اجراءات التجنيد

اجراءات التجنيد - هاااااااام جدا لكل الناس اللي عندها جيش

noreply@blogger.com (medical pharmacist) — Sun, 24 Jan 2010 12:10:00 +0000

الحقيقه فكرت كتير قبل ما اعمل المدونه دي بس اخيرا قررت اني اكتب عن اجراءات التجنيد والجيش والكشف الطبي والاوراق المطلوبه وكل الكلام المتعلق بالتجنيد المصري او كما يقولون التجنيد والتعبئه

في البداية احب اعرفكم بنفسي :

انا اسمي ........ بكالريوس ........محافظه الاسكندريه وساكن في منطقه ميامي وانا كنت نص اول في الكشف الطبي سنه 2009

انا بقولكم كده عشان اوضح ان انا مش موظف حكومي ولا بشتغل في الجيش
انا شخص عادي مؤهل عالي اتخرج من الكليه دفعه 2009 وحبيت اقولكم على الخطوات اللي انا عملتها وقت التقديم للجيش ( اجراءات التجنيد ) لكن قد تكون اوضاعكم مختلفه عني او تحصل بعض التغييرات الطفيفه في اجراءات التجنيد وقت ما تقدموا انتم في الجيش

يعني انا باختصار حقولكم على كل اجراءات التجنيد اللي انا عملتها وقت التجنيد عشان على الاقل تبقوا عارفين النظام ماشي ازاي وتبقوا رايحين وعندكم خلفيه كبيرة عن اجراءات التجنيد والكشف الطبي وعشان ازيل عنكم بعض المخاوف اللي جتلكم وقت ما سمعتوا الاشاعات المخيفه اللي انا نفسي سمعتها بالذاااات وقت الكشف الطبي سواء الكشف الطبي في منطقه التجنيد او الكشف الطبي في حلميه الزيتون و أقولكم كمان مين اللي له اعفاء من التجنيد اكيد وكمان عشان اقولكم على بعض الاختلافات البسيطه في اجراءات التجنيد اللي حصلت على سنتنا ( الظاهر كنا منحوسين D: ) عشان في حاجات في اجراءات التجنيد كانت بتحصل السنين اللي فاتت واتلغت حابقى اقولكم عليها بعدين ان شاء الله

المهم انتم بعد كده ممكن تختاروا الموضوع اللي محتاجين تشوفوه في المدونه عن طريق ارشيف المواضيع اللي في الجنب وده احسن من انت تمشوا الصفحه على طول عشان ترتيب المواضيع ممكن يبقى مختلف حسب الوقت اللي بكتب فيه المواضيع المتعلقه بإجراءات التجنيد والتعبئه ان شاء الله خصوصا ان الاجراءات الحكوميه المختلفه اللي بعملها تواريخها دايما بكتبها بتاريخ قديم عشان يفضل شكل الصفحه الرئيسيه للمدونه ثابت زي ما هو وطبعا المدونه فيها كزا صفحه وممكن بعد ما تخلص اول صفحه تروح لتاني صفحه وهكذا والارقام طبعا موجوده تحت خالص في اخر كل صفحه

وطبعا المواضيع حتبقى متجدده باستمرار وبصفه مستمرة ان شاء الله سوف اضع اخر الاخبار والمواضيع المهمه التي تتعلق باجراءات التجنيد وانا ايضا افكر بألا تقتصر تلك المدونه على اجراءات التجنيد فقط بل سأحاول ان اكتب ايضا عن باقي الاجراءات الحكوميه التي سوف اؤديها على مدى حياتي
وبالتالي اتمنى منكم دوما التشجيع وزيارة المدونه بصفه مستمرة واذا كان لدى احدكم استفسار او تعليق ممكن بمنتهى البساطه ان يكتب تعليقه بالضغط على كلمه comment الموجوده دائما في اخر اي موضوع

واي شخص يحب ان ينقل الموضوع للافاده معنديش اي مشكله بشرط واحد بس وهو انه يذكررابط الموضوع الاصلي

( وهو رابط المدونه http://eltagnid.blogspot.com)

وان شاء الله كلكم تستفادوا وتطلعوا تأجيل او اعفاء من الجيش باذن الله

اجراءات التجنيد - الاوراق المطلوبه عند التقدم للجيش

noreply@blogger.com (medical pharmacist) — Sat, 23 Jan 2010 12:12:00 +0000

الاوراق المطلوبه للتجنيد والتعبئه كالتالي :

1- شهاده ميلاد كمبيوتر وحقولكم بتتعمل ازاي في احد المواضيع الموجوده في المدونه

2- بطاقه 6 جند اللي كنا سلمناها للكليه

3- فيش جنائي عشان الجيش
ولازم يكون عشان الجيش مش لأي سبب تاني

4- قيد عائلي
و ممكن استخدام الوصل مختوم لو ملحقش يطلع
و خللي بالكم عشان الناس اللي بتحتاج تعمل القيد العائلي هما بسسسس اللي يعتبروا لائق أ وحيدخلوا ظباط أو اللي كانوا عندهم اعفاء سواء مثلا اذا كان وحيد او ابوه متوفي وهو العائل الوحيد للاسره

يعني من الاخر مش كل الناس حتعمله لكن على سنتي انا كان كل الناس بتعمله وده اختلاف مهم لازم تاخدوا بالكم منه

5- عدد 4 صور شخصيه على الاقللللللل ويا ريت يكون عندكم اكتر احتياطي

6- نموذج 40 اللي بتجيبوه من البوسطه ويا ريت تحاولوا تجيبوه من بدري عشان للاسف النموذج ده بيخلص بسرعه في معظم البوسطه وساعتها حتضطر تلف الدنيا عشان تلاقيه والنموذج ده هو اللي بتملاه عشان تعرف تعمل القيد العائلي

7- افاده من الكليه او شهاده مؤقته عشان تثبت بيها انك مؤهل عالي وتثبتلهم انك اتخرجت من كليه كذا

8- طبعا البطاقه الشخصيه ودي مفيهاش كلام

9- لو كان عندك اخ اصغراو اخت صغيره ومعندهومش بطاقه شخصيه يبقى لازم تعملهم شهاده ميلاد كمبيوتر عشان حتحتاج الرقم القومي بتاعه عشان القيد العائلي

10- صور البطاقات الشخصيه للعائله كلهاااا الاب والام والاخوات والاخوه

11- صورة من عقد زواج الوالد والوالده عشان القيد العائلي وغالبا حتحتاج الاصل عشان توريه بس للموظفه مع ان الموظفه لما روحتلها كانت مكسله ومبصطش على الاصل D:

12- تحليل فصيله دم من مستشفى حكومي او خاص او حتى معمل تحاليل بس المهم يكون عليه ختم المكان اللي عملت فيه التحليل

13- لو افترضنا لا قدر الله ان الوالد متوفي يبقى في الحاله دي حتحتاج تطلع له شهاده ميلاد كمبيوتر من اي مكتب خدمات جماهيريه وده كلام اكيييييييييد

شفتم اجراءات التجنيد والتعبئه في مصر سهله ازاي D:

اجراءات التجنيد - اول حاجه يا ريت تعملوها في اجراءات التجنيد

noreply@blogger.com (medical pharmacist) — Thu, 21 Jan 2010 17:52:00 +0000

يا ريت يا جماعه اول حاجه تحاولوا تعملوها في اجراءات التجنيد هي:

انكم تطلعوا القيد العائلي بدري عشان هو بيستغرق وقت طوييييل عشان يطلع وكمان لو انتم عملتوه بدري قبل معاد الكشف الطبي في التجنيد بفترة كويسه حتخلصوه بدري ومش حتلاقوا زحمه خااااالص وبجد تسليم الاوراق المطلوبه للقيد العائلي حتاخد 10 دقايق بالكتير من غير طوابير ولا زحمه

بينما اللي حصل معايا اني كنت ماشي في اجراءات التجنيد متأخر وبالتالي كان الحصول على القيد العائلي مقرف و اضطريت اقف في طوابير من ابشع الطوابير اللي وقفتها في حياتي D:

يعني :

انا صحابي ما شاء الله لما جم يسلموا الورق المطلوب راحوا الساعه 10 ( وده اساسا معاد وصول الموظفه ) وخلصوا التسليم بالضبط الساعه 10 وربع

بينما انا لما جيت اسلم الورق روحت الساعه 8 ( وكان قبلي حوالي 8 اشخاص ) وسلمت الورق على الساعه 11 بعد طابور وزحمه مقرفه والناس كلها كانت بتتخانق يوميها

طيب حتعملوه ازاي:

زي ما انا كاتب تحت عنوان القيد العائلي ( حتلاقوه في الجنب تحت ارشيف المواضيع )

اجراءات التجنيد - شهاده ميلاد بالكمبيوتر

noreply@blogger.com (medical pharmacist) — Wed, 20 Jan 2010 12:13:00 +0000

في البدايه لازم تعرفوا ان استخراج شهاده ميلاد كمبيوتر ده احد اجراءات التجنيد في مصر السهله جدا بس مشكلته بيطول اوي

حتعملوها ازاي:

1- حتجيب صورة من شهاده ميلادك سواء عاديه او لو كان عندك صورة لشهاده ميلاد كمبيوتر كنت عملتها قبل كده
2- صورة البطاقه الشخصيه
3- قلم ازرق :D عشان حتملى بيانات

طيب حتعملوها منين ؟

بمنتهى البساطه من اي مكتب خدمات جماهيريه موجود في محافظتك ودول بيبقوا كتير

بالنسبه للاسكندريه موجود في كزا حته زي درباله ومدينه فيصل
وستانلي ( وستانلي بالذات بيقولوا ممكن تطلعها بسرعه في خلال يوم او اتنين مش عارف ليه وازاي ؟ بس ده كلام اكيد )

او حتى في خالد بن الوليد قدام الحزب الوطني ( وعلى فكرة هو بيبقى فاضييييييييييييي خاااااااااااااااالص وروقان بجد الموظفه بتيجي 9 انا جتلها 9 وربع كنت اول ولد هناك جه بعدي راجل و بنتين ههههههه منتهى الروقان )

المهم بتاخد منها استماره ب 9 جنيه وتملاها وبياناتها بسيطه مش ازمه يعني وتسلمهالها مع صورة شهاده الميلاد وصورة البطاقه وحتقولك تيجي تستلمها للاسف بعد 10 ايام
يعني المشكله بس هي التأخير وعشان كده لو في واحد معندوش يا ريت يقدم على شهاده الميلاد الكمبيوتر اول خطوة عشان بتطول

طيب فيه حل تاني اسهل واريح وبياخد يومين بس عشان يطلع ايه هو ؟

عن طريق الانترنت والكلام ده اكيد عشان انا نفسي جربته واستلمت الشهاده عن طريق الانترنت
من خلال موقع الحكومه

اضغط هنا

فتملى البيانات بتاعتك من الانترنت وبعد كده حتستلم شهاده ميلاد الكمبيوتر بالبريد حييجي لحد بيتك راجل يخبط عليك ويسلمهالك
وتكلفه الحوار ده اغلى شويه بالضبط 30 جنيه + 6 جنيه وربع تكلفه التوصيل

اجراءات التجنيد - الفيش الجنائي

noreply@blogger.com (medical pharmacist) — Tue, 19 Jan 2010 12:14:00 +0000

بردك ده يعتبراجراء سهل من اجراءات التجنيد والتعبئه في مصر

بتاخد فيش جنائي ب 4 جنيه ( او ب 6جنيه لو مستعجل ) من القسم اللي انت تابع ليه
( بالنسبالي كان قسم المنتزه اول ما تدخله حتلاقي ممر في الارضي على الشمال شويه وحتلاقوا الموظف اللي بيسلمكوا الفيش )

