எதிர்நீச்சல்

ஏர்டெல் வாடிக்கையாளர்களுக்கு பெர்ப்ளெக்ஸிட்டி ப்ரோ இலவசம்

2025-07-17T02:56:00.000-07:00

பெர்ப்ளெக்ஸிட்டி என்பது சாட்ஜிபிடி, ஜெமினி, கிளாட், க்ரோக் உள்ளிட்ட முன்னணி இயற்றறிவு (GenAI) செயலிகளின் நவீன சேவைகளை ஒரே இடத்தில் வழங்கும் ஒரு செயலியாகும். இதில் தேடவோ, படம்/காணொளி உருவாக்கவோ, ஆய்வு செய்யவோ நிரல் எழுதவோ மேலும் பல கணினிப் பணிகளை எளிதில் செய்துகொள்ள முடியும். பேராசிரியரோ, வங்கிப்பணியாளரோ, அரசு ஊழியரோ, மாணவரோ, நிரலாளரோ யாராக இருந்தாலும் உங்களது தினசரி பணிகளை எளிமைப்படுத்தும். நான்கு மணிநேரம் அமர்ந்து தட்டச்சு செய்வதை அரைமணி நேரமாகச் சுருக்கும். ஆறு மணிநேரம் செய்யும் ஆராய்ச்சிகளை ஒரு மணிநேரத்தில் செய்ய உதவும். பொதுவாக எல்லா இயற்றறிவு உரையாடிகளிலும் இதைச் செய்து கொள்ளலாம் என்றாலும் அனைத்தையும் ஒரே இடத்தில் செய்து கொள்வதற்கு இந்த பெர்ப்ளெக்ஸிட்டி உதவுகிறது.

இன்று ஏர்டெல் வெளியிட்டுள்ள அறிவிப்பில் பெர்ப்ளெக்ஸிட்டியின் ப்ரோ பாதிப்பை இலவசமாகத் தங்கள் வாடிக்கையாளர்கள் ஓராண்டிற்குப் பயன்படுத்தலாம் என்று கூறியுள்ளது. பெர்ப்ளெக்ஸிட்டியில் இலவசப் பதிவு, ப்ரோ பதிப்பு, மேக்ஸ் பதிப்பு என்று மூன்று வகை பதிப்புகள் உள்ளன. கட்டணத்திற்கு ஏற்ப ஒவ்வொன்றிலும் ஒவ்வொரு வசதி கூடுதலாக இருக்கும். பெர்ப்ளெக்ஸிட்டி ப்ரோ எனப்படும் பதிப்பானது மாதத்திற்கு $20 (சுமார் 1700 ரூபாய்) கட்டணத்தில் உள்ளது. இந்தச் சிறப்பு அறிவிப்பால் ஏர்டெல் வாடிக்கையாளர்கள் இலவசமாக 17000 மதிப்புள்ள ஓராண்டு சேவையைப் பயன்படுத்திக் கொள்ள முடியும். அதற்கு நீங்கள் ஏர்டெல் வாடிக்கையாளராக இருந்தால் மட்டும் போதும், அது முன்பணத் திட்டமோ(prepaid) பின்பணத் திட்டமாகவோ(postpaid) இருக்கலாம். உங்களது ஏர்டெல் தெங்க்ஸ் செயலியில் "rewards & OTTs" பகுதியில் மேலேகண்டவாறு சலுகையைக் காட்டும். அதனைச் சொடுக்கினால் promocode உடன் பெர்ப்ளெக்ஸிட்டி தளத்தில் உங்களைப் பதிவு செய்யச் சொல்லும். அங்கே உங்களது கணக்கில் உள்ள நுழைந்து கொண்டால் இந்த 'ப்ரோ' பதிப்பு செயல்படுத்தப்பட்டிருக்கும்.

பெர்ப்ளெக்ஸிட்டியை இணையத்தில் மட்டுமல்லாமல் மேக், விண்டோஸ், ஆண்டிராய்டு செயலியாகவும் நிறுவிப் பயன்படுத்திக் கொள்ளலாம். ஆர்1, ஓ3, போன்று முன்னணி நிறுவனங்கள் வெளியிடும் நவீன மாதிரிகளை இவர்களே அவ்வப்போது இதில் இணைத்துவிடுவார்கள் என்பதால் நான் தேடிப் போய்ப் பயன்படுத்த வேண்டியதில்லை. உங்கள் கணினியில் உள்ள ஆவணங்களில் ஏதேனும் தேடவோ வகைப்படுத்தவோ, சுருக்கவோ, விளக்கப்படம் போடவும் முடியும். தமிழ் உட்பட பெரும்பாலான மொழி ஆவணங்களை இது புரிந்து கொள்ளும். நமக்கு எளிதில் புரியாத சட்டம், நவீன அறிவியல், பிறமொழி ஆவணங்களாக இருந்தாலும் படிக்க நேரமில்லாத நாவல்கள், கட்டுரைகள் போன்றவையாக இருந்தாலும் இதற்குக் கொடுத்து அதிலிருந்து கேள்விகளைக் கேட்டுப் படித்துக் கொள்ளலாம். தினசரி பணிகளான திட்ட வரைவு எழுதவோ, கடிதம் எழுதவோ, நழுவு படங்கள் தயாரிக்கவும் இதைப் பயன்படுத்திக் கொள்ளலாம். நாம் சிந்தித்து முடிவெடுக்கத் தேவைப்படும் தரவுகளை இது திரட்டிக் கொடுக்கும். இதே நிறுவனம் காமெட் என்ற புதிய வகை செநு உலாவியை (AI agent Browser) அறிமுகம் செய்துள்ளனர்.(தற்சயம் மெக்ஸ் பதிப்பில் மட்டும் உள்ளது) இதன் மூலம் ஒரு சில பணிகளையும் நமக்காக உலாவியில் இதனால் செய்யமுடியும். உதாரணத்திற்கு இந்தத் தளத்தில் சென்று இந்தத் திரைப்படத்திற்கு எனது நண்பர்களுடன் முன்பதிவினைச் செய் என்று தூண்டில் சொல் கொடுத்தால் அதுவே உங்களது நண்பர்களைக் கண்டுபிடித்து அவர்களுக்கும் சேர்த்து முன்பதிவு செய்து தகவலும் கொடுத்துவிடுமாம். அடிப்படையில் மெய்நிகர் உதவியாளர் போல நமக்கு உதவும்.

இந்த அறிவிப்பின் மூலம் ஏர்டெல்லின் 36 கோடி வாடிக்கையாளர்களுக்கும் 12 மாதங்கள் பெர்ப்ளெக்ஸிட்டி ப்ரோவை இலவசமாக பயன்படுத்திக் கொள்ளவாய்ப்புள்ளது. பெர்ப்ளெக்ஸிட்டியின் பயனர்கள் எண்ணிக்கை அதிவிரைவாக உயரக்கூடும். மற்ற செயலிகளைவிட இதன் இந்திய சந்தை மதிப்பு கூடவும் வாய்ப்புள்ளது. இலவச வரையறையற்ற தரவுத் திட்டத்தை அறிமுகம் செய்த ஜியோ போல இதுவும் ஒரு புதிய புரட்சிகரமான திட்டம். ஆனால் சரியாக இத்தகைய இயற்றறிவுக் கருவிகளைப் பயன்படுத்தவும் பாதுகாப்பாகத் தகவல்பரிமாற்றம் செய்யவும் செயற்கை நுண்ணறிவு கருவிகள் தரும் மதிமயக்கங்களை(hallucination) அடையாளங் காணவும் மக்களுக்கு விழிப்புணர்வு உள்ளதா என்பது ஐயமே. ஆனால் இதைக் கற்றுக் கொள்ள வேண்டியது காலத்தில் தேவையாகிறது.

பொதுவாக இந்த வகை செயலிகளின் இலவசப் பதிப்பில் குறையான வசதி கொடுப்பதால் அதன் முழுமையான வீச்சினைப் பெரும்பாலானவர்கள் பயன்படுத்தியிருக்க மாட்டோம். இந்த வாய்ப்பைப் பயன்படுத்தி, இவற்றை எப்படிப் பயன்படுத்துவது என்றும் கற்றுக் கொள்ளலாம். கூகிளில் ஒரு தகவலைத் தேடி எடுக்கத் தெரிவதே ஒரு முக்கிய திறனாக இருந்த காலம் போய் பெர்ப்ளெக்ஸிட்டியில் தேடிப் படிக்கத் தெரிவது அடிப்படைத் திறனாகிவிட்டது.

சில யோசனைகள்:

உங்களது தனிநபர் தகவல்களைப் பகிரும் முன் கவனத்துடன் கையாளுங்கள்.

அதன் பதில்களை அப்படியே நம்பாதீர்கள் (மதிமயக்கங்கள் உண்டு), சுயசரிபார்ப்பினைச் செய்து பயன்படுத்துங்கள்.

உங்களுக்கு உரிமையில்லாத பிறர் படங்களையோ, கோப்புகளையோ இதன் மூலம் தவறாகப் பயன்படுத்தாதீர்கள்.

கோலசுரபி புதிய மேம்பாடுகள்

2024-12-26T06:49:00.000-08:00

ஒவ்வொரு ஆண்டும் மார்கழி மாதம் கோலசுரபி மென்பொருள் சார்ந்து புதிய அறிவிப்புகள் செய்யும் வழக்கமுண்டு. இக்கருவியானது முதலில் கம்பிக்கோலம் மட்டும் வரைந்தது, பின்னர் கோட்டுக் கோலம், பின்னர் ரங்கோலிகான பலகோண வடிவங்கள், விருப்பமான நிறங்கள், புதிய பயனர் இடைமுகம், முப்பரிமாணக் கோலங்கள், மிகை மெய்ம்மை (AR) என்று நீங்கள் பார்த்திருக்கலாம். இந்த ஆண்டு கோலத்தின் கணிதப் பண்புகளை உருவங்கள் மீது செலுத்தி, புதிய வடிவங்களில் கோலங்களை உருவாக்கும் முறை அறிமுகமாகியுள்ளது.

https://apps.neechalkaran.com/kolasurabhi

இதுவரை சதுரம், சாய்சதுரம் என இரு வடிவங்களிலேயே கம்பிக் கோலங்களை வரைந்து தந்தது, இப்போது விளக்கு, தேர், மலர், மயில், அன்னம், யானை போன்ற புதிய உருவங்களிலும் கோலம் வரையலாம். நீங்கள் விரும்பிய அகலத்தில் இக்கருவி அந்த உருவத்தை வரைந்து கொடுக்கும். அளவு அதிகரிக்க அதிகரிக்க உருவத்தின் அடையாளங்கள் தெளிவாகத் தெரிகின்றன. ஒவ்வொரு முறை வரையும் போதும் புதுப் புது வளைவுகளில் ஒரே உருவத்தை வரைந்து காட்டும் விரும்பிய வடிவத்தை விரும்பிய நிறத்தில் எடுத்துக் கொள்ளலாம்.

விரும்பிய எல்லா வடிவத்திலும் கோலம் வர முடியும் என்றாலும் சில உருவங்களே தெளிவாக அமைகின்றன என்பதால் இவை மட்டும் சேர்க்கப்பட்டுள்ளன. நீங்கள் விரும்பிய வடிவங்கள் இல்லாவிட்டால் சுட்டிக் காட்டலாம் அதையும் சேர்க்க முயல்கிறேன்.

சுழல்வடிவு (rotational), நிழல்வடிவு(reflectional) ஆகிய இரு வடிவு ஏற்கனவே இருந்தன, இப்போது புதிதாக சீரற்றவடிவும் அறிமுகமாகியுள்ளது. இதனால் இதன் படைப்புகளில் புதுமையான வடிவங்களைப் பார்க்கலாம். இதுவரை 13 வகைக் கோலங்களே இருந்தன, இனி 27 வகைக் கோலங்கள் எனலாம்.

இந்த ஆண்டும் கூடுதல் செய்தியாக முதன்முதலாக கோலசுரபி சார்பாக ஒரு கேட்பு அச்சு நூல்(print on demand) அமேசானில் கோலப் பயிற்சிக்கு அறிமுகமாகியுள்ளது. குழந்தைகள் கோலம் பழக்குவதற்கான சிறப்பான நூலாக இது அமையும். இதில் கோலத் தடத்தில் வரைந்தோ, விடுபட்ட புள்ளிகளை இணைத்தோ, வண்ணம் தீட்டியோ பழகலாம். விருப்பமுள்ள குழந்தைகளுக்கு வாங்கிக் கொடுக்கலாம். குழந்தைகள் மட்டுமல்லாமல் பெரியவர்களும் பழகும் வகையில் வடிவமைக்கப்பட்டுள்ளது. கணிதமும் கற்பனையும் நிறைந்த கோலங்கள் அனைவர்கள் மனதையும் வண்ணமயமாக்கும்.

இந்த நூலுக்கான இணைப்பு.

கோலசுரபியின் இன்ஸ்டா முகவரி

சீன - தமிழ் அகராதி அறிமுகம்

2024-10-13T22:21:00.002-07:00

சீன மற்றும் தென்கிழக்காசிய நாடுகளில் வாழும் பல தமிழ் மாணவர்கள் சீனம் படிப்பதும் அது தொடர்பான தகவல்களைத் தேடுவதும் கணிசமாக உள்ளனர். மொழிபெயர்ப்பாளர்களுக்கும் மாண்டரின் அல்லது தமிழ் மொழி தேர்வுகளுக்கு தயாராகும் மாணவர்களுக்கும் இது உதவும் வகையில் புதிய சீன தமிழ் அகராதி அறிமுகமாகியுள்ளது.

https://chitadic.com/

சீன மொழியின் தொழில்நுட்ப வளர்ச்சியிலிருந்து கற்றுக் கொள்ள வேண்டியவை பல உள்ளன. குறிப்பாக, பல வட்டார வழக்குகள் இருந்தாலும் சீன எழுத்துக்களுக்கு இணையான ஆங்கில எழுத்துக்களை தரப்படுத்திவிட்டனர். கற்றுக் கொள்ள எளிதாக சீன அகராதிகள் பெரும்பாலும் கற்றல் நிலைக்கு ஏற்பச் சொற்களைக் காட்டுகின்றன. அதாவது ஒவ்வொருவரின் மொழி அறிவிற்கேற்ப, பல நிலைகளில் கற்றுக் கொள்ள வேண்டிய சொற்கள் என்று தனிப் பட்டியல் இட்டுள்ளனர். எழுதிப்பழக, மாற்றிக் கொள்ள என்று எண்ணற்ற கருவிகளும் இணையத்தில் வெளியிட்டுள்ளனர். ஆங்கிலத்தை விட தாய்மொழியை அதிகம் முன்னிறுத்துகின்றனர். இப்படிச் சொல்லிக் கொண்டே போகலாம்.

சீன மொழி எழுத்தென்பது இந்திய மொழிகள் போல ஓசைக்கு வடிவம் கொடுப்பதில்லை. மாறாக உருவத்திற்கு வடிவம் கொடுக்கிறார்கள். அதனாலேயே அவை சித்திர எழுத்துக்கள் என்கிறோம். கடந்த காலத்தை விடத் தற்போது எவ்வளவோ எழுத்துச் சீர்த்திருத்தம் செய்து நவீன வடிவிற்கு வந்துள்ளனர். இருந்தும் சுமார் நாற்பத்தோராயிரம் எழுத்துக்கள் தற்காலத்தில் பயன்படுத்துகின்றனர் அவற்றிற்கு ஒருங்குறியில் இடமும் வாங்கியுள்ளனர். அடிப்படை ஒலிகளாக சுமார் 407 ஒலிகள் எனலாம்.

உலகின் முக்கிய மொழிகளுள் ஒன்றான சீன சொற்களுக்கான தமிழ் அகராதி என்று பொதுவில் எதுவும் குறிப்பாக இணையத்தில் இல்லை. அதை ஈடு செய்யும் விதமாக முனைவர் மெய். சித்ரா அவர்களின் தொகுப்பில் சீன தமிழ் அகராதி அண்மையில் வெளியிடப்பட்டது. இது இரு மொழி அகராதி என்றாலும் இதில் சீனம், தமிழ், ஆங்கிலம் ஆகிய மூன்றிலும் தேடலாம். நேரடியாக இணையத்தில் தமிழ்ச் சொல்லுக்குச் சீனத்தில் எப்படி சொல்லலாம் என்று தேடவோ, மொழி ஆய்வுகள் செய்யவோ, மொழிபெயர்ப்புகளை அதிகரிக்கவோ இது உதவக்கூடும். இதில் ஐயாயிரம் சீனச் சொற்கள் உள்ளன. அடுத்தடுத்த மேம்பாடுகளில் விரிவாக்கவுள்ளோம்.

