இது குறும்பட இயக்குனர்கள் காலமா! குறும்பட இயக்குனர்கள் படமாக வந்து கொண்டு இருக்கிறது. காதலில் சொதப்புவது எப்படி, பீட்சா, சூது கவ்வும் போன்ற படங்களைத் தொடர்ந்து அடுத்ததாக “நேரம்” படம் வந்து இருக்கிறது. முன்பு எல்லாம் உதவி இயக்குனர்களாக இருந்து, இருந்து பின் இருந்து… தங்களுடைய வாழ்க்கையை உதவி இயக்குனராகவே முடித்துக் கொண்டவர்கள் பலர். தற்போதெல்லாம் குறும்படம் இயக்கி அதைக் காட்டி தயாரிப்பாளரைப் பிடித்து, படம் இயக்க வந்து விடுகிறார்கள். SMART!

நேரம் இயக்குனருக்கு இது தான் முதல் படம். இவர் “நேரம்” எப்படி இருக்குனு பார்ப்போம்

ஒருத்தருக்கு நேரம் நன்றாக இருந்தால் ஆண்டியும் அரசனாவான், நேரம் சரியில்லை என்றால் அரசனும் ஆண்டியாவான். இது தான் படத்தின் மையக் கருத்து.

கதாநாயகனுக்கு பல்வேறு பணப் பிரச்சனைகள் / தேவைகள், இதோடு வேலையும் போய் விடுகிறது. ஏதாவது ஒரு பிரச்சனை புதிதாக வந்து கொண்டே இருக்கிறது. இதில் காதல்,வேலையும் கிடைக்கவில்லை, வட்டிக்காரன் தொல்லை, திருட்டு என்று பல கிளைக் கதைகளுடன் படத்தை கொண்டு சென்று இருக்கிறார்கள்.

இந்தப்படத்தை காமெடி என்றும் கூற முடியாது, சீரியஸ் என்றும் கூற முடியாது. சூது கவ்வும் படம் மாதிரி இரண்டும் கலந்தது. நடிப்பு என்று பார்த்தால் யாரையும் தனித்து கூற முடியவில்லை, அனைவரும் அவர்கள் பங்கை சரியாக செய்து இருக்கிறார்கள்.

இதில் வில்லனாக [வட்டி ராஜா] வருபவர் “சூது கவ்வும்” படத்தில் நயன்தாராவிற்கு கோவில் கட்டுபவர். இந்தக் கதாப்பாத்திரம் ஒரு கனமான கதாப்பாத்திரம் ஆனால், ஆள் மட்டும் கனமாக இருந்தால் போதும் என்று நினைத்தார்களா என்று தெரியவில்லை…இவரை போட்டு விட்டார்கள். இந்தக் கதாப்பாத்திரத்திற்கு இவர் பொருத்தமாக இல்லை. மீசையை சின்னதாக வைத்து, முறைத்தபடி இருந்தாலும் அவர் சின்னப் பையன் மாதிரி தான் தெரிகிறார். நான் கூட முதலில் நகைச்சுவைக்கு அப்படி காட்டுகிறார்கள் என்று நினைத்தேன்… பின்னர் தான் தெரிந்தது அவர் தான் முக்கிய வில்லன் என்று.

இதில் வரும் கதாநாயகி நஸ்ரியா நஜிம் வழக்கமான கதாநாயகி போல இல்லாமல் ரொம்ப இயல்பான முகம் மற்றும் நடிப்பு. நம் அன்றாட வாழ்க்கையில் பார்த்து சைட் அடிக்கும் பெண் போல இயல்பாக இருக்கிறார், தமன்னா, நயன்தாரா, காஜல் என்று கதாநாயகிக்கு என்றே இருப்பவர்கள் போல இல்லை. கதாநாயகன் நிவின் ஏற்கனவே “தட்டத்தின் மறையத்து” என்ற மலையாள படத்தில் நடித்து இருக்கிறார், தமிழில் அறிமுகம். இருவருமே இயல்பான நடிப்பு.

படத்தில் ஸ்லொவ்மோசன் காட்சிகள் அடிக்கடி வருகிறது. இது படத்தை மெதுவாக செல்வது போல நம்மை தோன்ற வைக்கிறது. இதை அதிக காட்சிகள் வைக்காமல் இருந்து இருக்கலாம். படத்தில் குறிப்பிட்ட சிலரே அதிக காட்சிகளில் வருகிறார்கள் அதே போல எதேச்சையாக அனைவரும் சந்திப்பது, காட்சிகளில் வருவது, பார்ப்பது என்று கொஞ்சம் செயற்கையாக உள்ளது. எதோ இரு காட்சிகள் என்றால் பரவாயில்லை, படத்தில் வரும் அந்தக் குறிப்பிட்ட கதாப்பாத்திரங்களே பெரும்பாலான காட்சிகளிலும் சம்பந்தப்பட்டு இருக்கிறார்கள் [குறும்படம் பாதிப்பு].

நாசர், ஜான், சார்லி, தம்பி ராமையா, சூது கவ்வும் படத்தில் வேலைக்கு போகாமல் தண்ணி அடித்துட்டு இருப்பாரே அவர் என்று பலர் நடித்து இருக்கிறார்கள். இயக்குனரே எடிட்டிங்கும் பார்த்துள்ளார். இசை ராஜேஷ் முருகேசன் (அறிமுகமா?). இரு பாடல்கள் நன்றாக உள்ளது. பாடல்கள் குறைவு என்பதால், படம் இரண்டு மணி நேரம் தான். ஒளிப்பதிவு சிறப்பாக இருந்தது.

ஒரு காட்சியில் வில்லன் அவருடைய அடியாள் கிட்ட செல்ஃபோனை வாங்கி…

டேய்! என்னடா பட்டனே இல்லை…!

டச் ஸ்க்ரீன் ணா

எவ்வளவுடா விலை?

10000 ணா

ஏன்டா! 10000 ரூபாய்க்கு ஃபோன் வாங்கி பட்டன் கூட இல்லாம வைத்து இருக்கே…! என்று கூறுவார் படத்தில் இது போல சிறு சிறு காமெடிகள் இருந்து கொண்டே இருப்பது படத்தை சோர்வடைய வைக்காமல் உள்ளது.

இந்தப்படம் A B சென்டருக்கான படம். சாதி சண்டை, நாட்டாமை, வழக்கமான காதல் என்று போர் அடிக்காமல், இது போல படங்கள் தற்போது மாறி வருவது ரொம்ப சந்தோசமாக உள்ளது. அரைத்த மாவையே அரைக்காமல் புதிய முயற்சியில் படங்கள் வெளிவருவது, ஆரோக்கியமான விசயமாக உள்ளது.

இந்தப்படம் தமிழ், மலையாளம் இரு மொழிகளிலும் எடுக்கப்பட்டுள்ளது. மலையாளத்தில் ஒரு வாரம் முன்பே வெளியாகி பெரிய வெற்றியை பெற்றுள்ளது. தமிழில், பலரிடையே பாராட்டைப் பெற்று குறிப்பிடத்தக்க அளவில் வசூலைப் பெறும்.

Directed by Alphonse Putharen
Written by Alphonse Putharen
Starring Nivin Pauly, Nazriya Nazim,Simhaa
Music by Rajesh Murugesan
Cinematography Anand C. Chandran
Editing by Alphonse Putharen
Studio Winner Bulls Films
Distributed by Malayalam LJ Films, Tamil Red Giant Movies
Release date(s) Malayalam 10 May 2013, Tamil 17 May 2013
Running time 110 minutes
Country India
Language Malayalam, Tamil

கொசுறு

படம் முடிந்து நானும் நண்பர் முத்துவும் சாப்பிட வரும் போது “வைரமுத்து” அவர்களை லிட்டில் இந்தியாவில் பார்த்தோம். “சாதகப் பறவைகள்” இசை நிகழ்ச்சிக்காக சிங்கப்பூர் வந்து இருக்கலாம் என்று நினைக்கிறேன். எதிரில் நடந்து வரும் போது, வணக்கம் தெரிவித்து புன்னகைத்துச் சென்றார். நான் கூட கண்டு கொள்ளாமல் செல்வார் என்று நினைத்தேன். நாங்களும் பதிலுக்கு ஒரு புன்னகையுடன் அவரை கடந்து சென்றோம், அவரை தொல்லை செய்ய விரும்பாமல்.

நேரம் [2013] is a post from: கிரி Blog

யாரு படிக்கறாங்களோ இல்லையோ! நான் எழுதிட்டு இருப்பேன் / எழுதிட்டு இருங்க, உங்க மனசுக்கு தோன்றுவதை எழுதுங்க! என்று பலர் கூறக் கேட்டு இருப்பீங்க. எனக்கும் எழுதுவது ரொம்பப் பிடிக்கும். எழுதுவது மற்றும் திரைப்படங்கள் என்னோட Passion. இரண்டையுமே விருப்பமாகச் செய்வேன். இதெல்லாம் இருந்தாலும், ஊக்கம் ஆதரவு என்ற ஒன்றில்லை என்றால், அது எவராக இருந்தாலும் மனதளவில் சோர்வடையச் செய்யும் அதனால், சும்மா டகால்டிக்கு வசனம் பேச நான் தயாராக இல்லை. Image Credit :  http://thinkingonlearning.blogspot.sg

“இங்க என்ன சொல்லுது ” கேட்ட போது, வழக்கம் போல 10 பேர் கருத்துக் கூறுவார்கள் என்று தான் நினைத்தேன் ஆனால், அப்படியில்லாமல் பலர் கருத்துக்கூறி, அதுவும் நான் எழுதிய பதிவை விட பெரியதாகக் கூறி, நான் எழுதுவதற்கும் ஒரு அர்த்தம் கொடுத்து விட்டார்கள். வந்த கருத்தில் 80% பேர், வலைப்பதிவு எழுதாதவர்கள் தான்.

நீண்ட வருடங்களுக்குப் பிறகு ரொம்ப திருப்தியாக உணர்ந்தேன். அட! இவ்வளோ பேர், இவ்வளோ நினைத்து இருக்காங்களா! என்று எனக்கு ஆச்சர்யமாக இருந்தது. நான் இந்த அளவு நிச்சயம் எதிர்பார்க்கவில்லை, அதுவும் இவ்வளவு விரிவாக. உண்மையிலேயே ரசித்துப் படித்து இருந்தால் மட்டுமே இது போல கூற முடியும். இந்த வகையில் எனக்கு பெருமையாகவும் உடன் ரொம்பக் கூச்சமாகவும் இருந்தது.

என்னைப் பொருத்தவரை எழுதுவது தனி, என்னுடைய நட்பு தனி என்று பிரித்து வைத்து இருக்கிறேன். இரண்டையும் குழப்பிக் கொள்வதில்லை. பதிவர் நண்பர்களை சந்தித்தால், Blog பற்றி பேசக்கூடாது என்று கூறி விடுவேன் . இதன் காரணமாக பதிவுலகில் எனக்கு நண்பர்களும் வெகு குறைவு தான், அதற்காக நான் வருத்தப்படுவதும் இல்லை காரணம், என் உலகம் வேறு. இதை ஏற்கனவே பல சந்தர்ப்பங்களில் விளக்கி இருக்கிறேன். பாட்டி வடை சுட்ட கதை மாதிரி, அதையே திரும்பத் திரும்ப சொல்வதில் உடன்பாடில்லை.

இனி கருத்துக்கள் பற்றி

நான் “கிரி Blog என்றால் என்ன நினைவிற்கு வருகிறது?” என்று கேட்டு இருந்தேன். அதற்கு, ரஜினி மற்றும் திரைப்படம் தான் அதிகம் கூறுவார்கள், தொழில்நுட்பம் ஒரு சிலர் கூறுவார்கள் என்று நான் நினைத்தேன். இதில் திரைப்படம் மட்டுமே சரியாக இருந்தது. இது போல குறிப்பிட்ட எதையும் நினைவு படுத்தாமல், ஜனரஞ்சகமாக எழுதுகிறோம் என்பதே எனக்கு பெரிய விசயமாக இருக்கிறது. நான் எந்த அடையாளத்திலும் சிக்க விரும்பவில்லை, அப்படி இருந்தால் என்னால் சுதந்திரமாக எழுத முடியாது.

நண்பனிடம் நேரில் பேசுவது போல உள்ளது.

இந்தக் கருத்தையே பெரும்பாலனவர்கள் கூறி இருக்கிறார்கள். என்னை சந்திக்கும் நண்பர்கள் சிலர், இது போல கூறக் கேட்டு இருக்கிறேன். சரி! நண்பன் எழுதுகிறான் என்பதால், பாராட்ட கூறுகிறார்கள் என்று தான் நினைத்து இருந்தேன்.

இது பற்றி நிறைய பேர் கூறியதால் என்னுடைய சிறு வயதில் நடந்த ஒரு சம்பவம் நினைவிற்கு வருகிறது .

நான் 7 & 8 வகுப்பு உடுமலைப் பேட்டை அருகே, கரட்டு மேடம் என்ற கிராமத்தில் உள்ள “காந்தி கலா நிலையம்” என்ற பள்ளியில், ஹாஸ்டலில் தங்கிப் படித்தேன். அப்போது ஊரில் இருந்து ஹாஸ்டலுக்கு பேருந்தில் வரும் போது, ஜன்னல் அருகே உட்கார்ந்து இருந்தேன். அருகில் இருந்த ஒருவர் தூங்கி தூங்கி என் மீது சாய்ந்து கடுப்படித்துக் கொண்டு இருந்தார்.. அவரிடம் கூறினாலும், விழித்துப் பார்ப்பார், கொஞ்ச நேரத்தில் திரும்ப அதையே செய்வார். கடுப்பாகி, ஒருமுறை என் மீது சாயும் போது நைசா நகர்ந்து கொண்டேன். ஜன்னலில் அவர் தலை மோதி, தூக்கம் எல்லாம் தெளிந்து உட்கார்ந்து விட்டார். இதை நான் கடிதத்தில் எழுதி, என் அம்மாவிற்கு அனுப்பி இருந்தேன். அப்போது தொலைபேசியில் அழைத்துப் பேச முடியாது.

இதைப் படித்து என்னுடைய அம்மாவும் அப்பாவும் சிரித்து, எனக்கு பதில் கடிதம் அனுப்பி இருந்தார்கள். நீ எழுதி இருந்தது அப்படியே நேரில் சொல்வது போல இருந்தது என்று . இப்பொழுது தான் தோன்றுகிறது, என்னுடைய எழுத்துக்கு முதல் பாராட்டு என்னுடைய பெற்றோர் என்று . ஊருக்குச் செல்லும் போது, இந்தக் கடிதம் இருக்கிறதா என்று தேடிப் பார்க்க வேண்டும்.