حاجه مهمه جدااااااااااااااا: اوعى ايااااااااااااك انك تكتب اي حاجه في الفيش ولا تكتب اسمك ولا اي حاجه خااااااااااالص عشان في راجل مسئول اللي بتسلمله الفيش هو اللي بيملاه بخطه ولو كنت تعيس الحظ زيي ومليته حتضطر تجيب واحد تاني فمن الاول اهه بكررها تاني محدش يكتب اي حاجه خااااااااااااالص في الفيش ده او في الفيش الرباعي اللي بعدين في الاخر خااااااالص حتعملوه ان شاء الله

ملحوظة مهمه :

مدة صلاحية الفيش الجنائي هي 3 شهور من تاريخ إصداره

وبعد كده في احتمالين حسب الوقت اللي حتعمل فيه الفيش الجنائي:

أ - الاحتمال الاول وده اللي حصل لصحابي (ودول كانوا نص تاني في نفس السنه 2009 ) :

انهم بيعملوا الفيش كمان في القسم يعني كل خطوات الفيش بتتعمل في القسم نفسه وده احتمال كبير اللي انتم كمان حتعملوه ان شاء الله

و الخطوات بالتفصيل كالتالي

حتروح القسم اللي انت تابع ليه وحتقول للمخبر اللي بيبقى واقف على الباب انك عايز تعمل فيش جنائي حيقوم هو قايلك روح المكان الفولاني وحتاخد استماره الفيش الجنائي ب 4 جنيه او 6 جنيه لو مستعجل
وطبعا مش حتكتب فيها حاجه لكن حتروح في مكان تاني وتقف طابور وتستنى دورك لحد ما تدخل للشخص المسؤول وحتديله ورقه الفيش الجنائي متدبس فيها صورة شخصيه ليك مكتوب عليها اسمك من ورا وبردك متدبس في نفس الفيش صورة من البطاقه الشخصيه
وحتقوله انك عايزها عشان التجنيد وحيخليك تبصم بكل صوابعك وتستلم الفيش بعدها بيومين تقربيا

ب - الاحتمال التاني وده اللي حصل معانا ( واحنا كنا نص اول ) وهو ان :

بعد ما تاخدوا الفيش حتروحوا للنقطه اللي في منطقتكم والمسئوله عن الفيش و للاسف مش اي نقطه جنبك لأ في نقطه معينه في كل منطقه هي المسئوله عن عمل الفيش و بالنسبه ليا كانت نقطه فيصل

وبعدين ادامكم حلين:

1- تيجوا بدري اويييييييي 8 الصبح ( وفعلا مش بعد 8 الصبح) عشان تعملوا الفيش الجنائي

2- تيجوا في اي وقت وتدفعوا في الخفاء 5 او 10 جنيه عشان تنجزوا نفسكم للراجل المسئول اللي بيلم البطايق

رأيي الشخصي :

تيجوا على نفسكم وتروحوا بدري عشان هو الراجل اللي بيلم البطايق نظامه بياخد 5 وبعد كده 5 وكده فيا ريت تكونوا من اول 10 على الاقل عشان لو كنتم متأخرين شويه فعلا مش حتخلصوا عشان حتلاقوا ناس كتير جت بعديكم ويمشوهم قبليكم ومحدش حيعبركم للأسف

المهم سيبوكوا من الكأبه دي وحقولكم حتعملوا الفيش الجنائي بالضبط ازاي؟

تكونوا جايبن البطاقه + صورة من البطاقه + صورة شخصيه + قلم جاف تكتبوا بيه اسمكم على الصورة من ورا + دباسه تكونوا مدبسين فيها الصورة في المكان المخصص جوه ورقه الفيش الجنائي وتدبسوا صوره البطاقه ورا الفيش من فوق
حييجي راجل ياخد من كل 5 البطاقه ويقولكم تعالوا معاه عشان تدخلوا جوه

بعد كده حينادوا بالاسم على كل واحد وحتلاقي راجل لطيف حيسألك الفيش الجنائي عايزه عشان ايه حتقوم انت رادد بقوه وتقولوه عشان الجيش وبعد كده حيبصمك بكل الصوابع على الفيش
ويا ريت تسيبلوه ايدك خالص عشان ميتنرفزش عشان هو عصبي حبتين D:

وبس بعد ما ايدك اتلوثت بالحبر القذر مبروك انت كده خلصت وحتروح ويقولولك تعالى بعد بكرة ( لو كان مستعجل) او بعد 3-4 ايام لو كان عادي وحتى ممكن اي حد من اهلك يستلمهولك بالبطاقه بتاعته وبتاعتك وخلاص

ومبرووووووووك كده انتم عملتم الفيش الجنائي وتكونوا خلصتوا حاجه من اجراءات التجنيد والتعبئه في مصر

اجراءات التجنيد - القيد العائلي

noreply@blogger.com (medical pharmacist) — Mon, 18 Jan 2010 12:15:00 +0000

بصوا زي ما قلت قبل كده حاول تعمل الاجراء ده اول حاجه في اجراءات التجنيد ومتتأخرش زيي عشان متتعذبش زي ما انا اتعذبت لما جيت اطلعه
يمكن تحسوا من اسلوب كلامي اللي جاي بأنه اجراء بشعععععع وأنه كان اسوأ اجراء من اجراءات التجنيد عشان ده كان فعلا احساسي وقت ما كنت بعمله وبكتب كيفيه عمله
لكن لو عملتوه بدري زي صحابي ان شاء الله حيخلص بسهوله اوي من غير لا زحمه ولا قرف ولا حاجه ان شاء الله

نقاط مهمه بس لازم اوضحها :

القيد العائلي بيتعمل في السجل المدني اللي انت تابع له
بمعنى ادق انه حسب البطاقه يعني مثلا انا صاحبي مولود مثلا في البحيره بس هو وعائلته مستقرين في ميامي في الاسكندريه وكان مطلع بطاقته من قسم المنتزه يبقى ساعتها حيعمل القيد العائلي من السجل المدني اللي تابع لقسم المنتزه وبالمناسبه هو لازق في القسم

القيد العائلي اللي انت بتعمله بيكون باسم والدك باعتباره هو رب الاسره بمعنى ان صاحب القيد العائلي هو الوالد بينما طالب القيد العائلي هو انت ( انا بقول كده عشان مثلا حتلاقوا في البيانات المطلوبه اسم الوالده بكده هو يقصد تكتب اسم ام والدك اي اسم جدتك من ناحيه والدك فاهمني ؟ يعني مش تكتبوا اسم والدتك لكن الصح ساعتها انك تكتب اسم جدتك )

القيد العائلي نظرا لأنه بيتعمل في السجل المدني فهو بيبقى زحمه جداااااااا وقت اجراءات التجنيد فلازم لمصلحتكم تيجوا بدري اوي عشان تكونوا عملتوا اللي كنتم عايزين تعملوه احسن من انك تيجي متأخر وتقف في طابور طوييييييييييييل عريض وبعدين يقولولكم اوبس الوقت خلص تعالى بكرة صح؟
والقيد العائلي مفيهوش نظام انك تدفع وتخلص بدري لأ لكن للاسف فيه نظام الوسايط بس قمه العدل D:

ده اللي حصل معايا لكن زي ما قلتلكم لما صحابي جم يعملوه سلموا الورق في ربع ساعه بس
معلش انا بكرر النقطه دي كتير بس عشان انتم حتحسوا من اسلوب كلامي اللي جاي اني بجد كنت مخنوق لما جيت اعمله وحتلاقوني بفضفض شويه معاكوا D:
لكن بكرر اهه تاني وتالت لو عملتوه بدري يبقى حيخلص بسهوله قوي وكل الحاجات المقرفه اللي حقولهاكم وحوصفها بعد شويه مش حتحصل خالص ان شاء الله

الاوراق المطلوبه لعمل القيد العائلي ( احد اجراءات التجنيد والتعبئه في مصر ):

1- نموذج 40 من البوسطه وده انت حتملاه او ممكن تستسهل وتخللي واحد من اللي بيبقوا موجودين قدام السجل من الكتيبه تدفعلوا 5 جنيه وهو حيكتب كل حاجه ويدبسلك كل الاوراق المطلوبه

2- صور بطاقتك وصور بطايق العائله كلها ( الاب والام والاخوات والاخوه ) ولو في حد في عائلتك لسه مطلعش بطاقه ساعتها حتضطر للاسف انك تعمله شهاده ميلاد كمبيوتر عشان هما بيحتاجوا يعرفوا الرقم القومي للاسف

3- صوره قسيمه الزواج او الطلاق بتاعه والدك ووالدتك ويا ريت تجيب الاصل عشان المفروض الموظفه بتبص على الاصل وتتأكد منه وترجعهولك تاني

اجراءات التجنيد - تابع القيد العائلي

noreply@blogger.com (medical pharmacist) — Sun, 17 Jan 2010 12:15:00 +0000

انا حقولكم على اللي حصل معايا بالضبط لما جيت اعمل القيد العائلي عشان تبقوا في الصورة ( وللعلم انا عملت الحوار ده في سجل مدني المنتزه بالاسكندريه ) انا روحت الصبح بدري وكنت هناك بكل الورق المطلوب الساعه 8 واستسهلت بصراحه ودفعت 5 جنيه وخليت الراجل يكتبلي كل حاجه ويدبسها وروحت السجل المدني ووقفت في طابور بسيط كان قبليا حوالي 7 اشخاص بس
وحتى وقتها انا كنت مستغرب هي العمليه رايقه كده ليه ؟

وبعد كده فهمت ليه ؟

عشان الموظفه اساسا بتيجي 10 الصبح وتمشي 2 الظهر وطبعا معظم الناس جم على الساعه 9 ونص وكانت زحمه فظييييييييييييييعه وكلها خناقات من ناس بتستعبط وعايزه تزوغ من الطابور وناس كبيرة شويه تحاول تستهبل وتزوغ من الطابور مع ان الراجل مبيبقاش عجوز يعني عنده 40-50 سنه لكن مفيش اي نظام وكان قمه الهبل وفي ناس لطيفه خالص كانت بتستعبط بحاجه بسيطه تقولك انا عايز اسأل سؤال واحد بس ويقف قدام وفجأه تلاقي ورقه طلع وبيحاول يعمل الاجراءات

والستات العواجيز كانوا فظاع بمعنى الكلمه الواحده تتلزق فينا واحنا مكسوفين وبكون عايز اقولها متروحي يا حجه في طابورك لكن هي طبعا جايه متاخرة والستات كانوا حياكلوها لو استعبطتت وكبرت الدور فتلاقيها تقرف فينا احنا الولاد قال ايه زي ولادها

والموظفه تستعبط كل شويه وتتقمص وتقولك مش شغاله واحنا نقول في نفسينا ان ليك عند الكلب حاجه قوله يا سيدتي قصدي يا سيدي D: وابشع شئ هو غباء التنظيم عشان هما عاملين نفس الموظفه تقريبا بتعمل كل حاجه يعني تسليم نموذج 40 ليها( وده المفروض بياخد وقت بسيط 3 دقايق عشان هي بتختاج تراجعه كله) وبردك استلام القيد نفسه من نفس الموظفه ( وده المفروض بياخد ثواني )