ஆங்காங்கிலிருந்து முனைவர் மெய். சித்ரா அவர்களின் முயற்சியில் தமிழ் விளக்கங்களைத் தொகுக்கப்பட்டு, சிறப்பான அகராதியாக முழுமையடைந்துள்ளது. சொற்கள் திரட்டலிலிருந்து, தள வடிவமைப்பு, இயந்திர சோதனைவரை தொழில்நுட்ப உதவிகளை என்னால் செய்ய முடிந்தது. மேலும் அகராதிப் பணிக்கு பின்னூட்டம் கொடுத்த நண்பர்கள் அனைவருக்கும் நன்றி. இதில் உள்ள நிறைகுறைகளை அறியத் தரலாம். வாய்ப்புள்ளவர்கள் தமிழ் சீன அகராதியை உருவாக்கும் எங்கள் குழுவிலும் தன்னார்வலர்களாக இணையலாம்.

தமிழில் அரிச்சுவடித்தொடர் (pangram)

2024-10-02T02:44:00.000-07:00

ஆங்கிலத்தில் pangram என்றும் தமிழில் முழுவெழுத்து அல்லது 'முழு அரிச்சுவடி சொற்றொடர்' அல்லது அரிச்சுவடித்தொடர் என்றும் அழைக்கப்படும் தொடரானது அந்த மொழியின் அரிச்சுவடியிலுள்ள அனைத்து எழுத்துக்களாலும் அமைக்கப்பட்ட சொற்றொடரைக் குறிக்கும். சிறிய வாக்கியமாகவும் நினைவில் கொள்ளத்தக்க பொருளும் கொண்டாகவும் இருக்கும். இது அச்சடித்த வடிவத்தைக் காட்ட, அச்செழுத்துக் கருவியைப் பரிசோதிக்க, கையெழுத்து, வனப்பெழுத்து மற்றும் தட்டச்சுத் திறனை வளர்க்கவெனப் பயன்படுகிறது. அதாவது தொழில்நுட்பத்திலோ திரையிலோ எல்லா எழுத்தையும் சோதித்துப் பார்க்க இந்தத் தொடர் பயன்படுகிறது.

ஆங்கிலத்தில், "The quick brown fox jumps over the lazy dog" என்ற சொற்றொடர் பிரபலமானது. இதில் அனைத்து 26 எழுத்துக்களும் அடக்கமாகும். எந்த எழுத்துருவைக் கணினியில் பதிவு செய்யும் போதும் இந்தத் தொடரைப் பார்த்திருப்போம். ஆங்கிலத்தில் புதிதாகப் பயன்படுத்தும் எழுத்துருவைச் சோதிக்க இந்த ஒற்றை வரியை உருவாக்கி, அனைத்து எழுத்தும் எந்த வடிவில் உள்ளது எனப் பார்த்துக் கொள்ள முடியும். தமிழில் அவ்வாறு 247 எழுத்துக்களையும் கொண்ட தொடரை உருவாக்க முடியாது ஆனால் குறைந்தபட்சம் உயிரும் மெய்யும் சேர்த்து வருமாறு உருக்கலாம். மேலும் தமிழ் அரிச்சுவடில் உள்ள மாறுபட்ட குறியீடுகளையும் இந்தச் சொற்றொடர் பெற்றிருந்தால் இன்னும் சிறப்பு. அப்போது தான் இதனை வடிவச் சோதனைக்குப் பயன்படுத்த முடியும்.

தமிழில் உள்ள அனைத்து துணையெழுத்துகளின் வகைகளைக் கீழே பார்க்கலாம்.

* துணைக்கால் - கா, சா, தா, வா

* கொம்புக்கால் - ஊ, கௌ, சௌ. யௌ

* மடக்கு ஏறுகீற்றுக் கால் - ணூ, தூ, நூ

* ஒற்றைக்கொம்பு - கெ, நெ, செ,ளெ

* இரட்டைக்கொம்பு - கே, நே, சே,ழே

* இணைக்கொம்பு/சங்கிலிக்கொம்பு - கை, சை, நை, றை

* சாய்வுக்கீற்று - ஏ

* இறங்கு கீற்று - பு, சு, வு, யு

* மடக்கு ஏறு கீற்று - ணு, து, நு, லு. று

* பின்வளைகீற்று - கூ

* மேல்விலங்கு - கி, தி, பி, மி

* கீழ்விலங்கு - மு, ரு, கு, டு

* இறங்குகீற்றுக் கீழ்விலங்குச் சுழி - சூ, பூ

* மேல்விலங்குச் சுழி - கீ, தீ, ரீ, வீ

* கீழ்விலங்குச் சுழி - மூ, ரூ, டூ

* பிறைச்சுழி - ஆ

தமிழில் உள்ள 216 உயிர் மெய் எழுத்துக்களையும் வைத்துத் தொடர் அமைப்பது கடினமானது மட்டுமல்ல தேவையும் இல்லை. காரணம் "ை" என்ற சங்கிலிக் கொம்பு எழுத்து ஏதாவது ஒரு மெய்யுடன் வந்தாலே போதும் மற்ற கை,சை,தை, பை போன்ற ஐகார வரிசை முழுவதும் எழுதிவிடலாம். அது போல ஒற்றைக் கொம்பு, இரட்டைக் கொம்பு ஒருமுறை வந்தாலே போதும். கீற்று வகை எழுத்துக்களில் வகைக்கு ஒன்றாவது இருந்தாலே மற்றவற்றைப் புரிந்து கொள்ளலாம். விலங்கு வகை எழுத்துக்களிலும் வகைக்கு ஒன்றாவது இருந்தால் போதும். இப்படி இந்த எல்லா மாறுபாட்டைப் புரிந்து கொண்டு அனைத்து உயிர் எழுத்துக்களும், அனைத்து மெய் எழுத்துக்களும் அனைத்து வகை துணை எழுத்துக்களும் கொண்ட ஒரு தொடரை உருவாக்கினால் அதுவே தமிழில் சிறந்த முழுவெழுத்து எனலாம்.

தமிழுக்கு சில முழு அரிச்சுவடி சொற்றொடர்களைச் சிலர் உருவாக்கியுள்ளனர். முனைவர் தேமொழி உருவாக்கிய "ஈவது விலக்கேல், ஏற்பது இகழ்ச்சி, ஐயமிட்டு உண், ஊக்கமது கைவிடேல், மூதுரை ஔவை கூறிய ஆத்திசூடி நூலின் தீஞ்சுவை மொழி, அஃதே எங்கள் பூவுலக நெறி" என்ற தொடரில் ஏறக்குறைய அனைத்து உயிரும் மெய்யும் இருக்கின்றன. ஆனால் ஒ, ஓ ஆகிய இரண்டு மட்டும் இல்லை. இதில் மொத்தம் 69 எழுத்துக்களும் தனித்த எழுத்துக்களாக 56 உம் உள்ளன.

செல்வக்குமார் இராயப்பன் என்பவர் உருவாக்கிய "தமிழ் குடி ஐயன், ஆதி முருகன், சூர உலகிற்கு ஈந்தளித்த நீர், திருமந்திரம், ஓம் நமசிவாயெனும் பஞ்சாட்சரம் அஃதே மூப்பு, பிணி, ஏழுபிறப்பு, ஊழி, இம்மை, மறுமை ஒழிக்குங்கூறு" என்ற முழு அரிச்சுவடி சொற்றொடரில் மொத்தம் 81 எழுத்துக்களும் தனித்த எழுத்துக்களாக 58 உம் உள்ளன. இதில் எ மற்றும் ஔ ஆகிய உயரெழுத்துக்கள் இல்லை. இவ்வாறு ஆங்காங்கே சில உதாரணங்கள் இருக்கலாம். இந்த வரிசையில் புதிய சொற்றொடர் இக்கட்டுரை வாயிலாக அறிமுகம் செய்யப்படுகிறது.

"ஓர் ஊர்தியில் ஏறி, கீழே இறங்கி சூடான சுத்தமான நெய் உணவு ஆவினை எடுத்து, திடீரென ஐந்நூறு கூடை குண்டூசியும் ஈரேழு ஔடத மின்னூல்களும் அனுப்பி ஞாபகமூட்டியது ஒரு தூதுக்குழு"

எழுத்து	எண்ணிக்கை
து, ன	3
க, கு, த, தி, த், ம், ர், ல், ழு	2
அ, ஆ, இ, ஈ, உ, ஊ, எ, ஏ, ஐ, ஒ, ஓ, ஔ, கி, கீ, கூ, க், ங், சி, சு, சூ, ஞா, ட, டா, டி, டீ, டு, டூ, டை, ட், ண, ண், தூ, நூ, நெ, ந், ப, பி, ப், மா, மி, மூ, ய, யி, யு, ய், ரு, ரெ, ரே, வி, வு, ழே, ளு, ற, றி, று, னு, னூ, னை, ன்	1

இதில் மொத்தம் 83 எழுத்துக்களும் 70 தனித்த எழுத்துக்களும் உள்ளன. இத்தொடரில் அனைத்து உயிரும் மெய்யும் உள்ளன. இதில் துணைக்கால் முதல் பிறைச்சுழி வரை அனைத்து துணையெழுத்து வடிவங்களும் உள்ளன. இதன் மூலம் எளிதாக அனைத்து வடிவங்களையும் சிறிய தொடரில் பார்த்துவிடலாம். இதைவிட சிறிய தொடர்களை நீங்களும் உருவாக்கிப் பாருங்கள்.

சுளகு கருவி வழியாக நீங்களும் உருவாக்கிப் பார்க்க கீழே உள்ள வழிமுறைகள் உதவலாம்.

முதல் படி, எந்தெந்த எழுத்துக்கள் இருக்க வேண்டும் என்று முடிவு செய்து கொள்ள வேண்டும்.
தற்காலத் தமிழில் உள்ள சொல்வங்கி அல்லது பல தரப்பட்ட கட்டுரைகளைத் திரட்டி, சுளகு கருவி வழியாகத் தனிச் சொற்களைப் பிரித்துக் கொள்ள வேண்டும். அவற்றில் அரிதாக உள்ள எழுத்துக்களை வரிசைப் படுத்திக் கொள்ள வேண்டும்.
அந்த வரிசையில் உள்ள எழுத்துக்களுக்கு முன்னுரிமை கொண்டு பொருள் கொண்ட வாக்கியம் அமைக்க முயல வேண்டும்.
சுளகு கருவியைக் கொண்டு எல்லா எழுத்துக்களும் உள்ளனவா என்று சரிபார்க்கலாம்.

அக்டோபர் கணையாழி இதழி வெளிவந்த கட்டுரை

கிளாட்.ஏஐ - ஒரு திறனாய்வு

2024-07-18T01:57:00.000-07:00

கிளாட்.ஏஐ என்பது சாட்ஜிபிடி போல செயற்கை நுண்ணறிவில் செயல்படும் புதிய உரையாடி (chatBOT). ஆந்திரோபிக் என்ற நிறுவனம் உருவாக்கி வெளியிட்டுள்ள கிளாட் 3.5 சோனெட் என்ற மொழி மாதிரி கொண்டு இயங்கும் செயலி. குறிப்பாக மொழிபெயர்ப்பு, ஒளிப்பட பகுப்பாய்வு போன்றவற்றில் சிறப்பாகச் செயல்படும் செநு(AI) உரையாடியாகும்(Bot). ஜூன் மாதம் அறிமுகமானதால் மொழித் தொழில்நுட்பத்திற்குப் புதுவரவு. இதற்கு முந்தைய செநு சார்ந்த மொழிக் கருவிகளைவிட மொழிபெயர்ப்பு மற்றும் மெய்ப்புத் திருத்தம் போன்ற இடங்களில் சிறப்பாகச் செயல்படுகிறது. அதன் வித்தியாசத்தைப் பார்க்க முடிகிறது.

மொழிபெயர்ப்பு:

தமிழிலும் மொழிபெயர்ப்பு மற்றும் பிழைதிருத்தத்தைச் செய்கிறது. தமிழில் குறிப்பாக நன்றாகவே செயல்படுகிறது. சில பிழைகள் என்றால், பெயரெச்சத்தை அடுத்து "மற்றும்" இடுகிறது, வினையெச்சத்தை அடுத்தும் "மற்றும்" இடுகிறது. ஆனாலும் கூகிள் அளவிற்கு "மற்றும்" பயன்பாட்டை அள்ளித் தெளிக்கவில்லை. இடத்திற்கு ஏற்ற சொற்களைப் பரிந்துரைக்கிறது. மொழிநடையில் தெளிவு இருக்கிறது. "தற்காலிகமாகவோ அல்லது நிரந்தரமாகவோ" என்று இலக்கணரீதியான சில பிழைகளை இன்னும் விடுகிறது. கூகிளைவிடச் சிறப்பாக மொழிபெயர்த்தாலும் இன்னும் சந்தைக்கான பயனர் கருவிகளாக வெளிவரவில்லை. தற்போதைக்கு ஓரளவு பயன்பாட்டிற்கு இலவசமாகக் கொடுத்துள்ளனர். அதிகம் பயன்படுத்த கட்டணம் கட்டவேண்டும்.

பிழை திருத்தம்:

பிழை திருத்தம் என்ற பணியில் நன்றாகப் பயிற்சி எடுத்துள்ளது. தமிழ் மொழியின் இலக்கணத்தைப் புரிந்து கொள்வதில்லை தான் ஆனாலும் பெரும்பாலான பரிந்துரைகள் சரியாக உள்ளன. தமிழில் எங்கெல்லாம் அதிகம் பிழை வருமோ அங்கெல்லாம் சரியாகக் கணிக்கிறது. ஆனால் இலக்கணம் தெரியாமல் கணிப்பதால், குறைவான பயன்பாட்டு இடங்களில் அதே பிழையை விடுகிறது. ஒரு இடத்தில் பொருத்திக் கொள்ளும் விதியை மறு இடத்தில் போட்டுக் கொள்வதில்லை. ஒருமை பன்மை ஓரளவு கணிக்கிறது. ஆனால் கால வேற்றுமையைப் புரிந்து கொள்வதில் தடுமாறுகிறது

வாணி பிழை திருத்திக்கான சோதனை நேர்வுகள்(test case) கைவசமிருந்ததால் கிளாடில் போட்டிப் பார்த்ததில் 80% சரியாகச் சொல்கிறது. கூடுதலாக உலக அறிவு இருப்பதால் தானாகச் சில புரிதல் கொண்டு சரியாகக் கணிக்கிறது. தங்கிலீஷில் முழுமையான தெரியாமல் எழுதினாலும் சரியானவற்றிற்கு நெருக்கமாகப் பரிந்துரைக்கிறது. பொருள்மயக்கம் வரும் இடங்களில் பெரும்பான்மை வழக்கை எடுத்துக் கொள்கிறது. சில இடங்களில் பொருளை மாற்றியும் விடுகிறது. பிழைகளைச் சுட்டிக் காட்டும் போது ஒரு நிலைத்தன்மை இல்லாமல் இருக்கிறது. வழக்கமான செநு கருவிகளைப் போல வழக்கில் இல்லாத/மீறிய சொல்லாக்கங்களைத் தான்தோன்றித்தனமாகச் செய்கிறது.

தமிழ் எழுதத் தெரியாதவர்களுக்கு இது வரப்பிரசாதம். தமிழில் கொஞ்சம் தெரிந்தவர்களுக்கு இது ஓரளவிற்குப் பயனளிக்கலாம்.

பொருளை மாற்றும் உதாரணம்

உருபனியல் பிழை

பிழையாகக் காலத்தை மாற்றுதல்

நிலைத்தன்மை இல்லை என்பதற்கான உதாரணம்:

மொழி இலக்கணத்தையும், நிலைத்தன்மையையும் அதிகரிக்கும் போது மொழிக்கான முக்கிய வளர்ச்சியாக இது அமையும். விரைவில் இவை மேம்படலாம். எதுவானாலும் மொழிநுட்பத்தில் பிரமிக்கத்தக்க பாய்ச்சல். கிளாட்டைக் கைதட்டி வரவேற்போம்.

மேலும் அறிய:

https://claude.ai/

சோதனை நேர்வுகள்

பாவாச்சி - கவிஞர்களுக்கான மென்பொருள்

2024-03-21T10:19:00.000-07:00

ஒரு நல்ல திரையிசைப் பாடல் என்பது எதுகை மோனை என்பதைத் தாண்டி மெட்டுக்கு ஏற்ற வரிகளாக அமைய வேண்டும். அந்த சந்தத்திற்கான இலக்கணமே யாப்பு. செய்யுளுக்கான யாப்பிலக்கணத்தை முழுவதும் பயன்படுத்தாவிட்டாலும் அசைகளும் சீர்களும் சரியாக இருந்தால் தான் ஓசை நயம் வரும். கடந்த ஆண்டு இசைஞானி இளையராஜா ஒரு நேர்காணலில் பேரு "வச்சாலும் வைக்காம போனாலும் மல்லி" என்ற பாடல் திருக்குறளின் "துப்பார்க்குத் துப்பாய துப்பாக்கித் தூஉம் மழை" என்ற வரிகளின் சந்தத்தைப் பயன்படுத்தியதாகக் கூறியிருப்பார். இவ்விரு வரிகளையும் அசைகளாகப் பிரித்தால் "நேர்நேர்நேர் நேர்நேர்நேர் நேர்நேர்நேர் நேர்நேர்" என்று சரியாகப் பொருந்துகிறது. மேலும் இதே சந்தத்தில் பல திரைப் பாடல்களும் வெவ்வேறு மெட்டுக்களில் பாடப்பட்டுள்ளன. இத்தகைய இலக்கண ஆய்விற்குத் திரையிசைப்பாடல்களை உட்படுத்தமுடியும். இது போன்ற ஆய்வுகளுக்குப் பிற ஐரோப்பிய மொழிகளில் Scansion Tool, Prosody Analyzer வகை கருவிகள் பல உள்ளன. தமிழிலும் அகலோகிதம், எமோனி போன்ற மென்செயலிகள் உள்ளன. இவ்வரிசையில் பாவாச்சி என்ற மென்செயலி(webapp) முழுமையடைந்து உலக கவிதை நாளில் அறிமுகமாகியுள்ளது.

http://apps.neechalkaran.com/rhythm

இதில் மெட்டிற்குப் பாட்டிழுதவோ, திரையிசைப் பாடல்கள் சந்தம், சொல், தொடை போன்ற பாட்டுக்கான கூறுகளைத் தேடவோ முடியும்.

