின் முன் விழவைக்கின்ற நம்பிக்கை தான்.

கலைத்தாயின் தோளில் கமலஹாசன்

noreply@blogger.com (Nilavan) — Sun, 21 Feb 2010 22:43:43 PST

கமலஹாசனின் கலைச்சேவையைப் போற்றும் வகையில் ரஜினி கமலுக்கு பரிசளித்த ஓவியம்.

நன்றி: ஆனந்த விகடன்.

தாழ்தள முழுக்கால் சட்டை ( Low Waist Pant)

noreply@blogger.com (Nilavan) — Wed, 10 Feb 2010 02:20:13 PST

4. நினைவலைகள் - ’ஊருவிட்டு ஊருவந்து’

noreply@blogger.com (Nilavan) — Sun, 07 Feb 2010 06:13:50 PST

நினைவலைகள் தொடரை ஏதோ வேகத்தில் ஆரம்பித்து பலப்பல வேலை, கவனச் சிதறல்களால் தொடராமல் விட்டுவிட்டேன். தற்போது ஆரம்பிக்கலாம் என ஆரம்பித்து ஆரம்பிக்கின்றேன். வாருங்கள் நினைவலைக்குள் பயணிக்கலாம்...

சென்ற தொடரில் குறிப்பிட்டது போல எங்களின் சொந்த ஊரைக் காலி செய்து விட்டு வேறு ஊருக்குச் செல்லும் நிலை ஏற்பட்டது. விவசாயத்தில் போதிய வருமானம் இல்லாததாலும், வீட்டிலுள்ள மொத்த குடும்பத்தினரின் எண்ணிக்கை (8) பேராக இருந்த காரணத்தினாலும் வேறு எதாவது செய்து வருமானம் பார்த்தால் தான் என்ற நிலை உருவாகி இருந்தது. எங்கள் ஊர்க்காரர்கள் பலர் குட்டி ஜப்பான் என்றழைக்கப்படும் சிவகாசி பட்டாசு தொழிற்சாலைகளில் பணிபுரிந்து இருக்கிறார்கள். அன்றாட வருமானத்துக்கு குறைவில்லாமல் வேலையும் கிடைக்கும், பிழைப்பும் நடக்கும் என அறிந்து எனது தந்தை தெரிந்தவர் மூலம் அங்கு சென்று பார்த்திருக்கிறார். தனக்கான ஒரு வேலையை ஏற்பாடு செய்து கொண்டவர் ஒரு மாத காலம் தங்கியிருந்து வேலை பார்த்திருக்கிறார். வேலையும், இடமும் பிடித்துப் போகவே ஒரு மாதத்திற்குப் பின் எங்கள் அனைவரையும் அழைத்துக் கொண்டு ஊரை விட்டுச் சென்றோம்.

அந்நாட்களில் பள்ளியில் நான் மூன்றாம் வகுப்பு படித்துக் கொண்டிருந்தேன். ஜாதிகள் இல்லையடி பாப்பா ! குலத்தாழ்ச்சி உயர்ச்சி சொல்லல் பாவம் எனும் பாரதியின் வரிகளை எழுதி ஆசிரியையிடம் காட்டும் பாடங்களைப் படித்துக் கொண்டிருந்ததாய் ஞாபகம் என்றே நினைக்கிறேன். பள்ளி நிர்வாகத்திடம் தேவையான சான்றிதழ்களைப் பெற்றுக் கொண்டு பாத்திரம், பெட்டி, படுக்கைகளைத் தூக்கிக் கொண்டு எங்கள் ஊரின் தெருக்களில் நடந்து ஊரைக் காலி செய்ததை இன்றும் நினைவிலிருக்கும் நிகழ்வுகள்.

மரியாதையுடனும், சிறப்புடனும் பல தலைமுறைகள் வாழ்ந்த குடும்பம் இன்று பிழைப்புக்காய் வேறு ஊருக்குச் செல்லும் நிலை ஏற்பட்டுள்ளதே என்று கனத்த மனதுடன் நாங்களும், ஊர்க்காரர்களும் கண்ணீருடன் விடைபெற்றோம். எங்கள் ஊரிலிருந்து T.கல்லுப்பட்டி, ஸ்ரீவில்லிபுத்தூர், ரிசர்வ்லைன் வழியாகச் சென்று அங்கிருந்து பாரைப்பட்டி என்னும் ஊருக்குச் சென்று சேர்ந்தோம்.

