கிரி Blog

விண்ணைத்தாண்டி வருவாயா - திரைவிமர்சனம்

contact@giriblog.com (கிரி) — Mon, 08 Mar 2010 07:56:57 PST

கவுதம் வாசுதேவ மேனன் மீண்டும் ஒரு காதல் கதையில் களம் புகுந்து இருக்கிறார், இந்த முறை ஆர்ப்பாட்டமில்லாமல் அமைதியாக, வம்பான ஆளான சிம்பை வைத்துக்கொண்டு.

விண்ணைத்தாண்டி வருவாயா படத்தின் கதை என்னவென்றால் சிம்பு பொறியியல் பட்டதாரி, திரைத்துறையில் இயக்குனராக அதற்கு முதல் அடியான உதவி இயக்குனராகி வாய்ப்பு தேடுபவர். இவரது மாடி வீட்டில் வசிப்பவர் த்ரிஷா. முதல் முதலாக பார்க்கும் போதே சிம்பு த்ரிஷா மீது காதல் கொள்கிறார், ஆனால் இரு பிரச்சனை ஒன்று த்ரிஷா சிம்புவை விட ஒரு வயது மூத்தவர், இரண்டாவது சிம்பு ஹிந்து த்ரிஷா கிறிஸ்துவம். த்ரிஷா வீட்டில் இவர்களது காதலுக்கு கடும் எதிர்ப்பு வருகிறது. இறுதியில் காதலில் ஒன்று சேர்ந்தார்களா இல்லையா என்பதே படம்.

கவுதமின் இந்தப்படமும் வழக்கம் போல A சென்ட்டருக்கான படம் தான் B மற்றும் C யில் ஓட வாய்ப்பில்லை, அதெல்லாம் தெரிந்தே தான் கவுதமும் படம் எடுக்கிறார். அவரது பார்வையாளர்கள் எப்போதும் A சென்டர் தான். தமிழில் ஒரு முடிவு தெலுங்கில் ஒரு முடிவு என்று இரு வித்யாசமான முடிவுகளை தைரியமாக வைத்து இரண்டிலும் வெற்றி பெற்று இருக்கிறார், பெரிய விஷயம் தான்.

சிம்பு என்றாலே வம்பு தான் என்று இருக்கும் போது தன்னுடைய வழக்கமான விரல் வித்தை சேட்டைகள் மற்றும் பில்டப்புகள் அனைத்தையும் ஏறக்கட்டிவிட்டு அடக்கமான பையனாக அலட்டிக்கொள்ளாமல் நடித்து இருக்கிறார். உண்மையை கூறினால் சிம்பு இதில் இயல்பாக வந்து செல்கிறார் நடிப்பது போல் தெரியவில்லை. இவர் மீது பெரிதாக எந்த குறையும் கூற வாய்ப்பில்லை. தன் பங்கை சிறப்பாக செய்து இருக்கிறார். சிம்பு உண்மையில் மிகத்திறமையான நடிகர் இதில் எனக்கு மாற்றுக்கருத்தில்லை, வீம்புக்கு ஒரு சிலர் கிண்டலடிக்கலாம். இவரது அனைத்து திறமையும் இவர் செய்யும் பந்தா மற்றும் இவரது வாயால் கெட்டுப்போய் விடுகிறது என்பதே உண்மை. இதைப்போல கதாப்பாத்திரத்தின் தன்மை உணர்ந்து நடித்தால் கண்டிப்பாக சிறந்த நடிகராக வருவார் என்பதில் எந்தவித சந்தேகமுமில்லை.

த்ரிஷா ரொம்ப அழாக இருக்கிறார் அமைதியாக சிறப்பாக நடித்து இருக்கிறார் வழக்கமான பேக்குத்தனம் இல்லாமல். அவரது உடைகளே அவருக்கு கூடுதல் அழகை கொடுத்தது என்றால் மிகையில்லை.. சுருக்கமா கூறினால் இந்தப்படத்தில் சூப்பர் ஃபிகராக உள்ளார். சிம்பு த்ரிஷாவிடம் You are very beautiful என்று கூறுவார்..அப்போது பின்னாடி இருந்த ஒருத்தர் இது ஒரு சப்பை ஃபிகர் என்று கமெண்ட் அடித்தார்.... ம்ம்ம் இவருக்கு த்ரிஷா மீது என்ன கோபமோ! ;-) த்ரிஷா இந்தப்படத்தில் அரை மனநிலையில் நடித்துள்ளார் தப்பா எதுவும் நினைத்துக்காதீங்க! அதாவது அவ்வப்போது திடீர் திடீர் என்று தனது மனதை மாற்றிக் கொள்பவர், உறுதியான முடிவு எதுவும் எடுக்க மாட்டார். எந்த நேரத்தில் என்ன முடிவு செய்வார் என்று அவருக்கே தெரியாது கேட்டால் "that moment has gone' என்பார்.

