一部一驚心

【復活清明掃墓之旅】仿如重返摩洛哥

2025-04-18T16:51:00.000-07:00

巴黎之旅最後一個景點 -- 榮軍院。建築物原本是軍人療養院，如今變身成軍事博物館。早上去到就見到兩隻兔兔在子彈形植物草地戲嬉。10:00 先開門，圍繞着佢行咗半個圈，咦？地下有個男人瞓咗係行人路，睇定的先，睇前方的歐洲人會唔會理佢，個個都係行過就算，近睇原來係醉了的流浪漢。

安葬拿破崙的雄偉建築物

昨日已遊覽榮軍院外圍，今日直入需收費範圍。展品橫跨古時期及 30 世紀，武器、裝備，盔甲好重好精致，多不勝數，華麗又精致的花紋，也有平實的，但數量之多令人驚嘆不已。馬都要穿，小朋友細細果就要著，男仔、女仔都有好得意，自細培養。

以為展館得一個，準備離開之際，見到對面都有展館試吓門票可否通行，正，可以。呢度箭、槍、刀款式超多令人眼花撩亂，仲有大量大炮，有一個大炮雕刻居然男女接吻中，炮頭纏繞住一條蛇，打仗都要搞到咁鬼藝術。

小孩的盔甲

陳列咗的日本盔甲係日本國進貢嘅，都有東方盔甲及寶劍，細細玩具士兵展廳、軍隊樂器展廳、衣物、上戰場必備毯、杯、鍋、背囊、斜孭袋、個個年代的軍服展廳都睇到眼花撩亂。

咦！有電影睇，原來呢度係講戴高樂嘅，第二次世界大戰德國攻打法國法國投降而戴高樂投靠英國聯手反擊成功，成為法國總統，對國家做咗很多有益的事，受國民愛戴，而依家機場都係以佢命名。

安放拿破崙靈體的五層棺木

打仗當然少不了拿破侖，成個拿破侖一比一雕像就係榮軍院庭院，滑鐵盧戰敗囚於聖海倫娜島，死於此島，而榮軍院旁的金色圓頂建築，佢嘅屍體就安葬於此。可愛嘅龜龜自己都唔知門票包咗啲咩展館，金色圓頂墓館係離開時見到，抱着試吓嘅心態睇吓門票可否入去，原來係包埋。

展館除咗拿破侖靈墓都有幾個其他名人，石英岩石棺分五層，分別是錫、木、鉛和烏木，層層嵌套保護拿破侖，十二個勝利女神圍繞着棺材，地面珐琅葉子簇擁著拿破侖一世獲得的戰役名稱，真真正正名垂千古。榮軍院加破侖墓館，不知不覺就行足四個鐘，仲係粗略咁行，超出預計。

愛牆

天空飄起微微細雨，過咗馬路行一分鐘有超市，仲有枱凳，坐喺超市樓梯中間位食牛角酥、蘋果批、披蕯。再去聖心大教堂，一出地鐵站閘口通街都係人，行咗幾分鐘一個小公園出現蒙馬特愛牆，佢用不同國家文字寫滿我愛你，藍色嘅瓷磚白色字體，的人打卡位，蜂蜂對佢冇興趣，反而門口的街頭表演仲好睇。

龜龜見人多拖住蜂蜂離開人群，呢度係旅客必到景點，小鎮人多到一個點，去到教堂門口仲多人，打曬蛇餅排到我哋都夠鐘去機場了，唯有放棄，坐係樓梯度食住 Parma ham 嘆住紅酒睇人唱歌，因為呢度係山丘，開闊的視野可以飽覽城鎮全景，實在是十級享受。

巴黎最後一站聖心堂，教堂下的階梯有人唱歌。

沿樓梯直落又見到旋轉木馬，但冇咩小朋友玩，呢個旋轉木馬有兩層添，父母坐喺旁邊長凳等候，時間尚早隨便行去到布料街，呢度都係男人車衫，呢區街市人頭湧湧不見白皮膚人，全部非洲樣人，羊肉大塊大塊咁賣，小販霸佔行人路，仲有陣陣臭味，大蕉堆成一座小山，臨尾仲重溫摩洛哥風情，有在摩洛哥見過的土產售賣，簡直置身北非，除咗的建築物是法國的。

【清明復活掃墓之旅】搵個廁所都難

2025-04-17T18:17:00.000-07:00

一早出門見到有個清潔工人帶住一部绿色吸垃圾機吸馬路地下的垃圾，垃圾機都好型。今日景點是古監獄，屬於司法部大型建築群，去到搵入口，誤以為巴黎法院入口係古監獄門添。法院左邊係聖徒禮拜堂，古監獄係右邊入口，法院側邊一道相對細的側門，而其他部分是正在使用的政府司法機構；曾經嘅西堤宮被王室放棄了，搬咗去更加大更加靚的羅浮宮，但卻可以繼續使用，係呢度返工都幾正，話晒都係皇宮。

裝修中的聖母院

來得太早，四圍行吓先，聖母院就係附近，有小量人流排隊，但移動速度都算快。10:00 先開門，早少少再行返去古監獄已有的人排隊，1300 年的建築，已有 700 年歷史，一入去就係羅馬式建築嘅近衛騎兵大廳，食堂加宴會廳容納 2000 人。拱頂、石砌地面，真正羅馬建築，樓底有十幾米高，有錢的囚犯就住好點，冇錢囚犯住稻草監獄，仲要間多層閣樓上下兩層，潮濕令大量老鼠滋生仲散發惡臭。

14 世紀另一個國王將呢度變成辦公室，用屏風擋住開會及食飯。右手邊個廚房壁爐好巨型，法國大革命囚禁政治犯最高峰囚咗 500人，法國王後瑪麗安東尼間囚室靚很多，有梳妝箱、有枱凳可以寫信，但信件從未寄出，據說佢做皇後時生活很奢侈，令國民憎恨。而女性囚犯放風位係可以洗衫嘅。

巴黎古監獄

出去過咗馬路係條橋有樂隊唱歌，塞納河中島，巴黎最早發展的地區，古老的建築物好靚配埋寬敞的塞納河，陽光下微風輕輕吹過，聽住歌寫意的享受假期。搵嘢食行咗去超多商鋪的購物街，都係古舊建築物，嘩！個公園好靚，紫紅古樹開滿花花，鬱金香大過我塊面，有座高好多浮雕既建筑物，係 1509 年教堂嘅一部分，話係鐘樓響鐘嗰隻，但唔見個鐘因為佢圍住晒，每年春天會開放俾人參觀，但唔見開放呢？依家係春天噢。

12:00 午餐，對面馬路好大間類似星巴克的鋪頭，坐喺巴台對住好多花花的鐘樓公園喫 bagel、三文魚長長拖鞋包、咖啡，咁大間鋪上下兩層得一間厠所。蜂蜂話拖鞋包口感不錯，香港少吃得到。

無敵公園景配麫包午餐

食飽就去羅浮宮，沿着古舊建築購物街行 10 分鐘左右就到了。羅浮宮處邊用咗沙石路行去正門都需要十幾分鐘，結果見到佢嘅排水管都係龍形態，中國龍吐珠，法國龍吐污水呀！哈哈……小細節都咁靚，入面應該加豪華。沿馬路邊行去正門，嘭嘭嘭……馬路中有架車車輪鐵圈掉在馬路中，跟後的車直接碌咗上去，嗚！都幾危險。

對面係塞納河，好靚的一座皇宮樣貌的古建築，居然係工廠。正門又係打晒蛇餅，玻璃金字塔廣場人頭湧湧，在外圍打卡。見到有對姐妹不是影婚紗相，但都請咗個專業攝影師跟住，攝影師不停指導佢哋點擺姿勢。我們沒有預訂門票，即場排隊打晒蛇餅，決定放棄了。

極度熱鬧的羅浮宮

打完卡就向公園方向行，三三兩兩地攤販賣紀念品，草地有人野餐，杜樂麗花園回頭望向羅浮宮，嘩！佔地面積好大。行在呢個皇室園林中又見到公園食拖鞋包時睇到的紫紅色古樹花，呢度都有兩棵，鬱金香也有，中間位有個大型圈圈噴水池，遊客個個圍住佢坐喺度休息，公園範圍又係沙石路陣陣風不斷吹過帶起的沙塵，哈哈……

公園的林蔭大道樹開滿晒花花，超過七層樓高。向前直行就好，反正志在八卦，前方一個又高又尖的物體印入眼簾，什麼東西？不知不覺已經到咗協和廣場，原來呢個叫盧克索方尖碑，1830 年埃及送俾法國，埃及帝國權威的象徵。古埃及方尖碑原來係一對，放於盧克索神廟，左側方尖碑依然係埃及神廟。離佢不遠處有個以藍色為主調雕刻的噴泉但冇水出噢！

羅浮宮附近的林蔭大道

過馬路前方全部都係林蔭大道，路面超寬，寫意漫步就去到小皇宮，裸女雕像係金色正門左邊，但我哋不在呢個門口入，龜龜去下層排隊問人，原來可以免費入場，超高樓底抬頭望天花板精美的浮雕、彩色繪畫美輪美奐，而正中間放咗唔少各式各樣人體雕刻品，龜龜話以前的巴黎周街都係呢啲藝術雕像，牆壁上掛咗唔少畫作，雖然冇蒙羅麗莎，但呢度人少又免費，超正。

有部分展館已閂左，伸過頭入去睇好似係的工藝品、青銅器、鋾瓦、玻璃制品小物件個類，有啲地方又做更維修。15:00 就閂門了，免費去廁所、加水，再繼續向一馬路之隔的大皇宮出發，見到有人排隊，龜龜去問下，原來當日有運動比賽，需預先買票。

免費入場的巴黎小皇宮，反而人流不多。

過馬路就到矗立於塞納河上的亞歷山大三世橋，行多五分鐘左右就到咗明天去睇嘅軍事博物館添，一場來到去行下大圍環境，經過好隨意的安檢，入門係子彈型綠色松樹園，再入去係榮軍院，係佢廣場影相，上一樓行都係免費嘅，呢度居然有內地大媽團。樓梯下方有廁所但要收費，蜂蜂試咗幾次都唔得，放棄。

行完免費區返酒店買手信食嘢，再去行塞納河邊搵地方飲紅酒，呢個位越行越唔靚，似去咗工業區，尿急嘅蜂蜂行唔郁，龜龜轉改搵公園途經王子運動場入咗去，按電梯按咗幾層都搵唔到好似去咗結界，伸個頭出電梯時見球場閂燈，快快搵剛入來個層，衝出去時已閂門，黑人工作人員開門俾我哋出去，問佢有冇廁所佢話冇，應該驚我哋阻佢收工，邊有可能咁大個運動場會冇廁所。

榮軍院外圍的護城河

過咗馬路就係好多小朋友玩嘅公園，有廁所但鎖住咗，繼續行龜龜問咗幾個途人，終於有人建議我哋去酒店大堂廁所，龜龜入咗第一間冇，好彩去第二間一入門就見到左手間 WC 而前台完全冇人。解決三急再去返同先個小朋友公園飲紅酒、木枱木凳、沙地、青草地，所以都以大自然為住，不是石屎地，小朋友係公園沙地可以堆沙添，可惜少咗日落，呢度係平民小區，公園有個三角形木櫃，裏面放滿法文書，用呢種方法漂書，天色已晚飲完酒坐火車返酒店。

【清明復活掃墓之旅】願戰爭亡魂安息

2025-04-17T04:03:00.000-07:00

今朝一早起床去趁墟，巴士的市集逢周四、日開檔，我們 9:29 已在市集食生蠔，12 歐元一打好鮮，有刀叉提供，仲有一個汁係洋蔥浸白醋，都幾啱蜂蜂。身邊有講白話的港人出現話：咁早唔食生蠔住，晏的先啦，是行先的一位男人同佢老婆仔女講。

巴士的市集平靚正生蠔

人流極少，所以行得好舒服。檔口種類繁多，服裝、飾品、疏菜、水果、又便又肥的海鮮、欖欖、火腿煙肉都好抵買，本地人拖個車仔來掃貨，我哋買咗 10 歐元扇貝，大隻又肥美，7 歐元欖欖一磅、幸運手手金色耳環、頸鏈等等，蜂蜂揀首飾揀到唔捨得走。買完食物，就坐地鐵返酒店煮海鮮通粉。

食飽時已經 12:30，1出發去墓地。13:10 到達拉雪兹神父公墓，位於巴黎 20 區，佔地超過 43 萬平方米嘅園林公墓，每年吸引數十萬來訪旅人，但不見華人，龜龜呢個華人真特別，哈哈……百年古樹，綠樹成蔭，野花野草自由生長，墓穴上成座屋仔，仲有的似小小型宮殿，各種浮雕，令人驚嘆。間中會見到導賞員帶領嘅人群，仲有的好似拎住通告資料好似拍嘢的團隊。1804 年就有嘅墓地有好多名人、戰爭時期的人葬喺度。

