Green wave club

2012-05-11T01:18:00.001-07:00

A someone who I admire

And at the end if you want to ask about doing research just ask me I ‘m happy to

Ногоон Давалгаа Клуб Их дээд сургуулийн оюутны холбоодтой уулзлаа

2012-03-14T23:26:00.000-07:00

Монгол-Германы Гүүр ТББ-ын дэргэдэх Ногоон Давалгаа Клуб 2012 онд клубын гишүүдийг нэмэгдүүлэх, идэвхжүүлэх мөн бусад ижил төстэй үйл ажиллагаа явуулдаг төрийн бус байгууллага, Холбоо болон Клуб-тэй хамтын ажиллагааг өргөжүүлэх тал дээр түлхүү анхаарч ажиллахаар болсон билээ. Энэ зорилгын хүрээнд Их дээд сургуулийн Оюутны төлөөлөл болох Оюутны холбоо болон төрийн бус байгуулагуудын төлөөлөлтэй хийх уулзалтыг 2012 оны 3-р сарын 14 өдөр ХБНГУ-ын Элчин сайдын яам дээр зохион байгууллаа.

Энэхүү уулзалтанд МУИС-ийн Оюутны Холбоо- Оюутан Конгресс, МУБИС-ийн ОХ, ХААИС-ийн ОХ, Хүмүүнлэгийн Ухааны Их Сургуулийн ОХ зэрэг их дээд сургуулийн оюутны холбооны тэргүүн, дарга нар түүнчлэн World Club, Green bell Club-ын төлөөлөл болох нийт 17 оюутан залуус оролцлоо.

Уулзалтын үеэр Их дээд сургуулийн оюутан залуусын дунд Экологийн боловсрол тэр дундаа зохистой хэрэглээ, байгаль орчинд хандах хандлага сул байгаа талаар Оюутнууд ярьж байлаа. Тиймээс Монгол- Германы Гүүр болон Ногоон давалгаа Клуб-тэй энэ тал дээр хамтран ажиллах хүсэл сонихрол их байгаагаа илэрхийлж цаашид хэд хэдэн төслийг хамтран хэрэгжүүлж залуусын экологийн боловсролыг дээшлүүлэх, ногоон байгууламжийг бий болгох тал дээр хамтран ажиллахаар боллоо.

НОГООН СУВАГ-КИНО ҮДЭШ

2011-11-06T20:56:00.000-08:00

Монгол-Германы Гүүр ТББ-ын дэргэдэх Ногоон давалгаа клуб Үе тэнгийн хүүхэд залуустаа хандаж олон төрлийн арга хэмжээ зоион байгуулдаг билээ. Энэ удаад бид Ногоон Суваг-Кино үдшийг амжилттай зохион байгууллаа.

2011 оны 11-р сарын 1-ний 19 цагт M-Club-ын M-Cinema-д Ян Артус Бертнардын HOME хэмээх баримтат киног толилуулсан бөгөөд дэлхийн үүсэл гарлын түүх хийгээд хүн байгалийн харилцан хамаарал, байгаль орчны тулгамдаж байгаа асуудлуудыг хөндөөд зогсохгүй тэдгээрээс гарах арга зам шийдлийг харуулсан энэ гайхамшигт бүтээлийг хамтдаа үзэж сонирхон үзэл бодлоо солилцсон нь энэ арга хэмжээний давуу тал байлаа. Кино өдөрлөгт ХААИС-ийн Др. Проф. Ундармаа багш маань хүрэлцэн ирж Монгол орны хөрсний доройтол, цөлшилт хийгээд тулгамдаж буй асуудлын талаар мэдээлэл болон үнэтэй зөвлөгөө өгсөн юм.

Кино өдөрлөгт 50 гаруй зочид, үзэгчид ирсэн бөгөөд кино өдөрлөгийн үер шугам сүлжээнд гэмтэл гарч тог тасарсан боловч байгаль орчны төлөөх энэхүү арга хэмжээнд ирсэн зочид үзэгчид маань энэ бүхэнд төвөгшөөлгүй эрчим хүч, агааржуулагч хэрэглэхгүй байгалд ээлтэй арга хэмжээ болж байна хэмээн бэлэгшээн хүлээн авсанд талархал илэрхийлье.

Энэ удаагийн кино өдөрлөгийг зохион байгуулахад хамтран ажилласан Монгол Германы Гүүр ТББ, CIM, GIZ байгууллагууд болон Ногоон Хонх ТББ-т “Ногоон давалгаа” Клубын зүгээс талархал илэрхийлье. Кино өдөрлөгөөс олсон орлогыг гэр хорооллын эмзэг бүлгийн хүүхдүүдэд утааны тортогоос хамгаалах зориулалтын маск авч бэлэглэх арга хэмжээнд хандивлах болно.

Оролцогч Та бүхний Эх дэлхийгээ хайрлан хамгаалах, агаарын бохирдлоос үүссэн хорт утаанд хамгийн их хордож байгаа гэр хороолын хүүхдүүдэд туслах ариун үйлс тань үргэлж өөдрөг байх болтугай!