பாடல் ஒப்பீடு

அதில் விரும்பும் மெட்டைக் கொடுத்து நீங்களாகப் பாடல் வரிகளை எழுதலாம். மெட்டுக்கு வரிகளில் நெருக்கமாக அமைந்தால் அதைச் சுட்டிக் காட்டி வழிநடத்தும். எளிதில் ஒப்பிட்டுப் பார்த்து, திருத்திக் கொள்ளலாம். ஏற்கனவே பாவாச்சியில் உள்ள சந்தத் தேடல் மற்றும் ஒலித் தேடல் போன்ற வசதிகள் மூலம் தேவையான சொற்களைப் பரிந்துரையாகக் கொடுக்கலாம்.

எப்படிப் பயன்படுத்துவது?

"தான தத்த தத்த தந்த தான தத்த தத்த தந்த" என்று மெட்டினையோ அல்லது நேரடியாக ஏதேனும் பாடல் வரிகளையோ முதல்பெட்டியில் இடவேண்டும். அடுத்த பெட்டியில் நீங்களாகப் பாட்டெழுதலாம். எழுத்தினைத் தட்டச்சத் தட்டச்ச நீங்கள் கொடுத்த மெட்டின் நிறம் மாறி உங்களுக்கு ஒப்பிட்டுக் காட்டும். பச்சை எழுத்தென்றால் ஓசை பொருத்தமானது; சிவப்பு எழுத்தென்றால் ஓசை பொருத்தமாக வில்லை எனக் குறிக்கும். பச்சைக் கோடு இட்டிருந்தால் அசையும் பொருத்தமாகிவிட்டதெனப் பொருள். சிவப்புக் கோடு இட்டிருந்தால் அசை பொருத்தமாகவில்லை எனப் பொருள். வேண்டிய திருத்தங்களை உங்கள் வரிகளில் செய்து பச்சை நிறமாக்கி, பாடல் வரிகளைப் பயன்படுத்தலாம்.

சந்தத் தேடல்

விரும்பிய சந்தவரிகளையோ பாடல் வரிகளியோ இட்டால் அதே ஓசை நயத்தில் உள்ள வரிகளை எடுத்துத் தரும். உதாரணம் "லாலலால லாலா லாலலால லாலா" என்று தரும் போது கும்தலக்கடி கும்தலக்கடி பாடலில் உள்ள "மாமனாரு வீட்டில் மன்னனாக ஆனேன்" என்பது போன்ற பலவரிகளைக் காட்டும். "கொம்புல பூவ சுத்தி நெத்தியில்" பொட்டு வச்சு இந்தப் பாடல் வரியை இடும் போது "அன்பிலே வாழும் நெஞ்சில் ஆயிரம் பாடலே" வரிகள் உட்பட இசைக்கு ஒத்த வரிகள் கிடைக்கிறது. அசை பிரித்தும் தருவதால் இலக்கணத்தோடும் ஒப்பிட்டுக் கொள்ளமுடியும். மேலே குறிப்பிட்ட இளையராஜா பாடல் வரிகளை இட்டு அதே குறளைத் தேடி எடுக்கலாம். இன்னொரு உதாரணமாக "சிப்பி இருக்குது முத்தும் இருக்குது" பாடலில் நடிகை ஸ்ரீதேவி குறிப்பிடும் சந்தத்தை இதில் இட்டால் நடிகர் கமலஹாசன் பாடிய வரிகள் கிடைக்கும்.

சொல் தேடல்

உவமைக்குச் சொற்கள் தேடும் போதும் ஒரு சொல் எப்படியெல்லாம் பயன்படுத்தப் பட்டுள்ளது என்றும் காட்டுகிறது. குறிப்பாக குயில் என்ற சொல் காதல் குயில், ஆனந்தக் குயில், பருவக் குயில், தேவக் குயில், செல்லக் குயில் போன்று அறுபது வகையாகப் பயன்பட்டுள்ளது. காவேரி என்ற சொல்லும் காவிரி என்ற சொல்லும் தலா தொண்ணூறு பாடல்களில் பயன்பட்டுள்ளது. இது போன்ற சொல்லாட்சியும் பயன்பாட்டையும் கண்டுபிடிக்கமுடியும். மேலும் ஒரே எதுகை மோனை சொற்களையும் இதே திரையிசைப் பாடல்களிலிருந்து எடுத்துத் தரும். இது நிறைவான கருவியில்லை ஆனால் திரையிசைப் பாடலும் யாப்பிலக்கணமும் கலந்த ஆராய்ச்சிகளுக்கு உதவும்.

பிரபலமான அனைத்துத் திரையிசைப் பாடல்களும் இதன் தரவுத் தளத்தில் உள்ளதால் தமிழ்த் திசையிசைப் பாடல்களில் உள்ள மொழிவளத்தை கவித்துவத்தையும் ஆய்வு செய்யலாம். பொதுவாக எதுகை மோனை போன்ற மரபுகளை எல்லாம் புதுக் கவிதைகளில் உடைத்தாலும் ஓசை நயத்திற்கோ பொருள் நயத்திற்கோ நல்ல சொற்களைக் கவிஞர்கள் தேடுவதுண்டு. பாடலாசிரியர்களும் இசையமைப்பாளரின் மெட்டிற்கேற்ற வரிகள் எழுத சந்த நயத்தை பெரிதும் பின்பற்றியாக வேண்டியிருக்கும். இத்தகைய கவிதைகளை எழுதவும், எழுதிய பாடல்களில் தேடவும் இத்தளம் உதவும்.

மரபுக் கவிதைகளைவிடப் புதுக் கவிதைகளும் நவீனக் கவிதைகளும் மக்களை அதிகம் அடைந்துள்ளதற்கு இலக்கண விதிகள் ஒரு காரணமாகச் சொல்லப்படுவதுண்டு. பொதுவாக அசை, சீர் போன்ற விதிகளைத் தவிர்த்துப் பேசுபொருள் ஒன்றை மட்டும் மையமாகக் கொண்டு எழுதுவதால் மக்களுக்கு இவை எளிதாக இருக்கின்றன. ஆனால் முக்கிய வேற்றுமை என்னவெனில் மரபுக் கவிதைகளைப் பாடலாகப் பாடமுடியும். ஆனால் புதுக்கவிதைகளில் அது கடினம். இந்த விதி திரையிசைப் பாடலுக்கும் பொருந்தும். அதனாலேயே கவிஞர்களை எல்லாம் பாடலாசிரியராகக் கொள்ள முடிவதில்லை. திரையிசைப் பாடல்களைக் கவிதை என்று நவீனக் கவிஞர்களும் ஏற்பதுமில்லை. அப்படியெனில் திரையிசைப் பாடல்கள் கவிதைகளைவிட மேம்பட்ட இலக்கிய வடிவா என்ற விவாதத்தைத் தாண்டி நவீனக் கவிதைகளுக்குப் பொருந்தாத யாப்பிலக்கணம் திரையிசைப் பாடல்களில் பின்பற்றப்படுகிறது என்பதை உணரவேண்டும்.

கவிஞர்களுக்கு மட்டுமில்லாமல் கவிதையை ஆராய நினைப்பவர்கள் அனைவருக்கும் இக்கருவி பயன்படலாம். பயன்படுத்தி, நிறை குறைகளைக் கூறலாம்.

சுளகு கருவியில் புதிய மேம்பாடுகள்

2024-03-11T11:45:00.000-07:00

சொல்லாய்வுக் கருவியான சுளகில், எழுத்து எண்ணிக்கை, சொல் எண்ணிக்கை, சீர் எண்ணிக்கை, மாத்திரை உள்ளிட்ட பல புள்ளிவிவரங்களை எடுத்துத் தருகிறது. அதில் புதியதாக இன எழுத்துக்களையும், நெடுங்கணக்கினையும் கணக்கிட்டு, அழகிய வரைபடமாக வரைந்து காட்டும் வசதி அறிமுகமாகியுள்ளது.

https://apps.neechalkaran.com/sulaku

ஒரு தமிழ் கட்டுரையைக் கொடுத்தால் அதனைக் கூராய்ந்து மொழியியல் தரவுகளை இக்கருவி கணக்கிட்டுக் கொடுக்கும். அதாவது எத்தனை ஓரெழுத்து, ஈரெழுத்து, மூவெழுத்து, நாலெழுத்து, ஐயெழுத்துக் கூட்டல்கள் உள்ளன என்று வரிசைப்படுத்திக் காட்டும். எத்தனை சொற்கள் உள்ளன, அந்தச் சொற்களின் நிகழ்வெண், இரு சொற்களின் நிகழ்வெண், அடிச்சொல், சீர் எனச் சொல்லளவிலும் காட்டும். தற்போது கூடுதலாக எத்தனை அசை என்றும், இன எழுத்துக்களின் விகிதாசாரத்தையும் காட்டுகிறது. குறில் எத்தனை நெடில் எத்தனை, வல்லினம், மெல்லினம், இடையினம் என்று பிரித்து எண்ணிக் காட்டுகிறது.

ஏற்கனவே தமிழ் முறைப்படியான அகரவரிசைப்படுத்தல் வசதி இருந்தது. தற்போது நீளத்தின் அடிப்படையில் வரிசைப்படுத்தும் வசதி அறிமுகமாகியுள்ளது. எதாவது தமிழ்ச் சொற்பட்டியலை அதன் நீளத்தின் அடிப்படையில் வரிசைப்படுத்த விரும்பினால் இங்கே செய்து கொள்ளலாம்.

மேலும் ஒரு கட்டுரையில் உள்ள நெடுங்கணக்கைப் பிரித்து அதன் நிகழ்வெண்ணைக் காட்டும். அதாவது ஒவ்வொரு உயிரெழுத்தையும் மெய்யெழுத்தையும் எண்ணி எத்தனை முறை அவை பயன்பட்டுள்ளன எனக் கணக்கிடுகிறது. இதன் மூலம் ஒரு படைப்பில் எந்த எழுத்து அதிக முறை பயன்படுத்தப்பட்டுள்ளது அதன் பாங்கினை ஆய்வு செய்யலாம். மேலும் பல எழுத்தாளர்களின் படைப்புகளை ஒப்பிட்டும் ஆய்வுகளை மேற்கொள்ள இது உதவும். சில நூல்களின் உள்ளடக்கத்தை இட்டு உருவாக்கிய விகிதப்படத்தைக் கீழே பார்க்கலாம்.

சில உதாரணப் படங்கள்

சுளகு கருவியின் வசதிகளை காட்டும் செயல்முறை விளக்கக் காணொளி இங்கே உள்ளது. ஆர்வமுள்ளோர் பயன்படுத்திப் பார்த்து நிறை குறைகளைச் சொல்லலாம்.

கோலசுரபி துணை விளைவுகள்

2023-05-24T22:30:00.003-07:00

பொதுவாக ஒரு படைப்பை உருவாக்கும் போதும் எதிர்பாராத விதமாக சில வேளை பயனுள்ள இதர படைப்புகள் உருவாகும். அதனை ஆங்கிலத்தில் spinoff என்போம் அது போல கோலசுரபியின் மூலம் விளைந்த சில படைப்புகளைப் பகிர இக்கட்டுரை.

வடிவப் பொருத்தப் புதிர்களுக்கு (Fitting Shapes Puzzle) கோலங்களிலிருந்து சிறந்த உள்ளீடுகளைப் பெறலாம். உதாரணமாக கோலத்தின் அடிப்படையான வடிவங்களை பகடைக் காயில் இட்டுப் பல காய்களை ஒன்றொன்று ஒன்றாக வைத்து வடிவங்களைக் கோர்க்கலாம். 3டி அச்சிலோ வார்ப்பிலோ இதுபோலப் பல பகடைகளை உருவாக்கி விளையாட்டுப் பொருட்களைச் செய்யலாம். கோடுகளைக் கொண்ட இந்த வடிவமும் சுவாரசியமாக பொருத்தும் புதிருக்கு உகந்தது.

கடந்த ஆண்டு மிகை மெய்ம்மை(Augmented Reality) நுட்பத்தில் கோலங்களை விரும்பிய இடங்களில் இட்டுக் கொள்ள சில முப்பரிமாண மாதிரிகள் வெளியிடப்பட்டன. மிகை மெய்ம்மை என்பது விரும்பிய இடத்தில் நாம் விரும்பும் உருவங்களை காட்சிப்படுத்தும் நுட்பம். பொதுவாக அழிந்த உயிரினங்கள்/கற்பனை உலகம் போன்றவற்றை நமக்கருகே நடக்கவிட்டு பார்க்கமுடியும். இதற்கான பிரத்தியேக செயலிகள், கருவிகள் பல சந்தையில் உள்ளன. அதில் 3டி வடிவங்களை உள்ளீடு தந்து பயன்படுத்த முடியும். அதற்காகவே கோலங்களின் முப்பரிமாண மாதிரிகளை உருவாக்கி, கட்டற்ற முறையில் வெளியிடப்பட்டுள்ளன. https://sketchfab.com/neechalkaran ஆர்வமுள்ளோர் பயன்படுத்திக் கொள்ளலாம்.

Rangoli pattern 3 by neechalkaran on Sketchfab

குழந்தைகள் கோலங்களை வரைந்து பழக எளிய செயல்முறைப் பயிற்சிக்கான ஒரு மின்னூல் சில ஆண்டுகளுக்கு முன்னர் வெளிவந்தது. அது தற்போது புதுப்பிக்கப்பட்டுக் கூடுதல் வடிவங்கள் வண்ணம் தீட்டும் வசதிகள் சேர்க்கப்பட்டுள்ளன. ஆர்வமுள்ள சிறுவர்களிடம் அச்சிட்டுக் கொடுக்கலாம்.

கோலசுரபியைக் கைப்பேசியில் எளிதில் பயன்படுத்தும் வண்ணம் கையடக்க ஒத்திசைவுடன் உள்ளது. ஆர்வமிருந்தால் அதன் முகவரியை கைப்பேசியின் முதல்திரையில் சேமித்துக் கொள்ளலாம். இதன் மூலம் கோலசுரபியை ஒரு குறுஞ்செயலி போலப் பயன்படுத்திக் கொள்ளமுடியும். ஆண்ட்ராட் இயங்குதளமென்றால் அதில் உள்ள குரோம் உலாவியில் திறந்து, வலது மேல் முனையில் உள்ள மூன்று புள்ளியைச் சொடுக்கி "Add to homescreen" கொடுத்துக் கொள்ளலாம்.

தனிப்பயனாக்கச் சிறுவர் கதைகள்

2023-03-12T09:22:00.006-07:00

தனிப்பயனாக்கம்(Customization) என்பது ஏறக்குறைய அனைத்துத் தொழில்நுட்பத்திலும் வந்துவிட்டன. படைப்பிலக்கியங்களுக்குள்ளும் பிற மொழிகளில் வரத் தொடங்கியுள்ளன. தன்னாள்வியல் கவிதை (cybernetics poem) போன்று தமிழில் சில முயற்சிகள் அறிமுகமாகி வருகின்றன. அந்த வரிசையில் சோதனை முயற்சியாகத் தனிப்பயனாக்கச் சிறுவர் கதைகளுக்கான ஒரு தளம் அறிமுகமாகியுள்ளது. அதில் உள்ள கதைகளின் கதாப் பாத்திரங்களை விரும்பிய வகையில் மாற்றிக் கொள்ள முடியும். முயலுக்குப் பதில் பூனைக்குட்டியை வைத்து, கதையை வாசிக்கலாம் அல்லது வாசிக்கவிட்டுக் கேட்கலாம். பாட்டி வடை சுட்ட கதையில் பாட்டிக்குப் பதிலாகத் தாத்தாவைப் போட்டுக் கொள்ளலாம். முழுக்க முழுக்க மழலையர்களுக்காக உருவாக்கப்படும் தளம்.

https://stories.neechalkaran.com/

தொழில்நுட்பங்கள்:

இதில் சில நவீனத் தொழில்நுட்பங்கள் பயன்படுத்தப்பட்டுள்ளன. உதாரணமாக உரை-ஒலி மாற்றி(TTS) உள்ளது. விரும்பிய மாற்றங்களைச் செய்து, அக்கதையை ஒலிக்க விடலாம். சில இடங்களைத் தவிர மற்ற இடங்களில் இயல்பான மனிதரின் குரல் போல ஒலிக்கும். உருபனியல் உருவாக்கி(Morphological Generator) கொண்டு கதாப் பாத்திரங்களின் பெயர்களை இயல்பாகக் கதையுடன் பொருத்தப்படுகிறது. ஒரு சில கதாப் பாத்திரங்களுக்குச் செயற்கை நுண்ணறிவு கொண்டு படங்களை வரைய முடிகிறது ஆனால் அச்சேவைகள் கட்டண முறையில் இருப்பதால் இப்போதைக்கு இணைக்கவில்லை. குழந்தைகளின் ஆர்வத்திற்கேற்ப முயலலாம். கதைகளைக் கொடுத்துக் கதாப்பாத்திரங்களைத் தேர்வு செய்தால் கீழே உள்ள வார்ப்புருவினை இத்தளம் தானாக உருவாக்கிக் கொள்ளும்.