فطبعا كان كل شويه بيحصل صراع بين الناس اللي بتسلم والناس اللي بتستلم وكل واحد عنده حق مش معقوله اللي عايز يستلم في ثانيه يستنى طابور طويييييييييييل عشان يستلم وفي نفس الوقت اللي كانوا بيستلموا عددهم كبير ومعنى كده ان اللي عايزين يسلموا نموذج 40 مش حيخلصوا وده بردك مش عدل عشان هما واقفين من الصبح والمفروض الصح كان يبقى فيه شباك للتسليم وشباك للاستلام او على الاقل طابور للتسليم وطابور للاستلام لكن لا حياه لمن تنادي

خلاصه الكلام كان يوم مش لطيف
( معلش انا اسف اكيد انا نقلتلكم احساسي بالقرف من اليوم ده بس كان لازم اوضحلكم كل حاجه وبالمرة افضفض شويه D:)

المهم بعد ما بتوقف في الطابور وبتسلمها الورق هي بتراجعه شويه وبعدين هي بتديلك وصل وتقولك تعالى بعد اسبوع تقريبا او اكتر عشان تستلم القيد العائلي

طيب انا عن نفسي كان وقتي مزنوق وعشان كده خليتها تختملي وصل القيد العائلي وكملت باقي اجراءات التجنيد عادي خالص وبعدين استلمت القيد العائلي
بمعنى يفضل اول ما تستلم منها الوصل قولها اختمهولي عشان وقتي ضيق ومش حلحق معاد الكشف الطبي وبعد كده انت مصرحلك تكمل كل اجراءات التجنيد والتعبئه عادي خاااااااالص بيه ولما تروح العامريه عشان الكشف الطبي بردك حتشتغل بيه الفرق بس انك هناك حيخلوك تبصم وتكتب اقرار انك لما ييجي معاد الارجه بتاعك لازم تكون استلمته فاهمني ؟
انا عن نفسي اشتغلت بالوصل بعد ما ختمته وقبل مروح الكشف بيومين روحت استلمت القيد العائلي عشان اريح نفسي

وعلى فكرة يا ريت كده كده تخليها تختمهولك عشان انت فيه لسه اجراءات من ضمن اجراءات التجنيد حتحتاجوا فيها القيد العائلي او الوصل عشان تعرفوا تمشوا في الاجراءات دي ( عشان تعرفوا تطلعوا الفيش الرباعي )

وحبقى اشرحلكم موضوع الفيش الرباعي بالتفصيل ان شاء الله

اجراءات التجنيد - تابع القيد العائلي

noreply@blogger.com (medical pharmacist) — Sat, 16 Jan 2010 16:22:00 +0000

بعد اسبوع تقريبا من تقديمك لنموذج 140 ( وطبعا بعدها الموظفه اعطتك وصل ) حتروح تاني السجل المدني ومعاك الوصل ويفضل لو معاك كمان صورة بطاقه الوالد ( حقولكم ليه بعد شويه ) وبعد كده نفس الموظفه ( للاسف D: ) حتديها الوصل وهي حتديك القيد العائلي بس خللي بالك لأن القيد العائلي ده مش هو الصورة النهائيه
بمعنى ادق مش هو ده القيد العائلي اللي بالكمبيوتر بل هو يعتبر زي حاجه اوليه للقيد العائلي

والقيد العائلي اللي انت استلمته ده بتراجعه على جنب ( ولازم تراجعه كويس جدا عشان الحوار ده مفيهوش هزار يعني انا مثلا واحد صاحبي كانوا مطلعين ان ابوه متجوز واحده تانيه D: ) فخللي بالك وراجع البيانات كويس عشان لو فيه اي حاجه غلط ساعتها ( وان شاء الله ميكونش فيه ) حتديه تاني للموظفه عشان تظبطه تمام

المهم بعد ما انت استلمت القيد العائلي وراجعته حتقوم كاتب اقرار بسيط على القيد العائلي ده تقر فيه ان البيانات كلها صحيحه

والاقرار حيبقى بسيط اوي بالشكل ده :

اقر انا فلان ان البيانات كلها صحيحه وحتمضي كمان ويبقى عملت الاقرار

وبعدين بعد ما استلمت القيد العائلي وعملت الاقرار حتقولك الموظفه عند الموظفه الفولانيه في الشباك الفولاني وحتدفع 10 جنيه ونصف وحتديها القيد ده
والمفروض اساسا ان القيد ده هما مدبسين فيه صورة بطاقه والدك اللي كنت مقدمها مع نموذج 140 زمان لكن اللي حصل معايا ان صورة البطاقه اتفكت من الدبوس وضاعت طبعا ( واضح اني كنت محظوظ D: ) واضطريت اني اروح واجيب صورة تانيه من بطاقه والدي وبالتالي ريحوا دماغكم انتم وجيبوا صورة البطاقه احتياطي لعل وعسى

بعد كده الموظفه حتقولك تعالى بكرة وانت حتجيلهم بكرة ان شاء الله ومعاك بطاقتك الشخصيه طبعا وحتستلم اخيرا القيد العائلي الكمبيوتر
وبكده تبقى خلصت اجراء سخيف من اجراءات التجنيد والتعبئه ( وعلى فكرة القيد العائلي للاسف له مده صلاحيه مش عارف بالضبط اد ايه بس بأي حال من الاحوال مش ازيد من سنه )

باقي اجراءات التجنيد

noreply@blogger.com (medical pharmacist) — Fri, 15 Jan 2010 23:01:00 +0000

بعد ما طلعتم القيد العائلي ( او الوصل مختوم ) والفيش الجنائي وشهاده الميلاد الكمبيوتر يبقى فاضلكم حاجات سهله خالص في اجراءات التجنيد

فاضلكم تجيبوا :

الشهاده المؤقته او افاده من الكليه
نموذج 6 جند اللي كنتم طلعتوه من مده واديتوه للكليه
تحليل فصيله دم
صورة بطاقتك
3 صور شخصيه

وحتديهم للعسكري الموجود في جزء التجنيد ( غالبا بتبقى لازقه جنب القسم بالنسبالي كان لازق في قسم المنتزه ) وساعتها هو بيراجعهم عشان يتأكد ان كل الاوراق مظبوطه وكامله وحيديكم استمارة الفيش الرباعي اللي انتم بردك حتودوه عند النقطه اللي عملتوا فيها الفيش الجنائي ( بالنسبالي كان نقطه فيصل ) وحتبصموا بردك على الفيش الرباعي ( عباره عن 3 ورقات في كل ورقه صورة شخصيه ليك ) وحيسلمهولك وانت واقف

وبعد كده حترجع تاني للقسم عشان تخللي واحد اسمه شيخ الحارة ( وده اسم وظيفي بجد مش تريقه والله ) عشان يمضي على الفيش الرباعي ( بالنسبه لقسم المنتزه مكتبه فوق في الدور الاول ) وبعد كده حتروحوا لمدير القسم عشان يختمهولكم

وبعد كده حتودوه تاني لجزء التجنيد والعسكري حيقولكم تعالوا اما بكرة او في نفس اليوم متأخر عشان تاخدوا كل اوراقكم اللي كنتم اديتوهومله ويقولكم تعالوا يوم كزا ( يوم الكشف الطبي ) حالق ذقنك وشعرك ومعاك طبعا كل اوراقك وبكده تبقى انت خلصت الاوراق المطلوب احضارها لمنطقه التجنيد وخلصت اخيرا كل اجراءات التجنيد

كام ملحوظه بسيطه في اجراءات التجنيد بس فعلا مهممممممممممممه

noreply@blogger.com (medical pharmacist) — Thu, 14 Jan 2010 23:16:00 +0000

1- تحليل فصيله الدم ممكن يتعمل من اي معمل تحاليل سواء خاص او في مستشفى سواء حكومي او خاص
المهم انه يكون مختوم بختم المعمل ده او المستشفى

2- نموذج ال 6 جند بيتاخد من الكليه انا بنبه على كده عشان الموظفين في بعض الكليات ( ومنهم كليتي للاسف ) كانوا اما مش فاهمين حاجه او على الارجح والله اعلم رخمين جدا ومتكاسلين

انا وقت ما روحت للموظفه ال لطيفه وقولتلها عايز النموذج راحت محورة عليا وقالتلي ان انا فاهم غلط خالص وان النموذج بيتبعت مع الملف كله بمعنى ان الكليه بتبعته وانا مش محتاج اسحبه

وطبعا للاسف كل ده كان تحوييييييييير وكل الموضوع انها كانت مكسله تنزل تحت عشان تسحبلي النموذج من الملف بتاعي
المهم :
انا بعد ما فهمت الحوار رحت تاني يوم وروحت سحبت النموذج يعني الكلام الاكيد انك انت اللي بتسحب النموذج من الكليه

3- بالنسبه للقيد العائلي زي ما قولت انسب حاجه انك تشتغل بوصل القيد ( بس مختوم ) وتديه مع كل الاوراق المطلوبه للعسكري عشان يديك استماره الفيش الرباعي وتكمل باقي الخطوات زي ما قولتلك عشان انت متضمنش القيد العائلي ممكن يطلع امتى وبالتالي الاحسن انك تشتغل الاجراءات بالوصل
ولما تخلص كل اجراءات التجنيد دي واستلمت الفيش الرباعي وختمته وكل الكلام ده وكان لسه قدامك وقت يبقى ساعتها تكمل خطوات الحصول على القيد العائلي زي ما انا شرحت قبل كده

طيب حاجه تانيه بخصوص القيد العائلي واحد صاحبي بعد ما استلمه ووداه لجزء التجنيد اللي جنب القسم راح العسكري قاله انه لااااااااااازم يكون مختوم بالختم الاحمر الموجود عند ادارة المرور القديمه ( في اسكندريه موجوده في حته اسمها ابو الدردار ) عشان تختمه

وانا عملت زيه وختمته احتياطي لكن انا بقولكم بصراحه ان الحوار ده تقريبا مش ضروري او على الاقل مش ضروري لكل الناس ( عشان فيه بردك ناس صحابي ودوا القيد العائلي من غير ما يتختم ) فأنا تقريبا اللي فهمته ان موضوع الختم ده اما عشان العسكري كان بطيخه قرعه ومش فاهم حاجه وخلانا نعمل خطوة ملهاش اي لازمه ( عشان في العامريه محدش اهتم اذا كان القيد العائلي مختوم ولا لأ ) او احتمال تاني ان القيد لازم يبقى مختوم لبعض الكليات مش كلها والله اعلم

4- الفيش الرباعي بيتعمل متأخر من النقطه يعني ابتداء من الساعه 11 ( من نقطه فيصل بالنسبالي ) ووقتها الراجل
ال لطيف مخلاناش نعمل الفيش الا لما ندفع D: بس عموما انت بمجرد ما بتروحله بيبصمك وبتاخدوه في ساعتها
وطبعا الفيش الرباعي لما بتستلمه متكتبش فيه اي حاجه خاااااااااااااااالص زيه زي الفيش الجنائي

هيييييييييييه انتم كده خلصتوا كل اجراءات التجنيد وفاضلكوا الكشف الطبي ويوم الارجه ( يوم الارجاء ) وربنا معاكم
وانا حقولكم بالتفصيل كالمعتاد كل المعلومات اللي انتم محتاجينها عن الكشف الطبي ويوم الارجه ( يوم الارجاء )

الكشف الطبي - طريقه احتساب الوزن الزائد في الكشف الطبي

noreply@blogger.com (medical pharmacist) — Wed, 13 Jan 2010 23:50:00 +0000

كيفيه حساب الوزن الزائد في الكشف الطبي تتم كالتالي :

بمنتهى البساطه بتطرح 100 من طولك بالسنتي متر وتضرب ناتج الطرح في 1.5

مثلا :