Read: தர்ம அடி வாங்கிய என்னுடைய “ஹாஸ்டல்” அனுபவம் [2008 ல் எழுதியது, இப்ப படித்தாலும் எனக்கு சிரிப்பு தான்]

நான் இப்படி எழுத வேண்டும் என்று நினைத்து எழுதுவதில்லை, எனக்கு எழுதவே அப்படித்தான் வருகிறது. அதனால், என்னோட 8 ம் வகுப்பிலேயே Blog எழுத, எனக்குத் தெரியாமலே முன்னோட்டம் பார்த்துட்டேன் போல .

தொழில்நுட்பம்

பலரும் தொழில்நுட்பம் பற்றி எளிமையாகக் கூறுகிறீர்கள் என்று கூறி இருந்தீர்கள். நான் அதிகப் பேர் இதைக் கூறுவார்கள் என்று நினைக்கவில்லை காரணம், திரைப்படங்கள் / பொது தகவல்கள் பற்றிய பதிவை ஒப்பிடும் போது, இதற்கு ஆதரவு குறைவு தான். இதை கடந்த தொழில்நுட்ப பதிவில் கூட கூறி இருந்தேன். நன்றி.

திரைப்பட விமர்சனங்கள்

நான் என்றுமே என்னை திரைப்பட விமர்சகனாக கருதியதில்லை. இதையும் எழுதுவோம் என்று தான் எழுதுகிறேன். தன்னடக்கமா சீன் போடுறான் என்று நினைக்க வேண்டாம், நிஜமாகவே தான். நான் அதுக்கு சரிப்பட்டு வர மாட்டேன். எனக்கு திரைப்படங்கள் Passion என்பதால், ஏகப்பட்ட படங்கள் பார்ப்பேன். இதன் காரணமாக, சரி! விமர்சனமும் எழுதலாம் என்று நினைத்து எழுதுபவை தான் திரை விமர்சனங்கள். உங்கள் பாராட்டுகளுக்கு நன்றி.

மேற்கூறியவை அதிகம் பேரால் கூறப்பட்ட பொதுவான விஷயங்கள். இதோடு பயணக்கட்டுரையும் கூறப்பட்டது. இது வேண்டும் என்றால், என்னால் முழு மனதுடன் கூற முடியும், நான் பயணக்கட்டுரை சிறப்பாக எழுதுவேன் என்று . என்னுடைய நீண்ட வருட ஆசை காசி, ராஜஸ்தான், இமயமலை, ரிஷிகேஷ், கைலாஷ், மானசரோவர் போன்ற இடங்களுக்கு பயணம் செய்து, அது பற்றிய பயணக்கட்டுரை எழுத வேண்டும் என்பது. விடுமுறை தான், எப்படி ஒரு வாரம் போல எடுப்பது என்று மண்டை குடைச்சலாக இருக்கிறது. நான் சிங்கப்பூரில் இருக்கும் வரை நிச்சயம் என்னால் செல்ல முடியாது.. 2014 இறுதியில் சென்னை வந்த பிறகு தான், இது பற்றி யோசிக்க முடியும் ஆனால், நிச்சயம் செல்வேன், எழுதுவேன்.

குறைவாக எழுதுகிறீர்கள்

உண்மை தான், நான் அதிகம் எழுதுவதில்லை, அதனால் தான் தொடர்ந்து எழுதிக்கொண்டு இருக்கிறேன் என்று நினைக்கிறேன். அதிகமாக எழுதுபவர்கள் நிச்சயம் ஒரு கட்டத்தில் ஏதோ ஒரு வெறுப்பு வந்து அல்லது Writers Block வந்து நிறுத்தி விடுவார்கள். இது போல சீராக எழுதினால், நான் கொஞ்ச காலம் நிலைத்து நிற்க முடியும் என்று நினைக்கிறேன். அதுவுமில்லாமல் Blogging எனக்கு தொழில் / முழு நேர வேலை அல்ல, என்னுடைய Passion. எனவே கடமைக்கு எழுதாமல், விருப்பப்பட்டு எழுதுவதே சரி. எனவே நான் இப்படியே இருந்து விடுகிறேன்.

எனக்கு எழுதியே ஆக வேண்டும் என்ற கட்டாயமும் இல்லை, எழுதவில்லை என்றால் அருணைத் தவிர வேறு யாரும் கேட்கவும் போவதில்லை .  எத்தனையோ பேர் கடந்த வருடங்களில் வந்து சென்று இருக்காங்க.. ஐந்து வருடமா ஒரே மாதிரி இருக்கிற அருண், எனக்கு எப்பவுமே ஸ்பெஷல் தான்.

இவையல்லாமல், குடும்ப மற்றும் ஊர் பாசம், சமூக கருத்துகள், கோபம், ஆதங்கம் போன்ற கருத்துகளுக்கு நன்றி.

இதில் நண்பர் யாசின்,

கிரி… நான் ரொம்ப நாளைக்கு முன்பே யோசித்த ஒரு விஷயம்.. ஆனால் இது சாத்தியமா இல்லையா என்று தெரியவில்லை… சமுதாயத்தில் வறுமை, ஏழ்மை இது கண்டிப்பா ஒழியவேண்டும். எல்லோருக்கும் கல்வி கண்டிப்பா கிடைக்கணும். நம்மை சுற்றி நடக்க கூடிய நிகழ்வுகளை கண்டும் காணாமலும் செல்வது நமது வாடிக்கை ஆகி போச்சு… இன்னைக்கு தங்கள் தளத்தை பார்கின்ற நண்பர்களின் எண்ணிக்கை அதிகமாகி விட்டது. எதிர்காலத்தில் இது இன்னும் நிச்சயம் பெருகும்.. நாம எல்லா நண்பர்களும் (விருப்பம்) உள்ளவர்கள் சேர்ந்து நம் சமுதாயத்திற்கு நன்மை தரகூடிய செயல்களில் நமது பங்களிப்பை அளிக்கலாமே???

என்று கூறி இருந்தார். எனக்கு இது போல சிரமப்படுகிறவர்களுக்கு உதவி செய்ய வேண்டும் என்று ரொம்ப விருப்பம். இதில், உதவி என்று வரும் போது, பணம் வருகிறது. பணம் வந்தாலே உடன் பிரச்சனையும் வருகிறது, இதனாலே எனக்கு பயம். நிறையப் பார்த்து விட்டேன். எனவே, இது போல செய்யும் நண்பர்களிடம் என் பங்களிப்பை கொடுத்து விடுவேன். நானும் யாசின் போல நிறைய முறை யோசித்து இருக்கிறேன் இருந்தாலும், எதோ ஒரு தயக்கம் / பயம் இருந்து கொண்டே இருக்கிறது.

இது வெறும் பணம் மட்டுமே சம்பந்தப்பட்ட விசயமல்ல, பலரின் உழைப்பும் / நேரமும் / நம்பிக்கையும் அடங்கி இருக்கிறது. எனவே தான் இது போன்ற விசயங்களை செய்ய / ஒருங்கிணைப்பதில் உள்ள சிரமம் குறித்து தயக்கம் வருகிறது.

எனவே, இது குறித்து ஆர்வம் / விருப்பம் உள்ளவர்கள் contact[at]giriblog.com என்ற முகவரிக்கு மின்னஞ்சல் அனுப்புங்கள். வரவேற்ப்பு இருந்தால், தொடர்கிறேன். நன்றி யாசின், அகிலா.

நாம எழுதுவது, பலரால் கவனிக்கப்படுகிறது / ரசிக்கப்படுகிறது எனும் போது ரொம்ப சந்தோசமாக உள்ளது. நேரம் ஒதுக்கி, கருத்துகளை கூறிய அனைவருக்கும் மிக்க நன்றி.

“டச்” பண்ணிட்டீங்க .

“டச்” பண்ணிட்டீங்க :-) is a post from: கிரி Blog

உங்களில் பெரும்பாலானவர்களுக்கு இயக்குனர் பாலு மகேந்திரா அவர்கள் இயக்கிய “வீடு” என்ற படம் பற்றி தெரிந்து இருக்கும். சன் டிவி போன்ற தனியார் சேனல்கள் வந்து இராத சமயங்களில் தூர்தர்ஷன் தொலைக்காட்சியில், ஞாயிறு மதியம் தேசிய விருது பெற்ற படங்கள் போடுவார்கள், அதில் தமிழ் பிரிவில் அடிக்கடி இந்தப் படம் தான் வரும். அப்போது குறிஞ்சிப் பூ மாதிரி தமிழ் படம் வருவதால் படம் சோகமாக இருந்தாலும் இதையும் பார்க்க ஒரு கூட்டம் அமர்ந்து இருக்கும். என்னுடைய சிறு வயதில் “வீடு” படம் என்றாலே கதி கலங்கிய நாட்கள் உண்டு . Image Credit – Facebook

ஒரு நடுத்தர குடும்பம் வீடு கட்டும் போது, எதிர்கொள்ளும் நடைமுறை சிரமத்தை கூறி இருப்பார்கள். இந்தப் படம் வந்த போது அந்த வீடு கட்ட ஆன செலவு 1,50,000 ஆனதாக வரும். தற்போது நினைத்துப் பார்த்தால் தலை சுற்றுகிறது. இந்தப்படம் வந்து 25 வருடம் ஆகிறது. நான் கூறப் போவது அந்த வீட்டைப் பற்றி அல்ல, அந்த வீடு படத்தில் வரும் தாத்தா போன்ற பெரியவர்களைப் பற்றி.

இந்தப் படத்தில் வரும் தாத்தா “சொக்கலிங்கம் பாகவதர்” ரொம்ப அருமையாக நடித்து இருப்பார். நடிப்பு என்று கூறுவது தவறு என்று நினைக்கிறேன், நடிக்காமல் இயல்பாக வந்து செல்வார். இவர், கட்டிய வீட்டை அடையும் போது வெயிலில் சோர்ந்து போய் இருப்பார். பின் கட்டிய வீட்டை தடவி பெருமிதமாக / சந்தோசமாக ஒரு நடிப்பை வெளிப்படுத்தி இருப்பார் பாருங்கள்… அருமை! அவர் முகத்தில் அப்படி ஒரு திருப்தி இருக்கும். அர்ச்சனாக்கு கொடுத்த தேசிய விருதை இவருக்கு கொடுத்து இருக்க வேண்டும் என்று நினைத்தேன்.

ஒரு காட்சியில் அர்ச்சனாவிற்கு பிறந்த நாள் என்று தன்னுடைய வேட்டியில் வைத்து இருக்கும் ஒரு ரூபாயோ இரண்டு ரூபாயோ எடுத்துக்கொடுப்பார். எனக்கு இது மாதிரி கொடுக்க தாத்தா / பாட்டி இல்லையே என்று ஏங்கிய நாட்கள் அதிகம் உண்டு. நான் இந்தப் பதிவில் கூறப்போவது “தாத்தா பாட்டி” பற்றித் தான்.

கொசுறு தகவல் : இந்தப் படத்தில் வரும் “வீடு” தான் தற்போது பாலு மகேந்திரா அலுவலகமாக இருக்கிறதாம்.

என்னுடைய தாத்தா [அப்பாவின் அப்பா] ஒரு பேரன் வேண்டும் என்று ரொம்ப ஆசைப்பட்டார் ஆனால், நான் மூன்று அக்காவிற்குப் பிறகு பிறந்தேன். மூன்றும் பெண் பிள்ளைகள் என்ற ஏமாற்றம் இருந்தாலும், அனைவரிடமும் ரொம்பப் பிரியமாக நடந்து கொண்டதாக என் அம்மா கூறுவார்கள். நான் பிறக்கும் முன் என் தாத்தா இறந்து விட்டார், கடைசி வரை பேரனை பார்க்காமலே சென்று விட்டார். என்னுடைய ஆயா [அப்பாவின் அம்மா] என்னுடைய நான்கு வயது வரை இருந்தார்கள். அவர் என்னை அன்பாக கவனித்துக் கொண்டது மங்கலாக நினைவு இருக்கிறது. என்னுடைய அம்மாவின், அப்பா அம்மா இருவரையும் பார்த்ததே இல்லை.

என்னுடைய தாத்தா [கிரி] தமிழ்நாடு காங்கிரஸ் கமிட்டித் தலைவராக இருந்தவர். காமராஜர், ராஜாஜி போன்றவர்கள் எங்கள் வீட்டிற்கு வந்து இருகிறார்கள். ஒருவேளை நான் பெரியவன் ஆகும் வரை என் தாத்தா இருந்து இருந்தால், நான் அரசியல்வாதி ஆகி இருப்பேனோ என்னவோ ஆனால், கட்சி மாறி இருப்பேன் ஹா ஹா ஹா. என் தாத்தாவின் நினைவாகவே என்னுடைய பெயரும் கிரி. என்னுடைய பூஜை அறையில் நான் வைத்து வணங்குவது இரு படங்கள் தான். ஒரு படம் முருகன், இன்னொரு படம் என் ஆயாவின் படம் [அப்பாவின் அம்மா].

பெற்றோர் இல்லாதவர்கள் அம்மா அப்பா பாசமே கிடைக்கவில்லை என்று கூறக் கேட்டு இருக்கிறேன். என் பிரச்சனை தாத்தா பாட்டி பாசமே கிடைக்காமல் போனது. இவர்கள் இருந்தால் நம்மை எப்படி கவனித்துக்கொண்டு இருப்பார்கள்.. நமக்கு ஆதரவாக எப்படியெல்லாம் பேசி இருப்பார்கள் என்ற ஏக்கம் இருந்து கொண்டே இருக்கிறது. நமக்குப் பிடித்ததை வாங்கி கொடுத்து அசத்தி இருப்பார்கள். ஒரு சில தாத்தா பாட்டிகள் செல்லம் கொடுத்தே குழந்தைகளை கெடுத்து விடுவார்கள், அவர்கள் கொஞ்சம் பிரச்சனை தான். பாசம் அவர்கள் கண்ணை மறைத்து தாங்கள் செய்யும் தவறை உணரத் தவறி விடுகிறார்கள்.