படத்தில் அடிக்கடி, பேசிய வசனங்களே வருவது அலுப்பை தருகிறது, அதுவும் கவுதம் படத்தின் இதற்கு முந்தைய படங்களின் வசனங்களும் கூட. முன்பு புரியாத புதிர் என்ற ஒரு படம் வந்தது பலருக்கு நினைவிருக்கும். அதில் ரகுவரன் I Know I Know என்று திரும்ப திரும்ப கூறிக்கொண்டு இருப்பார். அவர் எத்தனை முறை அந்த வார்த்தையை கூறினார் என்று போட்டி எல்லாம் கூட வைத்தார்கள். அதே மாதிரி இதில் சிம்பு எத்தனை முறை ஜெஸ்சி (த்ரிஷா) என்று கூறினார் என்றும், த்ரிஷா எத்தனை முறை கார்த்திக் (சிம்பு) என்று கூறினார் என்றும் போட்டி வைக்கலாம். அநியாயத்திற்கு ஒவ்வொரு முறையும் பேசி முடித்த பிறகு பெயரை கூறுகிறார்கள். யப்பா! சாமி வெறுத்தே போயிட்டேன்... அதுவும் த்ரிஷா கார்த்திக் கார்த்திக் என்று ஒவ்வொரு வரி முடிவிலும் கூறுவது செம கடுப்பை வரவழைத்து விட்டது. கவுதமுக்கு ஏன் இந்த கொலை வெறி என்று தெரியவில்லை.

இந்தப்படத்தில் குறிப்பிடத்தக்க இன்னொருவர் காக்க காக்க கேமரா மேன் என்று கூறிக்கொண்டு ஒளிப்பதிவாளராக நடித்து இருக்கும் கணேஷ் என்பவர். இவரின் கதாப்பாத்திரம் எனக்கு ரொம்பப் பிடித்தது, ரொம்ப ரசித்தேன். இவர் திட்டினால் கூட நமக்கு கோபம் வராது போல :-)) இவரைப்போல ஒரு அண்ணன் அல்லது ஒருத்தர் நமக்கு உடன் இருந்தால் எவ்வளவு சுவாராசியமாக இருக்கும் என்று என்னை ஏங்க வைத்து விட்டார். இவர் தான் சிம்புவை இயக்குனர் K.S.ரவிக்குமாரிடம் உதவி இயக்குனராக சேர்த்து விடுவார். சிம்புவின் காதலுக்கு துணையாகவும் இருப்பார்.

படத்தில் காமெடி பகுதியை இவர் தான் செய்யப்போகிறார் என்று சூடம் கொளுத்தி சத்தியம் செய்தாலும் யாரும் நம்பமாட்டார்கள், ஆனால் படத்தில் தனது அட்டகாசமான வசன உச்சரிப்பில் அனைவரையும் ஈர்த்து விட்டார். படத்தின் மிகப்பெரிய பலம் இவர் என்றால் மிகையில்லை. சிம்புவை பார்த்து ஒவ்வொரு முறையும் டேய் தம்பி! என்று ஆரம்பித்து இவர் அடிக்கும் கமெண்ட்டும் உடன் இவரது முகபாவனைக்கும் திரையரங்கில் சிரிப்பலைகள். சிம்புவும் அவருக்கு பொருத்தமாக இருக்கிறார். சார் சார் என்று அவரிடம் சிம்பு பேசும் போது.. ஒரு செயற்கைத்தனமில்லாத இயல்பான உறவை காண முடிகிறது.

படம் முழுவதும் பெரும்பாலும் சிம்பு த்ரிஷா காதல் மட்டுமே வருகிறது, உடன் சிம்புவின் திரைத்துறையை பற்றிய பகுதியை இன்னும் கொஞ்சம் இணைத்து இருந்தால் சுவாராசியமாக இருந்து இருக்குமோ என்ற எண்ணம் வந்ததை தவிர்க்க முடியலை, காரணம் சிம்புவின் லட்சியமே இயக்குனராவது தான் ஆனால் சிம்பு த்ரிஷா காதல் பகுதியே பெரும்பாலும் படத்தில் உள்ளது, உடன் அவரது வேலையையும் பிரச்சனைகளையும் காட்டி இருந்தால் இன்னும் இயல்பாக இருந்து இருக்கும் என்பது என் கருத்து, கடைசியில் தான் இதை சரி செய்துள்ளார்கள்.

கவுதமாக இருந்து பின் கவுதம் மேனனாக தற்போது கவுதம் வாசுதேவ மேனனாக மாறி இருக்கும் இவர் படத்திலும் படத்தின் எழுத்திலும் கூட மலையாளத்தை புகுத்தி வருகிறார். படத்தை மட்டும் பார்த்தால் விமர்சித்தால் இதெல்லாம் கூற அவசியமில்லை தான் ஆனால் கொஞ்சம் கொஞ்சமா மாறி வருவதன் காரணம் என்ன என்று தான் புரியவில்லை, என்ன நிரூபிக்க முயல்கிறார் என்றும் புரியவில்லை. முதல் படத்திலேயே இவ்வாறு செய்து இருந்தால் பிரச்சனை இல்லை கொஞ்சம் கொஞ்சமாக மாறி வருவது தான் உறுத்துகிறது. என்னமோ! நல்ல படம் கொடுக்கும் வரை சரி!