واحد طوله 180 سنتيمتر

يبقى 180-100 = 80* 1.5 = 120 كيلوجرام

اذن الشخص اللي طوله 180 سنتيمتر لازم يبقى وزنه اكتر من 120 كجم عشان يعتبر وزن زائد وميدخلش الجيش لهذا السبب

مثال اخر :

واحد طوله 160 سنتيمتر

يبقى 160-100=60*1.5= 90 كيلوجرام

اذن الشخص اللي طوله 160 سنتيمتر لازم يبقى وزنه اكتر من 90 كجم عشان يعتبر وزن زائد وميدخلش الجيش لهذا السبب

الكشف الطبي - ملحوظات مهمه بخصوص الكشف الطبي

noreply@blogger.com (medical pharmacist) — Wed, 13 Jan 2010 12:12:00 +0000

1- هنالك بعض الحالات في الكشف الطبي التي تستدعي اما اعاده الفحص او انزال الشخص الى لائق ب او حتى اعطائه اعفاء طبي

من أمثله تلك الحالات الطبيه :

أ- ضعف النظر
ب- حمى البحر المتوسط
ج- فلات فوت عظمي
د- مرض السكر
م- الالتهاب الكبدي الوبائي سي ( فيروس سي )
و- وجود كسور او شروخ كبيرة في العظام
ن- التصاق الفخذين
ل- الوزن الزائد
ر- قصر القامه او ان يكون الشخص قصير ( اقل من 160 سنتيمتر )
غ- ضغط الدم المرتفع
ق- مشاكل في الجهاز التنفسي او ما يسمى ب الازمه
س-مشاكل جلديه او وشمه غريبه او ما شابه
ش - عدم تطابق الفكين ( تسمى كلاس ثري) بحيث ان الفك السفلي مستواه الطبيعي امام الفك العلوي
ض- وجود ناصور

هذه هي الحالات المرضيه التي اتذكرها والتي لها دلاله في الكشف الطبي في الجيش سواء الكشف الطبي في التجنيد او الكشف الطبي في حلميه الزيتون و لكن ليس شرط ان تكون هذه الحالات هي كل الحالات المرضيه التي لها علاقه بالكشف الطبي
كما انبه مرة اخرى انه ليس معنى ان تكون عندك حاله مرضيه من تلك الحالات انك ستأخذ اعفاء طبي فربما تنزل لعسكري ( لائق ب ) فقط
اي ان الموضوع اولا وأخيرا في الكشف الطبي يعتمد على حالتك المرضيه

2- ملحوظه مهمه :

لمزيد من الشفافية يقوم قائد منطقه التجنيد بإخراج عدد من الاشخاص "10%من عدد المعافين نهائيا" وتوجيههم لإعادة الكشف الطبي مرة أخرى بالمجلس الطبي العسكري بالقاهرة ( الكشف الطبي في حلميه الزيتون ) وذلك حتى يكونوا متأكدين تماما ان كل هؤلاء الاشخاص يستحقون فعليا الحصول على اعفاء طبي

الكشف الطبي - نصائح هاااااامه جدا للكشف الطبي

noreply@blogger.com (medical pharmacist) — Wed, 13 Jan 2010 10:49:00 +0000

انا عارف ان يمكن موضوع الكشف الطبي في الجيش هو اكتر حاجه مهمه بالنسبه لكم ويمكن الشئ الرئيسي اللي خلاكم تدخلوا الموقع اساسا فعشان كده انا حقولكم على اللي حصل بالتفصيل بدون حياء او كسوف عشان تبقوا فاهمين بالضبط ايه اللي حيحصل ( بس في الرساله اللي جايه مش الرساله دي )

بعد ما انتم خلصتوا كل اجراءات التجنيد حتعملوا الكشف الطبي في التجنيد وعشان كده حقولكم على كام نصيحه مهمه ليكم

النصائح هي كالتالي:

1- تروحوا بدري جدا لمنطقه التجنيد ( عشان تخلصوا بدري نوعا ما وعشان حاجه تانيه كمان ) يعني على الساعه 7 الا ربع ( واساسا المفروض تكونوا هناك رسميا الساعه 7 صباحا )

2- تكونوا مصورين كل الورق اللي معاكم ايا كان على الاقل نسخه واحده وتكونوا اخدينها معاكم عشان لو فيه اي ورق ضاع منكم لا قدر الله تعرفوا تتصرفوا وتستعملوا الصورة

3- اساسا مطلوب منكم تكونوا مصورين الفيش الجنائي ( مش الرباعي ) + شهاده الميلاد الكمبيوتر + الافاده ( او الشهاده المؤقته ) + استماره 6 جند + القيد العائلي او الوصل المختوم كل الكلام ده 5 نسخ ( ده بالاضافه للنسخه المتصورة من كل ورقك اللي قلتلك عليها في رقم 2 )

4- جايب قلم ازرق جاف ضروري + يفضل عشان تنجز نفسك تجيب بردك لو عندك دباسه صغيرة والبتاعه اللي بتشيل الدبابيس

5- جايب دوسيه او اكلاسير عشان ده اللي حتحط فيه الاوراق المطلوبه وتسلمهولهم وده ضروري جداااااااااا( من غيره مش حيستلموا الورق )

6- طبعا جاي حالق شعرك جامد ( يعني تروح للحلاق وتقوله عايزها حلاقه ميري ودي تقريبا درجه 2 او 3 ) واهم حاجه ذقنك تكون متشاله تمااااااااااما بالموس ( مش حتى بالمكنه )

7- لو عندك كاب او طاقيه يا ريت تجيبه لمصلحتك عشان لما تقف في الشمس متجيلكش ضربه شمس ( وهو مسموح بيه على فكرة )

9- تجيب شنطه عشان دي اللي حتشيلها وتحط فيها اوراقك والميه والاكل ( وطبعا كل ده مسموح بيه مفيهاش مشكله ) وكمان الشنطه دي هي اللي حتحط فيها هدومك لما احم تضطر تقلعها

10- طبعا بطاقتك الشخصيه شئ اساسي ويا ريت تكون مصورها كام مرة احتياطي

11- كام صورة شخصيه ليك عشان ممكن يطلبوها لو انت حتاخد اعفاء طبي في نفس يوم الكشف الطبي

12- فلوس بسيطه عشان حتدفع فلوس عشان تاخد بون التصوير ( ولو انت كنت مصور كل حاجه زي ما قولتلك يبقى حتدفع جنيه واحد بس انما لو ورقك مش كامل تصوير يبقى حتدفع اكتر تقريبا 5 جنيه ) وكمان فلوس المواصلات

طبعا انا مخليكم تصوروا يمكن زياده شويه لكن ده احتياطي لمصلحتكم ( احنا كان مطلوب مننا نصور 4 نسخ من 3 حاجات من الاوراق المطلوبه و5 نسخه من الحاجه الرابعه بس بصراحه مش فاكر انهه كانوا محتاجين 4 صور منها وانهه كانوا محتاجين 5 عشان كده يا ريت تصوروا 5 نسخ من الورق اللي قولتلكم عليه عشان تريحوا نفسكم )

والموضوع القادم حتكلم فيه باستفاضه عن الكشف الطبي في التجنيد ان شاء الله

الكشف الطبي - معلومات مهمه بخصوص الكشف الطبي في التجنيد

noreply@blogger.com (medical pharmacist) — Tue, 12 Jan 2010 13:25:00 +0000

بصوا بدايه زي ما قلت حتكونوا في منطقه التجنيد في اليوم المخصص ليكم الصبح بدري يا ريت على الساعه 7 الا ربع مثلا حتكونوا جايبين طبعا كل الاوراق والدوسيه وحتكونوا حالقين كويس طبعا زي ما قلتلكم

طيب بدايه لازم تكونواعارفين للاسف انكم حتضطروا تقلعوا هدومكم كلهااااااااااااااا لما حييجوا يكشفوا عليكم ( وقت الكشف الطبي بس ) وعشان كده تحاول وانت رايح تكون لابس خفيف وتكون لابس احم بوكسر كويس ساترك نوعا ما او حتى ينفع تكونوا لابسين شورت بتاع ترنج مثلا تحت البنطلون
بمعنى ان تحت البنطلون حتكون لابس حاجه واحده اما شورت او بوكسر او الشورة الابيض للي كلكم عارفينه

بعد كده حتدخلوا منطقه التجنيد وممنوع منعا باتا يكون معاك موبايل للاسف
وقدامك انك تحطه عند الامانات بس منصحش بده خااااااااااالص عشان اساسا الموبايل حيتبهدل او تتكسر الشاشه او اي حاجه ممكن تحصلوه و ممكن اساسا عسكري يطمع فيه ومش حتعرف تاخده منه عشان انت في وكر الاسد ده غير ان انت لما بتحطه عند الامانات طبعا مفيش اي حاجه بتثبت كده يعني لاوصل ولا رقم ولا اي حاجه فاهمني؟

ده غير اساسا انا لما روحت يوم الارجه (يوم الارجاء ) بالذات كانوا مانعين اساسااااااااا اني اديه للامانات ومردوش يدخلونا خاااااااااااالص لحد ما لقيت واحد صاحبي معاه عربيه حطيت الموبايل فيها وبالتالي يا ريت عشان تنجزوا نفسيكم تستحملوا معلش ومتجيبوش الموبايل وبرغم اني عارف انه في اليوم ده بالذات مهم على الاقل عشان تتفق مع صحابك عشان تروحوا مع بعض ؛ لكن صدقوني اريحلكم متجيبوهوش عشان هما بيفتشوا طبعا تفتيش ذاتي ومش حتعرفوا تخبوه فيا ريت متجيبوهوش لمصلحتكم انتم

بعد كده بتقفوا في طابور والعسكري حيشوف مين اللي مش حالق كويس وحيوديه للحلاق الغشيم اللي بيشوهه يا عيني D: وبعد كده العسكري حيقولكم على الاوراق المطلوبه بالضبط ان انتم تصوروها ( ولو انتم كنتم جدعان زي ما قولتلكم وكنتم مصورين اللي قولتلكم عليه ) ساعتها كده كده حتقفوا في طابور بسيط قدام بتاع التصوير وعشان انت مخلص كل الاوراق المطلوبه حتدفعلوه جنيه وهو حيديك زي كتيب صغير فيه شويه كلام عن التجنيد في مصر ومين ليه اعفاء ومين مالهوش وكده

بعد كده حتروحوا للمظله تقعدوا تحتها والعسكري حيقولكم على ترتيب معين الاوراق اصل وصور حتحطوه ( ومتخافوش هو بيقوله بالراحه ) وبعد كده حيقوم مدبسلكم الورق بالترتيب اللي قال عليه وحتحطوه في الدوسيه وحتسلموهوله
وطبعا طول ما انتم ماشيين حتلاقوا ناس يا عيني اوراقها مش كامله واي واحد كده العسكري بيقوله اما روح وتعالى بكره ههه او بيقوله اركنلي على جنب وحيخلص الكشف الطبي بس حيتأخر جامد

بعد كده حتدخلوا المبنى وحييجي رتبه جامده في الجيش تقريبا عقيد او لواء حيقولكم مين له جيش ومين مالهوش جيش وحيفهمكم ايه الوضع بالضبط وحتعملوا ايه باقي اليوم وايه هي الارجه ( الارجاء ) وايه نظامها وحيسأل اذا كان في حد في عائلتك او انت نفسك اذا كان ليك ملف في امن الدوله او كنت معتقل سياسي عشان دول بيبقوا وضعهم مختلف بس مش عارف بالضبط دول نظامهم ايه ؟

