WIN JAFFNA

யாழில் விடுதலைப் புலிகளின் அரசியல்துறைக் கட்டிடத்தை டக்ளஸின் அலுவலமாக மாற்ற முயற்சி...

2012-06-16T22:46:00.000+05:30

யாழ். மாவட்டத்தில் விடுதலைப்புலிகளின் முக்கிய அரசியல் செயற்பாட்டு நிலையமாக விளங்கிய பொற்பதி அரசியல்துறை செயலக கட்டிடத்தில், தற்போது ஈ.பி.டி.பியினர் முகாமிட்டு அதனை தமது கட்டுப்பாட்டின் கீழ் கொண்டுவருவதற்கு முயற்சித்து வருவதாக பிரதேச மக்கள் குற்றம்சாட்டியுள்ளனர்.

குறித்த கட்டிடத்தில், 1995ம் ஆண்டு வரையும், பின்னர் சமாதான காலத்திலும், புலிகள் தமது அரசியல் செயற்பாடுகளுக்காக பயன்படுத்திவந்தனர். எனினும் யுத்தம் தீவிரமடைந்த 2006ஆம் ஆண்டு காலப்பகுதியில் புலிகள் வெளியேறினர்.

இதன் பின்னர் மூடப்பட்டிருந்த வீடு விசேட அதிரடிப்படையினரால் தீயிடப்பட்டதுடன், பொற்பதி பகுதியிலிருந்த பல இளைஞர்கள் கடத்தப்பட்டும், காணாமல்போயும், சுட்டுக் கொல்லப்பட்டும் அடக்கப்பட்டனர்.

இந்நிலையில் யுத்தத்தின் பின்னர் இடம்பெயர்ந்த குடும்பமொன்று இதில் தங்கியிருந்தது. தற்போது அந்தக் குடும்பத்தையும் அங்கிருந்து துரத்திவிட்டு, அப்பகுதியிலுள்ள ஈ.பி.டி.பி அடிவருடிகளின் ஆதரவுடன் கட்டிடத்தை தம்வசப்படுத்தி அதனை அமைச்சர் டக்ளஸின் அலுவலகமாக மாற்ற முயற்சித்துள்ளனர். இதற்கென தற்போது கட்டிடத்தின் முகப்பில் அமைச்சரின் படங்கள் பொறிக்கப்பட்டுள்ளன.

மட்டக்களப்புக்கு 30 வருடத்தின் பின் அமைச்சர்கள் பட்டாளமொன்று விஜயம்...

2012-06-16T22:40:00.000+05:30

மட்டக்களப்பு மாவட்டத்தில் ஸ்ரீலங்கா சுதந்திரக்கட்சியை விரிவாக்கம் செய்வதற்காக கடந்த 30 வருடத்தில் முதன்முறையாக அதிகளவான அமைச்சர்களைக் கொண்ட பட்டாளம் மட்டக்களப்புக்கு வருகை தந்துள்ளது.

மட்டக்களப்பு மற்றும் கல்குடா தேர்தல் தொகுதிகளில் தமது ஆரம்ப விரிவாக்க செயற்பாடுகளை இவர்கள் இன்று ஆரம்பித்துள்ளனர்.

கிழக்கு மாகாணசபை கலைக்கப்பட்டு தேர்தல் அறிவிப்பு வெளியிடப்படும் என பல்வேறு தரப்பினராலும் ஆருடங்கள் வெளிப்பட்டுக்கொண்டிருக்கும் நிலையில் இந்நிகழ்வு இடம்பெற்றுவருகின்றது.

விசேடமாக மட்டக்களப்பு மாவட்டத்துக்கு ஸ்ரீலங்கா சுதந்திரக் கட்சியின் இணைப்பாளராக விளையாட்டுத்துறை அமைச்சர் மகிந்தானந்த அளுத்கமகே நியமிக்கப்பட்டுள்ளதுடன் அவர் தலைமையிலான அமைச்சர்கள் குழுவே மட்டக்களப்புக்கு வருகைதந்துள்ளது.

மட்டக்களப்பு மாவட்டத்தில் மேற்கொள்ளப்பட்டுவரும் இந்த விரிவாக்கத்தை ஸ்ரீலங்கா சுதந்திரக்கட்சியின் உதவித்தலைவரும் மீள்குடியேற்றப் பிரதியமைச்சருமான விநாயகமூர்த்தி முரளிதரன் வழிநடத்தி வருகின்றார்.

அத்துடன் மட்டக்களப்பு மாவட்ட அமைப்பாளர்களான இராஜன் மயில்வானம், அருண்தம்பிமுத்து, ருத்திரமலர் ஞானபாஸ்கரன் ஆகியோர் இந்த விரிவாக்கல் செயற்றிட்டத்தில் முக்கிய பொறுப்புக்கள் வழங்கப்பட்டுள்ளன.

மட்டக்களப்பு, கல்குடா ஆகிய தேர்தல் தொகுதிகளில் உள்ள ஒவ்வொரு கிராமத்துக்கும் சென்று தமது கட்சிக்கு உறுப்பினர்களை இணைக்கும் செயற்றிட்டத்தை இவர்கள் மேற்கொண்டு வருகின்றனர்.

அத்துடன் பிரதேசத்தில் மேற்கொள்ளப்பட வேண்டிய அபிவிருத்திப் பணிகள், மக்களின் குறைபாடுகளையும் மக்களிடம் அமைச்சர்கள் நேரடியாக அறிந்து கொள்கின்றனர்.

இதேவேளை கிழக்கு மாகாணசபை தேர்லில் ஆளும் கட்சியே இம்முறையும் மாகாணசபையினை கைப்பற்றும் என தெரிவித்துள்ள மீள்குடியேற்ற பிரதியமைச்சர் விநாயகமூர்த்தி முரளிதரன், முதலமைச்சராக தமிழர் ஒருவர் வரவேண்டுமாகவிருந்தால் சிறந்தமுறையில் தமது வாக்குகளை பிரயோக்கவேண்டும் என தெரிவித்தார்.

கடந்த முறை போன்று அல்லாமல் இம்முறை சிறந்த ஒரு முதலமைச்சரை நாங்கள் அனுப்புவதன் மூலமே எமது பகுதியை சிறந்தமுறையில் அபிவிருத்தி செய்யமுடியும் எனவும் தெரிவித்தார்.

இதேநேரம் கிழக்கு மாகாணசபை தேர்தலில் தமிழ் கட்சிகள் ஒன்றுபட்டு தமது சக்தியை வெளிப்படுத்த வேண்டும் என்று அண்மையில் மட்டக்களப்பு மாவட்ட புத்திஜீவகள் வேண்டுகோள் விடுத்திருந்தமையும் குறிப்பிடத்தக்கது.

தடை செய்யப்பட்ட இணையதளத்தை பார்வையிடுவதற்கு...

2012-06-16T22:32:00.002+05:30

முடக்கப்பட்ட அல்லது தடை செய்யப்பட்ட இணையத்தளங்களை எளிதாக பார்ப்பதற்கு ஒரு தளம் உதவி புரிகிறது.

அன் டைனி என்கின்ற தளம் என்ன செய்கிறது என்றால் இணைய முகவரிகளின் சுருக்கங்கள் முடக்கப்பட்டால் அவற்றின் பின்னே உள்ள மூல முகவரிக்கு சொந்தமான தளங்களை பார்வையிட உதவுகிறது.

டுவிட்டரில் இணைப்புகளை பகிர்ந்து கொள்ளும் போது, அதன் வரம்பு கருதி இணையத்தள முகவரிகளை சுருக்கி பகிர்ந்து கொள்கின்றனர்.

சில நேரங்களில் குறும்பதிவுகள் தணிக்கைக்கு ஆளாகும் போது இந்த இணைப்புகள் முடக்கப்பட்டு விடும். இதனால் இணைப்பில் சுட்டிக் காட்டப்பட்டுள்ள தளத்தை பார்க்க முடியாமல் போகலாம்.