Монгол-Германы Гүүр ТББ-ын дэргэдэх

НОГООН ДАВАЛГАА КЛУБ

Богино хэмжээний шүлэг болон гар зургийн уралдаан

2011-10-24T05:45:00.000-07:00

“УУР АМЬСГАЛЫН ӨӨРЧЛӨЛТИЙН НӨЛӨӨГӨӨР”
богино хэмжээний шүлэг болон гар зургийн уралдаан

Монгол-Германы Гүүр ТББ, Германы олон улсын шилжилт хөдөлгөөн хөгжлийн төв, Германы олон улсын хамтын ажиллагааны нийгэмлэгийн “Уур амьсгалын өөрчлөлт ба биологийн төрөл зүйл” хөтөлбөрийн дэмжлэгтэйгээр хэрэгжүүлж буй “Залуусын байгаль орчны боловсролыг дэмжих” төслийн хүрээнд тус байгууллагын дэргэдэх “НОГООН ДАВАЛГАА” клуб 16-30 насны хүүхэд залуусын дунд “Уур амьсгалын өөрчлөлтийн нөлөөгөөр” сэдэвт богино хэмжээний шүлгийн болон гар зургийн уралдаан зарлаж байна.

Зорилго:
Залуусын байгаль орчны боловсролыг нэмэгдүүлэх, тэдний нийгмийн оролцоо болон хамтын ажиллагааг идэвхжүүлснээр олон нийтэд хүрээлэн буй орчны доройтол, уур амьсгалын өөрчлөлтийн нөлөөг таниулах, байгалийн баялагийн үнэ цэнэ болон түүнийг хэрхэн зөв ашиглах талаар зөв ойлголт төрүүлэх, байгаль орчинд ээлтэй зан үйлийг хэвшүүлэх.
Богино хэмжээний шүлэг бичих болон Гар зургийг зурахдаа дараах сэдвүүдээс сонгож болно:

1.    Уур амьсгалын өөрчлөлтийн нөлөөлөл, түүнийг бууруулах арга замууд
2.    Ой болон ойн нөөцийг хамгаалах, тогтвортой ашиглах
3.    Агаар ба хөрсний бохирдол
4.    Усны нөөц түүний хэрэглээ, хомсдол, бохирдол
5.    Цөлжилт буюу газрын доройтол
6.    Байгалийн баялаг буюу түүнийг хэрхэн зөв ашиглах

Бүтээлд тавигдах шаардлага:
•    Авангард урлагийг агуулсан байх
•    Тодорхой мөн тулгамдаж буй байгаль орчны асуудлыг хөндсөн
•    Бүтээлч шинэ санаа, оновчтой шийдэл, сэдвийн ач холбогдлыг харуулсан
•    Асуудлыг шийдвэрлэх аргыг тодорхойлж тусгасан байх

Гар зураг: А1 хэмжээтэй ватум цаасан дээр зурсан байх
Шүлэг:    16 мөрт багтсан байх, Arial 11 Фонт-р мөр хоорондын зай 1,5 байхаар бичсэн байх

Уралдааны шалгаруулалт:
Бүтээлийг 2011 оны 10-р сарын 24-өөс 2011 оны 11-р сарын 09-ний 18.00 цаг хүртэл хүлээн авч шилдэг 12 гар зураг болон шилдэг 12 шүлгийг шалгаруулж 11-р сарын 19-ний өдөр болох үзэсгэлэнгийн арга хэмжээн дээр үзүүлэх бөгөөд шилдэгийн шилдэг шүлэг нэг, шилдэгийн шилдэг гар зураг тус бүр нэг нэгийг шалгаруулахаас гадна уралдаанд ирүүлсэн шилдэг 12 гар зураг мөн 12 шүлгээр 2012 оны календар гаргах болно.

Шагнал:
Шилдэг гар зураг    /нэг/    200.000 төгрөг
Шилдэг шүлэг        /нэг/    200.000 төгрөг

Бүтээлийг “Уур амьсгалын өөрчлөлтийн нөлөөгөөр” сэдэвт уралдаанд гэж хаяглан иргэний үнэмлэхийн хуулбарын хамт доорхи хаягаар авчрах буюу илгээнэ үү.
Монгол – Германы Гүүр ТББ
Чингэлтэй дүүрэг, 1-р хороо
Аризона Плаза 62/63
Утас / Факс: 315990
E-Mail: project@mdb.mn

Өөрчлөлтийг өөрөөсөө 350

2011-09-25T06:31:00.000-07:00

Өөрчлөлтийг өөрөөсөө 350 дэлхийн арга хэмжээг 9 дүгээр сарын 24-ний өдөр сүхбаатарын талбайд зохион явууллаа. Уг арга хэмжээг Монгол-Германы Гүүр ТББ-ийн дэргэдэх Ногоон давалгаа клуб, Ногоон Хонх ТББ санаачлан БОАЖЯ-ны сарын ажлын хүрээнд зохион байгуулсан бөгөөд уг үйл ажиллагааны үеэр уур амьсгалын өөрчлөлтийн талаар иргэдэд мэдээлэл өгч, өөрчлөлтийг өөрөөсөө эхлэн хүн бүр байгаль орчинг хайрлан хамгаалах үйлст хувь нэмэр оруулж, өдөр тутмын амьдралдаа хэвшүүлэхийг уриалсан юм. Үйл ажиллагааны төгсгөлд уг арга хэмжээг дэмжсэн залуус 350 гэсэн дүрсийг хийж зургаа авуулсан билээ.