நீங்களும் எழுதலாம்:

பங்களிக்க விரும்பினால் சுவாரசியமான கதைகளைச் சிறுவர்கள் படிக்கும் விதத்தில் எழுதி எனது மின்னஞ்சலுக்கு அனுப்பலாம். சிறுசிறு வாக்கியங்களாக இருக்க வேண்டும். தொகைச் சொற்களை இயன்றவரை தவிர்த்து வேற்றுமை உருபுகளைப் பயன்படுத்தலாம். விரும்பும் கதாப்பாத்திரப் பட்டியலையும் பரிந்துரைக்கலாம்.

விதவிதமான பாத்திரங்கள் இருப்பதால் குழுந்தைகள் ஒவ்வொரு முறையும் விரும்பிப் படிக்க வாய்ப்புள்ளது. இது புது முயற்சி என்பதால் மேலும் கூட்டல் கழித்தல்கள் நிகழலாம். நீங்களும் ஆலோசனைகளை அளிக்கலாம். ஆர்வமுள்ள குழந்தைகளுக்குக் காட்டிப் படிக்க வைக்கலாம்.

இவற்றையும் பார்க்கலாம்.

மழலையர்களுக்கான புதிய அரிச்சுவடி செயலி

தமிழ் இலக்கண உரையாடி

2023-02-26T22:19:00.004-08:00

முறையான விதி நுணுக்கங்களைக் கற்றுத் தராததாலேயே தமிழ் இலக்கணம் பல மாணவர்களுக்குக் கடினமாக இருக்கிறது. அந்த இலக்கணத்தை முறைப்படுத்தி, கற்பதற்கு எளிதாக ஒரு வழிகாட்டி மரமாக(Decision Tree) விதிகளை உருவாக்கமுடியும். அதாவது இலக்கணத்தைக் கற்பதற்காகத் தொழில்நுட்பத்தைப் பயன்படுத்தலாம். அந்த வகையில் சாட்பாட் எனப்படும் உரையாடிகள் கற்றலுக்ககாக உலக அளவில் பிரபலமாகி வருகின்றன. அந்த அளவில் செயற்கை நுண்ணறிவு கொண்டு உருவாக்குவதற்கு மாறாக விதியடிப்படையிலும் உரையாடிகளை உருவாக்கலாம். தமிழில் ஏற்கனவே ஆயிதழ் அவினி, இ-சேவை போன்ற உரையாடிகள் உள்ளன. கடந்த ஆண்டு சாட்விக்கி என்ற பொது அறிவு கேள்விகளுக்கான ஒரு தமிழ் உரையாடி அறிமுகமானது. அது போல இன்று தமிழ் இலக்கணங்களைக் கற்றுத் தரும் ஒரு உரையாடி அறிமுகமாகியுள்ளது.

செயல்முறை விளக்கம்:

உரையாடி உரலி:

https://vaanieditor.com/chatbot

முழு இலக்கணத்தையும் மொத்தமாகப் பாடநூலில் படிப்பதைவிட ஊடாடக்கூடிய அளவில் கொடுக்கும் போது நினைவு வரைபடத்தில் எளிதில் நிற்கும். அந்த வகையில் இந்த உரையாடல் தெளிவினைத் தரலாம். #நற்றமிழ்பழகு என்ற தொடருக்காக லட்சத்திற்கும் மேற்பட்ட பிழைகளை அலசிய எடுத்துவரும் குறிப்புகளை அப்படியே இந்த உரையாடிக்குக் கொடுக்கப்பட்டு வருகிறது. இன்னும் மெருகேற்றவேண்டிய பகுதிகள் உள்ளன. ஆனால் இந்த நிலையிலும் நல்ல விளக்கங்களைத் தருகிறது. இது Menu based Chat என்பதால் அனைத்து விதமாக வழியிலும் தற்போதைக்கு உரையாட இயலாது. எதிர்வரும் காலங்களில் இயற்கை மொழிப் பகுப்பாய்வு நுட்பங்களைக் கொண்டு உரையாடும் நிலை ஏற்படும். இதில் இணைக்க வேண்டிய இலக்கண நுட்பங்களைச் காட்டலாம். தேவைப்படும் மாணவர்களிடம் பகிரலாம். படவடிவில் குறிப்புகளைப் பெற https://www.instagram.com/tamilgrammar/ பக்கத்தைப் பயன்படுத்தலாம்.

மேலும் இந்த உரையாடி கட்டமைப்பானது(framework) தெளிவான நோக்கத்தைக்(intent) கொண்டு எல்லாத் துறைக்கும் அமல்படுத்த முடியும். தற்போதைக்கு திருக்குறள், விவசாயம், கல்வித்துறையில் மேலும் சில உரையாடிகள் உருவாக்க முயற்சிகள் நடைபெறுகின்றன. ஆர்வமுள்ளவர்கள் உங்கள் துறை சார்ந்த தெளிவான வழிகாட்டி மரம் இருந்தால் அதற்கான உரையாடிகளை உருவாக்கலாம். ஏற்கனவே சமூகம் சார்ந்து பல்வேறு தலைப்புகளில் உருவான சில வழிகாட்டி மரங்கள் இங்கே உள்ளன. இவற்றை மாதிரியாகக் கொண்டு நோக்க மரத்தை(Intent Tree) உருவாக்கி அதை உரையாடியாக மாற்றிக் கொள்ளலாம்.

இந்த இலக்கண உரையாடியைப் பயன்படுத்தலாம். நிறைகுறைகளைச் சுட்டிக் காட்டலாம்.

இணையத்தில் தாய்மொழிக்குப் பங்களிக்கலாம்

2023-02-20T20:36:00.006-08:00

ஒவ்வொருவரும் இணையத்தில் தாய்மொழிக்குச் செய்ய வேண்டிய பணிகள் ஏராளம் உள்ளன. அவரவர் விருப்பமான இடங்களில் பங்களித்து வருவீர்கள். கணினியிலும் கைப்பேசியிலும் ஆங்கில எழுத்தில்லாமல் தமிழ் எழுத்தில் தமிழில் எழுதுவதே பெரிய பங்களிப்பாக இருக்கிறது. பொதுவாக சமுகத்தளங்களில் தமிழில் எழுதுதல், வலைப்பதிவு, மின்னூல்கள், வலையொளி போன்று தமிழ் வளங்களை அதிகப்படுத்துதல் முக்கியப் பங்களிப்பு. இருந்தாலும் பொது நோக்கில் தன்னார்வமாகப் பங்களிக்கக் கூடிய இடங்கள் பல உள்ளன. அதைத் தொகுத்துப் புதியவர்களுக்கு உதவும் வகையில் இணையத்தில் பங்களிக்கக் கூடிய ஒரு பட்டியல் கீழே தயாரிக்கப்பட்டுள்ளது.

தமிழ் பிடிஎப் நூல்களை மெய்ப்புப் பார்த்து மின்னூலாக விக்கிமூலத்தில் மாற்றலாம். பொதுவுரிமையில் உள்ள தமிழ் அச்சு நூல்களை எல்லாம் கணினிமயப்படுத்தும் பெரிய முயற்சி.

https://ta.wikisource.org/

https://crowdsource.google.com/ கூகிள் தகவல் திரட்டலில் தமிழ்த் தரவுகளைச் சரிபார்த்து உதவலாம்

இந்திய மொழிகளில் செயற்கை நுண்ணறிவுக் கருவிகளுக்கு உதவும் தரவுகளைச் சேகரிக்க இந்திய அரசால் உருவாக்கப்பட்ட பாஷினி என்ற தளமுள்ளது. அதில் தமிழ்த் தரவுகளைப் பங்களித்து உதவலாம்.

https://bhashini.gov.in/bhashadaan/ta/

https://commonvoice.mozilla.org/ta/languages மொசில்லா பொதுக் குரல் திட்டத்தில் தமிழில் பேசிப் பங்களிக்கலாம்

தமிழர் வரலாற்று நூல்களைமின்னாக்கம் செய்யலாம். https://ta.wikisource.org/wiki/விக்கிமூலம்:மின்னியம்_திட்டம் https://t.me/minniyamkuzhu என்ற டெலக்ராம் குழுவில் இணைந்து. மின்னூல் உருவாக்க உதவலாம்.

தமிழில் கலைச்சொல்லாக்கம் வளர இணையத்தில் உள்ள கட்டற்ற அகரமுதலியான விக்சனரியில் சொற்களை மேம்படுத்தலாம், சேர்க்கலாம்.

https://ta.wiktionary.org/

இயந்திரங்களும் தமிழ் படிக்க உதவும் விக்கித்தரவு போன்ற தளங்களில் தமிழ்ப் பெயர்களையும் தமிழ்ச் சொற்களையும் கொடுத்துத் தரவுகளை அதிகரிக்கலாம். உலக மொழிகளுக்காக உருவாக்கப்பட்ட லேக்சிம் பகுதியும் உள்ளது.

https://www.wikidata.org/wiki/Wikidata:Main_Page

உலகின் முதன்மையான கலைக் களஞ்சியத்தில் தமிழில் கட்டுரை எழுதலாம், உள்ள கட்டுரையை விரிவுபடுத்தலாம், படங்களைக் கொடையளிக்கலாம்.

https://ta.wikipedia.org/

தற்போது மொழிகளுக்கிடையே ஒரு கட்டுரைப் போட்டியும் நடைபெற்று வருகிறது. அதில் கலந்து கொண்டு தமிழ் விக்கிப்பீடியாவை வெற்றி பெற வைக்கலாம்.

பல கட்டற்ற அமைப்புகளின் தளங்களைத் தமிழில் மொழிபெயர்க்கும் தேவை உள்ளது. அவற்றினை மொழிபெயர்க்கலாம்.

https://translatewiki.net/

https://wiki.hyperledger.org/display/I18N/Tamil+Documentation+Working+Group

சிறுவர் படக்கதைகளைத் தமிழில் மொழிபெயர்க்கலாம்.

https://storyweaver.org.in/stories?language=Tamil&sort=Ratings

ஆர்வமிருந்தால் கீழ்க்கண்ட முகநூல் குழுக்களில் இணைந்து மொழிசார்ந்த உரையாடலில் கலந்து கொள்ளலாம்.

https://www.facebook.com/groups/col.aayvu

https://www.facebook.com/groups/tamilsol

https://www.facebook.com/groups/vaanieditor

மேலும் ஆர்வமிருந்தால் கணினித் தமிழ் சார்ந்த கூகிள் குழுக்களில் இணைந்து புதிய தகவல்களை அறிந்து கொள்ளலாம்.

kanittamiz@googlegroups.com

freetamilcomputing@googlegroups.com

kanitamizhjobs@googlegroups.com

பின் குறிப்பு:

விடுபட்டத்தை நீங்களும் மறுமொழியில் சுட்டிக் காட்டலாம்.

வெண்முரசு - சொல்லடைவு

2022-11-18T03:08:00.008-08:00

ஒரு மொழி வளர அம்மொழியில் இலக்கியங்கள் வளர வேண்டும். அந்தவகையில் வெண்முரசு சமகால இலக்கியத்தில் முக்கியப் புதினமாகும். புதினம் முழுக்க பல புதிய சொற்கள் கையாளப்பட்டுள்ளன. புதியவர்களுக்கு வாசிக்க கடுமையானதாக இருந்தாலும், வாசிக்கக் கூடியவர்களுக்கு மொழியின் இனிமையையும் உணர்த்துகிறது. சொல்லாய்வு செய்யவும் மீளாய்வு செய்யவும் இச்சொற்கள் பயன்படும். ஆனால் அறிவியல்பூர்வமாக எத்தனைப் புதிய சொற்கள் உள்ளன எனக் கண்டுபிடிக்க ஒரு முயற்சி எடுக்கப்பட்டது.

நன்றி jeyamohan.in

சுளகு கருவி வழியாக சில கதைகளுக்கு முன்னரே சொல்லடைவுகள் உருவாக்கப்பட்டாலும், முதல் முறையாக ஒரு புதினத்திற்கான சொல்லடைவு மொழிநுட்பம் கொண்டு உருவாக்கப்பட்டுள்ளது. இப்புதினத்தின் 26 நூல்களில் 1932 அத்தியாயங்களில் சுமார் 1.38 கோடி சொற்களைக் கணினிவழி அலசி இந்த சொல்லடைவு உருவாக்கப்பட்டுள்ளது. அதில் 90% சொற்களின் அடிச்சொல் கணிக்கப்பட்டும் இதர சொற்கள் உள்ளவாறே பட்டியலாகியுள்ளன. கணினியால் கணிக்க முடியாதவை என்றால் புதிய சொல் என்று எடுத்துக் கொள்ள முடியாது ஆனால் நடைமுறையில் அதிகம் புழங்காத சொற்கள் என்று சொல்லமுடியும். நாளை கணினியின் திறன் கூடும் போது இந்த எண்ணிக்கையில் மாற்றங்கள் நிகழும் என்பதையும் கருத்தில் கொள்ளலாம்.

நூல்	மொத்தச் சொற்கள்	வாணியால் பகுக்க முடியாதவை
முதற்கனல்	84543	7718
மழைப்பாடல்	173733	15391
வண்ணக்கடல்	141509	13881
நீலம்	56463	8567
பிரயாகை	153956	9996
வெண்முகில்நகரம்	343689	29066
இந்திரநீலம்	525807	47110
காண்டீபம்	678381	58313
வெய்யோன்	159062	15516
பன்னிரு படைக்களம்	331091	33345
சொல்வளர்காடு	452717	45029
கிராதம்	159620	16135
மாமலர்	347741	32027
நீர்க்கோலம்	195108	18865
எழுதழல்	348760	35363
குருதிச்சாரல்	505304	52012
இமைக்கணம்	598061	61434
செந்நா வேங்கை	753298	77181
திசைதேர் வெள்ளம்	902531	93482
கார்கடல்	1070304	109038
இருட்கனி	1195815	119636
தீயின் எடை	1301463	128115
நீர்ச்சுடர்	1416884	137438
களிற்றியானை நிரை	1568449	150526
கல்பொருசிறுநுரை	157435	11071
முதலாவிண்	183548	13618
மொத்தம்	13805272	1339873

வெண்முரசு புதினத்தின் சொல்லடைவு இங்கே வெளியிடப்பட்டுள்ளது.

https://www.kaggle.com/datasets/neechalkaran/venmurasu நீங்கள் உங்கள் ஆய்வுக்குப் பயன்படுத்திக் கொள்ளலாம். அடிச்சொல் அடிப்படையில் "stem" என்று குறிக்கப்பட்டுள்ளது. மற்றவை "nonstem" என்று குறிக்கப்பட்டுள்ளது. கணினியால் பகுக்கமுடியாத சொற்கள் மட்டும் 9% உள்ளன. இவ்வகையில் மொத்தம் 1,34,934 தனித்த சொற்கள்(unique words) பயன்படுத்தப் பட்டுள்ளன. மொத்தமாக 21,764 அடிச்சொற்கள் தான் மீதி 1.24 கோடி சொற்களாகப் பயன்பட்டுள்ளன. இயந்திரவழிக் கற்றல் முதல் மொழியியல் ஆய்வுகளுக்குப் பயன்படுத்திக் கொள்ளலாம். புதிய புதிய சொல்லாடல்கள் புதிய புதிய வெளிச்சங்கள் கிடைக்கின்றன.

எத்தனையோ பர்னிச்சர்களை உடைத்த சமூகத்தளத்தில் இப்போது furniture ஏ உடைத்துக் கொண்டிருக்கிறோம். அறைகலன் என்ற சொல்லை யார் அறிமுகம் செய்து, யார் பயன்பாட்டிற்குக் கொண்டு வந்தார் என்று விவாதங்கள் நடந்து வருகின்றன. வெண்முரசிற்கு முன்னரே விக்சனரியில் 2006 இல் வாக்கில் இச்சொல் வந்தது என்று நேற்றே சுட்டிக்காட்டப்பட்டது. ஆனால் இன்றைய ஆய்வின்படி பார்த்தால் அறைகலன் அல்லது அறைக்கலன் என்ற எந்த சொல்லும் வெண்முரசு நாவலில் எங்கும் கிடைக்க வில்லை என்றும் தெரிகிறது.

எது எப்படியோ இரு நாட்களாக சொல் தொடர்பான விவாதம் கிளம்பியிருப்பது வரவேற்கப்படவேண்டிய ஒன்று.