இது போன்ற நேரங்களில் முடக்கப்பட்ட அந்த இணைப்பின் பின்னே உள்ள மூல இணையத்தளத்தை தடையின்றி பார்க்க உதவுவது தான் அன் டைனியின் பணி.

இணையதள முகவரி

கணணி அடிக்கடி Restart ஆனால் என்ன செய்வது?...

2012-06-16T22:25:00.000+05:30

உங்களது கணணி அடிக்கடி Restart ஆவதற்கும், Hang ஆவதற்கும் பல காரணங்கள் உள்ளன. அதில் மிக முக்கியமாக நான்கு காரணங்கள் உள்ளன.

1. புதிதாக ஏதேனும் ஒரு வன்பொருளை உங்கள் கணணியில் நிறுவி இருந்தால் அது நன்றாக பொருத்தப்பட்டு உள்ளதா என்று பரிசோதிக்கவும். அதன் பின் அந்த வன்பொருளின் Settings Check பண்ணவும்.

2. RAM Slot-ல் இருந்து RAM-ஐ எடுத்து அதன் காப்பர் பாகத்தை மென்மையாக துடைக்கவும். அதை துடைக்க Pencil Eraser பயன்படுத்துவது சிறந்தது. இதனை பின்பு Mother Board-ல் இணைக்கும் போது கவனமாக இணைக்க வேண்டும்.

3. Mother Board-ல் Processor Heat Sink உடன் இணைந்திருக்கும் Cooling Fan இயங்குகிறதா என்று சரிபார்க்கவும். மேலும் அது Heat Sink உடன் ஒட்டி இருக்கும்படி அமைந்துள்ளதா என்று சரி பார்க்கவும்.

4. கடைசியாக SMPS(Switch Mode Power Supply) Fan செயல்படுகிறதா என்று பார்க்கவும்.

அனைத்து உலாவிகளுக்குமான ஷொர்ட் கட் கீகள்...

2012-06-16T22:21:00.000+05:30

ஒவ்வொரு உலாவியும் தனக்கென சில கட்டமைப்புகளையும், வழிமுறைகளையும் வைத்துள்ளன. இதற்கான ஷொர்ட் கட் கீ தொகுப்புகளும் அந்த உலாவிக்கே உரித்தானவையாக இருக்கும்.

இருப்பினும் பல ஷொர்ட் கட் கீகள் அனைத்து உலாவிகளும் ஒரே மாதிரியான இயக்கத்தினைத் தருவதாகவே அமைந்துள்ளன.

இவற்றைத் தெரிந்து கொண்டால் நாம் எந்த உலாவியைப் பயன்படுத்தினாலும், எளிதாகவும் வேகமாகவும் செயல்பாடுகளை மேற்கொள்ளலாம். அத்தகைய ஷொர்ட் கட் கீ தொகுப்புகள் கீழே தரப்பட்டுள்ளன.

1. டேப்களுக்கான சில ஷொர்ட் கட் கீகள்:

Ctrl+1-8– இடமிருந்து வலமாக, எண்ணுக் கேற்றபடியான டேப்பில் உள்ள தளத்திற்குச் செல்லும்.

Ctrl+9 – கடைசி டேப்பிற்குச் செல்லும்.

Ctrl+Tab – அடுத்த டேப்பிற்குச் செல்லும். அதாவது அப்போது இருக்கும் டேப்பிற்கு வலதுபுறம் உள்ள டேப்பிற்குச் செல்லும்.

இந்த செயல்பாட்டினை இன்டர்நெட் எக்ஸ்புளோரர் உலாவியை தவிர, மற்ற உலாவிகளில்,

Ctrl+Page Up கீ தொகுப்பு செயல்படுத்தும்.

Ctrl+Shift+Tab –முந்தைய டேப்பிற்குச் செல்லும். அதாவது அப்போது உள்ள டேப்பிற்கு இடது புறம் உள்ள டேப்பிற்குச் செல்லும். இந்த செயல்பாட்டினை, இன்டர்நெட் எக்ஸ்புளோரர் உலாவியைத் தவிர மற்ற உலாவிகளில் Ctrl+Page Down கீ தொகுப்பு செயல்படுத்தும்.

Ctrl+W, Ctrl+F4– அப்போதைய டேப்பினை மூடும்.

Ctrl+Shift+T– இறுதியாக மூடிய டேப்பினைத் திறந்து தளத்தைக் காட்டும். இப்படியே இந்த கீகளை அழுத்த, அழுத்த, முந்தைய மூடப்பட்ட டேப்களில் உள்ள தளங்கள் திறக்கப்படும்.

Ctrl+T– புதிய டேப் திறக்கப்படும்.

Ctrl+N– புதிய பிரவுசர் விண்டோ ஒன்று திறக்கப்படும்.

Alt+F4– அப்போதைய விண்டோ மூடப்படும். உலாவிகளில் மட்டுமின்றி, அனைத்து அப்ளிகேஷன்களிலும் இந்த கீ தொகுப்பு இதே செயல்பாட்டினை மேற்கொள்ளும்.

2. மவுஸ் சார்ந்த ஷொர்ட் கட் கீ தொகுப்புகள்:

Middle Click a Tab– டேப்பில் கர்சரைக் கொண்டு சென்று, மவுஸின் நடுமுனையைக் கிளிக் செய்தால், டேப் மூடப்படும்.

Ctrl+Left Click, Middle Click –பின்னணியில் இயங்கும் டேப்பில், லிங்க் ஒன்றைத் திறக்கும்.

Shift+Left Click– லிங்க் ஒன்றில் கிளிக் செய்திட, அதற்கான தளம் புதிய உலாவி விண்டோவில் திறக்கப்படும்.

Ctrl+Shift+Left Click– லிங்க் ஒன்றில் கிளிக் செய்திட, தொடர்புடைய தளம் புதிய முன்புறமான டேப்பில் திறக்கப்படும்.

3. பிரவுசரில் உலா வருதல்:

Alt+Left Arrow, Backspace– பின் நோக்கிச் செல்ல.

Alt+Right Arrow, Shift+Backspace – முன் நோக்கிச் செல்ல.

F5– மீண்டும் தொடக்கத்திலிருந்து தளத்தை இறக்கித் தர.

Shift+F5 – தளத்தை இறக்குவதுடன், கேஷ் மெமரியை ஒதுக்கித் தரும். இணைய தளம் முழுமையும் புதியதாக இறக்கித் தரப்படும்.

Escape – தளம் இறக்கம் செய்வது உடனடியாக நிறுத்தப்படும்.

Alt+Home – ஹோம் பேஜ் எனக் குறிக்கப்பட்ட தளம் திறக்கப்படும்.

4. பெரிதாக்குதல்:

Ctrl and +, Ctrl+Mousewheel Up – ஸூம் என்ற வகையில் தளக் காட்சி பெரிதாக்கப்படும்.

Ctrl and -, Ctrl+Mousewheel Down – ஸூம் என்ற வகையில் தளக் காட்சி சிறிதாக்கப்படும்.

Ctrl+0 – மாறா நிலையிலான அளவில் தளம் காட்டப்படும்.

F11– மொனிட்டரின் திரையில் முழுக் காட்சி காட்டப்படும்.

5. மவுஸ் உருளை உருட்டுதல்:

Space, Page Down– தளத்தின் ஒரு பிரேம் கீழாகச் செல்லும்.

Page Up– ஒரு பிரேம் மேலாகச் செல்லும்.

Home – தளத்தின் பக்கத்தின் தொடக்கத்திற்குச் செல்லும்.

End – தளத்தின் பக்கத்தின் கீழ்ப் பகுதிக்குச் செல்லும்.

Middle Click – மவுஸ் கர்சர் வேகமாக, திருப்பும் திசைக்கேற்ப, கீழாகவோ, மேலாகவோ செல்லும்.