Бидний энэхүү арга хэмжээг дэмжиж ажилласан МБОИЗ, Скаутын холбоо, Зориг сангийн дэргэдэх EFP хөтөлбөрийн залуустаа талархал илэрхийлье.
Өөрчлөлтийг өөрөөсөө эхлэн дуу хоолойгоо нэгтгэсэн, цаашид хамтран ажиллах сонирхолтой бүх хүмүүст амжилт хүсье.

Өөрчлөлтийг өөрөөсөө. Уур амьсгалын эсрэг хамтдаа.

Холбоотой зурагнуудыг үзнэ үү. :-)

Завхан аймагт Ногоон давалгаа клубын үйл ажиллагаа зохион байгуулагдаж эхэллээ

2011-08-29T19:38:00.000-07:00

Завхан аймагт "Ногоон давалгаа" клубын үйл ажиллагаа идэвхитэй зохион байгуулагдаж эхэллээ. Ногоон давалгаа клубын гишүүн Мөнхтуяа өөрийн санаачлагаар Завхан аймгийн 12 жилийн сургуулийн сурагчдад байгаль экологийн боловсрол олгох, оршин суугаа орон нутгийнхаа байгалийг хайрлах, хамгаалах, хог хаягдал хаяхгүй байхыг уриалж, уур амьсгалын өөрчлөлтөөс хэрхэн урьдчилан сэргийлэх, усны хомсдол, цөлжилтийн эсрэг өсвөр үеийн хүүхдүүд хэрхэн санаачлагатай оролцох талаар сургалтыг хийж эхлээд байна.

Мөнхтуяадаа амжилт хүсье.

Бидний тухай үйл ажиллагааны товч

2011-08-11T06:09:00.000-07:00

Хүүхдийн “Нарлаг” зусланд байгаль орчны талаар хичээл заалаа

2011-08-11T05:58:00.000-07:00

“Ногоон давалгаа” клуб нь байгаль экологийн боловсролыг өсвөр үе залуучуудад олгох, байгаль орчны зохисгүй үйл ажиллагаа, уур амьсгалын өөрчлөлтөөс улбаалан дэлхий дахин болон тэр дундаа Монгол Улсад тулгамдаад байгаа асуудлын талаар өсвөр үеийнхэнд байгаль орчны талаарх үнэн зөв мэдлэг, мэдээллийг хүргэхийг зорьдог билээ. Өсвөр үеийнхний оролцоонд тулгуурлан байгаль орчныг хайрлах, хамгаалах сэдлийг төрүүлэх, өсвөр үеийн хүүхдүүд өөрсдөө санал санаачлага гарган сэтгэн бодож, уур амьсгалын өөрчлөлтийн эсрэг өөрсдийн хувь нэмрээ оруулж, түүнийг бууруулах арга замыг тодорхойлох зорилгоор 2010 оноос хойш “Уур амьсгалын өөрчлөлтийн эсрэг хамтдаа” аяныг өрнүүлэн 2 дахь жилдээ амжилттай зохион байгуулж байна.

Бид энэ удаагийн зуны сургалтаа хүүхдийн “Нарлаг” зусланд 2011 оны 8 дугаарын 11-ны өдөр өсвөр үеийн хүүхдүүдэд экологийн боловсрол олгох сургалтыг амжилттай зохион байгуулаад ирлээ. Уг сургалтыг гурван сэдвийн хүрээнд зааж, гурван өөр арга барил буюу өртөөчилсөн байдлаар хичээлийг сонирхолтойгоор хүүхдүүдийн оролцоонд тулгуурлан зааж явуулав.

Сургалтанд нийт “Нарлаг” зусланд амарч буй 14-17 насны өсвөр насны 80 гаруй хүүхдүүд гурван бүлэгт хуваагдан өөрсдийн оюун бодол, ур чадвар, авхаалж самбаа, аз золыг уралдуулан идэвхитэй оролцлоо.

Зуны сургалтыг дараах сэдвийн хүрээнд зааж явууллаа.

Үүнд:

· Уур амьсгалын өөрчлөлт - Б.Энхмөнх

· Ой, биологийн төрөл зүйл - Г.Уянга, Норовбанзад

· Усны бохирдол - Б.Энхмарал, Гандолгор нар хичээлийг удирдан зохион байгуулан заав.

Өмнөх жилүүдэд бид Олон Улсын “Найрамдал” төв, Хүүхдийн асран хамгаалах төвийн “Хараацай” зуслангуудад зааж байсан туршлага дээрээ тулгуурлан өртөөчилсөн байдлаар заасан нь үр дүнтэй болж байгаа батлагдлаа.