拉雪慈神父公墓

睇咗超過兩小時，然後冇帶咖啡的龜龜去超市買咖啡，蜂蜂見到貨架上有隻小老鼠正在偷食麫包，但係出世冇幾耐的老鼠仔好似未夠力咬開膠袋，龜龜通知黑人店員，店員只係趕走老鼠而已，沒有殺掉牠。

15:30 坐火車去凱旋門，15:50 轉火車時居然係兩層車廂，勁。凱旋門好多人，繞場一周欣賞先，見唔少人在馬路中間留影，車水馬龍，好繁忙地段。繞場一周後經隧道通往凱旋門底下，嘩！排隊的人龍嚇親蜂蜂，都係唔好上去頂好啦。龜龜話凱旋門曾中途停工，換咗統冶者後幾經波折先建成。

凱旋門人流甚多

查看網上資料，原來呢度係戴高樂廣場，拿破崙紀念 1805 年奧斯特利茨戰役打敗俄奧聯軍，1806 年下令興建，拿破崙被推翻後而停工，1830 年旁波王朝被推翻又重新復工，終於 1836 年完成，門上刻有法國大革命戰爭同拿破侖戰爭時期 660 名法國戰領及 158 場戰役。

廣場上長期點燃着一團永不滅之火，行埋去有熱力，係真火，佢係記念第一次世界大戰時犧牲的無名戰士，因為呢度好大風，頭先好曬又除衫，本來好涼，現在可以取暖，哈哈……

小老鼠偷食麫包

打完卡返酒店樓下超市買披蕯、蘋果批、杏仁汁、紅酒，坐喺超市枱凳食，食完返酒店再步行去塞納河畔。行行下有個公園，20:00 坐喺草地，冇蚊冇蟲，電視出現的場面，好寫意咁食住芝士、薯片、欖欖、飲住紅酒曬太陽，欣賞日落及熱氣球。

草坪上有人排緊舞、有人親熱緊、有人狂擺姿勢影相。噢！有兩隻鴨鴨朝住我哋行來，聞到我哋嘢食味，但佢唔會好似馬騮咁搶，你唔俾佢佢會走開，蜂蜂攞咗塊薯片同佢玩，本來係拋俾佢食，但從天而降一隻黑雀，嗖一下搶咗飛埋去樹度慢慢嘆！勁！公園仲有竹做既巴黎鐵塔同兩架竹製汽車。21:00 ，保安準時踩單車吹口哨叫的人出去公園閂門，我哋要係另一邊門出去，一出去轉個彎就係一間大型全玻璃製醫院，沿河邊行返酒店。

塞納河畔恬靜的公園

【清明復活掃墓之旅】深藏地底的萬人塚

2025-04-15T20:57:00.000-07:00

因為時近復活假期，全歐洲旅遊熱點都擠滿遊客，一些需要門票的景點更一早預約滿額。好彩七日前已上網預約了大名鼎鼎的 Catacombs，否則肯定無法入內。今日一早坐地鐵前往巴黎東南部的地區，剛到埗不熟悉錯縱複雜的地鐵綫，搭錯了車，要去返對面月台。乘車途中看見月台上有個女人睜開雙眼瞓咗喺月台，似發羊吊，周圍有幾個人圍觀，希望她沒事吧。

catacombs

11:00 去到 Catacombes，我哋約咗 12:30，門口已有人排隊，奇怪他們隨身有好多行李。未夠鐘入場，我們在周邊街道隨便行，好舒服，有個車站門口有自動售賣農產品，價錢好貴。紫色花花、粉紅色似樱花的花，古舊建築物、高大古樹，經過餅店披蕯四歐元一大塊，路邊攤大青檸檬六個兩元，日本青皮蜜瓜一個三歐元，抵買。仲有無印良品添。咦，對面有郵局，龜龜即刻衝入去。

12:15 去返排隊，經過安檢，要下降 131 級旋轉式梯級直達地底。這裏每年有幾十萬人來參觀，早在西元一世紀，稱為呂特斯嘅巴黎在此興建咗露天採礦場，14 世紀開辟成大型地下礦場，開採優良的石灰岩，巴黎很多建築物都係用佢，包括羅浮宮、聖母院等，成為蜂蜂今時今日仲可以睇到的八百幾年的建築。

復修人員很用心把頭骨砌成各種圖案

地底電話冇信號，依然維持住礦洞舊時面貌，龜龜話曾經因為開礦令到樓宇倒塌，皇帝唯有停止開礦。地下通道超長，碎石地洞時不時有地下水滲入。除咗採礦，有段時期仲用呢度地下水做噴泉。

因為有段時期有瘟疫死咗好多人，冇地方處理，所以當地居民提議用呢個礦洞當地下墓穴，加上窮人埋葬太近民居，埋葬方式不太理想、仲有革命時期死咗的人，都會葬於此，所以先有我哋見到嘅咁多骷髏骨。工作人員叫遊客背囊孭前面以免撞到脆弱的骷髏骨，還有很顯眼的警告牌叫人切勿觸摸骨頭，不過一個白人、操英語的家庭，還是多次拿起骨頭自拍。

地下墓穴一半是亂葬崗，但也有部分位置佈罝得比較整齊。

礦洞底有兩羅馬柱，上面的圖案意思係記住你都會死 memento mori。呢道標誌門後就係幾百萬個骷髏頭、骨，堆砌的好整齊。初期是由教會人員負責埋葬屍體，但他們年紀大，只能用最省力的方法葬屍，就是在井口扔屍體落去，所以見到好多骨破損咗。

洞內有口井，曾經有科學家養咗三條金魚做試驗，結果三條金魚盲咗，因為地底伸手不見五指，不需用眼，導致眼睛退化。行行下見到有工作人員推住手推車向前行，我們就跟住佢地去。嘩！原來佢哋處理屍骨，正！

巧遇工作人員執骨

1847年 4 月 2 號凌晨 2:00，這裏曾有一場交響樂表演，招呼小量賓客以免太張楊。可見很久以前，地下墓穴早已成為人們獵奇消閒的娛樂場所。出去都係要經歷長長旋轉樓梯，對於老人家來說是一大考驗，唔知在洞內遇到的一對老年夫婦要幾耐先爬到上來呢？我們見老太太行路相當不便，又肥又慢。

館口出口離入口好遠去咗幾條街之外，要用地圖先去到我哋之前見到嘅市集，去到時燒雞已閂鋪，唯有在超市買披蕯，三歐元一塊，還買了欖欖，又幫襯了海鮮店，八歐元六隻生蠔。在附近的公園野餐，一邊吃一邊欣賞風景。嘩！好靚嘅綠色雀，似鸚鵡。食完去超市買明天的包、番茄醬，這時突然發現雞檔冇閂門，只不過頭先睇唔到；我們再買咗兩隻番茄，一歐元、一隻燒雞，九歐元、桑果三盒，五歐元，再坐車返酒店食。

旅館距離鐵塔不遠，真係轉個彎就到。

18:00 再出門，行咗五分鐘左右轉彎，嘩！巴黎鐵塔！龜龜話自己都唔知酒店離鐵塔咁近。而且呢條路有兩間大型超市，其中一間有枱凳微波爐可以坐低慢慢嘆世界，仲路經一間中東嘢超市，有摩洛哥食品買。

行十來分鐘，見到自由女神像，在塞納河中央。漫遊塞納河去到巴黎鐵塔，巴黎鐵塔邊短短一個鐘就見到四對韓國情侶影婚紗相，坐喺河邊，見有對情侶好識嘆，成支紅酒加薯片、零食睇住塞納河慢慢享受，卻吸引咗河邊鴨鴨過嚟想食薯片，呢度仲有白色天鵝戲水睇，等到 21:00 天黑，影完鐵塔閃燈 show 就坐 42 號巴士返酒店。

矗立於塞納河中央的自由女神

【清明復活掃墓之旅】落後的巴黎鐵路售票系統

2025-04-15T04:29:00.000-07:00

凌晨落咗雨，好彩 6:30 出門冇落雨。未夠 6:00 已有可蘭經喇叭響勻全城，以為要拖住個喼行巷仔出去，點知 Riad 門口右邊行一分鐘就有道大門，職員用鎖匙打開，裏面有架大 benz，車房另一道門一打開就係大街，的士已等緊我們。10 分鐘就去到火車站，盛惠 100 DH，車站里已有餐廳開咗門，不過我哋已買了很多餅乾充飢，沒有幫襯。

7:50 的火車，返回 Casablanca，再坐飛機往巴黎。7:30 上咗車，架架長途火車都冇預咩放大喼嘅位。往機場需要中途轉車，我們在轉車站快速食蛋蛋肉絲 Tajin 配黑色欖欖加薄荷茶、橙汁，食完上上落落爬梯過隧道，有個大隻佬男人見我攞得好辛苦，佢單手輕鬆幫我攞上去，上咗站台先發現有平路係火車軌過對面月台即可，個職員真係亂咁點。

開往 Casablanca 的列車

巴黎地鐵月台

見有火車，鍾意影相的龜龜話過嚟同火車影相。佢哋通常會好慢好慢先駛入站台，啱啱拎起手機準備合影，咦唔對路噢，車停咗係我哋前方。衝呀！拎住喼快快上車，哈哈……。我們乘坐15:30 的航班飛到巴黎，到埗時已是 20:30，天仲未黑。

然後是全個旅程最麻煩的必經程序，就是購買公車周票。好奇怪，巴黎咁先進的城市，買類似八達通的增值票可以在售票機購買，偏偏周票要排隊到櫃台由人手處理。我們排了一小時才買到，再坐鐵路進入巴黎的旅館，到埗時已天黑了。

【清明復活掃墓之旅】最後一餐很滿足

2025-04-14T04:29:00.000-07:00

食完早餐去廁所，啱啱除衫，嘩！邊個開我房門？原來係隻松鼠狗，好可愛入埋房添。是鄰房一位法國旅客帶的狗狗。今日景點原本是新城區 YSL 花園，10:45 去到發現大排長龍，連票都售罄，唯有在附近閒逛。

這裏的建築物以豪宅為主，幾乎清一色泥土色。區內一帶街道種植了很多熱帶植物，超巨型堅硬量天尺和仙人掌，超巨型紫色、白色、黃色勒杜鵑、超高棕櫚樹，超大個露台民宅。附近冇咩景點，不如去超市，行去家樂福嘅途中有個公園用單車車輪砌成一個大型球形藝術品，好靚。

豪宅區外的熱帶植物

在家樂福買了肉餅、包包、番茄、辣椒、欖欖、曲奇果仁等返民宿開餐。行返去先知原來家樂福離民宿十來分鐘路程。14:30 出去行街，去到一個又高又大的鐵閘門覺得好靚，龜龜幫蜂蜂影相，對面咖啡屋有個女士咬住塊麫包走過來幫我們合照，原來佢來自瑞士，都係旅客，好熱情。

行行吓去咗條老鼠古董貨街道，復古的匕首、飾物、阿拉丁神燈，價錢可以斬到一成，難為從來冇講價嘅龜龜。染料街 120 DH 買咗條圍巾，亂行又去咗成條編織品街，個男人問我飲品係咪飲晒唔要了？幫我扔飲料杯添。

二手飾物店

行出窄街去到小廣場，地下都有唔少編織品，穿過地攤，有家小店，歐洲小女孩抱住烏龜玩得好開心，小男孩就不停摸更隻蜥蜴，吸引蜂蜂停下。男店主好熱情同我地講可以任摸，真係好人，手多多的蜂蜂用手指篤佢肚肚，哦！嘩軟嘅，即刻縮手，原來係真蜥蜴，居然可以一動也不動，以為係標本㖭。

去不成 YSL 反而購物使多咗錢，蜂蜂終於臨尾在一家有位猶太工匠做手袋的皮具店以 150 DH買咗個靚皮手袋，而且亂行返到昨日 20DH一對耳環的鋪位。

好乖任摸任影的蜥蜴

19:20 ，天台食晚餐，雞同牛 Tagin、茄子沙律、薑茶、薄荷茶，微風吹過好涼爽，好味，尤其是麫包煙韌口感很好。缺點係座好窄，廁所小白屋隱蔽有狹窄，歐洲人應該坐得仲辛苦過蜂蜂，但三樓依月灰爆滿。

晚餐後閒蕩一陣，近民宿小店又花了 50 DH 買咗兩對手手幸運耳環，其中一對蜂蜂同龜龜同時睇中手指指。21:30 先返到民宿而且冇落雨，圓滿結束摩落哥之旅。一返民宿蜂蜂整跌咗個床頭燈，冇晒電，叉頭都冇電，只有吊燈可以開著，以為就咁過一晚，好彩等咗一陣又可以開返電。