வாணி திருத்தியின் அண்மைய மேம்பாடுகள்

2022-11-07T08:10:00.001-08:00

கோப்பு உள்ளீடு

தட்டச்சு செய்தோ அல்லது நகலெடுத்து ஒட்டியோ பிழை பார்க்காமல் நேரடியாக ஒரு நூலை ஆய்வு செய்து அதில் உள்ள பிழைகளைச் சுட்டிக்காட்டும் வசதி ஆங்கிலம் போன்ற மொழிகளில் இணையத்தில் உள்ளது. அந்த வசதி சில மாதம் முன்னர் வாணியில் அறிமுகமானது. மின்னூல் அல்லது அச்சு நூல் வெளியீட்டிற்கு முன்னர் பதிவேற்றி (.docx .rtf .txt) இதில் சோதித்துப் பார்க்கலாம். செயல்முறை விளக்கம்:

https://www.youtube.com/clip/UgkxgsqWLtiNvtWPY6CWjPBTpOw2Y6nrhu-8

குரோம் உலாவி:

பொதுவாக இணையத்தில் ஏதேனும் தட்டச்சு செய்தால், வாணி தளத்திற்கு வந்துதான் கோப்பாகவோ, உரையாகவோ இட்டுத் திருத்த இயலும். அண்மையில் அறிமுகமான வாணி பிழை திருத்தியின் குரோம் நீட்டிப்பு வழியாக டிவிட்டர், பேஸ்புக், விக்கிப்பீடியா உட்பட பெரும்பாலான இணையத்தளங்களில் தட்டச்சு செய்யும் இடைமுகத்திலேயே பிழை சோதனை செய்ய முடியும். ஆங்கிலத்தில் உள்ள கிராமர்லி போன்று நேரடியாக, பிழை திருத்த முடியாவிட்டாலும், பரிந்துரைகளை அளிக்கிறது. அது தொடர்பான விளக்கக் காணொளி.

https://www.youtube.com/watch?v=cVAmnKydY_I

இதர குறியாக்கங்கள்:

பொதுவாக ஒருங்குறியில் தான் பொரும்பாலான மொழிக் கருவிகள் செயல்படுகின்றன. ஆனால் சில பதிப்பகங்கள்/அலுவலகங்கள் இன்னும் ஒருங்குறிக்கு மாறவில்லை அவர்களுக்கு உதவும் பொருட்டு, ஒருங்குறி அல்லாத(Baamini, Vaanavil, TAM, TAB, TSCII) குறியாக்கங்களையும் ஏற்கும் வசதி அண்மையில் அறிமுகமானது. அதில் தமிழ் உள்ளடக்கத்தை ஒருங்குறிக்கு மாற்றாமல் எழுத்துப் பிழை, சந்திப் பிழைகளைத் திருத்திக் கொள்ள முடியும். எப்படித் திருத்தலாம் என்பது குறித்த செயல் முறை விளக்கம்

https://www.youtube.com/watch?v=BaOvrsQ8Urk

ஏற்கனவே சுமார் 50 குறியாக்கங்களை ஓவன் மூலம் ஒருங்குறிக்கு மாற்றலாம் என்பது குறிப்பிடத்தக்கது. அதில் உள்ள சில முக்கியக் குறியாக்கங்கள் மட்டும் இதில் இணைக்கப்பட்டுள்ளன. வேறு குறியாக்கங்களுக்குப் பிழைதிருத்த வசதி தேவைப் பட்டால் அறியத் தரலாம்.

வாணி பிழை திருத்தி

பொதுவான செயல்முறை விளக்கம்

கணித் தமிழ் சார்ந்த அண்மைய வெளியீடுகள்

2022-09-11T21:35:00.006-07:00

கடந்த சில மாதங்களாக வெளிவந்த சின்னசின்ன மேம்பாடுகள் குறித்த அறிவிப்பு.

கிரந்தம் நீக்கி

கிரந்தம் நீக்கி எழுத சில ஆர்வம் கொள்வார்கள். அவர்களுக்கு உதவும் பொருட்டு, கிரந்தம் நீக்கலுக்கான விதிகளுடன் கிரந்தம் நீக்கித்தரும் கருவி வெளியிடப்பட்டது. விதிகளும் அங்கேயே உள்ளன.

https://vaanieditor.com/grantham

விடுபட்ட விதிகளை உதாரணங்களோடு தரலாம்.

செயல்முறை காணொளி

கலைச்சொல் தரவகம்

கோட்டாளம் அவர்களின் கலைச்சொல் தரவகம் தற்போது புதுப்பிக்கப்பட்டுள்ளது. தனிமுயற்சியில் சேகரிக்கப்பட்ட சுமார் 1.16 லட்சம் கலைச் சொற்களைக் கொண்டுள்ளது.

https://oss.neechalkaran.com/dictionary/

தமிழ் எழுத்துரு

செனட் செந்தில் உருவாக்கிய தமிழி உட்பட நான்கு புதிய தமிழ் எழுத்துருக்கள் இங்கே சேர்க்கப்பட்டுள்ளன. முன்தோற்றம் பார்த்துப் பயன்படுத்திக் கொள்ளலாம்

https://oss.neechalkaran.com/tamilfonts/?preview=Tamilri_Chenet

திருக்குறள் தரவுத்தொகுப்பு

பல ஆங்கில இலக்கியங்கள் இயந்திரவழிக் கற்றலுக்கு உதவும் வகையில் தரவுத்தொகுப்புகளாக(dataset) இணையத்தில் உள்ளன. அவற்றை யாரும் எளிதில் எடுத்தாய்வு செய்ய முடியும். ஆனால் தமிழில் பெரும்பாலும் உரைத்தொகுப்பாகத்(text) தான் உள்ளன. தற்போது திருக்குறளுக்கான சுமார் பதின்மூன்று உரைகள் தரவுத் தொகுப்பாக மாற்றி வெளியிடப்பட்டுள்ளன. பொதுவான ஆய்வுகளுக்கும் பயன்படுத்திக் கொள்ள முடியும் இயந்திரவழிக் கற்றலுக்கும் பயன்படுத்திக் கொள்ளலாம்.

https://www.kaggle.com/datasets/neechalkaran/thirukkural

மேலும் பல உரையாசிரியர்களின் உரைகள் பிடிஎப் வடிவிலேயே உள்ளன. ஆர்வமுள்ளவர்கள் உதவினால் அவற்றையும் தரவுத் தொகுப்பாக மாற்ற முடியும்.

ஆய்வுத் தேடல்

https://oss.neechalkaran.com/thesis_search

பொதுவாகவே முனைவர் பட்டம் உட்பட பெரும்பாலான பட்ட ஆய்வுகள் இணையத்தில் தற்போது கிடைத்து வருகின்றன. ஆனால் கூகிளில் ஆய்வுத் தளங்களில் மட்டும் தேடி எடுப்பது சற்று சிரமம். கூகிள் ஸ்காலரில் தமிழுக்கான தளங்கள் என வகைப்பாடு இல்லை. எனவே அறிவுத் திருட்டு சோதனை செய்யவும், ஒப்பிட்டுப் பார்க்கவும் ஆய்வுக் கட்டுரைகளைத் தேடும் மாணவர்களுக்கு உதவும் நோக்கில் புதிய தேடுபொறி இடைமுகம் அறிமுகமாகியுள்ளது. இது கூகிளை மையமாக வைத்துச் செயல்படுகிறது. ஆனால் ஆய்வுக் கட்டுரைகளை மட்டுமே காட்டும். ஏதேனும் விடுபட்ட தமிழ் ஆய்வு இதழ்களின் இணையத்தளங்கள் இருந்தால் அறியத் தரலாம். தேவையானவர்கள் பயன்படுத்திக் கொள்ளலாம்.

மழலையர்களுக்கான புதிய அரிச்சுவடி செயலி

2022-03-28T08:48:00.002-07:00

பெருந்தொற்றுக் காலத்திற்குப் பின் பொதுவாகவே இணையவழிக் கற்றல் அதிகரித்துள்ளது. குறிப்பாக பைஜூஸ் போன்ற நிறுவனங்கள் போலியான விளம்பரங்கள் கொடுத்தாலும் நவீன கற்றல் முறையை அறிமுகம் செய்துவருவதை மறுக்க இயலாது. நாம் விரும்பாவிட்டாலும் கணினிவழிக் கல்வி இச்சமூகத்தின் அங்கமாகிவிட்டது. ஆங்கிலம் உட்படப் பல பாடங்களுக்கு உலக அளவில் கற்றலுக்கான தேவையிருப்பதால் அவை சார்ந்த கருவிகளும் செயலிகளும் அதிகமாக உள்ளன. உதாரணமாக ஏ, பி, சி, டி வரைபடங்கள் சந்தைக்கு வரும் அளவிற்குத் தமிழ் அரிச்சுவடிகள் விற்பனைக்கு வருவதில்லை. வந்தாலும் ஆங்கிலத்திற்கு இருப்பது போலப் புதுமையான முறைகளில் விளையாட்டுப் பொருளாகக் கிடைப்பதில்லை. இதை மாற்றி, தமிழுக்கு ஒருபுறம் ஊக்குவிக்கும் வேளையில் புதிய கற்றல் செயலி ஒன்று இங்கு அறிமுகம் செய்யப்படுகிறது.

பொதுவாகவே மழலையர்களுக்காகத் தமிழ்க் கற்பிக்கும் செயலிகள் சில உள்ளன. தொடக்கத்தில் அவை காணொளிகளாக வந்தன, பின்னர் படங்களாகவும் ஒலிக்கீற்றாகவும் வந்தன, பின்னர் அசைவூட்டப் படங்களாகவும் வந்தன. இப்போதைய நவீனத் தொழில்நுட்பத்தில் இதற்கும் மேலே ஊடாடக்கூடிய செயலிகள் பல வர வேண்டும். இத்தேடலில் ஒரு முயற்சியாகப் புதிய இணையச் செயலி ஒன்று அறிமுகமாகியுள்ளது. இதில் மழலையர்களுக்கு 247 எழுத்தின் அடிப்படைகளைக் கற்றுக் கொடுக்கும். நான்கு நிலைகளில் தனி எழுத்து, உயிர் மெய் கூட்டு, உயிர்மெய் எழுத்து, வரிசை எழுத்து என ஒரு குழந்தையே தொட்டுப் பார்த்து, கேட்டுணர்ந்து, கண்டுணர்ந்து புரிந்து கொள்ளும் வகையில் வடிவமைக்கப்பட்டுள்ளது. கவனச் சிதறலில்லாமல் படிக்க பிரத்தியேகமாக வடிவமைக்கப்பட்டுள்ளது. ஒருமுறை முழுத்திரையை விரித்துவிட்டு ஒரு குழந்தையிடம் கொடுத்தால் தானே இயக்கிப் பார்க்கும் வகையில் எளிதாக இருக்கும். கைப்பேசி, தத்தல் போன்ற கையடக்கக் கருவிகளும் கணினியிலும் இயங்கும். அந்தந்த உலாவியில் முகவரியை சேமித்துக் கொண்டால் எளிதில் மீண்டும் மீண்டும் பயன்படுத்தலாம்.

http://apps.neechalkaran.com/alphabets

தொடக்கத்தில் விக்கிமீடியா பொதுவகத்தில் உள்ள 30 எழுத்துக்களுக்கு மட்டும் ஒலி வடிவம் தரப்பட்டது. பின்னர் அதன் திறனை அதிகரிக்க 247 எழுத்தையும் ஒரே குரலில் பதிவு செய்து நவீன நுட்பத்தில் இயக்கவும் ஒலிக்கவும் வசதி செய்யப் பட்டுள்ளது. இனிமையான குரலில் அனைத்து எழுத்திற்கும் குரல் கொடுத்துள்ளார் ஆங்காங்கைச் சேர்ந்த முனைவர் சித்ரா. இதிலுள்ள எழுதுமுறை தமிழ்நாட்டை மையமாகக் கொண்டது. அதாவது மேலிருந்து கீழாக நேர் கோடிட்டுப் பின்னரே கிடை மட்டக்கோட்டை இட்டு ஈ முதல் ர வரை எழுதும் முறை(எழுத்து முறையல்ல). மேலும் யோசனைகளையும், கருத்துக்களையும் அனுப்பலாம்.

இவை முழுக்கக் கற்றுக் கொடுக்கும் வகையில் உருவாக்கப்பட்டுள்ளது. கற்றவற்றை மதிப்பீடு செய்யும் முறைகளும், அரிச்சுவடி சார்ந்த விளையாட்டுக்களும் குழந்தைகளின் பயன்பாட்டிற்கு ஏற்ப உருவாக்கப்படும். பயனுள்ளதென்றால் தேவைப்படும் குழந்தைகளிடம் பகிருங்கள். மேலும் சொற்கள் கற்பித்தல், பாடல்கள் போன்று இம்மாதிரி நவீன முறையில் கற்பிக்கும் ஆர்வமுள்ளவர்களும் இணைந்து இச்செயலியை மேம்படுத்தலாம்.

http://apps.neechalkaran.com/alphabets

இதுபோன்ற வேறு கற்றல் செயலிகள் இவற்றையும் பயன்படுத்தலாம்.

https://www.palagutamil.in/

https://www.pollachinasan.co.in/tt/index.htm

http://learn101.org/tamil.php

http://ilovelanguages.org/tamil.php

மேலும் https://avvaitamil.org/online-resources/

புதிய தமிழ் உரையாடி சோதனையோட்டம்

2022-02-08T01:16:00.009-08:00

சேட்பாட் எனப்படும் உரையாடி என்பது மனிதர்களுடன் எழுத்துவடிவில் ஊடாடும் செயலியாகும். தமிழில் ஏற்கனவே ஆயிதழ் அவினி, அணில்பாட் போன்று சில உள்ளன. இந்த உரையாடிகள் தானியங்கியாக மனிதர்களுடன் ஊடாடி வேண்டிய பணிகளைச் செய்யும். குறிப்பாக வங்கித் துறை, சேவைத் துறைகளில் ஆங்கில உரையாடிகள் தங்களது வாடிக்கையாளர்களுக்குத் தேவையான தகவல்களைக் கொடுத்து உதவும். தமிழில் இல்லை காரணம் தமிழில் தட்டச்சு செய்தால் அதனைப் புரிந்துகொண்டு விடையை அளிக்கும் வகையில் மேம்படுத்த இயல்மொழி பகுப்பாய்வு நுட்பம் தமிழில் வளர வேண்டும். அந்த அடிப்படையில் கணினி மொழியியல்(Computational Linguistics) துறைக்குக் கிடைத்துள்ள புது வரவு விக்கித்தரவு(wikidata) என்று ஐந்தாண்டுகளுக்கு முன்னர் ஓர் ஆய்வுக்கட்டுரை இதே தளத்தில் வெளிவந்தது. அந்த அனுமானம் இன்று wikidata மற்றும் VaaniNLP உதவியுடன் நிரூபிக்கப்பட்டுள்ளது. http://apps.neechalkaran.com/chatbot

விக்கித்தரவை அடிப்படையாகக் கொண்டே இந்தத் தமிழ் உரையாடி உருவாக்கப்பட்டுள்ளது. ஏதேனும் சிறிய கேள்வியினைக் கேட்டால் அது விக்கித்தரவிற்கேற்ப அடிச்சொல்லைப் புரிந்து கொண்டு வினாவல் செய்து விடையைத் தமிழில் அளிக்கிறது.

உதாரணக் கேள்விகள்:

சிலப்பதிகாரத்தின் நூலாசிரியர் யார்?

இந்தியாவின் தலைநகரம் எது?

இந்தியாவின் பரப்பளவு எவ்வளவு?

மு. க. ஸ்டாலினின் பிறந்த நாள் எது?

மு. கருணாநிதியின் தாய் யார்?

ஜெயலலிதாவின் பிறந்த நாள் என்று?

நரேந்திர மோடியின் பிறந்த நாள் என்று?

மதுரையின் மக்கள் தொகை எத்தனை?

இப்படி விக்கித்தரவில் தமிழில் பெயர் கொண்ட எந்த ஒரு தரவையும் இயல்பான தமிழில் கேள்வியாகக் கேட்கமுடியும். விக்கித்தரவில் தமிழில் இல்லாத போதோ, தமிழ் இயல்மொழிப் பகுப்பாய்வில் புரிந்து கொள்ள முடியாதபோதோ பதிலளிக்காது.