என்னுடைய அப்பா நான் சிறு வயதாக இருக்கும் போது, எனக்கு பொம்மை என்று வாங்கித் தந்ததை விரல் விட்டு எண்ணி விடலாம். இப்ப என்னடான்னா என் பையன் வினய்க்கு அது இதுன்னு அவன் கேட்காமலே வாங்கிக் கொடுத்துட்டு இருக்காங்க. நான் ஒரு நாள் சண்டைக்கே போயிட்டேன்.. அப்பா! எனக்கு ஒண்ணுமே வாங்கித் தரல, இவனுக்கு அவன் கேட்காமையே வாங்கிக் கொடுக்கறீங்களே! என்று. அப்படி இப்படி என்று சமாளித்தார் [இதை முன்பே என் தளத்தில் கூறி இருக்கிறேன்]. ஒரு தந்தையாக பாசம் என்பதை விட தாத்தாவாக எவரும் அதிக பாசத்துடன் இருக்கிறார்கள்.

இதன் காரணமாகவே என் வயதான உறவினர் தாத்தா பாட்டிகளைக் கண்டால் ரொம்பப் பிரியமாக நடந்து கொள்வேன். என்னுடைய தாத்தாவின் தம்பி மனைவி இன்னும் இருக்கிறார்கள், அவருக்கு 85 வயது ஆகிறது. காது சரியாக கேட்காது. நான் எப்போது ஊருக்குச் சென்றாலும் இவரை பார்த்து விடுவேன். இவர் தான் எங்கள் குடும்பத்தில் மூத்தவர்.

ஊருக்குச் சென்றால், போனவுடன் திட்டு விழும்.. சரியா சாப்பிடறதே இல்லையா.. எப்பத்தான் உடம்பு போடுவே! ஹோட்டல் சாப்பாடு சாப்பிட்டுட்டு, அப்படி என்ன தான் சம்பாதிக்கறீங்க…! ஊருல எல்லோரையும் விட்டுட்டு வேற நாட்டுல போய் உட்கார்ந்துட்டு! என்று செம திட்டு விழும். சம்பாதிக்கிறேன் என்று எல்லோரும் கண் காணாத இடத்திற்குப் போயிட்டீங்க, இப்பெல்லாம் யாரு நாங்க சொல்றதை கேட்குறீங்க! என்று ரொம்ப ஆதங்கப்படுவார். அவர் கூறுவது சில நடைமுறையில் சாத்தியமே இல்லாதது என்று தெரியும், இருந்தும் அவர் கூறுவதை ரசித்துக் கேட்பேன். இப்படி எல்லாம் தாத்தா / பாட்டி திட்ட எனக்கு வாய்ப்பில்லாம போய் விட்டதே என்று இவர்களிடம் சென்று திட்டு வாங்கி வருவேன். நான் கூறுவது உங்களுக்கு கொஞ்சம் மிகைப்படுத்தப் பட்டது போல இருக்கும்.. ஆனால், இது உண்மை தான்.

சமீபத்தில் ஒரு காமெடி நடந்தது. “யூட்ரஸ்” அறுவை சிகிச்சை செய்ய வேண்டிய கட்டாயம் என் ஆயாக்கு நேர்ந்தது. பெண்களுக்கு இது குறிப்பிட்ட வயதை தாண்டியதும் வரும் பிரச்சனை தான். இது நடந்து முடிந்த போது, “கருமாந்திரம்… இந்த வயசுல எதை எதையோ காட்ட வேண்டியதா போச்சே! ச்சே!” என்று அவர் கூறியதை என் அம்மா கூறக் கேட்டு எனக்கு செம சிரிப்பு .

எனக்கு நகைச்சுவை உணர்வு கொஞ்சம் அதிகம். இது கோவைப் பகுதியை சேர்ந்தவன் என்பதால் அது இயல்பாகவே வரும். சிறியவர்கள் பெரியவர்கள் எந்த பாகுபாடும் எனக்கு கிடையாது.. வாய்ப்புக் கிடைத்தால் அனைவரையும் ஓட்டிக்கொண்டு இருப்பேன். இதில் தாத்தா பாட்டி என்று எவரும் விதி விலக்கு கிடையாது. இவர்களை கிண்டல் செய்து அவர்கள் சிரிப்பதைப் பார்த்தால் எனக்கு அதில் பரமானந்தம் . தம்பி [இன்னும் என்னை "தம்பி" என்றே பலர் அழைப்பார்கள்] கம்முனே [சும்மாவே] இருக்க மாட்டான்… இன்னும் கிண்டல் தான்…! என்று கூறுவார்கள்.

பெற்றோரிடம் ஆசிர்வாதம் வாங்குவது எனக்கு ஒரு திருப்தியான செயல் என்றாலும், தாத்தா பாட்டியிடம் காலில் விழுந்து ஆசிர்வாதம் வாங்குவது எனக்கு பரம திருப்தி அளிக்கும் விஷயம். அவர்கள் காலில் விழுந்து வணங்கினால், அவர்களுக்கு அவ்வளவு சந்தோசமாக இருக்கும். தற்போதைய தலைமுறை குழந்தைகள் இதை அவ்வளவாக செய்வதில்லை, பெற்றோர்களும் இதை ஊக்குவிப்பதில்லை. ஏதாவது பண்டிகை / பிறந்த நாட்களில் பெரியவர்கள் காலில் விழுந்து ஆசிர்வாதம் வாங்க வைப்பது குழந்தைகளுக்கு பெரியவர்கள் மீது அன்பையும் மரியாதையும் கொடுக்கும்.

அவர்களுக்கும் தங்களை வயதானவர்கள் என்று ஒதுக்கி விடாமல் மரியாதை கொடுக்கிறார்கள் என்ற மன நிம்மதி கிடைக்கும். இதெல்லாம் புரியாதவர்கள் / கிண்டலாக நினைப்பவர்கள், வயதாகி இந்த நிலையில் இருக்கும் போது தெளிவாகப் புரிந்து கொள்வீர்கள். ஆனால் என்ன! அது காலம் கடந்த புரிதலாக இருக்கும்.

இது போல என் பாட்டியை [தாத்தாவின் தம்பி மனைவி] காணச் செல்லும் போது, என் மகன் வினயையும் அழைத்துச் செல்வேன். கண்டிப்பாக அவர் காலில் விழுந்து வணங்கச் சொல்வேன். என்னை விட வினய் வணங்கினால் அவர்கள் முகத்தில் அவ்வளவு சந்தோசம் / திருப்தி இருக்கும். அவனுக்கு பணம் கொடுப்பார்கள்.. “அப்பா! ஆயா பணம் கொடுத்தாங்க” என்று சிரித்துட்டு சொல்வான். பெரியவர்கள் கொடுப்பது பத்து ருபாய் என்றாலும், அதன் மதிப்பின் ஆழம் புரிந்தவர்களுக்கு அது கோடி ரூபாய்க்கு சமம் என்பது தெரியும்.

வினய்க்கு என்னைப் போல பிரச்சனை இல்லை, அவனுக்கு இரு தாத்தா பாட்டியும் இருக்கிறார்கள், அன்பாக கவனித்துக் கொள்கிறார்கள்… குறிப்பாக என்னை அதிகம் கண்டு கொள்ளாத என் அப்பா இவனுக்கு செம கவனிப்பு. பெரியவர்கள் தங்கள் அனுபவத்தில் குழந்தைகளுக்கு கொடுக்கும் அறிவுரை, அன்பு அவர்களுக்கு அவசியம் தேவை. தற்போதைய தனிக் குடும்ப வாழ்க்கையில் இது போல சந்தர்ப்பம் குறைந்து விட்டதால், குழந்தைகளுக்கு வாய்ப்புக் கிடைக்கும் போது பெரியவர்களின் முக்கியத்துவத்தை உணரச் செய்யுங்கள். பெரியவர்களும் குழந்தைகளிடம் அதிக செல்லம் கொடுத்து அவர்களை கெடுத்து விடாதீர்கள். இதை நான் நிறைய கவனித்து இருக்கிறேன்.

தாத்தா பாட்டியின் அருமை என்னைப் போன்ற அந்த வாய்ப்பு கிடைக்காதவர்களுக்குத் தான் தெரியும். தாய் தந்தை இல்லாதவர்கள் ஏக்கம் எப்படி பலரால் கூறப்படுகிறதோ, அது போல இதுவும் அந்த உணர்வை ஒட்டியது தான். பெரியவர்களிடம் அன்பாக நடந்து கொள்ளுங்கள், அவர்களுக்கு உரிய மரியாதையை கொடுங்கள். குறிப்பாக உங்கள் குழந்தைகளுக்கு பெரியவர்களின் முக்கியத்துவத்தை உணரச் செய்யுங்கள். அனைவரும் இந்த நிலையை கடக்காமல் செல்ல முடியாது எனவே பின்னாளில், செய்த தவறை உணர்ந்து வருந்தாமல் தற்போதே சரியான வழியில் செல்லுங்கள்.

கொசுறு

“மூன்று பேர் மூன்று காதல்” படம் பாடலுக்காகவே சென்றேன் ஆனால், படம் என் பொறுமையை ரொம்ப சோதித்து விட்டது. விமல் பகுதி எல்லாம்… ஸ்ஸ்ஸ்ஸ் முடியல. எப்படா பேசி முடிப்பாங்க என்று இருந்தது. இவ்வளவு இழுவையான வசனங்களை கேட்டு / காட்சியமைப்புகளைப் பார்த்து நீண்ட நாட்கள் ஆகிறது. விமல் ஜோடி நடிகையின் முகத்தை காட்டாமல் கேமரா மட்டும் திரும்பும், பேசும். யார்ரா இது! அவ்வளவு அழகா… செம ஃபிகர் போல… என்று வசந்த் கொடுத்த பில்டப்பில் இருந்து, பின் கடைசியில் முகத்தைக் காட்டும் போது அவ்வ்வ்வ்.  இதுல க்ளோசப் ஷாட் சிரிப்பை செயற்கையாக வைத்து… அடங்கப்பா!

ஆசை, ஏய்! நீ ரொம்ப அழா இருக்கே (இந்தப் படம் ஓடவில்லை ஆனால், எனக்கு ரொம்பப் பிடித்த படம்), சத்தம் போடாதே (ரொம்ப அருமையான த்ரில்லர்) போன்ற படங்களை எடுத்த வசந்த் தான் இந்தப் படத்தையும் எடுத்தார் என்று நம்ப முடியவில்லை. “சூது கவ்வும்” போன்ற படங்கள் வசனங்களில், காட்சியமைப்புகளில் புதுமையாக இருந்தால் “மூன்று பேர் மூன்று காதல்” பத்து வருடம் பின்னே இருக்கிறது. வசந்த் சார் நிகழ்காலத்துக்கு வாங்க சார்!

“வீடு” தாத்தா is a post from: கிரி Blog

நண்பர் ஸ்ரீநிவாசன் “பாலஹனுமன்” தளம் பற்றி நீங்கள் கேள்விப்பட்டு இருக்கலாம், நானும் என் தளத்தில் முன்பு கூறி இருக்கிறேன். பல புத்தங்கள் பற்றிய அறிமுகங்கள் இவரது தளத்தில் இருந்து தான் தெரிந்து கொண்டேன். நான் அவ்வளவாக புத்தகங்கள் படிப்பது இல்லை என்றாலும், என்ன நடக்கிறது என்பதை தெரிந்து கொள்ள விரும்புவேன். இது மட்டுமல்லாமல் பல தகவல்கள் இவரது தளத்தில் தெரிந்து கொள்ள முடியும்.

இவரது ஒரு பதிவில் இவருடைய தளத்தைப் பற்றி படிப்பவர்கள் என்ன நினைக்கிறார்கள் என்று கேட்டு இருந்தார் அதாவது “பாலஹனுமன்” என்றால் என்ன நினைவிற்கு வருகிறது என்று. எனக்கும் அது சுவாரசியமாக இருந்தது. எனக்கு என்ன நினைவு வந்தது என்று கூறி இருந்தேன். இதே போல என்னுடைய தளத்தையும் கேட்டால் என்ன? என்று தோன்றியது. “கிரி Blog என்றால் உங்களுக்கு என்ன நினைவிற்கு வருகிறது” என்று கூறினால் நான் எப்படி? என்ன எழுதுகிறேன்? என்று தெரிந்து கொள்ள உதவும்.

நீங்கள் கூறும் போது இத்தனை பாயிண்ட் கூற வேண்டும் என்ற எந்தக் கட்டாயமும் இல்லை. இரண்டாக இருந்தாலும் சரி பத்தாக இருந்தாலும் சரி.

1. பயணக்கட்டுரை

2. திரைப்படம்

3. நகைச்சுவை

இப்படி கூறினால் எனக்கும் ஒரு ஐடியா கிடைக்கும். உடன், நான் என்ன தான் எழுதுகிறேன் என்று புரிய ஒரு வாய்ப்பு, தவறு இருந்தால் திருத்திக்கொள்ள வாய்ப்பு கிடைக்கும். எனவே இரண்டு நிமிடம் செலவழித்து கூறவும். ரீடரில் / மின்னஞ்சலில் இருப்பவர்கள் இப்பவும் அங்கேயே இருக்காமல் வந்து கூறவும்.

கிரி தான் சொல்ல சொல்லிட்டாரே என்று “மருதமலை” படத்தில் வடிவேல் கேட்பாரே…

யோவ்! என்னப்பத்தி இந்தாள் கிட்ட எடுத்துச் சொல்லு

எ..எ…எ.. என்னத்த சொல்றது

எதையாச்சு சொல்ல்ல்லுயாயா

சார் ஒரு… அப்படின்னு கூறி மானத்தை வாங்கிடாதீங்க ஐ ம் பாவம்.

முதல் முறையாக வந்தவர்கள் வேறு ஏதாவது பதிவை படித்து விட்டு செல்லவும்

இங்க என்ன சொல்லுது :-) is a post from: கிரி Blog

மலேசியாவில் இந்த முறை தேர்தலில் கடும் போட்டி இருந்தது. நம்ம ஊர் தேர்தல் மாதிரி படு மோசமாக நடந்து கொண்டார்கள். எதிர்க் கட்சி வெற்றி பெற வாய்ப்புள்ளது என்று கூறப்பட்டது ஆனால், வழக்கம் போல ஆளுங்கட்சியே வெற்றி பெற்றது ஆனால், குறைந்த வித்தியாச ஓட்டில். மலேசியா சுதந்திரம் பெற்றதில் இருந்து இவர்களே ஆட்சியில் உள்ளனர் என்பது குறிப்பிடத்தக்கது. ஒட்டு முடிந்தவுடன் விரலில் இருந்த மை எளிதாக அழிந்து விட்டது என்று ஏகப்பட்ட பேர் புகார் கூறினார்கள். நிறையப் பேர் உடனே மையை அழித்து படம் எடுத்து அதை ஃபேஸ்புக் கில் போட்டு இருந்தார்கள். இது பற்றி புகார் கூறியதற்கு, அந்த ஊர் தேர்தல் அதிகாரி ஒரு செமையான பதில் கொடுத்து அனைவரின் கடுப்பையும் சம்பாதித்துக் கொண்டார் .