狹窄的天台餐室，不過食物 OK，氣氛不錯。

【清明復活掃墓之旅】烚熟羊頭很好味

2025-04-13T00:35:00.000-07:00

食完早餐去巴希亞皇宮，人多擠逼，快速打打卡，就拜拜。之後行五分鐘左右去到街市，花舖好多月季花，好多白色雞，呢度啲人唔鍾意旅客拍佢哋，快快影相，再買咗 5DH 欖欖就向下一站出發。

巴希亞皇宮人太多，逛了一圈就快閃走人了。

今日係 Marrakesh 的第二日，仔細留意呢個城市建築顏色，佢係沙漠紅土顏色為主，盜墓迷城咁，哈哈……第二個景點係 Saadian Tombs。我們先坐喺墓園門口食晒欖欖，10:50 再入去，這是一個擁有 500 年歷史的墓園博物館，入場費 100 DH /人，入門影入眼簾的就係地下一個又一個嘅菱形圖案石板，佢就係墓。

就係呢個皇族墓室，遊人要排大隊輪流參觀，而且不准入內，只在小門外偷窺。

墓園一端有好多人排隊，雖不知排什麼，卻照排，人多暴曬排隊 30分鐘，以為可以入去，原來只係一個可以影相的打卡位，係重要皇族的墓，超精美的松木雕刻，睇完呢個就完，墓地唔算大。

然後在巷子左穿右插，12:00 又去到街市，求其搵間店舖食嘢，點了披蕯同牛肉包，超大超多芝士，盛惠 30 DH，食到反肚。食店舖外殘舊，但內櫳好精致，四盞大吊燈，甜點、麫包超多款。

極好味的摩洛哥甜點

蜂蜂見甜點寫住 25 DH/100g，嘴痕，同龜龜齊齊揀甜品，買單先知原來並不是所有都係 25 DH/100g，龜龜揀個個係 25 DH一個，但好酥脆美味。店舖好多自製麫包好吸引，可惜太遲發現冇肚肚食。舖頭廁所仲奇葩，在樓梯下，狹窄又矮，蜂蜂身形都好易撞頭，摩洛哥人咁高大唔知點用呀。

龜龜在等待上菜的時候居然仲去咗對面香薰店攞咗的香料返來，好香，係超通鼻塞個種噢。今日都見好多歐洲人買摩洛哥香料，佢係可以自配屬於自己獨一無二味嘅，蜂蜂見有各種花乾，仲有不同嘅木加埋磨成粉。

乾花店用花乾砌成不同圖案招徠顧客。

食飽行五分鐘去到與墓園同一個主人嘅 Badii 皇宮，盛惠 100/個人。首先我哋落樓梯去咗地下室，地下通道用於僕人做嘢去服侍主子，呢度夠寬敞，紅土顏色的地下通道遍布皇宮，通道盡頭去到地面，太陽光照射著滿目瘡痍的斷垣殘壁，好多洞洞的紅沙岩城牆配菱形圖案的地磚。

Badii Palace 很值得去，遠勝巴希亞皇宮。

抬頭有一對類似䴉的大鳥在煙囪位置築巢，父母飛來飛去輪流照顧巢中 BB。出門有個工作人員看守，坐喺度稍作休息，見有對情侣影相，女方是中國人，龜龜去幫手合照。呢度出去係皇宮廣場，有個水池、又有好幾個下陷的池狀建築，種滿橙樹，粗略估計總共種咗 135 棵橙，加一棵橄欖樹。

究竟橙樹的橙會不會摘下來食用呢？

去廁所時巧遇頭先龜龜幫手影相個華人，交談之下原來佢來自中國安徽，佢同摩洛哥男朋友入嚟玩，讀外語學校通過見工來呢度物流公司返工，人工 5,000 DH，仲話當地人根本在遊客區消費不起。

之後穿過古城街去到本約瑟夫伊斯蘭學院，建築物已有 500 年歷史，130 間課室，係當年北非學習可蘭經最大的學校。處處都係精美伊斯蘭建築幾何重複對稱組合，可蘭經銘文、星形、花瓣形、幾何圖形，中庭有個水池，打卡聖地，相比之下佢大過靚過菲斯個的好多。

靚到喊的 Ben Youssef Medersa

中庭兩側的樓梯上二樓就係課室，課室又細又暗門好低窗都冇，得門有個窿，是否用作苦練修行？有啲課室大少少但個窗都係好細，可能係導師用。

這日相當多歐洲人，旅客多到一個點，去廁所的通道牆身有個水管裝置，仲用緊，龜龜話用地心吸力原理，第一條喉水滿就去到另二條喉度，另二條喉水滿又去到第三條喉，供應大學各處用水。

另一角度欣賞五百年古老大學

下一站不眠廣場，古代商隊的交通樞紐，廣場有著傳統服飾的人，戴咗紅加綠的帽、著紅衫、孭住大皮袋、掛住好多個銅制杯、碗的人，俾錢可以同佢合照，出於好奇上網查先知呢種人叫做賣水人，古時水源珍貴，商隊來到呢度就可以補給水水了。

終於見到電視出現嘅眼鏡蛇表演者，但蛇蛇冇起舞，唔知係咪要有人俾錢先呢？仲有馬騮表演者，咦？前面圍住好多人噢，去睇下先。成堆本地人圍成一個圈，中間有個人席地而坐，噢，原來賭緊錢。

烚熟羊頭味道不錯，蜂蜂唔識嘢淨係食咗一條羊鼻毛。

不眠廣場其中一種人氣熟食檔就係羊頭、羊頭，龜龜想食，揀咗間較多本地人既坐低，叫咗份羊頭，90 DH，好多毛，倒香料點知一跌就出咗好多添，好咸。右邊有一個爸爸帶住三個囡囡同我哋同枱食嘢，好靚女的，頭髮三個都一模一樣仲好靚添，阿爸將的包包撕開就係咁扔在枱面俾囡囡們食，哈哈……摩洛哥玻璃肚不要來，佢哋真係冇乜食品衛生可言。食飽行吓，行咗一陣間就落雨了，好彩十來分鐘就停了，古城街試咗幾次鞋都唔啱，19:30 返到民宿又落大雨了，好彩好彩。

【清明復活掃墓之旅】充滿熱帶風情的民宿

2025-04-11T20:58:00.000-07:00

離開菲斯，向 Marrakesh 進發。今日一早起來前往火車站，由酒店出門短短 10 分鐘車程，的士佬收 50DH，但勝在佢架車夠大白色七人車。7:45 到菲斯火車站，火車的車廂乾淨，但廁所的紙亂扔，屎、尿痾完直接跌落路軌。法國人的喼好大，喼疊喼放到車頂，可憐蜂蜂個喼在最底，好驚會被壓爛。

去到 Marrakesh火車站已下午，再坐車去 Riad，幾經講價終於有個年紀較大少少的司機肯以 50DH收費接送我們，其餘個個都話要收 100 DH。十幾分鐘左右去到目的地，落車就見有幾個推住四個轆手推車的男人等生意。

秘密花園二樓

歐洲人一落的士就幫親佢地，一家三口帶四個大喼啱啱放到。我哋不用，龜龜話 Riad 十來分鐘就到。經過大巷直行轉左再轉右，雖然都係石春路但冇上樓梯還好。進入 Riad 的細巷黑黑暗暗，龜龜叫蜂蜂原地等，佢去探嚇路先。龜龜話：搵到了，過嚟啦。

只見一道高高鐵門寫住秘密花園，拍門等咗片刻先有人開門，打開大門，係另一個世界。高聳的牆後彩色的拼磚、繁複精致的雕刻出現在木門上、屋頂、內園外牆，入門歡迎我哋嘅係一篤烏龜屎。

這間 Riad 不大，中庭空間相對小。

長髮眼細黑衫女客服，辦理入住手續後，叫我哋首先飲咗薄荷茶加果仁餅先上樓，坐喺花園嘆茶食餅，的薄荷好新鮮，果仁餅香脆有果味，好食。趁我地飲茶男客服已將行李拎上二樓了。龜龜係花園尋找烏龜但不見烏龜蹤影。中庭花園種植的熱帶植物高至二樓，植物根邊隨意咁放咗的好原始嘅泥土燒制品，好正而且咁多植物天氣炎熱都冇蚊冇蠓咬。

因為肚餓所以行出 Riad 求其搵咗間醫肚， 17:18 食晚餐，在人來人往車水馬龍的巷仔，對面有菜檔買埋番茄辣椒，今晚點 Tajin、Tanjia。Tanjia 係馬拉喀什獨有嘅，個樣好似秦始王時代的罐。包包配辣醬，辣醬帶少許酸，蜂蜂鍾意，例牌摩洛哥最興嘅番茄加青椒加香料煮嘅菜式，呢間味道麻麻，仲有一道好似小米嘅菜龜龜覺得佢似黃色蛋糕，唔好食。

雨下的不眠廣場

返去放低番茄青椒再出發，經過無數商店街，18:15 去到不眠廣埸。20 DH 食咗碗蝸牛，腍 pat pat。19:00 下起傾盆大雨，我哋去咗博物館門口避雨，屋頂好多燕子巢，19:30 仲未停雨，去水差，博物館門口水深及腳踝。再等十多分鐘終於停雨，唱完錢後 20:00 先行返 Riad 。雨後的古城四圍都係積水，舖頭老細自掃門前水，快到Riad ，買咗四個橙，只須 7 DH，味道好食過菲斯，係唔同品種。

【清明復活掃墓之旅】扮晒衞兵巡邏城牆

2025-04-10T18:20:00.000-07:00

今日繼續掃墓。早上穿過古城去到邊皮外圍，過馬路爬上黃泥土小山，山上開滿野花，山下係另一個巴士總站，好多本地人坐車。去到山上的馬路，龜龜就衝去墓地入口，一心想睇墓地嘅龜龜話入一入墓地先，行去門口被個本地大嬸叫住：No、No。我們唯有改往軍事博物館。

10:38 去到 Fes 軍事博物館，先經過園林才到達呢座五百年歷城堡的入口，盛惠 60DH/人。不知道為何好少人參觀，加埋都冇 10個人，展區保存得相當完整。這座城堡，在法國統冶期間，當中的兵房曾經改建成監獄。

古城北面的小山

展品順時序展示，首先係石器時代兵器。那時候火藥未發明或未流行，所謂大砲是發射大石頭來攻擊敵人。然後到中古時代十一至十三時代兵器，青銅為主。16 世紀，意大利士兵盔甲重 25 公斤，單是頭盔也有七公斤，有時會反效果，尤其在沼澤，會令士兵寸步難移，同一展區內，日本東洋盔甲、中國劍都有出現。下一個展區是18 世紀 Ottoman style，兵器開始有精致雕刻花紋的劍、匕首。19 世紀兵有好幾間出名嘅鑄劍廠誕生，西洋劍十分精致。

然後是槍器，15 至 19 世紀的槍，有個展窗把槍枝的配件拆開展示，最初期的槍是用木造的。睇完歐洲的槍就展示摩洛哥槍，上面有金色精致雕刻配合貝殼做裝飾。仲有模型公仔展示蒙古兵如何攻城，架起高樓梯台，發射大石頭，用巨木撞城門。

軍事博物館城牆下的大炮

再行去到大炮展廳，摩洛哥 13 世紀已有大炮，炮彈放在地下，多手的蜂蜂親手搖好重，超厚鐵，佢唔怕碾親旅客任玩，仲大叫龜龜都試試大炮炮彈手感，哈哈……機會難得。

除了武器，還有古時很特別的裝置。一副巨大城牆展品上有十二個窗、十二條喉、十二個巨型碗，金屬嘅圓球跌落來，跌去第一位就代表 1:00，第二個位就 2:00，以此類推去睇幾點鐘。龜龜好仲意呢個，古人的智慧不可睇小。

有趣的時鐘

直行去見到精致窩釘水腰壺，水勺，酒壺、都係上戰場用。然後我們登上城堡天台俯視成個菲斯古城。天台正到一個點，船形尖角位冇任何保安措施任爬上打卡，城堡頂只有我們加多兩個非洲男人而已，清靜又舒適，雖然烈日當空但並不覺炎熱。

步出博物館花園入口，保安要專程幫我哋開鐵閘，咦咁早閂門？過咗馬路向上行搵咗間餐廳食披蕯、沙律，咖啡、薄荷茶，杯咖啡好細好細杯，薄荷茶終於有一間係用個靚靚不鏽鋼托盤、不鏽鋼茶壺加玻璃杯，正！有儀式感。