கொடுக்கப்பட்ட கேள்வியின் எழுவாய் மற்றும் செய்பாடுபொருளைப் புரிந்து கொண்டு அவற்றை விக்கித்தரவில் தேடி சரியான விடையைக் கண்டுபிடிக்கும். முதல் நிலையில் கொடுக்கப்பட்ட சொற்களின் அடிச்சொல்லைப் பிரித்துக் கொள்ளும் அதாவது விகுதிகளை நீக்கி அகராதிச் சொல்லை எடுத்துக் கொள்ளும். பின்னர் ஒரு பொருளைப் பலவாறு எழுதும் போது அவற்றை இயல்பாக்க(Normalization) நுட்பத்தில் சீர் செய்யவேண்டும். அல்லது விக்கித்தரவில் alias என்ற வகையிலாவது குறிப்பை உள்ளிட்டிருக்க வேண்டும். இதன் மூலம் "தமிழகம்" என்றாலோ "தமிழ் நாடு" என்றாலோ புரிந்து கொள்ளும். அதன் பிறகு தகவல்களை உரிய உருப்படி எண் மற்றும் பண்பு எண் கொண்டு விக்கித்தரவில் தேடித் தரும். எல்லாம் விக்கித்தரவிலிருந்து எடுப்பதால் அங்கே அத்தகவல் இருந்தால் மட்டுமே கிடைக்கும். சென்னையின் மக்கள் தொகையைக் கேட்டால் கிடைக்கும் ஆனால் சென்னை மாநகரட்சியின் மக்கள் தொகையைக் கேட்டால் கிடைக்காது. காரணம் அத்தகவல் அங்கே இல்லை. யாராவது சேர்த்த பிறகு அவற்றை இவ்வுரையாடி எடுத்துத் தரும். சில இடங்களில் பிழையான தகவலிருந்தால் அவற்றையும் தவிர்க்க இயலாது. யாரேனும் விக்கித்தரவில் திருத்தினால் இதுவும் சரியாக செயல்படும். இம்மாதிரி உலக அறிவைச் சேர்க்கும் பணியில் நீங்களும் விக்கித்தரவில் ஈடுபடலாம்.

எதிர்காலத்தில் பேச்சு நுட்பத்தையும் இதில் இணைக்கலாம், சிறிய கேள்விகளை மட்டுமல்லாமல் Discourse processing திறனை அதிகரித்து பெரிய கேள்விகளையும் புரிந்து கொள்ளும் திறனை வளர்க்கலாம், கல்வித்துறையில் போட்டித் தேர்வுகளுக்கு உதவும் வகையில் மேம்படுத்தலாம். தற்போதைக்கு வெறும் தேடலை மட்டுமே செய்கிறது. எதிர்காலத்தில் புரிந்துகொண்ட பகுத்தறிந்து விடையளிக்கவும் விவரிப்பு விடைகளையும் கொடுக்க வைக்க முடியும். ஆர்வமுள்ளவர்கள் இந்த APIஐப் பயன்படுத்தி முயலாம். https://chatwiki.toolforge.org/

சிறிய விளக்கக் காணொளியும் உள்ளது. விக்கித்தரவில் தமிழ்ப் பெயர்களும் மேம்பட்ட தமிழ் இயல்மொழிப் பகுப்பாய்வுப் பொதியும் உருவாகும் நாளில் உலகில் மிகப் பெரிய தமிழறிவுச் சுரங்கம் கிடைக்கும்.

தமிழுக்கான புதிய கூகிள் குழு

2021-11-08T20:08:00.001-08:00

வளரும் தொழில்நுட்பத்தில் தமிழைப் புகுத்த எந்தளவிற்குத் தொழில்நுட்பம் தேவையோ அதைவிட அதிகமாக அத்துறையில் மனிதவளத்தை அதிகரிக்க வேண்டும். கணித்தமிழுக்கு மனிதவளக் குழாம் உருவாக்கும் தேவை உள்ளது. சில மாதங்களுக்கு முன்னர் ஐரோப்பிய நிறுவனம் ஒன்று சரியான நபர்கள் கிடைக்காததால் தமிழில் தங்கள் சேவையை வழங்கவில்லை என்று சொன்னார்கள். அது உண்மையும் கூட. மொழிபெயர்ப்பாளர்கள், உள்ளடக்க எழுத்தாளர்கள், புத்தாக்க எழுத்தர் என்று பல்வேறு பணிகள் இணையத்தால் அபரிவிதமாக வளர்ந்துவருகின்றன. அந்தத் திறனை மேம்படுத்தவும் சரியான வாய்ப்புகளை அனைவருக்கும் கொண்டு சேர்க்கவும் இத்தகைய செய்திகளைப் பகிர ஒரு பொதுக் குழு உருவாக்கப்பட்டுள்ளது.

கணித்தமிழ் வேலைவாய்ப்பு என்ற இந்த கூகிள் குழுவில் தமிழும் கணினியும் தெரிந்த ஒருவருக்குப் பொருளாதாரப் பயனளிக்கும் செய்திகளை இதில் பகிரலாம். நீங்களும் பயனடையலாம். உங்கள் நிறுவனங்களில் இத்தகைய பணிவாய்ப்பிருந்தால் பகிரலாம். சிறிய தட்டச்சு முதல் பெரிய ஊடக மேலாண்மை வரை தமிழ் சார்ந்த வேலைவாய்ப்புப் பதிவுகளைப் பகிரலாம். சிறிய வலைப்பதிவு போட்டி தொடங்கி பன்னாட்டுப் பணி வாய்ப்பு வரை இணையத்தில் தமிழ்சார்ந்து இயங்குபவர்களை இது ஊக்குவிக்கும். திறனாளர்களையும் தேவையுள்ளோர்களையும் இணைக்கும் சிறு முயற்சி. ஆர்வமுள்ளவர்களிடமும் பகிருங்கள்.

https://groups.google.com/g/kanitamizhjobs

அனைத்துத் தொழில்நுட்பத்தையும் தமிழில் வழங்க மனிதவளம் குறையாக இருக்கக்கூடாது என்பதே நோக்கம். இதுபோல ஏற்கனவே உள்ள வேறு முக்கிய கூகிள் குழுக்கள் கீழே உள்ளன. கணினித் துறையில் ஆர்வமுள்ளவர்கள் பின்தொடர வேண்டியவை

கணினித் தமிழ்த் தன்னார்வலர்களின் குழு

https://groups.google.com/g/freetamilcomputing (1379)

தமிழ் இணையக் கல்விக் கழகத்தின் குழு

https://groups.google.com/g/tva_kanitamil_valarchi (112)

உத்தமம் அமைப்பின் குழு

https://groups.google.com/g/kanittamiz (51)

தமிழ் சார்ந்து உரையாட முக்கிய பேஸ்புக் குழுக்கள்

https://www.facebook.com/groups/col.aayvu - சொல்லாய்வு

https://www.facebook.com/groups/tamilsol - சொல்

https://www.facebook.com/groups/179849046077378 - நோக்கர்

வேறு குழுக்களையும் மறுமொழியில் இட்டுப்பகிரலாம்.

செய்தித் திரட்டி - திரள்

2021-08-14T17:12:00.001-07:00

இது தரவு உலகம். அதில் கைப்பேசி உறங்கும் வரை இணையத்தில் உலாவுபவர்களே அதிகம். இணையத்தில் எல்லாம் கிடைக்கும் தான் ஆனால் எல்லாம் கலந்துதான் கிடைக்கும். அதில் தேவையானதைப் பிரித்தெடுப்பதே இன்றைய காலத்தில் ஒருவரின் அதிகபட்ச மெனக்கெடலாகும். வலைப்பதிவாக இருந்தாலும், காணொளி அலைவரிசையாக இருந்தாலும், சமூகத்தளமாக இருந்தாலும் தொழில்நுட்பம் வேண்டிய ஓடைகளை பின்பற்ற வாய்ப்புகளை அளிக்கிறது. ஆனால் அனைத்தையும் தொகுத்துப் பார்க்கும் வசதி இல்லை. அந்த இலக்கில், குவிந்து கிடக்கும் வலைப்பதிவுகளைத் திரட்ட தமிழ் இயற்கை மொழிப் பகுப்பாய்வுத் திறனுடன் தமிழ்ச்சரம் சில ஆண்டுகளுக்கு முன்னர் உதயமானது. அதுபோல செய்தித் தளங்களைத் திரட்ட கடந்த தமிழ்ப் புத்தாண்டில் திரள் தளம் உதயமானது. (நண்பர் செல்வமுரளியுடன் சேர்ந்து வெளியிட்டப்பட்டது) இது கூகிள் நியூஸ் போல இணையச் செய்திகளைத் திரட்டித் தரும் ஒரு சேவை. பெரிய ஊடகச் செய்திகளைத் தவிர்த்து இதர செய்தித் தளங்களின் தரவுகளைப் பகுப்பாய்வு செய்து வகைப்படுத்தி வாசகருக்கு அளிக்கிறது.

https://thiral.in/

பொதுவாகச் செய்திகளைத் தானியக்கத்தில் வகைப்படுத்தல் என்பது தமிழில் சவாலானது. ஆங்கிலம் போல குறிச்சொற்கள் தனியாக இருப்பதில்லை, தமிழில் ஒரு சொல்லானது வெவ்வேறு வடிவங்களை ஏற்கும். உதாரணத்திற்கு வேற்றுமை உருபு, பன்மை விகுதி, திணை விகுதி என்று ஏற்று மாறிவரும். எனவே அடிப்படையில் உருபனியல்(morphology) பகுப்பி(analyser), உருவாக்கி(generator) முதல் கட்டமாகத் தேவை. அடுத்த நிலையில் பெயர் பொருள் சுட்டி(Named Entity Recognition) மற்றும் குறிச்சொல் கொத்தாக்கம் (keyword clustering) நுட்பங்களும் தேவை. இதன் சோதனை முயற்சியாக இந்த நுட்பங்கள் எல்லாம் திரள் தளத்தில் பயன்படுத்தப்பட்டுள்ளன. அதிகம் பேசப்படும் தலைப்புகளை எந்திரவழிக் கற்றல் கொண்டு வகைப்படுத்தி எளிய பயனருக்கும் பயன்தரும் வகையில் காட்டுகிறது. செயற்கை நுண்ணறிவுடன் வெளி வந்த முதல் செய்தித் திரட்டியாக இருக்கலாம்.

கூடுதலாகப் பயனருக்கு உதவும் பொருட்டு, சூடான தலைப்புகள், குறிச்சொல் தேடல், கடந்த கால செய்திகளைத் தேடல் போன்ற வசதிகளுள்ளன. இதில் மாவட்டம் வாரியாகவும் குறிச்சொல் வாரியாகவும் தகவல்கள் தொகுக்கப்படுவதைப் பார்க்கலாம். இது செய்தியை மட்டுமே திரட்டிக் காட்டும் அந்தந்தத் தளத்திற்குச் சென்றே செய்திகளைப் படிக்க வேண்டும். இணையத்தில் தமிழ் உள்ளடக்கம் அதிகரிக்க இத்தகைய செய்தித் தளங்கள் அதிகம் உருவாக வேண்டும். அவற்றை ஊக்கப்படுத்த மாதம் தோறும் அலெக்சா தரவரிசைப் பட்டியலும் திரள் சார்பாக வெளியாகிறது. செய்திகளை உடனுக்குடன் அறிதல், செய்திகளின் ஒப்பீடு, செய்தி விவரிப்பின் ஒப்பீடு போன்றவை இத்தகைய திரட்டி மூலம் சாத்தியமாகிறது. நீங்களும் பயன்படுத்திப் பாருங்கள் கருத்துக்களை அறியத் தாருங்கள்.

தமிழ் மின்னூல் அடைவு

2021-06-01T17:00:00.004-07:00

அச்சில் வந்த தமிழ் நூல்களை உலக அளவில் ஆங்காங்கே மின்னுருவாக்கம் செய்து வருகின்றன, குறிப்பாக தமிழிணைய மின்னூலகம், பொது நூலக இயக்ககம், நூலக.ஆர்க், ரோஜா முத்தையா நூலகம் இப்படிப் பல அமைப்புகள் உள்ளன. அவற்றின் நூல்கள் அனைத்தும் இலவசமாகத் தளத்திலும் வெளியிட்டுவருகின்றனர். வலைவழித் தேடல் நுட்பம் தெரிந்தவர்கள் தேடிப் படிப்பர் ஆனால் சாதாரணப் பயனருக்கும், மாணவர்களுக்கும் தேடிக் கிடைப்பதில்லை. அத்தகையோர்க்குப் பயன்படும் வகையில் அவற்றிற்கான ஒரு அடைவு(directory) உருவாக்கப்பட்டுள்ளது. (யாழ்ப்பாணப் பொது நூலக எரிப்பு நினைவாக ஜூன் 2 இல் வெளியிடப்படுகிறது)

https://oss.neechalkaran.com/books/

இதுவரை முக்கிய ஐந்து தள நூல்களின் பட்டியல் என சுமார் 27 ஆயிரம் உருப்படிகள் தொகுக்கப்பட்டுள்ளன. மேலும் நூல்கள் எதிர்வரும் நாட்களில் இணைக்கப்படவுள்ளன. நேரடியாகத் தலைப்புவாரியாகவோ, ஆசிரியர்வாரியாகவோ, குறிச்சொல் வாரியாகவோ தேடலாம், தரவிறக்கலாம். ஒரு பக்கத்தில் எவ்வளவு நூல்கள் காட்டவேண்டும் என்பதையும் மாற்றிக் கொள்ளலாம். அந்தந்த நூல்களைச் சொடுக்கினால் தரவிறக்கமும் செய்ய முடியும். இதுவொரு அடைவு, மூல தளத்தின் மாறுதல்கள் இதையும் பாதிக்கக் கூடும் என்பதையும் கருத்தில் கொள்க.

இது அறிவியல்பூர்வமானதாக தொகுக்கப்படாமல் இருக்கலாம் ஆனால் கிடைக்கும் நுட்பத்தில் திரட்டித் தொகுக்கப்பட்டுள்ளது. கிட்ஹப்பில் உள்ளதால் யாரும் எடுத்தும் மேம்படுத்தலாம். கருத்துக்களையும் ஆலோசனைகளையும் அனுப்பலாம். எழுத்தாக்கம் செய்யவும், ஆய்வுகளுக்கும் வாசிப்பனுபவத்தைப் பரவலாக்கவும் இவை உதவலாம்.

நேரடியாகப் படிக்க விரும்புபவர்கள் கீழ்க்கண்ட முகவரிகள் உதவும். அரிதான நூல்களைத் தொகுக்கும் முக்கிய ஐந்து அமைப்புகளின் தளங்கள்

https://tamildigitallibrary.in

https://www.noolaham.org/

https://archive.org/details/koviloorandavarlibrary

https://archive.org/details/RojaMuthiah

http://117.239.65.2:8080/jspui

இதர மின்னூல்களைப் படிக்கத் தரும் தளங்கள்

https://projectmadurai.org/

https://ndl.iitkgp.ac.in

http://www.chennailibrary.com/

http://www.ulakaththamizh.in/book_all

http://library.bjp.org/jspui/

http://dvkperiyar.com/?page_id=17537

http://community.ebooklibrary.org

கோலசுரபியின் புதிய பதிப்பு அறிமுகம்

2021-01-16T08:09:00.003-08:00

தமிழர்களின் கலை வடிவான கோலங்களை இணையத்தில் உருவாக்கிக் கொடுக்கும் செயலியாக 2012 ஆம் ஆண்டு கோலசுரபி வெளிவந்தது. பெரிதாக வரைகலை நிபுணத்துவமின்றி, கணித நிபுணத்துவத்தில் உருவான அந்தச் செயலியில் தான்தோன்றித்தனமான கோலங்கள் உருவாகிக் கொண்டே இருக்கும். அதனைப் பலர் பயன்படுத்தியும் வந்திருப்பீர்கள். அதன் மேம்பட்ட பதிப்பு ஜெர்மனியிலுள்ள முன்சென் தமிழ்ப் பள்ளியின் பொங்கல் விழாவில் இன்று(ஜன 16 2021) வெளியிடப்பட்டது.

http://apps.neechalkaran.com/kolasurabhi

இதில் கூடுதலாக இரு வகை கோலங்களை வரையும் திறனும், கோடுகளுக்கு நிறங்களை மாற்றிக் கொள்ளும் திறனும் புதியதாக அறிமுகமாகியுள்ளன. மேலும் வரைகலையில் நவீனமான யுக்தியைக் கொண்டு படங்களை வரைந்து தள்ளுவதால், உருவாக்கப்பட்ட ஒவ்வொரு கோலமும் அழியாமல் நழுவுபடமாக (slide show) போல சேர்ந்துகொள்ளும். விருப்பமான படத்தை இப்போது நேரடியாகவே சேமித்துக் கொள்ளலாம். முன்பு கோலத்தில் நான்குபுறம் மட்டுமே வளைகோடுகள் செல்லும் ஆனால் புதிய பதிப்பில் குறுக்காகவும் செல்லும் இதனால் பார்த்திராத கோலங்களும், புதுப்புது வடிவங்களும் கிடைக்கும். நட்சத்திர வடிவக் கோலங்களில் தான்தோன்றியான முனைகளுடன் புள்ளிகளுக்கேற்ற அளவில் வரைந்து கொடுக்கும். அனைத்தையும் ஒருமுறை வரைந்து பார்க்கலாம்.