Хүүхдүүдийн зүгээс устган үгүй болж байгаа гол горхи, цөлжилт, уур амьсгалын өөрчлөлтийн эсрэг бид ямар үр ашигтай зүйлийг хийх хэрэгтэй талаар зөвлөлдөн гэрэл цахилгаан, зурагтаа шаардлагагүй үед унтрааж байх, цаасан тор хэрэглэх, машины хэрэглээгээ багасган унадаг дугуй унах, сүүн гэрэл хэрэглэх, шахмал түлш, аргал түлэх, амаа угаахдаа бага ус хэрэглэж байх, ой модоо хамгаалах, мод тариад түүнийгээ асран хамгаалж, услаж байх, өөрсдийн үр ашиггүй хэрэглээг багасгах гэх мэт амьдралд ойр алхам тутамдаа хэрэгжүүлж болох саналыг гаргаж, өөрсдөө хог хаягдал хаяхгүй байхыг бусаддаа уриаллаа. Дашрамд дурдахад сургалтын дундуур цайны завсарлага болоход нэг ч хүүхэд хогоо энэ тэнд хаялгүй, бүгд хогийн уутанд хийж байсан нь хүүхдүүдийн ухамсар хэрхэн сайжирсан байгааг илтгэж буй нь тодорхой байна.

Мөн бидний байнгийн хэрэглэдэг ус бохирдвол бидэнд ямар их аюул, мөхөл хүлээж байгааг ойлгон ухамсарлаж өөрсдийн гараар туршилт хийж үзэн усыг ариг гамтай хэрэглэх, түүнийг бохирдуулахгүйн тулд хамгаалах, усруу хог хаяхгүй байхыг ойлгож байгаагаа санал нэгтэй ярилцаж байлаа. Сургалтын үеэр нэг хүүхэд найз нөхөддөө хандан “Ус есөн эрдэнийн тоонд ороогүй ч гэсэн амьдралыг тэтгэгж чадмань-эрдэнэ. Бид усгүйгээр 2 хоног ч байж чадахгүй, бидний ирээдүй алсын Африк тивийн хатаж, харангадаж үхэх гэж буй хүмүүстэй адил биш” тиймээс найзуудаа усыг өөрийн амь нас шигээ хайрлах нь зүйтээ гэсэн үнэн бөгөөд гайхамшигтай уриалгыг гаргаж байсан нь тэнд байсан нөхдийгөө сэргээсэн, ухаарал хайрласан үгийг хэлсэн билээ.

Жил бүр “Ногоон давалгаа” клубын залуус зохион байгуулдаг “Уур амьсгалын өөрчлөлтийн эсрэг” зуны энэ удаагийн сургалт их үр дүнтэй болсон гэдэгт итгэж байна. Сургалтыг танхимын нойр хүрсэн, нозоорсон байдлаар бус хүүхдүүдийн өөрсдийнх нь оролцоон дээр тулгуурлан тэдний санаа бодлыг сонссон, өөрсдөөр нь туршилт хийлгэж, уралдуулан, өрсөлдүүлж байсан тэдэнд их сонирхолтой байсан нь илт харагдаж байв. Бидэнтэй нэгдэн эх дэлхийгээ хайрлан хамгаалах, өсвөр үе, залуучуудыг байгалиа хамгаалахад уриалах, өөрөө идэвх зүтгэл гарган ажиллахаа илтгэн зарим хүүхдүүд бидний эгнээнд нэгдэн орж гишүүн болсон нь сургалтыг зохион байгуулсан бидний хувьд улам их урам зоригийг хайрласан билээ.

Бидний энэхүү үйл ажиллагааг дэмжиж “Монгол-Германы Гүүр” ТББ, Германы техникийн хамтын ажиллагааны “Уур амьсгалын өөрчлөлт ба биологийн төрөл зүйл“ хөтөлбөрийн хамт олон дэмжин ажиллаа.

Дэлхийн байгаль хамгаалах өдөр

2011-06-10T01:08:00.000-07:00

Дэлхийн байгаль хамгаалах өдөр жил бүрийн 6 дугаар сарын 5-ны өдөр болдог билээ. Энэ өдрийг “Ногоон давалгаа” клуб, “Ногоон хонх” ТББ-ын залуус хамтран Улаанбаатар хотын ундны усны эх үүсвэрийг хангадаг “Туул” голын эрэг дагуу амралт зугаалга, чөлөөт цагаа өнгөрүүлж байгаа иргэдэд хог хаяхгүй байхыг уриалан “БИ ХОГ ХАЯДАГГҮЙ ХҮН”, “БИ МОД ТАРЬДАГ ХҮН” гэсэн брошур тарааж байгаль эх дэлхийгээ хайрлан хамгаалах, эрүүл хоггүй орчинд аж төрөх сэдлийг төрүүлэх үүднээс нэг өдрийн арга хэмжээг амжилттай зохион байгууллаа.
Дэлхийн байгаль хамгаалах өдрөөр л хүмүүс байгаль эх дэлхийгээ ганцхан өдөр хайрлах бус үлдсэн бүх өдрүүдэд мөн хайрлах, хамгаалах, нөөц баялагийг нь зүй зохистой хэрэглэж, ашиглахыг зөвлөсөн бөгөөд голын эрэг, хөвөөг даган хөглөрөх хог хаягдлыг сайн дураараа түүж, бусдад хог хаяхгүй байхыг уриалахыг л энэ өдөр бидний хэсэг залуус зорилгоо болгон ажилласан билээ. Энэхүү ажил маань хүмүүсийг албан шахалтаар хог цэвэрлэх бус хүмүүсийн сэтгэхүйд л хог хаягдлаа хаяхгүй байхыг анхааруулсан өдөр байсан юм.