المهم بعد كده حتروحوا لقاعه الكشف الطبي وحيدوكم ورقه او ملف بسيط حتملوه وهو بيانات عنكم وعن العائله وهو مش لازم يتملى بالتفصيل يعني مجرد اهم حاجه تكتب بياناتك انت وحتلاقوا فيه خانه فاضيه حترسموا فيها رسم كروكي وده مش هزار بل بجد حترسموا رسم كروكي لعنوان البيت من اي مكان او شارع رئيسي وحتكملوا رسم لحد ما ترسموا عنوان البيت قال يعني عشان يعرفوا يجيبوكم لو حد حاول يلعب بديله D :
بس على فكرة فعلا اهم حاجه بتتكتب في الورقه ديه هي بياناتك انت ورسم الكروكي بتاع البيت وده اللي انا بس مليته باقي البيانات الغريبه عن الاعمام والخالات وكده مش لازم فعليا تملوهم

المهم بعد كده حتقوموا قالعين التيشيرت او القميص + الفانله الداخليه + الكوتشي او الجزمه وحتروحوا تتصوروا ( من غير ما تبتسموا والكلام ده بجد عشان فعلا ممنوع الابتسام ) بالقميص العسكري وحتقيسوا وزنكم وطولكم وبعد كده حتطلعوا من حجرة التصوير والدكتور حيقول على كام حاله مرضيه مالهاش جيش ( يعني اعفاء طبي ) لو انت كنت منهم ساعتها وانت بتديله الملف او الورقه اللي هما ادوهالك ومليتها حتقوله على حالتك المرضيه (ويا سلام لو معاك اثبات سواء تحاليل او اشعه وهما كده كده بعدين حيكشفوا عليك تاني عشان يتأكدوا بنفسهم)

وبعد كده المفروض وانت بتديه الورقه الدكتور بيقيس عرض صدرك وبيكتب لو انت لائق او غير لائق من حيث عرض الصدر او لو انت وزن زائد ساعتها مبرووووووووووووك عليك اخدت اعفاء طبي وحتروح تاخد طابع او نموذج اسمه طابع غير لائق تقريبا وحتكمل في اجراءات الاعفاء وحتاخدها في نفس يوم الكشف الطبي

لو كنت لائق لحد دلوقتي يبقى حتكمل للاسف باقي الكشف الطبي

الكشف الطبي - تابع نصائح مهمه للكشف الطبي

noreply@blogger.com (medical pharmacist) — Sun, 10 Jan 2010 17:01:00 +0000

طبعا انت قبل ما حتدي الدكتور الورقه اللي فيها الرسم الكروكي بتاع بيتك انت وكل زمايلك حتقلعوا كل هدومكم ما عدا الشورت او الشورت الابيض او البوكسر وحتدخلوا على كل كل كشف واحد واحد ورا بعض وبين كل حجرة وحجرة ستاره بتفصل كل كشف عن التاني

في كل كشف الدكتور بيسألك اذا كنت بتشتكي من مشكله معينه ليها علاقه بالكشف اللي انت داخله
يعني مثلا في كشف العظام الدكتور حيسألك اذا كنت مركب مسامير او عندك فقرات او مفاصل او عظام مكسورة او فيها شرخ مثلا وكده يعني

اهم حاجه عشان تبقوا فاهمين :

من مصلحتك ومن مصلحه الدكتور نفسه انك لو بتشتكي من اي حاجه بكرر اي حاجه اي حاجه ليها علاقه ولو حتى بعيده بالكشف ساعتها انت بتقوله عليها وهو اللي يحكم اذا كان الشئ اللي عندك يستحق يخليك تعمل فحص تاني او ينزلك عسكري من ظابط او تاخد اعفاء حتى

طيب ليه من مصلحته انك تقوله كل حاجه ؟

اقولكم انا :

عشان بمنتهى البساطه الكشف اللي انت بتكشفه اسمه كشف مبدأي او كشف أولي بمعنى انه مش هو الكشف النهائي يمعنى ادق الدكتور لما بيكون شاكك انك عندك حاجه احتمال تطلعك من الجيش او حتى تخليك لائق ب ( يعني عسكري ) ساعتها في ملفك الطبي بيكتب غير لائق او محتاج فحص يعني لو هو كتبلك محتاج فحص يبقى انت كده مش اخدت اعفاء لكن ده معناه انك حتكشف تاني اما في نفس اليوم او بعدها في يوم تاني او حتى في لجنه طبيه عليا في القاهرة ( الكشف الطبي في حلميه الزيتون )

اللي عايز اوصلهولكم ان الناس اللي كانت بتاخد اعفاء طبي في نفس يوم الكشف الطبي هما بس اللي كانوا بياخدوا اعفاء عشان وزن زائد او موضوع عرض الصدر لكن اي حد تاني بيتكتبله انه يفحص تاني وساعتها يياخد اعفاء او لائق ب او ممكن يكمل حتى لائق أ ( يعني ظابط وده في حاله انه عذره الطبي غير مقبول ولن يؤثر على تجنيده )

والدكتور من مصلجته انه لو شاكك في اي حاجه انه يكتبلك فحص تاني والناس المتخصصه هما اللي بيحددوا بمعنى ادق هو بيشيل ايده عشان ميتحطش في مشكله طيب ليه ؟ عشان انت بعد ما بتخلص كل الكشوفات خااااالص بييجي عقيد دكتور وبيسألكم حد بيشتكي من حاجه ؟ حد حاسس انه اتظلم في الكشف ؟حد حاسس انه كان المفروض ياخد اعفاء طبي واتظلم واتكتبله لائق ؟

لو انت مظلوم وقولتله على اللي عندك وكان عذرك فعلا يستحق انك تاخد اعفاء بينما الدكتور اللي كشف عليك اول مرة مأخدش باله او مهتمش ساعتها الدكتور العقيد حيزعقله والله اعلم اذا كان فيه عقاب بسيط ليه ولا لأ فاهمني ؟

طيب في ناس حتستعبط لا مؤاخذه وحتتحايل على اول دكتور حيكشف عليك وتقوله اكتبلي فحص ساعتها الدكتور ده حيبهدلهم

ليه؟

عشان هو اساسا بردك الدكتور العقيد حيعاقبه لو لقاه محول ناس كتير من غير ما يستحقوا للفحص الطبي الثاني ابسطها ده معناه انه مش فاهم شغله او مكوسها معاهم وطبعا ده غير مقبول اطلاقا في التجنيد المصري

طيب ايه الحل ؟

بمنتهى البساطه اولا تروح بدري وتكون مكمل ورقك وتكون من اول ناس بتكشف ( يعني اول مجموعه ) عشان ساعتها الدكاترة بيبقوا رايقييييييين جدا وانت لو عندك اي حاجه بتقولهم عليها و اهم حاجه تتكلم باحترام ومن غير دلع وتكلم كل دكتور في تخصصه يعني متقولش لبتاع العظم انا نظري ضعيف مثلا فاهمني ؟ والدكتور لما بيلاقيك بتتكلم باحترام ومن غير استعباط ساعتها على الاقل حيحترمك وهو اللي حيقولك اذا كان عذرك ليه دلاله ولا لأ

عشان حط نفسك انت مكان الدكتور لما انت تروحله متأخر بعد ما يكون كشف على ناس كتيييييييير فيه منهم اغبياء وناس كانت بتستعبط وكل واحد يقوله انا عندي كذا وكذا وناقص يقولوله انا عندي تسلخات ومش حينفع اخش الجيش D:

فبالتالي الدكتور على بال ما انت جاي تقوله اللي عندك حيكون اساسا مخنوق من الناس اللي قبلك وممكن يفتكرك انت كمان بتستعبط ( مع ان انت ممكن يكون سؤالك برئ فعلا ) وعشان كده انا ركزت قوي واكدت عليكم لمصلحتكم ان انتم تكونوا من اول ناس بتكشف عشان تتعاملوا باحترام وكمان فرصتكم انكم تدردشوا مع الدكاترة وتقولولهم اللي عندكم اكتر

وممكن من لاشئ تطلع حاجه انت كنت فاكرها بسيطه ومالهاش اي علاقه بالجيش تكون الحاجه دي هي السبب في طلوعك من الجيش وده حصل فعلا لناس كتيييييييييييير وحقولكم ايه اللي حصل معايا بالضبط عشان تتأكدوا بنفسكم

الكشف الطبي - اللي حصل معايا في الكشف الطبي في منطقه التجنيد

noreply@blogger.com (medical pharmacist) — Sat, 09 Jan 2010 21:03:00 +0000

انا بعد ما خلصت الكشوفات كلها خااااالص لقيت الدكتور بيقولنا حد يا جماعه بيشتكي من حاجه ومقالهاش لينا ؟ حد عنده حاجه وشاكك ان ليها علاقه بالجيش ومرضاش يقولهالنا ؟

انا لما لقيته بيلح كده روحت اتشجعت وقولتله على حاجه انا عارف انها مبتطلعش من الجيش بس قولت اجرب مش حخسر حاجه
وهي ان انا كان عندي فلات فوت لحمي ( مش عظمي ) وانا عارف اساسا ان الفلات فوت العظمي بس هو اللي بيطلع من الجيش مش الفلات فوت اللحمي لكن لما روحت للدكتور قولتله راح قالي انها مبتطلعش من الجيش

روحت قلتله طيب انا عندي ظهري مبيستحملش اني افضل قاعد لاقيته ابتسم وقاللي اه بيتعبك D: قاللي بردك مبتطلعش من الجيش
بس بالمناسبه لو فيه عندك غضروف او الفقرات حاسس انها مش مظبوطه يا ريت تعمل اشعه قبل الكشف الطبي في التجنيد وتاخدها معاك عشان لو كان عندك الحوار ده يبقى على الاقل حتعمل فحص تاني وانا اعرف واحد اخد اعفاء عشان كان عنده الفقرات مش مظبوطه

المهم انا طبعا اصبت بخيبه امل وقولتله طيب وانا بكلمه لاقيت الدكتور بيقوللي افتح فمك كده روحت فتحته وقاللي اقفل فمك على ضروسك فقفلت فمي لقيته بيقوللي ان عندي عدم تطابق الفكين ( يعني سناني وضروسي مبيقفلوش على بعض عشان الفك السفلي عظامه موجوده للامام قليلا وده يسمى في علم الاسنان ب class 3 )

طبعا انا كنت عارف حوار فمي ده من زمان بس انا مقولتلوش عليه عشان لم يخطر ببالي انه ليه اي علاقه بالتجنيد من الاساس

المهم لقيت الدكتور قاللي انت حتتحول لجنه طبيه عليا في القاهرة ( وانا بالمناسبه كنت مترشح ظابط ) طبعا كنت فرحاااااااااااااان جدا

وسألته يعني ايه لجنه طبيه عليا ؟

قاللي ديه معناها ان مش كل التخصصات الطبيه موجوده في العامريه وتخصص الاسنان والجراحه وكام تخصص كمان مش موجودين في العاميريه لكن موجودين في القاهرة بس وهما هناك لما بتروح بتكشف تاني ( الكشف الطبي في حلميه الزيتون ) وهما بيحددوا اذا كان وضعك يستحق تنزل عسكري ولا تفضل ظابط ولا تاخد اعفاء

وسألته ايه وضعي من حكم خبرته ( مع انه كان شكله لسه متخرج لانج ) فقالي انت غالبا ان شاء الله اعفاء
طبعا كنت قمه السعاده وقولتله :