பாரைப்பட்டி சிவகாசியிலிருந்து 5 கிலோ மீட்டர் தொலைவிலுள்ள மிகச்சிறிய கிராமம். விவசாயம் சொல்லிக் கொள்ளுமளவுக்கு இல்லையென்றாலும் பெருமளவு மக்கள் அருகிலிருக்கும் பட்டாசுத் தொழிற்சாலைகளிலேயே பணிபுரிந்தனர். எனது சொந்த ஊரான கிருஷ்ணாபுரம் பகுதியானது கரிசல் மண் வகையைச் சார்ந்தது. ஆனால் சிவகாசி பகுதி செம்மண் வகையாக அமைந்திருந்தது. தரையைத் தோண்டினால் செம்மண்ணாகத் தான் இருக்கும்.

பாரைப்பட்டி ஏறக்குறைய ஐநூறு வீடுகளைக் கொண்ட மிகச்சிறிய கிராமம். கிராமத்தின் ஆரம்பத்தில் ஒரு முத்தாலம்மன் கோவில், சிறியதாய் ஒரு ஊரணி, சிறு மைதானம் (சினிமா, நாடகம் போடுவதற்கு ஏற்றார் போல்), டீக்கடை, மளிகைக் கடை என கிராமத்தின் அனைத்து அம்சங்களும் கொண்டது. இக்கிராமத்தின் ஒரு புறத்தில் ரயில்வே தண்டவாளங்கள் அமைந்திருந்தது.

பெட்டி படுக்கைகளுடன் வந்த நாங்கள் ஏற்கனவே எங்கள் அப்பா பார்த்து வைத்திருந்த வீட்டில் குடியேறினோம். ஒரே ஒரு அறை, அதன் மூலம் அடுப்பு என மிகவும் அடக்கமாயிருந்தது வீடு. அதற்கான வாடகை ரூபாய் 30 என நினைக்கிறேன். நான், எனது சகோதரர், சகோதரி மூவரும் பக்கத்து ஊரான ஆவரம்பட்டியிலுள்ள அரசு தொடக்கப்பள்ளிக்கு சிலநாட்கள் சென்று கொண்டிருந்தோம். பின் ரிசர்வ்லைனில் உள்ள அரசு ஊராட்சி நடுநிலைப்பள்ளியில் முறையாகச் சேர்க்கப்பட்டோம்.

ரிசர்வ்லைன் என்பது சிவகாசி அருகிலுள்ள, ஸ்ரீவில்லிபுத்தூர் செல்லும் நெடுஞ்சாலையில் உள்ள ஒரு சிறிய நகரமாகும். நான் வசித்த பாரைப்பட்டிக்கு பேருந்து வசதியெதுவும் இல்லை, எதுவானாலும் ரிசர்வ்லைனுக்கு தான் வர வேண்டும். ரிசர்வ்லைனில் சிறப்பம்சமாக ராசி எனும் திரையரங்கம், காவல் துறையினர் வசிப்பதற்கான காலனி, பயிற்சி மைதானம், ஒரு மரத் தொழிற்சாலை, நான் படிக்கும் பள்ளி அவ்வளவு தான். மற்றபடி பட்டாசு தயாரிப்புகளுக்குத் தேவையான பொருட்களை தயார் செய்யும் அளவுக்கான சிறுதொழில்களும், தீப்பெட்டி பெட்டியை உருவாக்குவது போன்ற சிறிய குடிசைத் தொழிலுமாக இருந்தது.

இப்பள்ளியில் சந்தித்த புதிய அனுபவங்களையும், புதிய ஊரில் சந்தித்த புதிய மனிதர்களையும் அடுத்த பகுதியில் தொடர்கிறேன். அதுவரை