視野廣闊的軍事博物館天台

此刻反而覺得烈日當空好熱，我們點了沙律，有奇異果、香蕉、蘋果、超細粒蝦、蟹柳、白色四方膠質嘢撈沙律醬，披薩係雞絲、蟹柳、人工鮮紅火腿面粉質感肉、牛肉碎，連個披蕯底都唔及前晚間好食，但價錢 47DH ；前晚吃的仲係三層樓係當地應該係高級餐廳。嗎

食飽當然放咗水先走，咁多年旅遊中呢次係最唔方便搵廁所的旅程，店員話佢呢度冇廁所，帶著我的穿過馬路向上走，兩分鐘左右，原來呢間就係我哋同先叫咖啡、薄荷茶的餐廳，披薩店員順便還返的杯同托盤俾佢。呢間坐滿八成客，係那種叫杯咖啡坐成日的人，廁所上一層，啊？天花板專登鑿爛咗一個大窿，上面放咗的雜物，咩佢哋唔怕落雨入水咩？不過有水都唔怕，成幢係自己嘅，雨水最多都係由二樓流晒去地面街上。

粗獷的天梯

今日景點已完，隨心而行，再去返黃泥土小山另一邊位飽覽古城。hello、hello！有幾個小男孩同我地打招呼，見係小孩我哋都回應返佢 hello，點知小男孩們就話：Give me money，咦！唔睬佢哋當聽唔到繼續影相，嘩！有石頭打我嘅？

繼續向前行去到墓地，呢個位冇嘢圍住，山下有家人拜更先人，個 Tajin 大過個鼓，見我哋好好奇居然招手叫我哋落去一齊享用，摩洛哥都係要小心啲，防人之心不可無。

很有特色的回教墳場

墓地以白色為主，有幾個大山洞係度，龜龜爬入去探險，入面全部都係動物屎同垃圾。噢，對面有黃泥色城牆，過去睇吓先。不過我哋沿着樓梯上去睇下呢坐小山上有咩先，都係墓，但有個非洲男人放馬，自己聽歌由得馬兒自己食草。

遠望山頂位有廢城門建筑物圍起咗正在做修復。下山過馬路係墓既另一邊，墓邊坐咗幾個男人係度：This way 、This way，居然幫我地指路，朝住佢地指的路穿梭於白色墓地雜花叢生小路話咁快就去到頭先睇到嘅城牆。

很有電影感的城牆，每個角落都是打卡位。

有對情侶迎面而來，龜龜話女子聽英文口音似香港人，男仔係歐洲人。爬上去城牆都有一對歐洲情侶，原來都有同道中人對佢感興趣。呢度好正，眺望古城同白色古墓，電影的感覺，龜龜蜂蜂好似當年的士兵一樣係離地面十幾米高的城牆上巡邏，嘻嘻……原來呢個位都幾闊應該有米幾，行至去有民居位個邊好窄只供一對腳闊度，不知不覺玩咗個幾鐘。

返回古城，原來今日星期五好多舖頭都冇開門，行行吓去到河邊，呢個位條河乾淨好多，建築新淨，近住停車場呢度闊落好多，有個大型皮革廠，由牆壁的洞洞望入去已見到皮革製造的池和帶毛的羊皮、牛皮，牆邊也掛住一張張的皮。

蜂蜂一看就愛上的窩釘皮手袋

隔離有間 Riad 建築物，裏有手袋賣，中間有口井，個老闆自製手袋，有晒工具。龜龜幫蜂蜂買咗個窩釘復古風斜孭袋，外層係牛皮，裏面係羊皮，價錢是 200DH，仲有條皮手鏈送。離開的路上，買咗蜂蜂鍾意嘅香薰燈罩，100 DH，這是我們的開價，本來老闆拒絕，但我們離開後，老闆追咗我們九條街話 OK。

17:30，揀咗間三層樓高的貴價餐廳頂樓食晚餐，突然出面一陣驟雨，大包切到好細而且唔鬆化，烤羊肉好韌，前菜的蕃茄煮辣椒冇落香料唔好食，牛肉 Tagin 得一塊牛，食食吓西斜，太陽曝曬熱到飛起，盛惠 210 DH，又貴又唔好食。

【清明復活掃墓之旅】街邊肉丸湯超好味

2025-04-10T04:54:00.000-07:00

酒店距離菲斯古城頗遠，需要搭的士往返。今日首站是一間大學舊址，已經有 1000 年歷史，課室似監倉，又細又黑，入場收 $20，入口有一道屏風，門口有人把守收錢，感覺有點兒戲。不過建築物很美，值得一遊。

古大學遺址

10:44 行去博物館，呢個博物館介紹木同木製品，一共有三層加天台，天台有間飲品店，由天台望出去見到遠處的皮革廠。展館介紹咗唔同的木，有小朋友玩的凳，出嫁用的嫁妝箱，嫁妝箱表面有鋪上皮製品做裝飾，飾物盒、槍、木均髹上動物脂肪，讓木材可保存更耐。

由古學校改建而成的木工博物館

去到天台先知修復呢度用咗 2,500 萬 DH，已經覺得呢度很樸素，原來修復前仲殘舊。呢度的展廳完全冇 CCTV ，而且大多數展品可以觸摸，連嫁妝箱都可以打開，最正每層樓都有廁所而且不用再另外畀錢。

木工博物館樓上的走廊欄杆也是木製的。

博物館一出來就有人帶我哋去睇皮革廠，盛惠 $50/两個人，龜龜畀咗 100 DH 個男人，冇即刻找錢，話轉頭先找。博物館右邊小路兩分鐘，一道黑暗的小門入去，裏面有幾層樓，穿過寬敞的皮革店鋪直上頂，工人們正在忙碌，冇咩臭味，所以沒有人們常說的薄荷葉驅味。

菲斯皮革廠

皮革廠內有好幾位工人在不同染缸和水缸上工作，沒有旅遊照片呈現的五顏六色，不過也真的很特別。逗留了幾分鐘後離開，沒有被強迫購物，帶路男士也真的找回 50 DH 給我們。

睇完皮革廠穿過木工街，呢度見到很多男工加工木材，行咗一陣間見到有間本地人小食店，狹窄的小巷，人來人往，龜龜點咗肉丸，肉丸係個陶瓷器皿上菜，熱到出煙，肉丸、雞蛋、番茄加香料的茶式，另一個係番茄、青椒加香料配醮當地的大包食，好味！祗是食嘢期間皮革廠的味一陣一陣飄過。

路邊小店的地道美食 - 肉丸湯

13:30 ，行到一間手工飾品店，伯伯將銀綫碾入鐵塊入面，變成不同的圖案，再用火燒，燒完後再磨光滑，很有趣。在古城市集隨意行去到間幾靚的建築物，見有門入去俾人收 100 DH，以為是皇宮，原來只不過是旅行團食飯的地方，只有地下有的古舊雕花，樓底有四層樓咁高，大批旅客係包廂食更飯。出門時發現有牌寫住真係 1000 年前皇宫，但冇料到。

行到熱熱地，買水果飲，龜龜一杯蘋果、牛油果、香蕉汁似糊糊多過果汁，蜂蜂甘蔗汁加薑同檸檬汁幾好味。行下行下去到如家餐廳城門入口，又見到我哋中午在小巷食嘢佢哋飲嘢嘅荷蘭籍紅衫紅褲夫妻坐喺度食嘢。

14:55，烈日當空，我們步出古城。亂行亂蕩之後，去到一個公園，裏面養了些白鴿和天竺鼠。公園內都是本地人，隨處午睡，氣氛頗遊閒，只是太熱，影響心情。

菲斯古城外的公園

返回古城內再亂行，又遇見另一古建築，都是四面圍牆雕䦨玉砌的精致工事。18:00，行出菲斯古城迷宮，去到空曠的位置，在一間餐廳向街的茶座上又見到今朝著紅色成套衫褲的荷蘭夫妻坐喺度飲更咖啡。

我哋揀咗間小店食羊肉 Tajin 加沙律，佢呢間的包包超鬆軟很好食，食完兩塊點知佢又加多三塊畀我哋，食完就搭的士返酒店。

【清明復活掃墓之旅】沿路盡是心曠神怡的田野

2025-04-08T20:24:00.000-07:00

昨晚一覺瞓到 6:45 自然醒，奇怪無祈禱嘅？連摩托車聲、腳步聲都冇。 8:00 食早餐，今日在二樓食，樓下大枱要讓給一家新來的旅客。早餐有方形牛角酥、一個中間有一條黑色唔知什麼餡的包包、兩個圓形像油炸鬼的包包，味道都同香港一樣、三隻雞蛋、水果粒一份：有蘋果、草莓、香蕉、香草乳酪兩盒、一份圓圓芝士、一大壺超濃咖啡、一大壼熱到起腐皮的濃牛奶。

食飽去完廁所就出發，樓下有肥到似美國人的一家三口在吃早餐。我們拖住喼在石春路上走，落斜比較輕鬆，大約三分鐘就到城堡廣場，向左行一分鐘就到我哋到埗時下車的位置，好彩即刻有的士。架的士有個男乘客帶住成籠鸚鵡，佢應該係昨日見到嘅係廣場收 $10DH 同鸚鵡影相做生意嘅老闆。

藍城前往菲斯的沿路風光

去巴士站的短短幾分鐘路程收費 20DH，買行李費的窗口仲未開始售票，10:30 開車，10:10 已有人排隊等上車，去菲斯的人很多。等車時發現對面的巴士車底匿埋咗四隻貓貓係。架車 10:20 到達，車上的人一落車，冇人打掃架車乘客就上車。車底行李位寬闊，但行李太多，行李疊行李。

車上的乘客有幾個法國人亂咁來不按票上號碼坐，坐錯位攪到後來的乘客與他們在狹窄的通道擠塞換位。有乘客沒有擺放好座位上的行李，啱啱坐低靜咗一陣，嘭！行李就成袋跌咗落嚟。

食肆烤肉檔口

12:50 停車路邊車站餐廳食午餐，一隻隻全羊掛在店前，然後食幾多買幾多，磅好就自己攞去俾人燒。味道也不錯，幾位馬來西亞華人師奶組團自由行，跟我們搭訕討論香港近況，結果發現她們都是沒有見識的馬豬。

四個鐘車程，沿途望住無邊無際的田園，心曠神怡。15:30 去到酒店辦理入住手續，超大型酒店，休息一陣間就出去行下，因為已近黃昏，都是在酒店附近漫無目閒蕩。呢一帶全部都係富人區，樓宇新淨，附近有工程施工沙塵滾滾。我們在一間小店買了些蔬果，又在雜貨店買了一袋紅色不知道是甚麼的調味料。

回來時見到酒店正門好靚古城牆門外形，入去是公園，然後先至係酒店大堂及房，可惜施工不能一睹全貌。返房前我們從後門走進了貴賓才可免費享用的 lounge，吃了兩件馬卡龍，拿了些水走人。

非常便宜的民居小店

【清明復活掃墓之旅】衰貓搶芝士

2025-04-08T03:47:00.000-07:00

凌晨 02:00 窗外傳來男人講嘢聲，04:25 傳來摩托車聲男人講嘢聲，5:15 可蘭經響起，好似一班怪獸咆哮，加上昨晚十一、二點的大人小孩都不停講嘢唔使瞓，😄來咗一個二十四小時運作的精靈國。5:30 終於沒人唸經，但隨之而來嘅係腳步聲、雞叫聲。6:00 終於開始有片刻寧靜，蜂蜂瞓陣先。

8:00，食豐富早餐，有好多種麫包。食完出去亂行，明明行咗出新城，點知跟住班小學生足跡隨意亂行又在 11:00 返到民宿樓下，天意見我地的行裝太重讓我們放低嘢。

chefchaouen

換衫出街食午餐，求其揀咗間好細嘅餐廳，但係上到去天台別有洞天，樓梯細但內櫳好大，我哋直接上天台，呢度可以見到泥土古堡，視野廣闊。點咗個蝦套餐、一個牛套餐，食飯其間四面八方都傳來可蘭經聲，飽到反肚又出動，行去古堡。

古堡算是藍城地標，但今日前來的人不多。上到頂層可以鳥瞰整個藍城，現場職員太悶冇嘢做，主動替我們拍照，很專業的利用手機拍短片。

古堡

去完古堡買杯嘢飲，龜龜冰咖啡，蜂蜂檸檬薄荷，坐喺路邊慢慢飲，飲完隨便行。咦！前面有個公園，蜂蜂叫龜龜入去睇吓，點知係墳場。就這樣，掃墓之旅正式展開。回教墳場很簡樸，不會像西方或香港墳墓，有照片有時更有簷篷，此處千篇一律矮矮細細的小墳頭，而且配合藍城大多漆上天空藍。