தேர்தலில் நம்ம ஊரில் நடப்பது போலவே மலேசியாவிலும் பல தில்லுமுள்ளுகள் நடை பெற்றன. தேர்தல் நேரத்திலும், தற்போதும் ரேசிசம் பிரச்சனையும் ஓடிக்கொண்டு இருக்கிறது. இது எங்கே சென்று முடியுமோ! Image Credit : http://3rdeyelens.blogspot.sg

“ஜெ” அறிவிக்கும் அறிவிப்புகளைக் கேட்டாலே தற்போதெல்லாம் வெறுப்பாக வருகிறது. வெறும் அறிவிப்பு மட்டுமே வந்து கொண்டு இருக்கிறது, இது வரை இவரது இந்த ஆட்சியில் குறைகள் கூறப்பட்டாலும் சொல்லிக்கொள்ளும்படி / பாராட்டும்படி உள்ள ஒரே திட்டம் “அம்மா உணவகம்” மட்டுமே. செய்திகளில் “ஜெ” ஏதாவது திட்டம் என்று அறிவித்தாலே அதைப் படிக்கக் கூட தற்போது பிடிப்பதில்லை, எப்படியும் ஒன்றும் நடக்காது என்று தெரியும் எதற்கு படித்து ஏமாற வேண்டும் என்று தோன்றுகிறது.

மின்சாரப் பிரச்னைக்கு இன்று வரை உருப்படியான தீர்வு இல்லை! தண்ணீர் பிரச்னைக்கு நடவடிக்கைகள் அனைத்தும் ஆமை வேகத்தில் நடக்கிறது. இது மாதிரி வரிசையாகக் கூற நிறைய இருக்கிறது ஆனால், கூற சலிப்பாக இருக்கிறது. இதன் காரணமாகவே இதைப் பற்றி எல்லாம் கட்டுரைகள் எழுதுவதில்லை. இருந்தும் மனசு கேட்காமல் இப்படி சிறு அளவில் புலம்பினால் தான் ஆறுதலாக இருக்கிறது. ஜெ என்ன தான் பண்ணுறாங்க!!! “ஜெ” இல்லைனா “கலைஞர்” இப்படியே போகுது… யார் வந்தாலும் எந்த முன்னேற்றமும் இல்லை. அதே ஊழல், விலைவாசி உயர்வு, மந்தமான நடவடிக்கை, வரிப் பணம் வீணடிப்பு, கொள்ளை என்று இதே பாட்டு தான். ச்சே! நமக்கு விடிவுகாலமே கிடையாதா!!

கூடங்குளத்திற்கு உச்ச நீதிமன்றம் தடையில்லை என்று கூறி விட்டது. என்னைப் பொருத்தவரை, அணு உலை மின்சாரத்தில் உடன்பாடில்லை. பாதுகாப்பான இடத்தில் இருந்து கொண்டு நியாயம் பேசுபவர்கள் என்ன வேண்டும் என்றாலும் கூறலாம். அங்குள்ளவர்களுக்கு தான் அதன் பயம் புரியும். எப்படி இவர்கள் போராட்டம் செய்தாலும் அணு உலை செயல்படப்போவது உறுதி தான். இனி அதை யாராலும் தடுக்க முடியாது.

நடிகை ஹன்சிகா “ஒரு கோடி” ருபாய் அளவிற்கு, கேன்சரால் பாதிக்கப்பட்ட பெண்களுக்கு உதவி இருப்பதாக செய்திகளில் படித்தேன். இது உண்மை என்றால் என்னுடைய மன மார்ந்த பாராட்டுகள்.

ராமதாஸ் கைதுக்குப் பிறகு பா ம க வினர் செய்த கலவரத்தால் 500 பேருந்து தாக்கப்பட்டது என்ற செய்தியை விட 160 மரங்கள் வெட்டப்பட்டன என்ற செய்தியைப் படித்த போது மனதிற்கு ரொம்பக் கஷ்டமாக இருந்தது. நாம் பயணம் செய்யும் போது தான் சாலை ஓர மரங்கள் அருமை தெரியும். அனல் காற்று குறைந்து, இந்த மரங்களின் குளிர்ச்சியான காற்று நம் மீது படும் போதும் நிழலில் வண்டி ஓட்டுவதும் அவ்வளவு சுகமான விஷயம். இது போல ஒரு மரம் வளர 15 / 20 வருடங்கள் ஆகும் ஆனால், சில நிமிடங்களில் வெட்டப்பட்டு சாலையில் போடப்பட்டு விட்டன. இது பா ம க செய்து இருந்தாலும் / விடுதலை சிறுத்தைகள் செய்து இருந்தாலும் மிக மோசமான செயல் என்பதில் சந்தேகமில்லை. இந்தக் கொடுமை எல்லாம் சகித்துப் பழகிக் கொள்வதைத் தவிர வேறு ஒன்றும் தோன்றவில்லை. Image Credit : http://ncf-india.org

எங்க தங்கத் தலைவி, தானைத் தலைவி எவர் கிரீன் “பெப்சி உமா” ஜெயா தொலைக்காட்சியில் “ஆல்பம்” நிகழ்ச்சியில் வருகிறாராமே! தட்ஸ்தமிழ் ல படித்தேன். கண்டிப்பாக பார்த்துட வேண்டியது தான். வியாழன் இரவு 8.30 பெப்சி உங்கள் சாய்ஸ் க்காக காத்திருந்த காலம் உண்டு… ம்ம்ம். எனக்கு தொலைக்காட்சியில் நிகழ்ச்சி நடத்துபவர்கள் / நடத்தியவர்களிலேயே பிடித்த ஒரே நபர் “உமா” மட்டும் தான். இவரது நிகழ்ச்சியை மட்டும் தான் நீண்ட வருடங்கள் தொடர்ந்து பார்த்து இருக்கிறேன். அலட்டல் இல்லாம கடுப்படிக்காம ரொம்ப நல்லா நிகழ்ச்சி நடத்துவாங்க.

எனக்கு இன்னமும், எந்திரன் படம் வெளியான போது சன் டிவியில் ரஜினியை விஜய் சாரதி பேட்டி எடுத்த நேரத்தில், உமா எடுத்து இருந்தால் சூப்பராக இருந்து இருக்குமே! என்று நினைப்பேன். ஒரு நல்ல வாய்ப்பை விஜய் சாரதி வீணடித்து விட்டார்.

சீனா ஆக்கிரமிப்பு பற்றிய செய்தியாகப் படித்து இருப்பீர்கள். தற்போது சீனா திடீர் என்று பின் வாங்கி விட்டது. தன்னுடைய படைகளை திரும்ப பெற்றுக்கொண்டது. இதற்கு ஒவ்வொருவரும் ஒவ்வொரு காரணம் கூறுகிறார்கள். தற்போது எந்த ஒரு நாடும் இன்னொரு நாட்டை சார்ந்தே உள்ளது. அதிலும் இந்தியாவை பல நாடுகள் நுகர்வு விசயத்தில் பெருமளவு நம்பியுள்ளன காரணம், இங்கே உள்ள தேவை, மக்கள் தொகையின் அளவு.

பல நாடுகளின் முக்கிய விற்பனை மையமாக இந்தியா உள்ளது. எனவே இந்தியாவுடன் பிரச்சனை செய்தால், இந்தியா நினைத்தால் அந்த நாடுகளுக்கு மிகக் கடுமையான பொருளாதார நெருக்கடி கொடுக்க முடியும் [நமக்கும் பாதிப்புள்ளது என்பதையும் மறுப்பதற்கில்லை]. அதாவது, அவர்கள் நாட்டில் இருந்து வரும் பொருட்களுக்கு தடை விதித்தால் அது மிகப்பெரிய அளவில் பாதிப்பை ஏற்படுத்தும் குறிப்பாக சீனா போன்ற நாடுகளுக்கு. நம்மால் வேறு ஒரு நாட்டில் அதே பொருளைப் பெற்று சமாளிக்க முடியும் ஆனால், நமக்கும் சிரமம் என்பதும் உண்மை தான். எனவே சீனா, இந்தியா மீது போர் தொடுக்கும் என்பதெல்லாம் சாத்தியமில்லாத செயல் என்பதே என் கருத்து. நமக்கும் இது பொருந்தும்.

விஜய் அவார்ட்ஸ் நிகழ்ச்சியில் “நீர்ப்பறவை” இயக்குனர் சீனு ராமசாமியுடன் ["தென் மேற்கு பருவக்காற்று" படத்திற்காக தேசிய விருது வாங்கியவர்] ஒளிப்பதிவாளர் “பால சுப்ரமணியமும்” வந்தார். அந்தப் படம் எடுக்கப்பட்ட சில நிகழ்வுகளை பகிர்ந்து கொண்டார். இன்னும் கொஞ்சம் தகவல் கூறி இருந்தால் சந்தோசப்பட்டு இருப்பேன். ஒளிப்பதிவிற்க்காகவே நான் பார்த்த ஒரே படம் “நீர்ப்பறவை”. படமும் நன்றாக இருந்தது.

Read: “நீர்ப்பறவை” – அசத்தலான ஒளிப்பதிவு

IPL ல RCB கெயில் புனே வாரியர்சை பஞ்சர் ஆக்கி 175* எடுத்தார்.. RCB யை கொத்துக்கறி போட்டு 101* [38 பந்து] அடித்து [சேசிங்] கிங்க்ஸ் லெவன் பஞ்சாப் “டேவிட் மில்லர்” கிடுகிடுக்க வைத்து விட்டார். என்னது சென்னை சூப்பர் கிங்க்ஸ் Vs மும்பை இந்தியன் பற்றியா… ஹி ஹி சரி சரி விடுங்க! கிரிக்கெட் என்றால் சில அடிகள் விழத்தானே செய்யும்!

“நேரம்” என்ற படம் விரைவில் வரப்போகிறது. இது தமிழ் மற்றும் மலையாளம் இரு மொழிகளிலும் [May 17] வெளியாகிறது. இதில் கதாநாயகனாக வரும் நிவின் தான் மலையாளத்தின் சூப்பர் ஹிட் காதல் படமான “Thattathin Marayathu” படத்தில் கதாநாயகனாக நடித்தவர். இவரது நடிப்பு ரொம்ப இயல்பாக நன்றாக இருந்தது. இந்தப்படத்தில் எப்படி உள்ளது என்று இந்த காணொளி பார்த்துக் கூறுங்கள்

ஃபேஸ்புக்கிற்கு இந்தியாவிலும் பிரேசிலும் தான் பயனாளர்கள் அதிகமாக உள்ளார்களாம். ஆர்குட் பிரபலமாக இருந்த போதும், இந்த இரு நாடுகளே முன்னணியில் இருந்தன. தற்போது ஃபேஸ்புக் கதையும் அதே! நான் வலைப்பதிவு எழுதுவதை குறைத்துக் கொண்டு வருவதைப் போல, ஃபேஸ்புக் பயன்படுத்துவதையும் குறைக்க வேண்டும். எதற்கும் அடிமையாகி விடக்கூடாது என்ற எண்ணம் தான் வேறு எதுவும் இல்லை… ஆனால், தொலைபேசி / இணையம் இல்லாமல் என்னால் இருக்க முடியாது என்பதை ஒத்துக்கொள்கிறேன். இணையத்தை நம்பியே என் சார்ந்த பல விஷயங்கள் உள்ளது. பல தகவல்களுக்கு / துரித வேலைகளுக்கு இணையம் / தொலைபேசி தான், வேறு வழியில்லை.

சிங்கப்பூர்ல காற்றே அடிக்காமல் மழை பின்னி எடுக்குது! நம்ம ஊர்ல காற்றே, பெய்யுற கொஞ்ச மழையையும் கொண்டு சென்று விடுகிறது, அதோடு இருக்கிற கொஞ்ச நஞ்ச மரத்தையும் வேரோடு பிடிங்கி விடுகிறது. நீங்க சொன்னா நம்ப மாட்டீங்க… [அப்ப சொல்லாதீங்கன்னு சொல்லிடாதீங்க ] சிங்கப்பூர்ல காற்றே அடிக்காமல் 6 மணி நேரம் எல்லாம் சர்வசாதாரணமாக மழை பெய்யும். இங்க பெய்யுற மழை நம்ம ஊர்ல பெய்தால் எப்படி இருக்கும்!!

எழுத ஆரம்பித்தால் இது தான் பிரச்சனை.. வந்துட்டே இருக்கும். நெக்ஸ்ட் மீட் பண்றேன் .

மலேசியா – ராமதாஸ் – சீனா – பெப்சி உமா – மழை is a post from: கிரி Blog

 செம்ம்ம்ம்ம படம் .

சூது கவ்வும் [2013] is a post from: கிரி Blog

சிவ கார்த்திகேயன், தனுஷ் தயாரிப்பு, அனிருத் ஹிட் பாடல்கள். இயக்குனர் பாலசந்தரின், நாகேஷ் நடித்த “எதிர்நீச்சல்” படத்தின் பெயர். ஒரு குத்துப்பாட்டில் நயன்தாரா, இயக்குனர் வெற்றிமாறனின் உதவி இயக்குனர் எடுத்த படம் என்று படத்திற்கு நல்ல எதிர்பார்ப்பு.

கதை, சிவ கார்த்திகேயன் பெயர் “குஞ்சித பாதம்”. இந்தப்பெயரால் பலரின் கிண்டலுக்கு ஆளாகிறார். இதனால் கடுப்பாகி பெயர் மாற்றுகிறார், இடையில் காதல். தன்னுடைய மாற்றிய பெயரை பிரபலப்படுத்த சிறுவயதில் இருந்தே ஓட்டத்தில் ஆர்வமுள்ள இவர் சென்னை மராத்தான் போட்டியில் கலந்து கொள்கிறார். கடைசியில் என்ன ஆகிறது என்பது தான் கதை.

படத்தில் என்னமோ வழக்கமான நகைச்சுவை, சென்டிமென்ட் என்று இருந்தாலும் ஒரு பெயரால் வரும் சிரமத்தைப் பற்றிய படம் என்கிற அளவில் இது வித்யாசமான கதை தான். இது வரை ஒரு பெயரால் ஏற்படும் சிரமத்தை ஒரு முழுப் படமாக எடுத்ததாக நினைவில்லை.