طيب بعديها انا اعمل ايه ؟

قاللي سيب بطاقتك للعسكري المسؤول عن التحويل للجنه الطبيه العليا وروح استنى لحد ما تاخد نموذج 110 ( وده اللي كل بيروح الكشف ومأخدش اعفاء في يوميها بياخده عشان هو ده اللي بيكون مكتوب فيه معاد الارجه الخاص بيك )

المهم لما الوحد بياخد النموذج بيديه للعسكري اللي اديته البطاقه عشان يختملك عليه ختم اسمه لجنه طبيه عليا لو انت كنت مترشح عسكري او بيبقى الختم مكتوب عليه تأكيد كشف اثناء لجنه كشف الهيئه وده لو انت مترشح ظابط وبعد كده بتروح لمكتب الامن اللي عند البوابه والعسكري بيبصمك على النموذج وتروح اخيييييييييييرا بعد عناء وبتروح يوم الارجه ( يوم الارجاء ) عادي وتشوف اذا كنت اخدت تأجيل يبقى خير وبركه ومش حتحتاج تعمل حوار اللجنه الطبيه العليا ( الكشف الطبي في حلميه الزيتون )

اما لو لا قدر الله كنت حتدخل الجيش يبقى في الحاله دي:

لو انت مترشح عسكري يبقى بتروح لمكتب الشكاوي وتقولهم عايز تتحول لجنه طبيه عليا وتعمل اعاده كشف وتوريهم نموذج 110 المختوم وبعد كده حتروح القاهرة تقريبا في خلال اسبوع ومعاك الاتي :

1- نموذج 110 جند + 2 صورة
2- عدد 2 من صورة شخصيه مقاس 4*6 سم
3- عدد 2 من صورة البطاقه الشخصيه

وحتعيد الكشف الطبي في القاهرة في حته اسمها حلميه الزيتون

لو انت كنت مترشح ظابط وعندك تأكيد كشف اثناء كشف الهيئه يبقى من اسمها يبقى وقت كشف الهيئه بتاعك حتروح ومعاك الاتي :

1- نموذج 110 جند + 2 صورة
2- عدد 2 من صورة شخصيه مقاس 4*6 سم
3- عدد 2 من صورة البطاقه الشخصيه

وحتقوم مقدم هناك ( في القاهرة في حلميه الزيتون ) ( مش في منطقه التجنيد ) على شكوى عشان تعيد الكشف الطبي تاني

الموضوع التالي حقولكم فيه ان شاء الله عن الكشف الطبي وعن كل كشف بالتفصيل

الكشف الطبي - كشف العظام و كشف الرمد

noreply@blogger.com (medical pharmacist) — Fri, 08 Jan 2010 22:55:00 +0000

اول حاجه لازم تعرفوها ان الاربع كشوفات بتوع الكشف الطبي في التجنيد كلهم على بعض مش حيزيدوا عن 3 دقايق بالكتير ( عشان بيبقى وراك طابور طويل من البشر )

اول كشف طبي في التجنيد هو كشف الجراحه

بمنتهى البساطه الدكتور بيقولك اقف وانت ضامم رجليك على بعض ( عشان يشوف لو عندك فلات فوت عظمي ( مش لحمي زي ما قلنا ) او اذا كان عندك التصاق في الفخذين او اذا كانت المفاصل والركبه كويسين ولا فيهم مشكله ما

وانت بردك حتكون فارد كفين ايديك للامام عشان بردك يشوف لو في اي مشكله في ايدك ولا مفيش
وطبعا حيسألك اذا كان عندك كسر قديم ولا شرخ او اي حاجه متعلقه بالعظام ( وبالمناسبه لو عندك عدم تطابق الفكين بحيث ان الفك السفلي موجود للامام عن الفك السفلي ابقى قوله عليها ومتخافش )
ولو عندك اي مشكله حيعمل اعاده فحص اما في نفس اليوم او يوم تاني او وقت اللجنه الطبيه العليا

وبعد كده حتروح لكشف الرمد - تاني كشف طبي في التجنيد

طبعا الدكتور حيخليك ( بعد ما تقلع النظارة لو انت كنت بتلبس نظارة اساسا ) تبص على العلامات الغبيه ويقولك فتحه الرمز رايحه ناحيه ايه؟ اليمين ولا الشمال ولا فوق ولا تحت ولا ايه ؟

طيب افرض انت مشوفتهمش فعلا

والكشف الطبي ده بالذااااااااااااااااااات لمصلحتك الشخصيه متحاولش تستعبط فيه وتعمل نفسك مش شايف
عشان ساعتها حيحولك لاعاده فحص بعد ما تحط قطرة بشعه بتوسع حدقه العين حتخلي عينك تفضل مفتحه غصب عنها للاسف لمده طويله حوالي 10 ساعات ومش حيبقى عندك احساس بالابعاد كويس طول الفترة دي
يعني الحاجه القريبه ممكن تشوفها بعيده والعكس

وطبعا التأثير المنيل بتاعها بيروح بعد حوالي 10 ساعات لمده يوم تقريبا
المهم بعد ما انت حطيت القطرة البشعه دي حتعمل كشف طبي تاني وتحاول تشوف العلامات ولو نظرك ضعيف يا ريت ساعتها تبقى تجيب اي حاجه تثبت كده

وطبعا بعد ما انت بتخلص كشف الرمد بتخش على الكشف الطبي اللي بعده وهو كشف القلب

الكشف الطبي - كشف القلب وكشف الجراحه

noreply@blogger.com (medical pharmacist) — Thu, 07 Jan 2010 23:17:00 +0000

اولا كشف القلب : ( ثالث كشف طبي في التجنيد )

سهل جدا : الدكتور حيقيس نبض قلبك وضغطك ولو لقى ضغطك عالي جامد ساعتها حيقولك تيجي تفحص تاني في يوم تاني او في لجنه طبيه عليا

ثانيا كشف الجراحه : ( رابع كشف طبي في التجنيد )

اولا انا بعتذر عن الاسلوب الصريح اللي حضطر اتكلم بيه وعشان كده بجد يا رييييييييييييييييت لو في اي بنت دخلت الموقع وبقت تقرا الكلام بقولها بالله عليكي وقفي قرايه لحد هنا ومتكمليش عشان كشف الجراحه يعتبر شئ خاص ومحرج للرجال
اللهم بلغت اللهم فاشهد

معلومه بس احب أأكدها وهي ان الدكتور مش حيستعمل ايده اساسااااااا (يعني الشائعات المخيفه اللي كان الواحد بيسمعها غلط تماااااااااما ) والكشف ده مش حياخد اكتر من 10 ثواني بالكتير

بص انت اول ما حتدخل على الدكتور حتقلع الشورت اللي كنت لابسه وبرغم اني عارف انه شئ منيل بس الكلام ده حيحصل عليك وعلى كل الموجودين وده تأكد منه مليوووووووون في الميه فيا ريت عشان تريح نفسك اوعى وبكررها تاني اوعى تمايع الكتور او تقوله بلاش او بتكسف او اي حاجه عشان من الاخر طالما دخلتله هو كده كده حيكشف عليك
الشئ الوحيد اللي حتستفيده من مماطله الدكتور انه حيشك فيك وحيفتكرك لا مؤاخذه مش راجل يعني شاذ وبالتالي معاملته حتبقى حتبقى وحشه جداااااا يعني ساعتها ممكن يقولك الفاظ قبيحه او اي شئ
الملخص لكلامي متحاولش تماطل الكتور عشان الكشف الطبي الزفت ده يخلص في 5 ثواني وخلاص فاهمني ؟

طبعا بعد ما تقلع الكتور حينظر الى الخصيه ( بعينه بس من غير ما يلمسها حتى ) وبعدها حيقولك احم اتدور ووطي ( كأنك راكع ومديه ظهرك ) وحينظر الى فتحه الشرج ( وده للاسف هي الوسيله المتبعه عشان يكتشف بيها اذا كنت مستقيم ولا شاذ ؟ وكمان عشان يعرف اذا كان عندك ناصور ولا لأ ؟ )
لو عملت ده الكشف الطبي الزفت ده حيخلص في 5 ثواني وحتتعامل باحترام نسبي على الاقل

وبعد كده حتلبس الشورت وتطلع بره وحتروحوا على حجرة وحيعدي عليكم الدكتور العقيد وحيسألكم اذا كان اي حد عنده مشكله او حاسس انه اخد لائق في الكشف الطبي وهو مظلوم مثلا ولا لأ

وبعد كده حتلبسوا هدومكم كلها وحتستنوا ما يسمى بنموذج 110 وده اللي بيكون مكتوب فيه معاد الارجه بتاعك ( ولازم تحافظ عليه كويس جدا وتصوره احتياطي كزا نسخه )
وطبعا لو انت حتضطر تكشف تاني يبقى حتروح ولما تكشف تاني يبقى ساعتها حتاخد النموذج 110

ولو انت حتتحول للجنه طبيه عليا في القاهرة ( الكشف الطبي في حلميه الزيتون ) يبقى حتدي بطاقتك للعسكري المسؤول ولما تاخد النموذج 110 حتيهوله يختمهولك وبعدها حتروح لمكتب الامن اللي على البوابه وحتبصم عليه بصوابعك وتاخده وتروح وتيجي تاني في يوم الارجه ( يوم الارجاء ) وتشوف لو اخدت تأجيل يبقى خلاص مبروك عليك انما لو لبست لا قدر الله يبقى حتضطر تروح تكشف تاني في القاهرة في حلميه الزيتون

الكشف الطبي - اجراءات الاعفاء يوم الكشف الطبي

noreply@blogger.com (medical pharmacist) — Wed, 06 Jan 2010 23:16:00 +0000

لو انت كنت سعيد الحظ يوم الكشف الطبي في التجنيد يبقى حتاخد اعفاء ان شاء الله وده ممكن يكون بسبب وزن زائد أو ناصور أو بسبب ضعف النظر بدرجه كبيرة او اسباب كتير

المهم لو انت في نفس اليوم بتاع الكشف الطبي اخدت اعفاء وكنت غير لائق حتعمل ايه ؟

لازم يكون معاك صورة شخصيه + صورة من البطاقه الشخصيه

بعد ما تكشف حتروح انت وكل الناس اللي زيك لقائد المنطقه العسكريه ( منطقه التجنيد ) وحيكشف عليكم تاني للتأكد من ان اول تشخيص طبي كان صحيح وانك فعلا لك عذر طبي تستحق عليه الحصول على اعفاء طبي

لو انت فعلا كان عذرك الطبي صحيح ففي تلك الحاله :

حتبصم بالحبر على الورق مرتين ده غير انك حتبصم الكتروني على الكمبيوتر والكمبيوتر حيشوف بياناتك من خلال بصمتك
وبعدها باسبوع يا بطل حتروح تستلم شهاده الاعفاء بتاعتك من التجنيد
وبكده يبقى الف مبرووووووك و صدقني كل التعب اللي تعبته في اجراءات التجنيد أو الكشف الطبي لا يساوي شئ بالنسبه للتعب اللي كنت ممكن تتعبه في الجيش