6. அட்ரஸ் பார்:

Ctrl+L, Alt+D, F6– அட்ரஸ் பாருக்கு கர்சர் இயக்கம் செல்லும், இதில் டைப் செய்திட ஏதுவாக.

Ctrl+Enter – www. என்பதை முன்னாலும், .com என்பதனைப் பினாலும் இணைக்கும்.

Alt+Enter – அட்ரஸ் பாரில் உள்ள முகவரிக்கான தளத்தினை புதிய டேப்பில் திறக்கும்.

7. தேடல்:

Ctrl+K, Ctrl+E – உலாவியில் உள்ள சர்ச் பாக்ஸ் உள்ளே கர்சர் இயக்கம் செல்லும். உலாவிக்கென சர்ச் பாக்ஸ் இல்லை என்றால், அட்ரஸ் பாருக்குச் செல்லும். (இன்டர்நெட் எக்ஸ்புளோரரில், Ctrl+K செயல்படுவதில்லை, அதற்குப் பதிலாக அதே செயல்பாட்டினை Ctrl+E என்ற கீகள் செயல்படுத்தும்)

Alt+Enter – புதிய டேப் திறக்கப்பட்டு, சர்ச் பாக்ஸில் தேடல் தொடங்கும்.

Ctrl+F, F3 – அப்போதைய பக்கத்தில் தேடலைத் தொடர, அந்தப் பக்கத்தில் உள்ள சர்ச் பாக்ஸைத் திறக்கும்.

Ctrl+G, F3 – தேடப்படும் சொல் இடம் பெறும் அடுத்த இடம் கண்டறியப்படும்.

Ctrl+Shift+G, Shift+F3– தேடப்படும் சொல் இடம் பெறும் முந்தைய இடம் கண்டறியப்படும்.

8. ஹிஸ்டரி மற்றும் புக்மார்க்ஸ்:

Ctrl+H – பிரவுசிங் ஹிஸ்டரி திறக்கப்படும்.

Ctrl+J– டவுண்லோட் ஹிஸ்டரி திறக்கப்படும்.

Ctrl+D – அப்போதைய இணையதளம் புக்மார்க் செய்யப்படும்.

Ctrl+Shift+Del – பிரவுசிங் ஹிஸ்டரியை அழிப்பதற்கான விண்டோ திறக்கப்படும்.

9. மற்ற செயல்பாடுகள்:

Ctrl+P– அப்போதைய தளப் பக்கத்தினை அச்செடுக்கும்.

Ctrl+S – உங்கள் கணணியில், அப்போதைய தளம் கோப்பாக பதியப்பட்டு சேவ் செய்யப்படும்.

Ctrl+O –உங்கள் கணணியில் இருந்து ஒரு கோப்பு திறக்கப்படும்.

Ctrl+U– அப்போதைய தளப்பக்கத்திற்கான, சோர்ஸ் கோட்(source code) திறக்கப்படும். (இது இன்டர்நெட் எக்ஸ்புளோரரில் திறக்கப்பட மாட்டாது).

கணணி விளையாட்டுகளுக்கான பிரத்தியேக மவுஸ் அறிமுகம்...

2012-06-16T22:16:00.000+05:30

சிறுவர்கள் முதல் பெரியோர்கள் வரை தமது ஆற்றல்களை வளர்த்துக் கொள்ளும் பொருட்டு, தற்போது கணணி விளையாட்டுக்களில் அதிகளவில் ஈடுபட்டு வருகின்றனர்.

இவ்வாறானவர்களை மையமாக வைத்து கணணி விளையாட்டுக்களும், அவற்றிற்கான சாதனங்களும் நாளுக்கு நாள் மேம்படுத்தப்பட்டும், புதிதாக அறிமுகப்படுத்தப்பட்டும் வருகின்றன.

இதன் அடிப்படையில் தற்போது 20 பொத்தான்களைக் கொண்ட G600 மவுஸ்கள் கணணி விளையாட்டிற்கென பிரத்தியேகமாகத் தயாரிக்கப்பட்டுள்ளன.

கறுப்பு மற்றும் வெள்ளை நிறங்களில் தற்போது கிடைக்கக்கூடியதாக உள்ள குறித்த மவுஸ்கள் 6.5 அடிகள் நீளமான கேபிள்களை இணைத்து இயக்கக்கூடியன. இவற்றின் பெறுமதி 80 அமெரிக்க டொலர்கள் ஆகும்.

குழந்தைகளை எயிட்ஸ் தொற்றிலிருந்து பாதுகாக்கும் தாய்ப்பால்...

2012-06-16T22:12:00.000+05:30

உயிரைப் பறிக்கும் கொடிய நோயான எயிட்ஸ் நோய் குழந்தைகளிடம் பரவுவதை தாய்ப்பால் தடுக்கிறது என்று புதிய ஆராய்ச்சி ஒன்றின் மூலம் தெரியவந்துள்ளது.அமெரிக்காவிலுள்ள வடக்கு கரோலினா பல்கலைக்கழகத்தைச் சேர்ந்த டாக்டர் விக்டர் ஹார்சியா தலைமையிலான குழு ஒன்று சுண்டெலிகளினைப் பயன்படுத்தி மேற்கொள்ளப்பட்ட ஆய்விலிருந்தே எயிட்ஸ் நோயைப் பரப்பும் எச்.ஐ.வி யை கட்டுப்படுத்தும் ஆற்றல் தாய்ப்பாலுக்கு உண்டென தெரியவந்துள்ளது.

எனினும் எச்.ஐ.வி தொற்றுக்கொண்ட தாய்மார்களின் தாய்ப்பாலிலிருந்து குழந்தைகளுக்கு எயிட்ஸ் நோய் பரவுவது இவ் ஆய்வுக்கு விதிவிலக்கானது என்றும் தெரிவிக்கப்பட்டுள்ளது.

யூரோ கால்பந்து: பரபரப்பான ஆட்டத்தில் சுவீடனை வீழ்த்தி இங்கிலாந்து த்ரில் வெற்றி...

2012-06-16T22:06:00.000+05:30

யூரோ கிண்ண போட்டியில் இன்று நடந்த பரபரப்பான ஆட்டத்தில் இங்கிலாந்து அணி 3-2 என்ற கோல்கணக்கில் சுவீடன் அணியை தோற்கடித்தது.

யூரோ கிண்ண போட்டியின் கீவ் நகர ஒலிம்பிக் மைதானத்தில் நடைபெற்ற இன்றைய ஆட்டத்தில் இங்கிலாந்து அணி, சுவீடன் அணியுடன் மோதியது.

போட்டியின் முதல்பாதியில் 23வது நிமிடத்தில் இங்கிலாந்து அணியின் லிவர்பூல் வீரர் ஆன்டி கரோல் மிக அருமையாக தலையால் முட்டி ஒரு கோல் அடித்தார். அணித்தலைவர் ஸ்டீவன் ஜெரார்டின் ப்ரீகிக் ஆன்டி கரோல் கோல் அடிக்க உதவியாக இருந்தது.

இதனையடுத்து இங்கிலாந்து அணி முதல் பாதியில் 1-0 என்ற கணக்கில் முன்னிலை பெற்றது.

இரண்டாவது பாதியில் சுவிடன் அணி சிறப்பாக விளையாடியது. இதன் மூலம் அதிரடியாக விளையாடிய கிளென் ஜான்சன் 49வது நிமிடத்தில் ஒரு சொந்த கோல் அடிக்க ஆட்டம் சமநிலையடைந்தது. இந்த யூரோவில் சொந்த கோல் அடித்த முதல் வீரர் கிளென் ஜான்சன் ஆவார்.

போட்டி சமநிலையடைந்த நிலையில் தீவிரமாக சுவீடன் வீரர்கள் போராடினார்கள். இதன் பயனாக 59வது நிமிடத்தில் மெல்பெர்க் சுவீடனுக்கான 2வது கோலை அடித்தார். ஆட்டத்தில் 2-1 என்று சுவீடன் முன்னிலை பெற்றது.