சிவ கார்த்திகேயன் “கேடி பில்லா கில்லாடி ரங்கா” படத்தை விட நடிப்பில் முன்னேற்றம். குறிப்பாக மிமிக்ரி செய்வதை இதில் முற்றிலும் தவிர்த்து இருக்கிறார்கள். ஏற்கனவே இவருக்கு நகைச்சுவை எளிதாக வரும் என்பதால், இதில் அவருக்கு இந்தக் கதாபாத்திரம் நன்றாகப் பொருந்துகிறது. இவரது நண்பராக சதீஷ் என்பவர் நடித்துள்ளார். இவரை சந்தானமாகவே தான் நினைக்கத் தோன்றுகிறது. சந்தானம் பட்ஜெட் அதிகம் என்பதால் இவரைப் போட்டு விட்டார்கள் போல. ரொம்ப மோசமில்லாமல் நடித்து இருக்கிறார்.

ப்ரியா ஆனந்த் கதாநாயகி, பள்ளி ஆசிரியையாக வருகிறார். இவருக்கு பதில் வேறு யாரையும் [நம்ம ஊர் முகமாக] நடிக்க வைத்து இருக்கலாம் என்று தோன்றியது. இன்னொரு பகுதியில் நந்திதா [அட்டகத்தி படத்தில் வருபவர்] வருகிறார். இவர் பகுதியில் படம் கொஞ்சம் மெதுவாக செல்கிறது. படத்தில் பெரிய நிம்மதி இரட்டை அர்த்த வசனங்கள் எதுவுமில்லை.

படத்தில் வரும் குத்துப்பாடலான “லோக்கல் பாய்ஸ்” க்கு தனுஷ் நயன்தாரா ஆடுகின்றனர் [நயன்தாரா, நட்புக்காக பணம் வாங்காமல் நடித்தது]. இதில் தனுஷ் வரும் போது, மாடு மாதிரி இருக்கும் நான்கு பேரை பறக்கவிட்டு வருகிறார். பல்லி மாதிரி இருக்கும் தனுஷ் இவர்களை அடிப்பதைப் பார்த்தால், “எதுக்கு தனுஷ் இந்த வேண்டாத வேலை?” என்று தான் தோன்றுகிறது. இதெல்லாம் தேவையே இல்லை, ஏன் இதை புரிந்து கொள்ள மறுக்கிறார்கள் என்று தான் தெரியவில்லை. இதை ரொம்ப நீட்டிக்காமல் உடனே முடித்து விடுவது ஒரு ஆறுதல். நயன்தாரா இந்தப்பாடலில் வரும் போது பலத்த விசில் கொஞ்ச நேரமே வந்தாலும் ரசிகர்களை கிறங்கடித்து தான் செல்கிறார்.

சிவ கார்த்திகேயன் மராத்தானுக்கு தயார் ஆகும் காட்சிகள், போட்டியில் கலந்து கொள்ளும் காட்சிகள் நன்றாக உள்ளது. இவ்வளவு பேரை எங்கே பிடித்தார்கள்! முதலிலேயே இவர் ஓட்டப்பந்தயத்தில் ஆர்வம் உள்ளவர், வெற்றி பெற்றுள்ளவர் என்று வருவதால் மராத்தானில் பங்கு கொள்வதாக வரும் போது நமக்கு ஏற்றுக்கொள்ளும்படி தான் உள்ளது.

குஞ்சித பாதத்தை “டேய்! குஞ்சி”, “குஞ்சு” என்று அழைப்பதால் அவர் எதிர்கொள்ளும் சிரமங்கள் சரியாக எடுக்கப்பட்டு இருக்கின்றன. இது போல தர்மசங்கடமான பெயரை உள்ளவர்கள் இந்தப் படத்தைப் பார்த்தால் அவர்களுக்கு ஒரு ஆறுதலாக இருக்கும் என்று நினைக்கிறேன்.

என்னுடைய அப்பா தமிழ் பற்றால் எனக்கு கிரிராசு என்று பெயர் வைத்தார். மேல்நிலைப் பள்ளி வரும் வரை பெரிய பாதிப்பில்லை. என்னுடைய இனிசியல் KP. நான் ஏழு மற்றும் எட்டாம் வகுப்பு உடுமலைப் பேட்டை அருகே பள்ளியில் படித்தேன். ஹாஸ்டலில் என்னை “KP” என்று தான் அழைப்பார்கள். எனக்கும் அவ்வாறு அழைப்பது பிடித்து இருந்தது. எட்டாவது வரும் போது, எதோ ஒரு திரைப் படத்தில் KP க்கு “நல்ல” அர்த்தத்தை கொடுக்க பள்ளியில் இதை வைத்தே என்னை ஓட்டித் தள்ளி விட்டார்கள்.

அடுத்த வருடம் கோபியிலேயே ஒரு ஹாஸ்டலில் சேர்ந்தேன் அங்கே யாரும் “KP” என்று கூப்பிடவில்லை என்றாலும், அட்டனன்ஸ் கூப்பிடும் போது “KP கிரிராசு” என்று அழைக்க.. எல்லோரும் கெக்கே பிக்கேன்னு சிரிப்பாங்க. ஒரு சில நாட்கள், ஹாஸ்டலில் பசங்க தான் அட்டனன்ஸ் எடுப்பானுக! அவனுக வேண்டும் என்று அழுத்தி கூப்பிட்டு கடுப்பேத்துவானுக. சிவகார்த்திகேயன் மாதிரி, என்னுடைய பெயர் வரப்போகிறது என்றாலே கலவரம் ஆகி விடுவேன் . பின்னர் என் அப்பாவிடம் சண்டை போட்டு பத்தாவது வந்து P.கிரிராஜ் என்று மாற்றி விட்டேன். 10 வகுப்பு முடிக்கும் போது இது போல மாற்ற முடியும். அதன் பிறகு “கிரி” மட்டுமே என் பெயராகி விட்டது. இப்பவும் யாரும் என் முழுப் பெயரைக் கூப்பிட்டால் வேறு யாரையோ அழைக்கிறார்கள் என்று நினைத்து திரும்பக் கூட மாட்டேன் .

இது போல பெயர் பிரச்சனை என் மகனுக்கு வரக்கூடாது என்று யோசித்து யோசித்து வைத்த பெயரைப் பற்றி எழுதியுள்ளேன் . எனவே எனக்கும் இந்தப் படத்திற்கும் ஒரு வகையில் தொடர்பு உள்ளது. என்னைப் போல பலருக்கும் இருக்கும் என்று நினைக்கிறேன்.

Read: “யுவன்”னு பேரு வச்சாச்சுல்ல அப்புறம் என்ன குட்டித் தம்பி!

பாடல்கள் ஏற்கனவே செம ஹிட் ஆகி விட்டதால் படத்தில் பாடல்களுக்கு நல்ல வரவேற்பு. ஒளிப்பதிவு வேல்ராஜ் (பொல்லாதவனுக்கு ஒளிப்பதிவு செய்தவர்). அனிருத் கூட தனுஷ் வரும் காட்சியில் வருகிறார். “3″ படத்தோடு காணாமல் போய் விடுவாரோ என்று நினைத்தேன்… திறமையுள்ள ஆள் தான். படத்தில் Big FM RJ பாலாஜி ஒரு காட்சியில் வருகிறார். இவர், படத்தை விமர்சனத்தில் டேமேஜ் செய்து விடக்கூடாது என்று சேர்த்து விட்டார்களா! . “நிஜமெல்லாம் மறந்துபோச்சு” மற்றும் “பூமி என்னை சுத்துதே” பாடலை தனுஷ் எழுதி இருக்கிறார். இவருடைய “மயக்கம் என்ன” படத்தில் எழுதிய பாடல்களிலேயே ஆச்சர்யப்படுத்தி இருந்தார், தொடர்ந்து இதிலும்.

படத்தில் லாஜிக் பிரச்சனை என்று பார்த்தால், இவர் பெயரை மாற்றிய பிறகு இவரின் பழைய பெயரை அறிந்தவர்கள் “எதேச்சையாக” ஒரே சமயத்தில் வருவது போன்ற சில காட்சிகள் உள்ளது. இடைவேளைக்கு பிறகு கொஞ்ச நேரம் படம் மெதுவாகச் சென்றாலும், இறுதியில் சரிகட்டி விடுகிறார்கள். முடிவு இது தான் இருக்கும் என்று முன்பே ஊகிக்க முடிகிறது. குடும்பத்துடன் பார்க்கக் கூடிய நல்ல பொழுது போக்குப் படமாக இருப்பதால் சிறிய குறைகளை மன்னித்து, அனைவரும் பார்க்கலாம் என்று இந்தப் படத்தை பரிந்துரைக்கிறேன்.

நடிகராக, பாடல் ஆசிரியராக, பாடகராக வெற்றி பெற்றதைத் தொடர்ந்து தயாரிப்பாளராகவும் வெற்றி பெற்று இருக்கிறார். வாழ்த்துக்கள் தனுஷ்!

முதல் படத்தின் முடிவே பலரின் தலையெழுத்தை தீர்மானிக்கிறது. அந்த வகையில் இயக்குனர் துரை செந்தில்குமாருக்கு சந்தோசமான விஷயம் தான்.  இயக்குனர் செந்தில்குமாருக்கு இயக்குனராக முதல் படம், தயாரிப்பாளராக தனுஷ்க்கு முதல் படம்.

Directed by R. S. Durai Senthilkumar
Produced by Dhanush
Written by R. S. Durai Senthilkumar
Screenplay by R. S. Durai Senthilkumar
Story by R. S. Durai Senthilkumar
Starring Sivakarthikeyan, Priya Anand, Nandita
Music by Anirudh Ravichander
Cinematography Velraj
Editing by Kishore Te.
Studio Wunderbar Films
Distributed by Vendhar Movies
Release date(s) 1 May 2013
Running time 129 minutes
Country India
Language Tamil

கொசுறு 1

யாருடா மகேஷ்?

எதிர்நீச்சல் குடும்பத்துடன் பார்க்கக் கூடிய படம் என்றால் இது அப்படியே எதிர்ப்பதம் . அடல்ட் காமெடி படம். எனவே இந்தப் படத்துக்கான மனநிலையுடன் / எதிர்பார்ப்புடன் சென்றால் உங்களால் படத்தை என்ஜாய் செய்ய முடியும். தெரிந்து கொண்டே அங்கே சென்று அய்யே! படமா இது! என்ன இப்படி இரட்டை அர்த்த வசனங்கள் என்று புலம்புவது / நல்லவன் வேஷம் போடுவது தேவையற்ற வேலை. மிலிட்டரி ஹோட்டலில் சென்று சரவண பவன் பதார்த்தத்தை தேடாதீர்கள். தேடினாலும் கிடைக்காது . பசங்க மற்றும் இது போல அடல்ட் நகைச்சுவைகளை ரசிப்பவர்கள் சென்றால் என்ஜாய் செய்ய முடியும். மறந்து கூட குடும்பத்துடன் சென்று விடாதீர்கள். படத்தின் திரைக்கதை சுமார் தான். முடிவு இது போலத் தான் இருக்கும் என்று முன்பே தெரிந்து விடுகிறது. எனவே இது உங்களுக்கான படமாக இருப்பதாகக் கருதினால் செல்லுங்கள், இல்லை என்றால் போக வேண்டாம்.

கொசுறு 2

இந்த வாரம் “மூன்று பேர் மூன்று காதல்” படம் செல்லலாம் என்று இருக்கிறேன். இதிலும் பாடல்கள் அனைத்தும் அருமை. இசை யுவன், இயக்கம் வசந்த். படம் எப்படி இருந்தாலும் பாட்டுக்காகவே செல்லலாம் என்று இருக்கிறேன். “சூது கவ்வும்” படம் நன்றாக உள்ளதாகக் கூறினார்கள் [சிங்கப்பூரில் வெளியாகவில்லை]. விஜய் சேதுபதிக்கு சுக்கிர திசை நடைபெறுகிறது என்று நினைக்கிறேன் . நல்ல நல்ல கதை உள்ள படங்களாக அவருக்கு அமைகிறது.

கொசுறு 3

மரியான் பட முன்னோட்டம் பார்த்து அசந்து விட்டேன். இடங்களும் மனிதர்களும் என்று அனைத்துமே வழக்கமான பாணியாக இல்லாமல் வித்யாசமாக இருக்கிறது. இதன் ஒளிப்பதிவாளர் நம்ம நாடு அல்ல. எனக்கு இது போல வெறுமையான இடங்களை கொண்ட ஒளிப்பதிவு ரொம்பப் பிடிக்கும் அதாவது பாலைவனம், மலைப்பகுதி, நீண்ட ஆள் அரவமற்ற சாலை, வறட்சியான பகுதி, கடல், காடு போன்றவை. குறிப்பா மனிதர்கள் குறைவாக உள்ள இடங்கள். இயக்குனர் பரத் பாலா, இசை AR ரகுமான், இதில் யுவன் ஒரு பாடல் பாடி இருக்கிறார். தயாரிப்பாளர் ஆஸ்கார் ரவிச்சந்திரன்.

இதற்கு முன் AR ரகுமானின் “வந்தே மாதரம்” ஆல்பத்தை மட்டுமே இயக்கி இருக்கிறார். எனவே இந்தப் படம் எப்படி இருக்கும் என்று ஆவல் உள்ளது. படத்தின் கதை மீனவர்களைப் பற்றியது. தமிழகத்திலும் நமீபியாவிலும் படம் எடுக்கப்பட்டுள்ளது. சில படங்கள் முன்னோட்டம் மட்டுமே நன்றாக இருக்கும், படம் செம மொக்கையாக இருக்கும். இந்தப் படம் அதுபோல ஏமாற்றி விடக் கூடாது என்று வேண்டுகிறேன். இது போல வித்யாசமான இடங்கள், பளிச் ஒளிப்பதிவு, மனிதர்கள், காட்சி அமைப்புகள் என்று பார்க்கவே நிறைவாக உள்ளது. பார்ப்போம்… படம் எப்படி உள்ளது என்று!

கொசுறு 4

“Iron Man 3″ படம் நன்றாக உள்ளதாக அனைவரும் கூறுகிறார்கள். எனவே இதுவும் என்னுடைய பட்டியலில் உள்ளது .

எதிர்நீச்சல் [2013] is a post from: கிரி Blog

இந்தியாவில் ஆன்ட்ராயிடு தொலைபேசிகள் சக்கைப் போடு போட்டாலும், உடன் ஐபோன் ம் நல்ல வளர்ச்சி பெற்று வருகிறது. US$ 1 பில்லியன் விற்பனையை மிக எளிதாக பெறும் என்று கூறி இருக்கிறார்கள். ஆப்பிள் நிறுவனத்தின் கடந்த ஓராண்டு இந்திய வருமானம் 431 % உயர்ந்து இருப்பதாக டைம்ஸ் ஆஃப் இந்தியா அறிவித்துள்ளது.