கோலங்களைச் சிறுவயதில் நன்கு வரையும் குழந்தைகள் கணிதத்தில் கெட்டிக்காரர்களாக இருப்பார்கள். இராமனுஜரும் தனது தாயின் கோலங்களைப் பார்த்தே கணித வல்லுநராக உயர்ந்திருக்கலாம். கோலங்கள் கணிதத் திறனின் வெளிப்பாடு மட்டுமல்லாமல் கற்பனையின் வெளிப்பாடும் தான். கோலசுரபியின் கோலங்கள் அனைத்தும் கட்டுற்ற கோலங்கள், கட்டறு கோலங்கள் இத்தகைய கணித/கணினி சூத்திரங்களுக்குள் அடைப்பது ஒரு சவால் தான். கோலத்தின் விதிகள் என்றால் நேர்ப் புள்ளி, ஊடு புள்ளி என்று இரு வகையாகக் கோலங்களுக்குப் புள்ளிகள் உண்டு. சிக்கு, நெளி, கம்பி, புள்ளி போன்றவை அதன் அங்கங்களாகும். புள்ளி இல்லாமலும் பூக்கோலங்கள் கட்டறு கோலங்கள் உள்ளன. ஒருமுறை வந்த வழியே கோடுகள் மீண்டும் வரக்கூடாது. எங்குமே கூரிய முனையில் வளையக் கூடாது. அனைத்துப் புள்ளிகளையும் கோடுகள் கடந்திருக்க வேண்டும் இவை கோலத்தின் விதிகள். ஆந்திராவில் முக்கு, மேற்கு வங்காளத்தில் ஆல்பனா என்றும், சத்தீஸ்கரில் சௌக்புராணா என்றும் இதர பகுதிகளில் ரங்கோலி, ரங்கவல்லி என்றும் அழைக்கப்படுகிறது. கோலப்பொடி, அரிசிமாவு, சாணம், வண்ணப்பொடி, பூக்கள் போன்றவை கோலங்கள் வரைய பயன்படும் பொருட்கள். நட்சத்திரம், விளக்கு, தாமரை, ரோஜா, அன்னம், கிளி, மயில் போன்றவை கோலங்களில் அதிகமாக இடம் பெறும் வடிவங்களாகும். சங்கப் பாடலான நற்றிணையில் "வரி" என்றும் அகநானூற்றில் "கோல்" என்றும் பரிபாடலில் "அழகு/ஒப்பனை" என்றும் பல்வேறு குறிப்புகள் கோலத்தைப் பற்றிய உள்ளன. வரிவடிவக் கோலங்கள் தவிர பெரும்பாலும் நான்கு அல்லது இரு புறமும் ஒரே ஒழுங்கில் சதுரம், வட்டம், அறுகோணம் அல்லது எண்கோணம் வடிவில் இருக்கும்.

கோலங்களை வரைந்து குழந்தைகள் பழக எளிய செயல்முறைப் பயிற்சிக்கான ஒரு மின்னூலும் இந்த நிகழ்ச்சியில் வெளியிடப்பட்டது. இந்த நூலினை அச்சிட்டுக் கோலங்களுக்கு வண்ணம் தீட்டலாம், நிறைவடையாத கோலங்களை வரைந்து காட்டலாம். கோலப் பயிற்சிக்கான புத்தகங்கள் பெரிதாக இல்லை என்பதால் இதனைக் குழந்தைகளுக்குத் தந்து முயன்றும் பார்க்கலாம். இந்நூல் படைப்பாக்கப் பொதுமத்தில் (CC BY-SA) வெளியிடப்படுகிறது. அனைவருடனும் பகிரலாம், கோலங்களைப் பரப்பலாம். கோலசுரபியின் நிறைகுறைகளையும் ஆலோசனைகளையும் அறியத்தரலாம்.

ஒருங்குறி மாற்றியின் புதிய பதிப்பு

2021-01-11T16:00:00.000-08:00

தமிழில் குறியாக்க மாற்றிகள் பல இருந்தாலும் அவற்றில் விடுபட்ட குறியாக்கங்கள் சில இருந்தன. அதற்காக ஓவன் செயலி 2016 இல் வெளிவந்தது. இதையும் கணிசமான பயனர்கள் பயன்படுத்தி வந்தனர். இப்போது ஆங்கிலம் கலந்த கோப்புக்களையும் வடிவமைப்பு மாறாமல் இனி ஒருங்குறிக்கு மாற்ற முடியும். கடந்த சில நாட்களாக இதைக் கவனித்திருக்கலாம் அல்லது சிலர் பயன்படுத்திப் பின்னூட்டம் அனுப்பியிருக்கலாம். குறுகிய வட்டத்திற்குள் நிகழ்ந்த சோதனைக்குப் பிறகு இன்று அனைவருக்கும் அறிமுகம் செய்யப்படுகிறது.

http://apps.neechalkaran.com/oovan

Tamil unicode converter

இதில் நாற்பதிற்கும் மேற்பட்டவற்றை இருபுறமும் மாற்றும். இதில் வெகு நாட்களாக இரு வசதிகளைப் பெரும்பாலானோர் எதிர்பார்த்தனர். ஒழுங்கு(format) மாறாமல் எழுத்துருவை மாற்ற வேண்டும் மற்றும் பிற மொழி குறிப்பாக ஆங்கிலம் கலந்த கட்டுரைகளில் தமிழை மட்டும் மாற்ற வேண்டும். இவை உண்மையில் தற்காலப் பயன்பாட்டிற்கும் பெரிதும் தேவையானது. கடந்த ஆண்டு இந்த இருவசதிகளும் கூகிள் டாக்ஸ் செயலிக்கு உருவாக்கப்பட்டது. சில நூல்களும் அதில் மாற்றப்பட்டு வெளிவந்தன. தற்போது இணையத்தில் இவ்வசதி புதுப்பிக்கப்பட்டு, புதிய பதிப்பாக "ஓவன்" அனைவருக்கும் அறிமுகமாகிறது.

இனி எந்தவொரு ஆர்.டி.எப்.(Rich Text Format) வடிவக் கோப்பையும் வெட்டி ஒட்டி மாற்றிக் கொள்ளலாம். பழைய முறையிலும் வெறும் பனுவலை மட்டும் இட்டும் மாற்றிக் கொள்ளலாம். எம்.எஸ்.வேர்ட் போன்ற சொல்லாளர்களில் இருந்தோ வேறு இணையப் பக்கத்திலிருந்தோ நேரடியாகவும் உள்ளடக்கத்தை இட்டால் அதிலுள்ள எழுத்துருக்களைக் காட்டும் அதில் விரும்பியவற்றை மட்டும் தேர்வு செய்து மாற்றிக் கொள்ளலாம். மேலும் மாற்றப்பட்ட ஆக்கங்களை மீண்டும் ஒழுங்கு மாறாமல் பயன்படுத்த முடியும். உள்ளீட்டுக் குறியாக்கம் தெரியாவிட்டால் "auto detect" தேர்வு செய்து முயலலாம். வெளியீட்டுக் குறியாக்கத்தை "default" என்று கொடுத்தால் யுனிக்கோட் முறைக்கே மாற்றும். மற்றபடி பழைய அம்சங்கள் அப்படியே உள்ளன.

சிறிய செயல்முறை விளக்கம்

இதில் மொத்தமாக 43 வகையான குறியாக்கங்கள் உள்ளன. புதிய குறியாக்கங்கள் ஏதேனும் இதில் விடுபட்டிருந்தால் அறியத் தரலாம். நிறை குறைகளையும் பகிர்ந்து மேம்படுத்த உதவலாம்.

பொதுத் தகவல்

இலவச தமிழ் ஒருங்குறி எழுத்துருக்கள் பல இருந்தாலும் பழைய வடிவமைப்பு மென்பொருட்களைப் பயன்படுத்துபவர்கள் யுனிக்கோட் அல்லாத குறியாக்கத்தில் உருவான எழுத்துருவையே பயன்படுத்துகின்றனர். இணையத்தில் ஒருங்குறியே பிரதானமானாலும் அவை அல்லாத தளங்களும் பக்கங்களும் பல உள்ளன. நீங்கள் பாமினியிலோ மயிலையிலோ இட்டுத் தேடினால் அத்தகைய தளங்கள் கூகிளில் கிடைக்கும். பொதுவாக இத்தனைக் குறியாக்கங்களைப் பார்க்காதவர்களுக்கும், பழைய கணித்தமிழ் பாதையை அறிய விரும்புபவர்களுக்கும் இணையத்தில் உள்ள ஒருங்குறி அல்லாத வெவ்வேறு வகை பக்கங்கள் பட்டியலிடப்பட்டுள்ளன. படித்தும் பார்க்கலாம்.

https://web.archive.org/web/20200612073932/http://thamizhagam.in/?p=279

https://web.archive.org/web/20200612072201/https://sites.google.com/site/aranganarumai/periyalwar

https://web.archive.org/web/20200612070350/http://www.southindia.com/pesumperumal.html

https://web.archive.org/web/20200612074112/http://www.madurai.com/olivelicham/tamil.htm

http://web.archive.org/save/http://archive.sooddram.com/Articles/general/mar132009_AMugamathu.htm

https://groups.google.com/forum/#!topic/24hrs-mails/4idlM8pdHKM

https://web.archive.org/web/20200612070512/http://www.thiruarutpa.org/thirumurai/v/T191/romanized2/uykaith_thiruppathikam

http://www.soulologyofthetamils.com/%E0%AE%95%E0%AE%9F%E0%AE%BF%E0%AE%A4%E0%AE%99%E0%AF%8D%E0%AE%95%E0%AE%B3%E0%AF%8D/%E0%AE%87%E0%AE%A8%E0%AF%8D%E0%AE%A4%E0%AF%81-%E0%AE%AE%E0%AF%81%E0%AE%A9%E0%AF%8D%E0%AE%A9%E0%AE%A3%E0%AE%BF-%E0%AE%A4%E0%AE%B2%E0%AF%88%E0%AE%B5%E0%AE%B0%E0%AF%8D-%E0%AE%A4%E0%AE%BF%E0%AE%B0-2-2/

http://www.sanskrit-lexicon.uni-koeln.de/scans/MWScan/tamil/index.html

http://web.archive.org/web/20201129120304/http://kkalyan.tripod.com/novel2.html

http://web.archive.org/web/20040731024313/http://www.maalaisudar.com/

http://web.archive.org/web/20201129120926/http://cs.annauniv.edu/insight/Reading/index.htm

http://web.archive.org/web/20201129114805/http://devendrakulam.blogspot.com/2008/11/pudhia-thamizhagam-party-flag.html

http://web.archive.org/web/20180307055952/http://tamil.joelonsoftware.com/

http://web.archive.org/save/https://sites.google.com/site/deottr/home/httpwwwtngovinkaruvoolamcps_newcps_indexhtml

http://web.archive.org/web/20030213031414/http://www.vikatan.com/

எழுத்துப் பிழைகளுக்கான தரவுத்தொகுப்பு

2020-10-28T11:17:00.005-07:00

2011 காலக்கட்டத்தில் தமிழ் பிழைதிருத்திக்கான ஆய்வுகளில் ஈடுபடும் போது, கணினி நுட்பங்கள் படிக்க வாய்ப்புகள் இருந்தாலும் தமிழ் மொழி இலக்கணம் படிக்க இணையத்தில் பெரும் வாய்ப்புகளில்லை. பொதுவாகப் பள்ளிப் பாடத்திட்டத்தில் உள்ள இலக்கணம் மட்டும் ஒரு படைப்பிலக்கியத்திற்குப் பயன்படுவதில்லை. வாசிப்பும் பயிற்சியுமே மொழிக்கான இலக்கணத்தை நமக்குக் கற்றுத்தந்து தமிழில் பிழையின்றி எழுதவைக்கும் திறனைக் கொடுக்கும். அந்நிலையில் தமிழில் மொழிக்கருவிகள் உருவாக்குவதில் பெரிய இடராகவிருந்தது. கணினிநுட்பமும் மொழி இலக்கணமும் அனைவரிடமும் போய்ச் சேரும் போதுதான் தொழில்நுட்பத்தின் ஆற்றலை மொழி வளர்ச்சிக்கும் பயன்படுத்த முடியும். அதன் பொருட்டும் தமிழ் சார்ந்த இணைய வளங்களை அதிகரிக்கும் பொருட்டும் Error Annotated Corpus எனப்படும் பிழைகளின் தரவுத் தொகுப்பு வெளியிடப்படுகிறது.

இன்று பல்வேறு இலக்கண நூல்கள் இணையத்தில் கிடைக்கின்றன. சந்தி இலக்கணத்திற்கு வழிகாட்டி மரம், தமிழ்ச் சொல்வங்கிகள் என்று சிலவற்றை இதற்கு முன்னரே அறிமுகமானவை. ஆங்காங்கே மொழி சார்ந்த இணையவழிப் பயிற்சிகளும் நடைபெறுகின்றன. பல இயல்மொழிப் பகுப்பாய்வுக் கருவிகளும் இணையத்தில் வெளிவந்துள்ளன. மொழி குறித்து விவாதிக்கும் இணையக் குழுக்களும் பல உள்ளன. அதில் நோக்கர் என்ற பேஸ்புக் குழுவில் தற்காலத் தமிழ்ப் பயன்பாட்டில் உள்ள பிழைகளைச் சுட்டிக் காட்டிவருகிறோம். முனைவர் அண்ணாகண்ணன் தொடங்கிய இக்குழுவில் தற்போது மூவாயிரத்திற்கும் மேற்பட்ட பயனர்கள் இணைந்துள்ளனர்.

இங்கு #nokkarfront , #nokkar20 என்ற இரு கொத்துக் குறிச்சொற்கள் மூலம் ஊடகங்களில் காணப்படும் முக்கியப் பிழைகள் சுட்டிக்காட்டப்படுகின்றன. ஏறக்குறைய அனைத்துத் தமிழ் ஊடகங்களின் மொழிப்பயன்பாடுகள் பற்றியும் இங்கே அலசப்பட்டுள்ளன. குற்றம் சொல்வது எளிதுதான் என்றாலும் விழிப்புணர்வாகவும் ஆக்கப்பூர்வமாகவும் இங்கே ஊடகத்தமிழில் உள்ள பிழைகள் பகிரப்படுகின்றன. நோக்கர் குழுவிற்காக வாணி API மூலம் இயங்கும் பிழை அறிக்கை வழங்கும் ஒரு செயலி பயன்பாட்டிலுள்ளது. இது முழுமையான பிழை காட்டியில்லை என்றாலும் சொல்லிலக்கண அளவில் செயல்படும் செயலி இது. (பொருளளவில் செயல்படும் இலக்கணப் பிழை காட்டிகள் எதிர்காலத்தில் உருவாக்கப்படும்.)

https://www.kaggle.com/neechalkaran/error-annotated-tamil-corpus

இது ஒரு முக்கிய தகவல் வங்கியாக இத்தரவுகள் உள்ளன. தொழில்நுட்பரீதியாக எந்திரவழிக் கற்றலுக்கோ, ஆய்வுகளுக்கோ இவை பெரிதும் பயன்படும். கடந்த இரண்டாண்டுகளாக வாணி கருவிவழியாகத் திரட்டிய பிழைகளில் போலிகள் நீக்கி, வகைப்படுத்தி, (Error Annotated Corpus for Tamil) தரவுத் தொகுப்பு இங்கே வெளியிடப்படுகிறது. மேலும் ஊடகங்கள் மட்டுமல்லாமல் சில மின்னூல்களும் ஆய்வுக்குட்படுத்தி, கணிசமாகக் காணப்படும் பிழைகளைக் கொண்டு இந்த தரவுத்தொகுப்பு (dataset) உருவாகியுள்ளது. செந்தரப்படுத்தப்பட்ட வகைப்பாடுகள் இல்லை என்பதால் இரண்டாம் வேற்றுமை, நான்காம் வேற்றுமை, வினையெச்சம், பெயரெச்சம், மகர ஈற்று, விகுதிகளான ஆக/ஆன போன்றவை, பேச்சு வழக்கு, தட்டுப்பிழைகள் மற்றவவை 'சந்தி' என்றும் இலக்கண அடிப்படையில் வகைப்படுத்தப்பட்டுள்ளன. புதிய பிழைதிருத்திகள் உருவாகும் போதோ, மொழிக்கருவிகள் உருவாகும் போதோ இதனைக் கொண்டு test case உருவாக்கிக்கொள்ளலாம்.

இலக்கண ஆலோசனை வழங்கும் செங்கைப் பொதுவன், வகைப்படுத்த உதவிய சே. கார்த்திகா மற்றும் நோக்கர் குழு உறுப்பினர்கள் அனைவருக்கும் நன்றி.

மலையாளம்-தமிழ் மொழிபெயர்ப்புக் கருவி அறிமுகம்

2020-10-07T21:19:00.001-07:00

இந்திய அளவில் ஆங்காங்கே சில எந்திர மொழிபெயர்ப்பு முயற்சிகள் நடைபெற்றுவருகின்றன. அவ்வகையில் உலக மொழிபெயர்ப்பு தினத்தில் "பேச்சி" என்ற புதிய மொழிபெயர்ப்புக் கருவியின் முன்னோட்டப் பதிப்பு வெளிவந்துள்ளது. இந்திய மொழிகளை எல்லாம் தமிழில் மொழிபெயர்த்துக் காட்டவைக்கும் முயற்சியாக இது உருவாக்கப்படுகிறது. முதல் கட்டமாக மலையாளம் மொழியைத் தமிழில் எழுத்துபெயர்த்து அதற்கு இணையான தமிழ்ச் சொற்களைக் கொடுத்து மூலமொழியின் சாரம் மாறாமல் தமிழில் எழுதிக் காட்டுகிறது. மேலும் இந்தி உட்பட சுமார் பத்து இந்திய மொழிகளையும் எழுத்துப் பெயர்த்து தமிழில் காட்டுகிறது.