Энэ өдөр нийт 12 залуус сайн дурын энэхүү ажлыг хийсэн билээ.

Сургагч багшийн сургалтанд урьж байна

2011-06-06T22:29:00.000-07:00

Сайн байна уу эрхэм хүндэт клубын залуусаа? Та бүхний энэ өдрийн мэндийг хүргэе. Хичээлийн жил дуусч шалгалтаа амжилттай өгсөн гэдэгт итгэж байна.

Харин Ногоон давалгаа клубын маань ажил зуны амралтаараа амрах зуураа үргэлжлэх гэж байна.
Бидний тогтмол үйл ажиллагааны нэг болох зуны сургалтаа Улаанбаатар хотын ойролцоо байрлах хүүхдийн зуслангуудад байгаль орчны талаарх сургалтыг зохион байгуулах ажлыг төлөвлөж, бэлтгэл ажилдаа ороод байна.

Сургалт дараах чиглэлээр явагдана.
1. Ус
2. Хөрс
3. Уур амьсгалын өөрчлөлт
4. Ой, биологийн төрөл зүйл гэсэн сэдвийн хүрээнд хичээл заана.

Энэхүү хичээлийг заах сонирхолтой оюутан залуусыг сургагч багшийн сургалтанд урьж байна. Сургалтанд хамрагдаад өөрийн сонирхож буй чиглэлээр хичээл заах бөгөөд зуны амралтаа үр дүнтэй, байгалийн сайханд амарч, хөгжилтэй, гайхалтай дурсамжтай өнгөрөөх боломж таны өмнө нээлттэй.
Ингэхийн тулд та сургагч багшийн сургалтанд хамрагдахад л хангалттай.

Сургалт:

2010 оны 06-р сарын 10, 06 сарын 13-ны 17 цагаас “Хуримын ордон”-ы хурлын танхимд болно.

1. Усны тухай - Н.Сонинхишиг /дэд проф, МУИС-ийн Биологийн тэнхимийн багш/

2. Хөрс – Мөнхцэцэг

06 сарын 13-ны 17 цагаас

1. Уур амьсгалын өөрчлөлт /цөлжилт/ - Ж.Ундармаа /Доктор, дэд проф, ХААИС-ийн экосистемийн судалгааны төвийн эрхлэгч/

2. Ой – С.Саран /Германы олон улсын хамтын ажиллагааны нийгэмлэгийн (GIZ) "Уур амьсгалын өөрчлөлт ба биологийн төрөл зүйл" хөтөлбөрийн мэргэжилтэн/ нар хичээлийг заах болно.

Та сургалтанд суухыг хүсвэл дараах утсаар холбогдож бүртгүүлээрэй.
Утас: 95480504

Email: nogoondavalgaa@yahoo.com www.facebook/greenwaveclub хаягаар бүртгүүлээрэй.

Миний НОГООН ИРЭЭДҮЙ, миний гарт!

2011-05-07T21:18:00.000-07:00

Хаана: Ботаникийн цэцэрлэгт хүрээлэн,

Хэзээ: 2011 оны 5 сарын 14-нд 09-15 цагийн хооронд

Улаанбаатар хотын агаарын бохирдол, тоосжилт байх ёстой хэмжээнээсээ хэт их байна гэдэг ч Та үүний эсрэг ямар нэгэн зүйл хийж амжсан уу?

Хэрвээ амжаагүй бол хамтдаа МОД тарьцгаая!

Монгол-Германы Гүүр ТББ, түүний дэргэдэх “Ногоон давалгаа” клуб, Галсан Чинаг сан хамтран Монгол Улсын Ерөнхийлөгч Ц. Элбэгдоржийн гаргасан уриалгыг дэмжиж „Германы цэцэрлэгт хүрээлэн“-г байгуулах гэж байгаа бөгөөд энэ цэцэрлэгт хүрээлэнгийн эхлэл болгон 1000 МОД тарих гэж байна.

Энэ өдөр Та зөвхөн мод тариад зогсохгүй тарьсан модныхоо ирээдүйн халамжлагч нь болж Улаанбаатар хотынхоо ногоон байгууламжийг хөгжүүлэхэд бодитой хувь нэмэр оруулах боломж Танд нээлттэй байна.