விரைவில் ஆப்பிள் நிறுவனம் “பட்ஜெட் ஐபோன் / ஐபோன் மினி” என்ற குறைந்த வசதி கொண்ட ஐபோன் ஐ வெளியிடப்போவதாக அறிவித்துள்ளது. ஒருவேளை அது போல வெளி வந்தால் இந்தியாவில் மிகப்பெரிய ஹிட் அடிக்கும் என்பது உறுதி.

கூகுள் (ஜிமெயில்) போலவே மைக்ரோசாப்ட் நிறுவனமும் தன்னுடைய Outlook [ஹாட்மெயில்] மின்னஞ்சலுக்கு இரட்டை அடுக்கு [Two step verification] பாதுகாப்பு வசதியைக் கொண்டு வரப்போகிறது. இந்த வசதி இந்த மின்னஞ்சலைப் பயன்படுத்தும் அனைவருக்கும் விரைவில் வரப்போகிறது. ஏறக்குறைய ஜிமெயில் தரும் வசதி போலவே இருக்கும் என்று கூறப்படுகிறது. ட்விட்டரும் இது போல வசதியைக் கொண்டு வரப்போகிறது. ஆப்பிள் கூட இது போல செய்து இருக்கிறது ஆனால், என்னுடைய கணக்கில் காணவில்லை.

அடிக்கடி மொபைல் எண்ணை மாற்றுபவர்கள் இரட்டை அடுக்கு பாதுகாப்பு வசதியை செயல்படுத்துவது சிக்கலையே தரும்.

Google Glass பற்றி கேவிப்பட்டு இருப்பீர்கள். கண் கண்ணாடியையே அசத்தலான தொழில்நுட்பத்தில் தரப்போகிறது. இதை கடந்த வருடம் அறிமுகப்படுத்திய போது பலரும் ஏப்ரல் 1 முட்டாள்கள் தினத்திற்காக கூறியது என்றே நினைத்தார்கள் [நான் கூட]. பின்னர் தான், இது பொய்யல்ல உண்மை என்று தெரியவந்தது.

கூகுள், இந்தக் கண்ணாடியை விரைவில் சோதனை முறையில் இருந்து புழக்கத்திற்கு விடப்போகிறது. இதன் தொழில்நுட்ப தகவல்கள் 25-inch HD display, 5 megapixel and 720p video, 16GB of flash memory [12GB are usable] Wi-Fi and Bluetooth.

கூகுள் கண்ணாடியை செம நக்கல் அடித்து பல காணொளிகள் வந்து விட்டன, அதில் இரண்டு .

மைக்ரோசாப்ட் ன் இயங்கு தளங்களுள் [OS] முக்கியமானது விண்டோஸ் XP. இதன் பிறகு விஸ்டா, விண்டோஸ் 7 மற்றும் விண்டோஸ் 8 என்ற மூன்று வெளியீடுகள் வந்து விட்டன. இருப்பினும் இன்னும் பலர் விண்டோஸ் XP யையே பயன்படுத்தி வருகிறார்கள். மைக்ரோசாப்ட் சமீபத்தில் 2014 ஏப்ரல் 8 முதல் தன்னுடைய சேவையை விண்டோஸ் XP க்கு நிறுத்தப்போவதாக அறிவித்துள்ளது.

ஐயையோ! அப்படியா!! நான் விண்டோஸ் XP தான் பயன்படுத்துகிறேன். எனக்கு இதனால் பாதிப்பு வருமா! என்று கேட்கிறீர்களா?

சேவையை நிறுத்துவது என்றால் 2014 ஏப்ரல் 8 க்குப் பிறகு இதற்கு Security patch அப்டேட் கிடைக்காது. அதாவது சுருக்கமா நீங்க விண்டோஸ் அப்டேட் செய்தால், இனி இதில் அப்டேட் வராது என்று கூறும். மற்றபடி நீங்கள் இயங்கு தளத்தை எவ்வளவு நாட்கள் வேண்டும் என்றாலும் தொடர்ந்து பயன்படுத்தலாம்.

இதனால் எனக்கு என்ன பாதிப்பு?

புதிதாக ஏதாவது பாதுகாப்பு குறைபாடு கண்டுபிடிக்கப்பட்டால் அதை சரி செய்ய மைக்ரோசாப்ட் உதவாது, விண்டோஸ் அப்டேட் கொடுக்காது. இதனால் உங்கள் கணினி பாதுகாப்பு குறைந்து இருக்கும். ஹேக்கர்கள் உங்க கணினியை முடக்க, அவர்கள் கட்டுப்பாட்டில் எடுக்க அதிக வாய்ப்பு. எனவே இதைப் பயன்படுத்தாமல் இருப்பதே நல்லது.

எதனால் மைக்ரோசாப்ட் இது போல சேவையை நிறுத்துகிறது?

மைக்ரோசாப்ட் விண்டோஸ் XP [2001] க்குப் பிறகு மூன்று இயங்கு தளங்களை வெளியிட்டு விட்டது. எனவே, இன்னும் அதனால் பழைய இயங்கு தளத்திற்கு சேவையை வழங்க முடியாது. காரணம், இதைப் பயன்படுத்துபவர்கள் எண்ணிக்கை குறைந்து விட்டது மற்றும் தொழில்நுட்பத்தில் பின் தங்கி விட்டது. அதோடு புதிய தயாரிப்புகளில் தங்கள் கவனத்தை செலுத்த இது போல செய்கிறார்கள். இது வழக்கமான ஒன்று தான்.

எளிமையாக கூறுவது என்றால் நீங்க உங்கள் பழைய சாதனத்தை ரிப்பேர் செய்ய கடைக்கு எடுத்துச் சென்றால் அவர்கள் “சார் / மேடம் இது ரொம்பப் பழைய மாடல்! இப்ப ஸ்பேர் ஸ்பார்ட்ஸ் இல்லை. நீங்க பேசாம இதை தூக்கிப் போட்டுட்டு புதுசு வாங்கிக்குங்க” என்று கூறுவதை கேட்டு இருக்கலாம். அதே தான் இது. Can Can .

உங்களில் யாருக்காவது நாம் இறந்து விட்டால் நாம் பயன்படுத்தும் இணையக் கணக்கு, அதில் உள்ள தகவல்கள் என்ன ஆகும்? என்று சந்தேகம் இருக்கலாம். கூகுள் இதை மனதில் கொண்டு ஒரு வசதியை தந்து இருக்கிறது. இதன் மூலம் நம்முடைய கணக்கை குறிப்பிட்ட காலம் பயன்படுத்தவில்லை என்றால் நம்முடைய கணக்கை / தகவல்களை அழித்து விடுங்கள் என்றோ / என்னுடைய நண்பருக்கு / கணவனுக்கு / மனைவிக்கு / சகோதரிக்கு / சகோதரனுக்கு கொடுத்து விடுங்கள் என்றோ இதில் நாம் குறிப்பிட முடியும். இதை நீங்கள் செயல்படுத்த https://www.google.com/settings/u/0/account/inactive செல்லுங்கள். மேலும் விரிவான தகவல்களுக்கு இங்கே.

ஃபேஸ்புக்கும் கிட்டத்தட்ட இது போல ஒரு வசதி வைத்து இருப்பது குறிப்பிடத்தக்கது. இங்கே சென்று பார்க்கலாம்.

கூகுள் தன்னுடைய பல்வேறு சேவைகளை [Voice, Talk / Messenger, Hangout] ஒரு Apps ல் கொண்டு வர திட்டமிட்டு இருப்பதாக ஒரு வந்ததி உலவுகிறது. இந்த வசதியின் பெயர் “Babel” என்று கூறுகிறார்கள். இது வதந்தியா உண்மையா என்று விரைவில் தெரிந்து விடும். இது போல வந்தால் நன்றாக இருக்கும். ஒரு Apps ல் அனைத்தையும் முடிக்கலாம். நாம் பயன்படுத்தும் Apps எண்ணிக்கைகள் குறையும்.

அடுத்த மாதம் சாம்சங் கேலக்சி S 4 வெளியாவதால் இது பற்றிய எதிர்பார்ப்பு அதிகரித்துள்ளது. இதை முன்பே பயன்படுத்திப் பார்க்க வாய்ப்புக் கிடைத்தவர்கள், இதனுடைய முந்தைய மாடலான S 3 பெரிய வெற்றியைப் பெற்றது போல இதுவும் வெற்றி பெறும் என்று கூறுகிறார்கள். S 3 ஒரு வருடத்தில் 100 மில்லியன் தொலைபேசிகள் விற்பனையானது குறிப்பிடத்தக்கது. ஆப்பிள் நிறுவனத்திற்கு கடும் சவாலாக சாம்சங் விளங்கி வருகிறது.

இதில் உள்ள தகவல்கள் பழையதாக இருக்கலாம். நான் அடிக்கடி எழுதுவதில்லை என்பதால் தொழில்நுட்பச் செய்திகளை உடனக்குடன் கூற முடிவதில்லை. தொழில்நுட்பச் செய்திகள் சில கொஞ்ச நேரம் தாமதமானாலே காலாவதி செய்தி ஆகி விடுகிறது. இதனால் காலாவதியாகாத செய்திகளாகப் பார்த்து கூற வேண்டியதாக இருக்கிறது . இதை விட என்னுடைய சினிமா பதிவுகளுக்கு இருக்கும் வரவேற்பு தொழில்நுட்ப பதிவுகளுக்கு இருப்பதில்லை. இருந்தும் தொழில்நுட்பப் பதிவுகளை நான் எழுதக் காரணம் தொழில்நுட்பச் செய்திகளின் மீது உள்ள என்னுடைய ஆர்வம் தான். யார் படிக்கிறார்களோ இல்லையோ இது போல தொடர்ந்து எழுதிக்கொண்டு தான் இருப்பேன் . விருப்பமுள்ளவர்கள் படிங்க.. மற்றவர்கள் இது போன்ற பதிவுகளை தவிர்த்து விடுங்க [Ignore it!].

கொசுறு 1

கண்களில் 20 CM நாடாப்புழு இருந்து பார்த்து இருக்கிறீர்களா? என்னால் நம்பவே முடியலை.. நீங்களும் பாருங்க. இதோட எப்படி இவர் நடமாடிக்கொண்டு இருந்தார் என்று ஆச்சர்யமாக உள்ளது.

கொசுறு 2

கடந்த முறை ஊருக்குச் சென்று இருந்த போது என்னுடைய அக்கா பணி புரியும் அரசு மருத்துவமனைக்கு சென்று இருந்தேன். பொது மக்கள், மருத்துவர்களுக்கு / அங்கு பணி புரிபவர்களுக்கு தரும் மரியாதை அளவிட முடியாது. செய்யாத போது வெளியே வந்து கண்டபடி திட்டுவதும் நடக்கும் . அங்கு வருபவர்கள் பெரும்பாலும் ஏழைகள் தான் என்பதால் மருத்துவர்கள் சிறு வேலை செய்தால் கூட அதை மிகப்பெரிய உதவியாக நினைத்து சந்தோசப்படுகிறார்கள். மருத்துவர்களை கடவுளுக்கு நிகரானவர்கள் என்று கூறுவார்கள் [அவர்கள் மீது உள்ள குற்றச்சாட்டுகள் தனி] அதை நீங்கள் மருத்துவமனைகளில் கண்டு இருப்பீர்கள்.

பலர் அரசு மருத்துவமனைகளில் அலட்சியமாகத் தான் இருப்பார்கள் ஆனால், அங்கு வருபவர்களிடம் கொஞ்சம் அன்பாக பேசினால் பொதுமக்கள் தரும் மதிப்பு அளவிட முடியாதது. புரிந்து கொள்ளாமல் சண்டைப் போடும் பொதுமக்களையும் அதிகம் பார்த்து இருக்கிறேன். அரசு மருத்துவமனை என்றில்லை எந்த ஒரு அரசு அலுவலகத்திலும் யாராவது ஒருவர் அன்பாக / பொறுப்பாக / நியாயமாக நடந்து கொண்டால் நாம் அடையும் சந்தோசம் மிகப்பெரியதாக இருக்கும் காரணம் அது போல நடப்பவர்கள் குறிப்பிடத்தக்க அளவிலேயே இருக்கிறார்கள். தனியார் நிறுவனம் என்றால் நாம் சண்டைப் போட முடியும் ஆனால், அரசு அலுவலகத்தில் சரியாக செய்யவில்லை என்று சண்டைப் போட்டால், வேண்டும் என்றே ஏதாவது காரணம் கூறி தாமதப் படுத்துவார்கள் / சிக்கலை ஏற்படுத்துவார்கள்.

எனக்கு இது போல தருணங்களில், நாம் இந்த இடத்தில் இருந்தால் நன்றாக வேலை செய்யலாம் என்று தோன்றும். தனியார் நிறுவனங்களில் பெரும்பாலும் நீங்கள் என்ன தான் கடுமையாக உழைத்தாலும் பணம் / பதவி என்று வரும் ஆனால், மரியாதை என்பது இங்கு கிடைப்பது போல கிடைக்காது காரணம் அது மக்கள் சேவை / அரசாங்க அதிகாரி என்ற அதிகாரம். கடை நிலை ஊழியர் கூட முதலமைச்சர் கெத்தோடு பேசிக்கொண்டு இருப்பார். இக்கரைக்கு அக்கரை பச்சை .

இது இப்படி என்றால், கோவை பாஸ்போர்ட் அலுவலகத்தில் இன்ப அதிர்ச்சி கொடுத்து விட்டார்கள். இது பற்றி விரைவில் எழுதுகிறேன், மற்றவர்களுக்கும் பயனுள்ளதாக இருக்கும்.

கொசுறு 3

தனுஷ் ஒரு ஹிந்திப் படத்தில் நடித்து வருவது பற்றி நீங்கள் கேள்விப்பட்டு இருக்கலாம். அந்தப்படத்தின் பெயர் “Raanjhanaa“. இதன் முன்னோட்டத்தை புதன் வெளியிட்டார்கள், படம் ஜூன் 21 வெளியாகிறது. “துள்ளுவதோ இளமை” படத்தில் பார்த்த தனுஷ் எங்கே தற்போதுள்ள தனுஷ் எங்கே!! அபிரிமிதமான வளர்ச்சி. இவர் தன்னை சரியாகப் பயன்படுத்திக்கொண்டு இருக்கிறார். நடிகர், பாடகர், பாடலாசிரியர், தயாரிப்பாளர் தற்போது ஹிந்திப் படம் என்று இவரது வளர்ச்சி ஏறுமுகத்தில் தான் உள்ளது. இவரது சமீப படங்கள் சில தோல்வி அடைந்து இருந்தாலும் திறமையில் சீரான வளர்ச்சி என்று தான் கூற வேண்டும்.