ஆனால் இங்கிலாந்தின் மாற்று ஆட்டக்காரராக களமிறங்கிய தியோ வால்காட் 64வது நிமிடத்தில் ஒரு சூப்பர் கோல் அடித்தார். இதனையடுத்து 2-2 என்ற கணக்கில் போட்டி சமநிலையடைந்தது.

இதன் பின்பு 78வது நிமிடத்தில் மான்செஸ்டர் யுனைடெட்டின் டேனி வெல்பேக் அடித்த கோல் மூலம் இங்கிலாந்து அணி 3-2 என்ற கோல் கணக்கில் திரில் வெற்றி பெற்று அடுத்த சுற்று வாய்ப்பை பிரகாசப்படுத்திக் கொண்டுள்ளது.

இந்த போட்டியில் ஏற்பட்ட தோல்வியை அடுத்து சுவீடன் யூரோ கிண்ண போட்டியில் இருந்து வெளியேறியது. அடுத்த போட்டியில் உக்ரேன் அணியை இங்கிலாந்து சந்திக்கிறது.

யூரோ தொடரின் டி பிரிவில் பிரான்ஸ், இங்கிலாந்து அணிகள் தலா 4 புள்ளிகளுடனும், உக்ரைன் 3 புள்ளிகளுடனும் உள்ளது.

பாலின சர்ச்சையில் சிக்கிய பிங்கிக்கு 14 நாள் காவல்...

2012-06-16T21:59:00.000+05:30

ஆணா.. பெண்ணா என்ற பாலின சர்ச்சையில் இந்திய தடகள வீராங்கனை பிங்கி பிராமனிக்கை 14 நாட்கள் நீதிமன்ற காவலில் வைக்க உத்தரவிடப்பட்டுள்ளது.

மேற்குவங்கத்தை சேர்ந்த பிங்கி பிரமானிக் ஆசிய விளையாட்டு உட்பட பல்வேறு போட்டிகளில் பதக்கம் வென்றுள்ளார்.

இவர் மீது பெண் ஒருவர் பாலியல் பலாத்கார குற்றச்சாட்டை சுமத்தினார். பிங்கி உண்மையில் ஒரு ஆண் என்றும், தன்னை திருமணம் செய்து கொள்வதாக கூறி ஏமாற்றி விட்டதாகவும் பொலிசில் புகார் அளித்தார்.

இதன் அடிப்படையில் கைது செய்யப்பட்ட பிங்கிக்கு தனியார் மருத்துவமனையில் பாலின சோதனை நடத்தப்பட்டது. இதில், அவர் ஒரு ஆண் என்பது தெரிய வந்தது. தொடர்ந்து அரசு மருத்துவமனையில் இரண்டாவது சோதனை மேற்கொள்ள மறுத்தார்.

இந்நிலையில் நேற்று சப்-டிவிஷனல் மாஜிஸ்திரேட் நீதிமன்றத்தில் பிங்கி ஆஜர்படுத்தப்பட்டார். இவருக்கு, தலைமை சுகாதார அதிகாரி பாலின சோதனை நடத்த வேண்டுமென்று உத்தரவிடப்பட்டது.

பிணை மனு நிராகரிக்கப்பட்டதுடன், 14 நாட்கள் நீதிமன்ற காவலில் வைக்கவும் உத்தரவிடப்பட்டது.

இது குறித்து தலைமை சுகாதார அதிகாரி மருத்துவர் சுகந்தா சில் கூறுகையில், நீதிமன்றத்தின் உத்தரவு எங்களது கையில் கிடைக்கவில்லை. இதனை பெற்றவுடன் பிங்கிக்கு பாலின சோதனை நடத்தப்படும் என்றார்.

ஒருநாள் தொடர்: 244 ஓட்டங்கள் இலக்குடன் துடுப்பெடுத்தாடுகிறது பாகிஸ்தான்...

2012-06-16T21:56:00.000+05:30

இலங்கை அணிக்கெதிரான நான்காவது ஒருநாள் போட்டியில் பாகிஸ்தான் அணி 244 ஓட்டங்கள் இலக்குடன் துடுப்பெடுத்தாடுகிறது.

இலங்கையில் சுற்றுப்பயணம் மேற்கொண்டுள்ள பாகிஸ்தான் அணிக்கும், இலங்கை அணிக்கும் இடையிலான 5 போட்டிகள் கொண்ட ஒருநாள் தொடர் நடைபெற்று வருகிறது.

முதல் மூன்று போட்டிகள் நிறைவுற்ற நிலையில் நான்காவது ஒருநாள் போட்டி கொழும்பு பிரேமதாஸ மைதானத்தில் இன்று தொடங்கியது.

நாணய சுழற்சியில் வெற்றி பெற்ற இலங்கை அணி துடுப்பாட்டத்தை தெரிவு செய்தது.

தொடக்க வீரராக களமிறங்கிய உபுல் தரங்கா 4 ஓட்டங்கள் எடுத்த நிலையில் யூனிஸ்கான் பிடியில் ஆட்டமிழந்தார்.

மற்றொரு தொடக்க வீரரான திலகரட்ண டில்ஷன் 24 ஓட்டங்களும், அடுத்து களமிறங்கிய தினேஷ் சண்டிமால் 18 ஓட்டங்களும் எடுத்து ஆட்டமிழந்தனர்.

அடுத்து களமிறங்கிய குமாரா சங்கக்காரா 31 ஓட்டங்களும், அணித்தலைவர் மஹேல ஜெயவர்த்தன 40 ஓட்டங்களும் எடுத்து ஆட்டமிழந்தனர்.

மழை பெய்ததால் சிறிது நேரம் ஒத்திவைக்கப்பட்ட போட்டி மீண்டும் தொடங்கியது. பின்பு களமிறங்கிய அனைத்து வீரர்களும் சொற்ப ஓட்டங்களில் ஆட்டமிழந்தனர்.

இலங்கை அணி 50 ஓவர் முடிவில் 8 விக்கெட் இழப்பிற்கு 243 ஓட்டங்கள் எடுத்துள்ளது.

இதனையடுத்து 244 ஓட்டங்கள் இலக்குடன் பாகிஸ்தான் அணி துடுப்பெடுத்தாட தொடங்கியது. தொடக்க வீரர்களாக மொகமது ஹபிஸும், அசார் அலியும் களமிறங்கியுள்ளனர்.

அமெரிக்காவுக்கு பறந்தது சினேகா- பிரசன்னா ஜோடி...

2012-06-16T21:53:00.000+05:30

சினேகாவுக்கும் பிரசன்னாவுக்கும் காதல் ஆரம்பமானது, இருவரும் ஜோடி சேர்ந்த அச்சமுண்டு அச்சமுண்டு படத்திலிருந்துதான்.
இந்தப் படத்தில் நடிக்க ஒத்திகை பார்க்க, இருவரும் அமெரிக்காவில் ஒரே வீட்டில் தங்கியிருந்தனர். கணவன் - மனைவியாக நடிக்க ஒத்திகை பார்த்தனர்.

அப்போதுதான் இருவருக்கும் காதல் பூத்தது. இரண்டு ஆண்டுகளுக்குமேல் காதலித்து, கடந்த மாதம் தம்பதிகளாகினர்.

திருமணமாகிவிட்டாலும் அவர்களால் ஹனிமூனை உடனடியாகக் கொண்டாட முடியவில்லை.

தான் நடிக்க வேண்டிய பட வேலைகளில் பிஸியாகிவிட்டார் சினேகா. ஒருவழியாக இரவு பகல் பார்க்காமல் அந்த வேலைகளை முடித்துக் கொடுத்துவிட்டு, இப்போதுதான் இல்லற வேலைகளை ஆரம்பித்துள்ளனர் புதுமணத் தம்பதிகள்.