மொழிபெயர்ப்பு என்பது மனிதன் தோன்றிய காலந்தொட்டே வளர்ந்து வரக்கூடிய கலை. மக்கள்தொகை அதிகரிப்பாலும், பொருளாதார வளர்ச்சியினாலும் ஒருவர் ஒன்றிற்கும் மேற்பட்ட மொழிகளில் ஊடாடவேண்டிய தேவை ஏற்படுகிறது. இக்காலக்கட்டத்தில் தொழில்நுட்ப உதவியுடன் மொழிபெயர்ப்புகள் செய்யும் சூழல்களும் வளர்ந்து வருகின்றன. Machine Aided Translation எனப்படும் எந்திர உதவியுடன் மொழிபெயர்க்கும் கருவிகள் பல சந்தைகளில் உள்ளன. அவை கலைச்சொற்களை மொழிபெயர்க்கவோ, வாக்கியப் பிழைகளைச் சீர்செய்யவோ, பழைய மொழிபெயர்ப்புகளிலிருந்து மாதிரிகளை எடுக்கவோ எனப் பயன்படுகின்றன. இவற்றிற்கெல்லாம் ஒருபடி மேலே எந்திர மொழிபெயர்ப்புக் கருவிகளும் கடந்த பத்தாண்டுகளில் கூகிள், மைக்ரோசாப்ட் போன்ற பெருநிறுவனங்கள் உருவாக்கிவருகின்றன. அவை மொழிபெயர்க்க உதவி மட்டும் செய்யாமல் முழுமையான மொழிபெயர்ப்பையே அளிக்கவல்லவை. தமிழ் உட்படப் பல இந்திய மொழிகளுக்கும் இந்த வசதிகள் இருந்தாலும் அவை முழுமையான மொழிபெயர்ப்பாக இல்லாமல் உள்ளன. காரணம் எந்திரவழிக் கற்றல் முறையில் செயல்படுவதாலும், அனைத்து மொழிகளுக்கும் ஒரே கட்டமைப்பைக் கொண்டிருப்பதாலும் இவை முழுமை அடைவதில்லை. இவ்விடத்தில் இந்திய மொழிகளுக்குள் விதிகளடிப்படையில் மொழிபெயர்க்க முடியும் என்று பேச்சி திட்டம் தொடங்குகிறது.

2013 இல் நண்பர் ஜோதிஜியுடன் நடந்த உரையாடல் எந்திர மொழிபெயர்ப்பிற்கான ஆர்வத்தைத் தூண்டியது. 2014 ஆம் ஆண்டு வாணி பிழைதிருத்தி ஆய்வு இலக்கை எட்டியவுடன் பிற இந்திய மொழிகளில் தொடங்கிய முயற்சி இது. விக்கிப்பீடியாவில் நண்பரொருவர்க்கு மலையாளக் கட்டுரைகளைத் தமிழில் எழுத்துப்பெயர்த்து கட்டுரைகளை எழுத உருவாக்கிய சிறு கருவி இன்று மொழிபெயர்ப்புக் கருவியாக மேம்பட்டுள்ளது. http://apps.neechalkaran.com/translate

பேச்சியில், சுமார் நான்காயிரத்திற்கும் மேற்பட்ட மலையாளம்-தமிழ் பெயர்ச்சொற்களையும் முந்நூற்றுக்கும் மேற்பட்ட வினை இணைச்சொற்களையும் கொண்டுள்ளன. மேலும் சுமார் 150 மலையாளம் தமிழ் இலக்கண விகுதிகளும் கொண்டுள்ளதால் எளிய மலையாள வாக்கியங்களை முழுமையாக மொழிபெயர்க்கிறது. தற்போதைக்கு இணையான தமிழ் விகுதிகளைக் கூட்டல் குறியுடனே தருகிறது, வாணியின் சொல்லாக்க நுட்பத்தை(morphological generator) எதிர்காலத்தில் இணைக்கும் போது முழுமையான வாக்கியவடிவம் பெறும். இதன் மூலம் மலையாளம் அறிந்து ஆனால் வாசிக்கத் தெரியாத தமிழர்களுக்குப் பெரிதும் பயன்படும். கூடுதலாகத் தொடர்ந்து இதனை மேம்படுத்தி வருவதால் எதிர்காலத்தில் முழுமையான மலையாளம் தமிழ் மொழிபெயர்ப்புக் கருவியாக இது உருவாகும். புழக்கத்திலுள்ள தமிழ்ச் சொற்களில் பல பரவலாக மலையாளத்திலும் பயன்படுவதாலும் இருமொழிகளுக்கும் இலக்கண ஒற்றுமை பெரிதும் இருப்பதாலும் இந்த மொழிபெயர்ப்பு மற்ற மொழிகளைவிட ஒப்பீட்டளவில் எளிதாகிறது.

விக்சனரி, விக்கிப்பீடியா போன்ற திட்டங்களில் உள்ள இணைமொழிப் படைப்புகளும், பல மொழிகளில் வெளிவரும் மத்திய அரசின் செய்திக் குறிப்புகளும் இந்த மொழிபெயர்ப்பு ஆய்வுகளுக்குப் பயன்பட்டன. மேலும் சில விக்கிப்பீடிய நண்பர்கள், மலையாளத் தமிழ் ஆர்வலர்கள் உதவுகின்றனர். மலையாளம் -தமிழ் தற்கால அகராதியொன்றை வெளியிடவும், பிற இந்திய மொழிகளுக்கான எந்திர மொழிபெயர்ப்பை உருவாக்கவும் திட்டமுள்ளது. ஆர்வமுள்ளவர்கள் இணைந்தும் பங்களிக்கலாம். செய்திகளை வெளியிட்ட தமிழ் இந்து, தினமலர், தினகரன் ஊடகங்களுக்கு நன்றி. ஆலோசனைகளையும் கருத்துக்களையும் தெரிவிக்கலாம்.

மென்சான்றிதழ் நீட்சி அறிமுகம்

2020-07-18T20:24:00.001-07:00

ஒரே படத்தின் பின்புலத்தில் தரவுகளை மாறிலிகளாகப் போட்டுப் பல ஒளிப்படங்களை உருவாக்கும் பயனர் செயலி சில மாதங்கள் முன் அறிமுகமாகியிருந்தது. இணையவழிப் பயிற்சிகளுக்குச் சான்றிதழ் தயாரிக்க உதவும் வகையில் முதன்மையாக அமைந்திருந்தது. இதன் மூலம் பலர் சான்றிதழ்களையும் தயாரித்து அனுப்பினர். மேலும் பல பின்னூட்டங்கள் வந்தன குறிப்பாக அதில் நேரடியாக மின்னஞ்சல் அனுப்பும் வசதியும், அதிகத் தரவுகள் உள்ளீடும் வசதியும் கேட்டிருந்தனர். இதற்கு முன் வரை இங்கு உருவான மென்சான்றிதழ்ப் படத்தைத் தரவிறக்கும் செய்த பின்னரே மின்னஞ்சலில் பங்கேற்பாளர்களுக்கு அனுப்ப முடிந்தது. அது போல பெயர், ஊர் தவிர இதர தகவல்களும் இடும் தேவையும் இருந்தது.

அதற்கெல்லாம் தீர்வாக நேரடியாக கூகிள் ஆப்ஸ் ஸ்கிரிப்ட் வழியாக ஒரு நீட்சியை உருவாக்கி இச்செயலி மூலம் சான்றிதழை உருவாக்கி, கூகிள் மின்னஞ்சல் வழியாக அனைவருக்கும் அனுப்பும் வகையில் ஒரு முயற்சி நடந்தது. அதன்மூலம் கரூர் அரசுக் கல்லூரிக்காக இந்தச் செயலியை மேம்படுத்தி நேரடியாக கூகிள் விரிதாளிலிருந்து மென்சான்றிதழ் தயாரித்து உரியவருக்கு அனுப்பப் பயன்பட்டது. இப்போது அது பொதுப் பயன்பாட்டிற்கும் அறிமுகமாகிறது.

http://apps.neechalkaran.com/ecertificate

எப்போதும் போல இச்செயலியின் பக்கத்திற்குச் சென்று, அந்த கூகிள் விரிதாளின் இணைப்பைப் பெற்றுக் கொள்ளலாம். பக்கம் திறந்தவுடன் அதை உங்கள் கோப்பாக(Make Copy) நகலெடுத்துக் கொள்ளுங்கள். அப்போதுதான் இயக்க முடியும். பின்னர் வேண்டிய அமைவடிவங்களைப் பூர்த்தி(Configurations) செய்த பின்னர் முதல் முறை இயக்கும் போது கூகிள் அணுக்கம் கேட்கும்(unsafe), அதற்கு சம்மதம் என்று கொடுக்க வேண்டும்.

செய்ய வேண்டியவை

சான்றிதழுக்கான ஒரு வார்ப்புரு தயாரித்துக் கொள்ளவும் அதாவது பங்கேற்பாளர் பெயரில்லாத ஆனால் கையெழுத்து முதல் லச்சினை வரை அனைத்தும் கொண்ட வெற்றுச் சான்றிதழ். இதை கூகிள் டிரைவில் பதிவேற்றி அதன் கோப்பு எண்ணை எடுத்துக் கொள்க. பின்னர் சான்றிதழின் எந்தெந்த புள்ளியில் கொடுக்கப்படும் தகவல்கள் இடம்பெற வேண்டும் என்று முடிவுசெய்து X அச்சு Y அச்சு அளவுகளைக் குறித்துக் கொள்க. இவற்றை விரிதாளின் ஸ்ரிப்ட் எடிட்டர் பகுதிக்குச் சென்று உரிய இடங்களில் மாற்றிக் கொள்ள வேண்டும். மேலும் மின்னஞ்சலின் தலைப்பு, சிசி முகவரி போன்றவற்றையும் மாற்றிக் கொள்ளலாம். பின்னர் விரிதாளின் இரண்டாவது தாளில், அனுப்ப உள்ள மின்னஞ்சலின் உள்ளடக்கத்தை எழுதிக் கொள்ளுங்கள். கடைசியாக அனுப்ப வேண்டிய பெயர்கள் மற்றும் மின்னஞ்சல் முகவரிகளை தாளில் இட்டு, Macro -> Generatemail என்பதை இயக்கி அஞ்சல்களை அனுப்பலாம். இதை சரியாக இந்த நீட்சியில் இட்டு இயக்கினால் நாளொன்றிற்கு அதிகபட்சமாக 500 நபர்களுக்குச் சான்றிதழ்கள் அனுப்ப முடியும்.

இருமொழியில் சிறிய விளக்கக் காணொளி

சில குறிப்புகள்:

எம்.எஸ் பெயிண்ட் அல்லது வேறு ஒரு மென்பொருள் துணையுடன் X/Y அச்சுகளைக் குறித்துக் கொள்ளலாம்.
முதலில் சோதனை மின்னஞ்சலைக் கொடுத்து சான்றிதழின் இறுதி வடிவைப் பார்த்துக் கொண்டு பின்னர் அனைவருக்கும் அனுப்பலாம்.
கூகிள் பயனர் கணக்கில் நாளொன்றிற்கு 500 என்ற வரம்பிற்குப்பதால் இரண்டு வேறுவேறு கணக்கிலிருந்து ஒரே நாளில் ஆயிரம் வரைகூட அனுப்பிக் கொள்ளலாம்.
சான்றிதழுக்கு மட்டுமல்ல வேறு எந்த விதமான படிவங்களையும் பலருக்கு ஏற்றவகையில் விருப்பமைவு செய்ய வேண்டுமெனில் இது உதவும்
இது இலவசக் கருவி என்பதால் இதன் பயன்பாட்டு இடர்களுக்கு உருவாக்குநர் பொறுப்பேற்க இயலாது.
கூடுதல் ஆலோசனை மற்றும் மேம்பாடுகளுக்குத் தொடர்பு கொள்ளலாம்.

மென்சான்றிதழ் செயலி அறிமுகம்

2020-05-25T05:42:00.003-07:00

தற்போதைய சூழலில் பல இணையவழிப் பயிலரங்கங்கள் நடக்கின்றன. பங்கேற்பாளர்களுக்கு மென்சான்றிதழும் வழங்கும் முறை உள்ளது. சில செயலிகளில் இத்தகைய சான்றிதழ்களைத் தயாரித்து வழங்கினாலும் பெரும்பாலும் எளிதாக இல்லை. இணையத்தில் உள்ள சில வரைகலைச் செயலியில் தமிழ் எழுத்துக்கள் சிதைந்து வருவதால் அங்கும் தயாரிப்பது கடினம். அதனால் வரைகலை அறிந்தவரே அனைவர் பெயரையிட்டு மென் சான்றிதழ் தயாரிக்க வேண்டிய நிலை உள்ளது. அதை எளிமையாக்க இச்செயலி அறிமுகமாகிறது.

http://apps.neechalkaran.com/ecertificate

பெயர்ப் பட்டியலையும்(Participants List), சான்றிதழுக்கான வார்ப்புருவையும்(Template) கொடுத்தால் அத்தனைச் சான்றிதழைத் தயாரித்துவிடும். இதில் பெயரளவில் சில வார்ப்புரு (டெம்ளேட்) இருக்கும் அதைக் கூடத் தேர்வு செய்து பட்டியலை மட்டும் கொடுத்தும் சான்றிதழ் தயாரிக்கலாம், அல்லது சொந்தமாக ஒரு மூல வார்ப்புருவைப் பங்கேற்பாளர் பெயரில்லாமல் அவரவர் நிறுவன லச்சினை, கையெழுத்துடன் தயாரித்துக் கொள்ள வேண்டும். அதை இக்கருவியில் பதிவேற்றம் செய்து, பெயர்ப் பட்டியலை அப்பெட்டியில் இட வேண்டும். "Generate" பொத்தான் மூலம் மொத்தமாக உருவாக்கிப் பார்க்கலாம். பொதுவாக, பெயர் சரியாக இடத்தில் அமராது, அதனால் அம்புக்குறி மூலம் முன் பின் நகர்த்திச் சரியான இடத்தில் அமைத்துக் கொள்ளவேண்டும்.

மீண்டும் "Generate" கொடுத்தால் அனைத்துப் பங்கேற்பாளர் பெயருடன் சான்றிதழ் உருவாகிவிடும். "Download" பொத்தானை அழுத்தி மொத்தமாகத் தரவிறக்கம் செய்து கொள்ளமுடியும். மொத்தம் மூன்று அங்கங்கள் உள்ளன, முதல் பெட்டியில் அட்டவணை வடிவில் இரு அங்கங்கள்(Name1, Name2) இருக்கும். இவை ஒவ்வொரு சான்றிதழுக்கும் மாறக்கூடிய தகவல்களைக் கொடுக்கலாம். உதாரணமாக, பெயர், சான்றிதழ் எண், பங்கேற்பாளரின் தரநிலை போன்றவற்றை ஒரு எக்சல் அல்லது விரிதாளில் இணைக்கு இணையாக இட்டு அவற்றை இங்கே நகலெடுத்து ஒட்ட வேண்டும். நிகழ்ச்சியின் பெயர், பாராட்டு வரிகள், நாள் போன்ற அனைத்துச் சான்றிதழுக்கும் பொதுவான ஒரு உள்ளடக்கத்தை மூன்றாவது பெட்டியில் கொடுக்கலாம். அதற்கேற்ப அதன் அமைவிடத்தை நகர்த்தி நிறுத்திக் கொள்ளவேண்டும். பின்னர் ஜெனரேட் மூலம் உருவாக்கிக் கொள்ளலாம்.

சான்றிதழ்களுக்கு மட்டுமல்லாமல் ஒரு வார்ப்புருவினை அடிப்படையாகக் கொண்டு சொற்களை மட்டும் மாற்ற வேண்டிய தேவையனைத்திற்கும் இச்செயலி உதவும். ஒரே வடிவில் பல நூல்களின் அட்டைப்படம் தயாரிக்கலாம், ஒரே வார்ப்புரு கொண்டு கவிதைகளை சிறுசிறு படங்களாகத் தயாரிக்கலாம், இப்படிப் பல விதங்களில் பயன்படலாம். இதுவொரு தொடக்க நிலைதான் மேலும் தேவைக்கேற்ப மேம்படுத்தப்படும், பரிந்துரைகளையும் வழங்கலாம். அனைத்து மொழிகளிலும் இது செயல்படும். பயனுடையதென்றால் பயன்படுத்திக் கொள்ளலாம்.

எளிமையாகச் சான்றிதழுக்கான வார்ப்புரு தயாரிக்க இந்தக் காணொளியைப் பார்க்கலாம்.

இந்தச் செயலியின் செயல்முறை விளக்கத்தை இந்தக் காணொளியில் பார்க்கலாம்.

இதன் மேம்பட்ட அடுத்த பதிப்பு