பூம்புகார் ப்யணங்களில்.. - Journey to Poompuhar

noreply@blogger.com (Nilavan) — Fri, 05 Feb 2010 23:12:27 PST

சிதம்பரம் அண்ணாமலைப்பலகலைக்கழகத்தில் தமிழ் இணையப்பயிலரங்கை முடித்துக்கொண்டு ஒரிசா பாலு அவர்களின் அழைப்பின் பேரில் பூம்புகார் செல்ல முடிவெடுத்தோம். ஏறக்குறைய பத்து ஆண்டுகளுக்கு முனபு கல்லூரி படிக்கையில் திருமணம் ஒன்றிற்காக சிதம்பரம் சென்று விட்டு பூம்புகார் சென்றிருக்கிறேன். அப்போது செல்லும் பொழுது மாலையாகி விட்டதால் வெறும் கடற்கரையை மட்டும் ரசித்து விட்டு ஒரே ஒரு நிழற்படம் எடுத்து வந்ததாய் ஞாபகம். ஒரிசா பாலு அவர்கள் கடலாய்வுப்பணியில் மேற்கொண்டு வருகிறார். நாகர்கோவில் இணையப்பயிலரங்கில் சந்தித்த போது கன்னயாகுமரியில் கடலாய்வு மேற்கொண்டிருந்தார். சிதம்பரம் பயிலரங்கில் கலந்து கொண்ட போது பூம்புகாரில் கடலாய்வும், வரலாற்று ஆய்வாகவும் சில பணிகளை மேற்கொள்ள ஆயத்தமாயிருந்ததால் நானும் செலவமுரளியும் அவருடன் பூம்புகார் செல்ல ஆர்வமுடன் இருந்தோம்.

”படங்களைச் சொடுக்கி பெரிதுபடுத்திப் பார்த்துக் கொள்ளுங்கள்”

பூம்புகாரில் பிறந்தவரும், பல ஆய்வுப்பணிகளை மேற்கொண்டவருமான புலவர் நா.தியாகராசன் அவர்கள் ஒரிசா பாலு அவர்களுடன் ஆயவு உதவிக்காக வந்திருந்தார். நால்வரும் மாலை 6 மணிக்கு கிளம்பி சிதம்பரத்திலிருந்து கருவி சென்று, பின் பூம்புகார் இரவு 9 மணிக்குச் சென்றடைந்தோம். பூம்புகாரிலுள்ள தமிழகம் உணவு விடுதியில் இரவு உணவை முடித்து விட்டு ஏற்கனவே ஏற்பாடாகியிருந்த அரசு விருந்தினர் மாளிகையினில் தங்கினோம். விருந்தினர் மாளிகை அறை மிகவும் பிரதானமாகவும் அழகுற க்டற்கரையின் மிக அருகில் அமைந்திருந்தது.

”நீதி கேட்டு தலை விரித்த கோலத்துடன், சிலம்புடன் கைகளை நீட்டியுள்ளதைப் போலல்லாமல் கண்ணகி, கடவுளாக உருவகம் செய்யப்பட்டு அழகுற வலது கைகளை அருள் பாலிப்பது போல் அமைத்து, அணிகலன்கள் அணிந்து கால் சிலம்புடன் வடிவமைக்கப்பட்டுள்ளது”

ஜன்னலில் இருந்து வெளிப்படும் கடற்கரைக் காற்று தென்றலாய் இதமான உணர்வை ஏங்களுக்கு வீசிக்கொண்டிருந்தது. கல்பனா சேக்கிழார் அவர்கள் சிதம்பரத்தில் கொடுத்து அனுப்பியிருந்த மாதுளை பழமும், ஆப்பிளும் சாப்பிட்டுக் கொண்டு வெளிவரும் கடற்கரைக் காற்றில் அமிர்தமாய் இருந்தது. சற்று நேர அரட்டை முடித்து விட்டு கடற்கரைப் பக்கம் சென்று உலா சென்று வரலாம் என நினைத்துக் கொண்டிருந்த வேளையில் அசதியால் சோம்பலுடன் நடக்க மனமின்றி தூங்கிப் போனோம். கடற்கரை அலையின் வேகமும், ஒலியும் மிக வேகமாகவே இருந்தது. கடல் அலையின் ஒலியிலும், அதிகமான பயணத்தின் அசதியிலும், இதமான காற்றிலும் இனிய உறக்கம் எங்களை எளிதில் ஆட்கொண்டது.

அதிகாலை வேளையில்

இரவு அனுபவித்த அதே கடல் அலை சத்தத்துடனும், தென்றல் காற்றுடனும் காலை 5 30 மணிக்கெல்லாம் எழுந்து கடற்கரை உலா வர தயாரானோம். அரசு விருந்தினர் மாளிகையிலிருந்து வெளியில் சிறிது தூரத்தில் கண்ணகியின் சிலை வடிவமைக்கப்பட்டுள்ளது. நீதி கேட்டு தலை விரித்த கோலத்துடன், சிலம்புடன் கைகளை நீட்டியுள்ளதைப் போலல்லாமல் கண்ணகி, கடவுளாக உருவகம் செய்யப்பட்டு அழகுற வலது கைகளை அருள் பாலிப்பது போல் அமைத்து, அணிகலன்கள் அணிந்து கால் சிலம்புடன் வடிவமைக்கப்பட்டுள்ளது.