16:00 返到民宿摸門釘，坐喺處邊等伯伯開門，拍咗幾次門伯伯終於來咗，一打開門好涼爽。17:00 出門去咗睇城牆，有個露宿者模樣的人坐在牆，很怕我拍照的樣子。城門上可以俯視藍色小鎮，沿城牆碎石山而下去到溪邊食肆。呢度啲水果浸在水中，人們坐在溪畔食嘢，蜂蜂想食啲嘢先上西班牙寺，但個墨西哥卷制造需時，都係先上山穩陣啲。

西班牙廟外看日落

一路行一路出汗，途中有個男人坐喺地下用鎚子製作瓷片浮雕，好精致。大約 20 分鐘就到頂，西班牙寺已坐咗唔少人等睇日落。見紅磚圍牆冇位坐，蜂蜂去咗草地，拎個芝士出嚟食，即刻有貓貓出現搶食，嚇到蜂蜂即刻逃亡。

龜龜見有餐廳，去買咗個雜錦墨西哥卷配薯條，結果始終逃不掉衰貓的纏擾，龜龜吃剩一點丟給牠吃。19:30 先開始日落，對面山遮擋了視線，冇咸蛋黃睇，天空有些灰濛，但氣氛很好。

【清明復活掃墓之旅】恍如步進了歐洲

2025-04-06T19:15:00.000-07:00

1:45 已醒咗的蜂蜂再瞓到 6:45，早餐煮番茄、青紅椒螺絲粉配罐頭橄欖沙甸魚，步行去咗穆罕默德五世廣場，卡薩布蘭卡市中心，噴泉周圍全部都係白鴿，咦？呢個古老建築是什麼？龜龜查咗，原來係法院，膽粗粗行埋去試問可唔可以入內參觀，保安幾好人指咗可以行的地方。

拱門通道去到一間間房，律師、被告、證人、工作人員個個都好忙碌，只有龜龜同蜂蜂漫游欣賞佢的花園、古老建築。廣場周邊仲有不同的政府機構，都係古老建築，殖民時期建築，法國風格街道及樓宇，浮雕、高樓底、花崗岩石。

casablanca 市中心

哈桑二世街周圍行，過馬路，漫遊富人區，去咗個超高海藻棕樹大公園，步道很寬，錯落有序的棕樹一望無際，綠油油草地，乾爽天氣，陽光普照好舒服。沿着乾淨街道行去卡薩布蘭卡主教教堂，純白色大型建築物但冇得入去。

返去酒店，係酒店後面間路邊餐廳，11:00 食半隻燒雞加沙律結果 $72 一餐，有三個大包、半隻燒雞、炸薯條、炒飯、綠色的豆、雞內臟汁、紅蘿蔔，沙律。食到反肚。進食時見我哋間酒店的職員都有走來幫親。

70 Dirham 兩份午餐

返到酒店攞晒啲行李去到大堂，見成班阿聯酋機組人員同摩洛哥國家紅色衫女子球隊人坐滿大堂。拖住喼行出酒店酒店門口工作人員問我哋使唔使叫車？哈哈⋯⋯11 號巴士的車站轉個彎就到。

13:30 出發藍城，由主要城市去首都的路及綠化都很靚，條條天橋都有交通警，路邊開滿黃色、紫色花花，仲有成座嘅宜家傢私，經過電視出現嘅那種非洲樹林，樹死中求生半死不死的形態。

16:00 離開靚馬路開始進入三、四綫城市，路況變差，但開咗一段路後又是另一番景象，兩邊一望無際的小麥田，黃色、紅色、白色的野花超靚，靚過美瑛的田園風光。

前往藍城沿路風光如畫

司機 17:15 駛入一個小鎮停在一家燒羊肉店門口，濃煙滾滾，店員見巴士來即刻趕走兩架私家車，家羊肉店掛住幾隻羊，燒肉濃煙隨風飄揚，我哋 $8 買咗 1KG 草莓，司機食完飯開車冇幾耐，又是一大片農田。

農田之後出現一片又一片橄欖樹，仲有兩間小型橄欖加工廠，路開始彎來彎去進入深山的感覺，山路十八彎， 20:10 終於到達藍色小鎮。巴士一停車蜂蜂嘔個不停，龜龜居然幫蜂蜂扔嘔吐物，好窩心☺️。

夜幕下的藍城

落車相當清涼，有人上來問我地要唔要坐的士，龜龜話等等先坐的士，原來龜龜去買定後日離開的巴士票。小鎮人頭湧湧，3 分鐘車程盛惠 $30，一落車已有六個外籍老人等我地架的士，落車一見樓梯及石春路，蜂蜂的臭脾氣控制不住；在石春路拖喼係一大考驗，十來分鐘左右到達民宿，按咗幾次門才有一位 70 歲左右嘅伯伯來開門。放低行李咬住草苺夜行舊城，返來時好彩伯伯叫住我哋，差的唔認得民宿道門！

藍城我來了

【清明復活掃墓之旅】高聳於海上的清真寺

2025-04-05T23:35:00.000-07:00

香港時間 22:10 航機去巴黎，4 月 6 日清明翌日再翌日巴黎時間 6:24 到埗，8:10 分轉機去摩洛哥身Casablanca，3 小時飛機，去到 10:30 等過關。海關做嘢都幾慢，因為我們前面一家 5口查證搞好耐，所以蜂蜂懶醒揀咗另一窗口，點知仲慢，因為前面個人唔知問咩都搞咗好耐，反而我同龜龜好快，可能護照不同的關係吧。機場到處都係國王畫像大大幅掛係度，整個機場空蕩蕩，人少舖少。

11:40 去到買火車票前往市區，車站很樸素，4 條路軌，兩邊牆上黐咗一幅又一幅四四方方的馬賽克，咁就可以當掛畫真係夠特別。我們在 1 號站台上車，月台旁有兩棵營養不良的植物加碎石路軌。

casablanca 國際機場火車站

11:50，一架橙色鋪滿灰塵甩皮甩漆的火車以 0.0001 米的時速埋站。冇站台位顯示，見到門口位的人就蜂湧而上，火車的台階好高，有人落車跌親。11:58 ，車開了，沿途開滿黃色、橙色野花好大範圍好靚，太陽穿過玻璃曬在手上好熱，當我沉醉在野花中時，查票員到咗。我哋係尾站落車，越近市區的樓越多越現代化，但都係低密度樓宇及似內地四、五綫城市。12:45，火車到站，第一時間又去買定明天去藍城車票。

火車站行十分鐘左右就到酒店，在當地來講算是大酒店。酒店辦理入住手續時撞到成班機組人員，而且有一個同層，個麻煩內地男人搞到我地等咗好耐，龜龜話佢好似因為房價錢銀之類爭論中。擺放好行李落去換錢又撞到個機師換錢。

casablanca 市區平民小食店的三文治

14:11，搵咗間本地人小店食薯條雞肉包，龜龜話買好火車票有時間的話就去哈桑二世清真寺，行行下去到市集，市集有好大條死魚、仲有嘴咬自己魚尾的乾魚、乾雞，香噴噴的草莓、橙、香蕉、一車車的番茄、帶葉的洋蔥，雜七雜八樣樣都有。

再向右穿過民居去哈撒二世清真寺，呢度入唔到去，問保安，再行 4、5分鐘，看到旅遊巴，向住佢行實冇錯，結果兜成個彎先到，度度都用鐵架擋住，邊度入呢？買票位都幾隱蔽，只見有個男人企係玻璃門口，去問吓先知係呢度買票。

哈桑二世清真寺

16:00 導賞團才開始，我們先自行閒逛。嘩！有個本地女子拖住喼成箱閃令令的民族服裝換衫影相。高聳於海上的清真寺，外圍廣場好大，冇咩人，搵咗幾道大門影相，都幾靚。鈦合金門，有錢就可以任性，真主的寶座矗立在水面上，咁就有呢座海上清真寺出現，世界第三大清真寺，全世界最高的宣禮塔就在我哋眼前。銀色、綠色為主調，加上繁複精致雕刻，一般清真寺是圓頂而它卻是四四方方。有道又大又高的鈦合金門，據說國王來先會開。

行咗一圈去返門口等導賞團開始。Come 、Come，一個黑衫男人叫，成群人跟住佢向前行，去到閘口 QR code 入閘，盛惠 $240 兩個人，好貴。除鞋膠袋裝住自己拎，大殿𥚃分區，西班牙文、英文、法文，我哋跟頭先個黑衣男人導賞，英文團最多人。我哋依家置身於神聖嘅祈禱大廳，2 萬平方尺可供 2 萬 5 千名信徒祈禱，而大理石、白色花崗岩、雪松呢的建築材料上雕刻同繪畫咗好多不同的複雜幾何圖案、花卉等，超大水晶吊燈好多盞，但都係唔夠光，因為樓底太高太高，龜龜話個黑衫導賞的英文不標準好難聽，有好多唔知佢講咩。穿好鞋跟導賞下一層，呢度係公共淋浴間，靠牆位牆身好多水龍頭，而中間就係一個又一個好似蓮花的大理石都係有水出嘅。17:00 出嚟門口，大批民眾不用錢入場，應該是回教徒祈禱時間。

哈桑二世清真寺

口渴去買水，見到超市對面有蔬果店，買咗 11 蚊有兩個橙、兩個番茄、兩條大椒、一條青瓜，平到喊。去返清真寺海邊食橙發呆，只見清真寺圍場有兩個大排水口好似瀑布咁，小男孩在下面淋水，會不會是頭先嗰個淋浴間的污水排放口？。

沿着海邊走好多人，也有唔少做生意嘅，買咖啡、新鮮榨橙汁、一箱箱玻璃薯片，海濱長廊盡頭係廢墟。18:10 過咗馬路入去停車場是大型商場，好似沙田城市廣場咁多人，龜龜去超市買食物當晚餐，其間蜂蜂不顧隨身物品安危睡着了。龜龜買咗炒飯炒飯，有三塊檸檬片，多汁又清香，橄欖油炒豆角、紅蘿蔔、脆肉瓜、甜味香料羊肉，羊肉好奇怪有些好似牙籤一樣的一條條骨，食飽就返歸。

哈桑二世清真寺

【快閃尋花】包羅萬有的南部市場

2024-06-15T20:34:00.000-07:00

7:00 起身，酒店樓下便利店買早餐😀 ! 食完早餐就坐車去到根岸線出閘再轉車，呢架車好特別，冇人駕駛，成架車有水族館感覺，車頭駕駛倉被兩個小妺妹坐咗添，直奔車尾，正👍 冇人，哈哈。原來架駛倉有位坐。彭一聲，咦!原來個座椅係摺埋架，又俾人坐咗了，啊原來以為車尾方向嘅是車頭。

南部市場站落車行 5 分鐘左右，只見大型停車場已停晒來掃貨的人嘅車，水果、蔬菜、鮮魚、乾貨、肉類店，麵包店，⻄餐廳、日本餐廳，服裝店、飾品店，包羅萬有，價錢係我哋去過日本以來最便宜的，轉身就有一間好大專買夏威夷風格的店舖，的嘢好靚又便宜過香港同上次去嘅峇里島，正，蜂蜂掃左件防曬衫、圍巾，龜龜掃左條褲。還有一個可以看到海景的草地廣場，但被的板圍住咗。買刺身、海膽，食完又加買一份超大刺身，的嘢便宜過厚生食堂，又勁新鮮好味。

然後臨時決定去八景島再返鳥浜 OUTLET 狂掃鞋。八景島出名的是海族館，我們選擇睇紫陽花，花開的很靚，但種植排列次序唔太好，所以遠比不上明月寺。向海邊方向行返車站，見到過山車依海而建，傳來一陣陣尖叫聲。行人路抬頭望，過山車就在頭頂，哈哈⋯在我地返車站的路上，大量人群剛剛到八景島，去完水族館再睇埋日落，入夜再玩下機動遊戲都唔錯。

OUTLET 在鳥浜站落車，行十分鐘左右，商場好大又寬躺，掃咗四對鞋鞋，衫、帽。15:50 便利店買欖欖、啤酒、甜品上飲食廣場食。嘩!個飲食廣場好靚好大，無敵大海景，仲設有榻榻米卡座，大量遊艇停泊在碼頭，坐喺度嘆下午茶好正。17:00 坐車返新橫濱嘅車卡是女性專利車卡，但唔知點解好多男人坐喺度，後來才知道女性專用只限於繁忙時段。

返酒店 9 樓食燒肉，居然滿席，向拉麫館方向行，上咗安安燒肉，呢度都興拉客，樓下有幾個後生仔女拎住⺞廳的牌問人。當我地搵緊點上安安燒肉時，有兩個後生女係右邊衝咗上樓梯，咦!呢度上多層就係安安燒肉，原來佢哋兩個唔記得找錢。個

店舖似旺角放題，連裝修都係個地樣，抽風系統麻麻，哈哈⋯所以我哋會成身燒肉味。快閃紫陽花之旅就咁結束啦，聽日就返香港囉!