Таны НОГООН ИРЭЭДҮЙ, Таны гарт! Тиймээс эрхэм Та 5-р сарын 14-ний өдөр 09 цагаас Соёлын төв өргөөний өмнө хувин, хүрз, жоотуу, бээлий г.м. мод тарихад шаардагдах ажлын багаж болон Ирээдүйнхээ төлөө гэх ирмүүн их сэтгэлийг өвөртлөн ирээрэй.

Дэлгэрэнгүй мэдээллийг www.mdb.mn, 315990 болон 99817995 авч болох бөгөөд бүртгэлийг info@mdb.mn, nogoondavalgaa@yahoo.com болон 315990 утсаар хийж байна.

Монгол-Германы Гүүр ТББ-ын дэргэдэх “Ногоон давалгаа” клуб

Усны нөөцийн хомсдол

2011-04-13T06:09:00.000-07:00

“Хүрээлэн буй орчноо хамгаалахад миний оролцоо” сэдэвт эссэ бичлэгийн уралдааны 3-р байрын шагналт. МУИС-ийн Хууль Зүйн Сургуулийн Эрх зүйн 5-3 ангийн оюутан Ц.Ууганцэцэг

Хүмүүс бид эхийн хэвлийд нэгэн биеийг олсон цагаас усан дотор бойжиж, хорвоод мэндэлсэн үеэс дэлхий эхийн гар дээр өсч торнихдоо усаар ундаалан нэгэн насыг бардаг амьтан. Эндээс бид ус хэмээх амин эрдэнийн ач холбогдлыг тоочин жагсаалгүйгээр ойлгож болно.

Өдрөөс өдөрт хувьсан өөрчлөгдөж буй байгалийн өөрчлөлтийн нэг бол хүн бүрийн хэрэгцээгээ хангах, хүн төрөлхтний хөгжил дэвшлийг бүтээх гэсэн нийтлэг ашиг сонирхол бүхий хүний үйл ажиллагаанаас шалтгаалсан байгалийн нөөцийн тэр дундаа усны нөөцийн хомсдол гэдгийг хэн хүнгүй нүдээр харж, биеэр мэдэрч байгаа. Үүний илрэл нь сүүлийн үед дэлхий нийтийн анхаарлыг татаж байгаа дулаарлаас хамааран далай тэнгисийн усны температур нэмэгдэн далайн шуурга болж, усны ууршилтаар эрэг хавийн газраар аадар бороо орон үерийн аюул нүүрэлж харин эх газрын хэвлий, хөрсний температур ихэссэхэээр хөрсний чийг хатаж, гол горхи ширгэх, цөлжилт, хуурайшилт ихээхэн эрчимтэй явагдах зүй тогтол ажиглагдах болсон явдал юм. Нөгөөтэйгүүр хүн амын түргэн өсөлт, эдийн засгийн хурдацтай хөгжил, байгалийн баялгийн хэрэгцээ, ашиглалт ихэссэнээс дэлхийн олон улс орон усаар гачигдаж улмаар хөгжлийг нь саатуулах хязгаарлах хүчин зүйл болж, нийгэм эдийн засгийн хөгжил дэвшил, хүн ардын ахуй амьдрал, амьжиргааны түвшин нь усны нөөцийн асуудлыг хэрхэн шийдвэрлэснээр тодорхойлогдох болсон.

Хүн өөрийн дуусашгүй хэрэгцээгээ хангахын тулд гар дээр нь бойжиж буй дэлхий эхийнхээ нөөц баялгаас авдаг. Ийнхүү авахдаа хүн өөрийн бүтээл болох эрх зүй, хууль болон байгаль эхийн өөрийнх нь хуульд захирагдах учиртайг мэддэг атлаа үүнийг хүсдэггүй.

Монгол улсын Үндсэн хуульд “Монгол улсын газар түүний хэвлий, ой, ус амьтан, ургамал болон байгалийн бусад баялаг гагцхүү ард түмний мэдэл, төрийн хамгаалалтанд байна” гэж заасан нь ус, усны нөөцийн өмчлөлийн асуудлыг тодорхойлоод зогсохгүй байгалийн энэхүү баялгыг гагцхүү хуулиар олгогдсон эрхийн хүрээнд төрийн зохих байгууллагын хяналт дор ашиглах эрх зүйн үндсийг тодорхойлж өгсөн юм. Манай улсын хувьд усны хязгаарлагдмал нөөцтэй бөгөөд усны нөөцийн тархалт харилцан адилгүй, нийт усны нөөцийн 80 хувийг гадаргын ус, үлдсэн 20 хувийг газрын доорх ус эзэлдэг. Сүүлийн үед манай орны байгаль орчинд нүүрлээд байгаа байгаа хуурайшил, ган гачиг, газрын доройтол, цөлжилт, ой, усны нөөц, биологийн төрөл зүйлийн хомсдол, байгалийн гамшгууд нь ихэвчлэн усны нөөцийн зохисгүй ашиглалт, уур амьсгалын өөрчлөлттэй холбоотой байна.