தேனிலவுக்காக எங்கே போகலாம் என்ற குழப்பமே இருவருக்கும் இல்லையாம். காரணம், தங்கள் காதல் ஆரம்பித்த அமெரிக்காவுக்கே செல்ல முடிவெடுத்திருந்தார்களாம்.

தங்கள் முடிவை இரு தினங்களுக்கு முன் அமைதியாக செயல்படுத்தினர் சினேகாவும் பிரசன்னாவும்.

இருவரும் நேற்று முன்தினம் ஹனிமூனுக்காக அமெரிக்கா புறப்பட்டுச் சென்றனர்.

டர்ட்டி பிக்சரில் நடிப்பதால் நான் டர்ட்டி பெண் இல்லை: சனா கான்....

2012-06-16T21:47:00.000+05:30

மலையாளத்தில் உருவாகும் டர்ட்டி பிக்சர்ஸ் படத்தில் நடிகை சனா கான் நடிக்க உள்ளார்.
கொலிவுட்டில் சிலம்பாட்டம் படத்தில் சிம்புவுக்கு நாயகியாக பிராமண பெண்ணாக நடித்தவர் சனா கான்.

சென்ற மாதம் பெங்களூரில் விபசார வழக்கில் சிக்கியதாக தகவல் வெளிவந்தது. பின்னர் அவ்வழக்கில் சிக்கியது இவர் அல்ல, வேற சனா கான் என்பது தெரிய வந்தது.

இந்நிலையில் நடிகை சனா கான் மலையாளத்தில் உருவாகும் டர்ட்டி பிக்சர்ஸ் படத்தில் நடிக்கின்றார். இப்படம் வித்யாபாலன் நடித்த பாலிவுட் தழுவல் அல்ல.

நடிகை சில்க் ஸ்மிதாவை திரையுலகில் அறிமுகப்படுத்திய ஆன்டனி ஈஸ்ட் மேன் இப்படத்தை இயக்குகின்றார்.

இப்படம் குறித்து நடிகை சனா கான், டர்ட்டி பிக்சர்ஸ் படத்தில் சில்க் வேடத்தில் நடிக்கின்றேன். ஆனால் நான் டர்ட்டி பெண் இல்லை என்று கூறியுள்ளார்.

கடந்த மாதம் ஏற்பட்ட இந்த சம்பவத்தால் நானும் குடும்பத்தினரும் மனஉளைச்சலுக்கு ஆளானோம். அந்த சம்பவத்தை என்னால் மறக்கமுடியாது எனவும் தெரிவித்துள்ளார்.

பிளாஸ்டிக் சர்ஜரி செய்ய நான் தயார்: கமல்ஹாசன்...

2012-06-16T21:44:00.000+05:30

முகத்தை பிளாஸ்டிக் சர்ஜரி செய்துகொண்டு நடிக்க தயாராக இருப்பதாக பிரபல நடிகர் . கமல்ஹாசன் தெரிவித்துள்ளார்.
இது குறித்து அவர் கூறுகையில்: எந்தவொரு படத்தில் நடிக்கும்போதும் அதற்காக எனது முழு உழைப்பையும் ஆர்வத்தையும் செலவழிக்கிறேன்.

ஒவ்வொரு படத்தையும் தாயன்புடன் அணுகுகிறேன். நான் ஏற்கும் கதாபாத்திரங்களின் தன்மைக்கு ஏற்ப என்னை உருமாற்றிக்கொள்வதில் தயக்கம் காட்டுவதில்லை.

இன்னும் எந்த கதா பாத்திரத்துக்காகவும் பிளாஸ்டிக் சர்ஜரி செய்துகொள்ள வேண்டிய அவசியம் ஏற்படவில்லை. ஒருவேளை அந்த தேவை ஏற்பட்டால் அதையும் செய்துகொள்ள தயங்க மாட்டேன்.

இப்போதைக்கு என் படங்களை நானே எழுதி இயக்குகிறேன். மீண்டும் மணிரத்னத்துடன் இணைந்து நாயகன் போன்ற படம் எப்போது தருவீர்கள்? என்கிறார்கள்.

மணிரத்னத்துடன் இணைந்து பணியாற்றுவேனா இல்லையா என்பது தெரியவில்லை. ஆனால் இருவரும் சந்திக்கும்போது இணைந்து பணியாற்றுவது பற்றி பேசிக்கொள்வோம்.

ரஜினியுடன் இணைந்து மீண்டும் நடிப்பீர்களா? என்கிறார்கள். இருவரும் இணைந்தால் அந்த படத்துக்கு விலை நிர்ணயிப்பது என்பது வானத்தை எட்டிவிடும். இருவருக்கும் சம்பளம் நிர்ணயிப்பதற்கு ஒரு லிமிட் இருக்கிறது.

சம்பளம் கொடுத்த பிறகு அந்த படத்தை தயாரிப்பதற்கான பட்ஜெட்டை பார்க்கும்போது அது போதுமானதாக இருக்காது. இது மிகவும் யோசிக்க வேண்டிய விடயம் என தெரிவித்துள்ளார்.

தக்காளியை திருடியவருக்கு சிறைத் தண்டனை

2012-06-16T21:39:00.000+05:30

இத்தாலியில் நபர் ஒருவருக்கு தக்காளியை திருடியதற்காக 20 மாதம் சிறைத் தண்டனை விதிக்கப்பட்டுள்ளது.

இத்தாலியின் லெசி நகரத்தை சேர்ந்தவர் டேனியல் கார்லினோ(வயது 30).

இவர் கடந்தாண்டு ஜூலை மாதம் விவசாயி ஒருவரின் வாகனத்திலிருந்து 2 கூடை தக்காளியைத் திருடினார். இதனையடுத்து அப்பகுதி மக்கள் பொலிசில் புகார் செய்தனர்.

இவ்வழக்கை விசாரித்த நீதிமன்றம், தக்காளிக்கான 7 ஆயிரம் ரூபாயை விவசாயிடம் அளிக்கும்படி கூறியது. ஆனால் இதை டேனியல் செய்யத் தவறி விட்டார்.

எனவே இவருக்கு 4 ஆண்டு சிறைத் தண்டனை அளிக்கும்படி அரசு தரப்பு வழக்கறிஞர்கள் நீதிபதியிடம் கோரினர். ஆனால் டேனியலுக்கு 20 மாத சிறைத் தண்டனை விதித்து நீதிமன்றம் தீர்ப்பளித்துள்ளது.

ஜப்பான் மீது ஐரோப்பிய நாடுகள் பொருளாதார தடை...

2012-06-16T21:36:00.000+05:30

ஈரானில் இருந்து கச்சா எண்ணெய் இறக்குமதி செய்யும் நாடுகளுக்கு பொருளாதார தடை விதிக்க அமெரிக்கா மற்றும் ஐரோப்பிய கூட்டமைப்பு நாடுகள் முடிவு செய்துள்ளன.

மேலும் இறக்குமதியை குறைக்க ஜுலை மாதம் 1ஆம் திகதி வரை கெடு விதித்திருக்கிறது.

இந்தியா உள்பட 7 நாடுகள் இறக்குமதியை குறைத்ததால் விதிவிலக்கு அளிப்பதாக சமீபத்தில் அமெரிக்கா அறிவித்தது.

ஆனால் இவ்விவகாரத்தில் ஜப்பான் நிலை குறித்து பின்னர் முடிவு செய்யப்படும் என கூறி இருந்தன.

இந்நிலையில் ஜப்பான் நாடாளுமன்ற கீழ் சபையில் ஈரானில் இருந்து கச்சா எண்ணெய் இறக்குமதிக்கு இன்சூரன்ஸ் செய்ய வகை செய்து சட்ட மசோதா தாக்கல் செய்யப்பட்டு நிறைவேறியது.