கண்ணகி சிலை

இரவு இருந்ததைப் போலவே அலையின் வேகம் மிக அதிகமாகவே இருந்தது. ஒரிசா பாலு அவர்கள் சிறுவயதில் பூம்புகார் வந்ததையும், கடல்நீர் எந்த அளவு உள்வாங்கியுள்ளது என்பதையும், பூம்புகார் தொடர்பான பல்வேறு நிகழ்வுகளையும் நினைவு கூர்ந்தார். அதிகாலை என்பதனால் கடலின் அலைகளைத் தவிர அனைத்தும் கும்மிருட்டாக் இருந்தது. கடற்கரை ஓரங்களில் மண் அரிப்பைத் தடுப்பதற்கெனவும், அலையின் வேகத்தை கட்டுப்படுத்தவும் மலைபோல் இருபது அடிகள் அளவிற்கு கருங்கற்கள் குவிக்கப்பட்டிருந்தன. கடற்கரை மணலை தரிசிக்க, கடல்நீரில் கால்களை நனைக்க இருநூறு மீட்டர் வலதுபுறத்தில் நடந்து செல்ல வேண்டியிருந்தது.

இனிய கடல்காற்றை ரசித்தபடி பேசிக்கொண்டே கடற்கரை மணலில் நடந்தபடி சூர்ய உதயத்திற்காக காத்திருந்தோம். இதற்கிடையே நானும், செல்வமுரளியின் கடலலைகளில் கால்களை நனைத்து கடல்செல்வங்களை அள்ள முயன்று கொண்டிருந்தோம். சிப்பி, சங்கு போன்றவைகளை அலையூனோடே கை, கால்களினால் அரவணைத்து கைப்பற்றி கரையில் ஒதுக்கி சேமிக்கலானோம். மேகங்களின் மறைவினில் உதித்த சூரியன் ஆறுமணியாகியும் கண்களில் தென்படவில்லை.

காலை 6 30 மணியளவில் தம் செந்நிற கதிர்களைப் வானில் பரப்பி தன்னிகரில்ல தன்மையுடன் எழுந்த சூரியன் காணக்கிடைக்காத அழகுடன் காட்சியளித்தது. மேலெழும்பிய சூரியனை பிடிப்பது போல், தாங்குவது போல் அமைந்த நிழற்படங்களை ஒரிசா பாலு அவர்கள் அழகுற எடுத்தார். நிழற்பட எடுக்க கேமரா கொண்டு

வரவில்லையாததால் என்னுடைய 2MP கொண்ட பிளாக்பெர்ரி மூலம் எடுத்துத் தள்ளினோம். தேவையான அளவு நிழற்படங்களையும், கடலலைகளையும், சூரிய உதயத்தையும் ரசித்து விட்டு, கைப்பற்றிய சிப்பிகளுடன் விடுதி செல்ல தயாரானோம். வழியில் கலைங்கரை விளக்கமும், அழகுற வடிவமைக்கப் பட்டிருந்த விளக்குத்தூண் அருகிலும் நின்று நிழற்படம் எடுக்கத் மறக்கவில்லை.

அ) விளக்குத்தூண் ஆ) கலங்கரை விளக்கம்

கடற்கரை அழகை ரசித்து முடித்த பின் அருகில் அமைக்கப்பட்டிருந்த இலஞ்சி மன்றத்திற்குச் சென்றோம். பண்டைய கால வரலாற்றில் இங்கே குளம் அமைக்கப்பட்டிருந்துள்ளது. அவற்றை நினைவு கொள்ளும் வகையில் தமிழக அரசின் மூலம் குளம் அமைக்கப்பட்டுள்ளது. அத்துடன் கீழ்க்கண்ட படத்தில் காணப்படுவதைப் போன்ற மூன்று கட்டிட அமைப்புகளும் ஒருங்கே சிறப்புடன் அமைந்துள்ளது. இக்கட்டிடத்தின் இருமருங்கிலும் குளம் அமைக்கப்பட்டுள்ளது. ஆனால் குளத்திலுள்ள தண்ணீர் தான் மாசடைந்து காணப்படுகிறது.
இளஞ்சி மன்றம்