படத்தில் "ஒரு நாள் சிரித்தேன் ஒருநாள் வெறுத்தேன்" பாடல் வரும் இடத்தில் வரும் சிம்பு த்ரிஷா ரொமான்ஸ் டாப் க்ளாஸ். காதலிக்கும் காதலித்த ஒவ்வொருவருக்கும் தங்களையே பார்த்தது போல இருக்கும், அத்தனை அருமை. ரொம்ப ரசிக்கும் படி எடுக்கப்பட்டு இருக்கும். படத்தின் "பின்னணி இசை" அருமை ரகுமான் கலக்கி இருக்கிறார். படத்தின் பாடல்கள் சிறப்பாக உள்ளதாக அனைவரும் கூறினார்கள் எனக்கென்னவோ ஹாரிஸ் கவுதம் கூட்டணி போல இல்லை, நிறைவாக இல்லை. அனைவரும் அளவிற்கு மீறி ரகுமானை புகழ்வது போல எனக்கு தோன்றுகிறது. பொதுவாக கவுதம் படத்தில் பாடல்கள் எடுக்கப்பட்ட விதம் அருமையாக இருக்கும் இதில் அது குறைவு. அனைத்து பாடல்களிலும் ஒரே மாதிரி குழு நடனம், செயற்கையாக உள்ளது படத்தோடு ஒட்டவில்லை. ஒளிப்பதிவு சென்னை கேரளா அமெரிக்கா என்று அனைத்து இடங்களிலும் உள்ள அழகை நமக்கு தேடிக்கொண்டு வந்து தருகிறது. த்ரிஷா அப்பாவாக நீண்ட நாட்களுக்கு பிறகு "பூ விழி வாசலிலே" புகழ் பாபு ஆண்ட்டனி, நடிக்க ஓரளவு வாய்ப்புண்டு. சிம்பு அப்பாவாக வரும் கிட்டிக்கு எந்த வித வாய்ப்புமில்லை.

படம் ஹிட் என்று அறிவிக்கப்பட்டு விட்டது, விமர்சனங்களும் பெரும்பாலும் சாதகமாகவே வந்துள்ளன. மிகச்சிறந்த படம் என்றெல்லாம் கூறும்படி படத்தில் அப்படி எதுவும் இருப்பதாக தெரியவில்லை. ஆனால் படத்தை கொடுத்த விதம் அதாவது ஹீரோயிசம், ஹீரோயினின் பேக்குயிசம், பஞ்ச் வசனங்கள், சம்பந்தமில்லாத காட்சிகள், ஆபாசம் என்று எதுவுமில்லாமல் அழகான காதல் படத்தை இயல்பாக கொடுத்ததை கண்டிப்பாக பாராட்டியே ஆக வேண்டும். படம் பார்க்கலாம் எமாற்றமளிக்காது, காதலை ரசிப்பவர்களுக்கு.

Directed by - Gautham Menon
Produced by - Madan Ganesh Elred Kumar Jayaraman
Written by - Gautham Menon
Starring - Silambarasan Trisha Krishnan
Music by - A. R. Rahman
Cinematography - Manoj Paramahamsa
Editing by - Anthony Gonsalves
Distributed by - Red Giant Movies (India) TWO95 Entertainment Inc (Worldwide)
Release date(s) - February 26, 2010
Running time - 157 mins

Google Buzz பற்றிய ஒரு பார்வை

contact@giriblog.com (கிரி) — Mon, 08 Mar 2010 07:57:51 PST

கூகிள் பற்றிய முன்னுரை கொடுக்கக்கூடிய அளவில் கூகிள் இல்லை என்பதால் நேராக விசயத்திற்கு வருகிறேன். கூகிள் பல பல புதிய வசதிகளை தொடர்ந்து அறிமுகப்படுத்தி வருவது உங்கள் அனைவருக்கும் தெரிந்தது. அதில் சமீபத்திய அறிமுகமான Google Buzz பற்றிய செய்திகள் மற்றும் என் பார்வை தான் இந்த இடுகை.

இணைய உலகில் பெரும்பாலான விசயங்களில் கூகிள் முன்னணியில் இருந்தாலும் சமூக வலையமைப்பு தளங்களான Facebook, Twitter வளர்ச்சி கூகுளை உறுத்திக்கொண்டே இருந்தது ஆர்குட் என்ற பிரபலமான சேவையை தன் வசம் வைத்து இருந்தும். முன்பு Facebook Twitter தளங்கள் மேலை நாடுகளில் தான் பிரபலமாக இருந்தது ஆனால் தற்போது குறிப்பிடத்தக்க இணைய சந்தையான இந்தியாவிலும் அதிகம் இவற்றை பயன்படுத்த ஆரம்பித்து விட்டனர், எனவே அந்த விசயத்தில் நாம் பின் தங்கிவிடக்கூடாது என்பதற்காக கூகிள் ஆரம்பித்தது தான் இந்த Google Buzz.

கூகிள் மின்னஞ்சலை துவங்கிய போது இருந்தே திறமையான ஒரு மார்க்கெட்டிங் முறையை பயன்படுத்தி வருகிறது, அதாவது அழைப்பு இருந்தால் மட்டுமே முதலில் பயன்படுத்த முடியும். கூகிள் மின்னஞ்சல் துவங்கப்பட்ட போது அழைப்புக்காக மற்றவர்களிடம் வேண்டியவர்கள் அதிகம், இவ்வாறு இதன் மீதான எதிர்பார்ப்பை கூட்டி விடுகிறது. அதே போல Google Buzz க்கும் இதே போல எடுத்தவுடன் அனைவருக்கும் இந்த வசதியை கொடுத்து விடவில்லை , சிலருக்கு கொஞ்சம் காக்க வைத்து கொடுத்தது. ஃபிகர் உடனே பிக்கப் ஆனா ஒரு த்ரில் இருக்காது அது மாதிரி தான் ;-)

Google Buzz பயன் என்ன?