الكشف الطبي - اذا كنت غير لائق طبيا في الكشف الطبي في التجنيد

noreply@blogger.com (medical pharmacist) — Wed, 06 Jan 2010 13:22:00 +0000

دي معلومات موثوق فيها قالهالي واحد صاحبي وكان غير لائق في الكشف الطبي في التجنيد

وده كان رده لماسألته عن الوضع بالضبط

بالنسبة لاجراءات الاستشارى علشان تبقى الصورة قدامك واضحه

الدكاتره الاستشاريين بيجوا فى يومين فقططططططط فى الاسبوع والدكاتره العاديين بتوع الفحص المبدأى اوقات كتيرة اوى زى ما حصل معايا بيحبوا يحولوك على الاستشاريين زى ما حصل معايا برضه خصوصا ان اسكندريه كلها كانت فى الفحص المبدأى فى اخررررررره والدكاتره كلهم مش شايفين قدامهم وبيخافوا يكتبوا غير لائق وانما يرموا المسئولية على الاستشارى
انا فى حالتى كان الاستشاريين جايين تانى يوم فطبعا جيت تانى يوم الساعه سبعه
على سبعه ونص اتجمعنا قدام مبنى القومسيون الطبى ( مجاور لمبنى الاستقبال اللى دخلنا فيه فى اول يوم للفحص المبدأى )

العساكر نظمونا على الارض
يعنى اللى رمد بس يقعد فى الطابور ده وياخد القطره واللى عظام بس فى الطابور ده وهكذا

بعد كده دخلنا جوه وكل مجموعه دخلت اوضه الكشف الطبى الخاصه بيها ودى عباره عن اوضه كبيررررررررررررة على المحارة يعنى تحس انها مهجوره او كانوا بيقتلوا فيها الناس وبتقلع طبعا يا معلم وتقف بالشورت لو زى حالتى وكنت ( عظام ) ولو جلديه برضه حتقلع ولو رمد مش حتقلع وبنقف كلنا على جوانب الاوضه بالترتيب
شويه وحيجى الاستشارى ويقعد على الترابيزة بتاعه فى منتصف اول الاوضه ويبدا من اول واحد على اليمين
وحيقول متحاولش تصيع عليا لو انت فيك حاجه بجد حتطلع علشان ده قانون وبنطبقه لكن حتقعد تقولى اصلى بحس بوجع اصل مش عارف ايه حكون ضدك

ويبدا الكشف على واحد واحد وهكذا اللى فيه حاجه حيكتبله غير لائق ويروح يجيب البون وسعر البون بيتحدد حسب السنه بس الافضل الناس تاخد معاها حوالى 25 جنيه واللى بقى حيتكتبله لائق يروح يمشى فى اجراءات ال 110 بس وهوه مخنوق من نفسه لانه اضطر يجى يوم تانى

يوم الارجه او يوم الارجاء ( اليوم اللي حيحدد مصيرك في الجيش ) داخل منطقه التجنيد

noreply@blogger.com (medical pharmacist) — Tue, 05 Jan 2010 12:44:00 +0000

طبعا يوم الارجه او يوم الارجاء متهيألي حيعتبر من اهم الايام في حياتك D: اليوم اللي حيحدد مصيرك انت داخل الجيش ولا لأ ؟ انت ظابط ولا عسكري ولا تأجيل ؟

بعد ما انت خلصت كل اجراءات التجنيد وكمان خلصت الكشف الطبي في التجنيد حيبقى فاضل يا بطل يوم الارجه ( يوم الارجاء )

الاوراق المطلوب منكم انكم تجيبوها في يوم الارجه او يوم الارجاء بس هي:

1- نموذج 110

2- شهاده القيد العائلي وده مطلوب بس لو انت مكنتش جبت القيد العائلي وقت الكشف الطبي في التجنيد وكنت شغال بوصل القيد العائلي وزي ما قلتلكم ان انتم لو كنتم شغالين بوصل القيد العائلي يبقى يوم الكشف الطبي حتكتبوا اقرار على نفسكم انكم تجيبوا القيد العائلي

طيب فرضا مكانش القيد العائلي طلع يبقى ساعتها حتروح عادي يوم الارجه وتقولهم ان السجل المدني لسه مطلعلكش القيد العائلي

طيب وفعليا ايه هو اخر مدى مسموح بيه عشان تجيب القيد العائلي ؟

بصوا يوم الارجه ( يوم الارجاء ) لو كنتم تأجيل ( وان شاء الله كلكم تاخدوا تأجيل ) يبقى مش حتحتاجوا تجيبوا القيد العائلي اصلا

لكن لو لاقدر الله كنت حتدخل الجيش يبقى فيه حالتين:

1- لو كنت ظابط يبقى لااااااااااااااااااااااازم لما تروح كشف الهيئه للضباط في القاهرة يكون معاك وقتها القيد العائلي
وكشف الهيئه اساسا بيبقى بعد يوم الارجه او يوم الارجاء بحوالي كام يوم بس

2- لو كنت عسكري يبقى قبل ما تترحل لمنطقه التجنيد بتاعتك يبقى لازم يكون معاك وقتها القيد العائلي
وانا شخصيا انصحكم كده كده تحاولوا تطلعوا القيد العائلي بدري بدري بردك محدش يضمن الظروف ومين عارف لو اجلت الحوار اسبوع ولا اكتر ساعتها حيحصل ايه ؟ فاهميني ؟

تابع يوم الارجه ( يوم الارجاء للتجنيد ) داخل منطقه التجنيد

noreply@blogger.com (medical pharmacist) — Mon, 04 Jan 2010 23:00:00 +0000

اهم ملحوظه حنبهكم عليها في يوم الارجه او يوم الارجاء ان محدش يجيب خااااااااااااااااااااالص اي موبايل معاه في منطقه التجنيد في يوم الارجه او يوم الارجاء عشان حتى ممنوع انك تحطه في الامانات

اللي حصل معايا ومع كل الناس اللي كان معاها موبايل في يوم الارجه او يوم الارجاء انهم منعونا تماااااااااما ان احنا نحط الموبايل في الامانات وفضلوا لاطعين الناس اللي معاها موبايل بره في عز الشمس بره منطقه التجنيد اساسا لحااااااااااااااد لما جم ينادوا على الارجه او الارجاء
وخللوا بالكم عشان بيفتشوا تفتيش ذاتي دقيق للاسف

انما اللي مكانش معاه موبايل دخل منطقه التجنيد جوه وقعد تحت المظله
( اينعم فضل ملطوع ساعتين تلاته D: ) لكن على الاقل في الظل مش في عز الشمس فاهميني ؟

تاني ملحوظه :

ان انتم الاحسن ليكم انكم تيجوا بالضبط في يوم الارجه او يوم الارجاء الساعه 9 في منطقه التجنيد ( لا قبل كده ولا بعد كده) لو جيتم بعد يبقى غالبا حتضطروا تستنوا تاني مرة لما ينادي الضابط على الارجه ( الارجاء ) بينما الناس اللي حييجوا 9 حيكونوا من اول ناس حيدخلوا وحيقعدوا في المظله لحد الساعه 11ونصف تقريبا لحد ما الارجه ( الارجاء ) تتندى لكن تاني مرة تتنادى فيها الارجه اعتقد والله اعلم على الساعه 1-2 ظهرا وفي كلتا الاحوال انتم احرار حسب ظروفكم ومواعيدكم

وبالمناسبه مش مطلوب منكم انكم تيجوا حالقين لا شعر ولا حتى ذقن عشان انت خلاص خلصت الكشف الطبي قبل كده في منطقه التجنيد

نيجي بقى للمهم ومن اول هنا ركزوا قوي:

الظابط حيبتدي ينده على الارجه او الارجاء و نظامه في النداء حيكون اولا بالتخصصات
بمعنى في الاول حينده على التخصصات المطلوبه ودول هما الاشخاص اللي حيدخلوا الجيش ايا كان عمرهم او مولودين في يوم ايه او ايا كان الحال

باقي التخصصات اللي مش حينادي الظابط عليها حيفضلوا قاعدين وبعدها الظابط حينده على تخصصهم بالايام زي مثلا فرضا كليه هندسه قسم مدني متناداش عليها في الاول ( يعني كانت مش من التخصصات المطلوبه وده طبعا مجرد مثال للتوضيح ) ساعتها الناس اللي في كليه هندسه مدني حيبتدي الظابط ينده على تخصصهم بالايام يعني مثلا من يوم 8/1- لحد يوم 26/1 دول حيدخلوا الجيش وبعدها حيسقط كام يوم ( ودول مش حيدخلوا الجيش ) وبعدها حينادي على ايام تانيه حيدخلوا الجيش زي مثلا 5/2- لحد 5/3 دول داخلين الجيش

اظن كده فاهمين وطبعا المثال للايام والتخصص ده مجرد مثاااااااااال فقططططططططط للتوضيح مش اكتر

اللي متانداش عليه خالص في يوم الارجه او يوم الارجاء سواء تخصصه او يومه دول تأجيييييييييييل والف مبرووووووووووووووووك ليهم
والبقيه المساكين دول ربنا معاهم وساعتها حيكملوا يروحوا بقه في المواعيد المتحدده في نموذج 110

وان شاء الله ان شاء الله كلكممممممممم تاخدوا اعفاء او على الأقل تأجيل يوم الارجه او يوم الارجاء وتشوفوا حياتكم ومستقبلكم بقه D:

يوم الارجه او يوم الارجاء - استلام شهاده التأجيل

noreply@blogger.com (medical pharmacist) — Sun, 03 Jan 2010 11:31:00 +0000

بعض الملحوظات المتعلقه بشهاده التأجيل ( لمده 3 سنوات ):

1- التأجيل يكون لمده 3 سنوات فقط

2- الشهاده نفسها مبيكونش اسمها شهاده التأجيل بل بيكون مكتوب عليها نموذج وضع تحت الطلب

3- بتكون مختومه بختم ممنوع من السفر الا بعد الحصول على اذن من منطقه التجنيد

استلام شهاده التأجيل ( نموذج وضع تحت الطلب ) :

يفضل ان تذهب حوالي الساعه 11.30 ( ولا حاجه ان تذهب قبل او بعد ذلك )

وذلك لأن :

تسليم الشهاده يتم بعد سماع اسمك عشوائيا وليس بترتيب وجودك بمنطقه التجنيد
واساسا يتم نداء الاسماء حوالي الساعه 12 الا ربع وليس قبل ذلك ابدا

* بعد الوصول لمنطقه التجنيد ستجد احد الاشخاص بمنطقه التجنيد ينادي على مواليد كل سنه حصلت على التأجيل وذلك لأنهم سيقفون في طابور مختلف عن طابور مواليد السنوات الاخرى
وايضا لأن مواليد كل سنه سيدفعون مبلغا معينا من المال يختلف حسب تاريخ ميلادك

فمثلا :

مواليد سنه 88 سيدفعون 17 جنيه بينما مواليد سنه 87 سيدفعون 17 جنيه ونص وهكذا حسب تاريخ ميلادك

* بعد الوقوف في طابور حسب تاريخ ميلادك سيقوم أول شخص من كل طابور بجمع المال المطلوب منك ( ولذلك يفضل ان تأتي بفكه )
ثم سيحصل هذا الشخص على نموذج احمر سيقوم بتوزيعه على كل شخص منكم

* ثم ستنتظرون حتى يتم نداء الاسامي وعندما تسمع اسمك ستقوم باعطاء العسكري الذي ينادي عل الاسماء ذلك النموذج الاحمر مرة اخرى وهو سيعطيك شهاده التأجيل

وبالطبع حتى يتم تنظيم العمليه قليلا :

فسوف يتم توزيع الاشخاص حسب القسم التابع له
اي انه بعد تقسيم الاشخاص حسب تاريخ الميلاد لإنه ستم تتقسيم الاشخاص مرة اخرى حسب القسم التابع له ( قسم المنتزة مثلا او قسم الرمل او ايا كان القسم الذي انت تابع له )

وهكذا بعد حصولك على ذلك النموذج فأنت موقفك التجنيدي تم تأجيله لمده 3 سنوات والف مبروك لك

مركز التدريب - أول يوم في مركز التدريب

noreply@blogger.com (medical pharmacist) — Sat, 02 Jan 2010 22:57:00 +0000

الموضوع ده انا لقيته في منتدى الديفيدي فور عرب فقولت انقله بالنص عشان هو مهم ومسلي لكن كل المعلومات اللي فيه انا ناقلها بس لكن مش كاتبها

اول يوم فى مركز التدريب :

بدون تعيين يعني مفيش أكل هتاخده, هتعرف مكان الكانتين اليوم ده على طول, بس ممكن تصعبو عليهم و يدخلوكو الميس, الميس هو محل آكل الجنود.
المهم اليوم بيبدأ ازاي, انت بتروح المكان الي هيئولولك عليه لما تسمع سلاحك, هتيجي المكان ده الصبح, هتستنى شوية, بس شوية كتير يعني زي ما اتعودت منهم, هيجي الاول ظابط, و الظابط رتبة رفيعة اودام الجنود, هيبتدي يدي محاضرة على الواقف الجيش عامل ازاي, و هيقولك ان اهم حاجة تلاتة: شرفك, مهماتك, فلوسك, و المهمات هي المخلة او شنطة الهدوم العسكرية بتاعتك.