【快閃尋花】最冇料到的中華街偏偏最多人

2024-06-15T00:19:00.000-07:00

7:22 到車站步行去橫濱中央魚市場，一般日子不對外開放，咁啱俾我地趕上這個星期六對公眾開放，好開心。來到時市場已人頭湧湧，好多便宜海鮮啱主婦用，可以一次過買成個星期的材料。大多數批發海魚檔已執嘢準備收舖，剩返開鋪的並不多而且乾貨較多。

有個位好多人排隊，原來有便宜疏菜、水果買，8:30 一開放人們就直奔心頭好，唯有花檔冇人幫襯，枝豆連葉同梗一齊買好新鮮，我哋買咗蘋果、車厘子、紫蘇葉。買完嘢見有炸魚食就試吓啦，點知等好耐都未炸好，來來去去去洗蘋果，食完兩個蘋果、成盒車厘子先有魚食。9:09 食完炸魚，一分鐘左右就到厚生食堂，店舖得一個身手靈活的阿叔做嘢，所以要等 60 分鐘先有得食。的客加埋我地都只不過七個而已，刺身唔使煮都要咁耐。
終於 10:05 有刺身食，魚、海膽好新鮮，開⺞，龜龜點的係中華冷麵上放咗哋刺身，咦!睇到唔開胃。10:30 食完剛行出去見前方好似有店舖，原來呢度有食街，有幾間食肆及一排乾貨店、雜貨店，買咗日式蘿蔔、鰹魚、紫菜、綠茶、碗，滿載而歸。

步行去地鐵站，又路經只有一個人的差館，哈哈⋯⋯ 警察不在，可能去咗食飯。11:29 在 SOGO 附近飲咖啡，再返酒店放低戰利品。13:00 再坐車去外交官府邸，落車在車站月台往山坡上看，就可見到樹木中錐形屋頂，⻄洋風格建築嘅外交官之家，步行十來分鐘斜坡位右手邊就係，門口種咗好多花花。
到外交官之家(原址)紅瓦白牆綠窗，童話風格，換鞋入去參觀，兩層設計，二樓飯廳的枱凳櫃杯、碟是屋主的原物，依然保存的相當新，睇來靚嘢零舍不同。屋外花園的老樹又大又高，炎炎日子居然冇蚊，正。

上幾級樓梯去到車站遠望到嘅錐形木建築，山手⻄洋館，日本明治43年 (1910年)，本身建於東京都澀谷區南平台，依家搬咗來呢度，雖然感覺不是那回事，但館前大片的庭園，滿園月季，散步很寫意。屋外屋內的木很有歷史，埋邊的空間好大，飯廳、書房、會客室、主人照、床、仲有一張個個年代古舊的地圖，哈哈⋯⋯中國寫住支那。浴室很古舊，係電影入邊出現嘅個種四隻腳浴缸，最底層出口同入口位側邊加建咗落地玻璃屋喫茶室。
然後步行去中華街，不得了，人山人海，店舖也多，小籠包、生煎包、北京烤鴨、廣東點心、炒飯、中式麵食，甜品。而茶樓點心、小炒間間鋪都玩放題，哈哈⋯⋯第一次見，有創意。龜龜被小籠包吸引住，買咗四個坐低食，麻麻地，皮唔得。

中華街行來行去行反咗方向，都幾大呢度，又要返轉頭先至去到山下公園，綠樹成蔭、花香四溢的園區裡想悠閒散步都难，玫瑰園、海滂好似年宵咁多人。路邊恐龍世界一樣的紫色大花花埋邊有蜜蜂，龜龜當然又係要拍寫真先走啦。
前方停泊著一艘大船，原來是昭和時代的豪華客輪「冰川丸」，正，可以上船，盛惠 300日元/位。登船啦，內部共有四層，全都維持著當時的模樣，駕駛艙、船長室、船員室、餐廳、不同等級客房、最高級客房係查理卓別靈住過嘅。

17:30 到拉麫館，想自製拉麵的龜龜發現只得日文版 APP 唯有放棄，隔離枱香港旅遊團導游好繁忙咁教團友撳乒個乒個掣先可以。冇得玩就落去，呢層是复古的日本街道，有衫、鞋晾係處別添，有舊式電單車停泊屋外，有龜龜仲意嘅舊電話亭可以打電話，再落一層就係拉麵面店，求其揀咗間冇人排隊的拉麵店入去食居然有驚喜，利尻島的醬油勁香面夠彈牙五花腩燒肉好味，想試多間的蜂蜂拉埋龜龜又揀咗間冇人排隊嘅麫館，豚骨湯加好瘦的肉肉味道一般、面質一般。每間鋪都係等我哋剛剛出嚟就排長龍了，哈哈⋯⋯抬頭向上望係假嘅藍天白雲，食飽上去不二家掃零食。

【快閃尋花】500 円四杯啤酒

2024-06-14T00:07:00.000-07:00

6:00 起身，太陽已好猛，7:13 上電車去長谷寺。出閘步行前往大約幾分鐘，7:26 到長谷寺，得六個

人排隊，有個北京女士獨自一個人來，龜龜同佢交談，原來佢冇去到明月院又冇見到富士山，在沙灘

上被江之島擋住左，同埋佢只係停留鎌倉一日太趕。仲要去天津轉機也不是在羽田機場落機，佢個

機場遠過我哋過鎌倉。

我哋排用卡俾錢隊，原來係部自助機，人工售票快過我地好多。8:00 開始售票，而人群從側門入去，正門掛住個大紅色燈籠，側邊仲有棵大松樹。紫陽花要再另購票，成山都係花同人，清晨的陽光都很火辣，蜂蜂已出咗成身汗，隨便行，又見洞窟，祭祀著女神弁財天，洞窟中雕刻著弁財天的隨從，名為十六童子。

其他的洞窟中安置著許多小型弁財天人偶，全部都是石雕，很原始，洞窟內有的位要彎低身先可以過，洞內好涼爽，長谷寺並不算大，很快我哋就走了。

8:55 已到車站返亷倉酒店，步行街上巧遇一只大狗狗🐕 任摸，佢主人都不介意。10:25 到酒店原來在新橫濱電車上蓋 10 樓，不用行出街，好彩龜龜回頭一望認出咗。寄存行李係前台衝去 6 樓 GU掃貨，11:18 食午餐，揀咗間有鰻魚飯的⺞廳，點知入去點⺞居然午餐冇鰻魚，全部都係食雞，店舖高檔坐得舒服招呼熱情，一個定食港紙 $50 來蚊😄 香港冇 $500 港紙行唔到出去，點多份沙律，店員話有沙律唔使再另叫，正。
食完飯龜龜又即刻搵咖啡飲，上島咖啡店叫一杯因唔知店員講咩😝 誤會咗居然叫做兩杯齋啡，芝士蛋糕好味。

一入去導賞已叫大家地試吓⻨、啤酒花，啤酒花好香，跟住又有一番榨的⻨汁同二番榨的⻨汁試飲，一番榨⻨汁顏色深且香甜，二番榨的⻨汁顏色淺及淡味。導賞講⻨只壓一次，再加入啤酒花煮(香味、苦味、泡沫的來源)，加入酵母(酵母食晒啲糖釋放二氧化碳、酒精)發酵一星期入罐，低溫儲存繼續發酵一個月，入罐出售。尾聲試飲 4 杯啤酒，$500 円抵到爛，個導賞連客人買手信都全程陪伴。

16:20 去到車站返新橫濱，好熱，生麥街烈日當頭熱力滲入皮膚，放低手信又再出去。17:00 落車向紅磚屋出发，一出馬路邊有許多歐陸建築物，行十來分鐘去到倉庫。有 1 號館和 2 號館兩座建築，建築外觀依舊維持著紅磚建築的歐式風格，而內部則改建成商店、餐廳。紅磚倉庫賣廢手信，沿着海邊漫游，18:00 食拉麵、餃子，美食廣場人流極少。

回酒店時亂行到纜車位，纜車從櫻木町站前連結新港運河公園，車廂玻璃好似墨鏡，遠睇睇唔到入面，近睇就見到，雖然話有二十幾度但冇香港咁熱，仲有涼風，漫步河邊睇吓機動遊戲、夜景好靚好舒服。對面河有個好似餅一樣的機動遊戲，升到好高好刺激，連佢嘅摩天輪都靚過香港，LED 燈的顏色、圖案勁多，蜂蜂決定過去望吓，一轉彎見到有隻大船停泊係度，好巨型，日頭有開放可以上船參觀，向前行幾分鐘就到游樂場，可逐樣機動遊戲直接買票上去，玩嘅人並不多。

行去地鐵站時巧遇昔日維修船隻的船塢，現已改裝成商店，好得意，蜂蜂第一次見，感覺似盜墓迷城的場景。搵地鐵站時又路過橫濱美術館，似一座廢棄的大平房，畫滿塗鴉，步行三分鐘左右去到港未來站，過馬路時佢的車道超大，四條行車線。坐車返去時趕上放工高峰時間，係港未來站上車出閘再轉車，綠色綫橫濱站站內同時有 6、7 個站台可能夜咗，冇直接到新橫濱站的，等咗幾班車龜龜發現唔對路，唯有上車後再轉車。

【快閃尋花】整個明月院都是藍色紫陽花

2024-06-12T19:57:00.000-07:00

5:00 已被強烈的陽光照醒，6:00 起身。7:00 出發明月院，車站便利店買定早餐排隊食，北䥥倉落車步行上去，呢個係一個好細好古舊的小站，似漫畫情節畫面，兩邊都係⺠宅、樹木。沿着⺠宅漫步而上，各式各樣的⺠宅種滿花花草草樹木，好靚，成個小森林咁，密集的居⺠區。

7:47 開始排隊，前面已經有成堆人排隊中，目測都好多係日本人。條路不停有私家車、電單車出去，我哋只能盡量靠住的植物旁邊排隊，嘩!好大隻蚊咬蜂蜂，龜龜幫手噴蚊水，以咁多植物來講，相對於香港已經算少蚊了。枯燥的排隊令龜龜好忙，植物上有鬥雞眼長腳蜘蛛，兩隻眼粘埋一齊沒見過，竹節螳螂、蚧殼蟲、蝸牛、白色的蛾。

8:30 開門蜂湧而上的大量人群在長長的石梯個個齋影個景😄 ，蜂蜂行咗幾次終於見有個日本年輕女子穿住飄逸的中國藍色絲裙衝咗去石梯位影相，蜂蜂又跟住衝入去影相😜 。成個院區都是藍色紫陽花，大過蜂蜂個頭，院區唔大，四處都係人，唯有石洞古墓冇人流，好特別，但圍住咗唔俾入。

一出明月寺，右邊小溪一朵盛開的藍色紫陽花吸引住龜龜，唯一嘅一朵係樹林小溪中格外顯眼。沿住宅區去天園行山，沿途都有紫陽花，山路原始樹林茂盛，山上有好多怪石、山洞，山洞裏有墓碑、神靈，呢度好興將神靈放入山洞，哈哈⋯⋯

12:00食午餐，⺞廳全是日本本地人，門口蛋糕展示櫃上放置兩盆大大的紫陽花插花，白色溝藍色隨意擺都好靚。店舖似家庭式經營，年過花甲的父母在廚房煮嘢，肥仔仔同媳婦在店面，媳婦負責收錢。個個都叫漢堡扒⺞，我同龜龜兩個都食咖哩牛腩，蜂蜂喉嚨唔舒服食不知味，我哋入⺞廳時冇人，我們入坐後滿晒席，睇來我哋好旺鋪噢!