நம்மோட எண்ணங்களை நம்மை பற்றிய செய்திகளை நம் நண்பர்களுடன் எளிதாக பகிர்ந்து கொள்ள உதவும் ஒரு இடம். இங்கே எதை வேண்டும் என்றாலும் பகிர்ந்து கொள்ளலாம் படங்கள் வீடியோ உட்பட, அதற்க்கு நம்மை பின் தொடர்பவர்கள் அதில் தங்களுடைய எண்ணங்களை பகிர்ந்து கொள்வார்கள். உலகில் நடக்கும் அனைத்து செய்திகளையும் இதில் நாம் உடனுக்குடன் தெரிந்து கொள்ளலாம். ஒரு சிலர் காஃபி, சாப்பாடு சாப்பிட்டேன், தூங்கிட்டு இருந்தேன் என்கிற அளவில் அனைத்தையும் எழுதிக் கொண்டுள்ளார்கள்.

Google Buzz பற்றிய சில செய்திகள்

Google Buzz முதலில் துவங்கிய போது ஒருவர் அதிகளவில் தொடர்பில் உள்ளவர்கள் (மின்னஞ்சல் மற்றும் உரையாடி[chat]) மின்னஞ்சல் முகவரிகளை அதுவே பின்தொடருபவராக ஏற்படுத்தி விட்டது. இதற்கு அனைவரிடம் இருந்தும் கடும் எதிர்ப்பு கிளம்பியது. அதெப்படி என்னோட அனுமதி இல்லாமல் இதை நீங்கள் செய்யலாம்? என்று. கூகிள் எப்போதும் ஒன்றை துவங்கியவுடன் அதோடு நின்றுவிடுவதில்லை அதில் குறைகளை கேட்டு அதை உடனுக்குடன் நிவர்த்தி செய்து விடுகிறது. இதையும் காலம் தாழ்த்தாமல் இரண்டே நாட்களில் சரி செய்தது.

Google Buzz கூகிள் மின்னஞ்சல் உள்ளே ஒரு லேபிளாக வடிவமைக்கப்பட்டுள்ளது, எனவே இதற்காக வேறு தளம் செல்ல வேண்டியதில்லை. இதை சொடுக்குவதன் மூலம் நாம் எளிதாக பயன்படுத்த முடியும்.

இதில் Twitter போல எழுத்துக்களுக்கு கட்டுப்பாடு இல்லை

இதில் நமது தொலைபேசியில் உள்ள படங்களை தொலைபேசியில் இருந்தே buzz@gmail.com என்ற முகவரிக்கு அனுப்புவதன் மூலமும் உங்கள் செய்தியை மற்றவர்களுடன் பகிரலாம், இந்தப்படங்கள் பிக்காசாவில் சேமிக்கப்படும். (இதை யார் யார் பார்க்க அனுமதி என்பதை நீங்கள் முடிவு செய்யலாம்)

மற்ற தளங்களை போலவே இதிலும் உங்களுக்கு யாராவது பின் தொடருவது பிடிக்கவில்லை என்றால் அவரை தடை செய்யலாம்.

குறிப்பிட்ட விஷயத்தை ஒரு தலைப்பில் பலருடன் விவாதித்து இருக்கிறீர்கள் அதை (மொத்த உரையாடலையும்) நீங்கள் இன்னொருவருக்கு அனுப்ப விரும்பினால் அதை மின்னஞ்சல் செய்யலாம்.

Google Apps மூலமாக நிறுவனங்கள் மற்றும் கல்வி நிறுவனங்களுக்கு மேலும் வசதிகளுடன் விரைவில் இந்த சேவையை தர திட்டம் வைத்துள்ளதாக கூகிள் அறிவித்துள்ளது.

சிலர் Twitter பயன்படுத்திக்கொண்டு இருப்பார்கள் தற்போது Google Buzz ம் பயன்படுத்த வேண்டும் என்றால் அதிலும் செய்திகள் பதிவு செய்யணும் Google Buzz லும் பதிவு செய்ய வேண்டும் என்றால் எரிச்சலாக இருக்கும், இதற்க்கு நீங்கள் Twitter கணக்கை Google Buzz ல் சேர்த்து விட்டால் நீங்கள் Twitter ல் என்ன பதிவு செய்தாலும் அது Google Buzz லும் பதிவாகிவிடும், இரண்டு வேலை ஆகாது. ஆனால் நீங்கள் அதிகளவில் செய்திகளை பதிவு செய்பவராக இருந்தால் இது உங்களை பின்தொடர்பவர்களை எரிச்சலடைய செய்யலாம்.

இதே போல Google Buzz ல் பதியும் செய்திகளை Twitter ல் காட்ட வேண்டும் என்றால் http://reader2twitter.appspot.com/buzz தளத்திற்கு சென்று இணைத்துக்கொள்ளலாம்.

உங்கள் Google Buzz ல் உங்களுக்கு எரிச்சல் வரும்படியோ அல்லது பிடிக்காத விஷயங்கள் விவாதங்கள் மற்றவர்களால் நடத்தப்பட்டாலோ, விருப்பம் இல்லை என்றால் அதை Mute (This post) செய்வதன் மூலம் அதை மறைய செய்து விடலாம்.

Google Buzz மீதான சில விமர்சனங்கள்

Google Buzz அப்படியே Facebook ஐ காப்பி அடித்து அமைக்கப்பட்டுள்ளது, கூகிள் போன்ற திறமையான நிறுவனம் இதைப்போன்று செய்வது வருத்தம் அளிக்கிறது.