هيخلص من الكلام, هيقولك روحو اشترو شنطة و يشاور على كانتين وراكم كده هيكون فيه مستلزمات هتحتاجها جوة مركز التدريب, بالذات المعالق و الاقفال, في الاقفال بالذات اوعى تقرب من القفل الي لونه رمادي, لان ده القفل الصيني, القفل ده مفاتيحه بتفتح على بعضها, فخلي بالك و خليك ناصح و اشتري القفل الذهبي, او انزل رمسيس و اسئل عن القفل الكمبيوتر, معروف و حلو و قوي.

في عسكري هيجي يبتدي ينادي على الاسامي, و كل واحد يقول آفندم او ايوة يديله الكارنيه العسكري بتاعه, عليه تاريخ الاصدار و ينتهي في, و دي تواريخ مش كله زي بعضه, انت ممكن تكون سنة في غيرك سنتين تلاتة, المهم الكارنيه ده بتاعك و اوعى يضيع منك لحد ما يخلص جيشك, هات محفظة فيها سوستة, هتساعدك.

- بعديها بربع ساعة او نص, هيجي المندوب بتاعك, هينادي على الاسامي و يقول اسمك و يقول انت هتروح مركز التدريب الفلاني

- ربع ساعة او نص ساعة كمان و هتبتدو تشكلو طابور حسب مركز التدريب و عليه هتتشكل اول طابور الزامي في جيشك علشان تركب المركبات العسكرية "الاتوفيس المعفن" الي مفتوح من كل حتة, تحس انه كان طيارة قبل كده و قلب اتوبيس لدواعي امنية او هو طيارة بس عامل عبيط, جيش بئا.

- هتركب الاتوبيس, ابئا هات معاك آكل للرحلة دي, اي سوايل او عصاير, عشان الطريق ممكن يكون طويل, حسب مركز التدريب يعني.

- هتوصل مركز التدريب, هتنزل و تتشكل طابور, المندوب هيدخل و هتدخلو وراه و تبتدو تدخلو المركز و هتعضوا على الارض تحت المظلة.

- هييجي بتاع الآمن و يقولكو "الي معاه موبايل يطلعو بالزوء, الي معاه شريحة يقول, علشان الي مخبيه هنكسر الموبايل بتاعه اودام عينه", في ناس كتير هتجيب ورا و تطلع الموبايل, انت اعمل زكي و ما تجبهوش معاك اصلا, بس الي تجيبه هو شريحة خط, و تكون شاحنه بـ 100 جنيه, عشان لما تدخل جوة هتلاقي ناس مهربة موبايلات, شوية شوية هتلائي نفسك بتئولهم انك عايز تعمل مكالمة, فا مش هتحرج لان الشريحة معاك و الرصيد يا هندسة.

- المهم عسكرية الآمن هيقولك ايه, انكو هتخشو على مكتب الامن و الاجهزة هتشوف كل حاجة معاك و هيحسسك انك مسافر ابوظبي, و في الاخر هتطلع مفرزة الامن دي انهم بيفتشوك بايديهم عادي جدا, يعني ما تخافش اوي, هما بس بيتكلمو كتير عشان يخضوك و تترعب, اصله اول يوم ليك في الجيش دنتا لقطة, بس خليك كووول و هادي و كويس انك ئريت الكلام ده عشان تبئا انت الوحيد الي فاهم وسط الي حواليك.

- بعد ما يخلص تفتيش, الي معاه موبايل و سلمه من الاول هيحطه في ظرف و هتستلمه لما تخلص مركز تدريب و الي طلع موبايل او شريحة و هو بيفتشك هيكسره اودامك
- هتستنو شوية بعد كده هيجيب الحلاق, الي شعره طويل هيحلق له اودامكم, بعد كده كله هيكون جاهز انه يستلم المهمات.

- دلوئتي هتروح تستلم مهامتك, هتاخد المخلة و تلم حاجاتك, غيارات بيضة, ملكش دعوة بيها, 2 فوطة, 2 افارول مموه, افارول زيتي صيفي, افارول زيتي شتوي, شورت مموه, تي شيرت عسكري, تي شيرت اخضر, بيادة, كوتشي, جزمة نص "او خمسة خرم", كاب مموه, كاب زيتي, 4 اجواز شرابات زيتي عسكرية, آيش "حزام عسكري", كيس مخدة, ملاية, بيجامة صيفي, بيجامة شتوي, 3 بطاطين.

- هيدور على عنبر فيه مكان فاضي تعضو فيه كلكو و الزيادة تروح عنبر تاني, كل واحد هيدخل هيشوف سرير فاضي فياخده, هتلاقي دولاب على شمالك, تبتدي تطلع الي في الشنطة و المخلة و تبتدي ترتب لو في وقت, لو الساعة جت 10 بالليل, مش هتلحق غير انك تتطلع البيجامة و تلبسها و القفل الذهبي بتاعك علشان تقفل المخلة و تحطها جوة الدولاب و تقفل الدولاب و تنام و ترتاح من اليوم الفظيع ده, و بكده يكون انتهى اطول يوم في العسكرية, عشان بس اول يوم.

اي يوم في مركز التدريب من المعتاد انه يكون كالآتي:

- تصحى الساعة 4 و نص
- الساعة 5 تروح تفطر في الميس
- الساعة 6 صفارة الاستعداد لطابور الصبح
- 6 و نص تنزل الطابور ادام مساعد السرية "الشاويش الي ماسك السرية"
- 7 تخش ارض الطابور
- صفا و انتباه و تعليمات اثناء الطابور
- كل المخالفات في اليوم الي قبله يتنووه عليها في طابور الصبح
- هيجي عسكري كل يوم يقول المعنوي, آية, حديث نبوي, و خبر من جريدة القوات المسلحة آخر عدد
- بيطلع شاويش وراه الاوامر, و الاوامر هي اسم القائد منوب و الظباط النبطشيات
- بعد ما يخلصو, هتقول حاجة اسمها نشيد الجيش, مع الايام هتحفظو
- بعد كده هتبتدي تجهز التشكيلات عشان تبتدي تمارين اللياقة, هتجروا حوالين ارض الطابور, تعملوا شوية تمارين و بخ على الساعة 9, هتروح العنبر تريح شوية

- الساعة 9 و نص تنزل للطابور التاني و هو طابور التعليم الاولي, او اسمه طابور الكفار زي ما بنسميه, الطابور ده بيعض 4 ساعات في الشمس, يعني فيه وقفة كتير و صفا و انتباه, و الحدث الي فيه ان الشاويش بتاعك هيجي يعلمكو شوية حاجات عسكرية, مرة ازاي تفك السلاح, مرة يقولك ازاي تمشي الخطوة العسكرية, يعني طابور تعليم اولي بيبئا كده كل مرة.

- تيجي الساعة 2, تبتدي تجهز التشكيلات علشان يدور الطابور على الميس للغداء
- تخلص الغداء تروح العنبر تموت شوية من التعب على السرير كده
- الساعة 4 و نص تنزل طابور الهتاف, يجمعكو الشاويش
- الساعة 5 تخش ارض الطابور, الطابور ده ابسط طابور, هتقف لحد الساعة 5 و نص او 6 بالكتير, صفا و انتباه و شوية تعليمات بعد كده تحيو العلم و تمشو.
- الساعة 7 العشاء, في الاول لازم تروح بعد كده هتعرف السكة و مش هتروح, ملوش لازمة, هتلاقي نفسك بتروح الكانتين و هتتعود على الاكل بتاعهم.

- بعد العشا لحد الساعة 10 هتعض فاضي, في ناس بتنام, في ناس بتئرا حاجة, في ناس بتعض تلعب مع بعضها, ناس تانية يطلعو السجاير و يدخنو و يتكلمو ف اي حاجة, يعني الحياة بتبئا كول بعد الساعة 6, بعد اسبوع هتبتدي تحفظ اسماء صحابك الجداد.

- الساعة 10 النور يطفي, لازم راسك تكون على المخدة, و تنام عشان تصحى ليوم جديد.

بدل فاقد لأصل شهادة التجنيد

noreply@blogger.com (medical pharmacist) — Sat, 02 Jan 2010 14:58:00 +0000

بدل فاقد لأصل شهادة التجنيد :

لو ضاعت منك شهادة التجنيد سواء كانت شهاده الاعفاء المؤقت او شهاده التأجيل او حتى اصل الشهاده كان في شغلك وكنت محتاج اصل الشهاده بسرعه وفي الشغل مش حيرضوا يدوهالك بسرعه فممكن بمنتهى السهوله تروح منطقه التجنيد التابع ليها وتطلع بدل فاقد لشهاده التجنيد

الاوراق المطلوبه للحصول على بدل فاقد لشهاده التجنيد :

1- صورة من شهادة التجنيد بتاعتك

2- بون اسمه بون بدل فاقد وده سعره بيتراوح من 15 جنيه ل 30 جنيه

3- قلم ازرق :D

الخطوات المطلوبه للحصول على بدل فاقد لشهاده التجنيد :

حتسأل اي عسكري في منطقه التجنيد على مكان استخراج بدل فاقد لشهادة التجنيد ( المكان ده حيكون شباك اسمه مكتب مراجعة لمحافظتك ) مثلا انا عشان من اسكندريه طلعت شهاده بدل فاقد من شباك داخل منطقه التجنيد اسمه مكتب مراجعة اسكندرية وهكذا ....

حتلاقي جنب المكتب ده شباك الخزنه اللي حتجيب منه بون بدل فاقد وحيديك استماره لونها اصفر حتملأ بيانات الخانه الاولى منها فوق بس وهو حتلاقيه كله عن بطاقتك مكان استخرجها ورقمها وتاريخ صدورها واسمك طبعا بس كده ومتملأش الحاجات التانيه اللي بتكون مكتوبه تحت

وبعد كده بتروح الشباك اللي مكتوب عليه مكتب المراجعه وحتديه البون والاستماره الصفراء وصورة شهادة التجنيد وهو حيديك وصل عشان تستلم بيه بدل فاقد لأصل شهادة التجنيد وغالبا حيقولك تعالى بكره او ممكن كمان في نفس اليوم لو كنت جيتله بدري اوي الصبح

بس كدا بعدها عند نفس الشباك او احيانا عند الشباك اللي بره خاالص منطقه التجنيد حتاخد بدل فاقد لشهاده التجنيد