அறைக்குச் செல்லலாம் என முடிவெடுத்த நிலையில் தேனீர் அருந்தலாம் எனத் தோணவே சிறு தொலைவில் இருக்கும் தேநீர் கடைக்கு செல்ல ஆரம்பித்தோம். கடறகரையில் இருந்து செல்லும் சாலையின் வலது புறத்தில் பாவை மன்றம் ஒன்று உள்ளது. கீழ்க்காணும் படத்தில் கூறப்பட்டுள்ளது போல எட்டு வகையான தோற்றங்களும், முகபாவங்களும் கொண்ட உருவங்களை எட்டு தூண்களில் அமைந்துள்ளது. காலை 7 மணி நேரமாதலால் இது பூட்டப்பட்டிருந்தது.ஆகையினால் வெளியில் நின்று கண்டு ரசித்து விட்டு நகர்ந்தோம்.

பாவை மன்றம்

சிறிது தூரத்தில் சாலையின் இடதுபுறத்தில் சிலப்பதிகாரக் கலைக்கூடம் ஒன்றும் உள்ளது. அதன் வாயில் கதவுகள் சிலம்ப வடிவை ஒத்ததாய் அமைந்திருந்தன. அத்துடன் கலைக்கூட கட்டிடமும், வாயில் தோரணமும் அழகுற அமைக்கபெற்று கண்கவர் காட்சியாய் அமைந்திருந்தது.

சிலப்பதிகாரக் கலைக்கூடம்

இக்கலைக்கூடத்தில் சிலம்பு வடிவ குளம், 3 மீட்டர் உயரமுள்ள கண்ணகி சிலை, 2.75 மீட்டர் வடிவ மாதவியின் சிலை, சிலப்பதிகாரம் இயற்றிய இளங்கோ அடிகளின் சிலை, சோழ ஆட்சி புரிந்த கரிகால் சோழனின் சிலை மற்றும் சிலப்பதிகாரக் கதையில் வரும் 49 நிகழ்ச்சிகள் கல்லில் வடிவமைக்கப்படுள்ளன.

அங்கிருந்து சிறிது தூரத்தில் சாலையின் வலதுபுறத்தில் பேருந்து நிலையமும் சிலம்பு வடிவில் அமைந்திருந்து. ஆனால் அவை இன்னும் கட்டி முடிக்கப்படாமல் பயன்பாடின்றி காணப்பட்டுள்ளது. அதன் பின் தேநீர் அருந்திவிட்டு வரும் வழியில் அகழ்வியல் நிலையம் என்றழைக்கப்படும் அரிய பொருட்களை உடைய நிலையத்திற்குச் சென்றோம். அங்கு பூம்புகார நகரின் பலபகுதியில் கிடைக்கப்பெற்ற அரிய வகைப் பொருட்கள் கண்காட்சிக்காக வைக்கபட்டிருந்தது. பழங்காலத்தில் பயன்படுத்தப்பட்ட சிலம்புகள், மணிகள், பாசிகள், புலித்தோற்றம் கொண்ட படகுகள், ஓடங்கள், கண்டெடுக்கப்பட்ட புத்தர் சிலைகள், ஆவணங்கள், கிடைத்த பொருள்களின் பட்டியல்கள், கல்வெட்டுக்கள், இலக்கியக் குறிப்புகள், பூம்புகார் பற்றிய நூல்கள் பட்டியல்கள், படகுத்துறை படங்கள், 2 1/2 கோடி ஆண்டுகளுக்கு முந்தைய சிப்பி, வெளிநாடுகளில் கிடைக்கப்பெற்ற தமிழ்க் கல்வெட்டுக்கள், 7 ம் நூற்றாண்டில் கிடைக்கப்பெற்ற அய்யனார் சிலை, 7ம் நூற்றாண்டு அய்யனார் சிலை, 5ம் நூற்றாண்டு நங்கூரம் என அரிய வகைப் பொருட்களை உள்ளடக்கியதாய் அமைந்துள்ளது.

இவையனைத்தையும் பார்த்து ரசித்தி விட்டு, ஒரிசா பாலு அவர்கள் மேலும் பல ஆராய்வு பணிகள் இருந்தமையால் நானும், செல்வமுரளியும் காலை 10 மணியளவில் பூம்புகாரை விட்டு கிளம்பிச் சென்றோம். பார்க்கவேண்டிய மேலும் பல இடங்களைக் காணும் வாய்ப்பை நேரமின்மையால் இழந்து வேறொரு நாள் வந்து பார்க்கலாம் எனும் எண்ணத்தில் பூம்புகாரிலிருந்து இனிய நினைவுகளுடன் கிளம்பிச் சென்றோம்.