இது மின்னஞ்சலின் உள்ளேயே இருப்பது சிலருக்கு பிடிக்கவில்லை, தனித்தளமாக இருப்பதையே விரும்புகிறார்கள் (Twitter Facebook போல). விரைவில் Twitter ஐ கூகிள் வாங்கவேண்டும் என்பதும் இவர்களை போன்றவர்களது விருப்பம்.

SPAM கமெண்ட்ஸ் பிரச்சனை பற்றி அதிகளவில் கூகிள் க்கு புகார் வந்துள்ளது.

துவக்கப்பட்ட போது தானியங்கியாக (contact list ல் உள்ள) பலரை அனுமதி இல்லாமல் கூகிள் பின் தொடர்பவர்களாக செய்தது பலரை கடுப்படித்து விட்டது, ஆனால் இதை முன்பே கூறியபடி உடனே சரி செய்து விட்டது.

இவை இல்லாமல் பல குற்றசாட்டுகள் Google Buzz மீது சாட்டப்பட்டுள்ளது, அதை சரி செய்யும் முயற்சியில் கூகிள் இறங்கியுள்ளது.

உங்களுக்கு Google Buzz மின்னஞ்சல் Inbox பகுதியில் இருப்பது பிடிக்கவில்லை என்றால் அதை எப்போது வேண்டும் என்றாலும் Settings -->> Buzz சென்று மறைய செய்யலாம் அல்லது முற்றிலும் நீக்கலாம். உங்களுக்கு விருப்பமில்லை என்றால் மறைய செய்யும் வழியை பயன்படுத்தும்படி நான் பரிந்துரைக்கிறேன். தேவைப்பட்டால் அல்லது மனது மாறினால் மீண்டும் பயன்படுத்த எளிதாக இருக்கும்.

நான் Facebook Twitter போன்றவற்றை என் இடுகைகளை பகிர்ந்துகொள்ள மட்டுமே பயன்படுத்துகிறேன், அதில் என் எண்ணங்களை தெரிவித்து பின் அதற்க்கு பதில் அளித்து மேலும் பதில், பதில் என்று செல்வது என் பொறுமையை சோதிப்பதால் அதில் எனக்கு முற்றிலும் ஆர்வம் இல்லை. ஆனால் கூகிள் மின்னஞ்சல் நான் அதிகம் பயன்படுத்துகிறேன் அதனால் எனக்கு அதனுடன் இணைந்து இருக்கும் Goolge Buzz பயன்படுத்த மிக எளிதாக உள்ளது. எனவே தற்போது அவ்வப்போது Google Buzz ல் என் எண்ணங்களை தெரிவித்து வருகிறேன். பின் தொடர விரும்பினால் என்னுடைய Google Buzz ID.

குறுகிய காலத்தில் பல மில்லியன் பயனாளர்களை பெற்றுள்ள Google Buzz சில விமர்சனங்களை எதிர்கொண்டாலும் வழக்கம் போல தன் திறமையை நிரூபிக்கும் என்று நம்புகிறேன்.

கொசுறு

கதவை காற்று வரட்டும் கேமரா வரட்டும் என்றெல்லாம் படித்து சலித்து இருப்பீர்கள். இதுவும் அதைப்போல ஒன்று தான் ஆனால் வேற மாதிரி. இப்பெல்லாம் எங்க பார்த்தாலும் கேமராவை வைத்துடுறாங்க மனுஷன் நிம்மதியா கழிவறை கூட போகமுடியாது போல அந்த அளவிற்கு எங்க பார்த்தாலும் கேமராவை மறைய வைத்து திருட்டுத்தனமா வீடியோ எடுத்து இணையத்துல போட்டுடறாணுக!

இது என்னன்னா பள்ளியில் பசங்க என்ன பண்ணுறாங்கன்னு பார்க்க அவங்க லேப்டாப்பில் உள்ள கேமராவை வேறு இடத்தில் இருந்து பார்க்கும் படியான மென்பொருளை நிறுவி விடுகிறார்கள். இது தெரியாமல் பசங்க கேமரா முன்னாடியே ஆட்டம் போட்டுட்டு இருந்தால் கபால்னு பிடித்து விடுறாங்க. சரி பசங்களுக்கு தானே இந்தப்பிரச்சனை நமக்கு என்ன! ஃப்ரீயா விடு மாமே! என்று கூறாதீர்கள். இதைப்போல மென்பொருளை நமது லேப்டாப்பிலும் ஒருவரால் நிறுவ முடியும் என்பதே அதிர்ச்சி அளிக்கிறது. நீங்க அது தெரியாம கிளுகிளுப்பா இருந்தா அதை நீங்கள் அறியாமல் உலகமே பார்த்து விடும்.

இது பற்றி விரிவான இடுகைக்கு இங்கே செல்லவும்.

நான் பொதுவாக அனைத்து வகையான பதிவுகளும் எழுதுவேன் சுதந்திர இலவச மென்பொருள் தள ஷிர்டி சாய்தாசன் அவர்கள் தொழில்நுட்ப வலைபதிவுகள் பகுதியில் என் தளத்தையும் அவ்வப்போது குறிப்பிட்டு வருவது எனக்கு தொழில்நுட்ப பதிவுகள் எழுதுவதின் மீதான ஆர்வத்தை அதிகப்படுத்தியுள்ளது. என் தளத்தின் பெயரையும் குறிப்பிட்டு உற்சாகப்படுத்தியதற்கு என் நன்றியை இதில் தெரிவித்துக்கொள்கிறேன்.