சிம்புவும் மிகத் திறமையான நடிகர் [பலர் ஒத்துக்க மாட்டீங்க] ஆனால், அதை சரியான முறையில் பயன்படுத்தாமல் வீணடித்துக்கொண்டு இருக்கிறார்.

இந்தப் படத்தின் இயக்குனர் ஆனந்த் ராய். இசை A.R ரகுமான். ரகுமானின் இசையில் நடித்து இராத தனுஷ், “மரியான்” மற்றும் “Raanjhanaa” என்று இரு படங்களில் தொடர்ந்து நடிக்கிறார்.

கொசுறு 4

நண்பரும் என்னுடைய தளத்தை நீண்ட நாட்களாக படித்து வருபவருமான “யாசின்” க்கு குழந்தை பிறந்துள்ளது, அதை நம்முடன் பகிர்ந்துள்ளார். அவரது குழந்தை எல்லா வளமும் நலனும் பெற இறைவனை வேண்டுகிறேன். யாசின் என்னுடைய மனமார்ந்த வாழ்த்துக்கள் .

இணைய தொழில்நுட்பச் செய்திகள் [25-04-2013] is a post from: கிரி Blog

RBI புதிய உத்திரவை அமுல்படுத்தியிருக்கிறது. இதன் படி 2013 ஜூன் 30 முதல் புதிய மேம்படுத்தப்பட்ட பாதுகாப்பு வசதிகளைக் கொண்ட கடனட்டையைப் [Credit Card] பயன்படுத்த வேண்டும் என்று கூறி இருக்கிறது. இதனால் நீங்கள் கடனட்டையைப் பயன்படுத்தி ஏதாவது பொருள் வாங்கினால் / சேவையைப் பயன்படுத்தினால் அதற்கான கடவுச்சொல்லை அதில் நீங்கள் பதிய வேண்டும், அதன் பிறகே உங்கள் கடனட்டையில் இருந்து பணத்தை எடுக்க முடியும். இதன் மூலம் யாராவது உங்கள் கடனட்டையை திருடினாலும் உங்கள் கடவுச்சொல் தெரியவில்லை என்றால் பயன்படுத்த முடியாது.

சிங்கப்பூரில் உங்களுடைய பற்று அட்டையைப் [Debit Card] பயன்படுத்தினால் உங்களுடைய கடவுச்சொல்லையும் அந்த சாதனத்தில் பதிய வேண்டும், இல்லை என்றால் அதைப் பயன்படுத்த முடியாது. இது போல ஒரு வசதி நம் ஊரில் ஏன் வரவில்லை.. எப்போது இது போல வரும் என்று அடிக்கடி நினைப்பதுண்டு. தற்போது இது கடனட்டைக்கு வந்து இருக்கிறது. உண்மையிலேயே மிகவும் பயனுள்ள சேவை இது. புதிய கடனட்டை உங்களுக்கு விரைவில் வரும் என்று கூறி இருக்கிறார்கள்.

எங்க கோபியில் கடந்த வாரம் 1 மணி நேரம் கடும் மழை பெய்தது என்று சந்தோசப்பட்டால், அடித்த சூறைக் காற்றில் எங்கள் பகுதியில் இருந்த இரண்டு வேப்ப மரம் மற்றும் வாழை மரம் போட்டு இருந்தவர்கள் அனைவரது மரமும் முறிந்து விட்டதாம். அரசாங்கமும் மரம் வளர்ப்பதில் ஆர்வம் காட்ட மாட்டேன் என்கிறார்கள், இருக்கும் மரத்தையும் வெட்டிக்கொண்டு இருக்கிறார்கள். அப்படியும் தப்பித்து இருக்கும் மரத்தையும் இப்படி காற்று காலி செய்து விடுகிறது. என்னமோ போங்க!

குவைத்தில் ஆறு வருடங்களுக்குப் பிறகு மூன்று பேருக்கு தூக்குத் தண்டனை கொடுக்கப்பட்டது. மூவருக்கும் தண்டனை கொடுக்கப்பட்ட இடம் கார் நிறுத்தும் இடத்தில். இதில் ஒருவர் கடைசி ஆசையாக, சிகரெட் புகைக்க வேண்டும் என்று கேட்டதால், அவருக்கு கை கட்டுகள் அவிழ்க்கப்படாமல் புகைபிடிக்க அனுமதிக்கப்பட்டு பின் தூக்கிலேற்றப்பட்டார். Image Credit – தட்ஸ்தமிழ்

தூக்குத் தண்டனை என்றதும் இந்திய சம்பவம் நினைவிற்கு வருகிறது. டெல்லி என்றாலே இந்தியாவின் தலைநகரம் என்ற நிலை மாறி நம் அனைவரின் நினைவிற்கு மட்டுமின்றி உலகில் பலரின் அனைவரின் நினைவிற்கு வருவது “பாலியல் கொடுமைகள்” என்றாகி விட்டது.

சமீபத்தில் 5 வயது பெண் குழந்தையை இருவர் [முதலில் தெரிந்தது ஒருவர் பின் அவரிடம் பெற்ற தகவலில் இன்னொருவருக்கும் தொடர்பு இருந்தது அறியப்பட்டது] வன்புணர்வு செய்தது பற்றி கேள்விப்பட்டு இருப்பீர்கள். நீங்கள் கேள்விப்படாதது அந்தப் பெண் குழந்தை எந்த நிலையில் இருந்தது என்பது! சிலர் படித்து இருக்கலாம், என்னெவென்று தெரியாதவர்கள் நீங்கள் தெரிந்து கொள்ளாமல் இருப்பதே நல்லது. இது போல ஒரு மோசமான செயலை நான் இதுவரை கேள்விப்பட்டதே இல்லை, ஹாரர் படங்களில் கூட பார்த்தது இல்லை. இதில் ஒருவர் திருமணத்திற்கு முன் தன் மனைவியை வன்புணர்வு செய்தவர். பஞ்சாயத்தார் அந்தப் பெண்ணையே அவருக்கு திருமணம் செய்து வைத்துள்ளார்கள்.

இவர்கள் இருவரையும் திட்டும் முன் உருப்படாத சட்டத்தையும், எப்போதும் போல ஒரு சப்பை அறிக்கை விடும் நமது பிரதமர் மம்மம் சிங் அவர்களையும் என்ன கூறி திட்டுவது? அரசியல்வாதிகள் அனைவரும் முழுப் பாதுகாப்பில் இருப்பதால் தான் சாமானியர்களின் உணர்வு புரிவதில்லை.

&*&#^%$#%^&& இந்தத் திட்டு யாருக்கு என்றால், நம்ம மனித உரிமை மக்களுக்கு. இதுக்கும் ஏதாவது ஒரு நொள்ளைக் காரணத்தைக் கூறி கட்டுரை எழுதிட்டு இருக்கும் இரக்க சிந்தனை கொண்டவர்களுக்கு. மனசொடிஞ்சு சொல்றேன்.. உங்களுக்கெல்லாம் உங்கள் குடும்பத்தில் ஒரு சம்பவம் நடக்காதவரை மனித உரிமை மண்ணாங்கட்டி உரிமைனு பெரிய லபக்கு மாதிரி தான் பேசிட்டு திரிவீங்க! நல்லா இருங்க.

இதே முன்பு என்றால், இது பற்றி பெரிய கட்டுரை எழுதி பொங்கி இருப்பேன். தற்போதெல்லாம் விரக்தியானதால் இந்த சிறு புலம்பலோடு நிறுத்திக்கொள்கிறேன். இதைத் தவிர வேற என்னங்க பண்ணுறது…! நாம என்ன சூப்பர் மேனா! இது போல நடக்கும் இடங்களில் சென்று அடித்து துவைக்க. என்னோட பசங்களை நல்ல எண்ணங்களோடு வளர்க்கிறேன், இது தான் என்னால் செய்ய முடிந்த ஒன்று.

இன்னும் நிறையக் கூற மனசு நினைக்குது ஆனால், என்ன கத்தினாலும் ஒன்றும் நடக்கப்போவதில்லை எனும் நிதர்சனம் புரியும் போது 1000 மனக் குமுறல்களில் இது 1001 என்று நினைத்து, இதை வெறுப்புடன் கடந்து செல்கிறேன்.

இது யார் என்று தெரிகிறதா? Image Credit – உண்மைத் தமிழன்.

காங்கிரஸ் ஃபேஸ்புக் பக்கம் திறந்தாலும் திறந்தார்கள், பலருக்கு பொழுது போக்கே அந்த பக்கம் தான் என்றாகி விட்டது. அதுக்கு வரும் கமெண்ட்ஸ் எல்லாம் படித்தால், கவலை மறந்து சிரிக்க முடியும் . இவர்களாகவே சூனியம் வைத்துக்கொண்டார்கள். சொல்ல முடியாது.. அப்புறமா ரொம்ப ஓட்டுறாங்க என்று பக்கத்தையே நீக்கினாலும் ஆச்சர்யப்பட எதுவுமில்லை.

நீங்க செய்தித் தாள்களில் கவனித்து இருக்கலாம் ஏதாவது பாதிக்கப்பட்டவரைப் பற்றி எழுதும் போது “பெயர் மாற்றப்பட்டுள்ளது” என்று வேறு ஒரு பெயர் போட்டு இருப்பார்கள். அப்படி என்றால் வேறு பெயரில் உள்ளவர்கள் பெயர் வந்தால் தவறில்லையா! என்ன லாஜிக் இது!!

என் மகன் வினய்க்கு கோடை விடுமுறை விட்டு விட்டார்கள். “அப்பா! எனக்கு பிஃப்டி டேஸ் லீவ்..!” என்று சந்தோசமாகக் கூறுகிறான். குழந்தைகளை பள்ளியில் சக்கையாகப் பிழிந்து விடுகிறார்கள். LKG க்கு கூட ஏகப்பட்ட வீட்டுப் பாடம் கொடுக்கிறார்கள். பார்த்தாலே எனக்கு கடுப்பு ஆகிறது. உண்மையிலேயே நம் ஊரில் கல்வி என்பது ஒரு தண்டனைக்குரிய காலம் போல ஆகி விட்டது.

என்னோட அக்கா கணவருக்கு சென்னையில் இருந்து மாற்றல் ஆகி ஹைதராபாத்திற்கு கடந்த மூன்று வருடம் முன்பு சென்றார்கள். சென்னையில் படித்த பள்ளியில் படிக்க ரொம்ப டார்ச்சர் செய்ததாகவும் அங்கே ரொம்ப நன்றாக நடத்துவதாகவும் கூறினார்கள். அங்கு சென்ற பிறகு என்னோட அக்கா பையன் நன்றாகப் படிப்பதாகக் கூறினார். இந்த வருடம் திரும்ப சென்னை மாற்றலாகி வருகிறார்கள். என்ன ஆகப்போகிறதோ! பள்ளிக்கட்டணம் நினைத்தால் வயிற்றை கலக்குகிறது. கல்வியை லாபமான தொழில் ஆக்கி விட்டதால் இனி இதெல்லாம் எங்கே போய் முடியுமோ! ஒரு குடும்பத்தின் செலவில், இரு பெரும் செலவுகளாக வீட்டு வாடகையும், பள்ளிக்கட்டணமும் தான் முன் நிற்கிறது.

நீண்ட மாதங்களுக்குப் பிறகு “நீங்களும் வெல்லலாம் ஒரு கோடி நிகழ்ச்சி” பார்த்தேன். மும்பையில் இருந்து வந்த ஒருவர் கலந்து கொண்ட நிகழ்ச்சி [அதற்கு முன், கமல் கலந்து கொண்ட நிகழ்ச்சி ஒரு பகுதி பார்த்தேன்]. அவர் பேசியது ரொம்ப நன்றாக இருந்தது.. எதார்த்தமாகப் பேசினார். எனக்கு இன்னொரு மிகப் பெரிய ஆச்சர்யம் அவரின் அம்மா எந்த சேட்டையும் செய்யாமல் இருந்தது.

அழுது, அதை ஒரு செம சீன் ஆக்கி, விஜய் டிவி அதை ஸ்லொவ் மோசனில் காட்டி நம்மை கண்ணீர் விட வைத்து என்று கொடுமைப் படுத்தி இருப்பார்கள் ஆனால், இவர் எந்த பெரிய அதிர்ச்சியும் காட்டாமல் இருந்தது, எனக்குப் பெரிய அதிர்ச்சியாக இருந்தது . பிரகாஷ்ராஜ், நீங்க என்ன நினைக்கறீங்க? என்று அவரது அம்மாவையும் அக்காவையும் அடிக்கடி கேட்டு கடுப்பேத்திக்கொண்டு இருந்தார். அவர்களும் எத்தனை முறை தான் அதற்கு பதில் சொல்வார்கள்! நான் பார்த்தவரை 25,00,000 வெற்றி பெற்று இருந்தார். அதன் பிறகு என்ன ஆனது என்று தெரியவில்லை.

நேற்று சிங்கப்பூர் “வண்ணத்திரை” தொலைக்காட்சியில் “கிழக்கு சீமையிலே” படம் போட்டார்கள். இதில் ஒரு காட்சியில் பாண்டியனின் அப்பாவாக வருபவர் (பெயர் நினைவில்லை) குடித்து விட்டு மாட்டுக்கு மூக்கணாங் கயிறு கட்டும் போது மாடு முட்டி இறந்து விடுவார். அதற்கு முன் மாடு பிடித்து வருபவரிடம் பேசுவார்.. அந்த மாடு பிடித்து வருபவர் “S.J சூர்யா”. அடுத்த முறை இந்தக் காட்சி பார்க்க நேர்ந்தால் கவனித்துப் பாருங்கள்.

இதோடு இன்னும் கொஞ்சம். இந்தப்படம் வரும் முன்பு பாரதிராஜா எடுத்த நாடோடி தென்றல், கேப்டன் மகள் என்று இரு படங்களும் ஓடவில்லை. தயாரிப்பாளர் கலைப்புலி தாணு ஏறக்குறைய தனது சொத்துகளை வைத்து மிகப்பெரிய ரிஸ்க் எடுத்து படத்தை எடுத்தார். இளையராஜாவும் பாரதிராஜா படங்களுக்கு இசை அமைப்பதை நாடோடி தென்றல் படத்தோடு நிறுத்தி விட்டார் கேப்டன் மகள் இசை கூட ஹம்சலேகா தான்.