பூம்புகார் எப்படிச் செல்வது :

சென்னையிலிருந்து காரைக்கால் செல்லும் நெடுஞ்சாலையில் கருவி என்னும் இடத்திலிருந்து 6 கிலோ மீட்டர் தொலைவில் பூம்புகார் அமைந்துள்ளது. சிதம்பரம், சீர்காழியிலிருந்தும் நிறைய பேருந்துகள் இயக்கப்படுகின்றன. சென்னையிலிருந்து 220 கிலோ மீட்டர் தொலைவில் பூம்புகார் அமைந்துள்ளது.

வழித்தடங்கள் : சென்னை - பாண்டிச்சேரி - கடலூர் - சிதம்பரம் - சீர்காழி - கருவி - பூம்புகார்.

பூம்புகார் மண்ணில்

noreply@blogger.com (Nilavan) — Fri, 05 Feb 2010 02:12:07 PST

கடற்கரை செல்லும் சாலையின் முகப்புத் தோற்றம்

சிலப்பதிகார கலைக்கூடம்

கடற்கரையில் அமைந்திருக்கும் கண்ணகி சிலை

அரசினர் விருந்தினர் மாளிகையில் இருந்து

கலங்கரை விளக்கம்

விளக்குத்தூண்

பூம்புகார் கடற்கரையில்

காவிரி புகும் பட்டிணத்தில் இருந்து

புலவர் நா.தியாகராசன் அவர்களுடன்

noreply@blogger.com (Nilavan) — Sun, 31 Jan 2010 22:00:12 PST

புலவர் நா.தியாகராசன், ஒரிசா பாலு ஆகியோருடன்.

தமிழ்ப் பண்பாட்டுக்கும், தமிழின வரலாற்றுக்கும் இன்றும் ஆதராமாய் விளங்கிடும் பூமியாக பூம்புகார் விளங்குகிறது. இப்புண்ணிய பூமியின் தோன்றலாய் புலவர் நா. தியாகராசன் விளங்குகின்றார். இம்மண்ணின் பெருமைகளையும், ஆதாரங்களையும் வெளிக்கொண்ரும் வகையிலான எண்ணற்ற பணிகளில் தம்மை ஈடுபடுத்திக் கொண்டு இருக்கிறார். பூம்புகாரின் அனைத்துப் பகுதிகளிலும் கடந்த எண்பதாண்டு காலமாக எட்டுத்திக்குகளிலும் நடந்து இவர் பாதம் படாத இடமே இல்லை எனும் அளவிற்கு ஆய்வுகளை மேற்கொண்ட தியாகராசன் பெரும் உழைப்பை நல்கி இருக்கிறார்.

இந்திய தொல்லியல் துறையினரின் 1963 தொடங்கி 1972 வரை நடைபெற்ற புதைபொருள் ஆய்வில் நா. தியாகராசன் அவர்கள் உடனிருந்து, வேண்டும் உதவிகளைச் செய்து ஆய்வுப் பணிகளை மேற்கொண்டிருந்திருக்கிறார். எண்பதைத் தாண்டிய வயதிலும் சுறுசுறுப்பாய் களப்பணியாற்றி வரும் இவர் தம் பணிக்கு தமிழுலகம் பெரும் நன்றிக் கடன் பட்டிருக்கிறது.

சிதம்பரம் அண்ணாமலைப் பலகலைக்கழகத்தின் தமிழ் இணையப் பயிலரங்கில்..

noreply@blogger.com (Nilavan) — Sun, 31 Jan 2010 21:45:21 PST

சிதம்பரம் அண்ணாமலைப் பல்கலைக்கழகத்தில் நடைபெற்ற தமிழ் இணையப் பயிலரங்கில் பிளாக் உருவாக்கம், பயன்கள், செயல்பாடுகள், பதிவிடுதல், பண்படுத்துதல், கூகிள் ஆட்சென்ஸ் பற்றிய பயிற்சியில் நான்.

பொங்கல் மற்றும் மஹர சங்கராந்தி வாழ்த்துக்கள்

noreply@blogger.com (Nilavan) — Wed, 13 Jan 2010 03:23:09 PST