12:30 行返去小町通過馬路時見到八幡宮都幾靚入去行咗嚇，感受古都氣氛，小町通好多人好似去咗維園同花墟。13:20返到車站出發去江之島 14:00 到鎌倉高校前站，下雨了，冇在人氣最高嘅位打卡，揀咗一樣有海景鐵軌的位留影。

沿海邊行去江之島見有 familymart 買咗啤酒、薯片、乳酪坐喺黑沙灘邊食，呢度好多搭緊棚的沙灘⺞廳，為炎夏而準備，到時就會好似夏威夷海灘咁。食完唔想帶住的垃圾通街走的蜂蜂又返去 Familynart扔垃圾，遇到一個同樣又專登來扔垃圾的男人，哈哈⋯⋯

向江之島出發，馬路對面與超少雪的富士山留影再橫過馬路去到橋個邊，行多十幾分鐘⻘銅鳥居出現，稀有的烏居種類。直上岩屋，途經章魚餅舖，$1500 円買咗個混合口味，有章魚、蝦、蠔，但完全冇肉食嘅?得蝦殼同面粉味精味，咦!失望!去到岩屋時太陽出嚟了，要付費進入，紅色空中步道好吸晴，入口有工作人員俾蠟燭，天然海浪侵蝕的洞穴已有幾千年歷史，好涼爽，入口有介紹岩屋的歷史，第一個岩屋𥚃面放咗好多石頭碉刻而成的神像，前面仲有兩個大窿窿，唔俾遊客進入，有的位有岩洞水滴落來，沿住岩石鋪咗嘢引流至兩邊以免滴在游客身上，第二個岩屋里有條海龍，假假的仲發出怪聲嚇小朋友，應該係後期放入去唔夠歷史悠久，睇完岩屋海邊漫游。

海邊可以見到岩屋係由兩座山而成，成個⻄蘭花咁樣。仲可以遠望到富士山，三三兩兩的遊客都在海邊停留，有的跳舞、有的影相、有的釣魚、有的發呆，臨走時我哋係海邊的小池見到河豚🐡、龜龜話應該係俾海水衝咗上來。原路返見到一只又大又黑的烏鴉，努力用嘴想開醬油，哈哈成箱調味料放喺門口地下。

去到弁財天仲見世通商店街起點，揀咗間店舖入去，但四面都係牆冇景睇，門口有景睇位已俾人坐晒，龜龜決定向前睇吓有冇其他食肆，蜂蜂見有人起身即刻坐低霸位，18:00 食晚餐，燒魷魚🦑 套⺞、燒貝類、刺身套餐有配白飯魚，當然不少得龜龜的啤酒啦。今日喉嚨不適，刺身下的紫蘇葉同白蘿卜絲狂食下火去感冒，一轉身見到咸鴨蛋，已經快要落曬。返到酒店終於記得有免費嘢可以攞，免費飯團、超細粒蜆肉味噌湯，好味。

【快閃尋花】機上年輕男子發羊吊

2024-06-11T18:30:00.000-07:00

8:45的機，機上居然有個二十幾歲年輕男子發羊吊，反白眼、流口水、手抽搐，好像電影情節一樣，空姐廣播問機上有冇醫生，有個男醫生出咗來幫手，有驚無險，醫生建議佢落機後去醫院檢查。

從羽田機場出嚟，龜龜買咗⻄瓜卡，坐到橫浜三百幾円，出閘再轉JR到鎌倉站$363円。出鐮倉駅轉左直行成條都係步行街，幾分鐘的路程去到Tosei Hotel，酒店門口是亭園式入口，種了好多似通菜咁樣的植物，房間挺大，但設計唔好，行李箱要搬開的枱凳先有位擺，窗是和風式。

放好行李去小町通散步，經過雜貨鋪買咗欖欖先至$250円。經過郵局、文具店買咗郵票、明信片。馬路中央有條行人步道，兩旁長滿綠葉的樱花，如果4月一定好漂亮，長長的小徑一方有鶴罔八幡宮的襯托。右手邊有個教堂，門口的紫陽花開的好靚，佢居然整點時會響。

呢條街左手邊入去係小町通，人頭湧湧，大多數係日本本地游客，吃吃喝喝賣手信的街道，5點幾食晚飯蜂蜂白飯魚加海膽，龜龜白飯魚加三文魚，⺞廳除咗我哋其他全部是本地客，$2500罔一個丼有的貴，名物白飯魚並不好食。

返回酒店，一早起身的龜龜20:29就瞓咗覺了，忘記去攞酒店嘅免費味噌湯同飯團。

【尋幽探靈】告別大濠公園

2023-10-06T17:47:00.000-07:00

7:00上酒店 13 樓食早餐，蜂蜂著酒店拖鞋唔俾入，要返去換鞋。以為係自助早餐，點知係一個套餐，龜龜美式，蜂蜂日式。

8:38 坐 JR 去大濠公園， 8:53 步出 3號出口，出咗地鐵行兩三分鐘昨晚個湖已在眼前，沿湖慢步，橙色浮見堂庭一對情侶影緊相，此庭休息欣賞湖景很寫意，湖面成群鴨鴨𣈱游，公園高大的松樹形成一片片綠蔭，乘涼遮陰好地方。

行咗一圈出去，過馬路上斜路去西公園，斜坡有教練帶住幾個學生做訓練，教練一聲令下，幾個學生起跑，短綫衝刺。西公園最高處係光雲神社，有人群做更一的儀式，藩主嘅高大銅像同特別嘅水牛頭盔好吸晴，隨便走又見到狐神社，有個女人係度打掃，蜂蜂唔好意思坐低影相，怕人哋覺得對神靈不敬。

路邊大型畫唔知想表達啲咩？有貓、狗、魚、熊、生滿毛毛嘅人，顏色鮮艷畫風大膽。再向下走見到母女黑貓，呢度又有神社，路邊攀藤植物廢屋，超有神祕感。行多兩步，咦！一塊細爛草地有架車，明太中毒😄！昨晚個架擺檔買嘢嘅小販車，原來佢住呢附近。

沿海邊走一座吹薩士風特大壁畫牆畫得好靚，返到魚巿場，冇咩好睇，龜龜買咗真空包裝八爪魚同魚。11:26 揀咗間多人嘅餐廳食刺身定食。13:15 返到博多築紫札口出，回酒店攞行李再坐 JR 去福岡空港再轉國際線機場巴士，一出地鐵站已有巴士，好多人，呢度啲巴士明知去機場都冇設計放行李位，人流將我哋逼去兩卡車嘅接駁位😅。此時傳來車上廣播，話此位危險不適站立，只見腳下個半圓會轉來轉去，係有可能跌親，幽靈之旅咁就結束。🤣⋯⋯

【尋幽探靈】64 年元祖拉麪店

2023-10-05T17:00:00.000-07:00

6:00 醒咗，龜龜出露台見到紅霞，太陽 6:30 開始慢慢係海上雲層中升起，今日坐飛機飛返福岡，昨日前日最緊要嘅兩日都有雨😹。9:33 分嘅巴士去機場。忘記巴士沒有找贖，又忘記換 1000 圓紙幣，搞到蜂蜂下車後要飛奔到機場商店換 1000 圓，巴士司機面露不悅。

14:35 到達 MIYAKO 酒店，房間好大，對住博多車站，只見大量人群好似跪喺車站唔知做乜，邪教！

15:21 到大濠公園一出地鐵見到有魚市場，20 分鐘行到去發現係寫字樓，魚市場可能早上才在最底層開，有郵局龜龜又走咗入去買郵票。16:13 入咗間似車仔面檔嘅小店食拉麵，元祖長浜屋一間歷史悠久的麵檔，開咗 64 年，個茶壺好大但綠茶凍晒，麵的湯唔夠熱，豬肉片碎好咸，超多葱花，紅色姜絲好好味，麵好新鮮。佢廚房好大間開放式，左手邊個係運輸帶洗碗機，店員全部係南亞男士。

然後向前去到超市、二樓有護膚化妝品、三樓好似 12 蚊店的鋪頭買咗幾樣野但買單先 440 圓，買咗盒刺身行去公園，公園入口兩旁種滿荷花，但已冇花了，園內係一個又一個草地，搵咗個冇人嘅草地邊梯級位食刺身，哈哈⋯⋯冇垃圾桶只好去廁所清潔，仲要拎住個垃圾通街走。頭先搵唔到凳，原來廁所側邊有，過馬路穿過民宅，18:30 去到湖邊，湖對面藍色橙色燈光倒影湖面，好靚！好多人跑步、散步，呢度未夠 18:00 就天黑了。

游完湖去搵嘢食，行行下又返到元祖長浜屋條街，路邊有四檔路邊攤坐晒人，衝過馬路去到蜂蜂想食海膽嘅小巷，發現只有兩間鋪開門，而且門口冇價錢都係放棄好了。19:30 搵咗元祖長浜屋隔離鋪，燒螺、扇貝、蝦，一份海膽、自助壽司食，的貝殼類勁鮮！

【尋幽探靈】森林裏的軟體生物

2023-10-04T18:00:00.000-07:00

7:30 過去食自助早餐，枱面已擺定一細舊鯖魚、餃子，嘩😳唔係自助咩？另一邊自助位有白飯、紫菜、醃青瓜、黃蘿蔔、梅、味噌湯、牛角酥、小面包、乳酪、罐頭雜果，茶、咖啡、牛奶、橙汁，相當飽肚的食物。

排完毒衝過馬路去花店買便當🍱、咖啡、水，9:32 坐巴士向白谷雲水峽出發，等巴士期間發現前面有間木製品店，比我地睇開個間便宜。10:04 係小原町落車再轉車去白谷雲水峽 10:20 車。10:50到達，噢😦條褲濕咗嘅？漏水？原來個便當有汁流出來，龜龜提議用屎袋裝住。哈哈😂⋯⋯的

白谷雲水峽小木屋買咗票先，路邊就可見到大瀑布，水花四濺，好清涼。我們踩著大岩石上山，行兩三分鐘已見古杉加漂亮的青苔，仲有隻腳腳勁長的盲蛛。左邊有吊橋，龜龜影完相揀咗右邊梯級向上走，第一棵彌生杉麻麻，仲要原路出番去大路，呢度浪費咗唔少時間。

第二棵二代大杉唔錯樹高 32m 底部樹乾個大洞蜂蜂可以爬入去探秘👍🏼，可以近距離睇到舊杉已枯死如何生出第二代，前面嘅觀景平枱係木，可以俾我哋坐低食便當，冇人冇蚊冇蟲，👍🏼。呢度向前行，好快見到夫妻杉品種的樹，佢似八爪魚咁趴喺度，滑碌碌天然打磨土黃色軟體生物，隨便走到處都是蕨類、苔蘚，摸上去軟棉棉好多水份，廢樹桿、岩石、有生命的樹到處都被佢哋包圍，神秘又漂亮。

呢條路佈滿生青苔嘅大杉樹，大樹根，目不暇給，不知不覺行到去三本足杉，樹高 24.2m，三隻樹桿似人類劈🦵腿張開好遠，旁邊有溪，我哋需踩著石春過溪，如果冇指示絕對唔知如何前進。廢木、石頭、溪水、樹根、爛泥、枯葉形成原生林步道，同香港用磚砌成的步道好唔同。

繼續往深處走，幽靈村莊出現🤓，錯縱複雜的樹根落葉路，兩邊有三間超大樹屋生滿青苔，再向前少少有條小橋，溪水係青苔石頭上流過，被青苔重重包圍嘅拱門，童話世界一樣。之後仲有三本槍杉、奉行杉、二代杉、七本杉、女神杉，已冇時間慢慢欣賞。

途中遇到上山時嘅北方一家三口，爸爸話以我哋個速度去唔到太鼓岩，14:30 開始衝上太鼓岩，我哋飛奔登頂，三秒打卡即走，一舊大石望遠景，冇咩特別。衝、衝、衝⋯⋯小跑飛奔下山總算可以 15:40 衝到巴士位等 16:10 最後一班車，等車期間見三個露營者，有一個帶住導遊牌，團友只有兩個人，原來呢啲都可以開團。

巴士開開下 16:30 馬路出現🐒，司機專登停一停俾遊客影相，我哋直接坐到碼頭總站先落車，個碼頭冇咩好睇，返轉頭見有間介紹屋久島歷史、景點的館入去去完廁所好快閂門，行去巴士站18:00 返到中央，酒店冇人迎接，連的拖鞋都收埋咗，自己走去前枱同個英文唔錯的後生仔話晚餐19:00 食，佢居然連早餐幾時食都唔問我地。

【尋幽探靈】沿着廢棄路軌尋找繩文杉

2023-10-03T17:25:00.000-07:00

凌晨三點幾起身，龜龜食咗紅豆包，蜂蜂食咖哩包。行出馬路巴士站，天太黑巴士牌冇燈行過龍又返轉頭，咦！巨型機動車停車場，就係呢度了。見巴士就揮手佢不停，反而去咗我哋酒店門口停，我哋飛奔而去被司機告知不是呢架。呢架應該係報咗團個的人上嘅，我哋酒店好多人上咗去。

又回來巴士站，4:36 又截停咗架巴士。上車後肥佬又話我哋唔可以坐呢架，要收錢 640 日圓一個人。呢架應該係酒店職員講嘅班車，屋久島的交通都幾煩，有唔同公司啲巴士，我哋誤會咗係我哋買三日票的巴士公司。繼續等由碼頭四點幾開出巴士，5:20 來到我哋呢個站，希望架車準時啦！

Yeah ✌🏻準時到咗，成架車都冇人，去到屋久杉自然館全程只有八個人上車。落車買票兩人4800 日圓，售票員講個背囊可以咩咩咩😅聽唔明，跟住有個北京友行埋嚟話：背包可以放地下，當排隊用。哈哈⋯⋯唔怪得地下全部都係包包啦！