பின்னர் இது மேல் சபையிலும் தாக்கல் ஆனது. இந்த நடவடிக்கை ஐரோப்பிய கூட்டமைப்பு நாடுகளின் கொள்கைக்கு எதிராக அமைந்துள்ளதால் ஜப்பான் மீது பொருளாதார தடை விதிக்கப்படும் என எதிர்பார்க்கப்படுகிறது.

ரஷ்யாவில் 12 பயணிகளுடன் விமானம் மாயம்....

2012-06-16T21:30:00.000+05:30

ரஷ்யாவில் 12 பயணிகளுடன் சென்று கொண்டிருந்த தனியார் விமானம் ஒன்று திடீரென மாயமாகி உள்ளது.

ரஷியாவில் ரால்ஸ் பகுதியில் உள்ள விமான நிலையத்தில் இருந்து 12 பயணிகளுடன் ஒரு தனியார் விமானம் புறப்பட்டு சென்றது.

ஒன்றை என்ஜின் கொண்ட அந்த விமானத்தை விமானி ஒருவர் மட்டுமே ஓட்டிச் சென்றார். அதன் பின்னர் அந்த விமானம் மாயமாகி விட்டதாக பொலிசுக்கு தகவல் வந்தது.

சம்பவ இடத்திற்கு பொலிஸ் அதிகாரிகள் சென்று விசாரித்த போது, அங்கு மது விருந்து நடைபெற்று அதன் பிறகு நள்ளிரவில் 12 பயணிகளுடன் விமானம் புறப்பட்டதாகவும் தகவல் கிடைத்தது.

இந்த சம்பவம் நடைபெற்று 2 நாட்கள் ஆகியும் இதுவரையில் விமானம் குறித்து எந்த தகவலும் கிடைக்கவில்லை. இதுகுறித்து பொலிசார் தொடர்ந்து விசாரணை நடத்தி வருகின்றனர்.

விடுமுறைக்காக அமெரிக்கா சென்றிருந்த சவுதி இளவரசர் மரணம்....

2012-06-16T21:24:00.001+05:30

அமெரிக்காவில் சவுதி அரேபியாவின் இளவரசரான நயிப் பின் அப்துல் அஸிஸ் அல் சவுத் இன்று மரணமடைந்தார்.

சவுதி அரேபியா நாட்டில் மன்னராட்சி முறை நிலவி வருகிறது. இந்நாட்டின் இளவரசரும், துணைப் பிரதமர் மற்றும் உள்துறை அமைச்சராகவும் பதவி வகித்து வந்த நயிப் பின் அப்துல் விடுமுறை நாட்களை கொண்டாடுவதற்காகவும், மருத்துவப் பரிசோதனைகளை செய்து கொள்வதற்காகவும் கடந்த மாத இறுதியில் அமெரிக்கா சென்றார்.

கடந்த 3ஆம் திகதி அன்று இளவரசர் உடல்நலமுடன் இருப்பதாகவும், விரைவில் அவர் நாடு திரும்புவார் என்றும் சவுதி அரசு அறிவித்திருந்தது.

ஆனால் திடீரென உடல்நலக்குறைவு ஏற்பட்டதால் அமெரிக்க மருத்துவமனை ஒன்றில் சேர்க்கப்பட்டிருந்தார். இந்நிலையில் சிகிச்சை பலனின்றி அவர் இறந்து விட்டதாக அல் அரேபியா என்ற தொலைகாட்சி செய்தி வெளியிட்டிருக்கிறது.

இவருக்கு 77 அல்லது 78 வயது இருக்கலாம். சவுதி அரசின் அடுத்த மன்னராக பதவியேற்கும் நிலையில் இருந்த நயிப் இறந்ததை அடுத்து, அவரது தம்பியும் ரியாத் மாகாண கவர்னருமான சல்மான் அடுத்த இளவரசராக அறிவிக்கப்படுவார் என தகவல்கள் வெளியாகி உள்ளன.

யாழில் குற்றச் செயல்கள் 50 வீதமாக குறைவு: யாழ். பிரதி பொலிஸ்மா அதிபர்...

2012-06-16T21:02:00.000+05:30

யாழ்ப்பாணத்தில் குற்றச் செயல்கள் 50 வீதமாக குறைவடைந்துள்ளதாக யாழ்ப்பாண பிரதி பொலிஸ் மா அதிபர் எரிக் பெரேரா இன்று நடைப்பெற்ற ஊடகவியலாளர்கள் சந்திப்பில் தெரிவித்தார்.

கடந்த ஒருவாரக் காலப்பகுதயில் 63 பேர் யாழ். குடாவில் கைது செய்யப்பட்டுள்ளதாக தெரிவித்த யாழ்ப்பாண பிரதி பொலிஸ் மா அதிபர், பிடியானை பிறப்பிக்கபட்ட நிலையில் தலைமறைவாக வாழ்ந்து வந்த 28 பேரை இரவு நேரத்திலான சுற்றி வளைப்பின் போது கைது செய்ததாக குறிப்பட்டார்.

கைது செய்யப்பட்ட ஏனையவர்களில் சட்ட விரோதமாக மதுபானம் விற்பனை செய்தமை தொடர்பில் 7 பேரும், கஞ்சா விற்பனை செய்தமை தொடர்பில் 2 பேரும் குடி போதையில் வாகனம் செலுத்திய 13 பேரும் சூழல் மாசடையக் காரணமாண காரணமான 6 பேரும் ஏனையவர்கள் கொள்ளைச் சம்பவங்களுடன் தொடர்புடையவர்கள் என அவர் சுட்டிக்காட்டினார்.

அனுமதியின்றி மாடுகளை ஏற்றிச் சென்றமை மற்றும் கொல்களம் அல்லாத இடங்களில் மாடுகள் வெட்டியமை தொடர்பிலும் கோப்பாய் நெடுந்தீவு ஊர்காவற்துறையைச் சேர்ந்த சில சந்கே நபர்கள் கைது செய்யப்பட்டுள்ளதாக தெரிவிக்கப்படுகிறது.

கடந்த சில காலங்களாக களவில் ஈடுபட்ட யாழ்ப்பாணத்தைச் சேர்ந்த 4 பேர் கொண்ட குழுவும் மன்னார் மாவட்டத்தைச் சேர்ந்த 3 நபர்களையுடைய 3 பேரும் கைது செய்யப்ட்டுள்ளனர்.

குறித்த இரண்டு குழுவினரும் இணைந்து, யாழ்ப்பாணம் மற்றும் மன்னார் ஆகிய மாவட்டங்களில் மதுபான விற்பனை நிலையம் உடைத்து கொள்ளையில் ஈடுபட்டமை மற்றும் வீடுகள் சிலவற்றை உடைத்து பணம், கையடக்கத் தொலைபேசிகள், தங்க நகைகள் மற்றும் வீட்டு பாவனைப் பொருட்கள் போன்றவற்றை கொள்ளையடித்த சந்கேத்தின் பேரில் 7 பேரும் கைது செய்யப்பட்டுள்ளதாக அவர் மேலும் தெரிவித்தார்.

அத்துடன் கோப்பாயில் 4 வயது சிறுமியை பாலியில் துஸ்பிரயோகம் செய்த சந்தேகத்தின் பொது 18 வயது இளைஞன் ஒருவரும் கொடிகாமம் பகுதியில் வாள் சண்டையில் இருவரும் கைது செயய்ப்ட்டள்ளதாக பிரதி பொலிஸ் மா அதிபர் தெரிவித்துள்ளார்.

கவிஞர் வைரமுத்துவின் விவிலிய வார்த்தைகள்...

2012-06-13T13:24:00.000+05:30

நீர் பறவை படத்திற்காக கவிஞர் வைரமுத்து, விவிலிய பைபிளில் உள்ள சொற்களால் பாடல்களை எழுதியுள்ளார்.
ரெட் ஜெயன்ட் மூவிஸ் வழங்கும் நீர்ப்பறவை படத்தை தேசிய விருது பெற்ற இயக்குனர் சீனுராமசாமி இயக்கியுள்ளார்.