Харин усны нөөцийн зохисгүй ашиглалтанд хэний, ямар оролцоо байгааг амьдралыг тэтгэгч амин эрдэнийг хэрэглэгч байгалийн амьтан болохынхоо хувьд бас хуульч хэмээх өндөр хариуцлагатай мэргэжлийг эзэмшиж буй оюутан хүний нүдээр тодорхойлохыг хичээлээ.

2010 оны 03 сарын 16-ны өдрөөс оюутны байранд амьдрахаар болж, тэр өдрөө усны өрөө рүү ороход урд талын эгнэсэн 4 крантны хаалган талаас 2 дахь крантаас ус гоожиж байв. Хэн нэгэн нь усаа хаахааа мартаж дээ хэмээн бодож крантыг хаах гэтэл крант эргэсэнгүй. Говьд төрсөн хүнийхээ хувьд ч тэр, би ус хэрэглэснийхээ төлөө татвар төлдгийнхөө хувьд ч тэр ашиглагдахгүйгээр урсаж буй усыг хараад харамсах бас бухимдах сэтгэл төрж байв. Тэр өдрөөс хойш 14 хоног өнгөрч, усны өрөө рүү орох бүр өнөө л крантнаас гоожих усны чимээ сонсогдсоор. 2010 оны 03 сарын 30-ны өглөө цаг, хэмжүүрийн сав барьсаар усны өрөө руу орж 1 минутанд гоожсон усыг хэмжихэд 1,41 литр болов. Байранд ирээд 14 хоносон энэ хугацаанд хэдэн литр ус юунд ч ашиглагдалгүй урссаныг бодож үзвэл: 1мин - 1,41л

1хоног=1440мин – х =2030,4л=2,0304тн /1хоногт урссан усны хэмжээ/

14хоног=20160мин - х =28425,6л=28,4256тн /14 хоногт урссан усны хэмжээ /

Харин өдөр бүр 2тн гаруй ус ямарч ашиглалтгүй урсаж буй энэ үйл явцыг үгүй болгохын тулд би юу хийх боломжтой вэ?

1.Шинэ крант худалдаж авч хэн нэгнээр угсруулах. Би сард цахилгааны төлбөрөөс гадна 150,000төгрөг байрны төлбөрт төлдөг. Энэ төлбөр хуулиар тогтоосон ус ашигласны төлбөр, байрны эвдэрч гэмтсэн эд хогшил засах гэх мэт байрны засвар үйлчилгээнд зарцуулагдах учиртай. Гэтэл би хэн нэгэн албан тушаалтны хийх ажлыг урьдаас нь хийхийг хүссэнгүй.

2.Нэгэнтээ би крантыг засахыг хүсэхгүй байгаа учраас крантыг засахыг холбогдох этгээдэд хэлэх. Байрныхаа жижүүрт дээрх болсон үйл явдлыг хэллээ.

Маргааш өглөө нь усны өрөө рүү явах замд хоосон сав барьсан бухимдангуй хүмүүс зөрж байв. Усны өрөө рүү ортол ус гоожих дуу сонсогдсонгүй, аль ч крантнаас ус гарсангүй. Энэ үед нэг л өдөр ингээд усгүй болчихвол дэлхий хоосон сав барьсан бухимдангуй хүнтэй адил амьтдаар дүүрч, хэсэг хугацааны дараа усны өрөө шиг нам гүм болох байх даа гэсэн бодол орж ирж байлаа. Гэтэл сантехникч орж ирээд ус хаасан, крант сольж байгаа гэв.

Өдөр бүр хэвлэл мэдээллийн хэрэгслээр уул уурхайн болон арьс ширний үйлдвэрүүд бохир усаа гол мөрөн рүү цутгаснаас ус бохирдож, нөөц нь хомсдож байна гэж ярьж бичихийг хараад бид цухалдан уурладаг. Үнэн хэрэгтээ бид хоногт 2тн гаруй ус ямарч ашиглалтгүйгээр урсгаснаар экологийн өөрчлөлтөнд нөлөөлж буй усны нөөцийн хомсдолд томоохон үүрэг гүйцэтгэгчээр оролцож байгаагаа мэддэггүй ч юм уу, мэдсэн ч тоодоггүй юм уу, ямартаа өөрсдийн эс үйлдэхүйг хамгийн энгийн үзэгдэл болгон хувиргасан байх юм /монголчууд бид өөрийнхөө толгой дээрхийг хараагүй байж бусдын толгой дээрхийг харж ярьдаг улс юм/.