5:40 開車上山去荒川登山入口，落雨。6:20 開始這個 20 公里、耗時 10 小時嘅長征，廢棄鐵軌🛤️就在這停車場邊，沿着鐵軌行五分鐘左右就穿過山洞，山洞後都係沿鐵軌行，深山裏有廢棄嘅小學，依家只係一塊冇大樹的平地。一旁有個休息亭，有瓦遮頭，之後的路唔會有了，龜龜決定係度食嘢。

便當係酒店為我哋准備，四個便當 1400 日圓，我食個份有兩個飯團🍙、兩舊炸雞、一舊炸土豆、一個麻薯，龜龜有靖魚、炸番薯、飯團、麻薯，味道唔錯。特別係飯團中間個粒紅色小脆梅，炸嘢凍左就差的。俾龜龜試吓我舊炸土豆，可愛的龜龜話：你舊番薯軟身過我個舊好多，😹😹我舊係土豆而不是番薯。

8:02 見到三代杉，黑蒙蒙嘅樹洞睇唔出點算三代。繼續行廢鐵軼，鐵路係舊時為砍杉樹運輸而誕生，唔知行咗幾多個鐘，見有個向右分叉路口寫去繩文杉，就開始向上爬石頭路。踩著又大又長遍地橫生的樹根趕路，高底起伏。古老樹根石頭路加埋一直落雨仲要趕路趕車，都幾辛苦，但卻好壯觀。

抬頭不見天日，樹木好高，加埋多雨水先至咁多青苔。沿途都有好多導遊，一個導遊帶兩三個客登山。第一棵遇到啲係翁杉、一棵雜草叢生的枯樹枝，樹徑大外型睇唔出似老翁，太多雜草，第二棵遇到心形樹洞，靚、大、蜂蜂想入去，但洞內個對北京情侣狂影相加埋雨勢大，龜龜叫我繼續趕路，第三棵大王杉，好高。

第四棵夫妻杉、呢棵好特別，土黃色樹桿，兩棵樹連埋一起，摸上去滑碌碌，而且就在路邊，正。衝呀！時間緊迫，向繩文杉衝，繩文杉只能遠觀，觀景台有兩邊，距離老杉好遠，佢係一棵生滿一個個球球嘅高大老樹，係呢度我哋重遇小瀨田坐錯車嘅台灣男生情侶。

回程的路雨不停更落，又大，我哋係心形樹洞裏食飯團，居然冇蚊，正！呢個樹洞真係好大，應該有 400 呎，天氣唔好食飽就趕路，臨尾個段廢軌巧遇鹿鹿，本身佢企左係廢軌上，但佢一見到蜂蜂即刻衝上山，停在森林中好奇咁望向下面的我哋，佢條尾白色一個球球，身灰黑仲未有梅花斑點。

15:40 返到屋久杉自然館，好大雨坐返全日通巴士，點知未到酒店就叫我哋落車，話已是終點站，需要再轉車，我哋步行返去，好大雨，短短十來分鐘路程已淋濕曬。原來打算去安房個區食晚餐但太大雨蜂蜂選擇放棄，去花店雜貨鋪買個便當配杯麫算了。

睇咗一輪都係不想食凍冰冰的嘢。龜龜買咗啤酒加脆柿我哋過馬路回酒店，一入門口工作人員迎接，問我哋幾點食晚餐，龜龜答出街食，佢表情有啲奇怪，雞同鴨講完之後未搞清楚，好彩有個後生仔英文唔錯，原來住宿包晚餐，龜龜訂酒店都唔知😅😅晚餐龜龜將茶杯當碗用、魚當全蛋，味菜係魚包住的蛋呀！😹

【尋幽探靈】草莓蟹

2023-10-02T17:47:00.000-07:00

7:30 familymart 食早餐，龜龜又食油麪，蜂蜂又食飯團。又見到左手邊白色襯衫的男人飲住杯凍啡改功課，昨日坐喺我後面個中年肥佬又係度，前方十字路口咖啡色袋嘅西裝友今日換咗對黑皮鞋等緊過馬路，馬路中又出現豆零爭肥婆拎住兩袋嘢過更馬路。

返酒店排完毒去咗個神社行下，裡面有個藩主家族，墳墓好多蚊，墳上有幾個大石疊埋一齊做裝飾，旁邊嘅五重塔顏色鮮艷，隔離個小廟有串超大佛珠，一拉佢就劈叻拍啦，好似放炮仗。大樹下個僧人係碎沙石中掃落葉仲要用手一塊塊手執起的葉。

10:00 坐車去空港線內陸機福岡去屋久島，10:45 喺機場食牛餐，牛牛飯，入閘之後行下商鋪，國內線店鋪多。去到車81你號閘口先知仲要坐接駁巴士好彩早少少落去，細架短腳螺旋掌內陸機，巴士都大過佢。14:00 到達屋久島機場，好細好舊好少人，落機徒步出到去，行李都係人手攞落嚟嘅。

兩點幾上咗巴士，點知錯咗方向只好係下一個站落車，一落車就係小瀬田郵局，可能冥冥中有注定，龜龜搵咗幾日郵局都未搵到咁樣俾佢撞中🤪。要等一小時先有環島巴士，寫下明信卡食下明太子、帶子裙邊時間都過得好快。有兩個男人同我地一樣坐錯車一齊係小瀬田站等。

15:30 上巴士又去返機場，唔同方向的巴士係同一站停，玩嘢😅。去到 Green 酒店開始落雨，和風式間房好靚大花園加全海景，露台有化妝枱，放好行李出去行吓，咦好大雨。一過馬路就有間花店，埋邊有青菜、水果、調味料、酒、便當，日用品賣，老細係個中午大叔好好笑容。冒雨繼續行咗去間手信店，好大間，的屋久杉手工品價格不菲，有毛巾、衫、明信片、草餅、咖哩、包裝魚賣，18:00 酒店食晚飯所以行咗一陣間就返轉頭。

晚餐相當豐富，炸飛魚、凍蟹（旭蟹），龜龜話似草苺，凍九爪螺、魚魚刺身、酒、豚肉、甜品、正😄⋯⋯

【尋幽探靈】直擊開放式公廁

2023-10-01T16:26:00.000-07:00

晴天。星期一。溫度舒適似秋天，7:00 起身行兩三分鐘去 Family mart 食早餐，龜龜食炒油麪加咖啡、蜂蜂食明太子飯團加咖啡，坐喺轉角吧枱望住人來人往的紅綠燈十字路口，日本人的穿裝髮型都好企理🤪連昨晚河邊個露宿者都唔算太污糟。坐喺我身邊的幾個食早餐的人好奇怪，由我哋來到食完走佢地都仲係度，唔使返工咩？

排完毒行去JR，條路好多人，似香港返工一樣，我哋逆流而上🤓，福岡都算大城市，返工時間擁擠都正常。8:43 買票 8:50 上車，總站門司港，下車的人流勁多😹喪屍列車，車廂溫度熱過室外。坐咗個來鐘車到達，一落車眼前就係古老的建築，木材唔知經歷咗幾多個春秋，連燈都超古老，正門是古老洋式建築，也很漂亮，門前的噴水池冇噴水。

人少、藍天白雲海邊漫游超正，坐喺海邊飲下嘢吹下水，但有隻船排放的廢氣油味好臭，有名的藍翼橋，一群人等緊橋合埋過去對面。海邊有商舖食肆並不吸引，龜龜被海邊兩條香蕉人吸引。行多幾步去到北九州市立國際友好紀念圖書館，係一座複製中國大連的歐式建築物兩三層樓高，似迪士尼城堡，空蕩蕩冇人，埋邊有間中式餐廳開咗門，其他冇開。

路邊有架昭和 15 年既火車俾人任影唔嬲，可惜冇得上車廂。再行睇個樣都唔似有食肆，11:42 喺一間家庭式餐廳開餐，二代目清美食堂，兩層嘅小村屋，呢度的人好大食，的套餐有飯又有麪，店里有個大煲，煲內有大塊豆腐、牛雜，龜龜自己裝咗塊豆腐配黃芥辣，噢！豆腐好入味配黃芥辣有創意，其實可能係配牛雜用😹龜龜搞錯左。枱面任用辣椒醬勁好味，青檸皮加青椒攪碎物體，蜂蜂個套餐係咖喱飯配豚肉芽菜拉麵，龜龜係豚肉芽菜拉麵配白飯醃蘿蔔加咖啡，咖啡配一小包朱古力。呢度唔興搭枱，好多人來咗見冇位就走了，客全部都係本地人、地盤工、師奶、西裝友生意超好嘅夫妻檔。12:20 飲食完一出門口，嘩！好多男人等位，唔通呢度冇限時間食午餐？如果香港午餐，一小時等到夠鐘返工都冇得食。

沿着海邊走有廢鐵軌、有神社、按摩背脊椅、八爪魚🐙滑梯。咦！個廁所圓形冇門嘅，開放式馬路對面都可見到嘅兩個尿兜，大便房有門，個 40 來歲的男人痾緊尿，仲係男女共用。行多幾百米很快去到海底隧道入口，搭乘電梯落去，入口處有當地的景點介紹及印章任玩，真的就是一條人行隧道，兩邊都是牆，牆上有的魚魚裝飾，冇太大震憾，只能靠想像，想像自己在海底下 58 公尺的地方，不過都佩服日本人喺 1958 年就可以開通呢條海底隧道，技術高超啊👍🏼👍🏼。好快就由門司去咗下関，隧道內有隊單車隊跟隨我哋，似旅客韓國人，但伴隨佢哋左手邊個大嬸的裝扮唔太似踩單車，但一路跟隨佢哋同步行，哈哈⋯唔通係教練？點知去到下關出口時大嬸一人獨自返轉頭，咦🤔️！大嬸怕曬喺個隧道來回當散步呀。

一出馬路對面就有五架大炮迎接我哋，擺放在海邊，海邊小公園的松樹種得好靚。出口寫住唐戶市場逢星期五六日先開門，向右沿海邊行見到橙色鳥居係供奉狐仙，過馬路要按掣先轉綠燈，因為人少。一排排橙色鳥居寫滿捐獻者名，呢度可以高處欣賞跨海大橋，冇人景又靚。14:00 同狐仙影完相繼續走，一間神社出現，入門的鳥居是冇顏色個種，佢叫赤間神社，上梯級鮮紅屋頂配白色大拱門超級吸睛，原來道門叫水天門，佢道巨型黑鐵門都好靚好有氣派。咦！有團講普通話嘅，仔細聽聽，係台灣團。出咗水天門向右行幾分鐘去到日清講和紀念館，昔日令河䐁魚揚名國際嘅春帆樓餐廳現時已變成酒店，左邊係紀念館，似民宅，館內完全冇人，冇冷氣有風扇，對於啱啱行過嚟的蜂蜂來講有的熱，嘩😆入面啲字畫、當年簽的條約全部是真跡，第一長見展覽係用真嘢👍🏼。談判的枱、凳連的痰罐都在，痰罐成個花樽咁大，哈哈⋯⋯

沿着李鴻章被人刺殺的路上到廢山上的蕂原戶江紀念館，一座廢棄的民宅，門前一大片草地，小門緊鎖，行埋睇，上面寫住要預約，真巴閉😎，拜拜！而佢隔離嘅白色兩層村屋擺設地好詭異。15:00 去到唐戶市場已收檔，啲檔口連地都已清洗，樓上店鋪收 14:00 有的收 15:00，同河豚🐡影完相向敦煌食店行去，行下商鋪喝嚇酒食嚇雪糕，之後去唐戶商業街水靜鵝飛，先知原來 16:00 大多數已閂鋪，為咗等蜂蜂想食嘅海膽飯開鋪就要再等等，抬頭一望見到又有神社，打發時間入去龜山八橎宮神社逛。冇咩特別，優點係可以高處望唐戶港，小小的神社側邊又一個拜狐仙位。返去海邊同燈塔影相發現有個玻璃樓宇，海響館，係介紹海洋生物嘅，門口有個超巨型似恐龍嘅化石係藍鯨標本，大到令人驚嘆❗️有個保安專門守護。時間關系我哋冇入場，行去海響館正門向前走有架紅色英式雙層巴士加摩天輪游樂場係草地。終於 17:00 走去睇蜂蜂想食嘅餐廳，居然冇開門，冇咩選擇之下 17:05 入咗間回旋壽司随便叫了幾個，價錢偏貴味道一般。17:40 坐船下関（唐戶港）回門司港 10分鐘唔使就到了門司港似香港中環到尖沙咀天星小輪，坐在二樓露天甲板看到了咸鴨蛋👍🏼。

坐門司港 JR17:50 的車去到小倉再轉車，問人揀咗架去荒尾的車此車會經博多駅，係區間快速列車，這時已經 18:26 了。人超多車廂很寧靜，車上好多人都瞓覺，辛苦嘅城市。20:00 返到博多，搵咗間鋪食刺身，魷魚，好味！