ரகுநந்தன் இசையமைக்கும் இப்படத்திற்கு கவிஞர் வைரமுத்து பாடல்களை எழுதியுள்ளார்.

கடலோர கிறிஸ்தவ மீனவர்களைப் பற்றிய படம் என்பதால் கவிஞர் வைரமுத்து, விவிலிய பைபிள் சொற்களால் இப்பாடல்களை எழுதியுள்ளார்.

நீர்பறவையின் இசை அடுத்த மாதம் வெளிவர உள்ளது. இப்படத்தில் விஷ்ணு-சுனைனா இணைந்து நடித்துள்ளனர்.

இவர்களுடன் சரண்யா பொன்வண்ணன், நந்திதா தாஸ் ஆகியோர் முக்கியமான கதாப்பாத்திரங்களில் நடித்துள்ளனர்.

பெண்ணுடன் தவறான உறவு: பொலிஸ் அதிகாரிக்கு அடி, உதை...

2012-06-13T13:13:00.000+05:30

வழக்கு விசாரணைக்காக சென்றபோது, பெண்ணுடன் பாலியல் தொடர்பு ஏற்படுத்திக் கொண்ட பொலிஸ் அதிகாரிக்கு பொதுமக்கள் தர்மஅடி கொடுத்தனர்.
திண்டுக்கல் மாவட்டம் வத்தலக்குண்டு அருகே அய்யம்பாளையத்தை சேர்ந்த பாஸ்கரன் கொலை முயற்சி வழக்கில் கைதாகி சிறையில் உள்ளார்.

இந்நிலையில் வழக்கு விசாரணைக்காக பட்டிவீரன்பட்டி சிறப்பு பொலிஸ் அதிகாரி முருகேசன், பாஸ்கரன் வீட்டிற்கு அடிக்கடி சென்று வந்து உள்ளார். இதில் பாஸ்கரன் மனைவியுடன் முருகேசனுக்கு தொடர்பு ஏற்பட்டது.

கடந்த 4 மாதங்களாக இத்தொடர்பு நீடித்ததால் அப்பகுதி மக்கள் முருகேசனை எச்சரித்துள்ளனர். ஆனால் அவர் இதை பொருட்படுத்தவில்லை.

பின்னர் இதுகுறித்து அப்பகுதி மக்கள் பட்டிவீரன்பட்டி உயர் பொலிஸ் அதிகாரி கருணாகரன், அன்னம் ஆகியோரிடம் புகார் செய்தனர்.இதன்காரணமாக முருகேசன் சென்ற வாரம் விருவீடு என்ற மற்றொரு பொலிஸ் நிலையத்திற்கு இடமாற்றம் செய்யப்பட்டார்.

இந்நிலையில் அவர் நேற்று மாலை 3.30 மணியளவில், பாஸ்கரன் வீட்டிற்குள் சென்றுள்ளார். இதைப்பார்த்த பொதுமக்கள் அவரை பிடித்து சரமாரியாக தர்மஅடி கொடுத்தனர். இதனால் பரபரப்பு ஏற்பட்டது.

பின்னர் இந்த தகவலறிந்த உயர் பொலிஸ் அதிகாரிகள் குமரேசன், கருணாகரன் ஆகியோர் முருகேசனை மீட்டுச் சென்றனர்.

22 பெண்களை ஏமாற்றி, உல்லாசம் அனுபவித்த மோசடி இளைஞர் கைது....

2012-06-13T12:46:00.000+05:30

கவர்ச்சிகரமான திருமண விளம்பரங்களை இணையதளங்களில் வெளியிட்டு அதன்மூலம் 22 பெண்களை ஏமாற்றிய இளைஞர் ஒருவர் ஐதராபாத்தில் கைது செய்யப்பட்டார்.

ரவிகிஷோர் என்ற இளைஞர் ஒருவர், தான் மும்பை ஐஐடியில் படித்ததாகவும், கொலம்பியாவில் எம்.எஸ் படித்து தற்போது மைக்ரோசாப்ட் மென்பொருள் நிறுவனத்தில் உயர்பதவியில் இருப்பதாகவும் பிரபல திருமண இணையதளங்களில் கவர்ச்சிகரமாக விளம்பரம் கொடுத்தார்.

இதைப்பார்த்த இளம்பெண்கள் பலர், ரவிகிஷோரை தொடர்புகொண்டு விசாரித்துள்ளனர்.

இவர்களில் 22 இளம்பெண்களை ஏமாற்றி அவர்களிடமிருந்து ரூ.12 லட்சம் வரை ரவிகிஷோர் களவாடியுள்ளார். இந்த தொகையில் உல்லாசம் அனுபவித்ததுடன் விலையுயர்ந்த பொருட்களும் வாங்கியுள்ளார்.

இந்நிலையில் இவரிடம் ஏமாந்த பெண் ஒருவர், யூன் 7ம் திகதி ரவிகிஷோர் கொடுத்த புகாரின் அடிப்படையில் சைபர் கிரைம் பொலிஸார் விசாரணை மேற்கொண்டனர். இதையடுத்து நேற்று முன்தினம் ரவிகிஷோரை ஐதராபாத்தில் வைத்து பொலிஸார் கைது செய்தனர்.

இதுகுறித்து சைபர் கிரைம் பொலிஸார், கவர்ச்சிகரமான திருமண விளம்பரங்களை பெண்களோ, ஆண்களோ தீவிரமாக விசாரிக்க வேண்டும் என்றனர்.

உடல் எடையை குறைக்கும் ரெட் ஒயின்...

2012-06-13T00:50:00.000+05:30

ஒயின் திரவம் போதைப் பொருளாக மட்டுமே பார்க்கப்பட்டு வந்த காலத்தில், தினசரி இரண்டு டம்ளர் ஒயின் குடித்தால் இதயநோய் பாதிப்பு ஏற்படுவது 40 சதவிகிதம் குறைகிறது என்று அமெரிக்க ஆய்வு ஒன்று தெரிவித்தது.

அதேபோல் தினசரி மது குடிப்பவர்களுக்கு மார்பகப் புற்றுநோய் வரும் வாய்ப்பு அதிகம் என்று கூறும் மருத்துவர்கள், தினசரி சிவப்பு ஒயின் குடித்தால் மார்பகப் புற்றுநோய் வரும் வாய்ப்பு பாதியளவாக குறைகிறது என்று லாஸ் ஏஞ்சல்ஸ் மருத்துவ இதழ் ஒன்று தகவல் வெளியிட்டுள்ளது.

இந்த நிலையில் சிவப்பு ஒயின் குடிப்பதால் உடல் பருமன் குறையும் வாய்ப்புள்ளது என்று சமீபத்திய ஆய்வு முடிவு ஒன்று தகவல் வெளியிட்டுள்ளது.

அமெரிக்காவின் இன்டியானாவில் உள்ள பர்டியூ பல்கலைகழக ஆய்வாளர்கள் புதிய கண்டுபிடிப்பை நிகழ்த்தியுள்ளனர். அதாவது ரெட் ஒயினில் அடங்கியுள்ள ஒரு வேதிப்பொருளுக்கு உடல் பருமனைத் தடுக்கும் சக்தி உள்ளது என தெரியவந்துள்ளது.

ரெட் ஒயினில் உள்ள piceatannol என்ற அந்த வேதிப்பொருள் இளம் கொழுப்புச் செல்களின் வளர்ச்சியை தாமதப்படுத்துகிறது. அதாவது அது உடலைப் பருமனடையச் செய்யும் ரசாயன நடைமுறையை தாமதப்படுத்துகிறது என்று ஆய்வாளர்கள் தெரிவித்துள்ளனர்.