Хүн адгуусаас оюун ухаан, сэтгэн бодох, хөдөлмөрлөх чадвараараа ялгардаг боловч байгаль дэлхийнхээ нөмөр нөөлгөнд багтаж, түүний хуулинд захирагддаг. Энэ язгуур шинжээрээ ч бид Монгол улсын үндсэн хуулиар “...байгаль орчноо хамгаалах” журамт үүрэг хүлээсэн. Иймээс байгалийн болоод хэм хэмжээчилсэн байдлаараа байгаль экологийн аливаа асуудалд хамааралгүй хэн нэгэн хүн байхгүй бөгөөд энэ талаарх бүхий л асуудалд хүн бүр анхаарал хандууулж оролцох ёстой. Монголчуудын хувьд байгаль экологийн асуудал нь төрийн албан тушаалтан, эрх бүхий этгээдэд хамаатай, тэднийн хийх ажил хэмээн сэтгэж, юу хийхийг нь хүлээж суудаг бүр хийсэн зүйлийг нь хоногийн дотор хулгайлж, эвдэж дуусгадаг зантай улс. Түүнчлэн бид хувь хүн болохынхоо хувьд байгаль экологийн аливаа асуудалд оролцох оролцоо гэдгийг нийтийг хамарсан цэвэрлэгээ, мод тарих хэмээн явцуу хүрээнд ойлгодог. Тэгвэл оролцоо гэдгийг “Хөгжлийн асуудлаар үнэлгээ хийх, шийдвэр гаргах, төлөвлөх, хэрэгжүүлэх, хяналт мониторинг хийх үйл явцуудын үе шатуудад оролцогч талууд тодорхой үүрэг гүйцэтгэн хариуцлага хүлээж тэгш эрхтэй хамтран ажиллахыг ойлгоно” гэж тодорхойлдог байна.

Ер нь одоо дагаж мөрдөж буй хууль эрх зүйн актууд нь өөр хоорондоо зөрчилтэй, усны асуудал эрхэлсэн холбогдох байгууллагуудын ажлын уялдаа холбоо муу, усыг хэрэглэх ашиглах, бохир ус цэвэрлэх, усны нөөцийн ашиглалтанд хяналт тавих зэрэг ажлууд нь өнөөгийн нийгэм, эдийн засгийн хөгжлийн шаардлагад нийцэхгүй байгаа. Иймээс дээрх асуудлуудыг боловсронгуй болгохоос гадна хүмүүсийн экологийн асуудалд оролцох хандлагыг уламжлалт зан заншлын ухамсар дээр түшиглэн төлөвшүүлэх шаардлагатай юм.

Энэ бүхний эцэст өдөрт 2тн ус урсдаг 1ч гэсэн крантын талаар холбогдох хүнд нь хэлсэн миний үйлдэл, цаашид энэ чиглэлээр мэргэжлийн хүрээнд судалгаа шинжилгээний ажил хийх, зуслангийн багшаар ажилладгийнхаа хувьд амрагч хүүхдүүддээ экологийн асуудлаар багаас нь зөв хандлага төлөвшүүлэх зорилго бүхий байгаль экологийн сургалт явуулах зэрэг маань хүрээлэн буй орчноо хамгаалсан бас хамгаалах миний оролцоо юм.

“Ногоон давалгаа” клубын танилцуулга

2011-04-09T09:30:00.000-07:00

Ногоон давалгаа клуб нь хүний эрх, эрх чөлөөг дээдлэн, тогтвортой хөгжлийн үзэл баримтлалд тулгуурлан байгаль эх дэлхийгээ хайрлан хамгаалах, нийгэмд байгаль орчныг хамгаалах, байгалийн нөөцийг тогтвортой ашиглах, байгальд ээлтэй үйлийг хэвшүүлэхэд хувь нэмэр оруулахад чиглэсэн залуучуудын үүсгэл санаачлагын клуб билээ.

Манай клубын албан ёсны үйл ажиллагаа 2010 оны 10 дугаар сарын 9-ны өдөр бүх гишүүдийн хурлыг хийж Удирдах зөвлөл, Удирдах зөвлөлийн даргыг сонгосноор эхэлсэн.

Клубын үйл ажиллагааны чиглэл нь дангаараа болон бусад байгууллагуудтай хамтран гишүүдийнхээ байгаль орчны боловсролыг нэмэгдүүлэн, гишүүдээрээ дамжуулж нийгэмд энэ мэдлэг, мэдээллээ түгээн дэлгэрүүлэхэд оршдог.

Тус клубын үйл ажиллагаа нь Монгол-Германы Гүүр ТББ, Германы олон улсын хамтын ажиллагааны нийгэмлэгийн “Уур амьсгалын өөрчлөлт ба биологийн төрөл зүйл” хөтөлбөр, Ногоон давалгаа клуб хамтран хэрэгжүүлж буй “Залуусын байгаль орчны боловсролыг дэмжих” төслийн хүрээнд одоогоор үйл ажиллагаагаа хэрэгжүүлэн амжилттай ажиллаж байна.

Бид өнгөрсөн 2010 оны 08 дугаар сард өсвөр үеийнхний байгаль экологийн боловсролыг дээшлүүлэх, тэдэнд экологийн боловсрол олгох зорилгоор Олон Улсын “Найрамдал” төв, Монгол Улсын хүүхдийн асрамжийн “Хараацай” зуслангуудад зуны сургалтыг “Уур амьсгалын өөрчлөлт”, “Хог хаягдал”, “Цөлжилт”, “Ус бол амьдрал” сэдвийн хүрээнд хийсэн.

Найрамдал зуслан дээр хичээл заав.

Найрамдал зуслан

Хараацай зуслангийн хичээл. Б.Гончигсумлаа

Сургагч багш Г.Уянга