அஜித் ரஜினி கமல் விஜய் டிவி "கோ"

contact@giriblog.com (கிரி) — Sun, 28 Feb 2010 18:19:01 PST

விஜய் டிவியோட ஜோடி நம்பர் 1 சீசன் 4 ல வர எல்லோரும் கலக்கலா ஆடுறாங்க! பெரும்பாலும் எல்லோரும் சிறந்த நடன ஆட்டக்காரர்களாக இருப்பதால் இந்த முறை போட்டி கடுமையாக இருக்கும் என்றே தோன்றுகிறது. இந்த முறையாவது புதுமுகங்களாக போட்டார்கள்..... இல்லை என்றால் இந்த சீரியல் நடிக நடிகர்களையே போட்டு சாகடிப்பார்கள், மொக்கைனா மொக்கை அப்படி ஒரு மொக்கை (எனக்கு). இந்த சீசன் துவக்கத்தில் இரண்டு பசங்க ஃப்ளோரிங் ஆட்டம் ஆடுனாங்க பாருங்க... அடி தூள்! பொண்ணுகளும் பின்னி பெடலெடுத்தாங்க. நான் தொடர்ந்து இவற்றை எல்லாம் பார்ப்பது இல்லை என்றாலும் நன்றாக இருந்தால் (இதைப்போல) பார்ப்பேன். இந்த சன் டிவி நடிகைகளை எல்லாம் வைத்து என்னென்னமோ போட்டி நடத்துறாங்க ஆனால் விஜய் டிவி அளவிற்கு இவர்களால் வர முடியலை, இது மட்டும் ஏன் என்று எனக்கு புரியலை. விஜய் டிவி நிகழ்ச்சியை இன்னும் ரசிக்கற மாதிரி தராங்க.

சிங்கையில் இரண்டு வாரம் முன்பு சீனப்புத்தாண்டு சிறப்பாக கொண்டாடப்பட்டது, இங்கு இதற்கு இரண்டு நாள் அரசு விடுமுறை. நகரமே பெரும்பாலான கடைகள் பந்த் போல மூடி இருக்கும் குறிப்பாக விரைவு உணவகங்கள். வண்ண விளக்குகள், அலங்காரங்கள், கொண்டாட்டங்கள் என்று அசத்துவார்கள். சீனர்கள் கொண்டாட்டம் என்றாலே அது சிங்க நடனம் தான் (Lion Dance) தான், படு கலக்கலாக இருக்கும் இந்த முறை பார்க்க வாய்ப்பு கிடைக்கவில்லை.

இங்கே ஒரு நம்ப முடியாத ஒரு வித்யாசமான கொண்டாட்டம் உள்ளது, அது என்னவென்றால் அலுவகத்தின் உள்ளே வந்து சிங்க நடனம் ஆடுவது. எங்கள் அலுவலகத்தில் வருடாவருடம் நடக்கும்.. கார்ப்பரேட் நிறுவனம் என்றாலே அலுவலக தளம் நீளமாக இருக்கும் ஒரே தளத்தில் 500 பேர் எல்லாம் சர்வசாதரணமா அமர்ந்து இருப்பார்கள். இந்த இடத்தில் அதுவும் அலுவலக நேரத்தில் சிங்க வேடம் பூண்டு மேளச்சத்ததுடன் வந்து ஆடினால் எப்படி இருக்கும்! நான் ரொம்ப ரசித்து பார்த்தேன். இதை யாரும் தொந்தரவாக நினைப்பதில்லை மாறாக அனைவரும் சந்தோசமாக கொண்டாடினார்கள். புதிய விசயங்களை விரும்பும் எனக்கு இவை பிடிப்பதில் எந்த ஆச்சரியமும் இல்லை. இன்னும் இவர்கள் புத்தாண்டுக்கொண்டாட்டம் நிறைவு பெறவில்லை, நேற்றுக்கூட எங்கள் வீட்டு அருகில் ஆட்டம் போட்டிகள் "Lunar New Year Dinner Celebration" என்று கொண்டாடிக்கொண்டு இருந்தார்கள். வாழ்க்கையை கொண்டாட்டமாகவே எப்போதும் கழிக்கிறார்கள் குறிப்பாக உணவுடன் :-)

இரண்டு வாரமா திரையுலகை அஜித் பேசிய பேச்சும் அதற்க்கு ரஜினி ஆதரவாக பேசியதும் அதை எதிர்த்து திரையுலகில் எழுந்த சலசலப்புமே செய்திகளை ஆக்கிரமித்து இருந்தது. அஜித் அப்படி என்ன தவறாக பேசிட்டாருன்னு இவங்க எல்லாம் குதிச்சாங்கன்னே தெரியலை. எனக்கு தெரிந்து அஜித் செய்த ஒரே தவறு இதை பெப்சி (தொழிலார்கள்) விழாவில் பேசியது தான். அது கூட அவர்களை அவமானத்தபடுத்த வேண்டும் என்ற எண்ணத்தில் கூறி இருக்க மாட்டார்.

நாங்கெல்லாம் மிரட்டவில்லை என்று கூறிவிட்டு கீழ்கண்ட வசனத்தை பேசி இருக்காரு V.C.குகநாதன்..