இதில் A.R ரகுமான் இசையமைக்கப் போகிறார் என்றதும் பலரும் கிண்டல் அடித்தார்கள். முதல் முறையாக கிராமத்து இசை அதுவும் பாரதிராஜா படம் ஆனால், படம் வெளியாகி பெரிய வெற்றி பெற்று இசையும் பட்டையக் கிளப்பியது அனைவரும் அறிந்தது. இந்தப் படத்தின் இசை மாபெரும் வெற்றி பெற்றதும் இளையராஜா கொஞ்சம் அதிர்ச்சி ஆகி இருப்பார் என்று நினைக்கிறேன் . இதில் வரும் “எனக்கெதுக்கு பொண்டாட்டி” அப்போது சர்ச்சையைக் கிளப்பிய பாடல். ஒவ்வொருவருக்கும் ஒவ்வொரு காலம் பொற்காலம்!

கடனட்டை பாதுகாப்புகள் – தண்டனைகள் – இது யார்? is a post from: கிரி Blog

பாலாவின் “பரதேசி” படம் குறித்து பல்வேறு விமர்சனங்களை படித்து இருப்பீர்கள். சிலர் உலகப்படம் என்றும் சிலர் சுமாரான படம் என்றும் தங்களின் ரசனைக்கு ஏற்பவும் பாலா படம் என்பதாலும் குறிப்பிட்டு இருக்கிறார்கள். விகடன் உட்பட பெரும்பான்மையானவர்கள் இதை மிகவும் புகழ்ந்து எழுதி இருக்கிறார்கள்.

இந்தப்படத்தின் மூலக்கதையான “எரியும் பனிக்காடு” புத்தகத்தை பாலா படம் எடுக்கிறார் என்பதற்காகவே வாங்கிப் படித்தேன் காரணம், நான் பாலா படங்களின் தீவிர ரசிகன். இது பற்றி ஏற்கனவே நிறைய எழுதி இருக்கிறேன் என்பதால் மீண்டும் அதையே விளக்கி மொக்கை போட விரும்பவில்லை. நேராக விசயத்திற்கு வருகிறேன்.

“எரியும் பனிக்காடு” புத்தகம் ஏற்படுத்திய பாதிப்பில் பாதி கூட “பரதேசி” என்னை பாதிக்கவில்லை. உண்மையில் ஆர்வமாகப் படம் பார்க்கச் சென்ற என்னைப் படம் ஏமாற்றி விட்டது என்பது தான் உண்மை. இதனால் தான் படத்தின் விமர்சனம் கூட எழுதத் தோன்றவில்லை. உங்களில் ஒரு சிலர்… சரி! இரண்டு பேராவது எரியும் பனிக்காடு பற்றி நான் எழுதியதால் “பரதேசி” விமர்சனம் எழுதுவேன் என்று நினைத்து இருக்கலாம்.

இது பட விமர்சனம் அல்ல. அந்த அருமையான புத்தகத்தை சொதப்பிய பாலாவைப் பற்றிய விமர்சனம். நீங்கள் கூறினால் நம்ப மாட்டீர்கள்… அந்தப் புத்தகத்தின் வலிமையில் பாதி கூட படமில்லை. படத்தில் ஏகப்பட்ட காட்சிகள் அழுத்தங்கள் இல்லை.

இந்தப்புத்தகத்தில் மிகவும் வறட்சியாக, ஒருவேளை சாப்பிடக்கூட வழி இல்லாத மக்களாகத் தான் துவக்கத்தில் வருவார்கள். இதன் காரணமாகவே என்ன வேலை கிடைத்தாலும் சரி என்ற நிலையில் இருப்பார்கள். பரதேசியில் அப்படியா இருக்கிறது? நெல்லு சோறுக்காக எதிர்பார்த்து இருக்கிறார்கள் என்ற அளவிலே இருக்கிறது மற்றபடி பஞ்சத்தால் பாதிக்கப்பட்டவர்கள் என்ற தாக்கத்தை யார் மனதிலும் ஏற்படுத்தி இருக்காது.

இது மாதிரி நிறைய இருக்கிறது. எனக்கு கூறவே சலிப்பாக இருக்கிறது.

நான் இதை எழுத நினைத்ததற்கு முக்கியக் காரணம் தேயிலை தோட்டங்களில் இறந்த, வேதனையை அனுபவித்த, வெள்ளைக்காரர்களின் கொடுமையை அனுபவித்த அப்பாவி மக்களின் கஷ்டம் வெளியுலகிற்கு தெரியாமலே போய் விடக்கூடாது என்று அவர்கள் அனுபவித்த கொடுமைகளை அங்கு பணி புரிந்த மருத்துவர் பி.எச்.டேனியல் “Red Tea” என்ற புத்தகமாகக் கொண்டு வந்தார். இதைத் தான் தமிழில் “எரியும் பனிக்காடு” என்று முருகவேள் என்பவர் மொழி பெயர்த்தார்.

இப்படிப் பட்ட ஒருவரை கிறித்துவ மதமாற்றம் செய்பவராகக் காட்டி, அவரை காமெடி பீஸ் போல ஆடவிட்டு படத்தில் காட்டியிருப்பதை பார்த்து நான் அதிர்ச்சி அடைந்து விட்டேன். இந்த மருத்துவர் இல்லை என்றால், இந்தப் “பரதேசி” படமே இல்லை. மக்களின் எந்தக் கஷ்டமும் இந்தப் படத்தில் வர வாய்ப்பில்லை. அப்படி இருக்கும் போது இவரை உயர்த்தி கூறவில்லை என்றாலும் இது போல கேவலப்படுத்தி இருக்க வேண்டாம்.

மருத்துவருடைய மகள் இதைப் பார்த்தால், எவ்வளவு வருத்தப்பட்டு இருப்பார்கள் என்று நினைத்தாலே கஷ்டமாக உள்ளது. இந்தப்படத்திற்கு முருகவேள் அவர்கள் தான் மருத்துவர் மகளிடம் பேசி அனுமதி வாங்கிக்கொடுத்தாராம். அவருக்கு தற்போது எப்படி இருக்கும்? அவரும் புலம்பி எழுதி இருக்கிறார்.

இந்த மருத்துவர் பற்றி குறிப்பிடாமலே எடுத்து இருந்தால் கூட சரி என்று விடலாம் ஆனால், பலரின் நிலையை உலகிற்கு உணர்த்திய மற்றும் சங்கம் அமைத்து அவர்கள் கஷ்டம் போக்க உதவிய ஒருவரை இப்படி கேவலப்படுத்தி காட்சி அமைத்தால் இதை என்னவென்று கூறுவது?

எந்த ஒரு மதத்திற்கும் கிண்டலாக / குற்றச்சாட்டாக ஒரு பொது அடையாளம் உள்ளது போல், கிறித்துவ மதத்திற்கு மத மாற்றம் அதிகம் செய்பவர்கள் என்ற பொதுப்படையான பேச்சு உள்ளது. இதை யாரும் மறுக்க முடியாது. தினகரன் கோஷ்டிகள் ஏசு வருகிறார், அழைக்கிறார் என்று இதே வேலையாக பிரச்சாரம் செய்து கடுப்படித்துக்கொண்டு இருப்பதை கவனிக்காத ஒருவர் கூட இருக்க முடியாது.

இதைத் தான் பாலா எடுத்ததாக நினைக்கலாம் ஆனால், இதைக் கூற இந்தப்படம் / இந்தக் கதாப்பாத்திரம் பொருத்தமானது அல்ல. “நான் கடவுள்” படத்தில் ஒரு பெரியவர், இந்துக் கடவுளை “தேவடியா பய” என்று திட்டுவார். உண்மையில் அந்தக் காட்சி எனக்கு எந்த விதத்திலும் தவறாகத் தோன்றவில்லை (இது என்னுடைய தனிப்பட்ட கருத்து) காரணம் அங்கு நிலவிய சூழ்நிலை அப்படி!

அது போல ஒரு சூழ்நிலை இந்தப்படத்தில் வரவேண்டிய அவசியமில்லை அப்படியே வர வேண்டி இருந்தாலும் அது இந்த மருத்துவர் கதாப்பாத்திரத்தை குறிப்பிட்டு வரவேண்டிய எந்த அவசியமும் இல்லை. வேறு ஏதாவது கதாப்பாத்திரத்தை இது போல காட்டி இருந்தால் சரி! நடப்பதைத் தானே காட்டி இருக்கிறார் என்று நினைத்து இருக்கலாம்.

புத்தகத்தையும் சொதப்பி எழுதிய அவரையும் தவறாகக் காட்டி, பாலா செய்து இருப்பது மிகவும் தவறான செயல்.

இந்தப்புத்தகத்தை படிக்காமல் படம் பார்த்தவர்கள் மட்டுமே படத்தைப் புகழ முடியும்! படித்தவர்கள் நிச்சயம் கடுப்பு தான் ஆகி இருப்பார்கள். இந்தப்புத்தகம் படிக்காதவர்கள் “ஏங்க! நாங்க தான் புத்தகமே படிக்கலையே, எங்களுக்கு படத்தில் தவறாக ஒன்றும் தோன்றவில்லை” என்று கூறினால் அதில் ஒரு நியாயம் உள்ளது ஆனால், அனைத்தும் தெரிந்த “பாலா” இது போல எடுத்து இருப்பது எந்த விதத்திலும் நியாயமில்லை.

படத்தில் பலர் அழுகிறார்கள், அடிபடுகிறார்கள் ஆனால், நம் மனதில் அதன் தாக்கமே இல்லை. “பாவம்” என்கிற அளவில் உள்ளது அவ்வளவே. கதாப்பாத்திரத்தோடு ஒன்ற வேண்டிய நாம், வெளியே இருந்து வேடிக்கை பார்ப்பது போல உள்ளது. இப்பவும் படம் சொதப்பியதைப் பற்றிக் கூட எனக்கு வருத்தமில்லை ஆனால், இந்தப் புத்தகம் எழுதியவரையே சொதப்பி விட்டாரே பாலா! என்று நினைக்கும் போது தான் வருத்தமாக உள்ளது.

நான் கூறுவதை நம்பவில்லை என்றால் “எரியும் பனிக்காடு” புத்தகம் வாங்கிப் படித்துப் பாருங்கள். அந்தப் புத்தகத்திற்க்கும் இந்தப் படத்திற்கும் ஏணி வைத்தால் கூட எட்டாது.

பாலா ரசிகன் என்பதால் அவர் செய்யும் அனைத்தையும் சரி என்று கூறி வாதாடும் வேலையை என்னால் நிச்சயம் செய்ய முடியாது. தவறாக நினைத்தால் நினைத்துக்குங்க.. அதைப் பற்றி எனக்கு கடுகளவும் கவலையில்லை.

Read: எரியும் பனிக்காடு – உண்மைச் சம்பவங்களின் தொகுப்பு

கொசுறு 1

கேடி பில்லா கில்லாடி ரங்கா, சென்னையில் ஒரு நாள் படங்கள் பார்த்தேன். கேடி பில்லா கில்லாடி ரங்கா பெரிய வெற்றி பெற்று இருக்கிறது. படத்தில் கதையில்லை ஆனால் காமெடி உள்ளது அதனால் ஓகே. சிவ கார்த்திகேயன் இன்னும் மிமிக்ரி செய்வதை படங்களில் தொடரக்கூடாது. இது மக்கள் மனதில் அவரை ஒரு ஹீரோவாக நிலை நிறுத்தாது. இந்தப் பட வெற்றிக்குப் பிறகு சம்பளம் எக்கச்சக்கமாக ஏற்றி விட்டார். காற்றுள்ள போதே தூற்றிக்கொள்கிறார்.. சரி தானே! இவரது அடுத்த படம் தனுஷ் தயாரிப்பில் “எதிர் நீச்சல்” வெற்றி பெற்றால் கையில பிடிக்க முடியாது . விமல் தான் பரிதாபமாக நிற்கிறார்.

சென்னையில் ஒரு நாள் படத்தில் ஏகப்பட்ட நட்சத்திரங்கள் நடித்து இருந்தும் வெகு சிலரே இயல்பான நடிப்பை வெளிப்படுத்தி இருந்தனர். மற்றபடி செயற்கையாகத் தான் இருந்தது. ஒவ்வொரு நிமிடமும் முக்கியம் எனும் நிலையில் பிரசன்னாவிடம் சேரன் பொறுமையாக பேசுவது, மெதுவாக நடப்பது என்று கொஞ்சம் கடுப்பாகத் தான் இருந்தது. சரத் நடிப்பு படத்திற்கு பொருத்தமாக இல்லை. விபத்தைப் பற்றி படம் எடுக்கும் போது, செல்போனில் பேசிக்கொண்டு சேரன் காரை ஓட்டுவது முரண்பாடாக உள்ளது. செம விறுவிறுப்பாக எடுத்து இருக்க வேண்டிய படத்தை, சில காட்சிகளில் கொட்டாவி வரும்படி எடுத்து இருக்கிறார்கள். படம் நல்ல கருத்தை கூறுகிறது என்ற அளவில் மட்டுமே இதை பாராட்ட முடிகிறது மற்றபடி எனக்கு திருப்தி அளிக்கவில்லை.

நடிகர் சூர்யா நடிகராகவே வந்து கடைசியில் உடல் உறுப்பு தானம் பற்றி பேசுகிறார். NVOK ல் பேசுவது போல பேசிக்கொண்டு இருந்தார். கொஞ்சம் இயல்பா பேசுனா என்ன சூர்யா…!

கொசுறு 2

தனுஷ் “மரியான்” பட முன்னோட்டம் பார்த்தீங்களா! A R ரகுமான் பின்னணி இசை நன்றாக உள்ளது. தனுஷ் இருக்கும் உடம்புக்கு இது போல அடிப்பதைப் பார்த்தால் சிரிப்பு தான் வருகிறது. படம் முழுவதும் இப்படி எடுத்து இருக்க மாட்டார்கள் என்று நம்புவோமாக. படம் பார்க்க ஆவலாக உள்ளேன். முன்னோட்டங்கள் “புதுப்பேட்டை” படம் மாதிரி இருந்தது.

கொசுறு 3

எனக்கு திடீர்னு ஒரு விபரீத ஆசை வந்து விட்டது. நம்ம சாம் ஆண்டர்சன் படமான “யாருக்கு யாரோ” படத்தை இந்த வாரம் பார்க்கலாம் என்று… . நோ நோ அழப்படாது!

பரதேசியும் எரியும் பனிக்காடும் is a post from: கிரி Blog