மேலும் ரெட் ஒயினில் உள்ள இந்த வேதிப்பொருள் கொழுப்பு செல்களை உருவாக்கும் இன்சுலின் திறனை சிறப்பாகத் தடை செய்கிறது. இதேபோல் ரெட் ஒயினில் உள்ள piceatannol வேதிப்பொருளினால் இருதய மற்றும் நரம்புத் தளர்ச்சி உள்ளிட்ட நோய்களும் தடுக்கப்படுகிறது. இது புற்று நோயிலிருந்தும் காக்கிறது என்று இந்த ஆய்வில் கூறப்பட்டுள்ளது.

இப்போது இந்த ரெட் ஒயினில் காணப்படும் இந்த வேதிப்பொருளை வேறு மாற்று வடிவங்களில் கொடுக்க முடியுமா என்ற ஆய்வு நடைபெற்று வருவதாக இது தொடர்பான ஆய்வு மேற்கொண்ட டாக்டர் கிம் கூறியுள்ளார்.

ரெட் ஒயினில் காணப்படும் இந்த வேதிப்பொருள் திராட்சை, மற்றும் புளூபெர்ரி போன்ற பழங்களிலும் உள்ளது. இந்த ஆய்வு முடிவு பயலாஜிக்கல் கெமிஸ்ட்ர்ய் என்ற மருத்துவ இதழில் செய்தி வெளியிட்டுள்ளது.

இதேபோன்ற ஆய்வினை பாஸ்டனில் உள்ள ப்ரிகாம் பெண்கள் மருத்துவமனை ஆய்வாளர்கள் மேற்கொண்டனர். 39 வயதிற்கு மேற்பட்ட 19000 பெண்களிடம் 13 ஆண்டுகளாக அவர்கள் மேற்கொண்ட ஆய்வில் சிவப்பு ஒயின் உடல்பருமனை குறைப்பது கண்டறியப்பட்டது.

ஆரோக்கியத்தோடு மனம் தொடர்பான சிக்கல்களையும் சிவப்பு ஒயின் தீர்த்து வைக்கிறது என்றும் ஆய்வாளர்கள் தெரிவித்துள்ளனர்.

கார்த்தியின் சகுனிக்கு யு சான்று...

2012-06-13T00:45:00.000+05:30

புதுமுக இயக்குனர் சங்கர் தயாளன் இயக்கத்தில், கார்த்தி, ப்ரணிதா ஆகியோர் நடிப்பில் உருவான சகுனி படத்திற்கு யு சான்றிதழ் கிடைத்துள்ளது.
கொஞ்சம் அரசியல் பின்னணியில் உருவாகி இருக்கும் இப்படம், ரசிகர்கள் முழுக்க முழுக்க வயிறு குலுங்கி சிரிக்கும் படமாக உருவாகி இருக்கிறது.

தமிழ் புத்தாண்டுக்கே திரைக்கு வர வேண்டிய இப்படம் பெப்சி உள்ளிட்ட பல்வேறு காரணங்களால் படப்பிடிப்பு தாமதமாகியது.

தற்போது படப்பிடிப்பு அனைத்தும் முடிந்து வெளியீட்டிற்கு தயாராகியுள்ளது. முன்னதாக இப்படத்தை சென்சொர் போர்டுக்கு அனுப்பி வைத்திருந்தனர் சகுனி குழுவினர்.

படத்தை பார்த்த சென்சார் அதிகாரிகள் சகுனிக்கு யு சான்று கொடுத்துள்ளனர். வருகிற ஜூன் 22ஆம் திகதி விஜய் பிறந்தநாளில் இப்படம் உலகம் முழுக்க வெளியாக இருக்கிறது.

சகுனி படத்தோடு அஜித்தின் பில்லா-2 படமும் வெளியாக இருப்பது குறிப்பிடத்தக்கது.

நீ தானே என் பொன்வசந்தம் படத்தின் இசை விரைவில் வெளியீடு...

2012-06-13T00:42:00.000+05:30

இசைஞானி இளையராஜாவின் இசையில் 'நீ தானே என் பொன்வசந்தம்' படத்தின் இசை வெளியீடு ரசிகர்கள் மத்தியில் தற்போதைய பெரிய எதிர்பார்ப்பாக உள்ளது.
முதன் முறையாக 'நீ தானே என் பொன்வசந்தம்' படத்தின் இசைக்காக இளையராஜாவோடு இணைந்திருக்கிறார் இயக்குனர் கெளதம் மேனன்.

ஜீவா, சமந்தா இணைந்து நடித்துள்ள இப்படம் தமிழ் தவிர, வெவ்வேறு நடிகர்களை கொண்டு தெலுங்கு மற்றும் இந்தி மொழிகளிலும் தயாராகி வருகிறது.

இப்படத்தின் இசை வெளியீட்டு உரிமைக்கு கடும் போட்டி நிலவியது. ஆனால் சோனி நிறுவனம் இப்போட்டியில் வெற்றி பெற்றுள்ளது.

இந்நிறுவனம் தான் கெளதம் மேனன் - ஏ.ஆர்.ரஹ்மான் கூட்டணியில் வெளிவந்த 'விண்ணைத்தாண்டி வருவாயா' படத்தின் இசையையும் வெளியிட்டது.

சோனி நிறுவனம் 'நீ தானே என் பொன்வசந்தம்' படத்தின் இசை உரிமையை 'விண்ணைத்தாண்டி வருவாயா' படத்திற்கு கொடுத்த விலையை விட பெரிய தொகை கொடுத்து வாங்கியுள்ளது.

வரும் யூலை முதல் வாரத்தில் இப்படத்தின் இசை வெளியீடு இருக்கும் என்று கெளதம் வாசுதேவ் மேனன் அறிவித்துள்ளார்.

கொழும்பு மகசின் சிறையில் கைதிகளுக்கு எயிட்ஸ் பரிசோதனை...

2012-06-13T00:38:00.000+05:30

கொழும்பு புதிய மகசின் சிறையில் தடுத்துவைக்கப்பட்டுள்ள எய்ட்ஸ் தொற்றுடையதாக சந்தேகிக்கப்படும் கைதிகளை சோதனை மேற்கொள்ளுமாறு கொழும்பு நீதவான் நீதிமன்றம் உத்தரவிட்டுள்ளது.

மகசின் சிறைச்சாலைச் சாலை அதிகாரிக்கு இன்று இந்த உத்தரவு பிறப்பிக்கப்பட்டது. இவ்வாறு சந்தேகத்திற்குரியவர்களை விரைவாக பரிசோதனைக்கு உட்படுத்தி, அவர்களது இரத்த மாதிரியை சோதனை செய்யுமாறு கொழும்பு நீதவான் நீதிமன்ற நீதிபதி பணிப்புரை விடுத்துள்ளார்.

போதை பொருட்களை தம்வசம் வைத்திருத்த குற்றத்திற்காக கைது செய்யப்பட்ட கைதி ஒருவர், எய்ட்ஸ் தொற்றுக்கு உள்ளான நிலையில் பலியான சம்வம் தொடர்பில் இடம்பெற்ற வழக்கு விசாரணைகயின் போதே இந்த பணிப்புரை விடுக்கப்பட்டது.

கடந்த மார்ச் மாதம் 11 ஆம் திகதி சிறைச்சாலை மருத்துவமனையில் அனுமதிக்கப்பட்ட நிலையிலேயே குறித்த நபர் பலியானார். இந்த நிலையில் மேற்கொள்ளப்பட்ட மரண விசாரணையில் அவர் எயிட்ஸ் தொற்றுக்கு உள்ளான நிலையிலேயே மரணமானமை தெரியவந்தது.

இதனை அடுத்து கொழும்பு புதிய மகசின் நிறையில் சுமார் 220 எச்.ஐ.வி தொற்றாளர்கள் இருப்பதாக தாம் சந்தேகிப்பதாக சிறைச்சாலை அதிகாரிகள் நீதிமன்றில் தெரிவித்திருந்தனர்.