"இவர்களை எப்படி மேலே கொண்டு வந்தோமோ... அதே போல் இருக்கும் இடம் தெரியாமலும் செய்து விடுவோம். நாங்கள் பண்பாகவும் கேட்போம். பணிவாகவும் கேட்போம். வற்புறுத்தி அல்லது மிரட்டியும் கேட்போம். என்ன செய்துவிட முடியும் இவர்களால்? அப்படியும் கேட்காவிட்டால் அவர்களை எப்படி ஓரம் கட்ட முடியும் என்ற வழிமுறையும் எங்களுக்கு தெரியும், என்றார்?"

குகநாதன் என்ற ஒருத்தரையே இவர் ரஜினியையும் அஜித்தையும் விமர்சித்த பிறகு தான் பல பேருக்கும் தெரியும் இதுல ரஜினியையும் அஜித்தையும் இல்லாமல் செய்து விடுவாராம். ஹி ஹி சரியான காமெடி பீஸ் சார் நீங்க!

புரிஞ்சு போச்சு! வடிவேல் சிங்கமுத்து சண்டைல நைசா அவங்க இடத்தை பிடித்து விடலாம்னு தானே இப்படி ஒரு திட்டம் போட்டீங்க! நடக்காது சார் நடக்காது! வேணும்னா உங்க பேரை பஜ்ஜி நாதன்னு மாற்றிட்டு போண்டா மணிக்கு அடுத்ததா வரிசையில நின்னு குச்சி மிட்டாயும் குருவி ரொட்டியும் சாப்பிட்டுட்டு இருங்க மெதுவா வாய்ப்பு கிடைக்கும். கலைஞர் கிட்ட இருந்து பல்பு வாங்குனதும் இப்ப நண்பர்கள் ஆகிட்டோம்னு அறிக்கை விட்டு உங்க (காமெடி) இடத்தை உறுதி பண்ணிட்டீங்க கில்லாடி சார் நீங்க.

இப்படி எல்லாம் நடக்கும்னு தெரியாம ஜோக்குவார் தங்கம் வேற ஓவரா சீனை போட்டுட்டாரு! ஏற்கனவே வயித்துல புளியை கரைத்து இருக்கும்னு நினைக்கிறேன். ஆனா அவர் நிஜமான "ஸ்டன்ட்" மாஸ்டர் தான் :-) புரட்சி (ஆபாச அர்ச்சனை) தமிழன் சத்யராஜ் ஒண்ணும் பொங்க காணோம்.... ஒருவேளை திட்ட சரியான கெட்டவார்த்தை கிடைக்கலை என்று தேடிட்டு இருக்காரோ என்னவோ! சத்யராஜ் அண்ணே! விஷயம் தெரியுமா! உயர்நீதி மன்றம் பத்திரிக்கையாளர்களை நடிகர்கள் ஆபாசமாக பேசியதற்கு வழக்கு தொடுக்கலாம் என்று கூறி விட்டார்கள், அடுத்து ஆப்பு வைக்க உங்களைத்தான் பத்திரிக்கையாளர்கள் குறி வைத்து இருக்கிறார்களாம் :-)

அமெரிக்காவில் தனியாரும் தபால் தலைகள் வெளியிட அனுமதி அளிக்கப்பட்டுள்ளது (ஆறு ஆண்டுகளுக்கு முன்பே). இந்தியருக்கு சொந்தமான http://www.usa-postage.com/ என்ற நிறுவனம் தற்போது இந்து கடவுள்கள் படங்களுடன் தபால் தலைகளை வெளியிட்டு வருகிறது. இதற்கு அமெரிக்காவில் உள்ள இந்தியர்களிடையே நல்ல வரவேற்பு காணப்படுவதாக செய்திகளில் வந்துள்ளது. இவ்வாறு அனுமதி தருவது உண்மையிலேயே பெரிய விஷயம் தான். அதில் என் விருப்ப கடவுள் முருகனை பார்த்தவுடன் ரொம்ப சந்தோசமாகிட்டேன்.

ரேணிகுண்டா படம் பார்க்கும் வாய்ப்பு தற்போது தான் கிடைத்தது, படம் என்னை ரொம்ப கவர்ந்தது. அதில் நடித்து இருந்த அனைவரும் சிறப்பாக நடித்து இருந்தார்கள்... அதிலும் வாய் பேசாத பெண்ணாக வரும் பெண் (சிறுமி!) ரொம்ப அழகு! படத்தின் முடிவு நன்றாக இருந்தது அதாவது சினிமாத்தனமாக இல்லாமல் இயல்பாக இருந்தது. அதில் நடித்து இருந்த பசங்களும், சிறுமிகளும், பாலியல் தொழிலாளியாக வரும் பெண்ணும், வில்லன்களும் அனைவருமே இயல்பான நடிப்பை வெளிப்படுத்தி இருந்தனர். ஒருவரைக்கூட குறைகூற முடியாத அளவிற்கு சிறப்பாக இருந்தது. பார்க்காதவர்கள் பாருங்கள் வன்முறை படங்கள் உங்களுக்கு பிடிக்கும் என்றால் :-)

கமலோட திரையுலக 50 வருட விழா விஜய் டிவியில் கலக்கலாக ஓடி விஜய் டிவியின் TRP ரேட்டிங்கை தாறுமாறாக எகிற வைக்க அதை கண்ட சன் டிவி டென்ஷன் ஆகி விட்டதாம்.... இதை எப்படி நாம் தவற விட்டோம் என்று (இவங்களுக்கு தான் அடுத்தவங்க நல்லா இருந்தா பிடிக்காதே!), அந்த அளவிற்கு இந்த நிகழ்ச்சி மக்களை கவர்ந்தது.... அதற்க்கு விஜய் டிவி செய்த மார்க்கெட்டிங்கும் மேடையில் அவர்கள் அடக்கி வாசித்ததும் முக்கிய காரணம்.

அதில் ரஜினி கமலை மனதார பாராட்டியதும் கமல் நடித்த காலத்தில் நாமும் நடித்தோம் என்பதே எனக்கு பெருமை என்று கூறியதும், தேவதையை வைத்து கூறிய கதையும் கமலை கண்கலங்க வைத்தது நமக்கு தெரிந்தது. ஒரு சிலர் ரஜினி சும்மா சீனைப் போடறாரு பாராட்டு விழா என்பதால் வழக்கம்போல புகழ்ந்து கூறி இருக்கார் என்று நினைத்து இருப்பாங்க.. ஆனா அது மனதில் இருந்து கூறியது தான் என்று இந்த படத்தை கமலுக்கு அனுப்பியதன் மூலம் நிரூபித்து விட்டார். திரையுலகில் உண்மையான நட்பு என்றால் அது ரஜினி கமல் தான் என்று மீண்டும் அழுத்தம் திருத்தமாக நிரூபிக்கப்பட்டுள்ளது.

அயன் என்ற கலக்கலான மசாலா படத்தை கொடுத்த ஒளிப்பதிவாளர் இயக்குனர் K.V.ஆனந்த் தற்போது எடுத்து வரும் படம் "கோ" (பேரெல்லாம் வித்யாசமாத்தான் வைக்குறாரு) முதலில் சிம்பு நடிப்பதாக இருந்தது பிறகு சிம்பு எனக்கு K.V.ஆனந்த் கூட செட் ஆகலை!! மீ த எஸ்கேப் என்று கூறி விட்டார், அதன் பின் ஜீவாவை முடிவு செய்தார். படப்பிடிப்பு நடத்த சீனாவில் முடிவு செய்து அங்கே செல்ல படக்குழுவினர் அனைவருக்கும் விசா கிடைக்க, குடைச்சலாக முக்கிய நபரான ஜீவாவிற்கு கிடைக்கவில்லை. தாமதமாக அனுமதி கேட்டதே காரணம் என்று கூறி இருக்கிறார்கள் அதனால் இப்போது ஜீவா இல்லாமலே மற்ற காட்சிகளை எடுத்து அவர் வந்தவுடன் மீதியை எடுப்பார்களாம். "கோ" னு பேர் வைத்துட்டு படம் நகரவே மாட்டேங்குது! :-) எப்படியோ படம் நல்லா வந்தால் சரி.. "கோ" லோகோ பார்த்தீங்களா! ஸ்வஸ்திக் மாதிரி இருக்குல்ல! வித்யாசமா நச்சுனு இருக்கு.

ப்ளாக் எழுத வந்து நான்கு வருடம் முடிந்து ஐந்தாவது வருடம் துவங்கி விட்டது, நூறு பதிவு இருநூறு பதிவு வருடம் முடிவு என்று வரும் போது தனிப்பதிவு போட்டு மொக்கையை போடுவதும் வரலாறை! கூறுவதும் அவுட் ஆஃப் ஃபேஷன் ஆகி விட்டதால் சுருக்கமா முடித்துக்கிறேன் ;-) முதலில் (2006) யாகூ! ப்ளாக்கில் எழுதிக் கொண்டு இருந்தேன் 2006 ப்ளாக்கரில் இணைந்தாலும் இதில் எழுத ஆரம்பித்தது 2008 ல் தான் எப்படியோ நான்கு வருடம் ஓடி விட்டது.

எனக்கு இது வரை பின்னூட்டம் இட்டு உற்சாகப்படுத்தியவர்களுக்கும், ரீடர் மற்றும் மின்னஞ்சலில் தொடரும் 480 பேருக்கும், Google Friend Connect ல் தொடரும் 210 (+25 ரகசியமாக பின்தொடரும்) நண்பர்களுக்கும் எனது மனமார்ந்த நன்றிகள். தமிழிஷ் ல எனக்கு பதிவர்கள் போடும் ஓட்டை விட மற்றவர்கள் போடும் ஒட்டுத்தான் அதிகம். என் பதிவை பதிவர்கள் அல்லாது பதிவுலகிற்கு சம்பந்தம் இல்லாதவர்கள் ஓரளவு படிப்பதாக நினைக்கிறேன்! இந்த சமயத்தில் அவர்களுக்கும் என் நன்றியை தெரிவித்துக்கொள்கிறேன். கடந்த மாதம் தேர்வு இருந்ததால் பதிவு எதுவும் எழுதவில்லை (ஒரு வாட்டி எழுதக்கூடாதுன்னு முடிவு பண்ணிட்டா என் பேச்சை நானே கேட்கமாட்டேன் :-D) ஏன் எழுதவில்லை? என்று மறக்காமல் அன்பாக விசாரித்த அருண், சரவணன் மற்றும் ஷங்கர் ஆகியோருக்கும் என் நன்றி.